SANTIAGO

Santiago

Karta Santiagoba b̶ʉd̶a

Jesús ãba Santiagoba nau karta b̶ʉsii. Mau Santiagoba arab̶aed̶e Jesusd̶e ijãawẽa b̶uasii (Juan 7:1-9). Maamina ichi Jesusd̶e ijãabadaurã tãed̶e chi mechiu b̶eesii. Hechos kartad̶e dachiba mau unubadau (Hechos 12:17; 15:12-21 maud̶e 21:17-19). Santiago Jerusalend̶e b̶uabachii. Año 62d̶e ichi Jesusd̶e ijãa b̶uu kakua beasid̶au.

Santiagoba nau karta Israel 12 warrarãd̶ebena neeped̶aad̶arã druacha nuree baita b̶ʉsii. Waabenarãmaarã, mauba jara b̶uu ãbarã judiorã baita b̶ʉsii. Waabenarãmaarã jara b̶uu joma Jesusd̶e ijãabadaurã baita b̶ʉsii.

Santiagoba nau karta b̶ʉsii kuitaabii baita nau druad̶e saka nibad̶ai panuu. Capítulo 1:1-18d̶e b̶ʉ kub̶uu dachiba Dachi Akõre kʉ̃risia kuitaa maud̶e joma dauchia jãadua b̶uai ʉtaa id̶i panuu. Mawãare Dachi Akõre biawãra ijãa b̶uai ʉ̃rʉbena b̶ʉ kub̶uu (1:19—2:26). Mawãare b̶ʉ kub̶uu dachi kẽrame ome kauwad̶ai ʉ̃rʉbena maud̶e nau drua kʉ̃riad̶aabai panuu ʉ̃rʉbena (3:1—5:6). Kaad̶eare b̶ʉ kub̶uu dachiba joma dauchia jãadua panuud̶e waabenarã biꞌia aid̶ad̶ai ʉ̃rʉbena (5:7-20).

Chi kʉ̃risia mechiu b̶uu 2:8d̶e naka b̶ʉ kub̶uu: «Machiba Moisesba b̶ʉd̶ad̶ebena chi mechiu b̶uu biawãra wau panuubʉrã, biꞌia wau panuu. Dachi Akõre bed̶ead̶e mau Moisesba b̶ʉd̶ad̶e naka jara b̶uu: “Ab̶au kʉ̃riáse ara bichi kʉ̃ria b̶uu kĩra”».

Nebʉra barau b̶uud̶e dauchia jãadua b̶uai ʉ̃rʉbena

¹Mʉ Santiagobʉ, Dachi Akõre baita bari trajabarii maud̶e Dachi Mechiu Jesucristo baita bari trajabarii. Nau karta b̶ʉʉruu Israel 12 warrarãd̶ebena neeped̶aad̶arã1:1 Israel 12 warrarãd̶ebena neeped̶aad̶arã. Waabenarãmaarã, mau jara b̶uu Dachi Akõred̶e ẽbẽrarã. druacha nuree baita. Mʉʉba kʉ̃ria b̶uu machi biꞌia panad̶ayu.

²Ãbarã, barikia ãrea biꞌiwãe panuud̶e kĩrajʉʉ panásturu. ³Machiba kuitaa panuu maka ãrea biꞌiwãe panuud̶e Dachi Akõred̶e ijãa paneeduubʉrã, biꞌia dauchia jãaduad̶ai kuitaad̶ai. ⁴Mau biawãra dauchia jãadua paneeduubʉrã, ne jomad̶e biꞌia, jipa nuread̶ai. B̶istĩika bid̶a nistad̶awẽa panuu nuread̶ai.

⁵Machid̶ebena ab̶aba kʉ̃risia kuitaawẽa niibʉrã, Dachi Akõremaa ʉtaa id̶ii b̶uu. Maabae Dachi Akõreba deai. Ichimaa ʉtaa id̶iiduubʉrã iadaawẽa sõbiad̶eeba jomaurãmaa deabarii. ⁶Maamina biawãra ijãa b̶uud̶eeba ʉtaa id̶i b̶uu. B̶istĩika bid̶a kʉ̃risiabai b̶uu Dachi Akõreba deabai. Maka kʉ̃risia b̶uu pũaturãba mar ʉ̃rape ãyaa adoebarii kĩra b̶uu. ⁷Chi maka b̶uuba kʉ̃risiabai b̶uu Dachi Mechiud̶ebena ne adaui. ⁸Ichi kʉ̃risia ome uru b̶uud̶eeba arab̶au kʉ̃risiad̶e b̶uakau.

⁹Ãba chi nejarra barauwãe nii kĩrajʉʉ b̶uai b̶uu Dachi Akõre daad̶e mechiud̶eeba. ¹⁰Maamina chi ẽbẽra barau nii kĩrajʉʉ b̶uai b̶uu Dachi Akõreba ichi chi nejarr barauwãe nii unu b̶uud̶eeba. Ẽbẽra barau nii ãrea b̶uabai nepono ãrea b̶uakau kĩra. ¹¹Ʉmada neeruud̶e pisiaba nepono kidua bʉʉbarii. Maabae chi nepono b̶aeped̶a chi mipitaa wãꞌãebarii. Ara mau kĩra ẽbẽra barau nii ewaricha chi nejarra adaui baita b̶uu biui.

¹²Ab̶a kachirua waui kʉ̃risia dauchia jãadua b̶uubʉrã, Dachi Akõre daad̶e ãrea biꞌia b̶uu.1:12 Kachirua waui kʉ̃risia dauchia jãadua b̶uubʉrã. Griego bed̶ead̶e mauba nau sid̶a jara b̶uu: «ãrea biꞌiwãe b̶uud̶e dauchia jãaduaruubʉrã». Joma dauchia jãaduaruud̶e Dachi Akõreba boro jũra dearuu kĩra ichi ewaricha chokae b̶uabii. Dachi Akõreba joma ichi kʉ̃ria nureerã biawãrad̶eeba maka chokae b̶uabiai.

¹³Kachirua waui kʉ̃risia b̶eeruud̶e ab̶au bid̶a jaraabai b̶uu Dachi Akõreba mau makabii b̶uu. Dachi Akõreba kachirua waui kʉ̃risiakau maud̶e ab̶aumaa bid̶a mau makabikau. ¹⁴Maumaarã kachirua waui kʉ̃risia b̶eebarii ara dachiba maka wau kʉ̃ria panuud̶eeba. ¹⁵Kachirua waui kʉ̃risiaped̶a mau wau b̶eebarii. Maka wau b̶eesiid̶eeba biuruud̶e Dachi Akõred̶ebena ewaricha awara b̶uai.

¹⁶Ãbarã mʉa kʉ̃riakuabarii, ara machi du ab̶a nau ʉ̃rʉbena setaa kũruarã́sturu: ¹⁷Ʉtareeba Dachi Bajãad̶ebena Akõreba ne joma ãrea biꞌia b̶ee dachimaa deabarii. Ichiaburu ne joma bajãad̶e koabadau waukuasii. Maarã ewaricha arab̶aud̶e koad̶akau. Maumaarã Dachi Akõre kĩra awara b̶uakau maud̶e diware waukau. ¹⁸Ichi kʉ̃riad̶eeba ichi bed̶ea biawãrad̶eeba dachi chokae b̶uabiasii. Maka ne uu nub̶uud̶ebena nabena chaud̶a ichimaa dead̶a kĩra dachi joma ichiba waud̶ad̶ebena ichi baita biꞌia panuu.

¹⁹Ãbarã mʉa kʉ̃riakuabarii, nau kʉ̃risia panásturu: Jomaurãba biꞌia ũrid̶ai baita nuread̶ai panuu, biꞌia nuread̶ai panuu, maud̶e barikia isa kĩrud̶aabai panuu. ²⁰Dachi kĩruuduud̶e Dachi Akõreba jipa waubi b̶uu waud̶akau. ²¹Maud̶eeba ne joma kachirua maud̶e ne joma jipawãe b̶uu ida b̶ústuru. Maabae Dachi Akõreba ichi bed̶ea machi sõd̶e b̶ud̶a kʉ̃risia biad̶eeba ijã́sturu. Ara mau bed̶eaba machi Dachi Akõreba kastikaid̶ebena karibai.

²²Dachi Akõre bed̶ea jara b̶uu kĩra wau panásturu. Ab̶aburu ũriiduu panarã́sturu. Maka nureebʉrã, ara machi du ab̶a setaa kũrua nuread̶ai. ²³Dachi Akõre bed̶ea ũri b̶uuba mau wauwẽebʉrã, ẽbẽraba ichi kĩedarr chi ichiabariid̶e unubarii kĩra b̶uu. ²⁴Maka unuuruud̶e ichi saka b̶uu unubarimina, ãyaa wãaruud̶e ara makʉd̶e wãꞌãebibarii. ²⁵Maamina barikiuba Dachi Akõre bed̶ea ũrid̶a kĩraba b̶uai ida b̶uwẽebʉrã, ãrea biꞌia b̶uai. Ẽbẽraba mau bed̶ea jipa b̶uu dachi kariba b̶uu ewaricha biꞌia kʉ̃risiaped̶a wau b̶uubʉrã, ichiba maka wau b̶uud̶eeba ãrea biꞌia b̶uai.

²⁶Ab̶auba Dachi Akõred̶e ijãa b̶uu kʉ̃risia b̶uubʉrã, maamina ichi kẽrame biꞌia nuwẽebʉrã, ara ichi du ab̶a setaa kũrua b̶uu. Biawãra bari ijãa b̶uu. ²⁷Chi biawãra ijãa b̶uuba naka waui b̶uu Dachi Bajãad̶ebena Akõreba1:27 Dachi Bajãad̶ebena Akõre. Griego bed̶ead̶e b̶u kub̶uu: Dios y Padre. ichiba wau b̶uu biꞌia unumera maud̶e jipa unumera: jẽramara maud̶e pẽdrãarã ãrea biꞌiwãe panuu aid̶ai b̶uu, maud̶e nau iujãad̶e nuree kachirua wau b̶uabai b̶uu.

Ab̶auba waabenarã kãyabãra aude kʉ̃riabai b̶uu

¹Ãbarã, machiba dachi bia nii Mechiu Jesucristod̶e ijãa panuud̶eeba ab̶a chi waabenarã audeara biꞌia waurã́sturu. ²Machi araa ãbua duanuud̶e ẽbẽra ab̶aba juad̶e nee waud̶a jʉ̃ b̶uu, paru mipitaa ãrea id̶ibadau b̶uu jʉ̃ b̶uu ed̶a neeruubʉrã, maud̶e ẽbẽra chi nejarr barauwãe niiba paru sore jʉ̃ b̶uu ed̶a neeruubʉrã, ¿Kãare sãad̶aima? ^3-4Machiba chi ãrea mipitaa jʉ̃ b̶uu biꞌia unud̶aped̶a maumaa nama biꞌia b̶uumaa akʉ b̶eese aaduubʉrã, maud̶e chi nejarr barauwãe nii jamaria b̶ari nub̶eese aaduubʉrã, maebʉrã nama mʉ jʉ̃rʉ kaita jeed̶a akʉ b̶eese aaduubʉrã, ¿maarã ome ara machi tãed̶e kĩra awara wau panuuwãeka? ¿Kʉ̃risia kachiruad̶eeba maka jidea panuuwãeka?

⁵Ãbarã mʉa kʉ̃riakuabarii, ¡ũrísturu! ¿Dachi Akõreba nau iujãad̶e chi nejarr barauwãe nuree Jesucristod̶e ijãad̶amera karibasiiwãeka? Maka maarã barau panuu kĩra nuree. Dachi Akõreba maarã ichi juad̶e ua b̶uai. Maka biawãra jarasii, chi ichi kʉ̃ria nureerãmaa. ⁶Maamina machiba chi mau chi nejarr barauwãe nii biꞌia nii ichiad̶akau. Mʉʉba id̶iiruu: ¿Kairãba machi kachirua waubadama? Chi maka waubadaurã ¿chi nejarra barau nureewãeka? ¿Maarãba machi juezrãmaa erta adoebadauwãeka? ⁷Machi Jesucristod̶erãbʉ. Maamina ¿maarãba ichi trʉ̃ bia ʉ̃rʉbena kachirua jarabadauwãeka?

⁸Machiba Moisesba b̶ʉd̶ad̶ebena chi mechiu b̶uu biawãra wau panuubʉrã, biꞌia wau panuu. Dachi Akõre bed̶ead̶e mau Moisesba b̶ʉd̶ad̶e naka jara b̶uu: «Waabenarã kʉ̃riáse ara bichi kʉ̃ria b̶uu kĩra».2:8 Levítico 19:18.⁹Maamina machiba waabenarãmaa kĩra awara wau panuubʉrã, kachirua wau panuu. Moisesba b̶ʉd̶ad̶e jara b̶uu machi maud̶eeba nebʉra bara panuu. ¹⁰Ab̶auba Moisesba b̶ʉd̶ad̶ebena ab̶a bid̶a wauwẽebʉrã, mau joma wauwẽa b̶uud̶eeba nebʉra bara b̶uai. ¹¹Nau kĩra b̶uu. Dachi Akõreba jarasii «junebena miakãid̶a ome kãi b̶eerã́se» maud̶e «mia bearã́se». Junebena wẽra ome kãi b̶eewẽa b̶umina maamina mia bearuubʉrã, Moisesba b̶ʉd̶a wauwẽa b̶uu. ¹²Kauwa berreásturu maud̶e jipa wáusturu, Dachi Akõreba chi dachi enabarii leyba dachi nebʉra ichiaid̶eeba. ¹³Chi waabenarã kĩra chuburiakau Dachi Akõreba ichiaruud̶e kĩra chuburiabai. Maud̶e chi waabenarã kĩra chuburiabadau biꞌia nuread̶ai.

Cristod̶e biawãra ijãa b̶uuba biꞌia waubarii

¹⁴Ãbarã, ab̶auba Jesucristod̶e biawãra ijãa b̶uu aaruubʉrã, maamina biꞌia wauwẽa b̶uubʉrã, ¿mau aid̶ai b̶uka? ¿Mau biawãra karibai b̶uka? ¹⁵Nau kĩra b̶uu. Ãbaba maebʉrã neekauba paru jʉ̃i baita maud̶e koi baita wãꞌãe b̶uubʉrã, ¹⁶maud̶e ab̶a machid̶ebenaba ichimaa jaraaruubʉrã, «mʉʉba kʉ̃ria b̶uu bichi biꞌia wãi, paru jʉ̃i baita uru b̶uai maud̶e ãrea ko b̶uai», maamina ne ab̶a bid̶a deawẽebʉrã, ¿mau jarad̶a aid̶aika? Aid̶akau. ¹⁷Ara mau kĩra chi Jesucristod̶e ijãa b̶uu a b̶uuba biꞌia wauwẽebʉrã, biawãra ijãawẽa b̶uu. Mauba ijãa b̶uu a b̶uu, ẽbẽra biud̶a kĩra nii.

¹⁸Maamina ab̶auba naka jaraaruu: «Bichiba Jesucristod̶e ijãa b̶uu abarii maud̶e mʉʉba biꞌia waubarii». Mʉʉba nau jaraaruu: bichiba biꞌia wauwẽa unubise, Jesucristod̶e biawãra ijãa b̶uu. Maud̶e biꞌia wau b̶uud̶eeba mʉʉba unubii Jesucristod̶e biawãra ijãa b̶uu. ¹⁹Bichiba ijãa b̶uu Dachi Akõre ab̶aburu nii. ¡Ãrea biꞌia b̶uu! Jai kachiruarã bid̶a maka ijãa panuu, maamina Dachi Akõre wapeaba uribadau.

²⁰¡Bichi kʉ̃risiaswãe nii! Chi Jesucristod̶e ijãa b̶uu a b̶uuba biꞌia wauwẽebʉrã biawãra ijãawẽa b̶uu. ¿Mʉʉba bichimaa kuitaabii b̶uka?2:20 Griego bed̶ead̶e chi b̶ee kartad̶e mau versículo naka b̶ʉ kub̶uu: ¿Mʉʉba bichimaa kuitaabii b̶uka Jesucristod̶e ijãa b̶uu a b̶uuba biꞌia wauwẽebʉrã, ichiba ijãa b̶uu ad̶a ẽbẽra biud̶a kĩra nii?²¹¿Dachi chi judiorã akõre Abrahamba waud̶a Dachi Akõreba mau jipa unuubaska? Dachi Akõreba Abrahammaa ichi warr Isaac baa deábad̶e asiid̶e Abrahamba makad̶e wãsii.2:21 Génesis 22:1-18. ¿Dachi Akõreba ichi mau kakua jipa nii unuubaska? ²²Bichiba kuitaa b̶uu Abrahamba maka wausii, biawãra Dachi Akõred̶e ijãasiid̶eeba. Maud̶e maka wausiid̶eeba unubisii Dachi Akõred̶e biawãra ijãa b̶uu. ²³Abrahamba waud̶aba kuitaabi b̶uu Dachi Akõre bed̶ead̶e b̶ʉ kub̶uu biawãrabʉ. Naka b̶ʉ kub̶uu: «Abrahamba Dachi Akõred̶e ijãasii. Maud̶eeba Dachi Akõreba mau nebʉraswãe nii unusii».2:23 Génesis 15:6; Isaías 41:8. Maud̶e Abraham Dachi Akõre ome kõpaero abachid̶au.

²⁴Maud̶eeba machiba kuitaa panuu Dachi Akõreba dachi jipa unukau, bari dachiba ichid̶e ijãa panuu a panuud̶eeba, maumaarã jipa unu b̶uu ichid̶e ijãaped̶aad̶a biꞌia wau panuud̶eeba.

²⁵Ara mau kĩra wẽra aud̶ua nii Rahaba waud̶a kakua Dachi Akõreba ichi jipa nii unusii. Josueba bʉid̶arã orrõodad̶amera ichi ded̶e biꞌia irsibisii maud̶e o ãyare waya wãbiasii.2:25 Josué 2:1-24.²⁶Biud̶a jauri wãꞌãe nii. Ara mau kĩra Dachi Akõred̶e ijãa b̶uu a b̶uuba biꞌia wauwẽebʉrã, biawãra ijãawẽa b̶uu. Ichiba ijãa b̶uu a b̶uu ẽbẽra biud̶a kĩra nii.

Kauwa berread̶ai panuu

¹Ãbarã, machiba kuitaa panuu Dachi Akõreba dachi chi Ichi bed̶ea jaradeabadaurã aude ichiai. Maud̶eeba ãrea machid̶ebenaba jʉrʉd̶aabai panuu jaradeabadaurã nuread̶ai baita. ²Joma dachiba ãrea biꞌiwãe waubadau. Ab̶auba berrearuud̶e ab̶a sõ puꞌuabikaubʉrã, ne jomad̶e jipa nii maud̶e ichi kakua joma jipa b̶uu.

³Dachiba mura itaed̶e jiorr kaabibadau dachi ijãamera. Maka mauba dachi wã kʉ̃ria panuumaa adoebadau. ⁴Maud̶e jãba ʉ̃rʉbena kʉ̃risiásturu. Jãba mechiu nimina maud̶e pũatu ãrea puaruuba adoebarimina, chi ũubibariiba chi timón b̶istĩika b̶uu purrabarii ichi wã kʉ̃ria b̶uumaa wãi baita. ⁵Ara mau kĩra chi kẽrame b̶istĩika b̶umina ara ichi ʉ̃rʉbena ãrea berreabarii. Kʉ̃risiásturu saka tʉbʉchia b̶aꞌãra koaruuba mode mechiu joma baabibarii. ⁶Dachi kẽrame tʉbʉchia kĩra niid̶eeba joma kachirua jarabarii. Ab̶a mau dachi kakuad̶ebenad̶eeba dachi kakua joma pobibarii ab̶a biuduud̶aa. Maud̶e jʉbawãe niiba kachirua berreabiabarii tʉbʉchia koabiiruu kĩra.3:6 Jʉbawãe niiba. Griego bed̶ead̶e naka b̶ʉ kub̶uu: tʉbʉchia aoko kub̶uu kiikauba.

⁷Barikiu ãnimara moded̶ebena, ibanarã, b̶i jãaba nureabadau maud̶e mard̶ebena ẽbẽrarãba jidaud̶aped̶a ʉmʉmʉrʉabibadau. ⁸Maamina dachi kẽrame ome ab̶au bid̶a poyaad̶akau. Dachi kẽrameba joma kachirua berreabarii. Nearãa kachiruaba waabiru b̶uu kĩra b̶uu. ⁹Dachi kẽrameba Dachi Bajãad̶ebena Mechiumaa biꞌia berreabadau maud̶e ara mau kẽrameba ẽbẽrarãmaa kachirua jarabadau, Dachi Akõreba mau ẽbẽra ara ichi kĩra waud̶amina. ¹⁰Ara maud̶ebena okarrba bed̶ea bia maud̶e bed̶ea kachirua berreabarii. Ãbarã, mau makad̶aabai b̶uu. ¹¹Mied̶ebena bania, ¿bania kũaa maud̶e bania kuyaa chebarika? ¹²¿Higo bakuruba olivo jõ chaubarika? ¿Uvaba higo jõ chaubarika? Chaukau. Ara mau kĩra mied̶ebena bania kũaa maud̶e bania kuyaa chekau.

Chi biawãra kʉ̃risia kuitaa nii

¹³Machi kʉ̃risia kuitaa nuree maud̶e ne kuitaa nuree kʉ̃risia panuubʉrã, unubiásturu biawãra maka nuree, machi biꞌia nibabadaud̶eeba. Chi mechiu nuree kʉ̃risiad̶awẽa kʉ̃risia kuitaad̶eeba biꞌia waud̶ai panuu. ¹⁴Maamina ab̶auba chi uru b̶uu kakua maebʉrã chi wau b̶uu kakua jiwaa duanuubʉrã, maud̶e waabenarã aude biꞌia nuread̶ai baita jʉrʉduubʉrã, jararã́sturu machi ne kuitaa nuree. Maka jaraaduubʉrã, chi biawãra bed̶ea ida b̶u panuu. ¹⁵Machi kʉ̃risia kuitaad̶eeba maka kʉ̃risia panuubʉrã, mau kʉ̃risia kuitaa Dachi Akõred̶ebena neekau, maumaarã nau iujãad̶ebena, ẽbẽrarãd̶ebena maud̶e jʉbawãe niid̶ebena neebarii. ¹⁶Chi waabenarãba uru panuu kakua maebʉrã wau panuu kakua jiwaa nuree, maud̶e chi waabenarã aude biꞌia nuread̶ai baita jʉrʉ nureerãba kʉ̃risia kachirua barikia kʉ̃risiabadau maud̶e ne joma kachirua waubadau. ¹⁷Maamina chi Dachi Akõreba dea b̶uu kʉ̃risia kuitaa uru nureerãba ne jomad̶e jipa waubadau, jomaurã ome jirukaraayuwãe nuread̶ai baita jʉrʉbadau, jomaurã ome biꞌia panabadau, ab̶auba jara b̶uu ũrid̶ai baita panabadau, waabenarã kĩra chuburiabadau maud̶e ne joma biꞌia waubadau. Ab̶a waabenarã audeara biꞌia waud̶akau. Ichiba jara b̶uu kĩra biawãra waubarii. ¹⁸Jirukaraayuwãe b̶uabariid̶eeba, waabenarã jirukaraayuwãe panabiabarii, ne uuruu kĩra. Mau ẽbẽraba unui chi waabenarãba jipa wau panuu, ne jõ bakuru biꞌia chaubarii kĩra.

Dachi Akõreba jara b̶uu joma wau panásturu

¹¿Machi sakãe chĩobadama maud̶e oa kachirua berreabadama? Machiba kachirua wau kʉ̃ria panuu machi sõd̶e chĩo b̶uu maka waud̶amera. ²Machiba ne adaud̶ai ãrea kʉ̃riabadamina poyaa adaud̶akau. Maud̶eeba mia beabadau. Waabenarãd̶e ne kaebea adaud̶ai kʉ̃riabadau. Maamina poyaa adaud̶akaud̶eeba oa kachirua berreabadau maud̶e chĩobadau. Machiba chi kʉ̃ria panuu adaud̶akau, Dachi Akõremaa ʉtaa id̶id̶akaud̶eeba. ³Maud̶e machiba Dachi Akõremaa ʉtaa id̶iiduud̶e ne poyaa adaud̶akau kʉ̃risia kachiruad̶eeba ʉtaa id̶ibadaud̶eeba. Machiba ʉtaa id̶ibadau, ara machiaburu kʉ̃ria panuu kĩra waud̶ai baita. ⁴Junebena wẽra ome kãiduu kĩra machiba Dachi Akõre ida b̶uu panuu nau iujãad̶ebenarãba waubadau kĩra waud̶ai baita. ¿Machiba wabid̶a adua panuka chi nau iujãad̶ebena kʉ̃ria b̶uu Dachi Akõre ome chi kĩramaa? Biawãra barikiuba nau iujãad̶ebena kʉ̃ria b̶uubʉrã, Dachi Akõre ome chi kĩramaa b̶eei. ⁵Dachi Akõreba dachi sõd̶e b̶ud̶a Jauriba kʉ̃ria b̶uu Dachi Akõréturu kʉ̃ria panad̶amera. ¿Machiba kʉ̃risia panuka Dachi Akõre bed̶ead̶e bari ara jãka b̶ʉbisii? ⁶Maamina Dachi Akõreba ichi sõbiad̶eeba dachi ãrea aid̶a b̶uu. Maud̶eeba Ichi Bed̶ead̶e naka b̶ʉ kub̶uu:

«Chi nejuakaya nuree Dachi Akõreba ida biꞌia b̶uabikau.

Maamina chi mechiu kʉ̃risiawẽa nuree Dachi Akõreba ichi sõbiad̶eeba aid̶abarii».4:6 Proverbios 3:34.

⁷Maud̶eeba Dachi Akõre juad̶e panásturu. Jʉbawãe nii ijãarã́sturu. Maka ichi machid̶ebena ãyaa wãi. ⁸Dachi Akõre kaita nésturu, makarã ichi machi kaita neei. Machi chi kachirua waubadaurã, ¡machi jua jeraaduu kĩra waa kachirua waurã́sturu! Machi kʉ̃risia ome uru nuree, ¡kʉ̃risia kachirua ida b̶ud̶aped̶a Dachi Akõréturu kʉ̃risiásturu! ⁹Machiba kachirua wauped̶aad̶a kakua kĩra nomaa panásturu, jẽásturu, biuchaa jẽásturu. Waa kĩrajʉʉ ʉirã́sturu, maumaarã machiba kachirua wauped̶aad̶a kakua ãrea jirukaraa panásturu. ¹⁰Chi waabenarã audeara mechiuwãe nuree, Dachi Mechiu daad̶e nésturu. Maka mauba machi chi mechiurã b̶ui.

Waabena ʉ̃rʉbena kachirua jararã́sturu

¹¹Ãbarã, waabenarã ʉ̃rʉbena kachirua jararã́sturu. Ab̶auba ichi ãba ʉ̃rʉbena kachirua jaraaruubʉrã maebʉrã jidearuubʉrã, Moisesba b̶ʉd̶a ʉ̃rʉbena kachirua jara b̶uu, maud̶e mau Moisesba b̶ʉd̶a jidea b̶uu.4:11 Moisesba b̶ʉd̶a. Dachiba biꞌia kuitaad̶awẽma chi sãu b̶ʉd̶a jara b̶uu. Waabenarã baita «Moisesba b̶ʉd̶a» jara b̶uu. Waabenarã baita jara b̶uu «chi dachiba waabenarã kʉ̃riad̶ai b̶uu ʉ̃rʉbena b̶ʉd̶a». Santiago 2:8. Ab̶auba Moisesba b̶ʉd̶a maka jideai kʉ̃risia b̶uubʉrã, mau Moisesba b̶ʉd̶ad̶e jara b̶uu wauwẽa b̶uu. Moisesba b̶ʉd̶ad̶e jara b̶uu audeara ichi waabenarã nebʉra ichiabarii b̶eesii. ¹²Maamina mau Moisesba b̶ʉd̶a Dachi Akõréburu deasii. Jãuburu dachi nebʉra ichiabarii. Ab̶a jãuburu ẽbẽrarã poyaa karibai maud̶e poyaa dachi nebʉra ichiai. Maud̶eeba ¿bichi kaima, bichi ãba nebʉra ichiai baita?

Ara machi ʉ̃rʉbena arakʉd̶e kʉ̃risiásturu

¹³¡Mʉ bed̶ea ũrísturu! Waabenarãba naka jarabadau: «Id̶i maebʉrã nu dachi junebena puurud̶aa wãd̶ai. Aria año ab̶a paneed̶ai. Maud̶e ne waud̶ai chi nejarra adaud̶ai baita». ¹⁴Maamina machiba adua panuu nubena ewarid̶e kãare sãai. ¿Machiba kuitaa panuka nubena ewarid̶e chokae nuread̶ai? Adua panuu. Machi jʉ̃rʉara kĩra nuree. Jʉ̃rʉara neeped̶a isa wãꞌãebarii kĩra, machi sid̶a kãꞌãabariwãe nuread̶ai. ¹⁵Maud̶eeba biꞌia b̶uu machiba naka jarad̶ayu: «Dachi Mechiuba kʉ̃riaruubʉrã, dachi chokae nuread̶ai. Maabae ne waukuad̶ai». ¹⁶Maamina machiba maka waud̶akau. Maumaarã chi mechiu nuree kʉ̃risia panuud̶eeba jarabadau machiba wau kʉ̃ria panuu poyaa waud̶ai. Biawãra mau kachirua b̶uu. ¹⁷Chi biꞌia waui kuitaa b̶uuba maka wauwẽebʉrã, kachirua wau b̶uu.

Dachi Akõreba barau nuree iadaai ʉ̃rʉbena

¹Chi nejarra barau nuree, ¡mʉ bed̶ea ũrísturu! ¡Kĩra nomaa jẽásturu, kãꞌãabariwãed̶e machi nebʉrad̶e paneed̶aid̶eeba! ²Joma machiba uru panuu b̶eraad̶a kĩra b̶uu. Machi paru simiaba kod̶a kĩra b̶uu. ³Nau kaad̶ebena ewarid̶e machiba chi nejarra aribia ʉyaa panuu. Maamina machi nee maud̶e parata mokokoro chau b̶uu. Dachi Akõreba ichiaruud̶e machi parata arab̶aud̶e mokokoro chau b̶uuba kuitaabii machiba kachirua wauped̶aad̶a. Maud̶eeba tʉbʉchiaba ãrea biꞌiwãe panad̶ai. ⁴Machi ne uu nub̶uud̶e trajabadaurãmaa chi nejarra dead̶awẽa panuu ãchi traju bare. Maud̶eeba ãchiba Dachi Akõremaa ʉtaa id̶i panuu kastikamera. ¡Ũrísturu! Dachi Mechiu chi joma poyaa wau b̶uuba ũrisii maarãba ʉtaa id̶iped̶aad̶a. ⁵Nau iujãad̶e machiba ne joma uru panuu maud̶e machiba wau kʉ̃ria panuu waubadau. Maka machi sõ boreabi panabachid̶au, paka boreabibadau kĩra. Maamina paka beaduu kĩra kãꞌãabariwãed̶e Dachi Akõreba machi kastikai. ⁶Machiba chi ẽbẽra jipa nii nebʉra barau ad̶aped̶a beasid̶au. Maud̶e mauba ne waubasii bearãad̶amera.

Joma dauchia jãadua panásturu

⁷Maud̶eeba ãbarã, joma dauchia jãadua panásturu ab̶a Dachi Mechiu neeruud̶aa. Ne uu nub̶uud̶e ẽbẽraba wau b̶uu ʉ̃rʉbena kʉ̃risiásturu. Ichi pead̶e uuruud̶e, apii esed̶aubarii kui cheeruud̶e chi uud̶a tonomera maud̶e warimera. Ara maka nubarii kui maucha cheeruud̶e, mau uud̶a biꞌia chaumera. ⁸Ara mau kĩra joma dauchia jãadua panuud̶eeba esed̶au panásturu maud̶e sõd̶eeba ijãa panásturu, Dachi Mechiu Jesucristo kãꞌãabariwãed̶e neeid̶eeba. ⁹Ãbarã, waabena ʉ̃rʉbena kachirua jararã́sturu, Jesucristoba machi ichiarãamera. Jesucristo dachi nebʉra ichiabarii kãꞌãabariwãed̶e neei.5:9 Jesucristo dachi nebʉra ichiabarii kãꞌãabariwãed̶e neei. Griego bed̶ead̶e naka b̶ʉ kub̶uu: dachi nebʉra ichiabarii de poraad̶e b̶uu.

¹⁰Ãbarã, kʉ̃risiásturu saka Dachi Akõre baita berreabadaurãba dauchia jãaduaped̶aad̶a ʉ̃rʉbena. Dachi Mechiu trʉ̃d̶eeba berreasid̶au kakua ãrea biꞌiwãe panad̶a joma dauchia jãaduasid̶au. Ara mau kĩra machia bid̶a joma dauchia jãaduad̶ai panuu. ¹¹Dachimaarã, chi ãrea biꞌiwãe panuud̶e dauchia jãadua nuree ãrea biꞌia nuree. Machiba ũribadau Job ichi ewarid̶e ãrea biꞌiwãe b̶uad̶a joma dauchia jãaduasii. Mau ewari ãrea nebʉrad̶e b̶uaped̶a, kuitaa panuu Dachi Mechiuba ichi biꞌia b̶usii. Mauba kĩra chuburia b̶uu maud̶e kʉ̃riad̶eeba aid̶ai b̶uu.

Dachi Akõremaa ʉtaa id̶ísturu

¹²Mau awara ãbarã, ab̶au trʉ̃d̶e biawãra ne waud̶ai arã́sturu. Bajãa trʉ̃d̶eeba, nau iujãa trʉ̃d̶eeba maebʉrã barikiad̶e biawãra waud̶ai arã́sturu. Waud̶ai aaduubʉrã, biawãra wáusturu. Maud̶e waud̶awẽe aaduubʉrã, biawãra waurã́sturu. Maka Dachi Akõreba machi nebʉra ichiabai.

¹³Machid̶ebena ab̶a ãrea biꞌiwãe b̶uubʉrã, Dachi Akõremaa ʉtaa id̶i b̶uu. Ab̶a kĩrajʉʉ b̶uubʉrã, karid̶eeba Dachi Akõremaa biꞌia berreai b̶uu. ¹⁴Machid̶ebena ab̶a ẽpermo b̶uubʉrã, chi ijãabadaurã nubadaurã iui b̶uu mau baita Dachi Akõremaa ʉtaa id̶id̶amera.5:14 Ijãabadaurã nubadaurã. Kajuma bed̶ead̶e «ancianos» maebʉrã «pastores» a jarabadau. Ãchiba ʉtaa id̶iiduud̶e Dachi Mechiu Jesús trʉ̃d̶e olivo draaba b̶aꞌãra purud̶ai panuu. ¹⁵Maud̶e ijãa panad̶ai panuu Dachi Akõreba mau aribiabii. Maka ʉtaa id̶iiduubʉrã Dachi Mechiuba aribiabii. Chi ẽpermo b̶uad̶aba kachirua waud̶abʉrã, Dachi Mechiuba mau perdonai. ¹⁶Mau baita machiba kachirua wauped̶aad̶a chiya jarásturu. Maud̶e ãbua Dachi Akõremaa ʉtaa id̶ísturu biꞌia duanad̶ai baita. Ẽbẽra jipa b̶uuba Dachi Akõremaa ʉtaa id̶iiruubʉrã Dachi Akõre poyaabariid̶eeba ne aribia waubarii. ¹⁷Elías dachi kĩra ẽbẽra basii. Mauba sõd̶eeba Dachi Akõremaa ʉtaa id̶isii kui cherãamera. Maabae Israel druad̶e año õbea y medio kui cheebasii. ¹⁸Mau maad̶akare ichiba Dachi Akõremaa ʉtaa id̶isii kui chemera. Ara makʉd̶e kui chesii.5:18 1 Reyes 17—18. Mauba ne uu nub̶uu tonoped̶a chausii.

^19-20Ãbarã, nau kuitásturu: chi biawãra bed̶ead̶ebena ab̶a ãyaa wãaruubʉrã, maud̶e ab̶auba ichimaa kachirua ida b̶ubiped̶a waya neebiiruubʉrã, mau ẽbẽraba kachirua ãrea wau b̶uad̶a Dachi Akõreba perdonaped̶a, ewaricha Dachi Akõre awara b̶uai bad̶ad̶ebena karibai.5:19-20 Dachi Akõre awara b̶uai bad̶ad̶ebena. Griego bed̶ead̶e naka b̶ʉ kub̶uu: biuid̶ebena.