ROMANOS

Romanos

Karta Pabloba b̶ʉd̶a ãbarã Romad̶ebenarã baita

Año 56d̶e Pabloba nau karta ãbarã Roma puurud̶ebena baita b̶ʉsii. Roma puurud̶aa wãwẽa b̶uasiid̶eeba karta b̶ʉsii ichi ʉ̃rʉbena kuitaad̶amera. Jerusalend̶aa wãi naed̶e Corinto puurud̶ebena urubʉisii (Hechos 20:1-3).

Roma puurud̶e ãbarã judiorã maud̶e judiowãerã baraasii. Judiorãba chi Moisesba b̶ʉd̶ad̶e ijãa panabachid̶au maamina judiowãerãba ijãad̶aka basii. Maud̶eeba Pabloba nau kʉ̃risia mechiu 1:16-17d̶e naka b̶ʉsii: «Mʉ kĩra nejasiakau chi bed̶ea bia Jesús ʉ̃rʉbena jaradeai baita, mau bed̶ea ijãaduu Dachi Akõreba ichi poyaad̶eeba joma dachi karibabariid̶eeba; naa judiorã karibai maud̶e judiowãerã sid̶a. Mau bed̶ea biad̶eeba Dachi Akõreba kuitaabia b̶uu dachi karibai, ichiba jara b̶uu kĩra. Jesucristod̶e ijãaruubʉrã maka b̶uai».

Pabloba naa b̶ʉsii judiorãba maud̶e judiowãerãba kachirua waubadau kakua, Dachi Akõreba ãchi nebʉra ichiai (1:18—3:20). Mawãare b̶ʉsii Dachi Akõreba ichi sõbiad̶eeba Jesucristod̶e ijãaduurã chi ichid̶irã jipa nuree baara duanubarii ʉ̃rʉbena (3:21—5:21). Mawãare b̶ʉsii Dachi Akõreba Jesucristod̶e ijãa nuree ichi Jaurid̶eeba ara ichi baita biꞌia b̶ubarii (6:1—8:39). Mawãare b̶ʉsii ãrea judiorãba Jesucristod̶e ijãad̶awẽa panumina ewari ab̶a baaruud̶e ijãad̶ai (9:1—11:36). Mawãare b̶ʉsii saka dachi jipa nibad̶ai panuu (12:1—15:13). Kaad̶eare b̶ʉsii España druad̶aa wãi naed̶e ãbarã Romad̶ebena ichiad̶e wã kʉ̃ria b̶uu (15:14-28). Pabloba kaad̶eare b̶ʉd̶a 16:1-27d̶e b̶uu.

Nau kartad̶e Pabloba naa b̶ʉd̶a

¹Mʉ Pablobʉ, Jesucristo baita bari trajabariibʉ. Dachi Akõreba mʉ jʉrʉ adausii Jesucristoba bʉid̶a b̶uamera maud̶e b̶usii chi bed̶ea bia Dachi Akõre ʉ̃rʉbena jaradead̶e wãmera.

²Mau bed̶ea bia Dachi Akõreba nabẽraed̶e deai jara b̶uasii. Ichi baita berreabadaurãba mau ʉ̃rʉbena Ichi Bed̶ea arakʉd̶e b̶ʉsid̶au. ^3-4Mau bed̶ea bia ichi Warr ʉ̃rʉbena jara b̶uu. Ichi Warr Dachi Mechiu Jesucristo nau kakuad̶e Israeld̶ebena rey Davidd̶ebena need̶abʉ.1:3,4 Jeremías 23:5-6. Maud̶e ichi biu b̶uad̶a chokae jiradusiid̶e Dachi Akõre Jauriba unubisii mau Dachi Akõre Warr joma poyaa nii.1:3,4 Salmos 2:7.

⁵Jesucristod̶eeba Dachi Akõreba mʉ b̶usii ichiba bʉid̶a b̶uamera. Ichid̶eeba maka b̶usii joma druachabenarãba Jesucristod̶e ijãad̶amera, ichi bed̶ea waud̶amera maud̶e ichimaa biꞌia berread̶amera. ⁶Machi sid̶a Dachi Akõreba iusii Jesucristod̶e nuread̶amera.

⁷Mʉʉba nau karta b̶ʉʉruu joma Romad̶ebena ãbarã baita. Dachi Akõreba machi kʉ̃ria b̶uu maud̶e iusii ichi ẽbẽrarã nuread̶amera. Mʉʉba kʉ̃ria b̶uu Dachi Bajãad̶ebena Akõreba Dachi Mechiu Jesucristo ome ãchi sõbiad̶eeba machi aid̶a panad̶ai maud̶e jirukaraayuwãe panabiad̶ai.

Pablo Romad̶aa wã kʉ̃ria b̶uad̶a

⁸Naa mʉʉba jaraaruu: Jesucristod̶eeba mʉʉba joma machi baita Dachi Akõremaa ichíturu kid̶ibai abarii machiba Jesucristod̶e ijãa panuu ʉ̃rʉbena druachabenarãba berrea panuud̶eeba. ⁹Dachi Akõreba kʉ̃ria b̶uu joma mʉ sõd̶eeba wau b̶uu chi bed̶ea bia ichi Warr ʉ̃rʉbena jaradea b̶uud̶eeba. Ichiba kuitaa b̶uu mʉʉba ʉtaa id̶iiruucha machi baita ʉtaa id̶ibarii. ¹⁰Mʉʉba ʉtaa id̶ibarii ichiba kʉ̃ria b̶uubʉrã mʉ ida machi ichiad̶e wãbimera. ¹¹Biawãra mʉʉba machi ichia kʉ̃ria b̶uu Dachi Akõre Jaurid̶eeba aid̶ai baita. Maka machi karr chaarea nuread̶ai. ¹²Mʉʉba kʉ̃ria b̶uu dachiba arab̶au Cristod̶e ijãa panuud̶eeba chiya aid̶a panad̶ai karr chaarea panad̶ai baita.

¹³Ãbarã, mʉʉba kʉ̃ria b̶uu machiba kuitaad̶ai biawãra b̶es ãrea machimaa wãi kʉ̃risia b̶uabarii. Maamina wabid̶a poyaa wãwẽa b̶uu. Machimaa wã kʉ̃ria b̶uu mʉʉba jaradea b̶uud̶eeba arabenarãba Jesucristod̶e ijãad̶amera waabenarã druad̶ebenarãba ijãaped̶aad̶a kĩra.1:13 Arabenarãba Jesucristod̶e ijãad̶amera. Griego bed̶ead̶e naka b̶ʉ kub̶uu: ne jõ chi b̶ee uru b̶uai.^14-15Mʉʉba chi bed̶ea bia Jesús ʉ̃rʉbena jomaurãmaa jaradeai b̶uu. Ne kuitaa nureerãmaa, ne adua nureerãmaa, karta kuitaa nureerãmaa maud̶e karta adua nureerãmaa jaradeai b̶uu.1:14-15 Karta kuitaa nureerãmaa maud̶e karta adua nureerãmaa. Griego bed̶ead̶e naka b̶ʉ kub̶uu: griegorãmaa maud̶e waabenarãmaa. Maud̶eeba machi Romad̶ebenarãmaa bid̶a jaradead̶e wã kʉ̃ria b̶uu.

¹⁶Mʉ kĩra nejasiakau chi bed̶ea bia Jesús ʉ̃rʉbena jaradeai baita, chi mau bed̶ea ijãaduu Dachi Akõreba ichi poyaad̶eeba joma karibabariid̶eeba; naa judiorã karibai maud̶e judiowãerã sid̶a. ¹⁷Mau bed̶ea biad̶eeba Dachi Akõreba kuitaabia b̶uu dachi karibai, ichiba jara b̶uu kĩra.1:17. Ichiba jara b̶uu kĩra. Griego bed̶ead̶e naka b̶u kub̶uu: Dachi Akõre jipa niid̶eeba. Jesucristod̶e ijãaruubʉrã maka b̶uai. Dachi Akõre bed̶ead̶e naka b̶ʉ kub̶uu:

«Chi jipa nii, Dachi Akõred̶e ijãa niid̶eeba chokae nibai».1:17 Habacuc 2:4.

Ẽbẽrarã Dachi Akõre daad̶e nebʉra bara nuree ʉ̃rʉbena

¹⁸Dachi Akõreba bajãad̶ebena kuitaabi b̶uu kachirua wau nuree maud̶e jipawãe nuree ichi kĩrubid̶eeba mau joma kastikai. Ãchiba kachirua wau panuud̶eeba chi biawãra bed̶ea ida kuitaabid̶akau. ¹⁹Dachi Akõre ʉ̃rʉbena poyaa kuitaad̶ai b̶uu ãchiba mau ãrea kuitaa panuu, ichiba mau kuitaabia b̶uud̶eeba. ²⁰Nau iujãa wausiid̶eed̶ebena, maarãba chi ichiba waud̶a unu panuud̶eeba kuitaa panuu ichi ewaricha ne joma poyaa waubarii maud̶e ichi Dachi Akõre. Mau joma waud̶a unu panuud̶eeba ẽbẽrarã chi Dachi Akõre ʉ̃rʉbena unud̶akau mau biꞌia unubadau. Maud̶eeba kachirua waubadaurãba adua panuu poyaa jarad̶aabai panuu. ²¹Maarãba Dachi Akõre kuitaa panasid̶amina ichimaa biꞌia berread̶aabai maud̶e ichíturu kid̶ibai ad̶aabasii. Maumaarã kʉ̃risiaswãe nuree kĩra paneesid̶au. Maka paneed̶aped̶a pãriud̶e paneesid̶au. ²²Kʉ̃risia kuitaa nuree asid̶amina kʉ̃risiaswãe paneesid̶au. ²³Chi Dachi Akõre biukaraa nii maud̶e biꞌia nii ida b̶usid̶au. Maabae chi ẽbẽra biud̶a kĩra juaba ne kaped̶aad̶amaa ʉtaa id̶i kopaneesid̶au. Ibanarã, ãnimara jʉ̃rʉ kimare nuree maud̶e ãnimara iorod̶e ursu nuree kĩra juaba kaped̶aad̶amaa ʉtaa id̶i kopaneesid̶au.

²⁴Maud̶eeba Dachi Akõreba ida b̶usii ãchi sõd̶e kachirua wau kʉ̃ria b̶uu waud̶amera. Maud̶eeba maarãba mia pera wau paneesid̶au. ²⁵Dachi Akõre biawãra ida b̶ud̶aped̶a chi seta wau paneesid̶au. Dachi Akõreba joma waud̶amina ichi audeara ichiba waud̶ad̶e ijãa paneesid̶au maud̶e maumaa biꞌia berrea paneesid̶au. Maamina dachiba Dachi Akõremáburu ewaricha biꞌia berread̶ai panuu. Biꞌia b̶uu maka b̶uai.1:25 Biꞌia b̶uu maka b̶uai. Griego bed̶ead̶e naka b̶ʉ kub̶uu: amén.

²⁶Maud̶eeba Dachi Akõreba ida b̶usii mia pera waud̶amera. Wẽra mukĩra ome b̶uai b̶uu ida b̶ud̶aped̶a arab̶au wẽra ome paneesid̶au. ²⁷Ara mau kĩra mukĩra wẽra ome b̶uai b̶uu ida b̶ud̶aped̶a arab̶au mukĩra ome chiya kʉ̃riad̶aped̶a mia pera wau paneesid̶au. Mau kachirua wau panuu kakua Dachi Akõreba ãchi nebʉra kastikai, ichiba kastikai b̶uu kĩra.

²⁸Maarãba Dachi Akõre ida b̶uped̶aad̶ad̶eeba ichiba maarã ida b̶usii kachirua kʉ̃risiad̶aped̶a maka wau panad̶amera. ²⁹Ne joma kachirua waubadau. Mia pera b̶uu waubadau, ne joma uru panad̶ai kʉ̃riabadau, waabenamaa kachirua waubadau, waabenarãba uru panuu kakua kachirua kʉ̃risiabadau, mia beabadau, berreayaa panabadau, waabenarã setaa kũruabadau maud̶e waabenarã ʉ̃rʉbena kachirua kʉ̃risiabadau. ³⁰Waabenarã ʉ̃rʉbena kachirua berreabadau, Dachi Akõre kĩramaabadau maud̶e waabenarã daad̶e kachirua berreabadau. Waabenarã audeara chi bibuara nuree a kʉ̃risiabadau maud̶e maka jarabadau. Waabenarã kachirua waud̶ai baita jʉrʉbadau. Ãchi akõrerã bed̶ea ũrid̶akau. ³¹Kʉ̃risiaswãe nuree. Ãchiba bed̶ea deaped̶aad̶a waud̶akau. Kʉ̃risiaswãe nuree maud̶e waabenarã kĩra chuburiad̶akau.1:31 Waabenarã kĩra chuburiad̶akau. Griego bed̶ead̶e mau chaarea b̶uu biꞌia ũrid̶amera.³²Maarãba biꞌia kuitaa panuu Dachi Akõreba chi maka wau nuree ãrea kastikai.1:32 Dachi Akõreba chi maka wau nuree ãrea kastikai. Griego bed̶ead̶e naka b̶ʉ kub̶uu: Dachi Akõreba jara b̶uu chi maka wau b̶ee biud̶ai panuu. Maamina ara maka wau nibabadau maud̶e waabenarãba ara mau kĩra kachirua wauduud̶e mau biꞌia b̶uu a kʉ̃risiabadau.

Dachi Akõreba jomaurã kastikai ʉ̃rʉbena

¹Maka b̶uud̶e ab̶auba kʉ̃risiabai b̶uu Dachi Akõre daad̶e nebʉraswãe nii. Chi aude jipa wau b̶uu a b̶uuba maka kʉ̃risiabai b̶uu. Ab̶auba kachirua wau b̶uu a jaraaruud̶e ara ichi ʉ̃rʉbena jara b̶uu, ichia bid̶a ara mau kĩra waubariid̶eeba. ²Dachiba kuitaa panuu Dachi Akõreba chi kachirua waubadaurã kastikabarii, chi bed̶ea biawãraba. ³Maka bichiba waabenarãba kachirua wau panuu aaruubʉrã, maamina ara mau wau b̶uubʉrã, kʉ̃risiabai b̶uu Dachi Akõreba mau nebʉra kastikaabai. ⁴Bichiba ida b̶u b̶uu Dachi Akõre dachi ome ãrea sõbia b̶uu, joma dauchia jãadua b̶uu maud̶e kachirua waud̶a isa kastikakau. ¿Bichiba adua b̶uka Dachi Akõre bichi ome sõbia b̶uabariid̶eeba maud̶e chi ichiba kʉ̃ria b̶uud̶eeba bichi kachirua waubarii ida b̶ubarii ichimaa neemera?

⁵Maamina sõ chaarea niid̶eeba bichiba kachirua ida b̶ukau Dachi Akõremaa neebai baita. Maud̶eeba Dachi Akõreba kastikai ewarid̶e ichi kĩrubid̶eeba aude kastikai. Mau ewarid̶e Dachi Akõreba unubii saka jomaurã jipa kastikai. ⁶Ichiba jomaurãmaa deai ãchiba wauped̶aad̶a kĩra. ⁷Chi nureerãba biꞌia wau panuu Dachi Akõreba maarã biꞌia unumera, biꞌia jaramera maud̶e ewaricha ãchi ome chokae b̶uamera. Maarã biawãra chokae panabiai. ⁸Maamina chi nureerãba waabenarã audeara biꞌia panad̶ai baita jʉrʉbadau. Maud̶eeba chi biawãra bed̶ea ijãad̶ai kʉ̃riad̶akau kachiruad̶e panad̶ayua. Mau ẽbẽrarã Dachi Akõreba ichi kĩru kub̶uuba ãrea kastikai. ⁹Ichiba ichiaruud̶e joma kachirua wau nuree ãrea biꞌiwãe nuread̶ai maud̶e jirukaraa nuread̶ai. Naa judiorã maud̶e judiowãerã sid̶a maka nuread̶ai. ¹⁰Maamina joma biꞌia wau nuree Dachi Akõreba biꞌia unui, biꞌia jarai maud̶e jirukaraayuwãe b̶uabiai. Naa judiorã maud̶e judiowãerã sid̶a maka waui. ¹¹Dachi Akõreba ẽbẽrarã joma ara mau kĩra nebʉra ichiai.

¹²Chi Moisesba b̶ʉd̶a adua nureerãba kachirua waubadaud̶eeba mau adua panumina Dachi Akõreba kastikai. Maud̶e mau Moisesba b̶ʉd̶a kuitaa nureerãba kachirua waubadaud̶eeba Dachi Akõreba ara mau Moisesba b̶ʉd̶aba maarã kastikai. ¹³Moisesba b̶ʉd̶a ũri panuud̶eeba ẽbẽrarã Dachi Akõre daad̶e jipa nuread̶aabai, maumaarã mau joma wau panuud̶eeba Dachi Akõreba maarã nebʉraswãe nuree ai. ¹⁴Judiowãerãba mau Moisesba b̶ʉd̶a adua panumina ãchi kʉ̃risiad̶eeba mau Moisesba b̶ʉd̶ad̶e jara b̶uu kĩra b̶esed̶e waubadau. Maka wauduud̶e, unubiabadau ãchiba kuitaa panuu kãare biꞌia b̶uu maud̶e kãare kachirua b̶uu. ¹⁵Ara ãchiba wau panuud̶eeba unubia panuu mau Moisesba b̶ʉd̶ad̶e jara b̶uu sõd̶eeba kuitaa panuu. Ãchi kʉ̃risiad̶e kuitaa panuu biꞌia wauduud̶e jirukaraayuwãe panabadau. Maumaarã kachirua wauduud̶e, kĩra nomaa panabadau. ¹⁶Jomaurãba chi ãchi sõd̶e mera uru panuu Dachi Akõreba nebʉra ichiai ewarid̶e Jesucristod̶eeba mau ichiai. Mʉʉba chi bed̶ea bia jaradea b̶uu kĩra ara maka b̶uai.

Judiorãba Moisesba b̶ʉd̶ad̶e jara b̶uu kĩra waud̶akau

¹⁷Machíturu judiorã abadau. Dachi Akõre biꞌia kuitaa panuu abadau. Kʉ̃risia panuu ichiba machi aid̶akuai Moisesba b̶ʉd̶a uru panuud̶eeba. ¹⁸Mau uru panuud̶eeba kuitaa panuu Dachi Akõreba kãare kʉ̃ria b̶uu maud̶e kãare jipa b̶uu. ¹⁹Machiba kʉ̃risia panuu Dachi Akõred̶e ijãad̶akaurãmaa poyaa biꞌia jaradea panad̶ai dau pãriu nuree jipa adoeduu kĩra, pãriud̶e nuree ʉ̃d̶aad̶aa adoeduu kĩra. ²⁰Moisesba b̶ʉd̶a uru panuud̶eeba kʉ̃risia panuu joma kʉ̃risia kuitaa uru panuu maud̶e biawãra bed̶ea sid̶a kuitaa panuu. Maud̶eeba kʉ̃risia panuu chi kʉ̃risiaswãe nureerãmaa maud̶e chi wabid̶a ãrea adua nureerãmaa bid̶a poyaa jaradea panad̶ai. ²¹Machiba waabenarãmaa maka jaradea panuubʉrã, ¿sakãe ara machi du ab̶a jaradead̶awẽma? Machiba jaradeabadau nechiruabai b̶uu. Maamina machi nechiruabadau. ²²Machiba jaradeabadau junebena miakãid̶a ome kãi b̶eebai b̶uu. Maamina machi junebena miakãid̶a ome kãi b̶eebadau. Machiba kʉ̃riad̶akau Dachi Akõre kuenda juaba ne kaped̶aad̶amaa ʉtaa id̶id̶ai. Maamina mau juaba kaped̶aad̶a de mechiud̶e mau nechiruabadau. ²³Moisesba b̶ʉd̶a machiba ãrea kuitaa panuu abadau. Maamina mau Moisesba b̶ʉd̶ad̶e jara b̶uu ijãad̶awẽa panuud̶eeba, machi kakua waabenarãba Dachi Akõre ʉ̃rʉbena kachirua berreabadau. ²⁴Maud̶eeba Dachi Akõre bed̶ead̶e naka b̶ʉ kub̶uu: «Judiowãerãba Dachi Akõre ʉ̃rʉbena kachirua jarabadau machi judiorãba kachirua waubadau kakua».2:24 Isaías 52:5; Ezequiel 36:20-23.

²⁵Moisesba b̶ʉd̶a machiba wauduubʉrã, machi mukĩra chi kakua tõod̶a biꞌia b̶uu, ẽbẽrarã Dachi Akõred̶erã. Maamina mau Moisesba b̶ʉd̶a waud̶awẽebʉrã, machi Dachi Akõre daad̶e mukĩra chi kakua tõod̶awẽa nuree kĩra nuree.2:25 Mukĩra chi kakua tõod̶awẽa nuree kĩra nuree. Mau jara b̶uu «Dachi Akõre ẽbẽrarãwẽma».²⁶Maud̶e judiowãeba mau Moisesba b̶ʉd̶a wau b̶uubʉrã, mukĩra chi kakua tõowẽa b̶umina Dachi Akõre daad̶e mukĩra chi kakua tõo nii kĩra nii. ²⁷Machi judiorã mukĩra chi kakua tõobadau unubiad̶ai baita ẽbẽrarã Dachi Akõred̶erã. Maud̶e Moisesba b̶ʉd̶a kuitaa panuu. Maamina mau Moisesba b̶ʉd̶a waud̶awẽa panuu. Maud̶eeba chi mukĩra chi kakua tõowẽa b̶uuba mau Moisesba b̶ʉd̶a wauruubʉrã, kuitaabiai machi judiorãmina nebʉra bara nuree. ²⁸Ab̶a bid̶a judiowãema, chi judiorãba waubadau wau b̶uud̶eeba. Maud̶e mukĩra chi kakua tõod̶a ara nau kakuad̶ebenawãema. ²⁹Maumaarã Dachi Akõremaarã, chi sõ jipa nii, mau biawãra judiobʉ. Chi Moisesba b̶ʉd̶ad̶e b̶u kub̶uu kĩra mukĩra chi kakua tõod̶a abarii biawãra judiowãema, maumaarã chi Dachi Akõre Jauriba maka sõd̶e jipa nibabibariibʉ.2:29 Jeremías 4:4; Ezequiel 36:26-27. Ẽbẽrarãba chi sõ jipa nii ʉ̃rʉbena biꞌia jarad̶akamina Dachi Akõreba mau ʉ̃rʉbena biꞌia jarabarii.

¹Mʉʉba maka jara b̶uud̶eeba ab̶auba naka kʉ̃risiai: «¿Sakãe judio ẽbẽra mukĩra chi kakua tõoima? ¿Bibuara b̶uuwãeka judiowãe bai mau judio bai bad̶amaarã?» ²Makawãema. Ãread̶e judiorã bai ãrea biꞌia b̶uu. Naa mʉʉba jaraaruu maka panuu Dachi Akõreba ichi bed̶ea maarãmaa deasiid̶eeba. ³Maamina ãchid̶ebena chi nureerãba chi waud̶ai panuu kĩra waud̶aabasii. ¿Maud̶eeba chi Dachi Akõreba waui jarad̶a wauwẽka? ⁴Makawãema. Dachi Akõreba waui jarad̶a biawãra joma waui. Ẽbẽrarã setaa jarabadamina Dachi Akõreba waubarii ichiba jara b̶uu kĩra. Ichi Bed̶ead̶e naka b̶ʉ kub̶uu:

«Jomaurãba kuitaad̶ai bichiba jara b̶uu jipa b̶uu;

ab̶auba bichi ʉ̃rʉbena kachirua jaraaruud̶e bichiba kuitaabiai bichi jipa nii».3:4 Salmos 51:4.

⁵Mʉ berrearuu ẽbẽrarã berreabadau kĩra. Chi nureerãba jarabadau kachirua wau panuud̶eeba Dachi Akõre jipa nii arakʉd̶e unubiabadau abadau. Maud̶e Dachi Akõreba kastikaaruubʉrã, ichi jipa niiwãe abadau. ¿Chi maka jara panuurãmaa kãare jarad̶aima? ¿Jãarãba jarad̶aika Dachi Akõre jipa niiwãe dai3:5 Dai. Nama Pabloba judiorã ʉ̃rʉbena jara b̶uu. kastikaid̶eeba? ⁶¡Biawãra makawãema! Dachi Akõre maka jipa niiwãe basirã, ¿saka nau iujãad̶ebenarã nebʉra jipa ichiai basma? ⁷Chi nureerãba jarabadau setaa jara panuud̶eeba chi Dachi Akõre setaa jarakau arakʉd̶e unubiabadau. Kʉ̃risiabadau ãchiba setaa jara panuu kakua ẽbẽrarãba Dachi Akõremaa aude biꞌia berread̶ai. Maud̶eeba ãchimaarã, Dachi Akõreba nebʉra ichiabai b̶uu. ⁸Makarã ¿dachiba kachirua waud̶ai panuka ẽbẽrarãba Dachi Akõremaa biꞌia berread̶amera? Chi nureerãba ãchi kʉ̃risia kachiruad̶eeba jarabadau daiba maka jaradea panuu. Chi maka jara nuree Dachi Akõreba biawãra nebʉra barau ai.

Ẽbẽra jipa nii wãꞌãe

⁹Maud̶eeba ¿kãare jarad̶aima? ¿Jarad̶aika dai chi judiorã waabenarã audeara biꞌia nuree? ¡Makawãema! Mʉʉba nau kartad̶e kuitaabiasii judiorãba maud̶e judiowãerã bid̶a kachirua waubadau. ¹⁰Maud̶eeba Dachi Akõre bed̶ead̶e naka b̶ʉ kub̶uu:

«Ẽbẽra jipa nii ab̶a bid̶a wãꞌãe.

¹¹Ẽbẽra ab̶a bid̶a wãꞌãe kuitaai kãare jipa b̶uu. Ẽbẽra ab̶a bid̶a Dachi Akõre jʉrʉkau.

¹²Joma o ãyare wãsid̶au. Joma Dachi Akõre daad̶e kachirua paneesid̶au.

Ẽbẽra ab̶a bid̶a biꞌia waukau. Biꞌia waubarii ab̶a bid̶a wãꞌãe.3:12 Salmos 14:1-3.

¹³Ãchiba kachirua berreabadau ẽbẽra biud̶a jau b̶ubadau ewa nub̶uu kĩra b̶uu. Ãchi iiba setaa jarabadau.3:13 Salmos 5:9.

Ãchiba jara panuud̶eeba waabenarã kachirua waubadau damaba kaaruu kĩra.3:13 Salmos 140:3.

¹⁴Kĩramaa panuud̶eeba ãchi iiba kachirua jarabadau.3:14 Salmos 10:7.

¹⁵Barikia kakua mia beabadau.3:15 Barikia kakua mia beabadau. Griego bed̶ead̶e naka b̶u kub̶uu: ãchi jʉ̃rʉ isa wãbadau oa chebid̶ai baita.

¹⁶Ãchi wãaduumaacha waabenarã biꞌiwãe panabiad̶aped̶a nebʉrad̶e b̶aebiabadau.

¹⁷Waabenarã ome jirukaraayuwãe duanad̶ai adua panuu.3:17 Isaías 59:7-8.

¹⁸Maarãba Dachi Akõre b̶aꞌãra bid̶a wapead̶akau».3:18 Salmos 36:1.

¹⁹Mau bed̶ea Dachi Akõre bed̶ead̶e b̶uu chi mau b̶ʉd̶a ũri nureerãmaa jara b̶uu. Maka ab̶au bid̶a poyaa kachiruaswãe b̶uu a jarad̶aabai. Mau Moisesba b̶ʉsiid̶eeba kuitaa panuu joma nau iujãad̶ebenarã Dachi Akõre daad̶e nebʉra bara panuu. ²⁰Biawãra Moisesba b̶ʉd̶a wau b̶uud̶eeba ẽbẽra ab̶a bid̶a Dachi Akõreba chi ichid̶irã jipa nuree baara duanuubai. Mau Moisesba b̶ʉd̶ad̶eeba kuitaabia b̶uu dachiba kachirua waubadau.

Dachi Akõreba Jesucristod̶eeba ẽbẽrarã chi ichid̶irã jipa nuree baara duanubarii

²¹Maamina id̶ibae Dachi Akõreba kuitaabiasii mau Moisesba b̶ʉd̶a awara saka ẽbẽrarã chi ichid̶irã jipa nuree baara duanubarii3:21 Ẽbẽrarã chi ichid̶irã jipa nuree baara duanubarii. Kajuma bed̶ead̶e b̶ʉ kub̶uu: justificar. Nau sid̶a jara b̶uu «Dachi Akõreba dachi nebʉraswãe nuree abarii». ara ichiba jara b̶uad̶a kĩra. Moisesba b̶ʉd̶ad̶e maud̶e Dachi Akõre baita berreabadaurãba b̶ʉped̶aad̶a kartad̶e bid̶a mau ʉ̃rʉbena b̶ʉ kub̶uu. ²²Maka Dachi Akõreba waubarii ara ichiba jara b̶uu kĩra, Jesucristo dachi kakua biusiid̶e, ichi ũribaba nibad̶a unubiasiid̶eeba. Maka ichiba joma chi Jesusd̶e ijãaduurã chi ichid̶irã jipa nuree baara duanubarii. Ab̶a bid̶a kĩra awara unukau. ²³Biawãra jomaurãba kachirua waubadaud̶eeba, Dachi Akõre biꞌia niid̶ebena awara nuree. ²⁴Maamina Dachi Akõreba ichi sõbiad̶eeba ẽbẽra ab̶a chi ichid̶irã jipa nuree baara duanubarii, ne kaebea bari dearuu kĩra. Maka unubarii Jesucristoba kachiruad̶ebena karibasiid̶eeba. ²⁵Dachi Akõreba Jesucristo b̶usii ichi oa chemera, dachi kachirua kakua. Mau ijãaduud̶e Dachi Akõreba dachi kachirua perdonabarii. Maka unubia b̶uu Dachi Akõre jipa nii, dachi karibai baita. Cristo neei naed̶e kachirua wauped̶aad̶a Dachi Akõreba joma dauchia jãadua b̶uud̶eeba kastikawẽa b̶uasii. ²⁶Id̶ibae ichiba Jesucristod̶eeba dachi kariba b̶uu, ichi jipa niid̶eeba. Ichiba jaraaruu maka waubariid̶eeba, chi Jesusd̶e ijãaduu joma chi ichid̶irã jipa nuree baara duanubarii.

²⁷Maud̶eeba ¿kãare ara dachi ʉ̃rʉbena biꞌia berread̶aima? Poyaa biꞌia berread̶aabai. ¿Sakãe? Poyaa biꞌia berread̶aabai, Moisesba b̶ʉd̶a wau panuud̶eeba chi ichid̶irã jipa nuree baara duanuubaid̶eeba, maumaarã Jesusd̶e ijãa panuud̶eeba maka duanui. ²⁸Dachiba jaradea panuu Jesusd̶e ijãa panuud̶éburu, Dachi Akõreba dachi chi ichid̶irã jipa nuree baara duanui. Maka jarakau Moisesba b̶ʉd̶ad̶e ijãa panuud̶eeba.

²⁹Maebʉrã ¿Dachi Akõre judiorãd̶éturu b̶uka? ¿Ichi judiowãerãd̶ewãeka? Biawãra judiowãerãd̶ebʉ, ³⁰Dachi Akõre ab̶aburu niid̶eeba. Ichiba joma Jesusd̶e ijãaduu chi ichid̶irã jipa nuree baara duanubarii. Mukĩra chi kakua tõo nureerãba maud̶e mukĩra chi kakua tõowẽa nuree bid̶a Jesusd̶e ijãaduubʉrã chi ichid̶irã jipa nuree baara duanubarii. ³¹Jesusd̶e ijãa panuud̶eeba ¿Moisesba b̶ʉd̶a ida b̶u panuka? Makawãema, maumaarã mau Moisesba b̶ʉd̶a biꞌia b̶uu unubadau.

Abrahamba Dachi Akõred̶e ijãad̶a

¹¿Kãare jarad̶aima dai judiorã nabẽraed̶ebena Abraham ʉ̃rʉbena?4:1 Dai judiorã nabẽraed̶ebena Abraham ʉ̃rʉbena. Griego bed̶ead̶e naka b̶ʉ kub̶uu: Abraham, dai nabẽraed̶ebena kiurud̶ebena ʉ̃rʉbena.²Abrahamba ne wau b̶uud̶eeba Dachi Akõreba chi ichid̶irã jipa nuree baara b̶ud̶a basirã, ara ichi ʉ̃rʉbena poyaa biꞌia berreai basii. Maamina Dachi Akõre daad̶e poyaa biꞌia berreabai basii. ³Dachi Akõre bed̶ead̶e naka jara b̶uu: «Abrahamba Dachi Akõred̶e ijãasii. Maud̶eeba Dachi Akõreba ichi nebʉraswãe nii asii».4:3 Génesis 15:6.⁴Ab̶auba traju wauruubʉrã, chi nejarra bari deakau, maumaarã ichi traju bare chi chibariba deai. ⁵Maamina Dachi Akõreba chi ichid̶irã jipa nuree baara b̶umera chi ne wauwẽa b̶uuba ichid̶e ijãaruubʉrã, mau ẽbẽra chi ichid̶irã jipa nuree baara b̶ui. Chi kachirua wau nureerãba ichid̶e ijãaduubʉrã ichiba chi ichid̶irã jipa nuree baara duanubarii. ⁶Ara mau kĩra Davidba jarasii: Dachi Akõreba chi ne wauwẽa b̶uu chi ichid̶irã jipa nuree baara b̶uuruubʉrã, ãrea biꞌia b̶uai. ⁷Naka jarasii:

«Chi ẽbẽrarãba Moisesba b̶ʉd̶a waud̶awẽa panad̶a maud̶e kachirua wauped̶aad̶a Dachi Akõreba perdonaaruubʉrã ãrea biꞌia panad̶ai.

⁸Ẽbẽraba kachirua waud̶a kakua Dachi Mechiuba nebʉraswãe nii aaruubʉrã, mau ẽbẽra biꞌia b̶uai».4:8 Salmos 32:1-2.

⁹Maka ¿ab̶aburu mukĩra chi kakua tõoped̶aad̶a nuree ãrea biꞌia panad̶aika? ¿Mukĩra kakua tõoped̶aad̶awẽa nuree sid̶a ãrea biꞌia panad̶aiwãeka? Daiba jarasid̶au Abrahamba Dachi Akõred̶e ijãasiid̶eeba Dachi Akõreba ichi nebʉraswãe nii asii. ¹⁰Maamina ¿Dachi Akõreba sãa ichi nebʉraswãe nii asma? ¿Nebʉraswãe nii a jaraska mukĩra chi kakua tõosiid̶e maebʉrã mukĩra chi kakua tõoi naed̶e? Biawãra ichi mukĩra chi kakua tõoi naed̶e Dachi Akõreba ichi nebʉraswãe nii asii. ¹¹Abrahamba Dachi Akõred̶e ijãasiid̶eeba, mukĩra chi kakua tõowẽa b̶uasmina Dachi Akõreba ichi nebʉraswãe nii asii.4:11 Dachi Akõreba ichi nebʉraswãe nii asii. Génesis 15:6. Mau kuitaabiai baita Abrahamba mawãare mukĩra chi kakua tõosii.4:11 Génesis 17. Mukĩra chi kakua tõowẽa nureerãba Dachi Akõred̶e ijãaduubʉrã, Abraham ãchi akõrebʉ, Dachi Akõreba nebʉraswãe nuree a jara b̶uud̶eeba, ichi kĩra ijãasid̶aud̶eeba. ¹²Maud̶e Abrahamba mukĩra chi kakua tõoi naed̶e ijãa b̶uad̶a kĩra mukĩra chi kakua tõo nureerãba ijãaduubʉrã Abraham ãchi akõrebʉ.

¹³Dachi Akõreba Abrahammaa maud̶e ichid̶ebena imid̶ai bad̶a ẽbẽrarãmaa nau iujãa deai asii. Maamina maka jaraabasii Abrahamba Moisesba b̶ʉd̶a uru b̶uasiid̶eeba. Maumaarã maka jarasii Abraham nebʉraswãe nii asiid̶eeba. Maka nebʉraswãe nuree asii Abrahamba ichid̶e ijãasiid̶eeba. ¹⁴Moisesba b̶ʉd̶a uru panuurãba Dachi Akõreba deai jarad̶a adau panasirã, Cristod̶e bari ijãa panad̶ai basii maud̶e Dachi Akõreba deai jarad̶a adaud̶aabai basii. ¹⁵Mau Moisesba b̶ʉd̶a jara b̶uu kĩra wauwẽa panuud̶eeba, Dachi Akõreba dachi kastikai. Biawãra Moisesba b̶ʉd̶a wãꞌãe bad̶a basirã, nebʉra baraa panad̶aabai basii.

¹⁶Dachi Akõreba deai jarad̶a dachiba adaud̶ai ichid̶e ijãa panuud̶eeba. Dachi Akõreba ichi sõbiad̶eeba mau bari dea b̶uu. Maud̶eeba joma Abraham ẽbẽrarã, chi Moisesba b̶ʉd̶ad̶eeba panuurãba mau biawãra adaud̶ai. Maamina ãchiaburu adaud̶aabai, maumaarã judiowãerã bid̶a Abraham kĩra Dachi Akõred̶e ijãaduubʉrã adaud̶ai. Maka Abraham joma dachi, chi Dachi Akõred̶e ijãabadaurã akõrebʉ. ¹⁷Dachi Akõre bed̶ead̶e naka b̶ʉ kub̶uu: «Mʉʉba bichi b̶usii puuru ãrea akõre bamera».4:17 Génesis 17:5. Biawãra Dachi Akõre daad̶e Abraham joma dachi, chi Dachi Akõred̶e ijãabadaurã akõrebʉ. Abrahamba ijãa b̶uasii chi biuped̶aad̶a chokae jiradubiabarii maud̶e Dachi Akõred̶e chi ne wãꞌãed̶ebena ne waubarii.

¹⁸Dachi Akõreba naka jarasii: «Bichid̶ebena imiiduurã ãrea bad̶ai».4:18 Génesis 15:5. Abrahamba poyaa warr deakau kuitaa b̶umina ijãasii Dachi Akõreba warr deabii ichiba jarad̶a kĩra. Maka ijãa b̶uud̶eeba puuru ãrea akõre b̶eesii Dachi Akõreba jarad̶a kĩra. ¹⁹Warr deai baita ãrea chõra b̶uasmina Abrahamba mau wabid̶a ãrea ijãa b̶uasii. Ichi 100 año baidia b̶uasii. Ichi wẽra Sara sid̶a warr adaukau kuitaa b̶uasmina ichiba wabid̶a ãrea ijãa b̶uasii. ²⁰Ne ab̶a bid̶a kʉ̃risiabasii Dachi Akõreba deai jarad̶a deabai. Maumaarã sõd̶eeba biawãra ãrea ijãa b̶uasii maud̶e Dachi Akõremaa biꞌia berreabachii. ²¹Kuitaa b̶uasii Dachi Akõreba waui jarad̶a biawãra joma poyaa waui. ²²Maka ijãasiid̶eeba Dachi Akõreba mau nebʉraswãe nii asii.4:22 Génesis 15:6.²³Chi Dachi Akõre bed̶ead̶e maka b̶ʉ kub̶uu ichi ʉ̃rʉbenáturu b̶ʉʉbasii. ²⁴Maumaarã dachi ʉ̃rʉbena sid̶a berrea b̶uu, dachiba ijãa panuud̶eeba Dachi Akõreba nebʉraswãe nuree a jara b̶uud̶eeba. Dachi Akõreba Dachi Mechiu Jesús biu b̶uad̶a chokae jiradubisii. Dachiba ara maud̶e ijãa panuu. ²⁵Ichiba Jesús b̶usii dachi kachirua kakua biumera. Maabae biud̶ad̶ebena chokae jiradubisii dachi chi ichid̶irã jipa nuree baara duanui baita.

Jesusd̶eeba Dachi Akõre ome sõbia panuu

¹Dachi Mechiu Jesucristod̶e ijãa panuud̶eeba Dachi Akõreba dachi chi ichid̶irã jipa nuree baara duanubarii. Maud̶eeba Cristod̶eeba Dachi Akõre ome sõbia panuu. ²Mau awara Jesucristod̶e ijãa panuud̶eeba Dachi Akõreba ichi sõbiad̶eeba dachi ewaricha aid̶abarii. Maud̶e kĩrajʉʉ panuu kuitaa panuud̶eeba Dachi Akõre biad̶ebena adaud̶ai. ³Mau awara dachi ãrea biꞌiwãe panuud̶e kĩrajʉʉ panabadau, kuitaa panuud̶eeba mauba dauchia jãaduad̶ai kuitaad̶ai. ⁴Mau dauchia jãadua panuud̶eeba kuitaa panuu Dachi Akõreba dachi biꞌia unu b̶uu. Maud̶eeba kuitaa panuu Dachi Akõre biad̶ebena adaud̶ai. ⁵Mau setawãema, maumaarã biawãra adaud̶ai. Maka kuitaa panuu Dachi Akõreba ichi Jauri dachimaa deasiid̶eeba. Ichi Jaurid̶eeba dachi sõd̶e kuitaabia b̶uu dachi biawãra ãrea kʉ̃ria b̶uu.

⁶Dachiba ara dachi kachiruad̶ebena poyaa karibad̶awẽa panasid̶aud̶e ewari araa baaruud̶e Cristo dachi chi kachiruarã kakua biusii. ⁷Ẽbẽra b̶aꞌãra bid̶a wãꞌãe ab̶a jipa nii kakua ara ichi beabii. Maamina ẽbẽra biꞌia nii kakua ¿ab̶auba ara ichi beabii b̶ubaaka? ⁸Maamina Dachi Akõreba dachi ãrea kʉ̃ria b̶uu unubiasii wabid̶a kachiruad̶e panuud̶e Cristo dachi kakua biusiid̶eeba. ⁹Cristo oa chesiid̶eeba Dachi Akõreba dachi chi ichid̶irã jipa nuree baara duanusii. Maud̶eeba Cristod̶eeba Dachi Akõreba dachi kastikai bad̶a biawãra karibai. ¹⁰Dachi wabid̶a Dachi Akõre ome chi kĩramaa nureasiid̶e ichi Warr biusiid̶eeba dachi ichi ome biꞌia b̶usii. Cristo chokae b̶uud̶eeba, maka dachi biawãra karibai. ¹¹Mau awara Dachi Mechiu Jesucristod̶eeba Dachi Akõre ome biꞌia nureed̶eeba ichid̶eeba Dachi Akõre ome sõbia panuu.

Adán maud̶e Cristo

¹²Ẽbẽra ab̶ad̶eeba kachirua nau iujãad̶e neesii. Maud̶e mau kachiruad̶eeba dachi biud̶ai neesii. Jomaurãba kachirua waubadaud̶eeba biubadau. ¹³Dachi Akõreba ichi bed̶ea Moisesmaa b̶ʉbii naed̶e, ẽbẽrarãba nau iujãad̶e kachirua waubachid̶au. Maamina mau Moisesba b̶ʉd̶a wãꞌãe basiid̶eeba, mauba jarawẽa b̶uu ẽbẽrarãba kachirua wau panuu kakua, nebʉra bara nuree aabasii. ¹⁴Maka b̶umina Adán ewarid̶eed̶ebena ab̶a Moisés ewarid̶aa ẽbẽrarã biubachid̶au kachirua waubachid̶aud̶eeba. Adanba Dachi Akõreba ichimaa jarad̶a ijãabasii, maamina ãchiba Adán kĩra maka kachirua waud̶aabasii.

Adán kakua, joma kachirua paneed̶a kĩra, chi neei b̶uu a panad̶a kakua joma poyaa biꞌia paneesid̶au.5:14 Griego bed̶ead̶e naka b̶ʉ kub̶uu: Adán chi neei b̶uad̶a kĩra b̶uasii.¹⁵Biawãra ẽbẽra ara ab̶aba kachirua waud̶a kakua joma biusid̶au. Maamina ẽbẽra june ab̶ad̶eeba Dachi Akõreba ichi sõbiad̶eeba chokae b̶uai bari deasii joma chokae nuread̶amera.5:15 Joma. Griego bed̶ead̶e naka b̶ʉ kub̶uu: ãrea. Jesucristoba ichi sõbiad̶eeba dachi baita waud̶a, chi Adanba kachirua waud̶a audeara bibuara b̶uu. Maud̶eeba chi Dachi Akõreba bari dea b̶uu, Adanba kachirua waud̶a kakua need̶a kĩra b̶uwãema. ¹⁶Mau awara Adanba kachirua waud̶a kakua, Dachi Akõreba ẽbẽrarã ichiaped̶a joma nebʉra bara nuree asii. Maamina ẽbẽrarãba kachirua ãrea waubachid̶amina Dachi Akõreba ichi sõbiad̶eeba maarã chi ichid̶irã jipa nuree baara duanubarii. ¹⁷Biawãra ẽbẽra ab̶aba kachirua waud̶a kakua joma biubadau. Maamina june ẽbẽrad̶eeba, mau kãyabãra ewaricha ichi ome chi reyrã kĩra panad̶ai. Mau Jesucristod̶eeba Dachi Akõreba ne ab̶a bid̶a deábad̶e awẽa, ichi sõbiad̶eeba ãrea karibaped̶a, ẽbẽrarã nebʉraswãe nuree a jarabarii.

¹⁸Maka ẽbẽra ab̶aba kachirua waud̶a kakua Dachi Akõreba ichiaped̶a joma nebʉra bara panuu asii. Maud̶e ẽbẽra ab̶aba jipa waud̶a kakua Dachi Akõreba joma poyaa chi ichid̶irã jipa nuree baara b̶ui ewaricha ichi ome chokae panad̶amera. ¹⁹Biawãra ẽbẽra ab̶aba Dachi Akõreba jarad̶a waubasiid̶eeba ẽbẽrarã ãrea kachirua waubadaurã paneesid̶au. Maud̶e ẽbẽra ab̶aba ichiba jarad̶a joma wausiid̶eeba ẽbẽrarã ãrea Dachi Akõreba jipa nuree a jarai.

²⁰Dachi Akõreba Moisesmaa b̶ʉbisii, ẽbẽrarãba kuitaad̶amera ãchiba kachirua ãrea waubadau. Maamina ẽbẽrarãba kachirua ãrea wausid̶aud̶e Dachi Akõreba ichi sõbiad̶eeba ãrea kĩra chuburiasii. ²¹Biawãra ẽbẽrarãba kachirua waubadaud̶eeba biubadau. Maamina Dachi Akõreba ichi sõbiad̶eeba ẽbẽrarã chi ichid̶irã jipa nuree baara duanubarii Dachi Mechiu Jesucristod̶eeba ewaricha ichi ome chokae panad̶amera.

Kachiruad̶ebena ãyaa wãped̶aad̶a

¹¿Mau ʉ̃rʉbena saka kʉ̃risia panuma? ¿Dachi wabid̶a kachiruad̶e nibad̶ai panuka Dachi Akõreba ichi sõbiad̶eeba aude kĩra chuburiamera? ²¡Biawãra maka waud̶aabai panuu! Dachi kachiruad̶eeba biusid̶au.6:2 Dachi kachiruad̶eeba biusid̶au. Dachiba biud̶amaa poyaa ne waubiibai b̶uu kĩra, kachiruaba dachimaa kachirua waubiabai. Maud̶eeba ¿saka kachiruad̶e nibad̶aima? ^3-4Machiba kuitaa panuu boro easid̶aud̶e unubiasid̶au Cristo baara ãbua panuu. Maka unubiasid̶au ichi ome biuped̶aad̶a maud̶e jau b̶uped̶aad̶a. Maabae Dachi Bajãad̶ebena Akõreba ichi ãrea poyaa niid̶eeba Cristo chokae jiradubid̶a kĩra dachi sid̶a chokae jiradubiasii chokae b̶uai chiwid̶id̶e nibad̶amera.

⁵Dachi Cristo baara biusid̶aud̶eeba ichi chokae jiradud̶a kĩra, chokae b̶uai chiwid̶id̶e nibad̶ai. ⁶Dachiba kuitaa panuu dachi kʉ̃risia chõra biusii Cristo baara cruzd̶e jirab̶uped̶aad̶a kĩra. Maka dachi kʉ̃risia chõraba nau kakuaba kachirua wau kʉ̃ria b̶uu waa poyaa waubiibai. Dachi waa kachirua baita bari trajabadaurãwãema. ⁷Biawãra ab̶a Cristo ome biud̶abʉrã, kachiruad̶ebena ena b̶eesii.6:7 Kachiruad̶ebena ena b̶eesii. Griego bed̶ead̶e mau jara b̶uu «kachirua wau b̶uu ʉ̃rʉbena Dachi Akõreba nebʉraswãe nuree asii».

⁸Dachi Cristo ome biuped̶aad̶ad̶eeba ijãa panuu ichi ome chokae panad̶ai. ⁹Dachiba kuitaa panuu Cristo biu b̶uad̶a chokae jiradusiid̶eeba waya biubai. Biumiaba ichi ome waya poyaabai. ¹⁰Cristo b̶es ab̶a biud̶aba kachirua joma poyaasii. Ichi waya biubai maumaarã Dachi Akõre baita chokae b̶uu. ¹¹Ara mau kĩra kuitaad̶ai panuu machi kachiruad̶eeba biusid̶au maud̶e Dachi Mechiu Jesucristod̶eeba Dachi Akõre baita chokae panuu.6:11 Dachi Mechiu. Waabena kartad̶e mau wãꞌãe.

¹²Maud̶eeba chi kachiruamaa ida machi chibari babirã́sturu. Maka machi chi kakua biui b̶uuba kachirua wau kʉ̃ria b̶uu waud̶aabai. ¹³Machi kakuamaa ida kachirua waubirã́sturu. Maumaarã ara machi Dachi Akõremaa deásturu. Machi kachiruad̶e biu panad̶a Dachi Akõre baita chokae paneesid̶au. Maud̶eeba machi chi kakua Dachi Akõremaa deásturu jipa waud̶ai baita. ¹⁴Dachi Akõreba ichi sõbiad̶eeba machi karibasiid̶eeba maud̶e Moisesba b̶ʉd̶ad̶e duanuuwãed̶eeba, chi kachirua waa machi chibari b̶uabai.

Jipa waud̶ai ʉ̃rʉbena

¹⁵¿Mau ʉ̃rʉbena saka kʉ̃risia panuma? Dachi Akõreba ichi sõbiad̶eeba dachi karibasiid̶eeba maud̶e Moisesba b̶ʉd̶ad̶e dachi duanuuwãed̶eeba ¿kachirua waud̶ai panuka? ¡Makawãema! ¹⁶Machiba kuitaa panuu ara machi du ab̶a ab̶aumaa bari trajabadaurã nuread̶ai baita deaduubʉrã, chi chibariba jaraaruu joma waud̶ai panuu. Ara mau kĩra machiba chi kachirua machi chibari kĩra b̶uuduubʉrã, kachirua waud̶aped̶a biud̶ai. Maamina Dachi Akõre machi chibari b̶uuduubʉrã, ichi bed̶ea wauduud̶e jipa nibad̶ai. ¹⁷Naed̶e machi kachirua baita bari trajabadaurã basii. Maamina joma Dachi Akõre ʉ̃rʉbena jaradeaped̶aad̶a sõd̶eeba wau panuud̶eeba mʉʉba Dachi Akõremaa ichíturu kid̶ibai abarii. ¹⁸Machi kachiruad̶ebena ena paneed̶aped̶a Dachi Akõre baita bari trajabadaurã paneesid̶au jipa waud̶ai baita. ¹⁹Mʉʉba maka berrea b̶uu nau kʉ̃risia jaradeai baita. Maka jaradea b̶uu machiba ãi kʉ̃risiarãad̶amera. Biawãra naed̶e ara machi du ab̶a deasid̶au kachirua baita bari trajabadaurã nuread̶ai baita. Maka machiba mia pera wausid̶aud̶e joma kachirua ewaricha aude wau panabachid̶au. Maamina jãabae Dachi Akõre baita bari trajabadaurãd̶eeba, ara machi du ab̶a deásturu jipa waud̶ai baita. Maka Dachi Akõre baita biꞌia nuread̶ai.

²⁰Machi kachirua baita bari trajabadaurã basiid̶e jipa waud̶ai kʉ̃risiad̶aka basii. ²¹Maamina kachirua wau panuud̶eeba ¿kãare biꞌia adausid̶ama? ¿Maka wau panad̶a kakua, kĩra nejasia panuuwãeka? Kachirua wau panuu kakua ẽbẽrarã biud̶ai. ²²Jãabae machi kachiruad̶ebena ena wãsid̶aud̶eeba Dachi Akõre baita bari trajabadaurã paneesid̶au. Maka Dachi Akõre baita biꞌia paneesid̶au. Maud̶eeba ichi baara ewaricha chokae panad̶ai. ²³Biawãra kachirua wau panuu kakua ẽbẽrarã biud̶ai. Maamina Dachi Mechiu Jesucristod̶eeba Dachi Akõreba ewaricha chokae b̶uabiai, ne kaebea bari dea b̶uu kĩra.

Moisesba b̶ʉd̶a ʉ̃rʉbena Pabloba jaradead̶a

¹Ãbarã, Moisesba b̶ʉd̶a kuitaa panuud̶eeba mau ʉ̃rʉbena mʉʉba machimaa berrearuu. ¿Kuitaa panuuwãeka dachi chokae panuumisa Moisesba b̶ʉd̶a ũrid̶ai panuu? ^2-3Nau kĩra b̶uu. Mau Moisesba b̶ʉd̶ad̶e jara b̶uu wẽra mukĩra iu b̶uu ichi mukĩra chokae b̶uud̶e ichi ome b̶uai b̶uu. Ichi mukĩra wabid̶a chokae b̶uud̶e mau wẽraba junebena mukĩra adauruubʉrã, Moisesba b̶ʉd̶ad̶e jara b̶uu mau wẽra nebʉra bara b̶uu. Maamina ichi mukĩra biuruubʉrã Moisesba b̶ʉd̶ad̶ebena ena b̶eei. Maud̶e ichiba junebena mukĩra adauruubʉrã, nebʉraswãe b̶uai.

⁴Ãbarã, ara mau kĩra machi Cristo baara panuud̶eeba ichi biud̶akare, Moisesba b̶ʉd̶ad̶eeba biusid̶au. Jãabae machi Cristod̶erãd̶eeba, Dachi Akõre baita poyaa biꞌia waud̶ai. ⁵Dachi nau kakuaba wau kʉ̃ria b̶uud̶eeba nibasid̶aud̶e Moisesba b̶ʉd̶ad̶e jara b̶uu kakua kachirua aude wau kʉ̃riasid̶au. Maud̶e kachirua waud̶ai panuu kakua biud̶ai panasid̶au.7:5 Biud̶ai panasid̶au. Griego bed̶ead̶e naka b̶ʉ kub̶uu: Biud̶ai chau panasid̶au.⁶Maamina Moisesba b̶ʉd̶ad̶eeba panad̶a dachi ena paneesid̶au. Maud̶ebena biusiid̶eeba jãabae Dachi Akõre baita biꞌia waud̶ai ichi Jaurid̶eeba. Waya kʉ̃risiad̶aabai Moisesba b̶ʉd̶ad̶eeba maka waud̶ai.7:6 Griego bed̶ead̶e naka b̶ʉ kub̶uu: jauri wid̶i...karta chõra.

Kachirua wau kʉ̃ria b̶uu ʉ̃rʉbena b̶ʉd̶a

⁷¿Mau ʉ̃rʉbena saka kʉ̃risia panuma? ¿Moisesba b̶ʉd̶a kachirua b̶uka? ¡Makawãema! Mau Moisesba b̶ʉd̶a wãꞌãe basirã mʉʉba adua b̶uai basii kãare kachirua b̶uu. Moisesba b̶ʉd̶aba «ab̶auba uru b̶uu kʉ̃riarã́bad̶e» ad̶awãe basirã, mʉʉba ãibenaba uru b̶uu kʉ̃riai kachirua b̶uu adua b̶uai basii.7:7 Éxodo 20:17.⁸Maamina «kʉ̃riarã́bad̶e» asiid̶eeba kachirua wau kʉ̃ria b̶uud̶eeba mʉʉba ne joma aude kʉ̃riasii. Biawãra Moisesba b̶ʉd̶a wãꞌãe basirã aude kachirua wau kʉ̃riabai basii.7:8 Biawãra Moisesba b̶ʉd̶a wãꞌãe basirã aude kachirua wau kʉ̃riabai basii. Griego bed̶ead̶e naka b̶ʉ kub̶uu: Moisesba b̶ʉd̶awãe, chi kachirua biu b̶uu.⁹Naed̶e mau Moisesba b̶ʉd̶a adua b̶uasiid̶e mʉ jirukaraayuwãe b̶uabachii. Maamina kuitaasiid̶e mʉʉba kachirua wau kʉ̃riasii. Maabae kachirua kakua biui b̶uasii. ¹⁰Mau Moisesba b̶ʉd̶a wau b̶uud̶eeba mʉ Dachi Akõre ome chokae b̶uai b̶uasii. Maamina waukaud̶eeba Moisesba b̶ʉd̶aba kuitaabisii mʉ biui b̶uu. ¹¹Moisesba b̶ʉd̶ad̶e jara b̶uu kakua mʉʉba kachirua aude wau kʉ̃riasii. Maabae kachiruaba mʉ setaa kũruasii kʉ̃risiamera Moisesba b̶ʉd̶aba jipa b̶uai. Maamina ũrikaud̶eeba biui b̶uasii.

¹²Biawãra Moisesba b̶ʉd̶a Dachi Akõred̶ebʉ, maud̶e chi waubi b̶uu bed̶ea Ichid̶ibʉ, jipa b̶uu maud̶e ãrea biꞌia b̶uu. ¹³Makarã ¿Moisesba b̶ʉd̶a biꞌia b̶uuba mʉ biubiska? ¡Makawãema! Maumaarã kachirua wau b̶uu kakua mʉ maka biui b̶uasii. Mʉʉba kachirua wau b̶uu kakua mau Moisesba b̶ʉd̶a biꞌia b̶uuba jara b̶uu mʉ biui b̶uu. Maka arakʉd̶e unubi b̶uu chi kachirua saka b̶uu. Mʉʉba kachirua wau b̶uu biawãra ãrea kachirua b̶uu.

¹⁴Dachiba kuitaa panuu Moisesba b̶ʉd̶a Dachi Akõre Jaurid̶eeba neesii. Maamina mʉ nau kakuad̶e b̶uu. Mʉ nedobʉid̶a kĩra b̶uu kachirua baita bari trajabarii b̶uamera. ¹⁵Mʉʉba adua b̶uu sakãe jãka waubarii. Mʉʉba ne biꞌia wau kʉ̃ria b̶uu mau waukau, maumaarã mʉʉba kachirua wau kʉ̃riawẽa b̶uu mau waubarii. ¹⁶Maamina mʉʉba kachirua wau b̶uu wau kʉ̃riawẽa b̶uud̶eeba mauba unubi b̶uu Moisesba b̶ʉd̶a mʉʉba biꞌia unu b̶uu. ¹⁷Maud̶eeba ara mʉʉba kʉ̃ria b̶uud̶eeba kachirua wau b̶uwãema, maumaarã kachirua mʉ sõd̶e b̶uuba maka waubibarii. ¹⁸Mʉʉba kuitaa b̶uu mʉ sõd̶e ne bia wãꞌãema. Biꞌia jaraaruubʉrã, mʉ nau kakuad̶e b̶uud̶eeba ara mʉʉba kʉ̃ria b̶uud̶eeba biꞌia poyaa waukau. Mʉʉba biꞌia wau kʉ̃ria b̶umina poyaa waukau. ¹⁹Biawãra mʉʉba biꞌia wau kʉ̃ria b̶uu mau waukau, maumaarã kachirua wau kʉ̃riawẽa b̶uu mau waubarii. ²⁰Mʉʉba kachirua wau kʉ̃riawẽa b̶uu wau b̶umina, ara mʉʉba kʉ̃ria b̶uud̶eeba maka wau b̶uwãema. Maumaarã kachirua mʉ sõd̶e b̶uuba maka waubi b̶uu.

²¹Maud̶eeba nau kuitaa b̶uu: mʉʉba biꞌia wau kʉ̃ria b̶umina kachirua mʉ sõd̶e b̶uuba kachirua waubibarii. ²²Biawãra mʉʉba sõd̶eeba Dachi Akõreba Moisesmaa b̶ʉbid̶a ãrea biꞌia unu b̶uu. ²³Maamina june kʉ̃risia sid̶a mʉ sõd̶e b̶uu. Mauba mʉ jʉ̃a uru b̶uu kĩra mʉʉmaa kachirua waubibarii. Chi mʉʉba biꞌia wau kʉ̃ria b̶uu mau kʉ̃risiaba ida waubi kʉ̃riakau, ne bia waui kʉ̃risia ome chĩo b̶uu kĩra.

²⁴¡Mʉ miichuburi! ¿Kaiba mʉ enaima nau chi kakua biui b̶uuba kachirua wau kʉ̃ria b̶uud̶ebena? ²⁵Mau Dachi Akõréburu Dachi Mechiu Jesucristod̶eeba mʉ karibai. Maud̶eeba mʉʉba ichíturu kid̶ibai aaruu. Biawãra mʉ kʉ̃risiad̶e Moisesba b̶ʉd̶a wau kʉ̃ria b̶uu, maamina nau kakuad̶e b̶uud̶eeba kachirua mʉ sõd̶e b̶uuba kachirua waubibarii.

Dachi Akõre Jaurid̶e nibad̶ai ʉ̃rʉbena

¹Jãabae Dachi Akõreba ne ab̶a bid̶a nebʉra barau awẽma, dachi Cristo Jesús ome panuud̶eeba.8:1 Griego bed̶ead̶e chi b̶ee kartad̶e nau sid̶a b̶ʉ kub̶uu: ãchi nau kakuaba kachirua wau kʉ̃ria b̶uud̶eeba nibad̶aabasiid̶eeba, maumaarã Dachi Akõre Jaurid̶eeba nibasiid̶eeba.²Cristod̶eeba Dachi Akõre Jauriba dachimaa chi chokae b̶uai chiwid̶i deasiid̶eeba, dachi kachiruad̶ebena maud̶e biud̶ai bad̶ad̶ebena enakuasii. ³Moisesba b̶ʉd̶aba dachi kachiruad̶ebena poyaa enabiaibasii. Chi nau kakuaba wau kʉ̃ria b̶uud̶eeba nibabadaurãba mau Moisesba b̶ʉd̶a waud̶ai bad̶amaarã kachirua waubadau. Maamina Dachi Akõreba ichi Warr bʉisii dachi chi kachiruarã kĩra b̶uamera. Maud̶e dachiba kachirua wauped̶aad̶a kakua biusii. Maka chi dachi kakua kachirua wauped̶aad̶a Dachi Akõreba kastikasii. ⁴Ichiba maka wausii dachiba poyaa jipa waud̶amera Moisesba b̶ʉd̶ad̶e jara b̶uu kĩra. Jãabae dachi poyaa jipa nibad̶ai nau kakuaba wau kʉ̃ria b̶uud̶e nibad̶akaud̶eeba, maumaarã Dachi Akõre Jaurid̶eeba nibabadaud̶eeba.

⁵Chi nau kakuaba wau kʉ̃ria b̶uud̶eeba nibabadaurãba ara mau kĩra kʉ̃risiabadau. Maamina chi Dachi Akõre Jaurid̶eeba nibabadaurãba Dachi Akõre Jauriba kʉ̃ria b̶uu kʉ̃risiabadau. ⁶Ab̶auba chi nau kakuaba wau kʉ̃ria b̶uu kʉ̃risia b̶uaruubʉrã biui. Maamina chi Dachi Akõre Jauriba kʉ̃ria b̶uu kʉ̃risia b̶uaruubʉrã jirukaraayuwãe b̶uai maud̶e Dachi Akõre ome chokae b̶uai. ⁷Ab̶auba chi nau kakuaba wau kʉ̃ria b̶uu kʉ̃risia b̶uaruubʉrã, Dachi Akõre kĩramaabʉ. Moisesba b̶ʉd̶a wau kʉ̃riakau; ne ab̶a bid̶a poyaa waukau. ⁸Chi nau kakuaba wau kʉ̃ria b̶uud̶eeba nibabadaurã Dachi Akõreba biꞌia unukau.

⁹Maamina Dachi Akõre Jauri biawãra machi sõd̶e b̶uubʉrã, ichid̶eeba nibabadau. Nau kakuaba wau kʉ̃ria b̶uud̶eeba nibad̶aabai. Biawãra chi Cristo Jauri wãꞌãe nii, Cristod̶ewãema. ¹⁰Maamina Cristo machi sõd̶e b̶uubʉrã, machi jauri chokae b̶uu Dachi Akõreba machi nebʉraswãe nuree a b̶uud̶eeba. Machiba kachirua wau panad̶a kakua nau kakuad̶e biud̶ai. ¹¹Maamina ichi Jauri machi sõd̶e b̶uud̶eeba, ichid̶eeba machi chi kakua biui b̶uu chokae jiradubii, Cristo Jesús chokae jiradubid̶a kĩra.

¹²Maud̶eeba ãbarã, dachi biawãra Dachi Akõre Jaurid̶eeba nibad̶ai panuu. Nau kakuaba wau kʉ̃ria b̶uud̶eeba nibad̶aabai panuu. ¹³Machi nau kakuaba wau kʉ̃ria b̶uud̶eeba nibaaduubʉrã biud̶ai. Maamina chi nau kakuaba kachirua wau kʉ̃ria b̶uu Dachi Akõre Jaurid̶eeba ida b̶uuduubʉrã, Dachi Akõre ome chokae panad̶ai. ¹⁴Joma Dachi Akõre Jaurid̶eeba nibabadaurã Dachi Akõre warrarãbʉ. ¹⁵Machiba Dachi Akõre Jauri adausid̶aud̶e machi wapeabiabasii, chi chibari baita bari trajabarii makabarii kĩra. Maumaarã machi duanusii Dachi Akõre warrarã bad̶amera maud̶e «Chacha» ad̶amera. ¹⁶Dachi sõd̶e Dachi Akõre Jauriba kuitaabia b̶uu biawãra Dachi Akõre warrarã. ¹⁷Ichi warrarãd̶eeba dachirã maud̶e Cristo baarauba ichiba uru b̶uud̶ebena adaud̶ai. Biawãra Cristo biꞌiwãe uru panad̶a kĩra dachi ãrea biꞌiwãe panuubʉrã, Dachi Akõreba Cristo baara ãbua ãrea biꞌia duanui.

Dachi Akõreba chiwid̶i waukuai b̶uu esed̶au panuu

¹⁸Mʉʉmaarã, chi nau id̶ibaebena dachi ãrea biꞌiwãe panuu b̶aꞌãra b̶uu, chi kaad̶ebena ewarid̶e Dachi Akõreba dachi biꞌia duanui audeara. ¹⁹Joma Dachi Akõreba waukuad̶aba esed̶au b̶uu ichi warrarã biꞌia paneeduu isa unubimera, ²⁰naed̶e biꞌiwãe b̶uasiid̶eeba. Du ab̶a maka biꞌiwãe b̶eebasii, maumaarã Dachi Akõreba maka b̶eebisii. Maamina joma biꞌiwãe b̶eed̶aba esed̶au b̶uu ²¹Dachi Akõreba mau biꞌia b̶umera ichi warrarã biꞌia b̶ui kĩra. Chi chibari baita bari trajabarii ena b̶uu kĩra, chi Dachi Akõreba waud̶a makaa b̶eraabai.

²²Dachiba kuitaa panuu wẽraba warr adauruud̶e isa adaubai kʉ̃riabarii kĩra, joma Dachi Akõreba waukuad̶aba puꞌuaba isa biꞌia b̶uai kʉ̃ria b̶uu. ²³Maud̶e dachia bid̶a puꞌuaba isa neebii esed̶au panuu, Dachi Akõreba dachi chi kakua biꞌia b̶umera. Ichi warrarã adauruud̶e maka waui. Ichi Jauri dachimaa naed̶e deasii biawãra dachi ichi warrarã kuitaad̶amera. ²⁴Dachi Akõreba dachi karibasiid̶eeba mau esed̶au panuu. Chi dachiba esed̶au panuu wabid̶a wãꞌãe panuu. Uru panad̶a basirã ¿sakãe esed̶au panad̶ai basma? ¿Kaiba ichiba chi uru b̶uu, adaui baita esed̶au b̶uaima? ²⁵Maamina chi dachiba esed̶au panuu wabid̶a wãꞌãe panuud̶eeba joma dauchia jãadua panuud̶eeba kuitaa panuu biawãra adaud̶ai.

²⁶Mau awara ara dachi du ab̶a poyaara panuud̶eeba Dachi Akõre Jauriba aid̶a b̶uu. Biawãra adua panuu saka Dachi Akõremaa arakʉd̶e ʉtaa id̶id̶ai. Maamina Dachi Akõre Jauriba chi bed̶ea dachiba poyaa berread̶akaud̶eeba dachi kakua Dachi Akõremaa ʉtaa id̶ibarii. ²⁷Maud̶e Dachi Akõre dachi sõ ichiabariiba ichi Jauriba ʉtaa id̶i b̶uu kuitaa b̶uu, ichiba kʉ̃ria b̶uu kĩra ichid̶irã baita ʉtaa id̶ibariid̶eeba.

Dachi Akõreba ne jomad̶e aid̶abarii

²⁸Mau awara Dachi Akõreba kʉ̃risia b̶uad̶a kĩra chi ichi kʉ̃riabadau ichiba iukuasii. Dachiba kuitaa panuu maarã baita Dachi Akõreba ne jomad̶e biꞌia waubarii. ²⁹Mau maka b̶uu ichiba naed̶e kuitaa b̶uasiid̶eeba kairã ichid̶irã bai. Ãchi b̶usii ichi Warr Jesús kĩra nuread̶amera. Maka ichi Warr ãbarã ãrea panuud̶ebena, mau chi nabenabʉ. ³⁰Dachi Akõreba chi ichiba naed̶e duanud̶arã iukuasii, ichi Warr Jesús kĩra nuread̶amera. Chi ichiba iukuad̶a chi ichid̶irã jipa nuree baara b̶usii. Chi ichiba chi ichid̶irã jipa nuree baara duanud̶arãmaa ichi biꞌia niid̶ebena deai.

³¹¿Mau ʉ̃rʉbena saka kʉ̃risiad̶ai panuma? Dachi Akõre dachi baara b̶uud̶eeba ¿kaiba dachi poyaaima? ³²Biawãra Dachi Akõreba ichi Warr wãakaabasii maumaarã joma dachi kakua ida beabisii. Maud̶eeba ¿ichiba dachimaa joma biꞌia Cristo ome ãbua deabaika? ³³¿Kaiba Dachi Akõremaa ichiba jʉrʉ adaud̶arã ʉ̃rʉbena poyaa kachirua jaraima? Ara Dachi Akõreba dachi chi ichid̶irã jipa nuree baara duanubarii. ³⁴¿Kaiba dachi nebʉra bara panuu ad̶aima? Ab̶au bid̶a maka jaraabai Jesucristo dachi kakua biusiid̶eeba. Ichi biu b̶uad̶a chokae jiradusii. Jãabae Dachi Akõre jua biare b̶uu. Aria dachi baita Dachi Akõremaa chi chuburia id̶i b̶uu. ³⁵¿Kaiba dachi Cristoba kʉ̃ria b̶uud̶ebena poyaa ãyaa b̶uima? Ewari chaarea neeruud̶e, ãrea biꞌiwãe panuud̶e, ẽbẽrarãba dachi kachirua wauduud̶e, jarrbisia ewarid̶e, paruswãe panuud̶e, kachiruad̶e panuud̶e, ẽbẽrarãba bea kʉ̃ria panuud̶e ab̶au bid̶a dachi Cristoba kʉ̃riad̶ebena poyaa ãyaa duanud̶aabai. ³⁶Dachi Akõre bed̶ead̶e naka b̶ʉ kub̶uu:

«Ewaricha bichi kakua dai bea kʉ̃ria panuu. Oeja beabadau kĩra bead̶ai kʉ̃risia panuu».8:36 Salmos 44:22.

³⁷Maamina Cristoba dachi kʉ̃ria b̶uu. Ichid̶eeba joma mau dachiba poyaabadau. ^38-39Maud̶eeba mʉʉba kuitaa b̶uu dachi biuduubʉrã maebʉrã chokae panuubʉrã, Dachi Akõreba dachi kʉ̃riad̶ebena awara panad̶aabai. Nau ewarid̶e maud̶e kaad̶ebena ewarid̶e awara panad̶aabai. Maud̶e angelerãba, jai kachiruarãba, chi jai kachirua mechiurãba, chi ʉtʉbenarãba, chi ekarebenarãba, maebʉrã ab̶a bid̶a Dachi Akõreba waud̶ad̶ebena bid̶a dachi ichiba kʉ̃riad̶ebena poyaa ãyaa duanud̶aabai.8:38-39 Jai kachiruarã. Griego bed̶ead̶e naka b̶ʉ kub̶uu: chi mechiurãba, joma poyaa nureerãba. Ara mau kʉ̃ria, Dachi Mechiu Jesucristod̶eeba unubiasii.

Joma Israeld̶ebena imiped̶aad̶a biawãra israeld̶ebenarãwãe

¹Mʉ Cristod̶ed̶eeba biawãra jaraaruu. Setawãema. Dachi Akõre Jauriba mʉ sõd̶e nau bed̶ea biawãra arakʉd̶e kuitaabi b̶uu. ^2-3Nau jaraaruu: mʉ ẽbẽrarã judiorã kakua ewaricha ãrea kĩra nomaa b̶uabarii, ãchi Dachi Akõre ome biꞌiwãe panuud̶eeba. Mʉ Cristod̶ebena awara b̶eei kʉ̃riai, mʉ ãbarã aid̶ai baita, ⁴chi israeld̶ebenarã. Dachi Akõreba naed̶e ãchi jʉrʉ adausii ichi warrarã nuread̶amera.9:4 Éxodo 4:22. Ichi kĩrawãrea ted̶echoa maarãmaa unubiasii.9:4 Éxodo 40:34-35. Ãchi nabẽraed̶ebenarã ome bed̶ea deasii.9:4 Génesis 12:1-3. Moisesba b̶ʉd̶a maarãmaa deasii. Ãchimaa kuitaabiasii ichi de mechiud̶e kãare waud̶ai panuu maud̶e joma ichiba deai jarad̶a ãchi baita b̶uasii. ⁵Ãchi nabẽraed̶ebenarã chi mechiurã nureasii. Ãchid̶ebena Cristo ẽbẽra kakuad̶e chi naweba adausii. Mau jomaurã Akõrebʉ. Ichimáburu dachiba ewaricha biꞌia berread̶ai panuu. Biꞌia b̶uu maka b̶uai.

⁶Mʉʉba jarawẽa b̶uu Dachi Akõreba chi Israeld̶ebenarã baita waui ad̶a wauwẽa b̶uu. Maumaarã mʉʉba jara b̶uu joma Israeld̶ebena imiped̶aad̶a Dachi Akõre daad̶e biawãra israeld̶ebenarãwãe. ⁷Maud̶e joma Abrahamd̶ebena imiped̶aad̶a Dachi Akõre daad̶e Abraham warrarãwãe. Dachi Akõreba Abrahammaa naka jarasii: «Bichi warr Isaacd̶eeba bichi ãichekerã ãrea imid̶ai».9:7 Génesis 21:12.⁸Mau bed̶eaba dachimaa kuitaabiasii b̶uu joma Abrahamd̶ebena chi naweba adauped̶aad̶a Dachi Akõre warrarãwãe. Maumaarã chi warrarã Dachi Akõreba deai jarad̶a, biawãra Abraham warrarãbʉ. ⁹Dachi Akõreba Abrahammaa deai jarad̶a bed̶ea nau: «Año ab̶aud̶e mʉ waya neei. Maud̶e Saraba warr uru b̶uai».9:9 Génesis 18:10,14.

^10-12Mau awara Dachi Akõreba kuitaabiasii chi ichiba jʉrʉ adaui kʉ̃ria b̶uu jʉrʉ adaubarii. Maud̶e kuitaabiasii ab̶a bid̶a jʉrʉ adaukau ãchiba wau panuu biꞌia unu b̶uud̶eeba maumaarã jʉrʉ adaubarii ichiba iusiid̶eeba. Naka kuitaabiasii: Rebecaba mikisu adausii. Chi akõre dachi nabẽraed̶ebena Isaac basii. Maamina mau warrarã chi naweba adaui naed̶e maud̶e ne ab̶a bid̶a biꞌia maebʉrã kachirua waud̶ai naed̶e Dachi Akõreba Rebecamaa jarasii: «Chi nabena chi kaad̶ebena juad̶e b̶uai».9:10-12 Génesis 25:23.¹³Maud̶eeba Dachi Akõre bed̶ead̶e naka b̶ʉ kub̶uu: «Mʉʉba Jacob kʉ̃riasii, maamina Esaú kĩramaasii».9:13 Malaquías 1:2-3.

¹⁴¿Mau ʉ̃rʉbena saka kʉ̃risia panuma? ¿Dachi Akõreba jipa waukau kʉ̃risia panuka? ¡Makawãema! ¹⁵Dachi Akõreba Moisesmaa naka jarasii:

«Mʉʉba chi kĩra chuburia kʉ̃ria b̶uu ẽbẽra kĩra chuburiai maud̶e chi mʉʉba kʉ̃riad̶eeba kariba kʉ̃ria b̶uu ẽbẽra kʉ̃riad̶eeba karibai».9:15 Dachi Akõreba mau bed̶ea Moisesmaa jarasii, chi israeld̶ebenarã kastikad̶akare, chi paka warr nee waud̶a kʉ̃riabachid̶aud̶eeba. Éxodo 32:1-35; 33:19.

¹⁶Biawãra chi ẽbẽra Dachi Akõreba jʉrʉ adau b̶uu jʉrʉ adaukau, mau ẽbẽraba wau b̶uu biꞌia unu b̶uud̶eeba, maebʉrã chi ẽbẽraba maka kʉ̃ria b̶uud̶eeba. Maumaarã chi ichiba kĩra chuburiai kʉ̃ria b̶uu ẽbẽra, mau jʉrʉ adaubarii. ¹⁷Ichi bed̶ead̶e, ichiba faraonmaa jarad̶a naka b̶ʉ kub̶uu:

«Mʉʉba bichi chi rey mechiu b̶usii mʉ poyaa unubiai baita. Maka mʉ joma nau iujãad̶e trʉ̃ poa b̶uai».9:17 Éxodo 9:16.

¹⁸Mauba kuitaabia b̶uu Dachi Akõreba ab̶a bid̶a kĩra chuburiai kʉ̃ria b̶uubʉrã maka waubarii maud̶e ab̶a bid̶a sõ chaarea b̶eebii kʉ̃ria b̶uubʉrã makabibarii.

¹⁹Mau bed̶ea ʉ̃rʉbena ab̶auba naka jarai: «Dachi Akõreba maka waubariid̶eeba ¿sakãe dachi nebʉra bara panuu a b̶uma? ¿Ichiba dachi b̶ud̶a kĩra panuuwãeka?» ²⁰Maamina ¿chi maka berrea b̶uuba Dachi Akõremaa maka berreai b̶uka? ¿Chokoba chi kabariimaa naka jarai b̶uka: «Bichiba sakãe mʉ jãka kasma?» ²¹¿Chi choko kabariiba wau kʉ̃ria b̶uu kĩra wauiwãe b̶uka? ¿Choko kĩrajʉʉ bara b̶uabarii ewari baitabena maud̶e barikia ewari baitabena sid̶a arab̶au ioroba kai b̶uwẽka?

²²Ara mau kĩra Dachi Akõreba wau kʉ̃riad̶a naka wausii. Ẽbẽrarãba kachirua wau panuu baita Dachi Akõreba ichi kĩrubarii unubia b̶uud̶eeba maud̶e ichi poyaad̶eeba kastikaped̶a tʉbʉ aokod̶e jiratai basii. Maamina chi ãchiba kachirua wau panuu joma dauchia jãadua b̶uasii. ²³Maka dauchia jãadua b̶uasii ichi biꞌia b̶uu mechiud̶ebena ichiba kĩra chuburia b̶uu ẽbẽrarãmaa kuitaabiai baita. Ãchi ichiba naed̶e jʉrʉ adausii ichi biꞌia b̶uud̶ebena uru panad̶amera. ²⁴Dachi mau ẽbẽrarãd̶ebenabʉ. Dachi Akõreba dachi joma iusii. Chi nuree judiorãbʉ maamina chi nuree judiowãerãbʉ, ²⁵Dachi Akõreba jarad̶a Oseas kartad̶e naka b̶ʉ kub̶uu kĩra:

«Chi mʉ puurud̶ebenarãwãe bad̶a mʉ puurud̶ebenarã ai. Chi mʉʉba kʉ̃riawẽa b̶uad̶a puuru, mʉʉba kʉ̃ria b̶uu puuru ai».9:25 Oseas 2:23.

²⁶Maud̶e naka b̶ʉ kub̶uu:

«Mʉʉba jarasii machi mʉ ẽbẽrarãwãe.

Maka jarad̶amare, mʉʉba machi mʉ warrarã ai».9:26 Oseas 1:10.

^27-28Maud̶e Isaiasba israeld̶ebenarã ʉ̃rʉbena naka jarasii:

«Israeld̶ebenarã ãrea panuu mar ibu kĩra. Maamina ãchi ãreawãe karibad̶ai Dachi Mechiuba nau iujãad̶e nuree isa joma kastikakuaid̶eeba».9:27-28 Isaías 10:22,23.

²⁹Maud̶e mau naed̶e Isaiasba naka jarasii:

«Dachi Mechiu joma poyaa b̶uuba dachi israeld̶ebenarã chi nuree imiped̶aad̶arã ida chokae panabid̶awãe basirã, Sodomad̶ebenarã maud̶e Gomorrad̶ebenarã kĩra panad̶ai basii».9:29 Isaías 1:9.

Judiorãba Cristod̶e ijãad̶awẽa panuu ʉ̃rʉbena

³⁰¿Mauba kãare jara b̶uma? Judiowãerãba jʉrʉd̶aka basii chi Dachi Akõre puurud̶ebena jipa nureerã baara panad̶ai baita. Maamina maka paneesid̶au, Cristod̶e ijãasid̶aud̶eeba. ³¹Maumaarã israeld̶ebenarãba Dachi Akõre puuru jipa b̶uu bad̶ai jʉrʉ panasii, chi ley waubachid̶aud̶eeba. Maamina poyaa maka waud̶aabasii. ³²¿Sakãe makaabasma? Makaabasii Cristod̶e ijãad̶ai audeara ãchiba wau panuud̶eeba ichi daad̶e jipa nuread̶ai baita jʉrʉ panasiid̶eeba.9:32 Ãchiba wau panuud̶eeba. Griego bed̶ead̶e chi b̶ee kartad̶e naka b̶ʉ kub̶uu: Moisesba b̶ʉd̶a wau panuud̶eeba. Ãchimaarã, mukĩra chi kakua tõod̶ayu aude bibuara b̶uasii. Biawãra ãchiba Cristod̶e ijãad̶aabasii moomaa drʉʉduu kĩra. ³³Dachi Akõre bed̶ead̶e mau ʉ̃rʉbena naka b̶ʉ kub̶uu:

«Ũrísturu. Mʉʉba Sión puurud̶e de waui baitabena mo b̶uuruu.9:33 Sión puuru ara mau «Jerusalén» abadau.

Mau moomaa drʉd̶aped̶a b̶aed̶ai. Maamina chi ichid̶e ijãa b̶uuba bari ijãa b̶uabai».9:33 Bari ijãa b̶uabai. Griego bed̶ead̶e naka b̶ʉ kub̶uu: kĩra nejasiabai. Isaías 28:16; 1 Pedro 2:6.

¹Ãbarã, mʉʉba sõd̶eeba kʉ̃ria b̶uu Dachi Akõreba israeld̶ebenarã karibai. Maud̶eeba mʉʉba ichimaa ʉtaa id̶i b̶uabarii. ²Mʉʉba jaraaruu ãchiba Dachi Akõre biawãra kuitaa kʉ̃ria panuu. Maamina Dachi Akõreba kʉ̃ria b̶uu ʉ̃rʉbena biꞌiwãe kʉ̃risia panuu. ³Ãchiba unud̶akau saka Dachi Akõreba ẽbẽrarã ichi jipa nuree baara duanui, ichiba bed̶ea dead̶a kĩra. Maumaarã mau ida b̶ud̶aped̶a ara ãchiba wau panuuba jʉrʉ panuu Dachi Akõre puuru jipa b̶uu bad̶ai baita. ⁴Maamina maka nuread̶ai baita, ãchi ley waubachid̶au audeara, Cristoba joma wausii. Chi Cristod̶e ijãaduu Dachi Akõreba jipa nuree unubarii.

⁵Moisesba b̶ʉsii saka ẽbẽrarã poyaa jipa nuread̶ai, chi Dachi Akõreba ichimaa b̶ʉbisiid̶eeba. Naka b̶ʉsii: «Chi Moisesba b̶ʉd̶a wau b̶uu, mauba nibai».10:5 Levítico 18:5.⁶Maamina chi Cristod̶e ijãa b̶uu Dachi Akõre daad̶e jipa nuree baarabena bai baita naka jara b̶uu: «Bichi sõd̶eeba jararã́se: “¿Kai bajãad̶aa wãi b̶uma?”10:6 Deuteronomio 30:12. (Cristo nau iujãad̶aa neebii baita). ⁷Maud̶e kʉ̃risiarã́se: “¿Kai biud̶arã panabadaumaa wãi b̶uma?” (Cristo chokae jiradubii baita)». ⁸Maamina Dachi Akõre bed̶ead̶e naka b̶ʉ kub̶uu: «Bichiba Dachi Akõre bed̶ea kuitaai aude chaareawẽa b̶uu.10:8 Bichiba Dachi Akõre bed̶ea kuitaai aude chaareawẽa b̶uu. Griego bed̶ead̶e naka b̶ʉ kub̶uu: Ichi bed̶ea bichi kaita b̶uu. Bichi iiba ichi bed̶ea jarai b̶uu maud̶e bichi sõd̶eeba ijãai b̶uu».10:8 Deuteronomio 30:11-14. Ichi bed̶ea daiba naka jaradea panuu jomaurãba ijãad̶amera: ⁹Bichi iiba Jesús jomaurã Mechiu aaruubʉrã, maud̶e Dachi Akõreba ichi chokae jiradubid̶a bichi sõd̶eeba ijãaruubʉrã, ichiba karibai. ¹⁰Biawãra chi mauba sõd̶eeba ijãaruubʉrã, chi Dachi Akõre daad̶e jipa nuree baara b̶uai. Iiba Jesús jomaurã Mechiu aaruubʉrã Dachi Akõreba karibai.

¹¹Dachi Akõre bed̶ead̶e naka b̶ʉ kub̶uu: «Chi ichid̶e ijãa b̶uuba bari ijãa b̶uabai».10:11 Bari ijãa b̶uabai. Griego bed̶ead̶e naka b̶ʉ kub̶uu: Nejasiawẽma. Isaías 28:16; 1 Pedro 2:6.¹²Dachi Akõre jomaurã Mechiud̶eeba judiorã maud̶e judiowãerã sid̶a arab̶aud̶e waubarii. Ichimaa chi chuburia id̶iiduu joma karibabarii. ¹³Dachi Akõre bed̶ead̶e naka b̶ʉ kub̶uu: «Chi Dachi Mechiumaa chi chuburia id̶iiduu joma karibai».10:13 Joel 2:32.

¹⁴Maamina ẽbẽrarãba wabid̶a Dachi Mechiu Jesucristod̶e ijãad̶awẽa panuud̶e ¿saka ichimaa chi chuburia ʉtaa id̶id̶aima? Ichi ʉ̃rʉbena wabid̶a ũrid̶awẽa panuud̶e ¿saka ijãad̶aima? Maud̶e ab̶au bid̶a ãchimaa jaradead̶e wãwẽebʉrã ¿saka ichi ʉ̃rʉbena ũrid̶aima? ¹⁵Dachi Akõreba ab̶a bid̶a bʉiwẽebʉrã, ¿saka jaradead̶e wãd̶aima? Dachi Akõre bed̶ead̶e naka b̶ʉ kub̶uu: «Chi bed̶ea bia jarad̶e needuu ãrea biꞌia nuree».10:15 Griego bed̶ead̶e naka b̶ʉ kub̶uu: Chi bed̶ea bia jarad̶e needuu jʉ̃rʉ ãrea biꞌia nuree. Isaías 52:7. Griego bed̶ead̶e chi b̶ee kartad̶e b̶ʉ kub̶uu: chi jirukaraayuwãe b̶uabibarii bed̶ea jarad̶e needuu.

¹⁶Maamina joma judiorãba chi bed̶ea bia Cristo ʉ̃rʉbena ijãad̶aabasii. Isaías kartad̶e naka b̶ʉ kub̶uu: «Dai Mechiu, daiba jaraped̶aad̶a ¿kaiba ijãasma?»10:16 Isaías 53:1.¹⁷Biawãra ẽbẽrarãba Cristo ʉ̃rʉbena naa ũrid̶ai panuu, poyaa ijãad̶ai baita.10:17 Cristo ʉ̃rʉbena. Griego bed̶ead̶e chi b̶ee kartad̶e b̶ʉ kub̶uu: Dachi Akõre bed̶ea.¹⁸Maamina mʉʉba id̶iiruu: ¿Judiorãba mau bed̶ea ũrid̶aabaska? Biawãra ũrisid̶au. Dachi Akõre bed̶ead̶e naka b̶ʉ kub̶uu:

«Ichi ʉ̃rʉbena joma nau iujãad̶e jarasid̶au. Mau bed̶ea kaitawẽ jarad̶e wãsid̶au».10:18 Salmos 19:4.

¹⁹Mʉʉba waya id̶iiruu: ¿Judiorãba mau bed̶ea kuitaad̶aka baska? Maerã, kuitaasid̶au judiowãerãba kuitaaped̶aad̶a kĩra. Maud̶eeba Moisesba Dachi Akõred̶eeba judiorãmaa naa jarasii:

«Chi mʉʉba jʉrʉ adaud̶awãe puuru kariba b̶uud̶eeba mʉʉba machimaa jiwaabiai mʉ kʉ̃riad̶amera.

Chi kĩrabawẽa b̶uu puuru kariba b̶uud̶eeba mʉʉba machi kĩrubikabiai mʉ kʉ̃riad̶amera».10:19 Deuteronomio 32:21.

²⁰Maud̶e Isaiasba Dachi Akõred̶eeba wapeawẽa naka jarasii:

«Chi mʉ jʉrʉd̶awẽa panad̶aba mʉ unusid̶au. Chi mʉ ʉ̃rʉbena id̶id̶awẽa panad̶arãmaa mʉ ʉ̃rʉbena kuitaabiasii».10:20 Isaías 65:1.

²¹Maamina israeld̶ebenarã ʉ̃rʉbena Isaiasba naka jarasii:

«Ewaricha mʉ jua deabachii ẽbẽrarã sõ chaarea nuree maud̶e mʉʉd̶e ijãad̶akaurã mʉʉmaa need̶amera».10:21 Isaías 65:2.

Chi nuree judiorãba Cristod̶e ijãaped̶aad̶a

¹Maud̶eeba mʉʉba nau id̶iiruu: «¿Dachi Akõreba israeld̶ebenarã ichid̶irã ida b̶uska?» ¡Makawãema! Mʉ israeld̶ebenabʉ, Abrahamd̶ebena need̶abʉ, Benjamind̶ebena need̶abʉ. ²Dachi Akõreba naed̶e israeld̶ebenarã jʉrʉ adausii ichi puuru b̶uamera. Maud̶eeba ãchi ida b̶uwẽa b̶uu. Machiba Dachi Akõre bed̶ead̶e Elías ʉ̃rʉbena b̶ʉd̶a kuitaa panuu. Eliasba Dachi Akõremaa israeld̶ebenarã ʉ̃rʉbena naka biꞌiwãe jarasii. ³«Mʉ Mechiu, bichi baita berreabadaurã joma kenasid̶au maud̶e bichimaa ãnimara baa deabadau joma ãrisid̶au. Ab̶aburu mʉ́turu b̶eesii, maamina mʉ sid̶a bead̶ai baita jʉrʉ panuu».11:3 1 Reyes 19:10,14.⁴Maud̶e Dachi Akõreba naka panausii: «Mʉʉba 7.000 ẽbẽrarã mʉ baita nu uru b̶uu. Maarã Baal11:4 Baal. Nabẽraed̶e cananeorãba ãchi akõre Baald̶e ijãabachid̶au. daad̶e õdarrd̶eeba kob̶eed̶akau».11:4 1 Reyes 19:18.⁵Ara mau kĩra nau ewarid̶e bid̶a Dachi Akõreba ichi sõbiad̶eeba dai judiorã ãreawãe panuu nu uru b̶uu. ⁶Maka Dachi Akõreba ichi sõbiad̶eeba adausiibʉrã, daiba wau panuu kakua jʉrʉ adaubai basii. Daiba wau panuu kakua jʉrʉ adau b̶uasirã, makarã ichi sõbiad̶eeba jʉrʉ adaubai basii.

⁷¿Mau ʉ̃rʉbena saka kʉ̃risia panuma? Israeld̶ebenarãba Dachi Akõre puuru bad̶ai jʉrʉ panasmina makad̶aabasii. Maamina israeld̶ebenarã ãreawãe panuuba ijãasid̶au, Dachi Akõreba jʉrʉ adausiid̶eeba. Waabenarãba ijãad̶ai kʉ̃riad̶aabasii. ⁸Dachi Akõre bed̶ead̶e naka b̶ʉ kub̶uu:

«Dachi Akõreba ãchi kʉ̃risia jʉ̃asii poyaa kuitaarãad̶amera, ãchi dauba unud̶a poyaa kuitaarãad̶amera,

maud̶e ãchi kʉʉrʉba ũrid̶a poyaa kuitaarãad̶amera. Wabid̶a maka panuu».11:8 Isaías 29:10.

⁹Maud̶e judiorã rey Davidba mau ʉ̃rʉbena Dachi Akõremaa jarasii:

«Ãchi kĩrajʉʉ kobadau ewarid̶e komaa panuud̶e bichiba kastikaabai kʉ̃risiabiáse.

Maka ãchi du ab̶a setaa kũruad̶ai ãnimara enabed̶e b̶aeduu kĩra. Maud̶e ãchi kastikase.

¹⁰Ãchi dau pãriu nuree kĩra b̶use ãchiba unu panuu kuitaarãad̶amera. Maud̶e ewaricha ãrea biꞌiwãe panabiáse».11:10 Ewaricha ãrea biꞌiwãe panabiáse. Griego bed̶ead̶e naka b̶ʉ kub̶uu: ãchi ekarr jʉ̃rea b̶use. Salmos 69:22-23.

Dachi Akõreba judiowãerã karibad̶a

¹¹Nau mʉʉba id̶iiruu: ¿judiorãba Cristo ida b̶usid̶aud̶eeba waa Dachi Akõre ome poyaa biꞌia nuread̶aabai panuka?11:11 Griego bed̶ead̶e naka b̶ʉ kub̶uu: ¿Judiorã drʉd̶aped̶a ab̶aed̶e b̶aed̶akau? ¡Makawãema! Maumaarã maka wausid̶aud̶eeba Dachi Akõreba judiowãerã karibabarii. Maka judiorãba jiwaad̶aped̶a ichi kʉ̃riad̶ai. ¹²Judiorãba Cristo ida b̶usid̶aud̶eeba ãchi audeara Dachi Akõreba joma nau iujãad̶ebena judiowãerã ãrea kariba b̶uu. Maud̶eeba chi judiorã waya Dachi Akõre ome biꞌia paneeduu ewarid̶e ¿Dachi Akõreba jomaurã biꞌia karibaabaika?

¹³Mʉʉba judiowãerãmaa nau jaraaruu. Mʉ Dachi Akõreba bʉid̶a b̶usii, machimaa jaradeamera. Mau mʉʉba joma biꞌia wau kʉ̃ria b̶uu. ¹⁴Mʉʉba judiowãerãmaa jaradea b̶uud̶eeba kʉ̃ria b̶uu mʉ ẽbẽrarã judiorã bid̶a mau bed̶ea ũrid̶ai jiwaa panuu kĩra. Maka Dachi Akõreba ãchid̶ebena chi nuree karibai. ¹⁵Dachi Akõreba judiorã ida b̶usiid̶eeba waabenarã nau iujãad̶ebenarã ichi ome biꞌia b̶usii. Maud̶eeba Dachi Akõreba judiorã waya kʉ̃ria adauruud̶e ¿jãarã ome kãare sakaima? Ãchi sid̶a biud̶arã kĩra panad̶a Dachi Akõre ome chokae nuread̶ai.

¹⁶Trigo naa ea junaaduud̶e pan waud̶aped̶a mau pand̶ebena Dachi Akõremaa ab̶a deaduubʉrã, waabena pan sid̶a Dachi Akõred̶ebʉ. Maud̶e bakuru karr biꞌia b̶uubʉrã, chi bakuru jua sid̶a biꞌia nuree.11:16 Ara mau kĩra joma judiorã Dachi Akõred̶ebʉ, chi naa ijãaped̶aad̶ad̶eeba.

¹⁷Waabenarã judiorã Dachi Akõred̶ebena awara paneesid̶au olivo bakuru jua tʉʉd̶a kĩra. Machi judiowãerã Dachi Akõreswãe panasid̶au olivo bakuru ichi du ab̶a moded̶e warid̶a kĩra. Maamina machi ẽbẽrarã Dachi Akõred̶erã paneesid̶au chi bakuru jua chi b̶ʉatud̶amaa kara nub̶ud̶a kĩra. Maka jãabae Dachi Akõreba machi sid̶a kariba b̶uu judiorã kariba b̶uad̶a kĩra.11:17 Dachi Akõreba machi sid̶a kariba b̶uu judiorã kariba b̶uad̶a kĩra. Griego bed̶ead̶e naka b̶ʉ kub̶uu: Machi sid̶a bakuru b̶aa chi karrd̶ebena nee b̶uud̶eeba biꞌia panuu.¹⁸Maamina kʉ̃risiarã́sturu machi judiowãerã judiorã audeara Dachi Akõre daad̶e biꞌia nuree. Kĩrabásturu machi chi karrd̶eeba chokae panuu. Chi karr machid̶eeba chokae b̶uuwãe.

¹⁹Ab̶a machid̶ebenaba jarai b̶uu: «Dachi Akõreba judiorã ida b̶usii bakuru jua b̶ʉatud̶a kĩra, mʉ mau bakurud̶e kara nub̶ui baita». ²⁰Biawãra maka b̶uu. Maamina Dachi Akõreba ãchi ida b̶usii Cristod̶e ijãad̶aabasiid̶eeba. Maabae machi jʉrʉ adausii Cristod̶e ijãasid̶aud̶eeba. Maud̶eeba machi judiorã audeara biꞌia nuree kʉ̃risiarã́sturu, maumaarã Dachi Akõre wapeadee panásturu. ²¹Judiorãba ijãad̶awẽa panuu kakua Dachi Akõreba ãchi ida b̶usii bakuru jua b̶ʉatuuruu kĩra. Ara mau kĩra machi judiowãerãba ijãad̶awẽebʉrã, Dachi Akõreba machi sid̶a ida b̶ui.

²²Ãrea kʉ̃risiásturu saka Dachi Akõreba ichi sõbiad̶eeba karibabarii maud̶e saka kastikabarii. Judiorãba ijãad̶aabasiid̶eeba Dachi Akõreba kastikaped̶a ãchi ida b̶usii. Maud̶e machi judiowãerã ichi sõbiad̶eeba kariba b̶uu maud̶e kariba b̶uai. Maamina maud̶eeba panad̶ai panuu. Machiba ijãa panad̶awẽebʉrã, Dachi Akõreba machi sid̶a kastikaped̶a ida b̶ui bakuru jua b̶ʉatuuruu kĩra. ²³Maud̶e chi judiorã Cristod̶e ijãad̶awẽa panuurãba ijãaduubʉrã, Dachi Akõreba ãchi waya kʉ̃ria adaui ichi poyaad̶eeba chi bakuru jua tʉʉd̶amaa waya kara nub̶uuruu kĩra. ²⁴Biawãra machi judiowãerã olivo bakuru ichi du ab̶a moded̶e warid̶a kĩra panasid̶au. Dachi Akõreba mau bakurud̶ebena tʉʉped̶a olivo bakuru uud̶amaa kara nub̶usii. Maka b̶uabai b̶umina Dachi Akõreba wausii. Maud̶eeba ¿judiorã waya poyaa kʉ̃ria adauwẽka chi uud̶a bakuru jua waya kara nub̶uuruu kĩra?

Dachi Akõreba joma israeld̶ebenarã karibai

²⁵Ãbarã, mʉʉba kʉ̃ria b̶uu Dachi Akõreba ne naed̶e kuitaabiawẽa b̶uad̶a machiba kuitaad̶ai. Maka judiorã audeara biꞌia nuree kʉ̃risiad̶aabai. Dachi Akõreba naed̶e kuitaabiawẽa b̶uad̶a naubʉ: ãrea judiorã sõ chaarea paneesid̶au maud̶e maka paneed̶ai ab̶a joma chi Cristod̶e ijãad̶ai panuu judiowãerãba ijãaduud̶aa. ²⁶Maka Israel puuru Dachi Akõreba joma karibai. Dachi Akõre bed̶ead̶e naka b̶ʉ kub̶uu:

«Dachi Karibabarii Sión puurud̶ebena neei.11:26 Sión puuru ara mau «Jerusalén» abadau.

Ichiba Jacobd̶ebena imiped̶aad̶a chi kachirua waubadau ãyaa b̶ui.

²⁷Mʉʉba ãchi ome bed̶ea deai. Ãchiba kachirua wauped̶aad̶a perdonai».11:27 Isaías 59:20-21; 27:9.

²⁸Judiorãba chi bed̶ea bia Jesús ʉ̃rʉbena ida b̶u panuud̶eeba Dachi Akõre ome chi kĩramaabʉ. Maud̶eeba machi judiowãerã ẽbẽrarã Dachi Akõred̶erã poyaa nuread̶ai. Maamina Dachi Akõreba ãchi nabẽraed̶ebenarã jʉrʉ adausiid̶eeba wabid̶a kʉ̃ria b̶uu. ²⁹Biawãra Dachi Akõreba dead̶a juakaa adaukau. Ichiba iud̶a ida b̶ukau. ³⁰Machi judiowãerãba naed̶e Dachi Akõred̶e ijãad̶akau basii. Maamina judiorãba ijãad̶awẽa panuud̶eeba jãabae Dachi Akõreba machi kĩra chuburia b̶uu. ³¹Maarãba jãabae ijãad̶akau, Dachi Akõreba kĩra chuburiamera machi judiowãerã kĩra chuburia b̶uu kĩra.11:31 Dachi Akõreba kĩra chuburiamera. Griego bed̶ead̶e waabena kartad̶e naka b̶ʉ kub̶uu: jãabae Dachi Akõreba kĩra chuburiamera.³²Biawãra Dachi Akõreba joma jʉ̃akuasii ũribabaswãe nureed̶eeba. Maka wausii joma kĩra chuburiai baita.

³³Dachi Akõre ãrea kuitaa nii maud̶e kʉ̃risia kuitaa nii.

Ichiba waui kʉ̃risia b̶uu ab̶a bid̶a poyaa kuitaad̶aabai. Ichiba wau b̶uu sid̶a poyaa kuitaad̶aabai.

³⁴«¿Kaiba Dachi Mechiu kʉ̃risia kuitaa b̶uma? ¿Kaiba ichimaa kʉ̃risia jaradeaima?

³⁵¿Kaiba Dachi Akõremaa naa deasma, waya deamera?»

³⁶Dachi Akõréburu ne joma wausii. Ne joma ichid̶eeba b̶uu maud̶e ichi baita b̶uu.

Dachiba ewaricha ichimaa biꞌia berread̶ai panuu. Biꞌia b̶uu maka b̶uai.

Dachi Akõre baita panásturu

¹Mauba ãbarã, Dachi Akõreba machi kĩra chuburiasiid̶eeba, mʉʉba machimaa chi chuburia id̶iiruu ara machi Dachi Akõremaa dead̶amera, ãnimara baa deabadau kĩra. Mau ãnimara biud̶a audeara, ichi baita biꞌia panásturu machi biꞌia unumera. ²Nau iujãad̶ebenarãba waubadau kĩra nibarã́sturu, maumaarã kʉ̃risia wid̶i Dachi Akõreba dea b̶uu kakua jipa nibásturu. Maka machiba kuitaad̶ai chi Dachi Akõreba kʉ̃ria b̶uu. Joma ichiba kʉ̃ria b̶uu biꞌia b̶uu, jipa b̶uu maud̶e ichiba biꞌia unu b̶uu.

³Dachi Akõreba ichi sõbiad̶eeba mʉ b̶usii ichi baita ne wau b̶uamera. Maud̶eeba mʉʉba machimaa nau jaraaruu: ab̶au bid̶a kʉ̃risiabai b̶uu ara ichi chi mechiu nii. Machiba Cristod̶e ijãaped̶aad̶ad̶eeba Dachi Akõreba machicha aꞌawaraa deasii ne waud̶amera. Maud̶eeba ichiba dead̶a kĩra machiba wau panuu biꞌia kʉ̃risiásturu. ⁴Dachi kakua ab̶a b̶umina dachi kakuad̶e ãrea panuu: jua, jʉ̃rʉ, boro, maucha ne joma. Maamina dachi kakuad̶e nureerãba arab̶aud̶e waud̶akau. ⁵Ara mau kĩra dachi ãrea panumina, Cristo ome panuud̶eeba kakua ab̶aburu nii kĩra panuu. Maka dachi joma kakua ab̶ad̶e ãbua panuu.

⁶Dachi Akõreba ichi sõbiad̶eeba dachicha ne waud̶amera aꞌawaraa deasii. Ichiba chi nureerãmaa deasii ichi baita berread̶amera. Maka dead̶akasiibʉrã, ãchiba biawãra ijãa panuud̶eeba maka berread̶ai panuu. ⁷Chi nureerãmaa deasii waabenarã aid̶ad̶amera. Maka dead̶akasiibʉrã, waabenarã aid̶ad̶ai panuu. Chi nureerãmaa deasii ichi bed̶ea jaradead̶amera. Maka dead̶akasiibʉrã, ichi bed̶ea jaradead̶ai panuu. ⁸Chi nureerãmaa deasii ãbarã aid̶a panuud̶eeba biꞌia ijãad̶amera. Maka dead̶akasiibʉrã, ãbarã aid̶ad̶ai panuu biꞌia ijãad̶amera. Chi nureerãmaa deasii ne kaebea dea panuud̶eeba waabenarã aid̶ad̶amera. Maka dead̶akasiibʉrã, sõbiad̶eeba dead̶ai panuu. Chi nureerãmaa deasii chi ijãabadaurã jaradea ua b̶uabarii nuread̶amera. Maka dead̶akasiibʉrã, jipa wau nuread̶ai panuu. Maud̶e chi nureerãmaa deasii waabenarã kĩra chuburiad̶amera. Maka dead̶akasiibʉrã, kĩrajʉʉd̶eeba kĩra chuburiad̶ai panuu.

⁹Sõd̶eeba chiya kʉ̃ria panásturu. Joma kachirua ida b̶ústuru. Chi bia ãrea wau panásturu. ¹⁰Biawãra kʉ̃riad̶eeba chiya kʉ̃ria panásturu. Kʉ̃risia sõbiad̶eeba chiya wapeadee panásturu maud̶e waabenarã ʉ̃rʉbena biꞌia kʉ̃risiásturu. ¹¹Koꞌoa panarã́sturu, maumaarã chokekea panásturu. Chi Dachi Mechiu Jesusba kʉ̃ria b̶uu sõd̶eeba joma wáusturu. ¹²Dachi Akõred̶ebena ne adoed̶ai kuitaa panuud̶eeba kĩrajʉʉ panásturu. Biꞌiwãe panuud̶e dauchia jãadua panásturu. Ewaricha Dachi Akõremaa ʉtaa id̶ísturu. ¹³Ẽbẽrarã Dachi Akõred̶erã chi nejarr barauwãe nuree aid̶ásturu. Chi machi ded̶e needuu biꞌia irsibísturu.

¹⁴Chi machi kachirua waud̶ai baita wãraabadaurãmaa biꞌia berreásturu. Dachi Akõremaa ʉtaa id̶ísturu, ichiba waabenarã biꞌia panabiamera; ʉtaa id̶irã́sturu ichiba ãchi kachirua panabiamera. ¹⁵Chi kĩrajʉʉ nuree ome kĩrajʉʉ panásturu. Chi kĩra nomaa nuree ome kĩra nomaa panásturu. ¹⁶Jomaurã ome biꞌia panásturu. Waabenarã audeara biꞌia nuree kʉ̃risiarã́sturu, maumaarã chi miichuburi nuree ome biꞌia panásturu. Kʉ̃risiarã́sturu machiba waabenarã audeara biꞌia kuitaa panuu.

¹⁷Ab̶auba machi kachirua wauruubʉrã, ara mau kĩra waurã́sturu. Jomaurã daad̶e biꞌia wáusturu. ¹⁸Machiba jʉrʉ́sturu jomaurã ome jirukaraayuwãe panad̶ai baita. ¹⁹Ãbarã, ab̶auba machi kachirua wausiibʉrã ara mau kachirua waurã́sturu. Maumaarã ida b̶ústuru Dachi Akõreba kastikamera. Dachi Akõre bed̶ead̶e naka b̶ʉ kub̶uu: «Mʉaburu chi nebʉra kastikai. Jomaurãmaa deai ãchiba wauped̶aad̶a kĩra», a jara b̶uu Dachi Mechiuba.12:19 Deuteronomio 32:35.²⁰Maud̶e Dachi Akõre bed̶ead̶e naka b̶ʉ kub̶uu: «Bichi kĩramaabarii jarrbisia b̶uubʉrã kobise. Obisia b̶uubʉrã bania dease. Maka wauruubʉrã, ichi ãrea kĩra nejasia b̶uabii».12:20 Ãrea kĩra nejasia b̶uabii. Griego bed̶ead̶e naka b̶ʉ kub̶uu: tʉbʉchia ichi boro ʉ̃rʉ b̶ui. Proverbios 25:21-22.²¹Ab̶auba machi kachirua wauruubʉrã ara mau kĩra waurã́sturu. Maumaarã biꞌia wáusturu ichi kĩra nejasiaped̶a ichiba kachirua wau b̶uu ida b̶uamera.12:21 Griego bed̶ead̶e naka b̶ʉ kub̶uu: Kachirua ida poyaabirã́se, maumaarã bichiba biꞌia wau b̶uud̶eeba kachirua poyaase.

Chi jaradea ua b̶uabadaurã juad̶e panásturu

¹Dachi jomaurã chi nau iujãad̶ebena jaradea ua b̶uabadaurã juad̶e panad̶ai panuu Dachi Akõreba maarã b̶usiid̶eeba. Ab̶a bid̶a wãꞌãe Dachi Akõreba b̶ud̶awãe. ²Maud̶eeba chi nau iujãad̶ebena jaradea ua b̶uabadaurã kʉ̃riawẽa b̶uuba Dachi Akõreba b̶ud̶a kʉ̃riawẽa b̶uu. Chi maka kʉ̃riawẽa nuree ãchi jaradea ua b̶uabariiba nebʉra kastikakuai. ³Biawãra chi jipa wau nureerãba ãchi karrba kastikai wapead̶akau, maumaarã chi kachirua waubadaurãba maarã wapeabadau. Maud̶eeba machi karrarã wapeawẽa panad̶ai kʉ̃ria panuubʉrã, biꞌia wáusturu ãchiba biꞌia unud̶amera. ⁴Biawãra machi jaradea ua b̶uabadaurã Dachi Akõreba ichi baita bari trajabadaurã kĩra b̶usii machi aid̶ad̶amera. Maamina machiba kachirua wauduubʉrã, maarã wapeásturu biawãra ãrea kastikad̶ai panuud̶eeba.13:4 Biawãra ãrea kastikad̶ai panuud̶eeba. Griego bed̶ead̶e naka b̶ʉ kub̶uu: espada bari uru b̶uakau. Ãchi Dachi Akõre baita bari trajabadaurã kĩra nuree kachirua wau nuree kastikad̶ai baita. ⁵Maud̶eeba machi nau iujãad̶ebena jaradea ua b̶uabadaurã juad̶e nuread̶ai panuu kastikabiarãad̶amera. Mau awara ãchi juad̶e nuread̶ai panuu, kuitaa panuud̶eeba maka waud̶ai jipa b̶uu. ⁶Maud̶eeba machiba chi karrarãmaa deabadau nejarra dead̶ai panuu, ãchi Dachi Akõre baita bari trajabadaurã kĩra panuud̶eeba, maud̶e maka waubadaud̶eeba.

⁷Jomaurãmaa deásturu machiba ãchicha dead̶ai panuu kĩra. Machi jaradea ua b̶uabadaurãmaa chi nejarra dead̶ai panuu deásturu. Machiba wapeadee panad̶ai panuu wapeadee panásturu. Machiba chi biꞌia jarad̶ai panuurãmaa biꞌia jarásturu.

⁸Machiba chi dead̶ai panuu uru panuubʉrã, waya dead̶awẽa panarã́sturu. Ab̶aburu chiya kʉ̃ria panásturu. Chi waabenarã kʉ̃ria b̶uuba joma Moisesba b̶ʉd̶a wau b̶uu. ⁹Mau Moisesba b̶ʉd̶ad̶e jara b̶uu: «Junebena miakãid̶a ome kãi b̶eerã́se, mia bearã́se, nechiruarã́se, ab̶auba uru b̶uu kʉ̃riarã́se».13:9 Éxodo 20:13-15,17. Mau bed̶ea maud̶e joma mau Moisesba b̶ʉd̶ad̶e jara b̶uu sid̶a nau kʉ̃risia ab̶ad̶e joma jara b̶uu: «Waabenarã kʉ̃riáse ara bichi kʉ̃ria b̶uu kĩra».13:9 Levítico 19:18.¹⁰Chi kʉ̃ria uru b̶uuba waabenarã kachirua waukau. Waabenarã kʉ̃ria b̶uud̶e joma Moisesba b̶ʉd̶a wau b̶uu.

¹¹Joma mau wau panásturu kuitaa panuud̶eeba nau ewari saka b̶uu. Ʉ̃rʉmásturu. Waa kãi duanarã́sturu. Dachi nau iujãa kachiruad̶ebena karibai aude ara kaita b̶uu dachiba naed̶e ijãaped̶aad̶a audeara. ¹²Nau ewari kachirua wãꞌãemaa b̶uu ẽsabud̶ebena ewarimaa b̶uu kĩra. Maud̶eeba dachiba kachirua ida b̶ud̶aped̶a biꞌia waud̶ai panuu. Maka kachiruad̶ebena joma nu panad̶ai kokoroaba ichi ʉ̃rʉ chaarea b̶uu jʉ̃barii ãyadaa jʉ̃ b̶uu kĩra. ¹³Dachi kĩra jipa nibad̶ai panuu ãyadaa nibabadau kĩra. Kĩrajʉʉ waubadau ewarid̶e biu nibad̶aabai panuu, kĩra nejasia wau nibad̶aabai panuu, oa kachirua berrea panad̶aabai panuu, maud̶e ab̶auba uru b̶uu ʉ̃rʉbena kachirua kʉ̃risiad̶aabai panuu. ¹⁴Maumaarã Dachi Mechiu Jesucristo nibad̶a kĩra nibásturu. Nau kakuaba kachirua wau kʉ̃ria b̶uu waud̶ai kʉ̃risiarã́sturu.

Ãbarã ʉ̃rʉbena kachirua jarad̶aabai panuu

¹Ab̶a ãbaba dachiba Jesucristod̶e ijãa panuu ʉ̃rʉbena wabid̶a ãrea kuitaawẽa b̶uubʉrã, ichi biꞌia irsibísturu. Maamina ichiba adua b̶uu ʉ̃rʉbena ichi ome oa kachirua berrearã́sturu. ²Mʉʉba nau jara b̶uu: chi nuree ãbarãba kuitaa panuu ne joma kod̶ai panuu. Maamina chi nuree ãbarãba dachiba Jesucristod̶e ijãa panuu ʉ̃rʉbena wabid̶a ãrea kuitaawẽa panuud̶eeba kʉ̃risia panuu ab̶aburu ne uu nub̶uud̶ebena kod̶ai panuu. ³Maamina chi ne joma kobariiba chi ne joma kokau ida b̶uubai b̶uu. Maud̶e chi ne joma kokauba ne joma kobariimaa kachirua jaraabai b̶uu, Dachi Akõreba omea biꞌia irsibisiid̶eeba. ⁴¿Bichi kaima maka ab̶au baita bari trajabariimaa kachirua jarai baita? Ichi chibaríburu jarai biꞌia wau b̶uu maebʉrã kachirua wau b̶uu. Maamina Dachi Mechiuba jarai joma ichi baita bari trajabadaurãba biꞌia wau panuu, ichi poyaad̶eeba aid̶a b̶uud̶eeba biꞌia wau panad̶amera.

⁵Maud̶e chi nuree ãbarãba kʉ̃risia panuu bari panabadau ewari aude bibuara b̶uu waabenarã ewari audeara. Waabenarã ãbarãba kʉ̃risia panuu ewari joma arab̶aud̶e panuu. Maamina ãchicha sõd̶eeba kʉ̃risia panuu kĩra, maka waud̶ai panuu. ⁶Chi bari panabadau nubariiba Dachi Mechiu baita maka wau b̶uu.14:6 Griego bed̶ead̶e chi b̶ee kartad̶e nau sid̶a b̶ʉ kub̶uu: Bari panabadau ewari nukauba maka wau b̶uu Dachi Mechiu baita. Chi ne joma kobariiba maka kobarii Dachi Mechiu wapeadee b̶uud̶eeba. Maud̶eeba kooruud̶e ichiba Dachi Akõremaa ichíturu kid̶ibai abarii. Maud̶e chi ne joma kokauba maka kokau Dachi Mechiu wapeadee b̶uud̶eeba. Maud̶eeba kooruud̶e ichia bid̶a Dachi Akõremaa ichíturu kid̶ibai abarii.

⁷Ab̶a bid̶a ara ichid̶eeba chokae b̶uabai. Maud̶e ab̶a bid̶a ara ichid̶eeba biubai. ⁸Chokae panuud̶e Dachi Mechiu baita chokae panuu. Maud̶e biuduud̶e Dachi Mechiu baita biud̶ai. Maka chokae panuubʉrã maebʉrã biuped̶aad̶abʉrã Dachi Mechiud̶ebʉ.

⁹Cristo biusii, biud̶arã Mechiu bai baita. Maud̶e chokae jiradusii, chi chokae nuree Mechiu bai baita. ¹⁰Mau kakua ¿sakãe bichi ãba jidea b̶uma? ¿Sakãe jãu kĩramaa b̶uma? Joma Dachi Akõre daad̶e panad̶ai dachicha wauped̶aad̶a ichiamera.14:10 Dachi Akõre. Griego bed̶ead̶e chi b̶ee kartad̶e naka b̶ʉ kub̶uu: Cristo.¹¹Dachi Akõre bed̶ead̶e naka b̶ʉ kub̶uu:

«Dachi Mechiuba naka jara b̶uu: mʉ biawãra chokae b̶uud̶eeba biawãrad̶eeba jaraaruu jomaurã

mʉ daad̶e õdarrd̶e kopaneed̶ai mʉʉmaa biꞌia berread̶ai baita.

Maud̶e jomaurãba “mʉ Dachi Akõre” a jarad̶ai».14:11 Isaías 45:23.

¹²Maka dachicha wauped̶aad̶a Dachi Akõremaa joma jarad̶ai. ¹³Maud̶eeba ab̶auba wau b̶uu ʉ̃rʉbena waa kachirua berread̶aabai panuu. Maumaarã sõd̶eeba naka kʉ̃risiad̶ai panuu: dachiba wau panuud̶eeba ãba ab̶a bid̶a kachiruad̶e b̶aebid̶aabai panuu. ¹⁴Mʉ Dachi Mechiu Jesucristo ome b̶uud̶eeba biawãra kuitaa b̶uu ab̶a bid̶a chiko kachirua b̶uuwãe. Maamina ab̶auba barikia chiko koi kachirua kʉ̃risiaruubʉrã, ichiba mau koobai b̶uu. ¹⁵Maud̶eeba chi bichiba kobarii kakua bichi ãba ichi sõd̶e kachirua b̶eeruubʉrã, bichi kʉ̃riad̶eeba niiwãe. Chi bichiba kobarii kakua bichi ãba kĩra nomaabirã́se Cristo mau kakua biusiid̶eeba. ¹⁶Machiba wau panuu biꞌia kuitaa panuu. Maamina waabenarãba mau ʉ̃rʉbena kachirua jaraaduubʉrã, waurã́sturu kachirua berrearãad̶amera. ¹⁷Dachi Akõreba ichi juad̶e panuurãmaa jarakau kãare kod̶ai panuu maud̶e kãare dod̶ai panuu. Maumaarã kʉ̃ria b̶uu ãchiba ichi Jaurid̶eeba jipa wau panad̶ai, jirukaraayuwãe panad̶ai maud̶e kĩrajʉʉ panad̶ai. ¹⁸Chi maka Cristo baita ne waubadaurã Dachi Akõreba biꞌia unu b̶uu. Ẽbẽrarã bid̶a mau biꞌia unubadau.

¹⁹Maud̶eeba jʉrʉd̶ai panuu ãbarã ome jirukaraayuwãe nuread̶ai baita. Maka chiya aid̶a panad̶ai biꞌia ijãad̶ai baita. ²⁰Machiba chiko ko panuud̶eeba Dachi Akõreba ab̶au sõd̶e waud̶a ida b̶urã́sturu. Biawãra Dachi Akõre daad̶e chiko joma biꞌia b̶uu. Maamina chi chiko kakua ab̶au kachiruad̶e b̶aebid̶ai biꞌia b̶uuwãe. ²¹Biꞌia b̶uu kiuru koobai, uva b̶aa doobai, maebʉrã ne ab̶a bid̶a waubai bichi ãba kachiruad̶e b̶aebirãamera.

²²Bichiba ne joma koi b̶uu kʉ̃risia b̶uubʉrã, maebʉrã ne joma kokau kʉ̃risia b̶uubʉrã, ab̶a bichiaburu Dachi Akõre omeeba mau kuitaad̶ai panuu. Biawãra dachiba wau panuu kakua dachi sõd̶e kachirua kʉ̃risiad̶awẽebʉrã, ãrea kĩrajʉʉ panad̶ai. ²³Maamina chi «Nau koobai b̶uu» a kʉ̃risia b̶uuba mau kooruubʉrã, ichi sõd̶e kachirua b̶eei, mau kachirua waui b̶uu kʉ̃risia b̶uud̶eeba. Biawãra chi dachiba wau panuu jipa b̶uuwãe a kʉ̃risia panuubʉrã, maka wauduud̶e, kachirua wau panuu.

Waabenarã aid̶ásturu biꞌia panad̶amera

¹Dachiba ijãa panuu ʉ̃rʉbena ãrea kuitaa nureerãba dachiba kʉ̃ria panuu waud̶ai audeara, chi adua nuree aid̶ad̶ai panuu. ²Maumaarã waabenarãba kʉ̃ria panuu waud̶ai panuu maarã biꞌia nuread̶amera maud̶e biꞌia ijãad̶amera. ³Biawãra Cristo bid̶a ara ichiba kʉ̃ria b̶uu waubasii, maumaarã Dachi Akõre bed̶ead̶e b̶ʉ kub̶uu kĩra makasii. Naka b̶ʉ kub̶uu: «Dachi Akõre, ãchiba bichi ʉ̃rʉbena kachirua jarasid̶aud̶e mʉ ʉ̃rʉbena sid̶a kachirua jarasid̶au».15:3 Salmos 69:9.⁴Joma Dachi Akõre bed̶ead̶e b̶ʉd̶a dachimaa jaradeai baita b̶uu. Dachi sõbiabiabarii maud̶e aid̶abarii joma dauchia jãadua panad̶amera. Maka dachiba biawãra kuitaa panuu Dachi Akõre ome ewaricha biꞌia panad̶ai. ⁵Mʉʉba kʉ̃ria b̶uu ara mau dachi sõbia nureabiabarii maud̶e joma dauchia jãadua panabiabarii Dachi Akõreba machi aid̶a b̶uai, arab̶aud̶e kʉ̃risiad̶amera Jesucristoba kʉ̃ria b̶uu kĩra. ⁶Maka machiba Dachi Bajãad̶ebena Mechiu Jesucristo Akõremaa ãbua biꞌia berrea panad̶ai.

Bed̶ea bia Cristo ʉ̃rʉbena judiowãerã baita bid̶a b̶uu

⁷Cristoba machi biꞌia irsibid̶a kĩra, chiya biꞌia irsibísturu. Mau unuuduud̶e ẽbẽrarãba Dachi Akõremaa biꞌia berread̶ai. ⁸Mʉʉba jaraaruu: Cristo neesii dai judiorã karibai baita. Dachi Akõreba judiorã nabẽraed̶ebena chi mechiurã ome bed̶ea dead̶a Cristoba wausii. Mauba unubisii ichiba jara b̶uu kĩra wau b̶uabarii. ⁹Maud̶e Cristo neesii judiowãerãba Dachi Akõremaa biꞌia berread̶amera ãchi kĩra chuburiasiid̶eeba. Mau ʉ̃rʉbena Dachi Akõre bed̶ead̶e naka b̶ʉ kub̶uu:

«Mʉʉba bichi judiowãerã tãed̶e biꞌia berreai. Mʉʉba bichimaa biꞌia karii».15:9 Davidba maka b̶ʉsii Salmos 18:49d̶e.

¹⁰Maud̶e naka b̶ʉ kub̶uu:

«Machi judiowãerã, Dachi Akõre puuru ome kĩrajʉ́sturu».15:10 Deuteronomio 32:43.

¹¹Maud̶e naka b̶ʉ kub̶uu:

«Joma machi judiowãerã, Dachi Mechiumaa biꞌia berreásturu.

Joma puuru b̶ee, ichimaa biꞌia berreásturu».15:11 Salmos 117:1.

¹²Maud̶e Isaiasba ichi kartad̶e naka b̶ʉsii:

«Isaid̶ebena ab̶a neei.15:12 Isaid̶ebena. Isaí judiorã rey David akõre basii. Chi b̶ee kartad̶e Isaí ara mau «Jesé» abadau. Mau puuru b̶ee Mechiu bai.

Judiowãerãba ichid̶e ijãad̶ai joma chi bia esed̶au panuu ãchimaa deamera».15:12 Isaías 11:10.

¹³Joma chi bia dachiba esed̶au panuu Dachi Akõreba deai. Machiba ichid̶e ijãa panuud̶eeba mʉʉba kʉ̃ria b̶uu ichiba machi ãrea kĩrajʉʉbiai maud̶e jirukaraayuwãe duanubiai. Maka Dachi Akõre Jauri poyaad̶eeba machiba biꞌia kuitaad̶ai joma chi bia dachiba esed̶au panuu biawãra adaud̶ai.

Pabloba judiowãerã jaradeabarii

¹⁴Ãbarã, mʉʉba kuitaa b̶uu machiba biꞌia biawãra wau panuu maud̶e ãrea kuitaa panuud̶eeba poyaa chiya jaradead̶ai. ¹⁵Maamina nau kartad̶e mʉʉba chi b̶ee kʉ̃risia b̶ʉsii machiba kĩrabad̶amera. Maka b̶ʉsii Dachi Akõreba ichi sõbiad̶eeba mʉ b̶usiid̶eeba, ¹⁶judiowãerã tãed̶e Jesucristo baita bari trajabarii b̶uamera. Maud̶eeba chi bed̶ea bia Dachi Akõre ʉ̃rʉbena maarãmaa jaradea b̶uu. Ijãaduubʉrã paare judioba ãnimara baa dearuu kĩra mʉʉba ãchi Dachi Akõremaa dea b̶uu biꞌia unumera. Maud̶e Dachi Akõre Jauriba ãchi Dachi Akõre baita biꞌia b̶ui.

¹⁷Jesucristo ome b̶uud̶eeba mʉʉba Dachi Akõre baita wau b̶uu kakua ãrea kĩrajʉʉ b̶uu. ¹⁸Maamina ara mʉ ʉ̃rʉbena ne ab̶a bid̶a biꞌia berreabai. Biꞌia berrearuu Cristoba mʉʉd̶eeba waud̶a ʉ̃rʉbenáturu. Biawãra mʉʉd̶eeba Cristoba aid̶asii judiowãerãba Dachi Akõred̶e ijãad̶amera. Mʉʉba jaradea b̶uud̶eeba, wau b̶uud̶eeba, ¹⁹maud̶e ẽbẽrarãba ne poyaa waud̶akau wau b̶uud̶eeba maka aid̶asii. Mʉʉba Dachi Akõre Jauri poyaad̶eeba joma mau wausii. Jerusalend̶ebena Ilírico druad̶aa bed̶ea bia Cristo ʉ̃rʉbena mʉʉba joma jaradeai b̶uad̶amaa jaradeasii. ²⁰Biawãra chi bed̶ea bia Cristo ʉ̃rʉbena mʉʉba jaradea kʉ̃ria b̶uu chi wabid̶a ũrid̶akaurãmaa. Ab̶auba jaradea b̶uumaa mʉ traja kʉ̃riawẽma. ²¹Maka mʉʉba Dachi Akõre bed̶ead̶e b̶ʉ kub̶uu kĩra wau b̶uu. Naka b̶ʉ kub̶uu:

«Ichi ʉ̃rʉbena jarad̶awẽa panuurãmaa, ãchiba ũrid̶ai. Ichi ʉ̃rʉbena ũrid̶awẽa panuurãba kuitaad̶ai».15:21 Isaías 52:15.

Pablo Romad̶aa wãi kʉ̃risiad̶a

²²Maud̶eeba b̶es ãrea mʉ machimaa wã kʉ̃ria b̶umina poyaa wãwẽa b̶uu. ²³Maamina namaria joma jaradeasiid̶eeba ara nama kaita wãꞌãema sama Cristo ʉ̃rʉbena jaradeai. Ãrea ba b̶uasii mʉ machi ichiad̶e wãi kʉ̃ria b̶uasiid̶eeba, ²⁴España druad̶aa wãaruud̶e machimaa wãi kʉ̃ria b̶uu. Machi baara kĩrajʉʉ b̶uad̶auped̶a kʉ̃ria b̶uu machiba poyaa aid̶ad̶ai mʉ biꞌia wãmera. ²⁵Jãabae mʉ Jerusalend̶aa wãi chi nejarra ẽbẽrarã Dachi Akõred̶erãmaa deai baita. ²⁶Mau chi nejarra ãbarã Macedonia druad̶ebenarãba maud̶e Acaya druad̶ebenarãba kĩrajʉʉ araa pesid̶au ẽbẽrarã Dachi Akõred̶erã Jerusalend̶ebena chi nejarr barauwãe nuree aid̶ad̶ai baita. ²⁷Mau ãbarã judiowãerãba kĩrajʉʉ mau chi nejarra ãbarã judiorã baita araa pesid̶au. Biawãra maka waud̶ai panasid̶au judiorãmaa dead̶ai baraa panasid̶aud̶eeba. Judiowãerãba ne joma biꞌia Dachi Akõre ʉ̃rʉbena judiorãd̶ebena adausid̶aud̶eeba, ãbarã judiorãmaa ne bia nau iujãad̶ebena dead̶ai panuu. ²⁸Mau chi nejarra ãbarã Jerusalend̶ebenarãmaa dearuud̶e mʉ España druad̶aa wãi. Wãaruud̶e machimaa wãi. ²⁹Mʉʉba kuitaa b̶uu machimaa neeruud̶e Cristoba dachi ãrea aid̶ai.15:29 Cristoba. Griego bed̶ead̶e chi b̶ee kartad̶e b̶ʉ kub̶uu: bed̶ea bia Cristo ʉ̃rʉbena.

³⁰Ãbarã, Dachi Akõre Jaurid̶eeba dachi chiya kʉ̃ria panuu. Maud̶eeba Dachi Mechiu Jesucristod̶eeba mʉʉba machimaa chi chuburia id̶iiruu mʉ aid̶ad̶ai Dachi Akõremaa ʉtaa id̶id̶amera. ³¹Ichimaa ʉtaa id̶ísturu Judea druad̶ebena Jesusd̶e ijãad̶akaurãba mʉ kachirua waurãad̶amera. Maud̶e ʉtaa id̶ísturu mʉʉba chi nejarra ẽbẽrarã Dachi Akõred̶erã Jerusalend̶ebenarã baita adoeruu biꞌia adaud̶amera. ³²Maka Dachi Akõreba kʉ̃riaruubʉrã, mʉ machimaa kĩrajʉʉ wãi maud̶e machi tãed̶e biꞌia kʉrrjĩru b̶uai. ³³Mʉʉba kʉ̃ria b̶uu chi Dachi Akõre dachi jirukaraayuwãe duanabiabarii joma machi baara b̶uai. Biꞌia b̶uu maka b̶uai.

Pabloba nau kartad̶e aanama b̶ʉd̶a

¹Mʉʉba machimaa dachi neekau Febe ʉ̃rʉbena biꞌia jaraaruu. Ichi Cencrea puurud̶e ijãabadaurã aid̶abariibʉ.16:1 Ijãabadaurã aid̶abariibʉ. Griego bed̶ead̶e naka b̶ʉ kub̶uu: diácono. Febe wẽra basii. Maud̶eeba kajuma bed̶ead̶e «diaconisa» a jarabadau.²Dachi Mechiu trʉ̃d̶eeba biꞌia irsibísturu ẽbẽrarã Dachi Akõred̶erãba waud̶ai panuu kĩra. Ichiba ẽbẽrarã ãrea aid̶asii. Mʉ sid̶a ãrea aid̶asii. Maud̶eeba ne jomad̶e ichi aid̶ásturu.

³Neekau Priscilamaa maud̶e ãba Aquilamaa jarásturu mʉʉba kʉ̃ria b̶uu maarã biꞌia panad̶ai. Ãchiba mʉ ome arab̶au traju Jesucristod̶e wau panuu. ⁴Beraa biukausid̶au mʉ aid̶ad̶ai baita. Mʉʉba maud̶e joma ãbarã judiowãerãba ãchimaa ãchíturu kid̶ibai abadau. ⁵Maud̶e ãbarã ãchi ded̶e araa ãbua imibadaurãmaa jarásturu mʉʉba kʉ̃ria b̶uu ãchi biꞌia duanad̶ai. Mʉ ãba ãrea kʉ̃ria b̶uu Epenetomaa ara mau kĩra jarásturu. Acaya druad̶e ichiba naa Jesucristod̶e ijãasii. ⁶Neekau Mariamaa jarásturu mʉʉba kʉ̃ria b̶uu ichi biꞌia b̶uai. Ichiba machi ãrea aid̶a b̶uu. ⁷Mʉ ãbarã judiorã Andronicomaa maud̶e Juniamaa ara mau kĩra jarásturu. Waabenarã biꞌia kuitaa panuu maarã Cristoba bʉid̶arã. Mʉʉba Cristod̶e ijãai naed̶e maarãba ijãasid̶au.

⁸Mʉ ãba Ampliasmaa jarásturu mʉʉba kʉ̃ria b̶uu ichi biꞌia b̶uai. Dachi Mechiu Jesucristod̶e, mʉʉba ichi ãrea kʉ̃ria b̶uu. ⁹Ãba Urbanomaa jarásturu mʉʉba kʉ̃ria b̶uu ichi biꞌia b̶uai. Ichiba dai ome ãbua Jesucristo ʉ̃rʉbena jaradea b̶uu. Ãba Estaquismaa bid̶a ara mau jarásturu. Ichi sid̶a mʉʉba kʉ̃ria b̶uu. ¹⁰Ãba Apelesmaa jarásturu mʉʉba kʉ̃ria b̶uu ichi biꞌia b̶uai. Ichiba unubisii Cristo biawãra ijãa b̶uu. Joma Aristóbulo ded̶ebenarãmaa bid̶a ara mau kĩra jarásturu. ¹¹Mʉ ãba judio Herodionmaa jarásturu mʉʉba kʉ̃ria b̶uu ichi biꞌia b̶uai. Narciso ded̶ebenarã Dachi Mechiud̶e ijãa nureerãmaa jarásturu mʉʉba kʉ̃ria b̶uu ãchi biꞌia duanad̶ai. ¹²Neekau Trifenamaa maud̶e Trifosamaa jarásturu mʉʉba kʉ̃ria b̶uu maarã biꞌia panad̶ai. Ãchiba Dachi Mechiu baita biꞌia wau panuu. Maud̶e neekau Persidamaa ara mau jarásturu. Mauba Dachi Mechiu baita biꞌia wau b̶uu. ¹³Ãba Rufo Dachi Mechiuba jʉrʉ adaud̶amaa maud̶e ichi nawemaa jarásturu mʉʉba kʉ̃ria b̶uu maarã biꞌia panad̶ai. Ichi nawe mʉ nawe kĩra nii. ¹⁴Ãba Asincritomaa, Flegontemaa, Hermesmaa, Patrobasmaa, Hermasmaa maud̶e ãbarã ãchi ome duanuumaa jarásturu mʉʉba kʉ̃ria b̶uu ãchi biꞌia duanad̶ai. ¹⁵Maud̶e ãba Filologomaa, Juliamaa, Olimpasmaa, Nereomaa, ichi neekaumaa maud̶e joma ẽbẽrarã Dachi Akõred̶erã ãchi ome duanuumaa jarásturu mʉʉba kʉ̃ria b̶uu ãchi biꞌia duanad̶ai. ¹⁶Biawãra kʉ̃riad̶eeba chiya biꞌia berreásturu.16:16 Biawãra kʉ̃riad̶eeba chiya biꞌia berreásturu. Griego bed̶ead̶e naka b̶ʉ kub̶uu: kĩedarr ʉ̃yásturu. Joma Cristo ẽbẽrarãba kʉ̃ria panuu machi biꞌia duanad̶ai.

¹⁷Ãbarã, mʉʉba machimaa chi chuburia id̶iiruu kauwa nuread̶amera. Waabenarãba ãbarãmaa aꞌawaraa kʉ̃risiabiabadau. Chi machiba biawãra bed̶ea kuitaaped̶aad̶a ãchiba ãyaa jaradeabadau. Mau ẽbẽrarã ome ãbua panarã́sturu. ¹⁸Maarãba Dachi Mechiu Jesucristoba kʉ̃ria b̶uu wau panuuwãe, maumaarã ãchiba kʉ̃ria panuu wau panuu. Ãchi mipitaa berrea panuud̶eeba, chi biꞌia kʉ̃risiad̶awẽa nuree setaa kũruabadau.

¹⁹Jomaurãba kuitaa panuu machiba Dachi Akõre bed̶ea biawãra wau panuu. Maud̶eeba mʉ kĩrajʉʉ b̶uu. Biawãra mʉʉba kʉ̃ria b̶uu machiba biꞌia waud̶ai kuitaad̶ai maud̶e kachirua waud̶aabai. ²⁰Chi dachi jirukaraayuwãe b̶uabiabarii Dachi Akõreba kãꞌãabariwãed̶e Satanás poyaaped̶a machi juad̶e b̶ui.16:20 Satanás poyaaped̶a machi juad̶e b̶ui. Griego bed̶ead̶e naka b̶ʉ kub̶uu: jʉbawãe nii machi jʉ̃rʉ ekare berdʉai. Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi aid̶a b̶uai.

²¹Ãba Timoteo mʉ ome ãbua jaradea b̶uuba kʉ̃ria b̶uu machi biꞌia duanad̶ai. Maud̶e mʉ ãbarã judiorã Lucioba, Jasonba maud̶e Sosipateroba kʉ̃ria panuu machi biꞌia duanad̶ai.

²²Mʉ Terciobʉ. Pabloba berrea b̶uu mʉʉba nau kartad̶e b̶ʉmaa b̶uu. Dachi Mechiu Jesucristod̶eeba mʉʉba kʉ̃ria b̶uu machi biꞌia duanad̶ai.

²³Ãba Gayo bid̶a kʉ̃ria b̶uu machi biꞌia duanad̶ai. Mʉ ichi ded̶e b̶uu. Ãbarã jomaurã ichi ded̶e araa ãbua imi panuu. Nau puurud̶ebena chi nejarra nubarii Erastoba maud̶e ãba Cuarto kʉ̃ria panuu machi biꞌia duanad̶ai.

²⁴Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi aid̶a b̶uai.

Pabloba Dachi Akõremaa biꞌia jarad̶a

^25-26Mʉʉba chi bed̶ea bia Jesús ʉ̃rʉbena jaradea b̶uabarii. Ara mau bed̶ead̶eeba Dachi Akõreba machi poyaa aid̶ai chaarea nuread̶amera. Mau bed̶ea Dachi Akõreba naed̶e kuitaabiawẽa b̶uasii maamina id̶ibae kuitaabiasii. Ichi baita berreabadaurãba mau kartad̶e b̶ʉsid̶au. Dachi Akõre biukauba maka b̶ʉbiasii druachad̶ebenarãba ũrid̶aped̶a Jesucristod̶e ijãad̶amera. Dachi Akõremaa biꞌia berread̶ai panuu. ²⁷Ichi ab̶aburu nii. Ne joma kuitaa nii. Jesucristod̶eeba dachiba ewaricha ichimaa biꞌia berread̶ai panuu. Biꞌia b̶uu maka b̶uai.