2 Corintios
Karta ome Pabloba b̶ʉd̶a ãbarã Corinto puurud̶ebenarã baita
Nabena karta ãbarã Corintod̶ebena baita b̶ʉd̶akare Pabloba nau karta b̶ʉsii. Waabena karta nuree audeara nau kartad̶e ara ichi ʉ̃rʉbena ãrea b̶ʉsii.
Ãbarã Corintod̶ebenarãba karta Pabloba naa b̶ʉd̶a ed̶a jarad̶aped̶a ichiba b̶ʉd̶a kĩra wausid̶au. Maud̶eeba chi kachirua wau b̶uad̶a Pabloba kʉde uru b̶uad̶a ida b̶usii (2:5-11). Maud̶e Pablo kĩrajʉʉsii ãchiba kachirua wau panad̶a ida b̶uped̶aad̶ad̶eeba (7:2-16). Maamina waabenarã chi nuree ed̶a neeped̶aad̶a jara paneesid̶au Pablo biawãra Jesucristoba bʉid̶awãe basii. Ãchiba jarabachid̶au Pabloba araa wãi a b̶uasiid̶eeba, wãwẽa b̶uud̶eeba setaa jara b̶uu abachid̶au (1:15—2:4). Maud̶e jarabachid̶au ãchiba chi nejarra ãbarã Jerusalend̶ebena baita jʉrʉ adau panuu Pabloba ara ichi baita adaubarii. Mau awara jarabachid̶au ãchi Jesucristoba bʉid̶arã chi mechiurã (11:4). Ãbarãba mau ẽbẽrarã bed̶ea ijãaped̶aad̶ad̶eeba Pabloba kãare kʉ̃risiai adua basii (11:1-15).
Capítulo 1d̶ebena ab̶a 7d̶aa Pabloba b̶ʉsii Jesucristoba ichi biawãra bʉid̶a ʉ̃rʉbena. Capítulo 10d̶ebena ab̶a 13d̶aa arab̶aud̶e b̶ʉ kub̶uu. Mau awara jara b̶uu ãchi ichiad̶e wãaruud̶e chi wabid̶a kachirua wau nuree kĩra chuburiabai. Capítulo 8d̶ebena ab̶a 9d̶aa b̶ʉ kub̶uu saka chi nejarra ãbarã Jerusalend̶ebena baita jʉrʉ adaud̶ai panuu.
Nau kartad̶e chi kʉ̃risia mechiu 5:20d̶e b̶ʉ kub̶uu: «Maud̶eeba Cristoba dai bʉisii ichi baita berread̶amera. Daid̶eeba Dachi Akõreba machi iu b̶uu ichi ome biꞌia panad̶amera. Daiba Cristo trʉ̃d̶eeba machimaa chi chuburia id̶iiduu: Dachi Akõre ome biꞌia panásturu».
1Nau kartad̶e Pabloba naa b̶ʉd̶a
1Mʉ Pablobʉ. Dachi Akõreba ichi kʉ̃riad̶eeba mʉ Jesucristoba bʉid̶abʉ. Dachi ãba Timoteo mʉ ome b̶uu. Nau karta b̶ʉʉruu ẽbẽrarã Dachi Akõred̶erã Corintod̶ebena baita maud̶e joma ichi ẽbẽrarã Acaya druad̶e nuree baita. 2Mʉʉba kʉ̃ria b̶uu Dachi Bajãad̶ebena Akõreba maud̶e Dachi Mechiu Jesucristo ãchi sõbiad̶eeba machi aid̶a panad̶ai maud̶e jirukaraayuwãe panabiad̶ai.
Pablo biꞌiwãe b̶uad̶a
3Dachi Mechiu Jesucristo Bajãad̶ebena Akõremaa biꞌia berread̶ai panuu. Ichi dachi kĩra chuburiabarii Dachi Akõrebʉ, dachi sõ kĩrajʉʉbiabarii Dachi Akõrebʉ. 4Ne jomad̶e ãrea biꞌiwãe panuud̶e ichiba dai sõ kĩrajʉʉbiabarii waabenarã ãrea biꞌiwãe nuree sõ kĩrajʉʉbiad̶amera ichiba dai sõ kĩrajʉʉbiad̶a kĩra.1:4 Isaías 40:1.5Biawãra Cristo baita dai ãrea biꞌiwãe duanubadamina ichid̶eeba ne jomad̶e kĩrajʉʉbadau. 6Maamina dai maka ãrea biꞌiwãe panuu machi sõ kĩrajʉʉbia panad̶amera maud̶e kachiruad̶ebena wãd̶amera. Dachi Akõreba dai sõ kĩrajʉʉbiaruud̶e machi sid̶a daid̶eeba kĩrajʉʉbadau. Maka machi dai kĩra ãrea biꞌiwãe paneeduud̶e poyaa dauchia jãaduad̶ai. 7Daiba kuitaa panuu machiba Dachi Akõre biawãra ãrea ijãa panuu. Kuitaa panuu machi dai kĩra ãrea biꞌiwãe paneebadamina Dachi Akõreba machi dai kĩra sõ kĩrajʉʉbiabarii.
8Ãbarã, maud̶eeba daiba kʉ̃ria panuu dai Asia druad̶e biawãra ãrea biꞌiwãe panaped̶aad̶a machiba mau kuitaad̶ai. Dai ãrea nebʉrad̶e panasiid̶eeba waa poyaa dauchia jãaduad̶aabai kʉ̃risiasid̶au maud̶e poyaa chokae panad̶aabai kʉ̃risiasid̶au. 9Biawãra dai bead̶ai kʉ̃risiasid̶au. Maamina joma makasii ara dai du ab̶a poyaa karibad̶ai kʉ̃risiarãad̶amera maumaarã chi biuped̶aad̶a chokae jiradubibarii Dachi Akõreba karibai ijãad̶amera. 10Ichiba dai bead̶ai bad̶a karibasii maud̶e waya bead̶ai kʉ̃risiaduubʉrã kariba b̶uai. Daiba biawãra ijãa panuu ichiba dai bead̶ai bad̶a kariba b̶uai. 11Machia bid̶a dai baita Dachi Akõremaa ʉtaa id̶i panuud̶eeba aid̶a panuu. Ãreaba maka ʉtaa id̶i panuud̶eeba ãreaba Dachi Akõremaa bichíturu kid̶ibai ad̶ai ichi sõbiad̶eeba dai aid̶a b̶uu baita.
Pablo Corintod̶aa wãi bad̶a
12Nau kakua kĩrajʉʉ panuu: daiba kuitaa panuu sõ jipa panuud̶eeba, kʉ̃risia biad̶eeba nau iujãad̶ebenarã tãed̶e, maud̶e machi tãed̶e biꞌia nibaped̶aad̶a. Mau sõ jipa b̶uai maud̶e kʉ̃risia bia Dachi Akõred̶ebenabʉ. Dai nau iujãad̶ebena kʉ̃risia kuitaad̶eeba maka nibad̶akau, maumaarã Dachi Akõreba ichi sõbiad̶eeba aid̶a b̶uud̶eeba maka nibabadau. 13-14Daiba kartad̶e b̶ʉd̶aabasii chi machiba poyaa kuitaad̶aabai panuu. Mʉʉba kʉ̃risia b̶uu machiba b̶aꞌãra kuitaaped̶aad̶a ãrea kuitaa kãribad̶ayu. Maka machi dai kakua kĩrajʉʉd̶ai maud̶e Dachi Mechiu Jesús neeruud̶e dai machi kakua kĩrajʉʉd̶ai.
15Machi biawãra kĩrajʉʉd̶ai mʉ kakua mʉʉba kʉ̃risia b̶uud̶eeba, naa mʉʉba kʉ̃risia b̶uasii b̶es ome machi ichiad̶e wãi ãrea aid̶ai baita.1:15 Aid̶ai baita. Griego bed̶ead̶e chi b̶ee kartad̶e b̶ʉ kub̶uu: kĩrajʉʉbii baita.16Mʉʉba kʉ̃risia b̶uasii Macedonia druad̶aa wãaruud̶e naa machi ichiad̶e wãi. Maabae Macedoniad̶aa wãped̶a waya machi ichiad̶e wãi kʉ̃risia b̶uasii. Maka Judea druad̶aa wãaruud̶e machiba mʉ poyaa aid̶ad̶ai kʉ̃risia b̶uasii. 17Maamina mʉʉba kʉ̃risia b̶uad̶a kĩra waubasiid̶eeba ¿machimaarã mʉʉba ãyaa jaraska? ¿Machimaarã mʉʉba waui ad̶a waya wauwẽ abarika mʉʉba wau kʉ̃ria b̶uu kĩra waui baita? 18Dachi Akõre bed̶ea ab̶a b̶uu. Ichiba kuitaa b̶uu daiba jaraped̶aad̶a biawãra basii. Daiba machimaa wãd̶ai ad̶aped̶a ara makʉd̶e wãd̶aabai ad̶aabasii. Daiba «nau biawãra» ad̶aabasii, maad̶akare «seta» ad̶ai baita. 19Silvanoba, Timoteoba maud̶e mʉa bid̶a machimaa Dachi Akõre Warr Jesucristo ʉ̃rʉbena jaradea panasid̶au. Jesucristoba waui ad̶a waya wauwẽa akau. Ichiba waui ad̶a joma waubarii. Daiba «nau biawãra» ad̶aabasii, maad̶akare «seta» ad̶ai baita. 20Biawãra Dachi Akõreba waui jarad̶a joma Cristod̶eeba waubarii. Maud̶eeba dachiba Dachi Akõremaa ʉtaa id̶iiduud̶e Cristod̶eeba biꞌia b̶uu maka b̶uai abadau.1:20 Biꞌia b̶uu maka b̶uai. Griego bed̶ead̶e naka b̶ʉ kub̶uu: amén. Amén bed̶eaba b̶esed̶e jara b̶uu «biawãra» maud̶e b̶esed̶e jara b̶uu «biꞌia b̶uu maka b̶uai». Maka ichi ʉ̃rʉbena biꞌia jara panuu. 21Dachi Akõréburu dai maud̶e machi sid̶a Cristo ome ãrea nu ua b̶uu. Ichiba dachi jʉrʉ adausii. 22Ichi Jauriba dachicha dauchaa b̶usii dachiba ichid̶irã kuitaad̶amera. Maud̶e dachi sõd̶e b̶usii kuitaad̶amera joma ichiba deai jarad̶a biawãra adaud̶ai.
23Mʉʉba Dachi Akõre daad̶e jaraaruu: Corintod̶aa wabid̶a wãwãe b̶uu machi kĩra nomaabiamaaba chi mʉʉba machi ãrea kastikakuai b̶uud̶eeba. 24Daiba jara panuu kĩra waubiad̶aabai machiba Cristod̶e ãrea ijãa panuud̶eeba. Bari machi aid̶a kʉ̃ria panuu kĩrajʉʉ panad̶amera.
21Maud̶eeba mʉʉba kʉ̃risiasii machi ichiad̶e wãabai. Waya kastikad̶e wãaruud̶eeba machi kĩra nomaabiai kʉ̃riabasii. 2Mʉʉba machi kĩra nomaabiaruubʉrã ¿kaiba mʉ kĩrajʉʉbiima? ¿Machi kĩra nomaaba mʉ kĩrajʉʉbid̶aika? 3Maud̶eeba machi ichiad̶e wãi bad̶amaarã karta urubʉisii. Maka mʉ wãaruud̶e machiba mʉ kĩra nomaabid̶aabai. Machiba mʉ kĩrajʉʉbid̶ai panuu. Mʉʉba kuitaa b̶uu machiba maka waud̶aid̶eeba mʉ ome ãbua kĩrajʉʉ panad̶ai. 4Biawãra mau karta b̶ʉsii machi iadaai baita. Maamina maka b̶ʉʉbasii machi kĩra nomaad̶amera, maumaarã kuitaad̶amera mʉʉba machi biawãra kʉ̃ria b̶uu. Maud̶eeba mʉʉba kĩra nomaad̶eeba, ãrea kʉ̃risia b̶uud̶eeba maud̶e jẽa b̶uud̶eeba mau karta b̶ʉ b̶uasii.
Ab̶auba kachirua waud̶a Pabloba perdonad̶a
5Biawãra ab̶auba kachirua wau b̶uud̶eeba mʉ kĩra nomaabisii. Maamina mʉ́turu kĩra nomaabiibasii, maumaarã beraa joma machi sid̶a kĩra nomaabiasii. (Mʉʉba «beraa joma machi» jara b̶uu, ichiba waud̶a aude kachirua b̶uu a b̶uuwãed̶eeba). 6Machid̶ebena ãreaba mau ẽbẽra kachirua waud̶a kastikasid̶au. Ara mauba ara b̶uu. 7Maumaarã, jãabae ichiba waud̶a perdonad̶ai panuu maud̶e mau sõbiabid̶ai panuu ãrea kĩra nomaa b̶eerãamera. 8Maud̶eeba mʉʉba machimaa chi chuburia id̶iiruu machiba ichi kʉ̃ria panuu waya kuitaabid̶amera. 9Mʉʉba naed̶e mau ʉ̃rʉbena b̶ʉsii machiba biawãra joma mʉʉba jarad̶a ijãad̶ai kuitaai baita. 10Ab̶auba kachirua waud̶a machiba kʉde uru b̶ee ida b̶uuduubʉrã mʉa bid̶a kʉde uru b̶uu ida b̶ui. Kachirua mʉʉba kʉde uru b̶uu ida b̶ui biawãra b̶uasiibʉrã, mau kachirua Cristo daad̶e joma perdonasii machi biꞌia duanad̶amera. 11Mʉʉba mau perdonasii Satanasba dachi setaa kũruarãamera. Ichiba saka waubarii dachiba ãrea kuitaa panuu.
Cristod̶eeba dachiba ne joma poyaa panuu
12Mʉ Troas puurud̶aa wãsii chi bed̶ea bia Cristo ʉ̃rʉbena jarai baita. Aria Dachi Mechiuba poraa ewaaruu kĩra wausii ẽbẽrarãba ũri kʉ̃riad̶amera. 13Maamina mʉ ãba Tito unuwẽed̶eeba jirukaraa b̶uasii. Maud̶eeba ãbarã ome araa ãbua neesiid̶e mʉ wãi asii. Ara makʉd̶e Macedonia druad̶aa Tito jʉrʉd̶e wãsii.
14-15Dachi Akõremaa bichíturu kid̶ibai ad̶ai panuu. Jesucristoba joma poyaaped̶a jomaurã daad̶e puurud̶e dai adoeruu2:14-15 Jomaurã daad̶e puurud̶e dai adoeruu. Ichiáse chi ekare b̶ʉ kub̶uu Colosenses 2:15d̶e. maud̶e daid̶eeba druacha ichi ʉ̃rʉbena kuitaabi b̶uu. Cristo ʉ̃rʉbena jaradea panuud̶e Dachi Akõre daad̶e dai kera kĩra tuwaa panuu. Maud̶e ichi ʉ̃rʉbena kuitaai, mau kera kĩra b̶uu. Chi Dachi Akõreba karibai panuu ẽbẽrarãba maud̶e chi karibaabai panuu ẽbẽrarãba mau kera ʉ̃badau. 16Chi karibaabai nureemaarã, mau kera ẽbẽra biud̶a mikia kĩra b̶uu, Jesusd̶e ijãad̶awẽa panuud̶eeba biud̶aid̶eeba. Maamina chi karibai nureemaarã, mau kera ãrea tuwaa b̶uu, ewaricha chokae panad̶aid̶eeba. Maka ¿kaiba ara ichi meserãad̶eeba Dachi Akõre bed̶ea poyaa jaradeaima? 17Daiba chi nejarra adaud̶ai baita Dachi Akõre bed̶ea jaradea nibad̶aabai ãreaba waubadau kĩra. Maumaarã Cristo ome panuud̶eeba Dachi Akõreba dai bʉisii. Maud̶e ichi daad̶e kʉ̃risia sõbiad̶eeba jaradeabadau.
3Dachi Akõreba ẽbẽra baita bed̶ea chiwid̶i b̶ud̶a
1¿Mau jara panuud̶eeba waya ara dai ʉ̃rʉbena biꞌia berrea panuka? ¿Dai biꞌia nibaped̶aad̶a ʉ̃rʉbena karta machimaa ichiabiad̶ai panuka jaradead̶ai baita? ¿Daiba machimaa karta id̶id̶ai panuka jaradead̶e wãd̶ai baita waabenarãba waubadau kĩra? 2Machi chi karta dai sõd̶e b̶ʉ kub̶uu kĩra panuu. Jomaurãba mau karta ichiaduud̶e kuitaabadau daiba jipa jaradeabadau. 3Daid̶eeba Cristod̶e ijãaped̶aad̶ad̶eeba machi karta Cristoba b̶ʉ dead̶a kĩra panuu. Ichiba mau karta chi tintaba b̶ʉʉbasii, maumaarã chi chokae nii Dachi Akõre Jaurid̶eeba b̶ʉsii. Mo peed̶ead̶e b̶ʉʉbasii, maumaarã dachi sõd̶e b̶ʉsii.3:3 Jeremías 31:31-34.
4Dachi Akõre daad̶e daiba Cristod̶eeba mau biawãra kuitaa panuu. 5Daiba poyaa jarad̶aabai ara dai du ab̶a Dachi Akõre traju poyaa waud̶ai panuu. Maumaarã kuitaa panuu Dachi Akõred̶eeba joma poyaa waud̶ai. 6Dachi Akõreba dai b̶usii ichiba ẽbẽrarãmaa bed̶ea chiwid̶i dead̶a poyaa jaradead̶amera. Mau bed̶ea chiwid̶i dead̶a Moisesba b̶ʉd̶a kĩra juaba b̶ʉd̶awãe, maumaarã Dachi Akõre Jauriba kuitaabi b̶uu. Moisesba b̶ʉd̶aba kuitaabi b̶uu kachirua wau panuu kakua ẽbẽrarã biud̶ai panuu, maamina Dachi Akõre Jauriba dachimaa chokae nibabiabarii.
7-8Dachi Akõreba Moisesmaa ichi ley mokara peed̶ead̶e deasiid̶e, ichi ted̶echoaba Moisés kĩedarrmaa jẽratĩusii.3:7-8 Éxodo 31:18. Maud̶eeba israeld̶ebenarãba Moisés kĩedarr poyaa ichiad̶aabasii. Mau kĩrawãrea b̶uu bikãa wãꞌãemaa b̶uasmina wabid̶a poyaa ichiad̶aabai panasid̶au.3:7-8 Éxodo 34:27-35. Biawãra Dachi Akõreba ichi kĩrawãreaba unubisii mau Moisesba b̶ʉd̶a ãrea biꞌia b̶uu. Maamina ichiba bed̶ea chiwid̶i dead̶a ichi Jauriba kuitaabi b̶uud̶eeba ¿Moisesba b̶ʉd̶a audeara aude biꞌia b̶uwẽka? 9Biawãra mau Moisesba b̶ʉd̶aba ẽbẽrarã biud̶ai panuu jara b̶umina ãrea biꞌia b̶uu. Maamina Dachi Akõreba bed̶ea chiwid̶i dead̶a aude bibuara b̶uu. Mauba kuitaabi b̶uu saka Dachi Akõreba dachi nebʉraswãe nuree abarii. 10Moisesba b̶ʉd̶a ãrea biꞌia b̶uasmina id̶ibae ãrea biꞌiwãe b̶uu ichiba bed̶ea chiwid̶i dead̶a aude bibuara b̶uud̶eeba. 11Moisesba b̶ʉd̶a naed̶e ãrea biꞌia b̶uasmina ewaricha waa b̶uabai basii. Maamina ichiba bed̶ea chiwid̶i dead̶a wãꞌãekaud̶eeba bibuara b̶uu.
12Mau bed̶ea chiwid̶i dead̶a biawãra wãꞌãekau kuitaa panuud̶eeba daiba biꞌia jaradeabadau. 13Dai Moisés kĩra nibad̶akau. Mauba ichi kĩedarrd̶e paru anabaribachii israeld̶ebenarãba chi kĩrawãrea wãꞌãeruu apii ichiarãad̶amera. 14Maamina ãchiba mau ʉ̃rʉbena kuitaad̶aabasii. Id̶ibae bid̶a judiorãba chi Moisesba b̶ʉd̶a ichiaduud̶e kuitaad̶akau. Ãchi kʉ̃risia wabid̶a paruba mera panuu kĩra nuree, ab̶a Cristod̶éburu mau ãyaa ewaid̶eeba. 15Id̶ibae bid̶a Moisesba b̶ʉd̶a ed̶a jaraaduud̶e, paruba ãchi sõ mera panuu kĩra nuree. 16Biawãra ab̶a Dachi Akõremaa waya neeruud̶e ichi kʉ̃risia paruba mera uru b̶uu kĩra b̶uu Dachi Mechiuba ãyaa ewai. 17«Dachi Mechiu» aaruud̶e «Dachi Akõre Jauri» jara b̶uu. Chi Dachi Mechiu Jaurid̶eeba nibabarii kachiruad̶ebena maud̶e Moisesba b̶ʉd̶ad̶ebena ãyaa wãsii. 18Dachiba Cristod̶e ijãa panuud̶eeba dachi kĩra paruba mera uru panuu kĩra panuuwãema. Maud̶eeba dachid̶eeba waabenarãba Dachi Mechiu kĩrawãrea unu panuu kĩra ichiabadaud̶e ichia panuu kĩra. Maud̶e Dachi Mechiu Jauriba dachi ewaricha biꞌia wau kãrii Dachi Mechiu kĩra panad̶amera.
41Dachi Akõreba dachi maka kĩra chuburiad̶eeba ichi bed̶ea ida jaradeabia b̶u baerã daiba poyaad̶awẽe kʉ̃risiad̶akau. 2Ne joma kachirua ẽbẽrarãba mirubia waubadau maud̶e mia kĩra nejasia waubadau daiba ida b̶usid̶au. Waabenarã setaa kũruad̶akau. Dachi Akõre bed̶ea ãyaa jaradead̶akau, maumaarã chi biawãra bed̶ea arakʉd̶e jaradeabadau. Maka Dachi Akõre daad̶e jomaurãmaa kuitaabiabadau daiba jipa wau panuu. 3Maamina chi bed̶ea bia Cristo ʉ̃rʉbena daiba jaradea panuu wabid̶a biꞌia ũrid̶awẽebʉrã, ab̶a chi ẽbẽrarã Dachi Akõreba karibaabai panuu baita maka b̶uu. 4Dachi Akõred̶e ijãad̶akaurãmaarã mau biꞌia ũrid̶akau. Nau iujãad̶e jʉbawãe nii maarã chibaribʉ. Ãchimaa chi biawãra bed̶ea bia Cristo ʉ̃rʉbena kauwa kuitaabiwẽa b̶uu dau pãriu wau b̶uu kĩra.4:4 Biawãra. Griego bed̶ead̶e naka b̶ʉ kub̶uu: ʉ̃d̶aa. Maka ãchiba Cristo biꞌia nii ʉ̃rʉbena poyaa kauwa kuitaad̶aabai. Cristo Dachi Akõre niid̶eeba maka biꞌia b̶uu. 5Ara dai ʉ̃rʉbena jaradea panuuwãema, maumaarã jaradea panuu Jesucristo jomaurã Mechiu. Maud̶e daiba jara panuu Jesús kakua dai machi baita bari trajabadaurã. 6Nau iujãa joma pãriu b̶uad̶a Dachi Akõreba ʉ̃d̶aabisii.4:6 Génesis 1:3. Ara mau kĩra ichi ʉ̃d̶aa dachi sõd̶e ʉ̃d̶aabisii. Mauba jara b̶uu ichi kĩrawãrea Cristod̶eeba dachimaa kuitaabisii.
Cristod̶e ijãa b̶uud̶eeba nibad̶ai panuu
7Daiba chi bed̶ea bia Cristo ʉ̃rʉbena uru panumina, nau kakua meserãaswãe b̶uu. Choko bari au ãribarii kĩra b̶uu. Maud̶eeba jomaurãba kuitaa panuu dai meserãad̶eeba mau bed̶ea jaradea panuuwãe, maumaarã Dachi Akõre meserãa mechia b̶uud̶eeba jaradea panuu. 8Dai ne jomad̶e ãrea biꞌiwãe panumina mau nebʉrad̶ebena poyaa wãd̶aabai kʉ̃risiad̶akau. Saka waud̶ai adua panuud̶e poyaa waud̶aabai kʉ̃risiad̶akau. 9Ẽbẽrarãba dai kachirua wau panumina Dachi Akõreba ida b̶uwẽa b̶uu. Dai jeed̶a jirataadumina poyaa bead̶aabai. 10Dai wãaduucha ẽbẽrarãba dai bead̶ai kʉ̃ria panuu Jesús beaped̶aad̶a kĩra. Maamina Jesusba dai kariba b̶uud̶eeba ãchiba daid̶eeba Jesús chokae b̶uu unubadau. 11Biawãra dai wabid̶a chokae panuud̶e Jesús kakua ẽbẽrarãba dai bea kʉ̃ria panad̶ai. Maka dai chi kakua biui b̶uud̶eeba jomaurãba Jesús chokae b̶uu unud̶ai. 12Biawãra ẽbẽrarãba dai bead̶ai kʉ̃ria panumina daiba jaradea panuu machiba ijãasid̶au. Maud̶eeba ewaricha Dachi Akõre ome chokae panad̶ai.
13Dachi Akõre bed̶ead̶e b̶ʉ kub̶uu: «Mʉʉba Dachi Akõred̶e ijãasiid̶eeba berreasii».4:13 Salmos 116:10. Ara mau kĩra daiba Dachi Akõred̶e biawãra ijãa panuud̶eeba ichi ʉ̃rʉbena berrea panuu. 14Dachi Akõreba Dachi Mechiu Jesús chokae jiradubisii, maud̶e daiba kuitaa panuu dai sid̶a Jesús kĩra chokae jiradubiai. Maabae dai machi ome ãbua ara ichi daad̶e b̶ui. 15Dai mau joma ãrea biꞌiwãe panuu machi biꞌia nuread̶amera. Maud̶e Dachi Akõreba ichi sõbiad̶eeba ẽbẽrarã ãrea karibaaruu. Maka ãreaba ichimaa bichíturu kid̶ibai ad̶ai maud̶e ichi ʉ̃rʉbena biꞌia jarad̶ai.
16Maud̶eeba daiba waa jaradead̶ai ida b̶ud̶ai kʉ̃risiad̶akau. Dai chi kakua ewaricha meserãaswãekãrimina Dachi Akõreba aid̶a b̶uu dai sõd̶e chaarea nuread̶amera.4:16 Dachi Akõreba aid̶a b̶uu dai sõd̶e chaarea nuread̶amera. Griego bed̶ead̶e naka b̶ʉ kub̶uu: Dachi Akõreba dai sõ wid̶i wau b̶uu.17Dai ʉ̃raud̶e ãrea biꞌiwãe paneebadamina, mauba dai aid̶a b̶uu, maad̶akare chi Dachi Akõre kĩrawãread̶e ewaricha panad̶ai baita. Mau kĩrawãrea aude bibuara b̶uai chi id̶ibae b̶aꞌãra biꞌiwãe paneebadau audeara. 18Maud̶eeba dauba unubadau daiba kʉ̃risia panuuwãe, maumaarã dauba unud̶akau kʉ̃risia panuu. Dachi dauba unubadau isa wãꞌãebarii maamina dauba unud̶akau wãꞌãekau.
51Nau iujãad̶e dachi kakua ãrea dauchia jãaduad̶akaud̶eeba de ãnimara e wauped̶aad̶a kĩra b̶uu.5:1 Nau versiculod̶e, chi de dachi kakua kĩra b̶uu. Chi de ãnimara e wauped̶aad̶a dachi chi kakua biui b̶uu kĩra b̶uu. Mau kãyabãra chi bajãad̶ebena de dachi biukau kakua kĩra b̶uu. Dachiba kuitaa panuu dachi biuduud̶e Dachi Akõreba dachimaa chi kakua biukau bajãad̶ebena deai. Ẽbẽrarãba mau biukau kakua waud̶akau. 2Maud̶eeba nau kakuad̶e panuud̶e dachiba chi bajãad̶ebena kakua ãrea adaud̶ai kʉ̃ria panuu. 3Dachiba mau bajãad̶ebena kakua uru panad̶aid̶eeba kakuaswãe nuread̶aabai.5:3 Nabẽraed̶e griegorãba kʉ̃risiabachid̶au chi kakua kachirua nii. Maumaarã kʉ̃risiabachid̶au chi jauri biꞌia nii. Maud̶eeba kʉ̃risiabachid̶au dachi biuruud̶e chi jauri kakuad̶ebena wãbachii. Ãchimaarã, mau maka kʉ̃risiai ewaricha nibai.4Biawãra dachi nau kakuad̶e panuud̶e ãrea biꞌiwãe panabadau maud̶e kĩra nomaa berreabadau. Maamina mʉʉba jarawẽa b̶uu dachi biu kʉ̃ria panuu nau kakua uru paneed̶amaaba. Maumaarã bajãad̶ebena kakua adau kʉ̃ria panuu. Maka dachi kakua biui b̶uu wãꞌãeped̶a dachi kakua biukau b̶eei. 5Biawãra Dachi Akõreba dachi mau baita wausii. Ichi Jauri dachimaa deasii kuitaad̶amera joma ichiba deai jarad̶a biawãra adoed̶ayu.
6Maud̶eeba ewaricha dachi jirukaraayuwãe maud̶e wapead̶awẽa panuu. Dachiba kuitaa panuu nau kakuad̶e panuud̶e Dachi Mechiu b̶uumaa panuuwãe. 7Dachi dauba unu panuud̶eeba nibad̶akau, maumaarã Dachi Akõred̶e ijãa panuud̶eeba nibabadau. 8Maka dachi jirukaraayuwãe maud̶e wapead̶awẽa panuu. Dachi nau kakuad̶ebena wã kʉ̃ria panuu Dachi Mechiu baara nuread̶ai baita. 9Maud̶eeba nau kakuad̶e panuud̶e maebʉrã biuduubʉrã, dachiba joma wau kʉ̃ria panuu Dachi Akõreba dachi biꞌia unumera. 10Biawãra Cristoba joma dachiba wauped̶aad̶a ichiai. Ichiba dachicha deai dachiba nau kakuad̶e wau b̶uad̶a kĩra. Biꞌia wau b̶uasiibʉrã, ara mau kĩra deai. Kachirua wau b̶uasiibʉrã, ara mau kĩra deai.5:10 Nama Pabloba b̶ʉsii Cristoba chi ijãabadaurãba wauped̶aad̶a ichiai ʉ̃rʉbena. Apocalipsisd̶e Juanba b̶ʉsii june nebʉra ichiai ʉ̃rʉbena. Mau kaad̶ebena ewarid̶e, Dachi Bajãad̶ebena Akõreba joma chi ijãad̶akaurã chokae jiradubiaped̶a, ãchi nebʉra ichiai maabae joma tʉbʉchia kiikaud̶e kastikai. Apocalipsis 20:11-15.
Dachi Akõreba ẽbẽrarã ichi ome waya ãbua panabiad̶a
11Dachi Mechiu wapea panuud̶eeba daiba ẽbẽrarãmaa jara panuu ichid̶e ijãad̶amera. Dachi Akõreba kuitaa b̶uu daiba kʉ̃risia biad̶eeba jaradea nibaped̶aad̶a. Mʉʉba kʉ̃risia b̶uu machia bid̶a mau kuitaa panuu. 12Waya ara dai ʉ̃rʉbena machimaa biꞌia berrea panuuwãe, maumaarã kʉ̃ria panuu machiba dai ʉ̃rʉbena poyaa biꞌia kʉ̃risiad̶ai. Maka waabenarãba dai ʉ̃rʉbena kachirua jaraaduud̶e machiba dai ʉ̃rʉbena poyaa biꞌia jarad̶ai. Ãchi dauba biꞌia unu b̶uu biꞌia b̶uu kʉ̃risiabadau. Maamina chi sõd̶e b̶uu kʉ̃risiad̶akau. 13Waabenarãba jara panuu dai kĩranema nuree. Dai kĩranema panuubʉrã, Dachi Akõreba jara b̶uu waud̶ai baita maka panuu. Dai kĩrabia panuubʉrã, machi aid̶ad̶ai baita maka panuu. 14Cristoba dai kʉ̃ria b̶uud̶eeba ichiba kʉ̃ria b̶uu wau panuu. Mau kʉ̃risiad̶aped̶a biawãra kuitaa panuu Ẽbẽra Ab̶a biusii jomaurã kakua. Maud̶eeba Dachi Akõre daad̶e joma biusid̶au. 15Biawãra Cristo jomaurã kakua biuped̶a chokae jiradusii dachi chokae nureeba ara dachiba wau kʉ̃ria panuu kĩra waa waurãad̶amera, maumaarã ichiba kʉ̃ria b̶uu kĩra wau panad̶amera.
16Maud̶eeba nau iujãad̶ebenarãba waabenarã ichiabadau kĩra jãabae daiba maka ichiad̶akau. Naed̶e daiba Cristo ʉ̃rʉbena maka kʉ̃risia panasmina jãabae maka waud̶akau. 17Biawãra ab̶a Cristo ome b̶uubʉrã, ichi chi naed̶e b̶uad̶a kĩra b̶uuwãe maumaarã ichi ẽbẽra chiwid̶i nii. 18Joma mau Dachi Akõreba wausii. Cristod̶eeba dachi ichi ome biꞌia b̶usii maud̶e dai b̶usii mau ʉ̃rʉbena ẽbẽrarãmaa jaradead̶amera. 19Biawãra Cristod̶eeba Dachi Akõreba nau iujãad̶ebenarã ichi ome waya ãbua duanabiasii. Dachiba kachirua wauped̶aad̶a joma perdonasii. Maud̶e mau bed̶ea ichi ome biꞌia b̶uai ʉ̃rʉbena daimaa deasii jaradead̶amera. 20Maud̶eeba Cristoba dai bʉisii ichi baita berread̶amera. Daid̶eeba Dachi Akõreba machi iu b̶uu ichi ome waya ãbua panad̶amera. Daiba Cristo trʉ̃d̶eeba chi chuburia id̶iiduu: Dachi Akõre ome waya ãbua panásturu. 21Cristoba kachirua waukau basii. Maamina dachi baita Dachi Akõreba ichi kachirua waubarii kĩra unusii.5:21 Ichi kachirua waubarii kĩra unusii. Griego bed̶ead̶e naka b̶ʉ kub̶uu: ichi kachirua wausii. Maka Cristod̶eeba chi Dachi Akõre jipa nii dachiba waabenarãmaa poyaa unubiabadau.
61Daiba Dachi Akõre ome ichi traju wau panuud̶eeba, machimaa chi chuburia id̶iiduu Dachi Akõreba ichi sõbiad̶eeba kariba b̶uu ʉ̃rʉbena ida b̶urãad̶amera. 2Dachi Akõre bed̶ead̶e naka jara b̶uu:
«Chi mʉʉba karibai baita b̶ud̶a ewarid̶e bichiba id̶id̶a mʉʉba ũrisii.
Mau ewarid̶e mʉʉba bichi karibasii».6:2 Isaías 49:8.
Mʉʉba biawãra jaraaruu: Mau ewari neesii. Id̶i Dachi Akõreba dachi karibabarii.
3Dai ʉ̃rʉbena ab̶aumaa kachirua unubid̶awẽa panuu, ab̶au bid̶a kachirua berrearãad̶amera daiba jaradeabadau ʉ̃rʉbena. 4Maumaarã ne jomad̶e unubia panuu dai Dachi Akõre baita bari trajabadaurã. Ãrea biꞌiwãe panuud̶e, ne wãꞌãe panuud̶e maud̶e nebʉrad̶e panuud̶e joma dauchia jãadua panuud̶eeba maka unubia panuu. 5Soaba pe panuud̶e, jʉ̃a uru panuud̶e maud̶e dai kakua kĩrubika panuud̶e maka unubia panuu. Ãrea traja panuud̶e, kãi b̶eed̶awẽa panuud̶e maud̶e jarrbisia panuud̶e maka unubia panuu. 6-7Dai jipa nibaped̶aad̶ad̶eeba, biawãra kʉ̃risia kuitaad̶eeba, joma dauchia jãadua panuud̶eeba, sõbiad̶eeba, Dachi Akõre Jauri dai sõd̶e b̶uud̶eeba, biawãra kʉ̃riad̶eeba, chi biawãra bed̶ea jaradea panuud̶eeba, maud̶e Dachi Akõre poyaaba maka unubi panuu. Dai jipa panuud̶eeba kachirua poyaabadau maud̶e ara mau jipa panuud̶eeba daiba chi kachiruamaa ida poyaabid̶akau.6:6-7 Griego bed̶ead̶e naka b̶ʉ kub̶uu: jua bia maud̶e jua sordo.8B̶esed̶e waabenarãba dai ʉ̃rʉbena biꞌia jarabadau. B̶esed̶e kachirua jarabadau. B̶esed̶e dai ʉ̃rʉbena kachirua trʉ̃ poabadau. B̶esed̶e biꞌia trʉ̃ poabadau. Daiba chi biawãra bed̶ea jara panumina waabenarãba jara panuu dai setaa jarabadau abadau. 9Dai ãrea unu panumina ãchiba unud̶akau ẽbẽrarã kĩra waubadau. Dai biumaa panuu kĩra kʉ̃risia panumina wabid̶a chokae panuu. Dai soaba pebadamina bead̶akau. 10Dai kĩra nomaabadamina ewaricha kĩrajʉʉ panuu. Dai chi nejarra barauwãe panuu. Maamina daiba ẽbẽrarã ãreamaa Dachi Akõre ʉ̃rʉbena kuitaabiabadau ãchi barau nuree kĩra nuread̶amera. Dai chi nejarr barauwãe nuremina Dachi Akõred̶eeba joma uru panuu.
11Ãbarã Corintod̶ebena, daiba sõd̶eeba machi ãrea kʉ̃ria panuud̶eeba arakʉd̶e jara panuu. 12Biawãra daiba machi sõd̶eeba kʉ̃ria panuu, maamina machiba sõd̶eeba dai kʉ̃riawẽa panuu. 13Maud̶eeba mʉʉba machimaa chi chuburia id̶iiruu akõreba ichi warrarãmaa chi chuburia id̶ibarii kĩra: daiba sõd̶eeba machi kʉ̃ria panuu kĩra machia bid̶a sõd̶eeba dai kʉ̃ria panásturu.
Cristod̶e ijãad̶akaurã ome bed̶ea dearã́sturu
14Cristod̶e ijãad̶akaurã ome bed̶ea dearã́sturu. ¿Ẽbẽra jipa nii saka ẽbẽra kachirua ome biꞌia b̶uaima? ¿Chi ʉ̃d̶aad̶e b̶uu saka chi pãriud̶e b̶uu ome biꞌia b̶uaima? 15¿Cristo saka jʉbawãe nii ome biꞌia b̶uaima?6:15 Jʉbawãe nii. Griego bed̶ead̶e naka b̶ʉ kub̶uu: Belial. ¿Cristod̶e ijãa b̶uu saka Cristod̶e ijãawẽa b̶uu ome biꞌia nibaima? 16¿Dachi Akõre kuenda juaba ne kaped̶aad̶a Dachi Akõre de mechiud̶e b̶uai b̶uka? Biawãra dachi, chi Dachi Akõre chokae b̶uu de mechiubʉ. Maud̶eeba Dachi Akõreba ichi bed̶ead̶e naka jarasii:
«Mʉ ãchi ome b̶uai. Ãchi tãed̶e nibai.
Mʉ Dachi Akõre ãchid̶i bai maud̶e ãchi mʉ puuru nuread̶ai».6:16 Levítico 26:12; Ezequiel 37:27.
17Maud̶eeba Dachi Mechiuba naka jarasii:
«Maarãd̶ebena ãyaa wã́sturu. Maarã ome araa ãbua panarã́sturu.
Mʉʉba chi biꞌia unukau ida b̶ústuru. Maabae mʉʉba machi biꞌia irsibii.6:17 Isaías 52:11; Ezequiel 20:41.
18Mʉ machi akõre bai. Machi mʉ warrarã nuread̶ai maud̶e mʉ kaurã nuread̶ai.
Dachi Mechiu Joma Poyaabariiba maka jara b̶uu».6:18 2 Samuel 7:14; 1 Crónicas 17:13; Isaías 43:6.
71Ãbarã, Dachi Akõreba dachimaa mau joma waui asiid̶eeba nau kakuaba kachirua waubarii maud̶e dachi kʉ̃risiad̶eeba waubarii joma ida b̶ud̶ai panuu. Dachi Akõre ãrea wapea panuud̶eeba ichi baita biꞌia nuread̶ai panuu.
Pablo Corintod̶ebena ãbarã kakua kĩrajʉʉd̶a
2Sõd̶eeba dai kʉ̃riásturu. Daiba ab̶aumaa bid̶a kachirua waud̶awẽa panuu, kachirua kʉ̃risiabiad̶awẽa panuu maud̶e setaa kũruad̶awẽa panuu. 3Mʉʉba mau jarawẽa b̶uu machi ʉ̃rʉbena kachirua jarai baita. Mʉʉba naed̶e jara b̶uasii daiba machi sõd̶eeba kʉ̃ria panuu. Maud̶e machi ome ãbua panuud̶e maebʉrã biuduud̶e maka kʉ̃ria panad̶ai. 4Mʉʉba machimaa biawãra berrea b̶uu maud̶e machi kakua mʉ kĩrajʉʉ b̶uu. Dai ãrea biꞌiwãe panuud̶e mʉ machi kakua sõbiad̶eeba b̶uabarii maud̶e ãrea kĩrajʉʉ b̶uabarii.
5Macedonia druad̶e neesid̶aud̶e dai poyaa kʉrrjĩrud̶awẽa panasid̶au, maumaarã ne jomad̶e ãrea biꞌiwãe panasid̶au. Ẽbẽrarã dai ome oa kachirua berreabachid̶au maud̶e dai ne wapea nibabachid̶au. 6Maamina Tito neesiid̶e dai kĩrajʉʉbiasii Dachi Akõreba chi kĩra nomaa nuree kĩrajʉʉbiabariid̶eeba. 7Dai ichi need̶a kakúaburu kĩrajʉʉd̶aabasii, maumaarã machi kakua kĩrajʉʉsid̶au. Ichiba jarasii machi ome b̶uasiid̶e machiba ichi kĩrajʉʉbiped̶aad̶a. Mau awara nebʉrʉsii machiba dai unu kʉ̃ria panuu, kachirua wauped̶aad̶a kakua kĩra nomaaba jẽa panuu maud̶e kʉ̃riad̶eeba mʉ ʉ̃rʉbena kʉ̃risia panuu. Maud̶eeba mʉ ãrea kĩrajʉʉsii.
8Mʉʉba karta naa b̶ʉd̶aba machi kĩra nomaabia b̶uasmina mʉ kĩra nomaawẽa b̶uu. Biawãra naed̶e kĩra nomaa b̶uasii. Kuitaasii machi awawarrea kĩra nomaa panasmina mau kartad̶eeba machi kĩra nomaabiasii. 9Maamina jãabae mʉ kĩrajʉʉ b̶uu. Kĩrajʉʉ b̶uuwãe machi kĩra nomaabiasiid̶eeba, maumaarã kĩrajʉʉ b̶uu machiba kachirua wau panad̶a kĩra nomaad̶eeba ida b̶ud̶aped̶a waya Dachi Akõremaa neesiid̶aud̶eeba. Biawãra Dachi Akõreba kʉ̃ria b̶uu kĩra machi kĩra nomaa paneesid̶au. Maka daiba kastikaped̶aad̶a kakua machi kachirua nuread̶aabasii. 10Ab̶aba kachirua waud̶a kakua Dachi Akõreba kʉ̃ria b̶uu kĩra nomaa b̶eeruubʉrã, ichiba kachirua waud̶a ida b̶uped̶a Dachi Akõremaa neei. Maabae Dachi Akõreba ichi karibai. Dachi Akõre ome biꞌia b̶eesiid̶eeba mau kĩra nomaa b̶uad̶a kachirua kʉ̃risiakau. Maamina ab̶aba nau iujãad̶ebenarã kĩra nomaabadau kĩra nomaaruubʉrã, kachirua ida b̶uwẽed̶eeba biui.
11Dachi Akõreba kʉ̃ria b̶uu kĩra machi kĩra nomaasid̶aud̶eeba mau kĩra nomaaba machimaa jipa kʉ̃risiabiaped̶a jipa waubiasii. Maud̶eeba machiba jipa wau panuu jomaurãmaa kuitaabiai kʉ̃ria panuu. Ãbaba kachirua waud̶a kakua machi kĩrusid̶au maud̶e Dachi Akõreba kastikai bad̶a wapeasid̶au. Maud̶eeba chi kachirua waud̶a ẽbẽra kastikad̶aped̶a ãyaa bʉisid̶au. Nejomad̶eeba machiba unubisid̶au mau kachirua waud̶a kakua nebʉraswãe panuu.7:11 Chi nuree karta griego bed̶ead̶e b̶ʉ kub̶uu: mʉ unu kʉ̃ria panuu.12Mʉʉba mau karta chi kachirua waud̶a ẽbẽra kastikai báitaburu b̶ʉʉbasii. Maud̶e chi kachirua b̶eed̶a ẽbẽra aid̶ai baita b̶ʉʉbasii. Maumaarã b̶ʉsii machiba ijãa panuud̶eeba Dachi Akõre daad̶e kuitaad̶amera biawãra dai ome panuu. 13Joma mauba dai kĩrajʉʉbiasii.
Mau awara machiba Tito kĩrajʉʉbisid̶au. Ichi machimarebena kĩrajʉʉ neesiid̶eeba dai ãrea kĩrajʉʉsid̶au. 14Tito machimaa wãi naed̶e mʉʉba machi ʉ̃rʉbena ichimaa biꞌia jarasii. Mʉʉba jarad̶a kĩra Titoba unud̶e wãsiid̶eeba mʉ machi kakua kĩra nejasiawẽa b̶uu. Joma daiba machimaa jaradeaped̶aad̶a biawãra basii. Ara mau kĩra joma daiba Titomaa machi ʉ̃rʉbena biꞌia jaraped̶aad̶a biawãra basii. 15Titoba kĩraba b̶uabarii machiba ichi bed̶ea ijãaped̶aad̶a maud̶e wapea panuud̶eeba ichi biꞌia irsibisid̶au. Maud̶eeba machi ãrea kʉ̃ria b̶uu. 16Jãabae mʉ sid̶a kĩrajʉʉ b̶uu. Mʉʉba kuitaa b̶uu machiba biawãra jipa wau panad̶ai.
8Ãbarãba sõbiad̶eeba chi nejarra deaped̶aad̶a
1Mau awara ãbarã, daiba kuitaabiai kʉ̃ria panuu Dachi Akõreba ichi sõbiad̶eeba ãbarã Macedonia druad̶ebenarã aid̶a b̶uu. 2Ãchi ãrea biꞌiwãe panumina kĩrajʉʉ panuu. Chi nejarra barauwãe panumina kĩrajʉʉba chi nejarra ãrea deasid̶au. 3Mʉʉba jaraaruu: ãchiba sõbiad̶eeba chi nejarra ãchi poyaara deasid̶au. Maud̶e ãchiba poyaa dead̶ai panad̶a aude deasid̶au. 4Daimaa ãrea chi chuburia id̶isid̶au ãchia bid̶a ãbarã Jerusalend̶ebena aid̶ad̶ai baita. 5Maud̶e ãchiba waud̶aabasii ab̶aburu daiba kʉ̃risia panad̶a kĩra. Maumaarã naa ara ãstu deasid̶au Dachi Mechiuba kʉ̃ria b̶uu kĩra waud̶ai baita. Mawãare daiba jaraped̶aad̶a wausid̶au. Maka Dachi Akõreba kʉ̃ria b̶uu kĩra arakʉd̶e wausid̶au.
6Maud̶eeba daiba Titomaa chi chuburia id̶isid̶au machimaa jarad̶e wãmera joma machiba sõbiad̶eeba dead̶ai aped̶aad̶a biawãra ped̶ai baita. 7Machiba ne jomad̶e ãrea biꞌia wau panuu: Jesusd̶e ãrea ijãa panuu, ãrea berrea kuitaa panuu, Dachi Akõred̶eeba ãrea ne kuitaa panuu, Dachi Akõreba kʉ̃ria b̶uu kĩra ãrea wau kʉ̃ria panuu maud̶e dai ãrea kʉ̃ria panuu. Maud̶eeba machiba sõbiad̶eeba chi nejarra pe panuu ãrea deásturu.
8Mʉʉba mau wáusturu awẽa b̶uu, maumaarã mʉʉba kʉ̃ria b̶uu machiba unubid̶ai ãbarã biawãra kʉ̃ria panuu. Maud̶eeba mʉʉba machimaa kuitaabiai b̶uu saka waabenarãba chi nejarra ãbarã Jerusalend̶ebena baita pe panuu. 9Machiba ãrea kuitaa panuu Dachi Mechiu Jesucristoba ichi sõbiad̶eeba waud̶a. Ichi bajãad̶e ne joma uru b̶umina, machi baita chi nejarr barauwãe b̶uu kĩra b̶uasii machiba ne joma Dachi Akõreba dea b̶uud̶ebena uru nuread̶amera.
10Mʉʉmaarã machiba naka wauduubʉrã biꞌia panad̶ai: Nabena año basiid̶e machiba waabenarã audeara naa chi nejarra ped̶ai paneesid̶au maud̶e maka waud̶ai kʉ̃riasid̶au. 11Machiba naa chi nejarra pe panasid̶aud̶e sõbiad̶eeba maka wau panasid̶au. Ara mau kĩra machiba sõbiad̶eeba dead̶ai aped̶aad̶a joma maka deásturu. Machicha dead̶ai panuu machi poyaara deásturu. 12Biawãra ab̶auba poyaa dearuu kĩra sõbiad̶eeba dearuubʉrã, mau dead̶a Dachi Akõreba biꞌia unui. Ab̶auba deai baita uru b̶uuwãebʉrã, Dachi Akõreba deábad̶e akau.
13Mʉʉba maka jarawẽa b̶uu waabenarã aid̶a panuud̶eeba machi ãrea biꞌiwãe panad̶amera. Maumaarã mʉʉba kʉ̃ria b̶uu arab̶aud̶e chiya aid̶ad̶ai. 14Mʉʉba jara b̶uu id̶ibae machiba ãrea uru panuud̶eeba ãbarã aid̶ad̶ai panuu. Ara mau kĩra machi ne wãꞌãe panuud̶e ãchiba ãrea uru panuuba machi aid̶ad̶ai panuu. Maka jomaurã arab̶aud̶e chiya aid̶a nuread̶ai. 15Dachi Akõre bed̶ead̶e naka jara b̶uu: «Chi ãrea ped̶aba ʉ̃rʉ aude uru b̶uabasii maud̶e chi b̶aꞌãra ped̶a kirib̶aebasii».8:15 Éxodo 16:18.
Pabloba Tito Corintod̶aa bʉid̶a
16Mʉʉba Dachi Akõremaa ichíturu kid̶ibai abarii. Ichiba Titomaa sõd̶eeba machi kʉ̃ria b̶uabisii mʉʉba machi kʉ̃ria b̶uu kĩra. 17Daiba ichimaa jarasid̶au machi ichiad̶e wãmera. Maabae machi ichiad̶e wã kʉ̃ria b̶uasiid̶eeba, wãsii. 18Ichi ome daiba ãba ab̶a bʉiduu. Mau ãbaba chi bed̶ea bia Cristo ʉ̃rʉbena aid̶a jaradea nibabariid̶eeba ãbarã puuruchad̶ebenaba ichi ʉ̃rʉbena biꞌia jarabadau. 19Mau awara ãbarã puuruchad̶ebenaba ichi jʉrʉ adausid̶au dai ome chi nejarra ãbarã baita peped̶aad̶a Jerusalend̶aa dead̶e wãmera. Mau daiba wau panuu ãbarãba Dachi Mechiumaa biꞌia berread̶amera maud̶e daiba biawãra aid̶a kʉ̃ria panuu unubid̶ai baita.8:19 Daiba biawãra aid̶a kʉ̃ria panuu. Griego bed̶ead̶e chi b̶ee kartad̶e naka b̶ʉ kub̶uu: Machiba biawãra aid̶a kʉ̃ria panuu.20Daiba kauwa wau panuu mau chi nejarra ãrea peped̶aad̶a adoeduud̶e ab̶au bid̶a kachirua jararãad̶amera. 21Biawãra daiba Dachi Mechiu daad̶e maud̶e ẽbẽrarã daad̶e jipa wau kʉ̃ria panuu.
22Mau ãbarã baara machimaa bʉiduud̶e, ãba june bʉid̶ai. Mau ãbaba b̶es ãrea daimaa unubiasii ãbarã ãrea aid̶a kʉ̃ria b̶uu. Id̶ibae machi ãrea aid̶a kʉ̃ria b̶uu machiba jipa waud̶ai kuitaa b̶uud̶eeba. 23Barikiuba Tito ʉ̃rʉbena id̶iiruubʉrã jarásturu ichi mʉ baara nibabarii maud̶e mʉ ome machi tãed̶e Dachi Akõre traju wau b̶uu. Barikiuba chi maarã ome ʉ̃rʉbena id̶iiruubʉrã jarásturu chi ãbarãba maarã bʉiped̶aad̶arã maud̶e ãchi kakua Cristo ʉ̃rʉbena biꞌia berrea panuu. 24Mau ãbarãmaa unubiásturu machiba ãchi biawãra kʉ̃ria panuu. Maka ãchiba kuitaad̶ai daiba machi ʉ̃rʉbena biꞌia jaraped̶aad̶a biawãra basii. Waabenarã ãbarã bid̶a ara mau kĩra kuitaad̶ai.
9Ãbarã Jerusalend̶ebena baita chi nejarra peped̶aad̶a
1Machiba ãbarã Jerusalend̶ebena baita chi nejarra pe panuu ʉ̃rʉbena mʉʉba nau kartad̶e waa b̶ʉʉbai b̶uu, 2mʉʉba kuitaa b̶uud̶eeba machiba aid̶a kʉ̃ria panuu. Maud̶eeba nama Macedonia druad̶e mʉʉba ãbarãmaa machi ʉ̃rʉbena biꞌia berreabarii. Mʉʉba ãchimaa jarabachii nabena año basid̶eed̶ebena machi Acaya druad̶ebenarãba aid̶ad̶ai baita panuu. Maka ũrisid̶aud̶eeba ãbarã ãrea Macedoniad̶ebenarãba ara mau kĩra aid̶ad̶ai kʉ̃ria panuu. 3Maud̶eeba mʉʉba nau ãbarã machimaa bʉiruu chi mʉʉba machi ʉ̃rʉbena biꞌia jarad̶a setawãe b̶uu maumaarã machiba biawãra dead̶ai baita panad̶ai. 4Maka waud̶awẽebʉrã, chi nuree Macedoniad̶ebena ãbarã mʉ baara machimaa wãaduud̶e machiba chi nejarra ped̶awẽa panuu unud̶ai basii. Maud̶eeba dai kĩra nejasiad̶ai, kʉ̃risia panuud̶eeba machiba biawãra ped̶ai bad̶a. Maud̶e machi sid̶a ãrea kĩra nejasiad̶ai. 5Maud̶eeba mʉʉba naarã ãbarãmaa chi chuburia id̶isii mʉ naa machimaa jarad̶e wãd̶amera machiba sõbiad̶eeba dead̶ai aped̶aad̶a joma ped̶amera. Maka mʉ neeruud̶e mau joma uru panad̶ai. Mauba unubiad̶ai daiba deábad̶e ad̶awẽa panuu, maumaarã machiba sõbiad̶eeba deasid̶au.
6Nau kĩrabásturu: «B̶aꞌãra uuruuba b̶aꞌãra junai. Ãrea uuruuba ãrea junai». 7Ẽbẽraba ab̶aab̶acha deai b̶uu ichi sõd̶e kʉ̃risia b̶uu kĩra. Deamaa b̶uud̶eeba deabai b̶uu, maebʉrã deábad̶e a panuud̶eeba deabai b̶uu. Chi kĩrajʉʉba dea b̶uu Dachi Akõreba kʉ̃ria b̶uu. 8Biawãra Dachi Akõreba ne joma machimaa ãrea poyaa deai. Maka ewaricha ne jomad̶e machiba uru nuread̶ai panuu biawãra uru panad̶ai maud̶e joma biꞌia waud̶ai baita. 9Dachi Akõre bed̶ead̶e naka b̶ʉ kub̶uu:
«Ichiba dead̶akasiid̶e chi nejarra barauwãe nureerãmaa ãrea deasii. Ewaricha ichiba jipa waubarii».9:9 Salmos 112:9.
10Dachi Akõreba netaa deabarii uud̶amera. Kod̶ai baita bid̶a deabarii. Netaa ãrea deabarii kĩra uud̶amera, ichiba joma ãrea machimaa deai waabenarã ãrea aid̶ad̶amera. Maud̶e jipa wau panuud̶eeba ne biꞌia ãrea unud̶ai, ne uud̶a ãrea chaubarii kĩra. 11Biawãra Dachi Akõreba machimaa ne joma ãrea deai waabenarã sõbiad̶eeba poyaa aid̶ad̶amera. Maabae machiba dai ome chi nejarra urubʉiduu ʉ̃rʉbena ãbarãba Dachi Akõremaa ichíturu kid̶ibai ad̶ai. 12Machiba chi nejarra deaduuba ab̶aburu aid̶ad̶aabai ãbarã barauwãe panuuba uru panad̶amera, maumaarã mau kakua ãchiba Dachi Akõremaa ãrea ichíturu kid̶ibai a panad̶ai. 13Machiba maka aid̶a panuuba, maka unubi panuu chi bed̶ea bia Cristo ʉ̃rʉbena biawãra ijãa panuu. Sõbiad̶eeba chi ãbarãmaa dea panuu maud̶e jomaurã aid̶a panuu. Maud̶eeba Dachi Akõremaa biꞌia berread̶ai. 14Dachi Akõreba ichi sõbiad̶eeba machi ãrea aid̶asii maarã aid̶ad̶amera. Maud̶eeba ãchiba machi ãrea kʉ̃ria panuud̶eeba Dachi Akõremaa machi baita ʉtaa id̶i panad̶ai. 15Biawãra Dachi Akõreba mau dead̶a9:15 Dachi Akõreba mau dead̶a. Mau jara b̶uu «Jesucristo». kakua dachiba Dachi Akõremaa ichíturu kid̶ibai ad̶ai panuu. Mau dead̶a aude biꞌia b̶uud̶eeba dachiba poyaa kuitaa jarad̶aabai saka b̶uu.
10Pabloba ara ichi ʉ̃rʉbena ãbarãmaa kuitaabiad̶a
1Mʉ Pablobʉ. Cristo kʉ̃riad̶eeba maud̶e ichi sõbiad̶eeba mʉʉba machimaa chi chuburia id̶iiruu mʉ bed̶ea ũrid̶amera. Waabenarãba jara panuu machi ome b̶uud̶e mʉʉba wapea b̶uabarii machi iadaai baita, maamina machi ome b̶uuwãed̶e wapeakau kartad̶eeba iadaai baita. 2Maka jara panumina machimaa neeruud̶e dai kachirua jara panuu mʉʉba biawãra iadaai. Ãchiba jara panuu dai nau kakuaba kʉ̃ria b̶uu kĩra nibabadau. Maud̶eeba machi sid̶a iadaamaaba mʉʉba chi chuburia id̶iiruu jipa waud̶amera. 3Dai nau kakuad̶e panuu maamina nau kakuad̶eeba chĩo panuuwãe kachirua poyaad̶ai baita. 4Daiba chĩod̶ai baita uru panuu nau iujãad̶ebenawãema, maumaarã Dachi Akõre poyaabariid̶eeba joma nau iujãad̶ebena kʉ̃risiabadau daiba poyaabadau.10:4 Nau iujãad̶ebena kʉ̃risiabadau. Kajuma bed̶ead̶e b̶ʉ kub̶uu: fortalezas.5Joma kʉ̃risia biꞌiwãe b̶ee maud̶e dachi nejuakayad̶eeba Dachi Akõre ʉ̃rʉbena ida kuitaabiad̶akau, daiba chi seta kuitaabiabadau. Jʉ̃a uru paneeduu kĩra daiba chi maka kʉ̃risia nuree jipa kʉ̃risiabiabadau Cristod̶e ijãad̶amera. 6Daiba ãbarã sõ chaarea nuree kastikad̶ai baita panuu. Maamina naa esed̶au panuu machiba Cristod̶e joma ijãa panuu unubiad̶amera.
7Machiba chi ʉ̃rʉbena ichia panuu. Barikiuba biawãra Cristod̶e b̶uu kʉ̃risia b̶uubʉrã, kuitaa b̶uai b̶uu dai sid̶a Cristod̶erã. 8Dachi Akõreba daimaa waubi b̶uu ʉ̃rʉbena mʉʉba ãrea berrea b̶umina mau kakua kĩra nejasia b̶uuwãe. Dachi Mechiuba daimaa maka waubi b̶uu machiba biꞌia ijãad̶amera. Ichiba dai b̶uubasii machiba ijãa panuu ida b̶ud̶amera. 9Mʉʉba kʉ̃riawẽe machiba kʉ̃risiad̶ai mʉ kartad̶eeba machi perabiai kʉ̃ria b̶uu. 10Waabenarãba jara panuu: «Pabloba kartad̶eeba ãrea iadaabarii maud̶e machimaa ãrea waubiabarii. Maamina machi ome b̶uud̶e wapea b̶uu kĩra nii maud̶e biꞌiwãe berreabarii abadau». 11Chi maka jara panuuba kuitaad̶ai panuu daiba kaitawẽeba kartad̶eeba iadaa panuu kĩra, machi baara panuud̶e maka iadaad̶ai.
12Maamina ¿sakaburu dai ara ãstu chi bibuara nuree abadau kĩra kʉ̃risiad̶aima? Ara ãstu ichiabadau maud̶e ãchid̶ebena ichiabadau kai aude bibuara nuree kuitaad̶ai baita. Maka wau panuuba, kauwa ũrid̶akau unubiabadau. 13Ara dai ʉ̃rʉbena biꞌia berread̶aabai, maumaarã Dachi Akõreba daimaa waubi b̶uu ʉ̃rʉbena biꞌia berread̶ai. Ichiba waubi b̶uu wau panuud̶eeba dai machimaa neesid̶au. 14Dai machimaa naa chi bed̶ea bia Cristo ʉ̃rʉbena jaradead̶e wãsid̶au. Maka b̶uad̶awãe basirã id̶ibae machimaa jaradeaduud̶e, Dachi Akõreba bʉid̶awãemaa panad̶aabai basii. 15Waabenarãba wauped̶aad̶a kakua ara dai ʉ̃rʉbena biꞌia berread̶akau ara daiba wauped̶aad̶a kĩra. Maumaarã daiba kʉ̃ria panuu machiba Cristod̶e biꞌia ijãad̶ai. Maka daiba machi druad̶e poyaa biꞌia jaradead̶ai ara Dachi Akõreba waubi b̶uu kĩra. 16Jãabae chi bed̶ea bia Cristo ʉ̃rʉbena waabena druad̶e bid̶a jaradead̶ai. Maamina waabenarãba jaradeaped̶aad̶amaa wãd̶aabai, mau waabenarãba wauped̶aad̶a daiburu wausid̶au ad̶aamaaba. 17Dachi Akõre bed̶ead̶e b̶ʉ kub̶uu: «Ab̶auba biꞌia berrearuubʉrã, Dachi Mechiu ʉ̃rʉbena biꞌia berreai b̶uu».10:17 Jeremías 9:24.18Ab̶auba ara ichi ʉ̃rʉbena biꞌia jaraaruubʉrã, mauba jara b̶uuwãe Dachi Mechiuba mau ẽbẽra biꞌia unu b̶uu. Maumaarã chi Dachi Mechiuba biꞌia jara b̶uu ẽbẽra biꞌia unu b̶uu.
11Jesucristoba bʉid̶arã kĩra nuree
1Mʉ kʉ̃risiaswãe nii kĩra berrea b̶umina kʉ̃ria b̶uu machiba dauchia jãadua panad̶ai. Mʉ chi chuburia id̶iiruu mʉʉba jaraaruu ũrísturu. 2Dachi Akõreba nubia b̶uu kĩra mʉʉba machi ãrea nu kʉ̃ria b̶uu. Ẽbẽraba ichi kau kima dearuu kĩra mʉʉba machi Cristomaa dea kʉ̃ria b̶uu ara ichid̶irã nuread̶amera. Mʉʉba kʉ̃ria b̶uu machi ichi baita ãrea biꞌia nuread̶ai ãwera mukĩra adua b̶uu kĩra. 3Maamina mʉʉba wapea b̶uu waabenarãba machi setaa kũruad̶ai damaba kʉ̃risia kuitaad̶eeba Eva setaa kũruad̶a kĩra.11:3 Génesis 3:1-13. Makarã machiba Cristod̶e biawãra sõd̶eeba ijãa panuu ida b̶ud̶ai. 4Dai diware nuree need̶aba Jesús ʉ̃rʉbena daiba jaradeaped̶aad̶a awara jaradearuud̶e maebʉrã chi Dachi Akõre Jauri machiba adauped̶aad̶a ʉ̃rʉbena awara jaradearuud̶e machiba kauwa ũribadau. Maud̶e chi bed̶ea bia machiba ijãaped̶aad̶a awara jaradearuud̶e kauwa ũribadau. 5Chi maka jaradeabadaurã ¿machimaarã, jãarã Jesucristoba bʉid̶arã chi aude bibuararãka? Mʉʉmaarã, ãchi audeara mʉ chi aude kaebeu b̶uwãema. 6Mʉ biꞌia berreakamina, biawãra bed̶ea ãrea kuitaa nii. Mau biawãra bed̶ea daiba nejomad̶eeba machimaa arakʉd̶e kuitaabiasid̶au.
7Mʉʉba chi bed̶ea bia Dachi Akõre ʉ̃rʉbena machimaa chi nejarra id̶iyuswãe jaradeasiid̶eeba mʉ machi daad̶e kaebeu kĩra b̶eesii Dachi Akõre ome biꞌia nuread̶amera. ¿Makarã kachirua wauska? 8Waabena ãbarãba chi nejarra mʉʉmaa deasid̶au machimaa poyaa ãrea jaradea b̶uamera. 9Mʉ machimare b̶uasiid̶e ne joma uru b̶uabasmina machimaa ne id̶iibasii. Maumaarã mʉʉba wãꞌãe b̶uad̶a ãbarã Macedoniad̶ebena neeped̶aad̶aba joma mʉʉmaa deasid̶au. Mʉʉba ne ab̶a bid̶a machimaa id̶iibasii maud̶e id̶iwẽa b̶uai. 10Cristo mʉ sõd̶e b̶uud̶eeba biawãra jaraaruu: Mʉʉba machid̶eeba chi nejarra adauwẽa b̶uu aaruud̶e, chi waabenarã audeara nii kĩra jara b̶uu. Acaya druad̶ebenarã ab̶au bid̶a poyaa jarad̶aabai mʉʉba maka jaraabai b̶uu. 11¿Mʉʉba sakãe maka chi nejarra id̶iwẽa b̶uma? ¿Machi kʉ̃riawẽa b̶uud̶eeba maka wau b̶uka? Dachi Akõreba kuitaa b̶uu mʉʉba machi kʉ̃ria b̶uu.
12Ara mʉʉba waubarii kĩra wau b̶eei. Chi dai kĩra wau panuu abadaurãba maka berreabadau waabenarã audeara nuree a kʉ̃risia panuud̶eeba. Maamina ab̶au bid̶a poyaa jarad̶aabai dai kĩra wau panuu. 13Ãchi Cristoba bʉid̶arãwãema, maumaarã waabenarã setaa kũruabadaurãbʉ. Setad̶eeba kʉ̃risiabiabadau ãchi Cristoba bʉid̶arã. 14Jãarã ʉ̃rʉbena machiba kauwa kʉ̃risiad̶ai adua panuuwãema. Satanás sid̶a ángel ʉ̃d̶aad̶ebena kĩra neebarii. 15Maud̶eeba ichi baita bari trajabadaurã bid̶a jipa wau panuu kĩra needuubʉrã machiba kʉ̃risiad̶aabai panuu saka jãka needuu. Maamina ãchi biud̶ai ewarid̶e ãchiba kachirua wauped̶aad̶a kĩra kastikai.
Pablo ãrea biꞌiwãe b̶uu tãed̶e kĩrajʉʉd̶a
16Mʉʉba waya jaraaruu: ab̶au bid̶a kʉ̃risiabai b̶uu mʉ kʉ̃risiaswãe nii. Maamina maka kʉ̃risiaduubʉrã, mʉ kʉ̃risiaswãe nii kĩra ida berreabísturu mʉa bid̶a ara mʉ ʉ̃rʉbena b̶istĩika biꞌia berreai baita. 17Ara mʉ ʉ̃rʉbena biꞌia berrea b̶uud̶e Dachi Mechiuba maka berreabiwẽa b̶uu, maumaarã mʉ kʉ̃risiaswãe nii kĩra berrea b̶uu. 18Ãreaba ara ãchi ʉ̃rʉbena ãrea berreabadau nau iujãad̶ebenarãba waubadau kĩra. Maud̶eeba mʉa bid̶a ara mʉ ʉ̃rʉbena biꞌia berreai. 19Machi kʉ̃riskawa nureed̶eeba nau kʉ̃risiaswãe niiba jaradea b̶uu machiba dauchia jãadua panabadau.11:19 Nau kʉ̃risiaswãe niiba. Nama Pabloba ara ichíturu jara b̶uu.20Machi ãchi baita bari trajabadaurã kĩra paneebiaduud̶e, machi kod̶ai bad̶a kooduud̶e, machid̶e juakaa adauduud̶e, maarãba machi aude bibuara nuree kʉ̃risiaduud̶e maebʉrã machi kĩedarr sĩiduud̶e machiba ida kabibadau. 21Mʉʉba jaraaruu: mʉ machi tãed̶e b̶uasiid̶e, jãarã kĩra b̶uabasii. Machimaarã, mʉ maka chi poyaabariiswãe b̶uad̶a kakua, ¿nejasia b̶uai b̶uka?
Ab̶auba ara ichi ʉ̃rʉbena poyaa biꞌia berrearuubʉrã, mʉa bid̶a ara mʉ ʉ̃rʉbena poyaa biꞌia kʉ̃riai. Maamina maka berrearuud̶e kʉ̃risiaswãe nii kĩra berreai b̶uu. 22Ãchi hebreorã a panuu. ¿Mʉ sid̶a arab̶auwãeka? Ãchi Israeld̶ebenarã a panuu. ¿Mʉ sid̶a arab̶auwãeka? Ãchi Abrahamd̶ebena imiped̶aad̶arã a panuu. ¿Mʉ sid̶a arab̶auwãeka? 23Ãchi Cristo baita bari trajabadaurã a panuu. Maamina ãchi audeara mʉʉba biꞌia Cristoba kʉ̃ria b̶uu waubarii. Maka berrea b̶uud̶e kʉ̃risiaswãe nii kĩra berrea b̶uu. Biawãra ãchi audeara mʉʉba Dachi Akõre traju audeara waubarii. Ãchi audeara ẽbẽrarãba mʉ b̶es ãrea sĩsid̶au. Ãchi audeara mʉ b̶es ãrea jʉ̃a uru panasid̶au. B̶es ãrea mʉ biumaa b̶uasii. 24B̶es jua ab̶a judiorãba mʉ jidausid̶au. Jidauduucha soaba 39 b̶es pesid̶au. 25B̶es õbea mʉ jidaud̶aped̶a bakuruba usid̶au. B̶es ab̶a mʉ mooba b̶atasid̶au bead̶ai baita. B̶es õbea mʉ mard̶e wãsiid̶e, jãba taawãsii. B̶es ab̶a ãyadaa maud̶e ẽsabud̶e mʉ mar ẽsa ũu b̶uasii.
26Mʉ od̶e wãaruud̶e, do che nub̶uud̶e nibabachii, maud̶e nechiruabadau baraumare nibabachii. Ara mʉ ẽbẽrarã judiorã tãed̶e maud̶e judiowãerã tãed̶e mʉ kachiruad̶e b̶uasii. Puurud̶e maud̶e puuru awara mʉ kachiruad̶e b̶uasii. Mard̶e bid̶a kachiruad̶e b̶uasii. Biawãra ãbarãwãe kakua mʉ kachiruad̶e b̶uasii. 27Traja b̶uud̶e mʉ ãrea biꞌiwãe b̶uabachii. B̶es ãrea kãi b̶eeka basii, jarrbaa b̶uabachii, obisia b̶uabachii, kowẽa b̶uabachii. Kũrasãaba mʉ uri b̶uabachii maud̶e paruswãe b̶uabachii. 28Mau awara ewaricha joma ãbarã druachad̶ebena ʉ̃rʉbena mʉ ãrea jirukaraa b̶uabarii. 29Ab̶a ẽpermo b̶eeruubʉrã, mʉ sid̶a ẽpermo b̶eeruu kĩra b̶uabarii. Ab̶auba waabena ãba kachiruad̶e b̶aebiiruubʉrã, mʉ mau ẽbẽra ome kĩrubarii.
30Ara mʉ ʉ̃rʉbena biꞌia berrearuubʉrã, mʉ meserãaswãe nii ʉ̃rʉbena biꞌia berreai. 31Dachi Bajãad̶ebena Mechiu Jesús Akõre ʉ̃rʉbena ewaricha biꞌia berread̶ai panuu. Ichiba kuitaa b̶uu mʉ setaa jarakau. 32Damasco puurud̶e b̶uasiid̶e chi rey Aretasba ichi puuru nubariimaa mʉ jʉrʉbisii jidaumera. 33Maamina ãbarãba mʉ ẽ mechiud̶e ed̶a joad̶aped̶a, maabae chi puuru mooba ad̶u karaad̶a chob̶ea nub̶uud̶e ʉ̃rʉʉba ed̶aa bʉisid̶au. Maka ichi juakaa jĩidru wãsii.11:33 Hechos 9:23-25.
12Pabloba bajãad̶e unud̶a
1Waya ara mʉ ʉ̃rʉbena biꞌia berreai, mauba waabenarã aid̶akamina. Dachi Mechiuba mʉ daumaa unubid̶a maud̶e kuitaabid̶a mʉʉba jaraaruu. 2Cristod̶e ijãabarii ẽbẽra ab̶a mʉʉba unubarii.12:2 Pabloba ara ichi ʉ̃rʉbena maka jara b̶uu. Maamina mirubia jara b̶uu ẽbẽrarãba kʉ̃risiarãad̶amera ichi chi mechiu nii a jara b̶uu. Año 14 basiid̶e, Dachi Akõreba mau ãba bajãad̶aa ichi b̶uumaa adoesii.12:2 Bajãad̶aa ichi b̶uumaa. Griego bed̶ead̶e naka b̶ʉ kub̶uu: õbeabena bajãad̶aa. Chi judiorãmaarã, mau jara b̶uu «Dachi Akõre b̶uabarii». Mʉʉba adua b̶uu Dachi Akõreba ichi chi kakua adoe b̶uasii maebʉrã ab̶aburu ichi jauri adoe b̶uasii. Dachi Akõréburu mau kuitaa b̶uu. 3-4Maamina mʉʉba kuitaa b̶uu Dachi Akõreba mau ãba ichi bajãa biꞌia b̶uud̶aa adoe b̶uasii. Aria mau ãbaba bed̶ea bia ũrisii dachiba poyaa kuitaa jarad̶akau maud̶e nau iujãad̶e jarad̶aabai b̶uu. Biawãra mʉʉba adua b̶uu Dachi Akõreba ichi kakua adoe b̶uasii maebʉrã ab̶aburu ichi jauri adoe b̶uasii. Dachi Akõréburu mau kuitaa b̶uu. 5Mau ãba ʉ̃rʉbena mʉʉba biꞌia berreai, maamina ara mʉ ʉ̃rʉbena biꞌia berreawẽma. Ab̶aburu mʉ meserãaswãe nii ʉ̃rʉbena biꞌia berreai. 6Biawãra ara mʉ ʉ̃rʉbena biꞌia berrea kʉ̃ria basirã mʉ kʉ̃risiaswãe nii kĩra berreabasii, biawãra bed̶ea berreai basiid̶eeba. Maamina mʉ maka berreawẽma ab̶au bid̶a mʉ biꞌia b̶uu kʉ̃risiarãad̶amera. Maumaarã mʉʉba kʉ̃ria b̶uu machiba mʉ ʉ̃rʉbena arakʉd̶e kʉ̃risiad̶ai mʉʉba wau b̶uu unu panuud̶eeba maud̶e mʉʉba jaradea b̶uu ũri panuud̶eeba.
7Dachi Akõreba mʉʉmaa bajãad̶e unubid̶a ãrea bibuara b̶uasii. Maamina mʉʉba ara mʉ ʉ̃rʉbena ãrea biꞌia kʉ̃risiarãamera, Dachi Akõreba mʉʉmaa puꞌuabisii ʉriba su nub̶uu kĩra. Satanasba bʉid̶aba maka waubarii. 8Mʉʉba b̶es õbea Dachi Mechiumaa chi chuburia id̶isii mau puꞌua wãꞌãebimera. 9Maamina ichiba jarasii: «Mʉ sõbiad̶eeba bichi aid̶ai joma dauchia jãadua b̶uamera. Bichi meserãaswãe b̶uud̶e mʉ jua aude meserãa b̶uu». Mʉ meserãaswãe b̶uud̶e Cristo poyaa b̶uabariid̶eeba mʉ meserãaswãe b̶uu ʉ̃rʉbena kĩrajʉʉba biꞌia berreai. 10Cristo kakua ãrea biꞌiwãe b̶uud̶e, meserãaswãe b̶uud̶e, ne wãꞌãe b̶uud̶e, ẽbẽrarãba mʉ ʉ̃rʉbena kachirua jara panuud̶e maud̶e kachirua waud̶ai baita wãraa panuud̶e mʉ kĩrajʉʉ b̶uu. Biawãra mʉ meserãaswãe b̶uud̶e Cristod̶eeba meserãa nii.
Corintod̶ebena ãbarã ʉ̃rʉbena Pabloba kʉ̃risia b̶uad̶a
11Mʉ kʉ̃risiaswãe nii kĩra ara mʉ ʉ̃rʉbena biꞌia berrea b̶uu, maamina machiaburu mʉ maka berreabisid̶au. Machiba mʉ ʉ̃rʉbena biꞌia berread̶ai panumina biꞌia berread̶awẽa panuu. Maud̶e kʉ̃risia panuu jãarã Jesucristoba bʉid̶arã abadaurã chi mechiu nuree. Mʉ chi mechiuwãemina ãchi audeara kaebeu b̶uuwãe. 12Mʉ machi tãed̶e b̶uasiid̶e joma wausii, Jesucristoba bʉid̶arãba waubadau kĩra. Joma dauchia jãadua b̶uasii maud̶e ẽbẽrarãba ne poyaa waud̶akau waubachii. 13¿Mʉʉba kãared̶eeba machi waabena puurud̶ebena ãbarã audeara kachirua wausma? ¿Ab̶aburu machid̶ebena mʉʉba ne id̶iwẽa b̶uasiid̶eeba, maka kʉ̃risia panuka? Maka b̶uubʉrã ¡mau kachirua waud̶a michuburia perdonásturu!
14Mʉ machimaa wãi baita b̶uu. Nauba b̶es õbea bai wãaruu. Maamina mʉʉba id̶iwẽma machiba aid̶ad̶amera. Machiba uru b̶ee jʉrʉ b̶uuwãe, maumaarã machi kʉ̃ria b̶uu. Warrarãba chi nejarra jaatʉd̶akau ãchi akõrerãmaa dead̶ai baita, maumaarã chi akõrerãba chi nejarra jaatʉbadau ãchi warrarãmaa dead̶ai baita. 15Ara mʉ maud̶e joma mʉʉba uru b̶uu kĩrajʉʉ deai machi aid̶ai baita. Mʉ ãrea kʉ̃riad̶awẽa panumina, mʉʉba machi aude kʉ̃riakua b̶uai.
16Machiba kuitaa panuu mʉʉba machi chi nejarra b̶aꞌãra bid̶a id̶iibasii. Maamina chi waabenarãmaarã mʉ kʉ̃risia kuitaad̶eeba machi setaa kũruasii chi nejarra adaui baita. 17Mʉʉba ãbarã bʉisiid̶e ¿ãchid̶eeba machi setaa kũruaska chi nejarra adaui baita? 18Mʉʉba Titomaa chi chuburia id̶isii machi ichiad̶e wãmera. Junebena ãba sid̶a ichi ome bʉisii. Ãchi wãsid̶aud̶e ¿Titoba machi setaa kũruaska chi nejarra adaui baita? ¿Daiba arab̶au kʉ̃risia uru panad̶aabaska? ¿Ara mau kĩra nibad̶aabaska?
19¿Machimaarã daiba maka jara panuka dai ʉ̃rʉbena kachirua kʉ̃risiarãad̶amera? Makawãema. Ãbarã, dai Cristod̶erãd̶eeba Dachi Akõre daad̶e joma mau jara panuu machiba biꞌia ijãad̶amera. 20Mʉʉba wapea b̶uu machimaa wãped̶a machi unuubai mʉʉba unu kʉ̃ria b̶uu kĩra. ¡Maud̶e machiba mʉ unud̶aabai machiba kʉ̃ria panuu kĩra, machi iadaaid̶eeba! Biawãra mʉʉba wapea b̶uu unud̶e wãi machi oa kachirua berrea panuu, waabenarãba ne uru panuu kakua kĩra kachirua panuu, kĩru panuu, ara machi biꞌia panad̶ai baita jʉrʉ panuu, waabenarã ʉ̃rʉbena oa kachirua berrea panuu, waabenarã ʉ̃rʉbena setaa jara panuu, chi aude mechiu nii kʉ̃risia panuu, maud̶e kĩrubika bara b̶uu. 21Mʉʉba wapea b̶uu machimaa waya neeruud̶e Dachi Akõreba mʉ kaebeu kĩra b̶ui, machi kakua. Maud̶e ãrea machiba naed̶e kachirua wau panad̶a wabid̶a wau panuud̶eeba mʉ jẽai. Machiba chi Dachi Akõremaarã biꞌiwãe waubadau, dachi kakuaba barikia kachirua waubadau maud̶e waabenarã daad̶e kĩra nejasia waubadau wabid̶a mau ida b̶ud̶awẽa panuud̶eeba jẽai.
13Pabloba nau kartad̶e aanama b̶ʉd̶a
1Dachi Akõre bed̶ead̶e naka jara b̶uu: «Ab̶auba kachirua waud̶a ichiaduud̶e ẽbẽra ome maebʉrã õbea panad̶ai panuu. Maud̶e ichiba kachirua waud̶a ʉ̃rʉbena arab̶aud̶e jaraaduubʉrã, kuitaad̶ai biawãra kachirua wausii».13:1 Deuteronomio 19:15. Nauba b̶es õbea mʉ machimaa wãaruud̶eeba iadaai Dachi Akõre bed̶ead̶e jara b̶uu kĩra. 2B̶es ome machimaa wãsiid̶e mʉʉba jarasii kachirua wau nureerãmaa waa waurãad̶amera. Maka waud̶awẽebʉrã, waya neeruud̶e mʉʉba ãchi kĩra chuburiabai asii. Maud̶e ara ʉ̃raud̶e mʉ machi baara b̶uuwãemina arab̶aud̶e jaraaruu: kachirua wau nureerãba ida b̶ud̶awẽebʉrã, mʉ waya wãaruud̶e ãchi kĩra chuburiabai. 3Machiba Cristo biawãra mʉʉd̶eeba berrea b̶uu kuitaa kʉ̃ria panuud̶eeba, mʉʉba maka unubiai. Cristoba ara ichi meserãaswãe nii machimaa unubiakau, maumaarã meserãa nii unubia b̶uu. 4Ichi meserãaswãe nii kĩra cruzd̶e jirab̶usid̶amina Dachi Akõre poyaabariid̶eeba chokae nii. Dai sid̶a meserãaswãe panuu ichi meserãaswãe b̶uad̶a kĩra, maamina machimaa unubiad̶ai ichi ome dai Dachi Akõre poyaabariid̶eeba panad̶ai.
5Ara machicha ãrea kʉ̃risiásturu biawãra Jesusd̶e ijãa panuu kuitaad̶ai baita. Ara machicha ãrea ichiásturu jipa nibad̶a kuitaad̶ai baita. ¿Machiba adua panuka Jesucristo machi sõd̶e b̶uu? Machi sõd̶e b̶uuwãebʉrã ichid̶irãwãema. 6Maamina machi sõd̶e b̶uu kuitaaduubʉrã mʉʉba kʉ̃risia b̶uu machiba kuitaad̶ai dai biawãra Jesucristoba bʉid̶arã. 7Daiba Dachi Akõremaa id̶i panuu machiba kachirua waurãad̶amera. Maamina maka id̶i panuuwãema unubid̶ai baita dai Jesucristoba bʉid̶arã. Maumaarã id̶i panuu machiba joma biꞌia waud̶amera, dai Jesucristoba bʉid̶arã kʉ̃risiad̶awẽa panumina. 8Daiba chi biawãra bed̶ea poyaa kĩra awara waud̶aabai, maumaarã chi biawãra bed̶ea joma waud̶ai panuu. 9Machiba ãrea ijãa panuubʉrã dai meserãaswãe panumina kĩrajʉʉ panuu. Mau awara daiba Dachi Akõremaa ʉtaa id̶i panuu machiba jipa wau panad̶amera. 10Maud̶eeba machimaa wãi naed̶e mʉʉba nau karta urubʉiruu. Machiba mau ijãaduubʉrã machimaa neeruud̶e mʉʉba iadaabai. Biawãra Dachi Mechiu Jesusba mʉ b̶uubasii machi kachirua waud̶amera, maumaarã mʉ b̶usii machiba biꞌia ijãad̶amera.
11Ãbarã, kaad̶eare mʉʉba naka b̶ʉʉruu: kĩrajʉʉ panásturu, waya jipa wau panásturu, mʉʉba jara b̶uu wau panásturu, arab̶au kʉ̃risia uru panásturu maud̶e jirukaraayuwãe panásturu. Makarã chi Dachi Akõreba dachimaa kʉ̃riabiabarii maud̶e jirukaraayuwãe b̶uabiabarii machi ome b̶uai. 12Biawãra kʉ̃riad̶eeba chiya biꞌia berreásturu.13:12 Biawãra kʉ̃riad̶eeba. Griego bed̶ead̶e naka b̶ʉ kub̶uu: kĩedarr ʉ̃yásturu.13Joma namabena ãbarãba kʉ̃ria panuu machi biꞌia duanad̶ai.
14Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi aid̶a b̶uai, Dachi Akõreba ãrea kʉ̃ria b̶uai maud̶e ewaricha Dachi Akõre Jauriba ãbua biꞌia uru b̶uai.