Нахьум

Нахьум-пайхамаран

тептар

Дешхьалхе

Нахьум-пайхамаран тептар байтан кепехь ду. Цу тӀехь Нунав-гӀала йожор бахьана долуш адамаш даккхийдеш хилар гойту. Иза заманашкара дуьйна хилла болчу а, чӀогӀа ницкъ бина болчу а исраилхойн мостагӀий болчу ашурхойн коьрта гӀала яра. ГӀала йожор Ӏийса дуьнен тӀе валале ворхӀалгӀачу бӀешеран тӀаьххьарчу декъехь хилла. Къизачу а, дегалчу а къомана Дала дина таӀзар санна гуш ду Нунав-гӀала йожор.

¹- 1:1–3:19 ЕшаӀ-ЯхӀу 10:5-34; 14:24-27; Цапни-ЯхӀу 2:13-15. Нунав-гӀалина дуьхьал Делера болу хаам. Элкхушахо волчу Нахьумна Дала хӀоттийначу суьртах лаьцна долу тептар.

Дела Нунав-гӀалина оьгӀазвахар

² Веза Эла – эмгаралла йолу Дела а, бекхамхо а ву.

Бекхам бийриг а, дераллах вуьзнарг а ву Иза.

Шена дуьхьалболчарна бекхам а бо Цо,

мостагӀашна дуьхьал моха а латтайо Цо.

³ Веза Эла атта оьгӀаз а ца воьду,

Иза Шен ницкъаца сийлахь ву.

Цо бехк таӀзар ца деш а ца буьту.

Йилбазмохехь а, дарцехь а ду Везачу Элан волавалар,

мархаш – Цуьнан когаша хьалайоккху чан санна ю.

⁴ Цо омра дича, хӀорд а бакъало,

дерриг хиш а лекъа.

Башан-мохк а, Кармал-лам а маргӀалбулу,

Ливанун-ломан зазанаш дакъало.

⁵ Цунна хьалха лаьмнаш а дегадо,

баьрзнаш а деша.

Цуьнан юьхьа хьалха латта а,

дерриг а дуьне а, дуьнен чохь

мел дехарг а дегадо.

⁶ Мила латталур ву, Иза эргӀадвахча?

Хьан ловр ю Цуьнан чӀогӀа йолу оьгӀазалла?

Цуьнан дералла яьлла цӀе санна хиларна,

тархех Цунна хьалха чан хуьлу.

⁷ Веза Эла ма дика ву.

Бохам тӀебеача, Иза дӀалочкъийла ву.

Шех бӀобулучарна Ӏуналла до Цо.

⁸ Амма дерриге а дӀахьулдечу хин дестаро санна,

Цо кхоччуш дӀайоккхур ю Нунав-гӀала+ 1:8 *Ӏебархойн тептар тӀехь: *Цо кхоччуш дӀайоккхур ю Нунав-гӀала. *Грекийн гочдар тӀехь: *Шена дуьхьалбевлларш кхоччуш чаккхенга балор бу Цо.*.

Шен мостагӀий Цо бодане дӀахьулбойтур бу.

⁹ ХӀун дагадеана шуна Везачу Элана дан?

Цо шу кхоччуш хӀаллакдийр ду!

ШолгӀа шуна бохамаш бан оьшур дац.

¹⁰ Коканан колл санна, вовшахъхьаьрчина болу мостагӀий,

баххалц мелла болу маларчаш санна, хӀаллакбина хир бу,

дагийна декъа ча санна, берриш а хӀаллакбина хир бу.

¹¹ Везачу Элана дуьхьал зулам дан дагалаьцнарг а, мекара хьехам бинарг а хьох схьаваьлла, Нунав-гӀала. ¹² Везачу Эло иштта боху: «Ашурхой нуьцкъала а, дукха а белахь а, уьш хӀаллакбина дӀабохур а бу, уьш къайлабевр а бу. ЯхӀудан халкъ, Ас хьуна хӀинццалц халонаш йинехь а, кхин халонаш йийр яц. ¹³ ХӀинца Ас хьуна тӀехь долу церан дукъ дохор ду, хьан буржалш а йохор ю».

¹⁴ Ткъа хьуна, Ашуран къам, Везачу Эло хӀара билгалдаьккхина: «ХӀинца чул тӀаьхьа кхин хӀу хир дац хьан цӀе йоккхуш. Хьан деланийн цӀийнара дечиган а, лалийна бина болу а цӀуш хӀаллакбина дӀабохур бу Ас. Ас хьуна каш кечдийр ду, хьо мехала хӀума йоцу дела».

¹⁵- 1:15 ЕшаӀ-ЯхӀу 52:7. Хьажал, хаза кхаъ бахьаш волчу а, машар дӀакхайкхош волчу а геланчин когаш лаьмнашкахула схьабогӀу! ЯхӀудан къам, хьайн деза денош дазде, хьайн ваӀданаш а кхочушде. ХӀинца чул тӀаьхьа Ӏесанаш хьан махка кхин чугӀертар бац, уьш кхоччуш хӀаллакбина дела.

Нунав-гӀалина тӀелатар

¹ Бохам бийриг хьуна дуьхьалгӀаьттина,

ва Нунав-гӀала!

Ӏалашъе хьайн чӀагӀонаш,

ларбе хьайна тӀебогӀу некъ,

хьайн гӀодаюкъ ехка,

схьагулбе ницкъ.

² Веза Эла Якъубан тӀаьхьенан сийлалла меттахӀотто воллу,

Исраилан халкъан сийлалла меттахӀоттор ю,

бохам бечара церан латта дассийна делахь а,

церан кемсийн гаьннаш хӀаллакдина делахь а.

³ Церан эскархойн турсаш цӀен ду.

Церан тӀемалой цӀен духар дуьйхина бу.

ЦӀе санна лепаш ду церан гӀудалкхийн эчиг

тӀамана кечам бинчу дийнахь,

техкаш ю гоьмукъийн хьун.

⁴ ГӀудалкхаш урамашкахула дӀасахьаьдда,

майданашкахь къевкъа уьш.

Царах, цӀарах санна, лепар схьадолу,

къега уьш, секхаӀад санна.

⁵ Куьйгалхочо шен тӀеман хьаькамаш схьакхойкху,

амма церан болар тийсало.

ГӀалин пенашна тӀекхача сихбелла уьш,

амма хӀинцале а дӀахӀоттийна бу

гӀалин ков харцош болу бӀогӀам

беттачеран ларйо хӀума.

⁶ Хин кевнаш дӀаделлалуш ду,

паччахьан цӀа хӀаллакьхуьлуш ду.

⁷ Сацам бина бу.

Зуда-паччахь ерзина йийсаре дӀаюьгуш ю.

ГӀарбашаш, кхокхарчий санна, узарш деш бу,

сингаттамца шайн накхош тӀе буйнаш а детташ.

⁸ Нунав-гӀала ша мел ю

хих буьзна Ӏам санна яра,

ткъа хӀинца цуьнан нах бовду.

Совцийша! Совцийша! Амма

цхьа а юха ца хьожу.

⁹ ДӀасадаккха дети, дӀасадаккха деши!

Цхьана а езачу пхьегӀан тӀаьхьалонан йист хедаш яц.

¹⁰ Иза талораш дина, яссийна, хӀаллакйина.

Дог деша, голаш егайо.

Массеран меженаш чохь онда лазар ду.

Массеран яххьаш макхъелла.

¹¹ Мичахь бу хӀинца лоьмийн бен а,

лоьмийн кӀорнеш кхобуш йолу меттиг а

цхьаммо а ца кхерош лом-нана а,

лоьман кӀорнеш а лелла йолу?

¹² КӀорнеш тоъал юзорхьама катухура лоьмо,

лом-нанна кхача балархьама са дукъадора,

шен хьехаш ижух а юзуш,

оьрнаш катоьхначух а дузуш.

¹³ «ХӀинца Со ву хьуна дуьхьалваьлла! – боху Везачу Эло. – Хьан гӀудалкхаш Ас кӀур бина ягор ю. Хьан лоьман кӀорнеш туьро юур ю. Хьан хӀонс а дӀайоккхур ю Ас лаьтта тӀера. ХӀинца чул тӀаьхьа кхин хезар дац хьан геланчийн аьзнаш».

МостагӀаша Нунав-гӀала йоккху

¹ Бохам тӀебогӀу цӀийх юьзначу гӀалина!

Харцдолчух а, схьаяьккхина хӀонсах а юьзна ю иза,

талораш дар а соцуш дац цигахь.

² Шад еттар а, хьийзачу чкъургийн тӀак а,

юм еш йогӀучу говрийн татанаш а,

хахкаеллачу гӀудалкхан гӀовгӀа а ю хезаш.

³ Хахкаелла йогӀу дошлойн говраш,

къегаш ду тур, лепа гоьмукъ.

Шортта белларш бу, декъийн оьланаш ю.

Декъийн йист яц, оцу декъех тийсало.

⁴ Иза Нунав-гӀалин лелар бахьана долуш ду.

И гӀала, хаза куц долу кхахьпа санна, сийсаза лелара,

жинашца тайна хилар тӀехь уггар а говза йолу,

шен сийсаза леларца халкъаш духкуш йолу,

шен жиналлица тукхамаш духкуш йолу.

⁵ «ХӀинца Со ву хьуна дуьхьалваьлла! – боху Везачу Эло. –

Ас хьан бедаран юх хьан юьхь тӀе озор ю.

Ас халкъашна хьан ерзина ялар,

ткъа пачхьалкхашна хьан сий дайна хилар дӀагойтур ду.

⁶ Ас боьха дерш тӀекхуьйсур ду хьуна,

хьох Сан дог мел далар а гойтуш,

Ас нах кхардийта дӀахӀоттор ю хьо.

⁷ Хьо гича, муьлххачу а стага, хьох дӀа а воьрзуш,

эр ду: „Йохийна Нунав-гӀала!

Хьенан хир бу цунах лаьцна дагахьбаллам?

Мичара карор бу Суна хьан дог оьцурш?“»

Бахархошка Нунав-гӀала лар ца яло

⁸ Ну-Амин-гӀаланал+ 3:8 *Ну-Амин-гӀаланал *– хьалхалерчу заманахь иза Мисар-мехкан коьрта гӀала хилла.* гӀолехь-м яц хьо, хиша го а бина, Нил-хина юххехь йолчу? Хих цунна чӀагӀо хилла, хи цунна гӀалин пен санна хилла. ⁹ Хуша а, Мисар-мохк а хедар боцу цуьнан ницкъ хуьлура. ПӀатӀа а, Лива-мохк а цуьнга гӀо лаца богӀура. ¹⁰ Амма иза кхечанхьа яьккхина, иза а йийсар дина ю. Цуьнан кегий бераш урамаш вовшах мел кхетачохь кегдина, ткъа церан цӀеяхначарах лаьцна кхаж туьйсура, церан хьалдолу нах буржалш тоьхна бу.

¹¹ Иштта хьо а, Нунав-гӀала, яха а ехна, къайлаер ю. Иштта ахьа а, хьайн мостагӀех дӀа а едда, дӀалечкъийла лоьхур ю. ¹² Хилла стоьмаш долчу инжирийн диттех тера ю хьан ерриге а чӀагӀонаш. Нагахь санна и дитт дегадахь, и стоьмаш кхалла луучунна нийсса бага оьгур бу. ¹³ Хьайн эскаре хьажал! Хьан тӀемалой зударех тера хир бу! МостагӀий хьан махка чугӀурту кевнаш шуьйра схьаделладелла лаьттар ду. Церан гӀораш цӀеро дӀакхаьллина хир ду. ¹⁴ Хьайна го лоцучу ханна хи кечде, хьайн чӀагӀонаш чӀагӀъе, хотта юкъа гӀо, поппар хье, кибарчигаш еш йолу кепаш кечъе. ¹⁵ Цигахь цӀеро хӀаллакйийр ю хьо, туьро цоьстур ю хьо. ЦӀазо ялта дӀакхалларе терра, хьо а йиъна дӀайоккхур ю!

Къона а, доккха а цӀоз санна, дебаш хила! ¹⁶ Хьан совдегархой стигалара седарчел а алсамбевлла бу. Уьш, къона цӀоз санна, цӀока дӀа а яьккхина, хьалаоьху. ¹⁷ Хьан куьйгалхой доккха цӀоз санна бу. Хьан баьччанаш, шелъелча, пенийн хераллашкахь бенаш деш долчу цӀазан жӀуга санна бу. Амма малх кхетча, уьш, тӀема а йовлий, дӀасайоьлху, тӀаккха цхьанна а ца хаьа уьш стенга яхана.

¹⁸ Ашур-мехкан паччахь, хьан Ӏуналла дийраш самабевр боцу наб еш бу, хьан баьччанаш гуттаренна а бийшина бу. Хьан халкъ лаьмнашкахула дӀасадаьржина. Цхьа а вац иза схьагулдан. ¹⁹ Хьан чов ерзо дарба дац, хьуна йина чевнаш тоян йиш яц. Хьох лаьцна хаам хезнарш тӀараш детташ баккхийбер бу, хӀунда аьлча мила ву хьоьгара къизалла даим тӀекхачаза?!