1 TIMOTEO

1 TIMOTEO

¹ Na’ Pablo, nu nga’an tñan Jesucristo ’in lo’o cha’ cuiya’ ’in Ndiose, Ni nu Ndlo laa ’na, tsatlyu lo’o cha’ cuiya’ ’in Ni X’na na Jesucristo, ni nu nducua tloon na ’in. ² Nde nga’an tñan sca quityi ’in, Timoteo, nu chiñi ca lca ña’an ndyca ri’ sca sñen’ nu nguiaña’an ri’ ’in Ndiose. Ndyca ran’ siyana Stina Ndiose lo’o Ni X’na na Crixtu Jesús taa ni cha’ tsu’hue nu chu’hui ni’ carsya ’in, ca ’tna ri’ ni ’in, lo cu’ni ni cha’ tyi’in tsu’hue. ³ Cui’ tsaña’an nu cua yucuin’ lo’o bra nu mdo’on ngui’an se’en lyi’ya loo Macedonia, siyana quinu quichen Efeso, lo tyucu’ lo’o cuinta sca ne’ siyana a culu’u ’a ne’ cha’ nu a ndyucua ta’a lo’o ña’an cha’ nu ndlu’un na. ⁴ Ni a quine ’a ’in ne’ scaxca cha’ nu ndlo ri’ que nten, cui’ ncuaña’an lo’o cha’ nu yu’hui ’in nten cula ’na, siyana lca na cha’ nu a tycan’ la nguia, ndyucui’ lo’o ne’ siya cha’ can’, ni a nda yaa’ na calu cha’ ’in Ndiose ña’an nu ntsu’hui cha’ tsaña’an rin’ na ’in ni, can’ cha’ quinu cuinta ’in cha’ re. ⁵ Nde cha’ ndyucuin’ lo’o siyana chu’hui cha’ tsu’hue ’na lo’o ta’an na lo’o sca carsya nu luhui, lo’o cha’ tiaa nu lñi, tsaña’an nu nguiaña’an rin’ na ’in Ndiose. ⁶ Siyana ntsu’hui nu cua mdo’o tsu’ loo cha’ re, lo nguia ndyca’an scaxca cha’ nu a ntsu’hui lyoo, ⁷ ndyca ri’ ca sca nu ndlu’u cha’ ’in lee, una a ndi’ya cuinta ña’an cha’ nu nxtya lo ni cha’ nu ndyucui’. ⁸ Lyigaan na cua jlyo rin’ na siyana lee nu mxnu scua Ndiose tsu’hue ’a na, si tsa ndyca’an na ’na ña’an nu ntsu’hui cha’. ⁹ Qui’yan na cuinta siyana lee can’ a nguinu scua na cha’ ’in nten nu tsu’hue, siyana cha’ ’in nten nu lye’ ri’ nu nducun’, nten qui’ya chelyuu nu a nguiaña’an ri’ ’in Ndiose, nu nxcuan tloo ’in ni lo ndyucui’ ca’an ’in ni, nu ndujui nten, lo’o nu ndujui ’in sti lo’o jyi’an, ¹⁰ a cuinta lo’o cha’ ’in nu nguiten yu’hui lo’o ne’ cuna’an, ta lo’o ta’a qui’yu, lo’o nu ndi’ya buna ’in ta’a nten, lo’o nten cuiñi, lo’o nu ngui’ni ti’ya ’in Ndiose bra ndyucui’ cha’ cuiñi, lo’o scaxca la ña’an cha’ nu a ndyucua ta’a lo’o cha’ nu lñi nu ndlu’un na, ¹¹ tsaña’an ndyca ri’ nu tsu’hue ’in Crixtu, cui’ cha’ nu tsu’hue lati ’in Ndiose, ni nu tlyu lati, lo mxnu ni cuinta ’yan siyana tyucuin’ cha’ re. ¹² Ndyaan xu’hue ’in Ni X’na na Crixtu Jesús, ni nu ndaa juersa ’yan, siyana msi’ya ni ’yan cu’ni tñan re ’in ni, ¹³ nisiya yucuin’ ca’an ’in ni ti culo, ngutucui ndyca’an ’in ni, cua ña’an ti yucuin’ lo’o ni. Una Ndiose ’tna ri’ ni ’yan siyana a ngüi’yan cuinta ña’an nu nga’nin bra ti lyiji tsaña’an ran’ ’in ni. ¹⁴ Una ngutsa’an yu’hui carsya ’yan lo’o cha’ tsu’hue ’in Ni X’na na, lo lo’o Crixtu Jesús ngujui ña’an yaña’an ran’ ’in ni, nga’ni ni cha’ siyana chu’hui cha’ tsu’hue ’yan lo’o nten. ¹⁵ Nde sca cha’ nu lñi lo a ntsu’hui cha’ cu’ni tucua rin’ na lo’o na: Crixtu Jesús yaan ni loo chelyuu re siyana culo laa ni ’in nten qui’ya chelyuu, lo na’ lcan nu lyee lati nducui qui’ya. ¹⁶ Can’ cha’ lyee la ’tna ri’ Ndiose ’yan, siyana ca tycan’ snu ña’an tlyu cha’ tsu’hue ntsu’hui ’in Jesucristo lo’on, can’ tyucua tloo lyigaa nten nu ntsu’hui cha’ tsaña’an ri’ ’in ni siyana caja chelyuu nu a tsatii ’a ’in ne’. ¹⁷ Can’ nu chiñi lca Ree sa tyucui braa, ni nu a ntsu’hui ’a cha’ tsa tii, ni a ca ña’an tloon na, cui’ Ndiose ni nu ndun loo lati lo tiaa la ni, scati ni ntsu’hui cha’ cu’ni tnu na sa tyucui braa. Amen. ¹⁸ Timoteo sñen’, cui’ cha’ re xnun cuinta ’in, su’hua juersa cu’ni tñan ’in Ndiose tsaña’an cha’ nu mxyucui’ ni ’in nu mjñan cha’ ’in ti culo, ¹⁹ cu’ni cuinta cha’ nu nguiaña’an ri’, xñi cuinta ’in lo’o sca cha’ tiaa nu luhui, siyana ntsu’hui nu cua mscuan tloo cha’ nu yaña’an ri’ lo nde nguna’ yu’hui can’, ²⁰ cui’ ña’an yato’o ’in Himeneo lo’o Jantru, una cua ndyaan ’in ne’ yaa’ Ne’ xña’an, siyana qui’ya ne’ cuinta lo a tyucui’ ca’an ’a ne’ ’in Ndiose.

¹ Ri nii tyucuin’ lo’o sca cha’ nu ndun loo lati, siyana a jlya ri’ ne’ jñan ne’ ’in Ndiose, tyaa ne’ xu’hue ’in ni, lo tyucui’ ne’ lo’o ni lo’o cha’ ’in lyigaa tucui, ² lo’o cha’ ’in ree, lo’o lyigaa la ña’an bsya nu ndlo tñan ’na, siyana ca tyi’in tsu’huen na, lo a sca la cha’ caan ’na, lo chu’huin na sca chelyuu nu luhui ña’an nu ndyca ri’ Ndiose. ³ Siyana cha’ re nu tsu’hue lo ndyu’hui cuiya’ ri’ Ndiose, ni nu Ndlo laa ’na: ⁴ Ndyca ri’ ni siyana lyigaa nten tyo’o laa ne’ lo qui’ya ne’ cuinta ña’an cha’ nu lñi ’in ni. ⁵ Siyana scati Ndiose ntsu’hui, lo scati nu ca tyo’o cha’ ’in nten tloo Ndiose, can’ nu lca Jesucristo. ⁶ Mdyaa ni ’in ni lo ncuaña’an msu’hua lyiya’ ni qui’ya ’in lyigaa nten, cui’ cha’ nu mdyo’o scua yla bra nu mdiaa tsan can’. ⁷ Cui’ cha’ re ngulo tun Ndiose ’yan, siyana tyucuin’ cha’ tsu’hue ’in ni, lo can sca nu mdo’o hui ca ’in ni, (Cristu jlyo ri’ ni siyana ndyucuin’ cha’ nu lñi), a cuinta can sca nu culu’u ’in ne’ gentil ña’an nu ntsu’hui cha’ tsaña’an ri’ ne’ cha’ nu lñi. ⁸ Ndyca ran’ siyana lyigaa ne’ qui’yu tyucui’ lo’o Ndiose lyigaa se’en, scuen yaa’ lo’o sca carsya nu lñi, lo tsi’i na scuen tique’ ta nsuun. ⁹ Cui’ ncuaña’an ne’ cuna’an xñi cuinta ña’an te’ ntsu’hui cha’ cuu’ ne’, tsi’i na cu’ni chu’hue ne’ que ne’ ndijyin ya’, ta lo’o xcui’ oro, ta lo’o na nu xaa, ta cuu’ xcui’ te’ nu ntsu’hui lyoo. ¹⁰ Siyana culu’u ne’ tña tsu’hue ngui’ni ne’, siyana ncuaña’an nga’an cha’ cu’ni ne’ cuna’an nu nguiaña’an ri’ ’in Ndiose. ¹¹ Lo’o rsuun ña’an cu’ni ne’ se’en nguio’ ti’in lo tyucua seen ne’. ¹² Siyana a taan cha’ cuiya’ culu’u ne’ ta culo ne’ tñan ’in ne’ qui’yu, siyana tyucua seen ne’. ¹³ Siyana la nducua ngañan Ndiose ’in Adán, chun’ nde’en can’ ngañan ni ’in Eva. ¹⁴ Tsi’i ’in Adán ngujui nu ngañilyo’o ’in, siyana ’in nu cuna’an can’, lo nga’ni ne’ qui’ya. ¹⁵ Una tyo’o laa ne’ cuna’an bra nu tyi’in sñe’ chelyuu, si cu’ni cuinta ne’ cha’ nu nguiaña’an ri’ ne’, si ntsu’hui cha’ tsu’hue ’in ne’ lo ntsu’hui ne’ sca chelyuu nu luhui lo’o rsuun ña’an.

¹ Nde sca cha’ nu lñi, lo si ntsu’hui nu ndyca ri’ chu’hui cuinta ’in ta’an na, sca tñan tsu’hue ’a lca tiee can’ cu’ni. ² Una nu chu’hui cuinta ’in ne’ ndyca ri’ sca nu ntsu’hui sca chelyuu nu luhui, a cuinta scati cuilyo’o, mxñi cuinta ’in, lo’o cha’ tiaa ’ni scaa cha’, rsuun ndi’in cha’ ’in, ndyucuan xu’hue nten nu ndiaa se’en ndi’in, lo ndlu’u cha’ ’in Ndiose, ³ tsi’i sca nu cu’hui, ta ndi’in nsuun, ta tsi’i ña’an ’ni lo’o tñi, siyana tsu’hue nten lca, nan ña’an nu tyi’in tsu’hue lo’o nten, lo a nducua tloo cha’ cuilyiya’. ⁴ A cuinta tsu’hue ’ni cuinta se’en ndi’in, nducua sñe’ lyigaa cha’ ’in, ⁵ (siyana si sca nu a ndyca ’in cu’ni cuinta se’en ndi’in, ¿ni ña’an ra ca chu’hui can’ cuinta ’in nu cua yaña’an ri’ ’in Ndiose?). ⁶ Tsi’i sca nu cuine’ tucuiin ’in Ndiose, ti tsato’o cu’ni siye’ lo tiuu loo qui’ya ña’an mdiu ne’ xña’an. ⁷ A cuinta lo’o nten nu a nguiaña’an ri’ ndyu’hui cuiya’ ri’ ’in, a ndijyi ña’an tyucui’ ne’ cua ña’an ti cha’ ’in, ta tiuu loo can’ ’in ne’ xña’an. ⁸ Ticui’ ncuaña’an nu ta yaa’ ni’ lyaa ndyca ri’ sca nu mxñi cuinta ’in, lñi ndi’in cha’ ’in, tsi’i sca nu cu’hui, ni a ’ni cua ña’an ti lo’o tñi, ⁹ si nchu’hua se’en cha’ nu nguiaña’an ri’, luhui cha’ tiaa ’in. ¹⁰ Una la nducua la xñi cuinta ’in si a sca cha’ nducui ndyca’an ’in, la rcan’ ca quinu ta yaa’ ’in ne’. ¹¹ Ticui’ ncuaña’an lo’o ne’ cuna’an nu ta yaa’ ni’ lyaa ndyca ri’ sca nu lñi ndi’in cha’ ’in, tsi’i nu nda’an lo’o cha’ ndyca ndyucui’, xñi cuinta ’in, lo nducua cha’in lyigaa lo cha’ tsu’hue. ¹² A cuinta nu nda yaa’ ni’ lyaa scati cuilyo’o, tsu’hue ’ni cuinta se’en ndi’in lo’o sñe’ tsatlyu lo’o lyigaa nu ndi’in se’en ndi’in. ¹³ Nu tsu’hue ’ni cuinta ni’ lyaa, nde lyee la chu’hui cuiya’ ri’ ne’ ’in, lo caja la cha’ tnu tiee ’in lo’o cha’ nu nguiaña’an ri’ lo’o Crixtu Jesús. ¹⁴ Nde nga’an tñan sca quityi ’in, siya lca tieen tsa’an se’en ndi’in ndla la, ¹⁵ una si ntsu’hui la ña’an tiyan’, nu’huin cua jlyo ri’ ña’an ntsu’hui cha’ cu’ni cuinta cha’ cha’ re lo’o lyigaa ta’an na, siyana tsatlyu lcan na laa ’in Ndiose, ni nu lu’u ca, nda’an lo’on na cha’ nu lñi ’in ni, lo a caja nu culo ntan ’na. ¹⁶ Nu chiñi s’ni cha’ re nu tlyu lati, nu nduhue rin’ na, lo nguiaña’an rin’ na: Ndiose yaan ni tsaña’an ndyca ri’ sca nten, lo’o cha’ cuiya’ ’in Espíritu nga’ni ni cana lyigaa lo’o cha’, na’an tloo angajle ’in ni, ngujui nu mda’an yucui’ cha’ tsu’hue ’in ni lo’o ne’ gentil, lo ngujui nu yaña’an ri’ ’in ni loo chelyuu re, ndyucuen ni la ni’ cuaan lo’o sca cha’ cuiya’ nu tlyu ’in ni.

¹ Una Espíritu ngüitsa’ yla siyana tiaa braa ntsu’hui nu tyo’o tsu’ lo’o cha’ cha’ tsu’hue ’in Ndiose, tsato’o quine ’in can’ ’in cui’in nu cuiñi, a cuinta lo’o scaxca cha’ nu ndlu’u cui’in xña’an, ² cui’ lo’o cha’ cuiñi nu nda’an yucui’ scaxca nu a lñi ndi’in cha’ ’in, siyana cua ndyucun cha’ tiaa ’in ne’. ³ Ndyucui ndijin se’en caja cuilyo’o nten, ndyucui’ siyana cua lca ti na ca cun na, cui’ na nu ndaa Ndiose tyucuan xu’hue lyigaa nu nguiaña’an ri’ ’in ni, nu cua ngüi’ya cuinta cha’ nu lñi. ⁴ Siyana lyigaa na nu msu’hua Ndiose, tsu’hue na, a nga’an cha’ xcuan tloon na ’in na, siyana tyucuan xu’huen na ’in na lo’o lyigaa tieen na, ⁵ lo lo’o cha’ ’in Ndiose bra ndyucuin’ na lo’o ni, nxnu luhui ni in’ na. ⁶ Si culu’u cha’ re ’in ta’an na, tsu’hue ’a nducua tñan ña’an cha’ ’in Jesucristo, lca sca nu ngutsa’an yu’hui lo’o cha’ nu luhui ’in Ndiose, cui’ cha’ nu ndlu’un na nu cua nducui ndyca’an na. ⁷ A lyca cha’ cu’ni cuinta scaxca cha’ nu ndlo ri’ que nten cula, cha’ nu a ntsu’hui lyoo, siyana su’hua juersa chu’hui sca chelyuu nu luhui tloo Ndiose. ⁸ Siyana nu lsa lo’o scaxca cha’ cuijya, chin’ ’a ña’an nda yaa’ cha’ can’, una si su’huan na juersa chu’huin na sca chelyuu nu luhui, tsi’i loo chelyuu ti re ta yaa’ na ’na, siyana cu’ni tsu’hue na ’na sa tyucui braa. ⁹ Nde sca cha’ nu lñi, lo ni sca tucui a ntsu’hui cha’ cu’ni tucua ri’ lo’o na. ¹⁰ Lo’o cha’ re nsu’huan na juersa, lo ndijin na ndi’i, siyana nducua tloon na ’in scati Ndiose nu lu’u ca, Ni nu Ndlo laa ’in lyigaa nten, tsalca nu nguiaña’an ri’ ’in ni. ¹¹ Lyigaa cha’ re ntsu’hui cha’ tyucui’ lo culu’u ’in nten. ¹² A taa ya’ caja nu xcuan tloo ’in nisiya lca nu suhue ti, siyana culu’u tñan ngui’ni tloo ta’an na lo’o ña’an nu ndyucui’, lo’o ña’an nu ’ni, ña’an nu ntsu’hui cha’ tsu’hue ’in, a cuinta lo’o sca carsya nu lñi, lo’o ña’an nu nguiaña’an ri’ ’in Ndiose, lo’o sca cha’ tiaa nu luhui. ¹³ Laja nu ti lyiji tia’an se’en ndi’in, chu’hui yuhue ri’ tyucui’ quityi ’in Ndiose tloo ta’an na, ta cueen ’in ne’ lo culu’u ’in ne’. ¹⁴ Cu’ni cuinta cha’ tsu’hue nu cua ngujui ’in bra nu mxyucui’ Espíritu ’in ne’ nu ntsu’hui cuinta ’in bra mxtya yaa’ ne’ ’in. ¹⁵ Chu’hui yuhue ri’ cha’ re, tsa quiñan cu’ni ’in na, siyana lyigaa tucui ca jylo ri’ ña’an nguia nguilu lo’o cha’ ’in Ndiose. ¹⁶ Xñi cuinta ’in, a cuinta lo’o cha’ nu ndlu’u. Tsa tyun lo’o cha’ re, si ncuaña’an cu’ni, caja ña’an tyo’o laa tsatlyu lo’o lyigaa nu quine ’in cha’ nu ndyucui’.

¹ A xun lo’o ’in nu lca nten cula, siyana tyucui’ lo’o can’ ña’an ndyca ri’lo’o sca sti, lo nu suhue la, cu’ni lo’o can’ ña’an ndyca ri’ sca ta’a ngula, ² ne’ cuna’an nu lca nten cula, tyucui’ lo’o can’ ña’an ndyca ri’ lo’o jyi’an, lo nu cuna’an ti cuine’ ti, tyucui’ lo’o can’ tsaña’an ndyca ri’ ta’a ngula, lo’o sca cha’ tiaa nu luhui. ³ Cu’ni cuinta ’in ne’ cuna’an nu chiñi ca nguinu cha’ yucui’ ti. ⁴ Una nu ti ndi’in sñe’ ta sñe’ ste’, can’ nu nga’an cha’ cu’ni cuinta ’in ne’ la nducua la, ncuaña’an ca xitucui can’ cha’ tsu’hue lo’o nten cula ’in, siyana cha’ re tsu’hue nu ndyu’hui cuiya’ ri’ Ndiose. ⁵ Ne’ nu chiñi ca nguinu cha’ yucui’ ti nu ndi’in scati, can’ nu nducua tloo ’in Ndiose, a ndla ti ne’ njñan ne’ lo ndyucui’ ne’ lo’o ni tla lo titsan. ⁶ Una si nda’an ne’ ña’an nu ndyca ri’ ne’, ni si lu’u ne’ una cua ngujui ne’. ⁷ Lyigaa cha’ re culu’u ’in ne’, siyana a caja nu tyucui’ cuaña’an ti cha’ ’in ne’. ⁸ Siyana nu a ntsu’hui cuinta ’in nu ndi’in se’en ndi’in, ni a ’ni cuinta ’in nu ndia se’en ndi’in, cua mscuan tloo can’ cha’ ’in Ndiose, nducua la ’ni can’ que ña’an ndyca ri’ sca nten nu a nguiaña’an ri’. ⁹ Una tsalca nu cua ntsu’hui sna yla yjan nu nguiaa nde loo, can’ nu nga’an cha’ tyucua nii loo quityi lo ta yaa’ ne’ ’in, si scati ne’ qui’yu ta’a mdi’in, ¹⁰ Si ndlu’u can’ tñan tsu’hue nu ngui’ni, si nga’ni cu’u can’ sñe’, ta nga’ni cuinta can’ ’in nu mdiaa se’en ndi’in, ta mjyi’an can’ quiya’ ta’an na, ta ndaayaa’ ’in nu ndijin scaxca ndi’i, si nga’ni can’ lyigaa loo tñan tsu’hue. ¹¹ Una tsalca nu ti cuine’ la nu nguinu cha’ yucui’ ti, a lo’o can’ tyucua nii loo quityi, siyana sa ntsu’hui ca ri’ caja nten ’in xiya’, lo tyo’o tsu’ can’ sii’ Crixtu, ¹² ncuaña’an xo tucua can’ qui’ya chun’ siyana a mdo’o lñi cha’ ’in lo’o cha’ nu cua mxtya. ¹³ A cuinta tisna tya’an scaxca na’an, lo tsi’i tsacan’ ti, siyana lo’o cha’ ndyca ndyucui’, sten yu’hui lo’o scaxca lo’o cha’, lo tyucui’ cha’ nu a nga’an cha’ tyucui’. ¹⁴ Can’ cha’ ndyca ran’ siyana tsalca nu ti cuine’ ti, nu nguinu cha’ yucui’ ti, tsu’hue la si caja cuilyo’o can’, tsu’hue ti cu’ni cu’u sñe’, cu’ni cuinta se’en ndi’in, rcan’ a caja ña’an tyucui’ ta’a cusuun na cua ña’an ti cha’ ’in. ¹⁵ Siyana ntsu’hui nu cua mdo’o tsu’ lo nducui ndyca’an can’ ’in Ne’ xña’an. ¹⁶ Ne’ cuna’an nu nguinu cha’ yucui’ ti can’, si ndi’in ta’a nu cua yaña’an ri’ ’in Ndiose, can’ nu nga’an cha’ chu’hui cuinta ’in ne’, lo tsi’i cuinta ’in ta’an na tyi’in can’, rcan’ caja ña’an ta yaa’ ne’ ’in ne’ cuna’an nu chiñi ca cha’ nguinu cha’ yucui’ ti. ¹⁷ Lo tsalca nu ntsu’hui cuinta ’in ta’an na, si na tsu’hue ngui’ni cuinta tñan ntsu’hui yaa’, can’ nu nga’an cha’ tucua lta xñi can’ squiya’, una lyee la ngui’ni ca’an cha’ re ’in nu ndlu’u lo’o nu ndyucui’ cha’ ’in Ndiose. ¹⁸ Siyana quityi ’in Ndiose ndyucui’ na: A su’hua huan quiso tu’hua bta bra ngui’ni ’in tñan. A cuinta ndyucui’ na: Sca msu nga’an cha’ ’in xñi squiya’. ¹⁹ Si caja nu su’hua qui’ya ’in nu ntsu’hui cuinta ’in ta’an na, a cu’ni cuinta cha’ can’, Si na a lo’o tucua sna nu taa rsuun cha’ can’. ²⁰ Una tsalca nu ti ngui’ni qui’ya, tla cha’ tyucui’ lo’o can’ tloo ta’an na, ncuaña’an chu’hui sca cha’ chen ’in ne’ lyigaa ne’. ²¹ Tloo Ndiose lo’o Ni X’na na Jesucristo, lo’o tloo angajle nu mdo’o hui ’in ni, jñan cha’ tsu’hue ’in siyana xu’hua se’en lyigaa cha’ re ña’an nu ntsu’hui cha’, lo ndyca ri’ siyana scaña’an ti ca lca tiee lo’o lyigaa tucui. ²² A lyca cha’ ndla ndsa xtya yaa’ ’in sca tucui, xñi cuinta siyana a tyo’o lo’o qui’ya ’in xca tucui. Chu’hui sca chelyuu nu luhui ti. ²³ A co’o ’a xcui’ tyi’a ti, una co’o chin’ viñu siyana lyigaa braa ndyca ti’i tiee. ²⁴ Ntsu’hui qui’ya nu cui’ bra ndyca tycan’ ña’an na nisiya ti lyiji ca cuiya’ cha’ ’in na. Una ntsu’hui qui’ya nu ndyo’o scua yla na chun’ nde’en. ²⁵ Ticui’ ncuaña’an lo’o cha’ tsu’hue, cui’ bra ndyca tycan’ na, lo si a tyo’o scua yla na cui’ bra, una tiaa braa ca tycan’ na siyana a ca chu’hui catsi’ na.

¹ Cui’ ncuaña’an lyigaa msu nu cua ntsu’hui x’na, ntsu’hui cha’ tucua can’ cha’ ’in x’na lo’o lyigaa lo’o cha’, rcan’ a caja ña’an tyucui’ ca’an ne’ ’in Ndiose ta lo’o cha’ nu ndlu’un na. ² Si x’na can’ lca nu nguiaña’an ri’, tsi’i siyana lca can’ sca ta’an na, ta can’ cha’ a caja nu tucua cha’ ’in, siyana nde lyee la chu’hui yuhue ri’ can’ cu’ni tñan ’in x’na. Siyana nu ndyucuan cuinta tñan can’ lca sca nu nguiaña’an ri’ lo ndyu’hui cuiya’ ri’ Ndiose ’in. Nde cha’ nu culu’u lo ta cueen ’in ne’. ³ Si ntsu’hui nu ndlu’u xca lo’o cha’ nu a ndyucua ta’a lo’o ña’an cha’ tsu’hue ’in Ni X’na na Jesucristo, ta lo’o ña’an cha’ nu luhui nu ndlu’un na, ⁴ can’ nu ngutsa’an yu’hui lo’o cha’ siye’ lo a sca cha’ jlyo ri’, cua ngujui nu ndyucui’ lo’o scaxca lo’o cha’ nu a ntsu’hui cuinta, can’ ndyucua suun lyigaa lo’o cha’ a tsu’hue: Cha’ cuita’an ri’, cha’ cusuun, cha’ nu nducua yuhue’ ta’a ne’, a cuinta cha’ nu ’ni tucua ri’ ta’a ne’, ⁵ ndyucui’ lyo’o ta’a ne’ scaxca ne’ siyana a luhui cha’ tiaa ’in ne’, ni a ntsu’hui lyoo ne’ cha’ nu lñi, ndyca ri’ ne’ ca cuilyiya’ ne’ lo’o cha’ ’in Ndiose, can’ cha’ tyo’o tsu’ lo’o nten nu lca ncuaña’an. ⁶ Siyana cha’ nu luhui ’in Ndiose lca na cha’ cuilyiya’ ’na, Si tsu’hue ntsu’hui tieen na lo’o na nu cua ndi’in ’na, ⁷ siyana a sca na mdiyan lo’on na loo chelyuu re, ticui’ ncuaña’an bra cajan na, a sca na ca cui’yan na. ⁸ Si ndi’in na nu ’ni tsu’hue ’na, si ndia sten’ na, quinu tsu’hue tieen na lo’o tsacan’ ti. ⁹ Una nten nu nducua tloo cha’ cuilyiya’, tiuu can’ loo qui’ya ta loo can’, ngutsa’an yu’hui carsya ’in ne’ lo’o cha’ cuita’an ri’ nu ’ni ti’i lo’o ne’, lo ndya’an lo’o na ’in ne’ se’en nu tyucuna’ ne’ siya’ ti. ¹⁰ Siyana ti suun lyigaa lo’o cha’ a tsu’hue lca cha’ nu nchucui ri’ ne’ tñi, lo’o cha’ can’ ntsu’hui nu cua mdo’o tsu’ lo’o cha’ tsu’hue ’in Ndiose, lo lyee ’a quina’an ndi’i mdijin ne’. ¹¹ Una nu’huin, nu ngui’ni tñan ’in Ndiose, tyo’o tsu’ loo lyigaa lo’o cha’ a tsu’hue, lo tyucui ndyca’an cha’ nu tsu’hue, cha’ nu luhui, lo’o ña’an cha’ nu nguiaña’an rin’ na, chu’hui cha’ tsu’hue ’in lo’o nten, chu’hui cha’ tlyu ri’ ’in, a cuinta lo’o rsuun cu’ni. ¹² Taa juersa cu’ni cana lo’o cha’ nu nguiaña’an ri’, cu’ni cuinta chelyuu nu a tsatii ’a, nu cua ngujui ’in ti bra msi’ya Ndiose ’in, cui’ bra nu ndaa rsuun ña’an yaña’an ri’ ’in ni tloo ta’an na. ¹³ Tloo Ndiose, ni nu ndaa chelyuu ’in lyigaa loo na, lo’o tloo Ni X’na na Jesucristo, ni nu tsu’hue yucui’ lo ndaa ni rsuun tloo Poncio Pilato, can’ cha’ jñan cha’ tsu’hue ’in: ¹⁴ Tsu’hue ti xu’hua se’en cha’ re, xñi cuinta siyana a tnan’ cha’ ’in hasta bra nu quiaan ni X’na na Jesucristo xiya’. ¹⁵ Ndiose cu’ni ni cha’ tsato’o cha’ re sca tsan nu cua mxtyaa ni, cui’ ni nu tlyu lati cha’ cuiya’ ntsu’hui ’in, siyana scati ni lca ni Ree nu tlyu lati, lo lca ni X’na lyigaa tucui, ¹⁶ scati ni lca ni sa tyucui braa, ndi’in ni sca loo xaa se’en nu a as ten ña’an nu ti, ni sca nten a lyiji ña’an ’in ni, ni a ntsu’hui cha’ ña’an ne’ ’in ni, scati ni cu’ni tnu na ’in ni lo culo ni tñan sa tyucui braa. Amen. ¹⁷ Tyucui’ lo’o nten nu cuilyiya’ siyana a cu’ni siye’ ne’, a tyucua tloo can’ cha’ cuilyiya’ ’in, siyana lca na cha’ cuiñi ti, una nde tyucua tloo can’ ’in Ndiose, ni nu lu’u ca, ni nu ndaa lyigaa loo na nu ’ni tsu’hue ’na hasta nu quinu tsu’hue tieen na. ¹⁸ Tyucui’ lo’o ne’ siyana ca cuilyiya’ ne’, una lo’o lyigaa loo tñan tsu’hue nu cu’ni ne’, a cuinta tyo’o cha’ tsu’hue tiee ne’ ta yaa’ ne’ ’in nu ’ni cha’ ’in, lo a cu’ni tiji ne’ lo’o na nu ndi’in ’in ne’, ¹⁹ ncuaña’an xu’hua se’en ne’ cha’ cuilyiya’ nu ta yaa’ ’in ne’ sa tyucui braa, lo cu’ni cuinta ne’ chelyuu nu a tsatii ’a. ²⁰ Nu’huin Timoteo, xñi cuinta tñan nu cua ntsu’hui yaa’, a cu’ni cuinta scaxca cha’ nu ndlo ri’ que ne’, cha’ nu a sca cuinta ntsu’hui, cui’ ncuaña’an lo’o cha’ nu ndlu’u ne’ nu ljyan lo’o cha’ cuiñi, ²¹ ntsu’hui nu nguia ndyca’an cha’ can’, lo cua mdo’o tsu’ lo’o cha’ nu nguiaña’an rin’ na. Cha’ tsu’hue ’in Ndiose quinu lo’o. Amen.