Rom

ROM

kangkawng tea Pawlae tärü saite cae

Angcü üng älo

Pawlae lä hini cae tärü te kätü-a Korin märü-a awng te vi. Honi kätü-a äni lä ämäthung üng Angthang Kähawi thui hethang khölawng tho te vi. Honi khölawng byng aetawng-a äni lä Rom märü-a khölawng tho haw y kha hini cae tea tärü te vi. Hini tärü te kätü lä A.D. 57 khösäning daila awng ai. Pawlae üng cae lä phü netä awng vi. Angcü üng lä khimi angxynlyng na tähang, Judae khimi läsy, ceng kälang khimi na läsy, Säthaw ma äni ce tähang aeqang saite sa rüng pa te vi. Yng saite hai-a Säthaw lä khimi ce üng hunghö bälawi kha khimi käcüng-a mäthi te vi. Hini cae üng äbaeni-a lä Pawlae ma Khristen na üng hing saite hai kälu käsawng sa saite na phüng tärü te vi.

Äphüng äkädawiky

Angcü üng kawng saite lo hai cae üng älangdüng 1:1-17

Aeqang saite lä khimi qütä tähang aely ngai te 1:18-3:20

Säthaw üng aeqang saite älang 3:21-4:25

Khrista hai-a hing saite kangthae 5:1-8:39

Säthaw üng mawlang kaedawng thung-a Isrelae khimi na qa saite 9:1-11:36

Khristen na üng aeme aeqa saite 12:1-15:13

Kangkhüng üng cibai sa saite lo na 15:14-16:27

¹Hini lä Khrista Isu üng mawsawng Pawlae te üng cae vi. Säthaw lä äma üng Angthang Kähawi thui hethang ka kha kai bung angtawtha-a re te vi dy.

²Jangni üng hai ma Säthaw lä äma üng buisaw na te mang hai-a Angthang Kähawi tähang älo aedo te vi. Buisaw na lä hini älo aedo saite tea Caekäcai thung-a tärü ea khai vi dy. ³Hini Angthang Kähawi lä Säthaw üng Cäpaw, mä-ai üng Areng Isu Khrista üng phüng vi. Äni lä khimi-a aelawng kha Davidae kaesui kaebeng thung üng vi. ⁴Säthaw lä äni bung kädü thung üng hing haile te phüng-a, Muilaw Käcai üng haidae hai-a Säthaw üng Cäpaw vi näte tea mätü te vi dy. ⁵Honi Areng hai-a Säthaw ma kai lä Khrista tähang mawsawng sa kha angtawtha lawng hai hethang tähang kähawi py te vi dy. Ceng angxynlyng üng khimi na lä yng kha tängai ö hethang Säthaw lä kai tea Angthang Kähawi thui hai te vi. ⁶Rom märü-a awng saite nang ce la Isu Khrista hai aesui hethang Säthaw ma re saite na thung-a qa ö te by vi dy.

⁷Säthaw ma bälung aevaw kha äma üng khimi na khe khe-a lawng hai hethang re saite Rom märü üng nang ce tea kai lä cae tärü te vi.

Mä-ai üng Pä-ai Säthaw hai Areng Isu Khrista ma nang ce tea tähang kähawi hai awngneng saite py sy.

Kawng te lo thui kha aetang saite

⁸Angcüky-a kai lä nang ce angxynlyng tähang Isu Khrista hai-a kai üng Säthaw tea kawng te lo thui te vi. Ätephüng-a mei nädylä nang ce üng yng saite phüng älawngpre qütä khimi ce ma thui ö te phüng-a vi. ⁹Säthaw üng Cäpaw Angthang Kähawi thui te hai-a kai lä Säthaw üng kälu tea bälung mäke angxynlyng na hai sa te vi. Kai lä nang ce tea aedawng jawjaw kha aetang te vi näte Säthaw ma mäny khe te vi. ¹⁰Säthaw üng aely hai-a kai lä nang ce tea ly haw hethang älang aepä-awng he Säthaw tea aetang te vi dy. ¹¹Nang ce üng yng te cakhi hethang tähang Muilaw Käcai te üng tähang kähawi nang ce tea py hethang ngai te phüng-a, nang ce hai kai lä aeting hethang ngaiphi te vi. ¹²Kai ma thui saite älawngsai lä nang ce hai kai lä hini kätyng aeting te kätü-a, mä-ai üng yng saite leng rae hethang mä-ai ma tingtawi aethaw aepy haw ö te vi.

¹³Yng saite kangby jä-ai na ä, kai lä nang ce tea ly hethang aerü saite kätü awngmang-a nang ce lä aedawng haile ö hethang ngai hai te vi. Tungaila ätete haetä ma kai tea lä honi kätyng sa saite üng hai mäkhang jawjaw vi dy. Kai lä mityng kälang-a ceng kälang na tea Angthang Kähawi thui kha äni ce la Khrista tea yng ö vi dy. Nang ce thung-a la honi kätyng awng hai hethang ngai te vi. ¹⁴Kai lä rang y saite khimi, rang saite khimi, cae kaw saite khimi, hai cae kaw y saite khimi angxynlyng na tea Säthaw üng Angthang Kähawi thui hethang mawsawng lawng te vi. ¹⁵Tukätephüng-a kai lä Rom märü-a awng saite nang ce tea la Angthang Kähawi thui hethang tengxyng y ngai bärai te by vi.

Angthang Kähawi üng haidae

¹⁶Kai lä Angthang Kähawi tähang aejae te y. Honi Angthang Kähawi yng saite angxynlyng na tea aeqang hethang lä Säthaw üng haidae vi. Honi Angthang Kähawi lä angcüky-a Judae khimi na tähang hai honi pyng-a lä ceng kälang khimi ce tähang by vi. ¹⁷Säthaw lä mä-ai tea makä sa kha khimi käcüng-a mäthi ai mei näte Angthang Kähawi hai mätü te vi. Honi lä angcü üng hai kangkhüng khytä yng saite hai-a dang te vi. Caekäcai thung-a, “Khimi käcüng lawngtä lä yng saite hai-a dungtäsa hing ai” näkha awng vi.

Khimi ce üng hunghö

¹⁸Hunghö sa saite na hai Säthaw tea tämö khai y saite khimi angxynlyng na tea Säthaw üng kädawtho saite lä khösang mang üng hai mätü vi dy. Honi käsi sa saite na üng älang na lä Säthaw üng Lo mitang khimi kälang tea mäny hai y hethang mäkhangky te vi. ¹⁹Säthaw lä äni ce tea dengpy vi ai. Ätephüng-a mei nädylä, äni ce tea Säthaw üng aetüng hai saite phüng-a, äni üng phüng mäny haw saite tea nung haw ö te vi. ²⁰Säthaw lä älawngpre sa angcü üng hai ma äni üng nung haw y sakaw saite na lä khimi ce ma nungsy haw ö te vi. Honi sakaw saite na lä äma üng dungtäsa haidae hai äma üng Säthaw tätang lawng te na vi dy. Khimi ce lä Säthaw üng sa saite na hai-a honi na tea mänysy haw ö vi. Tukätephüng-a äni ce lä hawi y sa saite na tea aedung hai haw ö y vi dy. ²¹Äni ce lä Säthaw bung mäny ngaila äni tea cäphaw la cäphaw y, kawng te lo la thui ö y. Honi jüng-a äni ce üng dawng saite na lä aetütü-a lawng ö vi dy. Äni ce üng bälung kangthö lä ving saite hai kawi te vi dy. ²²Äni ce lä bälunghae vi näkha thui ngaila, bälunghae y saite kangthö na lawng ö te vi. ²³Äni ce lä dungtäsa hing saite phung-ang awng te Säthaw tea cäphaw te jüng-a, mimi na tea cäphaw ö lae vi. Honi mimi na lä dü saite khimi, tävaw, äkho hai ly saite tawngbawi na hai kaw-va ea ly saite tawngbawi na kätyng vi.

²⁴Honi na phüng-a Säthaw lä äni ce tea äma ce üng ngaiphi tüng y pawprae saite na sa hethang a te vi dy. Äni ce lä lawng lawngtä tea täkübäjang na sa ö vi. ²⁵Äni ce lä Säthaw üng lo mitang tea kaeling kaemae hai aeleng ö te vi. Äni ce lä Säthaw tea cäphaw te jüng-a, äni ma sa saite na tea cäphaw kha tängai ö vi. Ätete sa saite Kung tea lä dungtäsa bälaw ö jawjaw sy. Amen.

²⁶Tukätephüng-a Säthaw lä äni ce üng ngaiphi tüng y, saerae he hawi saite na sa hai hethang äni ce tea a pa vi dy. Nawngmädi na mäteng ma Säthaw üng mawlang kaedawng kätyng nawngmäcaw na hai mangtä i y käla nawngmädi tingtawi i ö te vi. ²⁷Honi kätyng nawngmäcaw na la nawngmädi na hai mangtä i saite Säthaw üng mawlang kaedawng tea khaisö kha nawngmäcaw tingtawi i hethang ngai saite bälung lä mai kätyng aekhaw ö na te vi. Nawngmäcaw tingtawi na la täkübäjang sa ö te vi. Tukätephüng-a Säthaw lä äni ce tea äma ce üng hunghö na tähang aeteng khaw saite dengpy te vi.

²⁸Hini khimi ce lä äma ce üng bälung thung-a, Säthaw üng phüng mänykaw saite tea aedawng haile he ngai ö te y vi. Tukätephüng-a Säthaw lä äni ce sa hethang kae y saite na sa hai he äni ce üng aetütü te bälung kaedawng na a pa vi dy. ²⁹Äni ce lä cüng y saite cawngkhang hai käsi sa kha ae-aw saite, esäre saite, pä-e saite, khimi bädü saite, aejaw aemang saite, kaeling kaemae na sa ö vi. Äni ce lä khimi ce üng phüng aeqa ö saite na vi. ³⁰Äni ce lä khimi ce üng phüng käsi thui saite, Säthaw tea esäre saite, khimi ce tea mäthi y sa saite, bälungleng saite hai aethaw saite na vi. Äni ce lä hawi y saite älang na dawng ö te kae. Änä-awi äpä-ai na üng lo na tängai ö y saite na vi. ³¹Äni ce lä mänykaw y saite, aedo saite lo kätyng sa y saite na, khimi ce tea bälung aevaw y saite hai bäheng y saite na vi. ³²Hini kätyng hing saite khimi tea Säthaw ma dü hai hethang dengpy ai näte lä Säthaw üng Ubädi thung-a awng näte äni ce mäny ö te vi. Tungaila äni ce lä honi na tea sa jawjaw te qaitä cang y honi kätyng sa saite khimi kälang na tea mäteng ma aethaw py ö te vi.

Säthaw üng tärae cei saite

¹Kai üng Judae kangby jä-ai ä, nang lä ceng kälang na tea tärae cei te vi mei. Nang lä khimi kälang na tea la tärae cei te lä tämang vi dy. Nang lä khimi kälang na tea tärae cei kha honi kätyng hunghö sa dylä nang ma tea nang ma tärae aecei te hai aetawng vi ai. ²Säthaw lä honi hunghö sa saite na tea tärae cei te lä tüngkhaw vi näte mä-ai lä mäny ö te vi. ³Nang ma la honi hunghö sa kha khimi kälang na üng sa aetawng saite hunghö na tea lä tärae cei te vi. Nang ma lä Säthaw üng tärae cei saite tea aelawi haw ai te käthi vi mei. ⁴Nang lä Säthaw üng bälung hawi saite käleng, khung saite hai änawngsa saite na tea mäthi y te vi. Säthaw lä nang ce tea bälung hawi te vi. Ätephüng-a mei nädylä äni lä nang ce tea ae-ui hethang ngai hai te vi. Honi tea nang ce lä mäny khaw te vi. ⁵Tungaila nang lä bälung tangkö kha ae-ui y. Tukätephüng-a Säthaw üng kädawtho phi saite hai kätüng khaw tärae cei saite mätü te käni-a lä Äni ma nang tea tengxyng y dengpy ai. ⁶Säthaw lä khimi angxynlyng na tea äma ce üng kähawi hai kähawi y sa saite na kätyng aeteng khaw saite ävang na py vi ai. ⁷Kähawi sa jawjaw te hai, Säthaw ma py te bälaw saite hai, ämüng leng saite hai dungtäsa kähing na ha saite khimi tea lä Säthaw ma dungtäsa kähing py vi ai. ⁸Tungaila Khimi phütä na lä mä-ai ma tähang qaitä dawng kha mitang khaw saite tea khaisö ea sa tämang jawjaw saite na vi. Honi khimi ce tea Säthaw lä tengxyng y kädawtho vi ai. ⁹Sa tämang saite khimi angxynlyng na tea lä Säthaw ma mätang bälaica saite hai naw mätang hai ö vi ai. Honi thung-a lä angcü-a Judae khimi na hai ceng kälang na la qa ö te by vi. ¹⁰Tungaila angcüky-a Judae khimi na, honi pyng-a ceng kälang na thung üng kähawi sa saite khimi angxynlyng na tea Säthaw lä äma tea bälaw saite, ämüng leng saite hai awngneng saite na py pa vi ai. ¹¹Säthaw üng maw-a khimi angxynlyng na lä mangtä kae vi.

¹²Ceng kälang na lä Säthaw ma Mosi te mang py saite Ubädi awng ö y. Äni ce hunghö sa ö dylä, Säthaw ma äni ce tea lä Ubädi awng y käla täphra vi ai. Mosi üng Ubädi awng saite Judae khimi na hunghö sa dylä, Säthaw ma Ubädi thung-a awng saite kätyng tärae cei vi ai. ¹³Tukätephüng-a Ubädi thai saite khimi lä Säthaw üng maw-a cüng te y lyng. Ubädi tängai saite na ni khimi cüng te kae. ¹⁴Ceng kälang na lä Mosi üng Ubädi awng ö te y. Tungaila Ubädi thung-a tärü saite na kätyng äni ce lä äma ce üng aely kängai sa ö te kae. Äni ce tea Mosi üng Ubädi awng y ngaila, äni ce üng sa hethang kae saite hai kae y saite tea mäny näte mätü ö te vi. ¹⁵Äni ce üng aeme aeqa saite lä Ubädi üng särilo äma ce üng bälung thung-a tärü vi näte tea mätü te vi. Honi lä tüngkhaw vi näte äni ce üng käsi kähawi mäny saite bälung la mätü te vi. Äni ce üng kaedawng na lä sa pyng saite tüng vi, y dylä sa pyng saite tüng y näte tea mätü te vi. ¹⁶Tudylä kai ma thui saite Angthang Kähawi kätyng Säthaw lä Isu Khrista hai-a khimi ce üng kangru-a dawng saite na tea tärae cei te Käni lä hini kä tyng vi ai.

Judae khimi na hai Mosi üng Ubädi

¹⁷Nang ce lä nang ma ce tea Judae khimi näkha aemäthi ö vi. Nang ce lä Ubädi ae-y kha Säthaw hai aesui saite phüng tea aethaw ö te vi. ¹⁸Säthaw ma nang ce tea sa hai hethang ngai saite nang ce lä mäny ö vi. Ubädi lä nang ce tea kätüng hai kätüng y tea mäny haw hethang mätu te vi dy. ^19-20Nang lä ämi kangjö tea lolang mätü saite, käving thung-a ly saite na tähang kaevang, mänykaw y te na tea mätü saite hai nade na üng särae näkha dawng te vi. Ubädi hai-a bälunghae saite hai Säthaw üng phüng lä mitang khaw vi näte nang lä dawng te vi. ²¹Nang lä khimi kälang na tea mätu saite lawng ngaila, nang ma tea nang ma äte makäte phüng-a aemätu y te vi mei. Khimi ce tea “Bäru hang” näkha nang ma lä bäru khe te vi. ²²Nang lä khimi ce tea, “Ämi üng nawngpui na tea täkübäjang sa hang ba” näkha thui ngaila, nang ma lä khimi kälang üng nawngpui na tea täkübäjang sa te vi be. Nang lä mimi na tea känyng saite lawngtä ea ätemakä ceng kälang na üng mimi na khai saite mityng üng sui tangkae na tea bäru te vi mei. ²³Nang lä Säthaw üng Ubädi tea mäny näkha aethaw ngaila, Ubädi hui y te phüng-a Säthaw tea mäthi y te vi. ²⁴Caekäcai thung-a, “Nang ce Judae khimi na phüng-a ceng kälang na lä Säthaw tea käsi thui ö te vi” näkha tärü te awng.

²⁵Nang lä Ubädi thung üng tärü saite na tea tängai dylä, nang üng lengkhüng täke saite lä ävang ting vi ai. Tungaila Ubädi thung üng tärü saite na tea tängai y dylä, nang lä lengkhüng täke y te khimi kätyng kae. ²⁶Lengkhüng täke y saite ceng kälang na Ubädi üng särilo tea tängai dylä, Säthaw lä äni ce tea lengkhüng täke te kätyng mäthi pa vi ai. ²⁷Nang ce lä tärü pyng saite Ubädi awng kha lengkhüng täke pyng saite khimi vi. Tungaila nang lä Ubädi thung-a awng te kätyng sa y te phüng-a, ceng kälang na ma nang ce tea cy ö vi ai. Äni ce lä ätabung-a lengkhüng täke y ngaila, Ubädi tängai saite na vi. ²⁸Lengkhüng täke saite Judae khimi tätang lä ämi mei. Ätabung-a lengkhüng täke ngaila bälung thung-a aemäqa y dylä, Judae khimi tätang lawng te y. ²⁹Judae khimi tätang lä Säthaw ma äma hai aesui näte mäny hai hethang äni üng bälung thung-a äsäny sa te vi. Honi lä Ubädi ma sa haw te y. Säthaw üng Muilaw Käcai ma sa haw te kae vi. Honi khimi tea lä khimi kälang na ma bälaw y ngaila, Säthaw lä äni tea bälaw vi ai.

¹Judae khimi lawng te lä ceng kälang khimi lawng te qawng-a hawiky te vi mei. Äni ce üng lengkhüng täke saite lä ävang ting te vi mei. ²Judae khimi lawng te lä ävang käting awng mang vi. Angcüky-a Säthaw lä Judae khimi na tea äma üng angthang py te vi. ³Judae khimi phütä na lä ae-y khü ö te y vi näte lä tätang khaw vi. Hokä dylä Säthaw lä ae-y khü he hawi y näkha thui ai mei. ⁴Hokä y lyng. Khimi qütä lä kaeling kaemae sa ngaila Säthaw lä mitang khaw te lo thui jawjaw vi. Caekäcai thung-a lä,

“Nang üng thui saite kätü-a, tüngkhaw saite lo thui te tea khimi qütä ma nung vi ai.

Khimi ce ma nang tea cy te kätü-a, nang lä bäja jawjaw vi ai” näkha thui vi.

⁵Tungaila khimi phütä ma, “Mä-ai üng hawi y sa saite na lä Säthaw üng sa saite kätüng tea mätü rae te vi” näpa. Mä-ai lä ätemakä thui haw ö ai mei. Khimi phütä na hokä dylä, “Säthaw ma mä-ai tea dengpy te lä tüng y vi” näkha thui ö ai. (Hini kätyng kai ma thui te lä khimi ce üng kaedawng kätyng thui te kae.) ⁶Hokä thui haw y lyng. Säthaw tüng y dylä, makä sa kha äni lä älawngpre-a khimi angxynlyng na tea tärae cei haw ai mei.

⁷Tungaila khimi phütä lä, “Kai üng tüng y saite lä Säthaw üng tüng saite tea khimi ce mäny hai rae kha äni üng phung-ang tea aesang hai rae te vi nädylä, äte makäte phüng-a hunghö sa saite lawngtä kätyng Säthaw ma dengpy te vi mei” näkha awng vi. ⁸Tukha khimi phütä na lä, “Hawi saite na tyng haw hethang hawi y saite na mä-ai sa ö si” näkha thui ö ai. Honi kätyng kai lä thui vi näkha khimi phütä na ma cy ea käsi thui ö te vi. Säthaw lä äni ce tea aeteng khaw saite dengpy vi ai.

Ämi lawngtä la cüng te y

⁹Hokä dylä mä-ai Judae khimi lä ceng kälang na qawng-a matangtä hawiky mei. Hokä y lyng. Judae na hai ceng kälang angxynlyng na lä hunghö üng haidae täkui-a mangtä awng te kae näte tea kai lä mätü pyng te vi dy. ¹⁰Caekäcai thung-a lä,

“Ämi lawngtä la Säthaw üng maw-a cüng te awng y.

¹¹Kätüng lä mani mei näte tea mänykaw saite ämi lawngtä la awng y.

Säthaw tea cäphaw hethang ngai saite ämi lawngtä la awng y vi.

¹²Khimi angxynlyng na lä Säthaw tea eng ja ö vi dy.

Äni ce angxynlyng lä aetütü ö kae vi dy.

Kähawi sa saite ämi la awng y. Lawngtä mäteng la awng y.

¹³Äni ce üng älo hai äni ce lä khimi ce tea bädü ö te vi.

Äni ce lä äma ce üng täbawng na hai kaeling kaemae lo thui ö vi.

Äni ce üng älo lä bärui na üng äce kätyng ri hethang hawi te vi.

¹⁴Äni ce lä kätü qütä khimi ce tea esäre te hai täking saite lo thui jawjaw ö te vi.

¹⁵Äni ce lä khimi tea bädü hethang bähüng te awng ö y.

¹⁶Äni ce lä tyng saite mityng qütä-a khimi ce tea täphra kha känaw na py ö te vi.

¹⁷Äni ce lä khimi ce hai mangtä awngneng saite älang mäny ö te y.

¹⁸Äni ce lä Säthaw tea ri te bälung awng ö y” näkha awng vi.

¹⁹Mosi üng Ubädi thung-a awng saite angxynlyng na lä Säthaw ma honi Ubädi py saite khimi tähang vi näte tea mä-ai lä mäny ö te vi. Khimi ce lä hawi te, hawi y te, äte mei näte tea kai ce lä mäny ö y näte thui haw y hethang Säthaw lä Ubädi py te vi. Säthaw lä Ubädi hai-a älawngpre-a awng saite khimi angxynlyng na lä hunghö sa saite na hai äni ce tea Säthaw ma tärae cei vi ai näkha mätü te vi. ²⁰Hokä Ubädi thung-a awng saite kätyng sa te hai-a ämi la Säthaw üng maw-a cüng te y vi. Ubädi lä mä-ai tea hunghö sa saite mäny hai te vi.

Yng te hai-a cüng saite

²¹Tungaila vaihi Säthaw lä äma üng maw-a makä sa kha käcüng-a lawng hethang älang mätü te vi dy. Honi älang lä Mosi üng Ubädi thung-a tärü te kätyng sa hethang y. Mosi üng Ubädi hai buisaw na ma honi phüng thui ö khü te vi. ²²Isu Khrista tea yng saite hai-a Säthaw lä Khrista tea yng saite khimi angxynlyng na bung cüng hai te vi dy. Judae khimi na hai ceng kälang na tea Säthaw üng maw-a cüng hai hethang lä älang kälang awng te y. ²³Khimi qütä lä hunghö sa kha Säthaw üng phung-ang hai hanglaw ö vi dy. ²⁴Tungaila khimi ce bung hunghö üng aelawi hai saite Isu Khrista hai-a Säthaw ma lasawng-a py saite tähang kähawi phüng-a, khimi ce bung lä äma üng maw-a cüng hai vi dy. ^25-26Khrista üng dü saite äthi hai-a, Säthaw lä khimi ce üng hunghö na tea bälawi haw hethang Säthaw lä äni bung löci kätyng sa pa vi dy. Khrista üng dü pa saite hai-a Säthaw lä äni ce üng hunghö na tea bälawi pa vi dy. Säthaw ma hikä sa te lä äma üng cüng saite tea mätü khekhe te vi. Jangni üng hai äni lä änawngsa kha khimi ce üng hunghö na tähang dengpy pa te y vi. Tungaila vaihi äni lä äma üng cüng saite mätü hethang Isu Khrista bung hikä dü hai hethang mätaw pa te vi dy. Honi kätyng Säthaw lä äma cüng vi näkha Isu tea yng saite khimi qütä bung lä khimi käcüng-a mäthi te vi dy.

²⁷Hokä dylä mä-ai lä makä sa kha la aethaw haw y. Aethaw he äte la awng te y. Ätephüng-a mei nädylä mä-ai lä Mosi üng Ubädi tängai te phüng-a, Säthaw üng maw-a cüng ö te y vi. Mä-ai lä yng te phüng-a cüng ö te kae. ²⁸Yng saite qaitä hai-a Säthaw lä khimi käcüng-a mäthi te kae. Mosi üng Ubädi tea tängai te hai-a lä Säthaw üng maw-a cüng haw te y näte kai ce lä mäny ö vi dy. ²⁹Säthaw lä Judae na qaitä üng Säthaw kae y. Ceng kälang na üng Säthaw la by vi. ³⁰Säthaw lä lawngtä xyng kae. Äni lä Judae na hai ceng kälang na tea äma ce üng yng saite hai-a cüng hai te kae. ³¹Mä-ai lä yng saite hai-a Ubädi tea khaisö vi dy näkha thui haw ai mei. Hokä y lyng. Mä-ai lä Isu Khrista tea yng te phüng-a Ubädi tängai haw ö te vi näte thui hethang ngai te vi.

Abraham üng yng saite

¹Mä-ai Judae ceng üng kangsi pä-ai Abraham üng phüng tea ätemakä thui haw ö ai mei. Äni lä Säthaw üng maw-a cüng saite phüng äte mäny mei. ²Abraham lä äma üng sa saite na hai-a Säthaw üng maw-a khimi käcüng lawng vi nädylä aethaw hethang awng mang te vi. Tungaila Säthaw üng maw-a äni lä aethaw hethang äte la dang haw y lyng. ³Caekäcai thung-a, “Abraham lä Säthaw tea yng te phüng-a, Säthaw lä äni tea khimi käcüng-a mäthi te vi” näkha thui te vi. ⁴Khimi lawngtä kälu sa kha dang saite ävang tea lä lasawng näkha thui haw y lyng. Honi lä äma sa kha dang saite ävang vi. ⁵Tungaila Säthaw lä khimi lawngtä äni üng kälu sa te phüng-a käcüng näkha mäthi te y. Äni lä hunghö sa saite na bung bälawi saite Säthaw tea yng te phüng-a, khimi käcüng näkha mäthi te kae. ⁶Sanphrang Davidae la “Kälu sa y käla Säthaw ma khimi käcüng näkha mäthi saite khimi lawngtä lä tähang hawi te vi” näte tea thui te vi.

⁷“Säthaw lä khimi lawngtä üng hunghö tea bälawi kha,

sa tämang saite tea dawng pa y vi dylä honi khimi lä tähang hawi.

⁸Äni üng hunghö na tea Säthaw ma sämai y saite khimi lä tähang hawi” näkha awng vi.

⁹Davidae ma thui saite hini tähang kähawi lä lengkhüng täke saite Judae khimi na ni dang ö hethang kae vi mei. Y lyng. Lengkhüng täke y saite khimi la dang haw ö te by vi. Mä-ai thui saite Caekäcai thung-a, “Abraham lä Säthaw tea yng te phüng-a, Säthaw lä äni tea khimi käcüng-a mäthi te vi” näkha näte vi. ¹⁰Säthaw lä Abraham tea mani kätü-a khimi käcüng-a mäthi te vi mei. Abraham üng lengkhüng täke pyng-a mei, täke y kälang-a mei. Täke pyng tea y lyng. Täke y te kälang-a ma Säthaw lä Abraham tea khimi käcüng-a mäthi te vi dy. ¹¹Abraham lä honi pyng-a lengkhüng täke te kae vi. Äni üng lengkhüng täke saite lä äni üng yng te phüng-a, Säthaw ma äni üng lengkhüng täke y kälang-a äni tea khimi käcüng-a mäthi saite mätü hethang äsäny vi dy. Abraham lä Säthaw tea yng saite khimi angxynlyng na üng pä-ai vi. Honi khimi ce lä lengkhüng täke y ngaila äni üng yng te phüng-a, äni ce tea lä khimi käcüng kätyng Säthaw lä nung te vi dy. ¹²Äni lä lengkhüng täke saite khimi üng pä-ai la vi. Honi khimi ce lä lengkhüng täke te cang y, äni ce lä mä-ai pä-ai Abraham üng kätyng lengkhüng täke kätü-a, yng te hai-a hing te kätyng äni ce la yng te hai-a hing ö by te vi.

Säthaw ma Abraham tea py saite aedo te lo

¹³Säthaw lä Abraham hai äni üng caw nade na tea älawngpre py ai näkha älo aedo pa vi dy. Honi aedo te lä, Abraham lä Ubädi tängai te phüng-a y. Äni lä Säthaw tea yng kha Säthaw ma äni tea khimi käcüng-a mäthi te phüng-a, Säthaw ma äni tea älo aedo te vi dy. ¹⁴Säthaw lä Ubädi tea tängai saite khimi qaitä ni älo aedo saite na tea py vi nädylä, Säthaw tea yng saite lä aetütü kae vi dy. Säthaw üng älo aedo saite la ävang ting y vi dy. ¹⁵Ubädi awng te phüng-a, Säthaw lä khimi ce tea kädawtho kha dengpy pa te vi. Tungaila Ubädi awng y dylä, Ubädi tea tängai y saite khimi la awng y lyng.

¹⁶Abraham üng yng te phüng-a, Säthaw lä tähang kähawi hai-a äni üng caw nade angxynlyng na tea lä Säthaw üng älo aedo saite py pa te vi. Ubädi tea tängai saite Abraham üng caw nade na qaitä tähang y lyng. Abraham kätyng Säthaw tea yng saite khimi angxynlyng na tähang älo aedo khü saite la py te vi. Ätephüng-a mei nädylä Abraham lä mä-ai angxynlyng na üng pä-ai te phüng-a vi. ¹⁷Caekäcai thung-a, “Kai lä nang tea pre cawngkhang khimi angxynlyng na üng pä-ai lawng hai vi” näkha näpa. Tukätephüng-a äni lä Säthaw üng maw-a mä-ai üng pä-ai vi. Abraham üng yng saite Säthaw lä dü saite na tea hing hai te vi. Hini Säthaw lä angcü-a awng y saite tea awng hai hethang särilo hai thui saite vi. ¹⁸Abraham lä aethang khai hethang awng y saite kätü-a mäteng ma, Säthaw tea yng kha aethang khai hai te vi dy. Tukätephüng-a äni lä pre cawngkhang khimi angxynlyng na üng pä-ai-a lawng te vi dy. Caekäcai thung-a, “Nang üng kaesui kaebeng na lä tengpaw na kätyng nyng phi vi ai” näkha thui te kätyng lawng vi dy. ¹⁹Äni lä khösäning cungvaitä tingtang awng te phüng-a, äni üng ätabung lä dü te kätyng kae vi dy. Sara la caw nade dang haw y dy näte mäny vi. Tungaila äni üng yng saite lä aethawdi te y vi. ²⁰Abraham lä Säthaw tea yng jawjaw te vi. Äni lä Säthaw ma äma üng älo aedo saite kätyng sa y lyng näkha dawng te y vi. Äni üng yng saite lä aethaw awng rae te vi. Tukha äni lä Säthaw tea bälaw te vi dy. ²¹Säthaw la äma üng älo aedo saite na tea sa haw ai näte äni lä ae-y khü te vi dy. ²²Tukätephüng-a Abraham üng yng saite phüng-a, Säthaw lä äni tea “Khimi käcüng-a mäthi te vi” näkha nä vi dy. ²³Caekäcai thung-a, “Äni tea lä khimi käcüng kätyng mäthi vi” näkha tärü te lä äni tähang qaitä y. ²⁴Mä-ai üng Areng Isu bung kädü thung üng mäning haile saite Säthaw tea yng saite phüng-a, Säthaw lä cüng vi näkha mäthi ai näsaite lä mä-ai tähang la tärü te by vi dy. ²⁵Mä-ai üng hunghö tähang Säthaw ma Isu bung lä dü hethang a pa te vi. Säthaw lä mä-ai üng hunghö bälawi kha khimi käcüng-a awng haw hethang Khrista bung kädü thung üng mäning haile pa te vi dy.

Säthaw üng maw-a cüng saite

¹Vaihi mä-ai lä yng saite hai-a Säthaw üng maw-a cüng ö te vi. Mä-ai üng Areng Isu Khrista hai-a Säthaw hai awngneng saite dang ö te vi dy. ²Mä-ai üng Isu Khrista tea yng saite hai-a Säthaw üng tähang kähawi lä mä-ai tea vaihi dang kha tähang kähawi thung-a hing ö te vi dy. Mä-ai lä Säthaw üng tähang kähawi hai-a hing ö te vi. Mä-ai lä Säthaw üng phung-ang thung-a qa hethang aethang khai saite phüng-a anghawtho ö te vi. ³Honi qawng-a cang y mä-ai lä mätang saite na aeting ngaila anghawtho ö te vi. Ätephüng-a mei nädylä mätang saite phüng-a, mä-ai lä änawngsa hethang aetu te vi näkha mä-ai lä mäny ö te vi. ⁴Honi änawngsa saite lä mä-ai üng aeme aeqa saite tea ryng hai te vi. Mä-ai üng aeme aeqa saite ryng te phüng-a mä-ai lä aethang khai haw ö te vi. ⁵Mä-ai lä aethang khai saite awng te phüng-a aethawsi ö te y. Ätephüng-a mei nädylä Säthaw ma mä-ai tea py saite Muilaw Käcai hai-a mä-ai üng bälung thung-a äni üng bälung aevaw saite mäkawi pa te phüng-a vi dy.

⁶Mä-ai lä aethawdi te kätü-a, Säthaw lä äma re saite käni-a mä-ai hunghö sa saite khimi na tähang Khrista lä dü pa te vi dy. ⁷Khimi käcüng lawngtä tähang khimi kälang ma dü hai hethang lä rae bärai te vi. Khimi kähawi lawngtä tähang lä dü vawng saite khimi phütä awng haw daila awng ai. ⁸Tungaila Säthaw lä mä-ai tea matangtä bälung aevaw mei näte mätü pyng te vi dy. Mä-ai lä hunghö sa te thüng-a, Khrista lä mä-ai tähang dü pa te vi dy. ⁹Khrista üng dü saite äthi phüng-a, vaihi Säthaw lä mä-ai tea khimi käcüng-a mäthi te vi dy. Tukätephüng-a Säthaw üng kädawtho saite üng Isu lä mä-ai bung aeqang tätang vi ai. ¹⁰Jangni-a mä-ai lä Säthaw üng täre na-a lawng vai ö te vi dy. Tungaila äni üng Cäpaw dü saite hai-a, mä-ai tea äni üng kangby jä-ai na-a bälawng te vi dy. Vaihi mä-ai lä Säthaw üng kangby jä-ai na lawng ö vi dy. Khrista üng hing te hai-a Säthaw lä mä-ai bung aeqang tätang khaw vi ai. ¹¹Hokä tangtä cang y rawng, mä-ai üng Areng Isu Khrista hai-a mä-ai bung Säthaw üng kangby jä-ai na-a lawng hai te phüng-a, mä-ai lä anghawtho ö te vi.

Adam hai Khrista

¹²Adam lä hunghö sa te kätü-a, hunghö lä khimi lawngtä hai-a hini älawngpre-a kung te vi dy. Adam üng hunghö phüng-a, dü saite khimi angxynlyng na tea lä tyng pa te vi dy. Adam üng hunghö phüng-a khimi angxynlyng na lä hunghö sa kha dü hethang kae ö te vi dy. ¹³Säthaw ma Ubädi py y te kälang üng hai älawngpre-a awng saite khimi na lä hunghö sa ö te vi dy. Tungaila honi kätü-a lä Ubädi awng y te phüng-a, Säthaw lä hunghö sa saite na tea lä sämai te y vi. ¹⁴Tungaila Adam kätü üng hai Säthaw ma Mosi tea Ubädi py te khytä khimi angxynlyng na lä dü hethang kae ö te vi. Adam kätyng Säthaw üng särilo tea tängai y kha hunghö sa saite khimi na mäteng ma dü hethang kae.

Adam lä vaimaw mang-a tyng hethang awng saite lawngtä täthei vi. ¹⁵Tungaila Säthaw üng lasawng hai Adam üng hunghö sa te lä tengxyng y lang kyng te vi. Adam näsaite khimi lawngtä üng hunghö sa te phüng-a, khimi awng mang saite na lä dü hethang kae näte lä tätang khaw vi. Tungaila Säthaw üng tähang kähawi lä lengky kha khimi awng mang saite na tea tyng saite lasawng lä lengky te by vi. Säthaw üng lasawng lä Isu Khrista näsaite lawngtä üng tähang kähawi hai-a tyng pa te vi. ¹⁶Säthaw üng lasawng tähang kähawi hai Adam näsaite khimi lawngtä üng hunghö sa saite lä aetawng y. Adam lä hunghö haetä sa pyng-a Säthaw lä tärae cei kha äni tea dengpy te vi. Tungaila khimi ce lä hunghö sa leilae pyng-a Säthaw lä äma üng lasawng py kha khimi ce bung äma üng maw-a khimi käcüng-a mäthi pa vi dy. ¹⁷Adam näsaite khimi lawngtä üng tämang saite phüng-a, khimi angxynlyng na lä dü hethang kae. Tungaila Isu Khrista näsaite lawngtä ma sa saite na lä tengxyng y haidae awng te vi. Säthaw üng cungrü saite tähang kähawi hai lasawng kätyng Säthaw üng cüng saite dang te khimi angxynlyng na lä dungtäsa hing ö ai. Khrista ma sa saite hai-a äni ce lä hing kha hunghö tea bäja ö vi ai dy.

¹⁸Tudylä Adam näsaite khimi lawngtä üng sa tämang te phüng-a, Säthaw lä khimi angxynlyng na tea lä dengpy pa he kae te vi. Honi kätyng khimi lawngtä üng kätüng sa te phüng-a, Säthaw lä khimi angxynlyng na bung äma üng maw-a khimi käcüng-a mäthi kha äni ce tea dungtäsa kähing py te vi. ¹⁹Khimi lawngtä ma lä Säthaw üng lo tängai y te phüng-a, khimi angxynlyng na lä hunghö sa saite na lawng ö te vi dy. Honi kätyng khimi lawngtä ma Säthaw üng lo tängai te phüng-a, Säthaw lä khimi angxynlyng na tea lä khimi käcüng-a mäthi pa vi ai.

²⁰Khimi ce lä äma ce üng hunghö sa saite na tengxyng y nung rae haw hethang Säthaw lä Mosi hai-a Ubädi py pa te vi. Tungaila hunghö sa te nyng saite kätü-a lä Säthaw üng tähang kähawi lä awng mang rae te vi. ²¹Tukha khimi angxynlyng na tea lä hunghö ma pyng kha dü hethang kae te kätyng, Säthaw üng tähang kähawi ma la pyng te vi dy. Honi hai-a khimi angxynlyng na tea lä Säthaw ma äma üng maw-a khimi käcüng-a mäthi kha mä-ai üng Areng Isu Khrista hai-a dungtäsa kähing py pa vi dy.

Khrista hai bungtä awng kha hing saite

¹Khimi phütä lä, “Säthaw üng tähang kähawi nyng rae hethang hunghö tea sa jawjaw kha hing ö ai mei” näkha nä ö vi. ²Hini kätyng sa hethang kae y. Mä-ai lä khimi kädü na kätyng hunghö hai aesui te y vi dy. Tukätephüng-a mä-ai lä hunghö sa jawjaw kha awng hethang kae khaw te ö y vi dy. ³Isu Khrista hai bungtä awng hethang mä-ai lä baptismae la saite kätü-a, äni hai mangtä dü saite tea nang ce lä mäny tätang ö te vi. ⁴Mä-ai lä baptismae la te hai-a Khrista hai mangtä dü kha äni hai mangtä ö te vi. Tukätephüng-a Khrista lä Äpä-ai üng phung-ang hai-a dü te üng hai hing haile tyng te kätyng mä-ai la hing saite kangthae-a hing haw ö te by vi dy.

⁵Ätephüng-a mei nädylä Khrista hai mangtä dü dylä, Säthaw lä Khrista hai mangtä mä-ai tea kädü thung üng mäning haile tyng vi ai. ⁶Jangni-a Säthaw bung mäny y saite mä-ai lä Khrista hai mangtä thinglang qawng-a dü ö te vi dy näkha mäny ö te vi. Honi kätyng Säthaw lä mä-ai üng hunghö sa hethang ngai saite bälung tea täphra pa vi dy. Tukha mä-ai lä hunghö üng mawsawng na lawng ö y vi dy. ⁷Khrista hai mangtä dü saite khimi tea lä hunghö ma pyng haw y vi dy. ⁸Mä-ai lä Khrista hai mangtä dü dylä, Äni hai mangtä la hing haile by ai näte mä-ai lä yng ö te vi. ⁹Säthaw ma Khrista bung dü saite thung üng mäning haile tyng kha äni lä manila dü haile tyng y vi ai. Kädü mi lä Äni tea bäja jawjaw y vi dy näte mä-ai lä mäny ö vi dy. ¹⁰Hunghö üng haidae tea täphra hethang Khrista lä qengtä hai ma dü pa te vi dy. Tungaila vaihi Äni üng hing saite lä Säthaw üng phung-ang leng hai hethang hing te vi. ¹¹Honi kätyng nang ce lä hunghö üng pyng saite tea kädü kätyng dawng hethang kae ö te vi. Tungaila nang ce lä Isu Khrista hai bungtä te phüng-a Säthaw tähang hing hethang kae ö te vi.

¹²Tukätephüng-a nang ce üng dü haw saite ätabung tea lä hunghö tea pyng hai ö hang. Nang ce üng ngaiphi tüng y saite na tea lä hui ö hang. ¹³Nang ce üng ätabung kaepreng na tea käsi sa hethang a ö hang. Honi jüng-a kädü thung üng nang ce bung mäning haile tyng pa saite Säthaw tea nang ma ce bung ae-a ö. Käcüng sa hethang nang ce üng ätabung kaepreng na lä äni tea a ö. ¹⁴Hunghö lä nang ce tea pyng hai hang. Ätephüng-a mei nädylä nang ce lä Ubädi thung-a awng te kätyng hing hethang ngai y dy. Nang ce lä Säthaw üng tähang kähawi hai-a awng ö te phüng-a vi.

Cüng saite üng mawsawng na

¹⁵Khimi phütä ma, “Mä-ai lä Ubädi thung-a awng te kätyng hing hethang ngai y vi dy. Säthaw üng tähang kähawi hai-a awng te phüng-a, hunghö sa haw ö vi dy” näkha nä ö vi. Honi kätyng lä tätang y lyng. ¹⁶Nang lä lawng lawngtä üng mawsawng sa hethang mä-ai ma tea ae-a dylä, ingkung üng tängai saite mawsawng-a lawng te mäny vi dy. Nang ce ma hunghö üng mawsawng-a lawng ö vi dylä, nang ce üng älang kangteng lä dü saite kae vi. Nang ce ma Säthaw üng lo tea tängai dylä, khimi käcüng-a lawng ö vi ai. ¹⁷Jangni-a nang ce lä hunghö üng mawsawng na lawng vai ngaila, vaihi lä nang ce dang te mätu saite tea bälung mäke hai tängai ö te vi dy. Tukätephüng-a mä-ai lä Säthaw tea kawng te lo thui ö si. ¹⁸Nang ce lä hunghö ma pyng saite üng aelawi kha Säthaw üng cüng saite mawsawng na lawng ö te vi dy. ¹⁹Nang ce lä Säthaw üng phüng mäny y saite na awng mang te phüng-a khimi ce üng thaikaw saite lo hai kai lä thui ai. Jangni-a nang ce lä käsi na hai cai y saite na üng mawsawng na kätyng ae-a vai te phüng-a, hunghö sa rae sa rae ö te vi dy. Honi kätyng vaihi nang ce lä cüng saite üng mawsawng na lawng hethang nang ma ce bung Säthaw tea ae-a kha cai rae cai rae hethang kae.

²⁰Nang ce lä hunghö üng mawsawng lawng te kätü-a, cüng saite ma nang ce tea pyng te y. ²¹Jangni-a nang ce sa saite na phüng-a vaihi nang ce lä saerae te dang ö vi dy. Honi na hai-a nang ce lä äte ävang na dang ö mei. Honi sa saite na üng ävang lä dü saite kae vi. ²²Tungaila vaihi nang ce lä hunghö üng pyng saite thung üng aelawi kha Säthaw üng mawsawng na-a lawng ö te vi. Nang ce üng dang saite ävang lä Säthaw ma nang ce tea cai hai kha honi pyng-a lä dungtäsa hing saite py te vi. ²³Hunghö sa saite üng ävang lä dü saite kae. Säthaw üng py saite lasawng lä mä-ai üng Areng Isu Khrista hai bungtä-a dungtäsa hing saite vi.

Ingthawng sa saite hai mätae pa

¹Kangby jä-ai na ä, nang ce angxynlyng lä Ubädi mäny phüng-a, kai ma thui saite tea mäny tätang ö vi ai. Ubädi lä khimi ce üng hing saite jungtä äni ce tea pyng pa te vi. ²Älo käbawng-a thui si nädylä ingthawng sa saite nawngmädi lawngtä lä äma üng nawngpaw hing saite kätü xyngtä Ubädi kätyng äni üng nawngpaw hai mangtä awng hethang kae. Tungaila änawngpaw dü dylä, honi Ubädi thung üng äni lä aelawi te vi dy. ³Änawngpaw hing te thüng-a, nawngmäcaw kälang hai awng vi nädylä honi nawngmädi tea lä täkübäjang sa saite nawngmädi näkha khimi ce ma thui haw te vi. Tungaila änawngpaw dü dylä honi nawngmädi lä Ubädi täkui üng aelawi te vi. Nawngmäcaw kälang lawngtä tea ingthawng sa ngaila, äni lä täkübäjang sa saite nawngmädi näkha ämi la thui haw y lyng. ⁴Kai üng kangby jä-ai na ä, hini lä nang ce hai la aesui te vi. Nang ce lä Khrista üng ätabung käsui na vi te phüng-a, äni hai mangtä dü ö te vi. Tukätephüng-a nang ce lä Ubädi kätyng hing hethang ngai ö y vi dy. Vaihi nang ce lä Säthaw ma kädü thung üng mätha tyng saite Isu Khrista hai aesui ö te vi. Tukätephüng-a mä-ai lä Säthaw üng kälu sa saite khimi lawng haw ö vi ai. ⁵Mä-ai lä mä-ai ma üng ngaiphi tüng y saite bälung kawi te kätyng hing ö te kätü-a, Ubädi lä ngaiphi tüng y saite na awng hai rae awng hai rae te vi. Mä-ai üng ätabung na hai hunghö sa hethang ngai ö phi te phüng-a, mä-ai angxynlyng na lä dü hethang kae ö te vi dy. ⁶Tungaila vaihi mä-ai lä pyng vai saite Ubädi thung üng aelawi ö te vi dy. Ubädi hai aesui kha mä-ai lä dü ö te phüng-a, Ubädi lä mä-ai bung thawng thung-a pä-ung hethang haidae awng y vi dy. Mä-ai lä tärü saite Ubädi üng älang kangrüng kätyng kälu sa hethang ngai ö y vi dy. Muilaw Käcai ma mätü kha säbawng saite älang kangthae kätyng Säthaw üng kälu sa haw ö te vi.

Säthaw üng Ubädi lä mä-ai üng hunghö tea mätü pa

⁷Khimi phütä ma “Ubädi lä hawi te y vi” näkha thui ö vi. Hokä thui hethang kae y. Tungaila kai tea lä Ubädi hai-a hunghö lä äte mei näte mäny haw te vi. Ubädi ma, “Bädö hang” näkha thui y dylä, bädö vi näte kai lä mäny he y. ⁸Hunghö lä Ubädi tea tawng kha kai tea bädö saite bälung cawngkhang awng hai hethang the te vi. Ubädi awng y dylä hunghö ma mä-ai tea pyng haw y lyng. ⁹Jangni-a kai lä Ubädi mänykaw y käla hing vai te vi. Tungaila Ubädi mäny te kätü-a, kai lä hunghö sa hethang ngai vi dy. ¹⁰Tukha kai la dü te vi. Kai tea hing hethang Säthaw ma py saite Ubädi lä kai bung dü saite mang-a tha te vi. ¹¹Hunghö lä Ubädi tea tawng kha kaeling kaemae sa ea dü hai te vi dy.

¹²Tukätephüng-a Ubädi lä cai vi. Särilo lä caiping saite, mitang khaw saite hai hawi saite vi. ¹³Hokä dylä hawi saite lä kai tea dü hai te vi näkha thui hethang ngai te mei. Hokä lä thui haw y lyng. Kai tea dü hai saite lä hunghö kae. Hunghö lä äma üng kängai kätyng hawi saite hai tawng kha kai tea dü hai te vi. Tudylä hunghö lä matangtä hawi y mei näte khimi ce lä Ubädi hai-a mäny haw ö te vi.

Khimi bälung thung üng Ubädi känetä

¹⁴Ubädi lä Säthaw üng Muilaw hai aesui vi näte mä-ai lä mäny ö vi. Tungaila kai lä dü haw saite ätabung hai aesui saite khimi lawng kha hunghö üng mawsawng lawng te vi. ¹⁵Kai ma sa saite tea kai lä mänykaw te y. Ätephüng-a mei nädylä kai lä kai ma üng ngai saite kätyng sa y käla, kai ma esäre saite tea sa te vi. ¹⁶Kai ma sa hethang ngai y saite tea kai lä sa te vi dy. Tudylä Ubädi lä tüng vi näte kai lä bälung aedü te vi. ¹⁷Hokä dylä honi hawi y saite tea kai ma sa khe te y. Kai üng bälung thung-a awng saite hunghö ma sa te kae. ¹⁸Kai üng ngaiphi tüng y saite bälung lä äte kähawi haetä la awng y vi näte kai lä mäny te vi. Ätephüng-a mei nädylä kai ma kähawi sa hethang ngai ngaila sa haw te y vi. ¹⁹Kai lä hawi saite sa hethang ngai ngaila, sa y käla ma sa hethang ngai y saite käsi tea ni sa te kae vi. ²⁰Kai ma ngai y saite tea sa vi nädylä kai ma sa khe te y vi. Kai üng bälung thung-a hing saite hunghö ma sa te kae.

²¹Kai üng bälung thung-a hini kätyng lawng te tea kai lä nung te vi. Hawi saite kälu tea kai lä sa hethang ngai te kätü-a, kähawi y sa hethang kai lä re haw te vi. ²²Säthaw üng Ubädi lä kai üng bälung tea kawng hai te vi. ²³Tungaila kai üng ätabung thung-a Ubädi kälang kälu sa te tea kai nung vi. Hini Ubädi kälang lä kai bälung thung üng ngai saite Ubädi tea lä elekhei sa te vi. Honi Ubädi kälang lä hunghö hai aesui kha kai bung hunghö üng mawsawng-a lawng hai te vi. ²⁴Kai lä tengxyng y anghawtho y saite khimi vi. Kai tea dü hai saite hini ätabung üng ämi ma kai bung aeqang ai mei. ²⁵Kai lä Säthaw tea tengxyng y kawng te vi. Mä-ai üng Areng Isu Khrista hai-a Säthaw lä mä-ai bung aeqang te vi.

Tudylä bälung kaedawng hai-a Säthaw üng Ubädi tea kai lä tängai hethang ngai te vi. Tungaila kai üng ngaiphi tüng y saite bälung phüng-a, kai lä hunghö üng mawsawng-a lawng te vi dy.

Muilaw Käcai hai-a hing saite

¹Vaihi Isu Khrista hai bungtä awng saite khimi lä Säthaw ma dengpy pa y vi dy. ²Ätephüng-a mei nädylä mä-ai lä Isu Khrista hai bungtä lawng te phüng-a, mä-ai tea kähing py saite Muilaw üng Ubädi lä mä-ai bung hunghö hai-a dü saite Ubädi thung üng bälawi pa te vi dy. ³Ngaiphi tüng y saite bälung phüng-a, Mosi üng Ubädi lä mä-ai bung aeqang haw te y vi. Tukätephüng-a Säthaw lä mä-ai bung aeqang hethang äni lä Äcäpaw khekhe bung mä-ai tea mätaw pa vi dy. Äni üng Cäpaw lä mä-ai kätyng hunghö sa hethang ngai saite ätabung awng vi. Äni lä mä-ai bung pyng saite hunghö tea täphra te vi dy. ⁴Säthaw ma hini kätyng sa te lä mä-ai lä ngaiphi tüng y saite bälung kätyng hui y käla, Muilaw Käcai üng aely kängai-a hing kha Ubädi ma thui saite tea mä-ai lä sa haw ö king te vi. ⁵Ngaiphi tüng y-a hui saite khimi üng kaedawng lä äma ce üng ngaiphi tüng y saite bälung tea pyng pa vi dy. Tungaila Muilaw Käcai ma äni ce tea thui te kätyng hing saite khimi üng bälung kaedawng tea lä Muilaw Käcai ma pyng pa te vi. ⁶Khimi lawngtä üng kaedawng tea ngaiphi tüng y saite bälung ma pyng dylä, äni lä dü hethang kae. Säthaw üng Muilaw Käcai ma khimi lawngtä üng kaedawng te pyng dylä, Säthaw ma äni tea lä hing saite hai awngneng saite py pa vi ai. ⁷Ngaiphi tüng y saite ma pyng saite khimi lä Säthaw üng täre na vi. Äni ce lä Säthaw üng Ubädi tea tängai ö y. Äni ce lä tätang tängai ö haw y te vi. ⁸Ngaiphi tüng y te tea hui saite khimi lä Säthaw üng bälung kawng hai haw y lyng.

⁹Tungaila Säthaw üng Muilaw Käcai lä nang ce thung-a awng dylä, nang ce tea lä ngaiphi tüng y saite ma pyng te y vi. Muilaw Käcai lä nang ce tea pyng te vi. Khrista üng Muilaw Käcai awng y saite khimi lä Khrista hai aesui ö te y. ¹⁰Tungaila Khrista lä nang ce thung-a awng dylä, nang ce üng ätabung lä hunghö phüng-a dü ö vi dy. Nang ce lä Säthaw üng maw-a cüng ö te phüng-a, Muilaw Käcai lä nang ce tea hing hai vi ai. ¹¹Isu bung kädü thung mätha haile tyng saite Säthaw üng Muilaw lä nang ce thung-a awng te vi. Honi kätyng Khrista tea dü saite üng mätha haile tyng saite Areng lä nang ce thung-a awng saite äni üng Muilaw hai-a dü haw saite nang ce üng ätabung tea la hing hai vi ai.

¹²Tukätephüng-a kai üng kangby jä-ai na ä, Muilaw Käcai ma mä-ai tea thui te kätyng awng hethang kae. Mä-ai üng ngaiphi tüng y saite ma mä-ai tea thui te kätyng mä-ai lä sa hethang ngai y lyng. ¹³Nang ce üng ngaiphi tüng y saite ma thui te kätyng hing dylä, dü ö vi ai. Tungaila Muilaw Käcai hai-a nang ce üng hunghö hai aesui saite kälu tea mänawng king dylä hing ö ai. ¹⁴Säthaw üng Muilaw leithung hui saite khimi lä Säthaw üng caw nade na vi. ¹⁵Säthaw ma nang ce tea py saite Muilaw lä nang ce bung mawsawng na lawng hai hethang y lyng. Ri hai hethang la y. Säthaw üng Muilaw lä nang ce tea äma üng caw nade na-a lawng hai te vi. Mä-ai lä Muilaw üng haidae hai-a Säthaw tea, “Äba, Üngai” näkha ka ö te vi. ¹⁶Mä-ai lä Säthaw üng caw nade na vi näsaite tea Säthaw üng Muilaw lä mä-ai üng muilaw hai mangtä sasi mätü te vi. ¹⁷Mä-ai lä Säthaw üng caw nade na näte phüng-a äma üng khimi na tähang khai saite tähang kähawi na tea dang ö ai. Säthaw ma Khrista tähang khai saite honi tähang kähawi tea la Khrista hai mangtä mä-ai lä dang ö by vi ai. Mä-ai lä Khrista üng mätang bälaica saite thung-a qa dylä äni hai mangtä phung-ang thung-a qa ö by ai.

Maw mang üng phung-ang

¹⁸Vaihi kätü-a mä-ai üng mätang bälaica saite lä vaimaw mang-a Säthaw lä mä-ai tea mätü saite phung-ang hai lä mätae haw y lyng näkha kai lä aedawng khü te vi. ¹⁹Säthaw ma sa saite käni, älawng hai khöteng täki angxynlyng lä Säthaw ma aetüng hethang äma üng caw nade na tea tengxyng y aedawng rawng ö te vi. ²⁰Säthaw lä honi sa saite angxynlyng na tea aetütü-a lawng hethang tärae cei pa te vi dy. Hokä lawng saite lä Säthaw ma sa saite üng aely kängai hai-a y lyng. Säthaw üng aely kängai kätyng kae vi. Tungaila Säthaw lä äma sa saite üng aethang khai he lä awng te vi rawng. ²¹Honi aethang khai saite lä känitä-a Säthaw üng sa saite lä pra king te üng aelawi kha Säthaw üng caw nade na hai mangtä phung-ang hai aelawi saite dang ö ai. ²²Honi Säthaw üng sa saite angxynlyng lä äby aepeng te kätü-a nawngmädi lawngtä lä naw mätang phi te kätyng vaihi kätü khytä naw kha hangsung te tea mä-ai lä mäny ö vi. ²³Säthaw üng sa saite qaitä hangsung te cang y, Säthaw lä äma angcü üng lasawng kätyng Muilaw Käcai mä-ai tea py kha mä-ai la reng ö te by vi. Säthaw lä mä-ai bung äma üng caw nade na-a mäthi kha äma üng älo aedo te kätyng mä-ai üng ätabung kangthae py hethang mä-ai lä aering ö te vi. ²⁴Säthaw ma mä-ai bung aeqang te kätü-a, mä-ai tea hini aethang khai saite py te vi dy. Tungaila mä-ai üng aethang khai saite nung dylä, honi lä tätang aethang khai saite y lyng. Nung pyng saite tea mä-ai lä aethang khai ö te y vi dy. ²⁵Tungaila mä-ai üng nung haw y saite tea aethang khai dylä, mä-ai lä änawngsa kha aering ö te vi.

²⁶Honi kätyng-a Muilaw Käcai lä aethawdi saite mä-ai tea säbawng te by vi. Ätemakä sa kha aetang he kae mei näte mä-ai lä mäny ö te y. Tungaila älo hai thui haw y, hang saite ätüng na hai-a Muilaw Käcai äma khekhe lä mä-ai tähang Säthaw tea aesi aebai hai pa te vi. ²⁷Mä-ai üng bälung tea kheng saite Säthaw lä Muilaw üng kaedawng tea la mäny te vi. Ätephüng-a mei nädylä Muilaw Käcai lä Säthaw üng aely kängai-a, Säthaw üng khimi na tähang aetang pa te phüng-a vi.

²⁸Säthaw tea bälung aevaw kha Säthaw lä äma üng mawlang kaedawng kätyng ka saite khimi ce tähang Säthaw ma äte angxynlyng na kähawi-a sa pa te tea mä-ai lä mäny ö vi. ²⁹Säthaw lä äma re rüng saite khimi ce tea äma üng Cäpaw kätyng lawng tätang hai hethang la aedawng rüng khaw te vi. Tukätephüng-a Äcäpaw lä yng saite kangby jä-ai awng mang te na thung-a Cäpaw äcälöky-a lawng hai te vi. ³⁰Tudylä Säthaw lä ka hethang äma aedawng rüng saite na bung ka pa te vi dy. Äni ma ka saite khimi ce tea lä khimi käcüng na-a mäthi kha äma üng phung-ang la äni ce tea py pa vi dy.

Säthaw üng bälung aevaw saite

³¹Tudylä hini na phüng dawng tea mä-ai lä ätemakä thui haw ö ai mei. Säthaw ma mä-ai te mang-a awng dylä, mä-ai tea ämi ma la mä-ai tea bäja haw y dy lyng. ³²Äma üng Cäpaw khekhe bung mäsai y käla, mä-ai angxynlyng tähang löci sa pa vi dy. Äcäpaw bung py saite Säthaw lä ngai saite angxynlyng na mä-ai tea py tätang khaw vi ai. ³³Säthaw ma re saite khimi tea lä ämi ma cy haw ai mei. Säthaw äma khekhe lä äni ce tea hunghö awng y näkha thui te vi. ³⁴Äni ce tea ämi ma dengpy ai mei. Isu Khrista lä mä-ai tea dengpy y lyng. Äni lä mä-ai tähang dü hai pa te cang y, Säthaw lä äni bung kädü thung üng mätha tyng pa te vi dy. Vaihi äni lä Säthaw üng bangtang mang-a awng kha mä-ai tähang Säthaw tea aetang pa te vi. ³⁵Tupyng dylä Khrista üng bälung aevaw saite thung üng mä-ai bung ämi ma täprei ja haw ai mei. Rai saite, mätangbälai saite, sakälö khü saite, böjo aelang saite, mätang bälai saite, ri hethang hawi saite hai dü saite na ma mä-ai bung lä Khrista bälung aevaw saite thung üng täprei ja haw y lyng. ³⁶Caekäcai thung-a,

“Nang üng tähang khimi ce lä kai ce bung käni qütä bädü hethang ngai ö te vi.

Mä-ai tea lä bädü hethang khai rüng saite beram kätyng khimi ce lä mäthi ö te vi” näkha tärü te awng.

³⁷Mä-ai tea bälung aevaw saite Khrista hai-a mä-ai lä äte angxynlyng na tea bäja king te vi dy. ³⁸Ätephüng-a mei nädylä, mä-ai bung Khrista üng bälung aevaw saite üng äte haetä hai la täprei haw y lyng näte tea kai lä yng khü te vi. Dü saite, hing saite, Känipre üng angtawtha saite na, Käni khösang üng pyng saite angra na, haidae awng saite na, vaihi awng saite ätete na, vaimaw mang-a tyng hethang awng saite ätete na la Khrista ma bälung aevaw saite thung üng mä-ai tea täprei ja ö haw y lyng. ³⁹Mä-ai üng älawngpre qawng-a awng saite angxynlyng na, ätäkui-a awng saite angxynlyng na, Säthaw ma sa saite angxynlyng na thung üng äte haetä la mä-ai üng Areng Isu Khrista hai-a Säthaw üng bälung aevaw saite üng mä-ai bung lä täprei ja haw y lyng näkha kai lä mäny tätang te vi.

Säthaw hai äma üng re saite khimi

¹Khrista üng maw-a kai lä lo mitang thui te vi. Kai lä kaeling kaemae lo thui te y lyng. Kai thui saite lä tüng vi näte Muilaw Käcai ma pyng saite kai üng käsi kähawi mäny saite bälung ma kai tea thui khü te vi. ²Kai lä bälung naw kha tengxyng y bälungsi phi vi dy. ³Hini lä kai üng amäjy na lawng saite Isrelae khimi na phüng-a vi. Äni ce tea säbawng haw vi dylä kai ma khekhe lä Säthaw üng täking saite hai Khrista te üng täprei ja saite tea kai lä ngaiphi saite bälung mäteng ma awng haw te vi dy. ⁴Äni ce lä Säthaw üng re saite khimi vi. Säthaw lä Isrelae khimi na tea äma üng caw nade na-a lawng hai kha äma üng phung-ang tea mätü pa vi dy. Säthaw lä äni ce hai aenai saite na sa kha äni ce tea Ubädi py pa vi dy. Äni ce lä Säthaw tea cäphaw tätang hethang mäny kha Säthaw üng älo aedo saite na dang ö vi dy. ⁵Äni ce lä ämüng aethang saite Hebrai kangsi kangjaw na üng kaepreng na vi. Khrista la khimi lawng te kätü-a, Isrelae khimi kätyng-a aepeng te vi. Äte angxynlyng na pyng saite Säthaw tea lä khimi ce ma dungtäsa bälaw hai ö sy. Amen.

⁶Säthaw ma Isrelae khimi na tea py saite älo aedo te kätyng äni lä sa y vi näkha kai lä thui te y lyng. Ätephüng-a mei nädylä Isrelae khimi angxynlyng Säthaw ma re saite khimi y vi. ⁷Hini kätyng Abraham üng kaesui kaebeng angxynlyng na la Säthaw üng caw nade na y lyng. Säthaw lä Abraham tea, “Nang üng cäpaw Isaika hai-a nang lä kaesui kaebeng tätang na dang ai” näkha näpa. ⁸Äte thui hethang ngai te mei nädylä Abraham üng caw nade na angxynlyng tea Säthaw lä äma üng caw nade na-a mäthi y lyng. Säthaw üng älo aedo saite kätyng aepeng saite caw nade na xyngtä tea ni Säthaw lä Abraham üng caw nade na tätang näkha mäthi vi. ⁹Säthaw ma, “Kätü tyng tea kai ly haile tyng ai. Tukha Sara lä cäpaw lawngtä aepeng vi ai” näkha Abraham tea älo aedo vi dy.

¹⁰Honi qawng-a cang y, Rebekha cäpaw lawng netä lä äpä-ai lawngtä awng te vi. Äni lä mä-ai üng kangsi kangjaw Isaika vi dy. ^11-12Tungaila änini lä aepeng y kälang-a, käsi kähawi sa haw y te kätü-a ma Säthaw lä Rebeka tea, “Nang üng cäpaw cälö lä cäpaw nade tea mawsawng sa vi ai” näkha näpa. Säthaw ma honi kätyng thui te lä äni üng mawlang kaedawng tea mätü hethang vi. Hokä Säthaw üng re saite lä khimi ce sa saite tea aenyng te y lyng. Äni üng aely kängai-a aenyng te kae vi. ¹³Caekäcai thung-a Säthaw lä, “Kai lä Jaeko tea bälung aevaw kha Esawka tea lä khaisö te vi” näkha näpa.

¹⁴Hokä dylä Säthaw lä cüng y vi näkha mä-ai lä thui haw mei. Hokä thui haw y lyng. ¹⁵Säthaw lä Mosi tea, “Kai lä säbawng hethang ngai saite khimi tea säbawng vi ai. Kai lä bäheng hethang ngai saite khimi tea bäheng vi ai” näkha näpa. ¹⁶Tukätephüng-a Säthaw üng re saite mä-ai khimi ce üng kängai hai sa saite tea aenyng te y lyng. Säthaw üng bäheng saite qaitä tea aenyng te kae vi. ¹⁷Caekäcai thung-a Säthaw lä Aikuta pre üng Faraw sanphrang tea, “Kai lä nang tea sanphrang sa hai te lä kai üng phung-ang nang te mang hai-a mätü kha älawngpre angxynlyng-a kai üng angthang aepreng hai hethang vi” näkha näpa. ¹⁸Hokä dylä Säthaw lä bäheng hethang ngai saite khimi tea bäheng kha bälung tangkö hai hethang ngai saite khimi tea lä tangkö hai te vi.

Säthaw üng kädawtho saite hai bäheng saite

¹⁹Khimi phütä ma kai tea, “Hokä dylä ätephüng-a Säthaw lä mä-ai tea cy te vi mei. Säthaw üng aely kängai tea ämi ma elekhei sa haw y lyng” näkha nä ai mei. ²⁰Tungaila kai ma “Kai üng kangby jä-ai ä, ämi lawngtä la Säthaw tea hini kätyng älo qa haile haw y lyng” näkha thui te vi. Nang lä nang ma tea äte käthi vi nang mei. Säthaw ma sa saite khimi lä sa saite kung tea, “Kai tea äte makäte phüng-a hikä sa te vi mei” näkha thui haw y lyng. ²¹Lä-awng sa saite kung lä lä-awng ngang tea la kha äma ngai te kätyng sa haw te vi. Äni lä lä-awng ngang la kha aely leng saite angvüng angvaw na tawng hethang kaephi haetä sa te vi. Honi lä-awng ngang tea la haile kha käni qütä tawng hethang kaephi la sa haw te vi.

²²Honi kätyng-a Säthaw la sa te vi. Äni lä äma üng kädawtho saite mätü kha haidae khimi ce tea la mäny hai hethang ngai te vi. Tungaila äni täphra hethang khimi ce hai kädawtho te kätü-a mäteng ma, tengxyng y änawngsa te vi dy. ²³Säthaw lä äma üng änawngsa saite ätephüng-a mätü te mei nädylä, bäheng saite mä-ai tea äma üng phung-ang käleng mätü hethang ngai te vi. Äni lä äma üng phung-ang mä-ai tea dang hai hethang angcü üng hai mä-ai tea re kha sa rüng pa te vi dy. ²⁴Mä-ai lä äni üng re saite khimi vi. Äni lä mä-ai bung re te kätü-a Judae ceng thung üng khimi na qaitä tea kae y, ceng kälang na thung üng tea la re te by vi. ²⁵Säthaw ma Hosea üng cae-u thung-a,

“Kai üng khimi y saite na tea vaihi ‘Kai üng khimi na vi’ näkha mäthi vi ai.

Kai ma bälung aevaw vai y saite ceng na tea,

Kai lä bälung aevaw saite ceng ‘na näkha mäthi vi ai’ näkha awng vi.

²⁶Tukha Säthaw ma, ‘Nang ce lä kai üng khimi na y lyng’ näkha thui saite mityng-a,

‘Nang ce tea lä Säthaw kähing üng caw nade na vi’ näkha mäthi ö vi ai” näkha nä vi.

²⁷Buisaw Isaia ma Isrelae khimi na üng phüng thui pa te lä, “Isrelae khimi na lä Pangle pyng-a awng saite täpung älawng ngangdi kätyng awng mang ö ngaila, Säthaw lä äjecäcaw na tea ni aeqang vi ai. ²⁸Ätephüng-a mei nädylä Areng lä älawngpre-a awng saite khimi angxynlyng na tea qengtä hai ma tärae cei king praw vi ai” näkha näpa. ²⁹Buisaw Isaia ma thui rüng te kätyng, “Tukha äte angxynlyng sa haw saite Säthaw lä kaesui kaebeng phütä na mä-ai bung kaebang-a khai pa y dylä, mä-ai lä Sodom märü kätyng lawng kha Komorae märü kätyng lawng vi dy” näkha näpa.

Isrelae khimi na hai Angthang Kähawi

³⁰Kai ce ma thui hethang ngai saite lä Säthaw üng maw-a cüng hethang aethawsa y saite ceng kälang na tea Säthaw lä cüng vi näkha mäthi te vi. Ätephüng-a mei nädylä äni ce lä Säthaw tea yng ö te vi. ³¹Tungaila Isrelae khimi na lä Säthaw üng Ubädi tea cakhi-a hui ö ngaila Säthaw lä äni ce tea khimi käcüng-a mäthi y vi. ³²Ätephüng-a mei nädylä äni ce la yng saite hai y käla äma ce üng sa saite na hai-a aenyng ö te phüng-a vi. Tukätephüng-a Isrelae khimi na lä Caekäcai thung-a tärü saite kälung tea äkho mäthui khy ö te vi dy. ³³Honi kätyng Säthaw lä Caekäcai thung-a,

“Tängai ö. Khimi ce lä mäthui khy kha aetüng hai saite kälung tea Zaion märü-a kai lä khai vi ai.

Honi kälung tea khimi ce lä mäthui khy kha täbakhu hai ö vi ai.

Tungaila äni tea yng saite khimi lä manila aethawsi ö y vi ai” näkha awng te vi.

¹Kai üng kangby jä-ai na ä, kai üng Isrelae khimi ceng na tea Säthaw ma aeqang hethang ngai hai te bälung mäke hai-a Säthaw tea kai lä aetang te vi. ²Äni ce lä Säthaw tea aethaw aela vi näte kai lä thui khaw haw vi. Tungaila äni ce lä Säthaw tähang makä kälu sa ai mei näte tea äni ce lä mäny ö y. ³Säthaw lä khimi ce tea mani älang hai käcüng-a mäthi mei näte tea äni ce lä mäny ö y. Äni ce lä Säthaw üng maw-a äma ce üng älang hai cüng hethang ngai ö te vi. Äni ce lä Säthaw ma khimi ce tea käcüng näkha mäthi saite älang tea ngai ö te y vi. ⁴Khrista lä Ubädi tea haidae awng y rung khytä sa te phüng-a, Säthaw lä yng saite khimi angxynlyng na tea khimi käcüng-a mäthi vi dy.

Säthaw lä khimi angxynlyng na tea aeqang saite

⁵Mosi lä Ubädi tea tängai kha cüng saite khimi phüng tärü vi dy. “Ubädi üng särilo tea tängai saite khimi lä hing ai” näkha tärü vi. ⁶Tungaila khimi lawngtä lä yng te hai-a Säthaw üng maw-a cüng saite phüng tea Caekäcai ma thui te lä, “Nang lä nang ma üng bälung thung-a Känipre-a paw hethang lä ämi mei näkha düng hethang kae y.” (Hini tea thui hethang ngai te lä, Khrista bung khösang üng hai älawng qawng-a ka haile tyng hethang näte vi.) ⁷“Nang ce lä angqaw khaw-a cäqa hethang lä ämi mei näkha nang ma ce üng bälung thung-a düng ö hang” näte awng vi. (Hini tea thui hethang ngai te lä kädükhaw üng Khrista bung mätha haile te kätyng vi.) ⁸Tungaila Caekäcai thung-a lä, “Säthaw üng angthang lä nang ce teng-a awng te vi. Nang lä thui pyng te vi dy. Nang üng bälung thung-a la awng te vi” näkha awng vi. Honi angthang nang ce tea kai ce ma thui pa saite lä Säthaw tea nang ce lä ae-y hethang kae te vi. ⁹Nang üng täbawng hai-a, “Isu lä Areng vi” näkha thui ea Säthaw lä äni bung dü saite thung üng mäning haile te vi näte tea nang ce üng bälung thung-a yng dylä, Säthaw lä nang ce tea aeqang vi ai. ¹⁰Ätephüng-a mei nädylä mä-ai üng bälung thung-a yng saite hai-a Säthaw lä mä-ai tea khimi käcüng na-a mäthi ai. Mä-ai lä yng saite phüng thui dylä, Säthaw lä mä-ai bung aeqang vi ai. ¹¹Caekäcai thung-a, “Äni tea yng saite khimi lä, ämi lawngtä la aethawsi y lyng” näpa te vi. ¹²Judae khimi na hai ceng kälang na lä äte la lang te awng y. Säthaw lä khimi angxynlyng na üng Areng mangtä vi te phüng-a, aetang saite qütä na tea lä Äni ma tengxyng y tähang kähawi py pa te vi. ¹³Caekäcai thung-a, “Areng tea aetang saite khimi qütä tea lä äni ma aeqang vi ai” nä te vi.

¹⁴Tungaila Isu tea yng y dylä, äni tea äni ce lä makä sa kha aetang haw ö ai mei. Äni üng Angthang Kähawi thai vai y dylä, äni ce lä makä sa kha yng haw ö ai mei. Angthang Kähawi thui saite khimi awng y dylä, äni ce lä makä sa kha thai haw ö ai mei. ¹⁵Tudylä Säthaw üng Angthang Kähawi thui hethang khimi ce bung Säthaw ma mätaw y dylä, makä sa kha äni ce lä Angthang Kähawi thui haw ö ai mei. Caekäcai thung-a thui te lä, “Angthang Kähawi thui saite khimi na üng ly saite äkho na lä tengxyng y cangxei he hawi vi” näkha nä vi. ¹⁶Tungaila Isrelae khimi angxynlyng na lä Angthang Kähawi tea yng ö bawi y vi. Tukätephüng-a buisaw Isaia ma, “Areng ä, kai ce üng thui saite angthang tea ämi ma yng mei” näkha nä vi. ¹⁷Tudylä Angthang Kähawi thai te phüng-a, khimi ce lä yng ö te vi. Khimi phütä ma Khrista üng phüng thui saite hai-a khimi ce lä Angthang Kähawi tea thai ö te vi.

¹⁸Tungaila khimi ce lä Angthang Kähawi tea thai y näte tätang vi mei näkha kai lä düng te vi. Äni ce lä thai ö tätang vi dy. Caekäcai thung-a,

“Angthang Kähawi thui saite na üng ätüng lä

älawngpre-a awng saite khimi angxynlyng na tea tyng vi dy” nä vi.

¹⁹Kai lä düng haile ai. “Isrelae khimi na lä thaikaw ö te y vi mei” näkha nä ai. Angcüky-a Säthaw lä Mosi hai-a,

“Kai lä ceng näkha mäthi y saite khimi na hai-a kai ma üng

khimi na tea dökhaw hai vi ai; Kai üng phüng äte la mäny y saite ceng hai-a kai ma üng khimi na tea kädawtho hai vi ai” näkha mäthang vi.

²⁰Tukha buisaw Isaia ma,

“Kai bung ha y saite ceng kälang na lä kai tea aeting ö vi dy.

Kai üng phüng düng y saite khimi na tea kai ma bung mätü vi dy” näkha thui vawng pa vi.

²¹Tungaila Isrelae khimi na phüng Isaia ma thui te lä, “Kai tea elekhei sa kha kai üng älo tängai y saite khimi na bung lady hethang käni khingtä kai üng äkö bäjang te vi dy” näkha thui vi.

Isrelae khimi na tea Säthaw üng bäheng saite

¹Hokä dylä kai ma düng te lä Säthaw lä äma üng khimi na tea käde phae te vi mei. Säthaw lä äni ce tea käde phae te y lyng. Kai ma khekhe la Isrelae khimi Abraham üng kaesui kaebeng Benjamin amäjy thung üng vi. ²Säthaw lä angcü üng hai re saite äma üng khimi na tea lä käde phae te y lyng. Caekäcai thung-a buisaw Elijae lä Säthaw ma Isrelae khimi na tea käde phae hethang Säthaw tea aesi aebai pa te tea nang ce lä mäny ö vi. ³Äni ma, “Areng ä, äni ce lä nang üng buisaw na tea bädü ö vi dy. Nang üng löci aesa saite maicang na tea la täphra ö vi dy. Kai ma qaitä awng kei te kae vi dy. Äni ce lä kai bung la bädü hethang aethawsa ö vi” näkha nä vi. ⁴Säthaw ma Elijae tea ätemakä mäthang vi mei. Äni ma lä, “Bala mimi tea cäphaw y saite khimi lawng sang säritä na la kai ma tea awng te vi rawng” näkha mäthang pa. ⁵Vaihi dung-a lä hini kätyng khaw te vi. Säthaw üng tähang kähawi phüng-a äni ma re saite yng te khimi na lä äje cäcaw awng te vi rawng. ⁶Säthaw üng re saite lä äma üng tähang kähawi qawng-a aenyng te vi. Äni ce üng sa saite qawng-a aenyng te y lyng. Khimi ce üng sa saite phüng-a, Säthaw lä khimi ce tea re te y vi. Hokä dylä Säthaw üng tähang kähawi lä tähang kähawi tätang y lyng.

⁷Isrelae khimi na lä äma ce ha saite na tea aeting y näte mäny ö sy te vi. Säthaw ma re saite khimi äje cäcaw ni aeting te kae. Säthaw lä khaisö saite khimi ce üng bälung tea tangkö hai kha äni ce lä ka saite tea thai ö y vi. ⁸Tukätephüng-a Caekäcai thung-a thui te lä, “Säthaw lä äni ce üng mänykaw y rung khytä sa pa te vi. Vaini khytä äni ce lä äma ce üng ämi na nung haw y, äni ce üng känawkhing na thai haw ö y” näkha nä vi. ⁹Tukha Davidae sanphrang ma,

“Äni ce üng nei ca saite pawi na lä äma ce tähang mäthang-a lawng ö sy.

Äni ce lä äkho mäthui khy kha aetüng ö sy. Säthaw ma äni ce tea dengpy sy.

¹⁰Äni ce üng ämi na lä ving kha nung haw ö hang sy.

Äni ce üng mätang saite na hai-a äni ce üng angkeng na la aekhüng cölö jawjaw ö sy” näkha nä vi.

¹¹Tudylä kai ma düng te lä Isrelae khimi na lä äni ce aetüng te kätü-a, aetha haw ö haile ai mei. Aetha haile haw ö tätang te vi. Äni ce lä hunghö sa te phüng-a, Säthaw lä khimi ceng kälang na tea aeqang pa ö vi dy. Säthaw lä Judae khimi na tea dökhaw hai hethang ngai te vi. ¹²Judae khimi na üng hunghö sa saite phüng-a, älawngpre-a awng saite khimi kälang na tea tähang kähawi na dang hai mang ö te vi. Judae khimi na sa tämang te phüng-a, Säthaw lä ceng kälang na tea tähang kähawi na py mang te vi. Tudylä Säthaw ma re saite Judae khimi angxynlyng na yng te kätü-a, hini qawng-a cang y khimi angxynlyng na lä tähang kähawi dang ö rae vi ai.

Säthaw ma ceng kälang na bung aeqang saite

¹³Nang ce ceng kälang na tea kai lä vaihi älo thui hethang ngai. Kai lä ceng kälang na üng angtawtha lawng te jungtä kai ma üng kälu tea aethaw vi ai. ¹⁴Kai lä kai ma ce Isrelae ceng üng khimi na tea dökhaw hai hethang aethang khai haw te vi. Tudylä Säthaw lä äni ce thung üng phütä na bung aeqang vi ai. ¹⁵Säthaw lä Isrelae khimi na tea käde phae saite kätü-a, älawngpre khimi angxynlyng na tea äma täre na lawng saite üng hai äma üng kangby jä-ai na-a lawng hai te vi dy. Tupyng dylä Judae khimi na tea Säthaw ma lady haile te kätü-a lä, khimi kädü tea mäning haile te kätyng lawng tätang vi ai.

¹⁶Khimi lawngtä lä täkaw phe äje cäcaw Säthaw tea angcü-a py dylä, täkaw phe angxynlyng na lä Säthaw hai aesui te vi. Khimi lawngtä lä äkung üng angjüng na Säthaw tea py dylä cangpre na la Säthaw hai aesui te by kae dy. ¹⁷Olive thingkawng kung kähawi üng cangpre phütä na tea tängang vi dylä, khimi ce lä daithung üng olive kung cangpre na tea lä cangpre kälang na thung-a sätawng kha e vi dy. Nang ce ceng kälang na lä daithung üng olive cangpre na kätyng vi. Jangni-a Säthaw ma Judae khimi na tea aedo saite üng tähang kähawi na vaihi nang ce lä tengxyng y dang ö vi dy. ¹⁸Tudylä nang ce lä tängang te cangpre na kätyng saite Isrelae khimi na tea mäthi y sa ö hang. Nang ce lä makä sa kha aethaw haw ö ai mei. Nang ce lä cangpre haetä kätyng kae vi. Nang ce lä cangpre kae vi kha angjüng na tea aethaw py te y. Angjüng na ni nang ce tea aethaw py te kae vi.

¹⁹Tungaila nang ce lä, “Kai ce tea mityng py hethang cangpre na tea lä tängang pyng te vi dy” näkha thui ö vi ai. ²⁰Älawng mang. Judae khimi na lä yng y te phüng-a, äni ce lä cangpre tängang saite kätyng vi. Nang ce lä yng ö te phüng-a, aesätawng haw te kae. Tungaila aethaw ö hang. Ri saite bälung awng ö. ²¹Säthaw lä olive kung kähawi üng cangpre khekhe kätyng saite Judae khimi na tea äma ce mityng na üng hai käsüja dylä, nang ce bung la käsüja haw te vi. ²²Hikä dylä Säthaw lä khimi tea matangtä bäheng kha matangtä dengpy te tea mä-ai lä mäny haw ö te vi. Äni lä äma tea aekö haile tyng saite khimi tea dengpy te vi. Tungaila äni üng bäheng te tea ae-y saite nang ce khimi ceng kälang na bung lä Säthaw ma bäheng jawjaw vi ai. Nang ce ma Säthaw üng bäheng saite tea ae-y jawjaw y dylä, nang ce tea lä Säthaw ma cangpre kätyng tängang ö by vi ai. ²³Judae khimi na lä aemäqa kha yng vi dylä, Säthaw lä äni ce üng mityng tea sätawng haile ö vi ai. Säthaw lä hini na tea sa haw te vi. ²⁴Nang ce ceng kälang na lä daithung üng olive kung cangpre tängang saite na kätyng vi. Honi cangpre lä olive kung kähawi tea sätawng haile te kätyng vi. Honi kätyng khimi ce lä sa vävawi ö te y vi. Judae khimi na lä olive kung kähawi kätyng vi. Säthaw la tängang saite cangpre na tea honi na üng äkung hai sätawng kha e haile tyng te lä jahawky vi ai.

Säthaw lä khimi angxynlyng na tea bäheng saite

²⁵Kangby jä-ai na ä, kai lä Säthaw üng ho saite na nang ce tea mäny hai hethang ngai te vi. Tudylä nang ce lä nang ma ce tea, “Mä-ai lä tengxyng y bälunghae vi dy” näkha dawng ö y ai dy. Honi ho saite lä hini kätyng vi. Isrelae khimi na üng bälung tangkö saite lä dungtäsa aekang y lyng. Ceng kälang na thung üng Säthaw tea yng saite na cungrü te khytä kae vi. ²⁶Hini kätyng Säthaw lä Isrelae khimi angxynlyng na tea aeqang vi ai. Caekäcai thung-a lä,

“Aeqang saite Kung lä Zaion märü üng ly ai.

Äni lä Jaeko üng kaesui kaebeng üng hawi y saite angxynlyng na tea lä bälawi vi ai.

²⁷Säthaw ma, ‘Kai lä äni ce hai älo aenai ai.

Honi kätü-a ni äni ce üng hunghö na tea mäcai pang ai’” näkha näpa.

²⁸Äni ce lä Angthang Kähawi tea käde phae vi te phüng-a, Judae khimi na lä Säthaw üng täre na-a lawng ö vi dy. Hikä awng saite na lä ceng kälang nang ce tähang kae. Tungaila Säthaw lä äni ce üng kangsi kangjaw na bung re te phüng-a, Säthaw lä Judae khimi na tea bälung aevaw te vi. ²⁹Säthaw lä ämi tea re mei, ämi tea tähang kähawi py mei näte phüng äni üng bälung lä aemäqa te y vi. ³⁰Ceng kälang nang ce lä angcü üng hai Säthaw üng lo tea tängai ö y. Tungaila vaihi Judae khimi na lä älo tängai ö y te phüng-a, Säthaw lä nang ce tea bäheng te vi. ³¹Honi kätyng Judae khimi na lä vaihi Säthaw üng lo tängai y te phüng-a, Säthaw lä nang ce tea bäheng te vi. Honi hai Säthaw lä Judae khimi na tea bäheng ai näkha mätü te vi. ³²Khimi angxynlyng na lä tängai y te phüng-a, Säthaw lä äni ce tea thawngsae na kätyng lawng hai vi dy. Hikä Säthaw ma sa saite lä äni ce angxynlyng tea äma üng bäheng saite mätü hethang ngai te phüng-a vi.

Säthaw tea bälaw saite

³³Säthaw üng bälungkähae hai mäny saite lä tengxyng y thu te vi. Äni üng aedawng khü saite tea ämi ma la thui mäcai haw y. Äni üng älang na tea ämi ma mäny haw y. ³⁴Caekäcai thung-a thui te la,

“Ämi la Areng üng bälung thung-a dawng saite tea mäny haw y.

Ämi ma la äni tea kaedawng saite kähawi py haw y.

³⁵Säthaw lä khimi ce tea py hethang tähang ämi ma äni tea lasawng py vai y.”

³⁶Areng lä äte angxynlyng na tea sa te vi. Angxynlyng na la äni phüng-a awng te kae. Angxynlyng na la äni tähang awng te kae vi. Säthaw üng phung-ang lä dungtäsa awng jawjaw sy. Amen.

Säthaw üng kälu sa hethang hing saite

¹Tukä dylä kai üng kangby jä-ai na ä, Säthaw lä mä-ai tea tengxyng y bäheng te phüng-a kai lä nang ce tea mäci hethang ngai te vi. Hing saite löci mawi kätyng nang ma ce ma Säthaw tea ae-a ö. Äni üng kälu sa hethang hai äni tea kawng hai hethang la ae-a ö. Hini nang ce üng ae-a saite lä Säthaw tea cäphaw tätang te vi. ²Nang ce lä hini älawngpre-a awng saite khimi üng reitae kätyng hing jawjaw ö hang. Nang ce lä mä-ai ma üng bälung kaedawng tea Säthaw ma mäqa king te hai-a äni ce ma nang ce tea kangthae lawng hai sy. Hokä dylä hawi saite na, Areng üng bälung-a kawng hai saite na näte Säthaw üng cungrü saite aely kängai lä mani mei näte tea nang ce lä mäny haw ö vi ai.

³Kai tea Säthaw ma py saite tähang kähawi phüng-a, nang ce angxynlyng na tea kai lä thui hethang ngai te vi. Nang ce lä mä-ai ma tea dawng ngece hethang kae saite qawng-a cang y, aedawng ö hang. Nang ce tea Säthaw ma py te yng saite kätyng mä-ai ma tea mä-ai ma kaeteng khaw-a aedawng ö. ⁴Mä-ai üng ätabung-a lä kaepreng na awng mang vi. Honi kaepreng angxynlyng na lä äma ce üng kälu na awng ö qi te vi. ⁵Honi kätyng-a mä-ai lä aetawng y saite khimi awng mang ö ngaila, Khrista tea lä bungtä te phüng-a, mä-ai angxynlyng na lä ätabung haetä üng aesui saite kaepreng na vi. ⁶Tukä dylä mä-ai angxynlyng na lä Säthaw ma mä-ai tea py saite tähang kähawi kätyng aetawng y sakaw saite na awng ö qi te vi. Mä-ai üng sakaw saite lä Säthaw üng Angthang thui haw saite vi dylä, mä-ai lä mä-ai ma üng yng saite kätyng thui hethang kae. ⁷Mä-ai üng sakaw saite lä yng te khimi ce tea säbawng haw vi dylä, säbawng hethang kae. Mä-ai üng sakaw saite mätu dylä, mä-ai lä kähawi-a mätu hethang kae. ⁸Mä-ai üng sakaw saite khimi tea aethaw py haw dylä, aethaw py hethang kae. Khimi ce tea säbawng he awng dylä, mäsai y käla säbawng hethang kae. Mä-ai üng sakaw saite lä yng saite na üng mätawngky-a sa hethang dylä, ae-eng kha sa hethang kae. Mä-ai üng sakaw saite hai khimi ce tea bäheng haw vi dylä, anghawtho te hai bäheng hethang kae.

⁹Nang ce üng bälung aevaw saite lä käjüng sa hethang kae y. Hawi y saite na tea lä esäre kha hawi saite tea lä aekhaw ceng ö. ¹⁰Nang ce lä Khristen kangby jä-ai na lawng lawngtä tea lä bälung aevaw ö. Nang ma ce ma lawng lawngtä tea tämö aemäsang ö. ¹¹Aethawli y käla kälu tea ae-eng kha sa ö. Bälung mäke aepy te hai Areng üng kälu tea sa ö. ¹²Nang ce üng aethang khai saite phüng-a anghawtho ö. Mätangbälai dylä, änawngsa ö. Kätü qütä aetang ö. ¹³Mätang saite Khristen kangby jä-ai na tea nang ce lä säbawng ö. Angvüng angvaw na bung kähawi-a nang ce lä üng ingthung-a mäkung ö.

¹⁴Nang ce tea sakälö khü saite na tea lä Säthaw ma tähang kähawi py hethang aetang pa ö. Äni ce tea lä täking pa ö hang. ¹⁵Anghawtho saite khimi hai mangtä anghawtho ö. Raw saite khimi hai mangtä raw ö. ¹⁶Yng saite khimi qütä hai bälung mangtä aedü ö. Aethaw ö hang. Mätang saite khimi hai kangby jä-ai na aesa ö. Mä-ai ma tea mä-ai ma bälunghae te vi näkha aedawng ö hang.

¹⁷Khimi lawngtä ma nang ce tea käsi y sa dylä, rawithung tha tyng pa ö hang. Khimi angxynlyng na ma kätüng hai kähawi näkha mäthi hethang na aethaw sa ö. ¹⁸Nang ce lä bäja te rytä khimi qütä hai awngneng saite hai-a hing hethang ae-eng ö. ¹⁹Kai üng kangby jä-ai na ä, nang ce lä rawithung tha ö hang. Säthaw ma käsi sa saite tea nang ce üng jüng-a rawithung tha tyng sy. Caekäcai thung-a lä, “Areng lä, kai ma rawithung tha pa vi ai. Hunghö sa saite khimi tea lä kai ma rawithung tha tyng ai” näkha thui te vi. ²⁰Caekäcai thung-a thui te kätyng, “Nang tea hawi y sa saite na böjo aelang dylä, äni ce tea bö mäcaw pa jo. Äni ce tui aehe dylä, tui mätyng pa jo. Hokä sa dylä, äni ce lä saerae kha äni ce üng älö qawng-a mai aeke thyng te kätyng awng pa ö vi ai” näkha näpa. ²¹Käsi ma nang ce tea lä bäja hang sy. Hini jüng-a kähawi saite na hai-a käsi na tea bäja ö ba.

Aecörae mätawngky na tea tämö khai saite

¹Khimi angxynlyng na lä aecörae mätawngky na üng pyng saite tea tängai hethang kae. Säthaw ma äni ce tea pyng hai hethang aenae py pa ö te vi. Aenae awng saite mätawngky na lä Säthaw ma khai te kae. ²Aenae awng saite na tea elekhei sa saite khimi lä Säthaw üng aenae hai täru saite tea elekhei sa te vi. Säthaw lä honi khimi ce tea tärae cei hethang sa te vi. ³Kähawi sa saite khimi lä aenae awng saite na tea ri hethang awng y lyng. Tungaila käsi sa saite na lä ri hethang awng te vi. Nang lä aenae awng saite khimi tea ri y käla awng hethang ngai dylä, hawi saite na tea sa ba. Hokä dylä äni ce ma nang tea bälaw ai. ⁴Ätephüng-a mei nädylä äni ce lä nang ma ce üng kähawi tähang Säthaw üng mawsawng na-a lawng ö te vi. Tungaila nang ce käsi sa dylä, äni ce tea ri ö hethang kae. Ätephüng-a mei nädylä äni ce lä tätang dengpy hethang aenae awng saite na vi. Äni ce lä Säthaw üng mawsawng na vi kha Säthaw üng jüng-a käsi sa saite na tea dengpy hethang aenae awng ö te vi. ⁵Tukätephüng-a Säthaw üng dengpy saite tea ri te qaitä tähang cang y, mä-ai ma üng käsi kähawi mäny saite bälung phüng-a aenae awng saite na üng älo na tängai ö hethang kae.

⁶Hini phüng-a nang ce lä angko cawng saite na tea la py hethang kae ö te vi. Aenae awng saite mätawngky na lä kälu sa te kätü-a, Säthaw üng kälu tea sa ö te vi. ⁷Tudylä nang ce lä aenae awng saite na tea py hethang kae saite na py pa ö. Py hethang awng saite angko cawngkhang na tea lä py pa ö ba. Tämö khai hethang kae saite mätawngky angxynlyng na tea tämö khai ö.

Lawng lawngtä tea bälung aevaw saite

⁸Ämi lawngtä la kälung kälai awng hang sy. Kälung kälai haetä xyng ni awng hethang kae. Honi kälung kälai lä lawng lawngtä tea bälung aevaw hethang kae saite vi. Khimi lawngtä lä äma üng kangby jä-ai tea bälung aevaw dylä, Ubädi tea tängai te vi dy. ⁹Särilo lä, “Täkübäjang sa hang, khimi bung bädü hang, bäru hang, bädö hang” näsaite na awng te vi. Tukha Särilo kälang angxynlyng na üng älangdüng lä hini särilo haetä thung-a thui pyng saite lä, “Nang ma tea nang ma bälung aevaw te kätyng nang üng kangby jä-ai na tea bälung aevaw hethang kae” näte vi. ¹⁰Äma üng kangby jä-ai tea bälung aevaw saite khimi lä äni tea käsi sa y lyng. Hokä äma üng kangby jä-ai tea bälung aevaw saite khimi lä Ubädi angxynlyng na tea tängai te vi dy.

¹¹Nang ce lä mä-ai ma i saite üng aelaw he kätü tyng te mäny te phüng-a, hini na tea sa haw hethang kae. Ätephüng-a mei nädylä vaihi Säthaw lä mä-ai bung aeqang hethang käni lä mä-ai üng angcü-a Isu tea yng saite kätü qawng-a aenaiky te vi dy. ¹²Kärung üng kätü lä khü aenai dy. Khötawi ai dy. Tukätephüng-a käving thung üng khimi na sa saite na lä sa hethang kae y dy. Kaevang thung üng aety nae ätawng äleng na tea süng ö si. ¹³Mä-ai lä kaevang-a hing saite khimi tähang aeteng khaw te kätyng hing ö si. Khimi ce üng jö nei phi kha bärui saite pawi-a qa ö hang. Täkübäjang sa saite na, aejaw aemang saite na, hai dökhaw saite na tea mä-ai lä sa ö hang si. ¹⁴Tungaila nang ce lä Areng Isu Khrista üng ätawng äleng na süng ö. Nang ce üng ngaiphi tüng y saite bälung kätyng sa ö hang.

Nang üng kangby jä-ai na tea tärae cei hang

¹Säthaw tea yng te aethawdi saite khimi bung lady ö. Tungaila äni ce üng bälung thung-a tüng te, tüng y te aedawng saite phüng äni ce hai ae-e ö hang ba. ²Khimi phütä na lä käcakänei angxynlyng na tea ca haw näkha yng kha ca ö te vi. Tungaila yng saite aethawdi te khimi na lä angrang na tea qaitä ca ö kae vi. ³Äte angxynlyng na tea ca saite khimi lä ca y saite khimi tea mäthi y sa ö hang. Angrang na tea qaitä ca saite khimi la angxynlyng na ca saite khimi tea tärae cei ö hang. Ätephüng-a mei nädylä khimi qütä tea Säthaw lä lady bawi te vi. ⁴Khimi lawng lawngtä üng mawsawng na tea tärae cei hethang lä nang tähang aeteng te y vi. Honi mawsawng na lä kähawi sa mei, sa y mei, näte tea äma ce üng ingkung ma kheng ai mang. Äni ce lä kähawi-a sa ö ai. Ätephüng-a mei nädylä Areng lä äni ce sa saite tea säbawng haw te phüng-a vi.

⁵Khimi phütä ma känitä lä käni kälang na qawng-a aely lengky näkha dawng ö te vi. Tungaila khimi phütä na lä käni angxynlyng na lä mangtä kae näkha dawng ö vi. Mä-ai lä mä-ai üng bälung tüng saite äte mei näte tea ae-y khü ö hethang kae. ⁶Käni phütä tea aely lengky vi näkha mäthi saite khimi lä Areng tea bälaw hethang ngai saite na vi. Tudylä äte angxynlyng na ca saite khimi la Areng tea bälaw hethang ngai te phüng-a ca ö te kae. Ätephüng-a mei nädylä äni ce lä Säthaw tea ca nei te tähang kawng te lo thui ö te vi. Angrang qaitä ca saite khimi la Areng tea bälaw hethang ngai te phüng-a ca ö te kae. Äni ce la Säthaw tea kawng te lo thui ö te by vi. ⁷Mä-ai lä mä-ai ma üng tähang qaitä hing ö te y lyng. Mä-ai ma tähang qaitä ämi la dü te y. ⁸Mä-ai üng hing saite khimi na lä Areng tea bälaw hethang hing ö te kae. Mä-ai üng dü saite la khimi ce ma Areng tea bälaw hethang dü ö te kae. Mä-ai üng hing saite hai dü saite lä Areng hai aesui te kae vi. ⁹Tukätephüng-a Khrista lä hing saite hai dü saite khimi na üng Areng lawng hethang dü kha hing haile tyng pa te vi dy. ¹⁰Tukätephüng-a nang lä ätephüng-a mä-ai üng Khristen kangby jä-ai na tea tärae cei te vi mei. Nang lä ätephüng-a mä-ai üng Khristen kangby jä-ai na tea mäthi y te vi mei. Mä-ai angxynlyng na lä tärae cei saite Säthaw üng maw-a aedaw hethang kae ö vi ai. ¹¹Caekäcai thung-a,

“Areng ma thui te lä, ‘Kai lä hing saite Säthaw vi te phüng-a, kai üng maw-a

khimi angxynlyng na lä khokhö didü ö vi ai. Khimi angxynlyng na ma

kai lä Säthaw lawng te vi näkha älo hai aepho sy ö vi ai’” näte vi.

¹²Tukä dylä mä-ai angxynlyng na lä mä-ai üng sa saite na phüng Säthaw tea thui bawi ö vi ai.

Kangby jä-ai na sa tämang hai hethang sa ö hang

¹³Tukätephüng-a mä-ai lä lawng lawngtä tea tärae cei jawjaw ö vi hang si dy. Nang ce üng kangby jä-ai na tea aetüng hai kha hunghö na sa y hethang aedawng khü ö lawi. ¹⁴Ätete käcakänei la pawprae y lyng näte Areng Isu hai bungtä te phüng-a, kai lä mäny khü te vi dy. Tungaila khimi lawngtä ma käcakänei phütä tea pawprae vi näkha dawng dylä, honi käcakänei lä äni üng tähang poprae kha äni lä ca hethang kae y vi dy. ¹⁵Nang üng käcakänei phüng-a, nang üng kangby jä-ai na tea bälung hawi hai y dylä, nang üng sa saite na lä bälung aevaw te awng y näkha nang tea mätü te vi. Nang üng yng saite kangby jä-ai tähang Khrista lä dü pa te vi dy. Tukätephüng-a, nang üng ca saite na hai-a äni üng yng saite tea täphra pa hang. ¹⁶Nang lä hawi vi näkha dawng saite na phüng tea khimi ce ma käsi thui saite lawng hai ö hang. ¹⁷Säthaw üng pre pyng saite lä mä-ai üng käcakänei na hai aesui te y lyng. Muilaw Käcai ma py te cüng saite, awngneng saite, anghawtho saite hai aesui te kae vi. ¹⁸Hini älang hai-a Khrista üng kälu sa dylä, nang lä Säthaw tea anghawtho hai kha khimi ce ma la nang tea bälaw ö vi ai.

¹⁹Tukä dylä mä-ai lä awngneng hethang hai lawng lawngtä yng saite aethaw awng hethang aesäbawng ö jawjaw he kae. ²⁰Käcakänei phüng-a Säthaw üng kälu tea täphra ö hang. Käcakänei angxynlyng na lä cai bawi te vi. Tungaila mä-ai lä käcakänei hai-a yng saite kangby jä-ai na tea hunghö sa hai vi dylä, mä-ai lä sa tämang ö te vi dy. ²¹Ängang na ca saite, cäpje tui nei saite, hai ätete sa te na hai-a yng saite kangby jä-ai na tea aetüng hai saite, hunghö sa hai dylä, mä-ai lä honi na tea aehi ö hethang kae. ²²Nang lä hini phüng tea yng te lä nang üng Säthaw hai aesui saite kae vi. Mä-ai ma üng sa saite na lä tüng vi näkha yng kha käsi kähawi mäny saite bälung cai te khimi lä tähang hawi vi. ²³Tungaila khimi lawngtä lä äma üng ca saite na tea ae-y khü te bälung awng y dylä, äni lä ca hethang kae y. Äni sa te lä tüng vi näkha yng y te hai ca dylä, Säthaw lä äni tea dengpy vi ai. Ätephüng-a mei nädylä, äni üng sa saite lä yng kha sa y te phüng-a vi. Mä-ai lä yng y käla sa saite angxynlyng na lä hunghö-a lawng king vi dy.

Kangby jä-ai na üng äkähawi tähang säbawng pa

¹Mä-ai üng yng saite aethaw awng dylä, yng te aethawdi saite kangby jä-ai na tea mä-ai lä äni ce üng rae saite na tea säbawng pa hethang kae. Mä-ai lä mä-ai ma üng aely kängai kätyng-a hui ö hethang kae y. ²Mä-ai angxynlyng na lä yng te aethawdi saite kangby jä-ai na üng yng saite ryng hai hethang säbawng ö he kae. Äni ce üng kähawi tähang äni ce tea kawng hai hethang mä-ai lä säbawng ö qi hethang kae. ³Khrista lä äma üng aely kängai hui y lyng. Caekäcai thung-a, “Khimi ce ma nang tea käsi prawng saite lä tätang kai tea käsi prawng te vi dy” näkha tärü te kätyng vi. ⁴Jangni-a Caekäcai thung-a tärü saite angxynlyng na lä mä-ai tea mätu hethang vi. Hokä dylä Caekäcai thung-a tärü saite na lä mä-ai tea änawngsa hai te hai aethaw py te vi. Tukätephüng-a mä-ai lä aethang khai haw ö te vi. ⁵Änawngsa saite hai aethaw py saite Säthaw ma nang ce tea säbawng jawjaw sy. Tudylä nang ce lä Isu Khrista üng sa te täthei hui te hai nang ma ce tingtawi lä bungtä awng haw ö ai. ⁶Hokä ea ni nang ce angxynlyng na lä bälung hai ätüng haetä hai-a mä-ai üng Areng Isu Khrista üng Pä-ai Säthaw tea bälaw haw ö ai.

Ceng kälang na Angthang Kähawi thai saite

⁷Tukätephüng-a Khrista lä nang ce bung lady te kätyng nang ma ce tingtawi lady ö. Tudylä khimi ce lä Säthaw tea bälaw ö ai. ^8-9Säthaw lä kangsi kangjaw na tea aedo saite älo na kätyng sa te mätü hethang Khrista lä Judae na üng mawsawng kätyng lawng vi dy näte kai lä nang ce tea thui hethang ngai te vi.

Tudylä Ceng kälang na la Säthaw üng bäheng saite tea bälaw hai haw te by vi.

Tukha Caekäcai thung-a, “Tukätephüng-a kai lä ceng kälang na säla-a nang tea bälaw ai.

Nang üng ämüng tea kai lä ae-awi na hai bälaw ai” näkha tärü te vi.

¹⁰Ceng kälang na tea Caekäcai ma, “Ceng kälang na ä,

Säthaw üng re saite khimi hai mangtä anghawtho ö” näkha näte vi. ¹¹Caekäcai ma thui tynglyng te lä,

“Ceng kälang nang ce angxynlyng na ä, Areng tea bälaw ö.

Hini älawng üng pre angxynlyng-a awng saite khimi na ä, Areng tea bälaw ö” näkha awng te vi.

¹²Buisaw Isaia ma thui te lä,

“Davidae amäjy thung üng lawngtä tho ai.

Äni lä ceng kälang na tea pyng ai.

Ceng kälang na lä äni tea ae-y kha aethang khai ö ai mang” näkha awng vi.

¹³Nang ce tea aethang khai saite py te Säthaw lä nang ce üng yng te hai-a nang ce tea anghawtho saite angxynlyng hai awngneng saite na py sy. Muilaw Käcai üng haidae hai-a nang ce üng aethang khai saite lä leng rae haw vi dy.

Pawlae lä äma üng cae tea thui mäcai saite

¹⁴Kai üng kangby jä-ai na ä, nang ce lä hawi saite na hai bälunghae saite angxynlyng na awng näte kai lä ae-y khü te vi. Nang ce lä nang ma ce tingtawi aemätu haw ö te vi. ¹⁵Tungaila hini cae-a kai ma nang ce tea sädi py saite phütä tea hini kätyng kai lä cüngpra-a tärü vawng te vi dy. Säthaw ma kai tea tähang kähawi py te phüng-a vi. ¹⁶Kai lä ceng kälang na tähang kälu sa hethang Khrista Isu üng mawsawng-a lawng vi dy. Säthaw ma kawng hai saite löci mawi käcai lawng hethang kai lä Säthaw üng Angthang Kähawi ceng kälang na tea thui hethang mäthykung lawngtä kätyng sa te vi dy. Muilaw Käcai lä honi na tea Säthaw tähang kälang khai pa te vi. ¹⁷Kai lä Khrista Isu hai bungtä lawng kha Säthaw üng kälu sa haw te phüng-a aethaw haw te vi. ^18-19Kai hai-a Khrista lä makä sa mei näte xyngtä kai lä thui vawng te vi. Ceng kälang na lä Säthaw üng lo tängai hai hethang kai üng thui saite lo, kai üng sa saite kälu na, kamarae na üng haidae hai cangxei saite na tea Säthaw üng Muilaw Käcai hai-a sa saite na vi dy. Tukätephüng-a Jerusalem märü üng hai aetawng kha Ilirikum khö-a tyng saite mityng qütä-a Khrista üng Angthang Kähawi tea kai lä thui king te vi dy. ²⁰Kai üng mawlang kaedawng lä Khrista üng Angthang Kähawi tea thai vai y saite mityng-a thui jawjaw hethang vi. Khimi kälang na üng sa pyng saite mityng-a, kai lä Angthang Kähawi thui hethang ngai te y vi. ²¹Caekäcai thung-a lä,

“Khrista üng phüng tea ämi ma thui vai y ngaila, äni ce lä nung ö ai.

Äni üng phüng thai vai y saite na lä mänykaw ö ai” näkha nä vi.

Pawlae lä Rom märü-a ly hethang aerü rüng saite

²²Tukätephüng-a kai lä mityng kälang-a Angthang Kähawi thui te phüng-a, nang ce tea tyng haw y te vi rawng. ²³Tungaila vaihi kai lä honi mityng-a, kai üng kälu sa khüng te vi dy. Nang ce tea ly hethang leithung üng khösäning tengxyng y te üng hai ma kai lä ngai te vi dy. ²⁴Vaihi lä kai la ly haw by ai dy näkha kai lä aethang khai te vi. Kai lä Spin pre-a ly te kätü-a, nang ce tea dawnghang ly lang hethang ngai te vi. Nang ce tea aehae pyng dylä, Spin pre-a tyng haw hethang kai tea nang ce ma säbawng hethang kai lä ngai hai te vi. ²⁵Tungaila vaihi kai lä Jerusalem märü-a awng saite Säthaw üng khimi na tea lasawng hai säbawng hethang ly vi ai. ²⁶Makedonia khö hai Käri pre üng Khristen kangkawng na lä Jerusalem märü-a awng saite mätangbälai-a yng saite Judae khimi na tea säbawng hai hethang kawng te hai tangkae na py pa vi dy. ²⁷Äni ce lä bälung kähawi hai honi tangkae py hethang dawng khü ö te vi. Äni ce lä yng saite Judae khimi na tea kälung kälai awng te vi näkha käthi ö te vi. Honi lä tätang khaw te vi. Hini yng saite Judae khimi na lä Säthaw ma Angthang Kähawi hai-a py te tähang kähawi na ceng kälang na tea bäri pa ö te vi dy. Tukätephüng-a ceng kälang na la Judae khimi na tea Säthaw ma äni ce tea py saite älawngpre üng tähang kähawi hai-a Judae na tea säbawng hethang lä aeteng khaw te vi. ²⁸Tudylä kai lä Jerusalem märü-a awng saite yng te khimi na tähang aecawng saite tangkae na kangkawng-a a king khüng dylä, nang ce tea ly kha Spin pre-a ly jawjaw vi ai rawng. ²⁹Tukha nang ce tea kai tyng te kätü-a, Khrista ma py saite tähang kähawi awng mang saite na hai ly ai näte kai lä mäny vi.

³⁰Kai üng kangby jä-ai na ä, kai lä nang ce tea mä-ai üng Areng Isu Khrista haidae hai Muilaw Käcai üng py saite bälung aevaw te hai-a, kai tähang kai hai mangtä Säthaw tea kähawi-a aetang hethang nang ce tea aesi aebai te vi. ³¹Kai lä Judae khö-a awng saite yng y te khimi na te üng kai bung aedung hai hethang hai kai üng säbawng saite tea Jerusalem märü-a awng saite Säthaw üng khimi na lä anghawtho te hai ma la hethang aetang pa ö. ³²Tudylä Säthaw ma aely ngai dylä, kai lä anghawtho kha nang ce tea tyng haw ai. Nang ce hai mangtä anghawtho kha tänaetä aehae hethang dang ai mang. ³³Awngneng te py saite Säthaw lä nang ce angxynlyng hai mangtä awng jawjaw sy. Amen.

Pawlae üng cibai sa saite lo na

¹Kenkria märü üng Khristen kangkawng-a säbawng saite nawngmädi mä-ai üng ticaw Phoebe üng phüng nang ce tea kai lä thui hethang ngai te vi. ²Säthaw üng khimi na lä lawng lawngtä tea lady hethang aeteng khaw te kätyng Areng üng ämüng hai-a hini nawngmädi bung lady pa ö. Äni üng ngai saite na tea säbawng pa ö. Hini nawngmädi lä Säthaw üng khimi awng mang saite na tea säbawng pa te vi. Kai tea la äni lä säbawng te vi.

³Kai hai mangtä Khrista Isu üng kälu na tea sa saite kangby jä-ai Precila hai Akuila nawngpui nawngpaw ni tea la cibai sa te lo thui pa jo ba. ⁴Änini lä kai üng hing saite tea aeqang hethang dü he aerü hawi rüng te vi. Änini tea lä kai ma qaitä cang y, ceng kälang üng kangkawng na la kawng te thui ö te by vi. ⁵Änini üng ing-a aecö saite yng te khimi ce tea la cibai sa te lo thui pa ba.

Angcüky-a Asia pre cäpi üng Khrista tea yng saite khimi, kai üng bälung aevaw saite kangby jä-ai Epenetus tea la cibai sa te lo thui pa ba. ⁶Nang ce tähang kälu tea ae-eng kha sa saite Maeri tea la cibai sa te lo thui pa jo. ⁷Kai hai mangtä thawng thung-a pä-ung saite Judae ceng thung üng Andronicus hai Junia ni tea la cibai sa te lo thui pa jo. Änini lä angtawtha saite na näkha ämüng aethang hawi te vi. Kai qawng-a angcüky Khristen lawng hawi saite khimi na vi.

⁸Areng hai bungtä saite kai üng bälung aevaw saite kangby jä-ai, Ampliatus tea la cibai sa te lo thui pa ö jo. ⁹Khrista üng kälu tea kai ce hai mangtä sa saite Urbanas hai kai üng ngai bärai saite kangby jä-ai Stakus ni tea la cibai sa te lo thui pa jo. ¹⁰Khrista tea yng khü te mätü saite Apeles tea la cibai sa te lo thui pa ba. Aristobula hai äni üng ingthung na tea la cibai sa te lo thui pa ö jo ba. ¹¹Judae ceng Herodion hai Areng tea yng saite kangby jä-ai Nakhisa hai äni ingthung üng yng saite khimi tea la cibai sa te lo thui pa.

¹²Areng üng kälu tea aethaw rae kha sa saite nawngmädi Truphaina hai Truphosa ni tea la cibai sa te lo thui pa jo ba. Areng üng kälu tea ae-eng kha sa saite kai üng bälung aevaw saite kangby jä-ai nawngmädi Persis tea cibai sa te lo thui pa jo ba. ¹³Areng ma re khü saite Rufus hai kai bung äcäpaw kätyng bälung aevaw saite änä-awi tea la cibai sa te lo thui pa ba. ¹⁴Asunkritus, Phlekona, Hermas, Patrobas, Heme ce hai äni ce hai mangtä awng saite Khristen kangby jä-ai angxynlyng na tea la cibai sa te lo thui pa ö ba. ¹⁵Philoluka, Julia, Neria hai äni üng ticaw Olumpas ce hai äni ce hai kangby jä-ai sa saite Säthaw üng khimi angxynlyng na tea la cibai sa te lo thui pa ö jo.

¹⁶Nang ce lä lawng lawngtä tea Khristen üng bälung aevaw saite hai-a cibai aesa ö. Khrista üng kangkawng angxynlyng na lä nang ce tea cibai sa te lo thui ö vi dy.

Pawlae ma kangkhüng üng täru saite lo

¹⁷Kai üng kangby jä-ai na ä, nang ce tea täphü hethang sa saite khimi tea sädi khai hethang kai lä mäci te vi. Khristen na üng yng saite tea täphra hethang äni ce lä sa ö te vi. Nang ce üng aetu saite na tea elekhei sa kha nang ce tea tämang saite mätu te tea nang ce lä sädi khai ö. Äni ce hai lä kangby jä-ai aesa ö hang. ¹⁸Äni ce lä mä-ai üng Areng Isu Khrista üng kälu sa saite na ö y lyng. Äma ce üng ngai saite na tea dang hethang sa ö te kae. Äni ce lä älo käneng na, mäthaw saite älo na hai khimi bälung kähawi na tea kaeling kaemae sa ö te vi. ¹⁹Nang ce lä Angthang Kähawi tea matangtä tängai khü mei näte khimi qütä ma thai ö bawi te vi. Tukätephüng-a kai lä nang ce üng phüng-a anghawtho te vi. Nang ce lä hawi saite lä äte na mei näte tea mäny hethang bälung kähae lawng hai hethang ngai te vi. Käsi hai aesui hai hethang kai lä ngai te y vi. ²⁰Awngneng te py saite üng Säthaw lä Setan angra bung nang üng kho täkui-a qae y tea ma ketibu vi ai.

Mä-ai üng Areng Isu Khrista üng tähang kähawi lä nang ce hai mangtä awng jawjaw sy.

²¹Kai üng kälu sa saite kangby jä-ai Timothe hai Judae ceng thung üng Lucia, Jason, Sosipater na ma nang ce tea cibai sa te lo thui ö dy.

²²Hini cae tärü te, kai, Tartia lä Areng ämüng hai-a nang ce tea cibai sa te lo thui te vi.

²³Kai bung angvüng kätyng lady saite Kaju ma la nang ce tea cibai sa te lo thui by vi. Äni üng ing-a kangkawng üng khimi na lä aecö ö te vi. Märü üng tangkae rui saite Eratu hai, mä-ai üng kangby jä-ai Kotas ni ma la nang ce tea cibai sa te lo thui hawi te by vi. ²⁴Mä-ai üng Areng Isu Khrista üng tähang kähawi lä nang ce hai mangtä awng jawjaw sy. Amen.

Kangkhüng üng aetang te

²⁵Säthaw üng phung-ang tea mä-ai lä bälaw ö si. Isu Khrista üng Angthang Kähawi tea kai ma thui te kätyng Säthaw lä nang ce üng yng saite cakhi hai hethang sa haw te vi. Honi Angthang Kähawi lä jangni üng khösäning leithung jungtä ho kha vaihi täphawng saite lo mitang vi. ²⁶Tungaila vaihi honi ho saite lo mitang lä buisaw na ma tärü saite hai-a khimi angxynlyng na lä mäny ö vi dy. Dungtäsa hing saite Säthaw lä khimi ceng angxynlyng na lo mitang mäny hethang särilo py te vi. Tukha khimi angxynlyng na lä Säthaw üng lo tea yng kha äni üng lo tea tängai ö ai.

²⁷Säthaw lawngtä xyng ni bälunghae saite angxynlyng na tea pyng te vi. Säthaw lä Isu Khrista hai-a dungtäsa phung-ang leng jawjaw sy. Amen.