MAHTE

MAHTE

¹ Abraham tenawn, David tenawn Jesuh Khrih suak nak pupa te heh tibang hen si. ² Abraham tsapa heh Isak ah si in, Isak tsapa heh Jakob ah si atsia, Jakob tsapa te heh Judah ah le a suahpi mipa te si si. ³ J udah ah le Tamar te nupa in Perez ah le Zerah ah tsawi si. Perez tsapa heh Hezron ah si in, Hezron tsapa heh Ram ah si. ⁴ Ram tsapa heh Amminadab ah si in, Amminadab tsapa heh Nahshon ah si atsia, Nahshon tsapa heh Salmon ah si. ⁵ Salmon ah le Rahab te nupa in Boaz ah tsawi in, Boaz ah le Ruth te nupa in Obed ah tsawi si, Obed tsapa heh Jesse ah si. ⁶ Jesse tsapa heh kumpibawi David ah si. Kumpibawi David in Uriah zi thaw Solomon ah tsawi si. ⁷ Solomon tsapa heh Rehoboam ah si in, Rehoboam tsapa heh Abijah ah si atsia, Abijah tsapa heh Asa ah si. ⁸ Asa tsapa heh Jehosaphat ah si in, Jehosaphat tsapa heh Joram ah si atsia, Joram tsapa heh Uzziah ah si. ⁹ Uzziah tsapa heh Jotham ah si in, Jotham tsapa heh Ahaz ah si atsia, Ahaz tsapa heh Hezekiah ah si. ¹⁰ Hezekiah tsapa heh Manaseh ah si in, Manaseh tsapa heh Amon ah si atsia, Amon tsapa heh Josiah ah si. ¹¹ Josiah tsapa heh Jekoniah ah le Babylon ah kainak a suahpi mipa te si. ¹² Amahni la heh Babylon ah kainak a si zawh in Jekoniah in Shealtiel ah tsawi in, Shealtiel tsapa heh Zerubbabel ah si. ¹³ Zerubbabel tsapa heh Abiud ah si in, Abiud tsapa heh Eliakim ah si atsia, Eliakim tsapa heh Azor ah si. ¹⁴ Azor tsapa heh Zadok ah si in, Zadok tsapa heh Akhim ah si atsia, Akhim tsapa heh Eliud ah si. ¹⁵ Eliud tsapa heh Eleazar ah si in, Eleazar tsapa heh Matthan ah si atsia, Matthan tsapa heh Jakob ah si. ¹⁶ Jakob tsapa heh Khrih tinak Jesuh nu Mary pasel Joseph ah si. ¹⁷ Tsimi manin Abraham pin David tian kheh khang leili si atsia, David pin Babylon ah sel taang tian heh khang leili si in, Babylon ah seltaang pin Khrih tian heh khang leili si. ¹⁸ Jesuh Khrih suaknak heh ti bang hen si. A nu Mary ah heh Joseph halh ham saak si atsia, a zau kawm ma in Raula Thiangrim thawmin nau a pai lam kheh thei si. ¹⁹ Sinapikhaw a pasel Joseph ah heh mi diktsang si in, mi mai ah mualpho tiar a nuam ngawl manin a halh ham saak kheh a thup kuhrukno in zam leh deen tum si. ²⁰ Joseph in me thu te heh a ruat tseih lai in, ngai in, Bawipa vanvummi pakhat kheh a mang ah lang atsia, "David tsapa Joseph, na zi tuh in Mary ah na huai tu heh thinhar mah nen. Nau a painak heh Raula Thiangrim thawmin si. ²¹ Ama’n tsapa hing tu atsia, a ming heh Jesuh ti’n sa tu si tsi. Heimansim tiphangin ama’n ama minung te kheh amahni sual pin san tu si," ti’n ti si. ²² Bawipa in profet tawnin a relnak a kim theinak tuh in me tehem heh tsang si. ²³ Profet in, "Ngai in, khangngai thiamlawh in naupai tu atsia, Tsapa hing tu si. Tsin, amahni’n a ming kheh Immanuel ti’n sa tu si." Immanuel tinak heh, "Pathian keimahni nen ah om si," tinak si. ²⁴ Joseph ah kheh a khangtho phangin Bawipa vanvummi in thu a penak bangin, a zi tuh in huai si. ²⁵ Tsin, a tsa minlawh a hing tian, Joseph in Mary ah kheh zaupi ngawl si. Nau a hing phangin a ming kheh Jesuh, ti’n sa si.

¹ Herod ah kheh kumpibawi a si lai in Judea peng Bethlehem khaw pin Jesuh ah kheh suak si. Tsin, a suak phangin, ngai in, ni suaknak lama mitsim te kheh Jerusalem ah leng dang si. ² Amahni’n, "Jew te Kumpibawi suak heh kawnai ah sim? Heitasim tiphangin keimahni’n ni suaknak lam ah ama arsi mu in, amah be tu in leng dang si ung," ti’n ti si. ³ Herod kumpibawi in me thu te heh a za phangin, amah le Jerusalem khaw sunga minung tehem kheh thintsawl ngai dang si. ⁴ Tsimi manin Herod in suang bawi tehem le Daan zirhtu tehem kheh ko khawm atsia, Khrih suak min tuh kheh dong kan si. ⁵ Tsimi manin amahni’n, "Judea peng Bethlehem ah si tu si. Heitasim tiphangin profet in, ⁶ ’Judah ram sunga Bethlehem, Judah uktu te lak pin a hei ngawl ber si ngawl si tsi. Heitasim tiphangin nangma sung pin ka minung Israel te khaltu tuh uktu suak tu si,’ ti’n ngan si," ti’n ti si. ⁷ Tsimi phangin Herod in mitsim te kheh ko kuhzen atsia, arsi lang hun keek kheh dong si. ⁸ Tsin, amahni kheh Bethlehem ah leh in, "Hawh ta ula, nausenno tsawh tsiltsang ngaino in zei ta un. Keimah khen a nenah hawh in ka be deve thei tuh in, nang tawk phangin ka rel leh lai un," ti’n ti si. ⁹ Amahni’n kumpibawipa rel nak a za zawh in hawh dang si. Tsin, pan in, ni suaknak lama a munak arsi kheh amahni masuan ah hawh in, nausenno omnak tian hawh atsia tsawl si. ¹⁰ Amahni’n arsi a mu dang leh phangin, ang tihtak in ang dang si. ¹¹ Inn sungah lut dang atsia, nausenno kheh a nu Mary ah thaw mu in, bok atsia be dang si. Amah pe tuh in a keng dangnak lehsawng sui, frankincense le myrrh te kheh suah in, amah pe dang si. ¹² Tsin, Herod nenah hawh leh tu ngawl in amahni mang ah relnak a si bangin, zin dang pin amahni ram ten ah hong leh dang si. ¹³ Mitsim te a hong zawh in, ngai in, Bawipa vanvummi pa khat kheh Joseph mang ah lang atsia, "Tho in, nauno le a nu heh huaila Izip ram ah dan ta un. Thu ka than leh ma hem tsimi munah om reng ta un. Heitasim tiphangin Herod in nauno heh reek tu in zei tula si," ti’n rel si. ¹⁴ Joseph ah kheh khangtho in, nauno le a nu kheh huai atsia, a zanzan in Izip ram ah danpi si. ¹⁵ Bawipa’n profet te tawnin, "Ka tsapa heh Izip rama ko leh tu sing," ti’n a awnnak a kimnak tuh in, Herod thi tian tsimi ah om si. ¹⁶ Herod ah khen mitsim te’n amah a zol lam a thei phangin, a thinraw ngaingai si. Mi leh in mitsim te nen pin a theinak hun bangin, Bethlehem le a kawnvela kumnih le a nuailam mipa nau pang tehem kheh reekberh tiar si. ¹⁷ Tsimi phangin profet Jeremiah relnak kim si. ¹⁸ Profet in, "Ramah khaw ah aw za si; siar dunnak le kapnak le lungse aw si. Rachel in a tsa te kah si. Amahni a om leh ngawlla manin neeknak khen nuam ngawl si," ti’n ti si. ¹⁹ Herod thi phangin, ngai in, Izip rama Joseph mang ah Bawipa vanvummi pakhat kheh lang si. ²⁰ Vanvummi in, "Nauno a reek tumtu te a thi ongla manin, tho in; naupangno le a nu kheh huaila, Israel ram ah hong ta un," ti’n ti si. ²¹ Tsimi phangin Joseph ah kheh tho atsia, naupangno le a nu kheh huai in Israel ram ah hongpi si. ²² Sinapikhaw Joseph in Arkhelaus a kheh a pa Herod ah thawl in Judea peng a uk lam kheh a thei phangin, Judea peng sungah hawh tu kheh Joseph in lau si. Pathian in a mang ah a rel bangin Galilee ram ah hawh leh si. ²³ "Amah heh, Nazareth khawte, ti’n tinak si tu si," ti’n profet in a reelnak a kimnak tuh in, Nazareth khaw ah hawh in om si.

¹ Tsimi hun in Niimtu Johan ah kheh leng in, Judea ram hampalak ah thu rel si. ² Johan in, "Vanvum uknak a nong ongla manin nang sual sir un," ti’n ti si. ³ Amah heh profet Isaiah in, "Hampalak ah mi pakhat au aw khen, ’BAWIPA lamzin kheh rem un. A lampi te kheh tsam tiar un,’" ti’n a rel hamnakpa kheh si. ⁴ Johan ah heh kalauk mul taknak puan sil atsia, savun in a el kilh si. Tsin, a lai eih heh khau le hampalak khuaiti te si. ⁵ Tsimi phangin Jerusalem, Judea ram sung hem le Jordan run dunglun ah a om tehem in Johan nenah hawh dang si. ⁶ Amahni’n amahni sual ten phuang atsia, Johan in Jordan run ah niimnak peberh si. ⁷ Sinapikhaw ama nenah niim tu in Farasi te le Sadusi te leng kheh a mu phangin, "Nangnihni rul hin te! A leng tula thinrawnak pin daan tu in, tu in ralringnak pe nang sim? ⁸ Tsimi manin sualsirnak thaw a phutua rah kheh rah un. ⁹ ’Abraham ah heh kei pa si,’ ti’n ruat tsawm mah na un. Nang rel sing, Pathian in me lungto te heh Abraham tsa te si tu in puah thei si. ¹⁰ Tuhen thing bul ah heipi koih reng ongla si. Rah pha a rah ngawl thingkuang tehem kheh vung akhaw, mei sungah sang tu si. ¹¹ "Nang sualsirnak tsa in keimah hen ti ah niim miau nang sing. Sinapikhaw ka ning pin a lengtupa heh keima tah in mak sawn pittseih in, ama kedawl vong sak tu riang taak ngawl sing. Ama’n Raula Thiangrim le mei ah niim tu nang si. ¹² A tsaangzapnak khawtsong vong atsia, a tsaang puum kheh zap tu si. A tsaang tsang te kheh beem sungah thun tu in, a vai te kheh a mit thei ngawl mei sungah sang tu si," ti’n ti si. ¹³ Tsimi phangin Jesuh ah kheh Jordan run ah Johan niim tuh in Galilee pin leng si. ¹⁴ Johan in amah kheh kham tum in, "Keimah sawn heh nangma niim tuh sipelh in, ka nenah leng si tsim maw?" ti’n ti si. ¹⁵ Sinapikhaw Jesuh in amah kheh o atsia, "Diktsangnak tehem kim tiar kei kul manin, tuhen vang ka relnak bangin puah in," ti’n ti atsia, Johan ah khen awi si. ¹⁶ Jesuh ah kheh niimnak pe atsia, ti sung pin a suak tsang in, pan in, ama tsa in van te kheh hong atsia, khuro bangin le khawlip bangin a vumah Pathian Raula a tolhsuk kheh Johan in mu si. ¹⁷ Makhat in van pin aw pakhat leng atsia, "Mepa heh ka it pittseihnak ka Tsapa si. Ama vumah ang ngai sing," ti’n ti si.

¹ Jesuh ah kheh diabol sualroih tuh in Raula in hampalak ah huai si. ² Ni sawmli le zan sawmli sung lai a tsang zawh in, a rikaam si. ³ Tsimi phangin sualroihtu khen amah zuan atsia, "Pathian Tsapa na silekhaw, me lungto te heh sang in a tsang tuh in thupe in," ti’n ti si. ⁴ Sinapikhaw Jesuh in o atsia, "’Minung heh sang bek in nung tuh si ngawl in, Pathian kam pin a suak thu tehem thawmin nung si sawn si,’ ti’n ngan si," ti’n ti si. ⁵ Tsimi zawh in diabol in Jesuh ah kheh khawpi thiangrim sungah huai in, temple khumlu ah koih si. ⁶ Diabol in Jesuh ah kheh, "Pathian Tsapa na si lekhaw, sawnsuk in, ’Nangma thu ah ama vanvummi te kheh thupe akhaw,’ tsin, ’Na kawng te kheh lung a khawk tuh ngawl in, amahni’n a kut in tsawi tu na si,’ ti’n ngannak om si," ti’n ti si. ⁷ Jesuh in, "Tihen ngannak om meek lai si, ’BAWIPA na Pathian kheh tsul mah nen,’" ti’n ti si. ⁸ Tsin, diabol in Jesuh ah kheh mual saangpi vumah huai atsia, leivum uknak tehem le a tsungnungnak te kheh muh si. ⁹ Diabol in Jesuh ah kheh, "Bok in keimah na be lekhaw, me thil tehem heh na peberh tu sing," ti’n ti si. ¹⁰ Tsimi phangin Jesuh in amah kheh, "Satan, ka nen pin daan in. Heitasim tiphangin, ’BAWIPA na Pathian be la, ama na bek per in,’ ti’n ngan si," ti’n ti si. ¹¹ Tsimi phangin diabol in amah kheh zam si. Tsin, ngai in, vanvummi te leng atsia, amah kheh tuamlawm si. ¹² Jesuh in Johan ah kheh thawng tohnak a si lam a za phangin, Galilee ah zuan si. ¹³ Nazareth khaw kheh zam atsia, Kapernaum khaw ah om si. Kapernaum khaw heh Zebulun le Naphtali te rama tipi kung ah om si. ¹⁴ Tsimi heh profet Isaiah rel hamnak a kimnak tuh in si. ¹⁵ Profet in, "Zebulun te ram le Naphtali te ram, Jordan run ral, tipi zin ah om, Gential te Galilee, ¹⁶ Thimnak sungah a to te’n vaarnak mak mu si; thihnak ram le lim nuai ah a to te vumah Vaar si lei," ti’n rel si. ¹⁷ Tsimi pin pan Jesuh in, "Vanvum uknak a nong ongla manin, nang sual te sir un," ti’n zirh atsia, rel pan si. ¹⁸ Jesuh ah kheh Galilee Tipi kung ah a hawh tseih lai in, unau panih Piter ti’n konak Simon ah le a nau Andrew te kheh mu si. Amahni heh ngalentu te a si manin sur kheh tipi sungah seh kawm tseih si. Heitasim tiphangin amahni heh ngalentu te si. ¹⁹ Jesuh in amahni kheh, "Ka lun un; minung te lentu tuh in nang puah tu sing," ti’n ti si. ²⁰ Makhat in amahni’n a sur te kheh zam atsia, amah lun kawm nom si. ²¹ Tsimi mun pin hawh lehleu atsia, unau panih Zebedee tsapa Jeim ah le a nau Johan ah kheh amahni pa Zebedee ah thaw khawm sungah sur a tholh dang tseih laitum kheh mu in ko si. ²² Makhat in amahni’n a khawm le a pa kheh zam atsia, amah kheh lun kawm nom si. ²³ Jesuh ah kheh Galilee peng sung hem ah hawh in, amahni sinakok te ah uknak thuthang pha zirh in, mipi laka minaa tehem le natnak hintsang te kheh dam tiarberh si. ²⁴ Tsimi phangin ama ming kheh Syria ram sung hem ah thang si. Amahni’n natnak hintsang a vei minaa tehem le nat roh tehem, khawvanga zingnak te, thihkah vei te le zenat vei te kheh ama nenah phurh dang in, ama’n dam tiarberh si. ²⁵ Galilee, Dekapolis, Jerusalem, Judea peng le Jordan run ral pina mihonpi te ’n amah lun dang si.

¹ Jesuh in mihonpi te mu atsia, mual vumah kai si. A to phangin a ningluntu te in ama nenah hawh dang si. ² Tsin, a kampau atsia, amahni kheh thu zirh pan si. Ti bang hen ti si: ³ "Raula lam ah minawm te heh mi ang te si; heitasim tiphangin vanvum uknak heh amahni si. ⁴ Lungse khawngai te heh mi ang te si; heitasim tiphangin neeknak si tulai si. ⁵ Lungnem te heh mi ang te si; heitasim tiphangin leilung ro luah tulai si. ⁶ Diktsangnak kheh rikaam dangrum bangin a haaltu te heh mi ang te si; heitasim tiphangin kham tulai si. ⁷ Mi a nge ihhar t hei te heh mi ang te si; heitasim tiphangin ngeihharnak ngah tulai si. ⁸ Thinlung a thiangrim te heh mi ang te si; heitasim tiphangin Pathian mu tulai si. ⁹ Remreltu te heh mi ang te si; heitasim tiphangin Pathian tsa te ti’n konak si tulai si. ¹⁰ Diktsangnak manin erhnak a tuartu te heh mi ang te si; heitasim tiphangin vanvum uknak heh amahni si. ¹¹ "Keima manin zohsuamnak le erhnak nang si phangin, le dik ngawl ngai in awn sesuak tehem thaw in a relse phangin, mi ang te si utsi. ¹² Vanvuma nang lawhman heh a mak leita manin, ang ngai in le sah tihtak in sah un. Heitasim tiphangin nang masuana profet te kheh amahni’n erh awng ongla si. ¹³ "Nangmahni heh leilung tsa tsi si utsi. Tsi heh a alnak a pai a si lekhaw, kawtibang in al leh tiar theihnung tu sim? Nempinak heimah a nei leh ngawlla manin, minung te pal tuh in vawr tuh phang si tu si. ¹⁴ "Nangmahni heh leivum vaarnak si si utsi. Mual vumah tohnak khaw kheh thup theihnung ngawl si. ¹⁵ Tumah in meiinn vaar atsia kho khuh ngawl si. Tsimi tahin meiinn tohnak ah toh in, inn sungah a om minung tehem vaarnak pe si. ¹⁶ Nang naper pha kheh mi te’n a mu tuh in nang vaarnak kheh mi mai ah vaar un. Tsin, mi te’n vana nang Pa kheh ultung tu si. ¹⁷ "Daan thu le Profet te thu siatsuah tu in a leng ka ring mah na un. Me te heh siatsuah tu in leng si ngawl in, kim tiar tu in leng si sawn sing. ¹⁸ Thungai ngai in nang rel sing; van le lei a pai thong ma hem, Daan sunga lai khetnak pakhatno le a koh ber pakhatno sikhen a vaseng a kimsek ma hem pai thong himhim tu ngawl si. ¹⁹ Tutu sikhen thukhaam sunga thukhaam hei ngawl ber pakhatno heek atsia, mi te khen tsimi bangin heek tu in a zirhtu heh vanvum uknak ah a hei ngawl ber tinak si tu si. Sinapikhaw thukhaam te bangin puah atsia, tsimi bangin puah tu in mi te a zirhtu heh vanvum uknak ah mi mak ber tinak si tu si. ²⁰ Nang diktsangnak heh Farasi te le Daan zirhtu te tah in nang diktsang sawn pittseih ngawl a si lekhaw, vanvum uknak sungah lut thei himhim tu ngawl si utsi. ²¹ "’Tualreek mah; tutu sikhen tualreektu heh thukhennak tuar tu si,’ ti’n tanglaia minung te nenah relnak kheh za ongla si utsi. ²² Sinapikhaw, tutu sikhen a maan heimah om ngawl sipelh in, a unaupi vumah thinrawtu heh thukhenak tuar tu si, ti’n nang rel sing. Tutu sikhen a unaupi kheh, ’Mi hei ngawl,’ ti’n a titu heh Sanhedrin ah tangtaih tuh si. Tutu sikhen a unaupi kheh, ’Mi taw!’ ti’n a titu heh hell mei sungah sangnak si tu si. ²³ "Tsimi manin bawlnak dawndel ah na lehsawng na keng phangin, na unaupi in na vumah thin hehnungnak a nei lam na thei lekhaw, ²⁴ bawlnak dawndel mai ah na lehsawng tsawh zamla, hong leh ten. Tsin, na unaupi thaw rem dun leh masa la, tsimi tselh phangin hawh leh in na lehsawng la pe in. ²⁵ Nangmah tangtaihtu kheh lampi ah nang si kawm lai in rem dunnak puah nawmnawm in. Tsimi a si ngawl lekhaw, nangmah tangtaihtu khen thukhentu kut ah na aap akhaw, thukhentu in temple kiltu bawi kut ah len salawn tu in, ama’n thawng na toh tu si. ²⁶ Thungai ngai in nang rel sing; na kuan tuh quadron tsangkhat tian na kuan tselh ma hem, thawng sung pin suak thei himhim tu ngawl si tsi. ²⁷ "’Zuanzam mah,’ ti’n tanglaia minung te nenah relnak kheh za ongla si utsi. ²⁸ Sinapikhaw keimah hen, tutu sikhen nupang pakhat kheh irnak thaw a pan a silekhaw, amah thaw a thinlung in zuanzam si lei ti’n nang rel sing. ²⁹ Na taklam mit in nangmah a sual tiar a silekhaw, khailok la vawr sawn in. Heitasim tiphangin na pumpuluk in hell sungah sangnak na si tah in, na ruangpum khen pakhat a se thong heh nangma tsa in nempi sawn pittseih si. ³⁰ Tsin, na taklam kut in nangmah a sual tiar a silekhaw, ten la vawr sawn in. Heitasim tiphangin na pumpuluk in hell sungah sangnak na si tah in, na ruangpum khen pakhat a se thong heh nangma tsa in nempi sawn pittseih si. ³¹ "Tsimi bek zo ngawl, ’Tutu sikhen zi a pawtu hen pawnak lai ken sen,’ ti’n ti si. ³² Sinapikhaw keimah hen, tutu sikhen nu le pa sualnak man siar ngawl, thu dang pakhat khat man men in a zi a pawtu heh a zi kheh zuanzam tiar si. Tsin, a pawnak minu a huaitu khehkhen zuanzam si ti’n nang rel sing. ³³ " ’A maan ngawl in tsial tsawm mah nen. Sinapikhaw Bawipa nenah na tsial tsawmnak kheh kim tiar in,’ ti’n tanglaia minung te nenah relnak kheh za ongla si utsi. ³⁴ Sinapikhaw keimah hen, tsial tsawm himhim mah nen. Vanvum saal in tsial tsawm mah nen. Heitasim tiphangin vanvum heh Pathian tohkheng si. ³⁵ Leilung saal in tsial tsawm mah nen. Heitasim tiphangin ama kepal si. Jerusalem khaw saal in tsial tsawm mah nen. Heitasim tiphangin Kumpibawi mak bera khawpi si. ³⁶ Nalu saal in khen tsial tsawm mah nen. Heimansim tiphangin na sam zangkhat pohkhen par tiar thei ngawl in, hang tiar thei ngawl si tsi. ³⁷ Sinapikhaw, ’Si si,’ ti’n nang tinak heh, ’Si si,’ ti’n ti reng ula, ’ Si ngawl,’ ti’n nang tinak heh, ’Si ngawl,’ ti’n ti reng un. Me tah hen a val in nang awnnak taak hem heh mi sesuakpa nen pina si. ³⁸ "’Mit ai in mit, tinak le ha ai in ha,’ tinak kheh za ongla si utsi. ³⁹ Sinapikhaw keimah hen, mi pha ngawl kheh kham mah na un ti’n nang rel sing. Na taklam biang a beng phangin, a hatlam khen dawh rih in. ⁴⁰ Mi pakhat khat in nangmah tangtaih nuam in na angki sungta a lesak a si lekhaw, na angki puta khen nei tiar rih in. ⁴¹ Mi pakhat khat in pengkhat a la tiarlok a si lekhaw, pengnih tian la ten. ⁴² A ngentu kheh pe in. Nangma thil a pu nuamtu kheh kirh mah nen. ⁴³ " ’Na inn nen kheh it la, na raal kheh haw in,’ ti’n relnak kheh za ongla si utsi. ⁴⁴ Sinapikhaw nang rel sing, nang raal te kheh it ula, nangmahni a tsamtu te kheh muitsu burh un. Nangmahni a hawtu vumah thilpha puah sak ula, mualpho ngai in nangmahni a zohsuamtu te le a erhtu te tsa sawngen sak un. ⁴⁵ Tsimi a si lekhaw vana nang Pa tsa te si tu si utsi. Heimansim tiphangin mi sesuak te le mipha te vumah ama ni kheh dang tiar in, midik le mi dik ngawl te vumah ruah sar tiar si. ⁴⁶ Nangmahni a ittu te bek it nang si lekhaw, hei lawhman ngah tu si utsim? Siahkhon te pohriang in tsimi bangin puah si ngawl si maw? ⁴⁷ Nang unaupi te bek kheh awnkam lumno thaw awnpi nang si lekhaw, midang te tah in nang pha sawnnak hei om tu sim? Siahkhon te pohriang tsimi bangin puah si ngawl si maw? ⁴⁸ Tsimi manin vana nang Pa a nakim bangin, nakim un.

¹ "Ngeihharnak thaw minawm te nang bawmnak heh mi te mai ah nang puah tuh ngawl in ralring un. Tsimi a si ngawl lekhaw vana nang Pa nen pin lawhman ngah tu ngawl si utsi. ² Tsimi manin ngeihharnak thaw minawm te nang bawm phangin mi sidat te’n mi te thang phatnak a si tuh in, sinakok ah le rawtpi ah a puah bangin nang mai ah ngunrasem tum mah na un. Thungai ngai in nang rel sing; amahni’n a lawhman ngah ong si lei. ³ Sinapikhaw ngeihharnak thaw minawm te nang bawm phangin, nang taklama puahnak kheh nang kehlam thei tiar mah na un. ⁴ Tsimi bang a si lekhaw ngeihharnak thaw minawm te nang bawmnak kheh a thupno in nang puahnak si tu si. Tsin, a thup kuhruk a mu saktu nang Pa in mi hem theih in lawhman pe tu nang si. ⁵ "Saw nang ngen phangin mi sidat te bangin ngen mah na un. Heitasim tiphangin amahni’n mi te mu tuh in sinakok ah le lam kaaksawm ah ding in sawngen kheh sunsak si. Thungai ngai in nang rel sing; amahni’n a lawhman ngah ong si lei. ⁶ Sinapikhaw nangnihni’n saw nang ngen phangin nang innkhan sungah lut ula, kong nang kham tselh phangin, a thup minah om nang Pa nenah ngen un. Tsin, a thup kuhruk a mu saktu nang Pa in mi hem theih in lawhman pe tu nang si. ⁷ Tsin, saw nang ngen phangin lawkih te sawngen bangin nang ngen baang ngen nok tseih mah na un. Amahni’n reipi sawngennak heh ngai sak lawt ruang tu in ring si. ⁸ Tsimi manin amahni bangin sawngen mah na un. Heitasim tiphangin nang Pa in nang kinnak thil te kheh nang ngen ma in nang thei sak si lei. ⁹ Tsimita tibang hen sawngen un: Vana kei Pa, na ming thiangrim tasen. ¹⁰ Na uknak leng tasen. Van ah na deihnak puah a si bangin, leivum ah puah si tasen. ¹¹ Tuni tsa ei tuh lai kei pe sawh in. ¹² Keimahni vumah sual leibatu te kei zah bangin, kei sualleibat te kei zah deve sawh in. ¹³ Sualroihnak sungah kei huai mah nala, mi sesuakpa nen pin kei kan in. Uknak le huham le tsungnungnak kheh kumkhaw in nangma si reng tasen. Amen. ¹⁴ "Midang te sualnak nang zah a si lekhaw, vana nang Pa in nang sualnak te kheh nang zah deve tu si. ¹⁵ Sinapikhaw midang te sualnak nang zah ngawl a si lekhaw, nang Pa khen nang sualnak te kheh nang zah deve tu ngawl si. ¹⁶ "Tsimi bek zo ngawl, mi sidat te’n lai a tsang phangin mitmai se ngai in a om bangin, lai nang tsang phangin mitmai se ngai in om mah na un. Amahni’n lai a tsang lam kheh mi te’n a mu belbel tuh in, amahni mitmai omdaan kheh theek veng si. Thungai ngai in nang rel sing; amahni’n a lawhman ngah ong si lei. ¹⁷ Sinapikhaw lai nang tsang phangin nang sam ah sathau pot ula, mai phiah un. ¹⁸ Tsimi a si lekhaw lai nang tsang lam kheh mi te mai ah lang tu ngawl in, nang Pa nenah lang tu atsia, a thup kuhruk a mu saktu nang Pa’n mi hem theih in lawhman pe tu nang si. ¹⁹ "Ngaan le sarkaia siatsuah theinak le ruko te’n a phul theihnung min leivum ah nangmahni tsa ro khawl mah na un. ²⁰ Tsimi tah in ngaan le sarkaia siatsuah theihnung ngawl le ruko te’n a phul thei ngawl min van ah ro khawl sawn un. ²¹ Heimansim tiphangin nang ro om minah nang thinlung khen om deve tu si. ²² "Ruangpuma meiinn heh mit si. Tsimi manin na mit a pha a si lekhaw, na ruang pumpuluk in vaarnak dim tu si. ²³ Sinapikhaw na mit a sesuak a si lekhaw, na ruang pumpuluk in thimnak dim tu si. Tsimi manin nangma sunga vaarnak kheh thimnak a si lekhaw, tsimi kheh kawzah amak thimnak si tu sim! ²⁴ "Tumah in bawi paniha na kheh per kop thei ngawl si. Pakhat kheh haw tu atsia, a khatta sawn kheh it tu si. A si ngawl lekhaw pakhat vumah muangtaak si tu in, a khatta sawn kheh heinam tu ngawl si. Nangnihni’n Pathian na le peisa na kheh per kop thei ngawl si utsi. ²⁵ "Tsimi manin nang rel sing; hei ka ei tuh, hei ka in tuh ti’n nang nungnak tuh in thintsawl tseih mah na un. Tsin, nang ruangpum tsa in, hei ka sil tuh ti’n khen thintsawl mah na un. Lai eih tah in nungnak heh thupi sawn ngawl si maw? Vansilh tah in ruangpum heh thupi sawn ngawl si maw? ²⁶ Vana vano te kheh pan un. Amahni’n laitsi pawi ngawl in, khawl ngawl atsia, beem sungah khen pam ngawl si. Sinapikhaw vana nang Pa in amahni kheh tsawm si. Amahni tah in nangmahni heh manpha sawn ngawl si utsim maw? ²⁷ Nang thintsawl manin nang ruang kheh dongkhatno a khan thei om utsim maw? ²⁸ "Hei manin nang vansilh tsa in thintsawl tseih si utsim? Hampalaka lily khang dan kheh ruat un. Lo bung ngawl in nim khen zom ngawl si. ²⁹ Sinapikhaw nang rel sing, Solomon ah riang kheh a tsungnungnak tehem in a langal phangin me lily par pakhatno riang bang lai ngawl si. ³⁰ Pathian in tuni in po atsia, thaizing in mei sungah sang men tuh hampalaka hampa te riang langal a si lekhaw, nangnihni umnak dawm te, Pathian in nang langal leilei ol ngawl si maw? ³¹ "Tsimi manin thintsawl in, ’Hei ka ei tuh?’ ti’n maw, ’Hei ka in tuh?’ ti’n maw, ’Hei ka sil tuh?’ ti’n ti mah na un. ³² Me thil tehem heh Gential te’n zei veng si. Vana nang Pa’n me thil tehem heh nang kin lam thei reng si. ³³ Tsimi tah in Pathian uknak le a diktsangnak kheh zei masa ula, me thil tehem heh nang pe beet tu si. ³⁴ Tsimi manin thaizing tsa in thintsawl mah na un. Thaizing hen ama thil te vumah thintsawl tsawm sawn tasen. Nikhat tsa harnak heh tsimi ni tsa a khawthu si.

¹ "Thukhen mah nen. Thukhen nak si tu ngawl si tsi. ² Mi te thu na khen bangin thukhennak si tu si tsi. Tehnak nang mangnak bangin tehnak si leh tu si utsi. ³ Nangma mit sungah thingpeek a om lam zong ruat tsawm ngawl in, hei manin na unaupi mita borh kheh pansak si tsim? ⁴ Na mit sungah thingpeek a om thahlam reng in na unaupi kheh, ’Na mit sunga borh na khaisak ang,’ ti’n kawti ti thei si tsim? ⁵ Mi sidat! Na mit sunga thingpeek tsawh khai masa la, na unaupi mit sunga mit borh kheh khaisak tu in tsiang ngai in mu thei tu si tsi. ⁶ "Thil thiangrim kheh uitso pe mah na un. Tsin, vok mai ah nang keplung seh mah na un. Tsimi bangin nang ti a si lekhaw amahni’n tsilnek akhaw her in nang pet tu si. ⁷ "Ngen un, nang pe tu si. Zei un, tawk tu si utsi. Khawng un, kong nang hon tu si. ⁸ Heitasim tiphangin a ngentu tehem in ngah atsia, a zeitu in tawk in, a khawngtu kheh kong honnak si tu si. ⁹ "Nangmahni lak pin a tsapa in sang a ngennak heh tu in lungto pe tu sim? ¹⁰ A si ngawl lekhaw nga a ngennak heh tu in rul pe tu sim? ¹¹ Nangnihni’n mi sesuak te nang si thahlam in nang tsa te thilpha pe tuh nang thei a si lekhaw, vana nang Pa in ama nenah a ngentu te kheh thilpha pe leilei ol ngawl si maw! ¹² Tsimi manin nangma vumah mi te’n puah tu in na deihnak tehem, mi te vumah puah deve in. Meheh daan le Profet te ngannak tehem a khomnak si. ¹³ "Kawka tsiik ah lut un. Heitasim tiphangin kawka vang heh a zin kaupi si atsia, senak ah huai si. Tsin, a hawhtu khen mi tampi si. ¹⁴ Nungnak ah a huaitu kawka heh a tsikno si in, a zin tawn khen a har ngai si. Tsin, a tawntu khen mi dawmno si. ¹⁵ "Profet dik ngawl te kheh ralring un. Amahni heh nangmahni nenah tuu mul puan sil in leng atsia, a sunglam heh ne rihse bang si. ¹⁶ Amahni kheh a rah pan in thei thei tu si utsi. Mi te’n lingkuang ah tsapit rah thawi kel si maw? A si ngawl lekhaw tu in huaikuang ah thei rah thawi kel sim? ¹⁷ Tsimi bangin thingkuang pha tehem in rah pha rah atsia, thingkuang nget in rah sesuak rah si. ¹⁸ Thingkuang pha hen rah pha ngawl rah thei ngawl in, thingkuang nget hen rah pha rah thei ngawl si. ¹⁹ Rah pha a rah ngawl thingkuang tehem vung tu atsia, mei sungah sang tu si. ²⁰ Tsimi manin amahni kheh a rah pan in thei tu si utsi. ²¹ " ’Bawipa, Bawipa,’ ti’n a titu tehem vanvum uknak ah lut tu tinak si ngawl in, vana ei Pa deihnak a puahtu tehem lut tu si sawn si. ²² Tsimi ni in keima nenah mi tampi te’n, ’ Bawipa, Bawipa, na ming in thuphuang si ung, nangma ming in khawvang te nawt si ung, nangma ming in thil khumnung tampi puah si ung, thei leh ngawlla si tsi maw?’ ti’n ti tu ka si. ²³ Tsimi phangin amahni kheh, ’Nang thei awngkel ngawl sing. Nangnihni tsan nei ngawl in a nung te, ka nen pin kiang un’ ti’n ti tu sing. ²⁴ "Tsimi manin tutu sikhen me thu ka relnak te za atsia, a puahtu te heh lungpi vumah inn satu mitsimpa thaw santeh tu sing. ²⁵ Ruah sar in ti lian atsia, khawtawng in tsimi inn kheh seu neknek pelh in, lungpi vumah sanak a si manin du ngawl si. ²⁶ "Tutu sikhen me thu ka relnak heh za reng pelh in, a puah ngawltu te heh pil vumah inn a satu mitawpa thaw santeh tu sing. ²⁷ Ruah sar in ti lian atsia, khawtawng in tsimi inn kheh a seu neknek phangin du si. Tsimi a du kheh roh taktak si." ti’n ti si. ²⁸ Tsin, tibang hen thiltsang si; Jesuh in me thu te heh a rel tselh phangin, a thu zirhnak heh mipi te’n khum tihtak in khum dang si. ²⁹ Heitasim tiphangin Daan zirhtu te bangin zirh ngawl in, thuneitu pakhat bangin zirh si.

¹ Jesuh ah kheh mual vum pin a hawhsuk leh phangin, mihonpi te’n amah lun dang si. ² Pan in, miphar pakhat in amah zuan in be atsia, "Bawipa, na nuam a si lekhaw damthiang tiar thei ka si tsi," ti’n ti si. ³ Tsimi phangin Jesuh in a kut suah atsia, amah kheh tong in, "Dam tiar nuam sing; damthiang in," ti’n ti si. Tsimi tsang in a pharnat kheh damthiang nom si. ⁴ Tsimi phangin Jesuh in amah kheh, ’Thei ten, tumah rel mah nen. Hawh ta la suang te nenah muh tsawm ten. Tsin, amahni tsa tetti a si tuh in Mawsi thukhaam bangin bawlnak lehsawng pe ten," ti’n rel si. ⁵ Jesuh ah kheh Kapernaum khaw sungah a lut phangin, raalkap zakhat uktu raalbawipa khen ama nenah hawh in kun si. ⁶ "Bawipa, ka omlawh heh zenat vei in inn ah zau reng si. A nat heh roh ngai in vei si," ti’n ti si. ⁷ Tsimi phangin Jesuh in amah kheh, "Hawh angkhaw dam tiar tu sing," ti’n ti si. ⁸ Tsimi phangin raalkap zakhat uktu raalbawipa khen o atsia, "Bawipa, ka inn ah na lut tu ngai heh taak ngawl sing. Awnkamkhat bek leh men la, ka omlawh kheh dam tu si. ⁹ Heitasim tiphangin keimah khen heh thuneinak nuai ah om in, ka kut nuai ah raalkap te nei sing. Me raalkap pakhat heh, ’Hawh ten’ ka ti phangin hawh si. Tsin, a dang pakhat heh, ’Nai ah hawh in,’ ka ti phangin hawh si. Tsin, ka omlawh pakhat kheh, ’Meheh puah in,’ ti’n ka ti phangin puah si," ti’n ti si. ¹⁰ Meheh Jesuh in a za phangin khum ngai atsia, amah luntu te kheh, "Thungai ngai in nang rel sing, Israel te lak ah riang in me bang umnak mak heh tawk ngawl sing. ¹¹ Nang rel sing, ni suaknak lam pin le nidanak lam pin mi tampi te leng tu atsia, Abraham ah le Isak ah le Jakob ah si vanvum uknak ah to dang tu si. ¹² Sinapikhaw uknaka tsa te heh pulam khawthim sungah vawrnak si tu si. Amahni kheh tsimi munah kap kuaikuai in hariat tuihtuih tu si," ti’n ti si. ¹³ Tsimi phangin Jesuh in raalkap zakhat uktu raalbawipa kheh, "Hong talen; na umnak bangin nangma tsa in puahsaknak si tasen," ti’n ti si. Tsimi hun rori in a omlawh kheh dam si. ¹⁴ Jesuh ah kheh Piter inn ah a leng phangin, Piter zi nu kheh a natdun zau reng tawk si. ¹⁵ Tsin, Jesuh in a kut tongsak atsia, a natdun kheh dam si. Tsimi phangin amah kheh tho atsia, amahni tsa tuh in lai eih puahsak si. ¹⁶ Simlam phangin mi te’n khawvanga zingnak tampi te kheh ama nenah huai dang si. A awnkam in raula te kheh nawt atsia, minaa tehem dam tiarberh si. ¹⁷ Tsimi heh profet Isaiah awnnak a kimnak tuh in si. Isaiah in, "Ama’n kei tha nei ngawlnak te lesak atsia, kei natnak tehem phursak si," ti’n ti si. ¹⁸ Jesuh in ama kawnvel ah mihonpi a mu phangin, tipi hatlam ral ah hawh tu in a ningluntu te kheh thupe si. ¹⁹ Tsimi phangin Daan zirhtu pakhat kheh a nenah hawh in, "Sayapa, na hawh min hem ah na lun tu sing," ti’n ti si. ²⁰ Jesuh in amah kheh, "Ne te’n kaw nei in, vana vano te’n bu nei si. Sinapikhaw Mi Tsapa hen lu nga min tuh nei ngawl si," ti’n ti si. ²¹ Tsin, a ningluntu midang pakhat in amah kheh, "Bawipa, ei pa’h vi masa rih tu sing," ti’n ti si. ²² Sinapikhaw Jesuh in amah kheh, "Ka lun in, mithi te’n amahni mithi te kheh vi tasen," ti’n ti si. ²³ Jesuh ah kheh khawm a to phangin, a ningluntu te’n amah lun dang si. ²⁴ Makhat in tipi vumah huihse mak a leng manin, khawm kheh tilet in khuh si. Sinapikhaw Jesuh ah heh eihmu si. ²⁵ Tsimi phangin a ningluntu te’n a nenah hawh in amah kheh phong dang atsia, "Bawipa, kei san in; kei ralberh tu si ongla si," ti’n ti dang si. ²⁶ Sinapikhaw Jesuh in amahni kheh, "Nangnihni umnak dawm te, heita thinphu si utsim?" ti’n ti si. Tsin, tho atsia, huih le tipi kheh hau in, dapliang si. ²⁷ Ningluntu te khen khum ngai dang in, "Mepa heh kawtibang minung sim? Huih te le tipi riang in ama thu ngai si," ti’n ti dang si. ²⁸ Tipi hatlam ral Gadara ram ah a leng phangin, khawvanga zingnak mi panih in amah kheh muak kawm si. Amahni kheh ngawr pin suak si atsia, rihse ngaingai si. Tsimi manin tsimi zin kheh tumah in tawn ngam ngawl si. ²⁹ Makhat in amahni’n au atsia, "Jesuh, nang Pathian Tsapa, nangmah thaw hei puah tuh nei si ung im? A hunkim ma keimahni erh tu in nai ah leng si tsim maw?" ti’n ti kawm si. ³⁰ Amahni nen pin khawla thah ah vok hon leida dang om si. ³¹ Tsimita khawvang te’n amah kheh kun in, "Keimahni heh nawt tu na si lekhaw, vok te sungah kei dum siang in," ti’n ti si. ³² Tsimi phangin ama’n, "Hawh ta la un," ti’n ti si. Tsimi manin amahni’n suak atsia, vok hon sungah dum dang si. Makhat in vok hon tehem kheh liang pin tipi sungah dawk dang in, ti sungah thi dangberh si. ³³ Vokkhal te kheh dan in, khawvanga zingnak te vumah thiltsang le heizongza kheh khaw sungah rel dang si. ³⁴ Pan un, Jesuh ah tawk tu in a khawseen in hawh dang si. A mu dang phangin amahni ram sung pin suak tu in kun dang si.

¹ Jesuh ah kheh khawm to in tipi ten atsia, a khaw ah hawh si. ² Ngai in, amahni’n zenat veipa kheh a zaunak ah a zau pah reng in ama nenah phurh dang si. Jesuh in amahni umnak kheh mu in, "Tsapa, muiliim thangvar in om in; na sualnak te zahnak si ongla si tsi," ti’n ti si. ³ Daan zirhtu pawlkhat te’n, "Mepa hen Pathian relse si," ti’n amahni’n rel dang tseih si. ⁴ Sinapikhaw Jesuh in amahni ruatnak kheh thei atsia, "Heita a sesuak heh nang thinlung sungah ruat si utsim? ⁵ ’Na sual te zahnak si ongla si tsi,’ ti le ’Thola hawh in,’ ti heh hei rel beih sawn tu sim? ⁶ Sinapikhaw Mi Tsapa hen leivum ah sual zah theinak thu a nei lam nang thei tuh in si," tsin, Jesuh in zenat veipa kheh, "Tho in, na zauphah zialla inn ah hong talen," ti’n ti si. ⁷ Tsin, ama’n tho atsia, inn ah hongper si. ⁸ Mihonpi te’n meheh a mu phangin khum ngai dang in, minung nenah tibang huham a petu Pathian kheh thangphat dang si. ⁹ Jesuh ah kheh tsimi mun pin hawh per atsia, Mahte ah kheh siahkhon zung ah a to reng mu si. Jesuh in, "Ka lun in," ti’n ti atsia, ama’n tho in lun nom si. ¹⁰ Tsin, tibang hen thiltsang si, Jesuh ah kheh inn sungah laikuang a kil lai in, pan in, siahkhon te le misual tampi te kheh Jesuh le a ningluntu te thaw laikuang kil in to dang si. ¹¹ Tsimi kheh Farasi te’n a mu phangin ningluntu te kheh, "Heita nang Sayapa hen siahkhon te le misual te heh laikuang kilpi sim?" ti’n ti si. ¹² Jesuh in a za phangin amahni kheh, "Midam te’n sibawi kintsak ngawl in, minaa te bek in kintsak si. ¹³ ’Bawlnak tah in ngeihharnak ngeet sawn sing,’ tinaka sullelam heh hawh ta ula zir ta un. Midik te ko tu in leng si ngawl in, misual te’n a sual te sir leh tuh in leng si sawn sing," ti’n ti si. ¹⁴ Johan ningluntu te’n ama nenah hawh atsia, "Keimahni le Farasi te’n laitsang veng sipelh in, heita na ningluntu te’n laitsang ngawl sim?" ti’n ti si. ¹⁵ Jesuh in, "Mohuaipa rualpi te’n mohuaipa thaw a om dang lai in lungse thei tu si maw? Sinapikhaw mohuaipa kheh amahni nen pin a le hun kim tu in, tsimi phangin amahni’n laitsang leh tulai si. ¹⁶ Tumah in puan lun bal kheh puan ther thaw in belh kel ngawl si. Tsimi bangin a belh a si lekhaw, puan ther khen puan lun kheh nukreih akhaw, a bal vang leilei tu si. ¹⁷ Tsin, mi te’n tsapit zu ther kheh savun num lun sungah thun kel ngawl si. A thun a si lekhaw savun num kheh keh tu atsia, tsapit zu ther kheh baw thong tu in, savun num kheh se thong tu si. Tsimi tah in tsapit zu ther kheh savun num ther sungah thun tuh si. Tsin, a panih in him tu si," ti’n amahni kheh ti si. ¹⁸ Me thu te heh amahni a rel tseih laitum in, pan in, uktu pakhat in ama nenah hawh atsia, amah kheh be in, "Ka tsanu heh a thi tsang si. Sinapikhaw hawh in ama vumah na kut na suan a si lekhaw, nung tu si," ti’n ti si. ¹⁹ Tsimi manin Jesuh in tho atsia, amah kheh lun nom si. Ningluntu te khen lun deve si. ²⁰ Pan in kum leinih sung thizungnat vei minu in ama ning ah hawh atsia, a angki tsepno kheh tong si. ²¹ Heitasim tiphangin ama’n, "A angki tong lengkhaw dam tsiangsek tu sing," ti’n a thin sung in ti tsawm si. ²² Jesuh in her atsia amah kheh a mu phangin, "Ka tsanu, thinnuam ngaino in om in. Na umnak in dam tiar na si lei," ti’n ti si. Tsimi hun rori in minu kheh dam tsiangsek nom si. ²³ Tsin, Jesuh ah kheh uktupa inn sungah a lut phangin, piru tumtu te le mi tampi te mithi kah rung bengbung kheh mu si. ²⁴ Tsin, amahni kheh, "Suakberh un; nupang nu heh a thi si ngawl in, a eihmu si," ti’n ti si. Amahni’n Jesuh ah kheh nihtsip ngai in nihsan dang si. ²⁵ Jesuh in mipi te kheh a suak tiar tselh phangin dum atsia, naupang nu kheh a kut pin len si. Tsimi phangin naupang nu kheh tho si. ²⁶ Tsin, me thu heh tsimi ram sung hem ah thang si. ²⁷ Jesuh ah kheh tsimi mun pin a kiang phangin, mittsaw panih te’n amah kheh lun atsia, "David Tsapa, kei ngeihhar sawh in," ti’n au kawm si. ²⁸ Inn sungah a lut phangin, mittsaw panih te’n amah kheh lun si. Tsimi phangin Jesuh in, "Meheh puah thei tu in ka um utsim maw?" ti’n amahni kheh ti si. Amahni’n, "Bawipa, um si ung," ti’n ti kawm si. ²⁹ Jesuh in amahni mit kheh zen sak atsia, "Nang umnak bangin nangmahni vumah kim tasen," ti’n ti si. ³⁰ Tsimi phangin amahni kheh khawmu si. Tsin, Jesuh in, "Tumah thei tiar mah na un," ti’n amahni kheh tiam si. ³¹ Sinapikhaw amahni’n hawh atsia, Jesuh thu kheh tsimi ram sung hem ah zalh si. ³² A pusuak lai in, pan in, mi te’n khawvanga zingnak awn thei ngawlpa kheh ama nenah huai dang si. ³³ Jesuh in khawvang kheh a nawt sak phangin amah kheh awn thei si. Mipi te’n khumngai dang in, "Me bang heh Israel te lak ah mu awngkel lai ngawl si sing," ti’n ti dang si. ³⁴ Sinapikhaw Farasi te’n, "Khaw vang te uktu thawmin khawvang te nawt si," ti’n ti si. ³⁵ Jesuh ah kheh khawpi tehem le khaw tenau tehem ah hawh in amahni sinakok ah thu zirh atsia, vanvum uknak thuthang pha rel in, mipi te laka minaa tehem le natnak a vei tehem dam tiar si. ³⁶ Sinapikhaw mipi te a mu phangin, amahni kheh ngeihhar ngun si. Heitasim tiphangin amahni kheh tuukhaltu nei ngawl tuu te bangin thinnau ngai in vaisep dang si. ³⁷ Tsimi phangin a ningluntu te kheh, "Lai khawl tuh heh tampi miau si. Sinapikhaw lai khawltu te heh dawmno phang si. ³⁸ Tsimi manin lai khawl tuh neitu Bawipa nenah ama lo sungah lai khawltu te a leh theinak tuh in sawngen un," ti’n ti si.

¹ Jesuh in ningluntu leinih te kheh ama nenah ko atsia, raula thiang ngawl te a nawt theinak tuh in le dam ngawlnak hintsang tehem le natnak hintsang tehem dam tiar theinak thuneinak pe si. ² Me heh lehnak leinih te ming si: Pakhatnak heh Piter ti’n ponnak Simon ah le a nau Andrew ah, Zebedee tsapa Jeim ah le a nau Johan ah, ³ Philip ah le Bartholomew ah, Thomas ah le siahkhonpa Mahte ah, Alphaeus tsapa Jeim ah le Thaddaeus tinak Lebbaeus ah, ⁴ Kanaan khawte Simon ah le amah zuartu Judas Iscariot ah si. ⁵ Me leinih te heh Jesuh in leh atsia, "Gential te lampi ah hawh mah na ula, Samaria te khawpi ah khen lut mah na un. ⁶ Sinapikhaw Israel innsang tuu pai te nenah hawh ta un. ⁷ Tsin, hawh ta ula, ’Vanvum uknak nong ong si lei,’ ti’n zirh in rel ta un. ⁸ Minaa te dam tiar ta ula, miphar te damthiang tiar atsia, mithi te tho tiar in, khawvang te nawt ta un. A thawn thong in nang ngahnak heh a thawnthong in pe un. ⁹ Nang tangka dip sungah sui a sikhen, ngun tangka a sikhen, dar tangka a sikhen ha mah na un. ¹⁰ Nang khualvak min ah tawngphu a sikhen, angki panih a sikhen, kedawl a sikhen, thingkhawh a sikhen keng mah na un. Heitasim tiphangin napertu heh lai a ei vo si. ¹¹ "Khawpi ah maw khaw tenau ah maw nang lut tu phangin nang zindungnak tuh a taak min kheh phatakno in dong kan ula, nang suak leh tian tsaam reng ta un. ¹² Inn sungah nang dum phangin innteek te kheh nukset un. ¹³ Tsimi inn kheh zindungnak taak a si lekhaw, thinnuamnak thupha nang penak kheh amahni vumah leng tasen. Zindungnak a taak ngawl a si lekhaw, thinnuamnak thupha nang penak kheh nangmahni nenah lehleh tasen. ¹⁴ Tutu sikhen nangmahni zindung siang ngawl in, nang thureelnak khen a ngai nuam ngawltu heh tsimi inn maw khawpi maw pin nang suak phangin nang khawborh thin ta un. ¹⁵ Thungai ngai in nang rel sing; thukhen ni in Sodom le Gomorrah khaw te tah in tsimi khawpi kheh roh ngai in tuar sawn tu si ti’n ti si. ¹⁶ "Ngai un, ne hon lak ah a om tuu bangin nang leh sing. Tsimi manin rul bangin tsim ula, khuro bangin nunnem un. ¹⁷ Minung te lak ah tsimkom ta un. Heitasim tiphangin nangmahni heh Sanhedrin te ah aap tu in, amahni sinakok te pin ling thiatnak rihual thaw vaat tu nang si. ¹⁸ Tsin, amahni mai ah le Gential te mai ah tetti si tu in keima manin mangki te le kumpibawi te mai ah zuar tu nang si. ¹⁹ Sinapikhaw nangmahni a aap phangin kawti bangin awn tu in, hei awn tu, ti ruat in thintsawl ham tseih mah na un. Tsimi hun in nang awn tuh kheh rel tu nang si. ²⁰ Heitasim tiphangin a awntu heh nangmahni si ngawl in, nangmahni sungah a awntu heh nang Pa-a Raula si sawn si. ²¹ "Tsin, reek tuh in unau le unau zuar dun tu in, pa in a tsa zuar tu atsia, tsa te’n nu le pa te do tu in, reek tiar tu si. ²² Keima ming manin mi tehem in haw tu nang si. Sinapikhaw a tawp tian a tuarzotu heh sannak si tu si. ²³ Me khawpi ah hen nangmahni a erh a si lekhaw, khaw dang ah dan ta un. Thungai ngai in nang rel sing; Mi Tsapa a leng ma in, Israel te khawpi hem palberh rih tu ngawl si utsi. ²⁴ "Ningluntu heh a saya vumah om ngawl in, sel khen heh a bawipa vumah om ngawl si. ²⁵ Ningluntu heh a saya bang si atsia, sel heh a bawipa bang a si heh tawk si lei. Innteekpa rori heh, Beelzebub ti’n ati a si lekhaw, ama innkawpi te kheh ti leilei ol ngawl si maw! ²⁶ Tsimi manin amahni kheh kih himhim mah na un. Phuang tuh ngawl in khuhnak heimah om ngawl in, thei tuh ngawl thupnak heimah om ngawl si. ²⁷ "Khawthim sungah nangmah ni ka relnak heh khawvar sungah rel ta un. Nang beng in nang zanak heh innkhum vum pin phuang ta un. ²⁸ Ruangpum reek thei pelh in nunnak a reek thei ngawl te kheh kih mah na ta un. Tsimi tah in ruangpum le nunnak hell ah a siatsuah theitupa kheh kih sawn un. ²⁹ Tsongthawi panih kheh darsen tangka tsangkhat in zuar si ngawl si maw? Pa deihnak peh ngawl in me tsongthawi te lak pin pakhat pohkhen lei ah tser thong ngawl si. ³⁰ Nang lu-a sam tehem kheh siar sakberh si. ³¹ Nangmahni heh tsongthawi tampi tah in mannei sawn nang si manin, heimah kih mah na un. ³² "Tsimi manin tutu sikhen mi mai ah keimah a phuangtu heh vana ei Pa mai ah keimah khen amah kheh phuang deve tu sing. ³³ Sinapikhaw tutu sikhen mi mai ah keimah a eltu heh vana ei Pa mai ah keimah khen amah kheh el deve tu sing. ³⁴ "Leilung vumah thinnuamnak phurh tu in a leng ka ring mah na un. Remnak phurh tu in leng si ngawl in, vangsang phurh tu in leng si sawn sing. ³⁵ Ka lengnak maan heh, ’mi pakhat kheh a pa do tiar tu in, tsanu kheh a nu do tiar tu in le a mo kheh a pasela nu do tiar tu in,’ le, ³⁶ ’mi pakhata raal heh ama innkawpi si tu si.’ ³⁷ Keimah tah in a pa maw a nu maw a it sawntu heh keimah thaw phutua dun ngawl si. Tsin, keimah tah in a tsapa maw a tsanu maw a it sawntu heh keimah thaw phutua dun ngawl si. ³⁸ Ama thinglamteh phur in keimah a lun ngawltu heh keimah thaw phutua dun ngawl si. ³⁹ Ama nungnak a tawktu heh a nungnak pai tu si. Keima manin ama nungnak a paitu hen nungnak tawk tu si. ⁴⁰ "Nangmahni a saangtu hen keimah khen saang si. Keimah a saangtu hen keimah lehtupa khen saang si. ⁴¹ Profet pakhat heh profet ming in a saangtu hen profeta lawhman ngah tu si. Midik pakhat heh midik ming in a saangtu hen mi dika lawhman ngah tu si. ⁴² Me naupangno pakhat heh ningluntu a si manin ti tsop khuat khatno a suahtu heh, thungai ngai in nang rel sing; a lawhman sungthong himhim tu ngawl si," ti’n ti si.

¹ Tsin, tibang hen thiltsang si. Jesuh in a ningluntu leinih te thupe a tselh phangin, amahni khawpi te ah thu zirh tu in le thureel tu in tsimi mun pin khen hawh si. ² Johan in thawnginn sung pin Khrih napernak thu te a za phangin, a ningluntu te lak pin panih kheh leh atsia, ³ "Nangmah heh a leng tulaipa si tsim maw? A si ngawl lekhaw midang ngak rih tu si ung im?" ti’n Jesuh ah kheh dong tiar si. ⁴ Jesuh in amahni kheh o atsia, "Hawh ta ula, nang zanak le nang munak thil te heh Johan ah rel ta un. ⁵ Mittsaw te khawmu in, kawngze te vaak thei si; phar nat vei te damthiang si. Bengngong te za in, mithi te tho tiarnak si atsia, minawm tsarah te nenah khen thuthang pha phuang ongla si. ⁶ Keima manin a khawsi ngawltu heh mi ang si," ti’n amahni kheh ti si. ⁷ Johan ningluntu te a hawh zawh in Jesuh in mihonpi te kheh Johan thu rel si. Jesuh in, "Hei pan tu in hampalak ah hawh si utsim? Huiha muutnak phaikuang thiing tseih si maw? ⁸ Hei pan tu in hawh si utsim? Puannem silpa pan tu in si maw? Thungai in ti le singkhaw tsimi bang puannem sil heh kumpibawi inn ah om si. ⁹ Hei pan tu in hawh si utsim? Profet pakhat pan tu in si maw? Si si, profet tah in nase sawn si, ti’n nang rel sing. ¹⁰ Heitasim ti phangin ’Ngai in, na lamzin remham tu tuh in, na mai ah ka nalang leh sing,’ ti’n ngannak heh ama thu ngannak si. ¹¹ Thungai ngai in nang rel sing, nupang te hingnak tehem lak pin Niimtu Johan tah in mak sawn tumah suak lai ngawl si. Sinapikhaw vanvum uknak ah a hei ngawl ber heh Johan tah in mak sawn si. ¹² Tsin, Niimtu Johan san pin pan tuni tian vanvum uknak heh niapnalnak tuar in, a niapnaltu te’n sutlok si. ¹³ Heitasim ti phangin profet tehem le Daan tehem in Johan san tiana rel ham si. ¹⁴ Amah heh nang saang nuam a silekhaw, amah heh a leng tula Elijah ah si. ¹⁵ Zanak tuh beng a nei te’n za tasen. ¹⁶ "Sinapikhaw tu san minung te heh hei thaw santeh tu sing im? Naupang te dawr ah to dang reng atsia, amahni rualpi te kheh ko in, ¹⁷ ’Piru nang tum sak pelh na ungkhaw, laam ngawl si utsi. Nang kah pelh na ungkhaw, khawngai ngawl si utsi,’ ti’n a titu naupang te thaw bangve si. ¹⁸ "Heitasim tiphangin Johan in ei ngawl in le in ngawl in leng atsia, amahni’n, ’Amah heh khawvang a zingnak si,’ ti’n ti si. ¹⁹ Mi Tsapa hen ei le in in leng atsia, amahni’n, ’Pan un, lairongpa le tsapit zu ak pa; siahkhon te le misual te rualpipa heh’ ti’n ti si. Sinapikhaw tsimnak heh a maan si, ti heh tsimnaka tsa te’n lang tiar si," ti’n ti si. ²⁰ Tsin, thilmak a puah tam ber min khawpi te kheh sual a sir ngawl manin mawhsiat pan si. ²¹ "Lungsenung Korazin khaw! Lungsenung Bethsaida! Nangmahni sungah puahnak thilmak naper te heh Tyre le Sidon khaw ah puah a si ta asin, tuma pi in buri puan sil in le vut bual in sual sir tula pelh si. ²² Sinapikhaw, nang rel sing; thukhen ni in nangmahni tuar tuh tah in Tyre le Sidon khaw te tuar tuh heh zahzuam s a w n r u a n g t u s i . ²³ Van ah tsawisangnak nang Kapernaum, mithi khaw ah lakulhnak si tu si tsi. Heitasim tiphangin nangma sungah puahnak thilmak te heh Sodom ah puah ta asin, tuni tian in Sodom khaw heh om reng rih tupelh si. ²⁴ Sinapikhaw na rel sing; thukhen ni in nangma tah in Sodom khaw heh zahzuam sawn ruang tu si," ti’n ti si. ²⁵ Tsimi hun in Jesuh in o atsia, "Ei Pa, van le lei Bawipa, me thil te heh mi tsim le mithiam te nen pin thuppek atsia, nausenno te nenah na muh manin na paak sing. ²⁶ Si si, ei Pa tsimi heh nangma mitmuh ah a pha in na ruatnak si. ²⁷ Tsin, ei Pa’n thil tehem pe ongla ka si. Ei Pa siar ngawl tumah in Tsapa heh thei ngawl si. Tsapa le Tsapa in muh a nuamnak te siar ngawl tumah in ei Pa ah thei ngawl si. ²⁸ Rimsu le thil rit a phur tehem, ka nenah hawh un; tsawlomnak nang pe tu sing. ²⁹ Ka kolhaak heh phur ula, keima nen ah zir un. Heitasim tiphangin keimah heh mi nunneem le mi thintsual sing. Tsin, nang nunnak tsawlomnak ngah tu si utsi. ³⁰ Ka kolhaak heh phur nuam in, ka thil khen a zangno si," ti’n ti si.

¹ Tsimi hun in Jesuh ah kheh Sabbath ni in sangvut lo tawnin hawh si. A ningluntu te kheh rikaam in, sangvut vi sik atsia ei dang si. ² Tsimi kheh Farasi te’n a mu phangin, amah kheh, "Pan in, Sabbath ni in puah daan ngawl kheh na ningluntu te’n puah si," ti’n ti dang si. ³ Tsimi phangin Jesuh in amahni kheh, "David ah le a ompinak te’n a rikaam dang phangin David in hei a puah ti le, ⁴ ama’n Pathian inn sungah lut atsia, suang te siar ngawl Daan in David ah le a ompinak te a ei siang ngawlnak sang linak a ei thu kheh siar awng ngawl si utsim maw? ⁵ A si ngawl lekhaw temple sunga suang te’n Sabbath ni in Sabbath ni hei nam ngawl atsia, heimah mawhsiatnak a si ngawl thu kheh Daan sungah siar awng ngawl si utsim maw? ⁶ Nang rel sing; nai munah hen temple tah in mak sawn om si. ⁷ ’Bawlnak si ngawl in ngeihharnak deih sing,’ tinak heh a sullelam nang thei tsuk asin, mawhnak nei ngawl te kheh han tu ngawl si utsi. ⁸ Mi Tsapa heh Sabbath Bawi khen si meek si," ti’n ti si. ⁹ Jesuh ah kheh tsimi mun pin hawh atsia, amahni sinakok ah lut si. ¹⁰ Pan in, tsimi munah kut ronat nei pakhat om si. Amahni’n Jesuh ah kheh sual a zei theinak tuh in, "Sabbath ni in dam tiar dan si maw?" ti’n dong dang si. ¹¹ Tsimi phangin Jesuh in amahni kheh, "Nangmahni lak pin mi pakhat in tuu pakhatno a neinak kheh, Sabbath ni in lei kawhor sungah a da kha tsuk asin, a tuu kheh khul ngawl in om hang ol si maw? ¹² Tuu tah in minung heh kawzah in mannei sawn sim? Tsimita Sabbath ni in thilpha puah daan si sawn si," ti’n ti si. ¹³ Tsimi phangin Jesuh in kut ropa kheh, "Na kut tsawh zar in," ti’n ti si. Ama’n a kut kheh zar atsia, a kut hatlam bangin dam si. ¹⁴ Tsimi phangin Farasi te’n hawh atsia, amah siatsuah theinak tuh thurel khawm dang si. ¹⁵ Jesuh in tsimi thu kheh a thei phangin, tsimi mun pin kiangden si. Mihonpi te’n amah kheh lun in, ama’n a vaseng in dam tiarberh si. ¹⁶ Tsin, ama thu kheh a zalhtseih tuh ngawl in khamberh si. ¹⁷ Tsimi heh profet Isaiah rel hamnak a kimnak tuh in si. ¹⁸ Isaiah in, "Pan un, ka dengnak ka Selpa heh! Ka it pittseihnak si in, ka nunnak heh ama vumah ang ngai si. Ka Raula heh ama vumah koih angkhaw, Gential te nenah thukhennak kheh muh tu si. ¹⁹ Mi haupi tu ngawl in au thong tseih men tu ngawl si. Tumah in rawtpi ah ama aw za tu ngawl si. ²⁰ Neh tu in thu man kheh a leh tian, phaikuang awn kheh tet tu ngawl in, meikhuat khu suak tseih kheh mit tu ngawl si. ²¹ Tsin, Gential te’n ama ming kheh muang tu si," ti’n ti si. ²² Tsin, khawvang in mittsaw in le awn thei ngawl in a zingnak pakhat kheh ama nenah huai in, ama’n a dam tiar manin, mittsaw le awn thei ngawlpa kheh khawmu atsia, awn thei si. ²³ Mihonpi tehem in khuum ngai dang in, "Mepa heh David Tsapa si thei ol ngawl si maw?" ti’n ti dang si. ²⁴ Tsimi thu kheh Farasi te’n a za phangin, "Mepa hen khawvang te uktu Beelzebub thawmin khawvang te nawt si," ti’n ti si. ²⁵ Jesuh in amahni ruatnak kheh thei atsia amahni kheh, "Uknak taak hem, khen dun in a do dun tseih a silekhaw, ral thong tu si. Kawtibang khawpi maw innsang maw heh a khen dun tseih nungsang kho tu ngawl si. ²⁶ Satan in Satan ah a nawt a si lekhaw, amah le amah a khen tsawm si. Tsimi bang a si lekhaw kawti bangin a uknak kho thei tu sim? ²⁷ Beelzebub thawmin khawvang te nawt ka si lekhaw, nang tsa te’n tu thawmin khawvang te kheh nawt sim? Tsimi manin amahni heh nangmahni thu a khen saktu te si tu si. ²⁸ Sinapikhaw Pathian Raula thawmin khawvang te nawt ka si lekhaw, Pathian uknak heh nangmahni nenah leng rori tu si. ²⁹ Mi kolpa kheh hen masa ngawl himhim in a inn sungah lut atsia, kawti’n a thil te sut thei tu sim? Tsimi phangin a inn kheh phul thei tu si. ³⁰ Keima lam ah a om ngawltu heh keimah a raaltu si atsia, keimah a khawmpi ngawltu heh a thehseptu si. ³¹ "Tsimi manin nang rel sing; minung te sual taak hem le Pathian a relsenak taak hem heh sualzahnak si tu si. Sinapikhaw Raula a relsetu te heh sualzahnak si tu ngawl si. ³² Tutu sikhen Mi Tsapa do in awnkamkhat a awn tu heh sualzahnak si tu in, sinapikhaw Raula Thiangrim a relsetu himhim heh tu san ah a sikhen, a leng tula san ah a sikhen, sualzahnak si himhim tu ngawl si. ³³ "Thingkuang pha heh a rah khen pha atsia, thingkuang pha ngawl heh a rah khen pha deve ngawl si. Thingkuang pha le pha ngawl heh a rah pin thei theihnung si. ³⁴ Rul hin te! Nang sesuak thahlam reng in kawti bangin awn pha awn thei tu si utsim? Heitasim tiphangin thin sungah a om tualnak bangin kam in awn deve si. ³⁵ Miphapa hen ama thin sungah thilpha a khawlnak thilpha suah si. Mi sesuak hen ama thin sunga asesuak a khawlnak thil sesuak kheh suah si. ³⁶ Sinapikhaw nang rel sing; minung te’n a awn thong thong tseih mennak tehem bangin thukhen ni in reltsiangsek leh tulai si. ³⁷ Nangmahni heh nang awnkam thawmin diktsang tu in, nang awnkam thawmin hannak si tu si utsi," ti’n ti si. ³⁸ Tsimi phangin Daan zirhtu te le Farasi honkhat te in o atsia, "Sayapa, na nen pin theihdiknak mu ot si ung," ti’n ti dang si. ³⁹ Sinapikhaw Jesuh in amahni kheh o atsia, "Mi sesuak le zuanzam hin te’n theihdiknak zei si. Profet Jonah-a theihdiknak siar ngawl amahni kheh theihdiknak heimah muh tu ngawl si. ⁴⁰ Jonah in nga lianpi pum sungah nithum le zanthum a om bangin, Mi Tsapa khen nithum le zanthum lei sungah om deve tu si. ⁴¹ Nineveh khaw te in Jonah thurelnak thawmin sual a sir manin, tu sana minung te thaw thukhennak ah ding tu atsia, amahni kheh han tu si. Ngai un, nai ah hen Jonah tah in nase sawn om si. ⁴² Langlam kumpibawi nu in lei tawpnak pin Solomon tsimnak ngai tu in a leng manin, thukhennak ah tu san minung te thaw ding tu atsia, amahni kheh han tu si. Ngai un, Solomon tah in nase sawn nai ah om si. ⁴³ "Raula thiang ngawl kheh mipa sung pin suak atsia, ramro min ah tsawlom min tuh zei in vak tseihzel atsia, tawk ngawl si. ⁴⁴ Tsimi phangin, ’Ka suak min awng inn ah hong leh tu sing ee,’ ti’n ti tsawm si. A leng phangin a om awngnak la heh a lawngpi si in, phiatsek atsia, remtepnak kheh tawk si. ⁴⁵ Amah khen hawh atsia, ama tah in sesuak sawn a dang raula pasarih te huai in lut atsia, om dang si. Mipa kheh a masa tah in dawlta heh se sawn si. Tu san, san sesuaka minung te heh me bang heh si," ti’n ti si. ⁴⁶ Mihonpi te thu a rel tseih laitum in, ngai in, a nu le a nau te kheh amah awnkam tawk nuam in pulam ah ding dang reng si. ⁴⁷ Tsimi phangin mi pakhat in amah kheh, "Pan in, na nu le na nau te nangmah zei in awnpi nuam in pulam ah ding dang reng si," ti’n rel si. ⁴⁸ Sinapikhaw amah thu a reltupa kheh o atsia, "Ei nu heh tu sim? Ka nau te heh tu te sim?" ti’n ti si. ⁴⁹ Jesuh in a ningluntu te lam ah a kut zar atsia, "Me te heh ka nu le ka nau te si. ⁵⁰ Heitasim tiphangin vana ei Pa deihnak a puahtu tehem heh ka nau, ka tser le ka nu si," ti’n ti si.

¹ Tsimi ni pah in Jesuh in inn sung pin suak atsia, tipi kung ah to si. ² Mihonpi te kheh ama nenah khawm dang si. Tsimi manin khawm sungah lut in to si. Mihonpi tehem heh tipi kung ah ding dang si. ³ Amahni kheh thusanteh mang in thu tampi rel si. Jesuh in, "Ngai un, laitsi pawitu khen laitsi pawi tu in hawh si. ⁴ Laitsi a pawi phangin, laitsi khenkhat te kheh lampi vumah tsu in, vano te leng in ei sakberh si. ⁵ Laitsi khenkhat te heh lunglak lei dawm min ah tsu in, lei a dal manin makhat in po si. ⁶ Sinapikhaw ni a sa phangin vuai in, ham a sa zo ngawl manin roberh si. ⁷ Laitsi khenkhat te heh linglak ah tsu in, lingkuang te khang atsia, lai po te kheh deep si. ⁸ Laitsi dang te heh leiram pha min ah tsu in, khenkhat te a let zakhat in, khenkhat te a let sawmruk in le khenkhat te a let sawmthum in rah si. ⁹ Zanak tuh beng a nei te’n za tasen," ti’n ti si. ¹⁰ A ningluntu te’n a nenah hawh in, "Heita amahni heh thusanteh mang in thurel si tsim?" ti’n ti dang si. ¹¹ Ama’n amahni kheh o atsia, "Nangmahni heh vanvum uknak thuthuk te thei theinak penak si ongla si utsi. Sinapikhaw amahni heh penak si lai ngawl si. ¹² Tutu sikhen a neitu heh tam leilei penak si tu in, nual ngai in nei tu si. Tutu sikhen a nei ngawltu heh a neihnak lamtsang riang lesaknak si tu si. ¹³ Tsimi manin amahni heh thusanteh mang in rel sing. Heitasim tiphangin amahni’n pan tseih pelh in mu ngawl, ngai tseih pelh in za ngawl in, theitsiang zo ngawl si. ¹⁴ Isaiah rel hamnak heh amahni ah kim si. Isaiah in, ’Nangnihni’n ngai tseihtseih tupelh in, theitsiang tu ngawl si utsi. Pan tseihtseih tupelh in, mu tu ngawl si utsi. ¹⁵ Heitasim tiphangin me minung te thinlung heh mol in, a beng te ngong atsia, a mit te siing si. Tsimi bang a si ngawl lekhaw amahni’n a mit te khen mu tu atsia, a beng te’n za tu si. Tsin, amahni thinlung te khen theitsiang tu in, keima lam ah her tu si. Tsimi phangin amahni kheh dam tiar tu sing,’ ti’n ti si. ¹⁶ "Sinapikhaw nang mit in a mu manin, nang mit heh a muitsu si. Nang beng in a za manin, nang beng heh a muitsu si. ¹⁷ Heitasim tiphangin thungai ngai in nang rel sing; profet tampi te le midik te’n nang munak heh mu ot pelh in, mu ngah ngawl in, nang zanak heh za ot pelh in, za ngah ngawl si. ¹⁸ "Tsimi manin laitsi pawitupa thusanteh heh ngai un. ¹⁹ Mi pakhat khat in uknak thu kheh za in, thei tsiang ngawl si. Tsimi phangin sesuakpa kheh leng atsia, ama thinlung sungah pawinak thu kheh danper sak si. Meheh lampi kung ah a tsu laitsi si. ²⁰ Lung lak ah a tsu laitsi heh thu kheh za in angngai in a saang zeptu heh si. ²¹ Sipelh atisa a ma sungah ham a sa zo ngawl manin, tsillem phang awk si. Pathian thu manin harsanak le erhnak a leng phangin, du nomper si. ²² Ling lak ah a tsu laitsi te heh, thu kheh za in, me leivum nungnak tsa in thintsawlnak le hausanak in zol atsia, thu kheh a deep manin a rah zo ngawl te si. ²³ Leiram pha min ah a tsu laitsi heh thu kheh za in, theitsiang zo in, rah atsia zai si. Khenkhat te a let zakhat in zai in, khenkhat te a let sawmruk in zai atsia, khenkhat te a let sawmthum in zai si," ti’n ti si. ²⁴ Jesuh in amahni kheh a dang thusanteh pakhat rel si. Jesuh in, "Vanvum uknak heh ama lo ah laitsi pha a pawitupa thaw bangve si. ²⁵ Minung te eihmu lan in a raalpa leng atsia, sangvut lak ah har tsi pawi in zam si. ²⁶ Laitsi kheh po atsia, a vi phangin har te khen lang deve si. ²⁷ Tsimi manin lo neitupa sel te’n ama nenah hawh atsia, ’Bawipa, na lo ah laitsi pha pawi si ngawl si tsim maw? Har te heh kawnai pin leng sim?’ ti’n ti si. ²⁸ Lo neitupa’n sel te kheh, ’Meheh kei raal pakhata pawinak si,’ ti’n ti si. Tsimi phangin sel te’n, ’Hawh atsia, botberh kei sin deih ol tsim?’ ti’n a amah kheh ti si. ²⁹ Lo neitupa’n, ’Bot mah na un. Har te nang bot phangin sangvut te bot tsih kha tu si utsi. ³⁰ Lai khawl hun tian titson khang langkhat rih ta la sen. Tsin, lai khawl hun phangin lai khawltu te kheh, "Har te khawm masa ula, mei sungah sangberh tuh in a teel a teel in teelberh ta un. Sinapikhaw sangvut te heh ka beem sungah thunberh un," ti’n ti leh tulai sing, ti’n ti si,’" ti’n amahni kheh rel si. ³¹ Jesuh in amahni kheh a dang thusanteh rel si. Jesuh in, "Vanvum uknak heh mipa pakhat in ankam tsi kheh le atsia, ama lo ah a pawinak thaw bangve si. ³² Tsimi ankam tsi heh laitsi tehem lak pin a koh ber sipelh in, a khang phangin antseh kuang te tah in lian sawn atsia, thingkuang in tsang si. Tsimi manin vana vano te’n hawh atsia, a kaak te ah bu sa si," ti’n amahni kheh rel si. ³³ Jesuh in amahni kheh a dang thusanteh rel si. Jesuh in, "Vanvum uknak heh tsol bang si. Minu pakhat in tsimi tsol kheh le atsia, sangvut vawh thum a thoberh tian in phulhnak bang si." ³⁴ Jesuh in thusanteh mang in me thu tehem heh mihonpi te rel si. Thusanteh mang ngawl in heimah rel ngawl si. ³⁵ Tsimi heh profet rel hamnak a kimnak tuh in si. Profet in, "Ka kam pau atsia, thusanteh mang in thu rel tu sing; leilung a po pan pin thupnak thu te kheh phuang tu sing," ti’n ti si. ³⁶ Jesuh in mihonpi te kheh a hong tiar tselh phangin, inn sungah dum si. Tsimi phangin a ningluntu te’n a nenah hawh dang in, "Lo sunga har thusanteh heh kei reltsiang in," ti’n ti dang si. ³⁷ Jesuh in amahni kheh o atsia, "Laitsi pha pawitu heh Mi Tsapa si. ³⁸ Lo heh leivumpi si. Laitsi pha te heh uknak tsa te si. Har te heh sesuakpa tsa te si. ³⁹ Har tsi pawitu raal heh diabol ah si. Lai khawl hun heh san a bonak si. Lai khawltu te heh vanvummi te si. ⁴⁰ Tsimi manin har te heh khawm atsia mei sungah a hal bangin, me san a bonak ah si deve tu si. ⁴¹ Mi Tsapa hen ama vanvummi te kheh leh tu atsia, ama uknak sunga mi te a du tiartu tehem le tsan nei ngawl tehem kheh khawm tu in, ⁴² meipual sungah sang tu si. Amahni kheh tsimi munah kap kuaikuai in hariat tuihtuih tu si. ⁴³ Midik te heh a Pa uknak sungah ni bangin vaar tu si. Zanak tuh beng a nei te’n za tasen. ⁴⁴ "Tsin, vanvum uknak heh lo sungah thil manpha thupnak thaw bangve si. Tsimi thil manpha kheh mi pakhat in tawk atsia, thup leh si. Ang ngai in inn ah hong atsia, a neih hem zuar in tsimi lo kheh lei si. ⁴⁵ "Tsin, vanvum uknak heh keplung mawi ngai a zei tseih sumpeitu thaw bangve si. ⁴⁶ Ama’n keplung manpha ngai pakhat a tawk phangin inn ah hong atsia, a neih hem zuar in tsimi keplung kheh lei si. ⁴⁷ ’Tsin, vanvum uknak heh nga hintsang a awk tipi sungah sehnak sur thaw bangve si. ⁴⁸ Sur sungah nga a dim phangin sur kheh tipi kung ah nuk si. Tsin, amahni’n to atsia, ei pha nga hem kheh bawm sungah koih in, ei pha ngawl nga hem kheh vawr si. ⁴⁹ Tsimi bangin san a bonak ah si tu si. Vanvummi te leng tu in, midik te lak pin mi suaksual te kheh khen tu atsia, ⁵⁰ meipual sungah sang tu si. Amahni kheh tsimi munah kap kuaikuai in hariat tuihtuih tu si," ti’n ti si. ⁵¹ Jesuh in amahni kheh, "Me thu tehem heh theitsiang utsi maw?" ti’n ti si. Amahni’n, "Bawipa, theitsiang si ung," ti’n ti si. ⁵² Tsimi phangin Jesuh in amahni kheh, "Tsimi manin Daan zirhtu te nenah vanvum uknak thu a zirhnak kheh, ro thil a ther le a lun a suahberhtu inn neitu thaw bangve si," ti’n ti si. ⁵³ Tsin, tibang hen thiltsang si. Jesuh in me thusanteh te heh a rel tselh phangin, tsimi mun pin kiang si. ⁵⁴ Jesuh ah kheh a khaw ah hong atsia, amahni sinakok ah thu zirh si. Amahni’n khum ngai in, "Mepa hen me tsimnak le amak naper te heh kawnai pin ngah sim? ⁵⁵ Amah heh lettamapa tsapa si ngawl si maw? A nu heh Mary ah si ngawl si maw? A nau te heh Jeim, Joses, Simon ah le Judas ah si ngawl si maw? ⁵⁶ A tser te heh keimahni si om langkhat si ngawl si maw? Mepa hen me thil tehem heh kawnai pin ngah sim?" ti’n ti si. ⁵⁷ Tsimi manin amahni kheh ama manin khawsi dang si. Sinapikhaw Jesuh in amahni kheh, "Profet heh ama khaw le ram, ama innkawpi te nenah siar ngawl mun dang ah upatnak si si," ti’n ti si. ⁵⁸ Amahni’n a um ngawl manin thilmak tampi puah ngawl si.

¹ A Tsimi hun in ram pali lak pin ram khen pakhat uktu Herod in mi te’n Jesuh thu a relnak kheh za si. ² Ama’n a sel te kheh, "Mepa heh Niimtu Johan ah la si in, mithi te lak pin tho tiarnak a si manin me huham te hen amah ah naper si," ti’n ti si. ³ Heitasim tiphangin Herod in a nau Philip zi Herodias manin Johan ah kheh pom atsia, hen in thawng toh si. ⁴ Johan in amah kheh, "Herodias ah na huai sak heh a daan si ngawl si," ti’n ti awng si. ⁵ Ama’n Johan ah kheh reek ot ngai pelh in, mipi te’n Johan ah heh profet pakhat in a ruat manin, mipi te kheh kih si. ⁶ Sinapikhaw Herod in a suak ni puai a puah phangin, Herodias tsanu in laam atsia, Herod ah kheh ang tiar ngaingai si. ⁷ Tsimi manin a ngennak taak hem pe tu in kam tsawm in thutiam si. ⁸ Ama’n a nu tiarnak bangin, "Niimtu Johan lu kheh leeng sungah koihla nai ah ka pe in," ti’n ti si. ⁹ Kumpibawipa kheh a lungse ngai si. Sinapikhaw a kam tsawmnak manin le tsabuai ah laikuang a kilpinak te a maisong manin, a ngennak kheh pe tu in thupe si. ¹⁰ Tsimi manin ama’n mi leh atsia, thawng sunga Johan ngawng kheh ten tiar si. ¹¹ A lu kheh leeng sungah koihin keng atsia, khangngai nu kheh pe si. Tsin, ama’n a nu nenah keng si. ¹² Johan ningluntu te’n hawh in a ruang kheh le atsia, vi dang si. Tsin, amahni’n Jesuh nenah hawh in me thu heh rel si. ¹³ Jesuh in me thu heh a za phangin, tsimi mun pin khen kiang atsia, khawm to in mi om ngam ngawl minah amah ruak in hawh si. Tsimi kheh khawpi pin mi tampi te’n a za phangin kawng in amah lun dang si. ¹⁴ Khawm sung pin Jesuh kheh suak atsia mihonpi a mu phangin ngeihhar ngun atsia, a natnak te kheh dam tiar sak si. ¹⁵ Simlam phangin a ningluntu te a nenah hawh atsia, "Nai heh mi om ngawl min si in, khawnu ongla si. Khaw hem ah lai a lei tsawm tuh in mihonpi te kheh hawh tiar in," ti’n ti dang si. ¹⁶ Sinapikhaw Jesuh in amahni kheh, "Amahni heh hawh kul ngawl si. Nangmahni’n amahni ei tuh pakhat khat pe un," ti’n ti si. ¹⁷ Amahni’n, "Sang tsuun panga le nga panihno bek nei si ung," ti’n amah kheh ti dang si. ¹⁸ Jesuh in, "Me te tsawh nai ah ka pe un," ti’n amahni kheh ti si. ¹⁹ Tsimi phangin ama’n mihonpi te kheh hampa vumah to tiar si. Tsin, sang tsuun panga le nga panih kheh le atsia, van panso in, muitsu aburh tselh phangin sang kheh hem atsia, a ningluntu te nenah pe in, a ningluntu te’n mihonpi te kheh li si. ²⁰ A vaseng in khampek in ei dang si. Tsin, ningluntu te’n a val a hembangno te kheh khul dang atsia kho leinih dim si. ²¹ A eitu te heh nupang le naupang te siar tsih ngawl in patsang veu thawngnga lun si. ²² Jesuh in mihonpi te a hong tiar thahlam in, a ningluntu te kheh tipi hatlam ah hawh ham tu in khawm to nomper tiar si. ²³ Mihonpi te kheh a hong tiar tselh phangin, sawngen tu in mual vumah amah ruak in hawh si. Simlam phangin tsimi munah amah ruak in om si. ²⁴ Sinapikhaw huih kheh khawm lam nga in a ra manin, khawm kheh tipi laingial ah taang reng lai in, tilet in thiing dek si. ²⁵ Zinglam naazi pathum phangin Jesuh ah kheh ningluntu te nen zuan in, tipi vumah kawng in hawh si. ²⁶ Ningluntu te’n tipi vumah a hawh kheh a mu dang phangin, lunglawi ngai in, "Thila si," ti’n kih ngai in au dang si. ²⁷ Sinapikhaw Jesuh in amahni kheh awnpi vut atsia, "Thinphu mah na un, keimah sing. Kih mah na un," ti’n ti si. ²⁸ Piter in amah kheh o atsia, "Bawipa, nangmah na si lekhaw ti vum pin na nenah ka hawh tiar in," ti’n ti si. ²⁹ Tsimi manin Jesuh in, "Hawh len," ti si. Piter ah kheh khawm sung pin tivum ah tsuarsuk in, Jesuh nenah hawh tu in ti vumah hawh si. ³⁰ Sinapikhaw huih nase ngai in a ra kheh a mu phangin lau si. Tsin, ti sungah da tu in a thawi manin, "Bawipa, ka san in!" ti’n au si. ³¹ Makhat in Jesuh in a kut kheh saan vut atsia, amah kheh len in, "Umnak dawm pa, heita ummawh si tsim?" ti’n ti si. ³² Khawm sungah a kai kawm leh phangin, huih kheh meng si. ³³ Tsimi phangin khawm sungah a omtu tehem in amah zuan dang in be dang atsia, "Nangmah heh Pathian Tsapa taktak si tsi," ti’n ti dang si. ³⁴ Tipi a ten tselh phangin, Kennesaret ram ah hawh si. ³⁵ Tsimi munah a om te’n amah a si lam a thei phangin, ram kawnvel tehem ah mi leh atsia minaa tehem kheh ama nenah phurh si. ³⁶ Amahni’n ama puan tsepno tongsak tu in kun dang in, a tongtu tehem kheh dam tsiang sek si.

¹ Jerusalem pin a leng Daan zirhtu te le Farasi te kheh Jesuh nenah hawh si. ² Amahni’n, "Heita na ningluntu te’n pupa daan heh heek sim? Heimansim tiphangin amahni’n lai a ei phangin a kut som ngawl si," ti’n ti si. ³ Sinapikhaw Jesuh in amahni kheh o atsia, "Nangmahni’n heita nang pupa daan manin Pathian thukhaam heek si utsim? ⁴ Heitasim tiphangin Pathian in, ’Na nu le na pa upat in,’ ti in le ’A nu le a pa a tsamtu heh reeknak si tasen,’ ti’n thupe si. ⁵ Sinapikhaw nangnihni’n, ’Tutu sikhen a nu a si ngawl lekhaw a pa kheh, "Ka nen pin na ngah tuh thil te heh Pathian nenah bawlnak lehsawng ka penak si," ti’n ati a si lekhaw, ⁶ a nu a si ngawl lekhaw a pa kheh, maisong kul ngawl si,’ ti’n ti si utsi. Tsimita nang pupa daan manin Pathian thukhaam kheh heimah ngawl men in tsan si utsi. ⁷ Mi sidat te, Isaiah in nangmahni thu a phuang hamnak heh maan taktak si. ⁸ "Isaiah in, ’Me mihing te hen a kam bek in keimah nong atsia, a mur bek in upat ka si. Sinapikhaw amahni thinlung heh keimah thaw khawlapi si. ⁹ Keimah a benak heh a thawnthong si. Minung te puah tsawmnak thukhaam kheh thupom bangin zirh si,’" ti’n ti si. ¹⁰ Tsimi phangin ama’n mipi te kheh ko atsia, "Ngai ula theitsiang un. ¹¹ Kam pin a lut thil te hen minung nawngkai tiar ngawl si. Kam sung pin a suak thil te sawn in minung nawngkai tiar si," ti’n ti si. ¹² Tsin, a ningluntu te’n ama nenah hawh dang atsia, "Farasi te’n me na awnnak la a za phangin, a bengkhawk ngai dang kheh thei tsim maw?" ti’n ti dang si. ¹³ Sinapikhaw Jesuh in amahni kheh o atsia, "Vana ei Pa phun ngawlnak thingkuang taak hem heh botberh tu si. ¹⁴ Zam men ta la un. Amahni heh mittsaw te lamhuaitu mittsaw te si. Mittsaw in mittsaw lam a huai a si lekhaw, hawrkaw sungah da kawm tu si," ti’n ti si. ¹⁵ Tsimi phangin Piter in o atsia, "Me thusanteh heh kei reltsiang in," ti’n ti si. ¹⁶ Tsimi manin Jesuh in, "Nangmahni khen theitsiang zo lai ngawl si utsim maw? ¹⁷ Kam pin a lut tehem heh hu sungah dum atsia, awng ah hawh si, ti heh theitsiang zo lai ngawl si utsim maw? ¹⁸ Sinapikhaw kam sung pin a suak thil te heh thinlung sung pin suak si atsia, minung nawngkai tiar si. ¹⁹ Heitasim tiphangin thinlung sung pin ruatnak sesuak te, tualreeknak, zuanzamnak te, nu le pa sualnak te, rukonak te, a man ngawl tetti sinak te le mi relsenak te suak si. ²⁰ Me thil te hen minung nawngkai tiar si. Sinapikhaw kut som ngawl in lai ei hen minung nawngkai tiar ngawl si," ti’n ti si. ²¹ Jesuh kheh tsimi mun pin kiang atsia, Tyre le Sidon ram ah hawh si. ²² Pan in, tsimi ram sung pin Kanaan minu pakhat in, "Maw Bawipa, David tsapa, ka ngeihhar sawh in! Ka tsanu heh khawvang in rohngai in zingsak si," ti’n au si. ²³ Sinapikhaw Jesuh in heimah o ngawl si. A ningluntu te’n, "Kei nilun pin keimahni a auh tseih manin hawl in," ti’n amah kheh kun dang si. ²⁴ Tsin, Jesuh in o atsia, "Keimah heh Israel innsang tuu pai te nen bek ah lehnak si in, midang te nenah lehnak si ngawl sing," ti’n ti si. ²⁵ Tsimi phangin minu in amah kheh be atsia, "Bawipa ka bawm sawh in!" ti’n ti si. ²⁶ Jesuh in o atsia, ’Tsa te einak lai kheh le atsia, uitso seh heh pha tu ngawl si," ti’n ti si. ²⁷ Minu’n, "Maan si, Bawipa, uino te’n a bawipa tsabuai pina lai tsuanno te kheh ei si," ti’n ti si. ²⁸ Tsimi phangin Jesuh in minu ah kheh o atsia, "Minu, na umnak heh mak taktak ee! Na ngeetnak bangin na vumah leng tasen," ti’n ti si. Tsimi hun rori in a tsanu kheh dam si. ²⁹ Jesuh in tsimi mun pin kiang atsia, Galilee Tipi kung ah leng in, mual vumah kai atsia to si. ³⁰ Tsimi phangin mihonpi te’n ama nenah hawh in kawng zenat vei te, mittsaw te, awn thei ngawl te, pum kim ngawl te le natnak a vei mi tampi te kheh ama nenah huai dang in, Jesuh kawngbul ah zau dang si. Tsin, Jesuh in dam tiarberh si. ³¹ Mipi te khen awn thei ngawl te’n awn atsia, pum kim ngawl te kim in, kawng zenat vei te hawh atsia, mittsaw te khawmu kheh a mu phangin khum ngai dang in Israel te Pathian kheh thangphat dang si. ³² Jesuh in a ningluntu te kheh ama nenah ko atsia, "Me mihonpi te heh ka nenah nithum sung om ongla in, ei tuh heimah a nei dang ngawl manin ngeihhar ngai sing. Lamlak ah a ba thong dang khatu manin lai ei ngawl in hong tiar heh hang ngawl sing," ti’n ti si. ³³ Tsimi phangin a ningluntu te’n, "Minung tizahmuah tsa in nai hampalak ah kawnaia amahni kham tham lai tawk tu si ung im?" ti’n amah kheh ti dang si. ³⁴ Jesuh in amahni kheh, "Sang tsuun kawzah nei si utsim?" ti’n ti si. Amahni’n, "Sang tsuun sarih le nga dawmlai nei si ung," ti’n ti si. ³⁵ Tsimi phangin Jesuh in mipi te kheh leilak ah to tiar si. ³⁶ Ama’n sang tsuun sarih le nga kheh le atsia, Pathian a paak tselh phangin hem in, ningluntu te kheh pe si. Tsin, ningluntu te’n mipi te kheh zem si. ³⁷ Tsin, amahni’n a vaseng in khampek in ei dang si. Ningluntu te’n a eih val a hembangno te kheh khul atsia kho sarih dim din dang si. ³⁸ A eitu te heh nupang le naupang te siar tsih ngawl in, patsang veu thawngli si. ³⁹ Tsin, mipi te kheh hong tiar atsia, khawmto in Makdala ram ah hawh si.

¹ Tsimi phangin Farasi te le Sadusi te’n ama nenah hawh atsia amah tsul dang in, van lama theihdiknak kei muh in ti’n ngen si. ² Jesuh in amahni kheh o atsia, "Simlam in, ’Van ah mei a sen lekhaw, khaw pha tu si,’ ti’n ti si utsi. ³ Zinglam in, ’Van ah mei sen atsia, huih a ra lekhaw, ruahtsing tu si ti’n ti si utsi. Mi sidat te, van omdan kheh thei pelh na utsikhaw, hun theihdiknak heh thei zo nom ngawl si utsi.’ ⁴ Tusan mi suaksual le zuanzam minung te’n theihdiknak zei si. Profet Jonah-a theihdiknak siar ngawl theihdiknak dang heimah muh tu ngawl si," ti’n ti atsia, amahni kheh zam in tsimi mun pin khen kiang si. ⁵ Ningluntu te’n tipi hatlam ral ah a hawh dang phangin, sang keng phawk dang ngawl si. ⁶ Jesuh in amahni kheh, "Farasi te le Sadusi te tsol kheh ralring ngai in pial un," ti’n ti si. ⁷ Tsimi phangin amahni le amahni kheh, "Sang kei keng phawk ngawl manin ti hen a tinak si," ti’n ti dun si. ⁸ Jesuh in tsimi kheh a theikuh zeen phangin, "Umnak dawm te, hei manin sang nang nei ngawl thu heh rel dang tseih si utsim? ⁹ Sang tsuun nga thaw minung thawngnga pe in a eihval kho kawzah nang khawm te thei zo ngawl in, phawk leh ngawlla si utsim maw? ¹⁰ Tsimi a si ngawl lekhaw minung thawngli tsa in sang tsuun sarih ka mangnak la a val kho kawzah khon si ta utsim? ¹¹ Sang thu thaw peh dun in heimah ka awn ngawl lam kawti thei zo ngawl si utsim? Farasi te le Sadusi te tsol heh nang pial kul himhim si," ti’n ti si. ¹² Tsimi phang bek in Jesuh in Farasi te le Sadusi te tsol pial tu in a relnak singawl in amahni zirhnak sawn heh pial tu in a relnak a si lam kheh theitsiang dang leh si. ¹³ Jesuh ah kheh Sisaria Filipi ram sungah a leng lai in, "Mi Tsapa keimah heh mi te’n tu si, ti’n ka ti sim?" ti’n a ningluntu te kheh dong si. ¹⁴ Tsimi manin amahni’n, "Mi pawlkhat te’n, Niimtu Johan ah si, ti’n ti atsia, pawlkhat te’n, Elijah ah si, ti in, pawlkhat te’n, Jeremiah ah si, a si ngawl lekhaw profet pakhat si, ti’n ti na si," ti’n ti si. ¹⁵ Tsimi phangin Jesuh in amahni kheh, "Nangmahni in keimah heh tu si ti’n ti ka si utsim?" ti’n ti si. ¹⁶ Simon Piter in amah kheh o atsia, "Nangmah heh a nung Pathian Tsapa Khrih ah si tsi," ti’n ti si. ¹⁷ Jesuh in amah kheh o atsia, "Jonah tsapa Simon, mi ang si tsi. Meheh na nenah thi le sa-a phuangnak si ngawl in, vana ei Pa’n na nenah a phuangnak si sawn si. ¹⁸ Na rel sing, nangmah heh Piter ah si tsi. Me lungtopi vumah ka pawlpi sa angkhaw, mithi khaw dawngkham riang in kham thei tu ngawl si. ¹⁹ Vanvum uknak tsabi heh na pe tu sing. Lei ah na hennak taak hem van ah hennak si deve tu in, lei ah na suutnak taak hem van ah suutnak si deve tu si," ti’n ti si. ²⁰ Tsin, a ningluntu te kheh amah heh Jesuh Khrih a si lam heh tumah nenah rel tuh ngawl in thupe si. ²¹ Jesuh in amah heh Jerusalem ah hawh kul tu in, upa te, suangbawi te le Daan zirhtu te nen pin tampi tuar tu in, reek tu atsia, a nithumnak ni in tho leh tiarnak a si tuh thu kheh tsimi hun pin pan muh pan si. ²² Tsimi phangin Piter in amah kheh mun dang ah kiangpi atsia, hau tepan in, "Bawipa, meheh nangmah thaw khawla dun ta sehla, na vumah tsang himhim mah na sen," ti’n hau si. ²³ Jesuh in Piter lam nga atsia, "Satan, ka ning ah daan in, nangmah heh keimah khak tu si tsi. Heitasim tiphangin Pathian thil te heh ruat ngawl in minung thil te bek ruat si tsi," ti’n ti si. ²⁴ Jesuh in a ningluntu te kheh, "Tutu sikhen ka ning a lun nuamtu hen amah le amah el tsawm sehla, ama thinglamteh phur in ka lun sen. ²⁵ Tutu sikhen ama nungnak a san nuamtu hen a nungnak ral tu in, keima manin ama nungnak a sung tiartu hen nungnak tawk tu si. ²⁶ Mi pakhat in leivumpi heh tso atsia, a nungnak raula a sung a si lekhaw hei nempi tu sim? Minung in ama nungnak raula tsa tuh in hei thaw thulh thei tu sim? ²⁷ Mi Tsapa in a Pa tsungnungnak ah ama vanvummi te thaw leng tulai atsia, mi taak hem kheh amahni puahnak bangten in lawhman tham tu si. ²⁸ Thungai ngai in nang rel sing, Mi Tsapa heh ama uknak thaw a leng a mu ma hem, nai ah a ding mi pawlkhat te’n thihnak tep tu ngawl si," ti’n ti si.

¹ Ni ruk zawh in Jesuh in Piter, Jeim ah le a nau Johan te kheh huai atsia mual sangpi vumah kai dang si. ² Tsin, amahni mai ah Jesuh ah kheh a mel theng in, a mai heh nii bangin vaar atsia, a puan te heh vaarnak bangin ngover si. ³ Pan in, amahni nenah Mawsi le Elijah ah lang in amah kheh awntsawp pi si. ⁴ Tsimi phangin Piter in Jesuh ah kheh o atsia, "Bawipa, nai ah kei om dang heh pha si. Na siang a si lekhaw buuk pathum sa dang a sing; pakhat heh nangma tuh, pakhat heh Mawsi-a tuh le pakhat heh Elijah-a tuh si," ti’n ti si. ⁵ Piter awn tseih laitum in, pan in, meiro vaarsur kheh amahni vumah zaam si. Makhat in meiro sung pin aw pakhat ring atsia, "Me pa heh ka it pittseihnak ka Tsapa si. Ama vumah tampi ang sing. A thu ngai ta un," ti’n ti si. ⁶ Ningluntu te’n me aw heh a za phangin bukhup dang atsia, kih tihtak in kih dang si. ⁷ Sinapikhaw Jesuh in amahni kheh zen atsia, "Tho leh la un, heimah kih mah na un," ti’n ti si. ⁸ Amahni’n a panso dang phangin Jesuh ah siar ngawl tumah mu leh ngawlla si. ⁹ Mual vum pin a hawhsuk dang tseih lai in, Jesuh in amahni kheh, "Mi Tsapa heh mithi te lak pin a tho ma hem, lalhnak nang munak heh tumah rel nang mah na un," ti’n thupe si. ¹⁰ Tsimi phangin a ningluntu te’n, "Tsimi a si lekhaw heita Daan zirhtu te’n Elijah leng masa tu si," ti’n rel sim?" ti’n dong si. ¹¹ Jesuh in amahni kheh o atsia ti hen ti si, "Elijah ah leng masa miau tu in, heizongza puah hamsek tu si. ¹² Sipelh atsia, nang rel sing, Elijah ah leng masa ongla si. Amahni’n thei ngawl in, a nuam bangin zing si. Tsimi bangin Mi Tsapa heh khen amahni kut ah harsanak a tuar tuzep si," ti’n ti si. ¹³ Tsimi phangin a ningluntu te’n a relnak heh Niimtu Johan ah a si lam thei zo dang si. ¹⁴ Mihonpi te nenah a leng dang phangin patsang pakhat in amah nenah hawh atsia, ama mai ah khuklepbok si. ¹⁵ Tsin, ama’n, "Bawipa, ka tsapano heh thihkah nei si in, zilhtsak ngai in a vei manin, ka ngeihhar sak sawh in. Amah heh mei sungah le ti sungah da veng si. ¹⁶ Tsimi manin na ningluntu te nenah phurh pelh sing. Amahni’n heimah dam tiar thei ngawl si," ti’n ti si. ¹⁷ Jesuh in amah kheh o atsia, "Maw umnak nei ngawl le lamvai miphun te, kontik tian nang ompi rih tu sing im? Kawtsan nang or rih ang im? Ka nenah huai un," ti’n ti si. ¹⁸ Jesuh in khawvang kheh hau atsia, naupangpa sung pin suak in, tsimi hun rori in naupangpa kheh dam si. ¹⁹ A ningluntu te’n amahni ruak in Jesuh nenah hawh dang atsia, "Heita khawvang heh nawt zo ngawl si ung im?" ti’n a thupno in ti si. ²⁰ Jesuh in amahni kheh, "Nang um ngawl ta si. Thungai ngai in nang rel sing; ankam tsi te umnak nang nei a si lekhaw, me mual heh, ’Nai pin hen me khen ah thawn taw,’ ti’n nang ti asin, mual kheh thawn tu si. Tsin, nangmahni tsa a si theihnung ngawl heimah om tu ngawl si. ²¹ Hei a sipelhta khen me bang khawvang heh sawngennak le lai eih tsangnak ngawl in suak tu ngawl si," ti’n ti si. ²² Tuhen, Galilee ah a om lai in Jesuh in ti hen ti si, "Mi Tsapa heh minung te kut sungah zuarnak si tula si. ²³ Amahni’n reek tu atsia, a nithumnak ni in tho tiarnak si tu si," ti’n ti si. Ningluntu te kheh lungse tihtak in lungse dang si. ²⁴ Kapernaum ah a leng dang phangin, temple siahkhontupa in Piter ah kheh, "Nang Sayapa hen temple siah pe reng maw?" ti’n ti si. ²⁵ Piter in, "Pe reng si," ti’n amah kheh o si. Inn sungah a dum phangin Jesuh in amah kheh awnpi masa vut in, "Simon, kawti’n ruat si tsim? Me leivum kumpibawi te’n siah heh amahni tsa te nena le si maw, ramdang te nena le si sawn sim?" ti’n ti si. ²⁶ Piter in, "Ramdang te nena le si," ti’n ti si. Jesuh in amah kheh, "Tsimi a si lekhaw a tsa te heh luat si. ²⁷ Heita sikhen me te heh thinraw tiar awl ala sing. Tipi sungah ngasio kawi leh ta la, na ngah masa bernak nga kheh le ten. A kam keula tangka tsangkhatno tawk tu si tsi. Tsimi tsawh keima le nangma tsa temple siah tuh in amahni kheh pe ten," ti’n ti si.

¹ Tsimi hun in ningluntu te’n Jesuh nenah hawh dang atsia, "Vanvum uknak ah tu ber heh mi thupi ber si tu sim?" ti’n ti dang si. ² Jesuh in naupangno pakhat kheh a nenah huai atsia, amahni laingial ah koih si. ³ Ama’ n, "Thungai ngai in nang rel sing, nang thinlung theng atsia, me naupangno bang hen nang si ngawl nungsang vanvum uknak sungah lut thei himhim tu ngawl si utsi. ⁴ Tutu sikhen me naupangno bangin thin a tsualtu heh vanvum uknak ah mi thupi ber si tu si. ⁵ Keima ming in me naupangno a saangtu heh keimah saang si. ⁶ "Tutu sikhen keimah a umtu me naupangno te lak pin pakhatno heh keimah a umnak pin a pial tiartu heh, a ngawng ah tsangrialnak lungtum khaih atsia, tipi sungah vawr asin ama tsa in pha sawn tu si. ⁷ Minung te a khawsi tiartu leivum minung te tsa lungsenung si. Minung a khawsi tiartu heh a leng kultsam si. Sinapikhaw mi a khawsi tiartupa tsa in lungsenung si. ⁸ "Na kut maw na kawng in maw nangmah a sual tiar a si lekhaw, ten la vawr in. Kut panih nei reng in maw kawng panih nei reng in maw kumkhaw mei sungah sangnak na si tah in, kawng him ngawl in maw pum kim ngawl in maw nungnak ah na lut heh pha sawn si. ⁹ Tsin, na mit in nangmah a sual tiar a si lekhaw khailok la vawr in. Mit panih nei reng in hell mei sungah sangnak na si tah in mit pakhat ruak thaw nungnak ah na lut heh pha sawn si. ¹⁰ "Me naupangno te laka pakhatno heh nang zohsuam khatu ralring un. Heitasim tiphangin nang rel sing; vanvum ah amahni vanvummi te’n vana ei Pa mitmai kheh pan reng veng si. ¹¹ Mi Tsapa heh a pai te san tu in leng si. ¹² "Kawti’n ruat si utsim? Mi pakhat in tuu zakhat nei atsia, pakhatno heh lam a vai tsuk asin, tuu sawmkua le kua te kheh zam atsia, mual vumah a tuu lamvai zei tu in hawh ol ngawl si maw? ¹³ Thungai ngai in nang rel sing; a tawk phangin lam a vai ngawl tuu sawmkua le kua tah in tsimi tuu pakhat vumah ang sawn pittseih tu si. ¹⁴ Me naupangno te laka naupangno pakhat a pai thong tu heh vana nang Pa deihnak si ngawl si. ¹⁵ "Tsimi bek zo ngawl, na unau pi pa’n na vumah thilsual a puah kha a si lekhaw, hawh ta la nang panih ruak tawkdun in a khelhnak kheh rel in. Na thu a ngai a si lekhaw na unau pi pakhat ngah leh si tsi. ¹⁶ Sipelh atsia ngai nuam ngawl a si lekhaw, ’Mi pakhat maw panih maw huai la, tetti panih maw pathum maw te awnkam te thawmin a thu kho tiar tuh si.’ ¹⁷ Tsimi khen a el lai pahpah a si lekhaw, pawlpi ah rel in. Sinapikhaw pawlpia relnak khen ngai nuam lawt ngawl a si lai lekhaw, lawkih te le siahkhon te bangin si tasen. ¹⁸ "Thungai ngai in nang rel sing; lei ah nang hennak taak hem van ah hennak si deve tu in, lei ah nang suutnak taak hem van ah suutnak si deve tu si. ¹⁹ "Nang rel lehleu sing; lei ah mi panih lungkim in thil nang ngennak pohpoh heh vana ei Pa’n amahni tsa puahsak tu si. ²⁰ Heimansim tiphangin keima ming in mi panih maw pathum maw khawm dangnak ah amahni laingial ah keimah om sing," ti’n ti si. ²¹ Piter in ama nenah hawh atsia, "Bawipa, ka unau pi in ka vumah thilsual a puah tsuk asin, vei kawzah tian zah tu sing im? Vei sarih tian si maw?" ti’n ti si. ²² Jesuh in, "Vei sarih tian zah tu in na rel ngawl sing, vei sariha let sawmsarih tian zah tuh in na rel sing. ²³ Tsimi manin vanvum uknak heh a sel te napernak a tseksaktu kumpibawi pakhat thaw bangve si. ²⁴ A tsek pan phangin talent thawngsawm a batupa kheh ama nenah huai si. ²⁵ A leibat a kuan zo ngawl manin a bawipa in amah le a zi le a tsa tehem zuar in rul tuh in thupe si. ²⁶ Tsimi manin a selpa khen a mai ah bok atsia, ’Bawipa, ka or sawh rih in. Na kuan veng tulai poh sing,’ ti’n ti si. ²⁷ A bawipa khen ngeihhar in, luat tiar atsia a leibat hem zah liang si. ²⁸ "Sinapikhaw tsimi selpa khen pulam ah suakper in, ama nenah denari zakhat a batu a selpi pa tawk in, a kutman atsia, a ngawng heet in, ’Na leiba ka kuan in,’ ti’n ti si. ²⁹ Tsimi manin a selpi pa khen a mai ah bok atsia, ’Ka or sawh rih in. Na rul veng tulai poh sing,’ ti’n kunlo si. ³⁰ Ama’n zah nuam ngawl in, hawh atsia a leibat a kuan tselh ma hem thawng toh si. ³¹ A selpi te’n a puahnak kheh a mu phangin, khawngai nguih in a bawipa nenah hawh dang atsia, a puahnak tehem kheh rel dang si. ³² Tsimi phangin a bawipa’n amah kheh ko atsia, ’Sel sesuak pa, na kun pittseih manin na leibat tehem na zah sing. ³³ Nangmah ka ngeihhar bangin na selpi pa heh na ngeihhar deve tuh si ngawl si maw?’ ti’n ti si. ³⁴ "A bawipa kheh thinraw in, a leibat tehem a kuan tselh ma hem mi erhtu te kut ah aap si. ³⁵ "Tsimi manin nangmahni vumah thilsual a puahtu nang unaupi kheh nang thinlung taktak in sual nang zah ngawl a si lekhaw, vana ei Pa in nang zah deve tu ngawl si," ti’n ti si.

¹ Tsin, tibang hen thiltsang si. Jesuh in me thu te heh a rel tselh phangin, Galilee pin kiang atsia, Jordan run rala Judea ram ah hawh si. ² Mihonpi te’n amah kheh lun dang in, ama’n dam tiarberh si. ³ Farasi te’n ama nenah hawh in, amah a tsulnak in, "Mipa in thu pakhat khat manin a zi paw daan si maw?" ti’n ti si. ⁴ Jesuh in amahni kheh o atsia, "A tepan in amahni puahtu hen ’mipa le nupang puah si.’ ⁵ Tsin, ’Me thu man hen mipa in a nu le a pa te kheh zam sehla, a zi nenah om tasen. Tsin, amahni panih heh pum khat in tsang tu si,’ ti’n ngannak kheh siar awng ngawl si utsim maw? ⁶ Tsimi manin amahni kheh panih si leh ngawlla in, pumkhat si ongla si. Tsimi manin Pathian komnak kheh minung in khen mah na sen," ti’n ti si. ⁷ Amahni’n Jesuh ah kheh, "Heita Mawsi in pawnak lai ken atsia, a zi kheh nawt tu in thupe sim?" ti’n ti si. ⁸ Jesuh in amahni kheh, "Nang thinkho leita manin Mawsi in nang zi te kheh paw siang si. Sinapikhaw a pan in tsimi bangin si ngawl si. ⁹ Nang rel sing, tutu sikhen nu le pa sualnak manin siar ngawl a zi paw atsia, zi dang a huaitu heh zuanzam si. Tsin, a pawnak zi a huaitu khehkhen zuanzam si," ti’n ti si. ¹⁰ A ningluntu te’n, "Nupa laklawh thu heh tsimi bang a si lekhaw, huai dun ngawl heh pha sawn si," ti’n amah kheh ti si. ¹¹ Sinapikhaw Jesuh in, "Mi tehem in me thu heh saang thei ngawl si. Pathian penak te bek in saang thei si. ¹² A nu pum sung pin tilret saak in a suak te om in, minung te tilret saknak te om atsia, vanvum uknak manin tilret tsawm te khen om si. A saang thei te’n saang tasen," ti’n ti si. ¹³ Tsin, naupangno te lu vumah a kut suansak atsia, saw a ngensak tuh in amah ni kheh Jesuh nenah a huai phangin, ningluntu te’n amahni kheh hau si. ¹⁴ Sinapikhaw Jesuh in, "Naupangno te tsawh ka nenah hawh la sen. Kham mah na un. Heimansim tiphangin vanvum uknak heh me bang naupangno tea si," ti’n ti si. ¹⁵ Tsin, amahni lu vumah a kut a suan tselh phangin, tsimi mun pin khen kiang si. ¹⁶ Pan un, mi pakhat kheh ama nenah hawh atsia, "Mipha Sayapa, kumkhaw nungnak ka nei theinak tuh in hei thilpha puah ang im?" ti’n ti si. ¹⁷ Jesuh in amah kheh, "Heita mipha, ti’n ka ti si tsim? Pathian siar ngawl tumah mipha om ngawl si. Sinapikhaw nungnak ah lut na nuam a si lekhaw, thukhaam te lun in," ti’n ti si. ¹⁸ Ama’n Jesuh ah kheh, "Hei ber te sim?" ti’n ti si. Jesuh in, "’Tualreek mah,’ ’Zuanzam mah,’ ’Ruko mah,’ ’A maan ngawl tettikhan mah,’ ¹⁹ ’Na nu le na pa upat in,’ tsin ’Na inn nen kheh nangmah le nangmah na it tsawm bangin it in,’" ti’n ti si. ²⁰ Khangnopa khen amah kheh, "Me tehem heh ka naupang lai pah in ka lunsek saak si. Hei kul lai sing im?" ti’n ti si. ²¹ Jesuh in amah kheh, "Mi nakim si nuam le tsikhaw, hawh ta la na neinak thil tehem zuarberh la, minawm te sawm ten. Tsin, van ah ro nei tu si tsi. Tsimi tselh phangin hawh la, ka lun in," ti’n ti si. ²² Sinapikhaw khangnopa kheh tangka tampi nei a si manin, tsimi awnnak a za phangin, lungse ngai in hawh leh si. ²³ Tsimi phangin Jesuh in a ningluntu te kheh, "Thungai ngai in nang rel sing, milian pakhat vanvum uknak sungah lut heh har ngai si. ²⁴ Nang rel not sing, milian pakhat Pathian uknak sungah a lut tah in, phim kaw sungah kalauk lut heh beih sawn si," ti’n ti si. ²⁵ Ningluntu te’n tsimi thu kheh a za dang phangin lunglawi tihtak in lunglawi dang atsia, "Tu heh sannak si thei tu sim?" ti’n ti dang si. ²⁶ Sinapikhaw Jesuh in amahni kheh pan atsia, "Minung te tsa in a si theihnung ngawl sipelh in, Pathian tsa in thil tehem heh si theihnung si," ti’n ti si. ²⁷ Piter in o atsia, "Pan in, heizongza zam in na lun si ung, hei ngah tu si ung im?" ti’n amah kheh ti si. ²⁸ Tsimi manin Jesuh in amahni kheh, "Thungai ngai in nang rel sing, remther hun ah Mi Tsapa heh ama tsungnung kumpibawi tohkheng ah a to phangin, nangmahni ka ningluntu leinih te heh Israel hin leinih te uktu tuh in kumpibawi tohkheng leinih ah to deve tu si utsi. ²⁹ Keima ming manin a inn maw a suahpi mipa te maw a tser te maw a pa maw a nu maw a zi maw a tsa te maw a lo maw a zam tu pohpoh in a let zakhat in ngah leh tu in, kumkhaw nungnak ro luah tu si. ³⁰ Sinapikhaw a masa minung tampi te kheh dawlta si leh tu in, dawlta te kheh masa si leh tu si," ti’n ti si.

¹ Tsin Jesuh in, "Vanvum uknak heh a tsapit lo ah napertu tuh mi tsial tu in zingmano in a hawhtu innteekpa thaw bangve si. ² Ama’n napertu te thaw in nitha denari pakhat pe tu in a lungkim dun tselh phangin, a tsapit lo ah hawh tiar si. ³ Zinglam naazi kua lun in pusuak atsia, dawr ah a ding dang reng midang te kheh mu si. ⁴ Tsin, amahni kheh, ’Nangmahni khen tsapit lo ah hawh deve ta un. A khawthu nitha nang pe tu sing,’ ti’n ti atsia, amahni khen hawh dang si. ⁵ Sun laitak in le simlam naazi pathum phangin pusuak lehleu atsia, masa bangpah in ti si. ⁶ Simlam naazi panga phangin pusuak leh in, ding dang reng midang te kheh tawk in, ’Heita nai ah sunnilawh ding dang reng si utsim?’ ti’n ti si. ⁷ Amahni’n, ’Tumah in a tiar ngawl ta si’ ti’n ti si. Ama’n amahni kheh, ’Nangmahni khen tsapit lo ah hawh deve ta un. A khawthu nitha nang pe tu sing,’ ti’n ti si. ⁸ "Simlam a si ongla phangin tsapit lo neitupa in a tangka kemtu kheh, ’Napertu te kheh koberh la, per dawlta ber te pin pan ta la, per masa ber tian amahni nitha pe ten,’ ti’n ti si. ⁹ Tsin, simlam naazi panga lun phangin tsialnak te kheh leng in nitha denari pakhat ten ngah si. ¹⁰ "Sinapikhaw per masa ber te a leng phangin, tam sawndoh ngah tu in ring si. Amahni’n nitha denari pakhat ten pah ngah dang si. ¹¹ A nitha ten a saang dang tselh phangin, ¹² ’Me te heh naazi pakhat sung bek phang per si in, harsa ngai in ni sen sa lak ah na a pertu keimahni thaw tsankim in puah si tsi,’ ti’n lo neitupa kheh ti dang si. ¹³ "Sinapikhaw lo neitupa in amahni laka pakhat kheh o atsia, ’Ei rual, nang vumah heimah khelh ngawl sing. Denari pakhat pe tu in lungkim dun si ngawl na sing im? ¹⁴ Nangmahnia tsawh le ula hong ta la un. Dawlta ber in a pertu khehkhen nangmahni bangin ngah tiar nuam sing. ¹⁵ Ka thil neinak vumah ka nuamnak bangin puah thei si ngawl si ing maw? A si ngawl lekhaw ka phatnak heh muheh si tsim maw?’ ti’n ti si. ¹⁶ Tsimi manin dawlta ber te heh masa ber leh tu in, masa ber te heh dawlta ber si leh tulai si. Konak heh minung tampi sipelh in, dengnak heh minung dawmno si," ti’n ti si. ¹⁷ Tsin, Jesuh ah kheh Jerusalem ah hawhso atsia, lamlak ah ninglun leinih te kheh a tseno in hawhpi in, ¹⁸ "Pan un, Jerusalem ah hawhso dang tu si sing. Tsin, Mi Tsapa heh suangbawi te le Daan zirhtu te kut ah aap tu atsia, amahni’n reek tuh in han tu si. ¹⁹ Tsin, nihtsiam bawlnak in mang tuh in le vat tuh in le thinglamteh ah reek tuh in Gential te nenah aap tu si. Tsin, a nithumnak ni in tho leh tu si," ti’n amahni kheh ti si. ²⁰ Zebedee tsapa te nu in a tsapa te keng in ama nenah hawh atsia, a mai ah khuk tsaitsen in thil pakhat ngen si. ²¹ Ama’n minu kheh, "Hei deih si tsim?" ti’n ti si. Minu in, "Na uknak ah me ka tsapa te panih heh na taklam ah le na kehlam ah to siang sawh in," ti’n ti si. ²² Sinapikhaw Jesuh in amah kheh o atsia, "Nang ngennak heh hei si ti thei tsawm ngawl si utsi. Ka in tuh khuat heh in thei tu si utsim maw? Ka niim tuh niimnak ah niim thei tu si utsim maw?" ti’n ti si. Amahni’n, "Zo tu si ung," ti’n ti si. ²³ Tsimita Jesuh in amahni kheh, "Ka khuat heh in miau tu in, ka niim tuh niimnak ah niim miau tu si utsi. Sinapikhaw ka taklam ah to tu le ka kehlam ah to tu heh keima pe theih si ngawl in, ei Pa siamham saak te tsa si sawn si," ti’n ti si. ²⁴ Ningluntu sawmkhat te’n tsimi thu heh a za phangin, nau-u te vumah ngaimawh ngai dang si. ²⁵ Tsimi manin Jesuh in amahni kheh a nenah ko atsia, "Gential te uktu te’n a uknak te vumah bawi ngai in, a mi thupi te khen amahni vumah thunei ngai si. ²⁶ Nangmahni lak ah tsimi bangin si mah na sen. Tutu sikhen nangmahni lak ah mi thupi ber si a nuamtu heh nang na persaktu si tasen. ²⁷ Nangmahni lak ah masa ber si a nuamtu hen nang sel si tasen. ²⁸ Mi Tsapa heh mi te natiar tu in leng si ngawl in, mi te na persak tu in le mi tampi dennak tsa ama nungnak pe tu in a leng si sawn si," ti’n ti si. ²⁹ Jerikho pin a kiang dang phangin mihonpi te’n amah lun si. ³⁰ Ngai in, lampi kung ah a toreng mittsaw panih te’n Jesuh hawh thawm a za phangin, "Maw Bawipa, David Tsapa, kei ngeihhar sawh in," ti’n au si. ³¹ Mihonpi te’n mengdeen tiar si. Sinapikhaw amahni’n au leilei in, "Maw Bawipa, David Tsapa, kei ngeihhar sawh in," ti’n ti si. ³² Tsimi manin Jesuh ah kheh ding in amahni kheh ko atsia, "Nangmahni tsa hei puah sak tu in deih ka si utsim?" ti’n ti si. ³³ Amahni’n, "Bawipa, khawmu ot si ung," ti’n ti si. ³⁴ Jesuh in amahni kheh ngeihhar ngun in, amahni mit kheh zen sak si. Makhat in a mit khawmu kawm atsia, amah kheh lun kawm nom si.

¹ Tuhen amahni heh Jerusalem md A nong lemlem ongla in, Olive Mual bula Bethfake khaw a leng phangin ningluntu panih leh atsia amahni kheh, ² "Nang raala khaw ah hawh ta un. Nang leng tsang in laakpi le a no khitnak kheh mu tu si utsi. A ri sut ta ula, ka nenah kai un. ³ Mi pakhat khat in a dong a si lekhaw, ’Bawipa’n kin si,’ ti’n ti ta ula, siang zep tu poh si," ti’n ti si. ⁴ Profet tawnin rel hamnak a kimnak tuh in me tehem heh tsang si. ⁵ Profet in, "’Pan in, na Kumpibawi heh, thintsual ngai in, laakpi le a no to in na nenah hawh tseih si,’ ti’n Zion tsanu kheh rel un," ti’n ti si. ⁶ Ningluntu panih kheh hawh atsia, Jesuh relnak bangin puah si. ⁷ Amahni’n laakpi le a no kheh kai in, amahni zaang ah puanphah sak atsia, Jesuh ah to tiar si. ⁸ Mihonpi te’n amahni puan kheh lampi ah phah sak atsia, midang te’n sawl tet in phah si. ⁹ Tsimi phangin a mai ah a hawhtu le a ning pin a luntu mihonpi te’n, "David Tsapa heh Hosanna! ’BAWIPA ming in a lengtu pa heh tsungnung tasen!’ A daak ber ah Hosanna!" ti’n au dang si. ¹⁰ Jerusalem khaw sungah a lut phangin, khaw sunga mi tehem kheh rung bengbung in, "Mepa heh tu sim?" ti’n ti si. ¹¹ Mihonpi te’n, "Mepa heh Galilee penga Nazareth khawte profet Jesuh ah si," ti’n ti si. ¹² Jesuh ah kheh Pathian temple reen sungah lut atsia, temple reen sungah thil leitu tehem le thil zuartu tehem kheh hawlberh si. Tangka thengtu te tsabuai te le khuro zuartu te tohkheng te kheh lailetberh sak si. ¹³ Tsin, Jesuh in amahni kheh, "’Ka inn heh sawngennak inn tinak si tu si,’ ti’n ngan si, sinapikhaw nangnihni’n ’ruko te kaw’ in tsan si utsi," ti’n ti si. ¹⁴ Mittsaw te le kawngzenat vei te’n temple reen sunga ama nenah hawh dang atsia, ama’n dam tiarberh si. ¹⁵ Sinapikhaw suangbawi te le Daan zirhtu te’n thil khumnung ngaingai a puahnak te a mu phangin, le "David Tsapa kheh Hosanna," ti’n temple reen sungah naupang te au dang tseihnak kheh a za phangin, thase ngai dang in, ¹⁶ Jesuh ah kheh, "Me te awnnak heh za tsim maw?" ti’n ti si. Jesuh in, "Za emsai poh ee, ’Nausen te le nau khul in lai te kam pin thangphatnak kheh nakim tiar ongla si tsi,’ tinak kheh siar awng ngawl si utsim maw?" ti’n amahni kheh ti si. ¹⁷ Tsin, Jesuh in amahni kheh zam atsia, Bethany khaw ah hawh in zan tsam si. ¹⁸ Tsin, zing in khawpi sungah a hawh leh phangin a rikaam si. ¹⁹ Lampi kung ah theikuang mu in, veeng pelh atsia, a nah siar ngawl a rah heimah tawk ngawl in, "Rah leh nom awl ta law," ti’n theikuang kheh ti atsia, makhat in theikuang kheh ro si. ²⁰ Ningluntu te’n tsimi kheh a mu dang phangin khum ngai dang in, "Kawti theikuang heh ro nomper nan tih im?" ti’n ti si ²¹ Tsimi manin Jesuh in amahni kheh o atsia, "Thungai ngai in nang rel sing, ummawhnak nei ngawl in nang um lekhaw, theikuang vumah puahnak bang bek heh puah si ngawl in, me mualpi heh, ’Thawnla tipi sungah lawn tsawm in,’ ti’n nang tinak heh nang tibang in si tu si. ²² Tsin, umnak thaw sawngen ula, nang ngennak taak hem ngah tu si utsi," ti’n ti si. ²³ Jesuh ah kheh temple reen sungah lut atsia, thu a zirh tseih laitum kheh suangbawi te le Jew te upa te’n mu in, amah kheh zuan dang atsia, "Hei thuneinak thawmin me thil te heh puah si tsim? Me thuneinak heh tu penak si tsim?" ti’n dong si. ²⁴ Jesuh in amahni kheh o atsia, "Keimah khen thu pakhat nang dong deve tu sing. Nang rel a silekhaw, keimah khen hei thuneinak thawmin me thil te heh puah sing im, ti nang rel tu sing. ²⁵ Johan niimnak heh kawnai pina sim? Van pina si maw minung nen pin sawn sim?" ti’n ti si. Amahni’n thuruat dang atsia, " ’Vanvum pina si,’ ti’n ti le singkhaw, ’Heita um ngawl si utsim?’ ti’n ti tu kei si. ²⁶ Tsin, ’Minung nen pin si,’ ti’n ti lehleu le singkhaw mi tehem in Johan ah heh profet pakhat in a tinak a si manin, mipi te kih meek si sing," ti’n rel dang si. ²⁷ Tsimi manin amahni’n Jesuh ah kheh o atsia, "Thei ngawl si ung," ti’n ti dang si. Jesuh in, "Keimah khen hei thuneinak thawmin me thil te heh puah sing im, ti nang rel deve tu ngawl sing. ²⁸ "Kawti’n ruat si utsim? Mipa pakhat in tsapa panih tsawi si. Ama’n a upa sawn kheh, ’Tsapa, tuni ka tsapit vuan ah hawh tala naper ten,’ ti’n ti si. ²⁹ A tsapa upa sawn in a pa kheh o atsia, ’Hawh tu ngawl sing,’ ti’n ti pelh atsia, dawllam in sir leh in hawh leh si. ³⁰ "Tsin, ama’n a nauta kheh hawh tiar deve si. A nauta khen a pa kheh o atsia, ’Bawipa, hawh tu sing,’ ti’n ti pelh atsia, hawh leh ngawl si. ³¹ "Me te panih lak pin tu sawn in a pa deihnak puah sim?" ti’n ti si. Amahni’n, "Upa sawn in si" ti’n ti si. Jesuh in, "Thungai ngai in nang rel sing, siahkhon te le dopzuar te heh Pathian uknak ah nangmahni maikhalh in lut tu si. ³² Heimansim tiphangin Johan in diktsangnak daan thaw nang nenah leng in um ngawl si utsi. Sinapikhaw siahkhon te le dopzuar te’n amah kheh um si. Meheh nang mu phang riang in, amah um tu in nang sual sir nuam lawt ngawl si utsi. ³³ "A dang thusanteh heh ngai rih un. Vuan neitu pakhat om in, a vuan sungah tsapit kuang phun si. Pal suum in ren atsia, tsapit surnak leikaw tso in, dawndel dawh si. Tsin, Tsapit vuan kiltu te kheh nga tiar in, ram khawlapi ah khualvak si. ³⁴ Tsapit rah thawi hun a kim dawn ongla phangin tsapit rah te le tu in a omlawh te kheh tsapit vuan kiltu te nenah leh si. ³⁵ "Tsapit vuan kiltu te’n omlawh te kheh pom atsia, pakhat heh vaatdek in, pakhat heh reek atsia, a dang pakhat heh lungto in seplum si. ³⁶ Vuan neitupa’n a masa tah tam sawn in omlawh te leh in, vuan kiltu te’n a masa bangpah in zing si. ³⁷ Tawpsannak in ama’n, ’Ka tsapa heh vang kihzah bel tu si,’ ti’n ti tsawm atsia, a tsapa kheh leh si. ³⁸ "Sinapikhaw tsapit vuan kiltu te’n a tsapa kheh a mu phangin, ’Mepa heh a ro luahtu si. Hawh in reek a singkhaw, a ro thil te long sak a sing,’ ti’n ti dang si. ³⁹ Tsimi manin, amahni’n a tsapa kheh pom atsia, vuan pulam ah lawn in reek dang si. ⁴⁰ Tsimi manin vuan neitu a leng phangin vuan kiltu te kheh kawti bangin ti tu sim?" ⁴¹ Amahni’n, "Tsimi bang mi suaksual te kheh mulzumnung ngai in siatsuah tu in, a tsapit vuan kheh tsapit rah hun phangin tsapit rah a petu tuh midang tsapit vuan kiltu te nga tiar leh tu si," ti’n ti dang si. ⁴² Jesuh in amahni kheh, "Laithiangrim siar awng ngawl si utsi maw? ’Inn satu te’n a lonnak lungto kheh inn ning khumnak in tsang si. Meheh BAWIPA puahnak si in, keimahni mitmuh ah khumnung ngai si,’ ti’n ti si. ⁴³ "Tsimi manin nang rel sing, Pathian uknak heh nangmahni nena lesaknak si tu in, a rah thei miphun kheh pe tu si. ⁴⁴ Tutu sikhen me lungto vumah a datu heh kehreih tu in, tsimi lungto in a daaknak heh vuatbuk tu si," ti’n ti si. ⁴⁵ Suangbawi te le Farasi te’n me thusanteh heh a za phangin, amahni a titsipnak a si lam thei si. ⁴⁶ Amah kheh pom tuum dang pelh in, mipi te’n profet pakhat in a koih manin mipi te kheh kih si.

¹ Jesuh in amahni kheh thusanteh mang in thurel in, ² "Vanvum uknak heh a tsapa-a mopuai a puah saktu kumpibawipa thaw bangve si. ³ Ama’n mopuai ah samnak te ko tu in a sel te tiar pelh atsia, amahni’n puai sim nuam ngawl si. ⁴ "Ama’n a dang sel te tiar lehleu in, ’Samnak te kheh, "Ngai un, ka simlai puah tselhsek ongla sing. Ka kawlpawtsang te le sum a thau te tel ngah ongla sing. Heizongza ralringlep ongla si. Mopuai sim la un," ti’n ti ta un,’ ti’n ti si. ⁵ "Sinapikhaw amahni’n hei nam ngawl in, mi pawlkhat te’n lothok in, pawlkhat te’n sumpeinak ah hawh in, amahni nuam min ten ah hawh dang si. ⁶ Midang te’n a sel te kheh pom atsia, zahtsaknung ngai in zing in, reek si. ⁷ Tsimi thu kheh kumpibawipa’n a thei phangin, thinraw ngai si. Tsin, a raalkap te leh atsia, tualreek te kheh siatsuahberh in, a khawpi khen haalsak si. ⁸ Tsin, a sel te kheh, ’Mo puai simlai ei theilep ongla si. Sinapikhaw samnak te heh puai sim taak ngawl si. ⁹ Tsimi manin rawtpi ah hawh ta ula, mi nang tawknak taak hem mo puai ah sam ta un,’ ti’n ti si. ¹⁰ "Tsimi manin sel te’n rawtpi tehem ah hawh in, a tawknak tehem, mipha a sikhen mi sesuak a sikhen khawmluut in, puai puahnak innkhan kheh mikhual dim tiar si. ¹¹ Sinapikhaw kumpibawipa’n mikhual te pan tu in a lut phangin, mo puai puan sil ngawl mipa pakhat kheh mu si. ¹² Tsimi phangin kumpibawipa khen amah kheh, ’Ei rual, mo puai puan sil ngawl in kawti’n nai sungah lut thei si tsim?’ ti’n ti si. Ama’n heimah awn thei ngawl si. ¹³ Tsimi phangin kumpibawipa khen a sel te kheh, ’A kut le a kawng henpek ula, amah heh huai in pulam khawthim sungah vawr ta un. Tsimi munah kap kuaikuai in hariat tuihtuih tasen,’ ti’n ti si. ¹⁴ "Konak heh minung tampi tupelh in, dengnak heh minung dawmno si tu si," ti’n ti si. ¹⁵ Tsimi phangin Farasi te’n hawh atsia, ama awnkam pin a sual man tu in sawm dun si. ¹⁶ Farasi te’n amahni ninglun te kheh Herod pawl te thaw a nenah leh in, "Sayapa, nangmah heh midik si atsia, Mi nopmawh nom ngawl in le mi maisong nom ngawl in le man ngaino in Pathian daan thudik na zirh lam na thei si ung. ¹⁷ Tsimi manin, Sizar nenah siah pe heh a daan si maw, si ngawl sim? Na ruatnak kei rel in," ti’n ti si. ¹⁸ Sinapikhaw Jesuh in amahni suaksual thiatha kheh thei in, "Nangnih ni mi sidat te, heita tsul ka si utsim? ¹⁹ Siah pe tuh tangka tsawh ka muh tsuk un," ti’n ti si. Amahni’n denari pakhat kheh muh si. ²⁰ Tsimi phangin Jesuh in, "Meheh tu mel le tu ming sim?" ti’n dong si. ²¹ Amahni’n, "Sizar mel le ming si," ti’n ti si. Ama’n, ’Tsimi manin Sizar thil te heh Sizar pe ula, Pathian thil te heh Pathian pe un," ti’n amahni kheh ti si. ²² Amahni’n me a awnnak heh a za phangin lunglawi dang in, amah kheh zam atsia hong dang si. ²³ Tsimi ni rengreng in mithi tholehnak om ngawl si, ti’n a titu Sadusi te’n a nenah thudong tu’n hawh atsia, ²⁴ "Sayapa, mipa pakhat heh tsa tsawi ngawl in a thi lekhaw, a nau in a zi kheh huai ta sehla, tsatsawi sak sen, ti’n Mawsi in rel kei si. ²⁵ Keimahni lak ah unau pasarih om si. Upa ber in zi huai atsia tsa tsawi ngawl in thi in, a zi kheh a nau nenah zam si. ²⁶ Tsimi bangin a panihnakpa khen thi deve in, a pathumnak khen thi si. Tsimi bangin sarihnak pa tian in thi dangberh si. ²⁷ Tawpsannak in minu kheh thi deve si. ²⁸ Tsimi manin tholehnak ah me minu heh unau pasarih sung pin tu zi ber si tu sim? A vaseng in minu heh a zi in nei dangberh awng si," ti’n ti si. ²⁹ Jesuh in amahni kheh o atsia, "Khelh taktak si utsi, Laithiangrim thei ngawl in, Pathian huham khen thei ngawl si utsi. ³⁰ Tholehnak ah huai dunnak om leh tu ngawlla in, vana Pathian vanvummi te thaw bangve tu si. ³¹ Mithi tholehnak thu ah hen Pathian in nangmahni a relnak heh siar awng ngawl si utsim maw? ³² Pathian in, ’Keimah heh Abraham Pathian, Isak Pathian, Jakob Pathian sing,’ ti’n ti si. Pathian heh mithi te Pathian si ngawl in minung te Pathian si," ti’n ti si. ³³ Me a onak heh mipi te’n a za phangin a thu zirhnak heh khum ngai dang si. ³⁴ Sadusi te kheh Jesuh in awn thei nom ngawl in a zinglam Farasi te’n a za phangin, munkhat ah khawm dang si. ³⁵ Amahni lak pin daan thiam pakhat in amah tsulnak in thu pakhat dong si. ³⁶ Ama’n, "Sayapa, daan sungah hei thukhaam heh thupi ber sim?" ti’n ti si. ³⁷ Jesuh in amah kheh, " ’BAWIPA na Pathian kheh na thinlung hem, na nungnak hem in le na lungmu hem in it in.’ ³⁸ Meheh a pakhatnak le a thupi ber thukhaam si. ³⁹ A panihnak heh, ’Nangmah le nangmah na it tsawm bangin na inn nen it in,’ ti heh si. ⁴⁰ Me thukhaam panih heh Daan hem le Profet te thureelnak tehema bulpi si," ti’n ti si. ⁴¹ Farasi te munkhat ah a khawm dang lai in, Jesuh in, ⁴² "Khrih thu heh kawtibang in ruat si utsim? Tu Tsapa sim?" ti’n ti si. Amahni’n, "David Tsapa si," ti’n ti si. ⁴³ Jesuh in, "Heita David in Raula in amah heh, ’Bawipa’ ti’n ko sim? ⁴⁴ David in, ’BAWIPA in ka Bawipa heh, "Na raal te kheh na palkam in ka puah ma hem ka taklam ah to in," ’ ti’n ti si. ⁴⁵ "David in amah heh, ’Bawipa’ ti’n a ko a si lekhaw, kawti’n a Tsapa si thei tu sim?" ti’n ti si. ⁴⁶ Amah kheh tumah in kamkhatno pohkhen o thei ngawl si. Tsimi ni pin pan tumah in thudong ngam leh ngawl si lei.

¹ Jesuh in mihonpi te le a ningluntu te kheh thurel si. ² Ama’n, "Daan zirhtu te le Farasi te’n Mawsi tohkheng ah to si. ³ Tsimi manin lun tuh in a relnak tehem lun ula puah un. Sinapikhaw amahni’n a awnnak bangin a puah leh ngawl manin a puahnak bangin puah mah na un. ⁴ Thilrit a phur har ngai te puah in mi te ko vumah suan si. Sinapikhaw amahni rori hen a kuttsungno pohkhen dang nuam ngawl si. ⁵ Sinapikhaw a puahnak tehem heh mi te mu belbel tuh in puah si. Tsel ah le baan ah hennak Laithiangrim ngannak savunpek te kheh a lian theitawp in puah atsia, angki tsual tseep kheh a tsual theitawp in tsual tiar si. ⁶ Puai puahnak ah tohkheng pha ber ah le sinakok ah tonak pha ber ah to tuur in, ⁷ dawr ah upatnak le mi te, ’Rabbi, Rabbi,’ ti’n ponnak kheh tuur si. ⁸ Sinapikhaw nangnihni’n ’Rabbi’ ti’n ponnak si mah na un. Nang vaseng heh unau dang nang si manin, nang Sayapa heh pakhat bek si. Amah heh Khrih ah si. ⁹ Leivum ah ei pa ti’n tumah pon mah na un. Heimansim tiphangin Pa pakhat bek nei si utsi, amah heh van ah om si. ¹⁰ Nang Saya heh pakhat bek si in, amah heh Khrih ah a si manin, ’Sayapa’ ti’n ponnak si mah na un. ¹¹ Nangmahni lak ah mi thupi ber heh nang omlawh si tu si. ¹² Mah le mah a tsawisang tsawm tu heh niam tiarnak si tu in, mah le mah a niam tiar tsawmtu heh tsawisangnak si tu si. ¹³ "Nangnihni mi sidat Daan zirhtu te le Farasi te, lungsenung si utsi. Heitasim tiphangin mi te lut theihnung tuh ngawl in vanvum uknak kongkham kheh khaam si utsi. Nangmahni in nang lut ngawl bek zo ngawl, a luttu te khehkhen lut siang ngawl si utsi. ¹⁴ Nangnihni mi sidat Daan zirhtu te le Farasi te, lungsenung si utsi. Heitasim tiphangin numei te inn ruam atsia, sidatnak thaw reipi pi sawngen khel si utsi. Tsimi manin hannak roh leilei in vei tu si utsi. ¹⁵ "Nangnihni mi sidat Daan zirhtu te le Farasi te, lungsenung si utsi. Heitasim tiphangin nang benak ah mi pakhat lut tiar ngah tu in, lei lam pin a sikhen ti lam pin a sikhen khualvak kawikawi si utsi. Mi pakhat nang ngah phangin nangmahni tah in letnih in hella tsa in tsan si utsi. ¹⁶ "Nangnihni lungsenung lamhuai tu mittsaw te, ’Tutu sikhen temple saal in a tsial tsawm tu heh a tsial tsawmnak hen amah heen ngawl in, temple sunga sui saal in a tsial tsawmtu heh a tsial tsawmnak in amah heen si,’ ti’n ti si utsi. ¹⁷ Mitaw te le mittsaw te! Sui le sui a thiang tiartu temple heh hei thupi sawn sim? ¹⁸ ’Tutu sikhen benak dawndel saal in a tsial tsawm a si lekhaw heimah poi ngawl si. Sipelh atsia bawlnak dawndel vuma lehsawng saal in a tsial tsawm a si lekhaw a tsial tsawmnak kheh a lamlen himhim kul si,’ ti’n ti si utsi. ¹⁹ Mitaw te le mittsaw te! Bawlnak lehsawng le bawlnak a thiang tiartu bawlnak dawndel heh hei thupi sawn sim? ²⁰ Tsimi manin bawlnak dawndel saal in a tsial tsawmtu heh bawlnak dawndel le a vuma bawlnak thil tehem saal in tsial tsawm si. ²¹ Temple saal in a tsial tsawmtu heh temple le a sungah om tehem saal in tsial tsawm si. ²² Vanvum saal in a tsial tsawmtu heh Pathian tohkheng le a vumah a totu saal in tsial tsawm si. ²³ "Nangnihni mi sidat Daan zirhtu te le Farasi te, lungsenung si utsi. Heitasim tiphangin vonna lawm te, lenmui te le saiso te sehsawm sehkhat pe atsia, daan thupi ngaingai a si thukhennak, ngeihharnak le umnak te kheh zulhzau men si utsi. A dang te heh zam lawt ngawl in, me te khen heh nang puah tuh si. ²⁴ Lamhuaitu mittsaw te, thosi te nang lem kha tuh ngawl in hap atsia, kalauk lemhawl si utsi. ²⁵ "Nangnihni mi sidat Daan zirhtu te le Farasi te, lungsenung si utsi. Heitasim tiphangin khuat le leeng te kheh a pulam zong thiang tiar atsia, a sung heh hampumnak le mah le mah kelen tsawm thei ngawlnak in dim si. ²⁶ Farasi mittsaw te, nang khuat le nang leeng heh a sung thiang tiar masa ula, a pulam khen tsiang tsih tu si. ²⁷ "Nangnihni mi sidat Daan zirhtu te le Farasi te, lungsenung si utsi. Heitasim tiphangin nangmahni heh pulam pan phangin mawi ngai in lang miau pelh atsia, a sungah mithi ruh le a thiang ngawl te ruakruak a dim, si ngo thuhnak thaan thaw bangve si utsi. ²⁸ Tsimi bangin nang pulam heh mi te mai ah diktsang ngai baang pelh in, nang sunglam heh sidatnak le tsannei ngawlnak ruak dim si. ²⁹ "Nangnihni mi sidat Daan zirhtu te le Farasi te, lungsenung si utsi. Heitasim tiphangin profet te thaan puahsak atsia, midik te thaan kheh mawi ngai in puah si utsi. ³⁰ Tsin, ’Kei pupa te san in om ongla kei si tsuk ta asin, profet te thisen a suahnak ah peh deve tu ngawl pelh si ung,’ ti’n ti tsawm si utsi. ³¹ "Tsimi manin profet te reektu te tsa te nang si lam kheh tettikhan tsawm si utsi. ³² Nang pa te thilsual a puahnak zah kheh kimsek tiar vanglak un. ³³ Rul le ru nei rul hin te, hell ah hannak pin kawti’n luat thei tu si utsim? ³⁴ Nang nenah profet te, mi tsim te le Daan zirhtu te leh sing. Pawlkhat te reek a utsikhaw, thinglamteh ah tar tu in, pawlkhat te heh nang sinakok ah savun rihual in vaat tu atsia, khaw pakhat pin khaw pakhat ah erh tseihzel tu si utsi. ³⁵ Tsimi bangin midik Abel thisen pin pan temple le bawlnak dawndel laklawh ah nang reeknak Berekhiah tsapa Zekhariah thisen tian, leivum ah midik te thisen nang suahnak tehem nangmahni vumah lengberh tu si. ³⁶ Thungai ngai in nang rel sing, me thil tehem heh tusan minung te nenah lengberh tulai si. ³⁷ "Maw Jerusalem, Jerusalem, profet te a reektu, na nenah lehnak te lungto in a seplumtu, arpi in a no te kheh a la nuai ah a huam bangin, na tsa te munkhat ah huam ot ngai veng sing. Sinapikhaw nuam ngawl si tsi. ³⁸ Pan in! Na inn heh innro in zamnak si tu si. ³⁹ Na rel sing, ’BAWIPA ming in a leng tu heh thangphatnak si tasen,’ ti’n na ti ma hem, tu pin pan ka mu leh kel tu ngawlla si tsi," ti’n ti si.

¹ Jesuh ah kheh suak atsia, temple pin khen kiang si. A ningluntu te’n temple innpi ruai kheh amah muh nuam in a nenah hawh dang si. ² Jesuh in amahni kheh, "Me thil tehem heh mu utsim maw? Thungai ngai in nang rel sing, phereihnak si tu ngawl pelh in, nai munah lungto pakhat le pakhat delh dun ngawl in zamnak si tulai si," ti’n ti si. ³ Olive Mual ah a to lai in ninglun te kheh amahni ruak in ama nenah hawh dang atsia, "Me thil te heh kontik in si tu sim? Na leng leh hun le san bonak theihdiknak heh hei si tu sim? Kei rel in," ti’n ti dang si. ⁴ Jesuh in amahni kheh o atsia, "Tumaha zol ngah tuh ngawl in tsimkom un. ⁵ Heitasim tiphangin keima ming in minung tampi leng tu in, ’Keimah heh Khrih ah sing’ ti’n ti atsia, mi tampi zol tu si. ⁶ Raal tawng thu le raal leng thawm te za tulai si utsi. Nang thin tsawl kha tu ralring un. Tsimi thil tehem leng rori tu pelh in, a tawpnak si rih tu ngawl si. ⁷ Miphun pakhat le pakhat tawng dun tu in, ram pakhat le pakhat tawng dun tu si. Tsin, rian dung tu atsia, pulnat leng tu in, mun hem ah thinthing tu si. ⁸ Tsimi tehem heh rimnak a pannak si lai si. ⁹ "Tsimi phangin nangmahni heh mi te’n harsanak pe tuh in le reek tuh in mi kut ah aap tu atsia, keima ming manin miphun tehem in haw tu nang si. ¹⁰ Mi tampi khawsi tu in, pakhat le pakhat zuar dun in haw dun tu si. ¹¹ Profet dik ngawl te suak tu in, mi tampi zol tu si. ¹² Tsan nei ngawlnak a tam leita manin, mi tampi te itnak kheh kiam lemlem tu si. ¹³ Sinapikhaw a tawp tian a tuar tul zotu te heh sannak si tu si. ¹⁴ Me uknak thuthang pha heh miphun tehem nenah tetti a si tuh in leivum hem ah rel tu si. Tsimi zawh in a tawpnak leng tu si. ¹⁵ "Tsimi manin profet Daniel reelnak ’siatsuahtu ningtsirnung’ ah kheh mun thiangrim ah a ding nang mu phangin," a siartu ten thei tasen. ¹⁶ "Judea peng ah a om te’n mual vumah dan tasen. ¹⁷ Innkhum vumah a omtu hen inn sunga thil pakhat khat le tu in tolhsuk mah na tasen. ¹⁸ Lo ah a omtu khen a puan leleh tu in inn ah hong mah na tasen. ¹⁹ Tsimi hun in naupai te le nau kanghuam nei te tsa lungsenung tu si. ²⁰ Nang dan hun heh khawsik hun in, le Sabbath ni a si tuh ngawl in sawngen un. ²¹ Heitasim tiphangin, leivum a po pan pin pan tuni tian a om awng lai ngawl, tuzawh khen a om kel leh tu ngawl harsanak maktak tak kheh leng tu si. ²² Tsimi ni te kheh tsom tiarnak a si ngawl lekhaw, tumah sannak si tu ngawl si. Sinapikhaw dengnak te tsa in tsimi hun kheh tsom tiar tu si. ²³ "Tsimi phangin mi pakhat khat in, ’Pan un, nai ah hen Khrih ah om si,’ ti’n maw, ’Mia khen ah Khrih ah om si,’ ti’n a ti sikhen, diksang mah na ta un. ²⁴ Heitasim tiphangin khrih dik ngawl te le profet dik ngawl te suak tu in, a si theihnung lekhaw dengnak te riang a zolzo tuh in theihdiknak mak le thil khumnung mak muh tu si. ²⁵ Pan un, nang rel ham po si lang. ²⁶ "Tsimi manin mi te’n, ’Pan un, amah heh hampalak ah om reng si,’ ti’n a tilekhaw, hawh mah na ta un. A si ngawl lekhaw, ’Inn sungta ber khan sungah om si,’ ti’n a tilekhaw diksang mah na ta un. ²⁷ Heitasim tiphangin khawlip heh ni suaknak lam pin leng atsia, nidanak tian in a desur bangin, Mi Tsapa leng phangin si deve tu si. ²⁸ Mithi ruang om min hem ah muvanlai te khawm tu si. ²⁹ "Tsimi harsanak ni a bo phangin nii thim tu atsia, lade kheh de leh tu ngawlla si. Arsi te van pin tserkuai tu in, vana huham kheh thiing tu si. ³⁰ Tsimi phangin Mi Tsapa-a theihdiknak kheh van ah lang tu si. Tsin, leivuma hin le nam tehem kheh kap tu atsia, Mi Tsapa kheh vana meiro vum pin a huham le a tsungnungnak mak thaw a leng kheh amahni’n mu tu si. ³¹ Tsin, ama vanvummi te kheh ngunrasem ring ngaingai thaw leh tu in, van tawpnak pin hatlam van tawpnak tian, leilung ninglia ama dengnak te kheh mun khat ah khawm tu si. ³² "Theikuang thusantehnak heh zir ta un. A kaak dawnno te tawt atsia, a nah a tserh phangin, khaal hun a nong ongla lam kheh thei si utsi. ³³ Tsimi bangin nangmahni khen me tehem heh nang mu phangin, Mi Tsapa heh a leng tu zep si ongla in, kawka bul ah riang leng ongla si, ti thei ta un. ³⁴ Thungai ngai in nang rel sing, me tehem heh a kimsek ma hem tu san minung te heh bo rih tu ngawl si. ³⁵ Van le leilung pai tupelh in, ka thu heh pai tu ngawl si. ³⁶ "Tsimi ni le naazi kheh tumah in thei ngawl in, vanvummi te riang in thei ngawl si. Ei Pa bek in thei si. ³⁷ Mi Tsapa lengnak heh Noah san bang si tu si. ³⁸ Tsimi hun, tilau dung ma, Noah in tangphawlawng sungah a dum ni tian amahni’n ei le in atsia, huai dun si. ³⁹ Tilau dung atsia, ti in amahni a vaseng in a laanrel tian amahni’n heimah a thei dang ngawl bangin, Mi Tsapa leng phangin si tu si. ⁴⁰ Tsin, minung panih lo sungah om tu in, pakhat heh lenak si tu atsia, a khatta zamnak si tu si. ⁴¹ Nupang panih laideng ruan dun tu in, pakhat heh lenak si tu atsia, a khatta zamnak si tu si. ⁴² "Nang Bawipa leng hun nang thei ngawl manin, ngak reng ta un. ⁴³ Inn neitupa hen ruko leng hun tuh a thei ham tsuk asin, ngak reng tu in, a inn kheh phul siang tu ngawl si. ⁴⁴ Tsimi manin nangmahni khen ralring reng deve un. Heitasim tiphangin Mi Tsapa heh nang limdik ngawl hunkeek in leng tu si. ⁴⁵ "A bawipa’n ama innsang uktu tuh in le a hun manno in lai pe tu in a koihnak muangtaak le a tsim sel heh tu sim? ⁴⁶ A bawipa a leng phangin tsimi bangin a naper a munak sel heh mi ang si. ⁴⁷ Thungai ngai in nang rel sing, a bawipa’n a neinak tehem uktu tuh in tsimi sel kheh puah tu si. ⁴⁸ Sinapikhaw sel sesuak hen, ’Ka bawipa heh leng khawnu tu poh,’ ti’n a thin sung in ti tsawm atsia, ⁴⁹ a selpi te kheh vat in, zu ri te thaw in le ei in a om tsuk asin, ⁵⁰ a bawipa kheh a limdik ngawl ni, a thei ngawl hun in leng tu atsia, ⁵¹ amah kheh ten nih in ten tu in, mi sidat te tsonak bangin tso tiar tu si. Amah kheh tsimi ah kap kuaikuai in hariat tuihtuih tu si.

¹ "Vanvum uknak heh khangngai thiamlawh sawmkhat thaw bangve si. Amahni’n meiinn khai atsia, mohuaipa muak tu in hawh si. ² Amahni sung pin panga te heh a tsim si in, a dang panga lam heh a taw si. ³ Khangngai taw te’n meiinn keng pelh atsia, zinan keng ngawl si. ⁴ A tsim te hen meiinn keng in, a nuum sungah zinan keng meek si. ⁵ Mohuaipa a leng khawnu manin amahni kheh singsi in eihmu dangberh si. ⁶ "Zan laitum in, ’Ngai un! Mohuaipa leng si lei; suak in muak la un,’ ti’n aunak kheh za dang si. ⁷ Khangngai thiamlawh tehem khen tho atsia, amahni meiinn ten vaar dang si. ⁸ Tsimi phangin khangngai taw te’n a tsim te kheh, ’Kei meiinn mit susuk men si; nang zinan dawmlai kei khen un,’ ti’n ti si. ⁹ Sinapikhaw a tsim te’n, ’Nangmahni le keimahni mang tham keng ngawl kei si manin, nang khen thei tu ngawl si ung. A zuartu nenah hawh ta ula, nangmahni tsa lei tsawm ta un’ ti’n ti si. ¹⁰ Amahni’n zinan lei a hawh lan in mohuaipa leng atsia, a ralringlep te’n mo puai puah minah mohuaipa thaw lut dang si. Tsin, kong kheh kham si. ¹¹ "Tsimi tselh phangin khangngai dang te kheh leng leh deve in, ’Bawipa, Bawipa, kong kei hon in,’ ti’n ti dang si. ¹² Sinapikhaw ama’n amahni kheh o atsia, ’Thungai ngai in nang rel sing, nang thei ngawl sing,’ ti’n ti si. ¹³ "Tsimi manin Mi Tsapa leng ni tuh le a hun nang thei ngawl manin ralring reng ta un. ¹⁴ "Vanvum uknak heh a sel te koberh atsia, a thil te a aap tselh phangin ram khawlapi ah khualvakpa thaw bangve si. ¹⁵ Ama’n a sel te kheh amahni thil titheinak bangten in sel pakhat kheh talent panga pe atsia, a dang sel pakhat kheh talent panih pe in, a dang sel pakhat kheh talent pakhat pe si. Tsin, amah kheh khualvak nomper si. ¹⁶ Talent panga a saangtu khen hawh atsia, tsimi tangka thaw sumpei in a dang talent panga ngah si. ¹⁷ Tsimi bangin talent panih a saangtupa’n a dang talent panih ngah deve si. ¹⁸ Sinapikhaw talent pakhat a saangtupa’n hawh atsia, lei tso in a bawipa tangka kheh thup si. ¹⁹ A reipi phangin a bawipa kheh leng in amahni napernak tsazin khawm dang si. ²⁰ "Tsimi manin talent panga a saangtupa khen hawh atsia, a dang talent panga keng in, ’Bawipa, talent panga pe ka si tsi. Pan in, a dang talent panga a miat ngah bet sing,’ ti’n ti si. ²¹ A bawipa’n amah kheh, ’Sel pha le muangtaak, pha ngai ee; thil dawmno vumah muangtaak si tsi. Thil tampi uktu tuh in na puah tu sing. Na bawipa angnak sungah lut in,’ ti’n ti si. ²² Talent panih a sangtupa khen hawh deve in, ’Bawipa, talent panih pe ka si tsi. Pan in, a miat talent panih ngah bet sing,’ ti’n ti si. ²³ A bawipa’n, ’Sel pha le muangtaak, pha ngai ee; thil dawmno vumah muangtaak si tsi. Thil tampi uktu tuh in na puah tu sing. Na bawipa angnak sungah lut in,’ ti’n ti si. ²⁴ "Talent pakhat a sangtupa kheh hawh atsia, ’Bawipa, mi tsul har tawp na si lam na thei sing. Na tuh ngawlnaka aat atsia, na pawi ngawlnaka khawl si tsi. ²⁵ Nangmah ka kih manin na talent heh lei sungah thup sing. Pan in, na talent la meheh si,’ ti’n ti si. ²⁶ "A bawipa’n amah kheh o atsia, ’Nang, sel sesuak le thazawng, ka tuh ngawlnaka at atsia, ka pawi ngawlnaka ka khawl lam thei si tsi maw. ²⁷ Ka leng leh phangin ka talent tsawh a khang thaw ka ngah leh tuh in, tangka khawlnak ah na koih tuh sipelh si. ²⁸ Tsimita ama nena talent pakhat tsawh le ula, talent sawm a neitupa la pe un. ²⁹ Heitasim tiphangin a neitu tehem heh pe beetnak si tu in, nual ngai in nei tu si. Sinapikhaw a nei ngawltu heh a neinak lamtsang riang sutnak si tu si. ³⁰ Me heimah a nempi ngawl sel tsawh pulam khawthim sungah vawr ta un. Tsimi munah kap kuaikuai in hariat tuihtuih tu si,’ ti’n ti si. ³¹ "Mi Tsapa heh a tsungnungnak ah a thiangrim vanvummi tehem thaw a leng phangin, ama a tsungnung kumpibawi tohkheng ah to tu si. ³² A mai ah miphun tehem khawm dang tu in, tuukhaltu in kel te lak pin a tuu te a khen bangin, amahni kheh khen tu si. ³³ Tuu te kheh a taklam ah koih tu in, kel te kheh a kehlam ah koih tu si. ³⁴ "Tsimi phangin Kumpibawi pa’n a taklama te kheh, ’Ei Pa muitsu dong te, nai ah hawh ula, leivum a po pan pin pan nangmahni tsa remham saak uknak ro luah la un. ³⁵ Heitasim tiphangin ka rikaam phangin lai pe ka si utsi. Ka dangrum phangin in tuh pe ka si utsi. Mikhual ka si phangin nang inn ah dung tiar ka si utsi. ³⁶ Ka kawngkolh lai in vansilh ka si utsi. Ka naa lai in veh ka si utsi. Thawng ka to lai in ka nenah leeng si utsi,’ ti’n ti si. ³⁷ "Tsimi phangin midik te’n, amah kheh o atsia, ’Bawipa, kontik in na rikaam mu in lai pe atsia, na dangrum mu in in tuh na pe si ung im? ³⁸ Kontik lai in mikhual na si kheh mu in zindung tiar in, na kawngkolh mu in van na silh si ung im? ³⁹ Kontik in na naa mu in le thawng na to mu in na veh awng si ung im?’ ti’n ti dang si. ⁴⁰ Kumpibawipa’n amahni kheh o atsia, ’Thungai ngai in nang rel sing, me ka unaupi te lak pin a hei ngawl berno pakhat vumah nang puahnak heh keima vumah puah si utsi,’ ti’n ti si. ⁴¹ "Tsin, a kehlama te kheh, ’Nangnihni tsamnak te, ka nen pin diabol ah le ama vanvummi te tsa in remham saak kumkhaw mei sungah luun ta la un. ⁴² Heitasim tiphangin ka rikaam lai in lai pe ngawl ka si utsi. Ka dangrum lai in in tuh pe ngawl ka si utsi. ⁴³ Mikhual ka si lai in zindung tiar ngawl ka si utsi. Ka kawngkolh lai in van silh ngawl ka si utsi. Ka naa lai in le thawng ka to lai in veh ngawl ka si utsi,’ ti’n ti si. ⁴⁴ "Tsimi phangin amahni’n, ’Bawipa, kontik in na rikaam maw na dangrum maw mikhual na si maw na kawngkolh maw na naa maw na thawng to maw mu in na tuamlawm ngawl si ung im?’ ti’n o dang si. ⁴⁵ Ama’n amahni kheh o atsia, ’Thungai ngai in nang rel sing, me tehem lak pin a hei ngawl berno vumah nang puah ngawlnak heh keima vumah puah ngawl si nom si utsi,’ ti’n ti si. ⁴⁶ Tsin, me te heh kumkhaw erhnak min ah luunberh tu atsia, midik te heh kumkhaw nungnak ah leng tu si," ti’n ti si.

¹ Tsin, tibang hen thiltsang si. Jesuh in me thu tehem heh a rel tselh phangin, a ningluntu te nen ah, ² "Tuzawh ninih phangin Leekdelh Puai si tula in, Mi Tsapa heh thinglamteh ah tar tuh in aap tu si," ti’n rel koh si. ³ Suangbawi te, Daan zirhtu te le Jew te upa te’n suangbawi ber Kaiafas inn ah khawm dang atsia, ⁴ Jesuh ah kheh zoldeen in pom atsia, a reek dang theinak tuh thuruat dang si. ⁵ Sinapikhaw amahni’n, "Mipi te lak ah buainak a suak kha tu manin, puai sungah hen ti awl a sing," ti’n rel dang si. ⁶ Jesuh ah kheh Bethany khawa miphar Simon inn ah om si. ⁷ Tsabuai ah a to lai in minu pakhat in a manpha ngaingai sathau rim ur alabaster num khat keng atsia a nenah hawh in a lu ah pawh si. ⁸ Tsimi kheh a ningluntu te ’n a mu phangin, reh awh ngai dang in, "Heita me rim ur heh thehthawk thong tseih men nan tih im? ⁹ Me tah hen rim ur heh tangka tampi in zuar atsia, minawm te sawm sawn awhnung sipelh si," ti’n ti dang si. ¹⁰ Tsimi kheh Jesuh in thei atsia, "Heita minu heh dimdor tseih si utsim? Amah hen thilpha puah sak ka si. ¹¹ Minawm te heh nangmahni nenah om reng veng poh si. Sinapikhaw keimah zong heh nangmahni nenah om reng tu ngawl sing. ¹² Ka ruang vumah me sathau rim ur a pawhnak heh keimah vinak tuh in a puah hamnak si si. ¹³ Thungai ngai in nang rel sing, me thuthang pha heh leivum hem ah relnak a si phangin, minu ah phawkrengnak in me a puahnak heh rel veng tu si," ti’n amahni kheh ti si. ¹⁴ Ningluntu leinih laka pakhat Judas Iscariot tinak pa khen suangbawi te nenah hawh atsia, ¹⁵ "Amah heh nang kut ah aap lengkhaw hei ka pe tu si utsim?" ti’n ti si. Amahni’n ngun tangka sawmthum kheh siar atsia, Judas ah pe si. ¹⁶ Tsimi hun pin pan Judas in Jesuh ah a zuar theinak tuh hunpha zei si. ¹⁷ Tsol Phulh ngawlnak Sang Puai a nikhatnak ni in ningluntu te’n Jesuh nenah hawh dang atsia, "Leekdelh Puai simlai na ei min tuh heh kawnai ah puahsak kei sin deih kei si tsim?" ti’n ti dang si. ¹⁸ Jesuh in, "Khawpi sungah hawh ta ula, mipa pakhat kheh, ’Sayapa’n, "Ka hun nong ongla in, ka ningluntu te thaw Leekdelh Puai heh na inn ah mang tu sing," ti’n ti si,’ ti’n ti ta un," ti’n ti si. ¹⁹ Tsimi manin ningluntu te’n Jesuh relnak bangin puah in, Leekdelh Puai simlai puah ham si. ²⁰ Simlam phangin Jesuh ah kheh a ningluntu te thaw to dang si. ²¹ Simlai a ei dang lai in, Jesuh in, "Thungai ngai in nang rel sing, nangmahni sung pin pakhat in zuar tu ka si," ti’n amahni kheh ti si. ²² Ningluntu te kheh khawngai tihtak in khawngai dang in, "Bawipa, keimah siing maw?" ti’n pakhat seuhseuh in ti dang si. ²³ Tsimi phangin Jesuh in amahni kheh o atsia, "Pakan pakhat sungah keimah thaw a kut in sang a niim khattupa in zuar tu ka si. ²⁴ Laithiangrim sungah ngannak bangin Mi Tsapa heh hawh kul tu si. Sinapikhaw Mi Tsapa a zuartu pa tsa in lungsenung si. A nu pum sung pin a suak awl sawn ta asin ama tsa pha sawn tu pelh si," ti’n ti si. ²⁵ Tsimi phangin amah a zuar tseih tu Judas in o atsia, "Rabbi, keimah siing maw?" ti’n ti si. Jesuh in, "Na awnnak bangin si si," ti’n ti si. ²⁶ Lai a ei dang lai in Jesuh in sang kheh le atsia, Pathian paak in hem atsia, a ningluntu te kheh pe in, "Meheh ka ruangpum si. Le ula ei un," ti’n ti si. ²⁷ Tsin, khuat kheh le atsia, Pathian apaak tselh phangin amahni kheh pe atsia, "Nang vaseng in in un. ²⁸ Meheh mi tampi te sualzahnak tsa in a luang ka thisena thukam ther si. ²⁹ Sinapikhaw nang rel sing, tu pin pan ei Pa uknak ah nangmahni si tsapit zu ther ka in ni tian me tsapit zu heh in leh tu ngawlla sing," ti’n ti si. ³⁰ La pakhat a sa dang tselh phangin Olive Mual ah hawh dang si. ³¹ Tsimi phangin Jesuh in amahni kheh, " ’Tuukhal pa kheh vaat angkhaw, tuu hon te kheh dansep tu si,’ ti’n ngannak bangin, tuzan hen keima manin nang vaseng in pialberh tu si utsi. ³² Sinapikhaw tho tiarnak ka si zawh in, Galilee ah hawh ham tu sing," ti’n ti si. ³³ Piter in amah kheh o atsia, "Ka rualpi tehem a pial sikhen, keimah vang pial himhim tu ngawl sing," ti’n ti si. ³⁴ Jesuh in, "Thungai in na rel sing, tuzan hen ar khuang ma in veithum tian phaa tu ka si tsi," ti’n ti si. ³⁵ Piter in amah kheh, "Nangmah thaw thi kul tu ka si riang in na phaa tu ngawl sing," ti’n ti si. Tsimi bangin ningluntu tehem khen ti dang ten si. ³⁶ Tsimi phangin Jesuh ah kheh a ningluntu te thaw Gethsemane ti’n konak vuan sungah hawh atsia, "Me khen ah hawh in saw ka ngen sung hem, nai ah to dang rih ta un," ti’n amahni kheh ti si. ³⁷ Jesuh in Piter ah le Zebedee tsapa panih te kheh huai si. Amah heh lungse in thintsawl pan si. ³⁸ Tsin, amahni kheh, "Ka nungnak heh lungse tihtak in lungse leita in, ka thi ngawl men phang sing. Nai pin hen ka ngak pi rih un," ti’n ti si. ³⁹ Mailam ah dawmlai hawh rih atsia, bok in, "Maw ei Pa, me khuat hen, a si thei lekhaw ka leek tasen. Sinapikhaw keima deihnak bang si ngawl in, nangma deihnak bangin si tasen," ti’n sawngen si. ⁴⁰ Tsin, a ningluntu te nenah a hawh phangin a eihmu dang reng kheh tawk atsia, Piter nen ah, "Heita naazi pakhat sungno pohkhen ka ngak pi zo ngawl si utsim maw? ⁴¹ Sualroihnak sungah nang da tuh ngawl in sawngen thahlam in ngak un. Raula hen otngai pelh atsia, tisa heh a thaneem si," ti’n ti si. ⁴² A veinihnak hawh lehleu in, "Maw ei Pa, me khuat heh in ngawl in keimah leek thei tu ngawl a si lekhaw, na deihnak bangin si tasen," ti’n sawngen si. ⁴³ Amahni nenah hawh in, a eihmu sung leita manin a eihmu dang reng kheh tawk lehleu si. ⁴⁴ Amahni kheh zam atsia, hawh lehleu in a masa bangpah in a veithumnak sawngen lehleu si. ⁴⁵ Tsimi zawh in a ningluntu te nenah hawh atsia, "Tutian hen eihmu in tsawlom reng lai si utsim maw? Pan un, a hun khawnen ongla in, Mi Tsapa heh misual te kut ah aap ongla si. ⁴⁶ Tho la ula; hawh dang ala sing. Pan un, keimah a aaptupa leng ongla si," ti’n ti si. ⁴⁷ Ngai un, a awn tseih lai tum in, ninglun leinih laka ninglun pakhat Judas ah kheh suangbawi te le mipi laka Jew te upa te lehnak vangsang le thingtawng vong mipi te thaw in leng si. ⁴⁸ Amah a zuartupa’n amahni kheh theihdiknak pe in, "Ka thuutnakpa heh amah si. Pom un," ti’n rel ham si. ⁴⁹ Makhat in Judas in Jesuh nenah hawhngut atsia, "Rabbi, dam tsim!" ti’n thuut si. ⁵⁰ Jesuh in amah kheh, "Ei rual, hei manin nai ah leng si tsim?" ti’n ti si. Amahni’n zuan dang in, pom atsia huai dang si. ⁵¹ Makhat in Jesuh nenah a om deve tu pakhat in a kut suah in a vangsang dawk atsia, suangbawi bera selpa beng kheh sat tawng sak si. ⁵² Tsimi phangin Jesuh in, "Na vangsang tsawh a omnak ah thiat leh in. Vangsang a vong tehem heh vangsang ah ral thong tu si. ⁵³ Tuhen ei Pa nenah ngen thei ngawl in ka ring si tsim maw? Ka ngen tsuk asin ei Pa’n vanvummi raalkap hon legion leinih tah in tam sawn a leh tu ngawl in ring si tsim maw? ⁵⁴ Tsimi bang a si tsuk asin, kawtibang in Laithiangrim heh kim thei tu sim?" ti’n ti si. ⁵⁵ Tsimi hun in Jesuh in mipi te kheh, "Ruko pom tu bangin vangsang le thingtawng thaw leng si utsim maw? Ni tin in nangmahni thaw to in temple reen sungah thu zirh sing. Pom ngawl ka si utsi. ⁵⁶ Profet te ngannak Laithiangrim a kimsek theinak tuh in me thil tehem heh tsang si," ti’n rel si. Tsimi phangin ningluntu tehem in amah kheh zam in dan dangberh si. ⁵⁷ Jesuh ah a pomtu te’n amah kheh suangbawi ber Kaiafas nenah huai dang si. Tsimi munah Daan zirhtu te le upa te khawm dang si. ⁵⁸ Piter in khawla tsawng pin lun in suangbawi bera inntual tian in lun si. Inntual ah lut in a tawpnak mu nuam in sel te nenah to deve si. ⁵⁹ Suangbawi te, upa te le Sanhedrin pi khen Jesuh ah a reek theinak tuh in a maan ngawl tetti in dingtu tuh zei si. ⁶⁰ Sinapikhaw tumah tawk ngawl si. A maan ngawl tetti dingtu mi tampi suak pelh atsia, amah reek theinak tuh tetti heimah tawk zo ngawl si. Tawpsannak in a maan ngawl tetti ding tu mi panih suak si. ⁶¹ Amahni’n, "Me unau in, ’Pathian temple heh phe atsia, nithum sung in sa leh thei sing,’ ti si," ti’n ti si. ⁶² Suangbawi ber in tho atsia, "Heimah o tu ngawl si tsim maw? Me te hen nangmah do in tetti a relnak hei sim?" ti’n ti si. ⁶³ Sinapikhaw Jesuh ah kheh mengdeen si. Suangbawi ber in, "Nangmah heh Pathian Tsapa Khrih ah na si maw na si ngawl keimahni na rel tuh in, a nung Pathian ming sal in na tsial tsawm tiar sing," ti’n ti si. ⁶⁴ Jesuh in amah kheh, "Na awnnak bangin si sing. Sinapikhaw na rel sing, tu zawh in Mi Tsapa heh Huham neitu taklam ah to atsia, vana meiro vumpin a leng kheh mu tu si tsi," ti’n ti si. ⁶⁵ Tsimi phangin suangbawi ber in a vansilh bal atsia, "Ama’n Pathian relse in awn si. Tetti dang kul lai si sing maw? Ngai un, Pathian a relsenak heh tu rori hen za ongla si utsi. ⁶⁶ Kawti’n ruat si utsim?" ti’n amah ni kheh ti si. Amahni’n, "Amah heh thi taak si," ti’n o dang si. ⁶⁷ Tsimi phangin amahni’n Jesuh mai kheh tsil thuh atsia, vaat in, midang te’n beeng si. ⁶⁸ Amahni’n, "Khrih, nangmah a vaattu heh tu sim? Kei rel in," ti’n ti dang si. ⁶⁹ Piter ah kheh pulam inntual ah a to lai in, omlawh khangngai pakhat in a nenah hawh atsia, "Nangmah khen heh Galilee te Jesuh pawlpinak si deve si tsi," ti’n ti si. ⁷⁰ Sinapikhaw Piter in amahni tehem mai ah phaa in, "Na awnnak tsawh thei nom ngawl sing," ti’n ti si. ⁷¹ Tsimi phangin Piter ah kheh kongbiang pulam ah hawh in a dang khangngai pakhat in amah kheh mu atsia, "Mepa khen heh Nazareth te Jesuh pawlpinak si deve si," ti’n tsimi munah om te kheh rel si. ⁷² Sinapikhaw Piter in tsial tsawm in, "Mepa heh thei nom ngawl sing," ti’n phaa si. ⁷³ Dawmlai a rei zawh in tsimi munah a ding tu te kheh hawh atsia Piter ah kheh, "Nangmah khen heh amahni laka mi pakhat si deve himhim si tsi. Na kamtsawi in theihnung diar si tsi," ti’n ti si. ⁷⁴ Tsimi phangin Piter in tsam tsawm in, tsial tsawm atsia, "Mepa heh thei ngawl sing," ti’n ti si. Tsimi tsang in ar khuang si. ⁷⁵ Piter in, "Ar khuang ma in veithum tian phaa tu ka si tsi," ti’n Jesuh awn awngnak la phawk leh si. Tsin, pulam ah suak atsia nase ngai in kap si.

¹ Zinglam phangin suangbawi tehem le mipi te upa tehem in Jesuh ah raaltsan in a reek theinak tuh thurel khawm dang si. ² Amahni’n Jesuh ah kheh a henpek tselh phangin, huai dang atsia, uktu Pontius Pilat nenah aap dang si. ³ Amah a zuartu Judas in Jesuh ah a han lam thei tsawm in, sir pittseih leh atsia ngun tangka sawmthum kheh suangbawi te le upa te pe leh si. ⁴ Ama’n, "Sualnak nei ngawl thisen luang tu in ka zuar manin, sual ngai sing," ti’n ti si. Amahni’n, "Keimahni thaw hei sengkha sim? Na puahnak heh pan tsawm in," ti’n ti dang si. ⁵ Tsimi phangin a ngun tangka la temple Mun Thiangrim ah bung atsia, temple pin kiang in, hawh atsia, ri awk si. ⁶ Suangbawi te’n ngun tangka kheh khul atsia, "Me tangka heh thisen man a si manin, temple alu lak ah khawm tuh in mawi ngawl si," ti’n ti si. ⁷ Amahni’n rel dang atsia, mikhual te vinak tuh in beel vawtupa lo leinak in mang si. ⁸ Tsimi manin tuni tian tsimi lo kheh, Thisen Lo, ti’n ti si. ⁹ Tsimi phangin profet Jeremiah in, "Ama man a tennak ngun tangka sawmthum, Israel tsa te man kheh amahni’n le si. ¹⁰ Tsin, BAWIPA relnak bangin beel vawtupa lo man in pe si," ti’n a rel hamnak kheh kim si. ¹¹ Tsin, Jesuh ah kheh uktupa mai ah ding in, uktupa’n, "Jew te Kumpibawi si tsim maw?" ti’n dong si. Jesuh in amah kheh, "Na awnnak bangin si sing," ti’n ti si. ¹² Suangbawi te le upa te’n sual tampi nawn pelh atsia, Jesuh in heimah o ngawl si. ¹³ Tsimi phangin Pilat in, "Me nangmah sual a zeinak te heh za ngawl si tsim maw?" ti’n ti si. ¹⁴ Jesuh in kam khat pohkhen a o nuam ngawl manin uktupa kheh ambuk zo si. ¹⁵ Uktupa in Leekdelh Puai phangin mipi te deihnak thawngto pakhat kheh suah sak veng si. ¹⁶ Amahni’n thawngto ming thang ngai Barabbas ti’n konakpa nei si. ¹⁷ Tsimi manin amahni kheh munkhat ah a khawm dang phangin Pilat in, "Nangmahni nenah tu sawn leh tu in deih ka si utsim? Barabbas ah sawn maw, Khrih ah tinak Jesuh ah sawn sim?" ti’n amahni kheh dong si. ¹⁸ Heitasim tiphangin amahni’n a iksik manin ama nenah a aap lam kheh Pilat in thei si. ¹⁹ Thukhennak tohkheng vumah a to lai in, a zii in mi pakhat leh atsia, "Me mi dikpa tsawh heimah ti mah nen. Heitasim tiphangin ama manin tuni ka mang ah thil tampi tuar sing," ti’n thulen si. ²⁰ Sinapikhaw suangbawi te le upa te’n Barabbas ah sawn ngen atsia, Jesuh ah heh reek tiar tu in mipi te kheh so si. ²¹ Uktupa’n amahni kheh o atsia, "Tu sawn heh luat tiar ka sin deih si utsim?" ti’n ti si. Amahni’n, "Barabbas ah," ti’n ti si. ²² Pilat in amahni kheh, "Khrih ah tinak Jesuh ah heh kawti’n ti ang im?" ti’n dong si. A vaseng in, "Thinglamteh ah khennak si ta sen," ti’n ti dang si. ²³ Tsimi phangin mangkipa’n, "Heita sim? Thil pha ngawl hei puah sim?" ti’n ti si. Sinapikhaw amahni’n, ’Thinglamteh ah khennak si ta sen," ti’n au leilei dang si. .i. ²⁴ Pilat in heimah a zing thei ngawl lam thei tsawm in, mipi te a buai leilei kheh a mu phangin, mipi mai ah ti le in a kut som atsia, "Keimah heh me mi dikpa thisen pin thiang sing. Amah heh nang nuam bangin zing ta la un," ti’n ti si. ²⁵ Mipi tehem in, "Ama thisen tsawh keimahni vumah le kei tsa te vumah leng tasen," ti’n o dang si. ²⁶ Tsimi phangin Pilat in mipi te tsa in Barabbas ah kheh luat tiar atsia, Jesuh ah kheh savun rihual in vaat atsia thinglamteh ah khen tuh in amahni aap si. ²⁷ Uktupa raalkap te’n Jesuh ah kheh Praetorium tinak uktupa inn ah huai dang in, garrison tinak raalkap honkhat a vaseng in kawn dang si. ²⁸ Amahni’n a puan suutsak atsia, puan sennum silh dang si. ²⁹ Tsin, lingkaak lupawng phiar atsia, a lu ah khim tiar in, a taklam kut ah phaikuang von dang si. A mai ah khuklepbok in, "Jew te Kumpibawipa, upat taak," ti’n nihtsiam bawlnak in mang dang si. ³⁰ Amah kheh tsil thuh dang atsia, phaikuang le in, a lu pin vaat si. ³¹ Nihtsiam bawlnak in a mang dang tselh phangin puan sennum a silh dangnak la suah leh sak atsia, ama puan kheh silh leh in, thinglamteh ah reek tuh in huai dang si. ³² A hawhpi dang lai in Sairin khaw te Simon tinak pa kheh tawk dang in, thinglamteh phur tiarlok dang si. ³³ Tsin, Golgotha tinak, luruh mual ti’n konak mun a leng dang phangin, ³⁴ thil kha rawinak tsapit zu pawng in tiar dang si. Ama’n tep atsia in nuam ngawl si. ³⁵ Tsin, amahni’n Jesuh ah kheh thinglamteh vumah khen dang si. "Amahni’n ka puan heh sem dang in, ka angki tsual tsa in aisan dang si," ti’n profet-a rel hamnak a kimnak tuh in, a puan kheh aisan in sem dang si. ³⁶ Amahni’n tsimi munah to dang in, amah kheh kil dang si. ³⁷ Amah sual a nawnnak, "ME HEH JESUH, JEW TE KUMPIBAWIPA SI," ti’n ngannak lai kheh a lu vumah taar si. ³⁸ Ruko panih te khehkhen amah thaw thinglamteh ah khen deve in, a taklam ah pakhat tar in a kehlam ah pakhat tar si. ³⁹ Tsimi mun a tawntu te’n relsenak thaw lupei in, awr se leh atsia, ⁴⁰ "Temple pi phe atsia, nithum sung in a sa leh tum pa, Pathian Tsapa na si lekhaw, san tsawm la thinglamteh pin tson tsuarsuk in," ti’n ti si. ⁴¹ Tsimi bangin suangbawi te, Daan zirhtu te le upa te’n amah kheh nihtsiam bawlnak in mang atsia, ⁴² "Midang te zong san thei, mah le mah san tsawm thei ngawl; Israel te Kumpibawi asi lekhaw thinglamteh pin hen tsuarsuk sehla um tu si ung. ⁴³ Ama’n Pathian aan si, ’Keimah heh Pathian Tsapa sing,’ ti’n ati man in, Pathian in amah heh a san tu a si lekhaw, tu rori hen san sen," ti’n ti dang si. ⁴⁴ Thinglamteh ah khen devenak damiah te khehkhen amah kheh urh deve si. ⁴⁵ Sun laitak pin simlam naazi pathum tian ram sung hem ah thimla dung si. ⁴⁶ Simlam naazi pathum lun in Jesuh in, "Eli, Eli, lama sabachthani," ti’n ring ngai in au si. Tsimi heh, "Ka Pathian, ka Pathian, heita zam ka si tsim?" tinak si. ⁴⁷ Tsimi munah a ding mi honkhat te’n a za phangin, "Mepa hen Elijah ah ko tseih si," ti’n ti si. ⁴⁸ Makhat in amahni laka mi pakhat in dan nawmnawm atsia, ti huup thei thil pakhat kheh le in, tsapit zu pawng sungah nim atsia, phaikuang rel ah koih in a tsawp tuh in tokso si. ⁴⁹ Midang te’n, "Om men ta la sen. Amah san tu in Elijah ah leng na maw, pan tsuk rih a sing," ti’n ti si. ⁵⁰ Jesuh ah kheh ring ngai in a au lehleu tselh phangin, a raula kheh suak si. ⁵¹ Ngai in, temple sunga puan zarnak kheh a vum pin pan a tedop tian bal zur in khennih in tsan si. Thinthing atsia, lungpi te kehberh si. ⁵² Thaan te kheh hong atsia, a eihmu saak mi thiangrim tampi te ruang te kheh tho si. ⁵³ Jesuh ah kheh a tho leh zawh in, amahni’n thaan sung pin suak atsia, khawpi thiangrim ah hawh in, mi tampi te nenah lang si. ⁵⁴ Jesuh ah a kiltu raalkap zakhat uktupa le a kilpinak te’n thinthing le thiltsang te kheh a mu dang phangin, kih ngaingai in, "Mepa heh Pathian Tsapa taktak si," ti’n ti dang si. ⁵⁵ Galilee pin pah amah lun atsia amah tuamlawmtu nupang te’n ralpan dang reng si. ⁵⁶ Amahni lak ah Mary Magdalene, Jeim le Joses te nu Mary ah le Zebedee tsapa te nu peh si. ⁵⁷ Simlam phangin Arimathia te mi hausa ngai Joseph ah leng si. Amah heh Jesuh ningluntu pakhat si deve si. ⁵⁸ Mepa hen Pilat nenah hawh atsia, Jesuh ruang kheh ngen si. Pilat in Jesuh ruang kheh amah pe tu in thupe si. ⁵⁹ Joseph in Jesuh ruang kheh le atsia, puan nemno thiangsek thaw tsuun si. ⁶⁰ Lungretnak thaan ther sungah vi in, thaan kawka kheh lung lianpi thaw in khaam atsia hong dang si. ⁶¹ Tsimi ah Mary Magdalene ah le a dang Mary ah peh deve in, thaan maitsang phet ah to kawm reng si. ⁶² Thawithang ni a thaizing in suangbawi te le Farasi te kheh Pilat inn ah khawm dang si. ⁶³ Amahni’n, "Bawipa, me mi zoltupa hen, ’Ni thum zawh in tho tu sing,’ ti’n a nung lai a tinak kheh nik reng si ung. ⁶⁴ Tsimi manin a nithumnak ni tian thaan kheh kilpek tu in thupe in. Tsimi a si ngawl lekhaw a ningluntu te’n zan lan in ru akhaw mipi te kheh, ’Amah heh mithi te lak pin tho ongla si,’ ti’n ti tu si. Tsimita a dawlta sonnak heh a masa sonnak tah in rohse sawn tu si," ti’n ti si. ⁶⁵ Pilat in amahni kheh, "Nangmahni’n a kiltu raalkap nei si utsi. Hawh ta ula, nang thiamthiam in thaan kheh him tiar ta un," ti’n ti si. ⁶⁶ Amahni’n thaan ah hawh dang atsia, thaan kheh him ngai in puah in, kongkham lunglian pi vumah tatsik khen atsia, thaan kiltu te koih si.

¹ Sabbath ni zawh, nipi khat sunga masa ber ni khawvar ma deuh in Mary Magdalene ah le a dang Mary ah kheh thaan pan tu in hawh kawm si. ² Ngai in, Bawipa vanvummi pakhat kheh van pin tolhsuk atsia, thaan ah hawh in thaan kawkka-a lung lianpi kheh thawn atsia, a vumah a to manin nase ngai in thinthing si. ³ A mai heh khawlip bang si in, a vansilh heh vur bangin ngo si. ⁴ Thaan kiltu te kheh amah a kih manin thinphu leita in mithi bang si dang si. ⁵ Sinapikhaw vanvummi in minu te kheh o atsia, "Kih mah na un. Thinglamteh ah khennak Jesuh ah nang zei lam nang thei sing. ⁶ Nai ah om leh ngawlla si. A rel ham saak bangin tho leh ong si lei. Nai ah hawh ula, Bawipa zaunak heh pan un. ⁷ Tsin, hawh nawmnawm ta ula, amah heh mithi te lak pin tho ong si lei, ti’n ningluntu te kheh rel ta un. Thu ngai in amah heh Galilee ah hawh ham ongla si. Tsimi ah amah mu tu si utsi. Ngai un, nang rel ong si lang," ti’n ti si. ⁸ Amahni kheh kih thah in le angngai in thaan pin hong nawmnawm kawm si. Tsin, ningluntu te nenah me thu heh rel tu in dan nawmnawm kawm si. ⁹ Me thu heh ningluntu te rel tu in a hawh kawm tseih lai in, pan in, Jesuh in amahni kheh muak atsia, "Ang un," ti’n ti si. Amahni’n a nenah hawh atsia, a kawng kheh huampek in, be kawm si. ¹⁰ Tsimi phangin Jesuh in amahni kheh, "Kih mah na un. Hawh ta ula, Galilee ah hawh tu in ka u le nau te kheh rel ta un. Tsimi ah mu tu ka si utsi, ti’n rel ta un," ti’n ti si. ¹¹ Amahni kheh a hong kawm tseih lai in, ngai in, raalkap honkhat te kheh khawpi sungah hawh atsia, suangbawi te kheh thiltsang tehem relsek si. ¹² Suangbawi te’n upa te thaw thuruat dang atsia, raalkap te kheh tangka tampi pe in, ¹³ "’Zan lan in a ningluntu te leng atsia, amah kheh ru dang si,’ ti’n rel ta un. ¹⁴ Me thu heh mangki pa’n a za kha lekhaw, keimahni’n amah kheh kun a ungkhaw, nang luat tiar tu poh si ung," ti’n ti si. ¹⁵ Tsimi manin amahni’n tangka kheh le atsia, amahni tiarnak bangin rel si. Tuni tian in me thu heh Jew te lak ah rel hehunak si lai si. ¹⁶ Ningluntu leikhat te kheh Galilee-a Jesuh in amahni a muhnak mual ah hawh dang si. ¹⁷ Amah a mu dang phangin be dang si. Sinapikhaw pawlkhat te’n ummawh si. ¹⁸ Tsimi phangin Jesuh in amahni kheh zuan atsia, "Van le lei-a thuneinak tehem penak si ongla sing. ¹⁹ Tsimi manin hawh ta ula, miphun tehem kheh ka ninglun si tu in puah ta un, Pa le Tsapa le Raula Thiangrim ming in niimberh ta un. ²⁰ Tsin, nangmahni thu ka penak tehem heh lun tu in zirh ta un. Ngai un, san a bo tian in nangmahni nenah om reng tu sing," ti’n ti si. Amen.