EFESIOS

EFESIOS

¹ Na’ Pablo, lo’o cha’ cuiya’ ’in Ndiose nga’an tñan Jesucristo ’yan tsa yucuin’ cha’ tsu’hue ’in ni, lo ca’an tñan sca quityi re ’huan, ’huan nu ndi’in quichen Efeso, lyigaa nu cua mdo’o hui ’in Crixtu Jesús nu nguiaña’an ri’ ’in ni. ² Stina Ndiose lo’o Ni X’na na Jesucristo taa ni cha’ tsu’hue nu chu’hui ni’ carsya ’huan, lo cu’ni ni cha’ tyi’in tsu’huen huan. ³ Tlyu ca xu’hue ntsu’hui ’in Ndiose, Sti Ni X’na na Jesucristo, siyana ndaa ni lyigaa lo’o cha’ tsu’hue ’na nu mdo’o la ni’ cuaan lo’o Crixtu. ⁴ Cui’ lo’o ni ngulosuhui Ndiose ’na bra ti lyiji tñan ni chelyuu, siyana ca na nten nu luhui ’in ni nu a nducui ’a qui’ya. ⁵ Lo’o cha’ tsu’hue nu lca tiee ni, siyana xisñe’ ni ’na lo’o Jesucristo tsaña’an nu ncua ri’ ni, ⁶ siyana cu’ni tnu na ’in ni lo’o cha’ tsu’hue nu tlyu lca tiee ni, nu ngujui ’na xu’hue ti lo’o Sñe’ ni nu tca’a lati ’in ni. ⁷ Lo’o Sñe’ ni mdo’o laan na lo’o tne ni, lo ngatyen ni qui’ya ’na lo’o cha’ tsu’hue nu lca tiee ni. ⁸ Nga’ni ni cha’ ngüitsa’ yu’hui cha’ tsu’hue can’ ’na, tsaña’an nu ndi’yan ni cuinta lo’o lyigaa lo’o cha’ tiyaa, ⁹ nguilyo scua yla ni cha’ nu ntsu’hui tiee ni, cha’ nu yu’hui catsi’ ’in ni, tsaña’an cha’ nu cua mxtya ni ti culo, lo’o cha’ tsu’hue nu lca tiee ni. ¹⁰ Lo cu’ni ni cha’ ca scati cha’ ’in lyigaa loo na lo’o Crixtu, na nu ndi’in loo chelyuu re lo’o na nu ndi’in la ni’ cuaan, tsan nu ca cha’ nu cua mxtya ni. ¹¹ Cui’ lo’o Crixtu ngujui cha’ tsu’hue ’na, xu’hue nu cua ngu’ni ca’an ’na cua ña’aan cha’ nu mxtya ni, ni nu nga’ni lyigaa lo’o cha’ tsaña’an nu ndyca ri’ ni, ¹² siyana cu’ni tnu na ’in ni lo’o cha’ cuiya’ nu tlyu ’in ni, lyigaan naa ne’ nu la nducua lati nducua tloo ’in Crixtu. ¹³ Cui’ ncuaña’an ’huan, sca cha’ ti ’huan lo’o ni ti bra ngune ’huan cha’ nu lñi, cui’ cha’ tsu’hue ’in Crixtu nu ndlo laa ’huan, lo lo’o cha’ nu yaña’an rin’ huan ’in ni, mjyi’in ca’an ni sca cuiya’ ’huan lo’o Espíritu nu Luhui ’in Ndiose tsaña’an cha’ nu cua mxtya ni cha’, ¹⁴ siyana ca tyucuan na cuinta cha’ tsu’hue nu cua mxnu Ndiose ’na, lo ndyuhui tan na tsan nu tyucuan ca na cuinta cha’ can’, siyana cu’ni tnu na ’in ni lo’o cha’ cuiya’ nu tlyu ’in ni. ¹⁵ Can’ cha’ lo’on na’, ti bra yna cha’ ña’an nu nguiaña’an rin’ huan ’in Ni X’na na Jesús, a cuinta siyana ntsu’hui cha’ tsu’hue ’huan lo’o lyigaa nu cua mdo’o hui ’in ni, ¹⁶ a ndla tin’ ndyaan xu’hue ’in Ndiose cha’ huan, lo nxu’hua ran’ ’huan lyigaa ya’ ndyucuin’ lo’o ni. ¹⁷ Ndiose ’in Ni X’na na Jesucristo, cui’ Stina, ni nu tlyu lati, taa ni cha’ tiaa ’huan lo quilyo scua yla ni cha’ ’in ni lo’on huan tsaña’an nu lca ni yucui’ ni. ¹⁸ A cuinta sla la ni cha’ tiaa ’huan, ca jlyo rin’ huan ni cha’ msi’ya ni ’huan, ca jylo rin’ huan snu ña’an tlyu cha’ tsu’hue nu cua ngujui ’in lyigaa nu cua mdo’o hui ’in ni, ¹⁹ snu ña’an tlyu cha’ cuiya’ ’in ni nu nda yaa’ ’na, naa ne’ nu nguiaña’an ri’ ’in ni, lo nda’an lo’o na cha’ cuiya’ ’in ni, ²⁰ cui’ cha’ cuiya’ nu ncua tycan’ bra nga’ni ni cha’ mdyo’o qui’u Crixtu, lo ndaa ni se’en tyucua can’ tsu’ cueen ’in ni la ni’ cuaan. ²¹ Ndyucuan can’ cha’ cuiya’ nu cuaan lati ’in lyigaa bsya, lo’o nu cuaan la tñan lyi’ya, lo’o nu ndia cha’ cuiya’ ’in, lo’o lyigaa nu lyee la ndlo tñan, lo cuaan la cha’ cuiya’ ’in ni que lyigaa cha’ nu ndlo naa ne’ ’in loo chelyuu re lo’o la ni’ cuaan, lo ndlo ni tñan ri nii, cui’ ncuaña’an sa tyucui braa. ²² Ndiose mxnu ni lyigaa lo’o cha’ nde tuquiya’ Sñe’ ni, cui’ ncuaña’an ngulo tun ni ’in can’ siyana ca ni que lo culo ni tñan ’in lyigaa laa, lyigaa nu nguiaña’an ri’ ’in ni, ²³ lo laa can’ lca na cuinan’ Crixtu nu ngüitsa’ yu’hui lo’o Ni, ni nu nga’ni cha’ cha’an yu’hui lyigaa loo na sa tyucui se’en.

¹ Ndiose lca nu ndaa chelyuu ’huan laja nda’an ngui’ni huan lucuati lo’o cha’ a tsu’hue, lo lo’o qui’ya can’ a yu’hui chelyuu ’huan tloo ni. ² Xcui’ cha’ a tsu’hue nda’an yi’ni huan rcan’, ngutucui ndyca’an huan cha’ nu ndyca loo chelyuu, ngutucuan huan cha’ ’in ne’ xña’an nu nducui loo cui’in se’en ndlo tñan, lo lyigaa nu lye’ ri’ nducua cha’ ’in can’, ³ cui’ laja can’ yu’huin na ti culo, ngutucui ndyca’an na cha’ nu lca tieen na, nga’ni na ña’an nu ncua rin’ na lo’o cha’ tiaa nguna’ ’na. Stu’hua ña’an mdi’in cha’ ’na lo’o lyigaa nten nu ntsu’hui cha’ tyijyin ndi’i tiaa braa. ⁴ Una Ndiose, ni nu ngüitsa’ yu’hui cha’ tsu’hue ’in, lyee ndyca ’tna ri’ ni ’na, ⁵ lo nisiya ngujuin na tloo ni lo’o qui’ya nducuin na, una ndaa ni chelyuu ’na tsatlyu lo’o Crixtu, (lo lo’o cha’ tsu’hue ’in ni mdo’o laan huan), ⁶ cui’ ncuaña’an tsatlyu nga’ni ni cha’ mdyo’o qui’un na lo’o Crixtu, lo ndaa ni se’en tyucuan na sca se’en ti lo’o Crixtu Jesús la ni’ cuaan, ⁷ se’en nu quilyo scua yla ni cha’ tsu’hue ’in ni sa tyucui braa, lo ca tycan’ snu ña’an tlyu cha’ tsu’hue lca tiee ni lo’on na lo’o Crixtu Jesús. ⁸ Lo’o cha’ tsu’hue ’in Ndiose mdo’o laan huan siyana yaña’an rin’ huan ’in ni, lo tsi’i cuinta ’huan lca cha’ can’, lo’o cha’ tsu’hue ’in Ndiose ti, ⁹ lo tsi’i lo’o tñan tsu’hue nu cua nga’ni huan, siyana a tucui cu’ni siye’ ’in. ¹⁰ Siyana Ndiose lca nu ngañan ’na, nga’ni sca ni cha’ ’na lo’o Crixtu Jesús siyana cu’ni na lyigaa loo tñan tsu’hue, cui’ cha’ nu mxtya Ndiose ti culo siyana tucuan na cha’ ’na. ¹¹ Can’ cha’ a jlya rin’ huan cha’ re, ’huan nu lca yucui’ ca ne’ gentil, siyana nu ncua ti culoo ne’ judio nu ndyca circuncida ’in ngulo naa ne’ ’huan nten nu a ndyca circuncida ’in, ¹² cui’ siyana a lyiji chu’hui lyoon huan ’in Crixtu, a cuinta tijyu’ ndyca huan sii’ ne’ Israel, ni a yu’hui xu’hue huan lo’o cha’ tsu’hue nu mxtya Ndiose lo’o ne’, ni a sca cha’ mducua tloon huan laja mda’an huan loo chelyuu re, lo ni a yu’hui lyoon huan ’in Ndiose. ¹³ Una ri nii sca cha’ ti ’huan lo’o Crixtu Jesús, ’huan nu mdo’o tijyu’ sii’ ni ti culo, lo ri nii lucui’ la ndycan huan sii’ ni lo’o tne Crixtu. ¹⁴ Siyana cui’ ni nga’ni ni cha’ tyi’in tsu’huen na tsatlyu, nga’ni sca ni ’na lo’o tyucuaa lta nten can’, nguijlyo ni na nu nga’ni tucui jlu’hue la se’en ndi’in na, ¹⁵ lo nga’ni ni cha’ yatii cha’ cusuun can’ bra ngujui ni, msi’yu co’ ni cha’ ’in lee lo’o scaxca cha’ nu ndlo can’ tñan, siyana xtya ni sca lta nten nu cui ti, tyucuaa lta nten can’ tyca tsatlyu ne’ lo’o ni, lo ncuaña’an nga’ni ni cha’ tyi’in tsu’huen na. ¹⁶ Lo’o cha’ nu ngujui ni loo cursi, ngujui ña’an nguinu tsu’hue cha’ ’in tyucuaa lta nten can’ lo’o Ndiose, nga’ni sca ni ’in ne’ bra nga’ni tyii ni cha’ cusuun can’. ¹⁷ Yaan ni lo yucui’ ni cha’ tsu’hue ’in ni tsaña’an nu ntsu’hui cha’ tyi’in tsu’huen huan tloo Ndiose, ’huan nu mdo’o tijyu’ sii’ ni, cui’ ncuaña’an yucui’ ni lo’o lyigaa nu ndi’in lucui’ se’en ti, ¹⁸ lo lo’o Crixtu ndijyi ña’an sten na tloo Stina Ndiose cuinta scaa ltan na, siyana scaña’an ti Espíritu ntsu’hui ni’ carsya ’na. ¹⁹ Can’ cha’ a lcan ’a huan nten nu mdo’o xca quichen ta nten nda’an ti, siyana sca quichen tyin tin huan lo’o nu nguiaña’an ri’ ’in Crixtu, lo lca huan nten nu cua ndi’in lo’o cha’ ’in Ndiose. ²⁰ Cua’ ndun huan lo’o cha’ nu cua mxtya nu mxyucui’ Ndiose ’in ti s’ni, lo’o cha’ nu yucui’ ta’a mda’an Jesús, lo quee nu ndun loo lati nu nsñi tun na’an lca yucui’ ca Jesucristo. ²¹ Lo’o ni nguia ndyca tlyu na’an can’, sca cha’ ti ’in na lo’o ni, lo ncuaña’an can na sca laa nu luhui ’in Ni X’na na. ²² Lo’o ni tsatlyu nguia nguilun na, siyana can na sca laa se’en tyi’in Ndiose lo’o Espíritu ’in ni.

¹ Lo’o cha’ re, na’ Pablo ntsu’huin na’an tyucuan lo’o Crixtu, lo’on ’huan, ’huan ne’ gentil. ² Si cua yna huan cha’ siyana Ndiose lca nu ndaa tñan re ’yan, lo lo’o cha’ tsu’hue ’in ni caja ’huan. ³ Nguilyo scua yla ni cha’ nu yu’hui catsi’ ’in ni, tsaña’an chin’ cha’ nu cua nga’an ’huan, ⁴ ca tyucuin’ huan ’in na lo ca jylo rin’ huan ña’an cha’ tiaa ndaa ni ’yan, cui’ cha’ nu yu’hui catsi’ ’in ni, cha’ ’in Crixtu, ⁵ cha’ nu msu’hua catsi’ ni ’in nten nu mdi’in ti s’ni, una ri nii lo’o Espíritu ’in ni nguilyo scua yla ni cha’ re lo’o nu ngulo tun ni tsa yucui’ cha’ tsu’hue ’in ni, a cuinta lo’o nu nxyucui’ ni ’in. ⁶ Nde cha’ nu yu’hui catsi’ can’: ne’ gentil tsatlyu caja cha’ tsu’hue ’in ne’ lo’o ne’ judio, tyca sca cha’ ti ’in ne’, lo scaña’an ti tyucua tloo ne’ cha’ tsu’hue nu taa Crixtu Jesús, cui’ siyana ngujui nu yucui’ cha’ tsu’hue ’in ni lo’on huan. ⁷ Lo’o cha’ tsu’hue ’in Ndiose nu ndaa ni, ’yan can’ cha’ nda’an yucuin’ cha’ tsu’hue ’in ni tsaña’an tlyu cha’ cuiya’ nu ntsu’hui ’in ni. ⁸ Nisiya lcan sca nu chin’ la cha’ ’in que lyigaa la ña’an nu nguiaña’an ri’ ’in ni, una nga’ni ni cha’ tsu’hue lo’on, ndaa ni cha’ cuiya’ tsa yucuin’ lo’o ne’ gentil snu ña’an tlyu cha’ tsu’hue ntsu’hui ’in Crixtu lo’o ne’, ⁹ a cuinta quilyo scua ylan cha’ lo’o lyigaa tucui tsaña’an cha’ nu cua mxtya Ndiose ti s’ni, cha’ nu yu’hui catsi’ ’in ni, ni nu ngañan lyigaa loo na, ¹⁰ siyana lo’o cha’ ’in nu lca laa ’in ni, ca quilyo scua yla lyigaa lo’o cha’ tiaa ’in Ndiose, lo’o nu ndyca bsya lo’o nu ndia cha’ cuiya’ ’in tloo ni la ni’ cuaan, ¹¹ tsaña’an cha’ nu mxtya ni ti culo, lo ndiaa cha’ re lo’o Crixtu Jesús, ni nu lca X’na na. ¹² Cui’ lo’o ni, tnu tieen na lo a ngui’ni tucua rin’ na sten na tloo Ndiose siyana nguiaña’an rin’ na ’in Crixtu. ¹³ Can’ cha’ tyucuin’ lo’on huan siyana a cu’ni na’an rin’ huan lo’o scaxca ndi’i ndijin, siyana cha’ tsu’hue ’huan lca na. ¹⁴ Can’ cha’ ndi’ya xtyin’ tloo Ndiose, Sti Ni X’na na Jesucristo, ¹⁵ ni nu nguia lo’o nii lyigaa nten, la ni’ cuaan lo’o loo chelyuu re. ¹⁶ Njñan ’in ni siyana caja la juersa ’huan lo’o cha’ ’in Ndiose lo’o Espíritu ’in ni, cui’ tsaña’an tlyu cha’ tsu’hue nu ntsu’hui ’in ni, ¹⁷ siyana chu’hui Crixtu ni’ carsya ’huan si tsaña’an rin’ huan ’in ni, a cuinta siyana tsa tyun huan lo’o cha’ tsu’hue ’in ni, ¹⁸ siyana ca qui’yan huan cuinta lo’o lyigaa nu nguiaña’an ri’ ’in ni, snu ña’an xeen cha’ tsu’hue ’in Crixtu, snu ña’an tucuin na, snu ña’an qui’ñi, lo snu ña’an cuaan na, ¹⁹ a cuinta ca jylo rin’ huan snu ña’an tlyu cha’ tsu’hue lca tiee Crixtu lo’on na, ni a ndlya cha’ tiaa ’na qui’yan na cuinta cha’ re, siyana cha’an yu’hui Ndiose ’huan tsaña’an nu lca ni yucui’ ca ni. ²⁰ Scati Ndiose, ni nu ndyca ’ni lyigaa lo’o cha’, lo hasta nducua la ngui’ni ni cha’ nu njñan na, tsu’hue a ndi’yan na cuinta, cui’ lo’o cha’ cuiya’ ’in ni nu cua ndaa ni ’na, ²¹ ’in ni cu’ni tnu na sa tyucui braa lo’o Crixtu Jesús, lyigaa nu lca laa ’in ni, lo ncuaña’an tsa quiñan can’ cu’ni sa tyucui braa. Amen.

¹ Can’ Cha’ na’, nu ntsu’hui presu lo’o cha’ ’in Ni X’na na, jñan cha’ tsu’hue ’huan siyana tya’an lo’on huan sca chelyuu nu luhui tsaña’an ndyca ri’ ni nu msi’ya ’huan. ² Lo’o rsuun ña’an cu’ni huan, ndi’ya ti tyi’in cha’ ’huan, ta loon huan scaxcan huan, chu’hui cha’ tlyu ri’ ’huan lo’o lyigaa tieen huan, ³ lo cuna huan ña’an nu tyi’in tsu’huen huan, sca cha’ ti ’huan lo’o Espíritu ’in Ndiose. ⁴ Siyana scati lcan na, scati Espíritu ntsu’hui ’na, a cuinta scaña’an ti nducua tloon na tsaña’an msi’ya Ndiose ’na, ⁵ scati Ni X’na na, sca loo ti cha’ nguiaña’an rin’ na, cui’ ncuaña’an lo’o cha’ nu nducua tyan na, ⁶ scati Ndiose lca Stina, ni nu cuaan la cha’ cuiya’ ndia ’in que lyigaa tucui, ni nu nda yaa’ ’na lyigaan na, ni nu ntsu’hui ni’ carsya ’na lyigaan na. ⁷ Una cuinta scaan na cua ndaa Ndiose cha’ tsu’hue nu chu’hui ni’ carsya ’na tsaña’an cha’ cuiya’ nu ndia ’in Crixtu. ⁸ Can’ cha’ ndyucui’ quityi ’in Ndiose: Bra ndyucuen Crixtu la ni’ cuaan, nguia lo’o ni lyigaa nu cua ntsu’hui tuyaa’ ni, lo ndaa ni scaxca cha’ tsu’hue ’in nten chelyuu. ⁹ ¿Ni ña’an ra ndi’in cha’ re ña’an nu ndyucuen ni la ni’ cuaan? ¿Ta tsi’i la nducua la ngüi’ya ni se’en nu qui’ya lati ’in chelyuu re? ¹⁰ Ni nu ngüi’ya can’ lca ticui’ ni nu ndyucuen se’en nu cuaan lati la ni’ cuaan, siyana cu’ni cha’an ni sca tyucui se’en can’. ¹¹ Cui’ ni ndaa ni cha’ cuiya’ ’in cuinta scaa nu ntsu’hui cha’ cu’ni tñan ’in ni: Cua’ lca nu ngulo tun ni ’in nu xtya quiya’ tñan ’in ni, a cuinta lo’o nu xyucui’ ni ’in, lo’o nu tya’an yucui’ cha’ tsu’hue ’in ni, cui’ ncuaña’an lo’o nu chu’hui cuinta ’in ne’ lo’o nu culu’u ’in ne’, ¹² siyana ca cu’ni cha’an ña’an ntsu’hui cha’ cu’ni tñan ’in Ndiose, calu tsatlyu sca cha’ ti ’in lo’o Crixtu, ¹³ hasta tiyaan na cuiya’ nu ca sca cha’ ti ’na lyigaan na, tsaña’an nu ntsu’hui cha’ tsaña’an rin’ na ’in ni lo chu’hui lyoo tsu’huen na ’in Sñe’ Ndiose, tiyaan na sca cuiya’ tsaña’an ndi’in cha’ ’in sca nten nu cua cula, tsaña’an nu lca yucui’ ca Crixtu, ¹⁴ a can ’an na ña’an ndyca ri’ sca nu suhue ti ta na’an ti ndun, nu ndlo lqui suhue’ cui’in ’in la nde ti, ta lo’o scaxca cha’ nu ndlu’u nten, siyana lo’o cha’ mañan ’in ne’ nsu’hua ne’ cha’ cuiñi se’en nu quiñilyo’o ne’ ’in can’. ¹⁵ Si tyucui ndyca’an na cha’ nu lñi, lo chu’hui cha’ tsu’hue tieen na scaxcan na, ncuaña’an calun na lo’o lyigaa lo’o cha’, ca sca cha’ ti ’na lo’o Crixtu, ni nu lca que ’na. ¹⁶ Cui’ ni nga’ni ni cha’ siyana tsatlyu nguia nguilun na, lo tsaña’an ndi’in cha’ ’in cuinan’ na, tsu’hue ndya tucua tijyan na lo’o tyucuin na, ticuii’ na nda yaa’ ta’a na, ncuaña’an lo’o tñan ngui’ni na cuinta scan na, nguia nguilun na tsatlyu lo nde ndyca quina’an la cha’ tsu’hue nu lca tieen na. ¹⁷ Ndyucuin’ lo’o cha’ cuiya’ ’in Ni X’na na, ndyca ran’ siyana a cu’ni ’a huan tsaña’an ngui’ni lyigaa la ña’an ne’ gentil, nda’an lo’o ne’ cha’ tiaa a tsu’hue nu a sca cuinta ntsu’hui. ¹⁸ Siyana cha’ tiaa ’in ne’ tla na, tijyu’ ndyca ne’ sii’ Ndiose, ni nu ndaa chelyuu ’in ne’, ndyucun cha’ tiaa ’in ne’ siyana ncua tla carsya ’in ne’, ¹⁹ ni a ngüi ’a ri’ ne’ na lca cha’ jyu’u, ndyaa ne’ ’in ne’ siya’ ti lo’o cha’ nu a tsu’hue siyana cu’ni ne’ ña’an nu ndyca ri’ ne’. ²⁰ Una ’huan tsi’i ncuaña’an nga’ni cha’an huan ’in Crixtu, ²¹ si ’huan cua ngune ’huan, lo ngujui nu ngulu’u ’huan tsaña’an ndyca ri’ nten tsu’hue ’in Jesús. ²² Tsaña’an chelyuu yu’huin huan ti culo, xcuan tloon huan lyigaa cha’ cula can’, cui’ cha’ a tsu’hue lo’o cha’ xque’ nu ni lyo’o ’in nten, ²³ siyana tyca cui cha’ tiaa ’huan lo’o carsya ’huan, ²⁴ ngujui sca chelyuu nu cui ti ’huan tsaña’an ndyca ri’ Ndiose, ni nu nga’ni tñan tsu’hue, luhui cha’ tiaa ’in ni, tsaña’an lñi ndi’in cha’ ’in ni. ²⁵ Can’ cha’ xcuan tloon huan cha’ cuiñi, lo’ scaxca huan tyucui’ huan cha’ nu lñi, siyana scati lcan na lyigaan na. ²⁶ Si scuen tiquen’ huan una a cu’ni huan qui’ya, a taan huan ya’ chu’hui cha’ can’ tieen huan hasta xiin tsan, ²⁷ ni a taan huan ya’ ’in ne’ xña’an. ²⁸ Nu ngui’ni cuna, a tsa quiñan ’a can’ ti cu’ni cuna, siyana cu’ni can’ tñan nu luhui, ncuaña’an ca ta yaa’ can’ ’in nu ’ni cha’ ’in. ²⁹ A tyucuin’ huan ni sca cha’ nu a tsu’hue, siyana quinan huan ña’an tyucuin’ huan lo’o ta’an huan cha’ nu cu’ni tsu’hue ’in, siyana ca ta yaan’ na ’in nu quine ’in. ³⁰ A cu’ni ñu’un huan ’in Espíritu nu Luhui ’in Ndiose nu cua ndaa ni ’huan, lca can’ sca cuiya’ nu cua nga’an ’huan siyana ca sten huan la ni’ cuaan bra nu tiaa braa. ³¹ Xcuan tloon huan chelyuu tlya’ nu ntsu’huin huan, cha’ nsin’ ri’, cha’ nu ndyucuen tiquen’ huan, cha’ nu nxi’ya lo’o ta’an huan, cha’ nducua yuhue’ ta’an huan, lo’o lyigaa lo’o cha’ a tsu’hue. ³² siyana cu’ni huan tsu’hue scaxcan huan, ca ’tna ri’ ta’an huan, cu’ni huan cha’ tlyu ri’ ’in ta’an huan tsaña’an nga’ni Ndiose cha’ tlyu ri’ ’huan lo’o Crixtu.

¹ Can’ cha’ taan huan ya’ tyucui ndyca’an huan ’in Ndiose siyana lcan huan sca sñe’ ni nu tca’a ’in ni. ² Chu’hui cha’ tsu’hue ’huan scaxcan huan tsaña’an ’tna ri’ Crixtu ’na, ndyaa ni ’in ni tsaña’an ndyca ri’ sca lomstan nu txi nu ndyiquin tloo Ndiose. ³ Una tsaña’an ndyca ri’ nu nguiten yu’hui lo’o xca ne’ cuna’an, lo’o scaxca cha’ a tsu’hue, ta cha’ nu nchucui ri’ ne’, ni sca cha’ re lo a ntsu’hui cha’ chu’hui ljan huan, siyana tsi’i ncuaña’an ntsu’hui cha’ chu’hui sca sñe’ Ndiose. ⁴ Ni sca cha’ a tsu’hue lo a tyo’o tu’huan huan, ta scaxca cha’ tantu’, ta lo’o cha’ nu a tsu’hue, cha’ nu a sca cuinta ntsu’hui, siyana lo’o tu’huan huan tyaan huan xu’hue ’in Ndiose. ⁵ Cua’ jlyo rin’ huan cha’ re, siyana ni sca nu nguiten yu’hui lo’o xca ne’ cuna’an, ta ngui’ni scaxca cha’ a tsu’hue, ta lyee lca tiee ne’ cha’ cuilyiya’, a caja cha’ tsu’hue ’in can’ se’en ndlo Ndiose tñan lo’o Crixtu, siyana nu nchucui ri’ cha’ can’ stu’hua ña’an ndyca ri’ lo’o nu ngui’ni tnu ngulucuin. ⁶ A taan huan ya’ caja nu quiñilyo’o ’huan lo’o cha’ nu a tsu’hue, lo’o cha’ re ca’an tñan Ndiose ndi’i ’in lyigaa nu lye’ ri’. ⁷ A lyca cha’ ca sca cha’ ti ’huan lo’o nu ngui’ni ncuaña’an. ⁸ Siyana ti culo ndun huan se’en tla, una ri nii lcan huan sca xaa lo’o Ni X’na na, can’ cha’ tya’an huan tsaña’an ndya’an sca nu cua nda’an loo xaa ’in ni, ⁹ (siyana tñan nu ngui’ni Espíritu ’in Ndiose ndyca tycan’ lyigaa cha’ tsu’hue nu ngui’ni na, cha’ nu luhui lo’o cha’ nu lñi), ¹⁰ can’ cha’ cuna huan ña’an nu cu’ni huan tsaña’an nu ndyca ri’ Ni X’na na. ¹¹ A sten yu’huin huan lo’o cha’ a tsu’hue nu ngui’ni nten nu nda’an se’en tla, cha’ nu a sca cuinta ntsu’hui, siyana xcuan tloon huan cha’ can’, ¹² siyana hasta jyu’u rin’ na tyucuin’ na lyigaa cha’ nu ngui’ni ne’ se’en ltsi’ ti. ¹³ Siyana lyigaa cha’ re bra ngui’ni xaa ’in na, ndyo’o scua yla na, siyana xaa can’ ’ni cha’ ndyca tycan’ lyigaa lo’o cha’. ¹⁴ Can’ cha’ nguinu scua sca cha’: Xaa ri’ Nu’huin nu lja’, lo tyo’o laja ne’ ngujui, lo Crixtu culu’u ni xaa ’in. ¹⁵ Xñi huan cuinta ña’an chu’huin huan chelyuu, tsi’i tsaña’an nda’an sca nu tantu’, siyana tya’an huan lo’o cha’ tiyaa, ¹⁶ cu’ni cuintan huan cha’ re laja nu ti ndijyi braa, siyana xcui’ cha’ a tsu’hue ndyca loo chelyuu re. ¹⁷ Can’ cha’ a taan huan ya’ ca tantun’ huan, siyana qui’ya huan cuinta tsaña’an ndyca ri’ Ni X’na na. ¹⁸ A lyca cha’ ca cu’huin huan, siyana can’ nu tna’ ’in nten, siyana taan huan ya’ cha’an yu’hui Espíritu ’in Ndiose ’huan. ¹⁹ Scaxcan huan taan huan cha’ ’in Ndiose culan huan salmo, lo’o himno, lo’o jyiin nu ndyo’o ni’ carsya ’huan, lo’o lyigaa tieen huan cula lo’on huan ’in Ni X’na na, ²⁰ lyigaa braa tyaan huan xu’hue ’in Stina Ndiose lo’o lyigaa lo’o cha’, lo’o cha’ cuiya’ ’in Ni X’na na Jesucristo. ²¹ Scaxca huan cu’ni cuintan huan ’in ta’an huan siyana jlyo rin’ huan ti ca lca Ndiose. ²² ’Huan ne’ cuna’an, tucua cha’ ’in cuilyo’on huan tsaña’an ntsu’hui cha’ nducuan huan cha’ ’in Ni X’na na. ²³ Siyana ne’ qui’yu lca que ’in nten ’in, cui’ tsaña’an Crixtu lca ni que ’in laa ’in ni, lo cui’ ni lca ni nu Ndlo Laa ’na. ²⁴ Can’ cha’ tsaña’an ndi’in cha’ ’in laa nducua can’ cha’ ’in Crixtu, cui’ ncuaña’an ne’ cuna’an tucua cha’ ’in cuilyo’o lo’o lyigaa lo’o cha’. ²⁵ A cuinta ’huan ne’ qui’yu, chu’hui cha’ tsu’hue ’huan lo’o nten ’huan, cui’ tsaña’an yu’hui cha’ tsu’hue ’in Crixtu lo’o laa ’in ni, ndyaa ni ’in ni lo’o can’, ²⁶ siyana xnu luhui ni ’in can’ bra mjyi’an ni ’in lo’o tyi’a lo’o cha’ nu ndyucui’ ni, ²⁷ cua lca ncua tsu’hue can’ tsan nu tiaa tloo ni, ni sca cuu’ lo a mda’an ’in, ni a la cuun’ ’in, ni sca cha’ a tsu’hue lo a nguija lyoo ’in, siyana lca can’ sca nu cua mdo’o hui ’in ni nu a sca qui’ya nducui ndyca’an ’in. ²⁸ Cui’ ncuaña’an ’huan ne’ qui’yu, chu’hui yuhue rin’ huan ’in nten ’huan tsaña’an ntsu’hui yuhue rin’ huan ’huan. nu ngui’ni ’tna ’in nten ’in, cui’ ncuaña’an ngui’ni can’ ’tna ’in ticuii’. ²⁹ Siyana a tucui nu nxcuan tloo ’in ticuii’, siyana tsu’hue ña’an seen can’ ’in, ntsu’hui cuinta ’in lyigaa braa, cui’ ncuaña’an nga’ni Crixtu lo’o laa ’in ni, ³⁰ siyana lyigaan na scati lcan na lo’o ni, sca cuinan’ tin na lo sca tijyan tin na lo’o ni. ³¹ Can’ cha’ ne’ qui’yu ntsu’hui cha’ tyo’o tsu’ sii’ sti lo’o jyi’an, lo tyi’in lo’o cuilyo’o, tyucuaa can’ sca ti ca rcan’. ³² Tlyu ca cha’ re ’in Ndiose, una ndyucuin’ cha’ re lo’on huan lo’o cha’ ’in Crixtu lo’o cha’ ’in laa. ³³ Can’ cha’ cuinta scaan ’huan ne’ qui’yu, chu’hui yuhue rin’ huan ’in nten ’huan tsaña’an ntsu’hui yuhue rin’ huan ’huan. Cui’ ncuaña’an ’huan ne’ cuna’an ntsu’hui cha’ cu’ni rsuun huan ’huan tloo nten ’huan.

¹ Nu suhue, tucuan huan cha’ ’in stin huan siyana ncuaña’an ntsu’hui cha’ cu’ni huan lo’o cha’ Ni X’na na. ² Cu’ni rsuun huan ’huan tloo sti huan lo’o jyi’an huan, cha’ re mxtya culo Ndiose nu ljyan lo’o cha’ tsu’hue ’na, ³ siyana ca tsu’hue chu’hui tieen huan, lo caja sca chelyuu nu tucuin ’huan. ⁴ ’Huan nu lca ne’ cula, a xcuen huan ’in sñe’ huan lo’o cha’ nu tyucuin’ huan, siyana cu’ni cu’un huan ’in can’ lo’o cha’ tiaa ’in Ni X’na na, lo jyi’in huan ’in bra tsi’i ña’an cu’ni. ⁵ A cuinta ’huan nu lca msu, tucua huan cha’ nu tyucui’ x’na huan, cu’ni rsuun huan ’huan tloo can’ lo su’hua yuhue rin’ huan tñan ngui’ni huan lo’o sca carsya nu lñi, siyana cuinta ’in Crixtu ngui’ni huan tñan can’, ⁶ una tsi’i tsalja ndun ti x’na huan tun rin’ huan cu’ni huan tñan, ta siyana quinu tsu’huen huan lo’o can’, siyana lo’o lyigaa tieen huan cu’ni huan cha’ nu ndyca ri’ Ndiose tsaña’an ’ni sca msu ’in Crixtu. ⁷ Tsu’hue ntsu’hui tieen huan cu’ni huan tñan, cu’ni huan cuinta siyana tñan ’in Ni X’na na ngui’ni huan lo tsi’i tñan ’in nten chelyuu. ⁸ Siyana cua jlyo rin’ huan cua ña’aan tñan tsu’hue nu ngui’ni na, Ni X’na na nxtucui ni cha’ tsu’hue can’, stu’hua ña’an ndi’in cha’ ’in nu lca msu nu cua msi’i ne’ ’in, lo’o nu ngui’ni tñan cha’ ’in ti. ⁹ A cuinta ’huan nu lca x’na msu, tsu’hue ti cu’ni huan lo’o can’, a lyca cha’ tyucuin’ huan tla cha’ lo’o ne’, siyana cua jlyo rin’ huan sca X’na tin huan lo’o ne’, ni nu ndi’in la ni’ cuaan, lo cuinta cha’ ’in ni scaña’an ti ngui’ni ni ’tna ’in nten chelyuu. ¹⁰ Xca cha’ ’huan ta’an na, tsa tyun huan lo’o cha’ ’in Ni X’na na, lo tya’an lo’on huan cha’ cuiya’ nu tlyu ’in ni. ¹¹ Cun’ huan cha’ cuiya’ ’in Ndiose siyana ca tyun tiyaan huan bra nu ndyca ri’ ne’ xña’an quiñilyo’o ’huan. ¹² Siyana a xuun na lo’o ta’an nten na, siyana lo’o scaxca cui’in nu ndlo tñan, lo’o nu cuaan la cha’ cuiya’ ndia ’in, lo’o lyigaa cui’in nu ndlo tñan se’en lyca cha’ a tsu’hue loo chelyuu re, ta nu nda’an ni’ cuaan. ¹³ Can’ cha’ tyucuan huan lyigaa cha’ cuiya’ ’in Ndiose, siyana ata loon huan bra ljyan cha’ a tsu’hue, lo tsa ndun huan bra cua mdijin huan lyigaa lo’o cha’. ¹⁴ Ndeña’an ntsu’hui cha’ tyun tsa huan, scan’ siin’ huan lo’o cha’ nu lñi, tucun huan jyan tieen huan lo’o lyigaa cha’ tsu’hue, ¹⁵ chu’hui quina quiyan’ huan, lo tyun tiyaan huan tsa yucuin’ huan cha’ tsu’hue ’in Crixtu tsaña’an ntsu’hui cha’ cu’ni chu’hue ne’ cha’ ’in ne’ lo’o Ndiose. ¹⁶ Cha’ nu ndun loo lati, xñi tsu’huen huan tyucuan nu nducua yaan’ huan, cui’ cha’ nu nguiaña’an rin’ huan, lo ca nsuhuin’ huan lyigaa quii’ nu nduguun ne’ xña’an. ¹⁷ Su’huan huan na quen huan, cui’ cha’ nu ndlo laa ’huan, lo tyucua espada ’in Espíritu yaan’ huan nu lca squicha’ Ndiose. ¹⁸ Lyigaa braa tyucui’ huan lo’o Ndiose lo’o lyigaa lo’o cha’, a cula’ tin’ huan jñan huan ’in ni lo’o cha’ cuiya’ ’in Espíritu, ncuaña’an tsa quiñan huan ndii rin’ huan, a ca ndaja rin’ huan jñan huan ’in ni lo’o cha’ ’in lyigaa ta’an na. ¹⁹ A cuinta jñan huan ’in Ndiose lo’o cha’ ’yan, siyana taa la ni cha’ nu tyucuin’ lo’o nu lyigaa tieen, quilyo scuan lan cha’ tsu’hue ’in Crixtu nu yu’hui catsi’ ’in Ndiose, ²⁰ cui’ cha’ nu nda’an yucuin’ lo’o cha’ ’in ni, lo lo’o cha’ re ndycan’ lo’o cadena, una jñan huan ’in Ndiose siyana ca tyucuin’ cha’ ’in ni tsaña’an nu ntsu’hui cha’ tyucuin’. ²¹ Siyana ca jylo rin’ huan ña’an ndi’in cha’ ’yan, can’ cha’ Tíquico tsaa se’en ndi’in huan lo taa rsuun lyigaa cha’ re, cui’ sca ta’an na nu ndyu’hui cuiya’ ran’ ’in, lo lñi ndi’in cha’ ’in lo’o tñan ’in Ni X’na na. ²² Nde cha’ msu’huan ’in tsaa se’en ndi’in huan, siyana ca jylo rin’ huan ña’an ndi’in cha’ ’hua, lo ncuaña’an taa la cha’ tnu tiee ’huan. ²³ Stina Ndiose lo’o Ni X’na na Jesucristo cu’ni ni cha’ tyi’in tsu’hue lyigaa ta’an na, a cuinta cu’ni ni cha’ chu’hui cha’ tsu’hue ’in scaxca lo’o cha’ nu nguiaña’an ri’. ²⁴ Cui’ Ndiose taa ni cha’ tsu’hue nu chu’hui ni’ carsya ’in tsalca nu chiñi ca tsu’hue ntsu’hui tiee lo’o Ni X’na na Jesucristo. Amen.