2 SIANGPAHRANG

2 SIANGPAHRANG

¹ Ahab thih hnuah Moab nih Israel kha a doh. ² Ahaziah cu Samaria khua i a innkhaan cung nung i thing kharvar thlalangawng khan a tla i a kuah ko; cucaah lamkal kha a thlah hna i, "Va kal u law, Ekron khua pathian Baal-zebub kha, hi zawtnak hin ka dam ṭhan lai maw dam ṭhan lo, va hal tuah u," tiah a chimh hna. ³ Sihmanhsehlaw Tishbemi Elijah cu Bawipa vancungmi nih a thawh i, "Tho law, Samaria siangpahrang lamkaltu hna ton awkah hung kal tuah, annih cu, ’Israel ram chungah Pathian a um lo caah maw nannih Ekron khua pathian Baal-zebub cu hal awkah nan kal?’ tiah hung ti hna. ⁴ Cucaah Bawipa nih hi bangin, ’Na hung kainak ihkhun khan na ṭum ṭhan lai lo, na thi hrimhrim lai,’ a ti," tiah a ti. Cucaah Elijah cu a kal. ⁵ Lamkal hna cu siangpahrang sinah an kir ṭhan i anih nih annih cu, "Zeicahdah nan kir?" tiah a ti hna. ⁶ Cun annih nih amah cu, "Kannih ton awkah khan mipa pakhat a ra i kannih cu a kan thawh i, ’An thlahtu hna siangpahrang sinah khan va kir u law amah cu, ’Hi bangin Bawipa nih a ti, Israel ram chungah Pathian a um lo caah maw Ekron khua pathian Baal-zebub kha va hal awkah mi na thlah hna? Cucaah na hung kainak ihkhun khan na ṭum ti lai lo, sihmanhsehlaw na thi hrimhrim lai,’ a ti tiah va chim u a kan ti," tiah an ti. ⁷ Annih cu a thawh hna i, "Nannih ton awkah a ra i hi thil an chimtu hna cu zei bantuk mi dah a si?" a ti. ⁸ Annih nih an leh i, "Sahmul puan aa aih i a tai ah saphaw taisawm aa sawmh," tiah an ti. Cun anih nih, "Tishbemi Elijah kha a si cu ta," tiah a ti. ⁹ Khi tikah siangpahrang nih ralkap sawm nga haotu kha a mi sawm nga he cun a thlah. Tlangpar i a ṭhu komi Elijah sinah cun a hung kal i, "Maw Pathian mi, siangpahrang nih, ’Rung ṭum seh,’ an ti," tiah a ti. ¹⁰ Sihmanhsehlaw sawm nga haotu cu Elijah nih a leh i, "Keimah cu Pathian mi ka si a si ahcun, vancung khin mei rung tla seh law nangmah le na sawm nga kha in kangh dih hna seh," tiah a ti. Cun mei cu vancung in a rung tla i amah le a sawm nga hna cu a kangh hna. ¹¹ Cun siangpahrang nih ralkap sawm nga haotu a dang pakhat le a mi sawm nga kha a thlah ṭhan hna. Cun a hung kal i amah cu, "Maw Pathian mi, mah hihi siangpahrang nawlbia a si, ’Khulrang tein rung ṭum tuah!" tiah a ti. ¹² Sihmanhsehlaw Elijah nih a leh i, "Keimah cu Pathian mi ka si ahcun, vancung in mei rung tla seh law, nangmah le na sawm nga kha in kangh hna seh," tiah a ti. Khi tikah Pathian mei kha a rung tla i amah le a sawm nga kha a kangh hna. ¹³ Cun siangpahrang nih ralkap sawm nga pawl phu thumnak a haotu le a mi sawm nga kha a thlah ṭhan hna. Cun sawm nga haotu pathumnak cu a kal i Elijah hmaiah cun a ra i a bawk i, "Maw Pathian mi, keimah ka nunnak le hi na sal mi sawm nga an nunnak hi na hmaiah a sungmi si ko seh. ¹⁴ Zohhmanh, vancung in mei a rung tla i ralkap sawm nga haotu pahnih hna kha an ralkap sawm nga veve he khan a rak kangh hna; sihmanhsehlaw atu cu ka nunnak cu na mithmuh ah a sungmi si ko seh," tiah a ti. ¹⁵ Cun Pathian vancungmi nih Elijah cu a thawh i, ’Amah he cun vung kal ko; amah cu ṭih hlah," tiah a ti. Cucaah a tho i siangpahrang sinah cun amah he khan an vung kal, ¹⁶ cun anih nih a thawh i, "Bawipa nih hi bangin, ’Nangmah nih Ekron khua pathian Baal-zebub cu va hal awkah lamkal na thlah hna caah, — mah cucu Israel ram ah hin hal awk Pathian a um lo caah maw a si? — cucaah na hung kainak ihkhun khan na ṭum ti lai lo, sihmanhsehlaw na thi hrimhrim lai,’ a ti," tiah a ti. ¹⁷ Cuticun Elijah nih a chimmi Pathian bia ningin amah cu a thi. Cun Ahaziah nih khan fapa a ngeih lo caah, Judah siangpahrang Jehoshafat fapa Jehoram a bawi kum hnihnak ah khan, a unau Joram cu amah hmun ah khan siangpahrang a cang. ¹⁸ Ahaziah nih a tuahsernak a tang rihmi hna cu, Israel Siangpahrang hna Chanrelnak Cauk chungah an i ṭial lo mei?

¹ Cun Bawipa nih Elijah cu phuchim in van ah a cawi hnik tikah khan Elijah le Elisha cu Gilgal in an i thawh. ² Cun Elijah nih Elisha cu a thawh i, "Hika ah hin rak um tuah, tiah kan nawl; zeitintiah Bawipa nih Bethel tiang kal a ka fial," tiah a ti. Sihmanhsehlaw Elisha nih, "Bawipa a nun bangin le nangmah hrimhrim na nun bangin, kan umtak lai lo," tiah a ti. Cucaah Bethel ah an vung kal. ³ Cun profet fapa hna, Bethel i a ummi kha Elisha sinah cun an ra chuak i, "Bawipa nih nihin ah hin na bawipa cu na sinin a lak lai kha na hngal maw?" tiah an ti. Cun anih nih, "A si, ka hngalh; dai tein um ko u," tiah a ti. ⁴ Elijah nih cun a thawh i, "Elisha, hika ah hin rak um tuah, tiah kan nawl; Bawipa nih Jeriko tiang kal a ka fial," tiah a ti. Sihmanhsehlaw anih nih, "Bawipa a nun bangin le nangmah hrimhrim na nun bangin, kan umtak lai lo," tiah a ti. Cucaah Jeriko an phan. ⁵ Cun profet fapa hna Jeriko i a ummi kha Elisha pawngah cun an ra i, "Bawipa nih nihin ah hin na bawipa cu na sinin a lak lai kha na hngal maw?" tiah an ti. Cun anih nih, "A si ka hngalh; dai tein um ko u," tiah a leh hna. ⁶ Khi tikah Elijah nih cun a thawh i, "Hika ah hin rak um tuah, tiah kan nawl; zeitintiah Bawipa nih Jordan tiang kal a ka fial," tiah a ti. Sihmanhsehlaw anih nih, "Bawipa a nun bangin le nangmah hrimhrim na nun bangin, kan umtak lai lo," tiah a ti. Cucaah an pahnih in an va kal. ⁷ Profet fapa hna chung khan sawm nga an kal ve i Jordan tiva pawng i an pahnih in an dir lioah khan lamhla nawn in an dir. ⁸ Cun Elijah nih a puan kha aa lak i a zual i ti kha a tuk i an pahnih in lei ro cungin an va kai hlan tiang, ti cu khattelei kam le khattelei kamah an i ṭhen. ⁹ An tan dih tikah Elijah nih Elisha cu, "Nangmah sinin lak ka si hlan ah hin zeidah kan tuahpiak lai, ka hal tuah," tiah a ti. Cun Elisha nih, "Na thlarau hi a let hnih in ka coter tuah tiah kan nawl," a ti. ¹⁰ Cun anih nih, "Thil har ngai na ka hal; asinain, nangmah sinin lak ka si lio kha na ka hmuh ahcun, mah cucu na ta a si ko lai; sihmanhsehlaw na ka hmuh lo ahcun, cu bang cun a si lai lo," tiah a ti. ¹¹ Cun an kal lengmang i bia an i ruah lio lengmang ah cun, zohhmanh, mei rangleng pakhat le mei rang hna nih annih pahnih cu an ṭhen hna. Cun Elijah cu phuchim in vancung ah a kai. ¹² Cun Elisha nih khan mah cucu a hmuh i, "Ka pa, ka pa! Israel mi rangleng hna le rang cung ralkap hna khing," tiah a au. Cun cu hnu cu amah kha a hmu ti lo. Khi tikah amah a puan kha aa tlaih hna i cheu hnih ah a cheu hna. ¹³ Cun Elijah sinin a rung tlami puan kha aa lak i a kir i Jordan tiva kamah khan a dir. ¹⁴ Cun a rung tlami Elijah puan kha aa lak i ti kha a tuk i, "Bawipa, Elijah i Pathian cu khuazei ah dah a um?" tiah a ti. Cun ti kha a tuk tikah, ti cu a sumlei le a hnalei ah an i ṭhen i Elisha cu va ral ah a kai. ¹⁵ Profet fapa hna, Jeriko khua i a ummi nih khan, annih an ralchan ah amah cu an hmuh tikah, "Elijah thlarau cu Elisha cungah aa fu," tiah an ti. Cun amah don awkah khan an ra i amah hmaiah vawlei lei hoih in an kun. ¹⁶ Cun annih nih amah cu, "Zohhmanh, na sal hna kan sinah hin miṭhawng pa sawm nga an um; va kal hna seh law na bawipa kha va kawl hna seh tiah kan in nawl; amah cu Pathian thlarau nih a cawi i tlang pakhatkhat cungah maw, a si lo ah, nel pakhat khat cungah dik a thlak a si ko hnga dah kaw," tiah an ti. Cun anih nih, "Nan thlah hna hnga lo," tiah a ti. ¹⁷ Sihmanhsehlaw annih nih amah cu a ning a zah tiang an nawl tikah, anih nih, "Thlah hna u," a ti. Cucaah mi sawm nga an thlah hna; cun ni thum chung amah cu an kawl, sihmanhsehlaw an hmu lo. ¹⁸ Cun Jeriko i a cam lioah khan a sinah an ra ṭhan i annih cu, "/’Kal hlah u,’ tiah kan ti hna lo mei kha?" tiah a ti hna. ¹⁹ Cu khuami nih cun Elisha cu, "Zohhmanh, hi khua a umnak hmun hi a nuam ko, ka bawipa nih a hmuh bang hin; sihmanhsehlaw a ti a ṭha lo i a ram cu rawl a vui lo," tiah an ti. ²⁰ Anih nih, "Khengkuar a tharmi pakhat in rak ka pe u law a chungah cite rawn u," tiah a ti. Cucaah amah sinah cun an rak put. ²¹ Cun ti chuahnak hramah khan a va kal i cite kha a va paih i, "Hi bangin Bawipa nih, hi ti hi ka thianter cang; hi hnuah cun thihnak siseh, naurawknak siseh, hi ti in a chuak ti lai lo, a ti," tiah a ti. ²² Cucaah cu ti cu nihin tiangin, Elisha nih a chimmi bia ningin, a thiang. ²³ Cuka cun Bethel ah a hung kal; a hung kalpah ah khin, ngakchia tlawmpal kha, cu khua chung khan an ra chuak i amah cu an nihsawh i, "Lu kolh pa, hung kal tuah! Lu kolh pa, hung kal tuah," tiah an hauh. ²⁴ Cun aa mer i a hmuh hna tikah Bawipa min in chiat a serh hna. Cun ramlak in vom a pi pahnih an ra chuak i pa ngakchia cu sawm li le pahnih an seh hna. ²⁵ Khika cun Karmel Tlang ah a va kal i cuka cun Samaria ah a kir.

¹ Judah siangpahrang Jehoshafat a bawi kum hleiriatnak ah, Ahab fapa Joram cu Israel mi cungah Samaria khua ah siangpahrang a cang i kum hleihnih a pen hna. ² Bawipa mithmuh ah thil ṭhalo kha a tuah, sihmanhsehlaw a nu le a pa bantuk kha cu a si lo, zeicahtiah a pa nih a rak sermi Baal lungphun kha a hlonh. ³ Sihmanhsehlaw Nebat fapa Jeroboam nih Israel mi a sualter hnanak a sualnak kha aa tlaih i a kaltak lo. ⁴ Moab siangpahrang Mesha cu tuu zua a si i Israel siangpahrang cu kum fate in tuufa sing khat le tuukawng sing khat hmul a pek lengmang awk a si. ⁵ Sihmanhsehlaw Ahab a thih tikah Moab siangpahrang nih cun Israel siangpahrang cu a doh. ⁶ Cucaah cu caan ah cun Siangpahrang Joram cu Samaria in a chuak i Israel mi vialte kha a pumh hna. ⁷ Cun a kal i Judah siangpahrang Jehoshafat kha bia a cah i, "Moab siangpahrang nih a ka doh; Moab doh awkah ral tuknak hmun ah na ka kalpi lai maw?" tiah a ti. Cun anih nih, "Kan kalpi lai; keimah le nangmah cu pum khat kan si, ka mi cu na mi an si ve ko i ka rangtum hna cu na rangtum an si ve ko," tiah a ti. ⁸ Cun amah nih cun a thawh i, "Khuazeilei lam in dah kan kal lai?" tiah a ti. Joram nih, "Edom ramlak lei lam in," tiah a leh. ⁹ Cucaah Israel siangpahrang cu Judah siangpahrang le Edom siangpahrang he tiah an kal. Cun annih nih aa vel in ni sarih an kal tikah ralkap caah siseh, anmah a zultu saṭil hna caah siseh ti a um lo. ¹⁰ Cu tikah Israel siangpahrang nih a thawh i, "Aize! Bawipa nih kannih siangpahrang pathum hna hi Moab kut chung i pek awkah a kan kawh ko hi ta," tiah a ti. ¹¹ Cun Jehoshafat nih a thawh i, "Hika ah hin Bawipa a kan halpiaktu ding Bawipa profet aho tal an um lo maw?" tiah a ti. Cu tikah Israel siangpahrang sinum pakhat nih a leh i, "Elijah kut i ti a rak toihtu Elisha, Shafat fapa kha hika ah hin a um ko," tiah a ti. ¹² Cun Jehoshafat nih cun, "Bawipa bia cu amah sinah cun a um," tiah a ti. Cucaah Israel siangpahrang le Jehoshafat le Edom siangpahrang cu amah sinah cun an vung kal. ¹³ Cun Elisha nih khan Israel siangpahrang cu, "Nangmah he kan i tlaknak zeidah a um? Na pa profet hna le na nu profet hna sinah khan va kal ko," tiah a ti. Sihmanhsehlaw Israel siangpahrang nih amah cu a thawh i, "Asilo; Moab kut chung i pek awkah hi siangpahrang pathum hna a autu hna hi Bawipa a si ko," tiah a ti. ¹⁴ Cun Elisha nih cun a thawh i, "Ralkapbu Bawipa, a rian ka ṭuanmi a nun bangin, Judah siangpahrang Jehoshafat kha hmaizah hlah ning law cu, a zoh zong kan zoh duh hnga lo i a hmuh zong kan hmu duh hnga lo. ¹⁵ Sihmanhsehlaw tingtang tum thiammi hunpi tuah ngat u," tiah a ti. Cun tingtang tum thiam nih khan a hun tum tikah Bawipa ṭhawnnak cu a cungah a tlung. ¹⁶ Cun amah nih cun, "Hi bangin Bawipa nih, ’Hi a carmi tiva kuang hi tili in ka khahter lai,’ a ti. ¹⁷ Zeitintiah Bawipa nih hi bangin, ’Nannih nih thli siseh ruah siseh nan hmu lai lo, sihmanhsehlaw kha tiva cu ti a khat lai i cucaah nannih nih, nanmah he nan caw he nan saṭil he nan din lai,’ a ti. ¹⁸ Mah hi cu Bawipa mithmuh ah cun a fawimi thil a si ko; Moab mi hna zong cu nan kut chungah an pek hna lai, ¹⁹ cun nannih nih kulhmi khua paohpaoh le khua ṭha vialte kha nan tei hna lai i thingkung ṭha vialte kha nan hau hna lai i ti putnak vialte kha nan phih hna lai i vawlei ṭhatnak hmun paohpaoh kha lung in nan hrawh hna lai," tiah a ti. ²⁰ A thaizing ah, raithawinak pekchanh caan ah khin, zohhmanh, ti cu Edom lei in a ra i ram cu ti in a khat dih. ²¹ Moab mi vialte hna nih siangpahrang hna nih kannih kha tuk awkah an kan hunhnawh tiah an theih tikah, ralthuam aa hruk kho vialte, ngakchia bik in upa bik tiang, an kawh hna i ramri ah khan an hun kalpi hna. ²² Zingkate ah an thawh i ni nih ti kha a vun cerh tikah, an ral i ti cu thi bantukin a sen in Moab mi nih an hmuh. ²³ Cun annih nih, "Mah hihi thisen a si ko; siangpahrang hna cu pakhat le pakhat an i tu i an i that ko hih. Cucaah Moab mi hna, hranchaw kha zuanhnawh u luao!" tiah an ti. ²⁴ Sihmanhsehlaw Israel mi riahhmun kha an phak tikah Israel mi cu an tho i Moab mi cu an ṭhuat ciammam hna i an hmai in an zam; cun hmailei ah an kal i an kalpah cun Moab mi cu an thah lengmang hna. ²⁵ Cun annih nih khua kha an hrawh hna i vawlei ṭhatnak hmun vialte kha an phih dih i thingkung ṭha vialte kha an hau dih; a lung hna lawng kha Kir-har-eseth ah cun an tang i cu zong cu lungherh cheh thiam nih an kulh i an tei. ²⁶ Moab siangpahrang nih an i dohnak kha ka celh ding a si lo tiah a hngalh tikah Edom siangpahrang lei khan bauh awkah vainam pumi za sarih aa kalpi hna; sihmanhsehlaw an pah kho lo. ²⁷ Khi tikah amah hmun ah bawi a si ding a fapa upa bik kha aa lak i ralhau cungah cun khangh thawinak caah a thawi. Cu tikah Israel mi hna cu an thin a hung ngaingai i amah sin cun anmah an ram lei ah khan an kir ṭhan.

¹ Profet fapa hna lak i pakhatpa nupi nih Elisha cu a auh i, "Na salpa ka vapa cu a thi cang; cun nang nih na salpa cu Bawipa a ṭihmi a rak si kha na hngalh, sihmanhsehlaw lei kan batmipa kha, ka fale pahnih hna cu sal si awk i lak awkah a ra cang," tiah a ti. ² Cun Elisha nih amah cu, "Zeidah kan tuahpiak lai? Ka chim tuah; zeidah innchung ah nan ngeih?" tiah a ti. Cun anih nih, "Na salnu nih hin, inn chungah chiti um khat dah ti lo cu zeihmanh ka ngei lo," tiah a ti. ³ Khi tikah anih nih, "Leng ah va chuak law na innpa vialte an um va hlang hna, um lawng, a tlawmtuai si loin. ⁴ Cun lut law, nangmah le na fapale kha innka i khar khumh u law hi um vialte kha chiti rawn hna u; cun pakhat a khah tikah a dang ah chia lengmang u," tiah a ti. ⁵ Cucaah amah sin cun a kal i amah le a fapale cu innka an i khar khumh i annih nih um cu an rak put hna i anih nih a rak rawn lengmang hna. ⁶ Um kha an khah dih tikah, a fapa pakhat kha, "Um dang rak pu rih tuah," tiah a ti i anih nih, "A dang a um ti lo," tiah a leh. Khi tikah chiti luan cu a dong. ⁷ A ra i Pathian mi kha a chimh i anih nih, "Va kal law, chiti kha va zuar law na leiba kha va cham, cun a tang rihmi khan nangmah le na fapa hna cu khua va sa u," tiah a rak ti. ⁸ Ni khat cu Elisha cu Shunam ah a va kal i khika ah a rum minu pakhat a rak um i cu nu nih cun rawl ei a rak fial. Cucaah khika lei i a kal fate rawl ei awkah cuka ah cun a lut pah tawn. ⁹ Cun minu nih a va cu a thawh i, "Zohhmanh, a kan palpah tawntupa hi Pathian mi thiang a si ti kha ka hngalh. ¹⁰ Inncung ah vampang a ngeimi dal pakhatte serpiak u sih law, khika ah ihkhun le cabuai le ṭhutdan le meiinn chiahpiak u sih; kannih a kan palpah chel paoh ah khika ah a luh khawh nakhnga," tiah a ti. ¹¹ Ni khat cu khika kha a phan i inndal chungah cun a lut i ¹² khika ah aa din. Cun a sinum Gehazi kha a thawh i, "Hi Shunam nu hi va au tuah,’ tiah a ti. A va auh tikah a hmaika ah a ra dir. ¹³ Cun amah nih anih cu a thawh i, "Amah kha, ’Zohhmanh, hi tlukin na kan tuammuai, zeidah kan in tuahpiak ve lai? Siangpahrang sinah siseh, ralkapbu haotu sinah siseh, bia chimpiak na duhmi a um maw? tiah hei ti," tiah a ti. Anih nih, "Keimah ka miphun sinah pei ka um ko cu," tiah a leh. ¹⁴ Cun anih nih a thawh i, "A si ahcun amah cu zeidah kan tuahpiak kun hnga?" tiah a ti. Cun Gehazi nih, "Vei mu, amah hi fapa a ngei lo i a va cu a tar fawn cang," tiah a ti. ¹⁵ Anih nih, "Hei au tuah," tiah a ti. Cun a hei auh tikah innka ah khan a ra dir. ¹⁶ Cun anih nih, "Atu tikah hin, a caan a phak tikah, fapa na pom lai," tiah a ti. Cun anih nih, "Maw Pathian mi, bawipa, na salnu hi ka hleng hlah hen," tiah a ti. ¹⁷ Sihmanhsehlaw minu cu fa a pawi i a kumvoi ṭhal, cu tik caan ah khan, Elisha nih amah cu a chimh bangkhan, fapa a hrin. ¹⁸ Ngakchia cu a ṭhang i ni khat cu a pa sinah rawlṭuantu hna lakah khan a kal. ¹⁹ Cun a pa cu a thawh i, "Maw ka lu, ka lu!" tiah a ti. A pa nih a sinumpa kha, "A nu sinah hei cawi tuah," tiah a ti. ²⁰ Cun a cawi i a nu sinah a hei kalpi tikah, ngakchia cu a nu phei cungah chun tiang a ṭhu i cun a thi. ²¹ Cun a hung kal i Pathian mipa ihkhun ah khan a ihter i innka a khar khumh i amah cu a chuak. ²² A va kha a auh i, "Pathian mi sinah khan khulrang tein ka va kal i ka ra kir ṭhan nakhnga sinum pakhat le laa pakhat in rak ka kua," tiah a ti. ²³ Cun anih nih, "Zeicahdah amah sinah cun nihin ah na kal lai? Thla thar zong a si lo i sabbath zong a si ṭung lo," tiah a ti. Anih nih, "A ṭha ko lai," tiah a ti. ²⁴ Khi tikah laa kha a danh i a sinum cu, "Saṭil kha hnawh law, keimah nih kan chimh lo ahcun, a kal ning kha ka fumhpiak hrim hlah," tiah a ti. ²⁵ Cuticun aa thawh i Karmel Tlang ah Pathian mi sin kha a phan. Pathian mi nih a rat kha a rak hmuh tikah a sinum Gehazi cu a thawh i, "Zohhmanh, khika i Shunam minu khi; ²⁶ amah don awkah va tli ta duak law amah cu, Na dam maw? Na va a dam maw? Na fa a dam maw? va ti tuah," tiah a ti. Cun anih nih, "Ka dam ko," tiah a rak leh. ²⁷ Cun tlang cungah Pathian mi sin kha a phak tikah, a ke kha aa tlaih. Cun amah cu namhlo awkah Gehazi cu a ra. Sihmanhsehlaw Pathian mi nih cun, "Um ko seh, zeitintiah amah cu a lungre a thei ngaingai; hi kong cu Bawipa nih ka sinin a thuh rih i a ka chim rih lo," tiah a ti. ²⁸ Cun anih nih, "Ka bawipa hi fapa ka rak in hal maw? Ka hleng hlah, tiah ka rak in ti lo mei?" tiah a ti. ²⁹ Cun Gehazi cu a thawh i, "Na biar i rengh law ka ṭhiangṭhunh kha i put law va kal tuah. Ahohmanh na ton hna ahcun va biachawn hna hlah; cun ahohmanh nih an in chawnh ahcun va let hna hlah; cun ka ṭhiangṭhunh cu ngakchia hmai cungah khan na va chiah lai," tiah a ti. ³⁰ Khi tikah ngakchia a nu nih khan, "Bawipa a nun bangin le nangmah hrimhrim na nun bangin, kan kaltak lai lo," tiah a ti. Cucaah a tho i a zulh. ³¹ Gehazi cu a rak kal chung i ṭhiangṭhunh cu ngakchia hmai cungah khan a rak chiah, sihmanhsehlaw nunnak thawng siseh, nunnak hmelchunhnak siseh, zeihmanh a um lo. Cucaah amah kha ton awkah a kir ṭhan i amah cu, "Ngakchia cu aa hlau lo," tiah a chimh. ³² Elisha cu inn chungah a rung luh tikah, ngakchia cu a thi cia in a ihkhun i a rak ih ko kha a hmuh. ³³ Cucaah a lut i an pahnih in innka aa khar khumh i Bawipa sinah thla a cam. ³⁴ Cun a hung kal i ngakchia cungah cun a bawk i a kaa cu a kaa ah a chiah i a mit cu a mit ah a chiah hna i a kut cu a kut ah a chiah hna; cun cu bantuk i ngakchia cung i a bawh cun, ngakchia taksa cu a hung lum. ³⁵ Khi tikah a tho ṭhan i inn chungah cun aa chawk i a hung kal i a cungah cun a bawk ṭhan; ngakchia cu voi sarih a hung hathiao i ngakchia nih cun a mit a hun au. ³⁶ Khi tikah Gehazi kha a auh i, "Shunam minu kha hei ko tuah," tiah a ti. Cucaah a hei kawh. Cun a rung luh tikah, "Na fapa cu i lak tuah," tiah a rak ti. ³⁷ Cun a ra i a ke hram ah a bawk i a lu a khun i a fapa kha aa lak i a chuak. ³⁸ Cun Elisha cu Gilgal ah, cuka ram i mangṭam a tlun lioah khan a ra. Cun profet fapa hna kha a hmai i an ṭhut lioah khan a sinum cu, "Um nganpi kha khing law profet fapa hna caah hin tihang chuang tuah," tiah a ti. ³⁹ Annih lak i pakhat cu ramlak ah tihang kawl ah a kal i ramlak i a khomi zun pakhat hi a va hmuh i cu zun cun a puan khat in um tlai cu a lawh i a ra i a can hna i tihang um chungah cun, zei an si ti hngalh loin, a paih hna. ⁴⁰ Cun ei awkah mi cu an suah hna. Sihmanhsehlaw tihang cu an ei lioah khan an ai i, "Maw Pathian mi, hi um chungah hin thihnak a um!" an ti. Cun annih nih an ei kho ti lo. ⁴¹ Anih nih, "Changvut rak pu tuah u," tiah a ti. Cun um chungah cun a paih i, "An ei awkah mi hna caah hin suak tuah u," tiah a ti. Cun um chungah cun ṭih awk zeihmanh a um ti lo. ⁴² Baal-shalisha in mipa pakhat a ra i Pathian mi cu thlai thar, barli changreu tlang kul le rawl thar a sawngkhoi in a rak put. Cun Elisha nih, "Mi kha pe hna, ei hna seh," tiah a ti. ⁴³ Sihmanhsehlaw a sinum nih a thawh i, "Zeitindah, mah hihi, mi za khat cu ka hunh hna lai?" tiah a ti. Cucaah anih nih, "Annih cu pe hna, ei hna seh, zeitintiah Bawipa nih hi bangin, ’An ei lai i tlawmpal cu an nganh lai,’ a ti," tiah a nolh ṭhan. ⁴⁴ Cucaah annih cu a hunh hna. Cun annih nih an ei Bawipa bia ning khan, tlawmpal an nganh taktak.

¹ Siria siangpahrang i a ralkapbu haotu Naaman cu, Bawipa nih amah thawng in Siria cu teinak a pek caah, a bawipa mithmuh ah mi ngan le hmaizah ngaingaimi a si. Amah cu a ṭhawng i a ral a ṭhami a si, sihmanhsehlaw mithinghmui a si. ² Siria mi hna nih ral hranh i an kal tawnnak ah hin, voi khat cu Israel ram in ngakchianute pakhat hi an i tlaih Naaman nupi tuammuaitu ah a cang. ³ Cun a bawinu sinah cun, "Samaria i a ummi profet sinah ka bawipa hi va kal seh law ka hei duh dah! A thinghmui zawtnak hi a hei damh ko hnga," tiah a ti. ⁴ Cucaah Naaman cu a va lut i a bawipa kha, "Cu bantuk, kha bantukin Israel ram ngakchianute nih khan a chim," tiah a chimh. ⁵ Cun Siria siangpahrang nih khan, "Va kal law, Israel siangpahrang cu ca ka kuat lai," tiah a ti. Cucaah a kal i ngun talen pahra, sui shekel thong ruk he puai puan zun hra aa phorh. ⁶ Cun Israel siangpahrang sinah khan ca cu a rak put i ca chungah cun, "Hi ca nih hin an phak tikah, ka sal Naaman cu, nangmah nih a thinghmui zawtnak khan na rak damter nakhnga, na sinah ka rak thlah ti kha rak hngal tuah," tiah aa ṭial. ⁷ Cun Israel siangpahrang nih ca cu a rel dih tikah a puan kha a thleh hna i, "Mi kha a that kho i a nunter khotu Pathian maw ka si i hi mipa nih hin mipa pakhat cu a thinghmui zawtnak damter awkah bia a rak ka cah? Ruat hmanh u law, zeitindah keimah he i siknak a kawl kha hngal tuah u," tiah a ti. ⁸ Sihmanhsehlaw Pathian mi Elisha nih Israel siangpahrang nih a puan a thleh hna ti kha a theih tikah, siangpahrang cu bia a hei cah i, "Zeicahdah na puan cu na thleh hna? Israel ram chungah profet a um ti kha a hngalh naklai, keimah sinah ratter tuah," tiah a ti. ⁹ Cucaah Naaman cu a rang hna le a rangleng hna he an ra i Elisha inn innka hram ah cun an va dir. ¹⁰ Cun Elisha nih cun a sinah lamkal pakhat a hei thlah i, "Va kal law Jordan tiva ah voi sarih in vaa kholh, cun na titsa cu a dam lai i na thiang lai," tiah a ti. ¹¹ Sihmanhsehlaw Naaman cu a thin a hung i a kal i, "Zohhmanh, ka sinah a hung chuak lai i pei a dir lai i a Pathian Bawipa min kha a auh lai i ka thinghmui zawtnak zawn ah khan a kut a zao lai i mithinghmui hi a ka damter lai, tiah ka ruah. ¹² Damaskas tiva Abana le Pharpar cu Israel ram ti vialte nakin an ṭha deuh lo maw? Cu tiva hna chungah cun kaa kholh in kaa thianh kho lo maw?" tiah a ti. Cucaah aa mer i thin hung ngaingai in a kal. ¹³ Sihmanhsehlaw a sinum hna nih khan an va naih i, "Ka pa, profet nih khan thil ngan pakhatkhat tuah in fial seh law tuah loin maw na um hnga? A si kun ahcun, ’Va kholh law va thiang; an ti tikah hin, zeitluk in dah tuah chinchin awk a si," tiah an ti. ¹⁴ Cucaah Pathian mi bia bangkhan a vung kal i Jordan tiva chungah voi sarih a vung i hnim i cun a titsa cu a dam i ngakchia note titsa bantuk a si i amah cu a thiang. ¹⁵ Khi tikah Pathian mi sinah khan, amah he a mi pawl vialte he an va kir i a hmaika ah khan a va dir cun aa thawh i, "Zohhmanh, Israel ram chungah dah ti lo ah cun, vawlei cung vialte ah Pathian a um lo ti kha ka hngalh; cucaah na sal sin hin laksawng cohlang tuah," tiah a ti. ¹⁶ Sihmanhsehlaw anih nih, "A rian ka ṭuanmi Bawipa a nun bangin, zeihmanh ka cohlang lai lo," tiah a ti. Cun lak awkah a nawl len nain a duh lo. ¹⁷ Khi tikah Naaman nih, "A si lo ahcun, na sal hi vawlei laa pahnih phor ka pe tuah, tiah kan nawl; zeitintiah hmailei ah cun Bawipa sinah dah ti lo ahcun na sal nih hin zei pathian sin hmanh ah khangh thawinak siseh, raithawinak siseh, ka pechan lai lo. ¹⁸ Hi kong bel ah hin Bawipa nih na salpa cu ka ngaithiam ko seh! Ka bawipa nih Rimmon inn chungah biak awkah, a luh tikah kei zong Rimmon inn chungah cun ka lu ka khun ve ding a si, cu bantukin Rimmon inn chungah ka lu ka khun tikah, hi kong ah hin Bawipa nih na salpa cu ka ngaithiam ko seh," tiah a ti. ¹⁹ Anih nih a thawh i, "Daihnak in va kal ko," tiah a ti. Sihmanhsehlaw Naaman cu amah sin khan tlawmpal a kal ah khin, ²⁰ Pathian mi Elisha i a sinum Gehazi nih khan, "Zohhmanh, ka bawipa nih Siria mi Naaman cu, a rak i phorhmi laksawng cohlang loin fawi tuk in a luatter cang. Bawipa a nun bangin, a hnu in ka hei dawi lai i amah sinin zeilo tetal ka va lak tuah lai," tiah a ti. ²¹ Cucaah Gehazi nih Naaman cu a zulh. Cun Naaman nih, mi zeimaw nih a ka dawi ti kha a hmuh tikah, amah ton awkah cun a rangleng in a ṭum i, "Zeizong a ṭha dih maw?" tiah a ti. ²² Cun anih nih, "A ṭha dih. Ka bawipa nih keimah cu, ’Efraim tlangram in ka sinah profet fapa hna chung khan tlangval pahnih, tu naite ah khan an ra; annih cu ngun talen pakhat le puai puan zun hnih rak pe hna, tiah kan nawl,’ ti in chim awkah a ka thlah," tiah a ti. ²³ Cun Naaman nih, "Talen pahnih hi cohlang tuah hna," tiah a ti. Cun hramhram in a lem i ngun talen pahnih cu puai puan pahnih he sawngkhoi pahnih in a rawn hna i a sal pahnih hna kha a phorhter hna; cun annih nih Gehazi hmaiah khan an phorh hna. ²⁴ Cun tlang kha a phak tikah, an kut chung khan a lak hna i inn chungah a chiah hna; cun mi kha a kalter hna i annih nih an kal. ²⁵ Amah cu a vung lut i a bawipa hmaika ah khan a dir i Elisha nih amah cu, "Khuazei ah dah na si, Gehazi?" tiah a ti. Anih nih, "Na salpa cu khuazei hmanh ah ka kal lo," tiah a ti. ²⁶ Sihmanhsehlaw amah cu a thawh i, "Nangmah ton awkah mipa nih a rangleng in a ṭum ah khan nangmah sinah khan thlarau in ka kal lo mei? Tangka le puan hna le oliv dum hna le mitsur dum hna le tuu hna le cawtum hna le salpa hna le salnu hna i lak caan a si maw? ²⁷ Cucaah Naaman thinghmui zawtnak nih khan nangmah le na tefa hna cu zungzal in an kaih hna lai," a ti. Cucaah a sin cun amah cu mithinghmui in a chuak, hawhra bantukin a rang.

¹ Profet fapa hna nih khan Elisha cu an thawh i, "Zohhmanh, na kan hruinak tang i kan umnak hmun hi kan caah a hme tuk. ² Jordan tiva ah khin vung kal u sih law khika ah khin thing thluan khat cio vung la u sih law khika ah khin umnak hmun vung ser u sih," tiah an ti. Cun anih nih, "Va kal u," tiah a leh hna. ³ Cun annih lak i pakhat nih, "Na sal hna kan sinah hin kal ve ko," tiah a ti i, "Ka kal lai," tiah a leh. ⁴ Cucaah an sinah a kal. Cun Jordan tiva kha an phak tikah thing kha an hau hna. ⁵ Sihmanhsehlaw pakhat pa cu thing a hau lioah khan a hreitlung fang cu ti chungah a tla; cun a au i, "Aize! ka bawipa, hlanmi a si ai ee," tiah a ti. ⁶ Cun Pathian mi nih cun, "Khuazei ah dah a tlak?" tiah a ti. A hmun kha a hmuhsak tikah fung pakhat a sah i khika ah cun a hei hlonh i thir cu a hung vuan. ⁷ Cun, "Hei la tuah," tiah a ti. A kut in a hei banh i a lak. ⁸ Voi khat cu Siria siangpahrang nih Israel mi a doh hna ah khan, a sinum hna he cun khua an khang i, "Cu hmun, kha hmun ah khan ka riahhmun cu a si lai," tiah a ti. ⁹ Sihmanhsehlaw Pathian mi nih Israel siangpahrang cu bia a cah i, "Hi hmun hi pal loin i ralring u, zeitintiah Siria mi cu khika ah khin an vung kal lai," tiah a ti. ¹⁰ Cun Israel siangpahrang nih Pathian mi nih a chimhmi hmun ah khan mi a thlah hna. Cu bantukin ralrinnak kha a pek tawn i cucaah khika ah voi khat voi hnih lawng si loin aa khamh tawn. ¹¹ Cun hi ruangah hin Siria siangpahrang cu a lungchung in a khuaruah a har ngaingai i a sinum cu a kawh hna i annih cu, "Ahodah kan lak i Israel siangpahrang ta a simi hi nan ka hmuhsak lai lo maw?" tiah a ti. ¹² Cun a sinum pakhat nih a thawh i, "Ahohmanh kan um lo, ka bawipa, maw siangpahrang; sihmanhsehlaw Israel ram i a ummi profet Elisha nih na ihnak dal chung i na chimmi bia cu Israel siangpahrang kha a chimh," tiah a ti. ¹³ Cun anih nih, "Va kal law khuazei i a um kha va hngal tuah, mi ka hei thlah hna i ka tlaih khawh nakhnga," tiah a ti. Amah cu, "Zohhmanh, Dothan ah a um ko," tiah an chimh. ¹⁴ Cucaah khika ah rang hna le rangleng hna le ralkapbu nganpi a thlah i zan ah an ra i khua cu an dum. ¹⁵ Pathian mipa sinum cu zingka in a thawh i a chuah tikah, zohhmanh, ralkapbu cu rang le rangleng he khua velchum cun an rak um. Cun sinum nih cun, "Aize, ka bawipa! Zeidah kan tuah lai?" tiah a ti. ¹⁶ Anih nih a thawh i, "Ṭih hlah, zeitintiah kan sin i a ummi hna cu an sin i a ummi hna nakin an tam deuh," tiah a ti. ¹⁷ Cun Elisha nih thla a cam i, "Maw Bawipa, a hmuh khawh nakhnga, a mit hi hun auter ko," tiah a ti. Cucaah Bawipa nih tlangvalpa mit cu a auter i a hmuh; cun zohhmanh, Elisha velchum ah cun, tlang cu rang le mei rangleng in a khat. ¹⁸ Cun Siria mi nih an run fuh tikah Elisha nih Bawipa sinah thla a cam i, "Hi mi hna hi, an mit cawtter ko hna," tiah a ti. Cucaah Elisha thlacamning khan, an mit a cawtter hna. ¹⁹ Cun Elisha nih a thawh hna i, "Lam nan tlau, nan kawlmi khua cu mah hi a si lo; ka zul u law nan kawlmipa sin cu kan phakpi hna lai," tiah a ti. Cun Samaria ah a hruai hna. ²⁰ Samaria khua chungah an luh cangka, Elisha nih, "Maw Bawipa, hi mi hna nih hin khua an hmuh khawh nakhnga, an mit auter hna," tiah a ti. Cucaah Bawipa nih an mit a auter hna i khua an hmu; cun zohhmanh, Samaria khuachungpi ah khan an um ko. ²¹ Israel siangpahrang nih khan a hmuh tik hna ah Elisha sinah cun, "Ka pa, ka thah hna lai maw? Ka thah hna lai maw? tiah a ti. ²² Anih nih, "Na that hna lai lo. Na vainam le na likuk in na tlaih mi hna cu na thah hna hnga maw? Annih cu ti le rawl hunh hna law ei in ding hna seh law an bawipa sinah kal hna seh," tiah a ti. ²³ Cucaah an caah puai nganpi pakhat a timh i an ei an din dih in a kalter hna i an bawipa sinah khan an kal. Cun Siria mi cu ralhranh awkah Israel ram chungah an lut ti lo. ²⁴ Cu hnuah cun, Siria siangpahrang Benhadad nih a ralkap vialte cu a pumh hna i a hung kal i Samaria kha an dum. ²⁵ Cun annih nih an kulh caah khan Samaria khua ah cun mangṭam fak ngaingai a tlung i laa lu pakhat nih ngun shekel sawm riat a man i ṭhuro ek kab cheu li cheu khat nih ngun shekel panga a man. ²⁶ Cun Israel siangpahrang cu ralhau cung i a kal lioah khan nu pakhat nih a hei auh i, "Maw siangpahrang, ka bawipa, ka bawm tuah," tiah a ti. ²⁷ Cun anih nih, "Bawipa nih an bawmh lo ahcun kei nih khuazei in dah kan bawmh khawh lai? Nangmah caah phuhri in siseh, mitsur nennak hmun in siseh, bawmhnak cu kan hmuhpiak khawh lai maw?" tiah a ti. ²⁸ Cun siangpahrang nih cun amah cu, "Na harnak cu zeidah a si?" tiah a hal. Anih nih, "Hi nu nih hin, ’Na fa kha tho law nihin ah kan ei lai, cun thaizing ah kei ka fa kan ei lai,’ a ka ti. ²⁹ Cucaah ka fa cu kan chuan i kan ei. Cun a thaizing ah amah cu, ’Na fa cu tho law kan ei lai,’ ka ti; sihmanhsehlaw a fa cu a rak thuh diam cang," tiah a ti. ³⁰ Siangpahrang nih minu bia kha a theih tikah a puan kha a thleh hna — ralhau cung i a kal lio a si — cun mizapi nih khan an zoh i, zohhmanh a pum cungah buri puan kha aa nawh ko. ³¹ Cun anih nih, "Shafat fapa Elisha kha nihin ah hin a liang cungah a lu kha a taan rih a si ahcun, Pathian nih cu bantukin le cu nak tam deuh zongin ka cungah tuah ko seh," tiah a ti. ³² Elisha cu a inn ah khan a ṭhu ko i upa hna cu amah sinah khan an ṭhu ve. Cun siangpahrang nih amah sinin mi pakhat a thlah i lamkaltu kha a ra phak hlanah khan Elisha nih cun upa hna cu, "Zeitindah lainawngpa nih hin keimah lu kha tan awkah a mi a thlah ti kha nan hngal maw? Zohhmanh u, lamkaltu kha a rat tikah, innka kha khar u law innka kha fek tein hrenhkanh u. A bawipa ke lamh thawng nih amah cu a zulh colh a si lo mei?" tiah a ti. ³³ Cun an sin i bia a chim lengmang lioah cun, siangpahrang cu a sinah a rung i, "Hi harnak hi Bawipa sinin a si. Zeicahdah Bawipa nih zeidah a tuah lai ti cu ka ngan len ti lai?" tiah a ti.

¹ Sihmanhsehlaw Elisha nih a thawh i, "Bawipa bia hi thei tuah: hi bangin Bawipa nih, Thaizing atu tik hrawngah hin Samaria khua hauka ah hin changvut dip rel khat cu shekel pakhat ah, cun barli rel hnih cu shekel pakhat ah zuar a si lai, a ti," tiah a ti. ² Cun siangpahrang nih a kut aa hngatchanmi ralbawi nih khan Pathian mi cu a thawh i, "Bawipa hrimhrim hmanh nih van ah khin thlalangawng hna a ser hmanh ah, mah thil hi a si kho hnga maw?" tiah a ti. Sihmanhsehlaw anih nih, "Na mit hrimhrim in na hmuh lai, sihmanhsehlaw a ei cu na ei lai lo" tiah a ti. ³ Cun kutka luhnak ah cun mi pali an um i annih cu mithinghmui an si; cun pakhat le pakhat kha bia an i ruah i, "Zeicah hen mah kah hin kan thih tiangin kan ṭhut ko? ⁴ ’Khua chungah lut u sih,’ tiah khua chungah cun mangṭam a um i khika ah kan thi ko lai; cun hika i kan ṭhut ko zongah, kan thi ṭhiamṭhiam lai. Cucaah cun ra u law, Siria mi hna riahhmun ah khan va kal u sih; kan nunnak kha an kan zuah a si le kan nung lai, cun an kan thah a si le kan va thi ko lai ta," tiah an ti. ⁵ Cucaah mui chupchap ah khin Siria mi hna riahhmun i va kal awkah cun an i thawh; sihmanhsehlaw Siria mi hna riahhmun tonter an va phanh tikah, zohhmanh, khika ah ahohmanh an rak um lo. ⁶ Zeitintiah Bawipa nih Siria ralkapbu hna cu rangleng thawng le rang thawng le ralkapbu nganpi thawng kha a theihter hna i cucaah pakhat le pakhat cu, "Zohhmanh, Israel siangpahrang nih kanmah doh awkah Hit mi siangpahrang hna le Izipt mi siangpahrang hna kha aa ruaih ko hna hi ta," tiah an i ti. ⁷ Cucaah mui chupchap ah cun an zam i an riahbuk hna le an rang hna le an laa hna cu an lektak hna i an riahhmun cu a umning te khan an zamtak i annih cu an nunnak ruah ah an zam. ⁸ Cun hi mithinghmui hna cu riahhmun tonter i an rat tikah khan, riahbuk pakhat chungah an lut i an ei i an ding i sui le ngun le hnipuan kha an i lak hna i an kal i an thuh hna; cun an ra ṭhan i riahbuk a dang pakhat chungah khan an lut i a chung thil cu an i kalpi hna i an kal i an va thuh hna. ⁹ Khi tikah pakhat le pakhat cu, "Kan tuahmi hi a ding lo. Nihin hi thawng ṭha ni a si; kannih nih dai ziar in kan um i zinglei khua ceu kha kan ngan ahcun, dantatnak nih a kan phak lai; cucaah ra u law va kal u sih law siangpahrang innchungkhar kha va chim hna u sih," tiah an ti. ¹⁰ Cucaah an ra i khua kutka cawngtu kha an auh hna i, "Siria mi riahhmun ah kan va kal i zohhmanh, khika ah ahohmanh an rak um lo, minung thawng le thlam zeihmanh a leng lo, aa hrengmi rang hna le aa hrengmi laa hna le an umning tein a ummi riahbuk hna dah ti lo cu zeihmanh a um lo," tiah an chimh hna. ¹¹ Khi tikah kutka vengtu hna cu an au i siangpahrang innchungkhar cu an va chimh hna. ¹² Cun siangpahrang cu zan ah cun a tho i a sinum hna cu, "Siria mi hna nih kannih an kan timhhnawhmi hi kan chimh tuah hna lai. Annih nih kan rawl a ṭam kha an hngalh; cucaah ramlak i i thuh awkah an riahhmun cun an chuak i annih nih, ’Khua chung hin hung chuak ko rih hna seh law, a nung in kan tlaih hna lai i khua chungah cun kan lut lai,’ tiah an ruah," tiah a ti. ¹³ Cun a sinum pakhat nih a thawh i, "A tang rihmi rang hna lakah panga hi aho ho nih dik i kalpi hna seh law annih cu thlah hna u sih law zoh u sih; zeicahtiah hika i a tangmi hna zong hi Israel mi bu a ning piin a rawk cangmi bantuk kha pei an si ṭhiamṭhiam ko lai cu," tiah a ti. ¹⁴ Cucaah rangleng cittu mi pahnih an lak hna i siangpahrang nih, "Va kal u law va zoh u," tiin, Siria ralkapbu kha va dawi awkah a thlah hna. ¹⁵ Cucaah Jordan tiva tiang an dawi hna; cun zohhmanh, Siria mi nih an i hnawhsarenak ah an hlonh tami hnipuan hna le thilri hna kha lampi ah cun a thluangthluan in an ril liangluang ko. Cun lamkal hna cu an kir i siangpahrang kha an chimh. ¹⁶ Khi tikah mi zapi cu an chuak i Siria mi riahhmun kha an va ramh. Cucaah changvut dip rel khat cu shekel pakhat ah zuarh a si i barli rel hnih cu shekel pakhat ah zuarh a si, Bawipa bia bang khan, ¹⁷ Siangpahrang nih khan a kut aa bochanmi ralbawipa kha kutka cawngtu ah cun a thiah i, siangpahrang nih Pathian mi sinah a vung kal i anih nih a rak chimning khan, mi nih khan kutka ah cun an cil ciammam i a thi. ¹⁸ Zeicahtiah Pathian mi nih siangpahrang sin i, "Thaizing atu tik hrawng ah hin, Samaria hauka ah, barli rel hnih cu shekel pakhat ah zuarh a si lai i changvut dip rel khat cu shekel pakhat ah zuarh a si lai," tiin a rak chim tikah khan, ¹⁹ ralbawipa nih cun Pathian mi kha, "Bawipa hrimhrim hmanh nih van ah khin thlalangawng a ser hna hmanh ah, mah bantuk thil cu a cang kho hnga maw?" tiah a rak leh. Cun anih nih a rak thawh i, "Na mit cun na hmuh sawk lai, sihmanhsehlaw a ei cu na ei lai lo," a ti. ²⁰ Cucaah a cungah cu bantukin a tlung; mi nih khan kutka ah cun an cil ciammam i a thi.

¹ Cun Elisha nih a fapa a rak nunter ṭhanmi minu sinah khan, "Tho law, na innchungkhar dihlak he kal u law, na pem khawhnak paoh ah va pem; zeicahtiah Bawipa nih mangṭam kha a kawh cang i hi ram cungah hin kum sarih chung a tla lai," tiah a ti. ² Cucaah minu cu a tho i Pathian mi nih a chimmi bia ning khan a tuah; a innchungkhar he an i thawh i Filistin mi hna ram ah an pem i kum sarih an um. ³ Cun kum sarih a donghnak i minu cu Filistin mi hna ram in a ra kir ṭhan tikah, a inn le a lo ca i nawlnak pek awkah khan siangpahrang sinah a va chuak. ⁴ Siangpahrang cu Pathian mi sinum Gehazi he khan bia an rak i ruah i, "Elisha nih thil lianngan a tuahmi vialte ka chim tuah," ti i a rak ti lio kha a si. ⁵ Cun anih nih, zeitindah Elisha nih a thimi a nunter ṭhannak kong kha a chimh lioah khan, zohhmanh, a fapa a nunter ṭhan minu nih khan a inn le a lo kong ah siangpahrang cu a nawl. Cun Gehazi nih a thawh i, "Maw siangpahrang, ka bawipa, minu kha mah hihi a si i a fapa Elisha nih a nunter ṭhanmi kha mah hihi a si," tiah a ti. ⁶ Cun siangpahrang nih minu cu a hal tikah amah nih cun a rak chimh. Cucaah amah caah cun siangpahrang nih bawi pakhat kha a fial i, "Amah ta a simi vialte kha, hi ram a kaltak ni thawk in atu tiang a lo in a chuakmi vialte he, amah cu pe ṭhan dih u," tiah a ti. ⁷ Elisha cu Damaskas khua ah a kal. Siria siangpahrang Benhadad cu a zaw i, "Pathian mi cu hika ah a ra," tiah an chimh tikah, ⁸ siangpahrang nih cun Hazael kha, "Laksawng i put law Pathian mi don awkah khan va kal tuah, cun, ’Hi zawtnak hin, ka dam ṭhan lai maw?’ tiin Pathian rak ka halpiak tuah seh," tiah a ti. ⁹ Cucaah Hazael cu amah don awkah khan a kal i laksawng, Damaskas thilri a phun phun, kalauk sawm li phor aa phorh. Cun a phak i a hmai i a dir tikah khan, "Na fapa Benhadad, Siria siangpahrang nih keimah cu nangmah sinah a ka thlah i, ’Hi zawtnak hin ka dam ṭhan lai maw?’ a ti," tiah a ti. ¹⁰ Cun Elisha nih a thawh i, "Va kal law, amah cu, ’Na dam ṭhan hrimhrim lai,’ tiah va ti; sihmanhsehlaw Bawipa nih a ka hmuhsak cang i a thi hrimhrim lai," tiah a ti. ¹¹ Cun dengteo in a ning a zah tiang ṭhep loin a zoh. Cun Pathian mi cu a ṭap. ¹² Cun Hazael nih a thawh i, "Zeicahdah ka bawipa na ṭah?" tiah a ti. Anih nih, "Zeicahtiah ṭhat lonak Israel mi cungah na tuah ding kha ka hngalh; an ralhau kha mei in na duah hna lai i an tlangval hna cu vainam in na thah hna lai i an ngakchia hna cu na den cikcek hna lai i fa a pawimi an nule hna cu na thler dih hna lai," tiah a ti. ¹³ Cun Hazael nih, "Uico tluk ceo a simi na sal hi zeidah ka si i cu thil lianngan ka tuah hnga cu?" tiah a ti. Elisha nih, "Nangmah cu Siria siangpahrang na si lai kha Bawipa nih a ka hmuhsak cang," tiah a leh. ¹⁴ Cun Elisha sin cun a kal i a bawipa sinah khan a ra i, "Elisha nih zeidah na sinah a chim?" tiah a rak hal. Cun anih nih, "Na dam ṭhan hrimhrim lai, tiah a ka chimh," tiah a leh. ¹⁵ Sihmanhsehlaw a thaizing ah aa khuhmi puan kha a lak i ti ah a hnim i a hmai a khuh i a thi. Cun Hazael cu amah hmun ah khan siangpahrang ah a cang. ¹⁶ Israel siangpahrang Ahab fapa Joram a bawi kum nganak ah khan Judah siangpahrang Jehoshafat fapa Jehoram cu pen hram aa thawk. ¹⁷ Siangpahrang a can ah kum sawm thum le kum hnih a si i Jerusalem ah kum riat a bawi. ¹⁸ Ahab innchungkhar nih an tuah bantuk khan, Israel siangpahrang hna lam kha a zul ve, zeitintiah a nupi cu Ahab fanu kha a si. Cun Bawipa mithmuh i thil ṭhalo kha a tuah. ¹⁹ Sihmanhsehlaw Judah cu Bawipa nih, a sal David ruangah khan, hrawh a duh lo; amah le a tefa hna cu zungzal in meiinn pek awkah bia a rak kam cang hna. ²⁰ Amah chan chungah cun Edom nih Judah uknak kha an doh i anmah siangpahrangte an i chiah ve. ²¹ Khi tikah Joram cu Zair ah a rangleng vialte he an kal, zan ah a tho i amah a kulhtu Edom mi vialte kha amah le a rangleng haotu bawi hna nih cun an tuk hna; sihmanhsehlaw a ralkap cu inn ah an zam. ²² Cucaah Judah uknak kha Edom nih nihin tiangin a doh. Cun Libnah zong cu caan ah cun a rak tho ve. ²³ Joram tuahsernak a tang rihmi le a tuahmi vialte cu, Judah Siangpahrang hna Chanrelnak Cauk chungah an i ṭial lo mei? ²⁴ Cuticun Joram cu a pupa hna sinah a it i a pupa hna sinah David khua chungah an vui; cun a fapa Ahaziah kha amah hmun ah khan a hung bawi. ²⁵ Israel siangpahrang Ahab fapa Joram a bawi kum hleihnihnak ah, Judah siangpahrang Jehoram fapa Ahaziah cu pen hram aa thawk. ²⁶ Pen hram aa thawk ah Ahaziah cu kum kul le kum hnih a si i Jerusalem khua in kum khat a uk. A nu min cu Athaliah a si; amah cu Israel siangpahrang Omri tu a si. ²⁷ Amah zong cu Ahab innchungkhar lam kha a zul ve i amah cu Ahab inn chungkhar tu a si caah Ahab innchungkhar nih an tuah bang khan Bawipa mithmuh i thil ṭhalo kha a tuah. ²⁸ Siria siangpahrang Hazael kha Ramoth-gilead i doh awkah Ahab fapa Joram he an kal i khika ah Siria mi nih Joram cu an hliam. ²⁹ Cun Siria siangpahrang Hazael he an i tuk tikah Siria mi nih Ramah khua ah an hliamnak a hma kha damter awkah, Joram Siangpahrang cu Jezreel ah a kir. Cun amah cu a zawt caah cun, Judah siangpahrang Jehoram i a fapa Ahaziah nih khan Jezreel i a ummi Joram, Ahab fapa cu va zoh awkah a vung kal.

¹ Khi tikah profet Elisha nih profet fapa hna lakin pakhat kha a auh i, "Na taisawm i sawmh law hi chiti thawl hi i put, cun Ramoth-gilead ah va kal. ² Cun khika na phak tikah, Nimshi fapa Jehoshafat i fapa Jehu kha va kawl tuah; cun va lut law a hawile sin khan thawhter law chungchin dal chungah luhpi. ³ Khi tikah chiti thawl kha i lak law a lu ah toih law, ’Hi bangin Bawipa nih, Nangmah cu Israel mi siangpahrang ah chiti kan thuh, a ti,’ tiah va ti. Cun innka kha hung law, zam; bualcam hlah," tiah a ti. ⁴ Cucaah tlangval, profet cu, Ramoth-gilead ah cun a kal. ⁵ Cun a phak tikah, zohhmanh, ralkapbu haotu hna cu an rak i pum; cun anih nih, "Maw ralbawipa, nangmah sinah biacahmi chim awk ka ngei," tiah a ti. Cun Jehu nih, "Aho kanmah hi dah?" tiah a ti. Cun anih nih, "Nangmah sinah, maw ralbawipa," tiah a ti. ⁶ Cucaah a tho i inn chungah a lut; cun tlangval nih cun chiti kha a lu ah a toih i, "Hi bangin Bawipa, Israel Pathian nih, ’Nangmah cu Bawipa mi, Israel mi hna cung i siangpahrang ah chiti kan thuh. ⁷ Cun ka sal profet hna thi le Bawipa sal vialte thi kha Jezebel cungah phu ka hlam naklai na bawipa Ahab i a innchungkhar cu na tuk hna lai. ⁸ Zeitintiah Ahab innchungkhar cu a ningpi in a rawk lai; cun Ahab ta a simi pa paohpaoh cu, Israel ram chung i sal a si ah, a luatmi a si ah, ka hloh dih hna lai. ⁹ Cun Ahab innchungkhar cu Nebat fapa Jeroboam innchungkhar bantuk ah khan le Ahijah fapa Baasha innchungkhar bantuk ah khan ka ser lai. ¹⁰ Cun uico nih Jezebel cu Jezreel ram chungah an ei lai i ahohmanh nih an vui lai lo,’ a ti," tiah a ti. Cun innka kha a hun i a zam. ¹¹ Jehu cu a bawipa sinum hna sin i a hung chuah tikah khan, annih nih amah cu, "A ṭha dih maw? Zeicahdah hi mihrutpa hi na sinah khan a rat?" tiah an ti. Cun anih nih annih cu, "Nannih nih amah cu nan hngalh i a bia zong nan hngalh ko kha ta," tiah a ti hna. ¹² Annih nih, "Mah, cucu ahmaan lo, kan chim ko," tiah an ti. Cun anih nih, "Hitihin a ka ti ko hen cu, ’Bawipa nih hi bangin a ti, Israel mi siangpahrang ah chiti kan thuh,’ ti in," tiah a ti. ¹³ Khi tikah an dihlak in khulrang in puan kha an i lak cio i hleihlak karao ah cun an phahpiak i muko kha an tum i, "Jehu cu siangpahrang a si," tiin an thanh. ¹⁴ Cuticun Nimshi fapa Jehoshafat i fapa Jehu nih cun Joram cu a rawi. (Cu lioah cun Joram cu Israel mi vialte he Siria siangpahrang Hazael kha doh awkah Ramoth-gilead ah an um; ¹⁵ sihmanhsehlaw Siangpahrang Joram cu, Siria siangpahrang Hazael he an i tuknak i Siria mi nih an hliamnak a hma kha damter awkah Jezreel ah khan a kir cang). Cun Jehu nih, "Mah hihi nan lung a si ahcun, ahohmanh hi thawng cu Jezreel khua i va chim awkah hi khua chung hin i zuk hlah u," tiah a ti. ¹⁶ Cun Jehu cu a rangleng kha aa cit i Jezreel ah a kal, zeicahtiah khika ah Joram cu a kuah ko. Cun Judah siangpahrang Ahaziah cu amah zoh awkah khan a rung. ¹⁷ Jezreel khua innsang cung i a dirmi ralveng nih Jehu pawl an rat cu a hmuh thli hna i, "Mibu bu khat ka hmuh," tiah a ti. Cun Joram nih, "Rangcung ralkap pakhat i lak law, anmah ton awkah hei thlah tuah, cun anih nih, ’Daihnak a si maw?’ tiah va ti seh," tiah a ti. ¹⁸ Cucaah rangcung ralkap pakhat cu amah ton awkah khan a va kal i, "Siangpahrang nih, ’Daihnak a si maw?’ a ti," tiah a ti. Cun Jehu nih, "Daihnak kong ah naa thlaknak zeidah a um? I mer law ka hnu khan ka zul ko," tiah a ti. Cun ralvengtu nih khan, "Lamkal nih khan a hei phak cang hna, sihmanhsehlaw a ra kir ṭhan lo," tiah a ti. ¹⁹ Cun rangcung ralkap pahnihnak a hei thlah ṭhan i an sin a phak tikah, "Siangpahrang nih, ’Daihnak a si maw?’ a ti," tiah a ti. Cun Jehu nih, "Daihnak kong ah naa thlaknak zeidah a um? I mer law ka hnu khan ka zul ko," tiah a leh. ²⁰ Cun ralvengtu nih khan, "A va phak ko hna, sihmanhsehlaw a ra kir ṭhan lo. Cun a mawngh ning zong khi choi cukmak in a mawngh caah, Nimshi fapa Jehu mawngh ning a lo," tiah a ti. ²¹ Joram nih, "I tim u," tiah a ti. Cun a rangleng kha an timh. Cun Israel siangpahrang Joram le Judah siangpahrang Ahaziah kha an rangleng veve in an i thawh i Jehu ton awkah khan an kal i Jezreel khuami Naboth dum ah khan an ton. ²² Cun Joram nih Jehu kha a hmuh tikah, "Daihnak a si maw, Jehu?" tiah a ti. Anih nih, "Na nu Jezebel hlawhhlannak le eih hmannak liangluang hi an um rih chungah hin, zei daihnak cu dah a um kho lai?" tiah a ti. ²³ Cun Joram nih a chak a mer i a zam, Ahaziah cu, "Maw Ahaziah, rawinak a um hih," tiah a ti. ²⁴ Cun Jehu nih a li cu a tha a dihumnak in a kuaih i Joram cu a liang le a liang karlak ah a kah i cucaah thal nih cun a lung kha a khen i a rangleng chungah cun a tlu rup ko. ²⁵ Jehu nih a bawmtu ralbawi Bidkar cu, "Hei hlawm law Jezreel khuami Naboth vawlei ah khan hei hlonh; zeitintiah, nangmah le keimah cu a pa Ahab hnulei i artlang in kan i cit lioah khan Bawipa nih hi bia a rak chim kha na cinken ko lai: ²⁶ ’Nizan ah Naboth thisen le a fapa hna thisen ka hmuh hrimhrim bantuk khan, nangmah cu hi hmun ah hin teirul kan cham lai,’ ti in Bawipa nih a ti kha. Cucaah hlawm law kha hmun vawlei ah khan hlonh tuah, Bawipa bia bang khan," tiah a ti. ²⁷ Mah hihi Judah siangpahrang Ahaziah nih a hmuh tikah Beth-haggan lei ah a zam. Cun Jehu nih a dawi i, "Amah zong khi kap u," tiah a ti i Ibleam pawng Gur i hung kainak cho ah khan a rangleng chungah an kah. Cun Megiddo ah a zam i khika ah a thi. ²⁸ A sinum hna nih khan rangleng in Jerusalem ah an kalpi i David khua chungah a pupa hna sinah a thlan ah an vui. ²⁹ Ahab fapa Joram a bawi kum hleikhatnak ah Ahaziah nih Judah ram pen hram aa thawk cu a si. ³⁰ Jehu cu Jezreel i a rat kha Jezebel nih a theih; cun a mit kha zeilo aa thuh i a lu kha aa ṭamh i thlalangawng in khua a hei cuan. ³¹ Cun Jehu cu kutka i a luh ah khin, "Nang Zimri, a bawipa a nawngtupa, daihnak in a si maw?" tiah a ti. ³² Cun thlalangawng lei cu a hun zoh i, "Ahodah keimah leiah a ṭang, ahodah?" tiah a ti. Tilditmi pahnih pathum nih khin an vun zoh. ³³ "Run hlonh u, amah kha," tiah a ti. Cucaah an vun hlonh i a thi nih cun vampang le rang hna kha a peh hna i annih nih an nan len. ³⁴ Cun a lut i a ei a ding i, "Hi chiatserhmi nu hi zohhmanh u, amah cu siangpahrang fanu a si caah va vui u," tiah a ti. ³⁵ Sihmanhsehlaw vui awk i an va kal tikah, a luruh le a ke hna le a zapei hna dah ti lo cu a zeihmanh an hmu ti lo. ³⁶ Cun an ra kir i amah kha an chimh tikah, "Mah hihi Bawipa nih a sal Elijah, Tishbemi sinin a chimmi a bia kha a si, ’Jezreel ram chungah uico nih Jezebel cu a sa an ei lai; ³⁷ cun Jezebel cu Jezreel ram chung lo ah khan ek bantuk a si lai caah, hihi Jezebel a si, tiah ahohmanh nih an ti kho lai lo,’ ti in," tiah a ti.

¹ Ahab nih Samaria ah fapa sawm sarih a ngeih hna. Cucaah Jehu nih ca a ṭial i Samaria khua ah khan, khua uktu hna le upa hna le Ahab fapa hna zohkhenhtu hna kha a kuat hna i, ² "Hi ca hi nan sin a phak cangka tein, nan bawipa fapa hna cu nan sin i an um caah khan le nan sinah rangleng hna le rang hna le kulh mi khua hna zong, cun hriamnam hna kha an um caah, ³ nan bawipa fapa hna lak i a ṭha bik le aa tlak bik kha thim u law a pa bawi ṭhutdan cungah khan ṭhutter u law nan bawipa innchungkhar kha ral dohpiak hna u," tiah a ti. ⁴ Sihmanhsehlaw an ṭih tuk hringhran i, "Zohhmanh, siangpahrang pahnih hna hmanh nih khan an dirh kho lo, kannih chinchin nih zeitindah kan dirh khawh lai?" tiah an ti. ⁵ Cucaah siangpahrang inn a zohkhenhtu le khua a zohkhenhtu hna nih khan upa hna le ngakchia zohkhenhtu hna he tiah Jehu cu bia an cah i, "Kannih cu na sal kan si ko, na kan fialmi paoh cu kan tuah lai. Ahohmanh siangpahrang ah kan ser hna lai lo; nangmah mit ah a ṭha na timi paoh kan cungah tuah ko," tiah an ti. ⁶ Cun ca pahnihnak a kuat hna i, "Nannih cu keimah lei ṭang nan si i ka bia ngaih awk nan i timh ahcun, nan bawipa fapa hna lu kha tan hna u law thaizing atu tikah hin ka sinah Jezreel khua ah ra u," tiah a ti. Siangpahrang fapa cu sawm sarih an si i anmah a cawmtu hna khuachung mingan hna sinah khan an um. ⁷ Cun ca cu an sin a phak tikah, siangpahrang fapa cu an lak hna i an thah hna, mi sawm sarih hna cu; cun an lu cu bawm ah an khumh hna i Jezreel ah cun amah sinah cun an hun kuat hna. ⁸ Lamkaltu kha a rat i "Siangpahrang fapa hna lu cu an rak put cang," tiah a chimh tikah, "Kutka luhnak ah khan bu hnih ah pong hna u law thaizing tiangin um hna seh," tiah a ti. ⁹ Cun a thaizing i a va chuah i a dir tikah, mi vialte sinah cun, "Nannih cu sualnak nan ngei lo. Ka bawipa a rawi i a thattu cu keimah ka si sihmanhsehlaw mah vialte hi aho nih dah an thah hna? ¹⁰ Cucaah Bawipa nih Ahab innchungkhar kong ah a chimmi, Bawipa bia cu, sawhsawh in pakhat hmanh vawlei ah a tla lai lo, ti kha hngal tuah u; zeitintiah Bawipa nih a sal Elijah in a chimmi kha a tuah cang," tiah a ti. ¹¹ Cucaah Ahab tefa Jezreel i a tang rihmi paohpaoh, a mi ngan vialte hna le a hawikom ṭha hna le a tlangbawi hna kha, pakhat hmanh tang loin Jehu nih a thah dih hna. ¹² Cun aa thawh i Samaria ah a kal. Lampi ah tuukhal hna hmun Beth-eked kha a va phak tikah, ¹³ Judah siangpahrang Ahaziah rualchan kha Jehu nih a ton hna i, "Ahodah nan si?" tiah a ti. Annih nih, "Kannih cu Ahaziah rualchan kan si i siangpahrang fapa hna kha le siangpahrang bawinu a nu fapa hna kha va tlawn awkah kan rung," tiah a ti. ¹⁴ Anih nih, "A nung in tlai hna u," tiah a ti i a nung in an tlaih hna i Beth-eked khor ah khan an thah hna, minung sawm li le pahnih, pakhat hmanh a zuah hna lo ¹⁵ Cun khika in a kal tikah, Rekhab fapa Jehonadab kha amah ton awkah a ra; daihnak a pek i, "Na cung i ka lung zumhawktlak a si bantuk hin nang tah ka cungah na si ve maw?" tiah a ti. Cun Jehonadab nih, "Asi," tiah a leh. Jehu nih, "A si ahcun, na kut ka chan tuah," tiah a ti. Cucaah a kut kha a chanh. Cun Jehu nih amah sinah rangleng chungah khan a vun hnuh. ¹⁶ Cun anih nih, "Ka sinah ra law, Bawipa ca i ka ṭanning hi ra zoh tuah," tiah a ti. Cucaah a rangleng ah khan a citter. ¹⁷ Cun Samaria a phak tikah Samaria i Ahab ta a tang rihmi paohpaoh kha, Bawipa nih Elijah sinah a chimmi a bia ningin, a thianh hirhiar hna hlantiang a thah hna. ¹⁸ Khi tikah Jehu nih mi vialte kha a pumh hna i annih cu, "Ahab nih Baal cu tlawmte lawng a rian a ṭuan; sihmanhsehlaw Jehu nih cun tampi in a ṭuan lai. ¹⁹ Cucaah Baal profet vialte le a biatu vialte le a tlangbawi vialte hna kha ka sinah ko hna u; pakhat hmanh bau hna hlah seh, zeitintiah Baal sin i pekchanh awk raithawinak nganpi pakhat ka ngei; a baumi paoh cu an nung lai lo," tiah a ti. Sihmanhsehlaw Jehu nih hlennak in a tuahmi a si, Baal a biami hna hrawhnak caah khan. ²⁰ Cun Jehu nih, "Baal caah pumhnak thiang pakhat tuah u," tiah nawl a pek. Cucaah mah cucu an thanh. ²¹ Cun Jehu nih Israel ram chung dihlak ah bia a cah hna i Baal a biami vialte cu an ra dih, pakhat hmanh a ra lomi an um lo. Cun Baal inn chungah khan an lut i Baal inn cu khattelei kam in khattelei kam tiang an khat dih. ²² Cun hnipuan chiahnak a zohkhenhtu sinah khan, "Thilpuan kha Baal biatu vialte hna caah hin rak chuah hna," tiah a ti. Cucaah thilpuan cu a chuahpiak hna. ²³ Cun Jehu cu Rekhab fapa Jehonadab he khan Baal inn chungah cun an lut i Baal a biami hna cu, "Nan lakah hin Bawipa a biami pakhat hmanh an um nakhnga lo kawl hna u, Baal a biami lawnglawng um hna seh," tiah a ti. ²⁴ Cun raithawinak le khangh thawinak pekchanh awkah khan a vung lut. Cun Jehu nih mi sawm riat cu lengah khan a chiah hna i, "Hi mi nan kut chung i kan pekmi hna lak hin pakhat hmanh a luattertu cu nan nunnak nan sung lai," tiah a ti hna. ²⁵ Cucaah khangh thawinak pekchanh kha a lim cangka in, Jehu nih ralvengtu hna le an bawi hna cu, "Lut u law, that hna u; pakhat hmanh luatter hna hlah u," tiah a ti. Cucaah vainam in an sam hna i ralvengtu hna le an bawi hna nih khan lengah an hlonh hna i Baal inn chungchin dal ah khan an lut i ²⁶ Baal inn chung i a ummi tungphun kha an chuah i an khangh. ²⁷ Cun Baal tungphun kha an hrawh cikcek i Baal inn kha an hrawh cikcek i zunput ah an ser i nihin ni tiangin a si lan. ²⁸ Cuticun Jehu nih Baal cu Israel ram chungin a thianh. ²⁹ Sihmanhsehlaw Nebat fapa Jeroboam nih Israel mi a rak sualter hnanak, sui cawfa Bethel i a ummi kha le Dan i a ummi hna kha a pialtak hna lo. ³⁰ Cun Bawipa nih Jehu cu, "Ka mithmuh ah a dikmi kha ṭha tein na tuah i ka lung chungah a umning dihlak in Ahab innchungkhar cungah na tuah caah, na fapa hna cu chan li tiangin Israel bawi ṭhutdan cungah an ṭhu lai," tiah a ti. ³¹ Sihmanhsehlaw Jehu cu Bawipa, Israel Pathian nawlbia kha a lungthin a dihumnak in zulh awkah aa ralring lo; Jeroboam nih Israel mi a sualternak hna a sualnak kha a pialtak hna lo. ³² Khi caan ah khan Bawipa nih Israel ram a cheu kha thianh hram a thawk. Hazael nih Israel ram chungah a tei thluahmah hna: ³³ Jordan in nichuahlei ah, Gilead ram vialte, Gad mi hna le Reuben mi hna le Manasseh mi hna ram, Arnon nelrawn pawng i a ummi Aroer thawk in, Gilead le Bashan tiang. ³⁴ Jehu tuahsernak a tang rihmi hna le a tuahmi vialte le a ṭhawnnak vialte cu, Israel Siangpahrang hna Chanrelnak Cauk chungah an i ṭial lo mei? ³⁵ Cuticun Jehu cu a pupa hna sinah a it i Samaria ah an vui. Cun Jehoahaz fapa cu amah hmun ah khan a hung bawi. ³⁶ Jehu nih Israel mi Samaria in a pen hna chung cu kum kul le kum riat a si.

¹ Ahaziah nu Athaliah nih a fapa a thih kha a hngalh tikah, a tho i siangpahrang innchungkhar vialte kha a thah hna. ² Sihmanhsehlaw siangpahrang Joram fanu Jehosheba, Ahaziah far nih khan Ahaziah fapa Joash cu a lak i thah awk i ruahmi siangpahrang fapa hna lak khan a thli tein a kalpi i amah le a cawngtunu cu ihnak dal chungah a chiah hna. Cuticun Athaliah sin khan a thuh i cucaah anih cu an that lo; ³ cun anih cu amah sinah khan, Athaliah nih ram a uk chung kum ruk chung cu Bawipa inn chungah khan aa thup. ⁴ Sihmanhsehlaw a kum sarihnak ah tlangbawi Jehoiada nih khan Karet mi haotu le ralvengtu hna haotu hna kha a cah hna i amah sinah Bawipa inn ah khan a ratter hna; cun annih he biakamnak a ser i Bawipa inn chungah cun chiat a serter hna i annih cu siangpahrang fapa kha a hmuhsak hna. ⁵ Cun nawl a pek hna i, "Mah hihi nan tuah awk cu a si lai; nannih lak i cheu thum cheu khat, sabbath ni ah rian a lawng i siangpahrang inn a cawngtu nih khan, siangpahrang inn cu nan cawngh lai, ⁶ a dang cheu thum cheu khat cu Sur kutka ah nan um lai i a dang cheuh thum cheu khat cu ralvengtu hna hnulei i kutka ah khan nan um lai; ⁷ cun nannih phu hnih, sabbath ni ah rian a ngei i Bawipa inn a cawngtu nih khan, ⁸ siangpahrang cu nan kulh lai, nan hriamnam kha nan i put cio lai; cun a kulhtu ralkap a hun naihmi hna paoh cu thah an si lai. Siangpahrang cu a chuah le a luh ah nan zulh lengmang lai," tiah a ti. ⁹ Tlangbawi Jehoiada nih nawl a pek hna ningte khan ralkapbu haotu nih cun an tuah i sabbath ah rian a lawng hnga ding an mi hna cu sabbath i rian a ngei ding an mi hna he khan an ratpi hna i tlangbawi Jehoiada sinah khan an ra. ¹⁰ Cun tlangbawi nih khan David Siangpahrang ta a rak si i Bawipa inn chungah a ummi fei hna le phaw hna kha ralkapbu haotu hna cu a pek hna; ¹¹ cun ralvengtu hna cu an hriamnam kha i put cio ah, inn thlanglei kam thawk in chaklei kam tiang, biakṭheng le inn cu a velchum in, an dir. ¹² Cun siangpahrang fapa kha a hun chuahpi i bawi luchin a chinh i hngalhternak bia kha a pek; cun annih nih siangpahrang ah an ser i chiti an thuh; an kut kha an bengh i, "Siangpahrang cu saupi nung ko seh!" an ti. ¹³ Athaliah nih ralvengtu hna thawng le mi thawng kha a theih tikah, Bawipa inn chungah khan, mi sinah khan a vung lut; ¹⁴ cun a hei zoh tikah, a phung ningin siangpahrang cu tungpi hram i a dir i siangpahrang pawng i ralkapbu haotu hna le muko tumtu hna an um i cu rammi vialte an lung aa lawmh i muko an tum kha a hmuh. Cun Athaliah nih cun a puan kha a thleh hna i, "Rawinak a si! rawinak a si!" tiah a au. ¹⁵ Cun tlangbawi Jehoiada nih ralkapbu cung i chiahmi ralkapbu haotu hna kha, "Amah kha zapi lak khan hun chuah u, cun amah a zulmi paoh cu vainam in that hna u," tiah nawl a pek hna. Zeitintiah tlangbawi nih cun, "Bawipa inn chungah cun thah si hlah seh," tiah a ti. ¹⁶ Cucaah amah cu an tlaih; siangpahrang inn ah cun an kalpi i Rang Kutka ah khan an thah. ¹⁷ Cun Jehoiada nih Bawipa le siangpahrang le mi zapi karlak ah cun, annih cu Bawipa mi an si nakhnga biakamnak a ser i siangpahrang le mizapi karlak zongah khan a ser fawn. ¹⁸ Cun rammi vialte cu Baal inn ah khan an va kal i an ṭheh i a biakṭheng hna le a siasal hna cu an den cikcek hna i biakṭheng hna hmaiah cun Baal tlangbawi Mattan kha an thah. Cun tlangbawi nih khan Bawipa inn vengtu kha a chiah hna. ¹⁹ Cun ralkapbu haotu hna le Karet mi hna le, ralvengtu hna le, rammi vialte kha a kalpi hna i siangpahrang cu Bawipa inn khan an runpi i ralvengtu hna kutka in siangpahrang inn ah an kalpi. Cun siangpahrang hna bawi ṭhutdan cungah khan a ṭhu. ²⁰ Cucaah rammi vialte cu an lung a lawm; cun Athaliah cu vainam in siangpahrang inn i an thah hnuah khan, khua cu a dai. ²¹ Joash cu pennak hram aa thawk tikah kum sarih a si.

¹ Jehu a bawi kum sarihnak ah Joash cu bawi hram aa thawk i Jerusalem in kum sawm li a uk. A nu min cu Zibiah a si, Beersheba khuami a si. ² Tlangbawi Jehoiada nih a cawnpiak caah Joash nih a chan chung vialte Bawipa mithmuh i a dikmi kha a tuah. ³ Asinain khuahrum bo hna kha an hrawk hna lo i khuahrum bo ah cun mi nih rai an thawi i zihmui an khangh ṭheo ko. ⁴ Joash nih tlangbawi kha a thawh hna i, "Bawipa inn chungah rak putmi thil thiang man tangka vialte, ahohmanh cu zat cio na thawh awk a si tiin tuahpiakmi — cu zat cu nang na thawh awk a si ti i tuakpiak ciomi tangka — le lungtho tein Bawipa inn chungah ratpimi tangka kha, ⁵ tlangbawi nih anmah le an hngalhtheihmi hna cio sin khan la hna seh; cun inn kha remh awk a herhnak zawn paoh remh hna seh," tiah a ti. ⁶ Sihmanhsehlaw Joash siangpahrang a bawi kum kul le kum thumnak tiangah tlangbawi nih inn kha khuazeihmanh an remh rih lo. ⁷ Cucaah Joash Siangpahrang nih tlangbawi Jehoiada le tlangbawi dang kha a kawh hna i, "Zeicahdah inn kha nan remh hlei lo? Cucaah atu cu nan hawikom sinin tangka la ti hlah u, sihmanhsehlaw inn remhnak ah khan pe u," tiah a ti hna. ⁸ Cucaah tlangbawi hna nih khan mi sinin tangka lak ti loin annih nih inn kha remh lo cu an hna a tla. ⁹ Khi tikah tlangbawi Jehoiada nih thingkuang pakhat a lak i a chin ah awng pakhat a vih i biakṭheng pawngah khan, Bawipa inn chung i vung luh tikah orhlei kamah khan a chiah; cun innleng a cawngtu tlangbawi hna nih khan Bawipa inn chung i rak putmi tangka vialte cu, cu chungah cun an sanh dih. ¹⁰ Cun thingkuang chungah tangka tampi a um ti an hngalh fate, siangpahrang Caṭialtu le tlangbawi ngan kha an hung i Bawipa inn chungah an hmuhmi tangka cu an rel i sawngkhoi in an beo hna. ¹¹ Cun thlai ciami tangka cu Bawipa inn a zohkhenhtu rianṭuantu hna kut chungah cun an pek hna; cun annih nih Bawipa inn i rian a ṭuanmi lehtama le inn satu hna kha le ¹² lung remhtu hna le lung tantu hna kha an pek hna i Bawipa inn remhnak ding ca i thingah le khoihmi lung cawknak le inn remhnak ca i a herhmi paohpaoh ah khan an hman. ¹³ Sihmanhsehlaw Bawipa inn caah cun ngun hmaihum le mei hmihnak le khengkuar le muko le sui umkheng paohpaoh le ngun umkheng paohpaoh cu, Bawipa inn chungah rak putmi tangka in ser a um lo, ¹⁴ zeicahtiah mah tangka cu Bawipa inn a remhtu rianṭuantu hna kha pek an si. ¹⁵ Rianṭuantu hna pek awkah an kut chungah tangka an pekmi hna cu zeitindah tangka kha nan hman tinak an hal ṭhan ti hna lo, zeicahtiah annih nih lihchim lo tein an tuah. ¹⁶ Phungbuar thawinak tangka le sual thawinak tangka cu Bawipa inn chungah an luhpi hna lo; tlangbawi hna ta a si. ¹⁷ Khi caan ah khan Siria siangpahrang Hazael cu a hung kal i Gath kha a tuk i a lak. Sihmanhsehlaw Jerusalem doh awk i hung kal aa timh tikah khan, ¹⁸ Judah siangpahrang Joash nih a pupa Judah siangpahrang hna Jehoshafat le Jehoram le Ahaziah nih an rak pekchanhmi biakam thawinak vialte le amah biakam thawinak le Bawipa inn chung le siangpahrang inn rokuang chung i a ummi sui vialte kha a lak hna i Siria siangpahrang Hazael kha a kuat hna. Khi tikah Hazael nih Jerusalem cu a kaltak ṭhan. ¹⁹ Joash tuahsernak a taang rihmi le a tuahmi vialte cu Judah siangpahrang hna Chanrelnak Cauk chungah an i ṭial lo mei? ²⁰ A sinum hna kha an tho i an rawi i Silla i vung kalnak lam i a ummi Millo inn ah khan Joash cu an thah. ²¹ Amah kha a tu i a thattu hna cu a sinum Shimeath fapa Jozakar le Shomer fapa Jehozabad an si. David khua chungah a pupa hna sinah an vui i a fapa Amaziah cu amah hmun ah khan bawi a cang.

¹ Judah siangpahrang Ahaziah fapa Joash a bawi kum kul le kum thumnak ah Jehu fapa Jehoahaz nih Israel ram cu Samaria in pen hram aa thawk i kum hleisarih a pen. ² Bawipa mithmuh i thil ṭhalo kha a tuah i Nebat fapa Jeroboam nih Israel mi a sualternak hna a sualnak kha a zulh hna i a kaltak hna lo. ³ Cun Bawipa thinhunnak cu Israel cungah a alh i Siria siangpahrang Hazael le Hazael fapa Benhadad hna kut chungah khan annih cu a pek lengmang hna. ⁴ Khi tikah Jehoahaz nih Bawipa kha a nawl i, Israel mi an temhinnak, zeitindah Siria siangpahrang nih a hrem hna kha a hmuh caah, a bia kha a theihpiak. ⁵ (Cucaah Bawipa nih Israel mi cu khamhtu a pek hna i Siria mi hna kut chung khan an luat i hlanlio bantuk khan Israel mi cu an inn ah khua an sa. ⁶ Sihmanhsehlaw Jeroboam nih Israel mi a sualternak hna Jeroboam innchungkhar sualnak kha an kaltak hna lo i an zulh hna; cun Asherah zong kha Samaria khua ah a um ko). ⁷ Zeitintiah Jehoahaz ralkap hna cu rangcung ralkap sawm nga le rangleng pahra le ke ralkap sang khat nak tam an tang ti lo; zeicahtiah Siria siangpahrang nih a hrawh hna i rawl cil tik i leidip bantuk ah khin a ser hna. ⁸ Jehoahaz tuahsernak a tang rihmi le a tuahmi vialte le a ṭhawnnak hna cu Israel Siangpahrang hna Chanrelnak Cauk chungah an i ṭial lo mei? ⁹ Cuticun Jehoahaz cu a pupa hna sinah a it i Samaria khua ah an vui; cun a fapa Jehoash cu amah hmun ah khan a hung bawi. ¹⁰ Judah siangpahrang Joash a bawi kum sawm thum le kum sarihnak ah Jehoahaz fapa Jehoash cu Israel kha Samaria khua in pen hram aa thawk i kum hleiruk a pen hna. ¹¹ Amah zong nih Bawipa mithmuh i thil ṭhalo kha a tuah ve; Nebat fapa Jeroboam nih Israel mi a sualternak hna a sualnak vialte kha a kaltak hna lo, sihmanhsehlaw a zulh lehlam hna. ¹² Jehoash tuahsernak a taang rihmi le a tuahmi vialte le Judah siangpahrang Amaziah a doh i a ṭhawnnak vialte kha, Israel Siangpahrang hna Chanrelnak Cauk chungah an i ṭial lo mei? ¹³ Cuticun Jehoash cu a pupa hna sinah a it i a bawi ṭhutdan cungah khan Jeroboam a ṭhu; cun Jehoash cu Samaria khua ah Israel siangpahrang hna sinah khan an vui. ¹⁴ Elisha cu a thihpi hnga ding zawtnak in a zawt tikah, Israel siangpahrang Jehoash cu a vung kal i a hmaiah a ṭap i, "Ka pa, ka pa! Israel mi rangleng hna le rangcung ralkap hna khing!" tiah a ti. ¹⁵ Cun Elisha nih amah cu a thawh i, "Li le cantiang i lak hna," tiah a ti; cucaah li le cantiang cu aa lak hna. ¹⁶ Cun Israel siangpahrang cu, "Li kha kuai tuah," tiah a ti i a kuaih. Cun Elisha nih siangpahrang kut cungah cun a kut a chiah hna. ¹⁷ Cun aa thawh i, "Nichuahlei thlalangawng kha hung," tiah a ti i a hun. Cun Elisha nih, "Kap tuah," tiah a ti i a kah. Cun a thawh i, "Bawipa teinak cantiang, Siria teinak ding cantiang! Zeitintiah Siria mi cu Afek ah an dongh cikcek tiangin na tei hna lai," tiah a ti. ¹⁸ Cun a thawh i, "Cantiang kha la hna," tiah a ti i a lak hna. Cun Israel siangpahrang cu, "Cantiang cun vawlei kha tu hna," tiah a ti i voi thum a tuk i a ngol. ¹⁹ Cun Pathian mi cu a cungah a thin a hung i, "Voi nga, voi ruk in pei na tuk awk a si cu, cu ti na tuah ahcun Siria mi cu an dongh cikcek hlantiang na tei hna hnga, sihmanhsehlaw atu cu Siria mi kha voi thum tiang lawng na tei hna lai," tiah a ti. ²⁰ Cuticun Elisha cu a thi i an vui. Moab mi bu hna nih ṭhal caan ah hin ram cu an hung chim tawn. ²¹ Cun mipa pakhat an vui lioah khan ramhtu pawl bu khat cu an hmuh hna i mipa cu Elisha thlan chungah an thlak; cun mipa nih Elisha ruh a vun tawngh cangka hna cun a nung ṭhan i a ke in a dir. ²² Siria siangpahrang Hazael nih Jehoahaz chan chung vialte cu Israel mi kha a hrem hna. ²³ Sihmanhsehlaw Bawipa cu an cungah vel a ngei i a zaangfah hna i Abraham, Isak le Jakob sin i a biakamnak ruangah khan anmah leiah aa mer i a hrawk hna lo; a hmaika zongin atu tiangin a hlonh hna lo. ²⁴ Siria siangpahrang Hazael cu a thih tikah a fapa Benhadad cu amah hmun ah khan siangpahrang ah a cang. ²⁵ Cun Jehoahaz fapa Jehoash nih khan Hazael fapa Benhadad sin khan, a pa Jehoahaz sinin Hazael nih ral lio i a rak lakmi khua kha a lak ṭhan hna. Jehoash nih amah cu voi thum a tei i Israel khua kha a lak ṭhan hna.

¹ Israel siangpahrang Joahaz fapa Jehoash a bawi kum hnihnak ah, Judah siangpahrang Joash fapa Amaziah cu pen hram aa thawk. ² Pen hram aa thawk ah kum kul le kum nga a si i Jerusalem in kum kul le kum kua a uk. A nu min cu Jehoaddin a si, Jerusalem khuami a si. ³ Bawipa mithmuh ah a dikmi kha a tuah, asinain a pu David bantuk ngaingai kha cu a si lo; zeizong vialte a tuahnak ah khan a pa Joash nih a tuah bantuk khan a tuah. ⁴ Sihmanhsehlaw khuahrum bo kha a hrawk hna lo i khua hrum bo ah cun mi nih rai an thawi i zihmui kha an khangh ṭheo ko rih. ⁵ Cun siangpahrang nawlngeihnak kha a kut chungah fek tein a um cangka, a sinum hna, a pa siangpahrang a rak thattu kha a thah hna. ⁶ Sihmanhsehlaw Moses phungbia cauk ah, "Pale hna cu fale can ah thah an si lai lo i fale hna zong pale can ah thah an si lai lo, sihmanhsehlaw mah le sualnak ruang cio ah thah an si lai," tiah Bawipa nawlbia pekmi aa ṭial bantuk khan, lainawngtu hna an fale cu a that hna lo. ⁷ Cite Nelrawn ah Edom mi thong hra a thah hna i Sela cu hlauhsaphak in a lak, cun Jokthe-el tiah min a sak i cu cu nihin tiang hin a min a si lan. ⁸ Cun Amaziah nih Israel siangpahrang, Jehu fapa Jehoahaz i fapa Jehoash sinah khan lamkal a hei thlah hna i, "Ra tuah, pakhat le pakhat hmaitonh tein i zoh tuah u sih," tiah a ti. ⁹ Cun Israel siangpahrang Jehoash nih cun Judah siangpahrang Amaziah cu bia a leh i, "Lebanon tlang i a ummi hlingkung nih Lebanon tlang i a ummi sidar thingkung sinah bia a cah i, ’Na fanu cu ka fapa nupi caah ka pe tuah,’ tiah a ti; cun Lebanon i ram sa pakhat cu a ra i hlingkung cu a lamh i a nan. ¹⁰ Edom cu na tei taktak ko i na hnar a puar hi ta. Sunparnak na hmuhmi cu i za ko law inn ah um ko; zeicahtiah zeicahdah nangmah tluknak dingah le nangmah sinah Judah zong tlukter dingin hnahnawhnak kha na chuahter lai?" a ti. ¹¹ Sihmanhsehlaw Amaziah nih a ngai duh lo. Cucaah Israel siangpahrang Jehoash cu a hung kal i Judah ta a simi Beth-shemesh khua ah cun Judah siangpahrang Amaziah he khan pakhat le pakhat hmaitonh in an i do. ¹² Cun Judah cu Israel nih a tei i an inn cio ah an zam dih. ¹³ Cun Beth-shemesh ah cun Israel siangpahrang Jehoash nih khan Judah siangpahrang Amaziah cu a tlaih, amah cu Joash fapa a si, Joash cu Ahaziah fapa a si. Cun Jerusalem ah a ra i ralhau kha Efraim Kutka in Kulhnak Kil Kutka tiang dong zali a chimh. ¹⁴ Cun Bawipa inn chungah a ummi le siangpahrang inn rokuang chungah a ummi sui le ngun vialte le umkheng vialte kha a lak hna i hreng i a tang dingmi zong kha a tlaih hna; cun Samaria khua ah a kir. ¹⁵ Jehoash tuahsernak a tang rihmi le a ṭhawnnak le zeitindah Judah siangpahrang Amaziah he an i tuknak kha, Israel Siangpahrang hna Chanrelnak Cauk chungah an i ṭial lo mei? ¹⁶ Cun Jehoash cu a pupa hna sinah a it i Israel siangpahrang hna sinah khan Samaria khua ah an vui; cun a fapa Jeroboam cu amah hmun ah khan bawi a hung cang. ¹⁷ Judah siangpahrang Joash fapa Amaziah cu, Israel siangpahrang Jehoahaz fapa Jehoash thih hnuah kum hleinga a nung. ¹⁸ Amaziah tuahsernak a tang rihmi hna cu Judah Siangpahrang hna Chanrelnak Cauk chungah an i ṭial lo mei? ¹⁹ Cun amah rawinak ding kha Jerusalem ah an tuah i Lakhish ah a zam. Sihmanhsehlaw Lakhish ah cun mi an hei dawiter hna i khika ah khan an thah. ²⁰ Cun rang in an tlunpi i Jerusalem khua chungah a pupa hna sinah khan David khua chungah an vui. ²¹ Cun Judah mi vialte nih kum hleiruk a timi Azariah kha an lak i a pa Amaziah hmun ah khan siangpahrang ah an ser. ²² Siangpahrang kha a pupa hna sinah a ih hnuah Elath khua kha a ser i Judah ram chungah a chiah ṭhan. ²³ Judah siangpahrang Joash i a fapa Amaziah a bawi kum hleinganak ah, Israel siangpahrang Jehoash i fapa Jeroboam cu Samaria khua ah bawi hram a thawk i kum sawm li le kum khat a pen hna. ²⁴ Cun amah nih Bawipa mithmuh i thil ṭhalo kha a tuah; Nebat fapa Jeroboam nih Israel mi a sualter hnanak a sualnak vialte kha a kaltak hna lo. ²⁵ Amah nih Israel ramri cu Hamath khua luhnak khan Arabah Rili tiang a siter ṭhan; mah cucu Bawipa, Israel Pathian nih a sal profet Jonah sinin a rak chimmi ning khan a si; Jonah cu Gath-hefer khuami Amittai fapa a si. ²⁶ Zeitintiah Israel mi nih hremnak an inmi cu a fak ngaingai ti kha a hmuh, zeitintiah ahohmanh an tang ti lo, sal si hna seh, miluat si hna seh, Israel bawmtu dingah pakhat hmanh an tang ti lo. ²⁷ Sihmanhsehlaw Bawipa nih Israel min cu vanrang toi hin ka hloh lai, a ti lo, cucaah Joash fapa Jeroboam kut in a khamh hna. ²⁸ Jeroboam tuahsernak a tang rihmi le a tuahmi vialte le a ṭhawnnak, zeitindah ral a doh i Israel caah Judah ta a rak simi Damaskas le Hamath a lak ṭhannak hna kha, Israel Siangpahrang hna Chanrelnak Cauk chungah an i ṭial lo mei? ²⁹ Cun Jeroboam cu Israel siangpahrang hna, a pupa hna sinah a it i a fapa Zekhariah cu amah hmun ah cun a hung bawi.

¹ Israel siangpahrang Jeroboam a bawi kum kul le kum sarihnak ah Judah siangpahrang Amaziah fapa Azariah cu bawi hram aa thawk. ² Pen hram aa thawh tikah kum hleiruk a si i Jerusalem khua in kum sawm nga le kum hnih a pen hna. A nu min cu Jekoliah a si, Jerusalem khuami a si. ³ A pa Amaziah nih a rak tuahmi vialte ning khan amah nih Bawipa mithmuh i a dikmi thil kha a tuah. ⁴ Sihmanhsehlaw khuahrum bo hna kha cu an hrawk hna lo i mi nih khuahrum bo hna ah khan rai an thawi i zihmui an khangh ṭhiamṭhiam ko. ⁵ Bawipa nih siangpahrang cu a tuk i cucaah cun a thih ni tiangin mithinghmui a si i inn dangte ah a um. Cun siangpahrang fapa Jotham nih khan innchungkhar cu a zohkhenh i rammi kha a uk hna. ⁶ Azariah tuahsernak a tang rihmi hna le a tuahmi vialte hna cu, Judah Siangpahrang hna Chanrelnak Cauk chungah an i ṭial lo mei? ⁷ Cun Azariah cu a pupa hna sinah a it i David khua chungah a pupa hna sinah an vui, cun a fapa Jotham cu amah hmun ah khan a hung bawi. ⁸ Judah siangpahrang Azariah a bawi kum sawm thum le kum riatnak ah Jeroboam fapa Zekhariah nih Israel cu Samaria in thla ruk a pen. ⁹ A pupa hna nih an rak tuah bang khan amah nih Pathian mithmuh ah thil ṭhalo kha a tuah. Nebat fapa Jeroboam nih Israel mi a sualternak hna sualnak kha a kaltak lo. ¹⁰ Jabesh fapa Shallum nih a rawi i Ibleam ah a tuk i a thah i amah hmun ah cun bawi ah a cang. ¹¹ Cun Zekhariah tuahsernak a tang rihmi cu, zohhmanh, Israel Siangpahrang hna Chanrelnak Cauk chungah an i ṭial. ¹² (Mah hihi Bawipa nih Jehu sinah biakamnak a pekmi cu a si, "Na fapa hna cu Israel bawi ṭhutdan cungah chan li tiang an ṭhu lai," tiin. Cu bang cun a si taktak.) ¹³ Jabesh fapa Shallum cu Judah siangpahrang Uzziah a bawi kum sawm thum le kum kua kum ah pennak a hram a thawk i Samaria ah thla khat a bawi. ¹⁴ Khi tikah Gadi fapa Menahem cu Tirzah khua in a hung i Samaria ah a phan i Jabesh fapa Shallum kha Samaria ah a tuk i a thah i amah hmun ah khan bawi ah a cang. ¹⁵ Shallum tuahsernak a taang rihmi hna le rawinak a tuahnak cu, zohhmanh, Israel Siangpahrang hna Chanrelnak Cauk chungah an i ṭial. ¹⁶ Khi caan ah khan Menahem nih Tappuah khua kha a tei i a chung i a ummi vialte le a ram chung Tirzah khua thawk in a ummi vialte kha a hrawh hna; annih nih khua chung luh kha an onh duh lo caah cun a hrawh; cun a chung i a ummi nu fapawi kha a thler dih hna. ¹⁷ Judah siangpahrang Azariah a bawi kum sawm thum le kum kuanak ah Gadi fapa Menahem nih Israel cu pen hram a thawk i Samaria in kum hra a pen. ¹⁸ Cun amah nih Bawipa mithmuh i thil ṭhalo kha a tuah. Nebat fapa Jeroboam nih Israel mi a sualter hnanak sualnak vialte kha a kaltak lo. ¹⁹ Assiria siangpahrang Pul nih an ram cu a hung doh i Menahem nih cun, siangpahrang ṭhawnnak aa tlaihmi kha a feh khawh nakhnga, Pul cu ngun talen thong khat a pek. ²⁰ Menahem nih tangka cu Israel mi kha a kholh hna, Assiria siangpahrang pek awkah cun, an mirum vialte kha ngun shekel sawm nga cio a kholh hna. Cucaah Assiria siangpahrang cu aa let ṭhan i ram chungah khan a um lo. ²¹ Menahem tuahsernak a tang rihmi hna le a tuahmi vialte hna cu, Israel Siangpahrang hna Chanrelnak Cauk chungah an i ṭial lo mei? ²² Cun Menahem cu a pupa hna sinah a it i a fapa Pekahiah cu amah hmun ah khan a hung bawi. ²³ Judah siangpahrang Azariah a bawi kum sawm nganak ah Menahem fapa Pekahiah nih Israel cu Samaria khua in pen hram a thawk i kum hnih a uk. ²⁴ Amah nih Bawipa mithmuh i ṭhat lonak kha a tuah; Nebat fapa Jeroboam nih Israel mi a sualter hnanak sualnak vialte kha a kaltak lo. ²⁵ Cun a ralbawi Pekah, Remaliah fapa nih khan Gilead mi sawm nga he amah cu an rawi i Samaria khua chungah khan, siangpahrang inn chung ralhruang chin chungah an thah; i amah hmun ah khan a bawi. ²⁶ Pekahiah tuahsernak a tang rihmi le a tuahmi vialte kha, zohhmanh, Israel Siangpahrang hna Chanrelnak Cauk chungah an i ṭial. ²⁷ Judah siangpahrang Azariah a bawi kum sawm nga le kum hnihnak ah Remaliah fapa Pekah nih Israel cu Samaria in uk hram a thawk i kum kul a pen. ²⁸ Amah nih Bawipa mithmuh i thil ṭhalo kha a tuah; Nebat fapa Jeroboam nih Israel mi a sualter hnanak a sualnak kha a kaltak hna lo. ²⁹ Israel siangpahrang Pekah chan ah khan Assiria siangpahrang Tiglath-pileser kha a ra i Ijon, Abel-besh maakah, Janoah, Kedesh, Hazor, Gilead le Galilee, Naftali ram vialte kha a lak; cun mi hna cu sal ah Assiria ram ah a kalpi hna. ³⁰ Cun Elah fapa Hoshea nih Remaliah fapa Pekah cu a rawi i a tuk i a thah i Uzziah fapa Jotham a bawi kum kulnak ah khan, amah hmun ah cun bawi a cang. ³¹ Pekah tuahsernak a tang rihmi le a tuahmi vialte cu zohhmanh, Israel Siangpahrang hna Chanrelnak Cauk chungah an i ṭial. ³² Israel siangpahrang Remaliah fapa Pekah a bawi kum hnihnak ah, Judah siangpahrang Uzziah fapa Jotham cu pennak hram aa thawk. ³³ Amah cu pennak hram aa thawk tikah kum kul le kum nga a si i Jerusalem in kum hleiruk a bawi. A nu min cu Jerusha a si, Zadok fanu a si. ³⁴ A pa Uzziah nih a tuah bantuk khan, amah nih Bawipa hmaiah a dikmi thil kha a tuah. ³⁵ Asinain khuahrumbo cu an hrawk hna lo i mi nih khan khuahrumbo ah cun rai an thawi i zihmui an khangh ṭhiamṭhiam ko. Amah nih Bawipa inn cunglei kutka kha a ser. ³⁶ Jotham tuahsernak a tang rihmi le a tuahmi vialte cu, Judah Siangpahrang hna Chanrelnak Cauk chungah an i ṭial lo mei? ³⁷ Khi caan ah khan Bawipa nih Siria siangpahrang Rezin le Remaliah fapa Pekah kha Judah ram doh awkah thlah hram a thawk hna. ³⁸ Jotham cu a pupa hna sinah a it i a pu David khua chungah a pupa hna sinah an vui; cun a fapa Ahaz kha amah hmun ah cun bawi a hung cang.

¹ Remaliah fapa Pekah a bawi kum hleisarihnak ah, Judah siangpahrang Jotham fapa Ahaz cu bawi hram aa thawk. ² Pen hram aa thawk tikah Ahaz cu kum kul a si i Jerusalem in kum hleiruk a pen hna. A pu David nih a rak tuah bangkhan, Bawipa a Pathian mithmuh ah a dikmi thil a tuah lo, ³ sihmanhsehlaw Israel siangpahrang hna lam kha a zul ve. Israel mi hna hmai in Bawipa nih a rak dawimi hna miphun nih thil fihnung an rak tuah bantuk khan, amah nih cun a fapa hmanh kha raithawi-nak caah a khangh. ⁴ Khuahrumbo ah khan le tlang le a hringmi thingkung kip toiah khan raithawinak a tuah hna i zihmui kha a khangh hna. ⁵ Khi tikah Siria siangpahrang Rezin le Israel siangpahrang Remaliah fapa Pekah nih Jerusalem kha doh awkah an ra, Ahaz cu an dum, sihmanhsehlaw an tei kho lo. ⁶ Khi caan ah khan Edom siangpahrang nih Edom caah Elath kha a lak ṭhan i Judah mi kha Elath cun a dawi hna; cun Edom mi cu Elath ah khan an ra i nihin ni tiangin khika ah khan an um. ⁷ Cucaah Ahaz nih Assiria siangpahrang Tiglath-pileser sinah khan lamkal a hei thlah hna i, "Keimah cu na sal le na fapa ka si. A ka tutu siangpahrang le Israel siangpahrang kut chung hin, hung law ra ka chanh tuah," tiah a ti. ⁸ Bawipa innchung le siangpahrang inn rokuang chung i a ummi sui le ngun zong kha a lak hna i Assiria siangpahrang cu laksawng ah a kuat. ⁹ Cun Assiria siangpahrang nih a bia a rak ngaihpiak; Assiria siangpahrang nih Damaskas kha a hun kalhnawh i a lak i a mi kha Kir ah a kalpi hna i Rezin kha a thah. ¹⁰ Ahaz siangpahrang cu Assiria siangpahrang Tiglath-pileser kha va ton awkah Damaskas khua i a kal tikah, Damaskas khua i a ummi biakṭheng kha a hmuh. Cun Ahaz Siangpahrang nih tlangbawi Urijah cu biakṭheng pungsan le a tuah ningcang le a cingcuai kha tling tein a kuat. ¹¹ Cun tlangbawi Urijah nih biakṭheng kha a ser; Siangpahrang Ahaz nih Damaskas khua in a kuatning te khan, Siangpahrang Ahaz cu Damaskas khua in a ra phak hlanah, Urijah tlangbawi nih a rak ser dih. ¹² Cun siangpahrang cu Damaskas khua in a ra phanh tikah, siangpahrang nih biakṭheng cu a zoh. Khi tikah siangpahrang nih biakṭheng cu a hei naih i a cungah a kai i, ¹³ biakṭheng cungah cun a khangh thawinak le changvut thawinak kha a khangh hna i a thlet thawinak kha a bungh i a daihnak thawinak thi kha biakṭheng cungah cun a theh. ¹⁴ Cun Bawipa hmai i a ummi dar biakṭheng kha inn hmailei, amah a biakṭheng le Bawipa inn karlak, khan a ṭhial i a biakṭheng chaklei kamah cun a chiah. ¹⁵ Cun Siangpahrang Ahaz nih tlangbawi Urijah cu nawl a pek i, "Biakṭheng ngan ah hin zinglei khangh thawinak le zanlei changvut thawinak le siangpahrang khangh thawinak le a changvut thawinak cu, hi rammi hna an khangh thawinak le an changvut thawinak le an thlet thawinak vialte he khan na khangh lai; cun a cungah khangh thawinak thisen vialte le raithawinak thisen vialte kha na bungh hna lai; sihmanhsehlaw dar biakṭheng cu keimah nih Pathian ka chawnhnak caah a si lai," tiah a ti. ¹⁶ Tlangbawi Urijah nih mah vialte hi Siangpahrang Ahaz nih nawl a pek bangin a tuah dih. ¹⁷ Cun Siangpahrang Ahaz nih a dirnak a tung hna cu a tan hna i an sin cun i ṭawlnak kheng kha a ṭhial, cun dar cawtum nih an dohmi hmaihumpi kha a ṭhial i lung tianmi cungah a hun. ¹⁸ Cun Assiria siangpahrang ruangah, sabbath ni ca i a cung khuhmi lam siangpahrang inn chung i an sakmi le siangpahrang ca i lenglei in vung luhnak kha Bawipa inn khan a ṭhial hna. ¹⁹ Ahaz tuahsernak a tang rihmi hna cu, Judah Siangpahrang hna Chanrelnak Cauk chungah an i ṭial lo mei? ²⁰ Cun Ahaz cu a pupa hna sinah a it i David khua chungah a pupa hna sinah an vui;cun a fapa Hezekiah cu amah hmun ah khan a hung bawi.

¹ Judah siangpahrang Ahaz a bawi kum hleihnihnak ah Elah fapa Hoshea nih Israel ram kha Samaria in pen hram a thawk i kum kua a uk. ² Cun amah nih Bawipa mithmuh ah ṭhat lonak kha a tuah, asinain, amah hlan i a rak ummi Israel siangpahrang hna bantuk khan cun a si lo. ³ Amah cu Assiria siangpahrang Shalmaneser nih a doh; cun Hoshea kha a tangum ah a cang i ngunkhuai a pek. ⁴ Sihmanhsehlaw Assiria siangpahrang nih Hoshea chungah khan rawinak lungthin a hmuh; zeitintiah Izipt siangpahrang So sinah khan lamkal a rak thlah hna i Assiria siangpahrang cu kum khat hnu kum khat ngunkhuai a pek tawnmi kha pe loin a um; cucaah Assiria siangpahrang nih thong ah a thlak i thong chungah cun a ṭem. ⁵ Cun Assiria siangpahrang nih cun ram vialte cu a tuk i Samaria ah a ra i kum thum chung a dum. ⁶ Hoshea a bawi kum kuanak ah Assiria siangpahrang nih Samaria khua kha a lak i Israel mi kha Assiria ah a kalpi hna, Halah ram le Gozan ram Habor tiva le Media mi hna khua ah a chiah hna. ⁷ Mah hihi hi bang hin a si, zeicahtiah Israel mi nih, Izipt ram chungin le Izipt siangpahrang Faro kut tangin a chuahpitu hna Bawipa an Pathian cungah khan an sual i pathian dang kha an ṭih hna i ⁸ Bawipa nih Israel mi hna hmai in a dawimi hna miphun hna phunglam le Israel siangpahrang hna nih an lakchommi phunglam hna kha an zulh hna. ⁹ Cun Israel mi nih khan a thli tein a dik lomi thil kha Bawipa an Pathian cungah an tuah. An khua kip ah khan, ralvennak innsang thawk in kulhmi khua tiang, khuahrumbo kha an i ser. ¹⁰ lungphun hna le Asherim kha tlang sang kip cung le thingkung hring tang kip ah an i ser hna i ¹¹ an hmai in Bawipa nih a rak hlohmi miphun hna nih an rak tuah bangkhan khuahrumbo kip ah cun zihmui an khangh. Cun annih nih thil ṭhalo kha an tuah hna i Bawipa kha a thin an phawh, ¹² cun Bawipa nih, "Mah hihi nan tuah lai lo," ti in a timi hna siasal kha an biak hna. ¹³ Sihmanhsehlaw Bawipa nih Israel le Judah cu profet kip le hmutu kip in ralrinnak a pek ṭhiamṭhiam hna i, "A ṭha lomi nan lam hi mertak hna u law, nan pupa hna sinah ka rak pekmi phungbia vialte ning khan le ka sal profet hna sinin nan sinah kan pek hna ning hin, ka phungbia le ka nawlbia cu zul hna u," tiah a ti. ¹⁴ Sihmanhsehlaw annih nih ngaih an duh lo, Bawipa an Pathian a rak zum lomi an pupa hna an lung a hah bantuk khan an lung a hak ve. ¹⁵ Annih nih a nawlbia hna le an pupa hna he a rak tuahmi a biakamnak le ralrinnak a pekmi hna cu zeihmanh ah an rel lo. A deu a simi thil, siasal kha an zulh hna i annih zong a deu ah an i cang, cun Bawipa nih anmah tuah bantukin nan tuah ve lai lo, tiin nawl a pekmi hna an pawngkam i a ummi miphun hna kha an zulh hna. ¹⁶ Annih nih Bawipa an Pathian nawlbia vialte kha an hlawt i thletmi siasal cawfa pahnih kha an i ser i, Asherah kha an i ser fawn; van i a ummi thil vialte khi an biak hna i Baal kha a rian an ṭuan. ¹⁷ Cun annih nih an fapale le an fanule hna cu thawinak caah an khangh hna i litin mangih le eih kha an hman, Bawipa mithmuh i thil ṭhalo tuah awkah khan an i zuar i a thin kha an phawh. ¹⁸ Cucaah Bawipa cu Israel cungah a thin a hung ngaingai i a mithmuh phak lonak ah a dawi hna; Judah phun dah ti lo cu ahohmanh an tang lo. ¹⁹ Judah mi hna zong nih Bawipa an Pathian nawlbia kha an zul lo, Israel mi nih an chuahpimi phunglam tu kha an zulh deuh. ²⁰ Cun Israel tefa vialte cu Bawipa nih a hlawt hna i a hrem hna, a mithmuh phak lo ah a hlonh hna hlantiang, hrawktu hna kut chungah khan a chanh hna. ²¹ Israel kha David innchungkhar sinin a thleh tikah Nebat fapa Jeroboam cu siangpahrang ah an ser. Cun Jeroboam nih Israel cu Bawipa zulhnak khan a pialpi i a nganmi sualnak kha a tuahter hna. ²² Israel mi cu Jeroboam nih a rak tuahmi sualnak vialte kha an tuah ve i an pialtak hna lo; ²³ Bawipa nih a sal profet vialte hna in a chim bantuk khan Israel cu a mithmuh phak lonak ah a ṭhial hlantiang, annih nih mah cucu an kaltak hna lo. Cucaah Israel mi cu anmah ram in Assiria ram ah nihin tiang sal ah an tang. ²⁴ Cun Assiria siangpahrang nih Babilon, Kuth, Avva, Hamath le Sefarvaim khua in mi kha a ratpi hna i Israel mi can ah khan Samaria ram khua chungah a chiah hna; cun Samaria ram kha an co i a khua hna chungah khan an um. ²⁵ Cun an umter ah cun Bawipa kha an ṭih lo; cucaah Bawipa nih chiandeih a thlahhnawh hna i tlawmpal an seh hna. ²⁶ Cucaah Assiria siangpahrang cu an chimh i, "Nangmah nih na kalpi hna i Samaria ram khua chung i na va chiahmi miphun hna nih cu ram pathian phunglam kha an hngal lo; cucaah chiandeih a thlahhnawh hna i zohhmanh an seh len ko hna, zeicahtiah annih nih cu ram pathian phunglam kha an hngal lo," tiah an ti. ²⁷ Cun Assiria siangpahrang nih khan, "Khika in nan ratpimi tlangbawi hna lakin pakhat cu khika ah khan kua ṭhan u; cun va kal seh law khika ah va um seh law cu ram pathian phunglam cu va cawnpiak hna seh," tiah nawl a pek. ²⁸ Cucaah Samaria ram in an kalpimi tlangbawi hna lakin pakhat cu a ra i Bethel khua ah khan a um i zeitindah Bawipa an ṭih awk a si kha a cawnpiak hna. ²⁹ Sihmanhsehlaw miphun kip nih anmahle an pathian cio kha an i ser hna i Samaria mi nih an rak sermi khuahrum bo i hmunthiang hna ah khan an chiah hna, miphun kip nih an mahle an umnak khua cio ah khan an chiah hna. ³⁰ Babilon mi nih Sukkoth-benoth an ser, Kuth mi nih Nergal an ser, Hamath mi nih Ashima an ser i ³¹ Avva mi nih Nibhaz le Tartak an ser; cun Sefarvaim mi nih Sefarvaim pathian hna Adrammelek le Anammelek biaknak ah an fale kha mei ah an khangh hna. ³² Bawipa zong kha an ṭih ṭhiamṭhiam, cucaah anmah lakin khuahrum bo tlangbawi ah khan an i ser i khuahrum bo hmunthiang hna ah cun rai an thawipiak hna. ³³ Cuticun Bawipa cu an ṭih ko, sihmanhsehlaw an chuahpi hnanak miphun hna nih an tuahning khan, an pathian hna rian kha an ṭuan fawn. ³⁴ Nihin ni tiang hin hlan i an rak tuahning khan an tuah ko. Annih nih Bawipa kha an bia lo i Bawipa nih Israel tiah min a sakmi Jakob i a tefa hna sinah nawl a pekmi nawlbia si hna seh, phunglam si hna seh, phungbia siseh, phung siseh, an zul lo. ³⁵ Bawipa nih annih he biakamnak a ser i nawl a pek hna i, "Nannih nih pathian dang kha nan ṭih hna in an hmaiah nan kun in an rian nan ṭuan in raithawinak nan pechan hna lai lo; ³⁶ sihmanhsehlaw Izipt ram chungin a nganmi ṭhawnnak le samhmi ban he an chuahpitu hna Bawipa kha cu nan ṭih lai; amah hmaiah nan kun lai i raithawinak nan pekchanh lai. ³⁷ Cun an ṭialpiakmi hna nawlbia hna le phunglam hna le phungbia hna le phung hna cu zulh awkah nan i ralring zungzal lai. Nannih nih pathian dang cu nan ṭih hna lai lo, ³⁸ cun nanmah he ka sermi biakamnak kha nan philh lai lo. Nannih nih pathian dang kha nan ṭih hna lai lo, ³⁹ sihmanhsehlaw nan Pathian cu nan ṭih lai i nan ral vialte hna kut chungin an chuahter hna lai," tiah a ti. ⁴⁰ Sihmanhsehlaw annih nih an ngai duh lo i hmasa an tuah tawn ning ṭheo khan an tuah ko. ⁴¹ Cuticun hi miphun hna nih hin Bawipa cu an ṭih i serchommi an siasal hna cu an biak ṭhiamṭhiam fawn hna; an fale le an fale fa hna zong nih an tuah — an pupa hna nih an tuah bantukin nihin ni tiangin an tuah ko.

¹ Israel siangpahrang Elah fapa Hoshea a bawi kum thumnak ah, Judah siangpahrang Ahaz fapa Hezekiah cu bawi hram aa thawk. ² Amah cu bawi hram aa thawk ah kum kul le kum nga a si i Jerusalem khua in kum kul le kum kua a pen hna. A nu min cu Abi a si, Zekhariah fanu a si. ³ Cun amah nih a pu David nih a rak tuah bantuk khan Bawipa mithmuh i a dikmi thil kha a tuah. ⁴ Khuahrum bo kha a hrawh hna i lungphun kha a chimh hna i Asherah kha a hau. Cun Moses nih a rak sermi dar rul kha a den cikcek, zeicaahdah tiah, Israel mi nih cu caan tiang cun zihmui kha an khanghhnawh; Nehushtan tiah an ti. ⁵ Amah nih Bawipa, Israel Pathian aa bochan; cucaah Judah siangpahrang vialte hna lakah amah hnuah amah bantuk an um ti lo i amah hlan zongah amah bantuk an rak um lo. ⁶ Zeicahtiah amah nih Bawipa kha fek tein aa tlaih i amah hnu zulhnak kha a kaltak lo i Bawipa nih Moses nawl a pekmi nawlbia kha a zulh hna. ⁷ Cun Bawipa cu amah sinah a um i a kalnak paoh ah khua awng a tong. Assiria siangpahrang kha a doh i a rian a ṭuan duh lo. ⁸ Filistin mi cu Gaza le a peng tiangin, a tuk hna i ralvennak innsang in kulhmi khua tiang, a tei hna. ⁹ Hezekiah siangpahrang a bawi kum linak, cucu Israel siangpahrang Elah fapa Hoshea a bawi kum sarihnak a si, cu kum ah cun Assiria siangpahrang Shalmaneser nih Samaria kha a hunhnawh i a kulh i ¹⁰ kum thum a dihnak ah a lak. Hezekiah a bawi kum ruknak, cucu Israel siangpahrang Hoshea a bawi kum kuanak a si, cu kum ah cun Samaria cu a lak. ¹¹ Assiria siangpahrang nih Israel mi cu Assiria ram ah a kalpi hna i Halah le Gozan ram tiva Habor ah le Media mi hna khua hna ah khan a chiah hna, ¹² zeicahdah a si tiah annih nih Bawipa an Pathian aw kha an ngai lo i a biakamnak kha an buar, Bawipa sal Moses nih nawl a pekmi vialte hna hmanh kha an buar; a ngaih zong an ngai duh lo, a tuah zong an tuah duh lo. ¹³ Hezekiah Siangpahrang a bawi kum hleilinak ah Assiria siangpahrang Sennakherib nih khan Judah ram chung i kulh mi khua vialte kha a rathnawh hna i a lak hna. ¹⁴ Cun Judah siangpahrang Hezekiah nih Lakhish ah Assiria siangpahrang sinah cun mi a hei thlah hna i, "Ka palh cang; ka kirtak ko; ka cung i na ka khinhmi paoh ka in lai," tiah a ti. Cun Assiria siangpahrang nih Judah siangpahrang Hezekiah cu ngun talen za thum le sui talen sawm thum a cawh. ¹⁵ Cun Hezekiah nih Bawipa inn chung i a ummi ngun vialte le siangpahrang inn rokuang chung i a ummi ngun vialte cu a pek dih. ¹⁶ Cu caan ah cun Hezekiah nih Bawipa biakinn innka i a ummi sui le Judah siangpahrang Hezekiah nih innka tung a hutnak hna sui cu a lak i Assiria siangpahrang kha a pek. ¹⁷ Cun Assiria siangpahrang nih khan ralbawi bik le tilditmi upa bik le ralbawi ngan bik kha ralkapbu nganpi he Lakhish in Jerusalem ah Hezekiah siangpahrang sinah a hei thlah hna. Annih nih an rat tikah Puansutu Lo lei i a kalmi lam pawng i a ummi, cunglei tili tidong pawngah khan an ra i an dir. ¹⁸ Cun siangpahrang kha an auh tikah inn zohkhenhtu Hilkiah i a fapa Eliakim le caṭialtu Shebnah le cazin tlaitu Joah, Asaf fapa kha an ra chuak. ¹⁹ Cun ralbawi ngan bik nih cun a thawh hna i, "Hezekiah sinah cun, ’Hi bangin a liannganmi siangpahrang, Assiria siangpahrang nih: Zei cungah dah na lung hi a hmunh: ²⁰ Bia menmen hi raldohnak ca i fimnak le thazang an si tiah na ruah! Ahodah na vaa hngatchan i na hei ka doh? ²¹ Zohhmanh, aa hngauhmi paoh an kut a rak chuntu hluang ṭhiangṭhunh per, Izipt naa bochan ko hih. Cu bantuk cu pei Izipt siangpahrang Faro cu amah aa bochanmi hna caah a si ko cu. ²² Sihmanhsehlaw, "Bawipa kan Pathian kan i bochan" nan ka ti ahcun, amah cu Hezekiah nih a khuahrum bo hna le a biakṭheng hna a hrawhpiak i Judah le Jerusalem cu, "Jerusalem i a ummi biakṭheng hmaiah hin nan biak lai," a timi kha a si lo maw? ²³ Cucaah cun ra law Assiria siangpahrang ka bawipa he biakamnak ser tuah u: Nangmah nih aa cittu dingmi naa hmuh khawh hna ahcun, rangtum thong hnih kan pek lai. ²⁴ A si kun ahcun, rangleng ca le rangcung ralkap ca i Izipt naa bochan tikah hin, zeitindah ka bawipa sal hna lak i a hme bik ralbawi pakhat hmanh hi na khirh khawh kun lai? ²⁵ Cu hleiah hi hmun hi hrawh awk i ka hunhnawh tikah hin Bawipa hnatla loin maw a si? Bawipa nih cun pei a ka thawh i, "Hi ram hi hung kalhnawh law hung hrawk," a ka ti cu, a ti,’ tiah va chim u," tiah a ti hna. ²⁶ Cun Hilkiah fapa Eliakim le Shebnah le Joah nih ralbawi ngan bik cu, "Zaangfahnak tein na sal hna hi Aramaik holh in kan chawn tuah, zeitintiah kan hngalh ko; ralhau cungah a ummi hna theih ah Judah holh in kan chawn hlah," tiah an ti. ²⁷ Sihmanhsehlaw ralbawi ngan bik nih cun a thawh hna i, "Hi bia hi nan bawipa le nanmah lawng sin i chim awkah maw ka bawipa nih a ka thlah? Ralhau cung i a ṭhumi hna, anmah ek lila ei awkah le anmah zun lila din awkah nannih he hrawh awkah ruah cangmi hna kha ka chim ve hna hnga lo maw?" tiah a ti. ²⁸ Cun ralbawi ngan bik cu a dir i aw fak piin Judah holh in a au i, "A liannganmi siangpahrang, Assiria siangpahrang bia cu ngai tuah u! ²⁹ Hi bangin siangpahrang nih a ti: ’Hezekiah cu i hlenter hlah u, zeitintiah amah nih ka kut chungin an khamh kho hna lai lo. ³⁰ "Bawipa nih a kan chuahter ṭheo lai; hi khuapi cu Assiria siangpahrang kut chungah pek a si lai lo," ti bia in Hezekiah cu Bawipa kha i hngatchanter hlah u. ³¹ - ³² Hezekiah bia cu ngai hlah u, zeitintiah hi bangin Assiria siangpahrang nih a ti: ’Keimah he remnak ser u law keimah sinah ra chuak tuah u; nan nun i nan thih nakhnga lo, nanmah ram bantuk a simi ram, rawl le mitsur hang a tamnak, changreu le mitsur dum a tamnak, oliv thingkung le khuaihliti a tamnak ram i kan kalpi hna hlantiang nannih nih nan dihlak in nanmahle nan mitsur ruang theitlai cio le nanmahle nan theipi kung theitlai cio kha nan ei lai i nanmahle nan tikhor cio ah ti nan din lai. Cun nannih nih Hezekiah nih, Bawipa nih a kan khamh lai, ti bia in a pingah an hruai tik hna ah a bia kha va ngai hlah u. ³³ Miphun hna pathian hna lakah aho tal nih a ram cu Assiria siangpahrang kut chungin a chanh kho bal maw? ³⁴ Hamath le Arpad pathian hna cu khuazei ah dah an um? Sefarvaim, Hena le Ivvah pathian hna cu khuazei ah dah an si? Samaria cu keimah kut chungin an chuahter kho maw? ³⁵ Jerusalem cu Bawipa nih ka kut chungin a chuahter nakhnga ding caah, hi ram vialte hna pathian hna lakah hin ka kut chungin an ram a chuahter khotu aho tal an um maw?" a ti," tiah a ti. ³⁶ Sihmanhsehlaw mi cu dai zirziar in an um i bia kaa khat hmanh an let lo, zeicahtiah siangpahrang nawl pekmi cu, "Let hlah u," ti a si, ³⁷ Cun siangpahrang inn zohkhenhtu Eliakim, Hilkiah fapa le caṭialtu Shebnah le cazin tlaitu Joah, Asaf fapa kha an puan tlek he Hezekiah sinah cun an ra i ralbawi ngan bik bia kha an chimh.

¹ Hezekiah Siangpahrang nih a theih tikah, a puan a thleh i buri aa aih i Bawipa inn chungah a lut. ² Cun inn zohkhenhtu Eliakim le caṭialtu Shebnah le tlangbawi upa hna, khumpuan aa aih ciomi hna kha, profet Isaiah, Amoz fapa, sinah a thlah hna. ³ Annih nih amah cu, "Hi bangin Hezekiah nih, ’Nihin cu lung retheihnak le nehsawhnak le ningzahnak ni a si. Fa cu an chuah caan a tling cang nain, hrinnak caah thazang a um lo. ⁴ Assiria siangpahrang nih a nungmi Pathian zawmhtaih awkah a ralbawi ngan bik cu a rak thlah cang. Amah bia vialte cu Bawipa na Pathian nih a theih zong a theih ko cang lai i a theihmi bia cu pakpalawng ah a can zong a canter ko lai; cucaah a tang rihmi a tangmi tete hna caah hin thla cam tuah,’ a ti," tiah an ti. ⁵ Hezekiah Siangpahrang salle hna cu Isaiah sinah an rat tikah ⁶ Isaiah nih annih cu, "Nan bawipa sinah cun, ’Hi bangin Bawipa nih: Assiria siangpahrang sal hna nih an ka zawmhtaihnak bia na theihmi caah na thinphang hlah. ⁷ Zohhmanh, a chungah thlarau pakhat ka chiah lai i biathangchin a theih lai i amah ram ah a kir lai; cun amah ram chung lila ah vainam in ka thihter lai, a ti,’ tiah va chim u," tiah a ti. ⁸ Assiria siangpahrang nih Lakhish kha a kaltak i Libnah a tuk tiah ralbawi ngan bik nih a theih tikah, cuka ah cun amah ton awkah khan a va kal. ⁹ Assiria mi hna nih, Izipt ralkapbu, Ethiopia siangpahrang Tirhakah haomi nih, kanmah doh awkah an i thawh cang, ti kha an theih i cucu siangpahrang nih a theih tikah, Judah siangpahrang Hezekiah cu ca a hei pek i, ¹⁰ "Naa bochanmi pathian, ’Ka kut chungah na tla lai lo,’ an timi cu i lun hlah. ¹¹ Assiria siangpahrang nih hrawh awkah aa khinh cangmi ram hna cu zeitindah a tuah hna ti cu na hngalh ko. Ka luat hnga tiah naa ruat maw? ¹² Ka pupa hna nih Gozan khua, Haran khua, Rezef khua an hrawh hna le Telassar ah a ummi Beth-eden mi an thah hna i an pathian vialte hmanh nih an chanh khawh hna lo kha na theih ko. ¹³ Hamath khua, Arpad khua, Sefarvaim khua, Hena khua le Ivvah khua siangpahrang hna kha tah khuazei ah dah an um cang?" tiah a ti. ¹⁴ Lamkal hna kut cun Hezekiah nih ca kha a hmuh i a rel; cun Hezekiah cu Bawipa inn ah a hung kal i Bawipa hmaiah cun ca cu a samh. ¹⁵ Cun Bawipa hmaiah cun Hezekiah nih thla a cam i, "Maw Bawipa, Israel Pathian, cherubim cungah a ṭhumi, vawlei cung pennak vialte hna Pathian cu nangmah lawnglawng hi na si; nangmah nih van le vawlei kha na ser hna. ¹⁶ Maw Bawipa, na hna chi law thei tuah, na mit cu au law hmu tuah; cun Sennakherib nih a nungmi Pathian zawmhtaih awkah a chimmi bia hi thei tuah hna. ¹⁷ Maw Bawipa, Assiria siangpahrang hna nih miphun hna le an ram cu an hrawh taktak hna i, ¹⁸ an pathian hna cu mei chungah an paih taktak hna; zeitintiah annih cu pathian an si lo, mi kut serchommi men an si, thing le lung an si; cucaah cun annih cu hrawh an si. ¹⁹ Cucaah maw Bawipa, kan Pathian, vawlei cung pennak vialte nih, maw Bawipa, nangmah lawnglawng hi Pathian na si ti kha an hngalh naklai, amah kut chung hin kan khamh ko, tiah kan nawl," tiah a ti. ²⁰ Cun Amoz fapa Isaiah nih Hezekiah sinah bia a cah i, "Hi bangin, Bawipa, Israel Pathian nih, ’Assiria siangpahrang Sennakherib kong i na thlacamnak kha ka rak theih,’ a ti. ²¹ Mah hihi amah kong ah Bawipa nih a chimmi bia cu a si: Maw Sennakherib, nangmah cu Zion fanu nih an zawmhtaih i an nihsawh, Jerusalem fanu nih na hnulei in a lu an thinhnawh. ²² Na nihsawh i na serhsat i Na aw na perhhnawh i ruamkai ngaiin na mit na renghhnawhmi Israel mi Thiang kha a si ko! ²³ Na lamkaltu hna in Bawipa na zawmhtaih i ’Ka rangleng tampi he tlangpar ah ka kai, Lebanon tlang a kenne tiang ka phan; a sidar thing a sang bik hna le a saipres thing a ṭha bik kha ka hau hna; a ram deng bik le a chah bik a tupi chungah ka lut; ²⁴ Tikhor ka cawh hna i ramdang ti ka din hna. Cun Izipt tiva kha ka kepha in ka kaoter,’ na ti. ²⁵ "Hlanpi in ka rak ruah cang, tiah na thei lo maw? Atu cu ka tlinter cang. Ralhruang in kulhmi khualipi hna cu rawkmi thilpon ah ser kan onh i, ²⁶ an chungah a ummi minung hna cu zeihmanh tuah kho loin khuaruahhar le vansang au in an um. Lo chung ramkung le inncung khomi belh bantuk, an ṭhan hlan i nichuahlei thli nih a cartermi hna bantuk an si. ²⁷ Sihmanhsehlaw na ṭhut, na luh, na chuah le ka cung i na thinhun kha ka hngalh ko. ²⁸ Ka cungah na thin a hun le na ruamkainak cu ka hna chungah a ra phan cang i na hnar in ka sio in kan sio lai i na kaa chungah ka chak kan hlomh lai. Cun na ratnak lam in kan kirter ṭhan lai," a ti. ²⁹ Cun Isaiah nih Siangpahrang Hezekiah cu, hihi nangmah caah hmelchunhnak a si lai, a ti: tukum le kumvoi cu rawl a hlih nan i rinh lai; asinain a kum thumnak ah cun rawl kha nan tuh lai, nan ṭuan lai; mitsur dum kha nan ser hna lai i an theitlai kha nan ei hna lai. ³⁰ Cun Judah innchungkhar chungin a nung in a tangmi hna cu vawlei chungah thuk piin hram a thla i thei a tlaimi bantuk an si lai. ³¹ Jerusalem le Zion Tlang ah a tangmi an um lai. Ralkapbu Bawipa ṭannak nih mah hi cu a tuah lai. ³² "Cucaah Bawipa nih Assiria siangpahrang kong ah hi bangin a ti: Hi khua chungah a lut lai lo, hika ah thal zong a thlah lai lo, phaw he zong a rathnawh lai lo i a hram ah raldohnak chuntlung zong a serhnawh lai lo. ³³ A ratnak lam te khan a kir ṭhan lai i hi khua chungah a lut lai lo. ³⁴ Zeitintiah hi khua cu keimah ruang le ka sal David ruangah khamh awkah ka humhak lai," tiah Bawipa nih a ti. ³⁵ Cun cu zan ah cun Bawipa vancungmi a kal i Assiria mi riahhmun ah cun sing khat, sang riat le thong nga a va thah hna; cun zingkate i mi nih an thawh tikah, zohhmanh, hi hna cu miruak an rak si dih ko. ³⁶ Cun Assiria siangpahrang Sennakherib cu a kal i inn ah a tlung i Nineveh ah a um. ³⁷ Cun a pathian Nisrok biakinn chungah a biak lioah khan, a fapa Adrammelek le Sharezer nih vainam in an thah i Ararat ram ah an zam. Cun a fapa Esarhaddon cu amah hmun ah khan bawi a hung cang.

¹ Khi caan ah Hezekiah cu a zaw i a thi dengmang. Cun Amoz fapa profet Isaiah kha a sinah a ra i, "Hi bangin Bawipa nih, ’Na innchungkhar kha a ningcang tein chia tuah; zeicahtiah na thi ko lai, na dam ṭhan lai lo,’ tiah a ti. ² Cun Hezekiah nih vampang leiah aa mer i Bawipa sinah thla a cam i, ³ ’Maw Bawipa, zeitindah nangmah hmaiah zumhawktlak le lungcheubang loin ka kal tawn i nangmah mithmuh ah a ṭhami ka tuah kha na cinken nakhnga, kan nawl," tiah a ti. Cun Hezekiah cu a ṭap thluahmah ko. ⁴ Cun Isaiah cu a laifang tual khan a chuah hlanah khin Bawipa bia cu a sinah a ra i, ⁵ "I let law ka mi hna bawi Hezekiah sinah cun, hi bangin Bawipa, na pu David Pathian nih, ’Na thlacamnak kha ka theih i na mitthli kha ka hmuh; zohhmanh, kan damter lai; a ni thumnak ni ah Bawipa inn ah na hung kal lai. ⁶ Cun na nunnak ah hin kum hleinga kan chap lai. Nangmah le hi khua cu Assiria siangpahrang kut chungin kan chuah hna lai i keimah ruang le ka sal David ruangah hi khua cu ka humhak lai,’ a ti tiah va chim," tiah a ti. ⁷ Cun Isaiah nih, "Theipi car hlum khat in rak pu u. Cun hei kalpi hna seh law, a dam ṭhan hnga, a hma cungah khan va chia hna seh," tiah a ti. ⁸ Cun Hezekiah nih Isaiah cu a thawh i, "Bawipa nih a ka damter lai i Bawipa inn ah a ni thumnak ah ka hung kal lai, tinak caah zeidah hmelchunhnak a si lai?" tiah a ti. ⁹ Cun Isaiah nih, "Bawipa nih aa kam ciami cu a tuah lai i hmelchunhnak Bawipa sinin nangmah sinah a rami cu hihi a si: ni thladem hi hmailei ah maw kar hra a kal lai hnulei ah dah kar hra a kir lai?" tiah a ti. ¹⁰ Cun Hezekiah nih a leh i, "Ni thladem caah cun kar hra hei sau deuh cu a fawimi thil a si ko, asinain ni thladem cu kar hra in kir deuh ko seh," tiah a ti. ¹¹ Cun profet Isaiah nih Bawipa cu a auh i Ahaz ni tahnak ah a liam cangmi thladem kha kar hra a hnuh ṭhan. ¹² Khi caan ah Babilon siangpahrang Baladan fapa Merodak-baladan nih Hezekiah cu a zaw ti kha a rak theih caah lamkaltu hna cu ca le laksawng he a hei thlah hna. ¹³ Cun Hezekiah nih a rak conglawmh hna i a ro inn vialte, ngun, sui, rimthawmi, a sungmi chiti, a ral hriamnam, a thil chiahnak inn hna chung i a ummi vialte kha a hmuhsak hna; a inn chung i a ummi siseh a ram chung i a ummi siseh, Hezekiah nih a hmuhsak lomi hna a um lo. ¹⁴ Cun profet Isaiah cu Siangpahrang Hezekiah sinah a ra i, "Hi hna nih hin zeidah an chim? Cun khuazei in dah na sinah an rat?" tiah a ti. Cun Hezekiah nih, "Annih cu a hlatpi ram, Babilon in an ra," tiah a ti. ¹⁵ Anih nih, "Na inn chungah zeidah an hmuh?" tiah a ti. Hezekiah nih, "Ka inn chung i a ummi thil vialte cu an hmuh dih ko; ka thil chiahnak inn hna chung i a ummi thil ka hmuhsak hna lomi an um lo," tiah a leh. ¹⁶ Khi tikah Isaiah nih Hezekiah cu a thawh i, "Bawipa bia hi ngai tuah: ¹⁷ Zohhmanh, na inn chung i a ummi thil vialte le nihin tiangin na pupa hna nih an khonmi thil hna cu Babilon i kalpi lai caan ni a ra lio; nganhtami thil zeihmanh a um lai lo, tiah Bawipa nih a ti. ¹⁸ Cun nangmah nih na hrinmi na fapa hna hrimhrim lakah hin a cheu cu kalpi an si lai i Babilon siangpahrang i a siangpahrang inn ah annih cu tilditmi an si lai," tiah a ti. ¹⁹ Khi tikah Hezekiah nih Isaiah cu, "Bawipa bia na chimmi cu a ṭha ko," tiah a ti. Zeicahtiah, "Keimah chan chung i daihnak le himnak a um paoh ah zeidah?" tiah a ruah. ²⁰ Hezekiah tuahsernak a tang rihmi le a ṭhawnnak vialte le zeitindah tili le tidong kha a ser i khuapi chungah ti kha a luhter ti kha, Judah Siangpahrang hna Chanrelnak Cauk chungah an i ṭial lo mei? ²¹ Cun Hezekiah cu a pupa hna sinah a it i a fapa Manasseh cu amah hmun ah khan a hung bawi.

¹ Manasseh cu bawi hram aa thawk ah kum hleihnih a si i Jerusalem in kum sawm nga le kum nga a bawi. A nu min cu Hefzibah a si. ² Bawipa nih Israel mi hna hmai in a ṭhawlmi hna miphun hna nih an tuahmi fihnung phunglam ning khan, amah nih Bawipa mithmuh ah ṭhat lonak kha a tuah. ³ Zeitintiah a pa Hezekiah nih a rak hrawhmi khuahrum bo kha a remh ṭhan hna i Israel siangpahrang Ahab nih a tuah bantuk khan Baal le Asherah caah biakṭheng a ser hna i van i a ummi thil vialte khi a biak hna i an rian a ṭuan hna. ⁴ Bawipa nih, "Jerusalem khua ah ka min cu ka chiah lai," tiin a rak tihnawh chanmi Bawipa inn chungah biakṭheng a ser hna. ⁵ Cun Bawipa inntual pahnih chungah khan van i a ummi thil vialte hna caah biakṭheng a ser hna. ⁶ Cun thawinak caah a fapa kha mei in a khangh i camh le litin kha a hman hna i thitlawn thiam le hnam kha a fuhpanh hna. Bawipa mithmuh ah ṭhat lonak tampi a tuah i a thin a hunter. ⁷ - ⁸ Bawipa nih David le a fapa Solomon sinah, "Hi inn chungah le Israel miphun vialte lakin ka thimmi Jerusalem khua chungah ka min ka chiah zungzal lai i ka mi Israel mi hna nih hin nawl ka pekmi vialte hna ning le Moses nih nawl a pekmi vialte hna ning in an tuah ahcun an pupa hna sinah ka rak pekmi ram chung hin an ke cu ka pialter lai lo," tiah a timi inn chungah khan amah nih a serchommi Asherah siasal cu a chiah. ⁹ Sihmanhsehlaw annih nih an ngai duh lo i Israel mi hna hmai in Bawipa nih a hrawhmi miphun hna nih an rak tuahmi nakkhan ṭhat lonak tam deuh Manasseh nih cun a tuahter hna. ¹⁰ Cun Bawipa nih, a sal profet hna in bia a chim i, ¹¹ "Judah siangpahrang Manasseh nih hi thil fihnung hi a tuah hna i amah hlan ah a rak ummi Amor mi nih an tuahmi vialte nakin a ṭhalo deuhmi thil a tuah hna i a siasal hna in Judah mi kha a sualter hna caah, ¹² cucaah Bawipa, Israel Pathian nih hi bangin a ti: ’Zohhmanh, a ṭhat lo tuk i a theitu paoh an hna a khenh lai ding ṭhat lonak cu Jerusalem le Judah cungah ka tlunter lai. ¹³ Cun Jerusalem cungah hin Samaria tahnak hri le Ahab innchungkhar suthri thlaimi cu ka zam hna lai i mi nih kheng cu an hnawh i an hnawh dih in a khup in an chiah bang khin Jerusalem cu ka hnawh lai. ¹⁴ Cun a tangmi ka ro hi ka hlonh lai i an ral hna kut chungah ka chanh hna lai i an ral hna caah ral tlaihmi le hranchaw an si lai, ¹⁵ zeicahtiah annih nih an pupa hna Izipt ram in an chuah ni in atu tiang ka mithmuh i ṭhat lonak kha an tuah lengmang ko;" tiah a ti. ¹⁶ Cu hleiah Manasseh nih Judah mi kha a sualter hna caah Bawipa mithmuh i ṭhat lonak kha an tuah i, kha a sualternak hna a sualnak hleiah khan, a sual lomi thisen tampi a chuah fawn, Jerusalem cu khattelei deng in khattelei deng tiang a khat. ¹⁷ Manasseh tuahsernak a tang rihmi le a tuahmi vialte le sualnak a tuahmi vialte cu, Judah Siangpahrang hna Chanrelnak Cauk chungah an i ṭial lo mei? ¹⁸ Cun Manasseh cu a pupa hna sinah a it i amah dum chung, Uzza dum chungah an vui; cun a fapa Amon cu amah hmun ah khan a hung bawi. ¹⁹ Amon cu bawi hram aa thawk ah kum kul le kum hnih a si i Jerusalem in kum hnih a bawi. A nu min cu Meshullemeth a si, i amah cu Jotbah khuami Haruz fanu a si. ²⁰ A pa Manasseh nih a rak tuah bangkhan Bawipa mithmuh i thil ṭhalo kha a tuah ve. ²¹ A pa nih a rak zulhmi lam kha a zulh hna i a pa nih an rian a rak ṭuanmi siasal vialte kha an rian a ṭuan hna i a biak hna; ²² Bawipa, a pupa hna Pathian cu a hlawt i Bawipa lam kha a zul lo. ²³ Cun Amon cu a sinum hna nih an rawi i siangpahrang inn chungah khan an thah. ²⁴ Sihmanhsehlaw Siangpahrang Amon a rawitu hna kha rammi nih an thah dih hna i rammi nih cun a fapa Josiah kha amah hmun ah khan siangpahrang ah an ser. ²⁵ Amon tuahsernak a tang rihmi cu Judah Siangpahrang hna Chanrelnak Cauk chungah an i ṭial lo mei? ²⁶ Cun amah cu Uzza dum chung i a thlan ah khan an vui i a fapa Josiah cu amah hmun ah khan a hung bawi.

¹ Josiah cu bawi hram aa thawk tikah kum riat a si i Jerusalem in kum sawm thum le kum khat a bawi. A nu min cu Jedidah a si, amah cu Bozkath khuami Adaiah fanu a si. ² Cun Bawipa mithmuh ah a dikmi thil kha a tuah i a pu David lam kha a zul, orhlei ah siseh, kehlei ah siseh a pial lo. ³ Siangpahrang Josiah a bawi kum hleiriatnak ah Meshullam fapa Azaliah i fapa Shafan, caṭialtu kha, Bawipa inn ah a hei thlah i, ⁴ "Tlangbawi ngan Hilkiah sinah khan hung kal law innleng cawngtu hna nih mi zapi sinin an lakmi tangka Bawipa inn chung i luhpi a simi kha zeizat dah a si tiah rak rel seh; ⁵ cun Bawipa inn zohkhenhtu rianṭuantu hna kut chungah rak pe seh; cun annih nih Bawipa inn a remh lengmangtu, ⁶ lehtama hna le inn satu hna le lung lei zungthiam hna kha rak pe hna seh, cun inn remhnak ca i thingah le khoihmi lung cawknak caah khan a si fawn lai. ⁷ Sihmanhsehlaw annih nih lihchim lo tein an ṭuan caah an kut chung i pekmi tangka kha zeitindah an hman tiah tuakpiak ṭhan an si lai lo," tiah a ti. ⁸ Cun tlangbawi ngan Hilkiah nih caṭialtu Shafan kha, "Bawipa inn chungah phungbia cauk kha ka hmuh," tiah a rak chimh. Cun Hilkiah nih cauk cu Shafan kha a pek i a rel. ⁹ Cun caṭialtu Shafan cu siangpahrang sinah a ra i siangpahrang cu, "Inn chung i a ummi tangka cu na sal hna nih an bungh i Bawipa inn a zohkhenhtu rianṭuantu hna kut chungah khan an chanh cang," tiah a chimh. ¹⁰ Cun caṭialtu Shafan nih cun siangpahrang cu, "Tlangbawi Hilkiah nih cauk pakhat a ka pek," tiah a ti. Cun Shafan nih Siangpahrang hmaiah cun a rel. ¹¹ Cun siangpahrang nih phungbia cauk chung bia cu a theih tikah a puan kha a thleh hna. ¹² Cun siangpahrang nih tlangbawi Hilkiah le Shafan fapa Ahikam le Mikaiah fapa Akbor le caṭialtu Shafan le siangpahrang sinum Asaiah kha nawl a pek hna i, ¹³ "Va kal u law hi cauk hmuhmi chungbia kong ah hin Bawipa cu, keimah ca le mi zapi ca le Judah vialte caah, va hal tuah u; zeicahtiah, kan pupa hna nih hi cauk chung i aa ṭialmi bia, kannih ca i aa ṭialmi bia vialte ning khan an rak tuah lo caah Bawipa thinhunnak kan cung i a alhmi cu a ngan ko," tiah a ti. ¹⁴ Cucaah tlangbawi Hilkiah le Ahikam le Akbor le Shafan le Asaiah kha nu profet Huldah, hnipuan chiahnak zohkhenhtu Harhas fapa Tikvah i fapa Shallum nupi, sinah khan an va kal (amah cu Jerusalem khua chungah Sang Hnihnak ah khan a um); cun amah cu bia an ruah. ¹⁵ Cun anih nih annih cu, "Bawipa, Israel Pathian nih hi bangin a ti, ’Ka sinah an thlahtu hna hi, ¹⁶ Hi bangin Bawipa nih a ti, zohhmanh, Judah siangpahrang nih cauk chung bia a relmi vialte kha, hi hmun cung le a chung i a ummi cungah ṭhat lonak ka tlunter lai, ¹⁷ annih nih an ka hlawt i pathian dang hna sinah khan zihmui an khangh i annih nih ka thinphawhnak caah an kut in hi rian vialte kha an tuah caah hi hmun cungah hin ka thinhunnak cu a alh lai i a mit lai lo. ¹⁸ Sihmanhsehlaw Bawipa hal awkah an thlahtu hna Judah siangpahrang tu cu, hi bangin nan va chimh lai. Hi bangin Bawipa, Israel Pathian nih a ti: Bia na theihmi kong ah, ¹⁹ hi hmun le hika i a ummi hna cu an ṭiao lai i chiatserhnak an ing lai ti in ka chimmi bia kha na theih tikah na lung cu aa ngaihchih i Bawipa hmaiah toidor in na um ca le na hnipuan na thleh hna i ka hmai i na ṭah caah, kei zong nih na bia cu kan theihpiak ve, tiah Bawipa nih a ti. ²⁰ Cucaah zohhmanh, nang cu na pupa hna sinah kan pumh lai i dai tein thlankhor na phan lai, cun hi hmun cung i ṭhat lonak ka tlunter laimi hi na mit nih a hmu lai lo,’ a ti, tiah chim hna, a ka ti," tiah a ti. Cun siangpahrang sinah cun bia cu an hei lanhpi.

¹ Cun siangpahrang nih khan mi a thlah hna i Judah le Jerusalem upa vialte cu a sinah an i pum. ² Cun siangpahrang cu Bawipa inn ah khan a hung kal i a sinah cun Judah ram mi vialte le Jerusalem khuami vialte le tlangbawi hna le profet hna le, mi vialte, a hme siseh a ngan siseh, an kal ve; cun Bawipa inn chung i hmuhmi biakamnak cauk chung bia vialte kha an theihhngan ah a rel dih. ³ Cun siangpahrang cu tungpi hram ah khan a dir i, Bawipa kha zulh i a nawlbia hna le a hngalhternak bia hna le a phungbia hna kha a lungthin dihlak le a nunnak dihlak in zulh awk le hi cauk chungah aa ṭialmi biakamnak bia hna kha tuah awkah Bawipa hmaiah khan bia aa kam; cun mi vialte nih khan a tuahmi biakamnak cu an tuahpi ve. ⁴ Cun siangpahrang nih tlangbawi ngan Hilkiah le a niam deuhmi tlangbawi hna kha le innleng cawngtu hna kha Bawipa biaknak inn chungin Baal le Asherah le van i a ummi thil hna ca i sermi umkheng vialte kha chuah dih awkah a fial hna; Jerusalem khua leng Kidron lo chungah khan a khangh hna i an vutcam cu Bethel ah a kalpi hna. ⁵ Cun Judah siangpahrang hna nih Judah ram chung khua hna le Jerusalem kiangkap i a ummi khua hna khuahrum bo i zihmui khangtu ah an rak fehtermi siasal-tlangbawi kha, a phuah hna; Baal sinah siseh, ni sinah siseh, thlapa sinah siseh, arfibu sinah siseh, van i a ummi thil vialte hna sinah siseh, zihmui a khangtu tlangbawi hna zong kha a phuah hna. ⁶ Cun Bawipa inn chung khan Asherah kha a chuah i Jerusalem khua lengah Kidron tiva ah a kalpi, Kidron tiva ah cun a khangh i dip lak in a den cikcek i a dip cu mi zapi thlan cungah a thlet. ⁷ Biaknak lei hlawhhlang an umnak inn, Bawipa inn chung i a ummi kha a hrawh hna; cuka ah cun khi nu hna nih khan Asherah caah puan an tak. ⁸ Cun Judah ram khua hna khan tlangbawi vialte kha a chuah hna i tlangbawi nih zihmui an khanghnak khuahrum bo vialte kha, Geba in Beersheba tiang a thurhnawmhter dih hna; khua uktu bawi Joshua kutka luhnak i a ummi kutka khuahrum bo khuapi kutka vung luh i cakeh lei ah a ummi hna kha a chimh dih hna. ⁹ Sihmanhsehlaw khuahrum bo tlangbawi hna cu Jerusalem i Bawipa biakṭheng ah khan cun an hung kal lo, an unau hna sinah khan thilnu phulh lo changreu kha an ei. ¹⁰ Cun Hinnom fapa hna horkuang i a ummi Tofeth kha, khika ah ahohmanh nih an fapa si hna seh an fanu si hna seh, Molek sin i thawinak ah an pekchanh hna nakhnga lo, a thurhnawmhter. ¹¹ Cun Bawipa inn luhnak i a inn kulh chung i bawi inn zohtu Nathan-melek khaan pawng i Judah siangpahrang hna nih ni ca i rang an pekchanhmi hna cu a ṭhial hna i ni rangleng hna cu mei in a khangh hna. ¹² Cun Ahaz cung dot inncung i a ummi biakṭheng, Judah siangpahrang hna nih an sermi hna kha le Manasseh nih Bawipa inntual pahnih chung i biakṭheng a sermi hna kha a chimh hna i a den cikcek hna, cun a dip cu Kidron tiva ah a paih hna. ¹³ Jerusalem nichuahlei, rawhralnak tlang in thlanglei i a ummi khuahrum bo hna kha siangpahrang nih cun a thurhnawmhter hna; mah cucu Israel siangpahrang Solomon nih Sidon mi pathian fihnung Ashtoreth le Moab mi pathian fihnung Khemosh le Ammon mi pathian fihnung Milkom ca i a sermi kha an si. ¹⁴ Cun lungphun kha a den cikcek hna i Asherim kha a hau hna i cu hmun ah cun mi ruh khat lak in a hlonh hna. ¹⁵ Cu hleiah Israel a sualtertu Jeroboam, Nebat fapa nih Bethel khua ah a sermi khuahrum bo biakṭheng, kha biakṭheng kha a khuahrum bo he khan a chimh i a lung cu a den cikcek hna i dip lak in a den hna; cun Asherah zong kha a khangh. ¹⁶ Cun Josiah cu a hei i mer i tlang cungah khan thlan a hmuh hna; cun mi a thlah hna i thlan chung cun ruh kha an chuah hna i biakṭheng cungah khan an khangh i an thurhnawmhter; mah cucu Pathian mi, hi thil hna kong a rak chimchungtu nih Bawipa bia a rak thanhning te khan a si. ¹⁷ Khi tikah anih nih, "Khika i ka hmuhmi lungphun khi zeidah a si?" tiah a ti. Cun cu khuami hna nih cun, "Bethel khua biakṭheng cungah na tuahmi thil hi a rak chimchungtu Pathian mi, Judah ram in a ramipa thlan a si," tiah an chimh. ¹⁸ Cun anih nih, "Amah cu um ko seh; ahohmanh nih a ruh kha ṭhial hna hlah seh," tiah a ti. Cucaah a ruh cu, Samaria in a ra mi profetpa ruh hna he khan zeihmanh an ti hna lo. ¹⁹ Cun Samaria ram chung khua i a ummi khuahrum bo hna i hmunthiang hna, Israel siangpahrang hna nih an ser i Bawipa a thin an phawhnak hna vialte zong kha, Josiah nih a ṭhial dih hna; Bethel ah a tuahning te khan annih cung zongah cun a tuah. ²⁰ Cun khuahrum bo tlangbawi vialte khika i a ummi hna kha biakṭheng cungah a thah hna i an cungah mi ruh kha a khangh hna. Cun Jerusalem ah a kir. ²¹ Cun siangpahrang nih mi vialte cu, "Hi biakamnak cauk chungah aa ṭial bang hin, nannih nih Bawipa nan Pathian sinah lanhtak puai kha ul u," tiah nawl a pek hna. ²² Zeitintiah Israel mi bia a rak ceihtu biaceihtu hna chan ri in siseh, Israel siangpahrang hna le Judah siangpahrang chan chung vialte ah siseh, cu bantuk lanhtak puai cu ulh a um bal ti lo; ²³ Sihmanhsehlaw Josiah Siangpahrang a bawi kum hleiriatnak ah hi lanhtak puai cu Bawipa sinah Jerusalem ah an ulh. ²⁴ Cu hleiah tlangbawi Hilkiah nih Bawipa inn chungah a hmuhmi cauk chung i aa ṭialmi phungbia hna kha a fehter nakhnga, Josiah nih khan litin thiam hna le hnamngei hna le milem tete hna le siasal hna le Judah ram chung le Jerusalem khua chung i fihnung a simi thil an hmuhmi vialte hna kha a hloh dih hna. ²⁵ Bawipa sinah a lungthin dihlak le a nunnak dihlak le a thazang dihlak in, Moses nawlbia dihlak ningin, aa mermi siangpahrang amah hlan ah an um lo i amah hnu zongah amah bantuk a hung chuakmi an um lo. ²⁶ Sihmanhsehlaw Manasseh nih a thin phawhnak a rak tuahmi vialte ruangah khan Judah cungah Bawipa thinhunnak kha a alh ko i cu a thinhunnak ṭih a nungmi cu a ṭhum hlei lo. ²⁷ Cun Bawipa nih, "Israel ka ṭhial bantuk khan Judah zong hi ka mithmuh phak lonak ah ka ṭhial lai, cun ka thimmi khuapi Jerusalem hi le "Hi chungah ka min a um lai," ti in ka rak timi inn zong hi ka hlonh hna lai," tiah a ti. ²⁸ Josiah tuahsernak a taang rihmi le a tuahmi vialte cu Judah Siangpahrang hna Chanrelnak Cauk chungah an i ṭial lo mei? ²⁹ Amah chan ah cun, Izipt siangpahrang Faro Neko cu Assiria siangpahrang sinah Zufrates tiva ah a hung kal. Josiah Siangpahrang cu amah ton awkah khan a kal; cun a rak hmuh tikah Faro Neko nih cun Megiddo ah a rak thah. ³⁰ Cun Megiddo khan amah cu a sinum hna nih a thi cia in rangleng in Jerusalem ah an kalpi i amah thlante ah khan an vui. Cun rammi nih khan Josiah fapa Jehoahaz cu an lak i chiti an thuh i a pa hmun ah khan siangpahrang ah an ser. ³¹ Jehoahaz cu bawi hram aa thawk ah kum kul le kum thum a si i Jerusalem in thla thum a bawi. A nu min cu Hamutal a si, amah cu Libnah khuami Jeremiah fanu a si. ³² Cun a pupa hna nih an tuahning te khan Bawipa mithmuh ah ṭhat lonak a tuah. ³³ Jerusalem khua ah cun bawi a si nakhnga lo, Faro Neko nih Hamath ram Riblah khua ah thong ah a thlak i a ram cu ngunkhuai ngun talen za khat le sui talen pakhat a cawh hna: ³⁴ Cun Faro Neko nih Josiah fapa Eliakim cu a pa Josiah hmun ah khan siangpahrang ah a canter i a min cu Jehoiakim tiah a let. Sihmanhsehlaw Jehoahaz cu a kalpi i Izipt ram a phan i khika ah a thi. ³⁵ Cun Jehoiakim nih Faro cu ngun le sui kha a pek, sihmanhsehlaw Faro nih nawl a pek bangkhan tangka peknak ding caah cun a mi kha ngun a khuai hna. Faro Neko pek awkah khan amah nih a tuah ningin a ram chungmi hna cu sui le ngun kha a thawhter cio hna. ³⁶ Jehoiakim cu bawi hram aa thawk ah kum kul le kum nga a si i Jerusalem khua in kum hleikhat a bawi. A nu min cu Zebidah a si, amah cu Rumah khuami Pedaiah fanu a si. ³⁷ Cun a pupa hna nih an rak tuahning te khan Bawipa mithmuh ah thil ṭhalo kha a tuah ve.

¹ Amah chan ah cun Babilon siangpahrang Nebukhadnezzar kha a hung i Jehoiakim cu kum thum chung a sal ah a cang; sihmanhsehlaw aa let i a doh. ² Cun Bawipa nih a sal profet hna in a rak chimmi bia ning khan, Bawipa nih Khaldi mibu hna le Siria mibu hna le Moab mibu hna le Ammon mibu hna kha a thlahhnawh hna i Judah hrawh awkah khan a thlah hna. ³ - ⁴ Manasseh nih a tuahmi vialte ruangah le a sual lomi thisen a chuahmi ruangah, Bawipa nawl in hi thil cu Judah mi cungah, annih kha a mithmuh phak lo i ṭhial awkah, a tlung hrimhrim ko; zeitintiah Jerusalem khua kha a sual lomi thi in a khahter i Bawipa nih a ngaithiam duh lo. ⁵ Jehoiakim tuahsernak a tang rihmi hna le a tuahmi vialte cu, Judah Siangpahrang hna Chanrelnak Cauk chungah an i ṭial lo mei? ⁶ Cuticun Jehoiakim cu a pupa hna sinah a it i a fapa Jehoiachin kha amah hmun ah khan a hung bawi. ⁷ Izipt siangpahrang cu a ram chungin a chuak ti lo, zeicahtiah Babilon siangpahrang nih Izipt siangpahrang ta a simi vialte Izipt tivate thawk in Zufrates tiva tiang, a lak dih. ⁸ Jehoiachin cu siangpahrang a can tikah kum hleiriat a si i Jerusalem in thla thum a bawi. A nu min cu Nehushta a si, amah cu Jerusalem khuami Elnathan fanu a si. ⁹ A pa nih a rak tuahning te khan amah nih Bawipa mithmuh i thil ṭhalo kha a tuah ve. ¹⁰ Khi caan ah khan Babilon siangpahrang Nebukhadnezzar sal hna cu an hung i Jerusalem khua kha an dum. ¹¹ Cun a sal hna nih an kulh lioah khan, Babilon siangpahrang Nebukhadnezzar cu Jerusalem khua ah khan a hung; ¹² cun Judah siangpahrang Jehoiachin cu, a nu he, a sinum hna he, a bawi hna he, a siangpahrang inn bawi hna he khan Babilon siangpahrang sinah cun a vaa pe. A bawi kum riatnak kum ah khan Babilon siangpahrang nih cun sal ah a tlaih i ¹³ Bawipa nih a rak chimchung bang khan, Bawipa inn chung ro thil vialte le siangpahrang inn chung ro thil vialte kha a lak hna i Israel siangpahrang Solomon nih a rak sermi sui umkheng, Bawipa biakinn i a ummi vialte kha a khuai dih cikcek hna. ¹⁴ Jerusalem mi vialte le bawi vialte le ralṭha le miṭhawng vialte, tlaihmi thong hra, cun zungthiam le soser vialte cu a kalpi dih hna; ram chung i sifak bikmi hna dah ti lo cu ahohmanh an tang lo. ¹⁵ Cun Jehoiachin cu Babilon ah a kalpi; siangpahrang i a nu, siangpahrang i a nupi hna, a bawi hna le ram chung santlai bikmi hna cu Jerusalem in Babilon ah sal ah a hruai hna. ¹⁶ Cun Babilon siangpahrang nih cun ralṭhami vialte, thong sarih, cun zungthiam le soser, thong khat, an dihlak in a ṭhawng i ral atu kho dingmi kha Babilon ah sal ah a kalpi hna. ¹⁷ Cun Babilon siangpahrang nih cun Jehoiachin i a pacheu Mattaniah kha amah hmun ah khan siangpahrang ah a chiah i a min cu Zedekiah ah a thlen. ¹⁸ Zedekiah cu bawi hram aa thawk ah kum kul le kum khat a si i Jerusalem in kum hleikhat a bawi. A nu min cu Hamutal a si, amah cu Libnah khuami Jeremiah fanu a si. ¹⁹ Jehoiakim nih a tuah ningte khan Bawipa mithmuh i ṭhat lonak kha a tuah. ²⁰ Hi thil Jerusalem le Judah i a tlun cu Bawipa a thin a hun tuk caah khan a si, a donghnak ah cun a sinin a hlonh ko hna. Cun Zedekiah nih Babilon siangpahrang a doh.

¹ A bawi a kum kuanak, thla hranak thla, a ni hra ni ah, Babilon siangpahrang Nebukhadnezzar nih cun a ralkap vialte he Jerusalem cu a rathnawh i an dum; cun raldohnak chuntlung kha a velchum in an ser. ² Cuticun Siangpahrang Zedekiah a bawi kum hleikhatnak tiang khua cu an kulh. ³ Thla linak thla a ni kua ni ah, khuapi chungah cun mangṭam cu a fak tuk cang i rammi caah rawl a um ti lo. ⁴ Khi tikah khua kulhnak kha an pemh i Khaldi mi cu khua velchum ah khan an um ko nain siangpahrang le a ralkap vialte cu zan ah siangpahrang dum pawng i a ummi vampang pahnih karlak i kutka khan an zam. Cun Arabah leiah khan an kal. ⁵ Sihmanhsehlaw Khaldi mi ralkap hna nih khan siangpahrang cu an dawi i Jeriko nelrawn ah khan an phak i a ralkap vialte cu a sinin an i ṭhek dih. ⁶ Cun siangpahrang cu an tlaih i Riblah khua ah Babilon siangpahrang sinah khan an ratpi i a cungah khan bia a rak khiah. ⁷ Zedekiah fapale cu a hmaika hrimhrim ah khan an thah hna i Zedekiah cu a mit an khoih i hreng an khenh i Babilon ah an kalpi. ⁸ Thla nganak thla, a ni sarihnak ni ah, cucu Babilon siangpahrang Nebukhadnezzar Siangpahrang a bawi kum hleikuanak a si — Babilon siangpahrang sinum, a pum ralvengtu haotu Nebuzaradan kha Jerusalem ah a ra. ⁹ Cun Bawipa inn le siangpahrang inn le Jerusalem khua chung inn vialte kha a khangh dih hna; inn ngan paohpaoh kha cu a khangh dih hna. ¹⁰ Cun ralveng haotu sinah a ummi Khaldi ralkap vialte nih khan Jerusalem velchum i a ummi kulhnak vampang cu an chimh. ¹¹ Cun mi a tang rihmi khua chungah nganhtami hna le Babilon siangpahrang sin i a rak zammi hna kha le zapi a tang rihmi vialte hna kha ralvengtu haotu Nebuzaradan nih sal ah a hruai dih hna. ¹² Sihmanhsehlaw ralvengtu haotu nih khan ram chungmi lak i sifak bik hna kha mitsur ruang a run cawnghramtu le lo a run thlotu ah a nganhta hna. ¹³ Cun Bawipa inn chungah a ummi dar tung pipi hna le Bawipa inn chungah a ummi hmaihumpi le a hunnak hna kha Khaldi mi hna nih cun an den cikcek hna i a dar cu Babilon ah an kalpi. ¹⁴ Cun um hna le cawhlek hna le mei hmihnak hna le zihmui kheng hna le, dar umkheng vialte hna, biakinn chung rianṭuannak i hmanmi vialte kha an lak hna, ¹⁵ meizahnak le khengkuar hna zong kha an lak hna. Ralvengtu haotu nih khan sui a simi thil paoh cu a sui kha a lak i ngun a simi thil paoh cu a ngun kha a lak. ¹⁶ Solomon nih Bawipa inn caah a rak sermi tungpi pahnih hna le hmaihum pakhat le a hunnak hna, hi umkheng dar hna hi cu a khing thlai cawk an si lo. ¹⁷ Tungpi pakhat cu a san leiah dong hleiriat a si i a cungah dar in sermi luchin pakhat a um; cu luchin a sanlei cu dong thum a si; dar in sermi taleti sur kha, cu luchin cungah cun a velchum in a um. Cun tungpi pahnihnak zong cu cu bantuk a si ve, sur zong kha a ngei ve. ¹⁸ Cun ralvengtu haotu nih khan tlangbawi upa bik Seraiah le a hun changtu Zefaniah le innleng cawngtu pathum hna kha a lak hna; ¹⁹ cun khuapi chung khan ralkap a haotu hna bawi pakhat le khua chung i a ummi siangpahrang tlangpi bu chungmi panga le rammi a pumtu hna ralbawi i a caṭialtu le khua chung i a ummi rammi sawm ruk kha a lak hna. ²⁰ Cun Nebuzaradan, ralvengtu haotu nih khan a kalpi hna i Riblah khua ah Babilon siangpahrang sinah khan a phakpi hna. ²¹ Cun Babilon siangpahrang nih khan a tuk hna i Hamath ram Riblah khua ah khan a thah hna. Cuticun Judah cu amah ram chungin saltannak chungah kalpi a si. ²² Judah ram chung i a tangmi hna, Babilon siangpahrang Nebukhadnezzar nih a nganhtami hna cungah khan Shafan fapa Ahikam i fapa Gedaliah cu uktu ah a ser. ²³ Cun ramlak i a ummi ralkapbu haotu pawl le an mi hna nih Babilon siangpahrang nih Gedaliah cu uktu ah a ser, ti an theih tikah, Mizpah ah Gedaliah sinah cun an mi hna he khan an ra, cu hna cu Nethaniah fapa Ishmael le Kareah fapa Hohanan le Netofah mi Tanhumeth fapa Seraiah le Maakah mi fapa Jaazaniah an si. ²⁴ Cun Gedaliah nih annih le an mi hna sinah chiat a ser i, "Khaldi mi bawi hna ruangah hin nan thinphang hlah u; ram chungah hin um ko u law Babilon siangpahrang hi rian ko u law nan caah a ṭha ko lai," tiah a ti. ²⁵ Sihmanhsehlaw thla sarihnak thla ah khan Elishama fapa Nethaniah i fapa Ishmael, siangpahrang chungkhar chungmi a simi kha, mi pahra he an ra i an tuk hna i Gedaliah le Mizpah ah a sin i a ummi Judah mi le Khaldi mi hna kha an thah hna. ²⁶ Khi tikah mi vialte cu a hme he a ngan he, ralkapbu haotu hna he khan an tho i Khaldi mi kha an ṭih hna caah Izipt ah an kal. ²⁷ Judah siangpahrang Jehoiachin sal i a tan kum sawm thum le kum sarihnak, thla hleihnihnak thla a ni kul le ni sarihnak ni ah, Babilon siangpahrang Evil-merodak nih, Judah siangpahrang cu a zaangfah caah thong chungin a chuah, cu kum cu siangpahrang a can kum a si; ²⁸ amah cu nem tein a chawnh i Babilon khua i amah sinah a ummi siangpahrang hna an ṭhutnak cung deuh ah khan ṭhutnak a pek. ²⁹ Cucaah Jehoiachin nih khan a thongtla puan cu aa phoih. Cun a chan chung vialte siangpahrang cabuai ah cun rawl a ei lengmang ve; ³⁰ cun aa cawmnak cu siangpahrang nih khan, nifate in a nun chung paohpaoh, a rin zungzal.