APOCALIPSIS

Apocalipsis

Jesucristoba Juanmaa unubid̶a

Jesús baara nibad̶a Juanba nau karta b̶ʉsii. Año 95d̶e b̶ʉsii. Griego bed̶ead̶e Apocalipsis jara b̶uu «unubid̶a».

Domitiano abadau año 81d̶ebena ab̶a 96d̶aa Romad̶ebena chi aude mechiu nibasii. Mau ewarid̶e ley ab̶a b̶ʉsid̶au jomaurãba Romad̶ebena chi aude mechiu niimaa biꞌia berread̶ai panuu, Dachi Akõremaa biꞌia berreabadau kĩra. Maka wauwẽa b̶uu kakua Juan jʉ̃a uru panasid̶au.

Maud̶e Jesucristoba Juanmaa nau karta b̶ʉbisii 7 puurud̶ebena ãbarã baita. Jesusba b̶ʉbid̶a Juanmaa joma unubisii. Juanba Jesusd̶e ijãabadaurãmaa unubiasii Jesús biawãra ãchi ome b̶uu maud̶e kãꞌãabariwãed̶e chi kĩramaabadaurã joma poyaai. Jarasii Jesucristo neeruud̶e Dachi Akõreba jʉbawãe nii maud̶e joma ichid̶irã tʉbʉchia kiikaud̶e baakuai. Maud̶e jarasii jʉbawãe niiba Cristod̶erã bearuubʉrã ewaricha Dachi Akõre puurud̶e biꞌia duanad̶ai.

Dachiba nau kʉ̃risia mechiu 2:10d̶e b̶ʉ kub̶uu kĩrabad̶ai panuu: «Chi machi kãꞌãabariwãed̶e biꞌiwãe panad̶ai ewari wapearã́sturu. ¡Ũrísturu! Chi jʉbawãe niiba machid̶ebena chi nuree jʉ̃a bʉikai ijãa panuu kuitaayua. Ewari 10 ãrea biꞌiwãe panad̶ai.1:0 Ewari 10 ãrea biꞌiwãe panad̶ai. Mau jara b̶uu aa mamaburu makai. Maamina biuduud̶aa ijãa panásturu. Maud̶e mʉʉba machimaa boro jũra dearuud̶e ewaricha chokae nibabiai».

Nau kartad̶e Juanba naa b̶ʉd̶a

¹Mʉ Jesucristo baita bari trajabarii Juanbʉ. Nau kartad̶e b̶ʉ b̶uu Jesucristoba bajãad̶ebena mʉʉmaa unubid̶a. Mau Dachi Akõreba Jesucristomaa unubisii ichid̶e ijãa nureerãmaa unubiamera kãꞌãabariwãed̶e kãare sãai b̶uu.1:1 Ichid̶e ijãa nureerãmaa. Griego bed̶ead̶e naka b̶ʉ kub̶uu: Chi chibari baita bari trajabadaurãmaa. Jesucristoba ángel mʉʉmaa bʉisii mau unubimera. ²Joma mʉʉba unud̶a biawãra jara b̶uu. Mʉʉba jara b̶uu nau bed̶ea Dachi Akõred̶ebena nee b̶uu maud̶e Jesucristoba biawãra unubisii. ³Chi mau Dachi Akõre baita berreabarii bed̶ea ãbarã daad̶e ed̶a jaraaruu ãrea biꞌia b̶uai. Maud̶e chi nau bed̶ea ũrid̶aped̶a wau nuree ãrea biꞌia nuread̶ai, kãꞌãabariwãed̶e makaid̶eeba.

Ãbarã Asia druad̶ebena baita Juanba b̶ʉd̶a

⁴Mʉ Juanbʉ. Nau karta b̶ʉmaa b̶uu ãbarã Asia druad̶e 7 puurud̶ebenarã baita. Mʉʉba kʉ̃ria b̶uu Dachi Akõreba ichi sõbiad̶eeba machi aid̶a b̶uai maud̶e jirukaraayuwãe b̶uabiai. Mau chi nibad̶abʉ, chi niibʉ maud̶e chi neei baita b̶uubʉ. Maud̶e mʉʉba kʉ̃ria b̶uu Dachi Akõre rey ãkau bia b̶uu daad̶e 7 jauri panuuba maka wau panad̶ai.1:4 7 jauri panuuba. Waabenarãmaarã, mau 7 jauri panuu Dachi Akõre Jauri maka b̶uu. Maud̶e waabenarãmaarã, mau jauri 7 panuu angelerã chi mechiu maka nuree.⁵Maud̶e kʉ̃ria b̶uu Jesucristo bid̶a maka wau b̶uai. Ichiba Dachi Akõre ʉ̃rʉbena biawãra jarabarii. Biu b̶uad̶a naa chokae jiradusii, joma nau iujãad̶ebena chi reyrã audeara chi mechiu nii b̶uai baita. Mauba dachi kʉ̃ria b̶uu maud̶e ichi oad̶eeba kachiruad̶ebena karibasii. ⁶Dachi b̶usii Dachi Akõreba ichi juad̶e paare nuread̶amera.1:6 1 Pedro 2:9. Maka ichi Bajãad̶ebena Akõreba kʉ̃ria b̶uu wau panad̶ai. Maumaa biꞌia berread̶ai panuu. Biꞌia b̶uu mau ewaricha jomaurã Mechiu b̶uai. Biawãra biꞌia b̶uu maka b̶uai.1:6 Biawãra biꞌia b̶uu maka b̶uai. Griego bed̶ead̶e naka b̶ʉ kub̶uu: amén.

⁷Ichiásturu. Cristo jʉ̃rʉarad̶e neei. Maud̶e jomaurãba unud̶ai. Ichi suped̶aad̶a bid̶a unud̶ai.

Ichi unuuduud̶e joma nau iujãad̶ebena jẽad̶ai.1:7 Mateo 24:30; Juan 19:34-37. Biawãra maka b̶uai.

⁸Dachi Mechiuba jarasii: «Mʉ chi Joma Poyaabarii Dachi Akõrebʉ, chi Alfabʉ maud̶e chi Omegabʉ.1:8 Griego alfabetod̶e alfa chi nabena letrabʉ, omega chi kaad̶ebena letrabʉ. Mau jara b̶uu mʉ chi nabenabʉ maud̶e chi kaad̶ebenabʉ. Mʉ chi nibad̶abʉ, chi niibʉ maud̶e chi neei baita b̶uubʉ».

Juanba Cristo unud̶a

⁹Mʉ machi ãba Juanbʉ. Dachi Jesucristo ome panuud̶eeba mʉ machi ome Dachi Akõre juad̶ebenarãbʉ, machi ome ãrea biꞌiwãe b̶uu, maud̶e machi ome joma dauchia jãadua b̶uu.

Dachi Akõre bed̶ea jaradea b̶uu kakua maud̶e Jesús ʉ̃rʉbena biawãra a b̶uu kakua mʉ Patmos islad̶e b̶usid̶au. ¹⁰Dachi Mechiu ewarid̶e mʉ Dachi Akõre Jaurid̶eeba b̶uasii.1:10 Dachi Mechiu ewarid̶e. Jesús chokae jiradusiid̶eed̶ebena misacha ãbarãba ichi chokae jiradud̶a ʉ̃rʉbena kĩrababadau. Maud̶e mʉ kaad̶eeba ab̶a mimi jĩwa berrea b̶uu ũrisii. Ichi bed̶ea kachu jĩwabarii kĩra ũrisii. ¹¹Mauba jarasii: «Bichiba unuuruu kartad̶e b̶ʉped̶a ãbarã 7 puuru b̶eed̶e duanuurãmaa urubʉise: Efesod̶aa, Esmirnad̶aa, Pergamod̶aa, Tiatirad̶aa, Sardisd̶aa, Filadelfiad̶aa maud̶e Laodicead̶aa».1:11 Griego bed̶ead̶e chi b̶ee kartad̶e nau sid̶a b̶ʉ kub̶uu: Mʉ chi Alfabʉ maud̶e chi Omegabʉ. Mau jara b̶uu mʉ chi nabena maud̶e chi kaad̶ebena.

¹²Maud̶e mʉʉba waya ichiasii kai berrea b̶uu kuitaa. Ichiasiid̶e 7 ʉ̃d̶aa koabarii nee waud̶a unusii. ¹³Mau 7 ʉ̃d̶aa koabarii ẽsa, chi Ẽbẽra Ba B̶uad̶a kĩra nii unusii.1:13 Chi Ẽbẽra Ba B̶uad̶a. Daniel 7:13. Paru jʉ̃rʉd̶eed̶e deseroa jʉ̃ b̶uasii. Ichi pechud̶e nee waud̶a paraa jʉ̃ b̶uasii. ¹⁴Ichi bud̶a meraa torroa b̶uasii oeja kara kĩra maebʉrã nieve kĩra. Ichi dau tʉbʉ aokooruu kĩra b̶uasii. ¹⁵Ichi jʉ̃rʉ bronce tʉbʉd̶e kub̶ud̶akare urua kub̶uu kĩra b̶uasii. Ichi bed̶ea do ãrea cheeruu kĩra jĩwa b̶uasii. ¹⁶Ichi jua biare pusterrea 7 uru b̶uasii. Ichi okarrd̶ebena espada kid̶a muriacha peed̶ea era b̶uu neesii. Ichi kĩedarr ʉmada ted̶echoa kĩra b̶uasii.

¹⁷Ichi unusiid̶e ichi jʉ̃rʉ kaita peraba jeed̶a b̶ari b̶eesii. Maamina ichi jua bia mʉ ʉ̃rʉ kub̶uped̶a jarasii: «Perarã́se. Mʉ chi nabenabʉ maud̶e kaad̶ebenabʉ. ¹⁸Mʉ chi Chokae Nima. Mʉ biud̶amina ichiáse chokae nii, maud̶e ewaricha chokae nibai. Mʉa chi biud̶arã poyaa chokae jiradubiai b̶uu.1:18 Mʉa chi biud̶arã poyaa chokae jiradubiai b̶uu. Griego bed̶ead̶e naka b̶ʉ kub̶uu: Mʉa ẽbẽrarã biud̶ai ʉ̃rʉbena llave uru b̶uu. Chi biuped̶aad̶a panuumaabena llave uru b̶uu.¹⁹Bichiba unu b̶uu karta ab̶ad̶e b̶ʉse. Id̶ibae makamaa b̶uu ʉ̃rʉbena maud̶e chi kaad̶ebena ewarid̶e makai ʉ̃rʉbena b̶ʉse. ²⁰Mʉʉba unubiiruu chi 7 pusterrearã bichiba mʉ jua biare uru b̶uu unud̶a kãare jara b̶uu maud̶e kãare jara b̶uu lámpararã nee waud̶a. Mau 7 lámpararã jara b̶uu chi angelerã. Mau 7 panuuba ãbarã 7 puurud̶e duanuu nubadaurãbʉ. Ãchi ab̶aab̶aa chi ãbarã puurucha nubadau. Chi 7 lámpararã jara b̶uu chi 7 puurud̶ebena ãbarã.

Cristoba chi ãbarã Efesod̶ebenarã baita b̶ʉbid̶a

¹»Chi Éfeso puurud̶ebena ijãabadaurã nubarii ángel baita kartad̶e naka b̶ʉse:

»Chi jua biare 7 pusterrea uru b̶uuba maud̶e 7 lámpara nee waud̶a tãed̶e niiba naka jara b̶uu:

²»Mʉʉba machiba wau panuu kuitaa b̶uu. Mʉ baita ãrea traja panuu maud̶e ãrea biꞌiwãe panuud̶e joma dauchia jãadua panuu kuitaa b̶uu. Machiba chi kachirua waubadaurãmaa ida kabid̶akau kuitaa b̶uu. Chi nuree machimaa wãd̶aped̶a maabae Jesucristoba bʉid̶arã abachid̶au.2:2 Jesucristoba bʉid̶arã abachid̶au. Griego bed̶ead̶e naka b̶ʉ kub̶uu: apóstoles. Maamina machiba kauwa ichia panuud̶eeba kuitaasid̶au maarã chi seta nuree. ³Machi mʉ kakua ãrea biꞌiwãe panuud̶e joma dauchia jãadua panuu maud̶e kĩrajaab̶ariwẽa mʉ baita biꞌia traja panuu. ⁴Maamina mʉʉba nau miadaa unu b̶uu: chi kʉ̃ria machiba naed̶e uru panad̶a id̶i jãabae ãrea uru panuuwãe. ⁵Maud̶eeba kĩrabásturu machiba naed̶e kʉ̃ria uru panad̶a.2:5 Griego bed̶ead̶e naka b̶ʉ kub̶uu: Kĩrabásturu samareeba b̶aesid̶au. Waya Dachi Akõremaa nésturu. Chi bia wáusturu naed̶e waubachid̶au kĩra. Dachi Akõremaa need̶awẽebʉrã, mʉʉba machi kastikad̶e wãi.2:5 Machi kastikad̶e wãi. Griego bed̶ead̶e chi b̶ee kartad̶e naka b̶ʉ kub̶uu: Kãꞌãabariwãed̶e mʉʉba machi kastikad̶e wãi. Maud̶e machi lámpara ãyaa b̶ui. ⁶Maamina nau biꞌia wau panuu: chi Nicolaitasd̶e ijãabadaurãba kachirua waubadau machiba kʉ̃riad̶akau. Mʉa bid̶a mau kʉ̃riakau. ⁷Chi kʉʉrʉ bara niiba ũrise chi Jauriba ãbarãmaa jara b̶uu. Chi kachirua waud̶ai poyaa ida b̶uped̶aad̶amaa chi nejõo bakuru chokae nibabiabariid̶ebena koi ida kabii. Mau bakuru Dachi Akõre drua biad̶e nub̶uu.

Cristoba ãbarã Esmirnad̶ebena baita b̶ʉbid̶a

⁸»Chi Esmirna puurud̶ebena ijãabadaurã nubarii ángel baita kartad̶e naka b̶ʉse:

»Chi Nabena maud̶e Kaad̶ebena, chi biud̶a bad̶a waya chokae niiba naka jara b̶uu:

⁹»Mʉʉba machiba wau panuu kuitaa b̶uu.2:9 Mʉʉba machiba wau panuu kuitaa b̶uu. Griego bed̶ead̶e chi b̶ee kartad̶e mau wãꞌãe. Ãrea biꞌiwãe panuu maud̶e chi nejarr barauwãe nuree kuitaa b̶uu. Maamina Dachi Akõred̶eeba machi ne bara nuree. Maka panumina machi Dachi Akõred̶eeba chi nejarr barau nuree kĩra nuree. Mʉʉba kuitaa b̶uu chi nuree judiorãba machi ʉ̃rʉbena miadaa berreabadau. Maarãba Dachi Akõred̶erã2:9 Dachi Akõred̶erã. Griego bed̶ead̶e naka b̶ʉ kub̶uu: judiorã. abadamina Satanasd̶ebʉ.2:9 Satanasd̶ebʉ. Griego bed̶ead̶e naka b̶ʉ kub̶uu: Jʉbawãe nii ome judiorã araa ãbua imibadau ded̶ebenarãbʉ.¹⁰Chi machi kãꞌãabariwãed̶e biꞌiwãe panad̶ai ewari wapearã́sturu. ¡Ũrísturu! Chi jʉbawãe niiba machid̶ebena chi nuree jʉ̃a bʉikai ijãa panuu kuitaayua. Ewari 10 ãrea biꞌiwãe panad̶ai.2:10 Ewari 10 ãrea biꞌiwãe panad̶ai. Mau jara b̶uu aa mamaburu makai. Maamina biuduud̶aa ijãa panásturu. Maud̶e mʉʉba machimaa boro jũra dearuud̶e ewaricha chokae nibabiai. ¹¹Chi kʉʉrʉ bara niiba ũrise Dachi Akõre Jauriba ãbarãmaa jara b̶uu. Chi kachirua waud̶ai poyaaped̶aad̶a ewaricha Dachi Akõred̶ebena awara nuread̶aabai.2:11 Ewaricha Dachi Akõred̶ebena awara nuread̶aabai. Griego bed̶ead̶e naka b̶ʉ kub̶uu: B̶es ome biud̶aabai.

Cristoba ãbarã Pérgamod̶ebena baita b̶ʉbid̶a

¹²»Chi Pérgamo puurud̶ebena ijãabadaurã nubarii ángel baita kartad̶e naka b̶ʉse:

»Chi espada kid̶a muriacha peed̶ea era b̶uu iniiba naka jara b̶uu:

¹³»Machiba wau panuu mʉʉba kuitaa b̶uu.2:13 Machiba wau panuu mʉʉba kuitaa b̶uu. Griego bed̶ead̶e chi b̶ee kartad̶e mau wãꞌãe. Maud̶e kuitaa b̶uu machi panabadaumare Satanás chi rey ãkaud̶e akʉ b̶uu.2:13 Satanás chi rey ãkaud̶e akʉ b̶uu. Juanba Pérgamo puuru «chi jʉbawãe nii ãkau» a b̶uu, aria chi Romad̶ebena chi aude mechiu maud̶e griegod̶ebena Dachi Akõre kuenda juaba ne kaped̶aad̶amaa ʉtaa id̶ibachid̶aud̶eeba. Maamina machi wabid̶a mʉ baara nibabadau. Chi Satanasd̶erãba chi ãba Antipas beasid̶aud̶e mʉ kakua biawãra berreasiid̶eeba, machi mʉʉd̶e ijãad̶ai ida b̶ud̶aabasii. ¹⁴Maamina mʉʉba nau miadaa unu b̶uu. Machid̶ebena chi nureeba Balaanba jaradead̶a ũri panuu.2:14 Números 22:1—25:3; 31:16. Balaanba Balacmaa jaradea b̶uasii israeld̶ebenarã kachiruad̶e saka b̶aebiai b̶uu. Mauba chi Dachi Akõre kuenda juaba ne kaped̶aad̶amaa baa deabadau kiuru kobiabachii maud̶e dachi kakuaba barikiu kachirua waubiabachii. ¹⁵Maud̶e machid̶ebena chi nureeba Nicolasba jaradead̶a ũri panuu. Mau jaradeabadau mʉʉba kʉ̃riakau.2:15 Mau jaradeabadau mʉʉba kʉ̃riakau. Griego bed̶ead̶e chi b̶ee kartad̶e mau wãꞌãe.¹⁶Maud̶eeba waya Dachi Akõremaa nésturu. Mau makad̶awẽebʉrã, kãꞌãabariwãed̶e mʉ machi kastikad̶e wãi. Maud̶e espada mʉ okarrd̶ebena neeruuba mau ẽbẽrarã ome chĩo b̶uai. ¹⁷Chi kʉʉrʉ bara niiba ũrise chi Dachi Akõre Jauriba ãbarãmaa jara b̶uu. Chi kachirua waui poyaad̶amaa mʉʉba chi maná2:17 Maná. Dachi Akõreba bʉid̶a pan basii. Éxodo 16:31-34. mera b̶uad̶a deai komera maud̶e mokara torroa b̶uu sid̶a ab̶a deai. Mau mokara kaebe b̶uumaa trʉ̃ wid̶i b̶ʉ kub̶uu.2:17 Mau mokara kaebe b̶uu. Mau mokara jara b̶uu boleta Bajãad̶aa wãi baita adaui. Ab̶au bid̶a mau trʉ̃ adua b̶uu. Chi adaurúburu mau trʉ̃ kuitaai.

Cristoba ãbarã Tiatirad̶ebena baita b̶ʉbid̶a

¹⁸»Chi Tiatira puurud̶ebena ijãabadaurã nubarii ángel baita kartad̶e naka b̶ʉse:

»Dachi Akõre Warr dau tʉbʉ aokooruu kĩra b̶uu, maud̶e jʉ̃rʉ bronce tʉbʉd̶e kub̶ud̶akare urua kub̶uu kĩra b̶uu. Ichiba naka jara b̶uu:

¹⁹»Machiba wau panuu mʉʉba kuitaa b̶uu. Machi kʉ̃riabadau, mʉʉd̶e ijãabadau, mʉ baita waubadau, maud̶e dauchia jãadua panabadau kuitaa b̶uu. Maud̶e kuitaa b̶uu machiba naed̶e wau panad̶a audeara bibuara wau panuu. ²⁰Maamina mʉʉba nau miadaa unu b̶uu: Machiba wẽra Jezabel abadauba chi setaa jaradea b̶uu ida kabi panuu.2:20 Jezabel. Bia kuitaad̶awẽa panuu kai basii. Jãu wẽraba chi waabenarã Tiatirad̶ebena ãbarãmaa kachirua waubiabachii sãabaiba, chi nabẽra Jezabelba chi mukĩra rey Acabmaa maka waubibachii kĩra. 1 Reyes 16:29-31; 18:4,19; 2 Reyes 9:22. Ara mauba Dachi Akõre baita berreabarii abarii. Maamina chi mauba jaradea b̶uud̶eeba mʉ baita bari trajabadaurã setaa kũrua b̶uu kĩra dachi kakuaba barikiu kachirua wau panad̶amera maud̶e kiuru Dachi Akõre kuenda juaba ne kaped̶aad̶amaa baa deabadau kod̶amera. ²¹Mʉʉba esed̶au b̶uasii jãuba chi kakuaba barikiu kachirua wau b̶uu ida b̶uped̶a Dachi Akõremaa neemera. Maamina mau kachirua ida b̶ui kʉ̃riabasii. ²²Maud̶eeba mʉʉba jãu wẽra chi kakua pira baraa kʉd̶ad̶e b̶ari b̶ui. Maud̶e joma chi jãu ome kachirua waubadaurãba ara mau wẽra kĩra kachirua wau panuu ida b̶ud̶awẽebʉrã biꞌiwãe panabiai. ²³Mʉʉba chi warrarã kinibiai. Maka joma ãbarãba kuitaad̶ai mʉʉba jomaurã kʉ̃risia kuitaa nii maud̶e chi sõd̶eeba wau kʉ̃ria panuu. Mʉʉba machiba wauped̶aad̶a kĩra kastikai. ²⁴Maamina chi nuree machid̶ebena Tiatirad̶ebenarãba jãu wẽraba jaradea b̶uu ũrid̶awẽa panuu. Mau awara machiba chi “Satanasba mera ua b̶uu” abadau jʉrʉd̶awẽa panuu kuitaad̶ai baita. Mʉʉba june maucha waubiawẽe, ²⁵bari dauchia jãadua panuud̶e, mʉʉd̶e ijãa panad̶ai mʉ neeruud̶aa. ^26-27Chi kachirua waud̶ai poyaaped̶aad̶arã maud̶e chi mʉʉba kʉ̃ria b̶uu ewaricha wauped̶aad̶arã, mʉʉba puuru jomad̶e chi karrarã b̶ui mʉ chachaba mʉ jomaurã karr b̶usii kĩra. Maud̶e kĩra chuburiad̶awẽa joma nau iujãad̶ebenamaa ichid̶e ijãabia b̶uai.2:26-27 Kĩra chuburiad̶awẽa joma nau iujãad̶ebenamaa ichid̶e ijãabia b̶uai. Griego bed̶ead̶e naka b̶ʉ kub̶uu: Jiorrba waubii. Maarãba jomaurã poyaa panad̶ai kuuru ãribarii kĩra.2:26-27 Salmos 2:9.²⁸Mʉʉba maarãmaa chi ewarimaabena pusterrea deai.2:28 Ewarimaabena pusterrea. Mau jara b̶uu Cristo ichid̶irã baara b̶uu. Apocalipsis 22:16.²⁹Chi kʉʉrʉ bara niiba ũrise Dachi Akõre Jauriba ãbarãmaa jara b̶uu.

Cristoba ãbarã Sardisd̶ebena baita b̶ʉbid̶a

¹»Chi Sardis puurud̶ebena ijãabadaurã nubarii ángel baita kartad̶e naka b̶ʉse:

»Chi Dachi Akõre daad̶e 7 jauri uru b̶uuba3:1 Waabenarãmaarã mau 7 jauri panuuba jara b̶uu Dachi Akõre Jauri. Maud̶e waabenarãmaarã jara b̶uu angelerã chi mechiu. maud̶e 7 pusterrea uru b̶uuba naka jara b̶uu:

»Machiba wau panuu mʉʉba kuitaa b̶uu. Ẽbẽrarãba jara panuu machiba Dachi Akõre ãrea ijãa panuud̶eeba chokae nuree. Maamina biawãra ara machiba Dachi Akõred̶e ijãad̶awẽa panuud̶eeba chi biud̶arãbʉ. ²¡Kauwa ichiásturu! Mʉʉba unu b̶uu machiba wau panuu Dachi Akõre daad̶e jipawãe b̶uu. Maud̶e chi naed̶e biꞌia wau panad̶a machiba beraa ida b̶uumaa panuu. Maamina mau waya mau biꞌia wáusturu. ³Chi biawãra bed̶ea machiba ũriped̶aad̶a kĩrabásturu. Mau ãrea ijã́sturu. Kachirua ida b̶ud̶aped̶a Dachi Akõremaa waya nésturu. Machi kauwa nibabadauwãebʉrã mʉ kãꞌãabariwãed̶e neei machi kastikai baita nechiru kãꞌãabariwãed̶e neebarii kĩra. ⁴Maamina machi Sardisd̶ebena b̶aꞌãra barau chi kachiruad̶e panabadauwãe, machi paru jayoaswãe panuu kĩra. Machi mʉ baara ãbua nibad̶ai baita biꞌia panuud̶eeba, paru torroa jʉ̃ʉduud̶e mʉ baara nibad̶ai. ⁵Chi kachirua waud̶ai poyaaped̶aad̶arãba ara mau kĩra paru torroa jʉ̃d̶ai. Ãchi trʉ̃ chi ewaricha chokae duanabarii kartad̶e b̶ʉ kub̶uud̶eeba mʉʉba mau jareebai. Maumaarã mʉ Chacha daad̶e maud̶e chi angelerã daad̶e ãchi mʉʉd̶erã ai. ⁶Chi kʉʉrʉ bara niiba ũrise Dachi Akõre Jauriba ãbarãmaa jara b̶uu.

Cristoba ãbarã Filadelfiad̶ebena baita b̶ʉbid̶a

⁷»Chi Filadelfia puurud̶ebena ijãabadaurã nubarii ángel baita kartad̶e naka b̶ʉse:

»Mau chi Ara Dachi Akõre Báitaburu Nii, Chi Biawãra Bed̶ea Ab̶a B̶uu, chi David puuru mechiu niibʉ.3:7 David puuru. Mau jara b̶uu «Dachi Akõreba puuru». Puuru mechiu nii. Griego bed̶ead̶e naka b̶ʉ kub̶uu: Chi David llave uru b̶uu. Chi ichiba ewabarii ab̶au bid̶a poyaa jʉ̃abai. Ichiba jʉ̃aruu ab̶au bid̶a poyaa ewaabai. ⁸Naka jara b̶uu:

»Machiba wau panuu mʉʉba kuitaa b̶uu. ¡Ũrísturu! Mʉʉba poraa ab̶a machi daad̶e ewasii. Mau ab̶au bid̶a poyaa jʉ̃abai. Machi meserãa ãreawãe nuremina, mʉ bed̶ea ãrea ijãabadau. Mʉ istu b̶ud̶awẽa panuu. ⁹¡Ũrísturu! Machi jʉ̃rʉ kaita mʉʉba Satanasd̶e ẽbẽrarã õdarrd̶e kopaneebiai.3:9 Satanasd̶e ẽbẽrarã. Griego bed̶ead̶e naka b̶ʉ kub̶uu: Jʉbawãe nii ome judiorã araa ãbua imibadau ded̶ebenarãbʉ. Maarãba Dachi Akõred̶erã abadamina, makawãema.3:9 Dachi Akõred̶erã. Griego bed̶ead̶e naka b̶ʉ kub̶uu: judiorã. Maarã chi seta nuree. Mʉʉba maarãmaa kuitaabiai mʉʉba machi kʉ̃ria ua b̶uu. ¹⁰Machiba joma chi mʉ kakua biꞌiwãe duanuu dauchia jãadua panuu mʉʉba jarad̶a kĩra. Maud̶eeba chi joma nau iujãad̶ebena biꞌiwãe panad̶ai ewari neeruud̶e, mʉʉba machi nu ua b̶uai. Mau ewarid̶e joma chi nau iujãad̶e duanuu biꞌiwãe panabiai sakad̶ai kuitaayua. ¹¹Mʉ kãꞌãabariwãed̶e neei. Maud̶eeba machiba id̶ibae ijãabadau kĩra dauchia jãadua panásturu. Maka ab̶au bid̶a machi boro jũra jʉ̃barii ẽe adaud̶aabai. ¹²Chi kachirua poyaaped̶aad̶a mʉ Dachi Akõre de wãto kĩra b̶ui. Maka mau ded̶ebena wãd̶aabai. Ãchi daub̶ʉʉrʉd̶e mʉ Chacha trʉ̃ b̶ʉi ichid̶irã kuitaabiayua. Maud̶e ãchi daub̶ʉʉrʉd̶e mʉ Chacha puuru trʉ̃ b̶ʉi mau puurud̶ebenarã kuitaabiayua. Mau Jerusalén Wid̶i abadau puuru bajãad̶ebena mʉ Chacha b̶uud̶ebena neei. Maud̶e ãchi daub̶ʉʉrʉd̶e mʉ trʉ̃ wid̶i b̶ʉi mʉʉd̶erã kuitaabiai baita. ¹³Chi kʉʉrʉ bara niiba ũrise Dachi Akõre Jauriba ãbarãmaa jara b̶uu.

Cristoba ãbarã Laodicead̶ebena baita b̶ʉbid̶a

¹⁴»Chi Laodicea puurud̶ebena ijãabadaurã nubarii ángel baita kartad̶e naka b̶ʉse:

»Biawãra Bed̶ea trʉ̃ jarabadauba Dachi Akõred̶ebena biawãra joma arakʉd̶e jarabarii.3:14 Biawãra bed̶ea. Griego bed̶ead̶e naka b̶ʉ kub̶uu: amén. Ichid̶eeba Dachi Akõreba ne joma wausii.3:14 Griego bed̶ead̶e mauba nau sid̶a jara b̶uu «Ichi ne joma Dachi Akõreba waud̶a Mechiubʉ». Ichiba naka jara b̶uu:

¹⁵»Machiba wau panuu mʉʉba kuitaa b̶uu. Mʉ ida b̶ud̶awẽa panuu maamina sõd̶eeba mʉ baara nid̶auwãe. Maka machi bania kũrasãa kĩra nureewãe maud̶e bania wãsia kĩra. Sõd̶eeba biawãra ichi baara wãd̶awẽebʉrã, mʉʉmaarã bibuara b̶uu mʉ baara akawa nibad̶aabai b̶uu. ¹⁶Maamina machi bania wãsia kĩra nuree; mʉ ida b̶ud̶akamina, biawãra sõd̶eeba nibad̶akau. Maud̶eeba mʉʉba machi ida b̶ui, mʉ okarrd̶ebena bania jʉ̃ʉrʉa id̶uuruu kĩra. ¹⁷Machiba chi nejarr barau nuree a panuu, ne joma uru panuu a duanuu, maud̶e ne ab̶a bid̶a wãꞌãe nistad̶ai baita a duanuu. Maamina adua panuu machi miichuburi duanuu, kachirua duanuu, ne ab̶a bid̶a uru panuuwãe, dau pãriu duanuu maud̶e ãkad̶aa duanuu. ¹⁸Maud̶eeba mʉʉba machimaa naka kʉ̃risia dearuu: Nee tʉbʉchiad̶e dorrb̶arid̶a nedósturu mʉʉd̶ebena. Maka machi biawãra barau nuread̶ai. Maud̶e mʉʉd̶ebena paru torr nedósturu jʉ̃d̶ai baita. Maka nejasiad̶aabai machi ãkad̶aa panasiid̶eeba. Maud̶e mʉʉd̶ebena daud̶e taabadau nedósturu, mauba taad̶aped̶a biꞌia ichiad̶amera. ¹⁹Chi ẽbẽrarã mʉʉba kʉ̃riakua b̶uu kastikakuabarii maud̶e bed̶ea bia ũribiabarii mʉ bed̶ea ijãad̶amera. Maud̶eeba waya mʉʉmaa nésturu biawãra mʉ baara sõd̶eeba nibad̶amera. ²⁰¡Ũrísturu! Mʉ poraad̶e b̶uma. Awareeba iu b̶uma machiba mʉ deed̶aa ida neebid̶amera. Barikiuba mʉ mimi ũriped̶a chi poraa ewaaruubʉrã, mʉ ed̶a wãped̶a mau baara koi. ²¹Mʉʉba chi kachirua waui poyaasiid̶eeba Dachi Akõre baara ichi rey ãkaud̶e akʉ b̶eesii. Ara mau kĩra chi kachirua waui poyaaped̶aad̶a mʉ baara mʉ rey ãkaud̶e akʉ b̶eebiai. ²²Chi kʉʉrʉ bara niiba ũrise Dachi Akõre Jauriba ãbarãmaa jara b̶uu».

Bajãad̶ebenarãba Dachi Akõre ãrea kʉ̃riaped̶aad̶a

¹Mau maad̶akare Dachi Akõreba mʉʉmaa unubisii poraa ab̶a bajãad̶e ewa nub̶uu. Ara maud̶e chi naed̶e mimi kachu chaaruu kĩra ũri b̶uad̶aba jarasii: «Nama ʉtʉ uruse. Mʉʉba unubii chi jãad̶akare makai b̶uu ewari».

²Ara makʉd̶e Dachi Akõre Jauri mʉʉd̶e need̶aba chi rey ãkau bajãad̶e unubisii. Mau ʉ̃rʉ ab̶a akʉ b̶uasii. ³Chi mau ãkaud̶e akʉ b̶uu ted̶echoasii mokara jaspe maud̶e coralina ted̶echoabadau kĩra. Mau ãkau ad̶u iuma jũra b̶uasii. Chi iuma mokara esmeralda kĩra ted̶echoa b̶uasii. ⁴Maud̶e 24 rey ãkau panuu chi rey ãkau ad̶u jũra panasii. Mau ʉ̃rʉ 24 chõrarã mechiu akʉ duanasii. Ãchi paru torroa b̶uasii. Maud̶e boro jũra nee waud̶a jʉ̃ panasii. ⁵Ara maud̶e chi rey ãkau bajãad̶e b̶uud̶ebena bã puri chebi b̶uasii, ʉrʉrʉa b̶uasii, maud̶e bã ãrea to b̶uasii. Mau rey ãkau daad̶e 7 lámpara koa topanasii. Mau lámpara chi 7 jauri Dachi Akõred̶ebʉ. ⁶Mau rey ãkau kĩraare mar biirio kĩra dod̶aa nub̶uasii.

Mau rey ãkau jua biare, jua sordoare, kaad̶e, maud̶e kĩraare kimare chokae nuree panasii. Maarã dau ãrea uru panasii, pechud̶e maud̶e akarrare. ⁷Ab̶a imama kĩra nibasii. Ab̶a paka kĩra nibasii. Ab̶a ẽbẽra kĩedarr kĩra nibasii. Maud̶e ab̶a nejõo ũub̶ari nii kĩra nibasii. ⁸Maarã chokae nuree ab̶aab̶aa ikia 6 uru nureasii. Ãchi kakuad̶e dau ãrea bara nureasii. Maud̶e ãchi ikia ekare bid̶a dau ãrea basii. Ãyadaa, maud̶e ẽsabud̶e maarãba ida b̶ud̶ayuwãe nau jarabachid̶au:

«Ãrea biꞌia nii, ãrea biꞌia nii, ãrea biꞌia nii Dachi Mechiu, Dachi Akõre, chi Joma Poyaabarii.

Mau chi nibad̶abʉ, chi niibʉ maud̶e chi neei baita b̶uubʉ».

^9-10Chi Dachi Akõre ewaricha chokae nii ichi rey ãkaud̶e akʉ b̶uu. Ara maud̶e chi chokae nureeba jara panuu ichi mipitaa nii, ichimaa biꞌia jara panuu, maud̶e ichíturu kid̶ibai a panuu. Mau jaraaduucha chi 24 mechiu chõrarã Dachi Akõre ewaricha chokae nii daad̶e õdarrd̶e kopaneed̶aped̶a ãrea kʉ̃riabadau. Ãchi boro jũra jʉ̃badau chi rey ãkau jãkaa duanud̶aped̶a naka jarabadau:

¹¹Dachi Mechiu, Dachi Akõrebʉ, bichi biꞌia nii jomaurãba jarad̶amera bichi mipitaa nii, bichi wapead̶amera, maud̶e joma poyaabarii.

Biꞌia b̶uu jomaurãba mau jarad̶ai, bichiba ne joma wausiid̶eeba.

Biawãra bichiba kʉ̃riasiid̶eeba, ne joma wausii maud̶e joma bichid̶eeba nuree.

Oeja kaebeu Juanba unud̶a

¹Maud̶e mʉʉba unusii chi rey ãkaud̶e akʉ b̶uu ichi juad̶e karta bʉra uru b̶uasii. Chi kartad̶e muriacha ne b̶ʉ kub̶uasii. Chi karta kub̶uumaa 7 jʉrrʉba wãa kub̶uasii ab̶au bid̶a ewarãamera. ²Maud̶e mʉʉba ángel ab̶a poyaabarii unusii. Mauba jĩkua berrearuuba id̶isii: «¿Kai biꞌia b̶uma chi kartamaa wãa kub̶uu oetaped̶a ewai baita?» ³Maamina mau karta ewaped̶a ed̶a jarai baita ab̶a bid̶a chi bia wãꞌãe basii. Bajãad̶e, nau iujãad̶e maud̶e biuped̶aad̶a duanaabadaumarebena sid̶a wãꞌãe basii.5:3 Biuped̶aad̶a duanaabadaumarebena. Griego bed̶ead̶e naka b̶ʉ kub̶uu: nau iujãa ekare.⁴Maud̶e mʉ ãrea jẽa kob̶eesii ẽbẽra bia ab̶a bid̶a wãꞌãe basiid̶eeba mau karta ewaped̶a ed̶a jaramera. ⁵Maamina ab̶a chi 24 chõrarãd̶ebenaba mʉʉmaa naka jarasii: «Jẽarã́se. Ichiáse, Davidd̶ebena ab̶a need̶abʉ. Mau Judad̶ebena need̶a Imama abadauba Dachi Akõre kʉ̃riad̶akaurã poyaasii.5:5 Isaías 11:1,10; Génesis 49:9-10. Maud̶eeba chi nau kartad̶e 7 wãa nub̶uu poyaa oetaped̶a ewai b̶uu».

⁶Maud̶e Dachi Akõred̶e rey ãkau kaita, kimare chokae nuree kaita maud̶e 24 chõrarã mechiurã tãed̶e oeja kaebeu ab̶a akʉ nub̶uu unusii. Mau chi bea panad̶a kĩra nibasii. Kachu 7 bara nibasii. Maud̶e 7 dau bara nibasii. Mau dau jara b̶uu chi 7 jauri Dachi Akõre daad̶e panuu. Dachi Akõreba nau iujãa jomad̶e maarã bʉikasii. ⁷Maud̶e mau oeja kaebeu chi rey ãkaud̶e akʉ b̶uumaa wãped̶a chi karta mau jua biare uru b̶uad̶a adausii. ⁸Mau karta adausiid̶e chi kimare chokae nuree maud̶e chi 24 chõrarã sid̶a ichi daad̶e õdarrd̶e kopaneesid̶au. Ãchi ab̶aab̶aa arpa maud̶e sãu nee waud̶a uru panasid̶au. Chi sãu incienso keraba waabiru uru panasii. Chi kera incienso jara b̶uu ẽbẽrarã Dachi Akõred̶erãba chi ichimaa ʉtaa id̶ibadau. ⁹Chi 24 chõrarã maud̶e chi kimare chokae nureerãba nau kari wid̶i karisid̶au:

«Bichíturu biꞌia nii, mau karta adauped̶a, chi wãa kob̶ee oekuai baita, bichi beasid̶aud̶eeba.

Bichi oa chesiiba ẽbẽrarã nedokuasii Dachi Akõre baita.

Ẽbẽrarã didiwaraacha jomad̶ebena, bed̶ea didiwaraacha jomad̶ebena, puurucha maud̶e drua jomad̶ebena chi nuree nedosii.

¹⁰Bichiba maarã duanusii Dachi Akõred̶e paarerã bad̶amera.

Maud̶e nau iujãad̶e ichi baara chi karrarã bad̶ai».

¹¹Maka b̶uud̶e mʉʉba angelerã karimaa panuu unusii. Maarã ãrea basiid̶eeba mʉʉba poyaa juasiibasii.5:11 Ãrea. Griego bed̶ead̶e naka b̶ʉ kub̶uu: miles de miles. Kajuma bed̶ead̶e jara b̶uu «millones de millones». Maarãba Dachi Akõre chi rey ãkau, chi chokae duanuurã maud̶e chi 24 chõrarã ad̶u jũra duanasid̶au. ¹²Naka jĩwa kari panasid̶au:

«¡Chi oeja kaebeu beaped̶aad̶a ãrea biꞌia nii!

Jomaurãba mau biꞌia berread̶ai panuu ne joma poyaabariid̶eeba, ne joma uru b̶uud̶eeba, joma kuitaa b̶uud̶eeba maud̶e ãrea poyaabariid̶eeba.

Ichi chi aude mechiu nii ad̶ai panuu maud̶e chi aude bia nii ad̶ai panuu».

¹³Maud̶e mʉʉba ũrisii chi joma Dachi Akõreba waukuad̶a chi bajãad̶e duanuu, chi nau iujãad̶e duanuu, chi biuped̶aad̶a maud̶e mard̶e duanuu bid̶a naka kari panasid̶au:5:13 Biuped̶aad̶a. Griego bed̶ead̶e naka b̶ʉ kub̶uu: nau iujãa ekare nureeba.

«Jomaurãba chi rey ãkaud̶e akʉ b̶uumaa maud̶e chi oeja kaebeu niimaa ewaricha biꞌia berread̶ai panuu.

Aude mechiu nii a jarad̶ai panuu, aude mipitaa nii a jarad̶ai panuu maud̶e bibuara b̶uu ichi juad̶e uru b̶uai a jarad̶ai panuu».

¹⁴Maabae chi kimare chokae nureeba naka jarasid̶au: «Bibuara b̶uu maka b̶uai». Ara makʉd̶e chi 24 chõrarã õdarrd̶e kopaneed̶aped̶a chi ewaricha chokae niimaa biꞌia berreasid̶au.5:14 Chi ewaricha chokae nii. Griego bed̶ead̶e chi b̶ee kartad̶e mau wãꞌãe.

Chi kartamaa wãa kub̶uu oetad̶a

¹Maabae mʉʉba unusii chi Oeja Kaebe Niiba chi kartamaabena wãa kub̶uu ab̶a oetasii. Maka b̶uud̶e chi kimare chokae nureed̶ebena ab̶auba naka jaraaruu ũrisii: «¡Neese!»6:1 «¡Neese!». Griego bed̶ead̶e chi b̶ee kartad̶e versículos 1, 3, 5 maud̶e 7 naka b̶ʉ kub̶uu: Chi chokae nureed̶ebena ab̶aba naka jarasii chi mura ʉ̃rʉ akʉ b̶uumaa: «Ichiaped̶a neese». Chi mimi bã kĩra jĩwa b̶uasii. ²Araa ichiasiid̶e, mura torroa nii unusii. Chi mau mura ʉ̃rʉ akʉ b̶uasiiba ichi juad̶e enadrʉma uru b̶uasii: Ab̶auba ichimaa borod̶e jũra jʉ̃barii ab̶a deasii. Ara makʉd̶e chi nuree poyaaped̶a maabae maucha poyaad̶e wãsii.

³Mau maad̶akare chi Oeja Kaebe Niiba chi wãa kub̶uu maucha oetasiid̶e mʉʉba ũrisii chi chokae nureed̶ebena ab̶aba naka jaraaruu: «¡Neese!». ⁴Maud̶e mura puria nii awara neesii. Ab̶auba chi mau mura ʉ̃rʉ akʉ b̶uumaa espada ab̶a deasii. Dachi Akõreba maumaa ẽbẽrarã chi nau iujãad̶e nebʉraswãe duanuumaa kachirua wauyu ida b̶usii chĩod̶aped̶a chiya bead̶amera.

⁵Mau maad̶akare chi Oeja Kaebe Niiba chi wãa kub̶uu maucha oetasiid̶e mʉʉba ũrisii chi chokae nureed̶ebena ab̶aba naka jaraaruu: «¡Neese!». Araa ichiasiid̶e mʉʉba mura parrba nii unusii. Chi mau mura ʉ̃rʉ akʉ b̶uuba ichi juad̶e chikʉa chaabarii uru b̶uasii. ⁶Maka b̶uud̶e mʉʉba chi kimare chokae nuree panuu tãed̶e ab̶a berrearuu ũrisii. Mauba naka jarasii chi mura ʉ̃rʉ akʉ b̶uumaa: «Chi trigo ãrisii. Maka ẽbẽra ab̶a ewari ab̶a trajai, trigo libra ome nedoi baita. Maud̶e chi cebada sid̶a ãrisii. Maka ẽbẽra ab̶a ewari ab̶a trajai cebada 6 nedoi baita. Maamina olivo jõ maud̶e uva jõ ida biꞌia chaubise drabirua maud̶e uva b̶aa baraamera».

⁷Mau maad̶akare chi Oeja Kaebe Niiba chi wãa kub̶uu maucha oetasiid̶e mʉʉba ũrisii chi chokae nureed̶ebena ab̶aba naka jaraaruu: «¡Neese!» ⁸Araa ichiasiid̶e mʉʉba mura kukuaraa nii unusii. Chi mau mura ʉ̃rʉ akʉ b̶uu trʉ̃ «Biud̶a» abadau. Chi ichi ome nibabarii chi trʉ̃ «Biud̶arã Panabadau» abadau. Joma nau iujãad̶e ẽbẽra kimared̶ebena ab̶a Dachi Akõreba maarãmaa ida beabiasii. Maarã ẽbẽrarã beasid̶au chĩoduuba, jarrbaba, dachi kakua kachirua paneebibadauba maud̶e ãnimara kachirua nureeba.

⁹Mau maad̶akare Oeja Kaebe Niiba chi wãa kub̶uu maucha oetasiid̶e mʉʉba unusii chi Dachi Akõre bed̶ea jaradea panuu kakua beaped̶aad̶a jaurirã. Maarã bajãad̶e chi ãnimara baa deabadau jãkaa panasid̶au. ¹⁰Kĩrud̶eeba naka berreasid̶au: «Jomaurã Mechiu, bichi ãrea bia nii maud̶e biawãra berreabarii. ¿Bichiba sakaed̶e chi jãu iujãad̶ebenarã dai beaped̶aad̶a kakua kastikakuaima?» ¹¹Dachi Akõreba ãchi ab̶aab̶aa paru torr dead̶akasii jʉ̃d̶amera. Maabae naka jarasii: «Apii esed̶au panad̶áusturu joma chi ẽbẽrarã beaduud̶aa joma bichi ãbarã Cristoba pekuad̶a machi beaped̶aad̶a kĩra».

¹²Mau maad̶akare mʉʉba unusii chi Oeja Kaebe Niiba chi wãa kub̶uu maucha oetaaruu. Maud̶e ioromia ãrea urisii. Ʉmada pãriusii paru parr ab̶a biud̶akare jʉ̃badau kĩra. Jed̶ako joma oa kĩra puria kob̶eesii. ¹³Ãrea pũatuuruud̶e higo jõo pãaraa b̶aebadau kĩra chi bajãad̶ebena pusterrearã iujãad̶e b̶aesid̶au. ¹⁴Bajãa wãꞌãesii karta araa bʉrabarii kĩra. Joma earã maud̶e islarã sid̶a chi naed̶e kub̶uad̶amare wãꞌãesii. ¹⁵Maud̶e chi nau iujãad̶ebena rey mechiurã, chi gobernadorã, chi kokoroarã mechiurã, chi nejarra barau nuree, chi meserãa nuree, chibari baita bari trajabadaurã maud̶e chibariswãe nuree ea chob̶ead̶e maud̶e ead̶e mo kob̶ead̶amare mirusid̶au. ¹⁶Maarãba naka jarasid̶au: «¡Ea, mo, dai ʉ̃rʉ b̶áesturu. Dai mirubiásturu chi rey ãkaud̶e akʉ b̶uuba dai unurãamera maud̶e chi Oeja Kaebe Niiba kastikarãamera. ¹⁷Chi ichiba kastikai ewari mechiu neesii. ¿Kaiba mau ome dauchia jãadua b̶uaima?»

Chi daub̶ʉʉrʉmaa sello wãabarii waud̶a

¹Mau maad̶akare mʉʉba ángel kimare unusii. Maarã nau iujãad̶e õkid̶ucha akʉ topanasid̶au. Maarãba pũatu mamareecha pũayu ida kabid̶aabasii nau iujãad̶e, mard̶e maud̶e bakurumaa bid̶a. ²Dachi Akõreba ãchimaa poyaabarii dea b̶uasii chi iujãa maud̶e mar ãrid̶amera. Maka b̶uud̶e mʉʉba ángel maucha ʉmada urubariare uruu unusii. Mauba Dachi Akõre chokae niid̶e sello wãabarii uru b̶uasii. Mauba naka jarakuasii chi kimare angelerãmaa: ³«Nau iujãa, mar maud̶e bakururã ãrirã́sturu, ab̶a daiba Dachi Akõre seña chi ichi baita bari trajabadaurã daub̶ʉʉrʉd̶e joma wauduud̶aa».

⁴Maud̶e mʉʉba ũrisii Dachi Akõre sello uru panuu sãabe panuu: 144.000 basii. Maarã joma Israeld̶ebena imiped̶aad̶arã basii. ⁵Judad̶ebena imiped̶aad̶arã 12.000 basii. Rubend̶ebena imiped̶aad̶arã 12.000 basii. Gadd̶ebena imiped̶aad̶arã 12.000 basii. ⁶Ased̶ebena imiped̶aad̶arã 12.000 basii. Neftalid̶ebena imiped̶aad̶arã 12.000 basii. Manasesd̶ebena imiped̶aad̶arã 12.000 basii. ⁷Simond̶ebena imiped̶aad̶arã 12.000 basii. Levid̶ebena imiped̶aad̶arã 12.000 basii. Isacard̶ebena imiped̶aad̶a 12.000 basii. ⁸Zabulond̶ebena imiped̶aad̶arã 12.000 basii. Josed̶ebena imiped̶aad̶arã 12.000 basii. Maud̶e Benjamind̶ebena imiped̶aad̶arã 12.000 basii.

Ẽbẽrarã ãrea Dachi Akõre daad̶e nuree

⁹Mau maad̶akare Dachi Akõreba waya mʉʉmaa ẽbẽrarã ãrea unubisii. Ab̶au bid̶a maarã poyaa juasiibasii. Druachad̶ebena, puuruchad̶ebena ẽbẽrarã didiwaraacha jomad̶ebena maud̶e bed̶ea didiwaraacha jomad̶ebena chi nuree ab̶aab̶aa duanasii. Joma paru torroa jʉ̃ duanasii maud̶e kĩrajʉʉ duanasiid̶eeba ãchi juad̶e meme kiruu uru panasid̶au. Dachi Akõre rey ãkau daad̶e maud̶e chi Oeja Kaebe Nii daad̶e b̶ari topanasid̶au. ¹⁰Maud̶e joma naka kĩrud̶eeba jarasid̶au: «¡Dai Akõre nau rey ãkaud̶e akʉ b̶uu maud̶e chi Oeja Kaebe nii baarauba dai karibasid̶au!»

¹¹Maud̶e chi kimare chokae nuree panuurãba maud̶e chi 24 chõrarã chi rey ãkau kaita duanasid̶au. Joma chi angelerã chi maarã ad̶u jũra b̶ari topanasid̶au. Maud̶e chi joma angelerã õdarrd̶e kopaneesid̶au maud̶e chi rey ãkau daad̶e daub̶ʉʉrʉ jaab̶arid̶aped̶a maabae Dachi Akõremaa biꞌia berreasid̶au. ¹²Naka jarasid̶au:

«¡Machiba jara panuu biawãrabʉ!7:12 Biawãrabʉ. Griego bed̶ead̶e naka b̶ʉ kub̶uu: amén. Ewaricha jomaurãba Dachi Akõremaa biꞌia berread̶ai panuu, ichi chi aude mechiu niid̶eeba,

chi aude kuitaa niid̶eeba, ne jomad̶e poyaabariid̶eeba maud̶e meserãa ãrea niid̶eeba.

Ichimaa ichíturu kid̶ibai ad̶ai panuu maud̶e chi biawãra b̶uu ad̶ai panuu. ¡Biawãra biꞌia b̶uu maka b̶uai!»7:12 Biꞌia b̶uu maka b̶uai. Griego bed̶ead̶e naka b̶ʉ kub̶uu: amén.

¹³Maabae chi 24 chõrarãd̶ebena ab̶aba mʉʉmaa naka id̶isii:

—¿Bichiba kuitaa b̶uka jãarã chi paru torroa jʉ̃ panuu kai maud̶e samareeba neesid̶au?

¹⁴Mʉʉba panausii:

—Bichiaburu kuitaa b̶uu.

Maabae ichiba jarasii:

—Naarã ẽbẽrarã́turu karibasid̶au chi kaad̶ebena ãrea biꞌiwãe panabiai ewari. Maarã chi Oeja Kaebe Nii oaba ãchi paru torroa jeraasid̶au. ¹⁵Maud̶eeba maarã Dachi Akõre rey ãkau jãkaa duanuu. Ichi ded̶e ãyadaa maud̶e ẽsabud̶e ichi baita ne wau panuu. Maud̶e chi ãkaud̶e akʉ b̶uu maarã baara b̶uai.7:15 Maarã baara b̶uai. Griego bed̶ead̶e naka b̶ʉ kub̶uu: Dachi Akõreba ichi paru waud̶a de ãchi ʉ̃rʉ b̶ui.¹⁶Maarã makaa jarbisiad̶aabai maud̶e waya obisia sid̶a uru panad̶aabai. Ʉmadaba makaa baakuabai maud̶e pisia bid̶a makaa joebai. ¹⁷Chi Oeja Kaebe Nii rey ãkaud̶e akʉ b̶uuba maarã nu b̶uai. Maarã uad̶oi chi chokae nibabiabarii iorod̶e bania bumadru b̶uumaa dod̶amera. Mau ewarid̶e Dachi Akõreba ãchi dau b̶aa joma jarekuai.

Chi kaad̶eare chi wãa kub̶uu oetad̶a ʉ̃rʉbena

¹Oeja Kaebe Niiba chi kaad̶earebena chi wãa kub̶uu oetasiid̶e, bajãa ãrea chũpea nub̶uad̶ausii.8:1 Ãrea. Griego bed̶ead̶e naka b̶ʉ kub̶uu: media hora.²Mau maad̶akare mʉʉba 7 angelerã Dachi Akõre daad̶e akʉ topanuu unusii. Maarãmaa kachu 7 deasii. ³Maabae ángel june neeped̶a Dachi Akõre baita kera baabadaumare akʉ nub̶eesii. Mau Dachi Akõre baita kera baabadau nee waud̶a chi rey ãkau kĩraare nub̶uu. Chi angelba ichi juad̶e paratu nee waud̶a uru b̶uasii kera baai baita. Ab̶aba ichimaa kera ãrea deasii Dachi Akõre baita baamera ẽbẽrarã Dachi Akõred̶erã ʉtaa id̶imaa panuumisa. Ara makʉd̶e ichiba chi kera baasii chi kera baa deabadau ʉ̃rʉ. ⁴Chi ẽbẽrarã Dachi Akõred̶erãba ʉtaa id̶iped̶aad̶a mau angelba kera baad̶a nari baara ãbua chi Dachi Akõremaa ʉtaa piumaa wãsii. ⁵Maabae chi angelba kera baa deabadaud̶ebena tʉbʉ kĩra adauped̶a, chi paratu waabirubisii. Mau tʉbʉ kĩra nau iujãad̶aa jiratasii. Mauba bã tosii, ʉrʉrʉa wã kob̶eesii, bajãa puri chebi kob̶eesii maud̶e nau iujãa sid̶a uri kob̶eesii.

Angelerãba kachu chaaped̶aad̶a

⁶Maabae chi 10 angelerãba kachu 7 chaad̶ai baita kopaneesid̶au.

⁷Ab̶auba ichi kachu chaasii. Ara makʉd̶e bajãad̶ebena nau iujãad̶e hielo kui kĩra b̶aesid̶au. Maud̶e nau iujãad̶e tʉbʉchia oa baara b̶aesid̶au. Mauba nau iujãa jomad̶ebena beraa mita baawãsii maud̶e bakururã sid̶a.8:7 Nau iujãa. Griego bed̶ead̶e chi b̶ee kartad̶e mau wãꞌãe. Beraa mita. Griego bed̶ead̶e naka b̶ʉ kub̶uu: la tercera parte. Mama chi siruarã joma baawãsii.

⁸Mau maad̶akare june ab̶a angelba ichi kachu chaasii. Ara makʉd̶e ab̶auba ea kĩra urua aoko b̶uu mard̶e jiratasii. Mauba beraa mita chi mar oa ba nub̶eesii. ⁹Chi oa ba nub̶ee b̶uad̶amare ãnimararã mard̶ebena beraa mita kinisid̶au maud̶e jãba aria duanad̶a beraa mita teakuasii.

¹⁰Mau maad̶akare june ab̶a angelba ichi kachu chaasii. Ara makʉd̶e bajãad̶ebena pusterrea mechiu ab̶a tʉbʉchiaba bʉra b̶uu b̶aesii. Beraa mita doorã ẽsad̶e b̶aesii maud̶e bania bumadru b̶uud̶e. ¹¹Mau pusterrea “Asia Nii” abadau. Chi mau b̶aed̶amare bania beraa mita asia nub̶eesii. Mau baniaba ẽbẽrarã ãrea kinisid̶au.

¹²Mau maad̶akare june ab̶a angelba ichi kachu chaasii. Ara makʉd̶e beraa mita jed̶ako pãriusii maud̶e ʉmada. Maud̶e beraa mita pusterrearã sid̶a pãriusii. Maud̶eeba beraa mita ewari ab̶a pãriu nub̶eesii. Maud̶e ẽsabud̶e bid̶a beraa mita chi jed̶ako maud̶e pusterrearã sid̶a pãriu nub̶eesii.

¹³Mʉʉba ʉtaa ichiasiid̶e ũrisii nejõo ab̶a ʉtʉ ũub̶ari kãriiba naka jara kãrii:8:13 Nejõo. Griego bed̶ead̶e chi b̶ee kartad̶e b̶ʉ kub̶uu: ángel. «¡Mia pera! ¡Mia pera! ¡Mia pera! Ẽbẽrarã nau iujãad̶ebena kĩra chuburiad̶ai chi waabena angelerãba ãchi kachu chaaduud̶e!»

¹Mau maad̶akare june ab̶a angelba ichi kachu chaasii. Ara maud̶e mʉʉba pusterrea ab̶a nau iujãad̶e b̶aeruu unusii. Ab̶auba mau pusterreamaa llave ab̶a poraa eakarr ed̶aa chob̶ea ewabarii deasii. ²Mau eakarr ed̶aa chob̶ead̶e poraa ewasiid̶e, chob̶ead̶ebena ʉtaa nari ãrea chesii mode baaruud̶e makabarii kĩra.9:2 Mode baaruud̶e makabarii kĩra. Griego bed̶ead̶e naka b̶ʉ kub̶uu: jiorr dorrab̶aribibadaumare kĩra. Mau nariba ʉmada paimaa ãrea kob̶eesii maud̶e chi bajãa sid̶a. ³Maud̶e jãu narid̶ebena nau iujãad̶aa sisi mechiu ũub̶ari chesid̶au. Dachi Akõreba maarã sisirãmaa poyaabarii deasii ẽbẽrarã kaad̶amera, dosurĩba kaaruu kĩra. ⁴Chi sisirãmaa jarasii siruarã maud̶e bakururã ãriraad̶amera. Bari ẽbẽrarãba ãchi daub̶ʉʉrʉd̶e Dachi Akõre selloswãe nuree kaabiasii. ⁵Dachi Akõreba chi sisirãmaa ẽbẽrarã ida beabiaibasii, bari jed̶ako jua ab̶a pirabíturu deasii. Mau pira b̶uu dosurĩba kaad̶a kĩra pira b̶uai. ⁶Mau ewarid̶e ẽbẽrarãba biud̶ai jʉrʉd̶ai. Biawãra biud̶ai kʉ̃ria panumina, biud̶aabai.

⁷Mau sisi mura kokoroaba chĩod̶e adoebarii kĩra nureasii. Ãchi borod̶e boro jũra ab̶a nee waud̶a kĩra b̶uu jʉ̃ panasii. Ẽbẽra kĩedarr kĩra nibasid̶au. ⁸Ãchi bud̶a wẽra bud̶a kĩra panasii. Ãchi kid̶a imama kid̶a kĩra panasii. ⁹Ãchi kakuad̶e chaarea b̶uu jʉ̃barii jiorr waud̶a jʉ̃ panasii. Ãchi ikia mura ãrearã piraaduud̶e ãchi karreta baara chĩod̶e wãaduu kĩra chirĩderrea panasii. ¹⁰Ãchi druu dosurĩ druu kĩra misua panasii. Maarãba ẽbẽrarã ãchi druuba jed̶ako jua ab̶a poyaa puꞌua pirabiad̶ai panasii. ¹¹Chi maarã sisi rey chi eakarr ed̶aa chob̶ead̶ebena angelbʉ. Ichi trʉ̃ hebreo bed̶ead̶e Abadón abadau maud̶e griego bed̶ead̶e Apolión.9:11 Abadón...Apolión. Mau trʉ̃ jara kʉ̃ria panuu «Ne joma baribabarii».

¹²Chi nabena mia pera jarad̶a wãꞌãesii, maamina wabid̶a ome panuu.9:12 Mau mia pera jarad̶a dachiba unubadau Apocalipsis 8:13d̶e.

¹³Mau maad̶akare june ab̶a angelba ichi kachu chaasii. Maud̶e chi Dachi Akõre daad̶e kera baa deabadau nee waud̶a kachu kimare panuumareeba mʉʉba ab̶a berreamaa b̶uu ũrisii. ¹⁴Chi berrea b̶uuba chi ángel chi kachu chaad̶amaa naka jarasii: «Chi kimare angelerã do Éufrates mechiu abadaumare jʉ̃ panuu enatase». ¹⁵Ara makʉd̶e ichiba maarã kimare enakuasii nau iujãad̶ebena ẽbẽrarã beraa mita bead̶amera.9:15 Beraa mita. Griego bed̶ead̶e naka b̶ʉ kub̶uu: la tercera parte. Ara mau kĩra jara b̶uu versículo 18d̶e. Dachi Akõreba maarã uru b̶uasii maka bead̶amera ara mau añod̶e, ara mau jed̶ako ab̶ad̶e maud̶e ara mau ewarid̶e bid̶a. ¹⁶Maud̶e mʉʉba ũrisii ab̶auba jaramaa b̶uasii sãabe kokoroa nuree murad̶e ataubadau eneemaa panuu. Dosientos millones eneemaa panuu asii.

¹⁷Chi murarã mʉ daumaa unubid̶a naka nureasii: ãchi boro imama boro kĩra nureasii. Ãchi okarrd̶ebena tʉbʉchia maud̶e nari aokokobadau panasii. Mau kakuad̶e chaarea b̶uu puria aoko b̶uu kĩra b̶uasii, zafiro mo pãwaraa kĩra b̶uasii maud̶e azufre mo kĩra kuaraa b̶uasii.9:17 Zafiro mo. Griego bed̶ead̶e naka b̶ʉ kub̶uu: jacinto pono.¹⁸Chi mura okarrd̶ebena aokooruuba, nariba maud̶e azufre chi cheeruu bid̶a beraa mita chi nau iujãad̶ebena ẽbẽrarã kenasii. ¹⁹Mau murarã poyaa ãchi okarrd̶e maud̶e ãchi drud̶e b̶uasii. Ãchi druu dama kĩra panasii. Ãchi druu boro bara nureeba ẽbẽrarã kaad̶aped̶a maabae beabachid̶au.

²⁰Maka b̶uukaud̶e chi ẽbẽrarã mauba biud̶aabad̶aba wabid̶a chi kachirua waud̶ayu maud̶e jai kachiruarã ijãad̶ai ida b̶ud̶aabasii. Dachi Akõre kuenda juaba ne kaped̶aad̶arã ida b̶ud̶aabasii: chi nee waud̶a, parata waud̶a, bronce waud̶a, mo waud̶a maud̶e bakuru erad̶a ida b̶ud̶aabasii. Maarã unud̶akau, ũrid̶akau maud̶e nibad̶akau. ²¹Maud̶e mia beabadau, waabenarã ẽpermabadau, dachi kakuaba barikiu kachirua waubadau maud̶e chiruabadau ida b̶ud̶aabasii.

Angelba karta kaebeu uru b̶uad̶a

¹Mau maad̶akare mʉʉba ángel ãrea poyaabarii ab̶a bajãad̶ebena jʉ̃rʉara tãed̶e uruu unusii. Ichi boro ʉ̃rʉ iuma jũra nub̶uasii. Ichi kĩedarr ʉmada kĩra urua b̶uasii. Ichi jʉ̃rʉ tʉbʉ aoko nub̶uu kĩra b̶uasii. ²Ichi juad̶e karta kaebeu ewa uru b̶uasii. Ichi jʉ̃rʉ biarebena mard̶e tʉa ʉkʉ nub̶uasii. Jʉ̃rʉ sordoarebena iorod̶e tʉa ʉkʉ nub̶uasii. ³Maabae ichi imama arraaruu kĩra jĩwa b̶iasii. Maka b̶iaruud̶e bã 7 b̶es tosii. ⁴Bã 7 b̶es tosiid̶e mau bã tooruuba jarad̶a mʉʉba kartad̶e b̶ʉʉruu basii. Maamina bajãad̶e mʉʉba mimi ũrisii naka jaraaruu: «Bã 7 b̶es tosiiba jarad̶a chũpea uru b̶uase. Kartad̶e b̶ʉrã́se».

⁵Maabae chi ángel mʉʉba unud̶a jʉ̃rʉ ab̶a mard̶e tʉa akʉ nub̶uad̶a maud̶e jʉ̃rʉ ab̶a iorod̶e tʉa akʉ nub̶uad̶a ichi jua biarebena ʉtaa bajãad̶aa jirasii. ⁶Maabae Dachi Akõre trʉ̃d̶eeba berreasii chi nau iujãad̶ebena, bajãad̶ebena, mard̶ebena joma waud̶a. Dachi Akõre ewaricha chokae nii trʉ̃d̶eeba naka jarasii: «Dachi Akõreba jarad̶a kãꞌãabariwãed̶e joma makai. ⁷Ichi baita berreabadaurã, ichi baita bari trajabadaurãbʉ. Naed̶e Dachi Akõreba ãchimaa jara b̶uad̶a ichiba kaad̶eare unubiwẽa b̶uad̶a joma makai. Kaad̶ebena ángel ab̶aba chi kachu chaaruud̶e biawãra joma makai».

⁸Maabae bajãad̶e chi mimi mʉʉba naed̶e ũrid̶aba waya mʉʉmaa naka jarasii: «ángel ab̶a ichi jʉ̃rʉ ab̶a mard̶e tʉa uru b̶uu maud̶e ab̶a iorod̶e tʉa uru b̶uuba karta kaebeu ichi juad̶e ewa uru b̶uu adaud̶e wãse».

⁹Ara makʉd̶e chi angelmaa wãped̶a chi karta kaebeu id̶isii mʉʉmaa deamera. Chi mauba panausii: «Adause. Kotase. Bichi okarrd̶e nidurr kũab̶ari b̶aa kĩra kũaa b̶uai, maamina bichi b̶id̶e asia b̶uai».

¹⁰Mau karta kaebeu chi ángel juad̶ebena adauped̶a kosii. Mʉ okarrd̶e nidurr kũab̶ari b̶aa kĩra kũaa b̶uasii maamina kosiid̶e mʉ b̶id̶e asia b̶uasii. ¹¹Maabae ichiba mʉʉmaa jarasii: «Bichi waya Dachi Akõred̶eeba berreai b̶uu puuru ãrea makai ʉ̃rʉbena, drua ãrea sakai ʉ̃rʉbena, berreabadaucha sakai ʉ̃rʉbena, maud̶e reyrã sakai ʉ̃rʉbena».

Chi ẽbẽra ome Cristo ʉ̃rʉbena berreabadau

¹Mau maad̶akare ab̶auba bakuru ne chaabarii mʉʉmaa deaped̶a naka jarasii: «Dachi Akõre de mechiu bakuruba chaayase asii, maud̶e chi Dachi Akõre baita ne baa deabadaumare. Maud̶e chi aria Dachi Akõremaa biꞌia berrea panuurã joma juasiise. ²Maamina Dachi Akõre de mechiu mooba aude ad̶u kĩra b̶uu ekarebena drua chaarã́se, mau Dachi Akõred̶e ijãad̶akaurã deasiid̶eeba. Maarãba Dachi Akõre puuru Jerusalén poyaad̶ai 42 jed̶akod̶aa.11:2 Griego bed̶ead̶e naka b̶ʉ kub̶uu: Maarãba chi Dachi Akõre baita b̶uu puuru 42 jed̶ako biraduad̶ai.³Mau ewarid̶e mʉʉba ẽbẽra ome bʉi mʉ ʉ̃rʉbena dod̶aa berread̶amera. Maarã paru parrba jʉ̃d̶aped̶a 1.260 ewari Dachi Akõre baita berread̶ai».

⁴Chi nau iujãad̶ebena Mechiu daad̶e olivo bakuru ome topanuu maud̶e ʉ̃d̶aa koabarii ome topanuu. Mau chi ichi ʉ̃rʉbena dod̶aa berreabadau ome panuu jara b̶uu.11:4 Zacarías 4:1-14.⁵Ab̶auba maarã kachirua waui kʉ̃riaruubʉrã, ãchi okarrd̶ebena aokoi maud̶e maarã kĩramaabadaurã baakuai. Ara mau kĩra chi maarãmaa kachirua waud̶ai kʉ̃riaduu joma kenad̶ai. ⁶Maarã ome ẽbẽra Dachi Akõre baita berreamaa panuud̶e, bajãa poyaa jʉ̃ad̶ai kui chebiamaaba. Maud̶e bania sid̶a poyaa oa babid̶ai, maud̶e ne kachirua didiwaraa poyaa neebid̶ai nau iujãa ãchi kʉ̃ria ãrid̶ai baita.

⁷Maamina joma Dachi Akõre ʉ̃rʉbena berreaped̶aad̶akare mau ãnimara eakarr ed̶aa chob̶ead̶ebena11:7 Mau ãnimara eakarr ed̶aa chob̶ead̶ebena. Ichiáse Daniel 7d̶e. neeruuba ãchimaa orrai. Maarã poyaaped̶a kenai. ⁸Chi biuped̶aad̶a chi Jerusalén puuru mechiud̶e jirata b̶ari panad̶ai. Mau puuru «Sodoma» maebʉrã «Egipto» abadau, aria ãchi Mechiu Jesús cruzd̶e jirab̶u beasid̶aud̶eeba. ⁹Ẽbẽrarã didiwaraacha jomad̶ebena, bed̶ea didiwaraacha jomad̶ebena, puurucha maud̶e drua jomad̶ebenarãba mau biuped̶aad̶a aria jirata b̶ari b̶ee unud̶ai ewari õbea bad̶aped̶a maud̶e ãsad̶aa.11:9 Ewari õbea bad̶aped̶a maud̶e ãsad̶aa. Griego bed̶ead̶e naka b̶ʉ kub̶uu: tres días y medio. Maarã biuped̶aad̶a ʉyaad̶ai ida kabid̶aabai. ¹⁰Chi ẽbẽrarã nau iujãad̶ebena mau biuped̶aad̶a kakua kĩrajʉʉd̶ai. Kĩrajʉʉba ne kaebea bia ãchiba chiya bari dead̶akad̶ai, Dachi Akõre baita berreabadaurãba maarã ãrea biꞌiwãe panabiasid̶aud̶eeba. ¹¹Maamina ewari õbea ẽsa basiid̶e Dachi Akõreba ãchi chokae jiradubiasii. Ãchi jiraduuduu unuped̶aad̶a ãrea perasid̶au. ¹²Maabae chi Dachi Akõre baita berreabadaurãba bajãad̶e mimi jĩkua ũrisid̶au. Naka jarasii: «Namaa ʉtaa urústuru». Ara makʉd̶e chi kĩramaabadaurãba ichiamaa panuud̶e, ʉtaa jʉ̃rʉara tãed̶e bajãad̶aa wãsid̶au.

¹³Maud̶e ioromia meserãa neesii. Mauba Jerusalén puurud̶e de ãrea korekuasii.11:13 Ãrea. Griego bed̶ead̶e naka b̶ʉ kub̶uu: la décima parte. 7.000 ẽbẽrarã biusid̶au. Ara maud̶e chi chokae panuuba perad̶eeba chi bajãad̶ebena Dachi Akõremaa biꞌia nii a jarasid̶au.

¹⁴Chi mawãarebena mia pera jarad̶a wãꞌãesii. Maamina chi kaad̶earebena mia jarad̶a kãꞌãabariwãed̶e neei.11:14 Chi kaad̶earebena mia pera jarad̶a neeruud̶e, chi kaad̶earebena kachu chaai. Apocalipsis 8:13.

Kaad̶earebena kachu chaad̶a

¹⁵Chi kaad̶earebena angelba ichi kachu chaasii.11:15 Chi kaad̶earebena angelba. Kajuma bed̶ead̶e b̶ʉ kub̶uu: séptimo ángel. Maud̶e bajãad̶e ãreaba jĩkua berreasid̶au. Naka jarasid̶au:

«Chi nau iujãad̶ebenarã reyrãba ãchi juad̶e naed̶e ua panaped̶aad̶a, Dachi Mechiu maud̶e ichi Cristo omeeba mau joma ãchi juad̶e ua paneesid̶au.

Id̶iiba waitaa jomaurã ichi juad̶e ua b̶uai».

¹⁶Maud̶e chi 24 chõrarã mechiurã ãchi rey ãkaud̶e sĩu duanad̶a Dachi Akõre daad̶e õdarrd̶e kopaneesid̶au maabae Dachi Akõremaa biꞌia berreasid̶au. ¹⁷Naka jarasid̶au:

«Dai Akõre Mechiu chi Joma Poyaabarii, chi nibad̶a maud̶e chi nii.11:17 Griego bed̶ead̶e chi b̶ee kartad̶e nau sid̶a b̶ʉ kub̶uu: Maud̶e chi neei b̶uu.

Bichíturu kid̶ibai a jara panuu bichi ãrea poyaabarii unubia b̶uud̶eeba maud̶e jomaurã bichi juad̶e ua b̶eesiid̶eeba.

¹⁸Druachad̶ebena bichi ome kĩru kopaneesid̶au. Maamina chi bichi kastikai ewari neesii.11:18 Bichi kastikai ewari neesii. Griego bed̶ead̶e naka b̶ʉ kub̶uu: Bichi kĩrubi ewari neesii. Jãabae bichiba chi biuped̶aad̶a jideai.

Maud̶e chi bichi baita berreabadaurã trajabadaurãmaa, bichi ẽbẽrarãmaa, joma chi bichi wapeabadaurãmaa, chi aude kaebeurãmaa maud̶e chi aude mechiurãmaa ne bia dead̶akai chi bia ãchiba wauped̶aad̶a kĩra.

Maamina chi nau iujãad̶e kachirua wauped̶aad̶a bichiba kastikakuai».

¹⁹Maabae Dachi Akõre de mechiu bajãad̶e kub̶uu ewa wãsii. Aria chi Dachi Akõreba waubid̶a baúl11:19 Dachi Akõreba waubid̶a baúl. Mau jara b̶uu ichi bed̶ea dead̶a ichiba waui bad̶a joma wausii. Chi ichid̶irã joma nu b̶uabarii, ne joma dea b̶uabarii maud̶e kariba b̶uabarii. Éxodo 16:33. kub̶uu mʉʉba unusii. Ara maud̶e bã puri chebi kob̶eesii, bã to kob̶eesii, maud̶e chi bã ãrea ʉrʉrʉa wã kob̶eesii. Nau iujãa uri kob̶eesii maud̶e hielo sid̶a kui kĩra ãrea che kob̶eesii.

Wẽra Juanba unud̶a

¹Bajãad̶e ne makai b̶uu ʉ̃rʉbena unusii. Mʉʉba wẽra ab̶a ʉmada paru kĩra jʉ̃ b̶uu unusii.12:1 Mau wẽra jara b̶uu chi biawãra Israel puuru, chi Dachi Akõre ida b̶ud̶akaurã maud̶e chi Dachi Akõreba karibabarii deai jarad̶ad̶e ijãabadaurã. Nau wẽra chi Babiloniad̶ebena wẽra kachirua nii awara nii 17:1-18d̶e. Mau jʉ̃rʉ jed̶ako ʉ̃rʉ tʉa kub̶uasii. Boro jũra pusterrea 12 waud̶a jʉ̃ b̶uasii. ²Mau wẽra warr baraa b̶uasii. Chi warr anakʉd̶e adauruud̶eeba chi puaba b̶ia b̶uasii.

³Maabae maucha ne makai b̶uu ʉ̃rʉbena bajãad̶e unusii. Mʉʉba dragón mimichia puria nii unusii. Mau dragón boro 7 inibasii maud̶e kachu sid̶a 10 inibasii. Boro jũra borocha jʉ̃ b̶uasii. ⁴Chi druu neapesiid̶e pusterrearã bajãad̶ebenarã beraa mita b̶aesid̶au nau iujãad̶e.12:4 Beraa mita. Griego bed̶ead̶e naka b̶ʉ kub̶uu: la tercera parte. Mau dragón wẽra warr adaui baita b̶uumare b̶ari nub̶eesii chi warr adauruud̶e mii baita. ⁵Ara maud̶e chi wẽraba warr adausii. (Mau warrba kĩra chuburiayuwãe joma nau iujãad̶ebenarãmaa ichid̶e ijãabia b̶uai).12:5 Kĩra chuburiayuwãe. Griego bed̶ead̶e naka b̶ʉ kub̶uu: Jiorrba waubiai. Salmos 2:7-9. Maamina mau dragonba mii naed̶e Dachi Akõreba mau warr ʉtaa adoesii ichi ãkaud̶e akʉ b̶uumaa. ⁶Maabae chi wẽra drua sirua wãꞌãed̶aa miru wãsii. Dachi Akõreba aria joma maka wau b̶uasii 1.260 ewarid̶aa mau nu uru panad̶amera.

⁷Mau maad̶akare chi ángel mechiu Miguel abadau maud̶e chi angelerã joma ichi baara duanuu, chi dragón chi ichi baara duanuu ome bajãad̶e chĩosid̶au. ⁸Maamina chi dragonba maud̶e chi ichi baara duanuuba poyaad̶aabasii. Maud̶eeba chi maarã makaa poyaa bajãad̶e panad̶aabasii. ⁹Ara maud̶e chi dragón mechiu maud̶e joma chi ichi baara duanuu nau iujãad̶aa jirakuasid̶au. Mau dragón chi nabẽraed̶ebena damabʉ. Chi mau trʉ̃ jʉbawãe nii maud̶e Satanás abadau.12:9 Griego bed̶ead̶e jʉbawãe nii jara b̶uu «Waabenarã ʉ̃rʉbena kachirua jarabarii». Satanás trʉ̃ jara b̶uu «chi kĩramaa». Mauba joma nau iujãad̶ebenarã setaa kũrua ua b̶uu.

¹⁰Maabae mʉʉba ab̶a bajãad̶e jĩkua berrearuu ũrisii. Naka jarasii:

«Id̶i Dachi Akõreba ichi ẽbẽrarã karibamaa b̶uu.

Id̶i ichi poyaabariiba jomaurã ichi juad̶e ua b̶uu.

Cristo chi karibabarii deai jarad̶aba joma poyaai.

Bajãad̶ebena iujãad̶aa chi dachi ãbarã jideabarii jiratasii.

Mauba ẽsabud̶e maud̶e ãyadaa Dachi Akõre daad̶e makabachii.

¹¹Dachi ãbarãba Oeja Kaebe Nii oa ched̶aba maud̶e ichi bed̶ea jara panuud̶eeba poyaasid̶au.

Dachi biud̶ai panuu ʉ̃rʉbena wapead̶aabasii, bari Cristo kakua biud̶ayua panasii.

¹²¡Maud̶eeba joma chi bajãad̶e panuurã kĩrajʉ́sturu!

Maamina chi nau iujãad̶e maud̶e mard̶e panuurã sid̶a miichuburi panad̶ai, jʉbawãe nii machimaa neesiid̶eeba.

Mau miusia ãrea b̶uu, ãrea b̶uabai b̶uu kuitaa b̶uud̶eeba».

¹³Chi dragonba ichi nau iujãad̶aa jiratad̶a kuitaasiid̶eeba, mau wẽra warr adaud̶a wãraasii kachirua wauyua. ¹⁴Maamina Dachi Akõreba mau wẽramaa nejõo mechiu ikia ome deasii drua sirua wãꞌãed̶aa ũub̶ari wãmera. Dachi Akõreba aria joma wau uru b̶uasii año õbea y medio chi dragond̶ebena nu uru b̶uai baita. ¹⁵Maud̶eeba chi dragonba ichi okarrd̶ebena bania id̶utasii do kĩra chi mau wẽra ũu adoemera. ¹⁶Maamina ioroba mau wẽra karibasii. Chi ioro ewaped̶a maabae chi bania dragonba ichi okarrd̶ebena id̶u b̶uad̶a joma dosii. ¹⁷Maud̶eeba chi dragón chi mau wẽra ome ãrea kĩru kob̶eesii. Ara makʉd̶e chi waabenarã chi mau wẽrad̶ebena imiped̶aad̶a ome chĩod̶e wãsii. Maarã imiped̶aad̶a chi Dachi Akõreba waubi b̶uu bed̶ea waubadaurãbʉ maud̶e chi Jesusba jaradead̶ad̶e ijãabadaurãbʉ.

Ãnimara kachirua mard̶ebena awara need̶a

¹Mau maad̶akare chi dragón mar iikaa ibud̶e ʉkʉ nub̶eesii.13:1 Chi dragón mar iikaa ibud̶e ʉkʉ nub̶eesii. Griego bed̶ead̶e chi b̶ee kartad̶e b̶ʉ kub̶uu: Mʉ mar ibud̶e akʉ nub̶eesii. Waabenarã kartad̶e mau bed̶ea b̶ʉ kub̶uu 12:18d̶e. Ara maud̶e mʉʉba ãnimara kachirua mard̶ebena awara neeruu unusii. Mau ãnimara 7 boro inibasii maud̶e 10 kachu. Kachurãcha boro jũra ab̶a inibasii. Borocha trʉ̃ kachirua Dachi Akõre ʉ̃rʉbena b̶ʉ kub̶uasii. ²Chi mau ãnimara mʉʉba unud̶a imama kĩra pã nibasii. Ichi jʉ̃rʉ ui jʉ̃rʉ kĩra nibasii. Chi okarr león okarr kĩra nibasii. Dragonba mau ãnimaramaa chi poyaabarii deasii. Maud̶e ichi rey ãkaud̶e akʉ b̶eebisii chi nau iujãad̶e panuurã joma ichi juad̶e duanamera. ³Chi mau ãnimara boro ab̶ad̶e tõod̶a bad̶a anid̶a ab̶a inibasii. Biawãra mau tõod̶aba biui b̶uasii maamina chi tõod̶a jãabae anid̶a b̶uasii. Joma nau iujãad̶ebenarã kãare kʉ̃risiad̶ai adua panasiid̶eeba mau baara panasid̶au. ⁴Maud̶e ãchiba chi dragonmaa biꞌia berreabachid̶au, mau ãnimaramaa chi poyaabarii dea b̶uasiid̶eeba. Naka jarabachid̶au: «¿Kai nau ãnimara kĩra nima? ¿Kai nau ome poyaa chĩoi b̶uma?»

⁵Dachi Akõreba mau ãnimaramaa ara ichi chi aude mechiu nii a jarai ida kabisii maud̶e Dachi Akõre chi biawãe nii a jaramera. Maud̶e 42 jed̶akod̶aa nau iujãad̶ebenarã ichi juad̶e ua b̶uai ida kabisii. ⁶Maud̶e mauba Dachi Akõre ʉ̃rʉbena kachirua jarabachii, maud̶e ichi trʉ̃ ʉ̃rʉbena, chi ichi b̶uumaabena ʉ̃rʉbena, maud̶e joma bajãad̶e duanuu ʉ̃rʉbena sid̶a. ⁷Maud̶e Dachi Akõreba mau ãnimaramaa ara ichi ẽbẽrarã ome chĩobii ida kabisii maarã poyaamera. Ẽbẽrarã didiwaraa joma, puuru joma, bed̶ea didiwaraa joma maud̶e chi druarã joma ichi juad̶e ua b̶uabisii. ⁸Maud̶e joma nau iujãad̶ebenarãba chi ãnimaramaa biꞌia berreasid̶au. Iujãa joma waukuai naed̶e maarã trʉ̃ chi Oeja Kaebe Nii kartad̶e wãꞌãe basii. Mau kartad̶e chi ẽbẽrarã joma biud̶aabai panuu trʉ̃ b̶ʉ kub̶uu. ⁹Chi kʉʉrʉ bara niiba ũrise:

¹⁰«Chi jʉ̃ad̶ai panuu, mau jʉ̃ad̶ai.

Chi espadaba biud̶ai panuu, mau espadaba biud̶ai».13:10 Jeremías 15:2; 43:11.

Maud̶eeba ẽbẽrarã Dachi Akõred̶erã ãrea ijãad̶aped̶a ãrea dauchia jãadua panad̶ai panuu.

Chi ãnimara iorod̶ebena awara need̶a

¹¹Mau maad̶akare mʉʉba ãnimara june iorod̶ebena awara neeruu unusii. Mau ãnimara oeja kaebeu kĩra kachu ome inibasmina, dragón kĩra berreabachii. ¹²Chi ãnimara iorod̶ebena awara need̶a joma chi nau iujãad̶ebenarã chibari b̶eesii, chi nabena ãnimara kĩra. Ichi poyaad̶eeba ẽbẽrarãmaa chi nabena ãnimaramaa biꞌia berreabiabachii. Mau tõod̶aba biui b̶uasmina, wabid̶a chokae b̶uasii. ¹³Ãnimara iorod̶ebena need̶aba ẽbẽrarãba ne poyaa waud̶akau mechiurã waukuabachii. Ẽbẽrarãba ichiamaa panasiid̶e bajãad̶ebena aoko nau iujãad̶e b̶aebisii. ¹⁴Dachi Akõreba mau ãnimara iorod̶ebena awara need̶amaa chi mau ẽbẽrarãba ne poyaa waud̶akau wauyu ida kabisii chi ãnimara mard̶ebena awara need̶a trʉ̃d̶e.13:14 Dachi Akõreba mau ãnimara...awara need̶a trʉ̃d̶e. Mau bed̶ea poyaa naka b̶ʉ kub̶uu: Jʉbawãe niiba chi iorod̶ebena awara need̶a ãnimaramaa meserãa deasii mau ẽbẽrarãba ne poyaa waud̶akau chi mard̶ebena awara need̶a ãnimara trʉ̃d̶e poyaa wau b̶uamera. Maka chi iorod̶ebena awara need̶aba nau iujãad̶ebenarã setaa kũruasii. Maka chi ãnimara kuenda juaba ne kaped̶aad̶a waubiasii, chi mau espadaba tõoped̶a maud̶e wabid̶a chokae nii kĩra.13:14 Maka ãnimara kuenda...chokae nii kĩra. Mau bed̶ea poyaa naka b̶ʉ kub̶uu: Maka juaba ne kaped̶aad̶a waubisii chi ãnimara nekoba tõod̶a bad̶a biud̶a chokae jiradu nii kĩra. Maka wauped̶aad̶akare jomaurãba mau ãrea kʉ̃riad̶ai panuu asii. ¹⁵Mau iorod̶ebena awara need̶amaa ida kabisii chi ãnimara kuenda juaba ne kaped̶aad̶a ʉ̃yaba deamera maud̶e berreabimera.13:15 Mau iorod̶ebena awara...berreabimera. Mau bed̶ea poyaa naka b̶ʉ kub̶uu: Jʉbawãe niiba mau ãnimara iorod̶ebena awara need̶amaa ida kabisii chi ãnimara kuenda juaba ne kaped̶aad̶a ʉ̃yaba deamera maud̶e berreabimera. Maabae chi iorod̶ebena awara need̶aba chi ãnimara kuenda juaba ne kaped̶aad̶a ãrea kʉ̃riad̶awẽerã beabiasii. ¹⁶Mau awara chi iorod̶ebena awara need̶aba jomaurãmaa jua biare maebʉrã daub̶ʉʉrʉd̶e seña b̶ubiasii. Chi aude mechiurãmaa, chi kaebeurã, chi nejarra barau nuree, chi nejarr barauwãe nuree, chi chibari baita bari trajabadaurã maud̶e chi chibariswãe nuree mau seña b̶ubiasii. ¹⁷Mau seña uru nuréburu nedod̶ai panasid̶au maud̶e poyaa nedobʉid̶ai panuu. Mau seña chi ãnimara mard̶ebena awara need̶a trʉ̃ basii maebʉrã ichi trʉ̃ número basii. ¹⁸Mau numeroba kai ʉ̃rʉbena jara b̶uu kuitaad̶ai baita chi kuitaa ãrea nibai b̶uu. Chi kʉ̃risia kuitaa niiba poyaa kuitaai chi kai ʉ̃rʉbena jara b̶uu. Mau número ẽbẽra trʉ̃ basii. Nau chi trʉ̃bʉ: 666.

144.000 ẽbẽrarã kariped̶aad̶a

¹Mau maad̶akare mʉʉba chi Oeja Kaebe Nii Sión ead̶e ʉkʉ nub̶uu unusii. Chi mau baara 144.000 ẽbẽrarã panasii. Ãchi daub̶ʉʉrʉd̶e chi Oeja Kaebe Nii trʉ̃ maud̶e ãchi Akõre trʉ̃ b̶ʉ uru panasii. ²Maabae mʉʉba bajãad̶e do ʉrʉrʉa kĩra ũrisii, bã ʉrʉrʉa kĩra. Chi mʉʉba ũrisii, arpa chaamaa panuud̶e jĩwabarii kĩra b̶uasii. ³Maud̶e chi Dachi Akõre chi rey ãkau daad̶e kari wid̶i karimaa panasid̶au, chi kimare chokae nuree daad̶e, maud̶e 24 chõrarã mechiurã daad̶e. Ab̶au bid̶a poyaa kuitaabasii mau kari karii baita. Bari chi 144.000 Dachi Akõreba nau iujãad̶ebena karibakuad̶áburu karid̶ai kuitaa panasii. ⁴Maarã ẽbẽrarã wẽra aud̶ua nureasii. Dachi Akõre baita maarã b̶aꞌãra bid̶a kachiruaswãe nureasii. Maarã chi Oeja Kaebe Nii baara chi wãaruumaa wãbadau. Dachi Akõreba nau iujãad̶ebena chi maarã ichi baita karibakuasii, ichi baita maud̶e chi Oeja Kaebe Nii baita bid̶a panad̶amera chi nabena chaud̶a ichimaa dearuu kĩra. ⁵Maarãba b̶es ab̶a bid̶a setaa jarad̶akau. Bari kachiruaswãe nuree.

Chi angelerã õbea panuurãba jaraped̶aad̶a

⁶Mau maad̶akare mʉʉba ángel ab̶a bajãad̶e ũub̶ari nii unusii. Mauba chi bed̶ea bia uru b̶uasii chi nau iujãad̶ebena jomaurãmaa jarai baita: puurud̶ebenarãcha, druad̶ebenarãcha, ẽbẽrarã didiwaraacha maud̶e bed̶ea didiwaraacha. Mau bed̶ea ewaricha maka b̶uai. ⁷Mauba jĩwa naka jarasii: «¡Dachi Akõre wapeásturu! Ichíturu chi mechiu nii ásturu, ichiba kastikai ewari neesiid̶eeba. Bajãa, iujãa, mar maud̶e bania iorod̶e bumadrubarii waud̶ad̶eeba, mau biꞌia berreásturu».

⁸Mau ángel kaad̶e neeped̶a naka jĩkua jarasii: «Babilonia puuru mechiu ãrisii. Biawãra joma ãrikuasii. Chi mau puurud̶ebenarãba ãrea mia kĩra nejasia wau panuud̶eeba drua aꞌawaraabenamaa ara mau kĩra kachirua waubiasid̶au uva b̶aa asia doobai panuud̶e dobiaduu kĩra».

⁹Mau ángel wãd̶akare kaad̶e june ab̶a ũub̶ari neesii. Mauba naka jarasii: «Ab̶auba chi mau ãnimaramaa biꞌia berrearuubʉrã maud̶e chi ara ichi kĩra juaba ne kaped̶aad̶amaa biꞌia berrearuubʉrã, maud̶e chi seña daub̶ʉʉrʉd̶e maebʉrã juad̶e ida waubiiruubʉrã, ¹⁰Dachi Akõreba ichi kĩruuruuba mau ẽbẽra kachirua ãrea b̶ui uva b̶aa asia dobiiruu kĩra. Mau ẽbẽra chi ángel biꞌia nuree daad̶e, maud̶e Oeja Kaebe Nii daad̶e azufre aoko nub̶uuba ãrea biꞌiwãe b̶uai. ¹¹Mau ẽbẽra ãrea biꞌiwãe b̶uumaa aoko nub̶uu id̶i kiikau, bari ewaricha bod̶iu nub̶uabarii. Ab̶auba chi ãnimara maud̶e chi ara ichi kĩra juaba ne kaped̶aad̶a ãrea kʉ̃riaruubʉrã, kʉrrjĩruswãe b̶uai. Chi mau ãnimara seña juad̶e waubiped̶aad̶a maebʉrã daub̶ʉʉrʉd̶e ãyadaa maud̶e ẽsabud̶e kʉrrjĩruswãe b̶uai». ¹²Maud̶eeba ẽbẽrarã Dachi Akõred̶erã ãrea dauchia jãadua panad̶ai panuu. Jesusd̶e ãrea ijãad̶aped̶a, ichiba waubi b̶uu bed̶ea ũribaba panad̶ai panuu.

¹³Mau maad̶akare mʉʉba bajãad̶e ab̶aba jaraaruu ũrisii: «Chi kartad̶e naka b̶ʉse: “Id̶iid̶eeba chi Dachi Mechiud̶e ijãa biubadaurã biꞌia panad̶ai”».

Maud̶e Dachi Akõreba naka jarasii: «Biawãra biꞌia panad̶ai. Maarã biꞌiwãe panad̶ad̶ebena kʉrrjĩru panad̶ai, maarãba biꞌia wauped̶aad̶a waa chau kãriid̶eeba».14:13 Maarãba biꞌia wauped̶aad̶a waa chau kãriid̶eeba. Griego bed̶ead̶e naka b̶ʉ kub̶uu: maarãba wauped̶aad̶a ãchi kaad̶e nibad̶ai.

Dachi Akõreba ẽbẽrarã kastikai ʉ̃rʉbena

¹⁴Mau maad̶akare mʉ bajãad̶aa ichiasiid̶e jʉ̃rʉara torr unusii. Mʉʉba chi Ẽbẽra Ba B̶uad̶a kĩra mau jʉ̃rʉara ʉ̃rʉ akʉ b̶uu unusii.14:14 Chi Ẽbẽra Ba B̶uad̶a kĩra. Daniel 7:13. Boro jũra nee waud̶a jʉ̃ b̶uasii. Ichi juad̶e neko peed̶ea jũria b̶uu uru b̶uasii. ¹⁵Maud̶e Dachi Akõre de mechiu bajãad̶e kub̶uareeba ángel ab̶a awara neesii. Chi mauba jʉ̃rʉara ʉ̃rʉ akʉ b̶uasiimaa naka jĩwa b̶ia jarasii: «Iujãad̶e uud̶a joma waraa kub̶uu. Bichi neko jũria b̶uuba tarise chi tarii ewari basiid̶eeba». ¹⁶Ara makʉd̶e chi jʉ̃rʉara ʉ̃rʉ akʉ b̶uad̶aba neko jũria b̶uuba ara jua ab̶a tuuruba joma nau iujãad̶e tarisii.

¹⁷Maabae Dachi Akõre de mechiu bajãad̶e kub̶uud̶ebena ángel ab̶a maucha awara neesii. Mau bid̶a neko peed̶ea jũria b̶uu ab̶a uru b̶uasii. ¹⁸Maabae chi Dachi Akõre baita bajãad̶e kera baa deabadaumarebena june ab̶a ángel awara neesii. Maud̶eeba chi tʉbʉchia aoko uru b̶uabarii chi kera baai baita. Naka jĩwa jarasii chi neko peed̶ea jũria uru b̶uumaa: «Chi iujãad̶ebena uva waraa kub̶uud̶eeba, bichi neko jũria b̶uuba joma tuukuase». ¹⁹Ara makʉd̶e chi angelba chi neko jũria b̶uuba jua ab̶a tuuped̶a chi uva b̶ʉʉrʉcha araa pesii. Maabae chi uva biraduabadaumare bʉikasii biraduad̶amera chi b̶aa adaud̶ai baita. Mau jara b̶uu Dachi Akõreba kastikai. ²⁰Chi uva Jerusalén puuru awara biraduasid̶au. Biraduasid̶aud̶e mamabena oa ãrea chesii.14:20 Oa ãrea chesii. Griego bed̶ead̶e naka b̶ʉ kub̶uu: 1.600 estadia oa chesii. Kajuma bed̶ead̶e jara b̶uu «300 kilómetro oa chesii». Mau oa chi id̶ubena ʉtʉ mura okarrd̶e jʉ̃badaumaa ba b̶uasii.

Chi 7 angelerãba biꞌiwãe paneebiad̶ai ʉ̃rʉbena

¹Maabae mʉʉba waya maucha ne makai biꞌia b̶uu bajãad̶e unusii. Mau kakua ẽbẽrarãba kãare kʉ̃risiad̶ai adua paneesii. Angelerã 7 duanasii. Ãchi ab̶aab̶aa chi kaad̶earebena ne kachirua uru panasid̶au mauba biꞌiwãe paneebiad̶ai baita. Dachi Akõreba maka kastikaped̶a, chi kĩrubi wãꞌãe.

²Mau awara mʉʉba mar biirio kĩra dod̶aa aoko nub̶uu unusii. Mau jãkaa joma chi ãnimara poyaaped̶aad̶a ʉkʉ nub̶easii. Maarãba mau ãnimara maud̶e chi ara ichi kĩra juaba ne kaped̶aad̶a kʉ̃riad̶akabasii, maud̶e chi trʉ̃ número b̶ʉbiad̶aabasii. Arpa Dachi Akõreba dead̶a uru panasii. ³Chi arpa chaamaa panuud̶e Moisés chi Dachi Akõre baita bari trajabarii kari, maud̶e chi Oeja Kaebe Nii kari karimaa panasii. Naka karisid̶au:

«Dachi Mechiu, Dachi Akõre, chi Joma Poyaabarii, bichiba wau b̶uu ãrea bibuara b̶uu.

Bichiba wau b̶uu ʉ̃rʉbena ẽbẽrarãba kuitaa kʉ̃risiad̶akau.

Jomaurã Mechiu, bichiba wau b̶uu jipa b̶uu maud̶e bichi bed̶ea ab̶a b̶uu biawãrabʉ.15:3 Jomaurã Mechiu. Griego bed̶ead̶e chi b̶ee kartad̶e b̶ʉ kub̶uu: ẽbẽrarã Dachi Akõred̶erã rey maebʉrã ewaricha b̶uu rey.

⁴Dai Mechiu, ¿kaiba bichi wapeabai b̶uma?

¿Kaiba bichi chi Mechiu nii aabaima? Bichi Dachi Akõre báitaburu niibʉ.

Joma druachad̶ebena imiped̶aad̶aba bichimaa biꞌia berread̶ai, bichiba chi jipa wau b̶uu jomaurãmaa unubiasiid̶eeba».

⁵Mau maad̶akare mʉʉba ʉtaa bajãad̶aa ichiasiid̶e unusii Dachi Akõre de mechiud̶e ed̶a kẽsa paru jiranuu ewa jiranasii. ⁶Mau ded̶ebena 7 ángel awara neesid̶au. Maarãba 7 ne kachirua uru panasid̶au mauba biꞌiwãe paneebiad̶ai baita. Maarãba paru torroa ted̶echoa lino waud̶a b̶uu jʉ̃ panasid̶au, maud̶e nee waud̶a ab̶a odeab̶ari jʉ̃ panasid̶au. ⁷Maud̶e chi kimare chokae nureed̶ebena ab̶aba ángel 7 panuurãmaa ab̶aab̶aa sãu nee waud̶a dead̶akasii. Mau sãu Dachi Akõre kĩru b̶uuba waabiru b̶uasii. ⁸Dachi Akõre ded̶e nari ãrea basii ichi ted̶echoad̶eeba maud̶e poyaabariid̶eeba. Maud̶eeba ab̶a bid̶a mau ded̶e poyaa wãabasii, chi 7 angelerãba ne kachirua uru panuu biꞌiwãe paneebiai baita wãꞌãeruud̶aa.

Dachi Akõreba 7 kaad̶eare biꞌiwãe paneebiai ʉ̃rʉbena

¹Maud̶e mʉʉba Dachi Akõre de bajãad̶e kub̶uareeba ab̶aba jĩwa berrearuu ũrisii. 7 angelerãmaa nau jarakuasii: «Chi sãu Dachi Akõre kĩru kub̶uuba waabiru nub̶uu iujãad̶e eakoad̶e wã́sturu». ²Ara makʉd̶e ángel ab̶a wãped̶a ichi sãud̶e uru b̶uad̶a iujãad̶e eabʉisii. Mauba chi ãnimara trʉ̃ daub̶ʉʉrʉd̶e maebʉrã juad̶e uru nuree maud̶e joma chi ara ichi kĩra juaba ne kaped̶aad̶a ãrea kʉ̃riabadaurã chaumia kachirua kakuad̶e posid̶au.

³Mau maad̶akare june ab̶a angelba ichi sãud̶e uru b̶uad̶a mard̶e eabʉisii. Mauba chi mar oa ba did̶isii. Ẽbẽra ab̶a biud̶a oa kĩra nub̶eesii. Maabae chi mard̶e chokae nuread̶a joma kinisid̶au.

⁴Mau maad̶akare june ab̶a angelba ichi sãud̶e uru b̶uad̶a docha maud̶e iorod̶e bania bumadrubariicha eabʉikasii. Maabae mauba chi doorã joma oa ba did̶ikuasii. ⁵Maud̶e mʉʉba ũrisii chi bania nubarii angelba Dachi Akõremaa naka jaraaruu:

«¡Bichi biawãra Dachi Akõrebʉ! Id̶i bichi nii maud̶e naed̶e bid̶a nibasii. Bichiba ẽbẽrarã maka kastikasii.

⁶Maarãba bichi ẽbẽrarã maud̶e chi bichi baita berreabadaurã oa chebiasid̶au.

Maud̶eeba id̶i bichiba maarãmaa oa dobiamaa b̶uu maka chi kachirua wauped̶aad̶a kĩra».

⁷Mau maad̶akare mʉʉba ũrisii kera baa deabadau bajãad̶e b̶uareeba ab̶auba naka berrearuu: «Dai Akõre Mechiu chi Joma Poyaabarii, bichi biawãra niid̶eeba arakʉd̶e ẽbẽrarã kastikabarii».

⁸Mau maad̶akare june ab̶a angelba ichi sãud̶e uru b̶uad̶a ʉmada ʉ̃rʉ eabʉisii. Mauba chi ʉmada aude koabisii ẽbẽrarã baamera. ⁹Dachi Akõre ʉ̃rʉbena kachirua berrea panasii pisiaba ãrea baa panasiid̶eeba, ichiaburu maka ãrea biꞌiwãe panabia b̶uud̶eeba. Maamina ãchi kachirua waubadau ida b̶ud̶aabasii maud̶e Dachi Akõre chi Mechiu nii ad̶aabasii.

¹⁰Mau maad̶akare june ab̶a angelba ichi sãud̶e uru b̶uad̶a chi ãnimara chi rey ãkau ʉ̃rʉ eabʉisii. Ara makʉd̶e chi mau ewari pãriusii chi mau ãnimaraba juad̶e ua b̶uad̶amare. Maabae chi ichid̶irã puaba ãchi kẽrame kaabachid̶au. ¹¹Chi puaba maud̶e kakua chausiid̶eeba Dachi Akõre bajãad̶e b̶uu ʉ̃rʉbena kachirua berrea panasii. Maamina ãrea biꞌiwãe panasmina chi kachirua wau panuu ida b̶ud̶aabasii.

¹²Mau maad̶akare june ab̶a angelba ichi sãud̶e uru b̶uad̶a Éufrates do mechiud̶e eabʉisii. Ara makʉd̶e mau do poasii chi ʉmada neebariared̶ebena reyrã chĩod̶e needuud̶e do põasãad̶e kĩaraa wãd̶amera.

¹³Maud̶e õbea chi jai kachirua nureerã unusii. Ab̶a dragón okarrd̶ebena neesii. Ab̶a ãnimara okarrd̶ebena neesii. Maud̶e ab̶a Dachi Akõre baita berreabarii chi biawãrawãe okarrd̶ebena sid̶a neesii.16:13 Dachi Akõre baita berreabarii chi biawãrawãe. Mau chi ãnimara iujãad̶ebena chi naa need̶abʉ. Apocalipsis 13:11-18.¹⁴Maarã chi jai kachirua nuree jaurirãba ẽbẽrarãba ne poyaa waud̶akau ãrea wausid̶au. Maud̶e joma druachad̶ebena reyrãmaa jarakuad̶e wãsid̶au Dachi Mechiu ome chĩod̶e wãd̶amera chi Dachi Akõre Joma Poyaabarii kastikai ewarid̶e. ^15-16Maarãba hebreo bed̶ead̶e Armagedón abadau druad̶aa chi reyrã chĩod̶e uad̶osid̶au.

«¡Ũrísturu! Mʉ nechiru kĩra neei.16:15-16 Mateo 24:43-44; Lucas 12:39-40; Apocalipsis 3:3. Biꞌia panad̶ai chi mʉ neeruu esed̶au panuu maud̶e paru uru nuree. Maka mʉ neeruud̶e maarã ewaraa panad̶aabai maud̶e kĩra nejasia panad̶aabai».

¹⁷Mau maad̶akare june ab̶a kaad̶earebena angelba ichi sãud̶e uru b̶uad̶a ʉtʉ ed̶aa eabʉisii. Ara maud̶e Dachi Akõre de bajãad̶e kub̶uumare chi rey ãkau kub̶uareeba jĩwa naka jarasii: «Jãabae ara basma». ¹⁸Ara makʉd̶e bã puri chebi kob̶eesii, bã bed̶ea baraa ãrea to kob̶eesii, maud̶e ioromia sid̶a ãrea neesii. Dachi Akõreba ẽbẽra wausiid̶eed̶ebena id̶i jãka ioromia urikabasii. ¹⁹Mau ioromiaba puuru mechiu ab̶a nau iujãad̶ebena kõaped̶a, maabae aꞌawaraa puuru õbea kĩra b̶usii. Maud̶e nau iujãad̶ebena puururã sid̶a joma ãrikuasii. Ara maud̶e Dachi Akõreba Babilonia puuru mechiu kastikai kʉde uru b̶uai ida b̶uubasii. Uva b̶aa asia dobiiruu kĩra ichi kĩru kub̶uud̶eeba mau puuru ãrea kastikasii. ²⁰Mau ioromiaba mar kẽsa islarã kob̶ead̶a maud̶e ea joma wãꞌãebisii. ²¹Bajãad̶ebena ẽbẽrarã ʉ̃rʉ hielo mo mechiu kĩra b̶aesid̶au. Mau hielo beraa 40 kilos chikʉa b̶easii.16:21 Griego bed̶ead̶e naka b̶ʉ kub̶uu: talento ab̶a. Kajuma bed̶ead̶e b̶ʉ kub̶uu: 40 kilos. Mau hielo b̶aesid̶auba biꞌiwãe panasid̶aud̶eeba, maarãba Dachi Akõre ʉ̃rʉbena kachirua berreasid̶au.

Wẽra aud̶uabarii Juanba unud̶a

¹Jua ab̶a ome angelerãd̶ebena sãu 7 uru b̶uad̶a ab̶a mʉ b̶uumaa neeped̶a mʉʉmaa naka jarasii: «Wãuríduru. Mʉʉba unubii Dachi Akõreba saka wẽra aud̶uabarii trʉ̃ poa b̶uu kastikaaruu. Mau wẽra bania ãrea tãed̶e akʉ b̶uu.17:1 Mau wẽra bania ãrea tãed̶e akʉ b̶uu. Jeremías 51:13.²Nau iujãad̶ebena reyrã mau wẽra ome kachirua waubachid̶au. Maud̶e mau wẽraba ichi kakuaba barikiu kachirua wauruu unubachiid̶eeba joma nau iujãad̶ebenarã bid̶a ara mau kĩra waubachid̶au ituaba biu panuu kĩra».

³Ara makʉd̶e Dachi Akõre Jaurid̶eeba angelba mʉ drua sirua wãꞌãe b̶uud̶aa adoesii. Aria mʉʉba wẽra ab̶a ãnimara kachirua ʉ̃rʉ akʉ b̶uu unusii. Puria nibasii maud̶e ichi kakuad̶e trʉ̃ ãrea Dachi Akõre ʉ̃rʉbena kachirua jaraaruu b̶ʉ inibasii. Boro 7 maud̶e kachu 10 inibasii. ⁴Mau wẽra paru pãaraa maud̶e puria jʉ̃ nibasii. Nee, mo dod̶aa mipitaa maud̶e perla jʉ̃ nibasii. Ichi juad̶e sãu nee waud̶a uru b̶uasii. Mau sãud̶e barikia ne joma Dachi Akõreba kʉ̃riakau duanasii maud̶e mau wẽraba mia kĩra nejasia wau b̶uad̶a. ⁵Ichi daub̶ʉʉrʉd̶e trʉ̃ ab̶a ẽbẽrarãba kauwa ũrid̶akau b̶ʉ inibasii. Naka b̶ʉ inibasii:

«Mʉ Babilonia chi puuru mechiubʉ. Mʉ wẽrarã aud̶uabadaurã nawebʉ, maud̶e ne joma Dachi Akõreba nau iujãad̶e kʉ̃riakau nawebʉ».

⁶Mʉʉba ichiasiid̶e kuitaasii mau wẽra ẽbẽrarã Dachi Akõred̶erã oaba itua biu b̶uasii, chi Jesusd̶e ijãabadaurã maud̶e chi ichi ʉ̃rʉbena jarabadaurã beaped̶aad̶a oaba.

Mau wẽra unud̶akare kãare kʉ̃risiai adua basii. ⁷Maud̶e angelba mʉʉmaa nau id̶isii: «¿Sakãe kãare kʉ̃risiai aduama? Mau wẽra ʉ̃rʉbena ab̶auba kauwa ũrii b̶uu maud̶e chi ãnimara ʉ̃rʉ mau wẽra wãaruu akʉ b̶uu mʉʉba mau kauwa jarai. Maud̶e chi ãnimara boro 7 inii, maud̶e ichiba kachu 10 inii ʉ̃rʉbena biꞌia jarai. ⁸Chi bichiba unud̶a ãnimara naed̶e chokae nibad̶a id̶ibae wãꞌãe. Maamina ewari ab̶ad̶e eakarr ed̶aa chob̶ead̶ebena ʉtaa neeruud̶e, Cristoba mau ewaricha kastikai. Nau iujãad̶ebenarãba chi naed̶e nibad̶a maud̶e id̶ibae wãꞌãe waya neeruu unuuduud̶e kãare kʉ̃risiad̶ai adua panad̶ai. Nau iujãa waui naed̶e ãchi trʉ̃ chi ewaricha chokae duanabarii kartad̶e b̶ʉwẽa b̶uasii.

⁹»Chi bichiba unud̶a kauwa ũrii baita chi kuitaa ãrea nibai. Chi 7 boro, 7 ea jara b̶uu. Chi wẽra aud̶uabarii mau 7 ea ʉ̃rʉ akʉ b̶uu. ¹⁰Maud̶e chi 7 boro, 7 rey jara b̶uu. Maarã 7 reyrãd̶ebena, jua ab̶a biusid̶au. Chi maarãd̶ebenaba ẽbẽrarã wabid̶a ichi juad̶e ua b̶uu. Maud̶e wabid̶a maarãd̶ebenarã ab̶a awara neewẽa b̶uu, maamina chi mau neeruud̶e ẽbẽrarã rey baarumina ãrea b̶uabai. ¹¹Chi ãnimara chi naed̶e nibad̶a maud̶e id̶ibae wãꞌãe, mau chi jua ab̶a õbea reybʉ. Mau chi 7 reyrãd̶ebenabʉ. Cristoba mau ewaricha kastikai.

¹²»Chi bichiba unud̶a kachurã 10 panuu, 10 reyrã bad̶ai panuu jara b̶uu; wabid̶a reyrã bad̶awẽa panuu. Maamina chi ãnimara rey baaruud̶e ãchi sid̶a rey bad̶ai, ewari ãrea panad̶aabai b̶umina.17:12 Ewari ãrea panad̶aabai. Griego bed̶ead̶e naka b̶ʉ kub̶uu: Hora ab̶aburu ẽbẽrarã reyrã bad̶ai.¹³Maarã 10 reyrã kʉ̃risia arab̶aud̶e panuu. Maud̶eeba chi poyaabarii chi ãnimaramaa dead̶ai maud̶e ãchi puuru ichi juad̶e b̶ud̶ai. ¹⁴Maabae chi maarã Oeja Kaebe Nii ome chĩod̶ai. Maamina chi Oeja Kaebe Niiba chi maarã poyaakuai, ichi Jomaurã Reyrã Audeara Chi Aude Mechiu Nii maud̶e Joma Chi Mechiurã Audeara Chi Aude Mechiu Niid̶eeba. Poyaakuad̶akare chi ichid̶e ãrea ijãabadaurã ichi baara paneed̶ai. Ichiba chi maarã iukuaped̶a jʉrʉ adaukuasii».

¹⁵Maabae chi angelba naka jarasii: «Bichiba chi mau wẽra akʉ b̶uumare doorã ãrea unusii. Chi mau doorã ãrea puuru didiwaraa, bed̶ea didiwaraa maud̶e drua didiwaraa jara b̶uu. ¹⁶Chi bichiba unud̶aba kachurã 10 panuurãba maud̶e chi ãnimaraba wẽra aud̶uabarii kĩramaa panad̶ai. Maud̶eeba chi mauba uru b̶uu joma juakaa adaud̶ai. Joma ewaraa b̶ud̶ai. Maarãba ichi kiuru kod̶aped̶a maabae chi b̶eeruu baatad̶ai. ¹⁷Dachi Akõreba maarã 10 reyrã sõd̶e b̶usii ichiba kʉ̃ria b̶uu waud̶amera. Maud̶eeba maarãba kʉ̃risia arab̶aud̶e uru panad̶ai maud̶e chi ãnimaraba jaraaruu joma ijãad̶ai Dachi Akõreba jarad̶a makaaruud̶aa. ¹⁸Chi bichiba unud̶a wẽra aud̶uabarii puuru mechiu jara b̶uu. Mau puurud̶ebena reyba drua jomad̶ebena reyrã ichi juad̶e ua b̶uu».

Dachi Akõreba Babilonia kastikai ʉ̃rʉbena

¹Mau maad̶akare mʉʉba june ab̶a ángel bajãad̶ebena ed̶aa uruu unusii. Mau chi mechiu nibasii. Ichi ted̶echoaba nau iujãa ʉ̃d̶aasii. ²Naka jĩwa jarasii:

«¡Babilonia puuru mechiu ãrisii! ¡Biawãra joma ãrikuasii! Ẽbẽrarã duanad̶amare, bari jãma chi jai kachirua nuréturu duanuu.

Jãma joma jairã kachirúaturu duanuu. Joma chi Dachi Akõremaarã ibanarã miadáturu jãma duanuu.18:2 Griego bed̶ead̶e chi b̶ee kartad̶e nau sid̶a b̶ʉ kub̶uu: Joma ãnimara Dachi Akõremaarã miadáturu jãma duanuu.

³Mau puurud̶ebenarãba mia kĩra nejasia wau panuud̶eeba, drua aꞌawaraabenamaa ara mau kĩra kachirua waubiasid̶au uva b̶aa asia doobai panuud̶e dobiaduu kĩra.

Maud̶e reyrã joma druachad̶ebenarãba ara mau kĩra waubiasid̶au wẽra aud̶uabarii ome kachirua wau panuu kĩra.

Chi nau iujãad̶ebena ne kaebea nedobadau barau duaneesii, mau puurud̶ebenarãba ne kaebea chi aude chi bia ãrea adaud̶ai kʉ̃ria panasiid̶eeba».

⁴Maabae mʉʉba ũrisii ab̶auba bajãad̶ebena naka jaraaruu:

«Mʉ ẽbẽrarã, Babiloniad̶ebena wãurísturu mau puurud̶ebenarãba kachirua wau panuu waurãad̶amera.

Maka Dachi Akõreba maarã kastikakuaruud̶e, machi kastikaabai.

⁵Mau puurud̶ebenarãba kachirua ãrea waumaa panuu. Maarã kachirua bajãad̶e neesid̶au, ab̶au ʉ̃rʉ ʉtaa pewãaduu kĩra.

Dachi Akõreba ãchiba kachirua wauped̶aad̶a kĩrabai ida b̶uwẽa b̶uu.

⁶Jãu puuru kachirua wáusturu waabenarãmaa makasid̶au kĩra.

Chi mauba jãka waabenarãmaa miadaa wausii baerã, b̶es ome kachirua wáusturu.

Chi mauba waabenarãmaa miadaa wausii uva b̶aa asia doobai b̶uud̶e dobiaruu kĩra.

Maud̶eeba maumaa b̶es ome miadaa wáusturu, uva b̶aa asia doobai b̶uud̶e b̶es ome dobiaruu kĩra.

⁷Mau puuru ãrea biꞌiwãe paneebísturu maud̶e ãrea kĩra nomaabísturu,

ãchi puuru mechiu b̶uu a panuud̶eeba maud̶e ne biꞌia ãrea uru panuu a panuud̶eeba.

Mau puurud̶ebena naka kʉ̃risia duanuu. “Mʉ chi reina ãkaud̶e akʉ b̶uu kĩra nii.

Mʉ ab̶a pẽdrãa kĩra niiwãe. Mʉ biꞌiwãe b̶uabai”.

⁸Maud̶eeba ewari ab̶aburu kĩra nomaa jẽai, jarrbisiaba kachirua b̶uai, maud̶e biui.

Dachi Akõre Mechiu chi joma poyaabariiba mau puuru joma ãriped̶a baabʉʉi».

⁹Reyrã drua jomad̶ebenarãba jãu puurud̶ebenarã ome kachirua waubachid̶au wẽra aud̶uabarii ome kãi b̶eeruu kĩra. Maarã sid̶a barau paneesii mau puurud̶e ne bia wãꞌãekaraa uru panad̶a adausid̶aud̶eeba. Maud̶eeba chi mau puuru baawãmaa b̶uud̶e nari unuuduud̶e maarã ẽrod̶ai. ¹⁰Wapead̶ai Dachi Akõreba Babilonia puuru kastikad̶a kĩra maarã kastikakuai. Maud̶eeba kaitawẽeba ichia kopanuuba naka jarad̶ai:

«¡Miichuburi, Miichuburi, Babilonia puuru mechiu ne joma waubadaud̶eeba!

Dachi Akõreba mau puuru kãꞌãabariwãed̶e kastikai».

¹¹Nau druad̶ebena ne kaebea nedobʉibadaurã jẽad̶ai mau puuru kakua ãchiba nedobʉi panuu kaiba nedod̶ai wãꞌãe baid̶eeba. ¹²Mau puurud̶e ne joma nedobʉibachid̶au: Nee, parata, mo dod̶aa mipitaa maud̶e perla chi nejarr ãrea id̶ibadau, lino maud̶e seda paru chi aude chi bia, paru pupuchia, paru purr, bakuru tuwaa b̶ee, ne elefante kid̶a waud̶a, ne bakuru chi nejarr ãrea id̶ibadau waud̶a, bronce waud̶a, ne jiorr waud̶a maud̶e ne mármol mokara waud̶a.18:12 Elefante kid̶a. Kajuma bed̶ead̶e b̶ʉ kub̶uu: marfil.¹³Canela, joma barikiu ne tuwaa, incienso ne tuwaa, mirra ne tuwaa, kera, uva b̶aa, olivo drabirua, harina biꞌia b̶ad̶a, trigo, pakarã, oejarã, murarã maud̶e karretarã nedobʉibachid̶au. Maud̶e mau puurud̶e ẽbẽrarã sid̶a nedobʉibachid̶au chibari baita bari trajabadaurã nuread̶amera. ¹⁴Joma mau nedobʉibadaurãba naka jarad̶ai:

«Joma mau puurud̶ebenarãba kʉ̃ria panad̶a jãabae wãꞌãesii. Chi nejarra ãrea uru panad̶a maud̶e chi ne bia nuree ãrea uru panad̶a joma wãꞌãesii. Waa makaa adaud̶aabai».

¹⁵Biawãra mau puurud̶aa ne kaebea nedobʉid̶e wãped̶aad̶a ãrea barau paneesii. Chi maarã wapea panad̶ai Dachi Akõreba mau puuru kastikad̶a kĩra ãchi sid̶a kastikaid̶eeba. Maud̶eeba kaitawẽeba ichia kopanuuba naka biuchaa jẽasid̶au:

¹⁶«¡Miichuburi, Miichuburi jãu puuru mechiu b̶uad̶a!

Jãu puuru wẽra lino paru chi aude chi bia jʉ̃ b̶uad̶a kĩra b̶uasii.

Wẽra paru pãaraa maud̶e puria jʉ̃ b̶uu kĩra b̶uasii.

Ne kaebea nee waud̶a, mo dod̶aa mipitaa maud̶e perla chi nejarr ãrea id̶ibadau jʉ̃ b̶uasii.

¹⁷Maamina mau puurud̶e ne bara b̶uad̶a kãꞌãabariwãed̶e wãꞌãesii».

Joma chi jãba adoebadaurã, jãbad̶e wãbadaurã, jãbad̶e trajabadaurã maud̶e mau mard̶e trajabadaurãba kaitawẽeba ichia duanad̶ai. ¹⁸Mau puuru baa nub̶uu nari unuuduud̶e jĩwa naka jarad̶ai: «¿Sãu puuru jãu puuru kĩra b̶uasma?» ¹⁹Nomaaba ãchi boro ʉ̃rʉ ioro jora kuikuad̶ai maabae jĩwa naka jẽad̶ai:

«¡Miichuburi, Miichuburi jãu puuru mechiu b̶uad̶a! Jãu puuru ne bara b̶uasiid̶eeba, joma chi jãba uru b̶ead̶a aria barau duaneesii.

Maamina jãu puuru kãꞌãabariwãed̶e joma ãrisii.

²⁰¡Joma bajãad̶e duanuu kĩrajʉ́sturu, jãu puuru ãrisiid̶eeba!

Ẽbẽrarã Dachi Akõred̶erã, Jesusba bʉid̶arã maud̶e Dachi Akõre baita berreabadaurã kĩrajʉ́sturu.

Dachi Akõreba jãu puuru kastikai machimaa miadaa wausiid̶eeba».

²¹Maabae ángel mechiuba mo mechiu kũruma kĩra b̶uu mard̶e jiratasii. Makamaa b̶uud̶e naka jarasii:

«Maka mʉʉba mau mo mard̶e jiratad̶a kĩra Babilonia puuru mechiu kãꞌãabariwãed̶e joma ãrii. Mau puuru waa unud̶aabai.

²²Aria arpa, purrsiru maud̶e kachu chaaduu waa ũrid̶aabai. Ẽbẽrarã kariiduu sid̶a waa ũrid̶aabai.

Ẽbẽrarãba ne kabadaurã waa unud̶aabai. Kũrumad̶e ne b̶aaduud̶e jĩwaaruu sid̶a waa ũrid̶aabai.

²³Ʉ̃d̶aa koabarii waa unud̶aabai. Miakãiduud̶e kĩrajʉʉbadau waa ũrid̶aabai.

Arabena ne kaebea nedobʉibadaurã nau iujãad̶e chi mechiu nureasii.

Ariabena jaibanarãba druachabenarã joma setaa kũruabachid̶au.

²⁴Dachi Akõre baita berreabadaurã beaped̶aad̶a, ẽbẽrarã Dachi Akõred̶erã beaped̶aad̶a, maud̶e joma nau iujãad̶e nuread̶a beaped̶aad̶a kakua mau puurud̶ebena nebʉrad̶e duanuu».

Bajãad̶e duanuurãba Dachi Akõremaa biꞌia jarabadau

¹Mau maad̶akare mʉʉba bajãad̶e ãrea naka berrea duanuu kĩra ũrisii:

«¡Dachi Akõremaa biꞌia jaráduru!19:1 Dachi Akõremaa biꞌia jaráduru. Griego bed̶ead̶e naka b̶ʉ kub̶uu: aleluya. Ichiaburu ẽbẽrarã karibabarii. Ichi chi aude mechiu nii maud̶e poyaabarii.

²Ichi biawãra niid̶eeba arakʉd̶e ẽbẽrarã kastikabarii. Wẽra aud̶uabarii trʉ̃ poa b̶uad̶a kastikasii, mauba joma chi nau iujãad̶ebenarãmaa arab̶au kachirua waubiasiid̶eeba.

Dachi Akõreba mau wẽra kastikasii chi ichi baita bari trajabadaurã kenad̶a kakua».

³Waya naka jĩwa jarasid̶au:

«¡Dachi Mechiu biꞌia jaráduru! Jãu puuru baa nub̶uud̶ebena nari ewaricha bod̶iu nub̶uai».

⁴Maud̶e chi 24 chõrarã mechiu maud̶e chi kimare chokae nuree õdarrd̶e kopaneesid̶au Dachi Akõremaa biꞌia berread̶ai baita. Dachi Akõre ichi rey ãkaud̶e akʉ b̶uud̶e ãchiba naka jarasid̶au:

«¡Biꞌia b̶uu maka b̶uai!19:4 Biꞌia b̶uu maka b̶uai. Griego bed̶ead̶e naka b̶ʉ kub̶uu: amén. ¡Dachi Mechiumaa biꞌia jaráduru!»

⁵Maud̶e mʉʉba ũrisii Dachi Akõre rey ãkau b̶uareeba ab̶auba naka jĩwa berrearuu:

«¡Dachi Akõre baita bari trajabadaurã, joma machiba Dachi Akõremaa biꞌia berreásturu!

¡Joma chi Dachi Akõre wapea nureerã, chi aude mechiurã maud̶e chi kaebeurã bid̶a ichimaa biꞌia berreásturu!»

Oeja Cheke miakãiduu ewari

⁶Maabae mʉʉba ãrearã jĩwa berrea duanuu ũrisii. Mau do ʉrʉrʉa kĩra maud̶e bã ãrea b̶aemaa b̶uu kĩra b̶uasii. Naka jara duanasid̶au:

«¡Dachi Mechiumaa biꞌia jaráduru,

Dachi Akõre Joma Poyaabariiba jomaurã ichi juad̶e ua b̶uud̶eeba!

⁷¡Kĩrajʉ́duru! ¡Kĩrajʉ́duru! Ichi chi Mechiu nii ad̶ai, Oeja Kaebe Nii miakãai ewari basiid̶eeba. Ichi wẽra ba b̶eeruu paru jʉ̃sii.

⁸Dachi Akõreba chi mau wẽra lino paru torroa ted̶echoa b̶uu jʉ̃bisii».

(Mau paru lino waud̶aba jara b̶uu ẽbẽrarã Dachi Akõred̶erãba jipa waubadau).

⁹Maud̶e angelba mʉʉmaa jarasii: «Kartad̶e naka b̶ʉse: “¡Biꞌia ãrea duanad̶ai chi Oeja Kaebe Nii miakãiped̶aad̶a chiko kooduumaa iuped̶aad̶arã!”» Maud̶e jarasii: «Mau biawãra bed̶ea Dachi Akõreba jarad̶abʉ».

¹⁰Ara makʉd̶e mʉ chi ángel jʉ̃rʉ kaita õdarrd̶e kob̶eesii biꞌia berreai baita. Maamina mauba mʉʉmaa jarasii: «Mau waurã́se, Dachi Akõréturu biꞌia kʉ̃riáse. Bari mʉ Dachi Akõre baita bari trajabariibʉ bichi kĩra, maud̶e ãbarã Jesusba jaradead̶a ijãabadaurã kĩra».

Jesusba jaradead̶a Dachi Akõre Jauriba chi ichi baita berreabadaurãmaa berreabiabarii.19:10 Jesusba jaradead̶a Dachi Akõre Jauriba chi ichi baita berreabadaurãmaa berreabiabarii. Griego bed̶ead̶e mau chaarea b̶uu biꞌia ũrid̶amera.

Mura torr ʉ̃rʉ need̶a

¹¹Maad̶akare mʉʉba bajãad̶e poraa ewa nub̶uu unusii. Ara makʉd̶e mura torr neesii. Mau mura ʉ̃rʉ akʉ b̶uu trʉ̃ jarabadau Chi Jarad̶a Kĩra Waubarii maud̶e Chi Biawãra abadau. Mauba ẽbẽrarã jipa ichiabarii maud̶e jipa wau b̶uud̶eeba chi kĩramaa panabadau ome chĩobarii. ¹²Ichi dau tʉbʉ aoko nub̶uu kĩra koa b̶uasii. Ichi borod̶e boro jũra ãrea jʉ̃ b̶uasii. Ichi borod̶e trʉ̃ b̶ʉ inibasii maamina ab̶au bid̶a mau trʉ̃ adua basii; ichiaburu mau kuitaa b̶uasii. ¹³Ichi paru oad̶e ũrad̶a b̶uu jʉ̃ nibasii. Ichi trʉ̃ «Dachi Akõre Bed̶ea» abadau.19:13 Juan 1:1.¹⁴Ichi kaad̶e bajãad̶ebena kokoroarã mura torroa nuree ʉ̃rʉ imisid̶au. Maarãba paru chi aude chi bia ãrea lino waud̶a torroa b̶ee jʉ̃ nureasii. B̶istĩika bid̶a ãichorroad̶awẽa nureasii. ¹⁵Dachi Akõre Bed̶ea abadau okarrd̶eeba chĩobarii neko peed̶ea b̶uu nee b̶uasii druachabenarã poyaai baita. Ichi kĩra chuburiayuwãe joma nau iujãad̶ebenamaa ichid̶e ijãabia b̶uai.19:15 Salmos 2:9. Uva biraduaruu kĩra, ãchi maka kastikai, Dachi Akõre Joma Poyaabarii kĩru kub̶uud̶eeba. ¹⁶Ichiba paru jʉ̃ b̶uumaa b̶akara ʉ̃rʉ nau trʉ̃ b̶ʉ inii: «Jomaurã Reyrã Audeara Chi Aude Mechiu Nii» maud̶e «Joma Chi Mechiurã Audeara Chi Aude Mechiu Nii».

¹⁷Maabae mʉʉba ángel ab̶a ʉmada ʉ̃rʉ akʉ nub̶uu unusii. Ichiba joma kiuru mikia kobadaurã ʉtʉ ũub̶aribadaurãmaa naka jĩwa jarasii: «Nésturu. Araa ãbua joma imísturu chiko ãrea Dachi Akõreba wau b̶uumaa. ¹⁸Aria reyrã kiuru kod̶e wãd̶ai, kokoroarã karrarã kiuru, mechiurã nuree kiuru, mura kiuru maud̶e mura ʉ̃rʉ ataubadau kiuru sid̶a kod̶ai. Joma ẽbẽrarã kiuru kod̶ai: chi chibari baita bari trajabadaurã kiuru, chi chibariswãe nuree kiuru, chi kaebeu nuree kiuru, maud̶e chi aude mechiurã kiuru kod̶ai».

¹⁹Maabae mʉʉba ãnimara kachirua, nau iujãad̶ebena reyrã, maud̶e joma ãchi kokoroarã ãbua imiped̶aad̶a unusii. Ãbua panasid̶au chi mura ʉ̃rʉ akʉ b̶uu ome chĩod̶ai baita maud̶e chi ichi baara panuu kokoroarã ome chĩod̶ai baita. ²⁰Chi mura ʉ̃rʉ akʉ b̶uuba ãnimara kachirua maud̶e chi Dachi Akõre baita berreabarii chi biawãrawãe jidausii. Mauba ãnimara kachirua trʉ̃d̶eeba ẽbẽrarãba ne poyaa waud̶akau mechiu waubachii. Mauba ãnimara kachirua seña ida waubiaped̶aad̶a joma setaa kũruabachii. Mau chi ara ichi kĩra juaba ne kaped̶aad̶a ãrea kʉ̃riaped̶aad̶a setaa kũruabachii. Chi mura ʉ̃rʉ akʉ b̶uuba mau ãnimara kachirua maud̶e chi Dachi Akõre baita berreabarii chi biawãrawãe chokae panuu chob̶ea mar kĩra ed̶a azufre aoko nub̶uud̶e jiratasii. ²¹Chi neko ichi okarrd̶ebena awara nee b̶uuba waabenarã joma kenasii. Maabae joma chi kiuru mikiad̶a kobadau ʉtʉ ũub̶aribadaurãba mau kiuru kosid̶au jãwaaduud̶aa.

1.000 años

¹Mau maad̶akare mʉʉba ángel ab̶a bajãad̶ebena ed̶aa uruu unusii. Mauba eakarr ed̶aa chob̶eabena poraa ewabarii uru b̶uasii. Maud̶e kaena borea b̶uu ichi juad̶e uru b̶uasii. ²Chi dragón jidadauped̶a 1.000 años jʉ̃ kub̶usii. Mau dragón nabẽraed̶ebena damabʉ. Jʉbawãe nii maud̶e Satanás abadau. ³Angelba mau eakarr ed̶aa chob̶ead̶e jiratasii maabae jʉ̃a kub̶usii ab̶au bid̶a poyaa ewarãad̶amera. Maud̶eeba jʉbawãe niiba drua jomad̶ebenarã waa setaa kũruabai ab̶a 1.000 años wãꞌãeruud̶aa. 1.000 años bad̶akare mau enatai nau iujãad̶e ewari b̶aꞌãra b̶uamera.

⁴Maabae mʉʉba rey ãkaurã ãrea unusii. Mau ʉ̃rʉ akʉ b̶eemaa Dachi Akõreba dead̶akasii ẽbẽrarãba wauped̶aad̶a ichiad̶amera. Maud̶e ẽbẽrarã boro tʉʉtaped̶aad̶a jauri unusii. Maka boro tʉʉtasid̶au Jesusba jaradead̶a ijãa panuud̶eeba maud̶e Dachi Akõre bed̶ea jaradea panuud̶eeba. Ãchiba ãnimara kachirua nii maud̶e chi ara ichi kĩra juaba ne kaped̶aad̶a ãrea kʉ̃riad̶aabasii. Ichi seña ãchi daub̶ʉʉrʉd̶e juad̶e bid̶a ida waubid̶aabasii. Ãchi chokae jiradud̶aped̶a Cristo baara karrarã 1.000 años paneesid̶au. ⁵Mau chokae jiraduped̶aad̶a chi Dachi Akõreba naa chokae jiradubiad̶a basii. Waabenarã biuped̶aad̶arã chokae jiradud̶aabasii ab̶a 1.000 años wãꞌãesiid̶aa. ⁶Ẽbẽrarã Dachi Akõreba naa chokae jiradubiaruu ãrea biꞌia nuread̶ai. Maarã waa biud̶aabai, bari Dachi Akõre maud̶e Cristo paarerã paneed̶ai.20:6 Waa biud̶aabai. Griego bed̶ead̶e naka b̶ʉ kub̶uu: B̶es ome biud̶aabai. Mau jara b̶uu Dachi Akõreswãe tʉbʉ aokod̶e ãrea biꞌiwãe panad̶ai. Apocalipsis 20:14. Maud̶e 1.000 años Cristo ome chi karrarã nuread̶ai.

Dachi Akõreba Satanás tʉbʉchia kiikaud̶e jiratad̶a

⁷1.000 años neeruud̶e Satanás jʉ̃ b̶uad̶a ena b̶eei. ⁸Mau maad̶akare chi mauba joma druacha setaa kũruakuad̶e wãi. Gog druad̶ebenarã maud̶e Magog20:8 Ezequiel 38:2; 39:1,6. druad̶ebenarã setaa kũruakuad̶e wãi. Mau druad̶ebenarã kokoroarã mar ibu kĩra ãrea panuu uad̶oi ẽbẽrarã Dachi Akõred̶erã ome chĩod̶amera. ⁹Joma nau iujãad̶e wãd̶ai. Maabae Dachi Akõreba kʉ̃ria b̶uu puuru maud̶e ichi ẽbẽrarã duanuumaa ad̶u jũrad̶ai. Maamina Dachi Akõreba bajãad̶ebena tʉbʉchia b̶aebiai. Mauba chi maarã joma baa kenai. ¹⁰Mau maad̶akare Dachi Akõreba jʉbawãe nii ẽbẽrarã setaa kũrua uru b̶uad̶a chob̶ea mar kĩra azufre bara aoko nub̶uud̶e jiratai. Naed̶e Dachi Akõreba ãnimara kachirua b̶uu, Dachi Akõre baita berreabarii chi biawãrawãe sid̶a mau tʉbʉ aokod̶e jiratasii. Chi maarã maud̶e jʉbawãe nii sid̶a ewaricha ãyadaa maud̶e ẽsabud̶e ãrea biꞌiwãe panad̶ai.

Rey ãkau torroa mechiu nub̶uud̶eeba nebʉra ichiakuai

¹¹Mau maad̶akare mʉʉba rey ãkau mechiu torroa b̶uu maud̶e chi maud̶e akʉ b̶uu unusii. Ichi daad̶e joma nau iujãa maud̶e bajãa wãꞌãesii. Ab̶au bid̶a waa unud̶aabasii. ¹²Maud̶e mʉʉba unusii biuped̶aad̶arã chi mechiurã maud̶e chi kaebeurã Dachi Akõre rey ãkau daad̶e akʉ topanuu. Maud̶e chi b̶ee karta20:12 Chi b̶ee karta. Ẽbẽrarãba wauped̶aad̶a maarã kartad̶e b̶u kub̶uu. ewakuasii. Maabae june ab̶a karta ewasii. Mau kartad̶e ẽbẽrarã ewaricha chokae nuread̶ai trʉ̃ b̶ʉ kub̶uasii. Dachi Akõreba chi biuped̶aad̶arã joma ichiasii ãchiba wauped̶aad̶a kĩra, chi maarã kartad̶e b̶ʉ kub̶uad̶a kĩra. ¹³Joma chi mard̶e biuped̶aad̶arã Dachi Akõre daad̶e imisid̶au. Joma chi biuped̶aad̶a ãchi panabadaumarebena Dachi Akõre daad̶e imisid̶au.20:13 Chi biuped̶aad̶a ãchi panabadaumarebena. Griego bed̶ead̶e naka b̶ʉ kub̶uu: Hades. Maabae Dachi Akõreba ãchi ab̶aab̶aa ichiai ãchiba wauped̶aad̶a kĩra. ¹⁴Dachi Akõreba chi biud̶ai joma wãꞌãebisii ea chob̶ead̶e azufre bara aoko nub̶uud̶e jirataaruu kĩra. Biuped̶aad̶a panabadaumarebena sid̶a aria jiratasii. Mau ea chob̶ead̶e azufre bara aoko nub̶uu b̶es ome biui jara b̶uu. ¹⁵Chi ẽbẽrarã trʉ̃ chi ewaricha chokae duanabarii kartad̶e wãꞌãerã Dachi Akõreba mau ea chob̶ead̶e azufre bara aoko nub̶uud̶e jiratasii.

Jerusalén wid̶i

¹Mau maad̶akare mʉʉba bajãa wid̶i maud̶e iujãa wid̶i unusii. Makaed̶e nau bajãa maud̶e nau iujãa wãꞌãe basii. Mar sid̶a wãꞌãe basii. ²Maud̶e mʉʉba unusii Dachi Akõre b̶uumarebena ichi puuru wid̶i Jerusalén bajãad̶ebena ed̶aa uruu.21:2 Mʉʉba. Griego bed̶ead̶e chi b̶ee kartad̶e b̶ʉ kub̶uu: Mʉ, Juanba unusii. Mau puuru mipitaa ãrea b̶uasii wẽra miakãiruud̶e paru jʉ̃barii kĩra. ³Maabae mʉʉba ũrisii ab̶a Dachi Akõre rey ãkau b̶uareeba naka jĩwa berrearuu:21:3 Dachi Akõre rey ãkau b̶uareeba. Griego bed̶ead̶e chi b̶ee kartad̶e b̶ʉ kub̶uu: bajãad̶eeba. «¡Ũrísturu! Id̶i Dachi Akõre ẽbẽrarã tãed̶e b̶uu.21:3 Dachi Akõre. Griego bed̶ead̶e naka b̶ʉ kub̶uu: Dachi Akõre ãnimara e wauped̶aad̶a de. Ichi ãchi baara b̶uai. Maud̶e ãchi ichi puurud̶ebenarã nuread̶ai. Ichi ãchi Akõre bai maud̶e biawãra ichi ãchi baara b̶uabarii. ⁴Ãchi dau b̶aa ichiba joma poabiai. Naed̶e b̶uad̶a joma wãꞌãesiid̶eeba, maarã waa biud̶aabai, jẽad̶aabai, kĩra nomaa jẽad̶aabai, maud̶e waa biꞌiwãe panad̶aabai».

⁵Maabae chi rey ãkaud̶e akʉ b̶uuba naka jarasii: «Mʉʉba joma chiwid̶i waumaa b̶uu». Maud̶e naka jarasii: «Chi mʉʉba jara b̶uu karta ab̶ad̶e b̶ʉse chi biawãra bed̶ead̶eeba, maud̶e biawãra makaaruu poyaa ijãaduud̶eeba».

⁶Maud̶e mʉʉmaa naka jarasii: «Jãabae mau joma wau kub̶uu. Mʉ chi Alfabʉ maud̶e chi Omegabʉ.21:6 Griego alfabetod̶e «alfa» chi nabena letrabʉ, maud̶e «omega» chi kaad̶ebena letrabʉ. Mau jara b̶uu mʉ chi nabenabʉ maud̶e chi kaad̶ebenabʉ. Bari obisia b̶uubʉrã, mʉʉba iorod̶e bania bumadru b̶uud̶ebena bari dobiai. Mau baniaba ewaricha chokae nibabiabarii. ⁷Chi kachirua waud̶ai poyaaped̶aad̶arãba joma nau adoed̶ai, warrba chi akõreba uru b̶uud̶ebena adaubarii kĩra. Mʉ ãchi Dachi Akõre bai maud̶e mʉ warrarã nuread̶ai. ⁸Maamina chi mʉ baara wãd̶ai sõ borekea nuree, chi Dachi Akõred̶e ijãad̶akaurã, chi Dachi Akõreba kʉ̃riakau waubadaurã, chi mia beabadaurã, chi dachi kakuaba barikiu kachirua waubadaurã, jaibanarã, chi Dachi Akõre kuenda juaba ne kaped̶aad̶ad̶e ijãabadaurã, maud̶e chi seta id̶aa nuree chob̶ea mar kĩra azufre baara aoko nub̶uud̶e ãrea biꞌiwãe duanad̶ai. Mau chi b̶es ome biui jara b̶uu».21:8 Apocalipsis 20:6,14.

⁹Maabae angelerã 7 sãu uru panad̶ad̶ebena ab̶a mʉʉmaa neesii. Mau angelerãba ãchi paratud̶e 7 uru panad̶aba nau iujãad̶ebenarã ãrea biꞌiwãe paneebiasid̶au.21:9 Apocalipsis 16. Chi mʉʉmaa need̶aba naka jarasii: «Wãd̶a. Mʉʉba unubii chi wẽra Oeja Kaebe Nii ome miakãiruu».

¹⁰Ara makʉd̶e Dachi Akõre Jauriba mʉ ea mechiu ʉtʉ b̶uud̶aa adoesii. Aria bajãad̶e Dachi Akõre b̶uabariimarebena ed̶aa neeruu mʉʉmaa unubisii Dachi Akõre puuru Jerusalén abadau. ¹¹Dachi Akõre kĩrawãreaba mau puuru ʉ̃d̶aa jẽratĩu b̶uasii. Ted̶echoa b̶uasii mo mipitaa mau chi nejarr ãrea id̶ibadau kĩra maud̶e jaspe mo kĩra. Mau biirio kĩra dod̶aa b̶uasii. ¹²Mau puuru mooba ʉtʉ, mechia ad̶u pũ kub̶uasii. Poraa 12 uru b̶uasii. Poraacha ángel ab̶a b̶uasii. Mau awara poraacha Israel warrarã 12 panad̶a trʉ̃ ed̶a b̶ʉ kub̶easii. ¹³Ʉmada neebariare poraa õbea topanasid̶au, ʉmada b̶aebariare poraa õbea topanasid̶au, norteare poraa õbea topanasid̶au maud̶e waya ab̶abena suruare poraa õbea topanasid̶au. ¹⁴Mau puuru ad̶u pũ kub̶uu mo 12 ʉ̃rʉ pũ kub̶uasii. Moocha Oeja Kaebe Niiba chi 12 bʉid̶ad̶ebena trʉ̃ ab̶a b̶ʉ poebasii.

¹⁵Chi ángel mʉ ome berrea b̶uad̶aba iujãa chaabarii nee waud̶a uru b̶uasii mau puuru, chi poraa maud̶e chi pũ kob̶ee chaai baita. ¹⁶Mau chaabariiba chi puuru chaasii. Joma arab̶aud̶e b̶uasii. Chi deseroa maud̶e chi jõparrea sid̶a arab̶aud̶e b̶uasii. Chi chaad̶a 2.200 kilómetros b̶uasii.21:16 2.200 kilómetros. Griego bed̶ead̶e naka b̶ʉ kub̶uu: 12.000 estadios. Chi deseroa, chi jõparrea maud̶e ʉtʉbena arab̶aud̶e b̶uasii. ¹⁷Maabae puuru ad̶u pũ kob̶ee sid̶a chaasii. Chi chaad̶a 65 metros b̶uasii.21:17 65 metros. Griego bed̶ead̶e naka b̶ʉ kub̶uu: 144 obiid̶i ab̶a. Angelba nau iujãad̶ebenarãba chaabadau kĩra chaasii.

¹⁸Mau puuru nee waud̶áturu b̶uasii. Mau biirio dod̶aa kĩra b̶uasii. Chi mo puuru ad̶u pũ kub̶uu jaspe mooba pũd̶a kub̶uasii. ¹⁹Mau 12 mo ʉ̃rʉ kub̶uasii. Mau mo joma mipitaa b̶easii.

Chi nabena jaspe mo basii.

Mawãare zafiro mo basii.

Mawãare ágata mo basii.

Mawãare esmeralda mo basii.

²⁰Mawãare ónice mo basii.

Mawãare cornalina mo basii.

Mawãare crisólito mo basii.

Mawãare berilo mo basii.

Mawãare topacio mo basii.

Mawãare crisoprasa mo basii.

Mawãare jacinto mo basii.

Mawãare amatista mo basii. ²¹Mau puurud̶ebena 12 poraa perla chi nejarr ãrea id̶ibadauba waud̶a b̶uasii. Poraa ab̶aab̶aa perla ab̶aba waud̶a basii. O puuru ẽsa b̶uu nee waud̶áturu basii. Maamina biirio kĩra dod̶aa b̶uasii.

²²Mau puurud̶e mʉʉba Dachi Akõre de mechiu unuubasii wãꞌãed̶eeba. Ẽbẽrarãba Dachi Akõre chi Joma Poyaabarii maud̶e chi Oeja Kaebe Niimaa biꞌia berread̶ai, naed̶e ichi de mechiud̶e waubachid̶au kĩra.21:22 Ẽbẽrarãba Dachi Akõre...waubachid̶au kĩra. Griego bed̶ead̶e naka b̶ʉ kub̶uu: Dachi Akõre chi Joma Poyaabarii maud̶e chi Oeja Kaebe Nii ichi de mechiu bai.²³Ʉmadaswãe, jed̶akoswãe mau puuru ʉ̃d̶aa nub̶uabarii Dachi Akõre kĩrawãreaba maud̶e Oeja Kaebe Niiba ʉ̃d̶aa b̶uuba. ²⁴Chi puuru ʉ̃d̶aaba druacha joma ʉ̃d̶aa duanad̶ai joma mau ʉ̃d̶aad̶e nibad̶amera. Maud̶e druachabena reyrãba ne bia uru b̶ee mau ichimaa adoed̶ai.21:24 Druachabena reyrãba ne bia uru b̶ee mau ichimaa adoed̶ai. Mau bed̶ea poyaa naka b̶ʉ kub̶uu: Druachabena reyrã mau puurud̶aa wãd̶ai Dachi Akõremaa biꞌia berread̶ai baita.²⁵Ẽsabud̶ebena wãꞌãe baid̶eeba poraa chi puurud̶ebena ewaricha ewa nub̶uai. ²⁶Joma druachabenarãba ne bia uru b̶ead̶a mamaa adoed̶ai Dachi Akõremaa dead̶ai baita.21:26 Mau bed̶ea poyaa naka b̶ʉ kub̶uu: Druachabenarã mau puurud̶aa wãd̶ai Dachi Akõremaa biꞌia berread̶ai baita.²⁷Maamina joma Dachi Akõreba biꞌia unukau mau puurud̶e ed̶a adoed̶aabai. Ne kachirua waubadaurã, chi Dachi Akõreba kʉ̃riakau waubadaurã maud̶e chi seta id̶aa nuree ed̶a wãd̶aabai. Ab̶a chi ewaricha chokae duanabarii kartad̶e trʉ̃ kub̶éturu poyaa ed̶a wãd̶ai. Mau karta Oeja Kaebe Niiba uru b̶uu.

Chi dachi chokae b̶uabiai do ʉ̃rʉbena

^1-2Mau maad̶akare angelba do pawãraa b̶uu mʉʉmaa unubisii. Biirio kĩra dod̶aa b̶uasii. Mau baniaba ewaricha chokae b̶uai deabarii. Dachi Akõre maud̶e Oeja Kaebe Nii rey ãkau bia b̶uareeba mau do puurud̶ebena o jõparrea b̶uu ẽsa eab̶ari b̶uu. Mau do kĩarecha bakuru chi jõo ewaricha chokae b̶uai deabarii poe basii. Añod̶e b̶es 12 ome chaubarii, jed̶ako ewaricha chaubariid̶eeba. Chi kiruu ʉrrmid̶ia kĩra b̶uu, druachabenarã jaiswãe panad̶amera. ³Dachi Akõreba mau puurud̶e kachirua baraai a jarad̶a wãꞌãe bai. Dachi Akõre maud̶e Oeja Kaebe Nii rey ãkau mau puurud̶e panad̶ai. Aria Dachi Akõre baita bari trajabadaurãba ichimaa biꞌia berread̶ai. ⁴Ichi kĩedarr unud̶ai maud̶e ichi trʉ̃ ãchi daub̶ʉʉrʉd̶e b̶ʉ uru nuread̶ai. ⁵Ẽsabud̶ebena wãꞌãe bai. Dachi Akõre Mechiuba ʉ̃d̶aa deaid̶eeba, ẽbẽrarã ʉ̃d̶aaswãe biꞌia duanad̶ai maud̶e ʉmadaswãe. Ewaricha ãchi ichi ome ãbua chi karrarã nuread̶ai.

Cristo kãꞌãabariwãed̶e neei ʉ̃rʉbena

⁶Maabae angelba mʉʉmaa jarasii: «Joma nau bed̶ea biawãrabʉ maud̶e biawãra makaaruu poyaa ijãa panuu. Dachi Akõre Mechiuba ichi baita berreabadaurãmaa ichi bed̶ea berreabiabarii. Ichiaburu chi ángel bajãad̶ebena bʉisii ichi baita bari trajabadaurãmaa kuitaabiamera kãꞌãabariwãed̶e makaaruu».

⁷Jesusba jarasii: «¡Ũrísturu, mʉ kãꞌãabariwãed̶e neei! Ãrea biꞌia b̶uu joma chi Dachi Akõre baita berreabarii bed̶ea nau kartad̶e jara b̶uud̶e ijãa b̶uu».

⁸Mʉ Juanbʉ. Joma mau unusii maud̶e ũrisii. Mau maad̶akare mʉ ángel jʉ̃rʉ kaita õdarrd̶e kob̶eesii biꞌia berreai baita. Makasii chi mauba mʉʉmaa unubisiid̶eeba. ⁹Maamina ichiba jarasii: «Jãka waurã́se, maumaarã Dachi Akõremáturu biꞌia berreáse. Mʉ arab̶aud̶e bichi kĩra Dachi Akõre baita bari trajabariibʉ, ãbarã Dachi Akõre baita berreabadaurã kĩra, maud̶e joma nau kartad̶e jara b̶uu ijãabadaurã kĩra».

¹⁰Maud̶e jarasii: «Chi Dachi Akõre baita berreabarii bed̶ea mirubia makarã́se kãꞌãabariwãed̶e joma makaid̶eeba. ¹¹Chi kachirua wau b̶uu ida b̶use waya kachirua wau b̶uamera. Chi ne joma Dachi Akõreba kʉ̃riakau wau b̶uu ida b̶use ichi kuitaa ne joma chi Dachi Akõreba kʉ̃riakau wau b̶uamera. Maamina chi jipa wau b̶uu chi ewaricha jipa wau b̶uai b̶uu. Maud̶e chi Dachi Akõre baita biꞌia b̶uu ewaricha Dachi Akõre baita biꞌia b̶uai b̶uu.

¹²»¡Ũrísturu, mʉ kãꞌãabariwãed̶e neei! Neeruud̶e mʉʉba jomaurãmaa dead̶akai baita adooi ãchiba wauped̶aad̶a kĩra. ¹³Mʉ chi Alfabʉ maud̶e chi Omegabʉ.22:13 Griego alfabetod̶e «alfa» chi nabena letrabʉ maud̶e «omega» chi kaad̶ebena letrabʉ. Mau jara b̶uu mʉ chi nabenabʉ maud̶e chi kaad̶ebenabʉ.

¹⁴»Ãrea biꞌia duanuu chi paru tõd̶aped̶a jʉ̃ duanuu. Maarã puurud̶e ed̶a wãd̶ai panuu chi jõo ewaricha chokae b̶uai deabarii kod̶ai baita. ¹⁵Maamina chi kachirua waubadaurã, jaibanarã, chi dachi kakuaba barikiu kachirua waubadaurã, chi junebena ome kãi paneebadaurã, mia beabadaurã, Dachi Akõre kuenda juaba ne kaped̶aad̶a kʉ̃riabadaurã maud̶e chi setarã joma awara duaneed̶ai.22:15 Kachirua waubadaurã. Griego bed̶ead̶e naka b̶ʉ kub̶uu: usa.

¹⁶»Mʉ Jesusbʉ. Mʉʉba ángel ab̶a bajãad̶ebena bʉisii joma ãbarã nau iujãad̶e nureecha mau jarakuamera. Mʉ Davidd̶ebena need̶abʉ, ichid̶ebena need̶a kĩra b̶uu.22:16 Isaías 11:1-10. Mʉ Daped̶ebena pusterrea ãrea koabarii abadau».

¹⁷Dachi Akõre Jauriba maud̶e chi Oeja Kaebe Nii kima abadauba naka jara b̶uu: «¡Uche!» Chi mau kartad̶e b̶ʉ kub̶uu ũriiruu bid̶a jarai b̶uu «¡Uche!» Chi obisia b̶uuba bania chi ewaricha chokae b̶uai deabarii dod̶e neei b̶uu. Mau bania kʉ̃ria b̶uuba bari dod̶e neei b̶uu.

¹⁸Chi Dachi Akõre baita berreabarii bed̶ea nau kartad̶e b̶ʉ kub̶uu ũri panuurãmaa mʉʉba nau jarakuaruu: barikiuba nau kartad̶e b̶ʉ kub̶uu aude b̶ʉʉruubʉrã, Dachi Akõreba mau chi mau kartad̶e ãrea biꞌiwãe jara kub̶uu kĩra biꞌiwãe b̶uabii. ¹⁹Maud̶e barikiuba nau kartad̶e b̶ʉ kub̶uud̶ebena bed̶ea ab̶a awara b̶uuruubʉrã, Dachi Akõreba ichimaa jõo ewaricha chokae b̶uai deabarid̶ebena ida kobiibai maud̶e Dachi Akõre puurud̶e bid̶a ed̶a ida wãbiibai. Mau jõo ʉ̃rʉbena maud̶e mau puuru ʉ̃rʉbena nau kartad̶e b̶ʉ kub̶uu.

²⁰Joma nau kartad̶e b̶ʉ kub̶uu Jesusba biawãra a b̶uu. Ichiba naka jara b̶uu: «¡Biawãra b̶uu mʉ kãꞌãabariwãed̶e neei!»

Biꞌia b̶uu kãꞌãabariwãed̶e neei.22:20 Griego bed̶ead̶e naka b̶ʉ kub̶uu: amén. ¡Uche dai Mechiu Jesús!

²¹Mʉʉba kʉ̃ria b̶uu Dachi Mechiu Jesusba ichi sõbiad̶eeba machi joma aid̶a b̶uai. Biꞌia b̶uu maka b̶uai.