MARKA
tärü saite Angthang Kähawi
Angcü üng älo
Marka lä Jerusalem märü-a awng saite Maeri üng cäpaw vi. Hini Maeri lä Isu üng nä-awi y. Angtawtha cae-u thung-a lä Marka tea Johan Marka näkha mäthi te vi. Pawlae hai Banabas ni angcü üng Angthang Kähawi thui te khölawng tho tea hini Johan Marka lä qa te by vi. Cangkhawng-a Khristen mätawngky na ma Marka tärü te cae-u lä Peterae thui saite lo hai mätu saite na tea bäjui te vi näkha aethang khai ö te vi. Marka lä hini cae-u thung-a tyng saite hai sa tätang saite phüng tea aely kälengky-a tärü te vi. Äni üng Angthang Kähawi lä Angthang Kähawi bälitä thung-a dawiky saite vi. Äni üng tärü saite lä Mathai ni Luka üng Angthang Kähawi thung-a qa te by vi. Tungaila phütä na lä Angthang Kähawi kälang thung-a qa te y. Hini cae-u-a Isu lä kätüng-a sa kha haidae awng saite khimi lawngtä kätyng mätü te vi. Isu lä khimi kätyng mäsae te, bälungsi te tea mätü te vi. Isu Khrista tea haidae awng te phüng lä äma üng mätu saite lo, angra na qawng-a aenae awngky kha khimi ce üng hunghö na bälawi saite hai-a nung haw te vi. Hini Angthang Kähawi lä khösäning A.D. 55-65 kätü tärü te vi näkha Caekäcai mänykaw saite na lä bälung aedü ö te vi. Marka lä Rom märü-a awng saite hai ceng kälang na tähang tärü pa te vi. Äni lä Caekäcai Kangrüng üng bäkung kädawng buisaw lo na tea awngmang-a tawng te awng y. Isu lä Säthaw üng Cäpaw lawng te vi näte Isu üng sa te hai mätü he Marka lä ngai te vi.
Äphüng äkädawiky
Isu Khrista üng Angthang Kähawi aetawng saite 1:1-13
Kalile khö-a Isu Khrista üng mipui thung-a kälu käsawng sa saite 1:14-9:50
Kalile khö üng hai Jerusalem märü-a ly saite 10:1-52
Jerusalem märü hai äteng äpa-a Isu Khrista üng kangkhüng kätü käni säritä tingtang-a 11:1-15:47
Isu Khrista kädü thung üng aetha haile saite 16:1-8
Aetha haile pyng-a Isu Khrista üng ämaw aetüng saite hai Känipre-a paw saite 16:9-20
1Säthaw ma Baptismae Särae Johan bung mätaw pa
Mat 3:1-12; Luk 3:1-18; Joh 1:19-28
1Hini lä Säthaw üng Cäpaw, Isu Khrista, phüng Angthang Kähawi tea aetawng angcü te vi dy. 2Buisaw Isaia ma cangkhawng-a Caekäcai thung-a tärü te lä,
“Tängai ö, nang üng maw-a kai üng angtawtha saite bung kai ma mätaw ai.
Äni lä nang üng ämaw-a lolang mäcai pa vi ai.
3Äni ma daithung kärang-a khimi ce tea a kha thui pa te lä
‘Areng ly nae lolang mäcai rüng lawi.
Äni tähang lolang mätaw pa lawi’” näpa.
4Tudylä Baptismae Johan lä daithung kärang-a tho pa dy. Äni ma khimi ce tea “Ae-ui kha baptismae la ö lawi. Tudylä Säthaw ma nang ce üng hunghö na bälawi vi ai” näkha khimi ce tea baptismae py pa vi. 5Jerusalem märü hai Judae khö vang na mang üng khimi awng mang saite na lä, Johan tea ly ö vi. Äni ce lä äma ce üng hunghö na khimi ce maw-a täphawng kha Jordan tävaw-a Johan ma baptismae py pa dy.
6Baptismae Johan lä cäphö känawngjang käsa mui hai aekhü saite kä-o rungrang aelawng kha angkeng-a mawiphö khabai aekheng vi. Äni üng käcakänei lä khakhö hai khawi tui vi. 7Baptismae Johan ma khimi ce tea “Kai qawng-a haidae lengky saite lawngtä lä qae y tea ma ly vi ai. Kai lä äni üng maw-a bü kha kho painai rui sö hethang mäteng ma aeteng y. 8Kai lä nang ce tea tui hai baptismae py dy. Tungaila äni lä nang ce tea Muilaw Käcai hai-a baptismae py vi ai” näpa.
Isu tea Johan ma baptismae py pa
Mat 3:13-4:11; Luk 3:21-22; 4:1-13
9Tupyng-a känitä-a Isu lä Kalile khö Nazare märü üng ly kha Jordan tävaw-a lä Baptismae Johan ma äni tea baptismae py pa. 10Isu lä tui üng tho praw te kätü-a käni lä aepä-awng kha äni qawng-a Muilaw Käcai lä bähö kätyng aeja käthu te nung vi dy. 11Tukha käni mang üng ätüng lä “Nang lä kai üng bälung aevawky saite Cäpaw vi. Nang lä kai tea kawng hai ky saite vi” näkha näpa.
Setan angra ma Isu tea hunghö sa hethang the pa
12Muilaw Käcai ma Isu bung daithung kärang-a nähai praw pa vi dy. 13Isu lä daithung kärang-a käni ruibälitä awng ea Setan angra ma Isu tea hunghö sa hethang the pa dy. Honi mityng-a lä daithung üng tawngbawi na la awng te by vi. Säthaw üng angtawtha na ma äni tea ly kha säbawng pa dy.
Isu ma angcü üng äkähui na bung ka pa
Mat 4:12-22; Luk 4:14-15; 5:1-11
14Baptismae Johan bung reisae na ma thawng thung-a khai pyng-a, Isu lä Kalile khö-a ly kha Säthaw üng Angthang Kähawi thui pa vi dy. 15Isu lä “Säthaw ma khai saite kätü lä tyng vi dy. Säthaw ma Sanphrang sa saite kätü lä aenai dy. Ae-ui kha Angthang Kähawi tea yng ö lawi” näkha näpa.
16Isu lä Kalile tuilipui teng-a aeke ea Simon hai äkangby Andru ni tea mawipry jae hawi te nung vi. Änini lä mawi ne saite na vi. 17Isu ma “Kai leithung hui hawi. Nang ni lä mawi ne hawi te jüng-a kai tea yng hethang khimi ce bung nähai saite-a bälawng vi ai” näkha näpa. 18Qengtäma änini lä äma ni üng mawipry na khaisö ea Isu leithung hui hawi praw dy.
19Cäditä kähanglaw-a Isu ly ea, äni lä Zebede üng cäpaw Jaeko hai äni üng kangby Johan bung nung vi. Änini lä äma ni üng bälawng qawng-a mawipry na sa rüng hawi te nung vi dy. 20Isu lä änini tea nung te hai ka praw pa vi. Änini la bälawng qawng üng äma ni üng pä-ai Zebede hai angae sae na bung khaisö ea Isu leithung hui praw dy.
Angra kung saite khimi lawngtä
21Äni ce lä Kapernawm märü-a ly ö dy. Tukha Aehae te Käni-a Isu lä Judae na üng ingkäcai-a kung praw kha Säthaw lo mätu te aetawng pa dy. 22Isu lä äni ce tea Ubädi särae na kätyng mätu te y käla Säthaw ma aenae py saite lawngtä kätyng mätu pa te vi. Tukha äni üng lo thai saite khimi na lä cangxei ö vi dy.
23Honi tänaetä kätü-a angra kung saite khimi lawngtä Judae na üng ingkäcai thung-a kung kha hang pa vi. 24Äni ma “Nazare märü üng Isu ä, nang lä kai ce tea ätemakä sa hethang ngai te mei. Täphra hethang ngai te mei. Nang lä Säthaw üng cai saite Cäpaw näte kai lä mäny vi” näkha thui pa dy.
25Isu ma äni tea “Sitäri-a awng. Hini khimi thung üng tho la” näkha särilo hai thui pa.
26Angra lä honi khimi tea käsawtho hai kha aethaw paitae hai ma hang rang ea äni thung üng thoja pa vi dy. 27Tukha khimi angxynlyng na lä cangxei ö dy. Äma ce tingtawi aedüng aethui ö te lä “Hini lä äte mei. Hini lä mätu saite lo kangthae vi be hi ly. Äni lä aenae hai mätu te vi. Äni üng särilo lä angra na mäteng ma tängai na ly” näkha aethui ö vi dy.
28Honi pyng-a khimi ce lä äma ce tingtawi aethui ö kha Isu üng angthang lä, Kalile khö mityng qütä-a aethangdü pa vi dy.
Isu ma khimi ce üng känaw käsaw na tea hawi sa pa
29Tudylä Isu hai äkähui na lä Judae na üng ingkäcai üng tho ö vi dy. Tukha Jaeko ni Johan hai mangtä Simon ni Andru ce ing-a kung ö vi dy. 30Simon üng pä-i lä kawngang naw kha i nae qawng-a aesawng sö ea awng pa te vi. Äni ce lä Simon pä-i üng angthang Isu tea thui praw pa ö dy. 31Tudylä Isu ma ly kha Simon pä-i tea äkö hai süng ea mätha pa. Tukha äni lä kawngang naw te hawi pa vi dy. Simon pä-i la äni ce tea käcakänei mäcaw pa dy.
32Honi kädüng käni leng ea lä khimi ce ma angra kung saite na hai känaw käsaw awng saite angxynlyng na bung Isu tea nähai pa ö cu dy. 33Märü qütä üng khimi ce lä Simon üng ing maw-a aekäcüng ö cu pa vi dy. 34Tukha Isu lä amäjy cawngkhang naw saite khimi märaw y na tea hawi sa pa kha angra märaw y na tea la mätho pa. Angra na lä äni tea mäny pa te phüng-a Isu lä äni ce tea älo haetä la aepe y hethang mäkhang pa vi.
Kalile khö-a älo thui pa
35Kädang mang khö aevang hethang sävae y te kätü-a Isu lä i aetha thawde kha khimi awng y saite mityng mang-a ly ea aetang dy. 36Simon hai äpy na lä hui kha Isu bung mäqang ö dy. 37Äni ce ma Isu hai aeting te kätü-a lä “Khimi angxynlyng na lä nang bung mäqang kha awng ö vi dy” näkha näpa.
38Tungaila Isu ma “Mä-ai lä äteng äpa üng vang na mang-a ly ö la si. Honi mityng na mang-a kai la Säthaw üng lo thui hethang kae te vi. Kai ly te lä hokä sa hethang tähang vi” näpa.
39Tukha Isu lä Kalile khö jungtä khölawng tho ea Judae na üng ingkäcai-a Säthaw lo thui prei kha angra na bung mätho pang pa vi dy.
Isu ma ängang käsi mang saite khimi bung hawi sa pa
40Ängang käsi mang saite khimi lawngtä lä Isu teng-a ly kha khokhö didü ea aebai pa dy. Äni ma “Nang ma aely ngai dylä kai tea hawi sa haw he kae” näpa.
41Isu lä bäheng kha äkö bäjang ea äni tea nang pa vi dy. Isu ma “Kai aely ngai cy. Hawi lawi sy” näkha mäthang pa dy. 42Tukha qengtäma äni üng ängang käsi lä la pang kha hawi pa vi dy. 43-44Tupyng-a Isu lä äni tea “Tängai ba. Ämi tea lä hini phüng thui hang ba. Tungaila ly kha nang ma bung mäthykung na tea mätü ba. Tukha Mosi üng Ubädi kätyng mäthykung tea löci sa ba. Hikä sa te lä nang vaihi naw saw hawi dy näte khimi qütä ma mäny vi ai” näkha älo täru khi kha mätaw praw pa vi dy.
45Tungaila ängang käsi awng vai saite khimi lä ly kha mityng qütä-a hini angthang thui pa vi. Tukätephüng-a Isu lä khimi ce üng maw mang märü thung-a kung haw pa y vi dy. Tukha Isu lä khimi awng y saite märü üng ärang mang-a awng kae dy. Tungaila mityng qütä üng khimi ce lä äni tea ly pa ö vi.
2Isu ma kökho dü saite khimi lawngtä bung hawi sa pa
1Käni ne, thungtä pyng-a Isu lä Kapernawm märü thung-a kung haile kha khimi ce lä Isu vawi haile te angthang thai ö vi dy. 2Isu awng te ing-a mityng aekawng y rung khytä khimi ce lä aekäcüng ö vi. Ing maw-a mäteng ma mityng awng pa y vi dy. Isu ma äni ce tea Säthaw lo thui pa. 3Khimi lawng bälitä na lä kökho kädü khimi lawngtä bung aejawng kha Isu tea ly hai hethang ngai ö dy. 4Khimi awng mang te phüng-a äni ce lä kökho kädü khimi bung Isu tea nähai haw pa ö y. Tukätephüng-a äni ce lä ingphö qawng-a paw ea älawng ngang hai lawi kha aebu saite ingphö tea khawng ea äkhaw sa ö dy. Tukha äkhaw mang i nae qawng-a aesawng saite kökho kädü khimi bung Isu üng ämaw-a bäla käthu pa ö dy. 5Isu lä kökho kädü hai äni bung nähai saite khimi na üng yng ö phi te tea nung dy. Tukha Isu ma kökho kädü khimi tea “Änang ä, nang üng hunghö bung kai ma bälawi vi dy” näpa.
6Ingthung-a Ubädi särae phütä na lä aety ö dy. 7Äni ce ma “Ätephüng-a hini khimi lä hakä thui vawng te vi mei. Äni lä Säthaw kätyng aesa te vi to. Säthaw lawngtä xyng ni hunghö bälawi haw te kae be” näkha äni ce lä aedawng ö dy.
8Äni ce üng bälung thung-a aedawng saite tea Isu lä mae praw kha äni ce tea “Ätephüng-a nang ce lä tukäti na dawng ö te vi mei. 9Kökho dü saite khimi tea ‘Nang üng hunghö bälawi dy’ näte jaky mei y käla ‘Aetha ea nang üng i nae la kha aeke lawi’ näte jaky mei. 10Tungaila Kai, Khimi üng Cäpaw, lä älawng qawng-a hunghö na bälawi hethang aenae awng näte kai ma mätü ai” näpa. Tukha Isu lä kökho kädü khimi te mang-a aehawi pa dy. 11Äni ma “Tängai ba. Aetha ea i nae süng kha ing-a vawi lawi cü” näpa.
12Tudylä äni lä aetha ea äma üng i nae süng kha khimi angxynlyng na maw mang ly ja pa vi dy. Tukha khimi angxynlyng na ma “A, hini kätyng cangxei saite mä-ai lä qengtä la nung vai te y vi ly” näkha Säthaw tea bälaw ö vi dy.
Angko cawng saite khimi lawngtä bung Isu ma ka pa
13Tupyng-a Isu lä Kalile tuilipui pyng-a ly haile be dy. Khimipui lä Isu tea ly kha äni ce tea Isu ma Säthaw üng lo mätu pa. 14Isu lä aeke te thüng-a Alphai üng cäpaw Levi bung nung dy. Levi lä Rom aecörae na tähang angko cawng saite khimi vi. Äni lä äma üng jung-a aety kha awng te vi. Isu ma äni tea “Kai leithung hui lawi” näkha näpa. Tukha Levi la aetha praw ea Isu leithung hui pa dy.
15Honi kädüng-a ma Isu lä äkähui na hai mangtä Levi üng ing-a kädüngbö ca dy. Angko cawng saite na hai khimi hunghö na lä äni ce hai mangtä bö ca ö te by vi. Ätephüng-a mei nädylä honi thung üng awng mang saite khimi na lä Isu leithung hui ö te vi. 16Tukha Pharisai lawng saite Ubädi särae phütä na ma angko cawng saite khimi na, khimi hunghö na hai Isu lä bö mangtä ca te nung ö ea äni ce ma Isu üng äkähui na tea “Makäte äni lä angko cawng saite na, khimi hunghö na hai mangtä bö ca te vi mei” näkha düng pa ö dy.
17Isu ma hokä thui te lo thai kha äni ce tea “Känaw käsaw awng y saite na lä, latang bung ngai y lyng. Tungaila naw saite khimi lä ngai vi. Kai lä khimi cüng saite na bung ka hethang ly te y. Khimi hunghö na bung ka hethang ly te kae” näkha mäthang pa.
Isu tea böjae saite phüng düng pa
18Baptismae Johan üng äkähui na hai Pharisai na lä böjae saite kätü khai ö te vi. Khimi phütä na ma Isu tea ly kha “Baptismae Johan üng äkähui na hai Pharisai na üng äkähui na lä böjae ö be. Nang üng äkähui na lä makäte phüng-a böjae ö y te vi mei” näkha düng pa vi.
19Isu ma “Aepawng saite särai üng rawijae na lä äma hai mangtä awng te kätü-a, böjae te awng bi y. Aepawng saite särai awng te thüng-a lä böjae te awng bi y. 20Tungaila aepawng saite särai lä äni üng rawijae na hai aeprei kha awng te kätü lä tyng ai rawng. Hini kätü-a lä äni ce la böjae ö vi ai.
21“Kä-o kangrüng ngang tea kangthae ngang hai bang kha hui te lä, awng vai y. Hokä hui dylä, kä-o kangthae ngang lä aeje kha kangrüng ngang lä aesä-ei rae vi ai baw. 22Khimi ce lä mawiphö bung kangrüng thung-a Cäpje tui kangthae mäkawi vai te y vi. Honi kätyng mäkawi dylä, Cäpje tui kangthae phüng-a mawiphö bung lä aesä-ei hai kha, Cäpje tui hai mawiphö bung la pra vi ai. Cäpje tui kangthae lä mawiphö bung kangthae-a ni mäkawi saite kae vi” näkha mäthang pa.
Aehae saite käni üng Areng
23Aehae te Känitä-a Isu lä äkähui na hai mangtä lai mang-a aeke prei ö dy. Äma üng äkähui na lä caw me khei kha ca hethang lai caw vui na sädy pa ö vi. 24Tukätephüng-a Pharisai na ma Isu tea “Kheng kae-e, nang üng äkähui na lä Aehae te Käni-a aesyng y saite kälu sa ö vi” näkha näpa.
25Isu ma “Sanphrang Davidae lä äma üng äpy phütä hai äjo aelang te kätü-a makä sa mei näte phüng nang ce lä Caekäcai-a qengtä la phai vai y vi nang mei. 26Mäthykung kälengky Abitha üng kätü-a, Davidae lä Säthaw üng Taipung thung-a kung kha Säthaw tea a saite täkaw la kha ca vi. Tukha äni lä äma üng äpy na tea phütä py pa te by vi. Honi täkaw lä Mosi üng Ubädi kätyng mäthykung na ma ca saite kae vi” näkha mäthang pa.
27Tupyng-a Isu ma äni ce tea “Säthaw ma khimi ce tähang Aehae te Käni sa te kae. Säthaw ma khimi ce bung lä Aehae saite Käni tähang sa te y vi. 28Tukätephüng-a Kai, Khimi üng Cäpaw, lä Aehae te Käni üng Areng la vi” näpa.
3Äkö pheitä aeqa saite khimi
1Tupyng-a Isu lä Judae na üng ingkäcai-a kung haile be dy. Äkö pheitä aeqa saite khimi lawngtä lä ho-a awng pa vi. 2Ho-a awng saite khimi phütä na lä Isu tea käsi thui hethang ngai ö dy. Tukätephüng-a Isu lä naw te khimi bung Aehae te Käni-a hawi sa pa mei, sa pa y mei näte äni ce mäny hethang kheng khü pa ö vi. 3Isu ma äkö aeqa saite khimi tea “Hini khimi ce üng ämaw-a ly kha aedaw lawi” näpa. 4Tupyng-a Isu ma khimipui na tea “Aehae te Käni-a Mosi üng Ubädi kätyng kähawi sa sai mei. Käsi sa sai mei. Khimi üng hing saite bung aeqang sai mei. Y käla bädü sai mei” näkha düng pa.
Tungaila äni ce lä sitäri-a awng ö pa kae vi. 5Äni ce lä bälung tangkö te phüng-a Isu lä kädawtho te hai äni ce te mang-a aehawi ea kheng pa. Tukha khimi känaw tea “Nang üng äkö bäjang lawi” näpa. Tukha äni lä äkö mätaw ea äni üng äkö la hawi ping pa vi dy. 6Qengtäma Pharisai na lä tho ea Isu bung makä sa kha bädü haw ai mei näte phüng sanphrang Herodae üng äpy na hai aedüng ö praw vi dy.
Isu leithung hui saite khimipui na
7Isu lä äkähui na hai Kalile tuilipui käleng pyng-a ly ö dy. Tukha Kalile khö hai Judae khö üng khimipui na lä Isu leithung hui ö dy. 8Jerusalem märü, Idumea khö hai Jordan tävaw rei mang hai Taira hai Sidon märü na mang üng khimipui na ly ö dy. Isu ma cangxei saite na sa te angthang thai ö bawi te phüng-a äni ce angxynlyng lä äni tea ly pa ö cu vi dy.
9Khimipui na phüng-a Isu lä äkähui na tea bälawng cäpi haetä äni tähang khai rüng hethang thui pa. Hokä thui te lä khimipui na ma äni tea mimawngtaw-a sa kha nui pa y hethang tähang-a vi. 10Ätephüng-a mei nädylä äni ma känaw käsaw awng mang saite khimi na bung hawi sa pa te phüng-a känaw käsaw awng te khimi angxynlyng na lä Isu tea aela hethang nui pa ö dy. 11Angra kung saite na ma Isu bung nung ea lä, äni üng maw-a aetüng ö dung kha “Nang lä Säthaw Cäpaw vi” näkha hangrang ö dy.
12Tungaila Isu ma “Kai lä ämi mei näte phüng ämi tea la thui ö hang” näkha äni ce tea täru khi pa dy.
Isu ma angtawtha lawng hawlai netä na bung re pa
13Isu lä me anghung-a paw ea äma ngai saite na bung ka kha äni ce la äni tea ly pa ö dy. 14Isu lä khimi lawng hawlai netä na bung re kha äni ce tea “Angtawtha na” näkha ämüng py pa. Tukha Isu ma “Kai hai mangtä awng hethang nang ce bung kai ma re te dy ba. Säthaw lo thui hai hethang tähang nang ce bung kai mätaw vi ai. 15Angra na bung mätho hethang aenae la kai ma nang ce tähang py ai mang” näpa.
16Isu ma re saite angtawtha lawng hawlai netä na lä Peterae näsaite Simon, 17Zebede üng cäpaw na Jaeko hai äkangby Johan, Isu ma änini tea Bonerke näkha ämüng mäthi dy. Honi üng älawngsai lä bärei tüng üng caw na näte vi. 18Andru, Philip, Barthawleme, Mathai, Thawmae, Alphai üng cäpaw Jaeko, Thadaeus, Isrelae pre tähang bälung naw hai phi saite Simon, hai 19Isu bung a saite Judae Iskriota ce vi.
Isu hai Bezebul angra
Mat 12:22-32; Luk 11:14-23; 12:10
20Tudylä Isu lä ing-a vawi jaw vi dy. Khimipui na lä aekäcüng ö haile be dy. Tukätephüng-a Isu hai äkähui na lä bö mäteng ca haw ö pa y vi. 21Hini phüng Isu üng engthung na ma thai ea “Isu lä mäthö te vi dy” näkha thui ö vi. Tukätephüng-a äni ce lä Isu bung ing-a ka haile hethang ly pa ö vi dy.
22Jerusalem märü mang üng ly saite Ubädi särae na ma “Belzebul angra lä Isu tea kung te vi dy. Angra mangkhawng üng haidae hai sa kha äni lä angra na bung mätho te vi” näkha näpa ö dy.
23Tukha Isu lä äni ce bung äma tea ka kha mätae te lo hai thui pa te lä “Makä sa kha Setan angra lä äma ma tea mätho raw haw vi mei. 24Pre haetä-a khimi ce lä aetäphü kha täre aety raw dylä honi pre lä pra vi ai baw. 25Engthung khaw üng khimi ce lawng lawngtä aety raw vi dylä hini engthung lä pra vi ai. 26Tukätephüng-a Setan angra lä äma tea äma aety raw dylä äni lä aedaw haw y lyng. Äni lä äma ma tea aetäphra raw vi ai.
27“Aethaw awng saite khimi bung mäkhing mang y käla ma äni üng ing-a kung kha ämi la äni üng vyng na la haw y lyng. Äni bung mäkhing pyng ea ni äni ing-a kung kha vyng na tea la haw hethang kae vi.
28“Tängai ö. Säthaw lä khimi üng hunghö angxynlyng na bälawi haw vi ai. Säthaw tea käsi prawng saite khimi na tea la Säthaw ma bälawi haw vi ai. 29Tungaila khimi lawngtä ma Muilaw Käcai tea käsi prawng dylä Säthaw lä manila äni üng hunghö bälawi y lyng. Honi hunghö lä äni hai mangtä dungtäsa awng jawjaw vi ai” näpa. 30Äni ce lä “Isu tea angra kung saite lawngtä vi” näkha thui ö te phüng-a Isu lä hini kä äni ce tea thui pa te vi.
Isu üng nä-awi hai kangby na
31Tupyng-a Isu üng nä-awi hai kangby na lä tyng kha ing ärang mang-a aedaw ö vi dy. Tukha äni ce lä Isu bung ka hethang khimi mätaw pa ö dy. 32Khimipui na lä Isu teng-a sävenglü kha aety ö pa vi. Äni ce ma Isu tea “Nang üng nä-awi hai kangby na lä ärang mang-a tyng kha nang hai aeting hethang ngai ö ti ho” näpa.
33Tudylä Isu ma “Kai üng nä-awi, kai üng kangby jä-ai tätang na lä ämi ce mei” näkha düng pa. 34Tupyng-a äni lä äma teng-a aety aekilü saite khimi na tea kheng kha “Hini khimi ce lä kai üng nä-awi hai kai üng kangby jä-ai tätang na kae dy. 35Khimi lawngtä lä Säthaw üng kängai kätyng sa dylä kai üng kangby jä-ai, ticaw hai nä-awi na kätyng kae dy” näkha mäthang pa haile dy.
4Ämöti hi saite hai mätae pa
1Isu lä Kalile tuilipui pyng-a Säthaw lo mätu pa be dy. Khimipui käleng lä äni tea aekäcüng ö vi. Khimipui käleng phüng-a Isu lä bälawng haetä qawng-a paw kha aety pa dy. Tukha Isu lä tui qawng üng bälawng-a awng kha khimi ce lä tui teng üng bälang qawng-a aedaw kha awng pa ö dy. 2Tupyng-a Isu lä äni ce tea mätae saite lo na hai mätu mang pa.
3Äni ma “Tängai ö. Lai sa te khimi lawngtä lä ämöti hi hethang lai-a ly dy. 4Ämöti hi te kätü-a, ämöti phütä na lä lolang qawng-a aeqa vi. Tävaw na ma ly ea ämöti na ca king pa ö vi dy. 5Ämöti phütä na lä älung qawng-a aeqa pa. Hini mityng-a lä älawng thaw y te phüng-a äkung aepra praw vi. 6Tungaila käni tho kha äkung na tea khöbi da pa vi. Tukha äkung cäpi na lä angjüng na ru haw y te phüng-a cei king pa dy. 7Ämöti phütä na lä angling kung na säla-a aeqa pa dy. Angling kung na lä ryng rae ea äkung cäpi na tea bäja te phüng-a äkung na lä äthai aethai haw pa y. 8Ämöti phütä na lä älawng kähawi qawng-a aeqa vi. Äkung aepra kha ryng rae ea äthai na aethai mang pa. Äkung phütä na lä aepra kha phü ruithungtä, phü rui tärutä hai cungvaitä-a aepu hai rae pa vi dy” näpa.
9Tupyng-a Isu ma “Känawkhing awng saite khimi na lä thaikaw ö sy” näkha näpa.
Mätae saite älo üng äphüng
10Isu lä äma qaitä awng te kätü-a äkähui lawng hawlai netä na hai khimi kälang na ma mätae saite lo na phüng thui mäcai hethang äni tea düng pa ö dy. 11Isu ma äni ce tea “Säthaw lä nang ce tea äma üng pre phüng ho saite na mäny hai dy. Tungaila khimi kälang na tea lä mätae te lo hai kai lä thui te vi. 12Hini phüng Caekäcai-a tärü te lä
‘Äni ce lä kai sa saite kheng ngaila nung ö y.
Kai ma thui saite thai ngaila mäny ö y.
Äni ce nung kha thaikaw dylä
Säthaw tea aekö haile tyng ö vi ai.
Tukha äni ce üng hunghö na tea Säthaw ma bälawi vi ai’ näkha näte vi” näpa.4:12 Isaia 6:9-10
Ämöti hi te khimi hai mätae te phüng thui mäcai pa
13Isu ma “Nang ce lä hini mätae saite lo tea mäny y dylä mätae saite lo angxynlyng na makä sa kha mäny haw ö ai mei. 14Lai sa te khimi lä Säthaw üng lo hi te vi. 15Khimi phütä lä lolang hai aetawng vi. Äni ce lä Säthaw lo thai te hai Setan angra lä ly praw kha äni ce bälung thung üng awng saite Säthaw üng lo tea la pa vi. 16Khimi kälang phütä na lä kälung qawng-a aeqa saite ämöti na hai aetawng vi. Äni ce lä Säthaw üng lo thai kha kawng te hai yng praw ö dy. 17Tungaila Säthaw üng lo lä äni ce üng bälung thung-a cakhi y te phüng-a tänaetä yng ö te kae vi. Säthaw üng lo phüng-a mätangca saite aeting te kätü-a lä yng jawjaw ö te y vi. 18Khimi kälang phütä na lä angling thung-a aeqa saite ämöti na hai aetawng vi. Äni ce lä Säthaw üng lo thai ö dy. 19Tungaila äni ce lä bälung mawng saite, tawngnang saite hai mä-ai ma üng kängai saite na phüng-a yng saite lä ryng haw ö y te vi. Säthaw üng lo tea lä bäja te phüng-a äthai lä aethai haw pa y dy. 20Tungaila khimi kälang phütä na lä älawng kähawi hai aetawng vi. Äni ce lä Säthaw üng lo thai kha yng te phüng-a phü ruithungtä, phü rui tärutä hai phü cungvaitä aepu kha äthai na aethai mang pa vi dy” näpa.
Maibung hai mätae pa
21Isu lä “Maibung tea tawng hai khumy kha khai vai y. Aety nae täkui-a la khai vai y. Maibung khai nae qawng-a ni khai saite kae vi.
22“Ho saite amäjy angxynlyng na Säthaw lä khimi ce tea täphawng vi ai. Täphung saite angxynlyng na lä Säthaw ma khimi ce tea mäny hai vi ai. 23Tukätephüng-a nang ce känawkhing awng saite khimi lä thaikaw ö sy.
24“Thai saite phüng lä kähawi-a aedawng ö. Nang ce tätang mäny he ngai ö dylä Säthaw ma nang ce tea tätang mäny hai rae vi ai. 25Sakaw te awng saite khimi tea lä Säthaw ma py rae vi ai. Tungaila sakaw te awng y saite khimi tea lä äma tea awng saite kaedawng tea mäteng ma Säthaw ma la king vi ai” näpa.
Ryng saite äkung hai mätae pa
26Isu ma “Säthaw üng pre lä lai sa saite khimi lawngtä lai-a ämöti hi te kätyng vi. 27Äni lä kärung-a i ea käni-a kälu sa kha awng. Äni lä mäny y ngaila äkung lä aepra kha ryng pa vi dy. 28Älawng lä äma ma äkung na bung ryng hai kha äthai aethai hai te vi. Angcü-a äkung ädi aepra kha ävui tho pyng-a lä äthai na aethai pa dy. 29Äthai müng te kätü-a lä lai kung ma tangkhi hai caw ae vi ai. Makäte phüng-a mei nädylä caw ae hethang kätü tyng te phüng-a vi” näpa.4:29 Jola 3:13
Angmawi mö hai mätae pa
Mat 13:31-32, 34; Luk 13:18-19
30Isu ma “Säthaw üng pre lä makä sa kha thui mäcai haw ai mei. Kai lä äte lo hai mätae kha thui ai mei. 31Säthaw üng pre lä angmawi mö hai aetawng vi. Khimi ce ma älawng qawng-a e saite hini angmawi mö lä ämöti cäpiky te vi. 32Ämöti e pyng-a aepra kha äkung ryng te kätü-a lä angkhaw thung-a äkung lengky te vi. Cangpre käleng na la ryng kha tävaw na lä honi kung kaekhui-a täbö sa haw ö vi” näpa.
33Äni ce lä thai hethang ngai te khytä Isu ma äni ce tea mätae te älo kälang na hai Säthaw lo thui pa dy. 34Isu ma khimi ce tea mätu te thüng-a lä mätae lo hai thui jawjaw vi. Tungaila äkähui na qaitä hai Isu awng te kätü-a lä äte angxynlyng na äni ma thui mäcai pa vi dy.
Aelipui lä Isu üng lo tängai pa
35Honi käni üng kädüng tyng te kätü-a lä Isu ma äkähui na tea “Tuilipui rei mang-a aekae ö si” näpa. 36Äkähui na lä khimipui na te üng tho kha Isu hai mangtä bälawng qawng-a paw ö dy. Bälawng kälang na la awng by. 37Qengtäma aeli kangcai tho te hai tuileng na lä bälawng thung-a kung kha tui kawi pa vi dy.
38Isu lä bälawngpai mang-a löqyng hai aeqyng kha i pa vi rawng. Äkähui na ma Isu bung i bälaw ea “Särae ä, mä-ai lä dü ai dy. Nang lä kheng sö te kae vi dy mei” näpa.
39Isu lä aetha kha aeli hai tuileng tea “Aehae lawi” näkha särilo hai thui pa. Aeli lä ding kha tuileng la aehae pa vi dy. 40Tukha Isu ma äkähui na tea “Nang ce lä makäte phüng-a ri ö te vi mei. Vaihi khytä nang ce lä kai tea yng ö te y vi” näkha näpa.
41Äni ce lä ri te hai cangxei ea “Hini khimi lä ämi vi nang mei. Aeli hai tuileng na mäteng ma äni üng lo tängai na ly” näkha äma ce tingtawi aethui ö vi dy.
5Isu ma angra na kung saite khimi bung hawi sa pa
1Isu hai äkähui na lä Kalile tuilipui rei mang-a awng saite Kerasene khö-a tyng ö dy. 2Isu lä bälawng üng aerung praw te hai angra kung saite khimi lawngtä lä täprawng mang üng tho kha Isu tea aeting pa vi. 3Hini khimi lä täprawng-a awng jawjaw te vi. Ämi lawngtä ma la äni bung lä singqy rui hai mäteng mäkhing kha khai haw te y vi. 4Khimi ce ma äni üng äkö hai äkho-a singqy rui hai mäkhing leilae ngaila singqy rui na tea lä aethobae vävawi te kae vi. Ämi lawngtä ma la äni tea bäja hethang aethaw awng pa y. 5Tukha kärung käni qütä äni lä täprawng säla hai anghung na-a awng pa vi. Äma ma tea la kälung na hai ae-ae kha awng pa te vi.
6Äni ma Isu bung kähanglaw mang nung te kätü-a lä aehui kha ämaw-a aebo pa dy. 7Tukha äni ma “Aesangky Säthaw üng Cäpaw Isu ä, kai tea nang lä äte sa hethang ngai hai te mei. Kai tea mätang bälai-a sa y hethang Säthaw üng ämüng hai älo aedo khü jo” näkha ätüng käleng hai hang pa vi dy. 8Hikä äni thui te lä Isu ma “Angra ä, hini khimi thung üng tho la” näkha näpa pyng te phüng-a vi.
9Isu ma äni tea “Nang ämüng lä ämi mei” näkha düng pa.
Tukha äni ma “Kai üng ämüng lä angra kanghö5:9 Käri lo üng “Legion” vi. Kai ce lä awng mang te vi” näpa. 10Tukha äni ce bung honi khö üng mäthoja y hethang Isu tea äni lä aebai leilae pa vi dy.
11Me anghung teng-a o kanghö käleng lä raca ca te awng pa vi. 12Angra na ma Isu tea “Kai ce bung o na thung-a kung hethang py kü jo” näkha mäkai pa. 13Isu lä äni ce mäkai te kätyng kung hethang py pa dy. Angra na lä khimi te üng tho kha o na thung-a kung ö dy. Sang netä tingtang awng saite o kanghö na lä täkha mang-a aehui käthu kha tuilipui thung-a aesänung ea dü king ö pa vi dy.
14O bung rui saite khimi na lä aehui kha märü hai särawng dawngpa na-a awng saite khimi na tea hini phüng thui pa ö dy. Tukha khimi ce lä ha-a makä mei näte na kheng hethang ly pa ö dy. 15Äni ce lä Isu tea tyng te kätü-a angra kung vai saite khimi lä bälung cüng haile kha kä-o aelawng ea aety te nung ö dy. Tukha äni ce lä ri ö phi vi dy. 16Nung khe saite khimi na ma lä angra kung vai saite khimi tea makä sa kha hawi haile te mei näsaite hai o na phüng khimi ce tea thui pa ö by dy.
17Tudylä khimi ce lä Isu tea äma ce khö üng tho hethang mäkai pa ö dy.
18Isu lä bälawng qawng-a paw ea angra kung vai saite khimi ma äni leithung hui hethang mäkai pa dy.
19Tungaila Isu ma äni tea äma leithung hui y hethang mäkhang pa vi. Isu ma äni tea “Ing-a phai vawi kha nang üng engthung na tea Areng ma nang tea kähawiky sa saite na phüng thui pa ba. Nang tea Areng ma bäheng phi saite na phüng äni ce tea thui” näpa.
20Tukätephüng-a äni lä ly kha Isu ma äni tea kähawiky sa saite na phüng Dikapoli khö angxynlyng na-a thui pa dy. Tukha thai saite khimi angxynlyng lä cangxei ö vi dy.
Jairae cänung hai Isu üng kä-o aela saite nawngmädi
21Isu lä tuilipui rei mang-a bälawng hai aekae haile dy. Tuilipui teng-a khimipui awng mang saite na lä äni tea aekäcüng ö dy. 22Jairae näsaite Judae na üng ingkäcai mätawngky lä tyng pa vi. Äni lä Isu bung nung te kätü-a ämaw-a aebo ea, 23“Kai üng cänung anglaw cäpi lä dü ai dy. Ly kha äni qawng-a nang üng äkö thyng pa kü. Tudylä kai cänung lä naw te hawi kha hing haile ai” näkha mäkai pa.
24Tukha Isu lä äni hai mangtä hui pa dy. Awng mang saite khimi na lä Isu tea hui ea ae-e kha aenui ö vi dy.
25Khösäning hawlai netä äthi märaw kha naw mätang saite nawngmädi lawngtä la hani mityng-a awng pa by. 26Äni tea latang awng mang te na ma aesi sa kha mätangbälai hai mang pa te vi. Awng saite tangkae na la byng king pa vi dy. Tungaila naw saite lä hawi y käla si rae pa vi. 27Äni lä Isu üng angthang thai te phüng-a khimipui thung mang Isu leithung-a tyng kha äni üng kä-o tea aela pa vi dy. 28Äni lä “Kai lä Areng üng kä-o na tea aela dylä, kai üng naw saite lä hawi king vi ai” näkha aedawng dy.
29Tukha nawngmädi lä Isu üng kä-o tea aela te hai äni üng äthi märaw saite lä khae praw pa vi dy. Äni üng ätabung thung-a naw saite lä hawi te äma la aemäny vi dy. 30Isu lä äma üng haidae tho te aemäny praw pa vi dy. Tukätephüng-a khimipui na tea aehawi ea “Kai üng kä-o tea ämi aela te mei” näkha düng pa.
31Äkähui na ma “Khimipui na ae-e kha aenui te nang ma mäny ea ma makäte phüng-a kai tea ämi aela te mei näkha düng te vi mei” näkha mäthang pa.
32Tungaila Isu lä äma tea aela saite khimi bung aeting hethang kheng prei pa vi dy. 33Tupyng-a Isu üng kä-o-a aela saite nawngmädi lä äma üng nawsaw hawi saite phüng mäny kha ri te hai käsawtho ea Isu üng ämaw-a aebo kha angxynlyng kätüng khaw-a thui pa dy. 34Isu ma äni tea “Cänung ä, kai tea yng te phüng-a Säthaw ma nang tea hawi hai te vi dy. Awneng te hai ly lawi ba. Nang lä naw mätang te üng hawi te dy” näpa.
35Hikä Isu ma thui te thüng-a Ingkäcai mätawngky Jairae ing üng khimi phütä na lä tyng ö ea “Nang üng cänung lä dü vi dy. Särae tea xhu hai vi hang lawi” näpa.
36Isu lä äni ce üng lo tea dawngcang y käla “Bälung mawng y ma. Yng jawjaw ba” näkha Jairae tea näpa. 37Tupyng-a Isu lä Peterae, Jaeko hai Jaeko üng kangby Johan ce tea ma qaitä äma leithung hui hai kha kälang na tea lä hui hai pa y vi. 38Äni ce lä Jairae ing-a tyng te kätü-a, khimi awngmang-a ätüng käleng hai tünglung-a raw ö sung te Isu lä thai pa dy. 39Isu lä engthung-a kung kha äni ce tea “Nang ce lä raw ö sung näpi y ma. Nade lä dü te y. I te kae ecy” näpa.
40Hokä thui pa ea lä khimi ce ma Isu tea mänui hai pa ö dy. Isu lä äni ce bung ing ärang mang-a mätho kha nawngmädi nade üng nä-awi pä-ai hai äkähui lawng thungtä na bung ka kha nade awng saite mityng-a kung ö dy. 41Isu lä nade üng kö süng ea “Taltha, Koum” näkha näpa. Thui te älawngsai lä “Anglaw ä, aetha lawi” näte vi.
42Tänaetäma anglaw lä aetha kha aeke praw pa vi dy. Hini anglaw lä khösäning hawlai netä awng pa dy. Tukätephüng-a khimi ce lä tengxyng y cangxei ö vi dy. 43Isu lä äni ce tea “Hini phüng ämi tea la thui ö hang. Anglaw tähang ca nae py pa ba” näkha täru khi pa.
6Nazare märü khimi ce ma Isu tea tämö khai pa y
1Isu lä äkähui na hai mangtä honi mityng üng tho kha äma awng vai saite Nazare märü-a tyng dy. 2Aehae te Käni-a, Isu lä Judae na üng ingkäcai thung-a Säthaw lo mätu pa dy. Äni üng lo thai saite khimi awng mang te na lä cangxei ö bawi vi. Äni ce ma “Äni lä hini lo na mamang üng aetu te mei. Ämi ma äni tea hini bälungkähae py pa te mei. Äni lä cangxei saite na mäteng sa na ly. 3Äni lä lasämae kae be. Maeri üng cäpaw y vi nang mei. Jaeko, Josefae, Judae, hai Simon ce üng jä-ai y vi mei. Äni üng ticaw na lä mä-ai hai hi-a awng te y mei” näkha näpa. Tukätephüng-a äni ce lä Isu tea tämö khai pa ö y dy.
4Isu ma äni ce tea “Buisaw lawngtä bung lä mityng qütä-a khimi ce ma tämö khai pa vi. Tungaila äma üng märü hai äma üng amäjy na hai ingthung na ma äma ce üng mityng qaitä-a lä tämö khai pa y vi” näpa.
5Isu lä honi märü-a naw saite khimi äjecäcaw na tea äkö thyng kha hawi sa pa te kae. Cangxei saite kälang na lä sa haw pa y. 6Khimi ce lä Isu tea yng y te phüng-a, äni lä cangxei pa vi dy.
Äkähui lawng hawlai netä na bung Isu ma mätaw pa
Tupyng-a Isu lä äteng äpa üng vang na mang-a ly kha Säthaw üng Angthang Kähawi khimi ce tea mätu pa. 7Äkähui lawng hawlai netä na bung äma tea ka pyng-a lawng netä lawng netä täbawi kha mätaw pa dy. Tukha angra na bung mätho hethang aenae py pa. 8Isu ma “Nang ce lä khölawng-a pawngpai qaitä pyng dylä äte haetä la nähai ö y ma. Käcakänei, cawngkö, tangkae phawisae na nähai ö y ma. 9Kho painai aecö ö. Kä-o kaeqai la nähai ö y ma hang. 10Honi märü üng tho y rytä lä nang ce bung lady saite ing-a ma aehae ö kae. 11Märü haetä-a khimi ce ma nang ce bung lady ö y dylä, nang ce lo tängai ö y vi dylä, nang ma ce honi mityng üng tho te kätü-a lä, nang ma ce üng khodi na täkhy pang ö. Nang ce hikä sa te hai-a Säthaw ma äni ce tea kädawtho te phüng khimi ce tea mätü ai” näkha täru khi pa dy.
12Äkähui na lä tho kha khimi ce hunghö üng ae-ui hethang tähang Säthaw lo thui pa ö dy. 13Angra awng mang te na bung la mätho ö dy. Känaw käsaw awng saite na tea lä situi hai bäjö kha naw te na tea hawi sa pa ö dy.
Baptismae Johan dü te
14Isu üng angthang lä mityng qütä aepreng pa te phüng-a sanphrang Herodae la äni üng äphüng thai vi dy. Khimi phütä na ma “Baptismae Johan lä kädü thung üng aetha haile tyng te vi. Tukätephüng-a äni lä cangxei saite na sa haw te vi” näpa.
15Kälang phütä na ma “Äni lä Elijae vi” näkha nä ö vi.
Kälang phütä na ma lä “Äni lä vaicaw üng buisaw na kätyng buisaw lawngtä by vi” näkha näpa.
16Khimi ce ma thui te lo Herodae ma thai te kätü-a lä “Kai ma älö byng hai saite Baptismae Johan lä hing haile tyng te vi müng” näkha nä dy. 17Herodae äma khekhe ma Baptismae Johan bung ne kha thawng thung-a bäla pa te vi. Herodae lä äkangby Philip üng nawngpui Herodia bung aepawng kha änawngpui üng kängai-a Johan tea sa pa te vi. 18Ätephüng-a mei nädylä Baptismae Johan ma Herodae tea “Nang lä nang kangby üng nawngpui bung la te lä Mosi üng Ubädi hai aebäla te y vi” näkha pring jawjaw pa te vi.
19Tukätephüng-a Herodia lä Johan tea bälungkae-i khai kha bädü hethang ngai pa te vi. Tungaila Herodae phüng-a äni lä Johan bung bädü haw pa te y vi. 20Baptismae Johan lä khimi cüng saite hai käcai vi näte Herodae lä mäny pa te phüng-a Johan tea ri kha kähawi-a rui pa te vi. Tukha Herodae ma Johan üng älo na thai ea lä bälung hawi y phi ngaila äni lä Johan üng lo tea ngai kha tängai jawjaw te vi.
21Kangkhüng-a lä Herodia lä Johan bung bädü hethang älang dang pa vi dy. Honi lä Herodae üng aepeng saite pawi käni-a vi. Honi käni-a Herodae lä Kalile khö üng mätawngky na, reisae mätawngky na, tämö khai he hawi saite mätawng käleng käsai na bung ka kha pawi käleng sa pa dy. 22Honi pawi-a Herodia üng cänung lä kung kha lang pa ea lä Herodae hai äma üng angvüng angxynlyng na la anghawtho kha bälung aevaw phi pa ö vi. Tukätephüng-a sanphrang Herodae ma lä anglaw tea “Nang ngai saite amäjy mäkai ba. Kai py ai mang. 23Kai üng pre kaehütä mäteng ma nang mäkai saite khytä kai py ai mang” näkha täking ea älo aedo khü pa dy.
24Honi anglaw lä tho kha änä-awi tea “Kai lä äte ta mäkai ai mei” näkha düng pa.
Änä-awi ma “Baptismae Johan üng älö tea mäkai” näkha mäthang pa.
25Anglaw ma lä sanphrang Herodae tea ly dawde kha “Baptismae Johan üng älö vaihi ma pangkae qawng-a khai kha py hethang kai lä ngai te vi” näkha näpa dy.
26Tukha sanphrang Herodae lä bälung hawi y phi pa vi dy. Tungaila angvüng angvaw na lä äni üng älo aedo saite thai ö bawi kha anglaw üng mäkai saite tea lä e haw pa y vi dy. 27Tukätephüng-a Johan üng älö la hethang äma üng reisae lawngtä bung mätaw praw dy. Reisae la thawng thung-a ly kha Johan üng älö byng po pa dy. 28Tudylä pangkae qawng-a Johan üng älö thyng kha nähai ea anglaw tähang py pa. Anglaw la änä-awi tea py pa dy. 29Hini angthang Johan üng äkähui na ma thai dylä Johan üng äro bung la kha ö pa vi dy.
Isu ma khimi lawng sang bangawtä na tea mäcaw pa
Mat 14:13-21; Luk 9:10-17; Joh 6:1-14
30Angtawtha na lä Isu tea vawi haile kha äma ce sa saite angxynlyng na hai Säthaw lo mätu saite na phüng thui pa ö dy. 31Kung tho saite khimi na lä awng mang pa te phüng-a Isu hai angtawtha na lä bö ca hethang kätü mäteng ma dang pa ö y. Tukätephüng-a Isu ma äni ce tea “Khimi awng y saite mityng-a Aehae hethang ly ö si co” näkha näpa dy. 32Tukätephüng-a äni ce lä khimi awng y saite mityng-a bälawng hai aekae ö dy.
33Tungaila khimipui na lä äni ce tho te nung kha Isu hai äkähui na näte mäny ö vi. Tukätephüng-a märü, vang na mang üng khimi awng mang te na lä Isu ly saite mityng mang-a mepui mang hui kha Isu hai äkähui na tyng y te kälang-a ma tyng ö rüng pa vi dy. 34Isu lä bälawng üng aerung kha paw te kätü-a lä, khimipui na tea nung dy. Beram rui te kung awng y saite beram na kätyng awng pa te phüng-a Isu lä äni ce tea bäheng vi dy. Tukätephüng-a Säthaw lo äni ce tea mätu mang pa.
35Ving aetawng te kätü-a lä äkähui na ma Isu tea ly kha “Hini lä vang, märü na hai hanglaw saite mityng kae vi. 36Kätü lä mätü te vi dy. Käcakänei na ca haw hethang khimi ce bung lä särawng dawngpa vang na mang-a mätaw kae” näkha näpa.
37Tungaila Isu ma äni ce tea “Nang ce lä äni ce tea käcakänei na mäcaw pa ö” näpa. Tukha äni ce ma Isu tea,
“Hini khimi angxynlyng na tea mäcaw hethang lä khimi lawngtä law täjaetä kälu sa te vang jetä ngai vi ai6:37 Phawisae pjaetä cungvai netä” näkha näpa.
38Isu ma “Nang ce tea ca nae majetä awng mei. Kheng ö re” näpa.
Äni ce kheng ea lä “Täkaw phe bangawtä hai mawi käcei me netä awng kae” näkha näpa.
39Isu lä khimi angxynlyng na bung aeca qawng-a äly äly-a aety hai ö hethang äkähui na tea thui pa. 40Tukha khimi ce lä lawng cungvaitä, lawng rui bangtä äly äly-a aety ö pa dy.
41Tupyng-a Isu lä täkaw phe bangawtä hai mawi me netä tea la ea käni khösang mang-a kheng tähang kha Säthaw tea kawng te lo thui pa dy. Tukätephüng-a täkaw tea täpe kha khimi ce tea bäri hethang äkähui na tähang py pa dy. Hini kätyng mawi me netä tea la täphü kha äni ce tähang py bawi pa dy. 42Khimi angxynlyng äjo käkawi-a ca ö dy. 43Tupyng-a äkähui na lä täkaw hai mawi na ca te kaebang mäküng ea lä tawng hawlai netä kawi tynglyng pa vi rawng. 44Täkaw ca saite khimi nawngmäcaw na lä lawng sang bangtä tingtang awng ö te vi.
Isu lä tui qawng-a aeke pa
45Isu lä qengtäma äkähui na bung bälawng qawng-a paw hai ea tuilipui üng rei mang-a awng saite Besaida märü mang-a aekae hai rüng pa dy. Äni ma khimi angxynlyng na bung lä ing-a mätaw pa vi dy. 46Isu lä khimi angxynlyng na tea “Kähawi-a vawi ö lawi ba ä” näkha thui pa pyng ea lä aetang hethang me anghung mang-a paw pa vi dy.
47Kärung thung-a lä äkähui na üng bälawng lä tuilipui säla ung-a tyng pa vi dy. Hokä ea Isu lä äma qaitä mepui-a awng pa te kae vi. 48Aelipui hai aesimu kha äkähui na lä bälawng haw hethang rae bärai ö te tea Isu lä nung pa vi dy. Khö aevang y kälang-a äma lä tui qawng-a aeke kha äni ce tea ly pa dy. Tukha Isu lä äni ce teng mang cäqeng kha ly he sa pa. 49Äkähui na lä Isu tui qawng-a aeke te tea nung te kätü-a lä seisi käthi kha täpe ö pa vi dy. 50Äni ce lä Isu bung nung te kätü-a ri ö bawi pa vi dy.
Tukha Isu ma äni ce tea “Aethaw aela ö. Kai kae ecy. Ri ö hang” näkha näpa. 51Tupyng-a Isu lä äni ce awng saite bälawng qawng-a paw pa dy. Tudylä aeli lä ding pa kha äni ce la tengxyng y cangxei ö vi dy. 52Ätephüng-a mei nädylä Isu ma täkaw mäcaw te thüng-a äma ce nung pyng saite na üng älawngsai lä äni ce mäny ö y te phüng-a vi. Äni ce üng bälung lä tangkö ö te phüng-a vi.
Kenesare märü-a khimi känaw bung Isu ma hawi sa pa
53Isu hai äkähui na lä tuilipui rei mang-a aekae ö dy. Kenesare khö-a tyng kha bälawng mäkhing ö dy. 54Äni ce bälawng üng aerung kha paw te hai khimi ce lä Isu tea mae praw pa ö te vi. 55Tukätephüng-a khimi ce lä äma ce üng khöri-a aehui kha khimi känaw na bung aejawng nae hai aejawng kha Isu awng saite mityng-a nähai pa ö dy. 56Tukha Isu ly saite märü, vang qütä, lolang qütä-a khimi känaw na bung khai ö dy. Isu üng kä-o tawng bung khimi känaw na tea aela hai pa hethang mäkai ö pa dy. Aela hethang dang saite khimi känaw angxynlyng na lä naw te hawi ö pa vi dy.
7Kangsi kangjaw na üng reitae
1Pharisai na hai Ubädi särae phütä na lä Jerusalem märü mang üng tyng kha Isu tea aekäcüng ö dy. 2Isu üng äkähui phütä na lä Judae na üng reitae kätyng äkö aese y käla bö ca ö te tea äni ce lä nung pa vi.
(3Pharisai na hai Judae khimi angxynlyng na lä kangsi kangjaw na üng reitae na tea tawng ö te vi. Reitae kätyng lä äkö aese y käla ma bö ca te y vi. 4Seng na üng rang saite käcakänei angxynlyng na tea mäse y käla ca ö te y vi. Äni ce lä kälang reitae na tea la tawng ö te vi. Äni ce lä lä-awng, bynglyng, bynglyng käsa na tea älang kätüngky-a mäse hethang kae ö te vi.)
5Tukätephüng-a Pharisai na hai Ubädi särae na ma “Ätephüng-a nang üng äkähui na lä kangsi kangjaw na üng reitae na tea tawng ö y te vi mei. Äni ce lä äkö aese y käla ma ca ö te vi” näkha Isu tea düng pa.
6Isu ma äni ce tea “Nang ce phüng buisaw Isaia ma thui rüng te lä hini kätyng vi. Nang ce lä khimi cüng saite na kätyng, angrubu-a awng saite na vi.
Buisaw Isaia ma ‘Hini khimi ce lä kai tea täbawng hai lä tämö khai ö.
Tungaila äni ce üng bälung lä kai hai hanglaw bärai vi.
7Äni ce ma kai tea cäphaw saite lä aetütü kae.
Äni ce lä äma ce üng raitae tea Kai üng särilo kätyng mätu ö vi’ näkha näpa.
8“Nang ce lä Säthaw üng särilo na tea lä khaisö kha khimi ce üng reitae tea tawng ö te kae vi” näpa.
9Tupyng-a Isu ma äni ce tea “Nang ce lä nang ma ce üng reitae na kätyng tawng haw hethang Säthaw üng särilo na tea khaisö te lä kaw ö phi na be tu ly. 10Mosi te mang thui te lä ‘Nang nä-awi ni nang pä-ai tea tämö khai ba’ näpa. Äni lä ‘Khimi lawngtä ma äma üng änä-awi ni äpä-ai tea e kha käsi thui dylä dü hethang kae’ näkha näte vi. 11Tungaila nang ce ma khimi lawngtä lä äpä-ai y dylä änä-awi tea mei, ‘Kai lä nang tea säbawng hethang khai pa te lä “Korban” lawng vi dy’ näkha nä haw te vi. Korban näte üng älawngsai lä ‘Säthaw tea py saite amäjy kae vi’ näsaite vi.7:11 Korbon näsaite la Käri lo vi. Säthaw tähang py saite amäjy na te vi.12Hini kätyng hai-a nang ce lä khimi lawngtä tea säbawng y hethang mäkhang pa ö te vi. 13Tukä dylä nang ce lä nang ma ce üng reitae tea hui hethang Säthaw üng lo tea särijy rung khytä sa ö te vi. Honi kätyng nang ce sa saite amäjy kälang na lä awng mang te vi” näkha näpa.
Khimi tea känüng hai y saite na
14Tupyng-a Isu lä khimipui na bung äma tea ka ea “Nang ce angxynlyng na lä kai üng lo tängai kha kähawi-a aedawng ö khü ba. 15Khimi üng täbawng ärang mang täbawng thung-a kung saite amäjy lä Säthaw üng maw-a khimi ce tea nüng hai haw te y lyng. Khimi üng bälung thung mang tho saite na ni honi khimi tea Säthaw üng maw-a nüng hai te vi. 16Khimi lawngtä thai hethang känawkhing awng dylä thai sy” näkha näpa.7:16 Hini na lä Caekäcai angxynlyng thung-a awng bawi te y.
17Isu lä khimipui na te üng tho kha äma awng saite ing-a kung te kätü-a lä, äkähui na lä Isu ma mätae te lo thui pyng saite üng älawngsai tea düng pa ö dy. 18Isu ma äni ce tea “Nang ce mäteng ma kai thui te lo tea tukätangtä mäny ö y te vi ly. Khimi üng täbawng mang kung saite amäjy lä äni tea Säthaw üng maw-a nüng hai haw te vi näte tea lä mäny ö. 19Khimi ma ca saite amäjy lä äni üng bälung thung-a kung te y vi. Äni üng äjo thung-a kung kha deithae aely ea tho pang vi dy” näkha thui pa. (Hini lo hai-a Isu ma “Ca saite amäjy angxynlyng na lä cai kha ca hethang hawi te vi” näkha thui pa dy.)
20Tudylä Isu ma “Khimi bälung thung mang üng tho saite lä khimi tea Säthaw maw-a nüng hai te amäjy vi. 21Khimi bälung thung üng lä nüng saite amäjy na tho te vi. Honi amäjy na lä, käsi dawng te na, täkübäjang sa te na, nawngpui nawngpaw y käla mangtä i saite na, bäru saite na, 22khimi bung bädü saite na, bälung üng kaengai mängae y saite na, käsi sa saite na, älo bälai te na, älokäqo thui saite na, pä-e saite na, khimi üng säri tea täphra saite na, bälungleng saite na, aethaw saite na vi. 23Hini hawi y sa te angxynlyng na lä khimi bälung thung mang tho kha khimi tea Säthaw üng maw-a känüng hai bawi te vi” näkha näpa.
Nawngmädi lawngtä üng yng saite phüng
24Isu lä honi mityng mang tho kha Taira hai Sidon märü üng püngkhe dawngpa-a ly pa. Äni lä ingthung-a kung kha äma ho-a awng te phüng, ämi tea la mäny he ngai hai y. Tungaila Isu lä aeho kha awng haw pa y vi. 25Nawngmädi lawngtä tea lä angra kung saite cänung lawngtä awng pa vi. Äni lä Isu üng angthang thai te phüng-a äni tea ly kha khokung-a aebo pa vi dy. 26Honi nawngmädi lä Käri khimi vi. Äni lä Syrophoni pre-a awng te vi. Tukha äni lä äma cänung te üng angra mätho pa hethang Isu tea mäkai vi dy.
27Isu ma äni tea “Nade na lä äma ce ngai saite na angcü-a ca ö mang re sy. Nade na üng täkaw la kha ui na tea kädesö hethang aeteng te y vi” näpa.
28Tungaila nawngmädi ma Isu tea “Areng ä, älawng mang. Tungaila äcaw na ma ca saite kaebang na lä böloka teng üng ui na mäteng ma ca ö te kae vi” näkha mäthang pa dy.
29Tukätephüng-a Isu ma nawngmädi tea “Nang lä tukä thui te phüng-a ing-a vawi lawi. Angra lä nang cänung te üng thoja pyng te vi dy” näpa.
30Tukha nawngmädi lä äma ing-a vawi kha äma üng cänung lä i nae qawng-a aesawng te nung dy. Angra lä äni te üng tho pyng pa te vi dy.
Isu ma känaw pang kha älo aepe haw y saite tea hawi sa pa
31Tupyng-a Isu lä Taira märü üng püngkhe dawngpa na mang üng tho kha Sidon märü-a ly ea Kalile tuilipui-a tyng kha Dikapoli khö mang-a aekae pa dy. 32Khimi phütä na lä känaw pang kha älo aepe haw y saite khimi lawngtä bung Isu tea nähai ea äni üng qawng-a äkö thyng hethang mäkai pa ö dy. 33Tukha Isu lä äni bung khimipui thung üng ka kha khimi awng y saite mityng mang-a ly ea äköbäjung hai äni üng känawkhing khaw-a täkhaw pa vi. Isu lä äma üng kö bäjung-a mäce mäthawi kha äni üng bälai tea aela pa dy. 34Tupyng-a Isu lä käni mang-a kheng tähang kha aehaw khui ea “Ephatha” näkha näpa. (“Ephatha” näte älawngsai lä “Aepä-awng lawi” näte vi.)
35Tänaetäma honi khimi üng känawkhing lä aepä-awng va kha bälai la aetae ea älo kähawi-a aepe haw pa vi dy. 36Hini na phüng ämi tea la thui y hethang Isu ma äni ce tea täru khi pa dy. Mäkhang khi ngaila äni ce lä Isu üng angthang thui rae pa ö vi dy. 37Tukha thai saite khimi angxynlyng na lä tengxyng y cangxei ö vi dy. Äni ce ma “Isu lä äte angxynlyng na tea kähawi-a sa pa vi. Känaw pang saite na tea mäteng thai hai tyng pa te vi. Älo aepe haw y saite na tea la älo aepe hai tyng pa te vi” näkha thui ö dy.
8Khimi sang bälitä na tea mäcaw pa
1Qae y tea ma khimipui lä aekäcüng ö be dy. Äni ce lä ca hethang äte la awng pa y te phüng-a Isu lä äkähui na bung äma tea ka dy. 2Tukha äni ma “Hini khimipui lä kai hai mangtä käni thungtä tütü awng ö te vi dy. Vaihi äni ce lä ca nei hethang äte la awng ö y. Tukätephüng-a äni ce tea kai lä bäheng phi vi dy. 3Kai lä äni ce tea mäcaw y käla mätaw dylä äni ce lä lolang säla-a baiphi kha aetüng ö he kae dy. Khimi phütä na lä khölawng kähanglaw mang üng tyng ö te vi” näpa.
4Äkähui na lä “Hini daithung kärang-a khimipui tea mäcaw haw hethang khytä käcakänei ma üng dang haw ai mei” näkha düng pa.
5Isu ma äni ce tea “Nang ce tea täkaw phe majetä awng mei” näkha düng pa.
Äkähui na ma “Täkaw phe säritä awng” näkha thui pa.
6Isu lä khimi angxynlyng na bung älawng-a aety hai kha täkaw säritä tea la ea Säthaw tea bälaw dy. Tupyng-a täkaw na tea täpe kha äkähui na tea py ea khimi ce tea bäri hai pa dy. 7Äni ce tea mawi käcei äjecäcaw la awng. Isu lä honi mawi käcei na bung Säthaw tea kawng te lo thui pyng ea lä khimi ce tea bäri hethang äkähui na tea mätaw pa vi dy.
8Tukha khimi ce lä äjo käkawi-a ca ö dy. Äkähui na lä käca kaebang na mäküng kha tawng säritä kawi pre-a dang ö vi rawng. 9Ca saite khimi na lä lawng sang bälitä tingtang awng ö vi ai. Isu lä khimipui na bung mätaw haile pa dy. 10Tupyng-a äkähui na hai mangtä bälawng qawng-a paw kha Dalmanutha khö-a ly ö dy.
Pharisai na lä kamarae haetä mäkai pa
11Pharisai phütä na lä Isu tea ly kha älo düng pa ö vi. Isu üng aenae Säthaw ma py te mäny hethang äni ce lä Isu tea käni mang üng kamarae sa hethang mäkai pa ö dy. 12Isu lä aehaw khui pyng-a äni ce tea “Vaidung üng khimi kaetha na lä ätephüng-a kamarae na mäkai ö te vi mei. Tängai ö, hini khimi ce tea kai lä kamarae mätü y lyng” näkha näpa.
13Isu lä äni ce te üng tho kha bälawng qawng-a paw haile ea tuilipui käleng üng rei mang-a aekae ja vi dy.
Isu lä Herodae hai Pharisai na üng täkaw aepae saite aesi phüng thui pa
14Äkähui na lä täkaw na nähai hethang tämang ö pa vi. Bälawng qawng-a lä täkaw phetä xyng ni awng pa kae. 15Tukha Isu ma äni ce tea “Nang ce lä Pharisai na hai sanphrang Herodae üng täkaw aepae saite aesi tea kähawi-a sädi khai ö” näkha näpa.
16Äkähui na lä “Mä-ai lä täkaw nähai pa y te phüng-a Isu ma hini kätyng thui te vi” näkha äma ce tingtawi aethui ö dy.
17Hokä thui saite tea Isu lä mäny kha “Nang ce lä täkaw awng y te phüng makä aethui ö te vi mei. Vaihi khytä mäny ö y te vi rawng mei. Makäte phüng-a nang ce lä bälung tangkö ö te vi mei. 18Nang ce lä ämi awng ngaila nung ö y. Känawkhing awng ngaila thaikaw ö y. Nang ce lä aemäny ö y vi nang mei. 19Kai lä khimi lawng sang bangtä tea mäcaw hethang täkaw bang ngawtä täpe pyng tea kätü-a nang ce lä mäküng saite täkaw kaebang na tawng majetä dang ö mei” näkha düng pa.
Tukha äkähui na ma Isu tea “Tawng hawlai netä mäküng te vi” näkha näpa haile ö dy.
20Isu ma “Kai lä khimi lawng sang bälitä na tea mäcaw hethang täkaw säritä täpe te kätü-a nang ce lä täkaw kaebang tawng majetä käkawi-a aekhü ö mei” näkha düng pa.
Äkähui na ma “Tawng säritä mäküng ö te vi” näkha mäthang pa ö dy. 21Isu ma äni ce tea “Nang ce lä vaihi khytä kai phüng mäny ö y te vi rawng mei” näkha düng pa.
Isu ma Besaida märü-a ämi kangjö lawngtä bung hawi sa pa
22Isu hai äkähui na lä Besaida märü-a tyng ö dy. Tukha khimi phütä na lä ämi kangjö lawngtä bung Isu tea nähai kha äni tea aela hethang mäkai pa ö vi. 23Isu lä ämi kangjö tea äkö hai süng kha märü üng ärang mang-a ka pa vi dy. Isu lä äni üng ämi na qawng-a mäce hai mäthawi kha äni üng qawng-a äkö thyng pa. Tukha äni tea “Nang lä ätete amäjy tea nung mei” näkha düng pa.
24Äni lä kheng tähang ea “Kai lä khimi ce tea nung vi. Tungaila äni ce lä aeke linglawng saite thingkawng kung na kätyng awng vi” näkha näpa.
25Isu lä honi khimi üng ämi na qawng-a äkö thyng haile pa be vi dy. Tupyng-a äni üng ämi na bäli ea lä aevang pa haile dy. Tukha äni lä äte angxynlyng na tea nungsy pa vi dy. 26Isu lä äni tea “Ing-a vawi te thüng-a vang thung-a lä kung hang ba” näkha täru pa.
Peterae ma Isu üng phüng thui pa
27Isu hai äkähui na lä Philipi Kesari märü üng püngkhe dawngpa na mang-a ly ö dy. Lolang-a lä Isu ma äni ce tea “Khimi ce ma kai tea ämi näkha nä ö mei” näkha düng pa.
28Äni ce ma “Khimi phütä na ma nang tea lä Baptismae Johan nä ö vi. Phütä na ma lä Elijae nä ö. Phütä na ma lä nang lä buisaw lawngtä vi ti ä, näkha thui ö vi” näpa.
29Isu ma äni ce tea “Tudylä nang ce lä makä dawng ö a. Nang ce lä kai tea ämi näkha nä ö mei” näkha düng pa.
Peterae ma “Nang lä Mesia vi” näkha mäthang pa dy. 30Tudylä Isu ma “Kai üng phüng ämi tea la thui ö hang ba” näkha äni ce tea älo säde khi pa vi dy.
Isu lä äma dü hethang phüng thui rüng pa
31Tupyng-a Isu ma äkähui na tea “Kai, Khimi üng Cäpaw, lä mätangbälai te na aeting hethang kae te vi. Mätawngky na, mäthykung käleng na, Ubädi särae na ma Kai, Khimi üng Cäpaw, tea e ö vi ai. Kai bung bädü ö vi ai. Tungaila käni thungtä pyng-a lä kai lä aetha haile tyng vi ai” näkha thui pa dy. 32Isu lä äni ce tea hini phüng aeny lyng-a thui pa te vi. Tukha Peterae lä Isu bung äteng-a ka kha pring pa dy. 33Tudylä Isu lä aehawi ea äkähui na tea kheng kha Peterae tea “Nang lä Setan angra kätyng älo thui te kae vi. Kai te üng aehi la. Nang lä Säthaw kätyng aedawng y käla khimi ce kätyng aedawng te kae vi” näkha pring pa.
34Tupyng-a Isu lä khimipui na hai äkähui na tea ka kha äni ce tea “Khimi lawngtä lä kai leithung hui hethang ngai dylä, äma üng kängai sai na khaisö kha äma üng thinglawng aepö kha dü hethang awng rüng kha kai leithung hui he kae. 35Khimi lawngtä lä mä-ai ma üng hing saite tea aeqang he ngai dylä honi khimi lä dungtäsa dü vi ai. Kai hai Angthang Kähawi tähang dü hai saite khimi tea lä Säthaw ma dungtäsa hing te py vi ai. 36Khimi lawngtä lä käni älawng angxynlyng na bung pyng king ngaila dungtäsa hing te dang y dylä äma tähang äte la ävang ting te y vi dy. 37Khimi lawngtä lä dungtäsa hing saite dang hethang Säthaw tea äte la py haw te y vi. 38Khimi lawngtä lä hini dungpasi te käni-a kai hai kai üng mätu saite angthang na phüng-a kaejae dang dylä, Kai, Khimi üng Cäpaw, la äni üng phüng-a Äpä-ai üng phung-ang hai Säthaw üng angtawtha käcai na hai mangtä ly te kätü-a lä kaejae dang vi ai” näkha näpa.
91Tukha Isu ma äni ce tea “Tängai ö. Hi-a awng saite khimi phütä na lä Säthaw üng pre pyng te haidae tyng te nung y kälang-a dü y vi ai rawng” näkha näpa.
Isu üng ämaw äcae lang pa
2Käni tärutä pyng-a Isu lä Peterae, Jaeko hai Johan ce bung ka kha äni hai mangtä me anghung kaesang-a paw ö dy. Ha-a lä äni ce ma qaitä awng ö te kae vi. Äni ce üng maw-a Isu üng ämaw äcae lä lang pa vi dy. 3Isu üng kä-o na lä kälung ping kha ang pa vi. Hikä kälung ping-a awng hethang älawngpre-a ämi khimi ma la kä-o mäsu haw y lyng. 4Äkähui lawng thungtä na üng maw-a Elijae hai Mosi ni lä tho kha Isu hai älo aepe hawi pa vi. 5Tukha Peterae ma Isu tea “Särae ä, hini mityng-a lä awng nae hawi bärai. Tukätephüng-a kai ce ma taipung käthungtä, nang tähang haetä, Mosi tähang haetä hai Elijae tähang haetä sa pa ai dy” näkha näpa. 6Peterae hai kälang äkähui na lä tengxyng y ri ö phi te phüng-a Peterae lä makä älo thui ai mei näte mäny pa y vi dy.
7Tukha khö angnüng lä tho kha äni ce tea bu ea khö angnüng thung mang tho te ätüng lä “Hini lä Kai ma bälung aevaw saite Kai üng Cäpaw vi. Äni üng älo tängai ö” näkha nä dy. 8Qengtäma äkähui na lä äteng äpa-a aehawi kha kheng ea lä Isu ma qaitä awng kha kälang na bung lä nung ö pa y vi dy.
9Tupyng-a Isu lä äkähui na hai me anghung üng aerung käthu te kätü-a Isu ma äni ce tea “Kai, Khimi üng Cäpaw, lä dü te üng aetha y kälang-a nang ce nung pyng saite na ämi tea la thui ö hang ba” näkha täru khü pa dy.
10Äni ce lä hikä thui te lo tängai ö ngaila “Dü te üng aetha haile näte lä ätemakä näte vi nang mei” näkha äma ce tingtawi aethui ö dy. 11Tukha äni ce lä Isu tea “Ubädi särae na lä angcü-a Elijae ly vi ai näkha makäte phüng-a thui te vi mei” näkha düng pa ö dy.
12Isu ma “Äte angxynlyng na tea aerü rüng hethang Elijae ly mang te lä aesyng vi. Caekäcai thung-a Kai, Khimi üng Cäpaw, lä awngmang-a mätangbälai te hai khimi ce ma e vi ai näsaite tea makäte phüng-a tärü te vi mei. 13Tängai ö. Elijae lä ly pyng te vi dy. Caekäcai ma thui te kätyng lä khimi ce lä äni tea ngai te kätyng sa pa ö vi dy näkha nang ce tea thui te dy” näpa.
Nade lawngtä te üng angra bung Isu ma mätho pa
14Isu hai äkähui lawng thungtä na lä äkähui äkälang na awng saite mityng-a tyng te kätü-a khimipui na bung nung ö dy. Äkähui na lä Ubädi särae phütä na hai älo ae-e ö dy. 15Khimipui na ma Isu bung nung praw ea lä cangxei te hai ma aehui kha Isu tea lady pa ö dy. 16Isu ma äkähui na tea “Nang ce lä äni ce hai äte phüng na älo ae-e ö te vi mei” näkha düng pa.
17Khimipui thung üng lawngtä ma “Särae ä, kai lä kai ma üng cäpaw bung nang tea nähai te vi. Nade tea lä angra kung kha älo aepe hai haw pa y vi. 18Angra ma nade bung süng te qütä äni lä älawng qawng-a aetüng hai dung pa te vi. Täbawng mang la mäcepolo tho kha äfaw na aemäkütang ea täqanlang-a awng hai te vi. Nang üng äkähui na tea honi angra bung mätho pa hethang kai ma mäkai ngaila äni ce lä sa haw ö te y vi” näkha mäthang pa.
19Isu ma äni ce tea “Nang ce lä yng y saite khimi na kae be tu la. Kai lä nang ce hai majetä käqae-a awng hethang mei. Matangtä käqae-a nang ce tea kai lä änawngsa ai rawng mei. Nade bung kai tea nähai lawi” näkha näpa.
20Äni ce lä nade bung Isu tea nähai pa ö dy.
Angra lä Isu bung nung praw te hai nade tea tengxyng y aehüng hai kha nade üng täbawng mang mäcepolo na tho hai ea älawng qawng-a aetüng hai dung kha aebälaw hai pa dy. 21Isu ma äni üng pä-ai tea, “Hikä awng te lä matangtä qae dy mei” näkha düng pa.
Nade üng pä-ai ma “Nade caw üng hai vi dy. 22Angra lä nade bung dü hai hethang tähang-a mai thung-a hai tui thung-a la käde kha aetüng hai leilae pa te vi. Nang ma sa haw dylä bäheng te hai säbawng kü ba” näkha mäkai pa dy.
23Isu ma “Nang lä ätephüng-a ‘Nang ma sa haw dylä’ näkha thui te vi mei. Yng saite khimi tähang lä äte angxynlyng aecyng haw bawi te kae be” näkha näpa.
24Nade üng pä-ai ma “Kai lä yng mang. Tungaila yng te cung bawi y te phüng-a kai tea säbawng kü jo ba ä” näkha ätüng käleng hai thui praw pa.
25Khimipui na lä äni tea säveng te Isu ma nung te kätü-a “Känaw pang kha älo aepe haw y saite angra, nade te üng tho la. Manila äni üng täkö thung-a kung haile tyng pa vi hang. Kai ma särilo hai thui khü te dy ba” näkha näpa.
26Angra lä hangrang kha nade tea tengxyng y aesö hai ea äni te üng thoja pa vi dy. Nade lä äro kätyng awng pa te phüng-a khimi awng mang saite na ma lä “Äni lä dü te vi dy” näkha nä ö dy. 27Tungaila Isu lä nade bung äkö hai süng ea mätha kha nade la aetha pa vi.
28Isu lä ingthung-a kung pyng-a äma qaitä awng tea äkähui na ma “Kai ce lä makäte phüng-a angra bung mätho haw y te vi mei” näkha düng pa ö dy.
29Isu ma “Böjae kha aetang te qaitä hai ni hikäti angra bung mätho haw te kae vi” näkha mäthang pa.
Isu lä äma dü hethang phüng thui haile tyng pa
30Isu hai äkähui na lä honi mityng üng tho pyng te kätü-a Kalile khö-a aekae ö vi dy. Isu lä äma ce awng saite mityng tea khimipui na mäny hethang ngai hai te y vi. 31Ätephüng-a mei nädylä Isu lä äkähui na tea älo mätu hethang kätü py he ngai pa te vi. Äni ma “Khimi lawngtä ma Kai, Khimi üng Cäpaw, bung lä täre na kö thung-a a vi ai. Tukha äni ce ma kai bung bädü vi ai. Tungaila käni thungtä pyng dylä kai lä kädü thung üng aetha haile tyng vi ai” näkha thui pa vi dy.
32Äkähui na lä Isu üng älo thui saite phüng tea mäny pa ö y. Tungaila äni ce lä Isu tea älo düng vawng pa ö y.
Ämi ta lengky mei
33Isu hai äkähui na lä Kapernawm märü-a tyng ö dy. Ingthung-a kung pyng ea Isu ma äkähui na tea “Lolang-a nang ce lä äte phüng älo ae-e ö te vi mei” näkha düng pa.
34Tungaila äni ce lä mäthang pa ö y. Ätephüng-a mei nädylä, äni ce lä äma ce thung-a ämi ta lengky mei näte phüng lolang-a älo ae-e ö te vi. 35Isu lä aety kha äkähui lawng hawlai netä na bung ka ea “Äkälengky-a awng he ngai saite khimi lä äcäpiky-a awng he kae. Khimi angxynlyng na üng mawsawng-a aelawng hethang kae te vi ba” näpa. 36Isu lä nade lawngtä bung äkähui na üng ämaw-a aedaw hai pa dy. Tupyng-a Isu lä nade bung täpawi kha äni ce tea 37“Kai üng phüng-a hini nade bung lady saite khimi lä kai bung lady te kae dy. Kai bung lady saite khimi lä kai tea ma qaitä lady te cang y kai bung mätaw saite Säthaw tea lady te by kae dy” näpa.
Kai ce tea e y saite khimi lä kai ce üng khimi kae
38Johan ma Isu tea “Särae ä, nang üng ämüng hai angra na tea mätho saite khimi lawngtä bung kai ce lä nung vi. Äni lä mä-ai äpy y te phüng-a äni tea kai ce lä mäkhang pa te vi” näkha näpa.
39Isu ma “Äni tea mäkhang ö hang. Kai üng ämüng hai cangxei sa pyng saite khimi lä, qae y tea ma äni lä kai phüng käsi thui ngang y lyng. 40Tukätephüng-a mä-ai tea engleng sa y saite khimi lä mä-ai te mang üng kae dy. 41Tängai ö, nang ce lä Khrista üng äkähui na te phüng-a kai üng ämüng hai-a nang ce tea tui bynglyngtä py saite khimi lä ävang tätang dang khaw vi ai” näpa.
Yng te pra hai saite phüng
42“Khimi lawngtä lä hini nade lawng lawngtä üng yng saite pra hai te qawng-a äma üng känawngjang-a kälung käleng ae-awi kha pangle tui thung-a khimi ce ma kädesö khyry te lä äni tähang hawiky vi ai rawng. 43Nang üng äkö ma nang üng yng saite tea pra hai dylä honi äkö bung byngpo la. Mai dü y saite ngärei pre thung-a äkö phei netä käcung-a aeqa te qawng-a lä äkö pheitä hawi y kha hing te lä hawiky khyry te vi rawng. 44(Honi ngärei lä khimi ce bung ca te kälung na dü bi y käla mai ding bi y saite mityng vi.) 45Nang üng äkho ma nang üng yng saite tea pra hai vi dylä honi äkho tea byng la. Kälung na dü y saite mai ngärei pre thung-a äkho phei netä hai kung te qawng-a lä äkho pheitä hai hing te lä hawiky khyry vi rawng. 46(Honi ngärei lä khimi ce bung ca te kälung na dü bi y käla mai ding bi y saite mityng vi.) 47Nang üng ämi ma nang üng yng saite tea pra hai dylä, honi ämi bung mätho pu la. Ämi känetä hai ngärei thung-a aeqa te qawng-a lä Säthaw üng pre thung-a ämi faitä hai kung te lä hawiky khyry te vi. 48Honi ngärei lä khimi ce bung ca saite kälung na dü bi y käla mai ding bi y saite mityng vi.
49“Ang thung-a bälawi thu te kätyng Säthaw lä khimi qütä bung mai hai-a mäcai vi ai.
50“Bälawi lä hawi. Tungaila bälawidae dylä nang ce lä makä sa kha bälawi lung haile tyng hethang sa haw ö ai mei.
“Nang ma ce khekhe lä bälawi kätyng lung ö. Lawng lawngtä hai aede ö ba” näkha näpa.
10Nawngpui nawngpaw aekhai te phüng
1Tupyng-a Isu lä honi mityng üng tho kha Judae khö-a ly pyng-a, Jordan tävaw rei mang-a aekae dy. Khimipui na lä Isu tea aekäcüng haile ö be dy. Isu lä äma sa vävawi te kätyng äni ce tea Säthaw lo mätu pa.
2Pharisai phütä na lä Isu tea ly kha “Khimi lawngtä ma äma üng nawngpui hai aekhai saite lä Mosi üng Ubädi hai aebäla mang mei” näkha käny te hai düng pa ö dy.
3Isu ma äni ce tea “Mosi üng Ubädi thung-a nawngpui nawngpaw aekhai te phüng makä tärü mei” näkha näpa.
4Äni ce ma “Mosi ma nawngpaw lä änawngpui bung aekhai te cae py ea änawngpui bung mätaw haile hethang dang näkha tärü te vi” näkha mäthang pa ö dy.
5Isu ma “Nang ce lä mätu hethang rae bärai saite khimi na vi te phüng-a Mosi lä hini Ubädi tea tärü te vi dy. 6Tungaila Caekäcai thung-a tärü te kätyng ‘Säthaw lä angcü-a khimi bung sa te kätü üng hai ma khimi nawngmädi hai nawngmäcaw ni bung sa te vi.’ 7Tukha ‘Nawngmäcaw lä nä-awi pä-ai ni bung khaisö kha nawngpui hai aepawng ea awng hawi te vi. 8Tudylä änini lawng netä lä bungtä-a lawng vi ai dy.’ Tukätephüng-a änini lä lawng netä y. Lawngtä kae dy. 9Tukätephüng-a Säthaw ma mangtä aepawng hai saite tea khimi ce ma täprei he kae y” näkha näpa.
10Äkähui na lä ing-a kung haile te kätü-a Isu tea äma thui saite phüng düng pa ö dy. 11Isu ma äni ce tea “Mä-ai ma üng nawngpui bung aekhai ea nawngmädi kälang lawngtä hai aepawng saite khimi lä äma angcü üng nawngpui tea täkübäjang sa te kae dy. 12Hini kätyng nawngpui la äma üng nawngpaw bung aekhai kha nawngmäcaw kälang lawngtä hai aepawng dylä angcü üng nawngpaw tea täkübäjang sa by kae dy” näpa.
Isu ma nade cäpi na tea tähang kähawi py pa
13Khimi phütä na lä nade na tea Isu üng äkö thyng kha tähang kähawi py hai hethang nade na bung Isu tea nähai pa ö dy. Tungaila äkähui na lä hokä sa saite tea jawsi pa ö vi. 14Hikä awng te Isu ma nung te kätü-a lä, kädawtho kha äkähui na tea “Nade na bung kai tea ly hai ö mai sy. Mäkhang pa ö hang. Säthaw üng pre lä honi nade kätyng awng saite khimi na tähang vi. 15Tängai ö, nade na kätyng Säthaw üng pre pyng te tea ngai y saite khimi lä pre thung-a kung haw y lyng” näpa. 16Honi pyng-a Isu lä nade na bung täpawi kha äni ce qawng-a äkö thyng ea tähang kähawi py pa vi dy.
Tawngnang saite khimi
17Isu lä khölawng tho te thüng-a khimi lawngtä lä aehui kha äni üng maw-a aebo pa. Tukha Isu tea “Särae kähawi ä, dungtäsa hing te dang hethang kai lä makä sa he kae mei” näkha düng pa vi.
18Tudylä Isu ma äni tea “Nang lä ätephüng-a särae kähawi näkha kai tea thui te vi mei. Ämi lawngtä la hawi te y. Säthaw lawngtä xyng ni hawi te kae be. 19Nang lä Säthaw üng särilo mäny te kae be, ‘Khimi bung bädü hang. Täkübäjang sa hang, bäru hang, khimi ce phüng tüng y saite na jung kai-a tho hang, älo bälai hang, nang nä-awi ni nang pä-ai tea tämö khai näkha näsaite lo na awng be’” näpa.
20Äni ma “Särae ä, hini särilo na lä kai nade üng hai ma tängai pyng te vi dy” näkha mäthang haile pa.
21Isu lä honi khimi tea bälung aevaw te hai kätaw-a kheng dy. Äni ma “Nang sa hethang haetä ngai vi rawng. Nang üng awng saite angxynlyng na jaw king kha dang saite tangkae lä khimi kangtang na tea py pa. Hokä sa dylä nang lä Känipre ingthawng dang ai mang. Honi pyng-a dylä kai leithung hui” näpa. 22Äni lä vyngsai awngmang-a tawngnang phi saite khimi vi te phüng-a Isu üng thui saite lo thai te kätü-a lä mimai hawi pa y dy. Tukha äni lä bälung hawi pa y phi te hai ma Isu te üng ly ja pa dy.
23Isu lä äkähui na te mang-a aehawi ea “Vyngsai tawngnang saite khimi na lä Säthaw üng pre thung-a kung hethang rae bärai” näpa.
24Äkähui na lä Isu üng lo thai kha cangxei ö dy. Tungaila Isu ma “Särai na ä, Säthaw üng pre thung-a kung hethang lä rae bärai vi. 25Tawngnang saite khimi lawngtä Säthaw üng pre thung-a kung hethang qawng-a lä cäphrüng haetä khaw-a cäphö känawngjang käsa metä kung te lä jaky vi ai rawng” näpa.
26Hini lo phüng-a äkähui na lä tengxyng y cangxei te hai “Tudylä Säthaw lä ämi bung aeqang ai mei” näkha äma ce tingtawi aethui ö dy.
27Isu lä äni ce tea kähawi-a kheng ea “Hini lä khimi ce ma sa haw y. Tungaila Säthaw lä sa haw te kae. Säthaw lä äte angxynlyng na sa haw bawi te kae vi” näkha mäthang pa.
28Tudylä Peterae ma Isu tea “Kai ce lä äte angxynlyng khaisö kha nang leithung hui ö te vi dy” näkha näpa.
29Isu ma äni ce tea “Tängai ö, khimi lawngtä lä Kai hai Angthang Kähawi tähang-a ing, la, kangby jä-ai, kangpraw ticaw, nä-awi pä-ai, cäpaw cänung na bung khaisö dylä, 30vaihi dung-a ma phü cungvaitä aepu rae saite ing, la, kangby jä-ai, kangpraw ticaw, nä-awi pä-ai, cäpaw cänung na tea la dang vi ai. Tungaila khimi ce lä äni tea mätang bälai-a sa pa ö vi ai. Tukha vaimaw mang-a la dungtäsa hing saite dang vi ai rawng. 31Angcüky-a kälengky saite khimi na lä kangkhüng-a lä cäpiky-a awng ö vi ai. Vaihi cäpiky-a awng saite khimi na lä kangkhüng-a lä kälengky-a awng ö lae vi ai” näkha näpa.
Isu lä äma dü ai te phüng ämäthung lo thui pa
32Äni ce lä Jerusalem märü mang-a khölawng tho ö te kätü-a Isu lä äkähui na üng ämaw-a ly mang pa. Tukha äkähui na lä aethüng ö pa vi. Isu leithung hui saite khimi na la ri ö by vi dy. Isu lä äkähui lawng hawlai netä xyng na bung ka haile kha äma ämaw mang üng aeting hethang phüng na thui pa dy. 33Isu ma äkähui na tea “Tängai ö, mä-ai lä vaihi Jerusalem märü mang-a khölawng tho ö te vi. Honi märü-a khimi lawngtä lä Kai, Khimi üng Cäpaw, bung lä mäthykung käleng na hai Ubädi särae na üng kö thung-a a ö vi ai. Äni ce lä Kai bung bädü hethang tärae cei ö vi ai. Tupyng-a ceng kälang na kö thung-a a vi ai. 34Khimi ce ma Kai tea lä mänui hai kha mäce mäthawi ö vi ai. Bo kha kai bung bädü ö vi ai. Tungaila ämäthung käni-a kai lä hing haile tyng vi ai” näkha näpa.
Jaeko ni Johan üng mäkai saite na
35Zebede üng cäpaw na Jaeko ni Johan lä Isu tea ly kha “Särae ä, kai ni üng mäkai saite amäjy tea py jo by ä” näpa.
36Isu ma änini tea “Nang ni lä kai tea äte sa hethang ngai hai te mei” näkha düng pa.
37Änini ma Isu tea “Areng ä, nang ma phung-ang hai pre pyng saite kätü-a kai ni tähang nang üng bangtang mang-a lawngtä, bangrawi mang-a lawngtä aety nae py jo ba ä” näkha näpa hawi dy.
38Isu ma änini tea “Nang ni mäkai saite tea nang mani lä mäny hawi te y vi be tu kä-aw. Kai mätangbälai te kätyng nang ni lä khang haw ai mang mei. Kai üng naw mätang aeting te kätyng nang ni la aeting vawng haw hawi ai mang mei” näkha näpa.
39Änini ma “Kai ni lä aeting vawng haw hawi ai mang” näkha näpa hawi dy.
Isu ma änini tea “Nang ni lä kai kätyng mätangbälai hawi tätang vi ai. Kai kätyng naw saite la nang ni lä aeting hawi tätang vi ai. 40Tungaila kai üng bangrawi bangtang mang-a aety hethang kai py haw y lyng. Hini lä Säthaw ma äma re saite khimi na tähang py hethang kae vi” näpa.
41Hini phüng äkähui kälang lawng hawtä na ma thai ea Jaeko ni Johan tea kädawtho pa ö vi dy. 42Tukätephüng-a Isu lä äkähui angxynlyng na bung ka kha äni ce tea “Ceng kälang üng pre pyng saite khimi na lä äma ce üng khimi ce qawng-a säri aenae hai pyng ö te hai mätawngky na lä äni ce tea aenae hai pyng ö saite nang ce lä mäny ö dy. 43Tungaila nang ce lä hokä awng ö hang. Nang ce thung-a mätawngky sa hethang ngai saite khimi lä nang ce üng mawsawng-a sa ngece hethang kae. 44Äkälengky-a sa he ngai saite khimi lä khimi angxynlyng na üng mawsawng tangnae-a sa ngece hethang kae. 45Kai, Khimi üng Cäpaw, mäteng ma khimi ce tea mawsawng khai hethang ly te y vi. Khimi ce üng mawsawng-a awng hethang, khimi ce bung awngmang-a aeqang hethang hai Kai üng hing saite khaisö hethang ly te kae vi” näkha näpa.
Isu ma ämi kangjö Batime tea hawi sa pa
46Isu hai äkähui na lä Jerikhaw märü-a tyng ö dy. Isu lä äkähui na, khimipui na hai mangtä honi märü üng tho ö te kätü-a ämi kangjö lawngtä lä lolang teng-a aety kha tangkae mäkai pa vi. Hini khimi üng ämüng lä Batime vi. Ämüng üng älawngsai lä Time üng cäpaw vi. 47Äni lä Nazare märü üng Isu tyng te angthang thai te kätü-a äni lä “Sanphrang Davidae üng Cäpaw Isu ä, kai tea bäheng kü jo” näkha hang ea thui pa dy.
48Awng mang saite khimi na ma äni tea jawsi kha sitäri-a awng hethang mäkhang pa ö vi. Tungaila äni lä “Sanphrang Davidae üng Cäpaw Isu ä, kai tea bäheng kü jo” näkha ätüng käleng hai hang rae pa vi.
49Isu lä aedaw ea “Äni bung ka lawi” näkha näpa.
Tukätephüng-a äni ce lä ämi kangjö tea “Aethawsi hang. Aetha lawi. Areng ma nang bung ka dy” näkha näpa.
50Ämi kangjö lä äma üng äqawng-a aekhu saite känih äteng-a khaisö kha aebälü te hai aetha kha Isu tea ly pa dy.
51Isu ma äni tea “Nang tähang kai lä äte sa pa ai mei” näkha düng pa. Ämi kangjö ma,
“Särae ä, kai lä ämi aevang haile hethang ngai vi” näpa.
52Isu ma äni tea “Ly lawi mai cü. Nang üng yng saite phüng-a nang lä ämi nungsy te vi dy” näkha näpa.
Tudylä äni üng ämi lä aevang praw kha Isu ly saite lolang-a leithung mang hui pa vi dy.
11Jerusalem märü-a Isu kung pa
Mat 21:1-11; Luk 19:28-40; Joh 12:12-19
1Isu hai äkähui na lä Jerusalem märü teng-a tyng kha Bephake hai Bethani vang na teng üng Olive kung na awng saite me anghung-a tyng ö dy. 2Isu lä äkähui na thung üng lawng netä bung ka kha “Nang ni lä ämaw üng vang-a ly hawi ba. Vang thung-a kung te hai ruinawng mäkhing saite cäphö känawkhing käsa cäpi metä bung nung hawi ai mang ba. Honi cäphö lä ämi la aedang vai te y vi rawng. Honi cäphö üng ruinawng sö kha hi-a nähai hawi ba ä. 3Khimi lawng lawngtä ma ‘Ätephüng-a nang ni lä cäphö ruinawng sö hawi te vi mei’ näkha düng dylä ‘Honi cäphö bung Areng ma aely ngai te vi. Tha haile tyng raw ai mang’ näkha nähawi ba” näkha täru ea mätaw pa.
4Tukha äkähui lawng netä la ly kha lolang-a aedaw saite cäphö metä nung hawi dy. Honi cäphö bung lä ing haetä üng kätho-a mäkhing pa vi. Änini la cäphö ruinawng sö hawi dy. 5Lolang-a aedaw saite khimi phütä na ma änini tea “Makäte phüng-a nang ni lä cäphö ruinawng sö hawi te vi mei” näkha düng pa ö dy.
6Äkähui ni lä Isu ma thui hai te kätyng mäthang pa te phüng-a änini tea ly hethang py pa ö dy. 7Tudylä äkähui ni lä cäphö cäpi bung Isu tea nähai hawi pa. Honi cäphö qawng-a lä äma ni üng kä-o na khu hawi pa vi. Tupyng dylä Isu lä cäphö qawng-a aedang pa dy. 8Awng mang saite khimipui na lä äma ce üng kä-o na lolang qawng-a mädai pa ö dy. Khimi phütä na ma lä vang ärang mang üng thing sai na hai lolang qawng-a mädai pa. 9Isu üng leithung leimaw mang-a hui saite khimi angxynlyng na ma lä “Mä-ai Säthaw tea hosana näkha bälaw ö si. Areng üng ämüng hai ly saite lawngtä tea Säthaw ma tähang kähawi py sy. 10Mä-ai üng kangsi Davidae üng pre tea lä Säthaw ma tähang kähawi py sy. Aesangky saite Säthaw tea Hosana näkha bälaw ö si” näkha ätüng käleng hai-a pa ö vi dy.
11Isu lä Jerusalem märü-a kung kha Säthaw üng Ingkäcai-a ly pa dy. Äte angxynlyng na tea kheng kha käni düng pa te phüng-a äkähui lawng hawlai netä na hai mangtä tho ea Bethani vang-a ly ö dy.
Thaidö kung tea Isu ma mäthawi pa
12Nitä pyng üng kädang mang-a Isu hai äkähui na lä Bethani vang mang üng vawi haile te kätü-a Isu lä böjo aelang pa dy. 13Ärang awng mang saite thaidö kungtä bung kähanglaw mang nung ea Isu lä äthai na mäqang hethang äkung teng-a ly pa dy. Tungaila äthai aethai saite kätü y te phüng-a äkung qawng-a ärang na qaitä awng pa kae vi. 14Tupyng-a Isu ma “Vai üng hai aetawng ämaw mang-a la nang üng äthai ämi la ca hang sy” näkha thaidö kung tea näpa.
Hokä äni üng thui te lo tea äkähui na lä thai ö vi.
Isu lä Säthaw üng Ingkäcai-a ly pa
Mat 21:12-17; Luk 19:45-48; Joh 2:13-22
15Isu hai äkähui na lä Jerusalem märü-a tyng ö te kätü-a Isu lä Ingkäcai baesung thung-a kung pa. Tukha Isu ma Ingkäcai baesung thung-a löci aesa hethang tawngbawi na rang saite khimi na hai jaw saite khimi angxynlyng na bung mätho pa. Tangkae aeleng saite khimi na üng khung na hai bähö jaw saite khimi na üng aety nae na tea la aekhu mo rung khytä nui pa vi dy. 16Ingkäcai baesung mang cäqeng kha jaw hethang vyngsai na nähai hethang Isu ma ämi tea la py pa y vi dy. 17Tukha Isu ma, “Äni ce tea Caekäcai-a tärü saite lä, Säthaw ma ‘Kai üng Ingkäcai lä khimi ceng angxynlyng na tähang aetang nae näkha mäthi ö vi ai’ näkha näpa. Tungaila nang ce lä hini Ing tea damarae na üng täbö tärawng-a bälawng ö lae te vi be tu lä” näkha pring pa.
18Mäthykung käleng na hai Ubädi särae na ma Isu sa saite phüng thai kha äni ce lä Isu bung bädü hethang älang ha ö pa dy. Khimipui angxynlyng na lä Isu üng mätu saite lo thai kha cangxei ö te phüng-a äni ce lä Isu tea ri ö vi dy.
19Kädüng tyng te kätü-a Isu hai äkähui na lä märü thung üng thoja ö pa.
Thaidö kung käcei
20Nitä pyng üng kädang mang-a Isu hai äkähui na lä lolang-a aeke te thüng-a thaidö kung tea nung ö dy. Honi äkung lä angjüng üng hai aetawng kha cei king pa vi dy. 21Peterae lä Isu thui saite lo tea aedawng haile va kha “Särae ä, kheng kae-e. Nang ma mäthawi saite thaidö kung lä cei king vi dy” näkha näpa.
22Isu ma äni ce tea “Säthaw tea yng ö lawi. 23Tängai ö. Khimi lawngtä lä hini me anghung tea ‘Nang ma ma bung aethui kha pangle tui thung-a aekäde ja la’ näkha äma lä tätang mang mei näte bälung kaedawng hai awng y käla yng dylä, Säthaw ma äni tea lä äma thui te kätyng sa pa vi ai. 24Tukätephüng-a nang ce tea kai thui te lä, nang ma ce ma mäkai saite na tea dang ngece ai näkha yng dylä mäkai saite angxynlyng na lä dang ö vi ai. 25-26Nang ce lä aedaw kha aetang te kätü-a nang ce tea sa tämang saite khimi tea lä bälawi hethang kae vi. Tukä ea ni Känipre-a awng saite nang ce üng Pä-ai lä nang ce sa tämang saite na tea bälawi vi ai.”11:25-26 Phütä Käri Caekäcai thung-a lä kädawng 26tä awng. Nang ce lä khimi ce üng hunghö na bälawi y dylä, Känipre-a awng saite nang ce üng Pä-ai la nang ce üng hunghö bung bälawi y by lyng.
Isu üng aenae phüng düng pa
27Isu hai äkähui na lä Jerusalem märü-a tyng ö haile be dy. Isu lä Säthaw üng Ingkäcai baesung-a aeke te kätü-a mäthykung käleng na, Ubädi särae na hai mätawngky na lä Isu tea ly pa ö dy. 28Tukha äni tea “Nang lä hini na äte aenae hai sa te mei. Hini aenae lä nang tea ämi ma py te mei” näkha düng pa ö vi.
29Isu ma äni ce tea “Nang ce tea kai älo haetä düng by ai. Nang ce ma mäthang pyng dylä hini sa saite na ämi üng aenae hai sa mei näte kai ma nang ce tea thui ai mang. 30Baptismae Johan lä khimi ce tea baptismae py hethang Säthaw ma äni tea aenae py te mei. Khimi ce ma py te mei. Dei thui ö” näpa.
31Äni ce lä äma ce tingtawi aedüng aethui ö ea “Säthaw ma äni tea thui te näkha mä-ai mäthang dylä ‘Ätephüng-a nang ce lä Johan tea yng ö y te vi mei’ näkha düng he kae dy. 32Khimi ce ma Baptismae Johan tea thui te näkha näpa dylä aesyng y lyng” näkha aethui ö dy. (Khimi qütä lä Johan tea buisaw näkha yng ö te phüng-a äni ce lä khimipui na tea ri ö te vi.) 33Tukätephüng-a äni ce ma “Kai ce lä mäny y” näkha Isu tea mäthang pa ö haile dy.
Tudylä Isu ma äni ce tea “Tukä dylä kai lä ämi üng aenae hai hini na sa te mei näte phüng nang ce tea thui y by lyng” näkha näpa.
12Cäpje angkhaw üng vang saite kung na hai mätae pa
1Tupyng-a Isu lä äni ce tea mätae te lo hai thui pa. Isu ma “Khimi lawngtä lä Cäpje angkhaw-a Cäpje kung e kha angkhaw aepang aekilü pa dy. Cäpje thai na aeti nae angrawng kähawi-a tai kha dyng nae ing kaesang haetä la sa te vi. Tupyng-a äni lä angkhaw bung khimi kälang na tea vang hai kha khölawng kähanglaw-a thoja pa dy. 2Cäpje thai na käcüng hethang kätü tyng tea lä angkhaw kung ma mawsawng lawngtä bung angkhaw vang saite khimi na tea mätaw kha angkhaw vang Cäpje thai mäkai hai pa dy. 3Angkhaw vang saite khimi na lä honi mawsawng bung mätawng rang ea bo kha äte haetä la py pa y käla ma bälawi sö tyng pa vi. 4Tupyng-a angkhaw kung lä mawsawng kälang lawngtä bung mätaw haile tyng pa be dy. Angkhaw vang saite na lä honi mawsawng üng älö-a bo kha käsi prawng pa ö dy. 5Angkhaw kung lä mawsawng kälang lawngtä bung mätaw haile tyng be ea lä angkhaw vang saite khimi na ma äni bung lä bädü pa vi. Äni ma mawsawng kälang awng mang saite na tea mätaw pa. Mawsawng phütä tea lä äni ce ma bo kha phütä na bung lä bädü pa ö vi. 6Angkhaw kung lä mätaw hethang äma bälung aevaw saite äcäpaw lawngtä xyng ni awng pa kae vi dy. Tukha Kangkhüng-a äni lä ‘Kai ma üng cäpaw tea lä äni ce tämö khai ö ai müng’ näkha aedawng ea äma üng cäpaw bung mätaw pa dy. 7Tungaila äni ce ma ‘Hini khimi lä angkhaw kung üng ingthawng kaety vi. Co, äni bung bädü ö kae si. Tudylä angkhaw bung mä-ai dang ai mang’ näkha äma ce tingtawi aedüng aethui ö dy. 8Tukätephüng-a äni ce lä äcäpaw bung nerang ea bädü pyng-a lä angkhaw rang mang-a kädesö pa ö vi dy.
9“Tudylä angkhaw kung lä makä sa ai mei. Äni lä ly kha angkhaw vang saite khimi na tea bädü ea Cäpje angkhaw bung lä khimi kälang na tea vang hai vi ai. 10Caekäcai thung-a tärü saite lä,
‘Ing sa saite khimi na ma khaisö saite kälung lä
aely kälengky saite kälung-a aelawng vi.
11Hini lä Areng ma sa saite vi.
Mä-ai üng maw-a cangxei saite vi dy’ näkha, nang ce phai ö vi ai” näpa.
12Judae mätawngky na lä äma ce tea Isu ma e te lo hai mätae kha thui te mäny te phüng-a äni bung nerang hethang aethawsa ö dy. Tungaila äni ce lä khimipui na tea ri ö te phüng-a äni te üng tho ö kae dy.
Angko py saite phüng
13Tupyng-a Judae mätawngky na lä Pharisai phütä na hai sanphrang Herodae üng äpy phütä na bung Isu tea käny hethang mätaw pa ö vi. 14Honi khimi ce ma Isu tea ly ea “Särae ä, nang lä kätüng khaw saite älo ni thui te kai ce lä mäny. Khimi ce ma nang phüng makä dawng kha thui ngaila, nang lä dawngcang te y vi. Khimi üng mimai tea kheng y käla Säthaw üng älang tea kätüng khaw-a mätu te vi. Kai ce lä Sica sanphrang tea angko py sang mei, py sang y mei. Kai ce tea thui” näkha düng pa.
15Tungaila Isu lä äni ce üng käjüng aesa saite mäny pa vi. Äni ma “Nang ce lä kai tea ätephüng-a käny näpi ö te vi mei. Kai ma kheng hethang phawisae pjaetä nähai” näpa.
16Äni ce lä Isu tea phawisae pjaetä nähai pa ea lä Isu ma, “Hini-a ämi üng ämaw äcae hai ämüng awng mei” näkha düng pa.
Äni ce ma, “Sica sanphrang üng äpung hai ämüng awng” näkha mäthang pa.
17Tudylä Isu ma “Sica sanphrang pyng saite lä Sica sanphrang tea py pa ö. Säthaw pyng saite na lä Säthaw tea py ö” näkha näpa.
Tukha äni ce lä Isu tea cangxei ö vi dy.
Kädü thung üng aetha saite phüng
18Tudylä kädü thung üng aetha haile te awng y näkha yng saite Sadukai phütä na lä Isu tea ly pa ö dy. 19Äni ce ma “Särae ä, Mosi ma äma üng Ubädi thung-a mä-ai tähang tärü te lä ‘Khimi lawngtä lä caw na dang y käla dü taqawi dylä änawngpui bung äkangby na ma aekö hai he kae. Ätephüng-a mei nädylä dü saite äjä-ai üng amäjy aepreng hai he kae te vi.’ 20Qengtä-a kangby jä-ai lawng säritä lä awng. Äjä-aiky lä ingthawng sa kha caw na dang y käla ma dü vi. 21Tukha äni üng kangby kälengky lä äjä-ai nawngmädi bung aekö dy. Honi kangby la caw na dang y käla dü tyng pa. Hini kätyng äbaeni kangby la hini nawngmädi bung aekö kha caw na dang y käla dü be tynglyng pa vi. 22Tupyng-a kangby jä-ai angxynlyng lawng säritä na lä hini nawngmädi bung aekö hai bawi kha caw na dang y käla dü ö bawi vi dy. Kangkhüng-a lä nawngmädi la dü by vi dy. 23Kangby jä-ai angxynlyng lawng säritä na lä hini nawngmädi hai aepawng bawi te phüng-a kädü thung üng aetha haile tyng saite kätü-a lä honi nawngmädi lä ämi üng nawngpui-a aelawng ai mei” näkha düng pa ö dy.
24Isu ma äni ce tea “Nang ce lä Caekäcai tea mäny ö te y vi. Säthaw üng haidae phüng la mäny ö y. Tukätephüng-a nang ce lä dawng tämang ö te dy. 25Khimi ce lä kädü thung üng aetha haile te kätü-a lä aepawng saite awng y ai dy. Äni ce lä Känipre üng angtawtha na kätyng aelawng ö vi ai. 26Dü saite khimi na lä aetha haile ai te phüng, Mosi üng cae tea nang ce lä phai vai y mei. Honi cae-a lä maikang saite angprüng phüng la qa vi. Honi kätü-a Säthaw ma Mosi tea ‘Kai lä Abraham üng Säthaw, Isaika üng Säthaw hai Jaeko üng Säthaw vi’ näpa. 27Tukätephüng-a honi Säthaw lä dü saite khimi na üng Säthaw y. Hing saite khimi na üng Säthaw kae. Nang ce lä dawng te tengxyng y tämang ö dy” näkha näpa.
Särilo kälengky
28Hokä Isu hai Sadukai na lä älo ae-e ö te kätü-a, Ubädi särae lawngtä lä äteng-a awng pa vi. Äni ce tea Isu ma kähawi-a mäthang te äni lä thai te phüng-a Isu tea ly dy. Tukha äni ma “Särilo angxynlyng na thung-a manita lä lengky mei” näkha düng pa.
29Isu ma “Aely lengky saite särilo lä hini dy. ‘Isrelae khimi ce ä, tängai ö. Mä-ai üng Areng lä Säthaw vi. Äni lawngtä xyng ni Areng kae vi. 30Nang ce üng Areng Säthaw tea bälung mäke hai bälunghaesy te kaedawng angxynlyng na hai, aethaw awng saite angxynlyng na hai bälung aevaw hethang kae’ näpa. 31Äbaeni aely lengky saite särilo lä ‘Nang ma tea bälung aevaw te kätyng äpy äjae tea bälung aevaw hethang kae’ näpa. Honi särilo känetä qawng-a lengky saite särilo lä awng y dy” näkha mäthang pa.
32Ubädi särae ma “Särae ä, nang thui te lä tüngkhaw vi. Säthaw lä lawngtä xyng awng te kae vi. Säthaw kälang lä awng y dy. 33Säthaw tea bälung mäke hai bälunghaesy te kaedawng angxynlyng hai aethaw awng saite angxynlyng na hai bälung aevaw hethang kae. Mä-ai ma tea bälung aevaw te kätyng äpy äjae na tea bälung aevaw hethang kae näkha särilo känetä tea tängai hethang kae. Hini na lä Säthaw tea maisawi kha löci aebawng saite na qawng-a hai Säthaw tea py saite kälang angxynlyng na qawng-a aely lengky vi” näkha Isu tea näpa.
34Honi khimi lä hikä äma üng bälunghae saite hai thui te phüng-a Isu ma äni tea “Nang lä Säthaw üng pre hai hanglaw y dy” näkha näpa.
Tupyng-a ämi lawngtä la Isu tea älo düng vawng ö pa y vi dy.
Mesia phüng älo düng pa
35Isu lä Säthaw üng Ingkäcai baesung thung-a Säthaw lo mätu te thüng-a äni ce tea “Mesia lä Sanphrang Davidae üng Cäpaw vi näkha ätephüng-a Ubädi särae na lä thui haw ö te mei. 36Sanphrang Davidae lä Muilaw Käcai hai thui te vi. Äni ma,
‘Kai üng Areng tea Säthaw ma thui te vi.
Nang üng täre na bung nang üng kho bäde täkui-a kai ma khai y rytä lä,
kai üng bangtang mang-a aety ba’ näkha nä vi.
37“Davidae lä Mesia tea ‘Areng’ näkha ka vi dylä, Mesia lä makä sa kha Davidae üng cäpaw-a aelawng haw ai mei” näkha näpa.
Ubädi särae na tea aehi hethang täru pa
Khimipui na lä Isu üng lo tea kawng te hai ma tängai ö vi dy. 38Hikä äni ce tea Säthaw lo mätu te thüng-a Isu ma “Nang ce lä Ubädi särae na tea aehi ö. Äni ce lä kä-o käsadui-a aelawng kha aeke lawlae hethang ngai ö vi. Seng mityng thung-a khimi ce ma äni ce bung tämö khai kha lady pa hethang ngai ö te vi. 39Judae na üng ingkäcai mityng kähawi-a aety hethang ngai ö bärai te vi. Pawi sa saite ing-a la hawiky saite mityng-a aety hethang ngai ö te kae vi. 40Äni ce lä nawngmädi lömai ingthawng na tämo kha la ea käjüng sa kha sadui-a aetang ö te vi. Säthaw lä äni ce tea khimi kälang na qawng-a käsiky saite dengpy vi ai” näpa.
Lömai nä-awi üng thawlawng
41Isu lä Säthaw Ingkäcai üng thawlawng bung maw-a aety kha khimi ce üng thawlawng tangkae na py ö te tea kheng pa. Tawngnang saite khimi na lä tangkae awngmang-a py pa ö vi dy. 42Tupyng-a nawngmädi lömai kangtang lawngtä lä ly kha phawisae pjae netä thawlawng bung thung-a lung pa vi. 43Tupyng-a Isu lä äkähui na bung mangtä ka kha äni ce tea “Tängai ö. Hini nawngmädi lömai kangtang lä khimi kälang angxynlyng na qawng-a tangkae py ky vi. 44Hini khimi angxynlyng na lä äma ce awng saite na thung üng kanglai na ta py ö te kae. Tungaila hini lömai nawngmädi kangtang lä äma hing hethang aelo xyng-a awng saite angxynlyng na py king te vi” näkha näpa.
13Säthaw üng Ingkäcai mäne saite
1Ingkäcai baesung thung üng Isu lä tho te thüng-a äkähui lawngtä ma “Särae ä, kheng kae-e. Hini kälung käleng na hai Ing na lä äcae hawi na ly” näpa.
2Isu ma “Hini Ing üng kälung käleng na nang ce lä nung ö dy. Hini kälung na lä haetä qawng-a kälang haetä aeqynlyng y te kätü lä tyng vi ai. Täre na ma hini kälung na tea mäne ö sangxang pa vi ai rawng” näpa.
Mätang bälaica saite na
3Isu lä Olive kung na awng saite me anghung mang Säthaw üng Ingkäcai tea ämaw khai kha äma qaitä aety vi dy. Peterae, Jaeko, Johan hai Andru ce lä khimi ce awng y te thüng-a Isu tea ly pa ö dy. 4Äni ce ma “Areng ä, nang thui saite lä mata kätü-a tyng ai rawng mei. Honi na tyng saite kätü-a lä äte kamarae na tho ai mei. Kai ce tea thui jo ba ä” näkha düng pa.
5Isu ma äni ce tea “Nang ce tea khimi ce ma kaeling kaemae sa y hethang sädi khai ö ba. 6Awng mang saite khimi na lä kai ämüng aengang kha ly ö ai. Äni ce ma ‘Kai lä Mesia dy’ näkha thui ö vi ai. Äni ce lä khimi awng mang saite na tea kaeling sa ö vi ai. 7Nang ce lä kaenai üng täre aety saite tüng thai ö ai. Kähanglaw üng täre aety saite angthang na thai te kätü-a la ri ö hang. Hokäti amäjy na lä tyng ngece ai. Tungaila Kangkhüng käni lä tyng te y vi rawng. 8Ceng haetä hai haetä, pre haetä hai haetä täre aety ö ai. Mityng qütä-a pangtälü naw kha bötäkang na la tho ai. Hini na lä nawngmädi lawngtä äma äby aepeng y te kälang-a äjo naw angcü te kätyng awng vi ai.
9“Nang ce lä kähawi-a sädi khai ö. Khimi ce ma nang ce bung jung kai-a nähai ö ai. Judae na üng ingkäcai na thung-a nang ce tea bo ö ai. Nang ce lä kai phüng-a pre pyng saite na hai sanphrang na üng maw-a tyng kha Angthang Kähawi äni ce tea thui ö ai. 10Kangkhüng kätü tyng y kälang-a ma Angthang Kähawi lä khimi angxynlyng na tea thui pa hethang kae. 11Nang ce bung ne kha jung kai-a tha saite kätü-a makä älo tho ai mei näte phüng bälung mawng ö rüng y ma. Honi kätü-a älo thui hethang Säthaw ma nang ce tea py ai mang. Honi lo na lä nang ce üng älo na y lyng. Muilaw Käcai üng thui saite älo na kae mang. 12Khimi ce lä kangby jä-ai tingtawi dü hethang tähang ae-a ö ai. Äpä-ai ma äcäpaw bung a ai. Äcäpaw ni äcänung lä änä-awi ni äpä-ai tea engleng sa kha bädü hethang a pa ö ai. 13Kai üng phüng-a khimi angxynlyng na lä nang ce tea esäre ö ai. Tungaila kangteng khytä cakhi-a awng saite khimi tea lä Säthaw ma aeqang pa vi ai” näpa.
Känyng kha ri hethang hawi saite na
14Isu ma “Känyng kha ri hethang hawi saite na lä awng vai bi y saite mityng-a aedaw te nang ce lä nung ö ai. Caekäcai phai saite khimi lä hini thui saite tea mänysy. Hokä nung ö te kätü-a Judae khö-a awng saite khimi na lä me anghung mang-a aehui ö kae sy. 15Engphö-a awng saite khimi lä ätäkui-a aerung ea ingthung üng äte haetä tea la y käla ma aehui kae sy. 16Lai-a awng saite khimi tea la äma üng kä-o la hethang ing-a vawi y käla ma aehui kae sy. 17Honi kätü-a lä äjopawng saite nawngmädi hai nökai kä-awng na lä tengxyng y rae saite tyng ö vi ai. 18Honi kätü-a lä säding tyng y hethang tähang-a aetang ö. 19Säthaw ma älawng sa te kätü üng hai vaihi khytä khimi ce lä qengtä la hini kätyng mätangca saite aeting vai te y. Khawngdüng-a la aeting haile tyng ö y ai lyng dy. 20Areng lä äma re saite khimi na tähang phüng-a honi kätü tea dawi hai te vi dy. Äni ma honi kätü tea dawi hai y dylä ämi lawngtä la hing haw y lyng.
21“Honi kätü-a khimi lawng lawngtä ma ‘Kheng e. Hi-a Mesia lä awng dy’ y käla ‘Kheng e. Ho-a Mesia awng dy’ näkha thui dylä yng ö hang ba. 22Mesia käjüng aesa saite hai buisaw käjüng aesa saite na tho kha cangxei saite na hai kamarae na mätü ö vi ai. Äni ce sa haw dylä Säthaw ma re saite khimi na tea yng te tämang rung khytä sa vi ai. 23Nang ce lä kähawi-a sädi khai ö. Honi angxynlyng na phüng nang ce tea kai ma thui rüng te dy ba” näpa.
Khimi üng Cäpaw ly ai te phüng
24“Mätang saite na tyng pyng te kätü-a Käni lä ving ai. Law lä aevang ngang y dy. 25Tengpaw na la khösang mang üng aeqa ai. Käni khösang üng na tea ca rung khytä sui saite haidae na tea lä tähüng pa vi ai dy. 26Tupyng-a Kai, Khimi üng Cäpaw, lä haidae hai phung-ang hai khö angnüng thung mang ly te khimi ce ma nung ö ai. 27Tukha Kai, Khimi üng Cäpaw, lä re saite khimi na bung käcüng hai hethang Känipre üng angtawtha na bung khöteng täki bälitä mang-a mätaw ai” näpa.
Thaidö kung
28“Thaidö kung üng älawngsai hai-a aetu ö. Thaidö kung lä kädo käna tho kha ärangsai te kätü-a lä nisae aenai te nang ce lä mäny ö dy. 29Honi kätyng kai thui pyng saite amäjy na tyng te nang ce nung te kätü-a lä, Kai, Khimi üng Cäpaw, lä ly haile ai te kätü aenai vi dy näkha nang ce lä mäny ö ai. 30Tängai ö. Hini angxynlyng na tyng te cung bawi y rytä lä vaidung üng kaetha na lä dü ö y ai rawng. 31Käni hai älawng lä pra ngaila kai üng älo lä manila pra y vi ai.
Kätü hai käni tea ämi la mäny y
32“Honi kätü hai käni lä mani tyng ai mei näte ämi la mäny y. Känipre üng angtawtha na la mäny y. Äcäpaw la mäny y. Pä-ai lawngtä xyng ni mäny haw te kae vi. 33Honi kätü käni lä mani tyng ai mei näte nang ce mäny y te phüng-a kähawi-a sädi khai ö. Canglailing-a awng ö. 34Hini lä khölawng hanglaw-a ly ja saite khimi lawngtä hai aetawng vi. Äni lä äma üng ing bung äma üng mawsawng käleng na tea a pa. Sa hethang kälu haetä ta mawsawng na tea py qi pa dy. Hawngkhae ty saite kung tea lä kähawi-a aering hethang älo täru khi pa dy. 35Tukätephüng-a ingkung vawi haile hethang kätü nang ce lä mäny y te phüng-a, kähawi-a aerü rüng kha aering ö. Äni lä kädüng-a läsy, angnihü-a läsy, aekhawng angcü-a läsy, khö aevang sungsang tea läsy vawi haile haw te kae vi. 36Ingkung tyng haile poco dylä, nang ce i-sämu te hai nang ce tea aeting y hethang sädi khai ö ba. 37Nang ce tea kai thui te kätyng, khimi angxynlyng na tea la thui te by kae dy. Kähawi-a aering ö ba” näkha näpa.
14Isu bung bädü hethang aeceng pa
Mat 26:1-5; Luk 22:1-2; Joh 11:45-53
1Cäqengja te pawi hai täkaw aepae saite aesi qa y te pawi tyng hethang käni netä ngai kae dy. Tukha mäthykung käleng na hai Ubädi särae na lä Isu bung kangru-a ne kha bädü hethang älang mäqang ö dy. 2Äni ce ma “Pawi käni-a mä-ai lä äni bung ne te dang y lyng. Khimipui na aepuilung ö vi ai” näkha näpa.
Bethani vang-a Isu üng älö-a situi bälawng pa
3Isu lä Bethani vang-a ängang käsi mang vai saite Simon üng ing-a awng. Äni ca te kätü-a nawngmädi lawngtä lä kung kha ävang ting bärai saite nadu näte rimui kähawi kälung kanglung pilang tea süng pa vi. Honi rimui bung mäkhawi kha nawngmädi ma Isu üng älö-a bälawng pa dy. 4Khimi phütä na lä kädawtho kha “Ätephüng-a hikä rimui tea täpang aetütü te mei. 5Hini rimui tea phawisae cungvai thungtä cang y hai jaw kha dang saite phawisae hai khimi kangtang na tea py te lä hawiky” näkha äma ce tingtawi aethui ö dy. Tukha äni ce lä nawngmädi tea jawsi pa ö vi.
6Isu ma “Awng kae sy. Nawngmädi tea käbi py ö hang. Kai tea äni ma sa saite lä hawi te kae ecy. 7Mätang saite na lä nang ce hai mangtä awng jawjaw te kae be. Nang ce ngai te kätü qütä äni ce tea säbawng ö haw vi. Kai lä nang ce hai mangtä awng jawjaw ngang y lyng. 8Hini nawngmädi lä äma sa haw saite hai kai tea sa dy. Kai üng äro bung ö hethang äni lä aerü rüng kha kai üng ätabung qawng-a rimui tui hai bälawng te vi dy. 9Tängai ö. Khimi ce ma Angthang Kähawi thui saite älawngpre qütä-a lä, hini nawngmädi ma sa saite phüng thui kha äni ce lä sämai jaw ö vi ai” näpa.
Judae lä Isu bung a hethang bälung aedü pa
10Tupyng-a äkähui lawng hawlai netä na thung üng Judae Iskriota lä Isu bung a hethang phüng aedüng he mäthykung käleng na tea ly pa dy. 11Äni ce lä hini phüng thai kha tengxyng y kawngphi te hai ma Judae tea tangkae py hethang älo aedo pa ö dy. Tukätephüng-a Judae lä Isu bung a hethang älang kähawi mäqang pa dy.
Areng üng Kädüngbö
Mat 26:17-25; Luk 22:7-14; 21-23; Joh 13:21-30
12Täkaw aepae saite aesi qa y te pawi üng angcü käni-a Judae khimi na lä cäqengja te pawi tähang beram caw bädü hethang reitae awng te vi. Tukha äkähui na ma Isu tea “Areng ä, nang üng Cäqengja te pawi kädüngbö ca hethang kai ce lä mani mityng-a aerü rüng pa ai mei” näkha düng pa.
13Isu ma äkähui lawng netä tea “Nang ni lä märü thung-a ly hawi ba. Awikaw aepawi saite khimi lawngtä tea nang ni lä aeting hawi ai mang. Honi khimi leithung nang ni lä hui hawi ba ä. 14Äni kung saite üng ingkung tea ‘Särae ma “Kai üng äkähui na hai kai ce lä mangtä Cäqengja te pawi-a kädüngbö ca hethang mityng lä ma-a mei nä vi” näkha düng ba’ näpa. 15Äni ma sa rüng saite ing qawng üng teithung käleng haetä nang ni tea mätü pa ai mang. Honi mityng-a nang ni lä mä-ai kädüngbö ca hethang aerü hawi rüng ba ä” näkha täru pa.
16Honi äkähui lawng netä lä tho kha märü thung-a kung pa hawi dy. Märü thung-a tyng te kätü-a lä Isu ma thui te kätyng aeting khaw kha Cäqengja te pawi üng kädüngbö tähang sa hawi rüng pa dy.
17Kädüng tyng te kätü-a, Isu lä äkähui lawng hawlai netä na hai mangtä ly ö dy. 18Äni ce lä bö aw kha ca ö te thüng-a, Isu ma “Tängai ö. Nang ce thung üng kai hai mangtä bö ca saite khimi lawngtä ma kai bung lä täre na kö thung-a a vi ai” näkha näpa.
19Äkähui na lä bälung hawi y phi te hai ma “Hini lä kai mei” näkha lawngtä pyng-a lawngtä ma Isu tea düng pa ö dy.
20Isu ma äni ce tea “Hini khimi lä nang ce lawng hawlai netä thung üng vi. Kai hai mangtä täkaw hai pangkae-a täpaw kha ca saite khimi vi. 21Caekäcai ma tärü te kätyng Kai, Khimi üng Cäpaw, lä dü vi ai. Tungaila Kai, Khimi üng Cäpaw, bung täre na kö thung-a a saite khimi lä tähang si. Honi khimi aepeng y khyry dylä äni tähang lä hawiky” näpa.
Areng üng kädüngbö phüng
Mat 26:26-30; Luk 22:14-20; 1 Kor 11:23-25
22Isu hai äkähui na lä kädüngbö ca ö te thüng-a Isu lä täkaw la kha Säthaw tea kawng te lo thui pa dy. Tupyng-a täkaw tea täpe kha äkähui na tea “Hini täkaw lä kai üng ätabung vi. La kha ca ö” näkha thui pyng-a py pa dy.
23Tukha cäpje tui bynglyng tea la kha Säthaw tea bälaw pyng-a äni ce tähang py pa ea äni ce angxynlyng na lä nei ö dy. 24Isu ma “Hini cäpje tui lä awng mang saite khimi na tähang bälawng te kai üng äthi vi. Hini äthi lä Säthaw hai khimi ce säla-a aenai saite vi. 25Tängai ö. Säthaw üng pre-a cäpje tui kangthae kai nei te kätü tyng y rytä lä, kai lä hini cäpje tui tea nei haile tyng bi y ai dy” näkha näpa.
26Tupyng-a Isu lä äkähui na hai ae-awi haetä thui pyng-a, Olive kung na awng saite me anghung mang-a ly ö dy.
Peterae üng aephae ai te phüng thui rüng pa
Mat 26:31-35; Luk 22:31-34; Joh 13:36-38
27Isu lä äni ce tea “Caekäcai thung-a tärü saite lä, ‘Kai lä beram rui saite kung bung bädü vi ai. Tukha beram na lä aehui sangxang ö vi ai’ näkha awng. Honi kätyng nang ce angxynlyng na ma kai bung lä khaisö kha aehui ö pang vi ai. 28Tungaila kai lä kädü thung üng aetha haile tyng pyng-a, Kalile khö-a nang ce üng maw-a ly mang vi ai” näkha näpa.
29Peterae ma Isu tea “Khimi kälang angxynlyng na ma nang bung khaisö ngaila kai lä nang bung khaisö y lyng” näkha näpa.
30Isu ma Peterae tea “Tängai khü Peterae ä, Vaidüng kärung ae qengnetä khawng y te kälang-a nang lä ‘Äni tea kai lä mäny y’ näkha qengthungtä aephae ai to” näkha näpa.
31Tungaila Peterae lä Isu tea “Kai lä nang hai mangtä dü hethang ea mäteng ma nang bung mäny y näkha aephae y lyng” näkha cüngtang khü-a ma thui tyng pa dy.
Tukha äkähui kälang angxynlyng na la hini kätyng thui ö bawi pa by dy.
Kesamani angkhaw thung-a Isu aetang pa
32Isu hai äkähui na lä Kesamani ämüng awng saite angkhaw haetä-a ly ö dy. Isu lä äkähui na tea “Kai aetang te thüng-a nang ce lä hini mityng-a aety ö ba” näkha täru pa. 33Tupyng-a Isu lä Peterae, Jaeko hai Johan ce bung äma hai mangtä ka pa. Isu lä tengxyng y ri te hai bälungbi phi pa vi dy. 34Tukha Isu ma äni ce tea “Kai lä dü aenai te khytä bälungbi phi vi dy. Nang ce lä hini mityng mang awng kha kähawi-a aering ö ba” näpa.
35Tupyng-a Isu lä äjecäcaw äni ce maw mang ly kü kha älawng qawng-a aebo pa dy. Hini mätang saite aeting y käla aehi haw hethang tähang-a äma lä aetang vi dy. 36Isu ma “Ä-ai ä, nang lä äte angxynlyng na tea sa haw te kae. Hini mätangbälai saite kai aeting y hethang säbawng kü jo. Tungaila kai üng ngai te kätyng hang sy. Nang ma üng ngai te kätyng kae sy ba” näkha aetang pa dy.
37Tupyng-a Isu lä äkähui lawng thungtä na tea aekö haile tyng kha äni ce lä i ö qu ea awng te nung pa. Tukätephüng-a Isu ma Peterae tea “Simon ä, nang lä i kha awng te kae dy mei. Tänaeritä mäteng ma i y käla aering haw y vi dy nang mei” näkha düng pa. 38Tukha Isu ma äni ce tea “Nang ce lä hunghö bärawi bäleng saite thung-a qa y hethang aetang kha aering ö baw. Bälung hai lä hunghö sa hethang ngai y ngaila ätabung lä aethaw awng y” näpa.
39Isu lä ly haile tyng kha äma angcü üng thui te kätyng-a aetang haile tyng be dy. Tupyng-a Isu lä 40äkähui lawng thungtä na tea aekö haile tyng be ea lä äni ce lä ämi aemö ö phi te phüng-a i ö te nung tynglyng pa be vi dy. Äni ce lä Isu tea makä thui haile ai mei näte mäny pa ö y dy.
41Isu ma äni ce tea ämäthung ly haile tyng be te kätü-a lä, äni ce tea “Nang ce lä vaihi khytä i kha aehae ö te vi rawng mei. Hawi ö dy cy. Kai üng kätü lä byng ai dy baw. Khimi lawngtä ma Kai, Khimi üng Cäpaw, bung lä hunghö sa te na üng kö thung-a a te vi dy. 42Aetha ö lawi baw. Co, mä-ai ly ö si dy. Kai bung täre na üng kö thung-a a hethang khimi lä tyng dy” näpa.
Isu bung ne pa
Mat 26:47-56; Luk 22:47-53; Joh 18:3-12
43Hokä Isu ma thui te thüng-a äkähui lawng hawlai netä na thung üng Judae Iskriota lä tyng pa vi dy. Äni hai mangtä aekei sawngseng, thingbyng na süng saite khimipui na la qa by. Honi khimi ce lä mäthykung käleng na, Ubädi särae na hai mätawngky na ma mätaw ö saite khimi na vi. 44Isu bung täre na kö thung-a a hethang Judae ma “Kai ma mänang saite khimi lä Isu dy mang ba. Äni bung ne kha rui saite khimi hai nähai ö kae” näkha äni ce tea äsäny thui rüng pa te vi.
45Judae lä Isu tea ly praw kha “Särae ä” näkha Isu tea mänang pa khaw dy. 46Tukätephüng-a äni ce lä Isu bung ne pa ö dy. 47Tungaila äteng-a aedaw saite khimi lawngtä lä aekei aebäju ea mäthykung kälengky mawsawng lawngtä üng känawkhing tea saibawng pa dy. 48Isu ma äni ce tea “Nang ce lä damarae bung ne te kätyng kai bung ne hethang aetu aekei, thingbyng na hai süng kha ly hethang ngai ö te vi ae. 49Kai lä nang ce tea käni qütä Säthaw üng Ingkäcai baesung thung-a aety kha Säthaw lo mätu te be. Hokä ea nang ce lä kai bung ne ö y. Tungaila Caekäcai ma thui te kätyng lä kai tea tyng hethang kae te vi” näpa.
50Tupyng-a äkähui angxynlyng na lä Isu bung khaisö kha aehui ö pang pa dy.
51Känih haetä xyng aekhu saite särai lawngtä lä Isu üng leithung hui pa. Khimi phütä na ma äni bung mätawng hethang sa ö vi. 52Tungaila äni lä känih byng bung kädesö kha kä-o awng y käla ma büngqaitä aehuija pa vi dy.
Judae na üng Sanhendrin kawngci-a Isu tea tärae cei pa
Mat 26:57-68; Luk 22:54-55, 63-71; Joh 18:13-14, 19-24
53Tupyng-a äni ce lä Isu bung mäthykung kälengky üng ing-a nähai pa. Ha-a lä mäthykung käleng na hai mätawngky na hai Ubädi särae na lä aekäcö kha awng ö bawi te vi. 54Peterae lä kähanglaw mang mäthykung kälengky üng ing baesung thung khytä Isu üng leithung hui pa. Äni lä mäthykung kälengky üng mawsawng reisae na hai mangtä mai ae-awng kha awng pa dy. 55Mäthykung käleng na hai mangtä Judae na üng Sanhendrin kawngci üng khimi angxynlyng na lä Isu bung bädü haw hethang sa tämang saite älang hae haetä ha ngaila äte haetä la dang pa ö y vi. 56Ätete lo tho mang saite na ma lä aesyng y te sasi na hai ma Isu tea käsi thui pa ö dy. Tungaila äni ce üng tho saite älo na lä aedü pa ö y.
57Khimi phütä na ma lä aetha kha Isu tea käsi thui pa. 58Äni ce ma “Isu lä ‘Khimi üng kö hai sa saite hini Ingkäcai tea lä kai ma täphra ai. Käni thungtä säla-a lä khimi kö hai sa y saite Ingkäcai kai ma sa haile tyng ai’ näkha äni lä thui te kai ce lä thai ö bawi te vi dy” näkha näpa. 59Tungaila äni ce ma tho saite älo na lä lawng lawngtä aeba pa ö y vi.
60Mäthykung kälengky ma lä khimipui na üng ämaw-a aedaw kha Isu tea “Honi khimi ce ma nang tea käsi thui saite na tea nang lä ätemakä la mäthang y käla ma awng te vi mei” näkha düng pa dy.
61Tungaila Isu lä sitäri-a awng pa kae vi. Älo bälangtä la mäthang haile tyng pa y vi. Tukha mäthykung kälengky ma “Nang lä khimi ce ma bälaw saite Säthaw üng Cäpaw Mesia dy mei” näkha düng haile pa be dy.
62Isu ma “Tukä cy. Kai, Khimi üng Cäpaw, lä haidae lengky saite Säthaw üng bangtang mang-a aety kha awng te hai khö angnüng qawng mang ly te tea nang ce lä nung ö vi ai rawng” näkha näpa.
63Mäthykung kälengky lä äma üng kä-o tea sä-ei kha “Mä-ai lä äte älo kälang na ngai bälai be y dy. 64Äma ma tea Säthaw kätyng aesa saite lo nang ce lä thai ö bawi dy tu la. Nang ce lä ätemakä dawng ö mei” näpa.
Äni ce angxynlyng na lä Isu lä dü sang vi näte bälung aedü ö bawi dy.
65Khimi phütä na ma lä Isu tea mäce hai mäthawi pa ö dy. Ämi mai-a libyng hai bang kha bo pa ö dy. Tukha “Nang tea ämi ma bo te mei, buisaw lo hai thui lawi by” näpa. Mäthykung kälengky üng mawsawng reisae na lä Isu bung nähai kha äni üng tangbeng-a äkö hai täbeng pa dy.
Isu bung mäny y näkha Peterae ma aephae pa
Mat 26:69-75; Luk 22:56-62; Joh 18:15-18, 25-27
66Peterae lä mäthykung kälengky baesung thung üng ing maw-a awng te thüng-a mäthykung kälengky üng mawsawng anglaw lawngtä lä tyng pa. 67Peterae la mai ae-awng kha awng te anglaw ma nung te kätü-a lä äni tea kähawi-a kheng ea “Nang lä Nazare märü üng Isu äpy by be, kä-aw” näpa.
68Peterae ma äni tea “Nang thui saite phüng kai lä mäny y” näkha aephae pa. Tupyng-a äni lä baesung thung üng thokhae kung mang-a tho pa vi. Tupyng dylä ae qengtä khawng pa raw dy.
69Mawsawng anglaw lä Peterae tea nung haile tyng be kha äteng-a aedaw saite khimi na tea “Hini khimi lä äni ce thung üng lawngtä vi” näkha näpa haile tyng pa be dy. 70Tungaila Peterae lä aephae haile tyng pa be vi.
Tänaetä pyng-a lä äteng-a aedaw saite khimi na ma “Nang lä äni ce thung üng khimi by. Kalile khö üng khimi by vi” näpa.
71Tungaila Peterae lä “Nang ce thui saite khimi bung kai lä mäny y. Kai thui te tüng y dylä Säthaw üng angsawi kai tea lawi sy” näkha Peterae lä aephae pa be dy.
72Tupyng dylä ae lä äbaeni khawng haile praw pa be dy. Tukha Peterae lä Isu ma äni tea “Ae qeng netä khawng y te kälang-a nang lä kai bung mäny y näkha qeng thungtä aephae ai” näsaite älo tea aedawng haile tyng praw kha Peterae lä bälung aekhy te hai rawsö kae dy.
15Pilata mätawngky tea Isu bung tha pa
Mat 27:1-2, 11-14; Luk 23:1-5; Joh 18:28-38
1Kädang thawde-a mäthykung käleng na lä Ubädi särae na, mätawngky na hai Sanhendrin kawngci üng khimi angxynlyng na hai aeting dawde kha älo aedüng ö dy. Tupyng-a äni ce lä Isu bung mäkhing rang pa. Tukha äni bung Pilata mätawngky tea tha pa ö dy. 2Pilata mätawngky ma Isu tea “Nang lä Judae na üng Sanphrang tätang vi nang mei” näkha düng pa.
Isu ma “Nang ma thui te kätyng kae dy” näkha mäthang pa.
3Mäthykung käleng na ma Isu lä sa tämang saite awng mang vi näkha käsi prawng pa ö vi dy. 4Tukätephüng-a Pilata ma Isu tea “Nang lä äni ce tea äte älo bälangtä la mäthang y mei. Äni ce ma nang tea tengxyng y käsi prawng ö te thai y vi nang mei” näkha düng haile pa dy.
5Isu lä älo bälangtä la aepe pa y kha Pilata lä cangxei vi dy.
Isu tea bädü hethang tärae cei pa
Mat 27:15-26; Luk 23:13-25; Joh 18:39-19:16
6Pilata lä Cäqengja te pawi tyng te qütä khimi ce ma mäkai saite thawngsae lawngtä bung bälawi te lä awng vävawi te vi. 7Honi kätü-a Baraba näsaite khimi lawngtä lä thawng thung-a pä-ung te vi. Äni lä aepuilung hai saite khimi na thung-a qa te vi. Äni lä khimi la bädü saite lawngtä vi. 8Khimipui na lä pawi kätü-a reitae awng te kätyng khimi lawng lawngtä bung bälawi hethang Pilata tea mäkai pa ö dy. 9Pilata ma äni ce tea “Hini Judae na üng Sanphrang bung nang ce tähang bälawi pa ai mei” näkha düng pa. 10Mäthykung käleng na ma Isu tea pä-e te phüng-a Isu bung Pilata tea a pa ö dy. Hokä sa te tea Pilata lä kähawi-a mänysy pa vi.
11Mäthykung käleng na ma mäcü pa te phüng-a khimi angxynlyng na lä Isu jüng-a Baraba bung bälawi hethang mäkai ö pa dy. 12Pilata ma khimipui na tea “Kai lä Judae na üng Sanphrang näsaite lawngtä hai makä sa ai mei. Nang ce lä äni bung kai tea makä sa hethang ngai hai ö te mei” näkha düng pa haile be dy.
13Äni ce ma “Äni bung lä thinglang qawng-a täheng kha bädü la” näkha hang pa ö dy.
14Pilata ma “Ätephüng-a mei. Äni lä äte sa tämang te awng vi nang mei” näkha düng pa.
Tungaila äni ce lä “Äni bung lä thinglang qawng-a täheng kha bädü la” näkha ätüng käleng hai hang rae ö pa vi.
15Pilata lä khimipui na üng kängai sa hethang Baraba bung bälawi pa dy. Tukha Isu tea kharui angre hai bo hai kha thinglang qawng-a täheng kha bädü hethang a pa vi dy.
Isu tea Rom reisae na ma mänui hai pa
16Rom reisae na lä Isu bung Rom aecörae kälengky üng baesung thung üng leikung-a nähai pyng-a reisae kangkawng angxynlyng na tea aekäcüng hai bawi pa dy. 17Tupyng-a Isu tea kä-o kangthing bälawng kha angling cangpre na täkawng ea sa saite lökhu hai khu pa vi. 18Tukha äni ce lä “Judae na üng sanphrang lä khö sa hawi sy” näkha mänui hai ea cäphaw te kätyng sa pa ö vi. 19Isu üng älö-a säbö kung hai mäkhae pa ö dy. Isu tea mäce hai la mäthawi pa. Äni ce lä Isu üng maw-a khokhö didü kha cäphaw te kätyng sa ö pa vi. 20Hikä mänui hai pyng dylä äni ce ma kä-o kangthing tea bäling kha Isu üng kä-o bälawng haile tyng pa ö dy. Tupyng-a thinglang qawng-a täheng kha bädü hethang äni ce lä Isu bung nähai ö dy.
Isu bung thinglang qawng-a täheng pa
Mat 27:32-44; Luk 23:26-43; Joh 19:17-27
21Honi kätü-a Sarene märü üng Simon, Alesanda hai Rufu ni üng pä-ai lä vang mang üng ly pa vi. Reisae na ma aethaw paitae hai äni bung ka kha Isu üng thinglang tea aepö hai pa ö dy. 22Äni ce lä Isu bung Kolakota näsaite mityng-a nähai pa. Kolakota näte lä älökorö hai aetawng saite mityng tea thui te vi. 23Äni ce lä mura näsaite aesi rang hai aeqo saite Cäpje tui Isu tea mätyng pa. Tungaila Isu lä nei pa y. 24Tupyng-a äni ce lä Isu bung thinglang qawng-a täheng pa. Isu üng kä-o na tea lä phui sa kha aeri pa ö vi. 25Isu bung thinglang qawng-a täheng te kätü lä kädang naeri täkawtä-a vi. 26Äni ce lä cae hai Isu üng sa tämang te näkha thingphei-a tärü pa ö dy. Hokä tärü te lä “Hini lä Judae na üng Sanphrang vi” näkha näte vi. 27Isu hai mangtä damarae lawng netä bung la thinglang qawng-a täheng pa hawi by dy. Lawngtä bung lä bangtang mang-a khai kha lawngtä bung lä bangrawi mang-a khai pa dy. 28Caekäcai-a tärü te lä “äni lä hunghö käsa na thung-a qa vi” näsaite awng te vi.15:28 Caekäcai phütä thung-a kädawng 28tä qa y vi.
29Cäqeng kha ly saite khimi na ma lä älö thu hai ea “Hei, nang lä Ingkäcai tea mäne kha käni thungtä säla ma sa haile tyng ai nä be. 30Thinglang qawng üng haita aerung lawi by. Nang ma tea nang ma aeqang lawi baw” näkha Isu tea mänui hai pa ö dy.
31Honi kätyng mäthykung käleng na hai Ubädi särae na la Isu tea mänui hai pa ö by vi. Tukha äni ce ma “Äni lä khimi kälang na bung lä aeqang ngaila äma ma tea lä aeqang haw y ta ma. 32Isrelae khimi ce üng Sanphrang, Mesia, lä thinglang qawng üng vaihi ma aerung lawi sy. Hokä mä-ai nung dylä äni tea yng ö ai cy” näkha äma ce tingtawi aethui ö dy.
Isu hai mangtä thinglang qawng-a täheng saite khimi ni ma la mänui hai pa dy.
Isu lä dü pa
Mat 27:45-56; Luk 23:44-49; Joh 19:28-30
33Käni anghung üng hai aetawng kha naeri thungtä khytä älawng angxynlyng lä ving pa vi dy. 34Naeri thungtä-a Isu lä “Eli, Eli, lama sabathani” näkha ätüng käleng hai hang pa dy. Hakä näte üng älawngsai lä “Kai üng Säthaw ä, Kai üng Säthaw ä, ätephüng-a nang lä kai bung khaisö te mei” näte vi.
35Äteng-a aedaw saite khimi phütä na ma honi lo thai te kätü-a lä “Kheng e, äni lä Elijae bung ka te dy” näkha aethui ö dy. 36Khimi lawngtä lä aehui ea tui bäjaw hai saite libyng kämawng säbö kung mawng-a mäkhing kha Cäpje tui käthaw thung-a üng pa dy. Tukha honita la kha Isu tea nei hethang py pa ö dy. Honi khimi ma lä “Äni bung aeqang hethang Elijae ma ly pa jo mei kheng ö si” näkha näpa dy.
37Isu lä ätüng käleng hai hangrang kha dü pa vi dy.
38Ingkäcai üng jaeky saite känih käsa lä honi kätü-a äqawng üng hai khotang khytä aesä-ei phung pa vi dy. 39Isu üng maw-a aedaw saite reisae cungvaitä na bung pyng te mätawngky lä Isu hang te tüng thai kha dü te nung ea lä “Äni lä Säthaw üng Cäpaw tätang vi” näkha nä kae dy.
40Nawngmädi phütä na lä hanglaw mang aedaw kha kheng ö dy. Honi na thung-a Makadala märü üng Maeri, säning na ky saite Jaeko hai Josefae ni üng nä-awi Maeri hai Salome ce la qa vi. 41Äni ce lä Kalile khö-a awng te thüng-a Isu üng leithung hui kha Isu tea säbawng saite nawngmädi na vi. Äni ce cang y Isu hai Jerusalem märü-a hui saite nawngmädi kälang na la honi mityng-a awng ö te by vi.
Isu ro bung ö pa
Mat 27:57-61; Luk 23:50-56; Joh 19:38-42
42Honi käni lä aerü rüng saite käni vi. Kädang mang dylä Aehae saite käni vi dy. 43Kädüng mang-a lä Arimathia märü üng Josefae lä tyng pa dy. Josefae lä Sanhendrin kawngci thung üng khimi lawngtä vi. Khimi ce ma äni tea lä tämö khai ö bärai vi. Äni lä Säthaw üng pre pyng saite tea aedawng rüng saite khimi vi. Äni lä ri y te hai ma Pilata tea ly kha Isu üng äro bung mäkai dy. 44Pilata mätawngky la Isu lä dü pyng te phüng thai kha cangxei te hai ma thinglang üng khokung-a awng saite reisae cungvaitä käpyng mätawngky bung ka ea “Isu dü te lä majetä qae dy mei” näkha düng pa. 45Pilata la reisae käleng üng thui saite lo thai pyng-a ni Isu üng ro bung la hethang Josefae tea py pa dy. 46Josefae lä libyng kanglung rang kha Isu ro bung thinglang qawng üng bäla ea honi libyng kanglung hai säve pa dy. Honi pyng-a kälung tea täko saite täprawng thung-a Isu bung ö kha täprawng äkhaw tea lä kälung käleng hai qeng pa vi dy. 47Isu üng äro ö saite mityng tea Makadala märü üng Maeri hai Josefae üng nä-awi Maeri ce lä nung ö te by vi.
16Isu lä kädü thung üng aetha haile tyng pa
Mat 28:1-8; Luk 24:1-12; Joh 20:1-10
1Aehae te Käni pyng-a Makadala märü üng Maeri, Jaeko üng nä-awi Maeri hai Salome ce lä Isu üng äro tea kälo hethang rimui äxainai na rang ö dy. 2Käni säritä üng angcü käni kädang thawde käni tho te kätü-a äni ce lä täprawng-a ly ö dy. 3-4Lolang-a äni ce lä “Täprawng khaw üng kälung tea lä mä-ai tähang ämi ma käsü pa ai mei” näkha äma ce tingtawi aethui ö dy. Tupyng-a äni ce kheng ea lä tengxyng y leng saite kälung käleng lä aethuija te nung ö dy. 5Tudylä äni ce lä täprawng thung-a kung ea lä bangtang mang-a caiping te kä-o kanglung hai aelawng saite särai lawngtä aety te tea nung ö pa vi. Tukätephüng-a äni ce lä aethüng ö dy.
6Honi lawngtä ma äni ce tea “Aethüng ö hang. Nang ce lä thinglang qawng-a täheng kha bädü saite Nazare märü üng Isu bung mäqang ö te kai lä mäny dy. Äni lä hini mityng-a awng y dy. Kädü thung üng Säthaw ma äni bung mätha haile tyng pa pyng vi dy. Hini mityng lä äni üng äro bung bäsawng saite mityng kae ecy. 7Nang ce lä Peterae hai äkähui kälang na tea ly kha ‘Areng lä Kalile khö-a nang ce maw-a ly mang dy. Jangni nang ce tea äni ma thui pyng te kätyng äni bung lä honi mityng-a nung ö ai mang’” näkha thui ö näpa.
8Nawngmädi na lä aethüng te hai käsawtho kha täprawng üng haita aehui ö pang dy. Äni ce lä ri ö phi te phüng-a ämi la nung saite na phüng thui haw ö y dy.
Makadala märü üng Maeri tea Isu lä aetüng pa
9Käni säritä üng angcü käni kädang thawde-a Isu lä kädü thung üng aetha haile tyng pyng ea, angcü-a Makadala märü üng Maeri tea aetüng mang pa. Isu lä angra me säritä hini nawngmädi te üng mätho vai pa te vi. 10Äni lä Isu üng äpy na tea ly kha honi angthang thui pa dy. Honi kätü-a äni ce lä bälungsi kha raw ö dy. 11Isu lä hing haile tyng te phüng hai äma ma nung khe te phüng Maeri ma thui te lo tea äni ce lä yng ö pa y vi.
Äkähui lawng netä tea Isu lä aetüng pa
12Tupyng-a äkähui lawng netä lä vang mang-a ly hawi te thüng-a Isu lä äma üng ämaw äcae kälang hai änini tea aetüng pa. 13Änini lä äkähui kälang na tea ly hawi haile kha honi angthang thui hawi ngaila äni ce yng ö pa be y vi.
Isu lä äkähui lawng hawlai haetä na tea aetüng pa
Mat 28:16-20; Luk 24:36-49; Joh 20:19-23; Angtawtha 1:6-8
14Tupyng-a äkähui lawng hawlai haetä na lä bö ca ö te thüng-a Isu lä äni ce tea aetüng pa dy. Äni ce lä yng ö y te phüng-a hai Isu lä kädü thung üng aetha pyng-a äni bung nung saite khimi na üng älo na tea yng haw y rung khytä bälung tangkö ö te phüng-a Isu ma äni ce tea pring pa dy. 15Isu ma äni ce tea “Nang ce lä älawngpre qütä-a ly kha khimi angxynlyng na tea Angthang Kähawi thui ö. 16Yng kha baptismae la saite khimi qütä bung lä Säthaw ma aeqang vi ai. Yng y saite khimi qütä tea lä Säthaw ma dungtäsa dengpy vi ai. 17Yng saite khimi na lä cangxei saite kamarae na mätü haw ö ai. Äni ce lä kai üng ämüng thui kha angra na bung mätho ö vi ai. Äni ce lä älo kangthae na aepe ö vi ai. 18Äni ce lä bärui na bung süng ngaila sy, dü hai saite aesi nei ö te läsy, äni ce tea lä äte käsi la tyng haw y lyng. Känaw käsaw awng saite khimi na qawng-a äni ce üng äkö na thyng kha känaw käsaw na lä hawi ö vi ai” näkha näpa.
Säthaw ma Isu bung Känipre-a nähai pa
Luk 24:50-53; Angtawtha 1:9-11
19Areng Isu lä hokä äkähui na tea thui pyng dylä, Säthaw ma äni bung Känipre mang-a nähaija pa vi dy. Tukha Isu lä Säthaw üng bangtang mang-a aety pa vi dy. 20Tupyng-a äkähui na lä mityng qütä-a ly kha Angthang Kähawi na thui ö dy. Areng lä äni ce hai mangtä awng pa te vi. Tukha äni ce thui ö saite älo na tüng te phüng mätü hethang tähang-a äni ce tea kamarae na sa hethang haidae na py pa vi dy.