1 JUAN

1 JUAN

¹ Nde cha’ nu ndisna ti culoo, cha’ nu cua ngune ’hua lo na’an tloo hua, ni nu yu’hui lyoo hua ’in, lo ngu’ni ca’an yaa’ hua ’in, cui’ ni nu ndaa chelyuu ’na. ² (Siyana ni nu ndaa chelyuu can’ ncua tycan’ ña’an cha’ ’in ni ña’an huan ’in ni lo ca ca jylo rin’ huan ña’an ndi’in cha’ ’in ni, cui’ ncuaña’an ndaa hua rsuun siyana cui’ ni ndaa ni chelyuu nu a tsatii ’a ’na, ni nu mdia se’en nducua Stina Ndiose, lo ngulu’u tloo ni ’hua). ³ Cha’ nu na’an tloo hua lo ngune ’hua, can’ cha’ ndyucui’ hua lo’on huan siyana ca sca cha’ ti ’huan lo’o hua, siyana sca cha’ ti ’na lo’o Stina Ndiose lo’o Jesucristo Sñe’ ni. ⁴ Nde cha’ nga’an tñan hua quityi re ’huan, siyana lyee la ca tsu’hue chu’hui tieen huan. ⁵ Nde cha’ nu ngune ’hua yucui’ ni, lo ndyucui’ hua lo’o huan ri nii siyana Ndiose lca ni xaa, lo a ntsu’hui tla ’in ni. ⁶ Si ndyucuin na siyana sca cha’ ti ’na lo’o ni, lo ti nda’an na lo’o cha’ a tsu’hue, cha’ cuiñi ndyucui’ na lo a nda’an na lo’o cha’ nu lñi. ⁷ Una si nda’an na loo xaa ’in ni tsaña’an nu lca ni yucui’ ni, lo’on nare sca cha’ ti ’na rcan’, lo tne Jesucristo Sñe’ Ndiose can’ nu nsuhui ’na lo’o lyigaa qui’ya ’na. ⁸ Si ndyucuin na siyana a ngui’ni na qui’ya, ticuiin’ na ñilyo’on na ’na rcan lo a lñi ndi’in cha’ ’na. ⁹ Una si ñee na qui’ya ’na tloo Ndiose, cu’ni ni cha’ tlyu ri’ ’na, lo suhui ni lyigaa qui’ya ’na, siyana lñi ndi’in cha’ ’in ni lo’o cha’ tsu’hue nu ’ni ni. ¹⁰ Si ndyucuin’ na siyana a ngui’ni na qui’ya, ngui’ni na ’in ni lca ni sca nu cuiñi, lo a lyiji tyucuan xu’huen na cha’ nu ndyucui’ ni.

¹ ’Huan nu lca ña’an ndyca ri’ sca sñen’ na’, nde ca’an sca quityi re ’huan siyana a cu’ni huan qui’ya. Una si nde’en nu cu’ni qui’ya, cua lca nu tyucui’ cha’ ’na tloo Stina Ndiose, cui’ Jesucristo nu ngui’ni tñan tsu’hue. ² Cui’ ni ngujui ni lo ngatyen ni qui’ya ’na, lo tsi’in naa re ti, siyana ngatyen ni qui’ya ’in nten sa tyucui chelyuu. ³ Nde ndyca tycan’ ña’an siyana ndyu’hui lyoon na ’in ni, si nxu’hua se’en na cha’ nu ndlo ni tñan. ⁴ Nu ndyucui’: Na’ ndyu’huin lyoon ’in ni, lo a nxu’hua se’en cha’ nu ndlo ni tñan, lca can’ sca nu cuiñi lo a lñi ndi’in cha’ ’in. ⁵ Una nu nxu’hua se’en cha’ nu ndyucui’ ni, can’ nu mtsa’an yu’hui lo’o cha’ tsu’hue ’in Ndiose, ncuaña’an ca jylo rin’ na siyana sca cha’ ti ’na lo’o ni. ⁶ Nu ndyucui’ siyana sca cha’ ti ’in lo’o ni, nga’an cha’ chu’hui can’ sca chelyuu tsaña’an nu yu’hui ni. ⁷ ’Huan ta’an na, cha’ nu ndlo ni tñan ’na tsi’i cha’ cui ti lca na, cui’ cha’ nu ndyucuan xu’huen huan ti culoo. Cha’ nu nga’an loo quityi re lca na yucui’ ca cha’ nu cua ngune ’huan ti bra ndisna huan. ⁸ Una nga’an sca cha’ nu cui ti nu xu’hua se’en na, lo ndyca tycan’ ña’an cha’ re loo chelyuu ’huan tsaña’an ndi’in cha’ ’in ni, siyana cha’ tiaa a tsu’hue cua nguia ndo’o tijyu’ na, lo ndyca tycan’ ña’an xaa ’in ni nu lca cha’ nu lñi. ⁹ Nu ndyucui’ siyana nda’an loo xaa ’in ni, lo nxcuan tloo ’in ta’a nten, ti nda’an can’ lo’o cha’ tiaa nu a tsu’hue. ¹⁰ Nu ntsu’hui cha’ tsu’hue ’in lo’o ta’a nten, can’ nu nda’an loo xaa ’in ni lo a ntsu’hui cha’ tyo’o tsu’ can’. ¹¹ Una nu nxcuan tloo ’in ta’a nten, ti nda’an can’ lo’o cha’ tla lo nda’an lo’o cha’ a tsu’hue, ni a jlyo ri’ la tucuin nguiaa, siyana cha’ tla can’ mducun na cha’ tiaa ’in. ¹² Nde nga’an quityi re ’huan, ’huan nu lca sñe’ Ndiose, siyana cua ngatyen ni qui’ya ’huan lo’o cha’ cuiya’ ’in Jesús. ¹³ Nga’an quityi re ’huan, ’huan nu lca nten cula, siyana cua ndyu’hui lyoon huan ’in ni nu ndi’in ti culoo. Nga’an quityi re ’huan, ’huan nu ti suhue ti, siyana cua nga’ni huan cana ’in ne’ xña’an. Nga’an quityi re ’huan, ’huan nu lca sñen’, siyana cua ndyu’hui lyoon huan ’in Stina Ndiose. ¹⁴ Nga’an quityi re ’huan, ’huan nu lca nten cula, siyana cua ndyu’hui lyoon huan ’in ni nu ndi’in ti culoo. Nga’an quityi re ’huan, ’huan nu ti suhue ti, siyana tsa tyun huan lo’o cha’ ’in Ndiose nu cua ntsu’hui ni’ carsya ’huan, lo cua nga’ni huan cana ’in ne’ xña’an nu ngui’ni cha’ a tsu’hue. ¹⁵ A xcui rin’ huan cha’ nu ndyca loo chelyuu re lo’o na nu ndi’in ’in na. Si nde’en nu nxcui ri’ cha’ nu ndyca loo chelyuu re, cha’ tsu’hue ’in Stina Ndiose a ntsu’hui ni’ carsya ’in can’. ¹⁶ Siyana lyigaa cha’ nu ndyca loo chelyuu re, ña’an ndyca ri’ cha’ nu nxcui ri’ cuina’ na, cha’ nu nxcui ri’ quiloo ne’, cha’ siye’, lyigaa cha’ re a lyijyan na se’en nducua Stina Ndiose, siyana loo chelyuu re ndyo’o na. ¹⁷ Cha’ nu ndyca loo chelyuu re tsatii cha’ ’in na, cui’ ncuaña’an lo’o cha’ nu nxcui ri’ ne’, una nu nducua cha’ nu ndyca ri’ Ndiose, a ntsu’hui a cha’ tsatii chelyuu ’in can’. ¹⁸ Sñen’, cua mdia tsan nu ntsu’hui cha’ tsatii cha’ nu ndyca loo chelyuu re, cui’ cha’ nu cua ngune ’huan siyana ntsu’hui cha’ caan nu ña’an ti’i ’in Crixtu, lo ri nii quina’an nu ti’i ri’ ’in Crixtu cua nda’an, can’ cha’ ndyca jylo rin’ na siyana cua mdia tsan can’. ¹⁹ Ljan na mdo’o can’, una tsi’i sca cha’ ti ’na lo’o, si sca cha’ ti ’na lo’o tsatlyu ndi’in na lo’o, una mdo’o tsu’ can’ siyana ca tycan’ ña’an siyana tsi’i sca cha’ ti ’na lyigaan na. ²⁰ Una ’huan cua ntsu’hui Espíritu nu Luhui ’in Ndiose ni’ carsya ’huan, lo cua ndi’yan huan cuinta lyigaa lo’o cha’. ²¹ Nga’an quityi re ’huan, una tsi’i siyana a ntsu’hui lyoon huan cha’ nu lñi ’in Ndiose, siyana cua ndyu’hui lyoon huan ’in na, siyana ni sca cha’ cuiñi lo a ljyan lo’o cha’ nu lñi. ²² ¿Ti ca lca nu cuiñi can’? Cui’ nu ndyucui’ siyana tsi’i Jesús lca ni Crixtu. Can’ nu ti’i ri’ ’in ni, cui’ nu ndyucui’ siyana tsi’i sca cha’ ti ’in Stina Ndiose lo’o Sñe’ ni. ²³ Lyigaa nu nxcuan tloo ’in Sñe’ ni, a ntsu’hui Stina Ndiose ni’ carsya ’in can’. Una nu nguiaña’an ri’ ’in Sñe’ ni, can’ nu ntsu’hui Stina Ndiose ni’ carsya ’in. ²⁴ Xñi huan cuinta ’huan lo’o cha’ nu cua ngune ’huan ti culoo. siyana a tyo’o tsun huan lo’o cha’ can’ ca sca cha’ ti ’huan lo’o Sñe’ ni lo’o Stina Ndiose. ²⁵ Nde sca cha’ nu cua mxtyaa ni ’na, cui’ chelyuu nu a tsatii ’a ’na. ²⁶ Nga’an quityi re ’huan si’ya cha’ ’in nu ndyca ri’ quiñilyo’o ’huan. ²⁷ Una Espíritu nu cua ndaa ni ntsu’hui ni’ carsya ’huan, lo a ’ni ’a cha’ ti culu’u xca tucui ’huan siyana yucui’ ni ndlu’u ni ’huan lyigaa lo’o cha’, ndyucui’ ni cha’ nu lñi a lca na cha’ cuiñi. Ña’an cha’ nu cua ngulu’u ni ’huan, a tyo’o tsun’ huan sii’ crixtu. ²⁸ Can’ cha’ ’huan nu lca sñen’, a tyo’o tsun huan loo cha’ nu ndyucui’ ni, siyana bra ca tycan’ ni, cu’ni tnu tieen na, lo a tyo’o cha’ jyu’u bra quiaan ni xiya’. ²⁹ Si ’huan jlyo rin’ huan siyana lca ni sca nu ngui’ni tñan tsu’hue, ca jylo rin’ huan siyana lyigaa nu ngui’ni tñan tsu’hue lca can’ sñe’ Ndiose.

¹ Ña’an huan, snu ña’an lca tiee Stina Ndiose ’na nu hasta ndlo naa ni ’na lcan na sñe’ ni. Can’ cha’ nten chelyuu a ndyucua ta’a cha’ ’in ne’ lo’on na, siyana a nxlya ne’ chu’hui lyoo ne’ ’in ni. ² ’Huan ta’an na nu ndyu’hui cuiya’ ran’ ’in, cua lcan na sñe’ Ndiose, una a lyiji ca tycan’ ña’an ña’an ntsu’hui cha’ can na, una cua jlyo rin’ na bra ca tycan’ ni, ca stu’hua ña’an na lo’o ni, siyana ña’an tloon can na ’in ni. ³ Lyigaa nu nducua tloo ’in ni lo’o cha’ re, xñi can’ cuinta ’in luhuiti tsaña’an nu lca ni yucui’ ni. ⁴ Lyigaa nu ngui’ni qui’ya ticui’ lee ’in Ndiose ncha ti’in can’, siyana qui’ya lca na si a tucuan na cha’ nu ndyucui’ lee can’. ⁵ Cua jlyo rin’ huan siyana Crixtu yaan ni loo chelyuu re siyana cuityen ni qui’ya ’na, lo ni sca qui’ya a nducui ni. ⁶ Lyigaa nu tsa ndun loo cha’ ’in ni, a tsa quiñan ’a can’ ti cu’ni qui’ya, una lyigaa nu ti ngui’ni qui’ya, a lyiji xna’an can’ ’in ni, ni a ntsu’hui lyoo ’in ni. ⁷ Sñen’, a taan huan ya’ caja nu quiñilyo’o ’huan. Sca nten nu ngui’ni tñan tsu’hue, lñi ndi’in cha’ ’in ne’ tsaña’an nu lca ni yucui’ ni. ⁸ Una nu ti ngui’ni qui’ya, tsu’ ’in ne’ xña’an nguiaa can’, siyana ne’ xña’an nga’ni qui’ya ti culoo. Can’ cha’ yaan Sñe’ Ndiose, siyana cuijlyo ni lyigaa tñan ngui’ni ne’ xña’an. ⁹ Tsalca sñe’ Ndiose, a tsa quiñan ’a can’ ti cu’ni qui’ya, siyana cua nguinu yu’hui lo’o cha’ tsu’hue ’in Ndiose ni’ carsya ’in, ni a ca ’a ti cu’ni can’ qui’ya siyana cua lca can’ sñe’ Ndiose. ¹⁰ Nde ndyca tycan’ ña’an ti ca lca sñe’ Ndiose, lo ti ca lca sñe’ ne’ xña’an: Lyigaa nu a ngui’ni tñan tsu’hue, ni a ntsu’hui cha’ tsu’hue ’in lo’o ta’a nten, tsi’i sñe’ Ndiose lca can’. ¹¹ Siyana cui’ cha’ re cua ngune ’huan ti culoo, siyana chu’hui cha’ tsu’hue ’na lo’o ta’an na. ¹² Tsi’i ña’an nga’ni Cain nu nguiaa tsu’ ’in ne’ xña’an, yjui ’in ta’a ngula. ¿Ni cha’ yujui ’in can’? Cui’ siyana a nga’ni tñan tsu’hue, una ta’a, can’ nu nga’ni tñan tsu’hue. ¹³ ’Huan ta’an na, a cuhue rin’ huan si xcuan tloo nten chelyuu ’huan. ¹⁴ Nare jlyo rin’ na siyana cua mdo’o tsun’ na loo cha’ ndija, cua ngujui sca chelyuu nu a tsatii ’a ’na, cui’ siyana ntsu’hui cha’ tsu’hue ’na lo’o ta’an na. Nu a ntsu’hui cha’ tsu’hue ’in lo’o ta’a nten, ti ndun can’ loo cha’ ndija. ¹⁵ Lyigaa nu nxcuan tloo ’in ta’a nten, lca can’ nu ndujui nten, lo cua jlyo rin’ huan siyana ni sca nu ndujui nten, a nda’an lo’o chelyuu nu a tsatii ’a. ¹⁶ Nde ncua ndyca jylo rin’ na ni na lca cha’ tsu’hue, cui’ siyana ngujui ni loon na, cui’ ncuaña’an nare ntsu’hui cha’ tyan na chelyuu ’na squi’ya ta’an na. ¹⁷ Una sca nu cuilyiya’ si jlyo ri’ ’ni cha’ ’in xca tucui, lo cu’ni tiji carsya ’in lo’o can’, ¿a ntsu’hui cha’ tsu’hue ’in Ndiose ni’ carsya ’in can’? ¹⁸ Sñen’, tsi’i lo’o tu’huan ti na chu’hui cha’ tsu’hue ’na lo’o ta’an na, ta siyana tsu’hue ndyucuin’ ti na, siyana lo’o lyigaa tieen na cu’ni na cha’ tsu’hue lo’o can’, lo’o sca carsya nu lñi. ¹⁹ Can’ cha’ ndyca jylo rin’ na siyana nguiaan na lo’o cha’ nu lñi, lo ni a cu’ni tucua rin’ na tloo Ndiose. ²⁰ Si carsya ’na ndlo qui’ya na ’na, cua jlyo rin’ na siyana lyee la ndun loo Ndiose que nare, lo ndyu’hui lyoo ni lyigaa lo’o cha’. ²¹ ’Huan nu ndyu’hui cuiya’ ran’ ’in, si carsya ’na a ndlo qui’ya na ’na, tsu’hue ntsu’hui tieen na lo’o Ndiose, ²² lo lyigaa cha’ nu njñan na ’in ni, taa ni ’in na, cui’ siyana nxu’hua se’en na cha’ nu ndlo ni tñan, lo ngui’ni na cha’ nu ndyu’hui cuiya’ ri’ ni. ²³ Nde cha’ nu ndlo ni tñan: Tsaña’an rin’ na ’in Jesucristo Sñe’ ni, lo chu’hui cha’ tsu’hue ’na lo’o ta’an na ña’an nu ngulo ni tñan ’na. ²⁴ Nu nxu’hua se’en cha’ nu ndlo ni tñan, sca cha’ ti ’in can’ lo’o Ndiose, cui’ ncuaña’an Ndiose lo’o can’. Nde ndyca jylo rin’ na siyana ntsu’hui ni ni’ carsya ’na, lo’o Espíritu nu cua ndaa ni ’na.

¹ ’Huan nu ndyu’hui cuiya’ ran’ ’in, a tsaña’an rin’ huan ’in lyigaa loo espíritu nu nxyucui’ ’in nten, siyana la nducua qui’yan’ huan cuinta si ta ljyan can’ lo’o cha’ ’in Ndiose, siyana quina’an ’a nu cuiñi nda’an loo chelyuu re, lo ndyucui’ siyana Ndiose nxyucui’ ’in. ² Ndeña’an ca jylo rin’ na cha’ ti ca nda’an lo’o Espíritu ’in Ndiose: Siyana lyigaa espíritu nu nguiaa tsu’ ’in Ndiose, ndyucui’ siyana Jesucristo yaan ni loo chelyuu re tsaña’an ndyca ri’ sca nten. ³ Lyigaa espíritu nu ndyucui’ siyana a yaan Jesucristo loo chelyuu re tsaña’an ndyca ri’ sca nten, a nguiaa can’ tsu’ ’in Ndiose, can’ espíritu nu na’an ti’i ’in Crixtu, nu cua yna huan cha’ siyana ntsu’hui cha’ caan, lo cua nda’an can’ loo chelyuu re. ⁴ Sñen’, cua lcan huan sñe’ Ndiose, lo cua nga’ni huan cana ’in nu cuiñi can’, siyana tlyu la cha’ cuiya’ ’in ni nu ntsu’hui ni’ carsya ’na que ña’an cha’ ’in nu nda’an loo chelyuu re. ⁵ Sca cha’ ti ’in nu cuiñi can’ lo’o nten chelyuu, can’ cha’ ndyucui’ can’ cha’ nu ndyca loo chelyuu re, lo nten chelyuu nee ’in cha’ nu ndyucui’ can’. ⁶ Nare cua lcan na sñe’ Ndiose, lo nu ndyu’hui lyoo ’in Ndiose ngui’ni cuinta cha’ nu ndyucuin’ na, lo nu a lca sñe’ Ndiose a ’ni cuinta cha’ nu ndyucuin’ na. Can’ cha’ ndyca jylo rin’ na ni ña’an espíritu nu lñi lo ni ña’an espíritu nu cuiñi. ⁷ ’Huan nu ndyu’hui cuiya’ ran’ ’in, chu’hui cha’ tsu’hue ’na lo’o ta’an na, siyana cha’ tsu’hue can’ ljyan na lo’o cha’ ’in Ndiose. Lyigaa nu ntsu’hui cha’ tsu’hue ’in lo’o ta’a nten, cua lca can’ sñe’ Ndiose, lo ndyu’hui lyoo can’ ’in ni. ⁸ Nu a ntsu’hui cha’ tsu’hue ’in lo’o ta’a nten, a lyiji chu’hui lyoo can’ ’in Ndiose, siyana Ndiose lca ni cha’ tsu’hue. ⁹ Nde ndyca tycan’ ña’an snu ña’an tlyu cha’ tsu’hue yu’hui ’in Ndiose lo’on na, siyana nga’an tñan ni ’in scati Sñe’ ni yaan loo chelyuu re, siyana chu’huin na chelyuu lo’o ni. ¹⁰ Ndeña’an ndyca ri’ cha’ tsu’hue can’: Tsi’i siyana cua lca ntsu’hui cha’ tsu’hue ’na lo’o Ndiose, siyana la nducua la ni yu’hui cha’ tsu’hue ’in ni lo’on na, nga’an tñan ni ’in Sñe’ ni, siyana caja lo cuityen qui’ya ’na. ¹¹ ’Huan nu ndyu’hui cuiya’ ran’ ’in, si Ndiose ncuaña’an yu’hui cha’ tsu’hue ’in ni lo’on na, ncuaña’an nga’an cha’ chu’hui cha’ tsu’hue ’na scaxcan na. ¹² A tucui nu cua na’an tloo ’in Ndiose, una si ntsu’hui cha’ tsu’hue ’na lo’o ta’a na, sca cha’ ti ’na lo’o Ndiose, lo nguinu yu’hui cha’ tsu’hue ’in ni ’na rcan. ¹³ Nde ndyca jylo rin’ na siyana sca cha’ ti ’na lo’o ni, cui’ ncuaña’an sca cha’ ti ’in ni lo’on na, siyana Espíritu ’in ni cua ndaa ni ntsu’hui ni’ carsyaa ’na. ¹⁴ Huare cua na’an hua lo ndaa hua rsuun siyana Stina Ndiose nga’an tñan ni ’in Sñe’ ni, ni nu ndlo laa ’in nten chelyuu. ¹⁵ Lyigaa nu ndyucui’ siyana Jesús lca ni Sñe’ Ndiose, Ndiose ndi’in ni lo’o can’, cui’ ncuaña’an ndi’in can’ lo’o Ndiose. ¹⁶ Huare cua ngüi’ya hua cuinta lo nguiaña’an ri’ hua siyana Ndiose ntsu’hui cha’ tsu’hue ’in ni lo’on na. Ndiose lca ni cha’ tsu’hue, lo nu ntsu’hui cha’ tsu’hue ’in, can’ nu ndi’in lo’o Ndiose, cui’ ncuaña’an Ndiose lo’o can’. ¹⁷ Nde cha’ ngutsa’an yu’hui cha’ tsu’hue ’in ni ’na, siyana cu’ni tnu tieen na tsan nu cu’ni cuiya’ ni cha’ ’in nten. Tsaña’an nu lca ni yucui’ ca ni, ncuaña’an ndi’in cha’ ’na loo chelyuu re. ¹⁸ Nu ntsu’hui cha’ tsu’hue ’in a ntsen can’, siyana cha’ tsu’hue nu ndaa ni ndlo tsu’ na lyigaa cha’ chen, siyana nu ti ntsen ndyuhui ta can’ ni bra tyijyin ndi’i. Lo nu ti ntsen, cui’ siyana a lyiji quinu yu’hui cha’ tsu’hue can’ ’in. ¹⁹ Nare ntsu’hui cha’ tsu’hue ’na lo’o ni, siyana ti culoo cua yu’hui cha’ tsu’hue ’in ni lo’on na. ²⁰ Si ntsu’hui nu ndyucui’: Na’ ntsu’hui cha’ tsu’hue ’yan lo’o Ndiose, lo nxcuan tloo ’in ta’a nten, lca can’ sca nu cuiñi. Siya’ na’an tloo can’ ’in ta’a nten, lo a ntsu’hui cha’ tsu’hue ’in lo’o can’, ni cara chu’hui cha’ tsu’hue ’in lo’o Ndiose, lo a ña’an ’in ni. ²¹ Nde cha’ nu cua ngulo ni tñan ’na: Nu ntsu’hui cha’ tsu’hue ’in lo’o Ndiose, cui’ ncuaña’an chu’hui cha’ tsu’hue ’in lo’o ta’a.

¹ Lyigaa nu nguiaña’an ri’ siyana Jesús lca ni Crixtu, can’ nu lca sñe’ Ndiose. Lyigaa nu ntsu’hui cha’ tsu’hue ’in lo’o nu lca sti, cui’ ncuaña’an lca tiee can’ lo’o sñe’. ² Nde ndyca jylo rin’ na siyana ntsu’hui cha’ tsu’hue ’na lo’o lyigaa sñe’ Ndiose, cui’ bra ntsu’hui cha’ tsu’hue ’na lo’o Ndiose, lo nxu’hua se’en na cha’ nu ndlo ni tñan. ³ Ndeña’an chu’hui cha’ tsu’hue ’na lo’o Ndiose, lo xu’hua se’en na cha’ nu ndlo ni tñan, lo a tucui ña’an xu’hua se’en na ’in na. ⁴ Siyana lyigaa nu cua ntsu’hui cha’ ’in Ndiose ngui’ni can’ cana ’in cha’ nu ndyca loo chelyuu re, lo cha’ re nga’ni na cana, cui’ siya cha’ nu nguiaña’an rin’ na. ⁵ ¿Ti ca ngui’ni cana ’in cha’ nu ndyca loo chelyuu re? Cui’ tsalca nu nguiaña’an ri’ siyana Jesús lca ni Sñe’ Ndiose. ⁶ Nde ni nu lca Jesucristo nu yaan loo chelyuu re, mducua tya ni lo’o tyi’a, a cuinta nguilu tne ni, lo tsi’i tsaloo ti cha’ ’in tyi’a can’, siyana cha’ ’in tyi’a lo’o tne ni. Cui’ Espíritu ndaa rsuun siyana lca na cha’ nu lñi, siyana Espíritu lca cha’ nu lñi. ⁷ La ni’ cuaan sna lca nu ndaa rsuun siyana lca na cha’ nu lñi: Stina Ndiose, lo’o jesus, lo’o Espíritu nu Luhui ’in ni, lo scati lca can’ quita’a sna. ⁸ Loo chelyuu re sna lca nu ndaa rsuun siyana lca na cha’ nu lñi: Espíritu, lo’o cha’ ’in tyi’a, a cuinta lo’o tne, quita’a sna cha’ re sca cha’ ti ’in na. ⁹ Si naa nguiaña’an rin’ na cha’ nu ndaa sca nten, lyee lati ndun loo cha’ nu ndyucui’ Ndiose, lo cui’ cha’ re lca nu cua ndaa Ndiose ’na lo’o cha’ ’in Sñe’ ni. ¹⁰ Nu nguiaña’an ri’ ’in Sñe’ Ndiose ticui’ cha’ re ndyucui’ can’, lo nu a nguiaña’an ri’ ’in ni, ngui’ni can’ ’in Ndiose lca ni sca nu cuiñi, siyana a nguiaña’an ri’ cha’ nu cua yucui’ Ndiose cha’ ’in Sñe’ ni. ¹¹ Nde cha’ nu ntsu’hui cha’ tsaña’an rin’ na: Siyana Ndiose ndaa ni chelyuu nu a tsatii ’a ’na, lo chelyuu can’ nda’an lo’o Sñe’ ni. ¹² Nu cua ndyucuan xu’hue ’in Sñe’ Ndiose, cua ngujui chelyuu nu a tsatii ’a ’in can’, lo nu a lyiji tyucuan xu’hue ’in Sñe’ Ndiose, a ndia chelyuu ’in can’. ¹³ Nde cha’ nga’an quityi re ’huan, ’huan nu nguiaña’an ri’ ’in Sñe’ Ndiose, siyana ca jylo rin’ huan siyana cua ngujui chelyuu nu a tsatii ’a ’huan, lo tsa quiñan la huan tsaña’an ri’ huan ’in Sñe’ Ndiose. ¹⁴ Nde cha’ nu a ngui’ni tucua rin’ na lo’o ni: Lyigaa cha’ nu jñan na ’in ni, cua ña’aan lca tiee ni, quine ’in ni cha’ nu tyucuin’ na. ¹⁵ Si jlyo rin’ na siyana ne ’in ni cha’ nu ndyucuin’ na, cu’ni na cuinta siyana cua ngujui na ’na. ¹⁶ Si ntsu’hui nu ña’an ’in sca ta’an na ngui’ni qui’ya, jñan can’ ’in Ndiose siya cha’ ’in can’, lo cui’ ni taa la ni chelyuu ’in, una si tsi’i qui’ya nu tsa lo’o ’in loo cha’ ndija lca na. Siyana ntsu’hui qui’ya nu ndya’an lo’o ’in ne’ loo cha’ ndija, lo a tyucuin’ lo’on huan siyana ti jñan huan ’in nisiya cha’ ’in can’. ¹⁷ Lyigaa loo cha’ a tsu’hue lca na qui’ya, una tsi’i lyigaa loo qui’ya ndya’an lo’o na ’na loo cha’ ndija. ¹⁸ Cua jlyo rin’ na siyana lyigaa nu lca sñe’ Ndiose, a tsa quiñan ’a can’ ti cu’ni qui’ya, siyana Sñe’ Ndiose nsñi ni cuinta ’in can’, lo a ca ’a ’in Ne’ xña’an ti cu’ni ti’i lo’o. ¹⁹ Cua jlyo rin’ na siyana cua lcan na sñe’ Ndiose, lo lyigaa la ña’an nten ntsu’hui ne’ yaa’ ne’ xña’an nu ngui’ni tñan a tsu’hue. ²⁰ Cua jylo rin’ na siyana cua yaan Sñe’ Ndiose loo chelyuu re, lo msla ni cha’ tiaa ’na siyana chu’hui lyoon na ’in ni nu lu’u ca, sca cha’ ti ’na lo’o ni nu lu’u ca, cui’ Jesucristo Sñe’ ni. Nde ni nu lca Ndiose nu chiñi ca, lo lca ni chelyuu nu a tsatii ’a. ²¹ Sñen’, xñi huan cuinta siyana a sten yu’huin huan lo’o scaxca na nu ’ni tnu ne’. Amen.