COLOSENSES

COLOSENSES

¹ Na’ Pablo, lo’o cha’ cuiya’ ’in Ndiose nga’an tñan Jesucristo ’yan tsa yucuin’ cha’ tsu’hue ’in ni, lo tsatlyu lo’o ta’an na Timoteo ca’an tñan hua sca quityi re ’huan, ² ’huan ta’an na nu ndi’in quichen Colosas, lyigaa nu cua mdo’o hui ’in Crixtu nu nguiaña’an ri’ ’in ni. Stina Ndiose lo’o Ni X’na na Jesucristo taa ni cha’ tsu’hue nu chu’hui ni’ carsya ’huan, lo cu’ni ni cha’ tyi’in tsu’huen huan. ³ Bra ndyucui’ hua lo’o Ndiose, Sti Ni X’na na Jesucristo, ndyaa hua xu’hue ’in ni cha’ huan, ⁴ siyana cua yna hua cha’ snu ña’an nguiaña’an rin’ huan ’in Crixtu Jesús, a cuinta ntsu’hui cha’ tsu’hue ’huan lo’o lyigaa ta’an na. ⁵ Siyana nducua tloon huan cha’ nu cua mxtya Ndiose nu ntsu’hui cha’ caja ’huan la ni’ cuaan, tsaña’an cha’ nu cua ngune ’huan, cha’ nu lñi nu lca cha’ tsu’hue ’in Jesucristo. ⁶ Lo mdiyaan na se’en ndi’in huan tsaña’an cua nguitsa yu’hui na sa tyucui chelyuu, nguia ngui’ni na, lo nguilu na tsaña’an ndi’in cha’ ’huan ti tsan nu ngune ’huan, lo ca jylo rin’ huan snu ña’an tlyu a’ tsu’hue ’in Ndiose, ⁷ cui’ cha’ nu ngulu’u Epafras ’huan, nu ta’a ngui’ni hua tñan ’in Ndiose nu ndyu’hui cuiya’ ri’ hua ’in, nu tsu’hue ngui’ni tñan ’in Crixtu ljan huan, ⁸ ndaa rsuun lo’o hua snu ña’an tlyu cha’ tsu’hue ntsu’hui ’huan lo’o Espíritu ’in Ndiose. ⁹ Can’ cha’ ti bra yna hua cha’ ña’an ndi’in huan, a ndla ti hua tyucui’ hua lo’o Ndiose lo njñan hua siyana nde lyee la qui’yan huan cuinta tsaña’an nu lca tiee ni, ncuaña’an ca jylo rin’ huan lo ca tyucui la cha’ tiaa ’huan lo’o cha’ nu ’in ni, ¹⁰ siyana tya’an lo’o huan sca chelyuu nu luhui tsaña’an ndyca ri’ Ni X’na na, cuna huan ña’an nu quinu tsu’hue tiee ni lo’on huan lo’o lyigaa lo’o cha’, ncuaña’an ca tycan’ loo chelyuu ’huan lo’o tñan tsu’hue nu ngui’ni huan, lo qui’yan la huan cuinta ña’an ndyca ri’ Ndiose. ¹¹ Ncuaña’an caja la juersa ’huan lo’o cha’ cuiya’ ’in ni tsaña’an juersa nu ndyo’o la ni’ cuaan, siyana chu’hui cha’ tlyu ri’ ’huan lo ta loon huan lo’o cha’ nu ndijin huan, ¹² tsu’hue ntsu’hui tieen huan tyaa huan xu’hue ’in Stina Ndiose, ni nu ndaa cha’ cuiya’ caja cha’ tsu’hue ’na, cui’ cha’ nu taa ni ’in lyigaa nu cua mdo’o hui ’in ni, nu nda’an loo xaa ’in ni. ¹³ Ngulo laa ni ’na se’en msñi su’hua cha’ tla ’na, lo cua mxtya ni ’na tsu’ se’en ndlo Sñe’ ni tñan, nu tca’a lati ’in ni, ¹⁴ siyana msu’hua lyiya’ qui’ya ’na lo’o tne, lo mdo’o laan na. ¹⁵ Cui’ ni lca ni ngulucuin ca Ndiose, cui’ Ndiose nu a tucui lyiji ña’an tloo, lo scati can’ lca nu ndun loo lati nu ndlo tñan ’in lyigaa lo’o cha’. ¹⁶ Siyana lo’o cha’ ’in ni nguiaa’ lyigaa loo na nu ndi’in ni’ cuaan lo’o loo chelyuu re, na nu tycan’ lo’o na nu a tycan’, lyigaa tucui nu nducua se’en ndlo tñan, nu ndia cha’ cuiya’ ’in, siyana cuaan la tñan lyi’ya, lo’o ndyca bsya, lyigaa cha’ re nducua quiya’ na lo’o ni, a cuinta siyana quinu tsu’hue tiee ni. ¹⁷ Cua’ ndi’in ni bra nu ti lyiji tsaa’ lyigaa loo na, lo lo’o cha’ cuiya’ ’in ni ti nguia quiñan lyigaa lo’o cha’. ¹⁸ Cui’ ni lca ni que ’in ta’an na nu lca laa ’in ni, cua lca ndi’in ni ti culo, ni nu ndun loo lati nu mdyo’o qui’u laja ne’ ngujui, se’en nu ca tycan’ siyana scati ni lca ni nu ndun loo lati, ¹⁹ can’ cha’ lca tiee Stina Ndiose siyana ca Sñe’ ni tsaña’an lca ni yucui’ ca ni, ²⁰ lo lo’o ni caja ña’an quinu tsu’hue lyigaa lo’o cha’ tloo ni xiya’, cha’ nu ndyca loo chelyuu re lo’o la ni’ cuaan, cua nga’ni chu’hue ni cha’ can’ lo’o tne Sñe’ ni nu nguilu la loo cursi. ²¹ Cui’ ncuaña’an ’huan, ti culo tijyu’ ndyca huan sii’ Ndiose, na’an ti’i huan ’in ni, nga’ni huan tñan a tsu’hue, una ri nii ngujui ña’an nga’ni chu’huen huan cha’ ’huan lo’o ni, ²² cui’ lo’o cha’ nu ngujui Sñe’ ni, siyana tiya lo’o ni ’huan tloo Ndiose luhui tloon huan, a sca cha’ nducui ndyca’an ’huan, ni a nducui huan qui’ya, ²³ si tsa quiñan huan lo’o cha’ nu nguiaña’an rin’ huan, tsa ndun huan lo a tyo’o tsun’ huan lo’o cha’ tsu’hue ’in Crixtu, cha’ nu nducua tloon huan ti bra ngune ’huan, cui’ cha’ nu nda’an yucui’ ne’ sa tyucui chelyuu, lo’on na’ Pablo nda’an yucuin’ cha’ re. ²⁴ Tsu’hue ntsu’hui tieen ndijin ndi’i squi’yan huan, ncuaña’an quita’a ndi’i nu ntsu’hui cha’ tyijin tsaña’an mdijin Crixtu, lo’o cha’ ’in lyigaa nu nguiaña’an ri’ ’in ni nu lca laa ’in ni. ²⁵ Cui’ tñan can’ ngui’nin ri nii, tsaña’an tñan nu ndaa Ndiose ’yan nu cu’ni tsu’hue ’huan, siyana quilyo scua ylan cha’ ’in ni, ²⁶ cha’ nu ntsu’hui catsi’ ’in Ndiose ti s’ni la, a tucui nu ncua jlyo ri’ cha’ re, una ri nii ncua tycan’ na lo’o lyigaa nu cua mdo’o hui ’in ni. ²⁷ Lca tiee Ndiose quilyo scua yla ni cha’ re lo’o ne’, lo ca jylo ri’ snu ña’an tsu’hue lo tlyu xaa nu cua ngujui ’in ne’ gentil, cha’ nu yu’hui catsi’ can’, cui’ Crixtu nu ntsu’hui ni’ carsya ’huan, lo nducua tloon huan caja xaa ’in ni ’huan. ²⁸ Cui’ cha’ ’in ni lca nu nda’an yucui’ hua lo nsu’hua tiaa hua ’in lyigaa tucui, ndlu’u hua ’in ne’ tsaña’an cha’ tiaa ’in Ndiose, siyana tsa lo’o hua ’in lyigaa tucui tloo Ndiose lo’o sca cha’ tiaa nu tyucui lo’o Crixtu Jesús. ²⁹ Can’ cha’ cu’ni cuintan huan tñan re tsaña’an cha’ cuiya’ nu ndaa ni ’yan, lo lyee ngui’ni cha’ re ni’ carsya ’yan.

¹ Ndyca ran’ siyana ca jlyo rin’ huan snu ña’an cha’ nu ndijin squi’yan huan, a cuinta lo’o nu ndi’in quichen Laodicea, tsatlyu lo’o lyigaa nu a lyiji ña’an tloo ’yan, ² siyana caja la cha’ tnu tiee ’in ne’, ca sca cha’ ti ’in ne’ lo’o cha’ tsu’hue lca tiee ne’, ncuaña’an ca tyucui la cha’ tiaa ’in ne’, lo qui’ya ne’ cuinta snu ña’an tlyu cha’ nu yu’hui catsi’ ’in Stina Ndiose lo’o Crixtu, ³ lo lo’o Crixtu quija lyoo lyigaa lo’o cha’ tiaa se’en nu qui’yan na cuinta lyigaa cha’. ⁴ Nde cha’ ndyucuin’ lo’on huan siyana a caja nu quiñilyo’o ’huan lo’o xca lo’o cha’, ta siyana tsu’hue ndyucui’ ne’ lo’on huan. ⁵ Nisiya a ndi’in lo’on huan una carsya ’yan ndyca na lo’on huan, tsu’hue ntsu’hui tieen siyana jlyo ran’ cha’ tsu’hue ndi’in huan, tsa ndun huan lo’o cha’ ’in Crixtu nu nguiaña’an rin’ huan. ⁶ Can’ cha’ tsaña’an nu ndyucuan xu’huen huan ’in Ni X’na na Jesucristo, cui’ ncuaña’an chu’huin huan chelyuu sca cha’ ti ’huan lo’o ni, ⁷ tsa tyun huan lo tsa quiñan lan huan calun huan lo’o ni, a cuinta lo’o cha’ nu nguiaña’an rin’ huan, xtyan huan ’huan lo’o cha’ can’ tsaña’an nu cua nga’ni cha’an huan, lo tyaan huan xu’hue ’in Ndiose lyigaa braa. ⁸ Xñi huan cuinta siyana a caja nu quiñilyo’o ’huan lo’o scaxca cha’ tiaa ’in nten chelyuu, cha’ nu a sca cuinta ntsu’hui, tsaña’an ndyca ri’ cha’ nu cua ntsu’hui ’in ne’, cha’ nu ndyca loo chelyuu re, nu a ndyucua ta’a lo’o cha’ ’in Crixtu. ⁹ Siyana Crixtu cui’ ña’an ndyca ri’ Ndiose ndyca ri’ ni, ¹⁰ can’ cha’ a sca cha’ nlyiji ’huan lo’o Crixtu, ni nu lca que ’in lyigaa nu ndia cha’ cuiya’ ’in lo’o lyigaa nu ndyca bsya. ¹¹ A cuinta lo’o cha’ ’in ni ncua circuncida ’huan, una tsi’i lo’o juersa ’in nten chelyuu, siyana lo’o cha’ cuiya’ ’in ni mscuan tloon huan lyigaa cha’ a tsu’hue nu ntsu’hui ni’ carsya ’huan, ncuaña’an ncua circuncida ’huan lo’o Crixtu. ¹² Bra mducua tyan huan ngujuin huan tsatlyu lo’o ni, cui’ ncuaña’an bra mdyo’o qui’u ni, lo’on huan mdyo’o qui’un huan, siyana yaña’an rin’ huan siyana mdyo’o qui’u ni lo’o cha’ cuiya’ ’in Ndiose. ¹³ Nu ncua ti culo a ndia chelyuu ’huan lo’o qui’ya nducuin huan, a lyiji xcuan tloon huan lyigaa cha’ a tsu’hue nu ntsu’hui ni’ carsya ’huan, una ndaa ni sca chelyuu ’huan lo’o Crixtu bra nga’ni ni cha’ tlyu ri’ ’huan lo’o lyigaa qui’ya ’huan, ¹⁴ ncuaña’an msi’yu co’ ni lyigaa cha’ nu nguinu scua, siyana ndlo qui’ya na ’na, scaxca cha’ nu nducui ndyca’an ’na, una ngatyen ni cha’ can’ bra mjyi’in ca’an ni ’na loo cursi, ¹⁵ ngulaa ni cha’ cuiya’ ’in lyigaa nu ndlo tñan, ndaa ni cha’ jyu’u ’in can’ tloo lyigaa tucui, lo nga’ni ni cana ’in la loo cursi. ¹⁶ Can’ cha’ a cu’ni cuinta ’an huan si caja nu tyucui’ lo’on huan lo’o na nu ndyucun huan, ta lo’o na nu ndi’yon huan, ta lo’o scaxca ta’a nu ngui’ni ne’, bra ndyucui coo’ cuine’ ta tsan nu nxtñan’ ne’, ¹⁷ lyigaa cha’ re ncua na sca xñii cha’ nu ntsu’hui cha’ caan, una cui’ cha’ ’in Crixtu ndyucui’ na. ¹⁸ A taan huan ya’ caja nu tyucui ndijin, ta tyucui’ siyana a tyucuan huan cuinta cha’ tsu’hue nu caja ’huan, siyana ndiaa ri’ ngui’ni rsuun ’in tloo nten lo ngui’ni tnu ’in angajle, nguiten yu’hui lo’o cha’ nu a lyca ña’an, tyucua cha’ ti ngui’ni siye’ ’in siyana cuu’ cha’ tiaa ’in. ¹⁹ A ngui’ni cuinta ’in Crixtu nu lca Que ’na, ni nu nga’ni cha’ ndlyun na tsaña’an nu ndyca ri’ Ndiose, naan seen ni ’na, ngui’ni sca ni ’na tsaña’an ndyca ri’ ’na lo’o se’en ndya cala na lo’o tyucuin na. ²⁰ ’Huan cua ngujuin huan tsatlyu lo’o Crixtu, cua ngujui huan lo’o tsu’ cha’ nu ndyca loo chelyuu re. ¿Ni cha’ ti nchu’hua se’en huan scaxca la cha’ nu ntsu’hui ’in nten chelyuu? ²¹ Ndyucui’ ne’: A cala’ na re, a cu ’in na, ni a ntsu’hui cha’ qui’ni ca’an ’in na, ²² (lca na cha’ tiaa ’in nten chelyuu tsaña’an nu ndlu’u ne’ lo ndlo ne’ tñan), xcui’ cha’ nu ntsu’hui cha’ tsatii cua ña’aan ndlyan’ na ’in na. ²³ Tsu’hue ’a cha’ tiaa lca na xque’ rin’ na tsaña’an nu ndyucui’ ne’ lo’o ña’an nu ’ni rsuun ne’, ticuii’ ne’ ndaa ne’ ndi’i ’in ne’, una tsi’i can’ cha’ nguiatii cha’ a tsu’hue lca tiee ne’.

¹ Lo siyana cua mdyo’o qui’un huan tsatlyu lo’o Crixtu, quinan huan cha’ nu ndyca la ni’ cuaan se’en nducua Crixtu tsu’ cueen ’in Ndiose. ² Tyucua tloon huan cha’ nu ndyca la ni’ cuaan, lo tsi’i cha’ nu ndyca loo chelyuu re. ³ Cu’ni huan cuinta siyana cua ngujuin huan, chelyuu ’huan cua ntsu’hui na yaa’ Crixtu tsatlyu lo’o Ndiose. ⁴ Bra nu caan Crixtu, ni nu lca chelyuu ’huan, tsatlyu ca tycan’ huan loo xaa ’in ni. ⁵ Can’ cha’ cu’ni tyiin huan lyigaa cha’ a tsu’hue nu ntsu’hui ni’ carsya ’huan: Cha’ nu nguiten yu’hui ne’ lo’o cuilyo’o nten ta lo’o ña’an nu ti, lyigaa lo’o cha’ cuu’, cha’ nu nxcui ri’ ne’, cha’ nu a tsu’hue nu lca tiee ne’, a cuinta lo’o cha’ nu nxcui ri’ ne’ cha’ cuilyiya’, lo stu’hua ña’an ndi’in cha’ re bra ngui’ni tnu ne’ ngulucuin. ⁶ Lo’o cha’ re Ndiose taa ni ndi’i ’in ne’, lyigaa nu lye’ ri’, ⁷ lo nde chelyuu nu yu’huin huan ti culo bra mda’an ngui’ni huan cha’ can’. ⁸ Una cha’ re ngüijlya rin’ huan: Cha’ nsin’ ri’, cha’ nu ndyucuen tiquen’ huan, cha’ a tsu’hue, cha’ nu nducua yuhue’ ta’an huan, cha’ nu a tsu’hue. ⁹ A tyucuin’ ’an huan cha’ cuiñi lo’o ta’an huan, siyana cua mscuan tloon huan chelyuu cula nu yu’huin huan ti culo, ¹⁰ lo cua ndyucuan huan sca chelyuu nu cui, cuinta sca tsan nguia ndyca cui la cha’ tiaa ’huan, ncuaña’an ca chu’hui lyoon lan huan ña’an cha’ ’in Ndiose, ni nu ndaa chelyuu ’na. ¹¹ lo’o cha’ re scaña’an ti ntsu’hui lyoo lyigaa tucui: Ne’ Israel, ne’ quita, nu ncua circuncida ’in lo’o nu a ncua na ’in, nu nga’ni cha’an lo’o nu a nga’ni cha’an, nu lca msu nu cua msi’i ne’ ’in lo’o nu ngui’ni tñan cha’ ’in ti, siyana Crixtu scati ni lca ni nu ndun loo, lo ndi’in ni lo’o lyigaa tucui. ¹² chu’huin huan chelyuu tsaña’an ’ni sca nu cua mdo’o hui ’in Ndiose, cua msuhui ni ’huan lo ndyu’hui cuiya’ ri’ ni ’huan, can’ cha’ ca ’tna ri’ ta’an huan lo’o lyigaa tieen huan, cu’ni huan tsu’hue lo’o ta’an huan, lo’o rsuun ña’an cu’ni huan, ndi’ya ti tyi’in cha’ ’huan, a cuinta chu’hui cha’ tlyu ri’ ’huan. ¹³ si ntsu’hui nu nsu’hua qui’ya ta’a, ta loon huan ’in can’ lo cu’ni huan cha’ tlyu ri’ ’in. Tsaña’an nga’ni Crixtu cha’ tlyu ri’ ’huan, ncuaña’an cu’ni huan cha’ tlyu ri’ ’in ta’an huan. ¹⁴ Cha’ nu lyee lati ndun loo chu’hui cha’ tsu’hue ’huan lo’o ta’an huan, siyana can’ cha’ nu nda yaa’ ndyca sca cha’ ti ’huan. ¹⁵ Ndiose cu’ni ni cha’ tyi’in tsu’huen huan lo taa huan ya’ culo ni tñan ’huan, can’ cha’ msi’ya ni ’huan siyana tsatlyu ca sca cha’ ti ’huan lo quinu tsu’hue tieen huan lo’o ni. ¹⁶ Tyaan huan ya’ cha’an yu’hui squicha’ Crixtu ni’ carsya ’huan, culu’u huan ’in ta’an huan lo’o lyigaa lo’o cha’ tiyaa, lo taan huan cha’ tnu tiee ’in, cula lo’on huan ’in Ni X’na na lo’o lyigaa tieen huan, ncuaña’an tyaan huan xu’hue ’in ni lo’o jyiin, lo’o salmo, himno, lo’o coro. ¹⁷ Lyigaa tñan nu cu’ni huan ta cha’ nu tyucuin’ huan, cu’ni huan ’in na lo’o cha’ cuiya’ ’in Ni X’na na Jesús, ncuaña’an ntsu’hui cha’ tyaan huan xu’hue ’in Stina Ndiose lo’o ni. ¹⁸ ’Huan ne’ cuna’an, tucua huan cha’ ’in cuilyo’on huan siyana ncuaña’an ndyca ri’ Ni X’na na. ¹⁹ Cui’ ncuaña’an ’huan ne’ qui’yu, chu’hui cha’ tsu’hue ’huan lo’o nten ’huan, lo tsi’i la xnan cu’ni huan lo’o can’. ²⁰ A cuinta ’huan nu ti suhue ti lo’o lyigaa loo cha’ tucua huan ’in ne’ cula ’huan, siyana ncuaña’an ndyca ri’ Ni X’na na. ²¹ ’Huan nu lca nten cula, a su’hua huan cha’ nsin’ ri’ tiee sñe’ huan siyana a ñu’un ri’ can’. ²² Cui’ ncuaña’an ’huan nu lca msu, tucuan tñan nu tyucui’ x’na huan, tsi’i tsalja ndun ti can’ tun rin’ huan cu’ni huan tñan ta siyana quinu tsu’huen huan lo’o can’, siyana lo’o lyigaa lca tieen huan cu’ni huan tñan siyana ntsu’hui sca cha’ chen ’huan tloo Ndiose. ²³ Lyigaa tñan nu cu’ni huan, cu’ni huan ’in na lo’o lyigaa tieen huan, siyana lo’o cha’ ’in Ni X’na na ngui’ni huan ’in na, lo tsi’i lo’o cha’ ’in nten chelyuu. ²⁴ Siyana cua jlyo rin’ huan Ni X’na na ntsu’hui cha’ taa ni cha’ tsu’hue nu caja ’huan, siyana lo’o cha’ ’in Crixtu ni nu lca X’na huan ngui’ni huan tñan can’. ²⁵ Una nu cu’ni cha’ a tsu’hue ticui’ cha’ a tsu’hue ca squiya’ can’, siyana scaña’an ti ntsu’hui cha’ ca cuiya’ cha’ ’in lyigaa nten.

¹ Cui’ ncuaña’an ’huan nu lca x’na msu, cu’ni huan tsu’hue lo’o msu ’huan tsaña’an nu nga’an cha’, siyana cua jlyo rin’ huan lo’on huan ntsu’hui sca X’na huan la ni’ cuaan. ² Tsa quiñan huan tyucuin’ huan lo’o Ndiose, tyun tiyaan huan lo’o cha’ can’ lo tyaan huan xu’hue ’in ni. ³ A cuinta jñan huan ’in ni lo’o cha’ ’hua, siyana taa Ni X’na na cha’ cuiya’ tyucui’ hua squicha’ ni, siyana chu’hui lyoo ne’ cha’ nu ntsu’hui ndyucun, cui’ cha’ ’in Crixtu, can cha’ ntsu’huin na’an tyucuan, ⁴ siyana ca quilyo scua lan cha’ re tsaña’an nu nga’an cha’ tyucuin’. ⁵ A cuinta lo’o cha’ tiaa chu’huin huan chelyuu tloo nten nu a nguiaña’an ri’, cuna huan ña’an nu tyucuin’ huan lo’o ne’ laja nu ti ndijyi braa. ⁶ Lo’o cha’ tiaa ña’an tyucuin’ huan, tsaña’an ndyca ri’ sca na nu yu’hui teje’ ’in, lo ncuaña’an cuna huan ña’an xcuen huan ’in ne’ cuinta scaa ne’. ⁷ ta’an na Tíquico, nu ndyu’hui cuiya’ rin’ na ’in, quitsa’ ’huan tsaña’an ndi’in cha’ ’yan, lca sca ta’a ngui’ni na tñan lo tsu’hue ’ni tñan ’in Ni X’na na. ⁸ Can’ cha’ msu’huan ’in tsaa se’en ndi’in huan siyana ca jylo rin’ huan ña’an ndi’in cha’ ’hua, lo taa la cha’ tnu tiee ’huan, ⁹ a cuinta lo’o Onésimo nga’an tñan ’in, ticui’ ta’a quichen tyin huan, nu ndyu’hui cuiya’ ran’ ’in, lca sca ta’an na nu lñi ndi’in cha’ ’in, cui’ quitsa’ ’huan lyigaa cha’ nu ndyca nde re. ¹⁰ Aristarco nu ta’a ntsu’huin na’an tyucuan, ndyucui’ cha’ ’huan. Lo’o Marcu sñe’ ta’a ngula Bernabé ndyucui’ cha’ ’huan, cua yucuin’ lo’on huan cha’ ’in Marcu, si tsaa se’en ndi’in huan tyucuan xu’huen huan ’in. ¹¹ A cuinta Jesús, nu ndyucui’ ne’ lo’o lca Justo, ndyucui’ cha’ ’huan, lo tsalca nu nda yaa’ ’yan lo’o tñan ’in Ndiose sna ne’ Israel ca lca nu nda’an yucui’ tsaña’an ntsu’hui cha’ culo ni tñan ’in nten, cui’ lo’o ne’ ndiji la cha’ tnu tiee ’yan. ¹² Lo’o Epafras nu lca msu ’in Crixtu ndyucui’ cha’ ’huan, ticui’ ta’a quichen tyin huan. lo’o lyigaa tiee njñan ’in Ndiose lyigaa braa cha’ huan, siyana tsa tyun huan lo ca tyucui la cha’ tiaa ’huan, tucuan huan lyigaa cha’ nu ndyca ri’ Ndiose. ¹³ Ndaan rsuun cha’ ’in snu ña’an lyee ntsu’hui yuhue ri’ ’huan, tsatlyu lo’o nu ndi’in quichen Laodicea lo’o quichen Hierápolis. ¹⁴ A cuinta lo’o Lucas, nu ’ni rmiyu, ndyucui’ cha’ ’huan, nu ndyu’hui cuiya’ rin’ na ’in. Lo’o Demas ndyucui’ cha’ ’huan. ¹⁵ Cui’ ncuaña’an tyucui’ chan’ huan ’in nu ndi’in quichen Laodicea cuinta cha’ ’hua, tyucui’ chan’ huan ’in Ninfas lo’o nu nguio’ ti’in se’en ndi’in. ¹⁶ Bra tyi yucui’ huan quityi re se’en nguio’ ti’in huan, ca’an tñan huan ’in na quichen Laodicea siyana tyucui’ ne’ ’in na. Cui’ ncuaña’an quityi nu ndyucuan la quichen Laodicea, lo’on huan ntsu’hui cha’ tyucuin’ huan ’in na. ¹⁷ Tyucuin’ huan lo’o Arquipo siyana cu’ni cuinta tñan ’in Ni X’na na nu cua ndaa ni ’in. ¹⁸ Na’ Pablo, nde ndyucuin’ chan’ ’huan lo’o cha’ nu nga’an lo’o yaan’. Xu’hua rin’ huan ’yan se’en ntsu’huin na’an tyucuan. Cha’ tsu’hue ’in Ndiose quinu lo’on huan. Amen.