1 Corintios
Nabena karta Pabloba b̶ʉd̶a ãbarã Corinto puurud̶ebenarã baita
Pabloba nau karta ãbarã Corinto puurud̶ebenarã baita b̶ʉsii. Mau año 55d̶e Éfeso puurud̶ebena urubʉisii.
Pabloba Corintod̶e chi bed̶ea bia Jesús ʉ̃rʉbena naa jaradeasii (Hechos 18:1-17). Chi judiorã araa ãbua imibadau ded̶e jaradea b̶uud̶eeba chi nuree judiorãba ijãasid̶au. Maabae junebena judiorãba Pablo duabʉisid̶aud̶e junebena ded̶e jaradea kob̶eesii. Maka b̶uud̶e waabenarã griegorãba ijãasid̶au. Pablo Corintod̶e año ab̶a y medio b̶uasii.
Corinto puuru mechiu b̶uasii. Ẽbẽrarã 600.000 baidia duanasid̶au. Mau awara ãchi Dachi Akõre kuenda juaba ne kaped̶aad̶a kʉ̃riabadau de ãrea uru panasid̶au. Maamina maarãd̶e ijãad̶ai baita mia pera kachirua waubachid̶au. Chi nureerãba Jesucristod̶e ijãasid̶amina wabid̶a ãibena ome kãi paneebachid̶au. Mau awara ãbarã tãed̶e nebʉra maucha baraasii.
Naa Pabloba maarã iadaasii ãchi chiya jiwaa berreayaa panuud̶eeba (1:1—4:21). Mawãare b̶ʉsii mia pera wau nibarãad̶amera (5:1—6:20). Mawãare chi ãbarãba kartad̶e naed̶e id̶iped̶aad̶a Pabloba panausii. Capítulo 7d̶e miakãid̶ai ʉ̃rʉbena id̶iped̶aad̶a panausii. Capítulo 8d̶ebena ab̶a 11d̶aa panausii chi Dachi Akõre kuenda juaba ne kaped̶aad̶a baita saka waud̶ai panuu ʉ̃rʉbena. Capítulo 12d̶ebena ab̶a 14d̶aa Dachi Akõre Jauriba waubi b̶uu ʉ̃rʉbena panausii.
Corintod̶e waabenarãba dachi chokae jiradud̶ai ʉ̃rʉbena biꞌiwãe kʉ̃risia panasid̶aud̶eeba Pabloba capítulo 15d̶e mau ʉ̃rʉbena b̶ʉsii. Capítulo 16d̶e b̶ʉsii saka chi nejarra ped̶ai panuu maud̶e ãchi ichiad̶e wãi.
1Nau kartad̶e Pabloba naa b̶ʉd̶a
1Mʉ Pablobʉ. Dachi Akõreba ichi kʉ̃riad̶eeba mʉ iusii Jesucristoba bʉid̶a b̶uamera. Dachi ãba Sóstenes mʉ ome b̶uu. 2Mʉʉba nau karta b̶ʉʉruu chi ẽbẽrarã Dachi Akõred̶erã Corintod̶ebena baita. Jesucristod̶eeba Dachi Akõreba machi awara b̶usii ichi baita biꞌia nuread̶amera. Ara mau kĩra ichiba druacha joma Dachi Mechiu Jesucristomaa ʉtaa id̶ibadaurã awara b̶usii. Ichimaarã Mechiubʉ maud̶e Dachi Mechiubʉ. 3Daiba kʉ̃ria panuu Dachi Bajãad̶ebena Akõreba maud̶e Dachi Mechiu Jesucristo ãchi sõbiad̶eeba machi kariba panad̶ai maud̶e jirukaraayuwãe panabiad̶ai.
Pabloba ãbarã baita Dachi Akõremaa ichíturu kid̶ibai ad̶a
4Machi Jesucristo ome panuud̶eeba Dachi Akõreba ichi sõbiad̶eeba aid̶a b̶uu. Maud̶eeba mʉʉba Dachi Akõremaa ʉtaa id̶iiruucha machi kakua ichíturu kid̶ibai abarii. 5Jesucristo ome panuud̶eeba Dachi Akõreba machimaa joma deasii biꞌia waud̶amera. Ichi bed̶ea poyaa kuitaa jaradea panad̶ai maud̶e ichi ʉ̃rʉbena poyaa ãrea kuitaa panad̶ai. 6Joma Dachi Akõreba machimaa dead̶aba unubi b̶uu chi Cristo ʉ̃rʉbena bed̶ea daiba jaradeaped̶aad̶a biawãra ara b̶uu. 7Machiba Dachi Mechiu Jesucristo unud̶ai baita esed̶au panuumisa, Dachi Akõreba ichi Jaurid̶eeba dea b̶uu joma uru panuu. 8Maud̶eeba Dachi Akõreba machi meserãa dea ua b̶uai ab̶a nau ewari wãꞌãeruud̶aa. Maka Dachi Mechiu Jesucristo neeruud̶e machi ʉ̃rʉbena kachirua jarad̶ayuswãe nuread̶ai. 9Dachi Akõreba ara ichiba jara b̶uu kĩra waubarii. Ichiba machi iusii ichi Warr Dachi Mechiu Jesucristo ome ãbua nuread̶amera.
Ãbarã ãchi kakawaa kʉ̃risia uru panad̶a ʉ̃rʉbena
10Ãbarã, Dachi Mechiu Jesucristod̶eeba mʉʉba machimaa chi chuburia id̶iiruu ãbua biꞌia duanad̶amera. Machi kʉ̃risia kakawaa uru panad̶aabai panuu, maumaarã kʉ̃risia ab̶aud̶e ãbua biꞌia duanad̶ai panuu. 11Ãbarã, mʉʉba ũrisiid̶eeba maka jara b̶uu. Neekau Cloé ded̶ebenarãba mʉʉmaa jarasid̶au machi ijara berrea duanabadau. 12Mau ʉ̃rʉbena biꞌia jaraaruu. Waabenarã machid̶ebenarãba jarabadau: «Mʉ Pablod̶e». Waabenarãba jarabadau: «Mʉ Apolosd̶e». Waabenarãba jarabadau: «Mʉ Pedrod̶e».1:12 Pedro. Griego bed̶ead̶e naka b̶ʉ kub̶uu: Cefas. Maud̶e waabenarãba jarabadau: «Mʉ Cristod̶e». 13Makarã ¿Cristorã ãreaka? ¿Mʉ machi kakua cruzd̶e jirab̶usid̶aka? ¿Machi mʉ trʉ̃d̶e boro easid̶aka? ¡Makawãema!
14Mʉʉba ab̶a bid̶a machid̶ebena boro eabasiid̶eeba kĩrajʉʉ b̶uu. Mʉʉba ab̶a Crispo maud̶e Gayóturu boro easii. 15Maka ab̶au bid̶a poyaa jarawẽe mʉ trʉ̃d̶e boro ead̶a. 16Maud̶e mʉʉba ãba Estéfanas ded̶ebenarã sid̶a boro easii. Maarã awara waabenarã boro easiibʉrã mʉʉba kĩrabawẽma. 17Cristoba mʉ bʉibasii ẽbẽrarã boro ea b̶uamera, maumaarã bʉisii chi bed̶ea bia ichi ʉ̃rʉbena jaradeamera. Nau iujãad̶ebena kʉ̃risia kuitaad̶eeba jaradeawẽa b̶uu, Cristo cruzd̶e biud̶a poyaaswãe b̶eerãamera.
Cristo, Dachi Akõre kʉ̃risia kuitaa maud̶e poyaabarii
18Chi tʉbʉchia kiikaud̶aa wãd̶ai ẽbẽrarãmaarã, Cristo cruzd̶e biud̶a ʉ̃rʉbena bed̶ea kĩranema berrea b̶uu. Maamina dachi, chi Dachi Akõreba karibabadaurã, dachiba kuitaa panuu mau bed̶eaba Dachi Akõre poyaabarii kuitaabia b̶uu. 19Dachi Akõre bed̶ead̶e naka b̶ʉ kub̶uu:
«Chi ãrea kuitaa nuree kʉ̃risia kuitaa, mʉʉba biꞌiwãe b̶uu unubiai. Chi kʉ̃risia kuitaa nureerãba waud̶ai kʉ̃risia panuu ida kabiabai».1:19 Isaías 29:14.
20Biawãra Dachi Akõreba nau iujãad̶ebena kʉ̃risia kuitaa biꞌiwãe b̶uu kuitaabiasii. Maud̶eeba ¿chi ãrea kuitaa nuree kãare sãasma? ¿Chi Moisesba b̶ʉd̶a jaradeabadaurã kãare sãasma? ¿Chi id̶ibaebena kʉ̃risia kuitaad̶eeba berreabadaurã kãare sãasma? 21Dachi Akõreba ichi kʉ̃risia kuitaad̶eeba waud̶aba, ara ichi unubia b̶uu. Maamina nau iujãad̶ebenarãba ara ãchi kʉ̃risia kuitaad̶eeba ichi unud̶akau.1:21 Griego bed̶ead̶e mauba nau sid̶a jara b̶uu Dachi Akõreba ichi kʉ̃risia kuitaad̶eeba b̶ʉsii ẽbẽrarãba nau iujãad̶ebena kʉ̃risia kuitaad̶eeba ichi poyaa kuitaarãad̶amera. Chi daiba jaradea panuu kĩra kawawẽa b̶uu kĩra b̶umina Dachi Akõremaarã bibuara b̶uu maud̶eeba joma chi ichid̶e ijãaduu karibai.
22Chi judiorãba, Cristod̶e ijãad̶ai baita, ẽbẽrarãba ne poyaa waud̶akau unu kʉ̃riabadau. Chi judiowãerãba nau iujãad̶ebena kʉ̃risia kuitaa jʉrʉbadau. 23Maamina daiba Cristo cruzd̶e biud̶a jaradea panuu. Mau bed̶ea judiorãba biꞌia ũrid̶akau. Judiowãerãba mau biꞌiwãe b̶uu kʉ̃risiabadau. 24Maamina Dachi Akõreba chi nuree judiorã maud̶e chi nuree judiowãerã iusii Cristod̶eeba karibai baita. Maarãba kuitaa panuu Dachi Akõreba Cristod̶eeba chi poyaabarii maud̶e kʉ̃risia kuitaa unubiasii. 25Ẽbẽrarãmaarã Cristo cruzd̶e biusiid̶eeba Dachi Akõre kuitaawãe nii maud̶e meserãaswãe nii. Maamina ne adua nii kĩra b̶umina Dachi Akõre joma nau iujãad̶ebenarã audeara ne kuitaa nii. Maud̶e meserãaswãe nii kĩra b̶umina joma nau iujãad̶ebenarã audeara meserãa nii.
26Ãbarã, kʉ̃risiásturu Dachi Akõreba machi adausiid̶e saka nureasii. Ẽbẽrarãmaarã ãrea machid̶ebena ne kuitaa nuread̶aabasii, chi jaradea ua b̶uabadaurã nuread̶aabasii maud̶e chi nejarra barau nureed̶ebena need̶aabasii. 27Maud̶eeba chi ne kuitaa nureerãmaarã machi ne adua nuree. Maamina Dachi Akõreba chi ne adua nuree jʉrʉ adausii chi ne kuitaa nuree kĩrakayad̶amera. Dachi Akõreba chi meserãaswãe nuree jʉrʉ adausii chi meserãa nuree kĩrakayad̶amera. 28Nau iujãad̶ebenarãba chi nejarr barauwãe nuree abadau maud̶e chi maarãba ida b̶ubadau Dachi Akõreba jʉrʉ adausii. Maka chi mechiuwãe nuree jʉrʉ adausii chi mechiu nuree chi nejarr barauwãe nuread̶ai b̶ui baita. 29Maud̶eeba ab̶au bid̶a ara ichi ʉ̃rʉbena Dachi Akõre daad̶e poyaa biꞌia berreawẽma. 30Maawẽa Dachi Akõreba machi Jesucristo ome ãbua b̶usii. Maka Cristod̶eeba Dachi Akõreba ichi kʉ̃risia kuitaa dachimaa kuitaabiasii. Ichiba dachi jipa b̶usii, ara ichi baita biꞌia b̶usii, maud̶e kachiruad̶ebena karibasii. 31Maud̶eeba Dachi Akõre bed̶ead̶e naka b̶ʉ kub̶uu kĩra dachiba waud̶ai panuu: «Ab̶auba biꞌia berrearuubʉrã, Dachi Mechiu ʉ̃rʉbena biꞌia berreai b̶uu».1:31 Jeremías 9:24.
2Cristo cruzd̶e biud̶a ʉ̃rʉbena Pabloba jaradead̶a
1Ãbarã, mʉʉba Dachi Akõre ʉ̃rʉbena machimaa jaradead̶e wãsiid̶e berrea mipitaa berrea b̶uud̶eeba mʉ kʉ̃risia kuitaad̶eeba ne ab̶a bid̶a jaradeabasii. 2Machi tãed̶e b̶uasiid̶e mʉʉba ab̶aburu Jesucristo ʉ̃rʉbena maud̶e ichi cruzd̶e beaped̶aad̶a kuitaabiai kʉ̃ria b̶uasii. 3Maud̶e mʉ meserãaswãe b̶uu kʉ̃risiasii. Maud̶e poyaa biꞌia jaradeawẽe kʉ̃risia b̶uasiid̶eeba wapeaba chi kakua uri b̶uabachii. 4Mʉʉba Jesús ʉ̃rʉbena jaradea b̶uasiid̶e mʉ kʉ̃risia kuitaad̶eeba maka waubasii machiba ijãad̶amera. Maumaarã Dachi Akõre Jauriba ichi poyaad̶eeba kuitaabiasii mau bed̶ea biawãra. 5Maka machiba nau iujãad̶ebena kʉ̃risia kuitaad̶eeba Jesucristod̶e ijãad̶aabasii, maumaarã Dachi Akõre poyaad̶eeba ijãasid̶au.
Chi Dachi Akõreba naed̶e kuitaabiawẽa b̶uad̶a ichi Jaurid̶eeba kuitaabiad̶a
6Maka b̶uud̶e daiba jaradea panuu chi Dachi Akõred̶e ãrea ijãa nureemaa. Ãchi baita mau jaradea panuu chi kʉ̃risia kuitaabʉ. Mau kʉ̃risia kuitaa nau iujãad̶ebenawãema maud̶e nau iujãad̶ebena karrarã kʉ̃risia kuitaawãema. Maarã ãrea panad̶aabai. 7Daiba chi Dachi Akõre kʉ̃risia kuitaa naed̶e kuitaabiawẽa b̶uad̶a jaradea panuu. Nau iujãa waui naed̶e Dachi Akõreba mau kʉ̃risia kuitaad̶eeba ne waui b̶usii dachi ichi ome ãbua biꞌia nuread̶amera. 8Chi nau iujãad̶ebena karrarã ab̶au bid̶a mau kʉ̃risia kuitaa kuitaad̶aabasii. Kuitaa panad̶a basirã, Dachi Mechiu biꞌia nii cruzd̶e bead̶aabai basii. 9Maamina kuitaad̶aabasii Dachi Akõre bed̶ead̶e naka b̶ʉ kub̶uu kĩra:
«Chi Dachi Akõreba ichi kʉ̃ria nuree baita biꞌia wauped̶a uru b̶uu, ab̶au bid̶a wabid̶a unud̶akau, kʉʉrʉba ũrid̶akau maud̶e ne ab̶a bid̶a kuitaa kʉ̃risiad̶akau».2:9 Isaías 64:4; 52:15.
10Joma mau Dachi Akõreba ichi Jaurid̶eeba dachimaa kuitaabiasii. Ichi Jauriba ne joma kuitaa b̶uu. Chi Dachi Akõre kʉ̃risia sid̶a ne joma kuitaa b̶uu. 11¿Ẽbẽra kʉ̃risia kaiba kuitaa b̶uma? Ara ichi du ab̶aburu kuitaa nii. Ara mau kĩra ab̶au bid̶a Dachi Akõre kʉ̃risia poyaa kuitaad̶aabasii. Ab̶a Dachi Akõre Jauríburu mau kuitaa nii. 12Dachiba nau iujãad̶ebena kʉ̃risia adaud̶aabasii, maumaarã Dachi Akõre Jauri adausid̶au joma Dachi Akõreba ichi sõbiad̶eeba dead̶a kuitaad̶amera. 13Ara mau ʉ̃rʉbena daiba berrea panuu. Maamina nau iujãad̶ebena kʉ̃risia kuitaad̶eeba berrea panuuwãema, maumaarã Dachi Akõre Jauriba daimaa jaradea b̶uu kĩra berrea panuu. Maka Dachi Akõre Jauriba kuitaabi b̶uu daiba jaradea panuu ichiba berreabi b̶uu kĩra.2:13 Ichiba berreabi b̶uu kĩra. Griego bed̶ead̶e nau sid̶a jara b̶uu «Dachi Akõre Jauri uru nureerãmaa».
14Maamina Dachi Akõre Jauriba kuitaabi b̶uu chi Dachi Akõre Jauriwãe niiba kuitaai kʉ̃riakau, ichimaarã biꞌiwãe b̶uud̶eeba. Maud̶e poyaa kuitaakau, ab̶a Dachi Akõre Jaurid̶éburu kuitaai b̶uud̶eeba. 15Chi Dachi Akõre Jauri uru b̶uuba Dachi Akõre ʉ̃rʉbena poyaa ãrea kuitaai. Maamina chi Dachi Akõre Jauriwãe niiba chi Dachi Akõre Jauri uru b̶uu kʉ̃risia, kauwa ũrikau. 16Dachi Akõre bed̶ead̶e naka b̶ʉ kub̶uu: «¿Kaiba Dachi Mechiu kʉ̃risia kuitaa b̶uma? ¿Kaiba ichimaa jaradeaima?»2:16 Isaías 40:13. Maamina dachiba Cristo kʉ̃risia uru panuu.
3Pablo maud̶e Apolosba Dachi Akõre traju wauped̶aad̶a
1Ãbarã, mʉ machimaa wãsiid̶e, chi Dachi Akõre Jaurid̶eeba nibabadaurãmaa jaradea b̶uu kĩra poyaa makaabasii. Maumaarã chi nau kakuaba wau kʉ̃ria b̶uu kĩra waubadaurãmaa maud̶e chi ea Cristod̶e ijãaped̶aad̶arãmaa jaradea b̶uu kĩra jaradeasii. 2Mʉʉba Cristo ʉ̃rʉbena bed̶ea chaareawãe b̶uu jaradeasii wãwamaa ju b̶aa dobi b̶uu kĩra. Chiko kobi b̶uu kĩra, mʉʉba chaareawãe b̶uu jaradeabasii, machiba kauwa ũrid̶aabasiid̶eeba. Maud̶e wabid̶a kauwa ũrid̶awẽa panuu. 3Machi wabid̶a nau kakuaba wau kʉ̃ria b̶uu kĩra nibabadau: waabenarãba uru panuu kakua, kachirua kʉ̃risiabadau maud̶e oa kachirua berreabadau. Maka nureed̶eeba ¿nau kakuaba wau kʉ̃ria b̶uu kĩra nureewãeka? 4Ab̶auba jarabarii: «Mʉ Paulod̶ebʉ». Waya ab̶auba jarabarii: «Mʉ Apolosd̶ebʉ». Machiba maka jarabadaud̶eeba nau iujãad̶ebenarã kĩra nuree.
5Maamina ¿Pablo kaima? ¿Apolos kaima? Dai Dachi Akõre baita bari trajabadaubʉ. Daid̶eeba machiba Dachi Mechiud̶e ijãasid̶au. Dachi Akõreba daicha waubiad̶a kĩra wausid̶au. 6Ne uuruu kĩra mʉʉba machimaa Jesús ʉ̃rʉbena naa jaradeasii. Maabae mʉʉba uud̶ad̶e bania earuu kĩra Apolosba Dachi Akõre bed̶ea biꞌia jaradeasii. Maamina Dachi Akõréburu aid̶asii machiba ijãad̶amera chi ne uud̶a waribiiruu kĩra. 7Maud̶eeba chi ne uubarii chi aude mechiuwãema. Chi bania eabarii sid̶a chi aude mechiuwãema. Dachi Akõre chi aude mechiubʉ. Ichiaburu ne uu nub̶uu waribibarii. 8Chi ne uubarii maud̶e chi bania eabarii sid̶a Dachi Akõre daad̶e arab̶aud̶e nuree. Ichiba dachicha ne biꞌia deai, dachiba wau panad̶a kĩra. 9Mʉʉba Apolos ome arab̶aud̶e Dachi Akõre traju wau panuu. Machi sid̶a Dachi Akõred̶e ne uu nub̶uu iujãabʉ.
Mau awara machi Dachi Akõreba de wau b̶uu kĩra nuree. 10Mʉ chi de waubarii bia kĩra nii. Dachi Akõreba ichi sõbiad̶eeba mʉʉmaa dead̶aba, de jʉ̃rʉ ãrea id̶u ʉyaasii. Waabenarãba mau ʉ̃rʉ de waubadau. Maamina dachicha kauwa panad̶ai b̶uu saka mau ʉ̃rʉ waui b̶uu. 11Jesucristo chi de jʉ̃rʉ baerã, june ãyaa poyaa nub̶uud̶aabai. 12Ab̶auba mau ʉ̃rʉ de bia wauruubʉrã, ichiba wau b̶uu nee, parata maebʉrã mo dod̶aa mipitaa ãrikau kĩra b̶uu. Maamina ab̶auba mau ʉ̃rʉ de biawãe wauruubʉrã, ichiba wau b̶uu bakuru, kiruu maebʉrã sia kiruuba wauped̶aad̶a kĩra b̶uai. 13Cristoba dachi nebʉra ichiai ewarid̶e dachicha wauped̶aad̶a tʉbʉchiaba ichia chaai, ãrea dauchia jãadua b̶uai kuitaai baita. Mauba unubii dachiba wauped̶aad̶a saka b̶uasii. 14Dachiba waud̶aba mau tʉbʉchiad̶e dauchia jãadua b̶uubʉrã Cristoba chi wau b̶uad̶amaa ne biꞌia deai. 15Maamina chi dachiba waud̶a baawãaruubʉrã chi wau b̶uad̶aba ne ab̶a bid̶a adaubai. Dachi Akõreba ichi karibarumina de baawãaruud̶ebena awara wãaruu kĩra b̶uai.
16¿Adua panuka Dachi Akõre Jauri machi sõd̶e b̶uu? ¿Adua panuka machi Dachi Akõre de? 17Ab̶auba Dachi Akõre de ãriiruubʉrã Dachi Akõreba ãrea kastikai, ichi de ichi baitabena b̶uud̶eeba. Machi mau deebʉ.
18Ara machi du ab̶a setaa kũruarã́sturu. Ab̶auba chi nau iujãad̶ebena kʉ̃risia kuitaa kĩra ne kuitaa b̶uu kʉ̃risia b̶uubʉrã, waa maka kʉ̃risiabai b̶uu. Maumaarã chi biawãra kʉ̃risia kuitaa uru b̶uai baita nau iujãad̶ebenarã daad̶e ne adua b̶uu kĩra b̶uai b̶uu. 19Dachi Akõremaarã, nau iujãad̶ebena kʉ̃risia kuitaa biꞌiwãe b̶uu. Dachi Akõre bed̶ead̶e naka b̶ʉ kub̶uu: «Dachi Akõreba chi nau iujãad̶e ne kuitaa nuree ara ãchi kʉ̃risia kuitaad̶eeba unubibarii ne kuitaa panuuwãe».3:19 Job 5:13.20Maud̶e naka b̶ʉ kub̶uu: «Dachi Mechiuba kuitaa b̶uu chi nau iujãad̶e ne kuitaa nuree kʉ̃risia, mau kʉ̃risiaswãe bari b̶uu».3:20 Salmos 94:11.21Maud̶eeba kʉ̃risiarã́sturu ẽbẽra ab̶a baara wãaduud̶eeba, mau waabenarã audeara biꞌia nii. Dachi Akõred̶eeba machiba ne joma uru panuu biꞌia nuread̶ai baita. 22Machiba mʉ, Apolos maud̶e Pedro uru panuu. Joma nau iujãad̶e b̶uu sid̶a uru panuu. Chi id̶ibaebena maud̶e nubena uru panuu. Dachi chokae panuubʉrã maebʉrã biuduubʉrã Dachi Akõred̶eeba ne joma uru panad̶ai biꞌia nuread̶ai baita. 23Joma machi Cristod̶erãbʉ. Maud̶e Cristo Dachi Akõred̶ebʉ.
4Jesucristo baita bari trajabadaurã
1Maka machiba kʉ̃risiad̶ai panuu dai Cristo baita bari trajabadaurã. Dachi Akõreba dai b̶usii chi ichi ʉ̃rʉbena naed̶e kuitaabiawẽa b̶uad̶a jaradead̶amera. 2Biawãra chi chibari baita bari trajabariiba ichi jaradea ua b̶uabariiba waubi b̶uu joma jipa wau b̶uai b̶uu chi jaradea ua b̶uabariiba biꞌia unumera. 3Maud̶eeba machiba maebʉrã barikia ẽbẽraba mʉ ʉ̃rʉbena kachirua jaraaduud̶e biꞌiwãe kʉ̃risiakau. Maud̶e ara mʉ du ab̶a jarawẽma mʉʉba wau b̶uu saka b̶uu. 4Mʉʉba ne ab̶a bid̶a biꞌiwãe wauwẽa b̶uu kuitaa b̶umina mauba jarawẽa b̶uu mʉʉba joma jipa wausii. Dachi Mechiúburu kuitaa jarai. 5Maud̶eeba ichiba nebʉra ichiai ewari naed̶e dachiba jarad̶aabai panuu ichi traju wau b̶uuba jipa wau b̶uu maebʉrã jipa wauwẽa b̶uu. Dachi Mechiu neeruud̶e dachi sõd̶e kʉ̃risia b̶uad̶a maud̶e ne joma dachi sõd̶e miru nuread̶a kuitaabii. Dachi Akõréburu dachicha biꞌia jarai dachiba biꞌia wauped̶aad̶a kĩra.
6Ãbarã, mʉ ʉ̃rʉbena maud̶e Apolos ʉ̃rʉbena b̶ʉsii machi aid̶ai baita. Dai ʉ̃rʉbena kuitaad̶ai panuu Dachi Akõre bed̶ead̶e b̶ʉ kub̶uu aude kʉ̃risiad̶aabai panuu.4:6 Dachi Akõre bed̶ead̶e b̶ʉ kub̶uu aude kʉ̃risiad̶aabai panuu. Griego bed̶ead̶e mau chaarea b̶uu biꞌia ũrid̶amera. Makarã machiba ab̶a bid̶a waabena audeara biꞌia b̶uu kʉ̃risiad̶awẽa panuu. 7¿Kaiba machi waabenarã audeara biꞌia b̶usma? Dachi Akõreba dead̶a awara ¿machiba kãare uru panuma? Machiba Dachi Akõred̶ebena ne joma adauped̶aad̶ad̶eeba ¿sakãe ara machi du ab̶a adauped̶aad̶a kĩra berrea panuma?
8Dachi Akõred̶eeba adau kʉ̃ria panad̶a machiba joma uru panuu abadau. Dachi Akõreba dea b̶uu ãrea uru panuu abadau. Dai ida b̶ud̶aped̶a machi du ab̶a chi mechiurã paneed̶ai a kʉ̃risia panuu. Maamina makawãema. Machi biawãra chi mechiurã paneed̶a basirã biꞌia b̶uai basii. Makara dai sid̶a machi ome ãbua chi mechiurã paneed̶ai basii. 9Maamina mʉʉba kʉ̃risia b̶uu dai chi Jesucristoba bʉid̶arã Dachi Akõreba jomaurã audeara kaebeu b̶usii. Dai chi juezba jomaurã daad̶e beabíbad̶e a b̶uu kĩra panuu.4:9 Mau ewarid̶e chi romad̶ebenarã kokoroarãba ãchi kĩramaabadau jidaud̶aped̶a, Roma puurud̶e adoed̶aped̶a maabae jemenabadaumaa adoebachid̶au. Aria ab̶au ome chĩobiabachid̶au, biꞌiwãe panabiad̶aped̶a beabiabachid̶au ẽbẽrarã daad̶e. Nau versiculod̶e Pabloba jara b̶uu chi Jesucristoba bʉid̶arã maarã kĩra nuree. Ẽbẽrarãba maud̶e angelerãba, jomaurãba ichia panuu biud̶ai kuitaad̶ai baita. 10Ẽbẽrarãmaarã dai Cristo baita ne adua nuree maud̶e meserãaswãe nuree. Maamina machi Cristo ome panuud̶eeba chi ne kuitaa nuree abadau maud̶e chi meserãa nuree abadau. Ẽbẽrarãba machi ʉ̃rʉbena biꞌia berrea panuu, maamina dai ida b̶u panuu. 11Id̶ibaed̶aa dai jarrba wau panuu, obisia wau panuu maud̶e paru sore uru panuu. Dai dewãe panuu maud̶e ẽbẽrarãba dai kachirua waubadau. 12Dai kʉrrjĩrud̶awẽa traja panuu ne uru panad̶ai baita. Ẽbẽrarãba daimaa kachirua berreaduud̶e daiba ãchimaa biꞌia berreabadau. Dai kachirua wauduud̶e dauchia jãadua panabadau. 13Setad̶eeba daimaa kachirua jaraaduud̶e bed̶ea biad̶eeba panaubadau. Id̶ibaed̶aa ẽbẽrarãba dai nejarr kĩra unubadau maud̶e ne miadaa kĩra unubadau.
14Mʉʉba mau b̶ʉ kub̶uwẽe machi kĩrakayabiai baita. Maumaarã mʉ warrarã kĩra machi kʉ̃ria b̶uud̶eeba maka b̶ʉ kub̶uu jipa kʉ̃risiabiai baita. 15Machiba Cristo ʉ̃rʉbena jaradeabadaurã ãrea uru panad̶a basirã wabid̶a akõre ab̶a uru panad̶ai basii.4:15 Ãrea. Griego bed̶ead̶e naka b̶ʉ kub̶uu: 10.000. Mʉʉd̶eeba machiba chi bed̶ea bia Jesús ʉ̃rʉbena ijãaped̶aad̶ad̶eeba ichid̶eeba mʉ machi akõrebʉ. 16Maud̶eeba mʉʉba machimaa chi chuburia id̶ii mʉ nibabarii kĩra nibad̶amera. 17Maud̶eeba Timoteo machimaa bʉiruu. Dachi Mechiud̶eeba mʉ warr kʉ̃riabarii kĩra nii, maud̶e jipa nibabarii. Ichiba machimaa kĩrababiai mʉ Jesucristo ome saka jipa nii. Mʉ maka nibai chi ẽbẽrarã Jesucristod̶erã duanabariicha jaradea b̶uu.
18Waabenarã machid̶ebena chi mechiurã kĩra nibabadau, kʉ̃risia panuud̶eeba mʉ machimaa wãabai. 19Maamina Dachi Mechiuba kʉ̃riaruubʉrã, mʉ machimaa isa wãi. Maud̶e chi mechiu abadauba jara panuu ũrid̶e wãabai, maumaarã ichiad̶e wãi ãchi biawãra Dachi Akõre poyaabarii uru panuu kuitaai baita. 20Dachi Akõre juad̶e ua b̶uud̶ebenarãba ichi ʉ̃rʉbena berread̶akau, maumaarã ichi poyaad̶eeba jipa waubadau. 21Mau ¿machiba saka kʉ̃ria panuma? ¿Kʉ̃ria panuka mʉʉba iadaad̶e wãi maebʉrã kʉ̃riad̶eeba, biꞌia berread̶eeba wãi?4:21 Iadaad̶e wãi. Griego bed̶ead̶e naka b̶ʉ kub̶uu: bakuru baraa wãi.
5Ãbarãba ida waubiped̶aad̶a chi ãbaba kachirua waud̶a
1Ẽbẽrarãba jara panuu machi tãed̶e ab̶a kĩra nejasia waubarii. Jara panuu mauba chi akõre wẽra ichi wẽra kĩra uru b̶uu. Biawãra Jesucristod̶e ijãad̶akaurã bid̶a mau kachirua waud̶akau. 2Maamina machiba wabid̶a kʉ̃risia panuu waabenarã audeara bibuara nuree. ¿Mau ẽbẽraba kachirua waud̶a kakua ãrea kĩra nomaa nuread̶ai panuuwãeka? ¿Mau machid̶ebena ãyaa b̶ud̶ai panuuwãeka? 3Mʉ machi ome b̶uuwãemina, kʉ̃risiad̶eeba machi ome ãbua b̶uu. Maka machi ome b̶uu kĩra mau kachirua wau b̶uu ẽbẽra Dachi Mechiu Jesús trʉ̃d̶eeba kastikasii. 4Machi araa ãbua imiiduud̶e mʉ jaurid̶e machi ome b̶uai. Maud̶e Dachi Mechiu Jesusba chi poyaabarii machimaa deai, 5mau ẽbẽra kastikad̶amera. Mau ãyaa duabʉid̶ai panuu, Satanasba ãrea biꞌiwãe b̶uabimera. Makaaduubʉrã nau kakuaba kachirua wau kʉ̃ria b̶uu ida b̶ui. Maud̶e Dachi Mechiu neei ewarid̶e ichi karibai.
6Ara machi waabenarã audeara biꞌia nuree ad̶aabai panuu. ¿Machiba adua panuka masa ẽesãabibarii b̶aꞌãra b̶uuba harina joma ẽesãabibarii? Ara mau kĩra chi kachirua b̶aꞌãra wauruuba waabenarã ãbarã joma kachiruabiabarii. 7Maud̶eeba masa ẽesãabibarii chi chõra ãyaa jirataaduu kĩra mau kachirua wau b̶uu machi tãed̶ebena ãyaa duabʉ́isturu.5:7 Éxodo 12:15. Maka machi kachiruaswãe nuread̶ai, harina wid̶i perad̶a ẽesãabibariiwãe b̶uu kĩra. Machi mau kĩra nureabiai baita, Cristo dachi kachirua kakua biusii, Egiptod̶ebena wãsid̶aud̶e oeja beaped̶aad̶a kĩra.5:7 Éxodo 12:3-13; Juan 1:29.8Jãabae pan ẽesãabibariiwãe b̶uu kobadau kĩra, kʉ̃risia sõbiad̶eeba maud̶e biawãrad̶eeba nibad̶ai panuu. Masa ẽesãabibarii chõra kĩra b̶uud̶eeba waa maka nibad̶aabai panuu. Waabenarã kĩramaa b̶uud̶eeba maud̶e kachirua wau b̶uud̶eeba waa maka nibad̶aabai panuu.
9Naed̶e mʉʉba june kartad̶e b̶ʉsii machi chi ãibena ome kãi paneebadaurã ome ãbua panad̶aabai panuu. 10Maamina mauba jarawẽa b̶uu chi nau iujãad̶ebena barikiu kachirua waubadaurã ome, chi nejarra kʉ̃riabadaurã ome, nechiruabadaurã ome maud̶e Dachi Akõre kuenda juaba ne kaped̶aad̶amaa ʉtaa id̶ibadaurã ome panad̶aabai panuu. Maarã ome panad̶ai kʉ̃riad̶awẽebʉrã, nau iujãad̶ebena wãd̶ai panuu. 11Maumaarã mʉʉba machi baita b̶ʉsii barikiuba ara ichi ãba aaruubʉrã, maamina barikiu kachirua wau niibʉrã, chi nejarra kʉ̃ria niibʉrã, Dachi Akõre kuenda juaba ne kaped̶aad̶amaa ʉtaa id̶i niibʉrã, setad̶eeba waabena kachirua jara niibʉrã, itua biu niibʉrã, maebʉrã chirua niibʉrã, mau ẽbẽra ome ãbua panad̶aabai panuu maud̶e ãbua kod̶aabai panuu. 12-13Dachi Akõred̶e ijãad̶akaurã nebʉra ichiai baita mʉ b̶uwãema. Dachi Akõréburu chi ichi ijãad̶akaurã nebʉra ichiai. Maamina chi machi tãed̶e nuree machiba ichiad̶ai panuu. Dachi Akõre bed̶ead̶e b̶ʉ kub̶uu: «Chi kachirua wau b̶uu machi tãed̶ebena duabʉ́isturu».5:12-13 Deuteronomio 17:7.
6Ãbarãba ara ãchi nebʉra ichiad̶ai ʉ̃rʉbena
1Machid̶ebena ab̶a nebʉra baraa b̶eeruubʉrã waabena ãba ome, ¿sakãe chi Dachi Akõred̶e ijãad̶akaurã juezrãmaa jarad̶e wãbadama? ¿Biꞌia b̶uuwãeka Dachi Akõred̶e ẽbẽrarãba ãchi nebʉra ichiad̶ai? 2¿Machiba adua panuka Jesús neeruud̶e Dachi Akõred̶e ẽbẽrarãba chi nau iujãad̶e nuree nebʉra ichiad̶ai? Machiba chi nau iujãad̶e nuree nebʉra ichiad̶aid̶eeba ¿sakãe nebʉra b̶istĩika nuree poyaa ichiad̶akama?6:2 Lucas 22:29-30.3¿Adua panuka dachiba angelerã nebʉra ichiad̶ai? Maka b̶uud̶eeba ¿chi id̶ibaebena nebʉra machi tãed̶e nuree poyaa ichiad̶aabaska? 4Machi mau kakua nebʉra baraa paneeduubʉrã, ¿sakãe Dachi Akõred̶e ijãad̶akaurãmaa wãbadama mau ichiad̶amera?6:4 ¿Sakãe Dachi Akõred̶e ijãad̶akaurãmaa wãbadama mau ichiad̶amera? Griego bed̶ead̶e mau chaarea b̶uu ũrid̶ai baita.5Mʉʉba mau jara b̶uu machi kĩrakayad̶amera. ¿Machi tãed̶e kʉ̃risia kuitaa nii ab̶a bid̶a wãꞌãeka, ãbarã nebʉrad̶e panuurã biꞌia berreabiai baita? 6Mau ãyaa ãba waabena ãba ome kĩru berread̶aped̶a nau iujãad̶ebena juezrãmaa wãbadau. Biawãra maka waud̶aabai panuu chi Dachi Akõred̶e ijãad̶akaurã daad̶e kĩru berreabadaud̶eeba.
7Biawãra waabenarã machid̶ebena nebʉra uru panabadaud̶eeba unubi panuu jipa nibad̶akau. ¿Bibuara b̶uuwãeka chi bichimaa kachirua waud̶a jãaduai, chi nebʉra ichiabadaumaa wãi bad̶amaarã? ¿Bibuara b̶uuwãeka bichiba uru b̶uu ida chiruabii, bichi ãba chi nebʉra ichiabadaumaa adooi bad̶amaarã? 8Maamina machiaburu ẽbẽrarãmaa kachirua waubadau maud̶e nechiruabadau. Biawãra ãrea kachirua wau panuu, ara machi ãbarãmaa maka waubadaud̶eeba.
9-10¿Machiba adua panuka chi kachirua waubadau Dachi Akõre juad̶e panad̶aabai, ichid̶irã baara? ¡Ara machi du ab̶a setaa kũruarã́sturu! Chi kakuaba barikiu kachirua waubadaurã, Dachi Akõre kuenda juaba ne kaped̶aad̶a kĩraare ʉtaa id̶i nuree, junebena ome kãi topaneebadaurã, mukĩra wẽra kĩra nuree, mukĩra ab̶aarakau mukĩra ome panabadaurã, nechiruabadaurã, chi nejarra kʉ̃riabadaurã, itua biu nibabadaurã, setad̶eeba waabena ʉ̃rʉbena kachirua jarabadaurã maud̶e waabena setaa kũruabadaurã Dachi Akõre puurud̶e panad̶aabai. 11Naed̶e machid̶ebena chi nuree maka nureasii. Maamina machiba kachirua wauped̶aad̶a Dachi Akõreba jeraasii, ichi baita biꞌia b̶usii, maud̶e nebʉraswãe nii asii Dachi Mechiu Jesucristod̶eeba maud̶e ichi Jaurid̶eeba.
Dachi kakuaba barikia kachirua waud̶aabai panuu
12Machid̶ebenarã chi nureerãba jarabadau: «Cristod̶e ijãa b̶uud̶eeba mʉʉba kʉ̃ria b̶uu kĩra joma waui b̶uu». Maamina mʉʉba jaraaruu dachiba kʉ̃ria b̶uu joma waud̶ai b̶umina, joma dachiba wau kʉ̃ria panuuba dachi aid̶akau. Maud̶eeba joma mʉʉba wau kʉ̃ria b̶uu mʉʉmaa ida kabiibai. 13Maud̶e waabenarãba jarabadau: «Chiko dachi b̶i baita b̶uu, maud̶e dachi b̶i ãnimara kiuru baita b̶uu». (Maka b̶umina Dachi Akõreba mau omea wãꞌãebii). Maamina dachi kakuaba barikia kachirua waui b̶uai baita b̶uuwãe, maumaarã Dachi Mechiu baita b̶uu. 14Dachi Akõreba ichi poyaad̶eeba Dachi Mechiu Jesús biud̶ad̶ebena chokae jiradubisii. Ara mau kĩra ichi poyaad̶eeba dachi sid̶a chokae jiradubiai.
15¿Machiba adua panuka machi kakua Cristod̶e? Makarã ¿mʉʉba ãbua b̶uika chi Cristod̶e, wẽra aud̶ua nii ome? ¡Makawãema! 16¿Machiba adua panuka wẽra aud̶ua nii ome b̶uud̶e, mau wẽra ome kakua ara ab̶a b̶uu kĩra nii? Dachi Akõre bed̶ead̶e naka jara b̶uu: «Ãchi kakua ab̶a b̶uu kĩra nuread̶ai».6:16 Génesis 2:24.17Maamina Dachi Mechiu ome ãbua b̶uu ichi ome jauri ab̶a b̶uu kĩra nuree.
18Dachi kakuaba barikia kachirua b̶aꞌãra bid̶a waurã́sturu. Kachirua june ãyaa wauruubʉrã, mauba dachi kakua biꞌiwãe b̶eebikau. Maamina kakuad̶eeba kachirua wauruubʉrã, dachi kakua kachirua b̶eei. 19¿Machiba adua panuka machi kakua Dachi Akõre Jauri de kĩra nii? Dachi Akõreba ichi Jauri machimaa deasii. Ichi machi sõd̶e b̶uu. Machi ara machid̶iwãema maumaarã Dachi Akõred̶ebʉ. 20Dachi Akõreba machi nedosii. Dachi Akõred̶ed̶eeba machi kakuad̶e maud̶e jaurid̶e kĩra jipa panásturu.6:20 Jauri. Griego bed̶ead̶e chi b̶ee kartad̶e mau wãꞌãe.
7Kima adaud̶ai ʉ̃rʉbena
1Jãabae machiba kartad̶e id̶iped̶aad̶a mʉʉba panauruu. Naka b̶ʉsid̶au: «Biawãra mukĩraba wẽra adaubai biꞌia b̶uu».7:1 Biawãra mukĩraba wẽra adaubai biꞌia b̶uu. Griego bed̶ead̶e naka b̶ʉ kub̶uu: mukĩraba wẽra waubai bibuara b̶uu.2Maamina machi tãed̶e kachirua barikiu waubadaud̶eeba mukĩraba ãchi wẽra ãchi kakawaa uru b̶eai b̶uu, maud̶e chi wẽraba ãchi mukĩra ãchi kakawaa uru b̶eai b̶uu. 3Mukĩraba ichi kakua wẽramaa wãakaabai b̶uu. Chi wẽra bid̶a ichi kakua kimamaa wãakaabai b̶uu. 4Chi wẽra ichi kakua chibariwãema, maumaarã chi kimáturu ichi kakua chibaribʉ. Ara mau kĩra chi mukĩra ichi kakua chibariwãema, maumaarã ichi wẽráturu chibaribʉ. 5Machi kakua machi kimamaa wãakarã́sturu. Dachi Akõremaa ʉtaa id̶i kʉ̃riaduud̶e, bed̶ea deásturu, mau ewarid̶e ãbua kãi b̶eed̶aabai baita. Maamina kãꞌãa maka panad̶aabai panuu. Mau maad̶akare, waya ãbua kãi b̶eei panuu, machi kakuaba kʉ̃ria b̶uu jãaduad̶awẽa paneeduud̶e, Satanasba kachirua waubiarãamera. 6Mʉʉba jaraaruu: machiba maka wau kʉ̃ria panuubʉrã, biꞌia b̶uu. Maamina mʉʉba wáubad̶e a b̶uuwãe. 7Mʉʉmaarã, biꞌia b̶uai jomaurã mʉ kĩra du nuread̶ai. Maamina Dachi Akõreba dachicha saka nuread̶ai deasii. Dachi Akõreba chi nureemaa du nuread̶ai dea b̶uu. Maud̶e chi nureemaa kima adaud̶ai dea b̶uu.
8Mʉʉba jaraaruu chi du nureerãmaa maud̶e pẽdrãarãmaa: biꞌia b̶uu mʉ kĩra kimaswãe nuread̶ai. 9Maamina machi kakuaba kʉ̃ria b̶uu poyaa jãaduad̶awẽebʉrã, kima adaud̶ai panuu. Machi kakuaba kʉ̃ria b̶uu ʉ̃rʉbena ãrea kʉ̃risia b̶uai7:9 Machi kakuaba kʉ̃ria b̶uu ʉ̃rʉbena ãrea kʉ̃risia b̶uai. Griego bed̶ead̶e naka b̶ʉ kub̶uu: ara dachi du ab̶a baai. audeara biꞌia b̶uu kima adaud̶ai.
10Mʉʉba nau jaraaruu chi kima bara nureerãmaa. Nau bed̶ea mʉʉd̶ewãema, maumaarã Dachi Mechiud̶ebʉ.7:10 Lucas 16:18. Chi wẽraba ichi kima amaabai b̶uu. 11Maamina ichi kima amaaruubʉrã, mukĩra june adaubai b̶uu. Maumaarã du b̶uai b̶uu maebʉrã chi kima ome waya bed̶ea deai b̶uu. Ara mau kĩra chi mukĩraba ichi wẽra amaabai b̶uu.
12Chi nuree ãbarãmaa mʉʉba nau (nau Dachi Mechiu Jesusba mʉʉmaa jaradeabiwẽma): ãbaba chi wẽra Jesusd̶e ijãawẽa b̶uu uru b̶uubʉrã, maud̶e mau wẽra ichi ome b̶uai kʉ̃ria b̶uubʉrã, mau ãbaba chi mau amaabai b̶uu. 13Neekauba chi mukĩra Jesusd̶e ijãawẽa b̶uu uru b̶uubʉrã, maud̶e mau mukĩraba chi mau amaa kʉ̃riawẽebʉrã, mau neekauba ichi amaai b̶uu. 14Mau Jesusd̶e ijãawẽa b̶uu mukĩra Dachi Akõre baita b̶eesii ichi wẽraba ijãa b̶uud̶eeba. Ara mau kĩra chi Jesusd̶e ijãawẽa b̶uu wẽra Dachi Akõre baita b̶eesii ichi kimaba ijãa b̶uud̶eeba. Makawãe basirã machi warrarã Dachi Akõre baita nuread̶aabai basii. Akõrerã Dachi Akõre baita panuud̶eeba ãchi sid̶a Dachi Akõre baita panuu. 15Maamina chi Jesusd̶e ijãawẽa b̶uu ichi kimad̶ebena ãyaa wã kʉ̃ria b̶uubʉrã, makarã́bad̶e ad̶aabai panuu. Maka chi ijãa b̶uu chi ãyaa wãd̶a ijãawẽa b̶uu ome b̶eebai b̶uu. Dachi Akõreba dachi jirukaraayuwãe nuread̶amera iusii. 16Neekau, ¿bichiba kuitaa b̶uka Dachi Akõreba bichi mukĩra karibai bichi kakua? Ãba, ¿bichia bid̶a kuitaa b̶uka Dachi Akõreba bichi wẽra karibai bichi kakua?
17-18Dachi Akõreba dachi iusiid̶e ara dachi panad̶a kĩra nuread̶ai panuu. Mukĩra kakua tõo b̶uasiibʉrã ara maka b̶uai b̶uu. Mukĩra kakua tõowẽa b̶uasiibʉrã ara maka b̶uai b̶uu. Dachicha nuread̶ai panuu Dachi Mechiuba b̶ud̶a kĩra. Mʉʉba ẽbẽrarã Dachi Akõred̶erã araa ãbua imibadaucha maka jaradea b̶uu. 19Mukĩra chi kakua tõo b̶uai aude bibuara b̶uwãema maud̶e mukĩra chi kakua tõowẽa b̶uai sid̶a aude bibuara b̶uwãema. Dachi Akõreba waubi b̶uu bed̶ea wau b̶uai aude bibuara b̶uu. 20Dachi Akõreba dachi iusiid̶e ara dachi panad̶a kĩra nuread̶ai panuu. 21Dachi Akõreba bichi iusiid̶e chi chibari baita bari trajabarii b̶uasiibʉrã, ãrea jirukaraa b̶uarã́se. Maamina bichi chibariba bichi ida bʉiruu b̶uubʉrã, maka wause. 22Chi chibari baita bari trajabarii Dachi Akõreba iud̶a Dachi Mechiuba kachiruad̶ebena karibasii ichi baita ne wau b̶uamera. Maud̶e chi chibari baita bari trajabariiwãe, jãabae Cristo baita bari trajabariibʉ. 23Cristoba paaruuba machi nedosii. Maud̶eeba waabena chibari baita bari trajabarii panarã́sturu. 24Ãbarã, Dachi Akõreba dachi iusiid̶e ara dachi panad̶a kĩra nuread̶ai panuu ichi ome.
25Mau awara chi wabid̶a miakãid̶awẽa nuree ʉ̃rʉbena mʉʉba jaraaruu. Dachi Mechiu Jesucristoba mʉʉmaa mau ʉ̃rʉbena jaradeabiibasiid̶eeba mʉʉba kʉ̃risia b̶uu jaraaruu. Machiba kuitaa panuu Dachi Mechiuba mʉ kĩra chuburiasiid̶eeba mʉʉba biawãra jarabarii. 26Naka jaraaruu: mʉʉmaarã nau ewarid̶e ãrea biꞌiwãe panuud̶eeba dachi mukĩra du nuree ara mau kĩra nuread̶ai panuu. 27Maamina kãiruubʉrã, bichi wẽra ida b̶ui kʉ̃risiarã́se. Du niibʉrã, wẽra adaui kʉ̃risiarã́se. 28Maamina kãiruubʉrã kachiruawãema. Wẽraba mukĩra adauruubʉrã kachiruawãema. Maamina chi kima adauruu nau iujãad̶e ãrea biꞌiwãe b̶uai. Machi maka ãrea biꞌiwãe panad̶ai mʉʉba kʉ̃riawẽa b̶uu.
29Ãbarã, mʉʉba nau jara kʉ̃ria b̶uu: nau ewari wãꞌãemaa b̶uu. Maud̶eeba jãabae chi ãbarã kima uru nureerãba Dachi Akõre od̶e wã panuu ida b̶ud̶aabai panuu ãchi wẽra ome nuread̶ai baita. Maumaarã chi kima wãꞌãe b̶uu kĩra nuread̶ai panuu. 30Ara mau kĩra chi ãbarã kĩra nomaa nuree kĩra nomaawẽa nuree kĩra nuread̶ai panuu. Chi kĩrajʉʉ nuree kĩrajʉʉwẽa nuree kĩra nuread̶ai panuu. Ne nedod̶aba ichiba nedod̶a ewaricha uru b̶uai kʉ̃risia b̶uabai b̶uu. 31Chi nau iujãa dachiba unu panuu joma wãꞌãemaa b̶uud̶eeba chi ne barau nureeba ne barauwãe nuree kĩra kʉ̃risia nuread̶ai panuu.
32Mʉʉba kʉ̃ria b̶uu machi jirukaraad̶awẽa panad̶ayu, nau iujãa ʉ̃rʉbena. Chi mukĩra kimawãe b̶uuba biꞌia kʉ̃risia b̶uabarii Dachi Mechiuba kʉ̃ria b̶uu waui baita. Dachi Mechiu kĩrajʉʉbii kʉ̃ria b̶uu. 33Maamina chi mukĩra wẽra uru b̶uuba nau iujãad̶e ichi wẽra biꞌia uru b̶uai ãrea kʉ̃risia b̶uabarii. Ichi wẽra kĩrajʉʉbii kʉ̃ria b̶uu. 34Maka chi wẽra bara b̶uuba kʉ̃risia ome uru b̶uabarii.7:34 Kʉ̃risia ome uru b̶uabarii. Griego bed̶ead̶e chi b̶ee kartad̶e mau wãꞌãe. Ara mau kĩra chi wẽra kima uru b̶uuba nau iujãad̶e ichi kima biꞌia uru b̶uai ãrea kʉ̃risia b̶uabarii. Ichi kima kĩrajʉʉbii kʉ̃ria b̶uu. Maamina chi wẽra mukĩrawãe b̶uuba Dachi Mechiu ʉ̃rʉbena biꞌia kʉ̃risia b̶uabarii. Nau kakuad̶e maud̶e jaurid̶e ichi baita biꞌia b̶uai kʉ̃ria b̶uu.
35Mau mʉʉba jarawẽa b̶uu machiba kʉ̃ria panuu kĩra panarãad̶amera maumaarã biꞌia nuread̶amera. Mʉʉba ab̶a kʉ̃ria b̶uu machi kĩra jipa nuread̶ayu maud̶e joma machi sõd̶eeba Dachi Mechiuba kʉ̃ria b̶uu waud̶ayu.
36Mukĩra ab̶aba ãwera ome adaui baita bed̶ea dea b̶uubʉrã, adaui naed̶e poyaa jãaduawẽe kʉ̃risiaruubʉrã maud̶e isa kãi kʉ̃riaruubʉrã, kãi b̶uu. Mau kachiruawãema. 37Maamina chi adaui baita bed̶ea deasiid̶e ichi sõd̶e mau wẽra kãibai a kʉ̃risia b̶uubʉrã maud̶e ichi kakuaba kʉ̃ria b̶uu poyaa jãadua b̶uubʉrã, biꞌia b̶uu mau wẽra ome kãibai. 38Biawãra chi miakãiruuba biꞌia wau b̶uu. Maamina mʉʉmaarã chi miakãiwẽeba aude bibuara wau b̶uu.7:38 Griego bed̶ead̶e versículo 36d̶ebena ab̶a 38d̶aa nau sid̶a b̶ʉ kub̶uu: 36 Maamina ãbaba ichi kau ãwera kima deawẽa b̶uud̶eeba kachirua wau b̶uu kʉ̃risia b̶uubʉrã, ichimaarã biꞌia b̶uubʉrã, kima deai b̶uu. Mau kachiruawãema. 37 Maamina ãbaba ichi kau deawẽa sõd̶eeba kʉ̃risia b̶uubʉrã, maud̶e ab̶auba jara b̶uud̶eeba maka wauwẽa b̶uubʉrã, biꞌia b̶uu ichi kau kima deabai. 38 Biawãra ichi kau dearuuba biꞌia wau b̶uu. Maamina mʉʉmaarã ichi kau deawẽeba aude bibuara wau b̶uu.
39Chi wẽra mukĩra bara b̶uu chi mukĩra chokae b̶uumisa ichi ome b̶uai b̶uu. Maamina chi mukĩra biuruubʉrã, waya miakãi kʉ̃riaruubʉrã, poyaa miakãai b̶uu. Maamina ab̶aburu Dachi Mechiud̶e ijãa b̶uu ome miakãai b̶uu. 40Mʉʉba kʉ̃risia b̶uu ichi kima adauwẽebʉrã kĩrajʉʉ b̶uai. Maud̶e mʉʉba kʉ̃risia b̶uu Dachi Akõre Jauriba maka kʉ̃risiabi b̶uu.
8Juaba ne kaped̶aad̶amaa ãnimara kiuru baa dead̶a ʉ̃rʉbena
1Jãabae Dachi Akõre kuenda juaba ne kaped̶aad̶amaa ãnimara kiuru baa dead̶a ʉ̃rʉbena mʉʉba jaraaruu.8:1 Mau ewarid̶e chi ijãad̶akaurãba ãnimararã maebʉrã kiuru chi Dachi Akõre kuenda juaba ne kaped̶aad̶amaa deabachid̶au. Chi paarerã ijãad̶akaurãba mau adaud̶aped̶a, bead̶aped̶a maabae baabachid̶au chi Dachi Akõre kuenda juaba ne kaped̶aad̶arã baita. Maamina chi kiuru b̶aꞌãra adaubachid̶au kod̶ai baita maebʉrã puurud̶e nedobʉid̶ai baita. Machiba jara panuu mau ʉ̃rʉbena kʉ̃risia kuitaa panuu. Maamina chi kʉ̃risia kuitaaba dachi waabenarã audeara biꞌia b̶uu kʉ̃risiabiabarii. Dachiba waabenarã kʉ̃ria panuud̶eeba waabenarã aid̶abadau. 2Ab̶auba ãrea kuitaa nii kʉ̃risia b̶uubʉrã, wabid̶a adua b̶uu ichiba kuitaai b̶uu kĩra. 3Maamina ab̶auba Dachi Akõre kʉ̃ria b̶uubʉrã, Dachi Akõreba mau kuitaa b̶uu.8:3 Griego bed̶ead̶e mau versículo chaarea b̶uu ũrid̶ai baita.
4Maud̶eeba Dachi Akõrerã kuenda juaba ne kaped̶aad̶arãmaa ãnimara kiuru baa dead̶a kobadau ʉ̃rʉbena mʉʉba jaraaruu. Dachiba kuitaa panuu juaba ne kaped̶aad̶a biawãrawãe. Maud̶e kuitaa panuu Dachi Akõre biawãra ab̶aburu nii. 5Bajãad̶e maud̶e nau iujãad̶e «akõre mechiurã» abadau barau. Biawãra maarã maud̶e ẽbẽrarãba «ãchi chibarirã» abadau sid̶a ãrea barau. 6Maamina dachimaarã Dachi Akõre ab̶aburu nii. Ichi dachi Bajãad̶ebena Akõrebʉ. Ichiaburu ne joma wausii. Dachi ichi baita chokae panuu. Maud̶e Dachi Mechiu Jesucristo ab̶aburu nii. Ichid̶eeba Dachi Akõreba ne joma wausii. Ichid̶eeba dachi chokae panuu.
7Maamina waabenarãba mau sõd̶eeba kuitaad̶awẽa panuu. Waabenarã ãbarãba wabid̶a kʉ̃risia panuu chi juaba ne kaped̶aad̶a ãchiba naed̶e kʉ̃ria panad̶a chokae panad̶a. Maud̶eeba chi juaba ne kaped̶aad̶arãmaa ãnimara kiuru dead̶a kooduubʉrã kʉ̃risiabadau maarãd̶e ijãaduu. Chi biawãra bed̶ea ãrea adua panuud̶eeba mau ãnimara kiuru ko panuud̶eeba kʉ̃risiabadau Dachi Akõre daad̶e kachirua paneeduu. 8Maamina chi ãnimara kiuru kooduuba dachi Dachi Akõre ome biꞌia b̶ukau. Maud̶eeba dachiba ko panuud̶eeba maebʉrã kod̶awẽa panuud̶eeba Dachi Akõre daad̶e biꞌia nuread̶aabai.
9Biawãra dachiba ko kʉ̃ria panuu poyaa kod̶ai panuu. Maamina kauwa panásturu machiba barikia kooduud̶eeba machi ãba mau ʉ̃rʉbena adua nii kachiruad̶e b̶aerãamera. 10Bichi chi Dachi Akõre kuenda juaba ne kaped̶aad̶a ded̶e ko akʉ b̶eeruubʉrã, maud̶e chi ne joma koi b̶uu adua niiba bichi aria akʉ b̶uu unuuruubʉrã, ichia bid̶a Dachi Akõre kuenda juaba ne kaped̶aad̶arãmaa ãnimara kiuru baa dead̶a koi kʉ̃risiai. Maamina chi juaba ne kaped̶aad̶amaa ʉtaa id̶iiruu kʉ̃risia b̶uud̶eeba, ichimaarã mau kachirua wau b̶uu. 11Maka chi ne joma koi b̶uu kuitaa b̶uuba chi mau ʉ̃rʉbena chi ãrea adua nii ãba, chi mau Cristo biusii kakua ãba, ichid̶e ijãai ida b̶ubii. 12Machiba mau adua nuree ãbarã kachiruad̶e b̶aebiaduud̶e Cristomaa kachirua wau panuu. 13Maud̶eeba mʉʉba ko b̶uud̶eeba mʉ ãba kachiruad̶e b̶aebiiruubʉrã, waa koobai.
9Pablo bed̶ea ũribadaurãba ichi aid̶ad̶ai panuu
1¿Mʉʉba wau kʉ̃ria b̶uu wauwẽa b̶uka? ¿Mʉ Jesucristoba bʉid̶awãeka? ¿Mʉa bid̶a Dachi Mechiu Jesús unusiiwãeka?9:1 Hechos 9:3-7. ¿Machiba mʉʉd̶eeba Dachi Mechiud̶e ijãaped̶aad̶awãeka? 2Waabenarã ãbarãba mʉ Jesucristoba bʉid̶a kʉ̃risiad̶awẽa panumina machiba kuitaad̶ai panuu mʉ biawãra ichiba bʉid̶abʉ. Mʉʉba jaradeasiid̶eeba machiba Dachi Mechiud̶e ijãasiid̶eeba mau unubi b̶uu. 3Chi mʉ ʉ̃rʉbena kachirua jarabadaurãmaa mʉʉba naka id̶iiruu: 4¿Mʉʉba jaradea b̶uud̶eeba koi baita adaubai b̶uka? ¿Doi baita bid̶a adaubai b̶uka? 5Waabenarã Jesusba bʉid̶arã, Dachi Mechiu Jesús ãbarã maud̶e Pedro ãchi wẽrarã ome ãbua nibabadau.9:5 Pedro. Griego bed̶ead̶e naka b̶ʉ kub̶uu: Cefas. Ara maarã kĩra ¿Jesusd̶e ijãa b̶uu wẽra ome kãiped̶a, mʉ ome ãbua uru nibaabai b̶uka? 6Bernabeba, mʉa bid̶a Dachi Akõre bed̶ea jaradea nibad̶ad̶e awara traju waubadau ne uru panad̶ai baita. Maamina ¿waabenarã kĩra daiba jaradea panuud̶eeba ne adau panad̶ai panuuwãeka?
7¿Kokoroa ara ichi chi nejarraba chĩod̶e wãbarika? ¿Chi uva uud̶a uru b̶uuba ichi uva jõbariiwãeka? ¿Oeja nubariiba oeja ju b̶aa dobariiwãeka? 8¿Joma mau mʉ kʉ̃risiad̶eeba jara b̶uka? ¿Moisesba b̶ʉd̶ad̶e ara mau kĩra jara b̶uuwãeka? 9Mau b̶ʉd̶ad̶e naka b̶ʉ kub̶uu: «Pakaba ne biraduamaa b̶uud̶e chi kũ jʉ̃rã́se».9:9 Deuteronomio 25:4. Dachi Akõreba mau bed̶ea jarasiid̶e ¿paka ʉ̃rʉbenáturu kʉ̃risiabarika? 10¿Dachi ʉ̃rʉbena sid̶a kʉ̃risia b̶uasiiwãeka? Biawãra dachi baita Dachi Akõreba mau Moisesba b̶ʉd̶a deasii. Chi netaa uubarii maud̶e chi chaud̶a pebarii trajabadau, maud̶ebena ne uru panad̶ai kuitaa panuud̶eeba. 11Ara mau kĩra daiba machimaa Dachi Akõre bed̶ea jaradeasiid̶eeba ¿biꞌia b̶uuwãeka daiba machid̶ebena ne adaud̶ai? 12Waabenarãba machid̶ebena ne adaud̶ai panuubʉrã, daiba ãchi audeara biꞌia ne adaud̶ai panuu.
Maamina ne id̶id̶akau. Maumaarã joma jãadua panuu ẽbẽrarãba chi bed̶ea bia Cristo ʉ̃rʉbena kachirua kʉ̃risiarãad̶amera. 13Machiba kuitaa panuu Dachi Akõre de mechiud̶e trajabadaurãba ãchiba wau panuud̶eeba adaubadau kod̶ai baita. Chi ãnimara baa deabadaurãba mau kiurud̶ebena adaubadau kod̶ai baita. 14Ara mau kĩra Dachi Mechiu Jesusba jarasii chi bed̶ea bia ichi ʉ̃rʉbena jaradea nibabadaurãba maud̶ebena adaud̶ai panuu kod̶ai baita.9:14 Mateo 10:10.15Maamina mʉʉba mau adaukau. Mau ʉ̃rʉbena nau kartad̶e b̶ʉwãe b̶uu machiba chi nejarra dead̶amera. Mʉʉba jaradea b̶uud̶eeba chi nejarra adaukaud̶eeba kĩrajʉʉ b̶uu. Mʉʉba kʉ̃riawẽma ab̶au bid̶a chi nejarra dea b̶uud̶eeba mau kĩrajʉʉ wãꞌãebii. Mʉʉmaarã machid̶ebena chi nejarra adaui kãyabãra biui bibuara b̶uu.
16Mʉʉba chi bed̶ea bia Cristo ʉ̃rʉbena jaradea b̶umina mʉ chi mechiu akau, Dachi Akõréburu jaradeabi b̶uud̶eeba. Biawãra mau bed̶ea bia jaradeawẽebʉrã, mʉ miichuburi b̶eei. 17Ara michi kʉ̃ria jaradea b̶uubʉrã, chi nejarra adaui b̶uu. Maamina ara michi kʉ̃ria jaradeawẽa b̶uu. Dachi Akõréburu mʉʉmaa jaradeabisiid̶eeba, mʉʉba makai b̶uu. 18Makarã ¿mʉʉba jaradea b̶uu baita, kãare adauima? Ne adaubai. Kĩrajʉʉ b̶uai chi bed̶ea bia Cristo ʉ̃rʉbena jaradea b̶uud̶eeba. Mʉʉba jaradea b̶uud̶eeba ne adaui b̶umina ne id̶ikau.
19Mʉ ab̶au chibari baita bid̶a b̶ari trajabariiwãed̶eeba chi jomaurã chibari baita bari trajabarii b̶eesii ãreaba mʉʉd̶eeba Jesucristod̶e ijãad̶amera. 20Mʉ judiorã tãed̶e b̶uud̶e judiorã kĩra b̶uabarii mʉʉd̶eeba Jesucristod̶e ijãad̶amera. Chi Moisesba b̶ʉd̶a ũribadaurã nuree tãed̶e b̶uud̶e mʉ mau Moisesba b̶ʉd̶ad̶eeba b̶uuwãemina mau kĩra b̶uabarii ãchiba mʉʉd̶eeba Jesucristod̶e ijãad̶amera. 21Maud̶e chi Moisesba b̶ʉd̶a adua nuree tãed̶e b̶uud̶e mʉ ãchi kĩra b̶uabarii mʉʉd̶eeba Jesucristod̶e ijãad̶amera. Maamina mʉʉba Dachi Akõreba Moisesmaa b̶ʉbid̶a ida b̶ukau. Joma Cristoba waubi b̶uu kĩra waubarii. 22Chi ãbarã chi biawãra bed̶ea ãrea adua nuree tãed̶e b̶uud̶e ãchi kĩra b̶uabarii mʉʉd̶eeba Jesucristo ʉ̃rʉbena biꞌia kuitaad̶amera. Mʉ wãaruucha ẽbẽrarã tãed̶e b̶uud̶e maarã kĩra b̶uabarii mʉʉd̶eeba waabenarãba Cristod̶e ijãad̶aped̶a mʉʉba maarã kachiruad̶ebena karibamera. 23Mʉʉba joma mau kĩra waubarii chi bed̶ea bia Cristo ʉ̃rʉbena kuitaabii baita. Maka mʉa bid̶a Dachi Akõred̶ebena ne biꞌia adaui.
24Machiba kuitaa panuu ẽbẽrarã pirabadau kai chi aude isa pira nii kuitaad̶ai baita. Maud̶e kabanaa pirabadamina ab̶a chi naa need̶aburu ne adaubarii. Machi sid̶a isa piraaduu kĩra joma biꞌia wáusturu Dachi Akõreba deai jarad̶a adaud̶ai baita. 25Pirabadaurãba ãchi kakua nubadau chaarea nuread̶ai baita. Maka waubadau waabenarã audeara biꞌia pirad̶aped̶a boro jũra adaud̶ai baita. Mau boro jũra isa bʉʉbarii.9:25 Mau ewarid̶e chi boro jũra kidua waubachid̶au, chi pirabadaumaa dead̶ai baita. Maamina dachiba ne joma biꞌia waubadau Dachi Akõreba deai jarad̶a bʉʉkau adaud̶ai baita. 26Maud̶eeba ẽbẽra barikia pira wãaruu kĩra mʉʉba waukau. Maud̶e ẽbẽra barikia drʉ b̶uu kĩra drʉkau. 27Maumaarã mʉ kakua chaarea wau b̶uu maud̶e mʉ kakuaba waubai b̶uu mʉʉba waubi b̶uu. Maka joma wau b̶uu Dachi Akõreba deai jarad̶a adaui baita. Maka wauwẽebʉrã, mʉʉba ẽbẽrarãmaa jaradea b̶uasmina Dachi Akõreba deai jarad̶a poyaa adaubai.
10Israeld̶ebenarãba kachirua wauped̶aad̶a ʉ̃rʉbena
1Ãbarã, mʉʉba kʉ̃ria b̶uu machiba Moisés ewarid̶e makad̶a kĩrabad̶awẽa panad̶ai. Mau ewarid̶e joma dachi nabẽraed̶ebenarã Moisés baara nibaped̶aad̶a Dachi Akõreba bʉid̶a jʉ̃rʉara ekare nibasid̶au maud̶e Mar Purrd̶e kĩaraa wãsid̶au.10:1 Números 10:34; Éxodo 14:1-31.2Mau mard̶e maud̶e jʉ̃rʉara ekare joma ãchi Moisés ome ãbua panasiid̶eeba Moisés trʉ̃d̶eeba boro eaped̶aad̶a kĩra panasid̶au. 3Jomaurãba chi arab̶au chiko Dachi Akõreba bajãad̶ebena bʉid̶a kobachid̶au.10:3 Éxodo 16:4,35.4Jomaurãba arab̶au bania Dachi Akõreba eakarrd̶ebena eab̶aribid̶a dobachid̶au.10:4 Éxodo 17:6; Números 20:11. Mau eakarr Cristo jara b̶uu, ãchi wãaduucha Cristo jaurid̶eeba ãchi ome b̶uasiid̶eeba. 5Maamina Dachi Akõreba ãchid̶ebena ãrea biꞌiwãe unusii, ichi ome kachirua wausid̶aud̶eeba. Maud̶eeba drua sirua wãꞌãe b̶uud̶e kinisid̶au.
6Mau ewarid̶e makad̶aba dachimaa kuitaabi b̶uu kachirua kʉ̃riad̶aabai panuu ãchiba kʉ̃riaped̶aad̶a kĩra. 7Juaba ne kaped̶aad̶ad̶e ijãarã́sturu waabenarã chi nureeba ijãaped̶aad̶a kĩra.10:7 Éxodo 32:1-35. Dachi Akõre bed̶ead̶e ãchi ʉ̃rʉbena naka b̶ʉ kub̶uu: «Ẽbẽrarã akʉ paneed̶aped̶a kĩrajʉʉ ãbua ko duanasid̶au maud̶e itua do duanasid̶au. Mau maad̶akare jiradud̶aped̶a ãchi kakuaba wau kʉ̃ria b̶uu wau duaneesid̶au».10:7 Éxodo 32:6.8Dachi kakuaba barikia kachirua waud̶aabai panuu waabenarãba wauped̶aad̶a kĩra. Ãchiba maka wau panuu kakua ara ewari ab̶ad̶e 23.000 kinisid̶au.10:8 Números 25:1-9.9Cristoba saka waui kuitaai dachiba kachirua waud̶aabai panuu waabenarã ãchiba wauped̶aad̶a kĩra. Maud̶eeba chi nuree damaba kaakuaped̶a kinisid̶au.10:9 Números 21:4-9.10Kĩrajʉʉwẽa panuud̶eeba Dachi Akõre ʉ̃rʉbena kachirua berrearã́sturu waabenarã chi nureeba wauped̶aad̶a kĩra. Maud̶eeba chi ángel dachi kinibibariiba ãchi ãrea kinibiasii.10:10 Números 16:41-50.
11Joma ãchi makad̶aba unubi b̶uu saka Dachi Akõreba kachirua kastikabarii. Mau Dachi Akõre bed̶ead̶e b̶ʉ kub̶uu dachi nau kaad̶earebena ewarid̶e nureerãba ara mau kĩra waurãad̶amera. 12Maud̶eeba ab̶auba ãrea ijãa b̶uu kʉ̃risia b̶uubʉrã, ara ichi du ab̶a kauwa b̶uai b̶uu kachiruad̶e ida b̶aebiamaaba. 13B̶esed̶e dachi sõd̶e kʉ̃risiabadau kachirua waud̶ai baita, jomaurãba maka kʉ̃risiabadau kĩra. Mau poyaa dauchia jãadua panad̶awẽebʉrã, Dachi Akõreba dachimaa maka kʉ̃risiabiabai. Maud̶e dachiba maka kʉ̃risia paneeduud̶e ichiba aid̶ai dauchia jãadua panad̶amera, ichiba jara b̶uu kĩra ewaricha waubariid̶eeba.
Juaba ne kaped̶aad̶a ida b̶ud̶ai panuu ʉ̃rʉbena
14Maud̶eeba mʉ ãbarã mʉa kʉ̃riakuabarii, Dachi Akõre kuenda juaba ne kaped̶aad̶a ida b̶ústuru. 15Mʉʉba machimaa berrearuu kʉ̃risia kuitaa nureerãmaa berrearuu kĩra. Ãrea kʉ̃risiásturu mʉʉba jara b̶uu biawãra kuitaai. 16Dachi Mechiu kĩraba panuud̶e dachiba uva b̶aa basud̶e b̶uu ʉ̃rʉbena Dachi Akõremaa ichíturu kid̶ibai ad̶aped̶a dobadau. Mau dooduud̶e unubibadau dachi Cristo oad̶eeba ichi ome ãbua panuu. Maud̶e pan b̶ʉakuad̶a kooduud̶e unubibadau Cristo nau kakuad̶e ãrea biꞌiwãe b̶uasiid̶eeba dachi ichi ome ãbua panuu. 17Dachiba pan ab̶a b̶uu ãrea b̶ʉakuaped̶a kobadau. Ara mau kĩra dachi ãrea panumina kakua ab̶a b̶uu kĩra nuree.
18Israeld̶ebenarãba waubadau ʉ̃rʉbena kʉ̃risiásturu. Ãchiba ãnimara Dachi Akõremaa baa deaduud̶e mau kiurud̶ebena kobadau. Mau kooduud̶e unubibadau Dachi Akõred̶e ijãa panuu. (Ara mau kĩra ab̶auba Dachi Akõre kuenda juaba ne kaped̶aad̶amaa kiuru baa dead̶ad̶ebena kooruubʉrã, unubii mau juaba kaped̶aad̶ad̶e ijãa b̶uu). 19Maamina mʉʉba jarawẽa b̶uu chi Dachi Akõre kuenda juaba ne kaped̶aad̶a biawãrabʉ. Chi maarãmaa kiuru dead̶ad̶ebena kiuru kĩra b̶uu. 20Maamina Dachi Akõred̶e ijãad̶akaurãba kiuru ãchi juaba ne kaped̶aad̶arãmaa deaduud̶e biawãra jai kachiruarãmaa dea panuu. Dachi Akõremaa dea panuuwãema. Machiba mau kiuru kooduubʉrã, unubid̶ai jai kachiruad̶e ijãa panuu. Mau mʉʉba kʉ̃riawẽma. 21Jauri kachiruamaa dead̶a basud̶e b̶uu machiba dooduubʉrã, Jesucristo oa kĩrabad̶ai baitabena basud̶e b̶uu dod̶aabai panuu. Jai kachiruamaa ãnimara kiuru dead̶a machiba kooduubʉrã, Dachi Mechiu kĩrabad̶ai baitabena kobadau kod̶aabai panuu. 22Maka wauduubʉrã ¿Dachi Mechiu kĩrubid̶aabaika? ¿Dachi ichi audeara meserãa nuree kĩra?
Joma wáusturu ãbarãba biꞌia kʉ̃risiad̶amera
23Waabenarãba jara panuu «Cristod̶e ijãa b̶uud̶eeba mʉʉba kʉ̃ria b̶uu kĩra joma waui b̶uu». Maamina mʉʉba jaraaruu: ne joma waui b̶umina joma dachiba wau kʉ̃ria b̶uuba dachi aid̶akau. Biawãra joma dachiba wau kʉ̃ria b̶uu waui b̶umina joma mauba ãbarã aid̶akau. 24Ab̶au bid̶a ara ichi biꞌia b̶uai jʉrʉ b̶uabai b̶uu, maumaarã waabenarã biꞌia nuread̶amera jʉrʉ b̶uai b̶uu.
25Kiuru nedobʉibadaumare nedobʉid̶a joma kod̶ai panuu. Maamina id̶irã́sturu mau kiuru chi Dachi Akõre kuenda juaba ne kaped̶aad̶amaa deaped̶aad̶a bad̶a kuitaad̶ai baita, mau biꞌiwãe b̶uu a kʉ̃risia panuud̶eeba. 26Nau iujãa maud̶e ne joma nau iujãad̶e b̶uu Dachi Mechiuba wausii. Maud̶eeba ne joma kod̶ai panuu.
27Chi Jesusd̶e ijãawẽa b̶uuba machi kod̶amera iuruubʉrã maud̶e wã kʉ̃riaduubʉrã, wã́sturu. Ichiba dearuu kósturu. Id̶irã́sturu mau chiko Dachi Akõre kuenda juaba ne kaped̶aad̶amaa deaped̶aad̶a bad̶a kuitaad̶ai baita, mau biꞌiwãe b̶uu a kʉ̃risia b̶uud̶eeba. 28Maamina ab̶auba «nau kiuru Dachi Akõre kuenda juaba ne kaped̶aad̶amaa deaped̶aad̶a» aaruubʉrã, mau korã́se ichiba mau biꞌiwãe b̶uu a kʉ̃risiai b̶uud̶eeba.10:28 Griego bed̶ead̶e chi b̶ee kartad̶e nau sid̶a b̶ʉ kub̶uu: Nau iujãa, ne joma nau iujãad̶e nub̶uu sid̶a Dachi Mechiuba wausii.29Mʉʉba jarawẽa b̶uu machiba mau kiuru kod̶akau panuu. Maumaarã mʉʉba jara b̶uu chi ab̶áuburu maka kʉ̃risia b̶uu.
Ab̶auba naka kʉ̃risiai: Mʉʉba wau kʉ̃ria b̶uu wauruud̶e ab̶auba kachirua a kʉ̃risiaruubʉrã, ¿mau poyaa waukau b̶uka? ¿Mʉʉba wau kʉ̃ria b̶uu kĩra waubai b̶uka? 30Mʉʉba chiko ʉ̃rʉbena Dachi Akõremaa ichíturu kid̶ibai aaruubʉrã, ¿sakãe waabenarãba mʉʉba chiko kooruu ʉ̃rʉbena kachirua berread̶ai panuma? Kachirua jarad̶aabai b̶uu.
31Maamina mʉʉba jaraaruu: machi komaa panuud̶e maud̶e waumaa panuud̶e joma wáusturu ẽbẽrarãba Dachi Akõre ʉ̃rʉbena biꞌia jarad̶amera. 32Machiba wau panuud̶eeba judiorã, judiowãerã maud̶e ẽbẽrarã Dachi Akõred̶erã kachiruad̶e b̶aebirã́sturu. 33Ara mau kĩra mʉʉba wau b̶uud̶eeba jomaurãmaa biꞌia kʉ̃risiabiai kʉ̃ria b̶uu. Ab̶aburu mʉ biꞌia b̶uai baita jʉrʉkau, maumaarã ẽbẽrarã ãrea biꞌia nuread̶amera jʉrʉbarii. Maka mʉʉba wau b̶uud̶eeba ãchiba Cristod̶e ijãad̶ai Dachi Akõreba karibamera.
111Mʉ Cristo nibad̶a kĩra nibabariid̶eeba mʉ kĩra nibásturu.
Neekaurã borod̶e jʉ̃badau ʉ̃rʉbena
2Ãbarã, ewaricha mʉ kĩraba panuud̶eeba maud̶e mʉʉba jaradead̶a ũri panabadaud̶eeba machimaa biꞌia jaraaruu. 3Maamina mʉʉba kʉ̃ria b̶uu machiba kuitaad̶ai Cristo, joma mukĩra chibaribʉ; mukĩra, wẽra chibaribʉ; maud̶e Dachi Akõre, Cristo chibaribʉ.11:3 Chibari. Griego bed̶ead̶e naka b̶ʉ kub̶uu: boro.4Ãbarã araa ãbua imiiduud̶e chi mukĩra ichi borod̶e ne jʉ̃ped̶a Dachi Akõremaa ʉtaa id̶iiruubʉrã maebʉrã Dachi Akõre baita berrearuubʉrã, ichi chibari Cristo wapeawẽa nii unubi b̶uu. 5Maamina wẽraba Dachi Akõremaa ʉtaa id̶iiruud̶e maebʉrã Dachi Akõre baita berrearuud̶e ichi borod̶e ne jʉ̃wẽebʉrã, ichi kima wapeawẽa nii unubi b̶uu. Chi maka wau b̶uu boro metad̶a kĩra b̶uu. 6Wẽra chi borod̶e ne jʉ̃wẽebʉrã, boro tʉʉi b̶uu. Maamina boro tʉʉped̶a nejasiai b̶uubʉrã maebʉrã boro metad̶a nejasiai b̶uubʉrã, borod̶e ne jʉ̃i b̶uu.
7Mukĩrarã borod̶e ne jʉ̃d̶aabai panuu Dachi Akõreba ara ichi kĩra wausiid̶eeba maud̶e mukĩrarãba Dachi Akõre ãchi chibari unubi panuud̶eeba. Maamina wẽrarãba unubi panuu mukĩra ãchi chibaribʉ.11:7 Chi nureeba kʉ̃risiabadau mau waud̶ai panuu chi Dachi Akõred̶erã araa ãbua imiiduud̶e. Maumaarã waabenarãba kʉ̃risiabadau awara bid̶a maka waud̶ai panuu.8Dachi Akõreba mukĩra wẽrad̶ebena waubasii, maumaarã wẽra mukĩrad̶ebena wausii.11:8 Génesis 2:21-22.9Maud̶e mukĩra wẽra baita waubasii, maumaarã wẽra mukĩra baita wausii. 10Maud̶eeba wẽraba ichi borod̶e anab̶ari jʉ̃barii jʉ̃i b̶uu unubii baita chi kima ichi chibari. Maka waui b̶uu angelerãba biꞌia unud̶amera.
11Maamina machiba Dachi Mechiud̶e ijãabadaud̶eeba wẽra chi mukĩra baita b̶uu maud̶e mukĩra chi wẽra baita b̶uu. 12Chi nabena wẽra mukĩrad̶ebena neesii. Mamau tõpe mukĩra wẽrad̶ebena neebarii. Maamina biawãra joma Dachi Akõred̶ebena nee panuu.
13Machimaarã, ¿biꞌia b̶uka wẽraba borod̶e ne jʉ̃barii jʉ̃wẽed̶e Dachi Akõremaa ʉtaa id̶ii? Ãrea kʉ̃risiásturu biꞌia b̶uu kuitaad̶ai baita. 14Ara dachi saka nureed̶eeba kuitaa panuu mukĩraba bud̶a deseroa awa niibʉrã nejasiai b̶uu. 15Maamina wẽra bud̶a deseroa awa niibʉrã biꞌia unubadau. Dachi Akõreba wẽramaa bud̶a deasii borod̶e anab̶ari jʉ̃barii kĩra jʉ̃mera. 16Ab̶auba mau kakua oa kachirua berrea b̶eeruubʉrã, mʉʉba nau ichimaa jaraaruu: daiba maud̶e ẽbẽrarã Dachi Akõred̶erã awara waud̶akau.
Dachi Mechiu kĩrabad̶ai baita kobadau ãbarãba biꞌiwãe wauped̶aad̶a
17Nau b̶ʉʉruud̶e mʉʉba machi poyaa biꞌia jarawẽma. Machi araa ãbua imiiduud̶e kĩra jipa waud̶akau. Biꞌia panad̶ai audeara kachirua wau paneebadau. 18Naa jaraaruu mʉʉba ũri b̶uu machi araa ãbua imiiduud̶e kʉ̃risia aꞌawaraa duanabarii. Mʉʉba kʉ̃risia b̶uu chi mʉʉmaa nebʉrʉped̶aad̶a chi b̶ee biawãra b̶uu. 19Biawãra machi kʉ̃risia aꞌawaraa panuud̶eeba unubid̶ai kairã Dachi Akõreba biꞌia unu b̶uu. 20Machi araa ãbua imiiduud̶e Dachi Mechiu kĩrabad̶ai baita kobadau kĩra jipa kod̶akau. 21Jomaurã need̶ai naed̶e machicha chi chiko kobadau. Maud̶e chi nuree jarrbisia duaneebarii maud̶e chi nuree itua biu duaneebarii.11:21 Chi nureeba ãchi chiko eneed̶aka basii, maud̶e chi waabenarãba ãchi chiko dead̶aka basii.22¿Machi de wãꞌãe nuree kĩra aria kod̶ai baita maud̶e dod̶ai baita? ¿Machiba ẽbẽrarã Dachi Akõred̶erã kʉ̃ria panuuwãeka? ¿Mauba chi nejarr barauwãe nuree kĩra nejasiabi panuuwãeka? ¿Mʉʉba kãare jaraima? ¿Maud̶eeba mʉʉba machi biꞌia jaraaruka? Mau kakua biꞌia jaraabai.
Dachi Mechiu kĩrabad̶ai baita kobadau
23Mʉʉba machimaa jaradead̶a Dachi Mechiu Jesusd̶ebena kuitaasii. Mau naka b̶uu: ẽsabud̶e Dachi Mechiu Jesús jidaubii naed̶e ichi juad̶e pan adausii. 24Dachi Akõremaa bichíturu kid̶ibai aped̶a chi pan b̶ʉaruud̶e jarasii: «Adáusturu. Kósturu.11:24 Adáusturu. Kósturu. Griego bed̶ead̶e chi b̶ee kartad̶e mau wãꞌãe. Nau mʉ kakuabʉ, machi kakua dearuu. Mʉ kĩrabad̶ai baita ara nau kĩra wau panásturu». 25Koped̶aad̶akare, ara mau kĩra basu ichi juad̶e adauped̶a jarasii: «Nau basud̶e b̶uu mʉ oabʉ. Mʉ oad̶eeba Dachi Akõreba machimaa bed̶ea chiwid̶i dearuu. Nau dooduucha mʉ kĩrabad̶ai baita dósturu».11:25 Jeremías 31:31-34; Éxodo 24:6-8.
26Dachi Mechiu Jesús neeruumisa mau pan kooduucha maud̶e mau basud̶e b̶uu dooduucha machiba ichi biud̶a ʉ̃rʉbena jara panuu. 27Maud̶eeba barikiuba Dachi Mechiu wapeawẽa mau pan kooruubʉrã maud̶e mau basud̶e b̶uu dooruubʉrã, kachirua wau b̶uu. Dachi Mechiu kakua maud̶e chi oa biꞌiwãe b̶uu a kʉ̃risia b̶uu. 28Mau pan koi naed̶e, mau basud̶e b̶uu doi naed̶e dachicha ãrea ichiai b̶uu biawãra Dachi Mechiu wapea b̶uu kuitaai baita. 29Chi Dachi Mechiu Jesús kakua wapeawẽa b̶uuba mau pan kooruubʉrã, mau basud̶e b̶uu dooruubʉrã, Dachi Akõreba nebʉra barau ai. 30Maud̶eeba ãrea machid̶ebenarã kakua biꞌiwãe nuree, ẽpermo nuree maud̶e waabenarã chi nuree biusid̶au. 31Maamina ara dachicha ãrea kauwa ichiaped̶aad̶a basirã makarã Dachi Akõreba nebʉra barau aabai basii. 32Maamina Dachi Mechiuba dachi ichiaruud̶e, dachi kastikabarii nau iujãad̶ebenarã ome nebʉra bara b̶uu arãamera.
33Maud̶eeba mʉ ãbarã, Dachi Mechiu kĩrabad̶ai baita kobadau wauduud̶e jomaurã esed̶áusturu ãbua kod̶ai baita. 34Ab̶a jarrbisia b̶uubʉrã ichi ded̶e koi b̶uu. Maka araa ãbua imiiduud̶e Dachi Akõreba machi kastikaabai kachirua wau panuud̶eeba. Mʉʉba wabid̶a jaradeai b̶uu machimaa wãaruud̶e joma jaradeai.
12Dachi Akõre Jauriba waubi b̶uu ʉ̃rʉbena
1Ãbarã, mʉʉba kʉ̃ria b̶uu Dachi Akõre Jauriba waubi b̶uu ʉ̃rʉbena machiba ãrea kuitaad̶ayu. 2Machiba kuitaa panuu Dachi Akõred̶e ijãad̶akaurã nureasid̶aud̶e, barikia ʉ̃rʉbena kʉ̃risiabachid̶au. Dachi Akõre kuenda juaba ne kaped̶aad̶ad̶e ijãabachid̶au. Chokae nureewãed̶eeba berread̶akau. 3Maud̶eeba mʉʉba kʉ̃ria b̶uu machiba nau kuitaad̶ayu: Chi Dachi Akõre Jaurid̶eeba berrea b̶uuba «Jesús kachirua nii» akau. Maud̶e chi Dachi Akõre Jaurid̶eeba berreawẽa b̶uuba «Jesús jomaurã Mechiu» akau.
4Dachi Akõre Jauri ab̶a niiba dachimaa dea b̶uu ne diwaraa waud̶amera. 5Dachi Mechiu ab̶a nii baita ne diwaraa waubadau. 6Dachi Akõre ab̶a niiba dachimaa ne diwaraa waubi b̶uu. Ichiaburu dachid̶eeba mau joma waubarii.
7Dachi Akõre Jauriba dachicha ne waubiabarii ãbarã jomaurã aid̶ad̶amera. 8Dachi Akõre Jauriba waabenarã chi nureerãmaa dea b̶uu ichi kʉ̃risia kuitaad̶eeba poyaa berread̶amera. Dachi Akõre Jauri ara ab̶a niiba chi nureemaa dea b̶uu ichid̶eeba kuitaaped̶aad̶a poyaa jaradead̶amera. 9Dachi Akõre Jauri ara ab̶a niiba chi nureemaa dea b̶uu poyaa ãrea ijãa panad̶amera. Maud̶e Dachi Akõre Jauri ara ab̶a niiba chi nureemaa dea b̶uu ẽpermo nuree poyaa aribiabiad̶amera. 10Maud̶e Dachi Akõre Jauriba chi nureemaa dea b̶uu ẽbẽrarãba ne poyaa waud̶akau poyaa waud̶amera. Chi nureemaa dea b̶uu poyaa Dachi Akõre baita berread̶amera. Chi nureemaa dea b̶uu poyaa kuitaad̶amera ab̶auba Dachi Akõre Jaurid̶eeba berrea b̶uu maebʉrã jai kachiruad̶eeba berrea b̶uu. Maud̶e chi nureemaa dea b̶uu dachiba ũrid̶akau chi bed̶ea didiwaraa berread̶amera. Maud̶e chi nureemaa dea b̶uu dachiba kauwa ũrid̶akau bed̶ead̶e jarad̶a kuitaa jarad̶amera. 11Ara Dachi Akõre Jauri ab̶a niiba joma mau waubi b̶uu. Ichiba dachicha waubi b̶uu ichiba kʉ̃ria b̶uu kĩra.
12Dachi kakua ab̶a b̶umina dachi kakuad̶e joma uru panuu. Cristo ichi ijãabadaurã ome ara mau kĩra panuu. 13Chi nuree dachid̶ebena dachi judiorãbʉ, chi nuree dachid̶ebena judiowãerãbʉ, chi nuree dachid̶ebena chi chibari baita bari trajabadaurãbʉ, chi nuree dachid̶ebena chibariswãe nureerãbʉ. Maamina Dachi Akõre Jauri ara ab̶a niiba dachi jomaurã kakua ab̶ad̶e b̶usii.12:13 B̶usii. Griego bed̶ead̶e naka b̶ʉ kub̶uu: boro easii. Nau versiculod̶e mau bed̶eaba jarawẽa b̶uu baniad̶e boro ead̶a ʉ̃rʉbena, maumaarã jara b̶uu Dachi Akõre Jauriba Cristod̶e ijãa b̶uu ichi ome ãbua b̶ud̶a ʉ̃rʉbena. Joma dachiba Dachi Akõre Jauri arab̶au nii adausid̶au.
14Dachi kakuad̶e joma uru panuu. Maamina chi dachi kakuad̶e nuree arab̶aud̶e nureewãema. 15Dachi jʉ̃rʉba jaraaruubʉrã: «Mʉ chi juawãed̶eeba nau dachi kakuad̶ebenawãema», maud̶eeba ¿biawãra dachi kakuad̶ebenawãeka? 16Maud̶e dachi kʉʉrʉba jaraaruubʉrã: «Mʉ chi dauwãed̶eeba nau dachi kakuad̶ebenawãema», maud̶eeba ¿biawãra dachi kakuad̶ebenawãeka? 17Dachi kakuad̶e ab̶aburu dau basirã ¿kãareba ũrii basma? Dachi kakuad̶e ab̶aburu kʉʉrʉ basirã ¿kãareba ʉ̃i basma? 18Dachi Akõreba dachi kakuad̶e joma b̶usii ichiba kʉ̃ria b̶uad̶a kĩra. 19Dachi kakuad̶e duanuu joma arab̶au basirã kakua wãꞌãe bai basii. 20Dachi kakuad̶e ne joma uru panumina dachi kakua ab̶a nii.
21Maud̶eeba dachi dauba chi juamaa poyaa jaraabai: «Bichiwãe mʉ biꞌia b̶uai». Maud̶e dachi boroba chi jʉ̃rʉmaa poyaa jaraabai: «Machiwãe mʉ biꞌia b̶uai». 22Biawãra nau kakuad̶e nuree, chi nuree dachimaarã biꞌiwãe nureebʉ. Maamina maarãswãe dachi kakua biꞌia b̶uakau. 23Maud̶e chi dachimaarã nau kakuad̶e ãrea balewẽa b̶ee biꞌia nubadau biꞌia unud̶amera. Maud̶e nau kakuad̶e chi nuree dachiba unubid̶aabai panuu kauwa merabadau. 24Maamina dachi kakuad̶e kĩrawãrea nuree merad̶akau. Dachi Akõreba dachi kakuad̶e nuree joma araa ãbua wausii. Chi dachiba unubid̶akau wausii biꞌia nud̶amera. 25Maka wausii dachi kakua kachirua b̶eerãamera, maumaarã dachi kakuad̶e nuree chiya nu panad̶amera. 26Dachi kakuad̶ebena ab̶a puꞌuaruubʉrã, chi kakua joma puꞌuabarii. Ara mau kĩra dachi kakuad̶ebena ab̶a biꞌia jaraaruubʉrã, joma kĩrajʉʉbadau.
27Ara mau kĩra machi joma ara chi Cristo kakua kĩra nuree. Machi ichi kakuad̶ebenarãbʉ. 28Dachi Akõreba ãbarã tãed̶e chi Jesucristoba bʉid̶arã naa b̶usii. Mawãare ichi baita berreabadaurã b̶usii. Mawãare ichi bed̶ea jaradeabadaurã b̶usii. Mawãare waabenarã b̶usii ẽbẽrarãba ne poyaa waud̶akau poyaa waud̶amera, chi nuree b̶usii ẽpermo nuree poyaa aribiabiad̶amera, chi nuree b̶usii ãbarã aid̶ad̶amera, chi nuree b̶usii chi ãbarã tãed̶e saka waud̶ai kuitaa panad̶amera, maud̶e chi nuree b̶usii barikiu dachiba ũrid̶akau bed̶ead̶e berread̶amera. 29Makarã ¿jomaurã Jesucristoba bʉid̶arãka? ¿Jomaurã Dachi Akõre baita berreabadaurãka? ¿Jomaurã Dachi Akõre bed̶ea jaradeabadaurãka? ¿Jomaurãba ẽbẽrarãba ne poyaa waud̶akau poyaa waubadaurãka? 30¿Dachi Akõreba jomaurãmaa deasika ẽpermo nuree poyaa aribiabiad̶amera? ¿Dachi Akõreba jomaurãmaa deasika dachiba ũrid̶akau bed̶ead̶e poyaa berread̶amera? ¿Jomaurãba dachiba ũrid̶akau bed̶ead̶e jarad̶a poyaa kuitaa jarad̶ai panuka? 31Dachi Akõre Jauriba waubi b̶uud̶ebena chi dachi aude aid̶a nuree jʉrʉ́sturu.
Jãabae mʉʉba machimaa kuitaabiai saka ne joma poyaa aude biꞌia wau panad̶ayu.12:31 Saka ne joma poyaa aude biꞌia wau panad̶ayu. Griego bed̶ead̶e naka b̶ʉ kub̶uu: chi o aude bia b̶uu unubiai.
13Waabenarã kʉ̃riad̶ai chi aude bibuara b̶uu
1Mʉ nau iujãad̶ebenarã bed̶ead̶e berrearuubʉrã maud̶e ángel bed̶ead̶e berrearuubʉrã maud̶e waabenarã ẽbẽrarã kʉ̃riawẽa b̶uubʉrã, mʉ jiorr waud̶a jĩwabarii kĩra maebʉrã campana jĩwabarii kĩra nii.13:1 Mʉ jiorr waud̶a jĩwabarii. Pabloba jara b̶uu chi ẽbẽrarã ãrea berreabadaurã jiorr jĩwabarii kĩra nuree. Mau ãrea jĩwaarumina, ne jara kʉ̃riawẽa b̶uu.2Mʉ Dachi Akõre baita berrearuubʉrã, Dachi Akõreba kʉ̃risia kuitaabiwẽa b̶uad̶a joma kuitaa b̶uubʉrã, Dachi Akõre kʉ̃risia kuitaa joma kuitaa b̶uubʉrã, maud̶e sõd̶eeba biawãra ijãa b̶uud̶eeba ea poyaa ãyaa b̶uuruubʉrã, maud̶e waabenarã kʉ̃riawẽa b̶uubʉrã, mʉ baleswãe nii kĩra nii. 3Joma mʉʉba uru b̶uu chi wãꞌãe nureemaa dearuubʉrã maud̶e Dachi Akõre baita ara michi kakua ida baa deabiiruubʉrã, maamina waabenarã kʉ̃riawẽa b̶uubʉrã, mʉ baleswãe nii kĩra nii.
4Chi waabenarã kʉ̃riabariiba joma jãadua b̶uu, waabena kĩra chuburiabarii, waabenaba uru b̶uu uru b̶uai kʉ̃riakau, waabena audeara biꞌia nii jarakau maud̶e maka nii kʉ̃risiakau. 5Chi waabenarã kʉ̃riabariiba waabenarã wapeadee ua b̶uabarii, ara ichi báitaburu b̶uu kʉ̃risiakau, bari au kĩrukau, waabenaba ichi kachirua waud̶a kĩrabakau. 6Kachirua kakua kĩrajʉʉkau, maumaarã biawãra kakua kĩrajʉʉbarii. 7Waabenaba kachirua waud̶a joma jãaduabarii, jomad̶e ijãabarii, waabenaba joma biꞌia waumera esed̶aubarii maud̶e ne jomad̶e jãadua b̶uabarii.
8Ẽbẽrarã kʉ̃riai wãꞌãekau. Maamina ewari ab̶a Dachi Akõre baita berreabadau waa berread̶aabai, dachiba ũrid̶akau bed̶ead̶e berreabadau waa berread̶aabai, Dachi Akõre Jaurid̶eeba kuitaaped̶aad̶a jaradeabadaurãba waa jaradead̶aabai. 9Maud̶eeba id̶ibae dachiba b̶aꞌãraburu kuitaa panuu maud̶e Dachi Akõre baita b̶aꞌãraburu berreabadau. 10Maamina chi bibuara b̶uu neeruud̶e mau b̶aꞌãra b̶uu wãꞌãe bai. Maud̶e joma kuitaad̶ai. 11Mʉ wabid̶a kaebe nibasiid̶e warr cheke kĩra berreabachii maud̶e warr cheke kĩra kʉ̃risiabachii. Maamina sĩbãra basiid̶e warr cheke kĩra b̶uad̶a ida b̶usii. 12Ʉ̃raud̶e dachiba Dachi Akõred̶ebena tõroroa kĩra unu panuu chi kĩra ichiabadaud̶e. Maamina ewari ab̶ad̶e dachiba joma ʉ̃d̶aa unud̶ai mau saka b̶uu. Ʉ̃raud̶e mʉʉba b̶aꞌãraburu kuitaa b̶uu, maamina ewari ab̶ad̶e joma kuitaai Dachi Akõreba mʉ ʉ̃rʉbena kuitaa b̶uu kĩra. 13Nau õbea panuu wãꞌãekau: ne jomad̶e biꞌia ijãa b̶uai, esed̶au b̶uai joma biꞌia neemera maud̶e waabenarã kʉ̃ria b̶uai. Mau õbead̶ebena, ab̶au kʉ̃ria b̶uai chi aude bibuara b̶uu.
14Dachiba ũrid̶akau bed̶ead̶e berreabadau ʉ̃rʉbena
1Waabenarã biꞌia kʉ̃ria panásturu. Maud̶e Dachi Akõre Jauriba waubi b̶uu joma wau kʉ̃riásturu. Dachi Akõre baita berread̶ai aude kʉ̃riásturu. 2Chi dachiba ũrid̶akau bed̶ead̶e berrea b̶uuba ẽbẽrarãmaa berrea b̶uuwãe, ichiba jaraaruu ab̶au bid̶a kuitaa ũrid̶akaud̶eeba. Ab̶a Dachi Akõremáburu berrea b̶uu. Dachiba kauwa ũrid̶akau chi Dachi Akõre Jaurid̶eeba dachiba adua panabarii bed̶ea berrea b̶uu. 3Maamina chi Dachi Akõre baita berrea b̶uuba ẽbẽrarãmaa berrea b̶uu biꞌia ijãad̶amera, chaarea nuread̶amera maud̶e sõbia panad̶amera. 4Chi dachiba ũrid̶akau bed̶ead̶e berrea b̶uuba ara ichi du ab̶a aid̶a b̶uu biꞌia ijãai baita. Maamina chi Dachi Akõre baita berrea b̶uuba ãbarã aid̶a b̶uu biꞌia ijãad̶amera.
5Mʉʉmaarã joma machi dachiba ũrid̶akau bed̶ead̶e poyaa berreabadau basirã biꞌia b̶uai basii. Maamina jomaurã Dachi Akõre baita poyaa berreabadau basirã biꞌia b̶uai basii. Biawãra dachiba ũrid̶akau bed̶ead̶e berreai audeara Dachi Akõre baita berreai biꞌia b̶uu. Maamina ab̶auba dachiba ũrid̶akau bed̶ead̶e berreaped̶a kuitaa jaraaruubʉrã, mau sid̶a biꞌia b̶uu. Maka ãbarãba kauwa ũrid̶aped̶a Dachi Akõred̶e biꞌia ijãad̶ai. 6Maud̶eeba ãbarã, mʉ machimaa wãped̶a dachiba ũrid̶akau bed̶ead̶e berrearuubʉrã, ¿machi saka aid̶aima? Aid̶aabai. Maamina dachiba ũribadau bed̶ead̶e Dachi Akõreba mʉʉmaa unubid̶a jaraaruubʉrã, maebʉrã Dachi Akõre kʉ̃risia kuitaad̶eeba berrearuubʉrã, maebʉrã Dachi Akõre baita berrearuubʉrã, maebʉrã Dachi Akõre bed̶ea jaradeaibʉrã mauba joma poyaa aid̶ai.
7Ara mau kĩra ab̶auba purrsiru maebʉrã arpa chaaruubʉrã maamina arakʉd̶e chaawẽebʉrã, jĩwa b̶umina dachiba kuitaad̶aabai kãare chaa b̶uu. 8Kachu sid̶a arakʉd̶e chaawẽebʉrã, ¿kokoroarã isa sakad̶aima chĩod̶ai baita? 9Ara mau kĩra machiba ũribadau bed̶ead̶e berread̶awẽebʉrã, ẽbẽrarãba ¿saka kuitaad̶aima machiba jara panuma? Maka berreaduubʉrã, machi bari berread̶ai. 10Nau iujãad̶e bed̶ea aꞌawaraa barau. Chi maarãd̶ebena bed̶ea kuitaa b̶uuba kauwa ũribarii. 11Maamina mʉʉba mau bed̶ea adua b̶uubʉrã, chi berrearuumaarã mʉ ãibena kĩra nii, maud̶e mʉʉmaarã ichi ãibena kĩra nii. 12Machi ara mau kĩra nuree. Dachi Akõre Jauriba waubi b̶uu machiba ãrea wau kʉ̃ria panuud̶eeba ãbarã aid̶ai baita biꞌia wau kʉ̃riásturu ãchiba biꞌia Dachi Akõred̶e ijãad̶amera.
13Maud̶eeba chi dachiba ũrid̶akau bed̶ead̶e berrea b̶uuba Dachi Akõremaa ʉtaa id̶i b̶uu ara ichiba jarad̶a poyaa kuitaa jaraaruu baita. 14Dachiba ũrid̶akau bed̶ead̶e mʉʉba Dachi Akõremaa ʉtaa id̶iiruubʉrã, mʉ jauriba ʉtaa id̶i b̶uu. Maamina mʉʉba adua b̶uu kãare ʉtaa id̶i b̶uu. 15Makarã ¿sakaima? Mʉ jauriba Dachi Akõremaa ʉtaa id̶ii maamina mʉʉba chi mau kuitaa b̶uu bed̶ead̶e bid̶a ʉtaa id̶ii. Mʉ jauriba Dachi Akõremaa biꞌia karii, maamina chi mʉʉba kuitaa b̶uu bed̶ead̶e bid̶a karii. 16Bichi jauriba Dachi Akõremaa biꞌia berrearuubʉrã, bichiba jarad̶a kuitaa ũrikauba ¿saka mau biawãrabʉ aima, bichiba bichíturu kid̶ibai ad̶ad̶eeba?14:16 Mau biawãrabʉ. Griego bed̶ead̶e naka b̶ʉ kub̶uu: amén. Mau bed̶ea hebreo bed̶eabʉ. Kʉ̃risia ome jara b̶uu. B̶esed̶e jara b̶uu «biꞌia b̶uu maka b̶uai» maud̶e b̶esed̶e jara b̶uu «biawãra».17Biawãra bichiba maka berrearuud̶e Dachi Akõremaa ichíturu kid̶ibai abarii kʉ̃ria b̶uu, maamina waabenarã aid̶awẽa b̶uu biꞌia ijãad̶amera. 18Mʉʉba Dachi Akõremaa bichíturu kid̶ibai abarii mʉ machi audeara dachiba ũrid̶akau bed̶ead̶e aude berreabariid̶eeba. 19Maamina ãbarã araa ãbua imiiduud̶e, mʉʉmaarã dachiba ũrid̶akau bed̶ead̶e 10.000 bed̶ea berreai bad̶amaarã dachiba ũribadau bed̶ead̶e jua ab̶a bed̶ea jaradeai b̶uu.
20Ãbarã, warr chekerã kĩra panásturu. Ãchiba kachirua ãrea adua panuu. Maamina Dachi Akõre Jauriba waubi b̶uu ʉ̃rʉbena chõrarã kĩra kʉ̃risia panásturu. Waa warr chekerã kĩra kʉ̃risiarã́sturu. 21Dachi Akõre bed̶ead̶e14:21 Dachi Akõre bed̶ead̶e. Griego bed̶ead̶e b̶ʉ kub̶uu: la ley. naka b̶ʉ kub̶uu:
«Dachi Mechiuba jara b̶uu: mʉ nau puurud̶ebenarã ome berreai, ãibenarã id̶eeba, chi ãchiba ũrid̶akau bed̶ea berreabadaurãd̶eeba. Maamina mʉ bed̶ea ũrimaa panad̶ai».14:21 Dachi Akõreba Israel puurud̶ebenarãmaa jarasii ãchiba ijãad̶awẽa panuu baita ãibenarãba ãchi ãyaa eneed̶ai. Isaías 28:11-12.
22Maka kuitaa panuu chi dachiba ũrid̶akau bed̶ead̶e berreabarii chi Jesusd̶e ijãad̶akaurã baita b̶uu, maumaarã Jesusd̶e ijãabadaurã baita b̶uuwãe. Maud̶e chi Dachi Akõre baita berreai Jesusd̶e ijãabadaurã baita b̶uu, maumaarã Jesusd̶e ijãad̶akaurã baita b̶uuwãe.14:22 Waabenarãba kʉ̃risia panuu nau versiculod̶e naka jara b̶uu: «Mauba kuitaa panuu chi dachiba ũrid̶akau bed̶ead̶e berreai Jesusd̶e ijãabadaurã baita b̶uuwãe, maumaarã chi Jesusd̶e ijãad̶akaurãmaa unubii b̶uu Dachi Akõreba kastikai».23Maud̶eeba ãbarã araa ãbua imiiduud̶e jomaurã dachiba ũrid̶akau bed̶ead̶e berreamaa panuubʉrã, maud̶e waabenarã Jesusd̶e ijãad̶akaurã maebʉrã Dachi Akõre bed̶ea ũri kʉ̃ria nuree ed̶a wãaduubʉrã ¿ãchiba jarad̶aabaika machi kĩranema panuu? 24Maamina jomaurã Dachi Akõre baita berreaduubʉrã, maud̶e Jesusd̶e ijãawẽa nii ab̶a maebʉrã Dachi Akõre bed̶ea ũri kʉ̃ria b̶uu ed̶a wãaruubʉrã, machiba jara panuu ũri b̶uud̶eeba ichiba kachirua waubarii kuitaad̶eeba Dachi Akõre daad̶e nebʉra barau nii kuitaai. 25Ichi sõd̶e mera uru b̶uad̶a biꞌia kuitaai. Maud̶e õdarrd̶e kob̶eeped̶a Dachi Akõremaa biꞌia berreai maud̶e «Dachi Akõre biawãra machi ome b̶uu» ai.
Araa ãbua imiiduud̶e joma arakʉd̶e wáusturu
26Maud̶eeba ãbarã, ¿saka arakʉd̶e waud̶aima? Machi araa ãbua imiiduud̶e ab̶auba Dachi Akõre bed̶ead̶ebena kari karii b̶uu, ab̶auba Dachi Akõre bed̶ea jaradeai b̶uu, ab̶auba Dachi Akõreba unubid̶a jarai b̶uu, ab̶auba dachiba ũrid̶akau bed̶ead̶e berreai b̶uu maud̶e ab̶auba mau berread̶a kuitaa jarai b̶uu. Maamina joma mau waud̶ai panuu ãbarãba biꞌia ijãad̶amera. 27Dachiba ũrid̶akau bed̶ead̶e berreaduubʉrã, ãba omeeba maebʉrã õbeaba maka berread̶ai panuu. Maamina ãchi ab̶aab̶aa berread̶ai panuu. Berread̶akare ab̶auba mau kuitaa jarai b̶uu. 28Maamina ãbarã araa ãbua imiiduud̶e mau berread̶a kuitaa jarabarii wãꞌãebʉrã, dachiba ũrid̶akau bed̶ead̶e berrea kʉ̃ria b̶uu chũpea b̶uai b̶uu. Ichi kʉ̃risiad̶e Dachi Akõremaa chũpea berreai b̶uu.
29Ara mau kĩra Dachi Akõre baita berreabadau ome maebʉrã õbea berread̶ai panuu. Maud̶e jomaurãba ãchiba berrea panuu kauwa ũrid̶ai panuu biawãra kuitaad̶ai baita. 30Ãba ab̶a berrea b̶uud̶e Dachi Akõreba chi ũri panuud̶ebena ab̶aumaa14:30 Chi ũri panuud̶ebena ab̶aumaa. Griego bed̶ead̶e naka b̶ʉ kub̶uu: Chi akʉ b̶uumaa. ne unubiiruubʉrã, chi berrea b̶uuba mau ãba ida berreabi b̶uu. 31Jomaurã ab̶aab̶aa Dachi Akõre baita berread̶ai panuu biꞌia kuitaad̶amera maud̶e biꞌia ijãad̶amera. 32Dachi Akõre baita berreabarii barikia berreakau, maumaarã esed̶aubarii berreai baita. 33Dachi Akõreba ororoa nub̶eebikau, maumaarã jirukaraayuwãe b̶uabiabarii.
Ẽbẽrarã Dachi Akõred̶erã araa ãbua imiiduucha 34wẽrarã berread̶aabai panuu, maumaarã chũpea ũrid̶ai panuu. Ãchi kima bed̶ea ũri panad̶ai panuu Moisesba b̶ʉd̶ad̶e jara b̶uu kĩra. 35Wẽrarãba ne id̶i kʉ̃riaduubʉrã, ded̶e panuud̶e ãchi kimamaa id̶id̶ai panuu. Ãbarã araa ãbua imiiduud̶e wẽra berreai baita bibuara b̶uuwãe.
36¿Dachi Akõre bed̶ea machid̶ebena neeska? ¿Ab̶a machimáburu neeska? 37Ab̶auba Dachi Akõre baita berreabarii kʉ̃risia b̶uubʉrã, maebʉrã Dachi Akõre Jaurid̶eeba ne wau b̶uu kʉ̃risia b̶uubʉrã, ichiba kuitaai b̶uu mʉʉba nau kartad̶e b̶ʉmaa b̶uu Dachi Mechiuba waubi b̶uu. 38Ab̶auba mau ida b̶uuruubʉrã, ichi sid̶a ida b̶ústuru.
39Maka ãbarã, biꞌia jʉrʉ́sturu Dachi Akõre baita berread̶ayu. Maud̶e dachiba ũrid̶akau bed̶ead̶e berreabadaurã ida berreabiásturu. 40Maamina joma kauwa arakʉd̶e wáusturu.
15Cristo chokae jiradud̶a ʉ̃rʉbena
1Mau awara ãbarã, mʉʉba machimaa kĩrababiai chi bed̶ea bia Jesús ʉ̃rʉbena mʉʉba machimaa jaradead̶a. Mau bed̶ea machiba mʉʉd̶ebena kuitaasid̶au maud̶e ãrea ijãa panuu. 2Mʉʉba jaradead̶a biawãra ijãa panuubʉrã, Dachi Akõreba karibai. Makawãebʉrã, machiba bari ijãasid̶au.
3Mʉʉba chi aude biꞌia b̶uu machimaa jaradeasii, ara mʉʉba kuitaad̶a kĩra. Mau naubʉ: Cristo dachi kachirua kakua biusii Dachi Akõre bed̶ead̶e b̶ʉ kub̶uu kĩra.15:3 Isaías 53:5-12.4Ichi jau b̶usid̶au, maabae ewari õbead̶e biud̶a bad̶a chokae jiradusii Dachi Akõre bed̶ead̶e b̶ʉ kub̶uu kĩra.15:4 Salmos 16:8-11; Isaías 26:19.5Chokae jiradusiid̶e Pedromaa unubisii.15:5 Pedro. Griego bed̶ead̶e naka b̶ʉ kub̶uu: Cefas. Mawãare ichiba 12 jʉrʉ adaud̶arãmaa unubiasii. 6Mau maad̶akare ãbarã 500 araa ãbua panuumaa unubiasii. Ãchid̶ebena chi nuree biusid̶au maamina ãrea wabid̶a chokae panuu. 7Mau 500 ãbarãba Jesús unuped̶aad̶akare Santiagomaa unubisii.15:7 Santiago. Santiago ara mau «Jacob» abadau. Ichi Jesús ãba basii. Mau maad̶akare joma ichiba bʉid̶arãmaa unubiasii.
8Kaad̶eare mʉʉmaa unubisii. Mʉ chi warr bai naed̶e adaud̶a kĩra maka unubisii.15:8 Hechos 9:1-6.9Biawãra chi Jesucristoba bʉid̶ad̶ebena mʉ chi aude kaebeu nii. Ẽbẽrarã Dachi Akõred̶erã kachirua waui baita wãraa b̶uasiid̶eeba biꞌia b̶uwãema ẽbẽrarãba mʉ ichiba bʉid̶a jarad̶ai. 10Maamina Dachi Akõreba ichi sõbiad̶eeba mʉ b̶usii Jesucristoba bʉid̶a b̶uamera. Ichiba mʉ bari maka b̶uubasii. Maumaarã joma waabenarã chi Jesucristoba bʉid̶arã audeara mʉʉba ichi baita aude wau b̶uu. Maamina ara michid̶eeba maka wauwẽa b̶uu. Dachi Akõréburu ichi sõbiad̶eeba mʉ aid̶a b̶uu maka waumera. 11Waabenarã Jesusba bʉid̶arãba ichi ʉ̃rʉbena jaradea panuubʉrã maebʉrã mʉʉba jaradea b̶uubʉrã, arab̶aud̶e jaradea panuu. Maud̶e machiba ara mau bed̶ea ijãasid̶au.
Ãbarã biuped̶aad̶a chokae jiradud̶ai ʉ̃rʉbena
12Daiba Cristo chokae jiradud̶a ʉ̃rʉbena jaradeabadau. Mau ¿saka waabenarã machid̶ebenaba biuped̶aad̶a chokae jiradud̶aabai a panuma? 13Biuped̶aad̶a chokae jiradud̶awẽebʉrã, mauba jara b̶uu Cristo sid̶a chokae jiraduubasii. 14Cristo chokae jiraduubasiibʉrã, makarã daiba bari jaradea panuu maud̶e machiba ichid̶e bari ijãa panuu. 15-16Cristo chokae jiraduubasiibʉrã, Dachi Akõreba ichi chokae jiradubisii aaduud̶e daiba Dachi Akõre ʉ̃rʉbena setaa jara panuu. Biawãra biuped̶aad̶a chokae jiradud̶awẽebʉrã, mauba jara b̶uu Cristo sid̶a chokae jiraduubasii. 17Cristo chokae jiradud̶awãe basirã, machiba ichid̶e bari ijãa panad̶ai basii maud̶e wabid̶a kachiruad̶e panad̶ai basii. 18Makarã joma Cristod̶e ijãabadaurã biuped̶aad̶a wãꞌãesid̶au. 19Dachiba Cristod̶eeba nau iujã́d̶eburu biꞌia nuread̶ai kʉ̃risia panuubʉrã, jomaurã audeara miichuburi nuree.
20Maamina Dachi Akõreba biawãra Cristo biu b̶uad̶ad̶ebena chokae jiradubisii. Biuped̶aad̶ad̶ebena ichi chi naa chokae jiradud̶abʉ. Maka Dachi Akõreba unubisii joma ichid̶irã sid̶a biawãra chokae jiradud̶ai. 21Ẽbẽra ab̶aba kachirua waud̶a kakua dachi biud̶ai. Ara mau kĩra ẽbẽra ab̶aba biꞌia waud̶a kakua dachi chokae jiradud̶ai. 22Joma Adand̶ebena neeped̶aad̶ad̶eeba biubadau. Ara mau kĩra Cristod̶eeba ichid̶irã joma chokae panad̶ai. 23Cristo naa chokae jiradusii. Ichi waya neeruud̶e ichid̶irã chokae jiradud̶ai. 24Kaad̶ebena ewarid̶e Cristoba jai kachiruarã jaradea ua b̶uabadaurã, jai kachiruarã mechiurã maud̶e jai kachirua meserãa nuree joma poyaai. Maabae ichid̶irã ichi juad̶e nuree Dachi Bajãad̶ebena Akõremaa deai.
25Biawãra Cristo jomaurã Mechiu b̶uai b̶uu ab̶a joma ichi kĩramaabadaurã poyaaruud̶aa.15:25 Ab̶a joma ichi kĩramaabadaurã poyaaruud̶aa. Griego bed̶ead̶e naka b̶ʉ kub̶uu: Ab̶a ichi jʉ̃rʉ ekare b̶uuruud̶aa.26Mau joma poyaaped̶a chi kaad̶ebena kĩramaabarii, dachi biubarii, ichiba mau wãꞌãebii, 27Dachi Akõre bed̶ead̶e jara b̶uud̶eeba: «Bichiba joma ichi juad̶e b̶usii».15:27 Salmos 8:6. «Joma Cristo juad̶e b̶usii» a b̶umina biꞌia kuitaa panuu Dachi Akõreba ara ichi Cristo juad̶e b̶uubasii. Dachi Akõréburu joma Cristo juad̶e b̶usii. 28Dachi Akõre Warr Cristoba joma poyaasiid̶e ichi Dachi Akõre juad̶e b̶eei Dachi Akõreba joma ichi juad̶e b̶ud̶a kĩra. Maka Dachi Akõreba joma ichi juad̶e uru b̶uai.
29Biuped̶aad̶a chokae jiradud̶akaubʉrã, ¿sakãe chi nuree biuped̶aad̶a kakau boro ea panuma? Dachi Akõreba biuped̶aad̶a chokae jiradubiawẽebʉrã, ¿sakãe maarã kakua boro ead̶aima?15:29 Corintod̶ebena ãbarãba chi biuped̶aad̶a kakua boro ea panasmina Dachi Akõre bed̶ead̶e jarakau dachiba maka waud̶ai panuu.30Maud̶e biuped̶aad̶a chokae jiradud̶awẽebʉrã, ¿dai sakãe Jesucristo bed̶ea baita ewaricha kachiruad̶e ãrea biꞌiwãe panuu? 31Ãbarã, machiba Dachi Mechiu Jesucristod̶e ijãa panuu baita mʉ biawãra kĩrajʉʉ b̶uu. Biawãra jaraaruu: ewaricha kʉ̃risia b̶uu ẽbẽrarãba mʉ chi Jesús bed̶ea kakua bead̶ai. 32Éfeso puurud̶e Dachi Akõre bed̶ea jaradeai baita mʉ ãrea biꞌiwãe b̶uasii ãnimara kachirua nuree ome chĩo b̶uu kĩra.15:32 Hechos 19:23-41. Biuped̶aad̶a chokae jiradud̶aabaibʉrã, ¿mʉ ãrea biꞌiwãe b̶uasiid̶eeba kãare biꞌia adausma? Biawãra dachi chokae jiradud̶aabaibʉrã, biꞌia b̶uu waud̶ai waabenarãba jarabadau kĩra: «Biꞌia kod̶ai, itua dod̶ai nu biud̶aid̶eeba».15:32 Isaías 22:13.
33Ida setaa kũruabirã́sturu. Machi kachirua waubadaurã ome ãbua nibaaduubʉrã, maarãba machi biꞌia nibabadau kachirua babid̶ai. 34Jipa kʉ̃risiásturu. Kachirua waa waurã́sturu. Waabenarã chi nuree machid̶ebenaba Dachi Akõre adua nuree. Maud̶eeba machi perad̶ai panuu.
Ãbarã chokae jiraduuduud̶e ãchi kakua saka b̶uai ʉ̃rʉbena
35Ab̶auba id̶ii b̶uẽka: «¿Biuped̶aad̶a saka chokae jiradud̶aima? ¿Ãchi kakua saka nuread̶aima?» 36¡Chi maka id̶i b̶uu kʉ̃risiaswãe nii! Ne uud̶a tonooruud̶e chi netaa e b̶eraabarii. 37Trigo uuruud̶e maebʉrã barikiu netaa uuruud̶e, chi b̶ʉʉrʉ uukau maumaarã chi netaa uubarii. 38Maamina mau netaad̶ebena Dachi Akõreba chi b̶ʉʉrʉ tonobibarii ara ichi b̶ʉʉrʉ kĩra b̶uamera.
39Nau iujãad̶e chokae nuree arab̶au kakua kĩra nureewãema. Ẽbẽra kakua ãyaa nii, ãnimara kakua ãyaa nii, ibana kakua ãyaa nii, b̶eda kakua ãyaa nii. 40Maud̶e bajãad̶e ne aꞌawaraa barau. Nau iujãad̶e bid̶a ne aꞌawaraa barau. Maamina chi bajãad̶e ne biꞌia nuree ãyaa nuree, chi nau iujãad̶e ne biꞌia nuree audeara. 41Ʉmada ʉ̃d̶aa ãyaa nii, jed̶ako ʉ̃d̶aa ãyaa nii, pusterrea ʉ̃d̶aa ãyaa nii. Pusterreacha ʉ̃d̶aa ãyaacha koabadau.
42Chi biuped̶aad̶a chokae jiradud̶ai ne uud̶a kĩra b̶uu. Kakua b̶eraabarii jau b̶ubadau maamina kakua b̶eraakau chokae jiradui. 43Kakua biꞌiawãe nii jau b̶ubadau maamina kakua bia nii chokae jiradui. Kakua meserãaswãe nii jau b̶ubadau maamina kakua meserãa nii chokae jiradui. 44Nau iujãad̶ebena kakua jau b̶ubadau maamina bajãad̶ebena kakua chokae jiradui. Nau iujãad̶ebena kakua baraubʉrã bajãad̶ebena kakua sid̶a barau.
45Dachi Akõre bed̶ead̶e b̶ʉ kub̶uu: «Chi nabena ẽbẽra Adán abadau Dachi Akõreba chokae b̶uabisii».15:45 Génesis 2:7. Maamina Cristo chi kaad̶ebena Adán abadau b̶usii ichi jaurid̶eeba chokae b̶uai deamera. 46Bajãad̶ebena kakua nabena kakuawãema, maumaarã nau iujãad̶ebena kakua chi nabenabʉ. Chi nabena kakua wãꞌãekare bajãad̶ebena kakua adaui. 47Chi nabena ẽbẽra Adán abadau ioro waud̶ad̶eeba, nau iujãad̶ebena basii. Chi mawãarebena ẽbẽra Jesucristo abadau bajãad̶ebenabʉ. 48Adán ichi kakua ioro waud̶a basii. Ara mau kĩra nau iujãad̶e duanuuba mau uru panuu. Maamina Cristoba bajãad̶ebena kakua uru b̶uu kĩra chi bajãad̶ebena ẽbẽrarãba mau uru panad̶ai. 49Dachi chi nabena mukĩra ioro waud̶a kĩra nuree maud̶e bajãad̶ebena need̶a ẽbẽra Cristo kĩra panad̶ai.
50Ãbarã, mʉʉba nau jaraaruu: chi kakua nau iujãad̶ebena Dachi Akõre juad̶e poyaa b̶uabai ichid̶irã baara. Chi kakua b̶eraabarii chi b̶eraakau kakuamaa poyaa b̶uabai. 51Ũrísturu. Dachi Akõreba naed̶e kuitaabiawẽa b̶uad̶a mʉʉba kuitaabii: joma dachi biud̶aabai, maumaarã chi kakua kĩra awara paneed̶ai. 52Maka b̶uud̶e, ara makʉd̶e, kaad̶ebena kachu jĩwaaruud̶e maka kĩra awara paneed̶ai. Biawãra Dachi Akõre kachu jĩwai. Maud̶e biuped̶aad̶a chi kakua b̶eraad̶akaud̶e chokae jiradud̶ai. Maud̶e dachi wabid̶a chokae nuree dachi kakua kĩra awara paneed̶ai. 53Dachi kakua chi b̶eraabarii, chi kakua b̶eraakau b̶eei. Dachi kakua biui b̶uu, chi kakua biukau b̶eei. 54Maka dachi kakua chi b̶eraabarii, chi kakua b̶eraakau b̶eeruud̶e maud̶e nau kakua biui b̶uu chi biukau kakua b̶eeruud̶e, Dachi Akõre bed̶ead̶e b̶ʉ kub̶uu kĩra biawãra b̶uai. Naka b̶ʉ kub̶uu: «Dachi Akõreba dachi biui wãꞌãebisii».15:54 Dachi Akõreba dachi biui wãꞌãebisii. Griego bed̶ead̶e naka b̶ʉ kub̶uu: Chi poyaa b̶uuba chi biui b̶uu misii. Isaías 25:8.55Maud̶e b̶ʉ kub̶uu:
«¿Chi dachi biubibariiba waa poyaa biubiibaika? ¿Chi dachi biubibariiba waa poyaa puꞌuabiibaika?»15:55 Griego bed̶ead̶e mau versículo naka b̶ʉ kub̶uu: Biubarii, ¿bichiba poyaa b̶uad̶a sama b̶uma? Biubarii, ¿bichi puꞌua sama b̶uma? Oseas 13:14.
56Moisesba b̶ʉd̶aba kuitaabi b̶uu dachiba kachirua waubadau. Kachirua waubadaud̶eeba biud̶ai. 57Maamina Dachi Akõremaa ichíturu kid̶ibai ad̶ai panuu Dachi Mechiu Jesucristod̶eeba biud̶ai ʉ̃rʉbena karibasiid̶eeba. 58Maud̶eeba ãbarã mʉa kʉ̃riakuabarii, ãrea ijãa panásturu. Dachi Mechiuba kʉ̃ria b̶uu ãrea wau kãribad̶eásturu. Machiba kuitaa panuu Dachi Mechiu baita wau panuu, machiba bari wau panuuwãe.
16Ãbarã Jerusalend̶ebena baita chi nejarra jʉrʉ peped̶aad̶a
1Mau awara machiba ãbarã Jerusalend̶ebena baita chi nejarra peeduu ʉ̃rʉbena mʉʉba jaraaruu. Mʉʉba ãbarã Galacia druad̶ebenarãmaa jarad̶a kĩra wáusturu. 2Misacha machicha chi nejarra kanabadaud̶ebena awara b̶uped̶aad̶a merásturu. Makarã mʉ neeruud̶e machiba ped̶aabai. 3Mʉ neeruud̶e chi ãbarã machiba peped̶aad̶a maarã ome mʉʉba Jerusalend̶aa chi nejarra urubʉʉi. Ãbarã Jerusalend̶ebenarãba ãchi biꞌia irsibid̶amera mʉʉba maarã ome karta urubʉʉi. 4Maamina machimaarã mʉ sid̶a wãi biꞌia b̶uubʉrã, maarã ome wãi.
Pablo Corintod̶aa wãi kʉ̃risiad̶a
5Mʉ naa Macedonia druad̶aa wãi b̶uu. Maabae machimaa wãi. 6¿Mʉ machi baara awawarrea b̶eei b̶uẽka? ¿Machi baara joma nau kui che ewarid̶e b̶eei b̶uẽka? Maabae machiba mʉ poyaa aid̶ad̶ai mʉ wãaruumaa biꞌia wãmera. 7Naud̶era poyaa kãꞌãa b̶eebaid̶eeba mʉʉba machi ichiad̶e wã kʉ̃riawẽe. Maamina Dachi Mechiuba kʉ̃riaruubʉrã, machimaa wãaruud̶e kãꞌãa b̶uad̶e wãi. 8Nama Éfeso puurud̶e b̶uai ab̶a Pentecostés bari panabadau ewari wãꞌãeruud̶aa.16:8 Judiorãba Pascua ewari wausid̶aud̶e 50 ewari b̶uud̶e ãchi ne uu nub̶uu chi naa chaud̶a ʉ̃rʉbena kĩrajʉʉ ewari waubachid̶au. Mau bari panabadau ewari «Pentecostés» abachid̶au. Levítico 23:15-16.9Nama mʉ kĩramaa panumina poyaa Dachi Akõre bed̶ea biꞌia jaradea b̶uai maud̶e ãreaba ijãa panuu.
10Ãba Timoteo machimaa neeruubʉrã, ichi machi tãed̶e biꞌia irsibísturu wapearãamera. Dachi Mechiuba kʉ̃ria b̶uu ichiba biꞌia wau b̶uu mʉʉba wau b̶uu kĩra. 11Maud̶eeba ichi kĩramaabiarã́sturu, maumaarã aid̶ásturu mʉ ichiad̶e neeruud̶e jirukaraayuwãe neemera. Mʉʉba maud̶e waabenarã ãbarã ichi neei esed̶au panuu.
12Dachi ãba Apolosmaa mʉʉba chi chuburia id̶isii waabenarã ãbarã ome machi ichiad̶e wãd̶amera. Maamina ʉ̃raud̶e ichi wã kʉ̃riawẽa b̶uu. Wãi poyaaruud̶e wãi.
Pabloba nau kartad̶e aanama b̶ʉd̶a
13Kauwa panásturu. Jesucristod̶e ãrea ijãa panásturu. Ichid̶eeba perawẽa panásturu maud̶e chaarea panásturu. 14Ne joma machiba wauduu kʉ̃riad̶eeba wáusturu.
15Ãbarã, machiba kuitaa panuu Acaya druad̶e Estefanasba maud̶e ichi ded̶ebenarã chi naed̶e Jesusd̶e ijãaped̶aad̶a maud̶e ãchiba kʉ̃risia panuu joma ãbarã aid̶ad̶ai baita. 16Mʉʉba machimaa chi chuburia id̶iiruu ãchi maud̶e joma ãchi kĩra nuree ũrid̶amera. Joma Dachi Akõre traju waubadaurã maud̶e ãbarã aid̶abadaurã ũrísturu.
17Ãba Estéfanas, Fortunato maud̶e Acaico mʉʉmaa neeped̶aad̶ad̶eeba kĩrajʉʉ b̶uu. Maarãba machi kuenda mʉ aid̶a panuu. 18Maarãba mʉ sõ kĩrajʉʉbisid̶au machi sõ kĩrajʉʉbiaped̶aad̶a kĩra. Maarã ʉ̃rʉbena maud̶e ãbarã ãchi kĩra panuu ʉ̃rʉbena biꞌia kʉ̃risiásturu.
19Ãbarã Asia druad̶ebenarãba kʉ̃ria panuu machi biꞌia panad̶ayu. Ãba Aquilaba, neekau Priscilaba maud̶e ãbarã ãchi ded̶e araa ãbua imibadaurã Dachi Mechiud̶eeba kʉ̃ria panuu machi biꞌia panad̶ayu. 20Ãbarã jomaurãba kʉ̃ria panuu machi biꞌia panad̶ayu. Biawãra kʉ̃riad̶eeba chiya biꞌia berreásturu.16:20 Biawãra kʉ̃riad̶eeba. Griego bed̶ead̶e naka b̶ʉ kub̶uu: kĩedarr ʉ̃yásturu.
21Mʉ Pablobʉ. Nau bed̶ea ara mʉ juaba b̶ʉʉruu.
22Barikiuba Dachi Mechiu Jesucristo kʉ̃riawẽebʉrã, Dachi Akõreba mau ẽbẽra nebʉra barau ai. ¡Uche, Dachi Mechiu!
23Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi aid̶a b̶uai. 24Jesucristod̶eeba mʉʉba machi biawãra kʉ̃ria b̶uu.16:24 Griego bed̶ead̶e chi b̶ee kartad̶e kaad̶eare b̶ʉ kub̶uu: biꞌia b̶uu maka b̶uai.