FILIPENSES

Filipenses

Karta Pabloba b̶ʉd̶a ãbarã Filipos puurud̶ebenarã baita

Año 61d̶e Pablo Roma puurud̶e jʉ̃a b̶uasiid̶e, nau karta b̶ʉsii (Hechos 28:16-31 maud̶e Filipenses 1:13).

Hechos 16:6-40d̶e b̶ʉ kub̶uu Pablo naa Filipos puurud̶aa wãd̶a ʉ̃rʉbena. Mau puuru kaita panuud̶e Pabloba chi nuree wẽrarã unuped̶a Jesucristo ʉ̃rʉbena jaradeasii. Wẽra Lidia abadauba naa ijãasii. Ichi ded̶e Pablo maud̶e ichi ome nibad̶a paneesid̶au. Ãbarã ara mau ded̶e araa ãbua imibachid̶au.

Pablo jʉ̃a b̶uasiid̶e ãbarã Filipos puurud̶ebenarãba ichi baita chi nejarra urubʉisid̶au. Ãchiba deaped̶aad̶a ãba Epafroditoba adoesii. Pabloba nau karta b̶ʉsii ãchimaa ãchíturu kid̶ibad̶ai ai baita. Naa Dachi Akõremaa biꞌia berreasii (1:1-11). Mawãare ãchimaa nebʉrʉsii ichi saka b̶uu ʉ̃rʉbena. Pabloba kʉ̃risia b̶uasii kãꞌãabariwãed̶e jʉ̃a b̶uud̶ebena wãyaa wãi (1:12-26). Mawãare b̶ʉsii Cristo kĩra nibad̶amera (1:27—2:18). Mawãare b̶ʉsii Epafrodito isa waya bʉii ʉ̃rʉbena maud̶e Timoteo jaradead̶e bʉii ʉ̃rʉbena (2:19-30). Mawãare b̶ʉsii chi biꞌiwãe jaradeabadaurã ʉ̃rʉbena kauwa panad̶amera (3:1—4:1). Pabloba kaad̶eare b̶ʉd̶a 4:2-23d̶e b̶ʉ kub̶uu.

Pabloba nau kartad̶e naa b̶ʉd̶a

¹Mʉ Pablobʉ. Timoteo mʉ ome b̶uu. Dai Jesucristo baita bari trajabadaurãbʉ. Mʉʉba nau karta ãbarã Filipos puurud̶ebenarã baita b̶ʉʉruu: ijãabadaurã nubadaurã, ijãabadaurã aid̶abadaurã, joma ẽbẽrarã Dachi Akõred̶erã Jesucristo ome nureerã baita.1:1 Ijãabadaurã nubadaurã. Kajuma bed̶ead̶e «pastores» maebʉrã «ancianos» abadau. Ijãabadaurã aid̶abadaurã. Kajuma bed̶ead̶e «diáconos» abadau.²Daiba kʉ̃ria panuu Dachi Bajãad̶ebena Akõreba maud̶e Dachi Mechiu Jesucristo ãchi sõbiad̶eeba machi aid̶a panad̶ai maud̶e ãchi jirukaraayuwãe panabiad̶ai.

Pabloba ãbarã baita Dachi Akõremaa ʉtaa id̶id̶a

³Mʉʉba machi kĩrabaaruucha Dachi Akõremaa ichíturu kid̶ibai abarii. ⁴Dachi Akõremaa ʉtaa id̶iiruucha mʉʉba machi baita kĩrajʉʉ ʉtaa id̶ibarii, ⁵machiba ichi bed̶ea ijãaped̶aad̶ad̶eed̶ebena mʉ aid̶a panuud̶eeba, chi bed̶ea bia Cristo ʉ̃rʉbena jaradeai baita. ⁶Mʉʉba nau biawãra kuitaa b̶uu: Dachi Akõreba chi machi sõd̶e traju biꞌia waud̶a biꞌia kãrii ab̶a Jesucristo neeruud̶aa. Maud̶e ichiba machi joma biꞌia ua b̶uai. ⁷Biꞌia b̶uu mʉʉba joma machi ʉ̃rʉbena maka kʉ̃risia b̶uai, machi ãrea kʉ̃ria b̶uud̶eeba. Mʉ jʉ̃a b̶uud̶e maebʉrã chi bed̶ea bia Cristo ʉ̃rʉbena biawãra kuitaabi b̶uud̶e Dachi Akõreba ichi sõbiad̶eeba machi maud̶e mʉ sid̶a aid̶a b̶uu ichi bed̶ea jaradea panad̶amera. ⁸Dachi Akõreba kuitaa b̶uu mʉʉba Jesucristo ãrea kʉ̃ria b̶uud̶eeba joma machi sid̶a ãrea kʉ̃riakua b̶uu.

⁹Mʉʉba Dachi Akõremaa ʉtaa id̶i b̶uu machi ãrea chiya kʉ̃ria nuread̶amera, ichi biꞌia kuitaad̶amera maud̶e saka nibad̶ai panuu kuitaad̶amera. ¹⁰Maka machiba ãrea kuitaad̶ai kãare biꞌia b̶uu maud̶e Cristo neeruud̶e ichi daad̶e kachiruaswãe nuread̶ai maud̶e machi ʉ̃rʉbena kachirua jarad̶ayuswãe nuread̶ai. ¹¹Mʉʉba ʉtaa id̶i b̶uu machi Jesucristod̶eeba ne jomad̶e jipa nuread̶amera. Maka ẽbẽrarãba Dachi Akõre chi mechiu nii ad̶ai maud̶e ichimaa biꞌia berread̶ai.

Ne jomad̶e Pablo Cristo baita b̶uu

¹²Ãbarã, mʉʉba machimaa kuitaabiai kʉ̃ria b̶uu mʉ chi makad̶aba aid̶a b̶uu ẽbẽrarãba chi bed̶ea bia Cristo ʉ̃rʉbena ijãad̶amera. ¹³Romad̶ebena jaradea ua b̶uabarii de nubadau kokoroarãba maud̶e waabenarãba kuitaa panuu mʉ Cristo kakua jʉ̃a b̶uu. ¹⁴Maud̶eeba ãrea ãbarãba Dachi Mechiud̶eeba Dachi Akõre bed̶ea wapeawẽa jara nibabadau.

¹⁵Biawãra chi nuree mʉ ome kĩra kachirua panuud̶eeba, maarãba jarabadau Cristo ʉ̃rʉbena mʉ audeara kuitaa panuu ad̶ai baita. Maamina waabenarãba kʉ̃risia biad̶eeba jarabadau. ^16-17Maarãba kʉ̃riad̶eeba maka waubadau. Kuitaa panuu Dachi Akõreba mʉ nama b̶usii chi bed̶ea bia Cristo ʉ̃rʉbena biawãra arakʉd̶e kuitaabiamera. Maamina chi nureerãba Cristo ʉ̃rʉbena jara nibabadau ãrea kuitaa nuree kʉ̃risia panuud̶eeba. Kʉ̃risia biad̶eeba maka waud̶akau. Kʉ̃risia panuu maka mʉ nama jʉ̃a b̶uud̶e aude kĩra nomaabid̶ai. ¹⁸Maamina ¿mau sakaima? Kʉ̃risia biad̶eeba maebʉrã kʉ̃risia kachiruad̶eeba jara nibaaduubʉrã, Cristo ʉ̃rʉbena jara panuu. Maud̶eeba mʉ kĩrajʉʉ b̶uu.

Maud̶e kĩrajʉʉ b̶uai ¹⁹mʉʉba kuitaa b̶uud̶eeba mʉ namabena awara wãaruu, machiba Dachi Akõremaa ʉtaa id̶i panuud̶eeba maud̶e Jesucristoba dead̶a Jauriba aid̶a b̶uud̶eeba. ²⁰Cristo kakua mʉ ne ab̶a bid̶a nejasiai kʉ̃riawẽa b̶uu, maumaarã ichi ʉ̃rʉbena berreai baita kĩra nejasiaswãe b̶uai kʉ̃ria b̶uu. Maka mʉʉba jomaurãmaa Cristo chi mechiu nii kuitaabiai, ewaricha wau b̶uabarii kĩra. Chokae b̶eeruubʉrã maebʉrã biuruubʉrã, mʉʉba kʉ̃ria b̶uu jomaurãba mʉʉd̶eeba kuitaad̶ai Cristo chi mechiu nii. ²¹Mʉʉmaarã, mʉ chokae b̶uud̶e Cristo baita b̶uai, maamina biuruubʉrã aude biꞌia b̶uai. ²²Mʉ chokae b̶uud̶e Cristo ʉ̃rʉbena poyaa jaradea b̶uai. Maud̶eeba mʉʉba adua b̶uu kãare kʉ̃ria b̶uu, chokae b̶uai maebʉrã biui. ²³Chaarea b̶uu jarai baita mau omed̶ebena sãu aude biꞌia b̶uu. Mʉʉmaarã biꞌia b̶uu biui, Cristo ome b̶uai baita. ²⁴Maamina machi baita biꞌia b̶uu mʉ chokae b̶uai. ²⁵Maud̶eeba kuitaa b̶uu machi aid̶ai baita mʉ wabid̶a chokae b̶uai maud̶e waya machi ome ãbua b̶uai. Maka machiba Cristod̶e biꞌia ijãa panuud̶eeba kĩrajʉʉ panad̶ai. ²⁶Jesucristoba mʉ waya machimaa adoeruud̶e machi ichi kakua biꞌia kĩrajʉʉd̶aped̶a biꞌia jarad̶ai.

²⁷Jipa nibásturu chi bed̶ea bia Cristo ʉ̃rʉbena jara b̶uu kĩra. Makarã mʉʉba machi ichiad̶e wãaruubʉrã, maebʉrã machi ome b̶uuwãed̶e machi ʉ̃rʉbena ũriiruubʉrã, kuitaai machiba arab̶au kʉ̃risiad̶eeba ãbua ãrea ijãa panuu maud̶e ãbua ãrea traja panuu mau bed̶ea bia kuitaabid̶ai baita. ²⁸Machi kĩramaabadau ab̶a bid̶a wapearã́sturu. Mauba kuitaabii Dachi Akõreba ãchi baribai, maamina machi karibai. Mau Dachi Akõreba joma wau b̶uu. ²⁹Ichi biad̶eeba machi iubasii ab̶aburu Cristod̶e ijãa panad̶amera, maumaarã iusii Cristo kakua ãrea biꞌiwãe panad̶amera. ³⁰Machiba unusid̶au mʉ ãrea biꞌiwãe b̶uud̶e dauchia jãadua b̶uad̶a maud̶e jãabae ũri panuu wabid̶a dauchia jãadua b̶uu.1:30 Hechos 16:11-40. Ara mau kĩra machi sid̶a ãrea dauchia jãadua panuu.

Dachi Akõreba Cristo jomaurã audeara chi mechiu b̶ud̶a

¹Cristod̶e kĩrajʉʉ panuud̶eeba, machi kĩrajʉʉbia b̶uu ichiba kʉ̃ria b̶uud̶eeba, Dachi Akõre Jauri machi ome b̶uud̶eeba maud̶e ichi kʉ̃riaba machi kĩra chuburia b̶uud̶eeba, ²mʉ naka ãrea kĩrajʉʉbísturu: arab̶au kʉ̃risia uru panásturu, chiya kʉ̃ria panásturu maud̶e arab̶au kʉ̃risiad̶eeba joma wáusturu. ³Waabenarã audeara biꞌia nuree kʉ̃risia panuud̶eeba ne ab̶a bid̶a waurã́sturu. Maud̶e waurã́sturu machi báitaburu biꞌia nuread̶ai baita. Maumaarã kʉ̃risiásturu waabenarã machi audeara biꞌia nuree. ⁴Machicha biꞌia nuread̶ai baita jʉrʉrã́sturu, maumaarã jʉrʉ́sturu waabenarã sid̶a biꞌia nuread̶amera. ⁵Jesucristoba kʉ̃risia b̶uad̶a kĩra kʉ̃risiásturu:

⁶Ichi Dachi Akõremina, ara Dachi Akõre kĩra arab̶aud̶e b̶uai kʉ̃risiabasii.

⁷Maumaarã ichi maka nibad̶a ida b̶usii chibari baita bari trajabarii bai baita. Maabae dachi kĩra nau kakuad̶e b̶eesii.

⁸Makaaruud̶e miichuburi b̶eesii. Dachi Akõreba biui b̶uu asiid̶e ichi makasii. Cruzd̶e ãrea biꞌiwãe b̶uaped̶a biui b̶umina mau makasii.

⁹Maud̶eeba bajãad̶e Dachi Akõreba ichi chi aude mechiu b̶usii. Ichi jomaurã Mechiu b̶usii.2:9 Griego bed̶ead̶e naka b̶ʉ kub̶uu: Dachi Akõreba ichimaa chi trʉ̃ mechiu deasii.

¹⁰Maka joma bajãad̶e nuree, nau iujãad̶e nuree maud̶e biud̶arã panabadaud̶e nuree Jesús daad̶e õdarrd̶e kopaneed̶ai.

¹¹Maud̶e jomaurãba Jesucristo jomaurã Mechiu a jarad̶ai maud̶e Dachi Bajãad̶ebena Akõremaa biꞌia berread̶ai.

Ãbarã nau iujãad̶e saka nuread̶ai panuu

¹²Maka mʉ ãbarã chi kʉ̃ria, mʉ machi ome b̶uasiid̶eeba Dachi Akõre bed̶ea jara b̶uu kĩra wau panuu. Jãabae mʉ machi ome b̶uuwãemina Dachi Akõre ãrea wapea panuud̶eeba wau panásturu ichiba machi karibasiid̶eeba. ¹³Ichiba machi aid̶a b̶uu ichiba kʉ̃ria b̶uu wau panad̶amera maud̶e maka wau kʉ̃ria panad̶amera.

¹⁴Waabenarã ʉ̃rʉbena kachirua berread̶awẽa maud̶e oa kachirua berread̶awẽa joma wáusturu. ¹⁵Maka machi ʉ̃rʉbena kachirua jarad̶ayuswãe nuread̶ai maud̶e jipa nuread̶ai. Ẽbẽrarã ãrea kachirua waubadau tãed̶e panumina kachiruaswãe panásturu. Dachi Akõre warrarãd̶eeba ãchi tãed̶e ʉtarebena pusterrea ted̶echoabadau kĩra nuree. ¹⁶Chi dachi chokae b̶uabiabarii bed̶ea ʉ̃rʉbena ãchimaa arakʉd̶e kuitaabia panásturu. Maka Cristo neeruud̶e mʉ machi kakua kĩrajʉʉi. Maud̶e mʉʉba kuitaai mʉ bari ara jãka nibaabasii maud̶e bari trajaabasii. ¹⁷Kãꞌãabariwãed̶e mʉ Cristo kakua bead̶ai panuu. Maka uva b̶aa Dachi Akõremaa ea deabachid̶au kĩra b̶uai.2:17 Números 15:5,6. Ara mau kĩra machiba Cristod̶e ijãa panuu, ãnimara Dachi Akõremaa baa deai kĩra b̶uu.2:17 Levítico 23:18. Maud̶eeba mʉ machi ome ãrea kĩrajʉʉ b̶uu. ¹⁸Ara mau kĩra machi sid̶a mʉ ome ãbua kĩrajʉʉ nuread̶ai panuu.

Timoteo maud̶e Epafrodito

¹⁹Dachi Mechiu Jesusba kʉ̃riaruubʉrã mʉʉba Timoteo isa machimaa wãbii. Maka ichi waya mʉʉmaa neeruud̶e mʉ sid̶a kĩrajʉʉ b̶uai machi saka panuu kuitaai b̶uud̶eeba. ²⁰Nama mʉ baara ichi kĩra nii wãꞌãe. Ichiba machi biawãra aid̶a kʉ̃ria b̶uu. ²¹Jomaurãba ara ãchi biꞌia nuread̶ai jʉrʉbadau, Jesucristoba kʉ̃ria b̶uu jʉrʉd̶ai bad̶amaarã. ²²Maamina machiba kuitaa panuu Timoteoba biꞌia waubarii. Warrba ichi akõre aid̶abarii kĩra ichiba bed̶ea bia Cristo ʉ̃rʉbena aid̶a jaradea b̶uu. ²³Mʉ kãare saka waud̶ai panuu kuitaaruud̶e Timoteo machimaa bʉii kʉ̃risia b̶uu. ²⁴Maamina kʉ̃risia b̶uu Dachi Mechiuba mʉ aid̶ai, kãꞌãabariwãed̶e mʉ sid̶a machimaa wãmera.

²⁵Machiba ãba Epafrodito mʉ aid̶amera bʉisid̶au. Mauba mʉ ome Dachi Akõre bed̶ea jaradea b̶uu kokoroa chĩo b̶uu kĩra. Mʉʉba machimaa ichi waya wãbii. ²⁶Ichiba machi biawãra unu kʉ̃ria b̶uu. Ãrea jirukaraa b̶uu, machiba ichi ẽpermo b̶uu ũrisid̶aud̶eeba. ²⁷Biawãra ichi ẽpermo b̶uasii. Beraa biukausii. Maamina Dachi Akõreba ichi kĩra chuburiasii. Ab̶aburu ichi kĩra chuburiabasii, maumaarã mʉ sid̶a kĩra chuburiasii waya jirukaraa b̶eerãamera. ²⁸Maud̶eeba mʉʉba ichi waya isa wãbi kʉ̃ria b̶uu, machiba ichi unuuduud̶e waya kĩrajʉʉd̶amera. Maka mʉ machi kakua ãrea jirukaraa b̶uabai. ²⁹Kĩrajʉʉ panuud̶eeba ichi biꞌia irsibísturu Dachi Mechiud̶ed̶eeba. Chi ichi kĩra nuree ʉ̃rʉbena biꞌia kʉ̃risiásturu. ³⁰Cristoba waubi b̶uu kakua ichi beraa biukausii. Chi machiba mamauba mʉ baita poyaa waud̶awẽa panuu, ichiba biui adua wausii.

Cristod̶éburu ijãad̶ai panuu

¹Mau awara ãbarã, Dachi Mechiud̶eeba kĩrajʉʉ panásturu. Mʉʉba nau bed̶ea naa b̶ʉsmina, ara mau b̶ʉi baita ida b̶ukau. Maka kachiruad̶ebena machi nu b̶uai.

²Ẽbẽrarã usa kĩra nureed̶ebena kauwa duanásturu, maarãba kachirua waubadaud̶eeba. Maarãba jaradeabadau mukĩra chi kakua tõod̶ai panuu ẽbẽrarã Dachi Akõred̶erã nuread̶ai baita.3:2 Maarãba jaradeabadau...Akõred̶erã nuread̶ai baita. Griego bed̶ead̶e naka b̶ʉ kub̶uu: chi tõobadaurã.³Maamina dachi chi biawãra mukĩra chi kakua tõoped̶aad̶abʉ.3:3 Chi biawãra mukĩra chi kakua tõoped̶aad̶abʉ. Mau bed̶ea jara b̶uu «dachi, Dachi Akõre puurubʉ». Naed̶e israeld̶ebenarãba joma ãchi mukĩra chi kakua tõobachid̶au kuitaabid̶ai baita ãchi Dachi Akõre puurud̶ebenarã basii. Dachiaburu Dachi Akõre Jaurid̶eeba ichimaa biꞌia berreabadau. Maud̶e Jesucristoba dachi baita waud̶a biꞌia jarabadau. Dachiba kʉ̃risiad̶akau Dachi Akõreba dachi jipa nuree unui, dachiba wau panuu kakua. ⁴Mʉʉba nau kakuad̶e biꞌia waud̶a kakua maka kʉ̃risia b̶uai b̶umina, maka kʉ̃risiakau. Biawãra ab̶auba wau b̶uu kakua Dachi Akõreba jipa unui kʉ̃risiaruubʉrã, ichi audeara mʉʉba aude maka poyaa kʉ̃risia b̶uai b̶uu. ⁵Mʉ danaba mʉ adaud̶a 8 ewari bad̶akare, mʉ mukĩra chi kakua tõosid̶au. Mʉ israeld̶ebenabʉ, Benjamind̶ebena need̶abʉ. Mʉ nabẽraed̶ebenarã chi biawãra hebreorã basii. Fariseo basiid̶eeba mʉʉba Moisesba b̶ʉd̶a kauwa waubachii. ⁶Mau judiorã ley ãrea waubachiid̶eeba Cristod̶e ijãa nuree wãraabachii kachirua waui baita. Mau judiorã ley ãrea waubachiid̶eeba ab̶au bid̶a mʉ ʉ̃rʉbena kachirua jarad̶ayuswãe nii.

⁷Maamina ne joma mʉʉba naed̶e biꞌia unu b̶uad̶a, jãabae Cristod̶e ijãa b̶uud̶eeba mau biꞌia unukau. ⁸Biawãra mʉ Mechiu Jesucristo kuitaai ne joma audeara bibuara b̶uu. Mʉʉba kʉ̃risia b̶uad̶a ichi kakua joma ida b̶usii. Joma mau nejarr kĩra unusii Cristo kuitaai baita ⁹maud̶e ichi ome b̶uai baita. Mʉ ichi ome b̶uuwãe chi Moisesba b̶ʉd̶ad̶eeba, maumaarã maka nii Cristoba ichi Akõreba jarad̶a kĩra wausiid̶eeba, dachi kakua biusiid̶eeba. Mʉʉba Cristod̶e ijãa b̶uud̶eeba, Dachi Akõreba mʉ ichi ome uru b̶uu. ¹⁰Mʉʉba Cristo ãrea unui kʉ̃ria b̶uu. Ichi Dachi Akõre poyaabariid̶eeba chokae jiradusii. Mʉ ara mau poyaabariid̶eeba ichi baara nibai kʉ̃ria b̶uu. Maud̶eeba ichi ãrea biꞌiwãe b̶uad̶a kĩra mʉ sid̶a biꞌiwãe b̶uai kʉ̃ria b̶uu, maud̶e ichi biud̶a kĩra biui kʉ̃ria b̶uu. ¹¹Maka kʉ̃ria b̶uu Dachi Akõreba mʉ chokae jiradubiid̶eeba.

¹²Mʉʉba jarawẽa b̶uu mʉ jãabae maka nii. Maud̶e jarawẽa b̶uu mʉ jãabae jipa nii. Maamina maka b̶uai baita mʉ id̶iid̶eeba naa wãaruu, Cristo Jesusba mʉ mau baita jidausiid̶eeba. ¹³Ãbarã, mʉʉba jarawẽa b̶uu mʉ biawãra maka nii; maamina mʉʉba nau wau b̶uu: mʉʉba naed̶e wau b̶uad̶a adua b̶eeped̶a naa pira wãaruu, Cristo kĩra b̶uai baita. ¹⁴Pira kãrii, chi neei b̶uumaa neei baita, Jesucristod̶eeba ne bia bajãad̶ebena adaui baita, Dachi Akõreba iusiid̶eeba.

¹⁵Joma dachi Cristo ãrea kuitaa nureerãba ara mau kĩra kʉ̃risiad̶ai panuu. Machiba ãyaa kʉ̃risia panuubʉrã, Dachi Akõreba saka kʉ̃risiad̶ai panuu arakʉd̶e kuitaabiai. ¹⁶Maamina dachiba kuitaaped̶aad̶a joma waud̶ai panuu.

¹⁷Ãbarã, mʉ kĩra panásturu. Machi tãed̶e nibasid̶aud̶e daiba unubiasid̶au saka nuread̶ai panuu. Ãbarã maka nuree baara nibásturu. ¹⁸B̶es ãrea mʉʉba nau machimaa jarasii maud̶e jẽa b̶uuba waya jaraaruu: ẽbẽrarã ãreaba ãchiba wau panuud̶eeba unubiabadau chi Cristo cruzd̶e biud̶a ʉ̃rʉbena bed̶ea kuitaad̶ai kʉ̃riad̶akau.3:18 Cristo cruzd̶e biud̶a ʉ̃rʉbena bed̶ea kuitaad̶ai kʉ̃riad̶akau. Griego bed̶ead̶e naka b̶ʉ kub̶uu: chi Cristod̶e cruz kĩramaabadaurã.¹⁹Maud̶eeba biuduud̶e Dachi Akõreba ãchi joma ichiai. Dachi Akõre ida b̶ubadau, ãchi kakuaba kʉ̃ria b̶uu waud̶ai baita.3:19 Dachi Akõre ida b̶ubadau, ãchi kakuaba kʉ̃ria b̶uu waud̶ai baita. Griego bed̶ead̶e naka b̶ʉ kub̶uu: ãchi b̶i, ãchi diosbʉ. Mia pera wau panuu ʉ̃rʉbena ãrea berreabadau. Ab̶a nau iujãad̶ebenáturu kʉ̃risiabadau. ²⁰Maamina dachi bajãad̶ebenarãbʉ. Dachi Karibabarii mamauba neei esed̶au panuu. Mau Dachi Mechiu Jesucristobʉ. ²¹Ichi neeruud̶e chi kakua biui b̶uu ãyaa waui. Maud̶e ichi kakua kĩra ãrea biꞌia b̶eei. Ichi poyaabariid̶eeba maka waui. Mau poyaabariid̶eeba ichiba ne joma poyaai.

¹Maud̶eeba mʉ ãbarã, mʉʉba jarad̶a kĩra Dachi Mechiud̶e ãrea ijãa panásturu. Mʉʉba machi ãrea kʉ̃ria b̶uu maud̶e unu kʉ̃ria b̶uu. Machi kakua, mʉ ãrea kĩrajʉʉ b̶uu. Machi mʉ kĩrajʉʉbibadaubʉ.4:1 Machi mʉ kĩrajʉʉbibadaubʉ. Griego bed̶ead̶e naka b̶ʉ kub̶uu: machi mʉ boro jũrabʉ.

Pabloba ãbarãmaa waubiad̶a

²Mʉʉba neekau Evodiamaa maud̶e neekau Sintiquemaa chi chuburia id̶iiruu chiya berread̶amera, Dachi Mechiu Jesucristo ome panuud̶eeba. ³Maud̶e bichi, chi mʉ ome Dachi Akõre traju waubarii, mʉʉba bichimaa id̶iiruu mau neekaurã aid̶amera. Ãchi Clemente baara maud̶e waabenarã sid̶a mʉ ome ãrea trajasid̶au chi bed̶ea bia Cristo ʉ̃rʉbena kuitaabiad̶ai baita. Joma ãchi trʉ̃ Dachi Akõreba chi ewaricha chokae duanabarii kartad̶e b̶ʉ uru b̶uu.

⁴Dachi Mechiu Jesucristo ome panuud̶eeba ewaricha kĩrajʉʉ panásturu. Mʉʉba waya jaraaruu: ¡Kĩrajʉʉ panásturu! ⁵Machi ẽbẽrarã bia nuree, jomaurãmaa unubiásturu. Dachi Mechiu neei ewari ʉ̃rʉ ba b̶uu.

⁶Barikia kakua ãrea jirukaraarã́sturu, maumaarã Dachi Akõremaa ʉtaa id̶ísturu, ichimaa chi chuburia id̶ísturu, maud̶e ne joma ʉ̃rʉbena ichíturu kid̶ibai ásturu. ⁷Mauba Dachi Akõreba machi sõ maud̶e machi kʉ̃risia jirukaraayuwãe duanubiai Jesucristo ome panuud̶eeba. Mau jirukaraayuwãe panad̶ai ẽbẽrarãba ãchi du ab̶a poyaa kauwa kuitaad̶aabai.

⁸Mau awara ãbarã, joma chi biawãra ʉ̃rʉbena, ne joma dachiba biꞌia b̶uu unubadau ʉ̃rʉbena, joma jipa b̶uu ʉ̃rʉbena, joma kachiruaswãe b̶uu ʉ̃rʉbena, jomaurãba kʉ̃riabadau ʉ̃rʉbena, joma biꞌia trʉ̃ poa b̶uu ʉ̃rʉbena, ne joma biꞌia ʉ̃rʉbena maud̶e ne joma dachiba biꞌia jarabadau ʉ̃rʉbena kʉ̃risia panásturu. ⁹Mʉʉba jaradead̶a, machiba mʉʉd̶eeba kuitaaped̶aad̶a, mʉʉd̶eeba ũriped̶aad̶a maud̶e unuped̶aad̶a joma wau panásturu. Maud̶e Dachi Akõre machi ome b̶uai maud̶e machi jirukaraayuwãe duanubiai.

Ãbarãba ne urubʉiped̶aad̶a ʉ̃rʉbena Pabloba ãchíturu kid̶ibai ad̶a

¹⁰Dachi Mechiud̶eeba mʉ ãrea kĩrajʉʉ b̶uu, machiba mʉ ʉ̃rʉbena kʉ̃risiasid̶aud̶e waya ne urubʉisid̶aud̶eeba. Mau machiba naed̶e wau kʉ̃ria panasmina poyaa waud̶aabasii. ¹¹Maka jarawẽa b̶uu mʉ ne wãꞌãe b̶uud̶eeba. Mʉʉba kuitaasii saka jirukaraayuwãe b̶uai chi mʉʉba uru b̶uud̶eeba. ¹²Chi nejarr barauwãe b̶uud̶e maud̶e ãrea uru b̶uud̶e saka b̶uai kuitaa b̶uu. Mʉʉba kuitaasii barikiad̶e saka jirukaraayuwãe b̶uai, b̶i jãwaa b̶uud̶e maud̶e jarrbisia b̶uud̶e; ãrea uru b̶uud̶e maud̶e ne wãꞌãe b̶uud̶e. ¹³Cristod̶eeba joma poyaa waui, ichiba mʉʉmaa meserãa b̶uabiiruud̶eeba. ¹⁴Maamina mʉʉba machíturu kid̶ibai aaruu, mʉ ãrea biꞌiwãe b̶uud̶e aid̶asid̶aud̶eeba. Biawãra machiba biꞌia wausid̶au.

¹⁵Ãbarã Filipod̶ebenarã, machiba kuitaa panuu chi bed̶ea bia Cristo ʉ̃rʉbena arab̶aed̶eed̶e ijãasid̶aud̶e, mʉ Macedonia druad̶ebena wãsiid̶e waabenarã ãbarã puurud̶ebenarãba mʉ baita ne urubʉid̶aabasii. Machiaburu mʉ baita makasid̶au.4:15 Hechos 18:5.¹⁶Mʉ Tesalónica puurud̶e b̶uasiid̶e machiba b̶es ãrea urubʉisid̶au mʉ aid̶ad̶ai baita. ¹⁷Mʉʉba id̶iwẽa b̶uu machiba ne urubʉid̶amera, maumaarã kʉ̃ria b̶uu biꞌia wau panuud̶eeba Dachi Akõreba machi biꞌia aid̶ai. ¹⁸Ne joma machiba ãba Epafrodito ome urubʉiped̶aad̶a mʉʉba adausii. Maud̶eeba ãrea uru b̶uu. Mauba mʉ biꞌia b̶uai. Machiba urubʉiped̶aad̶a chi kera tuwaa Dachi Akõremaa dead̶a kĩra b̶uu. Mau Dachi Akõreba biꞌia unu b̶uu. ¹⁹Biawãra joma machiba ne wãꞌãe panuu mʉ Bajãad̶ebena Akõreba ne bia uru b̶uud̶ebena Jesucristod̶eeba deai. ²⁰Maud̶eeba ewaricha Dachi Bajãad̶ebena Akõremaa biꞌia berread̶ai panuu. Biꞌia b̶uu maka b̶uai.

Pabloba nau kartad̶e aanama b̶ʉd̶a

²¹Joma ẽbẽrarã Dachi Akõred̶erã Jesucristo ome nuree biꞌia panábad̶e a jarásturu. Ãbarã mʉ ome panuurã bid̶a biꞌia panábad̶e a jarabʉi panuu. ²²Joma ẽbẽrarã Dachi Akõred̶erã namabenarãba biꞌia panábad̶e a jarabʉi panuu. Ãbarã Romad̶ebena chi aude mechiu nii baita trajabadaurã bid̶a biꞌia maka jarabʉi panuu.

²³Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi aid̶a b̶uai.4:23 Griego bed̶ead̶e chi b̶ee kartad̶e nau sid̶a b̶ʉ kub̶uu: biꞌia b̶uu maka b̶uai.