2 CHANRELNAK

2 CHANRELNAK

¹ David fapa Solomon cu a ram chungah khan fek tein a um i Bawipa a Pathian cu a sinah khan a um i fak piin a nganter. ² Solomon nih cun Israel mi vialte, a thongthong pawl haotu si hna seh, a zaza pawl haotu si hna seh, biaceihtu si hna seh, Israel ram chung i hruaitu a simi, innchungkhar lu a si ciomi vialte hna kha bia a chimh hna. ³ Cun Solomon le a sinah aa pummi vialte hna cu Gibeon i a ummi khuahrum bo ah khan an kal; zeicahtiah Bawipa sal Moses nih ramlak ah a sermi Pathian tonnak thlam kha khika ah cun a um. ⁴ (Sihmanhsehlaw David nih Pathian kuang kha cu Kiriath-jearim in David nih hmun a serpiakmi, Jerusalem i thlam pakhat a bunhpiakmi ah khan a rak hunpi cang.) ⁵ Cuhleiah Hur fapa Uri i fapa Bezalel nih a sermi dar biakṭheng kha khika ah cun Bawipa puan biakinn hmaiah a um. Cun Solomon le aa pummi nih khan Bawipa cu an kawl. ⁶ Cun Solomon cu Bawipa hmai i a ummi dar biakṭheng, tonnak thlam i a ummi ah cun a hung kal i a cungah khangh thawinak thong khat a pekchanh. ⁷ Cu zan ah cun Pathian cu Solomon sinah a lang i amah cu a thawh i, "Zeidah kan pek lai, ka hal tuah," tiah a ti. ⁸ Cun Solomon nih Pathian sinah cun, "Ka pa David cungah a fek i a nganmi dawtnak cu na langhter i amah hmun ah keimah cu siangpahrang ah na ka ser cang. ⁹ Maw Bawipa Pathian, ka pa David sinah bia na rak kammi cu atu ah hin tlinter ko, zeitintiah keimah cu vawleicung leidip zat in a tammi miphun hna cungah hin siangpahrang ah na ka ser cang. ¹⁰ Cucaah hi miphun hmai i chuahnak ca le luhnak caah hin fimnak le hngalhnak ka pe tuah, zeicahtiah hi na mi, a ngan hringhranmi hi aho nih dah a uk khawh hna lai?" tiah a ti. ¹¹ Pathian nih Solomon cu a leh i, "Mah hihi na lung chungah a um i nangmah nih chawva siseh, rumnak siseh, upatnak siseh, nangmah an huatu hna thah awk kha siseh, nun saunak hmanh kha siseh, na ka hal lo i an cung i siangpahrang ah keimah nih kan chiahmi ka mi hna uknak ding caah khan nangmah caah fimnak le hngalhnak na ka hal caah, ¹² fimnak le hngalhnak cu kan pek. Nangmah hlan i a rak ummi siangpahrang hna nih an rak ngeih bal lo i nangmah hnu i a um laimi zong nih an ngeih bal lai lomi rumnak le chawva le upatnak zong kan pek fawn lai," tiah a ti. ¹³ Cucaah Gibeon i a ummi khuahrum bo, tonnak thlam hmai cun Solomon cu Jerusalem ah a ra. Cun Israel mi kha a pen hna. ¹⁴ Solomon nih rangleng le rangcung ralkap kha a pumh hna; amah nih cun rangleng thong khat za li le rangcung ralkap thong hleihnih a ngeih hna i annih cu rangleng khua hna le Jerusalem khua chung i a ummi siangpahrang sinah khan a chiah hna. ¹⁵ Cun siangpahrang nih cun sui le ngun cu Jerusalem ah khan lungtekem tlukin a tamter i sidar thing cu Shefelah i saikamor thing zat in a tamter. ¹⁶ Cun Solomon nih a cawkmi rangtum hna cu Izipt le Kue in an si i siangpahrang chawlettu hna nih khan a man aa khat in Kue ah khan an cawk tawn hna. ¹⁷ Izipt ram in rangleng pakhat cu ngun shekel za ruk in an cawk i rangtum pakhat cu shekel za le sawm nga in an cawk; cu bantukin anmah sin ṭhiamṭhiam cun Hit mi siangpahrang hna le Siria siangpahrang hna sinah khan zuarh an si ṭhan.

¹ Bawipa min caah biakinn le amah caah siangpahrang inn sak kha Solomon cu aa tim. ² Solomon nih thil phortu ah mi sang sarih, cun tlang ram i lung khoihtu ah sang riat, cun anmah a kilkawitu hna ah thong thum le za ruk a thiah hna. ³ Cun Solomon nih Tair ram siangpahrang Huram kha bia a cah i, "Ka pa David cungah na rak tuah i amah a umnak ding inn saknak caah sidar thing na rak kuat bantuk khan, keimah zong ka kua ve tuah. ⁴ Bawipa ka Pathian upatnak caah biakinn sak kaa tim. Cu inn cu ka mi hna le keimah nih rimthaw zihmui khanghnak in Pathian kan biaknak hmunthiang a si lai. Cun Israel mi cu nan tuah zungzal lai tiah nawlpek a simi: hun camcinmi changreu kan pekchanh zungzalnak hmun le Bawipa kan Pathian upatnak caah zingfa zanfa, sabbath hna le thla thar puai hna le nizarh hna ah khangh thawinak kan pekchanhnak hmun a si lai. ⁵ Kan Pathian cu pathian vialte nakin a ngan deuh caah ka sak laimi inn cu a nganmi a si lai. ⁶ Asinain vancung, a sang bik vancung hmanh nih khin amah cu a tlum lo caah, aho nih dah inn cu a sakpiak khawh lai? Amah hmai i zihmui khanghnak hmun ca men ah dah ti lo ahcun, amah ca i inn sa dingah cun kei cu aho hen dah ka si i? ⁷ Cun ka pa David nih a rak i roihmi hna, Judah ram le Jerusalem i ka sinah a ummi zungthiam hna sin i a um dingah, sui le ngun le dar le thir lei i zung a thiammi, puan sendung, senpau le a dum lei zong i zung a thiammi, cun ṭamhnak zei ṭial paoh a thiammi pakhat in rak ka kua. ⁸ Sidar thing le saipres thing le algum thing zong Lebanon in rak ka kua, zeicahtiah na sinum hna nih Lebanon i thing ah an thiam kha ka hngalh. Cun ka sinum hna cu na sinum hna sinah, ⁹ thingah kha tam piin a ka timhpiaktu dingah an um lai, zeicahtiah ka sak laimi inn cu a ngan i a ṭha ngaingai dingmi a si. ¹⁰ Na sinum hna, thing attu hna kha denmi changvut rel sang hnih, barli rel sang hnih, mitsur hang bath sang hnih le chiti bath sang hnih ka pek hna lai," tiah a ti. ¹¹ Khi tikah Tair siangpahrang Huram nih Solomon cu ca in a leh i, "Bawipa nih a mi kha a dawt hna caah nangmah cu siangpahrang ah an ser," tiah a ti. ¹² Huram nih cun hi ti zong hin a ti fawn, "Bawipa, Israel Pathian, van le vawlei a ser i Bawipa caah biakinn le amah caah siangpahrang inn i saknak ding caah ruahnak fim le hngalhthiamnak a ngeimi fapa David Siangpahrang a petu cu thangṭhat si ko seh. ¹³ "Atu ah zungthiam, hngalh-thiamnak a ngeimi, Huram-abi cu kan kuat, ¹⁴ amah cu Dan phun minu hna lak i pakhat nu fa a si, a pa cu Tair mi a si. Amah cu sui, ngun, dar, thir, lung le thing lei rian, cun puan sendung, a dum, a senpau le puan hmangṭhia, cun ṭamhnak zei ṭial paoh ah le thil muisam tuahnak paohpaoh ah zungthiam a si; na zungthiammi hna, na pa David ka bawipa zungthiam hna sinah cun a ra ṭuan ve lai. ¹⁵ Cucaah ka bawipa nih na chimmi changvut, barli, chiti le mitsur hang hna cu na sal hna hi hun kua hna; ¹⁶ cun kannih nih na herhmi thing paoh cu Lebanon in kan rak in haupiak lai i rili in Joppa khua ah pum in kan ratpi lai i nang nih Jerusalem khua ah na hun kalpi hna lai," a ti. ¹⁷ Cun Solomon nih, a pa David nih a rak rel hna hnuah khan, Israel ram i a ummi ramdangmi vialte kha a rel hna i sing khat, sang nga, thong thum le za ruk an um. ¹⁸ Annih chung i sang sarih cu thil phorh a thiah hna, sang riat cu tlang ram i lung khoih a thiah hna, thong thum le za ruk cu mi kha rian ṭuanter awk caah zohtu ah a thiah hna.

¹ Cun Solomon nih Jerusalem khua chung Moriah Tlang, a pa David sin i Bawipa a langhnak, David nih a timhtuahmi phuhri, Jebus mi Ornan ta a simi ah khan Bawipa inn cu sak hram a thawk. ² A bawi kum linak, thla hnihnak thla ah khan sak hram cu a thawk, ³ Pathian inn saknak ca i Solomon nih a tahnak cu mah hihi an si: a sau, tahnak hlun dong in, dong sawm ruk a si, a kauh cu dong kul a si. ⁴ Cun inn ṭuangpi hmailei i innleng cu a inn vang can in dong kul a si; cun a sanlei cu dong za le dong kul a si. Cun a chunglei in sui thiang in a nalh. ⁵ Ṭuangpi cu saipres thing in a kamh i sui thiang in a nalh i a cungah tumkung le cikcin kha a cuanter hna. ⁶ Inn cu lungvar man sung in a ṭamh, a bunhnak tete a ser hna. Sui cu Parvaim sui a si. ⁷ Cuticun inn cu sui in a hut — a kaan le a innleng le a vampang hna le a innka khar hna kha; cun vampang hna ah khan cherubim a suai hna. ⁸ Cun a thiang bik hmun kha a ser; a saulei cu inn vang he aa khat in dong kul a si i a kauhlei cu dong kul a si; sui thiang talen za ruk in a hut. ⁹ Thirkhenh ca hmanmi cu sui shekel sawm nga a si. Cun cung dot hna cu sui in a hut hna. ¹⁰ Hmun thiang bik ah khan thing in cherubim pahnih a ser hna i sui in a hut hna. ¹¹ Cherubim hna thla hna nih cun dong kul a zarh; pakhat thla pakhat, dong nga a simi nih khan, inn vampang kha a tongh i a thla dang, dong nga a simi nih khan, cherub dang pakhat thla kha a tongh; ¹² cun hi cherub thla pakhat, dong nga a si vemi nih hin, inn vampang kha a tawngh i a khattelei thla, dong nga ṭhiamṭhiam a simi kha, cherub pakhatnak thla ah khan aa peh. ¹³ Hi cherubim hna thla hna nih hin dong kul an zarh; cherubim cu an ke in an dir i ṭuangpi lei kha an hoih. ¹⁴ Cun puanzar a dum, sendung, le sen eu hna kha la hmangṭhia in a ser hna i an cungah cherubim kha a cuanter hna. ¹⁵ Inn hmaiah cun tungpi pahnih, dong sawm thum le dong nga veve a sangmi a ser hna i an par ah cun luchin dong nga veve a sangmi a chinh hna. ¹⁶ Ṭhi bantuk cikcin a ser hna i tungpi par ah cun a ngerh hna; cun taleti za khat a ser hna i cikcin ah cun a thlaih hna. ¹⁷ Tungpi hna cu biakinn hmaiah, pakhat orhlei ah, pakhat kehlei ah a phun hna i orhlei i cu Jakhin tiah a ti i kehlei i cu Boaz tiah a ti.

¹ Dar biakṭheng pakhat a ser i dong kul a sau i dong kul a kau i dong hra a sang. ² Hmaihum a ser i a pum i khattelei tlang in khattelei tlang cu dong hra a si i dong nga a sang i a tlang velchum cu dong sawm thum a si. ³ A tangah cun umruang mui hri an um i dong sawm thum an sau i hmaihum cu a velchum in an kulh; umruang cu tlang hnih in an um i hmaihum an thlet ah khan an thlet chih hna. ⁴ Hmaihum cu cawtum hleihnih cungah a dir, pathum cu chaklei an hoih, pathum cu nitlaklei an hoih, pathum cu thlanglei an hoih i pathum cu nichuahlei an hoih; hmaihum cu an cungah cun khin a si i an hnulei cu a chunglei an chanh cio. ⁵ A chahlei cu zapar a si i a tlang cu hrai tlang bantukin an ser, lili pangpar bantuk a si; bath thong thum ring lo a tlum. ⁶ Kut ṭawlnak kheng pahra a ser fawn hna, panga cu thlanglei kamah a chiah hna i panga cu chaklei kamah a chiah hna. Hi hna chungah hin khangh thawinak ca a simi thil kha an tlengh hna i hmaihum cu tlangbawi hna an i ṭawlnak ding caah a si. ⁷ Cun rak ruah cia bang khan, sui mei vannak tung pahra a ser hna i biakinn chungah khan a hun hna, thlanglei kamah panga a chiah hna i chaklei kamah panga a chiah hna. ⁸ Cabuai zong pahra a ser hna i biakinn chungah khan, thlanglei kamah panga, chaklei kamah panga a chiah hna. Cun sui khengkuar za khat a ser hna. ⁹ Tlangbawi hna tual le tual ngan le tual ca i innkhar kha a ser hna i an innkhar hna cu dar in a hut hna; ¹⁰ cun hmaihum cu inn thlanglei-nichuahlei kamah khan a hun. ¹¹ Huram nih um hna le cawhlek hna le khengkuar hna kha a ser hna. Cuticun Huram nih Bawipa inn ca i Siangpahrang Solomon a tuahpiakmi rian kha a lim: ¹² tungpi pahnih le kheng hna le tungpi dong i a ummi luchin pahnih hna; cun tungpi dong i a ummi luchin kheng khuhtu ding ca i sur bantukin sermi pahnih; ¹³ cun tungpi dong i a ummi luchin kheng khuhtu hna ca i sur pahnih hna caah khan taleti za li, sur pakhat caah taleti rual hnih lengmang. ¹⁴ Cun hunnak hna le hunnak cung i ṭawlnak kheng hna le ¹⁵ hmaihum pakhat kha le a tang i cawtum hleihnih hna zong kha a ser hna. ¹⁶ Um hna le cawhlek hna le keuṭe hna le hi hna ca i thilri vialte cu Huram-abi nih khan Siangpahrang Solomon caah Bawipa inn caah khan dar tleu in a ser hna. ¹⁷ Jordan nelrawn, Sukkoth le Zeredah karlak i tlak hmun ah khan siangpahrang nih a thlet hna. ¹⁸ Solomon nih hi thil vialte hna cu tam piin a ser hna i cucaah dar cu a khing zeizat a si kha hngalh khawh a si lo. ¹⁹ Cuticun Solomon nih Pathian inn chung i a ummi thil vialte cu a ser hna: sui biakṭheng, Hun Camcinmi changreu ca i sui cabuai, ²⁰ ruah cia ningin hmunthiang chungchin i van awk ca meiinn tung hna le an meiinn hna, sui thiang in sermi; ²¹ sui thiang bik in sermi pangpar hna le meiinn hna le cengceh hna; ²² sui thiang in sermi mei hmihnak hna, khengkuar hna, zihmui kheng hna le mei zahnak hna; cun hmun thiang bik luhnak chungchin innkhar hna le biakinn ṭuangpi innkhar hna ca i sui thiang in sermi biakinn kapza hna.

¹ Cuticun Bawipa inn caah Solomon nih a tuahmi rian vialte cu lim a si. Cun Solomon nih a pa David nih a rak pekchanh ciami thil hna kha a luhpi hna i Bawipa inn chung rokuang chungah khan ngun, sui le umkheng vialte kha a chiah hna. ² Cun Solomon nih Israel mi upa hna le an phun cio lu hna kha le Israel mi an pale innchungkhar hna hruitu cio hna kha, David khua a simi Zion in Bawipa biakamnak kuang cu hun chuahpi awkah Jerusalem khua ah a pumh hna. ³ Cun thla sarihnak thla i a simi puai ah khan Israel mi vialte cu siangpahrang hmaiah cun an i pum. ⁴ Cun Israel mi upa vialte kha an ra i Levi mi nih khan kuang kha an thawhpi. ⁵ Annih nih kuang le tonnak thlam le thlam chung i a ummi umkheng thianghlim vialte kha an kalpi; tlangbawi hna le Levi mi hna nih khan an kalpi hna. ⁶ Cun Siangpahrang Solomon le Israel mi bu vialte amah hmai i aa pummi hna cu kuang hmaiah khan an um i annih nih an thawimi tuu le cawtum cu an tam tuk caah rel cawk le chim cawk an si lo. ⁷ Cuticun tlangbawi hna nih khan Bawipa biakamnak kuang cu a umnak ding hmun, inn chung chungchin hmunthiang, a thiang bik hmun, cherubim hna thla toiah khan an luhpi. ⁸ Kuang umnak hmun cungah khan cherubim hna nih khan an thla an zam caah cherubim hna nih cun kuang le a laang hna kha an thla cu an zarh hna. ⁹ Lang cu an sau caah chungchin hmunthiang hmai i a ummi hmunthiang khan an par le an par cu hmuh khawh an si; sihmanhsehlaw lenglei cun hmuh khawh an si lo; cuka ah cun nihin tiang hin an um ko. ¹⁰ Israel mi nih Izipt ram in an chuah tikah, Bawipa nih annih he biakamnak a tuahnak Horeb tlang i Moses nih biakamnak kuang chungah a khumhmi lungtlap pahnih hna dah ti lo kha cu, biakamnak kuang chungah cun a dang zeihmanh a um lo. ¹¹ Cun tlangbawi hna cu hmun thiang chung khan an hung chuah tikah (cuka i a ummi tlangbawi vialte hna cu an i thianh dih ko cang, an i ṭhenning kha cu ruah loin; ¹² cun Levi mi hlasa pawl vialte, Asaf, Heman le Jeduthun, an fapa hna le an rualchan hna kha puan hmang ṭhia in an i thuam i sumsel le tingtang le thonglawi he biakṭheng in nichuahlei ah khan muko tumtu tlangbawi za khat le pakul hna he khan an dir;) ¹³ muko tumtu hna le hlasatu hna an rian cu Bawipa lawmhnak hla le thangṭhatnak hla kha aw khat tein thanter kha a si caah, muko hna le sumsel hna le awdawh tumnak thilri dang hna he cun: "Zeitintiah amah cu a ṭha, A fekmi a dawtnak cu zungzal in a hmun," tiin Bawipa thangṭhat in hla cu an hun sak tikah, inn kha, Bawipa inn kha, minmei in a khah ¹⁴ caah tlangbawi hna cu rianṭuan awkah khan dir awk an si nain minmei ruangah cun an dir kho lo; zeicahtiah Pathian inn cu Bawipa sunparnak kha a khat.

¹ Khi tikah Solomon nih aa thawh i, "Bawipa nih a chahmi muihnak chungah ka um lai, tiah a ti. ² A sunglawimi inn kan sakpiak cang, Zungzal in na umnak ding caah," tiah a ti. ³ Cun siangpahrang cu a hnulei aa mer i Israel mi aa pummi vialte cu an dir lioah, Israel mi aa pummi vialte cu thluachuah a pek hna. ⁴ Cun aa thawh i, "Ka pa David sinah, ⁵ ’Ka mi Israel mi hna cu Izipt ram in ka chuahpi hna ni thawk in, Israel mi hna phun chung i khua zeihmanh kha, ka min umnak ding i inn saknak caah, ka thim lo i ka mi Israel mi hna cung i bawi caah ahohmanh ka thim hna lo; ⁶ sihmanhsehlaw ka min cu khika ah a um nakhnga Jerusalem cu ka thim i David cu ka mi Israel mi hna cung i um awkah ka thim,’ tiin a ka in a chimmi a biakamnak kha a kut in a tlintertu Bawipa, Israel Pathian cu thangṭhat si ko seh. ⁷ Bawipa, Israel Pathian min ca i inn rak sak kha ka pa David lung chungah a rak um ko. ⁸ Sihmanhsehlaw Bawipa nih ka pa David cu a thawh i, ’Ka min ca i inn sak awk kha na lung chung i a um caah, mah cucu na lung chung i na umter cu a ṭha; ⁹ asinain, nangmah nih cun inn cu na sa lai lo, sihmanhsehlaw nangmah nih na hrin laimi na fapa nih ka min ca inn cu a run sak te lai,’ a ti. ¹⁰ Atu cu Bawipa nih a biakamnak a sermi kha a hun tlinter cang; zeitintiah ka pa David hmun ah khan ka kai cang i Bawipa biakam bang khan Israel mi bawi ṭhutdan cungah ka ṭhu i Bawipa, Israel Pathian min caah khan inn cu ka sak cang. ¹¹ Cun Israel mi hna he Bawipa nih biakamnak a tuahmi khumhnak kuang kha khika ah cun ka chiah cang," tiah a ti. ¹² Cun Solomon cu Bawipa biakṭheng hmaiah khan Israel mi a pummi vialte hna hmuh ah cun a dir i a kut kha a phar hna. ¹³ Solomon nih dar in donhhlei pakhat, dong nga a sau, dong nga a kau i dong thum a sangmi kha tual ah khan a chiah i a cungah cun a dir. Cun Israel mi aa pummi vialte hna hmaiah cun a khuk aa bil i van leiah a kut a phar hna; ¹⁴ cun aa thawh i, "Maw Bawipa, Israel Pathian, van ah siseh, vawlei ah siseh, nangmah bantuk Pathian zeihmanh an um lo, nangmah nih cun na hmai i an lungthin dihlak in a kalmi na salle hna cungah cun na biakamnak kha na zulh i a fekmi na dawtnak kha na langhter; ¹⁵ na sal David, ka pa sinah na rak kamhmi cu na zulh; asi, a sinah na ka in na rak chim i mah cucu nihin ni ah hin na kut in na tlinter. ¹⁶ Cucaah maw Bawipa, Israel Pathian, na salpa David ka pa sin i, ’Na fapale hna nih hin, nangmah nih ka hmaiah na rak kal bantuk khan ka nawlbia chung i kal hi an i ralrin ahcun, Israel mi bawi ṭhutdan cung i ka hmaiah a ṭhu dingmi na ṭhing lai lo,’ tiin bia na rak kammi kha tlinter ko. ¹⁷ Cun maw Bawipa, Israel Pathian, na salpa David ka pa sin i na rak chimmi bia kha fehter ko. ¹⁸ "Sihmanhsehlaw Pathian nih cun vawlei cungah cun minung sinah hin khua a sa taktak hnga maw? Zohhmanh, van le a sang bik van nih khin an in tlum lo; zeitindah hi keimah sakmi inn chinchin nih cun an tlum hnga! ¹⁹ Sihmanhsehlaw na salpa nih thla ka camnak le kan nawlnak cu ka ngaihpiak ko sawh, maw Bawipa ka Pathian, nangmah hmaiah na salpa nih thla ka camnak le ka aunak cu ka theihpiak ko sawh; ²⁰ zeitintiah nangmah nih na min chiahnak caah bia na kammi hmun, hi inn leiah hin chun zan in na mit na chiah nakhnga le hi inn lei hoih in na salpa nih thla ka cammi hi na theih nakhnga. ²¹ Cun na salpa le na mi Israel mi hna nih hi hmun lei hoih in thla kan cam tikah, kan in nawlnak cu kan theihpiak ko; asi, na umnak hmun van khin run thei ko law, cun na theih tikah kan ngaithiam ko. ²² "Mi pakhatkhat nih a innpa cungah a sual i chiat serter a si i a chiatsernak cu hi inn chung na biakṭheng hmaiah hin chimter a si ahcun, ²³ khi tikah nang nih van khin run thei law, run ṭuan law, na salle cu bia run khiak ko hna, a mawhtu cu amah lu lila ah a ziaza kha tlunter in sual run phaw law, a dingmi cu a dinnak ningin pek awkah thiam coter ko. ²⁴ "Na mi Israel mi hna cu nangmah cung i an sual caah an ral hna hmaiah an sungh ahcun, annih nih an i mer ṭhan i na min kha an upat i nangmah kha hi inn chungah an in nawl i na sinah thla an cam tikah, ²⁵ van khin rak theihpiak hna law na mi Israel mi sualnak cu ngaithiam law, annih le an pupa hna sinah na pekmi ram ah cun kirpi ṭhan ko hna. ²⁶ "Cun nangmah cung i an sual ruangah van cu a pih i ruah a sur lo tikah, hi hmun lei hoih in thla an cam i na min kha an upat i nangmah nih na hrem hna tikah an sualnak kha an mertak ahcun, ²⁷ nangmah nih an kalnak hnga ding lam ṭha kha na cawnpiak hna tikah, van ah khin rak thei law, na mi Israel mi, na sal hna an sualnak kha rak ngaithiam ko hna; cun na mi hna sinah ro caah na pekmi na ram cungah cun ruah cu surter ko. ²⁸ "Ram chungah hin mangṭam a tlun ah siseh, rai a tlun ah siseh, rocarnak le theikung rai a tlun ah siseh, khaubawk le lunghmul an tlun ah siseh, an ral hna nih khan an khua pakhatkhat i an hren hna ah siseh, zei bantuk rai hmanh si ai kun, zei bantuk zawtnak hmanh si ai kun, ²⁹ Israel mi nih an dihlak in siseh, ahopaoh nih siseh, zei bantuk thlacamnak zong si ko seh, zei bantuk nawlnak zong si ko seh, an tuah i hremnak an in ciomi le an ngaihchiatnak cio kha an hngalh i hi inn leiah hin an kut an zao hna ahcun, ³⁰ khi tikah nang nih na umnak van khin rak theihpiak hna law, ngaithiam hna law, an zulhmi lam vialte ning cio ah an lungthin nangmah nih na hngalh komi hna cu pe ko hna, zeitintiah nangmah lawnglawng nih minung fa hna an lung cu na hngalh; ³¹ kan pupa na rak pekmi hna ram ah hin khua an sak chung vialte nangmah kha an in ṭih i na lam kha an zulh hna nakhnga, theihpiak ko hna. ³² "Cu bantukin, na mi Israel mi a si lomi ramdangmi nih, na min ngan le a ṭhawngmi na kut le na samhmi na baan ruangah lam hlatpi ram in an rat i hi inn lei hoih in thla an cam ahcun, ³³ na umnak van khin rak theihpiak law, ramdangmi nih an in auhnak vialte ning in tuahpiak ko hna; zeitintiah vawleicung mi vialte nih na mi Israel mi bangin, na min kha an theih i nangmah kha an in ṭih i hi inn ka sakmi hi nangmah min in kawh a si kha an hngalh nakhnga, theihpiak ko hna. ³⁴ "Cun na mi hna cu an ral doh awkah an kal ahcun, zei lam zongin na kalter hna a si ah, nangmah nih na thimmi khua hi le nangmah min caah ka sakmi inn lei hoih hin nangmah sinah thla an cam ahcun, ³⁵ khi tikah van khin an thlacamnak le an in nawlnak cu rak theihpiak hna law, annih an rian ah cun ṭanpi ko hna. ³⁶ "Annih nih na cungah an sual ahcun — zeitintiah a sual lomi minung an um lo — cun an cungah na thin a hun i ral kut chungah annih cu na chanh hna i a naimi ram ah siseh, a hlami ram ah siseh, sal ah kalpi an si i ³⁷ sihmanhsehlaw sal ah an kalpi hnanak ram ah cun, an lung a hung pem i an i ngaihchih i sal ah an tannak ram ah cun na sinah, ’Kan sual cang, ding lo pi le ṭhalo piin thil kan tuah cang,’ tiin nawlnak an tuah ahcun, ³⁸ sal ah an kalpi hna i sal i an tannak ram ah cun an ruahnak dihlak le an lungthin dihlak in an i ngaihchih i an pupa hna sinah na rak pekmi an ram le nangmah nih na thimmi khua le na min caah ka sakmi inn lei hoih in nangmah sinah thla an cam ahcun, ³⁹ khi tikah na umnak van khin an thlacamnak le an in nawlnak cu rak theihpiak hna law an rian ah cun ṭanpi ko hna law nangmah cung i a sualmi na mi cu ngaithiam ko hna. ⁴⁰ Maw ka Pathian, hi hmun thlacamnak hi run hmu ko sawh law, run thei ko sawh. ⁴¹ "Maw Bawipa Pathian, tho law na umnak hmun ah cun kal tuah, Nangmah le na ṭhawnnak kuang zong. Maw Bawipa Pathian, na tlangbawi hna cu khamhnak in thuam hna law, Na mithiang hna cu na ṭhatnak in lawmhter hna. ⁴² Maw Bawipa Pathian, na chiti thuhmi cu hlaw hlah! Na sal David ca i a fekmi na dawtnak kha philh hlah," tiah a ti.

¹ Solomon nih thla a camnak a dih tikah, van in mei a rung tla i khangh thawinak le raithawinak hna kha a kangh hna i Bawipa sunparnak cu biakinn kha a khat. ² Cun Bawipa sunparnak cu Bawipa inn kha a khah caah tlangbawi hna cu Bawipa inn ah khan an lut kho lo. ³ Israel fale vialte nih mei a rung ṭum le biakinn cung i Bawipa sunparnak kha an hmuh tikah, vawlei lei hoih in lung phahmi cungah khan an lu an i khun i Bawipa cu an biak i an lawmh i, "Zeitintiah amah cu a ṭha, A fekmi a dawtnak cu zungzal in a hmun," tiah an ti. ⁴ Cun siangpahrang le Israel mi vialte nih Bawipa hmaiah raithawinak kha an pekchanh. ⁵ Siangpahrang Solomon nih raithawinak caah cawtum sang hnih le thong hnih le tuu sing khat le sang hnih a pekchanh. Cuticun siangpahrang le mi vialte nih khan Pathian inn cu an pekchanh. ⁶ Tlangbawi cu an umnak hmun cio ah khan Levi mi hna he hmaitonh in an dir. Levi mi hna cu Bawipa thangṭhatnak caah David nih a rak sermi aw dawh tumnak thilri hna he khan an dir i David nih an rian ah a rak thiah hna bang khan, "A fekmi a dawtnak cu zungzal in a hmun," timi hla kha lawmhnak in an sa. Tlangbawi hna nih khan mi zapi an dir ah khan muko kha an tum hna. ⁷ Cun Solomon nih Bawipa inn hmai i a ummi tual laifang kha a thianter; Solomon nih a sermi dar biakṭheng nih khan khangh thawinak le changvut thawinak le a thau hna kha a tlum hna lo caah, khika ah khangh thawinak le daihnak thawinak thau hna kha an pekchanh hna. ⁸ Cu tan ah cun Solomon le a sin i a ummi Israel mi vialte, bu nganpi, Hamath khua luhnak in Izipt tivate tiang, cu hna nih cun puai cu ni sarih chung an tuah. ⁹ Cun a ni riatnak ni ah a thiangmi pumhnak an tuah; zeitintiah annih nih biakṭheng pekchanhnak kha ni sarih chung an tuah i puai kha ni sarih chung an tuah. ¹⁰ Thla sarihnak thla, a ni kul le ni thumnak ni ah mi cu an inn ah an tlunter hna i Bawipa nih David le Solomon le a mi Israel mi hna cung i ṭhatnak a langhtermi ruangah lunglawm le thanuam in an tlung. Bawipa Voi Hnihnak A lang Ṭhan ¹¹ Cuticun Solomon nih Bawipa inn le siangpahrang inn cu a lim hna; Solomon nih Bawipa inn chungah siseh amah a inn chungah siseh, tuah a timhmi vialte kha tling tein a lim dih hna. ¹² Cun Bawipa cu Solomon sinah zan ah a lang i amah cu a thawh i, "Na thlacamnak cu ka theih cang i hi hmun cu raithawinak inn caah kaa thim cang. ¹³ Van cu ka phih hna i ruah a um lo tikah siseh, khaubawk hna cu vawlei ei awkah nawl ka pek hna tikah siseh, ka mi hna lakah rai ka tlunter tikah siseh, ¹⁴ ka min in kawhmi ka mi hna nih khan an lung an ṭhumh i thla an cam i ka hmai kha an kawl i an lam ṭhalo khan an i mer ahcun, van khin ka run theih lai i an sualnak cu ka ngaihthiam hna lai i an ram cu ka damter lai. ¹⁵ Cun hi hmun i thla an cammi cu ka mit nih a hmuh lai i ka hna nih a theih lai. ¹⁶ Ka min cu zungzal in hika ah a um nakhnga hi inn cu ka thim cang i ka thianter cang; ka mit le ka lung cu hika ah an um camcin lai. ¹⁷ Cun nangmah kong ah cun, na pa David nih a rak kal bantuk khan ka hmaiah na kal i nawl kan pekmi vialte ningin na tuah i ka nawlbia hna le ka phunglam hna cu na zulh hna ahcun, ¹⁸ khi tikah na pa David sinah, ’Israel mi uktu dingah mi na ṭhing lai lo,’ tiin bia ka rak kam bang khan na siangpahrang bawi ṭhutdan cu ka fehter lai. ¹⁹ "Sihmanhsehlaw na pial i na hmai i ka chiahmi ka nawlbia hna le ka phungbia hna cu na hlawt hna i na kal i pathian dang hna kha an rian na ṭuan hna i na biak hna ahcun, ²⁰ kan pekmi ram hin kan phawi lai i hi inn ka min ca i ka thiantermi hi ka mit hmuh phak lo ah khin ka hlonh lai i mi vialte lakah phungthluk bia le nihchuak capo bia ah ka ser lai. ²¹ Cun hi inn a sunglawimi ah hin a pawng i a kalmi paoh an khuaruah a har lai i, ’Zeicahdah mahtihin Bawipa nih hi ram cung le hi inn cungah hin a tuah hnga?’ tiah an ti lai. ²² Khi tikah annih nih an i thawh lai i, ’Zeicahtiah annih nih Bawipa, an pupa hna Pathian, Izipt ram in a chuahpitu hna kha an hlawt i pathian dang kha an i tlaih i an biak hna i an rian an ṭuan hna caah a si; cucaah hi ṭhat lonak vialte hi an cungah a tlunter,’ an ti lai," tiah a ti.

¹ Solomon nih Bawipa inn le amah inn a sak chung kum kul a donghnak ah khan, ² Huram nih a pekmi khua hna kha a ser ṭhan hna i an chungah Israel mi kha a umter hna. ³ Cun Solomon cu Hamath-zobah ah a va kal i a va lak. ⁴ Ramlak i Tadmor kha le Hamath i thil khonnak khua a sermi vialte kha a ser hna. ⁵ Kulhmi khua, hau le kutka le a hrenhnak a ngeimi Beth-horon Cungnung le Beth-horon Tangnung le ⁶ Baalath le Solomon nih a ngeihmi thil khonnak khua vialte le a rangleng hna ca khua vialte le a rangcung ralkap hna ca khua hna le Solomon nih Jerusalem ah siseh, Lebanon ah siseh, a penmi ram chung paohpaoh ah siseh, sak a duhmi paohpaoh kha a sak fawn hna. ⁷ Hit mi hna le Amor mi hna le Periz mi hna le Hiv mi hna le Jebus mi hna chungin a tangmi vialte, Israel mi a si lomi hna kha, ⁸ kha hna an tefa, kha ram chung i a tangmi hna, Israel mi nih an hrawh lomi hna kha — hi hna hi Solomon nih hnekmi rian ṭuantu bu ah a ser hna i nihin tiang hin an si ko. ⁹ Sihmanhsehlaw Israel mi chung cun Solomon nih a rian ṭuantu caah sal a ser hna lo, annih cu ralkap le a bawi hna le a rangleng haotu hna le a rangcung ralkap an si. ¹⁰ Cun hi hna hi Siangpahrang Solomon bawi upa bik pawl an si, za hnih le sawm nga an si i, mi cung i nawl ngeitu an si. ¹¹ Solomon nih Faro fanu cu David khua khan, amah ca i a sakmi inn ah a hunpi i, "Bawipa biakamnak kuang a phanhnak hmun cu hmunthiang an si caah ka nupi cu Israel mi siangpahrang David inn chungah khan a um hnga lo," tiah a ti. ¹² Cun innleng hmai i a sakmi Bawipa biakṭheng cungah khan Solomon nih Bawipa sinah khangh thawinak kha a pekchanh hna, ¹³ mah cucu Moses nih sabbath hna ca le thla thar hna ca le kum khat voi khat tuahmi puai — thilnu telh lo changreu puai, zarh hna puai le deu puai hna ca i nawl a chiah bangkhan, a ni cio rian nih a hlamning khan an pekchanh hna. ¹⁴ A pa David nih a rak chiahmi phunglam ning khan, tlangbawi hna cu an rian cio caah khan a bubu in a thiah hna i ni fate rian nih a hlam cio ning khan Levi mi hna cu tlangbawi hna hmai i thangṭhatnak rian le rianṭuannak an tuah awk a simi ah khan a thiah fawn hna, cun kutka cawngtu pawl zong kha kutka hna caah khan an bubu in a thiah hna; zeitintiah cuticun Pathian mi David nawl pekning cu a si. ¹⁵ Siangpahrang nih tlangbawi hna le Levi mi hna, zei thil paoh kong le chawhlawn khonnak kong ah nawl a pekmi hna cu annih nih an pialtak lo. ¹⁶ Bawipa inn a hram an dirh ri in an lim tiang, Solomon rian vialte cu, cuticun lim a si. Cucaah Bawipa inn cu an lim. ¹⁷ Cun Solomon cu Edom ram chung, rili kam i a ummi Ezion-geber le Eloth ah a kal. ¹⁸ Cun Huram nih, rili i a kal tawnmi a sinum hna le lawng hna kha a sinum hna in a hei kuat, cun annih cu Solomon sinum hna he khan Ofir ah an kal i cuka cun sui talen za li le sawm nga an rak phorh i Siangpahrang Solomon sinah khan an ratpi.

¹ Siangpahrangnu Sheba nih Solomon minthannak kha a theih tikah, amah cu a harmi biahalnak in hneksak awkah Jerusalem ah a ra; mizul tampi, zihmui phormi kalauk hna le sui tampi le lung mansung tampi aa phorh hna. Solomon sin a phak tikah a lung chung i a ummi vialte cu a chim dih. ² Solomon nih a biahalnak vialte cu a leh dih; Solomon nih a sullam a chimh khawh lomi thil, Solomon sinin aa thupmi zeihmanh a um lo. ³ Cun Siangpahrangnu Sheba nih Solomon fimnak le a inn sakmi le ⁴ a cabuai i rawl le a bawi pawl an ṭhut-umning le a sinum hna nih an tuammuai hna ning le an hnipuan le a hrai putu hna le an hnipuan le Bawipa inn i a pekchanhmi a khangh thawinak hna kha a hmuh tikah, a chungah thlarau a tang ti lo. ⁵ Cun siangpahrang cu a thawh i, "Ka ram chungin, na rian ṭuanning le na fimnak kong ka rak theihmi kha bia dik a si ko, ⁶ sihmanhsehlaw an chimmi cu keimah hrim ka rat i keimah mit hrim nih a hmuh hlanah cun ka rak zum lo; zohhmanh, na fimnak a ngan ning a cheu hmanh an rak ka chimh ṭung lo; ka rak theihmi bia cu na lonh diam. ⁷ Na nupi hna hi an van a va ṭha dah! Hi na sinum hna, nangmah hmaiah a dir zungzal i na fimnak a theimi hna hi an van a va ṭha dah! ⁸ Bawipa na Pathian, nangmah chungah lawmhnak a ngei i Bawipa na Pathian ca i siangpahrang ah a bawi ṭhutdan cungah an ṭhuttertu cu thangṭhat si ko seh! Na Pathian nih Israel mi cu a dawt hna i zungzal in hmunhter a duh hna caah, nangmah nih biading le dinnak kha na tuah nakhnga, an cung i siangpahrang ah an ser," tiah a ti. ⁹ Cun siangpahrang cu sui talen za khat le kul le zihmui tampi le lungvar man sung hna kha a pek: Siangpahrangnu Sheba nih Siangpahrang Solomon a pekmi zihmui bantuk cu a dang a um ti lo. ¹⁰ Cuhleiah Huram sinum hna le Solomon sinum hna, Ofir in sui a rak phortu nih khan, algum thing le lungvar man sung an rak phorh hna. ¹¹ Cun siangpahrang nih algum thing cun Bawipa inn hleihlak hna le siangpahrang inn hleihlak hna le hlasatu hna ca i tingtang hna le ruakhuang hna zongah a ser hna; Judah ram chungah cu bantuk cu hmuh an si bal lo. ¹² Cun Siangpahrang Solomon nih siangpahrangnu Sheba cu a duhmi vialte, siangpahrang sin i a rak phorhmi hleiah a halmi vialte kha a pek dih. Cucaah aa let i a sinum hna he amah ram ah khan an tlung ṭhan. ¹³ Solomon sinah kum khat ah a lutmi sui a rih lei cu talen za ruk, sawm ruk le paruk a si, ¹⁴ mah hihi chawlet hna le chawdawr hna nih an luhpimi lengah a si; cun Arabia siangpahrang vialte le ram uktu bawi hna nih khan Solomon sinah sui le ngun kha an ratpi. ¹⁵ Siangpahrang Solomon nih phaw a nganmi za hnih, denmi sui in a ser hna; phaw pakhat ah denmi sui shekel za ruk cio a lut. ¹⁶ Cun denmi sui in phaw za thum a ser hna; sui shekel za thum cio phaw pakhat ah cun a lut; cun siangpahrang nih cun Lebanon Tupi Inn chungah khan a chiah hna. ¹⁷ Siangpahrang nih cun vuiho bawi ṭhutdan nganpi zong a ser i sui thiang in a hut. ¹⁸ Bawi ṭhutdan nih cun lamhbak paruk le sui in sermi kedanh a ngei i cu hna cu bawi ṭhutdan ah khan an i peh, ṭhutnak kam veve ah ban chiahnak an um i ban chiahnak pawng veve ah cun chiandeih pahnih an dir; ¹⁹ lamhbak kam kip ah khan a lamhbak paruk in, chiandeih hleihnih an dir. Cu bantuk cu khuazei ram hmanh ah an ser bal lo. ²⁰ Siangpahrang Solomon dinnak hrai vialte cu sui an si i Lebanon Tupi Inn umkheng vialte cu sui thiang an si; Solomon chan ah cun ngun cu zeihmanh ah an rak rel lo. ²¹ Zeicahtiah Huram sinum hna he khan siangpahrang i a sangphawlawng cu Tarshish ah an kal tawn; kum thum ah voi khat lengmang Tarshish sangphawlawng nih sui, ngun, vui ho, zawng le awtaw kha an rak phorh tawn hna. ²² Cuticun Siangpahrang Solomon nih vawlei cung siangpahrang vialte cu rumnak le fimnak ah a lonh dih hna. ²³ Cun Pathian nih a lung chung i a chiahmi fimnak theih awkah vawlei cung siangpahrang vialte hna nih cun Solomon cu an fuh. ²⁴ Cun kumfate in, cu zat in tiin, an laksawng ngun in sermi thilri hna le sui in sermi thilri hna le, puan hna le mura le zihmui le rangtum hna le laa hna kha an rak put cio hna. ²⁵ Cun Solomon nih cun rangtum hna le rangleng hna caah ranginn thong li a ngei i rangleng khua hna le Jerusalem i siangpahrang sinah a chiahmi rangcung ralkap sang khat thong hnih a ngeih hna. ²⁶ Cun Zufrates tiva in Filistin mi hna ram tiang, cun Izipt ramri tiang, cuka i a ummi siangpahrang vialte kha a uk hna. ²⁷ Cun siangpahrang nih Jerusalem ah ngun cu lungtekem tlukin a lenter i sidar thing cu Shefelah i saikamor thing bantukin a tamter. ²⁸ Cun rangtum hna cu Solomon caah Izipt ram le ram kip ah an va cawk hna. ²⁹ Cun Solomon tuahsernak a tang rihmi cu, a hramthawk in a donghnak tiang, profet Nathan ṭialmi tuanbia chungah le Shilon mi Ahijah nih a chimmi bia ṭialnak cauk chungah le Nebat fapa Jeroboam kong i hmutu Iddo nih langhnak a hmuhmi ṭialnak cauk chungah khan an i ṭial lo mei? ³⁰ Solomon nih Israel vialte cu Jerusalem in kum sawm li a pen hna. ³¹ Cun Solomon cu a pupa hna sinah a it i a pa David khua ah khan an vui; cun a fapa Rehoboam cu amah hmun ah khan a hung bawi.

¹ Israel mi vialte cu Rehoboam kha siangpahrang i ser awkah Shekhem ah an rat caah Rehoboam cu Shekhem ah a kal. ² Cun Nebat fapa Jeroboam nih a theih tikah (amah cu Solomon Siangpahrang sinin a zamnak khan Izipt ram ah a um ko) Jeroboam cu Izipt ram cun a hung kir. ³ Cun amah cu an hei cah i an kawh; cun Jeroboam le Israel mi vialte cu an ra i Rehoboam cu, ⁴ "Na pa nih kan seihnam cu a rihter. Cucaah nang nih cun na pa nih kan cungah rian har le seihnam rit a kan khinhmi cu zanter law na rian kan ṭuan lai," tiah an ti. ⁵ Cun anih nih a thawh hna i, "Ni thum chungah ka sinah ra ṭhan te u," tiah a ti hna. Cucaah mi cu an kal. ⁶ Cun Siangpahrang Rehoboam nih cun, a pa Solomon a nun lio i a hmai i a rak dirmi tar hna kha ruahnak a hal hna i, "Hi mi hna hi zeitin va let hna ti ah dah nan ka ti?" tiah a ti. ⁷ Cun annih nih an thawh i, "Hi mi hna cungah hin zaangfahnak na ngeih i na lawmhter hna i bia ṭha in na chawnh hna ahcun, annih cu a zungzal in na sal an si lai," tiah an ti. ⁸ Sihmanhsehlaw upa hna nih fim an chimhmi kha a hlawt i amah ṭhirual a hmaiah a um tawnmi tlangval hna kha ruahnak cheuh a hal hna. ⁹ Annih cu a thawh hna i, " ’Na pa nih kan cungah a kan khinhmi seihnam rit hi zanter tuah,’ tiah a ka timi hna hi zeitindah ka leh hna lai, zei ruahnak dah nan ka cheuh lai?" tiah a ti. ¹⁰ Cun amah ṭhirual tlangval hna nih khan amah cu, " ’Na pa nih cun kan seihnam kha a rihter ko, sihmanhsehlaw nang nih cun kan zaanterpiak ko,’ tiah na sinah a titu hna sinah cun hi bangin na chim lai, ’Ka hngete cu ka pa tai nakin a chah deuh. ¹¹ Cucaah atu cu ka pa nih nan cung i a ritmi seihnam a chiahmi ah khan kan chap chin hna lai. Ka pa nih fungfek in an chimhhrin hna, sihmanhsehlaw kei nih cun tlang ngaikuang in kan chimhhrin hna lai,’ na ti lai," tiah an ti. ¹² Cucaah siangpahrang nih, "Ni thumnak ni ah ka sinah ra te u," tiah a ti bang khan, Jeroboam le mi vialte cu Rehoboam sinah ni thumnak ni ah an ra. ¹³ Cun siangpahrang nih cun hrang ngaiin a rak leh hna i upa hna nih fim an chimhmi kha hlawt in ¹⁴ Siangpahrang Rehoboam nih cun tlangval hna nih lungthin an cheuhmi ning khan annih cu a chawnh hna i, "Ka pa nih nan seihnam cu a rak rihter ko, sihmanhsehlaw nan seihnam cu ka rihter chin lai; ka pa nih fungfek in an chimhhrin hna, sihmanhsehlaw kei nih cun tlang ngaikuang in kan chimhhrin hna lai," tiah a ti hna. ¹⁵ Cucaah siangpahrang nih mi cu an bia a ngai hna lo; zeitintiah Bawipa nih Shilon mi Ahijah kha hmang in Nebat fapa Jeroboam sinah bia a chimmi kha tlinter awk caah Pathian nih mahtihin thil kha a mersan. ¹⁶ Cun Israel mi vialte nih siangpahrang nih kan bia a ngai lo ti kha an hmuh tikah, mizapi nih cun siangpahrang cu an leh i, "David chungah zei covo dah kan ngeih? Jesse fapa chungah ro kan ngei lo. Maw Israel, nan thlam cio ah kal dih u! David, nangmahte nih na innchungkhar cu i zohkhenh ko," an ti. Cucaah Israel mi vialte cu an thlam cio ah an tlung dih. ¹⁷ Sihmanhsehlaw Judah ram khua chung i a ummi Israel mi kha cu Rehoboam nih a uk hna. ¹⁸ Cun hnekmi rian zohkhenhtu a simi bawi Hadoram kha Siangpahrang Rehoboam nih a hei thlah i Israel mi nih khan thi lak in lung in an rak cheh. Cun Siangpahrang Rehoboam cu Jerusalem i zam awkah khulrang in a rangleng kha aa cit. ¹⁹ Cucaah Israel mi hna nih cun David innchungkhar cu nihin ni tiang hin an doh hna.

¹ Rehoboam cu Jerusalem ah a rat tikah, Judah le Benjamin innchungkhar chung khan ralkap thim ciammammi sang riat kha. Rehoboam pennak lak ṭhan awk ca i Israel mi doh awkah khan a pumh hna. ² Sihmanhsehlaw Pathian mi Shemaiah sinah khan Bawipa bia a ra i, ³ "Judah siangpahrang Rehoboam, Solomon fapa le Judah le Benjamin ram chung i a ummi Israel mi vialte sinah khan, ⁴ ’Hi bangin Bawipa nih, Nan hung kal awk a si lai lo i nan unau Israel mi cu a doh zong nan hung do hna lai lo. Hi thil cu keimah sinin a rami a si caah nan inn cio ah kir dih u, a ti,’ tiah va chim," tiah a ti. Cucaah Bawipa bia cu an ngaih i an kir i Jeroboam cu an doh lo. ⁵ Rehoboam cu Jerusalem ah a um i i vennak caah Judah ram chungah khua a ser hna. ⁶ Bethlehem, Etam, Tekoa, ⁷ Beth-zur, Soko, Adullam, ⁸ Gath, Mareshah, Zif, ⁹ Adoraim, Lakhish, Azekah, ¹⁰ Zorah, Aijalon, le Hebron khua hna kha a ser hna, annih cu Judah le Benjamin ram chung i kulhnak a ngeimi khua an si. ¹¹ An ralhruang hna cu fek tein an ser hna i an chungah ralbawi hna le rawl khonmi hna le chiti le mitsur hang a chiah hna. ¹² Cun khua kip ah khan phaw le fei a chiah hna i khua fek ngaingai ah a ser hna. Cucaah Judah le Benjamin ram cu a co hna. ¹³ Cun Israel ram dihnak ah a ummi tlangbawi hna le Levi mi hna nih khan amah cu an umnak hmun kip khan an fuh cio. ¹⁴ Levi mi hna nih an i hrawmmi ram hna le an thilri kha an kaltak hna, zeicahtiah Jeroboam le a fapale hna nih khan Bawipa tlangbawi rian an ṭuannak khan an dawi hna i ¹⁵ a sermi khuahrum bo hna le mehehtum hna ca le cawfa hna caah khan amah a fapale hna kha tlangbawi ah a ser hna. ¹⁶ Cun Bawipa, Israel Pathian kha kawl awkah a lung in aa seh chihmi hna nih cun, Bawipa, an pupa hna Pathian sin i raithawi awkah khan Israel phun vialte chungin annih cu an zulh hna. ¹⁷ Judah pennak cu an fehter i Solomon fapa Rehoboam cu kum thum chung an himter, zeicahtiah annih nih kum thum chung cu David le Solomon lam kha an zulh. ¹⁸ Rehoboam nih Mahalath kha nupi ah a ṭhit, amah cu David fapa Jerimoth le Jesse fapa Eliab i fanu Abihail i an fanu a si; ¹⁹ cun fapa a hrinpiak hna: Jeush, Shemariah le Zaham an si. ²⁰ Amah hnuah cun Absalom fanu Maakah kha a ṭhit i Abijah, Attai, Ziza le Shelomith a hrin hna. ²¹ Rehoboam nih Absalom fanu Maakah cu a nupi dang hna le a nuchun vialte hna lakah a dawt bik (nupi hleiriat le nuchun sawm ruk a ngei i fapa kul le pariat le fanu sawm ruk a ngeih hna); ²² Rehoboam nih Maakah fapa Abijah cu siangpahrang i ser awkah a timh caah, a unau hna lak i amah changtu dingah a ser. ²³ Fim tein khua a khan i Judah le Benjamin ram chung i a ummi kulhnak a ngeimi khua ah khan a fapale hna cu a ṭhenṭhek dih hna; cun tirawl tlamtling tein a pek hna i nupi tampi a ṭhitpiak cio hna.

¹ Rehoboam uknak cu a feh i a ṭhawn tikah Bawipa phungbia cu a hlawt i amah sin ṭang Israel mi vialte zong nih khan an hlawt ve. ² Siangpahrang Rehoboam a bawi kum nganak ah, annih cu Bawipa sinah zumhawktlak an si ti lo caah, Izipt siangpahrang Shishak nih Jerusalem cu, ³ rangleng thong khat za hnih le rangcung ralkap thong sawm ruk he a hunhnawh. Izipt ram in amah he a rami hna cu rel cawk lo an si — Libia mi, Sukkiim mi le Ethiopia mi an si. ⁴ Cun Judah ram chung i kulhnak a ngeimi khua kha a lak hna i Jerusalem tiang a ra. ⁵ Khi tikah profet Shemaiah kha, Jerusalem i Shishak ruangah aa pummi Rehoboam le Judah bawi hna sinah khan a ra i annih cu, "Hi bangin Bawipa nih, ’Nan ka kaltak caah kei zong nih Shishak kut chungah kan kaltak ve hna lai,’ a ti," tiah a ti hna. ⁶ Cun Israel bawi hna le siangpahrang nih cun an lung an ṭhumh i, "Bawipa cu a ding," tiah an ti. ⁷ Bawipa nih an lung an ṭhumh kha a hmuh tikah Bawipa bia cu Shemaiah sinah khan a ra i, "Annih nih an lung an ṭhumh cang, cucaah ka hrawk hna lai lo, sihmanhsehlaw luatnak tlawmpal ka pek hna lai i Shishak kut in Jerusalem cungah ka thinhunnak cu thlet a si lai lo. ⁸ Asinain, annih cu a sal an si ko lai, zeicahtiah annih nih ka rianṭuan le ramdang hna pennak rianṭuan an i dan kha an hngalh nakhnga," tiah a ti. ⁹ Cuticun Izipt siangpahrang Shishak nih Jerusalem cu a hung doh; Bawipa inn chung rothil le siangpahrang inn chung rothil kha a lak hna; zeizong vialte kha a lak dih hna. Solomon nih a sermi sui phaw vialte zong kha a lak hna i ¹⁰ Siangpahrang Rehoboam nih anmah can ah cun dar phaw a ser hna i siangpahrang inn innka a cawngtu ralkap bawi hna kut chungah khan a chiah hna. ¹¹ Cun siangpahrang nih Bawipa inn chungah a luh fate, ralvengtu kha an ra i an rak put hna i ralvengtu hna khaan ah khan an kalpi ṭhan tawn hna. ¹² Cun a lung a ṭhumh tikah, hloh hirhiar a si nakhnga lo, Bawipa thinhunnak cu a sin khan aa mer i Judah ram chungah thil umtuning a ṭha. ¹³ Cucaah Siangpahrang Rehoboam cu Jerusalem ah cun aa fehter i khika in a pen hna. Rehoboam cu bawi hram aa thawk tikah khan kum sawm li le kum khat a si i Jerusalem ah kum hleisarih a bawi, cu khua cu Israel miphun dihlak chungin khika i a min chiah awkah Bawipa nih aa thimmi a si. A nu min cu Naamah a si, amah cu Ammon mi a si. ¹⁴ Cun ṭhat lonak kha a tuah i Bawipa kawl kha a lung in aa sehchih lo. ¹⁵ Rehoboam tuahsernak hna cu a hramthawk in a donghnak tiang, profet Shemaiah le hmutu Iddo chan relnak cauk ah khan an i ṭial lo mei? Rehoboam le Jeroboam karlak ah khan ral a um thluangthluan ko. ¹⁶ Cun Rehoboam cu a pupa hna sinah a it i David khua chungah khan an vui; cun a fapa Abijah kha amah hmun ah cun a hung bawi.

¹ Siangpahrang Jeroboam a bawi kum hleiriat kum ah Abijah nih Judah ram kha pen hram a thawk. ² Jerusalem ah kum thum a bawi. A nu min cu Mikaiah a si, amah cu Gibeah rammi Uriel fanu a si. ³ Cun Abijah le Jeroboam karlak ah khan ralnak a um. Abijah cu miralṭha ralkap thim khunmi thong za li he raldohnak hmun ah cun an kal i Jeroboam nih khan a ṭhawngmi ralkap thim khunmi thong za riat he a rak orh ve. ⁴ Khi tikah Efraim tlang ram i a ummi Zemaraim Tlang ah khan Abijah cu a dir i, "Maw Jeroboam le Israel mi vialte hna, ka bia thei tuah u! ⁵ Bawipa, Israel Pathian nih Israel mi cung i siangpahrang sinak cu David le a fapa hna sinah zungzal ca in cite biakamnak in a pek cang ti kha hngalh awk nan si lo maw? ⁶ Asinain, Nebat fapa Jeroboam, David fapa Solomon i a sal cu a tho i a bawipa kha a doh; ⁷ cun Rehoboam cu a no i lungthin fek a ngeih rih hlanah khan, mizeiruaramlo le santlailo pawl kha a sinah an i ṭom i Solomon fapa Rehoboam cu an doh i anih nih a rak celh hna lo. ⁸ "Atu cu mi tampi nan si ca le Jeroboam nih pathian an serpiakmi hna sui cawfa kha nan sinah nan i chiah hna caah nannih nih David fapa hna kut chung i Bawipa pennak cu doh awkah nan ruah. ⁹ Nannih nih Bawipa tlangbawi hna, Aaron fapa hna le Levi mi hna kha nan dawi hna i ramdangmi hna bantukin tlangbawi nanmahte in nan i ser hna lo mei? Ahopaoh cawtum no in siseh tuukawng pasarih in siseh aa thianhmi paoh cu pathian a si ṭung lomi hna tlangbawi ah khan an cang ko. ¹⁰ Sihmanhsehlaw kannih tu cu, Bawipa cu kan Pathian a si i amah cu kan hlaw lo. Bawipa rian a ṭuantu ah tlangbawi Aaron fapa hna kha kan ngei hna i an rian a ṭuantu ah Levi mi kha kan ngei hna. ¹¹ Kannih nih cun Bawipa kan Pathian nawlbia kha kan zulh caah Bawipa sinah zinglei fate le zanlei fate khangh thawinak le rim thawmi zihmui kha an pekchanh i sui thiang cabuai cungah khan hun camcinmi changreu kha an hun i zanlei fate sui meivannak tung cu a meiinn kha an alh naklai an zohkhenh; Bawipa nih a kan fialmi kha kan tuah; sihmanhsehlaw nannih nih cun amah cu nan hlawt. ¹² Zohhmanh u, kan hmaisuang ah Pathian cu a um i nannih doh awk i thawng thanhtu ah tlangbawi hna cu an raldohnak muko he an um. Maw Israel fale hna, Bawipa nan pupa hna Pathian cu doh hlah u, zeitintiah nan hlawhtling lai lo," tiah a ti. ¹³ Jeroboam nih lamhruang ortu, an hnulei in a hun chuah hnawhtu ding hna kha a thlah hna; cucaah a ralkapbu hna cu Judah mi hna hmaiah an um i lamhruang ortu hna cu an hnulei in an um. ¹⁴ Cun Judah mi nih khua an zoh tikah, zohhmanh, ral cu an hmailei he an hnulei he an um; cun Bawipa kha an auh i tlangbawi nih khan muko an tum. ¹⁵ Khi tikah Judah mi hna cu raldohnak au khan an au. Cun Judah mi kha an au tikah Pathian nih Jeroboam le Israel mi vialte kha Abijah le Judah mi hna hmaiah a sunghter hna. ¹⁶ Israel mi cu Judah mi hmaiah an zaam i annih cu Pathian nih an kut chungah a pek hna. ¹⁷ Abijah le a mi hna nih khan tampi an thah hna; cucaah Israel mi thim ciammammi sing nga an thi. ¹⁸ Cuticun Israel mi hna cu khi tan ah khan an sung i Judah mi hna nih Bawipa, an pupa hna Pathian kha an i bochan caah an tei hna. ¹⁹ Cun Abijah nih Jeroboam kha a dawi i a khua kha a chuh hna: Bethel le a pawngkam khuate hna, Jeshanah le a pawngkam khuate hna le Efron le a pawngkam khuate hna. ²⁰ Abijah chan ah cun Jeroboam nih a ṭhawnnak kha a hmu ṭhan kho ti lo i Bawipa nih a tuk i a thi. ²¹ Sihmanhsehlaw Abijah cu a ṭhawng chin lengmang. Cun nupi hleili a ṭhit hna i fapa kul le pahnih le fanu hleiruk a ngeih hna. ²² Abijah tuahsernak a tang rihmi, a umtu ningcang hna le a chimmi hna cu profet Iddo ṭialmi tuanbia cauk chungah an i ṭial.

¹ Cun Abijah cu a pupa hna sinah a it i David khua ah an vui; a fapa Asa cu amah hmun ah khan a hung bawi. Amah chan ah cun ram cu kum hra him tein a um. ² Cun Asa nih Bawipa a Pathian mithmuh i a ṭha le a ding kha a tuah. ³ Ram dang biakṭheng hna le khuahrum bo hna kha a hrawh hna i tung kha a chimh hna i Asherim kha a hau hna i ⁴ Judah mi hna cu Bawipa, an pupa hna Pathian kha kawl awkah le phungbia le nawlbia kha zulh awkah nawl a pek hna. ⁵ Cun Judah ram chung khua vialte hna chung khan khuahrum bo hna le zihmui biakṭheng hna kha a hrawh hna. Cun ram cu a kut tangah hnangam in a um. ⁶ Ram cu a daih caah Judah ram chungah khan kulh ngeimi khua a ser hna. Cu kum hna chungah cun Bawipa nih daihnak a pek caah ral a ngei lo. ⁷ Cun Judah mi cu a thawh hna i, "Hi khua hi ser hna u sih law vampang le innsang le kutka le kothrolh in kulh hna u sih; Bawipa kan Pathian cu kan kawl caah ram cu kanmah ta a si rih; kannih nih amah kha kan kawl i anih nih a kenkip ah daihnak a kan pek," tiah a ti. Cuticun khua cu an ser hna i an hungcho. ⁸ Asa nih Judah in ralkapbu mi sing thum, phaw ngan pipi le fei in aa thuammi le Benjamin in phaw a thlir i likuk a kuaimi sing hnih le sang riat a ngeih hna; hi hna hi an dihlak tein ralṭha miṭhawng an si. ⁹ Ethiopia mi Zerah nih ralkap nuai khat le rangleng sing thum he a chuahhnawh hna i Mareshah tiang a ra phan. ¹⁰ Cun amah cu Asa nih a hei chuahhnawh ve i Mareshah i Zefathah nelrawn ah cun i doh awkah an i tiang. ¹¹ Cun Asa nih Bawipa a Pathian kha a auh i, "Maw Bawipa, a ṭhawngmi le a dermi karlak ah, bawmtu nangmah bantuk ahohmanh an um lo. Maw Bawipa kan Pathian, kan bawm ko sawh, zeitintiah nangmah kha kan in bochan i hi mibu nganpi hi nangmah min in kan chuahhnawh hna. Maw Bawipa, nangmah cu kan Pathian na si; minung nih nangmah cu in tei hna hlah seh," tiah a ti. ¹² Cucaah Bawipa nih Ethiopia mi hna cu Asa le Judah mi hna hmaiah a tei hna i Ethiopia mi cu an zam. ¹³ Asa le a sin i a ummi hna nih khan Gerar tiang an dawi hna i Ethiopia mi cu a nung in pakhat hmanh an taan lo tiang an thi; zeitintiah annih cu Bawipa le a ralkapbu hmaiah cun an kuai dih. Judah mi nih cun hranchaw tampi an lak. ¹⁴ Gerar pawngkam khua vialte cu an tuk i Bawipa kha an ṭih caah an tei hna. Khua vialte kha an chungah hranchaw tampi an um caah an ramh hna. ¹⁵ Cun saṭil a ngeimi hna thlam kha an tuk hna i tuu le kalauk kha tampi an i kalpi hna. Cun Jerusalem ah an kir.

¹ Pathian thlarau cu Oded fapa Azariah cungah a tlung i ² Asa ton awkah khan a kal i amah cu a thawh i, "Asa le Judah mi vialte le Benjamin mi vialte hna ka bia ngai tuah u: Amah sinah nan um chung cu Bawipa cu nan sinah a um. Nan kawl ahcun amah cu nan hmuh lai, sihmanhsehlaw nan hlawt ahcun an hlawt ve hna lai. ³ Caan saupi chung Israel cu Pathian ngaingai ngei lo le cawnpiaktu tlangbawi ngei lo le phungbia loin an um; ⁴ sihmanhsehlaw an harnak chungin Bawipa, Israel Pathian leiah an i mer i an kawl tikah annih nih an hmuh ko. ⁵ Cu caan lioah cun a chuakmi caah siseh a lutmi caah siseh daihnak a um lo, zeitintiah hnahnawhnak ngan pipi nih ramchung mi vialte cu awlok a chonh hna. ⁶ Phun khat le phun khat, khua khat le khua khat an i do i an kek an kuai dih, zeicahtiah Pathian nih harnak phun zakip in harnak a pek hna. ⁷ Sihmanhsehlaw nannih cu nan lung ṭhawng ko u! Nan kut kha derter hna hlah u, zeitintiah nan rian cu man a ngei lai," tiah a ti. ⁸ Asa nih Oded fapa Azariah nih a chimmi bia hna cu a theih tikah, a ral a ṭha i Judah le Benjamin ram chung vialte le Efraim tlangram chung i a lakmi khua hna i a ummi fihnung siasal vialte kha a hlonh dih hna i Bawipa inn innleng hmai i a ummi biakṭheng kha a remh. ⁹ Cun Judah mi vialte le Benjamin mi vialte le Efraim, Manasseh le Simeon in a rami an sin i a pummi hna kha a pumh hna, zeitintiah Bawipa a Pathian kha a sinah a um ti an hngalh tikah Israel ram in mi tampi amah sinah khan an zam. ¹⁰ Annih cu Asa a bawi kum hleinganak, a thla thum thla ah khan Jerusalem ah an i pum. ¹¹ Cu ni ah cun hranchaw an va lakmi chung khan Bawipa sinah cawtum za sarih le tuu thong sarih an thawi hna. ¹² Cun annih nih Bawipa, an pupa hna Pathian kha an lung dihlak le an nunnak dihlak in kawl awkah biakamnak chungah an lut; ¹³ cun Bawipa, Israel Pathian a kawl duh lomi paoh cu mino a si ah, mitar a si ah, pa a si ah, nu a si ah, thah a si lai. ¹⁴ Bawipa sin chiatsernak cu aw thangpi le au le muko le saki tumnak he an tuah. ¹⁵ Cun Judah mi vialte cu an biakam chiatsernak ah cun an i lawm; zeicahtiah an lungtak tein chiatsernak cu an tuah i an duhnak dihlak in amah cu an kawl i amah cu an hmuh i an velchum ah Bawipa nih dinhnak a pek hna. ¹⁶ A nu Maakah hmanh kha Asherah caah fihnung siasal a ser caah, Siangpahrang Asa nih, siangpahrang bawinu a sinak khan a phuah. A siasal cu a hau i a den cikcek i Kidron varek ah a khangh. ¹⁷ Sihmanhsehlaw khuahrum bo hna kha cu Israel ram chungin a hlo hna lo. Asinain Asa lungthin cu a chan chung vialte soisel awk um lo a si. ¹⁸ Cun Pathian inn chungah khan a pa biakamnak laksawng hna le amah biakamnak laksawng hna, ngun le sui le umkheng hna kha a rak put hna. ¹⁹ Cun Asa uknak a kum kum sawm thum le kum nganak tiang ral a um ti lo.

¹ Asa a bawi kum sawm thum le kum ruknak ah Israel siangpahrang Baasha nih Judah cu a hung doh i Judah siangpahrang Asa sinah khan ahohmanh luhter lo le chuahter lo awkah Ramah khua kha a ser. ² Cun Asa nih Bawipa inn chung le siangpahrang inn chung i a ummi ro chung khan ngun le sui kha a lak hna i Siria siangpahrang Benhadad, Damaskas i a ummi kha a kuat i, ³ "Ka pa le na pa karlak i a rak um bang khan, keimah le nangmah karlak ah ṭanṭinak um seh; zohhmanh, ngun le sui kan kuat; cucaah va kal law Israel siangpahrang Baasha nih hin a ka kirtak nakhnga, amah he nan ṭanṭinak kha va chat tuah," tiah a ti. ⁴ Cun Benhadad nih Siangpahrang Asa kha a bia a ngaih i a ralkapbu haotu hna kha Israel mi khua doh awkah a thlah hna i Ijon, Dan, Abelmaim le Naftali i thil chiahnak khua vialte kha an tei hna. ⁵ Cun mah cucu Baasha nih a theih tikah Ramah khua ser kha a ngol i a rian kha a ṭhulh. ⁶ Cun Siangpahrang Asa nih Judah mi vialte kha aa kalpi hna i Baasha nih Ramah khua sernak i a hmanmi lung le thing kha an phorh hna i Geba le Mizpah khua sernak ah a hman hna. ⁷ Cu caan ah cun hmutu Hanani kha Judah siangpahrang Asa sinah cun a ra i, "Siria siangpahrang cu naa bochan i Bawipa na Pathian cu naa bochan lo caah, Siria siangpahrang ralkapbu cu na chuahter cang hna. ⁸ Ethiopia mi hna le Libia mi hna kha ralkapbu ngan ngaingai, rangleng tam hringhran le rangcung ralkap tam hringhran he a ummi an si lo maw? Asinain, Bawipa kha naa bochan caah annih cu na kut chungah amah nih an pek hna. ⁹ Zeitintiah vawlei cung dihlak ah hin Bawipa mit cu aa chawk dih i amah lei i an lung soisel awk a um lomi hna cungah a ṭhawnnak kha a langhter. Hi thil ah hin hrut piin na tuah cang; zeitintiah atu cun ral na ngei cang lai," tiah a ti. ¹⁰ Khi tikah Asa cu hmutu cungah khan a thin a hung i hi kong ah a cungah a thin a hun caah thong chungah hreng a khenh. Cun Asa nih mi cheukhat cungah hi caan ah hin hremnak zong a tuah. ¹¹ Asa tuahsernak hna cu a hramthawk in a donghnak tiang Judah le Israel Siangpahrang hna cauk chungah aa ṭial. ¹² Asa cu a bawi kum sawm thum le kum kuanak kum ah a ke ah zawtnak a ing i a zawtnak cu a fak ngaingai; asinain a zawtnak hmanh ah cun Bawipa kha a kawl lo i sihmanhsehlaw sibawi hna sin tu khan bawmhnak a kawl deuh. ¹³ Cun Asa cu a pupa sinah a it, a bawi kum kum sawm li le kum khatnak kum ah a thi. ¹⁴ David khua chungah amah nih aa cawhmi thlan ah khan an vui. Zihmui ser thiam hna nih an sermi zihmui phun zakip in a khatmi ruakkuang ah khan an suan; cun amah hmaizahnak ah mei nganpi an tih.

¹ A fapa Jehoshafat kha amah hmun ah cun a hung bawi i Israel mi he i dohnak ding caah khan a thazang aa ṭhawnter. ² Judah ram chung i kulhnak ngei khua vialte ah khan ralkap a chiah hna i Judah ram chung le a pa Asa nih Efraim khua a rak lakmi hna chungah khan ralvengtu ralkapbu a chiah hna. ³ A pa nih a hlan deuh i a rak zulhmi lam kha a zulh caah Bawipa cu Jehoshafat sinah a um; amah nih Baal kha a kawl hna lo, ⁴ sihmanhsehlaw a pa Pathian kha a kawl i Israel mi nih an zulhmi lam si loin a nawlbia kha a zulh. ⁵ Cucaah Bawipa nih pennak cu a kut chungah a fehter i Judah mi vialte nih Jehoshafat sinah ngunkhuai an thawh i a rum ngaingai i upatnak a hmu. ⁶ Bawipa lam leiah cun a lung kha a ral a ṭha i cuhleiah Judah ram chungin khuahrum bo hna le Asherim hna kha a ṭhial hna. ⁷ A bawi kum thumnak ah a bawi Benhail, Obadiah, Zekhariah, Nethanel le Mikaiah kha Judah ram chung khua hna ah cawnpiaktu ah a thlah hna; ⁸ anmah sinah cun Levi mi Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah le Tobadonijah kha an i tel; cun hi Levi mi hna sinah hin tlangbawi Elishama le Jehoram an i tel. ⁹ Cun Judah ram chungah khan Bawipa phungbia cauk kha an i put i an cawnpiak hna; Judah ram chung khua vialte kha an ṭol i mi kha an cawnpiak hna. ¹⁰ Cun Judah ram pawngkam i a ummi ram vialte cungah khan Bawipa ṭihnak kha a tlung i Jehoshafat kha an do lo. ¹¹ Filistin mi a cheukhat nih Jehoshafat cu laksawng an rak pek i ngunkhuai caah ngun an rak pek; cun Arab mi hna zong nih tuukawng thong sarih za sarih le mehehtum thong sarih le za sarih an rak pek. ¹² Cun Jehoshafat cu duhsah tein a ngan chin lengmang. Judah ram chungah ralhruang hna le thil khonnak khua hna kha a ser hna i ¹³ Judah ram khua chungah khan thil tampi a khon hna. Jerusalem ah ralkap a ṭhawng i a ral a ṭhami a chiah hna. ¹⁴ Mah hihi an pale innchungkhar ning cio ah an i relnak cu a si: Judah chungin, a thong pawl hna haotu ah Adnah a si, amah sin ummi cu miṭhawngmi ralṭha sing thum an si, ¹⁵ cun amah a hun dottu ah haotu Jehohanan a si, amah sin ummi cu sing hnih le sang riat, ¹⁶ cun amah a hun changtu ah Zikhri fapa Amasiah a si, amah cu Bawipa rian caah mah lungtho tein aa pemi a si, amah sinah cun miṭhawng miralṭha sing hnih an um. ¹⁷ Benjamin chungin: mit:hawng mi ralṭha Eliada, amah sinah cun likuk le phaw a ngeimi sing hnih an um, ¹⁸ cun a hun dottu ah Jehozabad a si i amah sinah cun raltuk awk i aa thuammi sing khat le sang riat an um. ¹⁹ Hi hna hi siangpahrang rianṭuantu cu an si, hi hna hleiah hin Judah ram chung dihlak kulhnak a ngeimi khua paoh i siangpahrang nih a chiahmi hna kha an um rih.

¹ Jehoshafat cu a rum ngaingai i upatnak a hmu; cun Ahab he Ṭhitumnak lei in i pehtlaihnak a ser. ² Kum tlawmpal hnuah khin Ahab sinah Samaria ah a vung kal. Cun amah le amah sin i a kalmi hna cu Ahab nih tuu le cawtum tampi a rak thah hna i Ramoth-gilead hung doh awkah khan a sawm khawh. ³ Israel siangpahrang Ahab nih cun Judah siangpahrang Jehoshafat cu a thawh i, "Ramoth-gilead ah na hun ka kalpi hnga maw?" tiah a ti. "Kei le nang hi mi khat kan si ko, ka mi cu na mi an si ve ko. Raldohnak ah cun na sinah kan si lai," tiah amah cu a leh. ⁴ Cun Jehoshafat nih Israel siangpahrang cu, "Bawipa bia cu dothlat hmasa rih tuah hen," tiah a ti. ⁵ Cu tikah Israel siangpahrang nih profet kha hmunkhat ah a pumh hna, za li an si, annih cu a thawh hna i, "Ramoth-gilead cu tuk awkah kan kal hnga maw, asiloah, kan i sum lai dah?" tiah a ti. Cun annih nih, "Hung kal ko, zeitintiah Bawipa nih siangpahrang kut chungah a pek," an ti. ⁶ Sihmanhsehlaw Jehoshafat nih, "Hika ah hin kan hal khawh ding Bawipa profet a dang pakhat tal an um ti lo maw?" tiah a ti. ⁷ Cun Israel siangpahrang nih Jehoshafat cu a thawh i, " Bawipa kan hal khawhnak ding mipa a dang pakhat a um rih, amah cu Imlah fapa Mikaiah a si; sihmanhsehlaw ka kong ah thil ṭha chim bal loin thil ṭhalo lawng kha a chim zungzal caah ka huat," tiah a ti. Cun Jehoshafat nih cun, "Cuticun siangpahrang nih chim hlah seh," tiah a ti. ⁸ Cun Israel siangpahrang nih bawi pakhat a auh i, "Imlah fapa Mikaiah kha khulrang in ratpi tuah," tiah a ti. ⁹ Cun Israel siangpahrang le Judah siangpahrang Jehoshafat cu an bawi ṭhutdan cungah an ṭhu i an puan in an i thuam; Samaria hauka luhnak i phuhri ah khan an ṭhu; cun profet vialte hna cu an hmaiah an rak chim dulmal ko. ¹⁰ Cun Khenaanah fapa Zedekiah nih thir ki aa ser hna i, "Hi bangin Bawipa, nih, ’Siria mi cu an rawk dih tiang mah hi hin na suk hna lai,’ a ti," tiah a ti. ¹¹ Cun cu bantuk ṭhiamṭhiam in profet vialte nih cun an chim i, "Ramoth-gilead ah cun hung kal law hung tei ko; Bawipa nih siangpahrang na kut chungah an pek lai," tiah an ti. ¹² Cun Mikaiah kawh awk i an thlahmi lamkaltu nih khan amah sinah cun, "Zohhmanh, profet hna cu lungnge tein a ṭha lei in siangpahrang sinah an bia a si; nangmah na bia zong annih lak i pakhat i a bia bantuk si ve seh law an duhning lei in chim ve ko," tiah a ti. ¹³ Sihmanhsehlaw Mikaiah nih, "Bawipa a nun bangin, Bawipa nih ka sin i a chimmi cu, mah cucu ka chim ko lai," tiah a ti. ¹⁴ Cun siangpahrang sinah a phak tikah, siangpahrang nih cun a rak thawh i, "Mikaiah, Ramoth-gilead cu hung tuk awkah kan kal lai maw, kan i sum lai dah?" tiah a ti. Cun anih nih a thawh i, "Hung kal u law hung tei hen u, annih cu nangmah kut chungah pek an si ko lai," tiah a leh. ¹⁵ Sihmanhsehlaw siangpahrang nih a thawh i, "Biatak dah ti lo cu Bawipa min in ka sin i na chim lo awkah voi zeizat dah bia kan kamter lai?" tiah a ti. ¹⁶ Cun anih nih a thawh i, "Israel mi vialte cu khaltu a ngei lomi tuu bantukin tlang cung i an i ṭhek dih kha ka hmuh; cun Bawipa nih, ’Hi hna hi bawi an ngei lo, anmah le an inn cio ah dai tein kir hna seh,’ a ti," tiah a ti. ¹⁷ Cun Israel siangpahrang nih Jehoshafat cu, "Keimah kong ah cun ṭhatnak si loin chiatnak a chim lai, tiah kan ti ṭheo lo mei?" tiah a ti. ¹⁸ Cun Mikaiah nih cun, "Cucaah Bawipa bia cu thei tuah: Bawipa cu a bawi ṭhutdan cungah a ṭhut i vancung ralkapbu vialte a orhlei le a kehlei ah an dir kha ka hmuh; ¹⁹ cun Bawipa nih a thawh i, ’Israel siangpahrang Ahab cu Ramoth-gilead ah hung kal i khika ah a thih naklai ahodah a lem lai?’ tiah a ti. Cun pakhat nih thil pakhat a chim i a dang pakhat nih thil dang pakhat a chim ve. ²⁰ Cun thlarau pakhat cu a hung chuak i Bawipa hmaiah cun a dir i, ’Keimah nih ka lem lai,’ tiah a ti. Cun Bawipa nih, ’Zei in dah na lem lai?’ tiah a ti. ²¹ Cun anih nih, ’Ka va kal lai i a profet vialte hna kaa chungah nal thlarau ka va si lai,’ tiah a ti. Cun anih nih, ’Na va lem hrimhrim lai i na va lem khawh taktak lai; va kal law cu bangin va tuah,’ tiah a ti. ²² Cucaah cun zohhmanh, Bawipa nih hi na profet hna kaa chungah hin nal thlarau a chiah cang; Bawipa nih nangmah kong ah ṭhat lonak a chim cang," tiah a ti. ²³ Khi tikah Khenaanah fapa Zedekiah kha a pawngah a ra i Mikaiah kha a biang ah a bengh i, "Zei lam in dah Bawipa thlarau cu nangmah sinah bia chim awkah ka sinin a chuah?" tiah a ti. ²⁴ Cun Mikaiah nih a thawh i, "Zohhmanh, khi ni ah, innchung chungchin dal i i thuh awkah na kal tikah na hngalh te lai," tiah a ti. ²⁵ Cun Israel siangpahrang nih cun, "Mikaiah kha tlai u law khua uktu Amon le siangpahrang fapa Joash sinah khan va kalpi u; ²⁶ cun siangpahrang nih hi bangin, ’Hi pa hi thong ah rak thla u law rawl tlawmte le ti tlawmte lawng, daihnak in ka ra kir ṭhan hlantiang, rak pe u, a ti,’ tiah va chim hna u," tiah a ti. ²⁷ Cun Mikaiah nih a thawh i, "Daihnak in na kir ṭhan a si ahcun, Bawipa nih ka sinah bia kha a chim lo a si lai," tiah a ti. Cun amah nih cun, "Nannih mi vialte hna, thei tuah u," tiah a ti. ²⁸ Cucaah Israel siangpahrang le Judah siangpahrang Jehoshafat cu Ramoth-gilead ah khan an hung kal. ²⁹ Cun Israel siangpahrang nih Jehoshafat cu a thawh i, "Ka mui kaa hleng lai i raldohnak chungah ka kal ve lai, sihmanhsehlaw nang cu na bawi puan kha i aih ko," tiah a ti. Cun Israel siangpahrang cu a mui aa hleng i raldohnak chungah cun a kal. ³⁰ Cun Siria siangpahrang nih cun a rangleng bawi hna cu, "Israel siangpahrang dah ti lo cu, ahohmanh a hme siseh, a ngan siseh, tu hna hlah u," tiah nawl a pek hna. ³¹ Cun rangleng ralbawi hna nih khan Jehoshafat kha an hmuh tikah, "Amah hi Israel siangpahrang cu a si ko," tiah an ti. Cucaah amah tuk awkah khan an i mer; cun Jehoshafat cu a au i Bawipa nih a bawmh. ³² Rangleng ralbawi hna nih khan amah cu Israel siangpahrang a si lo ti kha an hmuh tikah amah dawinak khan an i mer ṭhan caah Pathian nih a sinin kaa dang leiah a hnuh hna. ³³ Sihmanhsehlaw pakhatpa nih tinh setsai loin a li cu a koih sawhsawh i Israel siangpahrang cu a thir ngaphaw angki le a ṭangphaw karlak ah a khen; cucaah a rangleng a mawngtu cu, "I mer law hi i tuknak chung hin ka chuahpi tuah, zeicahtiah an ka hliam ai," tiah a ti. ³⁴ Cun cu ni cu an i tuknak kha a fak ngaingai i Israel siangpahrang cu Siria mi hna lei hoih in a rangleng chungah khan zanlei tiang doh chom in a um; cun nitlak ah a thi.

¹ Judah siangpahrang Jehoshafat cu Jerusalem i a inn ah him tein a tlung ṭhan. ² Sihmanhsehlaw hmutu Hanani fapa Jehu nih amah cu ton awkah a kal i Siangpahrang Jehoshafat cu a thawh i, "Miṭhalo cu bawmh i Bawipa a huami hna cu dawt awk a si maw? Hi ruangah hin nangmah cungah Bawipa thinhunnak cu a chuak cang. ³ Asinain, Asherah hna cu ram chungin na hloh hna i Pathian kawl kha na lung in naa sehchih caah nangmah chungah ṭhatnak tlawmpal cu hmuh a si," tiah a ti. ⁴ Jehoshafat cu Jerusalem ah khua a sa; cun Beersheba in Efraim tlangram tiang mi hna sinah khan a kal i an pupa hna Pathian, Bawipa sinah khan a ratpi ṭhan hna. ⁵ Judah ram chung i kulhmi khua dihlak ah khan, khua khat hnu khua khat in, biaceihtu a chiah hna i, ⁶ biaceihtu hna cu, "Nan tuahmi kha ṭha tein ruat u, zeitintiah bia nan ceihmi cu minung caah a si lo i Bawipa caah a si; nan biakhiahnak ah Bawipa cu nan sin ah aa tel lengmang ve. ⁷ Cucaah Bawipa ṭihnak cu nan cungah um seh; nan tuahmi kha i ralring u, zeitintiah Bawipa kan Pathian sinah cun biading merh siseh, duhdanh ngeih siseh, ziknawh siseh, a um lo," tiah a ti. ⁸ Cuhleiah Jerusalem ah Jehoshafat nih Levi mi tlawmpal, tlangbawi tlawmpal le Israel mi innchungkhar hna lu tlawmpal kha Bawipa ca i biakhiahnak tuah awkah le i almi bia kha ceih awkah, a thiah hna. ⁹ Cun nawl a pek hna i, "Hi bangin Bawipa ṭih buin zumhawktlak tein, nan lung dihlak in nan tuah lai: ¹⁰ khuazei khuami hmanh, thisen chuahnak kong ah siseh, phungbia le nawlbia kong ah siseh, an bia nan sin a phak tikah, annih nih Bawipa hmaiah mawhnak an ton nakhnga lo le nan cung le nan unau hna cungah thinhunnak a tlun nakhnga lo, nannih nih annih cu nan rak cawnpiak hna lai. Cu bantuk cun nan tuah lai i mawhnak nan tong lai lo. ¹¹ Cun zohhmanh u, Bawipa lei thil vialte ah tlangbawi upa bik Amariah cu nan cungah a um; cun siangpahrang lei thil vialte ah Judah innchungkhar uktu Zebadiah, Ishmael fapa cu nan cungah a um; cun Levi mi hna cu nan biaceihtu bawi hme deuh an si lai. Ralṭha tein tuah u law Bawipa cu miding mi hna sinah cun um ko seh!" tiah a ti.

¹ Hi hnuah hin Moab mi hna le Ammon mi hna cu Meunim mi a cheukhat hna he Jehoshafat tuk awkah an i thawh. ² Mi zeimaw kha an ra i Jehoshafat kha an chimh i, "Nangmah doh awkah mibu nganpi Edom ram in, rili lengin an ra lio i zohhmanh, Hazazontamar ah an um" tiah an ti (mah cucu Engedi kha a si). ³ Khi tikah Jehoshafat cu a thin a phang i Bawipa kawl awk kha aa tim i Judah ram chung vialte ah khan rawl ulhnak a thanh. ⁴ Cun Judah ram mi cu Bawipa sinin bawmhnak kawl awkah an i pum; Judah ram chung khua dihlak khan Bawipa kawl awkah cun an ra. ⁵ Cun Judah ram mi le Jerusalem mi aa pummi hna chungah cun; Jehoshafat cu Bawipa inn chungah, tual thar hmaiah khan a dir i, ⁶ "Maw Bawipa, kan pupa hna Pathian, nangmah cu vancung i Pathian na si lo maw? Miphun hna ram vialte cu nangmah nih na uk lo maw? Nangmah na kut chungah lianhngannak le ṭhawnnak cu an um i ahohmanh nih an in celh lo. ⁷ Maw kan Pathian, nangmah nih hika ram mi hna cu na mi Israel mi hna hmai i na dawi hna i na hawi Abraham tefa hna sinah zungzal ca in na pe hna lo mei? ⁸ Cu ram chungah cun khua an sa i na min caah hmunthiang pakhat an in sakpiak i, ⁹ ’Kan cungah ṭhat lonak, vainam maw, biaceihnak maw, rai maw, mangṭam maw a tlun ahcun, hi inn hmaiah le nangmah hmaiah hin kan dir lai, zeicahtiah na min cu hi inn chungah hin a um i kannih nih kan harnak chungin nangmah cu kan in auh lai i nang nih na kan theihpiak lai i na kan khamh lai,’ tiah an ti. ¹⁰ Cun atu cu zohhmanh, Ammon mi hna le Moab mi hna le Seir Tlang mi hna, Israel mi hna nih Izipt ram in an chuah tikah tuk na thlauh hna ca i an hrial hna i an hrawh lomi hna nih khan ¹¹ zohhmanh nangmah nih co awkah na kan pekmi na ta chung hin kannih cu dawi i cuticun lehrulh an kan timh. ¹² Maw kan Pathian, an cungah biaceihnak na tuah hnga lo maw? Zeitintiah kannih doh awkah a kan rathnawhtu hi bu nganpi hmaiah hin kannih cu santlailo kan si ko. Zei tuah awk kan hngal lo, sihmanhsehlaw kan mit lawng kha na cungah a um ko," tiah a ti. ¹³ Cu lioah cun Judah mi vialte hna cu an ngakchia hna le an nupi le an fale hna he, Bawipa hmaiah khan an dir. ¹⁴ Cun Bawipa thlarau cu aa pummi hna lak i a ummi Jahaziel cungah khan a tlung; amah cu Zekhariah fapa a si, Zekhariah cu Benaiah fapa a si, Benaiah cu Jeiel fapa a si, Jeiel cu Mattaniah fapa a si, Mattaniah cu Levi mi, Asaf fapa hna tefa kha a si. ¹⁵ Cun anih nih a thawh i, "Judah mi vialte le Jerusalem mi hna le Siangpahrang Jehoshafat hna, thei tuah u: Bawipa nih hi bangin nan sinah, ’Hi mibu nganpi ruangah nan thinphang in nan lung dong hlah u; zeicahtiah hi raldohnak cu nanmah ta a si lo, Pathian i a si. ¹⁶ Thaizing ah vung do hna u; zohhmanh, Ziz hung kainak khan an hung lai; nelrawn dongh, Jeruel ramlak nichuahlei ah khan nan hmuh hna lai. ¹⁷ Hi i tuknak chungah hin nannih nih nan tuk a hau lai lo; nan um hmun kha i tlaih u law dai tein dir ko u law nanmah ca i Bawipa nih teinak an tuahpiakmi hna kha zoh ko u, maw Judah le Jerusalem hna,’ a ti. Nan thinphang hlah u, nan lungdong hlah u; thaizing ah chuahhnawh hna u law Bawipa cu nan sinah a um lai," tiah a ti. ¹⁸ Cun Jehoshafat nih vawlei lei zoh in a lu a khun i Judah ram mi vialte le Jerusalem mi vialte kha Bawipa hmaiah an bawk i Bawipa kha an biak. ¹⁹ Cun Levi mi Kohath pawl hna le Korah pawl hna kha Bawipa, Israel Pathian cu aw thang piin thangṭhat awkah an dir. ²⁰ Cun zingka tein an tho i Tekoa ramlak ah khan an va kal; cun an kal lioah khan Jehoshafat cu a dir i, "Judah ram mi hna le Jerusalem mi hna, ka bia thei tuah u! Bawipa nan Pathian cu zum u law fehter nan si lai; a profet hna kha zum hna u law nan hlawh a tling lai," tiah a ti. ²¹ Cun mizapi kha ruahnak a hal hna hnuah, puan thiang i aih in ralkapbu hmai i an kal pah ah: "Bawipa sinah lawmhnak bia chim tuah u, Zeitintiah a fekmi a dawtnak cu zungzal in a hmun," tiin a titu ding, Bawipa sinah thangṭhatnak hla a satu ding le amah cu a hlorhtu ding kha a thiah hna. ²² Cun annih nih hlasak le thangṭhat kha an thawk tikah Bawipa nih Ammon, Moab le Seir Tlang mi, Judah tuk awk i a rami hna kha lamhruang a ahter hna i cucaah an sung dih. ²³ Zeitintiah Ammon mi le Moab mi hna nih khan Seir Tlang mi kha an tuk hna i an hloh cikcek hna, cun Seir i a ummi hna cu an thah dih hna hnuah anmah le anmah cu an i nawng dih. ²⁴ Judah mi cu ramlak i ralvennak innsang kha an phak tikah, mibupi cu an hei zoh hna i zohhmanh, annih cu an thi i vawlei ah khan an ril liangluang ko; pakhat hmanh an luat lo. ²⁵ Cun Jehoshafat le a mi hna kha hranchaw lak awkah an rat tikah saṭil tampi, thilri, hnipuan man sungmi thilri, an hmuh hna i an i phorh khawh ti lo tiangin an i lak hna. Hranchaw laknak ah cun ni thum tiang an rau, a tam hringhran ko. ²⁶ A ni linak ni ah Berakal Nelrawn ah an i pum i khika ah Bawipa kha an thangṭhat; cucaah cuka hmun min cu nihin tiangin Berakah Nelrawn tiah ti a si. ²⁷ Cun annih cu, Judah ram mi le Jerusalem mi vialte cu, Jehoshafat nih a hmaisat hna i an tlung, Bawipa nih an ral hna cungah a lawmhter hna caah lunglawm in an tlung. ²⁸ Jerusalem ah, tingtang, thonglawi le muko he, Bawipa inn ah khan an ra. ²⁹ Cun Bawipa nih Israel mi hna i an ral cu a tuk hna ti an theih tikah ram kip mi nih Bawipa cu an ṭih. ³⁰ Cucaah a Pathian nih a velchum in dinhnak a pek caah Jehoshafat pennak cu a dai. ³¹ Cuticun Jehoshafat nih Judah ram cu a pen. Pen hram a thawk ah kum sawm thum le kum nga a ti i Jerusalem in kum kul le kum nga a pen. A nu min cu Azubah a si, Shilhi fanu a si. ³² A pa Asa lam kha a zul i a pial tak lo; Bawipa mithmuh i a dikmi kha a tuah. ³³ Asinain khuahrum bo kha cu a hrawk hna lo; mi zapi nih khan an pupa hna Pathian cungah khan an lung an bunh rih lo. ³⁴ Jehoshafat tuahsernak a tang rihmi hna cu a hramthawk in a donghnak tiang, Hanani fapa Jehu ṭialmi chanrelnak chungah an um i cucu Israel Siangpahrang hna Cauk chungah khumh a si. ³⁵ Mah hi hnuah hin ṭhat lonak a tuahtu Israel siangpahrang Ahaziah he khan Judah siangpahrang Jehoshafat cu an i kom. ³⁶ Tarshish i a kal hnga ding tilawng kha an ser hna i tilawng cu Ezion-geber ah an ser hna. ³⁷ Cun Mareshah i a ummi Dodavahu fapa Eliezer nih Jehoshafat ralchanh in profet bia a chim i, "Ahaziah he nan i komh caah na ser ciami cu Bawipa nih a hrawh lai," tiah a ti. Cun tilawng hna cu an rawk i Tarshish ah khan an kal kho lo.

¹ Jehoshafat cu a pupa hna sinah a it i a pupa hna sinah David khua ah an vui; cun a fapa Jehoram cu amah hmun ah khan a hung bawi. ² Unau a ngei hna, Jehoshafat fapa hna kha: Azariah, Jehiel, Zekhariah, Azariah, Mikhael le Shefatiah an si; an dihlak hin Judah siangpahrang Jehoshafat fapa an si. ³ An pa nih laksawng ngan pipi sui laksawng, ngun laksawng le man sungmi thilri laksawng kha Judah ram chung i kulhmi khua hna he tiah a pek hna; sihmanhsehlaw pennak cu Jehoram kha a pek zeicahtiah amah cu a fapa upa bik a si. ⁴ Jehoram cu a pa bawi ṭhutdan cung i a kai i a feh tikah, a unau vialte cu vainam in a thah hna i Judah ram bawi a cheukhat zong kha a thah hna. ⁵ Jehoram cu siangpahrang a can tikah kum sawm thum le kum hnih a si i Jerusalem in kum riat a uk. ⁶ Cun Ahab innchungkhar nih an tuah bantuk khan, Israel siangpahrang hna lam kha a zul; zeitintiah a nupi cu Ahab fanu a si. Cun Bawipa mithmuh i thil ṭhalo kha a tuah. ⁷ Asinain, David sin i biakamnak a sermi ruangah khan le amah le a fapa hna cu zungzal in meiinn kan pek lai tiah bia a kam caah Bawipa nih David innchungkhar kha hrawh a duh lo. ⁸ Amah chan ah cun Edom nih Judah uknak kha a doh i anmah tein siangpahrang an i chiah ve. ⁹ Cun Jehoram le a ralbawi hna le a rangleng vialte hna cu an i chawk i amah le a rangleng ralbawi a kulhtu hna kha zan ah a tuk hna i an thah hna. ¹⁰ Cucaah Edom nih Judah uknak cu nihin tiang hin a doh. Cun kha caan ah khan, Bawipa, an pupa hna Pathian cu a hlawt caah Libnah zong nih khan a uknak kha a doh. ¹¹ Cuhleiah Judah tlang ram ah khan khuahrum bo a ser hna i Jerusalem khuami kha zumhawktlak lo sinak chungah a luhpi hna i Judah mi kha lam a pialter hna. ¹² Cun a sinah profet Elijah sinin ca pakhat a ra i, "Hi bangin, Bawipa, na pa David i a Pathian nih, ’Na pa Jehoshafat lam kha na zulh hna lo i Judah siangpahrang Asa lam zong kha na zulh hna lo i, ¹³ sihmanhsehlaw Israel siangpahrang hna lam kha na zulh hna i Ahab innchungkhar nih Israel mi an pialter hna bang khan nangmah nih Judah ram mi hna le Jerusalem mi hna kha na pialter hna i nangmah nakin a ṭha deuhmi na unau hna, na pa innchungkhar mi a simi hna kha na thah hna caah, ¹⁴ zohhmanh, na mi hna le na fale hna le na nupi hna le na ngeihmi vialte cungah Bawipa nih rai nganpi a tlunter lai i ¹⁵ nangmah cu paw fah zawtnak a fakmi na ngei lai i ni khat hnu ni khat in na ril cu cu zawtnak ruangah cun a chuak lai,’ a ti," tiah a ti. ¹⁶ Cun Ethiopia mi hna pawng i a ummi Filistin mi hna le Arab mi hna thinhunnak cu Jehoram cungah khan Bawipa nih a thawhter i ¹⁷ Judah cu an hunhnawh i an chim i siangpahrang inn chung thil a si tiah an hmuhmi vialte le a fapa hna le a nupi hna zong kha an kalpi dih hna i a fapa hniang bik Jehoahaz dah ti lo kha cu fapa pakhat hmanh an nganh ta lo. ¹⁸ Cun mah hi thil vialte dih hin Bawipa nih a paw ah a dam kho lomi zawtnak a tlunter. ¹⁹ Cun kum hnih hnuah cu zawtnak ruangah cun a ril cu an chuak i nganfak ngaingai in a thi. A mi hna nih, a pupa hna ca i rak tuahmi meiphu bantuk kha an tuah lo. ²⁰ Pen hram a thawk ah kum sawm thum le kum riat a si i Jerusalem in kum riat a pen; cun ahohmanh ngaihchiat loin a thi. David khua chungah khan an vui; sihmanhsehlaw siangpahrang hna thlan ah khan cun an vui lo.

¹ Cun Jerusalem khuami hna nih cun a fapa hniang bik Ahaziah kha amah hmun ah cun siangpahrang ah an ser; zeitintiah Arab mi hna he riahhmun i a rami hna nih khan a fapa upa deuh vialte kha cu an thah dih hna. Cucaah Judah siangpahrang Jehoram fapa Ahaziah cu bawi ah a cang. ² Ahaziah cu pen hram a thawk ah kum sawm li le kum hnih a si i Jerusalem in kum khat a pen. A nu min cu Athaliah a si, amah cu Omri tunu a si. ³ Amah zong cu Ahab innchungkhar lam kha a zul ve, zeicahtiah ṭhat lonak tuah i amah fim a chimtu cu a nu kha a si. ⁴ Ahab innchungkhar nih an rak tuah bang khan, amah zong nih Bawipa mithmuh i ṭhat lonak kha a tuah; a pa thih hnuah, anmah cu ṭhat lonak tuahnak leiah khan fim a chimtu an si. ⁵ An fimchimhning bang khan a zulh i Ahab fapa Joram, Israel siangpahrang sinah khan Siria siangpahrang Hazael cu tuk awkah Ramoth-gilead ah a kal. Cun Siria mi hna nih cun Joram cu an hliam i ⁶ Siria siangpahrang Hazael he an i tuk tikah Ramah i hma an banhmi kha i conghhramh awkah Jezreel khua ah a kir ṭhan. Cun Ahab fapa Joram cu a zawt caah khan amah cu Jezreel khua i vung zoh awkah Jehoram fapa Ahaziah Judah siangpahrang cu a vung kal. ⁷ Sihmanhsehlaw Pathian nih a rak ruahning ah hin Ahaziah ṭumchuknak cu Joram a vung tlawnnak hin tlung dingin a rak si. Zeitintiah khika a phak tikah Joram he khan an chuak i Bawipa nih Ahab innchungkhar hrawktu dingah chiti a thuhmi Jehu, Nimshi fapa kha an ton. ⁸ Cun Jehu nih Ahab innchungkhar cungah biakhiahnak kha a tlunter tikah khan, Judah ram bawi hna le Ahaziah unau hna fapa hna, Ahaziah a bultawltu kha a ton hna i a thah hna. ⁹ Ahaziah cu a kawl i Samaria i aa thuh lioah khan an va tlaih, Jehu sinah an ratpi i amah cu an thah. Amah cu an vui, zeicahtiah annih nih, "Amah cu Jehoshafat, Bawipa kha a lungthin dihlak in a kawltu tupa a si caah," tiah an ti. Cun Ahaziah innchungkhar lakah ram kha a peng khotu ding an um lo. ¹⁰ Ahaziah nu Athaliah nih khan a fapa a thih kha a hngalh tikah, a tho i Judah innchungkhar siangpahrang chungle vialte kha a thah dih hna. ¹¹ Sihmanhsehlaw siangpahrang fanu Jehoshabeath nih Ahaziah fapa Joash kha aa lak i thah awk a simi siangpahrang fapa dang hna sin khan a zampi i amah le a cawngtunu cu ihnak dal chungah a chiah hna. Cuticun Siangpahrang Jehoram fanu Jehoshabeath, tlangbawi Jehoiada nupi a simi nih cun, amah cu Ahaziah far a si caah, Athaliah sin khan a thuh i cucaah a that lo; ¹² cun an sinah cun kum ruk a um, Pathian inn chungah khan an thuh ko; Athaliah nih khan ram cu a pen.

¹ Sihmanhsehlaw a kum sarihnak kum ah Jehoiada cu a ral a hung ṭha i a zaza pawl haotu hna Jehoram fapa Azariah, Jehonan fapa Ishmael, Obed fapa Azariah, Adaiah fapa Maaseiah le Zikhri fapa Elishafat hna he khan biakamnak an tuah. ² Cun Judah ram chungah khan an i chawk i Judah ram chung khua vialte khan Levi mi hna le Israel innchungkhar i lu a si ciomi hna kha an pumh hna i Jerusalem ah an ra. ³ Cun aa pummi vialte nih siangpahrang he Pathian inn chungah khan biakamnak an tuah. Cun Jehoiada nih a thawh hna i, "Zohhmanh u, siangpahrang fapa hi! Bawipa nih David fapa hna kong ah a chim bantuk khan amah hi ukter ko u. ⁴ Mah hihi nan tuah awk thil cu a si lai: Nannih tlangbawi le Levi mi sabbath ni i rian a ṭuanmi hna, cheu thum cheu khat cu kutka hngaktu nan si lai, ⁵ cun cheu thum cheu khat cu siangpahrang inn ah nan um lai i cheu thum cheu khat cu Hram Kutka ah nan um lai; cun mi zapi vialte cu Bawipa inntual ah khan an um lai. ⁶ Tlangbawi hna le rian a ṭuantu Levi mi hna dah ti lo cu ahohmanh Bawipa inn chungah lut hlah u; annih cu an thian caah an lut kho lai; sihmanhsehlaw zapi vialte nih cun Bawipa nawl kha an zulh awk a si lai. ⁷ Levi mi hna nih an hriam kha i put cio in siangpahrang kha an kulh lai i inn chungah a lutmi paoh cu thah an si lai. Siangpahrang cu a luh a chuah tikah a sinah nan um lai," tiah a ti. ⁸ Levi mi hna le Judah ram mi vialte hna nih khan tlangbawi Jehoiada nawl pek bang cun an tuah: an minung cio kha sabbath ni i rian a ngei ding he a ngei lo ding he khan an i ratpi hna; zeicahtiah Jehoiada nih khan rian thiahmi bu hna kha a ṭinter hna lo. ⁹ Cun tlangbawi Jehoiada nih khan fei hna le phaw a ngan pawl le a hme pawl, Siangpahrang David ta a rak si i Pathian inn chungah an rak chiahmi hna kha, haotu pawl cu a pek hna; ¹⁰ cun mizapi cu an dihlak in, an hriam kha i put cio ah, inn cu a thlanglei le a chaklei in kulh in, biakṭheng velchum le inn velchum ah cun, siangpahrang cawngtu ah a chiah hna. ¹¹ Cun siangpahrang fapa cu a rak chuahpi i bawi luchin cu a chinh i hngalhternak bia kha a pek; cun siangpahrang a si tiah an thanh i Jehoiada le a fapa hna nih khan chiti an thuh i, "Siangpahrang cu saupi nung ko seh!" tiah an ti. ¹² Athaliah nih mi zapi cu an tlik an choipah in siangpahrang an thangṭhat kha a hmuh tikah, Bawipa inn chungah mi zapi sinah khan a vung lut; ¹³ cun a hei zoh tikah luhnak ka ah khan siangpahrang cu a tungpi pawng i a dir i siangpahrang pawngah cun haotu pawl le muko tumtu hna an um le ramchung mi vialte cu an i lawm i muko an tum i an hlasatu pawl hna nih an awdawh tumnak thilri hna he conglawmh tuahnak cu an hrui hna kha a hmuh. Cun Athaliah nih a puan kha a thleh hna i, "Rawinak a si! Rawinak a si!" tiah a au. ¹⁴ Cun tlangbawi Jehoiada nih ralkapbu cung i thiahmi haotu pawl kha a rak chuahpi hna i, "Amah cu ralkap hna lak khan rak chuahpi u; ahohmanh amah a zulmi cu vainam in thah a si lai," tiah a ti. Zeitintiah tlangbawi nih cun, "Amah, cu Bawipa inn chungah cun that hlah u," tiah a ti hna. ¹⁵ Cucaah an tlaih i siangpahrang inn Rang Kutka luhnak ah khan a lut i khika ah amah cu an thah. ¹⁶ Cun Jehoiada nih amah le mizapi hna le siangpahrang karlak ah khan, annih cu Bawipa mi si awkah biakamnak a ser. ¹⁷ Khi tikah mi vialte cu Baal inn ah khan an va kal i an ṭheh i a biakṭheng hna le a milem hna cu an khuai dih hna; cun Baal tlangbawi Mattan kha biakṭheng hna hmaiah cun an thah. ¹⁸ Cun Moses phungbia chungah aa ṭial bangin, lawmhpah le hlasak pah in David nawl pekning in Bawipa sin i khangh thawinak pekchanh awkah David nih Bawipa inn zohkhenhtu ah a chiahmi Levi tlangbawi hna le Levi mi hna kut tangah khan, Jehoiada nih Bawipa inn cawngtu kha a chiah hna. ¹⁹ Ahohmanh zei bantuk thian lonak hmanh in a thiang lomi paoh cu an luh nakhnga lo, Bawipa inn kutka ah khan kutka hngaktu a chiah hna. ²⁰ Cun ralbawi pawl le tuavon pawl le mi a uktu hna le ramchung mi vialte kha a lak hna i annih nih siangpahrang cu Bawipa inn khan an runpi i cunglei kutka khan siangpahrang inn ah an ra. Cun siangpahrang cu siangpahrang bawi ṭhutdan cungah khan an ṭhutter. ²¹ Cucaah ram chungah mi vialte cu an i lawm; Athaliah kha vainam in an thah hnuah cun khua kha a dai.

¹ Joash cu pen hram a thawk ah khan kum sarih a si i Jerusalem in kum sawm li a pen; a nu min cu Zibiah a si, amah cu Beersheba khuami a si. ² Tlangbawi Jehoiada chan chung cu Joash nih Bawipa mithmuh i a dikmi kha a tuah. ³ Jehoiada nih nupi pahnih a ṭhitpiak i fapa hna le fanu hna a ngeih hna. ⁴ Hi hnuah hin Joash nih Bawipa inn remh ṭhan kha a timh. ⁵ Tlangbawi hna le Levi mi hna kha a pumh hna i, "Judah ram chung khua ah khan va kal u law, Israel mi vialte sinin kum khat hnu kum khat nan Pathian inn cu remh awkah phaisa va khawl hna u; cun cu rian cu khulrang in va tuah u," tiah a ti hna. Sihmanhsehlaw Levi mi hna kha an i rianranh hlei lo. ⁶ Cucaah siangpahrang nih upa bik Jehoiada kha a auh i, " Bawipa sal Moses nih Israel mi bu cu hngalhternak thlam caah nan thawh lai tiin a timi hna ngunkhuai cu, Judah ram le Jerusalem khuami kha thawhter hna u tiah zeicahdah Levi mi kha na fial hna lo?" tiah a ti. ⁷ Zeicahdah tiah kha misual nu Athaliah fapa hna nih khan Bawipa inn kha an bauh i Bawipa inn chung i pekchanhmi thil vialte zong kha Baal caah an hman dih. ⁸ Cuticun siangpahrang nih nawlbia a ser i kuang pakhat an ser i Bawipa inn kutka lengah khan an chiah. ⁹ Cun Pathian sal Moses nih ramlak ah Israel mi cu nan thawh lai ti in a rak timi hna ngunkhuai kha Bawipa ca i rak put awkah, Judah ram le Jerusalem khua ah khan thawng an thanh hna. ¹⁰ Cun bawi vialte le mi vialte kha an lung aa lawm i an dih hlantiang an tangka cu an rak put hna i kuang chungah khan an sanh hna. ¹¹ Cun Levi mi hna nih kuang cu siangpahrang i a bawi pawl sinah khan an rak put fate, annih nih a chungah tangka tampi a um ti an hmuh tikah, siangpahrang caṭialtu le tlangbawi upa bik i a bawi kha an ra i kuang kha an tlen i an lak i a umnak ah khan an chiah ṭhan tawn. Cuticun ni khat hnu ni khat an tuah i tangka tampi an khawmh. ¹² Cun siangpahrang le Jehoiada nih khan Bawipa inn rian a latu hna sinah khan an pek hna i annih nih Bawipa inn remhnak caah cun lung lei zungthiam le zungthiam kha an lak hna, cun Bawipa inn remh awk caah khan thir lei zungthiam le dar lei zungthiam zong an lak fawn hna. ¹³ Cuticun rian ṭuan awk i fialmi hna nih khan an ṭuan i an kut chungah inn remhnak rian cu ṭha tein a kal i Bawipa inn cu a sining ding kha an siter ṭhan i an fehter. ¹⁴ Cun an lim tikah phaisa a tangmi kha siangpahrang le Jehoiada hmaiah khan an rak put i cu cun Bawipa inn ca i umkheng, biaknak ca le khangh thawinak ca i kha an ser hna i zihmui ca kheng tete le sui umkheng le ngun umkheng zong kha an ser hna. Cun Jehoiada chan chung cu Bawipa inn chungah khan khangh thawinak kha an pekchanh camcin ko. ¹⁵ Sihmanhsehlaw Jehoiada cu a tar, a upa i a thi; amah cu a thih ah kum za le kum sawm thum a si. ¹⁶ Cun Israel mi hna sin le Pathian le a inn caah thil ṭha a tuah caah David khua chungah, siangpahrang hna sinah khan an vui. ¹⁷ Cun Jehoiada thih hnuah khan Judah ram bawi hna cu an ra i siangpahrang sinah cun upatnak an tuah i siangpahrang nih an bia cu a ngaih hna. ¹⁸ Cun annih nih Bawipa, an pupa hna Pathian inn kha an hlawt i Asherim le siasal kha an rian an ṭuan hna. Cun hi an mawhnak ruangah hin Judah le Jerusalem cungah thinhunnak a tlung. ¹⁹ Asinain, Bawipa sin i kirpi ṭhan awkah khan profet kha a thlahhnawh hna, sihmanhsehlaw zei ah an rel hna lo. ²⁰ Khi tikah tlangbawi Jehoiada fapa Zekhariah kha Pathian thlarau nih a tlunhnawh i mizapi cungah cun a dir i a thawh hna i, "Hi bangin Pathian nih, ’Zeicahdah Bawipa nawlbia kha nan buar? Cucaah pei khua awng nan pemh khawh lo cu. Nannih nih Bawipa kha nan hlawt caah amah nih an hlawt ve hna,’ a ti," tiah a ti. ²¹ Sihmanhsehlaw an rawi i siangpahrang nawl in amah cu Bawipa inn tual ah khan lung in an cheh. ²² Cuticun siangpahrang a simi Joash nih khan, Zekhariah pa Jehoiada nih a cung i zaangfahnak a rak tuahmi kha a hngal duh lo i a fapa kha a thah. Cun a thih lioah khan, "Bawipa nih hmu seh law phuhlam ko seh," tiah a ti. ²³ Cu kum a donghnak ah Siria ralkapbu nih khan Joash cu an hung tuk. Judah ram le Jerusalem khua ah khan an ra i mi zapi hna lak khan mi zapi i an bawi hna cu an thah hna i an hranchaw vialte cu Damaskas siangpahrang kha an kuat dih. ²⁴ Siria ralkapbu cu mi tlawmte he an ra ko na in, annih kut chungah khan Bawipa nih ralkapbu nganpi cu a pek hna, zeicahtiah annih nih Bawipa, an pupa hna Pathian kha an hlawt. Cuticun Joash cungah biaceihnak kha an tlunter. ²⁵ Annih nih an tluntak tikah, hma fak ngaingai a ing in an kaltak, tlangbawi Jehoiada fapa thisen ruangah khan a sinum hna nih an rawi i a ihkhun cungah an thah. Cucaah a thi i David khua chungah an vui, sihmanhsehlaw siangpahrang hna thlan ah khan cun an vui lo. ²⁶ Amah a rawitu hna cu Ammon minu Shimeath fapa Zabad le Moab minu Shimrith fapa Jehozabad an si. ²⁷ A fapa hna kong le amah ralchanh in chimmi bia tampi le Pathian inn sak ṭhannak kong cu Siangpahrang hna Cauk Fianternak cauk ah an i ṭial. Cun a fapa Amaziah cu amah hmun ah khan a hung bawi.

¹ Amaziah cu pennak hram a thawk tikah kum kul le kum nga a si i Jerusalem in kum kul le kum kua a pen. A nu min cu Jeho-addan a si, amah cu Jerusalem khuami a si. ² Bawipa mithmuh ah a dikmi kha a tuah, asinain, soisel awk um lo lung he a si lo. ³ Siangpahrang lianhngannak kha a kut chungah fek tein a um cangka, siangpahrang a pa a rak thattu a sinum kha a thah hna. ⁴ Sihmanhsehlaw Moses cauk chung i phungbia ah aa ṭialmi chung i, "Pale hna cu fale can ah thah an si lai lo i fale hna zong pale can ah thah an si lai lo, sihmanhsehlaw mahle sualnak ruang cio ah ahohmanh thah an si lai," tiin Bawipa nawl pekmi ning khan, an fale cu a that hna lo. ⁵ Cun Amaziah nih Judah rammi kha a pumh hna i Judah le Benjamin dihlak ca i a thong pawl haotu hna le a za pawl haotu hna tangah khan an pale chungkhar ning cio ah a chiah hna. Kum kul le a cunglei mi kha a pumh hna i annih cu thim khunmi sing thum, raldoh awk ca i aa tlakmi, fei le phaw a tlai kho an si kha a hmuh. ⁶ Cun ngun talen sing khat in Israel ram i a ṭhawng i ral a ṭhami sing khat zong a roih hna. ⁷ Sihmanhsehlaw Pathian mi pakhat a sinah a ra i, "Maw siangpahrang, Israel ralkapbu cu na sinah kalter hna hlah, zeicahtiah Israel mi, hi Efraim mi vialte hna sinah hin Bawipa a um lo. ⁸ Sihmanhsehlaw nang nih hi lam hin raldohnak ah ka ṭhawng lai tiin na ruah ahcun, ral hmaiah khan Pathian nih nang cu an hlonh ko lai; zeitintiah Pathian nih cun bawmh khawhnak le hlonh khawhnak ṭhawnnak a ngei," tiah a ti. ⁹ Cun Amaziah nih Pathian mi cu a thawh i, "Sihmanhsehlaw Israel ralkapbu ka pek cangmi talen za khat tluk cu zeitindah ka tuah kun lai?" tiah a ti. Pathian mi nih cun a leh i, "Mah hi nak hin tam deuh pei Bawipa nih cun an pek khawh cu," tiah a ti. ¹⁰ Cun Efraim in a sinah a rami ralkapbu kha, an inn i tlun ṭhan awkah Amaziah nih a phuah hna. Cucaah Judah cungah khan an thin a hung ngaingai i thin lin in inn ah khan an tlung. ¹¹ Sihmanhsehlaw Amaziah cu ralṭha in a um i a mi hna cu a hrui hna i Cite Nelrawn ah khan an kal i Seir mi sang khat an thah hna. ¹² Judah mi nih a dang sang khat kha a nung in an tlaih hna i lungpang cungah an kaipi hna i lungpang cung cun an nam hna i an dihlak in an i som dih. ¹³ Sihmanhsehlaw Amaziah nih a sinah raltuknak hmun ah kalter loin a kirtermi ralkapbu chung mi hna nih khan Judah ram khua cu Samaria in Beth-horon tiang an chim hna i cu khuami cu thong thum an thah hna i hranchaw tampi an lak. ¹⁴ Edom mi a thah hnanak khan a rat hnuah, Seir mi hna pathian kha a rak i phorh hna i a pathian ah aa chiah hna i a biak hna i an sinah pekchanhnak kha a tuah. ¹⁵ Cucaah Amaziah cungah Bawipa cu a thin a hung i profet pakhat a hei thlah i amah nih cun, "Zeicadah anmah an mi hmanh na kut chungin a chuahter kho lotu pathian, miphun dang hna pathian cu na fuhpanh hna?" tiah a ti. ¹⁶ Sihmanhsehlaw bia a chim lioah cun siangpahrang nih khan a thawh i, "Nangmah cu siangpahrang fimchimtu ah maw kan in ser? Ngol ko! Zeicahdah thah na si lai?" tiah a ti. Cucaah profet nih cun a ngol, sihmanhsehlaw, "Mah hihi na tuah i kan chimhmi na ngaih lo caah, Pathian nih nangmah hrawk awk cu a ruah cang tiah ka hngalh," tiah a ti. ¹⁷ Cun Judah siangpahrang Amaziah nih cun khuakhannak a tuah i Israel siangpahrang Jehu fapa Jehoahaz fapa Jehoash sinah khan mi a thlah hna i, "Ra law, hmaitonh in kan i zoh tuah lai," tiah a ti. ¹⁸ Cun Israel siangpahrang Jehoash nih Judah siangpahrang Amaziah cu bia a hei cah i, "Lebanon tlang i hling pakhat nih Lebanon tlang i sidar thing pakhat sinah bia a cah i, ’Na fanu cu ka fapa nupi caah ka pe,’ tiah a ti; cun Lebanon tlang i ramlak sahrang pakhat aa chawk i hling cu a naan dih. ¹⁹ Nang nih na thawh i, ’Zohhmanh, Edom ka tei diam’, na ti i tluangkhawnnak in na lung cu aa porhlaw. Sihmanhsehlaw atu cu inn ah khan um ko; zeicahdah harnak kha thawhter i nangmah le, nangmah sinah Judah cu tlukter na duh?" tiah a ti. ²⁰ Sihmanhsehlaw Amaziah nih a ngai duh lo; zeicahdah a si ti ahcun, anih nih Edom pathian hna kha a kawl hna caah a ral hna kut chung i pek ding kha Pathian nih a tuahmi a si. ²¹ Cucaah Israel siangpahrang Jehoash cu a hung kal i Judah siangpahrang Amaziah he cun Judah ram ta a simi Beth-shemesh khua ah khan hmaitonh in an um. ²² Cun Judah cu Israel nih khan a tei i anmahle an inn cio ah khan an zam dih. ²³ Cun Israel siangpahrang Jehoash nih Ahaziah fapa Joash fapa Amaziah, Judah siangpahrang cu Beth-shemesh ah a tlaih i Jerusalem ah a kalpi i Jerusalem khua kulhnak vampang cu dong za li, Efraim Kutka in Kil Kutka tiang a chimh. ²⁴ Cun sui le ngun vialte, Pathian inn chungah a ummi umkheng vialte kha a lak hna i Obededom kha a tlaih chih; siangpahrang inn i chawhlawn hna le hreng i a tang dingmi hna zong kha a tlaih hna i Samaria ah a tlung ṭhan. ²⁵ Judah siangpahrang Joash fapa Amaziah cu Israel siangpahrang Jehoahaz fapa Jehoash thih hnuah kum hleinga a nung. ²⁶ Amaziah tuahsernak a tang rihmi hna cu a hramthawk in a donghnak tiang, Judah le Israel Siangpahrang hna Cauk ah an i ṭial lo mei? ²⁷ Bawipa sinin aa mer ri thawk khan Jerusalem ah amah rawinak kha an tuah i Lakhish ah a zam. Sihmanhsehlaw Lakhish ah cun mi an hei dawiter hna i khika ah khan an thah. ²⁸ Cun rang cungin an ratpi i David khua chungah, a pupa hna sinah khan an vui.

¹ Cun Judah ram mi vialte nih khan kum hleiruk a timi Uzziah kha an lak i a pa Amaziah hmun ah khan siangpahrang ah an ser. ² Siangpahrang cu a pupa hna sinah a ih hnuah Eloth kha a sak i Judah ta ah a siter ṭhan. ³ Uzziah cu pen hram a thawk ah kum hleiruk a si i Jerusalem in kum sawm nga le kum hnih a pen. A nu min cu Jekoliah a si, Jerusalem mi a si. ⁴ Cun a pa Amaziah nih a rak tuahmi vialte bantuk khan, Bawipa mithmuh ah a dikmi kha a tuah. ⁵ Bawipa ṭihnak kha a cawnpiaktu Zekhariah chan ah khan, Pathian kawl kha aa sehchih i Bawipa a kawl chung vialte cu Pathian nih khua awng a pemhter. ⁶ A chuak i Filistin mi kha a doh hna i Gath kulhnak vampang le Jabneh kulhnak vampang le Ashdod kulhnak vampang kha a chimh dih hna; cun Ashdod ram chung le Filistin mi hna lak hmun dang ah khan khua a ser hna. ⁷ Pathian nih, Filistin mi hna le Gurbaal i a ummi Arab mi hna le Meunim mi hna lakah khan amah cu a bawmh. ⁸ Ammon mi hna nih Uzziah cu ngunkhuai an pek i amah cu a ṭhawn ngaingai caah Izipt ramri tiang hmanh in a min a thang. ⁹ Cuhleiah Jerusalem ah cun Kil Kutka le Nelrawn Kutka le kulhnak vampang a kawinak ah khan innsang a sak hna i a kulh hna. ¹⁰ Cun chimram le nelrawn ah khan saṭil run tampi a ngeih caah ramlak ah khan innsang a sak hna i tikhor tampi a cawh hna, cun lothlawh a duh ngaingaimi a si caah tlangram le vawlei ṭhatnak hmun ah khan lothlo le mitsur nengtu kha a chiah hna. ¹¹ Cuhleiah, Uzziah nih cun, siangpahrang ralbawi hna lak i pakhat Hananiah kut tang i a ummi ralkapbu, raltuk awk i a tlakmi, caṭialtu Jeiel le ralbawi Naaseiah nih an bu chung cio minung zat ningin an ṭhenmi hna cu a ngei. ¹² Miṭhawngmi ralṭha hna, an pale innchungkhar hna an lu cio cu an dihlak ah thong hnih le za ruk an si. ¹³ Anmah kut tangah cun siangpahrang kha a ral hna tuk awkah a bawm khotu, raltuknak i a ṭhawng ngaingaimi ralkap sing thum thong sarih le za nga an um. ¹⁴ Cun Uzziah nih ralkap vialte caah cun phaw, fei, luchin, ngaphaw thir angki, li, le chehnak ah lung kha a timh hna. ¹⁵ Cun thal le lung ngan pipi a kap khotu seh zungthiam pawl nih an sermi hna kha, Jerusalem ah cun innsang le a kil ah khan a chiah hna. Cun amah cu a ṭhawn tiang khuaruahhar in bawmh a si caah a min cu khuazakip ah a thang. ¹⁶ Sihmanhsehlaw a hung ṭhawn tikah aa rawknak dingah a hun i porhlaw. Bawipa a Pathian sinah zumhtlak loin a um i zihmui biakṭheng i zihmui khangh awkah khan Bawipa biakinn ah cun a lut. ¹⁷ Sihmanhsehlaw tlangbawi Azariah nih Bawipa tlangbawi a ral a ṭhami sawm riat he a hnu in an zulh; ¹⁸ cun Siangpahrang Uzziah cu an donh i, "Uzziah, nangmah nih Bawipa sinah zihmui khangh cu na tuah awk a si lo, sihmanhsehlaw Aaron fapa hna tlangbawi hna zihmui khangtu ding i thiantermi hna lawnglawng nih khan an tuah awk a si. Thil hmaan lo na tuah caah hmunthiang chung hin chuak tuah, cun hi nih hin Bawipa Pathian sinin upatnak zeihmanh an tlunh lai lo," tiah an ti. ¹⁹ Khi tikah Uzziah cu a thin a hung. Zihmui khanghnak ding cengceh pakhat aa put i tlangbawi hna cungah a thin a hun tikah khan, Bawipa inn chung, zihmui biakṭheng pawng, tlangbawi hna hmaika ah khan a cal ah thinghmui hma a chuak ko. ²⁰ Cun tlangbawi upa bik Azariah le tlangbawi vialte nih khan amah cu an zoh i zohhmanh, amah cu a cal ah thinghmui zawtnak a ngei! Cun annih nih khulrang in an nam i amah zong kha chuah aa nam ve, zeicahtiah Bawipa nih a tuk cang. ²¹ Cun Siangpahrang Uzziah cu a thih ni tiang thinghmui a si lan, cun thinghmui a si caah khan Bawipa inn khan thlei a si i cucaah inn dang ah a um. Cun a fapa Jotham nih cun siangpahrang innchungkhar cu a zohkhenh i ram mi kha a uk hna. ²² Uzziah tuahsernak a tang rihmi hna cu a hramthawk in a donghnak tiang profet Isaiah, Amoz fapa nih a ṭial. ²³ Cun Uzziah cu a pupa hna sinah a it i, "Amah cu mithinghmui a si caah siangpahrang hna thlan ah vui loin siangpahrang hna thlanmual ah khan a pupa hna sinah an vui. Cun a fapa Jotham cu amah hmun ah khan a hung bawi.

¹ Jotham cu pen hram a thawk ah kum kul le kum nga a ti i Jerusalem in kum hleiruk a pen. A nu min cu Jerushah a si, amah cu Zadok fanu a si. ² A pa Uzziah nih a tuahmi vialte ning khan Bawipa mithmuh ah thil dik kha a tuah — Bawipa biakinn bel kha a luhhnawh lo. Sihmanhsehlaw mi zapi nih khan ṭhat lonak kha an tuah lengmang ko. ³ Bawipa inn cunglei kutka kha a ser i Ofel vampang cungah khan inn tampi a sak. ⁴ Cuhleiah Judah tlangram ah khan khua a ser hna i thing hmawnnak tlang ah khan ralhruang le innsang a sak hna. ⁵ Ammon mi hna siangpahrang he khan an i do i a tei hna. Cun cu kum ah cun Ammon mi hna nih, ngun talen za khat le changvut phor thong hra le barli phor thong hra an pek. Ammon mi nih cu zat ṭhiamṭhiam cu a kum hnihnak le a kum thumnak ah an pek. ⁶ Jotham cu a kalning kha Bawipa a Pathian hmaiah a ningcang tein a tuah caah miṭhawng ah a cang. ⁷ Jotham tuahsernak a tang rihmi hna le a raldohnak vialte le a kalning hna cu, zohhmanh, Israel le Judah Siangpahrang hna Cauk chungah an i ṭial. ⁸ Pen hram a thawk ah kum kul le kum nga a si i Jerusalem in kum hleiruk a pen. ⁹ Cun Jotham cu a pupa hna sinah a it i David khua ah an vui; cun a fapa Ahaz cu amah hmun ah khan a hung bawi.

¹ Ahaz cu pen hram a thawk ah kum kul a si i Jerusalem in kum hleiruk a pen. A hringsortu David bangin Bawipa mithmuh ah thil ding a tuah ve lo, ² sihmanhsehlaw Israel siangpahrang hna lam tu kha a zul. Baal hna caah khan thletmi milem hmanh a ser hna; ³ Hinnom fapa nelrawn ah khan zihmui a khangh i Bawipa nih Israel mi hna hmai in a dawimi miphun hna nih fihnung phunglam an tuahmi hna ning khan a fapale hna cu raithawinak ah a khangh hna. ⁴ Cun khuahrum bo hna le tlang hna le thingkung hring tang kip ah raithawinak kha a tuah i zihmui kha a khangh. ⁵ Cucaah Bawipa a Pathian nih amah cu Siria siangpahrang kut chungah a pek i amah nih cun a tei i a mi tampi hna cu sal ah a tlaih hna i Damaskas ah a kalpi hna. Israel siangpahrang kut chung zongah amah cu pek a si i Israel Siangpahrang nih cun a tei i tampi a thah hna. ⁶ Bawipa, an pupa hna Pathian kha an hlawt caah Remaliah fapa Pekah nih khan ni khatte ah Judah ram chungah cun sing khat le sang hnih a thah hna, an dihlak in miralṭha lawngte an si. ⁷ Cun Efraim miṭhawng Zikhri nih siangpahrang fapa Maaseiah le siangpahrang inn uktu Azrikam le nawl ngeihnak leiah siangpahrang a hun dottu Elkanah kha a thah hna. ⁸ Israel mi hna nih cun an rualchan hna chung cun nu le fapa le fanu hna sing hnih sal ah an tlaih hna; cun an sin cun hranchaw zong tampi an lak i hranchaw cu Samaria ah an kalpi. ⁹ Sihmanhsehlaw khika ah khan Bawipa profet pakhat a rak um i a min cu Oded a si; Samaria i a kalmi ralkapbu ton awkah cun a chuak i annih cu a thawh hna i, "Bawipa, nan pupa hna Pathian cu Judah cungah a thin a hun caah annih cu nan kut chungah an pek hna, sihmanhsehlaw nannih nih van tiang a phanmi thinhunnak in nan thah hna. ¹⁰ Cun atu cu nannih nih Judah mi hna le Jerusalem mi hna cu pa he nu he nan sal i zuat hna awkah nan i tim. Nannih tah Bawipa nan Pathian cungah nan sualnak a um ve lo maw? ¹¹ Cucaah ka bia ngai u, Bawipa thinhunnak ṭihnung cu nan cungah a um caah, nan rualchan hna chungin nan tlaihmi sal hna cu kua ṭhan hna u," tiah a ti. ¹² Efraim mi hna chung i bawi a cheu hna Johanan fapa Azariah le Meshillemoth fapa Berekhiah le Shallum fapa Jehizkiah le Hadlai fapa Amasa hna zong nih raltuknak in a rami kha an rak donh hna i, ¹³ annih cu an thawh hna i, "Nan ral tlaihmi hna cu hika ah hin nan runpi hna hnga lo, zeicahtiah atu lio kan sualnak le mawhnak lengah hin nannih nih Bawipa cungah mawh phorhter chin nan kan timh. Kan mawhnak cu a ngan cang i Israel mi cungah thinhunnak ṭihnung a um cang," tiah an ti. ¹⁴ Cucaah hriamnam aa putmi hna nih khan hrengtangmi hna le hranchaw hna cu bawi hna le aa pummi vialte hna hmaiah khan an kaltak hna. ¹⁵ Cun an min in an thiahmi hna nih khan an tho i hrengtangmi cu an lak hna i an lak i hnipuan lo i a ummi cu hranchaw chung khan hnipuan an aih hna; hnipuan an aih hna, kedan an pek hna, ei awk le din awk an pek hna i sathau an thuh hna; cun annih lak i a derthawmmi vialte kha laa an citter hna i ungkung khua an timi Jeriko khua ah cun an unau hna sinah an kalpi hna. ¹⁶ Khi caan ah cun Siangpahrang Ahaz nih Assiria siangpahrang sinah bawmhhal awkah mi a thlah hna. ¹⁷ Zeicahtiah Edom mi nih Judah ram cu an chim ṭhan hoi i an tei hna i sal ah an i kalpi diam hna. ¹⁸ Cun Filistin mi hna nih Judah ram chung chimram le Negeb i a ummi khua hna kha an hranh hna i Beth-shemesh, Aijalon, Gederoth, Soko le a khuate hna, Timnah le a khuate hna, Gimzo le a khuate hna kha an lak hna i khika ah cun an um colh. ¹⁹ Bawipa nih Israel siangpahrang Ahaz thawngin Judah cu a ṭumchukter, zeicahtiah Judah ram chungah khan thlahthlam in a um i Bawipa sinah khan zumhawktlak in a nung lo. ²⁰ Cucaah Assiria siangpahrang Tiglath-pileser nih khan a rathnawh i ṭhawnter lei loin hremnak tu kha a pek. ²¹ Ahaz nih khan Bawipa inn le siangpahrang le bawi hna inn khan a ramh hna i Assiria siangpahrang kha ngunkhuai a pek; sihmanhsehlaw cu nih cun a bawm lo. ²² Hi Siangpahrang Ahaz ṭhiamṭhiam cu, a lung retheih caan ah hin Bawipa sinah khan zumhawktlak lo chinchin in a um. ²³ Zeitintiah amah a teitu Damaskas pathian hna sinah khan rai a thawi i, "Siria siangpahrang hna pathian hna nih an bawmh hna caah, keimah zong an ka bawmh ve nakhnga an sinah raithawinak ka tuah lai," tiah a ti. Sihmanhsehlaw annih cu amah le Israel mi vialte rawhralnak an si. ²⁴ Cun Ahaz nih Pathian inn i umkheng hna kha a khawmh hna i Pathian inn i umkheng hna cu a den dih hna i Pathian inn i innka hna cu a phih dih hna; cun Jerusalem khua a kenkip ah khan biakṭheng aa serh hna. ²⁵ Judah ram chung khua kip ah khan pathian dang hna sin i zihmui khanghnak caah khuahrum bo a ser hna i Bawipa, a pupa hna Pathian cu a thin a phawh. ²⁶ A tuahsernak a tang rihmi hna le a lam zulhmi vialte cu a hramthawk in a donghnak tiang Judah le Israel Siangpahrang hna Cauk chungah an i ṭial. ²⁷ Cun Ahaz cu a pupa hna sinah a it i khua chungah, Jerusalem khua chungah cun an vui; Israel siangpahrang hna thlan ah khan cun an ratpi lo. Cun a fapa Hezekiah cu amah hmun ah khan a hung bawi.

¹ Hezekiah cu kum kul le kum nga a ti ah pen hram a thawk i Jerusalem in kum kul le kum kua a pen. A nu min cu Abijah a si, Zekhariah fanu a si. ² A pa David nih a rak tuah bantuk khan amah nih Bawipa mithmuh i a dingmi kha a tuah. ³ A bawi a kum khatnak, thla khatnak thla ah Bawipa inn i innka kha a hun hna i a remh hna. ⁴ Tlangbawi hna le Levi mi hna kha a ratpi hna i nichuahlei kam tual ah khan a pumh hna i, ⁵ annih cu a thawh hna i, "Levi mi hna, ka bia thei tuah u! Atu cu i thianh u law Bawipa nan pupa hna Pathian inn kha thianhhlimh tuah u, hmunthiang khan hmunthur kha hlonh u. ⁶ Zeicahtiah kan pupa hna cu zumhtlak loin an um i Bawipa kan Pathian mithmuh ah a ṭha lomi thil kha an tuah; amah cu an hlawt i Bawipa umnak hmun cu kaa dang an hoihtak i an hnulei an chit. ⁷ Innleng innka zong kha an khar hna i meiinn kha an hmih hna i Israel Pathian sinah khan zihmui zong an khang lo i khangh thawinak zong an pechan lo. ⁸ Cucaah Bawipa thinhunnak cu Judah le Jerusalem cungah a tlung i tuksapur, khuaruahhar le serhsat awk thil ah, nannih nih nan mit hrim i nan hmuh bang hin a ser hna. ⁹ Cucaah zohhmanh u, hi ruangah hin kan pupa hna cu vainam in an rak thi i kan fapa le kan fanu le kan nupi hna cu sal ah an rak tang. ¹⁰ Ṭih a nungmi thinhunnak cu kan sinin aa mer nakhnga, Bawipa, Israel Pathian sin i biakamnak ser cu atu cu ka lung i a ummi a si. ¹¹ Ka fapale hna, atu cu thluarthlap in um hlah u, zeitintiah Bawipa nih nannih cu a hmai i dir awk le amah rianṭuan awk le amah rianṭuantu si awk le amah sinah zihmui khangh awkah an thim hna," tiah a ti. ¹² Khi tikah Levi mi cu an tho, Amasai fapa Mahath, Azariah fapa Joel, Kohath mi hna fapa hna; cun Merari fapa hna chungin, Abdi fapa Kish, Jehallelel fapa Azariah; cun Gershon mi hna chungin Zimmah fapa Joah, Joah fapa Eden; ¹³ Elizafan fapa hna chungin, Shimri le Jeuel; cun Asaf fapa hna chungin, Zekhariah le Mattaniah; ¹⁴ Heman fapa hna chungin, Jehuel le Shimei; Jeduthun fapa hna chungin, Shemaiah le Uzziel. ¹⁵ An unaule kha an pumh hna i anmah kha an i thianh i Bawipa bia in siangpahrang nih nawl a pek hna bangin, Bawipa inn thianh awkah cun an lut. ¹⁶ Tlangbawi hna cu Bawipa inn chungchin thianh awkah khan an lut i Bawipa biakinn chungah thurhhnawmhnak an hmuhmi vialte kha Bawipa inn inntual ah an chuahpi hna i Levi mi hna nih khan an lak i Kidron tivarek ah khan an kalpi. ¹⁷ Thianhhlimh cu thla khatnak thla a ni khat ni ah an thawk i cu thla ni riat ni ah cun Bawipa innleng kha an phan; cun ni riat chung Bawipa inn cu an thianh i cu thla ni hleiruk ni ah cun an lim. ¹⁸ Cun Siangpahrang Hezekiah sinah cun an va lut i, " Bawipa inn kha kan thianh dih cang, khangh thawinak biakṭheng le a umkheng vialte, hun camcinmi changreu cabuai le a umkheng vialte, kan thianh dih hna. ¹⁹ Cun zumhtlaklo a si tikah Siangpahrang Ahaz nih a hlawtmi umkheng vialte kha kan timh dih hna i kan thianh dih hna; cun zohhmanh, Bawipa biakṭheng hmaiah an um," tiah an ti. ²⁰ Cun Siangpahrang Hezekiah cu zingka tein a tho i khua chung bawi kha a pumh hna i Bawipa inn ah khan a hung kal. ²¹ Cun ram le hmunthiang le Judah ca i sual thawinak caah cawtum pasarih, tuukawng pasarih, tuufa pasarih le mehehtum pasarih an rak put hna. Cun Aaron fapa tlangbawi hna kha Bawipa biakṭheng cung i pekchanh awkah nawl a pek hna. ²² Cucaah cawtum kha an thah hna i tlangbawi nih an thi kha an lak i biakṭheng kha an theh; cun tuukawng kha an thah hna i an thi khan biakṭheng kha an theh; cun tuufa kha an thah hna i an thi khan biakṭheng kha an theh. ²³ Cun sual thawinak ca mehehtum kha siangpahrang le aa pummi hna sinah khan an ratpi hna i an cungah an kut an chuan i ²⁴ tlangbawi hna nih khan an thah hna i an thi cun Israel mi vialte ca i remnak sernak ah biakṭheng cungah khan sual thawinak an tuah. Zeitintiah siangpahrang nih khan khangh thawinak kha le sual thawinak kha Israel mi vialte caah tuah awk a si lai tiin nawl a pek hna. ²⁵ Cun David le siangpahrang i a hmutu Gad le profet Nathan nawl peknak ning khan, Levi mi cu Bawipa inn chungah khan sumsel le tingtang le thonglawi he tiah a chiah hna; zeitintiah nawlbia cu Bawipa sinin a profet hna hmang in a ra. ²⁶ Levi mi hna cu David thilri he khan an dir i tlangbawi hna cu muko he khan an dir. ²⁷ Khi tikah Hezekiah nih, khangh thawinak cu biakṭheng cungah pekchanh si seh tiah nawl a pek. Cun khangh thawinak cu thawk a si tikah, Bawipa sin hlasak le muko tum cu David nih a sermi hlasaknak thilri he khan an thawk ve. ²⁸ Aa pummi nih cun an zapi in an biak, hlasatu nih khan hla an sak, muko tumtu nih khan muko an tum; mah vialte hi khangh thawinak a dih hlantiang an tuah. ²⁹ Cun pekchanhnak kha a dih tikah, siangpahrang le a sin i a ummi vialte nih khan an lu an khun i an biak. ³⁰ Cun siangpahrang Hezekiah le bawi hna nih khan Levi mi hna cu David bia le hmutu Asaf bia in Bawipa cu hla in thangṭhat u, tiah nawl an pek hna. Cun annih nih lunglawmhnak in thangṭhatnak hla kha an sak i an kun i an biak. ³¹ Khi tikah Hezekiah nih, "Nannih nih Bawipa sinah nan i thianh cang; ra u law raithawinak le lawmhnak thawinak cu Bawipa inn ah rak pu tuah hna u," tiah a ti. Cun aa pummi nih raithawinak hna le lawmhnak thawinak hna kha an rak put i duhnak lungthin a ngeimi paoh nih khan khangh thawinak an rak put. ³² Aa pummi nih khangh thawinak an rak putmi cu cawtum sawm sarih, tuukawng za khat le tuufa za hnih an si; mah vialte hi Bawipa sin i khangh thawinak caah a si. ³³ Cun thilthiang pekchanhmi cu cawtum za ruk le tuu thong thum an si. ³⁴ Sihmanhsehlaw tlangbawi cu an tlawm tuk caah khangh thawinak sa vialte cu a phaw an hawk cawk hna lo, cucaah tlangbawi dang hna nih an i thianh hlantiang, an unau Levi mi hna nih khan rian cu a dih tiang an bawmh hna — zeicahtiah Levi mi hna cu lungthin ah tlangbawi hna nih an i thianhnak nakkhan an ding deuh. ³⁵ Khangh thawinak tampi lengah cun daihnak thawinak ca i sathau le khangh thawinak ca i thletmi an um. Cuticun Bawipa inn i rianṭuannak cu umter ṭhan a si. ³⁶ Cun Pathian nih mi zapi ca i a tuahmi caah khan Hezekiah le mi vialte cu an i lawm; zeicahtiah cu thil cu duak tiah a hung ummi a si ko.

¹ Bawipa, Israel Pathian i Lanhtak Puai cu ulh awkah annih nih Bawipa inn ah Jerusalem ah an rat nakhnga, Hezekiah nih Israel ram le Judah ram ah mi a thlah hna i Efraim le Manasseh ram zongah ca a kuat hna. ² Zeicahtiah siangpahrang le a bawi pawl hna le Jerusalem i aa pummi vialte nih Lanhtak Puai cu thla hnihnak thla i ulh dingin bia an khiah — ³ zeicahtiah tlangbawi hna kha a za in an i thianh kho lo i mi zong kha Jerusalem ah an i pumh lo caah a caan ah khan an ul kho lo — ⁴ cu khuakhannak cu siangpahrang le aa pummi vialte nih a ding tiah an ruah. ⁵ Cucaah Israel ram chung dihlak khan, Beersheba in Dan tiang thawng thanh i Jerusalem ah nan ra lai i Bawipa, Israel Pathian i Lanhtak Puai cu nan hman lai tiin mizapi kha thawngthanh awkah khan bia an chuah; zeicahtiah an tining bang khan tampi nih an hmang lo. ⁶ Cucaah siangpahrang nawl peknak bang khan ca phortu kha Israel le Judah ram vialte ah khan siangpahrang le a bawi pawl hna ca kha an i phorh i an kal, siangpahrang nih cun, "Maw Israel mi hna, Bawipa, Abraham, Isak le Israel Pathian sinah cun kir ṭhan u law Assiria siangpahrang hna kut in a luatmi nannih a tangmi hna leiah hin aa mer ṭhan ve lai. ⁷ Nan pupa hna le nan unau hna, Bawipa, an pupa hna Pathian sinah zumhtlaklo an si ca i nannih nih nan hmuh bangin, a hrawhmi hna bantuk hi si hlah u. ⁸ Nannih cu nan pupa hna bantuk khan hngawngṭhawng si hlah u, sihmanhsehlaw Bawipa sinah khan i pe u law zungzal ca in a thiantermi a hmunthiang ah khan ra u, cun a thinhunnak ṭihnung cu nan sinin aa mer nakhnga Bawipa nan Pathian cu a rian ṭuan u. ⁹ Zeitintiah nannih nih Bawipa sinah khan nan kir ṭhan ahcun nan unau hna le nan fale hna nih khan annih a tlaitu hna sin khan zaangfahnak an hmuh lai i hi ram ah hin an kir ṭhan lai. Zeicahtiah Bawipa nan Pathian cu velngeih thiam le zaangfah thiam a si i amah sinah nan kir ṭhan ahcun nannih kha khuadang an hoitak hna lai lo," tiah a ti. ¹⁰ Cucaah ca phortu hna cu khua khat hnu khua khat in Efraim le Manasseh ram ah cun, cun Zebulun ram tiangin an kal; sihmanhsehlaw an rak nihsawh hna i zeihmanh ah an rel hna lo. ¹¹ Asher mi tlawmte, Manasseh mi tlawmte le Zebulun mi tlawmte lawng nih toidornak lungthin an ngei i Jerusalem ah cun an ra. ¹² Bawipa bia in siangpahrang le a bawi pawl nih an chimhmi hna tuah awk i lungthin khat ngeih awkah Pathian kut cu Judah cungah khan a um fawn. ¹³ Cun thilnu telh lo changreu puai cu thla hnihnak thla i hman awkah Jerusalem ah mi tampi an ra, aa pummi cu an tam ngaingai. ¹⁴ Cun rian cu an thawk i Jerusalem i a ummi biakṭheng vialte kha an ṭhial i zihmui khanghnak biakṭheng vialte kha an lak hna i Kidron horkuang ah an hlonh hna. ¹⁵ Cun Lanhtak tuufa kha thla hnihnak thla i ni hleili ni ah khan an thah. Cun tlangbawi hna le Levi mi hna cu an ning a zak i cucaah an i thianh i Bawipa inn chungah khan khangh thawinak kha an rak put. ¹⁶ Pathian mi Moses phungbia ning khan annih nih an umnak tawn hmun ah khan an um; Levi mi kut in an hmuhmi thisen cu tlangbawi hna nih khan an hlonh. ¹⁷ Zeicahtiah aa pummi chungah khan aa thianh lomi tampi an um; cucaah a thiang lomi ca paoh ah khan Levi mi nih Lanhtak tuufa kha thah a herh, tuufa cu Bawipa sinah a thiang i ser awkah. ¹⁸ Zeicahtiah mi tampi, Efraim mi, Manasseh mi, Issakhar mi le Zebulun mi tampi hna cu an i thianh lo i asinain a ningcang si lo khan lanhtak puai cu an ei ve ko. Zeitintiah Hezekiah nih annih cu thla a campiak hna i, ¹⁹ "Pathian, Bawipa an pupa hna Pathian cu a lungthin in kawl aa timmi paoh cu, hmunthiang chung i i thianhnak phung ningin a tuah lo hmanh ah, a ṭhami Bawipa nih cun ngaithiam ko seh," tiah a ti. ²⁰ Cun Bawipa nih Hezekiah cu a theih i mi cu a damter hna. ²¹ Cun Jerusalem i a ummi Israel mi hna nih cun thilnu telh lo changreu puai cu ni sarih chung lunglawm ngaingai in an hman; cun Levi mi hna le tlangbawi hna nih khan Bawipa cu ni fate an thangṭhat i Bawipa cu an thazang dihlak in hla in an hlorh. ²² Cun Bawipa rian ṭuannak i thiamnak ṭha a langhtertu Levi mi kha Hezekiah nih a forh chin hna. Cucaah cu puai rawl cu mi zapi nih khan ni sarih an ei i Bawipa an pupa hna Pathian sinah khan daihnak thawinak an pekchanh i lawmhnak kha an pek. ²³ Cun aa pummi nih cun an ningpi in puai cu a dang ni sarih tuah rih awk kha an hna a tla; cucaah lunglawmhnak in ni sarih an tuah rih. ²⁴ Zeitintiah Judah siangpahrang Hezekiah nih aa pummi cu cawtum thong khat le tuu thong sarih, pekchanh awk caah a pek hna i bawi pawl nih aa pummi cu cawtum thong khat le tuu thong hra an pek hna. Cun tlangbawi kha tam piin an i thianh. ²⁵ Judah mi aa pummi an ning piin, tlangbawi hna le Levi mi hna he, cun Israel ram in a rami mipem hna, cun Judah ram i a ummi miphun hna cu an i lawm. ²⁶ Israel siangpahrang David fapa Solomon chan hnu khan hi bantuk hi Jerusalem ah a um ti lo caah Jerusalem ah lunglawmhnak nganpi a um. ²⁷ Cun tlangbawi hna le Levi mi hna kha an dir i mi kha bongmal an sawmh hna i an aw cu theih a si i an thlacamnak cu vancung i a umnak hmunthiang kha a phan.

¹ Cun hi vialte hi a dih tikah, cuka i a ummi Israel mi vialte kha Judah ram khua an khan an kal i an dihlak in an hrawh dih hna hlantiang, Judah le Benjamin le Efraim le Manasseh ram chung dihlak i a ummi tung hna kha an den cikcek hna i Asherim kha an hau hna i khuahrum bo le biakṭheng kha an chimh hna. Cun Israel mi vialte cu an khua le an ram cio ah an tlung. ² Cun Hezekiah nih tlangbawi hna le Levi mi hna kha a phuphu in a ṭhen hna, a phuphu in an rianṭuanning cio khan Levi mi hna le tlangbawi hna cu khangh thawinak ca le daihnak thawinak ca le Bawipa riahhmun kutka i rianṭuantu ding hna le lawmhnak le thangṭhatnak petu hna tiin a chiah hna. ³ Siangpahrang nih amah ngeihmi chungin a thawhmi cu, Bawipa phungbia chungah aa ṭial bangin, zingfate le zanleifate tuahmi khanghthawinak, thla thar le sabbath le caan ngeimi puai hna i pekchanhmi saṭil kha an si. ⁴ Cun tlangbawi hna le Levi mi hna kha Bawipa phungbia ah an i pek khawh nakhnga, Jerusalem mi hna cu tlangbawi hna le Levi mi hna nih an hmuh awk a simi kha nan pek hna lai tiah nawl a pek hna. ⁵ Nawlbia cu ka kip ah an thanh tikah Israel mi nih tampi in rawl thar hmasa hna le mitsur hang le chiti le khuaihliti le lo in a chuakmi vialte kha an thawh i zeizong kip cheu hra cheu khat kha tam piin an rak put. ⁶ Cun Judah ram chung khua i a ummi Israel mi le Judah mi hna nih khan an caw le an tuu hna chung khan cheu hra cheu khat le Bawipa an Pathian sin i an pekchanhmi thil thiang kha an chuahpi hna i a bubu in an pon hna. ⁷ Thla thumnak thla ah khan pon hram an thawk hna i thla sarihnak thla ah khan an dih hna. ⁸ Hezekiah le bawi pawl kha an rat i thil pon kha an hmuh tikah, Bawipa le a mi Israel mi hna cu an thangṭhat hna. ⁹ Cun Hezekiah nih tlangbawi hna le Levi mi hna kha thil pon kong cu a hal hna. ¹⁰ Cun Zadok hrin a simi tlangbawi upa bik Azariah nih khan a leh i, "An thawhlawm cu Bawipa inn chungah ratpi an thawk in kannih nih kan rak ei i kan i za i tampi a hleimi kan ngei rih; Bawipa nih a mi cu thluachuahnak a pek hna caah, cucaah tampi a hleimi kan ngei," tiah a ti. ¹¹ Cun Hezekiah nih annih cu Bawipa inn chung i a dal hna kha timhtuah awkah nawl a pek hna i annih nih an timhtuah hna. ¹² Cun annih nih zumhawktlak tein thawhlawm le cheuhra cheukhat le pekchanhmi thil kha an rak put hna. Annih a zohkhenhtu bawi upa bik cu Levi mi Konaniah a si i a unau Shimei cu amah dottu a si; ¹³ cun siangpahrang le Pathian inn uktu upa bik Azariah nih an thiah hna bantukin Jehiel, Azaziah, Nahath, Asahel, Jerimoth, Jozabad, Eliel, Ismakhiah, Mahath, le Benaiah cu Konaniah le a unau Shimei a bawmtu zohkhenhtu an si. ¹⁴ Cun Levi mi Imnah fapa Kore, nichuahlei kutka cawngtu kha Pathian sinah mah lungtho tein pekmi laksawng zohkhenhtu a si i amah nih cun Bawipa ca i kenretmi le a thiang bik pekchanhnak ca i kenretmi thawhlawm cu a ṭhen awk an si. ¹⁵ Tlangbawi hna khua ah khan, an u an nau hna, a tar siseh, a no siseh, an i cheu ning khan, an covo cio kha phawt awkah Eden, Miniamin, Jeshua, Shemaiah, Amariah le Shekaniah nih khan tling tein an bawmh, ¹⁶ sihmanhsehlaw an chuahkehnak ningin min thlakmi, pa kum thum in a cunglei, an bawile nih an hrui hna ningin, an bu ning cio khan, an rian ṭuan awk caah ni fate rianṭuanning nih a kiah hna bangin Bawipa inn chungah a lutmi vialte kha cu phawt lo an si. ¹⁷ Tlangbawi pawl an min an thlak hna ning cu an pale innchungkhar ning cio khan a si i Levi mi, kum kul in a cunglei hna cu an bawi hna ningin, an bu an bu ning cio ah a si. ¹⁸ Tlangbawi hna cu an fale dihlak, an nupile hna le an fapa hna le an fanu hna, an dihlak khan minthlak an si, zeicahtiah anmah le anmah thiang tein i chiahnak ah khan zumhtlak tein an um. ¹⁹ Cun Aaron fapa hna, tlangbawi hna, an khua ta a si mizapi ram i a ummi hna caah khan, tlangbawi lak i pa paohpaoh le Levi mi paohpaoh minthlakmi hna kha an covo a phawtu dingah, min in thiahmi kha khua chung hna ah khan an um. ²⁰ Cuticun Judah ram chung dihlak ah Hezekiah nih a tuah i Bawipa a Pathian hmai i a ṭha le a dik le zumhtlak a simi kha a tuah. ²¹ Cun Pathian inn rian le phungbia le nawlbia he aa tlak in a tuahmi rian vialte ah, Pathian a kawlnak ah, a lungthin dihlak in a ṭuan i khua awng a tong.

¹ Hi thil vialte le hi bantukin zumhtlak tein a tuahmi hnuah hin, Assiria siangpahrang Sennakherib cu a ra i Judah cu a chim i kulhmi khua kha a riahhnawh hna i ka tei hna lai tiah aa ruah. ² Cun Sennakherib cu a ra cang i Jerusalem tuk kha aa tim ti kha Hezekiah nih a hmuh tikah, ³ khuapi leng i a ummi cerhti kha a bawi hna le a miṭhawng hna he phih aa tim, annih nih cun an bawmh. ⁴ Mi tampi kha an i pum i ram chung i a luangmi cerh hna le tiva tete hna kha an phih hna i, "Zeicahdah Assiria siangpahrang hna cu an rat lai i ti tampi an hmuh lai?" tiah an ti. ⁵ Rianṭuan awkah khan lung fek tein aa tim i a cimmi vampang kha a remh i a cungah innsang a sak i a lengah vampang dang pakhat a ser ṭhan; cun David khua i Millo kha fek chin in a tuah. Cun hriamnam le phaw kha tampi a ser hna. ⁶ Cun mi zapi cungah khan raltuknak lei ralbawi a chiah hna i khua kutka i a ummi tual ah khan amah sinah cun a pumh hna i lung ṭhawnnak in bia a chimh hna i, ⁷ "Ṭhawng u law nan ralṭha ko u. Assiria siangpahrang le a sinah a ummi mibu cu ṭih hna hlah u law nan lung zong dong hlah seh; zeicahtiah a ngan deuhmi pakhat a sin i a um lomi kan sinah a um. ⁸ Amah sin i a ummi cu titsa hriamnam a si, sihmanhsehlaw kan sin i a ummi cu Bawipa kan Pathian a si, amah nih a kan bawmh lai i kan ral hna cu a kan dohpiak lai," tiah a ti. Cun Judah siangpahrang Hezekiah bia cun mi nih zumhnak an i lak. ⁹ Hi hnuah hin, Assiria siangpahrang Sennakherib le a ralkap vialte hna cu Lakhish i an um lioah Jerusalem i a ummi Judah siangpahrang Hezekiah le Judah mi hna sinah cun sinum kha a hei thlah hna. ¹⁰ "Assiria siangpahrang Sennakherib nih, ’Zeidah nan i bochan i Jerusalem ah hin hrennak hi naa in ko? ¹¹ Hezekiah nih hin, "Bawipa kan Pathian nih Assiria siangpahrang kut chungin a kan chuah lai," tiin a ti tikah hin a pingah an hruai hna a si lo maw? ¹² Hi Hezekiah ṭhiamṭhiam nih hin a si lo mei a khuahrum bo hna le a biakṭheng hna kha a hlonh hna i Judah le Jerusalem cu, "Biakṭheng pakhat hmaiah nan biak lai i cu cungah cun nan raithawinak hna kha nan khangh lai," a ti kha. ¹³ Ramdang hna an mi cungah keimah le ka pupa hna nih zeidah kan tuah ti kha nan thei lo maw? Khi ram hna i a ummi miphun hna pathian hna nih khan an ram cu ka kut chungin an chanh khawh hna maw? ¹⁴ Nan Pathian nih hin ka kut chungin an chuah khawh hna nakhnga ah hin, ka pa nih a hrawh cikcekmi miphun hna i an pathian hna lakah khan aho tal nih a miphun cu ka kut chungin a chuah kho hna maw? ¹⁵ Cucaah Hezekiah cu hi bantukin i hlenter hlah u law a pingah i hruaiter hlah u, cun amah kha zum hlah u, zeicahtiah mi zei miphun pathian siseh, zei ram pathian siseh, ka pupa hna kut chungin siseh keimah kut chungin siseh a mi a chanh khotu hna an um lo. Zeitindah nan Pathian chinchin nih cun ka kut chung cun an chuah khawh hna lai!’ a ti," tiah an ti. ¹⁶ A sinum hna nih khan Bawipa Pathian le a sal Hezekiah cu an bia in an ti chinchin rih hna. ¹⁷ Cun Bawipa, Israel Pathian kha nihsawh awk le zawmhtaih awkah ca a ṭial i, "Ram chung i a ummi miphun hna pathian hna, ka kut chungin an mi hna a chuah kho lotu hna bantuk khan Hezekiah Pathian nih hin a mi hna cu ka kut chungin a chuah kho hna lai lo," tiah a ti. ¹⁸ Khua kulhnak vampang cung i a ummi Jerusalem mi hna kha an thin a phan i an tha a ther i khuapi cu an lak khawh nakhnga, mah cucu Judah holh in an auhnawh hna. ¹⁹ Cun vawlei cung miphun hna pathian, mi kut sermi a simi hna an ti hna bantuk khan Jerusalem khua Pathian cu an ti ve. ²⁰ Khi tikah Siangpahrang Hezekiah le Amoz fapa profet Isaiah kha hi ruangah hin thla an cam i van leiah an au. ²¹ Cun Bawipa nih vancungmi pakhat a thlah i Assiria siangpahrang riahhmun i a ṭhawngmi ralkap hna le haotu hna le bawi vialte hna kha a thah hna. Cucaah hmaichia in amah a ram ah a kir ṭhan. Cun a pathian inn chung i a luh tikah khan amah fapa hna lila nih khan vainam in an thah. ²² Cuticun Bawipa nih Hezekiah le Jerusalem khuami hna cu Assiria siangpahrang Sennakherib kut chung le a ral vialte hna kut chung khan a khamh hna i a kenkip ah dinhnak a pek hna. ²³ Cun mi tampi nih Bawipa sinah Jerusalem ah khan laksawng an rak put i Judah siangpahrang Hezekiah sinah khan thil man sung an rak put hna, cucaah cu caan thawk in hmailei ah cun miphun vialte hna mithmuh ah khan hlorh a si. ²⁴ Cu caan ah cun Hezekiah cu a zaw i a thi dengmang i Bawipa sinah khan thla a cam; cun amah cu a leh i hmelchunhnak a pek. ²⁵ Sihmanhsehlaw Hezekiah cu a lung in aa porhlawt caah a cung i ṭhathnemnak a tuahmi caah khan aa lawm lo. Cucaah amah le Judah le Jerusalem cungah thinhunnak a tlung. ²⁶ Sihmanhsehlaw a lung porhlawtnak kha Hezekiah cu aa ṭhum ṭhan i amah he Jerusalem mi hna he an i ṭhumh caah Bawipa thinhunnak cu an cungah Hezekiah chan ah khan cun a tlung lo. ²⁷ Hezekiah cu rumnak le upatnak tampi a ngei; cun ngun le sui le lung mansung le zihmui le phaw le a man a sungmi umkheng phun zakip caah chiahnak aa ser hna; ²⁸ rawl a chuakmi le mitsur hang le chiti ca i khonnak inn hna le caw phunphun caah caw inn hna le tuu kawm hna kha aa ser hna. ²⁹ Cu bantuk ṭhiamṭhiam in khua kha aa serh hna i tuurun le cawrun cu tampi a ngeih hna zeicahtiah Pathian nih ngeihmi tampi a pek. ³⁰ Hi Hezekiah ṭhiamṭhiam nih hin Gihon ti cunglei i a chuahnak kha a phih hna i David khua nitlaklei kamah khan a vun luanter hna. Cun Hezekiah cu a rian paoh ah khua awng a tong. ³¹ Cucaah Babilon bawi hna nih, ram chung i tuahmi hmelchunhnak va hlathlai awk i a sinah an thlahmi lamkal hna kong ah khan, amah cu hneksak awk le a lung chung i a ummi vialte hngalhnak ah, Pathian nih amah tein a thlah ko. ³² Hezekiah tuahsernak a tang rihmi hna le thil ṭha a tuahmi hna cu, zohhmanh, Judah le Israel Siangpahrang hna Cauk chung i a ummi Amoz fapa profet Isaiah nih langhnak a hmuhmi hna chungah a ṭial. ³³ Cun Hezekiah cu a pupa hna sinah a it i David fapa hna thlan kainak ah khan an vui; Judah ram mi vialte le Jerusalem mi hna nih khan a thih ah cun upatnak an pek. Cun a fapa Manasseh cu amah hmun ah khan a hung bawi.

¹ Manasseh cu pen hram a thawk ah kum hleihnih a si i Jerusalem in kum sawm nga le kum nga a pen. ² Bawipa nih Israel mi hna hmai in a dawimi hna miphun hna phunglam fihnungmi ning khan Bawipa mithmuh ah ṭhat lonak a tuah. ³ Zeicahtiah a pa Hezekiah nih a rak hrawhmi khuahrum bo kha a ser ṭhan hna i Baal caah khan biakṭheng a ser hna i Asherah hna kha a ser hna i van i a ummi thil vialte kha a biak hna i an rian a ṭuan hna. ⁴ Bawipa nih, "Jerusalem khua ah hin ka min cu zungzal in a um lai," tiah a rak timi, Bawipa inn chungah khan biakṭheng a ser hna. ⁵ Cun Bawipa inn tual pahnih chungah khan vancung thil vialte caah khin biakṭheng a ser hna. ⁶ Cun Hinnom fapa nelrawn ah khan a fapa hna cu raithawinak ah a khangh hna i khuavang kawh le litin le eih kha a lenh i thitlawnthiam le khuavang kha aa ruaih tawn hna. Bawipa mithmuh i thil ṭhalo tampi kha a tuah i a thin kha a phawh. ⁷ Cun amah nih a sermi siasal milem cu Pathian inn chungah khan a chiah. Cun inn kongah cun Pathian nih David le a fapa Solomon sinah khan, "Israel phun dihlak chungin ka thimmi Jerusalem le hi inn chungah hin zungzal in ka min cu ka chiah lai; ⁸ cun Israel mi nih Moses in nawl ka pekmi vialte hna le phungbia vialte hna le nawlbia hna le phunglam hna kha tuah awkah an i ralrin ahcun an pupa hna caah ka chiah cangmi ram chungah hin an ke kha ka ṭhial ti hna lai lo," tiah a rak ti. ⁹ Manasseh nih Judah le Jerusalem mi cu a lem khawh hna caah Israel mi hmai i Bawipa nih a hrawhmi miphun hna nakkhan ṭhat lonak tam deuh an tuah. ¹⁰ Bawipa nih Manasseh le a mi hna sinah khan bia a chim ko nain zeihmanh ah an rel lo. ¹¹ Cucaah Bawipa nih an cungah Assiria siangpahrang ralkapbu ralbawi kha a ratpi hna i annih nih Manasseh cu sio in an sio i dar hreng an khenh i Babilon ah an kalpi. ¹² Cun harnak a phak tikah Bawipa a Pathian zaangfahnak kha a nawl i a pupa hna Pathian hmaiah khan fak piin a lung aa ṭhum. ¹³ Amah sinah khan thla a cam i Pathian nih a nawlnak kha a cohlan i a thlacamnak kha a theih i amah ram Jerusalem ah khan a kirpi ṭhan. Khi tikah Manasseh nih Bawipa cu Pathian a si kha a hngalh. ¹⁴ Cun a hnuah David khua lengah khan Gihon nitlaklei nelrawn ah, Nga Kutka luhnak tiangin vampang a ser i Ofel kha a kulhter i sangpi ah a cawi; cun Judah ram chung khua hna ah khan ralkapbu haotu a chiah fawn hna. ¹⁵ Cun ramdang pathian hna le siasal kha Bawipa inn khan a ṭhial hna i Bawipa inn umnak tlang le Jerusalem i a sermi biakṭheng vialte kha khua lengah a hlonh dih hna. ¹⁶ Bawipa biakṭheng zong kha a chiah ṭhan i a cungah cun daihnak thawinak hna le lawmhnak thawinak hna kha a pekchanh hna i Bawipa, Israel Pathian cu a rian nan ṭuan lai, tiah Judah mi kha nawl a pek hna. ¹⁷ Mi nih cun khuahrum bo hna ah khan rai cu an thawi ko rih, asinain, Bawipa an Pathian sin lawnglawng ah khan a si cang. ¹⁸ Manasseh tuahsernak a tang rihmi hna le a Pathian sin i thla a camnak le Bawipa, Israel Pathian min in a sinah bia a chimtu hmutu hna bia cu, zohhmanh, Israel Siangpahrang hna Chanrelnak chungah an um. ¹⁹ A thlacamnak Pathian nih a nawlnak a cohlanpiakning le a lung a ṭhumh hlan i a sualnak vialte le zumhtlaklo a sinak le khuahrum bo a ser i Asherim le milem hna a chiahnak hmun hna kha, zohhmanh, Hmutu hna Chanrelnak chungah an i ṭial. ²⁰ Cuticun Manasseh cu a pupa hna sinah a it i amah a inn ah khan an vui; cun a fapa Amon cu amah hmun ah khan a hung bawi. ²¹ Amon cu pen hram a thawk ah kum kul le kum hnih a si i Jerusalem in kum hnih a pen. ²² A pa Manasseh nih a rak tuah bantuk khan Bawipa mithmuh i thil ṭhalo kha a tuah. A pa Manasseh nih a rak sermi milem dihlak sinah khan raithawinak a tuah i an rian a ṭuan hna. ²³ A pa Manasseh nih a lung a ṭhumh bangkhan Bawipa hmaiah a lung a ṭhum lo i hi Amon nih hin cun mawhnak kha tam chin lengmang a tuah. ²⁴ Cun a sinum hna nih an rawi i amah inn chungah an thah. ²⁵ Sihmanhsehlaw ramchung mi nih khan Amon a rawitu vialte kha an thah hna i ramchung mi nih khan a fapa Josiah cu amah hmun ah khan siangpahrang ah an ser.

¹ Josiah cu pen hram a thawk ah kum riat a si i Jerusalem in kum sawm thum le kum khat a pen. ² Bawipa mithmuh i a dikmi kha a tuah i a pa David lam kha a zulh hna; cun orhlei ah siseh, kehlei ah siseh aa mer lo. ³ Zeitintiah a bawi kum riatnak kum, tlangval note a si lioah khan, a pa David i Pathian kha kawl hram a thawk; cun a kum hleihnih kum ah Judah le Jerusalem chung i khuahrum bo hna le Asherim hna le suaimi milem hna le thletmi milem hna kha thianh hram a thawk hna. ⁴ Cun a mithmuh ah Baal biakṭheng hna kha a chimh hna; cun an cung i a dirmi zihmui biakṭheng hna kha a hau hna i Asherim le suaimi le thletmi milem hna kha a den cikcek hna i leidip ah a ser hna i an cung i rai a rak thawimi hna an thlan cungah khan a vorh hna. ⁵ Tlangbawi hna ruh zong kha an biakṭheng cungah cun a khangh hna i Judah le Jerusalem cu a thianh hna. ⁶ Cun Manasseh le Efraim le Simeon ram, cun Naftali ram tiangin, hi ram hna khua chung le an pawngkam i a rawkmi khua chungah hin, ⁷ Israel ram chung dihlak ah, biakṭheng hna kha a chimh hna i Asherim le milem hna kha dip tein a rial hna i zihmui biakṭheng kha a hau hna. Cun Jerusalem ah a kir. ⁸ A bawi kum hleiriat kum ah ram le inn kha a thianh dih in, Azaliah fapa Safan le khua uktu Ma-aseiah le Joahaz fapa Joah, cazinṭialtu kha Bawipa a Pathian inn remh awkah khan a thlah hna. ⁹ Tlangbawi bik Hilkiah sinah khan an ra i innka luhnak cawngtu Levi mi hna nih Manasseh le Efraim le Israel mi a tangmi vialte le Jerusalem khuami hna sinin an kholhmi phaisa Pathian inn chungah an rak putmi kha an pek. ¹⁰ Bawipa inn a zohkhenhtu rianṭuantu hna sinah khan an pek i Bawipa inn chung i rian a ṭuanmi hna nih cun inn cu remh ṭhan le dawhter ṭhannak caah an hman. ¹¹ Judah siangpahrang hna nih an rawhraltermi inn hna caah khan cawhmi lung hna le a tlang kamhnak ca thing hna le kaan hna cawknak ah zungthiam hna le inn satu hna cu an pek hna. ¹² Cun rian cu zumhtlak tein an ṭuan. An cungah khan Merari fapa hna Levi mi Jahath le Obadiah, cun Kohath mi hna fapa hna chungin Zekhariah le Meshullam cu zohkhenhtu ah an chiah hna. Cun awdawh tumnak thilri i a thiammi Levi mi vialte hna kha, ¹³ thil phortu hna zohkhenhtu an si i rian phun zakip a ṭuanmi hna kha hmuhsaktu an si; cun Levi mi a cheukhat cu caṭialtu le bawi le kutka cawngtu an si. ¹⁴ Bawipa inn chung i an rak putmi tangka kha an chuahpi lioah cun, Moses sinin pekmi Bawipa phungbia cauk cu tlangbawi Hilkiah nih a hmuh. ¹⁵ Cun Hilkiah nih cazin ṭialtu Safan sinah cun, "Phungbia cauk Bawipa inn chungah ka hmuh," tiah a ti; cun Hilkiah nih cauk cu Safan kha a pek. ¹⁶ Safan nih cauk cu siangpahrang sinah a rak put i, "Na sinum hna sinah ṭuan awk tiin na pekmi vialte cu an ṭuan lio a si. ¹⁷ Bawipa inn chungah a ummi phaisa kha an chuah i rian zohtu hna le rian ṭuantu hna kha an pek hna," tiah siangpahrang cu a chimh fawn. ¹⁸ Cun cazin ṭialtu Safan nih cun siangpahrang cu, "Tlangbawi Hilkiah nih cauk kha a ka pek," tiah a ti. Cun Safan nih siangpahrang hmaiah khan a rel. ¹⁹ Siangpahrang nih phungbia chung bia kha a theih tikah, a puan kha a thleh hna. ²⁰ Cun siangpahrang nih Hilkiah le Safan fapa Ahikam le Mikah fapa Abdon le cazin ṭialtu Safan le siangpahrang sinum Asaiah kha nawl a pek hna i, ²¹ "Va kal u law, keimah ca le Israel le Judah i a tang rihmi caah Bawipa kha, hi cauk an hmuhmi chung bia kong hi va hal tuah u; kannih kan pupa hna nih hi cauk chung i aa ṭialmi dihlak ningin tuah awkah Bawipa bia kha an zulh lo caah kannih kan cung i a thletmi Bawipa thinhunnak cu a ngan ko," tiah a ti. ²² Cucaah Hilkiah le siangpahrang nih a thlahmi hna kha profetnu Huldah sinah an ra i amah cu, cuticun an chimh; Huldah cu Shallum nupi a si, Shallum cu Tokhath fapa a si, Tokhath cu hnipuan chiahnak zohkhenhtu Hasrah fapa a si (Huldah cu Jerusalem ah Sang Pahnihnak ah khan a um). ²³ Cun anih nih annih cu a thawh hna i, "Hi bangin Bawipa, Israel Pathian nih, ’Nannih cu ka sinah an thlahtu hna mipa cu, ²⁴ Hi bangin Bawipa nih a ti, tiah va chim u, Zohhmanh, hi hmun le a chung i a ummi hna cungah hin ṭhat lonak, Judah siangpahrang hmai i kan relmi cauk chung i chiatserhnak vialte kha ka tlunter lai. ²⁵ Annih nih an kut in an ṭuanmi rian vialte in ka thin an ka phawh i keimah kha an ka hlawt i pathian dang hna sinah zihmui an khangh caah, cucaah hi hmun cungah hin ka thinhunnak ka bungh lai i hmih khawh a si lai lo. ²⁶ Sihmanhsehlaw Bawipa hal awkah an thlahtu hna Judah siangpahrang sinah cun hi bangin nan va chim lai, Hi bangin Bawipa Israel Pathian nih a ti: Bia na theihmi hna kong ah cun, ²⁷ hi hmun le hi hmun i a ummi hna cung i a bia cu na theih tikah na lung in naa ngaihchih i Bawipa hmaiah na lung na ṭhumh i ka hmaiah na puan na thleh i na ṭah caah, kei zong nih na bia kan theihpiak, tiah Bawipa nih a ti. ²⁸ Zohhmanh na pupa hna sinah kan pumh lai i daihnak in thlan khor na phan lai, cun hi hmun le a chung i a ummi hna cung i ṭhat lonak ka tlunter dingmi hi na mit nih a hmu lai lo, tiah va chim u,’ a ti," tiah a ti. Cun annih nih bia cu siangpahrang sinah an ratpi ṭhan. ²⁹ Cun siangpahrang nih mi a thlah hna i Judah le Jerusalem upa vialte kha a pumh hna. ³⁰ Cun siangpahrang cu Judah ram mi vialte le Jerusalem khuami le tlangbawi hna le Levi mi hna le, mi vialte a ngan he a hme he, Bawipa inn ah cun an hung kal; cun Bawipa inn ah an hmuhmi biakamnak cauk chung bia vialte cu an theihhngan ah a relpiak hna. ³¹ Cun siangpahrang cu amah hmun ah khan a dir i, Bawipa kha zulh awk le a nawlbia hna le a hngalhternak bia hna le a nawl hna cu a lungthin dihlak le a nunnak dihlak in tuah awk le hi cauk chung i aa ṭialmi biakamnak bia hna cu tuah awkah Bawipa hmaiah cun biakamnak a ser. ³² Cun Jerusalem khua le Benjamin ram i a ummi vialte hna kha mah cucu nan i tlaih lai tiah a ti hna. Cun Jerusalem khuami vialte nih Pathian, an pupa hna Pathian biakamnak bangin an tuah. ³³ Josiah nih cun Israel mi hna ta a simi ram chung khan fihnung vialte kha a hlonh dih i Israel ram i a ummi vialte kha Bawipa, an Pathian rian cu a ṭuanter hna. Amah chan chung cu annih nih Bawipa an pupa hna Pathian zulhnak khan an pial lo.

¹ Josiah nih Jerusalem ah Bawipa caah Lanhtak Puai a tuah i Lanhtak Puai tuufa cu thla khatnak thla ni hleili ni ah an thah. ² Tlangbawi hna cu anmahle an rian cio ah khan a thiah hna i Bawipa inn rianṭuannak ah cun a forh hna. ³ Israel mi vialte kha a cawnpiak hna i Bawipa sinah a thiangmi Levi mi kha a thawh hna i, "Israel siangpahrang David fapa Solomon nih a sakmi inn chungah khan kuang thiang kha chia u, nan liang in nan i zawnh a hau ti lai lo. Atu cu Bawipa nan Pathian le a mi Israel mi an rian kha ṭuan tuah u. ⁴ Israel siangpahrang David hmuhsaknak le a fapa Solomon hmuhsaknak kha zul in nan pale chung cio ning le nan bu nan i cheuning khan i tim tuah u. ⁵ Cun nan unau hna mi sawhsawh an pale innchungkhar bu ning cio khan nannih cu hmunthiang ah khan dir u law an bu cio caah cun Levi mi hna chung i an pale innchungkhar a cheuchum um cio hna seh. ⁶ Cun Lanhtak tuufa kha that u law i thianh tuah u, Moses sinin Bawipa bia ningin tuah awkah nan unau hna kha timtuah hna u," tiah a ti. ⁷ Cun Josiah nih mi sawhsawh hna caah cun, a ummi vialte ca i Lanhtak Puai laksawng caah, a tuurun chungin tuufa le mehehfa sang thum le cawtum thong thum a thawh; mah hihi siangpahrang nih pumpak in a ngeih mi chungin an si. ⁸ Cun a bawi hna nih khan mi zapi ca le tlangbawi ca le Levi mi hna caah lungtho tein an thawh ve. Pathian inn chung i a bawi bik pawl Hilkiah, Zekhariah le Jehiel nih Lanhtak Puai i pekchanh awk caah tlangbawi cu tuufa le mehehfa thong hnih le za ruk le cawtum za thum an pek hna. ⁹ Levi mi lak i upa bik hna Konaniah le a unau Shemaiah le Nethanel, cun Hashabiah le Jeiel le Jozabad nih lanhtak puai i pekchanh awkah tuufa le mehehfa thong nga le cawtum za nga cu Levi mi kha an pek hna. ¹⁰ Cun rianṭuannak cu timhtuah a si tikah, siangpahrang nawl peknak bangin, tlangbawi cu an hmun ah khan an dir i Levi mi cu an i ṭhenning khan an dir. ¹¹ Cun Lanhtak Puai tuufa kha an thah i tlangbawi nih khan an sinin an lakmi thisen cu an theh i Levi mi nih khan sa cu an phaw an hawh hna. ¹² Moses cauk chungah aa ṭial bangin, Bawipa sin i pekchanh awkah, mi sawhsawh pawl cu an pale innchungkhar ning in ṭhenmi bu ning khan phawt cio awkah, khangh thawinak hna kha cu a dang tein an chiah hna. Cu bantuk ṭhiamṭhiam in cawtum zong kha an tuah hna. ¹³ Cun phunglam ningin lanhtak puai tuufa cu mei in an rawh; cun pekchanhmi thilthiang hna cu um le marlei le ukang in an chuan hna i mi sawhsawh pawl vialte kha khulrang in an pek hna. ¹⁴ Cun a hnuah anmah ca le tlangbawi hna caah khan an timhtuah, zeicahtiah Aaron fapa hna tlangbawi hna kha khangh thawinak le a thau hna kha pekchanhnak ah khan zanṭim tiang an hna a hnawk; cucaah cun Levi mi hna nih anmah ca le tlangbawi hna ca i an timhtuahnak cu a si. ¹⁵ Cun David le Asaf le Heman le siangpahrang i a hmutu Jeduthun hna nawl peknak bangin, hlasatu, Asaf fapale hna cu an hmun ah khan an um; cun kutka cawngtu hna kha kutka ah cun an um cio; an unau Levi mi hna nih an timhtuahpiak hna caah an rianṭuannak khan an kal ta a herh lo. ¹⁶ Cucaah Siangpahrang Josiah nawl peknak bangin, lanhtak puai cu tuah awk le Bawipa biakṭheng cung i khangh thawi-nak pekchanh awkah Bawipa rianṭuannak ca i thil vialte cu khi ni ah timh dih a si. ¹⁷ Cun Israel mi a ummi hna nih cun khi caan ah Lanhtak Puai kha an tuah i thilnu telhlo changreu puai kha ni sarih an tuah. ¹⁸ Profet Samuel chan hnuah cun cu bantuk cun Lanhtak Puai kha tuah a si bal ti lo; Josiah le tlangbawi hna le Levi mi hna le cuka i a ummi Judah ram mi le Israel ram mi vialte le Jerusalem khuami hna nih an tuahmi Lanhtak Puai bantuk cu Israel siangpahrang ahohmanh nih an tuah bal lo. ¹⁹ Hi Lanhtak Puai cu Josiah a bawi kum hleiriat kum ah tuah a si. ²⁰ Hi thil vialte hnuah, Josiah nih biaknak inn cu a timhtuah dih tikah khan, Zufrates tiva i a ummi Karkhemish khua i i doh awkah Izipt siangpahrang Neko cu a hung kal i Josiah nih a rak chuahhnawh. ²¹ Sihmanhsehlaw a sinah lamkaltu a hei thlah hna i, "Judah siangpahrang, nangmah le keimah cu zeidah kan i ti awk a um? Nihin ah hin nangmah doh awkah ka ra lo, sihmanhsehlaw atu i a ka raltu innchungkhar he doh awkah ka ra; cun Pathian nih i khulranh tuah tiin nawl a ka pek. Ka sin i a ummi Pathian doh cu ngol tuah, zeicahtiah an hrawh sual lai,’ tiah a ti. ²² Asinain Josiah nih hrial cu a duh lo i amah he i doh awkah cun a mui aa hleng. Pathian kaa chungin a chuakmi bia Neko bia cu a ngai lo i Megiddo nelrawn i i tuk awkah khan a kal. ²³ Cun thalkah thiam hna nih Siangpahrang Josiah kha an kah i siangpahrang nih cun a sinum hna cu, "Ṭhalo tein an ka hliam caah ka kalpi u," tiah a ti hna. ²⁴ Cucaah a sinum hna nih cun rangleng chung khan an chuah i a rangleng pahnihnak in Jerusalem ah an tlunpi. Cun a thi i a pupa hna thlan ah khan an vui. Cun Judah mi dihlak le Jerusalem mi dihlak nih khan Josiah kha an ṭah. ²⁵ Jeremiah zong nih ṭah hla a lawh i hlasak thiammi pa vialte le nu vialte nih nihin tiang hin Josiah cu an hla ah an cuanter. Mah hihi Israel mi lakah phunglam ah an ser hna; zohhmanh, Ṭah Hla chungah an i ṭial. ²⁶ Josiah tuahsernak a tang rihmi hna, Bawipa phungbia ah aa ṭial ningin a tuahmi tuahsernak ṭha hna le ²⁷ a thil tuahmi hna, a hramthawk le a donghnak hna zong, zohhmanh Israel le Judah Siangpahrang hna Cauk chungah an i ṭial.

¹ Cu ram profet nih cun Josiah fapa Jehoahaz kha a lak i a pa hmun ah khan Jerusalem ah siangpahrang ah a ser. ² Jehoahaz cu pen hram a thawk ah kum kul le kum thum a si Jerusalem in thla thum a pen. ³ Cun Jerusalem ah cun Izipt siangpahrang nih a phuah i ram cu ngunkhuai ngun talen za khat le sui talen pakhat a cawh. ⁴ Cun a unau Eliakim kha Judah le Jerusalem siangpahrang ah cun Izipt siangpahrang nih khan a ser i a min cu Jehoiakim ah a thlen; sihmanhsehlaw a unau Jehoahaz cu Neko nih khan a lak i Izipt ah a kalpi. ⁵ Jehoiakim cu pen hram a thawk ah kum kul le kum nga a si i Jerusalem in kum hleikhat a pen. Bawipa a Pathian mithmuh i thil ṭhalo kha a tuah. ⁶ Babilon siangpahrang Nebukhadnezzar nih khan a hung doh i hreng a khenh i Babilon ah a kalpi. ⁷ Bawipa inn chung i a ummi umkheng a cheu hna zong kha Nebukhadnezzar nih Babilon ah a kalpi hna i Babilon i a siangpahrang inn ah cun a chiah hna. ⁸ Jehoiakim tuahsernak a tang rihmi hna le fihnung a tuahmi le a ziaza ṭhalo hna cu zohhmanh, Israel le Judah Siangpahrang hna Cauk chungah an i ṭial i a fapa Jehoiachin cu amah hmun ah khan a hung bawi. ⁹ Jehoiachin cu pen hram a thawk ah kum riat a si i Jerusalem in thla thum le ni hra a bawi. Bawipa mithmuh i thil ṭhalo kha a tuah. ¹⁰ Cun cu kum ṭhal ah Nebukhadnezzar Siangpahrang nih mi a thlah hna i amah cu Bawipa inn chung i umkheng mansung hna he cun Babilon ah an ratpi i a unau Zedekiah cu Judah le Jerusalem siangpahrang ah a ser. ¹¹ Zedekiah cu pen hram a thawk ah kum kul le kum khat a si i Jerusalem in kum hlei khat a bawi. ¹² Bawipa, a Pathian mithmuh i thil ṭhalo kha a tuah. Bawipa kaa chungin a chuakmi bia a chimtu Jeremiah hmaiah khan a lung a ṭhum lo. ¹³ Cun Pathian min chalh in chiat a sertu Siangpahrang Nebukhadnezzar zong kha a doh; Bawipa, Israel Pathian lei i i mer duh loin a hngawng kha a ṭhawnter i a lung kha a hahter. ¹⁴ Tlangbawi hna lak i haotu deuhdeuh hna le mi zapi hna zong kha, cu bantuk cun zumhtlaklo ngaiin an um i miphun hna thil fihnung vialte kha an zulh ve; cun Jerusalem ah a thiantermi Bawipa inn kha a thurhhnawmh. ¹⁵ Bawipa, an pupa hna Pathian nih khan a mi hna le a umnak hmun cungah khan zaangfahnak a ngeih caah lamkaltu kha ngol duh lo tein a thlahhnawh lengmang hna; ¹⁶ sihmanhsehlaw Bawipa thinhunnak cu a mi hna cungah a thawh i remh ṭhan khawhnak a um ti lo tiangin Pathian lamkaltu hna cu an rak zawmhtaih lengmang hna i a bia kha zei ah an rel lo i a profet hna kha an nihsawh hna. ¹⁷ Cucaah an tlangval hna cu an hmunthiang inn chungah khan vainam in a that i, tlangval cungah siseh, upa cungah siseh, zaangfahnak a ngei lomi, Khaldi mi siangpahrang kha an cungah a ratpi; a kut chungah cun an dihlak in a chanh hna. ¹⁸ Cun Pathian inn chung i a ummi umkheng vialte, a hme a ngan in, cun Bawipa inn rothil hna le siangpahrang le a bawi pawl rothil vialte hna cu an dihlak in Babilon ah an kalpi hna. ¹⁹ Cun Pathian inn cu an khangh i Jerusalem khua kulhnak vampang cu an chimh hna i a chung i siangpahrang inn vialte cu mei in an khangh hna i a umkheng mansung vialte cu an hrawh dih hna. ²⁰ Cun vainam thahnak in a luatmi hna kha Babilon ah sal ah a kalpi hna i Persia pennak a feh hlantiang annih cu amah le a fapa hna sal ah an cang; ²¹ mah hihi Jeremiah kaa in Bawipa bia a chuakmi, ram nih a sabbath hna cu aa lawmhpi dih hlantiang, timi tlinternak caah khan a si. Kum sawm sarih tlinternak caah khan rawkral in a um chung vialte sabbath kha a ul ko. ²² Jeremiah kaa in a langmi Bawipa bia cu a tlin nakhnga, Persia siangpahrang Sairas a bawi kum khatnak ah, Bawipa nih Sairas thlarau cu a hninhsaih i cucaah a pennak ram chung vialte ah thawng thanhnak a tuah i, ²³ "Hi bangin Persia siangpahrang Sairas nih, Bawipa, vancung Pathian nih vawleicung ram vialte cu a ka pek cang i mah caah Judah ram Jerusalem i inn pakhat sak awk kha a ka fial. Cucaah Pathian mi a simi nannih cu nan dihlak in cuka ah cun va kal u law Bawipa nan Pathian cu nan sinah um ko seh," a ti.