1 TIMOTE

1 TIMOTE

¹ Kan Khamhtu Pathian le kan i ruahchanmi Khrih Jesuh nawl in lamkaltu a simi keimah Paul nih. ² Zumhnak i ka fa taktak a simi Timote, ca kan kuat. Pathian kan Pa le Khrih Jesuh kan Bawipa nih vel le zaangfahnak le daihnak in pe ko seh. ³ Masidonia ram lei ka rak kalpah i ka rak in fial bantuk khan, Efesa khua ah um law ti ka duh. Efesa khua ah khan, cawnpiaknak hmaanlo a cawnpiaktu hna an um i kha hna kha ngolter kho hna law ti ka duh. ⁴ Kha bantuk tuanbia menmen hna le chuahkehnak min sau pipi in an ṭialmi cazin menmen hna kha cu, zeihmanh an si lo caah, hlaw hna u, tiah na rak chimh hna lai; zeicahtiah kha bantuk thil nih khan bia alnak lawnglawng a chuahpi i zumhnak in hngalh khawh a simi Pathian khuakhannak kha zeihmanh a langhter lo. ⁵ Hi bantukin bia kan cah tikah kaa tinhmi cu, a thiangmi lungthin le a thiangmi chiaṭha thleidannak le zumhnak taktak a simi chungin a chuakmi dawtnak kha a si. ⁶ Hi bantuk thil tu hi mi a cheu nih an hlawt riangmang hna i bia i al lengmangnak hruhnak burbuk chungah khan an lut. ⁷ Pathian nawlbia cawnpiaktu saya si cu an duh, sihmanhsehlaw anmah chimmi bia lila kha a sullam an hngal lo i a hngal ngai bantukin an chim lengmangmi thil kong zong kha an hngal taktak fawn lo. ⁸ Nawlbia hi a sining ding bantukin hman a si ahcun a ṭha ko ti kha kan hngalh. ⁹ Sihmanhsehlaw kan hngalh awk cu, nawlbia cu miṭha mi hna caah ser a si lo i nawlbia a buarmi hna le bia ngai duh lomi hna le Pathian zei i a rel lomi hna le misual mi hna le biaknak zei i a rel lomi hna le thlarau lei thil zei i a rel lomi hna le an nu an pa a nawngmi hna le ¹⁰ nu le pa sualnak a tuahmi hna le nu le pa kong ah ningcanglo in khua a sami hna le minung fir a hmangmi hna le lihchim a hmangmi hna le tehte dinglo a simi hna le cawnpiaknak ahmaanmi he aa tlak lomi thil a tuahmi hna ca tu ah khan tuah a si. ¹¹ Ahmaanmi cawnpiaknak cu thanh fial ka simi Thawngṭha chungah khan a um i cu Thawngṭha cu sunparnak le thangṭhatnak in a khatmi Pathian sinin a rami kha a si. ¹² Ka rianṭuannak ah thazang a ka petu kan Bawipa Khrih Jesuh cu ka lawmh. Amah rianṭuantu ah ser awk tlak i a ka ruah caah a cungah kaa lawm. ¹³ Hlanah cun ka rak thangchiat i ka rak hrem i ka rak serhsat, asinain Pathian cu ka cungah zaangfahnak a ngei; cu bantukin ka rak tuah cu amah kha ka rak zumh lo i ka tuahmi cu zeidah a si ti awk ka rak hngalh lo caah a si. ¹⁴ Cun kan Bawipa nih cun a tam ngaingaimi a vel kha a toih in a ka toih i Khrih Jesuh he kan i pehtlaihnak thawngin zumhnak le dawtnak kha a ka pek i cu hna cu kanmah ta an si cang. ¹⁵ Khrih Jesuh cu misual mi hna khamh awkah vawlei ah a rung ṭum, timi hi ahmaanmi le cohlan awk a tlakmi le zumh awk bia a si. Keimah cu an lakah a sual bik ka si ko, ¹⁶ sihmanhsehlaw hi ruang thengte ah hin Pathian nih ka cung i zaangfahnak a ngeih cu a si. Cu bantukin Pathian nih a ka zaangfah i misual mi hna lak i a sual bikmi keimah cungah Khrih Jesuh nih a lungsaunak le a thinfualnak a langhter cu, hmailei ah a hun zum i cu zumhnak thawngin zungzal nunnak a hmumi hna caah zohchunh awk siseh ti kha a duh caah a si. ¹⁷ Zungzal in a hmunmi Siangpahrang, thih a thiam lomi le mit in hmuh khawh a si lomi Pathian, Amah lawnglawng Pathian a simi cu, zungzal in zungzal tiang, upatnak le sunparnak, pek si ko seh! Amen. ¹⁸ Ka fa, Timote, hi bantukin mi va chimhhrinnak ding rian hi na kut chungah ka chiah. Hi ka chiahmi cu nangmah kongah rak chimchungmi bia ning khan a si. Kha bia kha raldohnak hriam ah i hman hna law na zumhnak le na lungthin kha fek tein umter hna. ¹⁹ Mi a cheu cu an chiaṭha thleidannak kha zeirello in an um tawn caah an zumhnak kha an rawhter tawn. ²⁰ Cu hna lakah cun Hymenaias le Alekzandar kha an i tel i annih cu Satan kut chungah ka pek cang hna. Cu nih cun Pathian thangchiat ngol kha a cawnpiak hna lai.

¹ Cucaah a hmasa bik ah fial kan duhmi cu, nawlnak le thlacamnak le halnak le lawmhnak biachimnak kha mi vialte caah, kan Pathian sinah tuah u sih. Siangpahrang hna le nawlngeitu hna caah ² daite le remte le Pathian ṭihzah le ziaza ṭha in kan nun khawh nakhnga, thlacam u sih. ³ - ⁴ Mi vialte nih khamhnak hmu hna seh ti le biatak kha hngal hna seh ti a duhmi Pathian kan Khamhtu nih, hi thil ṭha hi a duhmi a si. ⁵ Pathian cu pakhat lawng a si i Pathian le minung kar ah remnak sertu cu minung Khrih Jesuh lawng a si, ⁶ amah cu mi vialte tlanhnak caah a lu aa pemi a si. Cu nih cun, caan a tlin tikah Pathian nih mi vialte kha khamh a duh hna ti kha a langhter i ⁷ cu ruangah cun Jentail mi hna sinah lamkaltu le cawnpiaktu ah thlah ka si i zumhnak le biatak kong cu ka chim. Lih ka chim lo, biatak ka chim! ⁸ Pa paohpaoh nih hmun kip ah thlacam hna seh ti ka duh, Pathian sinah i pe in thinhunnak zeihmanh um lo le bia alnak zeihmanh um loin Pathian sinah cun an kut hler hna seh. ⁹ Nu zong aa za tawk le aa dawh tawk in i thuam hna seh ti ka duh. An sam kha a hlei a hluat in i tom hna hlah seh, sui hlawn le lungvar hlawn le hnipuan man sang tuktuk in i ṭamh tuk hna hlah seh. ¹⁰ Biaknak a ṭanhmi nu nih an tuah tawn bantukin ziaza ṭha tu in i thuam hna seh. ¹¹ Nu cu cawnpiaktu si loin a cawngtu an si awk a si, cun an cawn tikah daite le toidornak lungthin ngei in an cawn awk a si. ¹² Cawnpiaktu si awkah ka duh hna lo, pa cung i nawl ngeitu si ding zongah ka duh hna lo; dai tein an um awk a si ko. ¹³ Adam pei ser hmasa a si kha, amah hnuah pei Evi cu ser a si kha. ¹⁴ Hlen khawhmi cu Adam kha a si ṭung lo, nu kha pei a si i Pathian nawl zong a buar kha. ¹⁵ Sihmanhsehlaw nu cu fa an ngeih ruangah hin khamh an si lai — toidornak lungthin in zumhnak le dawtnak le thiannak chungah an um ahcun khamh an si lai.

¹ Mi pakhatkhat cu Khrihfabu hruaitu si a duh ahcun rian ṭha ngai a duh a si, timi bia hi ahmaanmi a si. ² Khrihfabu hruaitu cu soisel awk um lomi, nupi pakhat lawng a ngeimi, zu rit hmang lomi, mah le mah aa uk khomi, ningcang tein khua a sami, khualtlung a dawmi, cawnpiak a thiammi a si lai; ³ zu rit hmangmi a si lai lo, mitlokciar a si lai lo, milungnem le daihnak a duhmi a si lai; tangka mitthimi a si lai lo; ⁴ a innchungkhar ṭha tein a zohkhenh khomi a si lai i a fale nih a nawl an ngaihmi le an upatmi a si lai. ⁵ Mah innchungkhar hmanh ṭha tein a zohkhenh kho lomi nih cun zeitindah Pathian khrihfabu cu a zohkhenh khawh lai? ⁶ Khrihfa a cannak a naimi a si lai lo, zeicahtiah a hnar a puar sual lai i Khuachia kha sualphawt a rak si bantuk khan sualphawt a si ve sual lai. ⁷ Khrihfabu lengah a ummi nih an hmaizahmi a si lai, cu bantuk mi a si lo ahcun a thang a chia lai i Satan rap ah aa foih sual lai. ⁸ Khrihfa upa hna zong ziaza a ṭhami le lungthin a thiangmi an si lai; zu tam tuk a dingmi an si lai lo i hakkaumi zong an si lai lo. ⁹ Phuanmi zumhnak biatak cu chiaṭha thleidannak thiang in fek tein aa tlaihmi an si lai. ¹⁰ Annih cu hneksak hmasa an si lai i an awn ahcun an ṭuan lai. ¹¹ An nupile zong ziaza ṭhami an si lai i mi congoih hmangmi an si lai lo; zurit hmang lomi an si lai i zeizong kip ah miding an si lai. ¹² Khrihfa upa cu nupi pakhat lawng a ngeimi an si lai i an fale hna le an innchungkhar kha ṭha tein a zohkhenh khomi an si lai. ¹³ Rian ṭha a ṭuanmi khrihfa upa cu hmaizahnak an hmu i Khrih Jesuh an zumhnak kong kha ralṭha in an chim ngam. ¹⁴ Hi ca na sin i ka ṭial lioah hin, ka saduhthah cu tuan i na sin i rat i nangmah hmuh kha a si. ¹⁵ Sihmanhsehlaw ka tlai sual a si ahcun hi ca nih hin zeitindah Pathian innchungkhar chungah kan umtu kan ziaza a si awk a si ti kha an chimh lai; Pathian innchungkhar cu a nungmi Pathian Khrihfabu, biatak a dirkamhtu le biatak i a tungpi kha a si. ¹⁶ Kan biaknak phung chung i aa thupmi biathli hi zeitluk in dah a ngan ti kha ahohmanh nih an al kho lo: Minung pum in a lang i ahmaan tiah Thlarau nih tehte a khaan, Vancungmi zong nih an hmuh. Miphun kip sinah a kong cu chim a si, Vawlei cung khuazakip ah mi nih an zumh i vancung ah a kai.

¹ Hmailei ah cun mi a cheu nih zumhnak kha an hlawt lai i lih a chimmi thlarau tu kha an bia an ngaih hna lai i khuachia cawnpiaknak kha an zulh lai, tiah Thlarau nih fiang tein a chim. ² Hi cawnpiaknak hi lihchim hmangmi hna nih lih in mi an cawnpiak hnanak chungin a chuakmi a si; annih cu an chiaṭha thleidannak a thimi, thir lin nih a kangh ca i a ngongmi an si. ³ Cu hna pawl nih cun i ṭhit i umh hi thil ṭhalo a si, tiah an ti i ei chia an timi rawl phun zong a um. Sihmanhsehlaw hi rawl cu Pathian nih ei awk ding i a sermi an si i zumtu a simi hna le biatak a hngalmi hna nih cun lunglawmhnak in thlacam hnuah ei awk an si ko. ⁴ Pathian nih a sermi thil cu zei thil paoh an ṭha dih; zeihmanh hlawt awk an si lo, lunglawmh thlacamnak he cohlan awk an si ko. ⁵ Zeicahtiah Pathian bia le thlacamnak nih khan Pathian cohlan awk tlak thil ah a tuah hna. ⁶ Kan u le kan nau pawl kha, hi cawnpiaknak hi na chimh hna ahcun nangmah cu Khrih Jesuh sal ṭha na si lai, thlarau lei i naa cawmnak ah zumhnak bia le na zulhmi cawnpiaknak ahmaan taktakmi kha, va hmang hna. ⁷ Pathian kong a si lomi tuanbia menmen kha cu hrial hna, kha hna kha cu nutar ca lawngah an i tlak. Pathian he aa tlakmi nunnak kha ngeih i zuam zungzal. ⁸ Pum in thiam lakin cawnmi kha santlaihnak a ngei, asinain cu bantuk santlaihnak cu donghnak a ngei; sihmanhsehlaw biaknak ṭhathnemnak cu donghnak a ngei lo, zeicahtiah cu biaknak chungah cun Pathian nih atu kan nunnak ca he hmailei kan nunnak ca he bia a kan kamh. ⁹ Hika bia hi zumh awk tlakmi le cohlan awk tlakmi bia an si. ¹⁰ Cu ruangah cun sifahnak kan in le fak piin rian kan ṭuan hi a si. Kannih nih kan i ruahchannak cu mi vialte khamhtu a si i a nungmi Pathian cungah khan kan bunh i cu a nungmi Pathian cu a zummi hna khamhtu kha a si khun. ¹¹ Hi cawnpiaknak hi cawnpiak chin hna law nan zulh awk a si tiah ti hna. ¹² Na kum a no ruangah ahohmanh nih in zawmhtaih hna hlah seh, sihmanhsehlaw na biachim na holhrel ah siseh, na zia na za ah siseh, dawtnak, zumhnak le thiannak na ngeihmi ah siseh, zumtu hna caah tahchunh awk tlak va si tuah. ¹³ Mizapi cu ka rat hlantiang Cathiang kha rak relpiak lengmang hna, phung kha rak chim lengmang hna law rak cawnpiak lengmang hna. ¹⁴ Profet hna nih bia an chim i upa hna nih na cung i an kut an chuan tikah na hmuhmi thlarau laksawng kha hlothlau hlah. ¹⁵ Na ṭhannak kha mi vialte nih an hmuh nakhnga cu thil cu teimak tein tuah lengmang ko hna. ¹⁶ Nangmah kha ṭha tein i ralring law na cawnpiaknak zong kha i ralring fawn. Cun nangmah naa khamh hleiah na bia a theimi kha na khamh khawh hna nakhnga hi thil hi ngol loin tuah lengmang ko hna.

¹ Tar deuh cu va sica hna hlah. Na pa bantukin a lem tu in va lem hna. A no deuhmi kha na unau bantuk ah rel hna, ² a tar deuhmi nu kha na nu bantuk ah rel hna law a no deuhmi nu kha thiannak in na far ah rel hna. ³ Nuhmei a si taktakmi cu hmaizah hna. ⁴ Sihmanhsehlaw nuhmei nih cun fa si hna seh, tu si hna seh a ngeih hna ahcun, cu hna nih zumh awk tlak tein an innchungkhar zohkhenh le an pa si hna seh, an pi an pu si hna seh, cawm ṭhan ve cu an rian pakhatnak ah an chiah awk a si i cucu biaknak lei in an rian Pathian nih tuah hna seh ti a duhmi cu a si. ⁵ Ahohmanh bawmtu a ngei lomi nuhmei, Pathian lawng aa bochan i chunzan in a sinah thla a cammi cu nuhmei taktak a si. ⁶ Asinain nuamhnak lei i aa pemi nuhmei cu a nung nain a thi cangmi a si. ⁷ Annih cu ahohmanh nih an mawhchiat hna nakhnga lo hi nawlbia hi pe hna. ⁸ Mi pakhatkhat nih a rualchan kha a zohkhenh hna lo ahcun, cun cu nak hmanh in biapi deuh a simi cu, a innchungkhar kha a zohkhenh hna lo ahcun, amah cu zumhnak a hlawmi, Pathian a zum lomi nak hmanh in a ṭha lo deuhmi a si. ⁹ Nuhmei cazin chungah khan kum sawm ruk a ti lomi cu khumh ti hna hlah. Cuhleiah amah cu voi khat lawng va a ngeimi a si lai i ¹⁰ rian ṭha ṭuannak leiah min ṭhami a si lai: amah cu a fale ṭha tein a cawmkengmi, khualtlung a dawmi, Pathian mi an ke a ṭawlpiakmi, harnak a tongmi hna a bawm tawnmi le thil ṭha tuahnak ah aa hmangmi a si lai. ¹¹ Cun nuhmei kum no deuh pawl cu nuhmei cazin chungah khan khumh hna hlah. Zeicahtiah va ngeih an duh ṭhan tikah Khrih kha an chuahtak i ¹² Khrih sin i bia an i kammi kha an hrawh. ¹³ Inn khat hnu inn khat an vak lengmang i an caan kha pakpalawng men ah an hman. Cun cu nak hmanh in a ṭhalo chinmi cu, mi congoih kha an thiam i a kenkip ah khan an vaa sawh i chim awk a si lomi zong kha an chim lengmang. ¹⁴ Cucaah cun nuhmei kum no deuh pawl cu va ngei ṭhan ko hna seh law, tefa zong ngei hna seh law an inn an lo kha zohkhenh hna seh law cuticun kan ral pawl kha kanmah thangchiatnak caan ngei kho hna hlah seh, ti ka duh. ¹⁵ Nuhmei cheukhat cu Satan zulh awkah khan an i mer ṭhan cang. ¹⁶ Sihmanhsehlaw a zummi pakhatkhat nih an innchungkhar ah nuhmei an ngeih hna ahcun, ṭha tein an zohkhenh hna awk a si; Khrihfabu cungah kha rian kha an chiah men awk a si lo, Khrihfabu nih cun zohkhenhtu a ngei lo taktakmi nuhmei kha a zohkhenh khawh hna nakhnga, kha rian kha an chawn awk a si. ¹⁷ Khrihfabu ṭha tein a hruaitu Khrihfa upa hna cu, an hmuh awk a simi kha a let hnih in hmuh awkah an i tlak; cu hna lak zongah cun phungchim le cawnpiak i a ṭangmi kha hmuh awkah an i tlak khun. ¹⁸ Cathiang nih, "Cawtum cu facang a cil lioah a hmur ṭem hlah u," a ti i, "Rianṭuantu nih a ṭuan man hmuh awk a tlak," a ti fawn. ¹⁹ Khrihfa upa cu thil ṭhalo pakhatkhat an puh tikah cu kong a hngaltu tehte pahnih tal an um lo ahcun, zei ah relpiak duh hna hlah. ²⁰ Sualnak a tuahmi kha zapi hmaiah chimhring hna law a dang nih khan an ṭih lai. ²¹ Pathian le Khrih Jesuh le a thiangmi vancungmi hmaika ah, zei thil paoh na tuah tikah aho cung hmanh ah duhdanhnak zeihmanh um loin na tuah nakhnga hi cawnpiaknak hi va zul ko tiah kan nawl. ²² Bawipa rianṭuantu ding caah ahohmanh khulrang tuk in kutchuannak va pe hna hlah. Midang tuahmi sualnak ah i tel loin thiang tein um i zuam ko. ²³ Ti lawng kha ding ti loin, na paw a fak lengmangmi kha an bawmh nakhnga, zu kha tlawmpal in rak ding. ²⁴ Micheu cu an sualnak kha fiang tein a lang ko i an sualnak cu anmah hlanah biaceihnak kha a phan ko; sihmanhsehlaw a cheu cu an sualnak kha a hnu lawngah a lang. ²⁵ Cu bantukin thil ṭha tuahmi hi fiang tein an lang ve ko i a lang kho rih lomi zong thuh khawh an si lo.

¹ Sal nih nan bawile cu hmaizah awktlak ah nan rel hna awk a si. Cuti nan tuah lo ahcun kan Pathian min le kan in cawnpiakmi hna kha thangchiatnak nan hmuhter sual hna lai. ² Nan bawile cu a zummi an si ahcun, atu cu unau kan si cang sawk tiin nan serhsat hna lai lo. An rian kha ṭha chinchin tu in nan ṭuanpiak hna lai, zeicahtiah nan ṭuannak thawngin thil ṭha a hmumi hna cu, zumhnak le dawtnak ah nan u le nan nau an si. ³ Hihi na cawnpiak hna awk le na chimh hna awk a si. Kan Bawi Jesuh Khrih bia le kan biaknak phung nih a kan cawnpiakmi he aa khat lomi cawnpiaknak phun dang a cawnpiaktu hna paoh cu ⁴ porhlawtnak in a khat i zeihmanh a hngal ṭung lomi an si. Biafang tete i al duhnak lungthin, a ngan a dam lomi duhnak a ngeimi kha an si i cu nih cun nahchuahnak, lung i khah lonak, pakhat le pakhat i nihsawhnak, pakhat le pakhat i lunghrinhnak ⁵ le dong loin bia i al lengmangnak kha a chuahter: biatak a ngei ti lomi cu hi bantuk hi an si ko. Biaknak hi rumnak lam pakhat ah an ruah. ⁶ Biaknak nih hin rumnak a chuahpi taktak, sihmanhsehlaw cu rumnak a ngeimi cu mah tinvo i a lung hna a ngammi kha an si. ⁷ Zeidah vawlei ah hin kan hun i chuahpi? Zeihmanh kan i chuahpi lo. ⁸ Cu bantukin hi vawlei in kan kal tik zongah zeihmanh kan i kalpi kho lai lo. Cucaah cun rawl le fenh-aih kan ngeih ahcun cucu kan i zat awk a si ko. ⁹ Sihmanhsehlaw rum a duhmi hna cu tukforhnak chungah khan an tla i ṭih a nungmi le ṭhat lonak a chuahter khotu duhnak nih khan rap foih in a foih hna i cu nih cun rawhralnak ah khan a kalpi hna. ¹⁰ Tangka duhnak hi ṭhat lonak phun kip chuahnak hram a si. Mi a cheu cu tangka ngeih an duh tuk caah zumhnak kha an kaltak i ngaihchiatnak a phunphun an tong. ¹¹ Sihmanhsehlaw nang cu Pathian mi na si caah hi thil vialte hi hrial hna. Dinnak le Pathian hmaizahnak le zumhnak le dawtnak le in-khawhnak le lungnemnak kha tuah i zuam hna. ¹² Zumhnak tlik zuamnak ah hin na tha ngeihmi dihlak in i zuam law zungzal nunnak kha co i zuam. Tehte tampi hmaiah na zumhnak na rak phuan ah khan Pathian nih an kawhnak cu hi nunnak hmuh awk caah hin a rak si. ¹³ Zeizong vialte nunnak a petu Pathian le Pontius Pilat hmaika ah aa phuangmi Khrih Jesuh hmaiah nangmah cu hitihin nawl kan pek. ¹⁴ Kan Bawipa Khrih Jesuh Ni a chuah hlantiang a nawlbia cu thiangte le palhnak zeihmanh um loin zulh i zuam. ¹⁵ Cu Ni cu Pathian nih a caan a rem a ti tikah a tlunter ko lai; zeicahtiah Pathian lawnglawng cu thangṭhat awk tlak Uktu le siangpahrang hna Siangpahrang le bawi vialte hna Bawi a si. ¹⁶ Amah lawnglawng cu thih a thiam lomi, a naih in naih ngam lomi ceunak chung i a ummi a si. Amah cu ahohmanh nih an hmu bal lo, ahohmanh nih an hmu kho lai lo. Amah cungah cun upatnak le thil ti khawhnak zungzal in um ko seh! Amen. ¹⁷ Vawleicung thil i a rummi kha, nan i porhlawt awk a si lo, cun bochan awk a tlak lomi nan rumnak hi a bo zong nan i bochan awk a si lo, tiah na cawnpiak hna lai. Sihmanhsehlaw kan ca i a ṭha dingah zeizong vialte siang ngaiin a kan petu Pathian kha nan i bochan awk a si, tiah na chimh hna lai. ¹⁸ Ṭhatnak tuah le thil ṭha tuahnak i rum le nunsian le thil ṭhenh sian kha na chimh hna lai. ¹⁹ Cu bantukin an tuahmi cu hmailei an hram fehnak ding ca i ro an i khon a si. Cun nunnak taktak a simi nunnak cu an hmuh khawh lai. ²⁰ Timote, ken awk an in fialmi thil cu him tein na ken hna lai. Pathian hmaizah loin biachim lengmang le hruhnak bia alnak, mi a cheu nih hmaan lopi in "Fimnak" tiah an timi cu hrial naa zuam hna lai. ²¹ Mi a cheu nih cu fimnak cu kan ngei an ti i zumhnak kha an nganh diam! Pathian vel cu nan dihlak cungah um ko seh.