3 Juan
Karta õbea Juanba b̶ʉd̶a
Chi Jesús baara nibad̶a Juanba nau karta b̶ʉsii. Año 90d̶e Éfeso puurud̶e b̶uasiid̶e b̶ʉsii. Nau kartad̶e ichi chi chõra asii. Karta ãba Gayo baita b̶ʉsii.
Nau kartad̶e Juanba naa b̶ʉsii ichi kĩrajʉʉ b̶uu, Gayoba chi biawãra bed̶ea ijãa b̶uud̶eeba maud̶e biawãrad̶e niid̶eeba (1-4). Mawãare b̶ʉsii ichiba ãbarã bʉid̶a ʉ̃rʉbena. Gayoba maarã biꞌia irsibiped̶a aid̶a b̶uad̶ad̶eeba, Juanba ichi ʉ̃rʉbena biꞌia jarasii (5-8). Maamina aria, chi ãba Cristod̶e aude mechiu nii kʉ̃risia b̶uad̶a Diotrefesba ãchimaa ida jaradeabika basii. Mau awara chi ãchi biꞌia irsibiiduu duabʉikabachii maud̶e Juan ʉ̃rʉbena kachirua jarabachii (9-10). Maamina Juanba Gayomaa jarasii Diótrefes kĩra nibabiimaaba, maumaarã waabenarãmaa biꞌia wau b̶uamera (11-12). Kaad̶eare b̶ʉsii kãꞌãabariwãed̶e chiya unud̶ai maud̶e ãbarãba ichi biꞌia b̶uai kʉ̃ria panuu (13-15).
1Ãba Gayoba biꞌia waud̶a
1Mʉ Chõrabʉ.1 Chõrabʉ. Waabenarãmaarã mau jara b̶uu «ijãabadaurã nubarii». Mʉʉba nau karta b̶ʉʉruu mʉ ãba Gayo baita. Mʉʉba bichi biawãra kʉ̃ria b̶uu. 2Ãba, mʉʉba Dachi Akõremaa ʉtaa id̶i b̶uu bichi ichi ome biꞌia b̶uud̶eeba ne jomad̶e biꞌia b̶uamera maud̶e kakua biꞌia b̶uamera. 3Mʉ ãrea kĩrajʉʉsii, waabenarã ãbarã mʉʉmaa neeped̶aad̶aba nebʉrʉsid̶aud̶eeba bichiba chi biawãra bed̶ea ijãa b̶uu. 4Mʉ ãbarãba chi biawãra bed̶ea ijãa panuu ũriiruud̶e, mʉ ãrea kĩrajʉʉ b̶uabarii.4 Mʉ ãbarã. Griego bed̶ead̶e naka b̶ʉ kub̶uu: mʉ warrarã.
5Ãba, bichiba ãbarã aid̶a b̶uud̶eeba biꞌia wau b̶uu. Chi bichiba unukau ãbarã sid̶a aid̶abariid̶eeba biawãra ãrea biꞌia wau b̶uu. 6Ãbarã araa ãbua imisid̶aud̶e, jomaurã daad̶e maarãba bichi kʉ̃ria panuu ʉ̃rʉbena nebʉrʉsid̶au. Mʉ kĩra chuburiáse, ãchi aid̶ase biꞌia wãd̶amera Dachi Akõreba ichi traju waubadaurã aid̶abiabarii kĩra. 7Ãchiba Jesucristo ʉ̃rʉbena jaradead̶e wãsid̶aud̶e, chi Dachi Akõred̶e ijãad̶akaurãd̶ebena ne adaud̶aabasii.7 Chi Dachi Akõred̶e ijãad̶akaurãd̶ebena ne adaud̶aabasii. Mau jara b̶uu chi nejarra, chiko ne kaebea id̶id̶ai baita panuuwãe.8Maud̶eeba dachiba mau ãbarã biꞌia aid̶ad̶ai panuu. Maka ãchi ome ãbua traja panuu chi biawãra bed̶ea kuitaabiad̶ai baita.
Ãba Diotrefesba kachirua waud̶a
9Mʉʉba naed̶e karta b̶ʉsii joma ãbarã mamabena baita. Maamina Diotrefesba dai bed̶ea ijãawẽa nii. Ichi ãbarã tãed̶e chi mechiu nibai kʉ̃ria b̶uu. 10Maud̶eeba mamaa wãaruud̶e mʉʉba jomaurãmaa kuitaabiai ichiba kachirua wau b̶uu. Ichiba dai ʉ̃rʉbena setaa kachirua jarabarii. Mau awara chi ãbarã mamaa wãaduu ichiba biꞌia irsibiabikau maud̶e chi ãbarãba ãchi ded̶e biꞌia irsibi kʉ̃ria panuud̶e ida b̶ukau. Maarã biꞌia irsibiiduubʉrã mau ãbarã duabʉikabarii.
Ãba Demetrio ʉ̃rʉbena biꞌia b̶ʉd̶a
11Ãba, chi kachirua waubadau kĩra waurã́se maumaarã biꞌia wause. Chi biꞌia waubarii Dachi Akõred̶ebʉ, maamina chi kachirua waubariiba Dachi Akõre adua b̶uu.
12Ãba Demetrio ʉ̃rʉbena jomaurãba biꞌia berrea panuu. Chi biawãra bed̶ea ijãa b̶uud̶eeba unubia b̶uu ichi jipa nii. Dai bid̶a ichi ʉ̃rʉbena biꞌia kʉ̃risia panuu. Machiba kuitaa panuu daiba jara panuu biawãrabʉ.
Juanba nau kartad̶e aanama b̶ʉd̶a
13Mʉʉba ne ãrea bichimaa jara kʉ̃ria b̶umina kartad̶e b̶ʉwẽma. 14Isa bichi ichiad̶e wã kʉ̃ria b̶uu. Maabae ãbua berread̶ai. 15Mʉʉba kʉ̃ria b̶uu Dachi Akõreba ichi jirukaraayuwãe b̶uabii. Chi namabena ãbarãba kʉ̃ria panuu bichi biꞌia b̶uai. Jãmabena ãbarãmaa ãchi kakawaa jarakuase mʉʉba kʉ̃ria b̶uu ãchi biꞌia duanad̶ai.