Tito
Karta Pabloba b̶ʉd̶a Tito baita
Pabloba nau karta Tito baita b̶ʉsii. Mau Titoba Pablod̶eeba Jesucristod̶e ijãasii (1:4). Mamau tõpe Pablo ome nibabachii. Pablo naa Jerusalend̶aa ãbarã jaradea ua b̶uabadaurã ome berread̶e wãsiid̶e Tito adoesii (Gálatas 2:1-3). 2 Corintios 2:12-13d̶e maud̶e 2 Corintios 7:5-6d̶e jara b̶uu Titoba ãbarã Corinto puurud̶ebenarãmaa jaradea b̶uabachii. Pabloba b̶ʉd̶a 2 Timoteo 4:10d̶e jara b̶uu Tito Dalmacia druad̶aa wãsii.
Romad̶e jʉ̃a b̶uad̶a wãsiid̶e Pabloba waya puurucha ãbarã ichiad̶e wãsii. Tito ome bed̶ea bia Jesús ʉ̃rʉbena Creta isla mechiud̶aa jarad̶e wãsid̶au (1:5). Waabenarãba ijãasid̶aud̶e Pabloba Tito mama b̶ʉisii jaradea b̶uamera. Mau maad̶akare Pabloba nau karta urubʉisii Tito ichi ome Nicópolis puurud̶aa wãmera (3:12). Tíquico maebʉrã Artemas bʉisii Tito baita ãbarãmaa jaradea b̶uamera. Kʉ̃risiabadau año 63d̶e Pabloba nau karta Corinto puurud̶ebena urubʉisii. Ãba Zenasba maud̶e Apolosba Titomaa adoesid̶au (3:13).
Pabloba Dachi Akõremaa ichíturu kid̶ibai aped̶a b̶ʉsii ijãabadaurã nubadaurã saka panad̶ai panuu (1:1-9) maud̶e Titoba setaa jaradeabadaurã baita kauwai b̶uu (1:10-16). Mawãare b̶ʉsii chõrarã, chõodraarã, kũudrãarã, chibari baita bari trajabadaurã sid̶a saka panad̶ai panuu (2:1-10). Mawãare b̶ʉsii Dachi Akõreba ãchi karibasiid̶eeba jipa nibad̶ai panuu (2:11—3:10). Kaad̶e b̶ʉsii Tito neemera (3:12-15).
Chi kʉ̃risia mechiu 2:15d̶e naka b̶ʉ kub̶uu: «Joma mau jaradea b̶uase. Karibase ãbarãba mau bed̶ea ijãa waud̶amera. Biꞌiwãe wau nuree kastikase, Dachi Akõreba bichi b̶usiid̶eeba maka waumera. Ãbarãmaa bichi ida makabirã́se».
1Pabloba nau kartad̶e naa b̶ʉd̶a
1Mʉ Pablobʉ, Dachi Akõre baita bari trajabarii maud̶e Jesucristoba bʉid̶a. Mʉ bʉisii Dachi Akõreba jʉrʉ adaud̶arãba ichid̶e ijãad̶amera maud̶e chi biawãra bed̶ea kuitaad̶aped̶a Dachi Akõreba kʉ̃ria b̶uu kĩra nuread̶amera. 2Chi maka ijãa panuuba Dachi Akõre ome ewaricha chokae panad̶ai baita esed̶au panuu, nau drua waui naed̶e Dachi Akõre setaa jarakauba maka waui asiid̶eeba. 3Maabae ichiba b̶ud̶a ewarid̶e mʉʉba jaradea b̶uud̶eeba ichi bed̶ea Cristo ʉ̃rʉbena biꞌia kuitaabisii. Mau bed̶ea Dachi Akõre chi Karibabariiba mʉʉmaa jaradeabisii.
4Tito, mʉʉba nau karta bichi baita b̶ʉʉruu. Dachiba arab̶aud̶e Cristod̶e ijãa panuud̶eeba bichi biawãra mʉ warr kĩra b̶uu. Mʉʉba kʉ̃ria b̶uu Dachi Bajãad̶ebena Akõreba1:4 Dachi Bajãad̶ebena Akõre. Kajuma bed̶ead̶e b̶ʉ kub̶uu: Dios el Padre. maud̶e Dachi Mechiu Jesucristoba ãchi sõbiad̶eeba bichi aid̶a panad̶amera maud̶e jirukaraayuwãe panabid̶amera.
Pabloba Titomaa ijãabadaurã nubadaurã b̶ukuábad̶e ad̶a
5Mʉʉba bichi Creta islad̶e b̶ʉisii dachiba waud̶ai b̶uu joma waumera. Mʉʉba jarad̶a kĩra ijãabadaurã nubadaurã puurucha b̶ukuase.1:5 Ijãabadaurã nubadaurã. Griego bed̶ead̶e naka b̶ʉ kub̶uu: chõrarã maebʉrã chõrarã jaradea ua b̶uabadaurã. Kajuma bed̶ead̶e b̶ʉ kub̶uu: ancianos.6Ijãabadaurã nubarii ʉ̃rʉbena nebʉra barau nii ad̶ayuswãe b̶uu. Wẽra ab̶aburu uru b̶uai b̶uu. Chi warrarãba Cristod̶e ijãa panad̶ai panuu maud̶e jipa nibad̶ai panuu. Maka ẽbẽrarãba jarad̶aabai kachirua wau panuu maebʉrã ũribabaswãe nuree. 7Ijãabadaurã nubariiba Dachi Akõre traju waubariid̶eeba, nebʉra barau nii ad̶ayuswãe b̶uu. Ichi nejuakaya nibaabai b̶uu, bari au kĩru nibaabai b̶uu, itua biu nibaabai b̶uu, kĩrubi id̶aa nibaabai b̶uu maud̶e chi nejarra kʉ̃ria nibaabai b̶uu. 8Maumaarã ichi ded̶e needuu sõbiad̶eeba urúbad̶e ad̶ai b̶uu, ne joma biꞌia wau kʉ̃ria nibai b̶uu, kʉ̃risia sõbiad̶eeba b̶uai b̶uu, jipa b̶uai b̶uu, Dachi Akõre baita b̶uai b̶uu, maud̶e ara ichi kakua jipa uru b̶uai b̶uu. 9Chi biawãra bed̶ea ichimaa jaradeaped̶aad̶a ãrea ijãa b̶uai b̶uu. Maka ichiba biawãra bed̶ea jipa jaradea b̶uud̶eeba ẽbẽrarã poyaa aid̶ai biꞌia ijãad̶amera maud̶e chi biawãra bed̶ea kachirua abadaurãmaa poyaa kuitaabiai maarãba biꞌiwãe kʉ̃risia panuu.
10Mʉʉba maka jara b̶uu biawãra bed̶ea kʉ̃riad̶akaurã, dachi aid̶ad̶akau bed̶ea jaradeabadaurã maud̶e waabenarã setaa kũruabadaurã baraud̶eeba. Maarãba dachi mukĩra chi kakua tõod̶ai panuu abadaurã. 11Ãchiba chi jaradeabai b̶uu jaradea panuud̶eeba decha ẽbẽrarãmaa biꞌiwãe kʉ̃risiabiabadau. Ab̶a chi nejarra bareburu jaradeabadau. Maarãmaa ida jaradeabiarã́se.
12Ara mau Creta islad̶ebena nabẽraed̶ebena ab̶a chi aude kʉ̃risia kuitaa niiba naka jarasii: «Creta islad̶ebenarã, ãnimara kachirua kĩra nuree, ko ãrea nuree maud̶e koꞌoa nuree».1:12 Nabẽraed̶ebena ab̶a chi aude kʉ̃risia kuitaa niiba. Kajuma bed̶ead̶e b̶ʉ kub̶uu: profeta.13-14Mauba jarad̶a biawãrabʉ. Maud̶eeba mau ẽbẽrarã iadaa b̶uase biawãra bed̶ea ijãad̶amera, judiorãba nabẽraed̶ebena nebʉrʉbadau ida b̶ud̶amera maud̶e chi biawãra bed̶ea ijãad̶akaurãba jaradea panuu ijãarãad̶amera.
15Dachi Akõre daad̶e chi bia nuree baita ne joma Dachi Akõre daad̶e bia b̶uu. Maamina Dachi Akõred̶e ijãad̶akaurã baita ne ab̶a bid̶a biꞌiwãe b̶uu. Ãchiba kachirua kʉ̃risiabadau maud̶e ãchi sõd̶e nebʉra barauwãe nuree abadau. 16Ãchiba jarabadau Dachi Akõre kuitaa panuu, maamina ãchiba wau panuud̶eeba unubibadau ichi ida b̶u panuu. Ãchi sõ chaarea nuree maud̶e ne bia waud̶ai baita panad̶akau. Ãchiba waubadau Dachi Akõreba kʉ̃riakau.
2Pabloba Titomaa jaradeabid̶a
1Maamina bichiba chi biawãra bed̶ea jipa jaradea b̶uai b̶uu. 2Chõrarãmaa jaradease ãchi kakua jipa uru nuread̶amera, kĩra jipa nuread̶amera, kʉ̃risia biad̶eeba nibad̶amera, Cristod̶e ãrea ijãad̶amera, biawãra kʉ̃riad̶eeba nuread̶amera, maud̶e joma jãaduad̶amera. 3Maud̶e chõodraarãmaa jaradease Dachi Akõre daad̶e jipa nuread̶amera, waabenarã ʉ̃rʉbena setaa jararãad̶amera maud̶e itua biu nibarãad̶amera. Maumaarã ne joma biꞌia jaradead̶ai panuu. 4-5Ãchiba awẽrarãmaa jaradead̶ai panuu ãchi kima, ãchi warrarã sid̶a kʉ̃riad̶amera, kʉ̃risia biad̶eeba jipa nibad̶amera, wẽra bia nuread̶amera, ãchi de biꞌia nud̶amera, sõbia nuread̶amera, maud̶e ãchi kimaba jaraaruu waud̶amera. Maka ab̶au bid̶a Dachi Akõre bed̶ea kachirua jarad̶aabai.
6Kũudrãarãmaa jaradease kʉ̃risia biad̶eeba jipa nibad̶amera. 7Joma biꞌia wau b̶uud̶eeba jomaurãmaa unubi b̶uase saka nibad̶ai panuu. Kʉ̃risia biꞌia jipa jaradea b̶uase. 8Biawãra bed̶ea jaradea b̶uase ab̶au bid̶a bichi ʉ̃rʉbena kachirua jararãad̶amera. Maka jaradea b̶uaibʉrã, bichi kĩramaabadaurã kĩrakayad̶ai. Ãchiba b̶aꞌãra bid̶a dachi poyaa kachirua jarad̶aabai.
9Chibari baita bari trajabadaurãmaa jaradease ãchi chibariba jara b̶uu joma waud̶amera. Ne joma biꞌia waud̶ai panuu ãchi chibariba biꞌia unumera. Ãchiba jaraaruu arakʉd̶e panaud̶aabai panuu. 10Ãchi jaradea ua b̶uabariid̶e chiruad̶aabai panuu, maumaarã unubid̶ai panuu ãchiba ne joma jipa wau panuu. Maka ẽbẽrarãba kuitaad̶ai Dachi Akõre Karibabarii bed̶ea ãrea biꞌia b̶uu.
11Dachi Akõreba jomaurãmaa unubiasii ichi sõbiad̶eeba ẽbẽrarã karibabarii. 12Mauba dachimaa kuitaabia b̶uu ne joma kachirua maud̶e nau iujãad̶ebenarãba kʉ̃riabadau ida b̶ud̶ai panuu. Maud̶e kuitaabia b̶uu dachi nau iujãad̶e panuud̶e kʉ̃risia sõbiad̶eeba dachi kakua kĩra jipa nibad̶ai panuu Dachi Akõreba kʉ̃ria b̶uu kĩra. 13Dachi biꞌia panad̶ai ewari esed̶au panuumisa maka panad̶ai panuu. Mau ewarid̶e Dachi Karibabarii Jesucristo neeruud̶e, ichi kĩrawãrea unud̶ai Ichi Dachi Akõre chi mechiud̶eeba. 14Dachi baita Jesucristoba ara ichi ida beabisii ne joma kachiruad̶ebena karibai baita. Dachi ara ichi baita biꞌia b̶usii ichi puurud̶e panad̶amera maud̶e ne joma biꞌia wau kʉ̃ria panad̶amera.
15Joma mau jaradea b̶uase. Aid̶ase ãbarãba mau bed̶ea waud̶amera. Biꞌiwãe wau nuree iadaase, Dachi Akõreba bichi b̶usiid̶eeba maka waumera. Ãbarãmaa bichi ida makabiarã́se.
3Dachi Akõreba ichi sõbiad̶eeba dachi karibad̶a
1Ãbarãmaa kĩrababiáse nau iujãad̶ebena jaradea ua b̶uabadaurã juad̶e panad̶amera. Ãchiba jaraaduu ijãa waud̶ai panuu maud̶e ne joma biꞌia waud̶ai baita nuread̶ai panuu. 2Ãbarãmaa jarase: ab̶au ʉ̃rʉbena kachirua berread̶awẽa panad̶ai panuu maud̶e oa kachirua berread̶awẽa panad̶ai panuu, maumaarã jomaurã ome sõbia nuread̶ai panuu, maarã audeara kʉ̃risiad̶awẽa.
3Biawãra naed̶e dachia bid̶a kʉ̃risia biꞌiwãe panasid̶au, Dachi Akõred̶e ijãad̶aabai panasid̶au, biꞌiwãe kʉ̃risia panasid̶au. Dachiba kachirua wau kʉ̃ria nuree maud̶e kĩrajʉʉ wau kʉ̃ria nuree, chibari baita bari trajabarii kĩra joma waubachid̶au. Barikia kachiruad̶e nibabachid̶au, waabenarãba uru panuu kakua sõd̶e kachirua panabachid̶au, waabenarãba dachi kĩramaabachid̶au, maud̶e dachiba waabenarã kĩramaabachid̶au. 4Maamina Dachi Akõre chi Karibabariiba ichi biꞌia nii maud̶e ichiba dachi kʉ̃ria b̶uu jomaurãmaa kuitaabiasii. 5Mauba dachi karibasii. Dachiba biꞌia wauped̶aad̶a kakua karibaabasii, maumaarã ichi kĩra chuburiasiid̶eeba karibasii. Dachi kachirua jeraasii paru ea jeraad̶a kĩra nuread̶amera maud̶e Dachi Akõre Jauriba dachimaa chokae b̶uai chiwid̶i deasii. 6Dachi Karibabarii Jesucristod̶eeba, Dachi Akõreba ichi Jauri dachimaa ãrea deasii bania ãrea easii kĩra dachi kakua ʉ̃rʉ. 7Maka Dachi Akõreba ichi sõbiad̶eeba dachi jipa unu b̶uud̶eeba ewaricha ichi ome chokae panad̶ai. Mau esed̶au panuu.
8Mau bed̶ea biawãrad̶eeba, mau ijãad̶ai panuu. Mʉʉba kʉ̃ria b̶uu bichiba mau ãrea jaradea b̶uai Dachi Akõred̶e ijãabadaurãba ne joma biꞌia wau wãd̶amera. Mau bed̶ea ãrea biꞌia b̶uu. Jomaurã karibabarii. 9Maamina barikia bed̶ea biawãe b̶uu kakau oa kachirua berrearã́se. Maud̶e Moisesba b̶ʉd̶a ʉ̃rʉbena oa kachirua berrearã́se. Maud̶e dachi nabẽraed̶ebenarã trʉ̃ jaradeabadau ida b̶use. Joma mau biꞌiwãe b̶uu maud̶e ab̶a bid̶a karibakau.
10Ab̶auba ãbarã ijaraa berreabiiruubʉrã, mau iadaase waa maka waurãamera. Mauba ijãawẽebʉrã, waya iadaase. Maud̶e wabid̶a ijãawẽa b̶uubʉrã, mau ome b̶uarã́se. 11Bichiba ãrea kuitaa b̶uu mau ẽbẽraba biawãra bed̶ea ida b̶uped̶a kachirua wau b̶uu. Kachirua wau b̶uud̶eeba unubi b̶uu ara ichi Dachi Akõre daad̶e nebʉra barau a b̶uu.
Pabloba nau kartad̶e aanama b̶ʉd̶a
12Mʉʉba ãba Artemas maebʉrã ãba Tíquico bichimaa bʉiruu. Jãma neeruud̶e isa Nicópolis puurud̶aa mʉ ichiad̶e neese. Mʉ nau kui che ewarid̶e mama b̶uai kʉ̃risia b̶uu. 13Ẽbẽra chi aid̶a berreabarii Zenas maud̶e Apolos bichid̶ebena wãaduud̶e ne jomad̶e aid̶ase biꞌia wãd̶amera. 14Dachi chi Cristod̶e ijãabadaurãba biꞌia wau kuitaa wãd̶ai panuu chi nejarr barauwãe nuree aid̶ad̶ai baita. Maka ara dachi bari nuread̶aabai.
15Joma mʉ ome panuuba jarabʉi panuu bichi biꞌia b̶uai. Chi Cristod̶e ijãabadaurãmaa jarábad̶e ase daiba jarabʉi panuu maarã biꞌia duanad̶ai. Daiba maarã ãrea kʉ̃ria panuu. Mʉʉba kʉ̃ria b̶uu Dachi Akõreba ichi sõbiad̶eeba joma machi kariba b̶uai.