2 PEDRO

2 PEDRO

¹ Na’ Simun Tyu nu lca msu ’in Jesucristo, ni nu nga’an tñan ’yan, ndyucuin’ chan’ ’huan, ’huan nu cua yaña’an ri’ cha’ tsu’hue ’in Stina Ndiose lo’o Jesucristo, ni nu Ndlo laa ’na, scaña’an ti ntsu’hui lyoo cha’ nu nguiaña’an rin’ na lo’on huan. ² Taa la ni cha’ tsu’hue nu chu’hui ni’ carsya ’huan, lo cu’ni ni cha’ tyi’in tsu’huen huan, lo ncua ña’aan qui’yan lan huan cuinta cha’ ’in Ndiose lo’o Ni X’na na Jesús. ³ Lo’o cha’ cuiya’ nu tlyu ’in ni ngujui lyigaa lo’o cha’ nu ’ni ’na, tsaña’an nu ntsu’hui cha’ chu’huin na sca chelyuu nu luhui, siyana cua yu’hui lyoon na ’in ni nu msi’ya ’na, siyana caja xaa ’in ni ’na lo’o cha’ tsu’hue ’in ni. ⁴ Cha’ re mxtyaa ni scaxca lo’o cha’ ’na, cha’ nu ndun loo lo ntsu’hui lyoo, lo’o cha’ re caja ña’an ca sca cha’ ti ’huan lo’o Ndiose, lo tyo’o tsun huan loo cha’ a tsu’hue nu ndyca loo chelyuu re. ⁵ Can’ cha’ nde lyee la su’huan huan juersa lo’o cha’ re, tsa quiñan lan huan lo’o cha’ nu nguiaña’an rin’ huan lo taan huan cha’ cuiya’ ca lñi cha’ ’huan, lo tsaña’an nguia ndyca lñi cha’ ’huan ncuaña’an qui’yan lan huan cuinta, ⁶ lo ña’an nguia ndi’yan huan cuinta ncuaña’an xñi la huan cuinta ’huan, lo ña’an nguia nsñi huan cuinta ’huan ncuaña’an chu’hui la cha’ tlyu ri’ ’huan, lo ña’an ntsu’hui cha’ tlyu ri’ ’huan ncuaña’an ca luhui la cha’ ’huan tloo Ndiose, ⁷ lo ña’an nguia ndyca luhuin huan ncuaña’an lyee la chu’hui yuhue rin’ huan ’in ta’an huan, lo tsaña’an ntsu’hui yuhue rin’ huan ’in ta’an huan ncuaña’an nde lyee la chu’hui cha’ tsu’hue ’huan scaxcan huan. ⁸ Si cu’ni cuinta can huan lyigaa cha’ re, tsi’i tyucua cha’ ti ndyucuan xu’huen huan ’in na, siyana nde lyee la ca tycan’ ña’an na loo chelyuu ’huan, lo ncuaña’an qui’yan lan huan cuinta cha’ ’in Ni X’na na Jesucristo. ⁹ Una nu a ’ni cuinta cha’ re, chin’ ’a se’en ndyucua tloo can’, lca can’ sca nu cuityin’ siyana cua ngüijlya ri’ ña’an nguten qui’ya ’in ti culoo. ¹⁰ Can’ cha’ ’huan ta’an na, nde lyee la cu’ni cuinta huan cha’ nu nguiaña’an rin’ huan ña’an msi’ya ni ’huan lo ngulosuhui ni ’huan, si cu’ni huan lyigaa cha’ re a ntsu’hui ’a cha’ tyo’o tsun’ huan rcan. ¹¹ Ncuaña’an caja cha’ cuiya’ sten huan lo’o lyigaa tieen huan se’en ndlo Ni X’na na Jesucristo tñan sa tyucui braa, ni nu Ndlo laa ’na. ¹² Can’ cha’ na’ a cula tin’ xu’huan ran’ huan cha’ re, nisiya cua jlyo rin’ huan lo tsa ndun huan lo’o cha’ nu lñi re, ¹³ siyana nga’an cha’ ’yan su’hua tiyaan ’huan lo’o cha’ re laja nu ti ndi’in loo chelyuu. ¹⁴ Jlyo ran’ siyana cua ndyucui lucui cha’ tyo’on loo chelyuu re, tsaña’an nu cua ngüitsa’ Ni X’na na Jesucristo ’yan. ¹⁵ Su’huan juersa tsaña’an nu ca ’yan, siyana xu’hua rin’ huan cha’ re lyigaa braa chun’ nde’en bra nu cua ngujuin. ¹⁶ Siyana cha’ nu cua ngulu’u hua ’huan lo’o cha’ cuiya’ ’in Ni X’na na Jesucristo lo’o ña’an nu ntsu’hui cha’ quiaan ni xiya’, tsi’i cha’ ngulo ri’ que hua lca na ta siyana quiñilyo’o hua ’huan, siyana na’an tloo ca hua ’in ni lo’o cha’ cuiya’ ’in ni. ¹⁷ Bra nu msñi ni cha’ cuiya’ nu ndaa Stina Ndiose ’in ni, ncua tycan ña’an ni lo’o sca xaa nu tsu’hue ña’an, lo cui’ cha’ ’in ni ngujui nu yucui’ la ni’ cuaan: Nde nu lca Sñen’ na’ nu tca’a lati ’yan, ndyijyin ya’ tsu’hue ntsu’hui tieen lo’o. ¹⁸ Ngune ’hua ngujui nu yucui’ la ni’ cuaan bra nu ndun hua lo’o ni loo qui’ya nu mdo’o hui can’ ’in ni. ¹⁹ A cuinta cua ndia quityi ’na se’en mxyucui’ Ndiose msu ’in ni ti s’ni. Tsu’hue ’a cha’ nga’ni cuinta huan cha’ can’, siyana lca na tsa ña’an ndyca ri’ sca quii’ nu ndyu’hui xaa tyucui tla hasta xtyi xaa ni’ carsya ’huan, ña’an ndyca ri’ sca cuila nu ndyucua bra tlya. ²⁰ Nde cha’ nu qui’yan na cuinta la nducua la, siyana ni sca cha’ nu nguinu scua loo quityi ’in Ndiose, a lca na cha’ tiaa ’in nten chelyuu, ²¹ siyana a yaan cha’ can’ lo’o cha’ cuiya’ ’in nten, siyana nu cua mdo’o hui ’in Ndiose nga’an scua cha’ re tsaña’an nu mxyucui’ Espíritu nu Luhui ’in Ndiose ’in ne’.

¹ Tsaña’an ngujui nu yucui’ cha’ cuiñi laja nten nu mdi’in ti s’ni, cui’ ncuaña’an caja nu culu’u cha’ cuiñi se’en ndi’in huan, tuhue ti sten cha’ cuiñi nu culo tsu’ ’huan, lo tsato’o xcuan tloo can’ ’in Ni X’na na, ni nu ngulo laa ’in, ncuaña’an xo tucua can’ yuhue’ chun’ nu cuijlyo ’in sa ntsu’hui. ² Quina’an ’a nten tyucui ndyca’an cha’ nu a tsu’hue nu cu’ni can’, squi’ya cha’ can’ caja nu tucua yuhue’ tucuiin nu lñi ’in Ndiose, ³ lo siyana lyee lca ’in can’ lo’o tñi, cuna can’ ña’an nu cujui’ na ndi’in ’huan lo’o cha’ cuiñi can’. Una ti s’ni ’a nducui ndyca’an yuhue’ ’in can’ lo cua tyucua ti na ’in, a mdijyin cha’ tyucuna’ can’. ⁴ Siyana Ndiose a nga’ni ni cha’ tlyu ri’ ’in angajle nu nga’ni qui’ya, siyana msu’hua ni ’in can’ loo quii’, lo msu’hua ndyucun ni ’in sca se’en tla, can’ quinu yu’hui hasta nu ca cuiya’ cha’ ’in. ⁵ Cui’ ncuaña’an nten nu mdi’in ti s’ni, a nga’ni ni cha’ tlyu ri’ ’in ne’, siyana mdi’ya ni sca quio tnu nu ngüijlyo ’in nten nducun’ can’, una ngulo laa ni ’in Noé lo’o cati nu ndi’in se’en ndi’in, cui’ nu yucui’ cha’ tsu’hue ’in Ndiose. ⁶ A cuinta ngulo ni yuhue’ ’in quichen Sodoma lo’o Gomorra, ngüijlyo ni ’in quichen can’ hasta nguinu na xtyi jyii ti, lo cha’ re ca jylo ri’ nten tsaña’an ntsu’hui cha’ tsato’o ’in nu nducun’. ⁷ Una ngulo laa ni ’in Lot, nu ngutucua cha’ ’in Ndiose, lo ti’i ’a ntsu’hui tiee lo’o cha’ nu a tsu’hue nu ngui’ni nten can’, ⁸ (siyana can’ yaña’an ri’ ’in Ndiose lo mdi’in laja nten can’, ndyijyin ya’ ti’i ntsu’hui tiee siyana lyigaa braa na’an cha’ a tsu’hue nu ngui’ni ne’ lo ne ’in cha’ nu ndyucui’ ne’). ⁹ Una Ni X’na na jlyo ri’ ni ni ña’an culaa ni ’in nu nguiaña’an ri’ ’in ni bra ljyan scaxca cha’ ’in, lo jlyo ri’ ni ña’an taa ni ndi’i ’in nu a nguiaña’an ri’ ’in ni tsan nu cu’ni cuiya’ ni cha’ ’in can’, ¹⁰ una lyee lati lo’o nu nda’an lo’o cha’ a tsu’hue nu, nu nxcuan tloo ’in lyigaa nu ndia cha’ cuiya’ ’in, tnu tiee ne’ cu’ni ne’ cha’ nu ndyca ri’ ne’, ni a ntsen ne’ tyucui’ ca’an ne’ ’in nu ndaa Ndiose cha’ cuiya’ ’in la ni’ cuaan. ¹¹ Nisiya tlyu la cha’ cuiya’ ndia ’in angajle, una a nga’ni tiee tucua yuhue’ ’in nu nda’an lo’o cha’ cuiya’ tloo Ni X’na na, ¹² una ne’ can’ ndyucui’ ca’an ne’ cha’ nu a lyiji qui’ya ne’ cuinta, tsaña’an ndyca ri’ sca ’ni nu a ntsu’hui cha’ tiaa ’in nu ngula siyana quinu lo caja, lo ncuaña’an ntsu’hui cha’ tnan’ can’ ’in ticuii’. ¹³ Can’ cha’ caja ’in ne’ lo’o cha’ a tsu’hue nu ngui’ni ne’, lo ndia ri’ ne’ cu’ni ne’ cha’ nu ndyca ri’ ne’ cuinta scaa tsan. Cuu’ cha’ tiaa ’in ne’, a jyu’u ri’ ne’, lo a tsi’i ña’an cha’ ’in ne’ bra ndyucu ne’ lo’on huan stu’hua, ¹⁴ lyee lca tiee ne’ sten yu’hui ne’ lo’o ña’an nu ti, a ndla ti ne’ ngui’ni ne’ qui’ya, nxtyu ne’ ’in nu na’an ti ndi’in cha’ ’in loo qui’ya, siyana xcui’ cha’ a tsu’hue ntsu’hui ni’ carsya ’in ne’, lo lca ne’ nu nducua yuhue’ chun’. ¹⁵ Cua mdo’o tsu’ ne’ tucuiin nu lñi, nda’an ngunan’ yu’hui ne’ lo nguiaa ne’ tucuiin nu mda’an Balaam, sñe’ Beor, cui’ nu lyee ncua lca tiee chu’hui cana ’in lo’o cha’ a tsu’hue, ¹⁶ lo ngusun lo’o sca burra ’in ne’ lo’o cha’ a tsu’hue can’ ’in ne’, sca ’ni nu a ntsu’hui cha’ ndyucui’, una yucui’ ’in lo’o tsaña’an ndyucui’ sca nten, lo ngutucui ndijin ’in lo’o cha’ a tsu’hue can’ ’in ne’ nu nxyucui’ Ndiose ’in can’. ¹⁷ Ndyca ri’ ne’ can’ ña’an ndyca ri’ sca tyucu nu a ntsu’hui tyi’a, ta ña’an ndyca ri’ sca coo nu nguia lo’o cui’in ’in scaxca se’en, can’ nu ntsu’hui cha’ caja sca se’en nu lyee tla ’in, can’ chu’hui can’ sa tyucui braa. ¹⁸ Ndyucui’ ne’ cha’ nu a ntsu’hui lyoo, una cha’ siye’ nu ndyucui’ ne’ nan ne’ ña’an ñilyo’o ne’ ’in xca tucui lo’o cha’ a tsu’hue nu ntsu’hui tiee ne’, cui’ nu cua nguia ndo’o tsu’ lo’o cha’ a tsu’hue. ¹⁹ Ndyucui’ ne’ siyana a tucui nu culo tñan ’in can’, siyana ticuii’ ne’ ntsu’hui ndyucun ne’ lo’o cha’ a tsu’hue can’. Siyana caja nu quiñi lyo’o ’in siyana cua ntsu’hui can’ tuyaa’ xca tucui. ²⁰ Ni si sca nu cua mdo’o tsu’ lo’o cha’ nu ndyca loo chelyuu re, nu cua yu’hui lyoo ’in Ni X’na na Jesucristo, ni nu Ndlo laa ’na, si xiya’ xtucui can’ lo’o cha’ a tsu’hue, tsato’o chen la ña’an cu’ni can’ que ña’an ti culoo. ²¹ Tsu’hue lati si a yu’hui lyoo can’ tucuiin nu lñi, lo tsi’i nu xtucui xiya’ lo’o cha’ a tsu’hue, lo xcuan tloo cha’ nu luhui lati nu cua ndyucuan xu’hue. ²² Can’ nu ca ’in tsaña’an ndyucui’ sca cha’: Xni’ nxtucui ’in ndyucu ’in na nu cua yucuen ’in, cui’ ncuaña’an cuhue’, xiya’ nguiten ’in loo ngutsu’ nisiya cua mxcuta ne’ ’in ’in.

¹ ’Huan ta’an na nu ndyu’hui cuiya’ ran’ ’in, nde nu cua ndyca tucua quityi nga’an ’huan, tyucuaa quityi re scaña’an ti nsu’hua tiaan ’huan siyana ca lñi cha’ tiaa ’huan, ² lo xu’hua rin’ huan cha’ nu ngua’an nu mxyucui’ Ndiose ’in ti s’ni, lo’o tñan nu ngulo Ni X’na na, ni nu Ndlo laa ’na, cui’ cha’ nu ngulu’u ta’a mda’an ni. ³ Ca jylo rin’ huan cha’ re la nducua lati, siyana tiaa braa ntsu’hui cha’ caan scaxca nu xtyi lyo’o cha’ tsu’hue ’in Ndiose, lo cu’ni can’ ña’an nu ndyca ri’, ⁴ lo tyucui’: ¿La ncua cha’ nu cua mxtyaa ni siyana quiaan ni xiya’? Cua s’ni ngujui nten cula ’na, lo cui’ ña’an ti ndi’in chelyuu re ti bra nguiaa’ na. ⁵ A ndyca ri’ can’ cu’ni cuinta cha’ nu nguinu scua ti s’ni, siyana ni’ cuaan nguiaa’ na lo’o cha’ nu yucui’ Ndiose, cui’ ncuaña’an chelyuu re mdo’o na loo tyi’a lo ndi’in na squi’ya tyi’a, ⁶ cui’ ncuaña’an lo’o tyi’a ngüijlyo chelyuu ti s’ni. ⁷ Una ni’ cuaan lo’o chelyuu nu ndi’in ri nii, ticui’ lo’o cha’ cuiya’ ’in Ndiose ndi’in na, lo tsato’o squin na tiaa braa tsan nu cu’ni cuiya’ ni cha’ ’in nten, bra nu tyucuna’ lyigaa nu a nguiaña’an ri’ ’in ni. ⁸ ’Huan ta’an na nu ndyu’hui cuiya’ ran’ ’in, a lyica cha’ jlya rin’ huan cha’ re, siyana cha’ ’in Ni X’na na sca tsan lca na sca mii yjan, lo sca mii yjan lca na sca tsan ti ’in ni. ⁹ Nisiya ndiya’ Ni X’na na lo’o cha’ nu cua mxtyaa ni, tsi’i can’ cha’ ngüijlya ri’ ni tsaña’an ndyucui’ nten, siyana ntsu’hui cha’ tlyu ri’ ’in ni a ndyca ri’ ni tyucuna’ ni sca tucui, siyana ndyca ri’ ni siyana lyigaa tucui xtun ri’ qui’ya ngui’ni. ¹⁰ Una tsan nu quiaan Ni X’na na xiya’, tsato’o na tsa ña’an ndyca ri’ braa nguiten ne’ cuna bra tla, ni’ cuaan ntsu’hui cha’ quine na cueen bra jlyo na, chelyuu re squin na lo’o lyigaa na nu ndi’in ’in na. ¹¹ Si ncuaña’an ntsu’hui cha’ jlyo lyigaa na re, lyee la nga’an cha’ chu’huin huan sca chelyuu nu luhui tloo Ndiose, ¹² laja ndyuhui tan huan tsu’hue chu’hui tieen huan tia tsan nu cua mxtya Ndiose, cui’ bra nu ntsu’hui cha’ squin ni’ cuaan lo jlyo lyigaa na nu nducua ’in na, lo siya’ ti tsatii cha’ ’in na. ¹³ Una nare nducua tloon na cha’ nu cua mxtyaa ni, sca chelyuu nu cui lo’o ni’ cuaan se’en quinu scua sca cha’ cuiya’ nu lñi. ¹⁴ Can’ cha’ ’huan ta’an na nu ndyu’hui cuiya’ ran’ ’in, si ncuaña’an ndyuhui tan huan cha’ re, su’hua huan juersa lo xñi huan cuinta ña’an tyi’in huan, siyana quija lyoo ni ’huan luhui ti bra nu quiaan ni xiya’, ni sca cuu’ lo ni sca cha’ lo a nducui ndyca’an ’huan. ¹⁵ Qui’yan huan cuinta cha’ re: Ni X’na na ndyca ri’ ni siyana tyo’o laa nten, can’ cha’ ntsu’hui cha’ tlyu ri’ ’in ni. Cui’ ncuaña’an ta’an na Pablo, nu ndyu’hui cuiya’ rin’ na ’in, ticui’ cha’ re nga’an ’huan tsaña’an cha’ tiaa nu ndaa Ndiose ’in, ¹⁶ lyigaa quityi nga’an ticui’ cha’ re ndyucui’ na, lo ntsu’hui cha’ can’ tucui ña’an qui’yan na cuinta ’in na. Tsalca nu chin’ cha’ tiaa ’in ta na’an ndi’in cha’ ’in, nde ncha’an ne’ cha’ can’ tsaña’an nga’ni ne’ lo’o lyigaa la ña’an quityi ’in Ndiose, lo yato’o ntnan’ ne’ ’in ne’ lo’o cha’ can’. ¹⁷ Can’ cha’ ’huan ta’an na nu ndyu’hui cuiya’ ran’ ’in, siyana cua ngujui nu msu’hua tiaa ’huan lo’o cha’ re, xñi huan cuinta ’huan lo’o ne’ nducun’, a taan huan cha’ cuiya’ culo lqui ne’ ’huan lo’o cha’ cuiñi, tique’ tsato’o tyo’o tsun’ huan lo’o cha’ nu cua ntsu’huin huan. ¹⁸ Calun huan lo’o cha’ tsu’hue ’in Ni X’na na Jesucristo, ni nu Ndlo laa ’na, lo su’huan huan juersa chu’hui lyoon lan huan ’in ni. ’In scati ni ntsu’hui cha’ cu’ni tnu na, ti ri nii lo sa tyucui braa. Amen.