2 Timoteo
Karta ome Pabloba b̶ʉd̶a Timoteo baita
Pabloba nau karta kaad̶eare Timoteo baita b̶ʉsiid̶e waya jʉ̃a uru panasii. Dachiba kʉ̃risia panuu año 67d̶e b̶ʉsii. Ichi jʉ̃a b̶uud̶ebena wãwẽe kʉ̃risia b̶uud̶eeba nau karta b̶ʉsii Timoteo ichi isa ichiad̶e neemera (4:6-13 maud̶e 4:21).
Pabloba naa b̶ʉsii Timoteo baita Dachi Akõremaa ichíturu kid̶ibai abachii (1:1-7). Mawãare b̶ʉsii Timoteo kĩrakayawẽa b̶uamera, Jesucristo kakua maebʉrã ichi jʉ̃a b̶uu kakua (1:8-18). Mawãare b̶ʉsii Jesucristod̶e ijãa b̶uud̶eeba chaarea b̶uamera maud̶e ne jomad̶e Dachi Akõre baita biꞌia b̶uamera (2:1-26). Mawãare b̶ʉsii chi kaad̶ebena ewarid̶e kachirua neeimina, Timoteoba Dachi Akõre bed̶ea jipa jaradea b̶uai b̶uu (3:1—4:5). Mawãare b̶ʉsii ichi juez daad̶e b̶uai ʉ̃rʉbena maud̶e jarasii Timoteo isa neemera (4:6-22).
Chi kʉ̃risia mechiu 4:2d̶e naka b̶ʉ kub̶uu: «Dachi Akõre bed̶ea jaradea b̶uase. Ẽbẽrarãba ũri kʉ̃ria panuud̶e maud̶e ũri kʉ̃riawẽa panuud̶e jaradeai baita b̶uase».
1Pabloba nau kartad̶e naa b̶ʉd̶a
1Mʉ Pablobʉ. Dachi Akõreba kʉ̃riasiid̶eeba mʉ Jesucristoba bʉid̶a. Ichiba mʉ bʉisii Dachi Akõreba deai jarad̶a chokae b̶uai ʉ̃rʉbena jarad̶e wãmera. Mau chokae b̶uai Jesucristod̶ebena b̶uu. 2Timoteo, nau karta bichi baita b̶ʉʉruu. Mʉʉba bichi ãrea kʉ̃ria b̶uu mʉ warr kĩra. Kʉ̃ria b̶uu Dachi Bajãad̶ebena Akõreba1:2 Dachi Bajãad̶ebena Akõre. Kajuma bed̶ead̶e b̶ʉ kub̶uu: Dios el Padre. maud̶e Dachi Mechiu Jesucristo bid̶a bichi kĩra chuburia panad̶ai, ãchi sõbiad̶eeba aid̶a panad̶ai maud̶e jirukaraayuwãe panabid̶amera.
Pabloba Timoteo baita Dachi Akõremaa ichíturu kid̶ibai ad̶a
3Ãyadaa maud̶e ẽsabud̶e mʉʉba Dachi Akõremaa ʉtaa id̶iiruud̶e bichi baita ichíturu kid̶ibai abarii. Dachi Akõreba jara b̶uu mʉʉba waubarii, mʉ kʉ̃risiad̶e nebʉraswãe b̶uud̶eeba, mʉ nabẽrarãba maka wauped̶aad̶a kĩra. 4Mʉʉba bichi jẽad̶a ʉ̃rʉbena kʉ̃risiaruud̶e ichiad̶e wã kʉ̃ria b̶uabarii kĩrajʉʉ ãrea b̶uai baita. 5Mʉʉba kĩraba b̶uabarii bichiba Cristod̶e biawãra ijãa b̶uu bichi tata Loida maud̶e bichi nawe Eunice bichi naed̶e ijãa panad̶a kĩra. Mʉʉba kuitaa b̶uu bichia bid̶a arab̶aud̶e Cristod̶e ijãa b̶uu. 6Mʉ jua bichi ʉ̃rʉ kub̶usiid̶e Dachi Akõreba bichimaa deasii ichi baita ne waumera. Mau baita mʉʉba jaraaruu: Dachi Akõreba dead̶a biꞌia wau b̶uase, etabarrd̶e tʉbʉchia jãripuabarii kĩra. 7Dachi Akõreba dachi sõ wapea panabiabasii, maumaarã dachi poyaabarii panabiasii, waabenarã kʉ̃ria uru panabiasii, maud̶e dachi kakua saka kĩra jipa panad̶ai kuitaabiasii.
8Maud̶eeba Dachi Mechiu Jesucristo ʉ̃rʉbena jarai baita kĩrakayarã́se. Mʉ Jesucristo baita jʉ̃a b̶umina kĩrakayarã́se. Maumaarã chi bed̶ea bia Jesús ʉ̃rʉbena jaradearuud̶e Dachi Akõre poyaabariid̶eeba bichi sid̶a ãrea biꞌiwãe b̶uai jãadua b̶uase. 9Dachi Akõreba dachi karibasii maud̶e iusii ichi baita biꞌia nuread̶amera. Dachiba biꞌia wau panuud̶eeba makaabasii, maumaarã ichi sõbiad̶eeba waui kʉ̃risia b̶uasiid̶eeba maka wausii. Biawãra nau iujãa b̶uai naed̶e Dachi Akõreba ichi sõbiad̶eeba kʉ̃risiasii Jesucristod̶eeba dachi karibai. 10Maabae Jesucristo, Dachi Karibabarii neesiid̶e unubisii saka ichi sõbiad̶eeba karibabarii. Dachi biui b̶uad̶a Jesucristoba wãꞌãebiped̶a, ewaricha chokae b̶uabisii. Chi bed̶ea biaba ichi ʉ̃rʉbena mau biꞌia kuitaabi b̶uu.
11Dachi Akõreba mʉ b̶usii mau bed̶ea bia jarabarii b̶uamera, Jesucristoba bʉid̶a b̶uamera maud̶e judiowãerãmaa jaradeabarii b̶uamera.1:11 Judiowãerã. Griego bed̶ead̶e chi b̶ee kartad̶e mau wãꞌãe.12Mau baita mʉ maka biꞌiwãe b̶uu. Maamina kĩrakayayuwãe b̶uu. Mʉʉba kuitaa b̶uu kaid̶e ijãa b̶uu. Maud̶e kuitaa b̶uu mʉʉba ichi juad̶e b̶ud̶a, ichiba poyaa nui b̶uu ab̶a ichiba kastikai ewarid̶aa.
13Mʉʉba jipa jaradea b̶uad̶a kĩra jaradea b̶uase. Jesucristod̶e ijãa niid̶eeba, waabenarã kʉ̃ria nibase. 14Dachi Akõre Jauri dachi sõd̶e b̶uu. Maud̶eeba chi biawãra bed̶ea Dachi Akõreba bichimaa dead̶a ãrea nu b̶uase.
15Bichiba kuitaa b̶uu joma ãbarã Asia druad̶ebenarãba mʉ istu b̶ʉisid̶au. Maarãd̶ebena ãba Figeloba maud̶e Hermogenesba maka wausid̶au. 16Maamina mʉʉba kʉ̃ria b̶uu Dachi Mechiuba ãba Onesíforo ded̶ebenarã kĩra chuburia b̶uamera. Ichiba mʉ b̶es ãrea aid̶asii. Mʉ kaenaba jʉ̃ b̶umina mau kĩrakayaabasii. 17Maumaarã Roma puurud̶e neeped̶a mʉ jʉrʉ b̶uaped̶a unusii. 18Mʉʉba kʉ̃ria b̶uu Dachi Mechiuba kastikai ewarid̶e mau kĩra chuburiai. Bichiba kuitaa b̶uu Onesiforoba Efesod̶e ãrea aid̶asii.
2Saka Jesucristo bed̶ea jaradeai b̶uu
1Warr, Jesucristo2:1 Jesucristo. Griego bed̶ead̶e naka b̶ʉ kub̶uu: Cristo Jesús. sõbiad̶eeba chaarea b̶uase. 2Mʉʉba ẽbẽrarã ãrea daad̶e jaradea b̶uad̶a bichiba ũrisii. Ara mau jaradea b̶uad̶a bichia bid̶a waabenarã ãbarãmaa jarabʉise waabenarãmaa mau jaradead̶amera. Waabenarãba ãchi ijãad̶ai panuu maud̶e poyaa bia jaradead̶ai panuu.
3Bichi Jesucristo kokoroa biad̶eeba mʉ kĩra biꞌiwãe b̶uai baita b̶uase. 4Kokoroaba barikia waukau, maumaarã chi audeara niiba kʉ̃ria b̶uu waubarii biꞌia unumera. 5Maud̶e chi pirabarii chi jaradea ua b̶uabadaurãba jara panuu kĩra maka pirawẽebʉrã, mau chi naa neeruuba chi adaui b̶uad̶a adaubai. 6Chi uubarii ãrea trajabariid̶eeba, ichiba chi uu nub̶uu chaud̶ad̶ebena naa adaui b̶uu. 7Mʉʉba jara b̶uu ʉ̃rʉbena ãrea kʉ̃risiáse. Dachi Mechiu Jesusba bichimaa joma mau kuitaabii.
8Jesucristo kĩrabase. Ichi Davidd̶ebena need̶abʉ. Ichi biu b̶uad̶a Dachi Akõreba chokae jiradubisii. Mau bed̶ea bia ichi ʉ̃rʉbena mʉʉba jaradea b̶uu. 9Mau jaradea b̶uu kakua mʉ ãrea biꞌiwãe b̶uu. Mʉ ẽbẽra kachirua kĩra kaenaba jʉ̃ uru panuu. Maamina Dachi Akõre bed̶ea jʉ̃ uru panuuwãema. 10Mau baita mʉʉba joma jãadua b̶uu Dachi Akõreba jʉrʉ adaud̶a ẽbẽrarã karibai baita. Maka Dachi Akõreba ãchi sid̶a Jesucristod̶eeba aid̶ai ewaricha ichi biad̶ebena uru panad̶amera.
11Nau bed̶ea biawãrad̶eeba, mau ijãad̶ai panuu:
Dachi Cristo ome biuduubʉrã, ichi ome chokae panad̶ai.
12Dachi ãrea biꞌiwãe panuu dauchia jãadua panuubʉrã, ichi ome chi karrarã kĩra nuread̶ai.
Dachiba Cristo adua panuu aaduubʉrã, ichia bid̶a dachi adua b̶uu ai.
13Dachiba jara panuu kĩra waud̶awẽebʉrã, dachi maka panumina, ichiba jara b̶uu kĩra waubarii, ara ichiba jarad̶a meraabai b̶uud̶eeba.
Dachi Akõre baita bari trajabarii saka b̶uai b̶uu
14Joma mau ãbarãmaa kĩrababia b̶uase. Dachi Akõre2:14 Dachi Akõre. Waabenarã kartad̶e naka b̶ʉ kub̶uu: Dachi Mechiu. daad̶e jarase maarã barikia bed̶ea kakua kĩru id̶aa berrea panarãad̶amera. Mau kĩru id̶aa berreaba dachi aid̶akau, maumaarã chi ũri nureerãmaa kʉ̃risia kachirua kʉ̃risiabiabarii. 15Chi biawãra bed̶ea Dachi Akõred̶e jipa jaradeabarii unubi b̶uase. Trajabarii biꞌia b̶uu kĩra kauwa wau b̶uase Dachi Akõreba bichi kĩrakayayuwãe b̶uu unumera. 16Dachi Akõre daad̶e kachirua nureerãba nebʉrʉbadau ida b̶use. Chi maka nureerã Dachi Akõred̶ebena aude kaitawẽ wãbadau. 17Ãchiba jaradea panuuba ẽbẽrarã kʉ̃risia ãyaa kʉ̃risiabiabarii, dachi kakuad̶e chaud̶aba dachi kiuru ko kãrii kĩra. Mau jaradeabadaurãd̶ebena Himeneo maud̶e Filetobʉ. 18Ãchi chi biawãra bed̶ead̶ebena ãyaa wãsid̶au. Ãchiba jaradeabadau ẽbẽrarã biuped̶aad̶a chokae jiraduped̶aad̶a. Maud̶eeba waabenarãba Cristod̶e ijãa panuu ʉ̃rʉbena ãyaa kʉ̃risia paneesid̶au. 19Maamina ẽbẽrarã Dachi Akõred̶erãba Cristod̶e ãrea ijãa panuu de jʉ̃rʉ kad̶aba de chaarea uru b̶uabarii kĩra. De poraamaa ne b̶ʉ nubadau kĩra, Dachi Akõreba naka jarasii: «Dachi Mechiuba joma ichid̶irã kuitaa b̶uu». Maud̶e jarasii: «Joma Dachi Mechiud̶e ijãa panuu abadaurãba kachirua ida b̶ud̶ai panuu».
20De mechiud̶e paratu nee waud̶a duanuu maud̶e parata waud̶a duanuu. Maud̶e bakuru waud̶a maud̶e ioro kad̶a sid̶a duanuu. Waabenarã biꞌia panuud̶eeba barikia ewari baita panuuwãema, maamina waabena barikia ewari baita panuu. 21Dachi sid̶a ara mau kĩra panuu. Dachiba kachirua ida b̶uuduubʉrã, Dachi Mechiu baita biꞌia nuread̶ai. Maka dachid̶ebena ichiba ne poyaa waui maud̶e ne joma biꞌia waud̶ai baita nuread̶ai.
22Kũudrãarãba kachirua kʉ̃riabadau kĩra waurã́se. Mau kãyabãra jipa waui baita b̶uase. Jesusd̶e ijãa b̶uase. Jomaurã kʉ̃ria b̶uase. Jomaurã ome jirukaraayuwãe b̶uase. Dachi Mechiumaa ʉtaa id̶ibadaurã ome sõ jipa b̶uud̶eeba joma mau baara wã b̶uase. 23Oa kachirua berrearã́se chi arakʉd̶e kʉ̃risiad̶akau nuree ome, kuitaa b̶uud̶eeba mauba dachi oa kachirua berreabiabarii. 24Chi Dachi Mechiu baita bari trajabarii oa kachirua berrea b̶uabai b̶uu, maumaarã jomaurã ome sõbia b̶uai b̶uu. Jaradea kuitaa b̶uai b̶uu. Jomaurã ome jãadua b̶uai b̶uu. 25Ichiba bed̶ea biad̶eeba Dachi Akõre bed̶ea kuitaabia b̶uu, chi ichiba jaradea b̶uu kʉ̃riad̶akau ẽbẽrarãmaa, maka Dachi Akõreba maarã karibaaruubʉrã. Maka ichimaa waya need̶aped̶a chi biawãra bed̶ea kuitaad̶ai. 26Arakʉd̶e kʉ̃risiaduubʉrã jʉbawãe nii juad̶ebena wãd̶ai. Ʉ̃raud̶e jʉbawãe niiba jidau ua b̶uu ichiba kʉ̃ria b̶uu waud̶amera.
3Kaad̶ebena ewarid̶e ẽbẽrarã kachirua wau panad̶ai
1Kaad̶ebena ewarid̶e kachirua neeruud̶eeba bichiba mau kuitaa b̶uai b̶uu. 2Ẽbẽrarãba joma ara ãchi baita kʉ̃ria panad̶ai, chi nejarra kʉ̃ria panad̶ai, ãchi biꞌia nuree a panad̶ai, chi mechiu nuree kʉ̃risia panad̶ai, waabenarã ʉ̃rʉbena kachirua jara panad̶ai, ãchi akõrerã bed̶ea ijãad̶akau panad̶ai, ãchi aid̶aaruu ẽbẽramaa ichíturu kid̶ibai ad̶akau panad̶ai maud̶e Dachi Akõre wapead̶akau panad̶ai. 3Waabenarã kʉ̃riad̶akau panad̶ai, kĩra chuburiad̶akau panad̶ai, waabenarã ʉ̃rʉbena bed̶ea kachirua jara panad̶ai, kachirua waud̶ai baita poyaa ida b̶ud̶akau panad̶ai, chĩo ãrea panad̶ai maud̶e biꞌia b̶ee joma ida b̶u panad̶ai. 4Ãchi kõpaero ichi kĩramaabarii juad̶e b̶ud̶ai kachirua waumera. Ãrea kʉ̃risiaswãe barikia wau panad̶ai. Jomaurã audeara chi kuitaa ãrea nuree ad̶ai. Dachi Akõre audeara ara ãchíturu kĩrajʉʉ biꞌia kʉ̃ria nuread̶ai. 5Dachi Akõred̶e ijãabadaurã kĩra nuread̶ai maamina ida b̶ud̶aabai Dachi Akõreba ichi poyaabariiba ãchi jipa nureabiamera. Makʉrã ome ãbua b̶uarã́se.
6Mau ẽbẽrarã decha wãbadau wẽrarã kʉ̃risiaswãe nuree maud̶e kachiruaba boro wãyaa nuree setaa kũruad̶ai baita. Mau wẽrarãba joma kachirua wau kʉ̃riabadaud̶eeba barikia ijãabadau. 7Mau wẽrarã ewaricha kuitaamaa panuu, maamina chi biawãra bed̶ea poyaa kuitaad̶akau. 8Jãarã setaa jaradeabadaurã chi biawãra bed̶ea ida b̶ubadau. Janes maud̶e Jambres abadau kĩra waubadau, chi Moisés bed̶ea ida b̶uped̶aad̶arã.3:8 Janes maud̶e Jambres Egiptod̶ebena ne kuitaabadaurã basii. Éxodo 7:10-12. Ãchiba kʉ̃risia kachirua kʉ̃risiabadau maud̶e biawãra Cristod̶e ijãad̶akau. 9Maamina ãchiba wau panuu biꞌia b̶uabai. Jomaurãba ãchi kʉ̃risia biaswãe nuree kuitaad̶ai Moisés ewarid̶e Janes maud̶e Jambres makaped̶aad̶a kĩra.3:9 Janesba maud̶e Jambres bid̶a joma poyaa waud̶aabasii Moisesba Dachi Akõred̶ebena waud̶a kĩra. Maka jomaurãba kuitaasid̶au ãchi setaa jaradeabadaurã nuree. Éxodo 8:16-19.
Pabloba Timoteomaa jarad̶a
10Maamina bichiba nau biꞌia kuitaa b̶uu: mʉʉba jaradea b̶uu, mʉ nibabarii, mʉʉba wau kʉ̃ria b̶uu, mʉʉba Cristod̶e ijãa b̶uu, mʉ jomad̶e jãadua b̶uu, mʉʉba waabenarã kʉ̃ria b̶uu, mʉ jomad̶e dauchia jãadua b̶uu 11maud̶e mʉ wãraa panuu kachirua waud̶ai baita. Antioquiad̶e, Iconio puurud̶e maud̶e Listrad̶e mʉ kachirua waud̶ai baita wãraaped̶aad̶a bichiba biꞌia kuitaa b̶uu.3:10-11 Hechos 13:44—14:21. Mʉ ãrea biꞌiwãe b̶uasii. Maamina Dachi Mechiuba joma maud̶ebena karibasii. 12Biawãra joma Jesucristod̶e ijãabadaurã, Dachi Akõre daad̶e biꞌia nibad̶ai kʉ̃riabadaurã, ẽbẽrarãba wãraad̶ai kachirua waud̶ai baita. 13Maud̶e ẽbẽra kachiruarãba maud̶e waabenarã setaa kũruabadaurãba aude kachirua wau panad̶ai. Waabenarã setaa kũrua panad̶ai maud̶e waabenarãba ãchi setaa kũruad̶ai.
14Maamina bichiba kuitaad̶a chi biawãra kʉ̃risia b̶uud̶eeba, maud̶e nibase. Bichiba kuitaa b̶uu bichimaa jaradeaped̶aad̶aba jipa jaradeaped̶aad̶abʉ. 15Warraed̶e Dachi Akõre Bed̶ea kuitaasii. Mau Bed̶eaba bichimaa kuitaabi b̶uu ab̶auba Cristod̶e ijãaruubʉrã Dachi Akõreba mau karibai. 16Dachi Akõreba joma Ichi Bed̶ea b̶ʉbisii. Joma mau biꞌia b̶uu jaradeai baita, kachirua wau nuree kastikai baita, biꞌiwãe wau nuree jipa wau kuitaabiai baita maud̶e saka kĩra jipa nibad̶ai kuitaabiai baita. 17Maka ẽbẽrarã Dachi Akõred̶erãba ne joma biꞌia wau kuitaad̶aped̶a poyaa wau panad̶ai.
41Jesucristo neei ichid̶irã ichi juad̶e ua b̶uai baita. Maud̶e ẽbẽrarã chokae nuree maud̶e biuped̶aad̶a nebʉra ichiai. Maud̶eeba Jesucristo daad̶e maud̶e Dachi Akõre daad̶e mʉʉba nau bed̶ea jaraaruu bichiba waumera: 2Dachi Akõre Bed̶ea jaradea b̶uase. Ẽbẽrarãba ũri kʉ̃ria panuud̶e maud̶e ũri kʉ̃riad̶awẽa panuud̶e jaradeai baita b̶uase. Biꞌiwãe wau nuree jipa waui kuitaabiáse. Kachirua wau nuree iadaase. Maud̶e ãbarã aid̶ase biꞌia ijãad̶amera. Joma jãadua b̶uud̶eeba, kauwa jaradea b̶uud̶eeba maka wause. 3Ewari ab̶a neeruud̶e ẽbẽrarãba biawãra bed̶ea ũri kʉ̃riad̶awẽa panad̶ai. Maumaarã ara ãchiba kʉ̃ria panuu maka waud̶ai. Maud̶eeba jaradeabadaurã ãrea jʉrʉd̶ai ãchiba ũri kʉ̃ria panuu jaradead̶amera. 4Chi biawãra bed̶ea ũrid̶ai ida b̶u panad̶ai, maud̶e nabẽraed̶ebena nebʉrʉbadau ijãad̶ai. 5Maamina bichi jomad̶e kĩra jipa b̶uase. Joma nebʉrad̶e b̶uud̶e jãadua b̶uase. Bed̶ea biꞌia Cristo ʉ̃rʉbena jaradea b̶uase. Joma bichiba Dachi Akõre baita waui b̶uu jipa wau b̶uase.
6Kãꞌãabariwãed̶e mʉ bead̶ai.4:6 Kãꞌãabariwãed̶e mʉ bead̶ai. Griego bed̶ead̶e naka b̶ʉ kub̶uu: Mʉ uva b̶aa Dachi Akõre baita ea deaduu kĩra b̶uu. Mau bed̶ead̶eeba Pabloba kuitaabi b̶uasii kãꞌãabariwãed̶e ẽbẽrarãba ichiba Cristod̶e ijãa b̶uud̶eeba bead̶ai. Números 28:7. Mʉ biui ewari ʉ̃rʉ ba b̶uu. 7Mʉʉba Dachi Akõre baita waui b̶uad̶a joma wausii, pirabarii chi neei b̶uumaa neebarii kĩra. Joma jipa wausii biꞌia chĩod̶a kĩra. Mʉʉba Cristo ida b̶uwẽa b̶uu. 8Mʉʉba jipa wau b̶uu baita Dachi Mechiuba mʉ baita boro jũra nu uru b̶uu. Ichiba jipa ichiabariid̶eeba mau boro jũra mʉʉmaa deai ichiba ichiaruud̶e. Maamina ab̶aburu mʉʉmaa deabai, maumaarã joma ichi neei ewari unu kʉ̃ria nureerãmaa deai.
Pabloba jarad̶a Timoteo neemera
9Isa mʉ ichiad̶e neese. 10Dachi ãba Cresente Galacia druad̶aa wã b̶uasii. Tito Dalmacia druad̶aa wã b̶uasii. Mau awara ãba Demasba chi nau iujãad̶ebena ãrea kʉ̃riasiid̶eeba mʉ ida b̶uped̶a Tesalónica puurud̶aa wãsii. 11Ab̶aburu ãba Lucas mʉ ome b̶uu. Bichi neeruud̶e ãba Marcos jʉrʉd̶e wãped̶a eneese.4:11 Marcos. Hechos 13:5,13; 15:36-40. Mʉʉba Dachi Akõre baita wau b̶uu mauba aid̶ai b̶uu. 12Ãba Tíquico mʉʉba Efesod̶aa bʉisii. 13Bichi neeruud̶e mʉ paru ʉ̃rʉ jʉ̃barii eneese. Mau Troas puurud̶e, ãba Carpo ded̶e b̶eesii. Maud̶e mʉ karta eneese. Mʉʉba aude kʉ̃ria b̶uu chi kartarã ãnimara ed̶e b̶ʉ kub̶uu.
14Jiorrd̶eeba ne waubarii Alejandroba mʉ kachirua wausiid̶eeba Dachi Mechiuba kastikai. 15Ichi ome kauwa b̶uase. Dachiba jaradea panuu ʉ̃rʉbena ichiba ãrea kachirua jarasii.
16Ara michi baita chi juez daad̶e berreasiid̶e ab̶au bid̶a mʉ kakua berreabasii, mʉ aid̶ai baita. Maumaarã jomaurãba mʉ ida b̶usid̶au. Mʉʉba kʉ̃riawẽe mau ʉ̃rʉbena Dachi Akõre daad̶e maarã nebʉra baraa panuu ayu. 17Maamina Dachi Mechiu mʉ ome b̶uasii. Mʉ poyaabarii deasii ichi bed̶ea jaramera. Maka joma judiowãerã aria panuuba ũrisid̶au. Maud̶e Dachi Mechiuba mʉ imama okarrd̶ebena karibasii. 18Ichiba joma mʉ kachirua wauruud̶ebena karibai. Mʉ biꞌia nuped̶a bajãad̶aa adooi, ichid̶irã ichi juad̶e ua b̶uud̶aa. Ewaricha ichimaa ãrea biꞌia berread̶ai panuu. Biꞌia b̶uu maka b̶uai.
Pabloba nau kartad̶e aanama b̶ʉd̶a
19Ãba Aquilamaa maud̶e Priscamaa jarase mʉʉba jarabʉi b̶uu ãchi biꞌia panad̶ai. Ara mau kĩra ãba Onesíforo ded̶ebenarãmaa jarase. 20Ãba Erasto Corinto puurud̶e b̶eesii. Ãba Trófimo ẽpermo b̶uasiid̶eeba mʉʉba ichi Mileto puurud̶e b̶ʉisii. 21Kui chei ewari bai naed̶e isa neese. Ãbarã Eubuloba, Pudenteba, Linoba, Claudiaba maud̶e joma ãbarãba jarabʉi panuu bichi biꞌia b̶uai.
22Mʉʉba kʉ̃ria b̶uu Dachi Mechiu Jesucristo bichi ome b̶uai maud̶e Dachi Akõreba ichi sõbiad̶eeba machi aid̶a b̶uai. Biꞌia b̶uu maka b̶uai.4:22 Biꞌia b̶uu maka b̶uai. Griego bed̶ead̶e chi b̶ee kartad̶e mau wãꞌãe.