1 SAMUEL

1 SAMUEL

¹ Efraim tlangram Ramathaim-zofim khua ah mipa pakhat a um i a min cu Elkanah a si; amah cu Jeroham fapa a si, Jeroham cu Elihu fapa a si, Elihu cu Tohu fapa a si, Tohu cu Efraim mi Zuf fapa a si. ² Nupi pahnih a ngei, pakhat min cu Hannah a si i a dang pakhat min cu Peninnah a si. Cun Peninnah cu fa a ngei, sihmanhsehlaw Hannah cu fa a ngei lo. ³ Cun hi pa cu kumfate in, Eli fapa pahnih Hofni le Phinehas, Bawipa tlangbawi an sinak Shiloh khua ah khan, ralkapbu Bawipa biak awk le raithawi awkah, amah khua in a hung kal tawn. ⁴ Elkanah nih rai a thawi ni ah khan, a nupi Peninnah le a fapa hna le a fanu hna cu an dihlak in covo kha a pek cio hna; ⁵ cun Hannah cu a daw ko nain Hannah cu Bawipa nih a nau inn a kharpiak caah covo pakhat lawng kha a pek. ⁶ Cun Bawipa nih a nau inn a khar caah khan amah a engtaitu nih khan amah cu a thin hunter awkah ṭhalo tein a ti hram tawn. ⁷ Cuticun kum khat hnu kum khat a si lengmang i, Bawipa inn i a hung kal fate amah cu a ti hram lengmang tawn. Cucaah Hannah cu a ṭap i rawl ei kha a duh lo. ⁸ Cun a va Elkanah nih khan a sinah, "Hannah, zeicahdah na ṭah? Zeicahdah rawl ei na duh lo? Zeicahdah na thinlung a fah? Nangmah caah keimah cu fapa pahra nakin ka si deuh lo maw?" tiah a ti. ⁹ Cun Shiloh i an ei an din dih khan Hannah cu a tho. Cun tlangbawi Eli cu Bawipa biaknak inn innka tung pawng i ṭhutnak ah khan a ṭhu. ¹⁰ Cun Hannah cu a lungre a thei ngaingai i Bawipa sinah thla a cam i lunghno ngai tein a ṭap. ¹¹ Cun biatiamnak a tuah i, "Maw ralkapbu Bawipa, na salnu intuarnak hi na ka hmuhpiak i na ka cinken i, na salnu kha na philh lo i na salnu hi fapa na ka pek ahcun, a nun chung vialte amah cu Bawipa sinah ka pek lai i, luei nam nih a lu kha a tawng lai lo," tiah a ti. ¹² Bawipa hmai i thla a cam lengmang lioah cun Eli nih a kaa kha a rak i chingchiah. ¹³ Hannah nih cun a lung chungin a chim; a hmur lawng kha an caang i a aw cu theih a si lo; cucaah Eli nih zuri nu ah a rel. ¹⁴ Cun Eli nih amah cu a thawh i, "Zei can dah na rit lai? Na zu cu chia cang ngat," tiah a ti. ¹⁵ Sihmanhsehlaw Hannah nih a leh i, "Asilo, ka bawipa, lung rethei ngaingai in a ummi nu ka si; mitsur hang siseh, zu siseh ka ding lo, sihmanhsehlaw Bawipa hmaiah ka lungthin ka bungh a si. ¹⁶ Na salnu hi nu ṭhalo ah ka rel hlah, zeitintiah ka lung retheihnak le ka ngaihchiatnak pei ka chim lengmangmi hi a si cu," tiah a ti. ¹⁷ Cun Eli nih a leh i, "Dai tein va kal ko, Israel mi Pathian nih amah na halmi cu in pe ko seh," tiah a ti. ¹⁸ Cun anih nih, "Na salnu nih na mit ah duhdawtnak hmu ko seh," tiah a ti. Cun minu cu a kal i rawl kha a ei i ngaihchia mithmai a pu ti lo. ¹⁹ Zingka tein an tho i Bawipa cu an biak i Ramah khua i an inn ah khan an tlung. Cun Elkanah nih a nupi Hannah kha a hngalh i Bawipa nih amah kha a philh lo; ²⁰ cun a caan a tlin tikah Hannah cu fa a pawi i fapa a hrin i, "Amah cu Bawipa sinin ka halmi a si," tiin a min ah Samuel a sak. ²¹ Cun Elkanah le a chungle vialte cu Bawipa sin i kum fate thawinak pekchanh awk le a biahrennak pek awkah an hung kal. ²² Sihmanhsehlaw Hannah cu a hung kal lo, zeitintiah amah nih a va sinah cun, "Ngakchia hi hnuk ka thlei cangka in ka ratpi lai, Bawipa hmaiah a chuah i khika ah a um zungzal nakhnga," tiah a ti. ²³ Cun a va Elkanah nih cun "A ṭha bik ti i na ruahmi paoh cu tuah ko, amah kha hnuk na thlei hlantiang rak ngang rih ko; Bawipa nih a bia bel kha fehter ko seh," tiah a ti. Cucaah hnuk a thlei hlantiang minu cu a um i a fapa kha hnuk a dinh. ²⁴ Cun hnuk a thlei dih in, kum thum a timi cawtum pakhat le changvut ephah pakhat le mitsur hang cua khat he tiah, amah sinah a hun i kalpi; Shiloh i Bawipa inn ah khan a ratpi; ngakchia cu a note ko. ²⁵ Cun cawtum kha an thah i ngakchia cu Eli sinah an ratpi. ²⁶ Cun amah nih, "Maw ka bawipa! Na nun bangin, ka bawipa, keimah hi hika na hmai i Bawipa sin i thla a rak cam minu kha ka si. ²⁷ Hi ngakchia caah hin thla kha ka rak cam; cun Bawipa nih ka halnak kha a ka pek. ²⁸ Cucaah Bawipa kha amah cu ka hlanh cang; a nun chung vialte amah cu Bawipa sinah hlanh a si," tiah a ti. Cun khika ah Bawipa kha an biak.

¹ Cun Hannah nih thla zong a cam i, "Bawipa cungah ka lung aa lawm; Bawipa thawngin ka thazang cu hlorh a si. Na khamhnak ah khan kaa lawmh caah, Ka ral hna cu ka kaa nih a nihsawh hna. ² "Bawipa bantukin a thianghlim ahohmanh an um lo Nangmah hleiah ahohmanh an um lo; Kan Pathian bantuk lungpi zong an um lo. ³ Ninghngal tuk in bia chim ti hlah u, Ruamkainak cu nan kaa chung in chuak hlah seh; Zeitintiah Bawipa cu fimnak Pathian a si, Amah nih tuahnak hna kha an khing a thlai tawn hna. ⁴ A ṭhawngmi an likuk cu an kiak, Sihmanhsehlaw a derthawmmi nih thazang an i hruk. ⁵ A khim tawnmi cu rawl kawl ah kuli an ṭuan, Sihmanhsehlaw a ṭam tawnmi cu an ṭam ti lo. A cingmi nih pasarih a hrin cang hna. Sihmanhsehlaw fa tampi a ngeimi kha cihai in a um. ⁶ Bawipa nih a thah tawn hna a nun zong a nunter tawn hna. Sheol ah a kalter tawn i a chuah zong a chuahter tawn hna. ⁷ Bawipa nih a pamter tawn hna i a rumter tawn hna; A ṭhumh tawn hna i a hlorh zong a hlorh tawn hna. ⁸ Bawi hna sinah ṭhutter awk le Upatnak ṭhutdan coter awk caah, Sifakmi kha leidip lak in a thawh hna i Retheimi kha vutcam pumhmi lak in a cawi hna. Zeitintiah vawlei tung hna cu Bawipa ta an si i An cungah vawlei cu a chuan. ⁹ "A mithiang hna an ke kha a ven lai; Sihmanhsehlaw miṭhalo cu khuamui lakah hrawh an si lai; Zeitintiah mi nih teinak an hmuhnak cu zaang ṭhawnnak in a si lai lo. ¹⁰ Bawipa a raltu cu kek cikcek in den an si lai; Annih cu van in khuarit in a rithnawh hna lai. Bawipa nih vawlei cung dihlak bia a ceih lai, Amah siangpahrang cu ṭhawnnak a pek lai, Chiti a thuhmi lianhngannak cu a hlorh lai," tiin a ti. ¹¹ Cun Elkanah cu Ramah khua ah inn ah a tlung. Cun ngakchiapa cu tlangbawi Eli hmaiah Bawipa rian kha a ṭuan. ¹² Cun Eli fapa hna cu mizeiruaramlo an si; Bawipa kha an hmaizah lo. ¹³ Mi zapi hna sinah tlangbawi nih an tuah tawnmi phung cu hi bangin a si, mi pakhatkhat nih raithawinak a pekchanh tikah tlangbawi sinum kha a ra lai i sa cu a tlawh hluahmah lioah a kut i a rak i putmi keuṭe ṭe thum ngei khan ¹⁴ ukang chungah khan siseh, marlei chungah khan siseh, tawngca chungah khan siseh, um chungah khan siseh, a vun chunh lai i fungṭe nih a thur khawh zat paoh kha tlangbawi nih amah caah aa lak lai. Cu bantukin Shiloh ah khan, cuka i Israel mi a rami vialte hna kha an rak tuahpiak tawn hna. ¹⁵ Cuhleiah, a thau kha an khangh hlanah, tlangbawi sinum kha a ra tawn i rai a thawi liomi sinah cun, "Tlangbawi ca i em awkah na sa cu ka pe; zeitintiah a hring dah ti lo cu, chuan ciami sa cu an cohlang lai lo," tiah a ti tawn. ¹⁶ Cun mipa nih khan a sinah cun, "A thau kha khaang hmasa rih hna seh, cun na duh zat in naa lak lai," a ti ahcun, anih nih, "Asilo, atu hrimhrim ah na ka pek lai, cu ti a si lo ahcun, hramhram in keimah nih ka lak lai," a ti tawn. ¹⁷ Cu bangin tlangval hna sualnak cu Bawipa mit hmuh ah khan a ngan ngaingai ko, zeicahtiah annih nih Bawipa sin pekchanhnak kha zawmhtaih serhsat in an tuah. ¹⁸ Asinain Samuel cu ngakchia si hmanh seh law Bawipa hmaiah la hmang ṭhia tlangbawi angki i aih in rian a ṭuan. ¹⁹ Cun a nu nih angkifual hmete a serpiak tawn i kumfate an raithawinak pekchanh awk i a va he an hung kal tikah, kum fate in a hei phorh tawn. ²⁰ Cun Eli nih Elkanah le a nupi cu thluachuah a pek hna i, "Bawipa sin i a hlanhmi thawng hin, hi minu hin Bawipa nih fa in pe hna seh," tiah a ti; cun annih cu an inn leiah an tlung ṭhan. ²¹ Cun Bawipa nih Hannah cu a vung ven i fa a pawi i fapa pathum le fanu pahnih a hrin hna. Cun ngakchiapate Samuel cu Bawipa hmaika ah cun a ṭhang. ²² Eli cu a tar ngaingai cang i Israel mi vialte hna cungah a fapa hna nih an tuahmi vialte le zeitindah tonnak thlam luhnak i rian a ṭuantu nu hna an ihpi hna kha a theih. ²³ Cun amah nih annih cu, "Zeicahdah mah bantuk thil hna cu nan tuah? Zeitintiah mi vialte sin hin nan tuahnak ṭhalo hna cu ka theih. ²⁴ Asilo, ka fale hna, Bawipa mi hna nih a kenkip i an chim lulhmalhmi thawng cu thawng ṭha a si hrimhrim lo. ²⁵ Mi nih mi cungah a sual ahcun Pathian nih remnak a serpiak lai, sihmanhsehlaw mi nih Pathian cungah a sual ahcun, aho nih dah a nawlpiak ti lai?" tiah a ti. Sihmanhsehlaw a pa bia cu an ngai duh lo; zeitintiah annih thah awk kha Bawipa duhnak a si. ²⁶ Cun ngakchiapate Samuel cu pum in siseh, Bawipa le minung duhning in siseh a ṭhang lengmang. ²⁷ Cun Eli sinah Pathian mi pakhat a ra i amah sinah cun, "Hi bangin Bawipa nih a ti, Izipt ram i Farote chung sal i an um lioah khan, na pa chungle hna sinah keimah hrimhrim kaa langhter. ²⁸ Cun amah cu ka biakṭheng i hung kal awk le zihmui khangh awk le keimah hmai i tlangbawi angki i hruk awkah, Israel mi phun vialte chungin ka tlangbawi si awkah ka thim; cun na pa chungle hna sinah cun Israel mi sinin ka hmuhmi mei in khanghmi pekchanhnak vialte kha ka pek. ²⁹ A si kun ahcun zeicahdah ka umnak ah pekchanh awk tiin nawl ka pekmi ka raithawinak hna le pekchanhnak hna cu hakkauh mit in nan zoh i keimah nakin na fapale hna cu na upat deuh hna i ka mi Israel mi nih an pekchanhmi thil lak i a ṭha bik hna cun nan i cenh? ³⁰ Cucaah Bawipa Israel Pathian nih, "Na chungle hna le na pa chungle hna cu zungzal in ka hmaiah an lut an chuak lai," tiah ka rak ti taktak, sihmanhsehlaw atu cu Bawipa nih hitin a thanh: A si naisai ti lai lo, zeitintiah a ka upatmi cu ka upat hna lai i a ka zawmtaimi cu zei ah ka rel hna lai lo. ³¹ Zohhmanh, na ban le na pa innchungkhar ban ka tan lai ni cu a ra lio, cucaah na chungle lakah tar tlung in a nungmi an um lai lo. ³² Cun Israel mi cungah pek a si laimi rumnak cu lungrethei in le hngarnak mit in na zoh lai i na inn chungah zeitikhmanh ah tar tlung in a nungmi pakhat hmanh an um lai lo. ³³ Ka biakṭheng in ka hlonh lai lo ding na mi cu na mit zettertu le na lungretheihtertu ah zuah a si lai i na inn chungah hrinmi fa vialte cu vainam in an thi lai. ³⁴ Cun na fapa pahnih Hofni le Phinehas cungah a tlung lai dingmi hi nangmah caah hmelchunhnak a si lai: an pahnih tein ni khatte ah an thi lai. ³⁵ Cun keimah hrimhrim nih zumhawktlak tlangbawi pakhat, ka lung chung le ka ruahnak chungah a ummi ningin a tuahtu ding cu ka chuahter lai; cun amah cu a fekmi innchungkhar ka sakpiak lai i ka chiti thuhmi hmaiah a zungzal in a lut a chuak lai. ³⁶ Cun na inn i a tangmi paohpaoh nih ngun phar khat caah siseh, changreu tlang khat caah siseh, amah kha nawl awkah an ra lai i, ’Changreu tlawmte tal ka ei nakhnga, tlangbawi rian zei tal ah dik ka chia ko sawh,’ tiah an ti lai, a ti," tiah a ti.

¹ Cun ngakchiapate Samuel cu Eli tangah Bawipa rian kha a ṭuan lengmang ko. Cun cu caan lioah cun Bawipa bia kha a tlawm ngaingai; langhnak kha a um set lo. ² Cun khi caan lioah, a mit khua hmuh lo hram aa thawk cang caah khua a hmu kho set ti lomi Eli cu amah hmun ah khan a it; ³ Pathian meiinn cu a mit rih lo i Pathian kuang a umnak Bawipa biakinn chungah khan Samuel cu a it. ⁴ Cun Bawipa nih, "Samuel! Samuel!" tiah a kawh i anih nih, "Hika ah hin ka um!" tiah a ti. ⁵ Cun Eli sinah cun a va tli i, "Hika ah hin ka um, na ka kawh caah," tiah a ti. Sihmanhsehlaw anih nih, "Kan ko lo, va it ṭhan ko," tiah a ti. Cucaah a kal i a it. ⁶ Cun Bawipa nih, "Samuel!" tiah a auh ṭhan. Cun Samuel cu a tho i Eli sinah a va kal i, "Hika ah hin ka um, na ka auh caah," tiah a ti. Sihmanhsehlaw anih nih, "Kan au lo, ka fapa, va it ṭhan ko," tiah a ti. ⁷ Samuel nih cun Bawipa kha a hngal rih lo i Bawipa bia kha a sinah phuan a si rih lo. ⁸ Cun Bawipa nih Samuel cu a voi thumnak a kawh ṭhan. Cun a tho i Eli sinah khan a va kal i, "Hika ah hin ka um, na ka auh caah," a va ti. Bawipa nih ngakchiapa kha a auh tiah khi tikah Eli nih a hun hngalh. ⁹ Cucaah Eli nih Samuel sinah cun, "Va kal law, va it ṭhan ko; cun an kawh ṭhan ahcun, ’Chim tuah, Bawipa, zeitintiah na salpa nih a theih ko,’ tiah na ti lai," tiah a ti. Cucaah Samuel cu a kal i a umnak ah khan a va it ṭhan. ¹⁰ Cun Bawipa cu a ra i a rung dir i voi dang bantuk khan, "Samuel! Samuel!" tiah a auh. Cun Samuel nih, "Chim ko, zeitintiah na sal nih a theih," tiah a ti. ¹¹ Cun Bawipa nih Samuel sinah cun, "Zohhmanh, Israel chungah hin, a theitu paoh an hna a pahnih in a khenh lai dingmi thil pakhat ka tuah dengmang cang. ¹² Khi ni ah a innchungkhar kong i ka chimmi vialte, a hramthawk in a donghnak tiang, Eli cungah ka tlinter lai. ¹³ A fapa hna nih Pathian an vawlhpamhnak sualnak kha a hngal ko nain a thlauh hna lo caah, a innchungkhar cu zungzal ca in dantatnak ka pek dengmang cang, tiah amah kha ka chimh. ¹⁴ Cucaah Eli innchungkhar hna cu raithawinak in siseh, pekchanhnak in siseh, sualthianhpiak khawh, zungzal in an si lai lo, tiah Eli innchungkhar hna sinah cun chiat ka ser cang," tiah a ti. ¹⁵ Samuel cu zinglei tiang a it; cun Bawipa inn i innka hna kha a hun hna. Cun Samuel nih kha langhnak kha Eli chimh cu a ṭih. ¹⁶ Sihmanhsehlaw Eli nih Samuel cu a kawh i, "Samuel, ka fapa," tiah a ti. Cun anih nih, "Hika ah hin ka um," tiah a ti. ¹⁷ Cun Eli nih, "An chimhmi cu zeidah a si? Ka sinin thup hlah. An chimhmi vialte chungah khan zeihmanh ka sinin na thuh ahcun, Pathian nih na cungah cu bangin le tam deuh in tuah ko seh," tiah a ti. ¹⁸ Cucaah Samuel nih zeizong vialte a chimh dih i a sinin zeihmanh a thup lo. Cun anih nih, "Mah cucu Bawipa a si; a ṭha tiah a timi cu tuah ko seh," tiah a ti. ¹⁹ Cun Samuel cu a ṭhang i Bawipa cu a sinah a um i a bia kha pakhat hmanh vawlei ah a lohlakter lo. ²⁰ Cun Israel mi vialte nih, Dan in Beersheba tiang, Samuel cu Bawipa profet ah fehter a si ti kha an hngalh dih. ²¹ Cun Bawipa cu Shiloh ah a lang ṭhan, zeicahtiah Bawipa cu Samuel sinah Shiloh ah khan Bawipa bia in aa langhter.

¹ Cun Samuel bia cu Israel mi vialte sin a phan. Cun Israel mi hna cu Filistin mi hna kha doh awkah an chuak i Ebenezer ah an riak, Filistin mi cu Afek ah an riak. ² Filistin mi hna cu Israel mi doh awkah cun a tlang a tlang in an rak um i an hun i doh tikah Filistin mi hna nih cun Israel mi cu an tei hna, mi thong li tluk raldohnak hmun ah cun an thah hna. ³ Cun ralkap pawl cu an riahhmun ah an rat tikah, Israel upa hna nih cun, "Zeicahdah Bawipa nih nihin ah hin Filistin mi hna hmaiah a kan sunghter hnga? Bawipa cu kan sinah a rat i kan ral hna ṭhawnnak chungin a kan khamh nakhnga Bawipa biakamnak kuang kha Shiloh in hika ah hin ratpi u sih," tiah an ti. ⁴ Cucaah Shiloh ah mi an hei thlah hna i cherubim karlak i a ummi ralkapbu Bawipa biakamnak kuang cu khika in an rak put; cun Eli fapa pahnih Hofni le Phinehas hna kha Pathian biakamnak kuang sinah cun an rak um. ⁵ Bawipa biakamnak kuang cu riah-hmun chungah a phak tikah, Israel mi vialte cu fak piin an au i cucaah vawlei zong kha a tlerh dih. ⁶ Cun Filistin mi hna nih an aunak thawng cu an theih tikah, "Hebru mi hna riahhmun i hi ti fakpi an au hi a sullam zeidah a si?" tiah an ti. Cun annih nih Bawipa kuang kha riahhmun a phan cang ti an theih tikah, ⁷ Filistin mi hna cu an thin a phang i, "Riahhmun chungah khuazing an phan cang," tiah an ti. Cun annih nih, "Bialo kan si ai! Hi bantuk hi cu hlanah a um bal lo. ⁸ Belo kan si ai! Aho nih dah hi a ṭhawngmi khuazing hna ṭhawnnak chung hin a kan chuah khawh lai? Hi hna hi ramlak ah Izipt mi hna kha rai phunphun in a thattu khuazing an si. ⁹ Nan ralṭha ko uh, maw Filistin mi hna, pa bantukin um uh, cu ti a si lo ahcun, nannih tang ah sal an si bantuk hin, anmah Hebru mi tangah hin sal nan si sual lai; pa bantukin um u law, do hna u," tiah an ti. ¹⁰ Cucaah Filistin mi nih cun an tuk hna i Israel mi cu an sung, anmah le an inn cio ah khan an zam dih; i thahnak fakpi a um, Israel mi ke ralkap sang thum an thi. ¹¹ Pathian biakamnak kuang kha an tlaih; Eli fapa pahnih Hofni le Phinehas zong kha an thi. ¹² Cun Benjamin mi pakhat cu raltuknak hmun khan a le i cu ni lila ah cun Shiloh a phan, a puan kha a thleh hna i a lu ah vawlei aa phulh. ¹³ A phak tikah Eli cu kutka pawng i a ṭhutdan ah khan a ṭhu i lam lei kha a rak zoh, zeitintiah Pathian kuang caah khan a lung therphang in a um. Cun mipa cu khua chungah a luh i thawngpang kha a chim tikah an khua ning piin an ṭap dih. ¹⁴ An aukhuan thawng kha Eli nih a theih tikah, "An au urmar len ko cu zeidah a si?" tiah a ti. Cun mipa cu khulrang in a ra i Eli cu a chimh. ¹⁵ Eli cu kum sawm kua le kum riat a si cang i a mit cu a caw cang, cucaah khua a hmu kho ti lo. ¹⁶ Cun mipa nih cun Eli cu, "Keimah hi raltuknak hmun in a rami cu ka si; raltuknak hmun in nihin ah ka ra zam," tiah a ti. Cun anih nih, "Zeitindah a si, ka fapa?" tiah a ti. ¹⁷ Cun thawngpang a rak phortu nih cun a leh i, "Israel mi cu Filistin mi hna hmaiah an zam i mi lakah thahnak nganpi a um; na fapa pahnih Hofni le Phinehas zong kha an thi i Pathian kuang kha an tlaih," tiah a ti. ¹⁸ Pathian kuang, ti a vun chim tikah khan Eli cu, kutka pawng i a ṭhutdan cung khan hnulei ah aa ngal; a hngawng a kiak i a thi, zeicahtiah amah cu a tarmi a si i a rit fawn. Israel mi cu kum sawm li bia a ceih hna. ¹⁹ Cun a fapa nupi, Phinehas innchung cu pumlawnglo in a um i a nithla a tling dengmang. Cun Pathian kuang kha an tlaih i a va le a va pa kha an thi ti thawng a theih tikah a kun i fa a hrin; zeicahtiah a nganfah nih a hun phak colh. ²⁰ Cun a thih dengmang lioah khan amah a zohkhentu nu hna nih cun, "Ṭih hlah, zeicahtiah fapa na hrin," an ti. Sihmanhsehlaw a let hna lo i zei zongah a rel fawn lo. ²¹ Cun, "Sunparnak cu Israel mi sinin aa ṭhial cang!" tiin naute cu Ikabod tiah min a sak, zeicahtiah Pathian kuang cu tlaih a si, cun a va pa le a va zong kha an thi cang. ²² Cun amah nih cun, "Sunparnak cu Israel sinin aa ṭhial cang, zeitintiah Pathian kuang cu tlaih a si cang," tiah a ti.

¹ Filistin mi nih Pathian kuang kha an tlaih tikah, Ebenezer in Ashdod ah an kalpi; ² cun Filistin mi nih cun Pathian kuang cu an lak i Dagon inn chungah an luhpi i Dagon pawngah cun an chiah. ³ Cun a thaizing ah, Ashdod khuami hna cu zingkate in an thawh tikah, zohhmanh, Dagon cu a bawktakhup in vawlei ah Pathian kuang hmaiah cun a rak tlu. Cucaah Dagon cu an lak i a umnak kel ah khan an chiah ṭhan. ⁴ Sihmanhsehlaw a thaizing zingkate i an thawh tikah khan, zohhmanh, Dagon cu a boktakhup in vawlei ah Pathian kuang hmaiah a rak tlu ko i Dagon lu bul le a kut bul hna cu innkaba ah an rak ril ko; Dagon cu a pum thlur lawng kha a taang. ⁵ Dagon tlangbawi hna le Dagon inn chungah a lutmi vialte nih nihin tiangin, Ashdod i a ummi Dagon inn innka an lamh lonak cu, mah hi caah hin a si. ⁶ Ashdod khuami hna cungah Bawipa kut cu a rit i Ashdod khuami hna le a pawngkam i a ummi hna cu an thin a phanter hna i tak bonak in a hrem hna. ⁷ Cun Ashdod khuami nih zeitin thil umtuning a si kha an hmuh tikah, annih nih, "Israel Pathian i a kuang cu kan sinah a um awk a si lai lo, zeicahtiah a kut cu kan cung le kan khuazing Dagon cungah a rit ai," tiah an ti. ⁸ Cucaah Filistin bawi vialte kha an cah an pumh hna i, "Israel Pathian i a kuang hi zeitindah kan tuah lai?" tiah an ti. Annih nih, "Israel Pathian i a kuang cu Gath hrawngah ratpi si tuah seh," tiah an leh hna. Cucaah Israel Pathian i a kuang cu cuka ah cun an kalpi. ⁹ Sihmanhsehlaw an ratpi hnuah, Bawipa kut nih cu khua cu a ralchanh i launak nganpi a chuahter i cu khuami hna cu a tar a no in a hrem hna i an cungah tak bonak kha a chuak. ¹⁰ Cucaah Pathian kuang cu Ekron ah an kuat. Sihmanhsehlaw Pathian kuang cu Ekron ah a phak tikah, Ekron khuami hna nih cun, "Kanmah le kan mi hna kha thah awkah Israel Pathian i a kuang cu kan sinah an ratpi," tiah an au. ¹¹ Cucaah Filistin bawi vialte kha an cah an pumh hna i, "Israel Pathian i a kuang cu kalter ko u, kanmah le kan mi hna kha a kan thah nakhnga lo, amah umnak hmun ah kirter ṭhan ko u," tiah an ti. Zeitintiah khua chungah khan ṭih a nung ngaingaimi launak a um dih. Pathian kut cu khika ah a rit ngaingai ko. ¹² A thi lomi cu an bo dih i khua chung aunak thawng cu van tiang a kai.

¹ Bawipa kuang cu Filistin mi hna ram chungah thla sarih a um. ² Cun Filistin mi hna nih tlangbawi hna le litin thiam hna kha an auh hna i, "Bawipa kuang hi zeitindah kan tuah lai? A umnak ah zei he dah kan kuat lai, ti kha kan chim tuah u," an ti. ³ Annih nih, "Israel Pathian i a kuang kha nan kirter a si ahcun, a lawng in kirter citcet hlah u; phungbuar thawinak he nan kirter hrimhrim lai. Cun nan dam lai i zeicahdah a kut cu nan sinin aa mer lo ti kha nan hngalh lai," an ti. ⁴ Cun annih nih, "Amah kan pek hngami phungbuar thawinak cu zeidah a si lai?" an ti. Annih nih, "Filistin mi hna bawi zat in, nan bonak he aa loin sui in sermi bo panga le sui zu panga; zeitintiah nannih vialte le nan bawi hna cungah a tlungmi rai cu aa khat ko. ⁵ Cucaah nan bonak mui le nan ram a hrawktu nan zu hna mui cu nan ser lai i Israel Pathian cu sunparnak nan pek lai; nanmah le nan khuazing hna le nan ram cungin a kut cu a hei zanter hmanh maw. ⁶ Zeicahdah Izipt mi le Faro nih an lung an hahter bantukin nan hahter ve lai? A cawhdeh hna hnuah mi kha an kalter hna i an chuak, a si lo mei? ⁷ Cucaah, cawleng thar pakhat le hnuk sur lio cawpi pahnih, leng a hnuk bal rih lomi kha la hna u law, cawpi kha leng ah banh hna u law, an fale tu kha cu inn ah hruaikanh hna u. ⁸ Cun Bawipa kuang kha la u law, cawleng cungah khan chia u, cun a pawngah thingkuang in, phungbuar thawinak caah amah nan kuatmi sui siasal tete kha chia hna u. Cun thlah u law kalter u. ⁹ Cun zoh tuah u, amah ram lei i a hung kalmi Beth-shemesh lei i a kalmi lam kha a hun zulh ahcun, kannih cungah hi harnak nganpi a tuahtu hi amah a si; sihmanhsehlaw cu ti a si lo ahcun, a kan tutu cu amah kut a si lo, kan cungah a tlung sual i a si ko, ti kha kan hngalh lai," an ti. ¹⁰ Cu bangin an tuah; hnuk sur lio cawpi pahnih cu an lak hna i lengah khan an banh hna i an fale cu inn ah an khumh hna. ¹¹ Cun Bawipa kuang le sui zu tete le an bonak mui tete an khumhnak thingkuang cu, leng cungah an chiah hna. ¹² Cun caw hna nih cun ding teomao in Beth-shemesh lei i a kalmi lam pakhat kha paw pah lengmang in an zulh; orhlei ah siseh, kehlei ah siseh an i mer lo; Filistin bawi hna nih Beth-shemesh ramri tiang an zulh hna. ¹³ Beth-shemesh khuami hna cu nelrawn chung i an changvut an ṭuan lio a si i, annih nih khua an hei cuan i kuang kha an hmuh tikah an i lawm. ¹⁴ Beth-shemesh khuami Joshua lo chungah khan cawleng cu a phan i khika ah a dir. Khika ah lung nganpi pakhat a um. Cawleng thing kha an ceh i caw hna cu Bawipa sinah khangh thawinak caah an pekchanh hna. ¹⁵ Cun Levi mi hna nih Bawipa kuang le a pawngah a ummi thingkuang, sui milem tete an umnak kha, an lak hna i lungpi cungah cun an toh hna; Beth-shemesh khua mi hna nih cun khi ni ah Bawipa sinah khangh thawinak kha an pekchanh hna i raithawinak kha an tuah hna. ¹⁶ Cun Filistin bawi panga hna nih khan mah cucu an hmuh tikah, khi ni ah Ekron ah an kir. ¹⁷ Mah hihi an bonak he aa lo in sui in sermi, Filistin mi hna nih Bawipa sin i phungbuar thawinak caah an kuatmi cu an si: Ashdod caah pakhat, Gaza caah pakhat, Ashkelon caah pakhat, Gath caah pakhat, Ekron caah pakhat; ¹⁸ Filistin mi hna khua vialte, an bawi panga hna ta a simi, kulhmi khuapi si hna seh, kulh lomi khuate si hna seh, an tam an tlawm zat ningin, sui zu tete zong kha an kuat. A pawng i Bawipa kuang an chiahnak lung nganpi cu, Beth-shemesh khuami Joshua lo ah nihin tiangin hngaltu a si. ¹⁹ Cun Bawipa kuang chung kha Beth-shemesh khuami nih an bih caah tlawmpal a thah hna; annih kha mi sawm sarih a thah hna i, Bawipa nih annih kha tampi a thah hna caah an ṭap. ²⁰ Cun Beth-shemesh khuami nih, "Hi Pathian thiang, Bawipa, hmaiah hin ahodah a dir kho lai? Kannih sin hin aho sinah dah a hung kal lai?" an ti. ²¹ Cucaah annih nih Kiriath-jearim khuami hna sinah khan lamkal an hei thlah hna i, "Bawipa kuang kha Filistin mi nih an rak put ṭhan cang. Rung u law, nanmah leiah hun i kalpi u," an ti.

¹ Cun Kiriath-jearim khuami cu an ra i Bawipa kuang kha an lak i, tlang cung i a ummi Abinadab inn ah khan an hun kalpi. Cun annih nih Bawipa kuang zohkhenhtu ah a fapa Eleazar kha an thianter. ² Kiriath-jearim ah kuang kha a phak ni in, khika ah caan saupi, kum kul tluk a um; cun Israel innchungkhar vialte nih Bawipa kha an ngai ṭhan. ³ Cun Samuel nih Israel chungkhar vialte hna sinah cun, " Bawipa sinah nan lung dihlak in nan kir a si ahcun, ramdang khuazing hna le Ashtaroth hna kha nanmah chungin nan hlonh hna lai i Bawipa leiah khan nan lung nan hoihter lai i amah lawng kha nan biak lai, cun amah nih Filistin mi hna kut chungin an chuahter hna lai," tiah a ti. ⁴ Cucaah Israel mi nih Baal hna le Ashtaroth hna kha an hlawt hna i Bawipa rian lawng kha an ṭuan. ⁵ Cun Samuel nih, "Israel mi vialte hna cu Mizpah ah pum hna u law, Bawipa sinah keimah nih thla kan campiak hna lai," a ti. ⁶ Cucaah Mizpah ah an i pum i ti an than i Bawipa hmaiah an thlet i khi ni cu rawl an ul. Khika ah annih nih, "Bawipa cungah kan sual cang," tiah an ti. Cun Samuel nih Israel mi cu Mizpah ah bia a ceih hna. ⁷ Cun Filistin mi hna nih Israel mi cu Mizpah ah an i pum ti kha an theih, Filistin bawi hna cu Israel mi hna doh awkah an hung kal. Cun Israel mi nih mah cucu an theih tikah, Filistin mi cu an ṭih hna. ⁸ Israel mi nih Samuel cu, "Filistin mi hna kut chungin a kan khamh nakhnga, kan ca i Bawipa kan Pathian sin i na aunak cu ngol hlah," tiah an ti. ⁹ Cucaah Samuel nih hnuk ding lio tuufa pakhat a lak i Bawipa sinah pum khangh thawinak caah a pekchanh; cun Samuel nih Bawipa cu Israel mi caah a kawh i Bawipa nih amah cu a leh. ¹⁰ Samuel nih khangh thawinak kha a pekchanh lioah Filistin mi cu Israel mi kha doh awkah lam nai ah an ra; sihmanhsehlaw khi ni ah Bawipa nih aw fak piin Filistin mi hna cu khuarit in a rithnawh hna i an i tuai dih; Israel mi hna hmai in an zam dih. ¹¹ Cun Israel mi cu Mizpah khua in an chuak i Filistin mi kha Beth-kar thlang tiangin an dawi hna i an thah hna. ¹² Cun Samuel nih lung pakhat a lak i Mizpah le Jeshanah karlak ah a phun i, "Atu tiangin Bawipa nih a kan bawmh," tiin a min ah Ebenezer a sak. ¹³ Cucaah Filistin mi hna cu an sung i Israel mi hna ram ah khan an lut ṭhan ti lo, Samuel nun chung vialte cu Filistin mi kha Bawipa kut nih khan a ralchanh hna. ¹⁴ Israel mi hna sinin Filistin mi nih an rak lakmi khua hna kha, Ekron in Gath tiang, Israel sinah pek ṭhan an si i, Filistin mi hna kut chungin Israel mi nih an ram cu an chanh khawh ṭhan. Israel mi le Amor mi hna karlak zongah daihnak a um. ¹⁵ Samuel nih Israel mi cu a nunchung vialte bia a ceih hna. ¹⁶ Cun kum fate in Bethel, Gilgal le Mizpah cu a tlawn diahmah lengmang hna i, hi khua dihlak ah hin Israel mi kha bia a ceih hna. ¹⁷ Cun a inn umnak a si caah Ramah ah a ra kir tawn i khika zongah Israel mi kha biading in bia a ceih hna. Cun khika ah Bawipa caah biakṭheng pakhat a ser.

¹ Samuel cu a tar tikah a fapale hna kha Israel mi cung i biaceihtu ah a ser hna. ² A hrin hmasa bik fapa cu Joel a min a si i a pahnihnak cu a min Abijah a si. Beersheba ah biaceihtu an si. ³ Asinain, a fapa hna cu amah lam kha an zul lo, miaknak tu kha an merhnawh. Nawhthuh kha an lak i biading kha an merh. ⁴ Cun Israel upa vialte kha an i pum i Samuel sinah Ramah ah an ra. ⁵ Amah cu an thawh i, "Zohhmanh, na tar cang, cun na fapale nih na lam an zul fawn lo. Cucaah miphun vialte hna cio bangin, a kan uktu ah siangpahrang pakhat kan chiahpiak tuah," an ti. ⁶ Sihmanhsehlaw, "A kan uktu ah siangpahrang pakhat kan pe," an ti tikah, cu thil nih cun Samuel kha a lawmhter lo. Cun Samuel nih Bawipa sinah thla a cam. ⁷ Cun Bawipa nih Samuel cu a chawnh i, "Mizapi nih na sinah an chimmi bia vialte ah an aw kha ngai tuah; zeitintiah nangmah an in hlawt a si lo, an cung i siangpahrang ka sinak hin keimah an ka hlawt a si. ⁸ Izipt ram in ka chuahpi hna ni in atu tiang ka cungah an tuahmi vialte ningin, keimah kha hlawt le khuazing dang hna kha bia in, cu bangin nangmah cung zongah an tuah ve. ⁹ Cucaah atu cu an bia kha ngai ko hna; sihmanhsehlaw ṭha tein ralrinnak na pek hna lai i anmah a uktu ding siangpahrang kalning kha na hmuhsak hna lai," tiah a ti. ¹⁰ Cucaah Samuel nih amah sinin siangpahrang a halmi hna kha Bawipa bia vialte cu a chimh hna. ¹¹ Amah nih, "Nannih an uktu hna siangpahrang kalning cu hi bangin a si lai: nan fapa kha a lak hna lai i a rangleng cittu le a rang cittu le a rangleng hmai tlitu dingah a chiah hna lai. ¹² Cun a thong pawl haotu hna le sawm nga pawl haotu hna kha aa chiah hna lai, cun a cheu cu a leithuangtu le a rawlṭuantu le a ral hriamnam sertu le a rangleng thilri sertu ah a chiah hna lai. ¹³ Nan fanu hna cu zihmui sertu le rawlchuang le changreu rawtu ah a lak hna lai. ¹⁴ Nan lo le nan mitsur dum le nan oliv dum hna lakah a ṭha bikbik kha a lak hna lai i a rianṭuantu hna kha a pek hna lai. ¹⁵ Nan rawl le nan mitsur dum chungin cheu hra cheu khat kha a lak lai i, a bawi hna le a rianṭuantu hna kha a pek hna lai. ¹⁶ Nan salpa hna le nan salnu hna le nan caw le nan laa hna lakah a ṭha bikbik kha a lak hna lai i amah rianṭuantu ah a hman hna lai. ¹⁷ Nan tuurun hna chungin cheu hra cheu khat kha a lak hna lai i nannih cu amah sal nan si lai. ¹⁸ Cun khi ni ah nanmahte nih nan i thimmi nan siangpahrang ruangah nannih cu nan ai len te lai; sihmanhsehlaw Bawipa nih khi ni ah cun an let hna lai lo," tiah a ti. ¹⁹ Sihmanhsehlaw mi hna nih cun Samuel aw ngaih cu an duh lo; annih nih, "Si hlah! Kan cungah siangpahrang kan ngei ko lai, ²⁰ kannih zong miphun vialte hna cio bantuk kan si ve lai; kan siangpahrang nih cun a kan uk lai i kan hmaiah a kal lai i kan ral hna kha a kan tukpiak lai," tiah an ti. ²¹ Cun Samuel nih mi hna an bia vialte cu a theih tikah Bawipa kha a hna chungah a va rawnh chin. ²² Cun Bawipa nih Samuel sinah cun, "An aw kha ngai hna law, siangpahrang pakhat serpiak hna," tiah a ti. Cun Samuel nih Israel mi hna cu, "Nan khua cio ah va tlung u," tiah a ti hna.

¹ Benjamin phun mi pakhat a min Kish a si i a rum ngaimi a um; amah cu Abiel fapa a si, Abiel cu Zeror fapa, Zeror cu Bekorath fapa, Bekorath cu Afiah fapa a si; ² cun fapa pakhat a ngei i a min cu Saul a si, tlangval chuakthiam ngai a si. Israel mi lakah amah nakin aa dawh deuhmi pakhat hmanh an um lo; ahohmanh a liang cungin a lonh dih hna. ³ Saul pa Kish i laa cu an tlau i Kish nih a fapa Saul cu, "Sinum pakhat khan i kalpi law, tho law, laa kawl awkah cun va kal tuah," tiah a ti. ⁴ Cun annih nih Efraim tlangram kha an ṭol, cun Shalisha ram kha an ṭol, sihmanhsehlaw an hmu hna lo. Cun Shaalim ram kha an ṭol, sihmanhsehlaw khika zongah an um lo. Cun Benjamin peng kha an ṭol, sihmanhsehlaw khika zongah an hmu hna lo. ⁵ Zuf peng kha an phak tikah, Saul nih a sinum cu, "Ra, kir cang u sih, ka pa nih khan laa kong kha ruat ti loin, kanmah kong tu ah lungrethei in a um sual lai," tiah a ti. ⁶ Sihmanhsehlaw anih nih amah cu, "Zohhmanh, hi khua chungah hin Pathian mi pakhat a um i amah cu an hmaizah ngaimi a si; a chimmi vialte kha a tling dih ko. Khika ah va kal u sih; kan pawhhnawhmi kan khual tlawnnak kong hi a hei kan chimh khawh ko hnga dah kaw," tiah a ti. ⁷ Cun Saul nih a sinum sinah cun, "Sihmanhsehlaw, kan kal ahcun mipa cu zeidah kan put khawh lai? Kan zal chung i changreu a dih cang caah Pathian mi cu laksawng zeihmanh put awk a um ṭung lo. Zeidah kan ngeih?" tiah a ti. ⁸ Sinum nih khan Saul cu a leh ṭhan i, "Zohhmanh, ngun shekel phar cheu li cheu khat ka ngei, kan lam a kan chimhnak dingah mah hihi Pathian mi cu ka pek lai," tiah a ti. ⁹ (Hlan lioah cun Israel mi hna lak i pakhatkhat nih Pathian kha hal an duh ahcun, "Ra tuah, hmutu sinah kal u sih," tiah an rak ti tawn, zeicah tiah atu i profet timi hi hlanah cun hmutu ti a rak si.) ¹⁰ Cun Saul nih a sinum sinah cun, "Na bia a ṭha, ra, kal u sih," tiah a ti. Cucaah Pathian mi a umnak khua ah khan an va kal. ¹¹ Khua chung hung kal awk i fing an hun zawh lioah khin ti than awkah a rami ngaknu an ton hna i annih cu, "Hika ah hmutu kha a um maw?" tiah an hal hna. ¹² Annih nih, "A um ko; zohhmanh u, nan hmaite ah khan a kal. I khulranh u; nihin ah hi khuami nih khuahrum bo ah khan raithawinak an ngeih caah khua chungah atu naite ah khan a ra. ¹³ Nannih nih khua chungah nan va luh ka tein, khuahrum bo i rawl ei awk i a kal hlanah khan, nan va hmuh ko lai; amah nih raithawinak cu thluachuahnak a pek awk a si caah amah a rat hlanah cun mi nih khan an rak ei lai lo; cu hnuah cun sawmmi hna nih khan an ei lai. Cucaah cun hung kal u law, nan hung ton colh ko lai," tiah an ti. ¹⁴ Cucaah khua ah khan an hung kal. Khua chung i an va luh lioah khan, Samuel cu khuahrum bo lei i a kalpah ah annih lei i a rat kha an hmuh. ¹⁵ Cun Saul a rat hlan ni khat ah khan Bawipa nih Samuel sinah khan a rak phuan i, ¹⁶ "Thaizing atu tik hrawngah hin, na sinah Benjamin peng i mipa pakhat ka rak thlah lai i amah cu ka mi Israel mi hna cung i bawi si awkah chiti na rak thuh lai. Amah nih ka mi hna cu Filistin mi kut chungin a khamh hna lai; zeitintiah an aunak kha ka sinah a phak cang caah ka mi hna nih hremnak an inmi cu ka hmuh cang," tiah a ti. ¹⁷ Samuel nih Saul kha a hmuh tikah, Bawipa nih amah cu, "A kong kan chimh mipa kha mah pa hi a si! Amah hi ka mi hna uktu ding cu a si," tiah a chimh. ¹⁸ Cun Saul nih Samuel kha hauka ah cun a hei fuh i, "Hmutu inn cu khuazei ah dah a si, ka chim tuah," tiah a ti. ¹⁹ Samuel nih Saul cu a leh i, "Hmutu cu keimah hi ka si; ka hmaiah hin khuahrum bo leiah khan kal ko, zeitintiah nihin cu keimah sinah rawl na ei lai i thaizing ah kan kalter te lai i na ruah lengmangmi cu kan chimh dih lai. ²⁰ Na laa, ni thum a tlau cangmi hna cu ruat len ti hna hlah, zeicahtiah an hmuh cang hna. Cun Israel mi hna lak i duh awk thil vialte cu aho caah dah an si? Nangmah le na pa chungkhar vialte hna caah an si lo maw?" tiah a ti. ²¹ Cun Saul nih a leh i, "Keimah cu Israel phun hna lakah a hme bik Benjamin phun mi ka si lo maw? Cun ka chungle hna cu Benjamin phun chung i a ummi chungkhar vialte hna lakah a nauta bik an si lo maw? A si kun ahcun, zeicahdah mah bantuk hin ka sinah bia na chim?" tiah a ti. ²² Cun Samuel nih Saul le a sinum kha a kalpi hna i innchung khaan ah a luhpi hna i an sawmmi mi sawm thum tluk hna lakah khan, upatnak hmun ah khan a ṭhutter hna. ²³ Cun Samuel nih rawl chuangtu sinah khan, " ’A dang tein rak chia,’ ti i ka rak in pekmi covo kha rak pu tuah," tiah a ti. ²⁴ Cucaah rawl chuangtu nih cun a ke le a thaumi a mei kha a hun put hna i Saul hmaika ah cun a chiah hna; cun Samuel nih, "Zohhmanh, ka rak kenretmi cu hunh na si hih. Ei tuah; zeicahtiah sawmmi hna he nan ei ṭi nakhnga, caan tinhmi a tlin hlantiang, nangmah caah chiah a si," tiah a ti. Cucaah cu ni ah cun Saul cu Samuel sinah rawl a ei. ²⁵ Cun khuahrum bo in khua chungah an run tikah inncung ah Saul cu ihnak a phahpiak i a it. ²⁶ Cun ceu vukvak ah inncung i a ummi Saul cu Samuel nih a auh i, "Tho tuah, ka hei in thlah tuah lai," tiah a ti. Cucaah Saul cu a tho i Samuel he cun an pahnih in khuachung lam ah khan an va chuak. ²⁷ Cun khua pawngri lei i an vung kal lioah khan Samuel nih Saul sinah cun, "Na sinum kha kan lonh seh, hei chim tuah; cun a kan lonh tikah nang cu hika ah hin tlawm tein um ta rih tuah, Pathian bia cu nangmah kha kan hngalhter lai," tiah a ti.

¹ Cun Samuel nih chiti thawl kha aa chuah i a lu ah khan a toih i a hnamh i, "Bawipa nih a mi Israel mi hna cung i bawi si awkah chiti an thuh a si lo mei? Cun Bawipa mi cu na uk hna lai i an pawngkam i a ummi an ral hna kut chung khan na khamh hna lai. Cun Bawipa nih amah ro cung i bawi si awkah chiti an thuh cang, ti hmelchunhnak cu mah hihi a si lai. ² Nihin keimah sinin naa ṭhen tikah hin, Benjamin peng chung Zelzah i Rachel thlan ah khan mipa pahnih na ton hna lai i annih nih nangmah cu, ’Kawl awkah na kalhnawhmi laa kha an hmuh cang hna, atu cu na pa nih laa kong kha lungrethei in ruat ti loin, nangmah tu kha an ruat cang i, "Ka fapa kongah hin zeidah ka tuah lai?" a ti lengmang ko,’ tiah an in chimh lai. ³ Cun cuka cun na va kal deuh lai i Tabor kuhthing kha na hei phan lai; cuka ah cun Bethel i Pathian sinah a hung kalmi mi pathum nih an in ton lai, pakhat nih meheh fa pathum aa cawi hna lai, cun pakhat nih changreu tlang thum aa put lai i pakhat nih mitsur hang cua khat aa phorh lai. ⁴ Cun annih nih salaam an in pek lai i changreu tlang hnih an in pek lai, cucu an kut khan na cohlan hna lai. ⁵ Cu hnuah cun Filistin ralveng ralkapbu umnak Gibeath-elohim cu na va phan lai; cun cuka ah cun, khua chung i na va luh lioah khin tingtang le khuangte le thonglawi le ruakhuang he khuahrum bo in a rung ṭummi profet bu khat, a holh cukmak len komi, na ton hna lai. ⁶ Cun Bawipa thlarau cu na cungah ṭhawng ngaiin a tlung lai i nang zong an lakah na holh cukmak ve lai i midang ah naa cang lai. ⁷ Cun hi hmelchunhnak hi na ton hna tikah, thil umtuning nih a serning paoh in va tuah ko, zeitintiah Pathian cu na sinah a um. ⁸ Cun keimah hlanah Gilgal ah na rak kal lai i, zohhmanh, nangmah sinah khangh thawinak pekchanh awk le daihnak pekchanhnak thawi awkah ka ra lai. Nangmah sinah ka rat i nangmah nih zeidah na tuah awk a si kha kan hmuhsak hlantiang, ni sarih na rak ka hngah lai," tiah a ti. ⁹ Cun Samuel cu kaltak awk i aa mer tikah, Pathian nih amah kha lung dang a pek; cun hi hmelchunhnak vialte cu khi ni ah a tling dih. ¹⁰ Gibeah kha an phak tikah, zohhmanh, profet bu khat nih an rak ton; cu Pathian thlarau cu ṭhawng ngaiin a cungah a tlung i an lakah a holh cukmak len ve ko. ¹¹ Cun hlan i amah a rak hngalmi vialte nih khan, profet hna he an holh cukmak kha an hmuh tikah, cu mi hna nih cun pakhat le pakhat cu, "Kish fapa cungah hin zeidah a tlung hnga? Saul zong profet hna lakah aa tel ve cang dahra?" tiah an i ti. ¹² Cun cuka mi pakhat nih, "Cun ahodah an pa cu a si?" tiah a leh hna. Cucaah, "Saul zong profet hna lakah aa tel ve cang dahra?" ti cu capo siamsaknak bia ah a cang. ¹³ Cun a holh cukmak cu a dih tikah khuahrum bo ah khan a hung kal. ¹⁴ Saul pa unau nih khan amah le a sinum kha a thawh hna i, "Khuazei ah dah nan kal?" tiah a ti. Cun anih nih, "Laa kha kan kawl hna, cun hmuh khawh an si lo ti kha kan hngalh tikah, Samuel sinah kan kal," tiah a ti. ¹⁵ Cun Saul pa unau nih cun, "Zaangfahnak tein, Samuel nih zeidah an chimh, ka chim tuah," tiah a ti. ¹⁶ Cun Saul nih a pa unau sinah cun, "Laa cu an hmuh cang hna, tiah fiang tein a kan chimh," tiah a ti. Sihmanhsehlaw pennak kong Samuel nih a chimmi kha cu zeihmanh amah cu a chim lo. ¹⁷ Cun Samuel nih mi kha Bawipa sinah, Mizpah ah hmun khat ah a auh hna i, ¹⁸ Israel mi hna sinah cun, "Hi bangin Bawipa, Israel Pathian nih, ’Israel cu Izipt ram in ka hun chuahpi i Izipt mi hna kut le nannih an hremtu hna ram vialte kut chungin kan luatter hna,’ a ti. ¹⁹ Sihmanhsehlaw nihin ni ah hin nannih nih, vanchiat nan tonmi vialte le nan harnak vialte chungin an khamhtu hna nan Pathian cu nan hlawt i, ’Sihlah! kan cungah siangpahrang pakhat kan chiahpiak ko,’ nan ti. Cucaah atu cu Bawipa hmaiah, nan phun cio ning le nan chung cio ningin, chuak tuah u," tiah a ti. ²⁰ Cun Samuel nih Israel phun vialte cu a hun chuahpi hna i Benjamin phun cu camcawhfung khiah in thim a si. ²¹ Benjamin phun cu a chung a chung in a hun chuahpi hna i camcawhfung khiah in Matri chung cu thim a si; a hmanung bik ah Matri chung cu a mi a mi in a chuahpi hna i Kish fapa Saul cu camcawhfung khiah in thim a si. Sihmanhsehlaw an kawl tikah an hmu kho lo. ²² Cucaah Bawipa kha an hal ṭhan i, "Mipa kha hika ah a ra maw?" an ti. Cun Bawipa nih, "Zohhmanh, thilri lakah aa thup ko," tiah a ti. ²³ Khi tikah an va tli i khika khan an va lak; cun mizapi lak i a hung dir tikah mizapi lak i ahohmanh kha a liang cungin a lonh dih hna. ²⁴ Cun Samuel nih mizapi sinah cun, "Bawipa nih a thimmi hi nan hmu maw? Mi vialte lakah amah bantuk ahohmanh an um lo," tiah a ti. Cun mi vialte nih khan, "Siangpahrang cu saupi nung ko seh," tiin an au. ²⁵ Cun Samuel nih mizapi cu siangpahrang umtuning ding le a rian ding cu a chimh hna i cauk chungah a ṭial hna i Bawipa hmaiah khan a chiah hna. Cun Samuel nih mi vialte cu anmah le an inn cio ah khan a tlunter hna. ²⁶ Saul zong cu Gibeah khua i a inn ah a tlung ve i amah sinah cun Pathian nih an lung a canghtermi, mi ralṭha hna kha an kal ve. ²⁷ Sihmanhsehlaw, mizeiruaramlo a cheu khat nih cun, "Mah pa nih hin zeitindah a kan khamh khawh lai?" tiah an ti. An nihsawh i laksawng zeihmanh an put lo. Sihmanhsehlaw dai tein a um ko.

¹ Khi caan ah Ammon mi Nahash cu a hung kal i Jabesh-gilead kha a dum; cun Jabesh-gilead khuami vialte nih cun, "Kanmah he biahrennak ser law, na rian kan ṭuan lai," tiah an ti. ² Sihmanhsehlaw Ammon mi Nahash nih cun annih cu, "Nan orhlei mit kan khoih dih hna i cuticun Israel mi vialte cungah ningzah hmaichiatnak ka tlunter bel ah, nannih sinah hnatlaknak cu ka tuah hnga," tiah a ti. ³ Jabesh upa hna nih cun a sinah, "Kannih nih Israel ram chung vialte ah lamkaltu kan thlah hna nakhnga, ni sarih in kan ngang rih tuah. Khi tik i ahohmanh a kan khamhtu an um lo ahcun nangmah sinah kanmah tein kan i pe ko lai," tiah an ti. ⁴ Lamkaltu hna cu Saul khua Gibeah i an rat tikah mi hna theih ah cu kong cu an chim i mi vialte cu thang piin an ṭap dih. ⁵ Saul cu cawtum kha a hun zul hna i loin a hung tlung; cun Saul nih, "Mi hna hi an zeidah a ti i an ṭah?" tiah a ti. Cucaah Jabesh khuami hna thawngpang kha an chimh. ⁶ Cun hi bia kha Saul nih a theih tikah Pathian thlarau cu Saul cungah hmual fak piin a tlung i fak piin a thin a hung. ⁷ Cawtum khuah khat kha aa lak hna i a can cikcek hna i lamkaltu hna kut in Israel ram chung vialte ah a kuat dih hna i, "Saul le Samuel zulh awkah a chuak duh lo paoh cu a cawtum hna cungah hi bantukin tuah a si lai!" tiah a ti. Khi tikah Bawipa ṭihnak kha mi cungah khan a tlung i annih nih mi pakhat bantukin an chuak. ⁸ Bezek ah a pumh hna tikah, Israel mi cu sing thum an si i Judah mi cu sang thum an si. ⁹ Cun a rami lamkaltu hna sinah cun, "Jabesh-gilead mi sinah cun hi bangin nan va chim lai: ’Thaizing ni a hung linh vuaimai tikah khin, luatnak nan hmu lai,’ tiin," tiah a ti. Lamkaltu hna kha an rat i Jabesh mi hna kha an chimh tik hna ah, an lung aa lawm. ¹⁰ Cucaah Jabesh mi hna nih cun, "Thaizing ah nan sinah kanmah tein kan hun i pe lai, nannih nih a ṭha nan tining paoh in kan cungah nan tuah ko lai," tiah an ti. ¹¹ Cun a thaizing ah Saul nih mi kha phu thum ah a ṭhen hna i zinglei ven caan ah khin riahhmun chungah khan an lut i chun ni linh tiang Ammon mi kha an sam hna, cun a nung rihmi cu an i ṭhek dih i cucaah pahnih in a um ṭimi an um lo. ¹² Khi tikah mi nih Samuel sinah khan, "Ahodah, ’Saul nih cun maw a kan uk hnga?’ a titu kha an si. Kan thah hna nakhnga, rak chuah tuah hna," tiah an ti. ¹³ Sihmanhsehlaw Saul nih, "Nihin ah cun ahohmanh thah a si lai lo, zeicahtiah nihin ah hin Bawipa nih Israel mi lakah luatnak a ser," tiah a ti. ¹⁴ Cun Samuel nih mizapi hna cu, "Ra u, Gilgal ah kal u si law, pennak kha tharchuah u sih," tiah a ti hna. ¹⁵ Cucaah mi vialte cu Gilgal ah an kal i khika ah, Gilgal khua ah cun, Saul cu Bawipa hmaiah siangpahrang ah an ser. Khika ah Bawipa hmaiah daihnak thawinak kha an thawi i khika ah Israel mi vialte le Saul cu a tampi an i lawm.

¹ Cun Samuel nih Israel mi vialte hna sinah cun, "Zohhmanh u, nan ka chimhmi vialte ah nan aw kan ngaih hna i siangpahrang kan serpiak cang hna. ² Cun atu cu, zohhmanh u, siangpahrang nih an hruai cang hna lai; kei cu ka tar cang i ka ṭuak zong a par cang, cun zohhmanh u, ka fapa hna cu nan sinah an um; cun kei cu ka seino lio in nihin ni tiang nan hmaiah kaa chawk lengmang. ³ Hika ah hin ka um hih; Bawipa le a chiti thuhmi hmaiah hin ka soi tuah u. Aho cawtum ka la bal maw? Aho laa ka la bal maw? Aho tal ka hleng bal hna maw? Aho tal ka hrem bal maw? Ka mit phenhtertu ah aho sinin nawhthuh ka la bal maw? Ka chim u law, kan rulh hna lai," tiah a ti. ⁴ Annih nih, "Na kan hleng lo, na kan hrem fawn lo, aho sin hmanh in zeihmanh na la lo," tiah an ti. ⁵ Cun anih nih, "Ka kut chungah zeihmanh nan hmuh lonak kong ah hin Bawipa cu nan cungah biahngaltu a si i nihin ah hin a chiti thuhmi cu biahngaltu a si," tiah a ti hna. Cun annih nih, "Amah cu biahngaltu a si," tiah an ti. ⁶ Cun Samuel nih mizapi sinah cun, "Moses le Aaron kha rian a pe i nan pupa hna Izipt ram in a hun chuahpitu Bawipa kha biahngaltu cu a si. ⁷ Cucaah dir ṭhep u law, Bawipa hmaiah Bawipa nih nanmah ca le nan pupa hna ca i khamhnak rian a ṭuanmi kha kan ruah tuah hna lai. ⁸ Jakob nih Izipt ram chungah a vung kal i Izipt mi hna nih an hrem tikah, khi tikah nan pupa hna nih Bawipa kha an auh i Bawipa nih Moses le Aaron kha a thlah hna, annih nih nan pupa hna kha Izipt ram chungin an chuahpi hna i hi hmun ah hin an umter hna. ⁹ Sihmanhsehlaw Bawipa an Pathian kha an philh i Hazor siangpahrang Jabin i a ralkapbu haotu Sisera kut chungah khan le Filistin mi hna kut chungah le Moab siangpahrang kut chungah khan a zuarh hna; cun annih nih an tuk an doh hna. ¹⁰ Cun Bawipa kha an auh i, ’Bawipa kha kan hlawt i Baal le Ashtaroth kha an rian kan ṭuan hna caah kan sual cang; sihmanhsehlaw atu cu kan ral hna kut chungin kan chuahter law, nangmah na rian kan ṭuan lai,’ an ti. ¹¹ Cun Bawipa nih Jerubbaal le Barak le Jepthah le Samuel kha a run thlah hna i nan pawngkam i a ummi nan ral hna kut chungin an chuah hna i him tein khua nan sa. ¹² Cun nannih nih Ammon mi siangpahrang Nahash kha nanmah doh awkah a ra ti nan hmuh tikah, Bawipa nan Pathian cu nan siangpahrang a si ko lioah, keimah sinah, ’Sihlah, siangpahrang nih kan uk ko seh,’ nan ti. ¹³ Cun atu cu nanmah nih nan thimmi le nanmah nih nan halmi siangpahrang cu zoh tuah u; zohhmanh u, Bawipa nih nan cungah siangpahrang pakhat a chiah cang. ¹⁴ Nannih nih Bawipa kha nan ṭih i a rian nan ṭuan i a aw kha nan ngaih i Bawipa nawlbia kha nan ralchanh lo le, cun nanmah le an uktu hna siangpahrang nih Bawipa nan Pathian kha nan zulh ahcun, a ṭha ko lai; ¹⁵ sihmanhsehlaw Bawipa aw kha nan ngaih lo Bawipa nawlbia kha nan ralchanh ahcun, khi tikah Bawipa kut nih cun nanmah le nan siangpahrang kha an ralchanh hna lai. ¹⁶ Cucaah dir ṭhep u law, nan hmaika ah Bawipa nih a tuah laimi thil lianngan hi zoh tuah u. ¹⁷ Nihin hi changvut ṭuan ni a si lo mei? Khua a ritter i ruah a surter nakhnga, Bawipa kha ka auh lai i nan ca i nannih nih siangpahrang nan halnak kongah hin Bawipa hmai i nan tuahmi nan ṭhat lonak kha a ngan, ti kha nan hngalh lai i nan hmuh lai," tiah a ti. ¹⁸ Cucaah Samuel nih Bawipa kha a auh i khi ni ah Bawipa nih khua a ritter i ruah a surter; cun mi vialte nih Bawipa le Samuel kha an ṭih ngaingai hna. ¹⁹ Cun mi vialte nih Samuel sinah cun, "Bawipa na Pathian sinah cun, kan thih nakhnga lo, na sal hna caah hin thla kan campiak tuah; zeicahtiah kan sualnak vialte cungah hi thil ṭhalo hi kan i chap cang, kan ca i siangpahrang kan hal hi," tiah an ti. ²⁰ Cun Samuel nih mi sinah cun, "Ṭih hlah u; hi thil ṭhalo vialte hi nan tuah cang, asinain Bawipa nan zulhnak khan pial loin nan lungthin dihlak in Bawipa rian kha ṭuan tuah u; ²¹ cun pakpalawng thil, ṭhathnem zong an ṭhathnem kho hna lo i a khamh zong an khamh kho hna lomi thil hna kha, pialhnawh hna hlah u, zeitintiah pakpalawng an si. ²² Nannih cu amah ca miphun i ser kha Bawipa lawmhmi a si caah, a min ngan ruang ah hin, Bawipa nih a mi cu an hlonh hna lai lo. ²³ Cuhleiah nan ca i thlacam ka ngol thawngin Bawipa cung i sualnak ka tuah hnga cu ka duh ding naisai a si lo; lam ṭha le lam ding chung kal awk kha kan cawnpiak ko hna lai. ²⁴ Bawipa cu a ṭih bel ṭih ko u law, nan lungthin dihlak in a rian kha zumhawktlak tein ṭuan ko u; zeitintiah nan ca i thil lianngan a tuahmi kha ruat tuah hna u. ²⁵ Sihmanhsehlaw ṭhat lonak nan tuah ṭheo ahcun, nanmah he nan siangpahrang he nan lo dih ko lai," tiah a ti.

¹ Saul cu pennak hram a thawk tikah kum ... a si i amah nih kum ... le kum hnih Israel mi kha a uk hna. ² Saul nih Israel mi thong thum a thim hna; thong hnih cu Saul he Mikmash le Bethel tlangram ah khan an um i thong khat cu Jonathan he Benjamin phun khua Gibeah ah khan an um; cun a tangmi hna cu anmah le an thlam cio ah khan a kirter hna. ³ Jonathan nih Geba i a ummi Filistin ralveng ralkapbu cu a tei hna i mah cucu Filistin mi nih an theih. Cun Saul nih ram chung dihlak ah khan, "Hebru mi nih thei hna seh," tiin muko a tum. ⁴ Cun Israel mi vialte nih khan, Saul nih Filistin ralveng ralkapbu kha a tei hna ti le Israel mi cu Filistin mi hna huat kan phor cang ti zong kha an theih. Cun mi hna cu Saul kha Gilgal i hei fonh awkah an auh hna. ⁵ Cun Filistin mi cu Israel mi kha doh awkah an i pum, rangleng sang thum, rangcung ralkap thong ruk le ke ralkap an tam ning cu rilikam thetse zat; cun an hung kai i Mikmash ah an riak, Beth-aven nichuahlei ah khan. ⁶ Israel mi nih harnak chungah kan um ti kha an hmuh tikah (zeitintiah annih cu fak piin an det hna) mi hna cu lungkua hna le khor hna le lungpi chung hna le thlan chung hna le ti inn chung hna ah an i thup, ⁷ a cheu nih Jordan tiva kha a tannak hmun hna ah khan an tan i Gad le Gilead ram ah an zam. Saul tu cu Gilgal ah khan a um ko i mi vialte nih khan therphang lengmang in an zulh. ⁸ Samuel nih a caan a tinh tak bangin ni sarih a hngah; sihmanhsehlaw Samuel cu Gilgal ah khan a ra lo i mi nih khan amah kha an ṭiaotak lengmang cang. ⁹ Cucaah Saul nih, "Hika ah hin, keimah sinah, khangh thawinak kha le daihnak thawinak hna kha rak pu hna u," tiah a ti. Cun khangh thawinak kha a pekchanh. ¹⁰ Khangh thawinak kha a pekchanh dih kate ah khin, zohhmanh, Samuel kha a ra; cun Saul nih khan amah ton awkah a kal i salaam a pek. ¹¹ Samuel nih, "Zeidah na rak tuah?" tiah a ti. Cun Saul nih, "Mi kha ka sinin an ṭiao lengmang cang ti kha ka hmuh tik le kan ni tinhmi chungah na rat ti lo ca le Filistin mi kha Mikmash ah an i pumh luaimai caah, ¹² keimah nih, "Bawipa duhdawtnak ka hal hlanah hin maw Filistin mi hna nih hin Gilgal ah hin run kan zuanhnawh hna lai,’ ka ti i cucaah khangh thawinak pekchanhnak hi ka rak i hnek ko," tiah a ti. ¹³ Cun Samuel nih Saul cu, "Na tuahmi hi hruhnak ngaingai a si; Bawipa na Pathian nih an pekmi a nawlbia cu na zul lo; zeicahtiah atu cu, Bawipa nih na pennak cu Israel mi cungah zungzal ca in a hei fehter ko hnga. ¹⁴ Sihmanhsehlaw atu cu na pennak hi aa pehtlai lai lo; zeitintiah Bawipa nih amah duhning lungthin a pumi pakhat a kawl cang; cun nangmah nih Bawipa nih an pekmi nawlbia kha na zulh hna lo caah, a mi hna cung i bawi sinak kha Bawipa nih amah cu a pek cang," tiah a ti. ¹⁵ Cun Samuel cu a tho i Gilgal in Benjamin khua Gibeah ah khan a hung kal. Cun Saul nih amah sinah a ummi kha a rel hna i za ruk tluk an si. ¹⁶ Cun Saul le a fapa Jonathan le an sinah a ummi hna kha Benjamin khua Geba ah khan an um; sihmanhsehlaw Filistin mi cu Mikmash ah khan an riak. ¹⁷ Cun Filistin mi hna riahhmun khan raltutu phu thum in an chuak; phu khat cu Shual ram i Ofrah leiah khan an kal, ¹⁸ phu khat cu Beth-horon leiah an kal, cun phu khat cu ramlak lei Zeboim nelrawn vun zohtu pawng ri leiah khan an kal. ¹⁹ Israel mi ram chung dihlak ah soser pakhat hmanh an rak um lo, zeitintiah Filistin mi nih, "Hebru mi nih fei le nam an i ser sual ai hnga," tiah an ti; ²⁰ asinain Israel mi paohpaoh nih an tuhmui siseh, an hmuizum siseh, an hreitlung siseh, an fa-ah siseh, cer awkah Filistin mi hna sinah an vung kal lengmang; ²¹ cun a man cu tuhmui ca le hmuizum caah pim khat lengmang a si i shekel cheu thum cheu khat lengmang hreitlung cernak le leng hnuk caw sawhnak fung bunh man ah a si. ²² Cucaah raltuk ni ah khan fei siseh, nam siseh a ngeimi, Saul le Jonathan sin i a ummi hna lakah khan an um lo; sihmanhsehlaw Saul le a fapa Jonathan kha cu an ngei. ²³ Cun Filistin mi ralveng ralkapbu cu Mikmash i va lanhnak fiang ah khan an va kal.

¹ Ni khat cu Saul fapa Jonathan nih khan a ralthuam a putu tlangvalpa sinah khan, "Ra law, khatte lei ral i Filistin mi ralvengtu ralkapbu sinah khin va kal tuah u sih," tiah a ti. Sihmanhsehlaw a pa kha a chim lo. ² Saul cu Gibeah pawngri i a ummi Migron i a ummi taleti kung toiah a um ko; amah sinah a ummi cu za ruk tluk an si, ³ Bawipa tlangbawi Shiloh i a rak ummi Eli fapa Phinehas i fapa Ikabod i a unau Ahitub i fapa Ahijah zong, tlangbawi angki aa hruk i a um ve. Cun mizapi nih khan Jonathan a kal kha an hngal lo. ⁴ Cun Jonathan nih Filistin mi ralvengtu ralkapbu sin i va kal aa timhnak fiang ah khan a kap hnih in lungpang an um veve, pakhat min cu Bozez a si i a dang pakhat min cu Seneh a si. ⁵ Lungpang pakhat cu chaklei ah Mikmash hmailei ah aa chong i a dang pakhat cu thlanglei ah, Geba hmailei ah aa chong. ⁶ Cun a ralthuam putu tlangval sinah cun Jonathan nih, "Hi cuarpartan lomi hna an ralvengtu ralkapbu sinah khin va kal tuah u sih; Bawipa nih kan caah rian a hei ṭuan ko hmanh hnga maw, zeitintiah khamhnak cu mi tam thawngin a si ah siseh, mi tlawm thawngin a si ah siseh, Bawipa cu zeihmanh nih a dawnh khawh ṭung lo," tiah a ti. ⁷ Cun a ralthuam putu nih khan a sinah, "Na lung nih a duhning te cun tuah ko; zohhmanh, na sinah ka um, na ruahnak bantukte cu ka ruahnak a si ve," tiah a ti. ⁸ Cun Jonathan nih khan, "Zohhmanh, an sin leiah khin kan hei kal lai i kan hei i langhter lai. ⁹ Annih nih kan sinah, ’Nan sinah kan rat hlantiang rak um rih u,’ an ti ahcun, kan umnak hmun ah khan kan dir lai i an sinah khan kan hung kal lai lo. ¹⁰ Sihmanhsehlaw annih nih, ’Kan sinah hung tuah u,’ an ti ahcun, kan hung kal lai; zeitintiah mah hihi Bawipa nih annih cu kan kut chungah a kan pek cang ti hmelchunhnak a si lai," tiah a ti. ¹¹ Cucaah an pahnih in Filistin mi ralvengtu ralkapbu sinah cun an hei i langhter; cun Filistin mi hna nih cun, "Zohhmanh u, an i thuhnak kua chungin Hebru mi an chuak cang khi," tiah an ti. ¹² Cun ralvengtu ralkapbu hna nih cun Jonathan le a ralthuam putu cu an hei kawh hna i, "Kan sinah hung u law, thil pakhat kan in hmuhsak hna lai," tiah an hei ti hna. Cun Jonathan nih a ralthuam putu sinah cun, "Hun ka zul tuah; zeitintiah annih cu Bawipa nih Israel mi kut chungah a pek cang hna cuh," tiah a ti. ¹³ Cun Jonathan cu a kut le a ke i bawmh in a hung kai, a ralthuam putu nih cun a hnu in a zulh. Cun annih cu Jonathan hmaiah cun an tlu duahmah ko i a ralthuam putu zong nih a hnulei in a hun thah ve hna; ¹⁴ cun cu thahnak hmasa bik Jonathan le a ralthuam putu nih an tuahmi cu, tlangrel tuhnak kauh vawlei ah khin, leileh rinkuar a cheu can tluk ah khin, mi pakul tluk an thi. ¹⁵ Cun riahhmun le lo lak le mi vialte lakah khan launak a um ciammam i ralvengtu ralkapbu le ral hranhtu ralkap hna hmanh cu an ther ko; cun vawlei aa hnin i launak nganpi ah a cang. ¹⁶ Cun Saul ralvengtu hna, Benjamin mi khua Gibeah i a ummi hna nih khan an hei zoh i, zohhmanh, mi bupi cu hilei khilei ah an i cavai len ko. ¹⁷ Cun Saul nih a sin i a ummi hna sinah cun, "Mi i rel u law, ahodah kan sinin a kal, i zoh tuah u," tiah a ti. Cun annih nih an i rel tikah, zohhmanh, Jonathan le a ralthuam putu kha an um lo. ¹⁸ Cun Saul nih Ahijah sinah cun, "Hika ah hin Pathian kuang kha rak pu tuah," tiah a ti. Zeitintiah khi caan ah Pathian kuang cu Israel mi sinah khan a kal ve. ¹⁹ Cun Saul nih tlangbawi a chawnh lioah khan, Filistin mi riahhmun chung i i tuainak cu a karh chin lengmang i Saul nih tlangbawi sinah cun, "Na kut kha zuk ṭhan tuah," tiah a ti. ²⁰ Cun Saul le a sinah a ummi vialte kha an i pum ṭhan i raldohnak chungah cun an lut; cun zohhmanh, anmah le anmah cu nam in an i tu ciammam i, i tuainak nganpi a um. ²¹ Cun cu caan hlan i Filistin mi sin i a um i an sinah an riahhmun i a hung kalmi Hebru mi hna hmanh kha, atu ah cun, Saul le Jonathan sinah a ummi Israel mi hna sin i um awkah an i mer. ²² Cu bantukin, Efraim tlangram i aa thupmi Israel mi vialte nih khan Filistin mi cu an zam ti an theih tikah, annih zong nih raldohnak chungah khan i tel ve in, heh tiah an dawi ve hna. ²³ Cuticun khi ni ah Bawipa nih Israel cu a luatter; raldohnak cu Beth-aven pin tiang a phan. ²⁴ Cun khi ni ah Israel mi hna cu an lungre a thei, zeicahtiah mi cungah cun chiatsernak kha Saul nih a khin i, "Ka ral hna cungah phu ka hlam i zanlei a si hlan i rawl a eimi cu chiatserh siseh," tiah a ti. Cucaah ahohmanh nih rawl an tep lo. ²⁵ Cun mi vialte cu tupi chung i an va luh tikah, zohhmanh, vawlei ah khuaihliti a rak um. ²⁶ Cun mi kha tupi chung i an va luh tikah, zohhmanh, khuaihliti kha a rak tla lengmang, sihmanhsehlaw ahohmanh nih an kut an kaa ah an i tuh lo; zeitintiah mi nih khan chiatserhnak kha an ṭih. ²⁷ Sihmanhsehlaw Jonathan nih a pa nih mi kha chiatserhnak in bia a beuh hna ti kha a thei lo; cucaah a kut in aa putmi fung par cun khuai thlar cu a sawh i a kut in aa tuh i a mit a hung fiang ṭhan. ²⁸ Cun mi pakhat nih, "Na pa nih mi kha chiatserhnak in fek tein bia a beuh hna i, ’Nihin i rawl a eimi cu chiat siseh,’ a ti," tiah a ti. Cun mizapi cu an buhri dih. ²⁹ Cun Jonathan nih aa thawh i, "Ka pa nih ram hi harnak a pek ko hih. Khuaihliti tlawmpalte ka teh caah ka mit au a fian ṭhan hi zoh tuah ngat u. ³⁰ Mi hna nih hin, an ral hna hranchaw an hmuhmi hi, nihin ah hin heh tiah ei ko hna seh law, zeitluk in dik a hei ṭhat deuh hnga; cucaah cun pei Filistin mi hi tampi kan thah khawh hna lo hi," tiah a ti. ³¹ Cu ni ah cun Mikmash in Aijalon tiang Filistin mi cu an thah len hna. Cun mi cu an buhri ngaingai; ³² mi hna nih cun hranchaw kha an zuanhnawh hna i tuu hna le cawtum hna le cawfa hna kha an lak hna i vawlei ah an thah hna i mi nih cun an thisen he an ei chih hna. ³³ Cun Saul kha an chimh i, "Zohhmanh, mi nih thisen an einak thawng in Bawipa sinah an sual cang," tiah an ti. Cun anih nih, "Nannih nih hlennak in nan tuah cang; hika ah hin keimah sinah lungpi pakhat in rak hril tuah u," tiah a ti. ³⁴ Cun Saul nih, "Mizapi sinah khan vaa ṭhek u law, annih cu, ’Mi kip nih an cawtum siseh, an tuu siseh, rak i put cio hna seh law, hika ah hin that hna seh law, ei hna seh; cun thisen ei chihnak thawngin Bawipa sinah sual hlah u,’ tiah chim hna u," tiah a ti. Cucaah mi kip nih cu zan ah cun an cawtum cio kha an rak i put i khika ah an thah hna. ³⁵ Cun Bawipa caah Saul nih biakṭheng pakhat a sak; mah cucu Bawipa ca i a sak hmasa bikmi biakṭheng a si. ³⁶ Cun Saul nih, "Zan ah Filistin mi cu vung dawi hna u si law, zinglei khuadei tiang vung hrawk hna u sih; mi pakhat hmanh vung ngan hna hlah u sih," a ti. Cun annih nih, "A ṭha tiah na ruahmi paoh cu tuah ko," tiah an ti. Sihmanhsehlaw tlangbawi nih, "Hika ah hin Pathian naih rih tuah u sih," tiah a ti. ³⁷ Cun Saul nih Pathian cu a hal i, "Filistin mi cu ka vung dawi hna lai maw? Annih cu Israel mi hna kut chungah na pe hna lai maw?" tiah a ti. Sihmanhsehlaw khi ni ah cun amah cu a let lo. ³⁸ Cun Saul nih, "Hika ah hin ra tuah u, mizapi a hruaitu hna nan dihlak in; cun hi sualnak hi zeitindah nihin ah a thawh ti kha hngal u law, hmu tuah u. ³⁹ Zeitintiah Israel a khamhtu Bawipa nih a nun bangin, ka fapa Jonathan chungah a um a si hmanh ah, a thi hrimhrim lai," tiah a ti. Sihmanhsehlaw mi vialte lakah cun amah a hun lettu pakhat hmanh an um lo. ⁴⁰ Cun Israel mi vialte sinah cun, "Nannih cu kam khat ah nan um lai i keimah le ka fapa Jonathan cu kam khat ah kan um lai," tiah a ti. Cun mi zapi nih Saul cu, "A ṭha tiin na ruahmi cu tuah ko," tiah an ti. ⁴¹ Cucaah Saul nih, "Maw Bawipa, Israel Pathian, zeicahdah nihin cu na sal kha na ka leh lo? Hi mawhnak cu keimah chungah siseh, ka fapa Jonathan chungah siseh, a um a si ahcun, maw Bawipa, Israel Pathian, Urim langhter; sihmanhsehlaw hi mawhnak cu na mi Israel mi chungah a um a si ahcun, Thummim langhter," tiah a ti. Cun Jonathan le Saul cungah khan a tla i mizapi kha cu an luat. ⁴² Cun Saul nih, "Keimah le ka fapa Jonathan cungah khan camcawhnak cu tuah u," tiah a ti i Jonathan cungah khan a tla. ⁴³ Cun Saul nih Jonathan cu, "Zeidah na rak tuah, ka chim tuah," tiah a ti. Cun Jonathan nih amah cu, "Ka kut in kaa putmi ṭhiangṭhunh par in khuaihliti tlawmte ka teh; hika ah ka um ko hih, ka thi ko lai," tiah a ti. ⁴⁴ Cun Saul nih, "Pathian nih ka cungah cu bantukin le cu nak tam deuh zongin, tuah ko seh; na thi hrimhrim ko lai, Jonathan," tiah a ti. ⁴⁵ Khi tikah mizapi nih Saul sinah cun, "Israel chungah hi teinak nganpi a tuahtu Jonathan cu maw a thi hnga? Naisai hlah! Bawipa a nun bangin, a lu cung a samfa fa khat hmanh vawlei ah a tla lai lo; zeicahtiah nihin ah Bawipa he pei an tuah ṭi leh hi," tiah an ti. Cuticun mizapi nih Jonathan cu an tlanh; cucaah a thi lo. ⁴⁶ Cun Saul nih Filistin mi a dawi hna cu a kirtak i Filistin mi cu anmah umnak hmun ah khan an kal. ⁴⁷ Saul nih Israel mi siangpahrang a can tikah a kenkip i a ummi a ral vialte, Moab mi, Ammon mi, Edom mi Zobah siangpahrang hna le Filistin mi hna kha a doh hna; a va fuhmi paoh cu a tei lengmang hna. ⁴⁸ Cun ralṭha ngaiin a tuah i Amalek mi kha a tuk hna i Israel mi cu a roktu hna kut chung khan a luatter hna. ⁴⁹ Cun Saul fapa hna cu Jonathan, Ishvi le Malkhishua an si; cun a fanu pahnih hna an min cu mah hihi an si: upa deuh min cu Merab, cun a ngakchia deuh min cu Mikhal; ⁵⁰ cun Saul nupi min cu Ahinoam a si, amah cu Ahimaaz fanu a si. Cun a ralkapbu haotu min cu Abner a si, amah cu Saul pa unau Ner i fapa a si. ⁵¹ Saul pa cu Kish a si, cun Abner pa Ner cu Abiel fapa a si. ⁵² Saul chan chung vialte cu Filistin mi kha fak piin an doh hna cun Saul nih pa ṭhawng siseh, pa ralṭha siseh, a hmuhmi paoh cu amah sinah a fonh chih lengmang hna.

¹ Cun Samuel nih Saul cu, "Bawipa nih keimah cu, nangmah kha, a mi Israel mi cung i siangpahrang si awk i chiti thuh awkah, a ka thlah cang; cucaah Bawipa bia cu ngai tuah hna. ² Hi bangin ralkapbu Bawipa nih a ti, ’Amalek mi nih Israel mi cungah an tuahmi, Izipt ram in an chuah i lampi i annih an rak doh hna kha, dan ka tat lai. ³ Atu cu va kal law, Amalek kha va tu, an ngeihmi vialte kha va hrawk dih; zuah hna hlah, sihmanhsehlaw pa thlulo nu thlulo, ngakchia thlulo, bawhte thlulo, tuu thlulo, kalauk thlulo, laa thlulo in va that hna,’ a ti," tiah a ti. ⁴ Cucaah Saul nih mi kha a kawh hna i Telaim ah a rel hna, ke ralkap sing hnih le Judah mi sang khat an si. ⁵ Cun Saul cu Amalek mi hna khua cu a phan i horkuang chung cun a bawh. ⁶ Cun Saul nih Ken mi hna cu, "Kal u law, i ṭhen u, Amalek mi hna sinin vung kal u; cu ti a si lo ahcun, anmah sinah kan hrawh chih sual hna lai; zeitintiah Izipt ram in an hung chuah lioah khan nannih nih Israel mi vialte cu nan rak zaangfah hna," tiah a ti. Cucaah Ken mi hna cu Amalek mi hna sin khan an i ṭhen. ⁷ Cun Saul nih Amalek mi cu Havilah in Izipt nichuahlei i a ummi Shur tiang a tei hna. ⁸ Cun Amalek mi siangpahrang Agag kha a nung in a tlaih i mi vialte kha vainam in a sam dih hna. ⁹ Sihmanhsehlaw Saul le mi hna nih khan Agag le tuu lak i a ṭha bik hna le cawtum lak i a ṭha bik hna le cenhmi saṭil thauthau hna lakin a ṭha bik hna le, tuufa hna le a ṭhami vialte kha an zuah hna i an hrawk cikcek duh hna lo; a ṭhalo le santlailo vialte lawng kha an hrawh cikcek hna. ¹⁰ Bawipa bia cu Samuel sinah a ra phan: ¹¹ "Saul cu siangpahrang i ka rak ser caah hin kaa ngaichih; zeicahtiah keimah zulhnak in aa mer cang i ka nawlbia kha a tuah hna lo," tiah a ti. Cun Samuel cu a thin a hung i Bawipa kha zan khuadei in a auh. ¹² Cun Samuel cu Saul kha zinglei i ton awkah tuan tein a tho, cun Samuel kha an chimh i, "Saul cu Karmel ah a ra, cun zohhmanh, amah caah hngalh camcinnak lung aa phun i aa mer i a lan i Gilgal ah a vang kal," tiah an ti. ¹³ Cun Samuel cu Saul sinah a ra i Saul nih khan amah cu, Bawipa nih thluachuahnak in pe ko seh; Bawipa nawlbia cu ka tuah cang," tiah a ti. ¹⁴ Cun Samuel nih, "A si kun ahcun, tuu awnh ka hna i a lutmi hi le cawtum pawt ka theihmi hi zeidah a si kun?" tiah a ti. ¹⁵ Saul nih, "Amalek mi hna sinin an ratpimi an si; zeitintiah mi nih tuu lak i a ṭha bik hna le cawtum lak i a ṭha bik hna kha Bawipa na Pathian sin i raithawi awkah an zuah hna; cun a dang vialte cu kan hrawh cikcek hna," tiah a ti. ¹⁶ Khi tikah Samuel nih Saul cu, "Ngol rih hmanh! Zahan ah Bawipa nih a ka chimhmi cu kan chim hmanh lai," tiah a ti. Cun anih nih, "Chim ko," tiah a ti. ¹⁷ Cun Samuel nih, "Nangmah naa ruahnak ah mi hmete si hmanh law, Israel miphun hna lu na si lo maw? Bawipa nih Israel mi siangpahrang ah chiti an thuh cang. ¹⁸ Cun Bawipa nih rian pakhat tuah awkah an thlah i, ’Va kal law, misual mi, Amalek mi kha, va hrawk dih cikcek hna, cun an ciamh dih tiangin va do hna,’ a ti. ¹⁹ A si kun ahcun, zeicahdah Bawipa aw cu na zulh lo? Zeicahdah hranchaw kha na zuanhnawh i Bawipa hmai i thil ṭhalo kha na tuah?" tiah a ti. ²⁰ Cun Saul nih Samuel sinah cun, "Bawipa aw cu ka zulh ko, Bawipa nih a ka thlahnak rian ah khan ka kal ko, Amalek siangpahrang Agag kha ka ratpi i Amalek mi kha ka hrawh cikcek ko hna. ²¹ Sihmanhsehlaw mizapi nih hranchaw le tuu hna le cawtum hna hrawh awk i ulhamhmi thil lak i a ṭha bik hna kha, Gilgal ah, Bawipa na Pathian sin i raithawi awkah an lak hna," tiah a ti. ²² Cun Samuel nih a thawh i, "Bawipa nih hin Bawipa aw zulhnak i lawmhnak ngan a ngeih tluk hin maw, Khangh thawinak le raithawinak ah hin lawmhnak a ngeih ve? Zohhmanh, nawlngaihnak hi raithawinak nakin a ṭha deuh i Amah bia ngaih hi tuukawng hna thau nakin a ṭha deuh. ²³ Zeitintiah ralchanh hman hi litin bantukin sual a si ve i, Lungkhon hi ṭhat lo le siasal biak he an i tluk. Nangmah nih Bawipa bia na al cang caah amah zong nih nangmah cu siangpahrang sinak khan an hlawt cang," tiah a ti. ²⁴ Cun Saul nih Samuel sinah cun, "Ka sual cang; mi zapi kha ka ṭih hna i an aw ka zulh hna caah Bawipa nawlbia le nangmah bia kha ka buar cang hna. ²⁵ Cucaah atu cu, ka sualnak kha ka ngaithiam law, ka sinah kir tuah, Bawipa kha ka biak nakhnga, tiah kan nawl," tiah a ti. ²⁶ Cun Samuel nih Saul cu, "Nangmah cu kan kirpi lai lo; zeitintiah Bawipa bia kha na al cang i, Bawipa nih Israel mi cung i siangpahrang na sinak khan an hlawt cang," tiah a ti. ²⁷ Cun Samuel cu kal awk i aa mer pah ah khin Saul nih a puan ki in a tlaih i a tlek. ²⁸ Cun Samuel nih amah cu, "Bawipa nih Israel pennak cu nangmah sinin nihin ah hin a thleh cang i nangmah nakin a ṭha deuhmi na innpa sinah khan a pek cang. ²⁹ Cun Israel Sunparnak nih khan lih zong a chim lai lo i a ngaih zong aa ngaichih lai lo; zeitintiah i ngaihchih awkah amah cu minung a si ṭung lo," tiah a ti. ³⁰ Cun amah nih khan, "Ka sual ko cang; sihmanhsehlaw atu cu ka mi hna i an upa hna hmai le Israel mi hmaiah hin upatnak ka pe law ka kirpi ko. Bawipa na Pathian cu ka biak nakhnga," tiah a ti. ³¹ Cucaah Samuel nih Saul cu a kirpi i Saul nih Bawipa kha a biak. ³² Khi tikah Samuel nih, "Amalek mi siangpahrang Agag kha hika ah hin, ka sinah ratpi tuah u," tiah a ti. Cun Agag cu a sinah cun thanuam ngaiin a ra. Agag nih cun, "Thihnak a khaatnak cu ka lonh cang ko hnga lo maw cu," tiah a ti. ³³ Cun Samuel nih, "Nangmah na vainam nih nu kha fa loin a tuah hna bantukin, cu bangin na nu cu nu hna lakah fa ngei lomi a si ve lai," tiah a ti. Cun Samuel nih Agag cu Bawipa hmaiah Gilgal khua ah cun a sam cikcek. ³⁴ Cun Samuel cu Ramah ah a tlung; Saul cu a inn ah Saul khua Gibeah ah khan a hung kal. ³⁵ Samuel nih Saul cu a thih ni tiangin a hmu ṭhan ti lo, sihmanhsehlaw Samuel cu Saul kongah khan a ngaih a chia ko. Cun Bawipa cu, Israel mi hna siangpahrang i Saul a rak ser kha, aa ngaihchih.

¹ Bawipa nih Samuel sinah cun, "Israel mi hna cung i siangpahrang a sinak in ka hlawt na hmuhmi Saul kong ah hin zei can dah ngaihchia in na um lai? Na ki ah khan chiti rawn law, va kal tuah; nangmah cu Bethlehem khuami Jesse sinah kan thlah lai, zeicahtiah amah fapa hna lakah siangpahrang ca i kaa thimmi a um cang," tiah a ti. ² Cun Samuel nih, "Zeitindah ka kal khawh lai? Saul nih a theih ahcun, a ka thah lai," tiah a ti. Cun Bawipa nih, "Cawla pakhat in i lak law, ’Bawipa sin i raithawi awkah ka ra,’ tiah va ti. ³ Cun Jesse kha raithawinak ah cun va sawm law, nangmah nih zeidah na tuah awk a si kha kan hmuhsak lai; cun a min kan chimhmi kha nangmah nih chiti cu na ka thuhpiak lai," tiah a ti. ⁴ Bawipa nih nawl a pekmi cu Samuel nih a tuah i Bethlehem khua ah khan a ra. Cu khua upa hna nih amah cu ton awkah khan ther lengmang in an ra i, "Daihnak lei ca i a rami na si maw?" tiah an ti. ⁵ Cun anih nih, "Daihnak in; Bawipa sin i raithawi awkah ka ra; nanmah kha i thianh u law, raithawinak ah cun ka sinah ra ve u," tiah a ti hna. Cun Jesse le a fapa hna kha a thianh hna i raithawinak ah khan a sawm hna. ⁶ Annih nih an rat tikah Eliab kha a zoh i, "Bawipa chiti thuhmi cu Bawipa hmai i a ummi hi a si hrimhrim ko," tiah a ruah. ⁷ Sihmanhsehlaw Bawipa nih Samuel sinah cun, "A muisam in siseh, a pumrua in siseh, zoh hlah, zeicahtiah amah cu ka hlawt cang; zeitintiah Bawipa nih cun mi i an zohning in a zoh lo; mi nih cun lenglei langhning kha an zoh, sihmanhsehlaw Bawipa nih cun lungthin kha a zoh," tiah a ti. ⁸ Cun Jesse nih Abinadab kha a auh Samuel hmaiah khan a hei kalter. Cun anih nih, "Hi zong hi Bawipa thimmi a si lo," tiah a ti. ⁹ Cun Jesse nih Shammah kha a hei kalter. Cun anih nih, "Hi zong hi Bawipa thimmi a si lo," tiah a ti. ¹⁰ Cun Jesse nih a fapa hna chung i pasarih kha Samuel hmaiah cun a kalter hna. Cun Samuel nih Jesse sinah cun, "Bawipa nih mah hna hi cu a thim hna lo," tiah a ti. ¹¹ Cun Samuel nih Jesse sinah cun, "Hika ah hin na fapa an dihlak in an um maw?" tiah a ti. Cun anih nih, "A ngakchia bik a um rih, sihmanhsehlaw zohhmanh, amah cu tuu a khal," tiah a ti. Cun Samuel nih Jesse sinah cun, "Mi hei thlah hna law, amah cu va la hna seh; zeitintiah hika a phak hlantiang kan ṭhu lai lo," tiah a ti. ¹² Cun a hei thlah hna i an run luhpi. Amah cu mi sen tertar te, mit au dawh ngai, midawh ngai a si. Cun Bawipa nih, "Tho law, amah cu thuh tuah; zeicahtiah amah hi dahkaw a si cu," tiah a ti. ¹³ Cun Samuel nih a chiti rawnnak ki cu aa lak i amah cu a unau hna lakah cun a toih; cun Bawipa thlarau cu cu ni thawk in fak piin David cungah a tlung. Cun Samuel cu a tho i Ramah ah a kal. ¹⁴ Bawipa thlarau cu Saul sin khan aa ṭhial i Bawipa sinin a rami thlarau ṭhalo nih amah kha awlok a chonh. ¹⁵ Cun Saul cu a sinum hna nih khan, "Zohhmanh, Pathian sinin a rami thlarau ṭhalo nih awlok an chonh hih. ¹⁶ Kan bawipa nih nangmah hmai i a ummi na sal hna hi, tingtang tum a thiammi kawl awkah nawl kan pe tuah; Pathian sinin a rami thlarau ṭhalo kha na cungah a um tikah amah nih cun a tum lai i na dam lai," tiah an ti. ¹⁷ Cucaah Saul nih a sinum hna sinah cun, "Tum a thiammi ka hmuhpiak u law, ka sinah ratpi u," tiah a ti. ¹⁸ Tlangval pakhat nih khan a hun leh i, "Zohhmanh, Bethlehem khuami Jesse fapa pakhat, tingtang tum a thiammi, mi ralṭha, raldoh thiammi, biachim holh rel i a fimmi, mui dawh ngai, ka hmuh; cun Bawipa cu amah sinah a um," tiah a ti. ¹⁹ Cucaah Saul nih Jesse sinah cun lamkal a hei thlah hna i, "Tuu sinah a ummi na fapa David kha rak ka kua tuah," tiah a ti. ²⁰ Cun Jesse nih changreu le mitsur hang cua khat a phormi laa pakhat le meheh fa pakhat kha a lak i a fapa David sinin Saul sinah khan a kuat hna. ²¹ Cun David cu Saul sinah khan a ra i a rian ah khan a lut. Cun Saul nih khan a duh ngaingai i a hriamnam putu ah a cang. ²² Cun Saul nih Jesse cu bia a hei cah i, "David cu ka rian ah hin um ko seh, zeitintiah a cungah ka mit a tling," tiah a ti. ²³ Cun Pathian sinin a rami thlarau ṭhalo kha Saul cungah a tlun fate, David nih khan tingtang kha aa lak i a kut in a tum tawn; cucaah Saul cu aa hrim ṭhan tawn i a dam; cun thlarau ṭhalo nih khan a chuahtak tawn.

¹ Cun Filistin mi nih an ralkapbu hna cu raldoh awkah an pumh hna i Judah ram Sokoh khua ah; Sokoh le Azekah kar Efes-dammim ah an riak. ² Cun Saul le Israel mi cu an i pum i Elah nelrawn ah an riak i Filistin mi hna kha rak doh awkah an rak i tiang. ³ Cun Filistin mi hna cu kam khattelei tlang cungah an dir i Israel mi hna cu a dang kam khattelei tlang cungah khan an dir ve, an karlak ah horkuang pakhat a um. ⁴ Cun Filistin mi hna riahhmun cun an mi ṭhawng bik a min Goliath a simi, Gath khuami, a tung dong ruk le khap khat a timi cu a ra chuak. ⁵ A lu ah dar luchin aa chinh i thir ngaphaw angki aa hruk i cu angki cu a rih leiah pawng za le kul le nga a si. ⁶ Cun a ke ah ngal tuamnak dar phaw aa hruk i a liang ah dar fei aa bei. ⁷ Cun a feihlung cu thiamtlang bantuk a si i a feihmur thir cu pawng hleinga a rit; cun a phaw putu cu a hmaiah a kal. ⁸ A dir riangmang i Israel ralkap cu a hei hauh hna i, "Zeicahdah raldoh awk i i tian awkah nan hei chuah ve? Keimah cu Filistin mi ka si i nannih cu Saul sal nan si lo maw? Nanmah caah mi pakhat i thim u law, keimah sinah hin rung seh. ⁹ Keimah kha a ka doh khawh i a ka thah ahcun, kannih cu nan sal kan si lai; sihmanhsehlaw amah cu keimah nih ka tei i ka thah ahcun, nannih cu kan sal nan si lai i kan rian nan ṭuan lai," tiah a ti. ¹⁰ Cun Filistin mipa nih cun, "Nihin ah hin Israel ralkap cu keimah nih kan zuam hna; mi pakhat i thim u law, kan i tawng tuah lai," tiah a ti. ¹¹ Saul le Israel mi vialte nih Filistin mipa bia kha an theih tikah an lung a dong i an thin a phang ngaingai. ¹² Cun David cu Bethlehem khua i Jesse fapa a si. Jesse cu Efrath chung a si i fapa pariat a ngei. Saul chan ah khan cu pa cu a tar cang i a kum a upa cang. ¹³ Jesse fapa upa bik pathum hna nih khan Saul cu raltuknak ah an zulh i raltuknak i a kalmi a fapa pathum hna min cu, a chuak hmasa bik Eliab le a hun changtu Abinadab le a pathumnak Shammah an si. ¹⁴ David cu a hniang bik a si; a upa bik pathum hna nih cun Saul kha an zulh, ¹⁵ sihmanhsehlaw David cu a pa tuu kha Bethlehem i va cawngh awkah khan Saul sin cun aa chawk aa let lengmang. ¹⁶ Ni sawm li chung, Filistin mipa nih cun zingfa zanfa, a chuahhnawh hna i a dirhnawh lengmang hna. ¹⁷ Ni khat cu Jesse nih a fapa David cu, "Na ule caah vaireu ephah pakhat le changreu tlang hra hi i lak law, na ule sinah, riahhmun ah cun, khulrang in va kal tuah; ¹⁸ cun annih an thong khat haotu caah cawhnuk khal tlang hra hi i phorh fawn. Na ule kha zeitindah an um va zoh hna law, annih sinin hmelchunhnak pakhatkhat rak phor te," a ti. ¹⁹ Saul le a ule hna le Israel mi vialte cu Elah nelrawn chungah khan, Filistin mi hna he i do in an um, hna a ti. ²⁰ Cun David cu zingka tein a tho i tuu cu a cawngtu pakhat sinah a chiahtak hna i, thil kha a kalpi hna i Jesse nih a fial bantuk khan a kal; cun ralkapbu cu ral hla i sak pah in raldoh awk i i tiannak hmun i an chuah lioah khan riahhmun cu a va phan. ²¹ Cun Israel mi le Filistin mi hna cu i tuk awkah an rak i tiang, ralkapbu le ralkapbu i enhtonh in. ²² Cun David nih thil kha thilri zohkhenhtu sinah a chiah hna i ralkap hna sinah cun a va le i a ule cu a va biakchawnh hna. ²³ An sin i bia a chim lioah khan, zohhmanh, an miṭhawng bik, Gath khuami Filistin mi, a min Goliath a simi kha, Filistin ralkap chung cun a hung chuak i hmasa bantuk ṭhiamṭhiam khan Israel mi cu a zuamcawh hna. Cun David nih amah bia cu a theih. ²⁴ Israel mi vialte nih mipa kha an hmuh tikah an zam i an thin a phang ngaingai. ²⁵ Cun Israel mi hna nih cun, "Hi a hung chuak mipa hi na hmu maw? Israel zawmhtaih awk hrimhrim ah a hung chuak ko hi ta; cun hi pa a thattu hi cu siangpahrang nih laksawng tampi a pek lai i a fanu zong kha a pek lai i, a pa innchungkhar ngunkhuai a luatter lai," tiah pakhat le pakhat an i ceih. ²⁶ Cun David nih a pawng i a dirmi hna cu, "Hi Filistin mipa a that i hi thangchiatnak Israel mi sinin a ṭhialtu cu, a cungah zeitindah tuah a si hnga? Hi cuarpartan lomi Filistin mipa hi aho rialmal dah a hei si i Pathian nung ralkapbu a hei zawmhtaih hna hnga cu!" tiah a ti. ²⁷ Cun mizapi nih cun an leh i, "Hi pa a thattu cu kan chim bantuk khan a cungah tuah a si ko lai," tiah an ti. ²⁸ Cun a u upa bik Eliab nih mi hna sin i bia a chim kha a rak theih i David cungah cun a thin a hung i, "Zeidah na ra tuah?" Kha tuu, tlawmte kha ramlak ah khan aho sinah dah na kaltak hna? Na ninghngalte le raltuk zoh awkah na ra ko hih?" tiah a ti. ²⁹ Cun David nih, "Zei hen dah ka tuah i? Bia kaa khat chim thamtham cu," tiah a ti. ³⁰ Cun amah sin cun a dang pakhat sin leiah aa mer i cu bantuk ṭhiamṭhiam cun a chim; cun mi nih khan hmasa i an leh bantuk khan an leh ṭhan. ³¹ David nih a chimmi bia cu an theih tikah Saul kha an va chimh chin; cun amah kha a auh. ³² Cun David nih Saul sinah cun, "Amah ruangah hin aho hmanh an lungdong hna hlah seh; na salpa nih ka va kal lai i hi Filistin mipa hi ka va doh lai," tiah a ti. ³³ Cun Saul nih David cu, "Hi Filistin mipa va doh awkah hin na kal kho lai lo, zeicahtiah nang cu tlangvalte men na si i anih cu a tlanval ka in pei ralkap a si cang cu," tiah a ti. ³⁴ Sihmanhsehlaw David nih Saul sinah cun, "Na salpa nih hin ka pa caah tuu ka khal tawn i chiandeih siseh, vom siseh a rat i tuufa kha tuurun chungin a seh tikah, ³⁵ ka dawi tawn i ka tuk i a ka chung khan ka chuah tawn; cun a rak ka zuanh a si ahcun a hmurhmul in ka tlaih i ka tuk i ka thah tawn. ³⁶ Na salpa nih hin chiandeih si hna seh, vom si hna seh, ka thah hna; cun hi cuarpartan lomi Filistin mipa hi anmah lak i pakhat cu a si ve lai, Pathian nung ralkapbu hna a zawmhtaih hna caah hin," tiah a ti. ³⁷ Cun David nih, "Chiandeih tin chung le vom tin chungin a ka chuahtu Bawipa nih hi Filistin mipa kut chung hin a ka chuah ko lai," tiah a ti. Cun Saul nih David cu, "Va kal law, Bawipa cu na sinah um ko seh," tiah a ti. ³⁸ Cun Saul nih David cu a ralthuam khan a thuamh; dar luchin a lu ah a chinh i thir ngaphaw angki a hruk. ³⁹ Cun David nih cun ralthuam cungah cun a vainam cu aa bei, kal hnik aa zal i a kal kho lo, zeicahtiah cu bantuk cu aa hruk bal hna lo. Cu tikah David nih Saul sinah khan, "Hi hna he hin cun ka kal kho lo, zeicahtiah kaa nek hna lo," tiah a ti. Cun David nih aa phoih hna. ⁴⁰ Cun David nih cun a ṭhiangṭhunh kha aa lak i tiva in lung mil tete panga aa thim hna i a tuukhal zal, a saphaw zal ah khan aa sanh hna; a lungherhchehnak cu a kut in aa put i Filistin mipa kha a hei fuh. ⁴¹ Cun Filistin mipa kha a ra i David kha a rak naih, a phaw putu a hmai i a ummi he cun. ⁴² Cun Filistin mipa nih khan a hei zoh i David kha a hmuh tikah, zeite ah a rel lo; zeicahtiah amah cu mi sen tertarte, mi chuak thiam ngai, tlangval kate hi a si. ⁴³ Cun Filistin mipa nih cun David cu, "Uico maw ka si i fung he na ka rathnawh?" tiah a ti. Cun Filistin mipa nih cun a pathian hna kha i chalh in David cu chiat a serh. ⁴⁴ Filistin mipa nih cun David cu, "Ka sinah ra tuah, na sa kha van i a zuangmi va hna le vawlei i a ummi saram hna ka pek hna lai," tiah a ti. ⁴⁵ Cu tikah David nih cun Filistin mipa cu a thawh i, "Nang nih cun vainam le fei le fei nganpi he na ka chuahhnawh; sihmanhsehlaw kei nih cun ralkapbu Bawipa, Israel ralkapbu hna i an Pathian, na zawmhtaihmi min khan kan chuahhnawh. ⁴⁶ Nihin ni ah hin Bawipa nih nangmah cu keimah kut chungah a ka pek lai i kan thah lai i na lu kan tan lai; cun Filistin ralkapbu chung i a thimi ruak hna cu nihin ah hin van i a zuangmi va hna le vawlei i a ummi sahrang hna sinah ka pek hna lai; zeitintiah vawlei cung dihlak nih Israel mi lakah Pathian a um ti kha an hngalh nakhnga le ⁴⁷ hi aa pummi vialte nih hin, vainam le fei in Bawipa khamhnak hi a si lo ti kha an hngalh nakhnga; zeitintiah hi raltuknak cu Bawipa ta a si i nannih cu kan kut chungah pek nan si lai," tiah a ti. ⁴⁸ Filistin mipa nih khan David kha tawngh awkah a hun naih tikah, David cu ralkap an i tiannak lei ah khan, Filistin mipa he i ton awkah cun, khulrang in a va tli. ⁴⁹ Cun David nih a zal kha a vun i purh i lung pakhat kha a vun lak i a herh i a hei chaih i Filistin mipa kha a calpadar ah a khen; lung kha a cal ah cun a pil i a bawktakhup in vawlei ah a tlu. ⁵⁰ Cuticun David nih Filistin mipa kha, lungherhchehnak le lung pakhat in a tei i, Filistin mipa kha a khen i a thah; David nih nam aa ken lo. ⁵¹ Khi tikah David nih cun a hei tlikhnawh i Filistin mipa cungah cun a dir i a nam kha a lak i a kawng in a zuh i a thah i nam cun a lu kha a tan. Filistin mi nih an miṭhawng bik kha a thi cang tiah an hmuh tikah an zam. ⁵² Cun Israel mi le Judah mi hna cu an tho i an au i Filistin mi cu Gath le Ekron hauka tiang an dawi hna, cucaah hliammi Filistin mi hna cu Shaaraim in Gath le Ekron tiang lampi ah an ril liangluang ko. ⁵³ Cun Israel mi hna cu Filistin mi an dawi hnanak khan an ra kir i an riahhmun kha an rok. ⁵⁴ Cun David nih Filistin mipa lu kha a lak i Jerusalem ah a ratpi; sihmanhsehlaw a ralthuam cu a thlam chungah khan a chiahtak. ⁵⁵ Saul nih David kha Filistin mipa va doh awk i a chuah kha a hmuh tikah, a ralkapbu haotu Abner sinah khan, "Abner, hi tlangvalpate hi aho fapa dah a si?" tiah a ti. Cun Abner nih, "Na nunnak chalh in ka chim, maw siangpahrang, kan chim kho lo," tiah a ti. ⁵⁶ Cun siangpahrang nih khan, "Kha tlang valpa kha aho fapa dah a si hlat tuah u," tiah a ti. ⁵⁷ Cun David cu Filistin mipa a thahnak khan a hung kir ah, Abner nih cun a kalpi i a kut i Filistin mipa lu he cun Saul hmaiah a chuahpi. ⁵⁸ Cun Saul nih a sinah, "Aho fapa dah na si, tlangvalpa?" tiah a ti. Cun David nih, "Bethlehem khuami na sal Jesse fapa ka si," tiah a leh.

¹ Saul sinah bia kha a chim dih tikah, Jonathan nunnak cu David nunnak ah aa ṭhitchih i Jonathan nih amah nunnak aa dawt tluk khan a dawt. ² Cun cu ni cun Saul nih khan a lak i a pa inn ah kirter a siang ti lo. ³ Khi tikah Jonathan nih David sinah khan biakamnak a ser, zeitintiah amah nunnak bantukin a dawt. ⁴ Cun Jonathan nih aa aihmi puan kha aa phoih i David kha a pek, a ralthuam le a vainam le a likuk le a taisawm zong. ⁵ Cun David cu Saul nih a kuatnak paoh ah khan a hlawhtling; cucaah Saul nih ralkap hna haotu ah khan a ser. Cun mah hihi mi vialte mithmuh le Saul sinum hna mithmuh zongah khan thil ṭha a si. ⁶ Inn lei i an tlun lio, David nih Filistin mipa a thahnak in a kir tikah khan, Israel khua vialte in nu hna kha, hlasak pah le lampah in Siangpahrang Saul kha, khuang tete le lawmhnak hla le aw dawh tumnak hna he rak don awkah an chuak. ⁷ Cun nu hna cu lawmhnak an tuahpah khan hla in an i chawn i, "Saul nih a thong thong in a thah hna, David nih a sang sang in," tiah an ti. ⁸ Cun Saul cu a thin a hung ngaingai i hi chimnak nih hin a lawmh loter ngaingai; aa thawh i, "David vial cu a sang sang that ah an rel i kei tu cu a thong thong that ceo ah an ka rel; pennak hi dah ti lo cu zeidah cu hleiah a ngeih ding a um ti?" tiah a ti. ⁹ Cun cu ni thawk in Saul nih David cu a ngiat ziar. ¹⁰ Cun a thaizing ah thlarau ṭhalo Pathian sinin a rami kha Saul cungah a tlung i David nih ni khat hnu ni khat a tum tawn bang khan tingtang kha a tum lioah, a inn chungah molh bia kha a chim lengmang ko. Saul nih a fei kha a kut in aa put i ¹¹ "David kha vampang ah hlinh chih ning," tiah a ti i fei khan voi hnih a khawh. Sihmanhsehlaw David nih amah kha voi hnih a pianh manh. ¹² Saul nih David kha a ṭih; zei-cahtiah amah sinah khan Bawipa a um, sihmanhsehlaw Saul kha cu a chuahtak cang. ¹³ Cucaah Saul nih amah sin khan a ṭhial i thong khat haotu ah a ser i mi zapi hmaiah khan a chuak a lut lengmang. ¹⁴ Cun Bawipa kha amah sinah a um caah David cu a thil tuahmi vialte ah a hlawhtling. ¹⁵ Cun Saul nih a hlawh a tling ngaingai ti kha a hmuh tikah amah kha a zeuh ngaingai. ¹⁶ Sihmanhsehlaw Israel mi vialte le Judah mi vialte nih David kha an duh; zeitintiah amah cu annih hmaiah a chuak a lut lengmangmi a si. ¹⁷ Cun Saul nih David cu, "Hika ah hin ka fanu upa deuh Merab a um ko; nupi caah kan pek lai; keimah caah na ral bel ṭha ko law, Bawipa raldohnak cu do ko hna," tiah a ti. Zeitintiah Saul nih, "Keimah kut cun thi hlah seh, sihmanhsehlaw Filistin mi hna kut tu in thi deuh seh," tiah a ruah. ¹⁸ Cun David nih Saul sinah cun, "Keimah cu ahodah ka si i ka rualchan Israel mi lak i ka pa innchungkhar cu ahodah an si, siangpahrang tupa ka si hnga cu?" tiah a ti. ¹⁹ Sihmanhsehlaw Saul fanu Merab cu David he ṭhitter awk caan ah khan, Meholah mi Adriel sinah nupi caah a pek. ²⁰ Saul fanu Mikhal nih David kha a duh i cucu Saul kha an chimh i cu nih cun a lung a lawmhter. ²¹ Saul nih, "Amah cu a caah rap a si nakhnga le Filistin mi hna kut cu amah dotu a si nakhnga, amah cu pe ning," tiah a ruah. Cucaah Saul nih David cu a voi hnihnak a chimh i, "Atu cu ka tupa na si lai," tiah a ti. ²² Cun Saul nih a sinum hna cu, "David sinah a thli tein, ’Zohhmanh, siangpahrang nih nangmah cungah lawmhnak a ngei i a sinum vialte nih an in dawt; cucaah siangpahrang tupa cu si cang ko,’ tiah nan chim lai," tiah nawl a pek hna. ²³ Cun Saul sinum hna nih hi bia cu David hna theih ah an chim. Cun David nih, "Keimah bantuk misifak le aho zei rel a tong lomi caah hin, siangpahrang tupa si hi thil hmetuai ah dahra nan rel hi?" tiah a ti. ²⁴ Cun a sinum hna nih khan Saul cu, "David nih, cuti’n, khati’n, a ti," tiah an chimh. ²⁵ Khi tikah Saul nih, "Hi bangin David sinah cun, ’Siangpahrang nih, siangpahrang ral hna cungah khan phu a hlam nakhnga, Filistin mi hna cuarpar za khat dah ti lo cu man zei hmanh a duh lo,’ tiah nan chim lai," tiah a ti. Saul nih David cu Filistin mi hna kut in thihter awk kha a ruah. ²⁶ Cun a sinum hna nih khan amah bia cu David kha an chimh tikah, David cu siangpahrang tupa sinak ding nih khan a lawmhter. A caan kha a luan hlanah, ²⁷ David cu a mi hna he khan an tho i an kal i Filistin mi kha za hnih an thah hna i David nih an cuarpar cu a rak phorh hna i siangpahrang tupa a si nakhnga, siangpahrang sinah cun tling tein a pek hna. Cun Saul nih a fanu Mikhal cu nupi caah a pek. ²⁸ Sihmanhsehlaw Saul nih Bawipa kha David sinah a um ti le Israel mi vialte nih an duh ti kha a hmuh i a hngalh tikah, ²⁹ Saul nih cun David kha a ṭih chinchin. Cucaah Saul cu David ral a si zungzal ko. ³⁰ Cun Filistin bawi hna kha raltuknak ah an ra chuak tawn i an ra chuah fate David cu Saul sinum vialte hna nakkhan a hlawhtling deuh; cucaah a min cu an thangṭhat ngaingai ko.

¹ Cun Saul nih a fapa Jonathan le a sinum vialte hna kha, David kha nan thah lai, tiah a chimh hna. Sihmanhsehlaw Saul fapa Jonathan nih David kha a tlaihchan ngaingai. ² Cun Jonathan nih David cu, "Ka pa Saul nih thah an timh; cucaah zinglei ah cun i ralring tuah, hmun ken fiak ah um law i thup; ³ cun ka kal lai i na umnak lo lakah khan ka pa pawngah ka dir lai i nangmah kong kha ka pa cu ka ruah lai, cun zeizei ka hngalhmi a um ahcun kan chimh lai," tiah a ti. ⁴ Cun Jonathan nih a pa Saul sinah cun David cu a chimthiam i, "Siangpahrang nih a sal David cungah hin sualnak tuah hlah seh, zeicahtiah na cungah a sual lo i a tuahmi cu nangmah caah a ṭhami rian lengmang a si; ⁵ thih le thih tiin Filistin mipa kha a tuk i Israel mi vialte caah Bawipa nih teinak nganpi a tuah. Na rak hmuh i na rak i lawm; cucaah cun, zeicahdah, zeiruanglo i David thahnak thawngin zeihmanh a sual lomi thisen cungah sualnak na tuah kun lai?" tiah a ti. ⁶ Cun Saul nih Jonathan aw cu a zawn i Saul nih, "Bawipa nih a nun bangin, amah cu thah a si lai lo," tiah chiat a ser. ⁷ Cun Jonathan nih David cu a kawh i hi thil vialte cu Jonathan nih a hmuhsak. Cun Jonathan nih David cu Saul sinah a ratpi i a hlan bantuk khan a hmaiah a um ṭhan. ⁸ Cun ral a um ṭhan hoi i Filistin mi he i doh awkah David cu a kal, tampi a thah hna, cucaah a hmai in an zaam. ⁹ Cun Saul cu a inn chung i fei i put in a ṭhut lioah khan, Bawipa sinin a rami thlarau ṭhalo cu a cungah khan a tlung; cu lioah cun David kha tingtang a tum. ¹⁰ Cun Saul nih David cu fei in vampang i hlinh chih ding kha a kawl; sihmanhsehlaw Saul kha a pianh manh, cucaah fei kha vampang ah aa bunh. Cun David cu a zam i a luat. ¹¹ Cu zan ah cun Saul nih David inn ah khan zinglei ah a thah khawh nakhnga amah kha bawh awkah mi a thlah hna. Sihmanhsehlaw David nupi Mikhal nih, "Tuzan ah hin na nunnak naa khamh lo ahcun, thaizing ah cun thah na si lai," tiah a chimh. ¹² Cucaah Mikhal nih David cu thlalangawng in a vun thlak i a zam i a luat. ¹³ Mikhal nih milem pakhat kha a lak i ihkhun chungah cun a chiah i a lu ah meheh hmul chantling a tlinh i puan in a khuh. ¹⁴ Saul nih amah kha lak awkah mi a hei thlah hna tikah, "A zaw," tiah a rak ti. ¹⁵ Cun Saul nih David zoh awkah cun mi a hei thlah hna i, "A ihkhun in keimah sinah hun zawn u, ka thah nakhnga," tiah a ti. ¹⁶ Cun a fialmi hna kha an rung luh tikah, zohhmanh, milem kha, a lu ah meheh hmul chantling i i tlinh in ihkhun cungah khan a rak um ko. ¹⁷ Saul nih Mikhal sinah cun, "Zeicahdah hi bantukin na ka hlen i ka ral kha na kalter? Cu ca i amah a rak i zuh diam cang hi," tiah a ti. Cun Mikhal nih Saul cu a leh i, "Ka kalter tuah, zeicahdah nangmah cu kan thah lai, tiah cun pei a ka ti cu," tiah a ti. ¹⁸ Cun David cu a zam i a luat i Ramah ah Samuel sinah a ra i Saul nih a cung i a tuahmi vialte kha a chimh dih. Cun amah le Samuel cu an kal i Naioth ah an um. ¹⁹ Cun Saul cu, "Zohhmanh, David cu Ramah i Naioth ah a um," tiah an chimh. ²⁰ Khi tikah Saul nih David kha lak awkah mi a hei thlah hna; annih nih profet bu cu an holh cukmak len ko le Samuel kha an cungah haotu in a um kha an va hmuh tikah, Saul nih a thlahmi hna cungah khan Pathian thlarau cu a tlung i annih zong an holh cukmak ve. ²¹ Mah cucu Saul kha an chimh tikah, midang kha a thlah ṭhan hna; cun annih zong cu an holh cukmak ve. Cun Saul nih a voi thumnak ah mi a hei thlah ṭhan hna i annih zong cu an holh cukmak ve ṭhiamṭhiam. ²² Khi tikah amah hrimhrim Ramah ah cun a kal i Seku i a ummi tikhor nganpi kha a phan; cun, "Samuel le David kha khuazei ah dah an um?" tiah a hal hna. Cun pakhat nih, "Zohhmanh, Ramah khua chung i Naioth ah an um," tiah a ti. ²³ Cun khika in Ramah khua chung i Naioth ah cun a va kal i Pathian thlarau kha amah cungah cun a tlung ve i a kalpah cun, Ramah khua chung i Naioth a phak hlantiang a holh cukmak lengmang ko. ²⁴ Cun amah zong cu a hnipuan kha aa phoih ve i Samuel hmaiah khan bia a chim cukmak ve, cun cu ni cu chun nitlak, zan khuadei, pumlawng in a it. Cucaah, "Saul zong profet hna lakah aa tel ve cang dahra?" ti a si lan.

¹ Khi tikah David cu Ramah khua chung i Naioth khan a zam i Jonathan sinah a kal i, "Zeidah ka tuah? Zeidah ka mawhnak a si? Na pa hmaiah zeidah ka sualnak a si i ka nunnak a ka kawl hi?" tiah a ti. ² Cun anih nih, "A si hrimhrim lai lo! Na thi lai lo. Zohhmanh, ka pa nih hin thil ngan siseh, thil hme siseh zeihmanh keimah theihter loin a tuah lo; cun zeicahdah mah hi cu ka pa nih ka sinin a thuh lai? A thup hrimhrim lai lo," tiah a ti. ³ Sihmanhsehlaw David nih a leh i, "Ka cung i dawtnak na ngeih kha na pa nih fiang tein a hngalh i, ’Jonathan nih mah hi cu thei theng duh hlah seh, a lung lam a fak ai hnga,’ tiin a ruah lai. Sihmanhsehlaw biangai tein, Bawipa a nun bantuk le nangmah nunnak a nun bantukin, keimah le thihnak karlakah hin kar khat lawnglawng a um," tiah a ti. ⁴ Khi tikah Jonathan nih David sinah cun, "Na chimmi paoh kan tuahpiak lai," tiah a ti. ⁵ David nih Jonathan cu, "Zohhmanh, thaizing cu thla thar a si i siangpahrang sin i cabuai i ṭhut kha ka tlolh awk a si lo; sihmanhsehlaw a ni thumnak zanlei tiangin lo lakah kaa thuhnak hnga ka kalter tuah. ⁶ Cun na pa nih a ka hlam pingpang sual ahcun, nangmah nih, ’David nih an chungkhar dihlak ca i kum fate an ngeih tawnmi raithawinak kha Bethlehem khua ah a um caah, cu amah khua Bethlehem i va kal ta duak awk kha, hramhram in a ka nawl,’ tiah na ti lai. ⁷ Cun anih nih, ’A ṭha!’ a ti ahcun, na salpa caah hin a ṭha lai, sihmanhsehlaw a thin a hun ahcun, khi tikah, ṭhat lonak kha aa ruahchih tiah va hngal ko. ⁸ Cucaah nangmah nih na sal hi nangmah he biakamnak thiang chungah na luhpi cang caah, na sal cungah hin zaangfahnak ngei ko. Sihmanhsehlaw keimah chungah hin mawhnak a um a si ahcun, nangmah nih ka that ko; zeicahtiah, zeicahdah na pa sinah cun na ka kalpi len lai?" tiah a ti. ⁹ Cun Jonathan nih, "Cucu a si naisai lai lo! Nangmah cung i ṭhat lonak tlunter awk kha ka pa nih aa ruahchih ti ka hngalh ahcun, chim loin kan um hnga maw?" tiah a ti. ¹⁰ Cun David nih Jonathan sinah cun, "Na pa nih aw hrang in in let seh law, aho nih dah a ka chimh lai?" tiah a ti. ¹¹ Cun Jonathan nih David cu, "Ra, lo ah khin va kal u sih," tiah a ti. Cucaah an pahnih in lo ah cun an va kal. ¹² Cun Jonathan nih David cu, Bawipa, Israel Pathian cu biahngaltu si ko seh! Thaizing ah maw, a ni thumnak ni ah maw, atu caan hrawngah hin, ka pa cu ka hneksak tuah lai i, zohhmanh, David leiah ruahnak ṭha a ngeih ahcun, khi tikah nangmah sinah mi thlah lo le chimh loin kan um hnga maw? ¹³ Sihmanhsehlaw ka pa nih nangmah cu harnak pek an duh sual a si ahcun, him tein na kal nakhnga, cucu nangmah sinah ka phuan lo i kan kalter lo a si ahcun, Jonathan cungah Bawipa nih cu bantukin tuah seh law, cu nak tam zongin tuah ko seh. Ka pa sinah Bawipa cu a um tawn bantukin nangmah sinah um ko seh. ¹⁴ Ka nun rih a si ahcun, Bawipa, dawtnak zumh awk tlak kha ka cungah langhter tuah, ka thih nakhnga lo; ¹⁵ cun ka innchungkhar hna sinin a zungzal in zumh awk tlak na sinak kha chat hlah. Bawipa nih David ral vialte kha vawlei cungin a hloh dih hna tikah, ¹⁶ Jonathan min cu David innchungkhar sinin chah si hlah seh. Cun Bawipa nih David ral hna cungah phu hlam ko seh," tiah a ti. ¹⁷ Cun Jonathan nih David cu amah a dawtnak chalh in chiat a serter ṭhan; zeitintiah amah nunnak aa dawt bantuk te khan a dawt. ¹⁸ Cun Jonathan nih amah sinah cun, "Thaizing hi thla thar kha a si i kan in hlam ko lai, zeicahtiah na ṭhutnak kha a lawng lai. ¹⁹ Cun kiptuh ah cun kan in hlam ngaingai ko lai; khi tikah, kha kong kha a hung chuah tikah, naa thuhnak ah khan na va kal lai i khi lungpumh pinah khin na um lai. ²⁰ Cun hmuichon a kap bantukin kaa umter lai i a sirah cun thal pathum ka hun kah lai. ²¹ Cun zohhmanh, tlangval kha ka hei thlah lai i, ’Va kal law, thal kha va kawl hna,’ tiah ka ti lai. Cun tlangval sinah khan, ’Zohhmanh, thal kha nangmah in hi lei kap ah an um, rak la hna,’ ka ti ahcun, na rat awk a si lai, zeitintiah, Bawipa a nun bangin, nangmah caah hnangam a si i ṭih awk a um lo. ²² Sihmanhsehlaw tlangval cu, ’Zohhmanh, na piin ah thal kha an um,’ ka ti ahcun, na kal diam awk a si lai; zeitintiah Bawipa nih an kalter diam cang. ²³ Cun nangmah le keimah nih kan chimmi kongah cun, zohhmanh, Bawipa cu nangmah le keimah karlakah zungzal in a um ko," tiah a ti. ²⁴ Cucaah David cu lo lakah khan aa thup; thla thar kha a hung si tikah, siangpahrang cu rawl ei awkah a ṭhu. ²⁵ Siangpahrang cu voi dang tawn bantukin vampang pawng i a ṭhutdan cungah khan a ṭhu; Jonathan cu hmaitonh in a ṭhu, cun Saul sirah khan Abner a ṭhu, sihmanhsehlaw David ṭhutnak kha cu a lawng. ²⁶ Sihmanhsehlaw cu ni ah cun Saul nih zeihmanh a chim lo; zeitintiah, "Zeithil nih dik a tlunh rua; amah cu a thianglo i a si ko, a thianglo i a si hrimhrim ko lai," tiah a ruah. ²⁷ Sihmanhsehlaw a ni hnihnak ni, thla thar thaizing ah khan, David umnak cu a lawng ṭhiamṭhiam. Cun Saul nih a fapa Jonathan sinah khan, "Zeicahdah Jesse fapa hi nizan he nihin he rawl ei ah a rat lo?" tiah a ti. ²⁸ Jonathan nih Saul cu a leh i, "David nih Bethlehem khua i va kal ta duak awk kha hramhram in a ka nawl i, ²⁹ ’Ka innchung hna nih khi khua ah raithawinak an tuah i ka u nih khika i um awkah a ka hnek, cucaah ka kalter ko. Cucaah na hmaiah duhdawtnak ka hmuh a si ahcun, ka thlah law, ka ule cu va ka hmuhter tuah hna,’ tiah a ti. Hi ruangah hin siangpahrang cabuai i a rat lonak cu a si," tiah a ti. ³⁰ Cu tikah Saul thinhunnak cu Jonathan cungah a alh ciammam i, "Nang, milolak le ralchanh hmangmi nu fapa, nangmah lila ningzahnak caah le na nu pum lawnnak ningzahnak caah, Jesse fapa kha naa thim cang, tiah ka hngal lo mei? ³¹ Zeicahtiah, Jesse fapa hi, vawleicung i a nun chung paohpaoh ahcun, nangmah siseh, na pennak siseh, a hmun bal lai lo. Cucaah mi hei thlah hna law, ka sinah ratpi u, zeitintiah a thi hrimhrim lai," tiah a ti. ³² "Zeicaahdah a thih lai, zeidah a tuah i?" tiah Jonathan nih a leh. ³³ Khi tikah Saul nih cun Jonathan cu a fei in a hei khawh i thah a zalh, cucun Jonathan nih khan a pa i David thah a timh taktak cu fiang tein a hngalh. ³⁴ Cun Jonathan cu thinhung ngaiin cabuai cun a tho i thla ni hnihnak ni ah cun rawl a ei lo; zeitintiah a pa nih David kha thangchiat a phorhter caah David kha a ngaihchiatpi ngaingai. ³⁵ Zinglei ah tlangval note pakhat kha aa kalpi i lo chung i David he an i tiammi hmun ah khan a va kal. ³⁶ Cun a tlangvalpa sinah cun, "Va tli law, ka kahmi thal khi va char hna," tiah a ti. Cun tlangvalpa cu a tlik lioah khin, thal dang pakhat a pinah khan a hei kah. ³⁷ Cun tlangvalpa cu Jonathan nih a kahmi thal hmun a hei phak tikah khan, Jonathan nih tlangvalpa cu a hei auh i, "Thal kha na pinlei ah a si lo mei?" tiah a ti. ³⁸ Cun Jonathan nih tlangvalpa cu a hei auh i, "Khulrang in i namhnawh, um hlah," tiah a ti. Cucaah Jonathan tlangvalpa nih khan thal kha a char zokzok hna i a bawipa sinah khan a ra. ³⁹ Sihmanhsehlaw tlangvalpa nih khan zeihmanh a hngal lo; Jonathan le David lawng nih khan thil umtuning cu an hngalh. ⁴⁰ Cun Jonathan nih a hriamnam cu tlangvalpa kha a pek hna i amah cu, "Va tlung law, khua chungah hei phor hna," tiah a ti. ⁴¹ Tlangvalpa kha a kal dih cangka, lungpon sir khan David cu a hung chuak i vawlei ah a bawk i voi thum a kun; cun pakhat le pakhat an i hnam i pakhat le pakhat an i ṭah, David kha a zualhma khun. ⁴² Cun Jonathan nih David cu, "Dai tein va kal ko, zeicahtiah, ’Keimah le nangmah karah le ka tefa hna le na tefa hna karlak ah, zungzal in, Bawipa cu um ko seh,’ tiin pei Bawipa min in kan pahnih in chiat kan ser ṭi cang kha," tiah a ti. Cun a tho i a kal; Jonathan cu khua chungah a lut.

¹ Cun David cu Nob khua i tlangbawi Ahimelek sinah khan a ra; cun Ahimelek cu David ton awkah khan ther lengmang in a ra i amah sinah cun, "Zeicahdah nangmah lawng na si, ahohmanh na sinah an i tel lo?" tiah a ti. ² Cun David nih tlangbawi Ahimelek sinah cun, "Siangpahrang nih rian pakhat a ka fial i, ’Kan fialmi rian le bia kan beohmi hi ahohmanh nih hngal hna hlah seh,’ tiah a ka ti. Cun cu hmun cu hmun ah kan i tong lai, tiin tlangval hna kha bia ka tiam cang hna. ³ Cucaah atu ah na kut ah zeidah na ngeih? Changreu hlum nga in ka pe tuah, asiloah, hika i a ummi paoh zong," tiah a ti. ⁴ Cun tlangbawi nih khan David cu a leh i, "Changreu sawhsawh cu ka ngei lo, sihmanhsehlaw changreu thiang cu a um; tlangval hna cu nu sinin an i thianhhlimh paoh ahcun," tiah a ti. ⁵ Cun David nih tlangbawi kha a leh i, "Rian pakhatkhat ca i ka kal tikah a si tawn bangin, biangaite chim in, nu sinin kan i thianhhlimh ko; khualtlawn sawhsawh tik hmanh ah tlangval hna umkheng hi an thiang tawn ko; nihin ah hin cun zeitluk in dah an umkheng cu a thian chinchin lai?" tiah a ti. ⁶ Cucaah tlangbawi nih khan changreu thiang kha a pek; zeitintiah khika ah khan Hunh camcinmi changreu dah ti lo cu changreu dang a um lo, cu changreu cu Bawipa hmai in ṭhial a si ni ah changreu lum in rawlh ṭhan tawnmi a si. ⁷ Cu ni ah cun, khika ah khan, Saul sinum hna lak i pakhat, Bawipa hmai i taantermi a um; amah a min cu Doeg a si, Edom mi a si i Saul saṭil khaltu hna lak i upa bik a si. ⁸ Cun David nih Ahimelek cu, "Hika ah hin fei siseh, vainam siseh, na ngei pingpang lo maw? Zeitintiah siangpahrang rian kha khulrang in tuah a herh caah ka vainam siseh, ka hriamnam siseh, kaa lak manh hna lo," tiah a ti. ⁹ Cun tlangbawi nih cun, "Elah nelrawn i na thahmi, Filistin mi Goliath i a nam kha, zohhmanh, tlangbawi angki hnulei ah khin puan in aa zual i a um ko; mah khi naa lak duh ahcun i lak ko, zeicahtiah mah khi lawng khi a um," tiah a ti. Cun David nih, "A dang khi bantuk khi a um lo, ka pe tuah," tiah a ti. ¹⁰ Cun David cu a tho i khi ni ah Saul sinin a zam i Gath siangpahrang Akhish sinah a kal. ¹¹ Cun Akhish sinum hna nih cun a sinah, "Mah hihi an ram siangpahrang David kha a si lo maw? An lam pah in, "Saul nih a thongthong in a thah hna, David nih a sangsang in," tiin pakhat le pakhat hla an i leh lo maw kha?" tiah an ti. ¹² Cun David nih hi bia cu biatak tein a ruah i Gath siangpahrang Akhish cu a ṭih ngaingai. ¹³ Cucaah an hmaiah a umtu ziaza cu a thlen i an kut chungah cun aa hruhter, kutka innkhar cung hawi hna ah khan zei zei khi dik a ṭial hna i a cil hawi hna kha a khahmul ah khan a luanter. ¹⁴ Cu tikah Akhish nih a sinum hna cu, "Zohhmanh u, mihrut a si ti nan hngalh ko; a si kun ahcun zeicahdah ka sinah nan ratpi? ¹⁵ Mihrut ka bau hna caah maw hi pa hi ka hmai i mihrut ziaza langhter awkah nan ratpi? Hi pa hi ka inn ah a luh awk a si hnga maw?" tiah a ti.

¹ Cun David cu cuka cun a chuak i Adullam lungkua ah khan a zam; cun a unau hna le a pa innchungkhar vialte nih an theih tikah, khika ah amah sinah cun an vung kal. ² Cun harnak a tongmi paoh le leiba a ngeimi paoh le a lung a tling lomi paoh nih khan amah cu an fuh; cun annih hna haotu ah a cang. Cun amah sinah cun mi za li tluk an um. ³ Cun David cu khika in Moab ram Mizpah khua ah a kal; cun Moab siangpahrang sinah cun, "Ka pa le ka nu cu, Pathian nih keimah caah zeidah a tuah lai, ti kha ka hngalh hlantiang, na sinah um hna seh, tiah kan nawl," tiah a ti. ⁴ Cun Moab siangpahrang sinah cun a chiahtak hna i David cu ralhruang chung i a um chung vialte, a sinah cun an rak um. ⁵ Cun profet Gad nih David cu, "Ralhruang chungah um ti hlah, va kal law, Judah ram chungah va lut tuah," tiah a ti. Cucaah David cu a kal i Hereth tupi chungah khan a lut. ⁶ Cun Saul nih, David le a sin i a ummi hna kha an hmuh hna, ti kha a theih. Saul cu Gibeah ah, tlang bo pakhat ah, tamarisk thingkung toiah, a fei i put in a ṭhu i a sinum vialte hna cu a velchum in an dir. ⁷ Cun a velchum i a dirmi a sinum hna sinah cun Saul nih a thawh i, "Nannih Benjamin mi hna, thei tuah u; Jesse fapa nih cun nan dihlak te hin maw lo le mitsur dum an pek cio hna lai i a thongthong haotu ah le a zaza haotu ah an ser cio hna lai, ⁸ nannih i nan dihlak in nan ka rawiphiar len ko hi? Ka fapa nih Jesse fapa he ṭanṭinak a tuah tikah, ahohmanh nih ka sinah nan phuang lo i ka fapa nih ka sinum kha nihin ah a si bantuk hin, keimah doh awk le keimah bawh awkah a forh tikah, keimah a ka ngaihchiatpitu pakhat hmanh nan um lo i a phuan zong keimah sinah ahohmanh nih nan phuang fawn lo," tiah a ti. ⁹ Cu tikah Edom mi Doeg, Saul sinum hna pawng i a dirmi nih khan a hun leh i, "Jesse fapa cu Nob ah, Ahitub fapa Ahimelek sinah a rat kha ka hmuh i, ¹⁰ Bawipa kha a halpiak i rawl kha a pek i Filistin mi Goliath nam kha a pek," tiah a ti. ¹¹ Khi tikah siangpahrang nih Ahitub fapa tlangbawi Ahimelek le a pa innchungkhar vialte, Nob ah a ummi tlangbawi hna cu auh awkah mi a thlah hna; cun an dihlak in siangpahrang sinah khan an ra. ¹² Cun Saul nih, "Ahitub fapa, thei tuah," tiah a ti. Cun anih nih, "Hika ah ka um, ka bawipa," tiah a leh. ¹³ Cun Saul nih amah cu, "Zeicahdah nannih nih nan ka rawiphiar, nangmah le Jesse fapa nih hin, nangmah nih changreu le nam kha na pek i Pathian sin hawi ah na hei halpiak, cucaah cun amah nih keimah cu doh awk le bawh awkah, nihin ah a si bang hin a tho," tiah a ti. ¹⁴ Cun Ahimelek nih siangpahrang cu a leh i, "A si ah, na sinum vialte lakah, siangpahrang tupa a simi, nangmah pum rungvengtu hna haotu, na inn chungah upat a simi David tluk in, ahodah zumh awk tlak a um? ¹⁵ Nihin hi maw amah caah Pathian ka chawnh hmasa bik a si? Si hlah! Siangpahrang nih na sal cungah hin siseh, ka pa innchungkhar vialte cungah hin siseh, zeihmanh khing sawh hlah seh; zeicahtiah na sal nih hin hi kong vialte hi zeihmanh ka hngal lo, a tam siseh, a tlawm siseh," tiah a ti. ¹⁶ Cun siangpahrang nih, "Na thi hrimhrim lai, Ahimelek, nangmah le na pa innchungkhar vialte," tiah a ti. ¹⁷ Cun siangpahrang nih a pawng i a dirmi ralvengtu sinah khan, "I mer law, Bawipa tlangbawi kha that hna; annih zong David sin i an i ṭom caah a zam kha an hngal nain ka sinah an phuang lo," tiah a ti. Sihmanhsehlaw siangpahrang sinum hna nih khan Bawipa tlangbawi hna thah awkah khan an kut an chuah duh lo. ¹⁸ Cu tikah siangpahrang nih Doeg kha, "Nangmah kha i mer law, tlangbawi kha that hna," tiah a ti. Cun Edom mi Doeg cu aa mer i tlangbawi kha a thah hna; cun khi ni ah la hmang ṭhia tlangbawi angki aa hrukmi mi sawm riat le panga a thah hna. ¹⁹ Cun tlangbawi khua Nob kha vainam in a tuk; pa he nu he ngakchia he hnuktlai lio he, cawtum he laa he tuu he, vainam in a sam hna. ²⁰ Sihmanhsehlaw Ahitub fapa Ahimelek i fapa hna lakah khan pakhat, a min Abiathar a simi cu a luat i David sinah khan a zaam. ²¹ Cun David kha Abiathar nih cun, Saul nih Bawipa tlangbawi kha a thah hna, tiah a chimh. ²² Cun David nih Abiathar sinah cun, "Kha ni ah khan, Edom mi Doeg a um ve tikah khan, Saul a chimh ṭheo lai, tiah ka hngalh cia ko. Na pa innchungkhar chung mi vialte cu keimah nih ka thihter hna a si ko. ²³ Ka sinah um ko, ṭih hlah; zeicahtiah ka nunnak a ka kawlmi cu nangmah nunnak an kawlmi a si ve ko; keimah sinah cun na him ko lai," tiah a ti.

¹ David cu, "Zohhmanh, Keilah kha Filistin mi nih an tuk i phuhri i rawl kha an chuh hna," tiah an chimh. ² Cucaah David nih Bawipa cu a hal i, "Hi Filistin mi hna hi ka va kal in ka va tu hna lai maw?" tiah a ti. Cun Bawipa nih David cu, "Va kal law, Filistin mi kha va tu hna law, Keilah kha va khamh tuah," tiah a ti. ³ Sihmanhsehlaw David cu a mi hna nih, "Zohhmanh, hika Judah ram chung hmanh ah kan ning a ṭi; Keilah khua i vung kal i Filistin ralkapbu hna vung tuk cu zeitluk in dah kan ṭih chinchin lai?" tiah an ti. ⁴ Cun David nih Bawipa cu a hal ṭhan. Cun Bawipa nih a leh i, "Tho law, Keilah ah cun vung kal ko; zeitintiah Filistin mi hna cu na kut chungah kan pek lai," tiah a ti. ⁵ Cun David le a mi hna cu Keilah ah cun an kal i Filistin mi hna he cun an i tu, cun an saṭil hna kha an lakpiak hna i annih kha tampi an thah hna. Cuticun David nih Keilah khuami hna cu a luatter hna. ⁶ Ahimelek fapa Abiathar nih David sinah, Keilah i a zam tikah khan, tlangbawi angki pakhat he a rung. ⁷ Cun Saul kha, David cu Keilah ah a ra cang, tiah an chimh. Cun Saul nih, ’Amah cu keimah kut chungah Pathian nih a ka pek cang; zeitintiah kutka le hrenhnak a ngeimi khua ah a luhnak thawngin, amah le amah aa hrenh khumh cang," tiah a ti. ⁸ Cun Saul nih mi vialte kha, Keilah i vung kal i David le a mi hna kha vung kulh awkah, raldoh awkah a auh hna. ⁹ David nih Saul nih ka cungah ṭhat lonak kha tuah awkah khua a khaan ti kha a hngalh; cun tlangbawi Abiathar sinah khan, "Hika ah hin tlangbawi angki kha rak pu tuah," tiah a ti. ¹⁰ Cun David nih, "Maw Bawipa, Israel Pathian, Saul nih Keilah ah rat i khua kha keimah ruang i hrawh aa tim ti kha na sal nih ka theih hrimhrim ko. ¹¹ Keilah mi nih hin keimah cu amah kut chungah an ka pe lai maw? Na sal nih ka theih bang hin Saul cu a rung hnga maw? Maw Bawipa, Israel Pathian, na sal hi ka chim tuah, tiah kan nawl" tiah a ti. Cun Bawipa nih, "A rung lai," tiah a ti. ¹² Cun David nih, "Keilah khuami nih hin keimah le ka mi hna hi Saul kut chungah an kan pe lai maw?" tiah a ti. Cun Bawipa nih, "An in pek hna lai," tiah a ti. ¹³ Cun David le a mi za ruk tluk a simi hna cu an tho i Keilah khan an chuak i an kal khawhnak paoh ah an kal. David cu Keilah khua in a chuak cang ti kha Saul cu an chimh tikah va tuk awk kha aa ṭhul. ¹⁴ Cun David cu ramlak i ralhruang chungah khan a um, Zif Ramlak tlangram ah khan. Cun Saul nih ni fate in a kawl, sihmanhsehlaw Pathian nih amah kha a kut chungah a pe lo. ¹⁵ Saul nih amah kha thah awkah a kawl caah David kha a thin a phang. David cu Zif Ramlak chung Horesh ah a um. ¹⁶ Cun Saul fapa Jonathan kha a tho i David sinah Horesh ah khan a kal i amah kha Pathian ah a kut a fehter. ¹⁷ Cun amah kha, "Na thinphang hlah; zeitintiah ka pa Saul kut nih nangmah cu an hmu bal lai lo; nangmah cu Israel siangpahrang na si lai i keimah cu an changtu ka si lai; ka pa Saul zong nih mah hi a hngalh ko," tiah a ti. ¹⁸ Cun an pahnih in Bawipa hmaiah biakamnak an ser; David cu Horesh ah khan a rung um i Jonathan cu inn ah a tlung. ¹⁹ Cun Zif mi hna cu Gibeah ah Saul sinah an va kal i, "David cu kanmah lakah, Horesh ralhau chungah, Jeshimon thlanglei i a ummi Hakhilah tlang cungah, aa thup ko lo maw? ²⁰ Cucaah maw siangpahrang, run kha na lung sa duh thah a sining te khan rung tuah; cun kannih kan rak tuah ve awk cu amah kha siangpahrang kut chung i pek kha a si ko lai," tiah an ti. ²¹ Cun Saul nih, "Bawipa nih thluachuah in pe ko hna seh; zeitintiah keimah cungah zaangfahnak nan ngei. ²² Va kal rih u law, va fiang chin rih tuah u, a um kalnak le khika ah aho nih dah a hmuh ti kha va hngal u law va zoh u, zeitintiah amah cu a zer ngai, tiah an ka chimh. ²³ Cucaah cun, aa thuhnak hmun vialte kha vaa chingchiah u law, ka sinah a dik hrimhrimmi theihnak he ra ṭhan u. Khi tikah nannih sinah ka kal lai i hi ram chungah a um paohpaoh ahcun, Judah mi a thongthong vialte hna lakah hin, amah cu ka kawl lai," tiah a ti. ²⁴ Cun an tho i Saul hmaiah, Zif ah khan an kal. David le a mi hna cu Jeshimon in thlanglei, Arabah ram chung i Maon ramlak ah khan an um. ²⁵ Cun Saul le a mi hna cu amah kawl awkah khan an kal. Cun David cu an chimh; cucaah Maon ramlak i a ummi lungpi ah khan a vung kal. Cun mah cucu Saul nih a theih tikah, Maon ramlak ah cun David kha a dawi lengmang. ²⁶ Saul cu tlang khattelei kam khan a kal i David le a mi hna cu tlang khattelei kam khan an kal, cun Saul le a mi hna nih khan David le a mi hna kha tlaih awkah an naih chin lengmang hna caah David cu Saul sin khan khulrang in a zam; ²⁷ khi tikah khan lamkaltu pakhat cu Saul sinah khan a ra i, "Khulrang in ra tuah, zeicahtiah ram kha Filistin mi nih an chim," tiah a ti. ²⁸ Cucaah Saul nih David dawi kha a kirtak i Filistin mi kha a doh hna; cucaah cuka hmun cu Luatnak Lungpi tiah kawh a si. ²⁹ Cun David cu cuka cun a hung kal i Engedi ralhruang chungah khan aa thup.

¹ Saul cu Filistin mi a dawi hnanak khan a kir tikah, "Zohhmanh, David cu Engedi ramlak ah a um," tiah an chimh. ² Khi tikah Saul nih Israel mi lakin thimmi mi thong thum a lak hna i Sathar Lungpang timi hmaiah khan David le a mi hna kawl awkah cun a kal. ³ Cun lam pawng i tuu kiam hna cu a hei phan i cuka ah cun lungkua pakhat a rak um i Saul cu zun awkah a va lut. David le a mi hna cu lungkua a chung bik ah cun an ṭhu ko. ⁴ Cun David cu a mi hna nih khan, "Zohhmanh, na ral cu na kut chungah kan pek lai i nangmah nih a ṭha na tining paoh in a cungah na tuah lai, tiah Bawipa nih an timi ni kha mah hihi a si cang," tiah an ti. Cun David cu a tho i a thlite in Saul puanki par kha a va hleh. ⁵ Cun a hnuah cun Saul puanki par a va hleh caah khan David cu lung sivang in a um. ⁶ A mi hna sinah khan, "Amah cu Bawipa chiti thuhmi kha a si caah, amah cung i ka kut samh awkin, Bawipa chiti thuhmi ka bawipa cungah hi thil ka tuahmi hi Bawipa nih ka thlauh ko seh," tiah a ti. ⁷ Cuticun hi bia hin David nih a mi hna kha a lem khawh hna i Saul tuk kha a onh hna lo. Cun Saul cu a tho i lungkua khan a chuak i a kal. ⁸ A hnuah David zong cu a tho i lungkua chung khan a chuak i Saul kha, "Siangpahrang ka bawipa!" ti in a hei auh. Cun Saul nih a hnulei kha a hei zoh tikah David nih vawlei lei hoih in a kun i upatnak kha a tuah. ⁹ Cun David nih Saul cu, "Zeicahdah, ’Zohhmanh, David nih nangmah fahnak kha a kawl,’ tiin an timi hna bia kha na ngaih? ¹⁰ Zohhmanh, zeitintiah Bawipa nih nangmah cu nihin ah, lungkua ah khan, keimah kut chung i an pek kha, nangmah mit nih nihin hrimhrim ah a hmuh cang; mi cheu nih cun nangmah thah awk kha an ka fial, sihmanhsehlaw keimah nih kan zuah. ’Ka bawipa cu Bawipa chiti thuhmi a si caah a cungah ka kut ka samh lai lo,’ tiah ka ti. ¹¹ Zohhmanh, ka pa, ka kut chung i na puanki par hi zohhmanh; na puanki par ka hlep nain nangmah kan thah lonak ah hin, ka kut chungah ṭhat lonak siseh, rawinak siseh, a um lo ti kha na hngalh lai i na hmuh ko lai. Nangmah nih ka nunnak kha lak awkah na kawl lengmang nain, na cungah ka sual lo. ¹² Keimah le nangmah karlakah Bawipa nih bia kan ceih ko seh, Bawipa nih nangmah cungah phu ka hlampiak ko seh; sihmanhsehlaw ka kut nih cun an tu lai lo. ¹³ Hlanlio mi hna phungthluk ah, ’Miṭhalo chungin ṭhat lonak a chuak,’ ti a si; sihmanhsehlaw ka kut nih cun an tu lai lo. ¹⁴ Israel siangpahrang nih hin ahodah a chuahhnawh? Ahodah na dawimi hi a si? Ui thi cia! Uihli a si ko! ¹⁵ Cucaah Bawipa cu biaceihtu si seh law, nangmah le keimah karlak bia hi chat seh, ka zohpiak seh law ka bia hi ka chimpiak seh law, nangmah kut chung hin ka chuah ko seh," tiah a ti. ¹⁶ Hi bia cu David nih a chim dih hna tikah Saul nih, "Mah hihi nangmah aw a si maw, ka fapa David?" tiah a ti. Cun Saul cu thangpi in a ṭap. ¹⁷ David sinah cun, "Nangmah cu keimah nakin na ding deuh, zeitintiah kei nih chiatnak in kan cham zongah nang nih cun ṭhatnak in na ka cham. ¹⁸ Bawipa nih keimah cu nangmah kut chung i a ka chiah tik i na ka thah lo caah hin, ka cung i zaangfahnak na tuahmi kha nihin ah hin na langhter. ¹⁹ Zeitintiah mipa nih a ral kha a hmuh ahcun, him tein a kalter ko hnga maw? Cucaah nihin i ka cung i na tuahmi caah hin Bawipa nih ṭhatnak in in lehrul ko seh. ²⁰ Cun atu cu, zohhmanh, nangmah cu siangpahrang na si hrimhrim lai i Israel pennak cu nangmah kut ah fehter a si lai, ti kha ka hngalh. ²¹ Cucaah, keimah hnuah ka tefa hna cu na hloh hna nakhnga lo le ka min cu ka pa innchungkhar chungin na hrawh nakhnga lo, Bawipa min in ka sinah chiat ser tuah," tiah a ti. ²² Cun David nih mah cucu Saul sinah chiat in a ser. Khi tikah Saul cu a inn ah a tlung, sihmanhsehlaw David le a mi hna cu ralhau chungah khan an hung kal.

¹ Cun Samuel kha a thi i Israel mi vialte nih an i pum i an ṭah i Ramah khua i a inn ah khan an vui. Khi tikah David cu a tho i Paran ramlak ah khan a vung kal. ² Cun Maon ah khan mipa pakhat a um i a rian ṭuannak cu Karmel ah a si. Cu pa cu a rum ngaingai; tuu thong thum le meheh thong khat a ngei Amah cu Karmel ah khan a tuu hmul a met hna. ³ Cu pa a min cu Nabal a si i a nupi min cu Abigal a si. Minu cu a fimmi le aa dawhmi a si, sihmanhsehlaw mipa cu mikhepkha le ziaza ṭhalo a si; amah cu Kaleb mi a si. ⁴ David nih ramlak ah cun, Nabal nih a tuu hmul kha a meh hna tiah a theih. ⁵ Cucaah David nih tlangval pahra a thlah hna i David nih tlangval hna sinah cun, "Karmel ah hung kal u law, cun Nabal kha va tong u law, ka min in biakchawnhnak pe u. ⁶ Cun hi bangin amah cu, ’Nangmah cungah daihnak um ko seh, cun na innchungkhar cungah daihnak um seh law, na ngeihmi vialte cungah daihnak um ko seh. ⁷ Nangmah nih tuu hmul mettu na ngei hna ti kha ka theih; cun na tuukhal hna cu kan sinah an um i an cungah harnak zeihmanh kan tuah lo i Karmel i an um chung vialte zeihmanh an thlau lo. ⁸ Na tlangval kha hal hna law an in chimh ko lai. Cucaah puai ni i kan rat caah hin ka tlangval hna hi na hmaiah mithmai ṭha hmuhter ko hna. Na sal hna le na fapa David hi na ngeihmi paoh rak kan pe ko sawh, a ti,’ tiah nan va ti lai," tiah a ti. ⁹ David tlangval hna cu an rat tikah hi vialte cu David min in Nabal kha an chimh; cun annih nih an ngan. ¹⁰ Cun Nabal nih David sinum hna cu a leh hna i, "David cu ahodah a si? Jesse fapa cu ahodah a si? Atu caan lioah hin an bawile sinin a zammi sal tampi an um. ¹¹ Ka tuu hmul mettu hna caah ka thahmi sa le ka changreu le ka ti kha i lak in khuazei in an ra ti ka hngalh lomi minung kha ka pek hna lai maw?" tiah a ti. ¹² Cucaah David tlangval hna cu an i let i an kir i hi vialte kha an chimh dih. ¹³ Cun David nih a mi hna cu, "Nan vainam i thlaih dih uh," tiah a ti hna. Cun an dihlak in an vainam cu an i thlaih; David zong nih a vainam cu aa thlaih ve; cun David cu za li tluk nih an hun zulh i za hnih nih an thil kha an rak hngah. ¹⁴ Sihmanhsehlaw Nabal sinum hna lak i pakhat nih Nabal nupi Abigail kha a va chimh i, "Zohhmanh, David nih kan bawipa kha biakchawnh awkah ramlak in mi a rak thlah hna i annih cu a rak sik hna. ¹⁵ Sihmanhsehlaw mi hna cu kan cungah an rak ṭha ngaingai ṭung i harnak zeihmanh kan ing lo i lo chung i kan um lio zongah zeihmanh kan thlawtthlau hna lo, anmah sin i kan kal chung paohpaoh cu; ¹⁶ annih cu an sin i tuu cawng in kan um chung vialte zan ah siseh, chun ah siseh, kan caah hauhruang an si. ¹⁷ Cucaah mah hihi hngal law zeidah ka tuah lai ti kha i ruat tuah; zeitintiah kan bawipa le a innchungkhar vialte cung i ṭhat lonak tuah kha timh a si cang, amah hi ahohmanh nih chawnh khawh loin michiakha a si fawn ṭung," tiah a ti. ¹⁸ Khi tikah Abigail cu aa namhnawh i changreu hlum za hnih le mitsur hang cua hnih le chumh awk i can ciami tuu panga le vaireu rel nga le mitsur bor za khat le theipi hlum za hnih, aa lak hna i laa cungah a chuan hna. ¹⁹ Cun a tlangval hna cu a thawh hna i, "Ka hmaiah rak kal u, zohhmanh u, nan hnu in kan zulh hna lai," tiah a ti. Sihmanhsehlaw a va Nabal kha a chim lo. ²⁰ Cun laa kha aa cit i tlang phen i a vung zuan lioah khan, zohhmanh, David le a mi hna cu amah leiah khan an rung i a ton hna. ²¹ Cun David nih khan, "Hi pa i a ngeihmi thil vialte hi pakpalawng ah dah mu ramlak ah ka hei congh tawn i a ngeihmi vialte cu pakhat hmanh tlau loin a hei um; anih nih ṭhatnak cu chiatnak in a ka rulh; ²² thaizing tiang amah ta a simi a pa pakhat zong ka nganh a si ahcun, hi bantukin Pathian nih David cungah tuah seh law, hi nak tam deuh zongin tuah ko seh," tiah a rak ti. ²³ Cun Abigail nih David kha a hmuh tikah aa hnawchan i a laa khan a ṭum i David hmaiah a kun i a lu kha a khun. ²⁴ A ke hramah khan a bawk i, "Keimah cung lawnglawng ah hin, ka bawipa, mawhnak kha um ko seh; na salnu hi na hna theih ah bia chimter ko law, na salnu bia hi ka ngaihpiak ko sawh. ²⁵ Ka bawipa nih hi michiakha, Nabal hi zei ah relpiak loin um ko seh, zeitintiah a min bantukte hi amah cu a si ko; Nabal a min a si bang, mihrut a si ko; sihmanhsehlaw ka bawipa nangmah na tlangval na rak thlahmi hna cu keimah na salnu nih hin ka rak hmu hna lo. ²⁶ Cucaah cun ka bawipa, Bawipa a nun bantuk le na nunnak a nun bantukin, thisen chuah mawhnak le nangmah nih na kut hrimhrim in phuhlam tuahnak kha Bawipa nih tuah loin an umter caah, na ral hna le ka bawipa cungah ṭhat lonak tuah awk a kawlmi hna cu Nabal bantuk si ko hna seh. ²⁷ Cun na sal nih ka bawipa sinah ka rak putmi laksawng hi ka bawipa zultu tlangval hna cu pek si hna seh. ²⁸ Na salnu ka sualnak cu ka ngaithiam ko sawh; zeitintiah ka bawipa nih Bawipa raltuknak kha a tuk caah Bawipa nih ka bawipa cu a fekmi inn a serpiak ṭheo lai i na nun chung paohpaoh nangmah chungah ṭhat lonak hmuh awk a um lai lo. ²⁹ Mi nih nangmah kha dawi awk le na nunnak kha kawl awkah an in thawhhnawh ahcun, ka bawipa nunnak cu Bawipa na Pathian zohkhenhnak chung i a ummi minung hna nunnak tom chungah khan tom chih a si lai; cun na ral hna nunnak tu cu lungherhchehnak ṭe karlak chung in cheh bantukin a cheh hlo hna lai. ³⁰ Cun Bawipa nih ka bawipa cungah nangmah kong i a chimmi ṭhatnak vialte kha a tuah dih tikah le Israel cungah bawi i an chiah tikah, ³¹ zei ruang lo i thisen chuahnak kongah siseh, mah theng nih phu va hlamnak kongah siseh, ka bawipa nih zeihmanh na tuah lo caah, ngaihchiattertu phuhrunnak zeihmanh na ngei lai lo. Cun Bawipa nih ka bawipa hi ṭha tein an ti tikah, na salnu hi ka philh te hlah," tiah a ti. ³² Cun David nih Abigail cu a thawh i, "Bawipa, Israel Pathian, nihin i keimah ton awkah nangmah an thlahtu hi thangṭhat si ko seh! ³³ Na fimnak hi thluachuah hmu seh law, nihin ah thisen chuah mawhnak le keimah nih keimah kut hrimhrim in phu i hlamnak tuahnak in a ka khamtu nangmah cu thluachuahnak hmu ko! ³⁴ Zeitintiah nangmah kha fahnak peknak in a ka khamtu Bawipa, Israel Pathian nih a nun hrimhrim bantukin, keimah ton awkah khan khulrang in rak ra hlah law, thaizing zingka ah cun Nabal caah hin pa pakhat hmanh an tang ti hnga lo," tiah a ti. ³⁵ Cun David nih amah kut khan amah ca i a rak putmi kha a cohlan i anih cu, "Na inn ah dai tein hung kal ko; zohhmanh, na aw kha kan ngaihpiak i na ka halmi kha kan pek," tiah a ti. ³⁶ Cun Abigail cu Nabal sin kha a phan; cun zohhmanh, a inn ah khan siangpahrang puai bantuk puai pakhat a rak tuah. Cun Nabal cu a rak i lawm cuahmah ko, zeicahtiah a ri ngaingai ko; cucaah zinglei khuaceu hlanah cun zeihmanh a chim lo. ³⁷ Cun zinglei ah, Nabal cu a zu ritnak in a fim tikah khan, hi thil hna cu a nupi nih khan a chimh i a lung cu a chungah a thi i amah cu lung bantuk ah a cang. ³⁸ Cun ni hra tluk hnuah Bawipa nih Nabal cu a tuk i a thi. ³⁹ David nih Nabal kha a thi tiah a theih tikah, "Nabal kut ah ningzahnak ka hmuhmi phu a hlam i a sal kha ṭhat lonak tuah loin a ka khamtu Bawipa cu thangṭhat si ko seh; Bawipa nih Nabal cu ṭhat lonak a tuahmi kha amah lu cung lila ah a tlunter ṭhan," tiah a ti. Cun David nih mi a hei thlah hna i Abigail kha a nupi caah an len. ⁴⁰ Cun David sinum hna cu Karmel tlang ah, Abigail sinah an phak tikah annih nih amah kha, "David nih nangmah cu a nupi si awk i va lak awkah nangmah sinah a kan thlah," tiah an chimh. ⁴¹ Cun a tho i vawlei lei zoh in a kun i, "Zohhmanh u, nan salnu hi ka bawipa i a sinum hna ke ṭawltu salnu a si ko," tiah a ti. ⁴² Cun Abigail cu khulrang in a tho i laa cungah aa cuan i a sinum nu panga nih khan an tuammuai. David lamkal hna kha a zulh hna i a nupi ah a cang. ⁴³ David nih Jezreel khuami Ahinoam zong kha a lak i an pahnih in a nupi ah an cang. ⁴⁴ Saul nih a fanu Mikhal, David nupi kha, Gallim khuami Laish fapa Palti kha a rak pek cang.

¹ Cun Zif khuami hna cu Saul sinah Gibeah ah an ra i, "Jeshimon nichuahlei ah a ummi Hakhilah tlang ah David cu aa thup ko lo maw?" tiah an chimh. ² Cucaah Saul cu a tho i Zif ramlak ah khan, Israel mi chungin thimmi thong thum he tiah, Zif ramlak i David kha kawl awkah a vung kal. ³ Cun Saul cu Jeshimon in nichuahlei ah a ummi lam pawng i Hakhilah tlang ah khan a riak. Sihmanhsehlaw David cu ramlak ah khan a um ko; cun Saul nih ramlak ah a ka dawi ti kha a hngalh tikah, ⁴ David nih ngiatu a thlah hna i Saul cu a ra taktak ko, ti kha a hngalh. ⁵ Khi tikah David cu a tho i Saul riahnak hmun ah khan a ra; cun David nih Saul cu a ralkapbu haotu Abner, Ner fapa, he khan khuazei ah dah an ih ti kha a hmuh; Saul cu an riahhmun chungah cun a it i ralkapbu nih a velchum in an riahhnawh. ⁶ Cun David nih Hit mi Ahimelek le Joab unau Abishai, Zeruiah fapa, sinah khan, "Ahodah riahhmun chungah khin, Saul sinah khin, a vun ka zul lai?" tiah a ti. Cun Abishai nih, "Keimah nih kan zulh lai," tiah a ti. ⁷ Cucaah David le Abishai cu ralkapbu chung cun zan ah khan an lut; cun khika ah khan Saul cu riahhmun chungah a rak it ko i a fei cu a lu hramah, vawlei ah a rak i bunh ko; cun Abner le ralkapbu hna cu a velchum in an it. ⁸ Khi tikah Abishai nih David cu, "Pathian nih nihin ah hin na ral cu na kut chungah an pek ko; cucaah fei in voi khat chunhte ah amah hi vawlei ah bunh chih ko ning, voi hnih ka chun lai lo," tiah a ti. ⁹ Sihmanhsehlaw David nih Abishai cu, "Amah kha hrawk hlah; zeitintiah ahodah Bawipa chiti thuhmi cungah a kut a samh i mawh lo in a um kho lai?" tiah a ti. ¹⁰ Cun David nih, "Bawipa nih a nun bangin, Bawipa nih a thah te ko lai; a si lo ah a thih ni cu a phan te ko lai; a si lo ah raltuknak hmun ah a kal lai i a lo tlau te ko lai. ¹¹ Bawipa chiti thuhmi cung i ka kut samh awk cu Bawipa nih ka kham ko seh; sihmanhsehlaw a lu hram i a ummi fei kha le hranthawl kha la law kal u sih," tiah a ti. ¹² Cucaah David nih Saul lu hram khan fei le hranthawl kha a lak hna i an kal. Ahohmanh nih cucu an hmu lo, a hngalh zong an hngal lo, ahohmanh zong an i hlau lo zeitintiah Bawipa sinin mitkuh thut kha an cungah a tlung i an i hngilh dih. ¹³ Cun David cu ralchan ah khan a va kal i lam hlatpi ah tlang cungah khan a dir i an karlak cu aa hlat ngaingai; ¹⁴ cun David nih ralkapbu kha le Ner fapa Abner kha a hei auh hna i, "Abner, na ka let lai lo maw?" tiah a ti. Cun Abner nih, "Ahodah na si, siangpahrang a autu cu?" tiah a leh. ¹⁵ Cun David nih Abner cu, "Pa na si lo maw? Nangmah bantuk ahodah Israel mi lakah a um? A si kun ahcun zeicahdah siangpahrang na bawipa cu na kilven kun lo? Zeicahtiah mi pakhat nih siangpahrang na bawipa kha thah awkah a rak luhhnawh ṭung? ¹⁶ Hi thil na tuahmi hi a ṭha lo. Bawipa a nun bangin, nang cu thih awk na tlak, zeicahtiah Bawipa chiti thuhmi, na bawipa kha na kilveng lo. Siangpahrang lu hram i fei le hranthawl a ummi kha khuazei ah dah an um cang, hun zoh tuah ngat," tiah a ti. ¹⁷ Saul nih David cu a hngalh i, "Mah cucu nangmah aw a si maw, David ka fapa?" tiah a ti. Cun David nih, "Keimah aw a si, ka bawipa, maw siangpahrang," tiah a ti. ¹⁸ Cun anih nih, "Zeicahdah ka bawipa nih hin a salpa hi a dawi lengmang ko hnga? Zeidah ka tuahmi a um? Zei mawhnak dah ka kut chungah a um? ¹⁹ Cucaah ka bawipa siangpahrang nih hin a salpa ka bia hi ka ngaihpiak tuah seh. Keimah doh awkah an forhtu hi Bawipa a si ahcun, pekchanhnak hi cohlang ko seh; sihmanhsehlaw minung an si ahcun, BAWIPA hmaiah chiat si ko hna seh, zeitintiah annih nih nihin ah hin Bawipa ro chungah covo ka ngeih nakhnga lo an ka dawi i, ’Va kal law, pathian dang kha va bia hna,’ an ka ti. ²⁰ Cucaah cun ka thisen hi Bawipa hmuhphak lonak vawlei ah luang hlah seh; zeitintiah vaking kah awkah tlang cungah ram a vaimi bantukin Israel siangpahrang nih ka nunnak kha hloh awkah a ra chuak cang," tiah a ti. ²¹ Khi tikah Saul nih, "Ka palh cang, ra kir tuah, ka fapa David, ka nunnak cu na mit ah nihin ah hin a sun caah na cungah harnak ka tuah ti lai lo; zohhmanh, ka rak hrut hrimhrim ko i fak piin ka palh cang," tiah a ti. ²² Cun David nih a leh i, "Maw siangpahrang, hika ah hin fei kha a um ko! Tlangval pakhat in rak thlah law ra la seh. ²³ Bawipa nih mi zeipaoh kha a dinnak ca le zumhawktlak a sinak caah laksawng a pek cio hna; zeitintiah Bawipa nih nangmah cu nihin ah ka kut chungah an pek, asinain Bawipa chiti thuhmi cungah khan ka kut ka samh duh lo. ²⁴ Zohhmanh, nangmah nunnak cu keimah mit ah nihin ah a sun bantukin ka nunnak cu Bawipa mit ah sung ve seh law, temhinnak vialte chungin ka chuah ko seh," tiah a ti. ²⁵ Cun Saul nih David sinah khan, "Ka fapa David, nangmah cu thluachuahnak hmu ko! Thil tampi na tuah lai i cu thil hna ah cun na hlawh a tling lai," tiah a ti. Cucaah David cu amah lam ah khan a kal i Saul cu amah hmun leiah khan a kir ṭhan.

¹ Cun David nih a lung chungin, "Ni khatkhat cu Saul kut hin ka thi te lai; Filistin mi hna ram i ka va zam nakin a ṭha deuhmi thil ka caah a um ti lo; khi tikah Saul cu Israel ram chung i keimah kawl kha a lung a dong lai i a kut chungin ka luat lai," tiah a ti. ² Cucaah David cu a tho i amah le a sinah a ummi mi za ruk hna cu Maok fapa Akhish, Gath siangpahrang sinah khan an kal. ³ Cun David cu amah le a mi hna he, mi kip nih an innchungkhar cio he, cun David zong cu a nupi pahnih, Jezreel khuami Ahinoam le Karmel i a rak ummi Nabal nupi ro Abigail hna he khan, Akhish sinah, Gath ah khan an um. ⁴ Cun Saul kha, David cu Gath ah a zam cang, tiah an chimh tikah, amah cu a kawl ti lo. ⁵ Khi tikah David nih Akhish sinah khan, "Na mit ah mithmai ṭha ka hmuh a si ahcun, ram chung khuate pakhatkhat ah, khika ah ka um nakhnga, hmun pakhat ka pe tuah; zeitintiah zeicahdah na sal cu siangpahrang khua ah nangmah sinah ka um rua hnga?" tiah a ti. ⁶ Cucaah khi ni ah Akhish nih Ziklag khua kha a pek; cucaah pei nihin tiang hin Ziklag khua cu Judah siangpahrang hna ta a si cu. ⁷ Cun David nih Filistin mi hna ram chung i a um chung cu kum khat le thla li a si. ⁸ Cun David le a mi hna cu an hung kal i Geshur mi le Girzi mi le Amalek mi kha an hung chim hna; zeitintiah hi hna cu hlan liopi in hi ram chung mi, Izipt ram leiah Shur tiangin a ummi an si. ⁹ Cun David nih ram cu a tuk i pa siseh, nu siseh, a nung in a zuahmi hna an um lo, sihmanhsehlaw tuu hna le cawtum hna le laa hna le kalauk hna le puan hna kha a lak hna i Akhish sinah a ra kir ṭhan. ¹⁰ Akhish nih, "Nihin ah ahodah na hung hranh?" ti i a hal tikah, David nih, "Judah ram Negeb," tiin maw, "Jerahmeel mi hna Negeb," tiin maw, "Ken mi hna Negeb," tiin maw, a ti tawn. ¹¹ Cun David nih, "Annih nih kan kong kha an chim lai i, ’Cuticun David nih a tuah,’ tiin an ti lai ti kha a ruah caah, Gath khua i thawngpang a hei kalpitu ding pakhat hmanh um lo dingin, pa siseh, nu siseh, pakhat hmanh a nung in a zuah hna lo. Filistin mi hna ram i a um chung vialte cu, mahticun a tuah tawn. ¹² Cun Akhish nih David cu a zumh i, "A mi Israel mi kha aa huatter cikcek cang hna caah ka sal a si zungzal lai," tiin a ruah.

¹ Khi caan ah khan Filistin mi nih an ralkap kha raldoh awk caah, Israel kha doh awkah an pumh hna. Cun Akhish nih David cu a thawh i, "Nangmah le na mi hna kha keimah sinah ralkapbu chungah nan kal ve awk a si kha va hngal ko," tiah a ti. ² Cun David nih, "A ṭha ko, na sal nih zeidah a tuah khawh ti kha na hngalh lai," tiah a ti. Cun Akhish nih David cu, "A ṭha ko, nangmah cu na nun chung keimah pum rungvengtu ah kan ser lai," tiah a ti. ³ Samuel kha atu cu a thi cang i Israel mi vialte nih an ṭah i amah khua Ramah ah khan an vui. Cun Saul nih thitlawnthiam le hnamngei kha ram chungin a dawi dih hna. ⁴ Filistin mi cu an i pum i an ra i Shunem ah riahhmun an khuar; cun Saul nih Israel mi vialte kha a pumh hna i Gilboa ah riahhmun an khuar ve. ⁵ Saul nih Filistin ralkapbu kha a hmuh tikah, a thin a phang i a ther in a ther. ⁶ Cun Saul nih Bawipa kha a hal tikah Bawipa nih mang in siseh, Urim in siseh, profet hna in siseh, a let lo. ⁷ Cun Saul nih a sinum hna kha, "Thitlawnthiamnu pakhat in ka kawlpiak tuah u, a sinah ka va kal i amah cu ka va hal nakhnga," tiah a ti hna. Cun a sinum hna nih cun, "Zohhmanh, Endor ah thitlawnthiam pakhat a um," tiah an chimh. ⁸ Cun Saul cu mui dang in aa thleng i hnipuan dang aa hruk i amah sin i a um mipa pahnih he an kal; cun nu sinah cun zan ah an ra. Cun anih nih, "Thi ka tlawnpiak law, nangmah sinah a min ka chim laimi paoh hun ka chuahpiak tuah," tiah a ti. ⁹ Nu nih khan amah sinah cun, "Saul nih thitlawnthiam le hnamngei hna cu zeitindah hi ram chungin a ṭhawl hna ti kha na hngalh hrimhrim ko ṭung. Zeicahdah ka thih nakhnga dingin ka nunnak kha rap na ka chiah?" tiah a ti. ¹⁰ Sihmanhsehlaw Saul nih a sinah cun Bawipa min chalh in chiat a ser i, "Bawipa a nun bangin, hi thil ruangah hin na cungah dantatnak a tlung lai lo," tiah a ti. ¹¹ Cun nu nih cun, "Ahodah kan chuahpiak lai?" tiah a ti. Anih nih, "Samuel kha hun ka chuahpiak tuah," tiah a ti. ¹² Nu nih Samuel kha a hmuh tikah aw fak piin a ai i nu nih cun Saul kha, "Zeicahdah na ka hlen? Nangmah hi Saul na si," tiah a ti. ¹³ Siangpahrang nih amah cu, "Ṭih hlah; zeidah na hmuh?" tiah a ti. Cun nu nih khan Saul cu, "Vawlei chungin pathian pakhat a chuah kha ka hmuh," tiah a chimh. ¹⁴ Cun anih nih, "A mui zeidah a si?" tiah a ti. Cun anih nih, "Tarpa pakhat a hung kai i a angkifual aa hruk," tiah a ti. Cun Saul nih Samuel a si kha a hngalh i vawlei leiah a lu a khun i upatnak kha a tuah. ¹⁵ Cun Samuel nih Saul cu, "Zei-cahdah na hun ka chuahternak hin hna na ka hnawh?" tiah a ti. Saul nih a leh i, "Harnak nganpi chungah ka um; zeitintiah Filistin mi nih an ka tuk i Pathian nih hnulei a ka chit cang i profet hna sinin siseh, mang in siseh a ka let ti lo; cucaah nangmah cu zeidah ka tuah awk a si kha a ka chimtu dingah kan kawh," tiah a ti. ¹⁶ Cun Samuel nih, "Bawipa nih hnulei an chit cang i na ral ah a can cang caah zeicahdah keimah cu na ka hal duh ti? ¹⁷ Keimah in Bawipa nih a chim bantuk khan na cungah a tuah cang; zeitintiah Bawipa nih pennak cu na kut chungin an chuh i na innpa David kha a pek cang. ¹⁸ Nangmah nih Bawipa aw kha na zul lo i Amalek cung i a thinhunnak ṭihnung kha na tlinter lo caah, kha caah khan nihin ah hin Bawipa nih na cungah mah hi a tuah. ¹⁹ Cu hleiah Bawipa nih Filistin mi hna kut chungah Israel mi hna zong kha nangmah he a chanh hna lai i thaizing ah nangmah le na fapa hna cu keimah sinah nan um lai; Bawipa nih Israel ralkapbu zong kha Filistin mi hna kut chungah a chanh lai," tiah a ti. ²⁰ Samuel bia thawng cun, Saul cu ṭihnak in a khat i vawlei ah chikkhatte ah a tlu thlup ko; cun chun nitlak zan khuadei zeihmanh a ei lo caah thazang zeihmanh a ngei lo. ²¹ Cun nu kha Saul sinah cun a ra i a thin a phang ngaingai ti kha a hmuh tikah amah cu, "Zohhmanh, na salnu nih na bia kha ka rak in ngaih; thih le thih tiin keimah na rak ka chimhmi kha ka rak in ngaih. ²² Cucaah atu cu nang zong nih na salnu hi a bia ngai ve tuah; na hmaiah changreu tlawm tein hunh ning law, na lam lei i na kal tikah thazang na ngeih nakhnga, ei tuah," tiah a ti. ²³ Sihmanhsehlaw a al i, "Ka ei lai lo," tiah a ti. Sihmanhsehlaw a sinum hna nih khan, minu he cun, an hnek peng i an bia kha a ngaih hna. Cucaah vawlei khan a tho i ihkhun cungah a ṭhu. ²⁴ Minu nih khan a inn chungah cenhmi cawfa pakhat a ngei i khulrang in a thah, changvut kha a lak i a nawn i thilnu telh lo changreu ah a ser i, ²⁵ Saul le a sinum hna kha a hunh hna i annih nih an ei. Cun an tho i cu zan ah cun an kal diam.

¹ Filistin mi nih an ralkap vialte cu Afek ah an pumh hna i Israel mi cu Jezreel i a ummi cerh kamah khan an riak. ² Cun Filistin bawi hna cu a zaza le a thongthong in an lanh lengmang i David le a mi hna cu hnulei in Akhish he an lanh ve tikah, ³ Filistin mi ralbawi hna nih cun an thawh i, "Hi Hebru mi hna hi hika ah hin zeidah an tuah?" tiah an ti. Cun Akhish nih Filistin mi ralbawi hna sinah cun, "Mah hihi Israel siangpahrang Saul i a sal David, keimah sin i ni hi zat le kum hi zat a um cangmi, keimah sin i a rung zam hnu i a cung i palhnak zeihmanh ka hmuh lomi kha a si lo maw?" tiah a ti. ⁴ Sihmanhsehlaw Filistin mi ralbawi hna kha a cungah an thin a hung i Filistin mi ralbawi hna nih cun amah cu, "Mipa cu hmun na ruahpiakmi ah khan kirter ko; raltuknak hmun ah cun kan sinah kal hlah seh, raltuknak hmun ah khan kan ral ah a cang sual ai hnga. Kan mi hna cu a thah hna hnga i a thahmi hna lu cu a bawipa he i rem ṭhannak caah thilṭha bik an si ko hnga lo maw? ⁵ Mah hi David hi an lam pah i, "Saul nih a thongthong in a thah hna, David nih a sangsang in," tiin hla an i saktonhmi kha a si lo maw?" tiah an ti. ⁶ Khi tikah Akhish nih David kha a kawh i a sinah, " Bawipa nih a nun bangin, nangmah cu midik ngaingai na si i hi raldohnak i kan kalnak ah hin keimah sin i na luh na chuah ve hi a ding ko, tiah ka ruah; zeitintiah ka sinah na rat ni in nihin ni tiang nangmah chungah zeihmanh ṭhat lonak ka hmu lo. Sihmanhsehlaw bawi pawl nih nangmah cu an hna na tla lo. ⁷ Cucaah va kir law, Filistin bawi pawl hi lung si loin na umter hna nakhnga lo, dai tein va kal ko," tiah a ti. ⁸ Cun David nih Akhish sinah cun, "Sihmanhsehlaw zeidah ka tuah? Siangpahrang ka bawipa i a ral kha ka tuk nakhnga lo dingah hin, na rian chung i ka luh ni in atu tiangah, na sal chungah hin zeidah na hmuh?" tiah a ti. ⁹ Cun Akhish nih David cu a leh i, "Nangmah cu keimah mit hmuh ah, Pathian vancungmi tlukin soi awk um lo na si ti kha ka hngalh ko; asinain, Filistin mi ralbawi hna nih khan, ’Raltuknak hmun ah kan sinah kal hlah seh,’ an ti cang. ¹⁰ Cucaah cun nangmah sinah a rami na bawipa i a sal hna he khan zingka tein tho law, cun zing tein i thawh u law khua a dei cangka tein kal u," tiah a ti. ¹¹ Cucaah David cu a mi hna he khan zingka tein, Filistin mi hna ram i kir awkah khan an i thawh. Sihmanhsehlaw Filistin mi hna kha cu Jezreel ah an hung kal.

¹ David le a mi hna cu a ni thumnak ni ah Ziklag kha an phak tikah, Amalek mi nih Negeb le Ziklag kha an rak hranh hna. Ziklag kha an rak tei i mei in an khangh i ² nu hna le a chung i a ummi vialte, a hme a ngan in, an rak tlaih dih hna; pakhat hmanh an that hna lo, sihmanhsehlaw an rak kalpi diam hna i an rak kal cang. ³ Cun David le a mi hna cu khua kha an ra phak tikah, mei in khangh dih a rak si i an nupile le an fapale le an fanule hna cu an rak tlaih dih hna kha an hmuh. ⁴ Khi tikah David le a sinah a ummi hna kha fak piin, ṭahnak thazang an ngeih ti lo tiangin an ṭap. ⁵ David nupi pahnih, Jezreel mi Ahinoam le Karmel mi Nabal nupi ro Abigail zong kha an rak tlaih hna. ⁶ Cun David cu a lungre a thei ngaingai; zeitintiah mi vialte kha an fapa hna le an fanu hna kongah khan an ngaih a chiat ngaingai caah mi nih khan amah kha lung i cheh awk an ceih lengmang. Sihmanhsehlaw David cu Bawipa a Pathian ah khan aa hriim ṭhan. ⁷ Cun David nih tlangbawi Abiathar, Ahimelek fapa sinah khan, "Tlangbawi angki kha ka pe tuah," tiah a ti. Cucaah Abiathar nih David sinah khan tlangbawi angki kha a rak put. ⁸ Cun David nih Bawipa kha a hal i, "Hi bu hi ka dawi hna lai maw? Ka phan hna hnga maw?" tiah a ti. A leh i, "Dawi hna, zeicahtiah na phak hrimhrim hna lai i na chanh khawh hrimhrim hna lai," tiah a ti. ⁹ Cun David cu a sin i a ummi za ruk hna he khan aa thawh; Besor vate kha an va phan i cuka ah cun hnulei i an kaltakmi hna kha an rung tang. ¹⁰ David le a mi za li hna tu nih khan cun an dawi lengmang hna; asinain Besor vate tan awkah a ba tukmi za hnih kha cu hnuah an rung tang. ¹¹ Ramlak ah khan Izipt mipa pakhat an hmuh i David sinah an ratpi; cun changreu kha an pek i a ei, din awk ti kha an pek, ¹² theipi car hlum khat le mitsur car bor hnih an pek. Cun a ei dih tikah a hun i hriim ṭhan; ni thum le zan thum rawl zong ei lo ti zong ding loin a rak um. ¹³ Cun David nih amah cu a thawh i, "Aho mi dah na si? Khuazei in dah na rat?" tiah a ti. Anih nih, "Keimah cu Izipt mi tlangval ka si, Amalek mi pakhat i a sinum ka si; kan hnulei ni thum ah khan ka zawt caah ka bawipa nih hnulei ah hin a ka kaltak. ¹⁴ Khereth mi hna Negeb le Judah ta a simi le Kaleb i a Negeb kha kan hranh hna i Ziklag kha mei in kan khangh," tiah a ti. ¹⁵ Cun David nih amah cu, "Hi bu sinah hin na vun ka kalpi lai maw?" tiah a ti. Cun anih nih, "Kan that lai lo, cun na bawipa sinah kan pe ṭhan lai lo, tiin Pathian min in ka sinah chiat ser law, hi bu sinah hin ka vun in kalpi ko lai," tiah a ti. ¹⁶ Cun amah nih a vun kalpi tikah khan, zohhmanh, Filistin mi ram le Judah ram in hranchaw kha tampi an lak caah a kenkip ah an rak i ṭhek dih i an rak ei, an rak ding, an rak lam len ko. ¹⁷ Cun David nih nitlak in a thaizing zanlei tiang a thah hna i tlangval za li kalauk aa cit i a zammi hna dah ti lo cu annih lakah a luatmi pakhat hmanh an um lo. ¹⁸ Amalek mi nih an lakmi vialte kha David nih a chuh ṭhan hna; David nih a nupi pahnih hna zong kha a lak ṭhan hna. ¹⁹ A hme siseh, a ngan siseh, fapa si hna seh, fanu si hna seh, hranchaw siseh, thil zeipaoh an rak lakmi kha siseh, zeihmanh a tlaumi a um lo; David nih a ratpi ṭhan dih hna. ²⁰ David nih tuurun vialte le cawrun vialte zong kha a tlaih hna i a hmaiah mi nih an khalh hna i, "Mah hihi David hranchaw a si," an ti. ²¹ Cun David cu mi za hnih, an baat tuk ca i David a zul kho lo i Besor varek i an kaltakmi hna sin kha a ra phan; cun annih nih David le a sinah a ummi hna kha ton awkah an kal; cun David nih a hei phak deng hna tikah khan conglawmhnak a pek hna. ²² Khi tikah David sin i a kalmi miṭhalo hna le misual hna nih khan an thawh i, "Annih cu kan sinah an kal lo caah kan va lak ṭhanmi hranchaw hi zeihmanh kan pe hna lai lo, amah belte, an nupile le an fale cio kha i hruai hna seh law, kal ko hna seh," tiah an ti. ²³ Sihmanhsehlaw David nih a thawh hna i, "Ka u le ka nau hna, hi bantukin Bawipa nih a kan pekmi thil kongah nan tuah hnga lo; kannih kha a kan zuah i a kan dohtu bu kha kan kut chungah a kan pek cang. ²⁴ Hi kongah hin cun aho nih dah nan bia an in ngaih hna lai? Zeitintiah raltuknak hmun i a vung kalmi nih a tin a co bantuk tein thil a rak hngakmi zong nih a tin a co ve lai; aa khatrep in an i ṭhenh cio awk a si," tiah a ti. ²⁵ Cun cu ni thawk in nihin ni tiang Israel mi hna caah mah cucu nawlbia le phunglam ah a ser i nihin tiang a hmun. ²⁶ David cu Ziklag a phanh tikah hranchaw a cheu cu Judah ram upa a hawikom hna sinah khan a kuat i, "Bawipa ral hna sinin lakmi hranchaw chungin nanmah ca i laksawng a si," tiah a ti; ²⁷ mah cucu, Bethel khua chung i a ummi hna le Negeb i Ramoth khua i a ummi hna le Jattir i a ummi hna le ²⁸ Aroer i a ummi hna le Sifmoth i a ummi hna le Eshtemoa i a ummi hna le ²⁹ Rakal i a ummi hna le Jerahmeel mi hna khua i a ummi hna le, Ken mi hna khua i a ummi hna le, ³⁰ Hormah i a ummi hna le Borashan i a ummi hna le Athak i a ummi hna le ³¹ Hebron i a ummi hna, David le a mi hna an rak i chawhvaihnak hmun vialte i a ummi hna caah khan a si.

¹ Cun Filistin mi nih Israel mi cu an tuk hna i Israel mi cu Filistin mi hna hmaiah khan an zam i Gilboa Tlang ah cun an thi liangluang ko. ² Cun Filistin mi nih khan Saul le a fapa hna kha an phanh hna i Filistin mi nih cun Jonathan le Abinadab le Malkhishua, Saul fapa hna kha an thah hna. ³ Cun Saul cu heh tiah an nam i thalkah thiam hna nih khan an phak ai; cun thal kah thiam hna nih khan ṭhalo tein an hliam. ⁴ Cun Saul nih a ralthuam putu sinah khan, "Na nam kha i zuh law, tleng lak in ka chun, cu lo ahcun, cuarpartan lo pawl hi an ra lai i an ka chunh ṭhiamṭhiam ṭung lai i lentecelhnak ah an ka ser sual hnga," tiah a ti. Sihmanhsehlaw a ralthuam putu nih khan a tuah duh lo, zeicahtiah a thin a phang ngaingai. Cucaah Saul nih amah vainam kha aa lak i a bawhkhuh. ⁵ Cun a ralthuam putu nih khan Saul kha a thi cang tiah a hmuh tikah amah zong nih a vainam kha a bawhkhuh ve i amah sinah cun a thi. ⁶ Cuticun Saul le a fapa pathum hna le a ralthuam putu le a mi vialte cu ni khat ah hmun khat ah an thi. ⁷ Cun ralchan ah a ummi Israel mi hna le Jordan tiva ral ah a ummi hna nih Israel mi kha an zam i Saul le a fapa hna kha an thi, ti an theih tikah, an khua kha an chuahtak hna i an zam; cun Filistin mi kha an ra i an khua kha an rawlh hna. ⁸ A thaizing ah Filistin mi hna nih a thimi kha an thilthuam hawh awk i an rat tikah, Saul le a fapa pathum Gilboa Tlang i an thih kha an hmuh hna. ⁹ A lu kha an cik i a ralthuam kha an hawh i thawngṭha cu an siasal hna le mi zapi hna sin i kalpi awkah Filistin mi ram dihlak ah khan thawngthanhtu an thlah hna. ¹⁰ A ralthuam cu Ashtaroth biakinn ah an chiah; cun a pum cu Bethshan kulhnak vampang ah an tar. ¹¹ Sihmanhsehlaw Jabesh-gilead mi nih, Saul cung i Filistin mi nih an tuahmi kha an theih tikah, ¹² ralṭha vialte cu an tho i zan khuadei in an kal i Saul ruak le a fapa pathum hna an ruak kha Bethshan kulhnak vampang khan an va lak hna; cun Jabesh ah an ra phan i khika ah an khangh hna. ¹³ Cun an ruh cu an lak hna i Jabesh i tamarisk thingkung toiah an vui hna i ni sarih rawl an ul.