LEHNAK TE

LEHNAK TE

¹ Maw Theofilus, Jesuh in per tu in le zirh tu in a pan saak hem muah, ² lesonak a si ni tian a puahnak te kheh ka lai masa sungah ngan sing. A deng saak lehnak te kheh Raula Thiangrim tawnin thu pe si. ³ Thihnak a tuar zawh in lehnak te kheh ni sawmli sung lalh tsawm atsia, Pathian uknak thu te kheh rel in, a nung lam kheh kho ngai in tetti muh si. ⁴ Amahni khawmnak ah peh deve atsia, Jerusalem pin kiang rih ngawl in Pa penak thutiam ngak rih tu in thupe si. Jesuh in, "Me heh ka nen pin nang zanak thutiam si. ⁵ Johan ah hen ti ah niim miau si. Sinapikhaw tu pin pan ni a rei ngawl in Raula Thiangrim ah niimnak si tu si utsi," ti’n ti si. ⁶ Tsimi manin mun khat ah a khawm dang phangin amahni’n, "Bawipa, tuhen Israel te nenah uknak heh pe leh atsim maw?" ti’n amah kheh dong dang si. ⁷ Tsimi phangin ama’n, "Pa in ama thuneinak sungah a koihnak hun le khawhun te heh nangmahni thei kul si ngawl si. ⁸ Sinapikhaw nangmahni vumah Raula Thiangrim a leng phang in, huham ngah tu si utsi. Tsin, Jerusalem ah, Judea ram hem ah, Samaria ram ah le leilung a tawpnak tian ah keima tetti si tu si utsi," ti’n amahni kheh ti si. ⁹ Me thu te heh a rel tselh phangin, amahni’n amah kheh a pan dang reng lai in, amah kheh lesonak si atsia, amahni mubaan ngawlnak ah meiro in thiarper si. ¹⁰ Amahni’n amah lesonak van lam kheh a pan dang reng lai in, a vaar ngai mi panih kheh amahni kung ah ding si. ¹¹ Amahni’n, "Galilee te, heita van lam pan in ding dang reng si utsim? Nangmahni nen pin van ah lesonak me Jesuh ah heh van ah a kaiso nang munak bangpah hen leng leh tu si," ti’n amahni kheh ti si. ¹² Tsimi phangin amahni kheh Olive Mual pin Jerusalem ah hong dang leh si. Olive Mual heh Jerusalem kung ah om si in, Sabbath ni khualvaknak tsan khawla si. ¹³ Inn sungah dum dang atsia, amahni tsaamnak innkhan vumta ah kai dang si. Amahni heh Piter ah, Jeim ah, Johan ah, Andrew ah, Philip ah, Thomas ah, Bartholomew ah le Mahte ah, Alphaeus tsapa Jeim ah le phun it Simon ah, le Jeim tsapa Judas ah si. ¹⁴ A vaseng in nupi te, Jesuh nu Mary ah le a nau mipa te thaw thinkhat lungkhatno in tsawl ngawl in zuamnak thaw sawngen dang si. ¹⁵ Tsimi hun in ningluntu te lak pin Piter ah kheh ding si. A khawm dangtu te heh minung za le kul si dang si. ¹⁶ Piter in amahni kheh, "U le nau te, Jesuh ah a pomtu te huaitu Judas thu ah Raula Thiangrim in David awnkam mang in a rel hamnak, me Laithiangrim heh a kim kultsam si. ¹⁷ Amah heh keimahni lak ah siarkhatnak si in, me napernak ah a pehtu pa si." ¹⁸ Me pa hen thil sesuak ngai a puah man a ngahnak thaw leiram lei atsia, a lubuksuk in da in, a pum keh atsia a ril tehem suakberh si. ¹⁹ Me thu heh Jerusalem ah a omtu tehem in thei teen si. Tsimi manin tsimi lo kheh amahni awn in, ’Akel Dama,’ ti’n ti si. A sullelam heh ’Thisen Lo,’ tinak si. ²⁰ "Heimansim tiphangin Saam labu sungah, ’Ama inn kheh inn ro si ta sehla, tumah om mah na sen,’ ti’n le ’Huaitu a sinak kheh midang in theng tasen,’ ti’n ngan si. ²¹ "Tsimi manin keimahni lak pin mi pakhat heh deng kultsam tu si sing. Amah heh Jesuh in keimahni lak ah lut tuak suak tuak in a om min hem ah keimahni thaw om langkhat reng vengtu pa si kul tu si. ²² Tsin, amah heh Johan in mi te a niim hun pin pan Pathian in Jesuh ah kheh keimahni nen pin a leso ni tian keimahni thaw om langkhat reng vengtu pa si kul tu si. Tsimi pa heh keimahni thaw ama tholehnak tetti khantu tuh in deng kul tu si sing," ti’n ti si. ²³ Amahni’n mi panih Justus ti’n ponnak Barsabbas ah tinak Joseph ah le Matthias ah kheh suah si. ²⁴ Sawngen dang atsia, "Maw Bawipa, nangmah hen minung tehema thinlung kheh theisek si tsi. Me nasiam a pertu tuh le lehnak naper a pertu tuh in na dengnak sawn kei muh in. ²⁵ Amah heh Judas in daan a heek manin ama omnak munah a hawh theinak tuh in, a zamnak nasiam le lehnak naper kheh sawng tu si," ti’n ti dang si. ²⁶ Aisan dang atsia, Matthias vumah tsu si. Tsin, amah kheh lehnak leikhat te lak ah beet si.

¹ Pentikost Ni a kim phangin, amahni hem kheh thinkhat lungkhatno in mun khat ah khawm dang si. ² Makhat in tsimi munah khawtawng huihpi thawm bangin van pin aw thawm leng atsia, a to dangnak inn sung hem ah dim si. ³ Tsimi ah mei alh bang lei te lang atsia, pakhat seuhseuh vumah tsu heuh si. ⁴ Tsimi phangin amahni hem kheh Raula Thiangrim thaw dim atsia, Raula in awn theinak a penak bangin awn phun dangdang in awn pan dang si ⁵ Tsimi lai in van hang nuai ah om miphun tehem lak pin Pathian kihzah pengtu Jew te kheh Jerusalem ah om dang si. ⁶ Tsimi aw thawm a ring phangin mihonpi te’n zuan dang si. A khawm dangtu te awnnak kheh mipi te’n amahni awn ten in a za dang manin lunglawi ngai dang si. ⁷ A vaseng in me thiltsang kheh khuum ngai in le lunglawi ngai in pakhat le pakhat kheh, "Ngai un, me a awn tseihtu tehem heh Galilee te si ngawl si maw? ⁸ Amahni awnnak heh keimahni awn ten in kei za heh kawtibang thu sim? ⁹ Keimahni sung pin pawlkhat te heh Parthian ram ah om te, Media ram ah om te, Elam ram ah om te, Mesopotamia ram ah peem te, Judea peng le Kappadosia ram, Pontus ram le Asia ram ah om te si dang in, ¹⁰ pawlkhat te heh Frygia le Pamfilia ram ah om te, Izip ram le Libya ram sunga Sairin khaw kung ah om te si atsia, pawlkhat te heh Rom pin a leng Jew te le Jew te benak ah a luttu te si in, ¹¹ pawlkhat te heh Krete tikulh ah om te le Arab ram ah om te si dang si sing. Sinapikhaw Pathian naper khumnung a relnak te heh keimahni awn ten in za si sing," ti’n rel dun dang si. ¹² Tsimi manin a vaseng in khuum ngai in aitsan ngai dang in, "Meheh a sullelam hei sim?" ti’n pakhat le pakhat dong dun si. ¹³ Midang te’n zohsuam in, "Amahni heh tsapit zu ther ri si," ti’n ti si. ¹⁴ Tsimi phangin Piter ah kheh lehnak leikhat te thaw ding atsia, ring ngai in, "Judea te le Jerusalem ah a omtu tehem, meheh thei ula, ka thurelnak heh ka ngai sak rih un. ¹⁵ Nang ruatnak bangin amahni heh tsapit zu ri si ngawl si. Tuhen zinglam naazi kua bek si lai si. ¹⁶ Me thu heh profet Joel in rel ham ong si lei: ¹⁷ ’Pathian in, hun dawlta ber in tibang hen si tu si. Minung tehem vumah ka Raula burh angkhaw, nang tsanu le nang tsapa te’n profet bangin thurel tu si. Nang khangno te’n lalhnak mu tu in, nang patsang te’n mang man tu si. ¹⁸ Tsimi hun in ka sel mipa te le ka sel nupang te nenah khen ka Raula burh angkhaw, amahni’n profet bangin thurel tu si. ¹⁹ Vumlam van ah thil khumnung te muh angkhaw, nuai lam lei ah thisen, mei alh le meikhu thaw theihdiknak muh tu sing. ²⁰ BAWIPA ni mak taktak le tsiing taak ni a leng ma in ni kheh thim tu atsia, lade kheh thisen in tsang tu si. ²¹ Tsin, tibang hen thiltsang tu si, tutu sikhen BAWIPA ming a lam tu heh sannak si tu si,’ ti’n ti si. ²² "Israel te, me thu heh ngai un. Nang thei saak bangin Pathian in amah mang in nangmahni nenah thil khumnung, lunglawi nung le theihdiknak te thawmin Nazareth khawte Jesuh ah heh nangmahni muh ongla si. ²³ Amah heh Pathian in a teek ham saak le a rel ham saak bangin, nangmahni kut ah aapnak si atsia, nangmahni’n daan heektu te kut mang in thinglamteh ah khen atsia reek si utsi. ²⁴ Amah heh thihnak tuarnaka heen reng theihnung a si ngawl manin, thihnak a tuarnak kheh Pathian in suut sak atsia, tho tiar si. ²⁵ Ama thu heh David in, ’BAWIPA heh ka mai ah mu reng veng sing. Ka thiing tuh ngawl in amah heh ka taklam ah om si. ²⁶ Tsimi manin ka thinlung heh ang ngai in, awn sah ngai sing. Tsimi bek zo ngawl in ka taksa heh limdiknak ah tsawlom tu si. ²⁷ Heimansim tiphangin mithi khaw ah ka nunnak zam sak men ngawl si tsi. Na Thiangrim Pa heh se thong siang tu ngawl si tsi. ²⁸ Nungnak lamzin heh ka thei tiar ongla si tsi. Na maitsang ah angnak thaw in dim tiar ongla ka si tsi,’ ti’n ti si. ²⁹ "U le nau te, kei papi David thu heh tsangkhen in nang rel rih tu sing. Amah heh thi atsia, vi in ama thaan khen tuni tian in kei nenah om si. ³⁰ Tsimi manin, David in profet a sinak le Pathian in ama nenah tsial tsawm atsia a tsam tsawmnak a thei manin tisa lam in ama tenawn sung pin Khrih ah kheh ama kumpibawi tohkheng ah to tu in tho tiar tu si. ³¹ David in meheh muham atsia, Khrih nungnak heh mithi khaw ah zam ngawl atsia, a ruangpum khen a zaan tuh ngawl in tho leh tiarnak a si thu kheh rel si. ³² Me Jesuh heh Pathian in tho leh tiar si ti heh kei vaseng in a tetti te si ung. ³³ Tsimi manin Pathian in Jesuh ah heh a taklam ah tsawisang atsia, Pa nen pin thutiam Raula Thiangrim a saang ongla manin, tuhen nang munak le nang zanak tsimi Raula Thiangrim heh nang burh ongla si. ³⁴ "David ah heh vanvum ah kaiso ngawl pelh in, amah le amah tihen ti tsawm si, ’BAWIPA in ka Bawipa kheh, ³⁵ "Na raal te kheh na palkam in ka koih tian, ka taklam ah to in," ti’n ti si.’ ³⁶ "Tsimi manin thinglamteh ah nang khennak me Jesuh ah heh Pathian in Bawipa le Khrih in puah ongla si, ti heh Israel miphun tehem in thei rori ta un," ti’n ti si. ³⁷ Amahni’n me thu heh a za phangin a thinlung sun ngun atsia Piter ah le lehnak te kheh, "U le nau te, kawti’n ti tu si ung im?" ti’n ti dang si. ³⁸ Tsimi phangin Piter in amahni kheh, "Nang sual sir ula, sualzahnak nang si tuh in mi taak hem in Jesuh Khrih ming in niim un. Tsin, Raula Thiangrim lehsawng ngah tu si utsi. ³⁹ Heimansim tiphangin thutiam heh nangmahni le nang tsa te le khawlapi ah om Bawipa kei Pathian konak tehem tsa si," ti’n ti si. ⁴⁰ Ama’n thu dang tampi thaw in tettikhan atsia, amahni kheh thuso in, "Tusan nun suaksual te nen pin san tsawm un," ti’n ti si. ⁴¹ Me thu heh ang ngaino in a saangtu te’n niim dang si. Tsimi ni in amahni pawl sungah minung thawngthum lai luut belh si. ⁴² Amahni kheh lehnak te zirhnak, pawlkomnak, sang hemnak le sawngen dangnak ah kho ngai in om dang tsiat veng si. ⁴³ Tsin, lehnak te’n thil khumnung le theihdiknak tampi apuah manin mi tehem in kih ngai si. ⁴⁴ Umtu tehem kheh munkhat ah om dang in, a thil neinak tehem kheh lawm dun dang ten si. ⁴⁵ A thil te le a neinak te kheh zuar atsia, mi dasam tehem kheh zem si. ⁴⁶ Ni tin in thinkhat lungkhatno in temple sungah khawm dang veng in, innkhat zawh innkhat ah sahnung ngai le lungthiang ngaino in sang hem dang atsia lai ei dang veng si. ⁴⁷ Pathian thangphat dang veng atsia, mi hema mitmai pha penak si dang si. Bawipa’n sannak te kheh ni tin in pawlpi sungah belhsep si.

¹ Sawngen hun simlam naazi pathum phangin, Piter ah le Johan ah kheh temple ah hawhso kawm si. ² Tsin, sensuah kawng zenat veipa kheh ni tin in temple ah a hawhtu te nenah kutdawh ngen tu in puut atsia, Mawi tinak temple dawngkham ah koih veng si. ³ Piter ah le Johan te temple ah a luut tu zep kheh a mu phangin, a kutdawh in ngen si. ⁴ Tsimi phangin Piter ah le Johan in amah kheh er po in pan atsia, "Kei pan in," ti’n ti kawm si. ⁵ Tsimi manin amahni nen pin heino pohkhen ngah tu limdik in amahni kheh pan si. ⁶ Tsin, Piter in, "Sui le ngun nei ngawl si ung. Sinapikhaw ka neinak heh na pe tu sing. Nazareth khawte Jesuh Khrih ming in tho la hawh in," ti’n ti si. ⁷ Tsin, Piter in a taklam kut in amah kheh len atsia, daangso si. Makhat in a kawng ruh le a ruh mangbol te kheh kol si. ⁸ Tsimi manin amah khen dingso in, dawk tseih in hawh atsia, amahni thaw temple sungah luut si. A hawh thahlam in dawk tseih atsia, Pathian thangphat si. ⁹ Vak tseih atsia Pathian a thangphat tseih kheh mi tehem in mu si. ¹⁰ Amahni’n tsimi pa kheh Mawi tinak Dawngkham kung ah to in kutdawh ngentupa a si lam kheh thei si. Ama vumah thiltsang manin amahni’n lunglawi in khuum ngai dang si. ¹¹ Kawng zenat dam tiarnak pa khen Piter ah le Johan ah kheh beekpek reng si. Mi tehem in khuum pittseih in Solomon leenglim tinak ah dan dang si. ¹² Tsimi kheh Piter in a mu phangin, "Israel te, heita meheh lunglawi dang si utsim? Me pa heh keimahni huham le Pathian awizawng kei sinak manin kei hawh tiar theinak ring in, hei manin keimahni heh panken si utsim? ¹³ Abraham Pathian, Isak Pathian, Jakob Pathian le kei pa te Pathian in, a sel Jesuh ah heh tsungnung tiar ongla si. Pilat in amah heh a leh tuum phangin, Pilat maitsang rori ah amah heh han atsia, midang te kut ah nang aapnak la heh amah si. ¹⁴ Nangmahni’n Thiangrim Pa le Midik kheh han atsia, tualreek pa kheh leh sak tu in ngen si utsi. ¹⁵ Nungnak Kumpibawi nang reeknak kheh Pathian in mithi te lak pin tho tiar si. Tsimi tetti heh keimahni si ung. ¹⁶ Nang mu le nang theinak bangin me pa heh Jesuh ming a um manin, kol tiarnak si. Si si, Jesuh ming a umnak manin nang vaseng mitmuh ah damsek tiarnak si ongla si. ¹⁷ U le nau te, tuhen nangmahni uktu te bangin nang thei ngawl manin tsimi bangin a puahnak a si lam heh thei sing. ¹⁸ Sinapikhaw, Khrih ah hen a tuar kul himhim si ti’n Pathian in ama profet tehema kam mang in a rel ham bangin, ama’n kim tiar ongla si. ¹⁹ Nang sual sir ula, Pathian lam ah nga leh un. Tsimi asilekhaw nang sualnak te kheh phiatnak si tu si. Tsimi phangin Bawipa maia tha ther le lehnak hun leng tu si. ²⁰ Tsin tima nang nenah phuangnak Jesuh Khrih ah kheh Pathian in nangmahni nenah leh tu si. ²¹ Tsin, Pathian in leivum a po pan pin pan ama profet thiangrim tehem awnkam mangin a rel ham bangin, thil tehem kheh rem leh thernak a si hun tian in Jesuh Khrih ah heh vanvum ah om rih tu si. ²² Heimansim tiphangin Mawsi in kei pa te nenah, ’BAWIPA nang Pathian in nangmahni unaupi lak pin keima bang profet kheh nangmahni tsa in suak tiar tu in, nangmahni nenah a relnak thil tehem kheh za tu si utsi. ²³ Tsin, tibang hen thiltsang tu si. Tutu sikhen profet thurelnak a ngai ngawl minung hem kheh Pathian in minung te lak pin siatsuah tei tu si,’ ti’n a rel ham miau ongla manin si. ²⁴ Si si, Samuel pin pan a niluna a reltu profet tehem in tsimi hun kheh rel ham ongla si. ²⁵ Nangmahni heh profet te tsa te le Pathian in kei pa te nenah a puahnak thukama tsa te si utsi. Abraham nenah, ’Na tsi sung pin leivummi tehem heh muitsu burhnak si tu si,’ ti’n ti si. ²⁶ Pathian in ama sel Jesuh ah kheh mithi te lak pin a tho tiar zawh in, nang sesuaknak pin nang lehlawi leh manin nangmahni muitsu burh tu in amah kheh leh si," ti’n ti si.

¹ Mipi te kheh thu a rel kawm tseih lai in, suangbawi te, temple kiltu palik bawi te le Sadusi te kheh amahni nenah leng dang si. ² Amahni’n, Jesuh mithi te lak pin a tholehnak thu phuang in mipi te a zirh kawm manin, ngaimawh ngai dang si. ³ Amahni’n Piter ah le Johan ah kheh pom dang atsia, simlam a si ongla manin thawng toh dang si. ⁴ Sinapikhaw amahni thurelnak a zatu mi tampi te’n amahni thurelnak kheh um si. Amahni heh minung thawngnga kim dang si. ⁵ Tsin, tibang hen thiltsang si, a thaizing in amahni uktu te, upa te le Daan zirhtu te kheh Jerusalem ah khawm dang si. ⁶ Amahni lak ah suangbawi ber Annas ah, Kaiafas ah, Johan ah le Alexander ah le suangbawi bera innkawpi tehem peh si. ⁷ Amahni’n Piter ah le Johan ah kheh amahni laingial ah koih atsia, "Tu huham in le tu ming in me thil heh puah si utsim?" ti’n dong si. ⁸ Piter ah kheh Raula Thiangrim in dim atsia, amahni kheh, "Mipi te uktu te le Israel te upa te, ⁹ tuni in bawmtu nei ngawlpa vumah thilpha kei puahnak manin, kawti bangin amah heh dam sim, ti’n keimahni heh nang dong kan a silekhaw, ¹⁰ nangmahni’n thinglamteh ah khen atsia, Pathian in mithi te lak pin a tho tiarnak Nazareth khawte Jesuh Khrih ming in me pa heh damthiangsek in nang mai ah ding si ti heh nang vaseng le Israel mi tehem in thei ta un. ¹¹ Me Jesuh ah heh, ’Nangmahni inn satu te’n nang hannak lungto heh inn ning khuhnak lungto thupi ber in tsang si,’ ti’n tinak heh si. ¹² Midang tumah nenah sannak om ngawl si. Van hang nuai-a minung te ming sanak lak ah keimahni santu tuh ming dang himhim om ngawl si," ti’n ti si. ¹³ Amahni’n Piter ah le Johan te ralpha daan mu atsia, amahni heh lai zir ngawl le mi zaraan a si kheh a thei phangin khum ngai dang si. Tsin, amahni heh Jesuh nenah om awng te a si lam kheh theitsiang dang si. ¹⁴ Tsin, dam tiarnak pa kheh amahni thaw a ding langkhat kheh mu in, sual zei tuh heimah thei dang ngawl si. ¹⁵ Tsimi phangin Sanhedrin thukhennak khaan pin suak tu in amahni kheh thupe atsia, amahni thu a khen daan tuh kheh thuruat dang si. ¹⁶ Amahni’n, "Me te panih heh kaw ti’n ti a sing im? Lang ngai in theihdiknak a puahnak te heh Jerusalem ah omtu tehem in thei ten si. Keimahni’n heimah el thei ngawl si sing. ¹⁷ Sinapikhaw midang te nenah zalh leita ngawl in, le tu pin pan me pa ming in tumah nenah thurel leh tuh ngawlla in thumdek a sing," ti’n ti dang si. ¹⁸ Tsin, amahni kheh ko leh atsia, Jesuh ming in thurel leh tu ngawlla in le thu zirh leh tu ngawlla in thupe si. ¹⁹ Sinapikhaw Piter ah le Johan in o atsia, "Pathian thu kei ngai tah in nangmahni thu ngai le singkhaw, Pathian mai ah maan maw ti heh ruat po un. ²⁰ Heimansim tiphangin keimahni’n kei munak le kei zanak heh rel ngawl in om thei ngawl si ung," ti’n amahni kheh o si. ²¹ Tsimi manin amahni’n Piter ah le Johan ah kheh nase sawn in thum atsia leh si. Mipi tehem in amahni puahnak manin Pathian thangphat dang si. Tsimita amahni tsawhnak tuh zin heimah tawk zo dang ngawl si. ²² Damnak theihdiknak mang in a damtupa heh kum sawmli val si ongla si. ²³ Lehnak te’n a luat phangin, a pawlpinak te nenah hawh kawm atsia, suangbawi te le upa te’n amahni a relnak thu tehem kheh amahni rel si. ²⁴ Amahni’n a za phangin thinkhat lungkhat in Pathian nenah au dang in, "Bawipa, nangmah heh van le lei le tipi le a sungah om tehem puahtu Pathian si tsi. ²⁵ Tsin, na selpa David kam mang in, ’Hei manin lawkih te’n raaltho atsia, mipi te’n heimah a nempi ngawl thu ruat sim? ²⁶ Leilung vum-a kumpibawi te’n ding atsia, uktu te’n BAWIPA ah le Khrih ah do in khawm dang si,’ ti’n ti si tsi. ²⁷ "Heitasim tilekhaw, sathau na pawhnak na sel thiangrim Jesuh ah kheh do tu in Herod ah le Pontius Pilat ah kheh Gential te le Israel mi te thaw khawm dang si. ²⁸ Tsimi heh na kut in na puahnak taak hem le na tuumnak kim tiar tu in si. ²⁹ Bawipa, keimahni a vaudennak heh kei ngai sak in. Tsin, na sel te heh ralpha ngai in na thu phuang theinak pe in. ³⁰ Na sel thiangrim Jesuh ming in minaa dam tiar tu in, theihdiknak puah tu in le a khumnung naper te puah tu in na kut kheh zaar in," ti’n sawngen dang si. ³¹ Saw a ngen tselh phangin a khawm daangnak mun kheh thing si. Tsin, amahni hem kheh Raula Thiangrim in dim atsia, Pathian thu kheh ralpha ngai in rel dang si. ³² Umtu mi tampi te kheh thinlung munkhat in le ruatnak munkhat nei in om dang si. Mi pakhat pohkhen a thil neinak tehem kheh ama bul thil in ti ngawl in, lawm dun dang tennak si sawn si. ³³ Lehnak te’n huham mak thaw Bawi Jesuh tholehnak kheh tettikhan dang si. Tsin, lainatnak mak kheh a vaseng vumah om si. ³⁴ Tsin, amahni lak ah mi dasam tumah om ngawl si. Heimansim tiphangin leiram le inn a neitu te’n zuar atsia, a man a ngahnak kheh le in, ³⁵ lehnak te kawngbul ah koih in, amahni’n mi dasam te zem leh si. ³⁶ Saipras ram minung, Levi nam Joses in loram nei si. Lehnak te’n amah kheh Barnabas ti in pon atsia "Thapetu," tinak si. ³⁷ Tsimi a loram kheh zuar atsia, a man a saangnak tangka kheh lehnak te kawngbul ah koih si.

¹ Sinapikhaw Ananias tinakpa le a zi Sapfira te’n a neinak kheh zuar si. ² A man zahlam kheh luupkuh atsia, a zi khen theipi si. A zahlam kheh keng in lehnak te kawngbul ah koih si. ³ Sinapikhaw Piter in, "Ananias, Raula Thiangrim son tu in le nangma tsa tuh in loram man zahlam luupkuh tu in hei manin Satan ah heh na thinlung sungah dim tiar si tsim? ⁴ Na zuar ma in nangma si ngawl si maw? Na zuar tselh phang khen nangma thuthu si ngawl si maw? Hei manin me thil heh na thinlung ah pai si tsim? Minung son si ngawl in Pathian son si tsi," ti’n ti si. ⁵ Ananias in me thu te heh za atsia, du in a haihawh bo si. Me thu te a zatu tehem in kih ngaingai dang si. ⁶ Khangno te’n tho atsia, a ruang kheh tsuun in zawng atsia, vi dang si. ⁷ Simlam naazi pathum val duk in thiltsang kheh heimah thei ngawlpi in a zi Sapfira ah kheh leng si. ⁸ Piter in amah kheh, "Ka rel in, leiram heh me zah bek hen zuar si utsim maw?" ti’n ti si. A zi in, "Si si. Me zah bek hen zuar si ung," ti’n ti si. ⁹ Tsimi phangin Piter in amah kheh, "Bawipa Raula tsul tu in nang lungkim kawm heh nang kawti thu sim? Pan in, na pasel vitu te riang hong leh ongla si. Amahni’n nangmah khen na zawng tu si," ti’n ti si. ¹⁰ Makhat in minu kheh du atsia, a haihawh bo si. Khangno te kheh inn sungah lut in a thisaak kheh tawk dang si. Amahni’n minu kheh zawng dang atsia, a pasel kung ah vi dang si. ¹¹ Pawlpi sunga tehem le me thu te a zatu tehem kheh thinphu ngaingai dang si. ¹² Lehnak te’n mipi te lak ah theihdiknak le khumnung tampi muh si. Amahni tehem kheh Solomon leenglim ah thinkhat lungkhatno in khawm dang si. ¹³ Mipi te’n upat ngai pelh in, tumah in amahni kheh pawl ngam ngawl si. ¹⁴ Umtu mipa le minu tampi te kheh Bawipa nenah belhsep in pung si. ¹⁵ Piter in lampi ah a hawh phangin natnak a vei mi pawlkhat te’n amahni vumah a lim in a lim ngah tuh in, natnak a veitu te kheh lampi kung ah phurh in, eihkhun le khawsum vumah zau dang si. ¹⁶ Jerusalem khaw kunga khawpi te pin mi tampi te kheh Jerusalem ah khawm dang in, minaa te le raula nawngkai-a reemnak te kheh phurh dang in, a vaseng in damberh dang si. ¹⁷ Tsimi phangin suangbawi ber le a pawlpinak Sadusi pawl lak ah peh tehem kheh thase leita in tho dang atsia, ¹⁸ lehnak te vumah kutman dang in, thawng toh dang si. ¹⁹ Sinapikhaw zan lan in Bawipa vanvummi pakhat in thawnginn kongkham kheh hong sak atsia, amahni kheh pulam ah suah in, ²⁰ "Hawh ta ula, temple ah ding in me nungnak thu tehem heh mipi te nenah rel ta un," ti’n ti si. ²¹ Lehnak te’n me thu heh a za phangin, zingmano in temple ah luut dang atsia, thu zirh si. Sinapikhaw suangbawi ber le a pawlpinak te kheh leng dang atsia Sanhedrin thureltu te le Israel mi te lak pin uham tehem thaw thurel khawm dang tu in ko si. Tsin, thawnginn ah minung leh in lehnak te kheh huai tiar si. ²² Temple kiltu bawi te’n thawnginn ah hawh atsia, amahni kheh a tawk ngawl phangin, hong leh in khawnsel te nenah rel si. ²³ Amahni’n, "Thawnginn heh him ngai in kongkhamnak tawk reng si ung. A kiltu te khen kawka mai pulam ah ding dang reng si. Sinapikhaw kongkham kei hong phangin thawnginn sungah tumah tawk ngawl si ung," ti’n ti dang si. ²⁴ Suangbawi ber, temple kiltu palik bawi te, le suangbawi te’n me thu heh a za phangin, kawtibang si na maw, ti’n khum ngai dang si. ²⁵ Tsimi lai in mi pakhat in amahni nenah hawh atsia, "Pan un, thawng nang tohnak lehnak te la temple reen sungah ding in mipi te thu zirh tseih si," ti’n ti si. ²⁶ Tsimi phangin temple kiltu bawi le bawi upa te khen mipi te’n lungto in a seplum khatu manin, amahni vumah liah po ngawl in huai den si. ²⁷ Amahni’n lehnak te kheh huai atsia, Sanhedrin mai ah ding tiar si. Tsin, suangbawi ber in amahni kheh thudong si. ²⁸ Suangbawi ber in, "Me ming hen thu zirh tu ngawl in khakreen in thu nang pe si ngawl si ung maw? Pan un, nang zirhnak heh Jerusalem khaw sung hem ah dim tiar in, me pa thisen heh keimahni vumah dung tiar tuum si utsi," ti’n ti si. ²⁹ Tsimi phangin Piter ah le a dang lehnak te’n suangbawi ber ah kheh o atsia, "Minung te thu tah in Pathian thu ngai sawn tu si ung. ³⁰ Kei pa te Pathian in thing vumah tar in nang reeknak Jesuh ah heh tho tiar si. ³¹ Israel te nenah sual sir atsia sualzahnak a pe theinak tuh in, Pathian in amah kheh Kumpibawi si tu in le Santu si tu in ama taklam ah tsawisang ong si lei. ³² Keimahni heh me thil te vumah ama tetti te si ung. Tsin, ama thuluntu te nenah Pathian penak Raula Thiangrima tetti khen si meek si ung," ti’n ti dang si. ³³ Me thu heh a za dang phangin amahni kheh thinraw ngaingai dang in, amahni kheh reek tu in rel dang si. ³⁴ Tsimi phangin Sanhedrin lak ah peh deve Farasi mi, a ming Gamaliel tinak daan zirhtu saya le mihema upatnakpa kheh ding atsia, lehnak te kheh tsillem sung pulam ah suak tiar rih tu in thupe si. ³⁵ Ama’n a khawnsel pi te kheh, "Israel te, me minung te vumah nang puah tuumnak ah hen tsimkom ngai un. ³⁶ Heimansim tiphangin kei ninglam awng in Theudas in mi thupi pakhat si tiar tsawm in suak atsia, minung zali duk in amah lun si. Amah kheh reeknak tong in, ama thuluntu tehem khen kheksep atsia, heimah ngawl in tsang si. ³⁷ Me pa zawh in, mipum siar hun lai in Galilee te Judas ah suak atsia, minung tampi ama ningluntu si tu in huai zo awng si. Amah khen ral thong men in, ama thuluntu tehem khen kheksep si. ³⁸ Tuhen nang rel sing, me te heh zam men ula, amahni ruak in om ta la sen. Amahni tuumnak le me naper heh minung nen pina a silekhaw, heimah ngawl in tsang tu poh si. ³⁹ Sinapikhaw Pathian nen pina a si lekhaw, heimah siatsuah thei tu ngawl in, nangmahni sawn heh Pathian dotu in tsang khatu si utsi," ti’n ti si. ⁴⁰ Khawnsel te’n Gamaliel awnnak kheh lungkim dang in, lehnak te kheh ko in vaat atsia, Jesuh ming in thurel leh nom tuh ngawlla in amahni kheh thupe si. Tsin, lehnak te kheh hong tiar si. ⁴¹ Tsimi manin amahni kheh Sanhedrin mai pin kiang dang atsia, ama ming manin zaknung tuar taak in tsannak a si kheh ang ngai dang si. ⁴² Ni tin in temple ah le inn hem ah Jesuh ah heh Khrih si, ti zirh le phuang kheh tsawl lawt ngawl si.

¹ Tsimi hun in ningluntu te mi pum heh pung in, Grik awn a mangtu Jew te’n, ni tin eih le in zem dunnak ah keimahni lama numei te heh dar si, ti’n Hebru awn mang Jew te vumah phu si. ² Tsimi phangin leinih te’n ningluntu mi tampi te kheh ko khawm atsia, "Keimahni’n Pathian thu heh zam atsia, eih le in kei ngaisung tseih heh deih nung ngawl si. ³ Tsimi manin u le nau te, nangmahni lak ah Raula Thiangrim le tsimnak in a dim, maisong taak mipa pasarih zei un. Amahni heh me naper per tu in deng tu si sing. ⁴ Keimahni hen sawngennak le Pathian thu rel naper heh zompeh in per tu si ung," ti’n ti si. ⁵ Amahni awnnak in mipi tehem ang tiar si. Tsin, umnak le Raula Thiangrim in a dimtu Stefen ah, Filip ah, Prokhorus ah, Nikanor ah, Timon ah, Parmenas ah le Antiok pin Jew te benak ah a luuttu Nikolas te kheh deng si. ⁶ Amahni kheh lehnak te mai ah ding tiar atsia, a lu ah kutsuan in sawngen dang si. ⁷ Pathian thu kheh pung in zai atsia, Jerusalem ah ningluntu mipum tam pittseih in khang si. Tsin, suang tampi te’n umnak thu lun dang si. ⁸ Stefen ah kheh umnak le huham in dim atsia, mi te lak ah khumnung mak taktak le theihdiknak mak taktak puah si. ⁹ Tsin, Sinakok mi Luat te tinak te thaw thu el dun si. Amahni heh Sairin rama Jew te, Alexander khaw-a Jew te, Silisia peng le Asia rama Jew te si si. Amahni kheh Stefen ah thaw thu el dun si. ¹⁰ Stefen in tsimnak le Raula thawmin a awnnak kheh amahni’n kal zo ngawl si. ¹¹ Tsimi phangin amahni’n, "Me pa hen Mawsi le Pathian a relsenak kheh za ongla si ung," ti’n ti tu in mi te kheh phum si. ¹² Amahni’n mipi te, upa te le Daan zirhtu te kheh so atsia, Stefen nenah hawh dang in, amah kheh pom atsia Sanhedrin ah len dang si. ¹³ Amahni’n tetti maan ngawl te kheh, "Me pa hen me mun thiangrim le Daan a relse heh tawp ngawl si. ¹⁴ Tsin, me Nazareth khawte Jesuh in me mun heh siatsuah atsia, Mawsi penak hin le nam daan heh theng tu in a awn heh za ongla si ung," ti’n awn tiar si. ¹⁵ Sanhedrin ah a totu tehem in amah kheh pan po dang in, a mai vanvummi bang a si kheh mu dang si.

¹ Tsimi phangin suangbawi ber in, "Me thu te heh a dik si maw?" ti’n ti si. ² Stefen in, "Nangnihni, u le nau te le pa te, ngai un. Kei pa Abraham in Haran ah a peem ma Mesopotamia ram ah a om lai in tsungnungnak Pathian kheh ama nenah lang si. ³ Pathian in kei pa Abraham ah kheh, ’Na ram le na sen te nen pin suak la, ka muh tuh ram ah hawh in,’ ti’n ti si. ⁴ Tsimi phangin Abraham in Khaldea te ram pin khen suak atsia, Haran ah peem si. A pa a thi zawh in tsimi ram pin tuhen kei omnak me ram ah hen thawn si. ⁵ Pathian in amah kheh ro luah tuh le a kawngkoihnak tuh pohriang pe ngawl si. Sinapikhaw tsapa a nei ma in amah le a niluna a tsanawn te kheh a nei tuh in ram pe tu in thutiam si. ⁶ Amah kheh Pathian in tibang hen rel si, na tsanawn te kheh ramdang ah vai tu in, amahni’n sel in huai tu atsia, kum zali sung erhnak tuar tu si. ⁷ Tsin, ’A seltaangnak miphun kheh reem ang khaw, amahni’n tsimi ram pin suak tu atsia, nai mun pin hen ka na per tu si,’ ti’n Pathian in ti si. ⁸ Amah kheh Pathian in vunrel tennak thukam pe si. Tsimi manin Abraham in Isak ah nei atsia, niriat a kim ni in vunrel ten sak si. Tsin, Isak in Jakob ah nei atsia, Jakob in nampi leinih te hing si. ⁹ "Nampi te’n Joseph ah kheh iksik in Izip ram ah zuar dang si. Sinapikhaw Pathian in Joseph ah ompi si. ¹⁰ Tsin, harsa a tuarnak tehem pin luat tiar atsia, Izip kumpibawi Faraw mai ah mitmai pha le tsimnak ngah in, Izip ram uktu in le a kumpibawi inn tehem uktu tuh in koih si. ¹¹ Tsimi hun in Izip ram hem ah le Kanaan ram sung hem ah nase ngai in rian dung in harsanak tuar atsia, kei papi te’n lai ei tuh heimah nei ngawl si. ¹² Sinapikhaw Jakob in Izip ram ah tsaang om si, ti thu a za phangin, a veikhatnak in kei pa te kheh Izip ram ah hawh tiar si. ¹³ A veinihnak phangin Joseph in amah kheh Joseph ah a si lam a u te rel si. Tsin, Joseph innsang te kheh Faraw theinak te in tsang si. ¹⁴ Tsimi phangin Joseph in a pa Jakob ah le a unaupi minung a vaseng sawmsarih le panga te kheh Izip ram ah huai si. ¹⁵ Tsimi manin Jakob ah kheh Izip ram ah hawhsuk si. Amah le kei pa te kheh thi si. ¹⁶ A ruang kheh Shekhem khaw ah phur in, Abraham in Hamor tsapa te nena tangka tampi thaw a leinak thaan ah vi si. Hamor ah heh Shekhem te pa si. ¹⁷ "Pathian in Abraham nenah leng rori tu in hun a tiamnak a nong lemlem ongla phangin, Izip rama minung te kheh pung in zai si. ¹⁸ Tsimi hun in Joseph ah a thei ngawl a dang kumpibawi in Izip ram uk si. ¹⁹ Tsimi kumpibawi khen kei papi te kheh zol atsia erh si. Amahni tsano te kheh a thi tuh in pulam ah vawr tiar si. ²⁰ Tsimi hun in Mawsi ah suak si. Mawsi ah heh Pathian mitmuh ah a deihnung ngaino si in, lathum sung a pa inn sungah tsawmnak si. ²¹ Amah kheh vawrnak a si phangin, Faraw tsanu in khul atsia, ama tsapa si tu in tsawm si. ²² Tsin, Mawsi in Izip te tsimnak tehem zir atsia, awnkam ah le puahnak ah thawm lian ngai si. ²³ "Kum sawmli a kimkhoh phangin a unaupi Israel te nenah leeng tu in ngaisung si. ²⁴ A leeng phangin a unaupi pakhat la erhnak a tuar tseih kheh mu in kan atsia, amah a nuainentu Izip pa kheh reek sak in phuzul sak si. ²⁵ Heimansim tiphangin Pathian in amah heh a minung te santu in lehnak a si lam kheh a minung te’n a thei tu in ring si. Sinapikhaw ama minung te’n thei ngawl si. ²⁶ A thaizing in ama minung panih te hau dun kheh zuan in remrel tuum in, ’Unau te, nau-u si utsi. Hei manin hau kawm tseih si utsim?’ ti’n ti si. ²⁷ Sinapikhaw ama inn nen pa a tsum tseihtu pa sawn khen amah kheh tuul atsia, ’Keimahni uktu in le keimahni thu heh khen sak tu in, tu in na tiar sim? ²⁸ Tsingni Izip pa na reek bangin reek nuam ka si tsim maw?’ ti’n ti si. ²⁹ Me awnnak man hen Mawsi ah kheh Midian ram ah mi vakvai in tsang atsia, tsimi mun pin tsapa panih tsawi si. ³⁰ "Kum sawmli a rei phangin, Sinai Mual hampalak ah Bawipa Vanvummi pakhat kheh sawl sunga mei alh sung pin ama nenah lang si. ³¹ Mawsi in tsimi kheh mu atsia lunglawi ngai in, a munak kheh hei si, ti thei nuam in a neek phangin, Bawipa aw kheh ama nenah leng si. ³² Bawipa’n, ’Keimah heh na pa te Pathian, Abraham Pathian, Isak Pathian, le Jakob Pathian sing,’ ti’n ti si. Tsimi phangin Mawsi in a thinphu tsai in pan ngam ngawl si. ³³ ’Tsin, BAWIPA in, "Na dingnak leilung heh a thiangrim mun a si manin, na kedawl sut in. ³⁴ Izip rama ka minung te a siahtheihnak kheh mu in, a ainak aw khehkhen za ongla sing. Tuhen amahni kan tu in lengsuk ongla sing. Tuhen Izip ram ah na leh tu sing," ’ ti’n ti si. ³⁵ "Mi panih in el in, ’Tu in keimahni uktu in le kei thu heh khensak tu in na tiar sim?’ ti’n a tinak me Mawsi ah heh sawl sungah a langtu Vanvummi kut thawmin, uktu le santu tuh in Pathian lehnak pa heh si. ³⁶ Amah khen Izip ram ah, Tipi Sen ah, hampalak ah kum sawmli sung thil khumnung le theihdiknak te mang in huai si. ³⁷ " Me Mawsi ah heh Israel te nenah, ’BAWIPA na Pathian in nang unau dang sung pin nangmahni tsa in keima bang profet pakhat suak tiar tu si. Nangmahni’n a thu kheh ngai tu si utsi,’ ti’n a titupa si. ³⁸ "Amah heh hampalak ah Pathian konak te thaw a om awng Mawsi ah si. Amah heh Sinai Mual pin amah awnpitu Vanvummi le kei pupa te thaw om si awng si. Tsin, ama’n keimahni a pe salawn tuh a nung awnkam te saang si. ³⁹ Amah heh kei pa te’n a thu ngai ngawl in, a elnak pa si. Amahni’n a thinlung in Izip ram ah lehleh si. ⁴⁰ Aaron ah kheh, ’Izip ram pin keimahni a suahtu Mawsi bangin keimahni mai ah hawhtu tuh in pathian kei puah sak in. Mawsi ah heh hei a tsang, ti thei ngawl si ung,’ ti’n ti si. ⁴¹ Tsimi hun in amahni’n kawlpawno bang puah atsia, tsimi milim kheh bawlnak pe dang in, amahni kut rori in a puahnak ah khen sahnung ngai in puai puah dang si. ⁴² Tsimi manin Pathian in amahni kheh ningngat atsia, vana arsi te be tu in lehzau si. Tsimi heh Profet te’n, ’Maw Israel innsang te, hampalak ah kum sawmli sung sa tel in bawlnak pe ka si utsim maw? ⁴³ Si si, nangnihni’n Moloch benakbuuk le be tuh in nang puahnak milim, nang pathian Remphana arsi kheh keng si utsi. Tsimi manin nangmahni heh Babylon khaw kaan ah nang daan tu sing,’ ti’n a ngannak bangin si si. ⁴⁴ "Kei papi te’n hampalak ah tetti benakbuuk kheh nei si. Tsimi benakbuuk heh Pathian in Mawsi ah a sa daan tuh rel atsia, Mawsi in a innvuak a munak bangin sanak si. ⁴⁵ Kei papi te’n tsimi buuk kheh tso dun perper si. Tsin, Pathian in kei papi te mai ah Gential te kheh amahni luahnak ram pin nawtberh atsia, Joshua huainak in Kanaan ram ah a luut phang in, tsimi buuk kheh luutpi si. Tsimi buuk kheh David san tian in om reng lai si. ⁴⁶ David ah hen Pathian mitmai pha penak ngah in, Jakob Pathian tsa omnak tuh ngen si. ⁴⁷ Sinapikhaw Pathian tsa in inn a satu heh Solomon ah si. ⁴⁸ "Sinapikhaw profet-a relnak bangin Tsungnung ber ah kheh kut in sanak temple sungah om ngawl si. ⁴⁹ "Profet in, ’Vanvum heh ka kumpibawi tohkheng si in, leilung heh ka palkam si. Keima tsa in kawtibang inn sa sak tu si tsim? ti’n BAWIPA in ti si. Ka tsawlomnak mun heh kawnai ah sim? ⁵⁰ Me thil tehem heh ka kut in ka puahnak te si ngawl si maw?’ ti’n ti si. ⁵¹ "Nangmahni heh ngawng ruh khober atsia, thinlung le beng in vunrel a ten ngawl te si utsi. Nang pa te bangin Raula Thiangrim heh khaak tsiat veng si utsi. ⁵² Nang pa te’n a erh ngawlnak profet tu om sim? Midik Pa leng tu si, ti’n a rel hamtu te kheh amahni’n reek atsia, tuhen nangmahni heh tsimi Midik Pa zuartu le reektu te si si utsi. ⁵³ Amahni’n vanvummia relnak thawmin Daan kheh saang atsia, lun leh ngawl si," ti’n ti si. ⁵⁴ Amahni’n me thu te heh a za phangin, thinraw ngaingai in, hariat tuihtuih dang si. ⁵⁵ Sinapikhaw Stefen ah kheh Raula Thiangrim in dim atsia, vanvum lam panso in, Pathian tsungnungnak le Pathian taklam ah Jesuh ding reng kheh mu atsia, ⁵⁶ "Pan un, van hongnak le Pathian taklam ah Mi Tsapa a ding reng mu sing," ti’n amahni kheh ti si. ⁵⁷ Tsimi phangin amahni’n a beng hup in riik ngunngun atsia, thakhat in a nenah dan dang si. ⁵⁸ Amahni’n Stefen ah kheh Jerusalem khawpi pulam ah vawr in, lungto in seplum dang si. Tetti te’n amahni puan kheh Saul tinak pa kawngbul ah sop dang si. ⁵⁹ Amahni’n Stefen ah kheh lungto in a sep tuptup dang lai in, Stefen in Pathian kheh awn in, "Bawi Jesuh, ka raula heh ka le sak in," ti’n ti si. ⁶⁰ Tsin, khuk tsaitsen atsia, "Bawipa, me sualnak heh amahni vumah dung tiar mah nen," ti’n au ngunngun si. Me heh a awn tselh phangin amah kheh thi si.

¹ Stefen thihnak heh Saul in lungkimpi si. Tsimi hun in Jerusalem ah pawlpi erhnak nase ngai in a om manin, lehnak te siar ngawl umtu tehem heh Judea ram le Samaria ram ah dansep dang si. ² Pathian a kihzahtu te’n Stefen ruang kheh zawng in vi dang atsia, nase ngai in kah dang si. ³ Saul in pawlpi vumah senak rohse ngai in leng tiar si. Ama’n inn taak hem ah dum atsia, mipa le nupang te kheh nuuklok in thawng toh si. ⁴ A danseptu te’n mun hem ah thu kheh rel tseihzel si. ⁵ Tsin, Filip ah kheh Samaria khawpi ah hawhsuk atsia, amahni kheh Khrih thu kheh rel si. ⁶ Mihonpi te’n Filip thurelnak za atsia, thil khumnung a puahnak te a mu phangin lungrual ngai in a thurelnak kheh phatak ngai in ngai sak dang si. ⁷ Raula nawngkai te zingnak tampi te sung pin raula nawngkai te kheh au ngunngun in suak atsia, zenat vei te le kawng zenat vei tampi te khen damberh si. ⁸ Tsimi manin tsimi khawpi ah angnak mak taktak leng si. ⁹ Sinapikhaw tsimi khawpi sungah amah le amah mi thupi ngai si tiar tsawmtu Simon ah om si. Amah hen tima in tsimi khawpi sungah mitdawi muh veng in, Samaria khaw sunga te kheh lunglawi tiar ngai veng si. ¹⁰ "Me pa heh Pathian huham maktak tak ah si," ti’n ti si. Tsin, mi nauta ber pin pan mi thupi ber tian a vaseng in a thu kheh phatak ngai in ngai dang si. ¹¹ Ama’n hun reipi sung a mitdawi thaw in amahni a lunglawi tiar ongla manin a thu a ngainak si si. ¹² Amahni’n Filip reelnak Pathian uknak thu le Jesuh Khrih-a ming kheh a um zawh in, mipa le nupang te’n niim dang si. ¹³ Simon amah rori khen um deve in, niimnak a si zawh in Filip nenah om reng nom si. Ama’n Filip puahnak thil khumnung le theihdiknak te a mu phangin lunglawi ngai si. ¹⁴ Jerusalem-a lehnak te’n Samaria te Pathian thu a saang lam kheh a za dang phangin, amahni nenah Piter ah le Johan ah kheh leh si. ¹⁵ Amahni kheh hawhsuk kawm atsia, Raula Thiangrim a ngah tuh in amahni tsa sawngen sak si. ¹⁶ Amahni heh Bawi Jesuh ming beka niimnak a si lai manin Raula Thiangrim kheh tumah nenah leng lai ngawl si. ¹⁷ Amahni lu vumah a kut a suan kawm phang in, Raula Thiangrim kheh ngah leh si. ¹⁸ Lehnak te’n kut suan atsia Raula Thiangrim ngah a si kheh Simon in a mu phangin lehnak te kheh tangka tampi pe in, ¹⁹ "A lu vumah ka kut ka suannak pohpoh in Raula Thiangrim a ngah tuh in me huham heh ka pe deve un," ti’n ti si. ²⁰ Sinapikhaw Piter in amah kheh, "Pathian lehsawng heh tangka in lei theihnung in na ruat manin, na tangka heh nangmah thaw senak ah leng tasen! ²¹ Pathian mai ah na thinlung omdan a dik ngawl manin, me thu ah hen peh thei ngawl in, tel khen nei ngawl si tsi. ²² Tsimi manin na suaksualnak heh sir leh la, na sir miau a si lekhaw na thinlunga ruatnak heh zahnak na si tuh in Pathian nenah sawngen in. ²³ Heimansim tiphangin na thinlung heh nikkha bangin a kha nger dim atsia, kolkhahnak bangin diktsang ngawlnak in nangmah a heen kheh mu sing," ti’n ti si. ²⁴ Tsimi phangin Simon in amahni kheh o atsia, "Na awnnak te heh pakhatno pohkhen ka vumah a leng tuh ngawl in, Bawipa nenah saw ka ngen sak in," ti’n ti si. ²⁵ Amahni kheh Bawipa-a thu tettikhan in a rel kawm tselh phangin, Samaria te khaw tampi ah thuthang pha rel thah in Jerusalem ah hong kawm leh si. ²⁶ Bawipa vanvummi pakhat in Filip ah kheh awnpi atsia, "Tho la, Jerusalem khawpi pin Gaza khaw hawhsuknak lampi tawnin, hawhsuk in," ti’n ti si. Tsimi mun heh hampalak si. ²⁷ Tsimi manin amah khen tho atsia hawh si. Ngai in, Ethiopia kumpibawi nu Kandake kut nuai ah thuneinak nase ngai a neitu tilretnak Ethiopia pa pakhat om si. Amah heh kumpibawi nu tangka tehem keemtu si in, Pathian be tu in Jerusalem ah hawh si. ²⁸ Amah heh a hong leh lam si ongla si. Amah khen raaltawngnak sipuh leng to in, profet Isaiah laibu siar thah tseih si. ²⁹ Tsimi phangin Raula in Filip ah kheh, "Sipuh leng tsawh hil la, neektsek in hawh in," ti’n ti si. ³⁰ Tsimi manin Filip in amah kheh hil atsia, profet Isaiah laibu a siarnak kheh za in, "Na siarnak tsawh theitsiang zo tsim maw?" ti’n ti si. ³¹ Ethiopia pa’n, "Mi pakhat khat in a reltsiang ngawlnak kawti bangin theitsiang zo tu sing im?" ti’n ti si. Tsin, ama’n Filip ah kheh a sipuh leng vumah kai tiar atsia, a kung ah to tiar si. ³² Laithiangrim a siarnak heh meheh si, "Tel tuh tuu bangin amah kheh kai si. Tuuno in a mul voltu mai ah dapdeen in a ngat bangin, ama’n a kam kaa ngawl si. ³³ Mi nuai ah si tiarnak a si phangin dik ngawl ngai in thukhen saknak si. Leilung pin a nungnak kheh lesaknak a si manin, ama hin le nam tangthu kheh tu in phuang sak tu sim?" ³⁴ Tsimi manin Ethiopia pa in Filip ah kheh, "Profet hen tu thu rel sim? Ama thu a relnak si maw, midang thu a relnak sim? Ka rel in," ti’n dong si. ³⁵ Tsimi phangin Filip in a kam pau atsia, tsimi Laithiangrim mang in amah kheh Jesuh thu rel si. ³⁶ Lampi ah a hawh kawm tseih lai in ti om minah leng kawm si. Ethiopia pa’n, "Pan in, nai ah ti om si. Niimnak si tu in hei in khak ka sim?" ti’n ti si. ³⁷ Filip in, "Na thinlung vaseng in na um a si lekhaw niim thei si tsi," ti’n ti si. Ama’n, "Jesuh Khrih ah heh Pathian Tsapa si, ti’n um sing," ti’n o si. ³⁸ Tsimi manin sipuh leng kheh tsawl tiar si. Filip ah le Ethiopia pa kheh ti sungah tsuarsuk kawm in, Filip in niim si. ³⁹ Ti sung pin a suak kawm phangin, Bawipa Raula in Filip ah kheh thiarper in, Ethiopia pa’n mu leh ngawlla si. Tsin, amah kheh angngai in hongper si. ⁴⁰ Filip ah heh Azotus khaw ah leng in, Sisaria khaw a leng tian lamlaka khaw tehem thuthang pha rel thah tseihzel si.

¹ Tsimi hun in Saul in Bawipa ningluntu te kheh thum in, reek tu in huisa lutlut atsia, suangbawi te nenah hawh si. ² Tsin, amahni nenah Lamzin ther a luntu mipa le nupang a tawk a silekhaw, Jerusalem ah huai in thawng a toh theinak tuh in Damaskas khawa sinakok uktupa nenah pe tuh laiken kheh ngen si. ³ Tsin, Damaskas ah hawh in Damaskas khaw kung a leng phangin, makhat in a kawnvel hem kheh van pin vaarnak in deet si. ⁴ Tsimi phangin amah kheh lei ah du atsia, "Saul, Saul, hei manin erh ka si tsim?" ti’n tinak aw kheh za si. ⁵ Ama’n, "Bawipa, tu si tsim?" ti’n ti si. Bawipa’n, "Keimah heh na erh tseihnak Jesuh ah sing. Molhzum na sirh heh vei har ngai tu si tsi," ti’n ti si. ⁶ Tsimi manin Saul ah kheh tsai tseih atsia lunglawi ngai in, "Bawipa, hei puah tu in deih ka si tsim?" ti’n ti si. Bawipa’n, "Tho in, khawpi sungah hawh ta la, na puah tuh relnak si tu si tsi," ti’n ti si. ⁷ A khualvakpinak mipa te kheh awn ngawl in ding dang reng si. Amahni’n aw bek zong za atsia, tumah mu ngawl si. ⁸ Saul ah kheh lei pin tho in a mit a hak phangin tumah mu thei ngawl si. Sinapikhaw amahni’n a kut pin kai atsia, Damaskas khaw sungah huai dang si. ⁹ Amah heh nithum sung khaw mu ngawl atsia, heimah ei ngawl in, in ngawl si. ¹⁰ Damaskas khaw sungah Ananias tinak ningluntu pakhat om si. Lalhnak ah Bawipa’n amah kheh, "Ananias," ti’n pon si. Ama’n, "Bawipa, nai ah om sing," ti’n ti si. ¹¹ Tsimi phangin Bawipa’n, "Tho la, Zin Tsamphet tinak rawtpi ah hawh ten. Tsin, Judas inn ah Saul tinak pa kheh zeiper ten. Ngai in, amah heh sawngen tseih si. ¹² Tsin, ama’n lalhnak ah Ananias tinak pa kheh ama nenah hawh in, a lu vumah kut suan atsia a mit khawmu tuh in saw a ngen kheh mu si," ti’n ti si. ¹³ Tsimi phangin Ananias in o atsia, "Bawipa, me pa thu mi tampi te relnak za ongla sing. Tsin, Jerusalem-a na mi thiangrim te vumah thil pha ngawl kawzah a puah, ti khen mi tampi te relnak za ongla sing. ¹⁴ Tsin, nai ah hen nangma ming a kotu tehem heh thawng toh tu in suangbawi te nena thuneinak ngah si," ti’n ti si. ¹⁵ Sinapikhaw Bawipa’n, "Hawh ten; amah heh Gential te, kumpibawi te le Israel tsa te mai ah ka ming phur tu in ka dengnak minung si. ¹⁶ Keima ming manin harsanak tampi a tuar tuh kheh muh tu sing," ti’n ti si. ¹⁷ Ananias in hawh atsia, inn sungah luut si. Tsin, Saul vumah a kut suan atsia, "Ka nau Saul, na khawmu tuh in le Raula Thiangrim in na dim tuh in, nai ah na hawh tseih lai in lamlak ah nangma nenah a langtu Bawi Jesuh in na nenah leh ka si," ti’n ti si. ¹⁸ Makhat in a mit pin nga hawng bang thil pakhat tser atsia, mit khawmu zep si. Amah kheh tho atsia, niim nom si. ¹⁹ Lai a ei tselh phangin amah kheh tha nei leh si. Tsin, Damaskas khawa ningluntu te nenah Saul ah kheh ni dawmlai tsaam si. ²⁰ Ama’n, Khrih ah heh Pathian Tsapa si, ti’n sinakok ah phuang nomper si. ²¹ A thurelnak a zatu tehem in lunglawi ngai in, "Me pa heh Jerusalem-a me ming a saaltu te siatsuahtu pa la si ngawl si maw? Ama’n amahni kheh heen atsia, suangbawi te nenah a huai theinak tuh in, me tuumnak man hen nai ah a leng si ngawl si maw?" ti’n ti dang si. ²² Sinapikhaw Saul ah kheh kol leilei in, me Jesuh ah heh Khrih ah si, ti’n ati manin, Damaskas khaw ah a omtu Jew te kheh thinnok tiar ngai si. ²³ Ni tampi a liam zawh in Jew te’n amah kheh reek tu in rel dang si. ²⁴ Sinapikhaw a rel dangnak kheh Saul in thei si. Jew te’n Saul ah reek nuam in dawngkham pin sun le zan in bawh dang si. ²⁵ Zan lan in ningluntu te’n amah kheh huai dang atsia, kho lianpi sungah koih in ving vum pin lehsuk dang si. ²⁶ Saul ah kheh Jerusalem ah a leng phangin ningluntu te pawl tuum si. Sinapikhaw ningluntu tehem in amah kheh kih in, ningluntu a si deve kheh um dang ngawl si. ²⁷ Sinapikhaw Barnabas in amah kheh huai atsia, lehnak te nenah hawhpi si. Ama’n lampi ah Bawipa a mu daan kheh rel in, amah a awnpi daan te, Jesuh ming in Damaskas khaw sungah ralpha ngai in thuthang pha a phuang daan te kheh rel si. ²⁸ Tsimi manin Jerusalem-a lehnak te nenah om in, amahni thaw leida si. ²⁹ Bawi Jesuh ming in ralpha ngai in thureel atsia, Grik awn mang Jew te thaw in thu el dun veng si. Sinapikhaw amahni’n Saul ah kheh reek tu in zuam dang si. ³⁰ Tsimi kheh unaupi te’n a thei phangin, amah kheh Sisaria khaw ah huai atsia, tsimi pin Tarsus khaw ah hawh tiar dang si. ³¹ Tsimi phangin Judea peng, Galilee peng le Samaria peng sung hema pawlpi te kheh thinnuamno in om dang thei in, thakol dang si. Amahni kheh Bawipa kihzah ngai in, Raula Thiangrim thapenak ah khangso dang si. ³² Tsin, tibang hen thiltsang si. Piter ah kheh tsimi ram sung hem ah khualvak tseihzel in, Lidda khaw ah leng atsia, tsimi khawa mi thiangrim te kheh veh si. ³³ Tsimi ah Aeneas ah tinak zenat veipa om in, eihkhun ah a zau zawh kum riat si ongla si. ³⁴ Piter in amah kheh, "Aeneas, Jesuh Khrih in na dam tiar ong si lei. Tho la, na zaunak heh zial in," ti’n ti si. Tsimi tsang in amah kheh tho zep nom si. ³⁵ Lidda khaw le Sharon zawllai ah a omtu tehem in amah kheh mu in, Bawipa lam ah nga dang si. ³⁶ Joppa khaw ah Tabitha ah tinak ningluntu minu pakhat om si. Tabitha heh Dorkas tinak si. Me nu hen thilpha le ngeihharnak naper kheh per tseih veng si. ³⁷ Tsimi hun in tibang hen thiltsang si. Amah kheh naa atsia thi si. Amahni’n ruangsom a tselh phangin vumta khan ah zau dang si. ³⁸ Lydda khaw heh Joppa khaw thaw a nong dunno si in, ningluntu te’n Joppa khaw ah Piter om lam kheh thei si. Amahni’n mipa panih leh in, sanang po ngawl in amahni a lun zep nom tuh in kun tiar si. ³⁹ Tsimi phangin Piter ah khen tho atsia, amahni kheh lun nom si. A leng phangin amah kheh vumta khaan ah huai dang si. Numei tehem in Dorkas ruang kung ah ding in a kah dang thahlam in a khui awngnak angki le puan dang te kheh Piter ah muh dang si. ⁴⁰ Sinapikhaw Piter in amahni kheh a vaseng in pusuak tiarberh atsia, khuk tsaitsen in sawngen si. Tsin, Tabitha ruang lam nga atsia, "Tabitha, tho in," ti’n ti si. Tabitha ah khen a mit hak in Piter ah a mu phangin tho si. ⁴¹ Tsimi phangin Piter in a kut kheh saan atsia, daangso si. Tsin, mi thiangrim te le numei te kheh ko atsia, a nung in amahni aap si. ⁴² Tsimi thu kheh Joppa khaw sung hem ah thang pum in, minung tampi te’n Bawipa kheh um si. ⁴³ Tsimi manin Joppa khaw ah ni reipi om in savun puahtu Simon inn ah tsaam si.

¹ Sisaria khaw ah Italy raalkap garrison honkhat uktu Kornelius ah tinak pa om si. ² Amah heh Pathian lam ah mi zuam ngai si in, a innkawpi tehem thaw Pathian kihzah ngai dang si. Amah heh penak lam ah mi rawlthiam ngai si atsia, Pathian nenah sawngen tsiat veng si. ³ Simlam naazi pathum luun in lalhnak kheh tsiang ngai in mu in, Pathian vanvummi pakhat kheh ama nenah hawh atsia, "Kornelius," ti’n pon si. ⁴ A mu phangin kih in, "Hei thu sim, bawipa?" ti’n ti si. Tsin, vanvummi khen, "Na sawngennak le na penak te heh Pathian mai ah phawk rengnak si tu in lengso ongla si. ⁵ Tuhen Joppa khaw ah mi leh la, Piter ti’n ponnak Simon ah kheh ko tiar in. ⁶ Amah heh savun puahtu Simon inn ah tsaam si. Simon inn heh tipi kung ah om si. Ama’n na puah tuh rel tu na si," ti’n ti si. ⁷ Amah awnpitu vanvummi a kiang zawh in, Kornelius in a nen om panih le a raalkap te laka ama nenah a om tsiat vengtu Pathian lam ah mi zuam ngai raalkap pakhat kheh ko si. ⁸ Me thu tehem heh a reltsiang tselh phangin, amahni kheh Joppa khaw ah hawh tiar si. ⁹ A thaizing, Joppa khaw a leng dawn ongla phangin, sun laitak luun in Piter ah kheh sawngen tu in inn vumah kaiso si. ¹⁰ Tsimi lai in amah heh a rikaam ngai in lai ei ot si. Sinapikhaw amahni’n a ei tuh lai a puah sak tseih lai in, zialnak si si. ¹¹ Ama’n van hongnak kheh mu in, ningli in khuinak puan deeppi bang thil kheh ama nenah tolhsuk in lei ah a tsersuk kheh mu si. ¹² Tsimi sungah leilung vuma kawng pali nei ramsa hinkim, sapi hinkim, bokvak ramsa hinkim le huih laka a zuang vano hinkim te om si. ¹³ Aw pakhat kheh ama nenah leng in, "Piter, tho in, tel la ei in," ti’n ti si. ¹⁴ Sinapikhaw Piter in, "Bawipa, ei tu ngawl sing. Heimansim tiphangin a zaraan le a thiang ngawl sa himhim ei awngkel ngawl sing," ti’n ti si. ¹⁵ Tsin, aw khen a veinihnak in amah kheh, "Pathian in, a thiang tiarnak heh, zaraan si ti’n ti himhim mah nen," ti’n ti si. ¹⁶ Meheh veithum tian in puah si. Tsin tsimi thil kheh van ah leso leh si. ¹⁷ Piter in me a munak lalhnak heh a thinlung sung in a lunglawi tseih laitum in, ngai in, Kornelius lehnak mipa te’n Simon inn kheh zei in kongbiang dawngkham mai ah ding dang reng si. ¹⁸ Amahni’n innteek te kheh auh a tsia, Piter ti’n ponnak Simon ah a tsaam le tsaam ngawl dong dang si. ¹⁹ Piter in lalhnak kheh a ruat tseih lai in Raula in, "Ngai in, mi pathum te’n zei tseih na si. ²⁰ Tsimi manin tho la, tsuarsuk in. Tsin, amahni heh keima lehnak a si manin, ummawh po ngawl in amahni lun ten," ti’n ti si. ²¹ Tsimi phangin Piter ah kheh Kornelius in a nenah a lehnak te nenah tsuarsuk in, "Si si, nang zeinak heh keimah sing. Hei thu manin leng si utsim?" ti’n ti si. ²² Amahni’n, "Raalkap zakhat uktu, midik, Pathian kihzah ngaitu le Jew miphun hem lak ah upatnak Kornelius ah heh a thiangrim vanvummi in na thureelnak ngai tu in, a inn ah nangmah sam tiar si," ti’n ti si. ²³ Tsimi phangin Piter in amahni kheh a nenah tsam rih tu in kun atsia, tsaam dang si. A thaizing in Piter ah khen amahni thaw hawh in, Joppa khaw-a umtu u le nau pawlkhat te khen amah lun si. ²⁴ A thaizing in Sisaria khaw ah leng dang si. Kornelius ah heh amahni ngak reng si. Tsin, a sen te le a rualpi pha ngaingai te khen sam si. ²⁵ Piter ah kheh inn sungah a luut phangin Kornelius in muak rumrum atsia, a kawngbul ah bok in be si. ²⁶ Sinapikhaw Piter in amah kheh phong atsia, "Dingso in. Keimah khen heh minung si deve sing," ti’n ti si. ²⁷ Amahni a awnpi thah tseih pah in inn sungah luut atsia, minung tampi khawm dang kheh tawk si. ²⁸ Piter in amahni kheh, "Jew te tsa in nam dang te thaw pawl dun in amahni nenah hawh daan ngawl a si heh nang thei saak si. Sinapikhaw mi pakhat khat heh a zaraan le a thiang ngawl in ka ti tuh ngawl in Pathian in muh ongla ka si. ²⁹ Tsimi manin keimah a sam natsang in el ngawl in hawh sing. Tsin, heita keimah nang sam?" ti’n dong sing. ³⁰ Tsimi phangin Kornelius in, "Tima nili lai in tubang hun tian hen laitsang sing. Simlam naazi pathum phangin ka inn ah sawngen sing. Ngai in, puan vaar ngai sil mi pakhat kheh ka mai ah ding in, ³¹ ’Kornelius, na sawngennak heh za saknak si ongla in, na penak te heh Pathian mitmuh ah phawk reng saknak si ongla si. ³² Tsimi manin Joppa khaw ah mi leh la, Piter tinak Simon ah kheh nai ah sam in. Amah heh tipi kunga savun puahtu Simon inn ah tsaam si. A leng phangin thu kheh na rel tu si,’ ti’n ti ka si. ³³ Tsimi manin na nenah mi leh nomper sing. Tsin, na leng manin pha ngai si. Tuhen Pathian in rel tuh in a penak thu tehem ngai tu in kei vaseng in nai ah khawm dang ongla si ung," ti’n ti si. ³⁴ Tsimi phangin Piter ah khen a kam pau atsia, "Pathian in tumah deih dan ngawl si, ti heh thudik a si lam thei sing. ³⁵ Sinapikhaw miphun tehem laka amah kihzahtu te le diktsangnak na a pertu te kheh ama’n saang si. ³⁶ Israel tsa te nenah thu kheh leng tiar in, Jesuh Khrih tawnin thinnuamnak thuthang pha kheh phuang si. Amah heh bawi te hema Bawipa si. ³⁷ Johan in niimnak thu a rel zawh Judea peng pin pan Galilee peng tian a phuangnak thu kheh nang thei saak si. ³⁸ Pathian in Nazareth khawte Jesuh ah kheh Raula Thiangrim in le huham in sathau pawh si. Amah khen thilpha puah in khualvak tseih atsia, Pathian in a ompi manin diabola nuainennak tehem dam tiarberh si. ³⁹ Jew te ram sungah le Jerusalem ah a puahnak thil tehem a mutu heh keimahni si ung. Amah heh thing vumah tar in reeknak si. ⁴⁰ Amah heh Pathian in nithumnak ni in tho tiar atsia tsiangsek in muh tsawm si. ⁴¹ Mi tehem nenah muh tsawm si ngawl in, Pathian in tettikhan tu in a deng hamnak keimahni nen bek ah muh tsawm si. Mithi te lak pin a tho zawh in amah thaw ei le in dang si ung. ⁴² Amah heh minung le mithi te thukhen sak tu tuh in Pathian teeknak a si lam kheh mi hem nenah phuang tu in le tettikhan tu in thupe kei si. ⁴³ Tutu sikhen amah a umtu tehem kheh ama ming manin sualzahnak ngah tu si, ti’n profet tehem in tettikhan si," ti’n ti si. ⁴⁴ Piter in me thu te heh a rel tseih lai in, a thurelnak a ngaitu tehem vumah Raula Thiangrim leng si. ⁴⁵ Raula Thiangrim lehsawng heh Gential te nenah khen burhnak a si manin, Piter ah thaw a leng dang vunrel tennak tehem khen lunglawi ngai dang si. ⁴⁶ Heimansim tiphangin awn phundang dang in a awnnak le Pathian a thangphat dangnak kheh amahni’n za si. Tsimi phangin Piter in, ⁴⁷ "Keimahni ngahnak bang Raula Thiangrim a ngahtu me Gential te heh niim tuh in tu in khaak thei tu sim?" ti’n ti si. ⁴⁸ Tsin, amahni kheh Bawipa ming in niim tu in thupe si. Amahni’n ni dawmlaino pohkhen tsaam rih tu in kun dang si.

¹ Judea peng sunga lehnak te le u le nau te’n Gential te in Pathian thu a saang deve lam kheh za si. ² Piter ah kheh Jerusalem ah a hawhso phangin, vunrel ten te in amah kheh sawi si. ³ Amahni’n, "Nangmah heh vunrel ten ngawl te nenah hawh atsia, amahni kheh laikuang kilpi si tsi," ti’n ti dang si. ⁴ Piter in a tepan pin pan a lamlunno in amahni kheh reltsiang si. ⁵ Piter in, "Keimah heh Joppa khaw ah om sing. Saw ka ngen tseih lai in, keimah heh zialnak si atsia, lalhnak mu sing. Ningli nei puan deeppi bang thil kheh tolhsuk in, van pin tsersuk atsia keima nenah leng si. ⁶ Tsimi kheh pan po in ka ruat tseih lai in, leilung vuma kawng pali nei ramsa te, sapi te, bokvak te le huih laka vano te kheh mu sing. ⁷ Tsimi phangin van pin aw pakhat in, ’Piter, tho in; tel la ei in,’ ti’n a tinak kheh za sing. ⁸ "Sinapikhaw keima’n, ’Bawipa, ei tu ngawl sing. Heimansim tiphangin a zaraan le a thiang ngawl himhim ka kam sungah luut awng ngawl si,’ ti’n ti sing. ⁹ Sinapikhaw van pin aw khen keimah o lehleu atsia, ’Pathian in, a thiang tiarnak heh, zaraan si, ti’n ti himhim mah nen,’ ti’n ti ka si. ¹⁰ Meheh veithum tian in lalh atsia, a veksen in van ah nukso leh si. ¹¹ Tsimi hun keek in Sisaria pin lehnak mi pathum te kheh ka tsamnak inn mai ah ding dang si. ¹² Tsin, ummawh po ngawl in amahni kheh lun tu in Raula in rel ka si. Tsimi bek zo ngawl me u le nau paruk te’n lun ka si. Tsin, Kornelius inn sungah luut dang si ung. ¹³ Ama’n a inn sungah vanvummi pakhat ding reng a mu thu kheh rel kei si. Tsimi vanvummi khen ’Joppa khaw ah mi leh la, Piter ti in ponnak Simon ah kheh ko in. ¹⁴ Ama’n thuthang pha nang rel akhaw, tsimi thuthang pha thawmin nangmah le na innkawpi tehem sannak si tu si utsi,’ ti’n ti si. ¹⁵ "Amahni kheh thuthang pha ka rel tseih lai in, a pan in keimahni vumah a leng bangin, Raula Thiangrim kheh amahni vumah leng si. ¹⁶ Tsimi phangin Bawipa-a thu kheh phawk leh sing. Bawipa in, ’Nangmahni heh Johan in ti ah niim miau nang si. Sinapikhaw Raula Thiangrim ah niim tulai si utsi,’ ti’n ti si. ¹⁷ Tsimi manin Bawi Jesuh Khrih kei um phangin Pathian in keimahni a penak Raula Thiangrim lehsawng pah heh amahni a pe manin, Pathian a kham ngamtu keimah heh tu sing im?" ti’n ti si. ¹⁸ Amahni’n me thu heh a za phang in, meng den dang si. Pathian kheh thangphat dang in, "Pathian in Gential te heh a nung tuh in sual sirnak pe deve si," ti’n ti dang si. ¹⁹ Stefen ah erhnak a si zawh in tsimi erhnak manin ram dang ah a thehsep te kheh Fonisia ram, Saipras tikulh le Antiok khaw tian leng dang atsia thuthang pha kheh mi nam dang te nenah rel ngawl in Jew te nen bek ah rel dang si. ²⁰ Amahni laka mi pawlkhat te heh Saipras tikulh pin le Sairin ram pin a lengtu te si in, amahni’n Antiok khawa Grik awn mang Jew te kheh Bawi Jesuh thuthang pha rel si. ²¹ Bawipa kut kheh amahni vumah om in, mi tampi te’n um atsia, Bawipa lam ah nga si. ²² Me thuthang te heh Jerusalem-a pawlpi te’n a za phangin, Antiok khaw tian khun tu in Barnabas ah kheh leh si. ²³ A leng phangin Pathian lainatnak kheh mu atsia, ang ngai dang si. Amahni thinlung tuumnak kheh Bawipa a beentel tuh in a vaseng kheh so si. ²⁴ Amah heh mipha si in, Raula Thiangrim le umnak in dim si. Tsin, Bawipa nenah minung tampi te kheh belhsep si. ²⁵ Tsimi zawh in Barnabas ah kheh Saul ah zei tu in Tarsus khawpi ah hawh si. ²⁶ A tawk phangin Antiok khaw ah huai si. Tsin, tibang hen thiltsang si. Amahni kheh kumkhat viangvial pawlpi te ompi in, mipi te kheh thu tampi zirh si. Tsin, Antiok khaw pin ningluntu te kheh Khristian, ti’n ko masa ber si. ²⁷ Tsimi hun in Jerusalem pin profet te kheh Antiok khaw ah leng si. ²⁸ Amahni laka Agabus tinak pa in Raula-a thei tiarnak bangin, leivum mun hem ah nase ngai in rian dung tula si, ti’n phuang si. Tsimi heh Klaudius Sizar uk hun in leng si. ²⁹ Tsimi manin ningluntu mi taak hem in amahni ti theinak zah ten in Judea penga u le nau te bawmnak kuat tu in rel dang si. ³⁰ Tsimi kheh puah dang in, amahni’n a bawmnak kheh upa te nenah pe sak tu in Barnabas ah le Saul kut ah aap si.

¹ Tsimi hun in Herod in pawlpi sunga mi pawlkhat te vumah thil sesuak puah tu in a kut suah si. ² Ama’n Johan u Jeim ah kheh vangsang in reek si. ³ Tsimi bangin a puah manin Jew te a ang tiar kheh a mu phangin, mainawt sawndoh rih atsia, Piter ah kheh pom tu in tuum si. Tsimi hun heh Tsol Phulh ngawlnak Sang Puai puah hun si. ⁴ A pom tselh phangin thawng toh atsia, thuahkhat ah raalkap pali thaw thuahli in a kil tuh in amahni kut ah aap si. Ama’n Leekdelh Puai zawh in mipi te nenah huai tu in tuum si. ⁵ Tsimi manin Piter ah kheh thawnginn sungah khumpek si. Sinapikhaw pawlpi in Pathian nenah ama tsa tsawl ngawl in sawngen si. ⁶ Herod in mipi te nenah a huai tula zan in, Piter ah kheh raalkap panih te laklawh ah zau si. Amah kheh thiarri tawidun panih in hen atsia, kawka mai pin thawnginn kawka kheh kil si. ⁷ Ngai in, Bawipa vanvummi pakhat kheh ama kung ah ding in, vaarnak khen thawnginn sung kheh vaar si. Ama’n Piter tai pin beng atsia, phongso in, "Tho nawmnawm in," ti’n ti si. Amah hennak thiarri tawidun kheh a kut pin zuul phung si. ⁸ Tsin, vanvummi in, "Na el het la, na kedawl bun in," ti’n ti atsia, a el het in kedawl bun si. Vanvummi in, "Na angki tsual tsawh sil la, ka lun in," ti’n ti si. ⁹ Piter ah khen pusuak in amah kheh lun nom si. Vanvummi-a puahnak kheh a dik a si lam thei ngawl in lalhnak mu in ring si. ¹⁰ Kiltu pakhatnak le panihnak a kaan tselh phangin, khawpi lam ah hawhnak thiar dawngkham ah leng si. Tsimi thiar dawngkham kheh ama thu in hong tsawm men in, amahni’n suak si. Tsin, rawtpi pakhat ah a hawh kawm natsang in, vanvummi kheh ama nen pin kiang si. ¹¹ Piter ah kheh a thei tsawm phangin, "Herod kut pin le Jew te limdiknak tehem sung pin san tu in, Bawipa’n a vanvummi a leh lam heh tuhen thei taktak lang ee," ti’n ti si. ¹² Me thu heh a ruat thahlam in Mark ti’n ponnak Johan nu Mary inn ah leng si. Tsimi munah mi tampi te khawm dang in sawngen dang tseih si. ¹³ Piter in kong khawng atsia, khangngai Rhoda in kong hon tu in hawh si. ¹⁴ Piter aw a si lam a thei phangin, a ang leita in kong hon ngawl atsia, dan nawmnawm in kawka mai ah Piter ah a ding reng lam kheh amahni rel si. ¹⁵ Amahni’n khangngaino ah kheh, "Na am si maw," ti’n ti dang si. Sinapikhaw khangngaino in, amah rori si, ti’n ati pittseih phangin, amahni’n, "Ama vanvummi si tu si," ti’n ti bel lai si. ¹⁶ Sinapikhaw Piter in kong kheh khawng tseihtseih si. Amahni’n kong hon dang atsia, amah kheh a mu phangin lunglawi ngai dang si. ¹⁷ Piter in amahni kheh mengdeen tu in a kut in zaap atsia, Bawipa’n thawnginn sung pin amah a suah daan kheh rel si. Tsin, ama’n, "Hawh ta ula, me thu te heh Jeim ah le u le nau te kheh rel ta un," ti’n ti atsia, amahni nen pin kiang in mun dang ah hawh si. ¹⁸ Khawvar phangin amah kiltu raalkap te kheh Piter ah heh kawnai ah si tu sim ti’n buaibung dang si. ¹⁹ Herod ah khen zei in, tawk lawt ngawl in, kongkham kiltu te kheh dong kan atsia, amahni kheh reekberh tu in thupe si. Herod ah kheh Judea peng ah hawhsuk in, tsimi pin Sisaria khaw ah hawh atsia, om reng nom si. ²⁰ Herod ah kheh Tyre le Sidon khaw te vumah a thinraw ngaingai si. Sipelh atsia amahni’n lung rual dangno in a nenah hawh dang in kumpibawi zau min khan kelentu Blastus ah kheh amahni bawm tu in kun dang si. Heimansim tiphangin amahni rama ei tuh lai heh kumpibawi uknak ram sung pin kuatnak si. ²¹ A ni teek ni in Herod in a kumpibawi van te sil in, kumpibawi tohkheng ah to atsia, amahni kheh thu rel si. ²² Tsin, mipi te’n, "Me aw heh minunga aw si ngawl in, pathian aw si," ti’n au tseihtseih dang si. ²³ Amah khen Pathian nenah tsungnungnak a pe ngawl manin, makhat in Bawipa vanvummi in kutman atsia, huut in amah kheh ei in thi si. ²⁴ Sinapikhaw Bawipa thu kheh pung in zai leilei si. ²⁵ Barnabas ah le Saul ah kheh nasiam a tselh ongla manin Jerusalem pin hong in, Mark ti’n ponnak Johan ah kheh huai kawm si.

¹ Tuhen Antiok pawlpi sungah profet le zirhtu te om ongla si. Amahni heh Barnabas ah, Niger ti’n ponnak Simeon ah, Sairin te Lukius ah, ram khen pali sung pin ram khen pakhat uktu Herod rualpi pha ber Manaen ah le Saul ah si. ² Amahni kheh laitsang in Bawipa na a per dang tseih lai in Raula Thiangrim in, "Barnabas ah le Saul te heh me nasiam heh per tu in ka konak te a si manin a dangno ah koih un," ti’n ti si. ³ Pawlpi in laitsang in sawngen atsia, amahni lu vumah kut a suan tselh phangin amahni kheh leh si. ⁴ Tsimi manin amahni kheh Raula Thiangrim in a hawh tiarnak bangin, Seleusia khaw ah hawh kawm si. Tsimi pin Saipras tikulh ah timbaw to in hawh kawm si. ⁵ Salamis khawpi ah a leng kawm phangin, Jew te sinakok ah Pathian thu rel si. Amahni bawm tu in Johan ah kheh huai si. ⁶ Amahni kheh tikulh sung mun hem ah khualvak in Pafos khawpi ah leng si. Tsimi khawpi ah Jew miphun Bar-Jesuh tinak profet dik ngawl dawi thiam pa kheh tawk si. ⁷ Amah heh Rom kut nuaia ram pakhat uktu Sarkias Paulus nenah om si. Sarkias Paulus ah heh mitsim ngai si. Tsimi ram uktupa khen Pathian thu za nuam in, Barnabas ah le Saul ah kheh ko si. ⁸ Sinapikhaw amahni nam ming in ponnak dawi thiam Elimus ah khen ram uktupa kheh umnak pin peu tiar tuum in amahni kheh do si. ⁹ Tsimi phangin Paul ti’n ponnak Saul ah kheh Raula Thiangrim in dim si. Paul in amah kheh mitkhep ngawl in er po in pan atsia, ¹⁰ "Mizolnak tehem le awkrawlnak tehem thaw a dim, diabol tsapa, diktsangnak te hema raal, Bawipa zin tsamphet kawi tiar heh tawp rih tu ngawl si tsim maw? ¹¹ Ngai in, tuhen Bawipa kut heh na vumah leng ongla in, ni mu ngawl in hun khat sung na mit tsaw tu si," ti’n ti si. Tsimi tsang in a mit mal atsia a thim manin, a kut pin kaitu mi pakhat khat zei si. ¹² Ram uktupa in thiltsang kheh a mu phangin um in, Bawipa thu a zirh kawmnak kheh khum ngaingai si. ¹³ Tsin, Paul ah le a rualpi te kheh Pafos khawpi pin timbaw to atsia, Pamphylia rama Perga khawpi ah leng dang si. Tsin, Johan in amahni kheh zam atsia Jerusalem ah hong si. ¹⁴ Perga khaw pin hawh lehleu in, Pisidia peng sunga Antiok khawpi ah leng kawm si. Sabbath ni in sinakok ah hawh kawm in to si. ¹⁵ Sinakok uktupa’n Daan le Profet te laibu a siar tselh phangin, "U le nau te, mipi te thu so tuh nang nei a si lekhaw so un," ti’n ti si. ¹⁶ Tsimi phangin Paul ah khen ding atsia a kut zar in, "Nangnihni Pathian a kihzahtu Israel te, ngai un. ¹⁷ Me Israel te Pathian in kei pa te kheh deng atsia, Izip ram ah mikhual a si lai in Israel minung te kheh tsawisang si. Tsin, a kut kol thaw in amahni kheh Izip ram pin suah si. ¹⁸ Hampalak ah kum sawmli sung tsawm si. ¹⁹ Kanaan rama miphun sarih te kheh a siatsuah tselh phangin, a ram kheh ro bangin khen in sem si. ²⁰ "Profet Samuel san tian kum zali le sawmnga sung amahni kheh thukhentu te uk tiar si. ²¹ Tsimi zawh in amahni’n kumpibawi ngen si. Tsimi manin Pathian in kum sawmli sung amahni uktu tuh in Benjamin nam, Kish tsapa Saul ah kheh pe si. ²² Amah kheh a nawt zawh in, David ah kheh amahni kumpibawi per tiar si. Pathian in ama thu kheh tettikhan atsia, ’Ka deihnak tehem puahtu tuh, ka lungmu bang Jesse tsapa David ah tawk sing,’ ti’n ti si. ²³ Pathian in a thutiam bangin ama tenawn sung pin Israel te Santu tuh Jesuh ah suak tiar si. ²⁴ A leng ma in Johan in Israel minung tehem tsa sual sirnak niimnak thu rel ongla si. ²⁵ Johan in a naper a tselh dawn lam phangin, ’Keimah heh tu si tu in ruat ka si utsim? Keimah heh amah si ngawl sing. Sinapikhaw ngai un, ka ning pin mi pakhat leng si. Ama kedawl ri sut sak tu riang heh taak ngawl sing’ ti’n ti si. ²⁶ "Abraham tsa u le nau te le nangmahni laka Pathian a kihzahtu te, me sannak thu heh nang thei tiar si ung. ²⁷ Jerusalem ah a omtu te le uktu te’n amah kheh thei ngawl si. Sabbath ni nasiar in Profet te thu a siar tseih vengnak khehkhen a thei zo ngawl manin, amah kheh han atsia profet te thu kheh kim tiar si. ²⁸ Ama vumah thihnak tuh thu mu ngawl pelh in, Pilat nenah reek tuh in ngen dang si. ²⁹ Ama thu ngan hamnak tehem a kim tiar tselh phangin, thing vuma kheh losuk in thaan ah vi si. ³⁰ Sinapikhaw Pathian in mithi te lak pin tho tiar si. ³¹ Galilee peng pin Jerusalem ah amah thaw a hawhsotu te’n ni tampi sung amah kheh mu in, amahni kheh mipi te nenah ama tetti te si si. ³² "Keimahni’n kei pa te nenah thutiamnak thuthang pha heh nangmahni nenah phuang si ung. ³³ Saam la panihnak sungah, ’Nangmah heh ka Tsapa si tsi. Tuni in na nei sing,’ ti’n ngannak bangin, Pathian in keimahni a tsa te nenah a thutiam heh Jesuh ah a tho tiarnak hen kim tiar ongla si. ³⁴ ’David nenah ka penak thutiam thiangrim muangtaak heh na pe tu sing,’ ti’n a tinak bangin, a ruangpum kheh a zaan nomper tuh ngawl in, Pathian in amah kheh mithi te lak pin tho tiar si. ³⁵ Tsimi manin a dang Saam la sungah ama’n, ’Na Thiangrim Pa kheh zaan siang tu ngawl si tsi,’ ti’n ti meek si. ³⁶ "David in ama khang lai in Pathian deihnak bangin na a per zawh in thi atsia, a pupa te lak ah vi in zaan si. ³⁷ Sinapikhaw Pathian tho tiarnak pa heh zaan ngawl si. ³⁸ Tsimi manin u le nau te, me pa manin sual zahnak thu relnak nang si heh thei un. ³⁹ Mawsi Daan thawmin nang diktsang thei ngawlnak tehem heh amah a umtu tehem ama thawmin heizongza diktsang si. ⁴⁰ Tsimi manin tsimkom un. Tsimi a si ngawl lekhaw profet te relnak kheh nangmahni vumah leng kha tu si. ⁴¹ "Profet te’n, ’Nangnihni mi zohsuamtu te, ngai un, lunglawi ula ral thongberh ta la un. Heimansim tiphangin nangmahni san ah hen naper pakhat per sing. Tsimi naper heh mi pakhat in nangmahni a rel pelhta sikhen diksang awngkel tu ngawl si utsi,’ ti’n rel si," ti’n ti si. ⁴² Jew te kheh sinakok pin a suak dang zawh in, Gential te’n me thu heh mai Sabbath ni in amahni rel leh tu in kun dang si. ⁴³ Pumkhawm te a hongsep zawh in Jew te le Jew te benak ah luut in Pathian a betu Gential mi tampi te’n Paul ah le Barnabas ah kheh lun si. Tsin, Pathian lainatnak sungah om dang reng tu in amahni kheh rel in so kawm si. ⁴⁴ Sabbath ni a leng leh phangin khawpi sunga minung a vaseng dawn petpet in Pathian thu ngai tu in khawm dang si. ⁴⁵ Sinapikhaw Jew te in mihonpi te a mu phangin iksik in, Paul thurelnak kheh kal in relse dang si. ⁴⁶ Tsimi phangin Paul ah le Barnabas ah kheh ralpha leilei in, "Pathian thu heh nangmahni nenah rel masa ber kultsam si. Sinapikhaw nangmahni in el atsia, kumkhaw nungnak thaw phutua dun ngawl in thu nang ten tsawm manin, ngai un, Gential te lam ah nga tula si ung. ⁴⁷ Heimansim tiphangin Bawipa in keimahni heh thupe atsia, ’Nangmah heh Gential te tsa vaarnak si tu in le leilung a tawp tian sannak a si tuh in na deng sing,’" ti’n ti si. ⁴⁸ Me thu heh Gential te’n a za phangin ang ngai dang in, Bawipa thu kheh ultung dang si. Kumkhaw nungnak ngah tu in teeknak a om zahzah in um si. ⁴⁹ Tsimi ram sung hem ah Bawipa thu kheh zai si. ⁵⁰ Tsimi phangin Jew te’n Pathian a kihzahtu maisongnak minu te le khawpi sunga mi muangtaak te kheh so in Paul ah le Barnabas ah kheh erh tiar in, amahni ram sung pin nawt tiar si. ⁵¹ Amahni’n a kawnga leivul kheh thin kawm atsia, Ikonium khawpi ah hawh si. ⁵² Ningluntu te kheh angnak le Raula Thiangrim in dim si.

¹ Tsin, Ikonium khaw ah tibang hen thiltsang si. Amahni’n Jew te sinakok ah luut kawm in thurel in, Jew te le Grik te tampi in um si. ² Sinapikhaw a um ngawl Jew te’n a buai tuh in Gential te kheh so atsia, u le nau te a do tuh in lungmu sesuak nei tiar si. ³ Tsimi manin amahni kheh tsimi khawpi ah reipi tsaam kawm si. Bawipa ming in ralpha ngai in thurel atsia, amahni kut in theihdiknak te le thil khumnung te puah tu in Bawipa’n a lainatnak thu kheh tettikhan si. ⁴ Khawpi sunga minung te kheh khennih in khen si. Khenkhat te heh Jew te lam ah om in khenkhat te heh lehnak te lam ah om si. ⁵ Tsin, lehnak te kheh zahtsaknung ngai in zing atsia, lungto in seplum tu in le nom tu in, Gential te le Jew te’n amahni uktu te thaw tuum dang si. ⁶ Tsimi thu kheh a thei kawm phangin Lystra khawpi, Derbe khawpi, Lykaonia khawpi te le a kawnvel ram sung hem ah dan kawm si. ⁷ Amahni’n thuthang pha rel thah tseihzel si. ⁸ Lystra khaw ah a tsiah thei awngkeel ngawl mi pakhat to reng si. Amah heh a sensuah kawng zenat vei si in, vak thei awngkel ngawl si. ⁹ Me pa hen Paul thureelnak kheh ngai reng si. Paul in amah kheh er po in pan atsia, a nat dam tuh in umnak a nei lam kheh a thei phangin, ¹⁰ aw ring ngai in, "Na kawng vumah ding phet in!" ti’n ti si. Amah khen dawkso atsia vaak si. ¹¹ Paul thil puahnak kheh mipi te’n a mu phangin a aw neih hem suah in amahni Lykaonia awn in, "Minung bangin pathian te kheh keimahni nenah lengsuk si!" ti’n ti dang si. ¹² Amahni’n Barnabas ah kheh Zeus, ti’n ti atsia, Paul ah kheh thureltu sawn a si manin, Hermes ti’n ti si. ¹³ Zeus suang heh khawpi tawkpannak ah om si. Ama’n kawlpawtsang le papar kheh khawpi luutnak dawngkham ah keng in, mipi te thaw hibawl tu in tuum si. ¹⁴ Tsimi kheh lehnak Barnabas ah le Paul in a za phangin, a puan bal atsia, mipi te lak ah hawh in au si. ¹⁵ Amahni’n, "Patsang te, hei manin me thil te heh puah si utsim? Keimahni heh nangma ni bang sinak nei minung si deve si ung. Tsin, nangmahni’n me a heimah ngawl thil te pin van le lei le tipi le a sungah om tehem a puahtu a nung Pathian lam ah nang nga leh tuh in thuthang pha reltu te si ung. ¹⁶ Tanglai pi in Pathian in miphun tehem kheh amahni lamzin ten ah hawh tu in siang awng si. ¹⁷ Sinapikhaw thilpha puahnak thawmin ama thu tetti om ngawl in zam men ngawl atsia, van pin ruah sar tiar in, amahni hun ten in thingrah kheh rah tiar in kei thin sung heh thilpha le angnak thaw dim tiar si," ti’n ti si. ¹⁸ Ti hen thu a relnak manin tsangtsa ririat in amahni nenah a hibawl dang tu kheh kham thei si. ¹⁹ Tsimi phangin Antiok khawpi le Ikonium khawpi pin Jew te kheh Lystra khawpi ah leng si. Amahni’n mihonpi te kheh so in Paul ah kheh lungto in seplum in, a thi ongla a ring manin khawpi pulam ah kai dang si. ²⁰ Sinapikhaw ningluntu te kheh a kawnvel ah a khawm dang phangin, thoso atsia, khawpi sungah hawh si. A thaizing in Barnabas ah thaw Derbe khawpi ah hawh kawm si. ²¹ Derbe khawpi ah thuthang pha rel atsia, minung tampi te kheh ningluntu si tu in a puah kawm tselh phangin, Lystra khawpi ah, Ikonium khawpi ah le Antiok khawpi ah hong leh kawm si. ²² A leng min khawpia ningluntu te kheh umnak ah kho reng tu in so atsia, thin kol tiar in, "Harsanak tampi tuar thahlam in Pathian uknak sungah luut tu si sing," ti’n ti si. ²³ Amahni’n pawlpi taak hem ah pawlpi kelentu upa te deng sak thah zel si. Tsin, amahni kheh laitsang in sawngen pi zel atsia, amahni umnak Bawipa nenah amahni kheh aapberh si. ²⁴ Pisidia peng sung kheh hawh tenper in Pamfilia peng ah leng kawm si. ²⁵ Perga khawpi ah thuthang pha a phuang tselh kawm zawh in, Attalia khaw ah leng kawm si. ²⁶ Tsimi pin timbaw to in Antiok khawpi ah hawh kawm si. Pathian nasiam a per kawmnak kheh lamlen lawlaw tu in u le nau te’n amahni kheh Pathian lainatnak ah aap dang si. ²⁷ A leng phangin pawlpi te kheh ko khawm atsia, Pathian in amahni mang in na a pernak tehem le Gential te tsa in Pathian in umnak kong a hongsak thu te kheh relberh si. ²⁸ Tsin, ningluntu te nenah reipi tsam kawm si.

¹ Judea peng pin mi honkhat leng in u le nau te kheh, "Kei miphun daan Mawsi penak bangin vunrel nang ten ngawl a si lekhaw, sannak si thei tu ngawl si utsi," ti’n zirh si. ² Tsimi manin Paul ah le Barnabas ah kheh amahni thaw nase ngai in el dun in sol dun si. Tsimi manin Paul ah le Barnabas ah kheh amahni sunga mi pawlkhat te thaw Jerusalem ah hawhso in, lehnak te le upa te thaw tsimi thurel khawm dang tu in ngaisung dang si. ³ Pawlpi in amahni kheh a hawh tiar manin Fonisia peng le Samaria peng tawnin hawh tenper dang atsia, Gential te thin thengnak thu te kheh rel thah zel si. Tsimi khen u le nau tehem kheh ang tiar ngaingai si. ⁴ Jerusalem ah a leng phangin amahni kheh pawlpi te, lehnak te le upa te’n vaimuak dang si. Tsin, Pathian in amahni mang in a puahnak thil tehem kheh reltsiang kawm si. ⁵ Sinapikhaw umtu Farasi pawlkhat te’n ding atsia, "Gential te heh vunrel a ten kultsam si. Tsin, Mawsi Daan khen lun tu in thupe kultsam si sing," ti’n ti si. ⁶ Me thu heh ruat dang tu in lehnak te le upa te kheh khawm dang si. ⁷ Reipi thu a el dun zawh in Piter ah kheh ding atsia, "U le nau te, Gential te’n keima kam pin thuthang pha thu za atsia, a um theinak tuh in Pathian in keimahni lak pin dengnak a nei lam kheh nang thei saak si. ⁸ Minung thinlung a theisektu Pathian in keimahni heh Raula Thiangrim a pe bangin, amahni khen a pe devenak thawmin thei tiar ongla si. ⁹ Umnak thawmin amahni thinlung a thiang tiarnak thawm in, amahni le keimahni laklawh ah dang dunnak heimah om ngawl si. ¹⁰ Tsimi manin kei pupa te’n phur zo ngawl in, keimahni khen kei phur zo ngawlnak kolhaak heh amahni ngawng ah koih in heita Pathian heh tsul si utsim? ¹¹ Sinapikhaw, Bawi Jesuh Khrih lainatnak thawmin amahni heh sannak a si bangin keimahni khen sannak si sing, ti’n um si sing," ti’n ti si. ¹² Tsimi phangin mipi tehem kheh mengdeen dang si. Barnabas ah le Paul in amahni mang in Pathian in Gential te nenah theihdiknak le thil khumnung a puahnak a relnak kheh ngai dang si. ¹³ Mengdeen in a om dang zawh in Jeim in, "Mipi te le ka u le ka nau te, ka awnnak heh ngai rih un. ¹⁴ Pathian in ama ming tsa in Gential te lak pin mi pawlkhat le tu in amahni a veh masa bernak thu kheh Simon in thuthan ongla kei si. ¹⁵ Me thu heh profet te awnkam thaw thuhual dun si. Meheh tibang hen ngan si. ¹⁶ ’Me zawh hen leng leh angkhaw, a se saak David benakbuuk kheh sa leh tu sing. A du ongla kheh phong leh angkhaw, sa leh tu sing. ¹⁷ Tsimita a taanglai minung tehem le Gential tehem in BAWIPA ah zei tu si. Me thil tehem a puahtu BAWIPA in rel si.’ ¹⁸ "Pathian in leivum a po pan pin pan ama naper tehem kheh theisek si. ¹⁹ Tsimi manin ka ruatnak heh Gential te lak pin Pathian lam ah a ngatu te heh harsa tiar awl a sing. ²⁰ Tsimi tah in milim te baalnak pial tu in, nu le pa sual puah heh pial tu in, ngawng het in reeknak ramsa sa te pial tu in le thisen te kheh a pial tuh in amahni nenah laikuat sawn a sing. ²¹ Heimansim tiphangin Mawsi daan heh tanglai pah in Sabbath ni nasiar in sinakok ah siarnak si in, khawpi tehem ah relnak si ongla si," ti’n ti si. ²² Tsimi phangin lehnak te, pawlpi upa te le pawlpi tehem in ruat in mi deng atsia, Paul ah le Barnabas te thaw Antiok khawpi ah hawh tiar tu in rel dang si. Amahni’n u le nau te lak ah huaitu Barsabbas ah tinak Judas ah le Silas ah deng dang si. ²³ Amahni nenah me lai heh kuat si: "Lehnak te, upa te le u le nau te’n, Antiok khaw le Syria ram le Silisia rama Gential miphun u le nau te, ngai nang rel si ung. ²⁴ Keimahni nen pin mi pawlkhat te nangmahni nenah leng atsia, ’Daan lun in vunrel ten kul si utsi,’ ti’n nangmahni rel in nangmahni buai tiar in nang thin a tsawl tiar lam za si ung. Amahni heh tsimi banga thu kei penak si ngawl si. ²⁵ Keimahni hen thinkhat lungkhatno in thurel dang atsia, kei dengnak minung te heh Barnabas ah le Paul te nenah kei leh heh pha in ruat si ung. ²⁶ Barnabas ah le Paul ah heh kei Bawipa Jesuh Khrih ming tsa in amahni nungnak a pe ngamtu te si. ²⁷ Tsimi manin Judas ah le Silas ah heh nangmahni nenah leh si ung. Amahni’n a awnkam rori in me lai sungah kei ngannak thu te heh nang rel tu si. ²⁸ Me a nuaia nang lun kultsam tuh thil te vumah a rit sawn thilrit heimah suan tuh ngawl in Raula Thiangrim le keimahni’n pha in ruat si ung. ²⁹ Milim bawlnak sa ei mah na un; thisen ei mah na un; ngawng het in reeknak sa ei mah na un; nu le pa sual puah mah na un. Me te heh nang tsang zo lekhaw a pha puah si utsi. Dam reng ta un." ³⁰ Thurel khawmnak a ta dang zawh in, amahni lehnak te kheh Antiok khaw ah hawh dang si. Tsin, amahni’n umtu mipi te kheh ko khawm a tsia, laikuat kheh amahni pe dang si. ³¹ Amahni’n siar dang atsia, amahni tha a penak vumah ang ngai dang si. ³² Judas ah le Silas te’n profet a sinak thaw in umtu u le nau te kheh thu tampi so in thape si. ³³ Amahni kheh Antiok khaw ah dawmlai a tsam dang zawh in, amahni lehtu lehnak te nenah thinnuam ngaino in hong leh tu in u le nau te’n la dang si. ³⁴ Silas ah zong hen Antiok ah a tang rih heh pha in ruat si. ³⁵ Paul ah le Barnabas te khen Antiok ah tang deve in, midang tampi te thaw Bawipa thu kheh zirh in phuang si. ³⁶ Ni dawmlai a rei phangin Paul in Barnabas ah kheh, "Tuhen Bawipa thu kei phuang awngnak khawpi taak hema u le nau te nenah hawh leh a singkhaw, veh leh in amahni omdaan pan kawm leh a sing," ti’n ti si. ³⁷ Barnabas ah hen Mark ti’n ponnak Johan ah kheh huai ot si. ³⁸ Sinapikhaw Paul ah hen Pamfilia ram pin amahni zam atsia, amahni napernak ah a peh lensuah ngawltu pa huai tu heh man si ti’n ruat ngawl si. ³⁹ Amahni kheh nase ngai in awn o dun atsia, khek dun nom si. Tsin, Barnabas in Mark ah kheh ko atsia Saipras ah timbaw thaw hawh kawm si. ⁴⁰ Paul in Silas ah deng atsia, u le nau te’n Pathian lainatnak ah a aap dang zawh in kiang si. ⁴¹ Paul ah kheh Syria ram le Silisia ram sungah khualvak in pawlpi te kheh thape zel si.

¹ Tsin, Paul ah kheh Derbe khaw le Lystra khaw ah leng si. Ngai in, tsimi ah Jew miphun umtu minu tsapa Timote ah tinak ningluntu pakhat om si. A pa heh Grik te si. ² Timote ah heh Lystra khaw le Ikonium khawa umtu te’n a ziap ngainak si. ³ Paul in Timote ah kheh amah lun tu in deih in huai si. Tsimi ram sungah om Jew miphun tehem in a pa heh Grik te a si lam a thei ten manin Paul in a vunrel ten sak si. ⁴ Jerusalem-a lehnak te le upa te’n lun tuh in thu a penak kheh a hawh min khaw hem ah rel thah tseihzel si. ⁵ Tsimi manin pawlpi te kheh umnak ah thakol atsia, ni tin in umtu mi pum khang leilei si. ⁶ Amahni kheh Raula Thiangrim in Asia ram sungah thu kheh phuang tuh ngawl in a kham manin, Phrigia le Galati ram sungah khualvak dang si. ⁷ Mysia ram a leng dang zawh in, Bithynia ram sungah hawh tu in tuum dang pelh in, Raula in siang ngawl si. ⁸ Tsimi manin Mysia ram kheh tawnper atsia, Troas khawpi ah hawhsuk dang si. ⁹ Zan in lalhnak kheh Paul nenah lang si. Tsimi lalhnak ah Masidonia mipa pakhat in ding in kun atsia, "Masidonia ram ah hawh la kei bawm in," ti’n ti si. ¹⁰ Paul in lalhnak a mu tselhtsang in, Bawipa’n amahni nenah thuthang pha phuang tu in keimahni heh ko si, ti’n ruat atsia Masidonia ram ah hawh tu in tuum nom si. ¹¹ Tsimita Troas khawpi pin timbaw to in Samothrace tikulh ah hawh phet in, a thaizing in Neopolis khaw ah leng si ung. ¹² Tsimi pin Masidonia ram sunga peng pakhata khawpi Filipi khaw ah leng si ung. Me khaw ah hen a tam ber in Rom miphun te om si. Me khaw ah hen rei po tsaam si ung. ¹³ Sabbath ni in khaw pulam ah hawh in sawngen veng min run kung ah hawh si ung. Tsimi ah sawngen tu in a leng nupang pawlkhat te thaw awntsawp dang si ung. ¹⁴ Lydia tinak minu pakhat in kei thurelnak ngai reng si. Amah heh Thyatira khawte si in Filipi khaw ah puan sennum zuar si. Amah heh Pathian a kihzah ngaitu si. Paul thurelnak kheh thupi tsan tu in Bawipa’n ama thinlung kheh hongsak si. ¹⁵ Tsin, amah le a innkawpi te’n a niim zawh in keimahni kun in, "Bawipa nenah muangtaak ti’n keimah heh nang ti miau lekhaw, ka inn ah dung ula tsaam un," ti’n ti kei si. ¹⁶ Tsin, tibang hen thiltsang si. Sawngen tu in kei hawh tseih lai in, raulaa zingnak manin mailam thu a rel thei sel khangngai nu pakhat thaw tawk dun si ung. Ama’n mailam thu a relnak thawmin a bawi te’n tangka tampi ngah veng si. ¹⁷ Khangngai nu khen Paul ah le keimahni lun tseih in, "Me te heh keimahni nenah sannak zin a phuangtu Daak ber Pathian sel te si," ti’n au veng si. ¹⁸ Tsimi bangin ni tampi au si. Paul in nokkhah ongla in, ama lam her atsia, "Khangngai nu sung pin suak tu in Jesuh Khrih ming in thu na pe sing," ti’n raula kheh ti si. Tsimi hun rori in raula kheh suak si. ¹⁹ A bawi te’n tangka ngah tu in a limdiknak hem a bo lam a thei phangin, Paul ah le Silas ah kheh pom atsia, dawra thuneitu te nenah kai dang si. ²⁰ Amahni kheh uktu te nenah huai dang in, "Me te heh Jew te si atsia, kei khaw sungah buainak leng tiar si. ²¹ Tsin, Rom miphun te saang daan ngawlnak le lun daan ngawlnak daan kheh zirh kei si," ti’n ti si. ²² Tsimi phangin mipi te’n Paul ah le Silas ah kheh simtup dang in, uktu te’n a vansilh te bal atsia, amahni kheh molhkang thaw in vaat tu in thupe si. ²³ Amahni’n Paul ah le Silas te kheh vei tampi a vaat zawh in, thawng toh atsia, a kiltu kheh himno in a kilpek tuh in thupe si. ²⁴ Tsimi bangin thupenak a si manin amahni kheh thawnginn sungta ah khum atsia, a kawng te kheh kolkhah sak si. ²⁵ Zan laitum in Paul ah le Silas ah kheh Pathian nenah sawngen in thangphatnak la sa kawm si. Tsimi kheh thawng to te’n ngai dang reng si. ²⁶ Makhat in nase ngai in thinthing atsia, thawnginn elphah te thingberh si. Makhat in kawka tehem hongberh in thawng to te heennak thiarri tehem kheh zuulberh si. ²⁷ Thawnginn kiltu kheh a eihmunak pin phawk in, kawka tehem a hongberh kheh mu si. Ama’n thawng to tehem a danberh ongla ring atsia, a vangsang dawk in amah le amah reek tsawm tu in tuum si. ²⁸ Sinapikhaw Paul in amah kheh ring ngai in pon atsia, "Nangmah le nangmah siatsuah tsawm mah nen. Kei vaseng in nai ah om dang reng si ung," ti’n ti si. ²⁹ Tsimi phangin thawnginn kiltu khen mei vaar tiar in, dan nawmnawm atsia Paul ah le Silas te kawngbul ah bok si. ³⁰ Ama’n Paul ah le Silas ah kheh pulam ah suah atsia, "Saya te, sannak ka si theinak tuh in hei puah tu sing im?" ti’n ti si. ³¹ Tsimi manin amahni’n, "Bawi Jesuh Khrih um la, nangmah le na innkawpi tehem sannak si tu si utsi," ti’n ti si. ³² Tsin, amah le a inn ah om tehem kheh amahni’n Bawipa thu kheh rel si. ³³ Thawnginn kiltu khen amahni kheh huai a tsia, a vaatnak meima te kheh somsek sak si. Tsin, makhat in amah le a innkawpi tehem kheh amahni’n niimberh si. ³⁴ Tsin, amahni kheh a inn ah huai atsia, lai ei tuh pe si. Amah le a innkawpi tehem in Pathian um dang atsia, angngai ngai dang si. ³⁵ A thaizing in uktu te’n palik bawi te kheh, "Paul ah le Silas ah tsawh suak leh ta la sen," ti’n thupe si. ³⁶ Tsimi manin thawnginn kiltu khen me thu te heh Paul ah rel in, "Nangmahni heh uktu te’n suak tiar ongla si. Tsimi manin tuhen nai pin kiang ula, thinnuamno in hawh ta un," ti’n ti si. ³⁷ Sinapikhaw Paul in amahni kheh, "Keimahni heh Rom miphun sinak nei si in, lon men tuh kei si ngawl thahlam reng in khawza muh in vaat atsia, thawng toh kei si. Tuhen a thup kuhrukno in suah kei tum si maw? Si theihnung ngawl si. Amahni rori nai ah hawh sehla, kei suah sen," ti’n ti si. ³⁸ Palik bawi te’n me thu te heh uktu te nenah rel si. Amahni’n Paul ah le Silas ah heh Rom miphun sinak nei a si lam a thei phangin thinphu ngai dang si. ³⁹ Amahni’n Paul le Silas nenah hawh atsia, sual zah kun dang si. Amahni kheh thawnginn sung pin suah atsia, amahni khaw pin suak tu in kun dang si. ⁴⁰ Tsimi manin amahni kheh thawnginn sung pin suak atsia, Lydia inn ah hong si. Umtu u le nau te kheh a mu phangin thape atsia, tsimi khaw pin suak si.

¹ Paul ah le Silas te kheh Amfipolis khaw le Apollonia khaw kheh hawh tenper in, Thesalon khaw ah leng si. Tsimi khaw ah Jew te sinakok om si. ² Paul ah kheh a hawh veng bangin amahni nenah Sabbath zarh thum sung tsam in mipi te kheh Laithiangrim thu relpi si. ³ Khrih ah heh tuar tu atsia, mithi te lak pin a tho lehtu si. "Nangmahni nenah ka phuangnak me Jesuh ah heh Khrih ah si," ti’n amahni kheh reltsiang in lang tiar si. ⁴ Mi pawlkhat te’n um atsia, Paul ah le Silas ah kheh pawl si. Pathian a kihzah tu Grik mihonpi le mi thupi nupang tampi te khen pawl deve si. ⁵ Sinapikhaw a um ngawl Jew te’n amahni kheh eng si. Amahni’n dawra mi pha ngawl te kheh khawm atsia mihonpi in tsang tiar si. Khawpi kheh buaibung tiar atsia, Jason inn kheh sim dang in, Paul ah le Silas ah kheh mipi mai ah kai tu in tuum dang si. ⁶ Amahni’n Paul ah le Silas ah a tawk ngawl phangin, Jason ah le umtu mi pawlkhat te kheh khaw sung uktu te mai ah kai dang atsia, "Leivum a buai tiartu te heh nai ah leng deve si. ⁷ Jason in a inn ah dung tiar si. Amahni tehem in, Kumpibawi dang Jesuh ah om si, ti’n Sizar thupenak kalhberh si," ti’n ti si. ⁸ Khawpi uktu te le mipi te’n me thu te heh a za phangin a thinlung buai ngai dang si. ⁹ Tsimi manin Jason ah le a rualpi te kheh aamahkhannak tangka tampi liam tiar a tsia leh si. ¹⁰ Tsimi phangin makhat in umtu u le nau te’n Paul ah le Silas ah kheh zan lan in Berea khaw ah la dang si. Berea khaw ah a leng phangin, Jew te sinakok ah hawh kawm si. ¹¹ Berea khaw te heh Thesalon khaw te tah in a thinlung thiang sawn si. Amahni’n Paul thurelnak kheh thinkarh ngai in ngai atsia, a thurelnak te kheh a maan maw maan ngawl theinak tuh in ni tin in Laithiangrim siar in tsek dang si. ¹² Tsimi manin mi tampi in um si. Grik miphun upat taak nupang te le mipa te khen um si. ¹³ Sinapikhaw Paul in Berea khaw ah Pathian thu a phuang lam kheh Thesalon khawa Jew te’n a thei phangin, Berea khaw ah hawh atsia mipi buai tuh in puah si. ¹⁴ Tsimi phangin u le nau te’n Paul ah kheh tipi lam ah la dang si. Sinapikhaw Silas ah le Timote ah heh taang lai si. ¹⁵ Tsimi manin Paul ah a hungtu te’n amah kheh Athen khaw ah len dang si. Silas ah le Timote in a rang thei ber in ama nenah a hawh kawm tuh in Paul in thu a penak kheh amah latu te’n a saang zawh in Paul nen pin kiang dang si. ¹⁶ Paul in Athen khaw pin Silas ah le Timote ah a ngak reng lai in, tsimi khaw heh milim benak in a dim kheh a mu phangin a thintsawl ngai si. ¹⁷ Tsimi manin sinakok ah Jew te le Pathian a kihzahtu Gential te kheh thu relpi veng si. Ni tin a tawk vengnak dawra te khehkhen thu relpi si. ¹⁸ Leivum thuruat thiam mitsim Epikurus te le Stoic te thaw thu el dun si. Mi pawlkhat te’n, "Me mi tsimdatpa rel nuamnak heh hei sim?" ti’n ti si. Midang te’n, "Ramdang pathian te thu rel si," ti’n ruat si. Heimansim tiphangin Paul in Jesuh thu le a tholehnak thu kheh amahni rel si. ¹⁹ Amahni’n Paul ah kheh Areopagus tinak mual ah huai in, "Me zirhnak ther na relnak heh kei thei tiar thei ol tsim maw? ²⁰ Thu dangsa ngai kei za tiar si tsi. Me thu te sullelam thei ot si ung," ti’n ti dang si. ²¹ Tsimiman in Athen khaw tehem le amahni khawa ramdang minung tehem in hun a neinak te kheh thil dang ah mang ngawl in thuther relnak maw, ngainak in maw mang dang si. ²² "Tsimi phangin Paul in Areopagus tinak mual ah ding atsia, "Athen khawte, heizongza ah benak lam nga in a zuam ngai nang si lam heh thei sing. ²³ Nang benak thu te ruat thah in ka vaak tseih lai in nangmahni bawlnak dawndel vum ah, THEI NGAWLNAK PATHIAN NEN AH, ti’n ngannak mu sing. Thei ngawlpi in nang benak Pathian heh tua ka relnak heh si. ²⁴ Leivum le a sunga tehem a puahtu Pathian heh lei le vana Bawipa a si manin, kut in sanak temple te ah om ngawl si. ²⁵ Pathian heh minung tehema nungnak, haihawh le heizongza petu a si manin thil pakhat khat dasamnak nei bangin minung te kut in naper sak tu in a kinnak heimah om ngawl si. ²⁶ Leilung hem luahtu tuh in miphun tehema minung te kheh thisen pakhat pin puah atsia, amahni tsa hun te teek sak in, a luah tuh ram rituah te puah sak si. ²⁷ Tsimi heh minung te’n Bawipa kheh zei atsia, a zeet tseih phangin a tawk khapang theinak tuh in si si. Sinapikhaw amah heh keimahni pumpak ten thaw a khawlapi si ngawl si. ²⁸ Keimahni heh amah ah nung in phe atsia, om si sing. Nangmahni, la puah thiam khenkhat te’n, ’Keimahni heh ama hin te si sing,’ ti’n ti deve si. ²⁹ "Keimahni heh Pathian hin kei si manin, Pathian sinak heh minung te thiamnak le kutthiamnak thaw puahnak sui le ngun le lungto te bang men in kei ruat tuh si ngawl si. ³⁰ Thungai in ti le singkhaw Pathian in minung te amah a thei lai ngawl hun te kheh haiden sak pelh in, tuhen mun hema minung tehem kheh sual sir tu in thupe ongla si. ³¹ Heimansim tiphangin a dengnak pa thawmin leivumpi heh diktsangnak thaw in thukhen tu in a ni teek ongla si. Tsimi a dengnak pa heh mithi te lak pin a tho leh tiarnak thawmin minung tehem theitsiang tiar ongla si," ti’n ti si. ³² Amahni’n mithi te tho leh thu a za phangin mi pawlkhat te’n nihsan dang atsia, midang te’n, "Me thu heh na relnak za leh ot lai si ung," ti’n ti si. ³³ Tsimi manin Paul ah kheh amahni nen pin kiang si. ³⁴ Sinapikhaw mi pawlkhat te’n amah kheh lun in um si. A umtu te lak ah Areopagite pakhat a si deve Dionysius ah le minu Damaris ah le midang te peh si.

¹ Tsimi zawh in Paul ah kheh Athen khaw pin kiang atsia, Korin khaw ah hawh si. ² Paul in Pontus ram te Jew miphun Aquila ah tawk si. Aquila ah heh a zi thaw Rom khawpi pin Korin ah a leng kawm tsang si lai si. Heimansim tiphangin Rom kumpibawi Klaudius in Jew tehem kheh Rom khawpi pin danberh tu in thupe si. Tsin, Paul ah kheh amahni nenah leeng si. ³ Amahni heh puanbuuk puah in pum tsawm si in, Paul ah khen amahni bangin puanbuuk puah in pum tsawm a si manin, amahni nenah om nom si. ⁴ Paul ah kheh Sabbath ni nasiar in sinakok ah thu relpi in, Jew te le Gential te kheh a theitsiang theinak tuh in phatak ngai in reltsiang si. ⁵ Silas ah le Timote ah kheh Masidonia ram pin a leng phangin, Paul in Raula sonak bangin Jesuh ah heh Khrih ah si, ti’n Jew te kheh rel si. ⁶ Sinapikhaw amahni’n Paul ah kheh do in a relse phangin, Paul in a vansilh thiin atsia, "Nang thisen heh nangmahni lu vumah leng tasen. Keimah heh nang thisen pin thiang sing. Tu pin pan Gential te nenah hawh tu si lang," ti’n ti si. ⁷ Paul ah kheh sinakok pin suak atsia, Pathian kihzah ngaitu Justus inn ah hawh si. Justus inn heh sinakok kungtsek ah si. ⁸ Sinakok uktu Krispus in a innkawpi tehem thaw Bawipa um si. Korin khawte mi tampi te’n a thurelnak kheh ngai dang in um dang atsia, niim dang si. ⁹ Bawipa kheh zan in Paul nenah lang atsia, "Kih mah nen. Dapdeen men ngawl in rel in. ¹⁰ Na ompi reng sing. Nai khaw ah minung tampi ka nei manin, nangmah maliam suah tu in tumah in kutman tu ngawl na si," ti’n ti si. ¹¹ Paul ah kheh Korin ah kum khat le laruk sung om in, amahni kheh Pathian thu zirh tseih veng si. ¹² Gallio ah kheh Akhaia ram mangki a si lai in, Jew te’n thinkhat lungkhat in Paul ah kheh pom dang atsia, thukhennak zung ah kai dang si. ¹³ Amahni’n, "Me pa hen daan thaw kalh dun in Pathian be tu in mi te kheh zawl si," ti’n ti dang si. ¹⁴ Paul in awn tu in a thawi phangin Gallio in Jew te kheh, "Maw Jew te, me heh thilsual puah le suaksual sual manin thunei tum nang si lekhaw, nang thu nang ngai sak tu sing. ¹⁵ Sinapikhaw thu el dunnak, ming te le nangmahni daan thu man men a si lekhaw, nangmahni’n rel ta un. Tsimi bang thu ah thukhentu si naap ngawl sing," ti’n ti si. ¹⁶ Tsin, amahni kheh thukhennak zung pin hawlberh si. ¹⁷ Tsimi phangin Grik tehem in sinakok uktu Sosthenes ah kheh pom dang atsia, thukhennak zung mai ah vaatdek dang si. Sinapikhaw Gallio in tsimi kheh heisiar sak ngawl si. ¹⁸ Paul ah kheh Korin ah reipi a tsaam zawh in, u le nau te kheh zam atsia Priscilla le Akuila te nupa thaw timbaw to in Syria ram ah hawh si. Khenkhiria khaw ah a leng phangin Pathian nenah thu a kam saak bangin a lukolh in a sam vol si. ¹⁹ Efesa khaw ah a leng phangin Priscilla te nupa kheh zam atsia, sinakok ah hawh in Jew te thu relpi si. ²⁰ Jew te’n rei sawndoh tsaam rih tu in khaam pelh in, nuam ngawl si. ²¹ Amahni kheh nukset in, "Jerusalem ah puah pal tuh puai heh kal kultsaam sing. Pathian in a siang a silekhaw, nang nenah hawh leh tu sing," ti’n ti atsia, Efesa pin timbaw to in hawh si. ²² Sisaria khaw ah a leng phangin hawhso atsia, pawlpi te kheh nukset in Antiok khaw ah hawhsuk si. ²³ Antiok khaw ah khawthu po a tsaam zawh in thawn atsia, Galati ram le Frigia ram sung tehem ah hawh atsia, ningluntu tehem kheh thape tseihzel si. ²⁴ Tsimi hun in Alexandria khaw pin suak, thurel thiam ngai le Laithiangrim talensek in a theitu, Jew te Apollos ah kheh Efesa khaw ah leng si. ²⁵ Amah heh Bawipa lamzin thu phatakno in zirhnak si ongla si. Amah hen Johan niimnak bek thei sipelh in, Bawipa thu te kheh thinkarh ngai in rel atsia maan ngai in zirh si. ²⁶ Tsimi manin sinakok ah raalpha ngai in thurel si. Tsimi thu kheh Priscilla ah le Aquila te’n a thei phangin, amah kheh mun dang ah huai kawm atsia, Pathian lamzin thu kheh maan sawn ngai in reltsiang si. ²⁷ Apollos ah kheh Akhaia ram ah hawh tu in tuum atsia, ningluntu te’n amah a saang tuh in u le nau te’n laikuat ken si. A leng phangin lainatnak thawmin umtu tehem kheh nase ngai in bawm si. ²⁸ Heimansim tiphangin Jesuh ah heh Khrih a si lam heh Laithiangrim sunga muh in mipi mai ah Jew te kheh raalpha ngai in o thei si.

¹ Tsin, tibang hen thiltsang si. Apollos ah kheh Korin khaw ah a om lai in, Paul ah kheh mual vum ram ah khualvak in, Efesa khaw ah lengsuk atsia ningluntu pawlkhat te tawk si. ² Paul in amahni kheh, "Nang um zawh in Raula Thiangrim ngah la utsim maw?" ti’n ti si. Amahni’n, "Raula Thiangrim a om lam riang thei ngawl si ung," ti’n ti si. ³ Paul in amahni kheh, "Asi lekhaw hei niimnak sang si utsim?" ti’n ti si. Amahni’n, "Johan niimnak si," ti’n ti si. ⁴ Paul in, "Johan in a ning pin a lengtu Khrih Jesuh ah um tu in mi te kheh rel thah in sual sirnak niimnak thaw niim miau si," ti’n ti si. ⁵ Amahni’n me thu heh a za phangin, Bawi Jesuh ming in niim dang si. ⁶ Tsin, Paul in amahni lu vumah a kut suan atsia, Raula Thiangrim kheh amahni vumah leng in, awn dang in awn daang atsia profet bangin thu rel dang si. ⁷ Amahni heh a vaseng in patsang tep leinih lun si dang si. ⁸ Tsin, Paul ah khen sinakok ah hawh atsia, lathum sung raalpha ngai in thurel in Pathian uknak thu te kheh mi te reelpi in zol si. ⁹ Sinapikhaw mi pawlkhat te’n thinkho in um nuam ngawl atsia, mipi mai ah a thu zirhnaka Lamzin thu kheh relse dang si. Tsimita Paul in amahni kheh zam atsia, ningluntu te kheh mun dang ah huai in Tyrannus thuzirnak ah thureelpi si. ¹⁰ Tsimi bangin kumnih sung per si. Tsimi manin Asia ram khen sungah a om tehem Jew te le Gential te’n Bawi Jesuh thu kheh za si. ¹¹ Tsin, Pathian in Paul kut mang in khumnung dangsa ngai in naper si. ¹² Paul mangnak pavua le vaivuak puan te kheh le atsia, minaa te vumah a koih phangin a natnak te kheh dam in raula sesuak te khen amahni sung pin suak si. ¹³ Tsimi phangin mun hem ah khualvak atsia phuisam in raula sesuak te a hawl tseih vengtu Jew pawlkhat te’n raula sesuaka zingnak te vumah Bawi Jesuh ming saal in, "Paul phuangnak Jesuh thawmin suak tu in thu na pe sing," ti’in ti si. ¹⁴ Jew te suangbawi ber Skeva tsapa pasarih te’n tsimi bangin puah si. ¹⁵ Raula sesuak khen amahni kheh o atsia, "Jesuh ah thei sing. Paul ah khen thei sing. Nangmahni heh tu te si utsim?" ti’n ti si. ¹⁶ Raula sesuaka zingnak pa’n amahni kheh nom atsia, nuai reih in neh si. Tsimi manin amahni kheh tsangte in le maliam kuai in inn sung pin dan dang si. ¹⁷ Me thu heh Efesa khawa Jew tehem le Grik tehem in za ten in, kih ngai dang atsia Bawi Jesuh ming kheh a veksen in ultung dang si. ¹⁸ Umtu mi tampi te’n hawh atsia, a sual te phuang in a puah awngnak te kheh rel si. ¹⁹ Dawi thiam tampi te’n amahni laibu te ten kheh keng atsia, mi hem mitmuh ah hal dang si. Amahni’n a man a tuat phangin a veksen in ngun tangka thawngsawmnga man si. ²⁰ Tsimita Bawipa thu kheh nase ngai in thang atsia neh si. ²¹ Me zawh hen Paul in Masidonia ram le Akhaia ram ah a hawh tselh phangin Raula in Jerusalem ah hawh tu in tuum in, "Jerusalem ah ka hawh tselh phangin Rom khawpi ah hawh meek tulai sing," ti’n ti si. ²² Tsimi manin amah tuamlawmtu Timote ah le Erastus te kheh Masidonia ram ah hawh tiar in, amah heh Asia ram ah dawmlai om beetlai si. ²³ Me hun lai in Lamzin thu manin buainak lianpi suak si. ²⁴ Heimansim tiphangin ngun pumsutu Demetrius in Artemis milim temple kohno puah in, kutthiam te kheh a miat tampi ngah tiar si. ²⁵ Ama’n kutthiam te le amahni bang thiamnak nei in na a pertu te kheh ko khawm atsia, "Rual te, me napernak pin kei hausa heh nang thei saak si. ²⁶ Tsimi zo ngawl nang mu saak le nang za saak bangin Efesa khaw bek ah si ngawl in, Asia ram veksen dawn petpet ah me Paul ah hen, kut in puahnak te heh pathian si ngawl si, ti’n minung tampi zol zo in ama lam ah her zo ongla si. ²⁷ Tsimi manin me kei naper heh a ming se bek zo ngawl, Asia ram minung tehem le leivum minung tehema benak a maklek Artemis nuthian temple khen heh zohsuamnak si tu in, a ming thangnak khen siatsuahnak si tula heh launung meek si." ²⁸ Amahni’n tsimi thu a za phangin thinraw ngaingai dang in, "Efesa te Artemis heh mak si!" ti’n au tuptup dang si. ²⁹ Tsimi manin khawpi sung hem buaibung in, Gaius ah le Aristarkhus ah kheh pom in sel puai puahnak munah hawh hu dang si. Gaius ah le Aristarkhus ah heh Masidonia te si in, Paul in khual a vakpinak te si. ³⁰ Paul ah khen mihonpi te nenah hawh tu in a tuum phangin, ningluntu te’n siang ngawl si. ³¹ Asia rama thu neitu a rualpi te’n puai puahnak munah hawh himhim tuh ngawl in mi leh atsia kun dang si. ³² Mihonpi te kheh mi honkhat te’n thu pakhat au in, a dang honkhat te’n thu hin dang a au manin, buaibung dang si. Mi tampi te’n hei thu manin a khawm dang, ti khen thei nge ngawl si. ³³ Amahni’n mihonpi te lak pin Alexander ah kheh kaisuah atsia, Jew te’n mailam ah tul si. Ama’n a hung tsawmnak thu rel nuam in mipi te kheh a kut zaar si. ³⁴ Sinapikhaw mipi tehem in amah kheh Jew te a si lam a thei phangin, "Efesa te Artemis heh mak si," ti’n naazi panih sung lai au dang si. ³⁵ Khawpi lai ngantu khen mipi te kheh meng tiar atsia, "Efesa khaw te, Efesa khawpi heh a nase Artemis nuthian temple le Zeus nen pin a tsersuk a milim kelentu a si lam a thei ngawl tu om si utsim? ³⁶ Tsimi manin me thu heh el khop ngawl a si lekhaw mengdeen ula, au thong thong tseih men mah na un. ³⁷ Me nang huainak te heh temple phultu te si ngawl in, nang nuthian relsetu te khen si ngawl si. ³⁸ Tsimi manin Demetrius ah le a naperpi kutthiam te’n mi tangtaih tuh a nei a si lekhaw, thukhen zung om in khawpi uktu khen om reng si. ³⁹ Sinapikhaw thu dang rel tuh nang nei a silekhaw, a daan bangin thurel khawmnak ah nang rel tuh si si. ⁴⁰ Tunia buainak man hen thu kannak kei si tu launung si. Sullelam nei ngawl in kei khawm dangnak heh heimaan si ti rel tuh heimah nei ngawl si sing," ti’n ti si. ⁴¹ Me thu te heh a rel tselh phangin, mipi te kheh hong tiarberh si.

¹ Thunok a bo phangin Paul in ningluntu te kheh ama nenah ko atsia, a nukset tselh phangin Masidonia ram ah hawh si. ² Tsimi ram ah khualvak tseihzel in, thu tampi rel in thape si. Tsimi zawh in Grik ram ah hawh si. ³ Grik ram ah lathum sung om si. Timbaw to in Syria ram ah a hawh tula kheh Jew te’n a pang manin Masidonia ram lam tawnin hawh tu in thu ten si. ⁴ Berea ramte Sopater ah, Thesalon khawte Aristarkhus ah le Sekundus ah, Derbe khawte Gaius ah, Timote ah, le Asia ramte Tykhikus ah le Trophimus te’n Asia ram tian lun dang si. ⁵ Me te hen hawh ham atsia, Troas khaw pin ngak kei si. ⁶ Keimahni heh Tsol Phulh ngawlnak Sang Puai tselh phangin Filipi khaw pin timbaw to in hawh si ung. Ni nga zawh in amahni nen Troas khaw ah leng si ung. Troas khaw ah ni sarih tsaam dang si ung. ⁷ Nipi khat sunga ni masa ber ni in ningluntu te kheh sang hem dang tu in pumkhawm dang si. Paul ah heh a thaizing in a thawn tula manin zan laitum tian in thurel tseihtseih si. ⁸ A pumkhawm dangnak vumta khan ah meiinn tampi vaar si. ⁹ Eutykhus ah tinak dangvalpa kheh khamleng ah to in, eihmu sung tseih si. Amah kheh eihmu ur leita in, Paul thurel tseih lai in, inn thuahthumnak pin da atsia, a thisaak kheh zawngso dang si. ¹⁰ Paul ah kheh tsuarsuk in, a vumah bok atsia, huampek in, "Nang thintsawl mah na un. Ama sungah nungnak om reng si," ti’n ti si. ¹¹ Paul ah kheh kaiso leh in, sang hem atsia ei dang si. Khawvar tian in reipi thurel in, amahni nen pin thawn si. ¹² Amahni’n dangval pa kheh a nung in huai in, thinnuam ngai dang leh si. ¹³ Keimahni heh timbaw to in Assos khaw ah hawh ham si ung. Assos khaw pin Paul ah heh timbaw to tiar tu in tuum si ung. Paul, amah heh Assos khaw ah kawng in hawh a tuum manin tsimi bangin a tinak si. ¹⁴ Assos khaw pin kei tawk dun leh phangin amah kheh timbaw to tiar in, Mitylin khaw ah hawh si ung. ¹⁵ Tsimi pin hawh dang lehleu atsia, thaizing in Khios tikulh ah leng si ung. A thaizing in Samos tikulh ah leng in, Trogyllium leizum ah tsaam si ung. Tsimi thaizing in Miletus khaw ah leng si ung. ¹⁶ Paul ah hen Asia ram ah reipi tsaam a tuum ngawl manin Efesa khaw kheh leek men tu in tuum si. A tsang thei a si lekhaw Pentikost ni kal in Jerusalem ah leng ot si. ¹⁷ Miletus khaw pin Efesa khaw ah mi leh atsia pawlpi upa te kheh ko tiar si. ¹⁸ Efesa pawlpi upa te a leng dang phangin Paul in, "Asia ram ah ka leng masa ber ni pin pan nangmahni lak ah ka om sung hem ka omdan kheh thei si utsi. ¹⁹ Thintsualnak hem le mitti tampi luang thahlam in, Jew te a maan ngawl in phiarnak le tsuulnak te tuar thahlam in Bawipa na kheh per sing. ²⁰ Nangmahni phatnak tsa in heimah siitnak nei ngawl in, mi zapi mai ah le innkhat zawh innkhat ah thurel in ka zirh tseih lam te, le ²¹ Pathian lam ah sualsirnak le kei Bawipa Jesuh Khrih lam ah umnak a nei tuh in Jew te le Grik te nenah ka tetti khannak te heh nang thei saak si. ²² "Ngai un, tuhen Raula in Jerusalem ah hawh tu in kai ka si. Jerusalem pin ka vumah a leng tuh thil heh thei ngawl sing. ²³ Thiarri tawidun in hennak le harsanak bekbek in ngak ka si, ti bek heh Raula Thiangrim in khaw hem ah a thei tiarnak si. ²⁴ Sinapikhaw Pathian lainatnak thuthang pha tettikhan sing. Bawi Jesuh nen pin ka ngahnak nasiam heh ang ngai in ka lamlen theinak tuh in, ka nungnak khen pamheih ngawl sing. Tsin, me rimnak te hen thing zo ngawl ka si. ²⁵ "Ngai un, tuhen Pathian uknak thuthang pha ka relnak nang vaseng in kontik khen ka mel nang mu leh tu ngawlla lam heh thei sing. ²⁶ Tsimi manin mi hema thisen pin thiang sing, ti’n tuni hen tettikhan sing. ²⁷ Pathian deihnak hem rel tu heh pial ngawl sing. ²⁸ Pathian in ama thisen in a leinak ama pawlpi kelen tu in Raula Thiangrim in huaitu si tu in amahni lak pin a dengnak te nang si manin, nangmahni le tuu hon hem tsa in tsimkom ta un. ²⁹ Heimansim tiphangin ka kiang zawh in nangmahni lak ah ne rihse te luut akhaw, tuu hon te heh hawi nom tu ngawl si, ti heh thei sing. ³⁰ Ningluntu te kheh amahni lam ah huai nuam in thumaan ngawl reltu te heh nangmahni lak pin suak tu si, ti khen thei meek sing. ³¹ Tsimi manin tsimkom ula, a sun a zan tsawl ngawl in kumthum sung biat mitniraw thahlam in nang vaseng ka zirhnak thu te la phawk reng ta un. ³² "Tuhen, u le nau te, Pathian nenah le ama lainatnak thu ah nang aap sing. Ama lainatnak in nangmahni heh khangso tiar thei tu atsia, mithiang tehem lak ah roluahnak pe tu nang si. ³³ Tumaha sui le ngun le vansilh te ot ngawl sing. ³⁴ Si si, keimah le keima nenah a omtu te kulnak tehem me kut te’n a pe lam heh nangmahni rori in nang theiseknak si. ³⁵ Tsimi bangin nangmahni khen keima bangin naper atsia, thaneem te nang bawm theinak tuh in le ’Ngah lam tah in pe lam heh muitsu dong sawn si,’ ti’n Bawi Jesuh thu nang phawk reng theinak tuh in heizongza ah nang muh ongla sing," ti’n amahni kheh rel si. ³⁶ Me thu te heh a rel tselh phangin khuk tsaitsen atsia amahni tehem thaw sawngen si. ³⁷ A vaseng in kap dang in Paul ah kheh a ngawng pin kuah atsia thuut dang si. ³⁸ A lungse dangnak heh Paul in amahni kheh ama mel mu awngkel leh tu ngawlla in a rel manin si ber si. Tsin, amahni’n timbaw tsawl min tian in la dang si.

¹ Tsin, tibang hen thiltsang si. Amahni nen pin kiang atsia, timbaw to in Koos tikulh ah hawh phet si ung. A thaizing in Rhodes tikulh ah leng in, tsimi pin Patara khaw ah hawh si ung. ² Fonisia ram ah hawh tu timbaw tawk dang in, tsimi timbaw to in hawh dang si ung. ³ Saipras tikulh kei mu phangin kehlam pin heel atsia leekper in, Syria ram ah hawhper si ung. Kei tonak timbaw heh a phurnak van te leh kul a si manin Tyre khaw ah tsawl si ung. ⁴ Tyre khaw ah ningluntu te tawk in ni sarih biat tsaam si ung. Raula relnak bangin amahni’n Paul ah kheh Jerusalem ah hawh nom tu ngawl in rel dang si. ⁵ Ni sarih zawh in amahni nen pin kiang in hawh dang si ung. A vaseng in a zi a tsa te thaw khaw pulam tian in la kei si. Tsin, tipi kung ah khuk tsaitsen in sawngen dang si ung. ⁶ Nukset dun kei tselh phangin timbaw vumah kai dang si ung. Amahni khen inn ah hong dang si. ⁷ Tyre khaw pin Ptolemais khaw ah kei leng phangin, tipi vumah kei khualvaknak tselh si ung. Ptolemais khaw ah u le nau te nukset in amahni nenah nikhat tsam dang si ung. ⁸ A thaizing in keimahni Paul khualvakpinak te’n Ptolemais khaw pin kiang dang in, Sisaria khaw ah leng dang atsia, pawlpi upa pasarih lak ah a peh, thuthang pha reltu Filip inn ah lut in tsam dang si ung. ⁹ Filip in profet bangin mailam thu phuang thei tsanu khangngai thiamlawh pali nei si. ¹⁰ Ni reipi kei tsam zawh in Agabus ah tinak profet pakhat kheh Judea peng pin lengsuk si. ¹¹ Keimahni nenah a leng phangin Paul elkilh kheh lesak atsia, a kut le a kawng hen tsawm in, "Raula Thiangrim in, ’Me bang hen Jerusalem khaw a Jew te’n me elkilh neitu heh hen atsia Gential te nenah aap tu si,’ ti si," ti’n ti si. ¹² Me thu heh kei za phangin keimahni le Filip inn ah a omtu tehem in Paul ah kheh Jerusalem ah a hawh nom tuh ngawl in kun dang si ung. ¹³ Tsimi phangin Paul in, "Kawti kap dang tseih in ka thinlung tsim tiar si utsim? Bawi Jesuh ming in Jerusalem ah hennak bek si ngawl in, thi tu in ralringlep meek sing," ti’n o si. ¹⁴ Kei zawl zo ngawl phang in, "Pathian thuthu si tasen," ti’n ti dang in amah zawl tseih kheh ta dang si ung. ¹⁵ Tsimi zawh in kei van te puah in Jerusalem ah hawh dang si ung. ¹⁶ Sisaria khawa ningluntu pawlkhat te zawkpi si ung. Amahni lak ah ninglun masa pawl Saipraste Mnason ah khen peh deve si. Amah heh Jerusalem ah kei zindung min tuh si. ¹⁷ Jerusalem ah kei leng phangin u le nau te’n ang ngaino in vaimuak kei si. ¹⁸ A thaizing in Paul ah heh keimahni thaw Jeim nenah hawh si. Jeim inn ah upa tehem om dang si. ¹⁹ Paul in amahni nukset a tselh phangin nasiam a pernak manin Gential te nenah Pathian puahnak thil tehem kheh kimsekno in rel si. ²⁰ Amahni’n a za phangin Bawipa thangphat dang si. Tsin, amahni’n, "Kei nau Paul, umtu Jew te heh thawng kawzah om ti le amahni tehem heh daan lunnak ah mi zuam ngai te a si lam heh na theisek saak si. ²¹ Sinapikhaw Gential te laka Jew tehem in a tsa te kheh vunrel ten tu ngawl in le pupa te daan bangin nung tu ngawl in na relnak le Mawsi Daan han tu in na zirhnak te kheh amahni’n thei ongla si. ²² Kawti’n ti a sing im? Na leng lam heh amahni’n thei tu a si manin, mipi khawm dang ken tu si. ²³ Tsimi manin kei relnak heh puah in. Thukam a puah tu mi pali nei si ung. ²⁴ Amahni heh huai la, amahni thaw thiangnak puah ta un. Amahni sam vol man khen pesak ten. Nangmah rori hen daan lun atsia, daan thu bangin na nung lam heh mi tehem in thei atsia, nangma thu a theinak te heh heimah ngawl men a si lam kheh amahni’n thei tu si. ²⁵ Umtu Gential te heh milim bawlnak sa te, ramsa thisen te, ngawng het in reeknak sa te le nu le pa sual puah te a tsang siar ngawl thil dang te heh a tsang tuh ngawl in thu ten atsia lai khen kuat ongla si ung," ti’n rel dang si. ²⁶ Paul in me pali te heh huai atsia, a thaizing in amahni si thiangnak puah si. Tsin, thiangnak puah ni te a kim hun tuh rel tu in temple reen sungah lut si. Tsimi hun in amahni pakhat ten tsa bawlnak pe tu si. ²⁷ Ni sarih a kim tuzep phangin, Asia rama Jew te’n temple reen sunga Paul ah kheh mu si. Amahni’n mipi tehem kheh buai tiar atsia, Paul ah kheh pom dang si. ²⁸ Amahni’n, "Israel te, kei bawm un. Me pa heh kei mipi te do atsia, daan le me Mun Thiangrim heh do in ram hema minung tehem a zirhtu pa si. Tsimi bek zo ngawl temple reen sungah Grik te lut tiar in me Mun Thiangrim heh baal tiar si," ti’n ti dang si. ²⁹ Heimansim tiphangin Efesa khawte Trofemus ah kheh khaw sungah mu ongla in, amah kheh Paul in temple reen sungah huai bel tu in ruat dang si. ³⁰ A khawsen in buaibung in, mipi te kheh dan dang in Paul ah kheh pom atsia, temple reen pulam ah kai dang in, kongkham te kheh khamberh si. ³¹ Paul ah kheh reek a tuum dang lai in, Jerusalem khawsen in a buaibung thu kheh Jerusalem kiltu garrison tinak raalkap honkhat uktu Rom raalkap bawi ber pa’n thei si. ³² Ama’n raalkap te le raalkap honkhat uktu raalbawi te kheh huai in dansuk nawmnawm dang si. Mipi te’n raalbawipa le raalkap te a mu phangin, Paul ah a vaat tseih kheh tawp si. ³³ Raalbawi pa’n Paul ah kheh zuan ter nom in, pom atsia thiarri tawidun panih in hen tu in thupe si. Tsin, ama’n Paul ah kheh tu si, ti le hei a puah, ti dong si. ³⁴ Mipi te lak pin pawlkhat te’n thu pakhat au atsia, a dang te’n thu dang au si. A au tuptup dang manin raalbawi pa’n thumaan thei zo ngawl si. Tsin, Paul ah kheh raalving sungah huai tu in thupe si. ³⁵ Kaipom ah a leng phangin mipi te’n a bur leita manin, raalkap te’n amah kheh tsawiso dang si. ³⁶ Mihonpi te’n amah a lun thahlam in, "Reek un," ti’n au dang si. ³⁷ Raalving ah huai tu in a tuum phangin Paul in raalbawipa kheh, "Na awnpi thei ang maw?" ti’n ti si. Raalbawi pa’n, "Grik awn thiam si tsim maw? ³⁸ Nangmah heh raaltho atsia tualreektu minung zali te hampalak ah a huai awngtu Izip te la si ngawl si tsim maw?" ti’n ti si. ³⁹ Sinapikhaw Paul in, "Keimah heh Jew miphun si in, Silisia ram Tarsus khawte sing. Ka om min khaw heh khaw menmen si ngawl si. Na kun sing; mipi te nenah thurel ka siang in," ti’n ti si. ⁴⁰ Paul ah kheh thurel khuan pe si. Paul in kaipom ah ding atsia mipi te kheh a kut zar in, mipi te a meng phangin Hebru awn in thurel si.

¹ Paul in, "Nangnihni ka u le ka nau te le ka pa te, tuhen nang mai ah ka hung tsawmnak heh ka ngai sak un," ti’n ti si. ² Hebru awn in a awn kheh a za dang phangin mipi te kheh meng sawndoh si. ³ "Thu ngai in ti le singkhaw keimah heh Jew miphun sing. Silisia ram Tarsus khaw pin suak sing. Sinapikhaw nai khaw pin hen khang atsia, Gamaliel kawngbul ah a zirtu pa sing. Kei pa te daan heh tsiltsang ngai in zirhnak sing. Tunia nang veksen bangin Pathian lam ah mi zuam ngai si deve sing. ⁴ Me Lamzin thu a lun tu te heh thi tuh tian in erh atsia, nupang le mipa neih ngawl in hen atsia thawng tohberh sing. ⁵ Suangbawi ber le khawnsel upa tehem heh ka tetti si. U le nau te pe tuh in amahni nena lai ngah in, Damaskas khawa umtu te kheh kolkhah atsia tsawh tuh in Jerusalem ah huai tu in Damaskas khaw ah hawh sing. ⁶ "Tsin, tibang hen thiltsang si. Ka hawh tseih lai in, sun laitak in Damaskas khaw ah ka leng dawn ongla phangin, makhat in van pin vaarnak maktak tak in ka kawnvel hem deet si. ⁷ Keimah heh lei ah du atsia, aw pakhat in, ’Saul, Saul, heita ka erh si tsim?’ ti’n ti ka si. ⁸ Tsimi phangin, ’Bawipa, tu si tsim?’ ti’n o sing. Ama’n, ’Keimah heh na erh tseihnak Nazareth khawte Jesuh ah sing,’ ti’n ti ka si. ⁹ "Ka hawhpinak te’n vaarnak kheh mu in kih ngai dang si. Sinapikhaw keimah awnpitu pa aw heh za dang ngawl si. ¹⁰ Tsimi phangin, ’Bawipa, hei puah tu sing im?’ ti’n dong sing. Bawipa’n, ’Tho la, Damaskas khaw sungah hawh ten. Na puah tuh in nangma tsa teeknak tehem relsek tu na si,’ ti’n ti si. ¹¹ Tsimi vaarnak tsungnung manin khaw mu ngawl sing. Ka hawhpinak te kainak in Damaskas khaw sungah hawh sing. ¹² "Tsimi ah daan thu bangin Pathian lam ah a zuam ngai tu Ananias ah om in, amah heh Damaskas khaw sungah om Jew miphun tehem in a ziap ngainak si. ¹³ Ama’n ka nenah hawh in ding atsia, ’Ka nau Saul, khaw mu leh in,’ ti’n ti ka si. Tsimi hun rori in amah kheh panso sing. ¹⁴ Tsimi phangin ama’n, ’Kei pa te Pathian in ama deihnak thei thei atsia, midik pa mu tu in le ama kam pin a suak aw za tu in deng na si. ¹⁵ Heimansim tiphangin na munak te le na zanak te heh mi hem nenah ama tetti si tu si tsi. ¹⁶ Hei manin ngak reng si tsim? Tho la, niim in. Tsin, Bawipa ming ko in na sual te somtsiang in,’ ti’n ti ka si. ¹⁷ "Tsin, tibang hen thiltsang si. Jerusalem ah hawh leh in temple ah saw ka ngen lai in zialnak si sing. ¹⁸ Tsin, Jesuh ah mu sing. Ama’n, ’Keima thu tetti na khannak amahni’n a saang tu ngawl manin, nawhnah ngai in Jerusalem pin suak la, zam nawmnawm in,’ ti’n ti ka si. ¹⁹ Tsimi manin, ’Bawipa, nangmah a umtu tehem kheh thawng toh atsia, sinakok pin ka vaat lam heh amahni’n thei si. ²⁰ Na tetti Stefen ah thisen a suah dang lai in, a thi heh lungkim in amah reek tseihtu te vansilh hem keem sak in amahni kung ah ding deve sing,’ ti’n ti sing. ²¹ Tsimi phangin ama’n, ’Hawh ten. Nai pin hen khawlapia Gential te nenah na leh tu sing,’" ti’n ti ka si. ²² Me thu heh a rel tian hen mipi te’n ngai dang si. Tsin, amahni’n ring ngai in au in, "Ti bang mihing heh leivum pin pai tiar ta un. Nung tu in taak ngawl si," ti’n au dang si. ²³ Amahni khen a au thahlam in a vansilh te suah atsia, huih lak ah leivul te thehso dang si. ²⁴ Raalbawi ber pa’n Paul ah kheh raalving ah huai tu in thupe si. Paul ah do in tizah lawmmam in a au dangnak heh heiman si, ti thei nuam in savun rihual thaw in vaat atsia thudong tu in ti si. ²⁵ Paul ah kheh savun ri thaw in a hen tseih lai in, a kung ah a ding raalkap zakhat uktu raalbawipa kheh, "Rom miphun pakhat heh a sual thukhen sak ngawl in vaat men heh daan in siang si maw?" ti’n ti si. ²⁶ Tsimi Paul awnnak kheh raalkap honkhat uktu raalbawi pa’n a za phangin, raalbawi ber nenah, "Na puah tuh heh ralring in. Me pa heh Rom miphun si," ti’n ti si. ²⁷ Raalbawi ber pa khen Paul nenah hawh atsia, "Rom miphun si tsim maw? Ka rel in," ti’n ti si. Paul in, "Si sing," ti’n ti si. ²⁸ Raalbawi berpa’n, "Rom miphun sinak ka ngah theinak tuh in tangka tampi pe sing," ti’n o si. Tsimi phangin Paul in, "Keimah heh Rom miphun in piang sing," ti’n ti si. ²⁹ Tsimi phangin amah thudong kantu tehem kheh ama nen pin dan dangberh si. Raalbawi berpa’n Paul ah kheh Rom miphun a si lam a thei phangin le a hen manin thinphu ngai leh si. ³⁰ A thaizing in raalbawi berpa’n Paul ah kheh Jew te’n hei manin sual zei si tu, ti thei nuam in, suangbawi te le Sanhedrin tehem ko si. Paul ah kheh a hennak thiarri te suut sak in huai atsia, amahni mai ah ding tiar si.

¹ Tsimi phangin Paul in Sanhedrin kheh er po in pan atsia, "U le nau te, tuni tian in Pathian mai ah pha le se theinak lungmu pha hem thaw in nung sing," ti’n ti si. ² A kung ah a dingtu pa kheh suangbawi ber Ananias in a kam beng tu in thupe si. ³ Tsimi phangin Paul in amah kheh, "Sii ngo thuhnak bang thaw bangve nangmah heh Pathian in na beng tulai si. Nangmah hen daan thu bangin keimah heh thukhen tu in to si tsim. Daan thu thaw kalh dun in keimah beng tu in thupe si tsi maw?" ti’n ti si. ⁴ A kung ah a dingtu pa’ n, "Pathian suangbawi ber heh zohsuam si tsim maw?" ti’n Paul ah kheh ti si. ⁵ Tsimi phangin Paul in, "U le nau te, amah heh suangbawi ber a si lam heh thei ngawl sing, ’Na minung te a uktu vumah awn pha ngawl awn mah nen,’ ti’n ngannak om si," ti’n ti si. ⁶ Paul in khawnsel laka pawlkhat te heh Sadusi te si in, pawlkhat te heh Farasi te a si lam kheh a mu phangin Sanhedrin te kheh, "U le nau te, keimah heh Farasi pakhat si in, Farasi pa tsapa ka si thahlam in, limdiknak le mithi te tholehnak thu manin thukhennak tuar sing," ti’n ti si. ⁷ Paul in me thu heh a rel tselh phangin Farasi te le Sadusi te kheh nase ngai in sol dun in a khawm dang te kheh khen dun si. ⁸ Heimansim tiphangin Sadusi te’n, tholehnak om ngawl si. Vanvummi om ngawl in raula khen om ngawl si, ti’n ti si. Farasi te’n a panih in om si, ti’n ti si. ⁹ A sol dunnak a nase leita ongla phangin Farasi te pom zawng a pomtu Daan zirhtu te’n ding atsia, nase ngai in el in, "Me pa pha ngawlnak heimah tawk ngawl si ung. Raula in maw vanvummi in maw amah heh a awnpi a si lekhaw, Pathian heh tawng awl ala sing," ti’n ti si. ¹⁰ A sol dunnak a nase leita ongla phangin, raalbawi berpa khen amahni’n Paul ah kheh a botreih dang khatu a lau manin, raalkap te kheh tsuarsuk tu in thupe atsia, amahni laka Paul ah kheh sutlok in raalving sungah huai tiar si. ¹¹ A thaisim in Bawipa kheh Paul kung ah ding atsia, "Paul, muiliimno in om in. Keimah heh Jerusalem ah tetti na khan bangin, Rom ah khen ka tetti si tu si tsi," ti’n ti si. ¹² Khawvar phangin Jew te’n aihual dang atsia, Paul ah a reek ngah ma hem lai ei tu ngawl in tsial tsawm dang si. ¹³ A aihual kuhtu te heh minung sawmli val si dang si. ¹⁴ Amahni’n suangbawi te le upa te nenah hawh dang atsia, "Paul ah kei reek ngah ma hem lai ei tu ngawl in nase ngai in tsial tsawm si ung. ¹⁵ Tsimi manin tuhen nangmahni le Sanhedrin te’n raalbawi ber pa kheh Paul ah heh thudong kan sawndoh rih tu in ti khel ula, thaizing in Paul ah kheh nangmahni nenah huai tu in ngen un. Keimahni’n a leng ma in reek tu in pang tula si ung," ti’n ti dang si. ¹⁶ Tsin, a pang lam kheh Paul tsernua tsapa in a za phangin, raalving sungah lut atsia, Paul ah kheh rel si. ¹⁷ Tsimi phangin Paul in raalkap honkhat uktu raalbawipa kheh a nenah ko atsia, "Me dangval pa heh raalbawi ber nenah huai ten. Ama’n thurel tuh nei si," ti’n ti si. ¹⁸ Tsimi manin raalbawi pa’n dangvalpa kheh huai atsia, raalbawi berpa nenah hawhpi in, "Thawngto Paul in keimah heh ama nenah ko atsia, me dangvalpa heh na nenah huai tiar ka si. Ama’n nangmah thurel tuh nei si," ti’n ti si. ¹⁹ Tsimi phangin raalbawi ber pa’n dangvalpa kheh a kut pin kai atsia mun dang ah hawhpi in, "Keimah thu na rel otnak heh hei thu sim?" ti’n dong kuh si. ²⁰ Dangvalpa’n, "Jew te’n Paul ah heh thudong kan sawndoh rih tu bangin thaizing in Sanhedrin mai ah huai tu in nangmah ngen dang tu in lungkim dang si. ²¹ Sinapikhaw minung sawmli val te’n lamlak pin pang atsia, a reek ngah ma hem ei tu ngawl in le in tu ngawl in tsial tsawm dang a si manin, amahni thu heh diksang kha po mah nen. Tuhen nangma nen pin thutiam bek ngak in ralringlep in om dang si," ti’n ti si. ²² Raalbawi ber pa’n dangvalpa kheh hong tiar in, "Keimah na relnak me thu heh tumah rel mah nen," ti’n thupe si. ²³ Raalbawi berpa’n raalkap zakhat uktu raalbawi panih te kheh ko atsia, "Raalkap zanih, sipuh raalkap sawm sarih le tseipi vong raalkap zanih te tu zan naazi kua phangin Sisaria khaw ah hawh tu in tiari tiar ham un. ²⁴ Paul ah heh a to tuh ramsa te pe ula, mangki Felix nenah himno in huai ta un," ti’n ti si. ²⁵ Raalbawi ber Lysias in me lai heh ken si: ²⁶ Klaudius Lysias in upat taak ber mangki Felix, ngai na rel sing. ²⁷ Me pa heh Jew te’n pom atsia, a reek tuum dang tseih lai in raalkap te thaw hawhsuk in, Rom miphun a si lam ka thei phangin kan leh sing. ²⁸ Amahni sual zeinak ber ka thei nuam manin amahni Sanhedrin mai ah huai sing. ²⁹ Tsimi phangin amahni daan thu thaw peh dun in sual zeinak a si lam thei ngah sing. Sinapikhaw sual a zei dangnak heh thihnak taak sualnak, a si ngawl lekhaw thawng toh taak sualnak heimah mu ngawl sing. ³⁰ Jew te’n amah heh a reek tuum lam ka thei phangin nangma nenah hawh tiar zep nom sing. Amah sual a zeitu te’n nangma mai ah a tangtaihnak thu a rel tu in thupe sing. Mangpha. ³¹ Raalkap te’n thupenak bangin Paul ah kheh huai in, zan lan in Antipatris khaw ah hawhpi si. ³² A thaizing in Paul ah huai tu in sipuh raalkap zanih te zam atsia, a dang te heh raalving ah hong leh dang si. ³³ Sisaria khaw ah a leng dang phangin mangki bawi nenah lai pe atsia, Paul ah kheh ama kut ah aap dang si. ³⁴ Mangki bawi in lai a siar tselh phangin, a suaknak khaw le ram dong atsia, Silisia ram te a si lam thei si. ³⁵ Uktu bawi in, "Nangmah tangtaihtu te a leng phangin, na thu heh ngai leh tu sing," ti’n ti si. Tsin, Paul ah kheh Praetorium tinak Herod innkhan sungah thawng toh tu in thupe si.

¹ Ni nga zawh in suangbawi ber Ananias ah kheh upa te le sihni Tertullus ah si Sisaria khaw ah lengsuk si. Me te hen Paul ah sual a zeinak thu kheh mangki bawipa nenah rel dang si. ² Paul ah kheh luut tiar atsia, Tertullus in sual a zeinak kheh rel si. Ama’n, "Keimahni heh na muh bangin thinnuam ngai in khawsa dang atsia, mailam thu sangpi na mubaannak thawmin me miphun heh heizongza ah khangso si. ³ Maisong bernak Felix, tsimi heh keimahni’n mun hem ah tso in na paak pittseih si ung. ⁴ Hei bang a si sikhen na ngai heh leita tuh ngawl in a tsomnak in ka relnak heh ngeihharnak in na ngaisak sawh tuh in na kun sing. ⁵ "Heimansim tiphangin leivum mun hema Jew tehem lak ah buainak suak tiartu me misualpa heh tawk ngah si ung. Amah heh Nazarenes pawl te huaitu luu ber si. ⁶ Temple riang heh nawngkai tiar a tuum manin, kei daan bangin amah heh pom si ung. ⁷ Sinapikhaw raalbawi ber Lysias ah leng atsia keimahni kuta heh sutlok si. ⁸ Lysias in amah tangtaihtu te’n nangma mai ah a thu rel tu in thupe kei si. Nangmah rori in thudong kansek la, me amah sual kei zeinak tehem heh theitsiang tu poh si tsi," ti’n ti si. ⁹ Jew te khehkhen me a relnak heh, maan si, ti’n ti dang si. ¹⁰ Tsimi phangin mangki bawipa’n Paul ah kheh thurel tu in a lutsik si. Paul in sihni pa awnnak kheh o atsia, "Me miphun te vumah kum reipi thu khentu na si lam ka thei manin, ang ngai in keima thu heh rel tu sing. ¹¹ Pathian be tu in Jerusalem ah ka leng heh ni leinih tah in tam rih tu ngawl si, ti heh na thei saak si. ¹² Me hun sungah hen temple reen sungah mipi thaw thu el dun tseih in ka om heh mu tu ngawl ka si. Tsin, sinakok ah maw khawpi sungah maw mipi a buai tuh in ka so tseih heh amahni’n mu tu ngawl ka si. ¹³ Tsin, tuhen keimah sual a zeinak te heh amahni’n tetti muh thei tu ngawl si. ¹⁴ Me heh na mai ah phuang tu sing. Amahni’n pawl pakhat in a koihnak Lamzin thu bangin, Daan bu sungah le Profet te laibu sungah ngannak tehem um in kei pa te Pathian heh be sing. ¹⁵ Midik le mi dik ngawl te a vaseng in thihnak pin tho leh tu si, ti’n Pathian ah limdiknak nei sing. Meheh amahni khen limdik deve si. ¹⁶ Me man hen keima pha le se khennak lungmu heh Pathian lam ah le minung lam ah mawhsiatnak ka si tuh ngawl in zuam veng sing. ¹⁷ "Kum reipi zawh, tuhen ka miphun te bawmnak pe tu in le Pathian nenah bawlnak pe tu in leng sing. ¹⁸ Temple ah mipi khawm dang om ngawl in, buainak khen ka puah ngawlnak sipelh in, thiangnak ka puah tseihlai kheh Asia rama Jew te’n mu ka si. ¹⁹ Keimah sual a nawnnak a om kha a si lekhaw, nai na mai rori ah hen a rel tuh sipelh si. ²⁰ A si ngawl lekhaw Sanhedrin mai ah ka ding lai in, ²¹ ’Mithi te tholehnak tuh thu pakhat manin tuni hen thukhennak tuar sing,’ ti’n ka aunak thu siar ngawl thilsual ka puahnak heh nai ah a om te’n a thei kha a si lekhaw rel sen," ti’n ti si. ²² Felix in me thu heh a za phangin, tsiltsang sawn ngai in Lamzin thu thei tu a si bangin, "Lysias ah a lengsuk phangin nang thu heh nang khen sak leh tu sing," ti’n ti atsia, sanang sak si. ²³ Felix in Paul ah kheh dongda ngai in koih atsia kil tu in raalkap zakhat uktupa kheh thupe si. Tsin, a rualpi te’n thil pe nuam in a veh sikhen kham tu ngawl in rel si. ²⁴ Ni dawmlai a rei phangin Felix ah kheh a zi Drusilla ah thaw leng in, Paul ah kheh ko atsia, Khrih ah umnak a relnak kheh ngai kawm si. Drusilla ah heh Jew te si. ²⁵ Paul in diktsangnak thu te, mah le mah keem tsawmnak thu te le a leng tula thukhennak thu te a relnak kheh Felix in a za phangin thinphu atsia, "Tuhen vang hawh leh tarih in. Hun ka ngah leh phangin na ko leh tu sing," ti’n o si. ²⁶ Tsimi lai in Paul in a luatnak tuh in tangka a pe tu kheh Felix in limdik si. Tsimi manin Felix in Paul ah kheh ko nomnom in thu relpi veng si. ²⁷ Sinapikhaw kumnih a rei phangin Felix ah kheh Porkius Festus in theek si. Felix in Jew te ang tiar a nuam manin, Paul ah kheh thawnginn sungah zam si.

¹ Festus ah kheh tsimi ram ah a leng zawh nithum a si phangin, Sisaria khaw pin Jerusalem ah hawhso si. ² Tsimi phangin suangbawi ber le Jew te huaitu upa te’n Paul ah sual a nawnnak te kheh ama nenah rel in, thu a ruat sak leh tuh in kun dang si. ³ Amahni’n lampi ah Paul ah reek tu in a pang lai in, Jerusalem ah a huai tuh in ngeihhar kun dang si. ⁴ Festus in o atsia, Paul ah heh Sisaria khaw ah thawng toh reng tuh a si thu le amah rori khen a rei ma in Sisaria khaw ah hawhsuk leh tu a si thu kheh amahni rel si. ⁵ Tsimi manin Festus in, "Nangmahni laka thuneitu te’n Sisaria khaw ah ka lunsuk sehla, me pa hen thilsual a puah le puah ngawl ka thei theinak tuh in a sualnak te rel sen," ti’n ti si. ⁶ Festus ah kheh amahni lak ah ni sawm val a tsam zawh in, Sisaria khaw ah hongsuk si. A thaizing in thukhennak tohkheng ah to atsia, Paul ah kheh thukhennak zung sungah huai tu in thupe si. ⁷ Paul ah kheh thukhennak zung sungah a luut phangin, Jerusalem pin a lengsuk Jew te’n ding atsia, nase ngai in sual nawn pelh in, tetti heimah nei ngawl si. ⁸ Paul in, "Jew te daan thu vumah maw temple vumah maw Sizar kumpibawipa vumah maw thilsual ka puahnak heimah om ngawl si," ti’n a luatnak tuh in awn si. ⁹ Sinapikhaw Festus in Jew te ang tiar a nuam manin, Paul ah kheh o atsia, "Jerusalem ah hawhso in me na thu heh relsak tu in deih tsim maw?" ti’n ti si. ¹⁰ Paul in, "Sizar kumpibawi berpa thukhennak mai ah ding sing. Tsimi thukhennak ah ka thu heh relsak awhnung sipelh si. Na thei seksaak bangin Jew te vumah thilsual heimah puah ngawl sing. ¹¹ Thilsual puahtu ka si manin maw thi taak sual ka puah manin maw a si lekhaw, thi tu heh heimah nopmawh ngawl sing. Sinapikhaw me te sual zeinak heh heimah ngawl men a si lekhaw, me te kut ah tumah in aap thei tu ngawl ka si. Sizar kumpibawi berpa nenah thuneiso tu sing," ti’n ti si. ¹² Festus in thu relpinak te kheh thu a relpi tselh phangin o atsia, "Sizar kumpibawi ber nenah thunei so tu si tsim maw? Sizar nenah hawh tu si tsi," ti’n ti si. ¹³ Ni dawmlai a rei phangin kumpibawi Agrippa ah kheh a zi Bernice ah thaw Festus ah leeng si. ¹⁴ Ni reipi a tsam zawh in Festus in kumpi bawipa nenah Paul thu kheh, "Felix zamnak thawng to pakhat om si. ¹⁵ Ama thu heh Jerusalem ah ka om lai in suangbawi te le Jew te huaitu upa te’n keimah rel in, a thu rel sak tu in kun ka si. ¹⁶ "Amahni kheh, ’Tutu sikhen tangtaihnak heh tang a taihtu thaw maitsang tsan in sual a zeinak heh rel atsia, tangtaihnak khen sual a nawnnak heh a o thei ma in reek heh Rom atsuzah daan si ngawl si,’ ti’n o sing. ¹⁷ Tsimi manin amahni heh sanang po ngawl in leng dang atsia, a thaizing in thukhennak tohkheng ah to in, Paul ah kheh huai tiar sing. ¹⁸ Amah tangtaihtu te ding atsia a sual a rel phangin, ka ruatnak bangin a sual heimah rel thei nge ngawl si. ¹⁹ A relnak heh amahni benak thu a el dunnak le mi pakhat, thi atsia, nung leh si, ti’n Paul in kho ngai in a relnak Jesuh thu a el dunnak te phang si men si. ²⁰ Tsimi thu a el dunnak heh ka thei tsiang ngawlnak a si manin, amah heh Jerusalem ah hawh in, tsimi pin me thu heh relsak tu in a nuam maw nuam ngawl dong sing. ²¹ Sinapikhaw Paul in kumpibawi ber Augustus thukhen tuh in thawng sungah khum rih tu in a ngen manin, Sizar Augustus nenah ka kuat thei ma hem khum rih tu in thupe sing," ti’n ti si. ²² Tsimi phangin Agrippa in Festus ah kheh, "Keimah rori in ama thu heh ngai nuam deve sing," ti’n ti atsia, Festus in, "Thaizing in ngai tu si tsi," ti’n ti si. ²³ A thaizing in Agrippa ah le Bernice ah kheh taangkhawmnak inn sungah tsungnung ngai in lut si. Amahni kheh raalbawi te le khaw sunga mi upa te’n lun dang si. Tsin, Festus in Paul ah kheh huai tu in thupe si. ²⁴ Festus in, "Kumpibawi Agrippa ah le keimahni thaw nai ah a omtu tehem, me pa heh mu si utsi. Amah heh Jerusalem-a mi bu le nai-a Jew tehem in, nung rih tu in taak leh ngawlla si, ti’n keima nenah a ngennak pa si. ²⁵ Keimah hen thi taak sual a puahnak heimah mu ngawl sing. Ama’n Augustus nenah thunei so tu in ngen atsia, hawh tiar tu in thu ten sing. ²⁶ Keimah hen ka bawipa nenah ngan tuh in ama thu heh tsiltsang ngai in theinak heimah nei ngawl sing. Tsimi manin amah heh nangmahni mai ah le a tsuangtsung in kumpibawi Agrippa, nangma mai rori ah huai sing. Thu na dong kan tselh phang bek in ama thu ngan tuh dawmlai nei thei tu sing. ²⁷ Heimansim tiphangin thawng to pakhat heh amah sual nawnnak tsiltsang ngai in thei ngawl in hawh tiar tu heh sullelam nei ngawl ngai in ruat sing," ti’n ti si.

¹ Tsimi phangin Agrippa in Paul ah kheh, "Nangma thu rel tsawm thei si tsi," ti’n ti si. Tsimita Paul in a kut kheh zar atsia, ama thu kheh tibang hen rel si. ² Paul in, "Kumpibawi Agrippa, tuni hen Jew te sual zeinak tehem thu thaw peh dun in keimah rori in na mai ah ka rel thei manin angnung ngai in ruat sing. ³ A tsuangtsung in Jew te tidaan tehem le thu el dunnak tehem a theisek tu na si manin, ang sawndoh lai sing. Tsimi manin thintsual ngai in na ngaisak tuh in na kun sing. ⁴ "A pan in Jerusalem-a ka phunpi te nenah le ka rualtsam te nenah ka nungdaan te heh Jew tehem in thei ka si. ⁵ Jew te benak ah pawl lak pin a kip ber Farasi pawl te nungdaan in ka nung lam heh tetti a khan nuam a si lekhaw, amahni’n tuma pah in a thei saak si. ⁶ Pathian in kei pa te thu a tiamnak heh ka limdik manin, tuhen ding in thukhennak si sing. ⁷ Keimahni nam leinih te’n zuam ngai in Pathian na heh a sun a zan in per atsia, me thutiam heh ngah tu in limdik si ung. Kumpibawi Agrippa, me limdiknak manin keimah heh Jew te tangtaihnak sing. ⁸ Mithi te heh Pathian in tho leh tiar tu si, ti heh hei manin um awhnung ngawl in ruat si utsim? ⁹ "Thu ngai in ti le singkhaw Nazareth khawte Jesuh ming thaw a lehngat dun thil tampi puah tuh in ruat awng sing. ¹⁰ Tsimi bangin Jerusalem ah puah sing. Suangbawi te nen pin siangnak lai ka ngah phangin, mi thiangrim tampi te kheh thawng tohberh in, reeknak a si phangin lungkimpi sing. ¹¹ Amahni kheh sinakok tehem ah tsawh atsia, Pathian kheh relse tiarlok veng sing. Amahni vumah ka thin a raw leita manin, ramdang khawpi tea riang kheh erh sing. ¹² "Tsimi bangin puah in suangbawi te nena thuneinak le natiarnak thaw in Damaskas khawpi ah hawh sing. ¹³ Maw kumpibawi pa, sun laitak in lampi ah keimah le khual ka vakpinak te kawnvel ah van pin ni tah in vaar sawn vaarnak kheh mu sing. ¹⁴ Kei vaseng in lei ah du dang in, ’Saul, Saul, heita ka erh si tsim? Molhzum sirh heh nangma tsa har tu si,’ ti’n awnnak aw le Hebru awn in a relnak kheh za sing. ¹⁵ "Tsimita, ’Bawipa, tu si tsim?’ ti’n ti sing. Ama’n, ’Na erh tseihnak Jesuh ah sing. ¹⁶ Sinapikhaw tho la ding in. Na mu saak thil te le nangmah ka muh tuh thil te tsa naper tu in le tetti khantu si tu in tuumnak manin na nenah lalh tsawm sing. ¹⁷ Jew te kut pin le Gential te kut pin na kan tu sing. ¹⁸ Gential te mit vaar tiar tu in le thimnak pin vaarnak ah nga atsia, satan huham pin Pathian huham sungah a nganak manin, sual zahnak a ngah tuh in tuhen amahni nenah na leh sing. Tsin, keimah a umnak thawmin thiang tiarnak te lak ah ro luahtu te a si theinak tuh in khen, tuhen amahni nenah na leh sing,’ ti’n ti ka si. ¹⁹ "Tsimi manin kumpibawi Agrippa, van pin lalhnak thu ngai ngawl in om men thei ngawl sing. ²⁰ Mi te’n a sual sir atsia, Pathian lam ah nga in sualsirnak thaw a phutua naper pha te per tu in Damaskas khaw ah rel masa ber sing. Tsin, Jerusalem ah le Judea peng sung hem ah, le Gential te nenah rel sing. ²¹ Me thu manin Jew te’n temple sungah pom atsia, reek tuum ka si. ²² Pathian in keimah a bawm manin, minung a lian le a koh te nenah tettikhan tu in tuni tian ding reng sing. Profet te le Mawsi in a leng tula a relnak thu te siar ngawl thu dang heimah rel ngawl sing. ²³ Tsimi thu heh, Khrih in mithi te lak pin tho masa ber a si theinak tuh in rimnak tuar atsia, Jew te le Gential te nenah vaarnak thu phuang tula si, ti heh si," ti’n rel si. ²⁴ Tihen Paul in amah hung tsawmnak thu a rel tseih lai in Festus in, "Paul, am ongla si tsi! Zir tam leitanak hen nangmah am tiar ongla si!" ti’n ti si. ²⁵ Sinapikhaw Paul in, "Upat taakber Festus, am nom ngawl sing. Thudik thu le ruat taak thu rel sing. ²⁶ Kumpibawi pa, me thu te heh thei reng si tsi, ti’n thinlung thiang ngai in rel meek sing. Me thil heh ningnawi pin puahnak a si ngawl manin, me thil te sung pin kumpibawipa thei ngawlnak heimah a om ngawl lam heh muang sing. ²⁷ Kumpibawi Agrippa, profet te relnak te heh um tsim maw? Na um lam thei sing," ti’n ti si. ²⁸ Tsimi phangin Agrippa in Paul ah kheh, "Khristian si tu in zawl zo dawnzep ka si tsi," ti’n ti si. ²⁹ Paul in, "Nangmah ruak si ngawl in tuni thu ka relnak a zatu tehem heh me thiarri thaw hennak siar ngawl in keimah thaw nang bang tuzep bek si ngawl in, keima bang si rori tu in Pathian nenah ngen sing," ti’n ti si. ³⁰ Me thu te heh a rel tselh phangin, kumpibawipa kheh tho in, mangki bawi le Bernice ah le amahni thaw a to dang tehem khen tho deve si. ³¹ Amahni kheh suak dang atsia, "Me pa hen thi taak le thiarri in hen taak sualnak heimah puah ngawl si," ti’n rel dang si. ³² Tsimi phangin Agrippa in Festus ah kheh, "Me pa hen Sizar nenah thu a nei so ngawl tsuk asin, suah men tuh sipelh si," ti’n ti si.

¹ Italy ram ah timbaw thaw in hawh tiar tu in thu tennak kei si phangin, Paul ah le midang thawng to te kheh Sizar Augustus kumpibawi bera garrison tinak raalkap honkhat uktu raalbawipa Julius kut ah aap si. ² Tsimita Adramyttium timbaw to in hawh si ung. Tsimi timbaw heh Asia ram tipi kung pin hawhper tu si. Masidonia rama Thesalon khawte Aristarkhus in lun kei si. ³ A thaizing in Sidon khaw ah leng si ung. Julius ah heh Paul vumah a pha ngai si. Paul ah heh a rualpi te nenah leeng in bawmnak te a ngah thei tuh in dongda ngai in om tiar si. ⁴ Timbaw to in kei hawh leh phangin keimahni lam ah huih a ra manin, Saipras tikulh been in hawh si ung. ⁵ Silisia ram le Pamfilia ram te tipi kheh tenper in hawh dang atsia, Lycia ram khawpi Myra ah leng si ung. ⁶ Tsimi khaw ah raalbawi pa’n Italy ram ah hawh tu Alexandria khawte timbaw tawk in, tsimi ah thawn tiar kei si. ⁷ Nawmhet in ni reipi kei hawh zawh in, zilhtsak ngai in Knidus khaw ah leng si ung. Huih ra daan a deihnung ngawl manin Krete tikulh been in hawh atsia, Salmone leizum pin hawh tenper si ung. ⁸ Harsa ngai in kei hawh zawh in, Lasea khawpi kunga timbaw tsawlnak Deihnung, tinak ah leng si ung. ⁹ Tsimi ah hun reipi tsaam si ung. Laitsang Puai tselh ongla atsia, tipi vumah khualvak heh a launung ngai ongla manin Paul in amahni kheh ruatnak pe si. ¹⁰ Paul in, "Rual te, tipi vumah khualvak lai le singkhaw timbaw le a phurnak van te a ral thong bek zo ngawl, kei nungnak tian in a ral thei harsanak maktak tak kei tawk khatu launung si," ti’n amahni kheh ti si. ¹¹ Sinapikhaw raalkap honkhat uktu raalbawi pa’n Paul ruatnak penak tah in, timbaw napertu te le timbaw neitupa thu kheh ngai sawn si. ¹² Tsimi timbaw tsawlnak heh khawsik hun sung omnak tuh in a nuamdoh ngawl manin, mi tam sawn in khawsik hun sung omnak nuam Krete tikulha timbaw tsawlnak Foenix ah hawh khokho tu in ruatnak pe si. Foenix heh nidanak langlam le nidanak saklam nga si si. ¹³ Langlam huih nemno in a ra phangin mi te’n amahni tuumnak lamlen tu ring in, timbaw tsawltiarnak thiarkawi kheh nuukso atsia, Krete tikulh neek in hawh si ung. ¹⁴ Sinapikhaw a rei ngawl in Euroklydon tinak khawtawng huihpi rasuk si. ¹⁵ Khawtawng huihpi in timbaw kheh laan in, a nang zo ngawl manin huiha laannak bangbang a si tuh in timbaw kheh leh vanglak si ung. ¹⁶ Klauda tikulh been in kei hawh lai in khawm kheh a se tuh ngawl in zilhtsak ngai in nuukso si ung. ¹⁷ Khawm kheh timbaw sungah kei koih tselh phangin, timbaw a keh tuh ngawl in amahni’n rihual tuunpi thaw in kaanpek si. Syrtis runpil ah a taang kha tu a lau manin, timbaw puanzar te kheh lakulhberh in, khawtawng huihpia laannak bangbang in hawh si ung. ¹⁸ Khawtawng huihpi in a laan leita ongla phangin, a thaizing in timbaw a zaang doh tuh in a phurnak van te vawr si ung. ¹⁹ A nithumnak ni in timbaw ah mangnak thil te kheh kei kut rori in vawr si ung. ²⁰ Ni tampi sung nii le arsi lang ngawl in khawtawng huihpi in nase leita in a muut manin, luat tu in limdiknak hem nei leh ngawlla si ung. ²¹ Reipi lai kei ngawl zawh in Paul ah kheh amahni lak ah ding atsia, "Rual te, ka thu ngai in Krete pin hawh awl ta kei sin, me senak le ralnak pin luat tupelh si sing. ²² Sinapikhaw tuhen timbaw siar ngawl, nang nungnak heh a ral thong tu ngawl manin muangkeekno in om un. ²³ Heimansim tiphangin keimah a neitu le ama na ka pernak Pathian vanvummi pakhat kheh tsingzan in keima kung ah ding atsia, ²⁴ ’Paul, kih mah nen. Sizar mai ah huainak si tu si tsi. Ngai in, timbaw na topinak tehem heh Pathian in na kut sungah na pe si lei,’ ti’n ti ka si. ²⁵ Tsimi manin rual te, Pathian in keimah a rel bangin tsang tu in ka muang manin muangkeekno in om un. ²⁶ Sinapikhaw tikulh pakhat ah taang tu si sing," ti’n ti si. ²⁷ Adriatic tipi vumah khawtawng huihpi in a suk a so ah a laan zawh zan leilinak zan laitum luun in timbaw napertu te’n tipi kung lei kei neek ongla lam thei si. ²⁸ Timbaw napertu te’n ti a teh phangin lamkul lai a thuk kheh thei si. Dawmlai a hawh zawh in teh lehleu atsia, lamleinga a thuk kheh thei si. ²⁹ Lungpi te a khawk khatu a lau manin timbaw ninglam pin timbaw tsawltiarnak thiarkawi lehsuk in timbaw kheh tsawl tiar si. Tsin, sawngen in khawvar ngak si ung. ³⁰ Timbaw napertu te kheh timbaw pin dan kuhzen tu in tuum dang in, timbaw tsawltiarnak thiarkawi pi kheh timbaw mailam pin lehsuk khel in, khawm lehsuk kuhzen dang si. ³¹ Tsimi phangin Paul in raalkap zakhat uktu raalbawipa le raalkap te kheh, "Me timbaw napertu te heh a om ngawl a si lekhaw, him thei tu ngawl si utsi," ti’n ti si. ³² Tsimi phangin raalkap te’n khawm khitnak ri kheh sat tawng sak atsia, khawm kheh tser tiar si. ³³ Khawvar dawn ongla phangin Paul in amahni kheh lai ei tiar in, "Ni leili sung lai ngawl in ngak atsia, heimah ei ngawl si utsi. ³⁴ Tsimi manin nang dam reng theinak tuh in lai ei tu in nang kun sing. Tutu nang sikhen nang lua sam zangkhatno pohkhen zuuk thong tu ngawl si," ti’n ti si. ³⁵ Me thu heh a rel tselh phangin Paul in amahni vaseng mai ah sang le atsia, Pathian a paak tselh phangin hem in ei dang si. ³⁶ Tsimi phangin a vaseng kheh tha nei dang in lai ei dang si. ³⁷ Timbaw sungah minung zanih le sawm sarih le paruk om dang si ung. ³⁸ Lai a kham ten phangin timbaw a zaang sawndoh tuh in, sangvut te kheh ti sungah vawr dang si. ³⁹ Khawvar phangin amahni’n kei leng min heh kawnai si ti thei dang ngawl si. Sinapikhaw lei kawi pakhat ah timbaw tsawlnak a mu manin, a tsang thei a si lekhaw tsimi munah timbaw hawh tiar tu in tuum dang si. ⁴⁰ Tsimi phangin timbaw tsawltiarnak thiarkawi pi te kheh a ri sat tawng berh in, ti sungah vawr nom dang si. Timbaw mawngnak thil peek pi khitnak ri khen suut si. Timbaw mailam pin puanzar kheh zaar atsia, tipi kung lei lam zuan dang si. ⁴¹ Sinapikhaw timbaw in run le tipi khawmnaka runpil sawh kha in, a lu lam heh pil sungah a nim manin taang si. A ninglam heh tilet in nase ngai in a sawh manin keh si. ⁴² Thawng to te’n tileuh atsia a danberh kha tu a lau manin raalkap te’n thawng to hem reek tu in tuum si. ⁴³ Sinapikhaw raalkap zakhat uktu raalbawi pa’n Paul ah heh san a nuam manin raalkap te kheh kham in, tileuh thei te’n ti sungah dawk masa ber atsia, lei ah a kai tuh in thupe si. ⁴⁴ Midang te’n thing peek le timbaw keh bang thing tawng te pompai in tileuh tu in thupe si. Tsimi bangin a vaseng in luat in lei ah leng dang thei si.

¹ A luat dang tselh phangin tsimi tikulh heh Malta ti’n konak a si lam thei si. ² Limdik ngawl in tsimi tikulh ah om te heh kei vaseng vumah pha ngai dang si. Ruah sar in khawsik manin meiseem atsia, awi tiar kei si. ³ Paul in thingkang khawmkhat khawm atsia mei ah a sang phangin, a sa manin rul pakhat suak in a kut velh si. ⁴ Tikulh ah om te’n Paul kut ah rul a peet reng kheh a mu phangin, "Ummawhnung nom ngawl in me pa heh tual reek si. Tipi vum pin dan pelh in, thumaan in nung siang ngawl si," ti’n pakhat le pakhat rel dun si. ⁵ Sinapikhaw Paul in rul kheh mei sungah thiing lok si. Rul in amah kheh heimah naa tiar ngawl si. ⁶ Tsimi bang a sipelh sikhen amahni’n Paul ah heh a bumkung ngawl lekhaw tal in thi tu in um lai si. Sinapikhaw reipi pan dang reng in, heimah a naa ngawl a mu phangin thin theng dang atsia, me pa heh pathian si, ti’n ti dang si. ⁷ Kei leng min kung ah tsimi tikulh khawbawi Publius tinak pa omnak om si. Keimahni heh ama nenah dung tiar in, nithum sung var kei si. ⁸ Tsin, tibang hen thiltsang si. Publius-a pa kheh natdun in thisen sang nat vei si. Paul in ama nenah dum in sawngen atsia, a vumah kut suan in dam tiar si. ⁹ Paul in me heh a puah tselh phangin, tikulha minaa dang te khehkhen leng deve in, dam tiarberh si. ¹⁰ Amahni’n thil tampi sawm kei si. Kei hawh leh phangin timbaw vumah kei kulnak thil tampi phurh belh lai si. ¹¹ Lathum zawh phangin Alexandria khaw pin a leng timbaw to in hawh si ung. Tsimi timbaw vumah Tsaphir Unau milim bennak si in, khawsik hun sung hem tsimi tikulh ah om si. ¹² Syrakus khaw ah leng in nithum sung tsaam si ung. ¹³ Tsimi pin a heel in hawh atsia, Rhegium khaw ah leng si ung. Nikhat kei tsaam zawh in langlam pin huih a ra manin ninih zawh in Puteoli khaw ah leng si ung. ¹⁴ Tsimi khaw ah umtu u le nau te tawk si ung. Amahni nenah tsaam tu in a huai manin ni sarih biat tsaam si ung. Tsimi pin Rom ah hawhper si ung. ¹⁵ Rom khawa umtu u le nau te’n kei thawm a za phangin mi pawl khat te’n Appii Dawr tian in muak kei si. Tsin, pawl khat te’n Buuk Pathum tian in muak kei si. Paul in amahni a mu phangin Pathian paak in, tha ngah si. ¹⁶ Rom ah kei leng phangin raalkap zakhat uktu raalbawi pa’n thawng to tehem kumpibawipa kiltu raalbawi pa kut ah aap si. Sinapikhaw Paul ah heh a mah kiltu raalkap thaw in dongda ngai in om siang si. ¹⁷ Tsin, tibang hen thiltsang si. Nithum zawh in Paul in Jew miphun huaitu te kheh ko si. A leng dang phangin Paul in amahni kheh, "U le nau te, ka phunpi te vumah heimah sual ngawl pelh in, kei pa te puahdaannak te khen han ngawl pelh in, Jerusalem khaw te’n thawng toh atsia Rom minung te kut ah aap ka si. ¹⁸ Amahni’n keimah heh thudong kan atsia, thi taak sualnak ka puahnak a mu ngawl manin leh tuum ka si. ¹⁹ Tsimi a tuumnak kheh Jew te’n kham atsia, Sizar nenah thunei so tu in ti sing. Tsimi bangin ka ti phangin ka miphun te sual zeinak heimah nei ngawl sing. ²⁰ Tsimi manin nangmahni mu tu in le awntsawppi tu in nang ko sing. Heimansim tiphangin Israel te limdiknak manin thiarri thaw in hennak tuar sing," ti’n ti si. ²¹ Amahni’n, "Judea peng pin nangma thu thaw peh dun in laikuatnak heimah ngah ngawl si ung. Tsin, u le nau te leng in nangma thu relnak le nangmah relsenak awnkam heimah za lai ngawl si ung. ²² Sinapikhaw na ruatnak heh thei ot si ung. Me te pawla thu heh mun hem ah relsenak asilam thei si ung," ti’n ti dang si. ²³ Ni a teeknak a kim phangin Jew miphun tampi te kheh Paul tsaamnak ah leng dang in, Paul in Pathian uknak thu kheh tsiltsang ngai in tettikhan atsia, Mawsi Daan le Profet te laibu sunga Jesuh thu ngannak te kheh zing pin pan simlam tian in reltsiang in amah ni kheh zawl si. ²⁴ Mi pawlkhat te heh tsimi thu thaw zawl zo in, pawl khat te’n um ngawl si. ²⁵ Amahni kheh a rem dun thei ngawl zawh in, a khek dun maa in Paul in thu pakhat rel si, "Kei pa te nenah Raula Thiangrim in Isaiah profet ah mang atsia a relnak heh maan si. ²⁶ ’Me miphun te nenah hawh ta la, "Nangmahni’n za tseih pelh in thei zo ngawl si utsi. Pan tseih pelh in mubaan ngawl si utsi. ²⁷ Heitasim tiphangin me minung te thinlung heh mol in, amahni beng te heh thu za har ngai a tsia, a mit te siingpek si. Tsimi bang a si ngawl tsuk asin amahni mit in mu tu atsia, a beng te’n za tu in, a thinlung te’n theitsiang tu in, ka nen lam nga akhaw dam tiar tu sing," ti’n rel ten,’ ti’n ti si. ²⁸ "Tsimi manin Pathian sannak heh Gential te nenah penak si ongla in, amahni’n za tu si, ti heh thei ta un," ti’n amahni kheh ti si. ²⁹ Paul in me thu heh a rel tselh phangin Jew te kheh Paul nen pin kiang dang in, nase ngai in sol dun si. ³⁰ Paul ah heh inn a zawngnak ah kumnih sung biat om in ama nenah a leng tu tehem vai muakberh si. ³¹ Tsin, amahni kheh Pathian uknak thu rel atsia, Bawi Jesuh Khrih thu kheh muang ngai in zirh si. Amah kheh tumah in kham ngawl si.