JUAN

Juan

Bed̶ea bia Jesús ʉ̃rʉbena Juanba b̶ʉd̶a

Jesús baara nibad̶a Juanba nau karta b̶ʉsii. Año 80d̶e Éfeso puurud̶e b̶uasiid̶e nau b̶ʉsii. Maamina nau kartad̶e Juanba nau b̶ʉd̶a jarawẽa b̶uu. Chi nureemaarã, nau kartad̶e Juanba ara ichimaa «Jesusba ãrea kʉ̃ria b̶uu» trʉ̃ jarabachii (21:20-24d̶e).

Juanba nau karta ãbarã baita b̶ʉsii kuitaad̶amera ãchiba Jesús ʉ̃rʉbena ijãaped̶aad̶a biawãrabʉ. Maud̶e jomaurã baita b̶ʉsii Jesús biawãra Dachi Akõre Warr ijãad̶amera. Mau kʉ̃risia mechiu 20:31d̶e Juanba naka b̶ʉsii: «Joma nau b̶ʉsii machiba Jesús Dachi Akõreba Dachi Karibabarii deai jarad̶a, Dachi Akõre Warrd̶e ijãad̶amera. Maka ijãaduubʉrã ichid̶eeba chokae b̶uai ara uru nuread̶ai».

Nau kartad̶e Juanba arakʉd̶e kuitaabiasii Jesús biawãra Dachi Akõred̶ebena neesii. Mau naed̶e kuitaabiasii ẽbẽrarãba jara panuud̶eeba (1:1-51). Mawãare kuitaabiasii Jesusba ẽbẽrarãba ne poyaa waud̶akau 7 wau b̶uud̶eeba (2:1—11:44). Mawãare Juanba b̶ʉsii Jesús biui baita b̶uu ʉ̃rʉbena (11:45—17:26), ichi ida b̶u nureeba jidaud̶aped̶a cruzd̶e beaped̶aad̶a ʉ̃rʉbena (18:1—19:42) maud̶e ichid̶e ijãa nureeba ichi chokae jiradud̶a unuped̶aad̶a ʉ̃rʉbena (20:1—21:25).

Nau kartad̶e Jesusba arakʉd̶e jaradeasii Dachi Akõre Jauri ʉ̃rʉbena (3:1-8; 6:63; 7:37-39; 14:15-29; 15:26—16:15 maud̶e 20:19-23). Mau awara arakʉd̶e berrea b̶uu Dachi Akõreba ichi Warr kʉ̃ria b̶uu ʉ̃rʉbena (5:19-21; 10:17-18; 17:1-26) maud̶e saka ichid̶e ijãa nuree kʉ̃ria b̶uu (3:16-17; 11:33-37 maud̶e 13:1—17:26).

Jesucristo ẽbẽra ba b̶uad̶a

¹Arab̶aed̶eed̶e chi Bed̶ea b̶uasii.1:1 Apocalipsis 19:13. Mau Bed̶ea Dachi Akõre ome b̶uasii. Biawãra mau Dachi Akõre maka b̶uasii. ²Mau arab̶aed̶eed̶e Dachi Akõre ome b̶uasii. ³Ichid̶eeba Dachi Akõreba joma wausii. Ichiwãe Dachi Akõreba ab̶a bid̶a waubai basii.1:3 Waabenarã judiorãba jarabachid̶au Bed̶ea abadau Dachi Akõre kʉ̃risia kuitaa. Proverbios 8:22-31; 1 Corintios 1:30.⁴Mau bed̶eaba chokae b̶uai dead̶akasii. Mau ʉ̃d̶aa kĩra b̶uasii, ẽbẽrarãmaa ichi ʉ̃rʉbena kuitaabiai b̶uud̶eeba. ⁵Mau ʉ̃d̶aa pãriud̶e koa b̶uu kĩra b̶uu. Mau pãriuba mau ʉ̃d̶aa poyaa kiibai.

⁶Ẽbẽra Boro Eabarii Juan abadau b̶uasii.1:6 Juan chi Boro Eabariiba nau karta b̶ʉʉbasii. Dachi Akõreba ichi bʉisii ⁷mau ʉ̃d̶aa ʉ̃rʉbena berreamera, ichid̶eeba jomaurãba ijãad̶amera. ⁸Juan mau ʉ̃d̶aawãe basii, maumaarã mau ʉ̃rʉbenáturu berreabachii. ⁹Chi nau iujãad̶e neei b̶uad̶a mau biawãra ʉ̃d̶aabʉ. Mau jomaurã baita koabarii.1:9 Isaías 49:5-6.

¹⁰Mau ʉ̃d̶aa nau iujãad̶e b̶uasii. Dachi Akõreba ichid̶eeba nau iujãa waud̶amina nau iujãad̶ebenarãba ichi kauwa unud̶aabasii. ¹¹Ichi druad̶ebenarãmaa neesii. Maud̶e ichi biꞌia irsibid̶aabasii. ¹²Maamina chi ichi irsibiped̶aad̶arãba ichid̶e ijãasid̶au. Maud̶eeba ichiba maarã b̶usii Dachi Akõre warrarã nuread̶amera. ¹³Ãchi Dachi Akõre warrarã bad̶aabasii ãchi naweba adaud̶ad̶eeba maebʉrã ẽbẽrarãba kʉ̃ria panad̶ad̶eeba. Maumaarã Dachi Akõréburu ichi warrarã babiasii.

¹⁴Chi Bed̶ea ẽbẽra kakuad̶e b̶uaped̶a dachi tãed̶e nibabachii. Ichi sõbiad̶eeba dachi ãrea aid̶asii. Ichiba dachimaa arakʉd̶e kuitaabiasii Dachi Akõre biawãra saka nii. Maud̶e daiba ichi joma mechiu nii unusid̶au, Dachi Akõre Warr maka niid̶eeba. ¹⁵Juanba ichi ʉ̃rʉbena naka jĩwa jarabachii: «Nau ẽbẽra ʉ̃rʉbena, mʉʉba naka jara b̶uabachii: “Chi mʉare neeruu mʉ audeara chi mechiu nii, mau mʉ naed̶e nibasiid̶eeba”».

¹⁶Ichi mechiu niid̶eeba, sõbiad̶eeba dachi aid̶a b̶uabachii maud̶e sõbiad̶eeba aid̶abarii. ¹⁷Dachi Akõreba naed̶e Moisesba b̶ʉd̶a deasii, maamina Jesucristod̶eeba dachimaa kuitaabiasii ichi biawãra saka nii maud̶e ichi sõbiad̶eeba dachi ãrea kariba b̶uu. ¹⁸Ab̶au bid̶a Dachi Akõre unud̶akau.1:18 Éxodo 33:18-20. Maamina chi Warr ab̶aburu nii1:18 Chi Warr ab̶aburu nii. Griego bed̶ead̶e chi b̶ee kartad̶e b̶ʉ kub̶uu: Dachi Akõre ab̶aburu nii. Dachi Akõred̶eeba1:18 Dachi Akõred̶eeba. Griego bed̶ead̶e chi b̶ee kartad̶e mau wãꞌãe. maud̶e chi Akõre ome ãbua b̶uud̶eeba, dachimaa kuitaabiasii Dachi Akõre biawãra saka nii.

Juan chi Boro Eabarii ʉ̃rʉbena

Mateo 3:11-12; Marcos 1:7-8; Lucas 3:15-17

¹⁹Nau chi Juanba ara ichi ʉ̃rʉbena jarad̶abʉ. Judiorã paare mechiurãba Jerusalend̶ebena paarerã maud̶e levid̶ebenarã, Juanmaa bʉisid̶au. Maarãba Juanmaa id̶isid̶au:

—¿Bichi kaima? ¿Bichi Dachi Akõreba Dachi Karibabarii deai jarad̶aka?

²⁰Maud̶e ichiba arakʉd̶e jarasii:

—Mʉ Dachi Akõreba Dachi Karibabarii deai jarad̶awãema.1:19-20 Dachi Akõreba Dachi Karibabarii deai jarad̶a. Mau griego bed̶ead̶e naka b̶ʉ kub̶uu: Cristo. Mau chi trʉ̃wãe. Arameo bed̶ead̶e Mesías jarabadau.

²¹Ãchiba waya id̶isid̶au:

—¿Makarã bichi kaima? ¿Bichi Eliaska?1:21 Malaquías 4:5-6.

Ichiba panausii:

—Mʉ Eliaswãema.

Ãchiba waya id̶isid̶au:

—Bichi ¿Dachi Akõre baita berreabarii chi mechiu neei b̶uad̶aka?1:21 Deuteronomio 18:15-19.

Ichiba panausii:

—Mʉ mauwãema.

²²Maud̶eeba ãchiba id̶isid̶au:

—¿Makarã bichi kaima? Dai bʉiped̶aad̶arãmaa bichi ʉ̃rʉbena jarad̶e wãd̶ai panuu. Ara bichi ʉ̃rʉbena daimaa ¿kãare jarad̶ai kawa?

²³Maud̶e Juanba panausii:

—Dachi Akõre baita berreabarii Isaiasba naka jarasii: “Drua sirua wãꞌãe b̶uud̶e ab̶auba nau jara b̶uu: Dachi Mechiu o jipa wirua wáusturu”.1:23 Isaías 40:3. Mʉ mau ẽbẽrabʉ.

²⁴Juanmaa bʉiped̶aad̶arã chi nuree fariseorã basii.1:24 Griego bed̶ead̶e mauba nau sid̶a jara b̶uu «Juanmaa bʉiped̶aad̶arã fariseorãba bʉisid̶au».²⁵Maarãba ichimaa id̶isid̶au:

—Bichi Dachi Akõreba Dachi Karibabarii deai jarad̶awãebʉrã, maud̶e Eliaswãebʉrã, maud̶e Dachi Akõre baita berreabarii chi mechiuwãebʉrã, ¿kai trʉ̃d̶eeba bichiba ẽbẽrarã boro eakua b̶uma?

^26-27Juanba naka panausii:

—Mʉʉba baniáburu boro eabarii. Maamina chi mʉare neei b̶uad̶a machi tãed̶e b̶umina machiba mau unud̶akau. Mau mʉ audeara chi mechiu niid̶eeba, mauba jʉ̃rʉd̶e jʉ̃barii enai baita mʉ biꞌiwãe b̶uu.

²⁸Joma mau makasii drua Betania puuru abadaumaa, Jordán do kĩare orienteare Juanba boro ea b̶uad̶amare.1:28 Chi b̶ee kartad̶e naka b̶ʉ kub̶uu: Betábara.

Jesús Dachi Akõre Oeja Chekebʉ

²⁹Mau norema Juanba Jesús ichimaa neeruu unusiid̶e naka jarasii: «¡Ichiásturu! Jãu Dachi Akõre oeja chekebʉ. Ichid̶eeba Dachi Akõreba nau iujãad̶ebenarãba kachirua waubadau perdonabarii.1:29 Levítico 16:20-22.³⁰Ichi ʉ̃rʉbena mʉʉba naed̶e jara b̶uasii: “Chi mʉare neeruu mʉ audeara chi mechiu nii, mau mʉ naed̶e nibasiid̶eeba”. ³¹Naed̶e mʉʉba adua b̶uasii jãu Jesús basii. Maamina Israeld̶ebenarã mʉʉba baniaba boro eakua b̶uu kuitaad̶amera kai Dachi Akõreba bʉid̶a».

³²Maud̶e jarasii: «Mʉʉba unusii Dachi Akõre Jauri bajãad̶ebena paloma kĩra neeped̶a Jesús baara b̶eeruu. ³³Ara mʉʉba mau unuka basii. Maamina mʉʉba boro eamera Dachi Akõreba bʉisiid̶e naka jarasii: “Bichiba unui mʉ Jauri ẽbẽra ʉ̃rʉ neeped̶a mau baara b̶eeruu. Unuuruud̶e bichiba kuitaai mauba ichi Jaurid̶eeba boro earuu”.1:33 Ezequiel 36:25-27; Isaías 11:1-2; Joel 2:28-29.³⁴Mʉʉba mau unusii. Maud̶eeba mʉʉba jara b̶uu ichi biawãra Dachi Akõre Warr».

Chi Jesús baara naa nibabadaped̶aad̶a

Mateo 4:18-22; Marcos 1:16-20; Lucas 5:2-11

³⁵Mau norema Juan waya ara mama b̶uasii. Maud̶e chi ichi baara nibabadaurã ome panasid̶au. ³⁶Maud̶e Juanba Jesús ara kaita wãaruu unukare jarasii:

—¡Ichiásturu! Jãu Dachi Akõre Oeja Chekebʉ.

³⁷Juan baara nibabadaurã omeeba mau ũrisid̶aud̶e, Jesús baara wãsid̶au. ³⁸Jesús akarrnaa ichiasiid̶e ichi kaad̶e needuu unusii. Maabae id̶isii:

—Machiba ¿kãare kʉ̃ria panuma?

Maarãba jarasid̶au:

—Rabí, bichi ¿sama kãi b̶uma? (Mau bed̶ea Rabí jara b̶uu “Jaradeabarii”).

³⁹Jesusba panausii:

—Ichiad̶e nésturu.

Wãsid̶aud̶e unusid̶au sama kãi b̶uasii. Mau ewarid̶e ichi baara paneesid̶au kewaraa ba b̶uasiid̶eeba.

⁴⁰Juanba jarad̶a ũrid̶aped̶a Jesús baara wãped̶aad̶a ome panasid̶au. Ab̶a Simón Pedro ãba Andrés basii. ⁴¹Andrés Jesús baara b̶uaped̶a naa ichi ãba Simón jʉrʉd̶e wãsii. Unusiid̶e jarasii:

—Daiba unusid̶au Dachi Akõreba Dachi Karibabarii deai jarad̶a.

⁴²Maabae Andresba Simón Jesusmaa adoesii. Neesid̶aud̶e Jesusba Simonmaa ichiaped̶a jarasii:

—Bichi Simón Jonás warr, maamina id̶iid̶eeba bichi Cefas ad̶ai.1:42 Jonás. Griego bed̶ead̶e mau trʉ̃ Juan abadau. Cefas. Maarã trʉ̃ jara panuu «mo». (Mau Cefas trʉ̃ Pedro abadau).

Jesusba Felipe maud̶e Natanael iud̶a

⁴³Norema Jesusba Galilea druad̶aa wãi kʉ̃risiasii. Maud̶eeba Felipe jʉrʉsii. Unuped̶a jarasii:

—Mʉʉba kʉ̃ria b̶uu bichi mʉ baara nibai.

⁴⁴Mau Felipe Betsaida puurud̶ebena basii. Andrés maud̶e Pedro sid̶a arabena basii. ⁴⁵Maud̶e Felipeba Natanael jʉrʉd̶e wãsii. Unusiid̶e jarasii:

—Moisesba b̶ʉd̶ad̶e jara b̶uu ẽbẽra daiba unusid̶au. Dachi Akõre baita berreabadaurãba mau ʉ̃rʉbena b̶ʉsid̶au. Ichi José warr Jesús Nazaretd̶ebena.

⁴⁶Natanaelba Felipemaa jarasii:

—¿Makarã Nazaretd̶ebena ne biꞌia neeika?

Felipeba jarasii:

—Wãd̶a ichiad̶e.

⁴⁷Jesusba Natanael ichimaa neeruu unusiid̶e, jarasii:

—¡Ichiásturu! Nau biawãra israeld̶ebenabʉ. Ichiba ab̶a bid̶a setaa kũruakau.

⁴⁸Natanaelba Jesús unuka basiid̶eeba id̶isii:

—Bichiba mʉ ʉ̃rʉbena ¿saka kuitaa b̶uma?

Jesusba panausii:

—Felipeba bichi jʉrʉd̶e wãi naed̶e mʉʉba kuitaa b̶uasii bichi higo bakuru ekare b̶uu.

⁴⁹Maud̶eeba Natanaelba jarasii:

—Jaradeabarii, bichi biawãra Dachi Akõre Warrbʉ. Bichi Israeld̶ebenarã Reybʉ.

⁵⁰Maud̶e Jesusba jarasii:

—Mʉʉba bichi higo bakuru ekare b̶uu kuitaasiid̶e a b̶uud̶eeba ¿bichiba maka kʉ̃risia b̶uka? Mau audeara ẽbẽrarãba ne poyaa waud̶akau mechiu nuree ãrea unui.

⁵¹Maabae Jesusba jarasii:

—Mʉʉba biawãra jaraaruu: machiba bajãa ewa nub̶uu unud̶ai. Maud̶e Dachi Akõre angelerã mʉ, chi Ẽbẽra Ba B̶uad̶amaa ed̶aa wãd̶aped̶a, waya ʉtaa wãwãbadau unud̶ai.1:51 Génesis 28:12.

Jesusba bania uva b̶aa babid̶a

¹Ewari õbea baaruud̶e miakãiduu kĩrajʉʉ bara b̶uabarii ewari basii Caná puuru Galilea druad̶e. Jesús nawe aria b̶uasii. ²Jesús maud̶e chi baara nibabadaurã iusid̶au mau miakãiduumaa need̶amera. ³Maka panuud̶e uva b̶aa wãꞌãesiid̶eeba chi naweba Jesusmaa jarasii:

—Uva b̶aa wãꞌãesii.

⁴Maud̶e Jesusba jarasii:

—Dana, ¿Sakãe bichiba mʉʉmaa naka jara b̶uma? Mʉ ewari neewẽa b̶uu.2:4 Mʉ ewari. Chi nureemaarã Jesusba jara b̶uasii ichi bead̶ai ʉ̃rʉbena maebʉrã chi ichiba unubiad̶a chi Dachi Akõreba Karibabarii deai jarad̶a ʉ̃rʉbena.

⁵Maamina Jesús naweba chi chiko dead̶aka panuumaa jarasii:

—Ichiba jaraaruu joma wáusturu.

⁶Aria kuuru mo uyaped̶aad̶a 6 topanasid̶au. Judiorãba mau maka uyabadau, Dachi Akõre daad̶e biꞌia topanad̶amera. Kuurucha 20 maebʉrã 30 galón uru panad̶ai b̶uasii.2:6 20 maebʉrã 30 galón. Chi b̶ee kartad̶e b̶ʉsid̶au 80 maebʉrã 100 litros. Griego bed̶ead̶e naka b̶ʉ kub̶uu: metreta ome maebʉrã õbea.⁷Maud̶e Jesusba chi ne dead̶aka panuumaa jarasii:

—Nau kuuru baniaba waabirubísturu.

Ara makʉd̶e waabirubisid̶au. ⁸Maabae Jesusba jarasii:

—Jãu b̶aꞌãra juid̶aped̶a, maabae chi uva b̶aa dead̶aka panuu mechiumaa adoésturu.

Ara makʉd̶e makasid̶au. ⁹Maabae uva b̶aa dead̶aka panuu jaradea ua b̶uabariiba mau bania bad̶a do chaasiid̶e adua b̶uasii sama juisid̶au. Chi dead̶aka panúburu kuitaa panasid̶au. Chi uva b̶aa dead̶aka panuu jaradea ua b̶uabariiba chi mukĩra miakãimaa b̶uu iuped̶a jarasii:

¹⁰—Miakãibadau ewari wauduud̶e, jomaurãba uva b̶aa chi aude biꞌia b̶uu naa dead̶akabadau. Maka chi iud̶arãba ãrea doped̶aad̶akare, chi uva b̶aa ãrea balewẽa b̶uu dead̶akabadau. Maamina bichiba uva b̶aa chi aude biꞌia b̶uu mera uru b̶uad̶a jãabae dead̶akaaruu.

¹¹Mau ẽbẽrarãba ne poyaa waud̶akau naed̶e waud̶a Jesusba Caná puurud̶e Galilea druad̶e wausii. Maud̶ebena ichi chi Mechiu unubisii. Maka ichi baara nibabadaurãba ichi biawãra ijãasid̶au.

¹²Mau maad̶akare Jesús Capernaum puurud̶aa wãsii. Ichi nawe, ichi ãbarã maud̶e ichi baara nibabadaurã ichi baara ãbua wãsid̶au. Aria ãrea panad̶aabasii.

Jesusba ne kaebea nedobʉibadaurã duabʉikad̶a

Mateo 21:12-13; Marcos 11:15-18; Lucas 19:45-46

¹³Judiorã Pascua2:13 Pascua. Egiptod̶ebena wãd̶ai naed̶e, judiorãba decha oeja ab̶a beasid̶au maabae chi oa ãchi de poraa wãtomaa purusid̶au. Maka wausid̶au Dachi Akõreba Egiptobid̶arã kastikai ewarid̶e biurãad̶amera. Jãabae Jesusba jara b̶uu ichi oeja ara ichi oa cruzd̶e eab̶ari wãaruu kĩra nii. Maka wausii, Dachi Akõremaa ichid̶e ijãabadaurã nau iujãa jomad̶ebena kastikarãad̶amera. Éxodo 12:1-27. ewari ʉ̃rʉ ba b̶uasii. Maud̶eeba Jesús Jerusalend̶aa wãsii. ¹⁴Aria Dachi Akõre de mechiud̶e wãbariimare paka, oeja maud̶e paloma nedobʉibadaurã unusii. Maud̶e chi drua ãyarebena nejarra eneeduu nedobʉibadaurã mesad̶e akʉ panuu unusii. ¹⁵Maka unusiid̶e, Jesusba soa jʉ̃kara ab̶a wau adauped̶a, maabae awara joma duabʉikasii ãchi oeja maud̶e paka baara. Chi nejarra nedobʉibadaurã ãchi sẽetao ʉrikuasii maud̶e chi mesa jãwarikuaped̶a, ¹⁶maabae chi paloma nedobʉibadaurãmaa jarasii:

—Chi ne kaebea joma ãyaa adoésturu. Chacha de ne kaebea nedobʉibadau de waurã́sturu.

¹⁷Maud̶e ichi baara nibabadaurãba kĩrabasid̶au Dachi Akõre bed̶ead̶e naka b̶ʉ kub̶uu: «Bichi de mechiu mʉʉba ãrea kʉ̃ria b̶uud̶eeba mʉ biui».2:17 Griego bed̶ead̶e b̶ʉ kub̶uu: Bichi de mechiu mʉʉba ãrea kʉ̃ria b̶uud̶eeba mʉ baai. Salmos 69:9.

¹⁸Maka b̶uud̶e paare mechiurã aria panasid̶au. Maarãba Jesusmaa jarasid̶au:

—Daimaa unubiáse Dachi Akõreba bichimaa jãka waubi b̶uu.

¹⁹Jesusba panausii:

—Nau de mechiu ãriiduubʉrã, mʉʉba ewari õbead̶e waya waui.

²⁰Maud̶e paare mechiurãba jarasid̶au:

—Nau Dachi Akõre de mechiu 46 año ba b̶uasii joma waud̶ai baita. Mau bichiba ¿saka ewari õbead̶e joma waui a b̶uma?

²¹Jesusba nau de mechiu asiid̶e ara ichi ʉ̃rʉbena jara b̶uasii. ²²Ichi chokae jiradusiid̶e ichi baara nibabadaurãba kĩrabasid̶au ichiba maka jarad̶a bad̶a. Maud̶e ãchiba Dachi Akõre bed̶ead̶e b̶ʉ kub̶uu maud̶e Jesusba jarad̶a biawãra ijãasid̶au.

Jesusba ẽbẽrarã saka nuree kuitaad̶a

²³Judiorã Pascua ewarid̶e Jesús Jerusalend̶e b̶uasii. Maud̶e ãrea ẽbẽrarãba ne poyaa waud̶akau wausiid̶e, ãreaba ichid̶e ijãasid̶au. ²⁴Maamina Jesusba jomaurã kʉ̃risia kuitaa niid̶eeba ijãabasii ãchiba biawãra ijãa panuu. ²⁵Jomaurã sõ kuitaa niid̶eeba ab̶au bid̶a ichimaa ẽbẽrarã saka nuree jarad̶aabai panasid̶au.

Jesús Nicodemo ome berread̶a

¹Fariseo b̶uasii Nicodemo abadau b̶uasii. Mau judio mechiu basii. ²Mau Nicodemo ẽsabud̶aa Jesusmaa wãsii. Maabae Jesusmaa jarasii:

—Jaradeabarii, daiba kuitaa panuu bichi Dachi Akõreba bʉid̶a. Dachi Akõre bichi baara b̶uad̶awãe basirã chi ẽbẽrarãba ne poyaa waud̶akau poyaa waubai basii.

³Jesusba ichimaa jarasii:

—Mʉʉba bichimaa biawãra jaraaruu: wãwa adaubarii kĩra, waya chiwid̶i b̶eewẽebʉrã, Dachi Akõre juad̶e poyaa b̶uabai ichid̶irã baara.3:3 Chiwid̶i b̶eewẽebʉrã. Griego bed̶ead̶e mauba nau sid̶a jara b̶uu «bajãad̶eeba warr adauwẽebʉrã».

⁴Maud̶eeba Nicodemoba ichimaa id̶isii:

—¿Saka dachi chõra b̶uu waya wãwa adaui kĩra b̶eeima? Maka b̶uubʉrã ¿dachi nawe b̶ited̶e wãi b̶uka waya wãwa adauruu kĩra?

⁵Jesusba panausii:

—Mʉʉba bichimaa biawãra jaraaruu: baniad̶eeba maud̶e Dachi Akõre Jaurid̶eeba b̶ited̶ebena neewẽebʉrã, Dachi Akõre juad̶e poyaa b̶uabai ichid̶irã baara.3:5 Waabenarãmaarã mau bed̶ea jara b̶uu «Dachi Akõre Jauriba ẽbẽra jeraaped̶a waya warr adaubiiwẽebʉrã, mau ẽbẽra Dachi Akõre juad̶e poyaa b̶uabai ichid̶irã baara».⁶Dachi naweba chi warr adaud̶a nau kakuad̶ebena need̶abʉ, maamina waya chiwid̶i need̶a Dachi Akõre Jaurid̶eeba need̶abʉ. ⁷Mʉʉba waya wãwa adaui kĩra panad̶ai panuu ad̶a kakua ãrea kʉ̃risiarã́se. ⁸Pũaturã barikiareeba pũatubarii. Chi jĩwa ũribarimina kuitaakau samareeba neeruu maud̶e samaa wãaruu. Ara mau kĩra Dachi Akõre Jauri unud̶akamina kuitaa panuu ẽbẽra sõd̶e saka maka wau b̶uu.

⁹Nicodemoba jarasii:

—Dachi Akõre Jauriba ¿saka mau maka wauima?

¹⁰Jesusba panausii:

—Bichi Israeld̶ebenarãmaa Dachi Akõre bed̶ea jaradeabarii mechiumina ¿mau adua b̶uka? ¹¹Mʉʉba bichimaa biawãra jaraaruu: daiba kuitaa panuu ʉ̃rʉbena, unu panuu ʉ̃rʉbena berrea panuu maamina daiba jara panuu machiba ijãad̶akau. ¹²Mʉʉba nau iujãad̶e unubadau ʉ̃rʉbena jara b̶uu machiba ijãad̶awẽebʉrã, bajãad̶ebena jaraaruubʉrã ¿saka ijãad̶aima?

¹³»Ab̶a bid̶a bajãad̶aa wãkau mau kuitaai baita. Ab̶aburu mʉ́turu, chi Ẽbẽra Ba B̶uad̶aba mau kuitaa b̶uu, bajãad̶ebena need̶ad̶eeba.3:13 Griego bed̶ead̶e chi b̶ee kartad̶e nau sid̶a b̶ʉ kub̶uu: ichi bajãad̶e b̶uud̶eeba.¹⁴Moisesba drua sirua wãꞌãe b̶uud̶e dama bronce waud̶a ʉtʉ jira b̶ud̶a kĩra,3:14-15 Números 21:4-9. mʉ, chi Ẽbẽra Ba B̶uad̶a ʉtʉ jirab̶ud̶ai, ¹⁵chi mʉʉd̶e ijãaduu Dachi Akõre ome ewaricha chokae nuread̶amera.3:14-15 Griego bed̶ead̶e chi b̶ee kartad̶e nau sid̶a b̶ʉ kub̶uu: biud̶aped̶a aduarãad̶amera.

¹⁶»Dachi Akõreba ẽbẽrarã ãrea kʉ̃riakua b̶uud̶eeba ichi Warr ab̶a nii nau iujãad̶aa bʉisii joma ichid̶e ijãaduu ichid̶ebena awara nurearãad̶amera, maumaarã ichi ome ewaricha chokae nuread̶amera. ¹⁷Dachi Akõreba ichi Warr nau iujãad̶aa bʉibasii ẽbẽrarã kastikamera maumaarã bʉisii karibakuamera. ¹⁸Dachi Akõreba ichi Warrd̶e ijãa b̶uu kastikaabai. Maamina chi ichi Warrd̶e ijãawẽa b̶uu Dachi Akõreba kastikabarii, ichi Warr ab̶a nii ida b̶u b̶uud̶eeba.

¹⁹»Dachi Akõreba nau iujãad̶ebenarã kastikabarii nau kakua: chi ʉ̃d̶aa nii nau iujãad̶aa neesii jomaurãba Dachi Akõre unud̶amera. Maamina ẽbẽrarãba kachirua waubadaud̶eeba pãriu ãrea kʉ̃riasid̶au. ²⁰Joma chi kachirua waubadaurãba ʉ̃d̶aa kʉ̃riad̶akau. Ʉ̃d̶aad̶aa need̶akau ãchiba kachirua wau panuu kuitaarãad̶amera. ²¹Maamina joma chi biawãra waubadaurã ʉ̃d̶aad̶aa neebadau ãchiba Dachi Akõreba kʉ̃ria b̶uu kĩra waubadau jomaurãba kuitaad̶amera.

Juan chi Boro Eabariiba Jesús ʉ̃rʉbena berread̶a

²²Mau maad̶akare Jesús maud̶e ichi baara nibabadaurã Judea druad̶aa wãsid̶au. Aria panuud̶e chi ichid̶e ijãaduu boro eakuabachii. ²³Maumisa Juanba boro ea b̶uabachii Enond̶e, Salim puuru kaita, aria bania ãrea b̶uud̶eeba. Aria ẽbẽrarã wãbachid̶au, boro eabidai baita. ²⁴Mau makasii Juan jʉ̃ad̶ai naed̶e. ²⁵Mau ewarid̶e waabenarã Juan baara nibabadaurã ab̶a judio ome kĩru berreasid̶au ne jeraabadau ʉ̃rʉbena, Dachi Akõre daad̶e biꞌia nuread̶ai baita.3:25 Ab̶a judio. Griego bed̶ead̶e chi b̶ee kartad̶e naka b̶ʉ kub̶uu: judiorã. Mau ewarid̶e chi nuree Juan baara nibabadaurã waabena judio ome kĩru berreasid̶au Dachi Akõre daad̶e biꞌia nuread̶ai baita ne jeraabadau ʉ̃rʉbena.²⁶Mau maad̶akare Juanmaa wãd̶aped̶a jarasid̶au:

—Jaradeabarii, bichi ome Jordán kĩare b̶uad̶aba ẽbẽrarã boro eakuamaa b̶uu, chi mau ʉ̃rʉbena bichiba berread̶a. Joma maumaa wã panuu.

²⁷Maud̶eeba Juanba jarasii:

—Ab̶au bid̶a poyaa uru b̶uabai, chi mau Dachi Akõreba ichimaa dearuuwãebʉrã. ²⁸Machiba mʉʉba jarad̶a ũrisid̶au. Mʉʉba jarasii mʉ chi Dachi Akõreba Dachi Karibabarii deai jarad̶awãe. Maumaarã Dachi Akõreba mʉ naa bʉisii ichi o jipa jaremera. ²⁹Miakãiduud̶e chi wẽra adauruu chi aude mechiu nii. Maamina ichi kõpaero ichi jãkaa b̶uu kĩrajʉʉ b̶uu, ichi berrearuu ũri b̶uud̶eeba. Ara mau kĩra mʉ kĩrajʉʉ b̶uu ichi nama b̶uud̶eeba. ³⁰Mau chi aude mechiu bai b̶uu. Maud̶e mʉ kaebeu b̶eei b̶uu.

Ʉtʉbena ẽbẽra

³¹»Chi ʉtʉʉba need̶a jomaurã audeara mechiu nii. Chi nau iujãad̶e nuree nau iujãad̶ebenad̶eeba ab̶a nau iujãad̶ebenáturu berreabadau. Maud̶eeba chi bajãad̶ebena neeruu jomaurã audeara mechiu nii. ³²Ichiaburu berrea b̶uu bajãad̶e unud̶a ʉ̃rʉbena maud̶e ũrid̶a ʉ̃rʉbena. Maamina ichiba berrea b̶uu ab̶au bid̶a ijãad̶akau. ³³Chi ichi bed̶ea ijãa b̶uuba kuitaa b̶uu Dachi Akõreba jara b̶uu biawãrabʉ. ³⁴Dachi Akõreba bʉid̶aba Dachi Akõre bed̶ea jarabarii, Dachi Akõreba ichi Jauri wãakawẽa deasiid̶eeba. ³⁵Dachi Akõreba ichi Warr kʉ̃ria uru b̶uu; maud̶eeba ne joma deasii ichi juad̶e uru b̶uamera. ³⁶Chi ichi Warrd̶e ijãa b̶uu Dachi Akõre ome ewaricha chokae b̶uai, maamina chi ichi Warr ida b̶u b̶uu Dachi Akõre ome ewaricha chokae b̶uabai. Mau Dachi Akõreba kastikai.

Jesús Samariad̶ebena wẽra ome berread̶a

¹Mau ewarid̶e fariseorãba ũrisid̶au Jesusba Juan audeara ẽbẽrarã ãrea ua b̶uu maud̶e boro eakua b̶uu. ²(Biawãra Jesusba ẽbẽrarã boro eaka basii. Ichi baara nibabadaurã́buru boro eabachid̶au). ³Fariseorãba mau ũriped̶aad̶a Jesusba kuitaasiid̶e Judea druad̶e b̶uad̶a Galilea druad̶aa waya wãsii.

⁴Maamina araa wãi baita Samaria druare wãi b̶uasii. ⁵Wãaruud̶e Samariad̶e puuru Sicar abadaumaa neesii. Mau puuru Jacoba ichi warr Josemaa dead̶a drua kaita b̶uu.4:5 Génesis 33:18-20; 48:21-22; Josué 24:32.⁶Aria Jacobd̶e bania juibadau chob̶ea nub̶uasii. Ʉmada jipa baburuud̶e Jesús niid̶e kakua ãkaa b̶uasii. Maud̶eeba mau bania juibadau chob̶ea jãkaa akʉ b̶eesii. ^7-8Jesús baara nibabadaurã puurud̶aa wãsid̶au chiko nedod̶e. Maka b̶uud̶e Samariad̶ebena wẽra bania juid̶e neesii. Jesusba mau wẽramaa jarasii:

—Mʉʉmaa bania dease.

⁹Maabae chi wẽraba Jesusmaa jarasii:

—Mʉ Samariad̶ebena wẽrabʉ. ¿Sakãe bichi judio niiba mʉʉmaa bania id̶i b̶uma?

Mau wẽraba maka jarasii judiorãba Samariad̶ebenarã kʉ̃riad̶akaud̶eeba.4:9 Judiorãba Samariad̶ebenarã kʉ̃riad̶akaud̶eeba. Griego bed̶ead̶e mauba nau sid̶a jara b̶uu «judiorã Samariad̶ebena paratud̶e ne kod̶akaud̶eeba».

¹⁰Jesusba panausii:

—Dachi Akõreba dea b̶uu bichiba kuitaaibʉrã maud̶e cha bania id̶i b̶uu kai kuitaaibʉrã, bichiba mʉʉmaa bania id̶ii basii. Maabae mʉʉba bania chokae b̶uabibarii deai basii.

¹¹Wẽraba jarasii:

—Nau bania id̶u nub̶uud̶e, bichiba ¿kãareba chi bania juuima? Mau chokae b̶uabibarii bania ¿bichiba samabena juiima? ¹²Dai nabẽra Jacoba nau bania dachi baita b̶uisii. Naud̶ebena dobachii. Ichi warrarãba, ichi ãnimara bid̶a dobachid̶au. ¿Makarã bichi Jacob audeara mechiu nika?

¹³Jesusba panausii:

—Barikiuba nau bania dooruubʉrã, waya obisiai. ¹⁴Maamina chi mʉʉba dea b̶uu bania dooruubʉrã waa obisiabai. Chi mʉʉba dea b̶uu bania ichid̶e ewaricha che b̶uu maud̶e mau ẽbẽra Dachi Akõre ome ewaricha chokae b̶uai.

¹⁵Maud̶e wẽraba jarasii:

—Maka b̶uubʉrã mau bania mʉʉmaa dease waa obisiabai baita, maud̶e waa nama bania juid̶e neebayua.

¹⁶Maud̶eeba Jesusba jarasii:

—Bichi kima iud̶e wãped̶a namaa nésturu.

¹⁷Chi wẽraba jarasii:

—Mʉ kima wãꞌãe nii.

Jesusba jarasii:

—Bichiba jara b̶uu biawãrabʉ. Bichi kima wãꞌãe nii. ¹⁸Biawãra bichiba kima jua ab̶a uru b̶uasii. Maud̶e bichiba chi ʉ̃raud̶e uru b̶uu bichi kimawãe. Bichiba jara b̶uu biawãrabʉ.

¹⁹Maud̶eeba chi wẽraba jarasii:

—Mʉʉmaarã bichi Dachi Akõre baita berreabariibʉ. ²⁰Dai nabẽrarãba nau ead̶e Dachi Akõremaa biꞌia berreabachid̶au, maamina machi judiorãba jarabadau ichimaa biꞌia berread̶ai panuu Jerusalend̶e. ¿Samaa wãd̶ai panuma Dachi Akõremaa biꞌia berread̶ai baita?

²¹Jesusba panausii:

—Mʉʉba jara b̶uu ijãase. Ewari ab̶a neeruud̶e machiba biawãra Dachi Akõremaa biꞌia berread̶ai. Maamina maka waud̶aabai nau ead̶e maebʉrã Jerusalend̶e bid̶a. ²²Machi Samariad̶ebenarã Dachi Akõremaa biꞌia berreabadamina ichi adua panuu. Dai judiorãba ichi kuitaa panuu, judiorãd̶eeba Dachi Akõreba saka ẽbẽrarã karibabarii kuitaabia b̶uud̶eeba.4:22 Isaías 2:2-3.²³Maamina chi ewari neei b̶uad̶a neesii. Id̶ibae Dachi Akõreba kʉ̃ria b̶uu ẽbẽrarãba chi nureemarebenad̶eeba ichimaa ichi Jaurid̶eeba biꞌia berread̶ai maud̶e biawãra kuitaa panuud̶eeba. Ab̶a makaburu ichimaa arakʉd̶e biꞌia berread̶ai. ²⁴Dachi Akõre jauríturu nii. Maud̶eeba ẽbẽrarãba ichimaa biꞌia berread̶ai panuubʉrã maka waud̶ai panuu ichi Jaurid̶eeba maud̶e biawãra kuitaa panuud̶eeba.

²⁵Chi wẽraba jarasii:

—Mʉʉba kuitaa b̶uu Dachi Akõreba Dachi Karibabarii deai jarad̶a biawãra neei. Mau neeruud̶e dachimaa ne joma kuitaabiai.

²⁶Maud̶eeba Jesusba jarasii:

—Mʉ, chi bichi ome berrea b̶uu ichibʉ.

²⁷Maka b̶uud̶e chi Jesús baara nibabadaurã puurud̶ebena waya neesid̶aud̶e Jesús wẽra nii ome berrea b̶uu unusid̶aud̶e kauwa kʉ̃risiad̶aabasii. Maamina ab̶au bid̶a Jesusmaa id̶id̶aabasii «¿Kãare kʉ̃ria b̶uasii?» maebʉrã «¿Kãare jãu wẽra ome berrea b̶uasii?» ²⁸Maabae chi wẽraba ichi choko b̶uiped̶a puurud̶aa wãsii. Neeped̶a ẽbẽrarãmaa jarasii:

²⁹—Ichiad̶e wã́duru, chi mʉʉba unud̶a ẽbẽra. Mauba mʉʉmaa jarasii joma mʉʉba naed̶e waud̶a bad̶a. ¿Mau Dachi Akõreba Dachi Karibabarii deai jarad̶awãeka?

³⁰Ara makʉd̶e ẽbẽrarã puurud̶ebena Jesús b̶uumaa wãsid̶au. ³¹Maumisa Jesús baara nibabadaurãba ichimaa chi chuburia id̶i panasid̶au komera. ³²Maamina Jesusba jarasii:

—Kowẽma, mʉʉba koi baita uru b̶uu machiba adua panuu.

³³Ichi baara nibabadaurãba ãchicha jarasid̶au:

—¿Ab̶auba jãumaa chi kobii enee sãaka?

³⁴Maud̶eeba Jesusba jarakuasii:

—Mʉ bʉid̶aba waubi b̶uu joma wau b̶uu, mau mʉ chiko kĩra b̶uu. ³⁵Machiba jarabadau: “Wabid̶a jed̶ako kimare esed̶aui b̶uu ne uu nub̶uu junai baita”. Maamina mʉʉba jaraaruu: ichiásturu, ẽbẽrarã jãabae mʉʉmaa needuu drua uud̶a junaid̶e nub̶uu kĩra panuu. ³⁶Chi uu nub̶uu junad̶ai ewari neesii. Uu nub̶uu junaaduu kĩra machi trajad̶ai ẽbẽrarãba mʉʉd̶e ijãad̶amera. Maka ãchi Dachi Akõre baara ewaricha chokae duanad̶ai. Chi uu nub̶uu junabarii kĩrajʉʉbarii chi ichimaa paaduu adaui baita. Ara mau kĩra machi kĩrajʉʉd̶ai ẽbẽrarãba mʉʉd̶e ijãaduu kakua. Chi uu nub̶uu junabarii chi uubarii ome kĩrajʉʉ panad̶ai.

³⁷Dachiba jarabadau biawãrabʉ: “Ab̶aba uui b̶uu maud̶e ab̶auba junai b̶uu”. ³⁸Ara mau kĩra mʉʉba machi bʉikasii waabenarãba uuped̶aad̶a junad̶amera. Maarãba ãrea uuped̶aad̶a machiba bari au juna panuu.

³⁹Ãrea Samariabid̶arã mau puurud̶ebenarãba Jesusd̶e ijãasid̶au, wẽraba naka jarasiid̶eeba: «Ichiba mʉʉmaa jarasii joma mʉʉba naed̶e waud̶a bad̶a». ⁴⁰Samariad̶ebenarã Jesusmaa need̶aped̶a chi chuburia id̶isid̶au ãchi baara b̶eemera. Maabae Jesús ãchi puurud̶e ewari ome b̶eesii. ⁴¹Ichiba jaradea ua b̶uud̶e ãchi maucha ãreaba ijãasid̶au. ⁴²Ãchiba chi wẽramaa jarasid̶au:

—Daiba ab̶aburu bichiba jarad̶a kakua ijãa panuuwãe, maumaarã ijãa panuu ichiba jaradea b̶uu ũrisid̶aud̶eeba. Daiba kuitaasid̶au ichi biawãra jomaurã karibabarii.4:42 Jomaurã karibabarii. Griego bed̶ead̶e chi b̶ee kartad̶e nau sid̶a b̶ʉ kub̶uu: Cristo.

Jesusba Galilead̶e warr aribiabid̶a

⁴³Samariad̶e ewari ome b̶uaped̶a Jesús Galilea druad̶aa wãsii. ⁴⁴Mau naed̶e ichiba jarasii Dachi Akõre baita berreabarii ara ichi druad̶ebenarãba wapeadee nii ad̶akau.4:44 Mateo 13:57; Marcos 6:4; Lucas 4:24.⁴⁵Jesús Jerusalend̶e b̶uasiid̶e Galilead̶ebenarã sid̶a duanasid̶au Pascua ewari waud̶ai baita. Aria Jesusba ẽbẽrarãba ne poyaa waud̶akau wau b̶uu unusid̶au. Maud̶eeba ichi Galilead̶e neesiid̶e ãchiba biꞌia irsibisid̶au.

⁴⁶Galilea druad̶e b̶uud̶e Jesús waya Caná puurud̶aa wãsii ichiba naed̶e bania uva b̶aa babid̶amaa.4:46 Juan 2:1-11. Maumisa Capernaum puurud̶e chi rey ome trajabarii chi mechiu b̶uasii. Chi mau warr ãrea ẽpermo b̶uasii. ⁴⁷Maud̶e ichiba ũrisii Jesús Judead̶ebena Galilea druad̶aa neesii. Ara makʉd̶e Caná puurud̶aa wãsii Jesús b̶uumaa. Neeped̶a chi chuburia id̶isii ichi warr biumaa b̶uu aribiabid̶e wãmera. ⁴⁸Jesusba ichimaa jarasii:

—Machiba ẽbẽrarãba ne poyaa waud̶akau unud̶awẽebʉrã mʉʉba jara b̶uu ijãad̶aabai.

⁴⁹Maamina chi ẽbẽraba jarasii:

—Mʉ Mechiu, mʉ warr biui naed̶e isa wãd̶a.

⁵⁰Jesusba jarasii:

—Deed̶aa wãse. Bichi warr aribiasii.

Chi ẽbẽraba ijãasiid̶eeba ara makʉd̶e wãsii. ⁵¹Deed̶aa neeruud̶e ichi baita bari trajabadaurãba irsibid̶aped̶a jarasid̶au:

—Bichi warr aribiasii.

⁵²Maabae ichiba id̶isii:

—¿Sakaed̶e maka aribiasma?

Ãchimaa panausid̶au:

—Nuid̶a ʉmada wãd̶akare chi kʉamia duusii.

⁵³Maud̶e chi akõreba kuitaasii ara makʉd̶e Jesusba bichi warr aribiasii asii. Maabae ichiba maud̶e joma ichi ded̶ebenarãba Jesusd̶e ijãasid̶au. ⁵⁴Jesús Judead̶ebena Galilead̶aa waya neeruucha ẽbẽrarãba ne poyaa waud̶akau wau b̶uabachii. Mau ẽbẽrarãba ne poyaa waud̶akau waud̶a b̶es ome basii.

Jesusba bari panabadau ewarid̶e b̶akara bʉʉ nii aribiabid̶a

¹Mau maad̶akare Jesús Jerusalend̶aa wãsii, aria judiorãba bari panabadau ewari waumaa panasid̶aud̶eeba. ²Jerusalén puurud̶e ẽbẽrarã kuibadau wauped̶aad̶a nub̶uasii. Hebreo bed̶ead̶e Betzatá abadau.5:2 Betzatá. Griego bed̶ead̶e ãrea kartad̶e naka b̶ʉ kub̶uu: Betesda maebʉrã Betsaida. Mau kuibadau puurud̶e ed̶a wãbadau Oeja abadau kaita b̶uu. Chi kuibadau jãkaa de cheke jua ab̶a kob̶easii. ³Aria jeed̶a ẽpermo nuree, dau pãriu nuree, jʉ̃rʉ nʉka nuree maud̶e b̶akara bʉʉ nuree ãrea baraasii. [Ãchiba chi bania miipaaruu esed̶au panasid̶au. ⁴B̶esed̶e Dachi Mechiu angelba mau bania miipa neebachii. Makaaruud̶e chi naa mau baniad̶e ed̶a wãaruu chi ẽpermo b̶uad̶a aribiabachii.]5:3-4 Griego bed̶ead̶e chi b̶ee kartad̶e bed̶ea corcheted̶e b̶uu wãꞌãe.⁵Maud̶e ẽbẽra ab̶a 38 año ba b̶uasii ẽpermo b̶uu. ⁶Jesusba mau ẽbẽra jeed̶a b̶uu unusiid̶e kuitaasii chi mau aria maka b̶uu ãrea ba b̶uasii. Maud̶eeba ichimaa id̶isii:

—¿Bichi aribiai kʉ̃ria b̶uka?

⁷Maabae chi ẽpermo b̶uuba panausii:

—Maerã, maamina chi bania miipaaruud̶e kaiba mʉ doed̶a adooi wãꞌãe nii. Mʉ ed̶a wãi chaaruud̶e ab̶a mʉ naed̶e ed̶a wãbarii.

⁸Jesusba jarasii:

—Jiraduse. Chi bichi jira adoebadau adauped̶a deed̶aa wãse.

⁹Ara makʉd̶e chi ẽbẽra aribiasii. Ichi jira adoebadau adauped̶a nibad̶easii. Maamina mau ewari bari panabadau ewari basii. ¹⁰Maud̶eeba judiorã mechiurãba chi ẽbẽra aribiad̶amaa jarasid̶au:

—Id̶i bari panabadau ewarid̶eeba bichi jira adoebadau adoebai b̶uu.

¹¹Maud̶e ichiba panausii:

—Maamina chi mʉ aribiabid̶aba jarasii: “Bichi jira adoebadau adoeped̶a wãse”.

¹²Ãchiba id̶isid̶au:

—¿Kaiba bichimaa maka bichi jira adoebadau adoeped̶a wãs asma?

¹³Maamina mau adua b̶uasii. Jesús ẽbẽrarã ãrea tãed̶e b̶uad̶a ãyaa wãsiid̶eeba ichiba poyaa unuubasii.

¹⁴Mau maad̶akare Jesusba ichi Dachi Akõre de mechiu dud̶a unusiid̶e jarasii:

—Biꞌia ũrise: bichi aribiasiid̶eeba waa kachirua waurã́se bichi ẽpermo b̶uad̶a audeara kachirua b̶eerãamera.

¹⁵Mau maad̶akare chi ẽbẽra judiorã mechiurãmaa wãped̶a jarakuasii chi ichi aribiabid̶a Jesús basii. ¹⁶Maad̶akare paare mechiurãba Jesús ʉ̃rʉbena kachirua jara paneesid̶au mau ẽbẽra bari panabadau ewarid̶e aribiabisiid̶eeba.5:16 Griego bed̶ead̶e chi b̶ee kartad̶e nau sid̶a b̶ʉ kub̶uu: bea kʉ̃ria panasid̶au.¹⁷Maamina Jesusba ãchimaa jarasii:

—Mʉ Chacha wabid̶a kʉrrjĩruwẽa ẽbẽrarã kariba b̶uu maud̶e mʉa bid̶a kʉrrjĩruwẽa kariba b̶uu.

¹⁸Maud̶eeba judiorã mechiurãba ichi aude bead̶ai kʉ̃ria paneesid̶au. Ichiba bari panabadau ewarid̶e ẽbẽrarãba ne poyaa waud̶akau waud̶a kʉ̃riad̶aabasii. Mau awara mʉ Chacha ad̶a kakua aude kʉ̃riad̶aabasii, ara ichi Dachi Akõre asiid̶eeba.

Dachi Akõreba poyaabarii ichi Warrmaa dead̶a ʉ̃rʉbena

¹⁹Maabae Jesusba ãchimaa jarasii: «Mʉʉba biawãra jaraaruu: mʉ, Dachi Akõre Warrba ara mʉ du ab̶auba poyaa waubai. Maamina mʉʉba unu b̶uu mʉ Chachaba wau b̶uu. Joma mʉ Chachaba wau b̶uu mʉa bid̶a wau b̶uu. ²⁰Mʉ Chachaba mʉ kʉ̃ria b̶uu. Maud̶eeba joma ichiba wau b̶uu mʉʉmaa unubibarii. Mau awara ichiba nau ẽbẽrarãba ne poyaa waud̶akau waud̶a audeara mechia b̶uu unubiai. Maud̶eeba machi kãare kʉ̃risiad̶ai adua panad̶ai. ²¹Mʉ Chachaba biud̶arã chokae jiradubiaped̶a chokae duanubiabarii kĩra, maka mʉ chi Warrba chi mʉʉba kʉ̃riakuaruu chokae duanubiabarii. ²²Mʉ Chachaba ab̶aumaa bid̶a ichiabai. Maumaarã mʉ b̶usii jomaurã ichiamera. ²³Maka jomaurãba mʉ Chacha wapea panuu kĩra mʉ sid̶a wapead̶ai. Chi mʉ wapeawẽa b̶uuba mʉ Chacha sid̶a wapeawẽa b̶uu, mʉ Chachaba mʉ nau iujãad̶aa bʉisiid̶eeba.

²⁴»Mʉʉba biawãra jaraaruu: barikiuba mʉ bed̶ea ũriped̶a mʉ bʉid̶a ijãaruubʉrã, mau ẽbẽra mau ome ewaricha chokae b̶uai. Dachi Akõreba mau ichiabai. Biawãra mau ẽbẽra biu b̶uad̶a chokae b̶uu. ²⁵Mʉʉba biawãra jaraaruu: chi ewari neei b̶uad̶a jãabae neesii. Id̶iid̶eeba biud̶a kĩra nureeba mʉ, Dachi Akõre Warr bed̶ea ũrid̶ai. Chi mʉʉd̶e ijãaduu chokae panad̶ai. ²⁶Mʉ Chacha chokae b̶uabarii kĩra, mʉʉba mau chokae b̶uai deabarii ichiba mʉʉmaa deasiid̶eeba. ²⁷Mau awara mʉ b̶usii jomaurã ichiamera, mʉ chi Ẽbẽra Ba B̶uad̶a niid̶eeba.5:27 Daniel 7:13-14.²⁸Mʉʉba jara b̶uu kakua kʉ̃riskawarã́sturu. Biawãra ewari ab̶ad̶e jomaurã biud̶arãba mʉ, chi Ẽbẽra Ba B̶uad̶a bed̶ea ũriiduud̶e, ²⁹maud̶e jomaurã chokae jiradud̶ai. Chi ne biꞌia wau nuread̶a chokae jiradud̶ai mʉ baara ewaricha chokae nuread̶ai baita, maamina chi kachirua waubadaurã chokae jiradud̶ai mʉʉba ãchi kastikamera.

³⁰»Mʉ du ab̶auba ne ab̶a bid̶a poyaa waubai b̶uu. Mʉʉba ẽbẽra nebʉra ichiabarii mʉ Chachaba jara b̶uu kĩra. Mʉʉba jipa ichiabarii. Mʉʉba kʉ̃ria b̶uu kĩra waukau maumaarã mʉ Chacha, chi mʉ bʉid̶aba kʉ̃ria b̶uu kĩra waubarii.

¿Kaiba Jesús ʉ̃rʉbena bia berreabadau?

³¹»Mʉʉba jara b̶uu biawãramina ara mʉ ʉ̃rʉbena berrea b̶uud̶eeba, machimaarã mau biawãrawãe b̶uu.5:31 Deuteronomio 19:15.³²Maamina mʉ Chachaba mʉ ʉ̃rʉbena berrea b̶uu.5:32 Griego bed̶ead̶e b̶ʉ kub̶uu: ab̶auba mʉ ʉ̃rʉbena berrea b̶uu. Mʉʉba kuitaa b̶uu ichiba jara b̶uu biawãra b̶uu. ³³Machiba ẽbẽrarã Juan chi Boro Eabariimaa bʉisid̶au mʉ ʉ̃rʉbena id̶id̶amera. Maud̶e ichiba jarad̶a biawãra basii.5:33 Juan 1:19-34.³⁴Mʉʉba jʉrʉwẽa b̶uu ẽbẽraba mʉ ʉ̃rʉbena berreamera. Maamina Juanba mʉ ʉ̃rʉbena jarad̶a mʉa bid̶a machimaa jara b̶uu karibad̶amera. ³⁵Juan ʉ̃d̶aa koabarii kĩra nibasii. Machi ichi ʉ̃d̶aad̶e kĩrajʉʉ panasid̶au ichi machi baara ãrea b̶uabasmina.

³⁶»Maamina Juanba jarad̶a audeara nau mʉ ʉ̃rʉbena biꞌia berrea b̶uu: Mʉ Chachaba waubi b̶uu mʉʉba joma wau b̶uud̶eeba kuitaabi b̶uu mʉ Chachaba mʉ biawãra bʉisii. ³⁷Biawãra mʉ Chachaba, mʉ bʉid̶aba mʉ ʉ̃rʉbena berrea b̶uu. Maamina machiba ichi bed̶ea ũrid̶akau5:37 Éxodo 33:11. maud̶e ichi unud̶akau.5:37 Éxodo 19:9.³⁸Maud̶e ichi bed̶ea machi sõd̶e uru panuuwãe,5:38 Josué 1:8-9. mʉ, chi ichiba bʉid̶a ijãad̶akaud̶eeba. ³⁹Machiba Dachi Akõre bed̶ea kauwa ichiabadau kʉ̃risia panuud̶eeba Dachi Akõre ome ewaricha chokae nuread̶ai. ¡Mau kartad̶e mʉ ʉ̃rʉbena berrea b̶uu! ⁴⁰Maamina machi mʉʉmaa need̶ai, kʉ̃riad̶akau, mʉʉba chokae panabiamera.

⁴¹»Mʉʉba jʉrʉwẽa b̶uu machiba mʉ biꞌia unud̶amera. ⁴²Mau awara mʉʉba machi unubarii. Kuitaa b̶uu machiba Dachi Akõre kʉ̃riad̶akau. ⁴³Mʉ Chacha trʉ̃d̶eeba neesii, maamina mʉ biꞌia irsibisid̶au. Maamina ab̶a ara ichi trʉ̃d̶eeba neeruubʉrã, mau biꞌia irsibibachid̶au. ⁴⁴¿Saka mʉʉd̶e ijãad̶aima? Ab̶aburu kʉ̃ria panuu waabenarãba machi biꞌia unud̶ai. Maamina machiba jʉrʉd̶awẽe Dachi Akõre ab̶a niiba machi biꞌia unui.

⁴⁵»Kʉ̃risiarã́sturu mʉ Chacha daad̶e mʉʉba machi jideai. Machiba Moisesd̶eeba biꞌia panad̶ai esed̶au panuu. Maamina ara mau Moisesba mʉ Chacha daad̶e machi jideai. ⁴⁶Machiba Moisesba jarad̶a biawãra ijãaduubʉrã mʉʉd̶e ijãad̶ai basii, Moisesba mʉ ʉ̃rʉbena Dachi Akõre bed̶ead̶e b̶ʉsiid̶eeba.5:46 Biawãra joma Dachi Akõre nabẽraed̶ebena kartad̶e Jesús ʉ̃rʉbena b̶ʉ kub̶uu. Deuteronomio 18:15-19.⁴⁷Maamina Moisesba b̶ʉd̶a sid̶a ijãad̶awẽebʉrã ¿saka mʉ bed̶ea ijãad̶aima?»

Jesusba 5.000 panuumaa kobiad̶a

Mateo 14:13-21; Marcos 6:30-44; Lucas 9:10-17

¹Mau maad̶akare Jesús Galilea mar kĩaraa wãsii. Mau mar maud̶e Tiberias abadau.6:1 Galilea. Mau mar Antiguo Testamentod̶e «Quinéret» maebʉrã «Cineret» trʉ̃ jarabachid̶au. Maud̶e b̶ʉ naka kub̶uu: Genesaret. Lucas 5:1.²Jesusba ẽbẽrarãba ne poyaa waud̶akau wau b̶uud̶eeba ẽpermo nuree aribiabiabachii. Ẽbẽrarã ãreaba mau unu panasiid̶eeba ichi baara ãrea wãsid̶au. ³Maabae Jesús ichi baara nibabadaurã ome ead̶aa wãd̶aped̶a jeed̶a akʉ paneesid̶au. ⁴Mau ewarid̶e judiorã Pascua ewari ʉ̃rʉ ba b̶uasii. ⁵Maud̶e Jesusba ẽbẽrarã ãrea ichimaa needuu unusiid̶e, Felipemaa naka id̶isii:

—Pan ¿sama nedod̶aima joma naarã ẽbẽrarã kobiad̶ai baita?

⁶Jesusba kãare waui b̶uu kuitaa b̶uasii. Maud̶eeba maka jarasii Felipeba saka panaui kuitaayua. ⁷Felipeba panausii:

—Ab̶a año baidia trajad̶a bare paaped̶aad̶aba poyaa pan nedod̶aabai b̶uu, ẽbẽrarã ab̶aab̶aamaa b̶aꞌãra bid̶a kobiad̶ai baita.

⁸Maud̶e chi Jesús baara nibabarii Andrés, Simón Pedro ãbaba naka jarasii:

⁹—Warr nama b̶uuba cebada waud̶a pan jua ab̶a uru b̶uu maud̶e b̶eda ome uru b̶uu. Maamina ẽbẽrarã ãrea duanuu ome mau ¿sakaima?

¹⁰Aria sirua id̶aa b̶uasii. Maud̶eeba Jesusba jarasii:

—Jomaurãmaa jarásturu siruad̶e akʉ paneed̶amera.

Ara makʉd̶e jeed̶a akʉ duaneesid̶au. Maarã 5.000 mukĩrarã panuka duanasii. ¹¹Jesusba pan juad̶e adauped̶a Dachi Akõremaa ichíturu kid̶ibai asii. Maabae ichi baara nibabadaurãmaa jarasii ẽbẽrarãmaa dead̶akad̶amera. B̶eda sid̶a ara mau kĩra wausii jomaurãba ãchi kʉ̃ria kod̶amera. ¹²Jomaurãba jãwaa kosid̶aud̶e Jesusba ichi baara nibabadaurãmaa jarakuasii:

—Chi ʉ̃rʉ b̶eed̶a joma araa pésturu ab̶a b̶istĩika bid̶a jirakuarãad̶amera.

¹³Ara makʉd̶e araa pesid̶au. 12 jab̶ara waabirubisid̶au mau pan cebada waud̶a ʉ̃rʉ b̶eed̶aba. ¹⁴Chi Jesusba ẽbẽrarãba ne poyaa waud̶akau waud̶a unusid̶aud̶e, ẽbẽrarãba naka jarasid̶au:

—Biawãra nau Dachi Akõre baita berreabarii mechiu nii, chi nau iujãad̶aa neei b̶uad̶a.6:14 Deuteronomio 18:15-18.

¹⁵Maamina Jesusba kuitaasii ẽbẽrarãba ichi rey babid̶ai kʉ̃ria panuu. Maud̶eeba waya ichi du ab̶a ead̶e ʉtaa wãsii.

Jesús bania ʉ̃rʉ nibad̶a

Mateo 14:22-27; Marcos 6:45-52

¹⁶Kiusiid̶e Jesús baara nibabadaurã mar iikaad̶aa wãsid̶au. ¹⁷Jãbad̶e atausid̶aud̶e Jesús ãchimaa wabid̶a neewẽa b̶uasii. Maamina waa kĩaraa wã kopaneesid̶au Capernaum puurud̶aa wãd̶ai baita. Maka b̶uud̶e ãrea pãriu kob̶eesii. ¹⁸Maud̶e ãrea pũatu kob̶eesiid̶eeba chi mar ʉtʉ ʉ̃rape wã kob̶eesii. ¹⁹Mar kẽsa 5 maebʉrã 6 kilómetro baaduud̶e Jesús unusid̶au bania ʉ̃rʉ tʉa uruu jãba kaita. Ãchimaa uruud̶eeba ãrea perasid̶au. ²⁰Maamina Jesusba jarasii:

—¡Mʉʉbʉ! ¡Perarã́sturu!

²¹Maud̶e ichi jãbad̶e kĩrajʉʉ irsibisid̶au. Ara makʉd̶e ãchi wãaduumaa neesid̶au.6:21 Mau griego bed̶ead̶e nau sid̶a jara b̶uu «Maud̶e ichi jãbad̶e adoe kʉ̃ria panuud̶e ãchi wãaduumaa neesid̶au».

Ẽbẽrarãba Jesús jʉrʉped̶aad̶a

²²Chi nuree wa kĩare paneesid̶au. Mau norema maarãba kuitaasid̶au chi Jesús baara nibabadaurã ãchi du ab̶a jãbad̶e wãsid̶au. Unusid̶au jãba ab̶a aria nub̶uasii maud̶e Jesús ãchi baara wãabasii. ²³Maud̶e jãbarã maucha Tiberias puurud̶ebena topana chesid̶au Dachi Mechiuba Dachi Akõremaa bichíturu kid̶ibai aped̶a ẽbẽrarãmaa pan kobiad̶amaa. ²⁴Ẽbẽrarãba kuitaasid̶au Jesús, ichi baara nibabadaurã sid̶a aria panuuwãe. Maud̶eeba ãchi mau jãbad̶e ataukuad̶aped̶a Capernaum puurud̶aa Jesús jʉrʉd̶e wãsid̶au. ²⁵Jesús mar kĩare nii unusid̶aud̶e id̶isid̶au:

—Jaradeabarii, bichi ¿sakaed̶e nama neesma?

²⁶Jesusba panausii:

—Mʉʉba biawãra jaraaruu: machiba kauwa ũrid̶awẽa panuu mʉʉba ẽbẽrarãba ne poyaa waud̶akau waud̶aba kuitaabi b̶uu. Bari Mʉ jʉrʉ panuu pan b̶i jãwaaduud̶aa kosid̶aud̶eeba. ²⁷Trajarã́sturu chiko b̶eraabarii nedod̶ai baita. Maumaarã trajásturu chi Dachi Akõre ome ewaricha chokae b̶uabibarii chiko nedod̶ai baita. Mau mʉ, chi Ẽbẽra Ba B̶uad̶aba deai. Dachi Akõreba mʉ mau baita b̶usii.

²⁸Maud̶eeba ãchiba id̶isid̶au:

—Daiba ¿kãare waud̶aima Dachi Akõre traju waud̶ai baita?

²⁹Dachi Akõreba waubi b̶uu traju naubʉ: mʉ, chi ichiba bʉid̶ad̶e ijãad̶ai panuu.

^30-31Maud̶eeba ãchiba Jesusmaa id̶isid̶au:

—¿Bichiba daimaa kãare unubiaima bichi bed̶ea ijãad̶amera? Dachi nabẽrarãba drua sirua wãꞌãe b̶uud̶e maná kosid̶au. Dachi Akõre bed̶ead̶e jara b̶uu: “Ichiba bajãad̶ebena pan deasii ãchiba kod̶amera”.6:30-31 Éxodo 16:4,15; Salmos 78:24; Nehemías 9:15. ¿Bichiba kãare sãaima?

³²Maud̶e Jesusba panausii:

—Mʉʉba biawãra jaraaruu, mau bajãad̶ebena pan Moisesba machimaa deabasii. Mʉ Chacháburu deasii. Mau awara bajãad̶ebena chi biawãra pan machimaa dea b̶uu. ³³Mau Dachi Akõreba deabarii pan bajãad̶ebena need̶aba chi nau iujãad̶ebenarã chokae b̶uabiabarii.6:33 Chokae b̶uabiabarii. Juanba jara b̶uu dachiba Jesusd̶e ijãaduubʉrã ewaricha chokae nuread̶ai, ichi Jauri uru nuread̶ai dachi aid̶ai baita maud̶e ichi bed̶ea uru nuread̶ai chi biawãra bed̶ea kuitaad̶ai baita.

³⁴Ãchiba jarasid̶au:

—Dai Mechiu, mau pan daimaa ewaricha dea b̶uase.

³⁵Jesusba jarasii:

—Mau Mʉʉbʉ. Mʉ chi chokae b̶uabibarii panbʉ. Maud̶eeba chi mʉʉmaa neeruu waa jarrbisia b̶uabai maud̶e chi mʉʉd̶e ijãa b̶uu waa obisia b̶uabai. ³⁶Maamina mʉʉba jarad̶a kĩra, mʉʉba ẽbẽrarãba ne poyaa waud̶akau waud̶a machiba unusid̶amina ijãad̶akau. ³⁷Chi mʉ Chachaba mʉʉmaa dea b̶uu ẽbẽrarã mʉʉmaa need̶ai; maarã duabʉikaabai. ³⁸Mʉ bajãad̶ebena need̶awãe michi kʉ̃ria waui baita. Maumaarã neesii mʉ bʉid̶aba kʉ̃ria b̶uu waui baita. ³⁹Mʉ bʉid̶aba kʉ̃ria b̶uu ichiba mʉʉmaa dead̶arã ab̶a bid̶a wãꞌãerãad̶amera. Kʉ̃ria b̶uu nau baribai ewarid̶e mʉʉba joma ãchi chokae jiradubiai. ⁴⁰Mʉ Chachaba biawãra kʉ̃ria b̶uu ẽbẽrarãba mʉ ichi Warr kuitaad̶aped̶a ijãad̶ai ichi ome ewaricha chokae nuread̶amera. Makaburu mʉʉba ãchi nau baribai ewarid̶e chokae jiradubiai.

⁴¹Jesusba «mʉ chi pan bajãad̶ebena need̶a» asiid̶eeba, chi judiorã aria duanuurãba ichi ʉ̃rʉbena kachirua berreasid̶au. ⁴²Naka jarasid̶au:

—¿Nau Jesús, José warrwãeka? Chi akõre, chi nawe dachiba unubadau. ¿Ichiba sakãe bajãad̶ebena neesii a b̶uma?

⁴³Maka panuud̶e Jesusba jarasii:

—Waa kachirua berrearã́sturu. ⁴⁴Ab̶au bid̶a poyaa mʉʉd̶e ijãabai mʉ Chacha, chi mʉ bʉid̶aba ichi mʉʉmaa eneewẽebʉrã. Maamina mʉ Chachaba eneeruubʉrã nau iujãa baribai ewarid̶e mau ẽbẽra mʉʉba chokae jiradubii. ⁴⁵Dachi Akõre baita berreabadaurã kartad̶e naka jara b̶uu: “Dachi Akõréburu jomaurãmaa jaradeai”.6:45 Isaías 54:13. Maka barikiuba mʉ Chacha bed̶ea ũriped̶a ichi ʉ̃rʉbena kuitaaped̶a mʉʉd̶e ijãad̶e neei.

⁴⁶Mauba jarawẽa b̶uu ab̶aba Dachi Akõre unusii. Ab̶aburu mʉʉba Dachi Akõre unubarii ichimarebena neesiid̶eeba.

⁴⁷»Mʉʉba biawãra jaraaruu: ẽbẽraba mʉʉd̶e ijãaruubʉrã Dachi Akõre ome ewaricha chokae b̶uai uru b̶uai. ⁴⁸Mʉ chi panbʉ, chi chokae b̶uabibarii. ⁴⁹Machi nabẽraed̶ebenarãba drua sirua wãꞌãe b̶uud̶e maná kosid̶amina biusid̶au. ⁵⁰Maamina barikiuba nau pan bajãad̶ebena need̶a kooruubʉrã biubai. ⁵¹Mʉ chi panbʉ, chi chokae b̶uabibarii, chi bajãad̶ebena need̶a. Barikiuba mau pan kooruubʉrã ewaricha chokae b̶uai. Chi mʉʉba dea b̶uu pan mʉ kakuabʉ. Mʉʉba mʉ kakua deai, mauba ẽbẽrarã chokae nuread̶amera.

⁵²Maka b̶uud̶e judiorã chiya kĩru berrea bara b̶eesii:

—¿Saka ichiba ichi kakua dachimaa kobiaima?

⁵³Maud̶e Jesusba jarasii:

—Mʉʉba biawãra jaraaruu: machiba mʉ, chi Ẽbẽra Ba B̶uad̶a kod̶awẽebʉrã maud̶e mʉ oa dod̶awẽebʉrã, chokae panad̶aabai. ^54-55Mʉ kakua chi biawãra chikobʉ. Mʉ oa chi biawãra dobadaubʉ. Maud̶eeba chi mʉ kooruu6:54-55 Chi mʉ kooruu. Griego bed̶ead̶e naka b̶ʉ kub̶uu: mʉ kiuru kooruu. maud̶e chi mʉ oa dooruu Dachi Akõre ome ewaricha chokae b̶uai. Nau iujãa baribai ewarid̶e mʉʉba mau ẽbẽra chokae jiradubii.

⁵⁶Chi mʉ kooruu maud̶e chi mʉ oa dooruu mʉ ome b̶uu maud̶e mʉ ichi ome b̶uu. ⁵⁷Mʉ Chacha chokae b̶uabariiba mʉ bʉisii. Ara mau kĩra chi mʉ kooruu mʉʉd̶eeba chokae b̶uai. ⁵⁸Mʉ bajãad̶ebena need̶a panbʉ. Machi nabẽraed̶ebenarãba maná kobachid̶amina joma biusid̶au. Maamina mʉ maná kĩra niiwãe. Chi nau pan ko b̶uu ewaricha chokae b̶uai.

⁵⁹Jesusba joma mau Capernaumd̶e jaradeasii judiorã araa ãbua imibadau ded̶e.

Dachi Akõre ome ewaricha chokae panad̶ai ʉ̃rʉbena

⁶⁰Mau jaradea b̶uu ũrisid̶aud̶e ãrea Jesús baara nureeba jarasid̶au: «Jãuba jarad̶a chaarea b̶uu. ¿Kaiba poyaa ijãaima?»

⁶¹Jesusba kuitaasii ichiba jaradead̶a ʉ̃rʉbena ãchi maka kachirua berrea panuu. Maud̶eeba jarasii:

—Machimaarã, mʉʉba jaradead̶a ¿chaarea b̶uka?

⁶²Maka b̶uubʉrã machiba mʉ, chi Ẽbẽra Ba B̶uad̶a chi naa b̶uad̶amaa ʉtaa wãaruu unuuduubʉrã ¿saka kʉ̃risiad̶aima? ⁶³Dachi Akõre Jauríburu chokae b̶uabiabarii. Nau kakuaba poyaa maka waukau. Mʉʉba machimaa jaradea b̶uu Dachi Akõre Jauriba dachi chokae b̶uabiabarii ʉ̃rʉbena. ⁶⁴Maamina machid̶ebena chi nureeba wabid̶a mʉ bed̶ea ijãad̶awẽa panuu.

Jesusba maka jarasii ichiba arab̶aed̶eed̶e kuitaa b̶uad̶ad̶eeba kairãba ichi bed̶ea ijãad̶awẽa panuu, maud̶e kaiba ichi jidaubii b̶uu.

⁶⁵Maud̶e Jesusba jarasii:

—Maud̶eeba mʉʉba jarasii: mʉ Chachaba ẽbẽra mʉʉmaa eneewẽebʉrã, mau ẽbẽraba poyaa mʉʉd̶e ijãabai.

⁶⁶Maud̶eeba ãrea Jesús baara nibaped̶aad̶aba ichi ida b̶usid̶au. Waa ichi baara nibad̶aabasii. ⁶⁷Maud̶eeba Jesusba ichiba 12 jʉrʉ adaud̶arãmaa jarakuasii:

—¿Machi sid̶a wãaduka?

⁶⁸Simón Pedroba panausii:

—Dai Mechiu, dai ¿kaimaa wãd̶aima? Ab̶a bichiaburu daimaa jaradeabarii Dachi Akõre ome ewaricha chokae nuread̶amera.

⁶⁹Daiba bichi bed̶ea biawãra ijãa panuu, maud̶e daiba biawãra kuitaa panuu bichi Dachi Akõreba Bʉid̶a Jipa Nii.6:69 Dachi Akõreba Bʉid̶a Jipa Nii. Chi b̶ee kartad̶e griego bed̶ead̶e b̶u kub̶uu: Dachi Karibabarii deai jarad̶a, chi Dachi Akõre chokae nii warr.

⁷⁰Jesusba jarasii:

—Machi 12 panuu mʉʉba jʉrʉ adausii mʉ baara nibad̶amera. Maamina machid̶ebena ab̶a jʉbawãe niid̶ebʉ.

⁷¹Jesusba Judas, Simón Iscariote warr ʉ̃rʉbena berrea b̶uasii. Mauba Jesús jidaubisii ichi baara nibabadaurã 12 panuud̶ebenamina.

Jesús ãbarãba ichid̶e ijãad̶aka bad̶a

¹Mau maad̶akare Jesús Galilea druad̶e nibasii. Judea druad̶aa makaa wã kʉ̃riabasii judiorã mechiurãba ichi bead̶ai kʉ̃ria panasiid̶eeba. ²Maud̶e chi judiorãba de pãeb̶aribadau ewari ʉ̃rʉ ba b̶uasiid̶e7:2 Levítico 23:33-43., ³Jesús ãbarãba ichimaa jarasid̶au:

—Biꞌia b̶uu Judead̶aa wãi, chi arabena bichi baara nibabadaurãba bichiba waubarii unud̶amera. ⁴Chi trʉ̃ poa nibai kʉ̃ria b̶uuba ne kaebea mirubia waukau. Bichiba ẽbẽrarãba ne poyaa waud̶akau waubarii jomaurã daad̶e wause ãchiba bichi kuitaad̶amera.

⁵Maka jarasid̶au ãchia bid̶a ichid̶e ijãad̶awẽa panasiid̶eeba. ⁶Maud̶e Jesusba ãchimaa jarasii:

—Mʉ wãi ewari wabid̶a neewẽa b̶uu maamina machi baita barikiu ewari wãd̶ai baita bibuara b̶uu. ⁷Nau iujãad̶ebenarãba machi ¿sakãe kĩramaad̶aima? Maamina mʉ kĩramaabadau, ãchiba kachirua waubadau mʉʉba arakʉd̶e jarabariid̶eeba. ⁸Wã́sturu mau bari panabadau ewari wau panuumaa. Mʉ wabid̶a wãwẽe, wabid̶a mʉ wãi ewari bawẽa b̶uud̶eeba.

⁹Maka jaraped̶a Galilea druad̶e b̶eesii.

De pãeb̶aribadau ewari wau panuumaa Jesús wãd̶a

¹⁰Jesús ãbarã mau de pãeb̶aribadau ewari waumaa panuumaa wãsid̶au. Mau maad̶akare Jesús wãsii. Maamina chũpea wãsii ẽbẽrarãba kuitaarãad̶amera. ¹¹Judio mechiurãba mau de pãeb̶aribadau ewarid̶e ichi jʉrʉ panasid̶aud̶e naka akabichia id̶isid̶au: «¿Jãu Jesús sama b̶uma?»

¹²Maud̶e ãrea aria duanuuba Jesús ʉ̃rʉbena didiwaraa berrea duanasid̶au. Waabenarãba jarabachid̶au: «Ichi ẽbẽra bia nii», maamina waabenarãba jarabachid̶au: «Makawãema; seta id̶aa nii». ¹³Maamina judiorã mechiurã wapea panuud̶eeba ab̶au bid̶a Jesús ʉ̃rʉbena jĩwa berread̶aka basii.

¹⁴Mau de pãeb̶aribadau ewari semana ẽsa wauduud̶e Jesús Dachi Akõre de mechiu dud̶aa wãped̶a jaradea b̶eesii.7:14 Mau bari panabadau ewari, 8 ewari waubachid̶au.¹⁵Maka b̶uud̶e judiorã aria duanuu kʉ̃risia bia baraa bara b̶eesii maabae id̶isid̶au: «¿Sakaburu nau ẽbẽraba ãrea kuitaa nima, Dachi Akõre bed̶ea kawad̶awãe niikaud̶e waabenarã kĩra?»

¹⁶Maud̶e Jesusba ãchimaa jarasii:

—Mʉʉba jaradea b̶uu mʉʉd̶ewãe, maumaarã chi mʉ bʉid̶ad̶ebʉ. ¹⁷Chi Dachi Akõreba kʉ̃ria b̶uu waui baita b̶uuba arakʉd̶e kuitaai chi mʉʉba jaradea b̶uu Dachi Akõred̶ebena neeruu, maebʉrã ara mʉ kʉ̃risiad̶eeba jaradea b̶uu. ¹⁸Barikia ara ichi kʉ̃risiad̶eeba berrea b̶uubʉrã maka wau b̶uu ẽbẽrarãba ichi ʉ̃rʉbena biꞌia kʉ̃risiad̶amera. Maamina ab̶aba kʉ̃ria b̶uubʉrã waabenarãba ichi bʉid̶a ʉ̃rʉbena biꞌia kʉ̃risiad̶ai, biawãra jara b̶uu; setaa waukau.

¹⁹Dachi Akõreba Moisesmaa b̶ʉbid̶a chi Moisesba machimaa deasii. Maamina machiba mau ichiba b̶ʉd̶a ijãad̶akau. ¿Sakãe machiba mʉ bea kʉ̃ria panuma?

²⁰Maud̶e ẽbẽrarãba id̶isid̶au:

—¿Kaiba bichi bea kʉ̃ria b̶uma? ¿Jai kachirua bichi kakuad̶e b̶uuba maka kʉ̃risiabi b̶uka?

²¹Jesusba panausii:

—Mʉʉba bari panabadau ewarid̶e ẽbẽrarãba ne poyaa waud̶akau ab̶a waud̶a ʉ̃rʉbena machiba kuitaa kʉ̃risiad̶aabasii.7:21 Juan 5:1-9.²²Maamina machi sid̶a bari panabadau ewarid̶e ne waubadau. Mukĩra chi kakua tõobadau Moisesba b̶ʉd̶a kĩra. (Biawãra mau waubadau Moisesd̶ebena need̶awãe basii, maumaarã machi nabẽraed̶ebena neesii).7:22 Génesis 17:10-27.²³Moisesba b̶ʉd̶a waud̶ai baita machiba bari panabadau ewarid̶e wãwa chi kakua tõobadau. Mau machi ¿sakãe mʉ ome kĩru panuma bari panabadau ewarid̶e ẽbẽra aribiabid̶a kakua? ²⁴Machiba unu panuu kakua kachirua berrearã́sturu, maumaarã arakʉd̶e berreásturu chi biawãra kuitaad̶aped̶a.

¿Jesús Dachi Akõreba Dachi Karibabarii deai jarad̶aka?

²⁵Maud̶e chi nuree Jerusalend̶ebenarãba ara ãstu chiya id̶i bara b̶eebachii: «¿Nauwãeka chi bead̶ai baita jʉrʉ panuu? ²⁶Ichiásturu, ichi nama jomaurã daad̶e berrea b̶uu. Maamina ab̶au bid̶a ichimaa jarad̶awẽa panuu. Maka b̶uubʉrã dachi mechiurãba kʉ̃risia panuu ichi Dachi Akõreba Dachi Karibabarii deai jarad̶a.7:26 Dachi Akõreba Dachi Karibabarii deai jarad̶a. Griego bed̶ead̶e b̶ʉ kub̶uu: Cristo.²⁷Maamina dachiba kuitaa panuu ichi samareeba nee b̶uu. Dachi Akõreba Dachi Karibabarii deai jarad̶a neeruud̶e ab̶au bid̶a kuitaad̶aabasii ichi samareeba neeruu».7:27 Waabenarã judiorãba jarabachid̶au Dachi Akõreba Dachi Karibabarii deai jarad̶a ab̶au bid̶a kuitaad̶aabasii ab̶a ichiba Israel karibaaruud̶aa.

²⁸Maud̶e Jesusba Dachi Akõre de mechiu dud̶a jaradea b̶uud̶e mimi jĩwa jarasii:

—Biawãra machiba mʉ unubadau maud̶e kuitaa panuu samabena nee b̶uu.7:28 Samabena nee b̶uu. Jesús Nazaretd̶ebena neesii. Maamina ara mʉʉd̶eeba neewẽa b̶uu, maumaarã chi biawãra jarabariiba mʉ bʉisii. Machiba ichi unud̶akau. ²⁹Mʉʉba ichi unubarii ichid̶ebena need̶ad̶eeba. Ara ichiba mʉ bʉisii.

³⁰Maud̶eeba ãchiba Jesús jidaud̶ai kʉ̃ria panasid̶au, maamina ab̶au bid̶a jidaud̶aabasii ichi ewari neewẽa b̶uasiid̶eeba. ³¹Ãreaba ichid̶e ijãasid̶au maud̶e jarasid̶au:

—Dachi Akõreba Dachi Karibabarii deai jarad̶a neeruud̶e ¿nau ẽbẽraba wau b̶uu audeara ẽbẽrarãba ne poyaa waud̶akau ãrea waui b̶uka?

Fariseorãba Jesús jidaud̶ai baita panad̶a

³²Fariseorãba kuitaasid̶au ẽbẽrarãba Jesús ʉ̃rʉbena didiwaraa berrea panuu. Maud̶eeba ãchiba maud̶e chi paare mechiurãba chi Dachi Akõre de nubadaurã bʉisid̶au Jesús jidaud̶e wãd̶amera. ³³Maka panuud̶e Jesusba ẽbẽrarãmaa jarasii:

—Mʉ machi ome ãrea b̶uawẽe. Jãad̶akare mʉ waya wãi chi mʉ bʉid̶a b̶uabariimaa. ³⁴Machiba mʉ jʉrʉd̶ai maamina unud̶aabai. Mʉ wãaruumaa machi poyaa wãd̶aabai.

³⁵Maud̶eeba judiorã aria duanuuba ãchi chiya jara bara b̶eesid̶au:

—¿Samaa wãid̶eeba dachiba ichi waa unud̶aabaima? asid̶au. ¿Griegorã druad̶aa wãika judiorã aria duanuurãmaa jaradeai baita? ³⁶¿Sakãe ichiba maka jara b̶uma: “Machiba mʉ jʉrʉd̶ai maamina unud̶aabai”? Maud̶e ¿kãare jara b̶uma “mʉ wãaruumaa machi poyaa wãd̶aabai”?

Chi biawãra bania chokae nibabiabarii ʉ̃rʉbena

³⁷Mau bari panabadau ewari wau panuu chi kaad̶ebena ewari mechiu b̶uasii. Jesús kaad̶ebena ewarid̶e b̶ari nub̶eeped̶a mimi jĩwa jarasii:

—Barikia ẽbẽra obisia b̶uubʉrã mʉʉmaa neese, maabae bania chokae nibabiabarii dose. ³⁸Dachi Akõre bed̶ead̶e jara b̶uu barikiuba mʉʉd̶e ijãaruubʉrã chokae b̶uai ichid̶ebena do kĩra waabenarãmaa eab̶ari wãi maarã bid̶a adaud̶amera.7:38 Isaías 44:3; 55:1-4; 58:1; Joel 3:18; Zacarías 13:1.

³⁹Jesusba mauba kuitaabiasii chi ichid̶e ijãaduuba Dachi Akõre Jauri adaud̶ai. Mau ewarid̶e Dachi Akõre Jauri wabid̶a neewẽa b̶uasii Jesús wabid̶a bajãad̶aa wãwẽa b̶uasiid̶eeba.

Ẽbẽrarãba Jesús ʉ̃rʉbena ne ãrea berrea duanad̶a

⁴⁰Mau bed̶ea ũrisid̶aud̶e aria duanuurãba jarasid̶au: «Biawãra nau ẽbẽra Dachi Akõre baita berreabarii chi mechiu neei b̶uad̶a».7:40 Juan 1:21; 6:14; Deuteronomio 18:15-19.

⁴¹Maud̶e waabenarãba jarasid̶au: «Ichi Dachi Akõreba Dachi Karibabarii deai jarad̶a».

Maamina waabenarãba jarasid̶au: «Makawãe. ¿Dachi Akõreba Dachi Karibabarii deai jarad̶a Galilead̶ebena neebaika? ⁴²¿Dachi Akõre bed̶ead̶e jara b̶uuwãe ichi Davidd̶ebena neei? ¿Chi David b̶uad̶a puuru Belend̶ebena neeika?»7:42 David. 2 Samuel 7:12; Salmos 89:3-4; 132:11-12. Belend̶ebena. Miqueas 5:2.

⁴³Maka Jesús kakua ẽbẽrarã aꞌawaraa duanasii. ⁴⁴Chi nureeba ichi jidau kʉ̃ria panasid̶au, maamina ab̶au bid̶a jidaud̶aabasii.

Judiorã mechiurãba Jesusd̶e ijãad̶aabad̶a

⁴⁵Dachi Akõre de mechiu nubadaurã Jesús fariseorã maud̶e paare mechiurã ãbua duanuumaa waya wãsid̶aud̶e, ãchimaa id̶isid̶au:

—¿Sakãe mau eneed̶aabasma?

⁴⁶Maud̶e chi Dachi Akõre de nubadaurãba panausid̶au:

—Ab̶au bid̶a jãu ẽbẽraba berrea b̶uu kĩra berreakau.

⁴⁷Maud̶eeba fariseorãba jarasid̶au:

—¿Maka b̶uubʉrã ichiba machi sid̶a setaa kũruaska? ⁴⁸¿Dai fariseorãba maud̶e waabenarã chi mechiu nuree bid̶a ichid̶e ijãa panuka? ⁴⁹Chi ichid̶e ijãa nureeba Moisesba b̶ʉd̶a adua nuree. Dachi Akõreba ãchi kastikai.

⁵⁰Maud̶e Nicodemo ãchi ome b̶uasii. Ichi Jesusmaa naed̶e ẽsabud̶aa berread̶e wã b̶uad̶a basii.7:50 Juan 3:1-12. Mauba ãchimaa jarasii:

⁵¹—Maamina ¿Moisesba b̶ʉd̶ad̶e jara b̶uka barikia ẽbẽra kastikad̶ai panuu ichi bed̶ea ũrid̶ai naed̶e? ¿Ichiba waud̶a naed̶e kuitaad̶ai panuuwãeka?

⁵²Ãchiba panausid̶au:

—¿Makarã bichi Galilead̶ebenaka? Dachi Akõre bed̶ea b̶ʉd̶ad̶e biꞌia jʉrʉse. Maud̶e bichiba kuitaai ab̶au bid̶a Dachi Akõre baita berreabarii Galilead̶ebena neewẽe.7:52 Fariseorãba biꞌiwãe jarasid̶au. Jonás Gat-heferd̶ebena. Mau puuru Nazaret kaita b̶uasii Galilea druad̶e. 2 Reyes 14:25.

⁵³[Maka duanad̶aped̶a joma ãchi decha wãurisid̶au.7:53 Griego bed̶ead̶e ãrea kartad̶e versículos 7:53—8:11 wãꞌãe.

Wẽra chi kimawãe ome kãi nub̶eed̶a

¹Maabae Jesús Olivo ead̶aa wãsii. ²Norema daped̶e waya Dachi Akõre de mechiu dud̶aa wãsii. Aria b̶uud̶e ẽbẽrarã ãrea ichimaa neesid̶au. Jeed̶a akʉ b̶eeped̶a ãchimaa jaradea kob̶eesii.

³Maka panuud̶e Moisesba b̶ʉd̶a jaradeabadaurã maud̶e fariseorãba wẽra junebena mukĩra ome kãi nub̶uu jidauped̶aad̶a adoesid̶au. Mau wẽra aria duanuu ẽsa eneed̶aped̶a ⁴Jesusmaa jarasid̶au:

—Jaradeabarii, nau wẽra ab̶au ome kachirua waumaa b̶uakare daiba jidausid̶au. ⁵Moisesba b̶ʉd̶ad̶e naka nuree wẽrarã mooba b̶ata bead̶ai panuu b̶ʉ kub̶uu.8:5 Mau sid̶a jara b̶uu chi mukĩra sid̶a biui b̶uu. Levítico 20:10; Deuteronomio 22:22. ¿Bichimaarã bia b̶uka maka waud̶ai?

⁶Ãchiba maka id̶isid̶au Jesusmaa kachirua berreabid̶ai baita, mauba ichi jidead̶ayua. Maud̶e Jesús ed̶aa sinib̶arikau kob̶eeped̶a ichi jua jimid̶iba iorod̶e b̶ʉ kob̶eesii. ⁷Maamina ãchiba akabichia id̶i panuud̶eeba jiraduped̶a jarasii:

—Chi kachirua waukáuburu nau wẽra mooba naa b̶atai b̶uu.8:7 Deuteronomio 17:6-7.

⁸Maka jaraped̶a Jesús waya ed̶aa sinib̶arikau kob̶eeped̶a iorod̶e b̶ʉmaa b̶eesii. ⁹Jesusba jarad̶a ũrisid̶aud̶e ara makʉd̶e ab̶aab̶aa wãurisid̶au.8:9 Griego bed̶ead̶e chi b̶ee kartad̶e nau sid̶a b̶ʉ kub̶uu: Ãchi sõd̶e kuitaa panasid̶au jipawãe nuree. Naa chõrarã ãyaa wãsid̶au. Maabae kũudrãarã sid̶a wãurisid̶au. Jesús mau wẽra ome istu b̶eesii. ¹⁰Jesús ʉtʉ ʉkʉ nub̶eeruud̶e wẽra istu ʉkʉ nub̶uu unuped̶a8:10 Wẽra istu ʉkʉ nub̶uu unuped̶a. Griego bed̶ead̶e chi b̶ee kartad̶e mau wãꞌãe. maabae id̶isii:

—Bichi kachirua jara duanad̶a ¿sama panuma?8:10 Bichi kachirua jara duanad̶a. Griego bed̶ead̶e chi b̶ee kartad̶e mau wãꞌãe. ¿Ab̶auba bichi bas aska?

¹¹Wẽraba panausii:

—Ab̶au bid̶a makaabasii, mʉ Mechiu.

Jesusba jarasii:

—Mʉa bid̶a bichi maka nii awẽe. Wãse, maamina waa kachirua waurã́se.]

Jesús nau iujãad̶e ʉ̃d̶aa

¹²Mau maad̶akare Jesusba ẽbẽrarãmaa waya jarasii:

—Mʉ nau iujãad̶e ʉ̃d̶aa kĩra nii. Barikia mʉ baara wãaruubʉrã pãriud̶e nibaabai, maumaarã ʉ̃d̶aad̶e b̶uud̶eeba chokae b̶uai uru b̶uai.

¹³Maud̶e fariseorãba Jesusmaa jarasid̶au:

—Bichiba ara bichi ʉ̃rʉbena berrea b̶uu. Mauba jarawẽa b̶uu bichiba jara b̶uu biawãra b̶uu.

¹⁴Jesusba jarasii:

—Ara mʉ ʉ̃rʉbena berrea b̶umina mʉʉba jara b̶uu biawãrabʉ. Mʉʉba kuitaa b̶uu mʉ samareeba neesii maud̶e samaa wãi. Maamina machiba mau adua panuu.8:14 Juan 7:27-29.¹⁵Machiba nau iujãad̶ebena kʉ̃risiad̶eeba mʉ ichia panuu. Mʉʉba ab̶aumaa bid̶a maka ichiakau. ¹⁶Mʉʉba waabenarã saka nuree ichiaped̶a jaraaruubʉrã, mʉʉba jara b̶uu biawãrabʉ, mʉaburu maka jarawẽa b̶uud̶eeba. Maumaarã mʉ Chachaba, mʉ bʉid̶aba mʉ ome maka jara b̶uu. ¹⁷Machi leyd̶e jara b̶uu ẽbẽra omeeba arab̶au bed̶ea jaraaduubʉrã ãchiba jara panuu biawãrabʉ.8:17 Deuteronomio 17:6; 19:15.¹⁸Arab̶aud̶e ara mʉ ʉ̃rʉbena berrea b̶uu, maud̶e mʉ Chacha, chi mʉ bʉid̶aba mʉ ʉ̃rʉbena berrea b̶uu.

¹⁹Maud̶e ãchiba Jesusmaa id̶isid̶au:

—Maka b̶uubʉrã bichi akõre ¿sama b̶uma?

Jesusba panausii:

—Machiba mʉ unud̶akau maud̶e mʉ Chacha sid̶a unud̶akau. Machiba mʉ biawãra unubadau basirã, mʉ Chacha sid̶a unubadau bai basii.

²⁰Jesusba Dachi Akõre de mechiu dud̶a, chi Dachi Akõre baita chi nejarr pebadaumare, jaradea b̶uasiid̶e joma mau jarasii. Maamina ab̶au bid̶a ichi jidaud̶aabasii ichi ewari wabid̶a bawẽa b̶uasiid̶eeba.

Mʉ wãaruumaa machi poyaa wãd̶aabai

²¹Maabae Jesusba jarasii:

—Mʉ wãaruu. Wãd̶akare machiba mʉ jʉrʉd̶ai maamina unud̶aabai. Machiba mʉʉd̶e ijãad̶akaud̶eeba kachiruad̶e biud̶ai. Mʉ wãaruumaa machi poyaa wãd̶aabai.

²²Maud̶eeba judiorã Mechiurãba ãchicha berrea duanasid̶au:

—Maka b̶uubʉrã ¿ichi du ab̶a biui b̶uka? ¿Maud̶eeba ichiba jara b̶uka: “Mʉ wãaruumaa machi poyaa wãd̶aabai”?

²³Maud̶e Jesusba jarasii:

—Machi nau iujãad̶ebenabʉ maamina mʉ bajãad̶ebenabʉ. Mʉ nau iujãad̶ebenawãebʉ. ²⁴Maud̶eeba mʉʉba jarasii machi kachiruad̶e biud̶ai. Machiba Mʉ Nii ijãad̶awẽebʉrã kachiruad̶e biud̶ai.8:24 Mʉ Nii. Mau jaraaruuba Jesusba jara b̶uasii ichi Dachi Akõrebʉ. Éxodo 3:13-14.

²⁵Maud̶eeba id̶isid̶au:

—¿Bichi kaima?

Jesusba panausii:

—Arab̶aed̶eed̶e mʉʉba machimaa ara mau jara b̶uu.8:25 Mʉʉba machimaa ara mau jara b̶uu. Griego bed̶ead̶e mau arakʉd̶e b̶ʉ kub̶uuwãe. Waabenarãmaarã jara b̶uu «Mʉʉba machimaa ¿kãare kuitaa jarai b̶uu?» maebʉrã «Mʉ ¿sakãe machi ome berreai b̶uma?»²⁶Mʉʉba machi ʉ̃rʉbena ne ãrea berreai b̶uu, machi kastikai baita. Maamina makaabai. Chi mʉ bʉid̶a bed̶ea biawãrabʉ. Chi mʉʉba ichid̶ebena ũri b̶uu nau iujãad̶ebenarãmaa jarabarii.

²⁷Maamina kauwa ʉ̃rid̶aabasii Jesusba ichi Akõre ʉ̃rʉbena berrea b̶uu. ²⁸Maud̶eeba ichiba jarasii:

—Machiba mʉ, chi Ẽbẽra Ba B̶uad̶a ʉtʉ jirab̶uuduud̶e kuitaad̶ai Mʉ Nii. Kuitaad̶ai mʉʉba b̶istĩika bid̶a ara michi kʉ̃ria waukau basii, maumaarã mʉ berrea b̶uabarii mʉ Chachaba jaradead̶a kĩra. ²⁹Chi mʉ bʉid̶a mʉ baara b̶uu. Chachaba mʉ istu b̶ukau, mʉʉba wau b̶uabariid̶eeba ichiba kʉ̃ria b̶uu kĩra.

³⁰Jesusba mau ʉ̃rʉbena berreasiid̶e ãreaba ichid̶e ijãasid̶au.

Chi biawãra Abraham warrarã

³¹Maabae Jesusba judiorã ichid̶e ijãaduurãmaa jarasii:

—Machiba mʉ bed̶ea ijãa panuubʉrã, biawãra mʉ baara nibabadaurã nuread̶ai. ³²Mʉʉd̶eeba machiba Dachi Akõre biawãra kuitaad̶ai. Mauba machi chi chibari baita bari trajabadaurã nuread̶a karibakuai.

³³Maamina ãchiba jarasid̶au:

—Dai Abrahamd̶ebena imisid̶aud̶eeba chi chibari baita bari trajabadaurãwãe. ¿Saka bichiba dai karibai a b̶uma?

³⁴Jesusba panausii:

—Mʉʉba biawãra jaraaruu: kachirua wau nuree mau kachirua baita bari trajabadaurãbʉ. ³⁵Chi chibari baita bari trajabarii ichi chibari ded̶e ãrea b̶uabai, maamina chi chibari warr ichi akõre ome ewaricha b̶uabarii.8:35 Génesis 21:9-13.³⁶Maud̶eeba Dachi Akõre Warrba machi karibaaruubʉrã, biawãra ena nuread̶ai. ³⁷Mʉʉba kuitaa b̶uu machi Abrahamd̶ebena imiped̶aad̶a, maamina mʉ bea kʉ̃ria panuu mʉ bed̶ea ijãad̶awẽa panuud̶eeba. ³⁸Mʉʉba jara b̶uu joma mʉ Chachaba mʉʉmaa jaradead̶a. Maud̶e machiba machi akõreba ũribiaped̶aad̶a ijãa panuu.

³⁹Ãchiba panausid̶au:

—Dai chacha Abrahambʉ.

Maamina Jesusba jarasii:

—Machi Abraham warrarã basirã ichiba waud̶a kĩra waud̶ai basii. ⁴⁰Mʉʉba machimaa chi biawãra bed̶ea jara b̶uu Dachi Akõreba mʉʉmaa kuitaabid̶a kĩra. Maamina machiba mʉ bead̶ai kʉ̃ria panuu. ¿Abrahamba maka wauska? ⁴¹Machiba machi akõreba waubarii kĩra waubadau.

Maud̶e ãchiba jarasid̶au:

—¡Maamina dai wẽra aud̶uabariiba adaud̶awãe! Daiba Chacha ab̶aburu inid̶au. Mau Dachi Akõrebʉ.

⁴²Jesusba jarasii:

—Dachi Akõre machi Akõre basirã, machiba mʉ biawãra kʉ̃riad̶ai basii, Dachi Akõred̶eeba neeped̶a nama b̶uud̶eeba. Mʉ ara michi kʉ̃ria neebasii. Ichiaburu bʉisii. ⁴³Mʉʉba jara b̶uu ¿sakãe machiba kauwa ʉ̃rid̶awẽa panuma? Machiba kauwa ʉ̃rid̶awẽa panuu, mʉ bed̶ea ũrid̶ai kʉ̃riad̶akaud̶eeba. ⁴⁴Machi akõre chi jʉbawãe niibʉ. Maud̶eeba ichiba kʉ̃ria b̶uu machiba waud̶ai kʉ̃ria panuu. Mau arab̶aed̶eed̶e mia beabariibʉ. Biawãrad̶eeba b̶uakau, chi biawãra ichid̶e wãꞌãed̶eeba. Setaa jaraaruud̶e, ara ichi kĩra setaa jarabarii, setaa jarabariid̶eeba maud̶e seta akõred̶eeba. ⁴⁵Mʉʉba biawãra jara b̶umina machiba mʉ bed̶ea ijãad̶akau. ⁴⁶¿Kai machid̶ebenaba mʉʉba biawãra kachirua wau b̶uu aima? Mʉʉba biawãra bed̶ea jaraaruubʉrã, ¿sakãe mʉ bed̶ea ijãad̶awẽa panuma? ⁴⁷Chi Dachi Akõred̶e ijãa b̶uuba ichi bed̶ea ũribarii maamina machi Dachi Akõre warrarãwãed̶eeba ichi bed̶ead̶e jara b̶uu kĩra waud̶akau.

Jesusba ara ichi ʉ̃rʉbena jarad̶a

⁴⁸Maabae judiorãba Jesusmaa jarasid̶au:

—¿Bichi Samariad̶ebenawãeka maud̶e jai kachirua uru b̶uu? ¿Daiba arakʉd̶e jarad̶awẽa panuka?

⁴⁹Maud̶e Jesusba jarasii:

—Mʉ jai kachiruaswãe nii. Mʉ Chacha ʉ̃rʉbena biꞌia berreabarii. Maamina machiba mʉ ʉ̃rʉbena biꞌia berread̶akau.

⁵⁰Mʉʉba jʉrʉkau ẽbẽrarãba mʉ ʉ̃rʉbena biꞌia berread̶amera. Maamina ab̶a barau, mau jʉrʉi baita. Ichiaburu ẽbẽrarã dauchaabarii. ⁵¹Mʉʉba biawãra jaraaruu, chi mʉ bed̶ea ijãa nii biukaraa nibai.

⁵²Maud̶e judiorãba Jesusmaa jarasid̶au:

—Jãabáeburu daiba kuitaaduu bichiba jai kachirua bichi kakuad̶e uru b̶uu. Abraham biusii. Joma Dachi Akõre baita berreabadaurã sid̶a biusid̶au, maamina bichiba jara b̶uu: “Chi mʉ bed̶ea ijãa nii biukaraa nibai”. ⁵³Makarã ¿bichi dai nabẽra Abraham audeara chi mechiu nika? Mau biusii maud̶e joma Dachi Akõre baita berreabadaurã sid̶a biusid̶au. Bichi ¿kai kʉ̃risia b̶uma?

⁵⁴Jesusba panausii:

—Ara mʉ ʉ̃rʉbena biꞌia kʉ̃risiaruubʉrã mauba jarawẽa b̶uu mʉ biꞌia nii. Maamina mʉ Chachaba mʉ ʉ̃rʉbena biꞌia berrea b̶uu. Machiba ichi “Dachi Akõre” a panuu.

⁵⁵Maamina ichi unud̶akau. Maud̶e mʉʉba ichi unubarii. Ichi unukau ad̶a basirã mʉ machi kĩra seta id̶aa nibai basii. Maamina mʉʉba ichi kuitaa b̶uud̶eeba ichi bed̶ea wau b̶uu. ⁵⁶Machi nabẽra Abraham kĩrajʉʉsii mʉ nau iujãad̶aa neeruu ewari unui kuitaa b̶uasiid̶eeba. Biawãra unuped̶a ãrea kĩrajʉʉ b̶eesii.

⁵⁷Maud̶e judiorãba Jesusmaa jarasid̶au:

—Bichi wabid̶a 50 añoswãe nii. ¿Saka bichiba Abraham unubarii a b̶uma?

⁵⁸Jesusba panausii:

—Mʉʉba biawãra jaraaruu: Abraham chi naweba adaui naed̶e Mʉʉbʉ.8:58 Éxodo 3:13-14.

⁵⁹Jesusba maka jarad̶a kakua judiorãba mo adausid̶au ichi b̶ata bead̶ai baita. Maamina Jesús miruped̶a Dachi Akõre de mechiud̶ebena awara ãyaa wãsii.8:59 Griego bed̶ead̶e chi b̶ee kartad̶e b̶ʉ kub̶uu: Jesús ara ãchi tãed̶e wãsii.

Jesusba ẽbẽra dau pãriu aribiabid̶a

¹Wãaruud̶e Jesusba ẽbẽra chi naweba adaud̶ad̶eed̶ebena dau pãriu nii unusii. ²Maud̶e Jesús baara nibabadaurãba id̶isid̶au:

—Jaradeabarii, ¿kaiba kachirua wausiid̶eeba nau mukĩra jãka dau pãriu chi naweba adausma? ¿Ichi akõrerãba kachirua wausid̶aud̶eeba, maebʉrã ichiba kachirua waud̶ad̶eeba?

³Jesusba panausii:

—Ichiba kachirua wausiid̶eeba maebʉrã chi akõrerãba kachirua wau panasiid̶eeba, jãka adaubasii. Maumaarã dau pãriu adausii ichid̶eeba Dachi Akõreba ne wauruu ẽbẽrarãba unud̶amera. ⁴Maud̶eeba wabid̶a ãsaed̶e b̶uud̶e chi mʉ Bʉid̶aba waubi b̶uu mʉʉba waui b̶uu. Kiuruud̶e ab̶a bid̶a poyaa trajakau. ⁵Maamina nau iujãad̶e b̶uud̶e mʉ ẽbẽrarã baita ʉ̃d̶aa kĩra nii mʉ Chacha ʉ̃rʉbena kuitaabiai baita.

⁶Maka jaraped̶a Jesús iorod̶e id̶uped̶a ioro susua wausii. Mau ioro susuaba chi dau pãriu nii daucha purusii. ⁷Maabae Jesusba ichimaa jarasii:

—Chi Kuibadau Siloé abadaumaa jeraad̶e wãse. (Mau trʉ̃ jara b̶uu “bʉid̶a”).9:7 Génesis 49:10; Isaías 8:5-8.

Ara makʉd̶e chi dau pãriu nii wãped̶a ichi dau jeraasiid̶e unu b̶eesii. Maabae deed̶aa wãsii. ⁸Ichi de kaita duanuurãba maud̶e ichiba od̶e ne kaebea id̶ibachii unuped̶aad̶arãba jara duanasid̶au: «¿Nau mauwãeka, chi akʉ b̶eeped̶a ne kaebea id̶ibarii?»

⁹Chi nureerãba maerã maubʉ abachid̶au. Maud̶e waabenarãba ichi kĩra b̶umina mauwãe abachid̶au. Maamina chi dau pãriu b̶uad̶aba jarasii: «Biawãra mʉʉbʉ».

¹⁰Maud̶e ichimaa id̶isid̶au:

—¿Sakaburu bichiba unu b̶eesma?

¹¹Ichiba panausii:

—Ẽbẽra Jesús abadauba ioro susua wauped̶a mʉ daucha purusii. Maabae ichiba jarasii: “Kuibadau Siloé abadaumaa jeraad̶e wãse”. Wãped̶a mʉ dau jeraasiid̶e unu kob̶eesii.

¹²Maud̶e ãchiba id̶isid̶au:

—Mau ẽbẽra ¿sama b̶uma?

Ichiba panausii:

—Mʉʉba adua b̶uu.

Fariseorãba dau pãriu b̶uad̶amaa ãrea id̶iped̶aad̶a

^13-14Jesusba ioro susua wauped̶a dau pãriu nii aribiabid̶a ewari, chi bari panabadau ewari basii. Maud̶eeba waabenarãba chi dau pãriu b̶uad̶a fariseorãmaa adoesid̶au. ¹⁵Maabae chi fariseorã bid̶a mau mukĩramaa id̶isid̶au saka unu b̶eesii. Maud̶e ichiba jarasii:

—Jesusba ioro susua wauped̶a mʉ daucha purusii. Maabae mʉʉba baniaba jeraaruud̶e unu kob̶eesii.

¹⁶Chi nureerã fariseorãba jarasid̶au: «Mau mukĩra Dachi Akõred̶ebena need̶awãe b̶uu, bari panabadau ewari wapeakaud̶eeba».

Maamina waabenarãba jarasid̶au: «¿Saka kachirua waubarii mukĩraba mau ẽbẽrarãba ne poyaa waud̶akau poyaa wausma?»

Maka chiya ãyaa jarasid̶au. ¹⁷Maka panuud̶e waya chi dau pãriu b̶uad̶amaa id̶isid̶au:

—Mau mukĩra, chi bichi dau aribiabid̶a ¿kãare kʉ̃risia b̶uma mau ʉ̃rʉbena?

Chi dau pãriu b̶uad̶aba panausii:

—Mʉʉmaarã, mau Dachi Akõre baita berreabariibʉ.

¹⁸Maamina chi judiorã mechiurãba ijãad̶awẽa panasid̶au mau ẽbẽra naed̶e dau pãriu b̶uasii. Maud̶eeba ichi akõrerã iubiasid̶au. ¹⁹Maabae maarãmaa id̶isid̶au:

—¿Jãu machi warr dau pãriu adaud̶aka? ¿Saka id̶ibae jãuba unu b̶uma?

²⁰Ãchiba panausid̶au:

—Daiba kuitaa panuu jãu dai warr dau pãriu adaud̶abʉ. ²¹Maamina adua panuu saka id̶ibae unu b̶eesii, maud̶e adua panuu kaiba ichi aribiabisii. Jãu chõra baerã ichimaa id̶ísturu. Ara ichiba jaraika.

²²Ichi akõrerãba maka jarasid̶au judiorã karrarã wapea panuud̶eeba. Biawãra mau judiorãba jarasid̶au ab̶auba Jesús chi Dachi Akõreba Dachi Karibabarii deai jarad̶a a jaraaruubʉrã chi judiorã araa ãbua imibadau ded̶ebena ãyaa bʉid̶ai asid̶au. ²³Maud̶eeba chi akõrerãba jarasid̶au: «Jãu chõra baerã ichimaa id̶ísturu».

²⁴Maud̶eeba chi judiorã karrarãba chi dau pãriu b̶uad̶a waya iud̶aped̶a jarasid̶au:

—Dachi Akõre trʉ̃d̶e daimaa mau ẽbẽra ʉ̃rʉbena biawãra jarase.9:24 Griego bed̶ead̶e b̶ʉ kub̶uu: Dachi Akõre biꞌia kʉ̃riáse. Daiba kuitaa panuu mau kachirua waubarii.

²⁵Chi dau pãriu b̶uad̶aba jarasii:

—Mʉʉba adua b̶uu mauba kachirua waubarii maebʉrã waukau. Ab̶aburu kuitaa b̶uu mʉ dau pãriu b̶uasii maamina jãabae unu b̶uu.

²⁶Maud̶e ãchiba waya ichimaa id̶isid̶au:

—Jãuba ¿saka aribiabisma? ¿Kãare wausma bichi dau aribiabii baita?

²⁷Ichiba panausii:

—Mʉʉba machimaa jarasii maamina ijãad̶aabasii. Mau ¿sakãe waya ũri kʉ̃ria panuma? ¿Machi sid̶a ichi baara niba kʉ̃ria panuka?

²⁸Maud̶eeba ãchiba ichi naka iadaasid̶au:

—Bichi mau ẽbẽra ome nii, maamina dai Moisesba b̶ʉd̶ad̶eeba nibabadau. ²⁹Daiba kuitaa panuu Dachi Akõreba Moisesmaa berreasii,9:29 Éxodo 33:11. maamina mau ẽbẽra samabena adua panuu.

³⁰Maud̶e chi dau pãriu b̶uad̶aba jarasii:

—¿Sakaburu? ¿Saka machiba ichi samabena adua panuu a panuma? ¿Mauba mʉ dau aribiabid̶awãeka? ³¹Dachiba kuitaa panuu chi kachirua waubadaurãba id̶iiduu Dachi Akõreba biꞌia ũrikau. Mau awara kuitaa panuu barikiuba Dachi Akõre wapea b̶uubʉrã maud̶e ichiba kʉ̃ria b̶uu wau b̶uubʉrã, mauba ʉtaa id̶iiruu Dachi Akõreba biꞌia ũribarii.9:31 Salmos 66:18; Proverbios 15:29.³²Ewari ab̶ad̶e bid̶a dachiba ẽbẽra dau pãriu adaud̶a aribiabid̶a ũrid̶aka basii. ³³Nau ẽbẽra Dachi Akõred̶ebenawãe basirã, poyaa waubai basii.

³⁴Maud̶e judiorã mechiurãba ichi iadaasid̶au:

—Bichi adaud̶ad̶eed̶ebena kachirua waubarii. ¿Saka daimaa ne jaradeaima?

Maud̶eeba ichi chi judiorã araa ãbua imibadau ded̶ebena ãyaa bʉisid̶au.

Chi biawãra dau pãriu nuree

³⁵Jesusba ũrisii chi dau pãriu b̶uad̶a ãyaa bʉiped̶aad̶a. Maud̶eeba ichi jʉrʉd̶e wãsii. Unuped̶a id̶isii:

—¿Bichiba chi Ẽbẽra Ba B̶uad̶ad̶e biawãra ijãa b̶uka?9:35 Chi Ẽbẽra Ba B̶uad̶a. Griego bed̶ead̶e chi b̶ee kartad̶e b̶ʉ kub̶uu: Dachi Akõre Warr.

³⁶Ichiba jarasii:

—¿Mau kaima? Mʉʉmaa jarase mʉʉba ichid̶e biawãra ijãai baita.

³⁷Jesusba panausii:

—Bichiba mau unu b̶uu. Mʉ, chi bichi ome berrea b̶uu maubʉ.

³⁸Ara makʉd̶e Jesús daad̶e õdarrd̶e kob̶eeped̶a jarasii:

—Mʉ Mechiu, mʉʉba ijãa b̶uu.

³⁹Maud̶e Jesusba jarasii:

—Mʉ nau iujãad̶aa neesii ẽbẽrarã nebʉra dauchaai baita. Maka chi dau pãriu nuree kĩra nureeba unud̶ai maud̶e chi unu panuu a panuu dau pãriu nuree kĩra paneed̶ai.

⁴⁰Chi nuree fariseorã Jesús kaita panuuba mau bed̶ea ũrisid̶aud̶e id̶isid̶au:

—Bichiba ¿sakãe maka jara b̶uma? ¿Dai dau pãriu nureka?

⁴¹Jesusba panausii:

—Machi biawãra dau pãriu nuread̶a basirã, kachirua waubadau kakua nebʉrad̶e panad̶aabai basii. Maamina machiba unu panuu a panuud̶eeba nebʉrad̶e panuu.

Oeja nubarii bia nii

¹Mau ewarid̶e Jesusba jarasii:

«Mʉʉba biawãra jaraaruu: barikia oeja nubadaumare poraad̶e nub̶uare ed̶a wãwẽebʉrã, mau kãyabãra ãyare ed̶a wãaruubʉrã, mau oeja nechiruabariibʉ maud̶e ẽbẽra kachiruabʉ. ²Maamina chi oeja nubadaumare poraad̶e ed̶a wãbarii, chi oeja nubariibʉ. ³Mau oeja nubarii baita chi poraa nubariiba chi poraa ewabarii. Oejarãba ãchi nubarii bed̶ea kuitaa panuu. Ãchi ab̶aab̶aa trʉ̃ jarakuaped̶a awara adoebarii.10:3 Ezequiel 34:11-31.⁴Joma awara uad̶oped̶a ãchi naa wãbarii. Oeja ichi baara wãbadau ichi bed̶ea kuitaa panuud̶eeba. ⁵Maamina ãchiba chi ẽbẽra unud̶akau baara wãd̶akau, maumaarã mirubadau mau bed̶ea adua panuud̶eeba».

⁶Jesusba nebʉrʉʉruuba maka berreasii maamina judiorãba kuitaad̶aabasii kãare jara b̶uu. ⁷Maud̶eeba Jesusba naka jarasii: «Mʉʉba biawãra jaraaruu, mʉ chi oeja ed̶a wãbadau poraa. ⁸Mʉ neei naed̶e ãrea oeja nechiruabadaurã kĩra maud̶e ẽbẽrarã kachiruarã neebachid̶au. Maamina chi Dachi Akõred̶e ijãabadaurãba10:8 Dachi Akõred̶e ijãabadaurãba. Griego bed̶ead̶e naka b̶ʉ kub̶uu: oejarãba. maarã bed̶ea ijãad̶aabasii.

⁹»Mʉ chi poraabʉ. Chi mʉʉd̶eeba ed̶a wãaruu kachiruad̶ebena karibai. Ãrea jirukaraayuwãe b̶uai, ichiba wãꞌãe b̶uu Dachi Akõreba joma deaid̶eeba.10:9 Griego bed̶ead̶e naka b̶ʉ kub̶uu: Ichi ed̶a wãi, awara wãi maud̶e sirua unui.¹⁰Nechiruabarii neebarii oeja chiruai baita, beai baita maud̶e baribai baita. Maamina mʉ neesii, ẽbẽrarã ãrea chokae nibad̶amera.

¹¹»Mʉ oeja nubarii bia niibʉ. Chi oeja nubarii bia nii ichi oeja kakua biui b̶uu. ¹²Maamina ab̶aba chi nejarra kakua oeja nu b̶uaruubʉrã, usa kachirua neeruud̶e oeja duanuiped̶a miru wãi. Oeja ichid̶iwãed̶eeba biawãra nukau. Maud̶e usa kachiruaba oeja ab̶a kaa adauruud̶e waabenarã jĩichoabadau. ¹³Mau ẽbẽra miru wãbarii ab̶a chi nejarra kakúaburu oeja nubariid̶eeba. Ichiba kʉ̃risiakau oeja biꞌia panad̶amera.

¹⁴»Mʉ oeja nubarii biabʉ. Mʉʉd̶erã kuitaa b̶uu, chi oeja nubariiba ichi oeja kuitaa b̶uu kĩra. Maud̶e maarãba mʉ kuitaa panuu. ¹⁵Ara mau kĩra mʉ Chachaba mʉ kuitaa b̶uu maud̶e mʉʉba mʉ Chacha kuitaa b̶uu. Mʉ michi oeja kakua biui b̶uu. ¹⁶Mʉʉba oeja june ua b̶uu nau oeja nubadaumarebenawaẽ.10:16 Mʉʉba oeja june ua b̶uu nau oeja nubadaumarebenawaẽ. Mau berread̶eeba Jesusba jara b̶uasii judiowãerã bid̶a ichid̶e ijãad̶ai. Maarã sid̶a mʉʉba ed̶a adooi. Ãchiba mʉ bed̶ea ijãad̶ai. Maka joma ãbua panad̶ai. Maud̶e ãchi nubarii ab̶a b̶uai.

¹⁷»Mʉ Chachaba mʉ kʉ̃ria b̶uu, ara mʉ ida beabiid̶eeba. Maabae waya chokae jiradui. ¹⁸Mʉʉba mʉ ida beabiwẽebʉrã ab̶au bid̶a mʉ poyaa bead̶aabai, maamina mʉ biui mʉʉba maka kʉ̃ria b̶uud̶eeba. Mʉ biuped̶a poyaa chokae jiradui. Mʉ Chachaba mʉʉmaa maka waubisii».

¹⁹Mau bed̶ea ũriiduud̶e judiorã waya chiya aꞌawaraa berrea kopaneesid̶au. ²⁰Ãreaba jarasid̶au: «Jãu ẽbẽraba jai kachirua uru b̶uu. Jãu kĩrawãe b̶uu. ¿Sakãe jãu bed̶ea ũrid̶aima?»

²¹Maamina waabenarãba jarasid̶au: «¡Chi jai kachirua uru b̶uuba maka berreakau! Makarã ¿jai kachiruaba dau pãriu nuree aribiabibarika?»

Judiorãba Jesús ida b̶uped̶aad̶a

²²Mau ewarid̶e judiorãba Jerusalend̶e kĩrajʉʉ bara b̶uabarii ewari waubachid̶au. Ãchiba kĩraba panasid̶au Dachi Akõre de mechiu ichi baita awara b̶uped̶aad̶a. Kũrasãa ewarid̶e,10:22 Judiorãba mau ewari Janucá abadau. Añocha diciembred̶e waubadau. Kĩrababadau Judas Macabeo abadauba Dachi Akõre de mechiu waya biꞌia b̶ud̶a. Makasii 164 años Jesús b̶uai naed̶e.²³Jesús nibasii Dachi Akõre de mechiu ãbudare, Pórtico Salomón abachid̶aumare. ²⁴Maka b̶uud̶e chi nuree judiorãba Jesús ad̶u orrod̶aped̶a id̶isid̶au:

—Ab̶a ¿sakaed̶aa bichiba dai kʉ̃risia adua ua b̶uaima? Bichi Dachi Akõreba Dachi Karibabarii deai jarad̶abʉrã, daimaa ab̶aed̶e jarase.

²⁵Jesusba panausii:

—Mʉʉba machimaa jarasii maamina ijãad̶awẽa panuu. Joma mʉ Chacha trʉ̃d̶eeba waubarii mauba arakʉd̶e unubi b̶uu mʉ kai b̶uu. ²⁶Maamina machiba ijãad̶akau, mʉ oejarãwãed̶eeba. ²⁷Mʉ oejarãba mʉ mimi kauwa kuitaa panuu. Mʉʉba ãchi unubarii. Maud̶eeba ãchiba mʉ baara wãbadau. ²⁸Mʉʉba jãarã Dachi Akõre ome ewaricha chokae b̶uabiabarii. Ewari ab̶a bid̶a wãꞌãed̶aabai maud̶e ab̶au bid̶a mʉ juad̶ebena poyaa juakaa adaud̶aabai. ²⁹Mʉ Chachaba jãarã mʉʉmaa deasii. Ichi jomaurã audeara chi mechiu nii.10:29 Mau griego bed̶ead̶e arakʉd̶e b̶uuwãe. Waabenarãmaarã naka jara b̶uu «Mʉ Chachaba mʉʉmaa dead̶a ne joma kãyabãra chi mechiu b̶uu». Ab̶au bid̶a ãchi mʉ Chacha juad̶ebena poyaa juakaa adaud̶aabai. ³⁰Mʉ, mʉ Chacha ome arab̶au nid̶au.

³¹Maud̶eeba judiorãba waya mo adoesid̶au ichi b̶ata bead̶ai baita. ³²Maud̶e Jesusba jarasii:

—Mʉ Chachad̶eeba ãrea ne bia machimaa unubiasii. ¿Sãu ne bia waud̶a kakua mʉ mooba b̶ata bead̶aima?

³³Judiorãba panausid̶au:

—Daiba bichi mooba b̶atad̶aabai ne biꞌia wau b̶uu kakua, maumaarã b̶atad̶ai bichi ẽbẽra niikaud̶e ara Dachi Akõre a b̶uud̶eeba. Mauba bichiba Dachi Akõre ʉ̃rʉbena kachirua jara b̶uu.10:33 Levítico 24:14-16.

³⁴Jesusba jarasii:

—Machi Moisesba b̶ʉd̶ad̶e naka b̶ʉ kub̶uu: “Mʉʉba jarasii machi dachi akõrerã”.10:34 Salmos 82:6.³⁵Dachiba kuitaa panuu Dachi Akõre bed̶ea ewaricha biawãrabʉ. Dachi Akõreba mau ẽbẽrarãmaa “Machi dachi akõrerãbʉ” asiid̶e ³⁶¿sakãe mʉʉba ichi ʉ̃rʉbena kachirua jarasii a panuma, mʉʉba bari ichi Warr a b̶uasiid̶eeba? Dachi Akõreba mʉ ara ichi báitaburu awara b̶usii maud̶e nau iujãad̶aa bʉisii. ³⁷Mʉ Chachaba wau b̶uu mʉʉba wauwẽa b̶uubʉrã, mʉ bed̶ea ijã́sturu. ³⁸Maamina ichiba wau b̶uu mʉʉba wau b̶uubʉrã, mʉʉba jara b̶uu kakua machiba ijãad̶awẽa panumina mʉʉba wau b̶uu kakua ijã́sturu. Maka machiba biawãra kuitaad̶ai mʉ Chacha mʉ ome nii maud̶e mʉ, mʉ Chacha ome nii.

³⁹Maud̶e ãchiba waya Jesús jidau adoed̶ai kʉ̃ria panasid̶au, maamina ãchi juakaa wãsii.

⁴⁰Mau maad̶akare Jesús waya Jordán do kĩaraa wãsii Juan chi Boro Eabariiba naed̶e ẽbẽrarã boro ea b̶uad̶amaa.10:40 Juan 1:28. Jesús aria b̶eesii. ⁴¹Maka b̶uud̶e ãrea ẽbẽrarã ichimaa wãbachid̶au. Ãchi chiya naka jarabachid̶au: «Juanba ẽbẽrarãba ne poyaa waud̶akau wauka basii maamina joma ichiba nau Jesús ʉ̃rʉbena jarad̶a biawãrabʉ».

⁴²Aria ãreaba Jesusd̶e ijãasid̶au.

Lázaro biud̶a

^1-2Mau ewarid̶e ẽbẽra Lázaro abadau ãrea ẽpermo b̶uasii. Mau Lázaro Betania puurud̶ebena basii. Ara mau puurud̶e ichi neekaurã María maud̶e Marta panasid̶au. Mau Mariaba Dachi Mechiu jʉ̃rʉd̶e kera eaped̶a ichi bud̶aba poabisii.11:1-2 Juan 12:3.³Maud̶e Lázaro neekaurãba Jesusmaa jarad̶e bʉisid̶au:

—Dai Mechiu, bichi kõpaero ãrea ẽpermo b̶uu.

⁴Mau ũrisiid̶e Jesusba jarasii:

—Mau ẽpermo b̶uuba Lázaro biubai. Maumaarã mauba ẽbẽrarãba kuitaad̶ai Dachi Akõre maud̶e ichi Warr ome chi mechiurã.

⁵Jesusba Lázaro maud̶e chi neekaurã ãrea kʉ̃ria b̶uasmina, ⁶Lázaro ãrea ẽpermo b̶uu kuitaasiid̶e maucha ewari ome b̶eesii ichi b̶uad̶amaa. ⁷Mau maad̶akare ichi baara nibabadaurãmaa naka jarasii:

—Wãuríduru waya Judead̶aa.

⁸Maud̶eeba ichi baara nibabadaurãba jarasid̶au:

—Jaradeabarii, ewari ãrea bawẽe Judead̶ebenarãba bichi mooba b̶ata bea kʉ̃ria panad̶a. ¿Bichi waya mamaa wãaruka?

⁹Jesusba jarasii:

—¿Ewari ab̶a 12 hora b̶uuwãeka? Ãyadaa niid̶e jʉ̃rʉ drʉkau, ichiba ʉ̃d̶aa nau iujãad̶ebena unu b̶uud̶eeba. ¹⁰Maamina ẽsabud̶e nii jʉ̃rʉ drʉbarii, ʉ̃d̶aawãe b̶uud̶eeba.

¹¹Maka jaraped̶a Jesusba waya jarasii:

—Dachi kõpaero Lázaro kãi nub̶uu maamina mʉʉba mau ʉ̃rʉmad̶e wãaruu.

¹²Maud̶e Jesús baara nibabadaurãba ichimaa jarasid̶au:

—Dai Mechiu, mau kãi nub̶uubʉrã aribiai.

¹³Jesusba mau jarad̶aba Lázaro biud̶a ʉ̃rʉbena berrea b̶uasii, maamina ichi baara nibabadaurãba kʉ̃risiasid̶au Lázaro kãi nub̶uu ʉ̃rʉbena berrea b̶uu. ¹⁴Maabae Jesusba arakʉd̶e jarasii:

—Lázaro biusii. ¹⁵Mʉ aria b̶uabasiid̶eeba mʉ kĩrajʉʉ b̶uu, mau kakua machiba mʉ biꞌia ijãad̶aid̶eeba. Waya ichimaa wã́duru.

¹⁶Maud̶e Tomás, Mikisu abadau b̶uasii.11:16 Mikisu. Griego trʉ̃ Dídimo jara b̶uu «mikisu». Mauba waabenarã Jesús baara nibabadaurãmaa jarasii:

—Judead̶aa wãd̶ai dachi sid̶a bead̶amera.

Biud̶arã Jesusba chokae jiradubiai

¹⁷Betania puurud̶e neesiid̶e Jesusba kuitaasii Lázaro jau b̶uped̶aad̶a ewari kimare basii. ¹⁸Betania puuru Jerusalend̶eeba ara kaita b̶uasii.11:18 Ara kaita b̶uasii. Griego bed̶ead̶e b̶ʉ kub̶uu: 15 estadia. Mau kilómetro õbea kĩra b̶uu.¹⁹Maud̶eeba judiorã ãrea imisid̶au Marta maud̶e María kĩra chuburiad̶ai baita, ãchi neewau biusiid̶eeba. ²⁰Maka panuud̶e Martaba kuitaasii Jesús neeruu. Ara makʉd̶e mau irsibid̶e wãsii. Maud̶e María ded̶e b̶eesii. ²¹Martaba Jesús unusiid̶e jarasii:

—Mʉ Mechiu, bichi nama b̶uad̶a basirã mʉ ãba biubai basii. ²²Maamina mʉʉba kuitaa b̶uu joma bichiba Dachi Akõremaa id̶iiruu ichiba waui.

²³Jesusba ichimaa jarasii:

—Bichi ãba chokae jiradui.

²⁴Maud̶e Martaba jarasii:

—Maerã, mʉʉba kuitaa b̶uu mau kaad̶ebena ewarid̶e biud̶arã chokae jiraduuduud̶e, mau sid̶a chokae jiradui.11:24 Isaías 26:19; Daniel 12:1-3.

²⁵Jesusba jarasii:

—Mʉ biud̶arã chokae jiradubiabarii maud̶e chokae b̶uai deabarii. Barikiuba mʉʉd̶e ijãaruubʉrã, biurumina ewaricha Dachi Akõre ome chokae nibai. ²⁶Chi mʉʉd̶e ijãa nii, mʉ kakua chokae b̶uud̶eeba biukaraa nibai. ¿Bichiba mau ijãa b̶uka?

²⁷Maud̶e Martaba panausii:

—Maerã mʉ Mechiu, mʉʉba ijãa b̶uu bichi Dachi Akõre Warr, Dachi Akõreba Dachi Karibabarii deai jarad̶a, nau iujãad̶e neei b̶uad̶a.

Jesús Lázaro kakua jẽad̶a

²⁸Makaped̶a Marta wãsii ichi neekaumaa. Maabae chũpea jarasii:

—Chi Jaradeabarii nama b̶uu. Ichiba bichimaa ne jara kʉ̃ria b̶uu.

²⁹Mau ũrisiid̶e María jiraduped̶a Jesús b̶uumaa isa wãsii. ³⁰Jesús puurud̶e wãwẽa b̶uasii. Wabid̶a Marta chi Jesús ome unud̶amare b̶uasii. ³¹Judiorã María ded̶e panasid̶au ichi kĩra chuburiad̶ai baita. Maud̶e ichi isa jiraduped̶a awara wãaruu unusid̶au. Lázaro jau b̶uped̶aad̶amaa jẽad̶e wãaruu a kʉ̃risiasid̶aud̶eeba, kaad̶e wãsid̶au.

³²María Jesús b̶uumaa neesiid̶e maud̶e ichi unusiid̶e jʉ̃rʉ kaita õdarrd̶e kob̶eesii. Maud̶e jarasii:

—Mʉ Mechiu, bichi nama b̶uad̶a basirã, mʉ neewau biubai basii.

³³Jesusba María jẽaruu maud̶e judiorã chi mau ome neeped̶aad̶a sid̶a jẽaduu unusiid̶e ãchi kakua ãrea jirukaraa, kĩru kub̶uuba ĩyaabasii.11:33 Ãchi kakua. Waabenarãmaarã Jesús jirukaraasii ãchiba ijãad̶aabasiid̶eeba ichiba Lázaro chokae jiradubii. Waabenarãmaarã Jesús jirukaraasii nau druad̶e ẽbẽrarã biubadau, kakua kachirua nureabadau maud̶e kachirua waubadaud̶eeba.³⁴Maabae id̶isii:

—Mau ¿sama jau b̶usid̶ama?

Ãchiba panausid̶au:

—Dai mechiu, ichiad̶e wãd̶a.

³⁵Jesús jẽasii. ³⁶Maka b̶uud̶e judiorã aria panuuba jarasid̶au:

—Ichiásturu jãuba Lázaro saka kʉ̃ria b̶uasii.

³⁷Maamina waabenarã chi nureeba jarasid̶au:

—Nau dau pãriu nuree aribiabid̶aba ¿sakãe poyaa karibaabasma Lázaro biubiimaaba?

Jesusba Lázaro chokae jiradubid̶a

³⁸Jesús wabid̶a kĩru b̶uud̶e Lázaro mo chob̶ead̶e nub̶uped̶aad̶amaa neesii. Chi ed̶a wãbadau mooba jʉ̃a kub̶uasii. ³⁹Maud̶e Jesusba jarasii:

—Jãu mo ãyaa bʉrásturu.

Marta, chi biud̶a neekauba Jesusmaa jarasii:

—Mʉ Mechiu, jãu biud̶a ewari kimare baaruud̶eeba mikia kub̶uẽka.

⁴⁰Maamina Jesusba jarasii:

—¿Mʉʉba jaraabaska bichiba biawãra ijãaruubʉrã, Dachi Akõre chi mechiu nii unui?

⁴¹Maka b̶uud̶e ẽbẽrarãba chi mo ãyaa bʉraasid̶au. Maabae Jesusba ʉtaa ichiaped̶a jarasii:

—Chacha, mʉʉba bichimaa biꞌia jarai mʉʉba ʉtaa id̶id̶a ũrisiid̶eeba. ⁴²Mʉʉba kuitaa b̶uu bichiba mʉ bed̶ea ũri b̶uabarii, maamina mʉʉba nau jarasii naarã ẽbẽrarãba kuitaad̶amera bichiaburu mʉ bʉisii.

⁴³Maka jaraped̶a Jesusba jĩwa jarasii:

—¡Lázaro, awara neese!

⁴⁴Ara makʉd̶e Lázaro biu b̶uad̶a awara neesii. Ichi jua, chi jʉ̃rʉ wabid̶a paruba bʉra b̶uasii. Maud̶e ichi kĩedarr paruba bʉra b̶uasii. Maud̶e Jesusba jarasii:

—Enad̶aped̶a ida bʉ́isturu.

Judiorãba Jesús bead̶ai jʉrʉped̶aad̶a

Mateo 26:1-5; Marcos 14:1-2; Lucas 22:1-2

⁴⁵Ãrea judiorã María baara wãped̶aad̶arãba unusid̶au Jesusba waud̶a. Maud̶eeba ãchiba ijãasid̶au. ⁴⁶Maamina chi Jesusba waud̶a chi nuree fariseorãmaa jarad̶e wãsid̶au. ⁴⁷Maud̶eeba fariseorã maud̶e paare mechiurã ome araa ãbua imid̶ai jarasid̶au.11:47 Araa ãbua imid̶ai jarasid̶au. Kajuma bed̶ead̶e b̶ʉ kub̶uu: Concilio maebʉrã Consejo. Naka jarasid̶au:

—Dachiba ¿saka waud̶aima? Mauba ẽbẽrarãba ne poyaa waud̶akau ãrea wau b̶uu. ⁴⁸Ichi ida nibabiiduubʉrã jomaurãba ichid̶e ijãad̶ai. Maka Romad̶ebena kokoroarã imid̶aped̶a, ãchiba Dachi Akõre de mechiu ãrid̶ai maud̶e joma dachi judiorã sid̶a kenad̶ai.

⁴⁹Aria ab̶a Caifás abadau b̶uasii. Mau nau añod̶e paare mechiu basii. Mau Caifasba jarasii:

—¡Machi kʉ̃risiaswãe nuree! ⁵⁰Romad̶ebenarãba joma dachi judiorã bead̶ai kãyabãra biꞌia b̶uu ẽbẽra ab̶a jomaurã kakua biui.

⁵¹Caifasba ara ichi kʉ̃risiad̶eeba maka jarawẽa b̶uasii. Maumaarã ichi paare mechiu niid̶eeba Dachi Akõréburu ichimaa jarabisii Jesús joma judiorã kakua biui b̶uu. ⁵²Maamina ab̶aburu judiorã baita biubai basii, maumaarã joma Dachi Akõre warrarã nau iujãad̶e drua didiwaraacha nuree, ara puuru ab̶aud̶e duanui baita.11:52 Isaías 11:12; Jeremías 23:3; Miqueas 2:12.⁵³Paare mechiurãba bed̶ea deasid̶au mau ewarid̶eeba Jesús saka bead̶ai jʉrʉd̶ai.

⁵⁴Maud̶eeba Jesús judiorã tãed̶e ãrea nibaka basii, maumaarã Judead̶ebena ãyaa wãsii. Efraín puurud̶e ichi baara nibabadaurã baara b̶uad̶e wãsii. Mau puuru drua sirua wãꞌãe b̶uu kaita b̶uu.11:54 Efraín puuru Jerusalend̶eeba ewari ab̶a b̶uasii.

⁵⁵Judiorã Pascua ewari ʉ̃rʉ ba b̶uasii. Mau bari panabadau ewarid̶eeba puuruchad̶ebenarã Jerusalend̶aa wãsid̶au ãchiba waubadau kĩra wau panuud̶eeba Dachi Akõre daad̶e biꞌia nuread̶ai baita.11:55 Bari panabadau ewari waud̶ai naed̶e judiorãba ne waubachid̶au Dachi Akõre daad̶e biꞌia nuread̶ai baita. Ab̶a bid̶a ẽbẽra biud̶a wauruubʉrã, 7 ewari Dachi Akõre daad̶e kachirua b̶eebachii. Maud̶eeba ne waui b̶uasii. Maka wauwẽebʉrã bari panabadau ewari waukau b̶uasii. Números 19:16-22; 2 Crónicas 30:13-21.⁵⁶Mau ewarid̶e ẽbẽrarãba Jesús jʉrʉ nibasid̶au. Dachi Akõre de mechiu dud̶a ãbua panuud̶e id̶ibachid̶au: «Machimaarã ¿ichi nau kĩrajʉʉ bara b̶uabarii ewari waubadaud̶e neeibaaka?»

⁵⁷Maamina paare mechiurãba maud̶e fariseorãba jarasid̶au barikiuba Jesús neesii kuitaaduubʉrã jarad̶ai b̶uu ichi jidaud̶amera.

Mariaba kera Jesús jʉ̃rʉ ʉ̃rʉ ead̶a

Mateo 26:6-13; Marcos 14:3-9

¹Judiorã Pascua ewari neei bai baita wabid̶a 6 ewari b̶uud̶e Jesús Betania puurud̶aa wãsii Lázaro b̶uabariimaa. Mau Lázaro Jesusba chokae jiradubid̶a basii. ²Aria Jesusd̶e kĩrabad̶aped̶a ichimaa chiko bia kobisid̶au. Martaba dead̶aka b̶uasii maud̶e Lázaro waabenarã baara Jesús ome komaa b̶uasii. ³Maka panuud̶e Mariaba nardo keraara chi nejarr ãrea id̶ibadau b̶otia kʉrkabʉa nub̶uu adoeped̶a Jesús jʉ̃rʉd̶e easii.12:3 Kʉrkabʉa. Libra ab̶a maebʉrã medio litro maebʉrã 300 gramos. Maabae ichi bud̶aba poabisii. Mau keraba de joma tuwaa nub̶eesii. ⁴Maud̶e Jesús baara nibabarii ab̶a b̶uasii Judas Iscariote abadau. Judasba Jesús jidaubii b̶uasii. Mau Judasba jarasii:

⁵—Jãu kera chi nejarr ãrea id̶ibadau.12:5 Chi nejarr ãrea id̶ibadau. Griego bed̶ead̶e naka b̶ʉ kub̶uu: 300 denario wãyaa. Ẽbẽra ab̶a año ab̶a trajai b̶uasii mau chi nejarra adaui baita. ¿Sakãe jãu kera nedobʉibasma, chi nejarr barauwãe nureemaa dead̶akai baita?

⁶Maamina ichiba maka jaraabasii chi nejarr barauwãe nuree aid̶ai kʉ̃risia b̶uasiid̶eeba, maumaarã maka jarasii nechiruabariid̶eeba. Ãchi chi nejarra nubadau ũabisa ichiba uru b̶uabachii maamina maud̶ebena chiruabachii. ⁷Maud̶e Jesusba jarasii:

—Nau wẽra ida b̶use. Jãuba nau kera uru b̶uasii mʉ jau b̶ud̶ai ewari baita.12:7 Jãuba nau kera uru b̶uasii mʉ jau b̶ud̶ai ewari baita. Griego bed̶ead̶e mau chaarea b̶uu biꞌia ũrid̶amera.⁸Chi nejarr barauwãe nuree ewaricha machi tãed̶e panad̶ai, maamina mʉ machi baara ewaricha b̶uabai.

Lázaro bead̶ai baita bed̶ea deaped̶aad̶a

⁹Judiorã ãreaba Jesús Betania puurud̶e b̶uu kuitaasid̶aud̶eeba ichi ichiad̶e wãsid̶au. Mau awara Lázaro, Jesusba chokae jiradubid̶a sid̶a ichiad̶e wãsid̶au. ^10-11Lázaro chokae jiradud̶a kakua judiorã ãreaba paare mechiurã ida b̶ud̶aped̶a Jesusd̶e ijãasid̶au. Maud̶eeba paare mechiurã bed̶ea deasid̶au Lázaro sid̶a bead̶ai baita.

Jerusalend̶ebenarãba Jesús irsibiped̶aad̶a

Mateo 21:1-11; Marcos 11:1-11; Lucas 19:28-40

¹²Norema ẽbẽrarã ãrea kĩrajʉʉ bara b̶uabarii ewari waud̶ai baita Jerusalend̶aa neeped̶aad̶aba kuitaasid̶au Jesús Jerusalend̶e neeruu. ¹³Maud̶eeba ãchiba meme kiruu totod̶aped̶a ichi irsibid̶e wãsid̶au. Maabae jĩwa jarasid̶au:

«¡Ãrea biꞌia nii!12:13 ¡Ãrea biꞌia nii! Mau arameo bed̶ead̶e jarabadau «Hosanna». ¡Ãrea biꞌia nii chi Dachi Mechiu trʉ̃d̶eeba neeruu! ¡Biꞌia nii Israeld̶ebena Rey!»

¹⁴Maud̶e Jesusba mura cheke unusiid̶e mau ʉ̃rʉ atausii. Makasii Dachi Akõre bed̶ead̶e jara b̶uu kĩra:

¹⁵«Sión puurud̶ebenarã wapearã́sturu. Ichiásturu, machi Rey burro cheke ʉ̃rʉ neeruu».12:15 Jerusalén puuru Sión puuru ead̶e b̶uu. Zacarías 9:9; Isaías 40:9-10; Sofonías 3:14-17.

¹⁶Jesús baara nibabadaurãba mau unu panumina kuitaad̶aabasii. Maamina Jesús chokae jiraduped̶a bajãad̶aa wãd̶akáreburu kuitaasid̶au Dachi Akõre bed̶ead̶e ichi ʉ̃rʉbena naed̶e b̶ʉd̶a joma biawãra makasii.

¹⁷Jesusba Lázaro chi jau b̶ubadaumarebena awara uruba asiid̶e, mau chokae jiradubisiid̶e, ẽbẽrarã aria ãrea duanasid̶au. Mau maad̶akare ãchiba unuped̶aad̶a nebʉrʉbachid̶au. ¹⁸Jesusba mau ẽbẽrarãba ne poyaa waud̶akau waud̶a ãreaba ũrisid̶au. Maud̶eeba ichi irsibid̶e wãsid̶au. ¹⁹Maud̶e fariseorã chiya berrea bara b̶eesii: «¡Ichiásturu! Joma ichi kaad̶e wãaduu. Maud̶eeba chi dachiba ichi ʉ̃rʉbena kʉ̃risiaped̶aad̶a mau poyaa waud̶aabai».

Jesusba ichi bead̶ai jarad̶a

²⁰Mau kĩrajʉʉ bara b̶uabarii ewari waumaa panuud̶e chi nuree griegorã Dachi Akõremaa biꞌia berread̶ai baita Jerusalend̶e neesid̶au. ²¹Maarã Felipemaa wãsid̶au. Mau Felipe Galilead̶e b̶uu puuru Betsaidad̶ebena basii. Ãchiba Felipemaa jarasid̶au:

—Daiba Jesús unu kʉ̃ria panuu.

²²Maud̶eeba Felipeba Andresmaa jarad̶e wãsii. Maabae ãchiba Jesusmaa jarasid̶au. ²³Maud̶e Jesusba jarasii:

—Chi ewari basii. Dachi Akõreba mʉ, chi Ẽbẽra Ba B̶uad̶a chi Mechiu b̶ui. ²⁴Mʉʉba biawãra jaraaruu: trigo taa iorod̶e b̶aeruuwãebʉrã maud̶e biuruubʉrã, istu b̶eebarii. Maamina mau taa biud̶a kĩra iorod̶e b̶eeruubʉrã, tonoped̶a ãrea chaubarii. ²⁵Ara mau kĩra ab̶a nau iujãad̶e ara ichi biꞌia b̶uai kʉ̃risia b̶uubʉrã, mau poyaabai. Maamina nau iujãad̶e biꞌia chokae b̶uai kʉ̃riawẽebʉrã, mau Dachi Akõre ome ewaricha chokae b̶uai. ²⁶Barikia mʉ baita bari trajabarii ba kʉ̃ria b̶uubʉrã, mʉ baara nibai b̶uu. Mʉ wãaruumaa, mʉ baita bari trajabarii sid̶a wãi. Barikiu mʉ baita bari trajabariibʉrã, mʉ Chachaba mau chi mechiu b̶ui.

²⁷»Biawãra mʉ ãrea kĩra nomaa b̶uu. ¿Mʉʉba kãare jaraima? “¿Chacha, mʉ biꞌiwãe b̶uai b̶uud̶ebena karibase aika”? Maka jaraabai mʉ mau kakua need̶ad̶eeba. ²⁸Maumaarã jaraaruu: Chacha, mauba jomaurãmaa kuitaabiáse bichi chi Mechiu nii.

Ara makʉd̶e ẽbẽrarã aria panuuba bed̶ea bajãad̶ebena ũrisid̶au. Mau bed̶eaba jarasii: «Mʉʉba naed̶e kuitaabiasii mʉ chi Mechiu nii maud̶e waya kuitaabiai».

²⁹Mau bed̶ea ũrisid̶aud̶e chi nureerãba jarasid̶au bã tosii. Maud̶e chi nureerãba jarasid̶au:

—Angelba Jesusmaa berreasii.

³⁰Maud̶e Jesusba jarasii:

—Mau bed̶ea mʉ baitawãe basii. Maumaarã machi baita basii. ³¹Jãabae Dachi Akõreba kuitaabiaruu nau iujãad̶ebenarãba kachirua wau panabadau. Jãabae Dachi Akõreba poyaa duabʉiruu chi nau iujãad̶ebenarã rey, chi jʉbawãe nii. ³²Mʉ ʉtʉ jirab̶uuduud̶e mʉʉba jomaurã adooi mʉʉd̶e ijãad̶amera.

³³Maka jarasii ichi cruzd̶e jirab̶u bead̶ai kuitaabiai baita. ³⁴Ẽbẽrarã aria panuuba Jesusmaa jarasid̶au:

—Moisesba b̶ʉd̶ad̶eeba daiba kuitaa panuu Dachi Akõreba Dachi Karibabarii deai jarad̶a biukaraa nibai. Bichiba ¿saka jara b̶uma chi Ẽbẽra Ba B̶uad̶a ʉtʉ jirab̶ud̶ai? Mau chi Ẽbẽra Ba B̶uad̶a ¿kaima?

³⁵Jesusba jarasii:

—Nau ʉ̃d̶aa machi baara ãrea b̶uabai. Maud̶eeba ʉ̃d̶aad̶e nibásturu ichi machi baara b̶uumisa, pãriud̶e panad̶aabayua. Chi pãriud̶e nibabarii kawakau samaa wãaruu. ³⁶Ʉ̃d̶aa machi tãed̶e uru panuumisa mau ʉ̃d̶aad̶e ijã́sturu ẽbẽrarã ʉ̃d̶aad̶ebena nuread̶amera.

Mau bed̶ea jarasiid̶e Jesús wãped̶a mirusii.

Judiorãba wabid̶a Jesusd̶e ijãad̶aabad̶a

³⁷Jesusba ẽbẽrarãba ne poyaa waud̶akau ẽbẽrarã ãrea daad̶e wausmina ãchiba wabid̶a ijãad̶aabasii. ³⁸Dachi Akõre baita berreabarii Isaiasba jarad̶a kĩra biawãra makasii. Naka jarasii:

«Dai Mechiu, ¿daiba jaraped̶aad̶a kaiba ijãasma?

¿Kaimaa bichi poyaabarii kuitaabisma?»12:38 Isaías 53:1.

³⁹Maud̶eeba ãchiba poyaa ijãad̶aabasii, Isaiasba jarad̶a kĩra:

⁴⁰«Mʉʉba ãchi dau pãriu nuree kĩra b̶usii maud̶e sõ chaarea b̶usii

ãchi dauba unu panumina kuitaarãad̶amera maud̶e ũri panumina sõd̶eeba ũrirãad̶amera.

Maka panuud̶eeba mʉʉmaa need̶akau mʉʉba aribiabiamera».12:40 Isaías 6:10.

⁴¹Isaiasba ichi kartad̶e maka b̶ʉsii Jesús chi Mechiu nii unusiid̶eeba.12:41 Chi Mechiu nii unusiid̶eeba. Juan kartad̶e mau jara b̶uu Jesús cruzd̶e biuped̶a jiradusii. Maud̶e mau ʉ̃rʉbena berreasii.12:41 Isaías 6:1-5.

⁴²Isaiasba maka b̶ʉsmina ãrea judiorã maud̶e paare mechiurãba Jesusd̶e ijãasid̶au. Maamina waabenarãmaa mau jarad̶aabasii. Wapea panasid̶au fariseorãba ãchi araa ãbua imibadau ded̶ebena duabʉid̶ai. ⁴³Dachi Akõreba ãchi ʉ̃rʉbena biꞌia berreai audeara mau judiorãba kʉ̃ria panasid̶au ẽbẽrarãba ãchi ʉ̃rʉbena biꞌia berread̶ai.

Dachi Akõreba Jesús berread̶aba ẽbẽrarã kastikai

⁴⁴Maabae Jesusba jĩwa jarasii: «Chi mʉʉd̶e ijãa b̶uuba mʉ bʉid̶a sid̶a ijãa b̶uu. ⁴⁵Chi unu b̶uuba chi mʉ bʉid̶a sid̶a unu b̶uu. ⁴⁶Mʉ nau iujãad̶aa ʉ̃d̶aa kĩra neesii chi mʉʉd̶e ijãaduu pãriud̶e nurearãad̶amera. ⁴⁷Ab̶aba mʉ bed̶ea ũriped̶a ijãawẽebʉrã, mʉʉba ichi kastikaabai, mʉ nau iujãad̶e nuree kastikai baita neewẽed̶eeba. Mʉ nau iujãad̶e nuree karibai baita neesii. ⁴⁸Maamina chi mʉ ida b̶uu b̶uuba, mʉ bed̶ea ũri kʉ̃riawẽeba, mau Dachi Akõréburu kastikai. Kaad̶ebena ewarid̶e Dachi Akõreba kuitaabii mau mʉʉba jarad̶a bed̶ea ijãabasiid̶eeba. ⁴⁹Mʉ ara michid̶eeba berreakau. Mʉ Chacha, chi mʉ bʉid̶aba mʉʉmaa jarasii kãare jarai b̶uu maud̶e saka mau bed̶ea jarai b̶uu sid̶a. ⁵⁰Mʉʉba kuitaa b̶uu mau waubi b̶uu bed̶eaba ẽbẽrarã ichi baara ewaricha chokae duanabiai. Maud̶eeba mʉ Chachaba mʉʉmaa jarad̶a kĩra mʉʉba berrea b̶uu».

Jesusba ichi baara nibabadaurã jʉ̃rʉ jeraad̶a

¹Pascua ewari bai naed̶e Jesusba kuitaa b̶uasii ichi ewari neeruu. Kuitaasii nau iujãa b̶ʉiped̶a ichi Akõremaa wãi. Jesusba joma ichid̶irã nau iujãad̶e nuree ãrea kʉ̃ria b̶uasiid̶eeba ichiba mau kʉ̃ria unubiasii ab̶a ichi biuruu ewarid̶aa.

²Ẽsabud̶aa baaruud̶e komaa panasid̶au. Mau naed̶e jʉbawãe niiba Simón warr Judas Iscariote sõd̶e kʉ̃risiabisii Jesús jidaubii baita. ³Jesusba kuitaa b̶uasii ichi Akõreba ne joma ichi juad̶e b̶usii, maud̶e kuitaa b̶uasii ichi Dachi Akõred̶ebena need̶a maud̶e waya ichimaa wãi b̶uu. ⁴Maamina ãchi kewaraa komaa panuud̶e jiraduped̶a ichiba anab̶ari jʉ̃barii ẽesii. Maabae kakua poabarii adauped̶a kʉrrd̶e jʉ̃sii. ⁵Kuurud̶e bania jui adauped̶a ichi baara nibabadaurã jʉ̃rʉ jeraasii. Ãchi ab̶aab̶aa jeraaped̶a ãchi jʉ̃rʉ maud̶e chi kakua paru poabibariiba poakuasii.

⁶Jesusba Simón Pedromaa neeruud̶e Pedroba jarasii:

—Mʉ Mechiu, ¿bichiba mʉ jʉ̃rʉ jeraaruka?

⁷Jesusba panausii:

—Mʉʉba wau b̶uu bichiba anakʉd̶e kuitaawẽebʉrã maamina jãad̶akare kuitaai.

⁸Maamina Pedroba jarasii:

—Mʉ jʉ̃rʉ bichiba ewari ab̶a bid̶a jeraabai.

Jesusba jarasii:

—Mʉʉba bichi jʉ̃rʉ jeraawẽebʉrã, bichi mʉʉd̶ewãe.

⁹Maud̶eeba Simón Pedroba jarasii:

—Maka b̶uubʉrã, mʉ Mechiu, mʉ jʉ̃rʉ́turu jeraarã́se, ¡maumaarã mʉ jua maud̶e mʉ boro sid̶a jeraase!

¹⁰Maud̶eeba Jesusba jarasii:

—Ẽbẽra kuid̶akare ichi jʉ̃rʉ waa jeraabai b̶uu ichi kakua joma biꞌia jeraasiid̶eeba. Machi joma jeraa nuree, maamina ab̶a jeraawẽa b̶uu.

¹¹Jesusba kuitaa b̶uasii kaiba ichi jidaubii b̶uu. Maud̶eeba jarasii: «Ab̶a jeraawẽa b̶uu».

¹²Ãchi jʉ̃rʉ jeraakuasiid̶e Jesusba waya ichi anab̶ari jʉ̃barii jʉ̃sii. Maabae waya kobadaumare akʉ b̶eeped̶a jarasii:

—¿Kuitaasid̶aka sakãe mʉʉba machi jʉ̃rʉ jeraasii? ¹³Machiba mʉʉmaa “mʉ Jaradeabarii” abadau maud̶e “mʉ Mechiu abadau”. Biawãra arakʉd̶e jara panuu, mʉ maka niid̶eeba. ¹⁴Mʉ chi Mechiuba maud̶e machimaa Jaradeabariiba, machi jʉ̃rʉ jeraasiid̶eeba machia bid̶a chiya jʉ̃rʉ jeraad̶ai panuu. ¹⁵Mʉʉba jãka unubiasii machi chiya aid̶ad̶amera. ¹⁶Mʉʉba biawãra jaraaruu: Chi chibari baita bari trajabarii ab̶a bid̶a ichi chibari audeara mechiu niiwãe. Chi ichi bʉid̶a chi bʉid̶a audeara mechiu niiwãe. Bari trajabariiba waubarii kĩra mʉʉba waubariid̶eeba, machia bid̶a ara mau kĩra waud̶ai panuu. ¹⁷¿Ũrisid̶aka? Maka wauduubʉrã biawãra biꞌia panad̶ai.

¹⁸»Mʉʉba mau joma machimaa jarawẽa b̶uu, mʉʉba jʉrʉ adaud̶arã saka nuree kuitaa b̶uud̶eeba. Dachi Akõre bed̶ead̶e b̶ʉ kub̶uu kĩra biawãra makamera mʉʉba jaraaruu: “Chi mʉ baara ko b̶uad̶a mʉ kĩramaa b̶eesii”.13:18 Salmos 41:9.¹⁹Mʉʉba anakʉd̶e mau jaramaa b̶uu mau makai naed̶e, biawãra makaaruud̶e machiba Mʉʉd̶e ijãad̶amera.13:19 Isaías 43:10.²⁰Mʉʉba biawãra jaraaruu: mʉʉba bʉiruu ab̶auba biꞌia irsibiiruubʉrã mʉ biꞌia irsibiiruu. Maud̶e mʉ biꞌia irsibiiruuba mʉ bʉid̶a biꞌia irsibiiruu».

Jesusba Judas ʉ̃rʉbena jarad̶a

Mateo 26:20-25; Marcos 14:17-21; Lucas 22:21-23

²¹Maka jaraped̶a Jesús ãrea kĩra nomaa b̶eesii. Maabae jarasii:

—Mʉʉba biawãra jaraaruu: ab̶a machid̶ebenaba mʉ jidaubii.

²²Ichi baara nibabadaurã ãchi chiya ichia bara b̶eesii, Jesusba sãu jarad̶a adua panuud̶eeba. ²³Maarãd̶ebena ab̶a chi Jesusba ãrea kʉ̃riabarii, ichi jãkaa akʉ b̶uasii.13:23 Ichi jãkaa akʉ b̶uasii. Griego bed̶ead̶e b̶ʉ kub̶uu: Jesús pechumaa sĩu akʉ kub̶uu. Judiorã Pascua ewarid̶e maka kobachid̶au. Ab̶a chi Jesusba ãrea kʉ̃riabarii. Juanba ara ichi maka jarabachii.²⁴Simón Pedroba daud̶uba jara kub̶uuba, maumaa jarasii Jesusmaa kai ʉ̃rʉbena jara b̶uu id̶imera. ²⁵Maabae chi Jesús jãkaa akʉ b̶uuba id̶isii:

—Dai Mechiu, ¿kaiba bichi jidaubiima?

²⁶Jesusba panausii:

—Mʉʉba pan paratud̶e sũraped̶a dearuu, mau ichibʉ.

Ara makʉd̶e pan sũraped̶a Jesusba Simón Iscariote warr Judasmaa deasii. ²⁷Judasba mau kod̶akare Satanás juad̶e b̶eesii. Maud̶e Jesusba Judasmaa jarasii:

—Bichiba waui b̶uu isa wause.

²⁸Maamina chi komaa panuuba kuitaad̶aabasii Jesusba sakãe maka jarasii. ²⁹Judasba ãchi chi nejarra pebadau ũabisa uru b̶uabachii. Maud̶eeba waabenarãba kʉ̃risiasid̶au Jesusba chi bari panabadau ewari baita nedobʉimera jarasii maebʉrã chi nejarr barauwãe nureerãmaa dead̶e wãmera. ³⁰Judasba chi pan adauped̶a ara makʉd̶e awara wãsii. Mau ẽsabud̶aa ba b̶uasii.

Jesusba waubi b̶uu bed̶ea wid̶i

³¹Judas wãd̶akare Jesusba jarasii:

—Jãabáeburu Dachi Akõreba unubiai mʉ, chi Ẽbẽra Ba B̶uad̶a chi mechiu nii. Mau awara mʉʉd̶eeba Dachi Akõreba unubii ichi chi mechiu nii. ³²Mʉ, chi Ẽbẽra Ba B̶uad̶aba Dachi Akõre chi mechiu nii unubiiruu, Dachi Akõreba mʉ arab̶aud̶e chi mechiu unubii. Ichiba kãꞌãabariwãed̶e mau unubii. ³³Machi mʉ warrarãd̶eeba mʉʉba jaraaruu: mʉ machi baara kãꞌãa b̶uabai. Mʉʉba judiorã mechiurãmaa jarad̶a kĩra jãabae anakʉd̶e machimaa jaraaruu: machiba mʉ jʉrʉd̶ai, maamina mʉ wãaruumaa poyaa wãd̶aabai.13:33 Juan 7:33; 8:21.

³⁴»Mʉʉba waubi b̶uu bed̶ea wid̶i machimaa jaraaruu: ãrea kʉ̃ria nureásturu.13:34 Mʉʉba waubi b̶uu bed̶ea wid̶i. Dachi Akõreba waubi b̶uu bed̶ea chi chõra unubadau: Levítico 19:18; Deuteronomio 6:5. Mʉʉba machi ãrea kʉ̃ria b̶uu kĩra machi sid̶a arab̶aud̶e chiya kʉ̃riásturu. ³⁵Maka chiya kʉ̃ria duanuubʉrã, jomaurãba kuitaad̶ai machi mʉ baara nibabadau».

Jesusba jarad̶a Pedroba ichi unukau ai

Mateo 26:31-35; Marcos 14:27-31; Lucas 22:31-34

³⁶Simón Pedroba Jesusmaa id̶isii:

—Dai Mechiu, ¿bichi samaa wãima?

Maud̶e Jesusba panausii:

—Anakʉd̶e mʉ wãaruumaa bichi poyaa wãabai, maamina jãad̶akare mʉ kaad̶e wãi.

³⁷Pedroba id̶isii:

—Dai Mechiu, ¿sakãe mʉ bichi baara poyaa wãabaima? Mʉ bichi baita biui b̶uu.

³⁸Maud̶e Jesusba jarasii:

—¿Bichi mʉ baita biawãra biui b̶uka? Mʉʉba biawãra jaraaruu: eterr birui naed̶e bichiba b̶es õbea mʉ unukau ai.

Jesús chi dachi Akõremaa wãd̶ai o

¹»Jirukaraa nurearã́sturu. Chi Dachi Akõreba wauruud̶e maud̶e chi mʉʉba wauruud̶e ijã́sturu. ²Mʉ Chacha b̶uumare chi b̶uai ãrea barau. Mʉ machi naa wãi machi baita biꞌia wauyua. Makawãe basirã mʉʉba jaraabai basii. ³Mʉ mau biꞌia waud̶e wãaruubʉrã, waya neei machi uad̶oi baita mʉ ome nuread̶amera. ⁴Machiba kuitaa panuu mʉ samaa wãaruu. Chi o sid̶a kuitaa panuu.

⁵Maamina Tomasba jarasii:

—Dai Mechiu, adua panuu bichi samaa wãaruu. ¿Saka mau o kuitaad̶aima?

⁶Maud̶e Jesusba jarasii:

—Mau o mʉʉbʉ. Mʉʉd̶eeba Dachi Akõre biawãra unu panuu maud̶e chokae b̶uai uru panuu. Mʉwãebʉrã ab̶a bid̶a mʉ Chachamaa poyaa neebai.

⁷Machiba mʉ biawãra unu panuubʉrã, mʉ Chacha sid̶a unu panuu.14:7 Machiba mʉ biawãra unu panuubʉrã, mʉ Chacha sid̶a unu panuu. Griego bed̶ead̶e chi b̶ee kartad̶e b̶ʉ kub̶uu: Machiba mʉ biawãra unu panad̶a basirã, mʉ Chacha sid̶a unu panad̶ai basii. Jãabae machiba ichi kuitaa panuu unu panuud̶eeba.

⁸Maud̶e Felipeba ichimaa jarasii:

—Dai Mechiu, Dachi Akõre daimaa unubiáse. Mauba biꞌia b̶uaika.

⁹Maud̶e Jesusba jarasii:

—Felipe, mʉ ãrea baaruu machi baara b̶uu. Bichiba mʉ ¿wabid̶a unuwẽa b̶uka? Chi mʉ unubariiba mʉ Chacha sid̶a unubarii. Bichiba ¿saka jara b̶uu “Dachi Akõre daimaa unubiáse”? ¹⁰¿Bichiba ijãawẽa b̶uka mʉ, mʉ Chacha ome b̶uu maud̶e mʉ Chacha mʉ ome b̶uu? Mʉʉba berrea b̶uu ara mʉʉd̶eeba berreakau. Maumaarã mʉ Chacha mʉ ome b̶uuba mʉʉd̶eeba berrea b̶uu. Biawãra mʉʉd̶eeba ne joma waubarii. ¹¹Ijã́sturu mʉ, mʉ Chacha ome b̶uu maud̶e mʉ Chacha mʉ ome b̶uu. Mʉʉba maka jara b̶uu machiba ijãad̶awẽa panuubʉrã, mʉʉba wau b̶uu kakua ijã́sturu. ¹²Mʉʉba biawãra jaraaruu: barikiuba mʉʉd̶e ijãa b̶uubʉrã, mʉʉba wau b̶uu ichiba waui. Biawãra mʉʉba wau b̶uu audeara ichiba waui, mʉ, mʉ Chachamaa b̶uad̶e wãid̶eeba. ¹³Maka machiba mʉʉd̶e ijãa panuud̶eeba mʉ trʉ̃d̶eeba id̶iiduu mʉʉba joma waui. Maka mʉʉd̶eeba jomaurãba mʉ Chacha jomaurã audeara mechiu nii unud̶ai. ¹⁴Biawãra machiba mʉʉd̶e ijãa panuud̶eeba joma mʉ trʉ̃d̶eeba id̶iiduu mʉʉba waui.

Jesusba Dachi Akõre Jauri deai jarad̶a

¹⁵»Machiba mʉ biawãra kʉ̃ria panuubʉrã, mʉ waubi b̶uu bed̶ea ijãa panad̶ai.14:15 Ijãa panad̶ai. Griego bed̶ead̶e chi b̶ee kartad̶e b̶ʉ kub̶uu: ijãa panásturu.¹⁶Maud̶eeba mʉ Chachamaa id̶ii machi Karibabarii bʉimera. Mau machi baara ewaricha b̶uai. ¹⁷Ichi Dachi Akõre Jauribʉ. Ichiba Dachi Akõre biawãra kuitaabiabarii. Nau iujãad̶ebenarãba ichi poyaa adaud̶aabai, unud̶akaud̶eeba maud̶e adua panuud̶eeba. Maud̶e machiaburu ichi kuitaa panuu, machi baara b̶uud̶eeba maud̶e machi sõd̶e b̶uud̶eeba.

¹⁸»Mʉʉba machi jẽramara kĩra b̶ʉiwẽe. Mʉ waya machimaa neei. ¹⁹Kãꞌãabariwãed̶e ẽbẽrarã nau iujãad̶ebenarãba mʉ waa unud̶aabai maamina machiba mʉ unud̶ai. Mʉʉba chokae b̶uai uru b̶uud̶eeba, machia bid̶a chokae b̶uai uru nuread̶ai. ²⁰Mʉ neeruud̶e machiba kuitaad̶ai mʉ, mʉ Chacha ome b̶uu, machi mʉ baara panuu maud̶e mʉ machi baara b̶uu. ²¹Chi mʉ waubi b̶uu bed̶ea ũriped̶a wau b̶uuba mʉ kʉ̃ria b̶uu. Ab̶auba mʉ kʉ̃ria b̶uubʉrã, mʉ Chachaba mau kʉ̃ria b̶uai. Maud̶e mʉa bid̶a mau kʉ̃ria b̶uai maud̶e mʉ ichimaa unubii.

²²Maabae chi ab̶abena Judas, Iscariotewãeba Jesusmaa id̶isii:

—Dai Mechiu, ¿sakãe bichi daimaa unubiaima maamina nau iujãad̶ebenarãmaa unubiabaima?

²³Jesusba panausii:

—Chi mʉ kʉ̃ria b̶uuba mʉ bed̶ea wau b̶uai. Maud̶e mʉ Chachaba mau kʉ̃ria b̶uai. Maabae dai ichimaa need̶ai ichi baara panad̶ai baita. ²⁴Chi mʉ kʉ̃riawẽa b̶uuba mʉ bed̶ea waukau. Chi machiba ũri panuu bed̶ea mʉʉd̶ewãe, maumaarã mʉ Chacha, chi mʉ bʉid̶ad̶e.

²⁵»Mau mʉʉba machimaa jara b̶uu mʉ wabid̶a machi baara b̶uud̶eed̶e. ²⁶Maamina mʉ Chacha mʉ trʉ̃d̶eeba ichi Jauri bʉi machi Aid̶abarii b̶uamera. Dachi Akõre Jauriba ne joma machimaa jaradeai. Ichiba mʉʉba jarad̶a machimaa joma kĩrababiai.

²⁷»Mʉʉba machi sõd̶e jirukaraayuwãe duanubiai. Maamina mʉʉba makaabai, chi nau iujãad̶ebenarãba makabadau kĩra. Maud̶eeba ãrea jirukaraarã́sturu. Wapearã́sturu. ²⁸Mʉʉba machimaa jarasii mʉ wãaruu maud̶e waya machi baara b̶uad̶e neei.14:28 Juan 14:3,18. Machiba mʉ biawãra kʉ̃ria panasirã kĩrajʉʉd̶ai basii mʉ Chachamaa wãaruu kakua. Ichi mʉ audeara chi mechiu niid̶eeba mʉ waya b̶ui mʉ naed̶e b̶uad̶amaa. ²⁹Mʉʉba mau jara b̶uu makai naed̶e, biawãra makaaruud̶e machiba ijãad̶amera.

³⁰»Mʉ machi baara ãrea berreawẽe, nau iujãad̶ebena rey neeruud̶eeba. Mauba mʉ ome poyaakau. ³¹Maka mʉ Chachaba waubi b̶uu mʉʉba waui. Maka nau iujãad̶ebenarãba kuitaad̶ai mʉʉba mʉ Chacha ãrea kʉ̃ria b̶uu.

»Jiradústuru. Wãuríduru.

Jesús uva bakuru biawãra nii

¹»Mʉ chi uva bakuru biawãrabʉ.15:1 Antiguo Testamentod̶e jara b̶uu Dachi Akõreba Israel uva bakuru kĩra uusii, maamina ichiba kʉ̃ria b̶uad̶a kĩra ãchiba waud̶aabasii. Salmos 80:8-16; Isaías 5:1-7; Jeremías 2:21; Ezequiel 15:1-8; 19:10-14; Oseas 10:1. Maamina nau Juan 15:1d̶e jara b̶uu Jesusba wau b̶uu Dachi Akõreba kʉ̃ria b̶uu kĩra. Maud̶eeba jara b̶uu «Mʉ uva bakuru biawãrabʉ». Mʉ Chacha mau nubariibʉ. ²Chi mʉ bakuru jua chaud̶akau ichiba joma tarikuai, maamina chi bakuru jua chaubadau kauwa tarikuabarii aude chaud̶amera. ³Mʉ bed̶ea ijãabadaud̶eeba machi chi bakuru jua kauwa tarikuad̶a kĩra nuree.15:3 Juan 13:10.⁴Mʉ baara nureásturu mʉ machi baara nii kĩra. Bakuru jua chi karr jidauwẽa b̶uubʉrã ara istu poyaa chaukau. Ara mau kĩra machi mʉ baara nureewãebʉrã Dachi Akõreba kʉ̃ria b̶uu poyaa waud̶aabai.15:4 Dachi Akõreba kʉ̃ria b̶uu poyaa waud̶aabai. Griego bed̶ead̶e naka b̶ʉ kub̶uu: chaud̶aabai.

⁵»Mʉ uva bakurubʉ. Machi mʉ bakuru juabʉ. Chi mʉ baara nuree Dachi Akõreba kʉ̃ria b̶uu ãrea waud̶ai, mʉ machi baara niid̶eeba. Machiba mʉʉswãe Dachi Akõre baita poyaa waud̶aabai. ⁶Chi mʉ baara b̶uuwãe mʉ Chachaba ãyaa jirakuai bakuru jua chaukau kĩra. Mau bakuru jua poaruud̶e dachiba araa ped̶aped̶a baabadau.

⁷»Machi mʉ baara nureebʉrã, mʉ bed̶ea ijãa paneeduubʉrã, id̶ísturu joma machiba kʉ̃riaduu. Mau mʉʉba deai. ⁸Machi Dachi Akõreba kʉ̃ria b̶uu ãrea wauduubʉrã unubid̶ai biawãra mʉ baara nibabadau. Maka unubid̶ai mʉ Chacha chi mechiu nii. ⁹Mʉʉba machi kʉ̃ria b̶uu mʉ Chachaba mʉ kʉ̃ria b̶uu kĩra. Mʉʉmaa ida kʉ̃riabi nureásturu. ¹⁰Mʉʉba waubi b̶uu bed̶ea ijãaduubʉrã, chi mʉʉba kʉ̃ria ua b̶uuba nuread̶ai. Ara mau kĩra mʉ Chachaba waubi b̶uu bed̶ea ijãabariid̶eeba chi ichiba kʉ̃ria ua b̶uuba nuread̶ai.

¹¹»Joma mau mʉʉba jara b̶uu, machi mʉ baara ãrea kĩrajʉʉ nuread̶amera. ¹²Mʉʉba waubi b̶uu bed̶ea naubʉ: machi chiya ãrea kʉ̃riásturu mʉʉba machi ãrea kʉ̃ria b̶uu kĩra. ¹³Ẽbẽra ichi kõpaero karibai baita biuruubʉrã, ab̶au bid̶a mau audeara poyaa kʉ̃ria b̶uabai. ¹⁴Mʉʉba waubi b̶uu bed̶ea machiba ijãaduubʉrã machi mʉ kõpaerorãbʉ. ¹⁵Mʉʉba machi makaa mʉ baita bari trajabadaurã awẽe. Chi chibari baita bari trajabariiba ichi chibariba waui kʉ̃risia b̶uu adua b̶uu. Mʉʉba machi mʉ kõpaerorã ai. Mʉʉba machimaa kuitaabiasii joma mʉ Chachad̶ebena ũrid̶a. ¹⁶Machiba mʉ jʉrʉ adaud̶aabasii. Mʉaburu machi jʉrʉ adausii. Bakuru jõ b̶eraakau chaubarii kĩra, mʉʉba machi b̶usii wãd̶aped̶a biꞌia waud̶amera. Mʉʉba machi jʉrʉ adausiid̶eeba machiba mʉ Chachamaa mʉ trʉ̃d̶eeba id̶iiduu ichiba deai. ¹⁷Waya mʉʉba machimaa jaraaruu: Chiya kʉ̃riásturu.

Nau iujãad̶ebenarãba Jesús kĩramaabadau chi ichid̶irã baara

¹⁸»Nau iujãad̶ebenarãba machi kĩramaa panuubʉrã, kuitásturu maarãba naa mʉ kĩramaasid̶au. ¹⁹Machi nau iujãad̶ebenarã basirã maarãba machi kʉ̃riad̶ai basii ãchid̶ebenad̶eeba. Maamina mʉʉba machi nau iujãad̶ebena adoesii ãchi diware nuread̶amera. Maud̶eeba machi kĩramaabadau. ²⁰Kĩrabásturu mʉʉba nau jarad̶a: “Chi chibari baita bari trajabarii ab̶a bid̶a ichi chibari audeara mechiu niiwãe”.15:20 Juan 13:16. Mauba jara b̶uu ẽbẽrarãba mʉ bed̶ea wau panuubʉrã, machi bed̶ea sid̶a waud̶ai. Maamina ãchiba mʉ kachirua waud̶ai baita wãraa panuubʉrã, machi sid̶a kachirua waud̶ai baita wãraad̶ai. ²¹Machi mʉ kakua maka waud̶ai ãchiba chi mʉ Bʉid̶a adua panuud̶eeba.

²²»Mʉʉba ãchimaa jarad̶e need̶awãe basirã ãchi kachirua wauped̶aad̶a kakua nebʉrad̶e nuread̶aabai basii. Maamina mʉ bed̶ea ũrisid̶aud̶eeba, ãchiba kachirua wau panuu kakua mau adua panasii ad̶ai. ²³Ab̶auba mʉ kĩramaa b̶uubʉrã mʉ Chacha sid̶a kĩramaa b̶uu. ²⁴Mʉʉba ãchi daad̶e ẽbẽrarãba ne poyaa waud̶akau waud̶awãe basirã, ãchiba kachirua wauped̶aad̶a kakua nebʉrad̶e nuread̶aabai basii. Maamina mʉʉba waud̶a ãchiba unusid̶amina mʉ, mʉ Chacha sid̶a kĩramaa panuu. ²⁵Maka panuu ãchi leyd̶e jara b̶uu kĩra. Naka jara b̶uu: “Ãchi kʉ̃riaba mʉ kĩramaabachid̶au”.15:25 Salmos 35:19; 69:4.

²⁶»Dachi Akõre Jauri, chi machi Aid̶abarii neei. Mauba biawãra bed̶ea jarabarii. Mʉʉba mau mʉ Chacha b̶uabariimarebena bʉisiid̶e mauba mʉ ʉ̃rʉbena machimaa berreai. ²⁷Machia bid̶a mʉ ʉ̃rʉbena berread̶ai, machi arab̶aed̶eed̶e mʉ baara panuud̶eeba.

¹»Mʉʉba joma mau machimaa jara b̶uu mʉʉd̶e ijãa panuu ida b̶urãad̶amera. ²Judiorãba machi ãchi judiorã araa ãbua imibadau ded̶ebena duabʉikad̶ai. Mau awara machi bead̶ai ewari neei. Machi beaduud̶e ãchiba kʉ̃risiad̶ai “Dachi Akõreba kʉ̃ria b̶uu wau panuu”. ³Maka waud̶ai mʉ Chacha maud̶e mʉ unud̶akaud̶eeba. ⁴Maamina mʉʉba joma mau machimaa jarakuaruu, mau ewari neeruud̶e mʉʉba jarad̶a kĩrabad̶aped̶a perawẽa nuread̶amera.

Dachi Akõre Jauriba wau b̶uu ʉ̃rʉbena

»Mʉʉba naed̶e machimaa mau jaraabasii, machi baara b̶uasiid̶eeba. ⁵Maamina mʉ, chi mʉ bʉid̶amaa wãi. Maamina ab̶a machid̶ebenaba mau ʉ̃rʉbena mʉʉmaa id̶iwẽa b̶uu. ⁶Maumaarã machi kĩra nomaa panuu mʉ wãaruu asiid̶eeba. ⁷Mʉʉba biawãra jaraaruu: machi baita biꞌia b̶uu mʉ wãi. Mʉ wãwẽebʉrã machi Aid̶abarii neebai. Maamina mʉ wãaruubʉrã chi mau machimaa bʉii. ⁸Dachi Akõre Jauri neeruud̶e nau iujãad̶ebenarãmaa kuitaabiai kai chi kachirua waubarii, kai chi jipa nii maud̶e kai nebʉra wauped̶a nii. Kuitaabiai ãchiba joma mau arakʉd̶e kʉ̃risiad̶awẽa panuu. ⁹Dachi Akõre Jauriba ãchimaa kuitaabiai mʉ bed̶ea ijãad̶akaud̶eeba kachirua waubadau. ¹⁰Kuitaabiai mʉ jipa nii mʉ Chachamaa wãaruud̶eeba. Maud̶e machiba mʉ makaa unud̶aabai. ¹¹Maud̶e Dachi Akõre Jauriba kuitaabiai nau iujãad̶ebenarã nebʉrad̶e panuu, Dachi Akõreba nau iujãad̶ebena rey nebʉra bara b̶uu asiid̶eeba.16:11 Juan 7:21-24; 8:42-47; 12:31.

¹²»Mʉʉba wabid̶a ne ãrea machimaa jara kʉ̃ria b̶uu. Mau machiba anakʉd̶e joma poyaa kauwa ũrid̶aabai. ¹³Maamina Dachi Akõre Jauriba biawãra bed̶ea kuitaabiabariid̶eeba ichi neeruud̶e machimaa jaradeai chi biawãra bed̶ea Dachi Akõred̶eeba nee b̶uu joma kuitaad̶amera. Ara ichi kʉ̃risiad̶eeba berreabai, maumaarã joma mʉʉd̶ebena ũriiruu jarai. Ichiba machimaa kuitaabiai chi neei ewarid̶e kãare sakai. ¹⁴Kuitaabiai mʉ chi mechiu nii, mʉ bed̶ea ũriped̶a joma machimaa jaraaruud̶eeba. ¹⁵Joma mʉ Chachad̶e mʉʉd̶ebʉ. Maud̶eeba mʉʉba jarasii Dachi Akõre Jauriba mʉ bed̶ea ũriped̶a machimaa jaradeai.

Machi kĩra nomaa panaped̶a kĩrajʉʉd̶ai

¹⁶»Kãꞌãabariwãed̶e machiba mʉ makaa unud̶aabai, maamina nau maad̶akare waya kãꞌãabariwãed̶e mʉ unud̶ai.16:16 Griego bed̶ead̶e chi b̶ee kartad̶e b̶ʉ kub̶uu: mʉ Chachamaa wãid̶eeba.

¹⁷Maud̶e waabenarã ichi baara nibabadaurãba ãchi chiya id̶isid̶au:

—¿Mau kãare jara b̶uma: “Kãꞌãabariwãed̶e machiba mʉ makaa unud̶aabai. Maamina mau maad̶akare waya kãꞌãabariwãed̶e mʉ unud̶ai, mʉ Chachamaa wãid̶eeba?”

¹⁸Mau bed̶ea “kãꞌãabariwãed̶e” a b̶uuba ¿kãare jara b̶uma? Dachiba adua panuu kãare ʉ̃rʉbena berrea b̶uu.

¹⁹Jesusba kuitaasii ãchiba mau ʉ̃rʉbena id̶i kʉ̃ria panuu. Maud̶eeba jarasii:

—Mʉʉba machimaa jarasii kãꞌãabariwãed̶e mʉ unud̶aabai maamina nau maad̶akare waya kãꞌãabariwãed̶e mʉ unud̶ai. ¿Mau ʉ̃rʉbena machi chiya id̶i panuuwãeka?

²⁰Mʉʉba biawãra jaraaruu: nau iujãad̶ebenarã kĩrajʉʉduumisa, machi kĩra nomaaba jẽad̶ai. Machi kĩra nomaaba panad̶ai, maamina mau kĩra nomaa wãꞌãed̶akare kĩrajʉʉd̶ai. ²¹Biawãra wẽraba warr adauruud̶e b̶i pirabarii ichi ewari neesiid̶eeba. Maamina warr adaud̶akare mau puaba waa kĩrabakau ichi warr kakua kĩrajʉʉ b̶uud̶eeba. ²²Ara mau kĩra machi jãabae kĩra nomaa panuu, maamina mʉ waya machi ichiad̶e neei. Maabae machi kĩrajʉʉd̶ai. Ab̶au bid̶a mau kĩrajʉʉ poyaa wãꞌãebiibai.

²³Mau ewarid̶e machi ab̶au bid̶a mʉʉmaa waa id̶id̶aabai. Mʉʉba biawãra jaraaruu: machiba mʉ Chachamaa mʉ trʉ̃d̶eeba id̶iiduu ichiba deai. ²⁴Machiba wabid̶a Dachi Akõremaa ab̶au bid̶a mʉ trʉ̃d̶eeba id̶id̶awẽa panuu. Maamina maka id̶iiduubʉrã adaud̶ai. Maka machi ãrea kĩrajʉʉ nuread̶ai.

²⁵»Mʉʉba ne jara b̶uud̶eeba mau machimaa jarasii, maamina ewari ab̶a mʉ waa nebʉrʉ b̶uud̶eeba berreabai. Maumaarã mʉ Chacha ʉ̃rʉbena arakʉd̶e jarai. ²⁶Mau ewarid̶e machiba mʉ trʉ̃d̶eeba Dachi Akõremaa id̶id̶ai. Mʉ machi baita Dachi Akõremaa ne id̶iibai, ²⁷mʉ Chachaba machi kʉ̃ria b̶uud̶eeba. Ichiba machi kʉ̃ria b̶uu, mʉ kʉ̃ria panuud̶eeba maud̶e mʉ Dachi Akõred̶ebena need̶a ijãa panuud̶eeba. ²⁸Mʉ Chacha b̶uumarebena nau iujãad̶aa neesii. Maamina mʉʉba nau iujãa b̶ʉi mʉ Chachamaa waya wãi baita.

²⁹Maabae ichi baara nibabadaurãba jarasid̶au:

—Ʉ̃raburu bichiba jara b̶uu dai baita arakʉd̶e ũri panuu. Nebʉrʉ b̶uud̶eeba berrea b̶uuwãe. ³⁰Ʉ̃raburu daiba kuitaaduu bichiba ne joma kuitaa nii. Daiba id̶id̶ai naed̶e bichiba saka panaui kuitaa b̶uu. Maud̶eeba kuitaa panuu bichi Dachi Akõred̶ebena neesii.

³¹Jesusba jarasii:

—¿Ʉ̃raburu machiba biawãra ijãa panuka? ³²Chi ewari neei b̶uad̶a neeruu. Machi joma ab̶aab̶aa jĩichoad̶aped̶a mʉ du ab̶a b̶uid̶ai.16:32 Zacarías 13:7. Maamina mʉ du ab̶a b̶uabai mʉ Chacha mʉ ome b̶uud̶eeba. ³³Joma mau mʉʉba machimaa jarasii mʉʉd̶eeba jirukaraayuwãe nuread̶amera. Nau iujãad̶e ãrea biꞌiwãe nuread̶ai, maamina wapearã́sturu: nau iujãad̶ebena kachiruarã mʉʉba poyaasii.

Jesusba ara ichi baita Dachi Akõremaa id̶id̶a

¹Jesusba maka jarasiid̶e bajãad̶aa ichiaped̶a jarasii: «Chacha, mʉ ewari neesii. Bichi Warr chi mechiu nii unubise bichi Warrba bichi biawãra chi mechiu nii unubimera. ²Bichiba joma ẽbẽrarã mʉ juad̶e b̶usii, chi mʉʉmaa dead̶akad̶acha ewaricha chokae duanubiamera. ³Ewaricha chokae nureeba kuitaa panuu bichi biawãra Dachi Akõre ara ab̶a nii. Maud̶e nau bichiba bʉid̶a Jesucristo kuitaa panuu. ⁴Bichiba mʉʉmaa nau iujãad̶e waubid̶a mʉʉba joma wausii. Maka kuitaabisii bichi chi mechiu nii. ⁵Maud̶eeba Chacha, mʉ bichi daad̶e chi mechiu b̶use bichi ome nau iujãad̶e waui naed̶e maka nibad̶a kĩra.

Jesusba ichi baara nibabadaurã baita Dachi Akõremaa id̶id̶a

⁶»Bichiba mʉʉmaa ẽbẽrarã chi nuree nau iujãad̶ebena deasii. Mʉʉba maarãmaa joma bichi ʉ̃rʉbena kuitaabiasii. Maarã bichid̶imina, bichiba mʉʉmaa deasii. Maarãba bichi bed̶ea ijãasid̶au. ⁷Mauba kuitaa panuu joma mʉʉba uru b̶uu bichid̶ebena nee b̶uu. ⁸Bichiba mʉʉmaa jarad̶a mʉʉba maarãmaa jaradeasii. Maarãba mau bed̶ea ijãasid̶au. Maud̶eeba kuitaa panuu biawãra mʉ bichid̶ebena neesii. Biawãra ijãa panuu bichiba mʉ bʉisii.

⁹»Mʉʉba bichimaa id̶ii maarã karibamera. Mʉʉba bichimaa id̶iwẽa b̶uu nau iujãad̶ebenarã baita. Maumaarã bichiba mʉʉmaa dead̶arã báitaburu id̶i b̶uu, maarã bichid̶id̶eeba. ¹⁰Joma mʉʉd̶erã bichid̶ibʉ maud̶e joma bichid̶irã mʉʉd̶ebʉ. Maarãba wau panuud̶eeba mʉ chi mechiu nii unubi panuu.

¹¹»Mʉ nau iujãad̶e b̶uawẽe maamina maarã wabid̶a nau iujãad̶e panad̶ai. Chacha, bichi ãrea biꞌia nii. Mʉ bichimaa wãaruud̶eeba bichi poyaad̶eeba maarã ãrea nukua b̶uase. Bichi trʉ̃d̶eeba, mʉʉmaa mau poyaabarii deasii,17:11 Maarã ãrea nukua b̶uase. Bichi trʉ̃d̶eeba, mʉʉmaa mau poyaabarii deasii. Griego bed̶ead̶e chi b̶ee kartad̶e naka b̶ʉ kub̶uu: Joma bichiba mʉʉmaa dead̶arã ãrea nuse bichi poyaad̶eeba. ãchi kakua ab̶a nii kĩra nuread̶amera, dachi kakua ara ab̶a nii kĩra. ¹²Bichi poyaad̶eeba mʉʉba joma bichiba dead̶arã nau iujãad̶e nu ua b̶uabarii. Jãarãd̶ebenarã ab̶a bid̶a wãꞌãed̶aabasii. Ab̶aburu chi wãꞌãe bai bad̶áturu wãꞌãesii, bichi bed̶ea jara b̶uu kĩra biawãra makamera.17:12 Salmos 41:9; 55:12-15.

¹³»Jãabáeburu mʉ bichimaa wãi. Maamina mʉ wabid̶a nau iujãad̶e b̶uud̶e joma chi mʉʉba anakʉd̶e ʉtaa id̶id̶a mau jaraaruu. Maka mʉ bichi ome kĩrajʉʉ b̶uu kĩra ãchi sid̶a ãrea kĩrajʉʉ panad̶ai. ¹⁴Bichiba jarad̶a mʉʉba maarãmaa jaradeasii. Maamina nau iujãad̶ebenarãba maarã kĩramaabadau mʉ kĩramaabadau kĩra, nau iujãad̶ebenarãwãed̶eeba. ¹⁵Mʉʉba bichimaa id̶iwẽa b̶uu maarã nau iujãad̶ebena ãyaa adoemera, maumaarã id̶i b̶uu kachiruad̶ebena nu b̶uamera.17:15 Kachiruad̶ebena. Ãreamaarã, mau jara b̶uu «jʉbawãe nii».¹⁶Maarã nau iujãad̶ebenarãwãe mʉ nau iujãad̶ebenawãe kĩra. ¹⁷Bichi bed̶eaba bichi biawãra saka nii kuitaabia b̶uu. Maud̶eeba maarã bichi baita duanuse. ¹⁸Bichiba mʉ nau iujãad̶ebenarã tãed̶e bʉid̶a kĩra mʉa bid̶a maarã nau iujãad̶ebenarã tãed̶e bʉiruu. ¹⁹Maarã kakua mʉ bichimaa dearuu. Machi baita makaaruu, maarãba ara ãchi chi biawãra bichimaa dead̶amera.

Jesusba joma ichid̶e ijãaduu baita Dachi Akõremaa id̶id̶a

²⁰»Mʉʉba ãchi báitaburu id̶iwẽa b̶uu. Maumaarã maarã chi mʉ bed̶ea jaraaduud̶e ijãaduu baita id̶i b̶uu. ²¹Chacha, bichi mʉ ome b̶uud̶eeba maud̶e mʉ bichi ome b̶uud̶eeba mʉʉba id̶i b̶uu ãchi sid̶a dachi ome chi kakua ab̶a b̶uu kĩra nuread̶amera. Maka nau iujãad̶e nureeba ijãad̶ai bichiba mʉ bʉisii. ²²Bichiba mʉ adoesii dachi ãbua panad̶amera. Maka mʉ chi mechiu b̶usii. Ara mau kĩra mʉʉba ãchi chi mechiu b̶usii dachi ome chi kakua ab̶a nii kĩra panad̶amera. ²³Mʉ ãchi ome b̶uud̶eeba maud̶e bichi mʉ ome b̶uud̶eeba dachi joma ãbua chi kakua ab̶a nii kĩra panad̶ai. Maka nau iujãad̶e nureeba kuitaad̶ai bichiba mʉ bʉisii maud̶e kuitaad̶ai bichiba ãchi kʉ̃ria b̶uu mʉ kʉ̃ria b̶uu kĩra.

²⁴»Chacha, bichiba nau iujãa waui naed̶e mʉ kʉ̃ria b̶uu. Maud̶eeba bajãad̶e mʉ chi mechiu b̶usii. Mʉʉba kʉ̃ria b̶uu joma bichiba mʉʉmaa dead̶arã aria mʉ baara nuread̶ai bichiba mʉ chi mechiu b̶ud̶a unud̶amera. ²⁵Chacha, bichi jipa nii. Nau iujãad̶ebenarãba bichi unud̶akau, maamina mʉʉba bichi unubarii. Maud̶e cha duanuu bid̶a kuitaa panuu bichiba mʉ bʉisii. ²⁶Mʉʉba maarãmaa bichi ʉ̃rʉbena kuitaabiasii. Mau awara maucha aude kuitaabiai bichiba mʉ kʉ̃ria b̶uu kĩra ãchi sid̶a chiya kʉ̃ria panad̶amera maud̶e mʉ ãchi sõd̶e uru panad̶amera».

Jesús jidauped̶aad̶a

Mateo 26:47-56; Marcos 14:43-50; Lucas 22:47-53

¹Joma mau jarad̶akare Jesús ichi baara nibabadaurã baara Cedrón do cheke kĩaraa wãsid̶au. Aria ne uu nub̶uasii. Jesús ichi baara nibabadaurã baara araa wãsid̶au.

²Judas, chi Jesús jidaubii b̶uuba mau ne uu nub̶uu kuitaa b̶uasii, Jesús ichi baara nibabadaurã ome aria b̶es ãrea ãbua duanabachid̶aud̶eeba. ³Maud̶eeba Judasba kokoroarã ãrea romad̶ebenarã maud̶e Dachi Akõre de mechiud̶ebena nubadaurã mau ne uu nub̶uud̶aa uad̶osii. Maarã chi paare mechiurã maud̶e fariseorãba Judas ome bʉisid̶au. Maarãba ʉ̃d̶aa koabarii, lámpara maud̶e miasu uru panasid̶au. ⁴Maud̶e Jesusba joma makai b̶uu kuitaa b̶uud̶eeba ãchimaa wãped̶a id̶isii:

—Machiba ¿kai jʉrʉ panuma?

⁵Ãchiba panausid̶au:

—Jesús Nazaretd̶ebena.

Jesusba jarasii:

—Mʉʉbʉ.

Maud̶e Judas, chi Jesús jidaubii b̶uu ãchi baara nibasii.

⁶Jesusba «mʉʉbʉ» asiid̶e ãchi akarrnaa wãaduud̶e jeed̶a b̶aesid̶au.

⁷Maabae Jesusba waya id̶isii:

—¿Kai jʉrʉ panuma?

Ãchiba waya panausid̶au:

—Jesús Nazaretd̶ebena.

⁸Maud̶e Jesusba jarasii:

—Mʉʉbʉ asii. Mʉ jʉrʉ panuubʉrã, naarã ẽbẽrarã ida wãbiásturu.

⁹Maka jarasii ichiba naed̶e jara b̶uasiid̶eeba: «Chacha, bichiba mʉʉmaa dead̶a ab̶a bid̶a perdeebasii».18:9 Juan 6:39. Ichiba jarad̶a kĩra biawãra makasii. ¹⁰Maud̶e Simón Pedroba espada uru b̶uasii. Mau ẽeta adauped̶a paarerã mechiu baita bari trajabarii kʉʉrʉ biarebena oatutasii. Mau chibari baita bari trajabarii trʉ̃ Malco abadau. ¹¹Maud̶eeba Jesusba Pedromaa jarasii:

—Bichi espada ed̶a joa adause. Makarã, ¿mʉ biꞌiwãe b̶uabai b̶uka mʉ Chachaba mʉ biꞌiwãe b̶uabii b̶uu kĩra?18:11 Mʉ Chachaba mʉ biꞌiwãe b̶uabii b̶uu kĩra. Griego bed̶ead̶e naka b̶ʉ kub̶uu: chi mʉ Chachaba dead̶a basu.

Jesús Anasmaa jidau adoeped̶aad̶a

Mateo 26:57-58; Marcos 14:53-54; Lucas 22:54

¹²Maabae Romad̶ebena kokoroarãba, ara ãchi mechiu maud̶e chi Dachi Akõre de nubadaurãba Jesús jidaud̶aped̶a jua jʉ̃sid̶au. ¹³Naa Jesús Anás deemaa adoesid̶au. Anás Caifás chayũre basii. Maamina mau añod̶e Caifás chi paare mechiu basii.18:13 Caifás 18 año paare chi mechiu basii, año 18d̶ebena ab̶a 36d̶aa.¹⁴Ara mau Caifasba judiorãmaa jarasii biꞌia b̶uu ẽbẽra ab̶a jomaurã kakua biui.18:14 Juan 11:50.

Pedroba Jesús unuka ad̶a

Mateo 26:69-70; Marcos 14:66-68; Lucas 22:55-57

¹⁵Maud̶e Jesús baara nibabadaurã Simón Pedro maud̶e maucha ab̶a Jesús kaad̶e wãsid̶au. Chi Simón Pedro ome wãd̶a paarerã mechiuba unubachiid̶eeba ichi Jesús kaad̶e ed̶a wãsii paarerã mechiu de dud̶aa. ¹⁶Maamina Pedro awara poraad̶e ʉkʉ nub̶eesii. Maud̶eeba chi ichi ome wãd̶a, chi paare mechiuba unubarii awara wãsii. Chi poraa nubarii wẽra ome berreaped̶a Pedro ed̶a adoesii. ¹⁷Mau wẽraba Pedromaa id̶isii:

—¿Bichi sid̶a Jesús baara nibabariiwãeka?

Pedroba panausii:

—Mʉʉwãe.

¹⁸Maud̶e paare mechiu baita bari trajabadaurãba maud̶e Dachi Akõre de nubadaurãba tʉbʉ pua nub̶usid̶au kũrasãa nub̶uud̶eeba. Puad̶aped̶a b̶ari topaneed̶aped̶a tʉbʉ kã duaneesid̶au. Maud̶e Pedro ãchi ome tʉbʉ kã b̶uasii.

Anasba Jesusmaa ãrea ʉtaa id̶id̶a

Mateo 26:59-66; Marcos 14:55-64; Lucas 22:66-71

¹⁹Maabae paarerã mechiuba Jesusmaa ãrea id̶isii ichi baara nibabadaurã ʉ̃rʉbena maud̶e ichiba jaradea ua b̶uad̶a ʉ̃rʉbena. ²⁰Maud̶e Jesusba panausii:

—Mʉ nau iujãad̶ebenarã daad̶e arakʉd̶e berrea b̶uasii. Mʉʉba jaradea b̶uasii dachi judiorã araa ãbua imibadau decha maud̶e Dachi Akõre de mechiu dud̶a, joma dachi judiorã araa ãbua imibadaumaa. Ab̶a bid̶a mirubia berreabasii. ²¹¿Sakãe mʉʉmaa mau id̶i b̶uma? Mʉ bed̶ea ũriped̶aad̶amaa id̶iyase. Maarãba jarad̶aika, mʉʉba jarabarii kuitaa panuud̶eeba.

²²Jesusba maka jaraaruud̶e chi nubarii ichi kaita b̶uuba jua jãaba Jesús kĩedarrmaa sĩped̶a jarasii:

—¿Maka panau b̶uka chi paarerã mechiumaa?

²³Jesusba panausii:

—Mʉʉba bed̶ea kachirua jarasiibʉrã, mʉʉmaa jarase, kãare bed̶ea kachirua berreasii. Maamina mʉʉba jarad̶a biawãra b̶uubʉrã, ¿sakãe mʉ sĩsma?

²⁴Maabae Anasba Jesús jua jʉ̃ b̶uu Caifasmaa bʉisii, ichi paarerã mechiu basiid̶eeba.

Pedroba waya Jesús unukau ad̶a

Mateo 26:71-75; Marcos 14:69-72; Lucas 22:58-62

²⁵Maumisa Pedro wabid̶a b̶ari nub̶uasii tʉbʉ kãaruu. Maud̶e ẽbẽrarãba ichimaa id̶isid̶au:

—¿Bichi sid̶a jãu ẽbẽra baara nibabariiwãeka?

Pedroba merasii:

—Mʉʉwãema.

²⁶Maud̶e paare mechiu baita bari trajabarii ab̶aba Pedromaa id̶isii:

—¿Mʉʉba bichi chi mau ome ne uu nub̶uud̶e unud̶awãeka?

Mau bari trajabarii Pedroba kʉʉrʉ oatutad̶a ome chi ãba basii. ²⁷Pedroba waya merasii. Ara makʉd̶e eterr birusii.18:27 Juan 13:38.

Jesús Pilato daad̶e b̶uad̶a

²⁸Maabae daped̶eed̶e Jesús Caifás ded̶ebena Romad̶ebena chi karr de mechiud̶aa adoesid̶au. Chi Jesús adoeped̶aad̶a judiorã mau de Pretorio abadaud̶e ed̶a wãd̶aabasii ãchimaarã ed̶a wãaduubʉrã Dachi Akõre daad̶e kachirua b̶uai b̶uud̶eeba. Ichi daad̶e biꞌia panad̶ai kʉ̃ria panasid̶au Pascua ewarid̶e chi chiko kod̶ai baita.18:28 Judiorãba jarabachid̶au ab̶a bid̶a judiowãerã ded̶e ed̶aa wãaruubʉrã Dachi Akõre daad̶e kachirua b̶eei. Números 9:9-11.²⁹Maud̶eeba Pilato ãchimaa awara wãped̶a id̶isii:18:29 Romad̶ebena chi aude mechiu Tiberio abadauba Pilato Judea druad̶ebena chi karr b̶usii, año 26d̶ebena ab̶a 36d̶aa. Judiorã mechiurãba Jesús Pilatomaa adoesid̶au chi jʉ̃a panuurã bead̶akau panuud̶eeba. Ab̶a romad̶ebenarãba maka waud̶ai panasid̶au.

—Nau ẽbẽra, machiba kachirua jara panuuba ¿kãare kachirua wausma?

³⁰Ãchiba panausid̶au:

—Nauba kachirua waud̶awãe basirã daiba nau bichimaa adoed̶aabai basii.

³¹Maud̶eeba Pilatoba ãchimaa jarasii:

—Machiaburu jãu adoed̶aped̶a ichiásturu ara machi leyd̶e jara b̶uu kĩra.

Maud̶e judiorãba jarasid̶au:

—Daiba poyaa ẽbẽra beabid̶aabai panuu. Machi Romad̶ebenarã́buru beabid̶ai panuu.

³²Judiorãba maka jaraped̶aad̶aba kuitaabiasii Jesusba ichi saka biui b̶uu jarad̶a biawãra makasii.18:32 Juan 3:14; 8:28; 12:32.³³Maabae Pilato waya deed̶a ed̶a wãsii. Jesús ed̶a adoebiped̶a id̶isii:

—¿Bichi biawãra judiorã reyka?18:33 Judiorã mechiurãba Pilatomaa mau ʉ̃rʉbena jarasid̶au. Lucas 23:2.

³⁴Jesusba panausii:

—¿Mau bichiba id̶i b̶uu biꞌia kuitaai baita id̶i b̶uka, maebʉrã waabenarãba bichimaa mʉ ʉ̃rʉbena maka jarasid̶aud̶eeba id̶i b̶uka?

³⁵Maud̶eeba Pilatoba jarasii:

—¿Makarã mʉ judioka? Ara bichi puurud̶ebenarãba maud̶e paare mechiurãba bichi mʉʉmaa eneesid̶au. ¿Bichiba kãare wausma maarãba naka waud̶amera?

³⁶Jesusba panausii:

—Mʉ ẽbẽrarã mʉ juad̶e ua b̶umina mʉ puuru nau iujãad̶ebenawãe. Nau iujãad̶ebena basirã mʉ ẽbẽrarã chĩod̶ai basii judiorãba mʉ jidaurãad̶amera. Maamina mʉ puuru nau iujãad̶ebenawãe.

³⁷Maud̶eeba Pilatoba jarasii:

—¿Maka b̶uubʉrã biawãra bichi ẽbẽrarã reyka?

Jesusba panausii:

—Maerã, bichiba maka jara kʉ̃ria b̶uubʉrã, mʉ ẽbẽrarã reybʉ. Maamina mʉ nau iujãad̶aa neesii biawãra bed̶ea jaradeai baita.18:37 Nau iujãad̶aa neesii. Griego bed̶ead̶e naka b̶ʉ kub̶uu: Nau kakua mʉ naweba adaud̶aped̶a nau druad̶aa neesii. Joma chi biawãrad̶e nureeba mʉ bed̶ea ijãabadau.

³⁸Maud̶e Pilatoba id̶isii:

—¿Kãarema mau biawãra?

Jesús bead̶ai ʉ̃rʉbena jaraped̶aad̶a

Mateo 27:15-31; Marcos 15:6-20; Lucas 23:13-25

Maka jarasiid̶e Pilato waya awara judiorãmaa wãped̶a jarasii:

—Mʉʉba unuwẽe nau ẽbẽraba kãare kachirua wausii. ³⁹Maamina Pascua ewari baaruud̶e, machiba mʉʉmaa id̶ibadau chi jʉ̃abadaud̶ebena ab̶a ewa bʉi, añocha waubadau kĩra. ¿Machiba kʉ̃ria panuka mʉʉba cha nii judiorã rey ena b̶ui?

⁴⁰Maud̶e ãchiba jĩwa jarasid̶au:

—Jãuwãema. ¡Barrabás enatase!

Mau Barrabás mia kachirua nii basii.18:40 Chi b̶ee kartad̶e jara b̶uu Barrabás nechiru basii. Marcos 15:7.

¹Maabae Pilatoba Jesús pebewabisii. ²Maka b̶uud̶e Romad̶ebena kokoroarãba boro jũra ʉri kad̶a Jesús borod̶e jʉ̃ b̶usid̶au, maud̶e anab̶ari jʉ̃barii pupuchia b̶uu jʉ̃ b̶usid̶au. ³Maabae Jesús kaita need̶aped̶a jarasid̶au:

—¡Ãrea biꞌia nii, judiorã rey!

Maka jarad̶aped̶a juaba ichi kĩedarrmaa sĩsibachid̶au.

⁴Maabae Pilato waya awara judiorãmaa wãped̶a jarasii:

—Ũrísturu. Mʉʉba nau ẽbẽra awara machimaa eneei, mʉʉmaarã nauba kachirua wauwẽa b̶uu kuitaad̶amera.

⁵Jesús awara adoeduud̶e boro jũra ʉri kad̶a maud̶e anab̶ari jʉ̃barii pupuchia b̶uu jʉ̃ nibasii. Maud̶e Pilatoba jarasii:

—Naubʉ chi ẽbẽra.19:5 Naubʉ chi ẽbẽra. Pilatoba Jesús awara adoebisiid̶e ẽbẽra mia wapea nii unubiasii. Maamina waabenarãba chi bed̶ea «ẽbẽra» ũrisid̶aud̶e, mau chi Ẽbẽra Ba B̶uad̶a kʉ̃risiasid̶aud̶aa b̶uu. Juan 1:1,14.

⁶Maamina Jesús unuuduud̶e paare mechiurã maud̶e Dachi Akõre de nubadaurãba jĩwa b̶ia jarasid̶au:

—¡Jãu cruzd̶e jirab̶u beabise! ¡Cruzd̶e jirab̶u beabise!

Maud̶e Pilatoba jarasii:

—¡Machiaburu adoed̶aped̶a cruzd̶e jirab̶u beásturu! Mʉʉmaarã, jãuba kachirua wauwẽa b̶uu.

⁷Maamina judiorãba panausid̶au:

—Daiba Moisesba b̶ʉd̶a uru panuu. Mau Moisesba b̶ʉd̶ad̶e jara b̶uu kĩra jãu biui b̶uu ichi Dachi Akõre Warr a b̶uud̶eeba.19:7 Levítico 24:15-16.

⁸Mau bed̶ea ũrisiid̶e Pilato ãrea wapeasii. ⁹Maabae waya ichi de mechiud̶e ed̶a wãped̶a Jesusmaa id̶isii:

—¿Bichi samabenama?

Maamina Jesusba panaubasii. ¹⁰Maka b̶uud̶e Pilatoba jarasii:

—¿Panauwẽka? ¿Adua b̶uka mʉʉba bichi poyaa cruzd̶e jirab̶u beabi b̶uu maud̶e poyaa ida bʉi b̶uu?

¹¹Maud̶e Jesusba panausii:

—Dachi Akõreba bichi chi Romad̶ebena karr b̶ud̶awãe basirã bichiba mʉ ab̶a bid̶a maka waubai basii. Mauburu chi mʉ bichi juad̶e dead̶aba bichi audeara kachirua aude wausii.

¹²Mau ũrisiid̶e Pilato kʉ̃risia b̶eesii Jesús saka ida bʉi. Maamina judiorãba waya jĩwa jara kopaneesid̶au:

—Bichiba jãu ẽbẽra ida bʉiruubʉrã bichiba Romad̶ebena chi aude mechiu ome biawãra kõpaerowãe. Barikiuba ara ichi rey nii aaruubʉrã, mau ẽbẽra Romad̶ebena chi aude mechiu ome kĩramaa nii.

¹³Pilatoba mau ũrisiid̶e Jesús awara adoebisii. Maabae Pilato ichi juez ãkaud̶e akʉ b̶eesii, dud̶a Mo Kakayaa Waud̶a abadaumare. Hebreo bed̶ead̶e Gabatá abadau. ¹⁴Judiorã Pascua ewari norema baid̶eeba ãchi ne wau panasid̶au. Ʉmada jipa baaruud̶e Pilatoba judiorãmaa jarasii:

—Ichiásturu. Cha nau machi reybʉ.

¹⁵Maamina ãchiba jĩwa jarasid̶au:

—¡Beabise! ¡Beabise! ¡Cruzd̶e jirab̶u beabise!

Maud̶eeba Pilatoba jarasii:

—¿Makarã mʉʉba machi rey cruzd̶e jirab̶u beabi kʉ̃ria panuka?

Maabae chi paare mechiurãba panausid̶au:

—¡Dai rey june wãꞌãe panuu, César Augusto awara!19:15 Dachi Akõre bed̶ead̶e jara b̶uu Israel puurud̶ebenarã rey ara Dachi Akõre maka nii. Jueces 8:23; 1 Samuel 8:7.

¹⁶Maabae Pilatoba Jesús Romad̶ebena kokoroarãmaa deasii cruzd̶e jirab̶u bead̶amera. Ara makʉd̶e ichi adoesid̶au.

Jesús cruzd̶e jirab̶uped̶aad̶a

Mateo 27:32-44; Marcos 15:21-32; Lucas 23:26-43

¹⁷Jesusba ichi cruz atauped̶a kokoroarãba ichi adoesid̶au drua “Boro B̶ʉʉrʉ” abadaumaa. Hebreo bed̶ead̶e Gólgota abadau. ¹⁸Aria ãchiba Jesús cruzd̶e jirab̶usid̶au. Maud̶e ichi jãkaa ẽbẽra ome cruzd̶e jirab̶usid̶au, ab̶a jua biare, ab̶a jua sordoare. ¹⁹Mau awara Pilatoba bed̶ea b̶ʉd̶a Jesús boro ʉ̃rʉed̶e nub̶ubisii. Naka b̶ʉsii: «Jesús Nazaretd̶ebena, judiorã Reybʉ». ²⁰Mau bed̶ea hebreo bed̶ead̶e b̶ʉsii, latín bed̶ead̶e maud̶e griego bed̶ead̶e.19:20 Romad̶ebenarãba latín bed̶ea berreabachid̶au. Hebreo bed̶ea judiorãba berreabachid̶au. Griego bed̶ea beraa joma druachabenaba b̶istĩika kuitaa nureasii. Griego bed̶ead̶e berreabachid̶au druacha ne nedobʉid̶ai baita. Ãrea judiorãba mau bed̶ea unusid̶au, Jesús cruzd̶e jirab̶uped̶aad̶a puuru kaita b̶uud̶eeba. ²¹Judiorã paare mechiurãba mau bed̶ea ʉ̃risid̶aud̶e Pilatomaa jarasid̶au:

—B̶ʉrã́se “Judiorã Rey”. Maumaarã b̶ʉse: “Nau ẽbẽraba jarasii ichi judiorã rey”.

²²Maamina Pilatoba jarasii:

—Mʉʉba b̶ʉd̶a ara maka b̶eeruu.

²³Maad̶akare Romad̶ebena kokoroarãba Jesús cruzd̶e jirab̶usid̶aud̶e ichiba anab̶ari jʉ̃barii jʉ̃ b̶uad̶a kimare kõetad̶aped̶a ãchicha adausid̶au. Ichiba chi mau ekare jʉ̃ b̶uad̶a sid̶a adausid̶au. Mau ʉtʉʉba ed̶aa b̶ari kaapirud̶a b̶uasii. ²⁴Maud̶e kokoroarãba ãchi du ab̶a jarasid̶au:

—Nau kõetad̶aabai panuu. Bari bibuara b̶uu jemened̶ai, kaiba chi paru adooi kuitaad̶ai baita.

Mau makasii Dachi Akõre bed̶ead̶e nabẽraed̶e b̶ʉd̶a kĩra:

«Mʉ anab̶ari jʉ̃barii ãchicha adausid̶au; mʉʉba ekare jʉ̃ b̶uad̶a adaud̶ai baita jemenesid̶au».19:24 Salmos 22:18.

Biawãra kokoroarãba maka wausid̶au.

²⁵Jesús cruzd̶e jirab̶u kaita Jesús nawe maud̶e chi nawe neekau panasid̶au. Cleofás kima María maud̶e María Magdalena panasid̶au. ²⁶Jesusba ichi nawe unusiid̶e maud̶e ichi baara nibabarii «ichiba ãrea kʉ̃ria b̶uu» abadau. Mau ara jãma b̶uasii. Maud̶e Jesusba ichi nawemaa jarasii:

—Dana, nau bichi warrbʉ.

²⁷Maabae ichi baara nibabariimaa jarasii:

—Nau bichi nawebʉ.

Mau ewarid̶eeba waitaa Jesús nawe Jesús baara nibabarii ded̶e b̶uabachii.

Jesús cruzd̶e biud̶a

Mateo 27:45-56; Marcos 15:33-41; Lucas 23:44-49

²⁸Maka jarasiid̶e Jesusba kuitaasii joma ichiba waui b̶uad̶a wausii. Maud̶e jarasii:

—Mʉ obisia b̶uu.

Mau jarasii Dachi Akõre bed̶ead̶e jara b̶uu kĩra.19:28 Salmos 22:15; 69:21.

²⁹Maud̶e aria chokod̶e uva b̶aa orekea waabiru nub̶uasii. Chi nureerãba mau uva b̶aa orekead̶e modaa b̶uuba sũra adausid̶au. Mau hisopo bakuru juad̶e jʉ̃d̶aped̶a Jesús iimaa tusid̶au. ³⁰Jesusba mau uva b̶aa orekea do chaaped̶a jarasii:

—Mʉʉba waui b̶uad̶a joma wausii.

Maabae ichi boro ed̶aa jaab̶arisiid̶e biusii.

Jesús orrd̶e miasuba sud̶a

³¹Judiorã Pascua ewari norema baaruud̶eeba ne wau panasid̶au. Mau bari panabadau ewari mechiud̶eeba ãchiba kʉ̃riad̶awẽa panasid̶au ẽbẽra cruzd̶e jirab̶ud̶ai. Maud̶eeba Pilatomaa id̶isid̶au cruzd̶e jirab̶u b̶ʉʉrʉsiu b̶ʉikuabimera isa biubid̶aped̶a chi kakua ed̶aa jirad̶amera. ³²Maud̶eeba kokoroarã wãd̶aped̶a Jesús baara cruzd̶e jira panuu ab̶a chi b̶ʉʉrʉsiu b̶ʉitasid̶au. Ara mau kĩra chi ab̶abena b̶ʉʉrʉsiu sid̶a b̶ʉitasid̶au. ³³Maamina Jesusmaa neesid̶aud̶e unusid̶au ichi biusii. Maud̶eeba ichi b̶ʉʉrʉsiu b̶ʉitad̶aabasii.

³⁴Maka b̶uud̶e kokoroaba Jesús orrd̶e miasuba susii biawãra biusii kuitaa. Ara makʉd̶e oa bania baara chesii. ³⁵Chi nau karta b̶ʉd̶aba biawãra mau unusii. Ichiba jara b̶uu biawãra b̶uu.19:35 Juanba jara b̶uu Jesús biud̶ad̶eeba biawãra ẽbẽra basii. Juan chõra b̶uasiid̶e waabenarãba jarabachid̶au Jesús ẽbẽra kĩra b̶uasii maamina nau kakuad̶e neewẽa basii. Ichiba jara b̶uu biawãrabʉ, kuitaa b̶uu chi biawãra bed̶ea jara b̶uu machia bid̶a sõd̶eeba ijãad̶amera. ³⁶Joma mau biawãra makasii Dachi Akõre bed̶ead̶e b̶ʉ kub̶uu kĩra. Naka b̶ʉ kub̶uu: «Ichi b̶ʉʉrʉ ab̶a bid̶a b̶ʉitad̶aabai».19:36 Éxodo 12:46; Números 9:12; Salmos 34:20.³⁷Maud̶e Dachi Akõre bed̶ead̶e nau sid̶a b̶ʉ kub̶uu: «Ãchiba suped̶aad̶amaa ichiad̶ai».19:37 Zacarías 12:10.

Jesús jau b̶uped̶aad̶a

Mateo 27:57-61; Marcos 15:42-47; Lucas 23:50-56

³⁸Joma nau maad̶akare judio José abadau Pilatomaa wãsii. Mau José Arimatea puurud̶ebena basii. Mau Jesús baara nibabarii basii, maamina ab̶aumaa bid̶a jarawẽa b̶uasii waabenarã judiorã wapea b̶uud̶eeba. Ichiba Jesús kakua Pilatomaa id̶isii jau b̶ud̶e adooi baita. Maud̶eeba Pilatoba ida adoebisii. Ara makʉd̶e Joseba Jesús kakua adaud̶e wãped̶a jau b̶ud̶e adoesii. ³⁹Mau awara Nicodemo, chi naed̶e Jesusmaa ẽsabud̶e berread̶e nee b̶uad̶aba mirra kera jãra áloe ome perad̶a adoesii.19:39 Juan 3:1-15. Mau chikʉa 34 kilos b̶uasii.19:39 34 kilos. Griego bed̶ead̶e b̶ʉ kub̶uu: 100 litros. Mau jara b̶uu 75 libras. Mirra, áloe sid̶a bakuru piumaa panuu. Chi kera jãra basii.⁴⁰Ãchiba Jesús kakua adoed̶aped̶a mau mirra jãra kera áloe ome perad̶a paru torroad̶e posid̶au. Pod̶aped̶a ichi kakua mau paru torroaba bʉrasid̶au judiorãba naed̶e maka jau b̶ubachid̶au kĩra. ⁴¹Jesús cruzd̶e jirab̶uped̶aad̶a kaita ne uu nub̶uasii. Mau ne uu nub̶uud̶e biud̶a jau b̶ubachid̶aud̶e chob̶ea b̶uasii mo chob̶ea korod̶a wid̶i. Aria biud̶a wabid̶a jau b̶ud̶akau basii. ⁴²Mau chob̶ea ara kaita b̶uud̶eeba maud̶e judiorã bari panabadau ewari ʉ̃rʉ ba b̶uasiid̶eeba Jesús aria jau b̶usid̶au.

Jesús chokae jiradud̶a

Mateo 28:1-10; Marcos 16:1-8; Lucas 24:1-12

¹Misa ewarid̶e daped̶eed̶e wabid̶a pãriu b̶uud̶e María Magdalena Jesús jau b̶uped̶aad̶amaa wãsii. Neeruud̶e chi mo mechiu chi chob̶ea jʉ̃a kub̶uad̶a ãyaa bʉraa kub̶uu unusii. ²Maud̶eeba pira wãsii Simón Pedromaa. Jesús baara nibabarii chi «Jesusba ãrea kʉ̃ria b̶uu» abadau aria b̶uasii. Neeped̶a jarasii:

—Dachi Mechiu chi jau b̶uped̶aad̶amarebena ãyaa adoesid̶au. Daiba adua panuu samaa adoesid̶au.

³Maabae Jesús baara nibaped̶aad̶arã Pedro maud̶e chi ab̶abena Jesús jau b̶uped̶aad̶amaa wãsid̶au. ⁴Omea pira wãsid̶au, maamina chi ab̶abena Pedro aude isa pira wãsiid̶eeba Jesús jau b̶uped̶aad̶amaa naa neesii. ⁵Neesiid̶e ed̶a ichiai baita akõratusii. Maud̶e paru chi kakua bʉra b̶uad̶a aria b̶ari b̶uu unusii, maamina ed̶a wãabasii. ⁶Simón Pedro ichi kaad̶e neeped̶a chob̶ead̶e ed̶a wãsii. Mau bid̶a chi kakua bʉra b̶uad̶a paru aria b̶ari b̶uu unusii. ⁷Mau awara paru Jesús boro bʉra b̶uad̶a unusii. Mau paru waabena paru ome ãbua b̶uabasii, maumaarã awara b̶ed̶a kub̶uasii. ⁸Maabae chi naed̶e need̶a sid̶a ed̶a wãsii. Chi paru maka b̶ari b̶uu unusiid̶e biawãra ijãasii Jesús chokae jiradusii. ⁹Mau ijãasid̶amina, ãchiba wabid̶a kauwa kuitaad̶awẽa panasii Dachi Akõre bed̶ead̶e Jesús chokae jiradui ʉ̃rʉbena b̶ʉ kub̶uu.20:9 Dachi Akõre bed̶ead̶e Jesús chokae jiradui ʉ̃rʉbena b̶ʉ kub̶uu. Salmos 16:8-11; Isaías 53:11-12; Oseas 6:1-2; Jonás 1:17; Levítico 23:11.¹⁰Maabae Jesús baara nibaped̶aad̶arã ãchi panad̶amaa waya wãsid̶au.

Jesusba María Magdalenamaa ara ichi unubid̶a

Marcos 16:9-11

¹¹Maumisa María chi chob̶ea awara jẽa b̶uasii. Maka jẽaruud̶e akõratusii ed̶a ichiai baita. ¹²Maud̶e ángel torroa jʉ̃ panuu ed̶a ome unusii. Ab̶a chi Jesús boro sĩu nub̶uad̶amare akʉ b̶uasii. Chi ab̶abena chi jʉ̃rʉ nub̶uad̶amare akʉ b̶uasii. ¹³Maarãmaa id̶isid̶au:

—Wẽra, ¿sakãe jẽa b̶uma?

Maabae ichiba panausii:

—Mʉ Mechiu Jesús adoesid̶au. Mʉʉba adua b̶uu samaa adoesid̶au.

¹⁴Ara mau jaraaruud̶e María ãyaa ichiasiid̶e, Jesús unusii; maamina kuitaabasii Jesús jãma b̶uu. ¹⁵Jesusba ichimaa id̶isii:

—Wẽra, ¿sakãe jẽa b̶uma? ¿Kai jʉrʉ b̶uma?

Mariaba mau ẽbẽra chi ne uud̶a nubarii basii kʉ̃risiasii. Maud̶eeba jarasii:

—Bichiba Jesús kakua ãyaa adoesiibʉrã, mʉʉmaa jarase chi kakua samaa adoesma, mʉʉba jʉrʉd̶e wãi baita.

¹⁶Maud̶e Jesusba jarasii:

—¡María!

Mariaba araa ichiaped̶a —¡Raboni! asii. (Mau hebreo bed̶ead̶e jara b̶uu “Jaradeabarii”).

¹⁷Jesusba jarasii:

—Mʉ jidaurã́se mʉ wabid̶a Chachamaa wãwẽa b̶uud̶eeba. Jãabae mʉ ãbarãmaa wãped̶a jarase mʉ Chachamaa wãaruu. Mau machi Akõrebʉ. Mau mʉ Dachi Akõrebʉ maud̶e machi Dachi Akõrebʉ.

¹⁸Ara makʉd̶e María Magdalena Jesús baara nibaped̶aad̶arãmaa wãped̶a jarasii: «Mʉʉba Dachi Mechiu unusii».

Mau awara Jesusba jarad̶a joma nebʉrʉsii.

Jesusba ara ichiba jʉrʉ adaud̶arãmaa unubiad̶a

Mateo 28:16-20; Marcos 16:14-18; Lucas 24:36-49

¹⁹Maumisa ewari kiusiid̶e Jesús baara nibabadaurã deed̶a ed̶a ãbua panasid̶au. Waabenarã judiorã wapea panuud̶eeba poraa jʉ̃a nub̶usid̶au. Maka b̶uud̶e Jesús ãchi ẽsa neeped̶a jarasii:

—¡Jirukaraayuwãe duanásturu!20:19 ¡Jirukaraayuwãe duanásturu! Judiorãba chiya unuuduud̶e, maka jua deabadau.

²⁰Mau jaraped̶a ichi jua, ichi orr ãchimaa unubiasii. Dachi Mechiu b̶uu unusid̶aud̶e kĩrajʉʉsid̶au. ²¹Maabae Jesusba waya ãchimaa jarasii:

—Jirukaraayuwãe duanásturu. Mʉ Chachaba mʉ nau iujãad̶aa bʉid̶a kĩra mʉa bid̶a machi nau iujãad̶aa bʉikaaruu.

²²Maka jaraped̶a ãchimaa jãripuaped̶a jarasii:20:22 Dachi Akõre Jauri adoeped̶aad̶a ʉ̃rʉbena ichiáse Hechos 1:4-8; 2:1-4.

—Dachi Akõre Jauri adáusturu. ²³Ẽbẽraba kachirua waud̶a machiba Dachi Akõre Jaurid̶eeba perdonaaduubʉrã, mauba jara b̶uu Dachi Akõreba mau kachirua perdonasii. Maud̶e ẽbẽraba kachirua waud̶a machiba Dachi Akõre Jaurid̶eeba perdonad̶awẽebʉrã, mauba jara b̶uu Dachi Akõreba mau kachirua perdonawẽa b̶uu.

Jesusba Tomasmaa ara ichi unubid̶a

²⁴Tomas Jesusba jʉrʉ adaud̶a 12 panuud̶ebena basii. Ichi Mikisu abachid̶au.20:24 Mikisu. Griego bed̶ead̶e naka b̶ʉ kub̶uu: Dídimo. Jesús neesiid̶e ichi chi waabenarã ome b̶uabasii. ²⁵Maud̶eeba ichimaa jarasid̶au:

—Daiba Dachi Mechiu unusid̶au.

Maamina Tomasba jarasii:

—Mʉ dauba ichi jua cruzd̶e jirab̶ud̶ai baita merapeped̶aad̶a unuwẽebʉrã, maud̶e mʉ jua jimid̶i chi cruzd̶e jirab̶ud̶ai baita merapeped̶aad̶ad̶e ed̶a wãwẽebʉrã, maud̶e mʉ jua ichi orrd̶e ed̶a wãwẽebʉrã, ichi chokae jiradud̶a mʉʉba ijãabai.

²⁶8 ewari bad̶akare Jesús baara nibabadaurã waya deed̶a araa ãbua duanasii. Maud̶e Tomás sid̶a b̶uasii. Maka panuud̶e chi poraa biꞌia jʉ̃a nub̶umina Jesús maka b̶uud̶e neesii. Ãchi ẽsa neeped̶a jarasii:

—¡Jirukaraayuwãe duanásturu!

²⁷Maabae Tomasmaa jarasii:

—Bichi jua jimid̶i nama bʉise, mʉ jua ab̶aab̶aa ichiáse, maud̶e bichi jua mʉ orrd̶e bʉise. Waa ijãawẽa b̶uarã́se, maumaarã ijãase mʉ biawãra chokae jiradusii.

²⁸Maud̶e Tomasba jarasii:

—¡Mʉ Mechiu! ¡Mʉ Dachi Akõre!

²⁹Maka b̶uud̶e Jesusba ichimaa jarasii:

—Bichiba mʉ unusiid̶eeba ijãaruu. ¡Maamina chi ẽbẽrarãba mʉ unud̶awẽed̶e ijãaduubʉrã, ãrea biꞌia nuread̶ai!

Nau karta ¿mʉʉba sakãe b̶ʉsma?

³⁰Jesusba june maucha ẽbẽrarãba ne poyaa waud̶akau ichi baara nibabadaurã daad̶e ãrea wausii, maamina joma mau nau kartad̶e b̶ʉwẽa b̶uu. ³¹Maamina joma nau b̶ʉsii machiba Jesús Dachi Akõreba Dachi Karibabarii deai jarad̶a, Dachi Akõre Warr ijãad̶amera. Maka ijãaduubʉrã ichid̶eeba chokae b̶uai uru nuread̶ai.

Jesusba ichi baara nibabadaurãmaa waya unubiad̶a

¹Mau maad̶akare Jesusba ichi waya ichi baara nibabadaurãmaa unubisii Tiberias mar iikaa.21:1 Tiberias mar maud̶e «Galilea» abadau. Nakasii: ²Mau ewarid̶e ãbua panasid̶au, Simón Pedro, Tomás chi Mikisu abadau, Natanael Caná puuru Galilead̶ebena, Zebedeo warrarã, maud̶e maucha ome. ³Maka panuud̶e Simón Pedroba jarasii:

—Mʉ do b̶atad̶e wãaruu.

Maud̶e ãchiba jarasid̶au:

—Dai bichi baara wãd̶ai.

Ara makʉd̶e jãbad̶e ataud̶aped̶a wãsid̶au. Maamina mau ẽsabud̶e b̶eda jidaud̶aabasii.

⁴Daped̶eed̶e Jesús ibud̶e nibasii maamina ãchiba unusid̶amina ichi kauwa unud̶aabasii. ⁵Maka b̶uud̶e Jesusba ãchimaa jĩwa id̶isii:

—Warrarã, ¿b̶eda jidausid̶aka?

Ãchiba panausid̶au:

—Jidaud̶awẽa panuma.

⁶Jesusba jarasii:

—Maka b̶uubʉrã chi ãtarraya jua biare b̶atásturu. Makaburu jidaud̶aika.

Ara makʉd̶e ichiba jarad̶a kĩra wausid̶au. Maabae chi ãtarraya poyaa errud̶aabasii b̶eda ãrea jidausid̶aud̶eeba.

⁷Aria b̶uasii Jesús baara nibabarii chi “Jesusba ãrea kʉ̃ria b̶uu” abadau. Mauba Pedromaa jarasii:

—¡Jãu Dachi Mechiubʉ!

Simón Pedroba mauba “Dachi Mechiubʉ” aaruu ũrisiid̶e, ichi paru ʉ̃rʉbena jʉ̃sii, paru jʉ̃wẽa b̶uasiid̶eeba do b̶atai baita. Paru jʉ̃ped̶a doed̶a jĩidrusii.

⁸Maamina waabenarã jãbad̶e paneesid̶au. Chi ãtarraya b̶edaba waabiru b̶uu jãbad̶e ibud̶aa errb̶ari adoesid̶au ibud̶aa 100 metros baidia b̶uasiid̶eeba. ⁹Iikaa neesid̶aud̶e tʉbʉ kõroochoa nub̶uu unusid̶au. B̶eda baamaa panuu maud̶e pan ʉbʉmaa panuu unusid̶au. ¹⁰Jesusba jarasii:

—Machiba b̶eda jidauped̶aad̶ad̶ebena ab̶a enésturu.

¹¹Ara makʉd̶e Simón Pedro jãbad̶aa wãped̶a ãtarraya ibud̶aa errb̶ari adoesii. Chi ãtarraya b̶eda mechiu nureeba waabiru b̶uasii. 153 juasiisid̶au. Maamina ãrea jidausid̶aukaud̶e chi ãtarraya kõawẽa b̶uasii. ¹²Maabae Jesusba jarasii:

—Kod̶e nésturu.

Maud̶e ãchiba wapeasid̶au ichi kai nii id̶id̶ai baita. Kuitaasid̶au ichi Dachi Mechiu nii.

¹³Maka panuud̶e Jesusba pan adauped̶a ãchimaa dead̶akasii. B̶eda sid̶a dead̶akasii.

¹⁴Mauba b̶es õbea ba b̶uasii Jesús chokae jiradusiid̶e ichi baara nibabadaurãmaa unubiaruu.

Jesús Pedro ome waya kĩrajʉʉd̶a

¹⁵Koped̶aad̶akare Jesusba Simón Pedromaa id̶isii:

—Simón, Jonás warr, ¿bichiba mʉ biꞌia kʉ̃ria b̶uka, cha naarãba mʉ kʉ̃ria panuu audeara?21:15 Waabenarãmaarã Jesusba naka id̶i b̶uu: ¿Bichiba mʉ ne joma audeara kʉ̃ria b̶uka?

Pedroba panausii:

—Maerã mʉ Mechiu, bichiba kuitaa b̶uu mʉʉba bichi kʉ̃ria b̶uu.

Jesusba jarasii:

—Mʉ ijãa nuree biꞌia nu b̶uase oeja nubariiba ichi oeja chekerã nubarii kĩra.

¹⁶Jesusba waya Pedromaa id̶isii:

—Simón, Jonás warr, ¿mʉ kʉ̃ria b̶uka?

Pedroba panausii:

—Maerã mʉ Mechiu, bichiba kuitaa b̶uu mʉʉba bichi kʉ̃ria b̶uu.

Jesusba jarasii:

—Chi mʉʉd̶e ijãa nuree ãrea nu b̶uase oeja nubariiba ichi oeja chekerã nubarii kĩra.

¹⁷Jesusba waya id̶isii:

—Simón, Jonás warr, ¿mʉ kʉ̃ria b̶uka?

Mauba b̶es õbea id̶isii. Pedro kĩra nomaa b̶eesii, Jesusba b̶es õbea id̶isiid̶eeba. Maabae ichiba jarasii:

—Mʉ Mechiu, bichiba joma kuitaa b̶uu. Bichiba kuitaa b̶uu mʉʉba bichi kʉ̃ria b̶uu.

Jesusba jarasii:

—Chi mʉʉd̶e ijãa nuree ãrea nu b̶uase oeja nubariiba ichi oeja chekerã nubarii kĩra.

¹⁸Mʉʉba biawãra jaraaruu: kũudrãaed̶e bichi du ab̶a paru jʉ̃bachii bichi wã kʉ̃riaruumaa wãi baita. Maamina bichi chõra b̶eeruud̶e waabenarãba bichi jua jirad̶ai paru jʉ̃bid̶ai baita. Maabae adoed̶ai bichi wã kʉ̃riawẽa b̶uumaa.21:18 Mau jara b̶uu Pedro jidaud̶aped̶a bead̶ai ʉ̃rʉbena.

¹⁹Mau jara b̶uud̶eeba Jesusba kuitaabisii Pedro saka biui b̶uu, ichi biuruud̶eeba ẽbẽrarãba kuitaad̶ai Dachi Akõre chi mechiu nii. Maka jaraped̶a Jesusba Pedromaa jarasii:

—¡Mʉ baara nibase!

Jesús, chi ichiba ãrea kʉ̃ria b̶uu ome

²⁰Pedroba waya akarrnaa ichiasiid̶e Jesús baara nibabarii chi “Jesusba ãrea kʉ̃riabarii” abadau kaad̶e nii unusii. Mau Jesús kaita akʉ b̶uasii Pascua ewarid̶e chi kobadau kosid̶aud̶e. Ichiba id̶isii: «Dai Mechiu, ¿kaiba bichi jidaubiima?»21:20 Juan 13:25.²¹Pedroba mau ẽbẽra unusiid̶e Jesusmaa id̶isii:

—Mʉ Mechiu, cha nii ¿sãaima?

²²Jesusba panausii:

—Mʉʉba kʉ̃ria b̶uubʉrã ichi chokae b̶uai ab̶a mʉ waya neeruud̶aa ¿bichiba mau sakaima? Mʉʉba kʉ̃ria b̶uu bichi mʉ baara nibai.

²³Maka jarad̶a kakua ãrea ãbarãba kʉ̃risiasid̶au chi Jesusba ãrea kʉ̃ria b̶uu abadau biubai. Maamina Jesusba jarawẽa b̶uasii jãu biubai. Maumaarã jarasii: “Mʉʉba kʉ̃ria b̶uubʉrã ichi chokae b̶uai ab̶a mʉ waya neeruud̶aa, ¿bichiba mau sakaima?”

²⁴Mau Jesús ome nibad̶aba mau ʉ̃rʉbena jara b̶uu maud̶e nau kartad̶e naka b̶ʉʉruu. Daiba kuitaa panuu ichiba jara b̶uu biawãrabʉ.

²⁵Wabid̶a maucha Jesusba waukuad̶a barau. Maamina joma mau kartad̶e ab̶aab̶aa b̶ʉʉduubarã, mʉʉmaarã mau karta b̶ʉkuad̶a nau iujãad̶e kabeebai basii.