1 JUAN

1 Juan

Nabena karta Juanba b̶ʉd̶a

Juan, chi Jesús baara nibad̶aba nau karta b̶ʉsii. Maamina nau kartad̶e jarawẽa b̶uu ichiba nau karta b̶ʉd̶a. Año 90d̶e b̶ʉsii.

Nau karta joma ãbarã baita b̶ʉsii chi seta ijãarãad̶amera. Juan chõra b̶eesiid̶e waabenarãba Jesús ʉ̃rʉbena kʉ̃risia ãyaa ijãa paneesid̶au. Ãchiba jarabachid̶au Jesús nau iujãad̶e b̶uasiid̶e ẽbẽrarãba ichi jauríturu unubachid̶au. Waabenarãba jarabachid̶au Jesús ẽbẽra basmina boro easiid̶e Cristo ba did̶isii. Maud̶e waabenarãba jarabachid̶au chi nau kakua ãrea kachirua nii. Maud̶eeba jaradeabachid̶au chi kʉ̃risia kuitaa jʉrʉd̶ai panuu nau kakuad̶ebena wãd̶ai baita. Maamina chi mau kʉ̃risia kuitaa jʉrʉped̶aad̶aba jarabachid̶au nau kakuaba kachirua waui bibuara b̶uu.

Maud̶eeba Juanba nau karta b̶ʉsii. Chi kʉ̃risia mechiu naubʉ: Dachi Akõre Warr ¿kaima? Maud̶e Dachi Akõre warrarã ¿kairãma? Juanba naa b̶ʉsii dachi Dachi Akõre ʉ̃d̶aad̶e nibabadau ʉ̃rʉbena (1:1—2:17). Mawãare b̶ʉsii jʉbawãe nii warrarã saka nuree maud̶e Dachi Akõre warrarã saka nuree (2:18—3:11). Mawãare b̶ʉsii chi dachiba biawãra ab̶au kʉ̃riabadau ʉ̃rʉbena. Mau Dachi Akõred̶ebenabʉ (3:12—4:21). Kaad̶eare b̶ʉsii Jesusd̶e ijãa panuud̶eeba chi nau iujãad̶ebena kachirua poyaad̶ai (5:1-21).

Chi Chokae Nibabiabarii Bed̶ea

¹Arab̶aed̶eed̶e chi Chokae Nibabiabarii Bed̶ea abadau b̶uasii, maud̶e wabid̶a b̶uu. Mauba jaradead̶a daiba ũrisid̶au. Mau dai dauba unusid̶au maud̶e juaba wausid̶au. Mauba waud̶a kauwa ichiasid̶au. Mau ʉ̃rʉbena daiba nau kartad̶e b̶ʉmaa panuu. ²Mau chokae nibabiabarii Dachi Akõreba nau iujãad̶e unubiasii. Daiba mau unusid̶aud̶eeba mau ʉ̃rʉbena biawãra berrea panuu. Daiba machimaa jara panuu mau chi ewaricha chokae nibabiabarii. Arab̶aed̶eed̶e ichi Akõre ome bajãad̶e b̶uabachii. Mau bajãad̶e b̶uad̶a Dachi Akõreba daimaa nau iujãad̶e unubiasii. ³Daiba unuped̶aad̶a maud̶e ũriped̶aad̶a machimaa jara panuu machi sid̶a dai ome ãbuacha Dachi Bajãad̶ebena Akõre ome maud̶e ichi Warr Jesucristo ome biꞌia panad̶amera. ⁴Joma mau daiba b̶ʉmaa panuu dachi ãrea kĩrajʉʉd̶ai baita.1:4 Dachi. Griego bed̶ead̶e chi b̶ee kartad̶e naka b̶ʉ kub̶uu: machi.

Dachi Akõre kachiruaswãe nii

⁵Daiba Jesucristod̶eeba ũriped̶aad̶a machimaa jara panuu naubʉ: Dachi Akõre ʉ̃d̶aa kĩra nii ne jomad̶e jipa niid̶eeba. Mauba ichid̶e pãriu ab̶a bid̶a wãꞌãe. ⁶Ichi ome ãbua biꞌia panuu aaduubʉrã, maamina pãriud̶e nibaaduubʉrã, setaa jara panuu. Biawãra bed̶ea ijãad̶awẽa panuu. ⁷Maamina ichi ʉ̃d̶aad̶e b̶uu kĩra dachi sid̶a ʉ̃d̶aad̶e nibaaduubʉrã, ãbarã ome ãbua biꞌia panad̶ai. Maud̶e ichi Warr Jesucristo oa ched̶aba dachi kachirua joma jeraabarii.

⁸Dachi kachiruaswãe panuu a panuubʉrã, ara dachi du ab̶a setaa jara panuu maud̶e biawãra bed̶ea adua panuu. ⁹Dachi Akõreba jara b̶uu kĩra ara ichiba waubariid̶eeba, maud̶e jipa waubariid̶eeba, dachiba kachirua wauped̶aad̶a ichimaa jaraaduubʉrã, mau kachirua perdonai. Joma kachirua wauped̶aad̶a jeraai. ¹⁰Kachirua waud̶akau aaduubʉrã, Dachi Akõre chi seta nii a panuu maud̶e ichi bed̶ea ijãad̶awẽa panuu.1:10 Dachi Akõreba jarasii jomaurã kachirua waubadau. Maud̶eeba chi kachiruaswãe b̶uu a b̶uuba Dachi Akõre seta nii a b̶uu. Romanos 3:23.

Dachi baita Dachi Akõremaa chi chuburia id̶ibarii

¹Ãbarã, machi mʉ warrarã kĩra nuree. Mʉʉba mau b̶ʉmaa b̶uu machiba kachirua waurãad̶amera. Maamina ab̶aba kachirua wauruubʉrã, ab̶a uru panuu Dachi Bajãad̶ebena Akõremaa dachi baita chi chuburia id̶imera. Mau chi chuburia id̶ibarii Jesucristobʉ. Ne joma jipa waubarii. ²Ichi biusii Dachi Akõreba dachi kachirua perdonamera. Dachi kachirua báitaburu biubasii, maumaarã biusii joma nau iujãad̶e panuurã kachirua baita bid̶a.

³Dachi Akõreba waubi b̶uu bed̶ea dachiba mau wau panuubʉrã, unubiad̶ai panuu ichi biawãra unu panuu. ⁴Ab̶auba jaraaruubʉrã: «Mʉʉba ichi unu b̶uu», maud̶e ichiba waubi b̶uu bed̶ea wauwẽa b̶uubʉrã, mauba setaa jara b̶uu. Chi biawãra bed̶ea adua b̶uu. ^5-6Maamina chi Dachi Akõre bed̶ea wau b̶uuba Dachi Akõre biawãra kʉ̃ria b̶uu. Chi Dachi Akõre ome b̶uu a b̶uu Jesucristo nibad̶a kĩra nibai b̶uu. Dachi maka nibaaduubʉrã, kuitaa panuu biawãra ichi ome panuu.

Dachi Akõreba waubi b̶uu bed̶ea wid̶i

⁷Ãbarã, mʉʉba machi baita b̶ʉwẽa b̶uu chi Dachi Akõreba waubi b̶uu bed̶ea wid̶i, maumaarã b̶ʉ b̶uu ichiba chi naed̶e waubi b̶uu bed̶ea jarad̶a.2:7. Juan 13:34-35. Mau waubi b̶uu bed̶ea machiba Cristod̶e ijãaped̶aad̶ad̶eed̶ebena kuitaa panuu. Mau nabẽraed̶ebena bed̶ea chi ichid̶ebena ũriped̶aad̶abʉ. ⁸Maamina chi mʉʉba b̶ʉmaa b̶uu chiwid̶i kĩra b̶uu Cristoba wausiid̶eeba maud̶e machia bid̶a biawãra wau panuud̶eeba. Chi nau wid̶i pãriu wãꞌãe kãrii kĩra b̶uu, maud̶e chi biawãra bed̶ea ʉ̃d̶aa kãrii kĩra b̶uu.

⁹Ab̶auba ʉ̃d̶aad̶e b̶uu aaruubʉrã, maamina ichi ãba kĩramaa b̶uubʉrã, wabid̶a pãriud̶e b̶uu. ¹⁰Chi ichi ãba kʉ̃riabarii ʉ̃d̶aad̶e b̶uu maud̶e ichi sõd̶e wãꞌãe kachiruad̶e b̶aebii baita. ¹¹Maamina chi ichi ãba kĩramaa b̶uu pãriud̶e b̶uu. Pãriud̶e niid̶eeba adua b̶uu samaa wãi, pãriuba ichi dau berrea b̶uud̶eeba.

¹²Warrarã, mʉʉba nau karta machi baita b̶ʉ b̶uu Dachi Akõreba Cristod̶eeba machi kachirua perdonasiid̶eeba.

¹³Chõrarã, mʉʉba nau karta machi baita b̶ʉ b̶uu chi arab̶aed̶eed̶e nibad̶a wabid̶a nii, mau unubadaud̶eeba.

Kũudrãarã, mʉʉba nau karta machi baita b̶ʉ b̶uu jʉbawãe nii poyaasid̶aud̶eeba.

Warrarã, mʉʉba nau karta machi baita b̶ʉ b̶uu Dachi Bajãad̶ebena Akõre unusid̶aud̶eeba.

¹⁴Akõrerã, mʉʉba nau karta machi baita b̶ʉ b̶uu chi arab̶aed̶eed̶e nibad̶a wabid̶a nii, mau unubadaud̶eeba.

Kũudrãarã, mʉʉba nau karta machi baita b̶ʉ b̶uu ãrea ijãa panuud̶eeba, Dachi Akõre bed̶ea machi sõd̶e b̶uud̶eeba, maud̶e jʉbawãe nii poyaasid̶aud̶eeba.

¹⁵Nau iujãad̶ebena kʉ̃risia maud̶e ne joma nau iujãad̶ebena kachirua kʉ̃riarã́sturu. Chi nau iujãad̶ebena kachirua kʉ̃ria b̶uuba Dachi Bajãad̶ebena Akõre kʉ̃riawẽa b̶uu. ¹⁶Nau iujãad̶ebena kachirua naubʉ: dachi kakuaba kachirua wau kʉ̃ria b̶uabarii, dachi dauba unu panuu kʉ̃ria panabadau, maud̶e dachiba uru panuu kakua maebʉrã wau panuu kakua ara dachi waabenarã audeara aude nuree kʉ̃risia panad̶ai. Joma mau Dachi Bajãad̶ebena Akõred̶ebenawãe, maumaarã nau iujãad̶ebenabʉ. ¹⁷Nau iujãa kachirua maud̶e joma chi kachirua ẽbẽrarãba wau kʉ̃ria panuu wãꞌãe bai. Maamina chi Dachi Akõreba jara b̶uu bed̶ea wau b̶uu ewaricha ichi ome chokae b̶uai.

Cristo kĩramaabarii

¹⁸Mʉ warrarã, nau kaad̶ebena ewari wãꞌãeburuu. Machiba ũrisid̶au Cristo kĩramaabarii neei.2:18 Cristo kĩramaabarii. Griego bed̶ead̶e naka b̶ʉ kub̶uu: anticristo. Cristo kĩramaabadaurã id̶ibae barau. Maud̶eeba dachiba kuitaa panuu nau Dachi Akõre bed̶ea ewari wãꞌãeburuu. ¹⁹Maarã dachi baara panad̶a wãsid̶au, maamina biawãra dachid̶ebenawãe basii. Maarã biawãra dachid̶ebena basirã, dachi baara wabid̶a ãbua panad̶ai basii. Maamina mau makasii biꞌia kuitaad̶amera joma dachid̶ebenawãe nuree.

²⁰Maumaarã machiba Dachi Akõre Jauri Cristoba dead̶a uru panuu. Ichid̶eeba joma chi biawãra bed̶ea kuitaa panuu. ²¹Mʉʉba nau karta b̶ʉwẽa b̶uu machiba chi biawãra bed̶ea adua panuud̶eeba maumaarã b̶ʉ b̶uu kuitaa panuud̶eeba. Maud̶e kuitaa panuu chi seta biawãrad̶ebenawãe. ²²¿Chi setaa jarabarii kaima? Chi Jesús Dachi Akõreba deai jarad̶a dachi karibabariiwãe a b̶uubʉ.2:22 Dachi Akõreba deai jarad̶a dachi karibabarii. Griego bed̶ead̶e naka b̶ʉ kub̶uu: Cristo. Mau chi Cristo kĩramaabariibʉ. Mauba Dachi Bajãad̶ebena Akõre maud̶e Dachi Akõre Warr kʉ̃riawẽe. ²³Chi Dachi Akõre Warr kʉ̃riawẽa b̶uuba Dachi Bajãad̶ebena Akõre uru b̶uuwãe. Chi Jesús Dachi Akõre Warr a b̶uuba Dachi Bajãad̶ebena Akõre sid̶a uru b̶uu. ²⁴Maud̶eeba machiba ijãasid̶aud̶eed̶ebena chi Cristo ʉ̃rʉbena ũri panuu machi sõd̶e nu uru panásturu. Maka machi Dachi Bajãad̶ebena Akõre ome maud̶e ichi Warr ome ãbua panad̶ai. ²⁵Maka ãbua panuubʉrã, Cristoba dachimaa biawãra jarasii ewaricha Dachi Akõre ome chokae panad̶ai.

²⁶Mʉʉba mau b̶ʉsii waabenarãba machi setaa kʉ̃ria panuud̶eeba. ²⁷Maamina machiba Dachi Akõre Jauri Cristoba dead̶a uru panuu. Maud̶eeba jʉrʉd̶aabai panuu waabenarãmaa machi jaradeabiayua. Dachi Akõre Jauriba machimaa ne joma jaradea b̶uu. Ichiba jaradea b̶uu setawãe, maumaarã biawãrabʉ. Maud̶eeba Cristo ome ãbua panásturu Dachi Akõre Jauriba machimaa jaradead̶a kĩra.

²⁸Mʉ warrarã, Cristo ome ãbua panásturu. Maka ichi neeruud̶e wapead̶awẽa maud̶e kĩra nejasiad̶awẽa nuread̶ai ichi daad̶e. ²⁹Machiba kuitaa panuu Jesucristo jipa nii. Maud̶e kuitaa panuu chi joma jipa wau nuree, Dachi Akõre warrarãbʉ.

Dachi Akõre warrarã

¹Ichiásturu saka Dachi Akõreba3:1 Dachi Akõreba. Griego bed̶ead̶e naka b̶ʉ kub̶uu: el Padre. dachi ãrea kʉ̃ria b̶uu. Ichiba ãrea kʉ̃ria b̶uud̶eeba dachi ichi warrarã abarii. Biawãra dachi ichi warrarãbʉ.3:1 Dachi ichi warrarãbʉ. Chi b̶ee nabẽraed̶ebena kartad̶e mau bed̶ea wãꞌãe. Nau iujãad̶ebenarãba mau adua panuu, ichi unud̶akaud̶eeba. ²Ãbarã, dachi Dachi Akõre warrarãbʉ. Dachi Akõreba wabid̶a unubiawẽa b̶uu dachi saka nuread̶ai. Maamina kuitaa panuu Cristo neeruud̶e ichi kĩra nuread̶ai, mau ewarid̶e ichi saka nii unud̶aid̶eeba. ³Chi Cristo kĩra b̶uai baita esed̶au b̶uu kachiruaswãe b̶uai baita nu b̶uabarii, Cristo kachiruaswãe nii kĩra.

⁴Chi kachirua wau b̶uuba Dachi Akõre ley waukau. Mau kachirua wauruud̶e, Dachi Akõre maud̶e chi ley kʉ̃riakau. ⁵Maamina machiba kuitaa panuu Jesucristo nau iujãad̶aa neesii dachi kachirua awara b̶ui baita. Ichi chi kachirua b̶aꞌãra bid̶a wãꞌãe nii. ⁶Chi ichi ome ãbua b̶uuba kachirua waukau. Maamina chi kachirua wau b̶uuba Jesucristo unukau maud̶e saka nii adua b̶uu.

⁷Mʉ warrarã, ab̶aumaa ida setaa kũruabiarã́sturu. Chi jipa wau b̶uu Dachi Akõre daad̶e jipa nii, Cristo jipa nii kĩra. ⁸Maamina chi kachirua wau b̶uu jʉbawãe niid̶ebʉ, arab̶aed̶eed̶e jʉbawãe nii kachirua wau b̶uabariid̶eeba. Dachi Akõre Warr nau iujãad̶aa neesii jʉbawãe niiba wau b̶uu poyaai baita.

⁹Chi Dachi Akõre wãwa adaud̶a kĩra niiba kachirua waukau, Dachi Akõre chokae nibabiabarii ichid̶e b̶eebariid̶eeba.3:9 Dachi Akõre chokae nibabiabarii ichid̶e b̶eebariid̶eeba. Griego bed̶ead̶e naka b̶ʉ kub̶uu: Dachi Akõre netaa ichid̶e b̶uabarii. Dachi Akõred̶ebena neesiid̶eeba kachirua poyaa wau b̶uakau. ¹⁰Naud̶eeba dachiba kuitaa panuu kairã Dachi Akõre warrarã maud̶e kairã jʉbawãe nii warrarã. Chi jipa wauwẽa b̶uu Dachi Akõre warrwãe. Maud̶e chi ichi ãba kʉ̃riawẽa b̶uu Dachi Akõre warrwãe.

Chiya kʉ̃ria nuread̶ai panuu

¹¹Chi machiba ijãasid̶aud̶eed̶ebena ũri panuu bed̶ea naubʉ: dachi chiya kʉ̃ria nuread̶ai panuu. ¹²Caín kĩra panad̶aabai panuu.3:12 Génesis 4:1-15. Jʉbawãe niid̶e basiid̶eeba chi ãba beasii. ¿Sakãe ichi ãba beasma? Beasii ichi ãbaba wau b̶uad̶a Dachi Akõre daad̶e biꞌia b̶uasiid̶eeba maud̶e ichiba waud̶a kachirua b̶uasiid̶eeba.

¹³Ãbarã, nau iujãad̶ebenarãba machi kĩramaaduubʉrã, ãrea kĩra nomaarã́sturu. ¹⁴Dachiba ãbarã kʉ̃ria panuud̶eeba kuitaa panuu dachi biu panad̶a chokae paneesid̶au. Chi ichi ãba kʉ̃riawẽa b̶uu wabid̶a biu nub̶uu. ¹⁵Chi ichi ãba kĩramaa b̶uu Dachi Akõre daad̶e mia beabarii. Machiba kuitaa panuu chi mia beabarii ewaricha Dachi Akõre ome chokae b̶uabai. ¹⁶Naud̶eeba dachiba kuitaa panuu dachi ãbarã kʉ̃riabadau: Jesucristo dachi kakua biusii. Ara mau kĩra dachi sid̶a kʉ̃riad̶eeba ãbarã baita biud̶ai baita nuread̶ai panuu. ¹⁷Chi nau iujãad̶e chi nejarr barau niiba chi nejarr barauwãe nii ãba unu b̶uu aid̶awẽebʉrã, ¿Dachi Akõreba chi kʉ̃ria ichi sõd̶e uru b̶uka? Uru b̶uuwãe. ¹⁸Mʉ warrarã, dachi ãbarã kʉ̃riad̶ai panuu. Bed̶ead̶éburu maka waud̶aabai panuu, maumaarã dachiba wau panuud̶eeba biawãra kʉ̃riad̶ai panuu.

^19-20Maud̶eeba kuitaa panuu dachi biawãra Dachi Akõred̶e. Maud̶e ara dachi sõd̶e kachirua wau panuu a kʉ̃risiaduubʉrã, Dachi Akõre daad̶e poyaa jirukaraayuwãe panad̶ai. Dachi Akõreba dachi ʉ̃rʉbena biꞌia kuitaa b̶uu chi dachi sõd̶e kʉ̃risia panuu audeara. Ichiba joma kuitaa b̶uu. ²¹Ãbarã, dachi nebʉraswãe panuu a kʉ̃risia panuubʉrã, wapeawẽa Dachi Akõremaa poyaa ʉtaa id̶id̶ai. ²²Maud̶e dachiba ʉtaa id̶iiduu ichiba deai, Dachi Akõreba waubi b̶uu bed̶ea maud̶e chi ichiba kʉ̃ria b̶uu wau panuud̶eeba. ²³Mau waubi b̶uu bed̶ea naubʉ: ichi Warr Jesucristod̶e ijãad̶ai maud̶e chiya kʉ̃ria nuread̶ai ichiba dachimaa jarad̶a kĩra. ²⁴Chi Dachi Akõreba waubi b̶uu bed̶ea wau b̶uu Dachi Akõre ome b̶uu, maud̶e Dachi Akõre ichi ome b̶uu. Dachiba kuitaa panuu Dachi Akõre dachi ome b̶uu, ichi Jauri dachimaa deasiid̶eeba.

Setaa jaradeabadaurã saka kuitaad̶ai

¹Ãbarã, barikiurãba Dachi Akõre Jaurid̶eeba berrea panuu abadaurã ijãarã́sturu, maumaarã kauwa ichiásturu ãchiba biawãra Dachi Akõre Jaurid̶eeba maebʉrã waabenarãd̶eeba berrea panuu kuitaad̶ai baita. Mau makásturu ãreaba nau iujãad̶e setad̶eeba ãchiba Dachi Akõre Jaurid̶eeba berrea panuu abadaud̶eeba. ²Naka machiba kuitaad̶ai kai Dachi Akõre Jaurid̶eeba berrea b̶uu: ab̶aba Jesucristo nau kakuad̶e biawãra neesii aaruubʉrã, Dachi Akõre Jaurid̶eeba berrea b̶uu. ³Maamina ab̶auba Jesucristo nau kakuad̶e neebasii aaruubʉrã, Dachi Akõre Jaurid̶eeba berrea b̶uuwãe. Chi Cristo kĩramaabariid̶eeba berrea b̶uu.4:3 Cristo kĩramaabarii. Griego bed̶ead̶e naka b̶ʉ kub̶uu: anticristo. Machiba ũrisid̶au Cristo kĩramaabarii neei b̶uu. Biawãra mau nau iujãad̶e b̶uu.

⁴Mʉ warrarã, machi Dachi Akõred̶ebʉ. Machiba maarãmaa ida setaa kũruabiad̶aabasii, chi machi sõd̶e b̶uu chi nau iujãad̶e b̶uu audeara poyaabarii b̶uud̶eeba. ⁵Maarã nau iujãa kachiruad̶ebenarãbʉ. Maud̶eeba nau iujãad̶ebena kʉ̃risia jaradeabadau maud̶e ãchiba jaradea panuu nau iujãad̶e Dachi Akõred̶e ijãad̶akaurãba ijãabadau. ⁶Maamina Dachi Akõred̶ebʉ. Chi Dachi Akõre unu b̶uuba dachiba jaradea panuu ijãabarii. Chi Dachi Akõre unukauba dachiba jaradea panuu ijãakau. Maud̶eeba dachiba kuitaa panuu kaiba Dachi Akõre Jaurid̶eeba biawãra bed̶ea jaradea b̶uu maud̶e kaiba setad̶ebena jaurid̶eeba setaa jaradea b̶uu.

Dachi Akõreba ẽbẽrarã kʉ̃ria b̶uu

⁷Ãbarã, dachi chiya kʉ̃ria nuread̶ai panuu, Dachi Akõreba dachimaa dachi ãbarã biawãra kʉ̃riabiabariid̶eeba. Joma chi kʉ̃ria uru nuree Dachi Akõre warrarãbʉ maud̶e Dachi Akõre unubadau. ⁸Dachi Akõreba ne jomad̶e kʉ̃riakua b̶uud̶eeba chi ab̶au kʉ̃riawẽa b̶uuba Dachi Akõre unukau. ⁹Dachi Akõreba dachi kʉ̃ria b̶uu unubiasii ichi Warr ab̶a nii nau iujãad̶aa bʉisiid̶e ichid̶eeba ewaricha chokae nuread̶amera. ¹⁰Chi biawãra kʉ̃ria naka b̶uu: chi kʉ̃riad̶eeba Dachi Akõreba ichi Warr bʉisii biumera dachi kachirua perdonai baita. Dachi Akõreba maka waubasii dachiba ichi kʉ̃ria panasiid̶eeba, maumaarã maka wausii ichiba dachi kʉ̃riasiid̶eeba.

¹¹Ãbarã, Dachi Akõreba dachi maka kʉ̃riasiid̶eeba dachi sid̶a chiya kʉ̃ria nuread̶ai panuu. ¹²Ab̶au bid̶a Dachi Akõre dauba unukau. Maamina dachi chiya kʉ̃ria panuubʉrã, Dachi Akõre dachi ome b̶uu maud̶e ichi kʉ̃riad̶eeba dachiba biawãra joma kʉ̃ria panuu. ¹³Dachi Akõreba ichi Jauri dachimaa deasiid̶eeba kuitaa panuu dachi Dachi Akõre ome panuu maud̶e ichi dachi ome b̶uu. ¹⁴Daiba ichi Warr unusid̶aud̶eeba jara panuu Dachi Bajãad̶ebena Akõreba mau biawãra bʉisii nau iujãad̶ebenarã karibamera. ¹⁵Barikiuba Jesús biawãra Dachi Akõre Warr aaruubʉrã, Dachi Akõre ichi ome b̶uu maud̶e ichi Dachi Akõre ome b̶uu.

¹⁶Dachiba kuitaa panuu maud̶e ijãa panuu Dachi Akõreba dachi kʉ̃riakua b̶uu. Dachi Akõreba ne jomad̶e kʉ̃ria b̶uu. Biawãra kʉ̃ria uru b̶uu Dachi Akõre ome b̶uu maud̶e Dachi Akõre ichi ome b̶uu. ¹⁷Maka dachiba Dachi Akõre maud̶e joma ẽbẽrarã biawãra kʉ̃ria panuu. Dachi Akõreba dachi nebʉra kastikai ewarid̶e dachi ne wapeawẽa nuread̶ai, nau iujãad̶e Jesucristo nibad̶a kĩra nibaped̶aad̶ad̶eeba. ¹⁸Dachiba Dachi Akõre maud̶e joma ẽbẽrarã kʉ̃ria panuubʉrã, Dachi Akõreba kastikaid̶ebena wapead̶aabai panuu, chi biawãra kʉ̃riaba mau wapead̶ai wãꞌãebibariid̶eeba. Chi Dachi Akõreba dachi nebʉra kastikai wapea b̶uuba kuitaa b̶uu Dachi Akõreba ichi nebʉra kastikai. Ichiba Dachi Akõre maud̶e joma ẽbẽrarã wabid̶a biawãra kʉ̃ria b̶uuwãe.

¹⁹Dachiba Dachi Akõre kʉ̃ria panuu ichiba dachi naa kʉ̃riasiid̶eeba. ²⁰Ab̶auba Dachi Akõre kʉ̃ria b̶uu aaruubʉrã, maud̶e ichi ãba kĩramaa b̶uaruubʉrã, setaa jara b̶uu. Chi ãba unu b̶uu kʉ̃riawẽa b̶uubʉrã, ¿saka Dachi Akõre unuwẽa nii kʉ̃ria b̶uaima? ²¹Jesucristoba dachimaa waubi b̶uu bed̶ea naubʉ: chi Dachi Akõre kʉ̃ria b̶uuba ichi ãba kʉ̃ria b̶uai b̶uu.

Dachi Akõre Warr ijãad̶ai panuu ʉ̃rʉbena

¹Jesús Dachi Akõreba Dachi Karibabarii deai jarad̶a ab̶auba ijãaruubʉrã, mau ẽbẽra Dachi Akõre warrbʉ.5:1 Dachi Akõreba Dachi Karibabarii deai jarad̶a. Griego bed̶ead̶e naka b̶ʉ kub̶uu: Cristo. Dachi Bajãad̶ebena Akõre kʉ̃ria b̶uuba ichi warrarã sid̶a kʉ̃ria b̶uu. ²Dachiba Dachi Akõre kʉ̃ria panuubʉrã maud̶e ichiba waubi b̶uu bed̶ea wau panuubʉrã, kuitaa panuu ichi warrarã sid̶a kʉ̃ria panuu. ³Dachi Akõre biawãra kʉ̃ria panuubʉrã, ichiba waubi b̶uu bed̶ea joma waud̶ai. Ichiba waubi b̶uu bed̶ea chaareawẽa b̶uu. ⁴Joma Dachi Akõre warrarãba nau iujãad̶ebena kachirua ida b̶ubadau. Biawãra dachiba Jesucristod̶e ijãa panuud̶eeba mau poyaa ida b̶ud̶ai. ⁵¿Kaiba nau iujãad̶ebena kachirua poyaa ida b̶uima? Ab̶auba Jesús biawãra Dachi Akõre Warr ijãad̶e b̶uubʉrã, mau ẽbẽraba mau poyaa ida b̶ui.

Jesús biawãra Dachi Akõre Warrbʉ

⁶Mau ara ichi Jesucristo, chi nau iujãad̶aa neeped̶a baniad̶e boro eabid̶a maud̶e ichi oa cruzd̶e ched̶abʉ. Nau iujãad̶aa neeped̶a baniad̶éburu boro eabasii, maumaarã ichi oa sid̶a cruzd̶e chesii. Dachi Akõre Jauriba kuitaabia b̶uu mau biawãra, ichiba chi biawãra bed̶ea kuitaabiabariid̶eeba. ⁷Maud̶e bajãad̶e õbea panuuba mau biawãra arab̶aud̶e jara panuu; Dachi Bajãad̶ebena Akõreba maka jara b̶uu, chi «Bed̶ea» abadauba maka jara b̶uu maud̶e ichi Jauriba maka jara b̶uu. Mau õbea panuu ab̶aburubʉ.5:7 Griego bed̶ead̶e chi b̶ee kartad̶e versículo 7 wãꞌãe.⁸Naka chi õbea panuuba kuitaabiabadau chi bed̶ea biawãra Jesús ʉ̃rʉbena: Jesús boro easiid̶eeba, ichi oa cruzd̶e chesiid̶eeba, maud̶e Dachi Akõre Jauriba kuitaabia b̶uud̶eeba. Mau õbea jara panuuba arab̶aud̶e kuitaabia panuu. ⁹Ẽbẽraba unud̶a biawãra aaruubʉrã dachiba mau ijãabadau. Maamina Dachi Akõreba jara b̶uu aude ijãad̶ai panuu, ichi Warr ʉ̃rʉbena biawãra jara b̶uud̶eeba. ¹⁰Chi Dachi Akõre Warr ijãa b̶uuba ichi sõd̶e kuitaa b̶uu Dachi Akõreba jara b̶uu biawãra. Maamina chi Dachi Akõreba jara b̶uu ijãawẽa b̶uuba chi mauba setaa jara b̶uu a kʉ̃risia b̶uu, ichi Warr ʉ̃rʉbena jara b̶uu ijãawẽa b̶uud̶eeba. ¹¹Dachi Akõreba jara b̶uu naubʉ: ichi Warrd̶eeba dachi ewaricha mau ome chokae nibabiai. ¹²Biawãra chi Dachi Akõre Warrd̶e ijãa b̶uu mau ome ewaricha chokae b̶uai. Maamina chi Dachi Akõre Warrd̶e ijãawẽa b̶uu mau ome ewaricha chokae b̶uabai.

Juanba nau kartad̶e aanama b̶ʉd̶a

¹³Mʉʉba nau karta machi chi Dachi Akõre Warrd̶e ijãabadaurã baita b̶ʉʉruu kuitaad̶amera ewaricha Dachi Akõre ome chokae nuread̶ai.

¹⁴Dachi Akõreba kʉ̃ria b̶uu kĩra dachiba ʉtaa id̶iiduubʉrã, kuitaa panuu ichiba ũribarii. Maud̶eeba ne wapeawẽa ichimaa ʉtaa id̶id̶ai panuu. ¹⁵Dachiba ʉtaa id̶iiduu Dachi Akõreba ũribarii kuitaa panuud̶eeba, kuitaa panuu mau ʉtaa id̶iiduu ichiba deai.

¹⁶Machid̶ebena ab̶auba bichi ãba kachirua dachi biubikau wauruu unuuruubʉrã, ʉtaa id̶ii b̶uu. Maka Dachi Akõreba mau perdonaped̶a, chokae nibabii. Maamina dachi biubibarii kachirua baraubʉ. Mʉʉba jarawẽa b̶uu chi mau kachirua waubadaurã kakua ʉtaa id̶imera. ¹⁷Joma Dachi Akõre daad̶e biꞌiwãe waud̶a kachiruabʉ. Maamina kachirua barau dachi biubikau.

¹⁸Dachiba kuitaa panuu Dachi Akõre warrarãba kachirua wau panad̶akau,5:18 Dachi Akõre warrarãba kachirua wau panad̶akau. Griego bed̶ead̶e naka b̶ʉ kub̶uu: chi Dachi Akõred̶ebena need̶aba kachirua waukau. Dachi Akõre Warr Jesucristoba ãchi nu ua b̶uud̶eeba. Mauba jʉbawãe niiba ãchi kachirua poyaa waukau. ¹⁹Dachiba kuitaa panuu dachi Dachi Akõred̶e. Maud̶e kuitaa panuu joma nau iujãad̶e Dachi Akõred̶e ijãad̶akaurã jʉbawãe nii juad̶e duanuu. ²⁰Kuitaa panuu Dachi Akõre Warr neesii maud̶e kʉ̃risia kuitaa dachimaa deasii Dachi Akõre biawãra unud̶amera. Ichi Warr Jesucristo ome panuud̶eeba dachi biawãra Dachi Akõre ome panuu. Mau biawãra Dachi Akõrebʉ. Mauba ẽbẽrarãmaa ichi ome ewaricha chokae nuread̶ai deabarii. ²¹Mʉ warrarã, Dachi Akõre kuenda juaba ne kaped̶aad̶ad̶e ijãarã́sturu.