YAKOBO

Kadasi n bo

YAKOBO

akɛrɛ i ni

¹Mini Yakobo bo m ti Nyɛmɛ ni ya Mibiɛ Yesu Kristo dɛɛ akɔɔ ni, m bisa Kristo jamam n kɛrɛ dɔŋgu, bɛrɛ bo ba sandi abara ayɛ durunya n kɛrɛ nu ni.

Yarada­yo ni alecira jɔrɛ

²M ninbaam, nzɛn gbɛrɛ­gbɛrɛ be tu am, am ma am ahore jɔ. ³Dama am si ka am yarada bo am ayo Nyɛmɛ n dɛɛ ti, ye nyini gbɛrɛ­gbɛrɛ n tu am a, na am mindi ŋuuri i awieeri, am kóro mindi ŋu gbɛrɛ­gbɛrɛm bo bu tara nyini n mmɔɔ awieeri. ⁴Am ma am mindi n sun am nu, adena am woo­wa kɛrɛ ti kabo Nyɛmɛ koro ka i ti ni na má pui kpiɛ am su.

⁵Ama, nzɛn alecira akpiɛ am nu be su, i ti ye ni ka i mi sere i Nyɛmɛ dɔ, yiri bo i ce sɔnɔ kɛrɛ aceeri ni i kunnu kun ni, na i wura má be nyinsɛ ka i mi asere i n dɛɛ ti. Nyini ti, nzɛn be sere Nyɛmɛ, yiri má i mi alecira n a. ⁶Ama, nzɛn be sere Nyɛmɛ, i ti ye ni ka i mi yo yarada ka deke bo i sere i ni, Nyɛmɛ má i wɔ, na má i mi yo sika, dama sɔnɔ kɛrɛ bo i yo sika, i ti ka nzue bo aŋuma bo i kɔ i sin ba i nyunu wɔ. ^7-8Nyini sɔnɔ n bo i yo sika sɔ ni, i sunsunni ti nnyɔ nnyɔ ɔ, fa kɔ Nyɛmɛ dɔ, i si má i jinaa­biri. Má i mi n sunsun ka i nya pui fite Mibiɛ n dɔ.

Fɔ­tu fa kɔ Kristo jama n yaari­fɔm ni neŋge­fɔm dɔ

⁹Tɔ, ya niwa bo i ti yaari­fɔ, na Nyɛmɛ awura i kpiri, i ti ye ni ka i mi ma i ahore da. ¹⁰Na ya niwa bo i ti neŋge­fɔ gusu, na Nyɛmɛ ayo i kaan, i ti ye ni ka i mi ma i ahore da. Dama i cɛ má na i ni i neŋge n kɛrɛ bá wo má bɛrɛ, kabo wura pum cɛ má, na i ni i nyumi n kɛrɛ kpɔnkpɔn barasu ni. ¹¹I ti sɔ ɔ, kabo wiɛ ba bi, na i kɛkɛrɛ n bo kpɔnkpɔn wura pum na i wu, na i nyumi wie ni. Kabo neŋge­fɔ n gusu ni i neŋge n ti lɛɛ. Saŋga bo i nyunu aba aboro i juma su ni, i ni i neŋge n kɛrɛ bá wo má bɛrɛ kun.

Fɔ­tu fa kɔ saŋga bo am wo gbɛrɛ­gbɛrɛ nu ni

¹²Tere­fiɛ wo sɔnɔ kɛrɛ bo gbɛrɛ­gbɛrɛ tu i, na i mi saaki má i nɔɔ n dɔ. Nyini sɔnɔ n koro mindi ŋuuri nyini gbɛrɛ­gbɛrɛ n awieeri, i nyá ŋgɔɔ Nyɛmɛ dɔ, nyini la aceeri n bo i yo seeri ka i fá ma bɛrɛ bo bu koro i ni. ¹³Nzɛn gbɛrɛ­gbɛrɛ n sɔ n atu be na i ma i wura satiɛ nu, má i mi se ka, “Nyɛmɛ ayo m ye m wura satiɛ nu a.” Dama pui koro yo má Nyɛmɛ na i wura satiɛ nu, na i gusu yo má be na i mi wura satiɛ nu. ¹⁴Ama, deke bo i ma sɔnɔ wura satiɛ nu n la i mi ni i tii dɛɛ konvikiya a, nyini ma i cin dodo satiɛ­yo a, ¹⁵na nyini konvikiya n nya cin i wura satiɛ nu na i mi yo satiɛ be, na nyini satiɛ­yo n nya ba bi wieeri, i fa yiwee ba a.

¹⁶M ninbaa koroo­wam, má am daka am ŋu. ¹⁷Aceeri kɛrɛ bo i ti kpa na i ti kabo Nyɛmɛ koro ka i ti ni, i kɛrɛ fite aŋgoro ya Si Nyɛmɛ dɔ ɔ, yiri yiiri deke n kɛrɛ bo i ta aŋgoro n a. I wo ti i wo wɔ, na i ma má awosin yo má na i kaaki deke be. ¹⁸I dɛɛ koroya­nu, na wɔ fa i nɔaniɛ n bo i ti nahɔrɛ n ama ya, ye ya yo i nbaam. I yoori sɔ ɔ, adena ya yo deke n kɛrɛ bo wɔ yi bu n tii.

Am de Nyɛmɛ nɔaniɛ n na am yo kabo i kere ni

¹⁹M ninbaa koroo­wam, i ti ye ni ka am ti ahin sereya n bu, ka, sɔnɔ kɛrɛ so i sui ndende na i ti, má i mi koro nde jɔjɔ, má i kaaki fa yaa ndende. ²⁰Dama yaa kere má sɔnɔ na i yo sa bo i kɔ atin su Nyɛmɛ dɔ. ²¹Nyini ti, am yaki sa ŋgbɛɛn­ŋgbɛɛn, ni satiɛ kɛrɛ yo. Am yo am ŋu kaan fa ma Nyɛmɛ, na am de i nɔaniɛ n bo wɔ fa awura am ahore­mbaa su ni. Dama nyini nɔaniɛ ni koro de am tii ji a.

²²Am yo kabo Nyɛmɛ nɔaniɛ n kere ni. Má am dadaka am ŋu ka am ati i na am yo má kabo i kere ni. ²³Dama nzɛn be tiiri nɔaniɛ n na i yo má kabo i kere ni, i mi ti ka sɔnɔ bo i fa niɛɛnu niɛ, na i ŋu i ŋu wɔ, ²⁴ama, na i nya faari niɛɛnu n seeri, na i kɔ wieeri, a ŋu ka i wara afi kabo i nyunu­awa ti barasu. ²⁵Ama, sɔnɔ kɛrɛ gusu bo i fiitiiri Nyɛmɛ nɔaniɛ kpamaa­wa n nu, nɔaniɛ kpamaa­wa n bo i ti kabo Nyɛmɛ koro ka i ti n na i ma minɛm nyaari bu tii ni, na nzɛn i mi boro i nyi su nɔaniɛ n su, na i mi ti má sɔnɔ bo i ti nɔaniɛ n na i wara afi i, ama, na i ti sɔnɔ bo i yo kabo nɔaniɛ n kere ka i yo ni, i mi yiri, Nyɛmɛ yó i kisi fa kɔ i sa­yoo­wa kɛrɛ nu.

²⁶Sasu bekun, sɔnɔ kɛrɛ bo i ŋa i su Nyɛmɛ atin su, na i koro tara má i nɔɔ, i mi daka i ŋu wɔ lɛɛ, na i nyɛmɛsu atin n ti ŋgbɛɛn wɔ. ²⁷Nyɛmɛsu atin bo be su i su n na i la má gela be ya Si Nyɛmɛ dɔ n la ahin, ka, i mi niɛ ayikam ni nkuna­fɔm su, bɛrɛ bo bu di yaari ni, na i mi kaaki tara i ŋu na má durunya n nu­fɔm ma i yo fin be Nyɛmɛ dɔ ɔ.

Fɔ­tu fa kɔ tantambu­nu

¹M ninbaam, kabo am yo Yesu Kristo yarada ni, yiri bo i ti ya Mibiɛ Jirima­fɔ ni, má am fa tantambu­nu ni am beŋgu. ²Ma m fa i ka, nzɛn minɛ nnyɔ nbem ba wuraari am tiɛntiɛn­bunɔɔ sɔɔ n nu, na kun wura sutura kpakpa ni sika ŋgaa, na nyiŋga n ti yaari­fɔ na i wura sutura titii­wa, ³na nzɛn am nu kun se bo i wura sutura kpakpa n ka, “Jande, ba tana ahin tanaa­biri nyunyumi n su,” na i nya se yaari­fɔ n ka, “Wɔrɔ, ka jina dɔ, nzɛn má nyini, ba tana m jaa bu fɛn,” ⁴nyini kere ka am sufa tantambu­nu atin lɛɛ, na am sunsunni tiɛ ma am sufa kpakpaaki­nu ba lɛɛ, má sɔ?

⁵M ninbaa koroo­wam, am ti fɛn. Má Nyɛmɛ yiiri yaari­fɔm bo bu wo durunya n nu n ka bu ti ajɛkɛ­fɔm i dɔ, bu yarada n dɛɛ ti a, na bu nyá fɛmɛya n bo wɔ se ka i fa ma minɛm bo bu koro i n a, nzɛn sɛ? ⁶Ama, ambɛrɛ bu yaari­fɔm ŋgbɛɛn wɔ. Ŋmam kere am wahara n a? Ŋmam kaaki cin am kɔ jɔrɛ dii­birim n a? Má neŋge­fɔm n a? ⁷Má bɛrɛ jɔjɔ wura duma n bo i la anyunuyi ni ŋgasi nu n a? Yiri ye Nyɛmɛ afa ama am na i kere ka am ti i dɛɛm ni.

⁸Ba kɛrɛ i Nyɛmɛ Jɔrɛ Kadasi n nu ka, “Koro u beŋgu kabo a koro u ŋu ni.” Nyɛmɛ fɛmɛya n nu nɔaniɛ kpamaa­wa bambaka n lɛɛ. Nzɛn am yo sɔ, nyini ti kpa a. ⁹Ama, nzɛn am laari tantambu­nu, am ayo satiɛ, na Nyɛmɛ nɔaniɛ kpamaa­wa n kere ka am ti ketema­fɔm wɔ lɛɛ. ¹⁰Wɔrɔ kɛrɛ bo a suuri Nyɛmɛ nɔaniɛ kpamaa­wa n kɛrɛ su, ama, na a saakiiri i kun n kpein mmɔɔ, a saaki nɔaniɛ kpamaa­wa n kɛrɛ lɛɛ. ¹¹Nyɛmɛ bo wɔ se ka, “Má a kpini u beŋgu yi” ni, yiri akaaki ase ka, “Má a kun sɔnɔ” n a. Ama, nzɛn haari a kpini má u beŋgu yi, ye a kuunri sɔnɔ, a yo ketema­fɔ fa kɔ nɔaniɛ kpamaa­wa n su lɛɛ. ¹²Am ma am jɔjɔɔ­wa ni am sa­yoo­wa kere ka am ti minɛm bo Nyɛmɛ bá fa i nɔaniɛ kpamaa­wa ni fá di am jɔrɛ a, nyini nɔaniɛ kpamaa­wa n bo i ma minɛm nya bu tii ni. ¹³Dama jɔrɛ­di cɛɛn, minɛm bo bu si má bu beŋgum aŋunfɔ ni, Nyɛmɛ si má bɛrɛ mmɔɔ aŋunfɔ. Ama, aŋunfɔ si­fɔm ni, bɛrɛ dí nasara, jɔrɛ­di cɛɛn ni.

Fɔ­tu fa kɔ yarada ni i sa­yoo­wa

¹⁴M ninbaam, nzɛn sɔnɔ ŋa i yo Nyɛmɛ yarada, na i sa­yoo­wa kere má ka i la yarada, nyini yarada ni kóro de i tii ji, nzɛn sɛ? Ai, nyini ti ŋgbɛɛn wɔ lɛɛ. ¹⁵Ma m fa i ka, nzɛn am ninbaa Kristo jama nbem wo bɛrɛ bo bu la má diire, na bu la má sutura, ¹⁶na nzɛn am nu kun seeri i ka, “Kɔ ni ahoreda. Nyɛmɛ ma u na a di, na i ma a nya sutura.” Nzɛn a seeri sɔ, na a ma má i mi koroo­wa ni, i kpa la bɔnɔ? ¹⁷Nyini ti, nzɛn a la yarada n ŋgumi, na u sa­yoo­wa kere má ka a la yarada, i ti yarada ŋgbɛɛn wɔ lɛɛ.

¹⁸Be koro se ka, “Ahin sɔnɔ n yiri yo Nyɛmɛ yarada wɔ, ama, ahin n yiri yo sakpa a.” Tɔ, ye sɔnɔ yo sɛ kere ka i yo Nyɛmɛ yarada, bo i yo má sakpa a? Mini yo sakpa a, nyini kere ka m yo Nyɛmɛ yarada. ¹⁹A ŋa a yo yarada ka Nyɛmɛ ŋgumi wo bɛrɛ a. Nfan. Haari ajinim mmɔɔ si i sɔ ɔ, na bu ŋuniɛ subobo bu ni sɛrɛ. ²⁰Wɔrɔ sinnzin ŋgbɛɛn ni, a koro ka m kere u ka yarada yoo­wa bo i kere má sakpa n ti yarada ŋgbɛɛn wɔ, nzɛn sɛ? ²¹I yo sɛ ye Nyɛmɛ deeri ya na Abraham ka i yo sa bo i kɔ atin su i dɔ a? Abraham sa­yoo­wa n dɛɛ ti ye Nyɛmɛ deeri i sɔ a, dama Abraham yo faari i wa Izaki fa seeri Mikun n yoo­wa yoo­biri n ka i fa i yo yoo­wa ma Nyɛmɛ ni. ²²A ŋu má i? I yarada yoo­wa fa saŋga ni i sakpa yoo­wa kɛrɛ yoori kun wɔ. Na i sa­yoo­wa n akere ka i yarada n ti kabo Nyɛmɛ koro ka i ti n wɔ. ²³Sɔ ye deke n bo bu kɛrɛɛri i Nyɛmɛ Jɔrɛ Kadasi n nu n ayo yii­wa a, ka, “Abraham yoori Nyɛmɛ yarada n dɛɛ ti, na Nyɛmɛ ade i ka i yo sa bo i kɔ atin su i dɔ.” Nyini ti, ye bu fereeri i ka Nyɛmɛ danfo n a. ²⁴Tɔ, m ŋa am aŋu i e, ka sɔnɔ sa­yoo­wa ma Nyɛmɛ de i ka i yo sa bo i kɔ atin su i dɔ a, má ka i mi yarada ŋgumi ti. ²⁵I ti sɔ ɔ lɛɛ, fa kɔ bara sakara be bo bu fere i ka Rahabu n dɔ. Dama dawa saŋga, yiri yo bukaari Yisareli­fɔm dɛɛ kɔrɛsi­yi­fɔm n a, na wɔ kere bu atin na ba foro bu kpɔ­fɔm saa nu. Nyini sa­yoo­wa n dɛɛ ti, na Nyɛmɛ ade i ka i yo sa bo i kɔ atin su i dɔ ɔ. ²⁶Tɔ, kabo ŋumi awo má aŋuniɛ­mbaa n nu na i ti fuin ni, sɔ ye i ti a, nzɛn a la yarada na u sa­yoo­wa kere má ka a la yarada, yarada ŋgbɛɛn lɛɛ.

Fɔ­tu fa kɔ kabo ya bita ya taferema

¹M ninbaam, má am dɔŋgu yo am ŋu kere­fɔm. Dama am si ka yɛrɛ bo ya ti kere­fɔm ni, ya jɔrɛ dii­wa bá yo kekereke agaya a. ²Ya kɛrɛ ba yo, ya yo sam bo bu kɔ má atin su wɔ. Ama, nzɛn sɔnɔ kɛrɛ bo i jɔjɔɔ­wa kɛrɛ kɔ atin su, i mi woo­wa n ayo kabo Nyɛmɛ koro ka i yo n wɔ lɛɛ. I kere ka i mi n la tara­buŋu sa kɛrɛ nu lɛɛ. ³Am ma ya niɛ kpɔŋgɔ. Ya fa karafi wura kpɔŋgɔm nɔɔ ɔ, na ya kunma bu faŋga na bu yo deke kɛrɛ bo ya koro ka bu yo i ni. ⁴Am ma ya niɛ lee bambaka gusu, i ni i bambaka n kɛrɛ ni, haari nzɛn aŋuma bambaka subo i kɔ deke be, lee kan­fɔ n koro fa napɔku baka n bo i ti kaan ni lee ni, na i kan i kɔ deke kɛrɛ bo i koro. ⁵I ti sɔ lɛɛ ni taferema n gusu, i ni bo i ti kaan aŋuniɛ­mbaa n nu n kɛrɛ ni, i koro saaki deke dɔŋgu.

Niɛ kabo sin ti barasu a, haari i ti kaan sɛ, i koro je boo bambaka. ⁶Taferema n ti ka sin wɔ lɛɛ. Bekun, ya ŋuniɛ­mbaa n nu, i kaaki ti ka satiɛm bo ba yi durunya n nu n wɔ, i satiɛ n sa aŋuniɛ­mbaa n kɛrɛ wɔ. I yo juma ka sin wɔ, na i saaki sɔnɔ ŋuniɛ­mbaa n fite cɛɛn n bo bu wuuri i n fa kɔ ju haari i yiwee cɛɛn. Yiko bo taferema n la i na i yo sɔ n fite cɛɛma sin n nu wɔ. ⁷Adamande kunma deke n kɛrɛ faŋga, i ajaa­nnam o, i laŋkpɛtɛ­fɔm o, i cin­bukunnu­su­fɔm o, ni jombaam o. Na wɔ koro ata bu kɛrɛ. ⁸Ama, taferema yiri, sɔnɔ be nya koro kunma má i faŋga. I ti deke tiɛ wɔ, bo be koro tara má i. I ti ka wɔ yi ni bɔrɛ bo i kun wɔ. ⁹Ya fa yiri fa kansi Micɛra n bo i ti ya Si n a. Na ya kaaki fa yiri saaki minɛm bo Nyɛmɛ ayi bu ka bu ferema ni yiri n a. ¹⁰Nyini anɔɔ kun n ye kansi ni saaki fite nu a. M ninbaam, wɔ yo má daka ka i ti sɔ. ¹¹Bura kun koro tiɛ nzue kpa, ni nzue tiɛ, nzɛn sɛ? Ai, i koro yo má. ¹²M ninbaam, am si ka damba baka koro su má ŋguin­mbaa. Cumi baka gusu koro su má damba. I ti sɔ ɔ lɛɛ, bura bo i nzue ti lalaraki, i koro tiɛ má nzue bo i yo fiɛ.

Fɔ­tu fa kɔ alecira bo i fite Nyɛmɛ dɔ ni

¹³Ŋma wo am nu bo i la alecira ni si a? I ti ye ni ka i mi kere ka i ti sɔ ɔ, fa kɔ i woo­wa kpa su, na i yo sakpa, na i wo bɛnlɛ, nyini kere ka i la alecira. ¹⁴Ama, nzɛn am susi kɔrɛ ahore­mbaa su, na am suyo wi, na am bita anyii sunsunni, má am bita fɔ ka am la alecira, na má am bu kɔrɛ jaraki nahɔrɛ n sɔ. ¹⁵Nyini alecira n sɔ fite má Nyɛmɛ dɔ, ama, i fite durunya n nu fɛn wɔ, i nati má Nyɛmɛ atin su, i ti Sitana dɛɛ wɔ. ¹⁶Deke bo kɔrɛsi, ni anyii wo, kpakpaaki­nu ni satiɛ yoo­wa barasu kɛrɛ wo dɔ ɔ. ¹⁷Ama, sɔnɔ bo i la alecira n bo i fite Nyɛmɛ dɔ n la ka, i woo­wa ti casi. Bo i tɔ su n la ka, i koro tana­laifiɛ, na i la wo bɛnlɛ, na i de fɔ­tu, na i si aŋunfɔ agaya, na i yo sakpa beberebe, na i la má tantambu­nu, na i kaaki la má burukɔɔ­nu. ¹⁸Tana­laifiɛ­fɔm bo bu yo tana­laifiɛ juma ni, bu ŋkatɔ n la sam bo bu kɔ atin su Nyɛmɛ dɔ n wɔ.

Fɔ­tu fa kɔ kabo ya da ya ŋu asiɛŋgu fa ma Nyɛmɛ ni

¹Nzu ti ma am di aluwa, na am suse akuruwa am ŋuŋu nu a? I fite ka am sunsunni ti tiɛ, fa kɔ am ahore­mbaa koroo­wa beberebe n bo i wo am ŋuniɛ­mbaa nu, na i kpiɛ am daafiri n dɛɛ ti a, má sɔ? ²Am koro deke nbem, na am nya má bu n ti, ye am koro ka am kun am beŋgum n a. Am konviki wura minɛm neŋge nu, na am nya má i n ti, ye am se akuruwam, na am di aluwa n a. Am sere má Nyɛmɛ n dɛɛ ti, ye am nya má am koroo­wa n a. ³Deke bo i ti na am sere Nyɛmɛ na am nya má i n la ka, am sere ni sunsunni tiɛ wɔ. Am sere dekem ka am fa yo am kunnu koroo­wa a. ⁴Ambɛrɛ bo am su má Nyɛmɛ ni, am si má ka sɔnɔ kɛrɛ bo i koro durunya n nu neŋgem agaya, ti Nyɛmɛ kpɔ­fɔ ɔ, nzɛn sɛ? Nyini ti, sɔnɔ bo i fa i ahore­mbaa se durunya n nu neŋgem su, i mi ti Nyɛmɛ kpɔ­fɔ ɔ lɛɛ. ⁵Má am sunsun ka deke bo ba kɛrɛ i Nyɛmɛ Jɔrɛ Kadasi n nu n ti ŋgbɛɛn wɔ, ka, “Sɔnɔ kɛrɛ bo i fa i awiɛwiɛ n bo Nyɛmɛ afa ama i n suuri deke be sin Nyɛmɛ ŋu, Nyɛmɛ si i kɔrɛ agaya.” ⁶Ama, ahɔrɔma n bo Nyɛmɛ afa ama ya n sunnu. Nyini ti, ye ba kɛrɛ i Nyɛmɛ Jɔrɛ Kadasi n nu ka,

“Nyɛmɛ kete kpirikoro­fɔm wɔ,

ama, na i fa i ahɔrɔma n ma tarakam.”

⁷Nyini ti, am fa am ŋu ma Nyɛmɛ. Am kete Sitana, na i ŋmáti yaki am. ⁸Am cin dodo Nyɛmɛ, na i gusu cín dodo am. Ambɛrɛ satiɛ­yo­fɔm, am yi am saa fite satiɛ nu. Ambɛrɛ anɔɔ nnyɔ nnyɔ­fɔm, am yo am ahore­mbaa casi. ⁹Am satiɛ dɛɛ ti, am ma am ahore saaki, na am sun. Am fa am siri fa kaaki sun, na am fa am ahorejɔ fa kaaki ahoresaaki. ¹⁰Am da am ŋu asiɛŋgu ma Nyɛmɛ, na yiri bá wura am kpiri.

Fɔ­tu fa kɔ kabo má ya jaraki ya beŋgum ni

¹¹M ninbaam, má am jɔjɔ tiɛ ma am beŋgu. Wɔrɔ bo a jɔjɔ tiɛ ma u lamɔkɔ, wara a jaraki i, a jɔjɔ tiɛ afa akɔ Nyɛmɛ nɔaniɛ kpamaa­wa n su ajaraki i lɛɛ. Nzɛn a nya yoori sɔ, a nya ti má sɔnɔ bo i de Nyɛmɛ nɔaniɛ kpamaa­wa n lɛɛ, ama, a yo u ŋu ka jɔrɛ­di­fɔ lɛɛ. ¹²Nyɛmɛ ŋgumi ti i nɔaniɛ n kpama­fɔ a, na yiri ŋgumi kaaki ti i jɔrɛ­di­fɔ a, yiri bo i koro de minɛm tii ji na i kaaki koro ma bu ka ŋgbɛɛn ni. Wɔrɔ la ŋma na a jaraki u beŋgu a?

Fɔ­tu fa kɔ yanfɔya atin su

¹³Am ti fɛn, ambɛrɛ bo am se ka, “Nyuma, wara ahunma, ya kɔ́ ahin miɛ n su, na ya kɔ́ yo afɔ kun dɔ, na ya yó juma, na ya nyá ŋwaa beberebe ni.” ¹⁴Ambɛrɛ, haari am si má sa bo i bá yo am ahunma mmɔɔ. Am ni am ŋgɔɔ ti ka sɛ? Am ti ka bɔrɛ wɔ, bo i tɔ na i cɛ má, na wiɛ ba tiɛ, a ŋu ka wɔ kpɔnkpɔn ni. ¹⁵Deke bo i ti ye ni ka am se n la ka, “Nzɛn Nyɛmɛ diiri su, ya wó bɛrɛ, na ya yó ahin ni ahin.” ¹⁶Ama, kabo i ti ni, ambɛrɛ koro kpiri wɔ, na am sufɔ. Nyini yanfɔya sɔ n kɛrɛ ti má kpa. ¹⁷Tɔ, nyini ti, sɔnɔ kɛrɛ bo i si sakpa bo i yo i, na i yo má i, i mi yo satiɛ wɔ lɛɛ.

Fɔ­tu fa kɔ neŋge­fɔm dɔ

¹Ambɛrɛ neŋge­fɔm, am ti fɛn. Sa ŋgbɛɛn­ŋgbɛɛnm bo bu bá tu am n dɛɛ ti, am sun na am subo awie. ²Am ajɛkɛ n kɛrɛ susaaki, na nvɔrɛm sumuka am suturam n kɛrɛ. ³Am sika ni am jɛtɛ kɛrɛ suwura ŋgambulaari, na bu ŋgambulaari wuraa­wa ni bá ma Nyɛmɛ jaraki am, na i káaki ba yara am ka sin, am ŋuniɛ­mbaa nu. Am atiɛn ajɛkɛ nɔɔ afa ase fa kɔ durunya n awieeri wɔ lɛɛ. ⁴Sasu bekun, am akete ka am tɔ má juma­yo­fɔm ŋkatɔ, bɛrɛ bo bu tambu am fiesu neŋge mbaa ni. Am ti kabo bu kan am ndiɛ a, bu awie bo n kɛrɛ ato Micɛra Yiko­fɔ n sui nu. ⁵Kabo am wo durunya n nu fɛn ni, am adi fiɛ, na am ayo am kunnu koroo­wa. Am adi ayo ŋgbiŋgbiri ka toora dɔdɔɔri­fɔm bo bu sukɔ ka bu kpiɛ bu kɔm ni. ⁶Minɛm bo bu la má ŋgasi be ni, bɛrɛ n ye am ama ba di bu jɔrɛ acin bu sui akun bu a. Bu kete má am wɔ.

Awieeri su dɛɛ fɔ­tu jɔrɛm ni

⁷Nyini ti, m ninbaam, am yo sawɔrɛ ŋminda fa kɔ cɛɛn n bo Mibiɛ ni bá ni. Am niɛ kabo dɔdɔɔri­fɔ yo sawɔrɛ ŋminda, haari kabo bu fiesu diire bá yo kpakpa barasu. I yo sawɔrɛ ŋminda kpanyini nzue kɔ tu takoku wɔ. ⁸Am gusu yo sawɔrɛ. Am ma am ahore si, dama Mibiɛ n ba saŋga n adodo. ⁹M ninbaam, má am wo waraki su, sukan am beŋgu ndiɛ, adena má Nyɛmɛ bá di am jɔrɛ. Am ti fɛn, yiri Jɔrɛ­di­fɔ n lɛɛ, yiri jina anɔ n nu n a. ¹⁰M ninbaam, am ma ya teŋge su, fa kɔ Nyɛmɛ nɔaniɛ kan­fɔm n bo bu yo jɔjɔɔri Micɛra n duma n nu ni. Am su bu jaa yii­wa su, kabo bu yo yoori sawɔrɛ mindi diiri wahara ni. ¹¹Nahɔrɛ, minɛm bo sa tu bu, na bu la mindi kɔ ŋu i awieeri ni, bɛrɛ ye ya fere bu ka tere­fiɛ­fɔm a. Am tiiri kabo sɔnɔ be bo bu fere i ka Yobo n yo laari mindi barasu, fa kɔ ni wahara n kɛrɛ bo i yo diiri i ni. Am si kabo kasin na Micɛra n abuka i ni. Dama Micɛra n si aŋunfɔ na i la koro agaya.

¹²M ninbaam, jɔrɛ bo i buka i kɛrɛ su n la ka, má am tan deke be ndiɛ fieo. Má am se ka am tan asiɛŋgu, wara am tan aŋgoro. Nzɛn u jɔjɔɔ­wa n bu la ka ɛɛn, am se ka, “Ɛɛn.” Na nzɛn u jɔjɔɔ­wa n bu la ka ai, am se ka, “Ai.” Adena, má Nyɛmɛ di am jɔrɛ na i yo am ŋgbɛɛn.

¹³Nzɛn be wo am nu bo sa be atu i, i ti ye ni ka i mi sere Nyɛmɛ. Na nzɛn be wo am nu bo i ahore ajɔ, i ti ye ni ka i mi di jue kansi Nyɛmɛ. ¹⁴Nzɛn be wo am nu bo i la má laifiɛ, i ti ye ni ka i mi fere Kristo jama nkpiɛn­kpiɛnm na bu ba sere Nyɛmɛ ma i, na bu nunuka i ŋguin, Mibiɛ n duma n nu. ¹⁵Nyini nyɛmɛsere n bo bu sere i ni yarada ni, i má tukpaki­fɔ n nya laifiɛ, na Mibiɛ ni má i yasu. Na nzɛn haari wɔ yo satiɛ mmɔɔ, Nyɛmɛ fá i satiɛ n ce. ¹⁶Nyini dɛɛ ti, am kan am satiɛ bo am ayo i kere am beŋgu, na am sere Nyɛmɛ ma am beŋgu, adena am nya laifiɛ. Sɔnɔ bo i yo sa bo i kɔ atin su Nyɛmɛ dɔ ni, i nyɛmɛsere la faŋga, na i yo juma nahɔrɛ su. ¹⁷Nyɛmɛ nɔaniɛ kan­fɔ n bo bu fere i ka Eliya ni, i yo tiiri adamande ka yɛrɛ wɔ, na wɔ sere Nyɛmɛ ni anyum­boro su, ka, má nzue tɔ, na nzue n atɔ má asiɛn n su afɔ nsan ni sara nsɛn. ¹⁸Na wɔ kaaki asere Nyɛmɛ, ka, i ma nzue n tɔ, na wɔ tɔ, na asiɛn n diire mbaa kɛrɛ akaaki ayo.

¹⁹M ninbaam, nzɛn am nu kun miniiri nahɔrɛ atin ni, na am nu kun be faari i kpieeri i nyi baari atin n su, ²⁰i ti ye ni ka i mi n si nu ka, sɔnɔ kɛrɛ bo i yiiri satiɛ­yo­fɔ fiteeri i satiɛ atin n su, i mi de nyini sɔnɔ n tii fite yiwee nu, na i ma Nyɛmɛ fa i mi satiɛ beberebe n fa ce i.