2 TESALONICENSES

¹ Na’ Pablo, lo’o Silvano lo’o Timoteo, nga’an tñan hua sca quityi ’huan, ’huan ta’an na nu ndi’in quichen Tesalónica, ’huan nu cua ndi’in lo’o cha’ ’in Stina Ndiose lo’o Ni X’na na Jesucristo. ² Cui’ Stina Ndiose lo’o Ni X’na na Jesucristo taa ni cha’ tsu’hue nu chu’hui ni’ carsya ’huan, lo cu’ni ni cha’ tyi’in tsu’huen huan. ³ Lyigaa braa ndyaa hua xu’hue ’in Ndiose siya cha’ ’huan, ’huan ta’an na, siyana ncuaña’an ntsu’hui cha’ cu’ni hua, una lyee la siyana nguia nguilun huan lo’o cha’ nu nguiaña’an rin’ huan, a cuinta siyana lyee la ntsu’hui cha’ tsu’hue tieen huan cuinta scaan huan lo’o ta’an huan. ⁴ Can’ cha’ ndiaa ri’ hua ndaa hua rsuun ña’an ndi’in cha’ ’huan scaxca se’en nguio’ ti’in sñe’ Ndiose, siyana lyee nguiaña’an rin’ huan lo ndaa loon huan scaxca ndi’i ndijin huan, lo a ngui’ni na’an rin’ huan lo’o cha’ can’. ⁵ Lo’o cha’ re ca jylo rin’ na snu ña’an tsu’hue ngui’ni cuiya’ Ndiose cha’, siyana taa ni cha’ cuiya’ sten huan se’en ndlo ni tñan, lo lo’o cha’ re ndijin huan ndi’i ri nii, ⁶ una nga’an cha’ ’in Ndiose taa ni ndi’i ’in lyigaa nu ngui’ni cha’ ndijin huan ndi’i. ⁷ Ticui’ ncuaña’an cu’ni ni cha’ xtñan’ na lo’on huan, ’huan nu ndijin ndi’i ri nii, bra nu tyo’o Ni X’na na Jesús la ni’ cuaan tsatlyu lo’o angajle nu tla cha’ ’in, ⁸ lo ljyan ni ña’an ndyca ri’ sca quii’ ndyiquin, taa ni ndi’i ’in nu a yu’hui lyoo ’in Ndiose, nu a mducua cha’ nu ndyca ri’ Ni X’na na Jesucristo, ⁹ can’ nu tyijyin ndi’i sa tyucui braa, a ntsu’hui ’a xu’hue ’in can’ tloo Ni X’na na ta sten can’ loo xaa nu tlyu ’in ni, ¹⁰ bra nu quiaan ni xiya’, lyigaa nu cua mdo’o hui ’in ni cu’ni tnu ’in ni, lo cuhue rin’ na ’in ni, naa nu cua yaña’an ri’ ’in ni, (lo laja can’ ntsu’huin huan siyana yaña’an rin’ huan cha’ nu yucui’ hua). ¹¹ Can’ cha’ lyigaa braa njñan hua ’in Stina Ndiose lo’o cha’ ’huan, siyana cu’ni ni cha’ tsu’hue lo’on huan tsaña’an nu msi’ya ni ’huan, lo cu’ni huan lyigaa loo tñan tsu’hue nu lca tieen huan lo’o cha’ cuiya’ ’in ni, lo’o cha’ nu nguiaña’an rin’ huan, ¹² siyana cu’ni tnu huan ’in Ni X’na na Jesucristo, lo ncuaña’an ca tsu’hue chu’hui tieen ni lo’o huan, lo’o cha’ tsu’hue ’in Stina Ndiose lo’o Ni X’na na Jesucristo.

¹ Una tsaña’an ntsu’hui cha’ quiaan Ni X’na na Jesucristo, bra nu tsatlyu quio’ ti’in na lo’o ni, jñan hua cha’ tsu’hue ’huan, ’huan ta’an na, ² siyana a taan huan ya’ quiña ti’in huan, ta caja nu su’hua cha’ tieen huan, ta tyucui’ siyana Ndiose mxyucui’ ’in, ta ngujui nu ngüitsa’ ’in, ta tyucui’ siyana cua nga’an tñan hua sca quityi ’huan siyana cua mdiaa tsan quiaan Ni X’na na. ³ Ni scaña’an lo a taan huan ya’ caja nu quiñilyo’o ’huan, siyana a tsato’o cha’ re si tsi’i la nducua la tyo’o tsu’ ne’ sii’ Ndiose, bra ca tycan’ ne’ qui’yu nu lyee la ngui’ni qui’ya, nu ntsu’hui cha’ tyucuna’ carsya ’in. ⁴ Lo xtun ña’an ti’i ’in lyigaa loo na nu ndlu’u naa ne’ lca Ndiose, ta scaxca na nu ’ni tnu ne’, hasta tiaa ya’ titucua ni’ lyaa ’in Ndiose tsaña’an ndyca ri’ Ndiose, lo cu’ni ’in siyana lca Ndiose. ⁵ ¿Ta na a nxu’hua rin’ huan siyana cua yucuin’ cha’ re bra mdi’in lo’on huan? ⁶ Cua’ jlyo rin’ huan ni na nsñi ti’in ’in ne’, siyana tyo’o scua yla cha’ ’in ne’ bra nu tiaa tsan can’. ⁷ Siyana cha’ a tsu’hue can’ cua ndisna ndyca buna na, una ntsu’hui sca nu nsñi ti’in cha’ can’, ncuaña’an tsa quiñan na hasta bra nu a quine cueen nu nsñi ti’in ’in na. ⁸ La rcan’ tyo’o scua yla cha’ ’in ne’ lye’ ri’ can’, una Ni X’na na cujui ni ’in lo’o cha’ nu tyo’o tu’hua ni, lo cuijlyo ni ’in bra quiaan ni loo xaa ’in ni. ⁹ Nu lye’ ri’ can’ caan lo’o cha’ cuiya’ ’in Ne’ xña’an, cu’ni scaxca cha’ nu tnu se’en nu cuhue ri’ nten ’in lo’o cha’ cuiñi can’ ’in, ¹⁰ cu’ni lyigaa lo’o cha’ a tsu’hue se’en nu quiñilyo’o ’in tsalca nu ntsu’hui cha’ tyucuna’, siyana a tyucuan xu’hue ne’ cha’ nu lñi ’in Ndiose nu ca culo laa ’in ne’. ¹¹ Can’ cha’ Ndiose taa ni cha’ cuiya’ caja nu Quiñilyo’o ’in ne’, siyana tsaña’an ri’ ne’ cha’ cuiñi, ¹² ncuaña’an tsato’o tyucuna’ lyigaa ne’ nu a yaña’an ri’ cha’ nu lñi ’in Ndiose, siyana lyee la ncua lca tiee ne’ cha’ a tsu’hue. ¹³ Una huare’ lyigaa braa ntsu’hui cha’ tyaa hua xu’hue ’in Ndiose cha’ ’huan, ’huan ta’an na nu ndyu’hui cuiya’ ri’ Ni X’na na ’in, siyana ti lyiji tñan Ndiose chelyuu bra cua ngulosuhui ni ’huan siyana tyo’o laan huan, lo’o Espíritu nu nguia nsuhui ’huan, lo lo’o cha’ nu lñi nu nguiaña’an rin’ huan. ¹⁴ Cui’ lo’o cha’ re msi’ya ni ’huan lo ngune ’huan cha’ tsu’hue nu yucui’ hua, siyana caja ña’an sten huan loo xaa ’in Ni X’na na Jesucristo. ¹⁵ Can’ cha’ ’huan ta’an na, tsa tyun huan ’huan lo xu’hua se’en huan cha’ ’in Ndiose nu cua ngui’ni cha’an huan, lyigaa cha’ nu cua yucui’ hua, ta cha’ nu nga’an hua loo quityi. ¹⁶ Cui’ Ni X’na na Jesucristo lo’o Stina Ndiose, ni nu nga’ni ’tna ’na, ndaa ni cha’ tnu tiee ’na sa tyucui braa, lo lo’o cha’ tsu’hue can’ ’in ni nducua tloon na cha’ nu cua mxtya ni, ¹⁷ lo taa la ni cha’ tnu tiee ’huan cu’ni huan scaxca tñan tsu’hue, cui’ ncuaña’an lo’o cha’ nu tyucuin’ huan.

¹ Xca ti cha’, ’huan ta’an na, tyucuin’ huan lo’o Ndiose lo’o cha’ ’hua siyana ndla la quitsa yu’hui cha’ ’in Ni X’na na lyigaa se’en, lo caja nu tyucuan xu’hue ’in na tsaña’an nu yato’o ’huan, ² a cuinta jñan huan ’in ni siyana tyo’o laa hua yaa’ ne’ nducun’, siyana tsi’i lyigaa ne’ nguiaña’an ri’ ne’. ³ Una lñi ndi’in cha’ ’in Ni X’na na, cui’ ni xtun lñi ’huan siyana a tiun huan loo cha’ a tsu’hue. ⁴ Lo’o cha’ ’in Ni X’na na a ngui’ni tucua ri’ hua lo’on huan, jlyo ri’ hua siyana ngui’ni huan ña’an cha’ nu cua yucui’ hua lo’on huan, lo ti tsa quiñan la huan cu’ni huan ’in na. ⁵ Ni X’na na cu’ni ni cha’ chu’hui cha’ tsu’hue ni’ carsya ’huan lo’o cha’ tsu’hue ’in Ndiose, lo ta loon huan tsaña’an mdijin Crixtu. ⁶ Culo hua tñan ’huan, ’huan ta’an na, lo’o cha’ cuiya’ ’in Ni X’na na Jesucristo, siyana tyo’o tsun’ huan sii’ lyigaa nu a cha’ ’in, nu a xu’hua se’en ña’an cha’ nu cua ngulu’u hua. ⁷ Cuin’ huan jlyo rin’ huan ña’an ntsu’hui cha’ cu’ni cha’an huan ’hua, siyana a nda’an hua lo’o cha’ a tsu’hue ljan huan, ⁸ a tucui nu yucu xu’hue hua na ’in, siyana msu’hua hua juersa nga’ni hua tñan tla lo titsan siyana a ncua ri’ hua taa hua tñan ’huan lyee la. ⁹ Tsi’i siyana a nga’an cha’ ’hua jñan hua na nu cu hua, siyana nga’ni hua tñan siyana ncua ña’an cu’ni cha’an huan ’hua. ¹⁰ Nde cha’ mxnu hua bra mdi’in na lo’on huan: Si ntsu’hui nu a cu’ni tñan, a najo’o cu can’. ¹¹ Siyana yna hua cha’ ntsu’hui nu a se’en ña’an nda’an ljan huan, a ngui’ni tñan, siyana nda’an nguiten yu’hui lo’o na nu ’in xca tucui. ¹² Culo hua tñan lo jñan hua cha’ tsu’hue ’in can’ lo’o cha’ cuiya’ ’in Ni X’na na Jesucristo, siyana cu’ni tñan, lo ncuaña’an tyijyin yu’hui ’in. ¹³ Can’ cha’ ’huan ta’an na, a cula tin’ huan cu’ni huan tñan tsu’hue. ¹⁴ si ntsu’hui nu a xlya cu’ni cha’ nu ndyucui’ hua loo quityi re, xñi huan cuinta ’huan lo’o can’, lo ni a cu’ni ’a huan cuinta ’in, lo ncuaña’an ca jyu’u ri’. ¹⁵ Una tsi’i can’ cha’ ña’an ti’i huan ’in, siyana su’hua tiyan huan ’in can’ tsaña’an ndyca ri’ sca ta’an na. ¹⁶ Cui’ Ni X’na na Jesucristo nu ’ni cha’ ndyi’in tsu’huen na lyigaa braa lo’o lyigaa cha’ lo ni x’nan na chu’hui ni cuinta ’huan lyigaan huan. ¹⁷ Na’ Pablo, cha’ re nu nga’an lo’o yaan’ can, ndeña’an nsu’huan niin lyigaa quityi nu nga’an. ¹⁸ Cha’ tsu’hue ’in Ni X’na na Jesucristo quinu lo’on huan lyigaan huan. Amen.