SA­YIKEREE­WA

SA­YIKEREE­WA

bo Yesu yi kereeri YOHANE ni

¹Ahin jɔrɛ n ye Nyɛmɛ seeri Yesu Kristo ka i yi kere i akɔɔm fa kɔ sam bo i cɛ má na bu bá yo n a. Na Yesu asunma i mɛrɛkɛ i akɔɔ Yohane dɔ, na i kɔ se i jɔrɛ ni. ²Jɔrɛ n bo Nyɛmɛ ni Yesu Kristo yi kereeri Yohane na i ŋuuri i ni, nyini ye wɔ di i daani akɛrɛ i n a.

³Sɔnɔ kɛrɛ bo i kaanri ahin kadasi ni, tere­fiɛ wo i dɔ. Na minɛm kɛrɛ bo bu tiiri i jɔrɛ na bu deeri i, tere­fiɛ wo bu dɔ, dama saŋga n adodo bo nyini sam kɛrɛ bá yo.

Kabo Yohane kɛrɛɛri kadasi yoori Kristo jama n ansɛ ni

^4-5Mini Yohane akɛrɛ ahin kadasi n na m fa ma Kristo jama asɛsɛ nso n bo bu wo Esiya awɔrɛ n nu n a. Nyɛmɛ bo i wo bɛrɛ, na i yo woori bɛrɛ, na i bá wo bɛrɛ saŋga kɛrɛ ni, ni i awiɛwiɛ busu nsom n bo bu wo yiri Nyɛmɛ kpiri n nyunu ni ma am ahoreda, na am di bu ahɔrɔma. Bekun, Yesu Kristo, yiri bo i di i daani na i la dabuŋu ni, na yiri ti bo i du mɔ teŋgeeri yiwee nu ni, na i kaaki ti durunya n nu nfɛmɛm kɛrɛ tii ni, ma am ahoreda, na am di i ahɔrɔma. Yiri koro ya, na wɔ fa i mbunja ade ya afite ya satiɛ kɛrɛ nu, ⁶na wɔ yo ya i fɛmɛya n nu minɛm na ya yo i sa­yoo­wa dɔŋgu­yo­fɔm, na ya su i Si Nyɛmɛ. Yiri Yesu Kristo ni, yiri ti ye ni ka ya wura i kpiri a, i dɛɛ la yiko saŋga kɛrɛ. Ami.

⁷Am niɛ, i fíte aŋgoro yinyiŋgu n nu ba,

na sɔnɔ kɛrɛ nyu­mbaa bá ŋu i,

fa saŋga ni minɛm bo bu wɔɔri i kpiɛ n kɛrɛ.

Yiri ti, durunya n nu­fɔm kɛrɛ sún.

I ti sɔ ɔ. Ami.

⁸Ya Mi Nyɛmɛ Fɛmɛ Kpiri bo i wo bɛrɛ ni, na i yo woori bɛrɛ, na i bá wo bɛrɛ saŋga kɛrɛ n ase ka, “Mini ti mɔ­fɔ a, na m kaaki ti kasin­fɔ.”

Kabo Yohane ŋuuri Kristo ka alɛlɛ nu ni

⁹Mini Yohane ti am niwa bo m ni ambɛrɛ kɛrɛ saŋga di wahara ni mindi Yesu dɛɛ ti, na ya ti i fɛmɛya n nu minɛm ni. Nyɛmɛ nɔaniɛ n bo ma kan i ni, ni Yesu daani n bo ma di i n dɛɛ ti, na ba fa m akɔ aji miɛ be bo i wo lui bambaka n bo i wo tieku n nu na bu fere i ka Patamosi n su. ¹⁰Ya Mibiɛ n dɛɛ cɛɛn ni, na Nyɛmɛ Awiɛwiɛ Casi n awura m ŋu, na ma ti akonvi bambaka be ŋga m sin, ka awiɛ dɛɛ su. ¹¹Na wɔ se m ka, “Kɛrɛ deke n kɛrɛ bo a ŋú i n wura kadasi n nu, na a fa ma Kristo jama asɛsɛ nsom bo bu wo ahin miɛ kpirim n su ni, bɛrɛ la Ɛfɛso, ni Samirina, ni Pɛrɛgamon, ni Tiyatira, ni Saradisa, ni Filadɛlɛfiya, ni Lawodikaya.”

¹²Na ma cɛ aniɛ m sin ka m ŋu sɔnɔ n bo i jɔjɔ m dɔ ni, m cɛ niɛɛri ni, na ma ŋu fitana takaa­biri nsom bo bu ti sika ni. ¹³Na ma ŋu be ka adamande wa ni, i wo bu afiɛn, i wura tanlɛɛ tintiin yorom, na wɔ fa sika dambara abo i hoe su. ¹⁴I tii­ŋmiɛ kɛrɛ ti fofoe papasi ka gise wɔ, na i nyu­mbaa kɛrɛ je ka sin fofoe. ¹⁵Na i jaa gbagbaa kɛrɛ boro ka jawii bo ba fa awura sin nu na wɔ boro sonsoen, na i konvi bo awie kabo nzue beberebe soŋgi na i bo awie barasu ni. ¹⁶I bita asara­mbaam nso i saa fɔmbɔrɔ nu, na takobe nana afite i nɔɔ nu. I nyunu je kabo wiɛ ba bi na i je n wɔ.

¹⁷M ŋuuri i sɔ ni, na ma kaba ada i jaa bu asiɛŋgu ka ma wu dɛɛ su wɔ, na wɔ fa i saa fɔmbɔrɔ anana m ŋu, na wɔ se m ka, “Má a soro sɛrɛ. Mini ti deke kɛrɛ bumboori ni i awieeri a. ¹⁸Mini ti bo i wo bɛrɛ saŋga kɛrɛ n a. Niɛ fɛn. M yo wuuri wɔ, ama, kisa, ma teŋge yiwee nu. M la ŋgɔɔ bo i la má awieeri. Mini bita yiwee ni Yiwee­fɔm Woo­biri kadombaa a. ¹⁹Nyini ti, kɛrɛ sam bo a ŋu bu ni, ni bo bu suyo kisa ni, ni bo bu bá yo ahin dɛɛ sin ni. ²⁰Asara­mbaa nsom bo a ŋu bu m saa fɔmbɔrɔ n bu la ka, Kristo jama asɛsɛ nsom n mɛrɛkɛm. Na fitana takaa­biri nsom bo bu ti sika ni gusu bu la ka, Kristo jama asɛsɛ nsom ni.”

Nɔaniɛ n bo bu fa maari Kristo jama n bo i wo Ɛfɛso ni

¹Na wɔ se m ka, “Kɛrɛ kadasi fa ma mɛrɛkɛ n bo i niɛ Kristo jama n bo i wo Ɛfɛso miɛ kpiri n nu ni, na a se bu ka, ‘Ahin nɔaniɛ n fite mini bo m bita asara­mbaa nsom m saa fɔmbɔrɔ nu ni, na m kaaki nati fitana takaa­biri nsom bo bu ti sika n afiɛn n dɔ ɔ. ²M si am sa­yoo­wam, m si kabo am ayo am juma ni anyum­boro barasu, ni kabo am la mindi barasu ni, na m si kabo am de má satiɛ­yo­fɔm ni. Na m kaaki si kabo am ayi kɔrɛsi aŋu minɛm bo bu ŋa bu ti m jaramasam, ama, bu woo­wa kere ka bu ti má sɔ, na am aŋu ka bu ti kɔrɛ­fɔm ni. ³Mini dɛɛ ti, am ayo sawɔrɛ amindi am wahara nu, am nya fie má, am toko su m su.

⁴Ama, jɔrɛ kun bo m fa jaraki am la ka, kisa am koro má m kabo am yo koro m ni. ⁵Nyini ti, am bu am tii nu fɔ na am si deke bo am akpaasi ni, na am kaaki am wo, na am yo sam bo am yoori bu bumboori ni. Nzɛn am akaaki má am wo, m bá cin yi am fitana takaa­biri n deke bo i taka ni. ⁶Ama, am sa kun bo i yo m fiɛ n la kabo am koro má Nikolaita­fɔm sa­yoo­wam ni, mini mmɔɔ koro má bu sa­yoo­wam ni.’

⁷Sɔnɔ kɛrɛ bo i koro ka i ti ahin jɔrɛ n bu, i ti ye ni ka i mi so i sui na i ti kabo Awiɛwiɛ Casi ni suse Kristo jamam barasu ni. Sɔnɔ kɛrɛ bo i di nasara, m má i atin na i di baka n bo i ma ŋgɔɔ n dɛɛ suu­wa na i wo Nyɛmɛ dika n nu ni.”

Nɔaniɛ n bo bu fa maari Kristo jama n bo i wo Samirina ni

⁸Na wɔ se m ka, “Kɛrɛ kadasi fa ma mɛrɛkɛ n bo i niɛ Kristo jama n bo i wo Samirina miɛ kpiri n nu ni, na a se bu ka, ‘Ahin nɔaniɛ n fite mini bo m ti deke kɛrɛ bumboori ni i awieeri ni, na m yo wuuri na ma teŋge yiwee nu ni dɔ ɔ. ⁹M si kabo am adi wahara agaya barasu, ni kabo am ti yaari­fɔm ni, ama, am ti neŋge­fɔm wɔ Nyɛmɛ dɔ. Na m si kabo minɛm kpiɛ am nzukɔ ni, bo bu yo bu ŋu ka bu ti Yuda­fɔm, ama, bu ti má Yuda­fɔm ŋgba, bu ti Sitana dɛɛ jama n wɔ. ¹⁰Am dí wahara kisa, ama, má am soro sɛrɛ. Am ti fɛn, Sitana wúra am nbem saraka na i yó am na i níɛ na am ŋú kekereke le­buru. Ama, am su m ni nahɔrɛ haari am bá wu, na m tɔ́ am ŋkatɔ, yiri la ŋgɔɔ bo i la má awieeri n a.’

¹¹Sɔnɔ kɛrɛ bo i koro ka i ti ahin jɔrɛ n bu, i ti ye ni ka i mi so i sui na i ti kabo Awiɛwiɛ Casi ni suse Kristo jamam barasu ni. Sɔnɔ kɛrɛ bo i di nasara ŋú má yiwee kpe nnyɔ su n kun.”

Nɔaniɛ n bo bu fa maari Kristo jama n bo i wo Pɛrɛgamon ni

¹²Na wɔ se m ka, “Kɛrɛ kadasi fa ma mɛrɛkɛ n bo i niɛ Kristo jama n bo i wo Pɛrɛgamon miɛ kpiri n nu ni, na a se bu ka, ‘Ahin nɔaniɛ n fite mini bo m la takobe nana n dɔ ɔ. ¹³M si deke bo am woori ni, am woo­biri n ti Sitana fɛmɛya tanaa­biri wɔ, ama, am toko su m ni nahɔrɛ wɔ, am ayaki má m yarada­yo, haari ni saŋga bo bu kuunri Antipasi bo i diiri m daani nahɔrɛ su am miɛ n nu, deke bo Sitana wo ni. ¹⁴Ama, m la jɔrɛ nbem bo m fa jaraki am, am nbem bita Baalam keree­wa atin n wɔ. Yiri yo kereeri Fɛmɛ Balaki, ye i maari Yisareli­fɔm yoori satiɛ diiri tiɛ niɛ, na ba yo sakaraya. ¹⁵Am nbem gusu ti sɔ ɔ, bu su Nikolaita­fɔm dɛɛ atin keree­wa n su wɔ. ¹⁶Nyini ti, am kaaki am wo, má nyini, m bá am dɔ kisa, na m fá takobe n bo i wo m nɔɔ nu kun luɛ ni minɛm bo bu yo sɔ ni.’

¹⁷Sɔnɔ kɛrɛ bo i koro ka i ti ahin jɔrɛ n bu, i ti ye ni ka i mi so i sui na i ti kabo Awiɛwiɛ Casi ni suse Kristo jamam barasu ni. Sɔnɔ kɛrɛ bo i di nasara, m má i mi diire n bo bu fere i ka mana * ni, na i wo fiɛɛ­wa nu ni. Na m káaki ma i mi yabuɛ fofoe be, ba kɛrɛ duma fɔfɔrɛ su, be koro si má duma n bo i wo su ni, má ka yiri n bo i de i ni si i a.”

Nɔaniɛ n bo bu fa maari Kristo jama n bo i wo Tiyatira ni

¹⁸Na wɔ se m ka, “Kɛrɛ kadasi fa ma mɛrɛkɛ n bo i niɛ Kristo jama n bo i wo Tiyatira miɛ kpiri n nu ni, na a se bu ka, ‘Ahin nɔaniɛ n fite mini Nyɛmɛ Wa n dɔ ɔ, mini bo m nyu­mbaa je ka sin fofoe, na m jaa gbagbaa kɛrɛ boro ka jawii dɛɛ su ni. ¹⁹M si am sa­yoo­wam, m si kabo am la koro barasu, ni kabo am su m ni nahɔrɛ su ni, ni amusui bo am su i ni, na m kaaki si kabo am la mindi, na m si kabo kisa am boro am nyi tara bumboori ni.

²⁰Ama, jɔrɛ bo m fa jaraki am la ka, am amɔ am nɔɔ ye am niɛ Yɛzɛbɛli, bara n bo i yo i ŋu ka i ti Nyɛmɛ nɔaniɛ kan­fɔ ni. I kere m akɔɔm wɔ na i daka bu, na bu suyo sakaraya, na i ma m minɛm di tiɛ niɛ. ²¹Ma se i ka i kaaki i wo na i yaki somaya kɔ ni, wɔ kete ka i kaaki má. ²²Nyini ti, m má i da tukpaki kekereke, na i ni minɛm bo bu yo sakaraya n dí wahara agaya, nzɛn ba kaaki má bu wo ayaki má sam bo bu ni yiri yo bu ni. ²³Na m kún i nbaam, na Kristo jama asɛsɛ n kɛrɛ sí ka, mini fiiti si deke bo i wo sɔnɔ kɛrɛ ahore su, ni i sunsunni nu. Na m fá sɔnɔ kɛrɛ sa­yoo­wa tɔ i kaari.

²⁴Ama, ambɛrɛ Tiyatira­fɔm nbem bo am aka, na am su má i keree­wa atin n su ni, ambɛrɛ asɔnsɔn má deke bo nbem fere i ka Sitana asiri nu sa bambaka ni. M suse am wɔ lɛɛ, m sɔ́ má am sɔɔri nɔnɔɔri buka má su. ²⁵Ama, atin bo am bita i ni, am bita i kenken haari saŋga bo m bá kaaki ba.

^26-28Sɔnɔ kɛrɛ bo i di nasara na i yo m sa koroo­wa kɔ juuri awieeri, m má i yiko kabo m Si ama m yiko ni, na i níɛ daanfiɛ daanfiɛ kɛrɛ su. Na i bíta bu kekereke kabo naŋkasi fa bulaari kɔrɔma tu bo i naanim barasu ni, na i fúfu bu kabo bu fufu yakati­sɛ barasu ni. Na m má i asaakojo.’ ²⁹Sɔnɔ kɛrɛ bo i koro ka i ti ahin jɔrɛ n bu, i ti ye ni ka i mi so i sui na i ti kabo Awiɛwiɛ Casi ni suse Kristo jamam barasu ni.”

Nɔaniɛ n bo bu fa maari Kristo jama n bo i wo Saradisa ni

¹Na wɔ se m ka, “Kɛrɛ kadasi fa ma mɛrɛkɛ n bo i niɛ Kristo jama n bo i wo Saradisa miɛ kpiri n nu ni, na a se bu ka, ‘Ahin nɔaniɛ n fite mini bo m la Nyɛmɛ awiɛwiɛ busu nso n na m bita asara­mbaam nso m saa nu dɔ ɔ. M si am sa­yoo­wam, am wo ka am la ŋgɔɔ, ama, am ti fuinm wɔ. ²Nyini ti, am yasu na am bita deke n bo am toko la i n kenken, má nyini, i wú wɔ. Dama ma ŋu ka am sa­yoo­wam n akpiɛ su Nyɛmɛ dɔ. ³Am teŋge su, kabo am yo tiiri Nyɛmɛ nɔaniɛ n na am deeri i ni, am kaaki am wo na am bita i, nzɛn am ayasu má, am si má saŋga bo m bá ni, dama m bá fura am nu ka awiefɔ dɛɛ su wɔ.

⁴Ama, m la minɛ nbem bo bu wo Saradisa Kristo jama n nu, bo ba saaki má bu sutura ayo má bu fin, bu sa­yoo­wam nu. Bɛrɛ bá wura tanlɛɛ fofoe na m ni bɛrɛ sáŋga nati a, dama bu ti ye ni sɔ ɔ. ⁵Sɔnɔ kɛrɛ bo i di nasara, i wúra nyini tanlɛɛ fofoe n be sɔ ɔ. Na m yí má i mi duma fite má ŋgɔɔ kadasi n nu, ama, m bá jina m Si ni i mɛrɛkɛm nyunu, na m sé bu ka i ti m dɛɛ sɔnɔ ɔ.’ ⁶Sɔnɔ kɛrɛ bo i koro ka i ti ahin jɔrɛ n bu, i ti ye ni ka i mi so i sui na i ti kabo Awiɛwiɛ Casi ni suse Kristo jamam barasu ni.”

Nɔaniɛ n bo bu fa maari Kristo jama n bo i wo Filadɛlɛfiya ni

⁷Na wɔ se m ka, “Kɛrɛ kadasi fa ma mɛrɛkɛ n bo i niɛ Kristo jama n bo i wo Filadɛlɛfiya miɛ kpiri n nu ni, na a se bu ka, ‘Ahin nɔaniɛ n fite mini bo m ti casi na m ti nahɔrɛ­fɔ, na m bita Fɛmɛ Davidi kadombaa n bo i kere ka m la i dɛɛ yiko n be wɔ, na nzɛn m tekeeri anɔ, be koro tu má i, na nzɛn m tuuri i gusu, be koro teke má i. ⁸M si am sa­yoo­wam, am niɛ, ma teke anɔ ama am bo be wo má bɛrɛ bo i koro tu i. M si ka am la má faŋga agaya, ama, haari ni nyini mmɔɔ, am fite má m sin, am toko bita m nɔaniɛ n ni nahɔrɛ wɔ. ⁹Am yaki bo bu su Sitana n na bu yo bu ŋu ka bu ti Yuda­fɔm ni, bu ti kɔrɛ­fɔm wɔ, bu ti má Yuda­fɔm ŋgba. M má bu ba kutu am nyunu na bu si ka m koro am. ¹⁰Am ade m nɔaniɛ ni, na am amindi n dɛɛ ti, m yí am fite kekereke n bo Nyɛmɛ bá fa yo durunya n nu­fɔm kɛrɛ na i niɛ ni.

¹¹M cɛ́ má, m káaki ba kisa. Atin n bo am bita i ni, am bita i kenken na má be fin am ŋkatɔ ni. ¹²Sɔnɔ kɛrɛ bo i di nasara, m fá i yo jantaraka Nyɛmɛ Seree­biri Awuru n nu na i wó nu dɔ saŋga kɛrɛ. Na m kɛ́rɛ Nyɛmɛ duma mata i, na m kɛ́rɛ Nyɛmɛ miɛ n duma, miɛ n bo i fite aŋgoro Nyɛmɛ dɔ na bu fere i ka Yɛrusalem fɔfɔrɛ, na m káaki kɛrɛ m duma fɔfɔrɛ n gusu mata i mi ŋu.’ ¹³Sɔnɔ kɛrɛ bo i koro ka i ti ahin jɔrɛ n bu, i ti ye ni ka i mi so i sui na i ti kabo Awiɛwiɛ Casi ni suse Kristo jamam barasu ni.”

Nɔaniɛ n bo bu fa maari Kristo jama n bo i wo Lawodikaya ni

¹⁴Na wɔ se m ka, “Kɛrɛ kadasi fa ma mɛrɛkɛ n bo i niɛ Kristo jama n bo i wo Lawodikaya miɛ kpiri n nu ni, na a se bu ka, ‘Ahin nɔaniɛ n fite mini bo m ti Ami na m la dabuŋu, na m di daani ni nahɔrɛ su n dɔ ɔ. Mini ni Nyɛmɛ du mɔ yo woori bɛrɛ a, ye ya yiiri deke n kɛrɛ a. ¹⁵M si am sa­yoo­wam, am ti má niniki, am kaaki ti má kɛkɛrɛ, nzɛn má am ti niniki wara kɛkɛrɛ, má m koro. ¹⁶Ama, am ti bɔbɔrɔki n dɛɛ ti, m púuti am m nɔɔ nu butu. ¹⁷Am ŋa am ti neŋge­fɔm wɔ, deke be kpiɛ má am su, ama, am si má ka am la aŋunfɔ, na am si má ka am ti yaari­fɔm, na am kaaki si má ka am ti anyinsinm, na am kaaki si má ka am nati am ŋuniɛ ŋgbɛɛn wɔ. ¹⁸Nyini ti, m koro ka m tu am fɔ, na am bra m dɔ ba to sika kpa bo ba fa awura sin nu na wɔ fite casi ni, adena am yo neŋge­fɔm nahɔrɛ su, na am ba to sutura fofoe m dɔ, na am fa kata am ŋu, na má minɛ ŋu ka am nati am ŋuniɛ ŋgbɛɛn na i la nyinsɛ. Na am ba to anyumbaa ayiri m dɔ, na am fa wura am nyu­mbaa nu na am koro ŋu asi nyunyumi. ¹⁹Bo m koro bu ni, bɛrɛ ye m jaraki bu na m cin bu sui a, nyini ti, am boro am nyi na am kaaki am wo. ²⁰Am ti fɛn, m jina sɔɔ anɔ n sin subobo, sɔnɔ kɛrɛ bo i ti m konvi ŋga na i tekeeri anɔ ni, m bá wura i mi dɔ, na m ni yiri sáŋga di diire.

²¹Sɔnɔ kɛrɛ bo i di nasara, m má i atin na i bá tana m bi m fɛmɛya biɛ n su, kabo ma di nasara na m ni m Si saŋga tana i fɛmɛya biɛ n su ni.’ ²²Sɔnɔ kɛrɛ bo i koro ka i ti ahin jɔrɛ n bu, i ti ye ni ka i mi so i sui na i ti kabo Awiɛwiɛ Casi ni suse Kristo jamam barasu ni.”

Kabo bu su Nyɛmɛ i fɛmɛya n nu barasu ni

¹Nyini sin, na wɔ yo m ka alɛlɛ dɛɛ su, na ma ŋu ka anɔ be ateke aŋgoro. Na ma ti akonvi ŋga ka awiɛ dɛɛ su sujɔjɔ m dɔ, i ti akonvi n bo i du mɔ jɔjɔɔri m dɔ n wɔ. I ŋa, “Fun bra aŋgoro fɛn, na m kére u sam bo bu bá yo ahin sin.”

²Jina nu n bɛrɛ na Awiɛwiɛ Casi n aba awura m ŋu na ma ŋu ka fɛmɛya biɛ wo aŋgoro, be tana su. ³Bo i tana fɛmɛya biɛ n su je piɛpiɛu kabo cɛncɛɛri nbem je barasu wɔ, nbem je fofoe na nbem je kɔkɔrɛ, na i fɛmɛya biɛ ni, deke be je piɛpiɛu aŋgoro kabo nzue ba muna na ayi kpiɛ nu ni. ⁴Fɛmɛya biɛ abura­nyɔ ni nna nbem taka bara yɛ i fɛmɛya biɛ ni, na nkpiɛn­kpiɛnm abura­nyɔ ni nna tana biɛm su, bu wura tanlɛɛ fofoem na bu butu sika kere. ⁵Na fɛmɛya biɛ ni sukpɛsɛ ka nzue dɛɛ su, na i sutiɛntiɛn, na i suyo naŋmiɛ. Fitana nso taka fɛmɛya biɛ n nyunu wo je su, bɛrɛ la Nyɛmɛ awiɛwiɛ busu nsom ni. ⁶Deke be gusu da fɛmɛya biɛ n nyunu ka nzue bambaka dɛɛ su, i nyunu da cain ka niɛɛnu wɔ.

Deke ŋgɔɔ­fɔ nna nbem gusu abara ayɛ fɛmɛya biɛ ni, bu la anyumbaa beberebe, bu nyunu ni bu sin n kɛrɛ. ⁷Ciciri su dɛɛ n ti ka jara a, nnyɔ su n ti ka toora, nsan su n nyunu­awa ti ka adamande wɔ, na nna su n ti ka kajiri bo i sutu landi. ⁸Bu kun kun kɛrɛ la laŋkpɛtɛ nsɛn nsɛn wɔ, bu la anyumbaam bu ŋuniɛ­mbaa nu, ni bu ŋuniɛ kɛrɛ su. Na bu sudi jue kɔŋguɛ ni wiɛsu kɛrɛ, ka,

“Casi, casi, casi la ya Mi Nyɛmɛ Fɛmɛ Kpiri,

i yo woori bɛrɛ, na i toko wo bɛrɛ, na i bá wo bɛrɛ saŋga kɛrɛ ni.”

⁹Nzɛn bu nya sudi jue na bu fa kansi, ni jirima, ni ansɛ ma yiri n bo i tana fɛmɛya biɛ n su ni, na i wo bɛrɛ saŋga bo i la má awieeri ni, ¹⁰nyini saŋga, a ŋu ka nkpiɛn­kpiɛnm abura­nyɔ ni nna n sukutu i nyunu, na bu su i, yiri bo i wo bɛrɛ na i la má awieeri na i tana fɛmɛya biɛ n su ni. Na bu yi bu kere, sufa se fɛmɛya biɛ n nyunu, na bu sudi jue, ka,

¹¹“Ya Micɛra ni ya Nyɛmɛ, wɔrɔ ti ye ni ka

a de kansi a, ni jirima, ni yiko.

Dama wɔrɔ yiiri deke n kɛrɛ a,

u koroya­nu ye a maari deke n kɛrɛ la ŋgɔɔ a.”

Kadasi n ni Bɔmbaa n jɔrɛ

¹Na ma ŋu ka kadasi nyanyaa­wa be wo yiri n bo i tana fɛmɛya biɛ n su n saa fɔmbɔrɔ n nu, kɛrɛɛ­wa wo i kunnu ni i sin kɛrɛ su, ba fa wiɛ mɛnɛ amiɛ amata i busu nso. ²Na ma ŋu Nyɛmɛ mɛrɛkɛ faŋga­fɔ be ka i subo ndoori faŋga su ka, “Ŋma ti ye ni bo i koro cin ŋmaŋgi wiɛ mɛnɛ n na i teke kadasi n a?”

³Ama, aŋgoro, ni asiɛŋgu, ni bo bu wo asiɛn bu, be awo má bɛrɛ bo i koro teke kadasi ni, na a ba kan ka i koro niɛ nu. ⁴Be awo má bɛrɛ bo i ti ye ni bo i koro teke kadasi ni, na a ba kan ka i koro niɛ nu n dɛɛ ti, na ma sun ni nyunvuin ŋgba. ⁵Na nkpiɛn­kpiɛnm n nu kun, ase m ka, “Má a sun. Niɛ fɛn, Fɛmɛ Davidi anuma kpiri ni, bo bu fere i ka Yuda­fɔm busu nu jara n adi nasara, i koro cin ŋmaŋgi wiɛ mɛnɛ nso n na i teke kadasi ni.”

⁶Na ma ŋu bɔmbaa be, i ti ka ba kpiɛ i kɔm wɔ, i jina fɛmɛya biɛ n afiɛn. Deke ŋgɔɔ­fɔ nnam, ni nkpiɛn­kpiɛnm n abara ayɛ i. I la mbiɛ nso wɔ, i nyu­mbaa gusu ti nso wɔ. Bɛrɛ la Nyɛmɛ awiɛwiɛ busu nsom bo wɔ sunma bu durunya n kɛrɛ nu ni. ⁷Na wɔ kɔ yiri n bo i tana fɛmɛya biɛ n su n dɔ, na wɔ de kadasi n afite i saa fɔmbɔrɔ nu. ⁸I kɔ deeri kadasi n ni, na deke ŋgɔɔ­fɔ nnam, ni nkpiɛn­kpiɛnm abura­nyɔ ni nnam n akutu i nyunu. Bu kɛrɛ la biɛku, na bu kɛrɛ bita sika ayaba bo wɔ yi ni ayiri kunkuun­wa nva­nvani ŋgumi wɔ. Ayiri kunkuun­wa nva­nvani n ti nyɛmɛsere bo Nyɛmɛ dɛɛ minɛ sere i wɔ. ⁹Na ba di jue fɔfɔrɛ ama yiri Bɔmbaa n ka,

“Wɔrɔ ti ye ni ka a de kadasi ni,

na a ŋmaŋgi wiɛ mɛnɛ n a,

dama wɔrɔ ye bu kpiɛɛri u kɔm, ye a fa u mbunja ade minɛm tii aji a.

Adamande kɛrɛ, ni daanfiɛ kɛrɛ, ni aniɛm kɛrɛ,

ni asiɛn barasu barasu kɛrɛ bo bu wo durunya n nu ni,

bu nbem ayo Nyɛmɛ dɛɛ minɛm.

¹⁰A fa bu ayo u fɛmɛya n nu minɛm,

na bu yo u sa­yoo­wa dɔŋgu­yo­fɔm,

na bu niɛ durunya n kɛrɛ su.”

¹¹Na ma niɛ aŋu Nyɛmɛ mɛrɛkɛm beberebe, akpii akpii buru nɔ, ka, ba bara ayɛ fɛmɛya biɛ ni, ni deke ŋgɔɔ­fɔ nnam, ni nkpiɛn­kpiɛnm ni. Na ma ti ka ¹²ba yɛ bu konvi su sudi jue, ka,

“Bɔmbaa n bo bu yo kpiɛɛri i kɔm ni,

yiri ti ye ni ka i de yiko a, ni neŋge, ni alecira, ni faŋga,

ni jirima, ni kpiri, ni kansi a.”

¹³Na ma ti ka deke kɛrɛ bo bu wo aŋgoro, ni asiɛŋgu, ni bo bu wo asiɛn bu, ni bo bu wo nzue nu, ni deke kɛrɛ bo Nyɛmɛ ayi bu, ka bu sudi jue, ka,

“Yiri n bo i tana fɛmɛya biɛ n su n ni Bɔmbaa ni,

bɛrɛ ti ye ni ka bu de kansi a, ni jirima, ni kpiri, ni yiko,

saŋga kɛrɛ saŋga.”

¹⁴Na deke ŋgɔɔ­fɔ nnam n ase ka, “Ami.”

Na nkpiɛn­kpiɛnm n akutu asu Nyɛmɛ ni Bɔmbaa ni.

Wiɛ mɛnɛ bo bu fa mata kadasi n jɔrɛ

¹Na ma ŋu ka Bɔmbaa n aba acin aŋmaŋgi wiɛ mɛnɛ nso n bo bu fa mataari kadasi n nu kun. Na ma ti deke ŋgɔɔ­fɔ nnam n nu kun konvi ŋga, kabo nzue tiɛntiɛn barasu ni, ka, “Fite.”

²M niɛɛri na ma ŋu ka, kpɔŋgɔ fofoe lɛɛ. Bo i fun i n bita taa ni awiɛ, na ba butu i fɛmɛya kere, na wɔ kɔ ka luɛ­kun­fɔ na i di nasara.

³Na Bɔmbaa n acin aŋmaŋgi wiɛ mɛnɛ nnyɔ su ni, na ma ti ka deke ŋgɔɔ­fɔ nnyɔ su ni suse ka, “Fite.”

⁴Na kpɔŋgɔ kɔkɔrɛ afite, na ba ma i fun­fɔ n takobe tintiin, na ba ma i yiko ka i yi tana­laifiɛ fite durunya n nu, na minɛm kun bu beŋgum.

⁵Na Bɔmbaa n acin aŋmaŋgi wiɛ mɛnɛ nsan su ni, na ma ti ka deke ŋgɔɔ­fɔ nsan su n suse ka, “Fite.”

M niɛɛri na ma ŋu ka, kpɔŋgɔ biri lɛɛ. I fun­fɔ n bita deke bo bu bita sunsun diire ni i saa nu. ⁶Na ma ti akonvi be ŋga deke ŋgɔɔ­fɔ nnam n nu, i ŋa, “Ŋgani ayaba ŋgboroko kun ti juma­yo­fɔ le­kun ŋkatɔ ɔ. Na abuwe ayaba ŋgboroko nsan ti juma­yo­fɔ le­kun ŋkatɔ. Ama, má am saaki ŋguin ni nzan ni.”

⁷Na Bɔmbaa n acin aŋmaŋgi wiɛ mɛnɛ nna su ni, na ma ti ka deke ŋgɔɔ­fɔ nna su n suse ka, “Fite.”

⁸M niɛɛri na ma ŋu kpɔŋgɔ nzuin faa, i fun­fɔ n duma la Yiwee, na bo bu fere i ka Yiwee­fɔm Woo­biri n gusu su i su. Na Nyɛmɛ ama bu durunya kpaaki nu nna buekun yiko ka bu fa luɛ, ni ahɔɛ, ni tukpaki, ni boro neŋge­ndɔrɛ tiɛm, na bu kun bu.

⁹Na Bɔmbaa n acin aŋmaŋgi wiɛ mɛnɛ nnu su ni, na ma ŋu minɛm awiɛwiɛ Mikun yoo­wa yoo­biri n bu, bɛrɛ la minɛm bo bu yo kuunri bu fa kɔ bu Nyɛmɛ jɔrɛ kaan­wa, ni bu daani dii­wa n dɛɛ ti. ¹⁰Na bu sutiɛn faŋga su ka, “Ya Mi Nyɛmɛ Fɛmɛ casi, nahɔrɛ­fɔ, cɛɛn nzu ye a dí minɛm bo bu yo kuunri ya n jɔrɛ na a cín bu sui ma ya?”

¹¹Na Nyɛmɛ awura bu kun kun kɛrɛ sutura fofoe, na wɔ se bu ka, “Am yi am ŋumi kaan ka, na bu bá kun am beŋgu akɔɔm, ni am beŋgu Kristo­fɔm kɛrɛ kɔ wie ka, kabo bu yo kuunri am barasu ni, na m dí bu jɔrɛ.”

¹²Na ma ŋu ka Bɔmbaa n acin aŋmaŋgi wiɛ mɛnɛ nsɛn su ni, na asiɛn akpisi faŋga su, na wiɛ akaaki biri didiki ka nambiri ŋuma, na sara n akaaki kɔkɔrɛ ka mbunja dɛɛ su. ¹³Na asara­mbaam afite aŋgoro ati atɔtɔ kabo aŋuma ba kpisi damba baka na i poorim titi tɔtɔ barasu ni. ¹⁴Na aŋgoro n kɛrɛ anyanya kabo bu nyanya biɛ ni, na wɔ mini, na bukam, ni nzue nu lui bambakam kɛrɛ ayasu bu tanaa­biri. ¹⁵Na durunya n nu nfɛmɛm, ni tere­tere­fɔm, ni soja nkpiɛn­kpiɛnm, ni neŋge­fɔm, ni nfaŋga­fɔm, ni akɔɔm, ni sɔnɔ kɛrɛ akɔ afiɛ yabuɛ ŋgbiŋgbirim buɛm nu, ni yabuɛ bambakam bu, bukam su. ¹⁶Na ba se ka, “Má bukam bereki gɔ ya ŋu, na má yabuɛ ŋgbiŋgbirim kata ya ŋu, má i ti ye, adena má sɔnɔ n bo i tana fɛmɛya biɛ n su n ŋu ya, na má Bɔmbaa n gusu cin ya sui. ¹⁷Dama cɛɛn bo Nyɛmɛ ni Bɔmbaa ni cin sɔnɔ kɛrɛ sui n aju, ye ŋma koro jina bu nyunu a?”

Yisareli­fɔm minɛ akpii yaa ni akpii abura­na ni nna n jɔrɛ

¹Nyini sin na ma ŋu mɛrɛkɛm nna, ka bu jina durunya n awɔrɛ nna n kɛrɛ nu na bu kanda aŋuma, na má i kpiɛ asiɛn n su, ni tieku nu, wara i kpiɛ gɔ baka su. ²Na ma ŋu mɛrɛkɛ be ka i fite wiɛ afiiri, i bita deke be bo Nyɛmɛ bo i wo bɛrɛ saŋga kɛrɛ n fa se i minɛm nyaari. Na wɔ tiɛn faŋga su ajɔjɔ mɛrɛkɛ nnam bo Nyɛmɛ ama bu yiko ka bu saaki asiɛn n ni tieku n dɔ, ³na wɔ se bu ka, “Má am se ka am saaki asiɛn n ni tieku n ni bakam ni, má ka ya ba ase Nyɛmɛ minɛm kɛrɛ ŋuma su nyaari awie ka.”

⁴Na wɔ kan minɛm bo ba se bu nyaari bu ŋuma su ni, na wɔ kere m bu nɔ, bu kɛrɛ kɔ yasuuri minɛ akpii yaa ni akpii abura­na ni nna a, bu fite Yisareli­fɔm dɛɛ busu n kɛrɛ nu wɔ.

⁵Yuda dɛɛ busu nu­fɔm ti minɛ akpii buru ni akpii nnyɔ bo ba se bu nyaari, na Ruben dɛɛ busu nu­fɔm ti minɛ akpii buru ni akpii nnyɔ, na Gadi dɛɛ busu nu­fɔm ti minɛ akpii buru ni akpii nnyɔ. ⁶Na Aseri dɛɛ busu nu­fɔm ti minɛ akpii buru ni akpii nnyɔ, na Nafatali dɛɛ busu nu­fɔm ti minɛ akpii buru ni akpii nnyɔ, na Manase dɛɛ busu nu­fɔm ti minɛ akpii buru ni akpii nnyɔ. ⁷Na Simeyon dɛɛ busu nu­fɔm ti minɛ akpii buru ni akpii nnyɔ, na Levi dɛɛ busu nu­fɔm ti minɛ akpii buru ni akpii nnyɔ. Na Izaki dɛɛ busu nu­fɔm ti akpii buru ni akpii nnyɔ. ⁸Na Zabulon dɛɛ busu nu­fɔm ti minɛ akpii buru ni akpii nnyɔ, na Yosefu dɛɛ busu nu­fɔm ti minɛ akpii buru ni akpii nnyɔ, na Bɛnjamin dɛɛ busu nu­fɔm ti minɛ akpii buru ni akpii nnyɔ.

Jama beberebe bo ba nya tii­de n jɔrɛ

⁹Nyini sin na ma ŋu jama beberebe, bu la má nɔ, bu fite durunya asiɛn n kɛrɛ su, ni adamande kɛrɛ nu, ni durunya daanfiɛ n kɛrɛ nu, ni durunya aniɛm kɛrɛ nu, ka, bu jina yiri n bo i tana fɛmɛya biɛ n su n ni Bɔmbaa n nyunu. Bu wura tanlɛɛ fofoe yorom, bu bita kpakpa nyawam bu saa nu. ¹⁰Na ba bo afere faŋga su ase ka,

“Nyɛmɛ bo i tana fɛmɛya biɛ n su n ni Bɔmbaa n ama ya nya ya tii a.”

¹¹Na mɛrɛkɛm n kɛrɛ ajina abara ayɛ fɛmɛya biɛ, ni nkpiɛn­kpiɛnm, ni deke ŋgɔɔ­fɔ nnam ni, na ba dada bu nyunu su asiɛŋgu Nyɛmɛ bo i tana fɛmɛya biɛ n su n nyunu, na ba su i. ¹²Na bu suse ka,

“Ami. Kansi, ni kpiri, ni alecira,

ni ansɛ, ni jirima,

ni yiko, ni faŋga

ti ya Nyɛmɛ dɛɛ wɔ saŋga kɛrɛ saŋga. Ami.”

¹³Na nkpiɛn­kpiɛnm n nu kun abisa m ka, “Ŋmam ye a ŋu ka bu wura tanlɛɛ fofoe yorom n a, ye bu fite ni wɔ?”

¹⁴Na ma se i ka, “M mibiɛ, wɔrɔ si a, mini si má.” Na wɔ se m ka, “Bɛrɛ ti minɛm bo ba fite anyum­boro kekereke nu n a, bɛrɛ ye ba ŋmisi bu sutura Bɔmbaa ni mbunja n nu ayo bu fofoe n a.

¹⁵Nyini dɛɛ ti, ye bu jina Nyɛmɛ Seree­biri Awuru n nu,

i fɛmɛya biɛ n nyunu ye bu su i kɔŋguɛ ni wiɛsu n a,

na Nyɛmɛ bo i tana i fɛmɛya biɛ n su n wó bu dɔ na i yó bu kanda.

¹⁶Ahɔɛ ni nzuehɔɛ tí má bu kun cɛɛn be,

wiɛ bó má bu,

na i kɛkɛrɛ gusu wúra má bu.

¹⁷Dama Bɔmbaa n bo i wo fɛmɛya biɛ n afiɛn ni yó bu sasa­fɔ a,

na yiri fá bu kɔ bura nzue bo i tiɛ

na i ma ŋgɔɔ bo i la má awieeri n a.

Na Nyɛmɛ núnuka bu nyunvuin kɛrɛ bu nyunu.”

Wiɛ mɛnɛ nso su n jɔrɛ

¹Saŋga bo Bɔmbaa n cin ŋmaŋgiiri wiɛ mɛnɛ nso su n ni, na deke kɛrɛ atɔ amuna aŋgoro n nu, haari miti abura­san.

²Na ma ŋu mɛrɛkɛ nsom bo bu jina Nyɛmɛ nyunu ni, na ba fa awiɛ fitaawa nso ama bu.

³Na ma ŋu mɛrɛkɛ nyiŋga ka i bita sika ayaba, bo bu fa ayiri kunkuun­wa nva­nvani gɔ nu na bu kunkun i ni, na wɔ kɔ ajina Mikun n yoo­wa yoo­biri n bi. Na ba ma i ayiri kunkuun­wa nva­nvani beberebe ka i fa buka Nyɛmɛ minɛm nyɛmɛsere su, na i fa kunkun Mikun yoo­wa yoo­biri n bo bu fa sika mata su, na i wo fɛmɛya biɛ n nyunu ni. ⁴Na ayiri kunkuun­wa nva­nvani n ŋmisini n ni Nyɛmɛ minɛm nyɛmɛsere n ayasu mɛrɛkɛ n saa nu afun akɔ Nyɛmɛ nyunu. ⁵Na mɛrɛkɛ n ayi sin Mikun n yoo­wa yoo­biri n su, na wɔ fa awura ayaba n nu, na wɔ yi, na wɔ fa atu asandi durunya n nu. Na nzue sukpura sutiɛntiɛn, na i sujeje, na i sukpɛkpɛsɛ, na asiɛn n akpisi.

Awiɛ nso n bo bu kan i n jɔrɛ

⁶Na mɛrɛkɛ nsom n bo bu bita awiɛ fitaawam n asɛsɛ bu ŋu su ka bu kan awiɛm ni.

⁷Na mɛrɛkɛ n bo i du mɔ n akan i dɛɛ awiɛ ni. Na nzue yabuɛ, ni sin, saŋga ni mbunja atɔ durunya n nu, na sin aje durunya n kpaaki nu nsan buekun, ni bakam kɛrɛ bo bu wo durunya n nu kpaaki nu nsan buekun, ni wura mɔnɛ kɛrɛ.

⁸Na mɛrɛkɛ n bo i tɔ su nnyɔ su n akan i awiɛ ni, na deke be, i ti ka buka bambaka wɔ, ye wɔ so sin su a, na ba fa i atu tieku n nu, na tieku n kpaaki nu nsan buekun akaaki mbunja. ⁹Na deke ŋgɔɔ­fɔm kɛrɛ bo bu wo tieku n nu kpaaki nu nsan buekun awu, na lee bambakam bo bu wo tieku n nu kpaaki nu nsan buekun gusu asaaki.

¹⁰Na mɛrɛkɛ n bo i tɔ su nsan su n akan i awiɛ ni, na asara­mbaa bambaka bo i je sin ka wura sin afite aŋgoro aba atɔ kunmam ni nzuetinm bo bu wo durunya n nu kpaaki nu nsan buekun nu. ¹¹Asara­mbaa n duma la Wiwi, na nzue n bo i wo durunya n nu n kpaaki nu nsan akaaki wiwi, nzue n ti wiwi n dɛɛ ti, na minɛm dɔŋgu bo bu nuuri nyini nzue n awu.

¹²Na mɛrɛkɛ n bo i tɔ su nna su n akan i awiɛ ni, na deke be aba atɔ wiɛ, ni sara, ni asara­mbaam kɛrɛ kpaaki nu nsan buekun su asaaki bu, na ba kaaki biri tuum. Wiɛsu ni kɔŋguɛ n kpaaki nu nsan buekun, ayo má wein.

¹³Na ma niɛ, na ma ŋu ka kajiri be sulaandi tu aŋgoro, na ma ti kabo i tiɛn barasu ni, i ŋa, “Oi, keto, keto, keto wo sɔnɔ kɛrɛ bo i wo durunya n nu n ŋu, kabo mɛrɛkɛ nsanm bo ba ka n koro ka bu kan bu awiɛm ni, na bu tiiri.”

¹Na mɛrɛkɛ nnu su n akan i awiɛ ni, na ma ŋu ka asara­mbaa be afite aŋgoro n aba atɔ asiɛŋgu. Na ba ma i kadombaa ka i teke kunma n bo i kɔ ŋgoŋgo na i la má awieeri ni. ²Na wɔ teke nyini kunma n ni. I tekeeri i ni, na ŋmisini afite kunma n nu, i ti ka sin bambaka tɔrɔɔ­wa ŋmisini wɔ. Na ŋmisini n bo i fite kunma n nu n ama wiɛ ni aŋgoro n kɛrɛ asi biri didiki. ³Na lalom afite ŋmisini n nu asandi ade asiɛn n su, na Nyɛmɛ ama bu yiko, ka bundaanim dɛɛ su. ⁴Na wɔ se bu ka má bu di wura ni diire mbaa wara bakam, ama, bu kan minɛm n bo bu la má Nyɛmɛ anyaari see­wa bu ŋuma su ni. ⁵Wɔ ma má bu yiko ka bu kun minɛm wɔ, ama, bu kere bu wahara sara nnu. Wahara ni ti kabo bundaani kan sɔnɔ na i yo ya n wɔ. ⁶Nyini saŋga ni, adamande sún kpini yiwee busu na bu wú, ama, bu nyá má i.

⁷Lalom n ti ka kpɔŋgɔm bo ba cici bu ka bu kɔ luɛ dɛɛ su wɔ, deke be wo bu tii su, ka sika kere dɛɛ su, na bu nyunu­awa ti ka adamande dɛɛ su. ⁸Bu ndɔrɛ ti tintiin kabo bara bo i la tii­ŋmiɛ tintiin ti n wɔ, na bu jee ti ka jara dɛɛ. ⁹Deke be kata bu hoe su pɛpɛrɛpɛ ka bulaari dɛɛ su, na bu laŋkpɛtɛm suyo naŋmiɛ kabo kpɔŋgɔm ni bu torokum n beberebe suŋmati kɔ luɛ na bu yo naŋmiɛ n wɔ. ¹⁰Bu lɔ, bo bu fa kan n ti ka bundaani dɛɛ su wɔ. Bu la yiko bu lɔ n nu, bo bu fa kere minɛ wahara sara nnu. ¹¹Bu fɛmɛ n la mɛrɛkɛ n bo i niɛ kunma ŋgoŋgo n bo i la má awieeri n su ni. Hiburu aniɛ nu bu fere i ka, Abadon, ye Giriki aniɛ nu bu fere i ka, Apolin, i bu la ka, saaki­fɔ.

¹²Tɔ. Ciciri su dɛɛ ahoresaaki n asin, nnyɔ wo sin suba.

¹³Na mɛrɛkɛ nsɛn su n akan i awiɛ n na ma ti akonvi be ŋga ka i fite Mikun yoo­wa yoo­biri n bue nna n kɛrɛ, ba fa sika amata su na i wo Nyɛmɛ nyunu ni. ¹⁴Na akonvi n ajɔjɔ mɛrɛkɛ nsɛn su n bo i bita awiɛ n dɔ, i ŋa, “Kɔ mɛrɛkɛ nnam bo bu wo kunma kpiri n bo bu fere i ka, Yufarati n dɔ, na a nyaŋgi bu ji.”

¹⁵Na wɔ nyaŋgi mɛrɛkɛ nnam bo ba du mɔ akpa bu ŋu aŋminda nyini cɛɛn n gbingbin na bu kun minɛ bo bu wo durunya n nu kpaaki nu nsan buekun ni. ¹⁶Na ma ti kabo bu sojam bo bu fun kpɔŋgɔ nɔ ti, bu nɔ kɔ yasuuri akpii akpii busu yaa nnyɔ ɔ.

¹⁷Deke n bo i yo m ka alɛlɛ ni, m ŋuuri kpɔŋgɔm, ni bo bu fun bu ni, ka bulaari pɛpɛrɛpɛ be kata bu hoe su, nbem boro kɔkɔrɛ ka sin wɔ, na nbem ti biri ka bura nzue, na nbem ti ka ndɛrɛ nzue, kpɔŋgɔm tii dika ti ka jara tii wɔ. Na sin, ni ŋmisini, ni ferewita sufite bu nɔɔ nu. ¹⁸Ahin deke kekereke nsanm ni kuunri minɛ n bo bu wo durunya n nu kpaaki nu nsan buekun n a, bɛrɛ la sin, ni ŋmisini, ni ferewita n bo i fite bu nɔɔ nu ni. ¹⁹Dama kpɔŋgɔm n yiko kɛrɛ wo bu nɔɔ, ni bu lɔm nu wɔ. Bu lɔm ti ka woom wɔ, bu la atiim, ye bu fa kere minɛ wahara a.

²⁰Minɛm bo ahin wahara n akun má bu na bu kaari ni, ba kaaki má bu wo, ba yaki má amɔɛm su, ni dekem bo ba fa sikam, ni jɛtɛm, ni jawiim, ni yabuɛm, ni bakam ayo bu ka bu amɔɛm, nyini dekem koro ŋu má asi, na bu koro ti má asui, na bu koro nati má ni, ba yaki má bu su. ²¹Ba kaaki má bu wo fa kɔ kabo bu kun minɛm ni, ni kabo bu di ayiri ni, ni kabo bu yo sakaraya ni, ni kabo bu wɔ awie ni.

Mɛrɛkɛ ni kadasi kaan n jɔrɛ

¹Na ma ŋu mɛrɛkɛ faŋga­fɔ be bekun ka i fite aŋgoro sujura ba. Na yinyiŋgu akata i ŋu ka tani dɛɛ su. Na ayi bo i kpiɛ aŋgoro n abara ayɛ i tii, i nyunu ti ka wiɛ wɔ, na i jaam ti ka sin taferema. ²I bita kadasi kaan be i saa nu, i ti tekee­wa a. Na wɔ fa i jaa fɔmbɔrɔ atiɛn tieku n su, na wɔ fa i jaa biɛ atiɛn asiɛn n su. ³Na wɔ tiɛn faŋga su kabo jara ŋuundi ni, na nzue tiɛɛn­wa nso n abɔ i nu. ⁴Nzue n tiɛɛnri kpe nso ni, má m ŋa m kɛrɛ wɔ, na ma ti akonvi be ŋga aŋgoro. I ŋa, “Má a kɛrɛ jɔjɔɔ­wa n bo nzue tiɛɛn­wa nso n ase ni. Má a kan kere be.”

⁵Na mɛrɛkɛ n bo m ŋuuri i ka i jina tieku n ni asiɛn n su, n ayɛ i saa fɔmbɔrɔ su akere aŋgoro, ⁶na wɔ tan Nyɛmɛ bo i la ŋgɔɔ na i wo bɛrɛ saŋga kɛrɛ ni, yiri bo i yiiri aŋgoro, ni asiɛn, ni tieku, ni deke kɛrɛ bo bu wo nu ni, na wɔ se ka, “Nyɛmɛ ŋminda má kun. ⁷Ama, saŋga n bo mɛrɛkɛ nso su n ba sukan i awiɛ n ye Nyɛmɛ asiri nu jɔrɛ ni yó yii­wa, kabo i yo seeri i akɔɔm bo bu ti i nɔaniɛ kan­fɔm ni.”

⁸Na akonvi n bo i jɔjɔɔri m dɔ aŋgoro n nu n ajɔjɔ m dɔ bekun, i ŋa, “Kɔ de kadasi kaan n bo wɔ teke na i wo mɛrɛkɛ n bo i jina tieku n ni asiɛn n su n saa nu.”

⁹Na ma kɔ mɛrɛkɛ n dɔ, na ma se i ka, “Fa kadasi kaan n ma m.” Na wɔ se m ka, “De na a kpɛsɛ i, i yó u nɔɔ nu mamari ka wiɛ wɔ, ama, i to u kunnu, i yó wiwi wɔ.”

¹⁰Na ma de kadasi kaan n mɛrɛkɛ n dɔ, na ma kpɛsɛ i. I ti mamari m nɔɔ nu ka wiɛ wɔ, m miiri na wɔ yo wiwi m kunnu. ¹¹Na wɔ se m ka, “Kaaki jɔjɔ sam bo Nyɛmɛ ase ka bu bá tu minɛ barasu dɔŋgu, ni daanfiɛ barasu dɔŋgu, ni nfɛmɛm dɔŋgu.”

Daani­di­fɔ nnyɔm jɔrɛ

¹Na ba fa deke be bo bu bita sunsun ama m, i ti ka kpama a, na ba se m ka, “Kɔ sunsun Nyɛmɛ Seree­biri Awuru n ni Mikun n yoo­wa yoo­biri ni, na a kan minɛm bo bu wo nu dɔ su Nyɛmɛ ni. ²Ama, má a sunsun awɔrɛ n bo i bara yɛɛri Nyɛmɛ Seree­biri Awuru n kɛrɛ na ba ta kobe abara ayɛ i n buka su, dama ba fa nyini fofoe n ama minɛm bo bu su má Nyɛmɛ ni, na bu náti saaki Nyɛmɛ miɛ casi ni, sara abura­na ni nnyɔ afiɛn. ³M súnma m daani­di­fɔ nnyɔm ni, na bu fá bɔtɔ kara ka tani dɛɛ su, bo i kere ka bu wo ahoresaaki nu, na bu kán m nɔaniɛ n kere minɛm, nyini cɛɛn akpii kun ni yaa nnyɔ ni abura­sɛn n nu.”

⁴Daani­di­fɔ nnyɔm ni, bɛrɛ la ŋguin­mbaa baka nnyɔm, ni fitana takaa­biri nnyɔm bo bu jina Nyɛmɛ bo i dɛɛ la asiɛn nyunu ni. ⁵Sɔnɔ kɛrɛ bo i koro ka i yo bu sa be, sin fite bu nɔɔ nu ba yara bu kpɔ­fɔm. Nyini ti, nzɛn be ŋa i yo bu sa be, kabo i ti ye ni ka i wu lɛɛ. ⁶Bu la yiko bo bu koro kanda nzue aŋgoro na má nzue tɔ, saŋga bo bu wo Nyɛmɛ nɔaniɛ n kan su ni, na bu la yiko bo bu koro ma nzuem kaaki mbunja, na bu kaaki la yiko bo bu koro ma alɔɔba tɔ durunya n nu, saŋga kɛrɛ bo bu koro.

⁷Nzɛn bu ba diiri bu daani kaanri Nyɛmɛ jɔrɛ n wieeri, na boro neŋge­ndɔrɛ n bo i fite kunma n bo i kɔ ŋgoŋgo na i la má awieeri ni kún luɛ ni bɛrɛ, na i kúnma bu, na i kún bu. ⁸Na bu fuin ká da miɛ bambaka n atin afiɛn. Nyini miɛ n nu­fɔm sa­yoo­wa ti tiɛ wɔ, nyini ti ye bu fa bu sunsun Sodom­fɔm wara Ijipiti­fɔm n a. Nyini miɛ n nu ye minɛm kpamaari bu Mibiɛ baka jaanu n su n a. ⁹Bu fuin ni ká da bɛrɛ le­san ni wiɛ sin, na minɛm, ni daanfiɛm, ni aniɛm, ni asiɛnm kɛrɛ bo bu wo durunya n nu, bu nu nbem sín na bu niɛ bu, na bu dú má su na be se bu. ¹⁰Bu yiwee n dɛɛ ti, durunya n nu­fɔm síri taari, na bu gɔ́ agɔrɛ, na bu cé bu beŋgum aceerim, dama nyini Nyɛmɛ nɔaniɛ kan­fɔ nnyɔm bo ba wu n akere bu kɛrɛ wuwuruwa.

¹¹Le­san ni wiɛ sin n dɛɛ sin, na Nyɛmɛ ayi i ŋumi bo i ma ŋgɔɔ n agɔ bu ŋu, na ba yasu ajina, na sɛrɛ ati sɔnɔ kɛrɛ bo bu ŋuuri bu ni. ¹²Na bɛrɛ Nyɛmɛ nɔaniɛ kan­fɔ nnyɔm n ati akonvi bambaka be ka i jɔjɔ aŋgoro nu, i ŋa, “Am fun bra aŋgoro fɛn.” Na ba wura yinyiŋgu n nu akɔ aŋgoro, bu kpɔ­fɔm jina suniɛ bu. ¹³Jina n nu bɛrɛ na asiɛn akpisi faŋga su, na miɛ bambaka n kpaaki nu buru buekun afufu, na wɔ kun minɛ akpii nso, na sɛrɛ ati minɛm bo bu kaari ni, na bu sukansi Nyɛmɛ bo i wo aŋgoro ni.

¹⁴Tɔ. Na nnyɔ su dɛɛ ahoresaaki n gusu asin, bo i tɔ su nsan su ni suba kisa.

Awiɛ nso su n jɔrɛ

¹⁵Na mɛrɛkɛ nso su n akan i awiɛ ni, na akonvim atiɛn faŋga su aŋgoro n nu, bu ŋa,

“Durunya n nu fɛmɛya kɛrɛ faŋga ti ya Micɛra

ni Kristo Tii­de­fɔ n dɛɛ wɔ.

I dɛɛ fɛmɛya ni wó bɛrɛ saŋga kɛrɛ a.”

¹⁶Na nkpiɛn­kpiɛn abura­nyɔ ni nnam n bo bu tana bu fɛmɛya biɛm su Nyɛmɛ nyunu n ada bu nyunu su asiɛŋgu na bu subo tuntun Nyɛmɛ. ¹⁷Bu ŋa,

“Ya Mi Nyɛmɛ Kpiri bo a la má aŋusu ni,

wɔrɔ bo a wo bɛrɛ na a yo woori bɛrɛ ni,

ya da u asi, dama a de u yiko bambaka n

ye a suniɛ durunya n kɛrɛ su a.

¹⁸Durunya n nu­fɔm kɛrɛ afa yaa,

ye saŋga aju bo u gusu ahore ayasu,

na a dí minɛm bo ba wu n jɔrɛ.

Na saŋga n akaaki aju bo a tɔ́ u akɔɔm ŋkatɔ,

bɛrɛ bo bu ti Nyɛmɛ nɔaniɛ kan­fɔm ni,

ni u minɛm kɛrɛ bo bu su u ni,

nfaŋga­fɔm ni tarakam kɛrɛ.

Ye saŋga n akaaki aju bo a sáaki bɛrɛ n bo bu saaki durunya ni.”

¹⁹Na Nyɛmɛ Seree­biri Awuru n bo i wo aŋgoro n ateke, na ma ŋu Nyɛmɛ alaka n bo i kereeri ka wɔ fa sɛsɛ su adi i di n ka i wo dɔ, na nzue sukpɛsɛ na i sutiɛntiɛn, na i suyo naŋmiɛ, na asiɛn sukpisi, na nzue yabuɛ ŋgbiŋgbiri sutɔtɔ.

Bara ni Sitana n dɛɛ jɔrɛ

¹Na alekutura sa be ayo aŋgoro dɔ. Bara be awo dɔ, wɔ fa wiɛ akara ka tani dɛɛ su, na sara gusu awo i jaa bu, asara­mbaa buru ni nnyɔ butu i tii ka fɛmɛya kere dɛɛ su. ²I bita akunnu, na baa­wu yaari afa i na i subo awie.

³Na alekutura sa be gusu ayo aŋgoro dɔ, m ŋuuri woo tiɛ kɔkɔrɛ bambaka be, i tii ti nso wɔ, na i la mbiɛ buru, fɛmɛya kere nso butu atii nso kun kun n kɛrɛ su. ⁴Na wɔ fa i lɔ abaandi asara­mbaam kpaaki nu nsan buekun aji asiɛŋgu. Na wɔ ba ajina bara n nyunu, adena i wuuri baa n na i kaba fa baa n mi. ⁵Na bara n awu baa­biɛsɔ, bo i bá niɛ daanfiɛ daanfiɛm kɛrɛ su, na i bíta bu kekereke kabo naŋkasi fa bulaari kɔrɔma tu bo i naanim barasu ni. Na ba fa baa n akɔ yiri Nyɛmɛ ni, i fɛmɛya tanaa­biri n dɔ. ⁶Na bara n aŋmati akɔ boro kpantain awɔrɛ be nu, bo Nyɛmɛ asɛsɛ i su ama i na bu suniɛ i dika haari kɔ ju cɛɛn akpii kun ni yaa nnyɔ ni abura­sɛn.

⁷Tɔ, na Nyɛmɛ mɛrɛkɛ Mikali ni i jamam, ni woo tiɛ ni i dɛɛ jamam sukun luɛ ni bu beŋgu aŋgoro. ^8-9Ama, na Mikali ni i dɛɛ jamam n akunma woo tiɛ n ni i dɛɛ jamam ni, na ba fɔn bu afite aŋgoro, ba nya má woo­biri dɔ kun. Na ba fa woo tiɛ bambaka n ni i dɛɛ jamam n kɛrɛ aji asiɛŋgu. Yiri ti dada dɛɛ woo tiɛ n a, yiri la Sitana, bu kaaki fere i ka Dadaka­fɔ, yiri dadaka durunya n nu­fɔm kɛrɛ n a.

¹⁰Na ma ti akonvi bambaka be ŋga ka i sutiɛn faŋga su aŋgoro. I ŋa,

“Kisa, ya ŋu kabo ya Nyɛmɛ n la faŋga na i de i minɛm tii ji,

na i di i fɛmɛya ni.

Kisa, ye Kristo Tii­de­fɔ n akere i yiko a,

dama ba fɔn ayi Sitana aŋgoro aji durunya n nu fɛn,

yiri bo i ti saaki­fɔ na i jina Nyɛmɛ nyunu

na i jaraki ya ninbaam kɔŋguɛ ni wiɛsu ni.

¹¹Bɔmbaa n dɛɛ mbunja, ni bu daani dii­wa

ye bu fa kunmaari i a,

ba soro má bu yiwee,

bu soroori su wɔ, ka bu wu.

¹²Nyini ti, aŋgoro ni ambɛrɛ kɛrɛ

bo am wo aŋgoro ni,

am ma am ahore jɔ,

dama Sitana la má am faŋga kun.

Ama, ahoresaaki bá tɔ asiɛn n ni tieku n su,

dama Sitana ajura am dɔ.

Yaa ti i agaya,

dama i si ka i saŋga sunnu má kun.”

¹³Saŋga bo woo tiɛ n ŋu ka ba yi i aŋgoro aji asiɛŋgu ni, na wɔ nya ŋmati afɔn bara n bo i wuuri baa­biɛsɔ n ka i tara i. ¹⁴Ama, na Nyɛmɛ ama bara n kajiri bambaka laŋkpɛtɛ nnyɔ, adena i tu kɔ boro kpantain n awɔrɛ n bo wɔ sɛsɛ su ama i ni, na i niɛ i dika afɔ nsan ni kpaaki nu, na má woo tiɛ n tu i. ¹⁵Na woo tiɛ n apuuti nzue afite i nɔɔ nu ka wɔmbu nzue dɛɛ su, na má i sɔ bara n kɔ. ¹⁶Ama, na asiɛn n ade bara n aji, i kpaaki nu nnyɔ ɔ, na nzue n bo i soŋgi fiteeri woo tiɛ n nɔɔ nu n awura asiɛn bu, nyini ti, nzue n atu má bara ni. ¹⁷Woo tiɛ n atu má bara n dɛɛ ti, na yaa ati i agaya, na wɔ kaaki ka i kɔ kun luɛ ni bara n busu nu­fɔm, bo ba de Nyɛmɛ nɔaniɛ maa­wam n na bu di daani ni Yesu labari kpa n ni. ¹⁸Na woo tiɛ n akɔ ajina tieku n nɔɔ su.

Boro neŋge­ndɔrɛ nnyɔm jɔrɛ

¹Na ma ŋu boro neŋge­ndɔrɛ be ka i sufite tieku n nu, i la atii nso wɔ, na i mbiɛ ti buru, mbiɛ n kɛrɛ butu fɛmɛya kere, ye duma kɛrɛɛ­wa be bo i kpiɛ Nyɛmɛ nzukɔ n wo atii kun kun n kɛrɛ su. ²Boro neŋge­ndɔrɛ n bo m ŋuuri i n ti ka awɔba a, ama, i jaa ti bambaka, na i la faŋga, na i nɔɔ ti ka jara dɛɛ. Woo tiɛ n afa i dɛɛ yiko, ni i fɛmɛya, ni i faŋga afa ama i. ³Na ma ŋu ka ba kpiɛ boro neŋge­ndɔrɛ n kun tii, i ti ka ba kpiɛ i kɔm wɔ, ama, kani n awie, na wɔ yo durunya n nu­fɔm kɛrɛ alekutura na bu susu i su. ⁴Na bu kɛrɛ sukutu na bu su woo tiɛ ni, dama wɔ fa i yiko ama boro neŋge­ndɔrɛ ni, na bu sukutu na bu su boro neŋge­ndɔrɛ n gusu, na bu suse ka, “Ŋma ti ka boro neŋge­ndɔrɛ n a? Ŋma ni yiri koro kun luɛ na i kunma i a?”

⁵Na ba ma boro neŋge­ndɔrɛ n atin ka i jɔjɔ kpiri koroya jɔjɔɔri, na i jɔjɔ wura Nyɛmɛ ŋgasi nu, na ba ma i atin ka i la yiko haari sara abura­na ni nnyɔ. ⁶Na i jɔjɔ sukpiɛ Nyɛmɛ nzukɔ, na i susaaki i duma ni i dika ni, ni bo bu wo Nyɛmɛ dika n nu aŋgoro n kɛrɛ. ⁷Na wɔ nya yiko ka i kun luɛ ni Nyɛmɛ minɛm na i kunma bu, na wɔ kaaki anya yiko na i niɛ adamande kɛrɛ, ni daanfiɛ kɛrɛ, ni aniɛm kɛrɛ, ni asiɛn barasu kɛrɛ bo bu wo durunya n nu. ⁸Minɛm kɛrɛ bo bu wo durunya n nu ni su i wɔ, má ka minɛm n bo ba du mɔ akɛrɛ bu duma agɔ ŋgɔɔ kadasi n nu, na durunya n boori i bu ni. Kadasi n ti Bɔmbaa n bo ba kpiɛ i kɔm n dɛɛ wɔ.

⁹Sɔnɔ kɛrɛ bo i koro ka i ti ahin jɔrɛ n bu, i ti ye ni ka i mi so i sui na i ti.

¹⁰“Sɔnɔ kɛrɛ bo Nyɛmɛ ase ka bu wura i dan­saraka,

bu wúra i wɔ,

na sɔnɔ kɛrɛ bo Nyɛmɛ ase ka bu kun i ni takobe,

bu kún i wɔ.”

Nyini dɛɛ ti, i ti ye ni ka Nyɛmɛ minɛm fa sawɔrɛ ni mindi ni yarada na bu fa su Nyɛmɛ.

¹¹Na ma ŋu boro neŋge­ndɔrɛ n be bekun ka i fite asiɛn n nu, i la mbiɛm nnyɔ, bu ti kabo Bɔmbaa dɛɛ ti n wɔ, ama, i jɔjɔ kabo woo tiɛ n jɔjɔ n wɔ. ¹²I jina bumboori dɛɛ boro neŋge­ndɔrɛ n jinaa­biri wɔ, na i la i yiko n kɛrɛ, na i sumiɛ durunya n nu­fɔm kɛrɛ ka bu su bumboori dɛɛ boro neŋge­ndɔrɛ bo ba kpiɛ i tii ni, i ti ka ba kpiɛ i kɔm wɔ, ama, kani n awie. ¹³Na boro neŋge­ndɔrɛ nnyɔ su n ayo alekutura sam beberebe, na i ma sin fiteeri aŋgoro ba tɔɔri asiɛŋgu wɔ, na minɛm aŋu i. ¹⁴Alekutura sam n bo i nya yiko yoori bu bumboori dɛɛ boro neŋge­ndɔrɛ n nyunu n dɛɛ ti, na wɔ dadaka durunya n nu­fɔm. Na wɔ se bu ka bu ta amɔɛ na i ferema ni boro neŋge­ndɔrɛ n bo bu faari takobe fɔndɔɔri i ni, ama, i toko la ŋgɔɔ. ¹⁵Na boro neŋge­ndɔrɛ nnyɔ su n anya atin, na wɔ ma amɔɛ ŋumi, na wɔ nya ŋgɔɔ na i koro jɔjɔ na i koro kun minɛm kɛrɛ bo ba kete ka bu su má i ni. ¹⁶Na i sumiɛ minɛ barasu kɛrɛ, nfaŋga­fɔm ni tarakam, neŋge­fɔm ni yaari­fɔm, minɛm bo ba de bu tii, ni akɔɔm, na wɔ ma ba se bu nyaari bu saa fɔmbɔrɔ wara bu ŋuma su. ¹⁷Sɔnɔ kɛrɛ bo i la má nyini nyaari see­wa n be, koro tɔ má deke be na i kaaki koro to má deke be gusu, dama nyini nyaari see­wa n ti boro neŋge­ndɔrɛ n duma, wara i duma lamba.

¹⁸Sɔnɔ koro si má boro neŋge­ndɔrɛ lamba n bu, má ka i mi la alecira, i ti adamande duma a. I lamba n ti yaa nsɛn ni abura­sɛn ni nsɛn wɔ.

Bɔmbaa n ni minɛm bo wɔ de bu tii aji n jɔrɛ

¹Na ma niɛ aŋu Bɔmbaa n ka i jina Siyon Buka n su. Minɛ akpii yaa ni akpii abura­na ni nnam wo i dɔ. Bɛrɛ ye ba kɛrɛ Bɔmbaa n ni i Si Nyɛmɛ duma agɔ bu ŋuma su n a. ²Na ma ti ka minɛ nbem sudi jue aŋgoro, i yo naŋmiɛ kabo nzue soŋgi na i yo naŋmiɛ n wɔ, na i yo kabo nzue tiɛntiɛn na i yo naŋmiɛ ni, na i sun kabo bu bo biɛku na i sun barasu ni. ³Na minɛ akpii yaa ni akpii abura­na ni nnam n jina fɛmɛya biɛ n nyunu, ni neŋge ŋgɔɔ­fɔ nnam ni, ni nkpiɛn­kpiɛnm n nyunu, na bu sudi jue fɔfɔrɛ. Be wo má bɛrɛ bo i koro sɔnsɔn i, má ka bɛrɛ ŋgumi bo Nyɛmɛ ade bu afite durunya n nu­fɔm n nu ni. ⁴Bɛrɛ la minɛm n bo bu ni bara be ada má, na bu ti casi ni. Bɛrɛ la bo deke kɛrɛ bo Bɔmbaa n kɔ na bu su i su ni. Bɛrɛ ye Nyɛmɛ ade bu tii aji afite durunya n nu­fɔm nu n a, na ba yo i ni Bɔmbaa n dɛɛ ciciri su minɛm. ⁵Kɔrɛ be mmɔɔ wo má bu nɔɔ nu. Na bu kaaki la má ŋgasi be.

Mɛrɛkɛ nsanm jɔrɛ

⁶Na ma ŋu mɛrɛkɛ be bekun ka i wo tu su aŋgoro, na i sukan labari kpa n bo i la má awieeri n jɔrɛ kere adamande kɛrɛ, ni daanfiɛ kɛrɛ, ni aniɛm kɛrɛ, ni asiɛn barasu kɛrɛ bo bu wo durunya n nu ni. ⁷Na mɛrɛkɛ n ayɛ i konvi su atiɛn faŋga su agaya ase ka, “Am soro Nyɛmɛ na am wura i kpiri, dama saŋga n aju bo i dí minɛm jɔrɛ. Am su Nyɛmɛ bo i yiiri aŋgoro ni asiɛn, ni tieku ni nzue ni.”

⁸Na mɛrɛkɛ nnyɔ su n afite asu ciciri dɛɛ n su, na i suse ka, “Wɔ kpaasi, Babilɔn miɛ kpiri n akpaasi, yiri bo i maari durunya n nu­fɔm kɛrɛ nuuri i nzan n na bu yoori sa ŋgbɛɛn­ŋgbɛɛn ni.”

⁹Na mɛrɛkɛ nsan su n afite agɔ ciciri dɛɛm su. Na i sujɔjɔ faŋga su suse ka, “Sɔnɔ kɛrɛ bo i suuri boro neŋge­ndɔrɛ n ni i amɔɛ ni, na wɔ se bu ŋuma su wara bu saa fɔmbɔrɔ su n nyaari, ¹⁰Nyɛmɛ fá yaa bu ŋu, na i cín bu sui agaya, na i má sin ni ferewita tɔ bu ŋu na bu dí wahara agaya, i mɛrɛkɛ casim n ni Bɔmbaa n nyunu. ¹¹Na ŋmisini sufite nyini sin n bo i kere bu wahara n nu kɔ aŋgoro saŋga kɛrɛ, i la má awieeri. Minɛm kɛrɛ bo bu suuri boro neŋge­ndɔrɛ n ni i amɔɛ n na wɔ se bu nyaari ni, bu nya má ŋumi­yi, kɔŋguɛ ni wiɛsu kɛrɛ.”

¹²Nyini ti, i ti ye ni ka Nyɛmɛ minɛm la mindi, bɛrɛ bo bu de i nɔaniɛ maa­wam ni, na bu bita bu yarada n kenken fa kɔ Yesu dɔ ni.

¹³Na ma ti ka akonvi be sujɔjɔ aŋgoro suse m ka m kɛrɛ ka, “Tere­fiɛ wo minɛm n bo bu suuri Mibiɛ n na bu wuuri n dɔ fite kisa fa kɔ.”

Na Nyɛmɛ Awiɛwiɛ Casi n asoro su ka, “I ti nahɔrɛ wɔ, bo ba wu ni, bu yí bu ŋumi, bu ŋkatɔ ye bu sudi i n a, dama bu sakpa­yo su bu su a.”

Kabo Nyɛmɛ dí durunya n nu­fɔm kɛrɛ jɔrɛ ni

¹⁴Na ma niɛ aŋu yinyiŋgu fofoe be aŋgoro n su, be tana su, i ferema ni adamande wɔ, i butu sika fɛmɛya kere, i bita gɔrɔku nana i saa nu. ¹⁵Na Nyɛmɛ mɛrɛkɛ n be bekun afite Nyɛmɛ Seree­biri Awuru bo i wo aŋgoro n nu, na i sutiɛn faŋga su suse yiri n bo i tana yinyiŋgu n su ka, “Durunya n nu alɛ­mbaa n abi, fa u gɔrɔku n fa wura nu na a kpiɛ i, dama saŋga n a ju.” ¹⁶Na yiri n bo i tana yinyiŋgu n su n afa i gɔrɔku n ada awura durunya n nu na wɔ kpiɛ alɛ­mbaa ni.

¹⁷Na mɛrɛkɛ n be bekun afite Nyɛmɛ Seree­biri Awuru bo i wo aŋgoro n nu, i gusu bita gɔrɔku nana be.

¹⁸Na mɛrɛkɛ n be bekun bo i niɛ sin su afite Mikun yoo­wa yoo­biri n dika, na wɔ tiɛn faŋga su ase nyini mɛrɛkɛ n bo i bita gɔrɔku n ka, “Fa u gɔrɔku n fa kpiɛ durunya n nu baka suu­wam gɔ, dama baka suu­wa n aboro.”

¹⁹Na mɛrɛkɛ n afa i gɔrɔku n ada awura durunya n nu akpiɛ baka suu­wam n kɛrɛ atiɛn bu nɔɔ agɔ kunma bambaka n bo bu miɛmiɛ yiiri baka suu­wa nzue n nu ni. Nyini kere kabo Nyɛmɛ ahore­mbaa ayasu na i cin minɛm sui. ²⁰Na ba tiɛntiɛn baka suu­wa n su, kunma bambaka n bo i wo miɛ n ahɛmɛ n nu, na mbunja asoŋgi afite kunma n nu. Nzɛn kpɔŋgɔ wura nu, na i kɔ se ka wɔ dodo ŋgoŋgo dika, i tii nyaari ŋgumi kɔ ka. I tintiin gusu waari agaya.

Mɛrɛkɛm bo bu bita awieeri su kekereke ayaba nsom jɔrɛ

¹Na ma ŋu alekutura sa bambaka be aŋgoro, ka Nyɛmɛ mɛrɛkɛ nso nbem bita kekereke barasu nso n bo bu ti awieeri su dɛɛ ni. Nyini kekereke n dɛɛ sin, Nyɛmɛ fá má yaa kun.

²Na ma ŋu deke be, i ti ka nzue bambaka a, i je ka niɛɛnu wɔ, wɔ saŋga ni sin. Na ma ŋu minɛm bo ba kunma boro neŋge­ndɔrɛ n ni, ba kɔ ayaki i ni i amɔɛ n ni i duma lamba. Bu jina tieku n bo i je ka niɛɛnu n su, bu bita biɛkum n bo Nyɛmɛ afa ama bu ni. ³Na ba di Nyɛmɛ akɔɔ Moyisi ni Bɔmbaa n dɛɛ jue, ka,

“Ya Mi Nyɛmɛ Fɛmɛ Kpiri,

wɔrɔ ti adamande kɛrɛ fɛmɛ durunya n nu a.

U sa­yoo­wa ti bambaka na i ti alekutura.

U sa­yoo­wa kɛrɛ kɔ atin su wɔ, na i ti nahɔrɛ.

⁴Micɛra, ŋma wo bɛrɛ bo i soro má u a,

na i wura má u kpiri a?

Dama wɔrɔ ŋgumi ti casi a.

Adamande kɛrɛ bo bu wo durunya n nu,

bu bá kutu u na bu kánsi u,

dama u nahɔrɛ sam n afite fofoe nu.”

⁵Nyini sin, na ma ŋu Casi Kɛrɛ Casi Sɔɔ n bo i wo Nyɛmɛ Seree­biri Nambue n nu, na i wo aŋgoro n ka bu suteke i. ⁶Na mɛrɛkɛ nsom n bo bu bita kekereke nsom n afite Nyɛmɛ Seree­biri Awuru n nu, bu wura sutura fofoe papasi, ba fa sika dambara abo bu hoe su. ⁷Na deke ŋgɔɔ­fɔ nnam nu kun, afa sika ayabam n nso afa ama Nyɛmɛ mɛrɛkɛ nsom n ni. Ayabam n ayi ni Nyɛmɛ ahore­mbaa yasu, bo i kere ka Nyɛmɛ bo i la ŋgɔɔ na i la má awieeri n afa yaa agaya. ⁸Na Nyɛmɛ yiko ni i jirima woo­wa n ama Nyɛmɛ Seree­biri Awuru n ayi ni ŋmisini, bo be akoro awura má awuru n nu, fa kɔ ju saŋga bo mɛrɛkɛ nsom fa kekereke nsom n fa jiiri durunya n nu n kɔ wieeri.

Ayabam bo bu kere ka Nyɛmɛ afa yaa n jɔrɛ

¹Na ma ti akonvi bambaka be ŋga Nyɛmɛ Seree­biri Awuru n nu, i sujɔjɔ mɛrɛkɛ nsom dɔ, i ŋa, “Am kɔ na am kɔ kaaki Nyɛmɛ ahore yasu ayaba nsom n gɔ durunya n nu.”

²Na mɛrɛkɛ ciciri su n akɔ akaaki i ayaba n agɔ durunya n nu, na kani tiɛm, bo bu yo ya agaya, akpiɛ minɛm bo bu la boro neŋge­ndɔrɛ n nyaari see­wa n na bu su i amɔɛ n ni.

³Na mɛrɛkɛ nnyɔ su n akaaki i ayaba n agɔ tieku nzue n nu, na tieku nzue n akaaki ka sɔnɔ bo wɔ wu mbunja. Na deke ŋgɔɔ­fɔ kɛrɛ bo bu wo tieku n nu awu.

⁴Na mɛrɛkɛ nsan su n akaaki i ayaba n agɔ kunmam nzue ni buram nzue nu, na i kɛrɛ akaaki mbunja. ⁵Na ma ti ka mɛrɛkɛ n bo i niɛ nzue n su n ase ka,

“Nyɛmɛ, wɔrɔ ti casi a,

wɔrɔ bo a wo bɛrɛ na a yo woori bɛrɛ ni,

kabo a cin minɛm sui sɔ ni,

u sa­yoo­wa akɔ atin su.

⁶Dama ba kun u dɛɛ minɛm, ni u nɔaniɛ kan­fɔm

na bu mbunja afite,

ye u gusu ama bu nzuem n akaaki mbunja na bu nu.

I ti ye ni ka a yo bu sɔ ɔ.”

⁷Na ma ti akonvi be ŋga ka i fite Mikun yoo­wa yoo­biri n bi, i ŋa,

“Ya Mi Nyɛmɛ Fɛmɛ Kpiri,

kabo a di bu jɔrɛ ni, i ti nahɔrɛ wɔ, na i kɔ atin su.”

⁸Na mɛrɛkɛ nna su n akaaki i ayaba, n agɔ wiɛ n ŋu, na Nyɛmɛ ama i kɛkɛrɛ agaya suyara minɛm ka sin dɛɛ su. ⁹Na sin n kɛkɛrɛ ayara minɛm, na ba kpiɛ Nyɛmɛ nzukɔ, yiri bo i la yiko na i ma bu di nyini wahara ni, na ba kete ka bu kaaki má bu wo na bu ma i jirima.

¹⁰Na mɛrɛkɛ nnu su n akaaki i ayaba n agɔ boro neŋge­ndɔrɛ n fɛmɛya biɛ n su, na i fɛmɛya asiɛn n kɛrɛ asi biri didiki. Na minɛm sukan bu saa, yaari n ti. ¹¹Kambue n ni yaari n bo i wo bu ŋu n dɛɛ ti, ye bu sukpiɛ Nyɛmɛ bo i wo aŋgoro ni nzukɔ a, haari ni nyini mmɔɔ, ba kaaki má bu wo na bu yaki bu satiɛ ni.

¹²Na mɛrɛkɛ nsɛn su n akaaki i ayaba n agɔ kunma kpiri n bo bu fere i ka Yufarati n su, na nzue n kɛrɛ anu, na wɔ kpiɛ atin ama nfɛmɛm bo bu fite wie afiiri ni. ¹³Na ma ŋu awiɛwiɛ tiɛ nsan nbem, bu ti ka pɔntirim wɔ, kun sufite woo tiɛ n nɔɔ nu, kun sufite boro neŋge­ndɔrɛ n nɔɔ nu, na kun gusu sufite sɔnɔ bo wɔ yi i ŋu ka i ti Nyɛmɛ nɔaniɛ kan­fɔ n nɔɔ nu. ¹⁴Bu ti Sitana dɛɛ awiɛwiɛ barasu nbem wɔ, na bu suyo alekutura sam, na bu kɔ durunya n nu nfɛmɛm kɛrɛ dɔ kɔ tiɛn bu nɔɔ, na bu cici luɛ ŋminda ya Mi Nyɛmɛ Fɛmɛ Kpiri n jina cɛɛn.

¹⁵Ya Mi Nyɛmɛ ŋa o, “Am ti fɛn, m ba ni yó am fura nu ka awiefɔ dɛɛ su wɔ, tere­fiɛ wo sɔnɔ kɛrɛ bo i ŋminda fa kɔ m ba n dɛɛ su, i fa má i ŋu ti má, na i wura i sutura, adena má i nati i bu ŋgbɛɛn, na má minɛ ŋu i, na nyinsɛ ti i.”

¹⁶Na Sitana awiɛwiɛm n atiɛn nfɛmɛm nɔɔ dika n bo bu fere i Hiburu aniɛ nu ka, Amagɛdon n ni.

¹⁷Na mɛrɛkɛ nso su n akaaki i ayaba n agɔ aŋuma n nu. Na akonvi bambaka be ajɔjɔ afite fɛmɛya biɛ n nu, Nyɛmɛ Seree­biri Awuru n nu, i ŋa, “Wɔ yo awie.”

¹⁸Na nzue sukpɛkpɛsɛ, na i sutiɛntiɛn, na i suyo naŋmiɛ, na asiɛn sukpisi faŋga su. Kabo Nyɛmɛ yiiri adamande ni, be nya ŋu má nyini asiɛn kpisii­wa n ŋusu sɔ. ¹⁹Na miɛ kpiri n ati nu nsan, na miɛm kɛrɛ bo bu wo durunya n nu n atɔtɔ, dama Nyɛmɛ ateŋge Babilɔn miɛ kpiri n jɔrɛ su, nyini ti ye wɔ fa yaa i ŋu, sucin i sui n a. ²⁰Na lui bambakam kɛrɛ bo bu da nzue afiɛn, ni bukam kɛrɛ amini. ²¹Na nzue yabuɛm sutɔtɔ minɛm ŋu, i kun kun nɔnɔɔri la ŋma. Na minɛm sukpiɛ Nyɛmɛ nzukɔ, dama nzue yabuɛ n bo i tɔtɔ ni sukere bu wahara agaya.

Bara sakara n jɔrɛ

¹Na Nyɛmɛ mɛrɛkɛ nsom n nu kun, bo i bita ayaba nsom n nu kun, aba m dɔ, aba ase m ka, “Bra fɛn, na m kére u kabo Nyɛmɛ cín bara sakara tiɛ n sui ni, yiri bo i tana kunma nzue beberebem n su ni. ²Yiri ye durunya n nu nfɛmɛm akpini i afa ayo bu soma, na wɔ fa i sakaraya asa durunya n nu­fɔm kɛrɛ, na bu gusu akpini i afa ayo bu soma.”

³Na Awiɛwiɛ Casi n dɛɛ yiko nu, na mɛrɛkɛ n afa m akɔ boro kpantain nu. Na ma ŋu bara be ka i tana boro neŋge­ndɔrɛ kɔkɔrɛ be su, duma kɛrɛɛ­wa nbem bo bu kpiɛ Nyɛmɛ nzukɔ n wo boro neŋge­ndɔrɛ n ŋuniɛ kɛrɛ su. I la atii nso, na i mbiɛ ti buru. ⁴Bara n adi suŋguruya anyɔnyɔndi i ŋu, i wura sutura kɔkɔrɛ nyunyumi, na wɔ wura i kɔm, ni i saam, ni i suim jɔrɔkɔm, ni lalankundim, ni afere nyunyumim, ni sikam, ni afere fofoem bo bu la gɔ agaya. I bita sika kɔpu i saa nu, wɔ yi ni daŋgba ni i sa­yoo­wa ŋgbɛɛn­ŋgbɛɛn n wɔ. ⁵Ba kɛrɛ i asiri nu duma i ŋuma su, nyini duma n bu la ka, Babilɔn miɛ kpiri, bo i ti sakaram kɛrɛ ni, na i kaaki ti saa ŋgbɛɛn­ŋgbɛɛn yo­fɔm kɛrɛ bo bu wo durunya n nu n ni. ⁶Na ma ŋu ka bara n anu Nyɛmɛ minɛm mbunja abo, ni minɛm bo bu di Yesu daani n dɛɛ ti na ba kun bu ni gusu mbunja abo.

M ŋuuri i sɔ ni, na wɔ yo m alekutura. ⁷Na mɛrɛkɛ n abisa m ka, “Nzu ti ye a ma wɔ yo u alekutura? M kére u asiri nu jɔrɛ bo i wo bɛrɛ fa kɔ bara n ni boro neŋge­ndɔrɛ n bo bara n tana su, na i la atii nso ni mbiɛm buru ni. ⁸Boro neŋge­ndɔrɛ n bo a ŋuuri i ni, ti deke bo i yo woori bɛrɛ wɔ, ama, kisa i wo má bɛrɛ kun. Wɔ ka kaan na i fíte kunma ŋgoŋgo n bo i la má awieeri n nu, na i kɔ́ di wahara na i ká ŋgbɛɛn. Na durunya n nu­fɔm bo bu duma wo má ŋgɔɔ kadasi n nu, fite saŋga bo Nyɛmɛ nya yi má durunya ni, bu ba ŋuuri i, i yó bu alekutura, dama i yo woori bɛrɛ, ye kisa, i wo má bɛrɛ kun, na i bá kaaki ba cɛɛn be.

⁹Nyini dɛɛ ti, sɔnɔ kɛrɛ fa i alecira ni sunsunni na i ti ahin jɔrɛ n bu. Boro neŋge­ndɔrɛ n tii nso n ti buka nso bo bara n afun atana su wɔ. Bu gusu kaaki ti nfɛmɛm nso wɔ. ¹⁰Bu nu nnu akpaasi, nsɛn su n toko wo bɛrɛ, nso su n nya ba má, ama, i ba baari, i cɛ má, i fɛmɛya ni kpáasi wɔ. ¹¹Boro neŋge­ndɔrɛ n bo i yo woori bɛrɛ, ama, kisa i wo má bɛrɛ kun ni, yiri ti fɛmɛ n bo i buka su mɔcuɛ su n a, ama, i ti nfɛmɛ nsom nu kun wɔ, na i kɔ́ di wahara na i ká ŋgbɛɛn.

¹²Mbiɛ burum bo a ŋuuri bu n ti nfɛmɛ burum bo bu nya di má fɛmɛya, ama, bu nyá yiko na bu dí fɛmɛ buka boro neŋge­ndɔrɛ n su saŋga kaan sɔ. ¹³Nyini nfɛmɛ burum n yó bu nɔɔkun, na bu fá bu faŋga ni bu yiko kɛrɛ na bu fá ma boro neŋge­ndɔrɛ ni. ¹⁴Bu kún luɛ ni Nyɛmɛ Bɔmbaa ni, ama, i ni i minɛm ni kúnma bu, dama yiri ti mibiɛm kɛrɛ Mibiɛ, na i ti nfɛmɛm kɛrɛ Fɛmɛ. I minɛm bo bu wo i dɔ n la bo wɔ fere bu ni, ni bo wɔ yi bu na bu jina i sin nahɔrɛ su ni.”

¹⁵Na mɛrɛkɛ n ase m ka, “Kunmam nzue n bo a ŋuuri i ni, na bara sakara n tana su ni, ti durunya n nu minɛm, ni durunya n nu asiɛn barasu barasu kɛrɛ, ni daanfiɛ kɛrɛ wɔ lɛɛ. ¹⁶Mbiɛ burum bo a ŋuuri bu ni, ni boro neŋge­ndɔrɛ ni, bu bá kpɔ bara sakara ni, bu dé i neŋge kɛrɛ na i ká i bu ŋgbɛɛn, na bu dí i ŋuniɛ­mbaa kɛrɛ, na bu yára bo wɔ ka n sin. ¹⁷Dama Nyɛmɛ maari bu yoori kabo i koro a. I maari bu yoori bu nɔɔkun na bu fa bu fɛmɛya n kɛrɛ buka boro neŋge­ndɔrɛ, na i dí fɛmɛya n kɔ ju saŋga bo Nyɛmɛ nɔaniɛ ni bá yo yii­wa ni.

¹⁸Bara n bo a ŋuuri i n la miɛ kpiri n bo i ti durunya n nu nfɛmɛm kɛrɛ tii n a.”

Kabo Babilɔn miɛ kpiri n kpaasi barasu ni

¹Nyini sin, na ma kaaki aŋu mɛrɛkɛ be ka i fite aŋgoro sujura, i la yiko agaya, na i woo­wa n ata wein abara ayɛ durunya n kɛrɛ. ²Na wɔ yɛ i konvi su atiɛn faŋga su ka,

“Wɔ kpaasi. Babilɔn miɛ kpiri n akpaasi.

Wɔ kaaki awiɛwiɛ tiɛm, ni ajinim,

ni deke ŋgbɛɛn­ŋgbɛɛnm,

ni anuma tiɛm woo­biri wɔ.

³Dama durunya n nu­fɔm kɛrɛ nuuri i nzan

ye bu kɔɔri somaya yiri dɔ a.

Na durunya n nu nfɛmɛm kɛrɛ kɔ kpiniiri yiri yoori bu soma.

Na kabo i la ajɛkɛ na i koro tara má i ŋu ni,

durunya n nu wata­fɔm gusu nya bu ajɛkɛ fite i dɔ ɔ.”

⁴Na ma kaaki ati akonvi be ŋga bekun, ka i sujɔjɔ aŋgoro n nu, i ŋa,

“M minɛm, am fite miɛ n nu,

na má am yo bu satiɛ yoo­wa n be,

na má wahara n bo i suba bu dɔ n tu am.

⁵Dama miɛ n nu­fɔm satiɛ yoo­wa n aju Nyɛmɛ dɔ aŋgoro,

na i wara koro fi má bu satiɛ yoo­wa n sa.

⁶Sam bo bara n yoori bu ni, yo i gusu sɔ,

tɔ i kaari i ŋusu nnyɔ.

Ma i ŋu kekereke tara kabo i yo ma minɛm ŋuuri kekereke ni.

⁷Kabo i yo wuraari i ŋu kpiri na i diiri i tii barasu ni,

kere i kekereke na i ahore gusu saaki sɔ.

Dama i ŋa, ‘Ma di fɛmɛ, m ti má kuna­fɔ,

m ahore sáaki má cɛɛn be.’

⁸Nyini dɛɛ ti, le­kun ye kekereke bá tɔ i ŋu a.

Yiri la tukpaki, ni ahoresaaki, ni ahɔɛ.

Na sin yára i,

dama Micɛra Nyɛmɛ n bo i cin i sui n la yiko agaya.”

⁹Na durunya n nu nfɛmɛm bo bu kɔ kpiniiri i na bu ni yiri diiri bu tii ni, bu ŋu kabo sin je i, na bu ŋu kabo ŋmisini yasu kɔ aŋgoro barasu, na bu sún, na bu bó awie. ¹⁰Kekereke n bo wɔ tu i n dɛɛ ti, i ma bu sɛrɛ wɔ, na bu jina dede, na bu nya suse ka,

“Keto, keto, am niɛ ahin miɛ bambaka ni.

Babilɔn bo i ti miɛ kpiri n lɛɛ

ye ba kaba acin i sui, ye i kɛrɛ aka ŋgbɛɛn,

anyumbaa kata ni i teke n nu bɛrɛ n a.”

¹¹Na wata­fɔm bo bu wo durunya n nu ni susun, na bu sukoko miɛ ni, dama be to má bu gɔɔri n kun. ¹²Be to má bu sika, ni jɛtɛ, ni afere barasu nbem bo bu yo nyumi na bu la gɔ ni. Be to má bu suturam barasu barasu bo bu yo nyumi na bu la gɔ ni. Be to má bu bakam bo bu fa yo biɛ kpakpam ni, ni bu ayaba barasu kɛrɛ bo bu fa sui jee yo bu ni, ni deke kɛrɛ bo bu fa baka fa sense bu, ni deke kɛrɛ bo bu fa jawii bulaari, ni yabuɛ fa yo bu na bu la gɔ agaya. ¹³Be kaaki to má bu toro neŋge barasum bo bu la nva­nvani, ni ayiri kunkuun­wa nva­nvani, ni baka nyunvuin nva­nvani­fɔ, ni nzan, ni ŋguin, ni kpɔnɔ samɛnɛ, ni diire, ni naanim, ni nbɔɛm, ni kpɔŋgɔm, ni kpɔŋgɔ torokum, ni akɔɔm, ni domuɛm. ¹⁴Na wata­fɔm n ase i ka,

“Dekem bo a yo koro bu agaya n kɛrɛ

aŋmati ayaki u,

u ajɛkɛm, ni u neŋge kpakpam kɛrɛ bo a la bu

akɔ ayaki u,

a nyá má i be kun.”

¹⁵Wata­fɔm bo bu yoori neŋge­fɔm nyini miɛ n dɛɛ ti ni, bu kɔ́ jina dede wɔ, dama sɛrɛ ti bu fa kɔ kekereke n bo wɔ tɔ miɛ n nu ni, na bu ahore saaki agaya na bu sun. ¹⁶Na bu se ka,

“Keto, keto, am niɛ ahin miɛ bambaka ni.

I yo kara sutura barasu barasu nyunyumi,

na i la sika jɔrɔkɔm,

ni aferem barasu barasu

bo bu yo nyumi na bu la gɔ agaya ni.

¹⁷Nyini neŋge n kɛrɛ akaba aka ŋgbɛɛn,

anyumbaa kata ni i teke n nu bɛrɛ n a.”

Na lee bambaka kan­fɔm, ni lee­fɔm, ni lee wura­fɔm, ni bo bu juma nati tieku nzue n su n kɛrɛ akɔ ajina dede. ¹⁸Na bu jina niɛ kabo miɛ ni suje sin barasu na ŋmisini yasu kɔ aŋgoro ni, na bu bo awie se ka, “Miɛ bɔnɔ wo bɛrɛ bo i ju ahin miɛ bambaka n a?”

¹⁹Na bu susasa tuturi gɔ bu tii su na bu kere ka bu ahore asaaki agaya, na bu susun, na bu suse ka,

“Keto, keto, am niɛ ahin miɛ bambaka n ni.

Dama minɛm kɛrɛ bo bu la lee bambakam na bu juma nati tieku nzue n su n

nya bu neŋgem fite nyini miɛ n dɛɛ ajɛkɛ n nu wɔ.

Ye wɔ kaba aka ŋgbɛɛn,

anyumbaa kata ni i teke n nu bɛrɛ n a.

²⁰Ambɛrɛ bo am wo aŋgoro nu,

ni Nyɛmɛ minɛm, ni Yesu jaramasam, ni Nyɛmɛ nɔaniɛ kan­fɔm,

am ma am ahore jɔ

fa kɔ kabo miɛ kpiri n aka ŋgbɛɛn barasu bɛrɛ ni,

dama Nyɛmɛ subisa i nɔɔ nu ma am a.”

²¹Na Nyɛmɛ mɛrɛkɛ faŋga­fɔ be n afa yabuɛ bambaka, na wɔ fa atu aji tieku nzue n nu, na wɔ se ka,

“Sɔ ye Nyɛmɛ fá Babilɔn miɛ kpiri n

fa ji wuum a,

na i busu be bá ŋu má.

²²Be ti má deke be ŋga miɛ n nu kun,

i biɛku kan­fɔ o, i jue di­fɔ o, i tere kan­fɔ o, ni awiɛ kan­fɔm.

Na juma­yo­fɔ barasu be mmɔɔ gusu wo má miɛ n nu kun,

be ti má ŋgani san yabuɛ be ŋga miɛ n nu kun.

²³Na fitana haari kun n kpein

je má miɛ n nu cɛɛn be na be ŋu i.

Be ti má konya ni konyafan kuyigindi ŋga miɛ n nu kun,

dama wata­fɔm bo bu yo wo nyini miɛ n nu

yo ti nfaŋga­fɔm wɔ durunya n kɛrɛ nu,

na miɛ nu­fɔm yo boboyaya sam dadaka durunya n nu­fɔm kɛrɛ.

²⁴Nyɛmɛ acin miɛ n nu­fɔm sui a,

dama bɛrɛ yo kuunri Nyɛmɛ minɛm, ni i nɔaniɛ kan­fɔm n a,

ni minɛm kɛrɛ bo ba kun bu durunya n nu ni, bɛrɛ yiiri bu mbunja.”

¹Nyini sin, na ma ti akonvi be ŋga aŋgoro, ka jama beberebe akonvi, bu ŋa,

“Haleluya, ya kansi Nyɛmɛ,

ya Mi Nyɛmɛ n ama ya nya tii­de a,

yiri ti kpiri ni yiko­fɔ a.

²I di jɔrɛ ni i atin su, ni nahɔrɛ wɔ.

Wɔ di bara sakara n jɔrɛ,

yiri bo i maari durunya n nu­fɔm kɛrɛ kpini nbaram

na bu kɔ somaya

na bu yo sa ŋgbɛɛn­ŋgbɛɛnm kɛrɛ,

na wɔ cin i sui, dama yiri yo kuunri Nyɛmɛ akɔɔm n a.”

³Na jama n bo bu wo aŋgoro n akaaki ayɛ bu konvi su atiɛn ase ka,

“Haleluya.

Sin n bo i sudi miɛ ni ŋmisini n suyasu sukɔ aŋgoro

haari ni saŋga bo i la má awieeri.”

⁴Na nkpiɛn­kpiɛn abura­nyɔ ni nnam, ni deke ŋgɔɔ­fɔ nnam sukutu sukansi Nyɛmɛ bo i tana fɛmɛya biɛ n su ni, na bu se ka,

“Ami. Haleluya.”

Nyɛmɛ Bɔmbaa n konyaya jɔrɛ ni

⁵Na akonvi be afite fɛmɛya biɛ n nu, i ŋa,

“Ambɛrɛ Nyɛmɛ akɔɔm kɛrɛ,

tarakam ni nfaŋga­fɔm,

bo am soro Nyɛmɛ ni,

am kɛrɛ kansi i duma.”

⁶Na ma ti akonvi be naŋmiɛ ŋga, i ti ka jama beberebe suyo naŋmiɛ wɔ, na i yo naŋmiɛ, kabo nzue soŋgi na i yo naŋmiɛ ni, na i kaaki ti kabo nzue tiɛntiɛn na i yo naŋmiɛ ni, i ŋa,

“Haleluya,

Ya Mi Nyɛmɛ Fɛmɛ Kpiri n

adi i fɛmɛya n kisa.

⁷Am ma ya ahore jɔ na ya yo ya kunnu koroo­wa,

na ya wura i kpiri,

dama saŋga n aju bo Bɔmbaa ni já i konya ni,

konya n gusu asɛsɛ i ŋu su aŋminda i.

⁸Nyɛmɛ ama i sutura casi fofoe papasi ka i fa kara.”

Sutura fofoe papasi n la Nyɛmɛ minɛm sakpa yoo­wam ni.

⁹Na mɛrɛkɛ n ase m ka m kɛrɛ ka, “Tere­fiɛ wo minɛm bo Bɔmbaa n abaandi bu ka bu ba di konyaya diire n be i dɔ.”

Na wɔ kaaki ase ka, “Ahin nɔaniɛ ti nahɔrɛ wɔ, i fite Nyɛmɛ dɔ ɔ.”

¹⁰Na ma kutu i jaa bu asiɛŋgu ka m su i, na wɔ se m ka má m yo sɔ, ama, m kansi Nyɛmɛ ŋgumi. Na wɔ kaaki ase m ka, “M ti u beŋgu akɔɔ, ni u ninbaam bo bu di Yesu daani kere minɛ n be wɔ.” Jɔrɛ n kɛrɛ bo Nyɛmɛ nɔaniɛ kan­fɔm kaanri i ni, bu diiri ahin Yesu n daani wɔ.

Sɔnɔ n bo i fun kpɔŋgɔ fofoe n jɔrɛ

¹¹Na ma ŋu ka aŋgoro ateke, kpeŋga na ma ŋu kpɔŋgɔ fofoe be, bu fere bo i tana su n duma ka, Bo i la Dabuŋu ni Nahɔrɛ­fɔ, i di minɛm jɔrɛ kabo i ti ye ni ka i di bu nahɔrɛ su wɔ, na i kun i luɛ ni nahɔrɛ su. ¹²I nyu­mbaa kɛrɛ je ka sin fofoe, na i butu fɛmɛya kere beberebe i tii su. Duma kɛrɛɛ­wa be mata i, be si má nyini duma ni, má ka yiri ŋgumi si a. ¹³I wura sutura yorom barasu be bo ba fa i awura mbunja nu, na bu fere sɔnɔ n duma ka Nyɛmɛ Nɔaniɛ. ¹⁴Na Nyɛmɛ sojam bo bu wo aŋgoro n fun kpɔŋgɔ fofoe su i su, bu wura sutura casi fofoe papasi. ¹⁵Takobe nana bo i fá kunma durunya n nu­fɔm wo i nɔɔ nu, na i bíta bu kekereke kabo naŋkasi fa bulaari kɔrɔma tu bo i naanim barasu ni, na i tíɛntiɛn bu su kabo bu fa baka suu­wa gɔ kunma nu na bu miɛmiɛ yi i nzue ni, dama Micɛra Nyɛmɛ Kpiri n afa yaa agaya. ¹⁶Ba kɛrɛ i duma i sutura n su, ni i jaa sɔɔwa su ka, “Nfɛmɛm kɛrɛ Fɛmɛ ni mibiɛm kɛrɛ Mibiɛ.”

¹⁷Na ma ŋu mɛrɛkɛ be ka i jina wiɛ n su, na wɔ yɛ i konvi su atiɛn faŋga su ase anumam kɛrɛ bo bu tu aŋgoro na bu di niɛ n ka, “Am bra na am ba tiɛn am nɔɔ na am di ahin diire beberebe n bo Nyɛmɛ sufa ma am ni, ¹⁸am ba di nfɛmɛm ŋuniɛ­mbaa, ni sojam nkpiɛnm ŋuniɛ­mbaa, ni nfaŋga­fɔm ŋuniɛ­mbaa, ni kpɔŋgɔ niɛ, ni minɛm bo bu fun kpɔŋgɔm n ŋuniɛ­mbaa, ni adamande barasu kɛrɛ ŋuniɛ­mbaa, bo bu ti akɔɔm ni bo ba de bu tii, ni bo bu ti minɛ ŋgbiŋgbirim, ni bo bu ti minɛ kan kanm ni.”

¹⁹Na ma ŋu boro neŋge­ndɔrɛ n ni durunya n nu nfɛmɛm, ni bu sojam, ka, ba tiɛn bu nɔɔ acici na bu kun luɛ ni yiri n bo i tana kpɔŋgɔ fofoe n su ni, ni i jama nbaam. ²⁰Na ba tara boro neŋge­ndɔrɛ n ni kɔrɛ­fɔ n bo i yo i ŋu ka i kan Nyɛmɛ nɔaniɛ ni. Yiri yo yoori alekutura sam boro neŋge­ndɔrɛ n nyunu, na wɔ dadaka minɛm bo bu deeri boro neŋge­ndɔrɛ n anyaari see­wa na ba su i amɔɛ ni. Na ba fa boro neŋge­ndɔrɛ n ni kɔrɛ­fɔ n ni bu ŋgɔɔ aji sin n nu, bo i je ka ferewita na i da ka tieku ni. ²¹Minɛm bo bu kaari ni, na yiri n bo i tana kpɔŋgɔ n su n afa takobe n bo i wo i nɔɔ nu n akun bu kɛrɛ. Na anumam kɛrɛ adi niɛ na bu kunnu ayi.

Kabo bu nyi Sitana afɔ akpii kun n jɔrɛ

¹Na ma ŋu mɛrɛkɛ be ka i fite aŋgoro suba, i bita deke nbem i saa nu, kun la kadombaa bo i tu kunma ŋgoŋgo bo i la má awieeri ni, na kun gusu la jɔrɔkɔ bambaka faŋga­fɔ be. ^2-3Na wɔ tara woo tiɛ ni, dada dɛɛ woo tiɛ n bo i ti Sitana ni, na bu kaaki fere i ka Dadaka­fɔ ni, na wɔ fa jɔrɔkɔ n acici i, na wɔ fa i atu kunma ŋgoŋgo n bo i la má awieeri n nu, ka i wó dɔ haari afɔ akpii, na wɔ tu kunma n anɔ ni, na wɔ ta akata su, na má i koro fite na i dadaka durunya n nu­fɔm bekun, ama, i wo dɔ haari afɔ akpii n ba ju. Nyini sin, na bu nyáŋgi i ji kaan.

⁴Na ma ŋu fɛmɛya biɛm, Nyɛmɛ ama bo bu tana sum n atin ka bu di minɛm jɔrɛ. Na ma kaaki aŋu bɛrɛ bo bu yo wuuri Yesu ti ni. Minɛ yo kpiɛɛri bu tii a, dama bu yo kaanri Nyɛmɛ jɔrɛ na ba di Yesu daani n dɛɛ ti. Bɛrɛ keteeri ka bu su má boro neŋge­ndɔrɛ n ni i amɔɛ n a, bɛrɛ la bo bu kaaki keteeri ka bu de má i nyaari see­wa bu ŋuma wara bu saa su n a, ye ba teŋge bu yiwee n nu anya ŋgɔɔ, na bu ni Kristo Tii­de­fɔ n saŋga di fɛmɛya afɔ akpii. ⁵Ahin ti yiwee teŋge ciciri su n a. Ama, minɛm bo ba wu na ba ka ni, bɛrɛ teŋge má haari kɔ ju afɔ akpii n awieeri. ⁶Bɛrɛ n bo bu du mɔ teŋgeeri bu yiwee nu ni, na bu ti minɛ casim n ni, tere­fiɛ wo bu dɔ, bɛrɛ ŋú má yiwee nnyɔ su n kun, bɛrɛ yó Nyɛmɛ ni Kristo Tii­de­fɔ sa­yoo­wa dɔŋgu­yo­fɔm a. Na bu ni yiri sáŋga di fɛmɛya n afɔ akpii.

Kabo Nyɛmɛ kunmaari Sitana ni

⁷Afɔ akpii n nyaari kɔ juuri, na Nyɛmɛ má bu yi Sitana n dan­saraka sɔɔ n nu ji. ⁸Na i kɔ́ dadaka adamande barasu barasu kɛrɛ bo bu wo durunya n nu ni, Gogi ni Magogi asiɛn n kɛrɛ, na i tíɛn bu kɛrɛ nɔɔ na bu kɔ́ kun luɛ. Bu sunnu beberebe ka kunma ŋmiɛ wɔ. ⁹Na ba tɛrɛki abara ayɛ durunya n deke kɛrɛ, na ba bara ayɛ miɛ n bo Nyɛmɛ koro i agaya ni, deke bo i minɛm wo ni, ama, na sin afite aŋgoro aba ayara bu. ¹⁰Na ba fa Sitana n bo i dadaka bu n aji cɛɛma sin n nu, bo i je ka ferewita na i da ka tieku ni, deke bo bu faari boro neŋge­ndɔrɛ n ni kɔrɛ­fɔ n bo i yo i ŋu ka i kan Nyɛmɛ nɔaniɛ n jiiri nu ni. Dɔ na bu dí wahara, kɔŋguɛ ni wiɛsu saŋga kɛrɛ.

Kabo Nyɛmɛ dí minɛm jɔrɛ awieeri su ni

¹¹Na ma ŋu fɛmɛya biɛ bambaka fofoe be, ni bo i tana su ni. Na aŋgoro ni asiɛŋgu kɛrɛ amini i nyunu, bu wo má bɛrɛ kun. ¹²Na ma ŋu minɛm bo ba wu ni, nfaŋga­fɔm ni tarakam kɛrɛ, ka bu jina fɛmɛya biɛ n nyunu. Na ma kaaki aŋu ka be suteke kadasim, na be gusu suteke kadasi bo i ti ŋgɔɔ dɛɛ ni. Nyini kadasim ye bu fa diiri minɛm bo bu wuuri n jɔrɛ a, bu sa­yoo­wa kɛrɛ bo bu yo yoori wo nyini kadasim n nu. ¹³Na tieku n awɔrɔ minɛm bo ba wu n ama, na Yiwee, ni Yiwee­fɔm Woo­biri n awɔrɔ minɛm bo ba wu n ama, na Nyɛmɛ afa bu sa­yoo­wa bo bu yo yoori adi bu jɔrɛ. ¹⁴Na wɔ fa Yiwee, ni Yiwee­fɔm Woo­biri n aji sin n nu, bo i je ka ferewita na i da ka tieku ni. Ahin sin ni ti yiwee nnyɔ su n a. ¹⁵Na ba fa sɔnɔ kɛrɛ bo i duma awo má ŋgɔɔ kadasi n nu aji sin ni.

Aŋgoro ni asiɛn fɔfɔrɛ n jɔrɛ

¹Na ma ŋu aŋgoro fɔfɔrɛ ni asiɛn fɔfɔrɛ, dama aŋgoro dawa n ni asiɛn dawa n kɛrɛ wo má bɛrɛ kun, na ma ŋu ka tieku nzue n gusu wo má bɛrɛ kun. ²Na ma ŋu miɛ casi ni, Yɛrusalem fɔfɔrɛ n ka i fite Nyɛmɛ dɔ aŋgoro sujura ba asiɛŋgu, wɔ sɛsɛ i ŋu su ka konya bo i sukɔ ajaa. ³Na ma ti akonvi bambaka be ŋga fɛmɛya biɛ n nu, i ŋa,

“Am niɛ fɛn, Nyɛmɛ woo­biri wo adamandem dɔ,

na i wó bu dɔ.

Na i fá bu yo i minɛm.

Yiri ni i tii wó bu dɔ na i yó bu Nyɛmɛ a.

⁴Yiri núnuka bu nyunvuin kɛrɛ bu nyu­mbaa nu a,

yiwee wo má bɛrɛ kun, ahoresaaki wó má bɛrɛ kun,

minɛm sún má kun, na minɛm dí má yaari kun,

dama deke dawam kɛrɛ asin.”

⁵Na bo i tana fɛmɛya biɛ n su n ase ka, “Niɛ fɛn, m suyo deke kɛrɛ fɔfɔrɛ.” Na wɔ kaaki ase m ka, “Kɛrɛ ahin nɔaniɛ ni, dama i ti nahɔrɛ wɔ, na i la dabuŋu.” ⁶Na wɔ se m ka, “Wɔ yo awie, mini ti mɔ­fɔ a, na m kaaki ti kasin­fɔ, mini ti deke kɛrɛ bumboori ni i awieeri a. Sɔnɔ kɛrɛ bo nzuehɔɛ tiiri i, m má i nu nzue n bo i ma ŋgɔɔ ni, na i mi tɔ́ má kaari. ⁷Sɔnɔ kɛrɛ bo i diiri nasara, m má i ahin aceerim ni, na m yó i Nyɛmɛ, na m fá i yo m wa. ⁸Ama, sɛrɛ­fɔm, ni minɛm bo ba yo má m yarada, ni daŋgba yo­fɔm, ni minɛ kun­fɔm, ni nbara kpini­fɔm, ni somaya kɔ­fɔm, ni bo bu di ayiri ŋgbɛɛn­ŋgbɛɛn, ni munzue­yi­fɔm, ni amɔɛ su­fɔm, ni kɔrɛ­fɔm kɛrɛ, bu woo­biri la cɛɛma sin n bo i je ka ferewita na i da ka tieku ni. Nyini yiwee ni ti yiwee nnyɔ su n a.”

Yɛrusalem fɔfɔrɛ n jɔrɛ

⁹Na mɛrɛkɛ kun aba m dɔ, i ti mɛrɛkɛ nsom bo bu bita awieeri su dɛɛ kekereke ayaba nsom nu kun wɔ, na wɔ ba ase m ka, “Bra, na m kere u Bɔmbaa n konya ni.”

¹⁰Na Awiɛwiɛ Casi n dɛɛ yiko nu, na mɛrɛkɛ n afa m akɔ buka bambaka n bo i ti lenleŋge n tii su, na wɔ kere m Yɛrusalem miɛ kpiri n bo i ti casi ni, i fite Nyɛmɛ dɔ aŋgoro sujura ba. ¹¹Na i je na i ta wein kabo Nyɛmɛ jirima woo­wa n ti ni, na i sujeje kɔkɔrɛ ni sosofura nzue ka afere nyunyumi barasu be bo i da cain ka niɛɛnu. ¹²Ba ta kobe bambaka bo i wo aŋgoro abara ayɛ miɛ ni, na i la anɔ buru ni nnyɔ, anɔm kɛrɛ su la mɛrɛkɛ kun kun bo bu jina ŋminda. Ba kɛrɛ Yisareli anɔ barasu buru ni nnyɔ n duma agɔ anɔ n kun kun kɛrɛ su. ¹³Kobe n bue nna n kɛrɛ la anɔ nsan nsan, nsan wo wiɛ afiiri, na nsan wo wiɛ atɔɔri, na nsan nsan wo gbɛɛn­ŋgbɛɛn bue nnyɔ n kɛrɛ. ¹⁴Miɛ n kobe n ajaari see­wa yabuɛ n ti buru ni nnyɔ ɔ, ye bu nya taari kobe n taka su. Ba kɛrɛ Bɔmbaa n jaramasa buru ni nnyɔm duma agɔ yabuɛ n kun kun kɛrɛ su.

¹⁵Na mɛrɛkɛ n bo i jɔjɔɔri m dɔ n bita sika kara i saa nu, bo i fa sunsun niɛ kabo miɛ n ti bambaka barasu, ni kabo kobem n anɔm ti tɛtɛrɛ barasu, na i kaaki sunsun niɛ kabo kobe n aŋgoro ti barasu. ¹⁶Miɛ n ataari n ti ka sɔɔ laŋgba dɛɛ su wɔ, i tintiin, ni i tɛtɛrɛ kɛrɛ sɛ wɔ. Na mɛrɛkɛ n afa i sika kara sunsuun­wa n asunsun miɛ ni, i tintiin su ti kilo akpii nnyɔ ni yaa nna wɔ, nyini ti, i tintiin, ni i tɛtɛrɛ, ni i aŋgoro kɛrɛ sɛ wɔ. ¹⁷Na mɛrɛkɛ n asunsun kobe n gusu, kabo adamande bo ajaari ni, na i aŋgoro akɔ ayasu ka ajaari boo­wa kun kun kɔ ju yaa ni abura­na ni nna. ¹⁸Bu faari yabuɛ nyunyumi barasu be bo bu fere i ka jasapa ni taari kobe n a, na ba fa sika bo i da cain ka niɛɛnu, ata miɛ n ni i tii. ¹⁹Yabuɛ n bo bu fa seeri miɛ n kobe n ajaari n ti yabuɛ barasu nyunyumi, na i kɛrɛ busu wo i ŋgumi ŋgumi. I ti kabo Nyɛmɛ sa­yoo­wa dɔŋgu­yo­fɔ kpiɛn n sana i tanlɛɛ su na i wo i hoe su ni. Bu fere bu ka jasapa, ni safiri, ni agata, ni ɛmɛradi, ²⁰ni oniki, ni caniliya, ni krisolite, ni berili, ni topasi, ni krisoparasi, ni jasinti, ni amɛtisiti. ²¹Bu faari afere fofoe nyunyumi barasu be fa yoori anɔ buru ni nnyɔm n a. Bu faari sika fa yoori miɛ n atin natii­wa kɛrɛ a, na i da cain ka niɛɛnu.

²²Ma ŋu má Nyɛmɛ Seree­biri Awuru be miɛ n nu, dama ya Mi Nyɛmɛ Fɛmɛ Kpiri n ni Bɔmbaa n ade Nyɛmɛ Seree­biri Awuru n jinaa­biri a. ²³Miɛ n koro má wiɛ ni sara na bu ta wein ma i, dama Nyɛmɛ jirima woo­wa ni ti i wein a, na Bɔmbaa n ti i fitana. ²⁴Na durunya n nu adamande barasu kɛrɛ sunati i wein nu wɔ, na durunya n nu nfɛmɛm fa bu ajɛkɛ kɛrɛ ba wura nu. ²⁵Miɛ n anɔ ni téke wɔ saŋga kɛrɛ, dama ka kɔŋguɛ wo má dɔ. ²⁶Na adamande barasu kɛrɛ bo bu wo durunya n nu ni fá bu neŋge kpakpam ni bu jirima na bu fá wura nu. ²⁷Ama, deke kɛrɛ bo i ti má casi wúra má miɛ n nu, ni minɛm bo bu su amɔɛm, ni minɛm bo bu bu kɔrɛm ni. Má ka minɛm bo bu duma wo Bɔmbaa ni ŋgɔɔ kadasi n nu ni ŋgumi wúra nu a.

¹Na mɛrɛkɛ n akaaki akere m kunma nzue bo i ma ŋgɔɔ, i da cain kabo niɛɛnu ti n wɔ, i soŋgi fite Nyɛmɛ ni Bɔmbaa n fɛmɛya biɛ n nu wɔ, ²na i susoŋgi miɛ n atin n afiɛn ni. Kunma n bue nnyɔ n kɛrɛ, baka n bo i ma ŋgɔɔ n jinjina ahɛmɛ. Na i susu suu­wa barasu buru ni nnyɔ afɔ kɛrɛ, sara kɛrɛ ni i suu­wa. Na bu sufa i nyawa n tuntun durunya n nu adamande kɛrɛ tɔrɛm. ³Deke bo Nyɛmɛ ayo i nɔɔ ŋgbɛɛn wó má miɛ n nu. Ama, Nyɛmɛ ni Bɔmbaa n fɛmɛya biɛ ni wó dɔ, na i akɔɔm n súsu i. ⁴Bu ŋú i nyunu­awa dika kabo i ti barasu, na i kɛ́rɛ i duma gɔ bu ŋuma su. ⁵Awosin wó má dɔ, be koro má fitana dɔ, na bu kaaki koro má wiɛ dɔ, dama ya Mi Nyɛmɛ Fɛmɛ ni i tii yó bu wein a. Na bu dí fɛmɛya bo i la má awieeri.

Kabo Yesu seeri ka i cɛ́ má, i káaki ba ni

⁶Na mɛrɛkɛ n akaaki ase m ka, “Ahin nɔaniɛm n ti nahɔrɛ wɔ, na i ti deke bo sɔnɔ yo i yarada. Ya Mi Nyɛmɛ Fɛmɛ bo i faari i Awiɛwiɛ Casi n wuraari i nɔaniɛ kan­fɔm nu ni, yiri asunma i mɛrɛkɛ n ka i ba se i akɔɔm fa kɔ sa bo i yó kisa bɛrɛ n a.”

⁷Ya Mibiɛ Yesu ŋa, “Am so am sui. I cɛ́ má, m bá kisa. Tere­fiɛ wo sɔnɔ kɛrɛ bo i deeri nɔaniɛ n bo i wo ahin kadasi n nu na i jɔjɔ fa kɔ sa bo i bá yo n ŋu.”

⁸Mini Yohane tiiri, ye m ŋuuri ahin deke n kɛrɛ, m tiiri na m ŋuuri i sɔ ni, na ma kutu mɛrɛkɛ n bo i kereeri nyini dekem n jaa bu ka m su i. ⁹Na wɔ se m ka, má m yo sɔ, ama, m kansi Nyɛmɛ ŋgumi. Na wɔ kaaki ase m ka, “M ti u beŋgu akɔɔ, ni u ninbaam bo bu ti Nyɛmɛ nɔaniɛ kan­fɔm, ni bo bu de nɔaniɛ n bo i wo ahin kadasi n nu n be wɔ.” ¹⁰Na wɔ kaaki ase m ka, má m se ka m fiɛ nɔaniɛ n bo i wo ahin kadasi n nu na i jɔjɔ fa kɔ sa bo i bá yo n su, dama i cɛ́ má, i kɛrɛ yó kisa. ¹¹I ŋa sɔnɔ kɛrɛ bo i yo satiɛ, ma i kɔ su yo i satiɛ, sɔnɔ kɛrɛ gusu bo i yo i daŋgba sa ni, ma i kɔ su yo i daŋgba sa ni, na sɔnɔ kɛrɛ gusu bo i yo sakpa, ma i kɔ su yo i sakpa ni, na sɔnɔ kɛrɛ gusu bo i ti casi, ma i kɔ su wo i casi wo.

¹²Ya Mibiɛ Yesu ŋa, “Am so am sui. I cɛ́ má, m bá kisa, na m bá tɔ sɔnɔ kɛrɛ kaari kabo i juma­yoo­wa ti barasu. ¹³Mini ti mɔ­fɔ a, na m kaaki ti kasin­fɔ, mini ti deke kɛrɛ bumboori ni i awieeri n a.”

¹⁴Tere­fiɛ wo minɛm bo ba ŋmisi bu suturam ayo casi n dɔ, adena bu koro nya atin di baka n bo i ma ŋgɔɔ n dɛɛ suu­wa ni, na bu fa miɛ n anɔ n wura miɛ n nu. ¹⁵Ama, daŋgba yo­fɔm, ni bo bu di ayiri ŋgbɛɛn­ŋgbɛɛn, ni bara kpini­fɔm, ni somaya kɔ­fɔm, ni minɛ kun­fɔm, ni amɔɛ su­fɔm, ni bo bu bu kɔrɛ bu nɔaniɛ jɔjɔɔ­wa ni bu sa yoori nu n kɛrɛ koro wura má miɛ n nu.

¹⁶“Mini Yesu asunma m mɛrɛkɛ n ka i ba se am ahin jɔrɛ n a, ambɛrɛ bo am wo Kristo jamam n nu ni. Mini ti Fɛmɛ Davidi anuma a, na m ti asaakojo bo i ta ni.”

¹⁷Awiɛwiɛ Casi n ni konya n ŋa, “Bra.”

Sɔnɔ kɛrɛ bo i ti ahin, ma i mi gusu se ka, “Bra.”

Na sɔnɔ kɛrɛ bo nzuehɔɛ ati i,

na i koro ŋgɔɔ nzue ni,

i bra na i ba de nu ŋgbɛɛn.

Awieeri su n jɔrɛ

¹⁸Mini Yohane subɔbɔ sɔnɔ kɛrɛ bo i ti ahin kadasi n nu jɔrɛ fa kɔ sa n bo i bá yo n lɛɛ, ka sɔnɔ kɛrɛ bo i faari nɔaniɛ be bukaari su, Nyɛmɛ fá kekereke n kɛrɛ bo i wo ahin kadasi n nu n buka i mi su. ¹⁹Na sɔnɔ kɛrɛ gusu bo i yiiri nɔaniɛ n bo i wo ahin kadasi n nu n be, Nyɛmɛ yí i mi n aceeri na i nya má baka n bo i ma ŋgɔɔ n dɛɛ suu­wa n be, na i má i wura má miɛ casi n nu, kabo ba kɛrɛ bu jɔrɛ ahin kadasi n nu.

²⁰Yiri n bo i di ahin jɔrɛm kɛrɛ daani n ase ka, “Nahɔrɛ. I cɛ́ má, m bá kisa.”

Ma i yo sɔ. Ya Mibiɛ Yesu, bra. Ami.

²¹Ma ya Mibiɛ Yesu buka Nyɛmɛ minɛm kɛrɛ. Ami.