HEBREOS

HEBREOS

¹ Ndiose tyun ’a ya’ yucui’ ni ti s’ni, scaxca ña’an yucui’ ni lo’o nu ncua nten cula ’na tsaña’an mxyucui’ ni ’in ne’ nu ncua msu ’in ni, ² una mdiaa tsan, lo cui’ ri nii, Ndiose ndyucui’ ni lo’on na lo’o cha’ ’in Sñe’ ni, lyigaa lo’o cha’ ndyaa ni cuinta ’in can’, lo cui’ lo’o ni ngañan Ndiose chelyuu. ³ Lca ni xaa ’in Ndiose, lo tyucui ña’an lca Ndiose lca ni, cui’ ni lyi’ya ni cuinta lyigaa lo’o cha’ siyana tlyu cha’ cuiya’ ’in ni lo’o cha’ nu ndyucui’ ni. Bra cua ngatyen ni qui’ya ’na ndi tucua ni tsu’ cueen ’in Ndiose nu nducua ni’ cuaan. ⁴ Yato’o ndun loo la cha’ ’in ni que ’in angajle, siyana tlyu la cha’ cuiya’ ngujui ’in ni que ’in can’. ⁵ Ni sca angajle lo a nujuin Ndiose ’in: Nu’huin lca Sñen’, lo na’ lcan Sti ri nii, lo nde xca cha’ nu a yucui’ ni cha’ ’in angajle: Na’ ntsu’hui cha’ can Sti ni, lo cui’ ni ntsu’hui cha’ ca ni sñen’ na’. ⁶ A cuinta bra ca’an tñan ni yucui’ ca Sñe’ ni loo chelyuu re, ndeña’an mxtya ni cha’: Lyigaa angajle ’in Ndiose ntsu’hui cha’ cu’ni tnu ’in can’. ⁷ Nde cha’ nu ngu’ni ca’an ’in angajle can’: Ngui’ni ni cha’ siyana sca cui’in ti lca angajle ’in ni, lo nga’ni ni cha’ siyana sca quii’ ti lca msu can’ ’in ni. ⁸ Una ndeña’an nguinu scua cha’ ’in Sñe’ ni: Se’en nu ndlo tñan, nu’huin ni nu lca Ndiose, a ntsu’hui cha’ tyii cha’ cuiya’ ’in.Tsaña’an nu ndlo tñan lca na sca cha’ cuiya’ nu lñi. ⁹ Cui’ siyana ’ni cha’ nu lñi, lo nxcuan tloo cha’ a tsu’hue, can’ cha’ ngulo tun Ndiose ’in, ni nu lca Ndiose ’in, lo nga’ni ni cha’ siyana lyee la ca tsu’hue chu’hui tiee que ’in lyigaa la tucui. ¹⁰ Lo ti nujuin la ni: Nu’huin ni nu lca X’na hua, cui’ mxtyae quiya’ chelyuu re ti culo, lo ni’ cuaan lca na nu ngañan yaa’. ¹¹ Ña’aan na re tsatii cha’ ’in na, una nu’huin ndi’in sa tyucui braa, lo ña’aan na re ndyca cula na tsaña’an ndyca ri’ sca te’, ¹² ntsu’hui cha’ scuin’ ’in na tsaña’an ndyca ri’ sca te’, lo cha’an ña’an na, una nu’huin scaña’an ti, ni a ntsu’hui cha’ tsatii cha’ ’in. ¹³ Siyana ni sca angajle lo a nujuin Ndiose ’in: Tyucua tsu’ cueen ’yan laja cu’ni ’in cha’ ta’a cusuun quinu nde tuquiya’. ¹⁴ ¿Ta tsi’i lyigaa angajle lca ña’an ndyca ri’ sca msu ’in Ndiose nu nga’an tñan ni ta yaa’ ’in tsalca nu ntsu’hui cha’ culo laa ni ’in?

¹ Can’ cha’, ’ni cha’ nde lyee la cu’ni cuintan na cha’ nu cua ngune ’na, tsi’i na tyo’o tijyun’ na lo’o cha’ can’. ² Si tsa nguinu scua cha’ nu yucui’ angajle nu hasta nga’ni cha’ mdijin ndi’i lyigaa nu mxen quiya’ lo a mducua cha’ ’in na, ³ ¿ni xnu can nare, si a cu’ni cuintan na sca cha’ nu tlyu nu ntsu’hui cha’ culo laa ’na? Cui’ cha’ re lca na cha’ nu yucui’ Ni X’na na la nducua la, lo nten nu ngune ’in cha’ re mxnu scua tsa ni cha’ ’in na lo’on na. ⁴ Ndiose ndaa lñi ni rsuun lo’o cha’ nu mda’an yucui’ can’ lo’o scaxca cha’ nu tnu nu nga’ni ni, cha’ nu cuhue ri’ ne’, lo ncua tycan’ cha’ cuiya’ ’in ni, a cuinta Espíritu nu Luhui ’in ni ngüitsa’ scaxca cha’ cuiya’ ’in ni tsaña’an nu ncua ri’ ni. ⁵ Ndiose a mxnu ni cha’ cuiya’ yaa’ angajle nu culo tñan chelyuu tiaa braa, tsaña’an cha’ nu ndisna ndyucuin’ na ri nii. ⁶ Una ntsu’hui nu yucui’ sca cha’, lo ndeña’an nguinu scua na: ¿Ti ca lca ne’ qui’yu, siyana chu’hui yuhue ri’ ’in ne’, lo ti lca sñe’ siyana cu’ni cuinta ’in? ⁷ Chin braa nga’ni lyu’ la ’in ne’ que ’in angajle, una yato’o mscuen cuaan ’in ne’ lo nga’ni cuinta ’in ne’, ndaa cha’ cuiya’ ’in ne’ siyana culo ne’ tñan lyigaa na nu ngañan, ⁸ a sca cha’ ta a nguinu nde tuquiya’ ne’. Si ncuaña’an mxnu ni lyigaa lo’o cha’ yaa’ ne’, a sca cha’ ta a nguinu cuinta ’in ne’ rcan’, una ti lyiji ca tycan’ cha’ siyana culo ne’ tñan lyigaa lo’o cha’. ⁹ Una cua na’an cui’yan na ’in Jesús, ni nu nga’ni lyu’ la Ndiose ’in que ’in angajle, una ri nii mscuen cuaan ni ’in can’, nga’ni cuinta ni ’in lo’o cha’ nu mdijin ni ndi’i bra ngujui ni, lo lo’o cha’ tsu’hue nu nga’ni Ndiose lo’o lyigaa nten nga’ni ni cha’ ngujui can’ loon na. ¹⁰ Ndiose ntsu’hui ni cuinta lyigaa lo’o cha’, lo lo’o ni nguiaa’ lyigaa loo na, lo lca tiee ni tsa lo’o ni quina’an ’a nten nu ca sñe’ ni la ni’ cuaan, can’ cha’ nga’an cha’ ’in ni ndaa ni cha’ cuiya’ mdijin Jesús ndi’i, lo ncuaña’an cu’ni tyucui ni cha’ ’in can’, ni nu mducua quiya’ cha’ tyo’o laa nten. ¹¹ Siyana ni nu nga’ni cha’ nguinu luhui nten tloo Ndiose, lo nu cua mxnu luhui ni ’in can’ sca sti lca ni lo’o, can’ cha’ a jyu’u ri’ ni tyucui’ ni lo’o can’ lca ta’a ngula ni, ¹² lo ndeña’an nujuin ni: Tyucuin’ lo’o ta’an ti ca lcan huan, lo laja se’en nguio’ ti’in hua tya’an loon huan. ¹³ Nde xca cha’ nu yucui’ ni: Nan’ xtyan tloon ’in Ndiose. Lo xiya’ nujuin ni: Ña’an huan, nde ndi’in na’ lo’o sñe’ Ndiose nu ndaa ni ’yan. ¹⁴ Tsaña’an lcan na cuinan’ nten chelyuu, cui’ ncuaña’an ncua ni yucui’ ni, lo ngujui ni siyana cuijlyo ni ’in ne’ xña’an nu ndia cha’ cuiya’ ’in lo’o cha’ ndija, ¹⁵ lo culo laa ni ’in lyigaa nu nsñi su’hua cha’ ndija ’in laja nu nda’an ytsen can’ loo chelyuu re. ¹⁶ Cua’ jlyo rin’ na siyana a yu’hui yuhue ri’ ni ’in angajle, siyana msu’hua yuhue ri’ ni ’in sñe’ nten cuityi ’in Abraham. ¹⁷ Can’ cha’ nga’ni ’a cha’ nga’ni ni ’in ni tsaña’an ndi’in cha’ ’in ta’a ni lo’o lyigaa lo’o cha’, siyana ca ’tna ri’ ni ’in nten lo ca ni sca nu ndun loo lati nu nga’ni cuinta tñan ’in Ndiose, lo ngatyen ni qui’ya ’na. ¹⁸ Siyana mdijin ni ndi’i, can’ cha’ ndyca ’in ni ta yaa’ ni ’in lyigaa nu ndijin cha’.

¹ Can’ cha’, ’huan ta’an na nu cua msuhui Ndiose ’in, ’huan nu cua msi’ya Ndiose ’in quiaa la ni’ cuaan, cu’ni cuintan huan ’in Crixtu Jesús, ni nu nguiaña’an rin’ na, ni nu nga’an tñan Ndiose ’in, cui’ ni nu ndun njñan ni cha’ ’na tloo Ndiose. ² Lñi ndi’in cha’ ’in ni lo’o Ndiose nu ngulo tun ’in ni, tsaña’an lñi ndi’in cha’ ’in Moisé lo’o lyigaa tñan nu ndaa Ndiose ’in laja lta nten ’in ni. ³ Una Jesús lyee la ndun lo’o cha’ ’in ni que ’in Moisé, siyana tsaña’an ndi’in cha’ ’in sca na’an, a ntsu’hui lyoo la na que nu ngañan ’in na. ⁴ Lyigaa na’an ngujui nu ngañan ’in na, una Ndiose lca nu mxtya quiya’ lyigaa lo’o cha’. ⁵ Si siya Moisé ncua sca msu ’in Ndiose, lo nga’ni cuinta lyigaa tñan nu ndaa ni ’in laja nten cuityi ’in ni, siyana taa rsuun ña’an cha’ nu cu’ni ni tiaa braa. ⁶ Una Crixtu Sñe’ Ndiose lca ni, ndlo ni tñan na’an ’in ni, lo na’an can’ lcan nare, una si xñi tun tsan na ’in na, lo a cu’ni na’an rin’ na lo’o cha’ nu ndyuhui tan na, tsu’hue ntsu’hui tieen na hasta tyo’on na loo chelyuu re. ⁷ Can’ cha’ ndeña’an ndyucui’ Espíritu nu Luhui ’in Ndiose: Ri nii si quine ’huan cha’ nu ndyucui’ Ndiose, ⁸ ni a cu’ni tla carsya ’huan, tsaña’an nga’ni lye’ rin’ huan laja mda’an huan se’en bityi can’, ⁹ se’en ndaa nten cula ’huan cha’ nsin’ ri’ ’yan, ngana ne’ ña’an scuen tique’ ne’ ’yan, lo ni siyana’an tloo ne’ cha’ nu tnu nga’nin tucua yla yjan can’. ¹⁰ Si’ya cha’ can’ ngunu’un ’a ran’ lo’o nten can’, lo yucuin’: Scaña’an ti nga’ni tucua ri’ carsya ’in ne’, lo a nga’ni cuinta ne’ tucuiin nu ’yan. ¹¹ Can’ cha’ ngüisin’ ran’ lo mxtyan sca cha’ lo’o ne’ siyana a sten ne’ se’en ntsu’hui cha’ xtñan’ ne’. ¹² ’Huan ta’an na, xñi huan cuinta siyana ni scan huan lo a sten cha’ a tsu’hue ni’ carsya ’huan ta cu’ni tucua rin’ huan lo tyo’o tijyun’ huan sii’ Ndiose, ni nu lu’u ca, ¹³ taan huan cha’ tnu tiee ’in ta’an huan cuinta scaa tsan, laja nu ti ndijyi braa ña’an ndyca ri’ ri nii, siyana ni scan huan a ca tla carsya ’huan lo’o cha’ cuiñi nu ljyan loo qui’ya. ¹⁴ Nare’ cua ngu’ni ca’an cha’ ’in Crixtu ’na, si xii tun tsan na ’na lo’o cha’ nu yaña’an rin’ na ti culo, hasta tyo’on na loo chelyuu re, ¹⁵ tsaña’an ndyucui’ quityi ’in Ndiose: Si quine huan ri nii cha’ nu ndyucui’ Ndiose, ni a cu’ni tlan huan carsya ’huan, tsaña’an nu cua nga’ni lye’ rin’ huan. ¹⁶ ¿Ti ca ngune ’in lo nga’ni lye’ ri’ cha’ nu yucui’ Ndiose? ¿Ta tsi’i lyigaa nten nu mdo’o lo’o Moisé se’en lca Egipto? ¹⁷ ¿Ti ca lo’o nguiten cha’ ngüisin’ ri’ tiee Ndiose sa tucua yla yjan? ¿Ta tsi’i nu nga’ni qui’ya can’, cui’ tsalca nu ngujui se’en bityi can’? ¹⁸ ¿Ti ca lo’o mxtya ni cha’ siyana a sten se’en ntsu’hui cha’ xtñan’ ni? ¿Ta tsi’i nten nu a ngutucua cha’ can’? ¹⁹ Ndi’yan na cuinta ni cha’ a ncua sten ne’, cui’ siyana a yaña’an ri’ ne’ ’in Ndiose.

¹ Can’ cha’ chu’hui sca cha’ chen ni’ carsya ’na, laja nu ti ndiaa cha’ nu cua mxtya Ndiose siyana tca sten na se’en ndaa ni xtñan’ na, ti quee’ tsato’o a tyucuan huan cha’ tsu’hue can’. ² Siyana lo’on nare ngujui nu yucui’ cha’ tsu’hue ’in Ndiose tsaña’an yato’o ’in ne’ can’, una tyucua cha’ ti ngune ’in ne’ siyana a yaña’an ri’ ne’. ³ Una tsalca naa ne’ nu nguiaña’an ri’ sten na se’en ndaa Ndiose xtñan’ na, siyana cui’ ni nga’ni tyi’ya ni se’en can’ bra nujuin ni: Can’ cha’ ngüisin’ ran’ lo mxtyan sca cha’ lo’o ne’ siyana a sten ne’ se’en ntsu’hui cha’ xtñan’ ne’. Bra yucui’ ni cha’ re cua lca lyigaa tñan ’in ni ti bra ngañan ni chelyuu. ⁴ Nde xca cha’ nu yucui’ ni cha’ ’in tsan nu mxtñan’ ni: Ndiose nga’ni tyii ni lyigaa tñan ’in ni, lo mxtñan’ ni nu cua ndyca cati tsaan. ⁵ Lo xiya’ nga’ni ti’ya ni se’en can’ bra nujuin ni: A sten ne’ se’en ntsu’hui cha’ xtñan’. ⁶ Can’ cha’ ca jylo rin’ na siyana ti lyiji sten nu ntsu’hui cha’ sten se’en can’, siyana nten nu ngune ’in cha’ tsu’hue re ti culo, a nguiten ne’ siyana nga’ni lye’ ri’ ne’, ⁷ can’ cha’ xiya’ mxtya ni xca tsan, ña’an ndyca ri’ ri nii, tsaña’an mxyucui’ ni ’in David, lo nujuin ni: Si quine ’huan ri nii cha’ nu ndyucui’ Ndiose, ni a cu’ni tlan huan carsya ’huan. ⁸ Si Josué nguiten lo’o nten can’ se’en ntsu’hui cha’ xtñan’ ne’, a xtya ’a ni xca tsan nde loo la. ⁹ Ca jylo rin’ na siyana sñe’ Ndiose ti nducua tloo sten se’en nu ntsu’hui cha’ xtñan’. ¹⁰ Tsalca nu cua nguiten se’en nu ndaa Ndiose xtñan’, cui’ siyana cua xtñan’ lo’o tñan nga’ni, tsaña’an mxtñan’ Ndiose lo’o tñan nga’ni ni. ¹¹ Can’ cha’ taan na juersa sten na se’en ntsu’hui cha’ xtñan’ na, lo a cu’ni lye’ rin’ na ña’an nu nga’ni ne’ can’. ¹² Siyana squicha’ Ndiose lu’u na lo tla cha’ ’in na, lyee la cha na que ’in espada nu tyucua tsu’ cha, nguiten na la ni’ carsya ’na lo nsla ti’in na cha’ tiaa ’na se’en nu qui’ñi lati, lo ndlo suhui na ña’an nu lca tiee na. ¹³ Ni sca na nu ngañan Ndiose, a ca chu’hui catsi’ na tloo ni, siyana lyigaa loo na ndi’in yla tloo ni siya’ ti, ni nu ntsu’hui cha’ tyaan na cuinta tloo tiaa braa. ¹⁴ Siyana cua nguiten sca nu ndun loo lati la tloo Ndiose lo’o cha’ ’na, cui’ Jesús nu lca Sñe’ Ndiose, can’ cha’ tyun tsan na lo’o cha’ nu cua yaña’an rin’ na. ¹⁵ Siyana ni nu ndun tiaa can’, nu ndun loo lati ni nu ndyucui’ cha’ ’na tloo Ndiose, a lca ni sca nu a ndii ri’ cha’ nu ndijin na, siyana cua mdijin ni scaxca lo’o cha’ tsaña’an cha’ nu ndijin na, una a nga’ni ni qui’ya. ¹⁶ Can’ cha’ cu’ni tnu tieen na tsaan na lucui’ la se’en nducua ni, cui’ ni nu ntsu’hui cha’ tsu’hue ’in, siyana ’tna ri’ ni ’na, lo ta yaa’ ni ’na bra ndijin na cha’.

¹ Siyana sca nu ndlo ca tñan ni’ lyaa, ndlo tun nten quichen ’in ne’ siyana tyucui’ cha’ ’in ne’ tloo Ndiose, xtya lomstan tloo ni, lo tiquin ’ni squi’ya qui’ya ’in ne’. ² Ntsu’hui cha’ tlyu ri’ ’in ne’ lo’o sca nu chin’ cha’ ’in ta lo’o sca nu a ntsu’hua se’en cha’ ’in, siyana lo’o na’an ri’. ³ Can’ cha’ ’ni cha’ tiquin ’ni tloo Ndiose squi’ya qui’ya ’in ne’, a cuinta lo’o cha’ ’in nten. ⁴ Ni sca tucui lo a ca tyun lo’o cha’ cuiya’ re lo’o cha’ ’in ti, siyana Ndiose nxtya ’in can’, tsaña’an nga’ni ni lo’o Aaron. ⁵ Cui’ ncuaña’an Crixtu a mxtya ni ’in ni ca ni sca nu ndun loo lati nu cu’ni tñan ’in Ndiose, siyana ndeña’an nujuin Ndiose ’in ni: Nu’huin lca Sñen’, lo na’ lcan Sti ri nii. ⁶ Ndeña’an ndyucui’ xca se’en loo quityi can’: Nu’huin lca nu cu’ni tñan ’yan sa tyucui braa, tsaña’an cha’ cuiya’ nu mda’an lo’o Melquisedec. ⁷ Bra mda’an Crixtu loo chelyuu re mjñan ni cha’ tsu’hue ’in Ndiose, hasta lo’o tyi’a quiloo ni nguilu bra yucui’ cueen ni lo’o nu ca culaa ’in ni lo’o cha’ ndija, lo nga’ni cuinta Ndiose cha’ nu yucui’ ni siyana nga’ni rsuun ni ’in ni. ⁸ Nisiya lca ni Sñe’ Ndiose, una nga’ni cha’an ni lo’o scaxca cha’ nu mdijin ni lo mducua ni cha’ ’in Sti ni. ⁹ Bra cua ngüita’a lyigaa tñan nu mdo’o ’in ni, mxtya quiya’ ni cha’ nu tyo’o laa nten sa tyucui braa, lyigaa nu tucua cha’ ’in ni, ¹⁰ lo mxtya Ndiose ’in ni lca ni sca nu ndun loo lati nu cu’ni tñan ’in ni lo’o cha’ cuiya’ nu mda’an lo’o Melquisedec. ¹¹ Chun’ cha’ re quina’an ’a cha’ ca tyucuin’ na, lo tucui ’a ña’an tyo’o scua yla na, siyana que’ ’a ndi’yan huan cuinta ’in na. ¹² Ta tsi’i cua nga’an cha’ culu’un huan ’in xca tucui, cua s’ni la ngui’ni cha’an huan cha’ re, una nde nducua tloon huan caja nu culu’u ’huan cha’ ’in Ndiose lo xiya’ tisna cu’ni cha’an huan cha’ nu ngui’ni cha’an sca nu cui, ti ndyca rin’ huan co’on huan styi’ siyana nga’an cha’ cun huan na nu ngala la. ¹³ Tsalca nu ti ndi’yo styi’ a ndi’ya cuinta cha’ nu lñi ’in Ndiose, siyana ti cuine’ can’. ¹⁴ Una sca nten nu cua ngula, ’ni cha’ ’in lo’o sca na nu cua ngula la, lca can’ sca nu cua ndun tiyaa, lo ca culosuhui can’ ni ña’an cha’ nu tsu’hue lo ni ña’an cha’ nu a tsu’hue.

¹ Cua’ s’ni ndisna na lo’o cha’ ’in Crixtu, can’ cha’ taan na juersa tsaan na nde loo la hasta tyun tsan na, lo tsi’i na xtucuin na xiya’ ña’an ntsu’hui cha’ xtun rin’ na, ta tsaña’an ri’ na ’in Ndiose, ² lo’o si tyucua tyan na, ta bra mxtya ne’ yaa’ ne’ ’na, ta lo’o ña’an nu ntsu’hui cha’ tyo’o qui’u ne’ ngujui, ta siyana ca cuiya’ cha’ ’in ne’ lo tyijyin ne’ ndi’i sa tyucui braa. ³ Tsa quiñan na nde loo, una si Ndiose taa ni cha’ cuiya’. ⁴ Siyana sca nu cua nga’ni cha’an, lo ndyucuan xu’hue cha’ tsu’hue ’in Ndiose tsatlyu lo’o Espíritu nu Luhui ’in ni, ⁵ a cuinta cua ngüi ri’ can’ snu ña’an tsu’hue cha’ ’in Ndiose, lo sa tyucui braa ndia cha’ cuiya’ ’in ni, ⁶ lo si tyo’o tsu’ can’, a caja nu xtun ’in lo cha’an cha’ tiaa ’in xiya’, siyana xiya’ jyi’in ca’an can’ ’in Sñe’ Ndiose loo cursi, se’en nu tyo’o cha’ jyu’u ’in ni tloo lyigaa nten. ⁷ Ndyca ri’ can’ tsaña’an ndyca ri’ sca yuu se’en nu tsu’hue ndi’ya quioo, tsu’hue ’a ndyca tñan na nu nguita ’in na, can’ ndyca tycan’ cha’ tsu’hue nu ndaa Ndiose. ⁸ Una sca loo yuu se’en nu ndi’in quiche’, a sca cuinta ntsu’hui ’in na, chen ndyucui caan yuhue’ ’in na lo tsato’o squin na. ⁹ Cuinta cha’ nu ’huan, ’huan ta’an na nu ndyu’hui cuiya’ ri’ hua ’in, nisiya ncuaña’an yucui’ hua lo’on huan, una nducua tloo hua caja cha’ tsu’hue nu taa Ndiose ’in nu ntsu’hui cha’ tyo’o laa. ¹⁰ Siyana Ndiose lñi ndi’in cha’ ’in ni, lo a njlya ri’ ni tñan nu ngui’ni huan lo’o cha’ ’in ni, cui’ cha’ tsu’hue nu lca tieen huan tsaña’an nda yaan’ huan ’in ta’an na, lo ngui’ni huan ’in na hasta ri nii. ¹¹ Una nducua tloo hua siyana cuinta scaa huan nde lyee la ca lca tieen huan lo’o cha’ nu ndyuhui tan huan, hasta bra tyucuan huan cuinta ’in na bra tsatii cha’ nu ndyca loo chelyuu re, ¹² lo a taan huan ya’ ca ndaja rin’ huan, siyana cu’ni cha’an huan ’in scaxca nu ndyucuan cha’ nu mxtya Ndiose lo’o cha’ nu nguiaña’an ri’ lo a ngui’ni na’an ri’. ¹³ Bra mxtya Ndiose sca cha’ ’in Abraham, a ngujui xca nu ndun loo la cu’ni ti’ya ni, siyana ticuii’ ’in ni nga’ni ti’ya ni, ¹⁴ lo nujuin ni ’in ne’: Nu chiñi na’ cu’nin tsu’hue lo’o, lo cu’nin cha’ ca quina’an sñe’. ¹⁵ Siyana yu’hui cha’ tlyu ri’ ’in ne’ ndyuhui ta cha’ nu cua mxtyaa Ndiose, can’ cha’ ngu’ni ca’an cha’ tsu’hue can’ ’in ne’. ¹⁶ Nten chelyuu bra nxtya tsa ne’ sca cha’, ’ni cha’ ’ni ti’ya ne’ ’in xca tucui nu ndun loo la que ’in ne’, lo nisiya lyee la ndyucui’ ne’, una cui’ bra nxi’yu co’ cha’ nu ndyucui’ ne’ lo’o cha’ nu nxtya tsa ne’ can’. ¹⁷ Can’ cha’ Ndiose mxtya tsa ni cha’ lo’o Abraham, siyana ncua ri’ ni quilyo scua yla ni cha’ nu yucui’ ni, lo a cu’ni tucua ri’ lyigaa nu ntsu’hui cha’ caja cha’ tsu’hue can’ ’in. ¹⁸ Nde tucua cha’ nu a caja nu cha’an: Tsaña’an nga’ni ti’ya ni ’in ni ticuii’ ni, lo’o cha’ nu mxtya ni can’. Lo siyana Ndiose a ca quiñi ni, nde lyee la ndiji cha’ tnu tiee ’na, tsalcan naa nu cua ngulo chun’ cha’ nu a tsu’hue, siyana ca tyucuan na cha’ nu cua mxtya ni lo’on na. ¹⁹ Cha’ re nda yaa’ ’in carsya ’na siyana a tyo’o tsun’ na, lo lo’o cha’ re ca sten na la tloo ni, ²⁰ cui’ ni’ cuaan se’en nguiten Jesús la nducua la que nare, ni nu ndun cu’ni tñan ’in Ndiose sa tyucui braa, tsaña’an cha’ cuiya’ nu nda’an lo’o Melquisedec.

¹ Melquisedec ncua Ree quichen Salem, lo nga’ni tñan ’in Ndiose, ni nu tlyu lati. Yato’o bra mxtucui Abraham nga’ni cana ’in xca lta ree can’, Melquisedec can’ ya te’en ’in Abraham, lo mjñan ’in Ndiose siyana ta yaa’ ni ’in Abraham. ² Rcan’ Abraham sca se’en mxtya scaa lta loo mstan, na nu ngalaa se’en yaa cusuun, lo ndaa na ’in Melquisedec. Nii Melquisedec ndyca ri’ na tyucui’ na la nducua la: Ree nu lñi ndi’in cha’ ’in, a cuinta ndyca ri’ na tyucui’ na Ree ’in quichen Salem, Ree nu nga’ni cha’ ndi’in tsu’hue nten. ³ Melquisedec can’ a mdi’in nten cula ’in, ni nten cuityi ’in, a tycan’ ni braa ngula ta ni braa ngujui, ncua tsaña’an ndyca ri’ Sñe’ Ndiose, lo sa tyucui braa mducua tloo Ndiose ’in. ⁴ Can’ cha’ culucua tsu’hue rin’ huan, snu ña’an tlyu cha’ cuiya’ nda’an lo’o, hasta Abraham nu ncua nten cula ’na lo ndaa lomstan ’in ne’, cui’ na nu tsu’hue lati nu ngulaa se’en yaa cusuun. ⁵ Tsalca nu nga’ni tñan ’in Ndiose, siyana lca nten cuityi ’in Levi, nga’an cha’ ’in xñi sca lomstan nu ndaa nten quichen ’in tsaña’an cha’ nu ndyucui’ lee, cui’ nten nu ti ndyca ta’a tsatlyu lo’o cha’ ’in Abraham nu ncua nten cula ’in ne’. ⁶ Una Melquisedec can’, nisiya a tucui ndyca ’in nten cuityi ’in Levi, una mxñi sca lomstan nu ndaa Abraham ’in, rcan’ mjñan ’in Ndiose siyana ta yaa’ ni ’in Abraham, nu cua ngu’ni ca’an cha’ tsu’hue can’ ’in. ⁷ Yla ndi’in cha’ re siyana sca nu ndun loo lati ngulucuan ’in sca nu qui’ya la ndi’in cha’ ’in. ⁸ Siyana chelyuu re ndyucuan ne’ lomstan nu ndaa ticui’ ta’a nten ne’ nu ntsu’hui cha’ tsatii cha’ ’in, una Melquisedec nguinu scua cha’ siyana lu’u ca. ⁹ Ta tyucuin’ na siyana bra nu ndaa Abraham sca lomstan ’in Melquisedec, ña’an cha’ ’in Levi ndaa ’in na, nu nga’an cha’ ’in tyucuan lomstan can’, ¹⁰ siyana loo chelyuu ’in Abraham ca ntsu’hui cha’ caan Levi, lo a lyiji tiyaan chelyuu bra ya ya te’en Melquisedec can’ ’in Abraham. ¹¹ Si tloo Ndiose nguinu scua tsa cha’ ’in Levi tsaña’an cha’ cuiya’ nu nda’an lo’o (siyana lo’o cha’ ’in nga’ni cha’an cha’ ’in lee), a ’ni ’a cha’ ti tyo’o tun xca nu cu’ni tñan ’in Ndiose tsaña’an tlyu cha’ cuiya’ nu mda’an lo’o Melquisedec, una tsi’i loo nten cuityi ’in Aaron ntsu’hui cha’ tyo’o tun can’. ¹² Siyana si tyo’o tun xca nu cu’ni tñan ’in Ndiose, ’ni cha’ lo’o lee can’ cha’an na rcan’. ¹³ Una ni nu ndyucuin’ na cha’ ’in re, loo xca lta ne’ Israel yaan ni, lo a ngu’ni ca’an ’in nten can’ lo’o tñan nu ’in Ndiose. ¹⁴ Lyigaan na jlyo rin’ na siyana Ni X’na na yaan ni loo nten cuityi ’in Judá, lo a nisiya yucui’ Moisé cha’ ’in nten can’ siyana sten ne’ loo tñan ’in Ndiose. ¹⁵ Yla ’a ndi’in cha’ re, si ncuaña’an mdo’o tun xca nu sten loo tñan ’in Ndiose, tsaña’an ndi’in cha’ ’in Melquisedec, ¹⁶ una tsi’i lo’o cha’ ’in lee can’ mdo’o tun ni, ta siyana lca ni nten nu ntsu’hui cha’ tyucuan tñan can’, siyana mdo’o tun ni lo’o sca cha’ cuiya’ nu tlyu nu a ntsu’hui cha’ tsatii cha’ ’in. ¹⁷ Siyana ndeña’an ndaa Ndiose rsuun cha’ ’in ni: Nu’huin lca nu cu’ni tñan ’yan sa tyucui braa, tsaña’an cha’ cuiya’ nu mda’an lo’o Melquisedec. ¹⁸ Ndyca tycan’ ña’an siyana lyigaa cha’ nu mxnu scua Ndiose ti culo cua mdo’o chun’ na, siyana a juersa ’in na, ni a ncua culo laa na ’na, ¹⁹ (siyana lee can’ a ncua ’in na cu’ni chu’hue na cha’ ’na tloo Ndiose), una chun’ cha’ re cua mxtya ni sca cha’ nu tsu’hue lati nu ca tsa lo’o ’na la tloo Ndiose. ²⁰ Bra nu mxtya ni cha’ re, nga’ni ti’ya ni ’in ni, ²¹ una lyigaa la ña’an nu mdo’o tun nu cu’ni tñan ’in ni, a tucui nga’ni ti’ya ’in ni rcan’. Una bra mdo’o tun ni re, ndeña’an nguinu scua cha’ nu yucui’ Ndiose: Ni X’na na nga’ni ti’ya ni ’in ni, lo a ntsu’hui cha’ cha’an ni cha’ nu cua mxtya ni, lo nujuin ni: Nu’huin lca sca nu cu’ni tñan ’yan sa tyucui braa, tsaña’an cha’ cuiya’ nu mda’an lo’o Melquisedec. ²² Nde ndyca tycan’ ña’an siyana nguinu scua sca cha’ nu tsu’hue lati ’na, lo Jesús lca ni cuiya’ nu cua mxtya Ndiose siyana ca tyucuan na cha’ tsu’hue can’. ²³ Una lyigaa la ña’an nu nga’ni tñan ’in Ndiose, cui’ bra msyu’co tñan nu nga’ni lo’o cha’ ndija can’, can’ cha’ scaxca nguiten loo tñan can’, ²⁴ una Jesús siyana ndi’in ni sa tyucui braa, a ntsu’hui cha’ xi’yu co’ tñan nu ngui’ni ni, ²⁵ can’ cha’ ndyca ’in ni culo laa ni ’in tsalca nu tiaa tloo Ndiose lo’o cha’ cuiya’ ’in ni, ndi’in ni sa tyucui braa lo njñan ni ’in Ndiose cha’ ’in can’. ²⁶ Sca ni nu ndun loo la nu ngui’ni tñan ncuaña’an, ’ni cha’ ’na lo’o ni siyana lca ni sca nu cua mdo’o hui ’in Ndiose, luhui cha’ tiaa ’in ni, a sca qui’ya nducui ndyca’an ’in ni, ni sca cuu’, ni a nga’an ’in ni ña’an nten qui’ya chelyuu, ndyucuan ni sca cha’ cuiya’ nu tlyu la ni’ cuaan. ²⁷ Ni a ntsu’hui cha’ tiquin ni ’ni tloo Ndiose cuinta scaa tsan tsaña’an nga’ni lyigaa la ña’an nu mdun loo can’, la nducua la lo’o qui’ya ’in ne’, rcan’ lo’o qui’ya ’in nten quichen. Una Jesús bra ndyaa ni ’in ni, siya’ ti ngatyen ni qui’ya ’na tloo Ndiose. ²⁸ Siyana cuinta cha’ ’in lee xcui’ nten nu na’an ndi’in cha’ ’in nsñi cuinta tñan ’in Ndiose, una nde loo la can’ bra cua nga’ni ti’ya ni ’in ni, ngulo tun ni ’in Sñe’ ni, cui’ sca nu nga’ni tyucui ni cha’ ’in sa tyucui braa.

¹ Cha’ nu ndun loo lati nu ljyan na ndyucuin’ na, siyana cua mdo’o tun sca nu tyucui’ cha’ ’na tloo Ndiose, ni nu cua nditucua tsu’ cueen se’en ndlo Ndiose tñan ni’ cuaan, ² lo lca ni sca nu lyi’ya loo se’en luhui ’a ’in Ndiose, yucui’ ca te’ na’an nu mxtun Ni X’na na, lo tsi’i lo’o cha’ ’in nten chelyuu. ³ Siyana lyigaa la ña’an nu ndyucui’ cha’ ’in nten tloo Ndiose, ndyo’o tun siyana tsa lo’o lomstan lo tiquin ’ni tloo Ndiose, can’ cha’ lo’o Jesús nga’ni cha’ ya lo’o ni sca lomstan tloo ni. ⁴ Si ti ndi’in Jesús loo chelyuu re, ni a cu’ni ni tñan re, siyana cua lca nu ndya’an lo’o lomstan tloo Ndiose tsaña’an ndyucui’ lee. ⁵ Tñan nu nga’ni can’ lca na sca ngulucuin ta sca xñii cha’ nu ndyca la ni’ cuaan, siyana cha’ re ngulu’u Ndiose ’in Moisé bra ntsu’hui cha’ tsaa’ te’ na’an can’, lo nujuin ni ’in: Xñi cuinta siyana tñan ’in na na’an ngulucuin nu na’an bra ndun loo qui’ya Sinaí. ⁶ Una tñan nu ndyucuan Jesús, tsa la ntsucua cha’ ’in na siyana cui’ ni ndyucui’ ni cha’ ’na tloo Ndiose. Cha’ nu mxnu scua ni re ndun loo la na, lo ljyan lo’o na quina’an la cha’ tsu’hue ’na. ⁷ Si mdo’o scua ne’ lo’o cha’ nu mxnu Ndiose ti culo, a ntsu’hui ’a cha’ ti caan xca cha’ nde loo la can’. ⁸ Siyana ndeña’an ngusun lo’o Ndiose ’in ne’: Ña’an, cua ljyan sca tsan, nujuin Ni X’na na, bra nu xtyan sca cha’ nu cui ti lo’o ne’ Israel, a cuinta lo’o Judá. ⁹ Una tsi’i ña’an cha’ mxtyan lo’o nu ncua nten cula ’in ne’, bra msñin yaa’ ne’ lo nguilyoon ’in ne’ se’en lca Egipto. Lo siyana a mxu’hua se’en ne’ cha’ nu xtyan, can’ cha’ a yu’hui yuhue ’a ran’ ’in ne’, nujuin Ni X’na na. ¹⁰ Can’ cha’ nde xtyan sca cha’ lo’o ne’ Israel, bra cua mdijin tsan can’, nujuin Ni X’na na. Quinu yu’hui cha’ nu ngulon tñan ni’ cha’ tiaa ’in ne’, a cuinta quinu scua na ni’ carsya ’in ne’. Na’ can Ndiose nu chu’hui cuinta ’in ne’, lo ca ne’ quichen ’yan. ¹¹ Ni a ’ni ’a cha’ ti caja nu culu’u ’in ta’a nten ne’ ta ’in ta’a ngula ne’ ña’an ndi’in cha’ ’in Ndiose, ta ñujuin can’: ¿Ta jlyo rin’ huan cha’ ’in Ni X’na na? Siyana lyigaa tucui chu’hui lyoo ’yan, ti nu suhue lati hasta lo’o nu cula. ¹² Cuityen qui’ya ’in ne’, lo a xu’hua ’a ran’ qui’ya ngui’ni ne’ lo’o cha’ lye’ ri’ ’in ne’. ¹³ Bra nujuin ni siyana cua mxtya ni sca cha’ nu cui, cui’ siyana cua mdijin cha’ nu mxnu scua ni ti culo, lo sca na nu cua nguiaa ndijin cha’ ’in, ndyca cula na siyana cua ndyucui lucui’ la cha’ lyiji yu’hui na.

¹ Cha’ nu cua mxtya Ndiose ti culo, cua lca ña’an ntsu’hui cha’ cu’ni tnu ne’ ’in ni a cuinta nguiaa’ sca te’ na’an se’en nu luhui ’in ni. ² Siyana ndeña’an nguiaa’ te’ na’an can’: Se’en can’ ndlo naa ne’ ’in na Sca Se’en nu Luhui, can’ ndun se’en ndyucua quii’ ndyiquin, lo’o misa se’en nducua quijaxtlya nu cua ngulucuan ’in Ndiose. ³ Ticui’ ni’ te’ na’an can’ nducui ndijin sca te’ jlu’hue la can’, lo nde chun’ te’ can’ lca na Sca Se’en nu Luhui Lati. ⁴ Can’ ndun sca se’en nguiaa’ lo’o oro se’en nu ndyiquin na nu txi, a cuinta ntsucua quiñan’ nu luhui lati ’in Ndiose, ña’aan na nguxen oro ’in na. Can’ ntsu’hui sca quitun’ nu xcui’ oro se’en ntsu’hui maná, a cuinta lo’o yca scaan Aaron, ndyca ya’a can’, a cuinta lo’o ca’ quee se’en ngua’an lee ’in Ndiose. ⁵ Chun’ quiñan’ can’ ndun tucua ngulucuin angajle nu mdo’o loo xaa ’in Ndiose, jlyu’hue angajle can’ ntsucua na chun’ quiñan’ se’en nsuhui ni qui’ya ’in nten. Ri nii, a ca tyucuin’ na cha’ ’in quiñan’ can’ lyee la. ⁶ Bra ti nducua te’ na’an can’, lyigaa braa nda’an scaxca ne’ se’en nu ndiaa culo na can’, siyana cu’ni cuinta ne’ tñan nu ntsu’hui yaa’ ne’ tloo Ndiose, ⁷ una se’en nu luhui lati can’, scati nu ndun loo nguiten ’in na siya’ ti sca yjan, una ’ni cha’ sten lo’o tne ’ni se’en can’ squi’ya qui’ya ’in ne’, a cuinta lo’o qui’ya ngui’ni nten quichen lo’o cha’ tantu ’in ne’. ⁸ Lo’o cha’ re, Espíritu nu Luhui ’in Ndiose nditsa’ ni ’na siyana laja nu mducua te’ na’an can’, a lyiji quila sca tucuiin nu tiaa se’en nu luhui lati ’in Ndiose. ⁹ Lyigaa cha’ re ndaa na cha’ tiaa ’na ri nii: Nisiya ndya’an lo’o ne’ lomstan lo ndiquin ne’ ’ni tloo Ndiose, una a ncua nsuhui na cha’ tiaa ’in nu nducui ndyca’an cha’ can’, ¹⁰ siyana lca na xcui’ cha’ ndyucu ta na nu ndi’yo ne’, a cuinta scaxca ña’an nsuhui ne’ ’in ne’ lo’o na nu nguila’ ne’, lo nguinu scua cha’ re tsalja nu tiaa tsan tyca cui na. ¹¹ Cua’ yaan Crixtu, ni nu ndun loo lati nu ndyucui’ cha’ ’na tloo Ndiose, lo yan lo’o ni cha’ tsu’hue nu ntsu’hui cha’ caja ’na, siyana cua nguiten ni ni’ sca te’ na’an nu tlyu la, nu luhui la, una a nducua na loo chelyuu re siyana tsi’i nten chelyuu ngañan ’in na. ¹² Siya’ ti nguiten ni Se’en nu Luhui Lati ’in Ndiose, lo a ntsu’hui ’a cha’ ti sten ni xiya’, una a nguiten ni lo’o tne scaxca loo ’ni, siyana lo’o yucui’ ca tne ni msuhui ni ’na sa tyucui braa. ¹³ Si ncuaña’an nguinu luhui ne’ lo’o tne scaxca ’ni, ta lo’o jyii ’in nu nscuin ne’ squi’ya qui’ya ngui’ni ne’, ¹⁴ ni xnu ca tne Crixtu, ni nu luhui lati nu ndyaa ’in tloo Ndiose lo’o cha’ cuiya’ ’in Espíritu nu ndi’in sa tyucui braa, ca nsuhui ni cha’ tiaa ’na lo’o cha’ a tsu’hue nu nguiaa lo’on ’na lo’o cha’ ndija, siyana tyucua tloon na ’in Ndiose, ni nu lu’u ca. ¹⁵ Can’ cha’ Jesús lca ni nu ndyucui’ cha’ ’na tloo Ndiose lo’o cha’ nu cui mxnu scua ni, siyana ngujui ni ngatyen qui’ya ’in nu nga’ni cha’an cha’ nu mxtya Ndiose ti culo, siyana lyigaa nu ngulosuhui ni ca caja cha’ tsu’hue nu a ntsu’hui ’a cha’ tsatii ’in. ¹⁶ Sca quityi cha’ ’in yuu, a tucui nu ca tyucuan ’in na laja ti ndi’in x’na na, ¹⁷ siyana la cua ngujui can’ ca tyucuan xca tucui ’in na, siyana a ntsu’hui lyoo na laja nu ti lu’u nu ca’ ’in ca ’in na. ¹⁸ Can’ cha’ lo’o tne mxnu scua tsa Ndiose cha’ nu colo can’. ¹⁹ Siyana Moisé bra mdyi yucui’ lo’o nten lyigaa cha’ nu mxtyaa Ndiose ’in ne’ loo lee can’, mscan’ sca yni quixin’ nu naa hisopo lo’o sca syla’ nga’á, rcan’ msñi se’en ntsu’hui tne scaxca ’ni lo mxtiyaa’ ’in na lo’o tyi’a, lo mscuin ’in na loo quityi can’, a cuinta lo’o se’en ndi’in nten, ²⁰ lo nujuin ’in ne’: Lo’o tne re xnu scua tsa Ndiose sca cha’ nu ngulo ni tñan ’na lo’on huan. ²¹ A cuinta mscuin tne can’ ’in te’ na’an tsatlyu lo’o lyigaa na nu ’ni tsu’hue ’in ne’ se’en can’. ²² Cuinta cha’ ’in lee, lyigaa ti na ngüi na lo’o tne. si tsi’i lo’o tne nu nguilu can’ a ca caten qui’ya ’in nten. ²³ Si ncuaña’an nguinu luhui lyigaa cha’ can’, na nu lca xñii cha’ nu ndyca ni’ cuaan, ni xnu ca cha’ nu ndyca la cua, ta a lyee la ’ni cha’ ’in na lo’o sca lomstan nu ntsu’hui lyoo lati. ²⁴ Siyana Crixtu a nguiten ni se’en nu ngañan nten chelyuu, nu lca xñii sca cha’ nu yucui’ ca, siyana nguiten ni la ni’ cuaan tloo Ndiose lo’o cha’ ’na. ²⁵ Una a tyun ya’ ndyaa ni ’in ni siyana caja ni, tsaña’an ndi’in cha’ ’in ne’ nu ndun loo can’ bra nguiten ne’ lo’o tne lyigaa yjan Se’en nu Luhui can’ ’in Ndiose, una tsi’i tne ne’ lca na. ²⁶ Si ncuaña’an ndi’in cha’, Crixtu ’ni cha’ caja ni lyigaa yjan ti bra nguiaa’ chelyuu re, una mdiaa tsan siya’ ti nguiten ni la tloo Ndiose lo’o tne ni, siyana cuityen ni qui’ya ’in nten. ²⁷ Lo tsaña’an nguinu scua cha’ ’in lyigaa nten, siya’ ti ntsu’hui cha’ caja ne’, rcan’ ca cuiya’ cha’ ’in ne’, ²⁸ cui’ ncuaña’an Crixtu, siya’ ti ndyaa ni ’in ni loo lyigaa nten siyana cuityen ni qui’ya ’in ne’, lo bra quiaan ni xiya’, a tsi’i a lo’o cha’ ’in qui’ya, siyana quian ’ya ni ’in tsalca nu ndyuhui ta ’in ni.

¹ Lee can’ lca na sca xñii ti cha’ nu ntsu’hui cha’ caan, una tsi’i yucui’ ca cha’ tsu’hue can’ lca na, can’ cha’ a ndijyi ña’an nxnu luhui na ’in nten nu nguina ’in Ndiose, lo’o ña’an nu ndiquin ne’ ’ni tloo ni cuinta scaa yjan. ² Si ncua ’in lee can’ suhui na ’in ne’ siya’ ti, cui’ bra si’yu co’ ne’ cha’ nu ndiquin ne’ ’ni can’, siyana jlyo ri’ ne’ siyana a nducui ’a ne’ qui’ya. ³ Siyana lo’o ña’an nu ndiquin ne’ ’ni can’ lyigaa yjan, tsaloo ti nchu’hua ri’ na qui’ya ’in ne’, ⁴ siyana tne scaxca ’ni can’ a ndyca ’in na cuityen na qui’ya ’in ne’. ⁵ Can’ cha’ ndeña’an yucui’ Crixtu bra yaan ni loo chelyuu re: A ndyca ri’ scaxca lomstan ta tne ’ni, can’ cha’ nga’ni cha’ ngulan ña’an ndyca ri’ sca nten. ⁶ A nguinu tsu’hue tiee lo’o ’ni nu mdiquin ne’ tloo, ta lo’o lomstan nu ndaa ne’ squi’ya qui’ya ’in ne’. ⁷ Can’ cha’ yucuin’ lo’o: Nu’huin ni nu lca Ndiose, nde mdiyaan lo cu’nin ña’an nu ndyca ri’ siyana ca tsaña’an cha’ nu cua nguinu scua loo quityi lo’o cha’ ’yan. ⁸ Qui’yan na cuinta cha’ nu yucui’ Crixtu ti culo bra nujuin ni: A ndyucuan xu’hue lomstan ni tne ’ni, lo ni a nguinu tsu’hue tiee lo’o ’ni nu mdiquin ne’ tloo, ta lo’o scaxca lomstan nu ndaa ne’ squi’ya qui’ya ’in ne’, (lo nisiya lca na cha’ nu ndyucui’ lee can’), ⁹ lo ti nujuin la ni: Nu’huin ni nu lca Ndiose, nde mdiyaan lo cu’nin ña’an nu ndyca ri’. lo’o cha’ nu yucui’ ni re ngatyen ni cha’ nu mxtya ni ti culo, siyana xtya cui ni xca cha’. ¹⁰ Nguinu luhuin na tloo Ndiose lo’o tne Jesucristo siyana ndyaa ni ’in ni siya’ ti, lo cu’ni tsu’hue na ’na sa tyucui braa. ¹¹ Chiñi siyana nu ndyucui’ cha’ ’in nten tloo Ndiose, scaña’an ti ngui’ni ti cui’ ti loo ña’an ndiquin ’ni, lo ni a ndyca cuityen na qui’ya ’in ne’. ¹² Una Crixtu siya’ ti ndyaa ni ’in ni squi’ya lyigaa qui’ya ’na, rcan’ nditucua ni tsu’ cueen ’in Ndiose. ¹³ Ti rcan’ ndyuhui ta ni tsaya’ quinu ta’a cusuun ni nde tuquiya’ ni. ¹⁴ Siyana siya’ ti ngujui ni lo msuhui ni ’in lyigaa nu cua mdo’o hui ’in ni, lo quinu luhui can’ sa tyucui braa. ¹⁵ Espíritu nu Luhui ’in Ndiose ndaa rsuun lo’on na lo’o cha’ re, siyana ndeña’an nujuin ni la nducua la: ¹⁶ Nde cha’ nu cui xtyan lo’o ne’ tiaa braa, nujuin Ni X’na na: Quinu yu’hui lee ’yan ni’ carsya ’in ne’, lo quinu yu’hui na ni’ cha’ tiaa ’in ne’. ¹⁷ Lo ti nujuin la ni: Ni xiya’ lo a xu’hua ’a ran’ qui’ya nducui ne’ lo’o cha’ a tsu’hue nu nga’ni ne’. ¹⁸ Sca qui’ya nu cua nguten, a ’ni ’a cha’ ti caja nu su’hua lyiya’ ’in na xiya’. ¹⁹ Can’ cha’, ’huan ta’an na, cua ngujui cha’ cuiya’ sten na Se’en nu Luhui Lati ’in Ndiose lo’o tne Jesucristo, ²⁰ cua msla ni sca tucuiin nu cui ndaa chelyuu ’na, bra ngujui ni lo nguiten ni la ni’ cuaan lo’o cha’ ’in cuinan’ ni. ²¹ Ri nii siyana cua ndi’in sca nu ndun loo lati nu tyucui’ cha’ ’na la tloo Ndiose, ²² can’ cha’ tsaan na lucui’ la tloo Ndiose lo’o sca carsya nu luhui, lo a cu’ni tucua rin’ na lo’o cha’ nu nguiaña’an rin’ na, cua nguinu luhui carsya ’na lo jlyo rin’ na siyana a nducuin ’an na qui’ya, cui’ ncuaña’an mjyi’an ni ’na lo’o tyi’a nu luhui lati. ²³ Tyun tsan na lo’o cha’ nu nguiaña’an rin’ na, lo a cu’ni tucua rin’ na lo’o cha’ nu ndyuhui tan na, siyana lñi ndi’in cha’ ’in ni nu cua mxtya cha’ re. ²⁴ Scaxcan na cu’ni cuintan na ’in ta’an na, siyana nde lyee la chu’hui cha’ tsu’hue ’na, lo cu’ni na lyigaa loo tñan tsu’hue. ²⁵ A cula’ tin’ na quio’ ti’in na lo’o ta’an na, tsaña’an ngui’ni scaxca la tucui, siyana taan na cha’ tnu tiee ’in ta’an na, lo nde lyee lati siyana cua ndyucui lucui’ la cha’ quiaan ni. ²⁶ Si ti tsa quiñan na cu’ni na qui’ya lo’o cha’ nu lca tieen na, nisiya cua yu’hui lyoon na cha’ nu lñi ’in Ndiose, a ndia ’a xca tucui nu cuityen qui’ya ’na, ²⁷ tsaloo ti ljyan sca ndi’i tlyu nu cuijlyo ’in lyigaa ta’a cusuun Ndiose la loo quii’ ndyiquin. ²⁸ si ntsu’hui nu cuicha ti’in sca lee nu nga’an Moisé, lo si ntsu’hui tucua sna nu taa rsuun cha’ can’, tsaloo caja ti nu nga’ni qui’ya can’. ²⁹ Ni xnu ca lo’o nu lyo’ su’hua ’in Sñe’ Ndiose, tlyu la ndi’i ntsu’hui cha’ caan ’in can’, lo si cu’ni siyana tne ni lca na sca na nu cuu’, cui’ cha’ nu mxtya Ndiose nu nsuhui ’na, tsato’o xcuan tloo can’ ’in Espíritu nu ljyan lo’o cha’ tsu’hue ’na. ³⁰ Cua’ ndyu’hui lyoon na ’in ni nujuin: Na’ nga’an cha’ ’yan cu’nin cuiyan’ cha’ ’in nten, lo na’ su’huan lyiyan’ ’in ne’, nujuin Ni X’na na. Nde xca cha’ nu nguinu scua: Ni X’na na cu’ni cuiya’ ni cha’ ’in quichen ’in ni. ³¹ ¡Tlyu cha’ lca si tiun na tuyaa’ Ndiose, ni nu lu’u ca! ³² Una xu’hua rin’ huan bra nu ndyucuan xu’huen huan cha’ tsu’hue ’in Ndiose, snu ña’an nda loon huan lo’o scaxca ndi’i yaan ’huan. ³³ Si nisiya ntsu’hui braa ngutucua ne’ yuhue’ ’huan, lo hasta tloo nten ndaa ne’ ndi’i ’huan, a cuinta nda yaan’ huan ’in nu ndijin ndi’i. ³⁴ Cui’ ncuaña’an ndyca ’tna rin’ huan ’in nu yu’hui na’an tyucuan, tsu’hue ntsu’hui tieen huan bra ngujui nu ngalaa na nu ndi’in ’huan, siyana jlyo rin’ huan la ni’ cuaan ndi’in cha’ cuilyiya’ nu tsu’hue lati nu a ntsu’hui ’a cha’ tsatii. ³⁵ Can’ cha’ a xcuan tloon huan cha’ nu yaña’an rin’ huan, siyana lo’o cha’ can’ tyucuan huan sca cha’ tsu’hue nu tlyu, ³⁶ una ’ni ’a cha’ ta loon huan lo’o cha’ nu ndijin huan, lo bra cua mducua huan cha’ nu ndyca ri’ Ndiose, rcan’ tyucuan huan cha’ tsu’hue nu cua mxtya ni. ³⁷ Una, cua’ ndyucui lucui’ la cha’ caan ni nu ntsu’hui cha’ caan, lo a tiya’ ’a ni lyee la. ³⁸ Sca nu luhui tloo caja chelyuu ’in si tsaña’an ri’ ’yan. Una nu tya’an chun’ lo’o cha’ re, a tsu’hue chu’hui tieen lo’o can’. ³⁹ Una nare a lcan na nu xtucui nde chun’ nu ntsu’hui cha’ tyucuna’, siyana lcan na sca nten nu nguiaña’an ri’ nu ntsu’hui cha’ tyo’o laa.

¹ Bra nguiaña’an rin’ na, a ngui’ni tucua rin’ na cha’ nu ndyuhui tan na, tsaloo tyucuan tin na ’in na nisiya a tycan’ na. ² Nu ncua nten cula ’na, yaña’an ri’ ne’ lo yu’hui cuiya’ ri’ Ndiose ’in ne’. ³ Si nguiaña’an rin’ na ’in Ndiose, ca qui’yan na cuinta siyana lo’o cha’ nu yucui’ ti ni nguiaa’ lyigaa loo na, ngañan ni ’in na lo’o na nu a tycan’. ⁴ Abel siyana yaña’an ri’ ’in Ndiose, ndaa sca lomstan nu ntsu’hui lyoo la que nu ndaa Cain, can’ cha’ Ndiose yu’hui cuiya’ ri’ ni ’in lo ndyucuan xu’hue ni ’in na, lo nisiya cua ngujui, una ti nxu’hua rin’ na ña’an yaña’an ri’ ’in ni. ⁵ Ticui’ ncuaña’an Enoc siyana yaña’an ri’ ’in Ndiose, nguia lo’o ni ’in siyana a ña’an cha’ ndija, a la ’a ncua tycan’ siyana Ndiose nguiaa lo’o ni ’in la ni’ cuaan, lo ti lyiji tsa lo’o ni ’in bra ngune cha’ siyana yu’hui cuiya’ ri’ ni ’in. ⁶ Si a nguiaña’an rin’ na ’in Ndiose, a ndijyi ña’an quinu tsu’hue tiee ni lo’on na, siyana nu quinan ’in Ndiose, ’ni cha’ tsaña’an ri’ la nducua la siyana ntsu’hui ni, a cuinta siyana taa ni cha’ tsu’hue ’in nu quinan ’in ni. ⁷ Noé siyana yaña’an ri’ ’in Ndiose, ngutucua cha’ nu msu’hua tiaa ni ’in, sca cha’ nu a lyiji siya ña’an nten, lo ndisna ngañan sca yca na’an se’en ntsu’hui cha’ tyo’o laa lo’o lyigaa nu ndi’in se’en ndi’in. lo’o cha’ nu yaña’an ri’ ndaa cha’ jyu’u ’in nten chelyuu, yato’o ndyucuan cha’ tsu’hue nu lca cha’ caja ’in lyigaa nu tsaña’an ri’ ’in Ndiose. ⁸ Cui’ ncuaña’an siyana yaña’an ri’ Abraham ’in Ndiose, ngutucua cha’ bra nujuin ni siyana tyo’o quichen se’en ndi’in, lo caja xca loo yuu ’in, nisiya a jlyo ri’ la tiaa bra mdo’o se’en can’. ⁹ Siyana yaña’an ri’ ’in Ndiose, mdi’in loo yuu se’en nu mxtya ni cha’ tyi’in, mdiaa se’en can’ ña’an ndyca ri’ sca nu nda’an ti, lo mdi’in ni’ te’ na’an, cui’ ncuaña’an mdi’in Isaac lo’o Jacob, nu ntsu’hui cha’ caja ticui’ cha’ tsu’hue nu cua mxtya Ndiose ’in Abraham, ¹⁰ cui’ siyana nducua tloo sca quichen nu cua ndi’in ca, lo Ndiose ngulo cha’ tiaa ña’an tsaa’ na lo ngañan ni ’in na. ¹¹ Lo Sara nisiya ncua ne’ sca nu a ntsu’hui cha’ tyi’in sñe’, una yato’o ngua tycan ña’an ne’ lo mdi’in sca sñe’ ne’ nisiya lca ne’ sca nten nu cua cula, siyana yaña’an ri’ ne’ siyana lñi ndi’in cha’ ’in ni nu mxtya cha’ can’. ¹² Siyana sca ne’ qui’yu nu cua cula, nu cua ndyuhui cha’ caja, yato’o ngüi’ni quina’an ’a nten tsaña’an nducua cuila ni’ cuaan, cui’ tsaña’an ndi’in ysin tu’hua tyi’a tujo’o. ¹³ Lyigaa ne’ re yaña’an ri’ ne’ lo ngujui ne’, nisiya a ndyucuan ne’ cha’ nu cua mxtya Ndiose, una tijyu’ ti na’an cui’ya ne’ cha’ can’ lo a nga’ni tucua ri’ ne’, siyana tsu’hue ntsu’hui tiee ne’ ndyucuan xu’hue ne’ cha’ can’, lo ndyucui’ ne’ siyana lca ne’ sca nu nda’an ti lo ndijin ti loo chelyuu re. ¹⁴ Tsalca nu ndyucui’ ncuaña’an, ndi’yan na cuinta siyana nda’an nan ne’ se’en nu ntsu’hui cha’ ca quichen tyi ne’, ¹⁵ lo si ti ntsu’hui tiee ne’ quichen se’en mdo’o ne’, a tucui ña’an xtucui ne’ quiaa ne’. ¹⁶ Una siyana lca tiee ne’ tiaa ne’ sca se’en nu tsu’hue la, cui’ la ni’ cuaan, can’ cha’ a mjyu’u ri’ ni ngulo naa ne’ ’in ni lca ni Ndiose ’in ne’, siyana cua nga’ni chu’hue ni sca quichen se’en tyi’in ne’. ¹⁷ Cui’ ncuaña’an Abraham siyana yaña’an ri’ ’in Ndiose, mxtya ’in Isaac tloo Ndiose ña’an ndyca ri’ sca loo mstan, yato’o siyana ndyucuan xu’hue cha’ nu mxtya Ndiose can’, ndyaa ’in scati sñe’ siyana caja can’, ¹⁸ lo Ndiose ca lca nujuin ’in: Loo Isaac nu lca sñe’ ntsu’hui cha’ qui’ni nten ’in. ¹⁹ A nga’ni tucua ri’ siyana Ndiose tla cha’ ’in ni lo ca cu’ni ni cha’ tyo’o qui’u Isaac. Siyana lo’o cha’ ndija can’ xiya’ ndyucuan ’in sñe’. ²⁰ Ticui’ ncuaña’an Isaac siyana yaña’an ri’ ’in Ndiose, mjñan ’in ni siyana taa ni cha’ tsu’hue nu caja ’in tyucuaa sñe’, Jacob lo’o Esaú. ²¹ A cuinta Jacob siyana yaña’an ri’ ’in Ndiose, mjñan ’in ni lo’o cha’ ’in cuinta scaa sñe’ See bra nu cua ndyucui lucui’ la cha’ caja, lo’ xtyi lo’o juersa ’in yca scaan ti mditucua, lo nga’ni tnu ’in Ndiose. ²² Ticui’ ncuaña’an See bra nu cua ndyucui lucui’ la cha’ caja, siyana yaña’an ri’ ’in Ndiose, mxtya cha’ siyana ntsu’hui cha’ tyo’o lyigaa sñe’ ne’ Israel se’en lca Egipto, lo mxnu cuinta ’in ne’ siyana quilyoo ne’ tijyan bra nu tyo’o ne’ se’en can’. ²³ Cui’ ncuaña’an Moisé bra ncua cuine’, siyana yaña’an ri’ nten cula ’in ’in Ndiose, msu’hua catsi’ ’in sna coo’, na’an siyana tsu’hue ’a ña’an, lo a ytsen tsaña’an cha’ nu mxtya ree can’. ²⁴ Bra nu cua ylu Moisé can’, lo’o’ lca sñe’ ne’ cuna’an sñe’ Faraón, una mscuan tloo cha’ cuiya’ can’ siyana yaña’an ri’ ’in Ndiose, ²⁵ siyana nde lca tiee tyijyin ndi’i tsatlyu lo’o quichen ’in Ndiose, lo tsi’i siyana cu’ni qui’ya sti’i ti tsu’hue chu’hui tiee loo chelyuu re. ²⁶ Lyee la nga’ni cha’ tyijyin ndi’i tsaña’an mdijin Crixtu, lo tsi’i siyana xcui ri’ cha’ cuilyiya’ nu ndi’in ’in ne’ Egipto, siyana mxtya tloo cha’ tsu’hue nu caja ’in ne’ tiaa braa. ²⁷ Siyana yaña’an ri’ ’in Ndiose, mdo’o se’en lca Egipto, lo a ytsen tloo ree can’ nisiya scuen tique’ lo’o, siyana nducua tloo ’in ni nu A Tycan’. ²⁸ Siyana yaña’an ri’ ’in Ndiose, nga’ni tnu ta’a pascua lo mscuin tne ’ni can’, siyana a caja sñe’ culo ne’ Israel bra nu cuijlyo angajle can’ ’in sñe’ ne’ Egipto. ²⁹ Siyana yaña’an ri’ ne’ Israel ’in Ndiose, mdijin ne’ Tujo’o Nga’á ña’an ndyca ri’ loo yuu bityi. Lo’o ne’ Egipto ncua ri’ ne’ tyijyin ne’, una yato’o ngujui yu’hui ne’ loo tyi’a can’. ³⁰ Cui’ ncuaña’an siyana yaña’an ri’ ne’ Israel ’in Ndiose, can’ cha’ nguten ti’in lo’o nu ntsu’hui ndyucun quichen Jericó, bra ngüita’a cati tsan nu mda’an ne’ ca tyi’iin tu’hua quichen can’. ³¹ Ne’ cuna’an nducun’ nu naa Rahab, siyana yaña’an ri’ ne’ ’in Ndiose, mdo’o laa ne’ bra ngujui lyigaa nten nducun’ can’, siyana ndyucuan xu’hue ’in ne’ Israel nu ya nda quii quichen can’. ³² Ni lyiji la cha’ ti tyucuin’ lo’on huan, siyana si tisna tyucuin’ na cha’ ’in Gedeón, Barac, Sansón, Jefté, cha’ ’in David, Samuel, ta lyigaa la ña’an nu mxyucui’ Ndiose ’in ti s’ni. ³³ Siyana yaña’an ri’ ne’ ’in Ndiose, nga’ni ne’ cana ’in scaxca quichen tnu, nga’ni cuiya’ ne’ cha’ ’in nten can’ lo’o cha’ ’in lee, ndyucuan ne’ cuinta cha’ nu mxtya Ndiose, lo’ mducun ne’ tu’hua cuichi, ³⁴ lo nga’ni ne’ cana ’in quii’ tnu, a ngujui ne’ lo’o tu’hua mxtyi, msu’hua ne’ juersa nisiya na’an ri’ ne’, nga’ni ngula ri’ ne’ bra nga’ni ne’ cusuun, lo mdi lyo’o ne’ ’in sundaru nu mdo’o tijyu’. ³⁵ A cuinta ntsu’hui ne’ cuna’an nu ndyucuan sñe’ bra mdyo’o qui’u, una ntsu’hui nu mdijin ndi’i tnu yaa’ nten nducun’, nisiya ngujui ña’an tyo’o laa ne’ una mscuan tloo ne’ cha’ can’, siyana nducua tloo ne’ tyo’o qui’u ne’ lo caja sca chelyuu nu tsu’hue lati ’in ne’. ³⁶ Ntsu’hui nu cua ña’an ti nga’ni lyo’o ne’ ’in lo mjyi’in ne’ ’in, a cuinta ntsu’hui nu mscan’ ne’ ’in lo’o cadena lo msu’hua ne’ ’in na’an tyucuan. ³⁷ Ntsu’hui nu yujui ne’ ’in lo’o quee, msi’yu ne’ ’in lo’o cierra, ndaa ne’ ndi’i ’in snu ña’an nda loo, ntsu’hui nu ngujui lo’o tu’hua mxtyi, la nde ti mda’an ne’, yucu’ ne’ quijyin ’ni, nguinu ti’i ne’, mdijin ne’ cha’ xñi’in, cua ña’an ti ngujui nu nga’ni lyo’o ’in ne’. ³⁸ Tsaña’an nu nga’ni ne’ re, a nga’an cha’ ’in nten chelyuu tyucuan xu’hue ’in ne’. A cuinta mda’an sna yu’hui se’en bityi, loo qui’ya, tuquee, a cuinta la ni’ tiuu. ³⁹ Lyigaa re yaña’an ri’ ’in Ndiose, lo yu’hui cuiya’ ri’ ni ’in, nisiya ncuaña’an a ngula ña’an cha’ nu mxtyaa ni lo’o. ⁴⁰ Una Ndiose mxtya ni sca cha’ nu tsu’hue lati nu caja ’nare, siyana tsatlyu ca tyucui cha’ ’na lo’o ne’.

¹ Si ncuaña’an quina’an nu ndi’in ca tyi’iin tsu’, xcuan tloon na lyigaa lo’o cha’ nu ndyucui ndijin loo chelyuu ’na ta qui’ya nu nsñi tun ’na, lo su’hua na juersa tsaan na nde loo tucuiin nu cua nguiaan na. ² Tyucua quiloon na ’in Jesús, ni nu mxtya quiya’ cha’ nu nguiaña’an rin’ na, lo lca ni sca cuiya’ se’en ntsu’hui cha’ tiyaan na, nisiya mdijin ni ndi’i loo cursi, una tsu’hue ntsu’hui tiee ni, a jyu’u ri’ ni lo’o cha’ can’, lo nditucua ni tsu’ cueen ’in Ndiose la ni’ cuaan. ³ Culucua rin’ huan snu ña’an ndi’i mdijin Jesús yaa’ nten qui’ya chelyuu lo nda loo ni, ncuaña’an caja la cha’ tnu tiee ’huan lo a cu’ni na’an rin’ huan. ⁴ Siyana tsaña’an nu nxcuan tloon huan scaxca loo qui’ya, a lyiji tiaa ya’ nu cujui ne’ ’huan lo’o cha’ can’. ⁵ ¿Ta cua ngüijlya rin’ huan ña’an nda Ni X’na na cueen ’huan, ’huan nu lca sñe’ ni, bra nujuin ni: Sñen’, a xcuan tloon huan cha’ nu culu’u Ni X’na na ’huan, lo a ñu’un ri’ huan bra nu xun lo’o ni ’huan, ⁶ siyana Ni X’na na nda ni cueen ’in tsalca nu ngui’ni ni ’tna ’in, lo jyi’in ni ’in nu lca sñe’ ni? ⁷ Si ta loon huan lyigaa cha’ re, ndyca tycan’ ña’an siyana lcan huan sñe’ Ndiose. ¿Ta ntsu’hui nten nu a nxun lo’o ’in sñe’ bra nu tsi’i ña’an ngui’ni? ⁸ A tucui ta a ndijyi nu nda cueen ’in, una si Ndiose cula yaa’ ni ’na ncuati ña’an, a lcan na yucui’ ca sñe’ ni rcan’. ⁹ A cuinta nten cula ’na, lo’o can’ nda cueen ’na lo ngutucuan na cha’ yucui’, ¿ta tsi’i lyee lati ndun lo’o cha’ tucuan na cha’ ’in Stina Ndiose lo caja chelyuu ’na? ¹⁰ Nisiya nten cula ’na nda cueen ’na sti’i ti tsaña’an nu ncua ’in, una cha’ nu ’in Ndiose ndlu’u ni ’na siyana ca tsu’hue ’na, lo ca luhui cha’ tiaa ’na tsaña’an nu lca ni. ¹¹ Chiñi cha’ a tucui tsu’hue ntsu’hui tiee bra ndijin scaxca lo’o cha’, siyana nde ñu’un ri’ can’, una tiaa braa ndyca tycan’ cha’ tsu’hue nu ljyan lo’o na ’in nu nda lo’o cha’ can’. ¹² Can’ cha’ scuen huan yaan’ huan lo su’huan huan juersa titun huan xiya’, ¹³ lo tya’an huan sca tucuiin nu lñi ti, siyana nu na’an ri’ a tyo’o tsu’ can’, siyana ca tyucui cha’ tiaa ’in. ¹⁴ A cuinta cuna huan ña’an nu tyi’in tsu’huen huan lo’o lyigaa tucui lo chu’huin huan sca chelyuu nu luhui, siyana a tucui ca tiaa tloo Ni X’na na si a luhui carsya ’in. ¹⁵ Xñi huan cuinta siyana a tyo’o tsun’ huan lo’o cha’ tsu’hue ’in Ndiose, ta catsu sca cha’ a tsu’hue ljan huan lo tisna cu’ni na tucui loo chelyuu ’huan, lo tsato’o quina’an nu cu’ni ñu’un na chelyuu ’in. ¹⁶ A lyca cha’ sten yu’huin huan lo’o scaxca tucui ta quixen quiyan’ huan cha’ ’in Ndiose, ña’an ndyca ri’ Esaú bra yujui’ ña’aan cha’ tsu’hue nu ntsu’hui cha’ caja ’in lo’o sca qui’nan ti scua. ¹⁷ Jlyo rin’ na siyana chun’ nde’en ncua ri’ tyucuan cha’ tsu’hue can’, una ngujui nu mscuan tloo ’in, lo a ngujui ’a ña’an nu cu’ni chu’hue cha’ can’ nisiya nguilu tyi’a quiloo. ¹⁸ Una ’huan bra yaña’an rin’ huan a yaan huan se’en nducua ca qui’ya Sinai, se’en mdo’o quii’ loo qui’ya can’, a cuinta tla na, ngo’o ti’in coo ’in na lo lyee ndyca cui’in. ¹⁹ Lo laja yucui’ Ndiose lo’o ne’ cueen ’a ngune ña’an ndyca ri’ sca cuhuii, nu hasta mjñan ne’ cha’ tsu’hue ’in ni siyana a tyucui’ a ni, ²⁰ siyana cua a ta loo ’a ne’ lo’o cha’ nu ngulo ni tñan: Siyana hasta ’ni si tsa ca’an ’in sii’ qui’ya can’, ’ni cha’ caja ’in lo’o quee ta lo’o quilyaa tyucuan. ²¹ Ndyijyin ya’ tlyu cha’ nu ncua can’, nu hasta nujuin Moisé: Ndyucuan siyana lyee nguitsen cha’ re. ²² Una ’huan bra yaña’an rin’ huan mdiyaan huan se’en nducua qui’ya nu naa Sion, se’en lca quichen tyi Ndiose, ni nu lu’u ca, cui’ Jerusalén la ni’ cuaan se’en ndi’in tyun mii angajle, ²³ can’ nguio’ ti’in tsalca nu cua mdo’o hui ’in Ndiose nu cua nga’an nii la ni’ cuaan, can’ nducua Ndiose, ni nu N’ni Cuiya’ Cha’ ’in nten, a cuinta can’ ndi’in carsya ’in nu cua ngujui, lyigaa nu lñi mdi’in cha’ ’in nu cua nguinu luhui tloo ni. ²⁴ Can’ nducua Jesús, ni nu Nga’ni Cha’ ndyca cui lyigaa cha’ re, lo’o tne nu mscuin ni la ni’ cuaan, lo tne can’ a lca na ña’an ndyca ri’ tne Abel nu ntsu’hui cha’ chu’hui lyiya’, siyana lca na tne nu culo laa ’na. ²⁵ Xñi huan cuinta siyana a xcuan tloon huan ’in ni nu ndyucui’ lo’on na. Si ncuaña’an a mdo’o laa nten loo chelyuu re nisiya ngujui nu msu’hua tiaa ’in ne’, ni xnu can’ nare, si xcuan tloon na ’in ni nu ndyucui’ lo’on na ti la ni’ cuaan. ²⁶ Bra yucui’ Ndiose loo qui’ya Sinai, hasta nguiñan tucui chelyuu, una ri nii cua mxtya ni xca cha’, lo nujuin ni: Xiya’ ti ntsu’hui cha’ xquiñan tucuin chelyuu re, una cua lo’o la ni’ cuaan rcan’. ²⁷ Nde cha’ nujuin ni xiya’ ti can’, siyana cu’ni tyii ni na nu tycan’ loo chelyuu re, lo xnu scua tsa ni na nu a ntsu’hui ’a cha’ tsatii. ²⁸ Lo siyana cua ngujui sca chelyuu ’na nu a ntsu’hui ’a cha’ tsatii se’en ndlo Ndiose tñan, can’ cha’ tsu’hue ntsu’hui tieen na cu’ni tnu na ’in ni tsaña’an nu ndyca ri’ ni, lo’o rsuun tiyaan na tloo ni lo’o sca cha’ chen ni’ carsya ’na, ²⁹ siyana Stina Ndiose lca ni sca quii’ nu cuijlyo lyigaa loo na.

¹ Tsa quiñan huan chu’hui cha’ tsu’hue ’huan scaxcan huan. ² A jlya rin’ huan taan huan se’en quinu nu nda’an ti, siyana ntsu’hui nu ndaa na’an ’in se’en nguinu angajle, nisiya a nguajlyo ri’ ti ca lca can’. ³ Xu’hua rin’ huan ’in nu ntsu’hui na’an tyucuan, lo cu’ni huan cuinta siyana tsatlyu ntsu’huin huan lo’o can’, ticui’ ncuaña’an lo’o nu ndaa en’ ndi’i ’in, cu’ni huan cuinta siyana lo’on huan ndijin huan ndi’i. ⁴ Cunan huan ña’an cu’ni cu’un huan ’huan luhui ti lo’o nten ’huan, una nu nguiten yu’hui lo’o scaxca ne’ cuna’an, Ndiose cu’ni cuiya’ ni cha’ ’in can’. ⁵ A taan huan cha’ ca lca tieen huan cha’ cuilyiya’, lo tsu’hue chu’hui tieen huan lo’o na nu ndi’in ’huan, siyana ndeña’an nujuin Ndiose: A xnun ’in ncuati ña’an, lo ni a cula yaan’ ’in. ⁶ Can’ cha’ ca tyucuin’ na lo’o lyigaa tieen na: Ni X’na na nda yaa’ ni ’yan, lo a xcutsen ran’ lo’o ti’i nu ca cu’ni nten lo’on. ⁷ Xu’hua rin’ huan ’in tsalca nu ntsu’hui cuinta ’huan ni’ lyaa, nu yucui’ cha’ ’in Ndiose lo’on huan, xñi huan cuinta chelyuu nu yu’hui lo tyucui ndyca’an huan cha’ nu yaña’an ri’. ⁸ Jesucristo scaña’an ti ni lyigaa braa: Lca, lo’o ri nii, lo cui’ ni lca ni sa tyucui braa. ⁹ A taan huan ya’ caja nu quiñilyo’o ’huan lo’o scaxca cha’ nu a ndyucua ta’a lo’o cha’ nu ’in Ndiose. Lyee la ntsu’hui lyoo si cu’ni cuintan huan cha’ tsu’hue ’in ni lo a tyucui ndyca’an huan scaxca lo’o cha’ lo’o cha’ ndyucu, nu a sca cha’ tsu’hue ngujui ’in ne’ lo’o. ¹⁰ Cua nguia’ sca se’en ’ni tnu na ’in Ndiose la ni’ cuaan, lo nu ti nguia ndyca’an cha’ ’in te’ na’an can’, a ca cu na nu nducua can’. ¹¹ Lo lo’o qui’ya ’in nten quichen, nguiten lo’o tne ’ni se’en nu luhui lati ’in Ndiose, una cuinan’ ’ni can’ ndiquin ti’in ’in na nde tu’hua quichen. ¹² Cui’ ncuaña’an Jesús mdijin ni ndi’i nde tu’hua quichen, siyana suhui ni ’in nten lo’o tne ni. ¹³ Can’ cha’ lo’on nare tyo’on na nde tu’hua quichen lo quinan na ’in ni, lo ca sca cha’ ti ’na lo’o ti’i nu mdijin ni. ¹⁴ Siyana loo chelyuu re a la quija lyoo sca quichen se’en tyi’in na sa tyucui braa, siyana ndyuhui tan na sca quichen nu taa Ndiose ’na tiaa braa. ¹⁵ Can’ cha’ lo’o Jesús, cu’ni tnu na ’in Ndiose lyigaa braa, taan na sca lomstan ’in ni ña’an nu ndla lo’on na ’in ni, lo’o cha’ nu tyucuin’ na taan na ’in ni. ¹⁶ A lyca cha’ cula’ tin’ na cu’ni na tsu’hue, lo ta yaa’ ta’an na scaxcan na, siyana ticui’ sca lomstan nu ndyu’hui cuiya’ ri’ Ndiose lca na. ¹⁷ A cuinta tucuan huan cha’ ’in scaxca nu ntsu’hui cuinta ’huan se’en nguio’ ti’in huan, lo tucua huan cha’ nu ndyucui’ siyana cui’ ntsu’hui yuhue ri’ ’huan lo’o cha’ nu ’in Ndiose, nu ntsu’hui cha’ tyaa cuinta ’huan tiaa braa, siyana cu’ni tñan ndun ri’, siyana a sca cha’ tsu’hue ljyan ’huan si ta nu’un ri’ can’. ¹⁸ Jñan huan ’in Ndiose cha’ ’hua, jlyo ri’ hua siyana luhui cha’ tiaa ’hua, lo nducua tloo hua tyo’o tsu’hue lyigaa tñan nu cu’ni hua. ¹⁹ Jñan cha’ tsu’hue ’huan siyana nde lyee la jñan huan ’in Ndiose, siyana taa ni cha’ cuiya’ xtucuin se’en ndi’in huan nu ndla la. ²⁰ Ndiose, ni nu nga’ni cha’ nxtñan’ carsya ’na, ni nu nga’ni cha’ mdyo’o qui’u Ni X’na na Jesucristo, ni nu ndun loo lati nu ntsu’hui cuinta ’in nu cua ngulosuhui Ndiose, lo’o tne ni nga’ni Ndiose cha’ nguinu scua tsa cha’ nu cua mxtya ni, ²¹ lo cu’ni ni cha’ ca tyucui cha’ tiaa ’huan siyana ca cu’ni huan cha’ nu ndyca ri’ ni, lo lo’o Jesucristo cu’ni Ndiose cha’ ca lca tieen huan cha’ nu ndyu’hui cuiya’ ri’ ni, scati ni ntsu’hui cha’ cu’ni tnu na ’in ni sa tyucui braa. Amen. ²² Mjñan cha’ tsu’hue ’huan, ’huan ta’an na, siyana tyucuan xu’huen huan cha’ nu yucuin’ lo’o chin’ cha’ nu nga’an re. ²³ Quitsan’ ’huan siyana ta’an na Timoteo cua mdyo’o na’an tyucuan, lo si quila ndla la se’en ndi’in, lo’o ta’a tsa’an se’en ndi’in huan. ²⁴ Tyucui’ chan’ huan ’in lyigaa nu ntsu’hui cuinta ’huan cuinta cha’ ’yan, tsatlyu lo’o lyigaa la ña’an ta’an na. Ticui’ ncuaña’an ta’an na Italia ndyucui’ cha’ ’huan. ²⁵ Cha’ tsu’hue ’in Ndiose quinu lo’on huan sa tyucui braa. Amen.