LUKA
11 Keimahni lak ah tsiang ngai in a tsang me tangthu heh mi tampi te’n a lamlunno in ngan ongla si. 2 Amahni’n a pan pin mit rori in a mutu te le thu-a na a pertu te’n keimahni relnak bangin ngan si. 3 Tsimita upat ngainak Theophilus keimah khen tsimi thiltsang tehem kheh a pan pin pan tsiltsang ngai in kan atsia, nangma tsa in a lamlunno in ka ngan a sin pha deve bel tu in ruat sing. 4 Tsimi heh nangma zirhnak thu te la a man rori si, ti’n na thei tuh in si. 5 Herod in Judea peng kumpibawi a si lai in, Abijah pawl te suang Zakhariah tinak pa om si. A zi heh Aaron hin si atsia, a ming heh Elizabeth ah si. 6 A nupa in Pathian mai ah diktsang ngaino in nung kawm in, thukhaam tehem le Bawipa thupenak tehem kheh sawi bang ngawl in lun kawm si. 7 Sinapikhaw Elizabeth ah heh a tsing a si ta tsa tsawi kawm ngawl si. Tsin, amahni khen teer ngai ongla si. 8 Tsin, tibang hen thiltsang si. Ama pawl te suang na a per hun in, Pathian mai ah suang na a per laitak in, 9 suang te ti daan bangin Bawipa temple sungah lut atsia, rim ur haltu tuh in aisannak kheh ama vumah tsu si. 10 Rim ur a hal sung hen mihonpi te a vaseng in pulam ah sawngen dang tseih si. 11 Tsimi lai in Bawipa vanvummi pakhat kheh ama nenah lang atsia, rim ur halnak bawlnak dawndel taklam ah ding si. 12 Zakhariah in vanvummi kheh a mu phangin ambuk in kih ngai si. 13 Sinapikhaw vanvummi in, "Zakhariah, kih mah nen. Na sawngennak heh Pathian in za ongla si. Na zi Elizabeth in tsapa tsawi tu in, a ming heh Johan, ti’n sa tu si tsi. 14 Nangmah hen ang in sah a tsikhaw, a suak phangin mi tampi te’n ang ngai tulai si. 15 Amah heh Bawipa mai ah mi mak si tu in, tsapit zu le a rithei zu in tu ngawl si. A nu pum sungah a om lai pah in Raula Thiangrim thaw dim ham reng tula si. 16 Israel tsa tampi te kheh amahni Bawipa Pathian lam ah huai leh tu si. 17 ’Pa te thinlung kheh tsa te lam ah her leh tu in,’ thurelh khelh te kheh midik te tsimnak lam ah huai tu in le mipi te kheh Bawipa tsa remham sak tu in Elijah raula le huham nei in Bawipa mai ah hawh tu si," ti’n rel si. 18 Tsimi phangin Zakhariah in vanvummi kheh, "Tsimi tsawh kawti bangin thei thei tu sing im? Keimah heh teer ngai ongla in, ka zi khen heh teer ngai ongla si," ti’n ti si. 19 Vanvummi in amah kheh o atsia, "Keimah heh Pathian mai ah a dingtu Gabriel ah si in, me angnung thuthang pha te heh nangmah rel tu in le sel tu in lehnak sing. 20 Ngai in, a hunkim phangin a leng tulai ka thurelnak te heh na dik sang ngawl manin, me thil te a leng kim ni ma hem leiloh thei ngawl in awn thei tu ngawl si tsi," ti’n ti si. 21 Mipi te’n Zakhariah ah kheh ngak dang reng in, temple sungah a nuamda reng heh lunglawi ngai dang si. 22 Sinapikhaw a suak phangin amahni kheh awnpi thei ngawl si. A kut kawk in amahni a awnpi manin le a awn thei ngawl nom reng manin, temple sungah lalhnak a mu lam kheh mipi te’n thei si. 23 Tsin, tibang hen thiltsang si. Zakhariah ah khen a naper a tselhtsang in a inn ah hong si. 24 Tsimi zawh in a zi Elizabeth in naupai si. La nga sung kong khahkhum tsawm atsia, 25 "Mi te zohsuamnak ka sinak heh le sak tu in Bawipa’n keimah a pan phangin, tibang hen puah sak ka si," ti’n ti si. 26 Laruk phangin Pathian in vanvummi Gabriel ah kheh Galilee peng Nazareth khaw, 27 David tsanawn Joseph halh hamnak khangngai thiamlawh nenah leh si. Khangngai thiamlawh ming heh Mary ah si. 28 Vanvummi khen Mary nenah hawh atsia, "Ang in, mitmai pha a ngah bertu, Bawipa heh na nenah om si. Nupang hem lak pin muitsu thupha a dong bertu si tsi!" ti’n ti si. 29 Sinapikhaw Mary in amah kheh a mu phangin a awnnak manin thuruat har ngai atsia, ati nuamnak kheh ngaisung si. 30 Tsimi phangin vanvummi in, "Mary, thinphu mah nen. Heimansim tiphangin Pathian mitmai pha ngah si tsi. 31 Ngai in, naupai a tsikhaw, tsapa hing tu in, a ming heh, JESUH ti’n sa tu si tsi. 32 Amah heh mi thupi ngai si tu in, a Daak bera Tsapa ti’n ponnak si tu si. Bawipa Pathian in a pa David tohkheng kheh amah pe tu si. 33 Ama’n Jakob tsanawn kheh kumkhaw in uk tu in, a uknak kheh bo tu ngawl si," ti’n ti si. 34 Tsimi phangin Mary in vanvummi kheh, "Mipa riang ka thei lai ngawl, me thil heh kawti bangin si thei tu sim?" ti’n ti si. 35 Vanvummi khen amah kheh o atsia, "Na vumah Raula Thiangrim leng akhaw, Daak bera huham in lim tu na si. Tsimi manin na hingnak a Thiangrimpa heh Pathian Tsapa, ti’n ponnak si tu si. 36 Ngai in, a tsing tinak na u Elizabeth in a teer zawh in tsapa pai in, tuhen a laruknak si ongla si. 37 Heimansim tiphangin Pathian lam ah a si theihnung ngawl heimah om ngawl si," ti’n ti si. 38 Tsimi phangin Mary in, "Ngai in, keimah heh Bawipa selnu poh sing! Na awnnak bangin ka vumah leng ta sen," ti’n amah kheh ti si. Tsin, vanvummi kheh a nen pin kiang si. 39 Tsimi hun in Mary ah kheh tho atsia, mual vum rama Judah khawpi ah nawhnah ngai in hawh si. 40 Zakhariah inn sungah lut in, Elizabeth ah kheh nukset in awnpi si. 41 Tsin, tibang hen thiltsang si; Elizabeth in Mary ponnak kheh a za phangin, a sunga nauno kheh ang in do atsia, Elizabeth ah kheh Raula Thiangrim thaw in dim si. 42 Tsimi phangin ring ngai in, "Nangmah heh minu hem lak pin muitsu thupha dongtu nu si in, na sunga nauno khen heh muitsu thupha dong si! 43 Hei manin ka Bawipa nu heh ka nenah hawh sim? 44 Ngai in, na ponnak aw ka za natsang in ka sunga nauno heh ang in do si. 45 A nenah Bawipa’n thu a relnak kim rori tu in a umtu minu heh muitsu dong minu si," ti’n Mary ah kheh ti si. 46 Mary in, "Ka nungnak in Bawipa thangphat si. 47 Ka raula heh keimah Santu Pathian vumah ang ngai si. 48 A selnu mi nauta sinak heh mu sak ka si. Heimansim tiphangin, ngai in, tu pin pan khang taak hema minung te’n muitsu dongtu, ti’n ti tu ka si. 49 Heimansim tiphangin me huham neipa hen thilmak te puahsak ka si. Thiangrim heh ama ming si. 50 A ngeihharnak heh khang khat zawh khang khat amah a kihzahtu te vumah om si. 51 A baan thaw a kolnak muh ongla in, mi puarthau te thinlung sunga ruatnak te kheh thehsep sak si. 52 Mi thupi te kheh amahni tohkheng pin lakulh atsia, mi nauta te tsawisang si. 53 Rikaam te kheh thilpha te thaw kham tiar in, mi hausa te kheh kut ro thong in hawlberh si. 54 A ngeihharnak phawk rengnak tuh in a sel Israel ah kheh bawm si. 55 Tsimi heh kumkhaw tsa tuh in kei pupa te nenah le, Abraham ah le a tenawn a tsanawn te nenah a rel saak bangin si," ti’n ti si. 56 Mary ah kheh Elizabeth nenah lathum duk a om zawh in, a inn ah hong leh si. 57 Elizabeth in a nau hing hun a kim phangin, tsapa hing si. 58 Amah kheh Bawipa’n ngeihharnak lianpi a muh lam a inn nen te le unaupi te’n a za phangin, angpi ngaingai dang si. 59 Tsin, tibang hen thiltsang si; niriat ni in amahni’n nauno vunrel tensak tu in leng dang atsia, a ming kheh a pa ming khuah Zakhariah ti’n sa tu in thawi dang si. 60 Tsimi phangin a nu’n amahni kheh o atsia, "Si ngawl si. A ming heh Johan ti’n sa tuh si," ti’n ti si. 61 Sinapikhaw amahni’n Elizabeth ah kheh, "Nang unaupi lak ah me ming khuah nei tumah om ngawl si," ti’n ti dang si. 62 Tsimi manin a pa kheh kutzoh in, a ming heh tu sa nuam nan tih maw ti’n ti dang si. 63 A pa’n lai ngannak tuh ngen atsia, "A ming heh Johan ah si," ti’n ngan si. A vaseng in khum ngai dang si. 64 Makhat in a kam kaa atsia, a leiloh thei in, awn atsia Pathian thangphat si. 65 Amahni kawnvel ah omtu tehem in kih dang si. Me thu te heh mual vum Judea ram sung hem ah rel suihsuih dang si. 66 A zatu tehem in me thu heh amahni thinlung sungah kem in, "Me nauno heh kawtibang nauno si lai na maw?" ti’n ti dang si. Tsin, Bawipa kut in amah kheh ompi si. 67 Tsin, a pa Zakhariah ah kheh Raula Thiangrim thaw dim atsia, profet bangin awn in, 68 "A minung te heh veh atsia a den manin, Israel Bawipa Pathian kheh thangphatnak si tasen. 69 A selpa David innsang ah keimahni tsa sannak kii tawt tiar ongla si. 70 Tsimi sannak heh leilung a po pan pin pan ama profet thiangrim te kam mang in a awnnak bangin si. 71 Kei raal te kut pin le keimahni a hawtu tehem kut pin keimahni a san theinak tuh in, 72 kei pupa te nenah a thutiam ngeihharnak a kim tiarnak tuh in, le a thukam thiangrim a phawk reng tuh in, 73 kei papi Abraham nenah tsial tsawm atsia tsam tsawm si. 74 Kei raal te kut pin sannak kei si theinak tuh in, le 75 kei nun sung hem ama mai ah thiangrimnak le diktsangnak thaw kih ngawl in ama na kei per theinak tuh in si. 76 Nauno, nangmah heh Daak bera profet, ti’n ponnak si tu si tsi. Heimansim tiphangin Bawipa lamzin sialsak tu in a mai ah hawh tu si tsi. 77 Amahni sual te a zahnak thawmin a minung te nenah sannaka tsimnak pe tu in le, 78 kei Pathian-a a ngeihkuai ngeihharnak manin a daak min pin Khawvaar khen veh kei si. 79 Tsimi kheh thimnak sungah le thihnak lim nuai ah a totu te nenah vaarnak pe tu in le kei kawng te heh thinnuamnak lamzin ah huai tu in veh kei si," ti’n ti si. 80 Nauno kheh khang in, raula ah kol in khangso atsia, Israel te nenah a lang ni tian hampalak ah om si.
21 Tsimi hun lai in tibang hen thiltsang si; Sizar Augustus in leivum minung tehema ming khumberh tu in thupe si. 2 Me a veikhatnak mipum siarnak heh Kuirinius in Syria ram ah mangki a si lai in siarnak si. 3 Mi hem in tsimi ming khum tu in amahni khaw ten ah hawh si. 4 Joseph ah khen David innsang le David hin a si manin Galilee peng Nazareth pin Judea peng Bethlehem tinak David khawpi ah, 5 a zi tuh in a halh hamnak Mary ah thaw ming khum tu in hawh deve si. Mary ah heh a naupai teng si. 6 Tsin, tsimi munah a om kawm lai in Mary ah kheh a nau hing hunkim si. 7 A tsa minlawh kheh hing in, nau puan thaw in tsuun si. Khualbuuk ah khaan a dong leh ngawlla manin kawlpaw lai einak kuang sungah a nau kheh zau si. 8 Tsimi ram sungah tuukhaltu te om atsia, hampalak ah tuu te khal in, zan tsaampi veng si. 9 Tsin, ngai in, Bawipa vanvummi pakhat kheh amahni mai ah ding in, Bawipa tsungnungnak in a kawnvel kheh vaar si. Tsin, amahni’n kih ngaingai dang si. 10 Tsimi phangin vanvummi khen, "Kih mah na un. Ngai un, mi hemmuah tsa angnung pittseih, thuthang pha nang sel sing. 11 Khrih tinak Bawipa, Santu kheh tuni rori hen David khawpi ah hing si. 12 Tsin, me heh nangmahni tsa theihdiknak si tu si. Kawlpaw lai einak kuang sungah zau atsia, nau puan thaw tsuunnak nausenno kheh tawk tu si utsi," ti’n ti si. 13 Makhat in tsimi vanvummi thaw in van raalkap bu tampi te khen Pathian thangphat in, 14 "A daak ber ah Pathian kheh tsungnung tasen. Leivum ah remnak om tasen. Pathian deihnak pha kheh minung te nenah om tasen," ti’n ti si. 15 Tsin, tibang hen thiltsang si. Vanvummi te kheh tuukhaltu te nen pin vanvum ah a hong dang leh phangin, tuukhaltu te’n, "Tu rori hen Bethlehem ah hawh a singkhaw, Bawipa’n keimahni a thei tiarnak me thiltsang heh pan dang a sing," ti’n pakhat le pakhat ti dun dang si. 16 Amahni’n nawhnah ngai in hawh dang atsia, Mary, Joseph ah le kawlpaw lai einak kuang sungah zaunak nausenno kheh tawk dang si. 17 A tawk dang phangin vanvummi in nausen thu a relnak kheh rel tseihzel si. 18 Tuukhaltu te relnak tsimi thu a zatu tehem in lunglawi ngai dang si. 19 Mary in me thu tehem heh nik reng in, a thinlung in ngaisung si. 20 Tuukhaltu te’n amahni nenah vanvummi-a relnak bangin heizongza a zanak le a munak manin Pathian ultung thah in le thangphat thah in hong leh dang si. 21 Nauno vunrel ten tu in niriat a kim phangin, a nu’n a pum sungah a pai ma vanvummi in a ming a saham saak bangin Jesuh ti’n a ming sa si. 22 Mawsi daan bangin Mary in a thiang ni a kim phangin, Bawipa nenah aap tu in nausenno kheh Jerusalem ah hawhpi si. 23 Bawipa daan bu sungah ngannak bangin a si lekhaw, "Nu pum sung pin a suak masa ber mipa tehem heh, BAWIPA tsa in thiangrim, tinak si tu si," ti’n om si. 24 Tsin, Bawipa daan thu bangin, "Khuro panih a si ngawl lekhaw laileng panih," kheh bawlnak in pe kul si. 25 Tsin, ngai in, Jerusalem ah midik le Pathian lam ah mi zuam ngai Simeon tinak pa om si. Amah hen Israel te neeknak a si tuh hun ngak reng si. Tsin, a vumah Raula Thiangrim om si. 26 Bawipa-a Khrih a mu ma hem thihnak mu tu ngawl in Raula Thiangrim in amah kheh muh awng si. 27 Tsimi manin Raula thawmin temple sungah hawh si. Daana puah dan bangin ama tsa puah sak tu in, a nu le pa te’n nausenno Jesuh ah kheh a hawhpi phangin, 28 a kaang sungah tsawi atsia, Pathian thangphat in, 29 "Bawipa, tuhen na selpa heh nangma thu bangin thinnuamno in hawh siang ongla ka si tsi. 30 Heimansim tiphangin na sannak kheh ka mit in mu ongla sing. 31 Tsimi heh mi tehem mitmuh ah na puah ham saak si. 32 Gential te thuphuan a petu vaarnak le na minung Israel te tsungnungnak tuh in si." 33 Joseph ah le a nu in ama thu Simeon awnnak te manin lunglawi ngai kawm si. 34 Tsimi phangin Simeon in amahni kheh muitsu pe atsia, a nu Mary ah kheh, "Ngai in! me nauno heh Israel minung lak pin mi tampi te dunak le thonak si tu in, le mi te relse tuh theihdiknak si tu in teek saak si. 35 Si si, na nunnak rori kheh vangsang in tumpet in dawt tu atsia, mi tampi thinlung ruatnak te khen lang tiar tu si" ti’n ti si. 36 Tsin, Asher hin Phanuel tsanu profet pakhat Anna tinak om si. Amah heh teer ngai ongla in, khangngai thiamlawh a sinak pin a pasel thaw kum sarih sung bek om kawm si. 37 Kum sawmriat le kum li sung numei in om atsia, temple pin kiang awng ngawl si. Laitsang in a sun a zan in sawngennak thaw Pathian na kheh per si. 38 Ama’n tsimi hun keek in amahni nenah lut atsia, Bawipa paak in Jerusalem ah dennak a zeitu tehem nenah nauno thu kheh rel si. 39 Bawipa daan sunga bangin thil tehem a puah kawm tselh phangin, Galilee rama amahni khaw Nazareth ah hong dang leh si. 40 Nauno kheh khang atsia, raula lam ah kol in, tsimnak thaw dim si. Tsin, Pathian lainatnak kheh ama vumah om si. 41 A nu le a pa te heh kum tin in Jerusalem ah Leekdelh Puai sim veng si. 42 Kum leinih a kim phangin daan thu bangin puai sim tu in Jerusalem ah hawhso dang si. 43 Puai ni te a mang dang tselh phangin hong leh dang in, naupang Jesuh ah heh Jerusalem ah taang tum si. Tsimi kheh Joseph ah le a nu in thei ngawl si. 44 Amahni’n a hongpinak te lakah peh reng tu ring in, nikhat vaak dang man ongla si. Tsin, amahni unaupi te nenah le mel theih te nenah zei kawm si. 45 A tawk ngawl phangin Jerusalem ah lehlawi leh in zei kawm si. 46 Tsin, tibang hen thiltsang si. Nithum sung a zei kawm zawh in temple sungah saya te laingial ah to atsia, amahni relnak thu te ngai in, amahni thu a dong tseih kheh tawk kawm si. 47 A thu thei zo daan le a thu o thiam daan te a zatu tehem in khum ngai dang si. 48 A nu le a pa te’n a mu phangin khum ngai si. Tsimi phangin a nu’n, "Tsapa, kawti tihen kei ti si tsim? Ngai in, na pa le keimah hen thintsawl ngai in na zei tseih si ung," ti’n ti si. 49 Ama’n, "Heita ka zei si utsim? Ei Pa naper per kul ka si heh thei ngawl si utsim maw?" ti’n amahni kheh ti si. 50 Sinapikhaw amahni nenah a awnnak heh hei si, ti thei zo kawm ngawl si. 51 Tsimi zawh in amahni thaw Nazareth ah hong leh deve in, amahni thu lun si. Sinapikhaw a nu’n me thu tehem heh a thin sungah keem reng si. 52 Jesuh ah kheh tsimnak lam ah le taksa lam ah khang in, Pathian le minung te mai ah mitmai pha ngah si.
31 Tiberius Sizar in ram a uknak kum leinga a kim phangin, Pontius Pilat ah heh Judea ram mangki si. Herod ah heh ram khen pali laka Galilee ram uktu si in, a nau Philip ah heh ram khen pali laka Iturea le Trakhonitis ram uktu si atsia, Lysanias ah heh ram khen pali laka Abiliene ram uktu si. 2 Annas le Kaiafas te suangbawi ber a si lai in hampalaka Zakhariah tsapa Johan nenah Pathian thu leng si. 3 Johan ah khen Jordan run dungluna ram tehem ah khualvak tseihzel in, sualzahnak tsa sualsirnaka niimnak thu rel si. 4 Profet Isaiah in thu a ngannak laibu sungah, "Hampalak pin mi pakhata aunak aw khen, ’BAWIPA lamzin kheh rem un. Ama lampi te kheh tsam tiar un. 5 Lampi kawrok tehem dimberh tu in, mualsang le mual tehem niamberh tu si. Lampi kawi te kheh tsam tiar tu in, lampi bingbol te kheh maam leh tiar tu si. 6 Tsin, mi hem in Pathian sannak kheh mu tu si,’ " ti’n ngannak bangin si si. 7 Johan in ama nenah niimnak petu in a leng mihonpi te kheh, "Nangnihni rul hin te, a leng tula thinrawnak pin daan tu in, ralringnak tu in pe nang sim? 8 Tsimi manin sualsirnak thaw a phutua rah kheh rah ula, ’Abraham ah heh kei pa si,’ ti’n ti tuum mah na un. Nang rel sing, Pathian in me lungto te heh Abraham tsa te si tu in puah thei si. 9 Tuhen thing bul ah heipi koih reng ongla si. Tsimi manin rah pha a rah ngawl thingkuang tehem vung tu atsia, mei sungah sang tu si," ti’n ti si. 10 Tsimi manin mipi te’n ama nenah, "Tsimi a si lekhaw hei puah tu si ung im?" ti’n dong si. 11 Ama’n amahni kheh o atsia, "Angki panih a neitu in a nei ngawltu kheh sawm tasen. Lai ei tuh a nei tu in lei ei tuh a nei ngawltu kheh khen tasen," ti’n ti si. 12 Siahkhon te’n niim tu in a nenah leng deve atsia, "Sayapa, hei puah tu si ung im?" ti’n dong si. 13 Johan in, "Nangmahni teek saak tah a val in khon mah na un," ti’n amahni kheh ti si. 14 Tsimi bang deve in raalkap te’n thudong in, "Tsimi a si lekhaw keimahni’n hei puah tu si ung im?" ti’n dong si. Johan in amahni kheh, "Tumah nauneh leita mah na ula, a dik ngawlpi in mi sual nawn mah na un. Tsin, nang lawhman ah lungkim un," ti’n ti si. 15 Mipi te khen ngaklah ngai dang in Johan ah heh, Khrih ah si nan tih maw, si ngawl nan tih im, ti’n a vaseng in amahni thin sung ten in ruat dang si. 16 Johan in amahni tehem kheh o atsia, "Keimah hen ti ah niim miau nang sing. Keima tah in mak sawn pittseihpa leng tu in, ama kedawl ri suutsak tu riang taak ngawl sing. Ama’n Raula Thiangrim le mei ah niim tu nang si. 17 A kut ah a tsaangzapnak khawtsong vong in, a tsang puum kheh zaapsek tu si. Tsin, sangvut tsang tehem kheh a beem sungah pam tu si. Sinapikhaw a sii tehem kheh a mit thei ngawl mei sungah haal tu si," ti’n ti si. 18 Tsin, sonak thu tampi thaw mipi te kheh thu zirh si. 19 Ram khen pali lak pin khenkhat uktu Herod ah kheh a nau Philip zi Herodias thu manin le Herod puahnak sesuak tehem manin Johan in hau si. 20 Herod in thil sesuak a puahnak tehem vuma zo ngawl, Johan ah kheh thawng toh belhsep lai si. 21 Tsin, tibang hen thiltsang si. Mi hemmuah kheh niimnak a si zawh in, Jesuh ah kheh niimnak si deve si. Saw a ngen laitum in van kheh hong si. 22 Tsin, Raula Thiangrim kheh khuro bangin ama vumah tolhsuk atsia van pin aw leng in, "Nangmah heh ka it pittseihnak ka Tsapa si tsi. Na vumah ang ngai sing," ti’n ti si. 23 Jesuh in naper a pan phangin amah heh kum sawmthum kim ongla si. Amah heh Joseph tsapa ti in ruatnak si. Joseph ah heh Heli tsapa si. 24 Heli ah heh Matthat tsapa si in, Matthat ah heh Levi tsapa si. Levi ah heh Melkhi tsapa si in, Melkhi ah heh Janna tsapa si in, Janna ah heh Joseph tsapa si. 25 Joseph ah heh Mattathiah tsapa si in, Mattathiah ah heh Amos tsapa si in, Amos ah heh Nahum tsapa si in, Nahum ah heh Esli tsapa si atsia, Esli ah heh Naggai tsapa si. 26 Naggai ah heh Maath tsapa, Maath ah heh Mattathiah tsapa, Mattathiah ah Semei tsapa, Semei ah heh Joseph tsapa si in, Joseph ah heh Judah tsapa si. 27 Judah ah heh Joannas tsapa, Joannas ah heh Rhesa tsapa, Rhesa ah heh Zerubbabel tsapa, Zerubbabel ah heh Shealtiel tsapa si in, Shealtiel ah heh Neri tsapa si. 28 Neri ah heh Melkhi tsapa, Melkhi ah heh Addi tsapa, Addi ah heh Cosam tsapa, Cosam ah heh Elmodam tsapa si in, Elmodam ah heh Er tsapa si. 29 Er ah heh Jose tsapa, Jose ah heh Eliezer tsapa, Eliezer ah heh Jorim tsapa, Jorim ah heh Matthat tsapa si in, Matthat ah heh Levi tsapa si. 30 Levi ah heh Simeon tsapa, Simeon ah heh Judah tsapa, Judah ah heh Joseph tsapa, Joseph ah heh Jonan tsapa si in, Jonan ah heh Eliakim tsapa si. 31 Eliakim ah heh Melea tsapa, Melea ah heh Menan tsapa, Menan ah heh Mattathah tsapa, Mattathah ah heh Nathan tsapa si in, Nathan ah heh David tsapa si. 32 David ah heh Jesse tsapa, Jesse ah heh Obed tsapa, Obed ah heh Boaz tsapa, Boaz ah heh Salmon tsapa si in, Salmon ah heh Nashon tsapa si. 33 Nashon ah heh Amminadab tsapa, Amminadab ah heh Ram tsapa, Ram ah heh Hezron tsapa, Hezron ah heh Perez tsapa si in, Perez ah heh Judah tsapa si. 34 Judah ah heh Jakob tsapa, Jakob ah heh Isak tsapa, Isak ah heh Abraham tsapa, Abraham ah heh Terah tsapa si in, Terah ah heh Nahor tsapa si. 35 Nahor ah heh Serug tsapa, Serug ah heh Reu tsapa, Reu ah heh Peleg tsapa, Peleg ah heh Eber tsapa si in, Eber ah heh Shelah tsapa si. 36 Shelah ah heh Kainan tsapa, Kainan ah heh Arphaxad tsapa, Arphaxad ah heh Shem tsapa, Shem ah heh Noah tsapa si in, Noah ah heh Lamech tsapa si. 37 Lamech ah heh Methuselah tsapa, Methuselah ah heh Enoch tsapa, Enoch ah heh Jared tsapa, Jared ah heh Mahalalel tsapa si in, Mahalalel ah heh Kainan tsapa si. 38 Kainan ah heh Enos tsapa, Enos ah heh Seth tsapa, Seth ah heh Adam tsapa si in, Adam ah heh Pathian tsapa si.
41 Tsimi phangin Jesuh ah kheh Raula Thiangrim thaw a dim ngai pah in Jordan run pin hong leh atsia, Raula in hampalak ah huai si. 2 Tsin, diabol in ni sawmli sung sualroih si. Tsimi hun sung hem heimah ei ngawl si. Tsimi hun zawh in a rikaam si. 3 Tsimi phangin diabol in, "Pathian Tsapa na si lekhaw, me lungto heh sang in a tsang tuh in thupe in," ti’n amah kheh ti si. 4 Sinapikhaw Jesuh in amah kheh, "’Minung heh sang bek in nung tuh si ngawl in, Pathian awnkam tehem thawmin nung si sawn si,’ ti’n ngan si," ti’n o si. 5 Tsin, diabol in amah kheh mual saang vumah huai in, leivum uknak tehem kheh tsillem sung muh si. 6 Diabol in amah kheh, "Me thuneinak hem le a tsungnungnak te heh na pe tu sing. Me te heh keimah aap ongla in, ka pe nuamnak pohpoh petu sing. 7 Tsimi manin keimah na be a si lekhaw, me tehem heh nangma si tu si," ti’n ti si. 8 Jesuh in amah kheh o atsia, "Satan, ka ningah daan in! Heimansim tiphangin, ’BAWIPA na Pathian be la ama na bek per in,’ ti’n ngansaak om si," ti’n ti si. 9 Tsimi zawh in diabol ah khen amah kheh Jerusalem ah huai in, temple khumlu ah koih atsia, "Pathian Tsapa na si lekhaw, nai pin hen sawnsuk in. 10 ’Nangmah kiltu tuh in ama vanvummi te tiar akhaw,’ 11 tsin, ’Na kawng te kheh lung a khawk kha tuh ngawl in, amahni’n a kut in tsawi in kelen tu na si,’ ti’n ngansaak om si," ti’n ti si. 12 Jesuh in amah kheh, " ’BAWIPA na Pathian kheh tsul mah nen,’ ti’n ti si," ti’n o si. 13 Diabol in sualroihnak hintsang thaw a sualroih tselh phangin, hunpha ngak in amah nen pin kiang si. 14 Tsin, Jesuh ah kheh Raula huham thaw Galilee ah hong leh si. Ama thu kheh tsimi ram kawnvel hem ah thang hehu si. 15 Amahni sinakok ah thu zirh in, mi tehem in amah kheh thangphat si. 16 Tsin, ama khangnak Nazareth khaw ah hawh si. Sabbath ni in ama daan bangin sinakok ah lut atsia, Laithiangrim siar tu in ding si. 17 Amah kheh profet Isaiah laizial pe si. Ama’n tsimi laizial kheh pharh atsia, 18 "Minawm tsarah te nenah thuthang pha phuang tu in keimah heh sathau a pawh manin, BAWIPA Raula kheh keima vumah om si. Lungse khawngai te dam tiar tu in, sel taang te nenah luatnak thu phuang tu in, mittsaw te khawmunak tuh thu le nuainennak te luatnak pe tu in le, 19 BAWIPA-a angnung kum thu te rel tu in sathau pawh ka si lei," ti’n ngannak kheh mu si. 20 Laizial kheh zial leh in a kelentu nenah pe leh atsia, to si. Tsimi phangin sinakok sungah a khawmtu tehem khen amah kheh mit khep ngawl in pan dang si. 21 Tsin, ama’n amahni kheh, "Tuni hen me Laithiangrim heh nang zanak ah kimsek ongla si," ti’n ti si. 22 A vaseng heh ama tetti si dang si. Ama kam pin a suak lainatnak awnkam kheh khum ngai dang si. Amahni’n, "Amah heh Joseph tsapa si ngawl si maw?" ti’n ti dang si. 23 Tsimi phangin ama’n amahni kheh, " ’Siibawi, nangmah le nangmah dam tiar tsawm in! Kapernaum ah na puahnak kei zanak taak hem nai na khaw le na ram ah puah in,’ ti’n me thutsang simnak heh keimah tinak in mang tu si utsi,’" ti’n ti si. 24 Tsin, ama’n, "Thungai ngai in nang rel sing; profet heh ama khaw le ram ah saangnak tumah om ngawl si. 25 Sinapikhaw thudik nang rel sing, Elijah san lai in Israel ram ah numei tampi om si. Kumthum le laruk sung van kheh a khaam phangin, ram sung hem ah nase ngai in rian dung si. 26 Sinapikhaw Elijah ah kheh Sidon ram Zarephath khawa numei pakhat nenah siar ngawl numei dang tumah nenah hawh tiar ngawl si. 27 Profet Elisha san lai in Israel ram sungah miphar tampi om atsia, Syria raalbawi Naman ah siar ngawl miphar dang tumah dam thiang ngawl si," ti’n amahni kheh ti si. 28 Sinakok ah a khawmtu tehem in me thu te heh a za dang phangin, thinraw ngaingai dang si. 29 Amahni’n tho atsia khawpi pulam ah amah kheh kailok dang in, khawpi tohnak mual tawpnak ah huai dang atsia, tsimi liang pin a lubuksuk in tulset tu in tuum dang si. 30 Sinapikhaw amahni kheh heeklok atsia, hawhper si. 31 Jesuh ah kheh Galilee khawpi Kapernaum ah hawhsuk in, Sabbath ni te ah amahni kheh thu zirh si. 32 Thunei ngai in thu a zirh manin, a thu zirhnak kheh khum ngai dang si. 33 Tsimi sinakok sungah khawvang nawngkai raula-a zingnak mipa pakhat om si. Ama’n ring ngai in au atsia, 34 "He! Nazareth khawte Jesuh, kei zam men in. Nangmah thaw heiha kei seng dun? Keimahni siatsuah tu in leng si tsim maw? Na thei reng si ung. Nangmah heh Pathian Mi Thiangrim si tsi!" ti’n ti si. 35 Jesuh in amah kheh hau atsia, "Meng den la ama sung pin suak!" ti’n ti si. Tsimi phangin khawvang khen amah kheh pumkhawmtu te laingial ah du tiar atsia, heimah naa tiar po ngawl in ama sung pin suak si. 36 A vaseng in khum ngai dang in, "Meheh hei thu sim! Raula nawngkai te heh thuneinak le huham thaw in thupe atsia, suak dang si," ti’n ti dang si. 37 Tsin, ama thu kheh tsimi kawnvela ram sung hem ah thang si. 38 Jesuh ah kheh sinakok pin suak atsia, Simon inn ah lut si. Simon zi nu kheh a natdun a roh ngai si in, ama tsa in kun sak dang si. 39 Tsimi manin a kung ah ding atsia, a natdun kheh hau in dam si. Amah khen makhat in tho atsia amahni tsa tuh in lai eih puahsak si. 40 Ni a da phangin natnak hintsang a veitu tehem kheh a nenah phurh dang in, minaa hem te lu vumah a kut suan in dam tiar heuh si. 41 Minung tampi sunga khawvang te khen, "Nangmah heh Pathian Tsapa Khrih ah si tsi!" ti’n au ngunngun in suak si. Khawvang te khen amah kheh Khrih a si lam a thei manin amahni kheh hau atsia, heimah awn siang ngawl si. 42 Khawvar phangin tsimi mun pin khen pusuak atsia, hampalak ah hawh si. Mihonpi te’n amah kheh zei in, ama nenah hawh dang atsia, amahni a zam men tuh ngawl in khaam dang si. 43 Sinapikhaw ama’n, "Khaw dang dang ah khen Pathian uknak thu phuang kul tu sing. Heimansim tiphangin me thu man rori hen lehnak sing," ti’n amahni kheh ti si. 44 Tsin, ama’n Galilee peng sunga sinakok te ah thu zirh si.
51 Tsin, tibang hen thiltsang si. Kennesaret Tiniim kung ah a ding reng lai in, Pathian thu ngai nuam in mihonpi te’n amah kheh tsen tuptup dang si. 2 Tsimi phangin ama’n tiniim kung ah khawm panih khit rengnak kheh mu si. Sinapikhaw khawm sungah nga lentu te om ngawl in sur som dang tseih si. 3 Tsin, khawm pakhat sungah lut si. Tsimi khawm heh Simon-a si. Jesuh in khawm kheh lei pin khawla sawndoh min ah hot tu in Simon ah kheh tiar si. Amah khen khawm sungah to atsia, mipi te kheh thu zirh si. 4 A awn tselh phangin Simon ah kheh, "Na khawm heh ti thuk min ah hot la nga len tu in na sur seh in," ti’n ti si. 5 Sinapikhaw Simon in amah kheh o atsia, "Bawipa, zan vaar seh ongla in, heimah ngah ngawl si ung. Sinapikhaw na thu bangin sur heh seh tu sing," ti’n ti si. 6 Amahni’n sur kheh seh atsia, nga tam leita a ngah dang man in, a sur kheh a tawng thah tseih si ongla si. 7 Tsimi manin khawm danga rualpi te khen amahni zuan in a bawm tuh in kut zaap in ko si. Amahni’n zuan in bawm atsia, nga a ngah dangnak kheh khawm panih ah a dimpek manin, ti sungah niim tu in thawi si. 8 Tsimi kheh Simon Piter in a mu phangin Jesuh kawngbul ah bok atsia, "Maw Bawipa, keimah heh misual ka si manin, ka nen pin kiang in!" ti’n ti si. 9 Heimansim tiphangin amah le ama nenah om tehem khen nga a ngah dangnak kheh khum ngai dang si. Tsimi nga te kheh amahni’n le dang si. 10 Tsimi bangpah in Simon nga len pinak Zebedee tsapa Jeim ah le Johan in lunglawi ngai deve si. Tsin, Jesuh in Simon ah kheh, "Kih mah nen. Tu pin pan minung te len tu si tsi," ti’n ti si. 11 Tsimi manin amahni’n khawm te kheh lei ah nuk dang atsia, a vaseng in zamberh in amah kheh lun dang si. 12 Tsin, tibang hen thiltsang si. Khaw pakhat ah a om lai in, pan in, a pumpuluk in pharnat vei pakhat khen Jesuh ah kheh mu in, ama mai ah bok atsia, "Bawipa, na nuam a si lekhaw dam thiang tiar thei ka si tsi," ti’n damnak ngen si. 13 Tsimi phangin ama’n a kut suah atsia, amah kheh tong in, "Dam tiar nuam sing; dam thiang in," ti’n ti si. Makhat in a pharnat kheh dam si. 14 Ama’n tumah a rel tuh ngawl in thupe atsia, "Hawh ta la, suang te nenah muh tsawm ten. Tsin, na dam thiang ongla kheh amahni tsa tetti a si tuh in Mawsi thukhaam bangin bawlnak pe ten," ti’n ti si. 15 Tsimi manin ama thu kheh a kawnvel ram sung hem ah thang leilei si. Tsin, mihon tampi te khen ama thurelnak ngai tu in le amahni natnak te a dam tiar tuh in amah kheh zuan dang si. 16 Tsimi manin amah rori heh hampalak ah hawh in sawngen veng si. 17 Tsin, ni nikhat in tibang hen thiltsang si. Thu a zirh tseih lai in, Galilee peng khaw tehem pin le Judea le Jerusalem pin a leng Farasi te le Daan zirhtu te kheh a kung ah to dang si. Natnak te a dam tiar theinak tuh in Bawipa huham kheh ama vumah om si. 18 Ngai in, tsimi phangin mi te’n zenat veipa pakhat kheh a zaunak thaw in a nenah phurh dang si. Amahni’n a mai ah a len theinak tuh in inn sungah lutpi theinak zei dang si. 19 Mihonpi a tam leita manin amahni’n a nenah lutpi theinak a tawk zo dang ngawl phangin, innkhum lu ah kai dang atsia, mihonpi laingiala Jesuh mai ah lakulh dang si. 20 Jesuh in amahni umnak kheh a mu phangin, zenat veipa kheh, "Mi pa na sual te zahnak si ongla si," ti’n ti si. 21 Tsimi phangin Daan zirhtu te le Farasi te’n amahni thin sungah, "Pathian relse ngamtu heh tu sim? Pathian siar ngawl tu in sual zah thei sim?" ti’n ti dang si. 22 Sinapikhaw Jesuh in amahni ruatnak kheh thei kuhdek in, amahni kheh o atsia, "Hei manin nang thin sungah me thu heh ruat dang tseih si utsim? 23 ’Na sual te zahnak si ongla si’ ti le, ’Thola hawh in’ ti heh hei rel beih sawn tu sim? 24 Sinapikhaw Mi Tsapa hen leivum ah sual zah theinak huham a nei lam nang thei tuh in, na rel sing, tho in na zaunak zial la na inn ah hong talen," ti’n zenat veipa kheh ti si. 25 Amah khen makhat in amahni mai pin thoso atsia, a zaunak kheh zial in, Pathian thangphat thah in inn ah hongper si. 26 A vaseng in lunglawi ngai dang in, Pathian thangphat dang atsia, kih ngai ngai in, "Tuni hen thil khumnung ngai mu si sing!" ti’n ti dang si. 27 Tsimi zawh in Jesuh ah kheh suak atsia, Levi tinak siahkhonpa kheh siahkhon zung sungah a to reng mu si. Tsin, ama’n, "Ka lun in," ti’n amah kheh ti si. 28 Ama’n a heizongza zam atsia, tho in amah kheh lun nom si. 29 Tsimi phangin Levi in a inn ah Jesuh tsa puai nase ngai puah sak si. Tsimi puai lai einak ah siahkhon tampi te le midang te’n Jesuh ah kheh laikuang kilpi dang si. 30 Sinapikhaw amahni Daan zirhtu te le Farasi te’n a ningluntu te nenah, "Hei manin siahkhon te le misual te thaw ei in dang si utsim?" ti’n ti si. 31 Jesuh in amahni kheh o atsia, "Mi dam te’n sibawi kintsak ngawl in, minaa te bek in kintsak si. 32 Keimah heh midik te ko tu in leng si ngawl in, misual te’n a sual te a sir tuh in leng si sawn sing," ti’n ti si. 33 Tsimi phangin amahni’n, "Johan ningluntu te’n laitsang in sawngen veng in, amahni bangin Farasi te ningluntu te khen laitsang in sawngen veng si. Hei manin na ningluntu te’n ei in in sim?"ti’n ti si. 34 Ama’n, "Mohuaitu pa rualpi te kheh mohuaitu pa thaw a om dang lai in laitsang tiar thei tu si utsim maw? 35 Sinapikhaw mohuaitu pa kheh amahni nen pin lenak a si hunkim tu in, tsimi hun phangin amahni’n laitsang leh tulai si," ti’n amahni kheh ti si. 36 Tsimi phangin ama’n amahni kheh thusanteh pakhat rel si. Ama’n, "Tumah in puan lun kheh puan ther in belh keel ngawl si. Tsimi bangin a belh a si lekhaw puan ther khen puan lun kheh nuukreih tu in bal sawn nom tu si. Puan ther heh puan lun thaw rem thei ngawl si. 37 Tsin, tumah in savun num lun sungah tsapit zu ther thun awng ngawl si. A thun a si lekhaw tsapit zu ther khen savun num lun kheh keh tiar tu atsia, tsapit zu kheh baw thong tu in, savun num kheh se thong tu si. 38 Tsimi manin tsapit zu ther kheh savun num ther sungah thun tuh si. Tsin, a panih in him tu si. 39 Tsin, tumah in tsapit zu lun a in zawh in tsapit zu ther in nuam zep ngawl si, ’A lun panpan heh ur si,’ ti si," ti’n ti si.
61 Tsin, tibang hen thiltsang si. La khat la-a Sabbath a veinihnak ni in Jesuh ah kheh sangvut lo tawnin hawh si. A ningluntu te’n sangvut vi sik dang atsia, nuai in ei dang si. 2 Farasi pawlkhat te’n, amahni kheh "Sabbath ni in puah daan ngawlnak kheh hei manin puah si utsim?" ti’n ti si. 3 Tsimi phangin Jesuh in amahni kheh, "David ah le a ompinak te’n a rikaam dang phang David in hei a puah ti le, 4 ama’n Pathian inn sungah lut atsia, suang te siar ngawl Daan in David ah le a ompinak te a ei siang ngawlnak sang liinak ei in a ompinak te khen pe si ti thu kheh siar awng ngawl si utsi maw?" ti’n ti si. 5 Tsin, Jesuh in amahni nenah, "Mi Tsapa heh Sabbath Bawi khen si meek si," ti’n ti si. 6 Tsin, tibang hen thiltsang si. A dang Sabbath ni in sinakok sungah lut atsia, thu zirh si. Tsimi sinakok sungah a taklam kut ronat veipa pakhat om si. 7 Daan zirhtu te le Farasi te’n Sabbath ni in minaa dam tiar na maw, ti’n amah sual zei nuam in a kungtsek pin pan dang reng si. 8 Sinapikhaw ama’n amahni ruatnak kheh thei atsia, kut ronat veipa kheh, "Tho la nai ah hen ding in," ti’n ti si. Amah khen tho atsia ding si. 9 Tsimi phangin Jesuh in, "Thu pakhat nang dong tu sing. Sabbath ni in thilpha puah daan si maw, thil sesuak puah daan sawn sim? Nungnak san sawn tuh si maw, siatsuah sawn tuh sim?" ti’n amahni kheh ti si. 10 Tsin, a kawnvela tehem kheh pan zualzual atsia, kut ronat veipa kheh, "Na kut tsawh zaar in," ti’n ti si. Ama’n a kut kheh zaar atsia a hatlam bangin dam si. 11 Amahni kheh thinraw ngai dang in, Jesuh vumah a puah tuh thu kheh rel khawm dang si. 12 Tsin, tibang hen thiltsang si. Tsimi hun in Jesuh ah kheh sawngen tu in mual vumah kai in zan vaar in Pathian nenah sawngen si. 13 Khawvar phangin a ningluntu te kheh a nenah ko atsia, amahni lak pin minung leinih deng si. Amahni kheh lehnak ti’n ming sa si. 14 Amahni heh, Piter ti’n ming a sanak Simon ah, le a nau Andrew ah, Jeim ah le Johan ah, Philip ah le Bartholomew ah, 15 Mahte ah le Thomas ah, Alphaeus tsapa Jeim ah le phun it Simon ah, 16 Jeim tsapa Judas ah le amah zuartu Judas Iscariot ah si. 17 Jesuh ah kheh amahni thaw hawhsuk dang in, a ningluntu mipi te om min zawllai ah ding si. Tsimi ah Judea ram sung hem le Jerusalem pin, le tipi kunga Tyre le Sidon pin ama thurelnak ngai tu in le amahni natnak te a dam tiar tuh in a leng mihon tampi om si. 18 Raula nawngkaia zingnak te khen leng deve in damnak ngahberh si. 19 Ama sung pin huham suak atsia, a vaseng in a dam tiarberh manin, mihonpi in amah tong ngah tu in zei dang si. 20 Jesuh in a ningluntu te kheh diik atsia, ti hen ti si, "Minawm tsarah te heh mi ang te si. Heimansim tiphangin Pathian uknak heh nangmahnia si. 21 Tuhen a rikaam te heh mi ang te si. Heimansim tiphangin kham leh tulai si utsi. Tuhen a kaptu te heh mi ang te si. Heimansim tiphangin ni leh tulai si utsi. 22 Mi Tsapa manin mi te’n nangmahni a haw phang le a hawl phangin, a zohsuam phangin le mi sesuak bangin nang ming a lon phangin mi ang te si utsi. 23 Tsimi ni in ang ngaingai ula, sah in dawk un. Heimansim tiphangin vanvum ah nang lawhman heh a mak leita si. Tsimi bangpah in amahni pupa te khen profet te vumah puahawng ongla si. 24 Sinapikhaw nangnihni mi hausa te lungsenung si utsi. Heimansim tiphangin nang nunnuamnak kheh ngah ongla si utsi. 25 Laikham te lungsenung si utsi. Heimansim tiphangin rikaam leh tulai si utsi. Tuhen a ni tseih te, lungsenung si utsi. Heimansim tiphangin khawngai in kap leh tulai si utsi. 26 Mi te hema ziapnak nang si phangin mi lungsenung si utsi. Heimansim tiphangin nang pupa te’n profet dik ngawl te kheh ziap awng ongla si. 27 "Sinapikhaw ka thureelnak a ngaitu te, nang rel sing. Nang raal te kheh it ula, nangmahni a hawtu te vumah thilpha puah un. 28 Nangmahni a tsamtu te kheh muitsu thupha pe ula, nangmahni a zohsuamtu te tsa in sawngen sak un. 29 Na biang a thongtu heh a hatlam khen dawh rih in. Na angki putasilh a lesaktu heh a sungta a lesak sikhen it mah nen. 30 A ngentu tehem pe in. Na thil a longsaknak kheh ngen leh awl talen. 31 Mi te’n nangma vumah puah tu in na deihnak bangkeek in, midang te vumah puah deve in. 32 "Nangmah a ittu bek na it a si lekhaw, tu in na paak tu sim? Misual te riang in amahni ittu te kheh it si. 33 Nangmahni vumah thilpha a puahtu te vum bek ah thilpha nang puah a si lekhaw, tu in nang paak tu sim? Misual te riang in tsimi bangpah in puah thei si. 34 Mi te’n nangmahni nena thil a pu phangin rul leh thei tu in nang limdiknak te bek kheh nang put a si lekhaw, tu in nang paak tu sim? Misual te riang in a ngah leh tuh in misual te kheh put si. 35 Tsimi manin nang raal te kheh it ula, amahni vumah thilpha puah un. Tsin, a rul leh tu kheh heimah limdik ngawl in put un. Tsimi a si lekhaw nang lawhman heh mak tu si. Tsin, nangmahni heh a Daak bera tsa te si tu si utsi. Amah hen mi paak thiam ngawl le mi sesuak te vumah zawnruat si. 36 Tsimi manin nang Pa’n mi a ngeihhar bangin mi ngeihhar deve un. 37 "Thukhen mah nen. Thukhennak si tu ngawl si tsi. Han mah nen. Hannak si tu ngawl si tsi. Sual zah la, sualzahnak si tu si tsi. 38 Pe la, penak si tu si tsi. Tehnak pha, sawhpek atsia, thingdek in piit luahluah in na kaang sungah penak si tu si tsi. Heimansim tiphangin mi te vumah tehnak nang mangnak bangkeek in nangmahni heh tehnak si deve tu si utsi," ti’n ti si. 39 Jesuh in amahni kheh thusanteh pakhat rel si, "Mittsaw in mittsaw lamhuai thei tu si maw? A panih in hawrkaw sungah da kawm ol ngawl si maw? 40 Ningluntu heh a saya vumah om ngawl si. Sinapikhaw nakim ngaino in zirhnak tehem heh a saya bang si tu si. 41 "Nangma mit sungah thingpeek a om lam zong ruat tsawm ngawl in, hei manin na unaupi mit sunga mit borh kheh pan sak si tsim? 42 Na mit sunga thingpeek kheh mu tsawm ngawl in, ’Unau, na mit borh na khai sak ang,’ ti’n na unaupi kheh kawti’n ti thei si tsim? Mi sidat! Na mit sunga thingpeek tsawh khai masa la, na unaupi mit sunga mit borh kheh khaisak tu in tsiangno in mu thei tu si tsi. 43 "Thingkuang pha in rah pha ngawl rah ngawl in, thingkuang pha ngawl in rah pha rah ngawl si. 44 Thingkuang taak hem heh a rah in thei theihnung si. Mi te’n lingkuang ah thei rah thawi ngawl in huaikuang ah tsapit rah thawi ngawl si. 45 Mipha hen ama thin sunga thilpha a khawlnak thilpha kheh suah si. Mi sesuak hen ama thin sunga a sesuak a khawlnak thil sesuak kheh suah si. Minung te’n amahni thin sungah a khawl luutnak kheh a kam pin awn si. 46 "Ka relnak te puah ngawl in heita, ’Bawipa, Bawipa,’ ti’n ti ka si utsim? 47 Tutu sikhen keima nenah hawh atsia, ka relnak thu te za in a puahtu te heh hei thaw bang sim, ti nang rel tu sing. 48 Amah heh thuk ngai in tso atsia, lungpi vumah elphah in, inn a satu pa thaw bangve si. Ti laudung atsia, ti lian in a seu nekneknak inn a sikhen, lungpi vumah sanak a si manin thing zo tu ngawl si. 49 Sinapikhaw ka thurelnak za atsia, heimah a puah ngawltu heh elphah heimah nei ngawl in lei zangzau ah inn a sa mentu pa thaw bangve si. Tsimi inn kheh ti lian in seu neknek atsia makhat in tsim si. Tsimi inn se heh roh ngaingai si," ti’n ti si.
71 Jesuh in a thu ngaitu mipi te nenah thu a rel tselhberh phangin, Kapernaum khaw ah hawh si. 2 Raalkap za uktu pa sel, a bawipa it ngainak pa kheh naa in, a thi tuzep si. 3 Raalbawipa khen Jesuh thu a za phangin, Jew te upa te kheh ama nenah hawh tiar si. Tsin, a selpa dam tiarsak tu in a nenah hawh tu in kun tiar si. 4 Amahni’n Jesuh nenah hawh dang in, a dam tiar tuh heh taak si, ti’n kunlo dang si. 5 Amahni’n, "Raalbawipa heh kei miphun a it ngaitu si in, sinakok khen sa sak kei si," ti’n ti dang si. 6 Tsimi phangin Jesuh in amahni thaw hawh dang si. A inn a leng dawn ongla phangin, raalkap za uktu raalbawipa khen ama rualpi te kheh Jesuh nenah hawh tiar in, "Bawipa, rimsu nuam mah nen. Ka inn ah na lut tu ngai heh taak ngawl sing. 7 Keimah khen heh nangma nenah hawh tu in a taak in ruat tsawm ngawl sing. Awnkamkhat leh menla, ka sel heh dam tu si. 8 Keimah khen heh thuneinak nuai ah koihnak si in, ka kut nuai ah raalkap te nei sing. Me raalkap pakhat heh, "Hawh ten," ka ti phangin hawh si. Tsin, a dang raalkap pakhat heh, "Nai ah hawh in," ka ti phangin hawh si," ti’n ti si. 9 Jesuh in tsimi thu te kheh a za phangin khum ngai atsia, ama kawnvel kheh pan zualzual atsia amah luntu mihonpi te kheh, "Nang rel sing, Israel te lak ah riang in me bang umnak mak heh tawk ngawl sing," ti’n ti si. 10 A tiarnak te kheh inn ah a leng leh phangin a selpa kheh a dam saak in tawk dang si. 11 Tsin, tibang hen thiltsang si. A thaizing in, Nain tinak khawpi ah hawh si. A ningluntu mi tampi te le mihonpi te in amah kheh lun dang si. 12 Khawpi kongbiang kung a leng phangin, pan in, mi te’n mithi zawng dang si. Tsimi mithi heh a nu’n amah bek a tsawinak si. Amah heh numei si. Khawpia mihonpi pi te’n amah kheh lun dang si. 13 Bawipa’n minu kheh a mu phangin, ngeihhar in, "Kap mah nen," ti’n amah kheh ti si. 14 Ama’n thingkuang hongnak kheh zen si. Thingkuang zawngtu te heh ding dang reng lai si. Tsin, "Dangval, na rel sing; tho in," ti’n ti si. 15 Mithi kheh to atsia, awn tepan si. Tsin, Jesuh in a mah kheh a nu pe si. 16 A vaseng in lau ngai dang in, Pathian thangphat dang atsia, "Keimah ni nenah profet mak ngai suak si. Pathian in ama minung te veh si," ti’n ti dang si. 17 Jesuh thu kheh Judea peng sung hem ah le a kawnvela ram hem ah thang si. 18 Tsimi phangin Johan ningluntu te in me thu tehem heh Johan ah rel dang si. 19 Johan in a ningluntu panih te kheh ko atsia, "Nangmah heh a leng tulai pa si tsim maw? A si ngawl lekhaw midang ngak rih tu si ung im?" ti’n dong tu in Jesuh nenah hawh tiar si. 20 Johan ningluntu panih te kheh ama nenah a leng phangin, "Niimtu Johan in keimahni heh nangma nenah hawh tiar atsia, ’Nangmah heh a leng tulai pa si tsim maw? A si ngawl lekhaw midang ngak rih tu si ung im?’ ti’n dong tiar kei si," ti’n ti si. 21 Tsimi hun keek in ama’n mi tampi te dam ngawlnak te, nat kollen te le raula sesuaka zingnak te kheh dam tiarberh in, mittsaw te kheh khawmu tiarberh si. 22 Tsimi phangin Jesuh in amah ni kheh o atsia, "Hong ta ula, Johan ah kheh nang munak thil te le nang zanak thil te heh rel ta un. Mittsaw te khawmu in; kawng zenat vei te vak thei si; pharnat vei te dam thiang si; bengngong te za in, mithi te tho tiarnak si atsia, minawm tsarah te nenah thuthang pha heh phuang ongla si. 23 Keima manin a khawsi ngawltu heh mi ang si," ti’n ti si. 24 Johan nalang te a kiang zawh in mihonpi te kheh Johan thu rel pan si: "Hei pan tu in hampalak ah hawh si utsim? Huiha muutnak phaikuang a thing tseih si maw? 25 Hei pan tu in hawh si ta utsim? Puan nemno silpa pan tu in hawh si utsim maw? Tsimi banga puan mawi desur sil le nunnuam ngaia nung heh kumpibawi te inntual ah om si. 26 Hei pan tu in hawh si ta utsim? Profet pakhat pan tu in si maw? Si si, nang rel sing; profet tah in nase sawn si. 27 ’Ngai in, na lamzin remham tu tuh in, na mai ah ka nalang leh sing,’ ti’n ngannak heh ama thu ngannak si. 28 Nang rel sing; nupang te hingnak lak pin Niimtu Johan tah in nase sawn profet tumah suak ngawl si," ti’n ti si. Sinapikhaw Pathian uknak ah a hei ngawl ber heh Johan tah in mak sawn si. 29 Mipi tehem le, siahkhon te’n me a relnak heh a za dang phangin, "Pathian heh dik si," ti’n Johan niimnak ah niim dang si. 30 Farasi te le daan thiam te zong hen amah ni tsa Pathian thurelpinak kheh el in, Johan nenah niim ngawl si. 31 Tsimi manin Bawipa’n, "Tu san minung te heh hei thaw santeh tu sing im? Amah ni heh hei thaw bang sim? 32 Amah ni heh dawr ah to dang reng atsia, a rualpi te kheh ko in, ’Nangmah ni tsa piru tum pelh na ungkhaw, laam ngawl si utsi. Nang kah pelh na ungkhaw, kap ngawl si utsi,’ ti’n a titu naupang te thaw bangve si. 33 Niimtu Johan ah heh sang ei ngawl in le tsapit zu in ngawl in leng atsia, ’Amah heh khawvanga zingnak si,’ ti’n ti si utsi. 34 Mi Tsapa heh leng in sang ei in tsapit zu in atsia, ngai un, ’Lairong pa, tsapit zu aak pa; siahkhon te le misual te rualpi pa’ ti’n ti si utsi. 35 Sinapikhaw tsimnak heh a maan si ti heh tsimnaka tsa te’n lang tiar si," ti’n ti si. 36 Tsin, Farasi pakhat in Jesuh ah kheh amah thaw lai ei tuh in sam si. Tsimi manin Jesuh ah kheh Farasi inn ah hawh in lai ei tu in to si. 37 Ngai in, khaw sunga misual minu pakhat in Jesuh ah kheh Farasi inn ah lai ei a to lam kheh thei si. Amah khen alabaster num thaw in sathau rim ur keng si. 38 Tsin, Jesuh ninglam a kawngbul ah kap thah in ding atsia, a kawng kheh a mitti thaw som in, a sam thaw husek sak si. A kawng kheh thut atsia, sathau rim ur noih sak si. 39 Jesuh ah lai a dotu Farasi khen meheh a mu phangin, "Me Pa heh profet a si lekhaw, amah a zuut tseihtu me minu heh tu si ti le kawtibang nupang a si, ti heh thei bel tu si. Heimansim tiphangin minu heh misual si," ti’n a thin sung in ti si. 40 Tsimi phangin Jesuh in Farasi pa kheh o atsia, "Simon, na nenah thu pakhat rel tuh nei sing," ti’n ti si. Ama’n, "Sayapa, ka rel in," ti’n ti si. 41 Tsimi phangin Jesuh in, "Tangka puttu pakhat om in, ama nenah leibatu mi panih nei si. Pakhat in denari zanga baa in, a khatta in denari sawmnga baa si. 42 Me te panih hen a leibat a rul zo kawm ngawl manin, lungthiang ngai in zah kop si. Tsimi manin ka rel in; tangka puttu kheh tu in it sawn tu sim?" ti’n ti si. 43 Simon in, "Leiba tam sawn a zahnak khen it sawn tu in um sing," ti’n o si. Tsimi phangin Jesuh in, "Maan ngai in thukhen si tsi," ti’n ti si. 44 Jesuh in minu kheh her atsia Simon ah kheh, "Me minu heh mu tsim maw? Na inn sungah lut sing. Ka kawng somnak tuh in ti ka pe ngawl si tsi. Sinapikhaw minu hen ka kawng heh a mitti thaw in somsek atsia, a sam thaw in husek sak ka si. 45 Thuut ngawl ka si tsi. Sinapikhaw me minu hen inn sungah ka lut pin pah ka kawng a thuut heh tsawl lai ngawl si. 46 Ka lu heh sathau pawh ngawl ka si tsi. Sinapikhaw me minu hen ka kawng heh sathau rim ur noih sak si. 47 Tsimi manin na rel sing; me minu hen keimah a it pittseih manin, a sual tampi te zahnak si ongla si. Dawmno bek zahnak hen dawmno phang bek it deve si," ti’n ti si. 48 Tsin, minu kheh, "Na sual te zahnak si ongla si tsi," ti’n ti si. 49 Tsimi phangin laikuang a kilpinak te khen amahni thin sung ten ah, "Sual zahtu me pa heh tu sim?" ti’n ti dang si. 50 Tsin, Jesuh in, "Na umnak in san na si lei. Thinnuamno in hong ten," ti’n minu kheh ti si.
81 Tsimi zawh in tibang hen thiltsang si. Jesuh ah kheh khawpi le khaw tenau tehem ah khualvak in Pathian uknak angnung thuthang pha kheh phuang in rel tseihzel si. Tsin, ningluntu leinih te’n amah kheh lun dang si. 2 Tsin, raula sesuaka zingnak pin a dam tiarnak le amahni natnak a dam tiarnak nupang te, a sunga khawvang pasarih a nawt saknak Magdalene ti’n konak Mary ah, le 3 Herod thilkemtu Chuza zi Joanna ah le Susanna ah le a dang nupang tampi te khen amah lun si. Me tehem heh amahni neih le siah thaw Jesuh ah a tuamlawm tseihtu te si. 4 Tsin, khawpi taak hem pin mi tampi te kheh ama nenah leng dang atsia khawm dang in, Jesuh in thusanteh pakhat rel si. 5 Laitsi pawitu khen laitsi pawi tu in hawh atsia, laitsi kheh pawi si. Laitsi khenkhat te heh lampi vumah tsu atsia, mi te’n pal in vana vano te’n ei si. 6 Laitsi khenkhat te heh lung vumah tsu si. A po tsang pah in lei a nuum ngawl manin ro zep nom si. 7 Laitsi khenkhat te heh ling lak ah tsu atsia, lingkuang te thaw po in, ling in deep si. 8 Laitsi khenkhat te kheh leiram pha min ah tsu si. Poso atsia a let zakhat in rah si," ti’n ti si. Me thu te heh a rel tselh phangin, "Zanak tuh beng a nei te’n za tasen," ti’n au si. 9 A ningluntu te khen Jesuh ah kheh, "Me thusanteha sullelam heh hei sim?" ti’n dong dang si. 10 Jesuh in, "Pathian uknak thuthup thei tu in penak si ongla si utsi. Sinapikhaw midang te heh, ’Pan tseih pelh in a mu tuh ngawl in le za tseih pelh in a thei zo tuh ngawl in,’ thusanteh mang in thu rel si. 11 Thusantehnaka sullelam heh tibang hen si. Laitsi heh Pathian thu si. 12 Lampi kung ah a tsu te kheh Pathian thu a zatu te kheh si. Tsimi thu kheh um atsia, sannak a si ngawlnak tuh in diabol ah khen hawh in amahni thin sunga thu kheh dan sak si. 13 Lung vumah a tsu laitsi te heh thu kheh za atsia, ang ngai in a saangtu te si. Amahni khen ham nei ngawl in, tsillem sung bek um atsia, sualroihnak a tawk hun in du zep nom si. 14 Tsin, ling lak ah a tsu laitsi te heh thu kheh a za zawh in hawh atsia, nunnak tsa thintsawlnak, hausanak le sahnungnak te’n deep atsia a rah a min zo ngawl te kheh si. 15 Leiram pha ah a tsu laitsi te heh thu kheh ruatnak dik le thinlung pha thaw za atsia, kelen in thintsualnak rah a rahtu te kheh si. 16 Tumah in meiinn vaar atsia, kho khuh keel ngawl in, eihkhun nuai ah khen koih keel ngawl si. Tsimi tah in inn sungah a luttu te’n a vaar a mu thei tuh in a tohnak ah toh si sawn si. 17 Phuang tuh ngawl thupnak heimah om ngawl in, thei theih tuh ngawl le varnak ah a lang leh tu ngawl heimah om ngawl si. 18 Tsimi manin nang za daan ah tsimkom un. Heimansim tiphangin tutu sikhen a neitu te heh tam leilei penak si tu in, a nei ngawltu te heh nei ngai in a ring tsawmnak te riang kheh long sak si tu si," ti’n ti si. 19 Tsimi lai in a nu le a nau te kheh a nenah hawh in, minung a tam leita manin amah tawk thei ngawl si. 20 Tsimita mi pakhat in, "Na nu le na nau te’n nangmah tawk nuam in pulam ah ding dang reng si," ti’n rel si. 21 Sinapikhaw Jesuh in amahni kheh o atsia, "Pathian thu za atsia, a luntu te heh ka nu le ka nau te si," ti’n ti si. 22 Tsin, tibang hen thiltsang si. Ni khat in Jesuh ah kheh a ningluntu te thaw khawm to dang atsia, "Tipi hatlam ral ah hawh dang a sing," ti’n ti si. Tsin, amahni kheh hawh dang si. 23 A hawh dang lai in Jesuh ah kheh eihmu si. Tiniim vumah khawtawng leng in khawm kheh ti dim atsia, thinphunung ngai in om dang si. 24 Tsimita Jesuh nenah hawh atsia, phong dang in, "Bawipa, Bawipa, kei ral tseih si la khaw," ti’n ti dang si. Jesuh ah kheh tho in khawtawng le tilet te kheh hau atsia, khawtawng le tilet te kheh tsawl in, dap liang si. 25 Tsimi phangin Jesuh in amahni kheh, "Nang umnak kawnai ah sim?" ti’n ti si. Amahni’n kih ngai dang in khum ngai dang atsia, "Me pa heh kawtibang minung sim? Huih le ti te riang in a thupenak ngai si!" ti’n pakhat le pakhat rel dun dang si. 26 Tsimi phangin amahni kheh Galilee Tipi rala Kadarenes ram ah khawm to in leng dang si. 27 Lei a pal natsang in tsimi khawa mi pakhat in amah kheh muak si. Amah heh reipi sung khawvanga zingnak si ongla si. Heimah van sil ngawl in, inn ah khen om ngawl in ngawr ah om si. 28 Jesuh ah a mu phangin a mai ah bok atsia, ring ngai in, "A Daak bera Pathian Tsapa Jesuh, nangmah thaw hei puah tuh nei siing im? Na kun sing, ka erh sawh mah nen," ti’n ti si. 29 Heimansim tiphangin ama’n raula thiang ngawl kheh tsimi pa sung pin a suak tuh in thupe si. Raula thiang ngawl khen amah kheh kai veng si. Amah kheh kilpek in thiarri thaw hen atsia, kolkhah veng si. Tsimi amah hennak te kheh bottawng atsia, khawvang in hampalak ah kai veng si. 30 Jesuh in amah kheh, "Na ming tu sim?" ti’n ti si. Ama’n, "Legion ah sing," ti’n ti si. Heimansim tiphang ama sungah khawvang tampi dum si. 31 Tsin, khawvang te’n leikaw thukpi sungah a hawl tuh ngawl in kun dang si. 32 Tsimi mun mual vumah vok hon tampi leida dang si. Khawvang te’n vok hon sungah a dum siang tuh in kun dang atsia, Jesuh in dum siang si. 33 Khawvang te kheh tsimi pa sung pin suak dang atsia, vok hon sungah dum dang si. Tsin, vok te kheh haap pin tiniim sungah dansuk dang in thi dangberh si. 34 Vokkhaltu te khen tsimi thiltsang kheh a mu phangin, khawpi sungah le khawte hem ah rel dang si. 35 Tsimi manin mi tampi te khen tsimi thiltsang kheh pan tu in hawh dang si. Jesuh nenah a leng dang phangin, a sunga khawvang te a suak ongla mipa kheh lungmu maan ngai in le van sil in Jesuh kawngbul ah a to reng kheh mu dang atsia kih ngai dang si. 36 Tsimi a mutu tehem in khawvanga zingnakpa dam leh daan kheh midang te nenah rel si. 37 Tsimi phangin Kadarenes ram le tsimi ram kawnvel ah om mipi tehem khen Jesuh ah kheh a kih dang leita manin amahni ram sung pin a dan tuh in kun dang si. Tsin, Jesuh ah kheh khawm to atsia, hong si. 38 A sung pin khawvang a suaktupa khen Jesuh nenah om tu in Jesuh ah kheh kun si. Sinapikhaw Jesuh in, 39 "Inn ah hong ta la, Pathian in nangma vumah a puahnak thilmak te heh rel ten," ti’n ti atsia, inn ah hong tiar si. Tsimi phangin amah kheh hawh atsia Jesuh in a vumah a puahnak thilmak te kheh khaw sung hem ah phuang si. 40 Jesuh ah kheh tsimi munah a hawh leh phangin mihonpi te khen vaimuak dang si. Heimansim tiphangin amahni tehem in Jesuh leng tu kheh ngaklah ngai dang si. 41 Pan in, sinakok uktu Jairus ah khen Jesuh nenah hawh in a kawngbul ah bok atsia, ama inn ah leeng tu in kun si. 42 Heimansim tiphangin ama’n tsanu pakhatno bek nei in amah heh kum leinih si atsia, naa in a thi tu zep si si. A hawh tseih lai in mihonpi te khen amah kheh neek tuptup dang si. 43 Tsin, tsimi mihonpi lak ah kum leinih sung thizung nat vei minu pakhat peh deve si. A nungnak tsa tuh in a neinak tehem thaw sibawi nenah bawl pelh in, heimah dam zo ngawl si. 44 Ama’n Jesuh ninglam pin hawh atsia, a angki tsual tsepno tongsak in, makhat in a thizung kheh tawp si. 45 Tsimi phangin Jesuh in, "Tu in ka tong sim?" ti’n ti si. Mi tehem in a phaa dang manin Piter ah le a kunga te’n, "Bawipa, mihonpi te’n nangmah heh neek atsia tet dun suihsuih tsimi, ’Tu in ka tong sim?’ na ti," ti’n ti si. 46 Sinapikhaw Jesuh in, "Mi pakhat khat in tong ka si. Heimansim tilekhaw ka sung pin huham a suak heh thei sing," ti’n ti si. 47 Minu khen a thup tsawm zo leh ngawlla lam kheh a thei phangin, tsai thahlam in a nenah hawh atsia, a mai ah bok si. Tsin, mi tehem mai pin khen Jesuh nenah hei manin amah a tong, ti le a tong tsang in a damsek nom thu kheh phuang si. 48 Tsimi phangin Jesuh in, "Tsanu, ang in om in. Na umnak hen na dam tiar ongla si. Thinnuamno in hawh ten," ti’n ti si. 49 A awn tseih lai tum in, sinakok uktupa inn pin mi pakhat leng atsia, "Na tsanu thi ongla si. Sayapa heh nainok leh awl len," ti’n Jairus ah kheh ti si. 50 Sinapikhaw me thu heh Jesuh in a za phangin Jairus ah kheh, "Thinphu mah nen, um in. Na tsanu dam leh tu poh si," ti’n o si. 51 Jesuh ah kheh inn sungah a lut phangin Piter ah, Jeim ah, Johan ah le naupangnua nu le pa siar ngawl tumah lut siang ngawl si. 52 A vaseng in lungse in kah dang tseih si. Sipelh atsia Jesuh in, "Kap mah na un. Amah heh a thi si ngawl in a eihmu poh si," ti’n ti si. 53 Amahni’n a thi lam a thei reng manin, nautat ngai in nihsan dang si. 54 Jesuh in amahni kheh a vaseng in suakberh tiar si. Tsin, minu kheh a kut pin len in ko atsia, "Tsanu, tho in," ti’n ti si. 55 Tsimi phangin a raula kheh ama sungah dum leh in, makhat in tho si. Tsin, Jesuh in a ei tuh lai pe tiar si. 56 A nu le a pa te khen khum ngaingai kawm si. Sinapikhaw me thu heh tumah a rel tuh ngawl in Jesuh in amah ni kheh kham si.
91 Jesuh in ningluntu leinih te kheh ko khawm atsia, khawvang tehem neh theinak le natnak tehem dam tiar theinak huham, le thuneinak pe si. 2 Amahni kheh Pathian uknak thu phuang tu in le minaa te dam tiar tu in leh si. 3 Jesuh in amahni kheh, "Nang khualvaknak tsa in thingkhawh maw, tawngphu maw, sang maw, tangka maw heimah keng mah na un. Angki putasilh khen keng mah na un. 4 "Nang zindungnak inn ah nang hong ma hem tsaam un. 5 Tutu sikhen nangmahni zin a dung siang ngawl te kheh amahni hatlam ah tetti a si tuh in, tsimi khaw pin nang hong leh phangin nang khawborh rori kheh thin ta un," ti’n thuzam si. 6 Tsimi manin ningluntu te khen ama nen pin khen kiang dang atsia, khaw hem ah hawh in mun hem ah thuthang pha phuangin, mi naa te dam tiar si. 7 Tsin, Jesuh puahnak tehem kheh ram pali lak pin ram khen pakhat uktu Herod in za atsia, mi pawlkhat te’n, Johan ah mithi te lak pin tho si ti’n ati manin a thinlung buai ngai si. 8 Tsin, mi pawlkhat te’n, Elijah ah lang si ti’n ti atsia, midang te hen, tuma profet pakhat kheh thihnak pin tho si, ti’n ti dang si. 9 Herod in, "Johan ah heh a ngawng ka tennak si. Sinapikhaw a thu ka zanak me pa heh tu si tu sim?" ti’n ti si. Tsin, ama’n Jesuh ah tawk ngah tu in zei si. 10 Lehnak te kheh hong leh dang atsia, a puahnak te hemmuah kheh Jesuh ah rel dang si. Tsin, amahni kheh Bethsaida khaw kunga mi om ngawl minah hawhpi si. 11 Sinapikhaw mihonpi te’n tsimi thu kheh a thei phangin, amah kheh lun dang si. Jesuh in amahni kheh vaimuak atsia, Pathian uknak thu kheh rel in, damnak a kul minaa te kheh dam tiar si. 12 Khawthim dawn phangin ningluntu leinih te kheh a nenah hawh dang atsia, "Kei omnak heh hampalak a si manin, khawpi te ah le nai ram sung hem ah tsaam in, lai ei tuh a ngah theinak tuh in mipi te kheh hawh tiar in," ti’n ti dang si. 13 Sinapikhaw Jesuh in amahni kheh, "Nangmahni in amahni ei tuh pakhat khat pe un," ti’n ti si. Amahni’n, "Khaw sungah hawh in me mipi tehem tsa lai ei tuh kei leisak ti siar ngawl, keimahni’n sang tsuun panga le nga panih bek nei si ung," ti’n ti dang si. 14 Mihonpi te heh patsang veu mi thawng nga luun si. Jesuh in ningluntu te kheh, "Hon khat ah minung sawm nga in to tiar un," ti’n ti si. 15 Amahni’n a relnak bangin puah dang atsia, a vaseng in to tiar si. 16 Tsin, sang tsuun nga le nga panih kheh le atsia, van lam panso in, muitsu aburh tselh phangin, sang kheh hem atsia mipi te a li tuh in ningluntu te kheh pe si. 17 A vaseng in khampek in ei dang si. A kham val a khon dangnak heh kho leinih dim si. 18 Tsin, tibang hen thiltsang si. Amah ruak in saw a ngen tseih lai in a ningluntu te kheh a nenah om si. Tsin, a ningluntu te kheh, "Mipi te’n keimah heh tu si, ti’n ka ti sim?" ti’n ti si. 19 Amahni’n, "Mi pawlkhat te’n, Niimtu Johan ah si, ti’n ti na si. Pawlkhat te’n, Elijah ah si, ti’n na ti si. Tsin, pawlkhat te’n, tanglai profet te lak pin pakhat tho si, ti’n na ti si," ti’n o dang si. 20 Tsimi phangin Jesuh in amahni kheh, "Nangmahni in keimah heh tu si, ti’n ka ti si utsim?" ti’n ti si. Piter in o atsia, "Pathian-a Khrih ah si tsi," ti’n ti si. 21 Ama’n me thu heh tumah a rel dang tuh ngawl in nase ngai in kham atsia, thupe si. 22 "Mi Tsapa hen harsanak tampi tuar kultu in, upa te, suangbawi te le Daan zirhtu te’n han tu atsia, reek tu si. Tsin, a nithumnak ni in tho tiarnak si tu si," ti’n ti si. 23 Tsin, Jesuh in a vaseng te nen ah, "Tutu sikhen ka ning a lun nuam a si lekhaw, amah le amah el tsawm sehla, nitin ama thinglamteh phur in ka lun sen. 24 Ama nungnak a san ottu te heh a nungnak sungtu atsia, keima manin ama nungnak a sung tu heh a nungnak san tu si. 25 Mi pakhat in leivumpi heh tso atsia, a nungnak a siatsuah tsawm maw ral tiar maw a si tsuk asin, hei nempinak ngah tu sim? 26 Tutu sikhen keimah le ka thu te a mizahtu heh, Mi Tsapa khen ama tsungnungnak thaw in le Pa tsungnungnak thaw in le ama vanvummi thiangrim te tsungnungnak thaw in a leng phangin mizah deve tu si. 27 Sinapikhaw thudik nang rel sing. Pathian uknak a mu ma hem nai ah a ding mi pawlkhat te thi tu ngawl si," ti’n ti si. 28 Tsin, tibang hen thiltsang si. Me thu te heh a rel tselh zawh niriat duuk a rei phangin, Piter, Johan ah le Jeim te kheh sawngen tu in mual vumah kai pi si. 29 Saw a ngen dang lai in Jesuh mel kheh phun dang ngai in lang atsia, a vansilh te kheh ngover in desur si. 30 Ngai in, Mawsi ah le Elijah te panih khen Jesuh ah awntsawp pi si. 31 Amahni kheh tsungnung ngai in lang dang atsia, Jesuh in Jerusalem ah a nakim tula tuh thu asi a kheeknak tuh thu rel dang si. 32 Sinapikhaw Piter ah le a rualpi te heh eihmuh ur ngai in eihmu dang si. A khangtho dang phangin ama tsungnungnak le a kung ah mi panih ding reng kheh mu si. 33 Tsin, tibang hen thiltsang si. Mi panih te a nen pin a kiang lai in Piter in Jesuh ah kheh, "Bawipa, nai ah kei om dang heh pha ngai si. Buuk pathum sa dang a sing; pakhat heh nangma tuh, pakhat heh Mawsi-a tuh, tsin, pakhat heh Elijah-a tuh si," ti’n ti si. Piter ah khen hei a awn ti thei tsawm ngawl si. 34 A awn tseih lai in meiro lengsuk atsia, amahni vumah zaam si. Tsin, amahni kheh meiro sungah a lut phangin ningluntu te khen kih ngai dang si. 35 Tsin, meiro sung pin aw pakhat ring atsia, "Me pa heh ka it pittseihnak ka Tsapa si. A thu ngai un!" ti’n ti si. 36 Aw ring a tawp phangin Jesuh ah ruak kheh mu dang si. Amahni khen meng den dang in, a munak thil heh tsimi hun lai in tumah rel ngawl si. 37 Tsin, tibang hen thiltsang si. A thaizing in mual vum pin a tolhsuk dang phangin, mihonpi te’n amah kheh muak dang si. 38 Ngai in, makhat in mipi lak pin mi pakhat khen au atsia, "Sayapa, ka tsapa heh na paansak tuh in na kun sing. Amah heh ka neih lamtsang ka tsapa si. 39 Ngai in, ama sungah raula a dum phangin, au melh atsia, khakber in tsilbuan paih veng si. A naa ngaingai tuh in a erh tselh phangin har ngai in suak veng si. 40 Tsimi manin na ningluntu te kheh a nawtsak tuh in kun pelh sing. Sinapikhaw amahni’n nawt sak thei ngawl si," ti’n ti si. 41 Jesuh in o atsia, "Maw umnak nei ngawl le mi lamvai hin te, nang nenah kawtsan om in nang or rih tu sing im? Na tsapa tsawh nai ah huai in," ti’n ti si. 42 A hawhpi tseih lai in khawvang khen lei vahnak in mang atsia, khakber tiar si. Tsimi phangin Jesuh in raula nawngkai kheh hau atsia, naupang kheh dam si. Tsin, a pa nenah pe leh si. 43 A vaseng in Pathian huham mak kheh khum ngaingai dang si. Mi tehem in a puahnak thil tehem kheh a lunglawi ngai in, Jesuh in a ningluntu te kheh, 44 "Me thu tehem heh nang beng sungah lut tasen. Mi Tsapa heh mi te kut ah zuarnak si tula si," ti’n ti si. 45 Sinapikhaw me a awnnak heh amahni’n thei zo dang ngawl si. Amahni’n a theibaan tuh ngawl in me thu heh amahni nen pin thupnak si. Tsin, me a relnak heh amah dong ngam dang ngawl si. 46 A ningluntu te kheh amahni lak pin mi thupi ber si tu tuh kheh el dun dang tseih si. 47 Jesuh in amahni thinlung sunga ruatnak kheh thei atsia, naupang pakhat kheh huai in a kung ah koih si. 48 Tsin, amahni kheh, "Tutu sikhen keima ming in me naupangno a saangtu heh keimah saang si. Tsin, keimah a saangtu heh keimah lehtupa khen saang si. Nang vaseng lak pin mi nauta ber heh mi mak ber si tu si," ti’n ti si. 49 Tsin, Johan in amah kheh o atsia, "Bawipa, mi pakhat in nangma ming in khawvang a nawt tseih kheh mu in, keimahni thaw nangmah a lun ngawl manin kham si ung," ti’n ti si. 50 Sinapikhaw Jesuh in, "Keimahni a do ngawltu heh keimahni lama a si manin kham mah na un," ti’n ti si. 51 Tsin, tibang hen thiltsang si. Amah leso hun a kim phangin, Jerusalem ah hawh tu in a mai ngat si. 52 Tsin, a masuan ah thukotu leh si. Amahni kheh hawh in, ama tsa thil puah hamsak tu in Samaria khaw ah lut si. 53 Sinapikhaw Jerusalem ah hawh tu in a mai a ngat manin, amah kheh saang ngawl si. 54 A ningluntu Jeim ah le Johan in meheh a mu kawm phangin, "Bawipa, Elijah puah bangin me te heh a dumreih tuh in, van pin mei a lengsuk tuh in thupe tu in kei deih tsim maw?" ti’n ti si. 55 Sinapikhaw amahni lam her in hau atsia, "Kawtibang thinlung nang nei, ti heh thei tsawm ngawl si utsi. 56 Mi Tsapa heh minung te nungnak siatsuah tu in leng si ngawl in, san tu in leng si sawn si," ti’n ti si. Tsin, khaw dang ah hawh dang si. 57 Tsin, tibang hen thiltsang si. Lampi ah a hawh dang lai in mi pakhat in amah kheh, "Bawipa, na hawh min hem ah na lun tu sing," ti’n ti si. 58 Jesuh in amah kheh, "Ne te’n kaw nei in van ah a zuang vano te’n bu nei si. Sinapikhaw Mi Tsapa hen lu nga min tuh nei ngawl si," ti’n ti si. 59 Tsin, midang pakhat kheh, "Ka lun in," ti’n ti si. Sinapikhaw ama’n, "Bawipa, ei pa’h vi masa rih tu sing," ti’n ti si. 60 Jesuh in amah kheh, "Mithi te’n amahni mithi kheh vi ta sehla, nangmah zong hen hawh ta la Pathian uknak thu heh phuang sawn in," ti’n ti si. 61 Tsin, midang pakhat in, "Bawipa, na lun tu sing. Sinapikhaw ka inn ah om te awnkam lah rih tu sing," ti’n amah kheh ti si. 62 Sinapikhaw Jesuh in, "Ninglam her thahlam in lethuannak a leentu heh Pathian uknak thaw phutua dun ngawl si," ti’n amah kheh ti si.
101 Tsimi zawh in Bawipa’n a dang sawm sarih deng meek atsia, a hawh min tuh khaw le mun hem ah panih panih in leh ham si. 2 Jesuh in amahni kheh, "Lai khawl tuh tam pittseih pelh in, lai khawltu te heh a dawmno si. Tsimi manin laikhawl tuh neitu Bawipa nenah lai khawltu te a leh theinak tuh in sawngen un. 3 Nang hawh min tuh ah khen hawh ta un. Ngai un, ne hon lak ah tuuno bangin nang leh sing. 4 Tangka dip maw, tawngphu maw, kedawl maw keng mah na un. Tsin, lamlak ah tumah awnpi mah na un. 5 Inn pakhat khat ah nang lut phangin, ’Nai inn ah thinnuamnak om tasen,’ ti’n ti masa ber ta un. 6 Tsimi inn ah khen thinnuamnaka tsapa a om a si lekhaw, nang thinnuamnak kheh tsimi inn ah om reng tu si. Tsimi bang a si ngawl lekhaw thinnuamnak kheh nangmahni nenah lehleh tu si. 7 Tsimi inn ah khen tsaam reng ta ula, amahni penak te kheh ei in in ta un. Heimansim tiphangin napertu hen a per man a ngah tuh vo si. Inn pakhat pin inn dang ah thawn tseih mah na un. 8 Nang lengnak khaw taak hem ah nangmahni a saang lekhaw, nangmahni a linak kheh ei men un. 9 Tsimi khawa minaa te dam tiar ula, ’Pathian uknak heh a leng tu zep si ongla si,’ ti’n amahni kheh rel ta un. 10 Sinapikhaw khaw sungah nang lut phangin nangmahni a saang ngawl a si lekhaw, khaw sung lampi ah khen hawh ula, 11 ’Nang khaw sunga leivul rori heh nangmahni a dotu a si tuh in husek si ung. Sinapikhaw me zong heh thei ta un. Pathian uknak heh nangmahni nenah a leng tu zep si ongla si,’ ti’n ti ta un. 12 Nang rel sing. Tsimi Ni in me khaw tah in Sodom khawa tuarnak heh zahzuam sawn ruang tu si. 13 "Lungsenung Korazin khaw, lungse nung Bethsaida! Nangmahni sungah puahnak thilmak naper te heh Tyre le Sidon khaw ah puah a si ta asin, tuma pi in buri puan sil in le, vut lak ah to in a sual sir tula pelh si. 14 Sinapikhaw thukhennak ah nangmahni tuar tuh tah in Tyre le Sidon khaw te tuarnak heh zahzuam sawn ruang tu si. 15 Van ah tsawisangnak nang Kapernaum khaw, mithi khaw ah lakulhnak si tu si tsi. 16 Nangmahni thurelnak a ngaitu te heh keima thurelnak a ngaitu te si. Nangmahni a eltu te heh keimah el si in, keimah a eltu te heh keimah lehtupa kheh el si." 17 Sawm sarih te kheh ang ngai in hong leh dang atsia, "Bawipa, khawvang te riang kheh nangma ming manin keimahni thu ngai si," ti’n ti dang si. 18 Jesuh in amahni kheh, "Van pin khawlip bangin Satan tsersuk kheh mu sing. 19 Ngai un, rul le tii palkeh zonak thuneinak, le raal te huham tehem vumah thuneinak nang pe sing. Kawtibang bang a si ta sikhen tumah in nang naa tiar zo tu ngawl si. 20 Sinapikhaw raula te’n nangmahni thu a ngai man hen ang tseih men mah na un. Tsimi tah in vanvum ah nang ming ngannak a si heh ang sawn un," ti’n ti si. 21 Tsimi lai in Jesuh ah kheh Raula Thiangrim ah angngai ngai atsia, "Ei Pa, van le leia Bawipa, mitsim le mithiam te nen pin na thupnak me thil te heh nausen te nenah na muh manin thang na phat sing. Si si, ei Pa, tsimi heh na mitmuh ah a pha ngai si. 22 Ei Pa’n thil tehem heh keimah pe ongla si. Tsapa heh tu si, ti heh tumah in thei ngawl in Pa bek in thei si. Tsin, Pa heh tu si, ti heh tumah in thei ngawl in, Tsapa le Tsapa in a muhnak te bek in thei si," ti’n rel si. 23 Tsin, a ningluntu te lam ah her atsia, "Nang munak thil te a mutu mit heh a muitsu si. 24 Heimansim tiphangin nang rel sing; profet tampi te le kumpibawi tampi te’n nang munak heh mu ot pelh in mu ngah ngawl atsia, nang zanak heh za ot pelh in za ngah ngawl si," ti’n amahni kheh rel si. 25 Pan in, daan thiam pakhat khen ding atsia, Jesuh ah a tsulnak in, "Sayapa, kumkhaw nungnak ro ka luah theinak tuh in hei puah tu sing im?" ti’n ti si. 26 Jesuh in amah kheh, "Daan bu sungah kawti’n ngan sim? Kawtibang in siar si tsim?" ti’n ti si. 27 Ama’n o atsia, " ’BAWIPA na Pathian kheh na thinlung veksen, na nungnak veksen, na thazaang veksen le na lungmu veksen in it la,’ tsin ’na inn nen kheh nangmah le nangmah na it tsawm bangin it in,’" ti’n ti si. 28 Jesuh in amah kheh, "Maan ngai in o ka si tsi. Me tehem heh puahsek ta la nung tu si tsi," ti’n ti si. 29 Sinapikhaw amah le amah diktsang tiar tsawm a nuam manin Jesuh ah kheh, "Ka inn nen heh tu sim?" ti’n ti si. 30 Jesuh in amah kheh o atsia, "Mi pakhat kheh Jerusalem pin Jerikho ah hawhsuk atsia, lamlak ah damiah te kut sungah leng si. Amahni’n a vansilh te suah sak atsia, maliam suah in a thi tu zep in zam si. 31 Tsin, tibang hen thiltsang si. Tsimi hun keek in suang pakhat kheh tsimi zin tawnin hawhsuk atsia, a mu phangin zin heel in hawhper si. 32 Tsimi bangpah in Levi pakhat kheh tsimi zin tawnin hawhsuk deve in, tsimi mun a leng phangin hawh in pan atsia, zin heel in hawhper deve si. 33 Samaria te pakhat kheh a khualvak tseih lai in tsimi pa omnak min ah leng si. A mu phangin amah kheh ngeihhar ngai si. 34 Amah kheh zuan atsia, a meima te kheh tsun sak in, tsapit zu burh sak si. Tsin, a tonak ramsa vumah toh atsia, khual buuk ah huai in tuamlawm si. 35 A thaizing in tsimi mun pin a kiang phangin, khual buuk kiltu kheh denari panih pe atsia, ’Phatakno in ka tuamlawm sak in. Ama tsa na mangbeetnak tehem ka leng leh phangin na rul lehberh tu sing,’ ti’n ti si. 36 Tsimi manin me te pathum lak pin damiah te kut sungah a lengtu pa inn nen heh tu ber si tu in ruat si tsim?" ti’n ti si. 37 Ama’n, "Ama vumah ngeihharnak a muhtu pa heh si," ti’n ti si. Tsimi phangin Jesuh in, "Hawh ta la me bang hen puah ten," ti’n ti si. 38 Tsin, tibang hen thiltsang si. A hawh dang lai in Jesuh ah kheh khaw pakhat ah lut atsia, Martha tinak minu khen ama inn ah dung tiar si. 39 Martha in suahpi Mary ah nei si. Mary ah hen Jesuh kawngbul ah to in, a thurelnak ngaikek si. 40 Sinapikhaw Martha ah heh lai ei tuh puah in a nanok ngai si. Ama’n Jesuh nenah hawh atsia, "Bawipa, me ka suahpi Mary ah hen lai ei tuh puah tu in keimah ruak a zam men heh heinam ngawl si tsim maw? Tsimita keimah a bawm tuh in ka rel sak in," ti’n ti si. 41 Jesuh in Martha ah kheh o atsia, "Martha, Martha, thil tampi te ah thintsawl in rimsu si tsi. 42 Sinapikhaw na kulnak thil pakhat om si. Mary in tsimi thilpha kheh deng in, a nena heh tumah in sut thei tu ngawl si," ti’n ti si.
111 Tsin, tibang hen thiltsang si. Jesuh ah kheh mun khat ah sawngen atsia, a tselh phangin a ningluntu te lak pin ningluntu pakhat in, "Bawipa, Johan in a ningluntu te kheh sawngen dan a zirh bangin, sawngen dan kei zirh in," ti’n ti si. 2 Tsimi manin Jesuh in amahni kheh, "Nang sawngen phangin, van a kei Pa, na ming thiangrim tasen. Na uknak leng tasen. Van ah na deihnak puah a si bangin, leivum ah puah si tasen. 3 Ni tin in ei tuh lai kei pe sawh in. 4 Keimahni vumah a sual tehem kei zah bangin, kei sual te kei zah deve sawh in. Sualroihnak sungah kei huai mah nala, mi sesuak pa nen pin kei kan in," ti’n ti si. 5 Tsin, Jesuh in amahni kheh, "Nangmahni lak ah mi pakhat in rualpi pakhat a nei tsuk asin, zan laitum in ama nenah hawh atsia, ’Ka rual, sang phil thum ka put rih in. 6 Ka rualpi pakhat heh khualvak in ka nenah dung atsia, a mai ah ka li tuh heimah nei ngawl sing,’ ti’n ati tsuk asin, 7 inn sunga a rualpi khen, ’Ka nainok mah nen. Tuhen kong khamberh ongla sing. Ka tsano te khen eihkhun ah keimah thaw zauberh ongla si. Tho in na pe thei ngawl sing,’ ti’n o tu si. 8 Nang rel sing. A rualpi a si manin tho in a pe ngawl pelhta sikhen, a kun pittseih manin amah khen tho tu atsia, sang kheh a kinnak zah in pe tu si. 9 "Tsin, nang rel sing; ngen un; nang pe tu si. Zei un; tawk tu si utsi. Khawng un; kong nang hon tu si. 10 Heimansim tiphangin a ngentu tehem in ngah in, a zeitu in tawk atsia, a khawngtu kheh kong honnak si tu si. 11 Nangmahni laka pa pakhat khat heh a tsapa in sang a ngen tsuk asin, lungto pe tu si maw? Tsimi a si ngawl lekhaw nga a ngen tsuk asin, nga ai in rul pe tu si maw? 12 A si ngawl lekhaw arti a ngen tsuk asin, tii pe tu si maw? 13 Nangmahni mi sesuak nang si thahlam in nang tsa te thilpha pe dan tuh nang thei a silekhaw, van ah a om nang Pa’n ama nenah Raula Thiangrim a ngentu te kheh pe leilei ol ngawl si maw!" ti’n ti si. 14 Jesuh in awn thei ngawl khawvang pakhat nawt si. Tsin, tibang hen thiltsang si; khawvang kheh a suak phangin awn thei ngawlpa kheh awn thei in, mihonpi te khen khum ngai dang si. 15 Sinapikhaw mi pawlkhat te khen, "Amah hen khawvang te uktu Beelzebub thawmin khawvang te nawt si," ti’n ti si. 16 Midang te hen amah a tsulnak in van pin theihdiknak kheh muh tiar si. 17 Sinapikhaw ama’n amahni ruatnak kheh thei atsia amahni kheh, "Amahni le amahni a do dun ram tehem heh khensep tu in, a do dun innsang tehem heh se nom tu si. 18 Satan heh amah le amah a do tsawm a si lekhaw kawti bangin a uknak kheh kho thei tu sim? Beelzebub thawmin khawvang te nawt si, ti’n ti ka si utsi. 19 Beelzebub thawmin khawvang te nawt si lengkhaw, nang tsa te’n tu thawmin khawvang te kheh nawt sim? Tsimi manin amahni kheh nangmahni thu a khen saktu te si. 20 Sinapikhaw keimah hen Pathian kuttsung thaw in khawvang te nawt ka si lekhaw, Pathian uknak heh nangmahni nenah leng ongla si. 21 Mi kol ngai pa pakhat hen raalvan kimsek thaw ama inn kheh a kil a si lekhaw, a thilri te kheh him tu si. 22 Sinapikhaw ama tah in kol sawn mi pakhat in amah kheh nom atsia, neh in a aan ngainak a raalvan te kheh long in, mi te nena a longnak a thil te kheh sem sak tu si. 23 Keima lam ah a om ngawltu heh keimah a raaltu si atsia, keimah a khawmpi ngawltu heh a thehseptu si. 24 "Raula thiang ngawl kheh mipa sung pin suak atsia, ramro ah tsawlom min tuh zei in vak tseihzel si. A tawk ngawl phangin, ’Ka suaknak inn ah hong leh tu sing,’ ti’n ti si. 25 A leng leh phangin a inn kheh phiatsek atsia remseknak kheh tawk si. 26 Tsimi phangin amah khen hawh atsia, ama tah in sesuak sawn a dang raula pasarih te kheh huai in lut dang atsia om dang si. Tsimi pa nun daan dawl taber heh a masa tah in se sawn si." 27 Tsin, tibang hen thiltsang si. Jesuh in me thu te heh a rel tselh phangin mihonpi lak pin minu pakhat khen au ur atsia, "Nangmah a paitu sul le khul a tultu heh muitsu dong si," ti’n ti si. 28 Sinapikhaw Jesuh in amah kheh, "Tsimi tah in Pathian thu za atsia, a luntu heh muitsu dong sawn si," ti’n ti si. 29 Mihonpi te kheh tamngai ngai in a khawm dang lai in, Jesuh in, "Tu sana minung te heh a sesuak si. Amahni’n theihdiknak zei si. Profet Jonah-a theihdiknak siar ngawl theihdiknak heimah muhnak si tu ngawl si. 30 Jonah ah heh Nineveh khaw minung te nenah theihdiknak a si bangin, Mi Tsapa khen heh tu san minung te nenah theihdiknak si tu si. 31 Langlam kumpibawi nu in lei tawpnak pin Solomon tsimnak ngai tu in a leng manin, thukhennak ah tu san minung te thaw ding tu atsia, amahni kheh han tu si. Ngai un, Solomon tah in nase sawn nai ah om si. 32 Nineveh khaw te’n Jonah thureelnak thawmin sual a sir manin, tu san minung te thaw thukhennak ah ding tu atsia, amahni kheh han tu si. Ngai un, nai ah hen Jonah tah in nase sawn om si. 33 "Tumah in meiinn vaar atsia a thup min ah koih ngawl in, kho khuh ngawl si. Tsimi tah in inn sungah a luttu tehem in a vaar a mu thei tuh in meiinn tohnak ah toh sawn si. 34 Ruangpuma meiinn heh mit si. Tsimi manin na mit a pha lekhaw, na ruang pumpuluk in varnak dim deve tu si. Sinapikhaw na mit a pha ngawl a si lekhaw na ruangpum kheh thimnak dim tu si. 35 Tsimi manin na sunga varnak heh thimnak a si tuh ngawl in tsimkom un. 36 Tsin, na pumpuluk ah thimnak peh ngawl in varnak a dim a si lekhaw, meiinna vaar sur khen nangmah varnak a pe bangin, ruangpuma pumpuluk ah varnak dim tu si. 37 A awn tseih lai in Farasi pakhat khen Jesuh ah kheh a nenah simlai ei tu in kun si. Tsimi manin a inn sungah lut atsia, lai ei tu in to si. 38 Tsimi Farasi khen lai ei ma in kut a som masa ngawl kheh a mu phangin ambuk si. 39 Sinapikhaw Bawipa’n amah kheh, "Nangmahni Farasi te hen khuat le pakan te heh a pulam phang zong somsek tiar atsia, nang sunglam heh hampumnak le suaksualnak in dim si. 40 Mitaw te, pulam a puahtu hen sunglam khen puah meek si ngawl si maw? 41 Nang thil neinak zahno in minawm tsarah te bawmnak pe sawn un. Tsimi phangin thil tehem heh nangmahni tsa in thiang tu si. 42 "Nangnihni lungsenung Farasi te, lenmui te, vonna lawm le zira tehem-a sehsawma sehkhat kheh pe atsia, diknak le Pathian itnak kheh leekdelh si utsi. A dang te heh zam lawt ngawl in, me te heh nang puah tuh si. 43 Nangnihni lungsenung Farasi te, sinakok ah tohkheng thupi ber ah to tu le dawr ah vaimuaknak si kheh tuur si utsi. 44 Nangnihni lungsenung mi sidat Farasi te le Daan zirhtu te, nangmahni heh a sunglam mu theihnung ngawl thaan bang si utsi. Tsimi thaan vumah a hawhtu te’n thaan a om lam riang thei ngawl si," ti’n ti si. 45 Tsimi phangin daan thiam te laka pakhat in amah kheh, "Sayapa, me na awnnak heh keimahni na ti tsip si tsi," ti’n ti si. 46 Jesuh in, "Nangmahni daan thiam te khen lungsenung si deve si utsi. Thil rit ngai kheh mi te suan si utsi. Nangmahni rori zong hen tsimi thilrit kheh nang kuttsung pohkhen tong nuam ngawl si utsi. 47 Nangnihni lungsenung te, profet te thaan puahsak si utsi. Tsimi profet te heh nang pupa te reeknak te si. 48 Nang pa te puahnak heh nang lungkimpi manin, nang pa te puahnak heh a maan si, ti tettikhan si utsi. Amahni’n profet te kheh reek miau atsia, amahni thaan puahsak si utsi. 49 Tsimi manin Pathian tsimnak hen, ’ Amahni nenah profet te le lehnak te leh tu sing. Amahni’n pawlkhat te kheh reek in erh tu si,’ ti’n ti si. 50 Leivum a po pan pin pan profet tehema thisen luannak tehem kheh tusan minung te nenah phuzul leh tu si. 51 Si si, Abel thisen pin pan bawlnak dawndel le temple laklawh ah reeknak Zakhariah thisen tian kheh tusan minung te nenah phuzul leh ken tu si. 52 Nangnihni daan thiam te, lungsenung si utsi. Heimansim tiphangin tsimnak tsabi kheh dan si utsi. Nangmahni in a sungah lut nuam ngawl in, a luttu te kheh khak si utsi," ti’n ti si. 53 Me thu te heh amahni a rel tseih lai in, Daan zirhtu te le Farasi te’n nase ngai in amah kheh do si. 54 A awn pin sual zei atsia, a pom theinak tuh zei in tsul dang reng si.
121 simi lai in siar tselhnung ngawl mihonpi te kheh mun khat ah khawm dang in, pal kha dun neuno dang si. A ningluntu te kheh thurel pan in, a masa ber in, "Mi sidat Farasi te tsol kheh ralring ta un. 2 Phuang tuh ngawl khuhnak heimah om ngawl in, thei tuh ngawl thupnak heimah om ngawl si. 3 Tsimi manin khawthim sungah nang awnnak tehem heh khawvar ah zanak si tu si. Inn sungta ber ah na awn kuhnak kheh innkhum vum pin phuangnak si tu si. 4 "Rualpi te, nang rel sing; ruangpum reek thei pelh in, a reek tselh phangin heimah a puah bet leh thei ngawlla te kheh kih mah na un. 5 Nang kih tuh heh nang muh tu sing. Mi a reek tselh phangin hell ah vawr theinak huham a neitupa kheh kih ta un. Si si, nang rel sing; amah kheh kih un. 6 "Tsongthawi panga kheh darsen tangka tsang nih in zuar si ngawl si maw? Me tsongthawi te lak pin pakhatno pohkhen Pathian in hai thong men ngawl si. 7 Nang lua sam tehem kheh siar sakberh si. Nangmahni heh tsongthawi tampi tah in mannei sawn nang si manin heimah kih mah na un. 8 "Nang rel meek sing; tutu sikhen mi mai ah keimah a phuangtu heh Mi Tsapa khen Pathian vanvummi te mai ah phuang deve tu si. 9 Sinapikhaw mi mai ah keimah a eltu heh Pathian vanvummi te mai ah el deve tu sing. 10 "Tutu sikhen Mi Tsapa do in awnkamkhat a awntu heh sual zahnak si tu in, Raula Thiangrim a relsetu heh sual zahnak si tu ngawl si. 11 "Nangmahni heh sinakok ah maw, thukhentu te nenah maw, thuneitu te nenah maw a len phangin kawti’n nang o tuh ti le, hei nang awn tuh ti kheh, thintsawl mah na un. 12 Heimansim tiphangin tsimi hun rori in nang awn tuh kheh Raula Thiangrim in zirh tu nang si." 13 Tsimi phangin mihonpi lak pin mi pakhat in, "Sayapa, ka u heh a ro luahnak keimah a khen tuh in ka rel sak in," ti’n ti si. 14 Sinapikhaw Jesuh in, "Mipa, tu in nangmahni vumah thukhen tu in le ro sem sak tu in ka tiar sim?" ti’n amah kheh ti si. 15 Ama’n, "Hampumnak heh tsimkom ngaino in pial ta un. Heimansim tiphangin minunga nungnak heh kangkim in thil a neinak vumah om ngawl si," ti’n amahni kheh ti si. 16 Tsin, amahni kheh thusanteh pakhat rel si, "Mihausa pakhat heh a lo ah lai tampi nei si. 17 Tsimi phangin thuruat in, ’Hei puah tu sing im? Ka lai koihnak tuh innkhan nei leh ngawlla sing,’ ti’n ti tsawm si. 18 "Tsimi manin amah khen, ’Ti bang hen puah tu sing. Ka lai koihnak inn tehem heh pheberh angkhaw, a lian sawn sa leh tu sing. Tsimi inn sungah lai te le ka thilri tehem khawl tu sing. 19 Tsin, ka nungnak heh, "Ka nungnak, kum reipi tsa thil tampi na khawl sak sing. Tsawl pha sut la la, ei le in in, sahnung ngaino in om in," ti’n ti tu sing,’ ti’n ti si. 20 Sinapikhaw Pathian in, ’ Nang mitawpa! Tuzan rori hen na nungnak heh na le sak tu sing. Tsimi phangin na khawlnak me thil tehem heh tu in nei tu sim?’ ti’n ti si. 21 "Tsimi manin mahni tsa thil khawl atsia, Pathian ah hausa ngawl heh tibang heh si," ti’n ti si. 22 Tsin, Jesuh in a ningluntu te kheh, "Tsimi manin nang rel sing, hei ka ei tuh ti’n nang nungnak tsa tuh in maw, Hei ka sil tuh ti’n nang ruangpum tsa in maw thintsawl mah na un. 23 Nungnak heh lai tah in thupi sawn in, ruangpum heh vansilh tah in thupi sawn si. 24 Solo te kheh ruat po un. Amahni’n laitsi pawi ngawl in khawl khen khawl ngawl si; lai inn nei ngawl in beem khen nei ngawl si. Pathian in amahni kheh tsawm si. Nangmahni heh vano te tah in mannei sawn pittseih si ngawl si utsi maw? 25 Nang thintsawl manin nang ruang kheh dongkhatno a khan thei om utsim maw? 26 A hei ngawl ber riang nang puah thei ngawl, hei manin a dang te vumah thintsawl si utsim? 27 Lily par te kheh kawtibang in a khang ti ruat un. Lo bung ngawl in niim khen zom ngawl si. Sinapikhaw nang rel sing, Solomon ah riang kheh a tsungnungnak hem thaw a la ngal phangin me lily par pakhat riang heh bang lai ngawl si. 28 Pathian in tuni hampalak ah po atsia, thaizing in thukaam ah sang men tuh hampa te a langal a si lekhaw, nangnihni umnak dawm te, Pathian in nang langal leilei tu ngawl si maw? 29 "Nang ei tuh le nang in tuh zei in, thintsawl tseih mah na un. 30 Heimansim tiphangin me thil tehem heh leivuma miphun tehem in zei si. Tsin, nang Pa’n me thil te nang kul lam thei reng si. 31 Pathian uknak kheh zei ula, me thil tehem heh nang pe bet tu si. 32 "Tuu honno te, thinphu mah na un. Nangmahni nenah uknak pe tu heh nang Pa angnak si. 33 Nang neinak te kheh zuar ula, minawm tsarah te bawm un. Ruko te neek khop ngawl min ah le ngaan te ei theihnung ngawl tangka dip a se thei ngawl le ro a ral thong thei ngawl min van ah ro khawl sawn un. 34 Heimansim tiphangin nang ro om min ah nang thinlung khen om deve tu si. 35 "Nang el kilh ula, nang meiinn vaar lep un. 36 Nangnihni heh mo puai min pin a bawipa a hong phangin kong a khawng natsang in kong hon zep thei tuh in a ngak rengtu te bangin si ta un. 37 A bawipa’n a leng phangin amah ngak reng in a tawknak sel te heh mi ang te si. Thungai ngai in nang rel sing; a bawipa, amah rori in a el kilh in, a sel te kheh lai ei tu in to tiar tu atsia, hawh in amahni kheh lai li tu si. 38 Zinglam naazi panih phangin maw pathum phangin maw a bawipa a leng tsuk asin, amah ngak reng in a tawknak sel kheh mi ang si. 39 Inn neitu hen ruko leng hun tuh a thei ham tsuk asin, ngak reng tu in, a inn kheh phul siang tu ngawl pelh si. 40 Tsimi manin nangmahni khen ralring reng deve un. Heimansim tiphangin Mi Tsapa heh nang limdik ngawl hun keek in leng tu si," ti’n rel si. 41 Tsimi phangin Piter in, "Bawipa, me thusanteh heh keimahni ruak na relnak si maw, mipi tehem khen huap si tsim?" ti’n ti si. 42 Bawipa’n, "Tsimi a si lekhaw a bawipa’n ama innsang uktu tuh in le a hun manno in lai petu tuh in a koihnak muangtaak le a tsim thilkemtu heh tu sim? 43 A bawipa a leng phangin tsimi bangin na per tseih a munak sumkiltu heh mi ang si. 44 Thungai ngai in nang rel sing; a bawipa’n tsimi pa kheh a neinak tehem uk tiar tu si. 45 Sinapikhaw tsimi sel khen a thinlung sungah, ’Ka bawipa heh leng khawnu tu si,’ ti’n a thin sungah ti tsawm atsia, a selpi te kheh vaat in, ei le in atsia, zu ri in a om tsuk asin, 46 a bawipa kheh a limdik ngawl ni le a thei ngawl hun in leng tu in, ama’n a sel kheh ten nih in ten tu atsia, um ngawl te tsankim in koih tu si. 47 Tsimi sel khen a bawipa deihnak thei reng pelh in, ralring ham ngawl in a bawipa deihnak puah ngawl si. Tsimi sel kheh vei tampi vaat tu si. 48 Sinapikhaw thei ngawl thahlam in vaat taak sual a puah lekhaw, vei dawmno vaatnak tuar tu si. Tampi penak tehem heh tampi ngen lehnak si tu in, tampi aapnak tehem heh tampi ngennak si tu si. 49 "Leilung vumah hen mei leh tu in leng sing. Tuhen a kaang men ongla a sin ka deih daan heh maw! 50 Niimnak ka tuar tuh pakhat om si. Tsimi niimnak ka tuar tselh ma hem heh thinnuam thei ngawl sing. 51 Leilung vumah hen remnak pe tu in leng ka ring si utsim maw? Nang rel sing; si himhim ngawl sing. Khen tiar tu in a leng si sawn sing. 52 Tu pin pan innsang pakhat ah minung panga om tu in, pathum te’n panih te raal tu atsia, panih te’n pathum te raal tu si. 53 Pa’n a tsapa raal tu in, tsapa in a pa raal tu si. Nu in a tsanu raal tu in, tsanu in a nu raal tu si. Pasel te nu in mo raal tu in, mo in a pasel te nu raal tu si," ti’n ti si. 54 Ama’n mihonpi te kheh, "Nidanak lam ah meiro a zaam phangin makhat in, ’Ruah sar tu si,’ ti si utsi. Tsin, nang tinak bangin sar si. 55 Langlam pin huih ra nang thei phangin, ’Khawsaa tu si,’ ti’n ti si utsi. Tsin, nang tinak bangin khawsaa si. 56 Mi sidat te! Van omdaan le leilung omdaan pan in khawhun khen thei si utsi. Sinapikhaw heita tua hun heh thei khen thiam ngawl si utsim? 57 "Si si, hei manin thumaan kheh nangmahni thuthu in khen tsawm thei ngawl si utsim? 58 Nangmah tangtaihtu thaw thukhennak zung ah na hawh tseih lai in, na hawh thahlam in remrel thei zuam in. Tsimi a si ngawl lekhaw ama’n thukhentu mai ah na nuuk tu si. Tsin, thukhentu in palik bawi kut ah na aap akhaw, palik bawi in thawng na toh tu si. 59 Nang rel sing; na kuan tuh a dawlta ber dar tangka te na kuan thei ma hem, thawng pin suak thei nom tu ngawl si tsi," ti’n rel si.
131 Tsimi lai in Pilat in a hibawlnak ah Galilee te thisen rawi si, ti in ama nenah a titu mi honkhat om si. 2 Jesuh in amahni kheh o atsia, "Me Galilee te heh tsimi bangin a tuar manin a dang Galilee tehem tah in a sualnak se sawn in ruat si utsim maw? 3 Nang rel sing; si ngawl si. Nangmahni tehem khen nang sual nang sir ngawl a silekhaw, amahni bangpah in ral thong deve tu si utsi. 4 Siloam dawndel a tsim phangin a thi minung leiriat te kheh Jerusalem ah a om midang tehem tah in a sualnak se sawn in ruat si utsim maw? 5 Nang rel sing; si ngawl si. Nangmahni tehem khen nang sual nang sir ngawl a silekhaw, amahni bangpah in ral thong deve tu si utsi," ti’n rel si. 6 Ama’n me thusanteh heh rel meek si, "Mi pakhat in a tsapit vuan sungah theikuang phun atsia, a rah zei tu in hawh pelh in, heimah tawk ngawl si. 7 Tsimi phangin tsapit vuan kiltu kheh, ’Pan in, kumthum sung me theikuang vumah a rah zei tu in hawh pelh in, heimah tawk ngawl sing. Vung talen, hei manin leiram ei thong tseih rih tu sim?’ ti’n ti si. 8 Sinapikhaw vuan kiltu khen amah kheh o atsia, ’Bawipa, tu kum heh vang tihen hawi rih a sing. A kawnvel tso angkhaw leiram sii pe rih ang. 9 A rah kha ta lekhaw phangai si. Sinapikhaw a rah ngawl bel ta lekhaw, vung leh lai in,’" ti’n ti si. 10 Jesuh in Sabbath ni in sinakok pakhat ah thu zirh si. 11 Tsin, ngai in, tsimi munah kum leiriat sung thanemnak raula-a erhnak minu pakhat om si. Amah heh a el kuun atsia, ding phet tsawm thei ngawl si. 12 Jesuh in amah kheh a mu phangin a nenah ko atsia, "Minu, na natnak pin luat ongla si tsi," ti’n ti si. 13 Tsimi zawh in Jesuh in minu vumah a kut suan atsia, makhat in ding phet thei in Pathian kheh thangphat si. 14 Jesuh in Sabbath ni in mi a dam tiar manin sinakok uktupa’n reh awh ngai in, "Minung te’n ni ruk sung na a per tuh sipelh si. Tsimi manin tsimi ni ruk sung in sinakok ah hawh ula, amahni kheh dam tiar un. Sabbath ni in vang dam tiar mah na un," ti’n mipi te kheh ti si. 15 Bawipa’n amah kheh o atsia, "Mi sidat pa! Sabbath ni in nangmahni pumpak ten in nang kawlpaw maw laak maw a inn pin suah atsia, ti tul tu in huai si ngawl si utsim maw? 16 Kum leiriat sung Satan hennak minu, Abraham tsanu heh Sabbath ni in suut tuh si ngawl si maw?" ti’n ti si. 17 Me thu tehem heh a rel tselh phangin, a raal tehem kheh zahtsak ngai dang si. Tsin, mipi tehem khen a puahnak thil tsungnung tehem manin ang dang ngaingai si. 18 Tsimi zawh in Jesuh in, "Pathian uknak heh hei thaw bangve sim? Hei thaw santeh tu sing im? 19 Pathian uknak heh ankam tsi thaw bangve si. Mi pakhat in ankam tsi kheh le atsia, a vuan sungah pawi si. Khang atsia, thingkuang lianpi in tsang in, a kaak te vumah vana vano te’n bu sa si," ti’n ti si. 20 Tsin, Jesuh in rel lehleu atsia, "Pathian uknak heh hei thaw santeh tu sing im? 21 Minu pakhat in tsol kheh le atsia, sangvut vawh thum a thoberh tian in a phulhnak bang kheh si," ti’n ti si. 22 Tsimi zawh in Jesuh ah kheh khawpi te le khaw tenau te ah hawh in thu zirh atsia, Jerusalem lam zuan in hawhper si. 23 Mi pakhat in Jesuh nen ah, "Bawipa, sannak ngahtu minung dawm ol si maw?" ti’n ti si. Jesuh in amahni kheh, 24 "Kawka tsiik ah lut tu in thasuah in zuam un. Heita tiphangin, nang rel sing, minung tampi te’n lut tu in zuam tseih tupelh atsia, lut thei tu ngawl si. 25 Innteekpa kheh vei khat tho atsia, kong a kham tselh zawh in, nangmahni in pulam ah ding in kong khawng atsia, ’Bawipa, Bawipa kong kei hon in,’ ti’n ti tu si utsi. Sinapikhaw Bawipa khen, ’Nangmahni heh kawnai pin leng ti nang thei ngawl sing,’ ti’n o tu nang si. 26 "Tsimi phangin nangmahni in, ’Keimahni heh nangma mai ah ei le in tu te si ung. Keimahni lampi ah thu zirh veng si tsi,’ ti’n ti tu si utsi. 27 Sinapikhaw Bawipa’n, ’Nang rel sing. Nangmahni heh kawnai pin nang leng, ti heh thei ngawl sing. Nangnihni thil sesuak a puahtu tehem, ka nen pin daan un.’ 28 Nangmahni heh pulam ah nawtnak si tu atsia, Abraham, Isak, Jakob ah le profet tehem kheh Pathian uknak sungah mu tulai si utsi. Tsimi hun phangin kap kuaikuai in hariat tuihtuih tu si utsi. 29 Amahni kheh ni suaknak lam pin le nidanak lam pin, saklam pin le langlam pin leng tu atsia, Pathian uknak sungah to dang tu si. 30 Ngai in, dawlta ber te kheh masa ber si tu in, masa ber te kheh dawlta ber si tu si," ti’n ti si. 31 Tsimi ni rori in Farasi te’n ama nenah hawh dang atsia, "Herod in nangmah heh reek a nuam manin, nai pin hen suak la danper ten," ti’n ti dang si. 32 Ama’n, "Hawh ta ula, tsimi ramui tsawh rel ta un, ’Ngai in, tuni le thaizing in khawvang te hawl atsia, minaa te dam tiar tu sing. Nithumnak ni in ka naper tselh tu sing.’ 33 Heihei a si ta sikhen tuni, thaizing le thailehzawh in khualvak tseih rih tu sing. Heimansim tiphangin profet pakhat heh Jerusalem khaw pulam ah reek theihnung ngawl si. 34 "Maw Jerusalem, Jerusalem, profet te a reektu, na nenah lehnak te lungto in a seplumtu, arpi in a no te kheh a la nuai ah a huam bangin, na tsa te mun khat ah huam ot ngai veng sing. Sinapikhaw nuam ngawl si tsi! 35 Pan in, na inn heh innro in zamnak si tu si. Thungai ngai in na rel sing, ’BAWIPA ming in a lengtu heh thangphatnak si tasen!’ ti’n na ti hun a leng ma hem ka mu leh kel tu ngawlla si tsi," ti’n amahni kheh ti si.
141 Tsin, tibang hen thiltsang si. Sabbath ni in Farasi huaitu pakhat inn ah Jesuh ah kheh lai ei tu in hawh atsia, amahni’n a nektsek pin tsul dang si. 2 Ngai in, a mai ah tibum nat vei pakhat om si. 3 Jesuh in daan thiam te le Farasi te kheh, "Sabbath ni in mi naa dam tiar tuh si maw," ti’n ti si. 4 Amahni kheh meng khep dang si. Ama’n minaa kheh le atsia, dam tiar in, hong tiar si. 5 Tsin, Jesuh in amahni kheh, "Sabbath ni in a laak maw a kawlpawtsang maw kheh hawrkaw sungah a da kha tsuk asin, a nuukso leh nomper ngawl nangmahni lak ah mi pakhat pohkhen om ol utsim maw?" ti’n ti si. 6 Amahni’n me thu te heh heimah o thei dang ngawl si. 7 Jesuh in samnak te’n tonak pha ber a deng teen kheh a mu phangin, amahni kheh thusanteh pakhat rel si. 8 "Mi pakhat khat in mo puai ah a sam phangin tonak pha ber ah to nuam mah na un. Nangma tah in upat taak sawnpi a sam kha lekhaw, 9 nangmah a samtu khen amah kheh huai in, ’Me pa heh na tonak pial in,’ ti’n a tilekhaw, zahtsak ngai in tonak a hei ngawl ber ah to leh tu si tsi. 10 Puai ah samnak na si phangin tonak hei ngawl ber ah khen to in. Tsimi a si lekhaw nangmah a samtu khen na nenah hawh atsia, ’Rual, tonak pha sawn ah to in,’ ti’n na ti tu si. Tsimi phangin laikuang na kilpinak te mai ah ultungnak si tu si tsi. 11 Tutu sikhen mah le mah a tsawisang tu heh niam tiarnak si tu in, mah le mah a niam tiar tsawmtu heh tsawisang nak si tu si," ti’n ti si. 12 Tsin, amah a samtu kheh, "Zing lai in maw sim lai in maw puai puah atsia, mi na sam phangin na rualpi te, na unau pi te, na sen te le na inn nen mi hausa te kheh sam mah nen. Na sam a si lekhaw amahni’n nangmah sam thun tu in, rulnak si tu si tsi. 13 Sinapikhaw puai na puah phangin, minawm tsarah te, pum kim ngawl te, kawng zenat vei te le mittsaw te kheh sam in. 14 Tsimi bang minung te’n nangmah a rul leh thei ngawl manin muitsu thupha dong sawn tu si tsi. Tsin, midik te a tholeh phangin rul lehnak si tu si tsi. 15 Laikuang a kilpinak te lak pin pakhat in me thu te heh a za phangin, "Pathian uknak ah lai a ei tulai minung heh mi ang si," ti’n ti si. 16 Tsimi phangin Jesuh in amah kheh, "Mi pakhat in simlai ei puai thupi ngai puah atsia, mi tampi sam si. 17 Lai ei hun a kim phangin a sel pakhat kheh, ’Tu hen heizongza tiari lep ongla a si manin hawh la un,’ ti’n a samnak te kheh rel tiar si. 18 Sinapikhaw samnak tehem kheh thu tsundun in pawhlemnak nei tepan si. A pakhatnak in amah kheh, ’Lo tsing khat ka leinak pan kul tsaam sing. Ka zah sawh in, ti’n na kun sing,’ ti’n rel si. 19 A dang pakhat in, ’Kawlpawtsang kaapnga ka leinak naper tiar ot sing. Na kun sing. Ka zah sawh in,’ ti’n ti si. 20 A dang pakhat in, ’Zi ka huai ta hawh thei tu ngawl sing,’ ti’n ti si. 21 Tsimi manin sel khen hong leh atsia, a bawipa kheh me thu tehem heh rel si. Tsimi phangin innteek pa’n thinraw ngai in, ’Khawpi sunga rawtpi le zintsang hem ah hawh nawmnawm ta la, minawm mi tsarah, pum kim ngawl, kawng zenat vei le mittsaw te kheh huai ten,’ ti’n ti si. 22 A sel khen, ’Bawipa, thu na penak bangin puah tselh ongla sing. Sinapikhaw khaan lawng om lai si,’ ti’n ti si. 23 Innteekpa khen a sel kheh, ’Khaw pulam rawtpi lianpi ah le zintsang hem ah hawh ta la, ka inn sungah mi a dim tuh in huai ten. 24 Na rel sing; ka samnak te pakhat pohkhen puai lai tep tu ngawl si,’" ti’n ti si. 25 Mihonpi te’n ama nenah hawh dang in, Jesuh in amahni lam nga atsia, 26 "Tutu sikhen ka nenah hawh atsia, a pa, a nu, a zi, a tsa te, a mingpa te, a tser te haw atsia, ama nunnak a haw tsawm ngawl lekhaw ka ningluntu si thei tu ngawl si. 27 Tsin, ama thinglamteh phur tsawm ngawl in ka ning a luntu heh, ka ningluntu si thei tu ngawl si. 28 "Nangmahni lak pin mi pakhat khat in dawndel dakpi sa tum atsia, to masa po in a sanak tuh tham peisa a nei le nei ngawl a tuat masa ngawl tu om tu si utsim? 29 Tsimi bangin a tuat masa ngawl lekhaw, khuam a tung zawh in a sa tselh zo leh ngawl tsuk asin, a mutu tehem in amah kheh nihtsip tu si. 30 "Tsin, amahni’n, ’Me pa heh inn sa tepan tsiar atsia, tselh zo leh ngawl si,’ ti’n ti tu si. 31 "Tsin, kumpibawi pakhat in a dang kumpibawi pakhat thaw raal a tawng dun tu phangin, to masa po atsia, amah simtu raalkap thawngkul kheh a raalkap thawngsawm thaw in a neh zo thei tu maw neh zo thei tu ngawl tuat masa ngawl in om tu si maw? 32 A neh zo ol ngawl a si lekhaw a dang kumpibawi kheh khawlapi ah a si lai in, nalang te leh tu atsia remrel ngen tu si. 33 Tsimi bang deve in nangmahni lak-a mi pakhat khat in a neinak hem a zam ngawltu heh ka ningluntu si theihnung ngawl si. 34 "Tsi heh pha si. Sinapikhaw tsi hen a alnak a pai tiar a si lekhaw, kawtibang in al leh thei tu sim? 35 Leilung tsa pha ngawl atsia, borhkhawm ah koih tuh in khen pha ngawl in, mi te’n pulam ah vawr men tu si. Zanak tuh beng a nei te’n za tasen," ti’n ti si.
151 Tsin, siahkhon te le misual tehem in a thurelnak ngai tu in amah zuan dang si. 2 Tsimi phangin Farasi te le Daan zirhtu te’n, "Me pa hen misual te heh saang atsia, laikuang kilpi si," ti’n phu sepsup dang si. 3 Tsimi manin ama’n me thusanteh heh rel si. 4 Ama’n, "Nangmahni laka mi pakhat in tuu zakhat nei atsia, a tuu lak pin tuu pakhat a pai tsuk asin, tuu sawmkua le kua te kheh hampalak ah zam in, a pai tuu pakhat kheh a tawk tian in a zei ngawltu om tu si utsim maw? 5 A tawk phangin ang ngai in a ko vumah phur si. 6 Inn ah a leng phangin a rualpi te le a inn nen te kheh ko a tsia, ’Ka angpi un. Ka tuu pai tawk leh ongla sing,’ ti’n amahni kheh ti tu si. 7 Nang rel sing. Tsimi bangin sual sir kul ngawl midik sawmkua le kua tah in, sual a sir misual pakhat vumah angnak tam sawn tu si. 8 "Tsin, minu pakhat in tangka tsangsawm nei atsia, tsangkhat a pai tiar tsuk asin, meiinn vaar in a inn sung hem phiatsek akhaw, a tawk ma hem zeisek ol ngawl si maw? 9 A tawk phangin a rualpi te le a inn nen te kheh ko atsia, ’Ka angpi un. Tangka tsangkhatno ka pai tiar khanak tawk leh sing,’ ti’n ti tu si. 10 Nang rel sing. Tsimi bang deve in a sual a sirtu misual pakhat vumah Pathian vanvummi te mai ah angnak om tu si." 11 Tsin ama’n ti hen ti si, "Mi pakhat in tsapa panih nei si. 12 A nauta sawn in a pa kheh, ’Ei pa, na neinak thil te lak pin ka tsovo ka pe len,’ ti’n ngen si. Tsimi phangin a pa’n a thil neinak te kheh a tsapa te khen sak si. 13 Tsimi zawh a rei ngawl in tsapa nauta sawn khen a thil tehem khawm atsia, ram khawlapi ah khualvak in, tsimi munah a neinak tehem kheh tisa nuamnak ah phau tei si. 14 A neinak tehem a thehthawk tselh phangin, tsimi ram ah nase ngai in rian dung atsia, dasam rek in om pan si. 15 Tsimi manin ram sung mi pakhat nenah hawh in naper atsia, tsimi pa khen vok khal tiar si. 16 Vok te einak be hawng kheh khampek in ei ot tian in a rikaam si. Sinapikhaw tumah in a ei tuh pe ngawl si. 17 "Tsimi phangin amah le amah kheh thei tsawm atsia, ’Lawhlaknak omlawh te’n ei pa inn ah lai khampek in ei atsia, val pehpuh sipelh in, kei zong rikaam in ka thi tu si men ongla! 18 Tho angkhaw ei pa nenah hong leh atsia, "Ei pa, Pathian le na mai ah sual si lang. 19 Tsapa ti’n na pon tuh riang taak leh ngawlla sing. Na lawhlaknak omlawh te lak ah pakhat in ka koih in," ti’n ti tu sing,’ ti’n ti tsawm si. 20 "Ama’n tho atsia, a pa nenah hongper si. Khawlapi ah a si lai khen a pa’n mu atsia, ngeihhar ngun in daan nawmnawm atsia, muak rumrum in, a ngawng pin kuah atsia thuut si. 21 Tsimi phangin a tsapa khen, ’Ei pa, Pathian le na mai ah sual ongla sing, tsapa ti’n na pon tuh riang taak leh ngawlla sing,’ ti’n ti si. 22 Sinapikhaw a pa khen a omlawh te kheh, ’Puanpha ber le ula, silh un. A kut ah kutbun bun sak ula, a kawng ah kedawl bun sak un. 23 Tsin, kawlpawno thau ngai kai in tel ula ei in sahnung dang a sing. 24 Heimansim tiphangin me ka tsapa heh a thisaak si in, tuhen nung leh si. Amah heh a pai saak si in tuhen tawk lehnak si ongla si,’ ti’n ti atsia, sahnung ngai in om dang si. 25 "Tsimi hun in tsapa upa sawn heh lothok si. Inn ah hong in, inn a neek phangin, awn mawi thawm le laam thawm kheh za si. 26 Tsimi phangin a nenom pakhat kheh ko atsia, meheh kawti thu sim ti’n ti si. 27 Ama’n, ’Na nau la him le damno in a hong leh manin, na pa’n kawlpawno thau telh si,’ ti’n amah kheh ti si. 28 "Tsapa upa sawn kheh thinraw atsia, inn sungah lut nuam ngawl si. Tsimi manin a pa khen suak atsia, inn sungah lut tu in zawl si. 29 Tsapa upa sawn khen a pa kheh, ’Ei pa, ngai in, na na heh kum tampi sung per ongla sing. Na thupenak pakhatno pohkhen el awng ngawl sing. Sinapikhaw ka rualpi te thaw kei sahnungnak tuh in, kelno pakhatno pohkhen ka pe awng ngawl si tsi. 30 Sinapikhaw na neinak hem nupang dopzuar te nenah a phau thongberhtu me na tsapa heh a leng natsang in kawlpawno thau telh si tsi,’ ti’n ti si. 31 "Tsimi phangin a pa khen, ’Tsapa, nangmah heh ka nenah om reng veng si tsi. Ka neinak tehem heh nangmaaberh si. 32 Na nau heh a thisaak si in tuhen nung leh si. Pai awng in tuhen tawk lehnak si. Tsimi manin ang in kei sahnung dang heh a maan si,’" ti’n ti si.
161 Jesuh in a ningluntu te kheh, "Milian pakhat om in thil keemtu pakhat nei si. Tsimi thil keemtu khen a thil neinak te kheh a phausak tseih veng lam kheh a nenah mi te’n zuar si. 2 Tsimi manin a bawipa khen amah kheh ko atsia, ’Na thu ka theinak heh kawti thu sim? Thil na keemnak tsazin ka pe in. Thil keemtu si theihnung leh tu ngawlla si tsi,’ ti’n ti si. 3 "Thil keemtu pa khen, ’Hei puah ang im? Ka bawipa’n ka thil keemnak pin tawp tiar tu si bang si! Lothok la ka zo ol ngawl; kutdawh ngen tu le zak meek sing. 4 Thil keemtu pin a tawp tiar phangin, amahni’n amahni inn ah keimah a saang theinak tuh in hei ka puah tu ti thei sing,’ ti’n ti tsawm si. 5 "Tsimi manin a bawipa nenah leiba neitu tehem kheh ko atsia, a pakhatnak pa kheh, ’Ka bawipa nenah leiba kawzah nei si tsim?’ ti’n dong si. 6 Tsimi pa khen, ’Sathau pung zakhat si,’ ti’n ti si. Thil keemtu pa’n, ’Na tsazin le in to la, pung sawmnga ti’n ngan in,’ ti’n ti si. 7 Tsin, a dang pakhat kheh, ’Nang leiba kawzah nei si tsim?’ ti’n dong si. Tsimi pa khen, ’Sangvut beem zakhat si,’ ti’n ti si. Thil keemtu pa khen, ’Na tsazin le in to la, beem sawmriat ti’n ngan in,’ ti’n ti si. 8 Tsin a dik ngawl thil keemtupa khen tsing ngai in na a per kheh a bawipa in a mu phangin ziap si. Heiman sim tiphangin leivuma tsa te heh amahni khang hun in varnak tsa te tah in tsing sawn si. 9 "Nang rel sing. Nang nunnak a bo phangin kumkhaw omnak munah nangmahni a saang thei tu rualpi nang nei theinak tuh in, leivum peisa mang in rualpi zei un. 10 Thil kohno ah muangtaak te heh thil lianpi vumah muangtaak deve tu si. Tutu sikhen thil kohno ah a dik ngawl te heh thil lianpi vumah dik deve tu ngawl si. 11 Tsimi manin a kho ngawl peisa vumah muangtaak ngawl na si lekhaw, liannak taktak kheh tu in na aap ngam tu sim? 12 Midang te thil neinak vumah muangtaak ngawl na si lekhaw, nangma tuh heh tu in na pe ngam tu sim? 13 "Omlawh pakhat in bawi paniha na kheh per kop thei ngawl si. Pakhat kheh haw tu atsia, a khatta sawn kheh it tu si. A si ngawl lekhaw pakhat vumah muangtaak si tu in, a khatta sawn kheh heinam tu ngawl si. Nangmahni’n Pathian na le peisa na kheh per kop thei tu ngawl si utsi," ti’n ti si. 14 Peisa deih Farasi te’n me thu tehem heh a za phangin, Jesuh ah kheh nihtsip dang si. 15 Tsimi phangin Jesuh in, "Nangmahni heh minung mai ah dik tiar tsawm si utsi. Sinapikhaw Pathian in nang thinlung thei si. Minung te sunsak ngainak heh Pathian mai ah a ningtsir nung si. 16 "Johan leng tian in daan thu le profet thu te om si. Tsimi hun pin pan Pathian uknak heh phuangnak si in, mi tehem in lut si. 17 Tsimi manin daan thu kohberno a pai thong tah in van le lei pai heh beih sawn si. 18 "Tutu sikhen ama zi kheh paw in zi dang a huaitu heh zuanzam si. Tsin, tutu sikhen a pasel thaw a khektu minu a huaitu heh mi zuanzam si. 19 "Milian pakhat om in, puan sennum le puan hoih ngai sil atsia, ni tin in nuamtsangkhai ngai in om si. 20 Tsin, milianpa kongkham bul ah toh vengnak kutdawh ngen Lazarus ah tinak om si. Amah heh a pumpuluk in meima dim si. 21 Ama’n milian pa tsabuai pin a kulh lai tsuan te kheh ei ot pittseih si. Tsimi bek zo ngawl a meima te kheh uitso te’n liak si. 22 Kutdawh ngenpa kheh thi atsia, vanvummi te’n Abraham kaang sungah tsawiper si. Milianpa kheh thi deve atsia vi si. 23 Milianpa khen mithi khaw ah zilhtsak ngai in a om laitak in, van lam panso atsia, khawlapia Abraham ah le a kaang sunga Lazarus ah kheh mu si. 24 "Tsimi phangin ama’n au atsia, ’Ei pa Abraham, ka ngeihhar sawh in. Me mei alh ah hen reemnak nase ngai in tuar ka si manin, Lazarus in a kuttsung in ti tok sehla, ka lei a tsop tuh in ka tser sawh sen,’ ti’n ti si. 25 Sinapikhaw Abraham in, ’Tsapa, na nung lai in thilpha pha tso si tsi. Tsimi bangpah in Lazarus ah hen thilse tso si. Meheh phawk reng in. Sinapikhaw tuhen Lazarus ah heh nunnuam ngai in om si. Tsin, nangmah heh reemnak tuar si tsi. 26 Tsimi bek zolai ngawl in keimahni le nangma laklawh ah hawrkaw thukpi om si. Tsimi manin nai pin na nen lam ah a hawh ottu hen tsimi hawrkaw kheh leek thei ngawl in, na nen pin keimahni nenah a hawh ottu khen leek thei lawt ngawl si,’ ti’n ti si. 27 "Tsimi phangin milian pa khen, ’Tsimi manin ei pa, Lazarus ah tsawh ei pa inn ah na hawh tiar sak sawh tuh in na kun sing. 28 Unau suahpi panga nei sing. Amahni kheh me reemnak munah a leng deve tuh ngawl in, Lazarus in thurel tasen,’ ti’n ti si. 29 Abraham in, ’Amahni’n Mawsi le profet te nei si. Amahni thu kheh ngai tasen,’ ti’n ti si. 30 Ama’n, ’Ei pa Abraham, si ngawl si. Mi pakhat heh mithi te lak pin a leng a si lekhaw, amahni’n a sual sir tu si,’ ti’n ti si. 31 Tsimi phangin Abraham in, ’Amahni’n Mawsi thu le profet te thu a ngai ngawl a si lekhaw, mi pakhat kheh mithi te lak pin tho atsia a rel a sikhen ngai lawt tu ngawl si,’ ti’n ti si," ti’n rel si.
171 Tsin Jesuh in a ningluntu te kheh, "Khawsi tuh a leng ngawl heh si theihnung ngawl si. Sipelh atsia a leng tiartupa tsa zong hen lungsenung si. 2 Me naupangno te lak pin pakhatno heh a khawsi tiar tah in, a ngawng ah tsangrialnak lungtum khaih atsia, tipi sungah lawn asin ama tsa in pha sawn si. 3 Tsimkom un. Na unau pi pakhat in na vumah thilsual a puah kha lekhaw hau in. A sir leh lekhaw zah in. 4 Nikhat sungah vei sarih tian na vumah sual atsia, vei sarih tian na nenah lehlawi leh in, ’Ka sual sir sing,’ ti’n ati a silekhaw, zah rori in," ti’n ti si. 5 Lehnak te khen Bawipa kheh, "Kei umnak khang tiar sak in," ti’n ti dang si. 6 Tsimi manin Bawipa’n amahni kheh, "Nangmahni in ankam tsi te umnak nang nei a si lekhaw, me pukuang heh, ’Na bul pin bong tsawm la, tipi sungah phun tsawm ten,’ ti’n ti thei tu in, nangmahni thu kheh ngai tu si. 7 Nangmahni lak pin tu in a omlawh leilettu maw tuukhaltu maw, lo pin a leng phangin, ’Nai ah hawh nomper la la, to in lai ei in,’ ti’n ti tu sim? 8 Tsimi tah in, ’Ka simlai hei poh khen ka puahsak la, ka ei ka in tselh tian na el kilh la, ka tuamlawm in. Tsimi tselh phangin ei la in leh lai in,’ ti’n ti ol ngawl si maw? 9 Puah tuh in thupenak tehem a puah manin tsimi omlawh kheh a bawipa in paak ol maw? Diksang ngawl sing. 10 Tsimi bang deve in nangmahni khen thupenak bangin me thil tehem heh nang puah tselh phangin, ’Keimahni heh nempinak a nei ngawl omlawh te si sing. Kei puah tuh naper tselh ongla si ung,’ ti’n ti un," ti’n rel si. 11 Tsin, tibang hen thiltsang si. Jesuh ah kheh Samaria le Galilee ramri tawnin Jerusalem ah hawh si. 12 Khaw pakhat ah khen a lut lai in pharnat vei mi sawmkhat te’n Jesuh ah kheh muak dang atsia, khawla thah ngai ah ding dang si. 13 Amahni khen ring ngai in au dang atsia, "Bawipa Jesuh, kei ngeihhar sawh in," ti’n ti si. 14 Jesuh in amahni kheh a mu phangin, "Hawh ta ula, suang te nenah nang ruangpum muh tsawm ta un," ti’n ti si. A tiarnak bangin a hawh dang tseih lai in, a pharnat dam thiang dang si. 15 Amahni lak pin pakhat in dam thiang tiarnak a si lam kheh a mu tsawm phangin, lehlawi leh atsia, ring ngai in Pathian thangphat si. 16 Amah khen Jesuh kawngbul ah bok atsia, amah kheh paak si. Amah heh Samaria te si. 17 Jesuh in, "Mi sawmkhat dam thiang si ngawl si maw? A dang pakua te zong kawnai ah sim? 18 Me ramdang pa siar ngawl Pathian thangphat tu in a lehlawi leh midang om ngawl si maw?" ti’n ti si. 19 Tsimi phangin Jesuh in, "Tho la hawh talen. Na umnak in dam tiar na si lei," ti’n tsimi pa kheh ti si. 20 Farasi te’n Pathian uknak heh kontik in leng tu sim ti’n a dong phangin, Jesuh in, "Pathian uknak heh mitmuh theih rori in leng ngawl si. 21 ’Naia heh pan un,’ ti’n maw, ’Mia khena kheh pan un,’ ti’n tumah in ti tu ngawl si. Heimansim tiphang in, ngai un, Pathian uknak heh nangmahni sungah om si," ti’n o si. 22 Tsin, Jesuh in a ningluntu te kheh, "Mi Tsapa-a ni nikhat pohkhen nang mu ot pittseih hun leng tu si. Sinapikhaw mu ngah tu ngawl si utsi. 23 Tsimi hun in amahni’n nangmahni heh, ’Nai ah pan in,’ ti’n maw, ’Mia khen ah pan un,’ ti’n ti tu nang si. Amahni nenah hawh mah na un. Lun khen lun kha mah na un. 24 Heimansim tiphangin van hang nuai ah khawlip kheh van hatlam pin hatlam ah a vaarsur bangin, Mi Tsapa, ama ni in si deve tu si. 25 Sinapikhaw ama’n harsanak tampi tuar masa tu in, tusan minung te elnak khen tuar tu si. 26 "Tsin, Noah san bangin Mi Tsapa san khen si deve tulai si. 27 Noah in tangphawlawng sungah dum atsia, tilau dung in amahni hem a siatsuahberh ni tian in amahni kheh ei le in atsia, zi nei in huai dun si. 28 Tsimi bang deve in Lot san lai in si deve si. Amahni in ei atsia, in in, thil lei in, zuar atsia, laitsi tsing in inn sa si. 29 Sinapikhaw Sodom khaw pin Lot a dan ni rori in van pin mei le kaat sar atsia, amahni hem kheh siatsuahberh si. 30 Tsimi bang deve in Mi Tsapa a lang ni phangin si deve tu si. 31 "Tsimi ni in innkhum lu ah a omtu khen a inn sunga thil le tu in tolh mah na sen. Lo ah a omtu khehkhen lehlawi in hong leh mah na sen. 32 Lot zi kheh phawk reng ta un. 33 Tutu sikhen a nungnak san tsawm tu in a zeitu kheh a nungnak pai tu si. A nungnak a paitu kheh nung tu si. 34 Nang rel sing; tsimi zan in eihkhun pakhat ah mi panih zau kawm tu atsia, pakhat kheh lenak si tu in, a dang pakhat kheh zamnak si tu si. 35 Nupang panih laideng kawm tu in, pakhat heh lenak si tu atsia, a khatta zamnak si tu si. 36 Patsang panih lo sungah om kawm tu in, pakhat heh lenak si tu atsia, a khatta zamnak si tu si," ti’n ti si. 37 Tsimi phangin a ningluntu te’n, "Bawipa, kawnai ah si tu sim?" ti’n ti si. Jesuh in amahni kheh, "Mithi ruang om min hem ah muvanlai te khawm dang tu si," ti’n ti si.
181 Minung te’n thin nau ngawl in saw a ngen tuh in Jesuh in amahni kheh thusanteh pakhat rel si. 2 Ama’n, "Khawpi pakhat sungah Pathian kihzah ngawl, minung khen maisongnak nei ngawl thukhentu pakhat om si. 3 Tsimi khawpi sungah numei pakhat om in, thukhentu nenah hawh atsia, ’Ka raal heh ka phuzul sak in,’ ti’n ti si. 4 Thukhentu khen hun reipi sung heimah heisiar sak ngawl in om si. Sinapikhaw tsimi zawh in ama’n, ’Keimah heh Pathian kihzah ngawl in, minung maisongnak khen nei ngawl sing. 5 Sinapikhaw me numei nu hen keimah heh nainok tseih tu a si manin, a thu rel sak tu sing. Tsimi a si ngawl lekhaw keima nenah hawh nawnom akhaw, thintsawl tiar tu ka si,’" ti’n ti tsawm si. 6 Tsimi phangin Bawipa’n, "A dik ngawl thukhentupa relnak kheh ngai un ti’n ti si. 7 Pathian in a dengnak te a sun a zan in a aunak aw kheh thukhensak ngawl in om tu si maw? Reipi tian sanang reng tu si maw? 8 Nang rel sing; rang ngai in thukhensak tu si. Sinapikhaw Mi Tsapa a leng phangin, leivum ah umnak tawk miau ol maw?" ti’n ti si. 9 Jesuh in mah le mah muang tsawm in diktsang tiar tsawm te le, midang te a nautattu te kheh me thusanteh heh rel meek si. 10 "Temple sungah mi panih sawngen tu in hawh kawm si. Pakhat heh Farasi si atsia, a khatta heh siahkhon si. 11 "Farasi pa kheh ding atsia amah tumruak in, ’Pathian, keimah heh midang te peisa luupsak ngawl in, mi diktsang ngawl si ngawl atsia mi zi sual pi in sualnak nei minung si ngawl sing. Tsin me siahkhonpa bang ka si ngawl manin na paak sing. 12 Nipi khat ah veinih laitsang sing. Ka neinak tehem sung pin sehsawma sehkhat na pe sing,’ ti’n sawngen si. 13 Tsimi zawh in siahkhonpa khen khawlapi ah ding atsia, a mit in van lam riang panso ngam ngawl in, a kuttum in a awm tsum tsawm atsia, ’Pathian, misual keimah heh ka ngeihhar sawh in,’ ti’n sawngen si. 14 "Nang rel sing. Inn ah a hong phangin Farasi pa si ngawl in siahkhonpa sawn kheh diktsang si. Tutu sikhen mah le mah a tsawisang tsawmtu heh lakulhnak si tu in, mah le mah a niam tiar tsawmtu heh tsawisangnak si tu si," ti’n ti si. 15 Mi te’n nausenno te kheh a tongsak tuh in a nenah huai dang in, a ningluntu te’n a mu phangin amahni kheh hau si. 16 Sinapikhaw Jesuh in naupangno te kheh a nenah ko atsia, "Naupangno te heh ka nenah hawh tiar un. Kham mah na un. Pathian uknak heh me bang naupangno tea si. 17 Thungai ngai in nang rel sing. Tutu sikhen Pathian uknak heh me naupangno bangin a saang ngawl a si lekhaw, Pathian uknak sungah lut thei tu ngawl si," ti’n ti si. 18 Uktu pakhat in amah kheh, "A pha sayapa, kumkhaw nungnak ro ka luah theinak tuh in hei puah ang im?" ti’n ti si. 19 Jesuh in amah kheh, "Heita mipha ka ti si tsim? Mipha pakhat bek om in, amah heh Pathian si. 20 Thukhaam te kheh thei si tsi, ’Zuanzam mah,’ ’Tualreek mah,’ ’Ruko mah,’ ’A maan ngawl tetti ding mah,’ ’Na nu le na pa upat in,’" ti’n ti si. 21 Ama’n, "Me tehem heh ka naupangno lai pah in ka lunsek saak si," ti’n o si. 22 Jesuh in me thu te heh a thei phangin amah kheh, "Thil pakhatno sam lai si tsi. Na neinak thil tehem zuarberh la, minawm te sawm ten. Tsin, van ah ro nei tu si tsi. Tsimi zawh in ka lun in," ti’n ti si. 23 Amah heh milian ngai a si manin me thu heh a za phangin a lungse ngai si. 24 Jesuh in a lungse ngai kheh a mu phangin, "Milian te tsa Pathian uknak sungah lut tu heh kaw zah in har sim! 25 Milian pakhat Pathian uknak sungah lut tah in, phim kaw sungah kalauk lut heh beih sawn si," ti’n ti si. 26 Me thu heh a zatu te’n, "Tu heh sannak si thei tu sim?" ti’n ti dang si. 27 Jesuh in, "Minung tsa a tsang theihnung ngawl heh Pathian tsa in tsang theihnung si," ti’n ti si. 28 Tsimi phangin Piter in, "Pan in; heizongza zam in na lun si ung," ti’n amah kheh ti si. 29 Tsimi manin Jesuh in amahni kheh, "Thungai ngai in nang rel sing. Tutu sikhen Pathian uknak manin a inn maw, a nu le a pa te maw, a suahpi unau te maw, a zi maw, a tsa te maw a zamtu heh, 30 tu san ah hen a let tampi in a ngah ngawl tumah om tu ngawl in, a leng tulai hun ah kumkhaw nungnak a ngah ngawl tumah om tu ngawl si," ti’n ti si. 31 Jesuh in ningluntu leinih te kheh a nenah ko atsia, "Ngai un, profet te ngannak Mi Tsapa thu tehem a kim theinak tuh in, Jerusalem ah hawh dang tu si sing. 32 Amah heh Gential te nenah aapnak si tu atsia, zohsuamnak, zingsam in zingnak le tsil thuhnak tuar tu si. 33 Savun rihual in vaat tu atsia, reek tu in, a nithumnak ni in tho leh tu si," ti’n ti si. 34 A ningluntu te pakhat poh khen me thu te heh thei zo ngawl si. Me awnnak heh amahni lak pin thupnak a si lai manin amahni a relnak thu te heh thei dang ngawl si. 35 Tsin, tibang hen thiltsang si. Jesuh ah kheh Jerikho khaw leng dawn ongla si. Tsin, mittsaw pakhat kheh kutdawh ngen in lampi kung ah to reng si. 36 Mihonpi hawh thawm a za phangin, meheh hei thu sim ti’n dong si. 37 Amahni’n, Nazareth khaw te Jesuh ah leng si ti’n rel si. 38 Mittsaw pa’n, "David Tsapa Jesuh, ka ngeihhar sawh in," ti’n au si. 39 A mai pin a hawhtu te’n mengdeen tiar si. Sinapikhaw ama’n, "David Tsapa, ka ngeihhar sawh in," ti’n ring sawndoh in au leilei si. 40 Tsimi phangin Jesuh ah kheh ding atsia, mittsaw pa kheh ama nenah huai tiar si. A nenah a leng phangin amah kheh thu dong atsia, 41 "Nangma tsa in hei puahsak tu in deih ka si tsim?" ti’n ti si. Ama’n, "Bawipa, mit khawmu ot sing," ti’n ti si. 42 Tsimi phangin Jesuh in, "Khaw mu in; na umnak in dam tiar ongla na si," ti’n ti si. 43 Makhat in amah kheh mit khawmu in, Pathian kheh ultung thah in amah kheh lun nom si. Mi tehem in tsimi kheh a mu dang phangin, Pathian kheh thangphat dang si.
191 Jesuh ah kheh Jericho khaw sungah lut in hawh tenper si. 2 Tsin, ngai in, tsimi ah Zakhia tinakpa om si. Amah heh siahkhon bawiber si in, a hausa ngai si. 3 Amah khen Jesuh ah kheh mu ot si. Mipi tam leita in, amah khen heh mi tsomno a si manin, mu baan ngawl si. 4 Tsimi manin mailam ah dan hamper atsia, Jesuh ah a mu theinak tuh in theikuang vumah kai si. Heimansim tiphangin Jesuh ah heh tsimi lampi tawnin hawh tu si. 5 Jesuh in tsimi mun a leng phangin panso atsia Zakhia ah kheh mu in, "Zakhia, tsuarsuk nawmnawm in. Tuni hen na inn ah dung tu sing," ti’n ti si. 6 Zakhia ah khen tsuarsuk nawmnawm atsia, ang ngai in a inn ah dung tiar si. 7 Amahni hem in a mu phangin, "Ama’n misual pakhat inn ah dung tu in hawh si," ti’n phu sepsup dang si. 8 Zakhia ah khen ding atsia Bawipa kheh, "Bawipa, ngai in, ka thil neinak a zahlam heh minawm te pe tu sing. Tsin, mi pakhat khat nena thuson in thil pakhat khat ka le kha a silekhaw, a let li in rul leh tu sing," ti’n ti si. 9 Tsimi phangin Jesuh in, "Amah khen heh Abraham tsapa pakhat a si deve manin, tuni hen nai innsang ah sannak leng si lei. 10 Mi Tsapa heh a pai te zei tu in le san tu in leng si," ti’n amah kheh ti si. 11 Mi te’n me thu te heh a ngai dang reng lai in, amahni’n Jesuh ah heh Jerusalem a nong lemlem ongla manin le Pathian uknak heh a leng nomper tula in a ring manin, amahni kheh a dang thusanteh pakhat rel si. 12 Ama’n, "Mi upa pakhat khen ram khawlapi ah uknak le tu in le kumpibawi a si zawh in hong leh tu in hawh si. 13 "Amah khen omlawh sawmkhat te kheh ko atsia, maneh tangka tsangsawm pe in, ’Ka leng ma hem sumpei ta un,’ ti’n ti si. 14 Sinapikhaw a ram minung te’n amah kheh a haw manin, ’Me pa heh keimahni uk tu tuh in deih ngawl si ung,’ ti’n ti tu in ama nilun ah nalang te leh si. 15 Tsin, tibang hen thiltsang si; tsimi pa kheh kumpibawi sinak a sang tselh phangin hong leh atsia, tangka a aapnak a omlawh te sumpeinak kawzah ten a miat, ti a thei nuam manin amahni kheh ama nenah ko tiar si. 16 Pakhatnak pa kheh leng atsia, ’Bawipa, na penak maneh tangka sung pin a miat maneh tangka tsangsawm ngah sing,’ ti’n ti si. 17 "A bawipa’n, ’Omlawh phapa, thilpha puah si tsi. Nangmah heh thil kohno vumah muangtaak na si manin khawpi sawmkhat uk tu si tsi,’ ti’n ti si. 18 A panihnak pa leng in, ’Bawipa, na penak maneh tangka sung pin a miat maneh tangka tsangnga ngah sing,’ ti’n ti si. 19 A bawipa khen a masa bangpah in, ’Nangmah khen khawpi panga uk tu si tsi,’ ti’n ti si. 20 "A dang pakhat kheh leng atsia, ’Bawipa, pan in, maneh tangka na penak la puan in tsun in, keempek sing; meheh si. 21 Nangmah heh mi tsul har ngai na si manin na kih sing. Na koih ngawlnak le atsia, na pawi ngawlnaka khawl si tsi,’ ti’n ti si. 22 Tsimi phangin a bawipa khen amah kheh, ’Omlawh sesuak pa, na kampau bangin na vumah thukhen tu sing. Mi tsul har tawp ka si manin, ka koih ngawlnak kontik in le awng sing im? Kawti ka pawi ngawlnak ka khawl lam thei si tsim? 23 Heita ka tangka heh tangka khawlnak ah koih ngawl si tsim? Na koih ta asin ka leng phangin a khang ngah tu sing,’ ti’n ti si. 24 Tsimi phangin ama kung ah a dingtu te kheh, ’Ama nena maneh tangka tsawh le ula, maneh tangka tsangsawm a neitupa heh pe un,’ ti’n ti si. 25 "Amahni’n, ’Bawipa, ama’n maneh tangka tsangsawm nei ongla si,’ ti’n ti si. 26 A bawipa’n, ’Nang rel sing; a neitu tehem heh pe belhnak si tu atsia, a nei ngawltu heh a neinak lamtsang riang sutnak si tu si. 27 Tsin, ka uknak a nuam ngawl ka raal te kheh nai ah huai ula, ka mai rori ah hen reek un,’" ti’n ti si. 28 Me thu heh a rel tselh phangin Jesuh ah kheh amahni masuan pin Jerusalem ah hawh ham si. 29 Olive ti’n konak muala Bethfake khaw le Bethany khaw a leng dawn ongla phangin, a ningluntu panih te kheh leh si. 30 Jesuh in, "Nang raala khaw ah khen hawh ta ula, khaw sungah nang lut phangin tumaha tonak lai ngawl laakno khit rengnak kheh mu tu si utsi. A ri sut ula, nai ah kai ta un. 31 Mi pakhat khat in, ’Hei manin laakno ri sut si utsim?’ ti’n a dong lekhaw, ’Bawipa’n kin si,’ ti’n ti ta un," ti’n ti si. 32 A lehnak te khen hawh atsia, a rel ham saak bangin tawk si. 33 Laakno ri kheh a sut laitum in a neitupa khen, "Heita laakno ri sut si utsim?" ti’n ti si. 34 Ningluntu te’n, "Bawipa’n kin si," ti’n ti si. 35 Amahni khen laakno kheh Jesuh nenah huai kawm atsia, a zaang ah puanphahsak in amah kheh to tiar si. 36 Jesuh ah kheh laakno to in a hawh lai in, mi te’n lampi ah amahni puan te kheh phah si. 37 Olive Mual haap ah a leng phangin, ningluntu mihonpi tehem khen thawmlian thil a puahnak a mu manin, ang ngai in Pathian kheh aw ring ngai in thangphat pan dang si. 38 Amahni’n, "’BAWIPA ming in a leng Kumpibawi heh thangphatnak si tasen.’ Vanvum ah thinnuamnak om ta seh la, a daak ber ah tsungnung tasen," ti’n au dang si. 39 Mihonpi laka Farasi te’n, "Sayapa, na ningluntu te heh hau in," ti’n ti si. 40 Jesuh in, "Nang rel sing, me te hen dapdeenno in a om lekhaw, makhat in lungto te’n au tu si," ti’n amahni kheh ti si. 41 Jesuh ah kheh Jerusalem a leng dawn ongla phangin, khawpi kheh pan atsia kah si. 42 Jesuh in, "Nangmah, nangmah riang in, tuhun rori hen na thinnuamnak tsa in puahnak thil te heh na thei tsuk asin! Sinapikhaw tuhen tsimi thil te heh na mitmuh pin thupnak si. 43 Pathian in nangmah a leeng hun na thei ngawl manin, na raal te’n na kawnvel pin hual tu in, na kulhrep akhaw mun hem pin nom tu atsia, 44 nangmah le na sunga na tsa te heh lei tsankim in zelh tu si. Tsin, nangmah ah lungto tiangnak pakhat pohkhen a om ngawl hun leng tu si," ti’n ti si. 45 Tsin, Jesuh ah kheh temple reen sungah lut in, thil zuartu te le thil leitu te kheh hawl pan in, 46 "’Ka inn heh sawngennak inn si,’ ti’n ngan si. Sinapikhaw nangnihni’n ’ruko te kaw’ in tsan si utsi," ti’n ti si. 47 Ama’n ni tin in temple reen sungah thu zirh si. Sinapikhaw suangbawi te, Daan zirhtu te le mipi huaitu te’n amah kheh siatsuah tu in zei dang si. 48 Sinapikhaw mi hem in a thu zirhnak kheh phatak ngai in a ngai dang manin, heimah zing thei ngawl si.
201 Tsimi hun laia ni nikhat in tibang hen thiltsang si. Temple reen sungah thu zirh atsia, thuthang pha a rel tseihlai in, suangbawi te le Daan zirhtu te khen upa te thaw in amah kheh sim dang in, 2 awnpi atsia, "Kei rel in; hei thuneinak thawmin me thil te heh puah si tsim? Me thuneinak nangmah a petu heh tu sim?" ti’n ti dang si. 3 Jesuh in amahni kheh o atsia, "Keimah khen thu pakhat nang dong deve tu sing. Ka rel un. 4 Johan niimnak heh vanvum pina si maw, minung nen pina si sawn sim?" ti’n ti si. 5 Amahni’n thuruat dang atsia, " ’Vanvum pina si,’ ti’n ti le singkhaw, ’Heita um ngawl si utsim?’ ti’n ti tu kei si. 6 Tsin, ’Minung nen pina si,’ ti’n ti le singkhaw, mipi tehem in Johan ah heh profet pakhat si ti’n a um manin lungto in seplum tu kei si," ti’n rel dang si. 7 Tsimi manin, kawnai pin si ti thei ngawl si ung ti’n o dang si. 8 Jesuh in amahni kheh, "Hei thuneinak thawmin me thil te heh puah sing im, ti nang rel deve tu ngawl sing," ti’n ti si. 9 Jesuh in mipi te kheh me thusanteh heh rel si, "Mi pakhat in tsapit vuan sungah tsapitkuang phun atsia, a vuan kheh a kiltu te nga tuh in a aap tselh phangin ram khawlapi ah hun reipi khualvak si. 10 "Tsapit rah thawi hun phangin, tsapit vuan sunga tsapit rah te a pe tuh in omlawh pakhat leh pelh in, vuan kiltu te’n a vaatreih tselh phangin kut ro thong in hong tiar si. 11 A dang omlawh pakhat leh lehleu pelh in, vaatreih lehleu atsia zaknung ngai in a zing tselh phangin, kut ro thong in hong tiar lehleu si. 12 A pathumnak leh lehleu in, amahni’n maliam suah atsia, vuan pulam ah vawr dang si. 13 Tsimi phangin vuan neitupa’n, ’Kaw ti’n ti tu sing im? Ka it pittseihnak ka tsapa heh leh angkhaw, amah heh maisong bel tu si,’ ti’n ti si. 14 Sinapikhaw vuan kiltu te’n a tsapa kheh a mu phangin rel dang atsia, ’Me pa heh ro luahtu si, a ro tehem kei nei sak thei tuh in, amah heh hawh in reek a sing,’ ti’n ti dang si. 15 "Amahni’n a tsapa kheh vuan pulam ah hawl dang atsia, reek dang si. Tibang hen a si phangin vuan neitupa in vuan kiltu te kheh kawti’n ti tu sim? 16 Ama’n hawh atsia, vuan kiltu te kheh a reek tselh phangin vuan kheh mi dang aap tu si," ti’n ti si. Mipi te’n me thu heh a za dang phangin, "Ti bang tson si mah na sen," ti’n ti dang si. 17 Jesuh in amahni kheh panken atsia, "Tsimi a si lekhaw: ’Inn satu te’n a hannak lungto heh inn ning khumnak ber in tsang si,’ ti’n ngannak heh hei ati nuamnak si tu sim? 18 Mi pakhat khat tsimi lungto vumah a datu pohpoh heh kehreihtu in, tsimi lungtoa daaknak pohpoh heh vuatbuk tu si," ti’n ti si. 19 Suangbawi te le Daan zirhtu te khen me thusanteh heh amahni a tinak a si lam a thei dang phangin, tsimi hun rori in amah kheh pom tum pelh in mipi te kih si. 20 Tsimi manin amahni’n amah kheh tsul dang reng in, ama kampau pin a sual pom atsia, uktupa thuneinak le huham ah a aap theinak tuh in, mi diktsang si tiar tsawmtu thutsultu te kheh ama nenah leh si. 21 Amahni’n amah kheh thudong atsia, "Sayapa, nangmah hen minung maisong ngawl le deihdan ngawl in tsangkhen in rel atsia, thu zirh in, Pathian lamzin heh dik ngai in na zirh lam na thei si ung. 22 Sizar nenah siah pe tuh si maw, si ngawl sim?’ ti’n ti si. 23 Jesuh in amahni thiatha kheh a thei phangin, "Heita ka tsul si utsim? 24 Denari tsawh ka muh tsuk un. Me heh tu mel le tu ming sim?" ti’n ti si. Amahni’n, "Sizar mel le ming si," ti’n o dang si. 25 Jesuh in, "Sizar thil te heh Sizar pe ula, Pathian thil te heh Pathian pe un," ti’n ti si. 26 Tsimi manin mipi mai ah ama kampau pin a sualnak pom thei dang ngawl in a awn onak te manin khum ngai dang atsia dapdeen in om si. 27 Mithi tholehnak a eltu Sadusi te’n amah kheh thu pakhat dong dang si. 28 Amahni’n, "Sayapa, mi pakhat in zi huai atsia tsa tsawi ngawl in a thi a si lekhaw, a tsi a pai tuh ngawl in a zi kheh a naupa’n huai sen, ti’n Mawsi in ngan sak kei si. 29 Unau dang pasarih om atsia, upa ber in zi huai in tsa tsawi ngawl in thi si. 30 A zi kheh a nau in huai atsia, tsa tsawi ngawl in thi deve si. 31 A pathumnak pa in tsimi minu kheh huai si. Tsimi bangin a unau dang pasarih tian in huai dang pelh atsia, tsa tsawi ngawl in thi dangberh si. 32 Tawpsannak in minu kheh thi deve si. 33 Me minu heh a unau dang pasarih in a huai dang ten manin, tholehnak ah tu zi ber si tu sim?" ti’n ti dang si. 34 Jesuh in amahni kheh o atsia, "Leivuma tsa te’n huai dun atsia, a tsa te kheh huai dun tiar si. 35 Sinapikhaw mithi te lak pin thonak ah le, a om tulai san ah peh deve taak in siarnak te heh huai dun leh tu ngawlla in, a tsa te khen huai dun tiar leh tu ngawlla si. 36 Amahni heh thi leh tu ngawlla in, Pathian tsa te le tholehnaka tsa te a si ongla manin, vanvummi te bangin si thei tula si. 37 Tsimi bek zo lai ngawl in Mawsi in Bawipa kheh, ’Abraham Pathian, Isak Pathian, Jakob Pathian,’ ti’n sawl sung pin a pon phangin, mithi te a tho leh ongla lam muh ongla si. 38 Pathian heh mithi te Pathian si ngawl in, minung te Pathian si. Heimansim tiphangin minung tehem ama sungah nungberh si," ti’n rel si. 39 Tsimi phangin Daan zirhtu pakhat in amah kheh, "Sayapa, o thiam ngai si tsi," ti’n ti si. 40 Tsimi zawh hem amahni’n amah kheh thudong ngam leh nom ngawlla si. 41 Jesuh in amahni kheh, "Hei manin Khrih heh David Tsapa ti’n ti sim? 42 David amah rori in Saam Labu sung ah, ’BAWIPA in ka Bawipa kheh, 43 "Na ral te na palkam in ka tsan ma hem, ka taklam ah to in,"’ ti’n ti si. 44 Tsimi manin David in, ’Ka Bawipa,’ ti’n a ti a silekhaw, kawti’n a Tsapa si thei tu sim?" ti’n ti si. 45 Tsin, mipi tehem theih in a ningluntu te nenah, 46 "Daan zirhtu te kheh ralring un. Amahni’n angki tsualpi sil in vaak kheh sah atsia, dawr ah upatnak tuur in, sinakok ah tohkheng thupi ber le puai puahnak ah tonak pha ber ah to kheh tuur si. 47 Numei te inn ruam atsia, sidatnak thaw reipi pi sawngen si. Amahni’n hannak nase sawn pittseih tuar tu si," ti’n ti si.
211 Tsin, Jesuh in pan atsia, .Af Aalu kuang sungah mi hausa te’n alu a koih tseih kheh mu si. 2 Tsin, minawm numei pakhat in dar tangka tsang nih a koih khehkhen mu si. 3 Ama’n, "Thungai ngai in nang rel sing; midang tehem tah in me minawm numei hen tam ber koih si. 4 Heitasim tiphangin me midang tehem hen kangkim in a neinak sung pin Pathian nenah alu pe si. Sinapikhaw me numei nu hen a nawm ngai thahlam in a pum tsawmnak tuh in a neinak hem koih si," ti’n ti si. 5 Mi pawlkhat te’n temple reen sunga lungto mawi ngai ruai le bawlnak te thaw mawi tiarnak kheh rel dang si. 6 Tsimi phangin Jesuh in, "Me nang munak lungto pi te ruai heh tumah in phereih ngawl in, lungto pakhat le pakhat a delh dun ngawl hun leng tulai si," ti’n ti si. 7 Amahni’n Jesuh ah kheh, "Sayapa, tsimi thil te tsawh kontik in si tu sim? Tsimi thil te a tsang tula phangin hei theihdiknak om tu sim? ti’n dong dang si. 8 Tsimi phangin Jesuh in, "Tumaha zolnak nang si tuh ngawl in tsimkom un. Mi tampi te’n keima ming in leng tu in, ’Keimah heh Khrih ah sing,’ tsin ’hunkim ongla si,’ ti’n ti tu si. Amahni kheh luun mah na ta un. 9 Raal tawng thawm le thunok thawm te nang za a sikhen thinphu mah na un. Me te heh leng masa tupelh atsia, a bonak heh makhat in leng zep rih tu ngawl si," ti’n ti si. 10 Tsin, Jesuh in amahni kheh, "Miphun pakhat le pakhat do dun tu in, ram pakhat le pakhat do dun tu si. 11 Mun hem ah nase ngai in thinthing tu atsia, rian dung tu in, hizul natse te leng tu si. Van ah thil launung te le theihdiknak mak ngai ruai lang tu si. 12 "Sinapikhaw me tehem heh a leng ma in nangmahni heh keima ming manin pom tu atsia, erh tu in sinakok ah le thawnginn sungah aap tu nang si. Tsin, kumpibawi te le mangki te mai ah len tu nang si. 13 Tsimi te heh keima tetti nang si lam a langnak tuh si sawn tu si. 14 Tsimi manin nang o dan tuh heh ruat ham tseih a kul ngawl lam nang thinlung in thei ta un. 15 Heimansim tiphangin nang raal tehem in nangmahni do atsia, nang thu a el thei tuh ngawl in awnkam le tsimnak nang pe tu sing. 16 Nang nu le nang pa te, nang unaupi te, nang sen te le nang rualpi pha te ’n nang zuar tu si. Pawlkhat te heh reek tu nang si. 17 Keima ming manin mi hem in haw tu nang si. 18 Sinapikhaw nang lua nang sam zangkhatno pohkhen zuuk thong tu ngawl si. 19 Nang veizonak manin nang nungnak hung thei tu si utsi. 20 "Jerusalem kheh raal te’n a hual nang mu phangin, a se dawn ongla lam kheh thei ta un. 21 Judea peng sungah a omtu te’n mual vumah dan tasen. Jerusalem khaw sungah a omtu te’n khaw pulam ah suak ta sehla, khaw tenau ah a omtu te’n khawpi sungah lut leh mah na tasen. 22 Ngannak tehem a kimnak tuh in, tsimi hun heh phuzul hun si tu si. 23 Tsimi hun in naupai te le nau kanghuam nei te tsa lungsenung si. Me ram sungah hen rimnak le me minung te vumah thinrawnak leng tu si. 24 Amahni kheh vangsang hiam ah duberh tu atsia, miphun hem ah sel in huainak si tu si. Gential te’n amahni hun a kim maa hem Jerusalem khawpi kheh amahni kawng in pal beet rih tulai si. 25 "Tsin, nii, lade le arsi te ah theihdiknak lang tu si. Leilung vuma miphun te laklawh ah thunok reirui in rimnung tseih tu atsia, tipithuanthum tilet tho thawm ring hehu tu si. 26 Van huham te a thing tu man in, leilung vumah thil leng tu te ruat in minung te thinlung te heh thinphunak thaw in dim tu si. 27 Tsimi tselh phangin Mi Tsapa heh huham le tsungnungnak mak thaw in meiro sung pin a leng kheh amahni’n mu tu si. 28 Me thil te a tsang pan phangin nang dennak tuh a nong ongla manin, nang lu daak in panso un," ti’n ti si. 29 Tsin, Jesuh in amahni kheh thusanteh pakhat rel si; "Theikuang le thingkuang tehem kheh pan un. 30 A nah te a tserh phangin khal hun nong ongla si, ti kheh nangmahni rori in thei si utsi. 31 Tsimi bangin nangmahni in me thil te a tsang nang mu phangin Pathian uknak a nong ongla lam kheh thei ta un. 32 Thungai ngai in nang rel sing; me thil tehem a kimsek ma hem tusan minung te thi tu ngawl si. 33 Van le leilung pi heh pai tupelh atsia, ka thu te pai thong himhim tu ngawl si. 34 "Tsimkom ta un. Tsimi a si ngawl lekhaw zu rong in le zu nang ri tseih lai in, le me nungnak tsa nang thintsawl tseih lai in tsimi ni kheh leng tu si. 35 Tsimi ni khen leivum ah a omtu tehem kheh sur bangin khuhberh tu si. 36 Tsimi manin a leng tula me thil tehem pin luat tuh taak in siarnak nang si theinak tuh in, le Mi Tsapa mai ah nang ding theinak tuh in sawngen in ngak un," ti’n ti si. 37 Tsin, Jesuh ah kheh sun in temple reen sungah thu zirh veng in, zan phangin suak atsia Olive Mual ah tsaam veng si. 38 Minung tehem in a thu zirhnak ngai tu in, zingmano in temple reen sungah hawh dang veng si.
221 Tuhen Leekdelh Puai tinak Tsol Phulh ngawlnak Sang Puai nong ongla si. 2 Suangbawi te le Daan zirhtu te’n Jesuh a reek theinak tuh zei dang si. Heimansim tiphangin amahni’n mipi te kih si. 3 Tsimi teng phangin, ninglun leinih lak-a Iscariot ti’n ponnak Judas sungah Satan lut si. 4 Tsimi manin ama’n suangbawi te le temple kiltu bawi te nenah hawh atsia, amahni kut sungah Jesuh ah a aap dan tuh reelpi si. 5 Amahni kheh ang ngai dang in, tangka pe tu in lungkim dun si. 6 Ama’n mipi te om ngawl lan in amah kheh amahni kut ah zuar tu in thutiam atsia, hun remtsang zei si. 7 Leekdelh Puai tsa tuuno tel ni, Tsol Phulh ngawlnak Sang Puai ni leng si. 8 Tsin, Jesuh in Piter ah le Johan ah kheh, "Hawh ta ula, Leekdelh puai simlai kei ei tuh puah ham ta un," ti’n tiar si. 9 Amahni’n amah kheh, "Kawnai ah puah ham tu in deih kei si tsim?" ti’n dong kawm si. 10 Jesuh in, "Ngai un, Khawpi sungah nang lut phangin tibeel phur mipa pakhat tawk tu si utsi. A lutnak inn sungah amah kheh lun in lut ta un. 11 Tsin, innteek pa kheh, ’Sayapa’n "ka ninglun te thaw Leekdelh puai simlai ka einak tuh innkhan kawnai ah sim," ti’n dong tiar kei si,’ ti’n ti ta un. 12 Tsimi phangin ama’n thilri te kimsek in koihnak innkhan lianpi kheh inn vumta thuah ah muh tu nang si. Tsimi ah puah ham ta un," ti’n ti si. 13 Amahni kheh hawh kawm atsia Jesuh relnak bangin tawk atsia, Leekdelh puai simlai puah kawm si. 14 Hun a kim phangin amah kheh to atsia, a ningluntu te khen to deve si. 15 Tsimi phangin ama’n, "Thihnak ka tuar ma hen nangmahni thaw me Leekdelh puai simlai heh ei ot pittseih sing. 16 Nang rel sing. Pathian uknak a kim ma hem ei leh tu ngawlla sing," ti’n ti si. 17 Tsin, Jesuh in khuat kheh le atsia Pathian a paak tselh phangin, "Meheh le ula, sem un. 18 Nang rel sing. Tu pin pan Pathian uknak a leng ma hem tsapit zu heh in leh tu ngawlla sing," ti’n ti si. 19 Tsin, sang kheh le atsia Pathian paak si; hem in amahni kheh pe atsia, "Meheh nangmahni tsa ka penak ka ruangpum si. Keimah nang phawk rengnak in puah un," ti’n ti si. 20 Tsimi bangin simlai a ei dang tselh phangin, khuat khehkhen le a tsia, "Me khuat heh nangmahni tsa a luang ka thisena thukam ther si. 21 Sinapikhaw pan un, keimah a zuartua kut heh me tsabuai vumah hen keima kut thaw in om reng si. 22 Teekham saak bangin Mi Tsapa heh hawh kul tu si. Sinapikhaw amah a zuartu tsa in lungsenung si!" ti’n ti si. 23 Ningluntu te’n amahni lak ah me thil puahtu tuh heh tu ber si ol na maw ti’n dong dun dang pan si. 24 Tsin, amahni lak ah, tu ber heh mi thupi ber in ruatnak si tu ti’n el dunnak suak meek si. 25 Tsimi phangin ama’n, "Gential te kumpibawi te khen a uknak te vumah bawi ngai in, amahni vumah thuneitu te kheh, ’Thilpha puah saktu te,’ ti’n ti si. 26 Sinapikhaw nangmahni lak ah tsimi bangin si tu ngawl si. Nangmahni lak ah mi thupi ber heh nauta ber bangin om sawn ta sehla, uktu heh omlawh bangin om sawn tasen. 27 Laikuang kiltu le lai ei tuh in a puahsak tu heh tu thupi sawn sim? Laikuang a kiltu heh thupi sawn si ngawl si maw? Sinapikhaw keimah heh nangmahni lak ah naper saktu bangin om sing. 28 "Sualroihnak te ka tawk phangin keimah ompitu heh nangmahni si utsi. 29 Ei Pa’n uknak heh keimah a aap bangin, keimah khen uknak heh nang aap sing. 30 Tsimi heh ka uknaka ka tsabuai ah nang ei nang in theinak tuh in le Israel nam leinih te uktu tuh in le kumpibawi tohkheng ah nang to theinak tuh si," ti’n ti si. 31 Tsin Bawipa in, "Simon, Simon, ngai in, nangmah heh Satan in sangvut khap bangin khap ot na si. 32 Sinapikhaw na umnak a pirh tuh ngawl in, saw na ngen sak sing. Keima lam ah na nga leh phangin na u le nau te heh thape leh in," ti’n ti si. 33 Tsimi phangin Piter in amah kheh, "Bawipa, thawnginn ah le thihnak ah nangmah thaw hawh langkhat tu in tiari lep sing," ti’n ti si. 34 Sinapikhaw Jesuh in, "Piter, na rel sing, amah heh thei ngawl sing, ti’n veithum tian na phaa ma hem tuni ar khuang tu ngawl si," ti’n ti si. 35 Tsin, Jesuh in a ningluntu te kheh, "Tangka dip, tawngphu le kedawl keng tiar ngawl in nangmahni ka hawh tiar lailen, dasamnak heimah nei utsim maw?" ti’n ti si. Amahni’n, "Heimah nei ngawl si ung," ti’n ti dang si. 36 Tsimi phangin Jesuh in amahni kheh, "Sinapikhaw tuzonghen tangka dip a neitu te’n keng tasen. Tsimi bangin tawngphu a neitu te’n pai ta sehla, vangsang a nei ngawltu in a angki tsual kheh zuar in vangsang lei tasen. 37 Nang rel sing, ’Amah heh daan hektu te lak ah siar tsihnak si,’ ti’n ngannak kheh keima vumah a leng kultsam si in, keima thu te heh a tawpnak leng ongla si," ti’n ti si. 38 Amahni’n, "Bawipa, pan in, nai ah vangsang panih om si," ti’n amah kheh ti dang si. Ama’n, "Tham poh si," ti’n amahni kheh ti si. 39 Tsin, amah kheh suak in, ama dan bangin Olive Mual ah hawh atsia, a ningluntu te’n lun dang si. 40 Tsimi munah a leng phangin, "Sualroihnak sungah nang da tuh ngawl in sawngen un," ti’n amahni kheh ti si. 41 Amahni nen pin muilawnnak tsan ah hawh tum si. Khuklepbok in sawngen atsia, 42 "Ei Pa, na deihnak a si lekhaw, me khuat heh ka nen pin ka lesak sawh in. Sinapikhaw keima deihnak si ngawl in, nangma deihnak si tasen," ti’n ti si. 43 Tsimi phangin vanvum pin vanvummi pakhat kheh ama nenah lang atsia thape si. 44 A zilhtsak leita manin nase sawndoh in sawngen si. A saup heh thisen tser lianpi bangin lei ah tser si. 45 Saw a ngen tselh phangin a ningluntu te nenah hawh atsia, a lungse ngai dang manin a eihmu dang kheh tawk si. 46 Ama’n, "Hei manin eihmu si utsim? Sualroihnak sungah nang da tuh ngawl in, tho ula sawngen un," ti’n amahni kheh ti si. 47 A awn tseih laitum in, ngai in, mihonpi te leng si. Amahni kheh ningluntu leinih laka Judas tinak pa’n huai atsia, ama’n Jesuh ah kheh thuut tu in zuan si. 48 Sinapikhaw Jesuh in amah kheh, "Judas, Mi Tsapa heh thuutnak men in zuar tu si tsim maw?" ti’n ti si. 49 Ama kung ah omtu te’n thil sidaan tuh kheh a mu dang phangin, "Bawipa, vangsang thaw ban tei men a ung maw?" ti’n ti dang si. 50 Tsin, ningluntu te laka pakhat in suangbawi bera selpa taklam beng kheh sat tawng sak si. 51 Sinapikhaw Jesuh in, "Meno heh vang ka puah siang un," ti’n ti atsia, a beng kheh tong sak in dam tiar leh si. 52 Tsin, Jesuh in ama nenah a leng suangbawi te le temple reen sung kiltu palik bawi te le upa te kheh, "Ruko pom tu bangin vangsang le thingtawng thaw in leng si utsim maw? 53 Ni tin in temple reen sungah om sing. Keimah pom tu in heimah tuum ngawl si utsi. Sinapikhaw tuhun heh nangmahni hun si in, thimnak huhama hun si," ti’n ti si. 54 Amahni’n Jesuh ah kheh pom atsia, huai in, suangbawi ber inn ah huai dang si. Piter in khawla thah pin lun si. 55 Amahni’n inntual laingial ah meiseem atsia, mei awi to dang in, Piter ah khen to deve si. 56 Omlawh minu pakhat in amah kheh mu atsia, pan po in, "Me pa khen heh amahni lak ah peh deve si," ti’n ti si. 57 Piter in phaa atsia, "Minu, amah heh thei ngawl sing," ti’n el si. 58 Dawmlai a rei phangin midang pakhat in Piter ah kheh mu atsia, "Nangmah khen heh amahni minung si tsi," ti’n ti si. Piter in, "Unau, si ngawl sing," ti’n ti si. 59 Tsimi zawh naazi pakhat duk a rei phangin, midang pakhat in muangsiar in, "Me pa heh Galilee te a si manin, ama nenah a om pa la si rori si," ti’n ti si. 60 Piter in, "Unau, na awnnak heh thei nom ngawl sing," ti’n ti si. Tsimi tsang in, a awn tseih laitum in ar khuang si. 61 Tsimi teng in Bawipa in Piter ah kheh her atsia, pan si. Tsimi phangin Piter in, "Ar a khuang ma in veithum tian phaa tu ka si tsi," ti’n Bawipa relnak la phawk leh si. 62 Tsin, Piter ah kheh pulam ah suak atsia, nase ngai in kap si. 63 Jesuh ah a pomtu te’n zohsuam in vaat dang si. 64 A mai kheh hup dang in a biang pin beeng dang atsia thu dong in, "Nangmah a beengtu heh tu sim? Kei rel in," ti’n ti dang si. 65 Awn dang tampi thaw in amah kheh relse meek lai si. 66 Khawvar tsang in mipi laka upa te, suangbawi te le Daan zirhtu te kheh mun khat ah khawm dang in, Jesuh ah kheh amahni Sanhedrin ah huai dang si. 67 Amahni’n, "Khrih ah na si lekhaw, kei rel in," ti’n ti dang si. Sinapikhaw Jesuh in, "Ka rel sikhen diksang lawt tu ngawl poh si utsi. 68 Thu ka dong sikhen o nuam lawt tu ngawl in, leh nuam lawt tu ngawl ka si utsi. 69 Tu zawh in Mi Tsapa heh Pathian huham taklam ah to tu si," ti’n amahni kheh ti si. 70 Tsimi phangin a vaseng in, "Nangmah heh Pathian Tsapa si tsim maw?" ti’n dong dang si. Jesuh in, "Nang awnnak bangin si sing," ti’n rel si. 71 Amahni’n, "Keimahni rori in ama kampau kei za ongla manin, tetti dang kul lai si sing maw?" ti’n ti dang si.
231 Tsin, mihonpi tehem kheh tho dang hu atsia, Jesuh ah kheh Pilat nenah huai dang si. 2 Amahni’n Jesuh ah kheh sual nawn pan dang in, "Me pa hen kei miphun heh buai tiar in, Kumpibawi Khrih ah sing, ti tsawm in, Sizar nenah siah pe a kham tseih kheh mu si ung," ti’n ti dang si. 3 Tsimi phangin Pilat in, "Jew te Kumpibawi si tsim maw?" ti’n ti si. Jesuh in o atsia, "Na awnnak bangin si sing," ti’n ti si. 4 Pilat in, "Me pa thil tisualnak heimah mu ngawl sing," ti’n suangbawi te le mipi te kheh ti si. 5 Amahni’n, "Amah hen Galilee peng pin pan nai mun tian in, Judea ram sung hem ah mipi te kheh so in thu zirh si," ti’n nase sawndoh in ti dang si. 6 Pilat in Galilee tinak awnkam a za phangin, me pa heh Galilee te si maw ti’n dong kan si. 7 Pilat in Jesuh ah heh Herod uknak ram minung a si lam a thei natsang in, Herod nenah kuat si. Tsimi hun in Herod ah heh Jerusalem ah a om teng si. 8 Herod in Jesuh ah kheh a mu ot zawh reipi ongla in, a mu phangin ang tihtak in ang si. Heimansim tiphangin ama’n Jesuh thu tampi za ongla in, thil theihdiknak dawmlai a puahnak kheh mu tu in limdik si. 9 Amah khen thu tampi dong pelh in Jesuh in heimah o nuam ngawl si. 10 Suangbawi te le Daan zirhtu te’n ding atsia, nase ngai in a sual zei dang si. 11 Herod ah le a raalkap te’n zohsuam in nihtsiam bawlnak in mang dang atsia, puan mawi ngaino silh in Pilat nenah kuat leh si. 12 Herod ah le Pilat ah heh raal dun peng sipelh in, tsimi ni rori in rem dun thei si. 13 Pilat in suangbawi te, uktu te le mipi te kheh ko khawm si. 14 Pilat in, "Mipi te raaltho tiartu bangin, me pa heh ka nenah huai lehleu bang si utsi! Nang maitsang rori ah hen thudong kan pelh nangkhaw, a mawhnak nang zeinak bangin avum ah mawhnak heimah tawk ngawl sing. 15 Herod ah khen tawk tse ngawl si. Tsin nang nenah khen amah kheh leh sing. Pan un, nang vumah thi taak heimah puah ngawl si. 16 Tsimi manin amah heh nunzirh angkhaw, leh tu sing," ti’n ti si. 17 Tsimi puai ah mipi te tsa in mi pakhat lehsak kultsam veng si. 18 Tsimi tsang in amahni’n, "Me pa heh reek la, Barabbas ah kei lehsak in," ti’n au tuptup dang si. 19 Barabbas ah heh khawpi sunga mipi te raaltho tiar atsia, tualreek a si manin thawng tohnak si. 20 Pilat in Jesuh ah kheh a leh ot manin amahni kheh thurel lehleu si. 21 Sinapikhaw amahni’n au tuptup in, "Thinglamteh ah khen in; thinglamteh ah khen in," ti’n ti dang si. 22 A veithumnak in Pilat in, "Hei man sim? A pha ngawl hei puah sim? Thi taak sual a puahnak heimah mu ngawl sing. Tsimi manin nunzirh angkhaw leh tu sing," ti’n amahni kheh ti si. 23 Amahni’n aw ring ngai in thinglamteh ah khen tuh in ngen leilei dang si. Tsin, amahni au thawm le suangbawi te au thawm in neh si. 24 Tsin, Pilat in amahni ngennak bangin si tu in thukhen si. 25 Amahni deih sawnnak raaltho manin le tualreek manin thawng tohnak pa kheh suah sak atsia, amahni deihnak bangin Jesuh ah kheh amahni kut ah aap si. 26 Jesuh ah kheh a huai dang tseihlai in lo pin a leng Sairin khaw te Simon ah kheh Jesuh ai in thinglamteh kheh phur tu in a vumah thinglamteh kheh suan dang si. 27 A ning pin a luntu mi tampi te lak ah Jesuh ah kah in a siar tseihtu nupang te peh deve si. 28 Sinapikhaw Jesuh in amahni kheh her atsia, "Jerusalem tsanu te, keima manin kap mah na un. Nangmahni le nang tsa te tsa in kap sawn un. 29 Heimansim tiphangin, ’A tsing minu heh mi ang si. Naupai kel ngawl sul le nau in a tsawp kel ngawlnak khul heh a muitsu si,’ ti’n amahni’n ati hun leng tulai si. 30 Tsimi hun in amahni’n ’mual saangpi te kheh, "keimahni vumah min in," ti’n ti tu atsia, mual niam te kheh, "Kei nen in"’ ti’n ti tulai si. 31 Amahni’n thingkuang hing riang heh tibang hen a zing phangin, thingkuang ro heh kawtibang si tu sim?" ti’n amahni kheh ti si. 32 Tsin, Jesuh ah thaw reek langkhat tuh in misual panih te khen huai deve si. 33 Calvary tinak munah a leng phangin, Jesuh ah kheh thinglamteh ah khen in, misual panih te kheh a taklam ah le a kehlam ah khen deve si. 34 Tsimi phangin Jesuh in, "Ei Pa, amahni’n a puah dangnak heh a thei dang ngawl manin, amahni sual te zah sak in," ti’n ti si. A puan khen aisan in sem dang si. 35 Mi te kheh amah pan in ding dang reng si. Amahni lak ah a ding uktu te khen eu in, "Ama’n midang te kheh san si. Pathian dengnak Khrih a si miau lekhaw, amah le amah san tsawm tsuk sen," ti’n ti dang si. 36 Raalkap te’n amah kheh nihtsiam bawlnak in mang dang atsia, a nenah hawh in tsapit zu pawng kheh pe in, 37 "Israel te Kumpibawi na si miau lekhaw san tsawm in," ti’n ti dang si. 38 Tsin, Grik awn, Latin awn le Hebru awn in, "ME PA HEH JEW TE KUMPIBAWI SI," ti’n ngannak lai kheh a vumah tar si. 39 Thinglamteh ah khennak misual panih lak pin pakhat sawn in, "Khrih ah na si miau lekhaw san tsawm la, keimahni khen kei san in," ti’n Pathian relse in ti si. 40 Sinapikhaw a khatta sawn in o atsia, hau in, "Ama bangin hannak na tuar thahlam in Pathian riang kihzah ngawl lai si tsim maw? 41 Keimahni’n kei puah awngnak te manin tuar kei si manin kei tuarnak heh a dik si. Sinapikhaw me pa hen thilsual heimah puah ngawl si," ti’n ti si. 42 Tsin, ama’n Jesuh ah kheh, "Bawipa, na uknak sungah na lut phangin ka phawk sawh lai in," ti’n ti si. 43 Tsimi phangin Jesuh in, "Thungai ngai in na rel sing; tuni rori in keimah thaw paradise ah om tu si tsi," ti’n amah kheh ti si. 44 Sun laitak naazi leinih pin pan simlam naazi pathum tian leivum hem ah thimla dung si. 45 Nii thim in, temple sunga puanzar kheh khennih in bal zur si. 46 Jesuh in ring ngai in au atsia, "Ei pa, ’ka raula heh na kut sungah na aap sing,’" ti’n ati tselh phangin a haihawh bo si. 47 Tsin, raalkap zakhat uktupa’n me te heh a mu phangin, Pathian thangphat atsia, "Me pa heh mi diktsang si rori si," ti’n ti si. 48 Me heh pan tu in a leng mihonpi tehem in a awm tsum tsawm atsia, hong leh dang si. 49 A mel theih tehem le Galilee pin amah a luntu minu te khen khawla thah ah ding dang atsia, me thiltsang te heh ralpaan dang reng si. 50 Ngai in, tangsuak mipha le midik pakhat Joseph ah om si. 51 Ama’n tangsuak dang te thu ngai nuam ngawl in, amahni puahnak khen puah deve ngawl si. Amah heh Israel khawpi Arimathia khaw te si in, Pathian uknak a ngak rengtu si deve si. 52 Me pa hen Pilat nenah hawh atsia, Jesuh ruang kheh ngen si. 53 Ama’n Jesuh ruang kheh losuk atsia, puan nemno thaw in tsuun in, tumah vi lai ngawlnak lungretnak thaan sungah vi si. 54 Tsimi ni heh Thawithang ni si atsia, Sabbath ni a leng tu zep si ongla si. 55 Jesuh ah thaw Galilee pin a leng minu te khen a ruang kheh la dang in, thaan le a ruang a zau dan kheh pan si. 56 Amahni kheh hong leh dang in, rim ur le sathau rim ur puah ham dang si. Tsin, thukhaam bangin Sabbath ni in tsawlom dang si.
241 Nipi khat sunga ni masa ber ni, zingmano in minu te’n a puah hamnak rim ur kheh keng atsia, thaan ah hawh dang in, a dang minu te khen lun dang si. 2 Amahni’n thaan pin lungdeep thawn saak kheh tawk dang si. 3 Thaan sungah lut dang in, Bawi Jesuh ruang kheh tawk ngawl si. 4 Tsin, tibang hen thiltsang si. Ambuk in a om dang lai in, ngai in, puan vaar ngai sil mi panih kheh amahni kung ah ding si. 5 Amahni kheh kih dang ngai in lei ah bok dang si. Mi panih te’n, "Heita mithi lak ah minung zei si utsim? 6 Amah heh nai ah om leh ngawlla in, tho leh ongla si. Galilee ah a om lai in nangmahni a relnak la phawk leh un. 7 Ama’n, ’Mi Tsapa heh misual te kut ah aapnak a si kultsam si. Amahni’n thinglamteh ah khen tu in, nithumnak ni in tho leh tu si,’ ti’n nang rel awng si," ti’n ti si. 8 Tsimi phangin amahni’n a relnak la phawk leh dang si. 9 Amahni kheh thaan pin hong leh dang in, me thu tehem heh ningluntu leikhat te le midang tehem kheh rel si. 10 Lehnak te nenah me thu te a reltu te heh Mary Magdalene ah, Joanna ah le Jeim nu Mary ah le amahni ompinak a dang minu te kheh si. 11 Lehnak te’n me minu te relnak heh puah tsawmnak tangthu bang phang men in a ring dang manin, diksang dang ngawl si. 12 Tsin, Piter ah khen tho vut atsia thaan ah dan nawmnawm in, kun in thaan sung a pan phangin puan nemno heh amah keelno in a om kheh mu si. Amah khen me thil omdan heh lunglawi ngai in inn ah hong leh si. 13 Tsimi ni in ningluntu panih te kheh Jerusalem pin peng sarih luun khawla Emmaus khaw ah hawh kawm si. 14 A hawh thahlam in me thil tehema omdan heh rel kawm thah tseih si. 15 Me thu te heh a rel thah kawm tseih lai in, Jesuh amah rori in amahni kheh zuan atsia, amahni thaw hawh langkhat nom si. 16 Sinapikhaw a mit kheh zialnak a si manin amahni’n Jesuh ah kheh thei ngawl si. 17 Jesuh in, "Nang hawh thahlam in nang rel kawm tseihnak heh hei thu sim? Hei manin lungse khawngai in om si utsim?" ti’n amahni kheh ti si. 18 A khatta sawn Kleopas ah tinak pa’n amah kheh o atsia, "Tulai sung hem Jerusalem ah thiltsang a thei kha ngawl, mikhual nangmah pakhat bek om si tsim maw?" ti’n ti si. 19 Jesuh in, "Hei thu sim?" ti’n amahni kheh dong si. Amahni’n, "Nazareth khaw te Jesuh thu si. Amah heh Profet si in Pathian mai le minung tehem mai ah a puahnak le a awnkam ah thawmlian ngaingai si. 20 Keimahni suangbawi te le uktu te’n thi tu in han tuh in, le thinglamteh ah khen tuh in amah kheh aap si. 21 Sinapikhaw keimahni hen amah heh Israel te dentu tuh in limdik si ung. Tsimi bek zo ngawl me thil tehem a tsang zawh tuni heh a nithumnak ni si. 22 Si si. Keimahni pawl sunga zingmano in thaan ah a hawhtu minu te’n lunglawi tiar kei si. 23 Ama ruang a mu dang ngawl phangin hong leh dang atsia, amah heh nung leh ongla si ti’n amahni a reltu vanvummi te lalhnak a mu dangnak kheh rel kei si. 24 Keimahni pawl sunga mi pawlkhat te’n thaan ah hawh in minu te relnak bangin tawk pelh in, a ruang kheh tawk dang ngawl si," ti’n ti si. 25 Tsimi phangin Jesuh in amahni kheh, "Nangnihni mitaw te, profet tehema relnak um tu in thinlung sanang thei te, 26 Khrih ah hen me thil tehem heh tuar atsia, ama tsungnungnak ah lut tu si ngawl si maw?" ti’n ti si. 27 Tsin, Mawsi pin pan Profet te le Laithiangrim tehem in ama thu a ngannak te kheh amahni reltsiangsek si. 28 A hawh min tuh Emmaus khaw ah a leng dawn phangin, amah heh khawla sawn ah hawh rih tu bangin om si. 29 Sinapikhaw amahni’n, "Keimahni nenah tsaam rih len; ni da ongla in khawthim dawn ongla si," ti’n amah kheh ati manin, Jesuh ah kheh amahni nenah tsaam tu in hawh si. 30 Amahni thaw laikuang a kil lai in, sang kheh le atsia, muitsu burh in hem atsia, amahni pe si. 31 Amahni kheh a mit vaar kawm in, amah a si lam thei ngah kawm si. Jesuh ah kheh amahni mitmuh pin paiden si. 32 Tsimi phangin amahni’n, "Lampi khawdung kei awntsawp dang lai le Laithiangrima sullelam a reltsiang lailen kei thinlung heh tuaireih zo tho si ngawl si maw?" ti’n ti dun si. 33 Amahni kheh tho atsia, tsimi hun rori in Jerusalem ah hawh kawm leh atsia, ningluntu leikhat te le amahni thaw om langkhat te kheh mun khat ah a khawm dang laitum kheh tawk kawm si. 34 Amahni’n, "Bawipa heh tho leh miau ongla in, Simon nenah lang ongla si," ti’n rel si. 35 Tsin, ningluntu panih te’n lampi khawdung a awntsawp dangnak te le sang hem atsia, amah a si lam a thei tiar dan thu te kheh amahni rel deve si. 36 Me thu te a awn dang tseih lai in Jesuh amah rori kheh amahni laingial keek ah ding atsia, "Nang nenah thinnuamnak om tasen," ti’n amahni kheh ti si. 37 Sinapikhaw ningluntu te’n thila mu a ring tsawm dang manin, thinphu in kih ngai dang si. 38 Tsimi phangin Jesuh in, "Hei manin lunglawi si utsim? Heita nang thinlung sungah ummawhnak suak tiar si utsim? 39 Ka kut te le ka kawng te heh pan un. Keimah rori si reng nangnge! Ka zen ula, ka pan tsuk un. Thila hen taksa le ruh nei ngawl si. Keimah hen taksa le ruh nei sing," ti’n amahni kheh ti si. 40 Tsimi bangin a awn tselh phangin a kut le a kawng te kheh amahni muh si. 41 Amahni’n ang in lunglawi dang atsia, a diksang dang thotho lai ngawl phangin, "Ei tuh heipohkhen nei utsim maw?" ti’n amahni kheh ti si. 42 Amahni’n nga hainak pakhat le khuaipheng pe dang si. 43 Jesuh in tsimi te kheh le atsia, amahni mai rori ah ei si. 44 Jesuh in, "Mawsi daan bu sungah le Profet te Laithiangrim sungah le Saam labu sungah keima thu ngannak tehem heh a veksen in a kimsek kul si, ti’n nangmahni nenah ka om lai ka relnak te la heh me thu te heh si," ti’n amahni kheh rel si. 45 Laithiangrim a thei dang theinak tuh in amahni thinlung kheh hong sak si. 46 Tsin, Jesuh in amahni kheh, "Khrih in thihnak heh a tuar kultsam si in, a nithumnak ni in mithi te lak pin tho rori tu si ti’n ngan si. 47 Ama ming in sual sirnak le sual zahnak kheh Jerusalem pin pan leivum miphun hem te lak ah phuangnak si tu si. 48 Nangmahni heh me thu tea tetti si utsi. 49 Ngai un, ei Pa thutiam kheh nangmahni nenah leh tu sing. Sinapikhaw van lama huhama thuamnak nang si ma hem, Jerusalem khawpi pin ngak dang rih ta un," ti’n amahni kheh rel si. 50 Amahni kheh Bethany khaw ah huai atsia, a kut zar in muitsu burh si. 51 Tsin, tibang hen thiltsang si. Muitsu a burh tseih laitum in amahni nen pin kiang atsia, vanvum ah lesonak si si. 52 Amahni’n amah kheh be dang atsia, ang ngai in Jerusalem ah hong dang leh si. 53 Amahni kheh temple ah hawh dang in Pathian thangphat dang atsia, ultung dang tsiat veng si. Amen