EFESIOS

Efesios

Karta Pabloba b̶ʉd̶a ãbarã Éfeso puurud̶ebenarã baita

Pablo Romad̶e jʉ̃a uru panasiid̶e nau karta ãbarã Éfeso puurud̶ebenarã baita b̶ʉsii. Año 62d̶e b̶ʉsii.

Pablo Efesod̶e neesii Aquila, Priscila baara (Hechos 18:19). Pablo waya neesiid̶e año ome ãbarãmaa jaradea b̶uabachii (Hechos 19:8-10). Maarãd̶ebenarã ãreaba Cristod̶e ijãasid̶aud̶eeba, Dachi Akõre kuenda juaba ne kaped̶aad̶ad̶e ijãabadaurã kĩrusid̶au (Hechos 19:21-41). Mau Dachi Akõre kĩra nii wẽra Artemisa abachid̶au.

Pabloba b̶ʉsii judiorã maud̶e judiowãerã Cristo ome panuud̶eeba ãchi puuru ab̶aburu bamera. Capítulo 1d̶e b̶ʉ kub̶uu Dachi Akõreba Cristod̶eeba waud̶a, Pabloba Dachi Akõremaa biꞌia berread̶a maud̶e ãbarã baita ʉtaa id̶id̶a. Capítulo 2d̶e maud̶e 3d̶e b̶ʉ kub̶uu Dachi Akõreba Cristod̶e ẽbẽrarãd̶eeba waubia kʉ̃ria b̶uu ʉ̃rʉbena. Capítulo 4d̶ebena ab̶a 6d̶aa b̶ʉ kub̶uu saka dachiba mau waud̶ai.

Pabloba nau kartad̶e naa b̶ʉd̶a

¹Mʉ Pablobʉ. Dachi Akõreba kʉ̃riasiid̶eeba mʉ Jesucristoba bʉid̶abʉ. Mʉʉba nau karta b̶ʉmaa b̶uu joma Dachi Akõred̶erã ẽbẽrarã Jesucristod̶e ijãa nuree Éfeso1:1 Éfeso. Chi b̶ee kartad̶e ed̶a griego bed̶ead̶e mau bed̶ea wãꞌãe. puurud̶ebenarã baita. ²Mʉʉba kʉ̃ria b̶uu Dachi Bajãad̶ebena Akõreba maud̶e Dachi Mechiu Jesucristoba ãchi sõbiad̶eeba machi aid̶a panad̶ai maud̶e jirukaraayuwãe panabiad̶ai.

Dachi Akõreba chi bia joma dachi jauri baita dea b̶uu

³Dachi Mechiu Jesucristo Akõremaa biꞌia berread̶ai panuu. Cristo ome panuud̶eeba ichi Jaurid̶eeba chi bia joma dachimaa bajãad̶ebena dea b̶uu. ^4-5Nau drua waui naed̶e Cristod̶eeba dachi jʉrʉ adausii ichi baita biꞌia nuread̶amera maud̶e ichi daad̶e jayoa kachiruaswãe nuread̶amera. Nabẽraed̶eed̶e Jesucristod̶eeba dachi ichi warrarã bad̶ai a kʉ̃risia b̶uasii. Maka wau kʉ̃ria b̶uasii dachi kʉ̃riakuasiid̶eeba. ⁶Ichi sõbia ãrea b̶uud̶eeba dachi karibasii ichiba kʉ̃ria b̶uu Warrd̶eeba. Mau baita ichimaa biꞌia berread̶ai panuu. ⁷Ichi Warr oa chesiid̶eeba Dachi Akõreba dachi kachiruad̶ebena karibasii. Ichi mechiu sõbiad̶eeba dachiba kachirua wauped̶aad̶a joma perdonasii. ⁸Ichi sõbiad̶eeba dachi ãrea aid̶aped̶a joma kʉ̃risia kuitaa maud̶e kʉ̃risia kauwa dachimaa deasii.1:8 Ichi sõbiad̶eeba dachi ãrea aid̶aped̶a joma kʉ̃risia kuitaa maud̶e kʉ̃risia kauwa dachimaa deasii. Griego bed̶ead̶e mau chaarea b̶uu biꞌia ũrid̶amera. Nau sid̶a jara b̶uu: Ichi sõbiad̶eeba dachi ãrea aid̶asii joma kʉ̃risia kuitaa maud̶e kʉ̃risia kauwa niid̶eeba.⁹Ichiba wau kʉ̃ria b̶uu naed̶e kuitaabiawẽa b̶uasii. Maamina dachimaa kuitaabiasii ichi sõbiad̶eeba maka kʉ̃ria b̶uasiid̶eeba. Ichiba Cristod̶eeba nabẽraed̶eed̶e waui kʉ̃risia b̶uad̶a ¹⁰ichiba b̶ud̶a ewarid̶e maka joma waui: mau ewarid̶e ne joma bajãad̶ebena maud̶e nau iujãad̶ebena Cristo juad̶e b̶ui.

¹¹Dachi Akõreba ne joma ichiba wau kʉ̃ria b̶uu waubarii kĩra Cristod̶eeba dachi jʉrʉ adausii,1:11 Cristod̶eeba dachi jʉrʉ adausii. Chi nureemaarã naka jara b̶uu: «Ichiba chi deai jara b̶uu adaud̶ai nuree ẽbẽrarã babiasii». nabẽraed̶eed̶e kʉ̃risia b̶uad̶a kĩra. ¹²Maka wausii dai judiorã chi naa Cristod̶e ijãaped̶aad̶arãba ichi biꞌia nii ʉ̃rʉbena biꞌia berread̶amera. ¹³Mau awara machi judiowãerã bid̶a chi biawãra bed̶ea ũrisid̶aud̶e, mau dachi karibai bed̶ea bia ijãasid̶au. Maka Cristod̶e ijãasid̶aud̶e Dachi Akõreba ichi Jauri machimaa deasii ichiba jarad̶a kĩra. Dauchaa b̶uu kĩra mauba kuitaabia b̶uu machi ichid̶irã. ¹⁴Dachi Akõre Jauri adauped̶aad̶ad̶eeba dachiba kuitaa panuu joma Dachi Akõreba deai jarad̶a biawãra adaud̶ai ichid̶irã joma biꞌia b̶ui ewarid̶e. Maud̶eeba ichi biꞌia nii ʉ̃rʉbena biꞌia berread̶ai panuu.

Pabloba Dachi Akõremaa ʉtaa id̶id̶a

¹⁵Maud̶eeba machiba Dachi Mechiu Jesusd̶e ijãa panuu maud̶e joma ẽbẽrarã Dachi Akõred̶erã kʉ̃ria panuu mʉʉba ũrisiid̶eed̶ebena, ¹⁶mʉʉba ewaricha machi baita Dachi Akõremaa ichíturu kid̶ibai abarii maud̶e machi ʉ̃rʉbena ʉtaa id̶ibarii. ¹⁷Mʉʉba Dachi Mechiu Jesucristo Akõremaa, chi Akõre biꞌia niimaa ʉtaa id̶ibarii ichi Jaurid̶eeba machimaa biꞌia kʉ̃risiabiamera maud̶e ichi ʉ̃rʉbena kuitaabiamera. Maka machiba ichi aude kuitaad̶ai. ¹⁸Maud̶e ʉtaa id̶ibarii Dachi Akõreba machi kʉ̃risia ewamera. Maka machiba kuitaad̶ai kãare ichid̶ebena adaud̶ai baita esed̶au panuu, mau adaud̶amera iusiid̶eeba. Maud̶e machiba kuitaad̶ai ichi ẽbẽrarãba adaud̶ai ãrea biꞌia b̶uu. ¹⁹Maud̶e mʉʉba ʉtaa id̶ibarii machiba kuitaad̶amera ichi poyaa jomaurã audeara poyaa b̶uu. Mau poyaabariid̶eeba ichiba dachi ichid̶e ijãa nuree kariba b̶uu. Ara mau poyaabarii mechia b̶uud̶eeba, ²⁰Dachi Akõreba Cristo biu b̶uad̶a chokae jiradubiped̶a bajãad̶e ichi jua biare akʉ b̶eebisii. ²¹Dachi Akõreba ichi jomaurã mechiu b̶usii: jai kachirua karrarã audeara, bajãad̶ebena chi mechiu nuree audeara, chi poyaabadau audeara maud̶e chi aude jua chaarea nuree audeara. Nau ewarid̶e ichi jomaurã audeara chi mechiu nii maud̶e kaad̶ebena ewarid̶e bid̶a maka b̶uai. ²²Dachi Akõreba ne joma Cristo juad̶e b̶usii maud̶e Cristo b̶usii ne jomad̶e ichi ẽbẽrarã Mechiu b̶uamera. ²³Ẽbẽrarã Cristod̶erã ichi kakuabʉ. Ãchi ne jomad̶e ichid̶eeba panuu maud̶e ne joma ichid̶eeba b̶uu.

Dachi Akõreba Cristod̶eeba dachi karibad̶a

¹Naed̶e machi biu panasid̶au, ijãad̶awẽa panasid̶aud̶eeba, kachirua waubachid̶aud̶eeba.2:1 Waabenarã kartad̶e nau sid̶a b̶ʉ kub̶uu: ichiba machimaa chokae b̶uai deasii. Maamina mau griego bed̶ead̶e wãꞌãema.²Maka nibasid̶au nau iujãad̶ebena kʉ̃risia ijãa panasiid̶eeba maud̶e jai kachiruarã chi aude mechiu nii ijãa panasiid̶eeba. Id̶ibae ichiba chi Dachi Akõre bed̶ea ijãad̶akaurã ichi juad̶e ua b̶uu. ³Naed̶e joma dachi ãchi kĩra nibasid̶au nau kakuaba kachirua waubi b̶uu wau panasid̶aud̶eeba. Nau kakuaba kachirua waui kʉ̃ria b̶uu maud̶e dachiba kachirua waui kʉ̃risia b̶uu wau panasid̶au. Dachi kachiruad̶eeba Dachi Akõreba ichi kĩrubid̶eeba dachi kastikai b̶uasii joma kachirua waubadaurã kastikabarii kĩra.

⁴Maamina Dachi Akõreba ãrea kĩra chuburiabarii. Ichiba dachi ãrea kʉ̃ria b̶uud̶eeba ⁵kachiruad̶e biu panad̶a Cristo ome ãbua chokae b̶usii. Dachi Akõreba ichi sõbiad̶eeba machi karibasii. ⁶Jesucristo ome ãbua panuud̶eeba Dachi Akõreba dachi chokae jiradubiasii maud̶e mau ome ãbua bajãad̶e akʉ b̶eebiasii. ⁷Mau joma wausii kaad̶ebena ewarid̶e ichi ãrea sõbia nii unubii baita. Maud̶eeba dachi chi Jesucristo ome panuurã karibasii. ⁸Jesusd̶e ijãasid̶aud̶eeba Dachi Akõreba ichi sõbiad̶eeba machi karibasii. Ara machi du ab̶a karibad̶aabasii, maumaarã Dachi Akõréburu bari karibasii. ⁹Machiba biꞌia wau panuud̶eeba Dachi Akõreba karibaabasii. Maka ab̶au bid̶a ara ichi ʉ̃rʉbena poyaa biꞌia berreabai. ¹⁰Dachi Akõreba dachi Jesucristod̶eeba chiwid̶i wausii ne bia wau panad̶amera. Mau ne biꞌia waud̶ai panuu, ichiba naed̶e b̶usii dachiba waud̶amera.

Cristod̶eeba judiorã maud̶e judiowãerã Dachi Akõre ome biꞌia paneed̶a

¹¹Maud̶eeba kĩrabásturu machi judiowãerãd̶ebena adausid̶aud̶eeba, judiorãba machi «mukĩra chi kakua tõod̶awẽa nuree» abachid̶au. Ara ãchi «mukĩra chi kakua tõo nuree» abachid̶au, maamina ab̶a nau kakuad̶éburu ãyaa nuree. ¹²Kĩrabásturu naed̶e machi Cristowãe nureasii maud̶e israeld̶ebenarãwãe basii. Dachi Akõre ãchi ome bed̶ea deasiid̶e ichiba machimaa ab̶a bid̶a deai bad̶a jaraabasii. Mau awara machi saka biꞌia nuread̶aiswãe panasid̶au maud̶e nau druad̶e Dachi Akõreswãe nureasii. ¹³Maamina jãabae Jesucristo ome panuud̶eeba, machi naed̶e kaitawẽ nuread̶a Dachi Akõreba Cristo oad̶eeba ichi kaita adausii.

¹⁴Biawãra Cristoba dachi jirukaraayuwãe b̶usii. Ichiba judiorã, judiowãerã ome ãbua b̶usii puuru ab̶a b̶eemera. Ichi biud̶ad̶eeba dachi awara panad̶a ãbua b̶usii. ¹⁵Moisesba b̶ʉd̶aba ne ãrea waubiabachii judiorã, judiowãerã awara b̶ui baita. Maamina Cristo biud̶ad̶eeba Moisesba b̶ʉd̶a awara b̶usii puuru wid̶i ab̶ad̶e duanad̶amera maud̶e ãbua jirukaraayuwãe duanad̶amera. ¹⁶Ichi cruzd̶e biud̶ad̶eeba puuru ome b̶uad̶a puuru ab̶a wauped̶a omea Dachi Akõre ome biꞌia b̶usii. Maka dachi awara panad̶a ichiba ãbua biꞌia b̶usii.

¹⁷Cristo neesii, chi bed̶ea bia Dachi Akõre ome jirukaraayuwãe b̶uai ʉ̃rʉbena machimaa jarai baita, chi Dachi Akõred̶ebena kaitawẽ panad̶amaa maud̶e chi Dachi Akõre kaita panad̶amaa.2:17 Chi Dachi Akõred̶ebena kaitawẽ panad̶amaa maud̶e chi Dachi Akõre kaita panad̶amaa. Mau jara b̶uu «judiowãerãmaa maud̶e judiorãmaa jarad̶e neesii».¹⁸Cristod̶eeba dachi omeeba arab̶au Bajãad̶ebena Akõremaa poyaa ara kaita need̶ai, ichi arab̶au Jaurid̶eeba. ¹⁹Maud̶eeba machi judiowãerã waa drua ãid̶ebenarã kĩra nuread̶aabai, maumaarã Dachi Akõre puurud̶ebenarã ome ãbua panuu; machi ẽbẽrarã Dachi Akõred̶erãbʉ. ²⁰Machi de mo waud̶a kĩra panuu. Jesusba bʉid̶arã maud̶e Dachi Akõre baita berreabadaurã mau de ekarebena mo kĩra panuu. Mau ded̶ebena mo chi bibuara b̶uu Jesucristobʉ. ²¹Ichid̶eeba, mo ʉtaa karaa kãrii kĩra, de bia wau kãrii, Dachi Mechiu baita biꞌia b̶eemera. ²²Cristo ome panuud̶eeba machi sid̶a joma ẽbẽrarã Dachi Akõred̶erã baara de arab̶au kĩra nuree. Mau ded̶e Dachi Akõre ichi Jaurid̶eeba b̶uabarii.

Dachi Akõreba Pablo judiowãerãmaa jaradead̶e bʉid̶a

¹Maud̶eeba mʉʉba [machi baita Dachi Akõremaa ʉtaa id̶ibarii].3:1 Machi baita Dachi Akõremaa ʉtaa id̶ibarii. Mau griego bed̶ead̶e wãꞌãe. Pabloba jarai b̶uad̶a joma jaraabasii, maumaarã kʉ̃risia awara jaradea kob̶eesii. Maamina ãrea ãbarãmaarã ichiba jarai b̶uasii maarã ãbarã baita Dachi Akõremaa ʉtaa id̶ibarii, jara b̶uu kĩra 3:14d̶e. Mʉ Pablobʉ. Machi judiowãerãmaa Jesucristo ʉ̃rʉbena jaradea b̶uu kakua jʉ̃a uru panuu. ²Mʉʉmaarã machiba ãrea kuitaa panuu Dachi Akõreba ichi sõbiad̶eeba mʉ b̶usii machimaa jaradeamera. ³Ichiba naed̶e kuitaabiwẽa b̶uad̶a mʉʉmaa kuitaabisii. Mau ʉ̃rʉbena mʉʉba nau kartad̶e b̶aꞌãra b̶ʉsii. ⁴Nau karta ed̶a jara panuud̶e machiba kuitaad̶ai Dachi Akõreba Cristo ʉ̃rʉbena kuitaabiwẽa b̶uad̶a, mau mʉʉba kauwa kuitaa b̶uu. ⁵Naed̶e Dachi Akõreba ẽbẽrarãmaa mau kuitaabiawẽa b̶uasii, maamina jãabae chi ichi baita berreabadaurãmaa maud̶e Jesucristoba bʉid̶arãmaa ichi Jaurid̶eeba kuitaabiasii. ⁶Ichiba kuitaabiawẽa b̶uad̶a naubʉ: judiowãerãba chi bed̶ea biꞌia Cristo ʉ̃rʉbena ijãa panuud̶eeba judiorã ome ãbua Dachi Akõreba deaid̶ebena adaud̶ai3:6 Dachi Akõreba deaid̶ebena adaud̶ai. Mau ʉ̃rʉbena Pabloba b̶ʉsii Romanos 4d̶e., arab̶au kakuad̶e panuu, maud̶e Dachi Akõreba Jesucristod̶eeba deai jarad̶a3:6 Dachi Akõreba Jesucristod̶eeba deai jarad̶a. Mau ʉ̃rʉbena Pabloba b̶ʉsii Gálatas 3d̶e. ãbua uru panuu. ⁷Dachi Akõreba ichi sõbiad̶eeba mʉ ichi baita trajabarii b̶usii mau bed̶ea bia Cristo ʉ̃rʉbena jaradeamera. Ichi poyaabariid̶eeba maka wausii.

⁸Joma ẽbẽrarã Dachi Akõred̶erã tãed̶e mʉ kaebeu nimina, ichi sõbiad̶eeba mʉ b̶usii judiowãerãmaa Cristo ʉ̃rʉbena ne bia chi wãꞌãekau jaradead̶e wãmera. ⁹Chi ne joma waud̶a Dachi Akõreba mʉ b̶usii jomaurãmaa kuitaabiamera saka wausii ichiba arab̶aed̶eed̶e waui kʉ̃risia b̶uad̶a. Mau waui kʉ̃risia b̶uad̶a naed̶e kuitaabiawẽa b̶uasii. ¹⁰Jãabae ẽbẽrarã, Dachi Akõred̶eeba Ichiba ichi ne jomad̶e ãrea kuitaa b̶uu kuitaabiasii chi meserãa nureerãmaa maud̶e bajãad̶ebena chi mechiu nureerãmaa. ¹¹Maka wausii ichiba nabẽraed̶e Dachi Mechiu Jesucristod̶eeba waui kʉ̃risia b̶uasiid̶eeba. ¹²Dachiba ara mau Jesucristod̶e ijãa panuud̶eeba maud̶e ichi ome ãbua panuud̶eeba Dachi Akõremaa wapeawẽa ʉtaa id̶id̶ai panuu. ¹³Maud̶eeba mʉʉba machimaa naka chi chuburia id̶iiruu: mʉ machi kakua nama naka biꞌiwãe b̶umina ãrea jirukaraarã́sturu. Maka ãrea biꞌiwãe b̶uu machi Dachi Akõre ome biꞌia nuread̶amera.

Pabloba ãbarã baita Dachi Akõremaa ʉtaa id̶id̶a

¹⁴Maud̶eeba mʉ dachi Bajãad̶ebena Akõre daad̶e õdarrd̶e kob̶eebarii.3:14 Dachi Bajãad̶ebena Akõre. Griego bed̶ead̶e chi nuree kartad̶e naka b̶ʉ kub̶uu: Dachi Mechiu Jesucristo Bajãad̶ebena Akõre.¹⁵Ichiba joma bajãad̶e nuree maud̶e nau iujãad̶e nuree wausii maud̶e ichid̶eeba nuree.3:15 Griego bed̶ead̶e mau versículo naka b̶ʉ kub̶uu: Ichid̶eeba joma bajãad̶ebenarã maud̶e nau druad̶ebenarã trʉ̃abadau.¹⁶Mʉʉba ʉtaa id̶i b̶uu ichi Jaurid̶eeba maud̶e ichiba ne bia ãrea uru b̶uud̶ebena ichi poyaabarii machimaa sõd̶e deamera. Maka machi chaarea nuread̶ai. ¹⁷Maud̶e ʉtaa id̶i b̶uu ijãa panuud̶eeba Cristo machi sõd̶e b̶uamera maud̶e machi ne jomad̶e kʉ̃riad̶eeba panad̶amera. Maka chaarea nuread̶ai ãrea karr jidau panuu kĩra. ¹⁸Maud̶e machiba joma ẽbẽrarã Dachi Akõred̶erã baarauba poyaa kuitaad̶ai Cristoba dachi kʉ̃ria b̶uu. Mau jõparrea b̶uu, deseroa b̶uu, ʉtʉ b̶uu maud̶e id̶u b̶uu. ¹⁹Ara dachi kʉ̃risiad̶eeba poyaa kuitaad̶akamina mʉʉba ʉtaa id̶i b̶uu machiba mau kuitaad̶amera. Kuitaaduubʉrã ne jomad̶e Dachi Akõre kĩra nuread̶ai.

²⁰¡Dachi Akõre ãrea biꞌia nii! Ichi poyaabarii dachi sõd̶e b̶uud̶eeba ne mechiu poyaa waui, dachiba kʉ̃risiabadau audeara maebʉrã ichimaa ʉtaa id̶ibadau audeara. ²¹Ãbarã, Jesucristo baara panuud̶eeba ¡ewaricha Dachi Akõremaa biꞌia berread̶ai panuu! Biꞌia b̶uu maka b̶uai.

Dachi Akõre Jaurid̶eeba ãbarã chi kakua ab̶a nii kĩra nuree

¹Mʉ Dachi Mechiu kakua jʉ̃a uru panuu. Mʉʉba machimaa chi chuburia id̶iiruu jipa nibad̶amera. Dachi Akõreba machi iusii maka nibad̶amera. ²Machi waabenarã audeara biꞌia nuree kʉ̃risiarã́sturu. Kʉ̃riad̶eeba chiya dauchia jãadua nureásturu. ³Dachi Akõre Jauriba machi jirukaraayuwãe nureabiai b̶uud̶eeba, ne joma biꞌia wáusturu biawãra ãbua nuread̶amera. ⁴Dachi kakua ara ab̶aburu b̶uu. Dachi Akõre Jauri ara ab̶aburu inid̶au. Dachi Akõreba machi iusii ara mau esed̶au panad̶amera. ⁵Dachi Mechiu Jesús ara ab̶aburu nii. Dachiba arab̶au Jesusd̶e ijãa panuu. Maud̶e arab̶au trʉ̃d̶eeba boro easid̶au. ⁶Dachi Akõre ara ab̶aburu nii. Ichi jomaurã Akõrebʉ, jomaurã Mechiubʉ. Jomaurã sõd̶e b̶uu maud̶e jomaurãd̶eeba ichiba wau kʉ̃ria b̶uu waubarii.

⁷Maamina Cristoba ne waubiabarii dea kʉ̃ria b̶uad̶a kĩra ichi sõbiad̶eeba dachicha ichi baita ne bia waud̶amera aꞌawaraa dead̶akasii. ⁸Dachi Akõre bed̶ead̶e naka b̶ʉ kub̶uu:

«Ichi ʉtaa wãsiid̶e ichiba ichi kĩramaabadaurã poyaad̶a adoesii jʉ̃ʉka ua b̶uai baita. Maabae ẽbẽrarãmaa ne bia dead̶akasii».4:8 Salmos 68:18.

⁹Chi ʉtaa wãsii a b̶uuba ¿kãare jara b̶uma? Jara b̶uu ʉtaa wãi naed̶e ʉtʉʉba ichi nau iujãad̶e chi aude id̶ud̶aa neesii. ¹⁰Chi ʉtʉʉba ed̶aa need̶a waya bajãa chi aude ʉtʉ b̶uumaa wãsii ne joma ichi juad̶e ua b̶uamera. ¹¹Ara ichiba chi nuree b̶usii ichiba bʉid̶arã nuread̶amera, waabenarã b̶usii Dachi Akõre baita berreabadaurã nuread̶amera, waabenarã b̶usii chi bed̶ea bia Cristo ʉ̃rʉbena jarad̶e nibad̶amera, maud̶e waabenarã b̶usii chi ijãabadaurã nubadaurã maud̶e jaradeabadaurã nuread̶amera. ¹²Ichiba maka b̶usii ẽbẽrarã Dachi Akõred̶erã aid̶ad̶amera, ãchia bid̶a Dachi Akõre baita poyaa biꞌia waud̶amera. Maka joma Cristo ẽbẽrarã ichi kakua abadau chaarea warimaa panuu, ¹³ab̶a jomaurã Dachi Akõre Warrd̶e ijãa panuud̶eeba maud̶e kuitaa panuud̶eeba ãbua biꞌia paneeduud̶aa. Maud̶e dachi ne jomad̶e Cristo kĩra nuread̶ai. ¹⁴Makarã waa wãwa kĩra nuread̶aabai. Wãwaba barikia bed̶ea ijãabarii. Mau awara ẽbẽrarã setaa kũruad̶ai kuitaa nureeba jaradea panuud̶eeba, setaa ijãabiabadau pũatuba jãba ãyaa adoeruu kĩra. Maamina dachi mau jãba kĩra nuread̶aabai. ¹⁵Maumaarã kʉ̃riad̶eeba chi biawãra bed̶ea ijãad̶ai panuu ne jomad̶e Dachi Mechiu Cristo kĩra nuread̶ai baita. ¹⁶Ichid̶eeba joma dachi ichi kakuabʉ. Chi dachi kakuad̶e jid̶iu kara b̶eeba chiya aid̶ad̶ai. Dachicha waud̶ai panuu kĩra wauduud̶e jomaurã kʉ̃riad̶eeba biꞌia wari kãri bad̶ai.

Cristod̶eeba chokae b̶uai wid̶i uru nuree saka nibad̶ai panuu

¹⁷Machiba biawãra waud̶amera, mʉʉba Dachi Mechiu trʉ̃d̶eeba nau jaraaruu: waa Dachi Akõre adua nuree kĩra nibarã́sturu.4:17 Dachi Akõre adua nuree kĩra. Griego bed̶ead̶e b̶ʉ kub̶uu: judiowãerã nibabadau kĩra. Ãchi kʉ̃risia biꞌiwãe nureed̶eeba nibabadau. ¹⁸Ãchi kʉ̃risia pãriud̶e duanuud̶eeba Dachi Akõre ʉ̃rʉbena kuitaad̶akau. Ãchi sõ chaareaba Dachi Akõre adua nureed̶eeba, chi ichiba chokae duanubiai b̶uu wãꞌãe nuree. ¹⁹Ãchi kakuaba barikiu kachirua wauduu kakua perad̶akau. Ab̶a kachirua waud̶áituru kʉ̃riabadau. Chi kĩra nejasia joma wau panuu ʉ̃rʉbena, kakua ãkaad̶akau.

²⁰Maamina machiba Cristod̶e ijãasid̶aud̶e kuitaasid̶au maka nuread̶aabai panuu. ²¹Ãbarãba chi biawãra bed̶ea Cristo ʉ̃rʉbena biꞌia jaradeasid̶au maud̶e biawãra machiba ichi ʉ̃rʉbena ũrid̶aped̶a ijãasid̶au. ²²Ãchimaa jaradeaped̶aad̶a naubʉ: naed̶e machiba wau panad̶a kĩra waa maka nibarã́sturu. Chi kakua kachirua wau kʉ̃ria b̶uuba setad̶eeba biꞌiwãe paneebiabarii. Mau ida b̶ústuru, paru sore ẽebadau kĩra. ²³Maumaarã Dachi Akõremaa machi kʉ̃risia wid̶i ida waubiásturu. ²⁴Mau kʉ̃risia wid̶i Dachi Akõreba wausii machi ichi kĩra nuread̶amera. Maud̶eeba paru wid̶i jʉ̃ panuu kĩra, kʉ̃risia wid̶id̶eeba nibásturu. Maka machi Dachi Akõre daad̶e jipa, biꞌia nibad̶ai chi biawãra bed̶eaba jara b̶uu kĩra.

²⁵Maud̶eeba setaa ida b̶ústuru. Ab̶aburu biawãráturu waabenarã ome berreásturu, joma dachi arab̶au kakuad̶ebenad̶eeba.

²⁶Kĩruuduubʉrã kachirua waurã́sturu. Machi kĩru panuumisa, ewari araa b̶aebirã́sturu.4:26 Salmos 4:4.²⁷Jʉbawãe niimaa ida setaa kũruabiarã́sturu.

²⁸Nechirua badaad̶a waa nechiruabai b̶uu, maumaarã ichi juaba trajai b̶uu ne uru b̶uai baita. Maka ichiba uru b̶uai chi nejarr barauwãe nuree aid̶ai baita.

²⁹Bed̶ea kachirua berrearã́sturu. Maumaarã bed̶ea biáturu berreásturu waabenarã aid̶ad̶ai baita. Maka machi bed̶ea ũri nuree biꞌia panad̶ai. ³⁰Kachirua wauduuba Dachi Akõre Jauri kĩra nomaabirã́sturu. Dachi Akõreba mau machimaa deasii ichid̶irã kuitaa panad̶amera. Ichi Jauri machi baara b̶uai ab̶a Dachi Akõreba ichi ẽbẽrarã joma biꞌia b̶ui ewarid̶aa. ³¹Machiba joma ab̶au ʉ̃rʉbena sõd̶e kachirua kʉ̃risiabadau, sõd̶eeba kĩrubadau, oa kachirua berreabadau, kĩrud̶eeba berreabadau, waabenarã ʉ̃rʉbena setaa jarabadau maud̶e waabenarã kachirua waud̶ai kʉ̃risiabadau joma ida b̶ústuru. ³²Sõbiad̶eeba nureásturu. Kĩra chuburia baraa nureásturu. Chi machiba kachirua wauped̶aad̶a kʉde uru b̶ee ida b̶ústuru, Dachi Akõreba machi kachirua Cristod̶eeba ida b̶ud̶a kĩra.

Dachi Akõre warrarã saka nuread̶ai panuu

¹Dachi Akõreba ichi warrarã ãrea kʉ̃ria b̶uu. Maud̶eeba machi ichi kĩra nureásturu. ²Jomaurã kʉ̃riásturu Cristoba dachi kʉ̃ria b̶uu unubid̶a kĩra. Kʉ̃riad̶eeba dachi kakua ara ichi beabisii Dachi Akõremaa ãnimara baa dearuu kĩra. Dachi Akõreba mau biꞌia unusii.

³Machi ẽbẽrarã Dachi Akõred̶erãd̶eeba machi kakuaba barikiu kachirua waud̶aabai panuu, kĩra nejasia waud̶aabai panuu maud̶e waabenarãba uru b̶ee kʉ̃riad̶aabai panuu. Mau ʉ̃rʉbena ab̶au bid̶a b̶istĩika bid̶a berread̶aabai panuu.5:3 B̶istĩika bid̶a berread̶aabai panuu. Mau bed̶ea naka b̶ʉ kub̶uu: Nibásturu waabenarãba ab̶a bid̶a poyaa jararãad̶amera machiba kachirua wau panuu.⁴Bed̶ea kachirua, nebʉrʉ biꞌiwãe maud̶e bed̶ea miadaa mia ʉibi berrearã́sturu, maka berreai biꞌiwãe b̶uud̶eeba.5:4 Bed̶ea kachirua. Chi b̶ee kartad̶e naka b̶ʉ kub̶uu: setaa. Maumaarã Dachi Akõremaa biꞌia b̶uu áduru. ⁵Machiba kuitaa panuu junebena wẽra ome kãibadau, ne kĩra nejasia kachirua wau nibabadau, maud̶e ne joma uru panad̶ai kʉ̃riabadau chi Cristo maud̶e Dachi Akõreba dead̶ai a panuu adaud̶aabai. Ne joma uru b̶uu kʉ̃ria b̶uai Dachi Akõre kuenda juaba ne kaped̶aad̶ad̶e ijãa b̶uu kĩra b̶uu, Dachi Akõre audeara, chi ichiba uru b̶uai kʉ̃ria b̶uu aude ijãa b̶uud̶eeba.

⁶Ab̶a bid̶a setad̶eeba kachirua waud̶ai panuu aaruubʉrã, ida setaa kũruabirã́sturu. Kachirua wau panuu baita Dachi Akõreba chi ichi bed̶ea ijãawẽa nuree kastikai. ⁷Maud̶eeba kachirua waubadaurã ome arab̶au waurã́sturu.

⁸Naed̶e machi pãriud̶ebena basii, maamina id̶ibae Dachi Mechiu ome panuud̶eeba machi ʉ̃d̶aad̶ebenarãbʉ. Maud̶eeba ʉ̃d̶aad̶ebena warrarã kĩra nibásturu. ⁹Ʉ̃d̶aad̶e nibaaruubʉrã sõbia nuread̶ai, jipa waud̶ai maud̶e biawãrad̶eeba nibad̶ai.5:9 Ʉ̃d̶aad̶e nibaaruubʉrã. Griego bed̶ead̶e chi b̶ee kartad̶e b̶ʉ kub̶uu: Dachi Akõre Jaurid̶eeba nibaaruubʉrã.¹⁰Dachi Mechiuba biꞌia unu b̶uu kuitaad̶ai baita jʉrʉ́sturu. ¹¹Pãriud̶ebenarãba kachirua waubadaud̶eeba ne bia neekau. Maud̶eeba arab̶au waurã́sturu, maumaarã kuitaabiásturu ãchiba waubadau kachiruabʉ. ¹²Biawãra dachi kĩra nejasiad̶ai panuu ãchiba kachirua miru waubadau ʉ̃rʉbena berread̶ai baita. ¹³Maamina ne joma ʉ̃d̶aad̶e b̶uuduud̶e saka b̶uu unubibadau, ¹⁴ʉ̃d̶aad̶e ne joma unubadaud̶eeba. Mau baita naka jarabadau:

«Ʉ̃rʉmase bichi kãi b̶uu. Kachiruad̶e biu b̶uad̶a jiraduse. Maabae Cristoba bichi ʉ̃d̶aad̶e b̶ui».

¹⁵Maud̶eeba kauwa nibásturu. Adua nuree kĩra nibarã́sturu, maumaarã kʉ̃risia kuitaad̶eeba nibásturu. ¹⁶Machiba poyaa wauduucha biꞌia wáusturu, nau ewarid̶e ẽbẽrarãba ne joma kachirua waubadaud̶eeba. ¹⁷Kʉ̃risiaswãe nuree kĩra nurearã́sturu, maumaarã ãrea kuitásturu kãare Dachi Mechiuba waubi b̶uu. ¹⁸Ituaba biu nibarã́sturu. Mauba kachirua aude waubibarii. Biu nibad̶ai audeara Dachi Akõre Jaurid̶eeba nureásturu. ¹⁹Dachi Akõre bed̶ead̶e b̶ʉ kub̶uu karibadau, ãbarãba karibadau maud̶e Dachi Akõre Jauriba karibi b̶uu chiya karibad̶ai baita ãbua karísturu. Dachi Mechiumaa sõd̶eeba karísturu biꞌia berread̶ai baita. ²⁰Dachi Mechiu Jesucristo trʉ̃d̶eeba ewaricha dachi Bajãad̶ebena Akõremaa ne joma baita ichíturu kid̶ibai ásturu.

Dachi kima ome saka nuread̶ai panuu

²¹Cristo wapea panuud̶eeba arab̶aud̶e chiya ijã́sturu.5:21 Cristo wapea panuud̶eeba. Griego bed̶ead̶e chi b̶ee kartad̶e naka b̶ʉ kub̶uu: Dachi Akõre wapea panuud̶eeba.

²²Wẽrarã kima bara nuree, machi kimarãba jara panuu ijãa panásturu, machiba Dachi Mechiu Cristo bed̶ea ijãa waubadau kĩra. ²³Mukĩra ichi wẽra chibaribʉ. Ara mau kĩra Cristo ichi ẽbẽrarã Chibaribʉ maud̶e ichi ẽbẽrarã ichi kakua kĩra nuree. Ichi ãchi Karibabariibʉ. ²⁴Cristo ẽbẽrarãba ichi bed̶ea ijãabadau kĩra wẽraba ichi kima bed̶ea joma ijãa b̶uai b̶uu.

²⁵Mukĩrarã wẽra bara nuree, machi wẽra kʉ̃riásturu, Cristoba dachi kʉ̃ria b̶uu unubid̶a kĩra. Kʉ̃riad̶eeba dachi baita ara ichi ida beabisii. ²⁶Ichiba maka wausii dachi Dachi Akõre baita biꞌia b̶ui baita. Ichi bed̶eaba dachi kachirua jeraasii baniaba jeraad̶a kĩra.5:26 Griego bed̶ead̶e naka b̶ʉ kub̶uu: dachi kachirua jeraasii baniaba maud̶e ichi bed̶eaba.²⁷Joma mau wausii dachi ichi baita ãrea biꞌia b̶ui baita, jayoa kachiruaswãe, bibidruaswãe maud̶e barikiu kachiruaswãe. Ichiba kʉ̃ria b̶uasii dachi ichi baita biꞌia nuread̶ai, kachirua jarad̶ai a jaraswãe. ²⁸Ara mau kĩra mukĩraba ichi kima ãrea kʉ̃ria b̶uai b̶uu ara ichi kakua kʉ̃ria b̶uu kĩra. Mukĩraba ichi kima kʉ̃ria b̶uubʉrã, ara ichi kʉ̃ria b̶uu. ²⁹Ab̶au bid̶a ichi kakua kĩramaakau, maumaarã biꞌia ko b̶uud̶eeba ãrea nubarii. Ara mau kĩra Cristoba ichi ẽbẽrarã nubarii, ³⁰ichi kakua kĩra panuud̶eeba.5:30 Griego bed̶ead̶e chi b̶ee kartad̶e nau sid̶a b̶ʉ kub̶uu: ichi kiuru maud̶e ichi b̶ʉʉrʉ kĩra panuud̶eeba.³¹Dachi Akõre bed̶ead̶e naka b̶ʉ kub̶uu:

«Mau baita mukĩraba chi akõre maud̶e chi nawe b̶ʉiped̶a ichi wẽra ome ãbua b̶eei.

Maka kakua ara ab̶a b̶uu kĩra nuread̶ai».5:31 Génesis 2:24.

³²Mau bed̶eaba kʉ̃risia mechiu kuitaawẽa panad̶a kuitaabi b̶uu. Mʉʉba jara b̶uu Cristo ichi ẽbẽrarã ome ãbua panuud̶ebena. ³³Mau ʉ̃rʉbena kuitaabi b̶umina machicha machi kima kʉ̃ria nuread̶ai panuu ara machi kʉ̃ria panuu kĩra. Maud̶e wẽraba ichi kima wapeadee b̶uai b̶uu.

Warrarã akõrerã ome saka nuread̶ai panuu

¹Warrarã, machi akõrerã bed̶ea ũribaba ũrísturu Dachi Mechiuba kʉ̃ria b̶uu kĩra, maka jipa b̶uud̶eeba. ²Moisesba b̶ʉd̶ad̶e naka jara b̶uu: «Machi akõre maud̶e machi nawe wapea panásturu».6:2 Éxodo 20:12. Dachi Akõreba naed̶e naka aid̶ai a b̶uasii: ³Maka wauduubʉrã, «Machi nau druad̶e ewari ãrea biꞌia duanad̶ai».6:3 Deuteronomio 5:16.

⁴Akõrerã, machi warrarã kĩrubiarã́sturu. Maumaarã biꞌia jaradea panuud̶eeba maud̶e jipa waubia panuud̶eeba Dachi Mechiuba kʉ̃ria b̶uu kĩra waribiásturu.

Chi chibari baita bari trajabadaurã ãchi chibari ome saka nuread̶ai panuu

⁵Chibari baita bari trajabadaurã, machi chi nau iujãad̶ebena chibari wapea panuud̶eeba, ichiba jaraaruu machi sõd̶eeba joma wáusturu Cristo bed̶ea ijãa panuu kĩra. ⁶Ichiba ichia b̶uud̶éburu maka waurã́sturu, ichi ome biꞌia nuread̶ai baita. Maumaarã sõd̶eeba wáusturu, machi Cristo baita bari trajabadaurãd̶eeba. Dachi Akõreba maka kʉ̃ria b̶uu. ⁷Machi chibariba jara b̶uu waumaa panuud̶e, sõbiad̶eeba wáusturu Dachi Mechiu baita wau panuu kĩra. Kʉ̃risiarã́sturu nau iujãad̶ebena chibari báitaburu maka traja panuu. ⁸Machiba kuitaa panuu chibari baita bari trajabariibʉrã maebʉrã chibariswãe niibʉrã, Dachi Mechiuba dachimaa dachicha bajãad̶e deai dachiba wauped̶aad̶a kĩra.

⁹Ara mau maka, machi chi chibarirã bid̶a chi machi baita bari trajabadaurã biꞌia wáusturu. Ãchi iadaad̶ai arã́sturu. Kĩrabásturu chi maarã Chibari bajãad̶ebena ara machi Chibaribʉ. Ichiba joma arab̶aud̶e ichiabarii.

Kokoroaba ichi kakua ʉ̃rʉ chaarea b̶uu jʉ̃barii ʉ̃rʉbena

¹⁰Mau awara ãbarã, Dachi Mechiu ãrea poyaabarii b̶uud̶eeba chaarea nureásturu. ¹¹Chi kokoroaba ichi ʉ̃rʉ chaarea b̶uu jʉ̃barii Dachi Akõreba machimaa dead̶a jʉ̃́sturu, machi chaarea nuread̶ai baita, jʉbawãe niiba setaa kũruarãamera. ¹²Ẽbẽrarã ome chĩo panuuwãema.6:12 Ẽbẽrarã ome chĩo panuuwãema. Griego bed̶ead̶e naka b̶ʉ kub̶uu: Kiuru bara nuree ome, oa bara nuree ome chĩo panuuwãema. Maumaarã jai kachiruarã nau iujãa pãriud̶ebenarã ómeburu chĩo panuu. Maarã dachiba unud̶akau chi mechiu nureerãbʉ, chi ʉtarebena jai kachiruarã karrarãbʉ. ¹³Maud̶eeba chi kokoroaba ichi ʉ̃rʉ chaarea b̶uu jʉ̃barii Dachi Akõreba machimaa dead̶a jʉ̃́sturu. Maka jʉbawãe niiba kachiruad̶e b̶aebii chaaruud̶e machi poyaa dauchia jãadua panad̶ai. Poyaad̶aped̶a ãrea chaarea nuread̶ai.

¹⁴Maud̶eeba biawãra bed̶ea ijãa panuud̶eeba chaarea nureásturu, kokoroaba kʉrrd̶e jʉ̃barii jʉ̃ b̶uu kĩra. Jipa nibásturu kachiruad̶e b̶aebiarãad̶amera, kokoroaba ichi kakuad̶e chaarea b̶uu jʉ̃barii kĩra. ¹⁵Chi bed̶ea bia Dachi Akõre ome biꞌia b̶uai ʉ̃rʉbena jarad̶e wãd̶ai baita nureásturu, kokoroaba chĩod̶e wãi baita ichi jʉ̃rʉd̶e jʉ̃barii kĩra. ¹⁶Mau awara ne jomad̶e Cristod̶e ijãa panásturu, kokoroaba ichi juad̶e adaubarii ad̶u mirubarii kĩra. Jʉbawãe niiba kachiruad̶e b̶aebii chaaruud̶e, enadrʉma aoko b̶uuba drʉʉruu kĩra b̶uu. Maamina machiba Cristod̶e ijãa panuubʉrã, dauchia jãadua panad̶ai chi juad̶e adaubarii ad̶u mirubariiba chi enadrʉma kid̶a aoko b̶uu kiibibarii kĩra. ¹⁷Maud̶e sõd̶eeba ãrea kuitásturu Dachi Akõreba machi biawãra karibasii, kokoroaba ichi borod̶e chaarea b̶uu jʉ̃barii kĩra. Mau awara Dachi Akõre bed̶ea ichi Jaurid̶eeba ãrea kuitásturu. Dachi Akõre bed̶ea espada kĩra b̶uu, kachirua ome poyaabariid̶eeba.

¹⁸Ewaricha ne joma baita Dachi Akõre Jaurid̶eeba ʉtaa id̶i panásturu. Dau ʉ̃rʉma panuud̶eeba, joma ichi ẽbẽrarã baita kakua ãkaad̶awẽa ʉtaa id̶i panásturu. ¹⁹Maud̶e mʉ baita Dachi Akõremaa ʉtaa id̶i panásturu. Ichimaa ʉtaa id̶ísturu mʉʉmaa kuitaabimera saka Cristo ʉ̃rʉbena berreai b̶uu. Maka mʉʉba wapeawẽa ẽbẽrarãmaa kuitaabiai chi bed̶ea bia Cristo ʉ̃rʉbena, Dachi Akõreba naed̶e kuitaabiwẽa b̶uad̶a. ²⁰Cristoba mʉ bʉisii mau bed̶ea jaradeamera. Jaradea b̶uu kakua mʉ jʉ̃a uru panuu. Dachi Akõremaa ʉtaa id̶ísturu mʉʉba mau bed̶ea bia ʉ̃rʉbena wapeawẽa berreai baita mʉʉba maka waui b̶uud̶eeba.

Pabloba nau kartad̶e aanama b̶ʉd̶a

²¹Dachiba kʉ̃ria panuu ãba Tiquicoba mʉ ʉ̃rʉbena machimaa joma nebʉrʉi kuitaad̶amera mʉ saka b̶uu maud̶e kãare wau b̶uu. Ichi Dachi Mechiu baita ichi kʉ̃ria trajabarii jipa nii, maud̶e ne jomad̶e biꞌia waubarii. ²²Mʉʉba ichi machimaa bʉiruu kuitaad̶amera dai saka panuu. Mauba machi kĩrajʉʉbiai.

²³Ãbarã, mʉʉba kʉ̃ria b̶uu Dachi Bajãad̶ebena Akõreba maud̶e Dachi Mechiu Jesucristo bid̶a machi aid̶ad̶ai chiya kʉ̃ria panad̶amera maud̶e biꞌia ijãa panad̶amera. Maud̶e mʉʉba kʉ̃ria b̶uu maarãba jirukaraayuwãe panabiad̶ai. ²⁴Mʉʉba kʉ̃ria b̶uu Dachi Akõreba ichi sõbiad̶eeba joma Dachi Mechiu Jesucristo biawãra ãrea kʉ̃ria nuree aid̶a b̶uai. Biꞌia b̶uu maka b̶uai.