2 TESALONICENSES

2 Tesalonicenses

Karta ome Pabloba b̶ʉd̶a ãbarã Tesalónica puurud̶ebenarã baita

Nabena karta b̶ʉped̶a Pabloba ũrisii ãbarã ãrea biꞌiwãe panuu, setaa jaradeabadaurã ãchi tãed̶e neeped̶aad̶a maud̶e waabenarã ãbarã koꞌoa nuree ʉ̃rʉbena. Mau baita june nau karta b̶ʉsii. Ãbarã baita Dachi Akõre ichíturu kid̶ibai aped̶a ʉtaa id̶isii ãchiba biꞌia ijãad̶amera (1:1-12 maud̶e 2:13-17). Mau awara Dachi Akõreba kastikai ewari ʉ̃rʉbena b̶ʉsii waabenarãba setad̶eeba jaradea panad̶a ijãarãad̶amera (2:1-12). Mawãare b̶ʉsii maarãba Dachi Akõremaa ʉtaa id̶i panad̶ai panuu maud̶e chi koꞌoa b̶ee trajad̶ai panuu (3:1-15). Ichiba ãbarã baita kaad̶eare b̶ʉd̶a 3:16-18d̶e b̶uu.

Pabloba nau kartad̶e naa b̶ʉd̶a

¹Mʉ Pablobʉ. Nau karta b̶ʉʉruu ãbarã Tesalónica puurud̶ebena baita. Machi, Dachi Bajãad̶ebena Akõred̶ebʉ1:1 Dachi Bajãad̶ebena Akõred̶ebʉ. Kajuma bed̶ead̶e b̶ʉ kub̶uu: Dios el Padre. maud̶e Dachi Mechiu Jesucristod̶ebʉ. Ãba Silvano maud̶e Timoteo mʉ ome panuu. ²Daiba kʉ̃ria panuu Dachi Bajãad̶ebena Akõreba maud̶e Dachi Mechiu Jesucristo ãchi sõbiad̶eeba machi aid̶a panad̶amera maud̶e jirukaraayuwãe panabiad̶amera.

Dachi Akõreba ichi bed̶ea ijãad̶akaurã ichiai ʉ̃rʉbena

³Ãbarã, daiba ewaricha machi baita Dachi Akõréturu kid̶ibai abadau. Daiba maka waubadau biꞌia b̶uu. Machiba ewaricha Cristo biꞌia ijãa panuu maud̶e biꞌia chiya kʉ̃ria panuu. ⁴Mau baita daiba ẽbẽrarã Dachi Akõred̶erã panuucha machi ʉ̃rʉbena kĩrajʉʉ nebʉrʉbadau. Daiba jarabadau ẽbẽrarãba kachirua waud̶ai baita wãraa panumina machiba Cristod̶e wabid̶a ijãa panuu maud̶e ãrea biꞌiwãe panumina joma dauchia jãadua panuu. ⁵Mauba kuitaabi b̶uu Dachi Akõre jipa niiba ẽbẽrarã kastikabarii. Ichiba machi biꞌia unu b̶uu ichi juad̶e ua b̶uai baita. Maud̶eeba ʉ̃raud̶aa ãrea biꞌiwãe panuu.

⁶Dachi Akõre jipa niiba ẽbẽrarã kastikabarii. Ichiba chi machi ãrea biꞌiwãe panabiabadau ãrea biꞌiwãe panabiai. ^7-8Maamina machi, chi biꞌiwãe panabiaped̶aad̶a kʉrrjĩrubiai dai kʉrrjĩrubiabarii kĩra. Mau makai Dachi Mechiu Jesús ichi angelerã chi poyaabadau ome tʉbʉchia aokod̶e bajãad̶ebena neeruud̶e. Maud̶e joma Dachi Akõred̶e ijãad̶akaurã maud̶e chi bed̶ea bia Dachi Mechiu Jesús ʉ̃rʉbena ijãad̶akaurã kastikai. ⁹Ãchi tʉbʉ aokod̶e ewaricha ãrea biꞌiwãe panabiai. Dachi Mechiu daad̶ebena maud̶e ichi poyaabarii mechiud̶ebena kaitawẽ panad̶ai. ¹⁰Ichi neeruud̶e mau ewarid̶e ichid̶irãba ichimaa biꞌia berread̶ai. Ãchi ome biꞌia waud̶ad̶eeba joma ichi ijãabadaurãba ichi ãrea biꞌia unud̶ai. Daiba ichi ʉ̃rʉbena jaradeasid̶aud̶e, machia bid̶a ijãasid̶au.

¹¹Maud̶eeba daiba ewaricha Dachi Akõremaa ʉtaa id̶ibadau ichiba machi biꞌia unumera. Ichiba machi mau kakua iusii. Daiba ʉtaa id̶i panuu Dachi Akõreba ichi poyaabariid̶eeba machi ne jomad̶e aid̶amera. Maka ichid̶e ijãa panuud̶eeba biꞌia wau kʉ̃ria panuu joma waud̶ai. ¹²Makarã machid̶eeba jomaurãba Dachi Mechiu Jesucristo ʉ̃rʉbena biꞌia jarad̶ai maud̶e ichid̶eeba machi ʉ̃rʉbena biꞌia jarad̶ai, Dachi Akõreba maud̶e Dachi Mechiu Jesucristoba ãchi sõbiad̶eeba aid̶a panuud̶eeba.

Ẽbẽra kachirua nii neei ʉ̃rʉbena b̶ʉd̶a

^1-2Mau awara ãbarã, daiba chi chuburia id̶i panuu Dachi Mechiu Jesucristo neei ʉ̃rʉbena maud̶e dachi ichi ome ãbua panad̶ai ʉ̃rʉbena ara makʉd̶e adua panuu kãare kʉ̃risiad̶ayu. Ab̶auba Dachi Mechiuba kastikai ewari neesii aaruubʉrã, perarã́sturu. Barikiuba Dachi Akõre ʉ̃rʉbena berrea b̶uu kĩra maka jaraaruubʉrã, maebʉrã maka jaradearuubʉrã maebʉrã daiba kartad̶e maka b̶ʉped̶aad̶a aaruubʉrã, ijãarã́sturu. ³Ab̶au bid̶a ab̶aumaa ida setaa kũruarã́sturu. Dachi Mechiuba kastikai ewari neei naed̶e ãrea ẽbẽrarãba Dachi Akõre ida b̶ud̶ai. Maud̶e chi ẽbẽra kachirua nii unubiai. Mau ẽbẽra Dachi Akõreba tʉbʉ aokod̶e jiratai.2:3 Mau ẽbẽra Dachi Akõreba tʉbʉ aokod̶e jiratai. Griego bed̶ead̶e b̶u kub̶uu: chi joma kenabarii warr.⁴Ichiba Dachi Akõre maud̶e joma ẽbẽrarãba dachi akõre abadau kʉ̃riakau b̶uai. Ichiba joma mau audeara chi mechiu nii ai. Maud̶eeba Dachi Akõre de mechiud̶e akʉ b̶eeped̶a, ichíturu Dachi Akõre ai.

⁵Machimaa b̶uasiid̶e mʉʉba ¿mau jarawẽa b̶uaska? ¿Kĩrabad̶awẽa panuka? ⁶Maud̶eeba kuitaa panuu kãareba mau ẽbẽra ida neebiwẽa b̶uu. Maamina ichi ewari neeruud̶e neei. ⁷Ʉ̃raud̶aa chi kachirua miru waumaa b̶uu, maamina chi ida b̶uwẽa b̶uuba mau ẽbẽra kachirua nii ida neebiwẽa b̶uu. Maka b̶uai ab̶a Dachi Akõreba chi ida b̶uwẽa b̶uu ãyaa adoeruud̶aa. ⁸Maabáeburu chi kachiruad̶ebena ẽbẽra neei. Maamina Dachi Mechiu Jesús kĩrawãrea ted̶echoa neeruud̶e ara berrearuuba mau ẽbẽra beai.2:8 Ara berrearuuba. Griego bed̶ead̶e naka b̶ʉ kub̶uu: ichi iiba jãripuaruuba.

⁹Chi ẽbẽra kachirua nii Satanasba neebii. Mauba jʉbawãe nii poyaabariiba ẽbẽrarãba ne poyaa waud̶akau joma barikiu waukuai, ẽbẽrarãba Dachi Akõreba maka wau b̶uu kʉ̃risiad̶amera. ¹⁰Ne barikiu kachirua wau b̶uud̶eeba ẽbẽrarã tʉbʉ aokod̶e ãrea biꞌiwãe panad̶ai panuu, mauba setaa kũrai. Ãchiba chi biawãra bed̶ea kʉ̃riad̶akaud̶eeba Dachi Akõreba karibaabai. ¹¹Maud̶eeba Dachi Akõreba ida setaa ijãabiai. Maka ara ãchi du ab̶a ãrea setaa kũrua nuread̶ai. ¹²Mau ẽbẽrarã chi bed̶ea biawãra ijãawẽa nureerãba kachirua kʉ̃ria waubadaud̶eeba Dachi Akõreba kastikai.

Dachi Akõreba ichi ijãabadaurã karibad̶a

¹³Ãbarã, daiba ewaricha machi baita Dachi Akõremaa ichíturu kid̶ibai abadau. Dachi Mechiuba machi kʉ̃ria b̶uu. Ichiba arab̶aed̶eed̶e machi jʉrʉ adausii karibai baita. Machiba ichi bed̶ea biawãra ijãa panuud̶eeba maud̶e ichi Jauriba machi ichi baita biꞌia b̶ud̶ad̶eeba aid̶ai. ¹⁴Daiba bed̶ea bia Cristo ʉ̃rʉbena jaradea panuud̶eeba Dachi Akõreba machi iusii Dachi Mechiu Jesucristo bia niid̶ebena adaud̶amera. ¹⁵Maud̶eeba ãbarã, dauchia jãadua panásturu. Daiba jaradeaped̶aad̶a maud̶e kartad̶e b̶ʉped̶aad̶a kĩrabarã́sturu.

^16-17Dachi Akõreba dachi kʉ̃riasii. Ichi sõbiad̶eeba sõbia nureabiasii ewaricha maka panad̶amera. Maud̶e kuitaabiasii biawãra ichid̶eeba ne bia adaud̶ai. Daiba kʉ̃ria panuu Dachi Mechiu Jesucristoba maud̶e Dachi Bajãad̶ebena Akõreba2:16-17 Dachi Bajãad̶ebena Akõre. Kajuma bed̶ea b̶ʉ kub̶uu: Dios nuestro Padre. machi sõbiabid̶ayu maud̶e dauchia jãadua panad̶ayu. Maka machiba berrea panuu maud̶e wau panuu joma biꞌia b̶uai.

Pabloba id̶id̶a ichi baita ʉtaa id̶id̶amera

¹Mau awara ãbarã, dai baita Dachi Akõremaa ʉtaa id̶ísturu Dachi Mechiu bed̶ea druacha isa wãmera maud̶e ẽbẽrarãba mau kakua biꞌia jarad̶amera machi tãed̶eeba makad̶a kĩra. ²Dachi Akõremaa ʉtaa id̶ísturu dai aid̶amera, ẽbẽra kachiruarãba kachirua wau kʉ̃ria panuud̶ebena. Chi nuree ẽbẽrarãba Cristod̶e ijãad̶ai kʉ̃riad̶akau. ³Maamina Dachi Mechiuba waui ichiba jara b̶uu kĩra. Ichiba machi aid̶a b̶uai dauchia jãadua panad̶amera maud̶e kachiruad̶ebena kariba b̶uai.3:3 Kachiruad̶ebena kariba b̶uai. Griego bed̶ead̶e nau sid̶a jara b̶uu «Chi jai kachirua nii juad̶ebena kariba b̶uai».⁴Dachi Mechiud̶eeba kuitaa panuu daiba jaradeaped̶aad̶a machiba biawãra wau panuu maud̶e waa wau paneed̶ai. ⁵Maud̶e kʉ̃ria panuu Dachi Mechiuba kuitaabiai machi ãrea kʉ̃ria b̶uu Dachi Akõre kĩra. Maud̶e kʉ̃ria panuu ichiba karibai Cristoba jãaduad̶a kĩra jãaduad̶amera.

Koꞌoawãe trajad̶ai panuu

⁶Ãbarã, Dachi Mechiu Jesucristo trʉ̃d̶eeba daiba machimaa jarabʉiduu ãbarã koꞌoa nuree ome ãbua panarãad̶amera. Daiba jaradeaped̶aad̶a kĩra waud̶akau. ⁷Machiba kuitaa panuu dai nibaped̶aad̶a kĩra machi nibad̶ai panuu. Machi tãed̶e panasid̶aud̶e dai koꞌoa panad̶aka basii. ⁸Daiba machid̶e chiko bari deaped̶aad̶a kod̶aabasii, maumaarã ãyadaa maud̶e ẽsabud̶e kʉrrjĩrud̶awẽa traju wau panasid̶au machid̶ebena ab̶au bid̶a daimaa ne kaebea dearãad̶amera.3:8 Hechos 18:2,3.⁹Biawãra machiba karibad̶amera poyaa id̶id̶ai panasmina id̶id̶aabasii. Maumaarã dai trajasid̶au kuitaabid̶ai baita machiba ara mau kĩra waud̶ai panuu. ¹⁰Machi tãed̶e panasid̶aud̶e daiba nau jarasid̶au: «Chi trajai kʉ̃riawẽa b̶uumaa kobirã́sturu». ¹¹Daiba ũri panuu waabenarã machid̶ebena koꞌoa nuree. Maarã trajad̶akau maumaarã waabenarã nebʉrad̶e panabadau. ¹²Mau ãbarãmaa daiba Dachi Mechiu Jesucristod̶eeba chi chuburia id̶id̶ai jirukaraayuwãe trajad̶amera kod̶ai baita uru panad̶amera.

¹³Ãbarã, biꞌia wau panuud̶eeba kakua ãkaa panarã́sturu. ¹⁴Daiba nau kartad̶e jaradeaped̶aad̶a ab̶au bid̶a ijãawẽebʉrã, jomaurãmaa kuitaabiásturu mau kachirua wau b̶uu. Mau ome ãbua panarã́sturu kĩrakaya b̶eemera. ¹⁵Maamina mau machi kĩramaa kĩra uru panarã́sturu, maumaarã machi ãba baerã jarásturu jipa waumera.

Pabloba kaad̶eare b̶ʉd̶a

¹⁶Daiba kʉ̃ria panuu Dachi Mechiu jirukaraayuwãe panabibariiba machimaa ewaricha jirukaraayuwãe ne jomad̶e panabiamera. Kʉ̃ria panuu Dachi Mechiu machi ome b̶uamera. ¹⁷Mʉ Pablobʉ. Nau bed̶ea mʉ juaba b̶ʉʉruu. Joma mʉ kartad̶e naka b̶ʉbarii, kuitaabiai baita mʉaburu b̶ʉʉruu. Naka b̶ʉ kub̶uabarii. ¹⁸Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi biꞌia nu b̶uamera.