1 Timoteo
Nabena karta Pabloba b̶ʉd̶a Timoteo baita
Pabloba nau karta Timoteo baita b̶ʉsii. Timoteo Listra puurud̶ebena basii. Chi naa Pablo mau puurud̶aa wãd̶a ʉ̃rʉbena b̶ʉ kub̶uu Hechos 14:6-23d̶e. Pabloba Timoteo ichi ome jaradead̶e wãmera adoed̶a ʉ̃rʉbena b̶ʉ kub̶uu Hechos 16:1-3d̶e. Ãchi omeeba chi bed̶ea bia Jesús ʉ̃rʉbena puuru ãread̶e jaradeasid̶au.
Pablo Roma puurud̶e jʉ̃a b̶uad̶a año 62d̶e awara wãsii. Maabae waya Éfeso puurud̶aa wãsii. Timoteo ara b̶ʉisii ãbarã nebʉrad̶e panuu aid̶amera. Maabae Macedonia druad̶aa wãsii. Nau nabena karta mamauba Timoteo baita urubʉisii kʉ̃risia bia deai baita.
Efesod̶e waabenarãba chi nabẽraed̶ebena kʉ̃risia jaradea panasid̶au. Maamina Pabloba b̶ʉsii chi bed̶ea bia Cristo ʉ̃rʉbena ijãa panuud̶eeba dachi kachiruad̶ebena karibad̶ai (1:1-20). Mawãare b̶ʉsii saka ãbarãba Dachi Akõremaa ʉtaa id̶id̶ai panuu (2:1-8), neekaurã saka nuread̶ai panuu (2:9-15) maud̶e ãbarã jaradea ua b̶uabadaurã saka nuread̶ai panuu (3:1-16). Capítulo 4d̶e Pabloba b̶ʉsii setaa jaradeabadaurã ʉ̃rʉbena maud̶e saka Jesucristo baita bari trajabarii nibai b̶uu ʉ̃rʉbena. Mawãare b̶ʉsii chi ijãabadaurã nubadaurãba saka ãbarã nui b̶uu (5:1—6:2). Kaad̶eare b̶ʉsii chi Cristod̶e ijãa b̶uuba chi seta ida b̶uped̶a chi bed̶ea biawãra ijãai b̶uu. Mau awara b̶ʉsii chi nejarra awaabai b̶uu ʉ̃rʉbena, maumaarã ne bia waui b̶uu bajãad̶e ne bia uru b̶uai baita (6:3-21).
1Pabloba nau kartad̶e naa b̶ʉd̶a
1Mʉ Pablobʉ, Jesucristoba bʉid̶a. Dachi Akõre chi Karibabariiba maud̶e Dachi Mechiu Jesucristoba mʉ naka b̶usid̶au. Ara mau Jesucristod̶eeba dachi biawãra biꞌia nuread̶ai kuitaa panuu. Dachiba Jesucristod̶e ijãabadau maud̶e ichi kakua biꞌia nuread̶ai kuitaabadau. 2Timoteo, mʉʉba nau karta bichi baita b̶ʉʉruu. Mʉʉd̶eeba Cristod̶e ijãasiid̶eeba bichi biawãra mʉ warr kĩra b̶uu. Mʉʉba kʉ̃ria b̶uu Dachi Bajãad̶ebena Akõreba1:2 Dachi Bajãad̶ebena Akõre. Kajuma bed̶ead̶e b̶ʉ kub̶uu: Dios el Padre. maud̶e Dachi Mechiu Jesucristoba kĩra chuburia panad̶amera, ãchi sõbiad̶eeba aid̶a panad̶amera, maud̶e jirukaraayuwãe panabid̶amera.
Setaa jaradeabadaurãmaa ida jaradeabiarã́se
3Mʉʉba bichimaa chi chuburia id̶id̶a kĩra Macedonia druad̶aa wãsiid̶e, maucha jaraaruu: Efesod̶e b̶eese, chi ãyaa jaradeabadaurã waa setaa ida jaradeabiarãad̶amera. 4Ãchimaa jarase nabẽraed̶ebena nebʉrʉ maud̶e dachi nabẽraed̶ebenarã trʉ̃ ãrea jaradeabadau ʉ̃rʉbena ãrea kʉ̃risiarãad̶amera. Maud̶eeba oa kachirua berrea duaneebiabarii. Mauba dachi aid̶akau Dachi Akõreba waubi b̶uu waud̶amera. Ab̶a ichi bed̶ea ijãa panuud̶eeburu poyaa waud̶ai. 5Mʉʉba maka jara b̶uu ãbarã kʉ̃risia sõbiad̶eeba, biawãra Dachi Akõred̶e ijãa panuud̶eeba chiya kʉ̃ria duanad̶amera. 6Maamina waabenarã o ãyare wãsid̶au. Maabae barikia dachi aid̶akau bed̶eáturu berreabadau. 7Ãchiba Moisesba b̶ʉd̶a jaradeabadaurã ba kʉ̃ria panuu, maamina ãrea kuitaa panuu kĩra jaradeabadamina adua panuu kãare jaradea panuu.
8Dachiba kuitaa panuu Moisesba b̶ʉd̶a bibuara b̶uu. Maamina arakʉd̶e jaradead̶ai panuu. 9Nau kuitaad̶ai panuu: Dachi Akõreba mau Moisesba b̶ʉd̶a deabasii chi jipa nuree baita, maumaarã deasii chi Dachi Akõreba jara b̶uu kĩra waud̶akaurã baita, ũribabaswãe nuree baita, Dachi Akõreswãe nuree baita, kachirua wau nuree baita, Dachi Akõre wapead̶akau baita, chi nau iujãad̶ebenarã kĩra panabadaurã baita, ãchi akõrerã beabadau baita, mia beabadau baita, 10junebena ome kãi topaneebadaurã baita, ãchi arab̶aurã ome mia pera waubadaurã baita, ẽbẽrarã jidaud̶aped̶a nedobʉibadaurã baita, setaa jarabadaurã baita, chi juez kĩraare setaa jarabadau baita maud̶e chi biawãra bed̶ea jara b̶uu waud̶akaurã baita. 11Dachiba chi Dachi Akõre ʉ̃rʉbena bed̶ea bia jaradeaduud̶e mau joma kauwa kuitaabid̶ai. Dachi Akõre bia niiba mau mʉʉmaa deasii jaradea b̶uamera.
Dachi Akõreba Pablo kĩra chuburiad̶a
12Dachi Mechiu Jesucristoba mʉʉmaa poyaabarii deasii ichi bed̶ea jaradea b̶uamera. Kuitaasii mʉʉba ne joma jipa waui ichi baita. Maud̶eeba mʉ iusii ichiba kʉ̃ria b̶uu wau b̶uamera. Mau baita mʉʉba ichíturu kid̶ibai b̶uu ai. 13Naed̶e mʉʉba ichi ʉ̃rʉbena kachirua berreabachii maud̶e ichid̶irã kachirua waui baita wãraabachii. Waabenarãmaa kachirua berreabachii. Ichid̶e wabid̶a ijãawẽa b̶uasiid̶eeba maud̶e adua b̶uasiid̶eeba maka kachirua waubachii. Maamina ichiba mʉ kĩra chuburiasii. 14Dachi Mechiu Jesucristoba ichi sõbiad̶eeba mʉ ãrea karibasii ichid̶e ijãamera maud̶e ichi kʉ̃ria uru b̶uamera.
15Nau bed̶ea biawãrad̶eeba jomaurãba mau ijãad̶ai panuu: Jesucristo nau druad̶aa neesii kachirua waubadaurã karibai baita. Maarãd̶ebena mʉ chi aude kachirua b̶uasii. 16Maamina maud̶eeba Dachi Akõreba mʉ kĩra chuburiasii. Maka Jesucristoba mʉ, chi aude kachirua wau b̶uad̶ad̶eeba unubisii ichi joma dauchia jãadua esed̶au b̶uai b̶uu. Mʉʉd̶eeba chi wabid̶a ijãad̶akaurãmaa kuitaabiasii saka ẽbẽra kachirua kĩra chuburiabarii ewaricha chokae b̶uamera. 17Dachi Akõre ewaricha jomaurã Reybʉ. Mau chi dachiba unud̶akau biukau. Ichíturu ab̶aburu nii.1:17 Ichíturu ab̶aburu nii. Griego bed̶ead̶e chi b̶ee kartad̶e b̶ʉ kub̶uu: ab̶aburu mau chi kuitaa nii Dachi Akõrebʉ. Ichíturu dachiba ewaricha biꞌia berread̶ai panuu maud̶e wapead̶ai panuu. Maka biꞌia b̶uase.
18-19Mʉ warr Timoteo, mʉʉba Dachi Akõreba naa jarabʉid̶a bichi ʉ̃rʉbena kʉ̃risiaruud̶e, bichiba waui b̶uu jarabʉiruu. Maka Cristod̶e ijãa b̶uud̶eeba, kʉ̃risia jipa b̶uud̶eeba chi biawãra bed̶ea uru b̶uase waabenarã tãed̶e kokoroa chĩobarii kĩra. Waabenarãba mau kʉ̃risia bia uru panad̶a ida b̶ud̶aped̶a ãchiba Cristod̶e ijãa panuu ida b̶usid̶au. 20Maarãd̶ebena ab̶a Himeneo basii. Maud̶e ab̶a Alejandro basii. Maarã mʉʉba Satanás juad̶e b̶usii kuitaad̶amera Dachi Akõre ʉ̃rʉbena waa kachirua berrearãad̶amera.
2Dachi Akõremaa ʉtaa id̶id̶ai panuu ʉ̃rʉbena
1Nau biꞌia jaraaruu: joma ẽbẽrarã baita ãbarãba Dachi Akõremaa chi chuburia id̶id̶ai panuu, ichiba karibamera ʉtaa id̶id̶ai panuu maud̶e ichíturu kid̶ibai ad̶ai panuu. 2Joma nau iujãad̶ebena reyrã baita maud̶e jaradea ua b̶uabadaurã baita Dachi Akõremaa ʉtaa id̶id̶ai panuu dachi jirukaraayuwãe panad̶ai baita, apii panad̶ai baita, Dachi Akõre wapea panad̶ai baita maud̶e ne jomad̶e jipa panad̶ai baita. 3Maka ʉtaa id̶i panad̶ai biꞌia b̶uu. Dachi Karibabarii Dachi Akõreba mau biꞌia unu b̶uu. 4Ichiba kʉ̃ria b̶uu jomaurãba chi biawãra bed̶ea kuitaaped̶aad̶a kachiruad̶ebena karibad̶ai. 5Dachi Akõre ab̶aburu nii. Maud̶e chi ẽbẽrarã Dachi Akõre ome nebʉrad̶e panad̶a mau biꞌia nibabiabarii ab̶aburu nii. Mau ẽbẽra Jesucristobʉ. 6Ara ichi ida beabisii ẽbẽrarã joma kariba b̶uai baita. Dachi Akõreba b̶ud̶a ewarid̶e mau kuitaabisii. 7Mau baita mʉ ichi bed̶ea jarabarii b̶usii. Mʉ ichiba bʉid̶a b̶usii chi biawãra bed̶ea ichi ijãad̶ai panuu ʉ̃rʉbena judiowãerãmaa jaradead̶e wãmera. Mʉʉba biawãra jara b̶uu2:7 Mʉʉba biawãra jara b̶uu. Griego bed̶ead̶e chi b̶ee kartad̶e naka b̶ʉ kub̶uu: Mʉ chi Cristod̶ebena biawãra jara b̶uu. maud̶e setawãe b̶uu.
8Maud̶eeba, ãbarã araa ãbua imiiduucha mʉʉba kʉ̃ria b̶uu mukĩrarãba kʉ̃risia biad̶eeba ãchi jua ʉtaa jiraaduud̶e Dachi Akõremaa ʉtaa id̶id̶amera. Maud̶e kĩru panad̶aabai panuu maud̶e oa kachirua berrea panad̶aabai panuu.2:8 Dachi Akõremaa ʉtaa id̶id̶amera. Mau ewarid̶e ẽbẽrarãba jua ʉtaa jirabachid̶au Dachi Akõremaa ʉtaa id̶iiduud̶e. Maud̶eeba b̶esed̶e Dachi Akõremaa ʉtaa id̶id̶ai jarad̶ai bad̶amaarã jarabachid̶au: «Jua ʉtaa jirad̶ai».9Mʉʉba kʉ̃ria b̶uu wẽrarãba paru arakʉd̶e jʉ̃d̶amera, wẽrarã jipa nureeba jʉ̃badau kĩra. Ãchi bud̶a ãrea kapipia meraa irud̶awẽa panad̶ai panuu. Nee maebʉrã perla jʉ̃d̶awẽa panad̶ai panuu. Maud̶e paru chi nejarr ãrea id̶ibadau jʉ̃d̶awẽa panad̶ai panuu. 10Maumaarã Dachi Akõre wapea panuud̶eeba, wẽrarãba biꞌia wau panuud̶eeba ãrea biꞌia kapipia jʉ̃badau kĩra panad̶ai panuu. 11Ãbarã araa ãbua imiiduud̶e wẽrarãba chũpea ũrid̶ai panuu maud̶e chi ijãabadaurã nubadaurã wapea panad̶ai panuu.2:11 Chi ijãabadaurã nubadaurã wapea panad̶ai panuu. Griego bed̶ead̶e b̶ʉ kub̶uuwãe kai wapea panad̶ai panuu.12Ãbua panuud̶e mʉʉba ida b̶ukau wẽraba mukĩrarãmaa jaradea b̶uai maebʉrã mukĩra ichi juad̶e uru b̶uai. Maumaarã wẽrarãba chũpea ũri panad̶ai panuu. 13Maka b̶uai b̶uu Dachi Akõreba Adán naa wausiid̶eeba. Mawãare Eva wausii. 14Mau awara jʉbawãe niiba Adán setaa kũruabasii, maumaarã wẽráturu setaa kũruasii. Maka setaa kũruasiid̶e wẽraba kachirua wausii. 15Maamina wẽrarãba warr adaubadaud̶eeba maarã karibai, Cristod̶e ijãa paneeduubʉrã, biawãra waabenarã kʉ̃ria uru paneeduubʉrã maud̶e Dachi Akõre baita biꞌia paneeduubʉrã. Joma mau kĩra jipa nuread̶ai panuu.2:15 Griego bed̶ead̶e mau chaarea b̶uu biꞌia ũrid̶amera. Dachi Akõre bed̶ea ãrea kuitaabadaurã baita, Pabloba kuitaabi b̶uasii wẽrarã chi jaradea ua b̶uabadaurãwãemina biꞌia nuree. Ichiba jaraabasii warrarã adaud̶ai panuu karibad̶ai baita.
3Ijãabadaurã nubarii saka b̶uai b̶uu
1Nau bed̶ea biawãrad̶eeba, mau ijãad̶ai panuu: ab̶auba chi ijãabadaurã nubarii b̶uai kʉ̃ria b̶uubʉrã, biꞌia wau kʉ̃ria b̶uu.3:1 Ijãabadaurã nubarii. Griego bed̶ead̶e naka b̶ʉ kub̶uu: chi ichiabarii. Kajuma bed̶ead̶e «obispo» abadau.2Maud̶eeba chi ijãabadaurã nubarii nebʉra barau nii ad̶ayuswãe b̶uu, wẽra ab̶aburu uru b̶uai b̶uu, kauwa nibai baita b̶uu, kʉ̃risia biad̶eeba b̶uai b̶uu, kĩra jipa b̶uai b̶uu, ichi ded̶e needuurã biꞌia irsibii b̶uu maud̶e jaradea kuitaa b̶uai b̶uu. 3Itua biu nibaabai b̶uu. Kĩrubi id̶aa nibaabai b̶uu, maumaarã kĩrabia b̶uai b̶uu. Jomaurã ome jirukaraayuwãe b̶uai b̶uu. Chi nejarra kʉ̃ria nibaiswãe b̶uai b̶uu. 4Ichi ded̶ebenarã ãrea nu kuitaa b̶uai b̶uu, ichi warrarã ũribaba nuread̶ai b̶uu maud̶e ãchiba ichi wapead̶ai panuu. 5Ara ichi ded̶ebenarã nu adua b̶uubʉrã, ¿saka ẽbẽrarã Dachi Akõred̶erã biꞌia nuima? 6Dachi Akõre bed̶ea ea ijãad̶a nii ijãabadaurã nubarii b̶uabai b̶uu chi mechiu kʉ̃risiarãamera. Maka kʉ̃risiaruubʉrã Dachi Akõreba ichi kastikai jʉbawãe nii kastikad̶a kĩra. 7Cristod̶e ijãad̶akaurã bid̶a ichi ʉ̃rʉbena biꞌia kʉ̃risiad̶ai panuu. Maka ẽbẽrarãba ichi ʉ̃rʉbena kachirua berread̶aabai maud̶e jʉbawãe niiba ichi ẽbẽrarã daad̶e nebʉra bara nii ai.
Ijãabadaurã aid̶abarii saka b̶uai b̶uu
8Ara mau kĩra ijãabadaurã aid̶abadaurã jipa nibad̶ai panuu ẽbẽrarãba wapead̶amera.3:8 Ijãabadaurã aid̶abadaurã. Griego bed̶ead̶e naka b̶ʉ kub̶uu: chi chibari baita trajabarii. Kajuma bed̶ead̶e «diácono» a jarabadau. Ãchiba setaa berread̶aabai panuu, itua biu nibad̶aabai panuu, maud̶e chi nejarra kʉ̃ria panad̶aabai panuu. 9Dachiba ijãa panuu bed̶ea Dachi Akõreba kuitaabiad̶a, kʉ̃risia biad̶eeba ãrea nud̶ai panuu. 10Ãbarã aid̶abadaurã b̶ud̶ai naed̶e ãrea kauwa ichiad̶ai panuu. Maabae maarã ʉ̃rʉbena kachirua jarad̶ayuswãe nureebʉrã, ijãabadaurã aid̶abadau panad̶ai panuu. 11Ara mau kĩra wẽrarã sid̶a jipa nibad̶ai panuu ẽbẽrarãba wapead̶amera.3:11 Wẽrarã. Griego bed̶ead̶e naka b̶ʉ kub̶uu: wẽrarã. Waabenarãmaarã, jara b̶uu «ãbarã aid̶abadaurã chi wẽrarã» maud̶e waabenarãmaarã, jara b̶uu «ãbarã aid̶abadaurã wẽrarã». Waabenarã ʉ̃rʉbena ãrea kachirua berread̶aabai panuu. Kauwa nibad̶ai baita panuu maud̶e jomad̶e jipa nuread̶ai panuu. 12Ãbarã aid̶abariiba wẽra ab̶a uru b̶uai b̶uu. Ichi warrarã maud̶e ichi ded̶ebenarã ãrea nu kuitaa b̶uai b̶uu. 13Ãbarã aid̶abadaurãba waud̶ai panuu jipa wauduubʉrã, jomaurãba ãchi ʉ̃rʉbena biꞌia berread̶ai. Maka wapeawẽa ãchiba Jesucristod̶e ijãa panuu ʉ̃rʉbena aude poyaa berread̶ai.
Chi biawãra bed̶ea Dachi Akõreba kuitaabiad̶a
14Mʉ isa bichi ichiad̶e wã kʉ̃ria b̶uu. Maamina nau karta bichi baita b̶ʉd̶auruu. 15Maamina kãꞌãaruubʉrã mʉʉba kʉ̃ria b̶uu Dachi Akõre chokae nii ẽbẽrarã saka ãbua panad̶ai panuu bichiba kuitaamera. Dachiba Dachi Akõre chi biawãra bed̶ea jaradeabadau de wãto kĩra b̶uu maud̶e de jʉ̃rʉ kĩra b̶uu.
16Biawãra Dachi Akõreba mau bed̶ea kuitaabiad̶a ãrea biꞌia b̶uu:
Cristo nau kakuad̶e neesii.
Dachi Akõre Jauriba kuitaabiasii ichi jipa nii.
Angelerãba ichi unusid̶au.
Ãbarãba ichi ʉ̃rʉbena drua awarabenarãmaa jaradeasid̶au.
Ãreaba nau iujãad̶e ichid̶e ijãasid̶au.
Dachi Akõreba ichi bajãa bia b̶uud̶aa waya adoesii.
4Setaa jaradeabadaurã
1Dachi Akõre Jauriba arakʉd̶e jara b̶uu nau kaad̶ebena ewarid̶e waabenarãba Cristod̶e ijãa panaped̶aad̶a ida b̶ud̶aped̶a jai kachirua seta id̶aa nuree maud̶e ãchiba jaradeabi panuu ijãad̶ai. 2Mau jai kachiruarãba jaradeabi panuu ẽbẽrarã chi jipa kĩra nureeba jaradeabadau. Kachirua waubadaud̶eeba mau ẽbẽrarãba adua nuree sãu chi bia maud̶e sãu chi kachirua. 3Jãarãba wẽra ida miakãibid̶akau maud̶e chi b̶ee chiko ida kobid̶akau. Maamina Dachi Akõreba joma deasii ichid̶e ijãabadaurãba maud̶e chi biawãra bed̶ea kuitaa panuurãba ichimaa ichíturu kid̶ibai ad̶aped̶a kod̶amera. 4Ne joma Dachi Akõreba waukuad̶a biꞌia b̶uu. Maud̶eeba Dachi Akõremaa ichíturu kid̶ibai aaduubʉrã dachiba kod̶aid̶ebena ab̶a bid̶a kod̶aabai ad̶aabai panuu. 5Mau kod̶ai Dachi Akõre daad̶e biꞌia b̶uu Dachi Akõre bed̶eaba maka jara b̶uud̶eeba maud̶e ichimaa ʉtaa id̶ibadaud̶eeba.
Jesucristo baita bari trajabarii bia
6Timoteo, bichiba joma mau ãbarãmaa jaradea b̶uaruubʉrã, Jesucristo baita bari trajabarii biꞌia b̶uai. Dachi Akõre chi biawãra bed̶ea dachiba ijãa panuu ijãa kãriid̶eeba bichi jauri chaarea wari b̶uai biꞌia ko b̶uu kĩra.
7Nabẽraed̶ebena nebʉrʉbadau kachirua b̶ee ida b̶use. Dachi Akõreba kʉ̃ria b̶uu kĩra nibai baita jʉrʉse. 8Biawãra dachi kakua chaareabid̶ai baita wau panuubʉrã, dastu dachi kakua aid̶ad̶ai. Maamina Dachi Akõre baara nibaaduubʉrã, mauba dachi ne jomad̶e aid̶ai. Id̶ibae maud̶e kaad̶ebena ewarid̶e bid̶a karibai. 9Mau bed̶ea biawãra b̶uu. Jomaurãba mau ijãad̶ai panuu. 10Mau baita dachi traja panuu. Ãrea biꞌiwãe panuu, Dachi Akõre chokae b̶uuba jomaurã poyaa karibai kuitaa panuud̶eeba. Biꞌia jaraaruubʉrã, chi ichid̶e ijãaduu karibabarii.
11Joma mau jaradease maud̶e jarase waud̶amera. 12Bichi kũudrãa b̶umina ab̶aumaa bid̶a ida kabirã́se. Maumaarã bichiba berrearuud̶eeba, ne wau b̶uud̶eeba, waabenarã biawãra kʉ̃ria b̶uud̶eeba, kĩra jipa b̶uud̶eeba, maud̶e Cristod̶e ijãa b̶uud̶eeba ãbarãmaa unubiáse saka panad̶ai panuu. 13Mʉ jãmaa wãaruumisa, jomaurã daad̶e Dachi Akõre bed̶ea jĩwa ed̶a jarase, jaradea b̶uase maud̶e ãbarã aid̶a b̶uase biꞌia ijãad̶amera. 14Dachi Akõreba bichimaa waubi b̶uu dead̶a wãꞌãebirã́se. Ãbarã nubadaurãba ãchi jua bichi ʉ̃rʉ kub̶usid̶aud̶e Dachi Akõred̶eeba jarasid̶au ichiba mau dearuu. 15Joma mau kĩra jipa wau b̶uase jomaurãba kuitaad̶amera bichiba ewaricha biꞌia wau kãrii. 16Ara bichi ʉ̃rʉbena maud̶e bichiba jaradea b̶uu ʉ̃rʉbena kauwa b̶uase. Joma mau jipa wau nibase. Maka wau niibʉrã bichi karibai. Bichiba jaradea b̶uu ũri panuu sid̶a karibad̶ai.
5Ãbarã ome saka b̶uai b̶uu
1Chõrarã iadaarã́se, maumaarã bichi akõre ome berreabarii kĩra maarã ome sõbiad̶eeba berreáse ũrid̶amera. Kũudrãarãmaa berreáse bichi ãbarã ome berreabarii kĩra. 2Chõodraarãmaa berreáse bichi nawe ome berreabarii kĩra. Awẽrarãmaa berreáse bichi neekau ome berreabarii kĩra. Maarã baara joma kachiruad̶ebena awara b̶uase.
3Pẽdrãarã chi aid̶ad̶ayuswãe nuree aid̶ase. 4Maamina pẽdrãaba warrarã ua b̶uubʉrã, ãichekerã ua b̶uubʉrã, maarãba mau pẽdrãa aid̶ad̶ai panuu. Ãchiba ãrea kuitaad̶ai panuu saka ãchi ded̶ebenarã aid̶ad̶ai panuu. Ãchi akõrerãmaa ne kaebea dead̶ai panuu ãchi tatarãba ãchimaa dea panad̶a kĩra. Mau Dachi Akõre daad̶e jipa b̶uu. 5Pẽdrãa biawãra ichi du ab̶a b̶uuba ãrea kuitaa b̶uu joma ichiba uru b̶uai b̶uu Dachi Akõréburu deai. Ãyadaa maud̶e ẽsabud̶e Dachi Akõremaa ʉtaa id̶ibarii karibamera. 6Maamina pẽdrãaba barikia wau b̶uai jʉrʉʉruubʉrã, chokae b̶umina biud̶a kĩra b̶uu. 7Joma chi ãbarãmaa mau waubiáse pẽdrãarã ʉ̃rʉbena kachirua jarad̶awẽa panad̶amera. 8Ab̶aba ara ichi ded̶ebenarã aid̶akaubʉrã, Dachi Akõre bed̶ea ida b̶u b̶uu. Mau Cristod̶e ijãad̶akaurã audeara kachirua wau b̶uu.
9Ãbarãba barikiu pẽdrãa trʉ̃ kartad̶e b̶ʉd̶aabai panuu aid̶ad̶ai baita. Maumaarã naka nuree b̶ʉd̶ai panuu: 60 año wãyaa nuree maud̶e mukĩra ab̶aburu uru panad̶a. 10Ãchiba biꞌia wauped̶aad̶ad̶eeba trʉ̃ poa panad̶ai panuu. Ãchi warrarã biꞌia waribiabachid̶aubʉrã, ãchi ded̶e neeped̶aad̶a biꞌia irsibibachid̶aubʉrã, ãbarã jʉ̃rʉ jeraabachid̶aubʉrã, chi biꞌiwãe nuree aid̶abachid̶aubʉrã, maud̶e ne joma biꞌia waubachid̶aubʉrã, mau pẽdrãa trʉ̃ kartad̶e b̶ʉd̶ai panuu.5:10 Jʉ̃rʉ jeraabachid̶aubʉrã. Mau jara b̶uu chi chibari baita bari trajabarii kĩra ãbarã aid̶abachid̶au.
11Maamina pẽdrãa wabid̶a chõodraawãe nuree trʉ̃ kartad̶e b̶ʉrã́sturu. Maarã mukĩra awaba waya kima adaud̶ai kʉ̃riabadau. Maka ãchiba Cristo traju waud̶ai baita waya miakãid̶aabai bed̶ea deaped̶aad̶a ida b̶ubadau. 12Ãchiba chi naa bed̶ea deaped̶aad̶a ida b̶usid̶aud̶eeba nebʉra bara panuu. 13Mau awara ãchi decha nibabadau maud̶e koꞌoa paneebadau. Mau awara chi bed̶ea ãrea paneebadau, waabenarã nebʉrad̶e ed̶a wã paneebadau, maud̶e ne jaraabai b̶uu berrea paneebadau. 14Maud̶eeba mʉʉba kʉ̃ria b̶uu pẽdrãa wabid̶a chõodraawãe nuree miakãid̶ai, warr adaud̶ai, maud̶e ãchi de sid̶a biꞌia nud̶ai. Maka dachi kĩramaabadauba poyaa kachirua berread̶aabai. 15Mʉʉba mau jara b̶uu waabenarã pẽdrãarã o ãyare wãd̶aped̶a Satanás baara wã panasiid̶eeba.
16Cristod̶e ijãa b̶uu wẽraba pẽdrãa ichi ded̶ebenarã tãed̶e nuree aid̶ai b̶uu.5:16 Cristod̶e ijãa b̶uu wẽraba. Griego bed̶ead̶e chi b̶ee kartad̶e b̶ʉ kub̶uu: Cristod̶e ijãa b̶uu wẽraba maebʉrã mukĩraba. Maka mau pẽdrãa Cristod̶e ijãabadaurãba aid̶ad̶aabai panuu. Maumaarã pẽdrãa istu nuree aid̶ad̶ai panuu.
Ãbarã nubadaurã ome saka waud̶ai panuu
17Chi ijãabadaurã nubadaurãba biꞌia wau panuud̶eeba ãbarãba kʉ̃risia biad̶eeba maarã aid̶ad̶ai panuu, ne uru panad̶amera. Maarãd̶ebena chi Dachi Akõre bed̶ea jaradeabadaurã maud̶e dachi saka nibai ʉ̃rʉbena jaradeabadaurã, aude aid̶ad̶ai panuu. 18Dachi Akõre bed̶ead̶e naka jara b̶uu: «Bichiba pakaba ne biraduamaa b̶uud̶e chi kũ jʉ̃rã́se».5:18 Deuteronomio 25:4. Maud̶e naka jara b̶uu: «Trajabariiba ichi deai b̶uu chi nejarra adaui b̶uu».5:18 Lucas 10:7.
19Ab̶auba ijãabadaurã nubarii jidearuubʉrã, maamina ẽbẽra omeeba maebʉrã õbeaba ara mau kĩra jarad̶awẽebʉrã, mau bed̶ea ijãarã́se. 20Maamina ijãabadaurã nubariiba kachirua wau b̶uubʉrã, jomaurã daad̶e iadaase waabenarãba wapeaba mau kachirua waurãad̶amera. 21Dachi Akõre daad̶e, Cristo daad̶e maud̶e angelerã daad̶e mʉʉba bichimaa jaraaruu: joma mʉʉba jarad̶a ijãa wause. Maka wauruud̶e, ẽbẽraba jaraaruu ab̶auba aude ũrirã́se, maumaarã jomaurã ome arab̶aud̶e jipa wau b̶uase. 22Bichi jua ab̶au ʉ̃rʉ bid̶a isa kub̶urã́se, ijãabadaurã nubarii b̶uamera. Bichiba maka wauruubʉrã, mauba kachirua waud̶abʉrã bichi sid̶a nebʉrad̶e b̶uai mau kachirua baita. Joma kachiruad̶ebena awara b̶uase.
23Bichi barikia kakua kachirua b̶uabariid̶eeba baníaturu dorã́se. Maumaarã uva b̶aa sid̶a bichi b̶i baita b̶istĩika dose.
24Chi kachirua ichiai naed̶e, waabenarãba kachirua wau panuu dachiba biꞌia unubadau maamina waabenarãba kachirua wau panuu maad̶akare kuitaad̶ai. 25Ara mau kĩra waabenarãba biꞌia wau panuu dachiba biꞌia unubadau, maud̶e waabenarãba biꞌia wau panuu biꞌia unud̶akamina miru b̶eebai.
6Chibari baita bari trajabadaurã saka panad̶ai panuu
1Cristod̶e ijãa panuu baita bari trajabadaurãba ãchi chibari wapea panad̶ai panuu. Maka waabenarãba kachirua jarad̶aabai Dachi Akõre maud̶e dachiba jaradeabadau ʉ̃rʉbena. 2Ãchi chibari bid̶a Cristod̶e ijãa b̶uubʉrã, kʉ̃risiad̶aabai panuu ãbad̶eeba wapead̶aabai panuu. Maumaarã ichi baita bibuara trajad̶ai panuu. Ãchi trajud̶eeba Cristod̶e ijãa b̶uuba chi nejarra adaubariid̶eeba, kʉ̃riad̶eeba ichi baita trajad̶ai panuu. Mau jaradea b̶uase. Maud̶e ãchimaa jarase maka waud̶amera.
Chi nejarra kʉ̃ria nuree
3Ab̶auba ãyaa jaradearuubʉrã, Dachi Mechiu Jesucristoba jipa jaradead̶a makawãema aaruubʉrã, maud̶e dachi jipa nibad̶ai ʉ̃rʉbena sid̶a ãyaa jaradearuubʉrã, 4joma kuitaa b̶uu kʉ̃risia b̶umina biawãra adua nii. Kĩrajʉʉwãe b̶uud̶eeba oa kachirua berrea b̶uabarii. Barikia berreaduud̶eeba oa kachirua b̶eebarii. Maud̶eeba naarã neebadau: ãibenaba ne kaebea uru b̶uu kakua kĩra kachirua b̶uai, ãibena ome kĩrubi id̶aa b̶uai, ãibena ʉ̃rʉbena kachirua berrea b̶uai, maud̶e ãibena ʉ̃rʉbena kachirua kʉ̃risia b̶uai. 5Mau ẽbẽrarã kʉ̃risia biawãe nuree maud̶e biawãra berrea adua nuree sid̶a barikia oa kachirua berreabadau. Ãchiba kʉ̃risiabadau Dachi Akõred̶e ijãa b̶uud̶eeba chi nejarra adaud̶ai.6:5 Griego bed̶ead̶e chi b̶ee kartad̶e nau sid̶a b̶ʉ kub̶uu: maarã ome ãbua b̶uarã́se.6Biawãra jipa nid̶aud̶eeba ne bia ãrea uru panuu, maamina ara dachiba nau druad̶e uru panuuba kĩrajʉʉ nureebʉrã. 7Dachi danaba dachi adausid̶aud̶e nau iujãad̶e ne kaebea ab̶au bid̶a eneed̶aabasii. Biuduud̶e ne kaebea ab̶au bid̶a adoed̶aabai. 8Maud̶eeba kod̶ai uru panuubʉrã, paru uru panuubʉrã, ara mauba jirukaraayuwãe nuread̶ai panuu. 9Maamina barau nuread̶ai kʉ̃ria panuuba ne joma kʉ̃ria panuud̶eeba kachiruad̶e b̶aebadau. Chi dachi aid̶akau maud̶e dachi kachirua wau b̶uu kʉ̃ria panuud̶eeba kachiruad̶e paneebadau ãnimara enabed̶e b̶aed̶a kĩra. Mau ãrea miichuburi paneebadau, doed̶a taawãaruu kĩra. 10Chi nejarra kʉ̃ria b̶uud̶eeba ne kachirua ãrea neebarii. Ara mau kʉ̃ria panuud̶eeba waabenarãba Cristod̶e ijãa panad̶a ida b̶usid̶au. Maka ãchi ãrea biꞌiwãe panasid̶au.
Pabloba Timoteomaa waubid̶a
11Maamina bichiba Cristod̶e ijãa niid̶eeba joma maud̶ebena ãyaa wãse.6:11 Cristod̶e ijãa nii. Griego bed̶ead̶e naka b̶ʉ kub̶uu: Dachi Akõre ẽbẽra. Jipa nibase. Dachi Akõre baara wãse. Sõd̶eeba biawãra Cristod̶e ijãa b̶uase. Jomaurã kʉ̃ria b̶uase. Joma jãaduase. Jaradea ua b̶uabarimina, jomaurã ome sõbiad̶eeba b̶uase. 12Cristod̶e ne joma ijãa b̶uase biꞌia chĩobarii kĩra. Maka bichi ewaricha Dachi Akõre ome chokae b̶uai. Ãrea panuurã daad̶e, bichiba Cristod̶e ijãa b̶uu jarasiid̶e Dachi Akõreba bichi iusii mau chokae b̶uai uru b̶uamera. 13-14Joma chokae nuree Dachi Akõred̶eeba chokae nuree. Ara mau Dachi Akõre daad̶e mʉʉba jaraaruu bichiba wau b̶uamera. Jesucristo daad̶e bid̶a arab̶aud̶e jaraaruu ichiba Poncio Pilato daad̶e chi bed̶ea biawãra jarad̶a kĩra. Mʉʉba nau jaraaruu: mʉʉba jaradea b̶uu kĩra jipa wau b̶uase, bichi ʉ̃rʉbena kachirua jarabiamaaba ab̶a Dachi Mechiu Jesucristo neeruud̶aa. 15Dachi Akõreba b̶ud̶a ewarid̶e ichi unubii.
Dachi Akõréturu jomaurã Mechiu bia nii.
Ichi Jomaurã Reyrã Audeara Chi Aude Mechiu Nii maud̶e Joma Chi Mechiurã Audeara Chi Aude Mechiu Nii.
16Ichíturu biukau. Ichi b̶uumaa jẽratĩu b̶uud̶eeba ab̶a bid̶a ara kaita poyaa wãd̶aabai panuu.
Ichi ab̶au bid̶a unud̶awẽa panuu maud̶e poyaa unud̶akau.
Mʉʉba kʉ̃ria b̶uu ewaricha jomaurãba ichimaa biꞌia berrea panad̶ayu maud̶e ichi poyaabariiba jomaurã poyaa uru b̶uai.
Biꞌia b̶uu maka b̶uai.
Barau nureeba saka waud̶ai panuu
17Nau druad̶e barau nureerãmaa jarase waabenarã audeara mechiu nuree kʉ̃risiarãad̶amera. Ãchiba ne uru panuu ãrea b̶uakaud̶eeba jarase mau baita biꞌia panad̶ai kʉ̃risiarãad̶amera. Dachi Akõréturu kʉ̃risiad̶ai panuu.6:17 Dachi Akõréturu. Griego bed̶ead̶e chi b̶ee kartad̶e b̶ʉ kub̶uu: Dachi Akõre chokae b̶uu. Ichiaburu dachimaa ne joma wãꞌãekaraa deabarii jirukaraayuwãe nuread̶amera. 18Chi barau nureerãmaa jarase jomaurã ome biꞌia waud̶amera. Maud̶e jarase ãchiba uru panuud̶ebena sõbiad̶eeba waabenarãmaa dead̶ai baita panad̶ai panuu. 19Maka biꞌia wau panuud̶eeba ne kaebea pe nub̶uumaa panuu ewari ab̶a neeruud̶e biꞌia panad̶ai baita. Ara maud̶e ãchi biawãra chokae panad̶ai.
Pabloba nau kartad̶e aanama b̶ʉd̶a
20Timoteo, joma Dachi Akõreba jarad̶a ãrea nuse. Chi Dachi Akõre baita biꞌiwãe b̶uu ʉ̃rʉbena berreabadau ida b̶use. Maud̶e joma kʉ̃risia Dachi Akõre bed̶ea ome kĩra ãyaa nuree ida b̶use. Waabenarã baita, mau kʉ̃risia b̶ee biꞌia b̶uu. Maamina biꞌiwãe b̶uu. 21Waabenarãba mau kʉ̃risia ijãabadau. Maud̶eeba ãchiba Cristod̶e ijãa panad̶a ida b̶usid̶au. Mʉʉba kʉ̃ria b̶uu Dachi Akõreba ichi sõbiad̶eeba bichi aid̶a b̶uai.6:21 Bichi. Griego bed̶ead̶e chi b̶ee kartad̶e b̶ʉ kub̶uu: machi.