SANTIAGO

SANTIAGO

¹ Na’, Santiago nu lca msu ’in Ndiose lo’o Ni X’na na Jesucristo, ndyucuin’ chan’ ’huan, ’huan nu mdo’o loo tii tyucua ne’ Israel nu ndi’in sa tyucui chelyuu. ² ’Huan ta’an na, nde lyee la ca tsu’hue chu’hui tieen huan braa ndijin huan scaxca ndi’i, ³ cua jlyo rin’ huan bra ndijin huan ndi’i siya cha’ nu nguiaña’an rin’ huan, ncuaña’an caja la juersa ’huan ta loon huan lo’o cha’ can’. ⁴ Una ta loon huan hasta bra ca tycan’ tñan tsu’hue nu cu’ni cha’ can’, siyana ca tyun tsan huan lo ca tyucui la cha’ tiaa ’huan, lo ni sca cha’ a tsa lyiji ’huan. ⁵ Una si ntsu’huin huan nlyiji cha’ tiaa ’huan, jñan huan na ’in Ndiose, lo taa ni na ’huan. Siyana Ndiose tsi’i na ndyu’hui cuiya’ ti cha’ tiaa nu ndaa ni ’in lyigaa tucui, ni a nxcuan tloo ni ’in can’. ⁶ Una ’in Ndiose xtya tlon huan bra jñan huan ’in na lo a cu’ni tucua rin’ huan, siyana nu ngui’ni tucua ri’ ndyca ri’ can’ tsaña’an ndyca ri’ tyi’a tujo’o bra nguitsa na, lo scaxca tsu’ nguia lo’o cui’in ’in na. ⁷ Nu ngui’ni ncuaña’an a nducua tloo can’ cha’ tsu’hue nu taa Ni X’na na. ⁸ Sca nten nu tucua cha’ tiaa ’in, ncuaña’an ndyca ri’ ne’ lo’o lyigaa lo’o cha’. ⁹ Una sca ta’an na nu ti’i, ca tsu’hue chu’hui tiee can’ siyana Ndiose cua mscuen cuaan ni ’in. ¹⁰ Una nu cuilyiya’, ca tsu’hue chu’hui tiee siyana Ndiose cua mdi’ya ti’in ni cha’ ’in ne’. Tsaña’an ndyijyin cha’ ’in sca quee nu nducua ni’ quixin’, ncuaña’an ntsu’hui cha’ tyijyin cha’ ’in ne’, ¹¹ siyana bra ndyo’o tucua cuicha lo ngui’ni tique’ cuaan ’in na, quee can’ nguinan’ tucua na lo nguilu na, ndyijyin cha’ tsu’hue ña’an na, ncuaña’an ndyca ri’ ne’ cuilyiya’, tyucuna’ chelyuu ’in ne’ lo’o cha’ cuilyiya’ can’ ’in ne’. ¹² Tsu’hue ca xu’hue nu nda loo lo’o scaxca cha’ nu ljyan ’in, siyana bra nu cua mda loo can’, caja cha’ tsu’hue ’in can’, cui’ chelyuu nu cua mxtyaa Ndiose cha’ taa ni ’in lyigaa nu tsu’hue ntsu’hui tiee lo’o ni. ¹³ Bra ljyan sca cha’ nu xtyu ’na loo qui’ya, a tyucuin’ na siyana Ndiose ngala yaa’ ’na, siyana cuinta cha’ ’in Ndiose a ca xtyu ni ’na loo qui’ya, ni a ntsu’hui cha’ xtyu ni ’in ni sca tucui lo’o cha’ can’. ¹⁴ Cuinta scaan na ndiun na loo qui’ya lo’o cha’ nu lca tieen na, lo ndaan na cha’ cuiya’ nguiato’o cha’ can’. ¹⁵ Bra cua nguiten cha’ a tsu’hue can’ tieen na, a ndijyin cha’ catsu lucuati loo qui’ya, lo bra nu ca tycan ña’an na tsa lo’o na ’na loo cha’ ndija. ¹⁶ ’Huan ta’an na nu ndyu’hui cuiya’ ran’ ’in, a taan huan cha’ cuiya’ quiñi lyo’on huan ’huan ticuiin’ huan. ¹⁷ Lyigaa lo’o cha’ tsu’hue lo’o cha’ nu lñi ndyo’o na la ni’ cuaan, ljyan na lo’o cha’ ’in Stina Ndiose, ni nu ngañan lyigaa loo xaa nu ntsu’hui ni’ cuaan, ni nu scaña’an ti cha’ ’in, lo a ncha’an ni tsaña’an ncha’an sca coo. ¹⁸ Lo’o cha’ tsu’hue lca tiee ni ndaa ni chelyuu ’na lo’o cha’ nu lñi nu ngune ’na, siyana can na sñe’ ni nu mdo’o hui ca ’in ni. ¹⁹ Can’ cha’, ’huan ta’an na nu ndyu’hui cuiya’ ran’ ’in, tyun tiaan huan quine ’huan bra caja nu tyucui’, lo a lyica cha’ tyucuin’ huan ndla ndsa, ta quisin’ rin’ huan cui’ bra, ²⁰ siyana sca nu ndyucuen tique’ a xlya can’ cu’ni tñan tsu’hue nu ndyca ri’ Ndiose. ²¹ Can’ cha’ xcuan tloon huan lyigaa lo’o cha’ cha’ a tsu’hue, lo tyucuan xu’huen huan cha’ nu yta ni ni’ carsya ’huan, cui’ cha’ nu ca culo laa ’huan. ²² Una tsi’i tsaloo ti quine ’huan cha’ ’in na, siyana tucuan huan cha’ ’in na lo a quiñilyo’on huan ’huan ticuiin’ huan. ²³ Siyana nu nee ’in cha’ re, lo a nducua cha’ ’in na, ndyca ri’ can’ tsaña’an ndyca ri’ sca nten nu ñaan cui’ya ’in loo cuna. ²⁴ Bra nu cua na’an cui’ya can’ ’in, lo tyo’o nguiaa, cui’ bra njlya ri’ ña’an ndyun rcan. ²⁵ Una nu nxñi ca cuinta ’in lo’o cha’ nu lñi ’in Ndiose, cui’ lee nu ndlo laa ’na, tsa ndyun lo’o cha’ can’, ni a njlya ri’ cha’ nu cua ngune ’in, siyana nde nducua can’ cha’ ’in na, can’ nu tsu’hue xu’hue lo’o tñan nu cu’ni. ²⁶ Si nde’en nu nxque’ ri’ siyana lyee nguiaña’an ri’, lo a nxñi cuinta tu’hua, ticuii’ can’ ñilyo’o ’in, lo tyucua cha’ ti nguiaña’an ri’. ²⁷ Nde cha’ nu luhui lati ca cu’ni na tloo Stina Ndiose nu a nxtiyaa’ lo’o cha’ a tsu’hue: Chu’hui yuhue rin’ na ’in nu suhue nu a ndi’in nten cula ’in, cui’ ncuaña’an lo’o ne’ cuna’an nu nguinu cha’ yucui’ ti, a cuinta xñi na cuinta ’na lo’o cha’ a tsu’hue nu ndyca loo chelyuu re.

¹ ’Huan ta’an na nu nguiaña’an ri’ ’in Ni X’na na Jesucristo, ni nu nda’an lo’o sca cha’ cuiya’ nu tlyu, scaña’an ti ca lca tieen huan lo’o lyigaa tucui. ² Si se’en nguio’ ti’in huan sten sca nu ntsu’hui cui’ oro lo xñi yaa’ lo lcu sca te’ tsu’hue ña’an, a cuinta si sten sca nu ti’i nu lcu sca te’ cusun, ³ si cu’ni cuintan huan ’in nu lcu te’ tsu’hue can’ lo nujuin huan ’in: Nde tyucua se’en tsu’hue la re, lo si nujuin huan ’in nu ti’i can’: Nde ti tyun nu’huin, ta tyucua lyuu ti cua, ⁴ rcan’, ¿ta tsi’i na cua ngui’ni huan lo’o ta’an huan siyana lca can’ sca nu chin’ cha’ ’in? Ncuaña’an cua ngui’ni cuiyan’ huan cha’ ’in ta’an huan lo’o cha’ tiaa a tsu’hue. ⁵ ’Huan ta’an na nu ndyu’hui cuiya’ ran’ ’in, quine ’huan sca cha’ nu tyucuin’: ¿Ta tsi’i Ndiose ngulosuhui ’in nu ti’i siyana ca cuilyiya’ can’, una lo’o cha’ nu nguiaña’an ri’, lo caja se’en ndlo ni tñan ’in can’, tsa ña’an nu cua mxtyaa ni sca cha’ lo’o lyigaa nu tsu’hue ntsu’hui tiee lo’o ni? ⁶ Una ’huan nde ndi’ya ti’in huan ’in nu ti’i. ¿Ta tsi’i nu cuilyiya’ lca nu ndaa qui’ya ’huan tloo bsya? ⁷ ¿Ta tsi’i ndyucui’ ca’an can’ ’in ni nu tsu’hue lati, cui’ cha’ nu ntsu’huin huan? ⁸ Si chiñi nducua huan cha’ ’in lee nu ndun loo lati, cu’ni huan ña’an ndyucui’ quityi ’in Ndiose: —Ca ’tna rin’ huan ’in ta’a nten huan tsaña’an ngui’ni huan ’tna huan ticuiin’ huan—, tsu’hue ngui’ni huan rcan’. ⁹ Una si ndi’ya ti’in huan ’in xca tucui, qui’ya ngui’ni huan rcan, lo lee ’in Ndiose ndloo qui’ya na ’huan. ¹⁰ Siyana si ntsu’hui nu ndyca ri’ xu’hua se’en ña’aan lee can’, una si tnan’ nisiya’ scati cha’ can’, ña’an lee cua ngacha ti’in can’ rcan’. ¹¹ Siyana ticui’ Ndiose ndlo tñan: —A sten yu’hui lo’o cuilyo’o nten, —ticui’ ni nujuin ni: —A cuijui nten. —Si a nguiten yu’hui lo’o cuilyo’o nten, una ndujui nten, cua ngacha ti’in cha’ ’in lee rcan’. ¹² Xñi huan cuinta cha’ nu tyucuin’ huan, a cuinta lo’o ña’an nu cu’ni huan, siyana tsaña’an ndyucui’ lee nu ndlo laa ’huan, ncuaña’an ntsu’hui cha’ ca cuiya’ cha’ ’huan. ¹³ Siyana nu a ’tna ri’ ’in ta’a nten, cui’ ncuaña’an a caja nu ca ’tna ri’ ’in can’ bra ca cuiya’ cha’ ’in, una nu ’tna ri’ ’in ta’a nten, tnu tiee can’ bra ntsu’hui cha’ ca cuiya’ cha’ ’in. ¹⁴ ’Huan ta’an na, ¿ni cuinta ntsu’hui ’in nu ndyucui’ siyana nguiaña’an ri’, si a ndlu’u tñan tsu’hue nu ngui’ni? ¿Ta ca tyo’o laa can’ lo’o cha’ nu nguiaña’an ri’? ¹⁵ Sca ta’an na ta sca ne’ cuna’an si a ndia ste’ ne’, lo’o na nu cu ne’, ¹⁶ si nujuin huan ’in can’: Quiaa lya, a sca cha’ chu’hui tiee, Ndiose taa ni ste’ lo’o na nu cu, ¿ni cuinta ntsu’hui tyucuin’ huan ncuaña’an si a ta yan huan ’in can’? ¹⁷ Cui’ ncuaña’an ndyca rin’ na si a nguiaña’an rin’ na, si a ndlu’un na tñan tsu’hue ngui’ni na, a sca cuinta ntsu’hui ’na rcan. ¹⁸ Si ntsu’hui nu tyucui’: Nu’huin nguiaña’an ri’ ’in Ndiose, lo na’ ngui’ni scaxca cha’ tsu’hue. ¿Ta ca tsaña’an ri’ ’in Ndiose, si a culu’u tñan tsu’hue nu ngui’ni? Siyana na’ lo’o cha’ tsu’hue nu ’nin ndyca tycan’ ña’an cha’ nu nguiaña’an ran’. ¹⁹ Nu’huin nguiaña’an ri’ siyana scati Ndiose ntsu’hui, lo cui’ ña’an ndyucui’, una lo’o cui’in xña’an nguiaña’an ri’ lo ndyucuan can’ siyana ntsen. ²⁰ Nu’huin nu a ndi’ya cuinta cha’ re, ¿ta a jlyo ri’ siyana tyucua cha’ ti nguiaña’an rin’ na, si a ndlu’un na tñan tsu’hue nu ngui’ni na? ²¹ Abraham nu ncua nten cula ’na, ¿ta tsi’i siyana lo’o scaxca cha’ tsu’hue nu nga’ni can’ nguinu luhui tloo Ndiose, cui’ bra nu mxtya can’ ’in Isaac nu lca sñe’ se’en ntsu’hui cha’ squin can’ tloo Ndiose? ²² Ca jylo ri’ siyana lo’o ña’an nu nga’ni Abraham, ndyucua ta’an na lo’o cha’ nu yaña’an ri’, lo siya cha’ tsu’hue nu nga’ni ncua tyucui cha’ nu yaña’an ri’. ²³ Lo mducua cha’ nu ndyucui’ quityi ’in Ndiose: —Abraham nguinu luhui tloo Ndiose siyana yaña’an ri’ ’in ni—, lo ngujui nu ngulo naa ’in siyana ncua ta’a tsu’hue Ndiose. ²⁴ Ca jylo rin’ huan rcan’ siyana nten nguinu luhui ne’ tloo Ndiose, tsi’i tsaloo ti lo’o cha’ nu nguiaña’an ri’ ne’, siyana lo’o scaxca cha’ tsu’hue nu ’ni ne’. ²⁵ Cui’ ncuaña’an Rahab ne’ cuna’an nducun’ can’, ¿ta tsi’i lo’o cha’ tsu’hue nu nga’ni ne’ nguinu luhui ne’ tloo Ndiose, bra ndyucuan xu’hue ne’ ’in ne’ nu mdiaa se’en ndi’in ne’ bra nga’an tñan ’in ne’ xca tucuiin? ²⁶ Ncuaña’an ndi’in cha’ ’na si a ntsu’hui carsya ’na, lcan na sca nu ngujui, cui’ ncuaña’an lo’o cha’ nu nguiaña’an rin’ na, si a ndlu’un na tñan tsu’hue nu ngui’ni na, tyucua cha’ ti nguiaña’an rin’ na rcan’.

¹ ’Huan ta’an na, a lyica cha’ quina’an ’a huan can huan nu ndlu’u ’in, cua jlyo rin’ na siyana quina’an la cha’ nu ca cuiya’ ’na. ² Siyana lyigaan na ndyijyin cha’ ’na scaxcan na. Una si ntsu’hui nu mxñi cuinta ’in lo’o cha’ nu ndyucui’, lo a ntnan’ ni sca cha’, can’ nu lñi ndi’in cha’ ’in, lo ndyca xñi cuinta ’in lo’o lyigaa lo’o cha’. ³ Ña’an huan, nare nsu’huan na frenu tu’hua cuiyu siyana xlya ’in tsa ’in tucuiin nu ndyca rin’ na. ⁴ Cui’ ncuaña’an xñi huan cuinta ’in yca na’an, nisiya lca na sca na nu tlyu lo ndya’an lo’o cui’in tnu ’in na lo’o juersa, una lo’o sca yca’ lyu’ ti nu ndyucui’ ne’ lo’o lca timón, can’ cha’ ndyca ndya’an lo’o ne’ ’in na se’en nu ndyca ri’ ne’. ⁵ Cui’ ncuaña’an ndi’in cha’ ’in ltsen’ na, lca na sca na lyu’ ti, una snu ña’an ’ni siyen’ na lo’o cha’ nu ndyucuin’ na. Ña’an huan, sca quii’ lyu’ ti lo ca tiquin na sca qui’ya tlyu. ⁶ Lo ltsen’ na lca na ña’an ndyca ri’ quii’, lca na sca chelyuu nguna’ nu ngui’ni cuu’ ña’aan chelyuu ’na ti bra ngulan na, cua lcan na quii’ lo’o cha’ nu ndyucuin’ na. ⁷ Siyana lyigaa loo ’ni, ña’an ndyca ri’ ’ni yla, quiñi, cuinaan, ’ni nu ntsu’hui loo tyi’a tujo’o, ndyca ’ni msu ne’ ’in ’in. ⁸ Una ni sca nten lo a ca cu’ni chu’hue ne’ ltse’ ne’, lca na sca chelyuu nguna’ nu a tucui ndyca ’in cu’ni chu’hue ’in na, siyana mtsa’an yu’hui yaan loo na. ⁹ Lo’o tu’huan na ’ni tnu na ’in Ndiose, ni nu lca Stina, lo ticui’ lo’o tu’huan na nducuan na yuhue’ ’in ta’a nten na, cui’ nu ngañan ni tsaña’an ndyca ri’ yucui’ ca ni. ¹⁰ Ticui’ lo’o tu’huan na re n’ni tnu na ’in Ndiose lo nducuan na yuhue’ ’in nten. ’Huan ta’an na, a ndyo’o tñan cu’ni na nguaña’an. ¹¹ Xñi na cuinta se’en nducua tyi’a, ¿ta ca tyucua tyi’a nu tlyaa’ sca se’en ti lo’o tyi’a nu tsu’hue? ¹² ’Huan ta’an na, ¿ta ca tyo’o si’yu olivo loo yca higo? ¿Ta ca tyo’o si’yu higo loo ti uva? Ticui’ ncuaña’an a ca tyucua tyi’a tiyen’ sca se’en ti lo’o tyi’a nu tsu’hue. ¹³ ¿Ta ntsu’hui nu tiaa la ljan huan nu ndi’ya la cuinta? Can’ nu ntsu’hui cha’ culu’u cha’ tsu’hue nu cu’ni, lo’o rsuun. ¹⁴ Una si ngutsa’an yu’hui carsya huan lo’o cha’ cuita’an ri’ lo’o cha’ xlya, a cu’ni siyen huan ’huan, lo a su’huan huan cha’ cuiñi loo cha’ nu lñi ’in Ndiose. ¹⁵ Siyana cha’ tiaa re a ndyo’o na la ni’ cuaan, cui’ loo chelyuu re ndyo’o na, lca na cha’ a tsu’hue, lo ljyan na lo’o cha’ ’in Ne’ xña’an. ¹⁶ Siyana se’en ntsu’hui cha’ cuita’an ri’ lo’o cha’ xlya, a ndijyin cha’ nchu lucuati loo cha’ a tsu’hue nu ngui’ni ti’i lo’o nten. ¹⁷ Una cha’ tiaa nu ndaa Ndiose lca na xcui’ cha’ nu luhui, nda yaa’ na ’na tyi’in tsu’huen na, ’ni na tñan tsu’hue, ndyca tycan’ ña’an na bra n’ni na ’tna ’in ta’a nten na, loo can’ lyijyan lyigaa lo’o cha’ tsu’hue, lñi ndi’in cha’ ’in na lo a lyijyan na lo’o cha’ cuiñi. ¹⁸ Sca nten nu nguinan ña’an tyi’in tsu’hue lo’o lyigaa tucui, xcui’ cha’ tsu’hue ngui’ni can’ lo’o cha’ can’.

¹ ¿La ya’ ndyo’o cha’ cusuun nu nguiten ljan huan, lo ndyucui’ lyo’o ta’an huan scaxcan huan? ¿Ta tsi’i lo’o cha’ a tsu’hue nu lca tieen huan? ² Lca tieen huan sca na, lo a ndijyi na ’huan. Ti’i ntsu’hui tieen huan, lo ndujuin huan nten squi’ya cha’ cuita’an rin’ huan, a nguinu tsu’hue tieen huan, nisiya nii ru ña’an ndi’in yi’ni huan lo nsuun huan, una a ndijyi na nu ndyca rin’ huan siyana a njñan huan ’in na. ³ Njñan huan sca na, una a ndijyi na ’huan, siyana tsi’i ña’an njñan huan ’in na, tsaloo ti ndyca rin’ huan na nu lca tieen huan. ⁴ ¡’Tnan ca ’huan nu ndun tijyu’ sii’ Ndiose! ¿Ta a jlyo rin’ huan siyana nu lyee lca tiee cha’ nu ndyca loo chelyuu re, nde ndyca ta’a cusuun can’ ’in Ndiose? Can’ cha’ ña’an nu ti ca ta’a tsu’hue lo’o cha’ nu ndyca loo chelyuu re, ndyca ta’a cusuun can’ ’in Ndiose. ⁵ ¿Ta ndlucua rin’ huan siyana tyucua cha’ ti ndyucui’ quityi ’in Ndiose: Espíritu nu cua ndaa Ndiose chu’hui ni’ carsya ’na, lyee n’ni xlya ni ’na? ⁶ Una tlyu la cha’ tsu’hue ndaa ni ’na, can’ cha’ ndeña’an ndyucui’ xca cha’: —Ndiose nxcuan tloo ni ’in nten nu siye’, una n’ni cuinta ni ’in nten nu rsuun—. ⁷ Can’ cha’ xnu huan cuinta ’huan tuyaa’ Ndiose, tsa tyun huan lo a taan huan cha’ cuiya’ ’in ne’ xña’an lo tyo’o tsu’ siin’ huan. ⁸ Lyee la quinan huan ’in Ndiose, lo ncuaña’an lucui’ la tyun ni siin’ huan. ’Huan nu lca nten qui’ya chelyuu, tyaan huan cha’ cuiya’ tyuhui chelyuu ’huan, cui’ ncuaña’an ’huan nu ngui’ni tucua ri’, suhuin huan carsya ’huan. ⁹ Su’hua yuhue rin’ huan cha’ re, qui’ya tucu’hua tieen huan, lo cuna huan. Cha’ tsu’hue nu ntsu’hui tieen huan, tyca na cha’ xñi’in ’huan lo cuna huan. ¹⁰ Cu’ni rsuun huan ’huan tloo Ni X’na na, lo cui’ ni scuen cuaan ni ’huan. ¹¹ ’Huan ta’an na, a lyica cha’ tyucui’ ca’an ta’an huan, siyana nu ndyucui’ ca’an ta’a lo ngui’ni cuiya’ cha’ ’in ta’a, lee ’in Ndiose ndijin lyoo can’ lo ngui’ni cuiya’ cha’ ’in lee. Si nu’huin ngui’ni cuiya’ cha’ ’in lee, sca bse lca rcan, lo a nducua cha’ ’in na. ¹² Scati ni nu ndaa lee ’in nten chelyuu, lo scati ni ca culo laa ni ’na ta cuijlyo ni ’na. Una Nu’huin, ¿ti ca lca siyana ngui’ni cuiya’ cha’ ’in xca tucui? ¹³ Quine ’huan cha’ re, ’huan nu ndyucui’: Ri nii ta quiaa tsaan na xca quichen, la cua tyi’in na sca yjan, cu’ni na jyinsya lo caja tñi ’na. ¹⁴ Una a jlyo rin’ huan ña’an lyijyan cha’ ’huan tsan quiaa. Chelyuu ’huan, ¿ni na lca na? Ndyca ri’ na tsaña’an ndyca ri’ coo, ri nii tycan’ na, una ndi’a a la ’a quine cueen na. ¹⁵ Ndeña’an tyucuin’ huan: Si Ni X’na na taa ni cha’ cuiya’, chu’huin na chelyuu ta cu’ni na scaxca tñan. ¹⁶ Una ’huan nde nscuen cuaan huan ’huan lo’o cha’ siye’, lo lyigaa lo’o cha’ siye’ lca na qui’ya. ¹⁷ Nu cua jlyo ri’ cu’ni cha’ tsu’hue lo a si a cu’ni ’in na, ticui’ qui’ya lca na ’in.

¹ Ña’an, ’huan nu cuilyiya’, cuna huan lo xi’yan huan squi’ya ndi’i nu ljyan ’huan, ² siyana cha’ cuilyiya’ ’huan cua ndyucui ti’in na lo sten’ huan cua nsta ’ni ’in na, ³ a cuinta na oro lo’o plata nu ndi’in ’huan cua nducua cuiya’ na, lo cuiya’ can’ ntsu’hui cha’ culo qui’ya na ’huan tsaña’an nu ngui’ni huan, cuijlyo na ’huan tsaña’an ndyca ri’ sca na nu ntsu’hui loo quii’, siyana quina’an ’a cha’ cuilyiya’ cua mxo’ ti’in huan tichin’ braa ti ndi’in huan re. ⁴ A cuinta squiya’ msu ndlo qui’ya na huan, siyana a msu’hua lyiyan huan ’in ne’. Yta lo mxo’ na ’huan, lo nde ngañilyo’on huan ’in ne’, una ri nii mdiaa cha’ re la tloo Ni X’na na, ni nu tla la cha’ ’in. ⁵ Laja mdi’in huan loo chelyuu re a sca na ngüilyiji ’huan, cui’ nu nde nguinu na ’huan, ncua tsu’hue ña’an huan tsaña’an ndyca ri’ sca bta nu ntsu’hui cha’ cuijui ne’ ’in. ⁶ Msu’huan huan qui’ya chun’ nten nu tsu’hue, yjui huan ’in ne’, lo ni a mscuen yaa’ ne’ ’huan. ⁷ Can’ cha’ ’huan ta’an na taa lon huan hasta ra quian Ni X’na na xñin huan cuinta ña’an ndi’in cha’ ’in sca nten nu ntya jyaan, snu ña’an ndyuhui ta ne’ quila quioo, lo ncuaña’an ntsu’hui cha’ tyuhuita ne’ hasta ra xo’ ne’ na nu yta ne’, cua ña’aan nguila quio. ⁸ Cui’ ncuaña’an ’huan ta loon huan, lo nde lyee la ca lñi carsya ’huan siyana cua ndyucui lucui’ la cha’ quiaan Ni X’na na. ⁹ ’Huan ta’an na, a lyica cha’ su’hua qui’ya ta’an huan scaxcan huan, siyana cu’ni cuiya’ ni cha’ ’huan. Ña’an huan, cua ndun ni nu lca bse la tuna’an. ¹⁰ ’Huan ta’an na, xñi huan cuinta snu ña’an ndi’i mdijin nu mxyucui’ Ni X’na na ’in ti s’ni, lo mda loo lo’o cha’ can’. ¹¹ Ña’an huan, ndyucuin’ na siyana tsu’hue ca xu’hue nu nda loo lo’o scaxca ndi’i. Cua yna huan cha’ snu ña’an mda loo Job, a cuinta tsaña’an mda yaa’ Ni X’na na ’in nde loo, cui’ siyana ca tycan’ cha’ tsu’hue ’in Ni X’na na, snu ña’an ngui’ni ni ’tna ’in nten. ¹² ’Huan ta’an na, tyucuin’ sca cha’ lo’on huan: A cu’ni ti’yan huan ’in Ndiose bra nu xtyan huan sca cha’, ni a culo naa huan ni’ cuaan ta chelyuu re, ni a cu’ni ti’yan huan xca la cha’, siyana nujuin huan: Cui’ na, ta tsi’i na, siyana cu’ni cuiya’ ni cha’ ’huan. ¹³ Si ntsu’hui nu ndijin scaxca lo’o cha’, tyucui’ can’ lo’o Ndiose, si ntsu’hui nu tsu’hue ntsu’hui tiee, cula lo’o can’ ’in ni. ¹⁴ A cuinta si ntsu’hui nu ti’i ljan huan, cu’ni can’ cha’ caan tucua sna nu ntsu’hui cuinta ’in ta’an na, lo tyucui’ lo’o Ndiose siya cha’ ’in can’, lo su’hua ceite ’in can’ lo’o cha’ cuiya’ ’in Ni X’na na. ¹⁵ Lo si nguiaña’an ri’ ’in Ndiose bra ndyucui’ lo’o ni, cu’ni tyca Ni X’na na ’in nu ti’i can’, lo si ntsu’hui la qui’ya nga’ni can’ cu’ni ni cha’ tlyu ri’ ’in. ¹⁶ Si nde’en la qui’ya nga’ni huan scaxcan huan, quitsa’ ylan huan ’in ta’an huan, ncuaña’an jñan huan ’in Ndiose squi’ya cha’ ’in ta’an huan, lo cui’ ni xtun ni ’huan. Cu’ni cuinta ni cha’ nu njñan sca nu lñi ndi’in cha’ ’in. ¹⁷ Elía ncua nten chelyuu tsaña’an ndyca rin’ naa, yucui’ lo’o Ndiose lo’o lyigaa tiee siyana a qui’ya ’a quioo, lo a ngüi’ya ’a na sna yjan jlu’hue. ¹⁸ Chun’ nde’en can’ mjñan ’in Ndiose xya’ siyana qui’ya quioo, lo ndisna ngüi’ya na, xya’ ncua tñan na nu yta nten. ¹⁹ ’Huan ta’an na, si nde’en nu ntsu’hui ljan huan cua mdo’o tsu’ lo’o cha’ nu lñi, si ntsu’hui nu cu’ni cha’ xtucui can’, ²⁰ ca jylo rin’ huan siyana nu cu’ni cha’ xtucui sca nu nda’an nguna’, cua nga’ni can’ cha’ mdo’o laa sca nten lo’o cha’ ndija, lo nguten ña’an qui’ya ’in ne’.