2 TIMOTEO

¹ Na’ Pablo, lo’o cha’ cuiya’ ’in Ndiose nga’an tñan Jesucristo ’yan tsa yucuin’ cha’ tsu’hue ’in ni, ña’an ntsu’hui cha’ caja sca chelyuu ’na lo’o Crixtu Jesús. ² Nde nga’an tñan sca quityi ’in, Timoteo, nu’huin lca ña’an ndyca ri’ sca sñen’ nu tca’a lati ’yan, ndyca ran’ siyana Stina Ndiose lo’o Ni X’na na Jesucristo taa ni cha’ tsu’hue nu chu’hui ni’ carsya ’in, ca ’tna ri’ ni ’in, lo cu’ni ni cha’ tyi’in tsu’hue. ³ Lyigaa ya’ ndyucuin’ lo’o Ndiose tla lo’o titsan, nxu’hua ran’ ’in, lo ndyaan xu’hue ’in ni, cui’ ni nu ca ’in tñan ngui’nin lo’o sca cha’ tiaa nu luhui, tsaña’an nu nga’ni nten cula ’yan. ⁴ Bra nxu’hua ran’ ña’an nguilu tyi’a quiloon, lca tieen siyana cua cuna’an ’in lo quinu tsu’hue lca tieen. ⁵ Nxu’hua ran’ snu ña’an nguiaña’an ri’ ’in Ndiose, una la nducua la yaña’an ri’ Loida nu lca jyi’an cula, cui’ ncuaña’an lo’o Eunice nu lca jyi’an, lo jlyo tsu’hue ran’ siyana lo’o nu’huin nguia ndyca’an cha’ re. ⁶ Can’ cha’ ri nii nxu’hua ri’ siyana ’ni cuinta cha’ tsu’hue ’in Ndiose nu cua ngujui ’in bra mxtyan yaan’ ’in. ⁷ Siyana Ndiose a ndaa ni cha’ tsu’hue can’ ’na, ta siyana xcutsen rin’ na, cui’ nu nde cu’ni tnu tieen na, chu’hui cha’ tsu’hue ’na lo xñi na cuinta ’na. ⁸ Can’ cha’ a ca jyu’u ri’ tyucui’ cha’ tsu’hue ’in Ni X’na na, ni a ca jyu’u ri’ lo’on ña’an nu ntsu’huin na’an tyucuan lo’o cha’ ’in Ndiose, siyana ca sca cha’ ti ’na tyijyin na ndi’i lo’o cha’ tsu’hue ’in Crixtu nu ndyucuin’ na, lo Ndiose ta yaa’ ni ’na lo’o cha’ re, ⁹ ni nu ngulo laa ’na lo msi’ya ni ’na siyana chu’huin na sca chelyuu nu luhui, una tsi’i siyana nde’en la tñan tsu’hue cua nga’ni na, siyana lo’o cha’ tsu’hue nu cua ngujui ’na lo’o Crixtu Jesús, cui’ cha’ re mxtya Ndiose bra nu ti lyiji tñan ni chelyuu. ¹⁰ Una cua mdyo’o scua yla cha’ re bra nu yaan Jesucristo, Ni nu Ndlo laa ’na, lo msi’yu co’ ni ndi’i nu ljyan lo’o cha’ ndija, nguilyo scua yla ni sca chelyuu nu a ntsu’hui ’a cha’ tsa tii, lo’o cha’ tsu’hue ’in Ndiose nu nguiaña’an rin’ na. ¹¹ Ngulo tun ni ’yan siyana tyucuin’ cha’ tsu’hue ’in ni lo’o ne’ gentil, nga’an tñan ni ’yan laja ne’ siyana culu’un ’in ne’. ¹² lo’o cha’ re ndijin ndi’i, una a jyu’u ran’ siyana jlyo ran’ ti ca ’in yaña’an ran’. Jlyo tsu’hue ran’ siyana ca ’in ni chu’hui ni cuinta tñan nu ndaa ni ’yan hasta braa tiaa tsan nu mxtya ni. ¹³ Tyucui ndyca’an cha’ nu lñi tyucui ña’an nu cua yucuin’ lo’o, cha’ nu nguiaña’an rin’ na, a cuinta chu’hui cha’ tsu’hue ’in lo’o ta’an na lo’o Crixtu Jesús. ¹⁴ lo’o cha’ cuiya’ ’in Espíritu nu Luhui ’in Ndiose nu ntsu’hui ni’ carsya ’na, xñi cuinta ’in lo’o tñan nu cua ndaa ni cu’ni. ¹⁵ Cua’ jlyo ri’ siyana mdo’o se’en lca Asia ngala yaa’ ’yan, cui’ Figelo lo’o Hermógenes. ¹⁶ Una su’hua yaa’ Ni X’na na ’in Onesíforo lo’o lyigaa nu ndi’in se’en ndi’in, siyana tyun ’a ya’ ndaa cha’ tnu tiee ’yan, a mjyu’u ri’ lo’on nisiya ndycan’ lo’o cadena, ¹⁷ siyana bra mdiaa quichen Roma mda’an nan ’yan loo tñan hasta nguija lyoon ’in. ¹⁸ Can’ cha’ Ni X’na na cu’ni ni cha’ caja cha’ tsu’hue ’in tsan nu quiaan ni xiya’. Snu ña’an nda yaa’ ’na bra mdi’in na quichen Efeso.

¹ Can’ cha’ nu’huin sñen’, su’hua juersa lo’o cha’ tsu’hue nu cua ndaa Crixtu Jesús ’in. ² Lyigaa cha’ nu cua ngune ’in yucuin’ tloo nten quina’an can’, cui’ ncuaña’an cu’ni cuinta ’in ’in ne’ nu lñi ndi’in cha’ ’in, siyana lo’o can’ ca culu’u ’in xca tucui. ³ Can’ cha’ ta loo tyijyin ndi’i tsaña’an ndyca ri’ sca sundaru nu tsu’hue ca ’in Jesucristo. ⁴ Ni sca nu ngui’ni tñan sundaru, a nguiten yu’hui lo’o scaxca tñan, siyana nan ña’an nu quinu tsu’hue tiee x’na lo’o. ⁵ Ticui’ ncuaña’an lo’o sca nu ndijya, a ca cu’ni cana si a tijya ña’an nu ntsu’hui cha’. ⁶ Cui’ ncuaña’an ndyca ri’ sca ngui’ni tñan ni’ quixin’, la nducua la cu’ni tñan, la rcan’ xo’ na nu yta. ⁷ Culucua ri’ cha’ nu ndyucuin’ lo’o, lo Ni X’na na sla la ni cha’ tiaa ’in lo’o lyigaa cha’ re. ⁸ Xu’hua ri’ ’in Jesucristo, nten cuityi ’in David, ni nu mdyo’o qui’u can’, cui’ cha’ tsu’hue re ndyucuin’ ri nii, ⁹ lo lo’o cha’ re ndijin ndi’i, ntsu’huin na’an tyucuan tsaña’an ndyca ri’ sca nu nducun’, una cha’ ’in Ndiose a lo’o na ntsu’hui ndyucun na. ¹⁰ Can’ cha’ nda loon lo’o lyigaa ndi’i re, lo’o cha’ ’in lyigaa nu cua ngulosuhui Ndiose, siyana lo’o can’ tyo’o laa lo’o Crixtu Jesús, tyi’in can’ loo xaa ’in ni sa tyucui braa. ¹¹ Nde sca cha’ nu lñi: Si cua ngujuin na lo’o ni, ticui’ ncuaña’an ntsu’hui cha’ tyi’in na lo’o ni. ¹² Si tyijyin na ndi’i lo’o ni, ticui’ ncuaña’an ntsu’hui cha’ culon na tñan lo’o ni. Si xcuan tloon na ’in ni, ticui’ ncuaña’an xcuan tloo ni ’na. ¹³ Si naa re a nducua na cha’ nu ndyucuin’ na, una nducua ni tñan cha’ nu ndyucui’ ni, lo a cha’an ni sca cha’ nu cua mxtya ni. ¹⁴ Can’ cha’ xu’hua ri’ cha’ re, lo ta cueen ’in ne’ lo’o cha’ cuiya’ ’in Ni X’na na siyana a tyucui’ scaxca cha’ nu ndlo ri’ que ne’, siyana a la cu’ni tsu’hue, siyana nde cu’ni na ti’i lo’o nu quine ’in cha’ can’. ¹⁵ Cunan ña’an quinu tsu’hue tiee Ndiose lo’o, tsaña’an ndyca ri’ sca msu nu tsu’hue ngui’ni tñan, nu a sca cha’ jyu’u ri’, siyana mxñi tsu’hue cuinta ña’an ndyca ri’ nu lñi ’in Ndiose. ¹⁶ A cu’ni cuinta scaxca cha’ nu ndlo ri’ que ne’, cha’ nu a sca cuinta ntsu’hui, siyana nu ndyucui’ cha’ can’ nde lyee la nguia nguiten yu’hui lo’o cha’ a tsu’hue, ¹⁷ ncuaña’an nguia ndyucu luu na tsaña’an ndyca ri’ sca quicha, ña’an yato’o ’in Himeneo lo’o Fileto, ¹⁸ mdo’o tsu’ lo’o cha’ nu lñi ’in Ndiose, nda’an yucui’ siyana cua mdijin cha’ nu tyo’o qui’u nten, lo ngui’ni tantu ’in tucua sna nu cua yaña’an ri’ ’in ni. ¹⁹ Una cha’ nu mxtya Ndiose ngula ndi’in na, lo ndeña’an nguinu scua cha’ nu ndyucui’ na: Ni X’na na ndyu’hui lyoo ni tsalca nu nguiaa tsu’ ’in ni, lo nde xca cha’ ndyucui’ na: Lyigaa nu nguiaña’an ri’ ’in Crixtu tyo’o tsu’ loo cha’ a tsu’hue. ²⁰ Ña’an ndyca ri’ sca na’an tlyu, tsi’i lyigaa loo na ndi’in can’ nguiaa’ lo’o oro ta lo’o plata, siyana ntsu’hui nu nguiaa’ lo’o yca ta lo’o yuu, lo laja can’ ntsu’hui nu tca’a lati ’in ne’, lo ntsu’hui nu a cuinta ri’ ne’ lo’o. ²¹ Si ntsu’hui nu tyo’o tsu’ lo’o lyigaa cha’ a tsu’hue, ca can’ ña’an ndyca ri’ sca nu tca’a lati ’in Ni X’na na, lo cu’ni tsu’hue can’ ’in ni, lo ndun tiaa cu’ni lyigaa loo tñan tsu’hue. ²² Cui’ ncuaña’an ntsu’hui cha’ tyo’o tijyu’ loo scaxca cha’ tiaa nguna’ nu nda’an lo’o ti suhue ti, tyucui ndyca’an cha’ tiaa nu tsu’hue, cha’ nu nguiaña’an ri’, chu’hui cha’ tsu’hue ’in lo’o lyigaa tucui, lo tyi’in tsu’hue lo’o ne’ tsatlyu lo’o lyigaa nu nguiaña’an ri’ ’in Ni X’na na lo’o sca carsya nu luhui. ²³ A cu’ni cuinta scaxca lo’o cha’ nu ndlo ri’ que nten, cha’ nu a sca cuinta ntsu’hui, siyana cua jlyo ri’ xcui’ cha’ cusuun lyiya na. ²⁴ Siyana sca msu ’in Ni X’na na, a ntsu’hui cha’ tyi’in lo’o cha’ cusuun, siyana nde cu’ni tsu’hue lo’o lyigaa tucui, a cuinta tsu’hue ti culu’u ’in nten, lo chu’hui cha’ tlyu ri’ ’in, ²⁵ ncuaña’an lo’o cha’ tiaa tyucui’ lo’o nu ti’i ri’ ’in, tina’an taa Ndiose cha’ cuiya’ cha’an cha’ tiaa ’in can’, lo chu’hui lyoo cha’ nu lñi, ²⁶ lo tyo’o can’ se’en mxñi su’hua ne’ xña’an ’in.

¹ A cuinta ca jlyo ri’ siyana tiaa braa ntsu’hui cha’ caan tsan nu chen ndyucui. ² Nten can’ cha’ ’in ti ne’ tyucua tloo ne’, xcui ri’ ne’ tñi, tnu ’a cu’ni ne’ ’in ne’, cu’ni siye’ ne’, tucua yuhue’ ta’a ne’, a tucua ne’ cha’ ’in nten cula ’in ne’, a sca ’a cha’ ti tsu’hue ’in ne’, lo ni a tsaña’an ’a ri’ ne’ ’in Ndiose, ³ ni a chu’hui cha’ tsu’hue ’in ne’ lo’o ta’a ne’, a cu’ni ne’ cha’ tlyu ri’ lo’o siyana tla carsya ’in ne’, su’hua ne’ qui’ya ’in ta’a ne’ lo’o cha’ cuiñi, cu’ni ne’ ña’an nu ndyca ri’ ne’, tyucua yla ne’, lo xcuan tloo ne’ lyigaa cha’ tsu’hue, ⁴ tnan’ ne’ ticuii’ ta’a tsu’hue ne’, a cutsen ne’ cu’ni ne’ cua ña’an ti, cha’an yu’hui cha’ siye’ ’in ne’, lyee la cu’ni cuinta ne’ cha’ nu ndiaa ri’ ne’ que cha’ ’in Ndiose. ⁵ Cu’ni ne’ ’in ne’ siyana lyee nguiaña’an ri’ ne’ ’in Ndiose, una lo’o ña’an nu ngui’ni ne’ nxcuan tloo ne’ cha’ cuiya’ ’in ni. Can’ cha’ nu’huin ntsu’hui cha’ tyo’o tsu’ sii’ ne’ nu lca ncuaña’an. ⁶ Siyana ne’ re nan ne’ ña’an sten yu’hui ne’ scaxca na’an, lo quiñilyo’o ne’ ’in ne’ cuna’an nu chin’ la cha’ ’in, nu lyee ’a cua nga’ni qui’ya lo’o cha’ a tsu’hue nu lca tiee. ⁷ Nisiya lyigaa braa ngui’ni cha’an, una a ndi’ya cuinta ña’an cha’ nu lñi ’in Ndiose. ⁸ Tsaña’an nu nga’ni Janes lo’o Jambres mscuan tloo ’in Moisé, cui’ ncuaña’an nga’ni ne’ re nxcuan tloo ne’ cha’ nu lñi ’in Ndiose, siyana cuu’ cha’ tiaa ’in ne’, a cuinta mtnan’ ne’ cha’ ’in ne’ lo’o cha’ ’in Ndiose. ⁹ Una a tsa quiñan ne’ lyee la, siyana cha’ tantu can’ ’in ne’ tyo’o scua yla na tsaña’an yato’o ’in tyucuaa ne’ can’. ¹⁰ Una nu’huin cua nguia ndyca’an cha’ ’in Ndiose nu ndlu’un, chelyuu nu ntsu’huin, lo’o cha’ nu nducua tloon, ña’an nu nguiaña’an ran’, ña’an nu ntsu’hui cha’ tlyu ri’ ’yan, ña’an nu ntsu’hui cha’ tsu’hue ’yan, tsaña’an nda loon lyigaa lo’o cha’, ¹¹ lo jlyo ri’ ni snu ndi’i mdijin lyigaa se’en mda’an, ngujui nu ngutucui ndyca’an ’yan quichen Antioquía, Iconio lo’o Listra, scaxca ndi’i mdijin, una Ni X’na na, a siya ngala yaa’ ni ’yan. ¹² Cui’ ncuaña’an lyigaa nu ndyca ri’ chu’hui sca chelyuu nu luhui lo’o Crixtu Jesús, a ndijyin cha’ tyijyin can’ scaxca ndi’i. ¹³ Una tsalca nu nducun’ lo’o nu nda’an nilyo’o ’in nten, nde lyee la nguia nducunan’ yu’hui can’, siyana tsaña’an nu nilyo’o can’ ’in nten, cui’ ncuaña’an ndijyi nu ñilyo’o ’in. ¹⁴ Una nu’huin tsa quiñan lo’o cha’ nu cua nga’ni cha’an lo yaña’an ri’, a cu’ni tucua ri’ siyana cua jlyo ri’ ti ca ngulu’u ’in. ¹⁵ Siyana ti lyu’ nu’huin yu’hui lyoo quityi ’in Ndiose, lo ndaa na cha’ tiaa ña’an nu ntsu’hui cha’ tyo’o laa si tsaña’an ri’ ’in Crixtu Jesús. ¹⁶ Lyigaa cha’ nu nguinu scua loo quityi ’in Ndiose, cha’ tiaa ’in ni lca na lo cu’ni tsu’hue na ’na, ndlu’u na ’na, ’ni chu’hue na cha’ tiaa ’na, nda yaa’ na ’na ña’an ntsu’hui cha’ tyun lñi na, a cuinta ndlu’u na ’na ña’an ntsu’hui cha’ chu’huin na sca chelyuu nu luhui, ¹⁷ siyana ca tyucui cha’ tiaa ’in lyigaa sñe’ Ndiose, lo a sca cha’ tsa lyiji ’in can’ cu’ni lyigaa loo tñan tsu’hue.

¹ Jñan cha’ tsu’hue ’in tloo Ndiose lo’o Ni X’na na Jesucristo, ni nu ntsu’hui cha’ cu’ni cuiya’ cha’ ’in lyigaa nten tsatlyu lo’o ne’ cua ngujui, bra nu quiaan ni xiya’ lo culo ni tñan ’na. ² Can’ cha’ tyun tiaa lo tyucui’ cha’ tsu’hue ’in Ndiose lyigaa braa, cuna ña’an nu qui’ya ne’ cuinta lo’o cha’ re, tla cha’ tyucui’ lo’o ne’, a cuinta taa cha’ tnu tiee ’in ne’, cui’ ncuaña’an chu’hui cha’ tlyu ri’ ’in bra nu culu’u ’in ne’. ³ Siyana tiaa braa a cu’ni cuinta ’a ne’ cha’ nu lñi ’in Ndiose, siyana nde cuna ne’ scaxca nu culu’u ’in ne,’ siyana quine ’in ne’ cha’ nu ndyu’hui cuiya’ ri’ ne’, ⁴ tyo’o tsu’ ne’ lo’o cha’ nu lñi ’in Ndiose, lo tyucui ndyca’an ne’ scaxca cha’ nu ndlo ri’ que nten. ⁵ Una nu’huin xñi cuinta ’in lo’o lyigaa lo’o cha’, ta loo tyijyin scaxca ndi’i, tyucui’ cha’ tsu’hue ’in Ndiose, lo tucua cha’ nu cua ndaa ni ’in. ⁶ Siyana na’ cua ndyaan ’yan, ndyuhui tan ni braa cujui ne’ ’yan, cua ndyucui lucui’ la tsan nu ntsu’hui cha’ tyo’on loo chelyuu re. ⁷ Na’ cua nga’nin cana lo’o tñan re, cua nga’ni tyin tñan nu ntsu’hui cha’ cu’nin, lo mxu’hua se’en cha’ nu yaña’an ran’. ⁸ Ri nii ndyuhui tan cha’ tsu’hue nu taa Ni X’na na ’yan tsan nu cua mxtya ni, ni nu lca bse nu lñi ndi’in cha’ ’in, una tsi’i ’yan na’ ti, siyana lo’o lyigaa nu tsu’hue ntsu’hui tiee ndyuhui ta tsan nu quiaan ni xiya’. ⁹ Si ca caan se’en ndi’in nu ndla la, ¹⁰ siyana Demas ngala yaa’ ’yan lo mxtucui nde quichen Tesalónica, siyana lyee la lca tiee lo’o cha’ nu ndyca loo chelyuu re. Crescente nguiaa se’en lca Galacia, lo Tito nguiaa se’en lca Dalmacia. ¹¹ Xca ti Luca nguinu lo’on. Can lo’o ’in Marcu siyana tsu’hue nda yaa’ ’yan lo’o tñan ’in Ndiose. ¹² Tíquico cua nga’an tñan ’in nguiaa quichen Efeso. ¹³ Bra caan, qui’ya te’ ndycun’ braa tlya’, siyana mxnun ’in na quichen Troas ña’an ’in Carpo, cui’ya lyigaa quityi can’ lo’o nu ndun loo la can’. ¹⁴ Jantru cuityi tyucuan can’, lyee ’a ndaa cha’ nsin’ ri’ ’yan, una Ni X’na na su’hua lyiya’ ni ’in cua ña’aan tñan nga’ni. ¹⁵ Ncuaña’an nu’huin xñi cuinta ’in lo’o, siyana lyee ’a na’an ti’i ’na lo’o cha’ nu ndlu’un na. ¹⁶ Bra culo ncua cuiya’ cha’ ’yan tloo bsya, a tucui nda yaa’ ’yan, lyigaa tucui ngala yaa’ ’yan, una jñan ’in Ndiose siyana a cu’ni cuinta ni cha’ can’. ¹⁷ Una a ngala yaa’ Ni X’na na ’yan, siyana ndaa ni juersa yucuin’ ña’an ndyca ri’ nu tsu’hue ’in Ndiose, ncuaña’an yato’o ngune ’in lyigaa ne’ gentil. Cui’ ni ngulo laa ni ’yan tu’hua cuichi. ¹⁸ Ticui’ ncuaña’an culo laa Ni X’na na ’yan lo’o lyigaa la ña’an cha’ nu ti ljyan ’yan, lo cu’ni ni cuinta ’yan hasta nu tia’an la se’en nu ndlo ni tñan la ni’ cuaan, scati ni cu’ni tnu na ’in ni sa tyucui braa. Amen. ¹⁹ Tyucui’ cha’ ’in Prisca lo’o Aquila cuinta cha’ ’yan, a cuinta lo’o Onesíforo tsatlyu lo’o nu ndi’in se’en ndi’in ne’. ²⁰ Erasto nguinu quichen Corinto, lo Trófimo mxnun ’in quichen Mileto siyana ti’i. ²¹ Si ca caan laja nu ti lyiji qui’ya ti’in tlya’. Eubulo ndyucui’ cha’ ’in, a cuinta lo’o Pudente, Lino, Claudia, lyigaa ndyucui’ cha’ ’in. ²² Ni X’na na Jesucristo tyi’in ni lo’o sa tyucui braa, cui’ cha’ tsu’hue ’in ni quinu lo’on huan cuinta scaan huan. Amen.