GÁLATAS

Gálatas

Karta Pabloba b̶ʉd̶a ãbarã Galacia druad̶ebenarã baita

Pabloba naa Jesucristo ʉ̃rʉbena jarad̶e wãsiid̶e naarã puuru Galacia druad̶ebenad̶aa wãsii: Antioquía Pisidiad̶ebena, Iconio puuru, Listra maud̶e Derbe puuru (Hechos 13:1—14:23). Ẽbẽrarã mau puurud̶e nuree judiowãerã basii. Pabloba aria jaradeasiid̶e waabenarã judiorã need̶aped̶a jaradea kopaneesid̶au Cristod̶e ijãad̶aped̶a, mukĩra chi kakua tõod̶ai panuu. Mau awara jara panasid̶au Pabloba Moisesba b̶ʉd̶a ãchimaa joma ijãabiawẽed̶eeba, Cristoba bʉid̶awãe basii. Maud̶e ãbarã Galaciad̶ebenarãba maarã judiorãd̶e ijãa kopaneesid̶au.

Maud̶eeba Pabloba nau Gálatas karta b̶ʉsii. Año 50d̶e b̶ʉsii. Naa Pabloba ãbarã iadaasii chi bed̶ea bia Cristo ʉ̃rʉbena ijãad̶aped̶a kʉ̃risia junebena ũrisid̶aud̶eeba. Mawãare b̶ʉsii saka Jesucristoba ichi iusii judiowãerãmaa jaradea nibamera maud̶e chi ãbarã mechiurã Jerusalend̶e nureerãba ichiba maka wau b̶uu biꞌia unu panuu (Hechos 15). Mau awara b̶ʉsii Cristod̶e ijãa panuu kakua Dachi Akõreba ichi sõbiad̶eeba dachi chi ichid̶irã jipa nuree baara duanuu.1:0 Dachi Akõreba ichi sõbiad̶eeba dachi chi ichid̶irã jipa nuree baara duanuu. Kajuma bed̶ead̶e b̶ʉ kub̶uu: justificar. Nau sid̶a jara b̶uu «Dachi Akõreba dachi nebʉraswãe nuree abarii». Joma mau 1:10—2:2d̶e b̶ʉ kub̶uu.

Mawãare Pabloba b̶ʉsii Moisesba b̶ʉd̶a ijãabi panuud̶eeba mau judiorãba judiowãerãmaa chi bed̶ea bia Cristo ʉ̃rʉbena ijãad̶ai ida kabid̶akau maud̶e maarã Moisesba b̶ʉd̶ad̶e ijãa panuurãba joma waud̶ai panumina poyaa waud̶aabai. Maud̶eeba b̶ʉsii Abrahamba mau Moisesba b̶ʉd̶awãe ijãasiid̶eeba Dachi Akõreba karibasii. B̶ʉsii ãchiba maka ijãaduubʉrã Dachi Akõreba karibai Abraham karibad̶a kĩra. Joma mau b̶ʉ kub̶uu 3:1—4:31d̶e.

Pabloba kaad̶eare b̶ʉsii chi bed̶ea bia Cristo ʉ̃rʉbena ijãaduubʉrã jãabaera dachi Moisesba b̶ʉd̶ad̶e bari trajabadaurãwãema, ichi Jauriba ua nibamera. Maud̶eeba b̶ʉsii saka ichi Jaurid̶eeba nibad̶ai panuu. Mau ʉ̃rʉbena b̶ʉ kub̶uu 5:1—6:18d̶e.

Nau kartad̶e Pabloba naa b̶ʉd̶a

¹Mʉ Pablobʉ, Jesucristoba bʉid̶abʉ.1:1 Jesucristoba bʉid̶abʉ. Kajuma bed̶ead̶e naka b̶ʉ kub̶uu: apóstol. Mau griego bed̶ead̶e jara b̶uu «bʉid̶a». Ẽbẽrarãba mʉ jʉrʉ adaud̶aabasii Jesucristoba bʉid̶a b̶uamera. Maumaarã Jesucristoba maud̶e ichi Akõreba, ichi biu b̶uad̶a chokae jiradubid̶aba mʉ maka b̶usid̶au. ²Mʉʉba nau karta b̶ʉʉruu ãbarã Galacia druad̶ebenarã baita. Joma ãbarã mʉ ome panuurãba kʉ̃ria panuu, ³Dachi Bajãad̶ebena Akõreba maud̶e Dachi Mechiu Jesucristo ãchi sõbiad̶eeba machi aid̶a panad̶ai maud̶e jirukaraayuwãe panabiad̶ai. ⁴Ara mau Jesucristoba ichi dachi kachirua kakua ida beabisii nau ewari kachiruad̶ebena karibai baita. Maka wausii Dachi Bajãad̶ebena Akõreba maka kʉ̃riasiid̶eeba. ⁵Ewaricha ichimaa biꞌia berread̶ai panuu. Biꞌia b̶uu maka b̶uai.1:5 Biꞌia b̶uu maka b̶uai. Kajuma bed̶ead̶e b̶ʉ kub̶uu: amén.

Bed̶ea bia Cristo ʉ̃rʉbena ab̶aburu b̶uu

⁶Mʉ saka kʉ̃risiai adua b̶uu machiba kãꞌãabariwãed̶e Dachi Akõre ida b̶uped̶aad̶a. Ichiba machi iusii Cristo sõbiad̶eeba karibai baita, maamina machiba ãrea ũri panuu waabenarãba bed̶ea bia kĩra jara panuu. ⁷Biawãra, chi bed̶ea bia june wãꞌãe. Maamina chi nureerãba machimaa biꞌiwãe kʉ̃risiabiabadau, chi bed̶ea bia Cristo ʉ̃rʉbena ãyaa jaradea panuud̶eeba. ⁸Barikiuba chi bed̶ea bia Cristo ʉ̃rʉbena daiba machimaa jaradeaped̶aad̶a june ãyaa jaradearuubʉrã, Dachi Akõreba mau ewaricha kastikai; daiba maebʉrã ángel bid̶a june ãyaa jaradeaduubʉrã, dai sid̶a Dachi Akõreba ewaricha kastikai. ⁹Daiba naed̶e jaraped̶aad̶a mʉʉba waya jaraaruu: machiba chi bed̶ea bia Cristo ʉ̃rʉbena ijãaped̶aad̶a barikiuba june jaradearuubʉrã, Dachi Akõreba mau baribai.

¹⁰Maka jara b̶uud̶eeba mʉʉba jʉrʉwẽa b̶uu ẽbẽrarãba mʉ biꞌia unud̶amera, maumaarã kʉ̃ria b̶uu Dachi Akõréburu mʉ biꞌia unumera. Cristod̶e ijãai naed̶e mʉʉba jʉrʉ b̶uabachii ẽbẽrarãba mʉ biꞌia unud̶amera. Wabid̶a maka wau b̶uasirã, mʉ Cristo baita bari trajabarii b̶uabai basii.

Jesucristoba Pablo iud̶a

¹¹Ãbarã, kuitásturu chi bed̶ea bia Cristo ʉ̃rʉbena mʉʉba machimaa jaradead̶a ẽbẽra kʉ̃risiad̶ebenawãe. ¹²Mau bed̶ea mʉʉba ab̶a ẽbẽrad̶ebena kuitaabasii. Ab̶a ẽbẽraba mʉʉmaa jaradeabasii. Maumaarã Jesucristoba mʉʉmaa kuitaabisii. ¹³Machiba ũrisid̶au mʉ saka nibasii judiorãba jaradeabadau joma wau b̶uasiid̶e. Machiba kuitaa panuu mʉʉba ẽbẽrarã Dachi Akõred̶erã ãrea kachirua waubachii. Joma perdonai kʉ̃ria b̶uasii. ¹⁴Judiorãba jaradeabadau mʉʉba biꞌia kuitaaruu basii mʉ ab̶aarakaurã audeara, dai nabẽraed̶ebenarãba waubachid̶au mʉʉba ãrea waubachiid̶eeba. ¹⁵Maamina mʉ naweba mʉ adaui naed̶e Dachi Akõreba mʉ jʉrʉ adausii. Ichi sõbiad̶eeba mʉ iusii ichi baita bari trajabarii b̶uamera. Ichiba kʉ̃risiad̶a kĩra ¹⁶ichi Warr mʉʉmaa kuitaabisii judiowãerãmaa mau ʉ̃rʉbena jaramera. Maud̶e mʉʉba ab̶aumaa bid̶a id̶iibasii saka waui b̶uu kuitaai baita. ¹⁷Maud̶e mʉ Jerusalend̶aa wãabasii chi mʉ naed̶e Jesucristoba bʉid̶arãmaa id̶ii baita. Maumaarã mʉ Arabia druad̶aa wãsii. Maad̶akare Damasco puurud̶aa waya wãsii.

¹⁸Año õbea bad̶akare mʉ Jerusalend̶aa wãsii Pedro unui baita. Aria 15 ewari mau ome b̶uasii. ¹⁹Pedro awara, Jesucristoba bʉid̶arãd̶ebena, Dachi Mechiu ãba Santiagóturu unusii.1:19 Santiago ara mau «Jacob» abadau. Waabenarã mʉʉba unuubasii. ²⁰Dachi Akõre daad̶e mʉʉba machimaa jaraaruu: mʉ ʉ̃rʉbena b̶ʉʉruu setawãe. ²¹Jerusalend̶aa wãsiid̶e mʉ Siria druad̶aa maud̶e Cilicia druad̶aa wãsii. ²²Cristod̶e ijãabadaurã Judea druad̶ebenarãba mʉ unud̶akau basii. ²³Ãchiba naka jaraadúturu ũribachid̶au: «Dachi kachirua waui baita wãraa b̶uad̶aba jãabae jaradea b̶uu jomaurãba Cristod̶e ijãad̶amera. Naed̶e mau ichiba joma wãꞌãebii kʉ̃ria b̶uasii». ²⁴Maud̶eeba mʉ kakua ãchiba Dachi Akõremaa biꞌia berreasid̶au.

Jesucristoba bʉid̶arãba Pablo biꞌia irsibiped̶aad̶a

¹Año 14 bad̶akare mʉ Bernabé ome waya Jerusalend̶aa wãsii. Tito sid̶a wãsii. ²Mʉ wãsii Dachi Akõreba kuitaabisiid̶eeba araa wãi b̶uu. Ara basiid̶e mʉʉba ãbarã chi mechiurã ómeburu araa imibiaped̶a, jarasii chi bed̶ea bia Cristo ʉ̃rʉbena mʉʉba judiowãerãmaa saka jaradea b̶uu. Maka wausii mʉʉba wau b̶uu ãchiba biꞌia unu panuu kuitaai baita.2:2 Maka wausii...kuitaai baita. Griego bed̶ead̶e naka b̶ʉ kub̶uu: Maka wausii mʉ bari piraabayua maebʉrã bari pira b̶uad̶awãebayua.³Maud̶e Tito mʉ ome b̶uu judiowãemina, ãchiba jarad̶aabasii ichi mukĩra chi kakua tõoi b̶uu. ⁴Mau ʉ̃rʉbena berreasid̶au chi nuree biawãra ãbarãwãeba jarabachid̶aud̶eeba. Maarã ãbarã kĩra need̶aped̶a, unud̶ai kʉ̃riabachid̶au dachi Moisesba b̶ʉd̶ad̶ebena ãyaa wãsid̶au kuitaa. Jesucristod̶e ijãad̶ai bad̶amaarã, chi Moisesba b̶ʉd̶a waya waubi kʉ̃ria panasid̶au, chi mau b̶ʉd̶a baita bari trajabadaurã kĩra. ⁵Maamina ãchiba jaraped̶aad̶a daiba ne ab̶a bid̶a ijãad̶aabasii machiba chi bed̶ea bia biawãra Cristo ʉ̃rʉbena ewaricha uru nuread̶amera.2:5 Pabloba jara kʉ̃ria b̶uu mukĩra chi kakua tõobai b̶uu judiorãba waubadau kĩra, Dachi Akõred̶e ijãabarii bai baita.

^6-7Chi mechiurã abadau ãbarãba kʉ̃risia awara jarad̶aabasii mʉʉba jaradeamera. Maumaarã kuitaasid̶au Dachi Akõreba mʉ bʉisii chi bed̶ea bia Cristo ʉ̃rʉbena judiowãerãmaa jaradeamera Pedro judiorãmaa bʉid̶a kĩra. (Ãchi chi mechiurã panuu abadamina, mʉ baita arab̶aud̶e b̶uu, Dachi Akõreba dachi kĩra awara unukaud̶eeba). ⁸Biawãra Dachi Akõreba Pedro ichiba bʉid̶a b̶usii judiorãmaa jaradeamera. Ara mau Dachi Akõreba mʉ b̶usii ichiba bʉid̶a bai baita, judiowãerãmaa jaradeamera. ⁹Ãbarã chi mechiurã Santiagoba2:9 Santiagoba. Griego bed̶ead̶e naka b̶ʉ kub̶uu: Jacob., Pedroba2:9 Pedroba. Griego bed̶ead̶e naka b̶ʉ kub̶uu: Cefas. maud̶e Juanba kuitaasid̶au Dachi Akõreba ichi sõbiad̶eeba biawãra mʉ judiowãerãmaa bʉisii. Maud̶e ãchi mʉ ome maud̶e Bernabé ome jua deasid̶au kuitaabid̶ai baita arab̶au kʉ̃risia uru panuu. Ãchiba jarasid̶au daiba judiowãerãmaa jaradea panad̶ai, maud̶e ãchiba judiorãmaa jaradea panad̶ai. ¹⁰Ab̶aburu daimaa jarasid̶au ãbarã chi nejarr barauwãe nuree aid̶ad̶amera. Mau mʉʉmaarã ãrea biꞌia b̶uasii maka wau kʉ̃ria b̶uasiid̶eeba.

Pabloba Pedro iadaad̶a

¹¹Ewari ab̶a Pedro Antioquía puurud̶aa ãbarã ichiad̶e wãsii. Aria mʉʉba jomaurã ãbarã daad̶e ichi iadaasii, ichiba biawãra kachirua wausiid̶eeba. ¹²Naka kachirua wausii: chi nuree ãbarã judiorã ẽbẽrarã Santiagod̶ebenarã Antioquía puurud̶aa wãsid̶au. Ãchiba jarabachid̶au judiowãerã mukĩra chi kakua tõod̶ai panuu ẽbẽrarã Dachi Akõred̶erã nuread̶ai baita. Ãchi need̶ai naed̶e Pedro ãbarã judiowãerã ome kobachii, maamina mau ãbarã judiorã need̶aped̶a ichi waya ãbarã judiowãerã ome koobasii. Maumaarã ãyaa wãsii. Wapea b̶uasii chi judiowãerã ãchi mukĩra chi kakua tõod̶ai panuu a jara panuu ʉ̃rʉbena.2:12 Pedro ʉ̃rʉbena naed̶e kachirua jarasid̶aud̶eeba waya kachirua jarad̶ai kʉ̃risiasii. Hechos 11:1-18.¹³Maud̶e waabenarã ãbarã judiorãba chi ãbarã judiowãerã ida b̶usid̶au Pedroba biawãrawãe wau b̶uu kĩra. Maka wau panuud̶eeba Bernabé bid̶a ara mau kĩra kachirua wausii. ¹⁴Maamina mʉʉba unusii ãchi biawãra chi bed̶ea bia Cristo ʉ̃rʉbena jara b̶uu kĩra nibad̶aabasii. Maud̶eeba mʉʉba Pedro jomaurã ãbarã daad̶e naka iadaasii: «Bichi judiomina judio kĩra nibakau. Maumaarã judiowãe kĩra nibabarii. Mau ¿sakãe bichiba ãbarã judiowãerãmaa judiorãba waubadau waubia b̶uma?»

¹⁵Judiowãerãba Moisesba b̶ʉd̶a wãꞌãe panuud̶eeba dachi judiorãba ãchi kachirua waubadaurã abadau. Dachi naweba warr adausid̶aud̶eed̶ebena judiorãd̶eeba, mau Moisesba b̶ʉd̶a uru panuu. ¹⁶Maamina dachiba kuitaa panuu Dachi Akõreba ab̶a bid̶a b̶uwẽe chi jipa nuree baara, mau Moisesba b̶ʉd̶a wau b̶uud̶eeba. Maumaarã Jesucristoba mau Moisesba b̶ʉd̶a kĩra joma wausiid̶eeba, Dachi Akõreba dachi b̶ubarii chi jipa nuree baara. Maud̶eeba dachia bid̶a Jesucristod̶e ijãasid̶au maud̶e Jesucristod̶e ijãa b̶u kakua maka chi ichid̶irã jipa nuree baara duanubarii, ichiba mau b̶ʉd̶a kĩra joma waud̶a kakua. Biawãra Moisesba b̶ʉd̶a wau panuud̶eeba Dachi Akõreba dachi b̶ukau chi jipa nuree baara.2:16 Salmos 143:2.

¹⁷Dachiba jʉrʉsid̶au Cristod̶eeba Dachi Akõreba dachi chi jipa nuree baara duanumera. Maud̶eeba waabenarãmaarã dachi kachirua waubadaurãbʉ, chi Moisesba b̶ʉd̶a ida b̶usid̶aud̶eeba. Makarã ¿Cristoba dachimaa kachirua waubia b̶uka? ¡Makawãema! ¹⁸Mʉʉba Moisesba b̶ʉd̶a ida b̶ud̶akare waya ijãaruubʉrã, mʉ nebʉra baraa b̶eei mau b̶ʉd̶a ida b̶u b̶uasiid̶eeba. ¹⁹Naed̶e mʉ Moisesba b̶ʉd̶ad̶eeba nibasii. Maamina mau Moisesba b̶ʉd̶ad̶ebena wãsii.2:19 Mau Moisesba b̶ʉd̶ad̶ebena wãsii. Griego bed̶ead̶e naka b̶ʉ kub̶uu: Mau Moisesba b̶ʉd̶aba biusii Moisesba b̶ʉd̶a baita. Maka mʉ Dachi Akõre baita chokae b̶eesii. ²⁰Mʉ Cristo ome cruzd̶e ãbua jirab̶usid̶au. Maud̶eeba ara mʉʉd̶eeba b̶uwãema, maumaarã Cristo mʉ sõd̶e b̶uu. Nau kakuad̶e chokae b̶uumisa mʉ Dachi Akõre Warr Jesusd̶eeba nibai. Ara mau Jesús, Dachi Akõreba waubi b̶uu wausiid̶eeba, mʉ kʉ̃riasii maud̶e mʉ kakua ichi ida beabisii. ²¹Dachi Akõreba ichi sõbiad̶eeba waud̶a mʉʉba ida b̶uwẽe. Moisesba b̶ʉd̶a wau panuud̶eeba chi jipa nuree baara panasirã, Cristo bari biui basii.

Jesucristod̶e ijãad̶ai panuud̶éburu Dachi Akõre Jauri irsibibadau

¹Ãbarã Galacia druad̶ebenarã, ¡machi kʉ̃risiaswãe nureerã! ¿Kaiba machi setaa kũruasii chi biawãra bed̶ea ida b̶ud̶amera? Daiba machimaa joma chi Jesucristo cruzd̶e biu b̶uad̶a ʉ̃rʉbena jaradeabachid̶au. ²Mʉʉba nau machimaa id̶iiruu: Dachi Akõre Jauri irsibisid̶aud̶e ¿machiba chi Moisesba b̶ʉd̶a wau panasid̶aka? Maebʉrã ¿chi bed̶ea Jesús ʉ̃rʉbena ũriped̶aad̶a ijãasid̶aka? ³¡Machi biawãra kʉ̃risiaswãe nuree! Cristod̶e ijãasid̶aud̶e naed̶e Dachi Akõre Jaurid̶eeba biꞌia nibasid̶au. ¿Jãabae ara machiba wau panuud̶eeba chi jipa nuree baara panad̶aika?3:3 Ara machiba wau panuud̶eeba. Griego bed̶ead̶e naka b̶ʉ kub̶uu: nau kakuad̶eeba. Chi nureemaarã, mau jara b̶uu dachi mukĩra chi kakua tõoi.⁴Machi biꞌiwãe panad̶a Cristo kakua ¿bari makaska? ¡Mʉʉmaarã, machi bari ãrea biꞌiwãe panad̶aabasii! ⁵Dachi Akõreba ichi Jauri machimaa deasii awara, ẽbẽrarãba ne poyaa waud̶akau machi tãed̶e wau b̶uu. ¿Chi Moisesba b̶ʉd̶a machiba wau panasiid̶eeba maka wau b̶uka? ¿Maka wauwẽka chi bed̶ea bia Cristo ʉ̃rʉbena ũrid̶aped̶a ijãasid̶aud̶eeba?

⁶Abraham ʉ̃rʉbena kʉ̃risiásturu. «Abrahamba Dachi Akõred̶e ijãasii. Maud̶eeba Dachi Akõreba ichi nebʉraswãe nii unusii».3:6 Dachi Akõreba ichi nebʉraswãe nii. Mau versiculod̶e jara b̶uu Dachi Akõre ichi jipa nuree baara b̶usii. Cristod̶e ijãa panasid̶aud̶eeba Galaciad̶ebena judiowãerã ijãabadaurãba Dachi Akõre Jauri poyaa irsibid̶ai panasii, chi judiorã kĩra. Génesis 15:6.⁷Mauba kuitaad̶ai panuu chi biawãra Dachi Akõred̶e ijãabadaurã, Abraham warrarãbʉ. ⁸Nabẽraed̶e Dachi Akõre bed̶ead̶e b̶ʉ kub̶uu judiowãerãba Dachi Akõred̶e ijãaped̶aad̶a basirã ichiba ãchi ichid̶irã jipa nureerã baara b̶ui basii. Maud̶eeba nabẽraed̶e Dachi Akõreba Abrahammaa chi bed̶ea bia berreasii. Ichiba naka jarasii: «Bichi kakua mʉʉba nau iujãad̶e duanuu puuru joma karibai».3:8 Génesis 12:3.⁹Maud̶eeba chi Abrahamba ijãad̶a kĩra ijãa nuree Dachi Akõreba joma aid̶ai Abraham aid̶ad̶a kĩra.

¹⁰Chi Moisesba b̶ʉd̶a wau panuud̶eeba chi Dachi Akõred̶e jipa nuree baara paneed̶ai kʉ̃risia nuree, nebʉra barau a b̶uu. Mau Moisesba b̶ʉd̶ad̶e naka b̶ʉ kub̶uu: «Nau Moisesba b̶ʉd̶a joma wauwẽa nii Dachi Akõreba nebʉra barau ai».3:10 Deuteronomio 27:26.¹¹Biawãra dachiba biꞌia kuitaa panuu Moisesba b̶ʉd̶a wau b̶uud̶eeba Dachi Akõreba ab̶a bid̶a chi ichid̶irã jipa nuree baara b̶ui.3:11 Salmos 143:2; Romanos 3:20. Dachi Akõre bed̶ead̶e naka b̶ʉ kub̶uu: «Chi jipa nii, Dachi Akõred̶e ijãa niid̶eeba chokae nibai».3:11 Habacuc 2:4.

¹²Maamina chi Dachi Akõred̶e ijãa b̶uu chi Moisesba b̶ʉd̶a waui b̶uu audeara ãyaa b̶uu. Maumaarã ichi ʉ̃rʉbena naka b̶ʉ kub̶uu: «Chi Moisesba b̶ʉd̶a wau b̶uu, mauba nibai».3:12 Levítico 18:5.

¹³Moisesba b̶ʉd̶a kĩra wau panuwãed̶eeba, nebʉra barau ai. Maud̶ebena Jesucristoba dachi karibasii. Ichi Dachi Akõreba dachi kakua nebʉra baraabisii. Moisesba b̶ʉd̶ad̶e naka b̶ʉ kub̶uu: «Ab̶a bakurud̶e jira b̶eed̶a Dachi Akõreba mau nebʉra barau ai».3:13 Bakurud̶e. Griego bed̶ead̶e bakuru aaruud̶e cruz sid̶a jara b̶uu. Deuteronomio 21:23.¹⁴Makasii Dachi Akõreba Jesucristod̶eeba judiowãerã sid̶a karibamera ichiba naed̶e Abrahammaa karibai ad̶a kĩra.3:14 Génesis 12:3. Dachiba Jesucristo ijãa panuud̶eeba Dachi Akõreba ichi Jauri deai jarad̶a irsibisid̶au.3:14 Isaías 44:3; Hageo 2:5.

Dachi Akõreba Abrahammaa bed̶ea dead̶a

¹⁵Ãbarã, dachi ẽbẽrarãba ne waubadau kĩra berrearuu: ẽbẽraba waabena ome bed̶ea dead̶a kartad̶e b̶uped̶a ichi trʉ̃ mau kartad̶e b̶ʉʉruubʉrã ab̶au bid̶a mau bed̶ea b̶ʉd̶a poyaa ãyaa b̶ud̶aabai, maud̶e kʉ̃risia awara poyaa ed̶a b̶ʉd̶aabai. ¹⁶Ara mau kĩra Dachi Akõreba Abrahammaa, maud̶e chi ichid̶ebena neei b̶uumaa jarasii mauba jomaurã karibai.3:16 Génesis 22:18. Dachi Akõre bed̶ead̶e b̶ʉwẽa b̶uu «Abrahamd̶ebena imid̶ai ẽbẽrarã» ãrea ẽbẽrarã jara b̶uu kĩra. Maumaarã b̶ʉ kub̶uu Dachi Akõreba Abrahamd̶ebena neei b̶uumaa maka jarasii ab̶au ʉ̃rʉbenáturu berrea b̶uud̶eeba. Mau Cristobʉ. ¹⁷Mʉʉba naka jara b̶uu: Dachi Akõreba Abraham ome bed̶ea deasii.3:17 Griego bed̶ead̶e chi b̶ee kartad̶e naka b̶ʉ kub̶uu: Cristod̶eeba Dachi Akõre Abraham ome bed̶ea deasii. 430 año basiid̶e Moisesmaa ichiba jarad̶a b̶ʉbisii. Maamina ichiba Abraham ome naed̶e bed̶ea dead̶a mau Moisesba b̶ʉd̶a ãyaa b̶uubasii. Ãyaa b̶ud̶a basirã ichiba karibai ad̶a waubai basii. ¹⁸Moisesba b̶ʉd̶a wau panuu baita ichiba dachi karibaaruubʉrã, ichiba karibai ad̶a kĩra karibawẽe. Maamina Dachi Akõreba Abraham karibai asiid̶eeba ichi sõbiad̶eeba karibasii.

¹⁹Makarã ¿Dachi Akõreba sakãe Moisesmaa chi ichiba b̶ʉd̶a b̶ʉbisma? Maka wausii ẽbẽrarãba kachirua waubadau kuitaad̶amera. Ẽbẽrarã mau Moisesba b̶ʉsiid̶eeba panasid̶au ab̶a Abrahamd̶ebena neei b̶uad̶a neeruud̶aa, ichid̶eeba Dachi Akõreba karibai asiid̶eeba. Dachi Akõreba Moisesmaa mau ichiba b̶ʉd̶a angelerãd̶eeba deasii. Mau dead̶akare Moisesba ẽbẽrarãmaa deasii. ²⁰Maamina Dachi Akõreba Abrahammaa karibai asiid̶e ab̶a bid̶a mau bed̶ea jarad̶e bʉibasii, maumaarã ara ichiaburu Abrahammaa maka jarasii.

²¹Maka b̶uubʉrã Dachi Akõreba Moisesmaa ichi bed̶ea b̶ʉbisiid̶e ¿ichiba Abraham ome bed̶ea dead̶a ida b̶uska? ¡Makawãema! Moisesba b̶ʉd̶aba dachi poyaa chokae panad̶ai basirã, mau b̶ʉd̶a wau panuud̶eeburu Dachi Akõreba dachi chi jipa nuree baara duanui basii. ²²Maamina Dachi Akõre bed̶ead̶e b̶ʉ kub̶uu kachiruaba jomaurã jʉ̃a uru b̶uu. Maka Jesucristoba ichi Akõreba jarad̶a wausiid̶eeba, chi ichid̶e ijãaduurãba mau Dachi Akõreba deai jarad̶a adaud̶ai.

²³Cristod̶e ijãad̶ai naed̶e dachi Moisesba b̶ʉd̶a juad̶e panasid̶au. Maud̶ebena poyaa awara wãd̶aabasii ab̶a Dachi Akõreba Cristo kuitaabiiruud̶aa. ²⁴Biawãra Moisesba b̶ʉd̶aba dachi nu ua b̶uasii ab̶a Cristod̶e ijãaduud̶aa. Cristo neesiid̶e ichid̶e ijãa panuu kakua Dachi Akõreba dachi chi jipa nuree baara duanubarii. ²⁵Maamina id̶ibae dachiba Cristod̶e ijãa panuud̶eeba Moisesba b̶ʉd̶aba nu ua b̶uakau. ²⁶Jesucristo ijãa panuud̶eeba joma machi Dachi Akõre warrarãbʉ. ²⁷Machi boro easid̶aud̶e Cristo kĩra paneesid̶au unubisid̶au.3:27 Cristo kĩra paneesid̶au. Griego bed̶ead̶e naka b̶ʉ kub̶uu: Cristod̶e paru wid̶i kĩra jʉ̃ paneesid̶au.²⁸Mau jara b̶uu judio griego ome arab̶aud̶e panuu, chibari baita bari trajabarii chi chibariswãe nii ome arab̶aud̶e panuu, maud̶e mukĩra wẽra ome arab̶aud̶e panuu. Joma machi ẽbẽra ab̶a nii kĩra nureebʉ, Jesucristo ome ãbua nureed̶eeba. ²⁹Machi Cristod̶ed̶eeba biawãra Abraham warrarãbʉ. Mauba Dachi Akõreba machi karibasii ichiba Abrahammaa dachi karibai asiid̶eeba.

Dachi Akõre warrarãbʉ

¹Mau awara naka jara b̶uu: warrba ichi akõred̶e joma adaui b̶umina kaebe niid̶eed̶e chibari baita bari trajabarii kĩra nii. ²Chi kaebe nii warr ichi nubadaurã juad̶e b̶uu, maud̶e ichi akõred̶e adaui b̶uu chi nureerãba nubadau ab̶a chi akõreba jarad̶a ewarid̶aa. ³Ara mau kĩra Cristod̶e ijãad̶ai naed̶e dachi warraed̶ebena kĩra nureasii. Mau ewarid̶e dachiba nau iujãad̶ebena jauri mechiurã ijãa panasid̶au, chibari baita bari trajabarii kĩra. ⁴Maamina Dachi Akõreba jarad̶a ewari neesiid̶e ichi Warr nau iujãad̶aa bʉisii. Mau Warr wẽraba adausii maud̶e Moisesba b̶ʉd̶a waui b̶uasii. ⁵Dachi Akõreba ichi bʉisii dachi mau Moisesba b̶ʉd̶a juad̶e nuread̶a karibaped̶a, ichi warrarã babiai baita. ⁶Machi Dachi Akõre warrarãd̶eeba ichi Warr Jauri bʉisii machi sõd̶e b̶uamera. Ichi Jauri dachi sõd̶e b̶uuba «¡Mʉ Chacha!» abarii kuitaad̶amera dachi Ichi warrarãbʉ. ⁷Maud̶eeba jãabae machi chibari baita bari trajabadaurãwãema, maumaarã Dachi Akõre warrarãbʉ. Dachi Akõre warrarãd̶eeba ichi warrarã baita uru b̶uu adaud̶ai.4:7 Adaud̶ai. Griego bed̶ead̶e chi b̶ee kartad̶e b̶ʉ kub̶uu: Cristod̶ebena adaud̶ai.

Pablo ãbarã kakua kʉ̃risia baraa b̶uad̶a

⁸Naed̶e machiba Dachi Akõre adua panasid̶aud̶e chi biawãra Dachi Akõrewãerã ijãa panasid̶au ãchi baita bari trajabadaurã kĩra. ⁹Maamina jãabae machiba Dachi Akõre unubadau. Mʉʉba arakʉd̶e jaraaruubʉrã, Dachi Akõreba machi unubarii. Maka ¿sakãe nau iujãad̶ebena jauri mechiurã waya ijãad̶ai kʉ̃ria panuma, chibari baita bari trajabadaurã kĩra? Mauba machi aid̶akau. ¹⁰Barikiu bari panabadau ewari, jed̶akod̶e maud̶e añod̶e waubadau Dachi Akõreba biꞌia unumera. ¹¹Maud̶eeba mʉʉba kʉ̃risia b̶uu mʉ bari machimaa jaradeasii.

¹²Ãbarã, mʉ machi judiowãe kĩra b̶uai baita, Moisesba b̶ʉd̶a ida b̶usii. Maud̶eeba mʉʉba machimaa chi chuburia id̶iiruu mʉ kĩra mau Moisesba b̶ʉd̶ad̶e panarãad̶amera. Naed̶e machiba mʉʉmaa kachirua waud̶aabasii, maumaarã biꞌia wausid̶au. ¹³Kuitaa panuu mʉʉba machimaa chi bed̶ea bia Cristo ʉ̃rʉbena naa jarad̶e wãsiid̶e, mʉ ẽpermo b̶uasiid̶eeba machimaa jaradea b̶eesii. ¹⁴Ẽpermo b̶uasmina machiba mʉ ida b̶ud̶aabasii maud̶e duabʉid̶aabasii.4:14 Chi nureeba kʉ̃risiabadau Pablo ẽpermo b̶uad̶aba Galacia druad̶ebenarã ãrea biꞌiwãe panabiasii. Maumaarã biꞌia irsibisid̶au Dachi Akõred̶e ángel irsibiiduu kĩra, Jesucristo irsibiiduu kĩra. ¹⁵¿Sakasma chi machi kĩrajʉʉ naed̶e uru panad̶a? Mʉʉba biawãra jaraaruu machiba poyaa wauped̶aad̶a basirã ara machi dau noetad̶ai basii mʉʉmaa dead̶ai baita. ¹⁶Mʉʉba biawãra jara b̶uud̶eeba ¿mʉ machi kĩramaa baika?

¹⁷Machi tãed̶e chi biꞌia jaradead̶akaurãba ne joma wau panuu machiba ãchi bed̶ea ijãad̶amera. Maamina ãchiba maka waud̶akau machi aid̶ad̶ai baita. Machi daid̶ebena ãyaa adoe kʉ̃ria panuu sõd̶eeba ãchi baara panad̶amera. ¹⁸Biawãra biꞌia b̶uu ewaricha kʉ̃risia biꞌia sõd̶eeba ijãa panad̶ai. Maamina maka panad̶aabai panuu mʉ machi ome b̶uud̶éburu. Maumaarã mʉ wãꞌãed̶e bid̶a ijãad̶ai panuu. ¹⁹Ãbarã, machi mʉ warrarã kĩra nuree. Mʉ waya machi baita ãrea biꞌiwãe b̶uu wẽra warr adauruud̶e puꞌuabarii kĩra. Mʉ maka ãrea biꞌiwãe b̶uai ab̶a machi Cristo kĩra paneeduud̶aa. ²⁰¡Mʉ ʉ̃raud̶aa machi baara b̶uad̶a basirã kuitaai basii saka berreai b̶uu! Mʉʉba biawãra adua b̶uu machi ʉ̃rʉbena saka kʉ̃risiai.

Sara maud̶e Agar ʉ̃rʉbena

²¹Chi Moisesba b̶ʉd̶a juad̶e panad̶ai kʉ̃ria panuuba mʉʉmaa panáusturu: ¿Moisesba b̶ʉd̶ad̶e b̶ʉ kub̶uu adua panuka? ²²Naka b̶ʉ kub̶uu: Abrahamba warr ome uru b̶uasii. Ab̶a chibari baita bari trajabarii Agarba warr adausii.4:22 Génesis 16:1-16. Chi ab̶a chibariswãe nii Saraba warr adausii.4:22 Génesis 21:1-3.²³Chi chibari baita bari trajabariiba warr adausii Abrahamba maka kʉ̃riasiid̶eeba. Maamina chi chibariswãe nii wẽraba warr adaud̶a Dachi Akõreba deai jarad̶a basii.

²⁴Mauba dachimaa naka ãrea kʉ̃risiabia b̶uu: Dachi Akõreba bed̶ea dead̶a ome panuu. Mau bed̶ea dead̶a ome panuu Sara maud̶e Agar kĩra panuu. Dachi Akõreba bed̶ea dead̶a ab̶a Sinaí ead̶e deasii. Mau bed̶ea dead̶a chi chibari baita bari trajabarii Agar kĩra b̶uu, chi mau bed̶ea dead̶a ijãa nuree chibari baita bari trajabadaurã kĩra nureed̶eeba. ²⁵Chi Sinaí ea Arabia druad̶e b̶uu Agar kĩra b̶uu, chi mau ead̶e dead̶a Moisesba b̶ʉd̶ad̶e ijãa nuree, chibari baita bari trajabadaurã kĩra nureed̶eeba. Maud̶e chi nau iujãad̶ebena Jerusalén puuru Agar kĩra nii, mau puurud̶ebenarã chibari baita bari trajabadaurã kĩra nureed̶eeba. ²⁶Maamina chi bajãad̶ebena Jerusalén puuru Sara kĩra b̶uu, mau puurud̶ebenarã chibari baita bari trajabadaurã kĩra nureewãed̶eeba. Maka nuree Moisesba b̶ʉd̶ad̶e ijãawẽa nureed̶eeba. Dachi mamabenad̶eeba Sara warrarã kĩra nuree. ²⁷Dachi Akõre bed̶ead̶e naka b̶ʉ kub̶uu:

«Wẽra warr deakau, kĩrajʉʉse. Warr adauruuba chi puꞌua unukau, ãrea kĩrajʉʉ b̶iáse.

Wẽra mukĩraba amaad̶aba warrarã aude uru b̶uai, wẽraba mukĩra uru b̶uad̶a audeara».4:27 Isaías 54:1.

²⁸Isaac chi naweba adausii Dachi Akõreba Abrahammaa maka jarasiid̶eeba. Ãbarã, Isaac kĩra, dachi Dachi Akõre warrarã paneesid̶au ichiba maka jarasiid̶eeba. ²⁹Abraham ewarid̶e, Ismael chi naweba adausii, barikia warr kĩra. Isaac chi naweba adausii Dachi Akõre Jauri poyaabariid̶eeba. Ismaelba kachirua waubachii Isaacmaa. Id̶ibae bid̶a Moisesba b̶ʉd̶ad̶e nureerãba Cristod̶e ijãa nureemaa kachirua waubadau. ³⁰Maamina Dachi Akõre bed̶ead̶e naka b̶ʉ kub̶uu: «Chi chibari baita bari trajabarii wẽra maud̶e ichi warr sid̶a duabʉise. Chi chibari baita bari trajabarii wẽra warrba ichi akõreba uru b̶uu poyaa adaubai. Maumaarã chi chibariswãe nii wẽra warrba mau adaui».4:30 Génesis 21:10.

³¹Maud̶eeba ãbarã, dachi chi chibari baita bari trajabarii warrarã kĩra nureewãe. Maumaarã chi chibariswãe nuree warrarã kĩra nuree.

Moisesba b̶ʉd̶ad̶ebena Cristoba dachi karibad̶a

¹Cristoba dachi karibasii ena duanad̶amera. Mau ãrea ijãa panásturu. Waya chibari baita bari trajabadaurã kĩra nurearã́sturu. ²Mʉ Pablobʉ. ¡Ũrísturu! Mʉʉba nau machimaa jaraaruu: machi mukĩra chi kakua tõod̶ai panuu a kʉ̃risia panuubʉrã, Cristoba machi baita waud̶aba karibaabai. ³Waya mʉʉba jaraaruu: barikia mukĩraba ichi mukĩra chi kakua tõobiiruubʉrã, Moisesba b̶ʉd̶a joma wau b̶uai b̶uu. ⁴Chi nuree machid̶ebenarãba kʉ̃risiabadau Moisesba b̶ʉd̶a waubadaud̶eeba, Dachi Akõreba chi jipa nureerã baara b̶ui. Cristo ãyaa wãsid̶au maud̶e ichi sõbiad̶eeba jipa duanubiad̶a ida b̶usid̶au. ⁵Maamina dachiba Cristod̶e ijãa panuud̶eeba Dachi Akõre Jaurid̶eeba biawãra kuitaa panuu Dachi Akõreba dachi chi jipa nureerã baara b̶ui. ⁶Cristo Jesusba mukĩra chi kakua tõo b̶uai maebʉrã mukĩra chi kakua tõowẽa b̶uai biꞌia unuwẽa b̶uu. Maumaarã chi ichid̶e ijãa b̶uud̶eeba ichi ome ãbua b̶uu maud̶e waabenarã kʉ̃ria b̶uu.

⁷Machiba biawãra chi bed̶ea bia ijãa panasid̶au. ¿Kaiba waa joesma machiba mau bed̶ea ida b̶ud̶amera? ⁸Chi jãarãba jaradea panuu, mau Dachi Akõred̶ebena need̶awãe. Ichiba machi iukuasii. ⁹Kĩrabásturu: «Masa ẽesãabibarii b̶istĩika b̶uuba masa joma ẽesãabibarii». Ara mau kĩra b̶istĩika biꞌiwãe jaradea b̶uuba joma biꞌiwãe kʉ̃risiabibarii. ¹⁰Maamina Dachi Mechiu Jesucristod̶eeba mʉʉba kuitaa b̶uu machiba mʉʉba jara b̶uu awara kʉ̃risiad̶aabai. Barikiuba machi maka waa joe b̶eeruubʉrã Dachi Akõreba kastikai. ¹¹Ãbarã, mukĩra chi kakua tõod̶ai panuu mʉʉba wabid̶a jaradea b̶uad̶a basirã, chi maka jaradea nureerãba mʉ kachirua waud̶ai baita wãraad̶aabai basii. Mʉʉba maka jaradea b̶uad̶a basirã ãchiba Jesús cruzd̶e biud̶a ʉ̃rʉbena kachirua kʉ̃risiad̶aabai basii.5:11 Jesús cruzd̶e biud̶a ʉ̃rʉbena kachirua kʉ̃risiad̶aabai basii. 1 Corintios 1:22-23.¹²Mʉʉmaarã ¡biꞌia b̶uu chi machi maka waa joe nuree ãchicha kãra jad̶ai!

¹³Ãbarã, Dachi Akõreba machi iusii ichiba ena duanad̶amera. Maamina karibaped̶aad̶ad̶eeba kʉ̃risiarã́sturu machi kakuaba kʉ̃ria b̶uu kĩra waud̶ai panuu. Maumaarã biawãra kʉ̃riad̶eeba chiya aid̶ásturu. ¹⁴Moisesba b̶ʉd̶a nau bed̶ea ab̶aba joma jara b̶uu: «Ab̶au kʉ̃riáse ara bichi kʉ̃ria b̶uu kĩra».5:14 Levítico 19:18.¹⁵Kauwa panásturu. Oa kachirua berrea duaneeduubʉrã, chĩo duaneeduubʉrã, ara machi du ab̶a joma baribad̶ai.5:15 Griego bed̶ead̶e mau versículo naka b̶ʉ kub̶uu: Machi chiya ka duanaaduubʉrã, maud̶e chiya ko duanaaduubʉrã, ara machi du ab̶a joma ãrid̶ai.

Dachi Akõre Jaurid̶eeba nibásturu

¹⁶Maud̶eeba mʉʉba jaraaruu: Dachi Akõre Jaurid̶eeba nibásturu. Makaaruubʉrã machi kakuaba kachirua wau kʉ̃ria b̶uu waud̶aabai. ¹⁷Nau kakuaba kachirua wau kʉ̃ria b̶uu Dachi Akõre Jauriba kʉ̃riakau. Maud̶e Dachi Akõre Jauriba waubii kʉ̃ria b̶uu nau kakuaba kʉ̃riakau. Mau ãbua biꞌia panad̶akaud̶eeba machiba wau kʉ̃ria panuu poyaa waud̶aabai. ¹⁸Maamina Dachi Akõre Jauriba machi ua nibaaruubʉrã, Moisesba b̶ʉd̶ad̶e panuuwãe.

¹⁹Dachiba chi nau kakuaba kachirua waubarii ãrea kuitaa panuu. Naubʉ: dachi kakuaba barikia kachirua waubadau, ne mia pera wau nibabadau, barikiu ome kĩra nejasia wau kʉ̃riabadau, ²⁰Dachi Akõre kuenda juaba ne kaped̶aad̶amaa ʉtaa id̶ibadau, jaibanarãba waubadau, waabenarã kĩramaabadau, oa kachirua berreabadau, waabenarãd̶e ne uru panad̶ai kʉ̃riabadau, bari au kĩrubadau, waabenarã audeara biꞌia panad̶ai jʉrʉbadau, ãchi kakawaa kʉ̃risia uru panabadau, Dachi Akõre bed̶ea ãyaa jaradea panuud̶eeba ãyaa wãbadau, ²¹waabenarãba uru panuu kakua kachirua kʉ̃risiabadau, mia beabadau, itua biu nibabadau, kĩrajʉʉ bara b̶uabarii ewarid̶e ãrea kachirua waubadau maud̶e ne joma kachirua mau kĩra b̶ee sid̶a.5:21 Mia beabadau. Griego bed̶ead̶e chi b̶ee kartad̶e mau wãꞌãe. Mʉʉba machimaa naed̶e jarad̶a kĩra waya jaraaruu: mau kachirua wau nuree Dachi Akõre juad̶e panad̶aabai, ichid̶irã baara.

²²Maamina Dachi Akõre Jauriba nau deabarii: waabenarã kʉ̃ria nureabadau, kĩrajʉʉbadau, jirukaraayuwãe nureabadau, joma dauchia jãadua nureabadau, ẽbẽrarã baara biꞌia nureabadau, ẽbẽra bia nureabadau, chi jara panuu kĩra waubadau, ²³waabenarã audeara biꞌia nuree kʉ̃risiad̶akau maud̶e dachi kakua jipa uru nureabadau. Mau ley wãꞌãe, joma mau jarad̶a «kachirua» ai baita. ²⁴Cristod̶erãba chi nau kakuaba ne joma kachirua wau kʉ̃ria b̶uu cruzd̶e jirab̶u beasid̶au. ²⁵Dachi Akõre Jaurid̶eeba chokae panuud̶eeba ichid̶eeba nibad̶ai panuu. ²⁶Waabenarã audeara biꞌia nuree kʉ̃risiad̶aabai panuu, oa kachirua berrea duanad̶aabai panuu maud̶e ab̶auba uru b̶uu kakua kachirua kʉ̃risiad̶aabai panuu.

Chiya aid̶ásturu

¹Ãbarã, machid̶ebena ab̶a mia aduad̶e kachiruad̶e b̶aeruubʉrã, machi chi Dachi Akõre Jaurid̶eeba nureerãba, waabenarã audeara biꞌia nuree kʉ̃risiad̶akaud̶eeba, aid̶ad̶ai panuu mau waya jipa nibamera. Maamina kauwa panásturu machi sid̶a ara mau kĩra kachiruad̶e b̶aerãad̶amera. ²Nebʉrad̶e panuud̶e chiya aid̶ásturu. Maka Cristoba waubi b̶uu machiba joma waud̶ai. ³Chi mechiuwãe b̶uuba ichi chi mechiu nii kʉ̃risia b̶uubʉrã, ara ichi du ab̶a setaa kũrua b̶uu. ⁴Ab̶auba wau b̶uu ichiad̶ai bad̶amaarã dachiba wau panuu ichiad̶ai panuu, jipa wau panuu kuitaad̶ai. Maka ara dachiba wau panuu kakua kĩrajʉʉ panad̶ai. ⁵Dachicha waud̶ai panuu joma jipa waud̶ai panuu.

⁶Chi bed̶ea ũri b̶uuba ichi ne bia uru b̶uud̶ebena deai b̶uu6:6 Ichi ne bia uru b̶uud̶ebena deai b̶uu. Mau jara b̶uu chi nejarra, chiko, paru dead̶ai panuu chi Dachi Akõre bed̶ea jaradeabariimaa., chi Dachi Akõre bed̶ea jaradeabariimaa.

⁷Ara machi du ab̶a setaa kũruarã́sturu. Ab̶au bid̶a Dachi Akõre poyaa setaa kũruabai. Kĩrabásturu: chi ne uu b̶uuba ichiba uud̶a kĩra junai. ⁸Maud̶eeba nau kakuaba kachirua wau kʉ̃ria b̶uu ab̶auba wau b̶uubʉrã, Dachi Akõreba mau ẽbẽra ichiai.6:8 Dachi Akõreba mau ẽbẽra ichiai. Griego bed̶ead̶e naka b̶ʉ kub̶uu: dachi biubadau chaui. Maamina Dachi Akõre Jauriba kʉ̃ria b̶uu ab̶auba wau b̶uubʉrã, Dachi Akõreba mau ẽbẽra ewaricha ichi ome chokae b̶ui. ⁹Maud̶eeba kakua ãkaad̶awẽa ne biꞌia wau panásturu. Kakua ãkaad̶awẽa panuubʉrã, Dachi Akõreba b̶ud̶a ewarid̶e dachiba biꞌia adaud̶ai. ¹⁰Maud̶eeba dachiba poyaaduucha, jomaurã biꞌia aid̶ad̶ai panuu. Chi Jesusd̶e ijãabadaurã maka aude aid̶ad̶ai panuu.

Pabloba nau kartad̶e aanama b̶ʉd̶a

¹¹Ichiásturu, ara mʉ juaba letra mechiud̶eeba nau karta b̶ʉmaa b̶uu. ¹²Chi machi mukĩra chi kakua tõobi kʉ̃ria nureerãba maka waubadau, judiorãba biꞌia unud̶amera maud̶e ãchiba Cristo cruzd̶e biud̶a ʉ̃rʉbena jaradea panuu kakua ãchi kachirua waurãad̶amera. ¹³Chi mukĩra chi kakua tõoped̶aad̶arãba Moisesba b̶ʉd̶a joma waud̶akau. Maamina maarãba machi mukĩra chi kakua tõobiad̶ai kʉ̃ria panuu, ara ãchi ʉ̃rʉbena biꞌia berread̶ai baita. ¹⁴Maamina mʉ maka niiwãema. Ara mʉ ʉ̃rʉbena ab̶a bid̶a biꞌia berreawẽma. Maumaarã ab̶aburu Dachi Mechiu Jesucristo cruzd̶e biud̶a ʉ̃rʉbena biꞌia berreai. Cristo cruzd̶e biusiid̶eeba chi nau iujãad̶ebenarãba biꞌia unubadau, mʉʉmaarã mau joma biusii. Maud̶e chi nau iujãad̶e nureemaarã, mʉ biusii. ¹⁵Dachi Akõreba mukĩra chi kakua tõo b̶uai maebʉrã mukĩra chi kakua tõowẽa b̶uai biꞌia unuwẽa b̶uu. Ichiba ẽbẽra wid̶i waud̶a biꞌia unu b̶uu. ¹⁶Mʉʉba kʉ̃ria b̶uu joma chi mʉʉba jara b̶uu kĩra ijãa nuree Dachi Akõreba kĩra chuburia b̶uai maud̶e jirukaraayuwãe b̶uabiai. Maarã ẽbẽrarã Dachi Akõred̶erãbʉ.6:16 Maarã ẽbẽrarã Dachi Akõred̶erãbʉ. Griego bed̶ead̶e naka b̶ʉ kub̶uu: maarã Dachi Akõre Israeld̶ebenarãbʉ. Mau jara b̶uu joma chi Dachi Akõred̶e ijãabadaurã, judiorã maud̶e judiowãerã.

¹⁷Jesús ʉ̃rʉbena jaradea b̶uu kakua, ẽbẽrarãba mʉ kachirua wausid̶au. Mau mʉ kakuad̶e tõokuaped̶aad̶aba somia uru b̶uu. Mauba mʉ ichid̶e b̶uu unu b̶uu. Maud̶eeba id̶iid̶eeba mʉʉba kʉ̃riawẽma ab̶auba waa nebʉra baraabi b̶uai.

¹⁸Ãbarã, mʉʉba kʉ̃ria b̶uu Dachi Mechiu Jesucristoba ichi sõbiad̶eeba joma machi aid̶a b̶uai. Biꞌia b̶uu maka b̶uai.