2 JOHAN
11 Pawlpi huaitu upa, keimah Johan in thudik sungah ka itnak, upat taak minu le a tsa te nenah laikuat sing. Keimah ruak si ngawl in thudik a theitu tehem in nang it si. 2 Heitasim tilekhaw kei sungah a om reng thudik heh keimahni thaw a kumkhaw in om reng tu si. 3 Pa Pathian le Pa-a Tsapa Bawipa Jesuh Khrih nen pin lainatnak, ngeihharnak le thinnuamnak, thudik le itnak kheh nang nenah om tasen. 4 Nang tsa khenkhat te’n Pa nen pin thukhaam kei saangnak bangin thudik sungah leidaa si ti ka mu phangin ka angnak heh maktak si. 5 Upat taak minu, na nenah thukhaam ther ngan ngawl sing. A pan pin kei nei saak pakhat le pakhat it dunnak nei tu in na kun sing. 6 Itnak tinak heh a ma thukhaam te bangin kei nung heh si. A pan pin nang za saak bangin a thukhaam heh nang luun rori tuhnak si. 7 Jesuh Khrih heh tisa in leng si ti’n a phuang ngawltu, mi zolthei tampi leivum ah leng ong si lei. Me heh mi zoltu le Khrih dotu si. 8 Kei napernak te sung thong ngawl in thaman a kimsek in kei ngah theinak tuh in nangmahni le nangmahni keem tsawm un. 9 Tutu sikhen daan a heektu te heh Khrih zirhnak ah om reng ngawl atsia Pathian khen a nei ngawl te si. Khrih zirhnak ah a om rengtu tehem khen Pa le Tsapa neikop si. 10 Mi pakhat khat nang nenah leng atsia tsimi bang zirhnak a keng ngawl a si lekhaw nang inn ah dungtiar mah na ula awka lum thaw khen vaimuak mah na un. 11 Heimansim tiphangin awka lum thaw na vaimuak a si lekhaw ama puahnak sesuak kheh lawm deve si tsi. 12 Nangmahni laikuat tuh thu tampi nei lai sing. Laiti mang in lainah vumah ngan ot ngawl sing. Sinapikhaw nang angnak a kimsek theinak tuh in nang nenah hawh in maitsang tsan dun in awntsawp tu heh limdik sing. 13 Pathian dengnak na tsernu-a tsa te’n nuk na set si. Amen.