MATHAI
tärü saite Angthang Kähawi
Angcü üng älo
Hini Angthang Kähawi lä Mathai ma tärü te vi. Äni üng ämüng kälang lä Levi vi. Äni lä Isu üng angtawtha lawng hawlai netä thung üng lawngtä vi. Hokä y kälang-a äni lä Rom aecörae tähang angko cawng saite lawngtä vi. Äni lä Judae khimi ce tähang tärü kha Nazare märü üng Isu lä Säthaw ma mätaw saite Aeqangkung vi näkha mätü he ngai te lä äni üng mawlang kaedawng vi. Mathai ma tärü saite Angthang Kähawi lä Caekäcai kangrüng thung-a Säthaw ma älo aedo saite Aeqangkung lä Isu Khrista lawng te phüng thui te vi. Honi Aeqangkung hai-a Säthaw lä äma üng khimi na tea cangkhawng-a aedo saite lo tea cungrü hai te vi. Mathai lä Caekäcai Kangrüng thung üng buisaw lo na tea awng mang-a tärü leilae te vi. Äni lä “Säthaw üng Pre” näsaite älo tea tawng leilae vi.
Angthang Kähawi kälang-a qa y saite tea
1. Khimi bälungkähae na ma nade Isu tea ly saite
2. Josefae ma Maeri hai nade Isu bung Aikuta pre-a aehui hai ja saite
3. Herodae Sanphrang ma nade na bung mädü hai saite
4. Isu ma me anghung-a mätu saite
5. Peterae lä tui qawng-a aeke saite
6. Judae Iskriota lä Pharisai na te üng phawisae pjae ruithungtä la saite
7. Rom aecörae matawngky Pilata nawngpui üng aemang saite
8. Pharisai na ma Isu üng täprawng tea rui hai saite
9. Isu lä Känipre paw y kälang-a äkähui na tea khöteng täki tyng khytä
Angthang Kähawi thui hethang täru saite. Areng Isu üng mätu saite lä tea amäjy bangawtä täphü haw te vi. Honi na lä
1. Me anghung-a mätu saite lä Säthaw pre üng khimi na üng aeme aeqa saite, kälu käsawng, älang kähawi hai maw mang phüng thui te vi. (Bäkung 5-7)
2. Angtawtha lawng hawlai netä na tea kälu sa hethang täru pa saite na (Bäkung 10)
3. Säthaw üng pre phüng mätae saite lo na (Bäkung 13)
4. Äkähui lawng saite älawngsai mätu te phüng (Bäkung 18)
5. Vaihi dungpa teng te phüng hai Säthaw üng pre tyng hethang phüng mätu saite (Bäkung 24-25)
Äphüng äkädawiky
Areng Isu üng ceng kaesui kaebeng hai aepeng saite 1:1-2:23
Baptismae Johan üng kälu sa saite 3:1-12
Isu Khrista baptismae la kha Setan angra ma the saite 3:13-4:11
Kalile khö-a Isu Khrista üng mipui thung-a kälu käsawng sa saite 4:12-18:35
Kalile khö üng hai Jerusalem märü-a ly saite 19:1-20:34
Jerusalem märü hai äteng äpa-a Isu Khrista üng kangkhüng käni na 21:1-27:66
Areng lä kädü thung üng aetha haile saite hai ämaw aenung saite 28:1-20
1Isu Khrista üng ärui ceng na
1Hini lä Isu Khrista üng ärui äceng phüng tärü te cae vi. Isu lä sanphrang Davidae üng kaesui kaebeng vi. Sanphrang Davidae lä Abraham üng kaesui vi.
2Abraham lä Isaika üng pä-ai vi. Isaika lä Jaeko pä-ai vi. Jaeko lä Judae hai kangby jä-ai na üng pä-ai vi. 3Judae lä Pere hai Jera üng pä-ai vi. Änini üng nä-awi lä Tamar vi. Pere lä Heron pä-ai vi. Heron lä Ram pä-ai vi. 4Ram lä Anminade pä-ai. Anminade lä Nason pä-ai vi. Nason lä Salamon üng pä-ai vi. 5Salamon lä Boaz pä-ai. Äni üng nä-awi Raha vi. Obe üng pä-ai lä Boaz vi. Äni üng nä-awi lä Rutha vi. Obe lä Jese üng pä-ai vi. 6Jese lä sanphrang Davidae üng pä-ai vi. Davidae lä Solomon üng pä-ai vi. Solomon üng nä-awi lä Uria üng nawngpui-a aelawng vai vi. 7Solomon lä Rehobon üng pä-ai vi. Rehobon lä Abija üng pä-ai vi. Abija lä Asa üng pä-ai vi. 8Asa lä Jehosafae üng pä-ai, Jehosafae lä Jehoran üng pä-ai, Jehoran lä Uzia üng pä-ai vi. 9Uzia lä Jothan üng pä-ai, Jothan lä Aha üng pä-ai. Aha lä Hezekia üng pä-ai vi. 10Hezekia lä Manase üng pä-ai, Manase lä Amon üng pä-ai. Amon lä Josia üng pä-ai vi. 11Josia lä Jekonia hai äni üng kangby na üng pä-ai vi. Honi kätü-a Babilon khimi na lä Judae na bung Babilon pre-a aethaw paitae hai nähai pa vi.
12Babilon pre-a Judae khimi na bung nähai pyng-a Jekonia lä Sete üng pä-ai, Sete lä Zerubabel üng pä-ai vi. 13Zerubabel lä Abi üng pä-ai. Abi lä Eliakim üng pä-ai. Eliakim lä Azo üng pä-ai vi. 14Azo lä Zado üng pä-ai vi. Zado lä Akin üng pä-ai vi. Akin lä Elin üng pä-ai vi. 15Elin lä Eliaza üng pä-ai vi. Eliaza lä Mathan üng pä-ai vi. Mathan lä Jaeko üng pä-ai vi. 16Jaeko lä Josefae üng pä-ai vi. Josefae lä Maeri üng nawngpaw vi. Maeri ma Isu bung aepeng pa te vi. Khimi ce lä Isu tea Mesia näkha kähyng ö vi. 17Abraham üng hai sanphrang Davidae khytä dung hawlai bälitä awng vi. Babilon khimi na ma Isrelae khimi na bung äni ce pre-a nähai te khytä sanphrang Davidae üng hai dung hawlai bälitä awng be rawng. Honi üng hai Mesia aepeng te khytä lä dung hawlai bälitä vi.
Isu Khrista aepeng saite
18Hini lä Isu Khrista makä aepeng ai mei näte äphüng vi. Äni üng nä-awi Maeri lä Josefae hai aepawng hethang aedo pyng vi dy. Änini mangtä awng y te kälang-a Muilaw Käcai ma Maeri tea äjopawng hai te Maeri lä mäny vi. 19Josefae lä cüng saite khimi lawngtä vi te phüng-a Maeri tea khimi ce maw-a kaejae py hethang ngai y. Khimi ce mäny y rungtä Maeri bung aekhai hethang näkha aedawng pa vi dy. 20Tungaila hini kätyng äni aedawng te kätü-a Säthaw üng angtawtha lawngtä lä äni tea aemang-a aetüng kha “Davidae cäpaw Josefae ä, Maeri bung nang lä nawngpui kätyng la hethang aenaw hang. Makäte phüng-a mei nädylä Muilaw Käcai ma äni tea äjopawng hai te vi. 21Äni lä cäpaw lawngtä aepeng ai. Nang lä Äni tea ‘Isu’ näkha ämüng mäthi ba. Ätephüng-a mei nädylä Äni lä Äma üng khimi na bung hunghö thung üng aeqang vi ai” näkha näpa.
22Hini äphüng na lä Säthaw ma jangni-a buisaw Isaia te mang thui saite lo tea cungrü hai hethang vi. 23Buisaw Isaia ma “Anglaw käcai lä äjopawng ea cäpaw aepeng ai. Khimi ce ma Emanuela näkha ka ö ai.” Honi älawngsai lä “Säthaw lä mä-ai hai mangtä awng” näte vi näkha näpa.
24Josefae i aelaw kha äni tea Säthaw üng angtawtha ma thui te kätyng Maeri bung ing-a nähai ea nawngpui kätyng bälawng vi dy. 25Tungaila äni lä nawngpui äby aepeng y rytä mangtä i hai y. Tukha äni lä äby tea “Isu” näkha ämüng mäthi dy.
2Käni käse mang üng angvüng na
1-2Isu lä Judae khö Bethlehem märü-a aepeng dy. Honi kätü-a Herodae lä sanphrang vi. Isu aepeng pyng-a käni käse mang üng bälungkähae na Jerusalem märü-a tyng ö dy. Äni ce ma “Judae na üng sanphrang sa hethang aepeng te nade lä ma-a mei. Kai ce lä käni käse mang-a äni üng tengpaw nung ö vi. Äni tea cäphaw hethang ly te” näkha khimi ce tea düng ö dy.
3Hini lo sanphrang Herodae hai Jerusalem märü üng khimi na thai ea lä bälungbi ö vi dy. 4Sanphrang lä mäthykung käleng na hai Ubädi särae na bung käcüng pa dy. Äni ma “Mesia aepeng hethang mityng lä ma-a mei” näkha düng pa dy.
5Äni ce ma “Khrista lä Judae khö üng Bethlehem märü-a aepeng ai. Honi phüng buisaw ma jangni-a tärü pyng te vi dy. 6Säthaw lä buisaw te mang hai-a
‘Judae khö Bethlehem märü üng khimi na ä,
beram rui te Kung lä beram bung rui te kätyng,
kai üng khimi Isrelae na bung rui pa hethang Kung lä nang ce thung-a aetüng ai.
Nang ce üng märü cäpi lä Judae khö-a aely lengky-a aelawng ai’” näkha näpa.
7Tukha sanphrang Herodae lä bälungkähae na bung kangru-a kähyng jüng ea tengpaw aetüng te kätü mäny hethang düng ö vi dy. 8Tupyng-a sanphrang ma äni ce tea “Nang ce Bethlehem märü-a ly kha nade bung mäqang ö. Äni bung nung te hai kai tea angthang py praw ö ba. Kai lä ly ea äni tea cäphaw haw by ai” näkha näpa.
9-10Äni ce sanphrang lo thai pyng ea äma ce üng lolang kätyng ly ö dy. Käni käse mang üng tengpaw lä äni ce üng maw-a ly te nung vi dy. Äni ce lä tengpaw bung nung te kätü-a anghawtho phi ö vi dy. Honi tengpaw lä nade awng saite mityng-a aehae pa by vi. 11Bälung kähae lä ingthung-a kung ea äby hai änä-awi Maeri bung nung ö dy. Tupyng-a äni ce lä nade maw-a bü kha cäphaw ö dy. Tukha äni ce lä äma ce üng tengtae pä-awng kha ävang ting saite lasawng mätho dy. Äni ce lä sui, mura näsaite rimui hai dingrawng na bung py pa ö dy.
12Sanphrang Herodae te mang vawi haile y hethang aemang thung-a Säthaw ma älo täru pa vi. Tukätephüng-a äni ce lä lolang kälang mang äma ce üng pre-a vawi ö vi dy.
Aikuta pre mang-a aehuija te
13Bälung kähae na ly pyng ea Josefae lä Säthaw üng angtawtha lawngtä bung aemang thung-a nung vi. Säthaw üng angtawtha ma “Aetha lawi äby ni änä-awi bung nähai ea Aikuta pre-a aehui hai lawi. Kai üng lo thai y rytä ho-a awng ö re. Sanphrang Herodae lä nade bung bädü hethang mäqang vi ai” näkha näpa.
14Tukätephüng-a honi kärung-a Josefae lä aetha kha äby ni änä-awi bung nähai ea Aikuta pre-a kangru-a aehui hai ja vi dy. 15Äni ce lä sanphrang Herodae dü pyng khytä honi pre-a awng ö vi dy. Areng ma buisaw hai-a thui saite älo cungrü hai hethang hini kätyng vi. Buisaw ma “Kai cäpaw bung lä Aikuta pre mang kai ma nähai vi dy” näte vi.
Sanphrang Herodae ma nade na bung bädü saite
16Sanphrang Herodae lä bälungkähae na ma kangru-a vawi te mäny ea tengxyng y kädawtho vi dy. Tukha äni lä bälungkähae na ma tengpaw aetüng te kätü phüng thui te aedawng vi dy. Tupyng-a sanphrang Herodae lä reisae na bung mätaw kha Bethlehem märü hai khöri angxynlyng na-a awng saite säning netä täkui üng nade nawngmäcaw angxynlyng na bung bädü hai pa ö dy.
17Areng ma buisaw Jeremia hai-a thui pa saite cungrü hai hethang hini kätyng vi.
18“Buisaw Jeremia ma Rama märü-a rawpi saite ätüng tho vi.
Rakhela näsaite üng kaesui kaebeng na lä nade na dü kha tengxyng y raw ö vi.
Nade na dü pyng te phüng-a äni lä bälungsi jawjaw.
Ämi la äni tea bälung bädang haw y,” näkha näpa.
Nazare märü üng vawi haile te
19Sanphrang Herodae dü pyng ea Aikuta pre-a Josefae lä Säthaw üng angtawtha lawngtä bung aemang thung-a nung vi. 20Tukha Säthaw üng angtawtha ma “Nang lä aetha kha äby ni änä-awi bung nähai ea Isrelae pre-a vawi lawi. Nade bung bädü hethang ngai saite na lä dü king vi dy” näkha näpa. 21Tukätephüng-a Josefae lä aetha ea äby ni änä-awi bung nähai kha Isrelae pre-a vawi hai vi dy.
22Sanphrang Herodae üng caw Akhela lä äpä-ai mityng-a pyng te vi näte Josefae lä thai vi. Tukätephüng-a äni lä Judae khö-a vawi hethang ri vi dy. Tupyng-a Säthaw ma aemang thung-a äni hai älo aepe vi. Tukätephüng-a äni lä Kalile khö-a ly dy. 23Tukha Josefae lä Isu ni änä-awi Maeri hai mangtä Nazare näsaite märü-a awng dy. Areng ma buisaw hai-a thui saite lo cungrü hai hethang hini kätyng vi. Buisaw ma “Khimi ce lä Isu tea Nazare khimi” näkha näpa.
3Baptismae Johan ma thui saite älo
Mar 1:1-8; Luk 3:1-18; Joh 1:19-28
1Kätü käni qae ea Baptismae Johan lä Judae khö üng daithung kärang-a aetüng kha Säthaw üng angthang thui pa dy. 2Äni ma “Ae-ui ö lawi Säthaw ma pre pyng saite kätü lä tyng hethang aenai dy” näkha näpa. 3Jangni-a buisaw Isaia ma Johan phüng lä thui rüng pa vi dy. Isaia ma,
“Daithung kärang-a khimi lawngtä ma a kha thui pa vi. Äni ma,
‘Areng ly nae lolang mäcai rüng lawi.
Äni tähang lolang mätaw pa lawi’ näkha thui ai” näkha näpa.
4Baptismae Johan lä säphö känawngjang käsa mui hai aekhü saite kä-o rungrang aelawng kha angkeng-a mawiphö khabai aekheng vi. Äni üng käcakänei lä khakhö hai khawi tui vi.3:4 Daithung kärang-a awng saite hai buisaw na lä hini kä-o rungrang na aelawng ö vi.5Jerusalem märü üng khimi na, Judae khö angxynlyng na hai Jordan tävaw mityng üng khimi kä-awng mang na lä Johan tea ly ö vi. 6Äni ce lä äma ce üng hunghö na khimi ce maw-a täphawng kha Jordan tävaw-a Johan ma baptismae py pa dy.
7Johan ma Pharisai hai Sadukai awng mang saite na baptismae la hethang ly te nung pa vi. Äni ma “Nang ce lä bärui käsi hai aetawng vi. Baptismae lä te hai-a nang ce lä Säthaw ma dengpy saite aelawi haw y lyng. 8Nang ce lä tüng saite kälu sa te hai-a ae-ui tätang näte mätü mang re. 9Nang ce lä ‘Kai ce Abraham hai kaesui na kae vi’ näkha thui ö vi. Honi kä thui te hai lä Säthaw ma dengpy te üng aelawi haw y lyng. Säthaw lä hini kälung na tea mäteng ma Abraham kaesui kaebeng-a bälawng haw te vi. 10Säthaw lä aetu süng kha äthai kung üng angjüng bälu hethang awng rüng te khimi lawngtä kätyng vi. Äni ma äthai aethai y saite äkung angxynlyng na bung bälu pang ea mai hai sawi vi ai.
11“Nang ce ae-ui te mätü hethang kai lä nang ce tea tui hai baptismae py vi dy. Kai leithung-a tyng saite lawngtä ma Muilaw Käcai hai, mai hai, baptismae py ai. Äni lä kai qawng-a haidae lengky vi. Kai lä äni üng kho painai mäteng ma süng hethang aeteng y. 12Äma üng kö-a caw mäsi hethang bäraw süngrüng saite khimi hai aetawng vi. Äni lä cawpai thung-a caw kangta na bung mäkawi pa vi ai. Cawfi bung lä dü y saite mai hai sawi vi ai” näkha näpa.
Johan ma Isu tea baptismae py saite
13Tukha Isu lä Baptismae Johan te üng baptismae la hethang Kalile khö üng Jordan tävaw-a ly vi dy. 14Baptismae Johan lä Isu tea baptismae py hethang ngai y. Äni ma “Kai lä nang tea baptismae py hethang aeteng y. Nang lä kai tea baptismae py hethang aeteng khaw vi” näkha näpa.
15Tungaila Isu ma “Säthaw üng aely kängai mä-ai lä sa hethang kae. Tukätephüng-a vaihi kai tea baptismae py lawi” näkha näpa. Tukha Johan lä Isu tea baptismae py pa dy.
16Isu lä baptismae la te hai qengtä ma tui thung üng aetha praw dy. Honi kätü khaw-a, käni lä aepä-awng kha Säthaw üng Muilaw aeja käthu te Isu lä nung vi. Muilaw Käcai lä bähö kätyng aeja käthu ea Isu qawng-a cu pa dy. 17Käni mang Säthaw üng ätüng lä “Hini lä kai ma bälung aevaw saite Cäpaw vi. Äni tähang kai lä kawngphi vi” näkha näpa.
4Setan ma Isu hunghö sa he the pa saite
1Tupyng-a Isu bung Muilaw ma daithung kärang-a nähai kha Setan angra ma Isu tea hunghö sa hethang the pa vi dy. 2Isu lä käni ruibälitä hai rung ruibälitä böjae pyng-a tengxyng y äjo aelang phi pa vi dy. 3Tukha Setan angra ma äni tea ly kha, “Nang lä Säthaw üng cäpaw tätang dylä, hini kälung na bung täkaw-a bälawng by ä” näkha näpa.
4Tungaila Isu ma, “Caekäcai thung-a tärü te lä, ‘Khimi lä täkaw ma qaitä hai-a hing haw te y vi. Hing hethang Säthaw üng älo lä aely ngai vi’” näkha näpa.
5Tupyng-a Setan angra lä Isu bung Jerusalem märü käcai-a nähai pa vi. Säthaw üng Ingkäcai üng kaesangky mityng qawng-a aedaw hai pa dy. 6Setan angra ma, “Nang lä Säthaw üng cäpaw nädylä säly käthu by ä,
Caekäcai thung-a tärü te lä ‘Säthaw üng angtawtha na ma nang bung pangky hethang täru pa ai mang.
Nang üng kho tea kälung na hai tämaw dang y te khytä,
äni ce üng kö hai pawngdawnghy pa vi ai’” näkha näpa.
7Isu ma, “Caekäcai thung-a tärü te lä ‘Nang üng Areng Säthaw tea käny hang’” näkha näpa.
8Tupyng-a Setan angra ma Isu bung me anghung kaesang-a nähai ea älawng-a awng saite pre angxynlyng na tawngnang te hai aecang phrung saite na mätü pa dy. 9Setan angra ma Isu tea, “Nang ma kai tea bü kha cäphaw dylä, hini pre angxynlyng na kai ma nang tea py ai” näkha näpa.
10Tukha Isu ma, “Setan angra, kai te üng thoja lä. Caekäcai thung-a tärü te lä ‘Nang üng Areng Säthaw lawngtä xyng tea ni cäphaw kha äni üng mawsawng ni sa hethang kae’” näkha näpa.
11Tukha Setan angra lä Isu te üng thoja pa dy. Säthaw üng angtawtha na ma äni tea ly kha säbawng pa dy.
Isu kälu sa aetawng angcü saite
12Isu lä Baptismae Johan bung thawng thung-a pä-ung te angthang thai pyng-a, Kalile khö-a vawi vi dy. 13Isu lä Nazare märü-a ly pyng-a Kapernawm märü-a awng. Kapernawm märü lä Kalile tuilipui teng-a hai Natali hai Zabulun khö thung-a awng te vi. 14Buisaw Isaia üng thui rüng saite älo cungrü hai hethang tyng te vi. 15-16Buisaw ma,
“Zabulun khö hai Natali khö üng khimi na pangle pyng üng lolang-a awng te khimi na,
Jordan tävaw üng ha mang-a awng saite khimi na hai,
Kalile khö üng Säthaw mäny y saite ceng thung-a awng saite khimi na lä käving thung-a awng ö vi ai.
Hini khimi ce lä kaevang käleng bung nung ö ai.
Dü hethang ri saite khimi na tähang kädang-a,
käni tho te kätyng aevang vi ai” näkha näpa.
17Honi üng hai aetawng kha Isu lä, “Angthang Kähawi thui dy. Äni lä hunghö üng aekö haile lawi. Säthaw ma Sanphrang sa saite kätü lä aenai dy” näkha näpa.
Isu lä angcü üng äkähui na bung kähyng saite
18Isu lä Kalile tuilipui teng-a aeke ea kangby jä-ai lawng netä bung nung vi. Änini lä Peterae näsaite Simon hai äni üng kangby Andru vi. Äni ce lä mawi ne saite khimi na te phüng-a tuilipui thung-a mawipry jae sälö te vi. 19Isu ma “Kai leithung hui hawi. Nang ni lä mawi ne hawi te jüng-a, kai tea yng hethang khimi na bung nähai saite khimi ni-a bälawng vi ai” näkha näpa. 20Qengtäma änini lä äma ni üng mawipry na khaisö ea Isu leithung hui hawi praw dy.
21Honi mityng üng hai Isu ly ea äkälang kangby jä-ai Jaeko ni Johan bung nung vi. Änini lä Zebede üng cäpaw na vi. Äpä-ai hai mangtä bälawng thung-a mawipry na thung rüng haile kha awng ö te vi. Isu ma änini bung lä leithung hui hethang kähyng pa dy. 22Qengtäma äpä-ai hai bälawng bung khaisö ea Isu leithung hui praw dy.
Isu ma känaw käsaw hawi sa saite
23Isu lä Kalile khö-a khölawng tho kha Judae na üng ingkäcai-a Säthaw lo mätu pa dy. Säthaw ma pyng saite pre üng Angthang Kähawi phüng thui pa dy. Äni lä känaw käsaw amäjy cawngkhang awng saite angxynlyng na tea hawi sa pa dy. 24Siria pre mityng qütä-a khimi ce lä Isu äphüng thai vi dy. Äni ce lä känaw käsaw amäjy cawngkhang awng saite khimi na bung äni tea nähai pa ö dy. Khimi phütä na lä nawphi saite phütä na hai angra kung saite, phütä na lä aesö kanglang saite, phütä na lä kökho dü saite na vi. Isu ma äni ce angxynlyng bung känaw käsaw hawi sa pa dy. 25Kalile khö, Dikapoli khö, Jerusalem märü, Judae khö hai Jordan tävaw rei käni käse mang üng ly saite khimipui lä Isu leithung hui ö dy.
5Me anghung-a Isu üng angtu lo
1Isu lä khimipui na bung nung kha me anghung qawng-a paw ea aety dy. Tukha äkähui na lä äni tea ly pa ö dy. 2Tukha Isu ma äni ce tea mätu te aetawng pa dy.
Tähang kähawi py saite
3Äni ma “Säthaw üng säbawng saite aely ngai näte mäny saite khimi na lä tähang hawi.
Äni ce lä Säthaw üng pre-a tawngnang te vi.
4Bälungsi saite khimi na lä tähang hawi.
Säthaw ma äni ce bung awneng hai ai mang.
5Bälung aemäneng saite khimi na lä tähang hawi.
Säthaw ma äni ce tea älawngpre pyng hai ai.
6Säthaw üng aely kängai kätyng sa hethang ngai saite na lä tähang hawi.
Säthaw ma äni ce tea kawng hai phi ai mang.
7Bäheng te bälung awng saite khimi na lä tähang hawi.
Säthaw ma äni ce tea bäheng pa vi ai.
8Säthaw tähang bälung käcai hai aepy saite khimi na lä tähang hawi.
Äni ce lä Säthaw bung nung ö ai mang.
9Aede rung khytä sa pa saite khimi na lä tähang hawi.
Säthaw ma äni ce tea äma üng nade na näkha ka vi ai.
10Kätüng sa te phüng-a äkälang na ma mätang bälai-a sa pa saite khimi na lä tähang hawi.
Honi khimi na lä Säthaw üng pre-a tawngnang ö te vi.
11“Nang ce lä kai leithung hui ö te phüng-a, khimi ce ma nang ce tea käsi thui kha sakälö khü te hai kaeling kaemae thui dylä, nang ce lä tähang hawi. 12Kawng anghawtho ö. Säthaw ma nang ce tähang äma üng Känipre-a ävang käting py ai. Jangni-a buisaw na bung khimi ce ma nang ce tea sa te kätyng sakälö khü pa ö te by vi dy.
Bälawi hai Kaevang
13“Nang ce lä älawngpre üng bälawi kätyng vi. Bälawidae dylä, lung rung khytä sa haile haw y dy. Khimi ce ma tawng hethang y dy. Tukha hini bälawi tea ärang-a käde phae kha khimi ce ma thaw phaedae vi ai.
14“Nang ce lä älawng üng khimi na tähang kaevang kätyng vi. Me anghung qawng-a awng saite märü tea lä khimi ce ma homy haw y lyng. 15Ingthung-a awng saite khimi angxynlyng na lä maibung thawng kha tawng täkui-a khai te awng vai y. Khimi ce angxynlyng nung haw hethang maibung khai nae qawng-a ni khai saite kae vi. 16Honi kätyng nang ce üng kaevang khimi ce maw-a aevang sy. Tukä dylä, khimi ce lä nang ce üng kälu kähawi nung kha Känipre-a awng saite nang üng Pä-ai tea bälaw ö ai.
Mosi üng Ubädi phüng mätu saite
17“Kai lä Mosi üng Ubädi hai buisaw na üng älo tea täphra hethang ly te y. Kai lä täphra hethang ly te jüng-a, Mosi üng Ubädi hai buisaw na üng älo cungrü hai hethang ly te kae. 18Tängai ö. Käni hai älawng awng te khytä Mosi üng Ubädi älawngsai cäpi hai caelung cäpi la ja y. Säthaw ma sa saite kälu khüng y rytä äni üng Ubädi angxynlyng na awng vi ai rawng. 19Khimi lawngtä lä särilo cäpiky tea sa tämang dylä, khimi kälang tea hini kätyng sa hethang mätu pa dylä, honi khimi lä Säthaw üng Känipre-a cäpiky vi ai. Tukha khimi lawngtä lä hini särilo na tängai kha kälang na tea mätu pa dylä, Säthaw üng Känipre-a Säthaw ma honi khimi kälengky näkha ka vi ai. 20Tängai ö. Nang ce üng cüng saite lä Pharisai na hai Ubädi särae na qawng-a nang ce lä cungrü-a awng y dylä, Säthaw üng pre pyng saite thung-a kung haw y lyng.
Kädawtho te phüng mätu saite
21“Mosi ma nang ce üng kangsi na thui saite särilo phüng thai ö pyng te vi dy. ‘Khimi bung bädü hang. Khimi bung bädü dylä, Säthaw ma dengpy ai.’5:21Khimi bung dengpy kha bädü te, täre aety kha bädü te, käsae dü saite na, hini na lä hunghö vi näkha Judae na üng reitae hai Mosi üng Ubädi thung-a qa te y.22Tungaila vaihi nang ce tea kai ma: Nang lä nang ma üng äpy tea kädawtho dylä, Säthaw ma nang tea dengpy ai. Nang lä äpy tea käsi thui dylä, nang tea Sanhendrin kawngci-a dengpy vi ai. Nang ma äpy tea kaerö näkha ka dylä, ngärei thung-a tyng ai mang. 23-24Tukätephüng-a nang lä Säthaw tea aemäthy hethang lasawng nähai ea nang üng äpy ma nang tea nung ngai y te mäny va vi näre mai. Tudylä Säthaw tea aemäthy saite lasawng maicang maw-a khaisö. Angcü-a ly kha äpy hai aede mang re. Tupyng-a ly haile kha Säthaw tea aemäthy lawi.
25“Khimi lawngtä ma nang lä äni sa tämang saite thui kha nang hai mangtä tärae jung-a nähai hethang awng dylä, äni hai kärang-a aede lawi. Nang ni lolang-a awng tea ma äni hai aede lawi. Honi kä y dylä, äni ma nang bung tärae cei te kung tea a ai. Tärae käcei kung ma nang bung thawng üng reisae na kö thung-a a ai. Tukha äni ma nang bung thawng thung-a pä-ung vi ai. 26Tängai ba. Nang lä kälai py king y rytä, thawng thung üng tho y lyng.
Khimi nawngpui hai i te phüng
27“Mosi ma nang ce üng kangsi ce tea thui saite särilo phüng thai ö pyng te vi dy. Äni ma “Täkübäjang sa hang” näkha näpa. 28Tungaila vaihi nang ce tea kai ma: Khimi lawngtä lä bädö te bälung hai khimi nawngpui, y dylä, aepawng y te nawngmädi tea kheng dylä, äma üng bälung thung-a täkübäjang te dy. 29Nang üng ämi bangtang mang hunghö sa hai vi dylä, honi ämi bung thawpu kha kädeja la. Nang üng ätabung käcung hai-a ngärei thung-a ly te qawng-a ämi faitä pra te lä hawiky vi. 30Nang üng kö bangtang mang hunghö sa hai vi dylä, honi äkö bung aebyng po kha kädeja la. Nang üng ätabung käcung hai-a ngärei thung-a ly te qawng-a äkö faitä pra te lä hawiky vi.
Nawngpui aekhai te phüng
31“Mosi ma nang ce üng kangsi na tea särilo thui te nang ce lä mäny ö pyng te vi dy. Äni ma ‘Khimi lawngtä lä äma üng nawngpui hai aekhai hethang ngai dylä, aekhai te cae py hethang kae’ näkha näpa. 32Tungaila kai ma ‘Khimi lawngtä üng nawngpui äkälang nawngmäcaw hai i y dylä, äni hai aekhai haw y. Äni lä äkälang phüng hai äma üng nawngpui hai aekhai dylä, änawngpui tea täkübäjang sa te vi. Äni üng nawngpui bung la saite nawngmäcaw la täkübäjang sa te by vi.’
Älo aedo saite phüng
33“Mosi ma nang ce üng kangsi ce tea thui saite särilo phüng mäny ö pyng vi dy. Äni ma ‘Nang lä älo aedo saite tea täphra hang. Areng tea nang ma sa hethang aedo saite älo kätyng sa ba’ näkha näpa. 34Tungaila vaihi nang ce tea kai ma thui dy ‘Älo aedo ea täking ö hang. Känipre hai täking ö hang.’ Känipre lä Säthaw ma pyng saite mityng vi. 35Älawngpre hai täking ö hang. Älawngpre lä Säthaw üng äkho thyng nae vi. Jerusalem märü tea mänyng kha täking ö hang. Jerusalem märü lä Sanphrang käleng Säthaw üng märü vi. 36Mä-ai ma üng älö hai täking ö hang. Ätephüng-a mei nädylä nang ce lä äsangme metä bung kanglung-a kangnung-a sa haw ö te y. 37Nang ce lä kälu hae haetä sa dylä, sa ai näkha thui. Sa y dylä, sa y näkha thui ö.
Tärawitha saite äphüng
38“Mosi ma nang ce üng kangsi ce tea thui saite särilo phüng mäny pyng vi dy. Äni ma ‘Khimi lawngtä lä khimi kälang üng ämi faitä tea pra hai mai dylä, khimi ce lä äma üng ämi pra by hethang kae. Khimi lawngtä lä lawngtä üng äfaw aekhy hai dylä, khimi ce lä äma üng äfaw aekhy by hethang kae’ näkha näpa. 39Tungaila vaihi nang ce tea kai ma: Nang tea sa tämang saite khimi tea lä tärawitha hang. Nang üng tangbeng täbeng saite khimi tea pheitä mang la täbeng hai be re. 40Khimi lawngtä lä nang üng kä-o bung ngai kha tärae jung-a nähai hethang ngai dylä, äni tea nang üng kä-o käsa la py pa be re. 41Nang tea reisae na ma aethaw paitae hai mengtä ly hai dylä, äni hai meng netä ly pa be re. 42Nang tea säbawng hethang mäkai saite khimi tea säbawng pa. Nang te üng kälai khi hethang ngai saite khimi na tähang kälai khi py pa.
Nang ma ce üng täre na tea bälung aevaw ö
43“Nang ce lä hini älo thai ö vai te vi. ‘Nang ce üng rawijae tea bälung aevaw ö. Nang ce üng täre na tea esäre ö’ näkha näpa. 44Tungaila vaihi nang ce tea kai ma: Nang ma ce üng täre na tea bälung aevaw ö. Nang ce tea mätang bälai-a sa saite khimi na tähang aetang pa ö. 45Nang ma tukä sa dylä, Känipre üng Pä-ai Säthaw üng nade tätang-a nang aelawng vi ai. Areng ma khimi kähawi, khimi käsi na üng qawng-a käni aevang hai pa dy. Khimi kähawi khimi käsi na üng qawng-a khöne hai pa dy. 46Nang ce tea bälung aevaw saite khimi na tea ni bälung aevaw ö kae dylä, Säthaw ma nang ce tea äte ävang la py y lyng. Angko cawng saite na mäteng hini kätyng sa ö te by vi. 47Tukha nang ce lä nang ma ce üng rawijae na tea köcibai sa kae dylä, nang lä honi khimi ce kä by kae dy. Säthaw bung mäny y saite na mäteng ma äma ce bälung aevaw saite khimi tea bälung aevaw ö te vi. 48Tukätephüng-a Känipre üng Pä-ai Säthaw lä cungrü te kätyng nang ce la cungrü-a awng ö jo.
6Mätang saite na tea säbawng te phüng
1“Nang ce lä kähawi sa tea khimi ce känung-a sa ö hang. Y dylä, Känipre-a awng saite nang ce üng Pä-ai ma nang tea ävang py hethang y dy.
2“Nang lä mätang saite na tea säbawng kätü-a, nang sa te khimi na tea thui hang ba. Khimi kähawi käjüng aesa saite na kätyng sa ö hang. Äni ce lä Judae na üng ingkäcai hai lolang kaeting-a mätang saite na tea säbawng ö te vi. Khimi ce ma äni ce tea tämö khai hethang honi kä sa ö vi. Tängai ö. Äni ce la khimi ce üng ävang dang pyng ö te vi dy. Säthaw ma äni ce tea ävang py te y. 3Nang lä mätang saite na tea säbawng te kätü-a, nang rawijae na mäteng mäny hai hang. 4Honi kätyng sa dylä, nang üng säbawng saite tea khimi ce mäny y lyng. Känipre-a awng saite nang üng Pä-ai ma kangru-a sa saite nung te phüng-a ävang py ai mang.
Säthaw tea aetang te phüng Isu ma mätu pa
5“Nang lä aetang ea khimi kähawi käjüng käsa na kätyng sa hang. Äni ce lä khimi ce känung bawi-a Judae na üng ingkäcai hai lolang kaeting mityng-a aedaw kha aetang hethang ngai ö vi. Tängai ö. Äni ce la khimi ce üng ävang dang vi dy. Säthaw ma äni ce tea ävang py pa y dy. 6Tukha nang ce aetang ea ingthung-a kung kha kätho aekhae teng. Ämi hai nung haw y saite nang üng Pä-ai Säthaw tea aetang. Nang üng Pä-ai ma kangru-a sa saite nung kha ävang py ai mang.
7“Nang lä aetang ea älo aepe mang hang. Nang lä aedawng y käla älo awng mang-a thui hang. Säthaw bung mäny y saite na lä hini kä aetang vi. Äni ce lä älo sadui-a aepe kha aetang dylä, äma ce üng Säthaw ma tängai ai näkha aedawng ö te vi. 8Nang lä äni ce kätyng sa hang. Nang üng Pä-ai lä nang mäkai y te kälang-a ma nang ngai saite na mäny pyng vi dy. 9Tukha nang aetang te kätü-a hini kä thui ö.
‘Känipre üng kai ce üng Pä-ai ä, nang üng ämüng käcai tea khimi ce ma tämö khai sy.
10Nang ma Sanphrang kätyng pyng sy. Känipre-a nang üng angtawtha na nang ma üng aely kängai kätyng sa vi.
Älawngpre üng khimi na lä hini kätyng nang üng aely kängai sa sy.
11Kai ce üng käni qütä ca hethang py kü ba.
12Kai ce tea tämang saite khimi na hunghö kai ce bälawi te kätyng-a,
kai ce üng hunghö bälawi kü ba.
13Kai ce tea hunghö sa te khytä bärawi bäleng saite aeting hai jo hang ba.
Setan ma kai ce tea bäja y hethang säbawng kü ba’ näkha näpa.”
14Tukha Isu ma “Nang tea sa tämang saite khimi na üng hunghö bälawi dylä, Känipre-a awng saite nang ce üng Pä-ai la nang üng hunghö bälawi vi ai mang. 15Tungaila nang tea tämang saite khimi na üng hunghö bälawi y dylä, nang üng Pä-ai la nang ma üng hunghö bälawi y lyng.
Böjae te phüng mätu te
16“Nang lä böjae ea khimi kähawi käjüng aesa te kätyng mimai hawi y te sa ö hang. Äni ce lä böjae te khimi na mäny hethang ngai te phüng-a ämi aelae y käla mimai hawi y te kätyng sa ö vi. Tängai ö, äni ce lä khimi ce üng ävang dang vi dy. Säthaw ma äni ce tea ävang py y dy. 17Nang ce lä böjae ea mimai aelae pang kha äsang aeso ping. 18Honi kätyng sa dylä, nang ce üng böjae te ämi lä mäny he y. Ämi hai nung haw y saite nang üng Pä-ai lä kangru-a sa te nung kha ävang py ai.”
Vyngsai amäjy känetä phüng mätu pa
19“Nang ma tähang älawngpre-a vyngsai na mätung hang. Älawngpre-a vyngsai mätung dylä, süngei hai dengkeng ca haw vi. Khimi ce lä ing-a kung kha vyng na bäru haw vi. 20Honi jüng-a nang ma tähang Känipre-a vyngsai na mätung kae. Honi vyngsai lä süngei dengkeng na ma ca haw y lyng. Honi lä theru na ma bäru haw te y. 21Nang üng kätui awicae awng saite mityng-a nang üng bälung lä awng vi ai.
Ätabung üng kaevang
22“Nang üng ämi lä ätabung üng kaevang vi. Nang üng ämi na hawi dylä, nang üng ätabung lä Säthaw üng kängai sa vi ai. 23Tungaila nang ämi hawi y dylä, nang üng ätabung angxynlyng na lä käving thung-a awng kha Säthaw üng kängai mäny haw y dy.
Säthaw hai älawngpre üng vyngsai na
24“Ämi mawsawng la ingkung lawng netä üng kälu sa mei haw y. Honi kä sa dylä, lawngtä tea tämö khai kha lawngtä tea lä mäthi y vi ai. Ingkung lawngtä tea esäre kha kälang lawngtä tea lä bälung aevaw ai. Nang lä qengtä ma Säthaw hai älawngpre üng tangkae tähang mawsawng sa mei haw y lyng.
Bälungbi hang
25“Nang lä älawng qawng-a hing hethang tähang bälungbi hang. Ätemakä ca ai mei. Ätemakä aekhu aena ai mei näkha bälungbi hang. Nang üng hing te lä käcakänei qawng-a aely lengky vi. Nang üng ätabung lä aekhu aena nae qawng-a ävang tingky. 26Tävaw na phüng aedawng mäsüng kae-e. Äni ce lä caw la e y. Caw la ae y. Caw na cawtai thung-a khai y. Tungaila Känipre üng mä-ai üng Pä-ai Säthaw ma äni ce tea mäcaw pa te vi. Nang lä tävaw na qawng-a ävang tingky vi. 27Nang lä bälungbi te hai-a mä-ai ma üng hing saite säning tea äjecäcaw ryng hai sei haw te y vi.
28“Nang lä aekhu aena nae tähang bälungbi hang. Daithung üng äcae hawi saite äpa na phüng aedawng mäsüng kae-e. Äni ce lä kälu la sa vai te y. Kä-o la aekhü vai te y. 29Tungaila vaihi kai ma nang ce tea thui ai dy. Tawngnang phi saite Solomon sanphrang mäteng ma honi äpa na kätyng äcae hawi saite kä-o na aekhu aena haw y. 30Säthaw lä daithung üng aeca tea äcae kähawi-a sa pa te vi. Honi aeca vaihi hing kha khawngdang lä khimi ce ma mai thung-a käde te kae vi. Tukä dylä, Säthaw lä nang tea ngai saite kä-o na py ai be. Nang ce lä Säthaw tea yng te di bärai ö te vi.
31“Tukätephüng-a makä ca ai mei. Makä nei ai mei. Äte aekhu ai mei” näte bälungbi ö hang. 32Säthaw bung mäny y saite khimi na hai hini na phüng-a, bälungbi ö te vi. Nang ce hini ngai vi näte Känipre üng nang ce üng Pä-ai Säthaw lä mäny vi. 33Säthaw üng pre hai aesui saite na phüng angcü-a aedawng mang ö. Säthaw üng aely kängai kätyng angcü-a awng. Tupyng-a hini angxynlyng na Säthaw ma nang ce tea py vi ai. 34Tukätephüng-a nang lä khawngdang tähang bälungbi y ma. Khawngdang üng bälung käbi tähang lä khawngdang ma aedawng kae. Vaini aeting saite bälung käbi na lä vaini tähang aelo khaw dy.
7Khimi ce tea tärae cei hang
1“Khimi ce tea tärae cei ö hang. Tudylä nang ce tea Säthaw ma cei y ai mang. 2Khimi kälang tea nang ce ma tärae cei te kätyng-a Säthaw ma nang ce tea tärae cei tyng vi ai. Khimi ce tea nang ce ma kätüng-a tärae cei dylä, Säthaw ma nang ce tea kätüng-a tärae cei tyng ai. Tungaila nang ce ma khimi kälang na tea bäheng y käla ma tärae cei dylä, Säthaw ma nang tea bäheng y käla tärae cei tyng vi ai. 3Nang ce lä äpy üng ämi thung üng angnüng cäpi cäcaw tea kheng ö hang. Hini lä hunghö cäpi hai aetawng vi. Nang ce üng ämi thung-a awng saite thingkawng byng tea nang ce lä aedawng ö. 4Nang ce üng ämi thung-a thingkawng byng awng te kätü-a nang ce üng äpy äjae tea ‘Angnüng cäpi cäcaw bung mätho hethang säbawng ai dy’ näkha thui hang. 5Nang ce lä käjüng aesa te khimi na vi. Angcü-a nang ce üng ämi thung üng thingkawng byng käleng mätho la. Tupyng-a ni nang ce äpy äjae üng ämi angnüng cäpi cäcaw tea mätho haw ai.
6“Säthaw üng cai saite na, ui na ca hethang kädesö hang. Honi kä sa dylä, äni ce lä nang ce tea aehawi kha kei vi ai. Nang ce tähang khawisäling kälung kätyng ävang ting saite o na maw-a kädesö hang. Honi kä sa dylä, hani na qawng-a äni ce üng kho hai thaw pipu ö vi ai. Tupyng-a äni ce lä nang ce tea aehawi kha nang ce bung kei po bälo vi ai.
Säthaw tea mäkai ö
7“Nang ce ngai saite na Säthaw tea mäkai ö. Tudylä äni ma nang ce tähang py ai. Ha ö. Tudylä Säthaw ma nang ce tea nung hai ai mang. Kätho tea täkhü ö. Tudylä Säthaw ma nang ce tea kätho pä-awng pa ai mang. 8Säthaw tea mäkai saite khimi angxynlyng na tea lä py ai mang. Ha jawjaw saite khimi angxynlyng na lä nung hai ai mang. Kätho tea täkhü jawjaw saite khimi angxynlyng na tea lä Säthaw ma kätho pä-awng pa ai. 9Nang ce thung-a lawngtä üng nade ma täkaw mäkai dylä, ämi ma la kälung py ai mei. 10Äni ma nang ce tea mawi mäkai dylä, äni tea bärui py ai mei. 11Nang ce hunghö awng mang saite khimi na mäteng ma caw nade na tea kähawi sai na py vävawi te vi. Tudylä Känipre üng nang ce üng Pä-ai lä nang ma ce üng caw nade na tea kähawi py te qawng-a cang y mäkai saite khimi tea lä hawi te amäjy na py rae te vi.
12“Caekäcai angxynlyng na thung-a Säthaw ma thui saite särilo lä hini kätyng vi. Mä-ai ma tea kähawi sa hethang ngai te kätyng khimi kälang na tea kähawi sa pa ö.
Hawngkhae khaw cäpi
13“Säthaw üng pre-a kätho kaecei mang kung ö. Ngärei thung mang-a ly saite lolang lä hawi kha kätho khaw la leng bärai vi. Khimi kä-awng mang na lä honi lolang-a ly ö vi. 14Tungaila dungtäsa hing te mang-a tyng saite kätho lä cäpi kha lolang rae bärai. Tukätephüng-a khimi äjecäcaw ni honi lolang bung nung kae vi.
Äkung hai äthai
15“Nang ce lä buisaw käjüng aesa saite khimi tea sädi khai ö. Äni ce lä beram käjüng aesa kha nang ce tea ly dy. Tungaila äni ce lä tätang khaw-a kei kha bädü saite käsui na kätyng vi. 16Khimi ce tea äma ce üng sa saite hai-a nang lä mae ai. Angling kung-a Cäpje thai aethai te y. Angling kung-a thaidö thai aethai te y. 17Äkung kähawi qütä-a lä äthai kähawi aethai. Tungaila äkung kähawi y lä äthai kähawi y aethai kae vi. 18Äkung kähawi-a lä äthai kähawi y aethai haw y. Äkung kähawi y dylä, äthai kähawi aethai haw y. 19Khimi ce lä äthai kähawi aethai y saite äkung angxynlyng na tea la bälu kha mai thung-a käde ö te vi. 20Tukätephüng-a khimi ce lä hawi y saite amäjy na sa dylä, äni ce buisaw käjüng aesa te nang ce mäny ai.
Isu üng äkähui na tätang
21“Khimi phütä na lä Kai tea ‘Areng ä, Areng ä’ näkha kähyng ngaila, sanphrang Säthaw pyng saite pre thung-a qa y vi ai. Känipre Kai üng Pä-ai Säthaw üng kängai sa saite na tea ni Äni ma ngai ai. 22Säthaw ma khimi angxynlyng na tea tärae cei te kätü-a, khimipui na ma ‘Areng ä, Areng ä, Nang üng Ämüng hai-a Säthaw üng Angthang kai ce lä thui ö vi dy. Nang üng Ämüng hai kai ce lä kamarae na awng mang-a sa te hai khimi ce te üng angra na tea mätho vi dy’ näkha thui ö vi ai. 23Tupyng-a äni ce tea ‘Nang ce bung kai mäny vai te y. Nang ce lä käsi sa saite khimi na vi. Kai te üng tho la’ näkha cüngpra-a thui pa dy.
Ing sa te khimi lawng netä
24“Tukätephüng-a kai üng lo thai kha tängai saite lä hini kä vi. Äni lä ing sa saite khimi bälungkähae lawngtä kätyng vi. Äni lä älawng käthu-a tai kha kälung pui käca hai-a aeqyng nae kähawi qawng-a mänyng ea ing sa saite khimi lawngtä kätyng vi. 25Aeli khöpui khöre hai tuimaw lä tho pa vi dy. Aeli kangcai lä tho kha hani ing tea ty pa vi. Tungaila ing lä aene pa y vi. Ätephüng-a mei nädylä ing aenyng nae hawi bärai pa te phüng-a vi.
26“Tungaila kai üng lo thai ea tängai y saite khimi lä hini kä hei. Äni lä aenyng nae kähawi y saite puisidi qawng-a ing sa saite khimi kaerö lawngtä kätyng vi. 27Aeli khöpui khöre hai tuimaw lä tho pa vi dy. Aeli kangcai lä tho kha ing tea ty pa. Tukha ing honi lä aene kha äbyng älang na-a awng king pa vi dy” näkha näpa.
Isu üng aenae
28Isu ma thui pyng te kätü-a äni ma mätu te lo thai saite khimipui na lä honi mätu saite phüng tengxyng y cangxei pa ö vi dy. 29Ätephüng-a mei nädylä Ubädi särae na ma mätu te kätyng Isu lä mätu pa te y vi. Äni lä aenae awng saite lawngtä kätyng mätu pa te vi.
8Ängang käsi lawngtä bung Isu ma hawi sa pa
1Isu lä me anghung üng aerung käthu ea khimipui na lä äni leithung hui pa ö dy. 2Tukha ängang käsi mang saite khimi lawngtä lä ly kha Isu maw-a khokhö didü pa dy. Äni ma Isu tea “Areng ä, nang ma aely ngai dylä, kai bung hawi hai haw he kae” näkha näpa. 8:2 Mosi üng Ubädi kätyng-a ängang käsi mang saite tea aela saite khimi lä Säthaw üng maw-a cai y.
3Isu la äma üng kö bäjang kha khimi känaw tea aela pa dy. Äni ma “Kai aely ngai cy. Hawi lawi sy” näpa. Qengtäma äni üng ängang käsi lä hawi praw pa vi dy. 4Tupyng-a Isu ma äni tea, “Ämi tea lä hini phüng thui hang ba. Tungaila ly kha nang ma bung mäthykung na tea mätü ba. Tukha Mosi üng Ubädi kätyng mäthykung tea löci sa ba. Hikä sa te lä nang vaihi naw hawi dy näte khimi qütä ma mäny vi ai” näkha näpa. 8:4 Mäthykung lä ängang käsi mang saite khimi hawi kha äni lä Säthaw maw-a cai dy näkha thui haw te aenae awng vi.
Isu ma Rom reisae mätawngky üng mawsawng bung hawi sa pa
5Isu lä Kapernawm märü-a kung tea Rom reisae cungvaitä bung pyng saite mätawngky lä äni tea ly kha säbawng hethang mäkai pa dy. 6Rom reisae mätawngky ma “Särae ä, kai üng mawsawng lä tengxyng y kawngang naw vi. Äni lä ätabung aetae haw y käla ing-a awng te vi. Äni lä naw mätang phi vi dy” näkha näpa.
7Isu ma äni tea “Kai ly kha äni tea hawi sa pa ai mang” näpa.
8Tupyng-a reisae mätawngky ma “Särae ä, nang lä kai üng ing-a ly hethang aeteng y lyng. Nang üng lo bälangtä phai thui dylä, kai üng mawsawng lä naw te hawi raw ai mang. 9Kai lä khimi üng aenae täkui-a awng saite khimi kae. Kai üng aenae täkui-a reisae na awng. Kai ma lawngtä tea ‘ly lawi’ nädylä äni lä ly vi. Kai ma äkälang reisae tea ‘Vawi lawi’ nädylä, äni lä vawi vi. Kai ma üng mawsawng tea ‘Hini kä sa nädylä äni lä sa vi’” näkha näpa.
10Isu ma hini lo thai ea tengxyng y cangxei vi dy. Tukha äma leithung hui te khimipui na tea “Tängai ö, Isrelae khimi na thung-a mäteng ma hini kätangtä yng phi saite khimi bung kai aeting vai y. 11Kai ma nang ce tea thui ai dy, khimi kä-awng mang na lä käni düng känise pre kälang mang üng ly ö te vi. Säthaw lä äma üng pre-a Sanphrang sa te kätü-a mä-ai üng kangsi Abraham, Isaika, Jaeko ce hai äni ce mangtä aety kha pawi sa ö vi ai. 12Tungaila Säthaw üng khimi, Isrelae khimi na bung kävingky saite thung-a kädesö vi ai. Honi mityng-a äni ce lä tengxyng y rawpi te hai äfaw aemäkütang kha awng ö vi ai mang” näkha näpa. 13Tupyng-a Isu ma Rom reisae mätawngky tea “Ing-a vawi lawi. Nang ma üng yng te kätyng mawsawng lä naw hawi vi dy” näkha näpa.
Honi kätü khaw-a ma mawsawng lä naw hawi pa vi dy.
Isu ma khimi ce bung känaw käsaw hawi sa pa
14Isu lä Peterae ing-a ly ea Peterae üng pä-i lä kawngang naw kha i nae qawng-a aesawng te nung pa vi dy. 15Isu ma Peterae pä-i kö tea aela ea äpä-i lä naw hawi pa dy. Tupyng-a Peterae pä-i lä aetha praw ea äni ce tea käcakänei mäcaw pa dy.
16Honi kädüng käni leng ea lä khimi ce ma angra kung saite khimi kä-awng mang na bung Isu tea nähai pa ö cu dy. Isu ma älo thui kha khimi ce te üng angra na bung mätho pang pa vi dy. Isu ma khimi ce üng känaw käsaw angxynlyng na hawi sa pa dy. 17Caekäcai thung-a buisaw Isaia ma tärü rüng saite lä cungrü hai pa dy. “Äni ma mä-ai üng aethawdi saite hai känaw käsaw na tea hawi hai vi dy” näkha näpa.
Isu üng äkähui aelawng hethang ngai saite na
18Isu lä äma tea säveng saite khimipui na bung nung ea äkähui na tea “Tuilipui rei mang-a aekae ö si” näpa. 19Tukha Ubädi särae lawngtä ma Isu tea ly kha “Särae ä, Kai lä nang ly saite mityng qütä-a hui by ai” näkha näpa.
20Isu ma äni tea “Kivae na lä äkhaw awng. Tävaw na lä täbö awng. Tungaila Kai, Khimi üng Cäpaw, lä älö qu nae mäteng awng te y” näkha näpa.
21Äkälang äkähui lawngtä ma “Areng ä, kai pä-ai üng äro bärung he sa mang re si. Tupyng-a kai ly kha nang leithung hui ai mang.”
22Tungaila Isu ma äni tea “Nang lä kai leithung vaihi ma hui lawi. Kädü na ma äma ce üng äro tea bärung ö raw kae sy” näkha näpa.
Isu ma aeli kangcai tea ding hai pa
23Tupyng-a Isu lä bälawng qawng-a paw pa dy. Äkähui na lä äni hai mangtä hui ö dy. 24Qengtäma tuilipui-a aeli kangcai tho te aetawng kha tuileng na lä bälawng thung-a kung pa vi dy. Tungaila Isu lä i vi rawng. 25Äkähui na lä Isu tea ly ea i bälaw ö dy. Äni ce ma “Areng ä, mä-ai tea säbawng kü. Mä-ai lä dü ai dy hei” näkha näpa.
26Isu ma äni ce tea “Nang ce lä yng te aethaw awng ö y. Ätephüng-a ri ö te mei.” Tupyng-a Isu ma aetha kha aeli hai tuileng na tea särilo hai thui pa dy. Tukha aeli hai tuileng na lä ding king pa vi dy.
27Khimi ce lä cangxei ea “Hini lä makäti khimi vi nang mei. Aeli hai tuileng na mäteng ma äni üng lo tängai na ly” näkha äma ce tingtawi aethui ö dy.
Isu ma angra kung saite khimi lawng netä bung hawi sa pa
28Isu lä Kalile tuilipui rei mang-a tyng dy. Honi mityng lä Kerasene khimi ce üng khö vi. Angra kung saite khimi lawng netä lä täprawng mang üng tho kha Isu tea aeting pa dy. Änini lä tengxyng y aethaw awng kha khimi angxynlyng na ri ö bawi vi. Tukha ämi lä honi lolang mang ly vawng ö y. 29Änini ma Isu tea “Säthaw üng Cäpaw ä, nang lä kai ce tea ätemakä sa hethang ngai hai te mei. Säthaw üng kätü tyng y rawng ea kai ni tea dengpy hethang ly te dy mei” näkha näpa.
30Änini hai äjecäcaw hanglaw saite mityng-a o kanghö na lä raca ca kha awng. 31Angra na ma Isu tea “Nang ma kai ce bung khimi te üng mätho dylä, honi o na thung-a kung hethang py kü jo” näkha näpa.
32Isu ma angra na kung saite ni tea “Ly hawi lawi” näkha näpa. Tukha angra na lä khimi te üng tho kha o tea kung ö dy. Tupyng-a o kanghö na lä täkha pyng mang-a aehui käthu ö kha tuilipui thung-a aesänung kha dü king pa ö vi dy.
33O bung rui saite khimi na lä märü thung-a aehui ö kha äma ce tea aeting saite khimi na tea thui pa ö dy. Angra kung saite khimi lawng netä üng älawngsai lä thui pa ö dy. 34Tukha märü üng khimi angxynlyng na lä Isu bung nung hethang ly ö dy. Äni ce lä Isu bung nung ea äma ce khö üng thoja hethang mäkai pa ö dy.
9Isu ma kökho kädü lawngtä bung hawi sa pa
1Tupyng-a Isu hai äkähui na lä bälawng aedang kha tuilipui rei mang-a aekae ea äma üng märü-a9:1 Hini märü lä Kapernawm vi. tyng ö dy. 2Khimi phütä na ma kökho kädü lawngtä bung Isu tea nähai pa. Äni lä i nae qawng-a aesawng pa te vi. Isu lä hini khimi ce üng yng saite nung kha naw saite khimi tea “Änang ä, aethawsi hang. Nang üng hunghö bung kai ma bälawi vi dy” näkha näpa.
3Ubädi särae phütä na ma hini lo thai te kätü-a, äni ce ma “Hini khimi lä Säthaw kätyng aesa te vi ly” näkha dawng ö dy.
4Isu lä äni ce üng aedawng saite mäny kha äni ce tea “Nang ce lä käsi na dawng hethang kae y. 5Kökho kädü khimi tea thui hethang manita jaky mei. ‘Nang üng hunghö na kai bälawi dy’ näkha thui te jaky mei. Y käla äni tea ‘Aetha kha aeke lawi’ näte jaky mei. 6Tungaila Khimi üng Cäpaw, Kai lä älawng qawng-a hunghö na bälawi hethang aenae awng saite nang ce tea mätü vi ai” näkha näpa. Tupyng-a Isu ma kökho kädü khimi tea “Aetha, nang üng i nae tä-yng kha ing-a vawi lawi cü” näkha näpa.
7Tukha äni lä aetha kha ing-a vawi pa vi dy. 8Hini tea khimi ce ma nung te kätü-a lä ri kha cangxei ö phi pa vi dy. Äni ce lä khimi lawngtä tea hini aenae käleng py pa te Säthaw tea bälaw ö vi dy.
Isu ma Mathai bung ka pa
9Isu lä honi mityng tho ea Mathai näte lawngtä angko cawng saite jung cäcaw-a aety te nung vi. Isu ma äni tea “Kai leithung hui lawi” näpa.
Tukha Mathai lä aetha kha Isu leithung hui praw pa dy.
10Isu lä Mathai üng ing-a kädüngbö ca dy. Honi kätü-a angko cawng saite na hai, khimi hunghö na ly kha, Isu hai äkähui na mangtä bö ca ö te vi. 11Pharisai na ma Isu lä hunghö awng saite na hai bö ca te nung kha Isu üng äkähui na tea “Ätephüng-a nang ce üng särae lä khimi hunghö na, angko cawng saite khimi na hai mangtä bö ca te vi mei” näkha näpa.
12Hini lo Isu ma thai kha äni ce tea “Känaw käsaw awng y saite na lä latang bung ngai y lyng. Tungaila naw te khimi lä latang bung ngai vi. 13Nang ce lä Caekäcai thung-a tärü te älo üng äphüng aetu ö re. Säthaw ma ‘Kai lä löci aesa te ngai y. Khimi ce lä äma ce tingtawi aebäheng te kai lä ngai te kae’ näkha näpa te vi. Kai lä khimi cüng saite na bung ka hethang ly te y. Khimi hunghö na bung ka hethang ly te kae vi” näkha näpa.
Böjae saite phüng
14Tupyng-a Baptismae Johan üng äkähui phütä na ma Isu tea ly kha “Kai ce hai Pharisai na lä böjae ö te reitae awng vi. Ätephüng-a nang üng äkähui na lä böjae ö y te vi mei” näkha düng pa.
15Isu ma äni ce tea “Aepawng saite särai üng rawijae na lä äni hai mangtä awng te thüng-a lä bälungsi te awng haw y. Khimi ce ma aepawng saite särai bung rawijae na te üng nähaija te kätyng vi ai. Hini kätü-a äni üng rawijae na lä böjae ö ai.
16“Kä-o kangrüng ngang tea kangthae ngang hai bang kha hui te awng vai y. Hokä hui dylä, kä-o kangthae ngang lä aeje kha kangrüng ngang aesä-ei rae vi ai baw. 17Khimi ce lä Cäpje tui kangthae lä mawiphö bung kangrüng thung-a mäkawi te awng vai y. Honi kätyng mäkawi dylä, Cäpje tui kangthae phüng-a mawiphö bung lä aesä-ei vi ai. Cäpje tui hai mawiphö bung lä pra vi ai. Cäpje tui kangthae lä mawiphö bung kangthae-a mäkawi saite kae vi. Honi kätyng sa dylä, Cäpje tui hai mawiphö lä pra hethang y vi” näkha näpa.
Naw saite nawngmädi lawngtä hai dü te anglaw lawngtä
18Isu lä hini älo na thui te thüng-a Judae khimi mätawngky lä äni tea ly pa dy. Tukha äni lä ämaw-a aebo kha Isu tea “Kai cänung lä vaicüng ma dü vi dy. Tungaila nang lä ly kha anglaw qawng-a äkö thyng dylä, äni lä hing haile tyng vi ai” näkha näpa.
19Tukätephüng-a Isu lä aetha ea äkähui na hai anglaw üng pä-ai leithung hui ö dy.
20-21Honi kätü-a naw saite nawngmädi lawngtä lä Isu leithung mang ly pa vi. Honi nawngmädi lä khösäning hawlai netä äthi märaw pa vi dy. Nawngmädi lä äma üng bälung thung-a “Kai lä äni üng kä-o tawng-a aela dylä, naw te hawi king vi ai” näkha aedawng dy. Tukha äni lä Isu üng kä-o tawng-a aela pa dy.
22Isu ma aehawi kha nawngmädi bung nung pa vi. Äni ma “Cänung ä, aethawsi hang. Kai tea yng te phüng-a Säthaw ma nang tea hawi hai te vi” näkha näpa. Nawngmädi üng naw te hawi praw pa dy.
23Isu lä Judae khimi mätawngky ingthung-a kung te kätü-a khimi ce lä ae-awi lawng üng te hai khimi kälang na lä ätüng käleng hai raw ö sung te nung vi dy. 24Tukha Isu ma äni ce tea “Tho pa öng la. Anglaw lä dü te y. Äni lä i te kae ecy” näkha näpa. Tukha khimi ce ma äni tea mänui hai pa ö vi. 25Tupyng-a khimi ce bung ärang mang-a mätho pang ea Isu lä anglaw awng saite-a kung pa. Isu lä anglaw üng kö-a süng kha anglaw lä aetha pa vi dy. 26Hini angthang lä honi märü äteng äpa-a äpa mityng qütä-a aethangdü pa vi dy.
Isu ma mikangjö lawng netä bung hawi sa pa
27Isu la honi mityng üng thoja te kätü-a ämi kangjö lawng netä lä äni leithung hui pa dy. Änini ma “Sanphrang Davidae üng Cäpaw ä, kai ni tea bäheng kü jo” näkha a pa hawi dy.
28Isu lä ingthung khaw-a kung te kätü-a mikangjö lawng netä lä äni tea ly hawi pa te vi. Tukha Isu ma änini tea “Kai lä nang ni üng naw te tea hawi sa haw ai näte nang ni lä yng hawi mei” näkha düng pa.
Änini ma “Areng ä, Yng cy ä,” näkha mäthang pa hawi dy.
29Tupyng-a Isu ma änini üng ämi na tea aela ea “Nang ni kai tea yng hawi te phüng-a Kai ma nang ni üng naw te tea lä hawi sa te vi dy” näkha näpa. 30Tukha änini üng ämi lä aevang haile haw vi dy. Tupyng-a Isu ma änini tea “Hini phüng ämi tea la thui hawi hang ba” näkha älo täru khi pa dy.
31Tungaila änini lä tho kha hini angthang lä mityng qütä-a thui pa vi dy.
Isu ma lo-ae bung älo aepe hai pa
32Änini tho hawi pyng te thüng-a khimi ce lä khimi kälang lawngtä bung Isu tea nähai pa dy. Honi khimi lä angra kung te vi. Angra lä khimi tea älo aepe haw y hethang sa pa te vi.
33Isu ma angra bung älo aepe haw y saite khimi te üng mätho pyng-a äni lä älo aepe pa dy. Khimi ce lä tengxyng y cangxei kha “Isrelae pre-a hini kätyng mä-ai lä qengtä la nung vai y” näkha nä ö dy.
34Pharisai na ma “Angra mangkhawng üng haidae py te phüng-a khimi ce üng angra mätho haw te vi” näkha thui ö dy.
Isu ma äkähui na bung mätaw pa
35Isu lä märü na hai vang angxynlyng na mang cäqeng kha ly ea Judae na üng Ingkäcai na thung-a Säthaw ma sanphrang sa saite Angthang Kähawi khimi ce tea mätu pa. Khimi ce üng känaw käsaw amäjy cawngkhang na hawi sa pa dy. 36Isu lä khimipui na bung nung te kätü-a äni ce tea bäheng pa dy. Makäte phüng-a mei nädylä äni ce lä mäsae phi kha aethawdi pa ö te vi. Äni ce lä rui te kung awng y saite beram na kätyng vi. 37Tupyng-a Isu ma äkähui na tea “Hini khimi ce lä caw müng saite lai prang hai aetawng vi. Tungaila caw ae te khimi na lä di. 38Tukätephüng-a caw ae saite na bung mätaw mang hethang lai kung tea mäkai ö ba” näkha näpa.
10Angtawtha lawng hawlai netä na bung re pa
1Isu lä äkähui lawng hawlai netä na bung mangtä ka dy. Äni ce tea Isu ma khimi ce te üng angra na bung mätho hethang aenae py pa vi dy. Tukha naw te hai känaw mi amäjy cawngkhang na tea hawi sa pa hethang haidae la py pa vi dy. 2Angtawtha lawng hawlai netä üng ämüng na lä honi na dy. Angcü-a Peterae näsaite Simon, hai äni üng kangby Andru, Zebede üng cäpaw lawng netä Jaeko hai äni üng kangby Johan, 3Philip hai Barthawleme, Thawmae hai angko cawng vai saite Mathai, Alphai üng cäpaw Jaeko hai Thadaeus, 4Isrelae pre tähang bälung naw hai phi saite Simon hai Isu bung täre na kö thung-a a pa saite Judae Iskriota ce vi.
Isu ma angtawtha lawng hawlai netä na tea mätu pa
5Isu lä äkähui lawng hawlai netä na bung mätaw te kätü-a hini amäjy na äni ce tea täru pa dy “Nang ce lä ceng kälang na tea ly ö hang. Awng mang saite Samari khimi ce üng märü na mang-a ly ö hang. 6Beram käla na hai aetawng saite Isrelae khimi na tea phai ly pa ö. 7Nang ce ly kha ‘Säthaw ma pre pyng ai te kätü lä aenai dy’ näte thui ö ba. 8Naw saite khimi na tea hawi sa pa ö. Dü saite khimi na tea la mäning haile tyng pa ö. Ängang käsi mang kha naw saite khimi na bung la hawi sa pa. Khimi thung-a kung saite angra na bung la mätho pa ö. Nang ce lä ävang py y käla ma naw te hawi sa pa hethang haidae dang pyng te vi dy. Tukha ävang la y käla khimi ce tea säbawng pa ö. 9Sui, tangkae hai phawisae na bung nang ce üng cawngkö thung-a khai kha nähai ö hang. 10Khölawng-a ly hethang tähang cawngkö süng ö hang. Kä-o kaeqai, kho painai kaeqai nähai ö hang. Pawngpai na mäteng ma nähai ö hang. Kälu sa saite kung lä äma ngai te na dang hethang aeteng te vi.
11“Nang ce lä märü, vang thung-a kung te kätü-a khimi ce ma tämö khai saite khimi lawngtä bung ha ö. Honi mityng üng nang ce tho y rytä äni üng ing-a aehae ö. 12Nang ce lä ingthung-a kung te kätü-a honi engthung tea Säthaw ma tähang kähawi py hethang aetang pa ö. 13Honi ingthung ma nang ce bung lady dylä, Säthaw üng tähang kähawi lä äni ce tea awng sy. Tungaila äni ce ma nang ce bung lady y dylä, nang ce ma ‘Tähang kähawi dang hang sy’ näkha thui pa. 14Märü haetä, vang haetä üng khimi na ma nang ce bung lady y dylä, nang ce üng lo tängai y dylä, äni ce te üng tho te kätü-a nang ma ce üng khodi na täkhy pa öng. Hini lä Säthaw ma tärae cei ai näte sämai nae vi. 15Tängai ö, Säthaw ma khimi angxynlyng na tea tärae cei te kätü-a, Sodom hai Komorae märü na-a awng saite khimi na qawng-a cang y honi märü üng khimi na tea lä dengpy vi ai.
Khimi ce ma Isu üng äkähui na tea sakälö khü
16“Käsui na thung-a beram na bung mätaw te kätyng kai lä nang ce bung khimi käsi na thung-a mätaw te vi. Tukätephüng-a nang ce lä Bärui na kätyng bälungkähae awng ö. Bähö na kätyng tämang saite sa hang. 17Nang ce lä kähawi-a sädi khai ö. Makäte phüng-a mei na dylä, khimi phütä na ma nang ce bung ne kha Judae na üng jung kai-a nähai ö vi ai. Judae na üng ingkäcai thung-a nang ce tea bo ö ai. 18Nang ce lä kai phüng-a pre pyng saite na hai sanphrang na üng maw-a tyng kha Angthang Kähawi äni ce tea hai ceng kälang na tea thui ö ai. 19Nang ce bung ne saite kätü-a äte thui ai mei, makä älo tho ai mei näte bälung mawng ö y ma. Honi kätü-a nang ce tea thui hethang Säthaw ma älo py ai mang. 20Honi lo na lä nang ce te mang üng lo y lyng. Honi lo na lä nang ce te mang hai nang ce Pä-ai üng Muilaw ma thui saite älo na kae mang.
21“Khimi ce lä kangby jä-ai tingtawi dü hethang tähang ae-a ö ai. Äpä-ai ma äcäpaw bung a ai. Äcäpaw ni äcänung lä änä-awi ni äpä-ai tea engleng sa kha bädü hethang a vi ai. 22Kai üng phüng-a khimi angxynlyng na lä nang ce tea esäre ö vi ai. Tungaila kangteng khytä cakhi-a awng saite khimi tea lä Säthaw ma aeqang pa vi ai. 23Khimi ce ma nang ce tea märü haetä-a sakälö khü dylä, märü kälang mang-a aehui ö. Tängai ö. Nang ce lä Isrelae pre üng märü angxynlyng na tyng y kälang-a Kai, Khimi üng Cäpaw, tyng haile ai.
24“Aetu saite khimi lawngtä lä äma üng särae qawng-a lengky te y. Mawsawng lawngtä lä äma üng areng qawng-a lengky te y. 25Aetu saite lawngtä lä äma üng särae kätyng aelawng hethang hai mawsawng lawngtä la äma üng areng kätyng aelawng hethang anghawtho vi ai. Äni ce ma kai tea Belzebul angra näkha ka vi dylä, nang ce tea hini qawng-a cang y siky saite ämüng ka ö vi ai.
Khimi ce tea ri ö hang
26“Tukätephüng-a nang ce lä honi khimi ce tea ri ö hang. Khimi ce ma täphung saite na tea Säthaw ma lä täphawng vi ai. Ho saite amäjy tea khimi ce lä mäny ö vi ai. 27Kai lä nang ce tea käving thung-a thui saite älo nang ce lä khimi ce tea kaevang-a thui pa ö. Kai ma nang ce üng känawkhing teng-a mäcü saite lo nang ce lä khimi ce thai rungtä ingphö qawng mang thui pa ö. 28Khimi ce tea ri ö hang. Äni ce lä nang ce üng ätabung tea bädü haw ngaila nang ce üng muilaw tea lä bädü haw te y lyng. Honi jüng-a, nang ce lä Säthaw tea phai ri ö. Äni lä khimi ce üng ätabung hai muilaw na tea ngärei thung-a täphra haw vi. 29Nang ce lä mawri tävaw me netä tea phawisae äjecäcaw hai rang haw te kae vi. Tungaila Känipre nang ce üng Pä-ai ma mäny y dylä, mawri tävaw metä mäteng ma älawng qawng-a aeqa haw y lyng. 30Nang ce üng älö-a äsang na majetä awng mei näte mäteng ma Säthaw lä to bawi haw te vi. 31Tukätephüng-a ri ö hang. Nang ce lä mawri na qawng-a ävang tingky te vi.
Isu bung aephae te hai aephae y te
32“Khimi lawngtä ma khimi ce maw-a kai bung aephae y dylä, Känipre üng Kai Pä-ai maw-a äni bung kai la aephae y ai. 33Tungaila kai bung khimi ce maw-a aephae saite khimi tea lä Känipre üng kai Pä-ai maw-a äni lä kai üng äkähui y näkha aephae by vi ai.
Nang ce üng engthung na qawng-a Khrista tea bälung aevaw ö
34“Älawng qawng-a awneng hethang kai ly te käthi ö mei. Kai lä awneng hethang ly y. Aetäprei hai hethang kai lä aekei sawngseng hai ly te kae. 35Äpä-ai hai cäpaw, änä-awi hai äcänung, äkangni hai älingaw na aetäprei hethang Kai ly te kae. 36Khimi üng täre na lä äma üng engthung üng khimi raw vi.
37“Khimi lawngtä lä äma üng nä-awi ni pä-ai bung kai qawng-a bälung aevawky dylä, kai üng äkähui-a awng hethang aeteng y lyng. Khimi lawngtä lä äma üng cäpaw hai cänung na bung kai qawng-a bälung aevawky dylä, kai üng äkähui-a awng hethang aeteng y lyng. 38Khimi lawngtä lä kai leithung hui kha kai tähang dü hethang aerü rüng ea thinglang aepö y dylä, kai üng äkähui-a awng hethang aeteng y. 10:38 Käri lo-a nang üng thinglang aepö kha kai leithung hui näkha tärü te awng vi.39Khimi lawngtä lä äma üng hing saite tea mäsai vi dylä, dungtäsa hing te dang y. Khimi lawngtä kai tähang hini älawng qawng-a äma üng hing saite khaisö dylä, dungtäsa hing te dang ai.
Säthaw ma py te ävang
40“Nang ce bung lady saite khimi la kai bung lady te kätyng by kae dy. Kai bung lady saite khimi lä kai tea ma qaitä lady te cang y kai bung mätaw saite Säthaw tea lady te by kae dy. 41Khimi lawngtä lä buisaw lä Säthaw üng angthang thui te phüng-a hini buisaw tea lady dylä, Säthaw ma äni tea buisaw kätyng ävang py ai. Khimi lawngtä lä Säthaw üng khimi vi te phüng-a khimi käcüng bung lady dylä, Säthaw ma äni tea khimi käcüng kätyng ävang py pa ai. 42Khimi lawngtä lä kai üng äkähui thung üng äcäpiky lawngtä tea kai üng äkähui te phüng-a tui angding bynglyngtä py dylä, Säthaw ma äni tea kähawi-a ävang py khaw vi ai.”
11Isu ni Baptismae Johan phüng
1Isu la äkähui lawng hawlai netä na tea mätu pa dy. Tupyng-a äni lä honi mityng üng tho kha khimi ce tea älo mätu hethang hai Angthang Kähawi thui hethang Kalile khö üng märü kälang na mang-a ly pa.
2Baptismae Johan lä thawng thung-a awng te thüng-a Khrista üng sa saite angthang na thai dy. Tukha äni üng äkähui na bung Isu tea älo düng hethang mätaw pa dy. 3Äni ce ma Isu tea “Nang lä kai ce aering saite Mesia mei. Tukä y käla kai ce lä khimi kälang lawngtä bung aering ai rawng mei” näkha düng pa ö dy.
4Isu ma äni ce tea “Ly haile kha nang ce nung saite hai thai saite amäjy na Baptismae Johan tea thui pa ba. 5Ämi kangjö na ämi nung haw ö dy. Äkho kangbai na aeke haw ö dy. Ängang käsi mang saite na la hawi sa pa dy. Känaw pang saite na la thai haile tyng ö dy. Dü saite na lä aetha haile tyng ö dy. Mätang saite khimi na Angthang Kähawi thai ö by dy. 6Kai tea yng jawjaw saite khimi tea lä Säthaw ma tähang kähawi py ai” näkha mäthang pa dy.
7Baptismae Johan üng äkähui na tho sälö ea, Isu ma Johan phüng khimi ce tea thui pa dy. Äni ma “Nang ce lä äte bung nung hethang ngai kha daithung kärang mang-a ly ö te mei. Aeli tho kha aehüng saite säbö kung tea kheng ö he mei. 8Y dylä, äte tea kheng hethang ly ö te mei. Kä-o ävang käting aelawng saite khimi lawngtä bung nung he ngai ö te mei. Ävang käting kä-o aelawng saite khimi na lä sanphrang üng ing na thung-a awng ö te kae be. 9Tudylä nang ce lä makäti khimi bung nung hethang daithung kärang-a ly ö te mei. Buisaw lawngtä bung nung he ngai te mei. Tängai ö, nang ce lä buisaw lawngtä qawng-a lengky saite bung nung ö vi dy. 10Johan phüng Caekäcai thung-a tärü te lä ‘Tängai ba, nang üng maw-a kai üng angtawtha saite bung kai ma mätaw ai. Äni lä nang üng ämaw-a lolang mäcai pa vi ai’ näpa. 11Tängai ö, nawngmädi na üng aepeng saite khimi na thung-a Baptismae Johan qawng-a lengky te ämi la awng y. Tungaila Säthaw üng pre pyng te thung-a äcäpiky saite lawngtä lä Johan qawng-a lengky vi. 12Honi Baptismae Johan üng Angthang Kähawi thui te kätü üng hai vaihi khytä Säthaw pyng te khimi na lä aethaw paitae sa kha kung ea pyng hethang ngai ö vi. 13Baptismae Johan tyng y kälang-a buisaw angxynlyng na hai Mosi üng Ubädi na ma Säthaw pyng te pre phüng thui ö vi. 14Baptismae Johan lä Säthaw ma mätaw hethang thui rüng saite Elijae vi. 15Känawkhing awng saite khimi na lä thaikaw ö sy.
16“Vaihi dung üng khimi na tea lä äte hai mätae ai mei. Äni ce lä vyngjaw te mityng-a aety kha äma ce tingtawi älo aepe saite nade kätyng äma ce cici aekähyng ö vi. 17Äni ce ma ‘Kai ce lä nang ce tähang kätang üng ngaila nang ce lä lang ö y vi. Kai ce lä äro kung-a bälungsi te hai ae-awi ngaila nang ce lä raw ö y’ näpa. 18Tudylä hini kätyng Kai ni Baptismae Johan tea tyng te by vi. Baptismae Johan ly tea äni lä böjae kha Cäpje tui na nei y. Khimi ce ma ‘Johan tea angra kung te vi’ näkha näpa ö dy. 19Kai, Khimi üng Cäpaw, lä ly tea ca nei kha awng vi. Tukha khimi ce ma ‘Äni lä bö ca te hahaw pä-ai, Cäpje tui neipro te khimi äni lä angko cawng saite na, khimi hunghö sa saite na hai rawijae aesa vi näpa ö be dy.’ Tungaila Säthaw üng bälungkähae awng saite na üng thui saite sa saite na nung ea kälang na ma Säthaw üng bälungkähae lä tüng näte mäny haw ö ai.”
Ae-ui y saite khimi na
20Tupyng-a Isu lä cangxei te awng mang-a sa pyng saite märü üng khimi na tea jaw pa dy. Ätephüng-a mei nädylä hani märü üng khimi na lä ae-ui pa ö y. 21Isu ma lä “Korazin märü üng khimi na ä, Säthaw ma nang ce tea tähang käsi py vi ai. Besaida märü üng khimi na ä, nang ce tea Säthaw ma tähang käsi py vi ai. Nang ce nung te cangxei saite na Kai ma Taira hai Sidon märü-a sa ea kha lä honi märü na üng khimi na lä vaicaw üng hai ma hunghö ae-ui ö vi ai. Äni ce lä kä-o kämawng na aelawng ea baiphö thung-a aety kha ae-ui te mätü ö pyng te vi dy. 11:21 Kä-o kämawng aelawng kha baiphö thung-a aety te lä bälung käsi hai ae-ui te tea mätü te vi.22Tängai ö, Säthaw ma khimi ce tärae cei te kätü-a Taira hai Sidon märü üng khimi na qawng-a cang y nang ce tea lä dengpy ö vi ai rawng. 23Kapernawm märü üng khimi na ä, nang ce tea Säthaw ma tengxyng y mäsang te käthi mei. Tukä sa y lyng. Nang ce bung ngärei thung-a käde vi ai. Makäte phüng-a mei nädylä nang ce üng märü-a kai sa pyng saite kamarae na Sodom märü üng khimi na nung dylä, honi märü lä vaihi khytä awng ai rawng. 24Tungaila hini lo lä tängai ö, Säthaw ma khimi ce tea tärae cei te käni-a, nang ce lä Sodom märü üng khimi na qawng-a cang y nang ce tea lä dengpy vi ai” näkha näpa.
Isu ma aehae te py ai
25Tupyng-a Isu ma “Ä-ai ä, käni hai älawng üng Areng nang tea kai bälaw mang. Ätephüng-a mei nädylä nang lä bälungkähae na tähang ho saite phüng na nade kätyng awng saite khimi na tea täphawng pa te phüng-a vi. 26Ä-ai ä, Hini na lä nang ma aely ngai saite vi.
27“Kai pä-ai ma kai tea haidae hai bälungkähae py king vi dy. Ämi lawngtä lä Säthaw üng cäpaw näte mäny y. Pä-ai lawngtä xyng ni mäny te kae vi. Äpä-ai näte ämi lä mäny y. Kai, Äni üng Cäpaw, ma mäny hai he ngai saite khimi phütä na lä Ä-ai tea mäny ö dy.
28“Kälu sa qyng kha mäsae saite na kai tea ly ö. Nang ce aehae hethang kai ma säbawng ai. 29Kai üng müngkäli phaw kha älo tängai kha kai üng äkähui-a aelawng ö. Kai lä änawngsa te hai bälung aemäneng saite vi. Tudylä nang üng bälung aehae saite dang tätang vi ai. 30Ätephüng-a mei nädylä kai üng müngkäli lä jahaw kha phaw hethang janghy te vi” näkha näpa.
12Isu lä aehae te käni üng Areng vi
1Tupyng-a Aehae te Käni-a Isu lä äkähui na hai mangtä lai mang-a aeke prei ö dy. Äma üng äkähui na lä böjo aelang kha caw vui sädy ea caw me khei kha ca pa ö vi. 2Pharisai na ma äkähui na sa te nung ö kha Isu tea “Nang üng äkähui na sa te lä Mosi üng Ubädi kätyng Aehae te Käni-a sa hethang kae y” näkha näpa.
3Isu ma äni ce tea “Nang ce lä Caekäcai thung-a sanphrang Davidae hai äma üng äpy na böjo aelang te kätü-a sa saite na phüng phai vai ö y nang mei. 4Äni lä Säthaw üng Taipung thung-a kung kha äni hai äpy na lä Säthaw tähang khai saite täkaw käcai ca pa vi. Mosi üng Ubädi kätyng honi täkaw tea mäthykung na qaitä ca hethang kae. 5Mosi üng Ubädi thung-a Aehae te Käni qütä-a Säthaw üng Ingkäcai thung-a äni üng kälu sa saite mäthykung na lä Ubädi kätyng sa ö y näte nang ce lä phai vai y mei. Tungaila Säthaw ma äni ce sa te tea tämang vi näkha thui te y. 6Tängai ö, kai ma nang ce tea hikä thui te lä Säthaw üng Ingkäcai qawng-a lengky saite lawngtä lä hi-a awng vi. 7Caekäcai thung-a Säthaw ma ‘Kai lä löci aesa te ngai y. Khimi ce lä äma ce tingtawi aebäheng te kai lä ngai te kae.’ Nang ce honi älosai phüng mäny ea kha lä, äkähui na sa tämang saite nang ce thui ö y vi ai. 8Kai, Khimi üng Cäpaw, lä Aehae te Käni üng Areng la vi” näpa.
Äkö pheitä aeqa saite khimi
9Isu lä lai mang üng tho pyng-a Judae na üng Ingkäcai thung-a kung pa dy. 10Äkö pheitä aeqa saite lä ha-a awng pa vi. Äni lä äkö aeqa pa te vi. Pharisai na lä Isu tea käsi thui hethang ha kha äni tea “Aehae te Käni-a khimi bung hawi sa pa te lä Judae na üng Ubädi hai aebäla mang mei” näkha düng pa ö dy.
11Tukha Isu ma äni ce tea “Aehae te Käni-a nang ce üng beram metä angrawng thung-a aeqa dylä, nang ce lä makä sa ö ai mei. Nang ce lä angrawng thung üng beram bung ärang-a mätho ö vi ai. 12Khimi lawngtä lä beram metä qawng-a ävang tingky. Tukätephüng-a Aehae te Käni-a kähawi sa te lä Mosi üng Ubädi tea täphra te y” näpa. 13Tupyng-a Isu ma äkö pheitä aeqa saite tea “Nang üng äkö bäjang lawi.”
Tukha äni üng äkö mätaw kha pheitä mang üng äkö kätyng-a hawi ping pa vi dy. 14Tukha Pharisai na lä tho ea Isu bung makä sakha bädü haw ai mei näte phüng aedüng ö vi dy.
Säthaw ma re saite mawsawng
15Isu lä Pharisai na aeceng saite mäny kha honi mityng üng thoja pa vi dy. Awng mang saite khimi na lä äni leithung hui pa ö dy. Isu ma äni ce thung üng känaw käsaw awng saite khimi qütä tea lä hawi sa pa dy. 16Isu lä äni ce tea äma lä ämi mei näte phüng thui y hethang älo täru khi pa dy. 17Hikä sa te phüng-a Caekäcai thung-a buisaw Isaia ma tärü saite kätyng lä cungrü hai khaw te vi dy. 18Säthaw ma
“Hini lä kai üng mawsawng vi.
Kai ma äni bung re te vi.
Äni lä kai ma bälung aevaw saite lawngtä vi.
Tukha äni lä kai tea bälung kawng anghawtho hai phi te vi.
Kai lä äni tea kai üng Muilaw py vi ai.
Tudylä kai üng mawsawng ma ceng kälang na makä sakha,
khimi käcüng-a aelawng hethang phüng thui pa ai.
19Äni lä khimi ce hai älo ae-e y vi ai.
Ätüng käleng hai la a y vi ai. Lolang-a älo käneng y hai aepe y.
20Äni lä aetäkui kha awng rüng saite säbö kung bung khy te y.
Aethaw awng y saite khimi na tea bäheng vi.
Honi kätyng-a äni lä maicae üng mai äjecäcaw tea la bädü y.
Äma ma tea sa haw y saite khimi tea äni lä bälung hawi vi.
Äni lä käcüng saite ma bäja te khytä hini kätyng sa jawjaw vi ai.
21Ceng angxynlyng na üng khimi na lä äni tea ae-y ö vi ai” näkha näpa.
Hini kätyng cungrü hai vi ai.
Isu hai Belzebul angra mangkhawng
22Tupyng-a khimi phütä na lä angra kung saite khimi lawngtä bung Isu tea nähai pa ö dy. Honi angra lä khimi tea ämi nung haw y, älo la aepe haw y rung sa pa vi. Isu ma äni te üng angra bung mätho pa dy. Tukha äni lä ämi nung haw ea älo la aepe haw pa vi dy. 23Khimipui na lä cangxei ö ea “Hini khimi lä sanphrang Davidae üng cäpaw aelawng haw ai mei” näkha näpa ö dy.
24Tungaila Pharisai na ma hini phüng thai te kätü-a lä, “Hini khimi lä Belzebul angra mangkhawng üng haidae hai angra na bung mätho haw vi” näkha äma ce tingtawi aethui ö dy.
25Äni ce üng aedawng saite na Isu lä mäny kha äni ce tea “Pre haetä lä äma tea äma ma täre aety raw dylä, honi pre lä pra vi ai baw. Märü y dylä, engthung khaw üng khimi na lä lawng lawngtä aety raw vi dylä, hini ingthung lä aetäprei vi ai. 26Setan angra lä äma tea äma aety raw dylä, äni üng pre lä pra vi ai. 27Kai lä angra na bung Belzebul angra mangkhawng üng haidae hai-a mätho te dylä, nang ma ce üng äkähui na lä ämi üng haidae tawng kha angra na mätho ö te mei. Hini phüng-a nang ce thui te tämang te näte nang ma üng äkähui na ma mätü ö dy.
Säthaw lä khimi ce säla-a pre pyng pa
28“Kai lä Säthaw üng Muilaw ma kai tea py te haidae hai angra na bung mätho haw te vi dy. Tukha hini na ma Säthaw lä äma üng pre tea vaihi ma pyng rüng te mätü te vi dy. 29Pheitä mang hai thui dylä, aethaw awng saite khimi bung mäkhing mang y käla äni üng ing-a kung kha ämi lä äni üng vyng na la haw y lyng. Äni bung mäkhing pyng ea ni äni ing-a kung kha vyng na bäru haw hethang kae. 30Kai te mang-a awng y saite khimi lä kai üng täre kae vi. Khimi lawngtä lä kai hai mangtä Säthaw üng pre tähang khimi cüng saite y dylä, täprei saite kae vi.
Säthaw ma bälawi haw y saite hunghö
31“Tängai ö! Säthaw lä khimi üng hunghö angxynlyng na hai käsi prawng saite na bälawi haw vi ai. Tungaila khimi lawngtä ma Muilaw Käcai tea käsi prawng dylä, Säthaw ma manila äni üng hunghö bälawi haw y lyng. 32Khimi ce ma Kai, Khimi üng Cäpaw tea käsi prawng te lä Säthaw lä bälawi haw vi ai. Tungaila khimi lawngtä ma Muilaw Käcai tea käsi prawng dylä, Säthaw lä manila vaihi üng hai vaimaw mang-a la hunghö bälawi haw y dy.
Äkung hai äthai
33“Äkung hawi dylä, äthai kähawi aethai vi. Tungaila äkung hawi y dylä, äthai kähawi y aethai kae vi. Äthai tea kheng kha äthai kung üng äphüng mäny haw te vi. 34Nang ce lä äce küng hai saite bärui amäjy na kätyng vi. Nang ce lä khimi käsi käsae na vi kha älo kähawi amäjy tho haw ö y lyng. Ätephüng-a mei nädylä äma üng bälung thung-a kawi saite na ni äma üng täbawng mang tho te vi. 35Khimi kähawi lä kähawi-a aedawng te phüng-a, kähawi sa kha älo kähawi ni thui vi ai. Khimi käsi lä hawi y saite aedawng te phüng-a khimi ce tea hawi y sa kha hawi y saite lo ni thui vi ai.
36“Säthaw ma khimi ce tärae cei te kätü-a lä, nang ce lä ävang ting y aepe saite älo angxynlyng na phüng täphawng he kae. 37Ätephüng-a mei nädylä nang ce lä ävang ting y te älo aepe te phüng-a Säthaw ma cei vi ai. Nang ce lä älo kähawi aepe dylä, Säthaw ma nang ce tea tämang te awng y” näkha thui vi ai.
Khimi ce ma kamarae mäkai pa
38Tupyng-a Ubädi särae na hai Pharisai phütä na ma Isu tea “Särae ä, kai ce lä nang kamarae sa saite nung hethang ngai vi” näkha näpa.
39Isu ma äni ce tea “Vaidung üng kaetha khimi ce lä hawi y kha Säthaw üng lo tängai ö y. Nang ce lä kai te üng kamarae mäkai ö te vi. Tungaila Säthaw ma buisaw Jonae tähang sa pa saite kamarae haetä xyng kai ma nang ce tea mätü ai. 40Jonae lä mawi käleng üng äjo thung-a käni thungtä hai kärung-a rung thungtä awng te vi. Honi kätyng-a Kai, Khimi üng Cäpaw, lä älawng thung-a käni thungtä hai rung thungtä awng by vi ai. 41Säthaw ma khimi ce tea tärae cei te kätü-a lä Ninevi märü üng khimi na lä aedaw kha vaidung üng khimi na tea dengpy hethang aeteng khaw näkha thui ö vi ai. Ätephüng-a mei nädylä Jonae ma thui te lo phüng-a äni ce lä hunghö üng ae-ui ö te vi. Tukha vaihi Jonae qawng-a lengky saite lawngtä lä hi-a awng vi dy. Tungaila nang ce lä ae-ui hethang ngai ö y. 42Säthaw ma khimi ce tea tärae cei te kätü-a lä, Seba pre üng sanphrang nä-awi lä aedaw kha vaidung üng khimi na tea dengpy he aeteng näkha thui vi ai. Ätephüng-a mei nädylä äni lä Solomon sanphrang üng bälunghae te lo tängai hethang ngai kha khöteng täki mang üng hai ly pa vi. Vaihi kätü-a Solomon qawng-a kälengky saite lawngtä lä hi-a awng vi rawng.
Angra lä vawi haile tyng te hai mätae pa
43“Angra lä khimi thung üng tho ea, daithung kärang mang-a aevi kha awng nae ha vävawi vi. Tungaila äni lä mityng dang pa y. 44Tupyng-a angra lä äma tea ‘Kai ma üng mityng kangrüng-a vawi haile tyng khyry ai nä vi.’ Tukha angra lä mityng kangrüng-a vawi haile ea äma kung saite khimi lä khimi awng y te ing kätyng hai mäcai ping ea cülü-ü saite ing hai aetawng te nung pa vi dy. 45Tukha äni lä äma qawng-a siky saite kälang angra me säritä na tea ka dy. Tukha äni ce angxynlyng na honi khimi tea kung kha awng pa. Tukätephüng-a honi angra kung saite khimi üng kangkhüng-a awng saite lä angcü üng qawng-a siky vi. Honi kätyng-a vaidung üng kaetha khimi na tea lä tyng vi ai.”
Isu üng änä-awi hai kangby na
46Isu lä khimipui na tea älo thui te thüng-a, äni üng änä-awi hai kangby na lä tyng pa dy. Äni ce lä Isu hai älo aepe hethang ngai kha ing ärang mang-a aedaw pa ö vi dy. 47Khimi lawngtä ma Isu tea “Nang üng nä-awi hai kangby na lä ärang mang-a aedaw kha awng ö dy. Äni ce lä nang hai älo aepe hethang ngai te ti ho” näkha näpa.
48Tudylä Isu ma “Kai üng nä-awi, kai üng kangby na tätang lä ämi ce mei” näkha düng pa. 49Tupyng-a äni lä äkähui na tea täkhi kha kheng ö, “Hini khimi ce lä kai üng nä-awi hai kangby na dy. 50Khimi lawngtä lä Känipre üng kai pä-ai üng kängai kätyng sa dylä, kai üng kangby jä-ai, ticaw hai nä-awi na kätyng kae dy” näkha mäthang pa haile dy.
13Ämöti hi saite khimi hai mätae pa
1Honi käni-a Isu lä ing üng tho kha Kalile tuilipui pyng-a ly ea aety pa dy. 2Isu tea khimipui na lä sävenglü kha awng pa. Tupyng-a Isu lä bälawng qawng-a paw kha aety pa dy. Khimipui angxynlyng na lä tui teng üng bälang qawng-a aedaw kha awng ö dy. 3Tupyng-a Isu lä äni ce tea mätae saite lo na hai mätu mang pa dy.
Tängai ö, “Lai sa te khimi lawngtä lä ämöti hi hethang lai-a ly dy. 4Ämöti hi te kätü-a phütä lä lolang qawng-a aeqa vi. Tävaw na lä ly ea ämöti na ca king pa ö vi dy. 5Ämöti phütä na lä älung qawng-a aeqa pa. Hini mityng-a lä älawng thaw y te phüng-a äkung aepra praw vi. 6Tungaila käni tho kha äkung na tea khöbi da pa vi. Tukha äkung cäpi na lä angjüng na ru haw y te phüng-a cei king pa dy. 7Ämöti phütä na lä angling kung na säla-a aeqa pa dy. Angling kung na lä ryng rae ea äkung cäpi na tea bäja te phüng-a äkung na lä ryng pa y dy. 8Ämöti phütä na lä älawng kähawi qawng-a aeqa pa dy. Äkung aepra kha ryng rae ea äthai na aethai mang pa dy. Äkung phütä na lä tawngtä-a phü ruithungtä, phü rui tärutä hai cungvaitä, aepu hai rae pa vi dy. 9Känawkhing awng saite khimi na lä thaikaw ö sy” näkha näpa.
Mätae saite lo üng äphüng
10Äkähui na lä Isu tea ly kha “Ätephüng-a nang lä khimi ce tea mätae te lo na hai thui te vi mei” näkha düng pa.
11Isu ma äni ce tea “Säthaw ma pre pyng saite phüng ho saite na nang ce tea mäny hai dy. Tungaila khimi kälang na tea lä mäny hai y. 12Sakaw te awng saite khimi tea lä Säthaw ma py rae vi ai. Tungaila sakaw te awng y saite khimi tea lä äma tea awng saite kaedawng tea mäteng ma Säthaw ma la king vi ai. 13Tukätephüng-a kai ma äni ce tea älo thui te kätü-a, mätae te lo hai thui te vi. ‘Äni ce lä nung ngaila mäny ö y. Äni ce lä thai ngaila tängai kaw ö te y vi’ näkha näpa. 14Jangni-a Caekäcai-a buisaw Isaia üng tärü saite lä
‘Nang ce lä känawkhing hai thai jawjaw ngaila, thaikaw ö y vi ai.
Nang ce lä ämi hai nung jawjaw ngaila, mäny ö y vi ai.
15Ätephüng-a mei nädylä hini khimi ce üng bälung lä tangkö ö te vi.
Äni ce lä känawkhing pang ö te vi. Äni ce üng ämi lä bäjö ö te phüng-a vi.
Tukä y dylä, äni ce lä känawkhing hai thai ö ai.
Äni ce üng ämi hai nung haw kha bälung hai la mäny va haw ö vi ai.
Äni ce lä hini kätyng awng kha kai tea aekö haile dylä, äni ce üng känaw käsaw hawi sa ö vi ai.’
16“Säthaw ma nang ce tea tähang kähawi py te phüng-a Nang ce lä ämi la nung, känawkhing la thai ö dy. 17Tängai ö, nang ce nung saite na tea, awng mang saite buisaw na hai awng mang saite khimi käcüng na lä nung hethang ngai ea la nung he dang ö y. Nang ce thai saite na tea äni ce lä thai hethang ngai ea la thai he dang ö y.
Ämöti hi saite khimi hai mätae te phüng thui mäcai pa
18“Tängai ö, hini mätae saite ämöti hi te phüng lä hikä hei. 19Khimi lawngtä lä Säthaw ma Sanphrang sa kha pyng saite pre phüng thai kha äni ma mäny dylä, Setan angra lä äni üng bälung thung-a awng saite Säthaw üng lo tea la pa ja vi. Hini lä lolang qawng-a aeqa saite ämöti na tea mätae pa te vi. 20Kälung qawng-a aeqa saite ämöti na lä Säthaw üng lo thai kha kawng bärai te hai yng praw saite khimi na tea thui te vi. 21Tungaila Säthaw lo lä äni ce üng bälung thung-a cakhi y te phüng-a tänaetä yng ö te kae vi. Tukha äni ce lä Säthaw üng lo phüng-a mätangca saite aeting te kätü-a lä yng jawjaw ö y te vi. 22Angling thung-a aeqa saite ämöti na lä Säthaw üng lo thai pyng saite khimi na tea thui te vi. Tungaila äni ce lä bälung mawng saite hai tawngnang saite hai ngai saite na phüng-a yng saite lä ryng kha äthai aethai haw y. 23Älawng kähawi-a aeqa saite ämöti na lä Säthaw lo thai pyng-a mäny saite khimi tea thui te vi. Äni ce lä Säthaw üng lo thai kha yng te phüng-a, phü ruithungtä, phü rui tärutä hai phü cungvaitä, aepu rae kha äthai na aethai mang pa dy” näkha näpa.
Isu ma caw kung hai aeca kung na phüng hai mätae pa
24Tupyng-a Isu lä mätae te lo kälang thui pa be dy. Isu ma “Säthaw ma sanphrang sa saite pre lä hini kä vi. Khimi lawngtä lä äma üng lai-a ämöti kähawi na hi vi. 25Tungaila kärung-a äni ce i te kätü-a, äni üng täre lä ly kha lai-a hawi y saite ämöti na hi pa ö vi dy. Tupyng-a äni üng täre lä thoja pa dy. 26Caw kung na aepra kha ävui na tho te kätü-a, aeca kung na aepra te mawsawng na lä nung ö vi dy. 27Mawsawng na lä ly kha ingkung tea ‘Ingkung ä, kai ce lä nang üng lai-a ämöti kähawi na ni hi ö te vi dy. Aeca kung na lä ma üng tho te mei näte kai ce lä mäny ö y’ näkha näpa. 28Ingkung ma äni ce tea ‘Hini aeca kung na lä täretäkai ma e te vi’ näkha mäthang pa. Tupyng-a mawsawng na ma ingkung tea ‘Nang lä kai ce tea ly kha aeca kung na bung aephawi hethang ngai hai te mei’ näkha näpa. 29Tukha ingkung ma äni ce tea ‘Aepawi ö y ma. Ätephüng-a mei nädylä aeca kung na bung nang ce aephawi dylä, kjung angjüng na qa ma vi ai. 30Aeca kung na hai caw kung na mangtä caw ae te thüng khytä ryng re sy. Caw ae kätü tyng ea kai üng mawsawng na tea nang ce lä angcü-a aeca kung na aephawi mang kha honi na tea maisawi hethang tä-yng kha mäkhing ö he kae. Tupyng-a äni ce lä caw kung na tea ae kha käcüng ea kai üng cawpai thung-a mätung ö’” näkha näpa.
Angmawi mö hai mätae pa
31Tupyng-a Isu lä mätae te älo äkälang hai khimi ce tea thui pa be dy. “Säthaw ma Sanphrang sa saite pre lä hini hai aetawng vi. Khimi lawngtä lä angmawi mö la kha äma üng lai-a e dy. 32Hini angmawi mö lä ämöti angxynlyng na thung-a äcäpiky vi. Tungaila aepra kha ryng ea lä angkhaw thung üng äkung kälang angxynlyng na qawng-a lengky vi. Tukha tävaw na lä cangpre qawng-a aehae ö dy” näkha näpa.
Täkaw aepae saite aesi hai mätae pa
33Isu lä khimi ce tea mätae saite lo kälang hai thui pa dy. Äni ma “Säthaw ma pre pyng saite lä täkaw aepae saite aesi hai aetawng vi. Awng mang saite täkaw na tea aepae hai bawi hethang nawngmädi lawngtä lä täkawdi aesi la kha aeqo pa dy. Tukha awng mang saite täkawdi na tea lä aepae hai bawi pa dy” näkha näpa.
Buisaw na thui rüng pa saite lo na cungrü hai te
34Isu lä khimi ce tea hini amäjy angxynlyng na mätu hethang mätae te lo na hai thui pa. Isu ma khimi ce tea mätu ea lä mätae te lo hai thui jawjaw te vi. 35Jangni-a Säthaw ma buisaw hai-a thui rüng saite lä hini kätyng cungrü hai te vi
“Kai lä mätae saite lo na tawng kha khimi ce tea älo thui ai.
Kai lä älawng sa te üng hai ma täphawng y saite amäjy na thui ai” näkha näpa.
Caw kung hai aeca kung phüng
36Tupyng-a Isu lä khimipui na te üng tho kha ingthung-a kung pa vi dy. Äma üng äkähui na lä ly kha Isu tea “Kai ce tea lai üng caw kähawi y kung na phüng mätae saite lawngsai thui mäcai kü jo” näkha näpa.
37Isu ma “lai-a ämöti kähawi hi saite ingkung lä Kai, Khimi üng Cäpaw, tea thui te vi. 38Lai lä älawngpre vi. Ämöti kähawi na lä Säthaw ma pyng saite khimi na vi. Ämöti kähawi y näte lä Setan angra ma pyng saite khimi na vi. 39Aeca möti hi saite täre lä Setan angra tea thui te vi. Caw ae saite kätü lä hini älawngpre byng saite kätü tea thui te vi. Caw ae saite khimi na lä Säthaw üng angtawtha na vi. 40Mawsawng na ma aeca kung na bung aephawi kha mai-a sawi ö vi ai. Hini älawngpre byng tea lä hini kätyng awng vi ai. 41Kai, Khimi üng Cäpaw, älawng qawng-a Kai ma üng angtawtha na bung mätaw vi ai. Tukha äni ce lä khimi ce tea käsi sa hai saite hai hunghö na sa saite khimi angxynlyng na tea Säthaw pre thung üng mätho ö vi ai. 42Säthaw üng angtawtha na ma käsi sa saite khimi na bung ngärei thung-a käde pa ö vi ai. Honi mityng-a äni ce lä tengxyng y raw kha äfaw aemäkütang ö vi ai. 43Tupyng-a khimi cüng saite na lä äni ce üng Pä-ai Säthaw üng pre-a Käni kätyng aevang ö ai. Känawkhing awng saite khimi na lä thaikaw ö sy” näkha näpa.
Ävang ting saite amäjy na phüng hai mätae pa
44“Säthaw ma pre pyng saite lä khimi lawngtä ma lai-a ho saite ävang käting amäjy hai aetawng vi. Khimi kälang lawngtä ma hini tea äni ma nung te kätü-a, lä ho haile tyng be vi. Äni lä äma te üng vyngsai angxynlyng na tengxyng y kawng te hai jaw kha honi lai tea rang vi dy.13:44 Isaia 55:1, Philipi 3:7-8
‘Khawisäling kälung’ hai mätae pa
45“Säthaw ma pre pyng saite lä hini hai aetawng vi. Vyngjaw saite khimi lawngtä lä khawisäling kälung ävang käting mäqang te hai aetawng vi. 46Äni lä ävang tengxyng y ting saite ‘Khawisäling kälung’ nung te kätü-a, äma tea awng saite amäjy angxynlyng na jaw king vi dy. Tupyng-a äni lä ävang ting saite khawisäling kälung rang dy.
Mawipry hai mätae pa
47“Säthaw ma pre pyng saite lä mawi ne hethang jae saite pry haetä hai aetawng vi. Khimi ce lä tuilipui thung-a mawipry jae kha mawi amäjy cawngkhang na dang mang ö dy. 48Mawi na lä mawipry thung-a aemang mang te kätü-a, mawi särae na lä mawipry tea tui teng-a re kha mawi na la ö dy. Tupyng-a äni ce lä aety kha mawi kähawi na bung keipo thung-a mäceng ö dy. Tungaila mawi kähawi y na bung lä käde pa öng vi. 49Hini älawngpre teng te kätü-a honi kätyng by vi ai. Säthaw üng angtawtha käcai na lä älawng qawng-a cäqa kha khimi käsi na bung khimi kähawi na thung üng täprei ö vi ai. 50Säthaw üng angtawtha na ma khimi käsi na bung lä ngärei thung aethaw paitae hai käde ö vi ai. Tukha honi mityng-a khimi ce lä tengxyng y rawpi te hai äfaw aemäkütang kha awng ö vi ai.”
Isu ma älo thui khüng dy
51Isu ma äni ce tea “Kai ma thui saite hini angxynlyng na nang ce lä mäny ö mei” näkha düng pa.
Tukha äkähui na ma “Kai ce lä mäny ö cäkae” näkha näpa.
52Isu ma äni ce tea “Säthaw ma pre pyng saite mäny te hai Säthaw üng angthang mätu saite yng te khimi qütä lä, äma üng ing-a vyng mätung saite khimi lawngtä hai aetawng vi. Äni lä ävang ting saite vyngsai kangrüng hai kangthae na mätho saite khimi hai aetawng vi” näkha näpa.
Isu bung Nazare khimi ce ma ngai pa y
53Isu lä mätae saite lo na thui pyng-a, honi mityng üng thoja pa vi dy. 54Äni lä äma awng vai saite Nazare märü-a tyng pa dy. Tukha Isu lä khimi ce tea Judae na üng ingkäcai thung-a Säthaw lo mätu pa vi dy. Äni ce lä cangxei phi te hai “Äni lä hini bälunghae saite na mamang üng dang te mei. Makä sakha äni lä cangxei saite na sa hethang haidae dang te vi mei” näkha äma ce tingtawi aedüng ö dy. 55“Äni lä lasämae üng cäpaw y mei. Äni üng änä-awi lä Maeri y mei. Jaeko, Josefae, Judae hai Simon ce üng jä-ai y vi mei. 56Hini khimi lä cangxei saite amäjy angxynlyng na sa te hai älo thuikaw saite haidae lä mamang üng dang te vi nang mei. Äni üng ticaw na lä mä-ai hai hi-a mangtä awng saite y mei” näkha nä ö dy. 57Äni ce lä Isu tea kädawtho kha äni tea tämö khai pa ö y dy.
Tungaila Isu ma äni ce tea “Buisaw lawngtä bung lä äma üng märü hai ingthung na säla-a lä tämö khai pa y. Tungaila mityng kälang qütä üng khimi na lä äni tea tämö khai ö te vi” näkha näpa. 58Äni ce lä Isu tea yng pa ö y te phüng-a Isu lä äni ce tea kamarae na sa mang pa y vi dy.
14Baptismae Johan dü te phüng
Mar 6:14-29; Luk 3:19-20; 9:7-9
1Honi kätü-a Kalile khö pyng saite sanphrang Herodae lä Isu üng sa saite phüng khimi ce ma thui te thai vi dy. 2Sanphrang Herodae lä äma üng mawsawng na tea “Honi khimi lä Baptismae Johan he kae. Äni lä kädü thung üng aetha haile tyng te vi dy. Tukätephüng-a äni lä cangxei saite na sa haw te vi” näkha näpa.
3Hini kä y kälang-a sanphrang Herodae lä Baptismae Johan bung reisae na tea ne hai kha mäkhing ea thawng thung-a bäla pa pyng te vi dy. Ätephüng-a mei nädylä Herodae lä äkangby Philip üng nawngpui Herodia hai aepawng pa te vi. 4Hini phüng-a Baptismae Johan ma äni tea “Nang lä nang kangby üng nawngpui bung la te lä Mosi üng Ubädi hai aebäla te y vi” näkha pring pa te vi. 5Herodae lä Johan bung bädü hethang ngai vi dy. Tungaila äni lä Judae khimipui na tea ri vi. Ätephüng-a mei nädylä äni ce lä Johan tea Säthaw üng buisaw lawngtä vi näkha yng ö te phüng-a vi.
6Herodae üng aepeng saite käni-a äni lä pawi sa vi. Honi pawi-a Herodia üng cänung lä äni hai äma üng angvüng na maw-a lang pa dy. Äni üng lang saite tea Herodae lä tengxyng y bälung anghawtho hai pa vi dy. 7Tukha Herodae ma anglaw tea “Nang üng mäkai saite amäjy kai py ai mang” näkha älo täking ea älo aedo pa vi dy.
8Anglaw lä änä-awi ma thui te kätyng sanphrang Herodae tea “Baptismae Johan üng älö pangkae haetä qawng-a khai kha hi-a kai tea py” näkha näpa.
9Tukha sanphrang Herodae lä bälungsi pa dy. Tungaila äni lä äma üng pawi-a angvüng angvaw na maw-a älo aedo pyng vi dy te phüng-a anglaw ma mäkai saite kätyng sa hai hethang äma üng reisae na bung mätaw pa vi dy. 10Tukha reisae na lä thawng thung-a ly kha Baptismae Johan üng älö byng pa ö dy. 11Äni ce lä Johan üng älö pangkae qawng-a thyng ea nähai kha anglaw tea py pa ö dy. Tupyng-a anglaw lä änä-awi tea nähai pa dy. 12Johan üng äkähui na lä ly kha Johan üng äro bung la ea pa ö vi dy. Tupyng-a äni ce lä Isu tea ly kha Johan üng äphüng thui pa ö dy.
Isu ma Khimi nawngmäcaw lawng sang bangawtä na tea mäcaw pa
Mar 6:30-44; Luk 9:10-17; Joh 6:1-14
13Isu lä Johan dü te angthang thai ea lä, bälawng qawng-a aedang kha äkähui na hai khimi ce awng y saite mityng-a thoja pa ö vi dy. Isu hai äkähui na mityng kälang-a ly te angthang thai saite khimi na lä äma ce awng saite märü üng tho kha Isu leithung mepui mang hui pa ö vi dy. 14Isu lä bälawng üng aerung ea äni leithung hui saite khimipui na bung nung pa vi. Isu lä äni ce tea bäheng kha äni ce thung üng känaw käsaw awng saite khimi na tea lä hawi sa pa vi dy.
15Khöving aetawng te kätü-a lä, äkähui na ma Isu tea “Khöving ai dy. Hini lä märü, vang na hai hanglaw saite mityng kae vi. Khimipui na tea äma ce käcakänei dang hethang vang na mang-a ly hethang thui pa” näkha näpa.
16Tukha Isu ma äni ce tea “Äni ce bung mätaw hethang ngai y lyng. Nang ce lä äni ce tea käcakänei na mäcaw pa ö” näpa.
17Äkähui na ma Isu tea “Kai ce tea lä täkaw phe bangawtä hai mawi käcei me netä xyng awng te kae vi” näkha mäthang pa.
18Tupyng-a Isu ma äni ce tea “Täkaw hai mawi na kai tea nähai ö” näkha näpa. 19Isu ma khimi ce bung aeca qawng-a aety hethang thui pa dy. Tupyng-a äni lä täkaw phe bangtä hai mawi me netä la kha käni khösang mang-a kheng tähang ea Säthaw tea kawng te lo thui pa dy. Tupyng-a Isu ma täkaw täpe kha khimi ce tea bäri hethang äkähui na tea py pa dy. Tukha äkähui na ma täkaw bung khimi ce tea py pa dy. 20Khimi angxynlyng na lä äjo kawi te khytä ca ö dy. Äkähui na lä täkaw hai mawi ca te kaebang mäküng ea lä tawng hawlai netä kawi tynglyng pa be vi rawng. 21Täkaw ca saite khimi nawngmäcaw na lä lawng sang bangtä awng vi. Nawngmädi hai nade na lä ca ö te by vi.
Isu lä tui qawng-a aeke pa
22Qengtäma Isu lä äkähui na bung bälawng qawng-a paw ea Kalile tuilipui üng rei mang-a aekae hai ö dy. Äni ma khimipui na bung ing-a mätaw pa vi dy. 23Khimipui na tho pyng-a Isu lä Säthaw tea aetang hethang äma qaitä me anghung-a paw vi dy. Khöving thung-a Isu lä äma qaitä me anghung-a awng vi. 24Äkähui na üng bälawng lä tuilipui säla ung-a tyng pa vi dy. Aelipui tho kha bälawng tea tuileng ma bungba pa dy.
25Khö aevang y kälang-a Isu lä tui qawng-a aeke kha äkähui na tea ly pa. 26Äkähui na lä Isu tui qawng-a aeke te nung ea ri ö phi vi dy. Tukha äkähui na ma “Hini lä seisi vi” näkha ri te hai hang pa ö vi dy.
27Qengtäma Isu lä äni ce tea “Aethaw aela ö. Kai kae ecy. Ri ö hang” näkha näpa.
28Peterae ma Isu tea “Areng, nang tätang vi nädylä kai tui qawng-a aeke kha nang tea ly hethang särilo hai thui jo” näpa.
29Isu ma Peterae tea “Ly lawi” näkha näpa. Tupyng-a Peterae lä bälawng üng cäqa ea tui qawng-a aeke kha Isu tea ly pa dy. 30Tungaila Peterae lä aeli tho te nung kha ri pa vi dy. Tukha tui aesänung hethang sa te hai “Areng ä, kai tea säbawng kü” näkha näpa.
31Qengtäma Isu lä Peterae üng äkö-a süng pa. Äni ma Peterae tea “Nang lä kai tea yng te di vi. Ätephüng-a kai tea ae-y y te mei” näkha näpa.
32Isu ni Peterae bälawng qawng-a paw ea aeli lä ding praw pa vi dy. 33Tupyng-a bälawng qawng-a awng saite äkähui na lä Isu tea cäphaw ö dy. Äni ce ma Isu tea “Nang lä Säthaw üng Cäpaw tätang vi” näkha näpa.
Kenesare khö-a khimi känaw bung Isu ma hawi sa pa
34Tupyng-a Isu hai äkähui na lä tuilipui rei mang-a aekae kha Kenesare khö-a tyng ö dy. 35Honi khö üng khimi na lä Isu bung mäny ö pyng pa vi dy. Äni ce ma khöri dawngpa na tea aethai haidü pa ö vi dy. Tukha khimi ce lä känaw käsaw angxynlyng na bung Isu tea nähai pa ö vi dy. 36Äni ce lä Isu üng kä-o tawng-a känaw na bung aela hai hethang mäkai pa ö dy. Äni üng kä-o tawng-a aela saite khimi angxynlyng na lä naw te hawi ö bawi pa vi dy.
15Kangsi kangjaw na üng reitae
1Pharisai na hai Ubädi särae phütä na lä Jerusalem märü mang üng Isu tea ly pa ö dy. 2Äni ce ma Isu tea “Ätephüng-a nang üng äkähui na lä kangsi kangjaw na üng reitae tea bäjui ö y te mei. Äni ce lä hini reitae kätyng äkö aese y käla ca nei ö vi mei” näkha näpa.
3Isu ma ätephüng-a “Nang ce lä Säthaw üng särilo tängai y käla nang ma ce üng reitae tea bäjui ö te kae y mei. 4Älo käbawng-a Säthaw ma ‘Nang nä-awi ni nang pä-ai tea tämö khai. Nang nä-awi ni nang pä-ai tea käsi thui dylä, dü hethang kae näkha näte vi.’ 5Tungaila nang ce ma khimi lawngtä lä äpä-ai, änä-awi tea ‘Säbawng hethang nang ni tea khai pa saite lä Säthaw tea py pyng vi dy nä haw vi’ näkha näpa. 6Khimi lawngtä hikä sa dylä, änä-awi ni äpä-ai tea tämö khai hethang ngai y dy. Honi kätyng-a nang ce lä nang mäce reitae bäjui hethang Säthaw üng särilo tea tängai ö y. 7Nang ce lä käjüng aesa saite khimi na vi. Nang ce phüng buisaw Isaia ma thui rüng te lä hini kätyng vi.
8‘Hini khimi ce lä kai tea täbawng hai lä tämö khai ö.
Tungaila äni ce üng bälung lä kai hai hanglaw bärai vi.
9Äni ce ma kai tea cäphaw saite lä aetütü kae.
Äni ce lä äma ce üng raitae tea Kai üng särilo kätyng mätu ö vi’ näkha näpa.”
Khimi tea känüng hai y saite na
10Tupyng-a Isu lä khimipui na bung kähyng kha äni ce tea “Tängai kha kähawi-a aedawng ö khü ba. 11Khimi tea Säthaw maw-a nüng hai saite lä täbawng khaw-a kung saite amäjy na y. Tungaila täbawng mang tho saite lä khimi ce tea nüng hai te vi” näkha näpa.
12Tupyng-a äkähui na lä Isu tea ly kha “Nang üng thui saite lo thai kha Pharisai na kädawtho te mäny mei” näkha düng pa.
13Isu ma “Känipre üng kai üng Pä-ai ma e y saite äkung angxynlyng na lä äni ma angjüng aephawi king vi ai. 14Äni ce tähang bälungbi hang. Äni ce lä mikangjö na tea lolang mätü saite ämi kangjö hai aetawng vi. Mikangjö lawngtä ma äkälang mikangjö tea lolang mätü dylä, änini lawng netä lä angrawng thung-a aeqa hawi vi ai.”
15Tupyng-a Peterae ma Isu tea “Honi mätae saite phüng kai ce tea thui mäcai kü” näkha näpa.
16Isu ma äni ce tea “Nang ce lä vaihi khytä mäny ö y rawng mei. 17Täbawng hai ca saite amäjy lä äjo thung-a tyng kha deithae aely ea tho pang te nang ce mäny ö te be. 18Tungaila hawi y saite älo lä bälung thung üng tho te vi. Honi lä khimi tea Säthaw maw-a nüng hai vi. 19Khimi bälung thung üng tho saite na lä käsi dawng saite na, khimi bädü saite na, täkübäjang sa saite na, nawngpui nawngpaw y käla mangtä i saite na, bäru saite na, älo bälai saite na, khimi üng säri tea täphra saite na vi. 20Hini na lä khimi ce tea känüng hai te vi. Äkö aese y käla ca nei te lä khimi tea Säthaw maw-a nüng hai te y” näkha näpa.
Nawngmädi lawngtä üng yng saite phüng
21Isu lä honi mityng üng tho kha Taira hai Sidon märü üng püngkhe dawngpa-a ly pa dy. 22Tu-a awng saite nawngmädi lawngtä lä Isu tea ly pa dy. Äni lä Kanan ceng nawngmädi vi. Äni ma “Areng, Sanphrang Davidae üng Cäpaw ä, kai tea bäheng kü. Kai cänung lä angra kung kha tengxyng y mätang phi vi dy” näkha hang pa dy.
23Tungaila Isu lä nawngmädi tea älo bälangtä lä mäthang pa y. Tukha äkähui na lä “Hini nawngmädi bung mätaw ja la, äni lä mä-ai leithung hui kha hang te vi” näkha näpa.
24Tupyng-a Isu ma nawngmädi tea “Säthaw ma kai bung la saite beram kätyng Isrelae khimi na tähang ma qaitä mätaw te kae” näkha näpa.
25Nawngmädi lä cäphaw kha Isu tea “Areng ä, kai tea säbawng kü” näkha näpa.
26Isu ma “Nade na üng täkaw la kha ui na tea kädesö hethang aeteng te y vi” näkha näpa.
27Nawngmädi ma Isu tea “Areng ä, älawng mang. Tungaila äcaw na ma ca saite kaebang na lä böloka teng üng ui na mäteng ma ca ö te kae vi” näkha näpa.
28Tukätephüng-a Isu ma äni tea “Nang üng yng te lä lengphi vi. Nang ma üng mäkai te kätyng lawng sy” näpa. Honi kätü-a ma äcänung lä naw te hawi pa vi dy.
Isu ma khimi ce tea känaw käsaw hawi sa pa
29Isu lä honi mityng üng tho kha Kalile tuilipui mang-a ly dy. Tupyng-a äni lä me anghung-a paw ea aety kha awng pa dy. 30Khimipui na lä Isu tea ly pa ö dy. Äni ce lä äkho kangbai, ämi kangjö, khimi kaeqa, lo-ae na, hai äkälang känaw käsaw awng saite na bung nähai kha Isu üng khokung-a khai pa ö dy. Tukha Isu ma hini känaw angxynlyng na bung hawi sa pa dy. 31Khimipui na lä cangxei ö vi dy. Äni ce lä lo-ae älo aepe te, khimi kaeqa hawi te, kho kangbai aeke te, mikangjö mi aevang te na tea nung pa ö dy. Tukha khimipui na lä Isrelae ceng üng Säthaw tea bälaw ö dy.
Isu ma khimi sang bälitä na tea mäcaw pa
32Isu ma äkähui na tea kähyng kha äni ce tea “Hini khimi ce lä kai hai mangtä käni thungtä tütü awng ö te vi dy. Vaihi äni ce lä ca nei hethang äte la awng y. Tukätephüng-a äni ce tea kai lä bäheng phi vi dy. Kai lä äni ce tea mäcaw y käla mätaw dylä, äni ce lä lolang säla-a baiphi kha aetüng ö he kae dy” näkha näpa.
33Äkähui na ma Isu tea “Hini daithung kärang-a khimipui tea mäcaw haw hethang khytä käcakänei ma üng dang haw ai mei” näkha näpa.
34Isu ma äni ce tea “Nang ce tea täkaw phe majetä awng mei” näkha düng pa.
Äni ce ma “Täkaw phe säritä hai mawi cäpi äje cäcawtä awng” näkha näpa.
35Isu ma khimipui na bung älawng qawng-a aety hethang thui pa dy. 36Tupyng-a äni lä täkaw phe säritä hai mawi bung süng kha Säthaw tea bälaw pa dy. Tupyng-a täkaw hai mawi na täpe kha äkähui na tea py pa dy. Äkähui na ma täkaw hai mawi na khimi ce tea bäri pa dy. 37Khimipui angxynlyng na lä äjo käkawi-a ca ö dy. Tupyng-a äkähui na lä käca kaebang na mäküng kha tawng säritä kawi pre-a dang ö vi rawng. 38Ca saite nawngmäcaw na lä lawng sang bälitä awng vi. Nawngmädi na hai nade na lä qa be vi rawng.
39Tupyng-a Isu lä khimipui bung mätaw haile pa dy. Isu lä bälawng qawng-a paw kha Makadan khö-a ly dy.
16Pharisai na ma kamarae mäkai pa
1Pharisai na hai Sadukai phütä na lä käny hethang Isu tea ly pa ö dy. Isu üng aenae Säthaw ma py te mäny hethang äni ce lä Isu tea käni mang üng kamarae sa hethang mäkai pa ö dy. 2Isu ma äni ce tea “Kädüng mang-a käni khösang thingdang dylä, khawngdang lä khö hawi ai näkha nang ce lä thui ö vi. 3Kädang mang-a khö angnüng khu kha käni khösang thingdang kha mänungxae dylä, aeli khöpui tho ai nä ö vi näkha nang ce thui ö vi. Nang ce lä käni khösang-a kheng kha khöne ai mei, khö hawi ai mei näte mäny ö vi. Tungaila vaihi üng tyng saite na tea nung ea la nang ce lä mäny ö y. 4Vaidung üng khimi kaetha na lä si phi kha Säthaw üng lo tängai ö y vi. Ätephüng-a mei nädylä nang ce lä kai tea kamarae na mäkai ö vi. Säthaw ma buisaw Jonae tähang sa saite kamarae käti ma qaitä ni nang ce lä nung ö ai” näkha näpa.
Tupyng-a Isu lä äni ce te üng thoja pa vi dy.
Pharisai na hai Sadukai na üng täkaw aepae saite aesi phüng
5Äkähui na lä tuilipui rei mang-a aekae te kätü-a äni ce lä täkaw nähai hethang tämang ö vi. 6Isu ma äni ce tea “Nang ce lä Pharisai na hai Sadukai na üng täkaw aepae saite aesi tea kähawi-a sädi khai ö” näkha näpa.
7Äkähui na lä “Mä-ai lä täkaw nähai pa y te phüng-a Isu ma hini kätyng thui te vi” näkha äma ce tingtawi aethui ö dy.
8Hokä thui saite Isu lä mäny kha “Nang ce lä täkaw awng y te phüng makä aethui ö te vi mei. Nang ce lä kai tea yng te di bärai vi. 9Nang ce vaihi khytä mäny ö y te vi rawng mei. Kai ma täkaw phe bangawtä hai khimi lawng sang bangtä mäcaw pyng-a kaebang tawng majetä mäküng mei näte aedawng haile ö lawi. 10Tukha täkaw phe säritä hai khimi lawng sang bälitä na tea mäcaw pyng-a kaebang tawng majetä dang mei näte mäny haile ö lawi. 11Kai lä käcakänei phüng thui te y näte, ätephüng-a nang ce mäny ö y te vi rawng mei. Pharisai na hai Sadukai na üng täkaw aepae saite aesi tea sädi khai ö” näkha näpa.
12Tupyng-a äkähui na lä Isu ma täkaw aepae saite aesi tea sädi khai hethang thui y, Pharisai hai Sadukai na üng mätu saite tea sädi khai hethang thui te vi näte mäny ö vi dy.
Peterae ma Isu üng äphüng thui pa
13Tupyng-a Isu hai äkähui na lä Philipi Kesari märü üng khö-a tyng ö dy. Isu ma äkähui na tea “Khimi ce ma Khimi üng Cäpaw, kai tea ämi näkha nä ö mei” näkha düng pa.
14Äni ce ma Isu tea “Khimi phütä na ma nang tea lä Baptismae Johan nä ö vi. Phütä na ma Elijae nä ö vi. Phütä na ma nang lä buisaw Jeremia, y dylä, buisaw kälang lawngtä vi ti ä” näkha thui pa ö dy.
15Isu ma äkähui na tea tudylä nang ce lä makä dawng ö mei. “Nang ce lä kai tea ämi näkha nä ö mei” näkha düng pa.
16Simon Peterae ma “Nang lä Hing saite Säthaw üng Cäpaw Mesia vi” näkha mäthang pa dy.
17Isu ma äni tea “Jonae üng cäpaw Simon ä, nang lä tähang hawi. Makäte phüng-a mei nädylä hini kätüng phüng lä khimi ma nang tea mätu te y, Känipre-a Kai üng Pä-ai ma nang tea mäny hai te vi. 18Peterae ä, nang tea Kai thui ai dy nang lä kälung phö käleng haetä vi. Honi kälung käleng qawng-a kai ma kangkawng sa vi ai. Kädü mi haidae mäteng ma honi kangkawng tea bäja haw y. 19Kai lä nang tea Säthaw üng pyng te pre üng saw na py ai. Nang ma älawng qawng-a sa hethang py y saite na lä Säthaw üng Känipre-a la py y by vi ai. Nang ma älawng qawng-a khimi ce tea sa hethang py saite lä, Säthaw ma Känipre-a sa hethang py by ai” näkha näpa.
20Tupyng-a Isu ma äkähui na tea “Kai lä Mesia vi näte phüng ämi tea thui ö hang ba” näkha älo säde khi pa dy.
Isu lä äma dü hethang phüng thui rüng pa
21Isu ma äkähui na tea “Honi kätü üng hai aetawng ea kai lä Jerusalem märü-a ly kha mätangbälai te na aeting vi ai. Mätawngky na, mäthykung käleng na, Ubädi särae na ma kai tea mätangca-a sa ö vi ai. Kai bung bädü ö vi ai. Tungaila ämäthung käni pyng-a lä Säthaw ma kai bung mätha haile tyng vi ai” näkha cüngpra-a thui pa dy.
22Tungaila Peterae lä Isu bung äteng-a ka kha pring pa dy. Peterae ma “Areng ä, hini na nang tea manila tyng y hethang Säthaw ma mäkhang sy” näkha näpa.
23Isu lä aehawi kha Peterae tea “Nang lä Setan angra kätyng älo thui te kae vi. Kai te üng aehi la. Nang lä kai tea sa tälokhei te vi. Nang lä Säthaw kätyng aedawng y käla khimi ce kätyng aedawng te kae vi” näkha näpa.
Isu üng äkähui aelawng te
24Tupyng-a Isu ma äkähui na tea “Khimi lawngtä kai leithung hui hethang ngai dylä, äma üng kängai sai na khaisö kha dü hethang aerü rüng ea äma üng thinglang aepö kha kai leithung hui he kae. 25Khimi lawngtä lä mä-ai ma üng hing saite tea aeqang he ngai dylä, honi khimi lä dungtäsa dü vi ai. Kai tähang dü saite khimi lä dungtäsa hing te dang vi ai. 26Khimi lawngtä lä Käni, älawng angxynlyng na bung pyng king ngaila dungtäsa hing te dang y dylä, äma tähang äte la ävang ting te y dy. Mä-ai ma üng hing saite bung äte amäjy hai aeleng haw mei. 27Kai, Khimi üng Cäpaw, lä Äpä-ai üng phung-ang hai Säthaw üng angtawtha käcai na hai mangtä ly vi ai. Honi kätü-a khimi angxynlyng na äma ce sa te kätyng ävang py pa vi ai. 28Tängai ö. Hi-a awng saite khimi phütä na lä Sanphrang kätyng Khimi üng Cäpaw bung nung y kälang-a dü y vi ai rawng” näkha näpa.
17Isu üng ämaw äcae lang pa
1Käni tärutä pyng-a lä Isu lä Peterae, Jaeko, hai Jaeko kangby Johan ce bung ka kha äni hai mangtä me anghung kaesang-a paw ö dy. Ha-a lä äni ce ma qaitä awng ö kae vi. 2Äni ce üng maw-a Säthaw ma Isu üng ämaw äcae lä lang hai pa vi dy. Äni üng mimai la käni kätyng ang pa vi. Äni üng kä-o na lä kälung ping kha ang pa vi. 3Tupyng-a äkähui lawng thungtä na lä Mosi ni Elijae lä tho kha Isu hai älo aepe hawi te nung pa vi dy. 4Tukha Peterae ma Isu tea “Areng ä, hini mityng-a lä awng nae hawi bärai. Awng hethang ngai dylä, kai ma taipung käthungtä sa pa ai dy. Nang tähang haetä, Mosi tähang haetä hai Elijae tähang haetä vi” näkha näpa.
5Tungaila Peterae lä hini lo kä thui te thüng-a khö angnüng kanglung lä tho kha äni ce tea bu pa dy. Tukha khö angnüng thung mang tho te ätüng lä “Hini lä kai ma bälung aevaw saite Kai üng Cäpaw vi. Äni lä kai tea anghawtho hai te vi. Äni üng älo tängai ö” näkha näpa.
6Hini ätüng tea äkähui na lä thai ea tengxyng y ri phi te hai mimai lä älawng-a bü kha awng ö kae vi dy. 7Tukha Isu lä ly kha äni ce tea aela ea “Aetha ö lawi. Ri ö hang” näkha näpa. 8Äkähui na kheng ea lä Isu ma qaitä awng kha kälang na bung lä nung pa y vi dy.
9Isu lä äkähui na hai me anghung üng aerung käthu te kätü-a Isu ma äni ce tea “Kai, Khimi üng Cäpaw, lä dü te üng aetha y kälang-a nang ce nung pyng saite na ämi tea la thui ö hang ba” näkha täru khü pa dy.
10Äkähui na ma Isu tea “Ubädi särae na lä angcü-a Elijae ly vi ai näkha makäte phüng-a thui te vi mei” näkha düng pa ö dy.
11Isu ma äni ce tea, “Äte angxynlyng na tea aerü rüng hethang Elijae ly mang te vi. 12Tängai ö, Elijae lä ly pyng te vi dy. Tungaila khimi ce lä äni bung mäny y kha äni tea ngai te kätyng sa pa ö vi dy. Hini kätyng-a Kai, Khimi üng Cäpaw, tea lä äni ce ma mätang bälai-a sa ö vi ai” näkha näpa.
13Tupyng-a äkähui na lä Isu ma Baptismae Johan phüng thui saite na mäny ö vi dy.
Nade lawngtä üng angra bung Isu ma mätho pa
14Isu hai äkähui na lä khimipui na awng mang saite mityng-a tyng ea khimi lawngtä ma Isu maw-a ly kha khokhö didü pa dy. 15Äni ma “Särae ä, kai üng cäpaw tea bäheng kü. Äni lä re kanglang kha mai thung-a hai tui thung-a aetüng leilae te vi. 16Kai lä äni bung nang ma üng äkähui na tea nähai ea äni ce lä känaw käsaw hawi sa haw te y vi” näkha näpa.
17Isu ma äni ce tea “Nang ce lä yng y saite khimi na kae be tu la. Nang ce lä tyng saite hai tüng y saite mänykaw y. Kai lä nang ce hai majetä käqae-a awng hethang mei. Matangtä käqae-a nang ce tea kai lä änawngsa ai rawng mei. Nade bung kai tea nähai lawi” näkha näpa. 18Tupyng-a Isu lä angra tea nade te üng thoja hethang särilo thui pyng-a angra lä thoja pa. Qengtäma nade lä naw te hawi pa vi dy.
19Tupyng-a äkähui na lä Isu ma qaitä awng tea “Kai ce lä makäte phüng-a angra bung mätho haw y te vi mei” näkha düng pa ö dy.
20Isu ma äni ce tea “Ätephüng-a mei nädylä nang ce lä kai tea yng te di vi. Tängai ö, nang ce üng yng saite angmawi mö kaesüng jetä kätyng awng dylä, nang ce ma hini me anghung tea ‘Hini mityng üng hani mityng-a aethui lawi nädylä hani me anghung lä aethui vi ai.’ Nang yng dylä, äte angxynlyng na sa haw king vi. 21Böjae kha aetang saite mäqaitä hai-a ni hini kä angra bung mätho haw” näkha näpa.17:21 Caekäcai täpyng saite phütä na-a lä kädawng 21tä phüng tärü te awng y.
Isu lä äma dü hethang phüng thui haile tyng pa
22Isu hai äkähui na lä Kalile khö-a aekäcö kha awng te thüng-a Isu ma äni ce tea “Khimi lawngtä ma Kai, Khimi üng Cäpaw, bung täre na kö thung-a a vi ai. 23Äni ce ma kai bung bädü vi ai. Ämäthung käni-a Kai lä kädü thung üng aetha haile tyng vi ai” näkha näpa.
Tukha äkähui na lä bälungbi ö phi vi dy.
Säthaw üng Ingkäcai tähang maimö py te
24Isu hai äkähui na lä Kapernawm märü-a tyng ea Säthaw üng Ingkäcai tähang maimö ko saite na lä Peterae tea “Nang üng särae lä Säthaw üng Ingkäcai tähang maimö py by mei” näkha düng pa dy.
25Peterae ma “Py by cy ä” näkha näpa.
Tupyng-a Peterae lä ingthung khaw-a kung ea Isu ma “Simon ä, nang lä makä aedawng mei. Älawng üng sanphrang na lä ämi te üng angko cawng ö te mei. Äma pre üng khimi na tea mei, y käla pre kälang üng khimi na tea mei” näkha düng pa dy.
26Peterae ma “Pre kälang khimi maimö ko he kae” näkha näpa.
Isu ma “Tudylä äma pre üng khimi na lä maimö ko te aelawi bawi vi dy. 27Tungaila äni ce kädawtho y hethang nang lä tuilipui-a ly kha mawibawng lawi. Angcü-a dang mang saite mawi täbawng khawi kha kheng. Phawisae pjaetä dang ai mang. Honi phawisae pjaetä lä mä-ai ni maimö ko hethang aelo te vi. Honi phawisae la kha mä-ai ni tähang äni ce tea maimö py pa” näkha näpa.
18Ämi ta kälengky mei
1Honi kätü-a äkähui na lä Isu tea ly kha “Säthaw üng pre-a ämi ta lengky ai mei” näkha düng pa.
2Isu lä nade cäpi lawngtä bung ka kha äkähui na üng maw-a aedaw hai pa dy. 3Tukha Isu ma äkähui na tea “Tängai ö, nang ce lä hunghö üng aekö haile kha nade kätyng-a aelawng ö. Y dylä, Säthaw üng pre-a kung haw ö vi ai. 4Khimi lawngtä lä hini nade kätyng bälung aemäneng ea ni Säthaw üng pre-a lengky vi ai. 5Khimi lawngtä lä Kai üng ämüng phüng-a hini nade bung lady dylä, kai bung lady te by kae dy.
Yng te pra hai saite phüng
6“Khimi lawngtä lä hini nade lawng lawngtä üng yng saite pra hai te qawng-a äma üng känawngjang-a kälung käleng ae-awi kha pangle tui thung-a khimi ce ma kädesö khyry te lä äni tähang hawiky vi ai rawng. 7Khimi ce tea yng saite pra hai te na awng te phüng-a khimi ce qawng-a tähang käsi tyng vi ai. Yng te pra hai te amäjy na lä awng jawjaw vi ai. Tungaila yng te pra hai saite äni lä tähang si vi.
8“Nang üng äkö y dylä, äkho ma yng saite tea pra hai vi dylä, honi äkö kho bung byngpo kha kädesö la. Mai dü y saite ngärei pre thung-a äkö, äkho käcung-a aeqa te qawng-a äkö äkho pheitä hawi y kha hing te lä hawiky khyry te vi rawng. 9Nang üng ämi ma nang üng yng saite tea pra hai dylä, honi ämi bung mätho pu kha kädesö la. Ämi känetä hai ngärei thung-a aeqa te qawng-a ämi faitä hai hing te lä hawiky khyry te vi” näkha näpa.
10“Nang ce lä nade na tea khengsing ö hang. Tängai ö. Hini nade na üng Säthaw üng angtawtha na lä Känipre-a awng saite Pä-ai hai mangtä awng jawjaw te vi. 11Kai, Khimi üng Cäpaw, lä la saite na bung aeqang hethang cäqa te vi.
La saite Beram hai mätae pa
12“Khimi lawngtä lä beram cungvaitä awng kha honi thung üng metä la näre maisi. Hini khimi lä makä sa ai mei. Nang ce lä makä dawng mei. Äni lä beram rui täkaw hai täkaw na bung me anghung raca rawng-a khai kha beram käla bung ha ngece vi ai. 13Tängai ö, Beram käla bung dang haile ea la y saite beram rui täkaw hai täkawtä na qawng-a, la saite beram metä tea kawngky vi ai. 14Honi kätyng Känipre-a awng saite nang ce üng Pä-ai lä hini nade lawngtä bung lä la hai hethang ngai y vi” näkha näpa.
Hunghö sa saite käyng na tea säbawng hethang
15“Yng saite kangby jä-ai na ma nang tea hunghö sa vi dylä, äni tea ly kha sa tämang te phüng thui pa. Nang mani lawng netä xyng awng tea thui hawi. Nang üng älo tängai dylä, nang ni lä aede haile te dy. 16Tungaila äni lä nang üng älo tängai y dylä, Khristen kangkawng thung üng äpy ka pa. Caekäcai thung üng tärü te kätyng äni lä tämang vi näkha nang thui he ngai dylä, sasi lawng ne lawng thungtä awng he kae. 17Tukha äni lä äni ce üng älo tängai y vi dylä, kangkawng na ma hini phüng thui pa hethang kae. Kangkawng üng älo tängai y vi dylä, Säthaw tea yng y saite khimi kätyng, y dylä, angko cawng saite khimi kähawi y lawngtä kätyng aedawng ö kae.”
Sa hethang py te hai py y te
18“Tängai ö, älawng qawng-a nang ce sa hethang py y saite na lä, Säthaw ma Känipre-a sa hethang py y ai. Nang ce älawng qawng-a sa hethang py saite na lä Säthaw ma la Känipre-a sa hethang py by vi ai.
19“Tängai ö, älawng qawng-a nang ce thung üng lawng netä lä bälung aedü kha aetang dylä, Känipre üng Kai Pä-ai ma nang ce mäkai saite na py ai mang. 20Ätephüng-a mei nädylä khimi lawng ne lawng thungtä kai üng ämüng hai aekäcö te mityng-a kai lä äni ce hai mangtä awng te vi” näkha näpa. 21Tupyng-a Peterae ma Isu tea ly kha “Areng ä, kai üng äpy ma kai tea hunghö sa dylä, äni tea qeng majetä bälawi ai mei. Qengsäritä bälawi ai mei” näkha düng pa dy.
22Isu ma “Qengsäritä bälawi he näte y. Qeng rui säritä hai qengsäritä bälawi he kae näte vi.
Bäheng te bälung awng y saite mawsawng hai mätae pa
23“Säthaw ma pre pyng saite lä hini hai aetawng vi. Sanphrang lawngtä lä mawsawng na tea kälai caerang cei hethang ngai vi. 24Sanphrang lä caerang cei aetawng ea kälai täsing awng mang saite mawsawng lawngtä bung khimi ce ma nähai pa dy. 25Mawsawng lä kälai hung haw bäja y kha sanphrang ma ‘Kai ma nang ma hai nang nawngpui, caw na hai vyngsai na jaw kha dang saite tangkae kälai jüng-a la he’ näkha näpa. 26Tupyng-a mawsawng lä sanphrang maw-a khokhö didü kha awng pa dy. Tukha ‘Areng ä, kai tea bälungsa kü re ba. Kai ma kälai angxynglyng na hung bawi ai mang’ näkha näpa. 27Tukha sanphrang ma mawsawng tea bäheng kha äni üng kälai na bälawi pa vi dy.
28“Hini mawsawng lä sanphrang te üng tho ea äma tähang kälai täsawngtä py he awng saite mawsawng lawngtä hai aeting pa dy. Tukha äni üng känawngjang-a tära kha ‘Nang üng kälai hung hethang awng saite py lawi’ näkha näpa. 29Tukha äma üng äpy mawsawng lawngtä khokhö didü ea ‘Kai tea bälungsa kü jo re. Kai ma kälai angxynlyng na hung bawi ai mang’ näkha näpa. 30Tungaila kälai kung ma lä äni üng älo tängai pa y dy. Hini mawsawng bung kälai hung bawi y rytä lä thawng thung-a bäla hai pa vi dy.
31“Honi phüng-a mawsawng äkälang na ma nung tea lä bälung hawi y phi pa ö vi dy. Tukha sanphrang tea ly kha honi na thui pa ö dy. 32Tukha sanphrang lä mawsawng bung ka kha ‘Mawsawng käsi, nang kai tea aesi aebai tea nang üng kälai kai ma bälawi king vi dy. 33Kai nang tea bäheng te kätyng nang lä mawsawng tea bäheng hethang aeteng te vi’ näkha näpa. 34Tukha sanphrang lä kädawtho kha honi mawsawng bung kälai hung bawi y rytä thawng thung-a bäla kha mätangbälai hai pa dy.
35“Nang ce üng kangby jä-ai sa tämang te bälung khybawi hai bälawi y dylä, Känipre üng kai Pä-ai la nang ce tea sanphrang ma mawsawng tea sa te kätyng sa by vi ai” näkha näpa.
19Nawngpui nawngpaw aekhai te phüng
1Tupyng-a Isu lä hini lo na thui pyng-a Kalile khö üng tho kha Jordan tävaw rei mang üng Judae khö-a tyng dy. 2Khimipui na lä Isu leithung-a hui pa ö dy. Isu ma äni ce tea känaw käsaw na hawi hai pa dy.
3Pharisai phütä na lä Isu tea ly kha “Khimi lawngtä ma äma üng kängai kätyng änawngpui hai aekhai saite lä Mosi üng Ubädi hai aebäla mang mei” näkha käny te hai düng pa ö dy.
4Isu ma äni ce tea “Caekäcai thung-a tärü te kätyng ‘Säthaw lä angcü-a khimi bung sa ea khimi nawngmädi hai nawngmäcaw ni bung sa te vi’ näsaite nang ce phai ö vai y nang mei. 5Tukha Säthaw ma ‘Nawngmäcaw lä nä-awi pä-ai ni bung khaisö kha nawngpui hai aepawng ea awng hawi te vi. Tudylä änini lawng netä lä bungtä-a lawng vi ai dy’ näkha näpa. 6Tukätephüng-a änini lä lawng netä y. Lawngtä kae dy. Tukätephüng-a Säthaw ma mangtä aepawng hai saite tea khimi ce ma täprei he kae y” näkha näpa.
7Pharisai na ma Isu tea “Nawngpaw lä änawngpui bung aekhai te cae py ea änawngpui bung mätaw haile hethang dang näkha Mosi lä makäte phüng-a Ubädi py te mei” näkha näpa.
8Isu ma “Nang ce lä mätu hethang rae bärai saite khimi na vi te phüng-a Mosi lä hini Ubädi tea tärü te vi dy. Tungaila angcü-a Säthaw lä hini kätyng awng te y. 9Tängai ö, khimi lawngtä üng nawngpui äkälang nawngmäcaw hai i te phüng aekhai te y dylä, äni hai aekhai hethang dang y. Äma üng nawngpui hai aekhai kha nawngmädi kälang hai aepawng dylä, äma angcü üng nawngpui tea täkübäjang sa te dy” näkha näpa.
10Äkähui na ma Isu tea “Nawngpui nawngpaw hini kätyng vi dylä, nawngpui la y käla awng te lä hawiky” näkha näpa.
11Isu ma äkähui na tea “Hini mätu saite lä khimi angxynglyng na ma bäjui bawi haw y. Säthaw ma säbawng saite na khimi ce ni bäjui haw te kae. 12Nawngmäcaw phütä na lä nawngmädi hai aepawng haw y te äphüng amäjy cawngkhang awng vi. Nawngmäcaw phütä na aepeng te üng hai nawngmädi hai aepawng haw y. Nawngmäcaw phütä na lä äni üng tabung qawng-a khimi ce ma hae haetä sa te phüng-a, nawngmädi hai aepawng haw y. Phütä na lä Säthaw üng kälu sa haw hethang nawngpui la y hethang aedawng te vi. Hini älo thai saite na lä thaikaw ö sy” näkha näpa.
Isu ma nade cäpi na tähang aetang pa
13Khimi phütä na lä nade na tea Isu üng äkö thyng kha aetang hai hethang nade na bung Isu tea nähai pa ö dy. Tungaila äkähui na lä hokä sa saite tea jawsi pa ö vi. 14Isu ma “Nade na bung kai tea ly hai ö mai sy. Mäkhang pa ö hang. Säthaw üng pre lä honi nade kätyng awng saite khimi na tähang vi” näkha näpa.
15Isu lä nade na qawng-a äkö thyng kha aetang pa pyng-a honi mityng üng thoja pa vi dy.
Tawngnang saite khimi
Mar 10:17-31; Luk 18:30; 22:30
16Khimi lawngtä lä Isu tea ly kha “Särae ä, dungtäsa hing te dang hethang kai lä kälu kähawi makätita sa ai mei” näkha düng pa.
17Isu ma äni tea “Nang lä ätephüng-a hawi saite amäjy lä äte mei näkha kai tea düng te mei. Säthaw lawngtä xyng ni hawi te kae be. Nang dungtäsa hing hethang ngai dylä, Säthaw üng särilo tängai” näkha näpa.
18Äni ma Isu tea “Makäti särilo mei” näkha düng pa.
Isu ma äni tea “Khimi bung bädü hang. Täkübäjang sa hang, bäru hang. Khimi ce phüng tüng y saite na jung kai-a tho hang. 19Nang nä-awi ni nang pä-ai tea tämö khai. Nang ma tea bälung aevaw te kätyng äpy äjae na tea bälung aevaw hethang kae” näkha näpa.
20Honi särai ma Isu tea “Kai lä hini särilo na tängai pyng te vi dy. Kai äte amäjy na sa hethang ngai rawng mei” näkha düng pa.
21Isu ma äni tea “Nang cungrü bawi hethang ngai dylä, ly kha nang üng awng saite angxynglyng na jaw king kha dang saite tangkae khimi kangtang na tea py pa. Hokä sa dylä, nang lä Känipre ingthawng dang ai mang. Honi pyng-a kai leithung hui” näkha näpa.
22Äni lä vyngsai tawngnang phi saite khimi vi te phüng-a Isu üng thui saite lo thai ea bälung hawi y phi te hai Isu te üng thoja pa dy.
23Isu äkähui na tea “Tängai ö, vyngsai tawngnang saite khimi na lä Känipre thung-a kung hethang rae bärai. 24Kai nang ce tea thui haile be ai. Tawngnang saite khimi lawngtä Säthaw üng pre thung-a kung hethang qawng-a cäphrüng haetä khaw-a säphö känawngjang käsa metä kung te lä jaky vi ai rawng” näkha näpa.
25Äkähui na ma honi lo thai ea cangxei te ha Isu tea “Tudylä Säthaw lä ämi bung aeqang ai mei” näkha düng pa.
26Isu lä äni ce tea kähawi-a kheng ea “Hini lä khimi ce ma sa haw y. Tungaila Säthaw lä äte angxynlyng na sa haw bawi te kae vi” näkha näpa.
27Tupyng-a Peterae ma Isu tea “Kai ce lä äte angxynlyng na khaisö kha nang leithung hui ö te vi dy. Kai ce lä äte na dang ai mei” näkha düng pa.
28Isu ma äkähui na tea “Tängai ö, Säthaw ma äte angxynglyng na tea kangthae sa te kätü-a Kai, Khimi üng Cäpaw, lä Kai üng phung-ang awng saite aety nae qawng-a aety kha angxynglyng na bung pyng vi ai. Honi kätü-a Kai üng äkähui na lä nang ce la aety nae na qawng-a aety kha Isrelae ceng hawlai netä na tea pyng ö vi ai. 29Khimi lawngtä lä Kai üng ämüng phüng-a ing, la, kangby jä-ai, kangpraw, ticaw, nä-awi, pä-ai, cäpaw cänung, na bung khaisö dylä, vaihi dung-a ma phü cungvaitä dang rae vi ai. Vaimaw mang-a lä dungtäsa hing saite dang vi ai rawng. 30Angcü-a kälengky saite khimi na lä kangkhüng-a lä cäpiky-a awng ö vi ai. Vaihi cäpiky-a awng saite khimi na lä kangkhüng-a lä kälengky-a awng ö lae vi ai.”
20Cäpje angkhaw üng kälu sa saite na hai mätae pa
1“Säthaw ma pre pyng saite lä Cäpje angkhaw kung üng äphüng hai aetawng vi. Äma lä kälu sa saite na bung vang hethang kädang thawde-a tho jaw dy. 2Äni lä äma üng kälu sa saite khimi na tea känitä-a kälu sa te vang phawisae pjaetä py hethang bälung aedü kha äni ce bung Cäpje angkhaw-a mätaw ö dy. 3Kädang naeri täkawtä-a vyngjaw saite mityng-a ly ea khimi phütä na lä aedaw kha awng aetütü te nung dy. 4Tukha angkhaw kung ma äni ce tea ‘Nang ce ly kha Cäpje angkhaw thung-a kälu sa by dylä, kälu sa te ävang kaeteng-a kai py ai mang’ näkha näpa. 5Tukätephüng-a äni ce lä ly ö dy. Tupyng-a angkhaw kung lä käni anghung-a, hai kädüng naeri thungtä-a, lä vyngjaw te mityng-a ly haile tyng be kha kälu sa hethang khimi ce bung vang be dy. 6Kädüng naeri bangawtä awng te kätü-a vyngjaw saite mityng äni ly ea khimi phütä na lä ho-a aedaw kha awng te nung dy. Tukha äni ma honi na tea ‘Ätephüng-a nang ce lä hi-a äte lä sa y käla känini rui awng aetütü ö te vi mei’ näkha düng pa. 7Äni ce ma ‘Kai ce bung lä ämi la kälu sa hethang vang y vi’ näkha mäthang pa ö dy. Angkhaw kung ma äni ce tea ‘Nang ce lä kai üng Cäpje angkhaw thung-a ly kha kälu sa ö’ näkha näpa.
8“Kädüng mang-a angkhaw kung ma kälu sa saite mätawngky tea ka ea ‘Kälusämae na tea ävang py pa lawi. Kai ma kangkhüng-a vang saite tähang py pa mang. Kai ma angcü-a vang saite tähang lä kangkhüng-a py pa’ näkha näpa. 9Tukha kälu sa saite mätawngky ma kädüng naeri bangawtä-a vang saite kälu sa te na tähang phawisae pjaetä py pa dy. 10Angcü-a vang saite kälu sa saite na lä äkälang na qawng-a awng mang-a dang hethang aepö ö te vi. Tungaila äni ce tea lä phawisae pjaetä py qi pa kae vi. 11Kälusämae na lä phawisae pjaetä dang pyng-a angkhaw kung tea bälung hawi y te phüng thui ö dy. 12Angkhaw kung tea kälu sa saite na ma ‘Äni ce lä naeritä kälu sa te kae. Tungaila äni ce tea kai ce hai mangtä kaengi-a py vi. Kai ce lä känini rui khöbi thung-a kälu sa te mäsae qyng ö te vi’ näkha näpa.
13“Tungaila angkhaw kung ma kälu sa saite lawngtä tea ‘Änang ä, kai lä nang tea kaeling sa te y. Känitä-a phawisae pjaetä hai kälu sa hethang nang lä bälung aedü pyng te vi dy. 14Nang ma üng kälu vang la kha ing-a vawi lawi cü. Kangkhüng-a vang saite kälu sa saite na tähang nang tea py te kätyng kai lä py he ngai te vi. 15Kai ma üng phawisae bung kai ma ngai te kätyng sa haw te vi. Kai üng angcing khu y käla py saite tea nang lä pä-e te vi mei’ ” näkha näpa.
16Tukha Isu ma “Angcü-a kälengky-a awng saite khimi na lä kangkhüng-a lä cäpiky-a awng ö vi ai. Vaihi cäpiky-a awng saite khimi na lä kangkhüng-a lä kälengky-a awng ö vi ai”20:16 Mar 10:31, Luk 13:30 näkha näpa.
Isu ma äma dü ai te phüng ämäthung thui pa
17Isu lä äkähui lawng hawlai netä na hai Jerusalem märü mang-a khölawng tho ö dy. Tukha Isu lä äkähui lawng hawlai netä xyng na bung ka pa dy. 18Isu ma äkähui na tea “Tängai ö, mä-ai lä vaihi Jerusalem märü mang-a khölawng tho ö te vi. Honi märü-a khimi lawngtä lä Kai, Khimi üng Cäpaw, bung mäthykung käleng na hai Ubädi särae na üng kö thung-a a ö vi ai. Äni ce ma kai bung lä bädü hethang tärae cei ö vi ai. 19Tupyng-a ceng kälang na üng kö thung-a a ö vi ai. Khimi ce ma Kai bung mänui hai ö vi ai. Ry kha kai bung lä äni ce ma thinglang qawng-a bädü ö vi ai. Tungaila ämäthung käni-a Säthaw ma kai bung mäning haile tyng pa vi ai” näkha näpa.20:19 Judae khimi ce lä Rom khimi na ma äni ce tea pyng te phüng-a khimi ce bung bädü hethang tärae cei haw y.
Änä-awi lawngtä üng mäkai saite na
20Tupyng-a Zebede üng nawngpui lä äcaw lawng netä hai mangtä Isu tea ly kha khokhö didü ea äma üng cäpaw ni tähang äkähawi sa hethang mäkai pa dy.
21Isu ma nawngmädi tea “Nang lä äte sa hethang ngai hai te mei” näkha düng pa.
Nawngmädi ma Isu tea “Nang ma Sanphrang sa kha pre pyng saite kätü-a kai cäpaw lawng netä bung nang üng bangtang mang-a lawngtä, bangrawi mang-a lawngtä aety nae py jo ba ä” näkha mäkai pa.
22Isu ma änini tea “Nang ni mäkai saite tea nang mani lä mäny hawi te y vi. Kai mätangbälai te kätyng nang ni lä khang haw ai mang mei” näkha düng pa.
Änini ma “Kai ni lä mätangbälai saite na aeting vawng haw ai mang” näkha näpa.
23Isu ma änini tea “Nang ni lä Kai üng kätyng mätangbälai hawi tätang vi ai. Tungaila kai üng bangrawi bangtang mang-a aety hethang lä kai py haw y lyng. Hini lä Säthaw ma äma re saite khimi na tähang py hethang kae vi” näkha näpa.
24Hini phüng äkähui kälang lawng hawtä na ma thai ea Jaeko ni Johan tea kädawtho pa ö vi dy. 25Tukätephüng-a Isu lä äkähui angxynglyng na bung ka kha äni ce tea “Ceng kälang üng pre pyng saite khimi na lä äma ce üng khimi na qawng-a säri aenae hai pyng ö te hai, mätawngky na lä khimi ce tea aenae hai pyng ö saite nang ce lä mäny ö dy. 26Tungaila nang ce lä hokä awng ö hang. Nang ce thung-a mätawngky sa hethang ngai saite khimi lä nang ce üng mawsawng-a sa ngece hethang kae. 27Äkälengky-a sa he ngai saite khimi lä nang ce üng mawsawng tangnae-a sa ngece hethang kae. 28Kai, Khimi üng Cäpaw, tea khimi ce ma mawsawng sa hai hethang ly te y vi. Kai lä khimi ce üng mawsawng-a awng hethang hai khimi ce bung awng mang-a aeqang hethang hai Kai üng hing saite khaisö hethang ly te kae vi” näkha näpa.
Isu ma ämi kangjö lawng netä bung hawi sa pa
29Isu hai äkähui na lä Jerikhaw märü üng tho ö ea khimipui na lä äni ce leithung hui pa ö vi. 30Ämi kangjö lawng netä lä lolang teng-a aety kha awng ea Isu tyng te angthang thai hawi ea “Sanphrang Davidae üng Cäpaw Isu ä, kai ni tea bäheng kü jo” näkha ätüng käleng hai hang hawi pa dy.
31Khimipui na ma änini tea jawsi kha sitäri-a awng hethang mäkhang pa ö dy. Tungaila änini lä “Sanphrang Davidae üng Cäpaw Isu ä, kai ni tea bäheng kü jo” näkha ätüng käleng hai-a rae pa vi dy.
32Isu lä aenawng kha änini tea ka ea “Nang ni tähang kai lä äte sa pa ai mei” näkha düng pa dy.
33Änini ma Isu tea “Areng ä, kai ni lä ämi aevang haile tyng hethang ngai vi” näkha näpa hawi dy.
34Isu lä bäheng phi te hai änini üng ämi tea äkö hai aela pa dy. Änini lä ämi aevang hawi praw kha Isu leithung hui hawi vi dy.
21Isu lä Sanphrang kätyng Jerusalem märü-a kung pa
Mar 11:1-11; Luk 19:28-40; Joh 12:12-19
1Isu hai äkähui na lä Jerusalem märü teng-a tyng kha Olive kung na awng saite me anghung teng üng Bephake vang-a ly ö dy. Isu lä äkähui lawng netä bung ka kha “Nang ni lä ämaw üng awng saite vang-a ly hawi ba. 2Tukha vang thung-a kung te hai ruinawng hai mäkhing saite cäphö känawkhing käsa änä-awi metä hai äcäpi metä bung nung hawi ai mang ba. Honi cäphö me netä mäkhing saite ruinawng sö kha hi-a nähai hawi ba ä, 3Khimi lawng lawngtä ma nang ni tea ‘Ätephüng-a nang ni lä cäphö ruinawng sö hawi te mei’ näkha düng dylä, ‘Honi cäphö me netä bung lä Areng ma aely ngai te vi’ näpa. Tupyng-a äni lä nang ni tähang py praw ai mang” näkha näpa. Tukha änini tea älo täru ea mätaw pa dy.
4Jangni-a buisaw ma Caekäcai thung-a tärü kha thui rüng saite älo tea cungrü hai hethang lä hini kätyng awng te vi.
5“Säthaw ma buisaw tea Jerusalem märü üng khimi na tea21:5 Käri lo-a Zaion märü üng cänung näkha näte awng vi.
‘Kheng kae-e, nang ce üng sanphrang lä nang ce tea ly sälö dy.
Äni lä bälung aemäneng kha cäphö känawkhing käsa hai,
cäphö känawkhing käsa cäpi qawng-a aedang dy’ näkha thui pa ö näpa.”
6Tukha äkähui lawng netä lä Isu ma thui te kätyng sa hawi dy. 7Änini lä cäphö känawkhing käsa hai äcäpi bung Isu tea nähai pa ö dy. Änini lä cäphö me netä qawng-a äma ni üng kä-o na khu hawi pa kha Isu lä cäphö qawng-a aedang pa dy. 8Khimipui na lä äma ce üng kä-o na lolang qawng-a mädai pa ö dy. Khimi phütä na ma lä thingkawng cangpre na tängang kha lolang qawng-a mädai pa ö dy. 9Isu üng leithung leimaw mang-a hui saite khimi bawi na ma lä “Sanphrang Davidae Cäpaw tea Hosana näkha bälaw ö si. Areng üng ämüng hai ly saite lawngtä tea Säthaw ma tähang kähawi py sy. Aesangky saite Säthaw tea Hosana näkha bälaw ö si” näkha ätüng käleng hai-a pa ö vi dy.
10Isu lä Jerusalem märü-a kung te kätü-a, märü angxynlyng na üng khimi na lä aepuilung ea awng pa kha “Äni lä ämi mei” näkha düng pa ö dy.
11Khimipui na ma “Hini lä Kalile khö Nazare märü üng buisaw Isu vi” näkha näpa.
Isu ma Säthaw üng Ingkäcai baesung thung-a ly pa
Mar 11:15-19; Luk 19:45-48; Joh 2:13-22
12Isu lä Säthaw üng Ingkäcai baesung thung-a kung kha vyngjaw saite hai vyng rang saite na bung mätho pang pa. Tangkae aeleng saite khimi na üng khung na hai bähö jaw saite khimi na üng aety nae na tea aekhu mo rung khytä nui pa vi dy. 13Tukha Isu ma äni ce tea “Caekäcai-a tärü saite lä Säthaw ma ‘Kai üng Ingkäcai lä aetang nae näkha mäthi ö vi ai’ näkha näpa. Tungaila nang ce lä hini ingkäcai tea damarae na üng täbö tärawng-a bälawng ö lae te vi be tu” näkha pring pa.
14Säthaw üng Ingkäcai-a ämi kangjö hai äkho kangbai na lä Isu tea ly ö dy. Tukha Isu lä äni ce üng känaw käsaw na hawi sa pa dy. 15Mäthykung käleng na hai Ubädi särae na lä Isu ma sa te cangxei saite na nung ö dy. Tukha nade na ma Säthaw üng Ingkäcai thung-a “Sanphrang Davidae üng cäpaw tea bälaw ö si” näkha ätüng käleng hai-a te thai ea äni ce lä kädawtho ö vi dy. 16Äni ce ma Isu tea “Hini nade na thui saite tea nang lä thai mei” näpa.
Isu ma äni ce tea “Kai thai cy. Caekäcai-a tärü saite lä ‘Nade na hai nade nökai na nang tea käcung-a bälaw hai hethang mätu pyng vi dy’ näte phüng nang lä phai vai y nang mei” näkha näpa.
17Tupyng-a Isu lä Jerusalem märü üng tho kha Bethani vang-a ly ea honi mityng-a düngtä aehae pa vi dy.
Thaidö kung tea Isu ma mäthawi pa
18Kädang thawde mang-a märü-a vawi haile tea Isu lä böjo aelang pa dy. 19Isu lä lolang teng-a awng saite thaidö kungtä bung nung kha ha-a ly dy. Tungaila äkung qawng-a ärang na qaitä awng te nung pa. Tukha Isu ma “Nang lä manila äthai aethai haile haw hang sy” näkha thaidö kung tea thui pa dy. Tupyng-a qengtä ma thaidö kung lä cei raw pa vi dy.
20Äkähui na lä honi na nung te kätü-a cangxei te hai “Makä sakha thaidö kung lä cei praw te vi mei” näkha düng pa.
21Tupyng-a Isu ma “Tängai ö. Nang ce lä tätang mang mei näte bälung kaedawng awng y käla yng dylä, thaidö kung tea kai sa te kätyng sa haw ö vi ai. Honi qawng-a cang y me anghung tea la ‘Nang ma ma bung aethui kha pangle tui thung-a aekäde ja la’ näkha thui te kätyng awng vi ai. 22Nang ce lä yng te hai aetang kha mäkai saite angxynlyng na lä dang ö vi ai” näkha näpa.
Isu üng aenae phüng düng pa
23Isu lä Säthaw üng Ingkäcai baesung thung-a kung haile kha Angthang Kähawi mätu pa dy. Mäthykung käleng na hai mätawngky na lä Isu tea ly kha “Nang lä hini na äte aenae hai sa te mei. Honi aenae lä nang tea ämi ma py te mei” näkha düng pa ö vi.
24Isu ma äni ce tea “Nang ce tea kai älo haetä düng by ai. Nang ce ma mäthang pyng dylä, hini sa saite na ämi üng aenae hai sa mei näte kai ma nang ce tea thui by ai mang. 25Baptismae Johan lä khimi ce tea baptismae py hethang Säthaw ma äni tea aenae py te mei. Khimi ce ma äni tea aenae py te mei” näkha düng pa dy.
Äni ce lä “Säthaw ma äni tea aenae py te näkha mä-ai mäthang dylä, äni ma ‘Ätephüng-a nang ce lä Johan tea yng ö y te mei’ näkha düng he kae dy. 26Mä-ai lä ‘Khimi ce ma Baptismae Johan tea baptismae py hai te’ näkha thui dylä, kai ce lä khimipui na tea ri he awng vi. Ätephüng-a mei nädylä khimipui na lä Johan tea buisaw lawngtä kätyng yng ö vi” näkha äma ce tingtawi aethui ö dy. 27Tukätephüng-a äni ce lä Isu tea “Kai ce lä mäny y” näkha mäthang pa dy.
Isu ma äni ce tea “Tudylä Kai lä ämi üng aenae hai hini na sa te mei näte phüng nang ce tea thui y by lyng” näkha näpa.
Äcäpaw lawng netä hai mätae pa
28Isu ma äni ce tea “Nang ce lä mätae te phüng tängai ö. Khimi lawngtä-a cäpaw lawng netä awng. Äni lä äcäpaw kälengky tea ly kha ‘Cäpaw ä, Vaini Cäpje angkhaw thung-a ly kha kälu sa ba’ näkha näpa. 29Äcäpaw kälengky ma ‘Kai ngai y’ näkha näpa. Tungaila kangkhüng mang-a bälung aedawng haile tyng kha ly pa dy. 30Tupyng-a äpä-ai lä baeni üng cäpaw lawngtä tea angcü üng lo kä thui pa be dy. Äcäpaw ma ‘Üng, Ä-ai kai ly ai mang’ näkha näpa. Tungaila äni lä ly pa y vi. 31Honi cäpaw lawng netä thung-a, äpä-ai üng kängai sa te lä ämi ta mei” näkha düng pa dy.
Nang ce lä makä aedawng ö mei. Äni ce ma “Äcäpaw käleng” näkha mäthang pa.
Isu ma äni ce tea “Tängai ö, angko cawng saite hai täkübäjang sa saite nawngmädi na lä nang ce Säthaw pre-a tyng y kälang-a äni ce tyng mang vi ai. 32Baptismae Johan lä nang ce tea hing hethang älang kätüng mätü ngaila nang ce lä äni tea yng ö y. Tungaila angko cawng saite na hai täkübäjang sa saite nawngmädi na lä Johan tea yng ö vi. Hini phüng na nang ce nung ea la Johan tea yng hethang ae-ui te bälung awng y, äni tea yng hethang la ngai ö y vi” näkha näpa.
Cäpje angkhaw vang saite kung na hai mätae pa
33Isu ma “Kälang mätae saite lo tängai ö. Angkhaw kung lawngtä lä Cäpje kung e kha angkhaw aepang aekilü pa dy. Äni lä Cäpje thai na aeti nae angrawng kähawi-a tai kha dyng nae ing kaesang haetä la sa vi. Tupyng-a äni lä angkhaw bung khimi kälang na tea vang hai kha khölawng kähanglaw-a thoja pa vi dy. 34Cäpje thai na käcüng hethang, kätü tyng tea lä angkhaw kung ma mawsawng na bung angkhaw vang saite khimi na tea mätaw kha angkhaw vang Cäpje thai mäkai hai pa dy. 35Angkhaw vang saite na lä honi mawsawng na bung mätawng rang kha lawngtä bung bo kha, kälang lawngtä bung lä bädü ea, lawngtä bung lä kälung hai käde kae ö vi. 36Tupyng-a ingkung lä mawsawng na bung angcü üng qawng-a cang y awng mang-a mätaw pa be dy. Tungaila angkhaw vang saite na lä äni ce tea angcü üng na tea sa te kätyng sa pa be vi. 37Tukha kangkhüng-a äni lä ‘Kai ma üng cäpaw tea lä äni ce tämö khai ö ai müng’ näkha aedawng ea äma üng cäpaw bung mätaw pa dy.
38“Tungaila äni ce lä angkhaw kung üng cäpaw bung nung ea ‘Hini khimi lä angkhaw kung üng ingthawng kaety vi. Co, äni bung bädü ö kae si. Tudylä angkhaw bung mä-ai dang ai mang’ näkha äma ce tingtawi aedüng aethui ö dy. 39Tupyng-a äcäpaw bung nerang ea angkhaw ärang-a re kha bädü pa dy.
40“Tudylä angkhaw kung vawi haile te kätü-a äni ce tea ätemakä sa ai mei. Nang ce lä ätemakä aedawng ö mei” näkha näpa.
41Äni ce ma “Angkhaw kung ma khimi käsi na bung lä bädü vi ai. Tukha Cäpje angkhaw bung lä äthai aethai te kätü-a ävang py saite khimi kälang na tea vang hai vi ai” näkha näpa.
42Isu ma äni ce tea “Caekäcai thung-a tärü saite lä
‘Ing sa saite khimi na ma khaisö saite kälung lä
aely kälengky saite kälung-a aelawng vi.
Hini lä Areng ma sa saite vi.
Mä-ai üng maw-a cangxei saite vi dy näkha,’
nang ce lä phai vai y vi mei” näpa.
43Isu ma äni ce tea “Säthaw lä äma pre hai aesui saite tähang kähawi nang ce te üng la haile vi ai. Äceng kälang khimi ce tähang py vi ai. Äni ce lä Säthaw üng pre hai aeteng saite kälu sa ö vi ai. 44Khimi lawngtä lä honi kälung qawng-a aeqa dylä, ängang aela xixae vi ai. Honi kälung ma khimi lawngtä qawng-a aeqa dylä, tibutica-a awng vi ai” näkha näpa.
45Mäthykung käleng na hai Pharisai na Isu üng mätae saite na phüng thai te kätü-a äni ce phüng thui te vi näte mäny ö dy. 46Tukha äni ce lä Isu bung nerang hethang älang mäqang pa ö dy. Tungaila äni ce lä Isu tea buisaw näkha yng saite khimipui na tea ri ö vi.
22Aepawng saite pawi hai mätae pa
1Isu ma äni ce tea mätae saite hai älo na thui haile pa be dy. 2Äni ma “Säthaw üng pre lä hini hai aetawng vi. Sanphrang lawngtä lä äcäpaw üng aepawng pawi tähang aerü rüng dy. 3Äni lä mawsawng na bung mätaw kha pawi-a ly hethang thangka angvüng na tea ka hai pa dy. Tungaila äni ce lä ly hethang ngai pa ö y. 4Tupyng-a sanphrang ma mawsawng kälang na tea thangka angvüng na tea hini kä thui hai pa dy. ‘Kai lä Kädüngbö tähang sa rüng bawi dy. Kai üng raebawi mäte na hai ärung hawi saite raebawi na bung ra dy. Angxynlyng na lä khüng ycy dy. Aepawng pawi-a ly ö lawi’ näkha näpa. 5Tungaila äni ce lä dawngcang y käla, äma ce ngai saite na sa ö vi. Lawngtä lä äma üng lai-a ly vi. Khimi kälang lawngtä lä kälu sa saite mang-a ly pa vi. 6Kälang na ma lä sanphrang üng mawsawng na bung nerang kha bo ea bädü pa ö vi. 7Sanphrang lä tengxyng y kädawtho pa dy. Äma üng reisae na bung mätaw kha khimi bädü saite na bung bädü hai king dy. Äni ce üng märü bung maisawi hai pa vi dy. 8Tupyng-a mawsawng na tea ‘Aepawng pawi lä aerü rüng ngaila thangka angvüng na lä honi pawi-a ly hethang aeteng te y vi. 9Lolang pui, lolang säla-a ly kha, nang ce aeting saite khimi na bung aepawng pawi-a ka ö’ näkha näpa. 10Tukha mawsawng na lä lolang-a aeting saite khimi käsi, khimi kähawi angxynglyng na bung ka pa ö dy. Tukha aepawng saite mityng lä angvüng na hai kawipy pa dy.
11“Sanphrang lä angvüng angvaw na bung aeting hethang ly ea aepawng pawi hai aeteng saite kä-o aelawng y te khimi lawngtä bung nung pa dy. 12Sanphrang ma ‘Rawijae ä, makä nang lä aepawng pawi hai aeteng saite kä-o aelawng y käla kung mei’ näkha düng pa. Tukha hini khimi lä lo haetä lä mäthang pa y. 13Tupyng-a sanphrang lä mawsawng na tea ‘Äni üng äkö hai äkho-a mäkhing ö kha ärang kävingky mang-a mätho ö la. Honi mityng-a khimi ce lä raw kha äfaw aemäkütang ea awng ö vi ai’ näkha näpa.”
14Isu ma “Säthaw lä khimi awng mang-a ka vi. Tungaila äni ma re saite lä äjecäcaw kae” näkha näpa.
Sica sanphrang tea maimö py saite phüng
15Tupyng-a Pharisai na lä aekäcö ea Isu lä tämang saite älo aepe dang hethang makä sa ai mei näkha aedüng ö dy. 16Äni ce lä äma ce üng äkähui phütä na hai Herodae üng äpy na bung Isu tea mätaw pa dy. Äni ce ma “Särae ä, nang lä kätüng khaw ni thui te kai ce lä mäny vi. Nang lä khimi ce Säthaw üng älang kätüng kätyng awng hethang mätu te vi. Khimi ce ma nang phüng aethang khai ngaila nang lä dawngcang te y. Khimi ce üng mimai tea la kheng y. 17Nang makä aedawng mei kai ce tea thui kü jo. Kai ce lä Sica sanphrang tea angko py sang mei, py sang y mei” näkha düng pa dy.
18Tungaila Isu lä äni ce üng hawi y saite aedawng te na mäny pa vi. Äni ma “Nang ce lä khimi kähawi käjüng aesa saite na vi. Ätephüng-a kai tea käny näpi ö te vi mei. 19Angko py hethang phawisae pjaetä kai tea mätü” näkha näpa.
Tukha äni ce ma phawisae pjaetä nähai pa ö dy. 20Tukha Isu ma äni ce tea “Hini-a lä ämi üng äpung hai ämüng awng mei,” näkha düng pa.
21Äni ce ma Isu tea “Sica sanphrang üng äpung hai ämüng vi” näkha mäthang pa.
Tukha Isu ma “Sica sanphrang pyng saite lä Sica sanphrang tea py pa ö. Säthaw pyng saite na lä Säthaw tea py pa ö” näkha näpa.
22Honi lo thai ea äni ce lä Isu tea cangxei ö vi dy. Tupyng-a äni ce lä Isu te üng thoja pa ö vi dy.
Kädü thung üng aetha saite phüng
23Honi käni-a kädü thung üng aetha haile te awng y näkha yng saite Sadukai phütä na lä Isu tea ly pa ö dy. 24Äni ce ma “Särae ä, Mosi ma äma üng Ubädi thung-a mä-ai tähang tärü te lä ‘Khimi lawngtä lä caw na dang y käla dü taqawi dylä, änawngpui bung äkangby na ma aekö hai he kae. Ätephüng-a mei nädylä dü saite äjä-ai üng amäjy aepreng hai he kae’ näkha näpa. 25Vaihi kai ce tea kangby jä-ai lawng säritä awng näre si. Äjä-aiky lä ingthawng sa kha caw na dang y käla dü vi. Tukha äni üng kangby kälengky lä äjä-ai üng nawngpui aekö hai dy. 26Honi kangby lä caw na dang y käla dü tynglyng pa. Hini kätyng äbaeni hai ämäthung kangby ni lä hini nawngmädi bung aekö hai kha caw na dang y käla dü be tynglyng pa vi. Tupyng-a kangby jä-ai lawng säritä na lä hini nawngmädi aekö hai bawi kha caw na dang y käla dü ö bawi vi dy. 27Kangkhüng-a honi nawngmädi lä dü by vi dy. 28Kädü üng aetha haile saite käni-a honi nawngmädi lä ämi üng nawngpui-a aelawng ai mei. Kangby jä-ai lawng säritä na lä äni hai aepawng bawi te vi” näkha düng pa.
29Isu ma äni ce tea “Nang ce lä Caekäcai tea mäny ö y. Säthaw üng haidae phüng la mäny ö y. Tukätephüng-a nang ce lä dawng tämang ö te dy. 30Khimi ce lä kädü thung üng aetha haile te kätü-a aepawng saite awng y ai dy. Äni ce lä Känipre üng angtawtha na kätyng aelawng ö vi ai. 31Dü saite khimi na lä aetha haile ai te phüng Caekäcai thung-a, Säthaw ma thui te lä, 32‘Kai lä Abraham üng Säthaw, Isaika üng Säthaw, hai Jaeko üng Säthaw vi’ näpa. Hini na nang ce lä phai vai y mei. Tukätephüng-a honi Säthaw lä dü saite khimi na üng Säthaw y. Hing saite khimi na üng Säthaw kae.”
33Hini khimipui na thai ea lä äma üng mätae te lo phüng-a cangxei ö phi vi dy.
Särilo kälengky
34Pharisai na lä Isu ma Sadukai na älo qa haw y rungtä älo thui te thai ea aekäcö pa dy. 35-36Äni ce thung üng Ubädi särae lawngtä ma “Särae ä, Mosi üng Ubädi lo angxynglyng na thung-a särilo manita aely lengky mei” näkha käny te hai düng pa.
37Isu ma äni tea “‘Nang ce üng Areng Säthaw tea bälung mäke hai bälunghaesy te kaedawng angxynlyng na hai bälung aevaw hethang kae’ näkha näpa. 38Hini lä angcü üng äkälengky saite särilo dy. 39Äbaeni üng aely lengky saite särilo lä hini kätyng-a ‘Nang ma tea bälung aevaw te kätyng äpy äjae tea bälung aevaw hethang kae’ näpa. 40Honi särilo känetä lä Mosi üng Ubädi hai buisaw na üng lo angxynlyng na üng äkung pui vi dy” näkha näpa.
Mesia phüng düng pa
41-42Tukha Pharisai na lä mangtä aekäcö kha awng ea Isu ma äni ce tea düng pa dy. “Nang ce lä Mesia üng äphüng makä dawng ö mei. Äni lä ämi üng cäpaw mei” näkha düng pa.
Äni ce ma “Äni lä Sanphrang Davidae üng cäpaw” näkha mäthang pa dy.
43Isu ma äni ce tea “Tudylä Sanphrang Davidae lä Muilaw Käcai hai Mesia tea ‘Areng’ näkha ätephüng-a ka te mei. Sanphrang Davidae ma,
‘Kai üng Areng tea Säthaw ma thui te vi.
44“Nang üng täre na bung nang üng,
kho bäde täkui-a kai ma khai y rytä kai üng bangtang mang-a aety ba”’ näkha nä vi.
45“Davidae lä Mesia tea ‘Areng’ näkha ka vi dylä, Mesia lä makä sakha Davidae üng cäpaw-a aelawng haw ai mei” näkha düng pa.
46Isu tea ämi lä älo mäthang haw ö y dy. Honi käni üng hai aetawng kha Isu tea ämi lä älo düng ö vawng y dy.
23Isu ma Ubädi särae na phüng thui pa
Mar 12:38-39; Luk 11:43-46; 20:45-46
1Tupyng-a Isu lä khimipui na hai äkähui na tea älo thui pa dy. 2Isu ma äni ce tea “Ubädi särae na hai Pharisai na lä Mosi üng Ubädi täphawng hethang aenae awng saite na vi. 3Tukätephüng-a äni ce thui saite na tängai ö. Äni ce thui te kätyng sa ö. Tungaila äni ce lä äma ce mätu te kätyng sa ö y. Tukätephüng-a äni ce üng sa te kätyng sa ö hang. 4Äni ce lä khimi ce tea sa hethang bäja y saite särilo na py vi. Hini särilo na bäjui haw hethang äni ce lä säbawng pa ö y. 5Äma ce üng sa saite angxynglyng na khimi ce nung bawi rungtä sa ö te vi. Äma ce üng löpeng hai äkö-a Caekäcai lo kädawi na tärü saite aemäkhing ö vi. Äni ce üng äteng-a aebang sawi saite kä-o käsa na aelawng ö vi. 6Ubädi särae na hai Pharisai na lä pawi sa saite mityng kähawi-a aety hethang ngai ö vi. Judae na üng ingkäcai thung-a aesangky saite mityng-a aety hethang ngai ö vi. 7Vyngjaw saite mityng-a khimi ce ma tämö khai kha särae näkha ka te la ngai ö vi. 8Tungaila khimi ce ma nang ce tea särae näkha ka hai hang. Nang ce tea särae lawngtä xyng ni awng kae. Nang ce angxynlyng na lä kangby jä-ai kangpraw ticaw na kätyng vi. 9Älawng qawng-a ämi tea la Pä-ai näkha ka ö hang. Nang ce tea Pä-ai lawngtä xyng ni awng kae. Äni lä Känipre-a awng te kae vi. 10Khimi ce ma nang ce tea mätawngky näkha ka ö hai hang. Nang ce üng mätawngky hai Areng lawngtä xyng ni awng kae. Äni lä Mesia vi. 11Nang ce thung-a kälengky sa saite lä nang ce üng mawsawng-a aelawng hethang kae. 12Mä-ai ma tea aemäsang saite khimi tea lä Säthaw ma mäneng pa vi ai. Tukha mä-ai ma tea aemäneng saite khimi tea lä Säthaw ma mäsang pa vi ai.
Pharisai na hai Ubädi särae na tea pring pa
Mar 12:40; Luk 11:39-42, 44, 52; 20:47
13“Pharisai hai Ubädi särae na ä, nang ce lä tähang si vi. Nang ce lä khimi kähawi käjüng aesa ö te vi. Khimi ce lä Säthaw pre-a kung haw y hethang nang ce lä kätho aekhae ö vi. Tungaila nang ma ce lä kung y ta ma kung hethang aethawsa saite na tea mäkhang pa ö vi.
14“Pharisai na hai Ubädi särae na nang ce lä tähang si. Nang ce lä khimi kähawi käjüng aesa ö te vi. Nang ce lä nawngmädi lömai ing na tea tämo kha la ea khimi ce känung-a käjüng sa kha sadui-a aetang ö te vi. Säthaw ma äni ce tea khimi kälang na qawng-a käsiky saite dengpy vi ai” näkha näpa.
15“Pharisai na hai Ubädi särae na nang ce lä tähang si. Nang ce lä khimi kähawi käjüng aesa ö te vi. Nang ce lä mepui hai pangle tui aekae kha khimi lawngtä lä nang ce üng reitae kätyng Säthaw cäphaw he aethawsa ö vi. Khimi lawngtä lä nang ce üng reitae kätyng yng tea la, Säthaw ma nang ce tea ngärei-a dengpy te qawng-a qengnetä ngärei-a dengpy ngece hethang nang ce kätyng käjüng aesa ö hai te vi.
16“Lolang mätü saite mikangjö na nang ce lä tähang si. Nang ce ma ‘Khimi lawngtä lä Säthaw üng Ingkäcai tea aenyng ea täking saite lä aetütü kae. Tungaila Säthaw üng Ingkäcai üng sui tea aenyng kha täking saite lä cakhi vi’ näkha näpa. 17Nang ce lä mikangjö hai kangthö na vi. Manita aely lengky mei. Sui mei, y dylä, sui tea mäsang saite Säthaw üng ingkäcai mei. 18Nang ce ma ‘Khimi lawngtä lä löci aesa saite maicang tea aenyng ea täking dylä, aetütü kae. Tungaila löci mawi tea aenyng kha täking te lä cakhi te vi’ näkha mätu ö vi. 19Nang ce lä ämi bäjö tätang ö te vi. Manita lä aely lengky mei. Löci mawi amäjy ta mei. Y dylä, löci mawi tea cai hai saite maicang mei. 20Tukätephüng-a khimi lawngtä lä maicang tea aenyng kha täking ea löci aesa saite maicang hai löci mawi angxynlyng na tea aenyng kha täking te vi dy. 21Säthaw üng Ingkäcai tea aenyng kha täking saite khimi lä Ingkäcai thung-a awng saite Säthaw tea aenyng kha täking te vi dy. 22Tukha Känipre-a aenyng kha täking saite khimi lä Säthaw üng aety nae hai honi aety nae qawng-a aety saite Säthaw tea aenyng kha täking te dy.
23“Pharisai hai Ubädi särae na ä, nang ce lä tähang si. Nang ce lä khimi kähawi käjüng aesa ö te vi. Nang ce lä angkhaw thung-a e saite sawngprang, sawngsüng, sawnglä-e na thung üng hawtä-a haetä Säthaw tea py ö vi. Tungaila Mosi üng Ubädi thung-a aely lengky saite mätu te tea nang ce lä dawngcang ö y. Nang ce lä khimi ce tea Ubädi hai aesyng y saite na sa ö vi. Khimi ce tea bäheng ö y. Säthaw maw-a kätüng-a sa ö y. Nang ce lä hawtä-a haetä py hethang kae vi. Tungaila hini qawng-a aely leng saite mätu saite na la bäjui hethang kae. 24Lolang mätü saite mikangjö na ä, nang ce lä tui nei ea mätha bung bäjawng mei y hethang tui tea mäcae ö vi. Tungaila nang ce lä säphö känawngjang käsa bung lä bäjawng ö vi ly.
25“Pharisai hai Ubädi särae na nang ce lä tähang si. Nang ce lä khimi kähawi käjüng aesa ö te vi. Nang ce lä tui bynglyng hai pangkae na tea ärang mang-a mäse ö kae vi. Tungaila nang ce lä hini bynglyng hai pangkae thung üng lawngprae kha mä-ai ma üng kängai hai dang saite na ca ö vi. 26Ämi bäjö saite Pharisai na ä, nang ce üng bynglyng hai pangkae äthung-a mäse mei näte kheng ö mang re. Tupyng-a ni bynglyng hai pangkae ärang mang-a la mäseping by vi ai.
27“Pharisai hai Ubädi särae na nang ce lä tähang si. Nang ce lä khimi kähawi käjüng aesa ö vi. Nang ce lä thung kanglung kälo saite täprawng hai aetawng vi. Honi täprawng lä ärang mang kheng dylä, äcae hawi bärai. Äthung-a lä khimi kädü üng ähu na hai äkärawng na awng te kae vi. 28Honi kätyng-a nang ce lä ärang mang-a lä khimi ce känung-a khimi kähawi kätyng awng. Nang ce lä khimi kähawi käjüng aesa ngaila tätang khü-a hunghö käsi sa saite na kae.”
Isu Pharisai na hai Ubädi särae na tea dengpy te phüng thui rüng pa
29“Pharisai hai Ubädi särae na nang ce lä tähang si. Nang ce lä khimi kähawi käjüng aesa ö vi. Nang ce lä buisaw na üng täprawng sa pa dy. Säthaw üng kälu sa saite na üng täprawng na mäcai ping pa ö dy. 30Tukha nang ce lä ‘Kai ce kangsi kangjaw na dung-a awng ea kha lä buisaw na bung bädü ea kai ce lä säbawng y lyng’ näkha nä ö vi. 31Honi kä thui te phüng-a nang ce lä buisaw na bung bädü saite na üng kätökäteng na vi näte mätü hai ö te vi dy. 32Nang ce üng kangsi kangjaw na ma angcü-a sa saite hunghö tea khüng te khytä nang ce lä sa jawjaw ö. 33Nang ce lä bärui käsi hai aetawng vi. Bärui cäpi na hai aetawng vi. Nang ce ae-ui y dylä, Säthaw ma ngärei thung-a dengpy te üng aelawi haw y.
34“Tängai ö, kai lä nang ce tea buisaw na hai, khimi cüng saite na hai Caekäcai mätu saite särae na bung mätaw vi ai. Tungaila nang ce lä äni ce thung üng phütä na bung lä thinglang qawng-a bädü ö vi. Phütä na bung lä Judae na üng ingkäcai-a bo kha phütä na bung lä märü qütä-a aehui hai ö ai. 35Tukätephüng-a khimi cüng saite angxynlyng na bung bädü te phüng-a Säthaw ma nang ce tea dengpy ai. Hini lä cüng saite Abela üng hai aetawng te vi. Barakhi üng cäpaw Zakhari bung bädü te khytä vi. Nang ce üng kangsi na lä Zakhari bung Ingkäcai thung-a caiping te mityng hai maicang säla-a bädü ö vi. 36Tängai ö. Säthaw ma vaidung üng khimi angxynglyng na tea honi bädü te vang lä dengpy vi ai.
Isu lä Jerusalem märü tähang raw pa
37“Jerusalem märü üng khimi na ä, nang ce lä Säthaw mätaw saite buisaw na bung bädü kha Säthaw mätaw saite angtawtha na bung lä kälung hai käde kha bädü ö te vi. Ae nä-awi ma äma üng mäkhi täkui-a käcüng ea äcaw na bung aw hai te kätyng, kai ma nang ce angxynlyng na tea kähawi-a aedung hai leilae hethang kai lä ngai bärai te vi. Tungaila nang ce lä kai tea ngai ö y. 38Tukätephüng-a nang ce üng Ingkäcai tea lä Säthaw ma khaisö vi. 39Tängai ö. Nang ce ma ‘Areng üng ämüng hai ly saite lawngtä tea Säthaw ma tähang kähawi py sy’ näkha nang ce thui ö y rytä lä, nang ce lä vaihi üng hai aetawng kha kai bung nung haile y dy lyng” näkha näpa.
24Säthaw üng Ingkäcai mäne saite
1Isu lä Säthaw üng Ingkäcai baesung thung üng tho te täre kha ly ja pa vi dy. Äkähui na lä Isu tea ly kha Säthaw üng Ingkäcai bung täkhi pa ö dy. 2Isu ma äkähui na tea “Nang ce lä hini angxynlyng na nung ö te dy. Tängai ö. Hini kälung na lä haetä qawng-a haetä aeqynlyng y te kätü lä tyng vi ai. Täre na ma hini kälung tea mäne ö sangxang pa vi ai rawng” näpa.
Mätang bälaica saite na
3Isu lä Olive kung na awng saite me anghung qawng-a aety kha awng ea äkähui na lä ly kha “Nang thui saite na lä mata kätü-a tyng ai rawng mei. Nang ly haile kha hini älawngpre teng te kätü-a mäny hethang äte kamarae na tho ai mei. Kai ce tea thui jo ba ä” näkha düng pa.
4Isu ma äni ce tea “Nang ce tea ämi ma kaeling kaemae sa y hethang aerü rüng kha awng ö. 5Khimi awng mang saite na lä kai üng ämüng aengang kha ly ö ai. Äni ce ma ‘Kai lä Mesia dy’ näkha thui ö vi ai. Äni ce lä khimi awng mang saite na tea kaeling sa ö vi ai. 6Nang ce lä kaenai üng täre aety saite tüng thai ö ai. Kähanglaw üng täre aety saite angthang na thai ö ai. Tungaila nang ce lä bälung aethüng ö hang. Hokäti amäjy na lä tyng ngece vi ai. Tungaila kangkhüng käni lä tyng te y vi rawng. 7Ceng haetä hai haetä, pre haetä hai haetä täre aety ö ai. Mityng qütä-a pangtälü naw kha bötäkang la tho ai. 8Hini na lä nawngmädi lawngtä äma äby aepeng y te kälang-a äjo naw angcü te kätyng vi ai.
9“Tupyng-a khimi ce ma nang ce bung ne kha mätang bälai-a sa ea bädü vi ai. Kai üng phüng-a khimi qütä lä nang ce tea esäre ö vi ai. 10Honi kätü-a khimi awng mang saite na lä äma ce üng yng te khaisö ai. Lawngtä tea lawngtä esäre kha äma ce tingtawi ae-a ö vi ai. 11Tukha buisaw käjüng aesa saite khimi na lä tho kha khimi awng mang na tea kaeling sa ö vi ai. 12Hunghö na lä awng mang kha khimi ce lä äma ce üng äpy tea bälung aevaw y vi dy. 13Tungaila kangteng khytä cakhi-a awng saite khimi tea lä Säthaw ma aeqang pa vi ai. 14Tukha khimi ce ma Säthaw üng pre pyng te Angthang Kähawi älawngpre üng khimi qütä tea thui ai. Älawngpre üng khimi na lä hini angthang thai ö vi ai. Tupyng-a Säthaw lä hini älawngpre bung teng hai ai dy.
Känyng kha ri hethang hawi saite amäjy
15“Buisaw Daniela ma thui rüng saite känyng kha ri hethang hawi saite na lä mityng käcai-a aedaw te nang ce lä nung ö vi ai. Caekäcai phai saite khimi lä hini thui saite tea mänysy. 16Hokä nung ö te kätü-a Judae khö-a awng saite khimi na lä me anghung mang-a aehui ö kae sy. 17Ingphö-a awng saite khimi lä ätäkui-a aerung ea ingthung üng äte haetä tea la y käla ma aehui kae sy. 18Lai-a awng saite khimi lä äma üng kä-o la hethang ing-a vawi y käla aehui kae sy. 19Honi kätü-a lä äjopawng saite nawngmädi hai nökai kä-awng na lä tengxyng y rae saite tyng ö vi ai. 20Honi kätü-a lä säding tyng y hethang tähang hai, Aehae te Käni aepy y hethang aetang ö. 21Säthaw ma älawng sa te kätü üng hai vaihi khytä khimi ce lä qengtä la hini kätyng ri he kähawi mätangca saite aeting vai te y. Khawngdüng-a la hini kätyng aeting haile tyng ö y ai dy. 22Areng lä äma re saite khimi na tähang honi kätü tea dawi hai vi ai. Äni ma honi kätü tea dawi hai y dylä, ämi lawngtä la hing haw y lyng.
23“Honi kätü-a khimi lawng lawngtä ma ‘Kheng e. Hi-a Mesia lä awng dy.’ Y käla ‘Ho-a Mesia awng dy’ näkha thui dylä, yng ö hang ba. 24Mesia käjüng aesa saite hai buisaw käjüng aesa saite na tho kha cangxei saite na hai kamarae na mätü ö vi ai. Äni ce sa haw dylä, Säthaw ma re saite khimi na tea mäteng ma yng te tämang rung khytä sa vi ai. 25Tängai ö, honi na phüng nang ce tea kai ma thui rüng te dy ba” näkha näpa.
26“Khimi ce ma ‘Kheng ö, Mesia lä daithung kärang-a awng’ nä ea la ly ö hang. ‘Ingthung-a awng’ näkha thui ngaila yng ö hang. 27Anglaw säde te kätyng käni käse mang üng hai käni kädüng khytä käni khösang aevang pheng te kätyng vi ai. Kai, Khimi üng Cäpaw, ly haile tea hikä vi ai.
28“Äro na awng saite mityng-a aemö säling na aekäcö ö vi ai” näkha näpa.
Khimi üng Cäpaw ly ai te phüng
29“Mätang saite na tyng pyng te kätü-a, qengtä ma käni lä ving ai. Law lä aevang ngang y dy. Tengpaw na la khösang mang üng aeqa ai. Säthaw ma käni khösang üng na tea ca khi rung khytä aesui saite haidae na tea lä tähüng pa vi ai. 30Tupyng-a Kai, Khimi üng Cäpaw, lä ly ai dy näsaite mätü te kamarae lä khösang-a aetüng vi ai. Älawngpre angxynlyng na üng khimi na lä ri te phüng-a raw ö vi ai. Tukha Kai, Khimi üng Cäpaw, lä haidae hai phung-ang hai khö angnüng qawng mang ly te khimi na ma nung ö ai. 31Tukha Kai, Khimi üng Cäpaw, lä kähanglawky üng re saite khimi na bung käcüng hai hethang Känipre üng angtawtha na bung baw tüng käleng-a üng kha mätaw ai.
Thaidö kung
32“Thaidö kung üng älawngsai hai-a aetu ö. Thaidö kung lä kädo käna tho kha ärangsai te kätü-a lä nisae aenai te nang ce lä mäny ö dy. 33Honi kätyng kai thui pyng saite amäjy na nang ce nung te kätü-a lä, Kai, Khimi üng Cäpaw, lä ly haile ai te kätü aenai vi dy näkha nang ce lä mäny ö ai. 34Tängai ö. Hini angxynlyng na tyng te cung bawi y rytä lä vaidung üng kaetha na lä dü ö y vi ai rawng. 35Käni hai älawng lä pra ngaila kai üng älo lä manila pra y vi ai.
Kätü hai käni tea ämi lä mäny y
Mar 13:32-37; Luk 17:26-30, 34-36
36“Honi kätü hai käni lä mani tyng ai mei näte ämi la mäny y. Känipre üng angtawtha na la mäny y. Äcäpaw la mäny y. Pä-ai lawngtä xyng ni mäny haw te kae vi. 37Novae dung-a khimi ce sa ö te kätyng Kai, Khimi üng Cäpaw, ly haile te kätü-a khimi ce lä sa ö by vi ai. 38Tui cäqing tho hai y te kälang-a Novae üng sangphaw käleng thung-a kung te käni khytä khimi ce lä nei ca kha aepawng ea pawi na sa ö te vi. 39Äni ce lä tui cäqing tho kha äni ce angxynlyng na tui aesänung king te khytä ätemakä ai mei näte äni ce mäny ö y. Kai, Khimi üng Cäpaw, ly te kätü-a lä honi kätyng by vi ai. 40Nawngmäcaw lawng netä lä lai-a awng ai üng, Kai, Khimi üng Cäpaw, ma lawngtä bung laja kha lawngtä bung lä kai ma khaisö vi ai. 41Nawngmädi lawng netä caw mangtä deng te thung üng Kai, Khimi üng Cäpaw, ma lawngtä bung laja kha lawngtä bung lä kai ma khaisö vi ai.
42“Tukätephüng-a aerü rüng kha aering ö. Nang ce üng Areng lä mata kätü-a ly ai mei näte nang ce lä mäny ö y. 43Hini lä mäny ö ba. Ingkung lä mata kätü-a theru ly ai mei näte mäny dylä, äma üng ing tea theru ma täkhüva y hethang i y käla aering vi ai. 44Nang ce kätü qütä aerü rüng kha awng hethang kae by. Ätephüng-a mei nädylä Kai, Khimi üng Cäpaw, lä nang ce ma aethang khai y te kätü-a tyng vi ai.
Mawsawng lawng netä phüng
45“Kätüng-a sa khü te hai bälunghae saite mawsawng lä ämi mei. Ingkung ma hini mawsawng kälengky tea kälang mawsawng na bung rui hethang hai kätü tyng ea äni ce tea bö ang na py hethang aenae py pa dy. 46Ingkung ma vawi haile te kätü-a äni ma thui te kätyng mawsawng kälengky üng sa khü te nung dylä, mawsawng kälengky lä tähang hawi. 47Tängai ö. Ingkung lä äma üng pyng saite ingthawng angxynlyng na äni tea rui hai pa vi ai. 48Tungaila hini mawsawng kähawi y dylä, äni lä äma ma tea ‘Kai üng ingkung lä vawi haile hethang qae vi ai rawng’ näkha nä ai. 49Tukha äni lä mawsawng kälang na tea bo te hai ngai te kätyng ra nei saite na hai ca nei kha awng näre maisi. 50Mawsawng kälengky ma aethang khai y te kätü-a hai mäny y te kätü-a ingkung lä vawi haile vi ai. 51Ingkung lä hini mawsawng kälengky tea tengxyng y dengpy kha Säthaw üng lo tängai te käjüng sa saite na hai mangtä khai pa vi ai. Äni ce lä raw kha äfaw aemäkütang kha awng ö vi ai.”
25Anglaw lawng hawtä hai mätae pa
1“Honi kätü-a, Säthaw üng pre pyng saite lä hini kätyng vi. Qengtä-a anglaw lawng hawtä na äma ce üng maibung na süng kha nawngpui la saite särai hai aeting hethang ly ö dy. 2Äni ce thung üng lawng bangawtä na lä bälungkähae na vi. Lawng bangawtä na lä kaerö na kae vi. 3Anglaw kaerö lawng bangawtä na lä äma ce üng maibung süng ngaila maitui kanglai süng ö y vi. 4Tungaila anglaw bälungkähae na lä äma ce üng maibung tähang maitui pilang-a mäkawi py kha süng ö dy. 5Aepawng he särai lä tyng hethang kätü mätükü te phüng-a äni ce angxynlyng na lä ämi aemö kha i ö qu vi dy.
6“Tukha kärung angnihü-a lä khimi lawngtä ma ‘Aepawng saite särai lä tyng dy. Ly kha äni hai aeting ö lawi’ näkha ätüng käleng hai thui pa dy. 7Tukha anglaw lawng hawtä na lä aetha kha äma ce üng maibung na aerü rüng ö dy. 8Honi kätü-a anglaw kaerö na ma anglaw bälungkähae na tea ‘Kai ce üng maibung na lä mai dü ai dy te phüng-a kai ce tähang maitui py mai jaw’ näkha mäkai pa ö dy. 9Anglaw bälungkähae na ma ‘Hini maitui lä kai ce tähang hai nang ce tähang lä aelo haw y lyng. Ly kha maitui jaw saite khimi na tea nang ma ce tähang rang ö’ näkha mäthang pa. 10Tukätephüng-a anglaw kaerö na maitui rang hethang ly te thüng-a ma, aepawng he särai lä tyng pa vi dy. Aerü rüng saite anglaw na lä aepawng he särai hai mangtä aepawng pawi-a kung kha mawsawng na ma kätho aekhae pa vi dy.
11“Honi pyng-a anglaw kaerö na lä tyng haile ö dy. Äni ce ma ‘Särae ä, Särae ä, kai ce tähang kätho pä-awng kü jo e’ näkha näpa. 12Tungaila särai ma äni ce tea ‘Tängai ö, nang ce bung kai mäny y’ näkha mäthang pa.
13“Ätephüng-a nang ce lä Kai, Khimi üng Cäpaw, ly hethang kätü käni mäny y te phüng-a aering rüng kha awng ö.
Mawsawng lawng thungtä hai mätae pa
14“Säthaw üng pre pyng saite lä hini kätyng vi. Khimi lawngtä khölawng tho hethang aerü rüng dy. Äni lä äma üng mawsawng na bung ka kha vyngsai na rui hethang äni ce tea a pa dy. 15Mawsawng lawngtä tea sui phawisae sang bangtä, kälang lawngtä tea sui phawisae sang netä, hai kälang lawngtä tea be lä sui phawisae sangtä py ö qi pa dy. Äma üng mawsawng na sa haw te kätyng sui phawisae py pa dy. Tupyng-a äni lä khölawng tho vi dy. 16Sui phawisae sang bangtä dang saite mawsawng lä kaepai sa hai praw kha sui phawisae sang bangtä aepu hai rae pa dy. 17Hini kätyng sui phawisae sang netä dang saite mawsawng lawngtä lä sang netä aepu hai rae-a sa pa dy. 18Tungaila sui phawisae sangtä dang saite mawsawng lä älawng-a äkhaw tai ea homy kha khai pa dy.
19“Kätü qae ea lä äni ce üng ingkung lä vawi haile tyng pa dy. Tukha mawsawng na bung ka kha äma a saite sui phawisae ätemakä sa ö mei näte düng pa dy. 20Sui phawisae sang bangtä dang saite lä kaepai sa kha aepu rae saite sui phawisae sang bangtä hai ly kha äni tea ‘Särae ä, nang ma kai tea rui hethang sui phawisae sang bangtä a vi. Kheng e, kai lä kaepai sa kha sui phawisae sang bangtä aepu hai rae dy’ näkha näpa. 21Ingkung ma ‘Nang sa te lä hawi bärai te vi. Nang lä bälungkähae saite mawsawng kähawi vi. Nang lä sui phawisae äjecäcaw tea kätüng-a rui pa te vi. Tukätephüng-a kai ma nang tea hini qawng-a cang y, awng mang-a rui hethang py ai. Ly lawi, kai hai mangtä kawng anghawtho hawi si dy’ näkha näpa.
22“Tupyng-a sui phawisae sang netä, dang saite mawsawng lä ly ea ‘Särae ä, nang ma kai tea rui pa hethang py saite sui phawisae sang netä a vi. Kheng e, kai ma sang netä tea kaepai sa kha sang netä aepu hai rae dy’ näkha näpa. 23Ingkung ma ‘Nang sa te lä hawi bärai vi. Nang lä kätüng-a sa khü saite mawsawng kähawi vi. Nang lä sui phawisae äjecäcaw tea kätüng-a rui pa te vi. Tukätephüng-a kai ma nang tea hini qawng-a cang y awng mang-a rui pa hethang py ai. Ly lawi, kai hai mangtä kawng anghawtho hawi si dy’ näkha näpa.
24“Honi pyng-a sui phawisae sangtä, dang saite mawsawng lä ly ea ‘Ingkung ä, nang lä bäheng te bälung awng y te kai lä mäny vi. Nang lä äkung e y käla äthai dang hethang ngai saite khimi hai aetawng vi. Ämöti hi y käla caw na mätungcu hethang ngai saite khimi hai aetawng vi. 25Kai lä nang üng sui phawisae la ai te ri te phüng-a älawng khaw-a homy te vi. Kheng e, hini lä nang üng sui phawisae dy’ näkha näpa.
26“Ingkung ma ‘Nang lä mawsawng käsi hai aethaw käli vi. Kai lä äkung e y käla ae kha ämöti hi y käla caw na mätungcu saite khimi hai aetawng te nang mäny vi. 27Tudylä kai üng sui phawisae bung nang lä khimi ce tea äkhi mäqaw kha kai vawi ea aepu hai rae ai be. Tukä ea ni kai vawi haile te kätü-a kai lä äty hai sui phawisae dang haile tyng haw vi ai’ näkha näpa. 28Tukha ingkung ma ‘Äkälang mawsawng tea äni te üng sui phawisae la kha täsawngtä awng saite khimi tähang py näpa. 29Sakaw te awng saite khimi tea kai ma py rae vi ai. Tukätephüng-a äni lä aelo te qawng-a cang y awng mang rae vi ai. Tungaila awng y saite khimi na te üng lä awng angci saite mäteng ma kai ma la beng vi ai. 30Tupyng-a hini kaevang y saite mawsawng bung lä kävingky thung-a kädeja ö la. Honi mityng-a äni ce lä rawpi te hai äfaw aemäkütang kha awng vi ai’ näkha näpa.
Kangkhüng üng tärae cei te
31“Kai, Khimi üng Cäpaw, lä kai ma üng phung-ang hai Säthaw üng angtawtha angxynlyng na hai mangtä ly te kätü-a phung-ang awng saite Areng aety nae qawng-a aety ai. 32Tukha ceng angxynlyng na üng khimi na lä kai üng maw-a aekäcö ö vi ai. Beram kärui kung ma beram hai sobei na bung täphü te kätyng khimi ce bung lä phü netä täphü vi ai. 33Khimi cüng saite na bung lä bangtang mang-a khai kha khimi kälang na bung lä bangrawi mang-a khai ai. 34Tupyng-a Kai Sanphrang ma kai üng bangtang mang-a awng saite na tea ‘Ly ö lawi, Kai üng Pä-ai Säthaw üng tähang kähawi dang saite na ä, älawng sa angcü te kätü üng hai ma nang ce tähang sa rüng saite pre tea kung kha pyng ö lawi. 35Nang ce lä kai äjo aelang ea kai tea bö mäcaw ö vi dy. Kai tui aehe te kätü-a nang ce ma kai tähang tui nei he py ö vi. Kai lä angvüng angvaw lawngtä kä awng ea nang ce lä kai bung engthung-a aehae hethang py ö te vi. 36Kai lä aekhu aena he awng y te kätü-a nang ce lä kai tähang aekhu aena nae py ö dy. Kai kawngang naw te kätü-a nang ce lä kai tea kähawi-a rui ö dy. Kai lä thawng thung-a awng te kätü-a nang ce lä kai tea dyng ö te vi’ näkha näpa.
37“Tupyng-a khimi cüng saite na ma kai tea ‘Areng ä, matä kätü-a nang bö aelang tea kai ce lä aeting kha nang tea bö mäcaw mei. Nang tui aehe te nung kha mani kai ce lä nang tähang tui nei hethang py vai mei. 38Nang lä angvüng angvaw kätyng awng kha kai ce nung ea nang bung matä kätü-a kai ce ing-a aehae hai vai mei. Nang lä aekhu aena nae awng y te nung kha kai ce lä mani nang tähang aekhu aena nae py vai mei. 39Nang kawngang naw tea hai thawng thung-a pä-ung ea mani kai ce lä dyng kha rui vai mei’ näkha düng ö ai. 40Tukha kai Sanphrang ma äni ce tea ‘Tängai ö. Hini kai üng äkähui na thung-a cäpiky saite lawngtä tähang nang ce ma säbawng te lä kai tea säbawng te kätyng by kae dy’ näkha näpa.
41“Tupyng-a Kai Sanphrang lä bangrawi mang üng awng saite na tea ‘Säthaw ma nang ce tea tähang käsi py ai. Kai te üng tho pa öng la. Säthaw ma Setan angra hai äma üng äkähui na tähang sa rüng pa saite dungtäsa mai thung-a ly pa öng la’ näkha näpa. 42‘Ätephüng-a mei nädylä Kai lä böjo aelang ea nang ce lä kai tea bö mäcaw ö y. Kai tui aehe ea nang ce lä kai tea tui nei he py ö y. 43Kai lä angvüng angvaw lawngtä kätyng awng ea nang ce lä kai bung ingthung-a mäkung ö y. Kai lä aekhu aena nae awng y ea nang ce aekhu aena nae py ö y. Kai kawngang naw ea hai thawng thung-a pä-ung tea la nang ce lä kai tea dyng kha rui te awng ö y’ näpa ai.
44“Äni ce ma ‘Areng ä, nang lä böjo aelang te, tui aehe te, angvüng angvaw lawngtä kä awng te, aekhu aena nae awng y te, kawngang naw te, thawng thung-a awng te na nung kha kai ce ma säbawng y te lä mani mei’ näkha mäthang ö ai. 45Tukha Kai Sanphrang ma äni ce tea ‘Tängai ö. Hini äkähui na thung üng cäpiky lawngtä tea nang ce lä säbawng y käla awng te kätü qütä-a kai tea säbawng y te kätyng kae dy’ näkha näpa. 46Tukha Säthaw ma honi khimi ce lä dungtäsa dengpy te mityng-a mätaw ai. Tungaila khimi cüng saite na lä dungtäsa hing saite mityng-a mätaw ai” näkha näpa.
26Isu bung bädü hethang aeceng pa
Mar 14:1-2; Luk 22:1-2; Joh 11:45-53
1Isu lä honi phüng na mätu pyng ea äma üng äkähui na tea thui pa dy. 2Äni ma “Käni netä pyng-a Cäqengja te pawi lä tyng ai dy näte nang ce lä mäny ö by dy. Honi kätü-a khimi lawngtä lä Kai, Khimi üng Cäpaw, bung thinglang qawng-a täheng hethang täre na kö thung-a a ai dy” näkha näpa.
3Tupyng-a mäthykung käleng na hai mätawngky na lä mäthykung kälengky Kaiafa üng ing-a aekäcö ö dy. 4Äni ce lä Isu bung kangru-a ne kha bädü hethang aeceng ö vi dy. 5Äni ce ma “Pawi käni-a mä-ai lä äni bung ne te dang y lyng. Khimipui na aepuilung ö vi ai” näkha näpa.
Bethani vang-a Isu üng älö-a situi bälawng pa
6Isu lä Bethani vang-a ängang käsi mang vai saite Simon üng ing-a awng. 7Äni ca te kätü-a nawngmädi lawngtä lä kung pa dy. Äni lä ävang ting bärai saite rimui kähawi kälung kanglung pilang bung-a khai vi. Nawngmädi ma Isu üng älö-a rimui tui bälawng pa dy. 8Äkähui na hokä nung ea lä kädawtho kha “Ätephüng-a hikä rimui tea hini nawngmädi lä täpang aetütü te mei. 9Hini rimui jaw dylä, phawisae awng mang-a dang ai. Honi phawisae lä khimi kangtang na tea py te lä hawiky” näkha äma ce tingtawi aethui ö dy.
10Äni ce thui te Isu ma mäny ea “Ätephüng-a nang ce lä nawngmädi tea bälungbi hai ö te mei. Kai tea äni ma sa saite lä hawi te kae ecy. 11Mätang saite na lä nang ce hai mangtä awng jawjaw te kae. Kai lä nang ce hai mangtä awng jawjaw he y lyng. 12Kai üng äro bung ö hethang äni lä aerü rüng kha kai üng ätabung qawng-a rimui tui hai bälawng te dy. 13Tängai ö. Khimi ce ma Angthang Kähawi thui saite älawngpre qütä-a lä hini nawngmädi ma sa saite äphüng thui kha äni ce lä sämai jaw ö vi ai” näkha näpa.
Judae lä Isu bung a hethang bälung aedü pa
14Tupyng-a äkähui lawng hawlai netä thung üng Judae Iskriota lä mäthykung käleng na tea ly pa dy. 15Äni ma “Isu bung nang ce kö thung-a a dylä, kai tähang tangkae pjaetä py ai mei” näkha düng pa. Äni ce ma Judae tea tangkae pjae ruithungtä py pa dy. 16Tupyng-a Judae lä Isu bung a hethang älang kähawi mäqang pa dy.
Areng üng kädüngbö
Mar 14:12-21; Luk 22:7-14; Joh 13:21-30
17Täkaw aepae saite aesi qa y te pawi üng angcü käni-a äkähui na lä Isu tea ly pa dy. Tukha äni ce ma “Nang üng Cäqengja te pawi kädüngbö ca hethang kai ce lä mani mityng-a aerü rüng pa ai mei” näkha düng pa.
18Isu ma “Nang ce lä märü thung-a hini khimi tea ly ö ba. Äni tea kai ce üng särae ma Säthaw ma kai tähang khai saite kätü lä aenai dy. Nang üng ing-a kai üng äkähui na hai mangtä Cäqengja te pawi sa hethang ngai ti” näkha täru vi näpa ba.
19Isu ma thui te kätyng äkähui na lä Cäqengja te pawi üng kädüngbö tähang sa rüng pa dy.
20Kädüng tyng te kätü-a, Isu lä äkähui lawng hawlai netä na hai mangtä bö aw kha ca ö dy. 21Äni ce lä bö ca te thüng-a, Isu ma “Tängai ö. Nang ce thung üng khimi lawngtä ma kai bung lä täre na kö thung-a a ai” näkha näpa.
22Äkähui na lä bälung hawi y phi te hai ma “Areng ä, hini lä kai mei” näkha lawngtä pyng-a lawngtä ma Isu tea düng pa ö dy.
23Isu ma äni ce tea “Kai hai mangtä täkaw hai pangkae-a täpaw kha ca saite khimi lawngtä vi. 24Caekäcai ma tärü te kätyng Kai, Khimi üng Cäpaw, lä dü vi ai. Tungaila Kai, Khimi üng Cäpaw, bung täre na kö thung-a a saite khimi lä tähang si. Honi khimi aepeng y khyry dylä, äni tähang lä hawiky” näkha näpa.
25Tupyng-a äni bung täre na kö thung-a a saite Judae Iskriota ma Isu tea “Särae ä, kai mei” näkha düng pa.
Tukha Isu ma “Nang ma thui te kätyng kae dy” näkha näpa.
Areng üng kädüngbö phüng
Mar 14:22-26; Luk 22:14-20; 1 Kor 11:23-25
26Isu hai äkähui na lä kädüngbö ca ö te thüng-a Isu lä täkaw la kha Säthaw tea kawng te lo thui pa dy. Tupyng-a täkaw tea täpe kha äkähui na tea “Hini täkaw lä kai üng ätabung vi. La kha ca ö” näkha äni ce tea py pa dy.
27Tupyng-a cäpje tui bynglyng tea la kha Säthaw tea bälaw pyng-a äni ce tähang py pa be dy. Äni ma “Nang ce angxynlyng na hini bynglyng nei ö. 28Hini cäpje tui lä awng mang saite khimi na üng hunghö tähang bälawng te kai üng äthi vi. Hini äthi lä Säthaw hai khimi ce säla-a aenai saite vi. 29Tängai ö. Kai pä-ai üng pre-a nang ce hai mangtä cäpje tui kangthae nei haile y rytä kai lä cäpje tui tea nei y dy” näkha näpa.
30Tupyng-a Isu lä äkähui na hai ae-awi haetä thui pyng-a Olive kung na awng saite me anghung mang-a ly ö dy.
Isu ma Peterae aephae ai te phüng thui rüng pa
Mar 14:27-31; Luk 22:31-34; Joh 13:36-38
31Tupyng-a Isu ma äni ce tea “Caekäcai thung-a tärü saite lä, Kai lä beram rui saite kung bung bädü kha beram na lä aehui sangxang ö vi ai” näkha awng. “Honi kätyng vaidüng nang ce angxynlyng na ma kai bung lä khaisö kha aehui pa öng vi ai. 32Tungaila Säthaw ma kai bung kädü thung üng mätha haile tyng pyng-a, Kalile khö-a kai lä nang ce ly y kälang-a ly mang vi ai” näkha näpa.
33Peterae ma Isu tea “Khimi kälang angxynlyng na ma nang bung khaisö ngaila kai lä manila nang bung khaisö y lyng” näkha näpa.
34Isu ma Peterae tea “Tängai khü Peterae ä, Vaidüng kärung-a aekhawng y te kälang-a nang lä ‘Äni tea mäny y’ näkha qengthungtä thui vi ai” näkha näpa.
35Tungaila Peterae ma Isu tea “Kai lä nang hai mangtä dü hethang ea mäteng ma nang bung mäny y näkha aephae y lyng” näkha thui pa dy.
Tukha äkähui kälang angxynlyng na la hini kätyng thui ö bawi pa dy.
Kesamani angkhaw thung-a Isu aetang pa
36Isu hai äkähui na lä Kesamani ämüng awng saite angkhaw haetä-a ly ö dy. Isu lä äkähui na tea “Kai lä ho-a aetang te thüng-a nang ce lä hini mityng-a aety ö ba” näkha täru pa dy. 37Tupyng-a Isu lä Peterae hai Zebede üng cäpaw Jaeko ni Johan bung äma hai mangtä ka pa dy. Äni lä bälung mätang te hai bälungbi phi vi dy.
38Tukha Isu ma äni ce tea “Kai lä dü aenai te khytä bälungbi phi vi dy. Nang ce lä hini mityng mang awng kha kähawi-a aering ö ba” näkha näpa.
39Tupyng-a Isu lä äjecäcaw ly kha älawng qawng-a aebo ea “Ä-ai ä, nang lä äte angxynlyng na tea sa haw te kae. Hini mätangbälai saite kai aeting y hethang säbawng kü jo. Tungaila kai üng aely kängai kätyng hang sy. Nang ma üng aely kängai kätyng kae sy” näkha aetang pa dy.
40Tupyng-a Isu lä äkähui lawng thungtä na tea aekö haile tyng kha, äni ce lä i ö qu ea awng te nung pa dy. Isu ma Peterae tea “Nang ce lä tänaeritä mäteng ma i y käla kai hai mangtä aering haw y vi dy nang mei” näkha düng pa. 41Isu ma äni ce tea “Nang ce lä hunghö sa hethang bärawi bäleng saite thung-a qa y hethang aetang kha aering ö baw. Bälung hai lä hunghö sa hethang ngai y ngaila ätabung lä aethaw awng y” näpa.
42Tupyng-a Isu lä ly haile tyng kha “Ä-ai ä, hini mätangbälai saite kai te üng mäthuija haw y kha nang ma üng aely kängai kai aeteng dylä, tyng kae sy” näkha aetang pa dy. 43Isu äbaeni vawi haile tyng te kätü-a äkähui na lä ämi aemö phi kha i ö qu te nung pa vi dy.
44Tukha Isu lä ämäthung tho haile be kha angcü üng kätyng aetang haile pa be dy. 45Tupyng-a äkähui na tea vawi haile kha “Nang ce lä vaihi khytä i kha aehae ö te vi rawng mei. Kai, Khimi üng Cäpaw, bung lä hunghö sa te na üng kö thung-a a te kätü tyng vi dy. 46Aetha ö lawi baw. Co mä-ai ly ö si dy. Kai bung täre na üng kö thung-a a hethang khimi lä tyng dy” näkha näpa.
Isu bung ne pa
Mar 14:43-50; Luk 22:47-53; Joh 18:3-12
47Hokä Isu ma thui te thüng-a äkähui lawng hawlai netä na thung üng Judae Iskriota lä tyng pa vi dy. Äni hai mangtä aekei sawngseng thingbyng, na süng saite khimipui na la qa by. Honi khimi ce lä mäthykung käleng na hai mätawngky na ma mätaw ö saite khimi na vi. 48Isu bung täre na kö thung-a a hethang Judae Iskriota ma “Kai ma mänang saite khimi lä Isu dy mang ba. Äni bung ne ö ba” näkha äni ce tea äsäny thui pa rüng pa dy.
49Judae Iskriota lä Isu tea ly praw kha “Särae ä,” näkha Isu tea mänang pa khaw dy.
50Isu ma “Änang ä, nang sa he awng te na kärang-a sa lawi” näkha näpa.
Tupyng-a khimi ce lä Isu bung ne pa ö vi dy. 51Tungaila Isu üng äkähui lawngtä ma aekei aebäju ea mäthykung kälengky mawsawng lawngtä üng känawkhing tea saibawng pa dy. 52Isu ma “Aekei bung ä-ing-a mäceng la. Aekei süng saite khimi lä aekei hai-a dü saite tyng vi ai. 53Kai lä kai Pä-ai tea säbawng hethang mäkai dylä, Kai pä-ai ma äma üng angtawtha na bung awng mang-a mätaw ai näte nang ce lä mäny ö y mei. 54Tungaila Caekäcai ma thui te kätyng lä kai tea cungrü hai hethang kae te vi” näkha näpa.
55Isu ma khimipui na tea “Damarae bung ne te kätyng aetu aekei, thingbyng süng kha kai bung ne hethang ngai ö te ae. Kai lä käni qütä Säthaw üng Ingkäcai baesung thung-a aety kha Säthaw lo mätu te be. Hokä ea nang ce lä kai bung ne ö y. 56Tungaila hini na lä Caekäcai thung-a buisaw na ma tärü rüng saite lo na cungrü hai hethang vi” näkha näpa.
Tupyng-a äkähui angxynlyng na lä Isu bung khaisö kha aehui pa öng pa dy.
Judae na üng Sanhendrin kawngci maw-a Isu tea tärae cei pa
Mar 14:53-65; Luk 22:54-55; Joh 18:13-14, 19-24
57Tupyng-a äni ce lä Isu bung mäthykung kälengky Kaiafa üng ing-a nähai pa. Ha-a lä mäthykung käleng na hai mätawngky na hai Ubädi särae na lä aekäcö kha awng ö bawi te vi. 58Peterae lä kähanglaw mang mäthykung kälengky Kaijafa üng ing baesung thung khytä Isu üng leithung hui pa. Äni lä baesung thung-a kung kha mäthykung kälengky üng mawsawng reisae na hai mangtä aety kha awng pa. Isu tea ätemakä sa mei näte äni lä nung he ngai te vi. 59Mäthykung käleng na hai mangtä Judae na üng Sanhendrin kawngci üng khimi angxynlyng na lä Isu bung bädü haw hethang äni üng phüng kaeling thui saite na mäqang ö dy. 60Tungaila äni ce lä Isu sa tämang te dang pa ö y. Khimi kä-awng mang na ämaw-a ly kha Isu phüng kaeling kaemae thui ngaila äni ce lä Isu sa tämang te nung pa ö y vi. Kangkhüng-a khimi lawng netä lä aetha hawi kha, 61“Änini ma Isu lä ‘Kai lä Säthaw üng Ingkäcai bung täphra kha käni thungtä säla-a sa haile haw ai’ näkha thui vi” näkha näpa hawi dy.
62Mäthykung kälengky ma lä aedaw kha Isu tea “Honi khimi ce ma nang tea käsi thui saite na tea nang lä ätemakä la mäthang y käla ma awng te vi mei” näkha düng pa. 63Tungaila Isu lä sitäri-a awng pa kae vi. Tukha mäthykung kälengky ma “Nang lä Säthaw üng Cäpaw Mesia dy mei. Kai ce tea thui jo. Dungtäsa hing saite Säthaw üng ämüng tea aete kha kai lä nang tea düng te vi” näkha näpa.
64Isu ma “Honi lä nang üng älo vi. Tungaila kai nang ce tea thui ai. Vaimaw mang-a Kai, Khimi üng Cäpaw, lä haidae lengky saite Säthaw üng bangtang mang-a aety kha awng te hai khö angnüng qawng mang ly te tea nang ce lä nung ö vi ai rawng” näkha näpa.
65Mäthykung kälengky ma lä äma üng kä-o sä-ei kha “Mä-ai lä äte älo kälang na ngai be y dy. Äma ma tea Säthaw kätyng aesa saite lo nang ce lä thai ö bawi dy. 66Nang ce lä ätemakä dawng ö mei” näkha düng pa.
Äni ce ma “Isu lä dü sang vi” näkha näpa.
67Tupyng-a khimi phütä na ma lä Isu üng mimai-a mäce hai mäthawi pa ö dy. Phütä na ma äkö hai thawng pa. Phütä na ma tangbeng-a äkö hai täbeng pa. 68Äni ce lä Isu tea mänui hai kha “Nang tea ämi ma bo te mei Mesia ä. Buisaw lo hai thui lawi by ä,” näkha näpa.
Isu bung mäny y näkha Peterae ma aephae pa
Mar 14:66-72; Luk 22:56-62; Joh 18:15-18, 25-27
69Honi kätü-a Peterae lä mäthykung kälengky baesung thung-a aety kha awng. Mäthykung kälengky üng mawsawng anglaw ma ly kha “Nang lä Kalile khö üng Isu üng äpy by be kä-aw” näpa.
70Peterae ma äni tea “Nang thui saite phüng kai lä mäny y” näkha khimi angxynlyng na maw-a aephae pa. 71Tupyng-a Peterae lä ing maw-a tho pyng-a äkälang mawsawng anglaw ma äni tea nung haile tyng be kha äteng-a aedaw saite khimi na tea “Hini khimi lä Nazare märü üng Isu hai mangtä awng saite vi” näpa.
72Peterae ma “Äni bung kai mäny y” näkha täking ea aephae pa be vi.
73Tänaetä pyng-a lä äteng-a aedaw saite khimi na ma Peterae tea “Nang lä äni ce thung üng khimi by. Nang ma üng älo tho te ätüng phüng-a mäny haw te vi” näkha näpa.
74Tupyng-a Peterae ma “Äni bung kai mäny y. Kai thui te tüng y dylä, Säthaw üng angsawi kai tea lawi sy” näkha thui pa dy. Qengtäma ae lä khawng raw pa dy.
75Tukha Peterae lä Isu ma äni tea “Aekhawng y te kälang-a nang lä kai bung mäny y näkha qengthungtä aephae ai” näsaite älo tea aedawng haile tyng dy. Äni lä tho kha bälung aekhy te hai ma rawsö kae vi dy.
27Pilata mätawngky tea Isu bung tha pa
Mar 15:1; Luk 23:1-2; Joh 18:28-32
1Kädang thawde-a mäthykung käleng na hai mätawngky na angxynlyng na lä aekäcö kha Isu bung bädü hethang aedüng ö dy. 2Tupyng-a äni ce lä Isu bung mäkhing rang kha äni bung Rom aecörae mätawngky Pilata tea tha pa ö dy.
Judae Iskriota dü pa
3Isu bung täre na kö thung-a a saite Judae Iskriota lä, Isu bung bädü hethang sa ö te phüng mäny dy. Äni lä aedawng mäkhüng kha tangkae pjae ruithungtä mäthykung käleng na hai Ubädi särae na tea py pa haile dy. 4Äni ma “Kai lä hunghö awng y saite khimi bung bädü hethang a vi dy. Kai lä hunghö sa vi dy” näpa.
Tungaila äni ce ma lä “Honi lä kai ce hai aesui te y. Nang ma üng kälu kae” näkha näpa.
5Judae Iskriota lä phawisae äpjae tea Säthaw üng Ingkäcai thung-a kädesö pa dy. Tupyng-a äni lä honi mityng üng thoja ea äma ma üng känawngjang-a kharui hai aemäkhing kha kai-o vi dy.
6Mäthykung käleng na lä honi tangkae na aekhü ö vi dy. Tukha äni ce ma “Hini phawisae äpjae lä khimi bädü saite üng vi. Tukätephüng-a hini tangkae bung Säthaw üng Ingkäcai tangkae käcö nae thung-a mäceng sai y” näkha näpa. 7Äni ce lä aedüng ö kha honi tangkae hai lä-awng sa saite kung üng älawng tea rang kha ceng kälang na üng täprawng sa hai dy. 8Tukätephüng-a honi älawng tea vaihi khytä khimi ce ma “Äthi mityng” näkha mäthi ö vi dy.
9Säthaw ma jangni-a buisaw Jeremia hai-a thui rüng saite lä cungrü hai vi dy. Buisaw ma “Äni ce lä tangkae pjae ruithungtä la ö vi. Isrelae khimi na ma äni tea hokä rytä la ävang käting-a khai pa ö y. 10Äni ce lä honi tangkae pjae ruithungtä hai lä-awng sa saite kung üng älawng ngang tea rang ö te vi. Säthaw lä hini kätyng awng hai rüng te vi” näkha näpa.
Isu tea Pilata ma tärae cei pa
Mar 15:2-5; Luk 23:3-5; Joh 18:33-38
11Isu lä Rom mätawngky Pilata maw-a aedaw kha awng pa dy. Pilata mätawngky ma Isu tea “Nang lä Judae na üng sanphrang tätang vi mei” näkha düng pa. Isu ma “Nang ma thui te kätyng kae dy” näkha mäthang pa dy.
12Mäthykung käleng na hai mätawngky na ma käsi prawng pa ö vi dy. Tungaila Isu lä äte haetä lä mäthang pa y.
13Tukätephüng-a Pilata ma Isu tea “Äni ce ma nang tea käsi prawng te thai y vi mei” näkha näpa.
14Tungaila Isu lä älo bälangtä la aepe pa y kha Pilata lä cangxei pa vi dy.
Isu tea dü hethang tärae cei pa
Mar 15:6-15; Luk 23:14-25; Joh 18:39-19:16
15Pilata lä Cäqengja te pawi tyng te qütä khimi ce ma mäkai saite thawngsae lawngtä bung bälawi te awng vävawi te vi. 16Honi kätü-a ämüng aethang saite Baraba näsaite khimi lawngtä lä thawng thung-a awng vi. 17Tukha khimipui na lä aekäcö te kätü-a lä Pilata ma äni ce tea “Nang ce lä ämi bung bälawi hethang ngai ö te mei. Baraba bung mei, y dylä, Mesia näsaite Isu bung bälawi hethang ngai ö te mei” näkha düng pa dy. 18Mäthykung käleng na ma Isu tea pä-e te phüng-a Isu bung Pilata tea a pa ö dy. Hokä sa te tea Pilata lä kähawi-a mänysy pa vi.
19Pilata lä tärae cei saite aety nae qawng-a aety ea änawngpui ma äni tea khimi lawngtä bung mätaw kha “Honi khimi cüng saite tea äte lä sa hang ba. Vai rung kai üng aemang thung-a äni tähang kai lä tengxyng y bälung mätang te awng vi” näkha näpa.
20Tungaila mäthykung käleng na hai mätawngky na ma lä “Baraba bung bälawi kha Isu bung bädü” näkha Pilata tea mäkai hethang khimipui na tea mäcü pa ö dy. 21Pilata ma äni ce tea “Änini lawng netä thung-a ämi bung bälawi pa ai mei” näkha düng haile pa dy.
Tukha khimipui na ma “Baraba bung bälawi” näkha näpa.
22Tupyng-a Pilata ma äni ce tea “Mesia näsaite Isu tea kai lä makä sa ai mei” näkha düng pa.
Khimipui angxynlyng na ma “Äni bung lä thinglang qawng-a täheng kha bädü la” näkha näpa ö rü dy.
23Pilata ma äni ce tea “Ätephüng-a mei. Äni lä äte sa tämang te awng vi nang mei” näkha düng pa.
Tungaila khimipui na ma “Äni bung thinglang qawng-a täheng kha bädü la” näkha ätüng käleng hai hang rae pa vi dy.
24Pilata lä äma äte lä sa haw y te mäny dy. Khimipui na lä aepuilung ö ai te äni lä nung dy. Tukha äni lä äma üng mawsawng tea tuithai la hai ea khimipui na maw-a äkö aese pa dy. Äni ma “Hini khimi üng äthi hai dü te lä kai üng kälu y ba. Nang ce üng kälu kae” näkha näpa.
25Khimipui angxynlyng na ma “Hini khimi üng äthi hai dü te lä kai ce hai kai ma ce üng caw na üng kälu kae dy” näkha näpa ö dy.
26Tupyng-a Pilata lä Baraba bung bälawi pa dy. Tukha Isu tea kharui angre hai bo hai kha thinglang qawng-a täheng kha bädü hethang reisae na tea a pa vi dy.
Isu tea Rom reisae na ma mänui hai pa
27Tupyng-a Pilata üng reisae na lä Isu bung Pilata mätawngky üng baesung thung-a nähai pyng-a reisae kangkawng angxynlyng na tea aekäcüng hai bawi pa dy. 28Reisae na ma Isu üng kä-o tea bäling kha kä-o kangthing bälawng pa dy. 29Tupyng-a angling cangpre na täkawng ea sa saite lökhu Isu lö-a aekhu hai pa dy. Säbö kung haetä äni üng kö bangtang mang-a süng hai pa dy. Tupyng-a äni ce lä Isu üng maw-a khokhö didü kha “Judae na üng sanphrang lä khö sa hawi sy” näkha mänui hai pa ö dy. 30Äni ce lä Isu tea mäce hai mäthawi kha äni ce lä säbö kung la ea Isu üng älö-a mäkhae täto pa ö vi dy. 31Hikä mänui hai pyng dylä, äni ce ma kä-o kangthing tea bäling kha Isu üng kä-o bälawng haile tyng pa ö dy. Tupyng-a thinglang qawng-a täheng kha bädü hethang äni ce lä Isu bung nähai ö dy.
Isu bung thinglang qawng-a täheng pa
Mar 15:21-32; Luk 23:26-43; Joh 19:17-27
32Äni ce lä Jerusalem märü-a tho ö te kätü-a Sarene märü üng Simon näsaite hai aeting kha reisae na ma aethaw paitae hai äni bung ka kha Isu üng thinglang tea aepö hai pa dy. 33Äni ce lä Isu bung Kolakota näsaite mityng-a nähai pa. Kolakota näte lä älökorö hai aetawng saite mityng tea thui te vi. 34Äni ce lä khaw saite aesi hai aeqo saite Cäpje tui Isu tea mätyng pa dy. Isu lä mäteng kha nei pa y.
35Tupyng-a äni ce lä Isu bung thinglang qawng-a täheng pa. Isu üng kä-o na tea lä phui sa kha aeri pa ö vi dy. 36Tupyng-a äni ce lä aety ö kha Isu bung cawng ö dy. 37Äni ce lä Isu tea tärae cei te phüng tärü ea äni üng älölüng thinglang qawng-a täheng pa dy. Hokä tärü te lä “Hini lä Judae na üng Sanphrang, Isu vi” näkha näte vi. 38Tukha reisae na ma Isu hai mangtä damarae lawng netä bung thinglang qawng-a täheng pa hawi by dy. Lawngtä bung lä bangtang mang-a khai kha lawngtä bung lä bangrawi mang-a khai pa dy.
39Cäqeng kha ly saite khimi na ma lä älö thu ea käsi prawng pa ö dy. Äni ce ma, 40Nang lä Ingkäcai tea mäne kha käni thungtä säla ma sa haile tyng ai nä be. Nang ma tea nang ma aeqang lawi baw. Nang lä Säthaw üng Cäpaw tätang dylä, thinglang qawng üng aerung lawi by, näkha Isu tea mänui hai pa ö dy.
41Honi kätyng mäthykung käleng na hai Ubädi särae na hai mätawngky na ma la Isu tea mänui hai pa ö vi. 42Äni ce ma “Äni lä khimi kälang na bung lä aeqang ngaila äma ma tea lä aeqang haw y ta ma. Isrelae khimi na üng sanphrang y mei. Thinglang qawng üng aerung dylä, äni tea kai ce lä yng by ai cy ä. 43Äni lä Säthaw tea ae-y vi. ‘Kai lä Säthaw üng Cäpaw’ näkha nä vi. Säthaw ma vaihi aely ngai dylä, aeqang lawi sy” näkha mänui hai pa ö vi.
44Isu hai mangtä thinglang qawng-a täheng saite damarae ni ma lä hini kätyng mänui hai pa dy.
Isu lä dü pa
Mar 15:33-41; Luk 23:44-49; Joh 19:28-30
45Käni anghung üng hai aetawng kha naeri thungtä khytä älawng angxynlyng na lä ving pa vi dy. 46Naeri thungtä-a Isu lä “Eli, Eli, lama sabathani” näkha ätüng käleng hai hang pa dy. Hokä näte üng älawngsai lä “Kai üng Säthaw ä, Kai üng Säthaw ä, ätephüng-a nang lä kai bung khaisö te mei” näte vi.
47Äteng-a aedaw saite khimi phütä na ma honi lo thai te kätü-a “Äni lä Elijae bung ka te dy” näkha aethui ö dy. 48Qengtäma khimi lawngtä lä aehui ea tui bäjaw hai saite libyng kämawng säbö kung mawng-a mäkhing kha Cäpje tui käthaw thung-a üng pa dy. Honi la kha Isu tea nei hethang py pa ö dy.
49Tungaila kälang na ma lä “Äni bung aeqang hethang Elijae ly pa jo mei kheng ö si” näkha näpa ö dy.
50Tukha Isu lä ätüng käleng hai hangrang kha dü pa vi dy.
51Ingkäcai üng jaeky saite känih käsa lä honi kätü-a äqawng üng hai khotang khytä aesä-ei phung pa vi dy. Älawng lä pangtälü tähüng vi dy. Kälung na lä kawi pa ö vi dy. 52Säthaw ma täprawng üng kälung na aepä-awng kha äma üng khimi na awng mang saite mätha haile pa ö vi dy. 53Säthaw ma Isu bung mätha haile pyng-a täprawng üng tho saite na lä Jerusalem märü käcai thung-a kung ö te khimi na lä nung ö vi dy.
54Isu tea cawng saite reisae cungvaitä na bung pyng te mätawngky hai reisae na lä pangtälü tho te hai amäjy cawngkhang na nung ö vi dy. Äni ce lä ri phi te hai “Äni lä Säthaw üng Cäpaw tätang vi” näkha nä ö dy.
55Nawngmädi phütä na lä hanglaw mang aedaw kha kheng ö vi dy. Äni ce lä Kalile khö üng hai Isu tea säbawng hethang äni leithung hui ö saite na vi. 56Honi na thung-a Makadala märü üng Maeri, Jaeko ni Josefae üng änä-awi Maeri, Zebede cäpaw üng änä-awi la qa by.
Isu ro bung pa ö
Mar 15:42-47; Luk 23:50-56; Joh 19:38-42
57Kädüng mang-a lä Arimathia märü üng Josefae näsaite tawngnang te khimi lawngtä tyng pa dy. Äni lä Isu üng äkähui lawngtä by vi. 58Äni lä Pilata tea ly kha Isu üng äro bung mäkai pa dy. Pilata lä Isu üng äro bung Josefae tea py hethang reisae na tea thui pa dy. 59Josefae lä Isu üng äro bung la kha libyng kanglung hai säve pa dy. 60Honi pyng-a kälung tea täko saite täprawng kangthae thung-a Isu bung pa ö dy. Hini lä Josefae äma tähang sa rüng saite täprawng vi. Tupyng-a täprawng äkhaw tea kälung käleng hai qengtang kha thoja vi dy. 61Honi täprawng üng ämaw-a Makadala märü üng Maeri hai äkälang Maeri ce la aety kha kheng ö te by vi.
Reisae na bung täprawng tea cawng hai pa
62Aerü rüng te käni pyng-a Aehae saite käni tyng ea, mäthykung käleng na hai Pharisai na lä Pilata tea ly ö dy. 63Äni ce ma “Ingkung ä, honi khimi kaeling lä hing te thüng-a ‘Kai lä ämäthung käni aetha haile vi ai’ näkha näte kai ce lä sämai jaw ö te vi. 64Tukätephüng-a täprawng tea ämäthung khytä, kähawi-a cawng hethang reisae na tea täru ba. Y dylä, äma üng äkähui na ma äro bung bäru ö vi ai. Tukha äni ce lä Isu aetha haile vi näte khimi ce tea thui ö ai. Jangni üng kaeling thui te qawng-a vaihi üng kaeling thui te si rae he kae dy” näkha näpa.
65Pilata ma “Reisae na tea ka kha täprawng bung kähawi-a cawng hai ö” näkha näpa dy.
66Tukha äni ce lä täprawng-a ly ea ämi ma lä Isu üng äro bung bäru y hethang reisae na tea cawng hai pa ö dy. Äni ce lä kälung tea äsäny na sa pa dy.
28Säthaw ma Isu bung kädü thung üng mätha haile tyng pa
Mar 16:1-10; Luk 24:1-12; Joh 1:1-10
1Aehae te Käni pyng-a, käni säritä üng angcü üng käni kädang thawde khö aevang y te kätü-a Makadala märü üng Maeri hai äkälang Maeri lä Isu üng täprawng-a ly ö dy. 2Honi kätü-a aethaw awng saite pangtälü tähüng pa vi. Säthaw üng angtawtha lä käni mang üng cäqa kha täprawng khaw üng kälung käleng lä aethuija ea honi kälung qawng-a aety kha awng pa dy. 3Äni üng ämaw äcae lä anglaw säde te kätyng aecang phrung-a awng vi. Äni üng kä-o lä tengxyng y kälung ping na. 4Täprawng rui saite reisae na lä äni tea tengxyng y ri phi te phüng-a aethüng kha älawng qawng-a aetüng ö vi dy. Äni ce lä aetae y käla khimi kädü hai aetawng ö vi dy.
5Säthaw üng angtawtha lawngtä ma nawngmädi na tea “Ri ö hang. Nang ce lä thinglang qawng-a täheng kha bädü saite Isu bung mäqang ö te kai lä mäny dy. 6Isu lä hini mityng-a awng y dy. Äma thui te kätyng Säthaw ma kädü thung üng mätha haile vi dy. Äni üng äro bung bäsawng saite mityng kheng ö kae-e. 7Äkähui na tea ly dawde kha Säthaw ma Isu bung dü te üng mätha haile tyng vi dy. Vaihi Isu lä nang ce maw-a Kalile khö-a ly dy. Äni bung lä honi mityng-a nung ö ai mang kai thui saite älo sämai khü ba” näkha näpa.
8Honi nawngmädi na lä täprawng üng tho ö dawde vi dy. Nawngmädi na lä ri ngaila tengxyng y kawng anghawtho te hai äkähui na tea honi angthang thui hethang aehui ö dy.
Nawngmädi na ma aetha saite Areng tea cäphaw pa
9Qengtäma Isu lä äni ce tea aeting kha “Nang ce lä awneng te awng sy” näkha näpa. Äni ce lä Isu üng äkho-a täkawi kha cäphaw pa ö dy. 10Isu ma äni ce tea “Ri ö hang. Kai üng kangby jä-ai kätyng-a bälung aevaw saite äkähui na tea ly kha Kalile khö-a ly hethang thui pa ö jo. Äni ce lä honi khö-a kai bung nung ö ai mang” näkha näpa.
Reisae na ma thui te angthang
11Nawngmädi na tho te kätü-a täprawng rui saite reisae phütä na lä märü thung-a ly ö dy. Tukha äni ce lä mäthykung käleng na tea Säthaw üng angtawtha hai täprawng äphüng angxynlyng na thui pa ö dy. 12Mäthykung käleng na hai Ubädi särae na lä aeting kha aedüng pyng ea reisae na tea tangkae awng mang-a py pa ö dy. 13Äni ce ma reisae na tea “Nang ce lä hikä thui he kae. Kärung thung-a kai ce i ea Isu üng äkähui na lä ly kha äro bung bäru ö ja vi näkha thui ö. 14Tukha hini phüng Pilata ma thai dylä, äni ma nang ce tea dengpy te ri y hethang kai ce ma thui pa ai mang” näkha näpa.
15Tukha reisae na lä tangkae la kha mäthykung käleng na mätu te kätyng thui pa ö dy. Reisae na ma thui te kätyng vaini khytä Judae na thung-a aethui ö jaw vi rawng.
Isu lä äkähui na tea ämaw aetüng pa
Mar 16:14-18; Luk 24:36-49; Joh 20:19-23; Angtawtha 1:6-8
16Tupyng-a äkähui lawng hawlai haetä na lä Isu ma thui te kätyng Kalile khö üng me anghung-a paw ö dy. 17Äni ce lä Isu bung nung ea äni tea cäphaw ö dy. Tungaila phütä na lä yng khü pa ö y vi. 18Isu lä äkähui lawng hawlai netä na äteng-a ly kha “Säthaw ma Känipre-a hai älawngpre üng aenae angxynlyng na kai tea py vi dy. 19Tukätephüng-a nang ce lä ly ö kha pre angxynlyng na üng khimi na bung kai üng äkähui-a aelawng hai ö. Äni ce tea Pä-ai, Cäpaw hai Muilaw Käcai ämüng hai-a baptismae py pa ö. 20Kai ma nang ce tea thui saite särilo tängai hethang äni ce tea mätu haile pa ö. Tängai ö. Kai lä älawngpre teng te khytä nang ce hai mangtä awng jawjaw vi ai” näkha näpa.