1 SIANGPAHRANG

1 SIANGPAHRANG

¹ David Siangpahrang cu a upa i a tar ngaingai cang; puan an vorh nain a khua a lum kho hlei lo. ² Cucaah a sinum hna nih khan amah cu, "Siangpahrang ka bawipa caah hin ngaknu in kawlpiak u si law, siangpahrang hi in tuammuai seh law in zohkhenh seh law; siangpahrang ka bawipa nih hin lumnak na hmuh khawh nakhnga, na ṭang cungah it seh law," tiah an ti. ³ Cucaah Israel ram chung dihlak ah khan ngaknu dawhte cu an kawl i Shunam mi Abishag kha an va hmuh i siangpahrang sinah cun an ratpi. ⁴ Ngaknu cu aa dawh ngaingaimi a si; cun amah cu siangpahrang tuammuaitu ah khan a cang i amah kha a bultawl; sihmanhsehlaw siangpahrang nih amah cu a theihngal lo. ⁵ Cun Haggith fapa Adonijah kha amah le amah aa hlorh i, "Siangpahrang ka si lai," tiah a ti i amah caah khan rangleng hna le rangcung ralkap hna le a hmai i a tli dingah minung sawm nga kha a timh hna. ⁶ A pa nih zeitikhmanh ah, "Zeicahdah cu bantuk, kha bantukin na tuah?" tiin amah kha a ing a puanter bal lo. Amah cu Absalom a hun changtu kha a si i a dawh zong aa dawh ngaingai. ⁷ Zeruiah fapa Joab le tlangbawi Abiathar kha a chimh a ruah hna i annih nih Adonijah kha an zulh i an bawmh. ⁸ Sihmanhsehlaw tlangbawi Zadok le Jehoi-ada fapa Benaiah le profet Nathan le Shimei le Rei le David miṭhawng hna nih khan cun Adonijah kha an ṭanpi lo. ⁹ Adonijah nih khan tuu hna le cawtum hna le cenhmi saṭil thauthau hna kha Rulpi Lung. Enrogel pawng i a ummi ah khan a thawi hna i siangpahrang fapa a unau vialte le Judah ram i siangpahrang bawi hna cu an dihlak khan a sawm hna, ¹⁰ sihmanhsehlaw profet Nathan siseh, Benaiah siseh, miṭhawng hna kha si hna seh, a unaupa Solomon kha siseh, a sawm hna lo. ¹¹ Cun Nathan nih Solomon nu Bathsheba kha a thawh i, "Haggith fapa Adonijah kha kan bawipa David hngalh loin siangpahrang a si cang, ti hi na hngal lo dahra? ¹² Cucaah ra law ruahnak kan cheu tuah lai, nangmah na nunnak le na fapa Solomon nunnak kha na khamh khawh nakhnga. ¹³ David Siangpahrang sinah cun khulrang in va kal law amah cu, ’Siangpahrang ka bawipa, nangmah nih na salnu ka sinah, "Keimah hnuah Solomon na fapa hi a rung bawi lai i ka bawi ṭhutdan cungah hin a ṭhu lai," tiin chiat na ser lo maw? Zeicahdah Adonijah hi siangpahrang a si kun?’ tiah va ti. ¹⁴ Cun siangpahrang na chawnh lioah cun kei zong nih ka run in zulh colh ve lai i na bia cu ka fehter lai," tiah a ti. ¹⁵ Cucaah Bathsheba cu siangpahrang sinah a khaan chungah khan a vung lut (siangpahrang cu a tar ngaingai cang i Shunam mi Abishag nih khan siangpahrang cu a tuammuai). ¹⁶ Bathsheba nih cun a lu a khun i siangpahrang sinah upatnak kha a tuah, cun siangpahrang nih, "Zeidah na duh?" tiah a ti. ¹⁷ Cun anih nih amah sinah cun, "Ka bawipa, nangmah nih na salnu sinah hin, Bawipa na Pathian min chalh in chiat na rak ser i, ’Na fapa Solomon hi keimah hnuah a rung bawi lai i ka bawi ṭhutdan cungah a ṭhu lai,’ tiah na ti. ¹⁸ Sihmanhsehlaw, zohhmanh, siangpahrang ka bawipa, nangmah nih na hngal lo nain, Adonijah cu siangpahrang a si ko cang. ¹⁹ Amah nih cawtum hna le cenhmi saṭil thauthau hna le tuu hna kha tam piin a thawi cang hna i siangpahrang fapa vialte hna le tlangbawi Abiathar le ralkapbu haotu Joab kha a sawm hna, sihmanhsehlaw na sal Solomon cu a sawm lo. ²⁰ Cucaah siangpahrang ka bawipa, atu cu Israel mi vialte hna nih, ahodah siangpahrang ka bawipa ṭhutdan ah hin amah hnu in a ṭhu lai, ti chimh awkah nangmah cungah an mit an chiah dih. ²¹ Cu ti a si lo ahcun, siangpahrang ka bawipa hi a pupa hna sinah a ih tikah, keimah le ka fapa Solomon cu sualnak tuahtu ah rel kan vung si te ko lai," tiah a ti. ²² Siangpahrang cu a chawnh lioah cun profet Nathan kha a rung lut. ²³ Cun siangpahrang cu, "Hika ah hin profet Nathan a um," tiah an chimh. Cun siangpahrang hmaiah a rung luh tikah, vawlei lei hoih in siangpahrang hmaiah cun a kun. ²⁴ Cun Nathan nih cun a thawh i, "Siangpahrang ka bawipa, nangmah nih, ’Keimah hnuah Adonijah hi a rung bawi lai i ka bawi ṭhutdan ah a ṭhu lai,’ tiah na rak ti maw? ²⁵ Zeitintiah nihin ni ah hin a vung kal i cawtum hna le cenhmi saṭil thauthau hna le tuu hna kha tam piin a thawi hna i siangpahrang fapa vialte le ralkapbu haotu Joab le tlangbawi Abiathar kha a sawm hna i zohhmanh, a hmaika ah cun an ei an ding i, ’Siangpahrang Adonijah cu saupi nung ko seh,’ tiah an ti. ²⁶ Sihmanhsehlaw na salpa keimah le tlangbawi Zadok le Jehoiada fapa Benaiah le na sal Solomon kha cu a kan sawm lo. ²⁷ Mah hi thil hi siangpahrang ka bawipa nih na tuahmi a si i nangmah hnuah hin siangpahrang ka bawipa bawi ṭhutdan cungah ahodah a ṭhu lai ti kha na kan chimh lo a si maw?" tiah a ti. ²⁸ Cun David Siangpahrang nih, "Bathsheba kha ka sinah hei au tuah," tiah a leh. Cucaah siangpahrang hmaika ah khan a rung lut i siangpahrang hmaika ah cun a dir. ²⁹ Cun siangpahrang nih chiat a ser i, "Harnak kip chungin ka nunnak a ka tlantu Bawipa cu a nun bangin, ³⁰ Bawipa, Israel Pathian min chalh in na sinah chiat ka ser i, ’Ka hnuah na fapa Solomon cu a rung bawi lai i keimah hmun ah amah cu ka bawi ṭhutdan cungah a ṭhu lai,’ tiin ka ti bantuk khan, cu bantuk ṭhiamṭhiam cun nihin zongah hin ka tuah lai," tiah a ti. ³¹ Cun Bathsheba cu vawlei lei hoih in a kun i siangpahrang sinah cun upatnak a tuah i, "David Siangpahrang ka bawipa cu zungzal in nung ko seh!" tiah a ti. ³² David Siangpahrang nih, "Tlangbawi Zadok le profet Nathan le Jehoiada fapa Benaiah kha ka sinah au hna u," tiah a ti. Cucaah siangpahrang hmaiah khan an ra. ³³ Cun siangpahrang nih annih cu, "Nan bawipa sinum hna kha i kalpi hna u law, ka fapa Solomon cu keimah laa cungah khan citter u law, Gihon ah runpi u; ³⁴ cun tlangbawi Zadok le profet Nathan nih khan khika ah Israel mi vialte cung i siangpahrang ah chiti thuh hna seh; cun muko kha tum u law, ’Solomon Siangpahrang cu saupi nung ko seh!’ ti in au u. ³⁵ Cun nannih nih nan hun zulh lai i a ra lai i ka bawi ṭhutdan ah a ṭhu lai; zeitintiah amah cu keimah hmun ah siangpahrang a si lai; cun amah cu Israel le Judah cung i uktu si awkah rian ka pek cang," tiah a ti. ³⁶ Cun Jehoiada fapa Benaiah nih khan siangpahrang cu a leh i, "Amen! Bawipa, siangpahrang ka bawipa i Pathian nih cun cu bantukin chim ve ko seh. ³⁷ Siangpahrang bawipa sinah Bawipa cu a um bang khan, cu bantuk ṭhiamṭhiam in Solomon sinah um seh law, a bawi ṭhutdan cu ka bawipa David Siangpahrang i a bawi ṭhutdan nakin nganter deuh seh," tiah a ti. ³⁸ Cucaah tlangbawi Zadok, profet Nathan le Jehoiada fapa Benaiah le Khereth mi hna le Peleth mi hna kha an vung kal i Solomon cu David Siangpahrang laa cungah khan an citter i Gihon ah an ratpi. ³⁹ Khika ah tlangbawi Zadok nih thlam chung khan chiti chiahnak ki cu a lak i Solomon kha a thuh. Cun muko kha an tum i, mi vialte nih khan, "Solomon Siangpahrang cu saupi nung ko seh!" an ti. ⁴⁰ Cun mi vialte nih khan an hun zulh i thonglawi kha an tum pah i an i lawm ngaingai, an thawngpang nih vawlei kha a tlerh dih. ⁴¹ Adonijah le a sawmmi amah sin i a ummi vialte hna nih cun an rawldangh a dih pah ah khin mah thawng cu an theih. Cun Joab nih muko thawng kha a theih tikah, "Khua chung i an i tuai ur ko hi, a sullam zeidah a si?" tiah a ti. ⁴² Bia a chim lioah cun, zohhmanh, tlangbawi Abiathar fapa Jonathan kha a rung lut i Adonijah nih cun, "Rung lut tuah, zeitintiah nang cu misantlai na si i thawng ṭha na rak phorh ṭheo lai," tiah a ti. ⁴³ Jonathan nih cun Adonijah cu a leh i, "Asilo zeitintiah kan bawipa David Siangpahrang nih Solomon cu siangpahrang ah a ser cang; ⁴⁴ cun siangpahrang nih khan a sinah tlangbawi Zadok le profet Nathan le Jehoiada fapa Benaiah le Khereth mi le Peleth mi hna kha a thlah hna i siangpahrang laa cungah khan an citter; ⁴⁵ cun tlangbawi Zadok le profet Nathan nih khan Gihon ah chiti an thuh i cuka cun lunglawmhnak he an hung kal i cucaah khua cu aa tuai ur hi a si. Mah hihi nan theihmi thawng cu a si. ⁴⁶ Solomon cu siangpahrang bawi ṭhutdan ah a ṭhu. ⁴⁷ Cuhleiah siangpahrang sinum hna nih khan David Siangpahrang kan bawipa cu, ’Na Pathian nih Solomon min cu nangmah min nakin minthang deuh ah ser seh law a bawi ṭhutdan cu na bawi ṭhutdan nakin nganter deuh seh,’ tiin lawmhpi awkah an ra. Khi tikah siangpahrang nih cun ihkhun cungah cun a lu a khun. ⁴⁸ Cun siangpahrang nih cun, ’Keimah mit hmuh hrimhrim ah, ka bawi ṭhutdan cung i keimah tefa pakhat a ṭhuttertu Bawipa, Israel Pathian cu thangṭhat si ko seh’ ti zongah a ti fawn," tiah a ti. ⁴⁹ Khi tikah Adonijah nih a sawmmi vialte hna cu an ther i an tho i anmah le an lam cio ah khan an kal. ⁵⁰ Cun Adonijah nih Solomon kha a ṭih i cucaah a tho i a kal i biakṭheng ki kha aa tlaih hna. ⁵¹ Cun Solomon cu an chimh i, "Zohhmanh, Adonijah nih Solomon Siangpahrang kha a ṭih; zeitintiah, zohhmanh, biakṭheng ki kha aa tlaih hna i, ’Solomon Siangpahrang nih a salpa hi vainam in ka that lai lo,’ tiin ka sinah chiat ser hmasa seh, a ti," tiah an ti. ⁵² Cun Solomon nih, "Santlaimi a sinak a langhter ahcun, a samfa fa khat hmanh vawlei ah a tla lai lo, sihmanhsehlaw a chungah ṭhat lonak hmuh a si ahcun, a thi lai," tiah a ti. ⁵³ Cucaah Solomon Siangpahrang nih mi a hei thlah hna i biakṭheng khan an runpi. Cun a ra i Solomon Siangpahrang sinah khan upatnak a tuah i Solomon nih amah cu, "Na inn ah va kal," tiah a ti.

¹ David kha a thih caan nih a naih tikah a fapa Solomon cu ro a vuih i, ² "Vawlei cung vialte phung bangin ka kal dengmang ve cang. Ṭhawng law patling na si kha langhter tuah, ³ cun zei na tuahmi paoh ah le khuazeilei paoh i naa mernak ah na hlawhtlin nakhnga, Moses phungbia chungah aa ṭial bangin Bawipa na Pathian bia beuhmi kha na zulh hna lai i amah lam kha na zulh hna lai i a nawlbia hna le a phungbia hna le a phunglam hna le a hngalhternak bia hna kha na ulh hna lai; ⁴ Bawipa nih ka sinah keimah kong i, ’Na fapa hna nih an kalning kha an i ralrin i keimah hmaiah zumhawktlak tein an lung dihlak le an nunnak dihlak in an kal ahcun, Israel mi bawi ṭhutdan cungah a ṭhu dingmi na ṭhing lai lo,’ tiin a chimmi bia kha a fehter lai. ⁵ "Cuhleiah Zeruiah fapa Joab nih zeidah ka cungah a tuah kha na hngalh fawn: amah nih Israel mi ralkapbu haotu pahnih, Ner fapa Abner le Jether fapa Amasa a nawnmi hna cung i a tuahmi kha; ral lio i rak chuahmi thisen kha daihnak caan ah phu lei a cham hna i ka tai i taisawm le ka ke i kedan ah a sual lomi thisen kha a neh hna. ⁶ Cucaah na fimnak bantukin tuah ko, sihmanhsehlaw dai tein a lu par cu Sheol ah run kalter hlah. ⁷ Sihmanhsehlaw Gilead mi Barzillai fapa hna kha cu zumhawktlak tein na ti hna lai i na cabuai i rawl a eimi lakah na umter hna lai; zeitintiah na unau Absalom sinin ka rak zam lioah khan annih nih cu bantuk zumhawktlak sinak he an rak ka don. ⁸ Cun na sinah Benjamin mi Bahurim khuami Gera fapa Shimei zong kha a um, Mahanaim i ka hung kal ni ah khan amah nih a fakmi chiat a ka serh; sihmanhsehlaw keimah ton awkah Jordan i a run tikah, a sinah Bawipa min chalh in chiat ka ser i, ’Vainam in kan that lai lo,’ tiah ka ti. ⁹ Cucaah amah cu sual koplo ah rel hlah, zeitintiah nangmah cu a fim mi na si; nangmah nih zeidah a cung i na tuah awk a si kha na hngalh i thlan ah a lu par cu thisen he na kalpi lai," tiah a ti. ¹⁰ Cun David cu a pupa hna sinah a it i David khua ah khan an vui. ¹¹ David nih Israel a uk chung cu kum sawm li a si; Hebron in kum sarih a uk i Jerusalem in kum sawm thum le kum thum a uk. ¹² Cucaah Solomon cu a pa David bawi ṭhutdan ah a ṭhu i a pennak cu fek tein a hmunhter. ¹³ Cun Haggith fapa Adonijah kha Solomon nu Bathsheba sinah a ra. Cun anih nih a rak thawh i, "Daihnak in na ra maw?" tiah a rak ti. Amah nih, "Daihnak in ka ra," tiah a ti. ¹⁴ Cun amah nih cun a thawh i, "Na sinah chim awk zei maw ka ngei," tiah a ti. Cun anih nih, "Chim ko," tiah a ti. ¹⁵ Cun amah nih cun, "Pennak hi keimah ta a rak si i Israel mi vialte nih amah nih a kan pen lai tiin an rak ka ruah dih ko, ti kha na hngalh; sihmanhsehlaw pennak cu a lu taw aa let i ka unaupa caah a cang, zeitintiah Bawipa nih a pekmi a si. ¹⁶ Cun atu cu nangmah sinin hal kan duhmi pakhat a um i cucu ka al hlah," tiah a ti. Cun anih nih, "Chim ko," tiah a ti. ¹⁷ Cun amah nih cun, "Solomon Siangpahrang cu ka nawlpiak ko sawh — nangmah cu an al lai lo — Shunam mi Abishag hi nupi ah a ka pek nakhnga," tiah a ti. ¹⁸ Bathsheba nih, "A ṭha ko, siangpahrang cu ka rak in chawnhpiak lai," tiah a ti. ¹⁹ Cucaah Bathsheba cu Solomon Siangpahrang sinah, Adonijah airawl in bia va chim awkah a kal. Cun siangpahrang cu amah ton awkah khan a tho i a hmaiah cun a kun; cun a bawi ṭhutdan cungah khan a ṭhu i siangpahrang bawipa nu caah cun ṭhutdan a rak putter hna i a orhlei kamah khan a ṭhu. ²⁰ Cun anih nih, "Hal awk hmete pakhat kan ngei, ka al hlah," tiah a ti. Cun siangpahrang nih amah cu, "Hal na ka duhmi cu chim tuah, ka nu, zeitintiah kan al lai lo," tiah a ti. ²¹ Anih nih, "Shunam mi Abishag cu nupi caah na unau Adonijah sinah pek si ko seh," tiah a ti. ²² Solomon Siangpahrang nih a nu cu a leh i, "A si ah, zeicahdah Shunam mi Abishag cu Adonijah caah na ka hal? Amah caah pennak zong hi halpiak ngat? Zeitintiah amah cu ka u pei a si i amah leiah tlangbawi Abiathar le Zeruiah fapa Joab kha an ṭan cu," tiah a ti. ²³ Cun Solomon Siangpahrang nih Bawipa min chalh in chiat a ser i, "Mah hi bia nih hin Adonijah cu a nunnak a hloh lo a si ahcun, hi bantukin le hi nak tam deuh zongin Pathian nih keimah cungah tuah ko seh! ²⁴ Cucaah keimah kha a ka fehter i, ka pa David bawi ṭhutdan cungah a ka chia i bia a ka kam bangin innchungkhar a ka serpiaktu Bawipa nih a nun bangin, Adonijah cu nihin ah thah a si lai," tiah a ti. ²⁵ Cucaah Solomon Siangpahrang nih Jehoiada fapa Benaiah kha a hei thlah; cun amah nih cun a tuk i a thi. ²⁶ Cun tlangbawi Abiathar kha siangpahrang nih cun a thawh i, "Anathoth khua ah nangmah inn le lo ah va kal; zeitintiah thih awk na tlak. Sihmanhsehlaw Bawipa Pathian kuang kha ka pa David hmaiah na rak pu i ka pa nih harnak a inmi vialte kha na rak inpi caah, atu ah cun kan that lai lo," tiah a ti. ²⁷ Cucaah Solomon nih Abiathar cu Bawipa tlangbawi sinak khan a chuah i cuticun Shiloh khua chung i Eli chungkhar hna kong Bawipa nih a rak chimmi bia kha a tlinter. ²⁸ Cu thawng cu Joab sin a phak tikah — zeitintiah Joab nih khan Absalom cu a rak bawm lo nain, Adonijah kha cu a rak bawmh — Joab cu Bawipa thlam ah khan a va tli i biakṭheng ki kha a vaa tlaih hna. ²⁹ Cun Solomon Siangpahrang kha, "Joab cu Bawipa thlam ah a zam i zohhmanh, biakṭheng pawngah a um ko," tiah an chimh tikah, Solomon nih Jehoiada fapa Benaiah kha a hei thlah i, "Va kal law, tlu lakin va tu," tiah a ti. ³⁰ Cucaah Benaiah cu Bawipa thlam ah khan a ra i amah kha, "Siangpahrang nawl a si, ’Ra chuak tuah," tiah a ti. Sihmanhsehlaw anih nih, "Si hlah, hika ah hin thi ko ning," tiah a ti. Cu tikah Benaiah nih siangpahrang sinah cun bia a hei kalpi ṭhan i, "Cu bantukin Joab nih a chim i cu bantukin ka leh," tiah a ti. ³¹ Siangpahrang nih khan amah cu a leh i, "Amah nih a chim bantuk khan tuah ko, va tu law phum colh law, cuticun keimah cung le ka pa innchungkhar cungin, Joab nih zei ruang lo i a rak chuahmi thisen mawhnak cu ṭhial tuah. ³² Ka pa David hngalh loin amah nakin a ṭha deuhmi le a ding deuhmi pahnih, Ner fapa Abner, Israel mi ralkapbu haotu le Jether fapa Amasa, Judah mi ralkapbu haotu kha vainam in a tuk hna i a thah hna caah thisen chuah in a tuahmi thil hna cu Bawipa nih amah lu cung lila ah a kirter ṭhan lai. ³³ Cuticun Joab lu cung le a tefa hna lu cungah zungzal in an thisen cu a kir ṭhan lai; sihmanhsehlaw David cung le a tefa hna cung le a innchungkhar cung le a bawi ṭhutdan cungah cun Bawipa sinin a rami daihnak cu zungzal in a um thluangthluan lai," tiah a ti. ³⁴ Cun Jehoiada fapa Benaiah cu a hung kal i a tuk i a thah i ramlak ah amah a inn ah khan an vui. ³⁵ Siangpahrang nih Jehoiada fapa Benaiah cu Joab hmun ah khan ralkapbu cungah a chiah i siangpahrang nih tlangbawi Zadok cu Abiathar hmun ah khan a chiah. ³⁶ Cun siangpahrang nih Shimei kha a auhter hna i amah cu, "Jerusalem ah inn i sak law cuka ah cun um; cun cuka cun khuazei hmanh ah kal hlah. ³⁷ Zeitintiah na chuah i Kidron tivarek na tan ni ah, ka thi hrimhrim lai, ti kha vaa hngalh; na thisen cu nangmah lu cung lila ah a tla lai," tiah a ti. ³⁸ Cun Shimei nih siangpahrang sinah cun, "Na chimmi cu a ṭha; siangpahrang ka bawipa nih a chim bangin, cu bantukin na salpa nih ka tuah lai," tiah a ti. Cucaah Shimei cu Jerusalem ah saupi a um. ³⁹ Sihmanhsehlaw kum thum a donghnak ah khin Shimei sal pahnih hna cu Gath siangpahrang Maakah fapa Akhish sinah an zam. Cun Shimei cu, "Zohhmanh, na sal hna kha Gath ah an um," tiah an chimh tikah, ⁴⁰ Shimei cu a tho i laa pakhat kha a danh i a sal hna kawl awkah Gath ah cun, Akhish sinah cun, a va kal; Shimei cu a va kal i Gath cun a salle cu a ratpi hna. ⁴¹ Cun Solomon cu Shimei kha Jerusalem in Gath ah a va kal i a ra kir ṭhan tiah an chimh tikah, ⁴² siangpahrang nih cun Shimei kha mi a va auhter hna i a sinah, "Bawipa min chalh in chiat kan serter i fel tein kan chimhhrin i, ’Khuazei hmanh ah na kal ahcun, na kal ni hrimhrim ah na thi lai ti kha fiang tein hngal tiah ka ti. Cun nang nih ka sinah, ’Na chimmi cu a ṭha, ka ngaih lai,’ na ti. ⁴³ A si kun ahcun, zeicahdah Bawipa sin i chiat na sermi le keimah nih nawl kan pekmi nawlbia cu na zulh kun lo?" tiah a ti. ⁴⁴ Cun siangpahrang nih cun Shimei cu, "Nangmah nih ka pa David cungah ṭhat lonak na tuahmi vialte kha na lung chungin na hngalh ko; cucaah na ṭhat lonak cu Bawipa nih nangmah lu cung lila ah a kirter lai. ⁴⁵ Sihmanhsehlaw Solomon Siangpahrang cu thluachuah a hmu lai i Bawipa hmaiah zungzal in David bawi ṭhutdan cu fehter a si lai," tiah a ti fawn rih. ⁴⁶ Cun siangpahrang nih Jehoiada fapa Benaiah cu nawl a pek i a va kal i a tuk i a thi. Cucaah pennak cu Solomon kut chungah fehter a si.

¹ Solomon nih Izipt ram siangpahrang Faro he ṭanṭinak cu ṭhitumnak in a ser; Faro fanu kha a lak i amah inn le Bawipa inn le Jerusalem kulhnak vampang kha a sak dih hna hlan cu David khua ah khan a umter. ² Mizapi cu khuahrum bo ah khan raithawinak an tuah ko, zeicahtiah Bawipa min caah inn sakmi a um rih lo. ³ Solomon nih Bawipa kha a dawt ko, a pa David nawlbia kha a zulh ko hna; amah belte, khuahrum bo ah khan rai a thawi i zihmui a khangh. ⁴ Cun siangpahrang cu raithawi awkah Gibeon ah a kal, zeicahtiah mah cucu an khuahrum bo ngan a si; Solomon nih khika biakṭheng cungah khan khangh thawinak thong khat a pekchanh tawn. ⁵ Gibeon ah cun Solomon sinah Bawipa cu mang in zan ah a lang i Pathian nih cun, "Zeidah kan pek lai, ka hal tuah," tiah a ti. ⁶ Cun Solomon nih, "Nangmah nih ka pa David cu zumhawktlak in le dinnak in le nangmah lei i lungthin ding ngeihnak in na hmaiah a um caah, a ngan le a fekmi dawtnak cu na hmuhsak cang; cun hi a ngan i a fekmi dawtnak cu na chiahpiak i nihin i a bawi ṭhutdan cung i a ṭhu dingah fapa pakhat na pek. ⁷ Cun atu cu, maw Bawipa ka Pathian, nangmah nih na salpa hi ngakchiate ka si ko nain, ka pa David hmun ah siangpahrang ah na ka ser cang; keimah cu zeitindah ka chuah lai i zeitindah ka luh lai, ti a hngal lomi ka si. ⁸ Cun na salpa hi, nangmah nih na thimmi miphun ngan, an tam lei i rel cawk lo le zeizat an si hngalh cawk lomi hna lakah hin ka um. ⁹ Cucaah na mi hi uk khawhnak caah a ṭha le a chia kha ka thleidan khawh nakhnga, na salpa hi hngalhthiamnak lungthin ka pe tuah; zeicahtiah, aho nih dah hi na miphun ngan hi a uk khawh hna lai?" tiah a ti. ¹⁰ Solomon nih hi thil hi a hal caah Bawipa cu aa lawm. ¹¹ Cun Pathian nih amah cu, "Mah hihi na ka hal i nangmah caah nun saunak siseh, rumnak siseh, na ral hna thihnak siseh, hal loin nangmah caah a dingmi thil kha hngalh khawhnak na ka hal caah, ¹² zohhmanh, na bia bangin ka tuah lai. Zohhmanh, a fim le thil a thleidang khomi lungthin kan pek, cucaah nangmah bantuk ahohmanh an rak um bal lo i nangmah bantuk hi a chuah zong an chuak bal ti fawn lai lo. ¹³ Cun na ka hal lomi zong kan pek, rumnak he upatnak he, cucaah na nun chung vialte siangpahrang dang ahohmanh nih an in tluk lai lo. ¹⁴ Cun ka nawlbia hna le ka phungbia hna kha zul in na pa David nih a zulh bangkhan ka lam kha na zulh hna ahcun, na nunnak ka sauter fawn lai," tiah a ti. ¹⁵ Cun Solomon cu a hun i hlau i zohhmanh, mang a si. Cun Jerusalem ah a ra i Bawipa biakamnak kuang hmaiah khan a dir i khangh thawinak hna le daihnak thawinak hna kha a pekchanh hna i a sinum vialte kha rawl danghnak a serpiak hna. ¹⁶ Cun hlawhhlangnu pahnih, siangpahrang sinah cun an ra i a hmaiah an dir. ¹⁷ Minu pakhat nih cun, "Maw ka bawipa, hi nu le keimah hi inn khat ah kan um i inn chung i a um lioah khan fa ka hrin. ¹⁸ Cun nau ka hrin hnu ni thum ah hi nu zong nih fa a hrin ve i kanmah lawng kan si, kan sinah inn chungah a dang ahohmanh an um lo; kanmah pahnih lawngte inn chungah cun kan um. ¹⁹ Cun hi nu nih hin a fapa cu a nenh caah zan ah a thi. ²⁰ Cun zanṭim ah a tho riangmang i ka pawng i ka fapa cu na salnu kaa hngilh karah a lak i a ṭang chungah a chiah i a thimi a fapa tu cu ka ṭang chungah a chiah. ²¹ Zinglei i ka fa cu hnuk dinh awk i ka thawh tikah, zohhmanh, a rak thi ko; sihmanhsehlaw ṭha tein zing ah ka zoh tikah, zohhmanh, ka hrinmi ka fate kha a si lo," tiah a ti. ²² Sihmanhsehlaw a dang pakhat nu nih cun a thawh i, "Asilo, a nungmi fate hi keimah i a si i a thimi fate hi nangmah i a si," tiah a ti. A hmasa nu nih khan a thawh i, "Asilo, a thimi fate hi nangmah i a si i a nungmi fate hi keimah i a si," tiah a ti. Cuticun siangpahrang hmaiah cun an chim veve. ²³ Cun siangpahrang nih a thawh hna i, "Pakhat nih, ’A nungmi hi keimah fapa a si i a thimi hi nangmah fapa a si,’ nan ti, cun pakhat nih, ’Asilo, a thimi hi na fapa a si i a nungmi hi ka fapa a si,’ nan ti," tiah a ti. ²⁴ Cun siangpahrang nih, "Vainam rak ka pe tuah u," tiah a ti. Cucaah vainam pakhat siangpahrang hmaiah cun an rak put. ²⁵ Cun siangpahrang nih a thawh i, "A nungmi ngakchiate kha cheu hnih ah cheu u law, cheu khat cu pakhat kha pe u law cheu khat cu a dang pakhat kha pe u," tiah a ti. ²⁶ Cun a nungmi fa a nu nih khan siangpahrang sinah cun, a lung nih a fapa kha a tlaihchan caah, "Maw ka bawipa, a nungmi ngakchiate kha amah cu pe ko, that sawh hlah," tiah a ti. Sihmanhsehlaw a dang pakhat nih khan cun, "Keimah ta zong si hlah seh, nangmah ta zong si hlah seh; cheu ko," tiah a ti. ²⁷ Cun siangpahrang nih a leh hna i, "A nungmi fate kha pakhatnak nu kha pe u, that hrimhrim hlah u, amah kha a nu cu a si," tiah a ti. ²⁸ Cun Israel mi vialte nih siangpahrang biachahmi kha an theih i siangpahrang cu an khuaruah a har, zeicahtiah biading in biachah khawh awkah Pathian fimnak kha a chungah a um ti an hngalh.

¹ Solomon Siangpahrang cu Israel mi vialte cungah siangpahrang a si i ² mah hna hi a bawi ngan cu an si: Zadok fapa Azariah cu tlangbawi ah a si; ³ Shisha fapa hna Elihoref le Ahijah kha caṭialtu an si; Ahilud fapa Jehoshafat kha cazin ṭialtu a si; ⁴ Jehoiada fapa Benaiah kha ralkapbu haotu a si; Zadok le Abiathar kha tlangbawi an si; ⁵ Nathan fapa Azariah kha peng uktu bawi hna cung bawi a si; Nathan fapa Zabud cu tlangbawi le siangpahrang kawi a si; ⁶ Ahishar cu siangpahrang inn zohkhenhtu a si, Abda fapa Adoniram cu hnekmi rian zohtu a si. ⁷ Solomon nih Israel mi vialte cungah bawi pahleihnih a ngei hna, annih nih siangpahrang le a innchungkhar kha rawl khua an khanpiak hna; kum khat chungah pakhat nih thla khat ca cio rawl khua a khan awk a si. ⁸ Mah hihi an min cu an si: Efraim tlangram ah Ben-hur; ⁹ Makaz, Shaalbim, Beth-shemesh le Elom-beth-hanan khua hna ah Bendeker; ¹⁰ Arubboth ah Benhesed, (Soko le Hefer ram vialte cu amah ta an si); ¹¹ Nafath-dor vialte ah Ben-abinadab (Solomon fanu Tafath kha a nupi a si); ¹² Jezreel thlang Zarethan pawng i a ummi Beth-shean vialte le, cun Beth-shean in Abelmeholah tiang, cun Jokmeam khattelei ral tiang, cun Taanak le Megiddo ah Alihud fapa Baana; ¹³ Ramoth-gilead ah Bengeber (amah nih Manasseh fapa Jair i a khua hna, Gilead i a ummi hna kha a ngeih hna i cun Bashan i a ummi Argob peng khua ngan sawm ruk vampang le dar kothrolh a ngeimi hna a ngeih hna); ¹⁴ Iddo fapa Ahinadab kha Mahanaim ah; ¹⁵ Ahimaaz kha Naftali ah (Solomon fanu Basemath kha nupi ah a ṭhit); ¹⁶ Asher le Bealoth ah Hushai fapa Baana; ¹⁷ Issakhar ah Paruah fapa Jehoshafat; ¹⁸ Benjamin ah Ela fapa Shimei, ¹⁹ Amor mi siangpahrang Sihon le Bashan siangpahrang Og hna an ram Gilead ram ah Um fapa Geber. Cun Judah ram ah bawi khat a um. ²⁰ Judah le Israel mi hna cu rilikam i thetse zat khin an tam; an ei an ding i an i lawm. ²¹ Solomon nih Zufrates in Filistin mi hna ram le Izipt ramri tiang ram vialte cu a uk dih hna; a nun chung vialte Solomon sinah cun ngunkhuai an thawh i a rian an ṭuan. ²² Solomon ni khat ca rawl cu changvut dip rel sawm thum le changvut rel sawm ruk, ²³ a thaumi cawtum pahra, ram hnonak caw pakul, tuu za khat an si, sakhi, sazuk, nengpi le cenhmi ar chim loin. ²⁴ Zeitintiah amah nih Zufrates tiva in nitlaklei ram vialte Tifsah in Gaza tiang, Zufrates tiva nitlaklei siangpahrang vialte kha a uk hna i a velchum dihlak in daihnak a um. ²⁵ Cun Solomon a nun chung vialte cu Judah mi hna le Israel mi hna kha Dan in Beersheba tiang, anmah le an mitsur ruang tang le an theipi kung tang cio ah him tein khua an sa. ²⁶ Solomon nih a rangleng hna hnuktu rangtum hna caah rang inn sang li le rangcung ralkap thong hleihnih a ngeih hna. ²⁷ Cun kha bawi hna nih khan, anmah le an thla te cio ah khan Solomon Siangpahrang le Solomon Siangpahrang cabuai i a rami vialte caah khan, rawl khua an khan i zeihmanh an bauter lo. ²⁸ Cun anmah le an rian ning cio ah, rangtum hna le tlik mumi rang hna caah a herhnak hmun paoh ah khan barli le ramro zong an rak put hna. ²⁹ Cun Pathian nih Solomon cu fimnak le hngalhthiamnak tah cawk loin le lungkauhnak rilikam thetse zat in a pek. ³⁰ Cucaah Solomon fimnak nih nichuahlei mi vialte fimnak le Izipt fimnak vialte kha a lonh dih hna. ³¹ Zeitintiah amah cu midang vialte nakin a fim deuh, Ezrah mi Ethan le Mahol fapa hna Heman, Kalkol le Darda nakin a fim deuh; cun a min cu a pawngkam ram dihlak ah a thang. ³² Cun phungthlukbia zong thong thum a chim i a hla cu fung thong khat le fung nga an si. ³³ Thing kong, Lebanon i a ummi thing in i thawk in vampang chungin a hung kheumi hissop tiang a chim tawn; cun saram le vate le a lawnmi thilnung hna le nga hna kong zong kha a chim fawn hna. ³⁴ Cun miphun kip chungin le vawlei cung siangpahrang vialte hna sinin a fimnak a theimi paoh nih Solomon fimnak theih awkah cun an ra.

¹ Tair siangpahrang Hiram nih Solomon cu a pa hmun ah siangpahrang ah an ser cang ti kha a theih tikah, a sinah sinum kha a hei thlah hna; zeitintiah Hiram nih David cu a rak dawt zungzal. ² Cun Solomon nih Hiram cu bia a hei cah i, ³ "Bawipa nih a keza tangah a chiah hna hlantiang a ral hna nih a kenkip in an dum caah, ka pa David nih Bawipa a Pathian min caah inn a sa kho lo ti kha na hngalh. ⁴ Sihmanhsehlaw atu cu Bawipa ka Pathian nih a kenkip ah daihnak a ka pek i ral siseh, vanchiatnak siseh a um lo. ⁵ Cucaah Bawipa nih ka pa David sinah, ’Nangmah hmun ah, na bawi ṭhutdan cungah ka chiah laimi na fapa nih ka min caah inn cu a sak te lai,’ tiin a rak ti bang khan, Bawipa ka Pathian min caah inn ka sa lai, tiah kaa tim. ⁶ Cucaah Lebanon tlang i sidar thing cu an ka haupiak nakhnga nawl pe hna; cun ka sinum hna nih na sinum hna kha an bawmh hna lai i nangmah nih na khiahning bantukin na sinum hna cu ṭuan man ka pek hna lai; zeitintiah Sidon mi tlukin thing saih a thiammi kan lakah an um lo ti kha na hngalh," tiah a ti. ⁷ Hiram nih Solomon bia kha a theih tikah a lung aa lawm ngaingai i, "Hi a nganmi miphun cung i a um dingah David kha a fimmi fapa a petu Bawipa cu nihin ah hin thangṭhat si ko seh," tiah a ti. ⁸ Cun Hiram nih Solomon sinah cun mi a hei thlah hna i, "Bia na ka cahmi kha ka rak theih; sidar thing le saipres thing kong ah na duhmi paoh tuahpiak awkah kaa tim ko. ⁹ Ka sinum hna nih Lebanon tlang in rili ah an vun kalpi lai; cun na ka tinhmi hmun i rili in kalpi awkah puum ah ka ser hna lai i khika ah cun ka phoihter hna lai i nang nih na rak lak hna lai; cun ka duhnak cu ka innchungkhar cu rawl na rin hna lai," tiah a ti. ¹⁰ Cucaah Hiram nih Solomon cu sidar thing le saipres thing a duhmi vialte kha a pek, ¹¹ cun Solomon nih Hiram cu, a innchungkhar hna ca rawl ah changvut phorh thong kul le chiti phorh thong kul a pek. Solomon nih mah hihi kum khat hnu kum khat a pek lengmang. ¹² Cun Bawipa nih Solomon cu bia a kam bang khan fimnak a pek; cun Hiram le Solomon karlak ah remnak a um i annih pahnih nih hnatlaknak an ser. ¹³ Cun Solomon Siangpahrang nih khan Israel mi vialte chungin rian ṭuan awk i hnekmi bu a ser i cu hnekmi bu cu mi thong sawm thum an si. ¹⁴ Cun thla khat ah thong hra lengmang in, aa chang lengmang dingin, Lebanon ah a kuat hna; Lebanon ah thla khat, cun inn ah thla hnih lengmang an um; cu hnekmi bu a uktu ah cun Adoniram a si. ¹⁵ Cun Solomon nih cun thil phortu sang sarih le tlangram i lung ceektu sang riat zong a ngeih hna, ¹⁶ cu hna hleiah cun Solomon nih rian a ṭuantu mi a zohtu hna bawi ngan deuh pawl thong thum le za thum zong a ngeih fawn hna. ¹⁷ Siangpahrang nih nawl a pek hna bantukin, inn hram cu remhmi lung in ser awkah, a nganmi le a man a sungmi lung kha an khoih hna. ¹⁸ Cuticun inn satu pawl, Solomon mi hna le Hiram mi hna le Gebal mi hna nih, innsaknak caah cun lung kha an remh hna i thing kha an timh hna.

¹ Israel mi Izipt ram in an chuah hnu kum za li le kum sawm riatnak kum, Solomon nih Israel mi a uk hna kum linak kum, thla hnihnak thla a simi Ziv thla chungah khan Bawipa inn sak hram cu a thawk. ² Siangpahrang Solomon nih Bawipa ca i a sakmi inn cu a sau dong sawm ruk, a kauh dong kul le a san dong sawm thum a si. ³ Cun cu inn ṭuangpi hmailei i innleng cu a inn vang can in dong kul a sau i inn hmaiah cun dong hra a kau. ⁴ Cun inn thlalangawng cu thing kharvar in a ser hna. ⁵ Cun inn vampang hrul cun inn pakhat a sak fawn i cu nih cun inn vampang cu a kulh dih; ṭuangpi le chungchin hmunthiang zong kha a kulh chih hna; cun a velchum in dal tete a ser hna.a ⁶ A tangnung bik dal cu dong nga a kau, a lailak dal cu dong ruk a kau i a pathumnak cu dong sarih a kau; a dohtu kaan hna cu vampang chungah hluh an si nakhnga lo, inn velchum vampang a lenglei ah khan a fonghlei a ser hna. ⁷ Inn kha an sak tikah lung khoihnak hmun i remh ciami lung in a si, cucaah sobul thawng siseh, hreitlung thawng siseh, thir hriamhrei thawng siseh, an sak lioah khan, zei thawng hmanh biakinn chungah cun a leng lo. ⁸ Dot tangnung bik i luhnak cu inn i a thlanglei kamah a si i dot lailak ah cun hlei in hung kai a si i dot lailak cun dot thumnak ah cun kai chin a si. ⁹ Cuticun inn cu a sak i a lim; cun cu inn siling cu sidar thing tlang le thing per in a ser. ¹⁰ Biakinn a velchum i an sermi a dot hna cu a san dong nga cio a si i sidar thing in a fonghlei hna khan innpi ah cun a tlaihter hna. ¹¹ Cun Bawipa bia cu Solomon sinah a ra i, ¹² "Hi inn na sak liomi kongah hin, ka nawlbia kha na ngaih hna i ka phunglam kha na zulh hna i ka phungbia kha na tuah hna i na zulh hna ahcun, na pa David sinah ka rak chimmi ka bia kha nangmah sinah ka fehter lai. ¹³ Cun Israel mi hna sinah khan ka um lai i ka mi Israel mi kha ka hlawt hna lai lo," tiah a ti. ¹⁴ Cucaah Solomon nih cun inn kha a sak i a lim. ¹⁵ Cun inn vampang cu a chunglei in sidar thing a benh; zelṭuang in siling inntling tiang, a chunglei cu thing a benh hna i a ṭuang ah cun saipres zel a hman. ¹⁶ Cun inn hnulei dong kul cu zelṭuang in inntling tiang sidar thing in a ser i mah hihi a chungah, chungchin hmunthiang, a thiang bik hmun caah khan a ser. ¹⁷ Cun innpi, cucu chungchin hmunthiang in hmailei i a ummi ṭuangpi kha, mah kha kha dong sawm li a sau. ¹⁸ Cun innchung i sidar thing hna cu umruang le pangpar mui in an ṭial hna; a dihlak in sidar thing lawngte a si dih, lung cu pakhat hmanh a lang lo. ¹⁹ Bawipa biakamnak kuang chiahnak caah khan inn chung i a chung bik hmun ah chungchin hmunthiang kha a timh. ²⁰ Chungchin hmunthiang cu dong kul a sau, dong kul a kau i dong kul a sang i sui thiang in a hut dih. Cun sidar thing biakṭheng zong a ser. ²¹ Cun inn cu Solomon nih a chunglei kha sui thiang in a hut i chungchin hmunthiang hmaiah khan sui hri a zam hna i sui in a hut. ²² Cun inn cu a dih cikcek hlantiang, inn cu a ning piin sui in a hut. Chungchin hmunthiang i a ummi biakṭheng zong kha a ning piin sui in a hut. ²³ Chungchin hmunthiang chungah khan cherubim pahnih oliv thing in a ser hna i dong hra veve an sang. ²⁴ Cherub thla pakhat cu dong nga a sau i cherub thla a dang pakhat cu dong nga a sau; cucaah a thla khattelei par in a thla dang khattelei par tiang dong hra a si. ²⁵ Cun cherub a dang pakhat zong kha dong hra a si ve; cherub cu an pahnih in an hmetngan le an muisam aa khat. ²⁶ Cherub pakhat cu dong hra a sang, cu bantukin a dang pakhat zong cu a si ve. ²⁷ Cherubim hna cu inn chung bik hmun ah khan a chiah hna; cherubim thla hna cu pakhat thla nih vampang pakhat, a dang pakhat thla nih khattelei vampang kha a tawng dingin a chiah hna i a dang an thla kha inn laifang ah cun an i tawng. ²⁸ Cun cherubim cu sui in a hut hna. ²⁹ Inn vampang vialte cu a velchum in cherubim muisam le tumkung le pangpar mui in a chunglei khaan he a lenglei khaan he a ṭial dih hna. ³⁰ Inn cu a chunglei dal he a lenglei dal he a zelṭuang kha sui in a hut hna. ³¹ Chungchin hmunthiang i va luhnak ah innka oliv thing in a ser hna; innka cung le innka tung hna nih innka cu kil nga ngei an siter hna. ³² Oliv thing in sermi innka pahnih hna cu cherubim le tumkung le pangpar mui in a suai hna i sui in a hut hna i cherubim le tumkung cu sui in a nalh hna. ³³ Cu bantuk ṭhiamṭhiam in ṭuangpi vung luhnak innka tung hna zong kha oliv thing in, tungvangpalh in a ser hna i, ³⁴ saipres thing in sermi innka pahnih zong a ser hna; innka pakhat i a khar pahnih hna cu bil khawh an si i a dang innka pakhat i a khar pahnih hna zong cu bil khawh an si ve. ³⁵ Cun an cungah cherubim le tumkung le pangpar muisam kha a ker hna; cun cu kermi muisam hna cu sui in nal tein a hut hna. ³⁶ Cun a chung deuh tual cu remhmi lung thap thum le sidar thingphel thap khat in a ser. ³⁷ A kum linak, Ziv thla ah Bawipa inn hram cu bunh a si. ³⁸ Cun a kum hleikhatnak, thla riatnak thla a simi Bul thla ah inn cu a dihlak in le rak tuakning te khan, lim a si. Kum sarih chung a saknak ah a rau.

¹ Solomon nih amah inn cu kum hleithum chung a rianh i a inn cu a dihlak in a lim dih. ² Lebanon Tupi Inn timi kha a sak; a sau cu dong za khat a si, a vang cu dong sawm nga a si, a san cu dong sawm thum a si; cu inn cu sidar thing tung, tlar thum cung i chuanmi sidar thing kaan hna cungah khan sak a si. ³ Cun mah cucu, tlar khat ah tung hleinga cio ah, tung sawm li le tung nga cung i a ummi dal hna cungah cun sidar thing in khuh a si. ⁴ Cun tlar thum in thlalangawng an um i, pakhat zawn ah pakhat cio ah dot thum in an um. ⁵ Innka vialte le thlalangawng vialte cu tungvangpalh an si dih i thlalangawng cu tlar thum in an um i pakhat le pakhat kha an i zawn cio. ⁶ Cun Tungpi Khaan timi khaan kha a ser; a sau cu dong sawm nga, a vang cu dong sawm thum a si; cun a hmaiah cun ṭumbut a ser, tungpi hna le an hmai i saptonh kha a ser fawn hna. ⁷ Cun Bawi Ṭhutdan Khaan timi kha a ser, biaceihnak caah a si i Biaceihnak Khaan ti zong a si ve; mah cucu zelṭuang in inntling tiang sidar thing in sak a si. ⁸ Cun a umnak ding ca i amah inn, cu khaan hnulei i a ummi cu, cu bantuk ṭhiamṭhiam in sakmi a si. Cun hi khaan bantuk hin a ṭhit mi Faro fanu caah khan inn pakhat a sak. ⁹ Hi vialte cu a man a harmi lung in ser an si; lung cu tahning tein remhmi, a lenglei he a chunglei he hluah in ahmi, a hram in a par tiang; cun Bawipa inntual in tual ngan tiang an si. ¹⁰ Cun a hram lung cu lung man tam an si, lung ngan pipi, dong riat hna, dong hra hna an si. ¹¹ Cun cunglei ah cun lung man fak, tahning tein remhmi le sidar thing an si. ¹² Tual ngan cu remhmi lung chonh thum le sidar thing thluan thap khat in kulh a si, Bawipa inn chung i chungchin tual le cu inn innleng bantuk khan. ¹³ Cun Solomon Siangpahrang nih Tair in Hiram kha a hei cah i an ratpi. ¹⁴ Amah cu Naftali phun chung i nuhmei pakhat i a fapa a si i a pa cu Tair mi a si, amah cu dar lei i zungthiam a si; amah cu dar leiah cun fimnak le hngalhthiamnak le zung thiamnak in a khatmi a si. Siangpahrang Solomon sinah khan a ra i a rian vialte kha a ṭuanpiak. ¹⁵ Dar tungpi pahnih a thlet hna. Tungpi pakhat cu a san dong hleiriat a si i a sum cu dong hleihnih a si, a chung a kua i a chah cu zapar a si; tungpi pahnihnak cu cu bantuk ṭhiamṭhiam a si. ¹⁶ Tungpi dong i chiah awkah dar in thletmi luchin pahnih a ser hna; luchin pakhat cu a sanlei dong nga a si, luchin dang pakhat cu a sanlei dong nga a si ve. ¹⁷ Cun sur bantukin ṭial cikcek tein sermi le thir cikcin bantukin ngerh cincianmi pahnih, tungpi dong i a ummi luchin caah cun a ser hna; luchin pakhat caah sur khat a dang luchin pakhat caah sur khat ve. ¹⁸ Cu bantuk ṭhiamṭhiam in, tungpi cung i a ummi luchin khuhtu sur pakhat cungah khan, a velchum in taleti tlang hnih in a ser hna; a dang luchin ca zongah khan cu bantukin a tuah ve. ¹⁹ Innleng i a ummi tungpi hna an dong a khuhtu luchin cu dong li an si i lili pangpar mui in ser an si. ²⁰ Luchin cu tungpi pahnih hna dong ah khan le sur bantukin sermi pawng i a pummi a fonghlei cungah khan an um; taleti cu za hnih an si, tlang hnih in a velchum in an um; cun tungpi dang pakhat zong kha cu bantuk ṭhiamṭhiam a si. ²¹ Tungpi cu biaknak inn innleng ah khan a bunh hna; thlanglei kamah khan tungpi cu a bunh i a min ah Jakhin a sak; cun chaklei kamah tungpi kha a bunh i a min ah Boaz a sak. ²² Cun tungpi dong cu lili pangpar mui in a ṭelh hna. Cuticun tungpi rian cu a lim hna. ²³ Cun hmaihum pakhat a ser, a bial i khattelei tlang in khattelei tlang cu dong hra a si, a san cu dong nga a si i a velchum in tah tikah dong sawm thum a si. ²⁴ Cun a tlang toiah cun um ruang an um, a dong sawm thum ning khan, cun a hmaihum kha an vel; um ruang cu tlang hnih an si i an thlet tikah khan an rak thlet chih hna. ²⁵ Cun mah cucu cawtum hleihnih cungah a dir, pathum cu chaklei an zoh, pathum cu nitlaklei an zoh, pathum cu thlanglei an zoh, pathum cu nichuahlei an zoh; hmaihum cu an cungah khin a si i an hnulei an i chit cio. ²⁶ A chahlei cu kut zabok a si; a tlang cu hraitlang bantukin ser a si i lili pangpar bantuk a si; bath thong hnih a tlum. ²⁷ Cun dar in sermi a hunnak pahra zong a ser fawn hna; a hunnak hna cu dong li cio an sau, dong li cio an kau i dong thum cio an sang. ²⁸ Mah hihi hunnak an ser hna ning cu a si; tlang an ngei i cu tlang hna cu tung karah an um; ²⁹ cun tung karlak i a ummi tlang hna ah cun chiandeih hna le cawtum hna le cherubim an cuang; cun a tung hna zongah cun, chiandeih hna le cawtum hna cung le toiah khan, ṭamh cikcekmi kual tete an um. ³⁰ Cu hleiah hunnak hna nih khan dar cangpa kual pali le dar hlung kha an ngei cio. Cun a kil pali ah khan dohtu baan an um cio: hmaihum toiah cun, dohtu baan hna cu an pang cio ah khan ṭamhmi kual tete kha an thlet chih hna. ³¹ Dohnak baan karlak i a ka cu dong khat a kau i a ka cu a hram bantukin a pum i dong khat le a cheu a tla i a ka tlang ah cun kuakcik in an tuk fawn, cun a tlang hna cu an pum lo, tung vang palh an si. ³² Cun cangpa kual pali hna cu a tlang toiah cun an um hna i cangpa kual hlung hna cu hunnak he khan an i tlai dih, cun cangpa kual cu dong khat le a cheu cio an sang. ³³ Cangpa kual an serning hna cu rangleng ke kual an serning bantuk a si ko: cangpa kual hlung hna, cangpa kual tlang hna, cangpa kual karhtu fung tete hna le a lai bo hna cu an dihlak in a thlet in thletmi an si. ³⁴ Hunnak kil pali ah cun dohtu baan pali an um i dohtu baan hna cu hunnak he cun an i tlai dih. ³⁵ Hunnak dong ah cun a pummi a ka a um i dong cheu a sang; a tung hna le a tlang hna cu hunnak cungah khan an dir i a tlang hna he cun an i tlai dih. ³⁶ Cun a milmi a tung hna le a tlang hna cungah khan cherubim le chiandeih hna le tumkung hna an suai hna, a lawnnak hmun ning cio khan; cun a velchum in kual tete in a kulh dih hna. ³⁷ Hi bantukin hunnak pahra kha a ser hna: an dihlak te hin thlet khatmi, tah khatmi le muisam khat an si. ³⁸ Cun i ṭawlnak dar um pahra a ser hna; i ṭawlnak um pakhat nih bath sawm li cio an tlum, i ṭawlnak um pakhat cu dong li cio an si i hunnak pahra hna nih khan pakhat cio in an co hna. ³⁹ Cun hunnak hna cu, panga, inn a thlanglei kamah, cun panga, inn a chaklei kamah a hun hna; cun hmaihum cu inn a nichuah thlanglei kil ah khan a hun. ⁴⁰ Hiram nih um hna le cawhlek hna le khengkuar hna zong kha a ser hna. Cuticun Hiram nih Bawipa inn ca i Siangpahrang Solomon a tuahpiakmi rian vialte kha a lim dih: ⁴¹ tungpi pahnih, tungpi dong i a ummi luchin kheng pahnih le tungpi dong i a ummi luchin pahnih hna kheng khuhnak ca i sur bantukin sermi pahnih; ⁴² cun tungpi cung i a ummi luchin kheng pahnih hna a khuhtu ding ca i sur pahnih hna caah khan taleti za li, sur pakhat caah rual hnih cio; ⁴³ hunnak pahra le hunnak cung i i ṭawlnak um pahra; ⁴⁴ hmaihum pakhat le hmaihum tang i cawtum hleihnih. ⁴⁵ Cun um hna le cawhlek hna le khengkuar hna, hi umkheng Bawipa inn chung i a ummi vialte, Hiram nih Siangpahrang Solomon a serpiakmi hi dar tleu in sermi an si. ⁴⁶ Jordan nelrawn, Sukkoth le Zarethan karlak i tlak hmun ah khan siangpahrang nih a thlet hna. ⁴⁷ Cun cu umkheng vialte cu an tam tuk caah Solomon nih thlai loin a chiah ko hna; dar cu a khing zeizat dah a si hnga ti hngalh khawh ding a si lo. ⁴⁸ Cuticun Solomon nih Bawipa inn chung i a ummi umkheng vialte cu a ser hna: sui biakṭheng, Hun camcinmi changreu ca i sui cabuai, ⁴⁹ sui thiang in sermi mei vannak tung, chungchin hmunthiang hmai i chaklei kamah panga, thlanglei kamah panga a ummi hna kha; pangpar hna, mei inn hna, cengceh hna, sui in sermi hna kha; ⁵⁰ hrai hna, mei hmihnak hna, kheng kuar hna, zihmui ca kheng tete hna, mei zawhnak hna, sui thiang in sermi hna kha; cun innchung chungchin thiang bik hmun innka ca i sui kapza hna le biakinn ṭuangpi innka hna i sui kapza hna. ⁵¹ Cuticun Siangpahrang Solomon nih Bawipa inn ca i a ṭuanmi rian vialte cu a lim. Cun a pa David nih a rak pekchanhmi thil: ngun, sui le umkheng hna kha a luhpi hna i Bawipa inn rokuang chungah khan a ken hna.

¹ Cun Solomon nih Israel mi upa vialte hna le an phun cio i lu a simi vialte hna, Israel mi chungkhar hna haotu vialte hna kha, David khua Zion in Bawipa biakamnak kuang cu hunpi awkah, Jerusalem khua ah Siangpahrang Solomon hmaiah a pumh hna. ² Cun thla sarihnak thla a simi Ethanim thla chung puai ah khan Israel mi vialte cu Siangpahrang Solomon sinah an i pum. ³ Cun Israel mi upa vialte cu an ra i tlangbawi hna nih khan kuang cu an thawhpi. ⁴ Cun Bawipa kuang kha le, tonnak thlam kha le thlam chung i a ummi umkheng thiang vialte kha an hunpi, tlangbawi hna le Levi mi hna nih an hunpi hna. ⁵ Cun Solomon Siangpahrang le Israel mi bu vialte, a hmai i aa pummi hna nih cun amah he kuang hmaiah khan tuu le cawtum tam tuk hringhran an thawi hna caah zeizat an si kha hngalh cawk le rel cawk an si lo. ⁶ Cun tlangbawi hna nih khan Bawipa biakamnak kuang cu amah hmun ah inn chung chungchin hmunthiang, hmunthiang bik, cherubim hna thla toiah khan an chiah. ⁷ Zeitintiah cherubim hna nih khan kuang umnak hmun cungah khan an thla an samh hna i cucaah kuang le a laang hna kha cherubim hna nih cun an huh hna. ⁸ Cun laang cu an sau hringhran caah hmunthiang in chungchin hmunthiang hmaiah khan an par cu an lang; sihmanhsehlaw a leng cun hmuh khawh an si lo; cuka ah cun nihin tiang hin an um ko. ⁹ Israel mi nih Izipt ram in an chuah tikah Bawipa nih annih he biakamnak a tuahnak Horeb tlang i Moses nih a khumhmi lung tlap pahnih hna dah ti lo kha cu, kuang chungah zeihmanh a um lo. ¹⁰ Cun tlangbawi kha hmunthiang chungin an chuah tikah Bawipa inn cu minmei a khat. ¹¹ cucaah minmei ruangah khan rianṭuan awkah tlangbawi hna cu an dir kho lo; zeitintiah Bawipa sunparnak cu Bawipa inn kha a khat. ¹² Cun Solomon nih a thawh i, "Bawipa nangmah nih ni khi van ah khin na chiah, Sihmanhsehlaw a chahmi muihnak chungah ka um lai, na ti. ¹³ A sunglawimi inn, nangmah kan sakpiak cang, Zungzal in na umnak ding caah," tiah a ti. ¹⁴ Cun siangpahrang cu a hnulei aa mer i Israel mi aa pummi vialte cu an dir lioah Israel mi aa pummi vialte cu thluachuah a pek hna. ¹⁵ Cun aa thawh i, "Ka pa David sinah, ’Ka mi Israel mi hna cu Izipt ram in ka chuahpi hna ni thawk in, Israel mi hna phun chung i khua zeihmanh kha, ka min umnak ding i inn saknak caah, ka thim lo; ¹⁶ sihmanhsehlaw David cu ka mi hna cung i um awkah ka thim,’ tiin a kaa in a chimmi a biakamnak kha a kut in a tlintertu Bawipa, Israel Pathian cu thangṭhat si ko seh. ¹⁷ Bawipa, Israel Pathian min ca i inn rak sak kha ka pa David lung chungah a rak um ko. ¹⁸ Sihmanhsehlaw Bawipa nih ka pa David cu a thawh i, ’Ka min ca i inn sak awk kha na lung chung i a um caah, mah cucu na lung chung i na umter cu a ṭha; ¹⁹ asinain, nangmah nih cun inn cu na sa lai lo, sihmanhsehlaw nangmah nih na hrin laimi na fapa nih ka min ca inn cu a run sak te lai,’ a ti. ²⁰ Atu cu Bawipa nih a biakamnak a sermi kha a hun tlinter cang; zeitintiah ka pa David hmun ah khan ka kai cang i Bawipa biakam bang khan Israel mi bawi ṭhutdan cungah ka ṭhu i Bawipa, Israel Pathian min caah khan inn cu ka sak cang. ²¹ Cun Izipt ram in a chuahpi hna tikah kan pupa hna he Bawipa nih a rak sermi biakamnak a umnak kuang caah khan, khika ah hmun pakhat ka tuah," tiah a ti. ²² Cun Solomon cu Bawipa biakṭheng hmaiah khan Israel mi aa pummi vialte hna hmuh ah cun a dir i van leiah a kut a phar hna i, ²³ "Maw Bawipa Israel Pathian, cunglei van ah siseh, tanglei vawlei ah siseh, nangmah bantuk Pathian zeihmanh an um lo, nang nih cun na hmai i an lungthin dihlak in a kalmi na salle hna cungah cun na biakamnak kha na zulh i a fekmi na dawtnak kha na langhter; ²⁴ na sal David, ka pa sinah na rak chimmi cu na zulh; asi, a sinah na kaa in na rak chim i mah cucu nihin ni ah hin na kut in na tlinter. ²⁵ Cucaah maw Bawipa, Israel Pathian, na salpa David ka pa sin i, ’Na fapale hna nih hin, nangmah nih ka hmaiah na rak kal bantuk khan ka hmai i kal awkah an lam kha an i ralrin ahcun, Israel mi bawi ṭhutdan cung i ka hmaiah a ṭhu dingmi na ṭhing lai lo,’ tiin bia na rak kammi kha tlinter ko. ²⁶ Cun maw Israel Pathian, na salpa David ka pa sin i na rak chimmi bia kha fehter ko. ²⁷ "Sihmanhsehlaw Pathian cu vawlei cungah cun khua a sa taktak hnga maw? Zohhmanh, van le a sang bik van nih hin an in tlum lo, zeitindah hi keimah sakmi inn chinchin nih cun an tlum hnga! ²⁸ Sihmanhsehlaw na salpa nih thla ka camnak le kan nawlnak cu ka ngaihpiak ko sawh, maw Bawipa, ka Pathian, nangmah hmaiah nihin ah na salpa nih ka aunak le thla ka cammi cu ka theihpiak ko sawh; ²⁹ zeitintiah nangmah nih, ’Khika ah ka min a um lai,’ tiin na rak timi, hi inn leiah hin chunzan in na mit na au nakhnga le hi inn lei hoih in na salpa nih thla ka cammi hi na theih nakhnga. ³⁰ Cun na salpa le na mi Israel mi hna nih hi hmun lei hoih in thla kan cam tikah, kan in nawlnak cu kan theihpiak ko; asi, na umnak hmun van khin run thei ko law, cun na theih tikah kan ngaithiam ko. ³¹ "Mi pakhatkhat nih a innpa cungah a sual i chiat serter a si i a chiatsernak cu hi inn chung na biakṭheng hmaiah hin chimter a si ahcun, ³² khi tikah nang nih van in run thei law, run ṭuan law, na salle cu bia run khiak ko hna, a mawhtu cu amah lu lila ah a ziaza kha tlunter in sual run phaw law, a dingmi cu a dinnak ning khan pek awkah thiam run coter ko. ³³ "Na mi Israel mi hna nih nangmah cung i an sual caah an ral hna hmaiah an sungh tikah, nangmah leiah khan an i mer ṭhan i na min kha an upat i nangmah kha hi inn chungah an in nawl i na sinah thla an cam ahcun, ³⁴ van ah khin rak theihpiak hna law na mi Israel mi sualnak cu ngaithiam ko, cun an pupa hna sinah na rak pekmi ram ah khan kirpi ṭhan ko hna. ³⁵ "Cun nangmah cung i an sual ruangah van cu a pih i ruah a sur lo tikah, hi hmun lei hoih in thla an cam i na min kha an upat i nangmah nih na hrem hna tikah, an sualnak kha an mertak ahcun, ³⁶ nangmah nih an kal nakhnga ding lam ṭha kha na cawnpiak hna tikah, van ah khin rak thei law na mi Israel mi na sal hna an sualnak kha rak ngaithiam ko hna; cun na mi hna sinah ro caah na pekmi na ram cungah cun ruah cu surter ko. ³⁷ "Ram chungah hin mangṭam a tlun ah siseh, rai a tlun ah siseh, rocarnak le theikung rai a tlun ah siseh, khaubawk le lunghmul an tlun ah siseh, an ral hna nih khan an khua pakhatkhat i an hren hna ah siseh, zei bantuk rai hmanh si ai kun, zei bantuk zawtnak khum si ai kun, ³⁸ Israel mi nih an dihlak in siseh, ahopaoh nih siseh, zei bantuk thlacamnak zong si ko seh, zei bantuk nawlnak zong si ko seh, an tuah i an lung chung cio in hremnak an inmi kha an hngalh i hi inn leiah hin an kut an zau hna ahcun, ³⁹ khi tikah nang nih na umnak van khin rak theihpiak hna law ngaithiam hna law, tuah law an zulhmi lam vialte ning cio ah an lungthin nangmah nih na hngalh ko mi hna cu pe ko hna (zeitintiah nangmah, nangmah lawnglawng nih minung fa vialte hna an lung cu na hngalh); ⁴⁰ zeitintiah kan pupa na rak pekmi hna ram ah hin an khuasak chung vialte nangmah kha an in ṭihzah nakhnga. ⁴¹ "Cu bantukin, na mi Israel mi a si lomi ramdangmi nih na min ruangah lam hlatpi ram in a rat i. ⁴² (zeitintiah na min lianngan le a ṭhawngmi na kut le na samhmi na ban cu an theih ṭheo ding si kaw), hi inn lei hoih in thla a cam tikah, ⁴³ na umnak van ah khin rak theihpiak law, ramdangmi nih an in auhnak vialte ningin tuahpiak ko hna; zeitintiah vawleicung mi vialte nih na mi Israel mi bangin, na min kha an theih i nangmah kha an in ṭih i hi inn ka sakmi hi nangmah min in kawh a si kha an hngalh nakhnga. ⁴⁴ "Cun na mi hna cu an ral doh awkah an kal ahcun, zei lam zongin na kalter hna a si ah, nangmah nih na thimmi khua hi le nangmah min caah ka sakmi inn lei hoih hin Bawipa sinah thla an cam ahcun, ⁴⁵ khi tikah van ah khin an thlacamnak le an in nawlnak cu rak theihpiak hna law, annih cu an rian ah cun ṭanpi ko hna. ⁴⁶ "Annih nih na cungah an sual ahcun — zeitintiah a sual lomi minung an um lo — cun an cungah na thin a hun i ral kut chungah annih cu na chanh hna i an ral hna nih an ram ah a hlatpi ah siseh, a naite ah siseh, sal ah an kalpi hna i, ⁴⁷ sihmanhsehlaw sal ah an kalpi hnanak ram ah cun, an lung a hung pem i an i ngaihchih i a tlaitu hna ram ah cun na sinah, ’Kan sual cang, ding lopi le ṭhalo piin thil kan tuah cang,’ tiin nawlnak an tuah ahcun, ⁴⁸ sal ah a kalpitu hna an ral hna ram ah khan an ruahnak dihlak le an lungthin dihlak in an i ngaihchih i, an pupa hna sinah na rak pekmi an ram le nangmah nih na thimmi khua le na min caah ka sakmi inn lei holh in nangmah sinah thla an cam ahcun, ⁴⁹ khi tikah, nangmah nih na umnak van ah khin an thlacamnak le an in nawlnak cu rak theihpiak hna law, an rian ah cun ṭanpi ko hna, ⁵⁰ nangmah cungah a sualmi cu ngaithiam hna law nangmah cungah an palhnak vialte cu ngaithiam ko hna; cun sal ah a kalpitu hna nih khan an cungah zaangfahnak an ngeih nakhnga an hmuh hngan ah cun annih cu zaangfahnak pe ko hna, ⁵¹ (zeitintiah annih cu thir somei, Izipt ram, chungin na chuahpimi hna na mi le na ro an si). ⁵² Na salpa nih kan nawlnak le na mi Israel mi nih an in nawlnak ah hin na mit chia hram ko, an in auh tik paoh ah na hna chit ko hna. ⁵³ Zeitintiah maw Bawipa, Pathian, nangmah nih kan pupa hna Izipt ram chungin na chuahpi hna tikah na sal Moses sinin na rak thanh cang bantuk khan, na ro si awkah vawleicung mi vialte hna lakin na rak thleidan cang hna," tiah a ti. ⁵⁴ Solomon nih Bawipa sinah hi thlacamnak le nawlnak vialte a cam dih tikah, van leiah zaa chan in a khuk aa bilnak Bawipa biakṭheng hmai khan a tho i, ⁵⁵ a dir i Israel mi aa pummi vialte kha aw thang piin thluachuah a pek hna i, ⁵⁶ "A biakam vialte ningin a mi Israel mi dinhnak a petu Bawipa cu thangṭhat si ko seh; a sal Moses sinin a chimmi a biakam ṭha vialte cu bia pakhat hmanh a pelhmi a um lo. ⁵⁷ Bawipa kan Pathian cu, kan pupa hna sinah a um bang khan kannih sinah um seh, kan kaltak in a hlawt zong kan hlaw hlah seh; ⁵⁸ zeitintiah amah nih kan pupa nawl a rak pekmi hna a nawlbia hna le a phungbia hna le a phunglam hna cu kan zulh hna nakhnga, amah leiah kan lung kha a sor tlukter ko seh. ⁵⁹ Bawipa hmaiah nawlnak ka tuahnak ka bia hna hi Bawipa kan Pathian pawngah chun zan in um seh law, a sal ka rian hi ni khat hnu ni khat a herhnak bangin ka ṭanpi ko seh; ⁶⁰ zeitintiah vawleicung mi vialte nih Bawipa cu Pathian a si i a dang ahohmanh an um lo, ti kha an hngalh nakhnga. ⁶¹ Cucaah a nawlbia le a phungbia kha zul in, nihin i nan tuah bangin, Bawipa kan Pathian sinah nan lungthin cu a dih umnak in fehter ko u," tiah a ti. ⁶² Cun siangpahrang le a sinah a ummi Israel mi vialte nih Bawipa hmaiah raithawinak an pekchanh. ⁶³ Bawipa sin i pekchanhmi daihnak thawinak hna caah Solomon nih cawtum sang hnih thong hnih le, tuu sing khat sang hnih a pekchanh hna. Cuticun siangpahrang le Israel mi vialte nih Bawipa inn cu an pekchanh. ⁶⁴ Cu ni ṭhiamṭhiam ah cun siangpahrang nih Bawipa inn hmai i a ummi tual a laifang kha a thianter; zeicahtiah Bawipa hmai i a ummi dar biakṭheng kha, khangh thawinak le changvut thawinak le daihnak thawinak i a thau hna tlum awk caah a hme tuk i cucaah khika ah khan khangh thawinak le changvut thawinak le daihnak thawinak i a thau hna kha a pekchanh hna. ⁶⁵ Cuticun cu tan ah cun Solomon le Israel mi vialte, mi tampi aa pummi bu, Hamath khua luhnak in Izipt tivate tiang, cu mi hna nih cun Bawipa an Pathian hmaiah ni sarih chung puai an tuah. ⁶⁶ A ni riat ni ah cun mi cu a kalter hna; annih nih siangpahrang kha thluachuah an pek i Bawipa nih a sal David le a mi Israel mi cung i ṭhatnak a langhtermi ruangah lunglawm le thanuam in an inn cio ah an tlung.

¹ Solomon nih Bawipa inn le siangpahrang inn le Solomon nih sak a duhmi vialte kha a sak dih tikah, ² Gibeon ah a sinah a rak langh bangkhan, Bawipa cu a voi hnihnak Solomon sinah khan a lang ṭhan. ³ Cun Bawipa nih a thawh i, "Ka hmai i na thlacamnak le na ka nawlnak vialte cu ka theih cang; hi na sakmi inn hi ka thianter cang i zungzal ca in a chungah ka min ka chiah cang; ka mit le ka lung cu khika ah an um camcin lai. ⁴ Cun nangmah kongah, na pa David nih a rak kal bantuk khan, ka hmaiah lung hlumte le dinnak in na kal i nawl kan pekmi vialte ningin na tuah i ka nawlbia le ka phung lam kha na zulh hna ahcun, ⁵ khi tikah na pa David sinah, ’Israel mi bawi ṭhutdan cung ṭhu dingmi na ṭhing lai lo,’ tiin bia ka rak kam cang bang khan Israel mi hna cungah zungzal ca in na siangpahrang bawi ṭhutdan cu ka fehter lai. ⁶ Sihmanhsehlaw nangmah siseh, na fale si hna seh, keimah zulhnak khan nan pial i nan hmaiah ka chiahmi ka nawlbia le ka phungbia kha nan zulh hna lo i nan kal i pathian dang kha an rian nan ṭuan hna i nan biak hna ahcun, ⁷ khi tikah Israel mi cu ram ka rak pekmi hna chung khan ka hloh hna lai i ka min ca i ka thiantermi inn hi ka mit hmuh phak lo ah ka hlonh lai; cun Israel cu phungthluk bia le nihchuak capo bia ah mi vialte lakah a cang lai. ⁸ Cun hi inn hi a rawkmi thilpon ah a cang lai; a pawng i a kalmi paoh an khuaruah a har lai i an hnar an phit lai i annih nih cun, ’Zeicahdah mah ti hin Bawipa nih hi ram cung le hi inn cungah hin a tuah hnga?’ tiah an ti lai. ⁹ Cun annih nih an thawh hna lai i, ’Zeicahdah a si ti ahcun, annih an pupa hna Izipt ram in a chuahpitu Bawipa an Pathian kha an hlawt i pathian dang kha an i tlaih hna i an biak hna i an rian an ṭuan hna caah hi ṭhat lonak vialte hi Bawipa nih an cungah a tlunter,’ tiah an ti lai," tiah a ti. ¹⁰ Solomon nih Bawipa inn le siangpahrang inn a sak chung kha kum kul a rau. ¹¹ Tair siangpahrang Hiram nih khan sidar thing, saipres thing le sui a duh zat in Solomon kha a pek. Cun Siangpahrang Solomon nih Galilee ram chung khua pakul kha a pek. ¹² Sihmanhsehlaw Solomon nih a pekmi khua hna kha zoh awkah Hiram nih Tair in a rat tikah, a lung an tong lo. ¹³ Cucaah amah nih cun, "Ka unaupa, na ka pekmi khua hna hi zei bantuk khua hen an si ee?" tiah a ti. Cucaah nihin tiangin annih cun Kabul tiah ti an ti. ¹⁴ Hiram nih khan siangpahrang cu sui talen za khat le kul a rak pek. ¹⁵ Cun Siangpahrang Solomon nih Bawipa inn le amah inn le Millo kha le Jerusalem kulhnak vampang le Hazor le Megiddo le Gezer ¹⁶ (Izipt siangpahrang Faro nih khan Gezer khua kha a hung tlaih i mei in a khangh i cu khua chung i a ummi Kanaan mi kha a thah hna i a fanu, Solomon nupi kha, hlawn ah a rak pek; ¹⁷ i Solomon nih Gezer khua kha a sak ṭhan), cun thlanglei Beth-horon, ¹⁸ Baalath, le Judah ram chung ramlak i a ummi Tamar khua, ¹⁹ cun Solomon nih a ngeihmi thil khonnak khua vialte le a rangleng hna ca khua hna le a rangcung ralkap khua hna le Jerusalem, Lebanon le a penmi ram dihlak ah Solomon nih sak a duhmi paoh saknak caah hnekmi rianṭuantu bu a sernak kong cu mah hihi a si. ²⁰ Amor mi le Hit mi le Periz mi le Hiv mi le Jebus mi chungin a tangmi vialte, Israel mi a si lomi hna — ²¹ Israel mi nih an hrawh dih khawh lomi hna, an hnu i an tefa a rung tangmi hna kha — mah hna hi Solomon nih hnekmi rianṭuantu sal bu ah a ser hna i cu bang cun nihin tiang hin an si. ²² Sihmanhsehlaw Israel mi cu Solomon nih sal ah a ser hna lo; annih cu ralkap, bawi, ralbawi, ralkapbu haotu, a rangleng bawi hna le rangcung ralkap an si. ²³ Rianṭuantu a zohtu hna, Solomon rian cung i bawi bikbik hna cu, hi za nga le sawm nga hi an si. ²⁴ Sihmanhsehlaw Faro fanu cu David khua khan Solomon nih a sakpiakmi amah inn ah khan a hung kal; cu hnuah Millo kha a sak. ²⁵ Kum khat ah voi thum Solomon nih, Bawipa ca i a sermi biakṭheng cungah khan, khangh thawinak hna le daihnak thawinak hna kha a pekchanh tawn hna i Bawipa hmaiah zihmui kha a khangh tawn. Cuticun inn cu a lim. ²⁶ Siangpahrang Solomon nih, Edom ram chung, Rili Sen kam khua Eloth pawng i a ummi Ezion-geber khua ah khan sangphawlawng phu khat a ser. ²⁷ Cun cu sangphawlawng rual sinah cun Hiram nih a sinum, rili kong a hngal ngaimi tilawng rianṭuantu hna kha Solomon sinum hna he cun hmunkhat ah a thlah hna; ²⁸ cun Ofir ah an va kal i cuka cun sui an rak phorh; an rak phorhmi cu talen za li le kul a si; annih nih Siangpahrang Solomon sinah khan an rak phorh.

¹ Sheba siangpahrangnu nih Bawipa min kong i Solomon minthannak kha a theih tikah, amah cu a harmi biahalnak in hneksak awkah a ra. ² Jerusalem ah cun mizul tampi he, zihmui a phormi kalauk hna le sui tampi le lungvar hna he a ra i Solomon sinah a phak tikah a lung chung i a ummi vialte cu a chimh dih. ³ Solomon nih a biahalnak vialte cu a leh dih; siangpahrang nih a sullam a chimh khawh lomi, a hngalh lomi zeihmanh a um lo. ⁴ Cun Sheba siangpahrangnu nih Solomon fimnak vialte le inn a sakmi le ⁵ a cabuai i rawl le a bawi pawl an ṭhut-umning le a sinum hna nih mi an tuammuai hna ning le, an hnipuan le an hrai putu hna le Bawipa inn i a pekchanhmi a khangh thawinak hna kha a hmuh tikah, a chungah thlarau a taang ti lo. ⁶ Cun siangpahrang cu a thawh i, "Ka ram chungin, na rian ṭuan ning le na fimnak kong ka rak theihmi kha bia dik a si ko, ⁷ sihmanhsehlaw an chimmi cu keimah hrim ka rat i keimah mit hrim nih a hmuh hlanah cun ka zum lo; cun zohhmanh, a cheu hmanh an rak ka chimh ṭung lo; na fimnak le na rumnak nih ka rak theihmi bia cu a lonh diam. ⁸ Na nupi hna hi an van a va ṭha dah! Hi na sinum hna nangmah hmaiah a dir zungzal i na fimnak a theimi hna hi an van a va ṭha dah! ⁹ Bawipa na Pathian, nangmah chungah lawmhnak a ngei i Israel mi bawi ṭhutdan cungah an ṭhuttertu cu thangṭhat si ko seh. Bawipa nih Israel cu zungzal in a dawt caah, nangmah nih biading le dinnak cu na tuah nakhnga, siangpahrang ah an ser," tiah a ti. ¹⁰ Cun siangpahrang cu sui talen za khat le kul le zihmui tampi le lungvar man sung hna kha a pek; Sheba siangpahrangnu nih Siangpahrang Solomon a pekmi tluk tam hin zihmui a lut ṭhan bal ti lo. ¹¹ Cuhleiah Hiram sangphawlawng rual, Ofir in sui a rak phortu nih khan Ofir in almuk thing tampi le lungvar mansung tampi an rak phorh hna. ¹² Cun siangpahrang nih almuk thing cun Bawipa inn dohnak tung hna le siangpahrang inn dohnak tung hna le hlasatu hna caah tingtang le ruakhuang hna zong a ser hna; cun nihin tiangin cu bantuk almuk thing cu a ra bal ti lo i hmuh zong a si bal ti lo. ¹³ Cun Siangpahrang Solomon nih Sheba siangpahrangnu cu a duhmi vialte, Siangpahrang Solomon nih amah siannak in a pekmi hleiah a halmi vialte zong kha a pek dih. Cucaah amah ram ah khan a sinum hna he khan an tlung ṭhan. ¹⁴ Solomon sinah kum khat ah a lutmi sui a rih lei cu talen za ruk, sawm ruk le paruk a si; ¹⁵ mah hihi chawlet hna le chawdawr hna lam in le Arabia ram siangpahrang vialte hna le, cu ram uk bawi hna sinin a lutmi lengah a si. ¹⁶ Solomon nih phaw a nganmi za hnih, denmi sui in a ser hna, phaw pakhat ah sui shekel za ruk cio a lut. ¹⁷ Cun denmi sui in phaw za thum a ser hna; phaw khat ah sui mina pathum cio a lut; cun siangpahrang nih Lebanon Tupi Inn ah khan a chiah hna. ¹⁸ Cun siangpahrang nih cun vui ho bawi ṭhutdan nganpi zong a ser i a thiang bikmi sui khan a hut. ¹⁹ Bawi ṭhutdan ah cun lamhbak paruk an um i bawi ṭhutdan a hnulei kap ah cun cawfa lu a um, cu ṭhutdan kam veve ah cun ban chiahnak an um i ban chiahnak pawng veve ah cun chiandeih pahnih an dir, ²⁰ lamhbak kamkip ah khan a lamhbak paruk in, chiandeih hleihnih an dir. Cu bantuk cu khuazei ram hmanh ah an ser bal lo. ²¹ Siangpahrang Solomon hrai vialte cu sui an si i Lebanon Tupi Inn umkheng vialte cu sui thiang an si; pakhat hmanh ngun an um lo, Solomon chan ah cun ngun cu zeihmanh ah an rak rel lo. ²² Zeitintiah siangpahrang nih cun rili ah khan, Tarshish sangphawlawng rual khat, Hiram sangphawlawng rual sinah khan a ngei. Kum thum ah voi khat lengmang Tarshish sangphawlawng rual nih cun sui, ngun, vui ho, zawng le awtaw kha an rak phorh tawn hna. ²³ Cuticun Solomon Siangpahrang nih vawleicung siangpahrang vialte cu rumnak le fimnak ah a lonh dih hna. ²⁴ Cun Solomon cu a lung chung i fimnak Pathian nih a chiahmi theih awkah khan vawleicung mi dihlak nih khan an fuh. ²⁵ Cun an dihlak khan kum khat ah cu zat cio ah tiin amah cu laksawng, ngun umkheng hna le sui umkheng hna, hnipuan le zihmui le rangtum hna le laa hna kha an rak phorh lengmang. ²⁶ Cun Solomon nih rangleng le rang cit thiam kha a pumh hna; rangleng thong khat le za li le, rang cit thiam sang khat le thong hnih a ngeih hna i rangleng chiahnak khua hna le Jerusalem khua i siangpahrang umnak ah khan a chiah hna. ²⁷ Cun siangpahrang nih cun Jerusalem ah khan ngun cu lungtekem tlukin a tamter i sidar thing cu Shefelah i saikamor thing zat khan a tamter. ²⁸ Cun Solomon nih a cawkmi rangtum hna cu Izipt le Kue in an si; siangpahrang chawlettu hna nih khan a man aa khat in Kue ah khan an cawk tawn hna. ²⁹ Izipt ram in rangleng pakhat cu shekel za ruk in, rangtum pakhat cu za le sawm nga in, tlunpi khawh a si; cucaah siangpahrang chawlettu hna sin cun Hit mi siangpahrang vialte hna le Siria mi siangpahrang vialte hna sinah zuarh chin an si.

¹ Siangpahrang Solomon nih cun miphun dang minu tampi a duh hna: Faro fanu tehna, Moab mi tehna, Ammon mi tehna, Edom mi tehna, Sidon mi tehna, Hit mi tehna kha a duh hna; ² Bawipa nih Israel mi sinah, "Nannih nih nan ṭhi hna in nan la hna lai lo i annih zong nih in ṭhi hna in, in la ve hna hlah seh, zeitintiah annih nih nan lung kha an pathian hna leiah an in mer hrimhrim ko hna lai," tiin a rak chimmi miphun hna nu kha a duh hna i aa tlaih peng hna. ³ Nupi za sarih, bawi fanu, le nuchun za thum a ngei hna i a nupile nih cun a lung cu an pialter. ⁴ Zeitintiah Solomon cu a hung tar tikah a nupi hna nih cun a lung cu pathian dang hna leiah an pialter i a pa David lung bang khan cun a lung cu a dih umnak in a Pathian Bawipa sinah khan a hmun lo. ⁵ Zeitintiah Solomon nih cun Sidon mi hna khuazingnu Ashtoreth le Ammon mi hna pathian fihnung Milkom kha a zulh hna. ⁶ Cucaah Solomon nih Bawipa mithmuh i thil ṭhalo a simi kha a tuah i a pa David bantukin Bawipa kha a lung dihlak in a zul lo. ⁷ Cun Solomon nih Jerusalem nichuahlei tlang ah khan Moab mi khuazing fihnung Khemosh le Ammon mi pathian fihnung Molek caah khan khuahrum bo a ser. ⁸ Cu bantuk ṭhiamṭhiam in ramdangmi a nupi vialte hna caah khan a tuah i annih nih an pathian hna sinah khan zihmui an khangh i rai an thawi. ⁹ Cun Bawipa cu Solomon cungah a thin a hung, zeicahtiah Bawipa, Israel Pathian, a sinah voi hnih a rak lang i ¹⁰ hi thil kongah nawl a rak pe i pathian dang kha na zul hna lai lo tiin a titu sin khan a lung cu aa mer cang i Bawipa nih nawl a pekmi cu a zul lo. ¹¹ Cucaah Bawipa nih Solomon cu a thawh i, "Mah hihi na lungthin a si i nawl kan pekmi ka biakamnak le ka nawlbia kha na zulh hna lo caah, nangmah sin hin pennak hi ka thleh hrimhrim lai i na sinum sinah ka pek lai. ¹² Sihmanhsehlaw na pa David ruangah nangmah chan chungah cun ka tuah lai lo, na fapa kut chung tu in ka thleh te lai. ¹³ Asinain ram cu a dihlak in ka thlek lai lo, ka sal David le ka thimmi khua Jerusalem ruangah hin hrin khat cu na fapa cu ka pek lai," tiah a ti. ¹⁴ Cu Solomon caah Bawipa nih dohtu pakhat, Edom mi Hadad kha a thawhter, amah cu Edom ram i an bawi phun a si. ¹⁵ Zeitintiah David kha Edom i a um lio i a ralkapbu haotu Joab kha thahmi hna vui awk i a hung kal tikah khan, Edom i pa vialte kha a thah dih hna, ¹⁶ (Zeitintiah Joab le Israel mi vialte cu khika ah thla ruk chung, Edom ram i pa vialte a thah hna hlantiang, an cam); ¹⁷ sihmanhsehlaw Hadad cu Izipt ah, a pa sinum Edom mi a cheukhat hna he tiah an zam, Hadad cu ngakchiate a rak si. ¹⁸ Midian in an i thawh i Paran an phan, cun Paran cun mi an i kalpi hna i Izipt ah, Izipt siangpahrang Faro sin an phan; amah nih cun inn a pek i rawl kha a rak damhkhanpiak i ram zong a pek. ¹⁹ Hadad nih cun Faro cu a lung a ton ngaingai i cucaah a nupi, Siangpahrang Tahpenes i a unaunu kha ṭhit awkah a pek. ²⁰ Cun Tahpenes unaunu nih khan a fapa Genubath kha a hrinpiak i amah cu Faro inn ah khan Tahpenes nih hnuk a thlahter; Genubath cu Faro fapa hna lakah khan Faro inn ah cun a um ve. ²¹ Sihmanhsehlaw Hadad nih Izipt ram in David cu a pupa hna sinah a it cang i ralkapbu haotu Joab kha a thi cang ti a theih tikah, Hadad nih cun Faro sinah khan, "Ka ram ah ka va kal nakhnga, ka kalter tuah," tiah a ti. ²² Sihmanhsehlaw Faro nih cun amah cu a thawh i, "Na ram i kal naa timh cu keimah sin i na um ah hin zeidah na bau?" tiah a ti. Cun anih nih, "Zei kan ti hnga, ka kalter ko," tiah a ti. ²³ Pathian nih Elaida fapa Rezon, a bawipa Hadadezer, Zobah siangpahrang sinin a zammi zong kha a ral ah a thawhter. ²⁴ David nih Zobah khuami kha a thah hna hnuah, amah nih cun mi kha a sinah a pumh hna i mi ramhtu bu lu ah aa ser i Damaskas ah an kal i khika ah an um i siangpahrang ah an ser. ²⁵ Solomon chan chung vialte amah cu Israel mi ral a si i Hadad nih a tuah bantuk khan hnahnawhnak a tuah ve; amah nih cun Israel mi cu a huat hna i Siria ram kha a uk. ²⁶ Zeredah khuami Efraim mi Nebat i a fapa Jeroboam, Solomon sinum a simi, a nu nuhmei a si i a min ah Zeruah a simi zong nih khan, siangpahrang cu a kut a lekhnawh. ²⁷ Siangpahrang cung i a kut a hun leknak cu mahtihin a si: Solomon nih cun Millo kha a hun sak i a pa David khua a pemnak zawn kha a remh. ²⁸ Jeroboam cu thil ti kho ngai a si i Solomon nih tlangvalpa cu miteima a si ti kha a hmuh tikah, Josef hrin nih an ṭuan awk hnekmi rian vialte cung i haotu ah khan a chiah. ²⁹ Cun khi caan ah khan Jeroboam cu Jerusalem in a chuah tikah, profet Ahijah, Shilon mi nih khan lampi ah a hmuh. Ahijah cu puan thar aa aih i an pahnih cun ramlak sawhsawh ah anmah lawngin an um. ³⁰ Cun Ahijah nih aa aihmi puan thar kha a lak i cheu hleihnih ah a thleh. ³¹ Cun Jeroboam cu a thawh i, "Cheu hra kha i lak hna, zeitintiah hi bangin Bawipa Israel Pathian nih, ’Zohhmanh, pennak hi Solomon kut chungin ka chuh dengmang cang. ³² (sihmanhsehlaw ka sal David le Israel mi phun vialte chungin ka thimmi khua Jerusalem ruangah hin phun khat hi cu amah nih a co lai), ³³ amah nih a ka hlawt i Sidon mi khuazingnu Ashtoreth le Moab mi pathian Khemosh le Ammon mi pathian Milkom kha a biak hna i ka lam kha a zul hna lo i a pa David bantukin ka mithmuh ah a dikmi a tuah lo i ka nawlbia le ka phunglam kha a zulh hna lo caah, phun hra hi nangmah kan pek lai. ³⁴ Asinain pennak cu a ning piin a kut chungin ka la lai lo; sihmanhsehlaw ka thimmi ka sal David ka nawlbia hna le ka phungbia hna a zultu ruangah khan a chan chung paoh cu uktu ka siter ko lai; ³⁵ sihmanhsehlaw a fapa kut chung khan pennak cu ka lak lai i nangmah cu kan pek lai, phun hra hna cu. ³⁶ Sihmanhsehlaw ka sal David nih ka min chiahnak caah ka thimmi khua Jerusalem ah ka hmaiah mei inn a ngeih zungzal nakhnga, a fapa cu phun khat cu ka pek lai. ³⁷ Cun nangmah cu kan lak lai i na lungthin nih a duhmi vialte cungah uknak na ngei lai i Israel mi cungah siangpahrang na si lai. ³⁸ Cun nangmah nih nawl kan pekmi vialte kha na ngaih i ka lam kha na zulh hna i ka sal David nih a rak tuah bantukin ka nawlbia le ka phungbia zulhnak thawngin ka mit na tlin ahcun, na sinah ka um lai i David ca i ka sak bantuk khan, a fekmi innchungkhar kan sakpiak lai i Israel cu nangmah kan pek lai. ³⁹ Cun hi ruangah hin David tefa hna cu hremnak ka pek hna lai, asinain zungzal cun a si lai lo,’ a ti," tiah a ti. ⁴⁰ Cucaah Solomon nih Jeroboam cu thah a timh; sihmanhsehlaw Jeroboam cu Izipt ram ah, Izipt siangpahrang Shishak sinah a zam i Solomon a thih hlantiang Izipt ram ah cun a um. ⁴¹ Cun Solomon nih a tuahmi thil a tang rihmi vialte le a fimnak cu, Solomon tuahmi thil ṭialnak cauk chungah an i ṭial a si lo mei? ⁴² Cun Solomon nih Israel mi vialte a uk hna chung cu kum sawm li a si. ⁴³ Cun Solomon cu a pupa hna sinah a it i a pa David khua ah khan an vui; cun a fapa Rehoboam kha amah hmun ah cun a hung bawi.

¹ Rehoboam cu Shekhem ah a kal, zeitintiah amah cu siangpahrang i ser awkah Israel mi vialte cu Shekhem ah an ra. ² Cun Nebat fapa Jeroboam nih a theih tikah (amah cu Siangpahrang Solomon sinin a zamnak khan Izipt ram ah a um ko rih), Jeroboam cu Izipt ram cun a hung kir. ³ Cun amah cu an hei cah i an kawh; cun Jeroboam le Israel mi aa pummi vialte nih cun Rehoboam sinah cun an ra i, ⁴ "Na pa nih kan seihnam cu a rihter ko. Cucaah nang nih cun na pa nih kan cungah rian har le seihnam rit a kan khinhmi cu zanter law na rian kan ṭuan lai," tiah an ti. ⁵ Cun anih nih a thawh hna i, "Ni thum in va kal rih u law, cun ka sinah ra ṭhan te u," tiah a ti. Cucaah mi cu an kal. ⁶ Cun Siangpahrang Rehoboam nih cun, a pa Solomon a nun lio i a hmai i a rak dirmi tar hna kha ruahnak a hal hna i, "Hi mi hna hi zeitin va let hna ti ah dah nan ka ti?" tiah a ti. ⁷ Cun annih nih an thawh i, "Hi mi hna sal ah hin nihin cu naa can i an rian na ṭuanpiak hna i, na leh hna tikah bia ṭha in na chawnh hna ahcun annih cu a zungzal in na sal an si lai," tiah an ti. ⁸ Sihmanhsehlaw upa hna nih fim an chimhmi kha a hlawt i amah ṭhirual a hmaiah a um tawnmi tlangval hna kha ruahnak cheuh a hal hna. ⁹ Annih cu a thawh hna i, " ’Na pa nih kan cungah a kan khinhmi seihnam rit hi zanter tuah,’ tiah a ka timi hna hi zeitindah ka leh hna lai, zei ruahnak dah nan ka cheuh lai," tiah a ti. ¹⁰ Cun amah ṭhirual tlangval hna nih khan amah cu, "Na pa nih cun kan seihnam kha a rihter ko, sihmanhsehlaw nang nih cun kan zanterpiak ko,’ tiah na sinah a titu, hi mi hna sinah cun hi bangin na chim lai; hi bangin annih sinah, ’Ka hngete cu ka pa tai nakin a chah deuh. ¹¹ Cucaah atu cu ka pa nih nan cung i a ritmi seihnam a chiahmi ah khan kan chap chin hna lai. Ka pa nih fungfek in an chimhhrin hna, sihmanhsehlaw kei nih cun tlangngaikuang in kan chimhhrin hna lai, na ti lai," tiah an ti. ¹² Cucaah siangpahrang nih, "Ni thumnak ni ah ka sinah ra te u," tiah a ti bang khan, Jeroboam le mi vialte cu Rehoboam sinah ni thumnak ni ah an ra. ¹³ Cun siangpahrang nih cun, upa nih fim an chimhnak kha hlaw in mi cu hrang piin a rak leh hna, ¹⁴ tlangval pawl nih lungthin an cheuhning khan annih cu a rak ti hna i, "Ka pa nih nan seihnam cu a rak rihter ko, sihmanhsehlaw nan seihnam cu ka rihter chin lai; ka pa nih fungfek in an chimhhrin hna, sihmanhsehlaw kei nih cun tlangngaikuang in kan chimhhrin hna lai," tiah a ti. ¹⁵ Cucaah siangpahrang nih mi cu an bia a ngai hna lo; zeitintiah Bawipa nih Shilon mi Ahijah kha hmang in Nebat fapa Jeroboam sinah bia a chimmi kha tlinter awk caah Bawipa nih mah ti hin thil kha a mersan. ¹⁶ Cun Israel mi vialte nih, siangpahrang nih kan bia a ngai lo ti kha an hmuh tikah, mi zapi nih cun siangpahrang cu an leh i, "David chungah zei covo dah kan ngeih? Jesse fapa chungah ro kan ngei lo. Maw Israel, nan thlam ah kal dih u! David, nangmahte nih na inn chungkhar cu i zohkhenh ko," an ti. Cucaah Israel mi cu an thlam cio ah an tlung. ¹⁷ Sihmanhsehlaw Judah ram khua chung i a ummi Israel mi kha cu, Rehoboam nih a uk hna. ¹⁸ Cun hnekmi rian zohkhenhtu a simi bawi Adoram kha Rehoboam Siangpahrang nih a hei thlah i Israel mi vialte nih thi lak in lung in an rak cheh. Cun Siangpahrang Rehoboam cu Jerusalem i zam awkah khulrang in a rangleng kha aa cit. ¹⁹ Cucaah Israel mi nih cun David innchungkhar hna cu nihin tiangin an doh hna. ²⁰ Cun Israel mi vialte nih Jeroboam kha a kir ṭhan cang, tiah an theih tikah, an i pumhnak ah khan an hei cah i an kawh i Israel mi vialte cung siangpahrang ah an ser. Judah phun lawnglawng dah ti lo cu, David innchungkhar a zulmi cu ahohmanh an um lo. ²¹ Rehoboam cu Jerusalem ah a rat tikah, Judah innchungkhar vialte le Benjamin phun kha, ralkap thim ciammammi sing khat le sang riat kha Israel mi innchungkhar kha doh i Solomon fapa Rehoboam ram kha lak ṭhan awkah, a pumh hna. ²² Sihmanhsehlaw Pathian mi Shemaiah sinah khan Pathian bia a ra i, ²³ "Judah siangpahrang Rehoboam, Solomon fapa le Judah le Benjamin innchungkhar vialte le a dangmi vialte sinah khan, ²⁴ hi bangin Bawipa nih, ’Nan hung kal awk a si lai lo i nan unau Israel mi cu a doh zong nan hung do hna lai lo. Hi thil cu keimah sinin a rami a si caah nan inn cio ah kir dih u,’ a ti, tiah va chim," tiah a ti. Cucaah Bawipa bia cu an ngaih i Bawipa bia bangin an inn cio ah an kir ṭhan. ²⁵ Cun Jeroboam nih Efraim tlangram ah Shekhem kha a sak i khika ah a um; cun khika in a chuak i Penuel kha a sak. ²⁶ Cun Jeroboam nih a lung chungin, "Atu cu pennak hi David innchungkhar sinah a kir ṭhan ko lai, ²⁷ hi mi hna nih hin Jerusalem khua chung i Bawipa inn ah raithawinak pekchanh awkah an hung kal ahcun, khi tikah hi mi hna lung hi an bawipa, Judah siangpahrang Rehoboam sinah khan a kir lai i kei cu an ka thah lai i Judah siangpahrang Rehoboam sinah khan an kir ṭhan lai," tiah a ti. ²⁸ Cucaah siangpahrang nih ruahnak a hal hna i sui cawfa pahnih a ser. Cun mizapi kha a thawh hna i, "Jerusalem i nan hung kal lengmang hi a za cang. Maw Israel mi hna, Izipt ram in a hun in chuahpitu hna nan pathian hi zoh tuah hna u," tiah a ti. ²⁹ Cun pakhat cu Bethel ah a chiah i a dang pakhat cu Dan ah a chiah. ³⁰ Cun mah thil hi sualnak ah a cang, zeitintiah mi nih Bethel i a ummi sinah khan le a dang Dan i a ummi tiang khan an kalhnawh hna. ³¹ Khuahrum bo hna ah khan inn a sak hna i mi hna chung khan, Levi miphun a si lomi kha tlangbawi ah a chiah hna. ³² Cun Jeroboam nih thla riatnak thla a ni hleinga ni ah khan, Judah ram chung i a ummi puai bantuk puai pakhat ngeih awk a si lai, a ti i biakṭheng cungah raithawinak kha a pekchanh hna; cu bangin Bethel khua ah cun a tuah, amah nih a sermi cawfa hna kha raithawinak a pekchanh hna. Cun khuahrum bo a sermi ca i tlangbawi hna cu Bethel ah a chiah hna. ³³ Bethel khua chung i a ummi, amah nih a sermi biakṭheng ah cun, amah nih amah lung chung tein a tuaktanmi thla, thla riatnak thla, a ni hleinga ni ah cun a hung kal i Israel mi caah puai pakhat kha a fehter i zihmui khangh awkah biakṭheng ah khan a hung kal.

¹ Cun zohhmanh, Judah ram chungin Pathian mi pakhat, Bawipa bia thawngin Bethel ah a ra. Jeroboam kha zihmui khangh awkah biakṭheng pawngah khan a rak dir ko. ² Cun mipa nih cun Bawipa bia in biakṭheng cu a auhnawh i, "Maw biakṭheng, biakṭheng, Bawipa nih hi bangin a ti: ’Zohhmanh, David innchungkhar chungah fapa pakhat, a min Josiah a simi a chuak lai; cun nangmah cung i zihmui a khangmi khuahrum bo tlangbawi hna cu nangmah cungah hin rai ah a thawi hna lai i mi ruh cu nangmah cungah hin khangh a si lai,’ a ti," tiah a ti. ³ Cun cu ni ṭhiamṭhiam ah cun hmelchunhnak pakhat a pek i, "Mah hihi Bawipa nih a chimmi hmelchunhnak cu a si: ’Zohhmanh, biakṭheng kha a cim lai i a cung i a ummi vutcam hna cu thlet an si lai,’ a ti," tiah a ti. ⁴ Cun Pathian mi nih Bethel biakṭheng a chimhnawhchanmi bia kha siangpahrang nih a theih tikah, Jeroboam nih cun biakṭheng cun a kut a hei samh i, "Tlai u," tiah a ti. Cun a hei samhmi a kut cu a car i cucaah amah leiah a tum ṭhan kho ti lo. ⁵ Pathian bia in Pathian mi nih hmelchunhnak a tuahterning khan, biakṭheng zong cu a cim i biakṭheng cung i vutcam cu an hlonh hna. ⁶ Cun siangpahrang nih Pathian mi cu a thawh i, "Bawipa na Pathian cu ka nawlpiak law, thla ka campiak tuah, ka kut hi a dam ṭhan nakhnga," tiah a ti. Cun Pathian mi nih Bawipa cu a nawl i siangpahrang cu a kut kha a dam ṭhan i hmasa i bantuk kha a si ṭhan. ⁷ Cun siangpahrang nih Pathian mi cu a thawh i, "Ka sinah ka inn ah ra law, i hrim tuah, laksawng kan ṭhenh lai," tiah a ti. ⁸ Cun Pathian mi nih siangpahrang cu, "Na inn a cheu hmanh ka pe law nangmah sinah ka lut lai lo. Cun hi hmun ah hin changreu zong ka ei lai lo, ti zong ka ding lai lo; ⁹ zeitintiah cuticun Bawipa bia nih nawl a ka pek i, ’Rawl zong na ei lai lo, ti zong na ding lai lo, na ratnak lam zongin na kir ṭhan lai lo,’ a ka ti," tiah a ti. ¹⁰ Cucaah lam dang in a kal i Bethel i a ratnak lam khan cun a kir ṭhan lo. ¹¹ Bethel khua ah cun profet tar pakhat hi a um. Cun a fapa hna cu an ra i khi ni ah Pathian mi nih Bethel i a tuahmi vialte kha an chimh; siangpahrang sinah a chimmi bia zong kha an pa cu an chimh. ¹² Cun an pa nih cun a thawh hna i, "Khuazei lei lam in dah a kal?" tiah a ti hna. Cun a fapa hna nih cun Pathian mi, Judah ram in a rami a kalnak lam kha an hmuhsak. ¹³ Cun a fapale cu a thawh hna i, "Laa kha ka danhpiak u," tiah a ti. Cucaah laa kha an danhpiak i aa cit. ¹⁴ Cun Pathian mi cu a hei dawi i kuhthing toi i a rak ṭhut ko kha a hmuh; cun a thawh i, "Nangmah hi Judah ram in a rami, Pathian mi cu na si maw?" tiah a ti. Anih nih, "Ka si," tiah a ti. ¹⁵ Cun anih nih amah cu, "Inn ah ka sinah ra law rawl ra ei tuah," tiah a ti. ¹⁶ Cun anih nih, "Na sinah kir awk ka si lo i nangmah sinah luh awk zong ka si lo; hi hmun ah hin nangmah sinah rawl zong ka ei lai lo, ti zong ka ding lai lo; ¹⁷ zeitintiah Pathian bia nih hi bangin ka sinah, ’Khika ah rawl zong na ei lai lo i ti zong na ding lai lo, na ratnak lam zongin na kir lai lo,’ a ti," tiah a ti. ¹⁸ Cun anih nih amah cu a thawh i, "Keimah zong hi nangmah bantukin profet ka si ve, Bawipa bia in vancungmi pakhat nih pei ka sinah a chim i, ’Rawl a ei i ti a din nakhnga, na inn ah hin hun kirpi ṭhan,’ a ti cu," tiah a ti. Sihmanhsehlaw amah cu lih a chimh a si. ¹⁹ Cucaah amah sinah a kir i a inn chungah rawl a ei i ti a din. ²⁰ Cun cabuai i an ṭhut lioah khan a kirpi ṭhantu profet sinah khan Pathian bia cu a ra i, ²¹ Judah ram in a rami Pathian mi sinah khan, "Hi bangin Bawipa nih, ’Bawipa bia kha na ngaih lo i Bawipa na Pathian nih nawl an pekmi nawlbia cu na zulh lo i, ²² sihmanhsehlaw na ra kir i, "Rawl ei hlah, ti ding hlah," tiah a tinak hmun ah khan rawl na ei i ti na din caah, na pum cu na pupa hna thlan ah a phan lai lo,’ a ti," tiah a au. ²³ Cun rawl kha a ei i ti kha a din dih hnuah, a rak kirpimi profet kha laa cu a danhpiak. ²⁴ Cun a kal lioah khan lam ah chiandeih nih a ton i a seh. Cun a pum cu lam ah cun a tla i laa cu a pawngah khan a dir ko; chiandeih zong cu a ruak pawngah cun a dir ve ko. ²⁵ Cun zohhmanh, mi an va kal i lam i a ruak a rilh ko i a ruak pawng i chiandeih a dir ko kha an hmuh. Cun an ra i profet tarpa a umnak khua ah khan mah cucu an ra chim. ²⁶ Cun lam in a hun kirpi ṭhantu profet nih khan mah cucu a theih tikah, "Pathian mi, Bawipa bia zulh a duh lo mipa kha a si cu ta; cucaah Bawipa nih amah cu a chimhmi bia ningin, Bawipa nih amah cu chiandeih kha a pek i a rak thleh bauh i a rak thah," tiah a ti. ²⁷ Cun a fapale kha a thawh hna i, "Laa kha ka danhpiak u," tiah a ti hna. Cun annih nih an danh. ²⁸ Cun a va kal i a ruak cu lam i a rak rilh ko i laa le chiandeih kha a ruak pawng i an rak dir ko kha a hmuh. Chiandeih nih khan a ruak cu a rak ei lo, laa zong kha a thlek bauh lo. ²⁹ Cun profet nih khan Pathian mi ruak cu a lak i laa cungah khan a chuan i ṭah awk le vui awkah khua ah khan a kirpi ṭhan. ³⁰ Cun a ruak kha amah thlan ah khan a vui; cun amah cu an ṭah i, "Aize! ka naupa," an ti. ³¹ Cun a vui dih hnuah a fapa hna sinah khan, "Ka thih tikah, Pathian mi ka vuinak thlan ah hin run ka vui te u, ka ruh hna cu a ruh pawngah hin run chia hna u. ³² Zeitintiah Pathian bia thawngin Bethel biakṭheng le Samaria ram chung khua i a ummi khuahrumbo hna inn vialte kong i a chimmi bia vialte kha a tling hrimhrim lai," tiah a ti. ³³ Hi thil hnu zongah hin Jeroboam cu lam ṭhalo a zulhmi khan aa mer hlei lo, sihmanhsehlaw khuahrumbo ca i tlangbawi cu mi zapi lak khan a ser hna; tlangbawi si a duhmi paoh kha khuahrumbo tlangbawi caah cun a thianter duahmah ko hna. ³⁴ Cun mah hihi Jeroboam innchungkhar an ci a hmittu le vawlei cungin a hrawktu hna sualnak ah khan a cang.

¹ Khi caan ah Jeroboam fapa Abijah kha a zaw. ² Cun Jeroboam nih a nupi kha a thawh i, "Tho law, Jeroboam nupi na si kha hngalh lo dingin i hleng law, Shiloh ah va kal tuah; zohhmanh, khika ah profet Ahijah kha a um, amah cu keimah kha, hi mi hna cungah siangpahrang na si lai, a ka titu kha a si. ³ Cun changreu tlang hra, changreu thlum tlawmpal le khuaihliti thawl khat in i phorh law amah sinah cun va kal tuah; amah nih ngakchia hi zeitindah a um lai kha a rak in chimh lai," tiah a ti. ⁴ Jeroboam nupi nih cu bang cun a tuah; a tho i Shiloh ah a kal i Ahijah inn kha a va phan. Ahijah cu khua a hmu kho ti lo, zeicahtiah a kum a upa cang i a mit khua a hmu ti lo. ⁵ Cun Bawipa nih Ahijah cu a thawh i, "Zohhmanh, Jeroboam nupi cu nangmah kha a fapa kong hal awkah na sinah a ra lio; zeitintiah amah cu a zaw. Amah cu hitin na rak chimh lai," tiah a ti. A rat tikah nu dang bantuk aa siter. ⁶ Sihmanhsehlaw innka i a vung luh i ke thawng kha Ahijah nih a theih tikah, "Rung lut tuah, Jeroboam nupi; zeicahdah midang bantuk naa siter? Zeitintiah nangmah ca i thawng chia ngai chim awk kha fial ka si. ⁷ Va kal law Jeroboam kha, ’Hi bangin Bawipa, Israel Pathian nih, "Nangmah cu mi zapi hna lakin kan hlorh i ka mi Israel mi hna hruaitu ah kan ser i ⁸ David innchungkhar sinin pennak kha ka thleh i nangmah kha kan pek; asinain, ka nawlbia kha a ul hna i a lung dihlak in a ka zul i ka mithmuh ah a dingmi lawng a tuahtu ka sal David bantuk kha nang cu na si lo, ⁹ nang tu nih cun na hlan i a rak ummi vialte hna nakin thil ṭhalo na tuah deuh i pathian dang le thletmi milem kha na ser hna, ka thin na ka phawh i na hnulei ah na ka hlonh; ¹⁰ cucaah zohhmanh, Jeroboam innchungkhar cungah ṭhat lonak ka tlunter lai i Jeroboam sin hin pa paohpaoh, Israel mi chung i miluat si hna seh, miluat lo si hna seh, ka hloh hna lai i, mi nih ek cu an khangh hirhiar bangin, Jeroboam innchungkhar cu ka khangh cikcek hna lai. ¹¹ Jeroboam chungkhar a simi paoh khuapi chungah a thimi cu uico nih an ei lai; ramlak i a thimi cu van i a zuangmi va nih an ei lai, zeicahtiah Bawipa nih a chim cang," a ti," tiah va chim. ¹² Cucaah tho law na inn ah va kal tuah. Na ke nih khua chung a lamh ah khin ngakchia cu a thi lai. ¹³ Cun Israel mi vialte nih an ṭah lai i an vui lai; zeitintiah Jeroboam chungkhat hna lakah amah lawnglawng hi thlan ah vui a si lai; zeicahtiah Jeroboam chungkhar chungah hin amah ah hin cun Bawipa, Israel Pathian i a ṭha a timi thil zeimaw a um. ¹⁴ Cuhleiah nihin ah Jeroboam innchungkhar a hloral ding Israel mi siangpahrang pakhat Bawipa nih aa serh lai. Cun hi hnuah cun, ¹⁵ ti chungah phaikung aa hninh lengmang bantuk khin Bawipa nih Israel cu a tuk lai i annih nih an Asherim an i ser hnanak thawngin Bawipa kha a thin an hunter caah, an pupa hna sinah a pekmi hi ram ṭha chung hin Israel mi cu a phawi hna lai i Zufrates tiva ral ah khin a ṭhek hna lai. ¹⁶ Cun Israel mi cu, Jeroboam amah sualnak ruang le Jeroboam nih Israel mi a sualter hnanak ruangah khan, a hlawt hna lai," tiah a ti. ¹⁷ Cun Jeroboam nupi cu a tho i a kal i Tirzah khua kha a phan. Cun cu inn innka hram a va phak tikah ngakchia kha a thi. ¹⁸ Cun Bawipa nih a sal profet Ahijah in a chimmi bia ning khan Israel mi vialte nih an vui i an ṭah. ¹⁹ Jeroboam tuahsernak a tang rihmi, zeitindah ral a tuk ti tehna, zeitindah a pen ti tehna cu, zohhmanh, Israel Siangpahrang hna Chanrelnak Cauk chungah an i ṭial. ²⁰ Cun Jeroboam nih a pen chung cu kum kul le kum hnih a si; a pupa hna sinah khan a it i a fapa Nadab kha amah hmun ah cun a hung bawi. ²¹ Cun Solomon fapa Rehoboam nih khan Judah ram cu a pen. Pen hram aa thawk ah khan Rehoboam cu kum sawm li le kum khat a si i, Bawipa nih Israel mi phun vialte chungin amah min chiahnak caah aa thimmi Jerusalem khua ah khan kum hleisarih a bawi. A nu min cu Naamah a si, Ammon minu a si. ²² Cun Judah mi nih Bawipa mithmuh i a ṭha lomi thil kha an tuah i an pupa hna nih an tuahmi vialte nakin tam deuh in an tuahmi sualnak cun Bawipa cu a nahchuahnak an thawhter. ²³ Zeitintiah annih zong nih khuahrum bo tehna, lungphun tehna, Asherim tehna kha tlang sang kip cung le thinghring tang kip ah an i ser i ²⁴ cu ram chungah biaknak lei pa hlawhhlang zong an um. Israel mi hna hmai in Bawipa nih a ṭhawlmi miphun hna nih an tuahmi fihnung vialte kha an tuah ve. ²⁵ Siangpahrang Rehoboam, siangpahrang a si a kum nganak ah Izipt siangpahrang Shishak nih Jerusalem kha a hung doh; ²⁶ Bawipa inn chung rothil le siangpahrang inn chung rothil kha a lak hna; zeizong vialte kha a lak dih hna. Solomon nih a sermi sui phaw vialte zong kha a lak hna i ²⁷ Siangpahrang Rehoboam nih anmah can ah cun dar phaw a ser hna i siangpahrang inn innka a cawngtu ralkap bawi hna kut chungah khan a chiah hna. ²⁸ Cun siangpahrang nih Bawipa inn chungah a luh fate, ralvengtu nih khan an i put hna i ralvengtu hna khaan ah khan an rak chiah ṭhan tawn hna. ²⁹ Rehoboam tuahsernak a tang rihmi le a tuahmi vialte cu Judah Siangpahrang hna Chanrelnak Cauk chungah an i ṭial lo mei? ³⁰ Cun Rehoboam le Jeroboam karlak ah khan ral a um thluangthluan. ³¹ Cun Rehoboam cu a pupa hna sinah khan a it i David khua chungah khan a pupa hna sinah cun an vui. A nu min cu Naamah a si, amah cu Ammon minu a si. Cun a fapa Abijam kha amah hmun ah cun a hung bawi.

¹ Nebat fapa Jeroboam Siangpahrang, a bawi kum hleiriat kum ah khan, Abijam nih Judah ram uk hram aa thawk cu a si. ² Jerusalem ah kum thum bawi a si. A nu min cu Maakah a si, Abishalom fanu a si. ³ Cun amah hlan i a pa nih a rak tuahmi sualnak vialte chungah khan a kal ve i a pu David lung bantuk kha si loin, a lung cu Bawipa a Pathian sinah khan a dihlak in aa biatak ngaingai lo. ⁴ Sihmanhsehlaw David ruangah, Bawipa a Pathian nih Jerusalem khua ah meiinn pakhat a pek, amah hnuah a fapa cu a hun thawhter i Jerusalem kha a fehter; ⁵ zeicahtiah David nih Bawipa mithmuh i a dingmi kha a tuah i Hit mi Uriah kong ah khan dah ti lo ahcun nawl a pekmi paoh kha a nun chung vialte pakhat hmanh a pialtak hna lo. ⁶ Cun a nun chung vialte, Rehoboam le Jeroboam karlak ah khan ral a um zungzal. ⁷ Abijam tuahsernak a tang rihmi le a tuahmi vialte hna cu, Judah Siangpahrang hna Chanrelnak Cauk chungah an i ṭial lo mei? Cun Abijam le Jeroboam karlak ah khan ral a um. ⁸ Cun Abijam cu a pupa hna sinah a it i David khua ah khan an vui, cun a fapa Asa kha amah hmun ah cun a hung bawi. ⁹ Israel siangpahrang Jeroboam a bawi kum kul kum ah Asa nih Judah ram pen hram aa thawk, ¹⁰ Jerusalem ah kum sawm li le kum khat a bawi. A pi min cu Maakah, Abishalom fanu a si. ¹¹ Cun a pu David nih a rak tuah bang khan, Asa nih Bawipa mithmuh i a dikmi thil kha a tuah. ¹² Biaknak lei pa hlawhhlang kha ram chungin a dawi hna i a pupa nih an sermi siasal vialte kha a ṭhial hna. ¹³ A nu Maakah zong kha, Asherah caah fihnung siasal a ser caah siangpahrang bawinu a sinak kha a ngolter; cun Asa nih a nu milem cu a hau i Kidron tivate ah khan a khangh. ¹⁴ Sihmanhsehlaw khuahrum bo hna kha cu a hrawk hna lo. Asinain, Asa cu a nun chung vialte, Bawipa leiah a lung dihlak in aa biatak ko. ¹⁵ Cun Bawipa inn chungah khan a pa biakamnak laksawng hna le amah biakamnak laksawng hna, ngun, sui le umkheng hna kha a rak put hna. ¹⁶ Cun Asa le Baasha, Israel siangpahrang karlak ah khan, an chan chung vialte ral a um. ¹⁷ Israel siangpahrang Baasha nih Judah ram kha a hung doh i Judah siangpahrang sinah ahohmanh chuahter lo le luhter lonak caah Ramah khua kha a ser. ¹⁸ Cun Asa nih Bawipa inn chung le siangpahrang inn chung i a tangmi ro ngun, le sui vialte kha a lak hna i a sal hna kut chungah khan a pek hna; cun Siangpahrang Asa nih cun Hezion fapa Tabrimmon i fapa Benhadad, Siria siangpahrang, Damaskas khua i a ummi sinah khan mi a thlah hna i, ¹⁹ "Ka pa le na pa karlak i a rak um bangkhan, keimah le nangmah karlak ah ṭanṭinak um seh: zohhmanh, laksawng ah ngun le sui kan kuat; cucaah va kal law Israel siangpahrang Baasha nih hin a ka kirtak nakhnga, amah he nan ṭanṭinak kha chat tuah," tiah a ti. ²⁰ Cun Benhadad nih Siangpahrang Asa kha a bia a ngaih i a ralkapbu haotu hna kha Israel mi khua doh awkah a thlah hna i Ijon, Dan, Abel-beth-maakah le Khinneroth vialte kha, Naftali ram vialte he an tei dih. ²¹ Cun mah cucu Baasha nih a theih tikah, Ramah khua ser kha a ngol i Tirzah khua ah khan khua a sa. ²² Cun Siangpahrang Asa nih Judah ram dihlak ah thawng a thanh hna, pakhat hmanh an luat lo, Ramah khua sernak ah Baasha nih a rak hmanmi lung le thing vialte kha an thiar dih i cu thingrua cun Siangpahrang Asa nih Mizpah khua le Benjamin ram i Geba khua kha a ser hna. ²³ Asa tuahsernak a tang rihmi hna le a ṭhawnnak vialte, a tuahmi vialte le khua a sermi vialte hna cu, Judah Siangpahrang hna Chanrelnak Cauk chungah an i ṭial lo mei? Sihmanhsehlaw a tar leiah a ke ah hma a ing. ²⁴ Cun Asa cu a pupa hna sinah a it i a pupa hna sinah cun a pu David khua chungah an vui i a fapa Jehoshafat kha amah hmun ah cun a hung bawi. ²⁵ Judah siangpahrang Asa bawi kum hnihnak ah Jeroboam fapa Nadab nih khan Israel mi cu uk hram a thawk hna; Israel mi cu kum hnih a uk hna. ²⁶ Bawipa mithmuh i thil ṭhalo kha a tuah i a pa lam kha a zul ve i a pa nih Israel mi a sualter hnanak a sualnak kha a tuah ve. ²⁷ Issakhar chungkhar mi Ahijah i fapa Baasha nih amah cu a rawi i Filistin mi ta a simi Gibbethon khua ah khan Baasha nih cun a thah; Nadab le Israel mi vialte nih Gibbethon cu an dum lio a rak si. ²⁸ Cuticun Baasha nih, Judah siangpahrang Asa a bawi kum thumnak ah cun Nadab kha a thah i amah hmun ah cun amah cu a bawi. ²⁹ Cun siangpahrang a can kate in Jeroboam innchungkhar vialte cu a thah dih hna; Bawipa nih a sal Ahijah Shilon mi sinah a rak chimmi bia ningte khan, a hrawh dih hlantiang, Jeroboam hrinthlak hna lakah khan thaw a chuahmi pakhat hmanh a ngan hna lo; ³⁰ mah cucu, Jeroboam nih amah nih a sualmi sualnak hna le Israel mi a sualtermi hna sualnak ruang le Bawipa, Israel Pathian a thin a phawh caah khan a si. ³¹ Nadab tuahsernak a tang rihmi hna le a tuahmi vialte cu, Israel Siangpahrang hna Chanrelnak Cauk chungah an i ṭial lo mei? ³² Cun Asa le Israel siangpahrang Baasha karlak ah khan, an chan chung vialte ral a um. ³³ Judah siangpahrang Asa a bawi kum thumnak ah Ahijah fapa Baasha nih Israel mi vialte cu Tirzah khua in uk hram a thawk hna i kum kul le kum li a uk hna. ³⁴ Cun Bawipa mithmuh i a ṭha lomi kha a tuah i Jeroboam lam kha a zul i Israel mi a sualtermi hna sualnak a rak tuahmi kha a tuah ve.

¹ Cun Baasha kong ah Hanani fapa Jehu sinah Bawipa bia a phan i, ² "Nangmah cu leidip lakin kan hlorh i ka mi Israel mi hna hruaitu ah kan ser nain, Jeroboam lam kha na zul i ka mi Israel mi kha na sualter hna i an sualnak in ka thin na ka phawh caah, ³ zohhmanh, Baasha le a innchungkhar cu ka hloh cikcek hna lai i na innchungkhar hi Nebat fapa Jeroboam innchungkhar bantuk ah ka ser lai. ⁴ Baasha ta a simi paoh khua chung i a thih ahcun uico nih an ei lai; ramlak i a thih ahcun van i a zuangmi va nih an ei lai," tiah a ti. ⁵ Baasha tuahsernak a taang rihmi hna le thil a tuahmi le a ṭhawnnak cu, Israel Siangpahrang hna Chanrelnak Cauk chungah an i ṭial lo mei? ⁶ Cun Baasha cu a pupa hna sinah a it i Tirzah khua ah an vui; cun a fapa Elah kha amah hmun ah cun a hung bawi. ⁷ Cuhleiah Baasha le a innchungkhar he ralchanh in, a kut tuahmi thil in Bawipa cu a thin a phawh i a mithmuh i ṭhat lonak a tuahmi vialte ca le Jeroboam innchungkhar bantuk a si i a hrawh zong a hrawh caah khan, Hanani fapa profet Jehu sinin Bawipa bia cu a ra. ⁸ Judah siangpahrang Asa, siangpahrang a si kum kul le kum ruknak ah Baasha fapa Elah nih Israel mi kha Tirzah khua in uk hram a thawk hna i kum hnih a pen hna. ⁹ Sihmanhsehlaw a rangleng hnarcheu haotu Zimri nih a rawi. Tirzah khua i a um lio, a innchungkhar zohkhenhtu a simi Arza inn i ri lakin zu aa din ah khan, ¹⁰ Zimri cu a ra lut i a tuk i a thah, mah cucu Judah siangpahrang Asa, siangpahrang a si kum kul le kum sarihnak ah khan a si. Amah hmun ah cun Zimri cu a bawi. ¹¹ Pen hram a thawk tikah khan, a bawi ṭhutdan cung i a hung ṭhut cangka cun, Baasha innchung khar vialte kha a thah dih hna; a rualchan si hna seh, a hawikom si hna seh, pa pakhat hmanh a zuah hna lo. ¹² Cuticun Zimri nih Bawipa nih profet Jehu in Baasha kong i a chimmi bia ningin, Baasha innchungkhar vialte cu a thah dih hna; ¹³ mah cucu Baasha sualnak vialte le a fapa Elah sualnak vialte, anmah nih an tuahmi le Israel mi an sualtermi hna le Bawipa, Israel Pathian cu an siasal in a thin an phawh ruangah a si. ¹⁴ Elah tuahsernak a tang rihmi le a tuahmi vialte cu Israel Siangpahrang hna Chanrelnak Cauk chungah an i ṭial lo mei? ¹⁵ Judah siangpahrang Asa, siangpahrang a si kum kul le kum sarihnak ah khan Zimri cu Tirzah khua ah ni sarih bawi a cang. Cun ralkap hna nih khan Filistin mi ta a simi Gibbethon kha an riahhnawh, ¹⁶ cun a riahhnawhtu ralkap nih khan, "Zimri nih a rawi i siangpahrang kha a thah," tiah an theih; cucaah Israel mi vialte nih ralkapbu haotu Omri kha cu ni ah cun riahhmun ah cun Israel siangpahrang ah an ser. ¹⁷ Cucaah Omri cu Israel mi vialte he Gibbethon khan an hung kal i Tirzah khua kha an dum. ¹⁸ Cun Zimri nih khua kha an lak cang, tiah a hmuh tikah, siangpahrang inn chung ralhruang chungah khan a lut i siangpahrang inn cu mei in aa duah chih i a thi; ¹⁹ mah cucu amah nih a tuahmi sualnak le Bawipa mithmuh i ṭhat lonak a tuahmi le Jeroboam lam a zulhnak le Israel mi a sualter hna ruangah khan a si. ²⁰ Zimri tuahsernak a tang rihmi le rawinak amah nih a tuahmi kha, Israel Siangpahrang hna Chanrelnak Cauk chungah an i ṭial lo mei? ²¹ Cun Israel mi cu cheu hnih ah an i cheu; mi hnarcheu nih Ginath fapa Tibni cu amah kha siangpahrang i ser awkah an zulh i hnarcheu nih Omri kha an zulh. ²² Sihmanhsehlaw Omri a zulmi hna nih Ginath fapa Tibni a zulmi hna kha an tei hna; cucaah Tibni cu a thi i Omri cu siangpahrang a cang. ²³ Judah siangpahrang Asa, siangpahrang a sinak kum sawm thum le kum khatnak ah Omri nih Israel mi cu pen hram a thawk hna i kum hleihnih a uk hna; kum ruk cu Tirzah in a uk hna. ²⁴ Shemer sinin Samaria tlang cu ngun talen pahnih in a cawk; tlang ah cun ralhau a sak i a sermi khua cu tlang a rak ngeitu Shemer min chuankhan in Samaria a ti. ²⁵ Omri nih Bawipa mithmuh ah thil ṭhalo a tuah i amah hlan i a rak ummi vialte hna nakkhan thil ṭhalo tam deuh a tuah. ²⁶ Zeitintiah amah cu Nebat fapa Jeroboam lam kha a zul i Israel mi a sualter hnanak sualnak kha a tuah, mah cucu annih nih Bawipa, Israel Pathian cu an siasal hna in a thin an phawhnak kha a si. ²⁷ Omri tuahsernak a tang rihmi le ṭhawnnak a langhtermi cu, Israel Siangpahrang hna Chanrelnak Cauk chungah an i ṭial lo mei? ²⁸ Cun Omri cu a pupa hna sinah a it i Samaria khua ah an vui; cun a fapa Ahab cu amah hmun ah khan a hung bawi. ²⁹ Judah siangpahrang Asa, siangpahrang a si kum sawm thum le kum riatnak ah, Omri fapa Ahab nih Israel mi hna cu pen hram a thawk i Omri fapa Ahab nih cun Israel mi hna cu Samaria khua in kum kul le kum hnih a uk hna. ³⁰ Cun Omri fapa Ahab nih amah hlan i a ummi vialte hna nakkhan ṭhat lonak Bawipa mithmuh ah tam deuh a tuah. ³¹ Nebat fapa Jeroboam sualnak chung i kal ve kha a zaang temi thil hei si seh law cu bang, Sidon mi hna siangpahrang Ethbaal fanu Jezebel kha nupi ah aa ṭhit i a kal i Baal kha a rian a ṭuan i a biak. ³² Samaria khua chungah a sakmi Baal inn chungah khan Baal caah biakṭheng pakhat a ser. ³³ Cun Ahab nih Asherah pakhat a ser. Ahab nih amah hlan i a rak ummi Israel siangpahrang vialte hna nakkhan, Bawipa, Israel Pathian cu a thin a phawh deuh. ³⁴ Amah chan ah cun Bethel khuami Hiel nih Jeriko khua kha a ser; a hramlung phum ah cun fapa a hrin hmasa bik Abiram nunnak a hloh phah i a kutka ser ah cun a fapa hniang bik Segub nunnak a hloh phah, mah cucu Bawipa nih Nun fapa Joshua in a rak chimmi bia ning khan a si.

¹ Gilead ram chung Tishbe khua Tishbe mi Elijah nih Ahab cu a thawh i, "Bawipa, Israel Pathian, a hmaika i ka dir tawnmi a nun bangin, dap siseh, ruah siseh, ka bia in dah ti lo ahcun, hi kum hna chungah hin a um lai lo," tiah a ti. ² Cun Bawipa bia cu a sinah a ra i, ³ "Hika hin kal law nichuahlei ah i mer tuah, cun Jordan nichuahlei i a ummi Kherith tivate ah vaa thup. ⁴ Tivate ti cu na din lai i keimah nih langak hna cu khika ah nangmah kha rawl pek awkah nawl ka pek cang hna," tiah a ti. ⁵ Cucaah a kal i Bawipa bia ning cun a tuah; Jordan nichuahlei i a ummi Kherith tivate ah cun a va kal i a va um. ⁶ Cun langak nih zinglei ah rawl le sa, zanlei ah rawl le sa an chanh lengmang i tivate ti cu a din. ⁷ Cun tlawmpal hnuah khin, ram chungah ruah a um lo caah, tivate ti cu a reu dih. ⁸ Cun Bawipa bia cu amah sinah a ra i, ⁹ "Tho law, Sidon ram khua a simi Zarefath ah va kal law, khika ah va um. Zohhmanh, khika ah khin nangmah cu cawm awkah nuhmeinu pakhat nawl ka pek cang," a ti. ¹⁰ Cucaah a tho i Zarefath ah cun a kal; cun khua hauka kha a phak tikah, zohhmanh, nuhmei pakhat cu thinghreu a rak khawm len ko; cun anih nih amah cu a hei auh i, "Thawl in din awk ti tlawm tein rak ka put tuah," tiah a ti. ¹¹ Cun a rak put hnik lioah khin a hei auh i, "Na kut in changreu tlang khat in rak ka put," a ti. ¹² Cun anih nih a thawh i, "Bawipa, na Pathian a nun bangin, rawh ciami zeihmanh ka ngei lo, um chungah changvut pei khat lawng ka ngei i thawl chungah chiti tlawmte lawng ka ngei; cun atu hi ka tlun in mah cucu keimah le ka fapa ca i chuannak ding caah thinghreu pahnih thumte ka khawm hna; kan ei dih cun kan thi ko lai," tiah a ti. ¹³ Cun Elijah nih amah cu a thawh i, "Ṭih hlah, va kal law na chim bang cun va tuah ko; sihmanhsehlaw a hmasa bik ah keimah cu hlum hmete in va ka serpiak law, rak ka put, cun a hnuah nangmah ca le na fapa caah cun va ser. ¹⁴ Zeitintiah Bawipa, Israel Pathian nih, ’Bawipa nih ruah vawlei ah a surter hlantiang changvut um cu a lawng lai lo i chiti thawl cu a reu lai lo,’ tiin a ti," tiah a ti. ¹⁵ Cun a kal i Elijah nih a chim bantuk khan a tuah; cun amah le Elijah le a innchungkhar nih khan ni tampi an ei. ¹⁶ Bawipa nih Elijah in a chimmi a bia ningte khan, changvut um cu a lawng lo i chiti thawl cu a reu lo. ¹⁷ Cun cu hnuah cun, inn ngeitu nu fapa cu a zaw i a zawtnak cu a zual tuk caah a chungah thaw a tang ti lo. ¹⁸ Cun anih nih Elijah cu a thawh i, "Maw Pathian mipa, ka cungah lung si lonak zeidah na ngeih? Ka sualnak kha hngalhter ṭhan awk le ka fapa kha thihter awkah pei na rat ko hi!" tiah a ti. ¹⁹ Cun amah cu a thawh i, "Na fapa cu ka pe tuah," tiah a ti. Cun amah ṭangchung cun a lak i amah a riahnak cungdot dal chungah khan a kaipi i amah i ihkhun ah khan a ihter. ²⁰ Cun Bawipa kha a auh i, "Maw Bawipa, ka Pathian, ka tlunmi nuhmeinu cung hmanh ah hin, a fapa na thahnak in, harnak na tlunter ko maw?" tiah a ti. ²¹ Cun ngakchia cungah cun voi thum a bawk i Bawipa cu, "Maw Bawipa, ka Pathian, hi ngakchia nunnak hi a chungah lut ṭhan ko seh," tiah a auh. ²² Cun Bawipa nih Elijah aw kha a theihpiak i ngakchia cu a chungah khan a nunnak cu a lut ṭhan i a nung ṭhan. ²³ Cun Elijah nih ngakchia cu a lak i cungdot cun inn chungah a runpi i a nu kha a pek; cun Elijah nih a thawh i, "Zohhmanh, na fapa a nung hih," tiah a ti. ²⁴ Cun minu nih Elijah cu a thawh i, "Atu cu nangmah cu Pathian mi na si ti kha ka hngalh i na kaa chung i a ummi Bawipa bia cu biatak a si," tiah a ti.

¹ Caan saupi hnuah, a kum thumnak ah khin Bawipa bia cu Elijah sinah a ra i, "Va kal law Ahab sinah vaa langh tuah; cun vawlei cungah ruah ka surter lai," tiah a ti. ² Cucaah Ahab sin i vaa langh awkah cun Elijah cu a kal. Atu cu Samaria ram ah cun mangṭam cu a fak ko cang. ³ Cun Ahab nih, a innchungkhar zohkhenhtu Obadiah kha a kawh. (Obadiah nih cun Bawipa cu fak piin a upat i, ⁴ Jezebel nih Bawipa profet hna a thah hna ah khan, Obadiah nih profet za khat a lak hna i sawm nga sawm nga in lungkua ah a thuh hna i ti le rawl in a cawm hna). ⁵ Cun Ahab nih Obadiah cu a thawh i, "Ti chuahnak tihram vialte le hor vialte va ṭol awkah ram chungah i chawk tuah; ram hawi hna kan hei hmuh hnga i rang le laa hna hi kan hei khamh khawh sual ko hna hnga i kan saṭil hna hi sung loin kan hei um ko hnga dah kaw?" tiah a ti. ⁶ Cucaah ram cu ṭol awkah an i phaw i Ahab cu amah lawngin khattelei ah a kal, cun Obadiah cu amah lawng in khattelei ah a kal ve. ⁷ Cun Obadiah cu lam i a kal lioah khin, zohhmanh, Elijah nih a rak ton; cun Obadiah nih cun a hngalh i a bawk i, "Ka bawipa Elijah, nangmah na si maw?" tiah a ti. ⁸ Cun anih nih a leh i, "Keimah ka si. Va kal law na bawipa kha, ’Zohhmanh, Elijah hika ah hin a um ko,’ tiah va chim," tiah a ti. ⁹ Cun anih nih a thawh i, "Khuazei ah dah ka sual i na salpa hi rak thah awkah Ahab kut chungah na ka pek hnik? ¹⁰ Bawipa, na Pathian a nun bangin, ka bawipa nih hin nangmah kawl ah mi a thlah lonak ram le miphun a um ti lo; cun annih nih, ’Hika ah a um lo,’ tiah an rak ti tikah, cu ram cu siseh, cu miphun cu siseh, kan hmu lo tiin, chiat a serter hna. ¹¹ Cun atu cu nang nih na thawh i, ’Va kal law, "Hika ah Elijah cu a um ko," tiah na bawipa cu va chim,’ na ka ti. ¹² Nangmah sinin ka kal cangka, Bawipa thlarau nih ka hngalh lomi hmun ah an kalpi lai i cucaah ka rat i Ahab kha ka chimh i an hmuh khawh lo tikah, a ka thah lai, keimah na salpa nih hin ka tlanval lio in Bawipa cu ka upat ko dahkaw. ¹³ Jezebel nih Bawipa profet hna a rak thah hna ah khan, zeitindah Bawipa profet za khat hna kha sawm nga sawm nga in lungkua ah ka thuh hna i ti le rawl in ka cawm hna kha ka bawipa hi an in chim lo maw? ¹⁴ Atu ah nang nih naa thawh i, ’Va kal law, na bawipa cu, "Elijah cu hika ah a um ko," tiah va chim, na ka ti;’ amah nih cun a ka thah ko lai," tiah a ti. ¹⁵ Cun Elijah nih a thawh i, "A hmai i ka dirmi ralkapbu Bawipa nih a nun bangin, nihin ah amah sinah kaa langh hrimhrim lai," tiah a ti. ¹⁶ Cucaah Ahab kha va ton awkah Obadiah cu a kal i a va chimh; cun Ahab cu Elijah ton awkah khan a kal. ¹⁷ Ahab nih Elijah cu a hmuh tikah, "Nangmah na si maw? Israel hnahnawhnak petupa?" tiah a ti. ¹⁸ Cun anih nih a leh i, "Keimah nih Israel mi cu harnak ka pe hna lo, nangmah le na pa hrin nih pei nan pek hna tiah, zeicahtiah nannih nih Bawipa nawlbia kha nan hlawt hna i Baal kha nan zulh hna. ¹⁹ Cucaah mi thlah hna law Israel mi vialte le Baal profet za li le sawm nga hna kha le Asherah profet za li Jezebel cabuai i rawl a eimi hna kha Karmel Tlang ah pum hna," tiah a ti. ²⁰ Cucaah Ahab nih Israel mi vialte cu bia a cah hna i profet hna cu hmunkhat ah Karmel Tlang ah a pumh hna. ²¹ Cun Elijah cu mi vialte pawngah khan a ra i, "Zei can dah bei lengmang in ruahnak pahnih he nan kal lai? Bawipa cu Pathian a si ahcun, amah cu zul u; sihmanhsehlaw Baal cu Pathian a si ahcun, amah cu zul fawn ko u," tiah a ti hna. Mi zapi nih cun bia kaa khat hmanh an let lo. ²² Cun Elijah nih mizapi cu a thawh hna i, "Keimah, keimah lawnglawng hi Bawipa profet a tangmi ka si; sihmanhsehlaw Baal profet cu za li le sawm nga an si. ²³ Cawtum pahnih in kan pe u; annih nih tum khat i thim hna seh law, can cikcek hna seh law, thing cungah chia hna seh, mei bel kau loin; cun kei nih tum khat kha kaa can ve lai i thing cungah ka chiah lai, mei ka kau ve lai lo. ²⁴ Cun nannih nih nan pathian min kha nan auh lai i kei nih Bawipa min kha ka auh lai; mei in a kan lettu Pathian cu, amah cu Pathian cu a si lai," tiah a ti. Cun mi vialte nih an leh i, "Na chimmi cu a ṭha," tiah an ti. ²⁵ Cun Elijah nih Baal profet cu a thawh hna i, "Nannih nih cawtum pakhat kha i thim u law can hmasa u, nannih cu nan tam deuh cu ta; cun nan pathian min kha au u, sihmanhsehlaw mei bel kauhnawh hlah u," tiah a ti. ²⁶ Cun annih nih an pekmi hna cawtum cu an i lak i an can i Baal min cu zingka in chun tiang an auh i, "Maw Baal, kan let tuah!" tiah an ti. Sihmanhsehlaw zei aw hmanh a um lo i zeihmanh nih a let hna lo. Cun an sermi biakṭheng a velchum ah cun heh tiah an i hlok. ²⁷ Cun chun ah khin Elijah nih cun a nihsawh hna i, "Fak piin au ngat u, pathian pei a si cu; khuadang a ruah lio hoi hna maw a si maw, ka khatkhat ah a kal ta rih i maw a si maw, asiloah, khual a tlawng i dik a si ko lai, aa hngilh i ṭhangh a herh zong a si ko lai dah kaw!" tiah a ti hna. ²⁸ Cun annih nih fak piin an au i an phung bantukin fei le nam in anmah le anmah cu an thi pawt thluahmah in an i chun an i at. ²⁹ Cun ni cu a run i mer i thlet thawinak caan tiang an au cuahmah ko, sihmanhsehlaw zei aw hmanh a um lo; zeihmanh nih a let hna lo, ahohmanh nih zei ah a rel hna lo. ³⁰ Cun Elijah nih mi vialte cu a thawh hna i, "Ra ka naih tuah u," a ti hna i mi vialte nih cun an naih. Cun anih nih an hrawh cangmi Bawipa biakṭheng kha a remh; ³¹ Bawipa bia a sinah a phan i, "Na min cu Israel a si lai," tiah a timi Jakob i a fapa hna an phun zat khan Elijah nih lung hlei hnih aa lak i ³² Bawipa min in biakṭheng pakhat a ser. Cun a velchum cun kahcham a cawh i a ngan lei cu thlaici rel hnih tlum hrawng a si. ³³ Cun thing kha a ningcang tein a chiah hna i cawtum kha a can cikcek i thing cungah cun a chiah. Cun amah nih cun, "Ti ralca pali khat in chia u law, khangh thawinak le thing kha toih hna u," tiah a ti. ³⁴ Cun aa thawh i, "Tuah ṭhan rih u," tiah a ti i an tuah ṭhan. Cun, "A voi thumnak tuah ṭhan rih u," a ti i a voi thumnak an tuah ṭhan. ³⁵ Cun ti nih cun biakṭheng cu a kulh i kahcham zong cu ti a khat. ³⁶ Cun thlet thawinak caan ah khin profet Elijah cu a pawngah a ra i, "Maw Bawipa, Abraham, Isak le Israel i Pathian, nangmah cu Israel mi chungah hin Pathian na si i keimah cu na sal ka si i hi thil vialte hi nangmah bia in ka tuah ti kha nihin ah hin langhter ko. ³⁷ Maw Bawipa, nangmah cu Pathian na si i nangmah nih annih cu an lung na kirter ṭhan hna ti kha mi hna nih hin an hngalh nakhnga, ka let tuah, maw Bawipa, ka let tuah," tiah a ti. ³⁸ Cun Bawipa mei cu a rung tla ciammam i khangh thawinak le a thing le lung le leidip kha a kangh dih hirhiar hna i kahcham chung i a ummi ti kha a liah dih. ³⁹ Cun mah cucu mi vialte nih khan an hmuh tikah an bawk i, "Bawipa hi pei Pathian cu a rak si hi, Bawipa hi pei Pathian cu a rak si hi," tiah an ti. ⁴⁰ Cun Elijah nih annih cu, "Baal profet kha tlai hna u, pakhat hmanh luatter hna hlah u," tiah a ti. Cun annih nih an tlaih hna i Elijah nih Kishon tivate ah khan a vun kalpi hna i khika ah a thah hna. ⁴¹ Cun Elijah nih Ahab cu a thawh i, "Hung kal law hung ei law hung ding tuah, zeitintiah ruah a sur hluahmahmi thawng a um," tiah a ti. ⁴² Cucaah ei awk le din awkah Ahab cu a hung kal. Cun Elijah cu Karmel Tlang par ah a kal i vawlei ah a kun i a hmai cu a khuk le a khuk karlak ah a chiah. ⁴³ Cun a sinum cu a thawh i, "Hung kal law rili lei kha hung cuan tuah," tiah a ti. Cun a hung kal i a hung zoh i, "Zeihmanh a um lo," tiah a ti. Cun, "Voi sarih in hung kal ṭhan tuah," tiah a ti. ⁴⁴ Cun a voi sarihnak ah cun, "Zohhmanh, rili chungin mi kut tiate khi khuadawm a kai iaimai," tiah a ti. Cun amah nih, "Hung kal law, Ahab kha, ’Ruah nih an hren sual lai, na rangleng kha tim law vung kal cang,’ tiah hung chim," tiah a ti. ⁴⁵ Cun tlawmpal ah khin van cu khuadawm le thli in a nak khuihmaih i ruah cu fak piin a sur. Cun Ahab cu a rangleng kha aa cit i Jezreel ah a kal. ⁴⁶ Cun Bawipa kut cu Elijah cungah khan a um i a biar aa rengh i Ahab hlanah Jezreel luhnak kutka ah khan a rak tli.

¹ Ahab nih Jezebel cu Elijah nih a tuahmi vialte kha le zeitindah vainam in profet vialte a thah hna ti kha a chimh. ² Cun Jezebel nih Elijah sinah cun lamkal pakhat a hei thlah i, "Na nunnak cu annih lak i pakhat nunnak bantuk ah khan thaizing atu tik caan i ka ser lo ahcun, cu bantukin le cu nak tam deuh zongin pathian hna nih cun ka cungah tuah ko hna seh," tiah a ti. ³ Khi tikah a thin a phang i a tho i a zam i Judah ta a simi Beersheba khua ah a phan, khika ah a sinum kha a chiah ta. ⁴ Sihmanhsehlaw amah tu cu ramlak ah ni khat lamkal a kal i hmunphiah thingkung tangah a ra i a ṭhu; cun a thih nakhnga a hal i, "A za cang; atu cu maw Bawipa, ka nunnak kha la ko; zeitintiah ka pupa hna nakin ka ṭha hlei ṭung lo," tiah a ti. ⁵ Cun a it i hmunphiah thingkung pakhat tangah aa hngilh; cun zohhmanh, vancungmi nih a tawngh i, "Tho law ei tuah," tiah a ti. ⁶ Cun khua a hun zoh i, zohhmanh, a lu leiah lung lin in rawhmi changreu hlum hlum khat le ti thawl khat a hmuh. Cun a ei a din i a it ṭhan. ⁷ Cun Bawipa vancungmi cu a voi hnihnak a ra ṭhan i a tawngh i, "Tho law ei tuah, na khual tlawnnak lam cu na celh sual lai lo," tiah a ti. ⁸ Cun a tho i a ei a din i cu rawl thazang cun ni sawm li le zan sawm li, Pathian tlang Horeb leiah cun a kal. ⁹ Cun khika ah lungkua pakhat ah a phan i a riak; cun zohhmanh, Bawipa bia cu a sinah a ra i amah cu, "Elijah, hika ah hin zeidah na tuah?" tiah a ti. ¹⁰ Anih nih, "Bawipa, ralkapbu Pathian cu ka ṭanh hringhran ko, zeitintiah Israel mi hna nih na biakamnak kha an hlawt i na biakṭheng kha an chimh hna i na profet hna kha vainam in an thah hna i keimah, keimah lawnglawng hi ka tang; cun keimah zong cu thah awkah an ka kawl," tiah a ti. ¹¹ Cun anih nih a thawh i, "Chuak tuah, Pathian hmaiah tlang cungah va dir tuah," tiah a ti. Cun Bawipa cu a lan i a thlichia a hrang ciammam i tlang cu a cheu i Bawipa hmaiah cun lung hna cu a khuai cikcek hna, sihmanhsehlaw Bawipa cu thli chungah cun a um lo; cun thli a hran dih cun li a hnin, sihmanhsehlaw Bawipa cu lihnin chung zongah cun a um lo; ¹² lihnin a dih cun mei a hung chuak, sihmanhsehlaw Bawipa cu mei chung zongah cun a um lo; cun mei a dih cun aw ṭhia aw dinte a hung chuak. ¹³ Cun Elijah nih a theih tikah a puan in a hmai kha aa huh i a va chuak i lungkua luhnak ah cun a dir. Cun zohhmanh, aw pakhat kha a sinah a ra i, "Elijah, hika ah hin zeidah na tuah?" tiah a ti. ¹⁴ Anih nih, "Bawipa, ralkapbu Pathian, nangmah, nangmah lawnglawng hi kan ṭanh zungzal; Israel mi tu nih cun nangmah he an biakam kha an hrawh i na biakṭheng kha an hrawh hna i na profet kha an thah hna. Keimah lawnglawng hi ka tang i keimah zong cu thah an ka zalh lengmang," a ti. ¹⁵ Cun Bawipa nih a thawh i, "Va kir law Damaskas ramlak leiah khan va kal tuah; cuka na phak tikah Hazael cu Siria siangpahrang si awkah chiti na thuh lai; ¹⁶ Cun Nimshi fapa Jehu cu Israel siangpahrang si awkah chiti na thuh lai; cun Abel-meholah khuami Shafat fapa Elisha kha nangmah changtu profet si awkah chiti na thuh lai. ¹⁷ Hazael vainam in a luatmi cu Jehu nih a rak thah hna lai; cun Jehu vainam in a luatmi cu Elisha nih a rak thah hna lai. ¹⁸ Sihmanhsehlaw Israel chungah hin Baal hmai i a khuk aa bil lo i a hnamh zong a hnam lomi thong sarih kaa nganh hna lai," tiah a ti. ¹⁹ Cucaah khika khan a kal i Shafat fapa Elisha kha a hmai i cawtum tuah hleihnih he lei a rak thuan kha a hmuh, amah cu a tuah hleihnihnak sinah cun a rak um. Elijah cu a pawngin a lan i a puan khan a hei cheh. ²⁰ Cun a cawtum kha a kaltak hna i Elijah cu a dawi i, "Ka nu le ka pa va hnam ta hna ning law, cun kan zulh lai," tiah a ti. Cun anih nih a thawh i, "Va kir ṭhan ko ngat, kan thlauh lo zeicahtiah na cungah zeidah ka tuah kha na hngalh," tiah a ti. ²¹ Cun amah zulhnak cun a kir i cawtum tuah khat cu aa lak i a thah hna i an sa cu caw lei thuannak thing cun a chuan i mi cu a pek hna i an ei. Cun a tho i Elijah kha a zulh i amah cu a rian kha a ṭuanpiak.

¹ Siria siangpahrang Benhadad nih a ralkap vialte kha a pumh hna; siangpahrang sawm thum le pahnih kha a sinah an ṭang, rang le rangleng hna he; cun a hung kal i Samaria kha a kulh i a doh. ² Cun khua chungah cun Israel siangpahrang Ahab sinah khan lamkal a vun thlah hna i, "Hi bangin Benhadad nih: ³ ’Na ngun le na sui cu keimah ta an si; na nupi aa dawh bik hna le na fale hna zong keimah ta an si,’ a ti, tiah va chim u," tiah a ti hna. ⁴ Cun Israel siangpahrang nih cun a leh i, "Na chim bangin, ka bawipa, maw siangpahrang, keimah le ka ngeihmi vialte cu nangmah ta kan si ko," tiah a ti. ⁵ Lamkal hna kha an ra ṭhan i, "Hi bangin Benhadad nih: ’Na sinah mi ka rak thlah hna i, "Na ngun le na sui cu ka pe hna, na nupi hna le na fale hna zong," ka ti; ⁶ sihmanhsehlaw thaizing atu tikah hin na sinah ka sinum ka rak thlah hna lai i na inn le na sinum hna inn hna kha an kawl hna lai i an duhmi paoh an i lak lai i an i kalpi lai,’ a ti," tiah an ti. ⁷ Cu tikah, Israel siangpahrang nih ram chung upa vialte kha a auh hna i, "I chingchiah hmanh u, hi pa i harnak tuah awk a kawl ning hi; ka sinah mi a rak thlah hna i ka nupile le ka fale le ka ngun le ka sui kha a ka hal i ka rak al lo," tiah a ti. ⁸ Cun upa vialte le mi vialte nih an thawh i, "Zei ah rak rel hlah, na hna zong rak tla hlah," tiah an ti. ⁹ Cucaah Benhadad lamkal hna cu a thawh hna i, "Ka bawipa, siangpahrang cu, ’Na sal na ka hal hmasami vialte kha cu ka tuah lai, sihmanhsehlaw mah hi cu ka tuah kho lo,’ a ti, tiah va chim u," tiah a ti hna. Cun lamkal hna cu an kal i bia cu an hei phorh. ¹⁰ Benhadad nih a sinah cun a hei thlah hna i, "Cu bangin pathian hna nih ka cungah tuah hna seh law tam deuh zongin tuah hna seh, Samaria khua leidip cu a ka zultu hna caah pei khat cio in a zaat ding a si ahcun," tiah a ti. ¹¹ Cun Israel siangpahrang nih a leh i, "A ralthuam in aa thuammi nih aa phoihmi bantukin tluangkhawn awk a si lo,’ tiah va chim u," tiah a ti. ¹² Benhadad nih hi bia cu, siangpahrang hna he thlam chung i zu an din lioah khan a theih tikah, a mi hna cu, "Nan umnak hmun tlai u," tiah a ti hna. Cun annih nih khua cu doh awkah an umnak hmun kha an tlai cio. ¹³ Cun zohhmanh profet pakhat Israel siangpahrang Ahab pawngah cun a ra i, "Hi bangin Bawipa nih, ’Hi mibu nganpi hi na hmuh cang hna a si lo mei? Zohhmanh, nihin ah annih cu nangmah kan pek lai; cun nang nih keimah cu Bawipa ka si kha na hngalh lai,’ a ti," tiah a ti. ¹⁴ Cun Ahab nih, "Ahodah a hman lai?" tiah a ti. Anih nih, "Bawipa nih hi bangin, ’Peng cheumi uktu bawi hna i an sinum hna hi ka hman hna lai,’ a ti," tiah a ti. Cun anih nih a thawh i, "Ahodah i tuknak cu a thawk lai?" a ti. Cun anih nih, "Nangmah," tiah a leh. ¹⁵ Cun peng cheumi uktu bawi hna sinum kha a pumh hna i annih cu za hnih sawm thum pahnih an si; cun annih hnulei ah cun Israel mi vialte cu a pumh hna i thong sarih an si. ¹⁶ Cun Benhadad le a bawmtu siangpahrang sawm thum le pahnih hna cu ri koin thlam chungah zu an din lio chun ah khin, annih cu an va kal. ¹⁷ Peng cheumi uktu bawi hna sinum hna cu an kal hmasa. Cun Benhadad nih va zoh chungtu mi kha a thlah hna i annih nih amah cu, "Samaria khua in mi an ra chuak," tiah an chimh. ¹⁸ Annih nih, "Daihnak ca an ra chuah a si ahcun, a nung in tlai hna u i tuk awk i an ra chuah a si zongah, a nung in tlai hna u," tiah a ti. ¹⁹ Cucaah peng cheumi uktu bawi hna ralkap hna cu, an chuak i Israel ralkap nih an zulh hna. ²⁰ Cun annih nih anmah le an dohmi cio kha an thah hna; Siria mi cu an zam i Israel mi nih an dawi hna, sihmanhsehlaw Siria siangpahrang Benhadad cu rang cungin rangcung ralkap hna he an luat. ²¹ Cun Israel siangpahrang cu a chuak i rang le rangleng hna kha a tlaih hna i Siria mi cu tampi a thah hna. ²² Cu tikah profet kha Israel siangpahrang pawngah khan a ra i amah sinah cun, "Ra tuah, i hrim tuah, cun na tuah hnga ding hi ṭha tein ruat tuah; zeitintiah ṭhal a hung chuah ṭhan tikah Siria siangpahrang nih doh awkah an rathnawh lai," tiah a ti. ²³ Cun Siria siangpahrang cu a sinum hna nih an thawh i, "Annih an pathian cu tlang pathian an si, cucaah kannih nakin an ṭhawng deuh; sihmanhsehlaw rawn ah do hna u si law, annih nakin kan ṭhawng deuh hrimhrim lai. ²⁴ Cucaah mah hi tuah tuah: siangpahrang kha anmah le an rian cio khan ṭhial hna law an hmun ah khan ralbawi chia hna; ²⁵ cun na rak sunghmi ralkapbu bantuk kha, rang can ah rang, rangleng can ah rangleng in pum ṭhan hna; cun rawn ah kan doh hna lai i annih nakin kan ṭhawng deuh hrimhrim lai," tiah an ti. Cun an bia cu a ngaih i cu bangin a tuah. ²⁶ Ṭhal ah cun Benhadad nih Siria mi cu a pumh hna i Israel mi doh awkah khan Afek ah an hung kal. ²⁷ Cun Israel mi cu an pumh hna i rawl an pek hna i annih doh awkah khan an kal; Israel mi cu meheh run hmete pahnih bantukin an hmaiah khan an riak, Siria mi vial cu ram kha an khat dih. ²⁸ Cun Pathian mi pakhat nih Israel siangpahrang sinah cun a ra i, "Hi bangin Bawipa nih, ’Siria mi hna nih, "Bawipa, cu tlang pathian pei a si ko cu, nelrawn pathian a si ṭung lo," an ti caah, cucaah hi mibu nganpi hi a dihlak in na kut chungah kan pek lai i keimah cu Bawipa ka si kha na hngalh lai,’ a ti," tiah a ti. ²⁹ Cun annih cu ral enh veve in ni sarih chung veve an riak. Cun a ni sarihnak ni ah cun an i tawng i Israel mi nih Siria mi hna cu ni khat ah ke ralkap sing khat an thah hna. ³⁰ Cun a tang rihmi hna cu Afek khua ah an zam i a tangmi hna chungah sang hnih le thong sarih cu vampang nih a nenh hna. Benhadad zong cu a zam i khua chung i inn pakhat a dal chungchin ah a lut. ³¹ Cun a sinum hna nih amah cu an thawh i, "Zohhmanh, Israel chungkhar siangpahrang hna cu zaangfah thiammi siangpahrang an si tiah kan theih; cucaah kan tai ah puanchia i venh in kan lu ah hrihrual i ngerh u si law, Israel siangpahrang sinah cun va kal hnik u sih; na nunnak a hei in zuah ko hnga dah kaw," tiah an ti. ³² Cucaah an tai ah puanchia an i venh i an lu ah hrihrual an i ngerh i Israel siangpahrang sinah cun an va kal i, "Na sal Benhadad nih, ’Ka nunter ko sawh seh,’ a ti," tiah an ti. Cun anih nih, "A nung rih maw? Amah cu ka unau pei a si cu," tiah a ti. ³³ Cun mi hna nih cun mah cucu hmelchunhnak ṭha a si tiah an ruah i amah sin cun khulrang in an i lak i, "Asi, na unau Benhadad cu," tiah an ti. Cun anih nih, "Va kal u law, ratpi u," tiah a ti. Cun Benhadad cu a sinah a ra chuak i a rangleng cung khan a ratter. ³⁴ Cun Benhadad nih amah cu a thawh i, "Ka pa nih na pa sinin a lakmi khua kha kan khirh ṭhan lai; cun ka pa nih Samaria ah a rak tuah bang khan, nang zong nih Damaskas khua ah chawdawr naa ser ve lai," tiah a ti. Cun Ahab nih a thawh i, "Hi biakamnak thawng hin kan luatter lai," tiah a ti. Cucaah amah he cun biakamnak a ser i a kalter. ³⁵ Cun profet fapa hna lak i pakhat nih khan a hawipa pakhat cu, "Ka tu tuah, tiah kan nawl," tiah Bawipa nawl peknak thawngin a ti. Sihmanhsehlaw mipa nih tuk cu a al. ³⁶ Cu tikah anih nih, "Bawipa aw kha na ngaih lo caah, zohhmanh, ka sin i na kal cangkate hin chiandeih nih an seh lai," tiah a ti. Cun a sinin a kal cangkate cun chiandeih nih a rak ton i a seh taktak. ³⁷ Cun midang pakhat a hmuh i, "Ka tu tuah, tiah kan nawl," tiah a ti. Cun mipa nih cun a tuk i a hliam. ³⁸ Cucaah profet cu a kal i lam pawngin siangpahrang cu a rak hngah, a mit cu puanchia in a rak i men i a mui a rak i hleng. ³⁹ Cun siangpahrang cu a lanhpah ah khin siangpahrang cu a hei auh i, "Na salpa hi raltuknak hmunpi ah ka va kal i, zohhmanh, ralkap pakhat cu ka sinah a ra i mipa pakhat a rak put i, ’Hi mipa hi zohkhenh tuah; zei maw tiin a loh sual a si ahcun, na nunnak cu a nunnak caah a si lai, asiloah, ngun talen pakhat na liam lai,’ a ti. ⁴⁰ Cun na salpa cu khika, hika, i hnahnawk luri ngaiin ka um lioah, a rak kal diam ai," tiah a ti. Israel siangpahrang nih cun a thawh i, "Na cung i biakhiahnak cu cu bang cun a si ko lai; nangmah nih pei naa khiah cang ko cu," tiah a ti. ⁴¹ Cu tikah khulrang in a mit mennak puanchia cu a phoih i Israel siangpahrang nih profet hna lak i pakhat a si kha a hngalh. ⁴² Cun anih nih a thawh i, "Hi bangin Bawipa nih, ’Hrawh awkah kan pekchanh ciami kha nangmah nih na kut chungin na luatter caah, cucaah a nunnak caah na nunnak a kal lai i a mi hna caah na mi an si lai,’ a ti," tiah a ti. ⁴³ Cun Israel siangpahrang cu thinhung le hmaichia in a inn ah a kal i Samaria khua kha a phan.

¹ Jezreel mi Naboth nih Jezreel khua ah, Samaria siangpahrang Ahab inn pawngah mitsur dum pakhat a ngei. ² Cun Ahab nih Naboth cu a thawh i, "Na mitsur dum cu ka inn pawngah a um caah an hringso dum ah ka hman nakhnga, ka pe tuah; cun a can ah mitsur dum ṭha deuh kan pek lai; cucu a si lo le, nangmah nih a ṭha na ti ahcun, a man cu tangka in kan pek ko lai," tiah a ti. ³ Sihmanhsehlaw Naboth nih Ahab cu, "Ka pupa hna ro na sin i kan pek hnga cu Bawipa nih ka kham ko seh," tiah a ti. ⁴ Cun Naboth nih Ahab cu, "Ka pupa hna ro cu kan pe lai lo," tiah a sin i a timi bia ruangah khan, Ahab cu thinhung le hmaichia in a inn chungah a lut. Cun a ihkhun ah a it i khattelei kha a hoi i rawl ei kha a duh lo. ⁵ Sihmanhsehlaw a nupi Jezebel kha a sinah a ra i, "Zeicahdah cuticun na thlarau cu a thin a hun i rawl na ei duh lo?" tiah a ti. ⁶ Cun anih nih, "Jezreel mi Naboth kha, ’Na mitsur dum kha phaisa in kan cawk ko lai, cun cu ti a si lo le, na duh ahcun a ai ah mitsur dum dang kaan pek lai,’ ka ti i anih nih, ’Ka mitsur dum cu kan pe lai lo,’ tiah a ka leh caah a si," tiah a ti. ⁷ Cun a nupi Jezebel nih a thawh i, "Israel hi atu ah nangmah nih na uk maw? Tho law rawl ei law na lung kha lawmhter tuah; Jezreel mi Naboth mitsur dum cu keimah nih kan pek lai," tiah a ti. ⁸ Cucaah Ahab min in ca a ṭial i a min khenhnak in a khenh hna i cu ca cu Naboth he a khua i a um ṭimi upa hna le bawi hna sinah khan a kuat. ⁹ Cun ca chungah cun, "Rawl ulhnak thanh u law, Naboth kha mizapi lakah sang ngai ah hlorh u; ¹⁰ cun mi ṭhiṭhalo pahnih in amah hmaiah cun chia hna u law, ’Nangmah nih Pathian le siangpahrang chiat na serh hna,’ tiin bia puh hna seh. Cun chuahpi u law thi lakin lung in chep u," tiah a ṭial. ¹¹ Cun a khuami, upa hna le bawi hna a khua chung i a ummi hna nih cun, Jezebel nih bia a cah hna bang khan an tuah. Anih nih a kuatmi hna ca chungah aa ṭial bangin, ¹² rawl ulhnak kha an thanh i Naboth kha mizapi lakah sang ngai ah an hlorh. ¹³ Cun mi ṭhiṭhalo pahnih hna kha an ra i a hmaiah khan an ṭhu; cun mi ṭhiṭhalo hna nih khan mi zapi hmaiah cun Naboth cu bia an puh i, "Naboth nih Pathian le siangpahrang kha chiat a serh hna," an ti. Cucaah khua lengah an chuahpi i thi lakin lung in an cheh. ¹⁴ Cu tikah Jezebel sinah khan mi an hei thlah i, Naboth cu lung in cheh a si cang; a thi cang," tiah an ti. ¹⁵ Jezebel nih Naboth cu lung in cheh a si cang i a thi cang ti kha a theih cangka, Jezebel nih Ahab cu a thawh i, "Tho tuah, Jezreel mi Naboth nih phaisa in zuarh an sianh lomi mitsur dum kha i lak tuah; zeitintiah Naboth cu a nung ti lo, a thi cang," tiah a ti. ¹⁶ Cun Ahab nih Naboth kha a thi cang ti a theih cangka, Jezreel mi Naboth mitsur dum cu vung kal i vung i lak awkah a tho. ¹⁷ Cu tikah Bawipa bia cu Tishbemi Elijah sinah khan a ra i, ¹⁸ "Tho law, Samaria khua i a ummi Ahab, Israel siangpahrang kha ton awkah vung kal tuah; zohhmanh, amah nih co awkah a kalhnawhmi Naboth mitsur dum chungah a um ko. ¹⁹ Cun amah cu na thawh lai i, ’Hi bangin Bawipa nih, "Na thah cang i a ro zong na co cang maw?" a ti," na ti lai. Cun nangmah nih amah cu na thawh lai i, ’Bawipa nih hi bangin: "Uico nih Naboth thi an liahnak hmun ah khan uico nih nangmah na thi an liah lai," a ti,’ tiah na chimh lai," tiah a ti. ²⁰ Ahab nih Elijah cu, "Na ka hmuh cang mu, maw ka ralpa," tiah a ti. Cun anih nih, "Bawipa mithmuh i thil ṭhalo tuah awkah khan nangmah le nangmah cu naa zuar cang caah, kan hmuh cang. ²¹ Zohhmanh, nangmah cungah ṭhat lonak ka tlunter lai; kan hloh cikcek lai i Israel mi chungah Ahab ta a simi pa paohpaoh cu, a luatmi siseh, a luat lomi siseh, ka hrawh dih hna lai; ²² cun ka thin na ka phawh ruang le Israel mi na sualter hna caah hin, na innchungkhar cu Nebat fapa Jeroboam innchungkhar bantuk le Ahijah fapa Baasha innchungkhar bantuk ah ka ser lai. ²³ Cun Jezebel kongah hin Bawipa nih, ’Jezreel khua kulh chungah hin Jezebel cu uico nih an ei lai,’ a ti fawn. ²⁴ Ahab ta a simi paoh cu, khua chung i an thih a si ah, uico nih a ei hna lai; ramlak i an thih a si ah, van i a zuangmi va nih an ei hna lai," tiah a ti. ²⁵ (Bawipa mithmuh i thil ṭha lo tuah awkah aa pemi Ahab bantuk ahohmanh an um lo — cu vialte cu a nupi Jezebel nih a forh ruangah a si. ²⁶ Israel mi nih ram kha an hun nam tikah an hmai in Bawipa nih ram chungin a dawimi hna Amor mi nih an biakmi siasal biaknak thil fihnung bik kha Ahab nih a tuah). ²⁷ Cun mah bia cu Ahab nih a theih tikah, a puan kha a thleh hna i a tak cungah puanchia aa hruk i rawl a ul i lungpur ngaiin aa chawk. ²⁸ Cun Bawipa bia cu Tishbemi Elijah sinah khan a ra i, ²⁹ "Zeitindah Ahab nih ka hmaiah lungṭhum ngaiin a um kha na hmu ko lo maw? Ka hmaiah a lung a ṭhumh caah ṭhat lonak kha amah chan ah hin cun ka tlunter lai lo; sihmanhsehlaw a fapa chan ah a innchungkhar cungah hin ṭhat lonak kha ka tlunter lai," tiah a ti.

¹ Kum thum chung cu Siria le Israel cu i do loin an um. ² Sihmanhsehlaw a kum thumnak ah khan, Judah siangpahrang Jehoshafat cu Israel siangpahrang sinah khan a rung. ³ Cun Israel siangpahrang nih a sinum hna cu a thawh hna i, "Ramoth-gilead khi kanmah ta a si kannih nih dai tein kan um ko i Siria siangpahrang kut chungin kan chut lo ti kha nan hngal maw?" tiah a ti hna. ⁴ Cun Jehoshafat cu a thawh i, "Ramoth-gilead i vaa tuk awkah na ka kalpi hnga maw?" tiah a ti. Cun Jehoshafat nih Israel siangpahrang cu a thawh i, "Kei le nang cu mi khat kan si ko, ka mi cu na mi an si ve ko i ka rang cu na rang an si ve ko," tiah a ti. ⁵ Cun Jehoshafat nih Israel siangpahrang cu, "Bawipa bia cu dothlat hmasa rih tuah hen," tiah a ti. ⁶ Cu tikah Israel siangpahrang nih profet kha hmunkhat ah a pumh hna, mi za li tluk an si, annih cu a thawh hna i, "Ramoth-gilead cu tuk awkah ka kal hnga maw, asiloah, kaa sum ko lai dah?" tiah a ti. Cun annih nih, "Hung kal ko, zeitintiah Bawipa nih siangpahrang kut chungah a pek lai," an ti. ⁷ Sihmanhsehlaw Jehoshafat nih, "Hika ah hin kan hal khawh ding Bawipa profet a dang pakhat tal an um ti lo maw?" tiah a ti. ⁸ Cun Israel siangpahrang nih Jehoshafat cu, "Bawipa kan hal khawhnak ding mipa a dang pakhat a um rih, amah cu Imlah fapa Mikaiah a si; sihmanhsehlaw ka kong ah thil ṭha chim bal loin thil ṭhalo lawng kha a chim caah ka huat," tiah a ti. Cun Jehoshafat nih cun, "Cuticun siangpahrang nih chim hlah seh," tiah a ti. ⁹ Cun Israel siangpahrang nih bawi pakhat kha a auh i, "Imlah fapa Mikaiah kha khulrang in ratpi tuah," tiah a ti. ¹⁰ Cun Israel siangpahrang le Judah siangpahrang Jehoshafat cu Samaria hauka luhnak i phuhri ah khan, an bawi ṭhutdan cungah an ṭhu i an puan in an i thuam; cun profet vialte hna cu an hmaiah an rak chim dulmal ko. ¹¹ Cun Khenaanah fapa Zedekiah nih thir ki aa ser hna i, "Hi bangin Bawipa nih, ’Siria mi cu an rawk dih tiang, mah hi hin na suk hna lai,’ a ti," tiah a ti. ¹² Cun cu bantuk ṭhiamṭhiam in profet vialte nih cun an chim i, "Ramoth-gilead ah cun hung kal law, hung tei ko; Bawipa nih siangpahrang na kut chungah an pek lai," tiah an ti. ¹³ Cun Mikaiah kawh awk i an thlahmi lamkaltu nih khan amah sinah cun, "Zohhmanh, profet hna cu lungnge tein a ṭha lei in siangpahrang sinah an bia a si; nangmah na bia zong annih lak i pakhat i a bia bantuk si ve seh law an duhning lei in chim ve ko," tiah a ti. ¹⁴ Sihmanhsehlaw Mikaiah nih, "Bawipa a nun bangin, Bawipa nih ka sin i a chimmi cu, mah cucu ka chim ko lai," tiah a ti. ¹⁵ Cun siangpahrang sinah a phak tikah, siangpahrang nih cun a rak thawh i, "Mikaiah, Ramoth-gilead cu hung tuk awkah kan kal lai maw, kan i sum lai dah?" tiah a ti. Cun anih nih a thawh i, "Hung kal u law hung tei hen u; Bawipa nih siangpahrang kut chungah a pek ko lai," tiah a leh. ¹⁶ Sihmanhsehlaw siangpahrang nih a thawh i, "Biatak dah ti lo cu Bawipa min in ka sin i zeihmanh na chim lo awkah voi zeizat dah bia kan kamter lai?" tiah a ti. ¹⁷ Cun anih nih a thawh i, "Israel mi vialte cu khaltu a ngei lomi tuu bantukin tlang cung i an i ṭhek dih kha ka hmuh; cun Bawipa nih, ’Hi hna hi bawi an ngei lo, anmah le an inn cio ah dai tein kir hna seh,’ a ti," tiah a ti. ¹⁸ Cun Israel siangpahrang nih Jehoshafat cu, "Keimah kongah cun ṭhatnak si loin chiatnak a chim lai, tiah kan ti ṭheo lo mei?" tiah a ti. ¹⁹ Cun Mikaiah nih cun, "Cucaah Bawipa bia cu thei tuah: Bawipa cu a bawi ṭhutdan cungah a ṭhut i vancung ralkapbu vialte a orhlei le a kehlei ah a pawng i an dir kha ka hmuh; ²⁰ cun Bawipa nih a thawh i, ’Ahab cu Ramoth-gilead ah a hung kal i khika ah a thih naklai ahodah a lem lai?’ tiah a ti. Cun pakhat nih thil pakhat a chim i a dang pakhat nih thil dang pakhat a chim ve. ²¹ Cun thlarau pakhat cu a hung chuak i Bawipa hmaiah cun a dir i, ’Keimah nih ka lem lai,’ a ti. ²² Cun Bawipa nih, ’Zei in dah na lem lai?’ tiah a ti. Cun anih nih, ’Ka va kal lai i a profet vialte hna kaa chungah nal thlarau ka va si lai,’ tiah a ti. Cun anih nih, ’Na va lem hrimhrim lai i na lem khawh taktak lai; va kal law cu bangin va tuah,’ tiah a ti. ²³ Cucaah cun zohhmanh, Bawipa nih hi na profet vialte hna kaa chungah hin nal thlarau a chiah cang; Bawipa nih nangmah kongah ṭhat lonak a chim cang," tiah a ti. ²⁴ Khi tikah Khenaanah fapa Zedekiah kha a pawngah a ra i Mikaiah kha a biang ah a bengh i, "Zeitik ah dah Bawipa thlarau cu nangmah sin i bia chim awkah ka sinin a chuah cu a si?" tiah a ti. ²⁵ Cun Mikaiah nih a thawh i, "Zohhmanh, khi ni ah, innchung chungchin dal i thuh awkah na kal tikah na hngalh te lai," tiah a ti. ²⁶ Cun Israel siangpahrang nih cun, "Mikaiah kha tlai u law khua uktu Amon le siangpahrang fapa Joash sinah khan va kalpi u; ²⁷ cun siangpahrang nih hi bangin, ’Hi pa hi thong ah rak thla u law rawl tlawmte le ti tlawmte lawng, daihnak in ka ra kir ṭhan hlantiang, rak pe u, a ti,’ tiah va chim hna u," tiah a ti. ²⁸ Cun Mikaiah nih a thawh i, "Daihnak in na kir ṭhan a si ahcun, Bawipa nih ka sinah bia kha a chim lo a si lai," tiah a ti. Cun amah nih cun, "Nannih mi vialte hna, kan chimmi cu thei tuah u," tiah a ti. ²⁹ Cucaah Israel siangpahrang le Judah siangpahrang Jehoshafat cu Ramoth-gilead ah khan an hung kal. ³⁰ Cun Israel siangpahrang nih Jehoshafat cu a thawh i, "Ka mui kaa hleng lai i raldohnak chungah ka kal ve lai, sihmanhsehlaw nang cu na bawi puan kha i aih ko" tiah a ti. Cun Israel siangpahrang cu a mui aa hleng i raldohnak chungah khan a kal. ³¹ Cun Siria siangpahrang nih cun a rangleng ralbawi sawm thum le pahnih hna cu, "Israel siangpahrang dah ti lo cu, ahohmanh a hme siseh, a ngan siseh, tu hna hlah u," tiah nawl a pek hna. ³² Cun rangleng ralbawi hna nih khan Jehoshafat kha an hmuh tikah, "Amah hi Israel siangpahrang a si hrimhrim ko," tiah an ti. Cucaah amah tuk awkah khan an i mer i Jehoshafat cu a au. ³³ Cun rangleng bawi hna nih khan amah cu Israel siangpahrang a si lo ti an hmuh tikah, amah dawinak khan an kir ṭhan. ³⁴ Sihmanhsehlaw pakhatpa nih tinh setsaimi ngei loin a li cu a kuaih sawhsawh i Israel siangpahrang cu a thir ngaphaw angki le a ṭangphaw karlak ah a khen; cucaah a rangleng mawngtu cu, "I mer law hi i tuknak chung hin ka chuahpi tuah, zeicahtiah an ka hliam ai," tiah a ti. ³⁵ Cun cu ni cu an i tuknak kha a fak ngaingai i siangpahrang cu zan lei i a thih tiang, Siria mi hna lei hoih in a rangleng chungah khan an doh chom; cun a hma thi cu rangleng tawne ah khan a luang. ³⁶ Cun ni a tlak hnik lioah khin, ralkapbu chungah cun, "Nanmah le nan khua cio, nanmah le nan ram cio ah tlung dih u luao," tiin au thawng pakhat a hung um. ³⁷ Cuticun siangpahrang cu a thi i Samaria ah an ratpi i siangpahrang cu Samaria khua chungah an vui. ³⁸ Cun rangleng kha Samaria tili pawngah an ṭawl i, Bawipa nih a chimmi bia ning khan, uico nih a thi cu an liah i hlawhhlangnu hna a chungah an i kholh. ³⁹ Ahab tuahsernak a tang rihmi hna le, a tuahmi thil vialte hna le, vuiho inn a sakmi le, khua a sermi vialte hna cu, Israel Siangpahrang hna Chanrelnak Cauk chungah an i ṭial lo mei? ⁴⁰ Cu bangin Ahab cu a pupa hna sinah a it i a fapa Ahaziah cu amah hmun ah khan a hung bawi. ⁴¹ Israel siangpahrang Ahab a bawi kum linak ah Asa fapa Jehoshafat nih Judah cu pen hram a thawk. ⁴² Jehoshafat cu pennak hram a thawk ah khan kum sawm thum le kum nga a ti i Jerusalem khua in kum kul le kum nga a uk. A nu min cu Shilhi fanu Azubah a si. ⁴³ A pa Asa lam vialte kha a zulh dih; Bawipa mithmuh i a dikmi tuah awkah a pialtak hin lo; asinain khuahrumbo hna kha a hrawk hna lo i mi nih khan khuahrumbo ah cun rai an thawi i zihmui an khangh ṭheo ko rih. ⁴⁴ Jehoshafat nih Israel siangpahrang he remnak zong a tuah. ⁴⁵ Jehoshafat tuahsernak a tang rihmi hna le a ṭhawnnak a langhtermi le zeitindah ral a doh ti tehna kha, Judah Siangpahrang hna Chanrelnak Cauk chungah an i ṭial lo mei? ⁴⁶ Cun a pa Asa chan lio i a rak tang rihmi hlawhhlang nu le hlawhhlang pa vialte kha a ram chungin a hloh hna. ⁴⁷ Edom ram ah cun siangpahrang an um lo; a ai awhtu cu siangpahrang a si ko. ⁴⁸ Jehoshafat nih Ofir i sui va phortu ah Tarshish sangphawlawng a ser hna; sihmanhsehlaw an kal lo; zeicahtiah, Eziongeber ah lawng cu an rawk dih. ⁴⁹ Cu tikah Ahab fapa Ahaziah nih khan Jehoshafat cu, "Lawng cun kan sinum hna hi na sinum hna he kal hna seh," tiah a ti, sihmanhsehlaw Jehoshafat nih a duh lo. ⁵⁰ Cun Jehoshafat cu a pupa hna sinah a it i a pupa hna sinah cun a pu David khua chungah an vui; cun a fapa Jehoram cu amah hmun ah khan a hung bawi. ⁵¹ Judah siangpahrang Jehoshafat siangpahrang a si kum hleisarihnak ah Ahab fapa Ahaziah nih Israel cu Samaria khua in pen hram a thawk i Israel cu kum hnih a uk. ⁵² Bawipa mithmuh ah thil ṭhalo kha a tuah i a pa lam le a nu lam kha a zul ve i Israel mi a sualtertu Jeroboam, Nebat fapa lam kha a zulh. ⁵³ Baal kha a rian a ṭuan i a biak i a pa nih a rak tuahmi vialte kha tuah in, Bawipa, Israel Pathian cu a thin a phawh.