2 Pedro
Karta ome Pedroba b̶ʉd̶a
Pedroba nau karta sid̶a b̶ʉsii. Maud̶eeba Karta ome Pedroba b̶ʉd̶a abadau. Año 66d̶e b̶ʉsii. B̶ʉsiid̶e kãꞌãabariwãed̶e romad̶ebenarãba ichi cruzd̶e jirab̶u beasid̶au.
Pedroba nau karta b̶ʉsii Cristod̶e ijãabadaurãba setaa jaradeabadaurã ʉ̃rʉbena kauwa panad̶amera. Capítulo omed̶e mau ʉ̃rʉbena b̶ʉ kub̶uu. Capítulo ab̶ad̶e b̶ʉ kub̶uu dachiba chi biawãra bed̶ea kuitaa panuud̶eeba mau ijãad̶ai panuu. Capítulo õbead̶e b̶ʉ kub̶uu dachiba Cristo neei esed̶aud̶ai panuu.
Chi kʉ̃risia mechiu 3:14-15d̶e naka b̶ʉ kub̶uu: «Ãbarã, machiba joma mau esed̶au panuud̶eeba ne jomad̶e kĩra jipa nibásturu Dachi Akõreba machi biꞌia, kachiruaswãe, ichi ome jirukaraayuwãe panuu unumera. Kĩrabásturu Dachi Mechiuba joma jãadua b̶uu ẽbẽrarã karibai baita».
1Pedroba nau kartad̶e naa b̶ʉd̶a
1Mʉ Simón Pedrobʉ, Jesucristo baita bari trajabariibʉ maud̶e ichiba bʉid̶abʉ. Mʉʉba nau karta b̶ʉʉruu chi Dachi Akõred̶e maud̶e Dachi Karibabarii Jesucristod̶e ijãabadaurã baita. Ichi jipa niid̶eeba, dai ome arab̶aud̶e biꞌia ijãa panuu. 2Machiba Dachi Akõre maud̶e Dachi Mechiu Jesús kuitaa panuud̶eeba, mʉʉba kʉ̃ria b̶uu ãchi sõbiad̶eeba machi ãrea aid̶a panad̶amera maud̶e ãrea jirukaraayuwãe panabiad̶amera.
Dachi Akõreba iukuad̶arã saka nuread̶ai panuu
3-4Dachi Akõre kuitaa panuud̶eeba, ichi poyaabariid̶eeba dachimaa ne joma deasii ichiba kʉ̃ria b̶uu kĩra nibad̶amera maud̶e ewaricha ichi ome chokae nuread̶amera. Ichi chi mechiud̶eeba maud̶e jipa niid̶eeba dachi iuped̶a ne mechiu maud̶e ne bia dachi baita waui asii. Maka wau b̶uud̶eeba nau iujãad̶ebenarãba kachirua wau kʉ̃ria panuu machiba ida b̶ud̶aped̶a poyaa ichi kĩra jipa nuread̶ai. 5Maud̶eeba Cristod̶e ijãa panuud̶eeba ãrea jʉrʉ́sturu jipa nibad̶ai baita; jipa nid̶aud̶e jʉrʉ́sturu kʉ̃risia kuitaa nuread̶ai baita; 6kʉ̃risia kuitaa panuud̶e jʉrʉ́sturu machi kakua kĩra jipa nuread̶ai baita; machi kakua kĩra jipa panuud̶e jʉrʉ́sturu joma jãaduad̶ai baita; joma jãadua panuud̶e jʉrʉ́sturu Dachi Akõreba kʉ̃ria b̶uu kĩra nuread̶ai baita; 7Dachi Akõreba kʉ̃ria b̶uu kĩra panuud̶e jʉrʉ́sturu ãbarã kʉ̃riad̶ai baita; ãbarã kʉ̃ria panuud̶e jʉrʉ́sturu jomaurã kʉ̃riad̶ai baita.
8Machiba mau joma biꞌia wauduubʉrã, Dachi Mechiu Jesucristo aude kuitaabiad̶ai maud̶e ne biꞌia waud̶ai baita chokekea nureabiad̶ai. 9Maamina chi maka wauwẽa b̶uu dau tõroroa b̶uu kĩra b̶uu, maebʉrã dau pãriu b̶uu kĩra b̶uu. Ichiba kĩrabaabasii chi naed̶e kachirua wau b̶uad̶a Dachi Akõreba joma jeraasii. 10Ãbarã, Dachi Akõreba machi iuped̶a jʉrʉ adausii. Biawãra maka nuree unubid̶ai baita chokekea panásturu. Maka wauduubʉrã b̶aed̶aabai. 11Maud̶e Dachi Mechiu Jesucristoba machi ida wãbiai ichi puurud̶aa, de poraa ewa nub̶uu kĩra. Dachi Karibabariiba dachi ewaricha biꞌia uru b̶uai.
12Joma mau kuitaa panumina maud̶e chi biawãra bed̶ea ãrea ijãa panumina, mʉʉba joma mau machimaa kĩrababia b̶uai. 13Mʉʉmaarã jipa b̶uu wabid̶a chokae b̶uud̶e1:13 Wabid̶a chokae b̶uud̶e. Griego bed̶ead̶e naka b̶ʉ kub̶uu: wabid̶a nau de ãnimara e waud̶ad̶e b̶uud̶e. mau machimaa kĩrababia b̶uai. 14Dachi Mechiu Jesucristoba mʉʉmaa biꞌia kuitaabisii kãꞌãabariwãed̶e mʉ biui. 15Maud̶eeba mʉʉba joma waui, mʉ biud̶akare, machiba joma mau ewaricha kĩrabad̶amera.
Jesús ʉ̃rʉbena jaraped̶aad̶a biawãrabʉ
16Dachi Mechiu Jesucristo poyaabarii ʉ̃rʉbena maud̶e ichi waya neei ʉ̃rʉbena daiba machimaa jaradeasid̶aud̶e ara dai kʉ̃risiad̶eeba jaraped̶aad̶a jaradead̶aabasii. Maumaarã Dachi Mechiu Jesús kĩrawãrea ted̶echoa unuped̶aad̶ad̶eeba maka jaradeasid̶au. 17Dachi Bajãad̶ebena Akõreba ichi ʉ̃rʉbena biꞌia jarasiid̶e maud̶e chi mechiu nii unubiasiid̶e dai aria panasid̶au. Dachi Akõre chi mechiu ãrea kĩrawãrea niiba naka jarasii: «Nau mʉ Warrbʉ. Mʉʉba mau ãrea kʉ̃ria b̶uu maud̶e mau kakua kĩrajʉʉ b̶uu. Mauba jara b̶uu ũrísturu».1:17 Mateo 17:5; Marcos 9:7; Lucas 9:35.18Daiba mau bed̶ea biawãra bajãad̶e ũrisid̶au Jesús ome, Dachi Akõre ead̶e panasid̶aud̶e.
19Mau awara kuitaa panuu Dachi Akõre baita berreabadaurãba jaraped̶aad̶a biawãrabʉ. Mau bed̶ea ʉ̃d̶aa koabarii pãriud̶e urua b̶uu kĩra b̶uud̶eeba machiba ãrea kauwa ũrid̶ai panuu. Ʉ̃d̶aa koabarii urua b̶uabarii ab̶a ewariiruud̶aa, ab̶a chi daped̶eed̶ebena pusterrea neeruud̶aa. Ara mau kĩra dachi nau iujãa kachiruad̶e panuud̶e mau bed̶eaba dachi sõd̶e kuitaabia b̶uu saka nibad̶ai panuu ab̶a Cristo neeruud̶aa. 20Nau ãrea kuitásturu: Dachi Akõre baita berreabadaurãba Ichi Bed̶ead̶e b̶ʉped̶aad̶a ara ãchi kʉ̃risiad̶eeba b̶istĩika bid̶a b̶ʉd̶aabasii. 21Maarãba kʉ̃ria panad̶a kĩra jarad̶aabasii, maumaarã Dachi Akõre baita panasiid̶eeba, Ichi Jaurid̶eeba berreasid̶au.1:21 Mau sid̶a naka b̶ʉ kub̶uu: Maamina nau ãrea kuitásturu: Dachi Akõre baita berreabadaurãba Ichi Bed̶ead̶e b̶ʉped̶aad̶a b̶istĩika bid̶a ara ichi kʉ̃risiad̶eeba poyaa kuitaad̶aabasii, mau ẽbẽra kʉ̃risiad̶eeba neebasiid̶eeba. Maumaarã Dachi Akõre Jaurid̶eeba berreasid̶au.
2Setaa jaradeabadaurã
1Israel puurud̶ebenarã tãed̶e Dachi Akõre baita berreabadaurã setaa jaradeabadaurã basii. Machi tãed̶e bid̶a setaa jaradeabadaurã baraai. Setad̶eeba ãchiba dachi o ãyaa wãbiabarii kʉ̃risia, Dachi Akõre bed̶ea kĩra jaradead̶ai. Dachi Mechiu Jesusba ãchi kariba b̶uad̶a unud̶akau ad̶ai. Maud̶eeba Dachi Akõreba isa kastikai. 2Maarãba waabenarã daad̶e ãrea mianejasia waubadau, ẽbẽrarã ãreaba ara mau kĩra waud̶ai. Maarã ʉ̃rʉbena ẽbẽrarãba chi biawãra bed̶ea2:2 Chi biawãra bed̶ea. Griego bed̶ead̶e naka b̶ʉ kub̶uu: chi biawãra o. kakua kachirua berread̶ai. 3Chi nejarra kʉ̃ria panuud̶eeba, machi chi nejarra adaud̶ai baita ara ãchi kʉ̃risiad̶eeba setaa jaradead̶ai. Ãrea basii Dachi Akõreba maarã nebʉra ichiai baita b̶uu, maud̶e kãꞌãabariwãed̶e biawãra maarã kastikai.
4Angelerãba kachirua wausid̶aud̶e Dachi Akõreba kĩra chuburiabasii. Maumaarã chob̶ea pãriu b̶uud̶e jirakuasii.2:4 Chob̶ea pãriu b̶uu. Griego bed̶ead̶e naka b̶ʉ kub̶uu: Tártaro. Mama kaenaba jʉ̃ panuu ab̶a Dachi Akõreba ãchi nebʉra ichiai ewarid̶aa. 5Maud̶e nabẽraed̶ebenarãba Dachi Akõre ida b̶usid̶aud̶e ichiba kĩra chuburiabasii. Maumaarã bania ãrea birubisii mau ẽbẽrarã joma kinid̶amera. Maamina Noeba dachi jipa nibad̶ai ʉ̃rʉbena jaradeabachii. Ichi, ichi ded̶ebenarã 7 panuu sid̶a Dachi Akõreba karibasii.2:5 Génesis 6:1—8:22.6Maud̶e Dachi Akõreba Sodoma puuru maud̶e Gomorra puuru kastikasiid̶e joma baa bʉisii. Mau joma etab̶arr babisii. Mauba kuitaabiasii chi ichi kʉ̃riad̶akaurãmaa ãchi sãad̶ai. 7Maamina ẽbẽra jipa nii Lot abadau Dachi Akõreba Sodoma baaid̶ebena karibasii.2:7 Génesis 19:1-29. Lot kĩra nomaa b̶uabachii mau puurud̶ebenarãba ne joma kachirua wau panuud̶eeba. 8Mau ẽbẽra jipa nii maarã tãed̶e b̶uabachii. Jipa niid̶eeba maarãba kachirua wau panuu unuuruud̶e maud̶e ũriiruud̶e ewaricha kĩra nomaa b̶uabachii. 9Mauba unubi b̶uu Dachi Mechiuba chi jipa wau nuree ãrea biꞌiwãe panuud̶ebena kariba kuitaa b̶uu. Maud̶e kuitaa b̶uu chi jipa wauwẽa nuree saka uru b̶uai ab̶a ichiba kastikai ewarid̶aa. 10Chi nau kakuaba kachirua wau kʉ̃ria b̶uu waubadaurã maud̶e chi Dachi Akõre mʉ Mechiu ad̶ai kʉ̃riad̶akaurã aude kastikai.
Setaa jaradeabadaurã kachirua waud̶ai baita perad̶akau. Ãrea kuitaa nuree kĩra panabadau. Jauri kachiruarã chi mechiu nuree ʉ̃rʉbena kachirua jarad̶ai baita wapead̶akau. 11Angelerã ãchi audeara ãrea meserãa maud̶e poyaabarii nuremina, Dachi Mechiu daad̶e jai kachiruarã chi mechiu nuree ʉ̃rʉbena kachirua jarad̶akau. 12Maamina setaa jaradeabadaurãba ãchiba adua panuud̶ebena kachirua berreabadau. Ãnimara kĩra kʉ̃risiaswãe nuree. Ab̶a ãchi kakuaba kʉ̃ria b̶uu waubadau. Ãnimara tobadau ẽbẽrarãba jidaud̶aped̶a bead̶amera. Ara mau kĩra setaa jaradeabadaurã joma biud̶ai. 13Dachi Akõreba ãchi ãrea ichiai ara ãchiba wauped̶aad̶a kĩra. Ãchi ko ãrea nuree maud̶e itua do ãrea nuree. Mau ãchi baita kĩrajʉʉbadau. Ẽsabud̶e maud̶e ãsaed̶e maka waubadau. Ãbarã ome ãbua komaa panuud̶e maka waubadau. Maka machi tãed̶e paru jayoa miadaa kĩra nuree. 14Ãibena wẽra ome kãi paneebadau. Ne joma kachirua wau b̶uuba kĩrased̶akau. Chi ãrea ijãawẽa nuree setaa kũruabadau. Ne joma kʉ̃riabadau. Mau kakua Dachi Akõreba ãchi nebʉra ichiai. 15Dachi Akõre o jipa b̶uu ida b̶ud̶aped̶a o ãyaa wãsid̶au. Beor warr Balán abadauba waud̶a kĩra waubadau.2:15 Números 22:1-41. Balán chi nejarra kʉ̃ria b̶uasiid̶eeba chi nejarra baita kachirua waui kʉ̃risiasii. 16Maamina kachirua od̶e wãaruud̶e burroba ichi kastikasii. Mau ãnimara berreakau ẽbẽra kĩra berreasii. Dachi Akõre baita berreabarii Balán kʉ̃risiaswãe b̶uu kĩra kachirua od̶e wãi kʉ̃risia b̶umina burroba ida wãbiibasii.
17Setaa jaradeabadaurã mied̶e baniaswãe b̶uu kĩra nuree. Ãchi jʉ̃rʉara pũaturãba ãyaa adoeruu kĩra nuree. Pũaturãba jʉ̃rʉara ãyaa adoeruud̶e kui chekau. Ara mau kĩra ãchiba jaradea panuuba aid̶akau. Dachi Akõreba chob̶ea ãrea pãriu b̶uud̶e b̶usii ãchi kastikakuai baita. 18Ãchiba mipitaa berreaduuba jaradeabadau. Maamina mauba aid̶akau. Ãchiba jaradeabadau nau kakuaba kachirua wau kʉ̃ria b̶uu waud̶ai panuu. Maka chi ara ea kachiruad̶ebena wãped̶aad̶a nuree ãchiba setaa kũruabadau waya kachirua waud̶amera. 19Maarã jarabadau ijãaduubʉrã, biꞌia paneed̶ai abadau, chi chibari baita bari trajabarii ichi chibari juakaa miru wãaruu kĩra. Maamina kachirua poyaa ida b̶ud̶akaud̶eeba biꞌia paneebai. Mauba ãchi kachirua baita bari trajabadaurã babiai. Biawãra barikia kachirua poyaa ida b̶ud̶aabaibʉrã, dachi mau baita bari trajabadaurãbʉ. 20Jesucristo Dachi Mechiu maud̶e Dachi Karibabarii kuitaa panuud̶eeba nau iujãad̶e b̶uu kachiruad̶ebena karibasid̶au. Maamina jʉ̃karad̶e bʉra paneeduu kĩra waya kachirua wauduubʉrã, naa panad̶a audeara kachirua paneed̶ai. 21Maud̶eeba Dachi Akõre bed̶ea kuitaaped̶aad̶a ida b̶ud̶ai bad̶amaarã, bibuara b̶uu Dachi Akõreba jipa wau b̶uu kuitaad̶aabai. 22Ãchi ẽbẽraba naka jarabadau kĩra nuree: «Usa otomaaped̶a waya neebarii chi otomaad̶a koi baita».2:22 Proverbios 26:11. Maud̶e naka jarabadau: «Sina kuiped̶a waya ioro susuad̶e bʉraa b̶eebarii».
3Dachi Mechiuba kastikad̶e neei ʉ̃rʉbena
1Ãbarã, nau chi ome karta mʉʉba machi baita b̶ʉmaa b̶uu. Karta ome b̶ʉd̶ad̶e mʉʉba chi biawãra bed̶ea kĩrababia b̶uu jipa kʉ̃risiad̶amera. 2Mʉʉba kʉ̃ria b̶uu Dachi Akõre baita berreabadaurãba naa jaraped̶aad̶a machiba kĩrabad̶ayu. Maud̶e kʉ̃ria b̶uu Jesucristo Dachi Mechiu, Dachi Karibabariiba jarad̶a kĩrabad̶ayu. Mau ichiba bʉid̶arãba machimaa jaradeasid̶au.
3Nau ãrea kuitásturu: kaad̶ebena ewarid̶e Dachi Akõre atua jarabadaurã baraai. Ãchi kakuaba kachirua wau kʉ̃ria b̶uu wau panad̶ai. 4Naka atua jarad̶ai: «Cristo neei jarad̶a ¿kãare sãasma? Dachi nabẽraed̶ebenarã joma biusid̶au. Maamina nau iujãa wausiid̶eed̶ebena joma ara maka b̶uu». 5Mau ẽbẽrarãba ijãa kʉ̃riad̶awẽa panuu nabẽraed̶e Dachi Akõre bed̶eaba bajãa wausii, iujãa mar ekared̶ebena neebisii maud̶e baniad̶ebena maka wausii.3:5 Baniad̶ebena maka wausii. Griego bed̶ead̶e mau chaarea b̶uu biꞌia ũrid̶amera.6Ara mau baniaba joma nau iujãad̶e chi mau ewarid̶e panad̶a kinibisii mau bania ãrea chesiid̶eeba. 7Ara mau kĩra Dachi Akõre bed̶eaba nau iujãa maud̶e bajãa nu uru b̶uu maud̶e ichiba kastikai ewarid̶e tʉbʉchiad̶e baai. Mau ewarid̶e chi ichi kʉ̃riad̶akaurã nebʉra ichiaped̶a joma kastikai.
8Maamina ãbarã, nau kĩraba panad̶a ida b̶urã́sturu: Dachi Mechiumaarã ewari ab̶a 1.000 años kĩra b̶uu maud̶e 1.000 años ewari ab̶a kĩra b̶uu. 9Dachi Mechiu neei ad̶a bad̶a kãꞌãa b̶uud̶eeba waabenarãba kʉ̃risia panuu neebai. Maamina makawãema. Maumaarã machi kakua joma jãadua b̶uud̶eeba kãꞌãa b̶uu. Ichiba kʉ̃riawẽa b̶uu ẽbẽra ab̶a bid̶a ichid̶ebena ãi b̶uai. Kʉ̃ria b̶uu jomaurãba kachirua ida b̶ud̶aped̶a ichimaa need̶ai. 10Dachi Mechiuba kastikai ewari bai nechiru neebarii kĩra.3:10 Neebarii kĩra. Griego bed̶ead̶e chi b̶ee kartad̶e naka b̶ʉ kub̶uu: ẽsabud̶e neebarii kĩra. Mau ewarid̶e kachirua ãrea ʉrʉrʉaped̶a bajãa wãꞌãebii. Ne joma dachiba bajãad̶e unubadau baawãi. Maud̶e nau iujãa maud̶e ne joma nau iujãad̶e nuree baawãi.3:10 Ne joma nau iujãad̶e nuree baawãi. Griego bed̶ead̶e mau chaarea b̶uu biꞌia ũrid̶amera. Waabenarãmaarã naka jara b̶uu: «Maud̶e Dachi Akõreba ẽbẽrarã nebʉra ichiaruud̶e maarãba nau iujãad̶e wauped̶aad̶a joma unubiai».
11Ne joma wãꞌãe baid̶eeba machi Dachi Akõreba kʉ̃ria b̶uu kĩra jipa maud̶e kachiruaswãe nibad̶ai panuu. 12Dachi Akõreba kastikai ewari esed̶au panuumisa Dachi Akõreba kʉ̃ria b̶uu wau panásturu mau ewari isa bamera.3:12 Dachi Akõreba kʉ̃ria b̶uu wau panásturu mau ewari isa bamera. Mau bed̶ea poyaa naka b̶ʉ kub̶uu: mau ewari isa neei kʉ̃riad̶ai panuu. Mau ewarid̶e Dachi Akõreba bajãa baai. Ne joma dachiba bajãad̶e unubadau maud̶e nau iujãad̶e unubadau wãsiaba dorrab̶arii. 13Maamina Dachi Akõreba bajãa wid̶i maud̶e iujãa wid̶i waui asii. Mau dachiba esed̶au panuu. Mama jomaurãba jipa wau nuread̶ai.
14Ãbarã, machiba joma mau esed̶au panuud̶eeba ne jomad̶e kĩra jipa nibásturu Dachi Akõreba machi biꞌia, kachiruaswãe, ichi ome jirukaraayuwãe panuu unumera. 15Kĩrabásturu Dachi Mechiuba ẽbẽrarã karibai baita joma jãadua b̶uu. Ara mau kĩra dachiba kʉ̃ria panuu ãba Pablo bid̶a kartad̶e machi baita b̶ʉsii, Dachi Akõreba ichimaa dead̶a kʉ̃risia kuitaad̶eeba. 16Mauba kartacha mau ʉ̃rʉbena b̶ʉsii. Mau kartad̶ebena kʉ̃risia ichiba b̶ʉd̶a chaarea b̶uu kuitaad̶ai baita. Chi biawãra bed̶ea adua nureerãba maud̶e chi ãrea ijãad̶akaurãba mauba b̶ʉd̶a biꞌiwãe jaradeabadau, chi Dachi Akõre bed̶ea b̶ʉped̶aad̶a biꞌiwãe jaradeabadau kĩra. Maud̶eeba Dachi Akõreba ãchi nebʉra ichiai.
17Ãbarã, machiba mau kuitaa panuud̶eeba kauwa panásturu ẽbẽra kachiruarãba biꞌiwãe jaradea panuuba setaa kũruarãad̶amera. Maka machiba ãrea ijãa panuu ida b̶ud̶aabai. 18Jesucristo Dachi Mechiu maud̶e Dachi Karibabarii ʉ̃rʉbena biꞌia kuitaa kãribásturu. Ichi sõbiad̶eeba warísturu. Id̶i maud̶e ewaricha ichimaa biꞌia berread̶ai panuu. Biꞌia b̶uu maka b̶uai.