1 TESALONICENSES

1 Tesalonicenses

Nabena karta Pabloba b̶ʉd̶a ãbarã Tesalónica puurud̶ebenarã baita

Pablo Tesalónica puurud̶aa naa wãd̶a ʉ̃rʉbena b̶ʉ kub̶uu Hechos 17:1-10d̶e. Tesalonicad̶ebena Berea puurud̶aa wãsii. Mamabena Atenas puurud̶aa wãsii. Aria b̶uud̶e Timoteo waya Tesalonicad̶aa bʉisii. Maud̶e Pablo Corinto puurud̶aa wãsii. Tesalonicad̶ebena Timoteo, Silvano ome Pablomaa wãsid̶au. Ãbarã Tesalonicad̶ebena nebʉrʉped̶aad̶ad̶eeba Pabloba nau nabena karta chi Tesalonicad̶ebena ãbarã baita b̶ʉsii. Año 51d̶e Corinto puurud̶ebena urubʉisii.

Nau nabena kartad̶e Pabloba chi ãbarã baita Dachi Akõremaa ichíturu kid̶ibai asii (1:1-10). Mawãare kĩrababisii maarã tãed̶e biꞌia nibad̶a (2:1-16). Mawãare b̶ʉsii maarã ichiad̶e wã kʉ̃ria b̶uu ʉ̃rʉbena, maarãd̶e kʉ̃risia b̶uud̶eeba (2:17—3:5). Mawãare b̶ʉsii Timoteoba maarã biꞌia jarad̶a ʉ̃rʉbena (3:6-13). Mawãare b̶ʉsii chi ãbarã saka nibad̶ai panuu (4:1-12). Mawãare b̶ʉsii Cristo neei ʉ̃rʉbena (4:13—5:11). Pabloba ãbarã baita chi kaad̶e b̶ʉd̶a 5:12-28d̶e b̶uu.

Pabloba nau kartad̶e naa b̶ʉd̶a

¹Mʉ Pablobʉ. Nau karta b̶ʉmaa b̶uu chi ãbarã Tesalónica puurud̶ebenarã baita. Machi Dachi Bajãad̶ebena Akõred̶ebʉ maud̶e Dachi Mechiu Jesucristod̶ebʉ.1:1 Dachi Bajãad̶ebena Akõred̶ebʉ. Kajuma bed̶ead̶e b̶ʉ kub̶uu: Dios el Padre. Mʉ ãba Silvano maud̶e Timoteo mʉ baara panuu. Daiba kʉ̃ria panuu Dachi Akõreba maud̶e Dachi Mechiu Jesucristo bid̶a maarã sõbiad̶eeba machi kariba panad̶amera maud̶e jirukaraayuwãe panabiad̶amera.

Ãbarãba biꞌia wauped̶aad̶a

²Daiba ewaricha Dachi Akõremaa ʉtaa id̶iiduud̶e machi baita ichíturu kid̶ibai abadau. ³Daiba Dachi Akõre daad̶e ewaricha kĩraba panuu machiba Dachi Akõred̶e ijãa panuud̶eeba biꞌia wau panuu, kʉ̃riad̶eeba waabenarã kariba panuu maud̶e Dachi Mechiu Jesucristoba machi karibai ida b̶ud̶awẽa esed̶au panuu.

⁴Ãbarã, Dachi Akõreba machi ãrea kʉ̃ria b̶uu. Daiba kuitaa panuu ichiba machi jʉrʉ adausii. ⁵Daiba chi bed̶ea bia Cristo ʉ̃rʉbena machimaa jaradeasid̶aud̶e bed̶eáturu berread̶aabasii. Maumaarã mau bed̶ea biawãra arakʉd̶e b̶uu kuitaa panuud̶eeba Dachi Akõre Jauri poyaabariid̶eeba berreasid̶au. Machiba kuitaa panuu dai saka machi tãed̶e nibaped̶aad̶a, machi biꞌia panad̶amera. ⁶Arab̶aud̶e machiba dai panabachid̶au kĩra wau kopaneesid̶au. Maud̶e Dachi Mechiu nibad̶a kĩra wau kopaneesid̶au. Machi ãrea biꞌiwãe panumina Dachi Akõre Jauriba kĩrajʉʉbiasiid̶e chi bed̶ea bia ijãasid̶au.1:6 Hechos 17:1-10.⁷Maka joma Cristod̶e ijãabadaurã Macedonia druad̶ebenarãba maud̶e Acaya druad̶ebenarãba machi ʉ̃rʉbena ũrisid̶au saka nibad̶ai panuu. ⁸Maarãburu Dachi Mechiu ʉ̃rʉbena bed̶ea machid̶ebena ũriped̶aad̶awãe basii; maumaarã druacha ẽbẽrarãba kuitaasid̶au machiba Dachi Akõred̶e ijãa panuu. Maud̶eeba ¿daiba machi ʉ̃rʉbena kãare maucha jarad̶aima? ⁹Ara ãchiba jara panuu saka machiba dai deed̶aa urúbad̶e aped̶aad̶a, maud̶e Dachi Akõre kuenda juaba ne kaped̶aad̶arã ida b̶usid̶au Dachi Akõre biawãra chokae nii ijãad̶ai baita. ¹⁰Ãchiba jara panuu saka machiba Dachi Akõre Warr Jesús bajãad̶ebena neei esed̶au panuu. Ara mau Jesús Dachi Akõreba biud̶ad̶ebena chokae jiradubisii. Mauba Dachi Akõreba dachi kastikai bad̶a karibasii.

Pabloba Tesalónica puurud̶e waud̶a

¹Ãbarã, machiba kuitaa panuu dai machimaa wã panasid̶aud̶e bari wãd̶aabasii. ²Kuitaa panuu machimaa wãd̶ai naed̶e Filipod̶ebenarãba dai kachirua jarasid̶au maud̶e kachirua wausid̶au.2:2 Hechos 16:11-40. Mau awara machimaa neesid̶aud̶e ãreaba kʉ̃riad̶aabasii daiba jaradea panuu. Maamina Dachi Akõreba dachi sõbiabiasii ichi bed̶ea bia machimaa wapeawẽa jaradead̶amera. ³Daiba machimaa biawãrawãe jaradeabadau ijãarãad̶amera id̶id̶aabasii. Maud̶e machi tãed̶e setad̶eeba panuuwãe basii, machi setaa kũruad̶ai baita. ⁴Maumaarã Dachi Akõreba biꞌia unud̶ad̶eeba dai iusii ichi bed̶ea bia jaradead̶amera. Maud̶eeba daiba jaradeaduud̶e, makad̶akau chi ẽbẽrarãba daimaa ichiad̶aped̶a, kʉ̃riad̶amera. Bari jaradeabadau dai Dachi Akõre baara biꞌia panad̶amera. Ichiba dai sõ kʉ̃risia unubarii. ⁵Machiba kuitaa panuu daiba setad̶eeba machi ẽbẽrarã biꞌia nuree ad̶aabasii. Maud̶e chi nejarra adoed̶ai baita setad̶eeba jaradead̶aabasii. Mau Dachi Akõreba kuitaa b̶uu. ⁶Daiba jʉrʉd̶awẽa panasid̶au, machiba maud̶e waabenarãba dai ʉ̃rʉbena biꞌia jarad̶amera. Maumaarã dai Cristoba bʉikad̶ad̶eeba daiba jaradea ua panad̶ai panasid̶au machi tãed̶e. Maamina maka waud̶aabasii. ⁷Maumaarã daiba kʉ̃ria panuud̶eeba machi kariba panasid̶au chi naweba chi warrarã nubarii kĩra. ⁸Daiba machi ãrea kʉ̃ria panuud̶eeba bari chi Dachi Akõre ʉ̃rʉbena bed̶ea bia machimaa jaradead̶akau, maud̶e machi ne jomad̶e aid̶ad̶ai baita panasid̶au. ⁹Ãbarã, machiba kuitaa panuu ãyadaa maud̶e ẽsabud̶e kʉrrjĩrud̶aabasii. Mau awara traju sid̶a waubachid̶au chi nejarra adaud̶ai baita. Daiba chi Dachi Akõre ʉ̃rʉbena bed̶ea bia machimaa jaradea panasid̶aud̶e, kʉ̃riad̶aabasii machiba daimaa ne kaebea dea panad̶ayu, machi chiko b̶aꞌãra b̶eerãamera.

¹⁰Machiba kuitaa panuu maud̶e Dachi Akõreba kuitaa b̶uu dai machi chi Cristod̶e ijãabadaurã tãed̶e biꞌia, jipa maud̶e kachirua jarad̶ayuswãe nibasid̶au. ¹¹Mau awara kuitaa panuu chi akõreba ichi warrarã ome waubarii kĩra daiba machicha maka wau panasid̶au. ¹²Daiba biꞌia jarasid̶au machi Dachi Akõreba kʉ̃ria b̶uu kĩra nibad̶amera. Ichiba machi iusii, ichi juad̶e ua b̶uai baita maud̶e ichi biad̶ebena uru panad̶amera.

¹³Daiba ewaricha machi baita Dachi Akõremaa ichíturu kid̶ibai abadau. Machiba Dachi Akõre bed̶ea daid̶eeba ũrisid̶aud̶e ẽbẽra kʉ̃risia kĩra ijãad̶aabasii. Maumaarã mau bed̶ea biawãra chi Dachi Akõre bed̶ea kuitaaped̶aad̶ad̶eeba ijãasid̶au. Ara mau bed̶eaba machi chi Cristod̶e ijãabadaurãmaa biꞌia waubia b̶uu. ¹⁴Ãbarã, machiba ijãa panuu kakua ara machi druad̶ebenarãba kachirua wau panasid̶au Dachi Akõred̶e ẽbẽrarã judiorã druad̶e makaped̶aad̶a kĩra. Aria Jesucristod̶e ijãabadaurã judiorã chi ijãad̶akaurãba kachirua wau panasid̶au. ¹⁵Ara maarãba Dachi Mechiu Jesús maud̶e Dachi Akõre baita berreabadaurã sid̶a beasid̶au. Mau awara dai ãyaa bʉisid̶au. Maarã Dachi Akõreba biꞌia unukau. Maarãba jomaurã kĩramaabadau. ¹⁶Dachi Akõreba karibamera daiba judiowãerãmaa jaradea kʉ̃ria panuud̶e, maarãba daiba jaradead̶ai ida kabid̶aabasii. Maka aude kachirua wau panuud̶eeba Dachi Akõreba ichi oa kachiruad̶eeba maarã ãrea kastikai.

Pablo Tesalonicad̶ebena ãbarã ichiad̶e wã kʉ̃ria b̶uad̶a

^17-18Ãbarã, ãrea bawẽa b̶uu, dai machi baara panad̶a ãyaa wãped̶aad̶a. Naud̶e daiba machi unud̶awẽa panumina dai kʉ̃risiad̶e machi baara panuu. Daiba biawãra machi ichiad̶e wã kʉ̃ria panasid̶au maamina Satanasba ida b̶uubasii wãrãad̶amera. Mʉ biawãra b̶es ãrea machimaa wãi baita b̶uasii. ¹⁹Biawãra dai machi kakua kĩrajʉʉ panuu. Mau awara kuitaa panuu Dachi Mechiu Jesucristo neeruud̶e daiba machi jipa panuu ichimaa unubid̶ai. Maud̶e ichi daad̶e machi kakua dai kĩrajʉʉ panad̶ai.2:19 Machi kakua dai kĩrajʉʉ panad̶ai. Griego bed̶ead̶e naka b̶ʉ kub̶uu: machi dai boro jũra. Pabloba jara b̶uasii boro jũra jʉ̃ b̶uu kĩra ichi ãbarã kakua kĩrajʉʉ b̶uai.²⁰Biawãra machi dai nejuakayabʉ maud̶e kĩrajʉʉbʉ.

^1-2Daiba waa poyaa dauchia jãadua panad̶aabasiid̶eeba dai du ab̶a Atenas puurud̶e panuumisa kʉ̃risiasid̶au dachi ãba Timoteo machimaa bʉid̶ai. Dachi Akõre baita trajabarii Timoteoba dai ome arab̶au bed̶ea bia Cristo ʉ̃rʉbena jaradeabarii.3:1-2 Dachi Akõre baita trajabarii. Griego bed̶ead̶e chi b̶ee kartad̶e b̶ʉ kub̶uu: Dachi Akõre baita bari trajabarii. Ara makʉd̶e ichi bʉisid̶au Cristod̶e biꞌia ijãa panuud̶eeba dauchia jãadua panad̶amera, ³maud̶e machi ãrea biꞌiwãe panuud̶e, mau ãrea kʉ̃risiarãad̶amera. Machiba kuitaa panuu Cristod̶e ijãa panuu baita dachi ãrea nebʉrad̶e panad̶ai panuu. ⁴Machi baara panasid̶aud̶e daiba jarabachid̶au ẽbẽrarãba dachi ãrea nebʉrad̶e panabid̶amera. Machiba kuitaa panuu biawãra makasii. ⁵Maud̶eeba mʉʉba waa poyaa dauchia jãadua b̶uawẽed̶eeba Timoteo machimaa bʉisii, wabid̶a Cristod̶e ijãa panuu kuitaai baita. Mʉʉba kʉ̃risia b̶uasii jʉbawãe niiba machimaa Cristo ida b̶ubia b̶uasii. Makad̶a basirã daiba machimaa Cristo ʉ̃rʉbena jaradeaped̶aad̶a bari ara jãka b̶uai basii.

⁶Maamina Timoteo machimaa b̶uad̶a daimaa neesii. Machiba Cristod̶e ijãa panuu ʉ̃rʉbena maud̶e machi kʉ̃ria ʉ̃rʉbena ichiba biꞌia jarad̶e neesii. Ichiba jarasii machiba kʉ̃riad̶eeba wabid̶a dai kĩrababadau maud̶e unu kʉ̃ria panuu, daiba machi unu kʉ̃ria panuu kĩra. ⁷Mauba ãbarã, daiba kuitaasid̶au machiba Jesusd̶e wabid̶a ijãa panuu. Maud̶eeba dai ãrea nebʉra baraa panumina kĩrajʉʉsid̶au. ⁸Jãabae dai biawãra sõbia paneesid̶au, kuitaa panuud̶eeba machi Dachi Mechiud̶e dauchia jãadua panuu. ⁹¿Saka ichíturu kid̶ibai jarad̶aima, dai ãrea kĩrajʉʉ panuu Dachi Akõre daad̶e machi ʉ̃rʉbena? ¹⁰Ãsaed̶e, ẽsabud̶aa bid̶a daiba Dachi Akõremaa ʉtaa id̶ibadau machi ichiad̶e wãd̶ai baita. Maka machiba Cristo ʉ̃rʉbena wabid̶a adua panuu daiba poyaa jaradead̶ai joma aude ijãad̶amera.

¹¹Daiba Dachi Bajãad̶ebena Akõremaa maud̶e Dachi Mechiu Jesusmaa ʉtaa id̶i panuu machimaa waya wãbiad̶amera. ¹²Daiba kʉ̃ria panuu Dachi Mechiuba machi aid̶a b̶uai jomaurã ome biꞌia chiya kʉ̃ria panad̶amera daiba machi ãrea kʉ̃ria panuu kĩra. ¹³Maud̶e ʉtaa id̶i panuu Cristoba machi kariba b̶uai sõd̶eeba ãrea ijãad̶amera. Maka Dachi Mechiu Jesús joma ichid̶irã baara neeruud̶e machi Dachi Bajãad̶ebena Akõre daad̶e kachiruaswãe nuread̶ai.

Saka nibad̶ai panuu Dachi Akõreba biꞌia unumera

¹Mau awara ãbarã, daiba machimaa jaradeasid̶au saka Dachi Akõre daad̶e nibad̶ai panuu ichiba biꞌia unumera. Dachi Mechiu Jesús trʉ̃d̶e daiba machimaa chi chuburia id̶i panuu, ara mau kĩra nibad̶amera. Biawãra machiba maka waumaa panuu, maamina biꞌia wáusturu.

²Daiba Dachi Mechiu Jesusd̶ebena jaradeaped̶aad̶a machiba kuitaa panuu. ³Dachi Akõreba kʉ̃ria b̶uu machi ichi baita biꞌia nuread̶amera. Maud̶eeba machi kakuaba barikiu kachirua waurã́sturu. ⁴Machi kakua jipa kuitaa panad̶ai duanásturu Dachi Akõre daad̶e maud̶e ẽbẽrarã daad̶e biꞌia panad̶amera.4:4 Machi kakua. Griego bed̶ead̶e naka b̶ʉ kub̶uu: machi choko. Waabenarã baita mau bed̶eaba jara b̶uu «machi kima».⁵Nau kakuaba kachirua wau kʉ̃ria b̶uu waurã́sturu Dachi Akõre unud̶akaurãba waubadau kĩra. ⁶Maud̶éburu dachi ãbarãmaa kachirua waurã́sturu maud̶e seta sid̶a waurã́sturu. Joma mau Dachi Mechiuba kastikai, daiba machimaa jaraped̶aad̶a kĩra. ⁷Dachi Akõreba dachi jʉrʉ adaubasii kachiruad̶e panad̶amera, maumaarã jʉrʉ adausii ichi baita jipa panad̶amera. ⁸Chi mau mʉʉba jaradead̶a ida b̶u b̶uuba ẽbẽraba jarad̶a ida b̶uwẽa b̶uu, maumaarã Dachi Akõreba jara b̶uu ida b̶u b̶uu. Ara mau Dachi Akõreba ichi Jauri machimaa deasii kachiruaswãe panad̶amera.

⁹Mau awara machi saka ãbarã ome chiya kʉ̃riad̶ai panuu ʉ̃rʉbena, mʉʉba nau kartad̶e ¿kãare b̶ʉima? Ara Dachi Akõréburu machimaa mau jaradeasii. ¹⁰Machiba joma ãbarã Macedonia druad̶ebena mau kĩra kʉ̃ria panuu. Maamina ãbarã, daiba machimaa chi chuburia id̶i panuu aude chiya kʉ̃ria panad̶amera. ¹¹Maud̶e jʉrʉ́sturu jomaurã ome jirukaraayuwãe duanad̶ai baita. Waabenarã nebʉrad̶e panarã́sturu. Machi juaba trajásturu daiba jaraped̶aad̶a kĩra. ¹²Maka nureebʉrã, machiba esed̶aud̶ayuswãe panad̶ai waabenarãba machimaa ne kaebea dead̶ai. Maud̶e makaburu Jesusd̶e ijãad̶akaurãba machi biꞌia unud̶ai.

Jesús waya neei ʉ̃rʉbena

¹³Ãbarã, daiba kʉ̃ria panuu machiba Jesusd̶e ijãabadaurã biuped̶aad̶a ʉ̃rʉbena kuitaad̶amera. Maka machi kĩra nomaad̶aabai Dachi Akõred̶e ijãad̶akaurã kĩra nomaabadau kĩra. Ãchi kĩra nomaabadau chi biuped̶aad̶a saka duanad̶ai kuitaad̶awẽed̶eeba.4:13 Biuped̶aad̶a. Griego bed̶ead̶e naka b̶ʉ kub̶uu: kãi topanuu.¹⁴Maamina dachiba Jesús biu b̶uad̶ad̶ebena chokae jiradud̶a ijãa panuu. Maud̶eeba kuitaa panuu Jesusd̶e ijãabadaurã biuped̶aad̶a Dachi Akõreba joma chokae jiradubiaped̶a ichi baara uad̶oi.

¹⁵Mau baita Dachi Mechiuba jarad̶a daiba machimaa jaraaduu: Dachi Mechiu neeruud̶e dachi, chi wabid̶a chokae nuree chi biuped̶aad̶a naa ichimaa wãd̶aabai. ¹⁶Maumaarã Dachi Mechiu bajãad̶ebena neei. Berrearuu jĩwa ũrid̶ai, ángel chi mechiu sid̶a berrearuu ũrid̶ai, maud̶e Dachi Akõre kachu jĩwa chaaruu ũrid̶ai. Maud̶e chi Cristod̶e ijãabadaurã biuped̶aad̶a naa chokae jiradud̶ai. ¹⁷Ara makʉd̶e dachi, chi chokae nuree, maarã ome ãbua ʉtaa wãd̶ai Dachi Mechiu baara jʉ̃rʉarad̶e unud̶ai baita. Maka Dachi Mechiu ome ewaricha duanad̶ai. ¹⁸Mau bed̶eaba machi chiya kĩrajʉ́sturu.

Dachi Mechiuba kastikai ewari

¹Ãbarã, mʉʉba nau kartad̶e b̶ʉwẽma sakaed̶aa mau ewari neei, ²machiba ãrea kuitaa panuud̶eeba Dachi Mechiuba kastikai ewari maka neei nechiru ẽsabud̶e neebarii kĩra. ³Ẽbẽrarãba naka jara panad̶ai: «Joma jirukaraayuwãe panuu, perad̶awẽa panuu». Maka panuud̶e maarã joma baribai ewari neei wẽra warr bara nii barikiu ewarid̶e pirabari kĩra. Maud̶e maarã mirud̶aabai.

⁴Maamina ãbarã, machi pãriud̶e panuuwãema. Maud̶eeba Dachi Mechiuba kastikad̶e neeruu ewarid̶e machi perad̶aabai nechiru neeruud̶e perabadau kĩra. ⁵Joma machi ʉ̃d̶aad̶ebenarã maud̶e ãyadaabenarã. Dachi ẽsabud̶ebenawãema maud̶e pãriud̶ebenawãema. ⁶Maud̶eeba dachi kãi duanuuwãema waabenarã kãi duanuu kĩra, maumaarã dau ʉb̶ʉa panad̶ai panuu maud̶e kĩrabia panad̶ai panuu. ⁷Chi kãi duaneebadaurã ẽsabud̶e kãi duaneebadau maud̶e chi itua biu nureerã ẽsabud̶e itua dobadau. ⁸Maamina dachi chi ãyadaabenad̶eeba kĩrabia nuread̶ai panuu. Cristod̶e ijãa panad̶ai panuu, waabenarã kʉ̃ria nuread̶ai panuu maud̶e Dachi Akõreba kastikai bad̶ad̶ebena karibai esed̶au panad̶ai panuu. Maka ara dachi biꞌia nu panad̶ai, kokoroaba ichi borod̶e chaarea b̶uu jʉ̃barii kĩra, maud̶e kakuad̶e jʉ̃barii chaarea jʉ̃barii kĩra. ⁹Dachi Akõreba dachi iubasii kastikai baita, maumaarã iusii Dachi Mechiu Jesucristod̶eeba karibad̶amera. ¹⁰Ichi dachi kakua biusii. Maud̶eeba dachi chokae panuubʉrã maebʉrã biuped̶aad̶abʉrã, ichi neeruud̶e ichi ome ãbua chokae panad̶ai. ¹¹Maud̶eeba chiya kĩrajʉ́sturu. Maud̶e chiya aid̶ásturu biꞌia ijãad̶ai baita machiba wau panuu kĩra.

Pabloba ãbarãmaa kaad̶e jaradead̶a

¹²Mau awara ãbarã, daiba chi chuburia id̶i panuu chi ãbarã machi tãed̶e Dachi Akõre traju waubadaurã ãrea wapead̶amera. Ãchi Dachi Mechiu Jesucristod̶eeba machi saka nibad̶ai jarabadau maud̶e jaradeabadau. ¹³Ãchi ʉ̃rʉbena biꞌia kʉ̃risiásturu. Maarãba wau panuu kakua ãrea kʉ̃riásturu. Jomaurã ome biꞌia duanásturu.

¹⁴Ãbarã, daiba chi chuburia id̶i panuu chi machi tãed̶e koꞌoa nureerãmaa kĩra ʉb̶ʉa berread̶amera. Chi sõd̶e kĩra nomaa nuree kĩrajʉʉbísturu, maud̶e chi poyaa dauchia jãadua nuread̶awẽa nuree maud̶e chi sõd̶e meserãa wãꞌãe nuree aid̶ásturu. Jomaurã ome dauchia jãadua panásturu. ¹⁵¡Ũrísturu! Ab̶auba machi kachirua wauruubʉrã mau arab̶au kachirua waurã́sturu. Mau kãyabãra ewaricha machi chiya biꞌia wáusturu. Jomaurã ome biꞌia wáusturu.

¹⁶Jomad̶e kĩrajʉʉ panásturu. ¹⁷Ida b̶ud̶ayuwãe Dachi Akõremaa ʉtaa id̶i panásturu. ¹⁸Jomad̶e Dachi Akõremaa ichíturu kid̶ibai a panásturu. Mau Dachi Akõreba kʉ̃ria b̶uu, machi Jesucristod̶e ijãabadaud̶eeba.

¹⁹Dachi Akõre Jauriba wau b̶uu ida b̶urã́sturu.5:19 Griego bed̶ead̶e mau naka b̶ʉ kub̶uu: Dachi Akõre Jauri aoko kiirã́sturu.²⁰Dachi Akõre baita berreabariiba jara b̶uu ida b̶urã́sturu. ²¹Joma mau kauwa ũrísturu, maamina ab̶a chi biáturu ijã́sturu. ²²Kachirua ab̶a bid̶a waurã́sturu.

²³Mʉʉba kʉ̃ria b̶uu Dachi Akõreba machi jomad̶e ichi baita biꞌia panabiayu. Mauba dachi jirukaraayuwãe panabiabarii. Mʉʉba kʉ̃ria b̶uu Dachi Akõreba machi jauri, machi kʉ̃risia maud̶e machi kakua ãrea biꞌia nu b̶uayu. Maka Dachi Mechiu Jesucristo neeruud̶e machi ab̶a bid̶a kachirua a jarad̶ayuswãe panad̶ai. ²⁴Chi machi Iud̶aba joma maka waui, ichiba bed̶ea deasiid̶eeba.

Pabloba nau kartad̶e aanama b̶ʉd̶a

²⁵Ãbarã, dai baita Dachi Akõremaa ʉtaa id̶ísturu.

²⁶Biawãra kʉ̃riad̶eeba joma ãbarãmaa biꞌia berreásturu.5:26 Biawãra kʉ̃riad̶eeba. Griego bed̶ead̶e naka b̶ʉ kub̶uu: kĩedarr ʉ̃yásturu.

²⁷Mʉʉba Dachi Mechiud̶eeba jaraaruu: nau karta joma ãbarã daad̶e ed̶a jarásturu.

²⁸Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi aid̶a b̶uamera.