2 SAMUEL

2 SAMUEL

¹ Saul thih hnu i David nih Amalek mi a thah hnanak in a hung kir tikah, David cu Ziklag ah ni hnih a cam; ² cun a ni thumnak ni ah Saul riahhmun in mipa pakhat, a puan tlek le a lu ah leidip i phulh in a ra. Cun David sin kha a phak tikah vawlei ah a bawk i upatnak kha a tuah. ³ David nih amah cu, "Khuazei in dah na rat?" tiah a ti. Cun anih nih, "Israel mi hna riahhmun in ka ra zam," tiah a ti. ⁴ Cun David nih amah cu a thawh i, "Zeitindah a si? Ka chim tuah," tiah a ti. Cun anih nih a leh i, "Mi hna nih raltuknak hmun khan an zam i mi tampi cu an tlu i an thi; cun Saul le a fapa Jonathan zong an thi," tiah a ti. ⁵ Cun David nih amah a hung chimtupa tlangval sinah cun, "Zeitindah Saul le a fapa Jonathan cu an thi, tiah na hngalh?" tiah a ti. ⁶ Cun amah a chimtu tlangval nih khan, "Zeitimaw in Gilboa tlang ah khan ka rak um ngelcel i, khika ah khan Saul cu a fei kha i rinhchan in a rak dir i zohhmanh, rangleng le rangcung ralkap hna nih khan an naih chin cuahmah cang. ⁷ Cun a hnulei kha a hei zoh tikah a ka hmuh i a ka auh. Cun kei nih ka leh i, ’Hika ah hin ka um,’ ka ti. ⁸ Cun anih nih keimah cu, ’Ahodah na si?’ tiah a ka ti i, ’Amalek mi ka si,’ tiah ka leh. ⁹ Cun anih nih keimah cu, ’Ka pawngah dir law ka that tuah; zeitintiah vansang auhnak nih a ka tlaih cang, asinain ka nung rih ṭung,’ tiah a ka ti. ¹⁰ Cucaah a pawngah cun ka dir i ka thah, zeicahtiah a tluk cang hnuah khan cun a nung kho bal ti lai lo ti kha ka hngalh; cun a lu i a ummi bawi luchin le a baan i aa khihmi ban hrolh cu ka lak hna i hika ah ka bawipa sinah ka rak put hna," tiah a ti. ¹¹ Khi tikah David nih a thilpuan kha aa tlaih riangmang hna i a thleh hna i cu bantukin amah sin i a ummi vialte nih khan an tuah ve; ¹² Saul le a fapa Jonathan le Bawipa mi hna le Israel innchungkhar hna kha vainam in an thih caah, mithi cu an ngai, an ṭah hna i zanlei tiang rawl an ul. ¹³ Cun David nih amah a chimtu tlangval sinah cun, "Khuazei in dah na rat?" tiah a ti. Cun anih nih "Kei cu Amalek mi, mipem fa ka si," tiah a leh. ¹⁴ David nih amah cu, "Zeitindah a si e, nangmah nih Bawipa chiti thuhmi hrawh awk i na kut zao na ṭih lo cu?" tiah a ti. ¹⁵ Khi tikah David nih tlangval pakhat kha a auh i, "Va kal law, va that," tiah a ti. Cun a tuk i a thi. ¹⁶ Cun David nih amah cu, "Na thi cu nangmah lu cungah va um ko seh; zeitintiah nangmah kaa hrimhrim nih, ’Bawipa chiti thuhmi cu ka thah,’ tiin nangmah cung i biahngaltu a si," tiah a ti. ¹⁷ Cun David nih Saul le a fapa Jonathan kha hi ṭah hla hi a lawh hna i ¹⁸ Judah mi kha mah hihi cawnpiak awk an si lai, tiah a ti; zohhmanh, Jashar Cauk chungah aa ṭial. Amah nih a thawh i: ¹⁹ Maw Israel, na sunparnak cu, na tlang cungah thah an si cang. Ralkap ṭhawng bikbik hna cu an ril cang. ²⁰ Gath khua ah va thanh hlah u, Askelon khuachung lam zongah va chim hlah u, Filistin fanu hna kha an i lawm sual hnga i Cuarpartan lomi fanu hna kha an di a riam sual hnga. ²¹ Gilboa tlang hna, nan cungah ruah sur hlah seh, dap zong tla hna hlah seh lo ṭha zong um hna hlah seh; Zeicahtiah khika ah miṭhawng phaw cu thurhnawmh a si i Saul phaw cu chiti thuh ti loin a ril cang; ²² Jonathan likuk cu mithahnak caah a ṭhawng, Saul vainam cu zaangfahnak a ngei lo, Miṭhawng kha an tuk hna i ral kha an thah hna. ²³ Saul le Jonathan, duh a nung i aa dawhmi hna, nunnak ah siseh thihnak ah siseh an i ṭhen lo; muvanlai nakin an khul a rang, chiandeih nakin an ṭhawng. ²⁴ Maw Israel fanu hna, Saul cu ṭah tuah u, Amah nih maimaw puan an aihter hna i lungvar le sui in an ṭamh hna. ²⁵ Ralkap miṭhawng hna cu zeitindah i doh liopi ah an thih ee! Jonathan cu na tlang cungah a ril cang ai! ²⁶ Ka nau Jonathan, Nangmah cu kan ngai, Zeitluk in dah ka caah na sun Na ka dawtnak cu khuaruahhar a si, nu dawtnak kha a hluan. ²⁷ Ralkap ṭhawng hna cu an tlu cang, ralhriam hna cu an rawk cang," a ti.

¹ Hi hnuah hin David nih Bawipa kha a hal i, "Judah ram chung khua pakhatkhat ah ka hung kal lai maw?" tiah a ti. Cun Bawipa nih amah cu, "Hung kal," tiah a ti. David nih, "Khuazei ah khin dah ka hung kal hnga?" tiah a ti. Anih nih, "Hebron ah," tiah a ti. ² Cucaah David cu khika ah khan a hung kal, a nupi pahnih Jezreel khuami Ahinoam le Karmel ram mi Nabal nupi ro Abigail zong kha an kal ve. ³ Cun David nih a sin i a ummi a mi vialte hna kha, an innchungkhar cio he a hun i kalpi hna i Hebron khua hna ah cun an um. ⁴ Cun Judah mi kha an ra i khika ah David cu Judah hrin siangpahrang caah chiti an thuh. David kha, "Saul a vuitu cu Jabesh-gilead mi an si," tiah an chimh tikah, ⁵ Jabesh-gilead mi sinah cun lamkaltu a hei thlah hna i, "Nannih nih hi zumhawktlaknak kha nan bawi Saul cungah nan langhter i nan vui caah Bawipa nih thluachuahnak in pe ko hna seh! ⁶ Atu cu Bawipa nih nan cungah a fekmi dawtnak le zumhawktlaknak kha langhter ko seh! Cun nannih nih hi thil hi nan tuah caah nan cungah ṭhatnak ka tuah lai. ⁷ Cucaah nan kut kha ṭhawng hna seh law nan ralṭha ko u; zeitintiah nan bawipa Saul cu a thi cang i Judah hrin hna nih annih cung i siangpahrang ah keimah cu chiti an ka thuh cang," tiah a ti hna. ⁸ Ner fapa Abner, Saul ralkapbu haotu nih khan Saul fapa Ishbosheth kha a lak i Mahanaim ah a ratpi i, ⁹ Gilead le Asshur mi hna le Jezreel le Efraim le Benjamin le Israel vialte cung i siangpahrang ah a ser. ¹⁰ Saul fapa Ishbosheth cu Israel cung i uknak hram a thawk ah cun, kum sawm li a si i kum hnih a uk. Sihmanhsehlaw Judah hrin nih khan cun David kha an zulh. ¹¹ Cun Hebron khua i Judah hrin hna cung i David siangpahrang a si chung cu kum sarih le thla ruk a si. ¹² Ner fapa Abner le Saul fapa Ishbosheth i a sinum hna cu Mahanaim in Gibeon ah an kal. ¹³ Cun Zeruiah fapa Joab le David sinum hna cu an chuak i Gibeon tili ah khan an va ton hna; tili khatlei kamah phu khat an ṭhu i tili khattelei kamah phu dang an ṭhu. ¹⁴ Cun Abner nih Joab cu, "Tlangval pawl hi tho hna seh law kan hmaiah lente i celh tuah hna seh," tiah a ti. Joab nih, "Tho hna ngat seh," tiah a ti. ¹⁵ Cun an tho i an i rel: Benjamin le Saul fapa Ishbosheth lei in hleihnih, cun David sinum hna leiah hleihnih. ¹⁶ Cun pakhat le pakhat, anmah le an ral cio kha, an lu in an i tlai i an hnak ah nam in an i chun i hmun khat ah an tlu hna. Cucaah cuka hmun cu Helkath-hazzurim tiah ti a si, Gibeon ah a um. ¹⁷ Khi ni ah an i tuk cu a fak ko; Abner le Israel mi cu David sinum hna nih khan an tei hna. ¹⁸ Cun khika ah Zeruiah fapa pathum, Joab, Abishai le Asahel hna kha an um ve. Asahel cu ramlak sazuk bangin a mumi a si; ¹⁹ Asahel nih Abner kha orhlei ah siseh, kehlei ah siseh, pial loin a dawi. ²⁰ Khi tikah Abner nih a hnulei kha a hei zoh i, "Nangmah maw na si Asahel?" tiah a ti. Cun anih nih, "Ka si," tiah a leh. ²¹ Abner nih amah cu, "Na orhlei ah maw na kehlei ah maw pial law, tlangval pakhatkhat kha tlai law, a hranchaw kha la tuah," tiah a ti. Sihmanhsehlaw Asahel cu amah a dawinak khan a pial duh lo. ²² Cun Abner nih Asahel cu a chimh ṭhan i, "Na ka dawinak hin pial tuah; zeicahdah vawlei ah tlu lakin kan chunh lai? Na u Joab hmai zeitindah ka hmuh ngam lai?" tiah a ti. ²³ Sihmanhsehlaw i mer kha a duh hlei lo; cucaah Abner nih a paw ah a fei chek in a chunh i a kenglei ah a tleng; khika ah khan a tlu i a thi colh. Cun Asahel a tluk i a thihnak hmun a phanmi paoh kha cuka ah cun an dir colh lengmang. ²⁴ Sihmanhsehlaw Joab le Abishai nih Abner kha an dawi; cun ni tla zuarzar ah khin Gibeon ramlak lei kalnak lam i a ummi Giah khua, cu khua hmai i a ummi Ammah tlang kha an phan. ²⁵ Cun Benjamin mi kha Abner sinah cun an i pum i bu khat ah an cang i tlangpar ah khan dirhmun an khuar. ²⁶ Cun Abner nih Joab kha a hei auh i, "Zungzal in maw mah le mah hi kan i doh ko lai! A donghnak cu a fak lai tiah na hngal ko lo maw? Na mi hna cu, nan unau hna dawi hi ngol cang u, tiah zeitik ah dah na ti hna lai," tiah a ti. ²⁷ Cun Joab nih, "Pathian a nun bangin, nangmah nih cu bantukin chim hlah law cu, ka mi hna nih hin thaizing tiangin an in dawi peng ko hna hnga," tiah a ti. ²⁸ Cucaah Joab nih muko kha a tum i mi vialte nih khan Israel mi hna dawi kha an ngol i a tuk zong an i tu ti lo. ²⁹ Cun Abner le a mi hna cu Arabah tan in cu zan cu zan khuadei an kal; Jordan kha an tan i chunhlan thliahmah an kal i Mahanaim kha an phan. ³⁰ Joab cu Abner dawinak khan a kir; cun mi vialte kha a pumh hna tikah, David sinum hna chungin Asahel lengah hleikua an bau. ³¹ Sihmanhsehlaw David sinum hna nih, Benjamin mi, Abner mi hna chungah khan, za thum le sawm ruk an thah hna. ³² Cun Asahel kha an lak i Bethlehem i a pa thlan ah khan an vui. Cun Joab le a mi hna cu zan khuadei an kal i Hebron an phak ah khua nih a dei phuat hna.

¹ Saul innchungkhar le David inn-chungkhar karlakah khan i dohnak saupi a um; David cu a ṭhawng chin lengmang i sihmanhsehlaw Saul innchungkhar cu an der chin lengmang. ² Cun David nih Hebron khua ah cun fapa a hrin hna: a fater cu Jezreel khuami Ahinoam fapa Amnon a si; ³ a pahnihnak cu Karmel ram Nabal nupi ro Abigail i fapa Khileab a si; a pathumnak cu Geshur siangpahrang Talmai i fanu Maakah i fapa Absalom a si; ⁴ cun a palinak cu Haggith fapa Adonijah a si; a panganak Abital fapa Shefatiah a si; ⁵ a paruknak cu David nupi Eglah fapa Ithream a si. Mah hna hi David nih Hebron ah a hrin hna. ⁶ Saul innchungkhar le David inn-chungkhar karlak i dohnak a um lioah khan Abner nih amah le amah kha Saul innchungkhar chungah khan miṭhawng ah aa ser. ⁷ Saul nih khan nuchun pakhat a rak ngei i a min cu Rizpah a si, amah cu Aiah fanu a si; cun Ishbosheth nih khan Abner cu, "Zeicahdah ka pa nuchun sinah khan na vung luh?" tiah a ti. ⁸ Khi tikah Ishbosheth bia ruangah khan Abner cu a thin a hung ngaingai i, "Judah pawl uico lu maw ka si! Nihin tiangin na pa Saul innchungkhar hna cung le a unau hna cung le a hawikom hna chungah zumhawktlak in ka um ko rih i David kut chungah nangmah cu kan chaan lo; cun maw nang nih nihin ah hin, nu he sual na hei ka puh. ⁹ - ¹⁰ Pennak cu Saul hrin chungin ṭhial i David bawi ṭhutdan cu Israel le Judah cungah Dan in Beersheba tiang fehter awkah Bawipa nih a sin i chiat a sermi kha David caah ka tlinter lo ahcun, Pathian nih cu bantukin le tam deuh zongin Abner cungah hin tuah ko seh," tiah a ti. ¹¹ Cun Ishbosheth nih Abner cu a ṭih caah bia dang kaa khat hmanh a let kho lo. ¹² Cun Abner nih David sinah khan Hebron ah lamkal a hei thlah hna i, "Ram hi aho ta dah a si? Keimah he biakamnak ser law, zohhmanh, Israel mi vialte cu nangmah sin i komhter awkah ka kut cu nangmah sinah a ṭang lai," tiah a ti. ¹³ Cun anih nih, "A ṭha ko; nangmah he biakamnak cu ka ser lai; sihmanhsehlaw nangmah sinin thil pakhat kan hal; cu cu Saul fanu Mikhal kha ka hmai hmuh awk i na rat tikah na ratpi hmasa lo ahcun, ka hmai na ka hmu lai lo," tiah a ti. ¹⁴ Cun David nih Saul fapa Ishbosheth sinah khan lamkal a hei thlah hna i, "Filistin mi cuarpar za khat in ka hammi ka nupi Mikhal kha ka pe tuah," tiah a ti. ¹⁵ Cun Ishbosheth nih cun mi a hei thlah hna i amah cu Laish fapa Paltiel, a va sin khan a lakter hna. ¹⁶ Sihmanhsehlaw a va nih khan a zulh i Bahurim tiangin a ṭah lengmang. Cun Abner nih amah cu, "Va kal law va kir tuah," tiah a ti i a kir. ¹⁷ Cun Abner nih cun Israel upa hna kha a pumhpi hna i, "Kan hnulei nawn khan David cu nan siangpahrang si awkah nan kawl lengmang cang. ¹⁸ Cucaah atu cu tlinter tuah u; zeitintiah Bawipa nih David cu bia a kam i, ’Ka sal David kut in ka mi Israel mi hna cu Filistin mi kut chung le an ral vialte hna kut chungin ka chuah hna lai,’ a ti," tiah a ti. ¹⁹ Abner nih Benjamin mi zong kha a chimh hna; cun Abner cu David kha, Israel mi le Benjamin hrin vialte nih tuah awkah a ṭha ti i an ruahmi vialte kha Hebron i va chimh awkah a kal. ²⁰ Abner cu David sinah Hebron ah mi pakul he a rat tikah, David nih Abner le a sin i a ummi hna caah cun rawl danghnak a tuah. ²¹ Cun Abner nih David sinah, "Ka va kal lai i siangpahrang bawipa sinah khan, Israel mi vialte cu ka pumh hna lai. Nangmah he biakamnak an ser lai i na lung duhmi a rak si bang khan na uk hna lai," tiah a ti. Cucaah David nih Abner cu a kalter i daihnak in a kal. ²² Cu hnu tlawmpalte ah cun David sinum hna cu ral an hranhnak khan Joab he an kir i hranchaw tampi an rak i phorh. Sihmanhsehlaw Abner cu David sinah Hebron ah a rak um lo, zeicahtiah a rak kalter cang i daihnak in a rak kal cang. ²³ Joab le a sinah a ummi ralkapbu vialte cu an rat tikah Joab cu, "Ner fapa Abner kha siangpahrang sinah a ra i amah nih a kalter i daihnak in a kal cang," tiah an chimh. ²⁴ Khi tikah Joab cu siangpahrang sinah khan a va kal i, "Zeidah na rak tuah? Zohhmanh, Abner cu na sinah a rak ra; zeicahdah na rak kalter i cucaah a rak kal diam cang? ²⁵ Ner fapa Abner nih hin nangmah kha hlen awkah le na luh na chuah le na tuahmi vialte kha hngalh awkah a ra tiah na hngalh ko ṭung," tiah a ti. ²⁶ David sinin Joab kha a chuah tikah, Abner kha mi a hei dawiter hna i Sirah tikhor khan an rak kirpi ṭhan; sihmanhsehlaw cu kong cu David nih a hngal lo. ²⁷ Cun Abner kha Hebron i a ra kir tikah Joab nih a thli in biaruah awkah hauka chungah khan ken khat ah a kalpi i a nau Asahel thisen caah khan khika ah a paw ah a chunh i a thi. ²⁸ A hnuah, mah cucu David nih a theih tikah, "Keimah le ka pennak cu Bawipa hmaika ah Ner fapa Abner thi kongah hin a zungzal in mawhchiat awk um lo kan si ko. ²⁹ Dantatnak Joab lu cung le a pa innchungkhar vialte cungah tla ko seh; cun Joab chung hna lakah hin thil chuak a ngeimi siseh, thinghmui zawtnak a ngeimi siseh, lathlur a tlaimi siseh, vainam nih a thahmi siseh, rawl a pammi siseh, ṭhing bal hna hlah seh!" tiah a ti. ³⁰ Cuticun Joab le a unau Abishai nih Abner kha an thah, zeicahtiah amah nih khan Gibeon i raltuknak hmun ah khan an unau Asahel kha a rak thah. ³¹ Cun David nih Joab le a sin i a ummi vialte kha a thawh hna i, "Nan puan kha thlek hna u law, buri kha i aih u law, Abner kha ngai tuah u," tiah a ti hna. Cun Siangpahrang David nih ruakkuang kha a zulh. ³² Abner cu Hebron ah an vui; cun siangpahrang nih fak piin Abner thlan ah khan a ṭap; cun mi vialte zong kha an ṭap. ³³ Cun siangpahrang nih Abner kha ṭah hla a lawh i, "Abner hi mihrut thih bangin maw a thih ko lai! ³⁴ Na kut kha ṭem an si lo i na ke kha hreng khenh an si lo; Miṭhalo hmai i a tlumi bantukin na tluk ko hi ta," tiah a ti. Cun mi vialte nih an ṭah ṭhan. ³⁵ Cun mi vialte nih David cu chun a si rih lioah khan rawl ei fial awkah an ra, sihmanhsehlaw David nih chiat a ser i "Ni a tlak hlan i changreu siseh, zeipaoh siseh ka teh ahcun, Pathian nih hi bangin le hi nak tam deuh zongin ka cungah tuah ko seh!" tiah a ti. ³⁶ Cun cucu mi vialte nih an hmuh i, siangpahrang nih a tuahmi thil zeipaoh nih an lung a ton tawn hna bang khan, an lung a ton ngaingai hna. ³⁷ Cucaah mi vialte le Israel mi vialte nih, Ner fapa Abner thah kha siangpahrang duhnak cu a rak si lo ti kha khi ni ah khan an hngalh. ³⁸ Cun siangpahrang nih a sinum hna sinah cun, "Nihin ah hin Israel mi chungah bawi le mingan pakhat a thi ti kha nan hngal lo maw? ³⁹ Siangpahrang ah chiti thuh ka si nain, nihin ah hin ka der ko; hi mi Zeruiah fapale hna hi ka caah an hak tuk. Bawipa nih ṭhat lonak a tuahtu cu a ṭhat lonak bantukin rul ko seh!" tiah a ti.

¹ Saul fapa Ishbosheth nih Hebron ah Abner a thi ti kha a theih tikah a lung a der i Israel mi vialte cu an hnabei a dong. ² Saul fapa nih khan ral hranh bu haotu mi pahnih a ngeih hna i pakhat min cu Baanah a si i a dang pakhat min cu Rekhab a si, annih cu Beeroth khuami Benjamin phun Rimmon fapa an si (zeitintiah Beeroth zong khan Benjamin ta ah rel chih a si; ³ Beeroth mi hna cu Gittaim ah an zam i khika ah nihin tiangin mipem an si). ⁴ Saul fapa Jonathan nih khan fapa pakhat a ngeih i amah cu a ke a bei. Saul le Jonathan kong kha Jezreel in a hung than tikah amah cu kum nga a si; cun a cawngtunu nih khan aa pom duak i a zampi; cun khulrang i a zam lioah khan a thlak sual i a ke kha a bei. Cun a min cu Mefibosheth a si. ⁵ Cun Beeroth khuami Rimmon fapa Rekhab le Baanah kha an i thawh i chun nilinh saling hrawng khin Ishbosheth inn ah chunlai i aa dinh lioah khin, an phan. ⁶ Cun zohhmanh, innka a cawngtu cu changvut kha a thian i sihmanhsehlaw a ngu i aa hngilh ai; cucaah Rekhab le a unau Baanah cu a thli tein an lut. ⁷ Inn chung i an va luh tikah khan, a ihnak dai chung i a ihkhun cungah a ih lioah khan an tuk i an thah i a lu an tan. A lu kha an lak i Arabah lei kalnak lam khan zan khuadei an kal i ⁸ Isbosheth lu cu David sinah Hebron ah khan an ratpi. Cun siangpahrang sinah khan, "Mah hihi na nunnak an kawltu na ral Ishbosheth, Saul fapa i a lu kha a si; nihin ah hin siangpahrang ka bawipa cu Saul le a tefa hna cungah khan Bawipa nih phu an hlampiak cang," tiah an ti. ⁹ Sihmanhsehlaw David nih Beeroth khuami Rimmon fapa hna, Rekhab le a unau Baanah cu a leh hna i, "Ral vialte chungin ka nunnak a ka tlantu Bawipa a nun bangin, ¹⁰ mi pakhat nih, ’Zohhmanh, Saul cu a thi cang,’ ti i a ka chimh i thawng ṭha ka phorh ti i a ruah tikah khan, ka tlaih i Ziklag ah ka thah, mah cucu thawngpang a rak phorhmi ca i laksawng ka rak pekmi a si. ¹¹ Miding mi amah innte i a ummi, a ihkhun cung i a thattu miṭhalo hna chinchin cu, zeitluk tein dik nanmah kut ah a thisen man cu kan cawh hna lai i vawlei cungin kan hloh chinchin hna lai?" tiah a ti. ¹² Cun David nih a tlangval kha nawl a pek hna i an thah hna i an kut le an ke kha an tan hna i Hebron khua i tidil pawngah khan an thlai hna. Sihmanhsehlaw Ishobosheth lu kha cu an lak i Hebron i Abner thlan ah khan an vui.

¹ Cun Israel phun vialte kha David sinah Hebron ah an ra i, "Zohhmanh, kannih cu na ruh le na sa kan si, ² kan hnulei caan, Saul kan siangpahrang a si lioah khan, Israel mi a chuahpitu le a luhpitu cu nangmah na si; cun Bawipa nih nangmah cu, ’Nangmah cu ka mi Israel mi hna tuukhal na si lai i Israel mi hna bawi na si lai,’ an timi kha na si," tiah an ti. ³ Cucaah Israel upa vialte cu siangpahrang sinah cun Hebron ah khan an ra i Siangpahrang David nih Bawipa hmaiah Hebron ah khan anmah he biakamnak a ser i annih nih David cu Israel mi cung i siangpahrang ah chiti an thuh. ⁴ David cu pen hram a thawk tikah kum sawm thum a si i kum sawm li chung a pen. ⁵ Hebron ah Judah mi kha kum sarih le thla ruk a pen hna; cun Jerusalem ah Israel mi vialte le Judah mi vialte kha kum sawm thum le kum thum a pen hna. ⁶ Cun siangpahrang le a mi hna cu Jebus mi doh awkah Jerusalem ah an kal; cu hna cu cuka ram i a ummi an si i David kha, "Hika ah hin na lut lai lo, mitcaw le kebei hmanh nih an in kham khawh lai," tiah a rak titu kha an si. Annih nih, David cu hika ah a lut kho lai lo, tiah an ruah. ⁷ Sihmanhsehlaw David nih Zion ralhruang cu a lak ko ai, cucu David khua ti a si. ⁸ Cun David nih khi ni ah khan, "Jebus mi thah a duhmi paoh cu, David lungthin nih a huatmi hna kebei le mitcaw kha hung thah hna awkah, ti kua khan hung kai hna seh," tiah a ti. Cucaah cun, "Mitcaw le kebei hna cu inn chungah khan an lut lai lo," tiah ti a si. ⁹ Cun David cu ralhruang chungah khan a um i cucu David khua tiah min a sak. Cun David nih khua cu, Millo in a chunglei tiang khan a velchum in a kulh. ¹⁰ Cun David cu Bawipa, ralkapbu Pathian kha a sinah a um caah a ngan chin lengmang. ¹¹ Cun Tair siangpahrang Hiram nih David kha lamkaltu le sidar thing le zungthiammi hna le lungremhthiam hna zong kha a kuat i David kha inn pakhat an sakpiak. ¹² Cun David nih Bawipa nih Israel mi cungah siangpahrang ah a ka fehter cang ti le, a mi Israel mi hna ruangah a pennak kha a hlorh cang ti kha a hngalh. ¹³ Cun David nih Hebron in a hun hnuah khan Jerusalem mi nupichun le nupitak tam chinchin aa chap hna i David cu fapa le fanu tam chinchin a ngei. ¹⁴ Cun Jerusalem ah a hrinmi hna an min cu mah hihi an si: Shammua, Shobab, Nathan, Solomon, ¹⁵ Ibhar, Elishua, Nefeg, Jafia, ¹⁶ Elishama, Eliada le Elifelet. ¹⁷ Filistin mi nih David kha Israel siangpahrang ah chiti thuh a si cang tiah an theih tikah, Filistin mi vialte nih David kha kawl awkah an hung kal; sihmanhsehlaw mah cucu David nih a theih i ralhruang ah khan a vung kal. ¹⁸ Filistin mi cu an ra i Refaim nelrawn ah khan an i zar phut ko. ¹⁹ Cun David nih Bawipa kha a hal i, "Filistin mi hna doh awkah ka hung kal lai maw? Annih cu ka kut chungah na ka pe hna hnga maw?" tiah a ti. Cun Bawipa nih David cu, "Hung kal ko, zeitintiah Filistin mi cu na kut chungah kan pek hrimhrim hna lai," tiah a ti. ²⁰ Cun David cu Baal-perazim ah a ra i khika ah annih cu a tei hna i amah nih, "Bawipa nih ka ral hna cu, tilian aa sah phut bantukin ka hmaiah a sah hna," tiah a ti. Cucaah cu ka hmun cu a min ah Baal-perazim ti a si. ²¹ Cun Filistin mi hna nih khika ah an siasal kha an kaltak hna i David le a mi hna nih khan an lak hna. ²² Cun Filistin mi cu an ra ṭhan hoi i Refaim nelrawn ah khan an i zar phut ṭhan. ²³ Cun David nih Bawipa kha a hal tikah, "Na hung kal hnga lo; an hnulei in na va hel hna lai i balsam thing zawn khan na nam hna lai. ²⁴ Cun balsam thing par hna i kal thawng na theih tikah, khi tikah na cawlcang ve lai, zeitintiah khi tikah khan, Bawipa cu na hmaiah Filistin mi ralkapbu kha tuk awkah a kal cang a si lai," tiah a ti. ²⁵ Cun Bawipa nih nawl a pek bangin David nih a tuah i Filistin mi hna cu Geba in Gezer tiang a thah hna.

¹ David nih Israel mi lakin thim ciammammi sang thum kha a pumh ṭhan hna. ² Cun David cu a tho i a sinah a ummi vialte hna he khan, Pathian kuang, a cungah ralkapbu Bawipa min a cuang i cherubim cung i a ṭhumi kha, vung lak awkah Judah ram Baalah khua ah khan an vung kal. ³ Cun Pathian kuang kha cawleng thar in an phorh i tlang cung i a ummi Abinadab inn khan an chuah pi; cun Abinadab fapa Uzzah le Ahio nih khan, ⁴ a chung i Pathian kuang a ummi cawleng thar kha an mawngh i Ahio cu kuang hmaiah khan a kal. ⁵ Cun David le Israel chungkhar vialte cu Bawipa hmaiah an thazang dihlak le hla le tingtang le thonglawi le muko le khuang le sumsel hna he tiah nuamhnak an tuah. ⁶ Cun Nakon phuhri kha an phak tikah cawtum kha an rilh caah Uzzah nih Pathian kuang kha a kut in a hei banh i a tlaih. ⁷ Cun Bawipa thinhunnak cu Uzzah cungah a alh i a kut in kuang kha a hei banh caah Pathian nih khika ah a tuk i cuka ah Pathian kuang kiangah khan a thi. ⁸ Cun Pathian nih Uzzah cungah a thinhunnak a sah caah David cu a thin a hung i cuka hmun cu a min ah Perez-uzzah tiah nihin tiangin ti a si. ⁹ Cun David cu khi ni ah Pathian kha a ṭih i, "Zeitindah Bawipa kuang cu ka sinah a rat khawh lai?" tiah a ti. ¹⁰ Cucaah David nih Bawipa kuang cu David khua chung i luhpi awk kha a duh lo; asinain David nih Git mi Obededom inn lei tu ah khan a kalpi. ¹¹ Cun Bawipa kuang cu Git mi Obededom inn chungah khan thla thum a um i Bawipa nih Obededom le a innchungkhar vialte kha thluachuahnak a pek hna. ¹² Cun Siangpahrang David kha an chimh i, "Bawipa nih Obededom innchungkhar kha Pathian kuang thawngin thluachuah a pek hna," tiah an ti. Cucaah David cu a va kal i Obededom inn khan David khua ah lunglawmhnak in Pathian kuang kha a ratpi; ¹³ cun Bawipa kuang a zawntu hna nih khan kar ruk an kal tikah cawtum pakhat le cenhmi saṭil pakhat kha a thawi hna. ¹⁴ Cun David cu Bawipa hmaiah a thazang dihlak in a lam; David cu la hmang ṭhia tlangbawi angki aa hruk. ¹⁵ Cucaah David le Israel innchungkhar vialte nih aupah le muko tumpah in Bawipa kuang cu an hunpi. ¹⁶ Bawipa kuang kha David khua chung i a luh lioah Saul fanu Mikhal nih khan thlalangawng in a hei zoh i Siangpahrang David cu Bawipa hmai i a laam le aa hlawh len ko kha a hei hmuh i a lung chungin a nihsawh. ¹⁷ Cun Bawipa kuang kha an luhpi i a umnak ding hmun caah David nih a rak bunhmi thlam chungah khan an chiah. Cun David nih khangh thawinak le daihnak thawinak kha Bawipa hmaiah a pekchanh. ¹⁸ Cun David nih khangh thawinak le daihnak thawinak kha a pekchanh dih tikah, ralkapbu Bawipa min in mizapi kha thluachuah a pek hna i ¹⁹ mi vialte kha, Israel mibu cu an ning piin, nu he pa he, changreu hlum khat, sa zam khat le mitsur thei car hlum khat a phawt cio hna. Cun mi vialte cu, an inn cio ah an ṭin. ²⁰ Cun David cu a innchungkhar kha thluachuah pek awkah a va kir. Sihmanhsehlaw Saul fanu Mikhal nih khan David cu ton awkah a ra chuak i, "Nihin cu Israel siangpahrang cu a sunglawi ko cu ta, mizeiruaramlo pakhat nih ningzah hngal loin a hnipuan aa phoih bantukin pei, a sal hna i an salnu hna hmaiah, nihin ah aa phoih ve kha!" tiah a ti. ²¹ Cun David nih Mikhal cu, "Na pa le a innchungkhar vialte nakin keimah kha a ka thim i Israel mi cung i bawi a ka cantertu Bawipa hmaiah pei a si tiah — Bawipa hmaiah cun thanuamnak ka tuah ko lai. ²² Hi nak i nihsawh awk tlak deuh hmanh ah kaa ser ko lai i keimah mit hmanh ah zahpi awk tlak ka si ko lai, sihmanhsehlaw na chimmi sinum ngaknu pawl hna thawng khan pei upat ka si lai tiah," tiah a ti. ²³ Cun Saul fanu Mikhal kha a thih ni tiangin fa a ngei lo.

¹ Cun siangpahrang cu amah inn ah a um i Bawipa nih a velchum i ral a ummi vialte hna lakin dinhnak a pek tikah, ² siangpahrang nih profet Nathan cu a thawh i, "Zohhmanh, kei cu sidar thing inn chungah ka um i sihmanhsehlaw Pathian kuang cu puan thlam chungah a um ko," tiah a ti. ³ Cun Nathan nih siangpahrang cu a thawh i, "Va kal law na lung chung i a ummi paoh cu va tuah ko, zeitintiah Bawipa cu na sinah a um," tiah a ti. ⁴ Sihmanhsehlaw cu zan ṭhiamṭhiam ah cun Bawipa bia cu Nathan sinah a ra i, ⁵ "Va kal law ka sal David kha, ’Bawipa nih hi bangin a ti: Ka umnak ding caah nangmah nih inn na ka sakpiak hnga maw? ⁶ Israel mi kha Izipt ram in ka chuahpi hna ni thawk in nihin tiang, inn chungah ka um rih lo, sihmanhsehlaw ka umnak ca i puan thlam chungin kaa chawk lengmang ko. ⁷ Israel mi vialte he kaa chawhnak hmun dihlak ah, ka mi Israel mi hna kha zohkhenh awk i nawl ka pekmi Israel mi biaceihtu hna aho sin tal ah, "Zeicahdah sidar inn na ka sakpiak lo?" tiah bia kaa khat tal ka chim maw?’ a ti tiah va chim. ⁸ Cucaah atu cu ka sal David kha hi bangin na va chimh lai, ’Hi bangin ralkapbu Bawipa nih a ti, nangmah cu ka mi Israel mi cungah bawi si awkah phong lak, tuu na zulhkhalh hnanak khan kan lak; ⁹ cun khuazeika na kalnak hmanh ah nangmah sinah ka um i na hmai in na ral vialte kha ka hloh dih hna; cun vawlei cung i mi lianngan hna min bantukin min ngan kan serpiak lai. ¹⁰ Cun ka mi Israel mi hna caah hmun pakhat ka tuah lai i anmah hmunte ah cun an um nakhnga le hnahnawh an si ti nakhnga lo, ka phun hna lai; ¹¹ hlan lio i ka mi hna cungah biaceihtu ka rak chiah hna caan bantuk khan, zaang en hmangmi hna nih an hrem ti hna lai lo; cun nangmah cu na ral vialte hna sinin dinhnak kan pek lai. Cu hleiah Bawipa nih nangmah cu Bawipa nih inn pakhat an serpiak lai, tiin an thanh. ¹² Cun na ni kha a tlin i na pupa hna sinah na ih tikah, nangmah pum chungin a chuak laimi na fapa cu nangmah hnuah a chan ka thawhter lai i a pennak kha ka fehter lai. ¹³ Amah nih ka min caah inn pakhat a sak lai i a pennak bawi ṭhutdan cu zungzal in ka fehter lai. ¹⁴ Keimah cu a pa ka si lai i amah cu ka fapa a si lai. ṭhat lonak a tuah tikah minung fung le minung fapa hna tuknak vual in ka chimhhrin lai; ¹⁵ sihmanhsehlaw nangmah hmai in ka ṭhialmi Saul sinin ka lak bantuk khan a sinin a fekmi ka dawtnak cu ka la lai lo. ¹⁶ Cun na inn le na pennak cu ka hmaiah a zungzal fek dingin ser a si lai; na bawi ṭhutdan cu zungzal in a hmun lai,’ a ti," tiah a ti. ¹⁷ Hi bia vialte ning le hi langhnak vialte ning hin, Nathan nih David kha a chimh. ¹⁸ Khi tikah David cu a lut i Bawipa hmaiah a ṭhu i, "Maw Bawipa Pathian, keimah cu ahodah ka si i ka innchungkhar zong hi zeidah an si, hi tiang nangmah nih na ka hruai hi? ¹⁹ Asinain mah hi cu nangmah mit ah cun maw Bawipa Pathian, a hmemi thil a si ko; caan saupi lio in na sal innchungkhar kong zong hi na rak chim chung cang i hmailei ciruang ding hna zong kha na ka hmuhsak cang, maw Bawipa Pathian! ²⁰ Cun David nih na sinah zei hlei dah a chim khawh ti lai? Zeitintiah, maw Bawipa Pathian, nangmah nih na sal cu na hngalh ko! ²¹ Nangmah na biakamnak ruangah le nangmah na lung ning tein, hi lianngannak cu na sal kha hngalhter awkah nangmah nih na tuah cang. ²² Cucaah nangmah cu na ngan ko, maw Bawipa Pathian; zeitintiah kannih nih kan hna in kan theihmi vialte ah nangmah bantuk an um lo i nangmah hleiah Pathian dang zeihmanh an um lo. ²³ Pathian nih amah mi si awk ca i tlanh awkah a kalhnawh hna i amah ca i min pakhat i ser i, amah mi hna hmai in miphun pakhat le cu miphun khuazing hna kha ṭhawl in annih cu thil lianngan le ṭihnung a tuahpiakmi hna, na mi Israel mi hna bantuk hi, vawlei cungah hin zei miphun tal an um ti maw? ²⁴ Na mi Israel cu zungzal in nangmah mi si awkah nangmah nih na caah na fehter i nangmah cu maw Bawipa, an Pathian ah na cang cang. ²⁵ Cun maw Bawipa Pathian, na sal le a innchungkhar kongah na rak chimmi bia kha atu cu zungzal ca in fehter ko law, na chim bang khan tuah ko; ²⁶ cun ’Ralkapbu Bawipa cu Israel Pathian a si,’ tiin na min cu a zungzal in upat a si lai i, na sal David innchungkhar cu nangmah hmaiah fehter si ko seh. ²⁷ Zeitintiah maw ralkapbu Bawipa, Israel Pathian, nangmah nih hi phuannak cu na sal sinah, ’Nangmah cu innchungkhar pakhat kan serpiak lai,’ tiin na rak ser cang; cucaah na sal nih nangmah sinah hi thlacamnak hi a cam ngam. ²⁸ Cucaah maw Bawipa Pathian, nangmah cu Pathian na si i na bia cu biatak an si i nangmah nih hi thil ṭha cu na sal kha na kamh cang; ²⁹ cucaah atu cu na salpa innchungkhar hi na hmaiah zungzal in a um nakhnga, thluachuahnak ka pekpiak ko sawh; zeitintiah maw Bawipa Pathian, nangmah nih na chim cang i na salpa innchungkhar cu nangmah thluachuahnak in thluachuah pek si zungzal ko seh," tiah a ti.

¹ Cun mah hnuah cun, David nih Filistin mi kha a tei hna i a tangchiah hna; Metheg-ammah kha Filistin mi hna kut chung khan a lak. ² Cun Moab kha a tei i tahnak hri in a tah hna i vawlei ah a ihter hna; tlang hnih cu thah awkin a tah i tlang khat cu pum tein zuah awkin a tah. Cun Moab mi cu David sal ah an cang i David sinah khan ngunkhuai an thawh. ³ Cun David nih Zufrates tiva kha uk ṭhan awk i a kalpah ah Zobah siangpahrang Rehob fapa Hadadezer zong kha a tei. ⁴ Cun David nih amah sin khan rangcung ralkap thong khat le za sarih le ke ralkap sang hnih a tlaih hna i David nih leng hnuktu rang vialte kha an tha a pheh dih hna, sihmanhsehlaw rangleng za khat ca i a za ding lawnglawng kha a nganh hna. ⁵ Cun Damaskas khuami Siria mi nih khan Zobah siangpahrang Hadadezer kha bawmh awkah an rat tikah, David nih khan Siria mi cu sang hnih le thong hnih a rak thah hna. ⁶ Cun David nih Damaskas khua chung i Aram ah khan ralvengtu ralkapbu a chiah hna i Siria mi cu David sal ah an cang i ngunkhuai kha an pek. Cun Bawipa nih David cu a kalnak kip ah khan teinak a pek lengmang. ⁷ Cun Hadadezer sinum hna nih an i putmi sui phaw hna kha David nih a lak hna i Jerusalem ah a rak phorh hna. ⁸ Cun Hadadezer khua a simi Betah le Berothai khan Siangpahrang David nih dar tampi a lak. ⁹ Hamath siangpahrang Toi nih Hadadezer ralkapbu kha a ning piin David nih a tei dih hna ti kha a theih tikah, ¹⁰ Hadadezer kha a doh i a tei caah amah cu va biakchawnh awk le va conglawmh awkah David Siangpahrang sinah khan a fapa Joram kha a hei thlah; zeitintiah Hadadezer nih khan Toi kha a rak doh lengmang tawn. Cun Joram nih ngun kheng le sui kheng le dar kheng kha a rak i phorh hna i. ¹¹ Mah hna zong cu Siangpahrang David nih Bawipa sinah a teimi miphun vialte hna sinin a lakmi sui le ngun hna he khan hmunkhat ah, a pekchanh hna; ¹² a teimi miphun hna cu Edom, Moab, Ammon mi, Filistin mi, Amalek mi le Zobah siangpahrang Rehob fapa Hadadezer kha an si. ¹³ Cun David cu a min a thang ngaingai ko. A ra kir tikah Edom mi sang khat le thong riat cu Cite Nelrawn ah a thah hna. ¹⁴ Cun Edom ram chungah ralvengtu ralkapbu kha a chiah hna; Edom ram chungah a dihlak in ralvengtu ralkapbu kha a chiah hna i Edom mi vialte cu David sal ah an cang. Cun Bawipa nih David cu a kalnak kip ah teinak a pek lengmang. ¹⁵ Cucaah David nih Israel mi vialte cu a pen hna i David nih a mi vialte cu biading le ruannak in a uk hna. ¹⁶ Cun Zeruiah fapa Joab cu ralkapbu haotu bik a si i Ahilud fapa Jehoshafat cu cazin ṭialtu a si; ¹⁷ cun Ahilud fapa Zadok le Abiathar fapa Ahimelek cu tlangbawi an si i Seraiah cu caṭialtu a si; ¹⁸ cun Jehoiada fapa Benaiah cu Khereth mi hna le Peleth mi hna cung i haotu a si i David fapa hna cu tlangbawi an si.

¹ Cun David nih, "Jonathan ruangah an cung i zaangfahnak ka langhter khawh nakhnga, Saul innchungkhar lakah khan a tangmi aho tal an um maw?" tiah a ti. ² Cun Saul innchungkhar sinum pakhat a min Ziba a simi kha a um i amah cu David sinah cun an kawh; cun siangpahrang nih amah cu, "Nangmah cu Ziba na si maw?" tiah a ti. Anih nih, "Amah cu na salpa hi ka si," tiah a ti. ³ Cun siangpahrang nih, "Pathian zaangfahnak cu a cungah ka langhter khawh nakhnga, Saul innchungkhar chungin a um rihmi pakhat tal an um ti hnga lo maw?" tiah a ti. Ziba nih siangpahrang sinah cun, "Jonathan fapa pakhat a um rih; amah cu a ke a bei," tiah a ti. ⁴ Siangpahrang nih cun amah cu, "Khuazei ah dah a um?" tiah a ti. Cun Ziba nih siangpahrang sinah cun, "Amah cu Lodebar ah Ammiel fapa Makhir inn ah a um ko," tiah a ti. ⁵ Cun David Siangpahrang nih mi a hei thlah hna i Lodebar i Ammiel fapa Makhir inn khan an va lak. ⁶ Cun Saul fapa Jonathan i fapa Mefibosheth cu David sinah a ra i a kun i upatnak kha a pek. Cun David nih, "Mefibosheth," tiah a ti. Cun anih nih, "Zohhmanh, na salpa hi," tiah a leh. ⁷ Cun David nih amah cu, "Na thinphang hlah; na pa Jonathan ruangah na cungah zaangfahnak kan hmuhsak lai i na pu Saul ram vialte kha kan khirh ṭhan lai; cun ka cabuai ah rawl na ei zungzal lai," tiah a ti. ⁸ Cun upatnak kha a tuah i, "Na salpa hi zeidah ka si i uico thi cia bantuk keimah hi na ka hramh?" tiah a ti. ⁹ Cun siangpahrang nih Saul sinum Ziba kha a auh i, "Saul ta a simi thil vialte le a innchungkhar vialte ta a simi kha na bawipa i a fapa sinah hin ka pek cang. ¹⁰ Cun nangmah le na fapa hna le na sinum hna nih amah vawlei cu nan thlawhpiak lai i na bawipa fapa hi cu ka cabuai ah rawl a ei zungzal lai," tiah a ti. Ziba cu fapa hleinga le sinum pakul a ngei. ¹¹ Cun Ziba nih siangpahrang cu, "Siangpahrang ka bawipa nih a salpa a ka fial ningin, cu bantukin na salpa nih ka tuah dih lai," tiah a ti. Cucaah Mefibosheth cu, siangpahrang fapa pakhat ve bantukin David cabuai ah khan rawl a ei. ¹² Cun Mefibosheth nih fapa note pakhat a ngei i a min cu Mika a si. Cun Ziba inn chung i khua a sami vialte kha Mefibosheth sinum ah an cang dih. ¹³ Cuticun Mefibosheth cu Jerusalem ah a um; zeitintiah siangpahrang cabuai ah khan rawl a ei zungzal. Amah cu a ke a pahnih in a bei.

¹ Cun mah hnuah cun Ammon mi hna siangpahrang cu a thi i a fapa Hanun nih amah hmun ah khan bawi a cang. ² Cun David nih a thawh i, "Nahash fapa Hanun hi a pa nih ka cungah zumhawktlak tein a rak um bantuk khan a cungah zumhawktlak tein ka um ve lai," tiah a ti. Cucaah David nih a pa kong ah khan amah cu va hnemh awkah a sinum a hei thlah hna. Cun David sinum hna cu Ammon mi hna ram chungah khan an va phan. ³ Sihmanhsehlaw Ammon mi an bawi hna nih khan an bawipa Hanun cu, "David nih nangmah sinah hnemtu a hun thlah hna caah hin na pa kha a upat tiin maw na ruah? David nih hin khua chung hi kawl awk le ngiatthlai awk le tei awkah a sinum hna hi a hun thlah hna, a si lo maw?" tiah an ti. ⁴ Cucaah Hanun nih David sinum hna cu a lak hna i an khahmul a hnarcheu cio a meh hna i an khelbo zawn ah an puan cu a laifang in a tan hna i a kalter hna. ⁵ Mah cucu David kha an chimh tikah anmah don awkah mi a hei thlah hna; zeitintiah an ning a zak ngaingai ko. Cun siangpahrang nih cun, "Nan khahmul a corh ṭhan hlan tiang Jeriko khua ah cam ko u, cun nan ra kir ṭhan te lai," tiah a ti hna. ⁶ Ammon mi hna nih annih cu David huat kan phor cang ti kha an theih tikah, Ammon mi hna nih cun mi an hei thlah hna i Beth-rehob i Siria mi hna le Zobah i Siria mi hna, ke ralkap sang hnih le Maakah ram siangpahrang le a mi thong khat, cun Tobram mi sang khat le thong hnih kha an i ruaih hna. ⁷ Mah cucu David nih a theih tikah Joab le a ṭhawngmi ralkapbu vialte kha a thlah hna. ⁸ Cun Ammon mi hna cu an ra chuak i hauka luhnak ah khan raldoh awkah an i tiang; cun Zobah le Rehob i Siria mi hna le Tob le Maakah mi hna cu anmah tein ramlak ah cun an um ve ko. ⁹ Joab nih hmailei he hnulei he an ka tuk lai ti kha a hmuh tikah, Israel mi chungin thim khunmi a cheu kha a thim hna i Siria mi dohtu dingah khan a ningcang tein ṭan hmun a khuarter hna; ¹⁰ cun a tang rihmi a mi hna cu a unau Abishai kut tangah a chiah hna i Ammon mi hna dohtu dingah khan a ningcang tein ṭan hmun a khuarter hna. ¹¹ Cun anih nih, "Siria mi hi ka caah an ṭhawn tuk ahcun na ka bawmh lai; sihmanhsehlaw Ammon mi hna kha na caah an ṭhawn tuk ahcun, ka ra lai i kan bawmh lai. ¹² Ralṭha ngaiin um tuah, cun kan mi hna le kan Pathian khua hna caah hin pasal si u sih; cun Bawipa nih a ṭha a tining paoh in tuah ko seh," tiah a ti. ¹³ Cucaah Joab le a sin i a ummi hna nih cun i tuk awkah Siria mi cu an hei fuh hna i an hmaiah cun an zam. ¹⁴ Cun Ammon mi hna nih Siria mi an zam ti an hmuh tikah annih zong, cu bantukin Abishai hmai khan an zam ve i khua chungah khan an lut. Cun Joab cu Ammon mi he i tuknak khan a kir i Jerusalem ah a tlung. ¹⁵ Sihmanhsehlaw Siria mi hna nih Israel mi nih an kan tei ti kha an hmuh tikah, hmunkhat ah an i pum ṭhan. ¹⁶ Cun Hadadezer nih mi a hei thlah hna i Zufrates tiva ral i a ummi Siria mi hna kha an ratpi hna; Hadadezar ralkap phu ralbawi Shobak nih khan a hrui hna i Helam an ra phan. ¹⁷ Mah cucu David kha an chimh tikah Israel mi vialte kha hmun khat ah a pumh hna i Jordan tiva kha an tan i Helam kha an phan. Cun Siria mi nih khan David doh awkah cun a ningcang tein ṭan hmun an rak khuar i amah he cun an i tu. ¹⁸ Cun Siria mi cu Israel mi hna hmai in an zaam i David nih mi chungin rangleng za sarih aa citmi hna le rangcung ralkap sang li kha a thah hna i an ralkapbu ralbawi Shobak kha a hliam i cucaah cun khika ah a thi. ¹⁹ Cun Hadadezer sal a simi siangpahrang vialte nih khan Israel mi nih an kan tei ti kha an hmuh tikah, Israel mi he cun remnak an ser i an kut tangmi ah an cang. Cucaah Siria mi nih Ammon mi hna bawmh kha an ngamh ti lo.

¹ Ṭhal a hung chuak i siangpahrang hna nih raltuknak hmun i an kal tawn caan ah khan, David nih Joab le a sin i a ummi a sinum vialte hna le Israel mi vialte kha a thlah hna i annih nih Ammon mi kha an hrawh dih hna i Rabbah kha an dum. Sihmanhsehlaw David cu Jerusalem khua ah khan a um ko. ² Cun ni khat cu zanlei sang ah khin David cu a ihkhun in a tho i siangpahrang inncung i aa chawh tikah, inncung cun minu pakhat aa kholh lio kha a hei hmuh; cun cu nu cu aa dawh ngaingai. ³ Cun David nih mi a hei thlah hna i minu kong kha a hlat. Cun pakhat nih, "Mah nu hi Eliam fanu Bathsheba, Hit mi Uriah nupi kha a si lo maw?" tiah a ti. ⁴ Cucaah David nih lamkal a hei thlah hna i an va lak; cun a sinah a ra i a rak ihpi. (A nuphung thian lonak in aa thianh lio kha a si). Cun a inn ah khan a kir ṭhan. ⁵ Cun minu cu fa a pawi i mi a hei thlah hna i David cu, "Fa ka pawi," tiah a chimh. ⁶ Cucaah David nih Joab kha bia a hei cah i, "Hit mi Uriah kha rak ka kua," tiah a ti. Cun Joab nih Uriah cu David sinah a kuat. ⁷ Uriah cu amah sinah a rat tikah David nih zeitindah Joab le mi hna kha an ningcang a si le, zeitindah raldohnak a umtu ning a si kha a hal. ⁸ Cun David nih Uriah cu, "Na inn ah vung kal law, na ke vung i ṭawl," tiah a ti. Cun Uriah cu siangpahrang inn khan a chuak i siangpahrang laksawng nih a hei zulh colh. ⁹ Sihmanhsehlaw Uriah cu a bawipa sinum vialte hna sinah siangpahrang inn innka ah khan a it i a inn ah a vung kal lo. ¹⁰ Cun David kha, "Uriah cu a inn ah a vung kal lo," tiah an chimh tikah David nih Uriah cu a thawh i, "Khual tlawnnak in na rung tlung a si lo mei, zeicahdah na inn ah na vung kal lo?" tiah a ti. ¹¹ Cun Uriah nih David cu, "Israel le Judah le kuang cu thlam chungah an um i ka bawipa Joab le ka bawipa i a sal hna cu ramlak ah an riak ko; cu ti a si ko lioah cun maw, va ei va din awk le ka nupi he va um awkah, ka inn ah cun ka vung kal hnga? Nangmah na nun bantuk le na nunnak a nun bantukin, mah cucu ka tuah lai lo," tiah a ti. ¹² Cun David nih Uriah cu, "Nihin zong hika ah hin cam law, thaizing ah kan kalter lai," tiah a ti. Cucaah Uriah cu, cu ni le a thaizing cu Jerusalem ah a cam. ¹³ Cun David nih a sawm i a hmaika ah cun a ei a ding, cucaah a ritter; cun a zanlei ah a bawipa sinum hna sin i va ih awkah a chuak, sihmanhsehlaw a inn ah a vung kal lo. ¹⁴ A thaizing ah David nih Joab sinah ca a kuat i Uriah cu a phorhter. ¹⁵ A ca chungah cun, "Uriah cu ral hratnak bik hmun hmaisuang bik ah khan na chiah lai i an tuk i a thih naklai hnulei ah nan tawntak te lai," tiah a ti. ¹⁶ Cun Joab nih khan khua kha a dum lioah ralṭhami an umnak hmun ti i a hngalhmi kha Uriah cu a thiah. ¹⁷ Cun khua chung mi cu an hung chuak i Joab he cun an i do; cun cu mi hna lakah cun David salle zong tlawmpal an thi. Hit mi Uriah zong a thi ve. ¹⁸ Cun Joab nih mi a hei thlah i an i tuknak kong vialte cu David kha a chimh, ¹⁹ cun zualko kha bia a beuh i, "Raltuknak kong vialte kha siangpahrang sinah na chim dih tikah, ²⁰ siangpahrang cu a thin a phawh i na sinah, ’Zeicahdah doh awk i nan kal tikah khua cu nan va naih tuk? Ralhau vampang cungin an kan kah lai tiah nan hngal lo maw? ²¹ Aho nih dah Jerubbesheth fapa Abimelek kha a rak thah kha? Nu pakhat nih changvut rialnak lung a cunglei kha vampang in a vun thlakhnawh i Thebez ah khan a thi a si lo mei? Zeicahdah ralhau naih vampang naih tuk hringhran ah cun nan va kal?’ a ti ahcun, ’Na salpa Uriah, Hit mi zong kha a thi ve,’ tiah na ti te lai," tiah a ti. ²² Cucaah zualko cu a va kal i Joab nih na va chim lai ti i a thlahhnawh chanmi vialte kha David cu a va chimh. ²³ Zualko nih khan David cu, "Mi hna nih khan an kan tei deuh i ramlak ah khan an kan nam; sihmanhsehlaw hauka luhnak tiang kan en ṭhan hna. ²⁴ Khi tikah thal kah thiam pawl nih na salle cu an kan kah i siangpahrang sal tlawmpal cu an thi; na sal Uriah, Hit mi zong kha a thi ve," tiah a ti. ²⁵ David nih zualko sinah cun, "Hi bangin Joab sinah cun, ’Hi thil hi na lungre i theihter hlah, zeicahtiah vainam nih cun atu ah pakhat, cun a hnuah a dang pakhat tiin pei a thah phung a si ko cu; khua na dohnak cu ṭhawnter chin law hrawk dih tuah,’ a ti tiah na va chim lai. Cun amah cu thazang na va pek lai," tiah a ti. ²⁶ Uriah nupi nih a va Uriah a thi ti kha a theih tikah a va zun cu a ngai. ²⁷ Cun a ngaihnak kha a dih tikah, David nih a hei cah i a inn ah a ratter i a nupi ah a cang i fapa a hrinpiak. Sihmanhsehlaw David tuahmi thil nih cun Bawipa kha lunglawm loin a tuah.

¹ Cun Bawipa nih Nathan kha David sinah a hei thlah. Amah sinah cun a ra i, "Khua pakhat ah hin mi pahnih an um i pakhat cu a rummi a si i pakhat cu sifakmi a si. ² Mirumpa nih cun tuurun le cawrun tam ngaingai a ngeih hna i ³ sihmanhsehlaw misifakpa nih cun a cawkmi tuu a nute pakhat lawng khi a ngeih. Cun amah nih cun a cawm i a fale hna he cun an ṭhang ṭi, a kheng le a hrai kha aa hrawm ve tawn i a ṭang chungah a pom tawn, amah cu a caah fanu bantuk a si ko. ⁴ Voi khat cu, mirumpa cu khualtlung pakhat a ngei i amah tuurun chungin siseh, caw run chungin siseh, sa cu thah duh riangmang loin, misifakpa tuufate tu cu a lak i a khualpa cu a thah," tiah a ti. ⁵ Cun mipa cungah cun David thinhunnak cu a alh ciammam i Nathan sinah cun, "Bawipa nih a nun bangin, mah thil a tuahtu hi thih awk a tlak; ⁶ hi thil a tuah caah le zaangfahnak a ngeih lo caah a tuufate kha let li in a cham awk a si," tiah a ti. ⁷ Cun Nathan nih David cu a thawh i, "Mipa cu nangmah hi na si. Hi bangin Bawipa, Israel Pathian nih, ’Nangmah cu Israel mi siangpahrang ah chiti kan thuh i Saul kut chungin kan chuah; ⁸ cun na bawipa inn cu kan pek i na bawipa nupi hna cu nangmah ṭang chungah kan pek hna, cun Israel mi chungkhar hna le Judah mi chungkhar hna cu kan pek hna; cun mah hihi a tlawm tuk ahcun, cu zat cu kan chap rih lai. ⁹ Zeicahdah ka mithmuh i ṭhat lonak tuah awkah Bawipa ka bia cu na zawmhtaih? Hit mi Uriah cu vainam in na tuk i a nupi cu nupi ah naa lak i amah cu Ammon mi hna vainam in na thah. ¹⁰ Cun nangmah nih na ka zawmhtaih i Hit mi Uriah nupi kha na nupi ah naa lak caah, cucaah vainam cu na inn in aa ṭhen bal lai lo,’ a ti. ¹¹ Hi bangin Bawipa nih, ’Zohhmanh, nangmah inn chung lila in ṭhat lonak nangmah cungah ka chuahter lai i na mitka hrimhrim ah na nupile hna cu ka lak hna lai i na innpa kha ka pek hna lai i hi ni ka hmuh hngan ah hin na nupile cu a ihpi hna lai. ¹² Zeitintiah nang nih cun hi thil hi a thli tein na tuah, sihmanhsehlaw kei nih cun hi thil hi Israel mi vialte hna hmai le chun khua ceu ah ka tuah lai,’ a ti," tiah a ti. ¹³ Cun David nih Nathan sinah cun, "Bawipa sinah ka sual cang," tiah a ti. Cun Nathan nih David cu, "Bawipa zong nih na sualnak kha an ngaihthiam cang, na thi lai lo. ¹⁴ Sihmanhsehlaw mah hi thil na tuah thawngin Bawipa kha na zawmhtaih ngaingai cang caah, na hrinmi na fa cu a thi lai," tiah a ti. Cun Nathan cu a inn ah a ṭin. ¹⁵ Cun Bawipa nih, Uriah nupi nih David a hrinpiakmi fa cu a tuk i a zaw. ¹⁶ Cucaah David nih Bawipa kha ngakchia caah cun a nawl; cun David cu rawl a ul i a lut i vawlei ah zan khuadei a ril ko. ¹⁷ Cun inn chung i upa hna nih khan amah cu vawlei khan thawhter awkah a pawngin an dirhnawh; sihmanhsehlaw a tho duh lo, anmah sinah rawl zong a ei duh lo. ¹⁸ A ni sarihnak ah ngakchia cu a thi. Cun David cu a sinum hna nih khan ngakchia a thih kha a chimh an ṭih, zeitintiah annih nih, "Zohhmanh, ngakchia a nun lio hmanh ah khan kan chimh i a kan ngai duh lo, cucaah atu cu zeitindah ngakchia kha a thi cang, tiah kan chimh ngam lai? Amah le amah zeimaw tiin aa tuah sual lai," tiah an ti. ¹⁹ Sihmanhsehlaw David nih a sinum hna an i ceih sepmap kha a hmuh tikah, ngakchia cu a thi cang, ti kha a hngalh; cun David nih a sinum hna cu, "Ngakchia cu a thi maw?" tiah a ti hna i, annih nih, "A thi," tiah an ti. ²⁰ Khi tikah David cu vawlei khan a tho i aa kholh i sathau aa thuh i a hnipuan aa thleng i Bawipa inn chungah a lut i Pathian kha a biak; cun amah inn ah khan a kal i a hal hna tikah rawl an hunh i a ei. ²¹ Cun a sinum hna nih khan amah cu, "Na tuahmi thil hi zeidah a si? Ngakchia cu a nun lioah rawl na ul i amah cu na ṭah lengmang; sihmanhsehlaw ngakchia cu a thih tikah na tho i rawl na ei," tiah an ti. ²² Cun anih nih, "Ngakchia cu a nun lioah khan rawl ka ul i ka ṭap taktak; zeitintiah, ’Ngakchia cu a nun nakhnga Bawipa nih a hei ka zaangfah ko hnga dah kaw, aho nih dah an hngalh khawh lai?’ ka ti. ²³ Sihmanhsehlaw atu cu a thi cang; zeicahdah rawl cu ka ulh ti lai? Ka nunter ṭhan khawh lai maw? Keimah cu a sinah ka kal te lai, sihmanhsehlaw amah cu ka sinah a ra kir ṭhan lai lo," tiah a ti. ²⁴ Cun David nih a nupi Bathsheba kha a hnemh i a sinah a lut i a ihpi i fapa pakhat a hrin, a min ah Solomon a sak. Cun Bawipa nih amah cu a dawt i ²⁵ profet Nathan sinin bia a cah; cucaah Bawipa ruangah cun a min ah Jedidiah sak a si. ²⁶ Joab nih khan Ammon mi hna khua Rabbah kha a tuk i siangpahrang khua cu a lak. ²⁷ Cun Joab nih David sinah zualko a hei thlah hna i, "Rabbah cu ka tuk cang; cuhleiah ti tamnak khua zong kha ka lak cang. ²⁸ Cucaah atu cu a tangmi kha hmunkhat ah pum hna law khua kha riahhnawh law la tuah, cu ti a si lo ahcun, keimah nih khua cu ka lak lai i ka min in kawh a si sual lai," tiah a ti. ²⁹ Cucaah David nih mi vialte kha hmunkhat ah a pumh hna i Rabbah ah cun a va kal i a tuk i a va lak. ³⁰ Cun an siangpahrang bawi luchin cu a lu cung khan a lak; a rih lei cu sui talen pakhat a si i a chungah lungvar man sung a um; cun cucu David kha an chinh. Cun cu khua hranchaw kha a lak, a tam ngaingai ko. ³¹ Cun a chung i a ummi hna kha a chuah hna i hluah le thir hmuizum le thir hreitlung in rian a ṭuanter hna i tlakrawh rawhnak ah khan rian a ṭuanter hna; cu bangin Ammon mi hna khua vialte cungah khan a tuah dih. Cun David le a mi vialte cu Jerusalem ah an kir ṭhan.

¹ David fapa Absalom nih khan far dawh ngai pakhat a ngei i a min ah Tamar a si; cun David fapa Amnon nih khan a duh. ² Cun Amnon cu a farnu Tamar ruangah cun a lungre a thei ngai i cucaah amah le amah aa zawtter; zeitintiah amah cu ngaknu thiang a si ṭung i zei thil hmanh hei tuah khi Amnon caah a si kho lo ding khi a lo. ³ Sihmanhsehlaw Amnon nih cun hawi pakhat a ngei i a min cu Jonadab a si, amah cu David u Shimeah fapa a si i Jonadab cu mizer ngai a si. ⁴ Cun anih nih amah cu a thawh i, "Maw siangpahrang fapa, zeicahdah zing khat hnu zing khat na hmai lawng a chiat ko? Na ka chim lai lo maw?" tiah a ti. Anih nih, amah cu, "Ka unau Absalom far Tamar khi ka duh," tiah a ti. ⁵ Jonadab nih anih cu, "Na ihkhun ah it law i zawtter; cun na pa nih nangmah zoh awkah a rat tikah, ka farnu Tamar kha ka sinah hin ra seh law, ei awk rawl ka pe seh law, cun ka hmuh khawh nakhnga ka mit hmuh ah hin rawl cu chuang tuah seh, a kut chung ta cu ka ei nakhnga,’ na ti lai," tiah a ti. ⁶ Cucaah Amnon cu a it i aa zawtter; cun amah zoh awkah siangpahrang nih a rat tikah, Amnon nih siangpahrang cu a thawh i, "Zaangfahnak tein ka farnu Tamar kha ra seh law, ka mit hmuh ah hin changreu hlum hnih in ka serpiak seh law, amah kut chung ta cu ka rak ei tuah lai," tiah a ti. ⁷ Cun David nih Tamar cu a inn ah khan bia a hei cah i, "Na ṭa Amnon inn ah khan va kal law, rawl va chuanpiak tuah," tiah a ti. ⁸ Cucaah Tamar cu a ṭa Amnon inn ah khan, a ih konak ah khan, a va kal. Cun changvut cet kha a lak i a nen i a mit hmuh ah cun changreu hlum cu a ser hna i changreu hlum cu a rawh hna. ⁹ Cun ukang kha a lak i a hmaiah cun a bungh; sihmanhsehlaw a ei duh lo. Cun Amnon nih, "Ka sin i a ummi vialte kha chuak dih hna seh," tiah a ti. Cucaah a sinin an dihlak in an chuak dih. ¹⁰ Cun Amnon nih Tamar cu, "Na kut chung ta cu ka ei nakhnga, inn dal chungah hin rawl cu run luhpi tuah," tiah a ti. Cun Tamar nih a sermi changreu hlum hna cu a hei kalpi hna i inn dal chungah a ṭa Amnon sinah cun a hei luhpi hna. ¹¹ Sihmanhsehlaw ei awk i a pawng a hei phakpi tik hna ah a rak tlaih i, "Ra law, ka sinah ra it tuah, ka farnu," tiah a ti. ¹² Cun anih nih a leh i, "Asilo, ka ṭapa, i hramhram hlah; zeitintiah hi bantuk thil cu Israel mi lakah tuah a si bal lo; hi hor hruhnak hi tuah hlah. ¹³ Keimah lei ca in chim ah, hi ka ningzahnak cu khuazei ah dah kaa phorh khawh lai? Cun nangmah ca zongah, nangmah cu Israel mi lak i horhrutmi pakhat na si ve ko lai. Cucaah siangpahrang sinah chim tuah, tiah kan nawl, nangmah vat cu a ka thlauh lem lai lo," tiah a ti. ¹⁴ Sihmanhsehlaw a bia cu a ngai duh lo i amah cu a ṭhawng deuhmi a si caah hramhram in a ihpi. ¹⁵ Khi tikah Amnon nih cun a fak ngaingaimi huatnak in a huat ṭhan ṭung i a rak duh lio i a dawtnak nakkhan a huatnak cu a ngan deuh ṭhan. Cun Amnon nih amah cu a thawh i, "Tho law, kal zok," tiah a ti. ¹⁶ Sihmanhsehlaw amah nih cun, "Asilo, ka ṭapa; na ka dawinak i na palhnak hi ka cung i na tuahmi nak hmanh khan a ngan deuh," tiah a ti. Sihmanhsehlaw a bia cu a ngai duh lo. ¹⁷ Amah a bultawltu tlangvalpa kha a hei auh i, "Hi minu hi ka hmaika in chuahter law, innka kha hrenhkanh," tiah a ti. ¹⁸ Amah cu angki fualpi, ban ngeimi aa hruk; zeitintiah cu bang cun hlan lioah cun, siangpahrang fanu thiang hna cu an i thuam tawn. Cucaah a sinum nih cun amah cu a chuah i innka cu a hrenhkanh. ¹⁹ Cun Tamar nih cun a lu ah vutcam aa phulh i a ban a saumi a angki fual aa hrukmi cu a thleh i a lu cungah a kut kha aa chuan i a kal, a kalpah cun thang piin a ṭappah lengmang. ²⁰ Cun a ṭa Absalom nih khan a thawh i, "Na ṭa Amnon nih khan an ihpi dahra? Ka farnu, dai tein um ziar ko; amah cu na ṭa a si; mah kong cu lung fak tuk in ruat hlah," tiah a ti. Cucaah Tamar cu a ṭa Absalom inn ah khan thlavai kiang in a um. ²¹ David Siangpahrang nih hi thil vialte hi a theih tikah a thin a hung ngaingai. ²² Sihmanhsehlaw Absalom nih Amnon sinah khan bia ṭha siseh, bia chia siseh, zeihmanh a chim lo, zeitintiah Amnon nih a farnu Tamar kha hramhram in a sual caah Absalom nih Amnon kha a huat. ²³ Kum hnih kheng hnuah khin, Efraim pawng i Baalhazor ah Absalom nih tuu hmul mettu a ngei i Absalom nih siangpahrang fapa vialte kha a sawm hna. ²⁴ Cun Absalom cu siangpahrang sinah khan a ra i, "Zohhmanh, na salpa nih tuu hmul mettu kha ka ngei hna; zaangfahnak tein siangpahrang le a sinum hna cu na salpa sinah hin ra tuah u," tiah a ti. ²⁵ Sihmanhsehlaw siangpahrang nih Absalom cu, "Asilo, ka fapa, kan dihlak cun kal hlah u si, na caah thilrit kan si sual lai," tiah a ti. A hnek len, sihmanhsehlaw kal cu a duh lo, asinain a thluachuahnak cu a pek. ²⁶ Khi tikah Absalom nih a thawh i, "Asilo ahcun, ka unau Amnon cu ka sinah kal seh, tiah kan nawl," tiah a ti. Cun siangpahrang nih amah cu, "Zeicahdah na sinah cun a kal lai?" tiah a ti. ²⁷ Sihmanhsehlaw Amnon le siangpahrang fapa vialte kha amah sinah cun a kalter hna hlantiang Absalom nih khan a hnek peng. ²⁸ Cun Absalom nih khan a sinum hna cu nawl a pek hna i, "Amnon kha zu nih a lung a lawmhter tikah, i chingchiah u law, ’Amnon kha tu u,’ kan ti hna tikah that u. Ṭih hlah u, keimah nih nawl kan pek hna a si lo mei? Nan ral ṭha u law nan lung ṭhawng ko u," tiah a ti. ²⁹ Cucaah Absalom sinum hna nih khan Absalom i nawl a pek hna bangin Amnon cungah khan an tuah. Khi tikah siangpahrang fapa vialte kha an tho i an laa cio kha an i cit i an zam. ³⁰ Lampi i an um lioah khin David sinah, "Absalom nih siangpahrang fapa vialte kha a thah dih hna i pakhat hmanh an tang lo," tiin thawng a rak thang. ³¹ Khi tikah siangpahrang cu a tho i a puan kha a thleh hna i vawlei ah a ril; cun a sinum vialte a pawng i a ummi hna zong nih khan an puan cu an thleh ve. ³² Sihmanhsehlaw David cu Shimeah fapa Jonadab nih khan a thawh i, "Sihmanhsehlaw fapa tlangval vialte kha an thah dih hna tiin ka bawipa nih ruat hlah seh, zeitintiah Amnon lawnglawng kha a thimi cu a si; zeicahtiah a farnu Tamar hramhram in a sual ni thawk khan, hi thil hi Absalom nawl peknak bangin ruah chih a si diam cang. ³³ Cucaah siangpahrang fapa vialte cu an thi dih tiin siangpahrang ka bawipa nih a lung ah i ken hlah seh, zeicahtiah Amnon lawng pei a thi ko cu," tiah a ti. ³⁴ Sihmanhsehlaw Absalom cu a zam. Cun ralvengtu tlangvalpa nih khan khua a hei cuan i zohhmanh, tlang pang i a kalmi Horonaim lam khan mi tampi an rat kha a hmuh. ³⁵ Cun Jonadab nih siangpahrang cu, "Zohhmanh, siangpahrang fapa hna cu an ra cang; na sal nih a chim bangkhan a si taktak ko," tiah a ti. ³⁶ Cun a chim dih kate ah khin, zohhmanh siangpahrang fapa hna cu an ra i thang piin an ṭap; cun siangpahrang le a sinum vialte hna zong lunghno ngai tein an ṭap dih. ³⁷ Sihmanhsehlaw Absalom cu a zam i Geshur siangpahrang Ammihud fapa Talmai sinah khan a va kal. Cun David nih a fapa cu ni khat hnu ni khat a ṭah lengmang. ³⁸ Cuticun Absalom cu a zam i Geshur ah khan a va kal i khika ah kum thum a va um. ³⁹ Cun Siangpahrang David cu Absalom kha a ngai hringhran; zeitintiah Amnon kha cu a thi cang ko cu ta, tiin a kong ah khan aa lungsak cang.

¹ Zeruiah fapa Joab nih khan siangpahrang lungthin cu Absalom sinah khan a kal ti kha a hngalh. ² Cun Joab nih cun Tekoa ah mi a hei thlah hna i khika in a fimmi nu pakhat an va lak i amah cu, "Mithi ngai bantukin naa umter lai i mithi ngaihnak hnipuan kha naa hruk lai; sathau i thuh hlah; sihmanhsehlaw mithi ni tampi a ngai cangmi bantukin na um lai; ³ cun siangpahrang sinah na va kal lai i hi bangin na va chim lai," tiah a ti. Cuticun Joab nih a kaa chungah bia cu a khaih. ⁴ Tekoa minu cu siangpahrang sinah a rat tikah vawlei lei hoih in a bawk i upatnak kha a tuah i, "Maw siangpahrang ka bawm tuah," tiah a ti. ⁵ Cun siangpahrang nih, "Zeidah na harnak cu a si?" tiah a ti. Cun anih nih, "Cu ngai tak cu, nuhmei ka si i ka va a thi cang. ⁶ Cun na salnu nih hin fapa pahnih ka ngeih hna i lo ah an i si i a ṭhentu hna an um lo i pakhat nih pakhat cu a tuk i a thah. ⁷ Cun atu cu an innchungkhar ningin na salnu hi an ka thawhhnawh i, ’A thahmi a unaupa nunnak a lak ruangah khan amah cu kan thah nakhnga, a unaupa a tutu kha hun chuah tuah,’ tiah an ka ti. Cuticun rocotu ding zong kha hrawh an duh. Cu bantukin annih nih ka meiṭil a tangmi cu hmih an duh i ka vapa caah hi vawlei cungah hin min siseh, a tangmi siseh, zeihmanh nganh an duh lo," tiah a ti. ⁸ Khi tikah siangpahrang nih minu sinah cun, "Na inn ah va kal law nangmah kong ah nawlbia ka chuah lai," tiah a ti. ⁹ Cun Tekoa minu nih khan siangpahrang sinah cun, "Mawhchiatnak cu keimah le ka pa innchungkhar cungah si ko seh, siangpahrang ka bawipa; siangpahrang le a bawi ṭhutdan cu mawh phor hna hlah seh," tiah a ti. ¹⁰ Siangpahrang nih cun a thawh i, "Mi zeihmanh nih na sinah bia zeihmanh an chim ahcun, ka sinah ratpi law, amah nih an tawng ṭhan bal ti lai lo," tiah a ti. ¹¹ Cun anih nih, "Thisen phuhlamtu nih khan a thah ti nakhnga lo le, ka fapa cu hrawh a si nakhnga lo, siangpahrang nih Bawipa na Pathian min chalh in chim tuah, tiah kan nawl," tiah a ti. Cun anih nih, "Bawipa a nun bangin na fapa cu a samfa fa khat hmanh vawlei ah a tla lai lo," tiah a ti. ¹² Cun minu nih khan, "Siangpahrang ka bawipa sinah bia ka khatte in ka chimter rih tuah, tiah kan nawl," tiah a ti. Cun anih nih, "Chim tuah," tiah a ti. ¹³ Cun minu nih khan, "A si kun ahcun, zeicahdah cu bantuk thil cu Pathian mi cungah tuah awkah na timh kun? Hi bantuk biakhiahnak siangpahrang nih a pek tikah hin, siangpahrang nih a zammi a fapa kha inn ah a kirter ṭhan lo caah amah le amah sual aa phawt a si. ¹⁴ Kannih cu kan dihlak in kan thi hrimhrim ko lai, vawlei i thletmi ti ruh ṭhan khawh ti lomi bantuk khi kan si; sihmanhsehlaw hi a zammi fapa hi phung leng chuahmi si lo dingin khua a khangtu cu a nunnak Pathian nih a lakpiak lai lo. ¹⁵ Mi nih ka thin an ka phanter caah mah hihi siangpahrang ka bawipa sin i chim awkah ka ra; cun na salnu nih hin, ’Siangpahrang sinah cun ka va chim ko lai, siangpahrang nih cun a salnu i ka halmi hi a hei ka tuahpiak ko hnga dah kaw. ¹⁶ Zeitintiah siangpahrang nih cun a theih lai i, Pathian ro chungin keimah le ka fapa a ka hrawk hnga dingmi kut chungin a salnu cu a ka luatter lai,’ tiah ka ruah. ¹⁷ Cun na salnu nih hin, ’Siangpahrang ka bawipa bia nih cun dinhnak a ka pek lai, tiah ka ruah; zeitintiah siangpahrang ka bawipa hi a chia le a ṭha thleidan khawh leiah Pathian vancungmi bantuk a si. Bawipa na Pathian cu na sinah um ko seh!" tiah a ti. ¹⁸ Cun siangpahrang nih minu kha a leh i, "Kan halmi paoh ka sinin zeihmanh thup hlah," tiah a ti. Cun minu nih, "Siangpahrang ka bawipa nih chim ko seh," tiah a ti. ¹⁹ Siangpahrang nih a thawh i, "Hi thil kong ah hin na sinah Joab kut aa tel maw?" tiah a ti. Cun minu nih cun a leh i, "Siangpahrang ka bawipa nangmah na nun hrimhrim bantukin, siangpahrang ka bawipa nih a chimmi thil zeihmanh hin aho hmanh kehlei ah siseh, orhlei ah siseh an i mer kho lai lo. A ka fialtu cu na sal Joab kha a si; hi bia vialte na salnu ka kaa chungah a ka khaihtu cu amah kha a si. ²⁰ Thil kalning kha thlen awkah na sal Joab nih mah hihi a tuah. Sihmanhsehlaw ka bawipa cu vawlei i a ummi thil vialte hngalh awkah Pathian vancungmi fimnak bantuk fimnak na ngei," tiah a ti. ²¹ Cun siangpahrang nih khan Joab cu a thawh i, "Zohhmanh, mah hi cu kan pek; va kal law, tlangval Absalom kha va la ṭhan cang," tiah a ti. ²² Cun Joab cu vawlei ah a bawk i upatnak kha a tuah i siangpahrang kha thluachuahnak a pek; cun Joab nih a thawh i, "Siangpahrang ka bawipa, siangpahrang nih a sal nih a halmi a ka pek caah hin, na sal nih na hmaiah mithmai ṭha ka hmuh tiah nihin ah ka hngalh," tiah a ti. ²³ Cucaah Joab cu a tho i Geshur ah khan a va kal i Absalom cu Jerusalem ah a ratpi. ²⁴ Cun siangpahrang nih, "Amah dang tein amah inn ah khan um seh; ka mui cu ka hmu hlah seh," tiah a ti. Cucaah Absalom cu a dang tein amah inn ah khan a um i siangpahrang cu a mui a hmu lo. ²⁵ Israel mi vialte lakah dawh leiah Absalom tlukin thangṭhat awk aho hmanh an um lo; a kechik in a luthlung tiang soisel awk pakhat hmanh a um lo. ²⁶ Cun a sam cu aa meh tikah, a lu cung sam cu a tah tawn i siangpahrang khing tahnak in shekel za hnih a si, (kum fate kum dongh caan paoh ah aa meh tawn, a rih tikah khan.) ²⁷ Absalom cu fapa pathum le fanu pakhat a ngei, a fanu min cu Tamar a si i midawh ngai a si. ²⁸ Cuticun Absalom cu Jerusalem ah siangpahrang mui hmuh loin kum hnih kheng a um. ²⁹ Cu tikah Absalom nih Joab kha siangpahrang sin i kalpi awkah a hei cah, sihmanhsehlaw Joab cu a ra duh lo. Cun a voi hnihnak a hei cah ṭhan i sihmanhsehlaw cu a ra duh ṭhiamṭhiam lo. ³⁰ Cu tikah a sinum cu a thawh hna i "Vei mu, liou hna, Joab lo cu keimah lo chang ah khan a si i a chungah barli a ngei hna khah, va kal u law mei in va duah hna uh," tiah a ti. Cucaah Absalom sinum hna nih khan a lo cu mei in an duah. ³¹ Khi tikah Joab cu a tho i Absalom cu a inn ah a va kalhnawh i, "Zeicahdah na sinum hna nih ka lo kha an duah?" tiah a ti. ³² Absalom nih Joab cu a leh i, "Zohhmanh, nangmah cu bia kan cah i, ’Hika ah hin ra law, "Zeicahdah Geshur in ka rat kun? Khika ah khan rak um ko ning law ka caah a ṭha deuh hnga," tiin siangpahrang cu va hal awkah kan thlah lai,’ ka ti. Cucaah atu cu siangpahrang kha ka hmuhter tuah; ka cungah mawhchiatnak a um a si le, amah nih rak ka that ko seh," tiah a ti. ³³ Cun Joab cu siangpahrang sinah khan a va kal i a va chimh; cun Absalom kha a auh. Cucaah siangpahrang sinah khan a ra i siangpahrang hmaiah cun vawlei lei hoih in a kun i siangpahrang nih Absalom kha a rak hnamh.

¹ Hi hnuah hin Absalom nih rangleng pakhat le rang hna le a hmai i a tlitu dingmi sawm nga aa chiah hna. ² Cun Absalom cu zing tein a tho tawn i hauka lam pawngah a dir tawn; cun siangpahrang hmai i chuahpi awk bia a ngeimi paoh cu Absalom nih a rak auh hna i, "Khuazei khuami dah na si?" tiah a rak ti hna. Cun annih nih, "Na sal hi Israel mi lak i cu phun kha phun cu ka si," tiah a leh tikah, ³ Absalom nih annih cu a thawh tawn hna i, "Zohhmanh, na bia cu a ṭha i a dik ko; sihmanhsehlaw nangmah bia ngaihpiak awkah siangpahrang nih a thiahmi ahohmanh an um lo," tiah a ti tawn hna. ⁴ Cuhleiah Absalom nih cun, "Hi ram chungah hin keimah hi biaceihtu hei si ning law ka hei duh dah! Bia ngeimi le tazacuai duhmi vialte kha ka sinah an ra hnga i ding tein bia ka ceihpiak hna hnga," tiah a ti. ⁵ Cun amah cu upatnak pek awk i mi nih an hei fuh tikah khan, a kut a rak i chuah i a rak hnamh lengmang hna. ⁶ Cuticun Absalom nih siangpahrang sin i biaceih awk i a rami Israel mi vialte hna cungah khan a tuah. Cucaah Absalom nih Israel mi kha an lung a fir hna. ⁷ Cun kum li donghnak ah khan Absalom nih siangpahrang cu a thawh i, "Hebron khua i Bawipa sinah biahrennak ka rak tuahmi kha va tlinter awkah, zaangfahnak tein ka kalter tuah. ⁸ Zeitintiah na sal nih Aram ram Geshur i ka um lioah biahrennak pakhat ka rak tuah i, ’Bawipa nih Jerusalem ah a ka kirpi taktak ahcun, Bawipa sinah biaknak ka pekchanh lai,’ tiah ka rak ti," tiah a ti. ⁹ Siangpahrang nih cun, "Dai tein va kal tuah," tiah a ti. Cucaah a tho i Hebron ah a kal. ¹⁰ Sihmanhsehlaw Absalom nih Israel mi phun vialte hna sinah khan a thli tein lamkal a thlah hna i, "Muko thawng kha nan theih cangka, ’Absalom cu Hebron ah siangpahrang a si!’ tiah nan ti lai," tiah a ti hna. ¹¹ Absalom sinah khan sawmmi mi za hnih Jerusalem khua khan an kal ve, zei thuanghna loin an va kal ve ko i zeihmanh an hngal lo. ¹² Cun Absalom nih raithawinak kha a pekchanh lioah David tlangchuak, Gilon mi Ahithophel kha amah khua Giloh khan a hei cah. Cun ralthli khua an khan ṭinak cu a ṭhawng chin lengmang i Absalom mi cu an karh chin lengmang. ¹³ Cun lamkaltu pakhat David sinah khan a ra i, "Israel mi cu Absalom leiah an lungthin a tlu cang," tiah a ti. ¹⁴ Cun David nih Jerusalem ah a sin i a ummi vialte hna kha, "Tho u law, zam u si; Absalom sin hin kan caah luatnak um loin a um sual lai; khulrang in kal u, cu ti a si lo ahcun a kan phanh sual lai i kan cungah ṭhat lonak a tlunter sual lai i khuapi hi vainam in a sam dih sual lai," tiah a ti. ¹⁵ Cun siangpahrang sinum hna nih khan siangpahrang cu, "Zohhmanh, na sal hna hi siangpahrang kan bawipa nih tuah awk tiin bia a khiahmi paoh tuah dingah kan i manh ko," tiah an ti. ¹⁶ Cucaah siangpahrang cu aa thawh i a innchungkhar vialte nih an zulh. Cun siangpahrang nih nuchun pahra inn zohkhenhtu ah a chiahtak hna. ¹⁷ Cun siangpahrang cu a kal i mi vialte nih khan an zulh; cun inn hriang bik ah khan an i din. ¹⁸ Cun a sinum vialte kha a pawng cun an lan; cun Khereth mi vialte le Peleth mi vialte le Gath khua in amah a zulmi Git mi za ruk vialte kha siangpahrang hmaiah cun an lan. ¹⁹ Cun Git mi Ittai kha siangpahrang nih a thawh i, "Zeicahdah nang zong ka sin i na kal ve? Va kir law siangpahrang sinah cun va um tuah; zeitintiah nang cu ramdangmi na si i na inn in a zammi na si fawn. ²⁰ Nizan lawng i a rami na si i ka vahvaihnak kip ah maw kan vahpi hnga, khuazei ah ka kal lai ti awk hmanh ka hngalh ṭung lo? Va kir ṭhan law na unaule hna hi nangmah sinah kirpi hna; Bawipa nih a fekmi dawtnak le zumhawktlak a sinak cu in hmuhsak ko seh," tiah a ti. ²¹ Sihmanhsehlaw Ittai nih siangpahrang cu a leh i, "Bawipa nih a nun bangin le siangpahrang ka bawipa nih a nun bangin, siangpahrang ka bawipa a umnak hmun paoh ah, thih siseh nun siseh, khika ah na salpa cu ka um ve lai," tiah a ti. ²² Cun David nih Ittai cu, "A si ahcun, kal law lan ko kun," tiah a ti. Cucaah Git mi Ittai cu a mi vialte le amah sin i a ummi ngakchia vialte hna he khan an lan. ²³ Cun mi vialte an lanh cuahmah caah ram vialte cu fak piin a ṭap, siangpahrang nih Kidron tivarek kha a tan i mi vialte cu ramlak leiah khan an lan. ²⁴ Cun Abiathar kha a hung i, zohhmanh, Zadok zong kha Levi mi vialte he Pathian biakamnak kuang kha i zawn in an ra ve; cun mi kha khua chungin an chuah dih hlantiang Pathian kuang kha vawlei ah khan an chiah ko. ²⁵ Cun siangpahrang nih Zadok cu a thawh i, "Pathian kuang kha khua chungah va kirpi ṭhan tuah. Bawipa hmaiah mithmai ṭha ka hmuh ahcun, a ka kirpi ṭhan lai i mah hi he, a umnak he a ka hmuhter ṭhan lai; ²⁶ sihmanhsehlaw, ’Nangmah chungah lawmhnak ka ngei lo,’ a ka ti ahcun, zohhmanh, hika ah ka um ko, amah nih a ṭha a timi paoh cu ka cungah tuah ko seh," tiah a ti. ²⁷ Siangpahrang nih tlangbawi Zadok sinah cun, "Zohhmanh, dai tein khua chungah cun, nangmah le Abiathar cu, nan fapa pahnih hna, Ahimaaz, nangmah fapa le Jonathan, Abiathar fapa he tiah, va kir tuah u. ²⁸ Zohhmanh, ramlak i tiva tannak ah khan keimah thanh awkah nan sinin bia ka hmuh hlantiang ka rak um lai," tiah a ti. ²⁹ Cucaah Zadok le Abiathar nih Pathian kuang kha Jerusalem ah an hei kalpi ṭhan i khika ah khan an um. ³⁰ Sihmanhsehlaw David cu Oliv Tlang cho ah khan ṭappah lengmang le kelawng le a lu i khuh in a kai; cun a sin i a ummi vialte nih khan an lu an i khuh i an kai, an kalpah cun an ṭap lengmang. ³¹ Cun David cu, "Ahithophel kha ralthli khua a khangtu hna lakah Absalom sinah aa tel ve," tiah an chimh. Cun David nih, "Maw Bawipa, Ahithophel khuaruah thiamnak cu hruhnak ah canter ko sawh, tiah kan nawl," tiah a ti. ³² Cun David cu tlangpar i Pathian biaknak hmun kha a phak tikah, zohhmanh, Arki mi Hushai kha a angkileng tlek le a lu ah vawlei i phulh in amah ton awkah khan a ra. ³³ David nih amah cu a thawh i, "Ka sinah na kal lengmang ve a si ahcun, keimah caah thilrit na si lai. ³⁴ Sihmanhsehlaw khua chungah na va kir i Absalom cu, ’Maw siangpahrang, na sal ka si ko lai; kan hnulei caan ah na pa sal ka si bantuk khan atu cu nangmah sal ka si lai,’ na va ti ahcun, Ahithophel khuakhannak kha na ka teipiak lai. ³⁵ Tlangbawi Zadok le Abiathar hna kha khika ah na sinah an um a si lo mei? Cucaah siangpahrang inn ah na theihmi vialte cu tlangbawi Zadok le Abiathar hna kha chim hna. ³⁶ Zohhmanh, an fapa pahnih hna kha an sinah khika ah an um, Zadok fapa Ahimaaz le Abiathar fapa Jonathan hna kha; cun na theihmi vialte cu anmah sinin na hun ka thanh lai," tiah a ti. ³⁷ Cucaah Absalom kha Jerusalem a luh liote ah cun David hawi Hushai cu khua chungah cun a lut.

¹ Cun David cu tlangpar kha tlawmte a hei lonh ah khin Mefibosheth sinum Ziba nih khan, kengdan aa danh i changreu tlang za hnih, mitsur car bor za khat, ṭhal thingthei za khat le mitsur hang cua khat a phormi laa pahnih he a rak don. ² Cun siangpahrang nih Ziba cu a thawh i, "Zeicahdah mah hihi na rak phorh hna?" tiah a ti. Ziba nih cun a leh i, "Laa hi siangpahrang innchungkhar cit awkah an si; changreu le ṭhal thingthei hi tlangval hna ei awk caah an si i mitsur hang hi ramlak i a bami hna caah a si," tiah a ti. ³ Cun siangpahrang nih cun a thawh i, "Na bawipa fapa kha tah khuazei ah dah a si?" tiah a ti. Ziba nih siangpahrang sinah cun, "Zohhmanh, Jerusalem ah a um ko, zeicahtiah, "Nihin ah hin Israel chung hna nih ka pa pennak kha an ka pek ṭhan lai,’ a ti," tiah a ti. ⁴ Cun siangpahrang nih Ziba cu a thawh i, "Zohhmanh, Mefibosheth ta a simi vialte cu nangmah ta an si cang," tiah a ti. Cun Ziba nih, "Upatnak kan pek; na mithmuh ah, siangpahrang ka bawipa, mithmai ṭha hmu ko ning," tiah a ti. ⁵ David Siangpahrang cu Bahurim ah a phak tikah, Saul chung a simi innchungkhar chungin mipa pakhat a ra chuak i a min cu Shimei a si, amah cu Gera fapa a si; a chuah pah cun chiat a serh lengmang. ⁶ Cun David le David Siangpahrang sinum vialte kha lung in a cheh hna; mi vialte le miṭhawng vialte cu a orhlei le a kehlei ah khan an um. ⁷ Cun chiat a serh pah cun Shimei nih khan, "Va lo ko, va lo ko, nang thisen chuah hmangpa, nang zei ṭhahnem lopa! ⁸ A pennak na chuhmi Saul innchungkhar thisen vialte cu Bawipa nih nangmah cungah a kirter ṭhan cang; cun Bawipa nih pennak cu na fapa Absalom kut chungah a pek cang. Zohhmanh, nangmah cu thisen chuah hmangmipa na si caah na rawhnak cu na cungah a tlung cang," tiah a ti. ⁹ Khi tikah Zeruiah fapa Abishai nih siangpahrang sinah cun, "Zeicahdah hi uico thi cia nih hin siangpahrang ka bawipa cu chiat a serh len ko hnga? Va kal ning law a lu khi va chok tuah ning," tiah a ti. ¹⁰ Sihmanhsehlaw siangpahrang nih cun a thawh i, "Nannih Zeruiah fapa hna, nannih nan i thlaknak zeidah a um? Bawipa nih amah cu, ’David kha chiat va serh,’ tiah a ti i chiat a ka serh a si ahcun, ’Zeicahdah mah cuticun na ti?’ tiah aho nih dah a ti khawh lai?" tiah a ti. ¹¹ Cun David nih Abishai le a sinum vialte cu, "Zohhmanh u, keimah ka fapa hrimhrim nih ka nunnak kha a ka kawl; cucaah hi Benjamin mi nih hin cun zeitluk tam in dah a ka kawl chinchin lai! Zei ti hmanh in ti hlah u, chiat cu ka serh ko seh; zeitintiah Bawipa nih pei a fial lai tiah. ¹² Bawipa nih ka retheihnak hi a ka hmuhpiak hnga i nihin i chiat a ka serhmi ruangah hin ṭhatnak in a hei ka lehrulh ko hnga dahkaw," tiah a ti. ¹³ Cucaah David le a mi hna cu lam ah cun an kal ko i Shimei nih cun an ral tlangpang in a kalhnawh hna i a kal pah cun chiat a serh lengmang i lung hawi hna in a cheh i leidip hawi hna a vorh hna. ¹⁴ Cun siangpahrang le a sinah a ummi vialte cu baa cikcek in Jordan kha an phan i khika ah khan aa hrim. ¹⁵ Cun Absalom le mi vialte, Israel mi hna kha, Jerusalem ah an ra i Ahithophel kha a sinah cun a um. ¹⁶ Cun Arki mi Hushai, David hawi kha Absalom sinah a rat tikah, Hushai nih Absalom cu, "Siangpahrang cu saupi nung ko seh! Siangpahrang cu saupi nung ko seh," tiah a ti. ¹⁷ Cun Absalom nih Hushai cu, "Mah hihi maw na hawi cung i zumhtlak na sinak cu a si? Zeicahdah na hawi sinah cun na kal lo?" tiah a ti. ¹⁸ Cun Hushai nih siangpahrang cu, "Asilo, zeitintiah Bawipa le hi mi hna le Israel mi vialte nih an thimmi, cu pa ta cu ka si lai i amah sinah cun ka um ko lai. ¹⁹ Cun ahodah a rian ka ṭuan hlei ti lai? A fapa cu a si hnga lo maw? Na pa cu a rian ka rak ṭuan bantuk khan nangmah zong na rian kan ṭuanpiak lai," tiah a ti. ²⁰ Cun Absalom nih Ahithophel cu a thawh i, "Na ruahnak chim tuah, zeidah kan tuah lai?" tiah a ti. ²¹ Ahithophel nih Absalom cu, "Innhngaktu ah a chiahmi na pa nupichun kha va luhhnawh hna; cun Israel mi vialte nih na pa caah rim chia ah naa ser cang ti kha an theih lai i nangmah sinah a ṭangmi vialte hna kut cu a ṭhawng lai," tiah a ti. ²² Cucaah inn cungah Absalom cu thlam an sakpiak i Israel mi vialte hmuh ah Absalom nih cun a pa nupichun kha a luhhnawh hna. ²³ Cu caan ah cun Ahithophel nih ruahnak a chuahmi cu Pathian sin i hmuhmi bia tluk ah khin rel a si; cuticun Ahithophel ruahnak vialte cu David nih siseh Absalom nih siseh an upat.

¹ Cuhleiah Ahithophel nih Absalom cu a thawh i, "Mi thong hleihnih in thim hna ning law, tuzan ah hin kaa thawh lai i David kha ka dawi lai. ² Amah cu a bat lio le a lung a dongh lioah ka hei phanh lai i a lau ciammam lai i amah sin i a ummi vialte kha an zam dih lai. Siangpahrang lawnglawng kha ka va thah lai i ³ a va sinah mo nih a rat bang khin nangmah sinah mi vialte cu ka ratpi ṭhan hna lai. Mi pakhat lawnglawng thah awk kha na kawl i mi vialte cu dai tein an um lai," tiah a ti. ⁴ Cun cu ruahnak a cheuhmi nih cun Absalom le Israel mi upa vialte cu a lawmhter hna. ⁵ Cun Absalom nih, "Arki mi Hushai zong kha hei au u law, zeidah chim awk a ngeih, thei ve u si," tiah a ti. ⁶ Cun Hushai cu Absalom sinah a rat tikah, Absalom nih cun a thawh i, "Hi bangin Ahithophel nih a chim cang; lungthin a kan cheuh bantukin kan tuah lai maw? A si lo ahcun, nang chim ve tuah," tiah a ti. ⁷ Cun Hushai nih Absalom sinah cun, "Ahithophel ruahnak chuahmi, tutan i hi cu a ṭha lo," tiah a ti. ⁸ Cuhleiah Hushai nih cun, "Na pa le a mi hna cu miṭhawng an si le lolak i a fa lakpiakmi vom bantukin an thin a linh kha na hngalh. Cuhleiah na pa cu ral leiah a thiam ngaingaimi a si; mi hna sinah zan ah a riak lai lo. ⁹ Zohhmanh, atu hmanh ah hin khor pakhatkhat ah maw, hmun dang pakhatkhat ah dik, aa thup diam cang lai. Cun i tuk hmasa ter bik ah tlawmpal an thih tikah, a theimi paoh nih khan, ’Absalom a zulmi hna cu heh tiah an thah len hna,’ an ti lai. ¹⁰ Khi tikah mi ralṭha, a lung chiandeih lung bantuk a simi hmanh kha, ṭihnak in a dor sual ko hnga; zeitintiah Israel mi vialte nih khan na pa cu miṭhawng a si i a sin i a ummi hna cu mi ralṭha an si kha an hngalh dih. ¹¹ Cucaah kei ka ruahnak cheuhmi cu hitin a si: Israel mi vialte cu Dan in Beersheba tiang nangmah sinah kan pumh hna lai, an tam ning rilikam thetse zat in, cun nangmah zong na pum in raldohnak hmun ah cun na kal ve lai. ¹² Hmuh khawh a sinak hmun khuazei maw ah khan kan chuahhnawh lai i vawlei cu dap nih a tlakhnawh bantuk khin amah cu kan tlakhnawh lai; cun amah siseh, amah sin i a ummi si hna seh, pakhat hmanh an tang lai lo. ¹³ Cun khua chung i a luh a si ahcun, Israel mi vialte nih cu khua ah cun hri an rak put ciammam lai i cu khua i lung tekep pakhat hmanh a tan ti lo tiangin cu khua cu horkuang chungah kan rawt lai," tiah a ti. ¹⁴ Cun Absalom le Israel mi vialte nih cun, "Hushai ruahnak cheuhmi cu Ahithophel ruahnak cheuhmi nakin a ṭha deuh," tiah an ti. Zeitintiah Bawipa nih Absalom cungah ṭhat lonak a tlunter nakhnga, Bawipa nih Ahithophel cheuhmi ruahnak ṭha cu sunghter awkah a rak ruah cia cang. ¹⁵ Khi tikah Hushai nih Zadok le Abiathar, tlangbawi hna kha, a thawh hna i, "Cu bantuk kha bantukin Ahithophel nih Absalom le Israel upa hna kha ruahnak a cheuh hna i cu bantuk kha bantukin kei nih ruahnak ka cheuh hna. ¹⁶ Cucaah khulrang in mi hei thlah hna u law David cu, ’Tuzan ah ramlak i ti tannak hmun ah khan rak riak hlah, zeiti a si hmanh ah na rak lan lai; cu ti a si lo ahcun siangpahrang le a sin i a ummi vialte cu dolh nan si sual lai,’ tiah va chim u," tiah a ti hna. ¹⁷ Cun Jonathan le Ahimaaz kha Enrogel ah khan an rak um; salnu pakhat hi a va kal tawn i a va chimh tawn hna i annih nih an va kal i David Siangpahrang kha an va chimh chin tawn; zeitintiah khua chung i an luh kha ahohmanh nih hmuh lo ding a si. ¹⁸ Sihmanhsehlaw tlangval pakhat nih a hmuh hna i Absalom kha a va chimh; cucaah an pahnih in khulrang in an kal i Bahurim i mipa pakhat inn ah khan an va phan i cu pa nih cun a inntual ah tikhor pakhat a rak ngei i cu chungah cun an vung lut. ¹⁹ Cun nu nih khan tikhor kaa cu a chin a chinh i a cungah rawl a pho i kha kong kha ahohmanh nih an hngal lo. ²⁰ Absalom sinum hna kha inn i minu sinah khan an rat tikah, annih nih, "Ahimaaz le Jonathan kha khuazei ah dah an si?" tiah an ti. Cun nu nih cun annih cu, "Tivarek kha an tan," a ti hna. Mi hna nih cun an kawl len hna, an hmuh hna lo tikah khan Jerusalem khua ah an kir ṭhan. ²¹ An kal dih hnuah tikhor chung khan Ahimaaz le Jonathan cu an hung chuak i an kal i Siangpahrang David kha an va chimh. Annih nih David cu, "Tho law, tiral ah khulrang in kal tuah; zeitintiah cu bantuk kha bantukin nangmah ralchanh in Ahithophel nih ruahnak a chuah," tiah an ti. ²² David le a sin i a ummi vialte cu an tho i Jordan kha an tan; fingrei a hung cah ah khin cun Jordan tan loin pakhat hmanh a tangmi an um ti lo. ²³ Ahithophel nih a ruahnak chuahmi kha an zul lo ti a hmuh tikah, a laa kha a danh i inn leiah a khua ah a tlung. Cun a innchungkhar khuasak ding ning kha a ningcang tein a tuahpiak tak hna i amah le amah cu aa awk; cun a thi i a pa thlan ah khan an vui. ²⁴ Cun David cu Mahanaim a phan. Cun Absalom nih Israel mi vialte he Jordan tiva kha an tan. ²⁵ Cun Absalom nih Joab hmun ah khan Amasa kha ralkapbu haotu ah a chiah. Amasa cu Ishmael mi a min Ithra a simi fapa a si; Ithra nih cun Abigail kha a ṭhit; Abigail cu Joab nu Zeruiah i a unau Nahash fanu kha a si. ²⁶ Cun Israel mi le Absalom cu Gilead ram chungah khan an riak. ²⁷ Cun David cu Mahanaim a phak tikah khan Ammon mi hna ram i a ummi Rabbah khuami Nahash fapa Shobi le Lodebar i a ummi Ammiel fapa Makhir le Rogelim i a ummi Gilead mi Barzillai nih khan, ²⁸ ihkhun hna le hmaihum hna le tlak um hna le, changvut, barli, rawl, vaireu, be, pe, ²⁹ khuaihliti le cawhnuk khal le tuu hna le cawrun chungin hmuhmi cawhnuk kham, David le a sin i a ummi hna ei awkah khan an rak put hna; zeitintiah annih nih, "Mi cu ramlak ah an rawl a ṭam; an ba i an ti a hal ko," tiah an ti.

¹ Cun David nih a sin i a ummi kha a pumh hna i an cungah a thong pawl haotu le a za pawl haotu kha a chiah hna. ² Cun David nih ralkapbu cu a thlah hna, cheu thum cheu khat cu Joab nih a hrui hna, cun cheu thum cheu khat nolh cu Zeruiah fapa Joab unau Abishai nih khan a hrui hna i a dang cheu thum cheu khat cu Git mi Ittai nih khan a hrui hna. Cun siangpahrang nih mi cu a thawh hna i, "Keimah hrimhrim zong nan sinah ka kal ve lai," tiah a ti. ³ Sihmanhsehlaw mi nih cun an thawh i, "Na kal hnga lo, zeicahtiah kannih cu kan zam a si zongah an zei a poi lai lo. Hnarcheu kan thih zongah an zei a poi hlei lai lo. Sihmanhsehlaw nang cu kanmah thong hra tluk na si; cucaah khua chungin bawmhnak na kan pek ahcun a ṭha deuh lai," tiah an ti. ⁴ Siangpahrang nih annih cu a thawh hna i, "Nannih nih a ṭha bik nan timi paoh cu ka tuah lai," tiah a ti. Cucaah siangpahrang cu hauka kamah khan a dir i ralkapbu hna cu a zaza le a thongthong in an lan duahmah. ⁵ Cun siangpahrang nih Joab le Abishai le Ittai cu, "Keimah ruangah tlangvalpa Absalom cu nem tein va ti u," tiin nawl a pek hna. Cun siangpahrang nih Absalom kong i nawl a pekmi hna kha, ralbawi vialte nih an rak theih ve. ⁶ Cucaah David ralkapbu cu Israel mi he i doh awkah khan ram chungah cun an va lut; an i dohnak hmun cu Efraim tupi chungah a si. ⁷ Israel mi cu David sinum hna nih khan an tei hna i cu ni i an i thahnak cu a ngan ko, mi sang hnih an thi. ⁸ Raldohnak nih cun ram cu a pumpuluk in a huh dih i vainam nakin cu ni ah cun tupi nih khan tam deuh a thah hna. ⁹ Cun Absalom nih David sinum kha a ton dut sual hna ai. Absalom cu a laa kha aa cit i laa cu a nge a tam ngaimi kuhthing toi in a kal i kuhthing ah cun a lu cu fek ṭhup in a taap i van le vawlei karah aa thlai i a laa cu a lan. ¹⁰ Cun mipa pakhat nih a hmuh i Joab kha a chimh i, "Zohhmanh, Absalom cu kuhthing kung ah aa thlai ko," tiah a ti. ¹¹ Cun Joab nih a chimtupa cu, "Zei ee, na hmuh tak maw! A si kun ahcun zeicahdah vawlei ah tla lakin khika ah cun na tuk lo? Ngun phar hra le taisawm pakhat ka hei in pek hnga dah kaw," tiah a ti. ¹² Sihmanhsehlaw mipa nih cun Joab kha a thawh i, "Tangka thong khat hmanh ka kut ah humh si ning law, siangpahrang fapa cungah cun ka kut ka samh bal hnga lo; zeitintiah ka theih hngan ah pei siangpahrang nih nangmah le Abishai le Ittai kha, ’Tlangvalpa Absalom cu keimah ruangah va huppheng tuah u,’ an ti hna kha. ¹³ Cun cuhleiah, hrokhrawl in amah kha rak that ko ning law, (siangpahrang sin cun zeihmanh aa thupmi a um ṭung lo i), khi tikah nang cu aa tel lo te bangin na um ṭung hnga," tiah a ti. ¹⁴ Joab nih, "Nangmah he hi bantukin caan cu pakpalawng ah ka hmang lai lo," tiah a ti. Cun a kut in cantiang pathum aa put i kuhthing kung i a nung in a rak um komi Absalom lung ah khan a hei hlinh hna. ¹⁵ Cun Joab ralthuam putu tlangval pahra nih khan Absalom cu an kulh i an tuk i an thah. ¹⁶ Khi tikah Joab nih muko kha a tum i Israel mi a dawitu hna ralkap kha an ra kir; zeicahtiah Joab nih a thlauh hna. ¹⁷ Cun Absalom kha an lak i tupi chung i khor nganpi pakhat ah an thlak i a cungah cun lungpumh nganpi pakhat an pumh; cun Israel mi vialte cu anmah le an inn cio ah khan an zam dih. ¹⁸ Cun Absalom nih khan a nun lioah Siangpahrang Nelrawn ah khan lungphun pakhat a rak i ser i, "Ka min hngalh camcin a si nakhnga caah fapa ka ngei lo," a ti i cucaah cu lungphun cu amah min a rak i sak i nihin ni tiang hin mah cucu Absalom Lungphun, tiah ti a si. ¹⁹ Cun Zadok fapa Ahimaaz nih khan, "Va tli ning law, Bawipa nih na ral hna ṭhawnnak chungin an chuah cang, tiin siangpahrang cu thawng ka va thanh lai," tiah a ti. ²⁰ Cun Joab nih amah cu a thawh i, "Nihin ah cun thawng cu na va thanh hnga lo; ni dang ah na va thanh te ko lai, nihin ah cun thawng zeihmanh na thanh lai lo, zeicahtiah siangpahrang fapa pei a thi cu," tiah a ti. ²¹ Cun Joab nih Kush mi kha, "Va kal law siangpahrang cu na hmuhmi hi va chim," tiah a ti. Kush mi cu Joab hmaiah cun a kun i a tli. ²² Cun Zadok fapa Ahimaaz nih khan Joab cu, "Zeihmanh si ai kun, Kush mi hnu khin va tli ve ko ning," tiah a ti. Cun Joab nih a thawh i, "Zeicah hen na tlik lai, ka fapa? Cu thawng na va thanhmi caah cun laksawng zeihmanh na hmuh ṭung lai lo," tiah a ti. ²³ Anih nih, "Zeihmanh si ai kun, ka tli ko lai," tiah a ti. Cucaah, "Tli," tiah amah cu a ti. Cun Ahimaaz cu Nelrawn lei lam khan a tli i Kush mi kha a chawhkanh. ²⁴ Cun David cu chunglei kutka le lenglei kutka hna karlak ah khan a ṭhu i vampang pawng i a ummi kutka inncung ah khan ralvengtu kha a hung kai i khua a hei cuanh i a hei zoh tikah, mipa pakhat amah lawng in a ra tlik kha a hmuh. ²⁵ Cun ralvengtu cu a au i siangpahrang kha a hei chimh. Cun siangpahrang nih, "Amah lawngte a si ahcun, a kaa chungah thawngpang a um a si," tiah a ti. Cun khulrang in a ra i a ra nai deuh. ²⁶ Cun ralvengtu nih khan a dang pakhat a ra tlimi kha a hmuh; cun ralveng nih khan kutka ah cun a hei auh i, "Zohhmanh, a dang pakhat, amah lawng tein a tlimi a um!" tiah a ti. Siangpahrang nih, "Amah zong nih thawngpang a rak phorh ve," tiah a ti. ²⁷ Cun ralvengtu nih cun, "A hmasa bik a tlikning khi Zadok fapa Ahimaaz tlikning he aa lo tiah ka ruah," tiah a ti. Cun siangpahrang nih, "Amah cu miṭha a si i thawngpang ṭha he a ra lai," tiah a ti. ²⁸ Cun Ahimaaz nih siangpahrang cu a hei auh i, "A ṭha dih ko," tiah a ti. Cun siangpahrang hmaiah cun vawlei lei hoih in a lu a khun i, "Siangpahrang ka bawipa doh awkah a thomi vialte a sunghtertu hna Bawipa na Pathian cu thangṭhat si ko seh," tiah a ti. ²⁹ Cun siangpahrang nih cun, "Tlangval Absalom cu a dam maw?" tiah a ti. Ahimaaz nih, "Joab nih na sal hi a ka thlah lioah cun thil aa tuai ur ko kha ka hmuh i sihmanhsehlaw zei a si cu ka hngal lo," tiah a ti. ³⁰ Cun siangpahrang nih, "Ka sirah hin rak dir rih tuah," tiah a ti. Cun a sirah cun a dir. ³¹ Cun zohhmanh, Kush mi kha a ra phan i Kush mi nih cun, "Siangpahrang ka bawipa caah thawng ṭha! Zeitintiah nihin ah Bawipa nih nangmah doh awkah a thomi vialte hna ṭhawnnak chung khan nangmah cu an luatter cang," tiah a ti. ³² Siangpahrang nih Kush mipa cu, "Tlangval Absalom cu a dam maw?" tiah a ti. Cun Kush mipa nih khan, "Siangpahrang ka bawipa i a ral hna le ṭhat lonak tuah awk i nangmah an thawhhnawhtu vialte hna cu, kha tlangvalpa bantuk kha si ko hna seh," tiah a ti. ³³ Cun siangpahrang cu a lung a suk i kutka cung dal ah khan a hung kal i a ṭap; cun a kal pah cun, "Maw ka fapa Absalom, ka fapa, ka fapa Absalom! Nangmah can ah khan keimah hi va thi deuh ning law mu, maw Absalom ka fapa, ka fapa," tiah a ti.

¹ Joab cu, "Zohhmanh, siangpahrang kha a ṭap lengmang i Absalom zun kha a ngai ko," tiah an chimh. ² Cucaah cu ni i teinak cu mithi ngaihnak ah mi vialte caah a cang, zeitintiah mizapi nih cun, "Siangpahrang nih a fapa kha a ṭah lengmang ko," tiah an theih. ³ Cun raltuknak hmun in an zam tikah an ning a zak i a thli tein khua chungah an luh bantuk khin, cu ni ah cun mizapi cu a thli tein khua chungah cun an lut. ⁴ Siangpahrang cu a hmai aa khuh i siangpahrang cu aw thang piin, "Maw ka fapa Absalom, maw Absalom, ka fapa, ka fapa!" tiah a ai. ⁵ Khi tikah Joab cu inn chungah siangpahrang sinah khan a lut i, "Nihin ah hin nangmah nih, nihin i nangmah na nunnak le na fapa hna le an fanu hna an nunnak le na nupi hna le na nuchun hna an nunnak a khamhtu hna na sinum vialte hna hmai cu ningzahnak in na khuh cang; ⁶ zeicahtiah nangmah nih nangmah an huatu cu na dawt hna i an dawtu cu na huat hna. Zeitintiah nihin ah hin na ralbawi hna le an sinum hna cu na caah zeihmanh an si lo ti kha fiang tein na langhter cang; zeicahtiah nihin ah hin Absalom kha nung seh law kannih vialte hi thi dih u si law, cu nih cun an lawmhter deuh hnga, tiah nihin ah hin ka hmuh. ⁷ Cucaah atu ah tho law, na sinum hna sinah khan nem tein va chim tuah; zeitintiah Bawipa min chalh in chiat ka ser, na kal lo ahcun, mi pakhat hmanh tuzan ah hin na sinah an um lai lo; cun na tlanval ri in atu tiangah an tlunhnawhtu ṭhat lonak vialte nakkhan mah hihi na caah a ṭha lo deuh lai," tiah a ti. ⁸ Khi tikah siangpahrang cu a tho i kutka ah khan a ṭhu. Cun mi vialte kha an chimh hna i, "Zohhmanh, siangpahrang cu kutka ah khan a ṭhu," tiah an ti; mi vialte cu siangpahrang hmaiah khan an ra. Israel mi vialte kha cu, anmah le an inn cio ah an zam dih cang. ⁹ Israel phun an dihlak chungah khan mi vialte, pakhat le pakhat i alnak a um i, "Siangpahrang nih khan kan ral hna kut chungin a rak kan chuah i, Filistin mi hna kut chungin a rak kan khamh; atu cu Absalom sinin ram chungin a zam cang. ¹⁰ Sihmanhsehlaw kanmah uktu ding i chiti kan thuhmi Absalom cu raltuknak hmun ah a thi cang. Cucaah zeicahdah siangpahrang kirpi ṭhannak ding kongah hin zeihmanh nan chim lo," tiah an i ti. ¹¹ Cun David Siangpahrang nih Zadok le Abiathar, tlangbawi hna kha, mah hi bia hi a hei cah hna i, "Judah upa hna cu, ’Israel mi vialte an bia cu siangpahrang sin a phak cang tikah hin, zeicahdah nannih cu siangpahrang kha a inn i kirpi ṭhan awkah a hmanung bik nan si lai?" a ti tiah rak chim hna u. ¹² Nannih cu ka unau nan si, ka ruh le ka sa nan si; a si kun ahcun, zeicahdah siangpahrang kirpi ṭhan awkah a hmanung bik nan si lai,’ a ti, tiah rak chim hna u. ¹³ Cun Amasa kha, ’Nangmah cu ka ruh le ka sa na si lo maw? Nangmah cu Joab hmun ah ka ralkapbu haotu na si lo ahcun, Pathian nih cu bangin le cu nak tam zongin ka cungah tuah ko seh,’ a ti, tiah rak chim u," tiah a ti. ¹⁴ Cun Judah mi vialte kha minung pakhat lungthin bantukin an lungthin kha a lak dih hna i cucaah annih nih siangpahrang cu bia an hei cah i, "Nangmah he na sinum vialte he ra kir dih u," tiah an ti. ¹⁵ Cucaah siangpahrang cu Jordan ah khan a ra kir i siangpahrang cu va don awk le siangpahrang cu Jordan tiva tanpi awkah Judah mi cu Gilgal ah an kal. ¹⁶ Cun Benjamin phun Gera fapa Shimei, Bahurim khuami kha, David Siangpahrang don awkah cun khulrang in Judah mi hna sinah khan a ra ve; ¹⁷ cun amah sinah cun Benjamin mi thong khat an um. Cun Saul innchungkhar sinum Ziba kha a fapa hleinga le a sinum pakul he tiah, siangpahrang hmaiah khan Jordan tiva ah cun an rung tli, ¹⁸ cun siangpahrang innchungkhar kha lak awk le a duhnak kha tuah awkah tiva kha a tannak ah khan an tan. Cun Gera fapa Shimei cu siangpahrang hmaiah khan, Jordan tiva kha a vun tan hnik lioah khin, a bawk i ¹⁹ siangpahrang sinah cun, "Siangpahrang ka bawipa nih Jerusalem in na chuah ni i na cungah na sal nih zeitindah palhnak ka tuah kha ka bawipa nih ka cungah mawhnak ah ka ruahpiak hlah law a cin zong ka cinkenpiak sawh hlah; siangpahrang nih a lung chungah i chiah sawh hlah seh, ²⁰ zeitintiah ka sual cang ti kha na sal nih ka hngalh; cucaah zohhmanh, Josef innchungkhar vialte hna lakah a hmasa bik ah rat i siangpahrang ka bawipa cu don awkah nihin ah ka ra," tiah a ti. ²¹ Zeruiah fapa Abishai nih khan, "Bawipa chiti thuhmi kha chiat a rak serh caah, mah caah khan Shimei hi thah awk a si lo maw?" tiah a leh. ²² Sihmanhsehlaw David nih, "Nannih Zeruiah fapa hna, nannih nan i thlak awk zeidah a um, nihin i keimah caah ral bantuk nan si hnga cu? Nihin ah hin Israel mi ahohmanh thah awk a si hnga maw? Zeitintiah nihin ah hin Israel mi cungah siangpahrang ka si kha hngal loin maw ka um?" tiah a ti. ²³ Cun siangpahrang nih Shimei cu, "Na thi lai lo," tiah a ti. Cun siangpahrang nih a sinah chiat a ser. ²⁴ Cun Saul tupa Mefibosheth kha siangpahrang don awkah a rung; siangpahrang a kal ni thawk in him tein a kir ṭhan ni tiang, a ke zong kha a milhtlorh hna lo, a khahmul zong kha a riam hna lo i a hnipuan zong kha a su hna lo. ²⁵ Cun siangpahrang don awk i Jerusalem in a rat ah khan, siangpahrang nih amah cu a thawh i, "Zeicahdah ka sinah na kal ve lo, Mefibosheth?" tiah a ti. ²⁶ Cun anih nih a leh i, "Maw siangpahrang ka bawipa, ka sinum nih a rak ka hlen; zeitintiah na sal nih amah cu, ’Laa pakhat in ka danhpiak tuah, kaa cit i siangpahrang sinah ka kal nakhnga,’ tiah ka ti. Zeitintiah na sal cu kebei ka si. ²⁷ Cun na sal cu siangpahrang sinah a ka thangchiat cang. Sihmanhsehlaw siangpahrang ka bawipa cu Pathian vancungmi bantuk a si ko; cucaah nangmah nih a ṭha na timi paoh tuah ko. ²⁸ Zeitintiah ka innchungkhar vialte cu siangpahrang ka bawipa hmaiah cun thah awk i khilmi men pei an hei si ko cu; asinain nangmah nih na salpa cu na cabuai i rawl a eimi hna lakah na ka chiah. Cucaah siangpahrang sinin thil dang a hal ngam ding ka si ti hnga maw?" tiah a ti. ²⁹ Cun siangpahrang nih amah cu a thawh i, "Na konglam cu zeicahdah na chim ṭheo rih? Bia ka khiah cang; nangmah le Ziba nih ram cu nan i cheu lai," tiah a ti. ³⁰ Cun Mefibosheth nih siangpahrang cu a thawh i, "Siangpahrang ka bawipa cu a inn i him tein a rat cang hnu paohpaoh ahcun, amah nih a dihlak in i lak ko seh," tiah a ti. ³¹ Cun Gilead mi Barzillai kha Rogelim in a rung i Jordan tiva ral tiang hei thlah awkah khan siangpahrang sinah cun Jordan tiva tiang a va kal. ³² Barzillai cu upa ngaingai a si, kum sawm riat a si; cun siangpahrang cu Mahanaim i a um lioah khan rawl a rak pek; zeitintiah amah cu mirum ngaingai a si. ³³ Cun siangpahrang nih Barzillai cu a thawh i, "Keimah sinah ra law, Jerusalem khua ah kan cawm lai," tiah a ti. ³⁴ Sihmanhsehlaw Barzillai nih siangpahrang cu, "Kum zeizat hen dah nun awk kaa bat rih i siangpahrang sinah Jerusalem ah ka hei kal hnga cu? ³⁵ Keimah cu nihin ah hin kum sawm riat ka si; zei hi dah a nuam i zei hi dah a nuam lo ti kha ka thleidan khawh ti maw? Na sal nih hin ka eimi siseh, ka dinmi siseh, a thawtnam hmanh ka theih khawh ti maw? Hlasami pa hna le hlasami nu hna an aw hoi hna kha ka ngaih khawh ti maw? Cu a si caah cun zeicahdah na sal cu siangpahrang ka bawipa caah aa chapmi thilrit ka si lai? ³⁶ Na sal nih hin siangpahrang cu Jordan tiva ral ah khin tlawm tein ka hei in kalpi rih lai. Zeicahdah siangpahrang nih cu bantuk laksawng cun a ka lehrulh hnga? ³⁷ Keimah ka khuate ah ka pa le ka nu hna thlan pawngah ka thih nakhnga, na sal hi ka kirter ko. Sihmanhsehlaw hika ah na sal Khimham a um hih; amah nih hin siangpahrang ka bawipa cu in zul seh law, nangmah nih a ṭha na timi paoh tuahpiak ko," tiah a ti. ³⁸ Cun siangpahrang nih a leh i, "Khimham cu keimah sinah a kal lai i nangmah nih a ṭha na timi paoh ka tuahpiak lai; cun keimah sinin hmuh na duhmi vialte kan tuahpiak lai," tiah a ti. ³⁹ Cun mi vialte nih khan Jordan cu an tan i siangpahrang nih khan a tan; cun siangpahrang nih Barzillai kha a hnamh i thluachuah a pek i amah a inn ah khan a kir. ⁴⁰ Siangpahrang cu Gilgal tiang a lan i Khimham cu amah sinah cun a kal; Judah mi vialte le Israel mi hnarcheu nih siangpahrang cu an kalpi. ⁴¹ Cun Israel mi vialte cu siangpahrang sinah khan an ra i siangpahrang cu an thawh i, "Zeicahdah kan unau Judah mi hna nih a fir in an in fir i siangpahrang le a innchungkhar hna le David mi vialte hna cu Jordan va ral ah an in chuahpi hna?" tiah an ti. ⁴² Judah mi vialte nih Israel mi cu an leh hna i, "Zeicah ti ahcun, siangpahrang cu aa naihmi kan rualchan a si caah a si. Zeicahdah nannih cu hi kong ah nan thin a hun? Siangpahrang nih maw rawl a kan rin? Asiloah, laksawng zeital a kan pe maw?" tiah an ti. ⁴³ Cun Israel mi nih Judah mi cu an leh hna i, "Siangpahrang chungah hin vo hra pei kan ngeih tiah, cun David chung zongah hin nanmah nakin tam deuh kan ngei. A si kun ahcun, zeicahdah nan kan zawmhtaih? Kan siangpahrang cu tlunpi ṭhan u si tiah a ti hmasa biktu cu kanmah kan si lo maw?" tiah an ti. Sihmanhsehlaw Judah mi hna bia cu Israel mi hna bia nakin a hrang deuh.

¹ Cun khika ah khan mizeiruaramlo pakhat, a min Sheba a simi, Benjamin miphun Bikhri fapa kha a rak um ngelcel i muko kha a tum i, "David chungah covo zeihmanh kan ngei lo, Jesse fapa chungah ro zeihmanh kan ngei lo; Maw Israel mi hna, nanmah le nan thlam cio ah kal dih u!" tiah a ti. ² Cucaah Israel mi vialte nih cun David zulh kha an ngol i Bikhri fapa Sheba kha an zulh; sihmanhsehlaw Judah mi hna nih khan cun an siangpahrang kha fek tein Jordan tiva in Jerusalem khua tiang an zulh. ³ Cun David cu Jerusalem khua i a inn kha a phan i inn rak zohkhenh awkah a chiahtakmi nuchun pahra hna kha a lak hna i cawnghmi inn pakhat ah a chiah hna i a cawm hna, sihmanhsehlaw a va luhhnawh hna lo. Cucaah annih cu cuka ah cun an khumh hna i nuhmei bantukin an thih ni tiang an um. ⁴ Cun siangpahrang nih Amasa kha a thawh i, "Ni thum chungah Judah mi kha ka sinah hmun khat ah ko hna law, nangmah zong um ve," tiah a ti. ⁵ Cucaah Amasa cu Judah mi hna kawh awkah khan a kal; sihmanhsehlaw a caan tukpiakmi nakkhan a va rau deuh. ⁶ Cun David nih Abishai kha a thawh i, "Bikhri fapa Sheba nih hin Absalom nakkhan harnak tam deuh a kan pek lai; na bawipa ka sinum hna hi i kalpi hna law va dawi, cu ti a si lo ahcun, kulhmi khua hawi hna ah a lut lai i harnak a kan pek sual lai," tiah a ti. ⁷ Cun Abishai cu Joab le Khereth mi hna le Peleth mi hna le miṭhawng vialte nih khan an zulh; Bikhri fapa Sheba dawi awkah cun Jerusalem in an i thawh. ⁸ Gibeon i a ummi lung nganpi kha an va phak tikah, annih don awkah Amasa kha a ra. Joab cu a ralthuam in aa thuam i a lengah cun a tai ah taisawm in nam pakhat a kawng in aa thlaih i hmailei i a kalpah ah cun a tla. ⁹ Cun Joab nih Amasa cu a thawh i, "Na dam maw ka nau?" tiah a ti. Cun Joab nih Amasa cu hnamh awkah a orhlei kut in a khahmul in a tlaih. ¹⁰ Sihmanhsehlaw Amasa nih Joab kut i nam kha a ngia lo; cucaah Joab nih nam cun a pum ah a sawh i voi hnih nolh ṭhan ti loin a ril cu vawlei ah a tla i a thi. Cun Joab le a nau Abishai nih khan Bikhri fapa Sheba kha an dawi. ¹¹ Cun Joab mi pakhat kha Amasa pawngah khan a dir i, "Joab lei a ṭangmi le David lei i a ṭangmi paoh, Joab zul u," tiah a ti. ¹² Cun Amasa cu lamkalai ah cun a thi ah khan aa bual ko. Cun a rami kip nih khan an hmuh tikah an dir; cun mipa nih khan mi vialte an dir kha a hmuh tikah Amasa cu lam khan ramlak ah a ṭhial i puan a khuh. ¹³ Lam in ṭhial a si hnuah cun, Bikhri fapa Sheba kha dawi awkah Joab kha mi vialte nih khan an zulh. ¹⁴ Cun Sheba cu Israel phun vialte hna sinah khan Beth-maakah i Abel tiangin aa chawk; cun Bikhri mi vialte cu an i pum i amah kha an zulh. ¹⁵ Cun Joab sin i a ummi vialte kha an ra i Beth-maakah i Abel khua ah cun amah cu an dum; khua pawngah cun vawlei kha an hun toih i a kulhnak hrap duahmah ah cun a tlun; cun annih nih khua kulhnak cu chimh awkah heh tiah an den. ¹⁶ Cun a fim minu pakhat nih khua chung cun, "Hei! hei! Joab kha, ’Hika ah hin ra law bia kan chimh lai,’ a ti tiah hei chim u," tiah a ti. ¹⁷ Cun a pawngah cun a va kal i minu nih cun, "Nangmah cu Joab na si maw?" tiah a ti. "Ka si," tiah a leh. Cun anih nih amah cu a thawh i, "Na salnu bia hi ngai tuah," tiah a ti. Cun anih nih a leh i, "Ka ngaih ko," tiah a ti. ¹⁸ Cun anih nih a thawh i, "Hlan lioah cun, ’Abel khua ah cun lungthin lawng i hal hna seh,’ tiah an rak ti tawn i cuticun bia kha an rak donghter tawn. ¹⁹ Keimah hi Israel mi hna lak i daihnak a duhmi le zumhawktlak a simi pakhat ka si ve; nannih nih Israel chung i nu can a simi khua kha hrawh nan i tim; zeicahdah Bawipa ro cu nan dolh lai," tiah a ti. ²⁰ Joab nih a leh i, "Cuticun a si hrimhrim lo, dolh ka tim lo i hrawh zong ka tim naisai lo! ²¹ Cu bantuk cu a si ṭung lo. Efraim tlangram mi pakhat a min Sheba a simi Bikhri fapa nih Siangpahrang David doh awkah a kut a hler i pei a si ko cu; amah cu kan pe u law, khua cu kan kaltak ko lai," tiah a ti. Cun minu nih khan Joab sinah cun, "Zohhmanh, a lu cu vampang in na sinah kan run thlak lai," tiah a ti. ²² Cun minu cu a fimnak in mi vialte sinah khan a kal. Cun Bikhri fapa Sheba kha a lu an tan i Joab sinah khan an hei hlonh. Cucaah muko kha a tum i khua khan an ṭiao dih, anmah le an inn cio ah an kal. Cun Joab cu Jerusalem ah siangpahrang sinah khan a kir ṭhan. ²³ Joab cu Israel ralkap vialte haotu a si; Jehoiada fapa Benaiah cu Khereth mi le Peleth mi haotu a si; ²⁴ Adoram cu hnekmi rian zohkhenhtu a si; Ahilud fapa Jehoshafat cu cazin ṭialtu a si; ²⁵ Sheva cu caṭialtu a si i Zadok le Abiathar cu tlangbawi an si; ²⁶ cun Jairmi Ira zong David tlangbawi a si ve.

¹ David caan lioah cun kum thum chung, aa peh lengmang in mangṭam a tlung i David nih Bawipa hmai kha a kawl. Cun Bawipa nih, "Saul le a innchungkhar cungah thisen chuah mawhnak a um caah a si; zeicahtiah Gibeon mi kha a thah hna," tiah a ti. ² Cucaah siangpahrang nih Gibeon mi kha a auh hna. Gibeon mi cu Israel mi an si lo, Amor mi a tangmi kha an si; Israel mi nih kan in zuah ko hna lai tiin an sinah chiat an rak ser nain, Israel mi le Judah mi hna ca i a ṭan tuknak ah Saul nih khan thah awkah a rak kawl hna. ³ Cun David nih Gibeon mi cu a thawh hna i, "Zeidah kan tuahpiak hna lai? Cun nannih nih Bawipa ro kha thluachuah nan pek naklai kei nih zeitindah sual thianhnak kha ka tuah lai?" tiah a ti. ⁴ Gibeon mi hna nih cun amah cu, "Saul le a innchungkhar le kanmah karlak i thil a ummi hi sui le ngun kong a si lo; cun Israel mi hi ahohmanh kan thah awk hna zong an si fawn lo," tiah an ti. Cun anih nih, "Kan tuahpiak seh nan ka timi cu zeidah a si?" tiah a ti. ⁵ Siangpahrang sinah cun, "Kannih nih Israel ram chung paohpaoh ah hin hmun kan ngeih nakhnga loin a rak kan hlo i kannih hrawh awkah khua a rak khangtu ⁶ mipa i a fapa hna lakin pasarih cu, Bawipa tlang cungah Gibeon ah Bawipa hmaiah kan thlai hna nakhnga, kan pe hna law kan duh," tiah an ti. Cun siangpahrang nih, "Kan pek hna lai," tiah a ti. ⁷ Sihmanhsehlaw Saul fapa Jonathan i fapa Mefibosheth kha cu a zuah, zeicahtiah annih karlak ah, David le Saul fapa Jonathan karlak ah khan Bawipa chiatserhnak a rak um. ⁸ Siangpahrang nih cun Aiah fanu Rizpah nih Saul a hrinpiak mi fapa pahnih Armoni le Mefibosheth le Saul fanu Merab nih Meholah mi Barzillai fapa Adriel a hrinpiakmi fapa panga kha a lak hna i ⁹ Gibeon mi kut chungah cun a pek hna i annih nih Bawipa tlang cungah an thlai hna i an pasarih cun hmunkhatte ah an thi. Annih cu barli ṭuan domhka te ah khin an thah hna. ¹⁰ Cun Aiah fanu Rizpah nih buri puan a lak hna i rawl ṭuan domh ka in ruahpi nih van in a run surh hna tiang lung cungah khan aa zarh hna i an cungah cun van i a zuangmi va si hna seh, zan ah a vakmi ramlak saram si hna seh, a ratter hna lo. ¹¹ Cun David kha Aiah fanu Rizpah, Saul nupichun nih, a tuahmi kha an chimh. Cu tikah ¹² David cu a kal i Filistin mi nih Saul kha Gilboa tlang i an thah ni ah, Filistin mi nih an thlai hnanak hmun Bethshan khua i zapi pumhnak tual khan a va firtu Jabesh-gilead mi hna sin khan Saul ruh le a fapa Jonathan ruh kha an lak hna i ¹³ cuka cun Saul ruh le a fapa Jonathan ruh kha an hunpi hna i, an thlaimi hna an ruh kha an pumh hna. ¹⁴ Cun Saul ruh le a fapa Jonathan ruh kha Benjamin ram Zela khua i a ummi a pa Kish thlan ah khan an vui hna; cun siangpahrang nawl pekmi vialte kha an tuah. Cu hnuah cun ram ca i an halnak kha Pathian nih a cohlanpiak hna. ¹⁵ Filistin mi nih Israel mi kha an tuk hoi hna i David zong a sinum hna sinah khan a vung kal ve. Filistin mi cu an tuk hna i David cu a ba ngaingai. ¹⁶ Cun mi ngan tefa a simi Ishbibenob, a fei dar shekel za thum a rit i vainam thar aa beimi nih khan David cu thah a timh. ¹⁷ Sihmanhsehlaw Zeruiah fapa Abishai nih khan amah cu a ra zuanhnawh i Filistin mi kha a tuk i a thah. Khi tikah David cu a mi hna nih khan, "Raltuknak hmun ah kan sinah na kal ti lai lo, Israel mei inn kha na hmih sual hnga," tiin amah cu chiat an serter. ¹⁸ Mah hnuah hin Gob ah Filistin mi he i dohnak a um ṭhan hoi; cun Hushath mi Sibbekai nih mingan hna tefa a simi Saf kha a thah. ¹⁹ Cun Filistin mi he Gob ah i dohnak a um ṭhan hoi; Bethlehem khuami Jaareoregim fapa Elhanan nih Git mi Goliath a fei hlung thiamtlang bantuk a simi cu a thah. ²⁰ Cun Gath ah i dohnak a um ṭhan hoi; cuka ah cun mipa pakhat a pum a ngan ngaingaimi, a kut ah kutdong paruk veve le a ke ah kedong paruk veve, a dihlak kul le pali a ngeimi a um i amah zong cu mingan hna tefa kha a si ve. ²¹ Cun amah nih Israel mi kha a hauh hna tikah David u Shimei i fapa Jonathan nih khan a thah. ²² Hi pali hna hi Gath khua i a ummi mingan hna hrinthlak kha an si; David kut le a sinum hna kut in an thi.

¹ Cun Bawipa nih David a ral vialte hna kut chung le Saul kut chungin a chuahter ni ah, hi hla hin Bawipa cu a hloi. ² "Bawipa cu ka lungpi le ka ralhruang le a ka chuahtertu a si, ³ Ka Pathian, a chung i kaa dornak lungpi, ka phaw le ka khamhnak ki, ka ralhau le ka himnak; Ka khamhtu, nangmah nih zaang-ennak chungin na ka khamh. ⁴ Thangṭhat awk a tlakmi Bawipa cu ka auh i ka ral hna chungin a ka khamh. ⁵ "Zeitintiah thihnak tilet nih an ka dum, Rawhralnak tilian nih a ka tlunhnawh; ⁶ Sheol hri nih a ka zelh, Thihnak rap nih a ka foih. ⁷ "Ka harnak chungin Bawipa kha ka auh; Ka Pathian kha ka auh. A biaknak inn in ka aw kha a rak theih i Ka aunak kha a hna chung a phan. ⁸ "Cun vawlei kha aa hnin i aa sai; A thin a hun caah van hram hna kha an ther i an i hnin. ⁹ A hnar kua in meikhu a chuak i A kaa chungin mei alh a chuak; Amah sinin meiṭil vaam an chuak. ¹⁰ Van kha a kuaih hna i a rung ṭum A chahmi muihnak cu a ke tangah a um ¹¹ Cherub aa cit i a zuang; Thli thla cungah khan amah cu an hmuh. ¹² Muihnak a chahmi khuadawm, ti aa pummi cu, A velchum in i khuhnak ah a ser. ¹³ Amah hmai i ceunak chung khan Meiṭil an i hliau duakmak. ¹⁴ Bawipa cu van in khuarit in a rung ri i Cung Nung Bik nih a aw kha a chuah. ¹⁵ Cun thal kha an thlah hna i a ṭhek hna, Nimtlau kha a thlah i a dawi dih hna. ¹⁶ Bawipa nih a sik hna i a hnar thaw nih a chem hna caah rili kuang hna cu an lang i vawlei hram hna cu an lang. ¹⁷ "Cungpi khin a run ka banh i a run ka lak, Ti tampi chungin a ka chuah. ¹⁸ A ṭhawngmi ka ral hna le a ka huatu hna chungin amah nih a ka chuah, Zeitintiah annih cu ka caah an ṭhawng tuk. ¹⁹ Ka vanchiat ni ah an ka chuahhnawh; Sihmanhsehlaw Bawipa cu ka cherhchan a si. ²⁰ Hmun kaupi ah a ka kalpi; Keimah chungah lawmhnak a ngeih caah a ka chuahter. ²¹ Bawipa nih ka dinnak ningin laksawng a ka pek; Ka kut hna an thianning in a ka lehrulh. ²² Zeitintiah Bawipa lam kha kaa tlaih hna i Ka Pathian sinin, sualnak lam zulh awkah kaa ṭhen lo. ²³ Zeitintiah a phunglam vialte cu ka hmaiah an um i A nawlbia hna kha ka pialtak bal hna lo. ²⁴ Amah hmaiah soi awk um lo ka si i Mawhnak zeihmanh tuah loin ka um. ²⁵ Cucaah Bawipa nih ka dinnak ningin a ka lehrulh, Amah mit hmuh i ka thiannak ningin. ²⁶ "Zumhtlakmi sinah zumhtlak in naa langhter, Soi awk a um lomi sinah soi awk um loin naa langhter. ²⁷ A thiangmi sinah a thiang in naa langhter, A hrokhrawlmi sinah zer ngaiin naa langhter. ²⁸ Nangmah nih toidormi cu na chuahter hna, Sihmanhsehlaw ruamkaimi cu annih kha ṭhumh awkah an cungah na mit a um. ²⁹ Asi, nangmah cu ka mei inn na si, maw Bawipa, Cun ka Pathian nih ka muihnak kha a ceuter. ³⁰ Asi, nangmah thawngin ralkapbu bu khat ka tei khawh i Ka Pathian thawngin vampang kha ka per khawh. ³¹ Hi Pathian hi amah a lam cu ṭhat a tling; Bawipa biakamnak cu a dik taktakmi a si; Amah chung i aa dormi vialte caah amah cu phaw a si. ³² "Zeitintiah Bawipa dah ti lo cu ahodah Pathian a si? Kan Pathian dah ti lo cu ahodah lungpi a si? ³³ Hi Pathian hi, a ṭhawngmi ka himnak a si, Amah nih ka lam kha him tein a ser. ³⁴ Amah nih ka ke cu sazuk ke bantuk ah a ser hna i Hmun sang ah him tein a ka chiah. ³⁵ Ka kut cu raldohnak caah a cawnpiak hna, Cucaah dar likuk kha ka ban nih an koih khawh. ³⁶ Nangmah nih na khamhnak phaw cu na ka pek cang i Nangmah bawmhnak nih a ka lianhnganter. ³⁷ Ka tang i ka ke hlannak caah hmun kaupi na ka pek i Ka ke cu a nal lo; ³⁸ Ka ral hna kha ka dawi hna i ka hrawh hna, An dih hlan lo ka kir lo. ³⁹ Ka thah dih hna; tleng lak in ka chunh hna, cucaah an tho kho ti lo; Ka ke tangah an tlu. ⁴⁰ Zeicahtiah raldohnak caah nangmah nih ka tai ah ṭhawnnak na ka sawmh i, A ka chuahhnawhtu kha ka tangah na pilter hna. ⁴¹ Ka ral hna le a ka huatu hna cu, An hnulei na ka chitter hna i ka hrawh hna. ⁴² Khua an zoh, sihmanhsehlaw khamhtu ding pakhat hmanh an um lo, Bawipa kha an auh, sihmanhsehlaw a hawi hna lo. ⁴³ Vawlei i leidip bantuk ah ka rial hna, Ka den hna i lam i nawncek bantukin ka lamh hna. ⁴⁴ "Miphun hna he i siknak in na ka khamh, Miphun hna lu ah na ka chiah; Ka hngalh lomi hna nih khan ka rian an ṭuan. ⁴⁵ Ramdangmi nih bawh buin ka sinah an ra; Ka bia an theih cangka, ka nawl an ngaih. ⁴⁶ Ramdangmi cu an hnabei a dong i An ralhau chung khan ther lengmang in an ra chuak. ⁴⁷ "Bawipa cu a nung ko; ka lungpi cu thangṭhat si ko seh, Ka Pathian, ka khamhnak lungpi cu. ⁴⁸ Ka phu a ka hlampiak i ka tangah miphun hna a chiatu, ⁴⁹ Ka ral hna chungin a ka chuahtu Pathian cu hlorh si ko seh; Nangmah nih ka ral hna cungah na ka hlorh, Mipuar hna lakin na ka luatter. ⁵⁰ "Mah hi ruangah hin, maw Bawipa, Miphun hna lakah kan hlorh lai i Na min cu hla in ka thangṭhat lai. ⁵¹ Amah nih a siangpahrang cu teinak lianngan a pek i, A chiti thuhmi cu a fekmi dawtnak a hmuhsak, David le a tefa hna cu, zungzal in."

¹ Cun mah hihi David bia hmanung bik cu an si: Jesse fapa David bia, sangpi ah cawimipa, Jakob Pathian chiti thuhmi, Israel mi hla dawh phuah thiamtu bia cu: ² "Bawipa thlarau nih keimah kha hmang in a chim, Amah bia cu ka lei cungah a um. ³ Israel Pathian nih a chim cang, Israel lungpi nih a ka chimh cang: Uktu nih mi kha dinnak in a uk hna i Pathian ṭih buin a uk hna tikah, ⁴ Khuadawm a thiangmi zing i a hung ceumi ni bantuk, Zinglei ceunak bantuk khin annih cungah a rung ceu, Vawlei in ram a khohtertu ruah bantuk a si. ⁵ A si, ka innchungkhar cu cu bantukin Pathian hmaiah a dir lo maw? Zeitintiah keimah he zungzal hmunmi biakamnak kha a ser, Zeizong vialte kha ningcangte le fek tein a tuah. Zeitintiah keimah bawmhnak vialte le duhnak cu Tlinter loin maw a um hnga? ⁶ Sihmanhsehlaw Pathian zei i a rel lomi hna cu, Hlonhmi hling bantuk an si; Zeitintiah annih cu kut in lak khawh an si lo; ⁷ anmah a tonghnak ahcun, Thirfung feihlung hman a hau, Annih cu mei in khangh dih an si." ⁸ Mah hna hi David nih a ngeihmi miṭhawng hna min cu an si: Takhemon mi Josheb-basshebeth amah cu pathum hna lak i haotu bik a si; amah nih ṭum khat ah minung za riat kha a fei in a thah hna. ⁹ Cun miṭhawng pathum hna lak i amah a hun changtu cu Ahohi fapa Dodo i fapa Eleazar kha a si. Raldoh awkah aa pummi Filistin mi kha annih nih an zuamkhawn hna i Israel mi nih hnulei ah an i tawn ṭhan ṭung tikah khan, amah cu David sinah khan a um. ¹⁰ A tho i Filistin mi kha a kut a bat i a kut cu vainam ah aa khimh chih tiangin a thah hna; cun Bawipa nih cu ni ah cun teinak nganpi a ser; cun a hnu i a sinah an ra kir ṭhan tikah ral thahmi hna thilthuam phoih awk lawngah khan a si cang. ¹¹ Cun amah a hun changtu cu Harar mi Agi fapa Shammah a si. Filistin mi cu Lehi i hmun pakhat, phiang kung a khahnak hmun ah khan an i pum; cun mi hna cu Filistin mi hna sin khan an zam. ¹² Sihmanhsehlaw cu hmun laifang ah cun dirhmun aa serh i cu hmun cu a runven i Filistin mi cu a thah hna; cun Bawipa nih teinak nganpi a ser. ¹³ Cun an haotu ngan bikbik sawm thum hna lak i pathum cu an vung kal i rawl ṭuan caan hrawngah khan Adullam lungkua ah David sin an phan, cu lioah cun Filistin mi bu khat Refaim nelrawn ah khan an riak. ¹⁴ Cu lioah cun David cu ralhruang chungah a um i Filistin ralvengtu ralkapbu cu Bethlehem khua ah an rak um. ¹⁵ Cun David nih ti kha a ngai ruangmang i, "Bethlehem tikhor, hauka pawng i a ummi ti kha din awkah a ka petu hei um hna seh law, ka hei duh hnga dah," tiah a ti. ¹⁶ Khi tikah miṭhawng pathum hna nih khan Filistin mi hna riahhmun chung cun an va lan i Bethlehem tikhor, hauka pawng i a ummi chung khan ti cu an va than i an va lak i David sinah an ratpi. Sihmanhsehlaw a ding duh lo; Bawipa hmaiah khan a bungh i, ¹⁷ "Maw Bawipa, mah hi cu ka tuah hrimhrim hnga lo. Thih le thih tiin a kalmi hna thi cu ka din ko hnga maw?" tiah a ti. Cucaah cun a ding duh lo. Mah thil hna cu miṭhawng pathum nih khan an tuah. ¹⁸ Cun Joab unau Abishai (an nu cu Zeruiah a si) kha sawm thum hna lak i an haotu bik cu a si. Cun mi za thum kha fei in a thah hna i pathum hna sinah khan a thang aa chuah ve. ¹⁹ Amah cu sawm thum hna lakah khan min thang bik a si i an haotu ah a cang, sihmanhsehlaw pathum hna kha cu a khingkhang hna lo. ²⁰ Jehoiada fapa Benaiah cu Kabzeel khuami mi ralṭha, thil lianngan a tuahtu a si; amah nih Moab ariel pahnih a thah hna. Cun hawhra a tlak ni ah khan a vung kal i chiandeih pakhat zong khor chungah a thah fawn. ²¹ Cun Izipt mi pakhat, aa dawh ngaimipa, a thah. Izipt mipa cu fei aa put, sihmanhsehlaw Benaiah nih cun thing thluan he a vun fuh i Izipt mipa cu a kut chungin fei kha a chuh i amah fei lila cun a thah. ²² Mah thil hna hi Jehoiada fapa Benaiah nih khan a tuah hna i miṭhawng pathum hna sinah khan a thang aa chuah ve. ²³ Sawm thum hna lakah khan a min a thang ve, sihmanhsehlaw pathum hna kha cu a khingkhang hna lo. Cun David nih a pum ralveng haotu ah a chiah. ²⁴ Joab unau Asahel kha sawm thum hna lak i aa telmi a si ve; Bethlehem khuami Dodo fapa Elhanan, ²⁵ Harod khuami Shammah, Harod khuami Elika, ²⁶ Palti mi Helez, Tekoa khuami Ikkesh fapa Ira, ²⁷ Anathoth khuami Abeizer, Hushath mi Mebunnai, ²⁸ Ahohi mi Zalmon, Netofah mi Maharai, ²⁹ Netofah mi Baanah fapa Heled, Benjamin mi hna khua Gibeah mi Ribai fapa Ittai, ³⁰ Pirathon mi Benaiah, Gaash i tivarek hna mi Hiddai, ³¹ Arbath mi Abialbon, Bahurim mi Azmaveth, ³² Shaalbon mi Eliahba, Jashen fapa hna, Jonathan, ³³ Hara mi Shammah, Hara mi Sharar fapa Ahiam, ³⁴ Maakah mi Ahasbai fapa Elifelet, Gilon mi Ahithophel fapa Eliam, ³⁵ Karmel mi Hezro, Arbi mi Paarai, ³⁶ Zobah mi Nathan fapa Igal, Gad mi Bani, ³⁷ Ammon mi Zalek, Zeruiah fapa Joab i a hriamnam putu Beeroth khuami Naharai, ³⁸ Ithra mi Ira, Ithra mi Gareb, ³⁹ Hit mi Uriah: an dihlak in sawm thum le pasarih.

¹ Israel mi hna cungah Bawipa thinhunnak cu a alh ṭhan i, "Va kal law, Israel mi le Judah mi vialte kha va rel hna," tiin David kha an cung i hnahnawhnak tuah awkah a lungthin a thawhter. ² Cucaah siangpahrang nih cun Joab le ralkapbu haotu a sin i a ummi hna kha a thawh hna i, "Israel phun dihlak chungah khan, Dan in Beersheba tiang, i chawk u law, mi kha va rel hna u, mi kha zeizat dah an si hngalh ka duh," tiah a ti. ³ Sihmanhsehlaw Joab nih siangpahrang cu a thawh i, " Bawipa na Pathian nih, siangpahrang ka bawipa nih a mit in a hmuh khawh lioah, atu i nak hin let za khat in mi cu chap ko hna seh; sihmanhsehlaw zeicahdah mah bantuk tuah hi siangpahrang ka bawipa nih hin na duh?" tiah a ti. ⁴ Sihmanhsehlaw siangpahrang bia nih cun Joab le ralkapbu haotu hna cu a tei hna. Cucaah Joab le ralkapbu haotu hna cu mi kha rel awkah siangpahrang hmaika khan an chuak. ⁵ Jordan tiva kha an tan i Aroer le Gad lei i a va kal i Jazer i a va lanmi nelrawn laifang i a ummi khua in an i thawk. ⁶ Cun Gilead le Hit mi ram i a ummi Kadesh an phan; cun Dan an phan, cun Dan cun an i kual i Sidon an phan i ⁷ Tair ralhruang le Hiv mi le Kanaan mi khua vialte kha an phan; cun Judah ram Negeb ah khan an vung kal i Beersheba tiang an kal. ⁸ Cucaah annih nih ram vialte kha an ṭol dih hnuah Jerusalem ah khan thla kua le ni kul an rauh hnuah an ra phan. ⁹ Cun Joab nih siangpahrang kha minung an relmi hna a zat cu a pek: Israel chungah phawnam tlai kho ralṭhami sing riat an um, cun Judah mi cu sing nga an si. ¹⁰ Sihmanhsehlaw mi an rel dih hna hnuah khan David cu lung sivang in a um. Cun David nih Bawipa sinah cun, "Ka tuahmi ah hin fak piin ka sual cang. Sihmanhsehlaw, maw Bawipa, hruhnak piin ka tuah cang caah, na salpa ka ṭhat lonak hi ka hlohpiak ko sawh, tiah kan nawl," tiah a ti. ¹¹ - ¹² Bawipa nih David profet a simi Gad kha a thawh i, "Va kal law David cu, Bawipa nih i thim awk thil pathum ka pek, aa thimmi paoh cu ka tuah lai, a ti, tiah va chim," a ti. A thaizing ah David cu a thawh hnuah khan ¹³ Gad cu a sinah khan a va kal i Bawipa nih a chimhmi kha a va chimh i, "Zeidah naa thim lai? Na ram chung i kum thum mangṭam maw, na ral hna sinin thla thum zam maw, na ram chung i ni thum chung rai tlun dah? Cucaah i ruat law Bawipa sinah zei bialehnak dah ka kirpi lai ka chim tuah," tiah a ti. ¹⁴ Cun David nih Gad cu a thawh i, "Harnak nganpi chungah ka um; Bawipa kut chungah cun tla ko u sih, zeitintiah anih cu a zaangfahnak a ngan, sihmanhsehlaw minung kut chungah cun tla sawh hlah u sih," tiah a ti. ¹⁵ Cucaah Bawipa nih zingka khan a caan khiahmi tiang Israel mi cungah rai kha a tlunter i mi cu, Dan in Beersheba tiang, sang sarih an thi. ¹⁶ Cun vancungmi nih khan hrawh awkah Jerusalem leiah a kut a hei samh tikah, ṭhat lonak kha Bawipa cu aa ngaichih i mi lak i rawhralnak a tuahtu vancungmi sinah khan, "A za cang, na kut kha ṭhum cang," tiah a ti. Cun Bawipa vancungmi cu Jebus mi Araunah phuhri pawngah khan a um. ¹⁷ Cun mi a that lentu vancungmi kha a hmuh tikah David nih Bawipa sinah bia a chim i, "Zohhmanh, ka sual cang i ṭhalo ngaiin ka tuah cang; sihmanhsehlaw hi tuu hna nih hin zeidah an tuah? Na kut cu keimah le ka pa innchungkhar cungah si ko seh, tiah kan nawl," tiah a ti. ¹⁸ Cun cu ni ah Gad cu David sinah a ra i amah cu, "Hung kal law, Jebus mi Araunah phuhri ah Bawipa caah biakṭheng hung ser tuah," tiah a ti. ¹⁹ Cucaah Gad bia ning cun David cu Bawipa nih nawl a pek bangin a hung kal. ²⁰ Cun Araunah nih khua a vun zoh i amah leiah siangpahrang le a sinum hna an rat kha a hmuh; cun Araunah cu a va chuak i vawlei lei hoih in siangpahrang cu upatnak a pek. ²¹ Cun Araunah nih, "Zeicahdah siangpahrang ka bawipa cu a salpa keimah sinah hin na rat?" tiah a ti. David nih a thawh i, "Rai hi mi sinin a kian nakhnga, Bawipa sin i biakṭheng saknak caah na phuhri hi cawk awkah," tiah a ti. ²² Cun Araunah nih David cu, "Siangpahrang ka bawipa nih a ṭha a timi paoh i lak seh law, pechan ko seh; hika ah khangh thawinak caah cawtum an um, cun a thing caah rawl velhnak fung le cawtum hna hngawng kual thing an um. ²³ Mah vialte hi, maw siangpahrang, Araunah nih siangpahrang kan pek" tiah a ti. Cun Araunah nih siangpahrang cu, " Bawipa na Pathian nih in cohlang ko seh," tiah a ti. ²⁴ Sihmanhsehlaw siangpahrang nih Araunah cu a thawh i, "Asilo, a man in kan cawk ko lai, zeicahtiah Bawipa ka Pathian sinah, a man zeihmanh ka liam lomi khangh thawinak cu ka pechan kho hna lai lo," tiah a ti. Cucaah David nih phuhri le cawtum cu ngun shekel sawm nga in a cawk hna. ²⁵ Cun David nih khika ah Bawipa caah biakṭheng a ser i khangh thawinak hna le daihnak thawinak hna kha a pekchanh hna. Cucaah ram ca i nawlnak cu Bawipa nih a cohlan i Israel mi sinin rai cu a ṭian.