Judas
Karta Judasba b̶ʉd̶a
Jesús ãba Judasba nau karta b̶ʉsii. Chi b̶ʉd̶aba Santiago ãba a b̶uu (1). Waabenarãmaarã nau karta ãbarã judiorã baita b̶ʉsii. Año 65d̶e b̶ʉsii.
Judasba nau karta b̶ʉsii chi nureeba setaa jaradea panasiid̶eeba. Mau ẽbẽrarãba jara panasid̶au Dachi Akõreba ichi sõbiad̶eeba karibasiid̶eeba barikia kachirua poyaa waud̶ai panuu (4 maud̶e 18-19). Maud̶eeba Judasba chi ãbarãmaa jarasii ab̶au bid̶a ãchiba ijãa panuu ãyaa jaradeabiarãad̶amera (3). Mau awara b̶ʉsii chi ãbarã ãchi chiya aid̶ad̶ai panuu Jesucristod̶e biꞌia ijãad̶amera maud̶e Dachi Akõred̶e ijãad̶akaurã kĩra chuburiad̶ai panuu (20-23).
1Nau kartad̶e Judasba naa b̶ʉd̶a
1Mʉ Judasbʉ, Santiago ãba maud̶e Jesucristo baita bari trajabarii.1 Santiago ara mau «Jacob» abadau. Nau karta b̶ʉmaa b̶uu joma Dachi Akõre bajãad̶ebenaba iukuad̶a baita. Ichiba machi kʉ̃riakuabarii maud̶e Jesucristod̶eeba nu ua b̶uabarii. 2Mʉʉba kʉ̃ria b̶uu ichiba machi ãrea kĩra chuburia b̶uai, ãrea jirukaraayuwãe duanubiai, maud̶e machi ãrea kʉ̃ria b̶uai.
Setaa jaradeabadaurã
3Ãbarã, mʉʉba nau kartad̶e Dachi Akõreba dachi karibad̶a ʉ̃rʉbena b̶ʉ kʉ̃ria b̶uasii. Maamina mʉ baita, bibuara b̶uu jãabae b̶ʉi kauwa panad̶amera. Chi machiba ijãa panuu ab̶aumaa ida ãyaa jaradeabirã́sturu. Dachi Akõreba chi biawãra bed̶ea ichi ẽbẽrarãmaa b̶es ab̶aburu deasii. Diware deakau. 4Maka b̶ʉ b̶uu june ãbarã kĩra nuree machi tãed̶e duanuud̶eeba. Maarã ẽbẽrarãba setaa jaradeabadau Dachi Akõreba ichi sõbiad̶eeba dachi karibakuasiid̶eeba dachi kakuaba kachirua wau kʉ̃ria b̶uu poyaa waud̶ai panuu. Maarãba Dachi Mechiu ab̶a nii Jesucristo ida b̶ubadau. Eskareed̶eed̶e b̶ʉ kub̶uu Dachi Akõreba ãchi kastikai ʉ̃rʉbena.
5Mau joma kuitaa panumina mʉʉba kĩrababiai Dachi Mechiuba ichi puuru Egiptod̶ebena karibasii. Maamina karibasiid̶e chi ichid̶e ijãaped̶aad̶awãe nuree baribasii. 6Maud̶e kĩrabásturu chi nuree angelerã Dachi Akõreba duanud̶a kĩra paneed̶aabasii. Maumaarã chi panad̶amaa ida b̶usid̶au. Maud̶eeba Dachi Akõreba chob̶ea pãriud̶e jʉ̃akuasii ewaricha paneed̶amera chi ichiba kastikai ewarid̶aa. 7Ara mau kĩra Dachi Akõreba Sodomad̶ebena, Gomorrad̶ebena maud̶e chi puururã ara kaitad̶ebena kastikasii. Maarãba mianejasia waubachid̶au. Dachi kakuaba barikiu kachirua waud̶aabai panuu, ãchiba waubachid̶au. Maud̶eeba Dachi Akõreba maarã ewaricha tʉbʉchia kiikaud̶e biꞌiwãe panabiai. Mauba dachimaa kuitaabia b̶uu Dachi Akõreba chi kachirua joma maka kastikabarii.
8Chi machi tãed̶e neeped̶aad̶a maarã ẽbẽrarã kĩra nuree. Maarãba chi kamokaraaduu ijãabadau. Chi kakuaba waubi kʉ̃ria b̶uu waubadau, Dachi Mechiu ida b̶ubadau, maud̶e chi bajãad̶ebenarã ʉ̃rʉbena kachirua jarabadau.8 Chi bajãad̶ebenarã. Waabenarãmaarã mau jara b̶uu «Angelerã kachiruad̶e b̶aeped̶aad̶arã».9Maamina chi ángel aude mechiu nii Miguel abadauba maka wauka basii. Moisés biusiid̶e Miguel chi mau kakua ʉ̃rʉbena jʉbawãe nii ome chi kai juad̶e b̶eei ʉ̃rʉbena kĩru berreasid̶au. Maamina jʉbawãe niimaa kachirua jarai kʉ̃risiabasii, maumaarã jarasii: «Dachi Mechiuba bichi kastikai». 10Maamina chi maarã ẽbẽrarã machi tãed̶e neeped̶aad̶aba, ãchiba adua panuu ʉ̃rʉbena kachirua berreabadau. Ãnimararãba kʉ̃risiabadau kĩra kʉ̃risiabadau maud̶e chi kakuaba waubi kʉ̃ria b̶uu kĩráburu waubadau. Maud̶eeba Dachi Akõreba kastikakuai.
11¡Miichuburi chi kachiruad̶e nuree! Ãchiba Cainba waud̶a kĩra waubadau. Chi nejarra kʉ̃riabadaud̶eeba, kachirua wau nibabadau, Balaanba waud̶a kĩra. Coreba Moisés ida b̶ud̶a kĩra, Dachi Akõre ida b̶usid̶aud̶eeba, kastikakuai. 12Machi ãbua need̶aped̶a kʉ̃riad̶eeba kĩrajʉʉ komaa panuud̶e ãchi wapead̶awẽa machi baara kobadau. Maka machiba wau panuu maarãba kachiruabiabadau. Ara ãchid̶éburu kʉ̃risiabadau. Maarã jʉ̃rʉara pũatuba adoebarii kĩra nuree. Pũaturãba jʉ̃rʉara ãyaa adoeruud̶e kui chekau. Ara mau kĩra ãchiba jaradeaduuba aid̶akau. Bakuru b̶es ome biud̶a kĩra nuree, chi chaui ewarid̶e chi netaa deakaud̶eeba maud̶e chi karrad̶eed̶e ẽesiid̶eeba. 13Mard̶ebena ʉ̃rape meserãa kĩra nuree. Marba ichi ʉ̃raped̶ebena kõpepeabibarii kĩra, naarãba ne barikia nejasia waubadau. O kachiruad̶e wãaduud̶eeba, pusterrea aoko barikiud̶e wãaruu kĩra nuree. Dachi Akõreba chob̶ea pãriu kub̶usii ewaricha kastikakuai baita.
14-15Enocba maarã ʉ̃rʉbena berreasii. (Adand̶ebena ab̶a Enocd̶aa ẽbẽrarã imiped̶aad̶arã 7 panasid̶au). Enocba Dachi Mechiu baita naka berreasii: «¡Ũrísturu! Dachi Mechiu ichid̶irã ãrea baara neei joma kastikakuai baita. Maud̶e joma ichi kʉ̃riad̶akaurã kastikakuai. Maka waui kachirua wausid̶aud̶eeba Ichi kʉ̃riad̶aabasiid̶eeba, maud̶e Ichi ʉ̃rʉbena kachirua ãrea berreasid̶aud̶eeba». 16Maarãba ne barikia kakua ãi berreabadau, maud̶e waabenarã ʉ̃rʉbena ne barikia bed̶ea waubadau. Ara ãchiba kʉ̃ria panúturu jʉrʉbadau. Chi aude mechiurã kĩra berreabadau. Waabenarãmaa kũraabadau ãchiba kʉ̃ria panuu adaud̶ai baita.
Chi ãbarãba kãare waud̶ai panuu
17Maamina ãbarã, chi Dachi Mechiu Jesucristoba bʉid̶arãba jaraped̶aad̶a kĩrabásturu. 18Machimaa naka jarasid̶au: «Kaad̶earebena ewarid̶e baraai ẽbẽrarãba Dachi Akõremaa atua jarabadaurã maud̶e ãchi kakuaba waubii kʉ̃ria b̶uu wau panabadaurã». 19Maarãba ãbarãmaa ãchi kakawaa kʉ̃risia panabiabadau, ãchiba kʉ̃riaduu ne barikia waubadau, maud̶e Dachi Akõre Jauri wãꞌãe nuree.
20Maamina ãbarã, machicha aid̶ásturu Cristod̶e ãrea ijãad̶amera. Dachi Akõremaa ichi Jaurid̶eeba ʉtaa id̶ísturu. 21Dachi Akõre kʉ̃riad̶eeba nibásturu. Dachi Mechiu Jesucristoba kĩra chuburia b̶uud̶eeba ewaricha chokae nibabiad̶ai esed̶au panásturu.
22Chi ãbarã ãrea ijãawẽa nuree kĩra chuburiásturu. 23Chi tʉbʉchia kiikaud̶aa wãaduu karibásturu. Waabenarã kĩra chuburiásturu, maamina kauwa panásturu. Maarãba kachirua waubadau ida b̶ústuru.
Judasba Dachi Akõremaa biꞌia berread̶a
24Dachi Akõreba machi poyaa nu ua b̶uai b̶uu kachiruad̶e b̶aerãad̶amera. Ichi kĩrawãrea daad̶e kachiruaswãe poyaa biꞌia b̶ui. Aria machi kĩrajʉʉ panad̶ai. 25Dachi Akõre ab̶aburu nii. Ichi dachi karibabariibʉ. Ichi chi aude Mechiu nii, maud̶e joma poyaa waui b̶uu. Jomaurã chibaribʉ. Nabẽraed̶eed̶ebena maka nii. Id̶ibae bid̶a maka nii, maud̶e maka b̶uai. Dachi Akõremaa biꞌia berread̶ai panuu Dachi Mechiu Jesucristod̶eeba. ¡Biꞌia b̶uu maka b̶uai!