12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

1 PEDRO

1

1 Na’ Tyu nu nga’an tñan Jesucristo ’in, nde ca’an tñan sca quityi re ’huan, ’huan nu nguitsa yu’hui scaxca quichen se’en lyi’ya loo Ponto, lo’o Galacia, Capadocia, lo’o se’en lca Asia lo’o Bitinia. 2 Stina Ndiose ngulosuhui ni ’huan tsaña’an cha’ nu cua mxtyaa ni ti culo, lo’o cha’ cuiya’ ’in Espíritu ngusuhui ni ’huan, siyana tucuan huan cha’ ’in ni lo quinu luhuin huan lo’o tne Jesucristo. Taa la ni cha’ tsu’hue nu chu’hui ni’ carsya ’huan lo cu’ni ni cha’ tyi’in tsu’huen huan. 3 Tlyu ca cha’ tsu’hue ntsu’hui ’in Ndiose, Sti Ni X’na na Jesucristo, nga’ni ni ’tna ’na nga’ni ni cha’ ndyca cui chelyuu ’na siyana tyucua tloon na sca na nu cui, cui’ lo’o cha’ nu mdyo’o qui’u Jesucristo, 4 a cuinta siyana tyucuan xu’huen na cha’ tsu’hue nu cua ndi’in la ni’ cuaan, na nu caja ’na lo’on huan, sca na nu a ntsu’hui ’a cha’ tsatii, ni a ca cuu’ a na, 5 Lo’o cha’ nu nguiaña’an rin’ huan, Ndiose nsñi ni cuinta ’huan lo’o cha’ cuiya’ ’in ni, ncuaña’an caja ña’an tyo’o laan huan, lo ca tycan’ ña’an cha’ nu cua mxtya ni bra nu tsa tii cha’ nu ndyca loo chelyuu re. 6 Lo tsu’hue ntsu’hui tieen huan, nisiya ndijin huan scaxca ndi’i laja nu ti ndi’in huan loo chelyuu re. 7 Siyana ña’an ndyca ri’ oro, nisiya ndyu’hui na lo’o quii’ a nguia tii cha’ ’in na, una lyee la ntsu’hui lyoo cha’ nu nguiaña’an rin’ huan, lo bra cua mdijin huan scaxca ndi’i, caja nu cu’ni tnu ’in Ndiose lo tyaa xu’hue ’in ni tsan nu ntsu’hui cha’ quian Jesucristo xiya’. 8 Nisiya a lyiji ña’an tloon huan ’in ni, una lyee lca tieen huan ni, nisiya a tycan’ ni ri nii una nguiaña’an rin’ huan ’in ni, tsu’hue ’a ntsu’hui tieen huan, lo ni a jlyo ’a rin’ huan ni lyiji ña’an ti tyucuin’ huan siya cha’ re, 9 cui’ siyana cua tycan’ cha’ nu nguiaña’an rin’ huan tsaña’an ntsu’hui cha’ tyo’o laan huan. 10 Cui’ cha’ tsu’hue nu cua ndyucuan xu’huen huan re lca na cha’ nu yucui’ nu mxyucui’ Ndiose ’in ti s’ni, lo yaa nga’ni qui’i cha’ re tsaña’an nu ntsu’hui cha’ tyo’o laa nten, 11 lo’o cha’ tiaa nguinan cha’ re laja nu mxyucui’ Espíritu ’in Crixtu ’in ne’, tsaña’an nu ntsu’hui cha’ tyijyin Crixtu ndi’i, la rcan ca tycan ña’an cha’ cuiya’ nu tlyu ’in ni. 12 Nguilyo scua yla ni cha’ ’in ne’ siyana tsi’i cha’ ’in ne’ lca na, siyana cha’ nare lca na, una ri nii ngujui nu yucui’ cha’ re lo’on huan lo’o cha’ cuiya’ ’in Espíritu nu Luhui ’in Ndiose nu mdo’o la ni’ cuaan, sca cha’ nu hasta lo’o angajle ndyca ri’ ca jylo ri’. 13 Can’ cha’ tya’an lo’on huan sca cha’ tiaa nu tyucui, xñi huan cuinta ’huan, lo tyi’in tiaan huan lo’o cha’ tsu’hue nu caja ’huan bra nu quiaan Jesucristo xiya’. 14 Tsaña’an ndyca ri’ sñe’ Ndiose nu nducua cha’ ’in ni, a tya’an huan lo’o cha’ a tsu’hue tsaña’an mda’an huan ti culo, bra nu ti ndyucun cha’ tiaa ’huan, 15 siyana chu’huin huan sca chelyuu nu luhui tsaña’an ndi’in cha’ ’in ni nu msi’ya ’huan, lca ni sca nu luhui. 16 Siyana ndeña’an nguinu scua sca cha’ loo quityi ’in Ndiose: —Can huan sca nten nu luhui siyana na’ lcan ni nu luhui—. 17 Si ’huan ndlo naa huan ’in Ndiose lca ni Sti huan, ni nu scaña’an ti ngui’ni cuiya’ cha’ ’in nten cua ña’aan tñan ngui’ni ne’, can’ cha’ su’hua yuhue rin’ huan ña’an ntsu’hui cha’ chu’huin huan chelyuu laja nu ti ndi’in huan loo chelyuu re, 18 siyana cua jlyo rin’ huan ña’an mdo’o laan huan lo’o cha’ a tsu’hue, cui’ cha’ nu nga’ni cha’an huan ’in nten cula ’huan, una tsi’i lo’o na nu ntsu’hui cha’ tsatii, ta lo’o oro ta lo’o plata, 19 siyana lo’o tne Crixtu nu ntsu’hui lyoo ca, tsaña’an ndyca ri’ slya’ nu luhui lati, nu ni sca cuu’ lo a mda’an ’in, 20 ni nu cua mdo’o hui bra ti lyiji tsaa’ chelyuu, cua mdiaa tsan ncua tycan’ ña’an cha’ tsu’hue nu lca tiee ni lo’on huan, 21 squi’ya ni can’ cha’ nguiaña’an rin’ huan ’in Ndiose, ni nu nga’ni cha’ mdyo’o qui’u crixtu lo mscuen cuaan ni cha’ ’in can’, siyana ca tyuhuitan huan ’in Ndiose lo tsaña’an rin’ huan ’in ni. 22 Siyana cua nguhui carsya ’huan lo tucuan huan cha’ nu lñi, lo’o cha’ cuiya’ ’in Espíritu ’in ni ca chu’hui cha’ tsu’hue ’huan lo’o ta’an huan, lo tsi’i tyucua cha’ ti, lo’o lyigaa tieen huan chu’hui cha’ tsu’hue ’huan scaxcan huan, lo luhui cha’ tiaa ’huan, 23 siyana cua ndyca cui chelyuu ’huan, una tsi’i lo’o cha’ ’in nten chelyuu, siyana lo’o cha’ cuiya’ nu nguinu scua sa tyucui braa, squi’ya squicha’ Ndiose nu lu’u ca, nu a ntsu’hui cha’ tsatii. 24 Siyana ndeña’an ndyucui’ quityi ’in Ndiose: —Lyigaa nten lca ne’ ña’an ndyca ri’ quixin’, cha’ siye’ ’in ne’ ndyca ri’ na tsaña’an ndyca ri’ sca quee, quixin’ can’ nguityi na, lo quee can’ nguilu na, 25 una squicha’ Ni X’na na a ntsu’hui ’a cha’ tsatii na. Cui’ cha’ re lca na cha’ tsu’hue nu cua ngune ’huan—.

2

1 Can’ cha’ xcuan tloon huan lyigaa lo’o cha’ a tsu’hue, cha’ cuiñi, cha’ mayan, cha’ cuita’an ri’, lo’o cha’ ndyca ndyucui’. 2 Tsaña’an lca tiee cuhui’ cuine’ lo’o styi’, ncuaña’an ca lca tieen huan lo’o cha’ nu luhui ’in Ndiose, siyana ca calun huan lo tyo’o laan huan, 3 si cua jylo rin’ huan snu ña’an tlyu cha’ tsu’hue ’in Ni X’na na. 4 Can’ cha’ quinan huan ’in ni, ni nu lca sca quee nu lu’u, cui’ nu mscuan tloo nten chelyuu ’in, una lo’o cha’ ’in Ndiose lca can’ sca nu mdo’o hui ca nu ntsu’hui lyoo lati. 5 Cui’ ncuaña’an ’huan lcan huan sca quee nu lu’u, lo Ndiose cu’ni ni cha’ tsatlyu calun huan ña’an ndyca ri’ sca laa, lo can huan sca msu nu luhui ’in ni, siyana ca tsa lo’on huan sca lomstan nu ndyu’hui cuiya’ ri’ ni squi’ya Jesucristo. 6 Siyana ndeña’an nguinu scua xca cha’ loo quityi ’in Ndiose: —Ña’an huan, quichen Jerusalén xtyan sca quee nu nsñi tun na’an, nu mdo’o hui lo nu ntsu’hui lyoo lati, lo nu tsaña’an ri’ ’in can’, a tyo’o cha’ jyu’u ’in—. 7 Lca ni sca nu ndun loo lati ’huan, ’huan nu nguiaña’an ri’ ’in ni,una nu a nguiaña’an ri’ ’in ni lca ni ’in can’ tsaña’an ndyucui’ quityi ’in Ndiose: —Quee nu mscuan tloo cuityi na’an, ri nii lca na quee nu ndun lo la ti nu nsñi tun na’an.— 8 A cuinta ndeña’an ndyucui’ xca se’en: —Quee nu tyucua quiya’ ne’ ca na quee nu xtlyu ’in ne’—. Ndyucua na quiya’ ne’ siyana a nducua ne’ cha’ ’in Ndiose, siyana ncuaña’an tsan lo’o ne’. 9 Una ’huan lcan huan —quichen nu cua mdo’o hui ’in ni, lcan huan sca nten nu ’ni tsu’hue ’in ni nu lca Ree, lcan huan sca quichen nu luhui ’in ni, nten nu ndyu’hui cuiya’ ri’ Ndiose ’in—, siyana tya’an yucuin’ huan cha’ tsu’hue ’in ni nu msi’ya ’huan, siyana tyo’o tsun’ huan lo’o cha’ tla, lo tya’an huan loo xaa nu tsu’hue ña’an ’in ni. 10 Ti culoo a lcan huan quichen ’in Ndiose, una ri nii lca huan quichen ’in ni, siyana ti culoo tijyu’ ndun huan lo’o cha’ tsu’hue ’in ni, una ri nii cua ngujui cha’ tsu’hue can’ ’huan. 11 ’Huan ta’an na nu ndyu’hui cuiya’ ran’ ’in, jñan sca cha’ tsu’hue ’huan tsaña’an ndyca ri’ sca nten nu mdo’o tijyu’ nu nda’an yu’hui ti, siyana a sten yu’huin huan lo’o cha’ a tsu’hue nu ndyca loo chelyuu re, cui’ cha’ nu ndyucui ndijin ni’ carsya ’na, 12 cuna huan ña’an chu’hui huan sca chelyuu nu luhui laja ne’ gentil, siya’ ndaa ne’ qui’ya ’huan siyana lcan huan nu nducun’, una siya scaxca cha’ tsu’hue nu ngui’ni huan tloo ne’, cu’ni tnu ne’ ’in Ndiose tsan nu cu’ni cuiya’ ni cha’ ’in nten chelyuu. 13 Cui’ siya cha’ ’in Ni X’na na, tucuan huan cha’ ’in scaxca bsya nu ndlo tñan ’huan, cui’ nu lca ree nu tlyu cha’ cuiya’ lyi’ya, 14 ta ’in lyigaa la ña’an bsya, siyana can’ nu mxtyaa Ndiose ’in siyana taa ndi’i ’in nten nu nducun’, lo cu’ni tsu’hue lo’o nten nu ngui’ni tñan tsu’hue. 15 Siyana cha’ re ndyca ri’ Ndiose: Lo’o cha’ tsu’hue nu cu’ni huan, tyucua seen tu’hua lyigaa nu ndyucui’ cua ña’an ti cha’ ’huan. 16 Ca tsu’hue chu’hui tieen huan tsaña’an ndi’in cha’ ’in sca nu cua mdo’o laa, una tsi’i can’ cha’ cu’ni huan cha’ a tsu’hue, siyana cu’ni huan ña’an ’ni sca msu ’in Ndiose. 17 Cu’ni rsuun huan ’huan tloo lyigaa nten, a cuinta chu’hui cha’ tsu’hue ’huan lo’o ta’an na. Chu’hui sca cha’ chen’ ’huan tloo Ndiose. Cu’ni rsuun huan ’huan tloo ree. 18 ’Huan nu lca msu, tucuan cha’ ndyucui’ x’na huan, una tsi’i tsalca nu tsu’hue nten lca lo cuti cha’ ’in, siyana lo’o nu tla ndyucui’ tucuan huan cha’ ’in can’. 19 Nde cha’ nu ntsu’hui lyoo tloo Ndiose, si ntsu’hui nu ndijin ndi’i nisiya a sca cha’ a tsu’hue nga’ni, lo nda loo can’ siyana ndyca ri’ quinu tsu’hue tiee Ndiose lo’o. 20 Una, ¿a sca cuinta ntsu’hui si taa loon huan taa ne’ ndi’i ’huan si ngui’ni huan cha’ a tsu’hue? Una si ndaa loon huan ndijin huan ndi’i siyana ngui’ni huan tñan tsu’hue, cha’ re ntsu’hui lyoo tloo Ndiose. 21 Cui’ siya cha’ re msi’ya Ndiose ’huan, siyana ticui’ ncuaña’an mdijin Crixtu ndi’i loon huan, lo mxnu ni cha’ re siyana tyucui ndyca’an huan ’in ni. 22 —Una ni sca cha’ a tsu’hue lo a nga’ni ni, ni sca cha’ cuiñi lo a mdo’o tu’hua ni—, 23 bra ngutucua ne’ yuhue’ ’in ni, a lo’o ni ngutucua ni yuhue’ ’in ne’, cui’ ncuaña’an bra nda ne’ ndi’i ’in ni, a mxcuen ni ’in ne’ cua ña’an ti, siya mxnu ni cuinta cha’ can’ yaa’ ni nu tsu’hue ’ni cuiya’ cha’. 24 Cui’ ni nga’ya ni qui’ya ’na la loo cursi, siyana caja ña’an tyo’o tsun’ na loo cha’ a tsu’hue lo chu’huin na sca chelyuu nu luhui, lo squi’ya ndi’i mdijin ni cua nguinu luhuin huan. 25 Siyana ti culoo mda’an huan tsaña’an ndyca ri’ sca slya’ nu nguna’ yu’hui, una ri nii mxtucuin huan lo’o Crixtu, ni nu na’an seen ’huan nu ntsu’hui cuinta carsya ’huan.

3

1 Cui’ ncuaña’an ’huan ne’ cuna’an, tucua huan cha’ ndyucui’ cuilyo’on huan, lo si cuilyo’on huan a nguiaña’an ri’ cha’ tsu’hue ’in Ndiose, una tyucuan xu’hue cha’ can’ lo’o ña’an nu ’ni huan, nisiya a tyucuin’ huan lo’o, 2 siyana nguia ndyca ca jylo ri’ snu ña’an ndi’ya chelyuu ntsu’huin huan, lo rsuun ’ni huan. 3 A lyica cha’ cu’ni chu’huen huan quen huan lyee ’a, ta lo’o na oro, ta cun’ huan xcui’ te’ nu ntsu’hui lyoo, 4 cu’ni chu’huen huan ni’ carsya ’huan culu’un huan tñan tsu’hue nu ngui’ni huan nu a ntsu’hui cha’ tsatii, lo’o rsuun ña’an cu’ni huan, tsu’hue ti tyi’in cha’ ’huan, siyana cha’ re ntsu’hui lyoo tloo Ndiose. 5 Siyana cui’ ncuaña’an ne’ cuna’an nu mdi’in ti s’ni yaña’an ri’ ’in Ndiose, ngulu’u ne’ tñan tsu’hue nu nga’ni ne’ lo ndyuhui ta ne’ ’in ni, ngutucua ne’ cha’ ’in cuilyo’o ne’, 6 tsaña’an ngutucua Sara cha’ ’in Abraham bra ndlo naa ’in cuilyo’o: Ni x’na hua. Can huan sñe’ Sara, si cu’ni huan tsu’hue lo a cutsen huan ni sca cha’. 7 Cui’ ncuaña’an ’huan ne’ qui’yu, tsu’hue ti tyi’in huan lo’o cuilyo’on huan, rsuun tyi’in cha’ ’huan lo’o ne’, siyana tca ti la ndi’in cha’ ’in ne’, cu’ni cuintan huan ’in ne’ siyana scaña’an ti chelyuu ndaa Ndiose ’huan lo’o ne’, lo bra tyucuin’ lo’o ni a sca cha’ tyucui ndijin ni’ carsya ’huan rcan’. 8 A cuinta ca sca cha’ ti ’huan lyigaan huan, ca cuti carsya ’huan, chu’hui cha’ tsu’hue ’huan scaxcan huan, lo ca ’tna ri’ ta’an huan, lo rsuun cu’ni huan ’huan, 9 a cu’ni stu’huan huan ’huan lo’o nu ngui’ni ti’i lo’on huan, ni a tucuan huan yuhue’ ’in nu nducua yuhue’ ’huan, siyana jñan huan ’in Ndiose siyana culucuan ni ’in can’. Nde cha’ msi’ya Ndiose ’huan, siyana cu’ni huan tñan tsu’hue lo tyucuan huan cha’ tsu’hue nu taa ni ’huan. 10 Siyana, —nu ndyca ri’ chu’hui sca chelyuu nu tsu’hue, tsu’hue ntsu’hui tiee lyigaa braa, ’ni cha’ xñi can’ cuinta siyana a tyucui’ cha’ a tsu’hue lo’o cha’ cuiñi. 11 tyo’o tsu’ can’ loo cha’ a tsu’hue, cu’ni can’ tñan tsu’hue, quinan can’ ña’an tyi’in tsu’hue, lo tyucui ndyca’an cha’ can’. 12 Siyana Ni X’na na ntsu’hui ni cuinta ’in nten nu nducua cha’ ’in ni, nee ’in ni cha’ nu njñan can’, una tsalca nu ngui’ni cha’ a tsu’hue a ntsu’hui tiee Ni X’na na ’in can’—. 13 ¿Ta ntsu’hui nu ca cu’ni ti’i lo’on huan, si ngui’ni huan tñan tsu’hue? 14 Una si ndijin huan ndi’i squi’ya tñan tsu’hue nu ngui’ni huan, tsu’hue ca xu’huen huan rcan. Una a cutsen huan ’in nu ti’i ri’ ’huan, ni a su’hua huan cha’ tieen huan lo’o cha’ can’, 15 xna’an huan ’in Ndiose X’na na, tyun tiaan huan taan huan rsuun ’in nu cunicha’ ’huan lo’o cha’ nu nguiaña’an rin’ huan, una lo’o rsuun xcuen huan ’in can’ lo tsu’hue ti tyi’in cha’ ’huan lo’o. 16 Chu’huin huan sca chelyuu nu luhui ti, lo si caja nu tyucui’ ca’an ’huan siyana ngui’ni huan tñan tsu’hue squi’ya Crixtu, ta tyucui’ can’ cha’ ti’i ’huan, lo tyo’o cha’ jyu’u ’in can’. 17 Siyana tsu’hue lati si tyijyin huan ndi’i si ngui’ni huan tñan tsu’hue, si ncuaña’an ndyca ri’ Ndiose, lo tsi’i nu ndyijin huan ndi’i squi’ya cha’ a tsu’hue nu ngui’ni huan. 18 Siyana Crixtu siya’ ti ngujui ni squi’ya qui’ya ’in nten chelyuu, ni nu luhui lati ngujui ni loo nten ngui’ni qui’ya, siyana tiya lo’o ni ’na tloo Ndiose, chiñi siyana ngujui ni lo’o cha’ nu ’in cuina’ ni, una mdyo’o qui’u ni xiya’. 19 Una laja rcan’ ya yucui’ ni cha’ tsu’hue ’in Ndiose lo’o carsya ’in nten nu ntsu’hui ndyucun loo cha’ ndija, 20 cui’ nten nu lye’ ri’ nu mdi’in ti s’ni bra ngañan Noé yca na’an can’, ndyuhui ta Ndiose chin ni braa quinan ne’ ’in ni, una chin’ ti nten, cui’ snu’ ti lca mdo’o laa loo tyi’a can’. 21 Tyi’a can’ lca na sca xñii tsaña’an nu ndyucua tyan na ri nii lo tyo’o laan na, (una tsi’i siyana xnu luhui na ’na, siyana xtya na ’na yaa’ Ndiose lo’o sca cha’ tiaa nu luhui), cui’ lo’o cha’ nu mdyo’o qui’u Jesucristo. 22 Ndyucuen ni la ni’ cuaan, nducua ni tsu’ cueen ’in Stina Ndiose, ndlo ni tñan ’in lyigaa angajle, tsatlyu lo’o lyigaa la ña’an bsya lo’o nu lyi’ya cha’ cuiya’ ’in ni.

4

1 Siyana Crixtu mdijin ni ndi’i lo’o cha’ ’in cuina’ ni, ncuaña’an ’huan cu’ni tnu tieen huan, su’hua yuhue rin’ huan cha’ re, siyana nu cua mdijin ndi’i lo’o cha’ ’in cuina’, cua mdo’o tsu’ can’ loo lyigaa loo qui’ya, 2 siyana a tya’an ’a can’ lo’o cha’ a tsu’hue tichin’ braa nu ti tyi’in na loo chelyuu re, siyana cu’ni na tsaña’an nu ndyca ri’ Ndiose. 3 Blyaa tsacua ti ña’an chu’huin huan chelyuu a tsu’hue, cha’ nu ndyu’hui cuiya’ ri’ ne’ gentil: Cha’ nu nguiten yu’hui ne’ lo’o ña’an nu ti, cha’ a tsu’hue nu lca tiee ne’, cha’ cu’hui, lyigaa lo’o cha’ nu a tsu’hue nu ’ni ne’ se’en ndyca ta’a bra lyee ndi’yo ne’, cha’ nu ’ni tnu ne’ ngulucuin, cui’ cha’ nu nxcuan tloo Ndiose. 4 Nduhue ’a ri’ ne’ siyana a nda’an ’a huan lo’o cha’ a tsu’hue lo’o ne’, ndyucui’ ca’an ne’ ’huan siya cha’ can’, 5 una tiaa braa ntsu’hui cha’ tyaa can’ cuinta tloo ni nu cua ndun tiaa cu’ni cuiya’ cha’ ’in nten tsatlyu lo’o ne’ cua ngujui. 6 Can’ cha’ hasta lo’o nu ngujui ngujui nu yucui’ cha’ tsu’hue ’in Ndiose lo’o, siyana lo’o can’ cu’ni cuiya’ Ndiose cha’ ’in, una ca cuiya’ cha’ ’in lo’o cha’ ’in cuina’. 7 Cua ndyucui lucui’ cha’ tsatii cha’ nu ndyca loo chelyuu re, can’ cha’ nde lyee la xñi huan cuinta ’huan, lo ca tyucui cha’ tiaa ’huan tyucuin’ huan lo’o Ndiose. 8 Cha’ nu ndun loo lati, chu’hui cha’ tsu’hue ’huan scaxcan huan, siyana nu ntsu’hui cha’ tsu’hue ’in lo’o ta’a, ndyca ’ni can’ cha’ tlyu ri’ scaxca loo qui’ya. 9 Cu’ni cuintan huan ’in lyigaa nu tiaa se’en ndi’in huan, lo a taan huan qui’ya siya cha’ can’. 10 Cuinta scaan huan cua ndyucuan xu’huen huan cha’ cuiya’ nu ndaa Ndiose ’huan, cua ña’aan cha’ nu ndaa ni ’huan, cui’ na cu’ni tsu’hue na ’huan ta yaa’ ta’an huan, tsaña’an ’ni sca nu cua ngui’ni ca tñan ’in Ndiose lo’o cha’ tsu’hue nu cua ngujui ’in. 11 Si nde’en nu tyucui’ lo’o nten, tyucui’ can’ tsaña’an cha’ nu taa Ndiose ’in, si ntsu’hui nu ta yaa’ ’in xca tucui, lo’o cha’ cuiya’ ’in Ndiose cu’ni ’in na, siyana lyigaa ña’an nu ngui’ni huan ’ni tnu huan ’in Ndiose lo’o Jesucristo, ni nu nga’an cha’ cu’ni tnu na ’in, lo scati ni culo ni tñan sa tyucui braa. Amen. 12 ’Huan ta’an na nu ndyu’hui cuiya’ ran’ ’in, a cuhue rin’ huan siya cha’ nu cua ndijin huan, ta siyana xque’ rin’ huan a nga’an cha’ tyijyin huan ndi’i, 13 siyana nde ca tsu’hue chu’hui tieen huan, siyana sca cha’ ti ’huan lo’o ndi’i nu mdijin Crixtu, una nde lyee la ca tsu’hue chu’hui tieen huan tsan nu ca tycan’ cha’ cuiya’ ’in ni. 14 Tsu’hue ca xu’huen huan bra ndijyi nu ndyucui’ ca’an ’huan lo’o cha’ ’in Crixtu, siyana yucui’ ca Espíritu ’in Ndiose lca nu ntsu’hui ni’ carsya ’huan. Ni siya nten can’ nducua ne’ yuhue’ ’in ni, una ’huan nde ngui’ni tnu huan ’in ni. 15 Can’ cha’ xñi huan cuinta siyana ni scan huan a tyijyin huan ndi’i, ta siyana yujuin huan nten, ta nga’ni huan cuna, ta siyana lcan huan sca nu nducun’, ta nguiten yu’hui huan lo’o cha’ nu a ngui’ni ca’an ’huan, 16 una si ndijin huan ndi’i lo’o cha’ ’in Crixtu, a ca jyu’u rin’ huan, tyaan huan xu’hue ’in Ndiose squi’ya cha’ can’. 17 Siyana cua mdiaa braa ca cuiya’ cha’ ’in sñe’ Ndiose, lo si la nducua la tisna cha’ can’ lo’on nare, ¿ni xnu ca ña’an tsa to’o ’in nten nu a nguiaña’an ri’ Ndiose? 18 —Sca nten nu lñi ndi’in cha’ ’in, lo si tiseen ti tyo’o laa ne’, ¿ni xnu ca tsato’o ’in nten nducun’ lo’o nu ngui’ni qui’ya—? 19 Can’ cha’ nu ndijin ndi’i, si ncuaña’an ndyca ri’ Ndiose, xnu can’ cuinta carsya ’in yaa’ ni nu ndaa chelyuu, lo tsa quiñan can’ cu’ni tñan tsu’hue.

5

1 Ndyca ran’ tyucuin’ lo’o nu ntsu’hui cuinta ’huan, siyana lo’on na’ lcan nu ntsu’hui cuinta ’in ne’, lo na’an tloon ña’an mdijin Crixtu ndi’i, a cuinta caja cha’ cuiya’ nu taa ni ’yan tiaa braa, 2 can’ cha’ jñan cha’ tsu’hue ’huan siyana chu’huin huan cuinta ’in ta’an na nu cua ndaa Ndiose ’huan, una tsi’i lo’o juersa, lo’o cha’ tsu’hue nu lca tieen huan, ni tsi’i na nducua tloon huan caja squiyan’ huan, siyana cu’ni huan tñan can’ lo’o lyigaa tieen huan. 3 A cu’ni huan ’huan ña’an ndyca ri’ sca x’na ne’, siyana ndi’ya ti ña’an cu’ni huan ’huan. 4 Lo bra ca tycan’ Ni nu ntsu’hui ca cuinta ’in lyigaa ta’an na, tyucuan huan cuinta cha’ tsu’hue nu taa Ndiose ’huan la ni’ cuaan, na nu a ntsu’hui ’a cha’ tsatii. 5 Ticui’ ncuaña’an ’huan nu ti suhue ti, tucuan huan cha’ nu ndyucui’ nu ntsu’hui cuinta ’huan, cui’ ncuaña’an scaxcan huan cu’ni lyun huan ’huan siyana: —Ndiose nxcuan tloo ni ’in nten nu siye’, una nda yaa’ ni ’in nten nu rsuun—. 6 Can’ cha’ cu’ni rsuun huan ’huan tloo Ndiose, ni nu tla la cha’ cuiya’ ndia ’in, siyana cui’ ni scuen cuaan ni cha’ ’huan tia bra. 7 A cuinta yaa’ ni xnu huan lyigaa cha’ nduhue ri’ ntsu’hui tieen huan, siyana cui’ ni ntsu’hui ni cuinta ’huan. 8 Xñi huan cuinta ’huan lo tyi’in tiaan huan, siyana ne’ xña’an nu lca ta’a cusuun na, nda’an ca tyi’iin tsaña’an ndyca ri’ sca cuichi nu yla, lo nan can’ ti ca cu. 9 Can’ cha’ tyun tsan huan, lo’o cha’ nu nguiaña’an rin’ huan, siyana cua jlyo rin’ huan scaña’an ti ndijin huan ndi’i lo’o ne’ sa tyucui chelyuu. 10 Una Ndiose, ni nu ntsu’hui lyigaa lo’o cha’ tsu’hue ’in, squi’ya Jesucristo nsi’ya ni ’na sten na loo xaa ’in ni sa tyucui braa, bra cua mdijin huan ndi’i, cui’ ni cu’ni tyucui ni cha’ ’huan, cu’ni ni cha’ tyun tsan huan, taa la ni juersa ’huan, lo ncuaña’an xtya tsa la ni ’huan. 11 Scati ’in ni cu’ni tnu na sa tyucui braa. Amen. 12 Ta’an na Silvano, nu ndyu’hui lyoon siyana lñi ndi’in cha’ ’in, ngua’an chin’ cha’ loo quityi re lo’o cuinta cha’ ’yan, siyana taan cha’ tnu tiee ’huan, taan rsuun lo’on huan siyana cha’ tsu’hue re lca na cha’ nu lñi ’in Ndiose, cui’ cha’ nu cua ntsu’huin huan. 13 ’Huan ta’an na nu nguio’ ti’in quichen Babilonia ndyucui’ cha’ ne’ ’huan, nu cua ngulosuhui Ndiose ’in tsatlyu lo’on na, a cuinta Marcu ndyucui’ cha’ ’huan, nu lca sca sñen’ na’ lo’o cha’ ’in Ndiose. 14 Cui’ ncuaña’an tyucui’ cha’ ta’an huan scaxcan huan lo’o lyigaa tieen huan. Ndiose cu’ni ni cha’ siyana tyi’in tsu’huen huan lyigaan huan nu cua ndi’in lo’o cha’ ’in Jesucristo. Amen.