Colosenses
Karta Pabloba b̶ʉd̶a ãbarã Colosa puurud̶ebenarã baita
Dachiba kʉ̃risia panuu año 60d̶e Pablo jʉ̃a b̶uasiid̶e Roma puurud̶e, nau karta b̶ʉsii. Karta Filemonmaa urubʉisiid̶e, nau karta sid̶a urubʉisii ãbarã Colosad̶e nureerãba maud̶e Laodicead̶e nureerãba ed̶a jarad̶amera (4:16).
Pablo Colosad̶aa wãka basii (2:1). Epafrasba naed̶e bed̶ea bia Jesús ʉ̃rʉbena jarad̶e wã b̶uasii (1:5-7). Ãbarã Colosad̶e, Laodicead̶e, Hierapolisd̶e nureerãmaa jaradea b̶uabachii (4:12-13). Maarã puuru arab̶au druad̶e panasid̶au.
Epafras b̶uasiid̶e waabenarãba kʉ̃risia ãyaa kʉ̃risia kopaneesid̶au. Waabenarãba Dachi Akõremaa biꞌia berread̶ai bad̶amaarã, angelerãmáturu biꞌia berreabachid̶au. Waabenarãba jarabachid̶au ab̶auba ãchiba jaradeabadau ijãaruubʉrã kachirua wauwẽa b̶uai. Maud̶eeba Epafrasba Pablomaa jarad̶e wãsii. Pabloba nau karta b̶ʉsii ãbarãba setaa ijãarãad̶amera maud̶e Jesucristo chi mechiu nii kuitaad̶amera (1:15-23 maud̶e 2:6-23). Mau awara Pabloba nau kartad̶e b̶ʉsii, ãbarã aid̶ai baita (1:24—2:5). Mawãare b̶ʉsii ãbarã saka nibad̶ai panuu (3:1—4:6). Ãbarã baita kaad̶eare b̶ʉd̶a 4:7-18d̶e b̶uu.
1Pabloba nau kartad̶e naa b̶ʉd̶a
1Mʉ Pablobʉ. Mʉ Jesucristoba bʉid̶abʉ, Dachi Akõreba mau kʉ̃riasiid̶eeba. Dachi ãba Timoteo mʉ ome b̶uu. 2Mʉʉba nau karta b̶ʉʉruu ẽbẽrarã Dachi Akõred̶e, dachi ãbarã Jesucristod̶e ijãabadaurã Colosa puurud̶ebena baita. Daiba kʉ̃ria panuu Dachi Bajãad̶ebena Akõreba1:2 Dachi Bajãad̶ebena Akõre. Kajuma bed̶ead̶e b̶ʉ kub̶uu: Dios el Padre. ichi sõbiad̶eeba machi kariba b̶uai maud̶e jirukaraayuwãe b̶uabiai.1:2 Dachi Bajãad̶ebena Akõreba. Griego bed̶ead̶e chi b̶ee kartad̶e b̶ʉ kub̶uu: Dachi Bajãad̶ebena Akõreba, maud̶e Dachi Mechiu Jesucristo.
Pabloba ãbarã baita Dachi Akõremaa ʉtaa id̶id̶a
3Dachi Mechiu Jesucristo Akõre, Dachi Akõremaa ʉtaa id̶iiduucha daiba machi baita ichíturu kid̶ibai abadau. 4Daiba ũri panuu machiba Jesucristod̶e ijãa panuu maud̶e joma ẽbẽrarã Dachi Akõred̶erã ãrea kʉ̃ria panuu. 5Machi maka panuu, kuitaa panuud̶eeba Dachi Akõreba machi baita ne bia bajãad̶e nu uru b̶uu. Mau machiba naed̶e ũrisid̶au chi bed̶ea biawãra Jesucristo ʉ̃rʉbena machimaa neesiid̶e. Mau bed̶ea bia 6machimare ũrisid̶aud̶e Dachi Akõreba ichi sõbiad̶eeba machi biawãra karibai b̶uu joma kuitaasid̶au. Ara mau kĩra mau ewarid̶eed̶ebena joma druacha ẽbẽrarãba mau bed̶ea ãrea ijãamaa duanuu nejõo bakuru chaubarii kĩra. 7Mau bed̶ea dachi ãba Epafrasba machimaa kuitaabiasii. Ichi daiba biawãra kʉ̃ria panuu. Dai ome arab̶aud̶e wau b̶uu. Ichi Cristo baita bari trajabariibʉ. Machi aid̶ai baita ne jomad̶e jipa waubarii.1:7 Machi aid̶ai baita. Griego bed̶ead̶e chi b̶ee kartad̶e b̶ʉ kub̶uu: dai aid̶ai baita.8Ichiba daimaa jarasii machi Dachi Akõre Jaurid̶eeba biawãra chiya kʉ̃ria panuu.
9Maka ũrisid̶aud̶eed̶ebena daiba machi baita ewaricha Dachi Akõremaa ʉtaa id̶i panuu ichiba waubi kʉ̃ria b̶uu machimaa joma kuitaabiamera. Mau awara ʉtaa id̶i panuu ichiba maarãmaa kʉ̃risia kuitaa maud̶e kauwa ũri ichi Jaurid̶eeba joma deamera. 10Maka machi poyaa jipa nibad̶ai Dachi Mechiuba kʉ̃ria b̶uu kĩra maud̶e ne jomad̶e ichiba machi biꞌia unui. Biawãra machiba ne joma biꞌia wau panuud̶eeba nejõo biꞌia chaubarii kĩra duanad̶ai maud̶e Dachi Akõre biꞌia unu kãribad̶ead̶ai. 11Daiba Dachi Akõremaa ʉtaa id̶i panuu ichi poyaabarii ãrea b̶uud̶eeba machi chaarea panad̶amera. Maka machi ãrea biꞌiwãe paneeduud̶e maud̶e waabenarãba machi kachirua wauduud̶e, biꞌia dauchia jãadua panad̶ai. 12Maka kĩrajʉʉ Dachi Bajãad̶ebena Akõremaa biꞌia nii ad̶ai. Machi joma ichi ẽbẽrarã ome ʉ̃d̶aad̶e biꞌia b̶usii ichiba uru b̶uud̶ebena adaud̶amera. 13Dachi Akõreba chi jʉbawãe nii pãriud̶ebena dachi karibaped̶a b̶usii ichi Warr kʉ̃ria nii juad̶e ichid̶irã baara ua b̶uamera. 14Ichi Warrd̶eeba Dachi Akõreba dachi kachiruad̶ebena karibasii.1:14 Karibasii. Griego bed̶ead̶e chi b̶ee kartad̶e b̶ʉ kub̶uu: karibasii ichi oad̶eeba. Dachiba kachirua wauped̶aad̶a joma perdonasii.
Cristo joma audeara mechiu nii
15Chi Dachi Akõre dachiba unud̶akau, mau Jesucristod̶eeba unubadau. Ichi Dachi Akõre Nabena Warrd̶eeba joma Dachi Akõreba waud̶a chi Mechiu.
16Ichid̶eeba Dachi Akõreba ne joma wausii. Bajãad̶e nuree, nau druad̶e nuree, dachiba unubadau maud̶e dachiba unud̶akau joma wausii.
Joma chi dachiba unud̶akau jaradea ua b̶uabadaurã, chi mechiurã maud̶e chi meserãa nuree wausii. Dachi Akõreba Cristod̶eeba joma wausii maud̶e Cristo baita wausii.
17Ne joma waui naed̶e Cristo b̶uasii. Joma ichid̶eeba nuree.1:17 Joma ichid̶eeba nuree. Nau jara b̶uu nau iujãad̶e nuree, bajãad̶e nuree maud̶e dachiba ẽbẽrarãba ne poyaa waud̶akau sid̶a.
18Cristo ichid̶irã ẽbẽrarã mechiubʉ.1:18 Ichid̶irã ẽbẽrarã mechiubʉ. Kajuma bed̶ead̶e naka b̶ʉ kub̶uu: Él es la cabeza del cuerpo, que es la iglesia. Ichid̶eeba maarã nuree. Ichi ewaricha chokae b̶uai baita naa chokae jiradusii. Maud̶eeba joma aude chi mechiu nii.
19Dachi Akõreba kʉ̃riasii Cristo ara ichi kĩra b̶uai.
20Maud̶e kʉ̃riasii Cristod̶eeba ne joma bajãad̶ebena maud̶e nau iujãad̶ebena ichi ome biꞌia nuread̶amera.
Maud̶eeba Cristo cruzd̶e oa chesiid̶eeba ichi ome jirukaraayuwãe b̶usii.
21Kachirua wau panuud̶eeba machi mau naed̶e Dachi Akõred̶ebena awara nureasii maud̶e machiba kachirua kʉ̃risia panuud̶eeba Dachi Akõre kĩramaa panasid̶au. 22Maamina Cristo biusiid̶eeba Dachi Akõreba machi mau ome biꞌia b̶usii ichi daad̶e kachiruaswãe nuread̶amera maud̶e waabenarãba machi ʉ̃rʉbena kachirua jarad̶ayuswãe nuread̶amera. 23Maud̶eeba Cristod̶e ãrea ijãa panuud̶eeba dauchia jãadua nuread̶ai panuu. Chi bed̶ea bia Cristo ʉ̃rʉbena machiba ũriped̶aad̶a ida b̶ud̶aabai panuu, maumaarã Dachi Akõreba deai jarad̶a esed̶aud̶ai panuu. Mau bed̶ea bia joma nau iujãad̶e1:23 Joma nau iujãad̶e. Kajuma bed̶ead̶e naka b̶ʉ kub̶uu: en toda la creación que está debajo del cielo. jaradea panuu. Ara mau bed̶ea mʉa bid̶a jaradea b̶uu.
Pabloba ãbarã aid̶ai baita jaradea b̶uad̶a
24Jãabae mʉʉba machi aid̶ai baita ãrea biꞌiwãe b̶umina kĩrajʉʉ b̶uu. Maud̶e Cristo baita wabid̶a biꞌiwãe b̶uai b̶uud̶eeba, ãrea biꞌiwãe nibai joma ichi ẽbẽrarã aid̶ai baita. 25Dachi Akõreba mʉ ichi ẽbẽrarã baita trajabarii b̶usii. Maud̶eeba ichi bed̶ea joma arakʉd̶e machimaa jaradea b̶uu. 26Nabẽraed̶ebena ewarid̶e mau bed̶ea Dachi Akõreba kuitaabiawẽa b̶uasii, maamina id̶i mau bed̶ea ichi ẽbẽrarãmaa kuitaabiasii. 27Mau bed̶ea naed̶e kuitaabiawẽa b̶uad̶a, ichid̶irãmaa kuitaabiasii. Mau bed̶ea bia chi judiowãerã baita bid̶a b̶uu. Ichiba kuitaabiawẽa b̶uad̶a nau: Cristo machi sõd̶e b̶uu. Ichid̶eeba kuitaa panuu ichi biad̶eeba ne adaud̶ai.
28Joma kʉ̃risia kuitaad̶ebena daiba Cristo ʉ̃rʉbena jomaurãmaa jaradea panuu jipa nibad̶amera. Maka daiba ẽbẽrarã joma Cristod̶eeba jomad̶e jipa panuu Dachi Akõremaa unubiad̶ai. 29Mau baita mʉ kʉrrjĩruwẽa traja b̶uu Cristoba ichi poyaabarii ãrea dea b̶uud̶eeba.
21Mʉʉba kʉ̃ria b̶uu machiba nau kuitaad̶ai: mʉ dauchia jãadua ãrea traja b̶uu machi Colosad̶ebenarã, ãbarã Laodicea puurud̶ebenarã maud̶e joma ãbarã mʉ unud̶akau aid̶ai baita. 2Mʉʉba kʉ̃ria b̶uu jomaurã dauchia jãadua kĩra ʉb̶ʉa panabiai, kʉ̃riad̶eeba ãbua biꞌia duanad̶ai maud̶e biawãra kʉ̃risia kuitaa nureed̶eeba biꞌia duanad̶ai. Maka Dachi Akõreba mau naed̶e kuitaabiawẽa b̶uad̶a kuitaad̶ai. Mau Cristobʉ. 3Ichiaburu Dachi Akõre kʉ̃risia kuitaad̶ai maud̶e ne ãrea kuitaad̶ai baita poyaa deai. Mau kʉ̃risia kuitaad̶ai maud̶e ne kuitaad̶ai ãrea biꞌia nuree. 4Joma mau mʉʉba jara b̶uu ab̶auba machimaa setaa jararãamera, setaa mipitaa berrearuuba. 5Mʉ machi ome b̶uuwãemina mʉ kʉ̃risia machi ome b̶uu. Mʉʉba kuitaa b̶uu machi ãbua biꞌia panuu maud̶e Cristod̶e ãrea ijãa panuu. Maud̶eeba kĩrajʉʉ b̶uu.
Chokae b̶uai wid̶i Cristod̶e uru panuu
6Machiba Dachi Mechiu Jesucristod̶e ijãasid̶aud̶eeba ichid̶eeba nibásturu. 7Ichid̶eeba chaarea panásturu ãrea karr jidau panuu kĩra maud̶e de bia waud̶a kĩra. Ichid̶e ãrea ijãa panásturu ãbarãba jaradeaped̶aad̶a kĩra. Ewaricha Dachi Akõremaa ichíturu kid̶ibai ásturu.
8Kauwa panásturu ab̶auba machimaa setaa jararãamera, chi dachi aid̶akau biawãrawãe b̶uu kʉ̃risiabadaud̶eeba. Mau joma nabẽraed̶ebena kʉ̃risiabadau nau iujãad̶ebena jauri meserãa nureed̶ebenabʉ. Mau bed̶ea Cristod̶ebenawãebʉ. 9Cristo ẽbẽra kakuad̶e biawãra Dachi Akõrebʉ.2:9 Mau jauri poyaa audeara, Cristo aude poyaabarii nii, ichi Dachi Akõred̶eeba.10Machi Cristod̶e ẽbẽrarãd̶eeba, ichid̶eeba joma uru panuu Dachi Akõre ome biꞌia nuread̶ai baita. Mau joma chi meserãa nuree Mechiubʉ. 11Machi ichid̶irã nureed̶eeba, machi mukĩra chi kakua tõoped̶aad̶a kĩra nuree. Maamina ẽbẽra juaba maka waud̶aabasii. Maumaarã jara b̶uu dachi kakuaba kachirua wau kʉ̃ria b̶uud̶ebena karibasii. Mau mukĩra chi kakua tõod̶a Cristoba wausii. 12Dachi Akõreba ichi poyaabariid̶eeba Cristo chi biud̶ad̶ebena chokae jiradubisii. Machiba Dachi Akõre maka poyaabarii nii ijãasid̶aud̶eeba boro easid̶aud̶e unubisid̶au Cristo ome jau b̶uped̶aad̶a maud̶e Dachi Akõreba machi Cristo ome chokae jiradubid̶a.
13Cristod̶e ijãad̶ai naed̶e machi biu panasid̶au kachirua wau waubachid̶aud̶eeba. Maud̶e dachi kakuaba kachirua wau kʉ̃ria b̶uu waubachid̶au.2:13 Dachi kakuaba kachirua wau kʉ̃ria b̶uu waubachid̶au. Griego bed̶ead̶e naka b̶ʉ kub̶uu: mukĩra kakua tõowẽa panuud̶eeba. Maamina Dachi Akõreba machi Cristo baara chokae duanubiasii. Joma dachiba kachirua wauped̶aad̶a ichiba perdonasii. 14Biawãra kachirua wau panuud̶eeba dachi Dachi Akõremaa deai b̶uu dead̶ai panasid̶au. Maud̶eeba Moisesba b̶ʉd̶ad̶e b̶ʉ kub̶uu dachi biud̶ai panuu.2:14 Romanos 6:23. Maamina Cristo cruzd̶e biusiid̶e Dachi Akõreba mau dead̶ai panad̶a joma ida b̶usii. 15Maud̶eeba Dachi Akõreba joma dachiba unud̶akau chi mechiu nuree poyaasii. Mau waud̶a ichiba jomaurãmaa unubiasii.2:15 Mau ewarid̶e chi kokoroarãba ãchi kĩramaabadau poyaasid̶aud̶e, ãchi puurud̶aa adoebachid̶au. Aria jomaurã daad̶e puurud̶e nibabiabachid̶au, kĩrakaya panad̶amera.
16Maud̶eeba machiba kobadau ʉ̃rʉbena maud̶e dobadau ʉ̃rʉbena ẽbẽrarãba kachirua jaraaduubʉrã, maarã bed̶ea ijãarã́sturu. Machiba ẽbẽrarã kĩrajʉʉ bara b̶uabarii ewari waubadau ewari nud̶akau, jed̶ako wid̶i nud̶akau maud̶e bari panabadau ewari nud̶akau ʉ̃rʉbena maarãba kachirua jaraaduubʉrã, ijãarã́sturu. 17Dachi Akõreba joma mau waui b̶uad̶a tõroroa unubi b̶uasii. Maamina ichiba waui jarad̶a Cristod̶eeba joma wausii.
18Mau baita ab̶auba machiba ne bia bajãad̶e adaud̶aabai aaduubʉrã, ijãarã́sturu.2:18 Machiba ne bia bajãad̶e adaud̶aabai aaduubʉrã. Griego bed̶ead̶e nau sid̶a jara b̶uu «ab̶auba machi biꞌiwãe aaduubʉrã». Maarã berreabadaurã setaa maka nibabadau waabenarã chi aude kaebeu nibabadau kĩra. Maarãba angelerã ãrea kʉ̃riabadau. Chi maarã daumaa unubiaped̶aad̶a ãrea jaradeabadau. Dachi juaba biꞌiwãe waui kʉ̃ria b̶uud̶eeba ẽbẽra jaradea ua b̶uabadaurã mechiurã kĩra ãyaa kʉ̃risiabadau. 19Ãchi Dachi Mechiu Cristo2:19 Dachi Mechiu Cristo. Griego bed̶ead̶e b̶u kub̶uu: chi boro. ome panuuwãe. Maamina ẽbẽrarã Cristod̶eeba ichid̶eeba ne joma uru panuu ichi ome ãbua biꞌia panad̶ai baita. Ichid̶eeba dachi waribadau Dachi Akõreba waribi b̶uu kĩra.
20Machi Cristo ome ãbua biusid̶aud̶eeba nau iujãad̶ebena jauri mechiurãd̶e ijãad̶aabai panuu. Mau ¿sakãe wabid̶a mau kʉ̃risia ijãa panuma nau iujãad̶ebenarã ijãabadau kĩra? 21Naka jarabadau: «Jãkʉ waurã́sturu, jãkʉ ko chaarã́sturu, jãkʉ jidaurã́sturu». 22Joma mau ẽbẽrarãba ãchi kʉ̃risiad̶eeba jaradeabadau. Mau kʉ̃risia ijãad̶aabai panuu joma dachiba koped̶aad̶a maud̶e doped̶aad̶a wãꞌãebariid̶eeba. 23Biawãra mau kʉ̃risia kuitaa kĩra b̶uu. Ãchiba jarabadau ara dachi du ab̶a ne waubadaud̶eeba Dachi Akõre kaad̶e poyaa biꞌia wãd̶ai, waabenarã audeara kaebeu nibad̶ai panuu maud̶e ãrea biꞌiwãe panad̶ai panuu, ara dachi du ab̶a puꞌuaduud̶eeba. Maamina joma mauba dachi kakuaba kachirua wau kʉ̃ria b̶uu maka waubikau.
3Ne bajãad̶ebena jʉrʉd̶ai panuu
1Machi Cristo ome chokae jiradusid̶aud̶eeba ne bajãad̶ebena jʉrʉ panásturu. Aria Cristo Dachi Akõre jua biare akʉ b̶uu. 2Ne bajãad̶ebena kʉ̃risia panásturu, maud̶e nau iujãad̶ebena kʉ̃risia panarã́sturu. 3Maka nibad̶ai panuu, Cristo ome biud̶akare ichi ome chokae panuud̶eeba. Mau waabenarã ẽbẽrarãba kuitaad̶akau. Maamina Cristo Dachi Akõre ome chokae b̶uud̶eeba, machi sid̶a Dachi Akõre ome chokae panuu. 4Machi Cristod̶eeba chokae panuud̶eeba, ichi waya unubiiruud̶e machi ichi ome panad̶ai. Maud̶e ara ichi kĩra, kĩrawãrea panad̶ai.3:4 Machi. Griego bed̶ead̶e chi b̶ee kartad̶e b̶ʉ kub̶uu: dachi.
Cristod̶eeba dachi chiwid̶i paneed̶a
5Maud̶eeba joma nau iujãad̶ebena kʉ̃risia machi sõd̶e b̶uu ida b̶ústuru. Dachi kakuaba barikiu kachirua waurã́sturu, mia kĩra nejasia waurã́sturu, ne mia pera waurã́sturu, kʉ̃risia kachirua kʉ̃risiarã́sturu, maud̶e ne kaebea ãrea uru panad̶ai kʉ̃ria panarã́sturu. Chi ne kaebea ãrea kʉ̃ria b̶uu, Dachi Akõre kuenda juaba ne kaped̶aad̶ad̶e ijãa b̶uu kĩra nii. 6Joma mau kachirua baita Dachi Akõreba ichid̶e ijãad̶akau nuree kastikai.3:6 Ichid̶e ijãad̶akau nuree. Griego bed̶ead̶e chi b̶ee kartad̶e mau wãꞌãe.7Machi sid̶a eskareed̶e maka nibabachid̶au. 8Maamina jãabae nau joma ida b̶ústuru: machi sõd̶eeba kĩrubadau, oa kachirua berreabadau, waabenarãmaa kachirua waubadau, waabenarã ʉ̃rʉbena setaa jarabadau maud̶e bed̶ea kachirua jarabadau joma ida b̶ústuru.
9Waabenarãmaa setaa jararã́sturu. Machi ẽbẽra Cristod̶e ijãad̶ai naed̶e maka panad̶a ida b̶usid̶au, dachiba chi paru sore ẽebadau kĩra. Maud̶e machiba kachirua wauped̶aad̶a ida b̶usid̶au. 10Paru chiwid̶i jʉ̃ʉduu kĩra machi chiwid̶i paneesid̶au. Dachi Akõreba maka wausii. Mau awara machi biꞌia wau kãrid̶au ichi kĩra nuread̶amera maud̶e ichi biꞌia unud̶amera. 11Dachi Akõreba maka wausiid̶eeba ichi daad̶e griego judio ome arab̶aud̶e nii. Mukĩra chi kakua tõo nii mukĩra chi kakua tõowẽa nii ome arab̶aud̶e nii. Drua ãibena, ne adua nii ome arab̶aud̶e nii. Chi chibari baita bari trajabarii, chi chibariswãe nii ome arab̶aud̶e nii. Cristo chi aude bibuara nii. Ichi jomaurã sõd̶e b̶uu.
12Dachi Akõreba machi kʉ̃riad̶eeba jʉrʉ adausii ichi baita biꞌia nuread̶amera. Maud̶eeba waabenarã kĩra chuburia panásturu. Ẽbẽra bia panásturu. Machi waabenarã audeara biꞌia nuree kʉ̃risiarã́sturu. Jomaurã ome kʉ̃risia biad̶eeba panásturu. Ne jomad̶e jãadua panásturu. 13Jomaurã ome jãaduai kuitaa panásturu. Ab̶auba kachirua wauruubʉrã mau kachirua waud̶a perdonásturu. Machiba kachirua wauped̶aad̶a Dachi Mechiuba kʉde b̶eei ida b̶ud̶a kĩra machia bid̶a kʉde b̶eei ida b̶ústuru. 14Mau awara waabenarã kʉ̃ria duanásturu. Maka machi jomaurã ome ãbua biꞌia duanad̶ai. 15Dachi Akõreba machi iusii machi kakua ara ab̶a nii kĩra panad̶amera. Cristoba machi sõd̶e apii b̶uai dea b̶uu.3:15 Cristoba. Griego bed̶ead̶e chi b̶ee kartad̶e b̶ʉ kub̶uu: Dachi Akõreba. Mauba kuitaabii kãare waud̶ai panuu. Maka panásturu. Maud̶e Dachi Akõremaa ichíturu kid̶ibai ásturu.
16Bed̶ea Cristo ʉ̃rʉbena machi sõd̶e uru panásturu. Joma Dachi Akõre kuitaad̶eeba chiya jaradeásturu maud̶e chiya aid̶ásturu biꞌia ijãad̶ai baita. Dachi Akõre bed̶ead̶e b̶ʉ kub̶uu karísturu, ãbarãba karibadau maud̶e Dachi Akõre Jauriba karibi b̶uu sid̶a Dachi Akõremaa karísturu. Sõd̶eeba ichíturu kid̶ibai jara panuud̶eeba karísturu. 17Machi berreaduud̶e maud̶e ne wauduud̶e joma wáusturu Dachi Mechiu Jesusba kʉ̃ria b̶uu kĩra. Ichid̶eeba Dachi Bajãad̶ebena Akõremaa ichíturu kid̶ibai ásturu.3:17 Dachi Bajãad̶ebena Akõremaa. Griego bed̶ead̶e naka b̶ʉ kub̶uu: Dios el Padre.
Ãbarã ãchi ded̶ebenarã ome saka nuread̶ai panuu
18Wẽrarã kima bara nuree, machi kimarãba jara panuu ijãa panásturu.3:18 Wẽraba mukĩra ab̶aburu uru b̶uai b̶uu. Arab̶aud̶e mukĩraba wẽra ab̶aburu uru b̶uai b̶uu. Machi Dachi Mechiu Jesús ome panuud̶eeba maka waud̶ai panuu. 19Mukĩrarã wẽra bara nuree, machi wẽra kʉ̃riásturu. Maarã ome kĩrubi id̶aa panarã́sturu.
20Warrarã, machi akõrerã bed̶ea ũribaba ũrísturu, Dachi Mechiuba mau biꞌia unubariid̶eeba. 21Akõrerã, machi warrarã kĩrubiarã́sturu kĩra nomaarãad̶amera.
22Chi chibari baita bari trajabadaurã, machi jaradea ua b̶uabarii nau iujãad̶ebenarãba waubiiruu joma wáusturu. Maamina ichiba ichia b̶uud̶éburu waurã́sturu, ichi ome biꞌia nuread̶ai baita. Maumaarã Dachi Akõre wapea panuud̶eeba sõbiad̶eeba joma wáusturu. 23Joma machiba wau panuu chokekead̶eeba wáusturu Dachi Mechiu baita wau panuu kĩra. Maamina maka waurã́sturu ẽbẽrarãba biꞌia unud̶amera. 24Machi Dachi Mechiu Cristo baita bari trajabadaurãbʉ. Machiba kuitaa panuu ichi baita biꞌia wau panuud̶eeba, ichiba machimaa chi adaud̶ai panuu deai. 25Maamina chi kachirua wau b̶uu Dachi Akõreba kastikai. Ichiba joma arab̶aud̶e kastikabarii.
41Ne chibarirã, jipa wáusturu chi machi baita bari trajabadaurã ome. Kuitaa panuu machia bid̶a machi Chibari bajãad̶e uru panuu.
2Ewaricha Dachi Akõremaa ʉtaa id̶i panásturu. Ʉtaa id̶iiduud̶e dau ʉb̶ʉa panásturu maud̶e ichíturu kid̶ibai ásturu. 3Dai baita ʉtaa id̶ísturu Dachi Akõreba poraa ewaaruu kĩra, Cristo ʉ̃rʉbena naed̶e kuitaabiwẽa b̶uad̶a ida jaradeabimera. Mau jaradea b̶uu kakua mʉ jʉ̃a uru panuu. 4Ʉtaa id̶ísturu mʉʉba biꞌia jaradeamera, mʉʉba waui b̶uu kĩra.
5Cristod̶e ijãad̶akaurã tãed̶e kʉ̃risia kauwa nibásturu. Ewaricha jʉrʉ́sturu ichi ʉ̃rʉbena maarãmaa kuitaabiad̶ai baita. 6Bed̶ea biad̶eeba berreásturu jomaurãba biꞌia ũrid̶amera. Maka Cristo ʉ̃rʉbena id̶iiduud̶e machiba kuitaa panad̶ai saka panaud̶ai panuu.
Pabloba nau kartad̶e aanama b̶ʉd̶a
7-8Mʉʉba dachi ãba Tíquico machimaa bʉiruu mʉ ʉ̃rʉbena jaramera. Daiba mau biꞌia kʉ̃ria panuu. Mauba mʉ ome ãbua Dachi Mechiu traju ne jomad̶e biꞌia wau b̶uu. Mauba dai ʉ̃rʉbena machimaa joma kuitaabiai, maud̶e kĩrajʉʉbiai. 9Tíquico baara ãba Onésimo bʉiruu. Ichiba ne jomad̶e jipa wau b̶uu maud̶e daiba mau kʉ̃ria panuu. Tiquicoba maud̶e Onesimoba machimaa nebʉrʉd̶ai joma nama saka nub̶uu.
10Ãba Aristarco mʉ baara jʉ̃a uru panuu. Mauba jarabʉi b̶uu machi biꞌia panad̶ai. Bernabé niu Marcosba jarabʉi b̶uu machi biꞌia panad̶ai. Ichi ʉ̃rʉbena mʉʉba naed̶e kartad̶e b̶ʉsii. Mau machimaa wãaruubʉrã, deed̶aa iu biꞌia iústuru. 11Maud̶e ãba Jesús, Justo abadauba jarabʉi b̶uu machi biꞌia panad̶ai. Ãbarã judiorãd̶ebena mau õbea panuuba nama mʉ aid̶a jaradea panuu Dachi Akõreba ichid̶irã ichi juad̶e ua b̶uu ʉ̃rʉbena. Mau ãbarã kakua mʉ kĩrajʉʉ b̶uabarii. 12Machi puurud̶ebena Jesucristo baita bari trajabarii Epafrasba jarabʉi b̶uu machi biꞌia panad̶ai. Ichiba ewaricha Dachi Akõremaa ʉtaa id̶i b̶uabarii machi ne jomad̶e dauchia jãadua nuread̶amera, ãrea ijãa panad̶amera, maud̶e joma Dachi Akõreba waubi kʉ̃ria b̶uu kuitaad̶aped̶a waud̶amera. 13Mʉʉba jaraaruu: ãba Epafras biawãra traja b̶uu machi aid̶ai baita maud̶e joma ãbarã Laodicea puurud̶ebenarã maud̶e Hierápolis puurud̶ebenarã aid̶ai baita. 14Ãba ʉrrmid̶ia deabarii Lucasba jarabʉi b̶uu machi biꞌia panad̶ai. Mau daiba kʉ̃ria panuu. Ãba Demas bid̶a jarabʉi b̶uu machi biꞌia panad̶ai.
15Dachi ãbarã Laodicea puurud̶ebenarãmaa jarásturu mʉʉba jarabʉi b̶uu maarã biꞌia panad̶ai. Dachi neekau Ninfas maud̶e jomaurã ãbarã ichi ded̶e ãbua wãbadaurãmaa jarásturu mʉʉba jarabʉi b̶uu maarã biꞌia panad̶ai.
16Machiba nau karta ed̶a jaraaduud̶e ãbarã Laodicea puurud̶ebenarãmaa bid̶a ed̶a jarabiásturu. Machia bid̶a chi karta mʉʉba maarãmaa urubʉid̶a ed̶a jarásturu. 17Ãba Arquipomaa jarásturu: «Dachi Mechiuba waubi b̶uu joma wau b̶uase».
18Mʉ Pablobʉ. Ara mʉ juaba b̶ʉʉruu mʉʉba jarabʉiruu machi biꞌia duanad̶ai. Mʉ jʉ̃a uru panuud̶eeba Dachi Akõremaa ʉtaa id̶i panásturu. Mʉʉba kʉ̃ria b̶uu Dachi Akõreba ichi sõbiad̶eeba machi aid̶a b̶uayu.