TITO

TITO

¹ Na’ Pablo nu lca msu ’in Ndiose, lo Jesucristo nga’an tñan ni ’yan tsa yucuin’ cha’ tsu’hue ’in ni, siyana tsaña’an ri’ lyigaa nu cua ngulosuhui Ndiose ’in, lo qui’ya can’ cuinta ña’an ntsu’hui cha’ chu’hui sca chelyuu nu luhui, ² laja tyucua tloo can’ chelyuu nu a tsatii ’a, sca cha’ nu cua mxtya Ndiose bra nu ti lyiji tñan ni chelyuu, lo a ca cuiñi ni. ³ Mdia tsan nguilyo scua yla ni cha’ tsu’hue ’in ni, lo mxnu ni cuinta ’yan siyana tyucuin’ cha’ re lo’o nten. Cui’ Ndiose, Ni nu ndlo laa ’na, lca nu ngulo tñan ’yan. ⁴ Ca’an tñan quityi re ’in nu’huin Tito, nu lca ña’an ndyca ri’ sca sñen’ can lo’o cha’ nu nguiaña’an rin’ na. Ndyca ran’ siyana Stina Ndiose lo’o Ni X’na na Jesucristo, Ni nu ndlo laa ’na, taa ni cha’ tsu’hue nu chu’hui ni’ carsya ’in, ca ’tna ri’ ni ’in, lo cu’ni ni cha’ tyi’in tsu’hue. ⁵ Nde cha’ mxnun ’in se’en lca Creta siyana culo scua lyigaa la ña’an cha’ nu ti lyiji, lo cu’ni cha’ tyo’o tun tucua sna nu chu’hui cuinta ’in ta’an na cuinta scaa quichen, tsaña’an cha’ nu cua yucuin’ lo’o. ⁶ Una ndyca ri’ sca nu ntsu’hui chelyuu nu luhui, a cuinta scati cuilyo’o, lo si lo’o sñe’ nguiaña’an ri’ ’in Ndiose, nu a sca cha’ nducui ndyca’an ’in, lo ni a lye’ ri’. ⁷ Can’ cha’ nu chu’hui cuinta ’in ne’ ’ni cha’ sca nu ntsu’hui chelyuu nu luhui, siyana tñan ’in Ndiose chu’hui cuinta, ndyca ri’ sca nu a siye’, tsi’i la xnan nguisin’ ri’, tsi’i na nda’an yo’o, ta ndi’in nsuun, a cuinta si a ’ni mañan lo’o tñi, ⁸ ngui’ni cuinta ’in lyigaa nu ndiaa se’en ndi’in, nguia ndyca’an lyigaa cha’ tsu’hue, nxñi cuinta ’in ne’, lñi ndi’in cha’ ’in, luhui cha’ tiaa ’in, lo tsi’i la xnan ’ni sca cha’, ⁹ a cuinta tsa ndun lo’o cha’ tsu’hue nu ngui’ni cha’an, la rcan’ caja ña’an tyucui’ cha’ nu lñi ’in Ndiose lo’o xca tucui lo taa cha’ tnu tiee ’in can’, a cuinta lo’o nu ndyucui’ ca’an cha’ can’, cuna ña’an nu qui’ya can’ cuinta. ¹⁰ Siyana quina’an ’a nu lye’ ri’ ntsu’hui, lo ndyucui’ can’ xcui’ cha’ nu a ntsu’hui cuinta, nda’an nilyo’o can’ ’in nten, lo nu lyee lati ngui’ni ncuaña’an lca nten nu ncua circuncida ’in, ¹¹ can’ nu ’ni cha’ tucun tu’hua, siyana ngui’ni tantu ña’aan sca na’an, ndlu’u can’ cha’ nu a sca cuinta ntsu’hui siyana cu’ni can’ mañan lo’o tñi. ¹² Ndeña’an yucui’ sca ne’ Creta, nu ’ni cuinta nten ta’a quichen tyi cha’ nu ndyucui’: Ne’ Creta, a ndijyin xcui’ cha’ cuiñi ndyucui’ ne’, lca ne’ ña’an ndyca ri’ sca ’ni yla, tucun’ ne’ lo yuhue’ ne’. ¹³ Chi ñi ña’an ndyucui’ re, can’ cha’ tla cha’ tyucui’ lo’o can’ siyana tyun lñi can’ lo’o cha’ ’in Ndiose, ¹⁴ lo a cu’ni cuinta ’a can’ cuintu nu ndlo ri’ que ne’ judio, ta cha’ nu ndlu’u nten nu nxcuan tloo cha’ nu lñi. ¹⁵ Siyana tsalca nu luhui cha’ tiaa ’in, lyigaa cha’ luhui ’in can’, una nten nducun’ nu a nguiaña’an ri’, ni sca cha’ lo a luhui ’in can’, hasta lo’o cha’ tiaa ’in lo’o carsya ’in cuu’ na. ¹⁶ Ndyucui’ can’ siyana nguiaña’an ri’ ’in Ndiose, una a ndyucua ta’a cha’ ’in lo’o ña’an nu ngui’ni, lca can’ sca nu nducun’ lo lye’ ri’, a ca tñan can’ cu’ni tñan tsu’hue.

¹ Una nu’huin culu’u ’in ne’ ña’an ndyca ri’ sca nu tsu’hue ’in Ndiose. ² Tsalca ne’ qui’yu nu lca nten cula, ndyca ri’ siyana xñi ne’ cuinta ’in ne’, lo’o rsuun ña’an cu’ni ne’, lo’o cha’ tiaa cu’ni ne’ scaa cha’, a cuinta tsa tyun ne’ lo’o cha’ nu nguiaña’an ri’ ne’, lo chu’hui cha’ tsu’hue ’in ne’ lo’o nten, cui’ ncuaña’an lo’o lyigaa lo’o cha’. ³ Tsalca ne’ cuna’an nu lca nten cula, ticui’ ncuaña’an lo’o suun ña’an cu’ni ne’, tsi’i na tya’an lo’o ne’ cha’ ndyca ndyucui’ ta lo’o cha’ cu’hui, siyana culu’u ne’ cha’ tsu’hue, ⁴ ncuaña’an ca ta ne’ cueen ’in lyigaa ne’ cuna’an nu ti cuine’ ti, siyana chu’hui cha’ tsu’hue ’in lo’o cuilyo’o lo’o sñe’, ⁵ xñi can’ cuinta ’in lo’o cha’ tiaa nu luhui, lo chu’hui yuhue ri’ se’en ndi’in, cu’ni can’ lyigaa loo tñan tsu’hue, a cuinta tucua cha’ ’in cuilyo’o, siyana a caja nu tyucui’ cua ña’an ti lo’o cha’ tsu’hue ’in Ndiose. ⁶ Ticui’ ncuaña’an lo’o nu ti suhue ti, ta cueen ’in siyana xñi cuinta ’in. ⁷ Nu’huin culu’u tñan ’in lo’o lyigaa lo’o cha’ tsu’hue, cui’ ncuaña’an xñi cuinta ña’an culu’u ’in ne’ lo’o sca carsya nu lñi, ⁸ lo tyucui’ tsaña’an ndyca ri’ nu tsu’hue ’in Ndiose, siyana a caja nu tyucui’ ta tsi’i ña’an na, hasta lo’o nu ti’i ri’ ’na ca jyu’u ri’, ni a caja ’a ña’an ti tyucui’ ca’an can’ ’huan. ⁹ Tsalca nu lca msu, ta cueen ’in siyana tucua cha’ ’in x’na, cuna ña’an nu quinu tsu’hue lca tiee x’na, lo a xcuen ’in can’ cua ña’an ti, ¹⁰ ni a xñi su’hua na ’in x’na, siyana ca lñi cha’ ’in lo’o lyigaa lo’o cha’, siyana ncuaña’an ca cu’ni lo’o cha’ tsu’hue ’in Ndiose, Ni nu ndlo laa ’na. ¹¹ Can’ cha’ ncua tycan’ cha’ tsu’hue ’in Ndiose, siyana tyo’o laa lyigaa nten. ¹² Cha’ tsu’hue can’ ndlu’u na ’na siyana xcuan tloon na lyigaa lo’o cha’ a tsu’hue nu nxcui ri’ nten, lo chu’huin na sca chelyuu nu luhui, xñi na cuinta ’na tsaña’an nu ndyca ri’ Ndiose, ¹³ cui’ siyana ndyuhui tan na cha’ tsu’hue nu cua mxtya ni bra nu ca tycan’ cha’ cuiya’ ’in Jesucristo, Ni nu ndlo laa ’na lo lca ni Ndiose nu tlyu lati. ¹⁴ Ndyaa ni ’in ni squi’yan naa nten, cui’ siyana ca tyo’o laan na se’en nda’an na lo’o cha’ a tsu’hue, lo msuhui ni ’na siyana can na sca nten nu cu’ni tsu’hue ’in ni, nu cu’ni cuinta lyigaa tñan tsu’hue. ¹⁵ Cui’ cha’ re culu’u lo taa cha’ tnu tiee ’in ne’, a cuinta tla cha’ xtya lo a caja nu xcuan tloo ’in.

¹ Xu’hua ri’ ’in ne’ siyana tucua ne’ cha’ ’in bsya tnu lo’o bsya nu suhue la, tucua ne’ cha’ nu tyucui’ can’, tsu’hue ntsu’hui tiee cu’ni lyigaa loo tñan tsu’hue. ² A tucua yuhue’ ’in ni sca tucui, a cuna cha’ cusuun, siyana tsu’hue ti tyi’in cha’ ’in, lo’o rsuun ña’an culu’u tñan ’in lo’o lyigaa tucui. ³ Siyana ti culo lo’on nare ncuan na sca nu tantu’, nga’ni lye’ rin’ na, mda’an nguna’ yu’huin na, siya’ ti ndyaan na ’na lo’o cha’ a tsu’hue, lyigaa lo’o cha’ nu nxcui ri’ nten. Mda’an na ña’an nu ncua rin’ na, ngu’ni cuita’an rin’ na, ngujui nu na’an ti’i ’na lo ncuaña’an na’an ti’in na ’in can’. ⁴ Una ncua tycan’ cha’ tsu’hue ’in Ndiose, Ni nu ndlo laa ’na, snu ña’an ’tna ri’ ni ’in nten, ⁵ ngulo laa ni ’na, una tsi’i siyana nde’en la tñan tsu’hue nu cua nga’ni na, siyana lo’o cha’ tsu’hue ’in ni, a cuinta mjyi’an ni ’na lo nga’ni ni cha’ lcan na sca nten nu cui, ncha’an ni cha’ tiaa ’na lo’o Espíritu nu Luhui ’in ni, ⁶ nu cua ndaa ni cha’an yu’hui ni’ carsya ’na lo’o Jesucristo, Ni nu ndlo laa ’na. ⁷ Lo’o cha’ tsu’hue ’in ni cua nguinu luhuin na tloo ni, ncuaña’an ca tyucuan na chelyuu nu a tsatii ’a ’na, cui’ cha’ nu nducua tloon na ri nii. ⁸ Nde cha’ nu lñi lo ndyca ran’ siyana xtya tsa cha’ re: Ne’ nu nguiaña’an ri’ ’in Ndiose cu’ni cuinta lyigaa cha’ tsu’hue. Nde cha’ nu tsu’hue lo nda yaa’ na ’in lyigaa tucui. ⁹ Una a sten yu’hui lo’o cha’ tantu nu ndlo ri’ que nten, cui’ ncuaña’an lo’o ña’an nu nten cula ’na ndyucui’, a sten lo’o cha’ cusuun ta tyucui’ lyo’o ’in ne’ lo’o cha’ ’in lee, siyana a ntsu’hui cuinta cha’ can’ lo a ’ni tsu’hue na. ¹⁰ Si ntsu’hui nu ndyca ri’ su’hue ti’in ’in ta’an na, tyucui’ lo’o can’ tucua sna ya’, lo si a cu’ni cuinta cha’ can’ siya’ ti culo tsu’ ’in, ¹¹ lo ca jylo ri’ siyana cua nguna’ siyana nga’ni qui’ya, lo ticuii’ nso’ tucua qui’ya chun’. ¹² Bra nu ca’an tñan ’in Artemas ta ’in Tíquico tsaa se’en ndi’in, cuna ña’an tsaa nu ndla lati quichen Nicópolis, siyana can’ ntsu’hui tieen ti’in tsan nu ca tlya’. ¹³ Zenas nu nga’ni cha’an cha’ ’in lee, lo’o Apolo cuna ña’an ta yaa’ ’in ne’ lo’o na nu cu’ni tsu’hue ’in ne’ tucuiin tsaa ne’, siyana a sca na cuilyiji ’in ne’. ¹⁴ Ncuaña’an lo’o ta’an na, cu’ni cha’an la cu’ni lyigaa loo tñan tsu’hue lo ta yaa’ ’in nu ’ni cha’ ’in, siyana ca tycan’ tñan nu ngui’ni. ¹⁵ Lyigaa ta’a ndi’in hua re ndyucui’ cha’ ’in, cui’ ncuaña’an tyucui’ cha’ ’in ne’ cuinta hua, lyigaa ta’a tsu’huen na ta’a nguiaña’an ri’ na. Cui’ cha’ tsu’hue ’in Ndiose quinu lo’on huan cuinta scaan huan. Amen.