Aetüng

AETÜNG HAI SAITE

Säthaw ma Johan tea mätü te

Angcü üng älo

Aetüng hai saite cae tea lä angtawtha Johan ma A.D. 96 khösäning-a tärü te vi. Honi cae tärü te kätü-a, äni lä Asia pre cäpi üng käni kädüng mang-a awng saite Patmos angrai sälawng-a awng te vi. Johan lä Säthaw üng lo hai Khrista üng Angthang Kähawi thui pa te phüng-a, Khristen na tea esäre saite Rom aecörae na ma honi angrai sälawng-a dengpy kha khai pa vi. Hini cae thung-a lä Isu Khrista ma äni tea täphawng ea aetüng hai saite phüng na qaitä tärü te vi. Honi thüng-a Rom pre-a awng saite khimi angxynlyng na bung pyng saite Sica Sanphrang tea lä Säthaw kätyng khai kha cäphaw hai bawi hethang aecörae mätawngky na ma lä aethaw paitae hai sa ö te kätü vi.

Tukätephüng-a Isu Khrista tea yng saite khimi na lä mätang bälai-a ca kha sakälö khü saite na aeting ö te vi. Hini cae hai-a Khristen na lä Sica Sanphrang üng mimi na tea cäphaw y hethang aethaw py pa te vi. Hini thung-a aely lengky saite phüng lä Säthaw hai Setan angra üng kangkhüng täre aety saite vi. Säthaw hai Isu Khrista ma bäja kha Setan angra hai hui saite khimi angxynlyng na tea lä dungtäsa dengpy jawjaw vi ai rawng. Säthaw lä äma üng khimi na tea Känipre kangthae, älawngpre kangthae hai aesui saite ävang py kha tähang kähawi lä py vi ai. Hini cae üng älangdüng lä Beram caw kae vi. Beram caw näte lo lä qeng ruibälitä cang y nung haw te vi. Hini cae thung-a lä khimi ce tähang thaikaw he rae phi saite ämaw äcae na, äsämai hai mätae saite na awng mang-a qa te vi.

Äphüng äkädawiky

Angcü üng älo 1:1-8

Angcü üng aetüng saite äsämai, kangkawng säritä tea tha saite cae na 1:9-3:22

Dengki kamarae säritä qa saite cae 4:1-8:1

Baw säritä 8:2-11:19

Bärui Näka hai mawikäsi me netä 12:1-13:18

Aetüng hai saite äsämai cawngkhang 14:1-15:8

Säthaw üng kädaw thung-a qa saite kaephi säritä 16:1-21

Babilon märü hai, mawikäsi, buisaw kaeling hai Setan angra na bung täphra saite 17:1-20:10

Kangkhüng üng tärae cei saite 20:11-15

Känipre kangthae, älawngpre kangthae, Jerusalem märü kangthae 21:1-22:5

Kangkhüng üng cibai sa te lo 22:6-21

¹Hini lä Isu Khrista üng täphawng saite phüng na tea tärü te cae vi. Qae y tea ma äni üng mawsawng na tea tyng ai te phüng mätü hethang hini täphawng saite lä Isu Khrista tea Säthaw ma py pa te vi dy. Khrista lä äma üng mawsawng Johan tea äma üng Känipre angtawtha bung mätaw kha hini na tea mäny hai te vi. ²Johan lä äma nung saite angxynlyng na thui te vi dy. Hini lä Säthaw te mang üng lo angthang hai Isu Khrista hai-a täphawng saite lo mitang vi. ³Hini buisaw lo thui rüng saite na tea phai kha thai te lo tängai saite khimi angxynlyng na lä tähang hawi. Ätephüng-a mei nädylä hini angxynlyng na tyng hethang kätü lä aenai dy.

Kangkawng säritä tea kawng bärai sa te lo na

⁴Hini cae lä Johan ma Asia pre cäpi-a awng saite kangkawng säritä tea tärü te vi.

Vaihi awng saite, cangkhawng üng hai ma awng angci saite hai vaimaw mang-a la awng jawjaw kha tyng hethang awng saite Säthaw, Isu Khrista hai äma üng Areng aety nae maw-a awng saite Muilaw Käcai üng cungrü saite säritä te üng tähang kähawi hai awngneng saite lä nang ce tea awng sy. ⁵Isu Khrista lä sasi thui khü kha ae-y nae hawi khaw saite Kung vi. Säthaw ma äni bung lä kädü thung üng mätha angcü pa te vi. Äni lä älawngpre üng sanphrang angxynlyng na tea pyng saite Kung vi.

Isu Khrista lä mä-ai tea bälung aevaw kha äma üng äthi hai-a mä-ai üng hunghö na aelawi hai te vi dy. ⁶Isu lä mä-ai tea sanphrang kätyng pyng hethang hai mäthykung na kätyng äma üng Pä-ai Säthaw tea mawsawng sa hethang khai pa te vi. Äni tea phung-ang hai haidae lä dungtäsa awng jawjaw sy. Amen.

⁷Tängai ö. Äni lä khö angnüng qawng na mang ly ai. Äni bung khimi qütä ma nung ai. Äni tea täri hai thung saite khimi na mäteng ma nung ö ai. Älawngpre üng khimi angxynlyng na lä äni tea ri kha raw sung ö ai. Honi lä tätang khaw-a tyng vi ai. Amen.

⁸Säthaw ma, “Kai lä Kangmangky hai Kangkhüngky vi. Kai lä vaihi awng saite, cangkhawng üng hai ma awng angci saite hai vaimaw mang-a awng jawjaw kha tyng hethang awng saite Kung la vi. Kai lä haidae lengky saite Säthaw vi” näpa.

Johan lä Khrista bung äsämai-a nung pa

⁹Kai lä nang ce üng kangby jä-ai Johan vi. Isu üng äkähui qütä aeting saite mätang bälai te tea nang ce kätyng kai la aeting kha änawngsa te by vi. Khrista bung Sanphrang-a khai saite äma üng äkähui qütä lä mätang bälai saite aeting hethang kae. Kai lä Isu phüng hai Säthaw üng Angthang thui te phüng-a, khimi ce ma kai bung lä Patmos angrai sälawng-a tha te vi dy. ¹⁰Areng üng Käni-a lä kai tea Muilaw Käcai ma pyng te vi dy. Tukha baw haetä üng ätüng kätyng ätüng käleng kai ma üng leithung mang kai lä thai vi dy. ¹¹Honi ätüng ma, “Nang nung saite lä angxynlyng na cae-u thung-a tärü kha Ephesi, Samurana, Perkamon, Thetaria, Sardis, Philadelphia hai Leodikia märü na thung-a awng saite kangkawng säritä tea tha ba” näkha nä vi.

¹²Kai tea älo aepe saite bung nung hethang aehawi te kätü-a, kai lä sui maibung kaesang säritä tea nung vi dy. ¹³Honi maibung kaesang na säla-a lä Khimi üng Cäpaw kätyng kai lä nung vi. Äni lä äma üng äkho-a tyng khytä kä-o käsa aelawng vi. Äni üng tatärang-a lä sui khabai aemäkhing te kai lä nung vi dy. ¹⁴Äni üng älö hai äsang na lä beram mui kätyng kälung te y dylä, ritui kätyng kälung vi. Äni üng ämi na lä mai kätyng aengaw vi. ¹⁵Äni üng äkho na lä mai hai mäcai pyng saite süng kangseng kä-ang kätyng vi. Äni üng ätüng lä pangle tui leng bungba te ätüng käleng kätyng vi. ¹⁶Äni lä äma üng äkö bangtang mang-a tengpaw säritä süng vi dy. Äni üng täbawng mang lä äbaw känetä cörü saite aekei sawngseng haetä tho vi. Äni üng mimai lä käni anghungtü üng taw te kaevang kätyng säde vi dy. ¹⁷Äni bung nung te kätü-a lä, äni üng khokung-a kai lä ri kha khimi kädü kätyng-a aetüng dung vi dy. Äni lä äma üng äkö bangtang mang hai kai qawng-a thyng kha “Ri y ma. Kai lä Kangmangky hai Kangkhüngky vi. ¹⁸Kai lä Hing saite Kung vi. Kai lä dü pyng te ngaila, vaihi kai lä dungtäsa hing te vi. Dü saite hai Angqaw khaw pyng saite aenae lä kai tea awng te vi. ¹⁹Tukätephüng-a vaihi awng saite na hai vaimaw mang-a tyng hethang nung saite känetä tea nang lä tärü ba. ²⁰Kai üng äkö bangtang-a nang nung saite tengpaw säritä na hai sui maibung kaesang säritä na üng ho saite äphüng lä hikä vi. Maibung kaesang säritä na lä kangkawng säritä na vi. Tengpaw säritä na lä kangkawng säritä na üng Känipre angtawtha na vi.

Ephesi kangkawng tea thui saite Angthang

¹“Ephesi märü kangkawng üng Känipre angtawtha tea hini kätyng cae tärü ba:

“Hini lä sui maibung kaesang säritä säla-a aeke kha äma üng äkö bangtang-a tengpaw säritä süng saite Kung te üng älo na vi. ²Nang ce sa saite na tea kai lä mäny vi. Nang ce aethaw rae kha sa saite hai, änawngsa te na tea kai lä mäny. Hunghö sa saite khimi na tea bälungsa haw y te hai, angtawtha na y käla ma angtawtha na kätyng thui saite na tea käny kha äni ce lä khimi kaeling kaemae na vi näkha aeting saite na kai lä mäny vi. ³Nang ce lä änawngsa kha kai üng tähang mätang bälai ö pyng te vi dy. Nang ce lä aethawsi te la awng ö y vi. ⁴Tungaila nang ce lä angcü üng kätyng vaihi lä kai tea bälung aevaw y te phüng-a nang ce tea cy hethang awng ö vi. ⁵Nang ce lä jangni-a makä awng kha vaihi lä ma-a tyng mei näte tea aedawng haile ö ba. Nang ce lä hunghö sa saite na tea ae-ui kha angcü üng nang ma ce sa saite kätyng sa ö. Nang ma ce üng hunghö sa saite na ae-ui y dylä, nang ce tea kai lä ly kha nang ce üng maibung kaesang bung lä kangkawng na mityng thung üng käsüja ai. ⁶Tungaila hini lä nang ce üng kähawi sa saite vi. Kai lä Nikola üng äkähui na sa saite na tea esäre te kätyng nang ce la esäre ö te by vi.

⁷“Muilaw Käcai ma kangkawng na tea thui saite lo känawkhing awng saite khimi lä thaikaw sy.

“Bäja saite khimi na tea lä Säthaw üng angkhaw thung üng kähing py saite thingkawng kung üng äthai ca hethang kai ma py ai” näpa.

Samurana kangkawng tea thui saite Angthang

⁸“Samurana märü kangkawng üng Känipre angtawtha tea hini kätyng cae tärü ba:

“Hini lä kädü thung üng hing haile tyng kha Kangmangky hai Kangkhüngky-a awng saite Kung üng älo na vi. ⁹Nang ce üng mätang te hai mätangca saite na kai lä mäny. Tungaila nang ce üng yng saite na lä tawngnang ö te vi. Mä-ai ma tea Judae khimi näkha thui saite na lä Säthaw ma re saite khimi na kätyng sa y te na ma nang ce tea käsi prawng saite na kai lä mäny vi. Äni ce lä Setan angra üng äkähui thung üng na kae. ¹⁰Nang ce üng mätang bälai tyng hethang awng saite tea lä ri ö hang. Tängai ö. Setan angra ma nang ce thung üng phütä na tea lä thawng thung-a kädephae te hai-a käny ö ai. Nang ce lä käni hawtä mätang bälai saite aeting ö ai. Dü te khytä yng te ca ö khi ba. Tudylä nang ce tea dungtäsa hing saite sanphrang üng lökhu kätyng ävang käting kai ma py ai.

¹¹“Muilaw Käcai ma kangkawng na tea thui saite lo känawkhing awng saite khimi lä thaikaw sy.

“Bäja saite khimi tea lä äbaeni dü saite hai-a aeting hai pa y ai.

Perkamon kangkawng tea thui saite Angthang

¹²“Perkamon märü üng kangkawng üng Känipre angtawtha tea hini kätyng cae tärü ba:

“Hini lä äbaw känetä cörü saite aekei sawngseng awng te Kung üng thui saite älo na vi. ¹³Nang ce lä Setan angra üng aety nae mityng-a awng saite tea kai lä mäny. Nang ce lä kai tea ae-y khü ö te vi. Setan angra üng awng saite nang üng märü-a kai üng lo sasi thui khü saite Antipa bung khimi ce ma sakälö khü kha bädü te kätü-a mäteng ma, kai tea yng saite nang ce lä khaisö ö te y vi dy. ¹⁴Tungaila kai lä nang ce tea hae haetä cy hethang awng vi. Nang ce thung-a phütä na lä Balam üng mätu saite lo tea hui ö vi. Jangni-a Balam lä Balak tea Isrelae khimi na bung hunghö sa hai hethang the pa te vi. Äni lä mimi na tea löci sa saite löci mawi na ca hethang hai täkübäjang sa hethang Isrelae khimi na tea the pa ö te vi dy. ¹⁵Honi kätyng-a nang ce thung-a la Nikola üng äkähui na mätu saite lo tea hui saite na awng ö te by vi. ¹⁶Tukätephüng-a nang ce lä ae-ui ö lawi. Ae-ui te awng y dylä, qae y tea ma ly dawde kha honi sa tämang saite na tea lä kai täbawng üng aekei sawngseng hai kai ma aety ai.

¹⁷“Muilaw Käcai ma kangkawng na tea thui saite lo känawkhing awng saite khimi lä thaikaw sy.

“Bäja saite khimi tea lä Känipre-a ho saite Mana täkaw phütä tea kai ma py ai. Äni tea ämüng kangthae tärü saite älung kanglung phei la py ai. Honi ämüng tea lä dang saite khimi qaitä ni mäny hethang kae.

Thuatira kangkawng tea thui saite Angthang

¹⁸“Thetaria märü kangkawng üng Känipre angtawtha tea hini kätyng cae tärü ba.

“Hini lä Säthaw üng Cäpaw te üng älo na vi. Äni üng ämi na lä mai kätyng aengaw te vi. Äni üng äkho lä mäcai ping saite süng kangseng kätyng awng vi. ¹⁹Nang ce sa saite na tea lä kai mäny. Nang ce üng bälung aevaw saite, yng cakhi saite, kälu sa saite hai änawngsa saite na kai lä mäny vi. Nang ce lä angcü üng sa te qawng-a vaihi saky te kai lä mäny vi. ²⁰Tungaila kai lä nang ce tea hae haetä cy hethang awng vi. Jangni-a sanphrang üng nawngpui Jerebel2:20 1 Sanphrang 21: 25 Jerebel lä sanphrang Aha üng nawngpui vi. Äni lä mimi na tea cäphaw kha sanphrang änawngpaw hai Isrelae khimi na tea mimi na cäphaw hai hethang the pa te vi. Äni lä Säthaw üng buisaw na tea la bädü hai pa te vi. 1 Sanphrang 18:4; 19:1-2; 21:8-10; 21:23; 21:25-26 hai aetawng saite nawngmädi käsi tea nang ce lä änawngsa ö te vi. Äni lä äma tea Säthaw üng buisaw nawngmädi-a aengang vi. Äni lä kai üng mawsawng na bung mimi na tea löci sa saite löci mawi na ca kha täkübäjang sa hai hethang mätu pa ö te vi. ²¹Kai lä honi nawngmädi tea äma üng hunghö sa saite na ae-ui hethang kätü py pa vi dy. Tungaila äni lä ae-ui hethang ngai te y. ²²Tukätephüng-a kai lä honi nawngmädi tea känaw käsaw mätang ca saite i nae qawng-a kädephae ai. Äni hai mangtä täkübäjang sa saite khimi na lä äma ce üng sa tämang te na ae-ui y dylä, kai ma tengxyng y mätang bälaica saite äni ce tea tyng hai ai. ²³Kai lä nawngmädi leithung äcaw na kätyng hui saite na tea la bädü ai. Tupyng-a kai lä khimi qütä üng kaedawng na hai bälung mäke na tea mäny saite Kung vi näte kangkawng angxynlyng na ma mäny ö ai. Nang ce üng sa ö qi saite na kätyng-a kai lä py ai.

²⁴“Thetaria kangkawng üng phütä na lä Jezebel näsaite nawngmädi üng mätu saite leithung hui ö te y vi. Khimi ce ma näsaite ‘Setan angra üng ho saite kaedawng tea’ nang ce lä mäny ö y. Tukätephüng-a nang ce tea äte kälang särilo na hai-a kai lä hui hai y lyng. ²⁵Tungaila kai ly y rytä nang ce üng yng saite tea lä cakhi ö hethang kae. ²⁶Käteng khytä kai üng kängai sa kha bäja saite khimi na tea lä ceng cawngkhang na tea pyng hethang aenae kai ma py ai. ²⁷Kai Pä-ai te üng aenae kai lä dang te kätyng äni ce tea kai lä py vi ai. Äni ce lä süng pawngpai haetä hai-a ceng cawngkhang na tea pyng ö ai; Äni ce bung lä älawng ngang lä-awng tea tibutica-a käthu te kätyng sa ai. ²⁸Kädang Tengpaw bung la äni ce tea kai ma py by ai.

²⁹“Muilaw Käcai ma kangkawng na tea thui saite lo känawkhing awng saite khimi lä thaikaw sy.

Sardis kangkawng tea thui saite Angthang

¹“Sardis märü kangkawng üng Känipre angtawtha tea hini kätyng cae tärü ba:

“Hini lä Säthaw üng Muilaw üng cungrü saite säritä tea pyng kha tengpaw säritä tea süng saite Kung üng älo na vi. Nang ce sa saite na tea kai lä mäny. Khimi ce ma nang ce lä hing vi näkha dawng ngaila, nang ce lä kai leithung hui ö y te phüng-a, khimi kädü na kae vi. ²I aelaw ö lawi. Nang ce üng aethaw äje cäcaw awng saite tea lä awng rae hethang aethawsa ö ba. Nang ce hokä sa y dylä, Säthaw ma py saite nang ce üng aethaw lä dü ö ai. Nang ce sa saite kälu na Säthaw üng maw-a lä cungrü y te kai lä nung vi. ³Tukätephüng-a nang ce lä aetu pyng saite hai thai pyng saite na tea aedawng haile tyng ö ba. Nang ce üng hunghö na ae-ui kha Säthaw üng lo tängai ö lawi. Nang ce i aelaw y dylä, theru kätyng nang ce lä aedawng ö y te kätü-a, kai lä nang ce tea ly ai. ⁴Tungaila Sardis märü üng kangkawng thung-a nang ce thung üng phütä lä hunghö na tea caiping-a khai ö vi. Nang ce lä aeteng khaw te phüng-a, kä-o kanglung na aelawng kha kai hai mangtä aeke ö ai. ⁵Bäja saite khimi angxynlyng na lä hini kätyng kä-o kanglung tea aelawng hai ö ai. Kai lä äni ce üng ämüng na tea dungtäsa kähing dang saite na üng ämüng tärü saite cae-u thung üng mai ja y lyng. Kai üng Pä-ai hai Känipre angtawtha na maw-a äni ce lä kai hai aesui saite na vi näkha Kai ma thui ai.

⁶“Muilaw Käcai ma kangkawng na tea thui saite lo känawkhing awng saite khimi lä thaikaw sy.

Philadelphia kangkawng tea thui saite Angthang

⁷“Philadelphia kangkawng üng Känipre angtawtha tea hini kätyng cae tärü ba.

“Hini lä käcai hai lo mitang-a awng saite Kung te üng älo na vi. Äni tea lä sanphrang Davidae üng aenae näsaite kätho saw awng vi. Honi saw hai pä-awng saite kätho tea lä, ämi ma la aekhae haw y. Aekhae saite kätho tea lä, ämi la pä-awng haw y lyng. ⁸Nang ce sa saite na tea kai lä mäny. Nang ce lä aethaw äje cäcaw xyng awng te kai mäny vi. Tungaila nang ce lä kai üng lo tängai kha kai tea aephae ö te y. Nang ce üng maw-a kai lä kätho pä-awng pyng te vi dy. Honi tea ämi la aekhae haw y vi. ⁹Tängai ö. Setan angra üng äkähui na lä Judae khimi tätang na y käla ma Judae khimi na näkha kaeling thui ö vi. Kai lä äni ce bung nang ce üng maw-a ly kha khokung-a aebo hai ö ai. Nang ce tea kai ma bälung aevaw saite lä äni ce angxynlyng na ma mäny ö ai. ¹⁰Nang ce lä änawngsa hethang kai üng särilo tea tängai ö te vi dy. Tukätephüng-a kai lä älawng qawng-a khimi qütä tea käny hethang mätang bälai tyng te kätü-a nang ce bung lä kai ma aedung hai ai. ¹¹Kai lä qae y tea ma ly ai. Nang ce üng yng saite tea lä süng ö khi ba. Tudylä nang ce tea ävang kätyng areng lökhu kai ma py ai. Honi lökhu tea lä ämi ma laja y lyng. ¹²Bäja saite äni bung lä kai üng Säthaw Ingkäcai ing aeling-a lawng hai ai. Äni lä Ingkäcai ärang mang-a manila tho y lyng. Kai lä äma qawng-a Kai üng Säthaw üng ämüng hai, Kai üng Säthaw üng märü ämüng, Jerusalem kangthae, tea tärü ai. Hini Jerusalem märü kangthae lä Kai üng Säthaw Känipre te mang üng cäqa vi. Kai la äni qawng-a Kai üng ämüng kangthae tärü by ai.

¹³“Muilaw Käcai ma kangkawng na tea thui saite lo känawkhing awng te khimi lä thaikaw sy.

Leiodikia kangkawng tea thui saite Angthang

¹⁴“Leodikia kangkawng üng Känipre angtawtha tea hini kätyng cae tärü ba.

“Hini lä Cakhi kha mitang khü-a sasi tho saite üng älo na vi. Äni üng ämüng lä Amen näkha mäthi te vi. Äni lä Säthaw ma sa saite angxynlyng na üng langdüng vi. ¹⁵Nang ce sa saite na tea kai lä mäny. Nang ce lä kai tea bälung aevaw bärai y, kai tea la esäre y te kai lä mäny vi. Nang ce lä bälung aevaw bärai te läsy, esäre te läsy, hae haetä tea kai lä ngai te vi. ¹⁶Tungaila nang ce lä Kai tea bälung aevaw bärai y te hai esäre y te phüng-a, Kai ma nang ce bung khaisö vi ai. ¹⁷Nang ce ma, “Kai ce lä tawngnang vi. Ngai saite angxynlyng na awng vi dy. Täkang y dy lyng” näkha thui ö vi. Tungaila nang ce lä tähang si te hai bäheng hethang hawi ö te vi. Nang ce lä kangtang kanglai, ämi kangjö, hai aekhu aena nae awng ö te y vi. Tungaila honi na tea nang ce lä mäny ö te y. ¹⁸Tudylä nang ce lä Säthaw üng maw-a tawngnang hethang mai hai mäcai pyng saite sui tea kai te üng rang hethang nang ce tea kai lä thui he ngai te vi. Nang ce üng aekhu aena nae awng y saite tea saerae y hethang kai te üng kä-o kanglung käcai tea rang ö. Nang ce üng ämi nung hethang ämi aemäcai nae aesi la rang ö ba. ¹⁹Kai ma bälung aevaw saite khimi angxynlyng na tea kai lä dengpy kha pring te vi. Tudylä nang ce lä aethawsa kha ae-ui ö lawi. ²⁰Tängai ö ba. Kai lä kätho teng-a aedaw kha täkhü te vi. Ämi la kai üng ätüng thai kha kätho pä-awng dylä, kai lä kung kha mä-ai lä mangtä bö ca ö ai. ²¹Kai lä bäja kha kai Pä-ai üng Areng Aety nae qawng-a äni hai mangtä aety te kätyng, bäja saite khimi tea lä Kai üng aety nae qawng-a kai hai mangtä aety hethang kai ma py ai.

²²“Muilaw Käcai ma kangkawng na tea thui saite lo känawkhing awng saite khimi lä thaikaw sy” näkha näte vi.

Känipre-a Areng tea cäphaw saite

¹Tupyng-a kai lä kheng kha Känipre üng kätho lä kai üng maw-a aepä-awng ea awng vi.

Angcü-a baw haetä üng te kätyng kai tea thui saite ätüng thai te lä “Hi-a paw lawi. Vaimaw mang-a tyng hethang awng saite na kai ma nang tea mätü ai” nä vi. ²Qengtä ma Säthaw üng muilaw lä kai tea pyng vi dy. Känipre-a lä Areng aety nae haetä awng vi. Honi qawng-a lawngtä aety tea kai lä nung vi dy. ³Honi aety saite lawngtä lä jasper näsaite ävang käting kälung hai mia kälung na kätyng ang vi. Honi aety nae tea lä mia kälung ävang käting kätyng ang saite kungbäje hai täkawnglü pa te vi. ⁴Aety nae kälang kuisy bälitä lä honi Areng aety nae tea sävenglü vi dy. Hini aety nae na qawng-a lä mätawngky lawng kuisy bälitä lä aety ö qi vi dy. Äni ce lä kä-o kanglung na aelawng kha äni ce üng älö-a lä sui lökhu na aekhu ö qi vi. ⁵Areng aety nae üng anglaw säde saite, khö bärü saite ätüng, hai bärei mäkhawi saite tüng na tho vi dy. Honi aety nae maw-a lä maito säritä aekhaw kha aevang vi dy. Honi na lä Säthaw üng Muilaw üng cungrü saite säritä na vi dy. ⁶Areng aety nae üng ämaw-a la caiping-a ang saite kälung, khawitälae kätyng tuilipui käleng awng vi dy.

Areng aety nae-a hing saite me bälitä ma sävenglü pa ö vi dy. Honi na üng leithung hai leimaw-a lä ämi na ceicei awng ö vi dy. ⁷Angcü üng hing saite lä xangsi metä kätyng awng. Äbaeni üng lä raebawi mangsang metä kätyng vi. Ämäthung üng lä khimi lawngtä üng mimai kätyng äni tea awng. Äbäli üng lä ämäkhi kädai kha aeja saite aemö säling metä kätyng vi dy. ⁸Honi hing saite me bälitä na lä mäkhi tärutä awng ö qi vi dy. Äni ce mäkhi üng äthung äqawng-a lä ämi na ceicei awng ö qi vi dy. Äni ce ma kärung käni aehae y käla ae-awi thui ö te lä:

“Cangkhawng üng hai ma awng angci saite,

vaihi awng saite hai vaimaw mang-a la awng jawjaw ea tyng hethang awng kha äte angxynlyng na sa haw saite

Areng Säthaw lä, Käcai, Käcai, Käcai vi” näkha thui ö vi.

⁹Honi hing saite na lä Areng aety nae qawng-a aety kha dungtäsa hing jawjaw saite Kung tea bälaw saite, tämö khai saite hai kawng saite lo thui ö vi dy. ¹⁰Honi hing saite na lä Säthaw tea bälaw saite qütä, mätawngky lawng kuisy bälitä ma areng aety nae qawng-a aety saite dungtäsa hing saite Kung üng maw-a khokhö didü ea aebo kha cäphaw ö vi dy. Äni ce lä areng aety nae maw-a äma ce üng Areng lökhu na khai ö vi dy. ¹¹Tukha äni ce ma,

“Kai ce üng Areng Säthaw ä,

Nang lä phung-ang, tämö khai saite hai haidae dang hethang aeteng khaw vi.

Ätephüng-a mei nädylä nang lä äte angxynlyng na tea sa te vi dy.

Nang ma üng aely ngai te kätyng äni ce tea sa kha äni ce lä awng ö te vi” näkha thui ö vi.

Cae ang-yng hai Beram caw

¹Areng aety nae qawng-a aety saite lawngtä üng äkö bangtang mang cae ang-yng süng saite tea kai lä nung vi dy. Honi cae ang-yng lä dengki säritä hai dengtang kha khai vi dy. Honi tea lä phei netä cae tärü bawi vi dy. ²Tupyng-a Känipre angtawtha aethaw awng bärai saite ma, “Hini dengki dengtang saite na tea täphra kha cae ang-yng lang hethang aeteng te lä ämi mei” näkha ätüng käleng hai a saite lawngtä bung kai lä nung vi dy. ³Tungaila hini cae ang-yng tea lang kha kheng haw hethang Känipre-a, älawngpre-a hai älawng täkui-a lä ämi la awng y vi dy. ⁴Hini cae ang-yng lang kha äthung-a kheng hethang aeteng saite ämi la awng y te phüng-a, kai lä tengxyng y raw sö kae vi dy. ⁵Tupyng-a mätawngky na thung üng lawngtä ma lä kai tea, “Raw vi hang lawi. Tängai ba. Judae ceng thung üng Xangsi täkai, Davidae üng kaesui kaebeng käleng, ma bäja vi dy. Äni lä hini cae ang-yng hai cakhi saite dengki säritä na tea täphra kha lang haw vi” näpa.

⁶Tupyng-a Beram caw lä areng aety nae äsäla ung-a hing saite me bälitä hai mätawngky na ma säveng kha aedaw te tea kai lä nung vi dy. Äni lä löci aesa he ra saite beram kätyng awng vi dy. Beram caw lä täki säritä hai ämi säritä awng vi dy. Honi ämi na lä Muilaw Käcai üng cungrü saite säritä vi. Säthaw ma äni bung lä älawngpre qütä-a mätaw saite na vi dy. ⁷Honi Beram caw lä ly kha areng aety nae qawng-a aety saite lawngtä üng äkö bangtang mang üng cae ang-yng tea la vi dy. ⁸Hokä la te kätü-a, hing saite me bälitä na hai mätawngky kuisy bälitä lä Beram caw üng maw-a aebo ö vi dy. Äni ce tea lä tingtyng haetä hai rimuidi kawi saite sui kaephi süng qi ö vi dy. Honi dingrawng mui na lä Säthaw üng khimi käcai na üng aetang saite na tea thui te vi. ⁹Tukha äni ce lä ae-awi kangthae thui ö vi dy.

“Nang lä honi cae ang-yng la hethang hai,

cakhi saite dengki na tea täphra hethang aeteng khaw vi.

Ätephüng-a mei nädylä, khimi ce lä nang bung bädü kha nang üng löci aesa saite hai ceng qütä, älo cawngkhang aepe saite qütä,

älawng qawng üng pre qütä awng saite na üng khimi na bung lä Säthaw tähang rang vi dy.

¹⁰Nang ma äni ce bung lä mäthykung na kätyng mä-ai üng Säthaw tea mawsawng sa hethang hai

sanphrang na kätyng älawngpre tea pyng ö ai” näpa.

¹¹Tupyng-a kai lä kheng kha täsawngtä hai sangrui-a to lei y rung khytä nyng saite Känipre angtawtha na üng ätüng thai vi dy. Äni ce lä areng üng aety nae, hing saite me bälitä na hai mätawngky na tea sävenglü vi dy. ¹²Tukha äni ce lä ätüng käleng hai,

“Khimi ce ma bädü saite Beram caw lä haidae awng saite, tawngnang saite, bälunghae saite, aethaw awng saite,

tämö khai saite, phung-ang hai awng hethang aeteng khaw te vi.

Hing saite angxynlyng na lä äni tea bälaw ö sy” näkha ae-awi thui ö vi.

¹³Tupyng-a käni hai älawng qawng-a, älawng thung-a, pangle thung-a awng saite hai khöteng täki angxynlyng na üng hing saite angxynlyng na ma ae-awi hai thui te lä:

“Areng aety nae qawng-a aety saite Kung hai Beram caw tea lä hing saite qütä na ma bälaw kha,

tämö khai hethang lä aeteng khaw te vi. Äni tea lä phung-ang hai haidae na lä,

dungtäsa awng jawjaw sy” näkha thui ö vi dy.

¹⁴Tudylä hing saite me bälitä na lä, “Amen” näkha mäthang ö vi dy. Tukha mätawngky na lä aebo kha Säthaw hai Beram caw tea cäphaw ö vi dy.

Cakhi saite dengki na

¹Tupyng-a Beram caw lä cakhi saite dengki säritä thung üng angcü üng dengki tea täphra te kai lä nung vi dy. Hing saite me bälitä thung-a haetä te üng bärei mäkhawi te tüng kätyng, “Ly lawi” näkha thui te kai lä thai vi dy. ²Kai lä kheng kha cäphö kanglung metä tea nung vi dy. Honi qawng-a aedang saite kung lä livaw haetä süng vi. Areng üng lökhu haetä äni lä dang vi dy. Äni lä bäja saite kung kätyng täre na tea bäja hethang tho te vi dy.

³Beram caw ma äbaeni üng cakhi saite dengki tea täphra ea lä, hing saite äbaeni ma, “Ly lawi” näkha thui saite lo kai lä thai vi dy. ⁴Tupyng-a cäphö kälang kangthing metä tho vi dy. Cäphö aedang saite kung tea lä älawngpre-a täre aety hai hethang Säthaw ma aenae py pa vi dy. Khimi ce tea lä äma ce tingtawi aebädü hai ö vi dy. Äni lä aekei sawngseng käleng haetä dang vi dy.

⁵Beram caw ma ämäthung üng cakhi saite dengki tea täphra te kätü-a lä, hing saite ämäthung üng ma, “Ly lawi” näkha thui te lo kai lä thai vi dy. Kai kheng ea lä, cäphö kangnung metä bung nung vi dy. Honi qawng-a aedang saite kung üng äkö thung-a lä nüng nae haetä süng vi dy. ⁶Hing saite me äbälitä na thung üng ätüng tho te kätyng kai thai saite lä, “Kjung näsaite caw nibu känetä lä känitä kälu sa te ävang tähang py he kae. Bali näsaite caw nibu netä hai aelae lä känitä kälu sa te ävang py hethang kae vi. Olive situi kung na hai Cäpje thai kung na tea lä täphra ö hang” näkha nä vi.

⁷Tudylä Beram caw ma cakhi saite dengki äbälitä tea täphra ea lä, hing saite äbälitä ma, “Ly lawi” näkha thui te kai lä thai vi dy. ⁸Tukha kai kheng ea lä cäphö kädapae saite metä bung kai lä nung vi dy. Honi qawng-a aedang saite kung üng ämüng lä Kädü khaw vi dy. Angqaw khaw lä äni leithung-a hui vi dy. Änini tea lä Säthaw ma älawng qawng üng phü bälitä-a phütä na tea bädü hethang aenae py pa vi dy. Honi lä täre aety saite, tähung täkang tho saite, anghawi kaelae tyng saite hai tawngbawi käpryng na hai-a bädü hethang aenae änini lä dang hawi vi dy.

⁹Tupyng-a Beram caw lä cakhi saite dengki bangawtä tea täphra ea lä, Säthaw üng angthang hai äma ce üng yng saite tea thui te phüng-a, mätang bälai kha dü saite khimi na üng muilaw na bung löci aesa nae maicang täkui-a kai lä nung vi dy. ¹⁰Honi na lä, “Lengky saite Areng ä, nang lä cai saite hai ae-y nae hawiky saite Kung vi. Nang ma kai ce bung bädü saite älawng qawng-a awng saite khimi na tea tärae cei kha dengpy hethang lä matangtä qae ai rawng mei” näkha ätüng käleng hai hang ö vi dy. ¹¹Tupyng-a äni ce angxynlyng tea lä kä-o kanglung py qi kha tänaetä aehae hethang thui pa vi dy. Äni ce kätyng bädü hethang awng saite Areng üng mawsawng kälang na hai kangby jä-ai kälang na cungrü te y rytä äni ce lä sitäri-a aering hethang kae ö vi dy.

¹²Beram caw ma cakhi saite dengki ätärutä tea täphra te tea kai lä nung vi dy. Tukha pangtälü käleng lä naw vi dy. Käni lä kärung kätyng mänungxae kha law lä äthi kätyng thing vi dy. ¹³Käni khösang üng tengpaw na lä aeli kangcai tho te phüng-a, thaidö kung aehüng kha äthai kangheng na lä aerui te kätyng älawng-a aeqa ö by vi dy. ¹⁴Käni khösang lä cae ang-yng kätyng tä-yng kha awng y vi dy. Me anghung hai angrai sälawng angxynlyng na la äma ce mityng üng hai aethui ja ö vi dy. ¹⁵Tupyng-a älawngpre-a sanphrang na, khimi mätawngky na, reisae kälengky na, kätawng känang na hai aenae kä-awngky na, khimi kälang angxynlyng na, mawsawng na hai khimi kaelawi na lä täpu khaw hai me anghung na qawng üng kälung na täkui-a aeho ö vi dy. ¹⁶Äni ce lä me anghung hai kälung na tea, “Kai ce tea aekai kha täphung ö la. Areng üng aety nae qawng-a aety saite Kung üng mimai tea nung y hethang hai Beram caw üng kädawtho saite thung üng kai ce bung hoja ö kü jo. ¹⁷Änini üng kädawtho saite ri hethang hawi te käni lä vaihi tyng te vi dy. Ämi lawngtä la hing haw y ai” näkha ätüng käleng hang ö vi dy.

Isrelae ceng üng khimi täsingtä hai täsawng bälitä hai sang bälitä

¹Hini pyng-a kai lä kheng kha Känipre angtawtha lawng bälitä na lä älawngpre üng khöteng täki bälitä-a aedaw ö te nung vi dy. Äni ce lä älawngpre täki bälitä üng aeli na tea mäkhang ö vi dy. Tukha älawng qawng-a pangle hai, thingkawng na tea lä äte aeli la mäsaeja haw y hethang sa ö te vi dy. ²Säthaw Kanghing üng äsäny tea süng kha käni käse mang üng ly saite Känipre angtawtha kälang bung kai lä nung vi dy. Äni lä älawng hai pangle tea täphra hethang Säthaw ma haidae py saite Känipre angtawtha lawng bälitä na tea ätüng käleng hai thui vi dy. ³Känipre angtawtha lä, “Mä-ai üng Säthaw üng mawsawng na üng löpeng tea kai ce ma äsäny sa y rytä lä, älawng, thingkawng na hai pangle tea täphra ö hang” näkha thui vi dy. ⁴Tupyng-a Säthaw üng äsäny sa saite khimi rui na kai lä thai vi dy. Honi na lä lawng täsingtä hai täsawng bälitä hai sang bälitä awng ö vi dy. Äni ce lä Isrelae ceng hawlai netä angxynlyng na thung üng vi. ⁵Judae amäjy khimi lawng 12,000tä, Ruben amäjy thung üng 12,000tä, Kad amäjy thung üng lawng 12,000tä, ⁶Asa amäjy thung üng lawng 12,000tä, Natali amäjy thung üng lawng 12,000tä, Manase amäjy thung üng lawng 12,000tä, ⁷Simon amäjy thung üng lawng 12,000tä, Levi amäjy thung üng lawng 12,000tä, Isaika amäjy thung üng lawng 12,000tä, ⁸Zabulun amäjy thung üng lawng 12,000tä, Josefae amäjy thung üng lawng 12,000tä, hai Benjamin amäjy thung üng lawng 12,000tä na tea lä äsäny sa qi ö vi dy.

Khimipui na

⁹Honi pyng-a kai kheng ea lä, ämi la to haw lei y saite khimipui na tea kai lä nung vi dy. Äni ce lä älawng qawng üng pre qütä na, amäjy qütä na, ceng qütä na, khimi ce hai älo cawngkhang aepe saite qütä na vi dy. Äni ce lä kä-o kanglung na aelawng kha äkö hai cangrang cangpre na süng ea areng aety nae hai Beram caw üng maw-a aedaw ö vi dy. ¹⁰Tudylä äni ce lä, “Mä-ai üng Säthaw lä areng aety nae qawng-a aety vi. Äni hai Beram caw lä mä-ai bung aeqang te vi,” näkha ätüng käleng hai thui ö vi dy. ¹¹Känipre angtawtha angxynlyng na lä areng aety nae, mätawngky na hai, hing saite me bälitä na tea sävenglü kha aedaw ö vi dy. Tupyng-a äni ce lä Areng üng aety nae maw-a aebo kha Säthaw tea cäphaw ö vi dy. ¹²Tukha äni ce lä, “Amen, mä-ai üng Säthaw tea lä bälaw ö sy. Mä-ai üng Säthaw lä phung-ang awng saite, bälunghae saite, kawng te lo thui he hawi saite, tämö khai he hawi saite, haidae hai aethaw na dungtäsa awng jawjaw sy, Amen” näkha thui ö vi dy.

¹³Tupyng-a mätawngky lawngtä ma kai tea, “Kä-o kanglung na aelawng saite hini khimi ce lä ämi ce mei. Äni ce lä mamang üng ly ö te vi mei” näkha düng vi dy.7:13 Aetüng 6:11

¹⁴Kai ma äni tea, “Areng ä, Nang lä mäny vi” näkha mäthang vi dy. Äni ma kai tea,

“Hini khimi na lä sakälö khü phi saite na aeting kha bäja ö saite na vi. Äni ce lä äma ce üng kä-o na tea Beram caw üng äthi hai mäcai ping ö pyng saite na vi dy. ¹⁵Tukätephüng-a äni ce lä Säthaw üng areng aety nae maw-a awng kha Säthaw üng Ingkäcai thung-a kärung käni äni tea mawsawng sa ö vi. Areng aety nae qawng-a aety saite Kung ma lä äni ce hai mangtä awng kha äni ce tea aedung hai vi ai. ¹⁶Äni ce lä manila böjo aelang, tui aehe haile tyng ö y ai. Käni taw te hai käbi la äni ce tea lä tyng ö y dy lyng. ¹⁷Ätephüng-a mei nädylä areng aety nae üng äsäla ung-a awng saite Beram caw lä äni ce bung rui saite beram kärui Kung-a lawng vi ai. Äni ma äni ce bung lä kähing py saite tui cäpring mityng-a bähawi pa vi ai. Tukha Säthaw lä äni ce üng ämi na mang tho saite minaw tui angxynlyng na tea mai pang vi ai” näkha nä vi.

Cakhi saite dengki äsäritä

¹Cakhi saite dengki säritä thung üng kangkhüngky tea Beram caw ma täphra te kätü-a, Känipre-a lä naeri kaehü rytä sitäri-a awng ö vi. ²Tupyng-a Säthaw üng maw-a aedaw saite Känipre angtawtha lawng säritä bung kai lä nung vi dy. Äni ce lä baw säritä dang ö vi dy.

³Sui kaephi awng saite Känipre angtawtha kälang lawngtä lä löci aesa nae maicang teng-a ly kha aedaw vi dy. Äni tea lä Säthaw üng khimi käcai angxynlyng na üng aetang saite hai mangtä löci sa hethang äni lä rimuidi awng mang-a dang vi dy. Honi lä areng aety nae maw-a sui hai sa saite maicang cäpi qawng-a äni lä maisawi kha löci sa hethang vi. ⁴Känipre angtawtha üng kö-a süng saite sui kaephi üng maisawi saite rimuidi maikhü mui kähawi hai khimi käcai na üng aetang saite hai mangtä Säthaw üng maw-a paw vi dy. ⁵Tupyng dylä Känipre angtawtha lä maisawi saite sui kaephi süng ea maicang üng mai na mäkawi kha älawng qawng-a käde phae vi dy. Tukha khö bärü saite ätüng na, bärei mäkhawi saite tüng na, anglaw säde saite na hai pangtälü naw te lä awng vi dy.

Baw na üng pa

⁶Tupyng-a baw säritä awng saite Känipre angtawtha lawng säritä na lä baw üng hethang aerü ö rüng vi dy.

⁷Angcü üng Känipre angtawtha lä äma üng baw üng vi dy. Äthi hai aeqo saite ri thai hai mai lä älawng qawng-a aeqa vi dy. Älawng üng phü thungtä-a phütä, thingkawng kung na phü thungtä-a phütä hai aeca kanghing angxynlyng na tea lä mai ma kang vi dy.

⁸Tupyng-a äbaeni üng Känipre angtawtha lä äma üng baw üng vi dy. Me anghung käleng haetä kätyng awng saite mai aeke tea lä pangle thung-a kädeja vi dy. Pangle üng phü thungtä thung-a phütä lä äthi-a aelawng vi dy. ⁹Tukha pangle thung üng hing saite phü thungtä-a phütä lä dü kha tui sangphaw na phü thungtä thung-a phütä lä phra vi dy.

¹⁰Tupyng-a ämäthung üng Känipre angtawtha lä äma üng baw üng vi dy. Tengpaw käleng haetä lä maito kätyng aekhaw kha käni khösang mang üng hai tävaw käleng hai tui cäpring phü käthungtä üng phütä na qawng-a aeqa vi dy. ¹¹Honi tengpaw üng ämüng lä “Khawta saite vi.” Tui phü thungtä-a phütä lä tui käkhaw-a aelawng vi dy. Honi tui käkhaw nei te phüng-a khimi awng mang saite na lä dü ö vi dy.

¹²Tupyng-a äbäli üng Känipre angtawtha lä äma üng baw üng vi dy. Käni üng phü thungtä-a phütä, law üng phü thungtä-a phütä, tengpaw na üng phü thungtä-a phütä tea lä täphra king ö vi dy. Tukätephüng-a äni ce üng kaevang na phü thungtä thung-a phütä lä ving vi dy. Kärung hai käni üng phü thungtä-a phütä lä kaevang awng y by vi dy.

¹³Tupyng-a kai kheng ea lä käni khösang-a aeja saite aemö säling metä üng ätüng käleng tea kai lä thai vi dy. Honi aemö säling ma, “Tähang si, tähang si, Känipre angtawtha kälang käthungtä na ma baw üng saite ätüng tho te kätü-a, älawng qawng üng hing saite na lä hini qawng-a cang y tähang si rae ö ai” näkha hang vi dy.

¹Tupyng-a äbangaw üng Känipre angtawtha lä äma üng baw tea üng vi dy. Käni khösang üng älawng-a aeqa saite tengpaw haetä hai aetawng saite Känipre angtawtha bung kai lä nung vi. Honi angtawtha tea lä Angqaw khaw käthu üng kätho saw dang te vi dy. ²Äni ma Angqaw khaw käthu tea pä-awng te kätü-a, maikhü lä aengaw bärai saite angrawng üng maikhü kätyng tho vi dy. Honi Angqaw khaw käthu üng maikhü phüng-a käni hai käni khösang na lä ving vi dy. ³Honi maikhü thung üng khölawng na lä älawng qawng-a aeqa ö vi dy. Äni ce lä känitä-ai na tea awng saite haidae kätyng dang ö by vi dy. ⁴Lawngtä ma äni ce tea, “Nang ce lä Säthaw üng äsäny äma ce üng löpeng na qawng-a awng y saite khimi na tea xyng känaw py hethang kae. Nang ce lä äte aeca, äkung hai thingkawng kung na tea lä täphra ö hang” näkha särilo hai thui pa vi dy. ⁵Khimi ce bung bädü hethang Säthaw ma khölawng na tea aenae py pa y. Äni ce tea lä law bangawtä mätang bälai hai hethang py pa ö te vi. Khölawng na ma khimi ce tea kei te lä känitä-ai ma kei te kätyng naw te by vi. ⁶Honi law bangawtä kätü-a, khimi ce lä dü hethang aethawsa ngaila dü haw ö y lyng. Äni ce lä dü hethang ngai ngaila, dü haw ö y lyng.

⁷Honi khölawng na lä täre aety hethang aerü rüng saite cäphö na üng ämaw äcae hai aetawng ö vi dy. Äni ce üng älö na-a lä areng üng sui lökhu na hai aetawng saite na aekhu kha äni ce üng mimai na lä khimi üng mimai na hai aetawng vi.

⁸Äni ce üng äsang lä nawngmädi na üng äsang na hai aetawng vi. Äni ce üng äfaw na lä xangsi täkai na üng äfaw na hai aetawng vi dy. ⁹Äni ce üng tatärang-a lä süng kä-o hai aetawng saite na aelawng vi. Äni ce üng mäkhi na hai bo kha aeja saite ätüng lä täre kung-a aety hethang aehui saite cäphö kaeri na üng ätüng kätyng vi dy. ¹⁰Äni ce üng tämai na lä känitä-ai na üng tämai ru saite na kätyng vi. Honi tämai na hai khimi ce tea law bangawtä mätang bälai-a sa hethang haidae awng te vi. ¹¹Äni ce üng sanphrang lä Angqaw khaw käthu tea pyng saite angtawtha kälengky vi. Äni üng ämüng lä Hebärai lo hai Abadon näkha, Käri lo hai lä Apolyon näkha nä vi. Hini üng älawngsai lä “Täphra saite Kung” vi.

¹²Angcü üng tähang si saite lä teng vi dy. Honi pyng-a tähang si saite kälang känetä lä tyng ai rawng.

¹³Tupyng-a Känipre angtawtha ätärutä ma äma üng baw üng vi dy. Säthaw üng maw-a awng saite dingrawng sawi saite sui maicang täki bälitä üng tho saite ätüng tea kai lä thai vi dy. ¹⁴Honi ätüng ma baw üng saite Känipre angtawtha ätärutä tea “Euphrate tävaw käleng teng-a mäkhing saite Känipre angtawtha bälitä na bung bälawi la” näpa. ¹⁵Älawngpre üng khimi phü thungtä-a phütä tea bädü hethang Känipre angtawtha bälitä na bung äni ce ma bälawi pa vi dy. Säthaw ma honi Känipre angtawtha bälitä na lä hini naeri hai, käni hai, law hai säning tähang khai rüng vi dy. ¹⁶Cäphö qawng-a aedang saite reisae na üng nyng te lä lawng kädi pakuisytä awng te phüng thui te kai lä thai vi dy. ¹⁷Kai üng äsämai-a lä cäphö na hai aedang saite na tea kai lä nung vi dy. Äni ce üng tatärang-a lä süng kä-o aelawng ö vi. Hini süng kä-o na lä mai kätyng kangthing, käni khösang kätyng pä-ing sungsang, keng kätyng kangseng na awng ö vi dy. Cäphö na üng älö na lä xangsi täkai na üng älö na kätyng vi dy. Äni ce üng täbawng na mang lä mai, maikhü hai keng maikhü na tho ö vi. ¹⁸Honi cäphö täbawng na mang üng tho saite mai, maikhü hai keng maikhü näsaite mätang bälai-a naw saite na hai-a khimi ce phü thungtä-a phütä lä dü ö vi dy. ¹⁹Cäphö na üng haidae lä äni ce üng täbawng na thung hai tämai na qawng-a la awng te ö by vi. Äni ce üng tämai na lä bärui na üng älö na kätyng vi. Honi tämai na hai-a khimi ce tea mätang bälai hai ö te vi dy.

²⁰Hini mätang bälai saite känaw käsaw na hai-a dü y saite khimi na lä äma ce üng sa tämang saite na tea ae-ui ö y lyng. Äni ce lä angra na tea cäphaw jawjaw ö te vi. Äni ce lä sui, tangkae, süng kangseng, kälung, thingkawng na hai sa saite mimi na tea cäphaw jawjaw ö te vi. Honi mimi na lä ämi la nung haw te y, känawkhing hai la thaikaw te y, aeke haw ö te y vi. ²¹Khimi ce lä äma ce üng khimi kälang na tea bädü saite, angra üng ädawi na hai sa saite, ngaiphi tüng y saite mang-a hui saite na hai theru sa saite na üng ae-ui ö te y vi.

Cae ang-yng cäpi süng saite Känipre angtawtha

¹Tupyng-a aethaw awng bärai saite angtawtha kälang lawngtä Känipre mang üng cäqa käthu te kai lä nung vi. Äni lä khö angnüng bung kä-o kätyng aelawng kha älö-a lä kungbäje kätyng säveng pa vi dy. Äni üng mimai lä käni kätyng ang te vi. Äni üng äkho na lä mai ing aeling na kätyng vi dy. ²Äni üng äkö thung-a lä pä-awng saite cae ang-yng cäpi awng te vi. Äni üng äkho bangtang mang lä pangle qawng-a thaw kha äkho bangrawi mang lä älawng qawng-a thaw pa vi dy. ³Tukha äni lä xangsi täkai kätyng ätüng käleng hai hang vi dy. Honi kätyng hang te kätü-a lä, bärei mäkhawi te ätüng qeng säritä mäthang vi dy. ⁴Bärei mäkhawi te qeng säritä ätüng na tüng te kätü-a, kai lä cae tärü hethang sa te vi dy. Tungaila käni mang üng ätüng haetä ma, “Bärei säritä ma thui saite tea lä ho la; Honi tea lä tärü hang ba” näkha thui saite tea kai lä thai vi dy.

⁵Tupyng-a pangle hai älawng qawng-a aedaw saite Känipre angtawtha lä äma üng äkö bangtang tea lä käni khösang mang-a bäjae te kai lä nung vi. ⁶Dungtäsatä awng jawjaw kha käni, älawng, pangle na hai äte angxynlyng na tea sa saite Säthaw üng ämüng hai-a Känipre angtawtha ma aenai kha thui vi dy. Äni ma, “Säthaw lä kätü tea mänawng hai y lyng. ⁷Tungaila äsäritä üng Känipre angtawtha lä äma üng baw üng te kätü-a, Säthaw lä äma üng ho saite mawlang kaedawng tea lä cyng hai vi ai. Äni lä äma üng mawsawng na, buisaw na tea thui te kätyng sa vi ai” näkha näpa.

⁸Käni mang üng kai tea älo aepe te ätüng kai lä thai haile tyng be vi. Honi ma kai tea, “Ly kha pangle hai älawng qawng-a aedaw saite Känipre angtawtha äkö thung-a awng kha pä-awng saite cae ang-yng cäpi tea la ba” näkha nä vi.

⁹Kai lä honi Känipre angtawtha tea ly kha cae ang-yng cäpi mäkai dy. Äni ma kai tea “Nang lä honi tea la kha ca ba. Nang üng äjo thung-a khawta hai vi ai. Tungaila nang üng täbawng thung-a lä khawi tui kätyng tui vi ai” näkha nä vi.

¹⁰Kai lä Känipre angtawtha äkö thung üng cae ang-yng cäpi tea la kha ca vi dy. Honi lä kai üng täbawng thung-a khawi tui kätyng tui te vi. Tungaila kai ma bäjawng pyng-a lä, äjo thung-a lä khawta hai te vi. ¹¹Tupyng-a äni ce ma kai tea, “Pre qütä, khimi ceng angxynlyng na, älo cawngkhang aepe saite na hai, sanphrang na phüng tea Säthaw ma thui saite angthang kätyng nang lä thui haile tyng hethang kae” näkha thui vi dy.

Mäny khe kha älo mitang thui saite lawng netä

¹Tupyng-a pawngpai kätyng mätae nae jawngtä kai tea py vi. Tukha khimi lawngtä ma, “Ly kha Säthaw üng Ingkäcai hai maicang tea mätae ba. Ingkäcai thung-a cäphaw saite na tea to lawi. ²Tungaila Ingkäcai ärang üng baesung na tea lä mätae y ma. Honi lä ceng kälang na tea py pa te phüng-a vi. Äni ce lä Märü käcai tea law rui bäli känetä äkho hai aecö täto ö vi ai.

³“Kai lä mäny khe kha älo mitang thui saite lawng netä bung mätaw ai. Änini lä bälungsi kha bälung hawi y saite mätü hethang kä-o kämawng aelawng ea käni rui sang cungvai netä hai rui tärutä tütü Säthaw üng angthang thui hawi ai” näpa.

⁴Änini lä älawngpre angxynlyng na pyng saite areng üng maw-a aedaw hawi vi ai. Änini lä olive thingkawng kung känetä hai, maibung kaesang känetä kätyng vi. Honi olive kung üng äthai lä Muilaw Käcai ma änini tähang aethaw py saite phüng tea thui hawi te vi. Änini lä maibung kaesang känetä hai la aetawng hawi te vi. Maibung kaesang lä Säthaw üng kaevang phüng tea näte vi. ⁵Änini tea lawng lawngtä ma känaw py dylä, änini üng täbawng mang mai na tho kha äma ni üng täre na tea täphra hawi vi ai. Änini tea täphra hethang aethawsa saite na lä hini kätyng dü ö by ai. ⁶Änini lä Säthaw üng angthang thui saite kätü-a, khöne y hethang mäkhang saite aenae awng hawi vi. Tui tea äthi mäqa haw saite aenae la änini lä awng hawi te by vi. Äma ni üng ngai te kätyng älawngpre tea la käsi cawngkhang na tyng leilae haw saite aenae awng hawi by vi.

⁷Änini ma angthang thui hawi pyng te kätü-a, Angqaw khaw käthu thung üng tho saite mawikäsi lä änini tea aety ai. Tukha äni ma änini tea bäja kha bädü pa ai. ⁸Änini üng äro lä märü käleng pui üng lolang qawng-a bäsawng hawi pa vi ai. Honi lä khimi ce ma Areng bung thinglang qawng-a bädü saite märü vi. Honi märü üng khimi na lä si bärai te phüng-a, Sodom märü y dylä Aikuta pre kätyng ämüng mäthi ö te vi. ⁹Älawngpre qütä üng khimi na, ceng qütä, älo cawngkhang aepe saite na hai amäjy qütä üng khimi na lä änini üng äro tea käni thungtä hai kaehütä kheng ö vi ai. Honi änini üng äro bung lä aevui hethang py ö y ai. ¹⁰Älawngpre üng khimi na lä änini üng dü saite phüng-a anghawtho ö ai. Äni ce lä pawi na sa kha lawng lawngtä tea lasawng na aepy ö ai. Hini buisaw lawng netä ni lä khimi angxynlyng na tea mätang bälai phi saite na tyng hai hawi te phüng-a vi.

¹¹Käni thungtä hai kaehütä pyng dylä, kähing py te Säthaw üng aehaw saite lä änini tea kung kha änini lä aetha hawi vi dy. Tukha änini bung nung saite khimi angxynlyng na lä ri ö vi dy. ¹²Tupyng-a buisaw lawng netä lä, “Hi-a paw hawi lawi” näkha käni mang üng hai änini tea thui saite ätüng käleng thai hawi vi dy. Tukha änini lä khö angnüng thung mang khösang-a paw hawi te tea änini üng täre na ma nung ö vi dy. ¹³Honi tänaetä kätü-a ma, pangtälü käleng naw kha märü käleng pui üng phü hawtä-a phütä lä phra vi. Tukha khimi lawng sang säritä na lä dü ö vi dy. Dü y saite khimi na lä tengxyng y ri kha Känipre Säthaw üng phung-ang leng saite tea bälaw ö vi dy.

¹⁴Tähang käsi äbaeni lä teng vi dy. Tungaila tähang käsi ämäthung lä tyng raw ai.

Äsäritä üng baw tüng

¹⁵Tupyng-a äsäritä Känipre angtawtha lä äma üng baw tea üng vi dy. Käni mang üng ätüng käleng na lä, “Älawngpre-a pyng hethang haidae lä vaihi mä-ai üng Areng hai äni üng Mesia tea awng vi. Äni lä dungtäsa pyng jawjaw ai” näkha nä vi. ¹⁶Tupyng-a Säthaw maw üng areng aety nae na qawng-a, aety saite mätawngky lawng kuisy bälitä na lä aebo kha Säthaw tea cäphaw ö vi dy. ¹⁷Äni ce ma,

“Äte angxynlyng na sa haw saite, cangkhawng üng hai ma awng angci saite hai vaihi la awng saite Areng Säthaw ä, nang tea kai ce lä bälaw ö vi.

Nang lä nang ma üng haidae käleng hai äte angxynlyng na tea pyng hethang aetawng pyng te vi dy.

¹⁸Nang tea mäny y saite khimi na lä kädawtho bärai ö vi.

Ätephüng-a mei nädylä nang üng kädawtho saite mätü hethang kätü lä tyng vi dy.

Dü pyng saite angxynlyng na tea tärae cei hethang kätü lä tyng khaw vi dy.

Nang lä nang üng mawsawng na, buisaw na, nang üng khimi angxynlyng na,

nang tea tämö khai saite khimi angxynlyng na hai, khimi cäpi käleng angxynlyng na tea ävang py hethang kätü lä tyng te vi.

Älawngpre tea täphra saite khimi na tea täphra hethang kätü tyng vi” näkha thui ö vi.

¹⁹Tupyng-a Känipre-a Säthaw üng Ingkäcai lä pä-awng vi dy. Honi Ingkäcai thung-a lä äma üng älo aenai saite tengtae lä nung haw vi dy. Tukha anglaw säde saite na, khö bärü saite na, bärei mäkhawi saite ätüng na, pangtälü naw saite hai ri thai käleng na aeqa saite na awng ö vi dy.

Nawngmädi hai Näka käleng

¹Tupyng-a käni khösang-a lä cangxei saite käleng haetä tho vi dy. Käni tea kä-o kätyng aelawng saite nawngmädi lawngtä awng kha äni üng äkho täkui-a lä law awng te vi. Äni üng älö-a lä tengpaw hawlai netä awng saite areng lökhu tea aekhu pa vi dy. ²Äni lä qae y tea ma äby aepeng ai te phüng-a äjo naw kha hang te vi.

³Käni khösang-a lä cangxei saite kälang haetä tho be vi dy. Älö säritä hai täki hawtä awng saite näka kangthing käleng metä lä äma üng älö na qawng-a areng lökhu säritä aekhu qi te vi. ⁴Äni lä käni khösang üng tengpaw phü thungtä-a phütä tea äma üng tämai hai re kha älawng qawng-a kädeja pa te vi. Näka käleng lä äby aepeng aetawng saite nawngmädi üng maw-a aedaw kha honi äby bung aepeng te hai ca phraw hethang äni lä ngai pa te vi. ⁵Honi pyng-a nawngmädi lä äcäpaw bung aepeng vi dy. Äni lä pre angxynlyng na üng khimi na tea süng pawngpai hai pyng ai. Nade bung lä änä-awi te üng Säthaw ma äni üng areng aety nae-a nähai pa te vi dy. ⁶Nawngmädi lä äma tähang Säthaw ma sa rüng saite mityng daithung kärang thung-a aehuija vi dy. Honi mityng-a äni ce ma äni bung lä käni sang cungvai netä hai rui tärutä khytä rui pa vi ai.

⁷Honi pyng-a Känipre-a lä täre aety ö vi dy. Känipre angtawtha käleng Mikhela hai äni üng Känipre angtawtha na lä näka käleng tea täre aety ö vi dy. Näka käleng hai äma üng äpy angtawtha na lä äni ce tea täre aety haile tyng ö vi dy. ⁸Tungaila, äni ce lä bäja ö y. Näka hai äma üng angtawtha na lä Känipre üng tho hethang kae ö vi dy. ⁹Setan angra näsaite Näka käleng lä cangkhawng üng bärui hai äma üng kangby jä-ai na lawng vai saite Känipre angtawtha na bung lä mangtä Säthaw ma älawng qawng-a käde phae pa ö vi dy. Äni lä älawngpre angxynlyng-a awng saite khimi na tea kaeling kaemae sa vi dy.

¹⁰Honi pyng-a käni khösang üng ätüng käleng kai ma thai te lä, “Vaihi Säthaw üng aeqang saite lä tyng vi dy. Vaihi Säthaw lä Sanphrang kätyng äma üng haidae mätü vi dy. Vaihi äni üng Mesia lä äma üng aenae mätü vi dy. Ätephüng-a mei nädylä Säthaw maw-a aedaw kha yng saite na tea kärung käni cy saite lawngtä bung lä käni khösang mang üng mäthoja pa te phüng-a vi. ¹¹Äni ce lä Beram caw üng äthi hai, äni ce thui saite Säthaw üng lo mitang hai-a Setan tea bäja ö vi dy. Äni ce lä dü hethang ri y käla äma ce üng hing saite tea la mäsai ö y vi dy. ¹²Tukätephüng-a käni khösang na hai äqawng-a awng saite angxynlyng na ä, anghawtho ö lawi. Älawng hai pangle lä tähang si bärai na ly. Ätephüng-a mei nädylä Setan angra lä nang ce tea cäqa pyng te vi dy. Äni üng kätü lä äje cäcaw xyng awng saite tea äni lä mäny te phüng-a, tengxyng y kädawtho vi dy” näkha nä vi.

¹³Äni bung älawng qawng-a kädephae saite tea Näka käleng ma mäny te kätü-a, äni lä nawngmäcaw nade bung aepeng saite nawngmädi tea sa kälökhü pa te vi dy. ¹⁴Nawngmädi lä daithung kärang äma üng mityng-a aeja haw hethang aemö säling käleng üng mäkhi känetä tea dang vi dy. Äni lä honi mityng-a säning thungtä hai kaehütä rytä Näka käleng ma äni tea känaw py pa y hethang äni ce ma äni bung kähawi-a rui pa ai. ¹⁵Näka käleng lä nawngmädi bung tuisaw-a bäja hai hethang äma üng täbawng mang tui tea tävaw käleng kätyng mätho pa vi dy. ¹⁶Tungaila älawng ma nawngmädi tea säbawng pa vi dy. Älawng lä aekaw phung kha Näka käleng üng täbawng mang mätho saite tävaw käleng üng tui tea lä bäjawng king pa vi dy. ¹⁷Tudylä Näka käleng lä nawngmädi tea kädawtho pa vi dy. Äni lä nawngmädi üng kaesui kaebeng kälang na tea aety hethang tho pa vi dy. Tukha Säthaw üng Ubädi na tea tängai kha Isu ma mätü saite lo mitang tea cakhi-a yng khü saite na tea la Näka ma täre aety vi dy. ¹⁸Tukha Näka lä pangle pyng-a aedaw vi dy.

Pangle thung üng Mawikäsi

¹Näka käleng lä pangle tui teng-a aedaw vi. Tupyng-a mawikäsi metä lä pangle thung üng tho te kai lä nung vi dy. Honi lä täki hawtä hai älö säritä awng vi. Honi üng täki qütä qawng-a lä areng lökhu aekhu ö qi vi. Hini üng älö qütä qawng-a lä Säthaw tea käsi prawng saite ämüng tärü ö qi vi dy. ²Hini mawikäsi lä täkai cäqung hai aetawng vi. Äni üng äkho lä tävawng üng äkho hai aetawng kha täbawng lä xangsi täkai üng täbawng hai aetawng vi. Näka käleng lä mawikäsi tea äma üng haidae, aety nae hai, aenae käleng py pa vi dy. ³Mawikäsi üng älö haetä lä tengxyng y tämaw käsi dang te kätyng vi. Tungaila honi tämaw lä thae pa vi dy. Älawngpre üng khimi angxynlyng na lä cangxei kha äni leithung hui ö vi dy. ⁴Khimi qütä lä Näka käleng tea cäphaw ö vi dy. Ätephüng-a mei nädylä äni lä äma üng aenae mawikäsi tea py pa te phüng-a vi. Äni ce lä mawikäsi tea la cäphaw kha, “Hini mawikäsi lä ämi hai aetawng mei. Äni tea ämi ma täre aety haw ai mei” näkha thui ö vi dy.

⁵Mawikäsi lä bälungleng kha Säthaw tea käsi prawng hethang, law ruibälitä hai law netä khytä aenae dang vi dy. ⁶Äni lä Säthaw hai äni üng ämüng, Säthaw awng saite mityng hai Känipre-a awng saite angxynlyng na tea tengxyng y käsi thui pa vi dy. ⁷Äni lä Säthaw üng khimi käcai na hai täre aety kha äni ce tea bäja hethang, pre qütä-a awng saite khimi qütä, älo cawngkhang aepe saite qütä hai ceng qütä na tea pyng hai hethang aenae dang vi dy. ⁸Hini älawngpre-a awng saite khimi angxynlyng na lä hini mawikäsi tea cäphaw ö ai. Älawngpre sa y kälang üng hai dungtäsa kähing dang hethang ämüng lä bädü saite Beram caw üng cae-u thung-a tärü saite khimi na xyngtä ni mawikäsi tea cäphaw ö y vi ai.

⁹“Känawkhing awng saite khimi lä thaikaw sy. ¹⁰Säthaw ma khimi lawngtä tea thawng thung-a pä-ung hai hethang mawlang kaedawng awng dylä, äni lä thawng thung-a pä-ung vi ai. Säthaw ma khimi lawngtä tea aekei sawngseng hai dü hai hethang mawlang kaedawng awng dylä, äni lä aekei hai-a dü vi ai. Hini phüng-a Säthaw üng khimi käcai lä yng te cakhi saite na, änawngsa kha khung saite na lawng hethang kae” näte vi.

Mepui üng mawikäsi

¹¹Tupyng-a mawikäsi kälang metä lä älawng thung üng tho te tea kai lä nung vi dy. Honi tea lä beram üng täki kätyng känetä awng vi. Tungaila äni lä näka kätyng älo aepe vi dy. ¹²Äbaeni üng mawikäsi lä mawikäsi angcü üng mawikäsi aenae angxynlyng na tea angcü üng mawikäsi tähang tawng vi dy. Äni lä älawngpre-a awng saite khimi angxynlyng na bung tämaw thae haile tyng saite angcü üng mawikäsi tea aethaw paitae hai cäphaw hai pa ö vi dy. ¹³Äbaeni üng honi mawikäsi lä cangxei saite käleng na sa vi dy. Äni lä khimi qütä üng maw-a Känipre mang üng mai älawngpre-a aeqa hai pa vi dy. ¹⁴Äni lä mawikäsi angcü üng tähang sa saite cangxei te na hai-a älawng qawng üng khimi angxynlyng na tea kaeling kaemae sa te vi. Aekei hai tämaw dang ngaila dü y käla hing saite honi mawikäsi tea tämö khai hai hethang khimi ce tea äni üng mimi sa hai pa te vi dy. ¹⁵Mawikäsi angcü üng mimi tea aehaw kha hing hai hethang aenae äni lä dang vi. Tukätephüng-a mimi lä älo aepe kha äma tea cäphaw y saite khimi angxynlyng na tea bädü hethang särilo py haw vi dy. ¹⁶Mawikäsi lä khimi aely leng te hai leng y saite, kätawng känang hai kangtang kanglai, mawsawng hai khimi kaelawi angxynlyng na tea aethaw paitae hai äma ce üng äkö bangtang qawng-a, y dylä löpeng-a äni ma äsäny sa hai bawi pa ö vi dy. ¹⁷Honi äsäny awng y dylä ämi la vyngjaw, vyng rang saite sa haw y lyng. Honi äsäny lä mawikäsi üng ämüng, y dylä äni üng nangbae tea thui te vi.

¹⁸Hini phüng-a Säthaw üng khimi na lä bälunghae hethang kae. Mawikäsi üng ämüng lä 666 vi. Honi nangbae lä khimi üng ämüng näte vi. Mänykaw saite khimi lä mawikäsi üng nangbae käthu käcawng tea to haw te vi.

Beram caw hai äma üng khimi na

¹Tupyng-a kai lä kheng kha Zaion me anghung qawng-a aedaw saite Beram caw bung nung vi dy. Äni üng ämüng hai Äpä-ai üng ämüng tea äni ce üng löpeng na-a tärü saite khimi lawng täsingtä hai täsawng bälitä na la äni hai mangtä aedo ö vi. ²Käleng üng tui aetäkhüng saite ätüng, käni khösang mang üng bärei mäkhawi saite ätüng kätyng kai lä thai vi dy. Honi lä tingtyng aetho kaw saite khimi na üng ätüng na kätyng by vi. ³Khimi lawng täsingtä hai täsawng bälitä na lä areng aety nae, hing saite me bälitä na hai khimi mätawngky na üng maw-a aedaw ö vi dy. Äni ce lä äma ce qaitä aetu haw saite ae-awi kangthae haetä thui ö vi. Säthaw lä khimi ceng angxynlyng na thung üng äni ce bung aeqang pyng te vi dy. ⁴Honi khimi na lä nawngmädi na hai täkübäjang sa ö y saite na vi. Äni ce lä äma ce tea pawprae y hethang sädi khai ö te vi. Äni ce lä Beram Caw ly saite mityng qütä-a hui ö vi. Äni ce bung Säthaw lä khimi ceng angxynlyng na thung üng kätho haile pa ö te vi dy. Äni ce lä Säthaw hai Beram Caw hai aesui saite na vi. Äni ce lä angcü üng ae saite cawbi cawthai na Säthaw hai Beram Caw tea a pyng saite na kätyng vi dy. ⁵Äni ce lä manila älo kaeling thui vai ö te y. Äni ce tea lä cy hethang awng ö y vi.

Känipre angtawtha lawng thungtä

⁶Tupyng-a käni khösang-a aeja saite Känipre angtawtha kälang lawngtä tea kai lä nung vi. Äni lä älawng qawng-a awng saite khimi na, ceng qütä, amäjy qütä, älo cawngkhang aepe saite qütä na tea dungtäsa Angthang Kähawi thui saite kung vi. ⁷Äni ma, “Säthaw tea tämö khai kha äni üng leng saite tea bälaw ö. Khimi angxynlyng na tea äni ma tärae cei hethang kätü lä, tyng pyng vi dy. Käni, älawng hai pangle, tui cäpring na sa saite äni tea cäphaw ö lawi” näkha ätüng käleng hai thui pa vi dy.

⁸Äbaeni üng Känipre angtawtha lä angcü üng angtawtha leithung hui kha, “Babilon märü käleng lä aene vi dy. Babilon märü käleng lä aene vi dy. Nawngmädi kangdei ma mätyng saite mai aekhaw te ra tea älawngpre angxynlyng na üng khimi na lä nei ö te vi. Tukha äni ce lä äni hai täkübäjang sa ö vi dy” näkha thui vi dy.

^9-10Ämäthung üng Känipre angtawtha lä angcü üng angtawtha lawng netä leithung hui kha ätüng käleng hai thui te lä, “Mawikäsi hai äni üng mimi tea cäphaw saite khimi na hai äma ce üng löpeng, y dylä äkö na qawng-a äsäny dang ö saite khimi na tea Säthaw lä mai aekhaw saite ra bynglyng thung-a mäkawi kha nei hai pa vi dy. Honi lä Säthaw üng tengxyng y kädawtho saite tea thui te vi. Honi khimi na lä Beram caw hai äma üng Känipre angtawtha käcai na maw-a keng maikang saite hai naw mätang ö vi ai. ¹¹Äni ce tea naw mätang hai saite maikang te üng maikhü lä äqawng mang-a dungtäsa paw jawjaw te vi. Mawikäsi hai äni üng mimi tea cäphaw kha äni üng äsäny löpeng qawng-a awng saite khimi na lä kärung käni mätang bälai ö vi ai” näkha ätüng käleng hai thui vi.

¹²Tukätephüng-a Isu tea yng khü kha Säthaw üng Ubädi na tea tängai saite Äma üng khimi käcai na lä änawngsa te hai khung ö hethang kae.

¹³Tupyng-a Känipre mang üng ätüng kai thai saite lä, “Hini tea tärü ba. Vai üng hai aetawng kha Areng üng kälu sa ea dü saite khimi na lä tähang hawi” näkha nä vi.

Muilaw Käcai ma, “Mitang khaw mang. Äni ce lä äma ce kälu üng aehae kha anghawtho ö vi ai. Ätephüng-a mei nädylä äni ce üng sa te tea Säthaw lä sämai vi ai” näpa.

Älawng qawng üng cawbi cawthai na ae saite

¹⁴Tupyng-a kai lä kheng kha khö angnüng kanglung haetä qawng-a Khimi üng Cäpaw kätyng aety saite bung nung vi. Äni üng älö-a lä areng üng sui lökhu aekhu kha äkö-a lä tangkhi käcö haetä süng vi. ¹⁵Tupyng-a Känipre angtawtha kälang lawngtä lä Ingkäcai mang üng tho kha khö angnüng qawng-a aety saite lawngtä tea ätüng käleng hai thui pa te lä, “Älawng qawng-a cawbi cawthai na lä müng vi dy. Caw ae hethang kätü lä tyng vi dy. Nang üng tangkhi tea la kha ae lawi ba” näkha näpa. ¹⁶Tupyng-a khö angnüng qawng-a aety saite lä äma üng tangkhi älawng qawng-a hawi kha älawng üng caw na tea ae pa vi dy.

¹⁷Tupyng-a Känipre angtawtha kälang lawngtä lä Känipre Ingkäcai mang üng tho kha äni la äma üng cörü saite tangkhi haetä awng te kai lä nung vi dy.

¹⁸Honi pyng-a mai tea pyng saite Känipre angtawtha kälengky kälang lawngtä lä maicang mang üng tho vi dy. Äni lä tangkhi käcörü süng saite Känipre angtawtha tea, “Nang üng tangkhi la kha älawng qawng üng Cäpje thai kangmüng äxawng na tea ae lawi. Cäpje thai na lä müng te vi dy” näkha ätüng käleng hai thui pa vi dy. ¹⁹Tukätephüng-a Känipre angtawtha lä äma üng tangkhi hawi kha älawng qawng üng Cäpje thai kangmüng na ae pa vi dy. Tupyng-a Cäpje thai na lä Cäpje thai tui aeti nae angrawng thung-a käde pa vi dy. Hini Cäpje thai tui ke nae näte lä Säthaw üng kädawtho phi saite tea thui te vi. ²⁰Cäpje thai na tea märü üng ärang mang-a ke kha Cäpje thai tui aeti nae thung üng äthai tui jüng-a äthi na tho vi dy. Honi äthi lä Säthaw üng dengpy saite tea thui te vi. Honi äthi lä meng cungvai netä lawng kha äkäthu lä pe bangawtä tingtang awng pa vi dy.

Kangkhüng üng mätang bälai saite na

¹Tupyng-a kai lä käni khösang-a cangxei saite kamarae käleng kälang haetä tea nung be vi dy. Känipre angtawtha lawng säritä tea lä mätang bälai hai saite säritä na awng ö vi. Honi na lä kangkhüng kangteng üng mätang bälai hai saite na vi. Ätephüng-a mei nädylä honi na lä Säthaw üng kädawtho te tea kangkhüng üng dang hai saite vi dy.

²Tupyng-a mai hai aeqo saite khawitälae üng tuikang kätyng awng te kai lä nung te vi. Mawikäsi hai äni üng mimi hai ämüng nangbae tea bäja saite na la kai lä nung vi dy. Äni ce la Säthaw ma py saite tingtyng na tea süng kha khawitälae kätyng awng saite tuilipui teng-a aedaw ö te la kai lä nung vi dy. ³Äni ce lä, Säthaw üng mawsawng Mosi üng ae-awi hai Beram caw üng ae-awi tea thui ö te vi. Äni ce ma,

“Äte angxynlyng na sa haw saite Areng Säthaw ä,

nang sa saite na lä tengxyng y leng kha cangxei hethang hawi bärai vi.

Pre angxynlyng na khimi ce üng Sanphrang ä, nang üng älang na lä mitang khaw kha cüng bärai vi näkha khimi qütä ma nung haw te vi.

⁴Areng ä, nang üng ämüng bälaw kha tämö khai y saite lä ämi awng ai mei.

Nang lawngtä xyng ni cai te kae vi.

Pre angxynlyng na üng khimi na lä nang tea ly kha cäphaw ö ai.

Ätephüng-a mei nädylä nang sa saite lä cüng vi näte khimi qütä mäny ö vi” näkha thui ö vi dy.

⁵Honi pyng-a Känipre-a Säthaw üng Ingkäcai lä aepä-awng kha Taipung awng te tea kai lä nung vi dy. ⁶Mätang bälai te säritä awng saite Känipre angtawtha lawng säritä lä Ingkäcai thung üng tho ö vi dy. Äni ce lä caiping-a ang bärai saite kä-o kanglung na aelawng kha äma ce üng tatärang-a lä sui khabai na hai aemäkhing ö vi dy. ⁷Tupyng-a hing saite me bälitä thung üng metä ma dungtäsa hing jawjaw saite Säthaw üng kädaw kawipy saite sui kaephi säritä Känipre angtawtha lawng säritä tea py pa vi dy. ⁸Säthaw üng Ingkäcai lä äma üng haidae hai phung-ang üng maikhü hai kawi vi dy. Känipre angtawtha säritä ma nähai saite mätang bälai te säritä byng y te kälang-a lä ämi lawngtä la Ingkäcai thung-a kung haw y lyng.

Säthaw üng kädaw kawi saite kaephi na

¹Tupyng-a Känipre angtawtha lawng säritä tea Ingkäcai mang üng aepe saite lo ätüng käleng kai lä thai vi dy. Honi ätüng lä, “Ly kha Säthaw üng kädaw kawi saite kaephi säritä älawng qawng-a kädi paö lawi” näkha Känipre angtawtha säritä tea thui pa te vi.

²Angcü üng Känipre angtawtha ma ly kha äma üng kaephi tea älawng qawng-a kädi pavi dy. Tukha mawikäsi üng äsäny awng kha äni üng mimi tea cäphaw saite khimi na tea lä tengxyng y si kha nawphi saite angvawi na tho mang pa ö vi dy.

³Äbaeni üng Känipre angtawtha lä äma üng kädaw kawi saite kaephi üng tui tea pangle qawng-a kädi pavi dy. Tukha pangle tui lä khimi kädü lawngtä üng äthi kätyng aelawng kha pangle thung üng hing saite angxynlyng na lä dü ö vi dy.

⁴Ämäthung üng Känipre angtawtha lä äma üng kaephi tea tävaw käleng na hai vawcawng üng tui na qawng-a kädi pavi. Tukha tui na lä äthi-a aelawng ö vi dy. ⁵Tui tea rui saite angtawtha mätawngky lawngtä ma, “Areng ä, nang lä vaihi la awng, jangni la awng saite Käcai vi. Nang üng tärae cei saite lä tüng bärai vi.

⁶“Äni ce lä nang üng khimi käcai na hai buisaw na üng äthi tea bälawng ö vi dy. Tukätephüng-a nang lä äni ce tea äthi nei hai pa vi dy. Äni ce lä hini na hai aeteng khaw te vi” näkha näte kai lä thai vi.

⁷Tupyng-a maicang mang üng ätüng lä, “Äte angxynlyng na sa haw saite Areng Säthaw ä, nang üng tärae cei saite na lä tüng la tüng kha hawi la hawi vi” näkha thui te tüng kai lä thai vi dy.

⁸Tupyng-a äbäli üng Känipre angtawtha lä äma üng kaephi käni qawng-a kädi pavi dy. Tukha käni lä äma üng äkäbi hai-a khimi ce tea kang hai hethang aenae dang vi dy. ⁹Khimi ce tea lä tengxyng y äkäbi hai-a kang kha äni ce lä hini mätang bälai saite na tea pyng saite Säthaw üng ämüng tea täking ö vi dy. Tungaila äni ce lä äma ce üng hunghö ae-ui ö y. Säthaw üng leng saite tea la bälaw ö te y vi.

¹⁰Äbangaw üng Känipre angtawtha lä äma üng kaephi hai mawikäsi üng aety nae qawng-a kädi pa vi dy. Tukha mawikäsi üng pyng saite pre lä ving vi dy. Honi pre üng khimi na lä nawphi pa te phüng-a äma ce üng äfaw na aemäkütang ö vi dy. ¹¹Äni ce lä äma ce üng angvawi hai naw saite na phüng-a, Känipre üng Säthaw tea täking ö vi dy. Tungaila äni ce lä äma ce üng hunghö tea ae-ui ö te y vi.

¹²Tupyng-a ätärutä üng Känipre angtawtha lä äma üng kaephi hai Euphrate tävaw käleng-a kädi pa vi dy. Tukha honi tävaw tui lä kang kha käni käse mang üng ly saite sanphrang na tähang lolang haetä sa pa vi dy. ¹³Tupyng-a kai lä uiphaw na hai aetawng saite angra me thungtä bung nung vi. Honi na lä Näka käleng täbawng, mawikäsi täbawng hai buisaw kaeling täbawng na thung üng tho ö te vi dy. ¹⁴Äni ce lä kamarae na sa saite angra na vi. Äni ce lä älawngpre üng sanphrang angxynlyng na tea käcüng hethang tho ö vi dy. Äni ce lä äte angxynlyng na sa haw saite Säthaw üng käni pui-a täre aety ö ai.

¹⁵Areng ma, “Tängai ö, kai lä theru kätyng ly ai. I aelaw kha äma üng kä-o aelawng rüng saite khimi lä tähang hawi. Ätephüng-a mei nädylä äni lä khimi ce üng maw-a khawngjawng-a aeke te y käla saerae te dang hai y vi ai” näpa.

¹⁶Tupyng-a äni ce lä sanphrang na bung Hebärai lo hai Amakedon näsaite mityng-a mangtä käcüng hai ö vi dy.

¹⁷Äsäritä üng Känipre angtawtha lä äma üng kaephi hai aeli thung-a kädi pa vi dy. Ingkäcai aety nae üng tho saite ätüng käleng lä, “Honi kälu lä sa khüng vi dy” näkha nä vi. ¹⁸Tudylä anglaw säde saite, khö bärü saite, bärei mäkhawi saite ätüng na tho kha pangtälü tengxyng y naw pa vi dy. Älawng qawng-a khimi ce bung sa angcü te üng hai honi kätyng pangtälü naw saite lä awng vai te y vi. Hini lä siky saite pangtälü vi dy. ¹⁹Babilon märü käleng lä phü thungtä-a aelawng kha pre angxynlyng na üng märü na la aene ö king vi dy. Säthaw lä Babilon märü käleng tea aedawng haile kha mai aekhaw saite ra bynglyng thung-a mäkawi ea nei hai pa vi dy. Hini lä honi märü tea Säthaw üng tengxyng y kädawtho saite tea mätü pa te vi dy. ²⁰Angrai sälawng angxynlyng na lä la king kha me anghung angmang angxynlyng na la awng ö y vi dy. ²¹Caw ni nibu cungvaitä tingtang li saite ri aeke käleng na lä käni khösang mang üng hai khimi ce qawng-a aerui ö pa vi dy. Äni ce lä ri aeke käleng na phüng-a, Säthaw tea täking ö vi dy. Ätephüng-a mei nädylä äni ce lä tengxyng y mätang bälai ö phi pa te phüng-a vi dy.

Nawngmädi kangdei hai aetawng saite Babilon märü

¹Tupyng-a kaephi säritä na awng saite Känipre angtawtha lawng säritä thung üng lawngtä lä kai tea ly kha, “Ly lawi, aethang saite nawngmädi kangdei tea Säthaw üng dengpy saite kai ma mätü ai. Honi nawngmädi kangdei lä awng mang saite tävaw käleng na teng-a sa saite märü käleng tea näte vi. ²Älawngpre üng sanphrang na lä honi nawngmädi kangdei hai mangtä täkübäjang sa ö vi dy. Älawngpre üng khimi na lä honi nawngmädi kangdei hai täkübäjang sa saite na lä mai aekhaw saite ra nei te kätyng awng kha bärui ö vi dy” nä vi dy.

³Tupyng-a Säthaw üng Muilaw lä kai tea pyng kha Känipre angtawtha ma kai bung lä daithung kärang mang-a nähaija vi dy. Mawikäsi kangthing metä qawng-a aedang saite nawngmädi lawngtä bung kai lä nung vi. Honi mawikäsi üng ätabung angxynlyng na qawng-a lä Säthaw tea käsi prawng saite ämüng na tärü bu pa te vi. Äni lä älö säritä hai täkhi hawtä awng vi dy. ⁴Honi nawngmädi lä kä-o kangthing hai metathai ämawi awng saite kä-o aelawng vi. Sui na, ävang käting mia kälung na, ävang ting saite khawisäling kälung na hai anglaw aesa vi dy. Honi nawngmädi üng äkö-a lä sui kaephi süng vi. Honi kaephi lä täkübäjang sa saite na hai känyng hethang hawi saite na kawipy te vi. ⁵Nawngmädi üng löpeng-a lä älawngsai ho saite ämüng tärü vi dy. Honi ämüng lä “Nawngmädi Kangdei angxynlyng na üng Änä-awi, Babilon märü Käleng pui vi. Honi lä täkübäjang sa saite angxynlyng na üng Äkung vi” näkha awng vi. ⁶Honi nawngmädi lä Säthaw üng khimi na äthi hai Isu tea yng cakhi te phüng-a dü saite na üng äthi nei kha bärui te tea kai lä nung te vi. Tukha kai lä tengxyng y cangxei vi dy.

⁷Känipre angtawtha ma kai tea, “Nang lä ätephüng-a cangxei te mei. Honi nawngmädi üng ho saite älawngsai hai äma aedang saite älö säritä hai täki hawtä awng saite mawikäsi üng ho saite älawngsai na nang tea kai thui ai. ⁸Honi mawikäsi lä jangni-a hing vai ngaila, vaihi lä hing y vi dy. Äni lä qae y tea ma angqaw khaw käthu üng tho kha Säthaw ma äni tea lä täphra ai. Säthaw lä älawng sa y te kälang-a ma hing saite na üng cae-u thung-a ämüng qa y saite älawng qawng üng khimi na lä honi mawikäsi bung nung te kätü-a, cangxei ö vi ai. Äni lä jangni-a hing ngaila, vaihi lä hing y vi dy. Tungaila äni lä tho haile tyng ai.

⁹“Hini na tea mänykaw hethang lä bälunghae saite ngai vi. Älö säritä na lä honi nawngmädi aety saite me anghung säritä hai sanphrang lawng säritä tea näte vi. ¹⁰Honi sanphrang lawng bangawtä na lä dü ö vi dy. Sanphrang lawngtä lä vaihi awng te vi rawng. Tungaila lawngtä lä vaihi tho te y vi rawng. Äni ly te kätü-a lä, äni ma tänaetä xyng pre pyng ai. ¹¹Jangni-a hing kha vaihi dü saite mawikäsi lä sanphrang säritä na thung-a qa te vi. Äni lä sanphrang ätäjaetä lawng ngaila dü hethang kae te vi.

¹²“Nang nung saite täki hawtä lä pre pyng hethang dang y rawng saite sanphrang lawng hawtä na vi. Tungaila äni ce lä tänaetä säla-a mawikäsi hai mangtä sanphrang na kätyng pyng hethang aenae dang ö ai. ¹³Äni ce lä mawlang kaedawng mangtä vi. Äni ce lä äma ce üng haidae hai aenae na mawikäsi tea py ö ai. ¹⁴Äni ce lä Beram caw tea täre aety ö ai. Tungaila Beram caw ma lä äni ce tea bäja vi ai. Ätephüng-a mei nädylä äni lä areng na üng Areng hai sanphrang na üng Sanphrang lawng te phüng-a vi. Äni üng ka saite, re saite, yng khü saite äkähui na lä äni hai mangtä awng ö ai” näkha näpa.

¹⁵Känipre angtawtha ma la kai tea, “Nawngmädi kangdei aety saite tui na lä pre qütä üng khimi na, ceng qütä na hai älo cawngkhang aepe saite qütä na vi. ¹⁶Nang nung saite mawikäsi hai täki hawtä na lä nawngmädi kangdei tea esäre ö ai. Äni ce ma nawngmädi kangdei te üng awng saite angxynlyng na la king kha büng qaitä khai pa ö ai; Äni ce ma honi nawngmädi ngang ca kha mai hai sawi ö vi ai. ¹⁷Säthaw lä äma üng mawlang kaedawng kätyng sa hai hethang äni ma äni ce üng bälung thung-a mäkung pa vi dy. Tukätephüng-a äni ce lä bälung mangtä aedü kha Sanphrang kätyng pyng hai hethang haidae lä mawikäsi tea aenae py ö vi dy. Säthaw üng mawlang kaedawng angxynlyng na cungrü hai te khytä äni ce lä hini kätyng sa ö vi ai.

¹⁸“Nang ma nung saite nawngmädi lä älawngpre üng sanphrang angxynlyng na tea pyng saite märü käleng pui üng älawngsai vi” näpa.

Babilon märü käleng aene saite

¹Honi pyng-a Känipre angtawtha kälang lä Känipre mang üng cäqa te kai lä nung vi dy. Äni lä tengxyng y aenae awng vi. Äni üng phung-ang lä älawngpre angxynlyng na tea aevang hai vi dy. ²Äni lä ätüng käleng hai, “Babilon märü käleng lä aene vi dy. Babilon märü Käleng lä aene vi dy. Honi märü-a angra na, khönan na hai känyng he hawi saite angxynlyng na awng vi. Kädü kärawng ngang na ca saite tävaw na üng mityng vi dy. ³Nawngmädi kangdei ma mätyng saite mai aekhaw te ra tea lä älawngpre angxynlyng na üng khimi na lä nei ö vi dy. Tukha äni ce lä äni hai täkübäjang sa ö vi dy. Älawngpre üng sanphrang na la honi nawngmädi kangdei hai täkübäjang sa ö by vi dy. Älawngpre üng kaepai sa saite khimi na lä nawngmädi üng ngaiphi te tawngnang saite vyngsai kanglai na phüng-a, äni ce lä tawngnang ö rae vi dy” näpa.18:3 Täkübäjang sa saite na lä mimi na tea cäphaw näte älawngsai awng te vi.

⁴Tupyng-a kai lä ätüng kälang haetä Känipre mang üng thai te lä,

“Kai üng khimi na ä, Babilon märü käleng üng tho ö lawi.

Honi märü üng khimi na hai mangtä hunghö sa saite thung-a qa ö hang.

Tudylä Säthaw ma äni ce tea dengpy te kätü-a, nang ce lä honi thung-a qa ö y ai.

⁵Ätephüng-a mei nädylä honi märü käleng üng khimi na sa saite hunghö na lä Känipre aesang te kätyng aepung cu ö vi dy.

Säthaw lä äni ce üng käsi sa saite na tea aedawng haile bawi te vi.

⁶Honi märü üng khimi na lä khimi kälang na tea sa tämang te kätyng nang ce lä äni ce tea sa haile tyng ö jo.

Tätang khaw, nang ce lä äni tea sa tämang saite na äphü känetä hai hung ö hethang kae.

Babilon märü lä khimi kälang na tea mai aekhaw saite ra hai,

nei hai te kätyng äni tea lä äphü känetä mai aekhaw rae saite ra mätyng ö tyng hethang kae.

⁷Nawngmädi kangdei lä bälungleng kha äma üng ngaiphi te tawngnang saite vyngsai kanglai na äma tähang la king vi.

Hini kätyng-a mätang bälai saite hai bälungsi saite lä äni tea tyng sy. Ätephüng-a mei nädylä äni lä äma tea,

‘Kai lä sanphrang nä-awi-a aety te vi.

Kai lä lömai nä-awi y.

Kai lä manila bälungsi y lyng’ näkha thui vi.

⁸Hini phüng-a, känitä-a ma äni lä mätang bälai saite na, dü saite,

bälungsi saite, tähung täkang tho saite na aeting vi ai.

Säthaw ma äni tea lä mai hai sawi ai. Ätephüng-a mei nädylä äni tea tärae cei saite,

Areng Säthaw lä aethaw awngky te phüng-a vi” näkha näpa.

⁹Nawngmädi kangdei hai täkübäjang sa saite älawngpre üng sanphrang na lä honi nawngmädi bung kang saite maikhü nung te kätü-a, äni ce lä raw ö sung ai. ¹⁰Äni ce lä äni üng mätang bälai saite tea ri te phüng-a, kähanglaw mang aedaw ö vi. Äni ce ma, “Haidae awng saite Babilon märü käleng ä, Tähang si dy. Tähang si dy. Nang lä tänaeritä säla-a ma Säthaw ma dengpy te vi dy” näkha näpa.

¹¹Älawngpre üng kaepai sa saite khimi na lä äma ce üng vyngsai na rang saite khimi na lawngtä la awng pa y te phüng-a, raw kha bälungsi ö by vi. ¹²Honi na üng vyngsai na lä sui, tangkae, ävang ting saite kälung na hai khawisäling kälung ävang käting na vi. Aedü neng saite kä-o ngang na, metathai kätyng ämawi na, py ngang na hai kä-o kangthing ngang na la awng vi. Ämui kähawi thingkawng cawngkhang na, käsaifaw hai sa saite angxynlyng na, ävang ting saite thingkawng na, süng kangseng, süng, kälung kanglung hai sa saite vyngsai cawngkhang na awng vi. ¹³Mawsälae kung keilei, ang thung-a thu saite ämui cawngkhang na, rimuidi kähawi na, mura näsaite rimuidi hai frankincense näsaite neng cäqi na vi. Cäpje tui, olive situi, kjung caw täkawdi, kjung caw ni na vi. Raebawi, beram na, cäphö na, cäphö kaeri na, mawsawng na, khimi ce üng hing hai saite na vi dy. Hini angxynlyng na hai-a khimi ce lä kaepai sa ö te vi. ¹⁴Kaepai sa saite na ma, “Nang ngai saite honi kähawi angxynlyng na lä la king vi dy. Nang üng ngaiphi saite tawngnang te hai ngaiphi saite vyngsai kanglai na lä la king vi dy. Honi na tea nang lä manila nung haile tyng y dy lyng” näkha thui ö vi. ¹⁵Honi märü hai-a kaepai sa kha tawngnang saite khimi na lä kähanglaw mang aedaw ö ai. Ätephüng-a mei nädylä äni ce lä nawngmädi üng naw mätang bälai saite tea ri ö te phüng-a vi. Tukha äni ce lä bälungsi kha raw ö ai. ¹⁶Äni ce ma, “Tähang si dy. Märü käleng lä tengxyng y tähang si na ly. Äni lä aedü neng saite kä-o na, metathai kätyng ämawi na, py kä-o ngang na, kä-o kangthing ngang na, aelawng vi. Sui na, mia kälung kangthing ävang käting, khawisäling kälung na hai äma tea anglaw aesa vi dy. ¹⁷Hini tawngnang saite angxynlyng na lä tänaeritä-a ma la king vi dy” näkha raw ö vi ai.

Tui sangphaw üng mätawngky angxynlyng na hai khölawng ly saite na, sangphaw-a kälu sa saite na, hai hing hai hethang pangle thung-a kälu sa saite na lä kähanglaw mang aedaw ö vi dy. ¹⁸Honi märü käleng tea kang saite maikhü tea äni ce ma nung kha hang te lä, “Hini märü käleng kätyng äte märü kälang la awng vai y dy lyng” näkha nä ö vi dy. ¹⁹Äni ce lä äma ce älö-a älawng ngangdi aehi ea, “Honi märü käleng lä tähang si bärai dy. Tähang si bärai vi dy. Äni lä pangle üng tui sangphaw angxynlyng na üng mätawngky na tea areng tawngnang hai saite märü vi. Äni üng awng saite angxynlyng na lä tänaeritä säla-a ma la king vi dy” näkha ätüng käleng hai raw kha hang ö vi.

²⁰Tungaila Känipre üng ätüng lä, “Känipre-a awng saite na ä, Babilon märü tea Säthaw ma täphra te phüng-a, nang ce lä anghawtho ö. Säthaw üng khimi na, Säthaw üng Angthang thui saite na hai buisaw na lä anghawtho ö hethang kae. Ätephüng-a mei nädylä nang ce tea sa tämang saite na phüng-a, Babilon märü tea Säthaw lä dengpy vi dy” näpa.

²¹Tupyng-a aethaw awngky saite Känipre angtawtha lawngtä lä caw ke nae kälung käleng kätyng awng saite kälung käleng tea aekhü ea pangle thung-a kädeja pyng-a, “Babilon märü käleng tea la aethaw paitae hai hini kätyng kädephae by ai. Manila nang ce la äni tea lä nung haile tyng ö y vi ai. ²²Khimi ce üng ätüng na, tingtyng kätho te tüng na, ae-awi tüng na, phüsävü üng saite hai baw üng saite na, nang ce lä honi märü üng manila thai haile tyng ö y vi ai. Ävang käting sakaw saite khimi na lä ämi la honi märü-a awng haile tyng y vi ai. Caw ke saite üng ätüng na la thai haile tyng ö y vi ai. ²³Nang ce lä manila maibung üng kaevang nung haile tyng ö y vi ai. Särai anglaw na aepawng saite ätüng na la thai ö y vi ai dy. Honi märü hai kaepai sa saite na lä älawngpre angxynlyng na thung-a aenae awngky ö vi dy. Honi märü lä älawngpre angxynlyng na üng khimi na tea angra üng haidae hai the vi dy” näkha nä vi.

²⁴Säthaw lä Babilon märü tea dengpy vi dy. Ätephüng-a mei nädylä äni lä buisaw na hai Säthaw tea yng saite khimi kälang angxynlyng na bung bädü pa ö te phüng-a vi. Älawngpre angxynlyng na üng khimi na bung bädü saite lä Babilon märü üng hunghö sa te na vi dy.

¹Honi pyng-a Känipre mipui käleng üng ätüng kätyng kai lä thai vi. Äni ce ma, “Säthaw tea bälaw ö. Mä-ai üng Säthaw lä mä-ai bung aeqang te vi. Äni lä phung-ang hai haidae na awng vi. ²Äni üng tärae cei saite na lä cüng la cüng kha tüng la tüngkhaw vi. Äma üng täkübäjang sa saite hai älawngpre qütä üng khimi na tea täphra saite nawngmädi kangdei tea Säthaw lä dengpy vi dy. Nawngmädi kangdei lä äni üng mawsawng na bung bädü te phüng-a, Säthaw lä äni tea dengpy vi dy” näkha thui ö vi. ³Äni ce lä, “Säthaw tea bälaw ö. Honi märü käleng üng maikang saite maikhü na lä dungtäsa paw tähang jawjaw vi” näkha ätüng käleng hai thui tyng ö be vi dy. ⁴Mätawngky lawng kuisy bälitä hai hing saite me bälitä na lä areng aety nae qawng-a aety saite Säthaw tea aebo kha cäphaw ö vi. Äni ce lä, “Amen, Säthaw tea bälaw ö” näkha thui ö vi dy.

Beram caw üng aepawng saite pawi

⁵Tupyng-a areng aety nae mang üng tho te ätüng lä, “Mä-ai üng Säthaw tea bälaw ö. Äni üng mawsawng angxynlyng na, äni tea ri saite na, aely leng saite hai aely leng y saite nang ce angxynlyng na ä, mä-ai üng Säthaw tea bälaw ö” näkha nä vi. ⁶Tupyng-a mipui käleng üng ätüng kätyng, käleng üng tui aetäkhüng saite ätüng kätyng hai, bärei mäkhawi saite ätüng käleng na kätyng kai lä thai vi dy. Honi na lä, “Säthaw tea bälaw ö lawi. Äte angxynlyng na sa haw saite mä-ai üng Areng Säthaw lä Sanphrang te phüng-a vi. ⁷Mä-ai lä kawng te hai anghawtho ö si. Säthaw üng phung-ang tea mä-ai lä bälaw ö si. Ätephüng-a mei nädylä Beram caw üng aepawng saite pawi lä tyng vi dy. Äni hai aepawng hethang anglaw lä äma ma tea anglaw aesa rüng vi dy. ⁸Äni lä caiping-a ang saite kä-o kanglung ngang aelawng hethang dang vi dy” näpa. Honi kä-o kanglung ngang lä Säthaw üng khimi na üng kähawi sa saite na tea thui te vi.

⁹Tupyng-a Känipre angtawtha ma kai tea, “Beram caw üng aepawng saite pawi-a ly hethang hyng rüng saite khimi na lä tähang hawi, näkha tärü ba” nä vi. Känipre angtawtha ma, “Hini na lä Säthaw üng lo mitang na vi” näkha thui be vi dy.

¹⁰Kai lä äni tea cäphaw hethang äni üng maw-a aebo vi dy. Tungaila äni ma, “Tukä lä sa hang. Kai lä nang ce hai yng saite kälang na kätyng mawsawng lawngtä by vi. Äni ce lä Isu üng täphawng saite lo mitang tea hui saite na kae vi. Säthaw tea phai cäphaw kae.

“Isu Khrista üng täphawng saite lo mitang lä buisaw na tea thui hai pa te vi” näkha thui vi dy.

Cäphö kanglung qawng-a aedang saite Kung

¹¹Tupyng-a Känipre aepä-awng te tea kai lä nung kha ho-a lä Cäphö Kanglung metä awng vi. Honi qawng-a aedang saite üng ämüng lä Yng cakhi saite hai lo mitang vi. Äni üng tärae cei te hai täre tea aety saite na lä tüngkhaw vi. ¹²Äni üng ämi na lä mai kätyng aengaw vi. Äni üng älö-a lä areng lökhu na aekhu vi. Äni üng qawng-a lä ämüng haetä tärü vi dy. Tungaila honi ämüng tea lä äma qaitä ni mäny kae vi. ¹³Äni üng aelawng saite kä-o käsa lä äthi aebi mang te vi. Äni üng ämüng lä, “Säthaw üng Älo vi” näpa. ¹⁴Käni mang üng cäphö kanglung qawng-a aedang saite reisae rangpui na lä äni leithung hui ö vi dy. Äni ce lä caiping saite kä-o kanglung na aelawng ö vi. ¹⁵Pre qütä üng khimi na tea bäja hethang äni üng täbawng mang aekei sawngseng käcörü haetä tho vi dy. Areng lä äni ce tea süng pawngpai hai pyng ai. Äni lä Cäpje tui aeti nae khaw-a Cäpje thai na tea aethaw hai aeti vi ai. Hini lä äte angxynlyng na sa haw saite Säthaw üng kädawtho phi saite phüng tea thui te vi. ¹⁶Äni üng kä-o käsa hai äphai qawng-a tärü saite ämüng lä, “Sanphrang na üng Sanphrang, areng na üng Areng” näkha awng vi.

¹⁷Tupyng-a Känipre angtawtha lawngtä lä Käni qawng-a aedaw te tea kai lä nung te vi. Äni lä käni khösang qawng-a aeja saite tävaw angxynlyng na tea, “Ly kha Säthaw üng pawi käleng-a aekäcüng ö lawi. ¹⁸Ly kha sanphrang na, reisae mätawngky käleng na, reisae na, cäphö na hai cäphö qawng-a aedang saite na, khimi angxynlyng na, mawsawng na hai khimi kaelawi na hai khimi aely leng saite na hai leng y saite na üng ängang na ca hethang ly bawi lawi” näkha ätüng käleng hai hang ö vi dy.

¹⁹Tupyng-a mawikäsi hai älawngpre üng sanphrang na hai äni ce üng reisae na lä cäphö kanglung qawng-a aedang saite hai äni üng reisae na tea aety hethang aekäcüng ö te tea kai lä nung vi dy. ²⁰Areng lä mawikäsi hai äni üng jüng-a cangxei mätü saite buisaw kaeling bung lä ne vi dy. Buisaw kaeling lä mawikäsi üng äsäny awng saite hai mawikäsi üng mimi tea cäphaw saite khimi na tea cangxei te na hai-a kaeling kaemae sa pa vi dy. Areng lä änini lawng netä bung keng maikang saite maipui tuilipui thung-a kanghing-a ma käde hawi mei pa vi dy. ²¹Äni ce üng reisae na bung lä cäphö kanglung aedang saite Kung üng täbawng mang tho saite aekei sawngseng hai bädü pa ö vi dy. Tävaw angxynlyng na lä honi na üng ängang tea ca kha äjo kawi bawi ö vi dy.

Khösäning sangtä

¹Tupyng-a käni mang üng Känipre angtawtha lawngtä aerung te tea kai lä nung vi dy. Äni üng äkö thung-a lä Angqaw khaw käthu üng saw hai singqy rui leng bärai saite haetä süng vi. ²Äni lä Näka cangkhawng üng bärui bung ne kha säning sangtä tähang süng rui hai mäkhing ea khai pa vi dy. Honi lä Setan angra vi. ³Känipre angtawtha ma Setan angra bung lä Angqaw khaw käthu-a kädephae kha saw lawngko hai pi tang ea äsäny sa pa vi dy. Honi hai-a Setan lä pre qütä üng khimi na tea säning sangtä byng y rytä lä kaeling kaemae sa haw pa y vi dy. Honi pyng-a lä, äni bung tänaetä-a bälawi hethang kae.

⁴Tupyng-a kai lä areng aety nae na tea nung vi. Honi na qawng-a aety saite na tea lä tärae cei hethang Säthaw ma aenae py pa ö vi dy. Isu üng täphawng saite lo hai Säthaw üng lo mitang thui saite phüng-a äni ce ma bädü saite khimi na üng muilaw na bung la kai lä nung vi dy. Äni ce lä mawikäsi hai äni üng mimi tea cäphaw ö y vi. Äni ce üng äkö na y dylä, löpeng na qawng-a lä mawikäsi üng äsäny dang hethang äni ce lä ngai ö y phi te vi dy. Äni ce lä hing haile tyng kha Isu Khrista hai mangtä sanphrang na kätyng säning sangtä pre pyng ö vi dy. ⁵(Dü pyng saite angxynlyng na lä khösäning sangtä byng te khytä lä hing haile tyng ö y dy lyng.) Hini lä dü saite thung üng aetha angcü saite na vi. ⁶Hikä kädü üng aetha angcü saite thung-a qa saite na lä tengxyng y tähang hawi kha caiping ö vi dy. Äni ce lä äbaeni dü saite tea aeting y dy lyng. Äni ce lä Säthaw hai Khrista üng mäthykung na-a lawng kha Khrista hai mangtä säning sangtä pre pyng ö vi ai.

Setan tea bäja saite

⁷Tupyng-a säning sangtä byng te kätü-a lä, Säthaw ma Setan angra bung lä thawng thung üng bälawi hai vi ai. ⁸Setan angra lä älawngpre angxynlyng na qawng-a aehi sangxang saite üng khimi na tea kaeling kaemae sa hethang ly vi ai. Hini pre na üng Säthaw üng täre na tea lä Koka hai Makoka näkha khimi ce ma mäthi ö vi. Setan lä äni ce angxynlyng na tea täre aety hai hethang mangtä käcüng ö vi ai. Äni ce üng khimi rui na tea to dylä, pangle pyng üng täpung älawng ngangdi na kätyng vi. ⁹Äni ce lä älawngpre qütä-a ly kha Säthaw üng khimi na üng tai nae, Säthaw ma bälung aevaw saite märü tea säveng ö vi ai. Tungaila Känipre mang üng mai lä aeqa kha äni ce tea täphra king ö vi dy. ¹⁰Tupyng-a Säthaw lä äni ce tea kaeling kaemae sa saite Setan angra bung keng hai maikang saite tuilipui thung-a kädephae vi dy. Honi mityng-a lä mawikäsi hai äma üng buisaw käjüng aesa saite ni bung la kädephae pyng te by vi dy. Äni ce lä kärung käni dungtäsa naw mätang saite aeting jawjaw ö vi ai.

Kangkhüng üng tärae cei saite

¹¹Tupyng-a kai lä areng aety nae kanglung käleng hai honi qawng-a aety saite bung nung vi. Äni üng maw-a, älawng hai käni khösang lä la kha honi na tea ämi la nung haile tyng y vi dy. ¹²Tukha khimi kädü aely leng saite na hai leng y saite angxynlyng na lä areng aety nae maw-a aedaw ö te tea kai lä nung vi. Känipre angtawtha na lä cae-u na tea pä-awng pa ö vi dy. Honi pyng-a cae-u kälang haetä pä-awng te tea kai lä nung vi dy. Hini lä dungtäsa kähing dang te na üng ämüng tärü saite cae-u vi. Dü saite na lä honi cae-u na thung-a tärü te kätyng äni ce sa saite na tea Säthaw lä tärae cei pa vi dy. ¹³Tupyng-a pangle käleng pui thung-a dü saite na lä Säthaw üng tärae cei saite thung-a ly ö vi dy. Dü saite hai Angqaw khaw üng awng saite khimi kädü na lä tyng by vi dy. Äni ce angxynlyng na tea lä äma ce sa saite kätyng-a Säthaw ma tärae cei pa ö vi dy. ¹⁴Tupyng-a Säthaw lä dü saite hai Angqaw khaw bung lä mai tuilipui thung-a kädephae vi dy. Hini mai tuilipui lä äbaeni üng dü saite vi. ¹⁵Dungtäsa kähing dang saite ämüng tärü te cae-u thung-a qa y saite khimi na bung lä Areng ma mai tuilipui thung-a kädephae pa ö vi dy.

Känipre kangthae hai älawngpre kangthae

¹Tupyng-a Känipre kangthae hai älawngpre kangthae tea kai lä nung vi dy. Angcü üng Känipre hai älawngpre lä la ja kha pangle la awng y vi dy. ²Märü Käcai käleng, Jerusalem kangthae, tea Säthaw lä Känipre üng hai cäqa te kai lä nung vi dy. Äni lä särai hai aepawng he anglaw aesa rüng saite nawngmädi kätyng vi. ³Areng aety nae üng ätüng käleng thai te lä, “Vaihi Säthaw üng tai nae lä khimi ce hai mangtä vi. Äni lä khimi ce hai mangtä awng ai. Äni ce lä Äni üng khimi na-a aelawng ö ai. Säthaw äma ma la äni ce hai mangtä awng khe kha äni ce üng Säthaw-a lawng ai. ⁴Säthaw lä äni ce üng minaw tui angxynlyng na tea mai pang ai. Dü saite, bälungsi saite, rawpi saite hai, naw mätang saite la awng y dy lyng. Angcü üng awng saite na lä la king vi dy” näkha nä vi.

⁵Areng aety nae qawng-a aety saite ma, “Tängai ö. Vaihi kai ma äte angxynlyng na tea kangthae sa ai” nä vi. Tupyng-a äni ma kai tea, “Hini lä ae-y nae hawi saite älo mitang vi. Tärü kha khai ba” näkha nä vi. ⁶Tukha äni ma kai tea, “Kai lä kälu sa khüng dy. Kai lä Alpha hai Omeka vi. Angcü hai Kangteng la vi. Tui aehe saite khimi na tea lä, kähing py saite tui cäpring tea ävang mäkai y käla nei hethang Kai ma py ai. ⁷Kai lä bäja saite khimi na tea hini angxynlyng na py ai. Kai lä äni ce üng Säthaw-a aelawng kha äni ce la Kai üng cäpaw na-a aelawng ö ai. ⁸Tungaila bälung bähawrö saite na, yng y saite na, känyng hethang hawi saite na, khimi tea bädü saite na, täkübäjang sa saite na, angra üng haidae hai sa saite na, mimi tea cäphaw saite na hai kaeling kaemae sa saite angxynlyng na bung lä kai ma keng maipui tuilipui thung-a kädephae vi ai. Hini lä äbaeni üng dü saite vi” näpa.

Jerusalem märü kangthae

⁹Tupyng-a kangkhüng üng mätang bälai saite na kawipy te kaephi säritä tea süng saite Känipre angtawtha lawng säritä thung üng lawngtä ma kai tea ly kha, “Ly lawi, Beram caw üng nawngpui, aepawng hethang anglaw bung nang tea kai mätü ai” näkha thui vi. ¹⁰Tukha Säthaw üng Muilaw lä kai tea pyng kha, Känipre angtawtha lä kai bung me anghung käleng kaesangky haetä qawng-a nähai vi dy. Känipre Säthaw te üng Jerusalem märü käleng käcai lä aeqa käthu te kai tea äni lä mätü vi. ¹¹Honi märü lä Säthaw üng phung-ang hai aevang kha ävang käting jasper näsaite kälung kätyng caiping-a ang vi dy. ¹²Honi märü-a lä baesung kaesang käleng pui hai hawngkhae kätho hawlai netä awng vi. Honi hawngkhae kätho na-a lä Känipre angtawtha lawng hawlai netä na ma rui ö qi te vi. Isrelae amäjy hawlai netä na üng ämüng na lä hawngkhae kätho na qawng-a tärü pa vi dy. ¹³Käni käse-a hawngkhae kätho käthungtä, älüng-a hawngkhae kätho käthungtä, ätüng-a hawngkhae kätho käthungtä hai käni kädüng-a hawngkhae kätho käthungtä awng ö qi vi dy. ¹⁴Honi märü käleng pui üng baesung aenyng nae lä kälung hawlai netä hai sa te vi. Honi kälung na qawng-a Beram Caw üng angtawtha lawng hawlai netä üng ämüng na tea tärü pa ö vi dy. ¹⁵Kai tea älo aepe saite Känipre angtawtha lä honi märü käleng pui tea, hawngkhae kätho na tea hai, baesung tea mätae hethang sui pawngpai haetä awng vi dy. ¹⁶Honi märü lä täki bälitä awng kha angpai hai äjung sa saite lä aebäla khaw vi. Känipre angtawtha lä äma üng pawngpai hai märü käleng pui tea mätae vi dy. Honi üng angpai, äjung, äjaw na lä meng sangtä hai cungvai bangawtä awng ö qi vi. ¹⁷Honi pyng-a Känipre angtawtha lä märü käleng pui üng baesung tea la khimi üng mätae nae kätyng mätae ea äkaesang lä pe cungvai netä hai hawlai tärutä awng vi. ¹⁸Märü käleng pui üng baesung tea lä jasper näsaite kälung hai sa vi dy. Märü tea lä khawitälae kätyng caiping saite sui tätang hai sa vi dy. ¹⁹Märü käleng pui baesung aenyng nae üng kälung na lä ävang ting saite kälung cawngkhang na hai äcae kähawi-a sa vi dy. Angcü üng aenyng nae üng kälung lä khawitälae kätyng ang saite jasper näsaite kälung, äbaeni üng aenyng nae üng kälung lä käni khösang ämawi kälung, ämäthung üng aenyng nae üng äkae-e ämawi, äbälitä üng aenyng nae üng kälung lä kälung kang-ing vi. ²⁰Äbangawtä üng aenyng nae kälung lä kälung kangthing, ätärutä üng aenyng nae üng kälung lä kangthing dang, äsäritä üng aenyng nae üng kälung lä bäja ämawi awng saite kälung, ätäjae üng aenyng nae üng kälung lä kang-ing cuca ämawi, ätäkaw üng aenyng nae üng kälung lä bäseng xawngxang saite kälung, hawtä üng aenyng nae üng kälung lä äthai kang-ing kätyng kälung, hawlai haetä üng aenyng nae üng kälung lä kang-ing pawpae ämawi kälung hai hawlai netä üng aenyng nae üng kälung lä laikipa ämawi kälung vi. ²¹Hawngkhae kätho hawlai netä na tea lä khawisäling kälung hawlai netä na awng vi. Kätho qütä tea lä khawisäling kälung haetä hai sa qi ö te vi. Märü käleng pui üng lolang lä caiping te khawitälae kätyng ang saite sui käcai hai sa te vi.

²²Honi märü käleng pui thung-a Säthaw üng Ingkäcai tea kai lä nung y. Ätephüng-a mei nädylä äte angxynlyng na sa haw saite Areng Säthaw hai Beram caw lä honi märü üng Ingkäcai vi dy. ²³Säthaw üng phung-ang lä honi märü qawng-a aevang kha Beram Caw lä maibung kaesang lawng te phüng-a märü lä käni üng kaevang, law üng kaevang tea ngai y vi dy. ²⁴Khimi ceng angxynlyng na lä honi märü üng kaevang hai-a aeke ö ai. Älawngpre-a awng saite sanphrang na la äma ce üng areng tawngnang saite na honi märü-a nähai ö vi ai. ²⁵Märü käleng pui üng hawngkhae kätho na tea lä känini rui aepä-awng jawjaw kha manila aekhae y vi ai. Honi märü-a lä kärung awng y vi ai dy. ²⁶Älawngpre üng khimi qütä lä äma ce üng phung-ang hai tawngnang saite na tea honi märü käleng pui thung-a nähai ö vi ai. ²⁷Tungaila ätete cai y saite na, kaejae sa saite na, kaeling thui saite na lä honi thung-a kung hethang dang ö y vi ai. Beram Caw üng dungtäsa kähing dang saite na üng ämüng tärü saite cae-u thung-a qa saite xyng na ni honi märü käleng pui thung-a kung ö ai.

¹Tupyng-a Känipre angtawtha ma kai tea kähing py saite tävaw pui mätü vi dy. Honi tävaw lä Säthaw hai Beram caw Areng aety nae te üng lawng kha kälung kä-ang kätyng ang bärai vi. ²Honi tävaw lä märü pui üng lolang säla ung-a lawng vi. Tävaw pui üng bangrawi bangtang-a lä kähing py saite thingkawng kung awng qi vi. Honi kung lä law qütä-a qengtä, säningtä-a qeng hawlai netä äthai aethai vi. Äkung üng ärang na lä älawngpre-a awng saite khimi angxynlyng na üng känaw käsaw na tea hawi hai te vi. ³Säthaw üng täking saite lä honi märü-a äte haetä la awng y vi ai.

Säthaw hai Beram caw üng Areng aety nae lä honi märü-a awng kha äni üng mawsawng na lä äni tea cäphaw ö vi ai. ⁴Äni ce lä Areng üng mimai tea nung ö vi ai. Äni ce üng löpeng na qawng-a lä äni üng ämüng tärü ö vi ai. ⁵Ho-a lä kärung awng y vi ai. Äni ce lä käni, y dylä maibung kaevang aely ngai ö y vi ai. Areng Säthaw ma äni ce tea kaevang py ai te phüng-a vi. Äni ce lä sanphrang na kätyng dungtäsa pre pyng jawjaw ö vi ai.

Areng Isu üng ly saite

⁶Känipre angtawtha ma kai tea, “Hini na lä älo mitang hai ae-y khü nae hawi saite na vi. Buisaw na tea Muilaw Käcai py saite Areng Säthaw lä qae y tea ma tyng hethang awng saite na äma üng mawsawng na tea mätü hethang äma üng Känipre angtawtha bung mätaw vi dy” näkha nä vi.

⁷Areng Isu ma, “Tängai ö. Kai lä qae y tea ma ly ai. Hini cae-u thung-a awng saite buisaw lo na tea tängai te khimi lä tähang hawi” näkha nä vi.

⁸Hini angxynlyng na thai kha nung saite lä kai, Johan, vi. Honi na thai kha nung pyng te kätü-a, hini na mätü saite Känipre angtawtha üng khokung-a aebo kha kai lä äni tea cäphaw hethang sa vi dy. ⁹Tungaila äni ma kai tea, “Tukä lä sa hang. Kai lä nang hai nang üng kangby jä-ai buisaw na hai hini cae-u üng älo na tea tängai saite angxynlyng na üng kangby jä-ai mawsawng lawngtä by kae vi. Säthaw tea phai cäphaw kae” näkha nä vi. ¹⁰Honi pyng-a äni ma kai tea, “Hini cae-u üng buisaw lo na tea lä ho kha khai hang ba. Ätephüng-a mei nädylä hini angxynlyng na tyng hethang kätü lä, aenai vi dy. ¹¹Sa tämang saite khimi na lä sa jawjaw ö ai. Bälung cai y saite na lä cai y käla awng jawjaw ö ai. Kähawi sa saite khimi na lä kähawi sa jawjaw ö ai. Cai saite khimi na lä cai jawjaw ö ai” näkha thui vi.

¹²Areng Isu ma, “Tängai ba. Qae y tea ma Kai ly ai. Khimi qütä tea lä äma ce üng sa saite na kätyng ävang y dylä Kai ma dengpy ai. ¹³Kai lä Kangmangky hai Kangkhüngky, angcü hai kangtengky la vi” näkha nä vi.

¹⁴Mä-ai ma üng kä-o na tea caiping-a mäsu saite khimi na lä tähang hawi. Äni ce lä kähing py saite thingkawng kung üng äthai ca haw kha märü käleng thung-a hawngkhae kätho na mang kung haw ö ai. ¹⁵Tungaila märü üng ärang mang-a lä hini hunghö sa te hai-a ui kätyng mä-ai ma tea pawprae-a awng saite na vi. Äni ce lä angra haidae hai käsi sa saite na, täkübäjang sa saite na, khimi bädü saite na, mimi tea cäphaw saite na, kaeling thui saite na-a lawng ö vi.

¹⁶“Kai, Isu, lä kangkawng na thung-a awng saite nang ce tea hini na thui hai hethang Kai ma üng Känipre angtawtha bung mätaw vi dy. Kai lä sanphrang Davidae amäjy thung üng vi. Ang bärai saite Kädang Tengpaw la vi.”

¹⁷Muilaw Käcai hai aepawng saite nawngmädi anglaw ma, “Ly lawi” näkha thui vi.

Hini tea thai saite angxynlyng na ma la, “ly lawi” näkha thui ö vi. Tui aehe saite khimi lä ly lawi sy.

Kähing py saite tui tea ngai te khimi lä äjawng-a nei mai sy.

Kangkhüng üng älo

¹⁸Hini cae-u thung üng buisaw lo na thai saite khimi angxynlyng na tea kai, Johan, lä sädi py te vi ba. Hini älo na tea kanglai täbe saite tea lä hini cae-u thung üng mätang bälai saite na Säthaw ma äni tea tyng hai vi ai. ¹⁹Hini cae-u üng buisaw älo phütä tea kädephae saite khimi lä, Säthaw ma hini cae-u thung-a tärü te kähing py saite thingkawng kung üng äthai tea ca haw saite hai Caiping saite Märü Käleng Pui thung-a kung haw hethang py y vi ai.

²⁰Hini na tea thui saite Kung lä,

“Qae y tea ma kai ly tätang ai” nä vi. Hini kätyng sy. Areng Isu ä, ly lawi mai ba.

²¹Areng Isu üng tähang kähawi lä Säthaw üng khimi angxynlyng na tea awng sy.Amen.