Tita

TITA

tea Pawlae tärü saite cae

Angcü üng älo

Tita lä ceng kälang kha Khristen lawng te khimi vi. Tupyng-a äni lä Angthang Kähawi thui saite hai-a Pawlae tea säbawng pa te vi. Pawlae lä Antioh märü üng tho kha Jerusalem märü-a Khristen kangkawng üng mätawngky na hai äni üng thui saite Angthang Kähawi phüng, älo aedüng hethang ly te kätü-a, Tita bung nähai te vi. Pawlae lä ämäthung üng Angthang Kähawi thui hethang khölawng tho te kätü-a, Tita la qa kha Ephesi märü-a Säthaw tähang kälu sa te by vi. Honi pyng-a Pawlae lä Krete angrai sälawng üng kangkawng tea mätawngky sa hai hethang Tita bung khai pa te vi. Pawlae lä Tita tea tengxyng y ae-y khü kha yng saite cakhi ea ryng saite khimi lawng te phüng mäny te vi. Pawlae lä Korin märü-a awng te thüng A.D. 64 khösäning-a hini cae tärü te daila awng ai. Pawlae üng mawlang kaedawng lä Tita tea kangkawng üng mätawngky na awng hethang aeme aeqa saite na aedawng haile tyng hai te vi. Kätüng mätu saite na tea elekhei sa saite na bung makä sa kha mäkhang haw ai mei näte äni tea Pawlae ma mäci pa te vi.

Äphüng äkädawiky

Angcü üng älo 1:1-4

Kangkawng üng mätawngky na 1:5-16

Kangkawng-a awng saite khimi nae üng awng qi te kälu na 2:1-15

Täru saite hai sädi py saite na 3:1-11

Kangkhüng üng cibai sa te lo 3:12-15

¹Hini cae lä Säthaw üng mawsawng hai Isu Khrista üng angtawtha saite kai, Pawlae, ma tärü te vi.

Säthaw ma re saite khimi na üng yng te aethaw awng hethang hai äni ce lä Isu üng mätu saite älo mitang tea mäny rae hethang Säthaw ma kai bung mätaw te vi. Tukha äni ce lä Säthaw tea tämö khai te mätü te älang-a awng ö ai. ²Tukätephüng-a äni ce lä dungtäsa hing saite tea aethang khai ö khü te vi. Ätephüng-a mei nädylä Säthaw ma älawng sa y te kälang-a äma üng khimi na lä dungtäsa hing ö ai näkha älo aedo pyng te vi dy. Äni lä manila älo bälai te awng vai y. ³Säthaw ma khai khü te kätü-a äni üng angthang lä khimi ce tea kai üng thui te lo hai-a mäny hai ö te vi. Hini lä sa hethang mä-ai üng Aeqangkung Säthaw ma särilo hai kai tea py saite kälu vi dy.

⁴Mä-ai üng yng saite sangrung hai-a kai üng cäpaw tätang kätyng awng saite Tita tea kai lä hini cae tärü te vi.

Mä-ai üng Pä-ai Säthaw hai mä-ai üng Aeqangkung Isu Khrista ma nang tea tähang kähawi, bäheng saite hai awngneng saite py sy.

Pawlae ma Krete angrai sälawng-a kälu sa hethang Tita bung khai pa

⁵Kai, Pawlae, lä nang tea täru te lo kätyng Kreti üng märü qütä-a mätawngky na khai hethang hai kai ma sa khüng y saite kälu tea sa haw hethang phüng-a, kai lä nang bung khai te vi dy. ⁶Kangkawng üng mätawngky lawngtä lä khimi ce ma cy saite awng haw y hethang kae. Äni lä nawngpui lawngtä xyng ni awng he kae. Äni ce üng caw nade na la yng saite khimi na-a lawng hethang kae. Äni üng caw nade na lä deirei te hai älo aetängai y saite na kätyng-a khimi ce ma cy haw y hethang kae. ⁷Ätephüng-a mei nädylä kangkawng üng mätawngky sa saite khimi lawngtä lä Säthaw üng kälu sa te phüng-a, khimi ce ma cy haw y saite khimi-a lawng hethang kae. Äni lä äma üng kängai kätyng kädaw rae saite, Cäpje tui neipro saite, khimi ce hai aejaw aemang rungrang saite, hai äe-aw te bälung awng saite khimi-a lawng hethang kae y. ⁸Honi jüng-a äni lä angvüng angvaw na bung lady te hai kähawi sa hethang ngai saite khimi-a lawng he kae. Äni lä äma tea aeküng te hai bälung kähawi khai saite hai, bälung cai saite hai, cülä-ü-a awng saite khimi-a lawng hethang kae. ⁹Äni lä mä-ai mätu pyng te Angthang Kähawi tea süng khü hethang kae. Honi angthang lä älo mitang kha lang te awng y vi näte äni lä yng khü haw te vi. Tukäte hai-a äni lä khimi kälang na tea aethaw py kha aesyng saite lo mätu haw ai. Aesyng saite mätu te tea elekhei sa saite khimi na üng sa tämang saite tea mätü haw pa hethang kae.

Aesyng y saite särae na phüng

¹⁰Ätephüng-a mei nädylä kangkawng üng mätawngky lo na tängai y saite na lä awng mang vi. Äni ce lä älo aetütü na thui rungrang te hai yng saite na tea tämang hai te vi. Yng saite khimi qütä na lä lengkhüng täke hethang kae näkha thui te khimi na thung-a awng ö ky te vi. ¹¹Honi khimi ce tea lä mätu hai hethang py ö hang. Ätephüng-a mei nädylä äni ce lä mätu sang y saite hini cawngkhang na mätu te kätü-a, engthung rütä yng saite na tea mäne ö baw te vi. Äni ce lä khimi ce te üng tangkae dang hethang ngai te phüng-a, hini kätyng mätu ö te vi. ¹²Kreti angrai sälawng üng buisaw lawngtä mäteng ma äma ce üng khimi na phüng na “Krete üng khimi na lä älo bälai vävawi saite na tawngbawi kärai na hai aethawli kha hahaw mi kung saite na vi” näkha thui te vi dy. ¹³Buisaw üng thui saite hini lo na lä tätang vi. Tukätephüng-a äni ce tea kähawi-a pring ö khü ba. Tudylä äni ce lä kätüng-a yng khü ö ai. ¹⁴Tukha äni ce lä Judae na üng aesyng y saite cäkae kangrüng na hai älo mitang tea e saite khimi nae üng särilo na tea lä khaisö ö hethang kae. ¹⁵Khimi käcai na tähang lä äte angxynlyng na lä cai bawi te vi. Tungaila pawprae-a awng kha Säthaw tea yng y saite na tähang lä äte angxynlyng na la cai te awng bi y. Ätephüng-a mei nädylä äni ce lä käsi lang-a dawng jawjaw kha äni ce üng bälung kaedawng lä hawi te, hawi y te, tea mänykaw ö te y vi. ¹⁶Äni ce lä täbawng mang Säthaw tea mäny vi näkha thui ngaila aeme aeqa saite hai lä Äni tea aephae ö te vi. Äni ce lä känyng hethang hawi saite na hai kähawi sakaw y saite na kae vi.1:16 Conscience, Hawi te hawi y te tea mäny te

Älo mitang

¹Nang lä älo mitang na hai kaebäla-a mätu hethang kae. ²Nawngmäcaw mätawng na lä äma ce ma aeküng hethang, khimi ce ma tämö khai hethang, bälung kätüng awng ö hethang kae. Äni ce lä yng cakhi te hai bälung aevaw te awng kha änawngsa hethang kae. ³Honi kätyng nawngmädi mätawng na tea lä Säthaw bung tämö khai saite lang-a awng hethang mätu pa. Äni ce lä khimi ce üng phüng thui rungrang y hethang hai jö nei ngae y hethang mätu pa. Honi jüng-a äni ce lä khimi kälang na tea kähawi sa hethang mätu sy. ⁴Hini kätyng äni ce lä nawngmädi anglaw na tea äma ce üng nawngpaw na hai caw nade na tea bälung aevaw ö hethang mätu he kae. ⁵Bälung cai kha mä-ai ma üng kängai tea aeküng hethang hai äma ce üng engthung-a aethaw rae kha awng hethang kae. Khimi kälang na tea bäheng hethang hai äma ce nawngpaw na üng älo na tängai hethang mätu he kae. Tudylä ämi ma la Säthaw üng lo Angthang tea lä käsi prawng haw y vi ai.

⁶Hini kätyng särai na tea lä äma ce ma kähawi-a aeküng hethang mäci pa ö. ⁷Nang ma lä sa saite qütä khimi ce tähang aetu nae-a lawng he kae. Tudylä nang lä Säthaw phüng mätu te kätü-a, bälung mitang khü hai khü sälü-a sa ba. ⁸Nang lä khimi ce ma cy haw y hethang älo kätüng saite mätu pa ba. Tukäte hai-a nang tea elekhei-a sa hethang ngai saite na lä saerae lae ö vi ai. Ätephüng-a mei nädylä, äni ce lä mä-ai tea käsi thui hethang dang haw ö pa y te phüng-a vi.

⁹Mawsawng na tea lä ingkung na üng lo na tängai jawjaw hethang mätu pa. Äma ce üng ingkung na üng kängai sa hethang hai älo qa y hethang la mätu pa. ¹⁰Ingkung na te üng ätete cawngkhang na la bäru ö hang. Ingkung lä äma ce üng mawsawng na tea ae-y king haw hethang kae. Hokä mawsawng ma awng dylä äma üng ingkung lä mä-ai üng Aeqangkung Säthaw üng Angthang Kähawi tea tängai hethang ngai ai.

¹¹Ätephüng-a mei nädylä Säthaw lä khimi angxynlyng na bung aeqang hethang äma üng tähang kähawi aetüng hai pa pyng te vi dy. ¹²Säthaw lä tähang kähawi hai-a, mä-ai tea äma üng kängai y-a aeme aeqa saite na khai sö hethang mätu te vi. Säthaw bung mäny y saite khimi na üng ngaiphi tüng y saite na tea hui y hethang mä-ai lä aetu ö te vi. Hini älawng qawng-a awng te kätü-a, mä-ai tea aeküng kha cüng saite hai Säthaw üng kängai-a hing hethang la aetu ö te vi. ¹³Mä-ai lä hikä awng te thüng-a, mä-ai tea kawng hai saite aethang khai te tea aering ö te vi. Honi lä mä-ai üng kaesangky Säthaw hai Aeqangkung Isu Khrista lä äma üng phung-ang hai aetüng ai te tea vi. ¹⁴Äni lä mä-ai bung hunghö angxynlyng na üng aelawi hethang hai, äma üng khimi käcai hai khimi khekhe-a bälawng pa hethang vi dy. Tukha ätete kähawi sa hai hethang dawng khü saite na aelawng hai hethang äma ma mä-ai tähang aepy te vi dy.

¹⁵Yng saite na tea hini ätete cawngkhang na mätu pa. Äni ce tea aethaw py te hai aenae awng saite angxynlyng na hai pring pa. Ämi lawngtä ma la nang tea mäthi y te awng hang sy.

Khristen na üng awng te sai

¹Pre pyng kha aenae awng saite na tea tämö khai te hai äni ce üng älo na tängai hethang yng saite khimi na tea aedawng hai ö ba. Hawi saite kälu angxynlyng na sa hethang awng ö rüng sy. ²Khimi ce phüng käsi thui y hethang äni ce tea thui pa. Äni ce lä khimi qütä tea aede te hai bälung mitang-a aemäneng te hai bälung kähawi-a awng hethang kae. ³Mä-ai la jangni-a lä kaerö te hai älo aetängai vai y saite na by vi. Tukha khimi ce lä mä-ai tea lolang tämang hai ö te vi. Mä-ai lä jangni-a ngaiphi tüng y saite cawngkhang na mang-a hui hethang aepä-üng haw ö y. Mä-ai lä kawng saite hai bädö saite amäjy angxynlyng na tea mawsawng na lawng te vi dy. Mä-ai lä kätü qütä käsi sa kha khimi ce tea pä-e ö te vi. Khimi ce lä mä-ai tea esäre kha mä-ai la äni ce tea esäre ö tyng te by vi dy. ^4-5Tungaila mä-ai tea bäheng kha bälung aevaw saite mä-ai üng Aeqangkung Säthaw tho te kätü-a lä, mä-ai bung äni ma aeqang pa te vi dy. Honi lä mä-ai üng cüng saite hai sa saite phüng-a y vi. Äni üng bäheng te phüng-a mä-ai bung aeqang te kae. Säthaw ma mä-ai tea Muilaw Käcai py te hai-a mä-ai üng hunghö na mäse pang kha aepeng te kangthae hai hing saite kangthae py te phüng-a vi. ⁶Säthaw ma mä-ai üng Aeqangkung Isu Khrista phüng-a, Muilaw Käcai lä mä-ai tea cungrü-a bälawng pa te vi dy. ⁷Tukätephüng-a äma üng bälung kähawi saite hai-a Säthaw lä mä-ai bung khimi käcüng näkha mäthi te vi. Tukha mä-ai üng aethang khai te dungtäsa hing saite lä mä-ai dang haw ö ai. ⁸Hini lä ae-y nae hawi saite lo na vi.

Hini na phüng kai lä nang ce tea kähawi-a thui hethang ngai te vi. Tudylä Säthaw tea yng saite khimi na lä kälu kähawi sa te hai äma ce üng kätü aepy haw ö ai. Hini mätu saite na lä khimi qütä tähang hawi la hawi, maw la cawng hai te vi. ⁹Tungaila nang lä khimi ce hai aetütü-a älo ae-e saite, kangsi kangjaw na üng phüng tärü saite, aejaw aemang saite, Mosi üng Ubädi phüng-a aejaw aemang saite na tea lä aehi ba. Ätephüng-a mei nädylä hini na lä ävang ting te y. Aetütü kae vi. ¹⁰Nang ce thung-a aetäphü saite khimi na tea lä qengtä, qeng netä pring pa. Tupyng dylä äni ce hai aebe hang. ¹¹Hokäti khimi ce lä kätüng tea aehi ö te, nang lä mäny haw vi. Äni ce üng hunghö na lä äma ce sa tämang saite hai mätü ö te vi.

Kangkhüng üng täru saite lo

¹²Kai lä Artema, y dylä, Tukhika bung nang tea mätaw hethang aedawng te vi. Äni tyng praw te hai, Nikopoli märü-a, kai hai aeting hethang nang ly ngece ba. Ätephüng-a mei nädylä Säding-a, kai lä ho-a awng hethang aedawng pyng te vi dy. ¹³Tärae cei te kung Zena hai Apolo üng khölawng ly haw hethang nang lä bäja te rytä säbawng kü pa jo. Änini aely ngai saite angxynlyng na awng saite tea kähawi-a säbawng pa khü. ¹⁴Mä-ai üng yng saite khimi na lä kälu kähawi tea aethaw rae te hai sa jawjaw hethang nang ma mätu he kae. Honi hai-a äni ce lä khimi kälang na üng aely kängai na tea säbawng haw ö ai. Äni ce lä aetütü-a awng he kae ö y.

¹⁵Kai hai mangtä yng saite angxynlyng na ma nang tea kawng bärai sa te lo thui ö dy. Kai ce tea bälung aevaw saite yng te khimi na tea kai ce üng kawng bärai sa te lo thui pa jo ba.

Säthaw üng tähang kähawi lä nang ce angxynlyng hai mangtä awng jo sy.