2 Juan
Karta ome Juanba b̶ʉd̶a
Jesús baara nibad̶a Juanba nau karta b̶ʉsii. Año 90d̶e Éfeso puurud̶e b̶uasiid̶e b̶ʉsii. Nau kartad̶e ara ichíturu chi Chõra asii. Karta b̶ʉsii «wẽra Dachi Akõreba jʉrʉ adaud̶a baita maud̶e ichi warrarã baita bid̶a». Waabenarãmaarã mau jara b̶uu ãbarã arab̶au puurud̶ebena.
Nau kartad̶e Juanba naa b̶ʉsii ichi kĩrajʉʉ b̶uu chi biawãra bed̶ea ijãa panuud̶eeba maud̶e biawãra kʉ̃ria uru panuud̶eeba (1-6). Maabae ãchimaa jarasii setaa jaradeabadaurã biꞌia irsibibiarãad̶amera (7-11). Juan chõra b̶uasiid̶e waabenarãba jara panasid̶au Jesús nau iujãad̶e b̶uasiid̶e ẽbẽrarãba ichi jauríturu unubachid̶au. Juanba jarasii ãchi irsibirãad̶amera (7). Kaad̶eare b̶ʉsii kãꞌãabariwãed̶e chiya unud̶ai maud̶e waabenarã ãbarãba kʉ̃ria panuu ãchi biꞌia panad̶ai (12-13).
1Nau kartad̶e Juanba naa b̶ʉd̶a
1Mʉ Chõrabʉ.1 Chõrabʉ. Waabenarãmaarã, mau jara b̶uu «ijãabadaurã nubarii». Mʉʉba nau karta b̶ʉʉruu wẽra Dachi Akõreba jʉrʉ adaud̶a baita maud̶e ichi warrarã baita bid̶a. Mʉʉba machi biawãra kʉ̃ria ua b̶uu. Mʉaburu machi kʉ̃ria b̶uwãema, maumaarã joma chi biawãra bed̶ea kuitaa nureerãba machi kʉ̃ria panuu. 2Maka kʉ̃ria panuu, chi biawãra bed̶ea dachi sõd̶e b̶uud̶eeba. Maud̶e dachi sõd̶e ewaricha b̶uai. 3Mau biawãra bed̶ea ijãa panuud̶eeba maud̶e chiya kʉ̃ria panuud̶eeba, mʉʉba kʉ̃ria b̶uu Dachi Bajãad̶ebena Akõreba, dachi Akõre Warr Jesucristo ome ãchi sõbiad̶eeba machi kariba panad̶ai, kĩra chuburia panad̶ai maud̶e jirukaraayuwãe panabiad̶ai.3 Juan 1:14-18.
Chiya kʉ̃ria panad̶ai panuu
4Mʉʉba bichi warrarãd̶ebena chi nuree unusii. Mʉ kĩrajʉʉsii ãchi chi biawãrad̶e nibasid̶aud̶eeba, Dachi Bajãad̶ebena Akõreba jara b̶uu kĩra. 5Neekau, mʉʉba chi chuburia id̶imaa b̶uu dachi chiya kʉ̃riad̶amera. Dachi Akõreba waubi b̶uu bed̶ea wid̶iwãebʉ, maumaarã mau dachiba arab̶aed̶eed̶e ũri panasid̶au.5 Juan 13:34.6Dachiba naka waabenarã kʉ̃ria panad̶ai panuu: Dachi Akõreba waubi b̶uu bed̶ea wau panad̶ai. Mau waubi b̶uu bed̶ea machiba arab̶aed̶eed̶e ũrisid̶au. Mauba jara b̶uu kʉ̃riad̶eeba nibad̶ai panuu.
7Chi nuree setaa kũruabadaurã nau iujãad̶e ãrea nibabadau. Maarãba ijãad̶akau Jesucristo nau kakuad̶e dachi kĩra neesii. Chi maka b̶uu waabenarã setaa kũruabarii maud̶e Cristo kĩramaabʉ. 8Kauwa panásturu machi setaa kũruabiarãad̶amera. Maka machiba chi Dachi Akõre baita wau panuu ichiba deai bad̶a wãꞌãe bai, maumaarã joma adaud̶ai.8 Machiba chi Dachi Akõre baita wau panuu. Griego bed̶ead̶e chi b̶ee kartad̶e b̶ʉ kub̶uu: daiba Dachi Akõre baita wau panabadau.
9Barikiuba Cristoba jaradead̶a ãyaa jaradea nibaaruubʉrã, maebʉrã Cristoba jaradead̶a ida b̶uuruubʉrã, mau Dachi Akõreswãe nii. Maamina barikiuba Cristoba jaradead̶a ijãa niibʉrã, chi Akõre maud̶e chi Warr sid̶a uru b̶uu. 10Ẽbẽra machimaa wãaruud̶e Cristoba jaradead̶a kĩra jaradeawẽebʉrã, mau machi ded̶e biꞌia irsibirã́sturu maud̶e «biꞌia b̶uu bichi neesii» arã́sturu. 11Chi «biꞌia b̶uu bichi neesii» a b̶uuba mau kachirua ichi ome ãbua wau b̶uu.
Juanba nau kartad̶e aanama b̶ʉd̶a
12Mʉʉba machimaa ãrea jara kʉ̃ria b̶umina nau kartad̶e joma b̶ʉwẽma. Mʉʉba machi ichiad̶e wã kʉ̃ria b̶uu. Maud̶e machi ome ãbua berread̶ai ãrea kĩrajʉʉd̶ai baita.
13Bichi neekau warrarã Dachi Akõreba karibad̶aba kʉ̃ria panuu machi biꞌia duanad̶ai.13 Griego bed̶ead̶e chi b̶ee kartad̶e nau sid̶a b̶ʉ kub̶uu: amén. Mau jara b̶uu «biꞌia b̶uu maka b̶uai».