1 PEDRO

1 Pedro

Nabena karta Pedroba b̶ʉd̶a

Pedroba nau karta b̶ʉsii. Jesusba ichi iusiid̶e b̶eda jidaubarii basii (Marcos 1:16-18). Maamina Jesusba jʉrʉ adaud̶ad̶ebena Pedro chi aude mechiu b̶uasii. Ichiba Jerusalend̶e Dachi Akõre de mechiud̶e judiorãmaa Jesucristo ʉ̃rʉbena biꞌia jaradeasii (Hechos 2:14-41) maud̶e judiowãerãmaa bid̶a Jesús ʉ̃rʉbena jarad̶e wãsii (Hechos 10:1-48). Año 67d̶e romad̶ebenarãba ichi cruzd̶e boro ed̶aa jirab̶u beasid̶au.

Año 64d̶e Roma puuru baawãsii. Waabenarãmaarã, chi karr Nerón abadauba baabisii de wid̶i waukuai baita. Maamina nebʉrad̶e b̶uamaaba, Neronba jarasii chi Cristod̶e ijãabadaurãburu maka wausid̶au. Maud̶eeba romad̶ebenarãba druacha ãbarã kachirua waud̶ai baita wãraa paneesid̶au. Maud̶eeba Pedroba nau karta b̶ʉsii. Ichiba mau urubʉisii Romad̶ebena ãbarãmaa druacha, ãrea biꞌiwãe panumina Cristod̶e ijãa panad̶amera (2:18-25; 3:8-18; 4:12-19 maud̶e 5:8-11).

Chi kʉ̃risia mechiu 2:21d̶e naka b̶ʉ kub̶uu: «Cristo machi kakua ãrea biꞌiwãe b̶uasiid̶eeba Dachi Akõreba machi iusii ãrea biꞌiwãe panad̶amera. Cristo ãrea biꞌiwãe b̶uasiid̶e unubisii machi biꞌiwãe paneeduud̶e saka nibad̶ai panuu».

Nau kartad̶e Pedroba b̶ʉsii Dachi Akõreba Jesucristod̶eeba dachi adausii ichi puuru bamera (1:1-11 maud̶e 2:1-10). Maud̶eeba dachi ne jomad̶e jipa nibad̶ai panuu (1:1—3:7; 4:1-11 maud̶e 5:1-11). Dachi druad̶ebena ley maud̶e chi karrarã ijãad̶ai panuu (2:13-17). Maamina ne joma audeara Jesucristod̶e ijãad̶ai panuu (3:13-16).

Pedroba nau kartad̶e naa b̶ʉd̶a

¹Mʉ Pedrobʉ, Jesucristoba bʉid̶abʉ. Mʉʉba nau karta b̶ʉʉruu Dachi Akõreba jʉrʉ adaud̶arã Ponto druad̶e, Galacia druad̶e, Capadocia druad̶e, Asia druad̶e, Bitinia druad̶e maud̶e drua awarad̶ebenarã kĩra panabadau baita. ²Dachi Bajãad̶ebena Akõreba1:2 Dachi Bajãad̶ebena Akõreba. Kajuma bed̶ead̶e b̶ʉ kub̶uu: Dios y Padre. machi adausii ichiba naed̶e makai kʉ̃risia b̶uad̶a kĩra. Dachi Akõre Jauriba machi ichi baita b̶usii Jesucristod̶e ijãad̶amera maud̶e ichi oad̶eeba Dachi Akõre daad̶e kachiruaswãe nuread̶amera. Mʉʉba kʉ̃ria b̶uu Dachi Akõreba ichi sõbiad̶eeba machi aid̶a b̶uamera maud̶e jirukaraayuwãe b̶uabiamera.

Pedroba Dachi Akõremaa biꞌia berread̶a

³Dachi Mechiu Jesucristo, dachi Bajãad̶ebena Akõremaa biꞌia berread̶ai panuu. Ichiba dachi ãrea kĩra chuburiasiid̶eeba Jesucristo biu b̶uad̶a chokae jiradusiid̶eeba dachi waya chokae duaneebiasii. Maud̶eeba kuitaa panuu ⁴ichiba dachi baita bajãad̶e nu uru b̶uu joma adaud̶amera. Mau ãrikau, wãꞌãekau maud̶e kachiruaswãe b̶uu. ⁵Jesucristod̶e ijãa panuud̶eeba Dachi Akõreba ichi poyaabariid̶eeba machi nu uru b̶uai, ab̶a chi kaad̶ebena ewarid̶e karibaaruud̶aa.

⁶Maud̶eeba ãrea kĩrajʉʉ panuu. Ara ʉ̃raud̶aa ne aꞌawaraad̶eeba machi ãrea biꞌiwãe panumina, ⁷mau biꞌiwãe panuud̶eeba unubid̶ai Jesucristod̶e biawãra ijãa panuu. Machiba ijãa panuu nee kĩra b̶uu. Nee wãsiaba dorrab̶aribibadau mau chi néeturu b̶eemera. Ara mau kĩra machi ãrea biꞌiwãe panuu jãadua panuud̶eeba unubi panuu Jesucristod̶e biawãra ijãa panuu. Mau ijãa panuu nee audeara biꞌia b̶uu nee wãꞌãebariid̶eeba. Machiba Jesucristod̶e biawãra ijãa panuu unubi panuud̶eeba, ichi unuuduud̶e Dachi Akõreba machi biꞌia unui, biꞌia jarai maud̶e chi mechiurã b̶ui.

⁸Machiba Jesucristo unud̶akamina mau kʉ̃ria panuu. Ʉ̃raud̶aa unud̶awẽa panumina ichid̶e ijãa panuu. Ichi kakua ãrea kĩrajʉʉ panuu. Maka kĩrajʉʉ panuud̶eeba mau kĩrajʉʉ saka b̶uu, poyaa kuitaa jarad̶awẽa panuu. ⁹Maka kĩrajʉʉ panuu Jesucristod̶e ijãa panuud̶eeba, Dachi Akõreba karibaid̶eeba.

¹⁰Dachi Akõre baita berreabadaurãba nabẽraed̶e jarabachid̶au Dachi Akõreba ichi sõbiad̶eeba machi karibai. Mau ʉ̃rʉbena kuitaad̶ai baita ãchiba kauwa kʉ̃risiabachid̶au maud̶e mau ichiaped̶aad̶akare id̶ibachid̶au. ¹¹Cristo Jauri ãchi sõd̶e b̶uuba berreabiabachii Cristo ãrea biꞌiwãe b̶uad̶a bad̶a Dachi Akõreba biꞌia b̶ui ʉ̃rʉbena. Berreasiid̶e kuitaa kʉ̃ria panasid̶au kai ʉ̃rʉbena Cristo Jauriba ãchimaa berreabiasii maud̶e sakaed̶e joma mau makai. ¹²Maamina Dachi Akõreba kuitaabiad̶a ãchiba berreaped̶aad̶a ãchi baitawãe basii, maumaarã machi baita b̶uu. Ãchiba berreaped̶aad̶a jãabae chi bed̶ea bia Cristo ʉ̃rʉbena jaradeabadaurã dachimaa biꞌia kuitaabia panuu Dachi Akõre Jauri bajãad̶ebena bʉisiid̶eeba. Mau angelerã bid̶a kuitaa kʉ̃ria panuu.

Dachi Akõre baita biꞌia panásturu

¹³Maud̶eeba kʉ̃risia kuitaad̶eeba panásturu biꞌia waud̶ai baita. Kĩra jipa panásturu. Kakua ãkaad̶awẽa esed̶au panásturu Jesucristo unuuduu ewarid̶e Dachi Akõreba ichi sõbiad̶eeba machimaa ne bia deamera. ¹⁴Warr ũribaba nii kĩra panásturu. Nau kakuaba kachirua wau kʉ̃ria b̶uu waa waurã́sturu Dachi Akõred̶e ijãad̶awẽa panasiid̶e waubachid̶au kĩra. ¹⁵Dachi Akõreba machi iusii. Ichi ne jomad̶e jipa nii. Maud̶eeba machiba wauduucha jipa panásturu. ¹⁶Dachi Akõre bed̶ead̶e naka b̶ʉ kub̶uu: «Jipa panásturu mʉ jipa niid̶eeba».1:16 Levítico 11:45; 19:2.

¹⁷Machiba Dachi Akõremaa berreaduud̶e machi Chacha abadaubʉrã, kuitásturu Ichiba ẽbẽra waabenarã audeara kʉ̃riakaud̶eeba joma ichiai dachiba wauped̶aad̶a. Maud̶eeba wabid̶a nau iujãad̶e ãibenarã kĩra panuumisa ewaricha ichi wapea panuud̶eeba jipa nibásturu. ^18-19Naed̶e machi chi kʉ̃risia biawãed̶e nibabachid̶au machi nabẽraed̶ebenarãba maka jaradeabachid̶aud̶eeba. Maamina kuitaa panuu Dachi Akõreba machi maud̶ebena karibasii. Ichiba machi nedoobasii nee ãrea b̶uakauba maebʉrã parata ãrea b̶uakauba, maumaarã Cristo oa chi nejarr ãrea id̶ibadauba nedosii. Cristo chi bibuara nii oeja cheke Dachi Akõremaa baa dead̶a kĩra b̶uasii. ²⁰Nau iujãa waui naed̶e Dachi Akõreba Cristo jʉrʉ adauped̶a nau kaad̶ebena ewarid̶e bʉisii machi biꞌia nuread̶amera. ²¹Cristod̶eeba machiba Dachi Akõred̶e ijãa panuu. Dachi Akõreba ichi biu b̶uad̶a chokae jiradubiped̶a chi mechiu b̶usii. Maud̶eeba machiba Dachi Akõred̶e biawãra ijãa panuu maud̶e esed̶au panuu Dachi Akõreba jarad̶a joma waumera.

²²Chi biawãra bed̶ea ijãa panuud̶eeba machi kachiruaswãe paneesid̶au.1:22 Chi b̶ee kartad̶e kajuma bed̶ead̶e naka b̶ʉ kub̶uu: Dachi Akõre Jaurid̶eeba. Maud̶eeba ãbarã biawãra kʉ̃ria panuu. Sõd̶eeba biawãra ãrea chiya kʉ̃ria panásturu. ²³Nau kakua biui b̶uud̶eeba machi chiwid̶i naweba waya adaud̶aabasii, maumaarã Dachi Akõre biukau niid̶eeba chiwid̶i adausid̶au. Dachi Akõre bed̶ea wãꞌãekauba chokae b̶uai deabarii. Mau bed̶ead̶eeba machi chiwid̶i wãwa kĩra adausid̶au. ²⁴Dachi Akõre bed̶ead̶e naka b̶ʉ kub̶uu:

«Jomaurã sirua kĩra nureebʉ. Ãchi mipitaa nepono kĩra nuree.

Sirua poaped̶a chi nepono b̶aebarii.

²⁵Maamina Dachi Mechiu bed̶ea wãꞌãekau».1:25 Isaías 40:6-8.

Mau wãꞌãekau bed̶ea bia Cristod̶ebenabʉ. Mau ãbarãba machimaa jarasid̶au.

¹Maud̶eeba waabenarãmaa kachirua waud̶ai ida b̶ústuru. Waabenarãmaa setaa jararã́sturu. Chi nureeba ara ãchiba jarabadau kĩra waud̶akau. Mau ẽbẽrarã kĩra panarã́sturu. Waabenarãba uru panuu kakua, kachirua kʉ̃risiarã́sturu. Waabenarã ʉ̃rʉbena kachirua jararã́sturu. ^2-3Dachi Mechiuba sõbiad̶eeba machi karibabarii kuitaasid̶au. Maud̶eeba warr ea adaud̶aba ju do kʉ̃ria b̶uabarii kĩra Dachi Akõre bed̶ea biꞌia kuitaa kʉ̃riásturu.2:2-3 Ju do kʉ̃ria b̶uabarii kĩra Dachi Akõre bed̶ea biꞌia kuitaa kʉ̃riásturu. Griego bed̶ead̶e naka b̶ʉ kub̶uu: Dachi Akõre Jauriba dea b̶uu ju b̶aa do kʉ̃riásturu. Ichi bed̶ea chi biawãra ju b̶aara kĩra nii. Ichi bed̶ea kuitaaduubʉrã, warid̶ai ab̶a ichiba machi karibaaruud̶aa.

Dachi Akõreba jʉrʉ adaud̶a ẽbẽrarã

⁴Dachi Mechiu Jesucristomaa nésturu. Ichi chokae b̶uu, de waui baitabena mo kĩra b̶uu.2:4 Ichi chokae b̶uu, de waui baitabena mo kĩra b̶uu. Griego bed̶ead̶e naka b̶ʉ kub̶uu: Ichi chokae b̶uu moobʉ. Ẽbẽrarãba ichi ida b̶usid̶au, maamina Dachi Akõreba mo bia maud̶e chi mau nejarr ãrea id̶ibadau jʉrʉ adausii. ⁵Machi ichid̶ebena chokae nureed̶eeba, de waui baitabena mo kĩra nureebʉ. Machid̶ebena Dachi Akõreba ichi de wauruu. Maud̶e ichi baita machi paarerã babiaruu. Machiba Jesucristod̶ebena Dachi Akõre baita ne wau panuud̶e ichimaa ãnimara baa deaduu kĩra wau panuu. Maka wau panuu ichiba biꞌia unu b̶uu. ⁶Dachi Akõre bed̶ead̶e Jesucristo ʉ̃rʉbena naka b̶ʉ kub̶uu:

«Ũrísturu, Sión puurud̶e mʉʉba de waui baitabena mo chi bibuara b̶uu b̶uuruu.2:6 Sión puuru maud̶e Jerusalén abadau.

Mau mo bia maud̶e mau chi nejarr ãrea id̶ibadau mʉʉba jʉrʉ adausii. Maud̶eeba chi ichid̶e ijãa b̶uuba bari ijãa b̶uabai».2:6 Bari ijãa b̶uabai. Griego bed̶ead̶e naka b̶ʉ kub̶uu: kĩrakaya b̶uabai. Isaías 28:16.

⁷Machi chi Cristod̶e ijãabadaurãmaarã, ichi ãrea biꞌia b̶uu. Maamina chi ichid̶e ijãad̶akaurã ʉ̃rʉbena Dachi Akõre bed̶ead̶e naka b̶ʉ kub̶uu:

«Chi mo chi de waubadaurãba ida b̶uped̶aad̶a, mau chi biara b̶eesii».2:7 Salmos 118:22.

⁸Maud̶e naka b̶ʉ kub̶uu:

«Ẽbẽrarã mau moomaa drʉd̶aped̶a b̶aed̶ai».2:8 Isaías 8:14.

Ãchiba Dachi Akõre bed̶ea ijãad̶awẽa panuud̶eeba moomaa drʉʉduu kĩra nuree. Dachi Akõreba maarã b̶usii maka nuread̶amera.

⁹Maamina machi Dachi Akõreba jʉrʉ adaud̶arãbʉ, joma Dachi Mechiu paarerãbʉ, ichi baita b̶ud̶a ẽbẽrarãbʉ maud̶e ichi puurubʉ. Maka Dachi Akõreba ne ãrea biꞌia waud̶a ʉ̃rʉbena machiba berreabadau. Dachi Akõreba machi pãriud̶ebena iusii ichi ʉ̃d̶aa ãrea biꞌia b̶uud̶e nuread̶amera. ¹⁰Naed̶e machi Dachi Akõre puuruwãe basii, maamina jãabae Dachi Akõre puurubʉ. Naed̶e Dachi Akõreba machi kĩra chuburiawẽa b̶uasii, maamina jãabae kĩra chuburia b̶uu.2:10 Oseas 2:23.

Ijãad̶akaurã tãed̶e jipa panad̶ai panuu

¹¹Mʉ ãbarã, nau iujãad̶e machi ãibena druad̶ebenarãb̶u. Maud̶eeba mʉʉba machimaa chi chuburia id̶iiruu nau kakuaba kachirua wau kʉ̃ria b̶uu ida b̶ud̶amera. Mau ara dachi ome chĩo b̶uu. ¹²Dachi Akõred̶e ijãad̶akaurã tãed̶e jipa nibásturu. Maka ãchiba machi kachirua waubadaurã a panumina, machiba biꞌia wau panuu unu panuu. Maabae Dachi Akõre neeruud̶e machi ʉ̃rʉbena ichimaa biꞌia berread̶ai.

¹³Dachi Mechiu Jesucristo baita joma nau iujãad̶ebena karrarã bed̶ea ijã́sturu. Nau iujãad̶ebena karrba jaraaruu ijã́sturu ichi chi mechiu niid̶eeba. ¹⁴Maud̶e chi ichid̶e karrarã jaraaduu ijã́sturu. Chi karr chi mechiu niiba maarã b̶usii kachirua waubadaurã kastikad̶amera maud̶e biꞌia waubadaurã ʉ̃rʉbena biꞌia jarad̶amera. ¹⁵Dachi Akõreba kʉ̃ria b̶uu machiba biꞌia wau panad̶ai. Maka machiba chi kʉ̃risiaswãe nuree chũpeabid̶ai, adua panuud̶ebena machi ʉ̃rʉbena kachirua jarabadaud̶eeba.

¹⁶Machi jʉ̃ uru panad̶a kĩra b̶uud̶ebena Cristoba machi enakoasiid̶eeba, mau kĩra nibásturu. Maamina maka b̶usiid̶eeba kʉ̃risiarã́sturu kachirua waud̶ai panuu. Maumaarã Dachi Akõre baita bari trajabadaurã panásturu. ¹⁷Jomaurã wapeásturu. Ãbarã ãrea kʉ̃riásturu. Dachi Akõre wapeásturu. Nau iujãad̶ebena karr chi mechiu sid̶a wapeásturu.

¹⁸Chi chibari baita bari trajabadaurã, machi chibari wapea panásturu. Ichi bed̶ea ijã́sturu. Ab̶aburu machi chibari chi bia nii maud̶e chi kĩra chuburiabarii ome maka panarã́sturu, maumaarã chi kachirua ome bid̶a maka panásturu. ¹⁹B̶esed̶e biꞌia wau b̶uud̶eeba dachi ãrea biꞌiwãe panabadau. Maamina Dachi Akõreba dachi biꞌiwãe panuu kuitaa b̶uu. Dachiba mau ʉ̃rʉbena kʉ̃risiaduud̶e, mau joma dauchia jãadua panuubʉrã, Ichiba biꞌia unui. ²⁰Machiba kachirua wau panuu kakua chi chibariba kastikaaruubʉrã, machiba jãaduadumina ¿kaiba machi ʉ̃rʉbena biꞌia berreaima? Maamina biꞌia wau panuu kakua nebʉrad̶e panuud̶e jãaduaduubʉrã, Dachi Akõreba biꞌia unui. ²¹Cristo machi kakua ãrea biꞌiwãe b̶uasiid̶eeba Dachi Akõreba machi iusii ãrea biꞌiwãe panad̶amera. Cristo ãrea biꞌiwãe b̶uasiid̶e unubiasii machi nebʉrad̶e panuud̶e saka nibad̶ai panuu. ²²Cristoba kachirua wauka basii maud̶e setaa jaraka basii.2:22 Isaías 53:9.²³Ẽbẽrarãba ichi kachirua jarasid̶aud̶e ichiba ãchimaa kachirua jaraabasii. Ichi kachirua wausid̶aud̶e ichiba waya ãchi kachirua waui a jaraabasii. Maumaarã Dachi Akõreba nebʉra jipa ichiabariid̶eeba ichi kachirua wau panuu Dachi Akõre juad̶e b̶ubachii. ²⁴Cristoba dachi kachirua ichi ʉ̃rʉ cruzd̶e adoesii dachi kachiruad̶ebena biud̶aped̶a jipa nuread̶amera. Ichi kakua puꞌuasid̶aud̶eeba machi biꞌia paneesid̶au. ²⁵Machi naed̶e chi oeja barikiud̶e nibad̶a kĩra nibabachid̶au, maamina jãabae Cristomaa waya neesid̶au. Ichiba machi nu b̶uu, oeja nubariiba ichi oeja nubarii kĩra.

Kima barau nuree saka nuread̶ai ʉ̃rʉbena

^1-2Wẽra kima barau nuree, machi kima bed̶ea ijã́sturu. Maka chi nuree machi kimad̶ebenarãba Dachi Akõre bed̶ea ijãad̶awẽa panumina machi kĩra jipa nuree maud̶e Dachi Akõre wapea nuree unud̶aped̶a ijãad̶ai. Machiba machi kimamaa ijãad̶amera jarad̶awẽa panumina machiba biꞌia wau panuud̶eeba ijãabid̶ai. ³Machi kĩrawãrea chi ʉ̃rʉbenáburu b̶uabai b̶uu; bud̶a biꞌia iruped̶a ãrea kãajʉ̃ b̶uabai b̶uu, nee waud̶a kapipia jʉ̃ b̶uabai b̶uu, paru aude mipitaa b̶uu jʉ̃ b̶uabai b̶uu. ⁴Maumaarã machi kĩrawãrea sõd̶éburu b̶uai b̶uu; sõbia b̶uud̶eeba maud̶e jirukaraayuwãe b̶uud̶eeba b̶uai b̶uu. Mau kĩrawãrea wãꞌãekau maud̶e Dachi Akõreba biꞌia unu b̶uu. ⁵Ara mau kĩra nabẽraed̶ebena wẽrarã Dachi Akõre baita nuread̶a kĩrawãrea nureasii. Dachi Akõreba waui jarad̶a ãchiba sõd̶eeba biawãra ijãa panabachid̶au maud̶e ãchi kima bed̶ea ijãabachid̶au. ⁶Saraba Abraham bed̶ea ijãabachii maud̶e «mʉ mechiu» abachii. Ne wapeawẽa machiba ne joma biꞌia wau panuubʉrã, Sara kau nuread̶ai.

⁷Mukĩrarã wẽra barau nuree, kʉ̃risia biad̶eeba machi wẽra ome biꞌia panásturu. Machi wẽra biꞌia b̶uabii kʉ̃ria panuud̶eeba ãchi biꞌia nu panásturu, wẽra mukĩra aude meserãaswãe niid̶eeba maud̶e machi omea ãbua Dachi Akõre sõbiad̶eeba ichiba chokae panabiasiid̶eeba. Maka waud̶awẽebʉrã, machiba ʉtaa id̶iiduu Dachi Akõreba biꞌia ũriibai.

Biꞌia wau panuud̶eeba nebʉrad̶e paneed̶ai ʉ̃rʉbena

⁸Mau awara ãbarã, arab̶au kʉ̃risiad̶eeba joma machi ãbua biꞌia duanásturu. Waabenarã aid̶ad̶ai kʉ̃risia panásturu. Ãbarãd̶eeba chiya kʉ̃riásturu. Chiya kĩra chuburiásturu maud̶e waabena audeara biꞌia nuree kʉ̃risiarã́sturu. ⁹Ab̶auba machi kachirua wauruubʉrã ara mau kĩra waurã́sturu. Kachirua jaraaruubʉrã ara mau kĩra kachirua jararã́sturu. Maumaarã ʉtaa id̶ísturu Dachi Akõreba mau aid̶amera. Kuitaa panuu Dachi Akõreba machi adausii maka nuread̶amera. Maka nureebʉrã, Dachi Akõreba machi sid̶a aid̶ai. ¹⁰Dachi Akõre bed̶ead̶e naka b̶ʉ kub̶uu:

«Ab̶a kĩrajʉʉ b̶uai kʉ̃ria b̶uubʉrã, ichi kẽrame nui b̶uu kachirua berrearãamera.

Ewari ãrea biꞌia b̶uai kʉ̃ria b̶uubʉrã, ichi okarr nui b̶uu, setaa jararãamera.

¹¹Jãuba ne joma kachirua ida b̶uped̶a biꞌia wau b̶uai b̶uu.

Waabenarã ome jirukaraayuwãe b̶uai baita jʉrʉped̶a maka b̶uai b̶uu.

¹²Dachi Mechiuba ẽbẽra jipa nuree nu b̶uu. Ãchiba ʉtaa id̶iiduu biꞌia ũri b̶uu.

Maamina chi kachirua waubadaurã kũriakau».3:12 Salmos 34:12-16.

¹³Machiba biꞌia wau panuubʉrã, ¿kaiba machi kachirua wauima? ¹⁴Maamina biꞌia wau panuud̶eeba ãrea biꞌiwãe duanuubʉrã, Dachi Akõre daad̶e ãrea biꞌia nuread̶ai. Maud̶eeba chi machi kachirua wauduu wapearã́sturu. Ãrea jirukaraarã́sturu. ¹⁵Cristo machi Mechiud̶eeba, sõd̶eeba mau wapeásturu. Chi Cristod̶e adaud̶ai baita esed̶au panuud̶eeba mau ʉ̃rʉbena berread̶ayu panásturu. Maka ab̶auba id̶iiruubʉrã, poyaa ijarra berread̶awẽa arakʉd̶e panaud̶ai. ¹⁶Ara machi du ab̶a kuitaa panásturu kachirua waud̶awẽa nuree. Maka machi Cristo kakua biꞌia nibabadau ʉ̃rʉbena kachirua berreabadaurã perad̶ai.

¹⁷Dachi Akõreba machi biꞌiwãe paneebiaruubʉrã, biꞌia b̶uu ãrea biꞌiwãe paneed̶ai biꞌia wau panuud̶eeba ãrea biꞌiwãe panad̶ai bad̶amaarã kachirua wau panuud̶eeba. ¹⁸Cristo jipa b̶umina kachirua kakua b̶es ab̶a biꞌiwãe b̶uasii. Mauba dachi chi jipawãe nuree Dachi Akõre ome biꞌia b̶usii. Ichi beasid̶au, maamina Dachi Akõre Jaurid̶eeba chokae jiradusii. ¹⁹Maud̶e Dachi Akõre Jaurid̶eeba chi jauri jʉ̃a duanuumaa wãsii. Wãped̶a chi kachirua joma poyaasii, asii. ²⁰Maarã jaurirãba nabẽraed̶e Noé ewarid̶e Dachi Akõre bed̶ea ijãad̶aabasii. Noeba jãba mechiu wau b̶uumisa Dachi Akõreba joma dauchia jãadua b̶uud̶eeba esed̶au b̶uasii ãchiba ijãad̶amera. Maamina ẽbẽra b̶aꞌãra bania birud̶ad̶ebena paneesid̶au. Biawãra jaraaruubʉrã, 8buru karibasii. ²¹Mau baniaba nau ʉ̃raud̶e boro eabadau ʉ̃rʉbena jara b̶uu. Boro eaduud̶e Jesucristo chokae jiradusiid̶eeba dachi kariba b̶uu. Boro earuuba dachi kakua jayoa jeraakau, maumaarã maka waubadau dachi kʉ̃risia jipa b̶uuba, biawãra Dachi Akõre ome nibad̶ai kʉ̃ria panuud̶eeba.3:21 Maumaarã maka waubadau dachi kʉ̃risia jipa b̶uuba, biawãra Dachi Akõre ome nibad̶ai kʉ̃ria panuud̶eeba. Waabenarãmaarã mau bed̶eaba naka jara b̶uu: «Boro eaduud̶e dachiba Dachi Akõremaa ʉtaa id̶ibadau dachi kachirua perdonakuamera».²²Jesucristo chokae jiraduped̶a, bajãad̶aa wãped̶a Dachi Akõre jua biare b̶uu. Joma angelerã, joma jai kachiruarã chi mechiurã maud̶e chi meserãa nuree ichi juad̶e uru b̶uu.3:22 Cristoba nau jai kachiruarã poyaasii, chi Dachi Akõred̶e ijãabadaurã kachirua waubiabadaurã. Versículo 3:13d̶e ichiáse.

Cristo nibad̶a kĩra nibásturu

¹Cristo nau kakuad̶e ãrea biꞌiwãe b̶uasiid̶eeba machia bid̶a arab̶aud̶e kʉ̃risia uru panásturu. Chi nau kakuad̶e ãrea biꞌiwãe b̶uuba kachirua ida b̶usii. ²Mau ẽbẽraba wabid̶a nau iujãad̶e b̶uud̶e nau kakuaba kachirua wau kʉ̃ria b̶uu wau b̶uawẽma, maumaarã Dachi Akõreba kʉ̃ria b̶uu wau b̶uai. ³Naed̶e machiba kachirua wau nureasii Dachi Akõred̶e ijãad̶akaurãba waubadau kĩra. ¡Ara basma! ¡Waa maka waurã́sturu! Waabenarã daad̶e ãrea kĩra nejasia waubachid̶au, nau kakuaba kachirua wau kʉ̃ria b̶uu waubachid̶au, itua biu nibabachid̶au, kĩrajʉʉ ewari waubadaud̶e ãrea kachirua waubachid̶au, waabenarã baara itua ãrea dobachid̶au maud̶e Dachi Akõre kuenda juaba ne kaped̶aad̶amaa ʉtaa id̶ibachid̶au. Mau Dachi Akõreba kʉ̃riakau. ⁴Jãabae machiba waa chi Dachi Akõred̶e ijãad̶akaurã ome kachirua waud̶akaud̶eeba ãchiba kuitaa kʉ̃risiad̶akau. Maud̶eeba machi ʉ̃rʉbena kachirua berreabadau. ⁵Maamina Dachi Akõreba ãchi nebʉra ichiaruud̶e ãchiba wauped̶aad̶a ichimaa joma jarad̶ai. Ichiba chi chokae nuree maud̶e biud̶arã nebʉra ichiai baita b̶uu. ⁶Maud̶eeba biud̶arãba chi bed̶ea bia Cristo ʉ̃rʉbena ũrisid̶au ãchi jauri chokae nuread̶amera, Dachi Akõre chokae b̶uu kĩra.4:6 Biud̶arãba. Waabenarãmaarã jara b̶uu ãbarã chokae nureasid̶aud̶e mau bed̶ea ũrisid̶au. Waabenarãmaarã jara b̶uu chi Cristo neei naed̶ebenarãba ũrisid̶au. Maamina ãchi chi kakua biusid̶au, Dachi Akõreba joma biud̶ai panuu asiid̶eeba.

⁷Kãꞌãabariwãed̶e joma baribai. Maud̶eeba jipa kʉ̃risia panásturu maud̶e kauwa panásturu. Maka Dachi Akõremaa poyaa ʉtaa id̶id̶ai. ⁸Ãrea chiya kʉ̃ria panásturu. Mau jomad̶ebena audeara bibuara b̶uu. Chi waabenarã kʉ̃ria uru b̶uuba ãchi kachirua ãrea kʉde uru b̶uad̶a ida b̶ubarii. ⁹Chi machi ded̶e needuurã kachirua kʉ̃risiad̶awẽa biꞌia irsibísturu. ¹⁰Dachi Akõreba ichi sõbiad̶eeba dachicha ichi Jauriba waubi b̶uu deasii, waabenarã aid̶ad̶amera. Dachi Akõre baita bari trajabadaurã biawãrad̶eeba ichiba machicha deasiid̶eeba waabena aid̶ásturu. ¹¹Ab̶auba jaradearuubʉrã, Dachi Akõre bed̶ea jaradea b̶uud̶eeba kauwa jaradeai b̶uu. Ab̶auba waabena aid̶aaruubʉrã, Dachi Akõreba dea b̶uu poyaabariid̶eeba aid̶ai b̶uu. Ne joma wáusturu jomaurãba Jesucristod̶eeba Dachi Akõremaa biꞌia berread̶amera. Ichíturu ewaricha biꞌia berread̶ai panuu. Biꞌia b̶uu ne joma ichi juad̶e uru b̶uai. Ãrea biꞌia b̶uu maka b̶uai.4:11 Griego bed̶ead̶e naka b̶ʉ kub̶uu: amén. Mau bed̶eaba b̶esed̶e jara b̶uu «biawãra» maud̶e b̶esed̶e jara b̶uu «biꞌia b̶uu maka b̶uai».

Cristod̶e ijãa b̶uu kakua biꞌiwãe b̶uu ʉ̃rʉbena

¹²Ãbarã, machi ãrea biꞌiwãe panuud̶eeba ãrea kʉ̃risiarã́sturu. Maka panuu Cristod̶e biꞌia ijãad̶ai baita. Maud̶eeba maka ãrea biꞌiwãe panad̶aabai panuu kʉ̃risiarã́sturu. ¹³Maumaarã Cristo biꞌiwãe b̶uasii kĩra ãrea biꞌiwãe panuud̶eeba kĩrajʉʉ panásturu. Maka Dachi Akõreba Cristo chi mechiu nii unubiaruud̶e machi ãrea kĩrajʉʉd̶ai. ¹⁴Machi Cristod̶e ijãa panuu kakua kachirua jaraaduubʉrã, Dachi Akõre daad̶e ãrea biꞌia nuree. Dachi Akõre Jauri kĩrawãrea nii machi ome b̶uu. ¹⁵Machi ãrea biꞌiwãe duanumina, nau kakua biꞌiwãe panad̶ai biawãe b̶uu: mia bead̶a kakua, nechiruad̶a kakua, kachirua waud̶a maebʉrã chĩara nebʉrad̶e b̶uad̶a kakua. ¹⁶Maamina ab̶auba Cristod̶e ijãa b̶uud̶eeba ãrea biꞌiwãe b̶uaruubʉrã, peraiwãe b̶uu. Maumaarã Cristod̶eeba Dachi Akõremaa biꞌia berreai b̶uu. ¹⁷Jãabae Dachi Akõreba ichid̶irã nebʉra ichiai. Dachi Akõreba dachi naa ichiaruubʉrã, ¿chi bed̶ea bia Dachi Akõre ʉ̃rʉbena ijãawẽa nuree saka panad̶aima?

¹⁸«Chi ẽbẽra jipa nii karibai baita chaarea b̶uubʉrã, ¿chi Dachi Akõre ida b̶uped̶a kachirua waubarii saka karibaima?»4:18 Proverbios 11:31.

¹⁹Maud̶eeba chi Dachi Akõreba kʉ̃ria b̶uu kĩra ãrea biꞌiwãe nuree ichi juad̶e b̶ud̶aped̶a ne biꞌia waud̶ai panuu. Dachi Waud̶ad̶e poyaa ijãad̶ai.

Pedroba ijãabadaurã nubadaurãmaa jarad̶a

¹Machi chi ijãabadaurã nubadaurãmaa mʉʉba chi chuburia id̶iiruu, mʉ sid̶a ijãabadaurã nubariid̶eeba. Cristo ãrea biꞌiwãe b̶uad̶a mʉʉba unusii. Maud̶e Dachi Akõreba Cristo chi mechiu nii unubiaruud̶e mʉ sid̶a ichi ome b̶uai. Maud̶eeba naka chi chuburia id̶iiruu: ²Dachi Akõreba ãbarã machi juad̶e b̶ud̶a ãrea nústuru. Maka waurã́sturu waabenarãba maka waubi panuud̶eeba. Maumaarã nu kʉ̃ria panuud̶eeba maka wáusturu.5:2 Griego bed̶ead̶e chi b̶ee kartad̶e nau sid̶a b̶ʉ kub̶uu: Dachi Akõreba kʉ̃ria b̶uu kĩra. Chi nejarra kʉ̃ria panuud̶eeba nurã́sturu, maumaarã sõd̶eeba nu kʉ̃ria panuud̶eeba maka wáusturu. ³Chi machiba nu uru panuurã, machi baita bari trajabadaurã kĩra uru panarã́sturu, maumaarã machi nibad̶eeba unubiásturu saka nibad̶ai panuu. ⁴Maabae Cristo dachi Nubarii chi Mechiu neeruud̶e machi chi mechiurã babiai boro jũra ãrikau dearuu kĩra.

⁵Kũudrãarã, chõrarãba jaraaduu ijã́sturu. Jomaurã chiya aid̶a nuread̶ai panuu waabena audeara chi mechiu nii kʉ̃risiad̶awẽa. Dachi Akõre bed̶ead̶e naka b̶ʉ kub̶uu:

«Chi nejuakaya nuree Dachi Akõreba ida biꞌia b̶uabiakau.

Maamina chi mechiu kʉ̃risiawẽa nuree Dachi Akõreba ichi sõbiad̶eeba aid̶abarii».5:5 Proverbios 3:34.

⁶Maud̶eeba Dachi Akõre juad̶e panásturu, chi ne joma poyaa waubarii Ichi daad̶e chi mechiu kĩra nureewãe baita. Maka chi ichiba b̶ui ewarid̶e, machi chi mechiurã b̶ui. ⁷Machiba ãrea kʉ̃risia panuu Dachi Akõremaa joma jarásturu, ichiba machi nu b̶uud̶eeba.

⁸Kauwa panásturu maud̶e kĩrabia panásturu. Jʉbawãe nii machi chi kĩramaabarii imama kĩra arraa niiba kai koi jʉrʉi.5:8 Kai koi jʉrʉi. Mau jara b̶uu jʉbawãe niiba chi ãbarã kachiruad̶e b̶aebiai maebʉrã Dachi Akõre ida b̶ubiai.⁹Maamina jʉbawãe nii ijãarã́sturu. Cristod̶e ãrea ijãa panásturu, kuitaa panuud̶eeba machi ãbarã joma druacha nuree ara mau kĩra ãrea biꞌiwãe panuu. ¹⁰Machi ewari b̶aꞌãra biꞌiwãe panaped̶aad̶akare Dachi Akõreba ne jomad̶e biꞌia b̶ui. Ichiba machi aid̶ai biꞌia ijãad̶amera, joma jãaduad̶amera maud̶e chaarea nuread̶amera. Dachi Akõreba ichi sõbiad̶eeba ne jomad̶e aid̶abarii. Ichiba machi Jesucristod̶eeba iusii ichi ome ewaricha chi mechiu nuread̶amera. ¹¹Biꞌia b̶uu ewaricha ne joma ichi juad̶e uru b̶uai.5:11 Griego bed̶ead̶e chi b̶ee kartad̶e nau sid̶a b̶ʉ kub̶uu: ẽbẽrarãba ichimáburu biꞌia berread̶ai panuu. Biꞌia b̶uu maka b̶uai.

Pedroba nau kartad̶e aanama b̶ʉd̶a

¹²Ãba Silvanoba nau karta cheke aid̶a b̶ʉsii. Mʉʉba kuitaa b̶uu ara ichiba jara b̶uu kĩra joma waubarii. Nau kartad̶eeba mʉʉba machi aid̶a kʉ̃ria b̶uu biꞌia ijãad̶amera. Maud̶e kuitaabiai kʉ̃ria b̶uu biawãra Dachi Akõreba ichi sõbiad̶eeba aid̶a b̶uu. Mau ijãa panásturu.

¹³Ãbarã Babiloniad̶ebenarãba jarabʉi panuu machi biꞌia panad̶ai.5:13 Babiloniad̶ebenarã. Pedro ewarid̶e ãbarãba Roma puuru «Babilonia» abachid̶au. Machi jʉrʉ adaud̶a kĩra ãchi sid̶a Dachi Akõreba jʉrʉ adausii. Mʉ warr kĩra nii Marcos bid̶a jarabʉi b̶uu machi biꞌia panad̶ai. ¹⁴Biawãra kʉ̃riad̶eeba chiya irsibid̶ai panásturu.5:14 Biawãra kʉ̃riad̶eeba chiya irsibid̶ai panásturu. Griego bed̶ead̶e naka b̶ʉ kub̶uu: kʉ̃riad̶eeba ʉ̃yásturu chiya biꞌia nuread̶ai ad̶ai baita. Mʉʉba kʉ̃ria b̶uu joma machi, Jesucristo ome nuree jirukaraayuwãe nuread̶ai.5:14 Griego bed̶ead̶e chi b̶ee kartad̶e nau sid̶a b̶ʉ kub̶uu: biꞌia b̶uu maka b̶uai.